Bahasa Sougb - Alkitab (download)

Matius 1

1:1 Dan dog dau mougt mera medam, moho Daud dara Abraham, lan mardebeito, moho Yesus Krisdus, en meijemouwer dou yen dag gini: 1:2 Abraham en meisi Isag. Isag en meisi Yakub. Yakub en meisir Yehuda an en maguner dara magtor. 1:3 Yahuda mesira ebsa mebeba Tamar, kaba, lan maraisi Peres dara Serah. Peres en meisi Hesron. Hesron en meisi Ram. 1:4 Ram en meisi Aminadab. Aminadab en meisi Nahason. Nahason en meisi Sarmon. 1:5 Sarmon en eici Rahab, kaba, lan maraisi Boas. Boas en eici Rud, kaba, lan maraisi Obed. Boas en meisi Isai. 1:6 Isai en meisi Daud leng Yahudi meren mougt mera medam. Daud en mesira ebsa Uria mesouwa, kaba, lan maraisi Solaiman. 1:7 Solaiman en meisi Rahabeam. Rahabeam en meisi Abia. Abia en meisi Asa. 1:8 Asa en meisi Yosapad. Yosapad en meisi Yoram. Yoram en medebeito Usia. 1:9 Usia meisi Yotam. Yotam en meisi Ahas. Ahas en meisi Hiskia. 1:10 Hiskia en meisi Manasei. Manasei en meisi Amon. Amon en meisi Yosia. 1:11 Yosia en medebeito Yakonia an en maguner dara magtor len laugwan. Hanoba ogdoc len gini meriresebaba, kaba, leng Babel lahwan len dag sogougb dig meren hancob. 1:12 Sug Yesus meijemouwer len lecicugb dau Babel dig meren hancobohob, kaba, len meroho aududi dag gini: Yakonia en medebeito Sealtiel. Sealtiel en meisi Serubabel. 1:13 Serubabel en meisi Abiud. Abiud en meisi Eliakim. Eliakim en meisi Asor. 1:14 Asor en meisi Sadog. Sadog en meisi Akim. Akim en meisi Eliud. 1:15 Eliud en meisi Eleaser. Eleaser en meisi Matan. Matan en meisi Yakub. 1:16 Yakub en meisi Yusub. Yusub gini en eic gidob hom, en moho Mariam, dag en mesouwa. Dangga Mariam gini en ouwadan meisi hom en moho dag Yesus. Lusud leija Yesus gini dag Krisdus, anai en eigdoc len dau meren gogom augwan. 1:17 Dangga Yesus men meijemouwer dau Abraham terimda edebeij Daud, kaba, merug sisa hobjerogu. Dara men meijemouwer dau Daud terimda leng Babel lahwan len aud meren hancob, kaba, merug sisa hobjerogu. Dara sug len lecicugb dau Babel terimda edougdoc sug Krisdus enin, kaba, en meijemouwer merug sisa hobjerogu toua. 1:18 Yesus Krisdus sug mem ouwadan en, kaba, men meijouhw augwan audud dag gini: Sug sud hom moho Yusub, dara Yesus mem moho Mariam, lan lameicimbuma, kaba, en menuhwohob. Anai Yusub en erba ara debin en dousaba. Doba gini ogdoc Mena Gogoufu men goubesa dous. 1:19 Dangga Yusub, Mariam mesuwa, en ouwan ogod ameiji dougwo eni. Doba en medoc edag beim an Mariam namcir. Hang en emod en moho se simei. Anai en emouwan naugb esmesman en deseino lusud leinyanero. 1:20 Doba sug en auwaman ucina naugb sug en ogod ameiji dougwo en deb, kaba, maman Adehsud men malaikad hom ens enin dou en se augwa. Hanoba en enara, endagai: Yusub, Daud medebeito, igdebes emeba ban an Mariam sug bahwan en dag ban absouwero. Anai godeh hom gebsa mem menuhwa gini, kaba, dau Mena Gogoufu dous. 1:21 Dangga sug en ouwadan meisi hom gini, kaba, ban beija en moho dag Yesus. Anai enin dous eng emeigdoc men lusud laugwan dau meren sesar augwans. 1:22 Aremer augwan gini esogwesa dau areg ELOHIM enara ogdoc Yesaya deb nosohob, endagai: 1:23 Ban bemeiya gidob hom gemebarebma, en menuhwa, en ouwadan meisi hom, kaba, ban beija en moho dag Imanuel. Gini leija dag ELOHIM eigtou desij mamanohob. 1:24 Dangga sug Yusub eisa dau atoudohob, kaba, en eicara aimo dau areg Adehsud men malaikad enara dou enohob. Hanoba en ahwan Mariam dag en mesouwa misen toua. 1:25 Doba en emeici Mariam terimda en ouwadan meisi hom gini dauwahabi. Dangga sug en ouwadanohob, kaba, Yusub eija godeh gini en moho dag Yesus toua.

Matius 2

2:1 Sug Yesus mem ouwadan en se cinogo Bedlehemohob, kaba, lusud merug aibibra len meroho Majus, len len dau dig igda eisaugb dig cinogo Yerusalem. Lusud leija len dag Majus, anai len meru ouforoho naugb len lecinaga tebeij men gansins augwan dag misen namcir. Doba gini ebiji sug Herodes edag mougt mera medam naugb leng Yahudiaba. 2:2 Dangga sug len ledebeij lusud se Yerusalemohob, kaba, len leijidougwo len, lendagai: Yeng Yahudi, yen yeiya meijen mougt mera medam gin ouwaden deb sugiro? Emen emecinaga mem ouwadan en dag misenohob. Anai emen emeiya men tebeij ens dou emenohob. Dangga hang, emen emen aud en naugb emesijaresa eni toua. 2:3 Doba sug Herodes ouman dau areg leng Majus leijidougwo lusud dag graga, kaba, en medoc eijesa medam namcir. Dara men lusud se cinogo Yerusalem laugwan merdoc eijesa toua. 2:4 Dangga hang, en emesa mer dou gembala gesa taij meren mougtir dara leng meru ouforoho se Musa men gomnomna naugb len loucimdeb dara eni. Sug len len aud enohob, kaba, en eijidougwo len, endagai: Sud hom gedig ELOHIM osdeb deinaugb mamanohob naugb sug en eigdoc maman dau sesar men gogom augwan, kaba, mem ouwadan en deb sugiro? 2:5 Doba len launi dou en, lendagai: Mem ouwadan mougt mera medam gini se cinogo Bedlehem se leng Yudea meren hancob. Anai ELOHIM enara dangga ogdoc sud hom gesai en moro deb sug nosohob, endagai: 2:6 Yeng dau cinogo Bedlehem se leng Yahudi meren hancob, kaba, yen meijoho eb taiba dau leng Yahudi meren mougtir laugwan. Anai lona daiyamo, kaba, mougt mera medam hom agunya debin yen naugb en eseyeiyo indan yusud dau yeng Israel yaugwan. 2:7 Sug Herodes en ouman danggohob, kaba, en esa mer dou leng Majus, endagai: Yen yedu yen meijaga naugb yen yen aud dan sugini. Dangga sug len ledebeij enohob, kaba, en eijidougwo dau len, endagai: Yen yeiya tebeij gini agunya se lona hosohoba? 2:8 Sug len lens meijouhw augwan dou enohob, kaba, en arougb len, endagai: Yen yeihwedig Bedlehem naugb yen yeijidougwo leng se cinogo ingga an godeh hom gin deigeigouhwahabi. Dangga sug yen yesma enohob, kaba, yen yecicugb naugb yen yeden dou dan. Dauntoba dan deihweda sungga naugb dan dedesijaresa en toua. Doba gini dag en enara baunun dou len dous. 2:9 Sug len louman en merohob, kaba, len leihwedig Bedlehem. Dara tebeij gedig len leiya nosa se igda eisaugwohob, kaba, en eino len merin terimda en esa bainobono irir tu sug mem ouwadan godeh debsa. 2:10 Sug len leiya tebeij esa bainobono irir tu danggohob, kaba, len merdoc agahugouhw medam an gin namcir. 2:11 Dangga sug len leinesa tuohob, kaba, len leiya godeh ingga, dara en mem Mariam lani. Hanoba len lecguna dara lesijaresa godeh ingga. Gin ouwohob, kaba, len leigba biruwa meh dau meren aremougb mera eisaugb dag w emas, dara aremoung mohu men ouwadebeda, moho w kemenyan, dara sogo mod, moho w mur, naugb len lob desij en maga. 2:12 Doba ELOHIM en dougwo len se augwa, endagai: Sug yen yecicugb, kaba, yen yemeraga ucina hom graga aud Herodesero. Dangga hang, sug len lecicugb, kaba, len leraga ucina susugb aud meren cinogoda. 2:13 Sug leng Majus leihwededau Yusub dara Mariamohob, kaba, Adehsud men malaikad hom ouwaden naugb enara dou Yusub se augwa, endagai: Ban beisa bougwan godeh dara en mem dig cinogo Mesireda, kaba, ban beigtou sungga terimda dan demedenara dou ban deits. Anai Herodes esedeb naugb ehilon godeh ingga dauntoba en eic gomom dou en. 2:14 Danggohob, kaba, Yusub en eisa dau atouda. Hanoba en ougwan godeh dara en mem se loba ingga dig cinogo Mesireda. 2:15 Len leigtou sungga terim edebeij sug Herodes omom dauwahabi. Doba augwan gini ebiji dauntoba esogwa deisa maman Adehsud mogtimei mohw an areg en en dou lusud ogdoc sud hom gesai en moro deb nosohob, endagai: Dan deija dan Indisi Mohora Hom gini, en en dau cinogo Mesir en. 2:16 Sug leng Majus len lemecicugb aud Herodesero, kaba, en medoc esrougb medam an len. Anai en oudesa dag len lereiyara dou enohob. Dangga en arougb men sadodor, endagai: Yen yeihweda se cinogo Bedlehem, dara cinogo geb acec cinogo ingga augwan toua. Hanoba yen yeic gomom dou logodeh ligiji gedig meren arisogomoc hwai dig gaihida laugwan lomom namcir. En arougb len dangga anai en aimo dau areg leng Majus len lens dau tebeij men lona sug ebiji dou enohob. 2:17 Areg graga, augwan ebiji naugb ouma debin areg sud hom gesai ELOHIM moro nosa, en moho Yeremia, en og deb nosohob, endagai: 2:18 Yen youman gida hom en eb medam. Dara en eiyogoseser toua se meruda se cinogo Rama. Eni Rahel eb an medebeitor namcir. Dara en emouwan naugb len leic en medoc emagadgeij dou en ucugblo. Anai en medebeitor laugwan gini lomom dau enohob. 2:19-20 Doba sug Herodes en omomohob, kaba, Adehsud men malaikad hom en ouwaden dau bogo naugb en enara dou Yusub se augwa, endagai: Ban besedeb naugb ban becicugb an ban abisi dara en mem Mariam dig leng Israel meren hancob. Anai leng louwan logod ban abisi gin, kaba, len lomom dau enohob. 2:21 Sug Yusub en ouman dau ginohob, kaba, en eisa dau atouda naugb en eicara baimo Adehsud men malaikad en mer an gini. Hanoba en ahwan meisi dara mem dig Israel ucugb. 2:22 Doba sug Yusub en ouman dag Arkelaus, Herodes meisi, en eperwei mena mohw dag mougt mera medam se leng Yudea meren hancobohob, kaba, en emeinesa men cinogoro. Doba en ocir men hancob gin dous. Anai en ahau dag cum, kaba, en emeic gomom dou Yesus toua. 2:23 Dangga len leinesa leng Galilea meren hancob naugb len leigtou sungga se meren cinogo hom, moho Nasared. Anai ELOHIM esulou Yusub se augwa dag gin dou en deitohob. Augwan gini esogwesa areg leng lesai ELOHIM moro nosa, len log deb eisaugb Yesus deb nosohob, lendagai: Lusud lemeija en dag Adeh Nasaredes.

Matius 3

3:1 Sug arisogomoc einyana debin lona sug Yusub ahwan Mariam dara Yesus dig cinogo Nasaredohob, kaba, sud hom moho Yohanes en en se lomougwisa se leng Yudea meren hancob naugb en en dougwo len an meren sesar. Lusud leija en toua dag Sud Hom Gogun Lusud Se Duhu. 3:2-3 Dara sud hom gesai ELOHIM moro sug nosa, en moho Yesaya, en og deb eisaugb Yohanes gin toua deb nosohob, endagai: Lona daiyamo, kaba, sud hom en emen aud yens naugb en emeijara an dou yen, emendagai: Yen yesedeb yenin meigdoc mes obosboro deb naugb Adehsud sug en en dau bogo, dauntoba en oiharaga yen ucugb. Aninim dag lusud lesa ucina obosboro naugb mougt mera medam sug en einesa aud len toua. Dangga sug Yohanes en edebeij se lomougwisa ginohob, kaba, en en dougwo len, endagai: Yen yesga meijen sesar moho asesa dou ELOHIM. Dara yen yahau an dougwo namcir, anai ELOHIM esedeb en medoc mes naugb sug en oiharaga yen ucugb. 3:4 Doba Yohanes gin, kaba, en eg sansun dau aremeta, moho unta, mos. Dara areg en ahud meida moc, kaba, dau aremeta mos toua. Dara men ared naugb en et, kaba, dag amo dara omohu mogud dous. 3:5-6 Dangga sug en eijara an dag graga dou lenohob, kaba, leng dau cinogo Yerusalem, dara lusud dau leng Yudea meren hancob, dara lusud dau cinogo geb acec duhu Yordan mebera, len laugwan louwa debin en se lomougwisa naugb len lesga meren sesar moho augwan asesa dou en. Hanoba en ogun len se duhu Yordan debin gin toua. 3:7 Dangga leinyana dau leng Parisi, dara leinyana dau leng Saduki, len toua laimo len naugb Yohanes ogun len se duhu. Doba sug Yohanes en eiya leng gin, kaba, en owun len an gini, endagai: Gareg en en dau ELOHIM men gogom dou yen, hang yen yamougwin aud dan gina? Anai meijen geicara augwan dag hinogo mehir yen smougb mougwaba. 3:8 Hang yen yemens dau meijen geicara dag yen yarges dau meijen sesar dag misen dou danahabi, kaba, dan demogun yen se duhu debin gin toues. 3:9 Dara yen yemoudesan yen meijemouwa Abraham dag en moho oiharaga yen dau ELOHIM men gogom gin touwero. Doba yen yesa doc dan namcir. Anai sug ELOHIM en ouwan, kaba, en eic igdahab augwan gini beperwei dag Abraham medebeitor misen dau yen deit. Yen youman dan indir gini deigeigouhw namcir. 3:10 Dangga yen yera mera geigouhw ansins dag yen yesga dara yahau an dougwo meijen sesarohob. Anai ELOHIM esedeb keita se sogo meiyo debohob. Gareg dau yen en emera mera geigouhwero, kaba, en eh en aninim dag en eh sogo gemera merero naugb en ec se smougb toua. 3:11 Dani, kaba, dan dogun yen se duhu ansins dag yen yesga meijen sesar dara yahau an dougwohob. Doba cum, kaba, sud hom deit en emaimo ucan dan aud yens. En moho agas medam edreg dau dan. Dangga dan indoho emedeinyum naugb sug dan demodo men hwigbeimos touwero. En gin, kaba, en emesa Mena Gogoufu dara smougb aud yen toues. 3:12 Hanoba en emekeba yen daums. Aninim dag sud hom os aigdaga mes an tramdad naugb os berban. Dauntoba loungmen ohu merila etrij dau mogo misen eb se aigdaga mes dous. Dangga gareg dau yen en edag mogo misen, kaba, en ouci en debinim naugb en. Aninim dag sud hom en ob mogo misen se mougwa mes naugb enin toua. Doba gareg en edag merila, kaba, en erba en se smougb gedig lusud lemob touwero, aninim dag sud hom en erba merila mogud augwan se smougb toua. 3:13 Lona aibibra debin gragohob, kaba, Yesus enin en dau leng Galilea meren hancob aud Yohanes se duhu Yordan mebera. Sug Yesus edebeij enohob, kaba, en en dou en, endagai: Ban bogun dan se duhu gin toua. 3:14 Doba Yohanes ainyen eperwei Yesus medoc mes an gini. Hang en emenara dou en, endagai: Dagiro, naugwe hang, ban bacgeij dan naugb dan dogun ban se duhua? Eigouhw naugb ban bogun dan se duhu dous. 3:15 Doba Yesus auni en mer, endagai: Ban bemen dougwo danlo. Doba se aremer hom gin, kaba, ban baimo areg dan douwan dous. Anai sug nanan naicara dag gin, kaba, nanan naimo areg asesa ELOHIM enin medoc mes ingga. Sug Yohanes ouman danggohob, kaba, en ogun Yesus se duhu. 3:16 Sug en ogun Yesus se duhuohob, kaba, Yesus eisa dedemeda dau duhu naugb en eihwedig lonog. Sug en edebeij lonogohob, kaba, en eiya, doba bogo ec dau. Hanoba en eiya Mena Gogoufu ohw dag bohobei dau bogaden aud en toua. 3:17 Doba yen youman deigeigouhw. Sug bohobei eigtou taiba Yesus en mougtohob, kaba, ELOHIM enara dau bogaden naugb auma debin en dou lusud gedig len lesa sungga, endagai: Gini dan Indisi gedig dan indoc gororougb eni, anai en eic dan indoc esgiraha dou dan namcir.

Matius 4

4:1 Sug Mena Gogoufu ohw dau bogaden naugb eigtou desij Yesusohob, kaba, en ahwan en aud usi hom se lomougwisa naugb Bilis ainyen en sungga. 4:2 Dangga sug Yesus en ehig dau ared se lona sud hwai, dara loba sud hwaiyohob, kaba, sireben namcir. 4:3 Hanoba Bilis en en aud en naugb ainyen en. Sug Bilis edebeij Yesusohob, kaba, en enara dou en endagai: Bang ELOHIM Meisi misen, kaba, ban benara dou igdahab einyana geb gini bedag roti naugb ban bet. 4:4 Doba Yesus auni dou en, endagai: Musa en og deb se Surad Injil Meb Mohon debohob, endagai: Lusud lemeic merireseb dau sug len let ared misen dousero. Doba dau sug len lesogwesa areg asesa ELOHIM enin medoc mes toua. 4:5-6 Dobnaro, kaba, Bilis ahwan Yesus aud ELOHIM Men Tuari medgomori se cinogo gecabeci, moho Yerusalem, naugb en ainyen en sungga deit. Hanoba en enara dou en, endagai: Bang ELOHIM Meisi misen, kaba, ban bahacugb banin dau sugini dig cinogo gaihida. Anai sud hom en erba ugwaremer se Surad Injil Meb Mohon an debohob, endagai: ELOHIM en emarougb men malaikadir an bans. Hang len lemoc len merisira naugb ban, dauntoba ban abohora emoc igdahab touwero. 4:7 Doba Yesus auni dou en, endagai: Musa en og deb eisaugb gin se Surad Injil Meb Mohon deb touohob, endagai: Yen yemainyen Adehsud meijen ELOHIM en touwero. 4:8 Dobnaro, kaba, Bilis ahwan Yesus aud menmod gagas medam hom naugb en ens dau mougt mera medam se cinogo gini meren hancob dara meren ariloboc geigouhw gebsa augwan dou en toua. 4:9 Hanoba en ainyen en deit, endagai: Ban becguna naugb besijaresa dan, kaba, dan deic areg dan dens dou ban gragohob augwan dou ban dag banin aban namcir. 4:10 Doba Yesus en auni Bilis mer ucugb deit, endagai: Setan, ban beihwededau dan namcir. Anai Musa en og deb eisaugb gini se Surad Injil Meb Mohon deb sug nosa touohob, endagai: Yen yecguna yesijaresa meijen Adehsud Geis Huhugb. Dara yen yeicara yaimo en toua. Anai enin dous eng meijen ELOHIM misen. 4:11 Sug Yesus ecicugb Bilis ineg danggohob, kaba, Bilis ougbdedau en namcir. Hanoba ELOHIM men malaikadir len len naugb len lagauwesa en toua. 4:12-13 Doba sug Yesus en ouman dag len lagaigeij Yohanes naugb louf en se tu gesisugohob, kaba, en emeigtou se leng Yudea meren hancob gin deitero. Doba en eisa dau sungga dig leng Galilea meren hancob deitda. Sug en edebeij sungga, kaba, en emeigtou se en gun Nasared touwero. Doba en eitig naugb en eigtou se Kapernaum dous. Anai cinogo ingga, kaba, eb se leng Sebulon dara Nabtali meren hancob geb deinyor Tiberias mebera. 4:14 En eicara dag gini dauntoba esogwa deisa areg sud hom gesai ELOHIM moro sug nosa, en moho Yesaya, en og deb sug nosohob, endagai: 4:15 Leng se Sebulon dara Nabtali maran hancob, dara leng se dum mebera, dara leng se cinogo aud igda agunya se Yordan nagama, dara lugmahara se leng Galilea meren hancob, kaba, len laugwan gini leigtou se lobeigbogo nosohob. 4:16 Doba sud hom en moho dag mouf eririj medam, en en naugb aisema len deitohob. Dara leng leigtou se cinogo gomom meniha, kaba, sud hom, en moho mouf, en agunya aud len touohob. 4:17 Dangga ebiji dau sug Yesus en eigtou se Kapernaum graga, kaba, en ebedbed dou lusud, endagai: Yen yesga meijen sesar, dara yen yahau an dougwo toua. Anai lona naugb sug ELOHIM oiharaga yen ucugb, kaba, edebeij deinyor namcirohob. 4:18 Se lona hom sug Yesus oci Galilea mebera, kaba, en eiya Simon dara en magto Andreas lan larba diara debin hosei deb gini. Anai maran geicara dag lan lahilon hosei dous terimda. Lusud leija Simon en moho toua dag Petrus. 4:19 Dangga Yesus en dougwo lan, endagai: Yan yaimo dan. Anai dan douwan dens meijouhw dou yan naugb yan yahwan lusud aud dan, dauntoba len ledag indan logodeh, aninim dag yan yarba diara debin hosei gin toua. 4:20 Sug lan lauman Yesus eija lan dangga inegohob, kaba, lan larges diara deb. Hanoba lan laimo en namcir toua. 4:21 Sug Yesus en eda deitohob, kaba, en eiya Sebedeus meisi lahwai, lan maroho Yakobus dara en magto Yohanes, lan eng lagon maran diara gobogougb dougwo deb se ing mes gini. Dara lan marna Sebedeus en toua moongga desij lan. Sug Yesus eiya lan, kaba, en eija lan toua, endagai: Yan toua, yan naugb yaimo dan. 4:22 Sug lan lauman Yesus eija lan dangga inegohob, kaba, lan larges maran ij dara marna toua deb. Hanoba lan laimo Yesus namcir. 4:23 Sug Yesus eija len gragohob, kaba, en ec mohora acec leng Galilea meren hancob naugb en esai ELOHIM moro geigouhw dau sug en ouwan oiharaga lusud ucugb dou len se meren tuari augwan. Dara en edidib meijouhw dau augwan gin dou len toua. Hanoba en eic geingmos agauwesa dou leng areber, dara leng meraga omomtom len laugwan toua. 4:24 Sug lusud leiya dau gini, kaba, len lagaha merir an men geicara gini se Galilea dara leng Siria meren hancob augwan toua. Dangga hang, len lemahwan leng areber aingma aingma, dara leng merna mog mog einesa len merdoc mes, dara leng ugweber, dara leng merohora dara merisira agaim dou Yesus naugb en eic geigouhw dou len laugwan toua. 4:25 Dangga lusud dau leng Galilea meren hancob, dara lusud dau Cinogo Sisa ladedim hom meren hancob, dara lusud dau cinogo Yerusalem, dara lusud dau leng Yudea meren hancob, dara leng leigtou se Yordan nagama, kaba, len leinyana leila ucan Yesus naugb laimo en toua.

Matius 5

5:1-2 Sug Yesus en eiya, doba lusud leinyana leila ucan en dag gin, kaba, en eisaugb se menmougb hom. Sug en edebeij usohob, kaba, en eigtou naugb sug en edidib aremeijouhw einyana dou men logodeh. Dangga sug en eigtouohob, kaba, len len aud en. Hanoba en ebiji naugb en ens ara ara dou len toua, endagai: 5:3 Gareg dau yen en owun enin medoc mes dag monggwereij an ara ara deseino ELOHIM, kaba, en gin eng emeinesa ELOHIM men lona naugb sug en emoiharaga en toua. Anai ELOHIM medoc eigouhw an enohob. 5:4 Dara gareg dau yen en medoc momogo an men sesar, kaba, ELOHIM medoc eigouhw an en naugb en emeic en medoc esgiraha dara eigouhw se lona daiyamo gacin dou en. 5:5 Dara gareg dau yen en owun enin medoc mes arjaga deseino ELOHIM dara lusud, kaba, ELOHIM en medoc eigouhw an en naugb en emeic areg en os deb augwan dou en toues. 5:6 Dara gareg dau yen en medoc etrij icira naugb en aimo areg asesa ELOHIM enin medoc mes ucucugb terimda, kaba, ELOHIM medoc eigouhw an en naugb emousa en icira augwan gin. 5:7 Dara gareg dau yen en medoc eineg an len gus, kaba, ELOHIM medoc eigouhw an en naugb en medoc emeineg an en. 5:8 Dara gareg dau yen en medoc ecabeci naugb en aimo ELOHIM dara medoc hom, kaba, enin eng emedeiya en asesa toues. Anai ELOHIM medoc eigouhw an enohob. 5:9 Gareg dau yen en oho geigouhw se lusud merufu naugb len lesgigouhwesem, kaba, ELOHIM medoc eigouhw an en naugb en emeija en ingga dag en mogwihi mogo en dag misen. 5:10 Dara gareg dau yen sug lusud leic mog erij dou en anai en aimo areg asesa ELOHIM enin medoc mes namcir, kaba, en gin eng emeinesa ELOHIM men lona naugb sug en oiharaga en toues. Anai ELOHIM medoc eigouhw an en enohob. 5:11 Dangga sug lusud lesmesman yen meijoho icira sug yen yaimo danohob. Dara len leic mog erij dou yen, dara len merdoc ogdogda yen augwougb an areg gecgu icira gin toua, kaba, yen meigdoc momogo an ginlo. Doba yen meigdoc eigouhw icira gin namcir. Dara yen yagahugouhw an gin toua terimda. 5:12 Anai augwan gini eic dag ELOHIM eised huga medam deinaugb yen se bogohob. Dara lusud leicara dangga dou leng lesai ELOHIM moro sug nosa touohob. 5:13 Sug Yesus esulou men logodeh dag gragohob, kaba, en esulou len ucan deit dag gini, endagai: Esloulougb naugb meijen geicara augwan dag aremor gahaufo naugb lusud se cinogo gin augwan. Doba sug aremor gini men gahaufo ediyebeiya dauwohob, kaba, lusud lerba se cinogo naugb laiyan namcir. Anai emeigouhw naugb len lemeicara deitero. 5:14 Dara meijen geicara dou lusud toua dag mouf eririj naugb len terimda, aninim dag cinogo medam geb se menmod. Anai cinogo medam geb se menmod gini, kaba, emebdededelo dau lusudero. Doba men mouf eririj eb ainyes naugb lusud laugwan leiya terimda. 5:15 Toua sug lusud lei meren smougwohob, kaba, len lemob dabei mes laihiron dougwo mouf ginero. Doba len lob deb ainyes, dauntoba men mouf aisema lusud se dimei mes ingga augwan. 5:16 Dangga toua, meijen geicara augwan dag mouf naugb aisema ucina aud ELOHIM dou lusud laugwan. Dauntoba sug len leiya dau meijen geicara dag mouf gini, kaba, len len aud ELOHIM gedig en eigtou se bogo naugb len lesijaresa en toua. 5:17 Sug Yesus esulou men logodeh eisaugb meren geicara ouwa dauwohob, kaba, en ens dau men geicara ucan dou len deit, endagai: Yen youdesa sug dan den aud yen gin, kaba, dag dan doguc dougwo ELOHIM men gos dou augwan namcirei? Naro, dan demen aud yen naugb ginero. Doba dan den aud yen naugb dan desogwa deisa areg ELOHIM os deb se men gomnomna gini augwan aududi terimda ouwedoc gin toua. 5:18 Anai areg ELOHIM os deb se men gomnomna gini, kaba, en emarges dau mer mohw hom dara moho mohw hom touwero. Doba yen youman deigeigouhw, sug bogo dara cinogo lamediyebeiyabuma, kaba, en esogwa deisa augwan terimda bouwedoc toua. Augwan gini asesa dag misen namcir. 5:19 Dangga deciciji naugb yen yemedreg dau ELOHIM men gomnomna geb tainya augwan hom touwero. Doba yen yaimo augwan gin terimda. Anai gareg dau yen eni edreg dau ELOHIM men gomnomna geb tainya hom gini, dara en ebedbed dou lusud naugb len ledreg toua, kaba, ELOHIM emowun en moho eb tainya men lusud laugwan se lona sug en oiharaga len ucugb gin toues. Doba gareg dau yen en eicara baimo ELOHIM men gomnomna augwan gin namcir, dara en esulou lusud naugb len leicara laimo augwan toua, kaba, ELOHIM emeigdoumesa en moho bagas medam se lona sug en oiharaga men lusud gin toues. 5:20 Dangga hang, meijen geicara augwan aninim dag leng Parisi dara leng meru ouforoho se Musa men gomnomna lenero. Doba yen yeicara yaimo augwan gini edreg dau len namcir. Anai sug yen yemeicara yemaimo areg asesa ELOHIM enin medoc mes emedreg dau lenero, kaba, yen yemeinesa ELOHIM men lona sug en oiharaga lusud ucugb gin touwero. Doba yen yeigtou dau gin toua terimda. Yen youman dan indir an areg dan den dou yen gini deigeigouhw namcir. 5:21 Sug Yesus ens dau areg graga meijouhw dou men logodeh dauwohob, kaba, en ens dau gesim men meijouhw asesa dou len deit, endagai: Yen yecinaga dau sug Musa enara dou yen meijemouwer sug nosa, kaba, en en dougwo len naugb len lemesimero. Dara en en dou len dau sug sud hom en es sud hom gusohob, kaba, len leic gogom dou en toua. 5:22 Doba dan den dou yen dau sug sud hom en medoc esrougb an mesi, kaba, edeinyum naugb ELOHIM eic gogom dou en. Dangga gareg dau yen en owun en mesi dag en entog mecicgu, kaba, edeinyum naugb Majelis ogod gogom deinaugb en touohob. Doba gareg dau yen en owun en mesi dag en mei emaiyero, kaba, edeinyum naugb ELOHIM ogod an dum smougb deinaugb enohob. 5:23 Dangga hang, sug yen yeinesa ELOHIM Men Tuari naugb yen yeic ara ara dag yauwaharo dou enohob, hanoba yen meigdoc eiseisan dag yen meisi en medoc ediseij yen an meijen geicara gecgu dou en, kaba, yen yemob meijen ared se ELOHIM men boromei naugb yemesijaresa dou enlobma. 5:24 Doba yen yarges meijen ared deb deinyor boromei dous. Hanoba yen yecicugb naugb yen yedos yen mesi mesira naugb yen yesgigouhwesem nosa dauwahabi. Yen yemecicugb naugb yen yob meijen ared se boromei naugb yen yesijaresa ELOHIM toua. 5:25 Sug Yesus owun len meroho dag gin dauwohob, kaba, en eic gainyenara hom ucan dou len deit. Dauntoba len lemehig debin meren sesarero, doba len lesga dau len sug meriresebaba. Hanoba en enara dou len, endagai: Sug sud hom ahwan yen naugb en edahacugb gogom debin yen deseino sud hom gogod aremer aga lusud, kaba, yen yemaiyan meigdoc mes an meijen geicara terimda en ahwan yen deseino sud hom ginahabero. Doba yen yahahumohumesa mesi gini sug yen yec se ucina mogumsaba. Anai sug yen yeic meijus terimda yen yedebeij sud hom gogod aremer aga lusud dougwohob, kaba, en ogugwo yen deb se men logodeh merisira naugb len louf yen se tu gesisug dous. 5:26 Yen youman dan indir an areg dan den dou yen deigeigouhw namcir. Anai sug yen yeinesa tu gesisug ginohob, kaba, yen yemen dau deitero. Doba yen yeigtou sungga terimda yen yoc sud hom graga men aremeij augwan bouwa namcirahabi. 5:27 Dara yen yecinaga dau sug Musa ens ELOHIM men gomnomna dou yen meijemouwer sug nosa, kaba, dag en en dougwo len naugb len merisira emebsa ligida gus aibibrero. 5:28 Doba dan den dougwo yen naugb yen yemauweila ligida toutou touwero. Anai sug yen yauweila len naugb yen youwan dag yaimo len, kaba, gini aninim dag yen meisira ebsa len se yen meigdoc mesohob. 5:29 Dangga sug yen meijires dig yen meisira misen ahwan yen naugb yen yebesesar dag gin terimda, kaba, eigouhw naugb yen yeihwa homa ingga dau. Anai sug yen yamsoho yen meijires hwas eb naugb yenohob, kaba, ELOHIM erba yen meijires hwas an yen meijaga augwan se dum smougb namcir. Doba sug yen yeihwa hom dauwohob, kaba, yen yeinesa maireseb huhugb an yen meijires geigouhw hom ingga. 5:30 Era sug yen meisira misen os areg gecgu naugb augwohosa yen aud sesar, kaba, eigouhw naugb yen yogod yen meisira misen ingga bedug dau yen namcir. Anai sug yen yamsoho yen meisira hwas an naugb yenohob, kaba, cum ELOHIM erba yen meisira hwas an yen meijaga augwan se dum smougb namcir. Doba sug yen yogod yen meisira misen ingga edug dauwohob, kaba, yen yeinesa se maireseb huhugb an yen meisira geigouhw hom ingga. 5:31 Dara Musa en toua en dougwo yen meijemouwer naugb len lemogod ameiji dougwo len mersouwer augwougwero. Doba len leic surad an aremeijouhw eisaugb gini dou len. 5:32 Doba dan, kaba, dan den dougwo yen naugb yen yemogod ameiji dougwo yen meisouwer mougwa homero. Anai gareg dau yen en ogod ameiji dougwo en mesouwa, kaba, gini dag en ahwan en se ucina aud mesira ebsa. Dara gareg dau yen en eic gida gedig en mesuwa ogod ameiji dougwo enohob, kaba, en mesira ebsa en touohob. Doba sug yen meisouwa en maires edreg dau yenohob, kaba, aremer hom gin dous eng edeinyum naugb sug yen yogod ameiji dougwo en. Aremer gus augwan, ga, naro. 5:33 Dara yen yecinaga toua dau sug Musa enara dou yen meijemouwer sug nosa, kaba, dag en en dougwo len naugb len lemarges dau areg len los dou maman Adehsud hom touwero. Doba len lesedoc areg len louwara debinohob augwan gin namcir, dara laimo toua. 5:34 Doba dan den dougwo yen naugb yen yemou ELOHIM en moho dougwom era debinim touwero. Anai bogo gin, kaba, dag ELOHIM men maija moc touohob. 5:35 Dara yen yemou cinogo dara Yerusalem lan maroho dougwom era debinim touwero. Anai cinogo, kaba, ELOHIM en mohora eb se. Dara Yerusalem, kaba, ELOHIM en edag mougt mera medam dougwo cinogo gin touohob. 5:36 Dara yen yemou yenin meijugt toua dougwom era debinim touwero. Anai yen meijugt modi gogor dara gogoufu gin, kaba, yenin yemesinsin hom ingmaro. 5:37 Dangga sug yen yecinaga, doba aremer dag misen, kaba, yen yousa dag you. Era sug yen yecinaga, doba aremer dag misen ingmaro, kaba, yen yenara dou en dag naro dous. Anai sug yen youwara yaos debin meijen aremer augwan deseino leng gus, kaba, ginis en dau Sud Hom Mobgos Maha dous. 5:38 Dara yen yecinaga dau sug Musa enara dou yen meijemouwer sug nosa, kaba, en esulou len dag gini, endagai: Sug sud hom en eihwa yen meijires hom dau, kaba, yen toua yeihwa en maires hom dau toua. 5:39 Doba dan den dougwo yen naugb yen yemeic meijus dou sud hom geic gecgu dou yenero. Doba yen yeigtou namcir. Dangga sug en eic en mesira bato yen meijumin dig yen meisira misenohob, kaba, yen yeineg yen meijumin dig nagama dou en naugb en oto toua deit. 5:40 Era sug sud hom en ohobas yen an meijen sansun geb aimei, kaba, yen yemen dougwo en anlo. Doba yen yeic meijen sansun gouji yaos dara dou en toua. 5:41 Era sug sud hom dau leng Roma meren sadodor en agodgod yen naugb yen yodo aremougb sougb eni, kaba, yen yemarges deinyor areg en arougb yenero. Doba yen yodo men aremougb sougb eni edreg aigusi deit. 5:42 Era sug sud hom en acgeij ara ara dau yen, kaba, yen yemehig debin dau enlo. Doba yen yeic areg en acgeij dau yen ingga dou en toua. Era sug sud hom en acgeij ara ara dau yen dag en emoho namcirero, doba en emedug ucugb dou yen, kaba, yen yemesebud an enlo. Doba yen yeic dou en toua. 5:43 Dara yen yecinaga dau sug len lebedbed dou yen meijemouwer sug nosa, kaba, dag len len dou len dag gini, endagai: Yen meigdoc gororougb yen meisir misen len dous. Doba meijen mocir, kaba, eigouhw naugb yen meigdoc mog mog an len namcir. 5:44 Doba dan, kaba, dan den dougwo yen an gini, dendagai: Yen meigdoc gororougb yen meisir dousero. Doba yen meigdoc gororougb meijen mocir toua namcir. Dara gareg en eic mog erij dou yen, kaba, yen yemauni gecgu dou enero. Doba yen yocuncum dou ELOHIM naugb en eic geigouhw dou en toua. 5:45 Dauntoba yen Meijina se bogo en eigdoumesa yen meijoho dag en mogwihi mogo yen dag misen namcir. Anai en, kaba, en emesinsin igdes naugb ohudei leng merdoc ecabeci dousero, doba en esinsin igdes naugb ohudei leng leicara gecgu len laugwan toua. Dara sug en esa los dou lusud, kaba, en emesa los dou leng lemeicara areg asesa ELOHIM enin medoc mes dous touwero. Doba en esa los dou leng lohoiya en mer len laugwan toua terimda. 5:46 Dangga sug yen meigdoc gororougb lusud gedig len merdoc gororougb yen aiyei, kaba, ELOHIM emeic siouwa dou yen an meijen geicara ginero. Anai meijen geicara gini, kaba, emedreg dau lusud gedig len lagodgod len gus naugb lohw cinogo dou len ginero, doba aninim dous. 5:47 Era sug yen yesi yen meisir naugb yen you len aiyei dous, kaba, meijen geicara gini emedreg dau len gus touwero. Anai leng merdoc emebdebin an ELOHIM enero, kaba, len toua lesi len mersir naugb len lou len aiyei dous. 5:48 Dangga hang, ELOHIM en emouwan yen meigdoc gororougb yen mesir dousero. Doba en ouwan naugb yen meigdoc gororougb meijen moc len laugwan toua. Aninim dag yen Meijina se bogo en medoc gororougb leng merdoc eigouhw an en len dousero. Doba en medoc gororougb leng merdoc ecgwan en toua terimda.

Matius 6

6:1 Sug yen yaimo areg asesa ELOHIM enin medoc mes naugb yen yeicara geigouhw dou lusud, kaba, yen yemens gini ainyes dou lusud laugwanlo. Doba yen yeic augwougb dous. Anai sug yen yens ainyes dou lenohob, kaba, yen Meijina se bogo emeic meijen siouwa ingma icira meijen geicara gin dou yen touwero. 6:2 Dangga sug yen yeic ara ara dou leng meren ara ara ingmaro, kaba, yen yemoc desan dou lusud aninim dag leng leicara larerei lusud meriresero. Doba yen yodmun se yen meigdoc mes dous. Anai leng larerei gini, kaba, len loc desan dou lusud se meijen tuari, dara ucina mebera terimda. Dauntoba lusud leimiman len meroho an areg len leic dou lusud gin namcir. Dangga, kaba, len leic meren siouwa dau ginohob. Yen youman dan indir an areg dan den dou yen gini deigeigouhw. Anai gini asesa dag misen namcir. 6:3 Dangga sug yen yeic ara ara dou leng meren ara ara ingmaro, kaba, yen yemoc desan dou yen mesir misen touwero. Doba yen yecgoneh dau len toua, dauntoba len lemecinagero. 6:4 Anai sug yen yeicara dag gini, kaba, yen Meijina se bogo en emeic ara ara naugb en emauni ingga ucugb dou yen toues. Anai en eiya dau areg yen yod se simei gin augwanohob. 6:5 Dara yen yemaimo len gedig leicara larerei lusud meriresi meren geicara an gocuncum touwero. Doba yen yasid yenin dau len namcir. Anai len gini, kaba, len meru ehigehi naugb lusud louman dau sug len locuncum dou ELOHIM. Dangga sug len merugwengga se tuari, era sug len lesa se ucina maraida, kaba, len locuncum ucucugb. Dauntoba lusud leimiman len an dau gin terimda. Hang len lemeic meren siouwa augwan icira gin dau touohob. 6:6 Dangga sug yen yocuncum, kaba, yen yemaimo leng graga meren geicara an gocuncum ginero. Doba yen yeinesa meijen dimei mes. Dara yen youf misis dougwo yen touahabi. Yen yemocuncum dou yen Meijina se bogo gedig lusud lemeiya en mougwa hom touebma. Anai en, kaba, en eiya yen sug yen yecgoneh yen meijug naugb yen yocuncum dou enohob. Hang en emeic ara ara naugb en emauni ucugb dou yen toua. 6:7 Dara sug yen yocuncum dou yen Meijina se bogo, kaba, yen yemeiso yen meijir an dou en aninim dag leng lecguna dou seiseij len touwero. Anai len gini, kaba, len loudesa dag sug len leiso len merir an dou en terimda, kaba, en emousa deisa areg len lacgeij en an gini dou len toues. 6:8 Dangga yen yemeiso yen meijir an meijen gocuncum, aninim dag leng lecguna dou meren seiseij ginlo. Anai sug yen yemocuncum naugb yemacgeij ara ara dau yen Meijina ELOHIM enbuma. Doba en ecinaga areg yen yesedeb naugb yacgeij en an gini se yen meigdoc mes dag misen nosohob. 6:9 Dangga sug yen yocuncum dou ELOHIM, kaba, yen yocuncum dag gini, yendagai: Akeinya se bogo, emen emouwan naugb lusud laugwan leigdoumesa ban aboho dara lesijaresa ban hom dous. Anai bani ecabeci namcir. 6:10 Dara emen emacgeij ban ben naugb ban boiharaga emen emaugwan se cinogo gini ucugb toua. Dara ban barautut emen naugb emen emaimo areg asesa banin abdoc mes namcir, aninim dag leng se bogo len laimo ban abir touohob. 6:11 Dara ban beic ared edeinyum irogini dou emen toua. 6:12 Dara ban baigdougwo emen sesar augwan dau emen, aninim dag emen emaigdougwo len gus meren geicara gecgu dou emen dau len toua. 6:13 Dara ban bemesa areg ainyen emen aud sesar touwero. Doba ban beseyeiyo emen dougwo Sud Hom Mobgos Maha sug en ainyen emen gini, dauntoba emen ememobsara dau banlo. Anai banin boiharaga augwan. Dara ban abuwemougb esesa naugb augwan. Dara ban aboho eb taiba naugb augwan beb huhugb namcir toua. Amin. 6:14 Sug Yesus eic gansins dau gocuncum dou men logodeh dag gragohob, kaba, en enara dau sug len laigdougwo lusud meren sesar mougwa hom ucan dou len deit, endagai: Sug yen yacgeij ELOHIM aigdougwo meijen sesar dag mogud, kaba, esloulougb naugb yen yaigdougwo len gus meren sesar dag mogud toua. Anai sug yen yaigdougwo len gus meren sesar dag mogud terimda, kaba, yen Meijina se bogo en aigdougwo meijen sesar terimda toua. 6:15 Doba sug yen meigdoc agadgeij naugb yen yemaigdougwo len gus meren sesar dag mogudero, kaba, yen Meijina se bogo emaigdougwo meijen sesar dag mogud touwero. 6:16 Dara sug yen yehig dau ared naugb yen yocuncum dou ELOHIM, kaba, yen yemec dara yen meigbes eririj. Aninim dag leng larerei lusud meriresero. Anai len gini, kaba, len lec dara len merbes eririj namcir. Dara len lehin ara ara se len merbes dara merugt bogor namcir toua, dauntoba lusud lecinaga dag len leigtou dau aredohob. Dangga len leic meren siouwa icira gin dauwohob. Yen youman dan indir an areg dan den dou yen gini, deigeigouhw. Anai gini asesa dag misen namcir. 6:17-18 Doba yen, kaba, yen yemeicara danggero. Doba sug yen yehig dau ared, kaba, yen yomceduhu naugb yen yedu yen meigbes ecabeci. Dara yen yeic mani yaugb meijugt toua, dauntoba lusud lemecinaga dag yen yemehig dau aredero. Doba yen Meijina gedig lusud lemeiya en mougwa hombuma, kaba, enin eng ecinaga dous. Anai enin eng eiya dau meijen geicara gini sug yen yecgoneh dau lusudohob. Hang en emeic ara ara naugb en emauni ucugb dou yen toua. 6:19 Dara yen yemeigb meijen aremougb deb se cinogo ginlo. Doba yen yarges dau namcir. Anai sug yen yeigb aremougb deb se cinogo gin, cum kaba, dagames et, dara ongkum betaha dau yen. Dara leng leiyohora lod sibij dau meijen tu. Hanoba len leinesa leiyoho meijen aremougb dau yen toua. 6:20 Dangga yen yemeic meijuwemougb asesa naugb yen yemeigb meijen aremougb se cinogo ginero. Doba yen yeic meijuwemougb esesa naugb yen yeigb meijen aremougb se bogo dous. Anai sungga, kaba, dagames emet, dara emongkum bemetaha dau yen touwero. Dara leng leiyohora lemod sibij dau meijen tu naugb len lemeiyoho meijen aremougb gini dau yen touwero. 6:21 Hang yen meigdoc emetrij icira areg geb se cinogo gin toua deitero. Anai sug meijen aremougb eb se cinogo gini, kaba, yen meigdoc ebdebin sugin toua. Doba sug meijen aremougb eb se bogo, kaba, yen meigdoc ebdebin sungga toua. 6:22 Dara yen meijiresi edag smougb mouf naugb aisema yen meigdoc mes. Dangga sug yen meijires auweila areg gesgiraha dara medoc hom namcir, kaba, yen meigdoc dag mouf toua terimda. 6:23 Doba sug yen meijires auweila areg se lobeigbogo dous, kaba, yen meigdoc dag lobeigbogo toua terimda. Dangga sug lobeigbogo aihiron dougwo mouf dau yen meigdoc mesohob, kaba, mouf hom emeb se yen meigdoc mes toua deitero, doba augwan edag lobeigbogo mogud namcir dous. 6:24 Dara yen yemeicara naugb mougt hwai daremlo. Doba yen yeicara naugb mougt hom dous. Anai sug yen yeicara naugb mougt hwai, kaba, cum yen meigdoc gororougb homa. Doba yen meigdoc esbes homa. Era sug yen meigdoc edag beim naugb yen yaimo mougt homa en mer, kaba, cum, yen yohoiya mougt homa en mer gin toua. Hang emedeinyum naugb yen yemeicara dou ELOHIM dara aremougb lahwas daremero, doba yen yeicara dou mougt hom dous. 6:25 Dangga sug yen yeicara yaimo ELOHIM dous, kaba, dan den dougwo yen naugb yen meigdoc emeijesan areg yen yet, dara areg yen yeg, deitlo. Dara yen meigdoc emeijesan areg yen yeg dougwo yen meijaga touwero, doba yen yesa doc dau namcir. Anai yen meijireseb gini mera eisaugb edreg dau areg yen yet. Dara yen meijaga mera eisaugb edreg dau sug yen yehilon sansun naugb yen yeg toua. 6:26 Dara yen yeiya dougwo ba meren geicara sug len lohw touahabi. Anai len gini, kaba, len lemeba meij dara lemec mera. Dara len lemeic meij gin lemobdeb se tu meij touwero. Doba yen Meijina se bogo enin eic ared edeinyum naugb len laugwan terimda. Sug en eic ared dou len dag ginohob, kaba, en eic ared dou yen toua terimda. Anai yeni mera eisaugb edreg medam dau len namcir. 6:27 Dangga yen meigdoc emeijesan terimlo. Anai gareg dau yen sug en medoc eijesan an ara graga, kaba, emousa en naugb eic maireseb aulo terberba dou en deita? Naro, en medoc eijesan gini emeic maireseb emaulo hom dou enero. 6:28 Dara yen meigdoc emeijesan areg yen yeg dougwo yen meijaga touwero. Doba yen yeiya dau bideh sug leiji se lomesmes len touahabi. Anai len gini, kaba, len lemeic ara ara naugb sug len lemerijero. Dara len lemou igdebes naugb lemesinsin sansun naugb lenin touwero. 6:29 Doba hom dau bideh gin, kaba, merij mouf esesilo edreg medam dau Solaiman men sansun gogouf cucugb augwan ginohob. Yen youman dan indir an areg dan den dou yen gin deigeigouhw namcir. Anai Solaiman, kaba, en mesoho mougb. Doba men ariloboc meb tintin hom aninim dag bideh hom merij mohw gesisilo gin touwero. 6:30 Doba sug ELOHIM eg sansun se aremerij geb se lomesmes dag ginohob, kaba, dagiro, naugwe hang, yen meigdoc ebdebin an ELOHIM gurereito dag gin dousa? Yen youdesa en emeic sansun dou yen naugb yen yemegeroei? Naro, en emeic sansun dag misen dou yen yemeg toues. Anai aremerij gin, kaba, eiji irogini. Doba lonehibi, kaba, lusud lec se smougb, hang emediyebeiya toua namcirohob. 6:31-33 Dangga hang, yen yemohuresa eisaugb areg yen yet, dara areg yen yeg, dara areg yen yeg dougwo yen meijaga deitlo. Doba aimougtut, kaba, yen yehilon naugb ELOHIM oiharaga yen ucugb. Dara yen yeic meijuwemougb esesa naugb yen yaimo areg asesa ELOHIM enin medoc mes toua terimdahabi, ELOHIM en emeic areg graga augwan emaos dara dou yen toua. Anai leng merdoc emebdebin an ELOHIM enero, kaba, len lohuresa eisaugb areg len let, dara areg len leg, dara areg len leg dougwo len meraga terimda. Doba yen Meijina se bogo, kaba, en ecinaga dag areg graga augwan, kaba, esloulougb naugb yen teiteiyohob. 6:34 Dangga hang, yen meigdoc emeijesan areg yen yet dara areg yen yeg naugb lonamen gin touwero. Doba yen yogod se yenin meigdoc mes dag aremer naugb yen yaimo se lona irogini, kaba, edeinyum naugb lona iroginahabi. Anai lonamen, kaba, medoc eijesan areg geb se men lona gin dous.

Matius 7

7:1 Dara yen yemowun leng gus meroho an meren geicara ucucugblo. Dauntoba ELOHIM emowun yen an meijen geicara touwero. 7:2 Anai sug yen meigdoc agadgeij an len gus naugb yen yowun len meroho an meren geicara terimda, kaba, ELOHIM en medoc agadgeij an yen naugb en owun yen meijoho an meijen geicara toua. Era sug yen yeic hameij an ared gurereito dou len gus, kaba, ELOHIM eic dangga dou yen toua. 7:3 Dangga dagiro, naugwe hang, yen yauweila aremoslos gobsaresa yen mesir meriresi toutoua? Doba yen yemeiya sogo meb geb se yenin meijiresi nosa dauwero? 7:4 Era sug sogo meb eb se yen meijiresaba, kaba, dagiro yen yen dou yen meijaguner dara yen meigdamouwer naugb yen yeic aremoslos dau len meriresa? 7:5 Naro, eigouhw naugb yen yeic sogo meb dau yen meijiresi dauwahabi. Anai sug yen yeicara dag gin, kaba, yen meijiresi esgiraha naugb yen yeic aremoslos dau yen meijaguner dara yen meigdamouwer toua. Doba sug yen yemeicara dag ginero, kaba, yen yedag lusud gedig len leicara larerei len gus meriresi. 7:6 Dara yen yemeic areg ELOHIM enin moho aiga becabecohob dou lusud gedig meren geicara dag mihero. Anai cum, kaba, len leineg naugb lau yen an gin dous. Dara yen yemeic areg mera eisaugb dau ELOHIM dou lusud gedig meren geicara dag hweij touwero. Anai gini dag yen yerba sariou mogo dou hweij naugb len laiyan mor mor toua. 7:7 Dangga yen toua, sug yen youwan yacgeij ara ara dau ELOHIM, kaba, yen yemouf yen meijirs an gin touwero. Doba yen yacgeij en an ucucugb terimda. Dara sug yen meigdoc etrij icira ara ara dau ELOHIM, kaba, yen meigdoc emtereta dau ginero. Doba yen meigdoc esrougb an gin namcir. Dara sug yen youwan youma misis se ELOHIM men tu naugb en ousa yen toua, kaba, yen yemarges dau gin touwero. Doba yen youma misis dougwo en terimda toua. 7:8 Anai gareg en emouf mers an areg en acgeij dau ELOHIM enero, doba en eicara baimo dangga terimda, kaba, cum, ELOHIM emeic dou ens. Dara gareg en medoc emtereta dau areg en acgeij dau ELOHIM enero, doba en medoc esrougb an gin namcir, kaba, cum, en emesma dau ens. Dara gareg en emesa doc dau sug en ouma misis se ELOHIM men tuero, doba en ouma misis dougwo en toua terimda, kaba, cum, ELOHIM emousa en toues. 7:9 Gareg dau yen sug en meisi acgeij roti dau en, kaba, en eic igdahab dou enei? Naro, en eic roti dou en. 7:10 Era sug en acgeij hosei dau en, kaba, en eic hinogo dou enei? Naro, en eic hosei dou eni toua. Anai eni dag en mena misenohob. 7:11 Dangga sug yen yecinaga naugb yen yeic ara ara geigouhw dou yen meijihirohob, kaba, yen Meijina se bogo en emeic areg gecgu dou yenero. Doba en eic ara ara geigouhw dou yen sug yen yacgeij dau en toua. Anai meijen geicara einyana dag meijug mog namcir. Doba enin men geicara augwan ecabeci mogud an yen dous. 7:12 Dara yen youwan len gus leicara geigouhw an yen, kaba, yen toua yeicara geigouhw an len nosahabi. Anai areg Musa dara leng lesai ELOHIM moro sug nosa len log deb se Surad Injil Meb Mohonohob, kaba, men meijouhw dag gini. 7:13 Dara yen yeic meijuwemougb esesa naugb sug yen yeinesa misis geinyim gin dous. Anai misis aud dum smougb, kaba, gebehibera namcir. Dara ucina gini emogom naugb sug lusud leraga touwero, doba eigouhw dous. Dangga hang, lusud leinyana leraga ucina gin touohob. 7:14 Doba misis aud maireseb huhugb, kaba, einyim namcir. Dara ucina toua ogom naugb sug lusud leraga. Dangga lusud leinyana lemeraga ucina ginero. Doba lusud hom yom len lehilon naugb sug len leraga dous. 7:15 Dara yen yebehnehino yenin meigdoc mes dougwo leng lesai ELOHIM moro areibahau. Anai len gini, kaba, len leg domba modi laperwei lenin merucbobaga dag len merdoc arjaga deseino yen. Doba se len merdoc mes, kaba, len ledag mihiloro gau yen an ara ara dau yen dous. 7:16 Dara yen yecinaga leng ledag gembala areibahau gini dau sug len lera mera. Anai sug len merdoc dag lisugaba, kaba, len lemera mera dag anggur mera naugb yenero. Doba len lera mera dag lisug mera dous. Era sug len merdoc dag imbrei mogaba, kaba, len lemera mera dag sogo, moho ara mera, naugb yen touwero. Doba len lera mera dag imbrei mera mogud dous. 7:17 Dangga gareg en edag sogo maga geigouhw, kaba, en era mera geigouhw dous. Anai sug sogo maga geigouhw namcirohob, kaba, en emeineg naugb emera mera dag gecgu deitero. Doba en era mera geigouhw augwan terimda. 7:18 Dangga toua, sug sud hom en edag sogo maga gecgu, kaba, en era mera gecgu dous. Anai sug sogo gecgu namcir, kaba, en emeineg naugb emera mera geigouhw touwero. Doba en era mera dag gecgu mogud terimda. 7:19 Dara gareg en edag sogo maga gera mera ecgu, kaba, en emeigtou terberbero. Doba ELOHIM ehi en dau naugb erba en se smougb namcir. 7:20 Dangga hang, yen yemecinaga leng lesai ELOHIM mer areibahau dou yen dau sug len lera mera. Anai len lemera mera geigouhwero, doba ecgu namcir dous. 7:21 Dara astesda sud hom areg en eigdoumesa dan indoho dag men mougt mera medam, doba se en mers dous, kaba, en emeinesa naugb ELOHIM oiharaga enero. Doba gareg en aimo areg asesa dan Indina se bogo enin medoc mes gin toua, kaba, en ingga dous ELOHIM oiharaga en. 7:22 Dangga ebeij Lona Sug Dan Dogod Aremer Aga Lusud, kaba, len leinyana lemeiyagarij dan, lendagai: Adehsud, Adehsud, emen emesai ban aburo dou lusud sungga sunggohob. Dara emen emocirma merna mog mog dau lusud ogdoc ban aboho. Dara ban beic goubesa dou emen naugb emen emens ganusbus einyana ainyes dou lusud touohob. 7:23 Doba se Lona ingga, kaba, dan denara dauni len merir dag misen namcir, dendagai: Dan demecinaga yenero. Hang yen yeihwededau dan sugin namcir. Anai meijen geicara augwan gini edag mog mog edreg dau areg asesa ELOHIM enin medoc mes namcir touohob. 7:24 Gareg dau yen en ouman dan indir an areg dan den dou yen graga. Dara en eicara baimo toua, kaba, eni aninim dag sud hom gedig en mou ouforoho naugb en ohud men tu se igdahab moc gototo namcir. 7:25 Dangga sug los es medam, dara duhu eh medam, dara sug loungmen medam eisa naugb ahacugb tu graga, doba emeijero. Anai en men tu eb se igdahab moc gototo namcirohob. 7:26 Doba gareg dau yen en ouman dan indir an areg dan den dou yen graga, doba en emeicara emaimoro, kaba, eni aninim dag sud hom mou edgom gedig en ohud en men tu deb se dibo dous. 7:27 Dangga sug los es medam, dara duhu eh medam bougwan tu. Dara loungmen medam eisa naugb ahacugb tu graga, kaba, en eij bot baisoboro namcir. 7:28 Sug Yesus ens meijouhw dau areg graga augwan sug ouwedoc asesa dou lusudohob, kaba, len merug eijesa an areg en en dou len ingga. 7:29 Anai en ens meijouhw augwan dou len. Doba aninim dag leng meru ouforoho se Musa men gomnomnero. Anai len leses meriresa dou len dous. Doba Yesus enin, kaba, en ouma debin meijouhw asesa dou len namcir.

Matius 8

8:1 Sug Yesus enara dag graga dou len bouwohob, kaba, en ouwaden dau menmougb aud dougwen. Dara lusud leinyana leila ucan en naugb laimo en toua. 8:2 Doba yen youman deigeigouhw, sug en ec gini, kaba, sud hom aremos gogoufu et en, en en aud Yesus. Sug en edebeij enohob, kaba, en eic mohorbrida badedeij cinogo naugb ecguna dou eni. Hanoba en enara dou en, endagai: Adehsud, dan decinaga aban goubesa edeinyum naugb sug ban beic geigouhw dou dan. Dangga hang, ban bouwan, kaba, ban beic geigouhw dou danahabi. Anai sug aremos gogoufu et dan dag gini, kaba, emedeinyum naugb sug dan desijaresa ELOHIM deiterohob, doba dan dogor deseino en namcir. 8:3 Sug Yesus ouman dag gini, kaba, en ou mesira naugb os en toua. Hanoba en oho mer debin en, endagai: Dan douwan naugb deic geigouhw dou ban. Dauwohob, kaba, en enara dou en deit, endagai: Ban beigouhwohob. Sug Yesus enara dag gin dou en inegohob, kaba, aremos gogoufu ingga, augwan ediyebeiya dau en mos namcir. 8:4 Gin ouwohob, kaba, Yesus esulou en ucan deit, endagai: Ban abdoc eiseisan dan indir, dauntoba ban bemedecic dau areg dan deic geingmos agauwesa dou ban gini dou lusud gus hom touwero. Doba ban bidens banin dou aban gembala gesa taij naugb en ouma debin dag ban abus ecabecohob. Gin ouwohob, kaba, ban beic ara ara naugb bauwaharo dou ELOHIM, aimo dau areg Musa en og se Surad Injil Meb Mohon an gin debohob. Dauntoba lusud laugwan len toua lecinaga dag ban becabeci deseino ELOHIM deitohob. 8:5 Sug Yesus edebeij cinogo Kapernaumohob, kaba, sadodor merug huntun hom meren mougt mera en edagasa Yesus naugb enara aigebeb dou en, endagai: 8:6 Adehsud, indan sogougb hom en atou se indan tu terimda. Anai en areba dag en mog augwan arjeijaga namcir. Dara en mog erij medam toua. 8:7 Yesus auni en mer dou en, endagai: Dan demenbo naugb dan demeic geigouhw dou ens. 8:8 Doba sadodor merug huntun hom meren mougt mera graga, kaba, en en dougwo Yesus, endagai: Adehsud, dan indoho emagas emedeinyum naugb sug dan debin ban beinesa indan tuero. Doba ban ben se ban abir dous, kaba, indan sogougb men gareba gini edina dau enohob. 8:9 Anai dan toua dedag mougt mera naugb sadodor. Hang len lemedreg dan indir touwero. Doba len laimo dan indir, aninim dag dan daimo indan mougt mera en mer gini toua. Dangga sug dan denara dou indan sadodor hom naugb en eihweda sugwada, kaba, en aimo dan indir asesa dag gini. Era sug dan deija indan sadodor hom naugb en en aud dan, kaba, en aimo debin gini. Era sug dan darougb indan sogougb hom naugb en eicara ara ara, kaba, en aimo debin dag gini toua. 8:10 Sug Yesus ouman dau sadodor meren mougt mera en enara dou en dag graga, kaba, en eimiman dau en mer dou lusud gedig len laimo en ingga namcir, endagai: Dan demouman sud hom dau yeng Israel hom en emod mena debsa dani dag gin ingmebma. 8:11-12 Dangga hang, yen youman dan indir deigeigouhw namcir. Anai se lona sug ouwedoc, kaba, lugmahara leinyana len len dau dig igda eisaugb, dara igda obsaresa naugb sug ELOHIM oiharaga len ucugb. Dara len leigtou desij Abraham, dara Isag, dara Yakub naugb len letara aninim dara len se ELOHIM men goiharaga gin toua. Doba yeng Yahudi, kaba, ELOHIM emoiharaga yen deitero. Doba en erba yen se lobeigbogo mes naugb yen yeiyogoseser, dara yeg meijugta ecugwom sungga terimda. 8:13 Sug Yesus owun len dag ginohob, kaba, en arougb sadodor meren mougt mera graga, endagai: Ban becicugb dig aban tueda. Anai areg ban bod abina debsa dan an gini, kaba, acgunogohob. Dangga sug Yesus enara dou en ingga, kaba, mougt mera men sogougb toua eigouhw namcirohob. 8:14 Sug Yesus enara dou mougt mera graga ouwohob, kaba, en eihweda bedebeij Petrus men tu. Hang en eiya, doba Petrus memba en atou se boromei, anai en areba dag en mos esrougb medam namcir. 8:15 Dangga sug en ou mesira bos gida ingga en mesirohob, kaba, men mos gesrougb augwan edina dau en namcir. Sug mos gesrougb edina dau en inegohob, kaba, en eisa naugb en ougwan ared dou Yesus ben et. 8:16 Doba sug lobohob, kaba, lusud lahwan leinyana gedig merna mog mog einesa merdoc mesohob aud Yesus se Petrus men tu. Dangga men goubesa edeinyum naugb en ocirma merna mog mog lougbdedau lusud graga len laugwan merdoc mes namcir. Dara leng areber, kaba, Yesus eic geigouhw dou len laugwan toua. 8:17 Dangga men geicara gini esogwa deisa areg sud hom gesai ELOHIM moro nosa, en moho Yesaya, en og deb se Surad Injil Meb deb sug nosohob, endagai: Enin eng eigdoumesa areg geic maman mamug omomtom dau maman. Dara areg eic gareba dou maman, kaba, enin eng erba augwan dau maman toua. 8:18 Sug Yesus en eiya, doba lusud leinyana gougwa len len naugb louwa debin en, kaba, en arougb men logodeh len larougb ij naugb leisan en dig duhu nagama. 8:19 Doba sug Yesus emeinesa ing mesebma, kaba, sud hom gedig en mou ouforoho se Musa men gomnomna, kaba, en en aud Yesus naugb enara dou eni, endagai: Bani sud hom abu ouforoho naugb ban bens aremeijouhw augwan asesa dou emen namcir. Dangga hang, dan douwan daimo ban naugb nanan nac sungga sungga toua. 8:20 Doba Yesus enara bagod dougwo en mer, endagai: Mihiloro, kaba, meren igdohos mes inggebga naugb len latousa. Dara ba toua len mererum inggebga naugb len latousa. Doba Lusud Meraguna Mebin dan, kaba, indan ara ara ingmemeb naugb sug dan dareb touwero. 8:21 Dara sud hom dau Yesus men logodeh gus en toua en aud Yesus naugb en acgeij dau en, endagai: Adehsud, ban bouwan, kaba, ban barges dan naugb dan dedec dan indina magahabi, dan demaimo ban deits. 8:22 Doba Yesus en dougwo eni, endagai: Ban, isnaro. Anai leng lomom leinyana merugwengga naugb len lemec leng lomom misen inggas. Doba ban, kaba, ban baimo dan namcir dous. 8:23 Sug Yesus en dougwo lahwai graga ouwohob, kaba, Yesus dara men logodeh, len laugwan leisa ij. 8:24 Doba sug len logo duhu leihweda, kaba, Yesus en atou bamumi dau ginohob. Doba cum, kaba, loungmen medam eisa obsara se duhu. Dangga duhu mogo medam erba se ing mes. 8:25 Dangga men logodeh len lebir en, dara len leiyagarij en namcir, lendagai: Adehsud, ban bisa beigdoc emeni. Anai duhu mogo erba se ingmes naugb aiyan maman maugwan mamom dangga. 8:26 Doba Yesus en esa mer debin len, endagai: Dagiro naugb yen yahau dau gina? Yen yemod meijina debsa daneroei? Sug en enara dag graga dou len ouwohob, kaba, en eisa dau sug en atou graga naugb en esa mer debin loungmen dara duhu mogo. Dangga, kaba, loungmen aimo en mer bedina namcir. Dara duhu mogo arjaga bebtou namcir toua. 8:27 Dangga men logodeh len leimiman dau en namcir. Hanoba len leijidougwom ucucugb, lendagai: Sud hom gini garena? Hang en emenara dou loungmen dara duhu mogo lamaimo en mer gina? 8:28 Sug len ledebeij se leng Gadara meren hancob dig nagamohob, kaba, lasud lahwai lan lan dau igdohos mes gedig len lob leng lomom debsa naugb lan aud Yesus. Lani marug mog, anai merna mog mog eisa lan mardoc mes namcirohob. Dangga hang, lusud laugwan lahau naugb len lemeraga ucina irir sug lan laigtou sunggaro. 8:29 Doba sug lan ladebeij Yesusohob, kaba, merna mog mog geb se lan mardoc mes len lesa merir medam debin en, lendagai: Anara hang, ELOHIM Meisi, ban bos aban dara naugb ban bogod aremer aga emen gina? Anai lona naugb ban beic mog erij dou emen emedagasebma. Dangga, dagiro naugb ban ben aud emen sugin iteitogina? 8:30 Doba hweij einyana lesa letara deinyor sungga. 8:31 Dangga hang, merna mog mog len lacgeij dau Yesus ucucugb, lendagai: Sug ban bocirma emen dau lan gin mardoc mes, kaba, ban bousa deisa emen emir. Dauntoba emen emeinesa hweijir gedig len lesa gada len merdoc mes. 8:32 Sug Yesus ouman dau gin, kaba, en ousa deisa len merir an. Hanoba en enara dou len, endagai: Yen yeihweda. Sug merna mog mog louman danggohob, kaba, len lagunya dau lasud lahwai graga mardoc mes naugb len leinesa hweijir merdoc mes deit. Hang hweijir ingga len lemobga dau men maga terimda len lesogwesa duhu men lomom namcir. 8:33 Sug leng lesedougwo hweijir graga, len leiya dangga, kaba, len lobga ledecic aremer eisaugb hweij se meren cinogo dou lusud laugwan. Dara len lecic dau sug Yesus ocirma merna mog mog dau lan graga mardoc mes dou lusud toua. 8:34 Sug len lecic augwan dou lusud dauwohob, kaba, len laugwan len dau meren cinogo naugb len ledeiya Yesus. Sug len ledebeij enohob, kaba, len lecicugb Yesus, lendagai: Ban bededau emen hancob sugin namcir.

Matius 9

9:1 Sug leng Gadara lecicugb Yesus dag gragohob, kaba, en eisa ij ucugb dig nagama aud men cinogo deit. 9:2 Dangga sug en edebeijohob, kaba, lusud lodo hogo an sud hom maga omomtom dou eni. Sug Yesus en eiya, doba len ingga lod merna debsa an en namcir, kaba, en enara baded sud hom maga omomtom graga medoc mes, endagai: Dan indisi, ban abdoc momogoro. Anai dan daigdougwo aban sesar augwan dau ban namcirohob. 9:3 Doba ligbum dau leng meru ouforoho se Musa men gomnomna sug len louman dau gin, kaba len lenara doum, lendagai: Sud hom gini en eic ELOHIM moho acecim namcirohob. Anai ELOHIM enin dous eng aigdougwo lusud meren sesar. 9:4 Doba Yesus en ecinaga dau areg len lauwam an ingga se len merdoc mesohob. Dangga hang, en emeijidougwo len, endagai: Yen yauwam an areg gecgu eisaugb dan se yen meigdoc mes anara? 9:5 Anai sug dan denara dou sud hom dag dan daigdougwo men sesar. Era dan denara dou en dag en eisa besa naugb en ec mohora, kaba, yen youdesa gedigiro ing eijouhwa? Naro, hwas hwas ogom namcir. 9:6 Doba dan dens dou yen dag ELOHIM eic goubesa dou Lusud Meraguna Mebin danohob naugb sug dan daigdougwo lusud meren sesar, dauntoba yen yecinaga dag misen. Sug Yesus enara dou len dag gin dauwohob, kaba, en enara dou sud hom mohora agaim deit, endagai: Ban beisa bod aban sidgwa. Hanoba ban beihwedan dig aban tueda. 9:7 Sug Yesus arougb enohob, kaba, sud hom maga omomtom ingga, en eisa besa. Hanoba en ecicugb dig men tueda. 9:8 Dangga lusud laugwan sug len leiya dau gini, kaba, len merdoc ahau dau namcir. Hang len lemesijaresa ELOHIM, lendagai: Emen emeigdoumesa ban aboho. Anai ban beic goubesa dou lusud naugb len leic geigouhw dou leng areber dag ginohob. 9:9 Sug Yesus eic geigouhw dou sud hom maga omomtom gragohob, kaba, en ec dau sungga deit. Hanoba en eiya, doba sud hom, moho Matius, en eigtou se tu meij se ucina mebera deb. Eni sud hom gedig en acgeij lusud naugb len lohw cinogo dou leng Roma. Dangga Yesus eija en, endagai: Ban baicira dan iteitogini. Sug Matius ouman gin, kaba, en eisa naugb aimo Yesus namcir. 9:10 Se lona hom deit, kaba, Yesus en eigtou se Matius men tu naugb etara dara en. Dangga lusud leinyana dau leng lacgeij lusud naugb len lohw cinogo dou leng Roma, dara len gedig leng Yahudi len lowun len meroho dag len lebesesarohob, kaba, len laugwan gini len leinesa tu aud Yesus naugb len letara aninim dara eni dara men logodeh laugwan toua. 9:11 Dangga sug merug hosa dau leng Parisi len leiya dau augwan gini, kaba, len leijidougwo Yesus men logodeh, lendagai: Dagiro naugb meijen adehsud, en etara desij lusud gedig len lacgeij lusud naugb len lohw cinogo dou leng Roma, dara lusud gedig len lebesesar touohoba? 9:12 Doba sug Yesus en ouman dau len merir an dangga, kaba, en enara auni len merir ucugb dou len, endagai: Leng gedig loudesa len leigouhw namcir, kaba, len lemehilon leng los merinuhwero. Doba leng areber dous eng lehilon len. 9:13 Dangga leng leigdoumesa lenin meroho dag len laimo areg asesa ELOHIM enin medoc mesohob, kaba, dan demeija len naugb len lesga meren sesar dou ELOHIM enero. Doba dan deija leng lebesesar naugb len lesga meren sesar moho asesa dou ELOHIM. Doba yen, kaba, eigouhw naugb yen yecic dau areg ELOHIM en og deb se Surad Injil Meb deb sug nosohob. Dauntoba yen yecinaga meijouhw augwan asesahabi. Anai en enara dag ginohob, endagai: Dan demouwan naugb yen yemeic aremeta naugb yemauwaharo dou dan deitero. Doba dan douwan naugb yen meigdoc erij an len gus dous. 9:14 Se lona hom deit, kaba, Yohanes men logodeh, len len aud Yesus naugb leijidougwo en, lendagai: Emeni dara leng Parisi, kaba, emen emehig dau ared terimda. Doba dagiro naugb aban logodeh, len lemehig dau ared mougwa homero? 9:15 Dangga Yesus enara bauni ucugb dou len, endagai: Yen youdesa dagiro? Sug sud hom geic mesouwa en ougwan ared debin lani, kaba, en mesir medoc momogo an enei? Naro, len merdoc momogo an enero. Doba sug en moongga desij lenaba, kaba, len merdoc agahugouhw debin en namcir. Doba cum, kaba, lusud lagaigeij en dau mesir. Se lona ingga, kaba, en mesir len lebiji naugb len lehig dau ared toua, anai len merdoc momogo an enohob. 9:16 Sug Yesus auni dou Yohanes men logodeh dag gragohob, kaba, en eic gainyenara hwai dag maman mameic gomnomna mohon mamaos dara men gomnomna menauwero dou len deit, endagai: Sud hom ingma en emeic minc meti menau, hanoba en emogon dara sansun mohon touwero. Anai minc meti menau gin, kaba, odunggon. Hang sug en ogon minc meti menau dara sansun mohon, kaba, cum, sansun met menau eican sansun mohon mes medam namcir. 9:17 Dangga toua, sud hom ingma en emeic anggur mohu menau emeiri deisa aremeta mos mohonero. Doba en eic anggur mohu menau gini eir se aremeta mos menau dous. Dauntoba hwas eigouhw bebsugeb namcir. Anai sug en eir anggur mohu menau deisa aremeta mos mohon, kaba, cum, anggur menau men oubesa bagan bobogougb an anggur mohu baicarehiro. Hang mos mohon toua ecgu namcir. 9:18 Sug Yesus eic gainyenara hwai dou len dag gragaba, kaba, mougt mera gesedougwo leng Yahudi meren tuari, en en aud Yesus. Sug en edebeij Yesusohob, kaba, en ecgun mohorbrida badedeijlo deseino en. Hanoba en acgeij en, endagai: Dan indihida hom en omom iteitogragohob. Dangga hang, dan demacgeij naugb ban baimo dan naugb ban bedob ban absira debseni. Anai dan decinaga dau sug ban bobo ban absira debsa enohob, kaba, en eisa ucugb toua. 9:19 Sug en acgeij Yesus dag gragohob, kaba, Yesus eisa naugb en eino sud hom ingga en men. Dara Yesus men logodeh, kaba, len laicara lan toua. 9:20 Sug len lec merohora aud mougt mera graga men tu, kaba, gida hom gedig en os mogwihi se arisogomoc sisa hobjeraiyohob, kaba, en aimo dig Yesus medigo. Hanoba en os men sansun icira en mos toua. 9:21 Anai en oudesa dag en os men sansun dous, kaba, cum mogwihi edina namcir. 9:22 Doba sug gida graga en os Yesus men sansun inegohob, kaba, en eineg naugb auweila en. Hanoba en enara dou en, endagai: Dan indihida, aban garebeb gini ediyebeiya dau ban namcirohob. Anai ban abdoc ebdebin an dan dag misenohob. Dangga ban abdoc momogo dau gin deitero, doba ban baiyan abdocesem namcir. Sug Yesus enara dag graga dou inegohob, kaba, en mogwihi edina doc dau en namcir. 9:23-24 Doba sug Yesus edebeij sud hom mougt mera graga men tuohob, kaba, en ouman dau sug lusud lohw hwigbei dougwo gomom graga. Dara lusud leinyana leiyogoseser medam namcir toua. Dangga hang en emetaha len icira gini, endagai: Yen yeihwededau sugini. Anai gida gidob hom gini, kaba, en emomomero, doba en atou dous. Doba sug len louman Yesus en dou len dangga, kaba, len lobohuba dagasges an en namcir. 9:25 Dangga sug en ocirma len laugwan dauwohob, kaba, en einesa dimei aud gida gidob graga naugb os en mesira. Sug en os en mesira danggohob, kaba, en eisa maireseb ucugb deit. 9:26 Doba sug lusud len leiya gida gidob hom en eisa ucugwohob, kaba, len leigdoumesa len merir an gin doum bagaha se cinogo Kapernaum men hancob augwan. 9:27 Sug Yesus en dau mougt mera graga men tuohob, kaba, en ec deit. Doba lan mairires mougb lahwai, kaba, lan laucan en dig medigo. Hanoba lan laiyagarij ucan en toua, landagai: Daud Medebeito, ban abdoc eineg an aman amahwai gini. 9:28 Doba sug Yesus en einesa tu dau lanohob, kaba, lan toua lainesa ucan en se dimei mes ingga. Dangga Yesus eijidougwo lan, endagai: Yan yaod maijina debsa dan dag indan goubesa edeinyum naugb sug dan desga yan maijiresei? Dangga, kaba, lan lausa en mer, landagai: Adehsud, aman amod amina debsa ban icira gin namcir. 9:29 Sug lan lausa en mer danggohob, kaba, en ou mesira bos lan mairiresi. Hanoba en enara dou lan, endagai: Areg yan yaod meijina debsa dan naugb dan deic geigouhw dou yan, kaba, indan goubesa edeinyum naugwohob. 9:30 Sug Yesus enara dou lan dangga inegohob, kaba, lan mairires esga naugb lan laiya lo asesa ucugb deit. Doba Yesus, en en dougwo lan namcir, endagai: Yan yemedecic dau sug dan desga yan maijires gini dou sud hom touwero. 9:31 Doba lan, kaba, ladreg en mer namcir naugb lan ladecic en moho an gini bagaha se cinogo Kapernaum men hancob augwan. 9:32 Sug lang mairires mougb graga lan laihwededau Yesusohob, kaba, len gus lahwan sud hom gedig merna mog mog einesa medoc mesohob aud en deit. Anai merna mog mog louf dougwo en mers bosum namcirohob. 9:33 Dangga sug Yesus ocirma merna mog mog dau enohob, kaba, en enara dag misen deit. Hang lusud leinyana len lemeimiman dau Yesus an gin namcir, lendagai: Emen ememeiya gidag gini ingma se leng Israel meren hancob touebma. 9:34 Doba leng Parisi, len lesbes an Yesus men geicara gini, lendagai: En ocirma merna mog mog dau lusud dangga. Anai merna mog mog meren mougt mera medam, moho Belsebul, eng ogugwo men goubesa dou en naugb ginohob. 9:35 Sug Yesus eic geigouhw dou sud hom gragohob, kaba, en ec mohora se cinogo medam, dara cinogo mogurerei augwan toua, naugb en esai ELOHIM Mer Geigouhw dau sug en ouwan oiharaga lusud ucugb se leng Yahudi meren tuari. Dara en edidib meijouhw dau augwan gin dou len toua. Hanoba en eic geigouhw dou leng areber. Dara en eic geigouhw dou leng meraga omomtom len laugwan toua. 9:36 Dara en medoc eineg an len toua. Anai en eiya len laugwan, doba len merdoc ougbdibed, dara len merug arjaga aninim dag domba gedig gembala emesedougwo len deitero. 9:37 Dangga hang, en eic gainyenara hom debin gin dou men logodeh deit, endagai: Tramdad einyana ohoserohob. Doba lusud gedig len lemouji meij deb gini, kaba, lemeinyanerodaha. 9:38 Dangga hang, yen yemocuncum dou sud hom gedag mougt mera naugb meij gini. Dauntoba en ens lusud leinyana ingma dara naugb len leic men meij gini laihiro deb naugb eni.

Matius 10

10:1 Se lona hom, kaba, Yesus en eija men logodeh merug sisa hobjerai naugb len loucimdeb dara en. Hanoba en eic goubesa dou len naugb len locirma merna mog mog dau lusud. Dara en eic goubesa dou len naugb len leic geigouhw dou lusud gareber, dara lusud gedig len meraga omomtom laugwan toua. 10:2 Doba men logodeh merug sisa hobjerai ingga, kaba, len meroho dag gini: Hom gedig en moho edreg dau len gus laugwan, kaba, en moho dag Simon, doba lusud leija en dag Petrus toua. Hom toua, en moho dag Andreas, eni Petrus maguna. Hom deit, kaba, eni Sebedeus meisi, moho Yakobus. Dara hom deit Yakobus magto, moho Yohanes. 10:3 Dara Pilipus, dara Bartolomeus, dara Tomas, dara Matius gedig en acgeij lusud naugb len lohw cinogo dou leng Roma sug nosa. Hom deit, kaba, eni Alpius meisi, moho Yakobus. Dara hom deit en moho Tadeus. 10:4 Dara Simon gedig lusud leija en dag Selot. Anai sug nosa, kaba, en ouwan ocirma lugmahara laugwan dau meren cinogo. Dara sud hom deit toua, en moho dag Yudas dau cinogo Keriod. En eng sud hom gohw Yesus dou leng Yahudi meren mougtir. 10:5-6 Sug Yesus esa merug sisa hobjerai graga aud lusud, kaba, en en dougwo len nosahabi, endagai: Yen yemeitig se ucina gus aud lugmaharero. Dara yen yemeinesa leng Samaria meren cinogo augwan touwero. Doba yen yeinesa leng Israel meren hancob augwan dous naugb yen yesai ELOHIM moro dou len. Anai len ledag domba gaijahasero namcirohob. 10:7 Dangga sug yen yedebeij lenohob, kaba, yen yesai ELOHIM moro dou len, yendagai: Lona naugb sug ELOHIM oiharaga yen ucugb, kaba, ebeij deinyor namcirohob. 10:8 Dara sug yen yesai ELOHIM moro dou len, kaba, yen yeic geigouhw dou leng areber laugwan toua. Dara leng lomomohob, kaba, yen yeigdoumesa len leisa ucugb. Dara leng aremos gogoufu et lenohob, kaba, yen yeic geingmos agauwesa ucugb dou len. Dara len gedig merna mog mog eisa len merdoc mesohob, kaba, yen yocirma dau len toua. Dara yen yemacgeij ara ara dau len touwero. Doba yen yeicara dag mogud dou len dous. Anai yen yemeic ara ara yemauma goubesa naugb gini dau dan touwero. Doba dan deic dag mogud dou yen dous. 10:9 Dara yen yemeisgoho meijen aregoufu dau w emas, dara w perag, dara w tembaga se meijen hwigbei mos gedig yen yeiji se yen meijihw isisi touwero. Doba yen yeihweda dara yen meijug mogud dous. 10:10 Dara yen yemoho meijen i naugb yen yemohwiaga lusud an ared se ucina mogumsi touwero. Doba yen yecus dau i deb dous. Anai sug yen yesai ELOHIM moro dag mogud dou lusud, kaba, yen meijoho agas edeinyum naugb len leic ara ara dag mogud ucugb dou yen toua. Hang yen yemoho meijen sansun dara hwigbei mos ingma dara yen touwero. Doba yen yeihwedan areg geb se yen meijus dous. Dara yen yemodo ijouhugwa se ucina mogumsi naugb yen yemos dougwo sug lusud logod yen touwero. Doba yen yec dara yen meisira mogud dous. 10:11 Dangga sug yen yedebeij beimes, era cinogo homohob, kaba, yen yeijidougwo lusud an sud hom areg dau len sungga, kaba, en men geicara eigouhw bedeinyum naugb sug yen yatou desij en. Sug sud hom moongga, kaba, yen yeigtou desij en se men tu terimda edebeij lona sug yen yeihweda se cinogo gus dau eni toua. 10:12 Dara sug yen yeinesa en men tuohob, kaba, yen yocuncum dou ELOHIM an lusud se tu mes ingga len laugwan, yendagai: ELOHIM eic gesgigouhwesa dou yeng yeigtou se tu mes gin augwan dougwo augwan namcir. 10:13 Dangga sug len lebin yen deigeigouhw namcir, kaba, yen yemedug gesgigouhwesa ucugb dau lenero. Doba ebsugeb naugb len terimda. Doba sug len lemebin yenero, kaba, gesgigouhwesa gedig yen yacgeij ELOHIM an dou len gragohob, kaba, yen yacgeij ELOHIM edug ucugb dau len aud yenin deit. 10:14 Dara sug tu hom, era sug cinogo hom lemebin yenero, kaba, yen yeihwededau len namcir. Hanoba yen yetir yen meijohora an meren cinogo mor bobsara ucugb dou lenin deb, ansins dag yen yotogoto len deb namcirohob. 10:15 Dangga se Lona Sug ELOHIM Ogod Aremer Aga Lusud, kaba, en emeic gogom debin lusud se cinogo ingga edreg dau gogom gedig en esa debin lusud se cinogo Sodom dara Gomora sug nosohob. Yen youman dan indir an areg dan den dou yen gini deigeigouhw, anai augwan gini asesa dag misen namcir. 10:16 Yen youman dan indir. Dan desa yen dag domba se mihiloro merufu naugb yen yesai ELOHIM moro dou len. Dangga hang, yen meiju auti aremeijouhw augwan aninim dag hinogo. Doba yen meigdoc mes, kaba, edag beim an lusud aninim dag bohobei medoc arjaga namcir. 10:17 Dangga yen yebehnehino yenin meigdoc mes dougwo leng merug mog namcir. Anai len, kaba, len lemohw yen dou meren Majelis. Hanoba len lemarougb meren lusud naugb len lemobosbos yen se meren tuari toua. 10:18 Dara len lemohugouhw yen meisira aud leng meroho agas dara meren mougt mera medamir toua. Anai yen yaimo danohob, doba yen yemahaulo. Anai sug len lohugouhw yen aud meren mougtir, kaba, gini eic cumougt dou yen naugb yen yos yad dan deseino len dara lugmahara laugwan toua. 10:19 Doba sug len larges yen deb se mougtir graga meisirohob naugb sug len leic gomom dou yen, kaba, yen meigdoc emeijesan areg yen yen dou lenlo. Dara yen yemoudesa dag yen yenara dagiro dou len gin touwero. Anai se lona sug yen yos yad dan indoho deseino len ingga, kaba, ELOHIM en emens areg yen yen dou len toues. 10:20 Hang areg yenara dou len, kaba, yen yemenara dau yenin meigdoc mes dou len touwero. Doba se lona ingga, kaba, Mena Gogoufu dau yen Meijina se bogo, enin eng emarautut gin augwan se yen meigdoc mes naugb yen yemenara moho asesa dou len toues. 10:21 Doba leng lohugouhw yen meisira aud mougtir gini, kaba, leni lugmaharero. Doba leni dau yen meijaguner, dara meigdamouwer dau yen meijouhuda hom. Dangga se lona ingga, kaba, maguna en ohw magto dou mougtir. Dara magto en ohw maguna dou len toua. Dara mena en ohw en mehir dou len. Dara merihir len lohoiya merna dara merim merir. Hanoba len lemohw len dou mougtir naugb len logod aremer gomom dou len toues. 10:22 Dara lusud hom ingma en medoc emeigouhw an yen toua deitero. Doba len laugwan merdoc mog mog an yen namcir naugb len leic mog erij dou yen toua, anai yen yaimo danohob. Doba gareg dau yen en aiyan medocesem naugb en es agadgeij terimda bouwedoc dougwo ginohob, kaba, ELOHIM emeic maireseb huhugb dou en toues. 10:23 Dangga sug len leic mog erij dou yen se cinogo hom, kaba, yen yougbda dau cinogo ingga naugb yen yesai ELOHIM moro se cinogo gus deit. Doba yen youman dan indir deigeigouhw namcir. Anai sug yen yemesai ELOHIM moro se leng Israel meren hancob augwanbuma, kaba, Lusud Meraguna Mebin dan decicugwen aud yenohob. Augwan gini asesa dag misen namcir. 10:24 Sug Yesus esulou men logodeh dag graga ouwohob, kaba, en eic gainyenara hwai debin dou len deit dau sug lusud leic mog erij dou en nosohob, kaba, emedreg dau len touwero. Hanoba en enara dou len, endagai: Guru men logodeh len meroho emagas dau enero. Dara sogougb en moho emagas dau men mougt touwero. 10:25 Doba eigouhw naugb guru men logodeh len meroho aninim dag eni. Dara edeinyum naugb sogougb en moho aninim dag men mougt toua. Dangga hang, sug len lowun mougt naugb leng se tu mes en moho dag Belsebul, era bougena meren mougt mera medam dag ginohob, kaba, len lemowun leng se men tu len meroho gineroei? Naro, len leic len meroho ecgu edreg dau mougt namcir dou len toua. 10:26 Doba yen yemahau dau leng mougtir, gedig len leic gogom dou yen gragero. Anai len loudesa endag sug len lod se simei dau lusud, kaba, len lemecinagero. Doba len lauwam an didi dau lenin dous. Anai se lona hom, kaba, ELOHIM ens dau areg len lod se simei ingga ainyes dou len ucugb deits. Dara len loudesa meren geicara gecgu gedig len leic dou yen ingga, kaba, len lecgoneh dau lusud namcir. Doba len lauwam an gin toua didi. Anai se lona hom, kaba, ELOHIM ens augwan gini eb ainyes dou lusud laugwan toua lecinaga namcir. 10:27-28 Dangga hang yen yemahau dau lusud misen se cinogo ginlo. Doba yen yeic meijus naugb yen yen dau areg dan den dou yen gini beb ainyes dou lusud laugwan terimda. Dara yen yeic meijus naugb yen yesa meijir an areg dan dec luluf an se yen meijums gin dou lusud laugwan louman toua. Anai len se cinogo gini, kaba, len lemeic gomom dou yen meijinero. Doba len leic gomom dou yen meijaga dous. Doba ELOHIM, kaba, en emeic gomom dou yen meijaga dousero. Doba men goubesa inggebga naugb en eic mor mor dou yen se dum smougb toua. Dangga hang, yen yahau dau en hom dous. 10:29 Yen yecinaga dau sug lusud leic ba moho rumem laumara, kaba, len lauma aregoufu mera ouwada namcir dag mogo hom dous. Doba hom dau len, kaba, en emobsara se cinogo sug ELOHIM emouwan ginero. 10:30 Doba eisaugb yen, kaba, en ecinaga yen meijugt modi astesda augwan gin touohob. 10:31 Dangga hang, yen yemahau dau lusudero. Anai sug ELOHIM esedougwo ba mogurereito mera ouwada gini dara geigouhw namcir, kaba, en esedougwo yen edreg dau len deit. Anai yen meijina mera eisaugb edreg dau ba rumem laugwan gin namcir. 10:32 Gareg dau yen en eic mos naugb en os bad dan indoho deseino lusud namcir, kaba, dan toua dos dadi en moho deseino dan Indina se bogo toua. 10:33 Doba gareg dau yen en ahau naugb en aideido dan indoho deseino lusud, kaba, dan toua daideido en moho deseino dan Indina se bogo toua. 10:34 Dara yen yemoudesa dag dan douwaden dau bogo se cinogo gini naugb dan dousa lusud, dauntoba len leic gesgigouhwesem touwero. Anai dan demeicara daimo dangga an len dag ginero. Doba dan douwaden dau bogo naugb dan deic krawan, dauntoba len lesara anim dous. 10:35-36 Dangga hang, sud hom gesedougwo men tu, kaba, men moc emen dau len gus dousero. Doba men moc medam inggeb se men tu mes toua. Anai sug dan den naugb dan dekeba len daum dag ginohob, kaba, dan deic meisi medoc susugb dau mena. Dara mehida susugb dau mem. Dara mebeba en medoc susugb dau memba toua. 10:37 Hang gareg dau yen en medoc gororougb mena dara mem edreg dau dan namcir, kaba, emedeinyum naugb dan demeigdoumesa en moho dag dan indisi misenero. Dara gareg dau yen en medoc gororougb en meisir dara en mehider edreg dau dan namcir, kaba, emedeinyum naugb dan demeigdoumesa en moho dag dan indisi misen touwero. 10:38 Dara gareg dau yen en emesogwesa dan indohotimei mohw se ucina mog erij aud gomomero. Doba en ahau dau namcir, kaba, emedeinyum naugb dan deigdoumesa en moho dag dan indisi misen touwero. 10:39 Dangga gareg dau yen en ehilon ucina naugb en ebehnehino enin mena dougwo areg gogom. Dauntoba en maireseb terimda, kaba, cum, en mena ediyebeiya namcir. Doba gareg en eic mog erij naugb en omom icira dan indoho, kaba, en mena emediyebeiya namcirero. Doba dan demeic maireseb menau geb huhugb dou en deits. 10:40 Dara gareg en ebin yen, kaba, gini aninim dag en ebin dan touohob. Dara gareg en ebin dan, kaba, gini aninim dag en ebin ELOHIM toua. Anai en eng esa dan aud yen gini. 10:41 Dara gareg en ebin sud hom, anai en esai ELOHIM moro dou lusud en, kaba, en momsi emocgocroro. Doba ELOHIM eic siouwa dou en, aninim dag en eic dou sud hom gesai ELOHIM moro ingga toua. Dara gareg en ebin sud hom gesai ELOHIM moro dara men geicara edag beim an en namcir, kaba, ELOHIM eic siouwa dou en, aninim dag en eic dou sud hom gesai en moro ingga toua. 10:42 Dara gareg dau yen en eic duhu misen dou sud hom dau leng meroho eb tainya namcir, anai en edag indan logodehohob, kaba, men geica gini emocgocroro. Doba se lona daiyamo gacin, kaba, ELOHIM emeic siouwa dou ens. Yen youman dan indir an areg dan den dou yen gini deigeigouhw, anai augwan gini asesa dag misen namcir.

Matius 11

11:1 Sug Yesus esulou men logodeh merug sisa hobjerai dag graga dauwohob, kaba, en eihwededau sungga naugb en esai ELOHIM moro dara en edens aremeijouhw dou len se cinogo geb acec len ingga toua. 11:2 Dangga sug Yohanes Gogun Lusud Se Duhu en ouman dau Yesus men geicara ougbdebeij en se tu gesisugohob, kaba, en arougb men logodeh merug hosa naugb len ledeijidougwo en, anai en eija medocesa enaba. Dangga sug len ledebeij Yesusohob, kaba, len len Yohanes mer dou en, lendagai: 11:3 Ban eng ELOHIM os dou emen naugb ban beigdoc emen dau emen gogom augwan ingga, ginei? Era emen emeigtou naugb sud hom deitahabei? 11:4-5 Dangga Yesus arougb len, endagai: Yen yeihweda naugb yedecic dau areg yen youman dara yeiyohob gini, augwan asesa dou Yohanes. Anai yen yeiya, doba leng meriresmougb, kaba, merires esga naugb len leiya lo deitohob. Dara leng merohora agaim toua, len leisa lec merohora namcir. Dara leng garemos gogoufu et lenohob, kaba, len merus eingmos agauwesa ucugb deitohob. Dara leng merums etub toua, len merums esda naugb len louman lo asesohob toua. Dara leng lomom toua, len leisa merna agau deitohob. Dara leng merunggwereij, kaba, len toua louman Mer Geigouhw dau ELOHIM enohob. 11:6 Dara yen yesulou en, yendagai: Gareg en emeija mouwesa danero, doba en od mena debsa dan dedag Sud Hom Geigdoc Lusud Dau Meren Gogom Augwan, kaba, sud hom gin eng ELOHIM eic geigouhw dou en namcir. 11:7 Sug Yohanes men logodeh len lebiji naugb len lecicugb dau Yesusohob, kaba, en ebiji naugb en enara eisaugb Yohanes dou len leinyana, gedig len leigtou desij en ingga deit, endagai: Sug yen yeihweda se lomougwisa naugb yen yedeiya dougwo Yohanes sug nosa, kaba, yen youdesa yen yemdeiya sud hom gin edag sogo geiror naugb meijir dedemedei? Naro, yen yemeiya sud hom dag ginero. Doba yen yeiya sud hom edag sogo omom se cinogo namcirohob. 11:8 Era sug yen yen yeihweda gini, kaba, yen youdesa yen yemdeiya sud hom geg sansun mohw gesisiloei? Naro, yen yemeiya sud hom dag gin touwero. Doba yen yeiya sud hom geg sansun mohw ousirij dous. Anai leng leg sansun mohw gesisilo gin, kaba, len leigtou se mougt mera medam men tu geigouhw dous. 11:9 Sug yen yemeiya gin augwanero, kaba, yen yemdeiya dag garena? Yen yemdeiya sud hom gesai ELOHIM moroei? You, yen yeiya sud hom gesai ELOHIM moro gus laugwan namcir. Dara yen yemeiya sud hom gesai ELOHIM moro gin dousero. Doba yen yeiya sud hom en moho agas edreg dau sud hom gesai ELOHIM moro gin toua. 11:10 Anai sud hom, en moho ELOHIM, kaba, en enara eisaugb en dou en Meisi Mesias se Surad Injil Meb Mohon deb sug nosohob, endagai: Ban bouman deigeigouhw. Anai dan demesa sud hom gesai dan induro naugb en emeino ban abin. Dauntoba en esa lusud merdoc mes dag ucina bedouder naugb ban toues. 11:11 Dangga yen youman deigeigouhw. Dau lusud se cinogo gin augwan, kaba, sud hom ingma en moho emedreg dau Yohanes Gogun Lusud Se Duhu ginero. Doba en eng moho agas dau len laugwan namcir. Doba gareg en moho eb tainya namcir se ELOHIM men goiharaga gin, kaba, en moho agas edreg dau Yohanes gin toua. 11:12-13 Anai Musa dara leng lesai ELOHIM moro nosa, terimda edebeij Yohanes, kaba, len laugwan lens dau sug ELOHIM emoiharaga lusud ucugbs dou len deb sug nosohob. Dangga hang, dau lona sug Yohanes en ebiji naugb en esai ELOHIM moro dou lusud, terim iteitogini, kaba, lusud leinyana leic lasesem naugb sug ELOHIM oiharaga len toua. 11:14 Anai Yohanes gini, kaba, en men geicara dag Elias gedig yen meijemouwer nosa len log deb naugb yenohob dag lona daiyamo, kaba, en emagunyen debin yen deits. Yen meigdoc esgirahesa dan indir an gin naugb yen yaimoei? Era naroei? 11:15 Dangga hang, gareg dau yen en moms ai, kaba, en oc en moms deigeigouhw naugb areg dan den dou yen gin namcir. 11:16-17 Sug Yesus enara dag graga dou lenohob, kaba, en eic gainyenara hom dara ucan dou len deit, endagai: Meijen geicara, kaba, dan deic dainyen dag ara dou yena? Yen yedag logodeh gedig len lenara merir laisedim se us mougwa hom, lendagai: Emen emohw higbei naugb sug yainuhwera. Doba yen yemeinuhwerero. Dangga emen emeperwei naugb emen emeiyogoseser an gomom. Doba yen yemaimo emen naugb yemeb touwero. 11:18 Augwan gini aninim dag Yohanes. Anai sug en en aud yen sug nosa, kaba, en toua ehig dau ared. Dara en emeg anggur mohu touwero. Doba yen yowun en moho an gin namcir, endagai: Merna mog mog einesa en medoc mesohob, hang en emeicara dag gini. 11:19 Dangga toua, sug Lusud Meraguna Mebin dan den aud yen deit dan demehig dau ared dara anggur mohwero. Doba dan det ared, dara dan deg anggur mohu an yen terimda. Doba yen yowun dan indoho an gin toua, yendagai: Yen yeiya sud hom gini en menuhwa maga naugb en etara augwougb namcir. Dara en eg anggur mohu bed bomom. Dara en medoc aninim dara leng lacgeij lusud naugb len lohw cinogo dou leng Roma dara leng lebesesar ucugb toua terimda. Doba inggaida. Anai leng meru ouforoho dara leng meru auti aremeijouhw, kaba, len lemowun aman amoho an areg aman amesai dou len ginero. Doba len leigdoumesa aman amoho an gin terimda. 11:20-22 Sug Yesus owun lusud dag gragohob, kaba, en owun cinogo homoi moho debin gin deit. Anai en ens dau men ganusbus einyana dou lenohob. Doba len lemahau an dougwo meren sesarero. Hanoba en enara dou len, endagai: Ogom medam naugb yeng se cinogo Korasin dara yen se cinogo Bedsaida. Anai dan dens dau ganusbus einyana daos debin ELOHIM mer dou yenohob. Doba yen yemesga meijen sesar naugb yemahau an dougworo. Doba yen meigdoc agadgeij dougwo namcir. Dangga hang, se Lona Sug ELOHIM Ogod Aremer Aga Lusud, kaba, en medoc eineg an leng se cinogo Tirus dara Sidon gini edreg dau en medoc eineg an yen toua. Anai dan decinaga dau sug dan demdens ganusbus ingma dag gin dou len sug nosa, kaba, len merdoc emagadgeij dag yen ginero. Doba len merdoc eijesa an meren sesar namcir. Hanoba len leg sansun morgor, dara leiyoiyo se hirog debin gin lansins dag len merdoc obsara dau sesar touohob. Yen youman dan indir deigeigouhw, anai augwan gini asesa dag misenohob. 11:23 Dara yen se cinogo Kapernaum, yen yeigdoumesa yenin meijoho bedebeij se bogo danggei? Naro, ELOHIM owun yen meijoho naugb en erba yen se dum smougb dous. Anai dan decinaga dau sug dan demens ganusbus ingma dou leng se cinogo Sodom, aninim dag dan dedens dou yenohob, kaba, meren cinogo emediyebeiya an lenero. Doba inggeb an len terimda iteitoginaba, anai len merdoc eijesa an meren sesar namcirohob. 11:24 Dangga yen youman dan indir deigeigouhw. Se Lona Sug ELOHIM Ogod Aremer Aga Lusud laugwan, kaba, en medoc eineg an leng se Sodom gini edreg dau en medoc eineg an yen toua, naugb en eic gogom gurereito dou len. Doba yen, kaba, en emeic gogom medam dou yen namcir. 11:25-26 Sug Yesus owun len dag graga ouwohob, kaba, en ocuncum dou en Mena se bogo ucan deit, endagai: Akeinya, ban bedag mougt mera medam naugb areg geb se bogo dara areg geb se cinogo gin augwan toua. Dangga hang, dan demen sijo medam dou ban, anai ban becgoneh areg dan desai dou lusud augwan gini dau leng leigdoumesa lenin meroho dag len meru ouforoho. Dara ban becgoneh augwan gini dau leng leigdoumesa lenin meroho dag len lecinaga meijouhw augwan dau gomnomna len touohob. Doba ban abdoc esgirahesa naugb ban bens meijouhw dau areg dan desai graga augwan dou leng merdoc arjaga dag len leb merei augwougb len dous. Anai gini aimo asesa areg banin bouwan danggohob. 11:27 Sug Yesus ocuncum dou en Mena danggohob, kaba, en esulou enin men logodeh ucan gin deit endagai: Areg dan Indina en esinsin se bogo, dara cinogo, kaba, en ogugwo augwan namcir dou danohob. Dara sud hom ingma, kaba, en emecinaga areg asesa danin indoc mes augwan asesa touwero. Doba dan Indina enin dous eng ecinaga dau augwan gini asesa namcir. Dara sud hom ingma, kaba, en emecinaga areg asesa ELOHIM enin medoc mes augwan touwero. Doba en Meisi dara gareg dan dens dau areg asesa ELOHIM enin medoc mes dou enohob, kaba, emenin dous eng emecinaga dau augwan gini dag misen toua. 11:28 Dangga gareg dau yen men ara gogom ebdebin en, kaba, en emeigtou anlo. Doba en en an aud dan, dauntoba dan deigdoumesa dau en naugb en medoc esgiraha ucugb deit. Anai en mog omsiris an namcirohob. 11:29 Dara yen yemohoiya dan indir touwero. Doba yen yen aud dan naugb dens meijouhw augwan asesa dou yen toua. Anai dan demeic dan indug demeic yenero. Dara dan demeigdoumesa dan indoho agas deseino yen touwero. Doba dan dougarij dara dan indoc edouder an yen dous. Hang yen meigdoc momogo touwero, doba yen meigdoc esgiraha namcir. 11:30 Anai areg dan dens dou yen gin, kaba, emeic dag yen meijdemaga emembreij icirero. Doba eic dag yen meiju obgesa dedemeda. Dara areg dan darougb yen gin, kaba, emogom touwero. Doba eijouhw naugb sug yen yaimo namcir.

Matius 12

12:1 Sug Yesus enara dou men logodeh dag graga ouwa dou lenohob, kaba, en ec an len se ucina sug tramdad esa se ucina mebera dig nagama nagama. Doba Yesus men logodeh sireber len medam namcir. Dangga hang, len lemoi tramdad mera naugb len let. Doba lona sug len loi tramdad se gini, kaba, leng Yahudi meren Lona Gemeicaresero. 12:2 Dangga merug aibibra dau leng Parisi sug len leiya dau gini, kaba, len merir laised Yesus icira gin namcir, lendagai: Ban beiya aban logodeh. Anai meren geicara se Lona Gemeicarero gin, kaba, edreg dau maman gomnomnohob. 12:3-4 Doba Yesus aisan medagas dau Daud an men logodeh bauni dou len ucugb, endagai: Sug Daud en sireba sug nosa, kaba, en einesa ELOHIM Men Tuari Dau Hugbei. Hanoba en et roti gedig gembala gesa taij len louwaharo dou ELOHIM. Dara men lusud gedig len laicara en, kaba, len let toua. Hang len ledreg Musa men gomnomna gin namcirohob. Anai roti gin, kaba, naugb sug Daud an men logodeh len lemetero. Doba naugb gembala gesa taij lenin eng let dous. Yen yemecic dau meren geicara gini dag misenbumei? Naro, yen yecic dau augwan gini dag misenohob. 12:5 Dangga toua, astesda sug gembala gesa taij len leicara se ELOHIM Men Tuari se Lona Gemeicaresero, kaba, len ledreg maman gomnomna gin touohob. Doba maman gomnomna emowun len meroho dag len lebesesar touwero. Doba amsoho len an gin namcir. Yen yemecic dau gin touebmei? Naro, yen yecic dau augwan gini dag misen touohob. 12:6-8 Anai sug yen yecinaga dau areg ELOHIM en dougwo yen meijemouwer sug nosa meijouhw augwan asesa touohob, kaba, yen yemen dougwo indan logodeh an meren geicara gin touwero. Doba yen yamsoho len an gini toua terimda. Anai ELOHIM en dougwo len, endagai: Dan demouwan naugb yen yeic aremeta yauwaharo dou dan deitero. Doba dan douwan naugb yen meigdoc erij an lusud dous. Doba yen yemecinaga meijouhw dau gin dag misenbuma. Hang yen meigdoc emerij an indan logodeh gin touwero. Doba yen yowun len meroho an gin toua. Doba inggaida. Anai sud hom en moho edreg medam dau ELOHIM Men Tuari moho gin, kaba, en agunya debin yen. Anai Lusud Meraguna Mebin danin dedag mougt mera naugb Lona Gemeicaresero gin touohob. 12:9 Sug Yesus owun leng Parisi dag graga ouwohob, kaba, en ec dau sungga bedeinesa leng Yahudi meren tuari hom. 12:10 Doba se tuari mes ingga, kaba, sud hom gedig en mesira nagama omom en toua moongga desij len. Dangga leng Yahudi len leijidougwo Yesus dag lerba mohoisa en, lendagai: Eigouhw naugb sud hom en eic geigouhw dou lusud se Lona Gemeicaresero ginei? Era naroei? Len lerba mohoisa en dangga, dauntoba sug Yesus ousa len merir an gini, kaba, len lowun en moho icira gin namcir. 12:11 Sug Yesus ecinaga len merdoc mes an dangga, kaba, en eic bainyen dau meren domba dou len, endagai: Sug meijen domba obsaresa cinogo mes se Lona Gemeicaresero gin, kaba, yen yamsoho namcirdei? Naro, cum, yen yeigdoumesa meijen domba ingga dau cinogo mes se lona gin toua. 12:12 Doba lusud eng mera eisaugb edreg dau domba namcir. Dangga hang, sug dan demeic geigouhw dou lusud se lona gin, kaba, emedreg dau gomnomna gin touwero. Doba esogwa deisa gomnomna gin touohob. 12:13 Sug Yesus eic gainyenara dou len dag graga ouwohob, kaba, en enara dou sud hom mesira omom graga, endagai: Ban bou absira. Dangga sug en ou mesira aud Yesusohob, kaba, en mesira eigouhw namcir, aninim dag en mesira nagama toua. 12:14 Doba sug leng Parisi len leiya dau gin, kaba, len lagunya dau tuari. Hanoba len ledoucimdeb dou lenin naugb len lehilon ucina sug len leic gomom dou Yesus. 12:15 Doba sug Yesus ouman dau areg len lesedeb se merdoc mes naugb enohob, kaba, en asid enin dau len naugb en eihwedig cinogo gus deit. Doba lusud leinyana gougwa, kaba, len toua loucan en dig cinogo ingga. Dangga gareg dau leng loucan en gini areber, kaba, en eic geigouhw dou len laugwan toua. 12:16-17 Doba sug en eic geigouhw dou lenohob, kaba, en en dougwo len namcir endagai: Yen yemecic dan indoho an gini bemagaha dou lusud laugwan lemecinaga touwero. En esulou len dougwo dangga, dauntoba esogwesa areg ELOHIM ens dou sud hom gesai en moro nosa, en moho Yesaya, eisaugb en deb sug nosohob, endagai: 12:18 Yen yauweila sud hom gini deigeigouhw namcir, anai danin eng deigdoumesa en moho dag indan sogougb, dauntoba en eicara naugb dani. Dan indoc gororougb eni. Dara dan dagahugouhw an en toua namcir. Dara dan demesa Mena Gogoufu dou en toua naugb en emesai dan induro dou leng Yahudi dara dou lugmahara laugwan toua. Dauntoba len lecinaga areg dan dogod deinaugb lenohob augwan asesa. 12:19 Dara en emenara ucucugb an len sug en esai dan induro dou lenero. Dara en emesa mer debin len. Dara sug en ec, kaba, en mer emahaba asa ucina touwero. 12:20 Dara en emeised len dag hu hom se moufero. Dara en emob leng ledag hiraga mouf se len merufu touwero. Doba en esedougwo len terimda lusud laugwan laimo areg ELOHIM ogod deinaugb lenohob augwan asesa touohob. 12:21 Dangga hang, lugmahara len toua lemotogoto en touwero. Doba len laugwan lod merna debsa en namcir. 12:22 Sug Yesus eic geigouhw dou leng gragohob, kaba, lusud lahwan sud hom merna mog mog ogod en mairesmougb dara eic dag en osum dou Yesus naugb en eic geigouhw dou en. Dangga sug Yesus eic geigouhw dou enohob, kaba, en enara, dara en eiya lo asesa ucugb deit. 12:23 Sug lusud leinyana len leiya dau gini, kaba, len leimiman dau Yesus namcir. Hanoba len leija meruwesa en ucucugb, lendagai: Sud hom gini Daud medebeito gen en aud maman naugb eigdoc maman dau maman gogom augwan ingginei? 12:24 Doba sug leng Parisi len louman lusud leija meruwesa Yesus dag gini, kaba, len letaha len merir an, lendagai: Sud hom gin, kaba, merna mog mog meren mougt mera medam, moho Belsebul, eic goubesa dou en naugb ginohob. Hang en emocirma len dau lusud toua. 12:25 Doba Yesus en ecinaga dau areg len lauwam an inggohob. Dangga hang, en emenara baised len merir ucugb, endagai: Sug lusud lebemocedoum astesda se mougt mera gouji meren hancob, kaba, cum, meren hancob augwan dag losnesebesero namcir. Dara astesda cinogo sug meren lusud lebemocedoum, kaba, cum, len lougb laisoboro dau cinogo ingga toua. Dara astesda lusud se tu hom sug len lenara doum, kaba, cum, len lagag meren tu daum toua. 12:26 Dangga sug Setan en ocirma enin men logodeh dau lusud merdoc mes, kaba, gini aninim dag en ebemoc dou enin men logodeh gin touohob. Hang enin men goubesa emedeinyum naugb eninei? Naro, enin men goubesa emedeinyum naugb eninero. Anai men logodeh laugwan lougbdedau enohob. 12:27 Yen yowun dan indoho dag dan docirma Setan men logodeh dau lusud merdoc mes ogdoc men goubesa gin dous. Doba sug dan docirma merna mog mog dau lusud ogdoc Belsebul men goubesa dag gin, kaba, dagiro eisaugb yenin meijen lusud gina? Len toua locirma merna mog mog dau lusud ogdoc Belsebul men goubesa ginei? Hang len lenin lemowun yen meijoho dag areg yen yenara eisaugb danohob. Doba augwan gini dag yen yauwam an didi namcirohob. Anai len lecinaga dag len lemocirma merna mog mog dau lusud emogdoc Belsebul men goubesa ginero. Doba ogdoc ELOHIM enin men goubesa gin dous. Dangga hang, sug len locirma merna mog mog dau lusud ogdoc ELOHIM men goubesa gin, kaba, gini ansins dag dan docirma merna mog mog gini dau lusud ogdoc men goubesa gin touohob. 12:28 Doba sug dan democirma merna mog mog emogdoc Belsebul men goubesa ginero. Doba ogdoc Mena Gogoufu men goubesa gin dous, kaba, gini ansins dag men lona naugb sug en oiharaga lusud ucugb edebeij yen touohob. Anai Mena Gogoufu gini en en dau ELOHIM ginohob. 12:29 Dara gini ansins dou yen dag dan dohud Bilis mesira dau yen touohob. Anai yen yemeinesa sud hom mobisamougb men tu naugb yedeida men aremougb augwougb touwero. Doba yen yohud en mesira nosahabi, yen yemeinesa men dimei mes naugb yen yemedeida men aremougb dau tu mes ingga toua. 12:30 Dangga gareg dau yen en medoc aninim dara dan naugb aman amemesma aremougb geb se tu mes inggaro, kaba, en edag indan mocohob. Dara gareg dau yen en emousa dan naugb aman amamouci areg geb se dimei mes debinimero, kaba, gini aninim dag en amsoho aremougb naugb en aisoboro dous. 12:31 Dangga yen youman dan indir deigeigouhw. Gareg dau yen en ebesesar einyana dara en eic ELOHIM moho bacecim, kaba, augwan gini emedreg dau sug ELOHIM aigdougwo men sesar ginero. Doba gareg dau yen en esmesman Mena Gogoufu dag men geicara aninim dag Belsebul men geicara gin, kaba, men sesar hom gini edreg dau sug ELOHIM aigdougwohob. 12:32 Era gareg dau yen en esmesman Lusud Meraguna Mebin dan, kaba, emedreg dau sug ELOHIM aigdougwo men sesar ingga dou en touwero. Doba gareg en esmesman Mena Gogoufu dag men geicara aninim dag Belsebul men geicara, kaba, men sesar gini edreg dau sug ELOHIM aigdougwohob. Dara beb huhugb naugb en namcir toua. 12:33 Sug Yesus auni dou leng Parisi eisaugb dau areg len lowun en an dag graga dauwohob, kaba, en owun len dag merug mog ucan dou len deit. Hanoba en enara dou len, endagai: Sug sogo era mera geigouhw, kaba, esloulougb dag sogo maga toua eigouhw. Anai sug sogo maga ecgu, kaba, mera toua ecgu. Dangga lusud lecinaga sogo maga geigouhw era gecgu, kaba, len leiya dau men mera dous. 12:34 Dangga toua, areg geb se sud hom medoc mes, kaba, gin dous eng agunya dau en mers deseino lusud. Hang areg agunya dau yeng Parisi meijirs, kaba, emeigouhw touwero, doba ecgu namcir. Anai yen meigdoc mog mog aninim dag hinogo teiteiyohob. 12:35 Dangga sug sud hom en medoc atij an areg gedag beim, kaba, men geicara augwan edag beim toua. Doba sug sud hom medoc atij an mog mog, kaba, men geicara augwan toua dag mog mog namcir. 12:36 Hang yen yauwam an areg yen yen nosahabi. Dauntoba yen yemenara areg gecgu agunya dau yen meijirs dou lusud dedemedero. Anai se Lona Sug ELOHIM Ogod Aremer Aga Lusud, kaba, sud hom yom enin emecic dau areg en en moho hom yom aududi dou ELOHIM ucugb deits. Dara en aimo areg agunya dau sud hom en mers gini naugb en ogod aremer aga en toua. 12:37 Dangga gareg en ens dau areg dag geigouhwohob, kaba, ELOHIM ogod aremer geigouhw naugb eni. Doba gareg en ecic dau gecgu, kaba, ELOHIM ogod aremer gogom ogdoc gin dou yen toua. 12:38 Sug Yesus owun leng Parisi an meren geicara dag gragohob, kaba, merug aibibra dau leng meru ouforoho se Musa men gomnomna, dara merug aibibra dau leng Parisi, kaba, len lacgeij Yesus deit, lendagai: Adehsud, emen emouwan ban bens ganusbus ingma dou emenahabi. 12:39 Doba Yesus en etaha len merir an gini, endagai: Yen youwan dan dens ganusbus dou yen, doba augwougb dous. Anai meijen geicara dag mog mog terimda. Dara yen meigdoc esges ELOHIM deb terimda, aninim dag gida en medoc esges mesuwa toua deb dous. Dangga hang, dan demens ganusbus dou yen touwero. Doba dan dens dau ELOHIM men geicara dag ganusbus dou Yunus sug nosa dou yen. Anai en, kaba, en edag sud hom gedig en esai ELOHIM en moro sug nosohob. 12:40 Anai sug Yunus en eigtou se hosei menuhwa mes se lona homoi dara loba homoiyohob, kaba, ELOHIM eigdoumesa en ucugb. Dangga Lusud Meraguna Mebin dan toua demeigtou se cinogo mei se lona homoi dara loba homoiyohob, kaba, ELOHIM emeigdoumesa dan demeisa ucugb aninim dag en toues. 12:41 Sug Yesus etaha len merir dag gragohob, kaba, en owun len meroho ucan deit, anai en ebedbed dou lenohob. Doba len lemahau an dougwo meren sesarero. Hanoba en enara dou len, endagai: Yen youman deigeigouhw. Se Lona Sug ELOHIM Ogod Aremer Aga Lusud Laugwan, kaba, leng dau cinogo Niniwe len lesa desij yen naugb len lehin meriresa yen namcir. Anai sug Yunus en esai ELOHIM moro dou len sug nosa, kaba, len lemeic merusero. Doba len lesga meren sesar dara len lahau an dougwo namcir. Doba areg dan desai dou yen gin, kaba, mera eisaugb namcir dau areg Yunus en esai dou leng se Niniwe sug nosohob. Doba yen yemesga meijen sesar dara yen yamahau an dougwo touwero. Doba yen yaiyan meigdocesem terimda. Hang len lemehin meriresa yen se lona ingga toues. Yen youman dan indir an areg dan den dou yen gin deigeigouhw. Anai augwan gini asesa dag misen namcir. 12:42 Dauwohob, kaba, Yesus owun len meroho mougwa hom ucan deit. Anai en mou ouforoho naugb en edidib aremeijouhw asesa dou len. Doba len merdoc esbes en namcir. Hanoba en enara dou len, endagai: Yen youman deigeigouhw. Se Lona Sug ELOHIM Ogod Aremer Aga Lusud laugwan, kaba, gida mougt mera gouji hom dau cinogo Sebe en esa desij yen naugb en ehin meresa yen toua. Anai sug en ouman dau Solaiman en mou ouforoho naugb en edidib aremeijouhw augwan asesa dou lusud, kaba, en medoc emesbesero. Doba en en dau aigusi naugb en ouman en mer. Doba areg dan desai dou yen gin, kaba, mera eisaugb namcir dau areg Solaiman en edidib dou lusud sug nosohob. Doba yen yemen aud dan naugb yen youman dau areg dan desai dou yen ginero. Hang en emehin meresa yen se Lona ingga toues. 12:43 Sug Yesus owun len meroho dag gragohob, kaba, en esulou len dag len lemebin en mer se len merdoc mesero, kaba, cum, meren geicara ecgu edreg dau nosa deit. Hang en emens meijouhw dau mena mog mog dag gin dou len, endagai: Sug mena mog mog hom en agunya dau sud hom medoc mesohob, kaba, en ohw acec miseda mougb, dauntoba en ehilon usi naugb sug en atousa. 12:44 Doba sug en emesma ingmaro, kaba, en enara dou enin se en medoc mes, endagai: Dan decicugb se indan tu mohon, gedig dan den dau graga ucugb deit. Dangga sug en ecicugwohob, kaba, en eiya tu mohon. Doba sud hom men tu ingga, kaba, ecabeci deb namcir. Dara len led aremougb augwan debinim toua dauwohob. Doba en emeiya lusud ingma emeigtousebma. 12:45 Hang en emedehilon mesir merug senggai gedig len merug mog edreg dau en namcir naugb len laugwan leinesa leigtou se sud hom men tu gin deit. Dangga hang, sud hom gini men geicara ecgu edreg medam dau nosa deit. Gini aninim dag yen iteitogin toua. Anai yen meigdoc ematij an dan indirero, doba mes mogud namcir. Hang cum, kaba, meijen geicara gecgu edreg medam dau nosa deit toua. 12:46 Sug Yesus enara dou lusud leinyana dag gragaba, kaba, en mem, dara magtor, dara medemeitor len len, kaba, lesa dig medigo. Hanoba len larougb lusud leden dou Yesus dag len louwan lenara dou en. 12:47 Dangga sud hom dau len leinyana ingga, kaba, en enara, endagai: Ban bideiya ban abim, dara ban abagtor, dara ban abdemeitor len merugwengga dig medigo. Anai len louwan lenara dou ban. 12:48 Doba Yesus auni ucugb dou en, endagai: Dan dens dau dan indim, dara dan indagtor, dara dan indameitor misen dou banahabi. 12:49 Sug Yesus auni ucugb dou en danggohob, kaba, en ens men logodeh dou en, endagai: Len gin eng dag dan indim, dara dan indagtor, dara indan indameitor misen. 12:50 Anai gareg en eicara baimo areg asesa dan indina se bogo enin medoc mes, kaba, en eng dag dan indagto, dara dan indameito, dara dan indim misen en namcir.

Matius 13

13:1 Sug Yesus enara dou len dag graga ouwohob, kaba, en agunya dau tu naugb en eihwedig Tiberias mebera. Sug en edebeij Tiberias mebera ginohob, kaba, en eigtou naugb sug en ens dau sug ELOHIM oiharaga lusud ucugb meijouhw asesa dou len deit. 13:2 Doba lusud leinyana gougwa louwa debin en namcir. Dangga hang, en emeisaugb ij naugb en eigtou sungga. Doba len leinyana graga, kaba, len lesa se lonog dig Tiberias mebera dous. 13:3 Sug en eisaugb ijohob, kaba, en ens ara ara einyana dag gainyenara dou len. Dauwohob, kaba, en emeic gainyenara hom dag gini dou len toua, endagai: Yen youman dau sud hom sug en eihwedaud men lo, kaba, en eic meij bargehilo dous. 13:4 Doba sug en eic meij bargehilo gini, kaba, meij igbum obsara se ucina mebera. Dangga ba lohwin naugb let meij gin bouwa namcir. 13:5-6 Doba meij igbum, kaba, obsara se cinogo geb se igdahab moc taiba dous. Dangga hang, meij gini eij dedemeda namcir, anai cinogo gurereito dous. Doba sug igdes ohu desrougb, kaba, ogod mec ingga bagac dedemeda ucugb, anai igdahabi ebdougwodaha. Hang men mom emeinesa cinogo touwero. 13:7 Dara meij igbum deit, kaba, obsara se ara mog mog meda. Dangga sug ara mog mog eijohob, kaba, eic baiyan dougwo mec gini bedehibera namcir. Hang en emera mera hom touwero. 13:8 Doba meij igbum, kaba, obsara se cinogo mog geigouhw. Dangga sug meij eiji dara orbesbes namcirohob, kaba, en era mera einyana toua. Maga hom, kaba, men mera edebeij huntun hom. Maga hom deit, kaba, men mera edebeij mos senggem. Dara maga hom deit, kaba, men mera edebeij mos homoi toua. 13:9 Sug Yesus eic gainyenara gin dou len bouwohob, kaba, en esulou len debin gin dou len deit, endagai: Gareg dau yen en moms ai, kaba, en ouman areg dan den dou en gin deigeigouhw namcir. 13:10 Sug Yesus eic gainyenara dag gragohob, kaba, men logodeh len len aud en naugb leijidougwo en, lendagai: Dagiro hang, ban bens meijouhw dag bainyenara dou lusud leinyana gina? Anai augwan gini eic dag len lemecinaga meijouhw asesero. 13:11 Doba Yesus enara bauni dou len, endagai: Yen, kaba, ELOHIM eigdoumesa yen meijoho naugb en ens dau sug en oiharaga lusud ucugb men meijouhw augwan asesa dou yen. Doba len gus, kaba, en ecgoneh augwan dau len terimda. 13:12-13 Anai len gin, kaba, len leiya dau indan geicara dag ganusbus ginohob. Doba len lemouwan lemeiya augwan asesero. Dara len louman dau sug dan desai ELOHIM mer dou len touohob. Doba len lemouman naugb len lecinaga meijouhw augwan asesa touwero. Hang dan demens augwan gini se gainyenara dou len dous. Dangga sug sud hom graga en ecinaga meijouhw gurereitohob. Hanoba en eic mouwemougb esesa naugb en ecinaga deit, kaba, ELOHIM eic men mou ouforoho bauloulo dou en naugb en ecinaga meijouhw einyana dau gin deit. Doba gareg en emeic mouwemougb esesa naugb en ecinaga meijouhw augwan ginero, kaba, ELOHIM edug areg en ecinaga ginohob augwan dau en toua. 13:14-15 Dangga hang, meren geicara augwan esogwa deisa dau sug ELOHIM ehin meresa leng Israel ogdoc sud hom gesai en moro, moho Yesaya, sug nosohob. Anai en enara dou len, endagai: Dan desa indan logodeh aud yen naugb len lesai dan induro dou yen ucucugb terimda. Dara yen yeiya dau sug dan daben ganusbus einyana debin gin ucucugb terimda toua. Doba dan deic naugb yen yemecinaga meijouhw dau areg len lesai dou yen, dara dan deic naugb yen meiju emobgesa areg yen yeiya gin touwero, dauntoba yen yemen aud dan deitero. Anai sug yen yecinaga areg graga meijouhw augwan asesa, kaba, yen yesga meijen sesar augwan asesa dou dan. Hanoba dan demaigdougwo meijen sesar augwan ediyebeiya dau yen toues, doba dan demouwan ginero. Anai yen yesedeh naugb yen yoc dou meijums dougwo areg indan logodeh len lesai dou yen. Dara yen yogod se yen meigdoc mes naugb yen yemeiya dau indan geicara dag ganusbus gin touohob. Hang yen meiju ouforoho toua deitero, doba yen meigdoc oungmerema dougwo dan indir namcirohob. 13:16 Sug Yesus ens meijouhw dau areg len leijidougwo en an graga dou men logodeh ouwohob, kaba, en eigdoumesa len meroho, endagai: Doba yen, kaba, yen yemocuncum meijiresi dougwo indan geicara dag ganusbus ginero. Doba yen meigdoc erleij naugb yen yauweila dara geigouhw. Dara yen yemoc dou meijums dougwo areg dan desai dou yen dau sug ELOHIM oiharaga lusud ucugb gin touwero. Doba yen yei meijums naugb yen youman deigeigouhw namcir. Dangga hang, ELOHIM eic geigouhw dou yen edreg dau lusud laugwan toua. 13:17 Anai leng lesai ELOHIM moro nosa dara men logodeh leinyana len lebehibeh naugb len leiya areg yen yeiya iteitogini. Doba len lemeiya dau augwan ginero. Dara len lebehibeh naugb len louman dau areg dan desai dou yen toua. Doba len lemouman dau augwan gin touwero. 13:18 Sug Yesus eigdoumesa men logodeh len meroho dag graga dauwohob, kaba, en enara dou len, endagai: Yen yei meijums deigeigouhw, dauntoba yen yecinaga meijouhw dau sud hom geic meij bargehilo asesa toua. 13:19 Meij gobsara se ucina, kaba, aninim dag lusud sug len louman dau ELOHIM mer dag en ouwan oiharaga len ucugb, kaba, len lemouwan naugb lemecinaga meijouhw ginero. Dangga hang, Sud Hom Mobgos Maha en en naugb en esma mer augwan gini dau len merdoc mes, anai eni mog mog namcir. 13:20 Dara meij gobsara se cinogo geb se igdahab moc taiba, kaba, aninim dag lusud sug len louman dau ELOHIM mer an areg graga inegohob, kaba, len lebin en mer gini se len merdoc mes dara lagahugouhw an namcir. 13:21 Doba mer emeinesa emaga len merdoc mesero. Dangga hang, sug lusud leic gogom dara mog erij dou len icira ELOHIM en mer gin, kaba, len lemes emagadgeij terimdero. Doba len lobsara naugb len merdoc emebdebin an en mer gin deitero. 13:22 Dara meij gobsara se ara mog mog, kaba, aninim dag lusud sug len louman dau ELOHIM dag en ouwan oiharaga len ucugb, kaba, len lecinaga meijouhw asesohob. Hang len lebin en mer gini se len merdoc mes namcir toua. Doba cum, kaba, ara mog mog gin aiyan ELOHIM mer augwan dau len merdoc mes deit. Anai len lemarges dau sug len merdoc ebdebin an areg geb se cinogo ginero. Doba sug len merdoc eijesa icira areg len let, dara areg len lohw gin terimda, kaba, len merdoc etrij naugb sug len merisoho mougb toua namcir. Hang ELOHIM mer emera mera se len merdoc mes touwero. Doba len ledag maga mogud dous. 13:23 Doba meij gobsara se cinogo mog, kaba, aninim dag lusud sug len louman dau ELOHIM mer an areg graga, kaba, len lemebin en mer gini se len merdoc mes dousero. Doba sug len lecinaga meijouhw augwan asesohob, kaba, len laimo terimda. Hang ligbum, kaba, len lera mera edebeij huntun hom. Lingma deit, kaba, len lera mera edebeij mos senggem. Dara ligbum, kaba, len lera mera edebeij mos homoi gin toua. 13:24 Sug Yesus ens meijouhw dau sud hom geic meij bargehilo dou men logodeh ouwohob, kaba, en eic gainyenara hom ucan dou len deit. Hanoba en enara dou len, endagai: Edebeij lona sug ELOHIM en oiharaga lusud ucugb, kaba, aninim dag sud hom os meij geigouhw bargehilo se men lo. 13:25 Doba se loba, kaba, sud hom gos meij geigouhw bargehilo graga men moc en en naugb en os men meij gareibahau bargehilo debin meij misen gin toua. Anai mougt mera geba meij misen graga dara men logodeh laugwan latou dauwohob. Dangga hang, sug men moc os men meij gareibahau bargehilohob, kaba, en eihwededau namcir. 13:26 Dangga meij geigouhw dara meij gareibahau hwas eiji terimda sug mera ebsohob, kaba, len leiya. Doba meij gareibahau eiji aihirir meij misen gin touohob. 13:27 Dangga hang mougt mera graga men logodeh len len aud en naugb leijidougwo eni, lendagai: Adehsud, dagiro emen emeiya mec gareibahau eiji aihirir meij geigouhw ingga? Mec gin daugiro? Anai emen emecinaga dau sug ban bos meij bargehilo sug nosa, kaba, ban bos meij geigouhw eng mogud bargehilo dous. 13:28 Doba meren mougt en auni len merir ucugb, endagai: Indan moc eng en erba meij gareibahau debin tramdad ingga. Dangga hang, men sogougwir leijidougwo en ucugb deit, lendagai: Ban bouwan, kaba, emen emohoma mec gareibahau gin daudei? 13:29 Doba meren mougt mera en dougwo len, endagai: Yen yemohomero. Doba yen yamsoho hwas eb dangga dous, terim bedebeij sug ohoserahabi. Anai sug yen yohoma, kaba, yen yohoma an tramdad toua. 13:30 Dangga edebeij lona sug leng meru ouforoho naugb len leic meij deb len leicara laimo dag gin, kaba, dan demen dou len naugb len lemogod maga gareibahau augwan debinim. Hanoba len lemohud augwan darem naugb len lemec se smougwes. Doba tramdad misen, kaba, dan demen dou len naugb len lemouci meij gin augwan debinim naugb len lemobdeb se indan mougwa mes. 13:31 Sug Yesus eic gainyenara dou lusud dag graga ouwa dou lenohob, kaba, en eic gainyenara hom dara dou len deit, endagai: Edebeij lona sug ELOHIM oiharaga lusud ucugb deit, kaba, aninim dag sud hom geba sawi meij mogo hom se men lo. 13:32 Mogo gini mogurei namcir edreg dau aremeij gus augwan. Doba sug eiji, kaba, agas medam bedreg dau areg gedig lusud leba meij augwan namcir. Dangga sug eiji edag magohob, kaba, ehimon naugb ba len len dauntoba len loho mererumesa se men mesira augwan toua. 13:33 Sug Yesus eic gainyenara dou len dag graga ouwa dou lenohob, kaba, en eic gainyenara hom dara debin dou len deit, endagai: Edebeij lona sug ELOHIM oiharaga lusud ucugb deit, kaba, aninim dag gida hom sug en eic areg mogo mogurei hom, moho ragi, naugb baihiriri roti mor geb se bleg homoi. Dangga mogo gini mogurereito dous. Doba men goubesa edeinyum naugb ohu mougwesa roti mor augwan berisa medam namcir. 13:34 Dangga areg Yesus en ens dou lusud dau sug ELOHIM oiharaga len ucugb gini, kaba, en emenara moho dou lenero. Doba en ens augwan gini ogdoc gainyenara mogud dou len dous. 13:35 En eicara dag gini dauntoba en esogwa deisa areg sud hom gesai ELOHIM moro nosa en erba ugwaremer an dou men lusud sug nosohob, endagai: Dan demens dau aremeijouhw augwan se gainyenara dou yen. Dara areg ELOHIM en ecgoneh dau lusud dau sug en ahasesei cinogo ginohob, kaba, dan demedidib meijouhw augwan gini asesa dou yen toues. 13:36 Sug Yesus eic gainyenara einyana dou len leinyana gragohob, kaba, en en dau ing mes aud sud hom se men tu dau len deit. Sug en einesa dimei mesohob, kaba, men logodeh len len aud en naugb lacgeij dau eni, lendagai: Ban bens dau mec gareibahau, dara tramdad mec gesa se lo graga meijouhw asesa dou emenahabi. 13:37 Dangga Yesus ens meijouhw dou len, endagai: Sud hom gos meij geigouhw bargehilo se lo gini, kaba, Lusud Meraguna Mebin danin. 13:38 Dara lo, kaba, dag lusud se cinogo gin augwan. Dara tramdad mec, kaba, dag lusud gedig ELOHIM en esedeb naugb en oiharaga len ucugb deits. Doba mec gareibahau, kaba, dag lusud gedig sud hom, moho Mobgos Maha, en oiharaga lenohob. 13:39 Dara moc geba meij gareibahau gaihirir meij misen graga, kaba, eni Bilis. Dara lona sug len leic meij deb, kaba, gini aninim dag Lona Sug ELOHIM Ogod Aremer Aga Lusud Laugwan. Dara leng leic meij deb, kaba, dag ELOHIM men malaikadir laugwan toua. 13:40-41 Dangga edebeij Lona Sug Ouwedoc, kaba, Lusud Meraguna Mebin dan darougb indan malaikadir naugb len louci leng ledag sogo maga dougwo len gus debinim dau ELOHIM men goiharaga augwan. Anai leinyana dau len, kaba, lobsara se sesar ogdoc len. Dara len louci leng merug mog len laugwan debinim touohob. 13:42 Hanoba len lerba len se smougb gouji namcir. Aninim dag lusud louci lougb meh magaci augwan debinim naugb lec se smougb toua. Sungga, kaba, len leiyogoseser dara leg merugta terimda. 13:43 Doba len gedig laimo areg asesa ELOHIM enin medoc mes namcir, kaba, ELOHIM men gogouf cucugb erbacec len laugwan se men goiharaga gini. Aninim dag igda mouf geinyedei lusud laugwan toua. Anai en edag len Merna misenohob. Dangga gareg dau yen en moms ai, kaba, en ouman dan indir an areg dan den dou en gini deigeigouhw namcir. 13:44 Sug Yesus ens meijouhw dou men logodeh dag graga ouwohob, kaba, en eic gainyenara homoi ucan dara dou len deit, endagai: Edebeij lona sug ELOHIM oiharaga lusud ucugb deit, kaba, aninim dag sud hom gesma aremougb mera eisaugb gedig sud hom gus ecgoneh se men lo deb nosohob. Dangga sug en eiyohob, kaba, en ebir cinogo debin ucugb. Hanoba en eihweda naugb en edohw men aremougb augwan, dauntoba en edauma cinogo graga dau sud hom men longga deit. Anai en medoc etrij icira en an aremougb mera eisaugb ingga namcir. 13:45 Dara lona sug ELOHIM oiharaga lusud ucugb gin, kaba, toua aninim dag sud hom gedig en ehilon sariou mogo gecabeci aibibra naugb en ouma. 13:46 Dangga sug en edebeij sud hom gohw men sariou mogo gedig mera eisaugb namcirohob, kaba, en eihweda naugb en edohw men aremougb augwan. Dauntoba en edauma sariou mogo gedig mera eisaugb gin toua. 13:47 Dara lona sug ELOHIM oiharaga lusud ucugb gin, kaba, toua aninim dag lusud lerba diara debin hosei se dum mohu. Dangga sug len lerba debinohob, kaba, hosei aingma aingma augwan eb se diara mes ingga toua. 13:48 Doba sug len lesera diara an hosei augwan dig lonogohob, kaba, len lemouci hosei misen augwan debinim se aigdaga mes hom. Doba hosei gedig len lemetero, kaba, len lerba ucugb se dum mohweda. 13:49 Gini toua, aninim dag malaikad meren geicara se Lona Sug ELOHIM Ogod Aremer Aga Lusud. Anai se Lona ingga, kaba, len len naugb len lekeba leng merug mog dau lusud gedig len laimo areg asesa ELOHIM enin medoc mesohob. 13:50 Hanoba len lerba leng merug mog gini se smougb gouji namcir. Sungga, kaba, len leiyogoseser dara len leg merugta terimda. 13:51 Sug Yesus eic gainyenara augwan graga ouwa dou men logodehohob, kaba, en eijidougwo len ucan deit, endagai: Yen yecinaga meijouhw dau areg graga augwan asesohobei? Hang len lousa en mer, lendagai: Emen emecinaga meijouhw augwan asesohob. 13:52 Dangga Yesus enara ucugb dou len, endagai: Sug yen meiju ouforoho naugb yen yecinaga dau sug ELOHIM oiharaga lusud ucugb meijouhw augwan asesa dag misen, hanoba yen yaimo touohob, kaba, yen yemecgoneh gini dau lusud touwero. Doba yen yesai dau areg lusud log deb se Surad Injil Meb Mohon eisaugb ELOHIM men goiharaga gini. Dara areg dan desai dag menau dau gin dou yen touohob, kaba, augwan dou len namcir. Aninim dag sud hom mesoho mougb sug areg mera eisaugb dau mohon dara menau eb se en men tuohob, kaba, en emecgoneh dau lusud touwero. Doba en odo dau men tu, hanoba en ens ainyes dou lusud laugwan toua. 13:53 Sug Yesus ecicara eisaugb gainyenara augwan graga dou men logodeh bouwohob, kaba, en eihwededau cinogo Kapernaum ingga dig men gun Nasared deit. 13:54 Sug en edebeij sunggohob, kaba, en ens aremeijouhw dau ELOHIM mer augwan asesa dou men lusud se meren tuari. Doba leng louman dau areg en ebedbed dou len gin, kaba, len leimiman dau gin namcir. Hanoba len leijidougwom ucucugb, lendagai: Gareg en eic mou ouforoho dou sud hom gini naugb en ens aremeijouhw asesa dou maman gina? Dara gareg eic goubesa dou en, hang en emens men ganusbus einyana dou maman toua? 13:55 Anai en mena, kaba, mou ouforoho naugb en aga sogomehir naugb ohud tu dous. Dara en mem Mariam, dara en magtor merug hogu, dag Yakobus, dara Yusub, dara Simon, dara Yudas. 13:56 Dara en medemeitor len laugwan len merugwengga desij maman gin toua. Dangga hang, len lemeija meruwesa endag gareg en eic mou gouforoho dara goubesa naugb areg graga dou en gina? 13:57 Sug len leija meruwesa dag ginohob, kaba, len merdoc aihagab en an areg en ens dou len ingga toua. Dangga Yesus enara bauni len merir, endagai: Sug sud hom gesai ELOHIM moro en eihweda se cinogo gus gus, kaba, len leigdoumesa en moho an namcir. Doba sug en esai ELOHIM moro se gun, dara se men tu, kaba, len lemeigdoumesa en moho anero. Doba len lowun en moho dous. 13:58 Hang en emens dau men ganusbus einyana dou len sungga toua deitero. Anai len merdoc emebdebin an en dag sud hom gemesai ELOHIM moro misenero.

Matius 14

14:1 Sug Yesus esai ELOHIM moro dou lusud, dara eic ganusbus dou len, kaba, leng Galilea meren mougt mera medam, moho Herodes, en ouman dau sug men lusud lagaha merir an men geicara gin augwan dou en toua. 14:2 Dangga hang, en emen dou men meijouhugwer gedig len ledeijan en, endagai: Indeic, sud hom gini, kaba, en Yohanes gogun lusud se duhu sug nosa gedig dan deic gomom dou enohob. Doba iteitogini, kaba, ELOHIM eigdoumesa en dau gomom ucugwohob. Hang en emeic goubesa dou en naugb en emaben ganusbus ucugb deit gini. 14:3-5 Herodes enara dag gini dou men logodeh, anai sug nosa, kaba, en eihwa en maguna Pilipus mesouwa, moho Herodias, dau enohob. Dangga Yohanes Gogun Lusud Se Duhu edebeij en naugb owun en moho ucucugb icira men geicara gini, endagai: Emeigouhw naugb ban beic Herodias ginero. Anai ban bedis dau ELOHIM men gomnomna namcirohob. Sug Herodes ouman gini, kaba, en emarougb men sadodor naugb len ledagaigeij Yohanes. Dara len lohud en mesira toua. Hanoba len lemouf en se tu gesisug. Dara en ehilon ucina naugb eic gomom dou en toua, doba en ahau dau lusud leinyana. Anai len gin, kaba, len leigdoumesa Yohanes en moho dag en esai ELOHIM moro misen dou lenohob. 14:6 Doba se lona hom, kaba, Herodes ougwan ared debin enin men lona sug mem ouwadan ensa. Dangga sug len letara, kaba, Herodias mehida en eihwa deseino len laugwan. 14:7 Sug en eihwa dag gin, kaba, Herodes medoc agahugouhw an en namcir. Hanoba en os dou en, endagai: Sug ban bacgeij ara ara dau dan, kaba, dan demeic areg ban bacgeij dau dan ingga asesa dou bans. Sug en os danggohob, kaba, en ouwara debin gin dou en toua. 14:8 Dangga Herodias mehida enara ucugb dou Herodes, endagai: Ban ben dou aban sadodor, len lougb Yohanes Gogun Lusud Se Duhu en mougt naugb len lob desa igdebirahabi, len lemodo an dou dan sug dan deigtou gin toua. En en dag gin dou en, anai en aimo dau areg en mem en dou en danggohob. 14:9 Sug Herodes ouman dau gin, kaba, en medoc eijesan areg en os dou en. Doba en ouwara debin gin dou enohob. Dara men lusud gedig len letara desij en, kaba, len louman en mer an gin touohob. Dangga hang, en emarougb men sadodor hom naugb en aimo debin areg gidob ingga acgeij dau enohob. 14:10 Hanoba en arougb en dig tu gesisug naugb en edougb Yohanes en mougt dau toua. 14:11 Dangga sug en edougwohob, kaba, en odo igdebir an naugb edeic dou gidob ingga. Sug en eic igdebir dou gidob ginohob, kaba, en odo igdebir an dou mem deit toua. 14:12 Danggohob, kaba, Yohanes men logodeh, len len naugb len ledeic en maga naugb ledec en. Sug len lec dauwohob, kaba, len leihweda naugb ledecic dou Yesus en toua. 14:13 Sug Yesus en ouman eisaugb Yohanes dag len logug enohob, kaba, en eihwededau cinogo Nasared naugb en eisa ij dig Tiberias nagama naugb en edeigtou se losneseba dou enin sungga. Doba sug lusud len louman dag Yesus eisa ij beihwedig nagamohob, kaba, len leinyana dau cinogo gus augwan len loci Tiberias mebera ucan en sungga toua. 14:14 Dangga sug Yesus edebeij dig nagamohob, kaba, en eiya, doba lusud leinyana medam len loci ledeigtou inohob. Hang en medoc eineg medam an len namcir, kaba, en eic geigouhw dou leng gedig areber len laugwan toua. 14:15 Doba sug deinyor lobohob, kaba, Yesus men logodeh len len aud eni naugb len lenara dou eni, lendagai: Usi gini dag losneseba namcir. Dara ebeij losog touohob. Dangga hang, ban barougb len naugb len leihweda se cinogo geb acec gininda. Dauntoba lenin louma ared naugb len letahabi. 14:16 Doba Yesus en dougwo len, endagai: Dangga, isnaro. Doba yen eng yemeic ared dou len lemet. 14:17 Doba men logodeh, len lenara launi Yesus mer ucugb, lendagai: Emen roti mogo sergem, dara hosei maga hwaito inggin dous. Dangga emedeinyum naugb len leinyana gin dagiro? 14:18 Dangga Yesus arougb len, endagai: Yen yodo dou dan suginahabi. 14:19 Sug len leic roti dara hosei dou enohob, kaba, Yesus enara dou lusud laugwan naugb len lecguna leigtou se aremon. Sug len laugwan leigtouohob, kaba, en os roti mogo sergem dara hosei maga hwai graga icira en mesira, hanoba en eised mergo augb bogo dauntoba en en sijo dou ELOHIM naugb gin toua. Sug en ocuncum dou ELOHIM dauwohob, kaba, en ekris roti. Hanoba en eic dou men logodeh naugb len lohw an len ingga laugwan toua. 14:20 Dangga sug len laugwan let beicerohob, kaba, Yesus men logodeh len louci mougwu debinim se aigdaga mes sisa hobjerai batij an namcir. 14:21 Doba sug len lecic dau leng let ared gini, kaba, len lecic ligiji mogud eng merug ribu sergem gini. Doba len lemecic ligida dara logodeh toua darero. 14:22 Sug len louci ared mougwu augwan debinimohob, kaba, Yesus arougb men logodeh, endagai: Yen yeisa ij ino dau dan indin dig nagamada. Sug en arougb men logodeh leisa ij dauwohob, kaba, en arougb len leinyana ingga toua leihwededau en dig meren cinogoda. 14:23 Sug Yesus arougb lusud leinyana graga leihwededau enohob, kaba, en eisaugb se mengarougb hom naugb en edocuncum dou en Mena sungga. Dangga sug lobohob, kaba, Yesus enin dous eng loba osun deb se mengarougb ingga deb. 14:24 Doba ij an men logodeh, kaba, edebsa duhu mediaba. Anai loungmen eisa ucugb dau dig merdoc en. Hang duhu mogo oto ij an len ucucugb deb namcir. 14:25 Dangga deinyor sug bogo obrurugb, kaba, Yesus ec mohora se duhu mod ucan men logodeh dig meridigo. 14:26 Sug len leiya en ec se duhu mod ucan len, kaba, len lahau medam. Hanoba len leiyogoseser, lendagai: Aremoung mena ingga oucucan maman gaden. 14:27 Doba Yesus oho mer debin len, endagai: Yen yemahaulo. Anai aremoung menero, doba dang Yesus eng doucan yen gini. Dangga yen yemomi touwero. 14:28 Sug Yesus oho mer debin len danggohob, kaba, Petrus eija ucugb dou en, endagai: Adehsud, ban ingga dag misen, kaba, ban barougb dan naugb dan dec se duhu mod aud ban sungga toua. 14:29 Dangga Yesus eija en, endagai: Ban bin. Sug Yesus eija en dag ginohob, kaba, Petrus esogwa dau ij, bec se duhu mod aud en toua. 14:30 Doba sug Petrus eiya lougb obsaresa duhu boc mogo medam, kaba, en ahau dau gin namcir. Anai en ebiji naugb en oc se duhu. Hang en eiyagarij Yesus, endagai: Adehsud, ban beigdoc danahabi, anai dan doc se duhu dangga. 14:31 Sug Yesus ouman Petrus eiyagarij en dag ginohob, kaba, en ou mesira dedemeda naugb eigdoc en dau duhu. Hanoba en enara debin en, endagai: Dagiro naugb ban beija abuwesa dan dag gina? Aban geicara aninim dag sud hom gemod mena debsa dan namcirero. 14:32 Dangga sug lan laisaugb se ingmesohob, kaba, loungmen mohora edina dau len, dara duhu toua ogor namcir. 14:33 Sug men logodeh gedig len leigtou se ing mes ingga len leiya dau gini, kaba, len lesijaresa en namcir. Hanoba len lenara, lendagai: Bani gini ELOHIM Meisi misen namcir. 14:34 Sug len ledos dig nagamohob, kaba, len lesogwa deisa dougb, moho Genasared. 14:35 Dangga sug lusud sungga len leiya, doba Yesus en an men logodeh ledebeij lenohob, kaba, len lesa merir dou lusud geb acec dougb ingga len laugwan. Dauntoba len loho leng areber len laugwan aud en toua. 14:36 Sug len lahwan leng areber laugwan aud Yesusohob, kaba, leng areber gini len lacgeij en dara leiyagarij en, lendagai: Ban bouwan, kaba, emen emos sansun icira ban abus dous, kaba, edeinyum naugb emen emaugwan emeigouhwohob. Dangga leng areber ingga, gareg en os sansun mohora icira Yesus mos, kaba, en eigouhw namcirohob.

Matius 15

15:1-2 Doba sug Yesus moongga se Genasared ginaba, kaba, lusud merug aibibra dau leng Parisi dara leng meru ouforoho se Musa men gomnomna, kaba, len louwaden dau Yerusalem aud Yesus. Sug len ledebeij enohob, kaba, len leijidougwo eni, lendagai: Dagiro hang, aban logodeh len leicara bedreg dau maman mamjemouwer meren gomnomna gina? Anai sug len letara, kaba, len lemedu len merisira dau nosa habero. 15:3 Doba Yesus enara bauni len merir ucugb dou len, endagai: Dagiro naugb yen yowun indan logodeh len meroho dag len ledreg dau maman mamjemouwer meren gomnomna gina? Anai yen, kaba, yen yedreg dau ELOHIM men gomnomna terimda naugb yen yaimo areg yenin yauwam an gin touohob. 15:4 Anai ELOHIM enara dag gin dou yenohob, endagai: Yen yagauwesa yen meijina dara yen meijim dara deigeigouhw namcir. Dara en en ingma dag gin dou yen touohob, endagai: Gareg dau yen en ouwareij mena dara mem, kaba, len gus leic gomom dou en toua. 15:5-6 Doba yen, kaba, yen yesulou lusud dag gini, yendagai: Gareg dau yen en enara dou mena dara mem dag areg en esedeb naugb ousa lan, doba en es moro dou ELOHIM enohob, kaba, gini dag en emousa lan deitero, doba en arges dau namcirohob. Hang yen yaiyan ELOHIM men gomnomna gin namcir. Dauntoba yen yaimo areg yenin yauwam an gin dous. 15:7 Dangga areg ELOHIM en enara se Surad Yesaya eisaugb yen deb sug nosohob, kaba, augwan misen namcir. Anai meijen geicara augwan dag yen yarerei lusud dous. 15:8 Hang en enara eisaugb yen dag gini, endagai: Len gini, kaba, len leigdoumesa dan indoho augwougb se len merirs dous. Doba len merdoc mes, kaba, aigus gougwa dau danohob. 15:9 Dangga eigouhw naugb len lemesijaresa danlo. Anai len len dou lusud dag areg len lomnomnan dou len gini, kaba, dau dan ingga. Dobnaro. Areg len lomnomnan gini, kaba, dag lusud lenin meren gomnomna dous. 15:10 Sug Yesus owun leng Parisi dag gragohob, kaba, en eija lusud leinyana len len aud en naugb en esulou len debin gin deit. Hanoba en enara dou len, endagai: Yen youman dan indir an areg dan den dou yen gini deigeigouhw namcir, dauntoba yen yecinaga meijouhw asesa toua. 15:11 Anai areg yen yet se yen meijirs, kaba, emeic gogor dou yen deseino ELOHIM enero. Doba areg gen dau yen meigdoc mes naugb agunya se meijirs, kaba, gin eng eic gogor dou yen deseino ELOHIM dous. 15:12 Sug Yesus eic gainyenara dag graga dou lusud bouwohob, kaba, men logodeh len len aud en naugb lenara dou en, lendagai: Areg ban ben dou leng Parisi graga, kaba, eic len merdoc ehin an ban icira namcirohob. Ban bemecinageroei? 15:13 Doba Yesus auni len merir ucugb dou len, endagai: Astesda meij gedig dan Indina se bogo en emebero, kaba, cum, en ohoma an mom augwan dau. 15:14 Dangga yen yemahau dau leng gin merirero, doba yen yamsoho len dous. Anai len leigdoumesa lenin dag len merires esgiraha naugb len leinoisa len meriresmougb gus laugwan. Dobnaro. Len toua merires edag mougwohob. Hang sug len lahwan leng meriresmougb gus, kaba, cum, len laugwan lobsara se cigaha namcir. 15:15 Doba Petrus eijidougwo Yesus eisaugb gainyenara graga, endagai: Ban ben dou emen dag areg sud hom en et, kaba, emeic gogor dou enero. Doba areg agunya dau en mers inggeic gogor dou en dous, kaba, gini men meijouhw dagiro? 15:16 Sug Yesus ouman dau gini, kaba, en owun len meroho dag len meru emaiyero namcir. Hanoba en enara dou len, endagai: Yen gin, kaba, yen yaimo dan mohonohob. Doba yen gin meiju edgom dag len gusaba? 15:17 Dagiro yen yemecinaga dau areg sud hom en et, kaba, emeic gogor dou enero? Anai areg en et gini, kaba, einesa en menuhwa dous. Hanoba en edoran ucugb. 15:18 Doba areg agunya dau sud hom en mers, kaba, en dau en medoc mes teisis, hang emeic gogor dou en deseino ELOHIM toua. 15:19 Anai gauwamara naugb areg gecgu dag gohudara, dara mesira ebsa, dara laimom aibibrida, dara geiyohora, dara geseyeiyo len gus an meren geicara gecgu era geigouhw, dara gecic meroho gouhw genes, kaba, augwan gin eng en dau sud hom medoc mes. 15:20 Hang emeic gogor dou en deseino ELOHIM toua. Doba aimo leng Parisi len merir naugb sug en etara dara en mesira ogor, kaba, gini emeic gogor dou en deseino ELOHIM enero. 15:21 Sug Yesus esulou men logodeh dag graga ouwohob, kaba, en eihwededau sungga dig leng Tirus dara Sidon meren hancob deit. 15:22 Sug en edebeij meren hancob ginohob, kaba, gida hom dau leng Kanaan gatou se cinogo ingga, en en aud Yesus. Hanoba en eiyagarij en, endagai: Daud Medebeito, ban abdoc eineg an danahaba. Anai mena mog mog einesa dan indihida medoc mes naugb ogod en mog eihwesa gebeba namcir. 15:23 Doba Yesus emauni ara ara dou en touwero, doba en amsoho en mer namcir. Dangga hang, men logodeh len len aud Yesus naugb lenara dou en lendagai: Ban beic geigouhw dou en mehida. Hanoba ban barougb en beihwedanda. Anai en oucucan maman naugb en mer esesa terimdaha. 15:24 Doba Yesus en etaha len merir an, endagai: Dan Indina en arougb dan den aud leng Israel dous. Anai len ledag domba gaijahasero. 15:25 Doba gida graga en en aud Yesus naugb en emecguna dou en. Hanoba en eiyagarij en deit, endagai: Adehsud, ban bousa dan an dan indihidahabi. 15:26 Doba Yesus etaha en mer an ucugb deit, endagai: Emeigouhw naugb dan demeic logodeh meren ared naugb dan demerba dou mihero. Doba eigouhw naugb meren ared ebdougwo lenin dous. 15:27 Doba gida graga, kaba, en toua ouwas Yesus mer an, endagai: Adehsud, areg ban ben gini misen namcir. Doba sug mihi merna len let ared se boromei, kaba, moslos ebrera dou meren mihi naugb len let toua. 15:28 Sug Yesus ouman dag gini, kaba, en ousa deisa en mer, endagai: Daneh, areg ban beiyagarij dan an gini, kaba, dan deicara daimo ban abir an namcir toua. Anai ban bod abina debsa dan dag misenohob. Sug Yesus enara dag gin inegohob, kaba, en mehida eigouhw namcir. 15:29 Sug Yesus ecicugb dau leng Tirus dara Sidon, meren hancobohob, kaba, en oci Galilea mebera terimda en edeisaugb men garougb hom naugb en edeigtou dou enin sungga. 15:30 Dangga lusud leinyana len lahwan leng merohora omom, dara leng meriresmougb, dara leng lagaim, dara leng losum, dara leng areber aingma aingma aud en sungga. Sug len lob len gin desij enohob, kaba, en eic geigouhw dou len laugwan toua. 15:31 Sug lusud leinyana sungga len leiya, doba leng losum, kaba, len lenara moho asesa. Dara leng merohora agaim, kaba, len merohora eigouhw deit. Dara leng merohora omom, kaba, len lec merohora dag misen. Dara leng merires, kaba, len leiya lo asesa ucugb deit, kaba, len leimiman dau gin namcir. Hanoba len leigdoumesa leng Israel meren ELOHIM en moho agas an gin toua. 15:32 Sug Yesus eic geigouhw dou leng areber len laugwan dauwohob, kaba, en eija men logodeh naugb len len aud en. Sug len ledebeij enohob, kaba, en enara dou len, endagai: Dan indoc eineg an lusud leinyana gindaha. Anai len leigtou desij dan se lona homoiyohob. Hang meren ared toua ouwa dau lenohob. Dangga dan demouwan len lemeihwedan merinuhwa mes mogudero. Doba dan douwan naugb len letara nosahabi, dauntoba len ledahauwa se ucina mogumsero. 15:33 Doba men logodeh len lenara ucucugb an en, lendagai: Maman mameic ared daugiro naugb maman mameic edeinyum dou len leinyana gougwa gini, anai maman maisa se losnesebadaha gina? 15:34 Doba Yesus eijidougwo len an meren ared, endagai: Yen yoho roti mogo hosaiya dara yeng gina? Doba len launi ucugb dou en, lendagai: Roti mogo senggai dous. Dara hosei moto moto maga aibibra toua ing dara gini. 15:35 Dangga Yesus arougb len leinyana ingga, endagai: Yen yecguna yeigtouahabi. 15:36 Sug len leigtouohob, kaba, en os roti mogo senggai graga icira mesira, dara hosei moto moto graga toua. Sug en os augwan icira mesirohob, kaba, en en sijo dou ELOHIM naugwahabi. Hanoba en emekris roti graga dou men logodeh naugb len lemohw an lusud leinyana ingga len lemet toua. 15:37 Dangga len ingga laugwan let beicer namcir. Sug len let beicerohob, kaba, Yesus men logodeh louci mougwa debinim se aigdaga mes senggai batij an namcir. 15:38 Doba sug len lecic dau leng let ared gini, kaba, ligiji mogud eng merug ribu hogu gini, doba len lemecic ligida dara logodeh toua darero. 15:39 Gin dauwohob, kaba, Yesus arougb len laugwan lecicugb dig meren cinogoda. Hanoba eni dara men logodeh, kaba, len leisa ij dig leng Magadan meren hancob deit.

Matius 16

16:1 Sug Yesus en edebeij leng Magadan meren hancobohob, kaba, lusud aibibra dau leng Parisi dara leng Saduki, len len aud en naugb len lerba mohoisa en. Sug len ledebeij enohob, kaba, len lenara dou en, lendagai: Ban bens ganusbus dau bogo ingma deseino emenahabi. Dauntoba emen emecinaga dag ELOHIM enin eng eigdoumesa ban aboho naugb augwan ginohob. 16:2 Doba Yesus auni len merir ucugb dou len, endagai: Yen yeiya bogo ahani se losog, kaba, yen yenara doum, yendagai: Lona, kaba, lohos, anai bogo ahanohob. 16:3 Era sug yen yeiya hinehibemogo ogorgor, dara bogo gahan se inenihi, kaba, yen yenara doum toua, yendagai: Irogini, kaba, lomos ecgu namcir. Dangga hang, yen meiju ouforoho naugb yen yecinaga umer goho lohos dara goho los toua asesohob. Doba gansins eisaugb lona sug sud hom en en naugb eigdoc yen dau meijen gogom, kaba, yen meiju emouforoho naugb ginero. Doba yen meigdoc aiyansem dougwo namcir. 16:4 Dangga hang, dan demaimo yen meijir naugb dan demens ganusbus hom dou yen gin touwero. Doba dan demens sud hom gesai ELOHIM moro nosa, moho Yunus, en edag gansins dou yens dous. Anai yen gini, kaba, yen meijug mog namcir. Dara yen meigdoc esges ELOHIM deb terimda, aninim dag gida en medoc esges mesuwa toua deb dous. Sug Yesus enara gouji dangga dou lenohob, kaba, en arges len ingga deb sungga. Hanoba en eihwededau len. 16:5 Sug Yesus eihwededau leng Parisi dara leng Saduki debohob, kaba, eni dara men logodeh len leisa ij dau Magadan ucugb dig nagama deit. Dangga sug len ledebeij dig nagamohob, kaba, men logodeh len ledoudesa ared, doba len lemoho homero. 16:6 Hang Yesus esulou men logodeh, endagai: Yen yesedougwo dara yebehnehino yenin meigdoc mes dougwo leng Parisi dara leng Saduki meren gugdo mougb gin terimda. 16:7 Doba sug Yesus men logodeh louman dau gin, kaba, len meru laiso en mer an gini. Hanoba len lenara doum ucucugb, lendagai: En enara baugtarera dougwo maman, anara? Anai maman mamodo maman roti ingmaro, gin enggei? 16:8 Doba Yesus ecinaga areg len len doum ingga. Hanoba en etaha len merir an gini, endagai: Yen yenara doum eisaugb yemoho aredero, anara? Yen yemod meijina debsa daneroei? 16:9 Anai sug dan dekris roti mogo sergem dou lusud merug ribu sergem nosa, kaba, yen youci mougwu debinim se aigdaga mes hosaiya? Yen meigdoc moc dougwohobei? Dara yen yemecinaga gin meijouhw asesa touebmei? 16:10 Era sug dan dekris roti mogo senggai dou lusud merug ribu hogu, kaba, yen youci mougwu debinim se aigdaga mes hosa toua? 16:11 Dangga hang, dan demesulou yen eisaugb roti misen yen yen ginero. Doba dan desulou yen dauntoba yen yebehnehino yenin meigdoc mes dougwo leng Parisi dara leng Saduki meren gugdo mougb gin terimda. Dagiro hang, yen meigdoc emobgesa dan indir an ginero? 16:12 Dau ingga, kaba, men logodeh len meru obgesa dag Yesus emenara eisaugb gugdo mougb misen dou lenero. Doba len lecinaga dag en esulou len dougwo dau sug leng Parisi dara leng Saduki len ledidib aremeijouhw dau gomnomna mohon dou len dous. Anai areg len lebedbed gin, kaba, dag gugdo gobobo deisa namcir. 16:13 Sug Yesus edebeij nagamohob, kaba, eni dara men logodeh len lec merohora dig cinogo Kaisarea Pilipi deit. Sug len ledebeij deinyorohob, kaba, en eijidougwo len eisaugb enin, endagai: Lusud Meraguna Mebin dan gini, kaba, lusud leija dan dag garena? 16:14 Dangga men logodeh, len launi dou eni, lendagai: Ligbum, kaba, len leija ban dag Yohanes Gogun Lusud Se Duhu. Doba ligbum, kaba, leija ban dag Elias. Dara ligbum deit, len leija ban dag sud hom gesai ELOHIM moro nosa, en moho Yeremia. Doba ligbum, kaba, len leija ban dag sud hom gus dau leng lesai ELOHIM moro nosohob. 16:15 Doba Yesus eijidougwo men logodeh ucugb deit, endagai: Yen, kaba, yen yeija dan dag garena? 16:16 Dangga Simon Petrus en auni dou en, endagai: Ban, kaba, ELOHIM Gedig Maireseb Huhugb en Meisi ban gedig ban beigdoc emen dau emen gogom augwan. 16:17 Sug Simon Petrus os badi Yesus deseino len gus dag ginohob, kaba, Yesus ousa deisa en mer ucugb, endagai: Simon, Yona meisi, areg ban ben gini, kaba, dau lusud misen se cinogo lemens dou banero. Doba dan Indina se bogo dous, eng ens dou ban gini. Hang en emeic geigouhw dou ban toues. 16:18 Dangga ban bouman deigeigouhw. Sug ban bos badi dan dag ginohob, kaba, dan deigdoumesa ban bedag igdahab moc gototo naugb dan dohud indan logodeh laugwan dag tu icira ban. Hang emedeinyum naugb sug gomom men goubesa emougdud ban touwero, doba ban abina agau beb huhugb terimda. 16:19 Dara dan demeic gusin dou ban. Dauntoba gareg en ouwan einesa bogo naugb ELOHIM oiharaga en ucugb, kaba, ban bec misis dau en. Dangga gareg ban bouf misis dougwo en se cinogo gini, kaba, ELOHIM en toua eicara aimo dangga. Era gareg ban bec misis dau en se cinogo gin, kaba, ELOHIM eicara aimo dangga dou en toua. 16:20 Sug Yesus eigdoumesa Petrus en moho dag gragohob, kaba, en oungben dougwo men logodeh laugwan, endagai: Yen yemdecic dan dedag Sud Hom Geigdoc Lusud Dau Meren Gogom dou len gusero. 16:21 Ebiji dau lona sug Petrus os badi Yesus en moho gini, kaba, Yesus ens dau areg ELOHIM esedeb naugb enin meijouhw augwan asesa dou men logodeh toua. Hanoba en enara dou len, endagai: ELOHIM esedeb naugb dan deihwedesa Yerusalem, dauntoba leng Yahudi meren mougtir, dara gembala gesa taij meren mougtir, dara leng meru ouforoho se Musa men gomnomna len laugwan leic mog erij aingma aingma dou dan sungga. Dara en esedeb naugb len leic gomom dou dan sungga toua. Doba lona hwai debin, kaba, ELOHIM eigdoumesa dan dau leng lomom laugwan ucugb deitohob. 16:22 Doba sug Petrus ouman gini, kaba, en ohugouhw Yesus mesira dou enin naugb en eden dougwo eni, endagai: Adehsud, dan docuncum dou ELOHIM naugb en asid gogom augwan gin dau ban. Anai dan demouwan naugb len leicara dangga dou banero. 16:23 Doba Yesus ei maires dara Petrus namcir. Hanoba en etaha en, endagai: Setan, ban beihwededau dan namcir. Anai cum, ban bedag igdahab naugb dan detohob bani. Anai areg ban ben gini, kaba, emaimo asesa ELOHIM enin medoc mesero, doba aimo dau lusud meren gauwamara dous. Dangga hang, bemes lougb dougwo dan indibes touwero. 16:24 Sug Yesus etaha Petrus en mer an dag gragohob, kaba, en esulou men logodeh laugwan ucan deit, endagai: Gareg en ouwan aimo dani, kaba, en emaimo areg enin ouwan deitero. Doba en ogod se enin medoc mes naugb en aimo ucina mog erij aud gomom ucan dan terimda. 16:25 Anai gareg dau yen en ebehnehino enin mena naugb en maireseb terimda, kaba, cum, en mena ediyebeiya dau en namcir. Doba gareg dau yen en emebehnehino enin menero, doba en omom icira sug en aimo danohob, kaba, en mena emediyebeiya touwero. Doba en esma mena maireseb menau geb huhugb namcir. 16:26 Dangga hang, yen yemeic yenin meijina maireseb naugb yemamcirac icira areg geb se cinogo gin augwanlo. Anai sug yen yesma areg geb se cinogo augwanohob, doba yen meijina ediyebeiya se dum smougb, kaba, yen yemeic areg yemeperwei yen meijina ucugb se mohw deita? Naro, augwan gini hom ingma emeic yen meijireseb deb touwero. 16:27 Dangga yen yemebehnehino yenin meijina dau areg gogomero. Doba yen yesogwesa dan indohotimei mohw se ucina mog erij gini aud gomom dous. Anai lona naugb sug Lusud Meraguna Mebin dan dogod aremer aga lusud, kaba, ebeij deinyorohob. Hanoba dan dogod aremer daimo dau astesda sud hom yom men geicara geigouhw era gecgu dou len toua. Dara sug dan den gini, kaba, danin demenero. Doba dan den dara dan Indina men gougouf cucugb. Dara men malaikadir laugwan len laimo dan toua. 16:28 Doba yen youman deigeigouhw, ligbum dau yen gini, kaba, yen meijireseb terimda edebeij lona sug yen yemeija Lusud Meraguna Mebin dan dedag mougt mera medam naugb dan doiharaga lusud ucugb deits. Augwan gini asesa dag misen namcir.

Matius 17

17:1 Lona senggem debin areg graga gin, kaba, Yesus, dara Petrus, dara Yakobus, dara Yakobus magto, moho Yohanes, len leisaugb menmod gagas medam hom naugb len leigtou dou lenin sungga. 17:2 Sug len ledebeij menmod inggohob, kaba, Yesus eperwei en mocbobaga deseino len. Dangga len leiya, doba en mebes mouf esesilo dag igda mohora. Dara men sansun toua ogouf cucugb namcir. 17:3 Dara len leiya, doba lasud lahwai lagunya lasa desij Yesus naugb lanara dou en toua. Laingma maroho dag Musa, doba laingma maroho dag Elias. 17:4 Dangga Petrus enara dou Yesus, endagai: Adehsud, eigouhw, kaba, emen emeigtou desij ban sugini naugb emen emousa bani. Dangga sug ban bouwan, kaba, dan dohud tu meij homoi naugb yen. Hom naugb bani, hom naugb Musa, dara hom naugb Elias toua. 17:5 Doba sug Petrus enara dag graga dou Yesusaba, kaba, umer gogouf cucugb obsara en bod len namcir. Hanoba len louman, doba sud hom enara dau umer dou len, endagai: Gini dan Indisi gedig dan indoc gororougb en namcir. Dara dan dagahugouhw an en. Dangga hang, yen youman en mer an areg en esai dou yen deigeigouhw toua. 17:6 Sug Yesus men logodeh merug homoi graga len louman mer gin, kaba, len leijeboho lamuhumlo. Anai len lahau medam namcir. 17:7 Doba Yesus en en aud len. Dangga sug en ou mesira bos lenohob, kaba, en enara dou len toua, endagai: Yen yemahau dau ginlo, doba yen yisa yesa. 17:8 Dangga sug len loho merirgohob, kaba, len lemeiya lingma lemesa desij Yesus deiterohob. Doba len leiya Yesus enin dous. 17:9 Doba sug len louwaden dau menmod ucugb, kaba, Yesus oungben len dougwo areg len leiya graga. Hanoba en enara dou len, endagai: Yen yemecic dau areg yen yeiyohob graga dou sud hom touwero. Doba yen yeigtou terimda lona sug ELOHIM eigdoumesa Lusud Meraguna Mebin dan dau leng lomom laugwan ucugwahabi. 17:10 Dangga Yesus men logodeh merug homoi graga len leijidougwo eni lendagai: Leng meru ouforoho se Musa men gomnomna, kaba, len len dou emen, endag Elias en eino Mesias menahabi, kaba, Mesias emaimo ucan en. Len lenara dangga dou emen, anara? Anai ban benohob gina? 17:11 Dangga Yesus ousa deisa len merir, endagai: Indeic, areg leng meru ouforoho len dou yen gin, kaba, misen namcir. Anai Surad Injil Meb Mohon enara dag lona hom, kaba, Elia en eng einon naugb en esedeb lusud merdoc mes deb, dauntoba sug sud hom geigdoc len dau meren gogom en en, kaba, augwan ecabeci deb naugb enohob. 17:12 Dara dan den dou yen endag Elias gin, kaba, en enohob. Doba lusud lemecinaga enero. Hang len laimo areg len merdoc mes oungmogo debin en dous, aninim dag len merdoc oungmogo debin Lusud Meraguna Mebin dan toua. Anai len lemecinaga dan asesa touwero. 17:13 Sug men logodeh louman gin, kaba, len merdoc obgesa dag en enara dou len eisaugb Yohanes Gogun Lusud Se Duhu inggini. 17:14 Sug Yesus dara men logodeh merug homoi graga, len ledebeij lusud leinyana se dougb ucugwohob, kaba, sud hom dau len ingga en en aud Yesus. Sug en edebeij enohob, kaba, en mohorbrida badedeij cinogo deseino en. Hanoba en eiyagarij en, endagai: 17:15 Adehsud, ban abdoc erij an dan indisi, anai ugweba en namcir. Hang ec enin se smougb mougwa einyana. Dara ahacugb en se duhu ucucugb touohob. 17:16 Dangga dan dahwan en aud aban logodeh naugb len leic geigouhw dou en, doba meren goubesa emedeinyum naugb ginero. 17:17 Sug Yesus ouman gin, kaba, en omi debin len. Hanoba en enara medam dou len, endagai: Dan deigtou desij yen dara deigtou dateteij yen se lona hosa deitahaba? Anai dan dens dau ELOHIM mer dara men goubesa augwan bedeinyum dou yen touohob. Doba yen yemod meijina debsa en an aremer ginbuma. Dara yen yemaimo en mer touwero. Doba yen meigdoc aihagab en mer gin terimdaba. Sug Yesus enara gouji dangga dou lenohob, kaba, en arougb len, endagai: Yen yidahwan en meisi ingga dou dan suginahabi. 17:18 Sug len lahwan godeh graga aud Yesusohob, kaba, en esa mer debin mena mog mog, endagai: Ban beihwededau godeh gini. Sug en arougb en dangga inegohob, kaba, godeh ingga, en eigouhw namcir, anai mena mog mog eihwededau enohob. 17:19 Sug Yesus eic geigouhw dou godeh hom gragohob, kaba, men logodeh leisa dau lusud leinyana ingga naugb len ledeijidougwo Yesus dou lenin, lendagai: Dagiro, naugwe hang, emen goubesa emedeinyum naugb sug emen emocirma mena mog mog dau godeh ginero? 17:20 Dangga Yesus enara bauni len merir, endagai: Yen yemocirma mena mog mog dau godeh ginero, anai yen meigdoc emebdebin an ELOHIM men goubesa dag misenbuma. Anai sug yen yod meijina debsa ELOHIM an men goubesa, aninim dag sawi mogo mogurei dous, kaba, aremer hom ingma emedreg dau meijen goubesa touwero. Doba goubesa areg ELOHIM eic dou yen gin, kaba, edeinyum naugb augwan namcir. Hang edeinyum naugb sug yen yenara dou menmod gini en eda dau mohw bedesa sugada, kaba, en eisa ben aimo yen meijir dangga toua. Doba yen yemod meijina debsa ELOHIM men goubesa aninim dag sawi mogo hom emebsa yen meigdoc mes touebma. Dangga hang, meijen goubesa emedeinyum naugb yen yemocirma mena mog mog dau godeh gin touwero. Yen youman dan indir an areg dan den dou yen gin deigeigouhw namcir. 17:21 Anai mena mog mog gedag gin, kaba, yen yemocirma en dau lusud augwougwero. Doba ogdoc sug yen yehig dau ared naugb yen yocuncum esesa dou ELOHIM terimda dous. Areg gus augwan, kaba, men goubesa emedeinyum naugb ginero. Augwan gini asesa dag misen namcir. 17:22 Sug Yesus dara men logodeh len laugwan merugwengga se leng Galilea meren hancob deitohob, kaba, en ens dau ucina mog erij naugb sug en omom mougwa hom dou len deit, endagai: Cum, kaba, sud hom en emohw Lusud Meraguna Mebin dan debsa lusud merug mog merisira naugb len lemeic gomom dou dans. Doba lona hwai debin gin, kaba, ELOHIM emeigdoumesa dan ucugbs. 17:23 Sug men logodeh louman en dangga, kaba, len merdoc eijesa medam an en namcir. 17:24 Sug Yesus dara men logodeh ledebeij cinogo Kapernaum deit, kaba, len gedig lacgeij aregoufu dau lusud naugb ELOHIM Men Tuari len len aud Petrus. Hanoba len leijidougwo en, lendagai: Meijen Adehsud en toua eic aregoufu mogo hwai naugb ohw se ELOHIM Men Tuari ginei? Era naroei? 17:25 Doba Petrus ousa len merir an, endagai: En toua ohw. Sug Petrus en ousa len merir anohob, kaba, en einesa dimei mes eda aud Yesus naugb edeijidougwo en an gini. Doba sug Petrus emenarabuma, kaba, Yesus eijidougwo en an gin nosa, endagai: Simon ban boudesan dagiro? Sug mougt mera se cinogo gini len lacgeij lusud naugb len lohw cinogo dou len, kaba, len lacgeij dau lugmaharaei? Era dau meren logodehei? 17:26 Doba Petrus auni dou en, endagai: Naro, len lacgeij aregoufu dau lugmahara dous. Dangga Yesus enara bauni en mer ucugb, endagai: Sug lugmahara len lohw dous, kaba, ara ingma emata dougwo meren logodeh touwero. Doba len larges dau gin namcir. 17:27 Doba eigouhw naugb maman mameic merdoc momogo dou lenero. Dangga hang, beihweda naugb ban biderba mui se Tiberias. Sug ban beic hosei gacgunogohob, kaba, ban beiya aregoufu mogo hom gedeinyum naugb nanan naic dou ELOHIM Men Tuari geb se en mers ingga. Ban beic dau naugb ban bedeic dou leng lacgeij lusud naugb len lohw aregoufu dou ELOHIM Men Tuari gin toua.

Matius 18

18:1 Se lona ingga, kaba, men logodeh gus len toua len len aud Yesus. Sug len ledebeij enohob, kaba, len leijidougwo en, lendagai: Se lona sug ELOHIM oiharaga emen ucugb, kaba, gareg dau emen en moho agas edreg dau emen gus emaugwana? 18:2 Sug Yesus ouman dag gin, kaba, en eija godeh hom bedesa desij en maga deseino men logodeh laugwan. 18:3 Sug godeh esa deseino len laugwanohob, kaba, Yesus ens meijouhw ucan gin dou len toua, endagai: Gareg dau yen en emeperwei en medoc mes, hanoba en emowun en medoc mes arjaga, aninim dag godeh gin touwero, kaba, en emeinesa ELOHIM men goiharaga touwero. 18:4 Anai gareg dau yen en owun enin medoc mes arjaga, aninim dag godeh gin, kaba, en eng moho agas gedreg dau lusud se ELOHIM men goiharaga len laugwanohob. 18:5 Dara gareg dau yen en eperwei dan indoho, hanoba en owun enin medoc mes arjaga naugb en ebin godeh gedig en medoc ebdebin an dan ginohob, kaba, gini aninim dag en ebin dan touohob. 18:6 Doba gareg dau yen en eicara barses godeh gedag gini naugb en medoc emebdebin an dan deitero, kaba, eigouhw dau sug en emeicara emaimo dangga an enbuma, kaba, dag lusud lera aumaga an igdahab gouji se en morcahabi, len lemderba en se dum mei geb aimei naugb en omom namcir. Anai sug len lamsoho en, hanoba en eicara aimo dag gini an indan godeh hom gin toua, kaba, ELOHIM eic gogom edreg medam dau gin dou en deit. 18:7 Dara gogom medam eb naugb lusud gedig Bilis oiharaga len se cinogo gini. Anai meren geicara ahwan lusud naugb len merdoc emebdebin an dan toua deitero. Dara len lemarges dau gin touwero. Doba sug len merdoc etrij icira dag ginohob, kaba, arautut len naugb len leicara larses len dag gin terimda. Hang ELOHIM emamsoho len touwero. Doba gareg dau len en eicara barses lusud naugb len merdoc emebdebin an dan deitero, kaba, ELOHIM eic gogom medam dou en namcir toua. 18:8 Dara yen toua, sug yen meisira os areg gecgu, era yen meijohora ahwan yen aud areg gogor naugb yen yebesesar terimda, hanoba eic dag yen meigdoc emebdebin an dan toua deitero. Doba yen yobsara dau dan, kaba, eigouhw naugb yen yogod yen meisira homa dara yen meijohora homa dau yen. Hanoba yen yerba dau yen toua. Anai eigouhw naugb yen yeinesa maireseb menau geb huhugb dara yen meisira dara meijohora hom dous, dau gedig yen yamsoho hwas gin deb, hanoba ELOHIM erba yen an gini se dum smougb geb huhugb toua namcir. 18:9 Dara sug yen meijires eiya areg gecgu naugb arautut yen meigdoc mes etrij icira, hanoba eic dag yen meigdoc emebdebin an dan deitero. Doba yen yobsara dau dan, kaba, eigouhw naugb yen yeihwa yen meijires homa dau yen. Hanoba yen yerba dau yen toua. Anai eigouhw naugb yen yeinesa maireseb menau geb huhugb dara yen meijiresi hom dous, dau gedig yen yamsoho hwas gin deb, hanoba ELOHIM erba yen an gini se dum smougb toua namcir. 18:10 Dangga hang, yen yesedougwo deciciji, dauntoba yen yemesbes an lusud gedig len lod merna debsa dan, aninim dag logodeh ginlo. Anai meren malaikadir, kaba, len leinesa aud dan Indina naugb len ledeseino en se bogo astesda lona loba naugb len terimda. 18:11 Dara Lusud Meraguna Mebin dan demen naugb demamsoho len, dauntoba len lemaijahasero touwero. Doba dan den naugb dehilon len ucugb dous. Yen youman dan indir an areg dan den dou yen gin deigeigouhw namcir. 18:12 Sug Yesus esulou men logodeh dougwo meren geicara emedag igdahab naugb lusud lemetohobro ouwa dou lenohob, kaba, en eic bainyen dau sud hom men domba gaijahasero debin gin dou len deit, endagai: Sug sud hom men domba maga huntun hom doba hom aijahasero dauwohob, kaba, yen youdesa dagiro? En amsoho hom gin baijahasero deb namcirdei? Naro, en emamsoho debero. Doba en arges men domba gedig maga mos senggegu senggegu edeisu se men mougwa deb. Hanoba en eihweda naugb edehilon domba hom gedig aijahasero graga se menmod deitahabi. 18:13 Dangga sug en edesma hom gragohob, kaba, en medoc agahugouhw medam an hom gini edreg dau maga mos senggegu senggegu edeisu gin toua. Anai augwan emaijahasero, doba merugwengga se uro mesaba. Yen youman dan indir an gini deigeigouhw namcir. 18:14 Dangga hang, deciciji dauntoba meijen geicara emedag igdahab naugb len gedig lod merna debsa danohob, kaba, len letohob icira gin dau dan touwero. Anai yen Meijina se bogo en emouwan sud hom dau len gini, kaba, en emeihwedig dum smougwero. Doba en ouwan len laugwan lesma maireseb huhugb dous. 18:15 Sug sud hom en ebesesar an ban, kaba, banin beihweda naugb bens men sesar dou en nosahabi. Dangga sug en obsara doc ban abir an, kaba, ban bebin en ucugb aud ucina misen deit touohob. 18:16 Doba sug en edegeij mer dougwo ban abir, kaba, ban bidahwan sud hom, era lahwai dara ban deit. Dauntoba sug yahwai era yen meijug homoi, kaba, yen youma debin aremer gini dag misen dou en namcir. Anai augwan gini aimo dau areg geb se Surad Injil Meb Mohon gin touohob. 18:17 Sug en edegeij mer an yen meijir, kaba, yen yedecic dau men geicara graga dou lusud se goucimdeb toua. Doba sug en edegeij mer an leng se goucimdeb toua, kaba, yen yowun en moho dau goucimdeb dag eni sud hom gedig en emecinaga ELOHIM enero. Era yen yowun en moho dag sud hom gedig en acgeij lusud naugb len lohw cinogo dou leng Roma gini. 18:18 Gareg yen yasid en dau goucimdeb se cinogo gin, kaba, ELOHIM se bogo asid en toua. Doba gareg yen yogod men aremer obsara dau en se cinogo gin, kaba, ELOHIM se bogo ogod aremer obsara dau en touohob. Yen youman dan indir an areg dan den dou yen gini deigeigouhw. Anai augwan gini asesa dag misen namcir. 18:19 Sug lahwai dau yen se cinogo gini lan mardoc dag hom naugb lacgeij ara ara dau dan Indina se bogo, kaba, en ousa deisa lan marir an areg len lacgeij dau ingga toua. 18:20 Anai sug lahwai era merug homoi dau yen len loucimdeb naugb len lacgeij ara ara se dan indoho dau ELOHIM, kaba, dan indugwengga desij lenohob. Hang areg len lacgeij gin, kaba, ELOHIM ousa deisa len merir an gin toua. Yen youman dan indir deigeigouhw an gin toua namcir. 18:21 Sug Yesus ens meijouhw dau leng lebesesar anim ouwa dou men logodehohob, kaba, Petrus en en aud Yesus naugb eijidougwo en, endagai: Adehsud, sug dan indaguna era dan indagto, lan labesesar an dan, kaba, dan daigdougwo maran sesar edebeij mougwa senggai dousei? Era mougwa hosaiya? 18:22 Dangga Yesus auni dou en, endagai: Ban bemaigdougwo maran sesar mougwa senggai dousero. Doba ban baigdougwo maran sesar esesa terimda. 18:23 Sug Yesus auni Petrus mer ucugb dag ginohob, kaba, en eic gainyenara hom debin gin dou men logodeh deit, endagai: Se lona sug ELOHIM oiharaga lusud ucugb, kaba, aninim dag sud hom mougt mera medam gen ecic men aremeij geb dou men sogougwir laugwan. 18:24 Sug en ebiji naugb ecic men aremeij dou men sogougwir, kaba, len ledahwan men sogougb hom deseino en. Doba mougt mera men aremeij geic dou men sogougb gini dag aregoufu ebedero namcir. 18:25 Dangga sug sogougb men aregoufu emedeinyum naugb sug en oci ucugb dou men mougtero, kaba, men mougt arougb len gus naugb len lohw en dag sogougb lauma aregoufu dau len gus. Dara en arougb len naugb len lohw en mesouwa, dara en mehir, dara men aremougb geb se men tu augwan naugb lauma aregoufu dau len gus toua. 18:26 Sug men sogougb graga en ouman dau gin, kaba, en ecguna bamuhumlo deseino men mougt. Hanoba en eiyaga, dara eb namcir dou en, endagai: Ban beigtou bateteij danahabi, kaba, dan democ aban aremeij augwan dou bans. 18:27 Sug men mougt mera ouman dag gin, kaba, en medoc eineg an men sogougb gini medam namcir. Hanoba en ogod men aremeij gen ohw dou men sogougb graga augwan dag mogud dou en namcir. 18:28 Doba sug sogougb graga en agunya dau men mougt ingga men tu ucugwohob, kaba, en agasa mesi sogougb hom gus gen men aremeij geic dou mesi gini dag aregoufu ribu mos homoi sergem edeisu gini. Dangga hang, en agaigeij mesi gini, dara esugb en morc. Hanoba en agodgod en an, endagai: Ban boc indan aremeij dou dan dedemeda iteitoginahabi. 18:29 Doba mesi ecguna bamuhumlo deseino eni. Hanoba en en dougwo en ucucugb, endagai: Ban beigtou bateteijahabi, kaba, dan democ aban aremeij augwan ucugb dou bans. 18:30 Doba sogougb hom gin, kaba, en medoc aihagab mesi mer an gin namcir. Hanoba en ohugouhw mesi dou leng lesedougwo tu gesisug naugb len louf mesi ingga terimda mosur loc men aremeij augwan dou en dauwahabi. 18:31 Sug mougt mera graga men sogougwir gus len leiya dau gin, kaba, len merdoc momogo medam icira en namcir. Hang len leihweda naugb len ledecic gin augwan asesa dou meren mougt mera toua. 18:32 Sug meren mougt mera medam ouman dau gin, kaba, en arougb men sogougwir ingga naugb len ledeija men sogougb hom graga aud eni. Sug en enohob, kaba, mougt mera esa mer debin en, endagai: 18:33 Ban bedag indan sogougb gedig men geicara augwan ecgu namcirohob. Anai sug ban beiyaga dara ban beb dougwo dan namcir, hang dan demogod dougwo indan aremeij augwan dag mogud dou banohob. Dangga dagiro, naugwe hang, ban abdoc emeineg an ban absi dau indan sogougb ginero? 18:34 Hang sug mougt mera medam esa mer debin en dag ginohob, kaba, en ohugouhw en aud leng lesedougwo tu gesisug naugb len leic mog erij dou en debin men aremeij geb dou en graga, terimda en oc augwan dou en toua. Anai en medoc esrougb medam an men sogougb ginohob. 18:35 Dangga esloulougb medam naugb sug yen yaigdougwo yen meijaguner dara yen meigdamouwer meren aremer dag mogud toua. Anai sug yen yemaigdougwo meren sesar dag mogudero, kaba, dan Indina se bogo en emaigdougwo meijen sesar dag mogud touwero. Doba en eicara baimo an yen, aninim dag mougt mera medam en eicara baimo an men sogougb dag gin touohob. Dara yen yemaigdougwo meren aremer dara yen meijirs dousero. Doba yen yaigdougwo meren aremer augwan dag misen dara yen meigdoc augwan toua terimda.

Matius 19

19:1 Sug Yesus eic gainyenara augwan dou men logodeh dag graga dauwohob, kaba, en eihwededau leng Galilea meren hancob naugb en einesa leng Yudea meren hancob dig duhu Yordan nagama deit. 19:2 Dara lusud leinyana gougwa leila ucan eni toua. Dangga sug len ledebeij enohob, kaba, en eic geigouhw dou leng areber leinyana dau len ingga toua. 19:3 Dara leng Parisi len toua len aud en sungga naugb len lainyen en eisaugb sug lusud logod ameiji dougwom. Hanoba len leijidougwo en, lendagai: Sug sud hom ogod ameiji dougwo en mesouwa aimo dau areg en ouwan dous, kaba, gini esogwesa maman gomnomnohobei? Era naroei? 19:4 Doba Yesus enara bauni len merir ucugb, endagai: Yen yecic dau areg ELOHIM en deb eisaugb gin nosohobei? Era yen yemecic dau gin ingmebmei? Anai sug ELOHIM en esinsin cinogo aimougtut, kaba, en esinsin giji hom dara gida hom dous. 19:5 Dara en en deb dag gin eisaugb lan touohob, endagai: Sug gida en audi gijohob, kaba, giji emeigtou desij mena mem toua deitero, doba en arges lan deb namcir. Hang lan lamedag hwai toua deitero, doba lan ladag mog homohob. 19:6 Sug ELOHIM eic lan deb dag homohob, kaba, emedeinyum naugb sug lusud lemedug lan daum deitero. Anai lan lamedag hwaiyero, doba lan ladag hom dous. 19:7 Sug leng Parisi len louman gini, kaba, len leijidougwo Yesus an ucugb, lendagai: Sug ELOHIM en emouwan lusud lemedug leng leicimohob daumero, kaba, dagiro Musa eic gomnomna deb naugb emenohob gina? Anai en ousa emen emjemouwer len merir an ginohob, endagai: Sug sud hom en ouwan ogod ameiji dougwo en mesouwa, kaba, en eic surad an aremeijouhw dou gida ingga toua teiteiyahabi, en emesa en dou men lusud ucugb. Sug ELOHIM en emouwan naugb lusud lemogod ameiji dougwo len mersouwero, kaba, dagiro naugb Musa eic men gomnomna dou emen emjemouwer deb naugb emen gina? 19:8 Doba Yesus ens meijouhw bauni len merir ucugb, endagai: Sug ELOHIM esinsin giji dara gida lan acgunog, kaba, en mer emogod an ingma deb danggero. Doba yen meigdoc agadgeij dougwo en mer naugb yen yogod ameiji dougwo yen meisouwer terimda. Hang Musa en emen dougwo meijen geicara ingga toua deitero, doba en ousa deisa yen an gin namcir. 19:9 Dangga yen youman dan indir an gin deigeigouhw. Gareg dau yen en ogod ameiji dougwo en mesouwa mohon deb. Hanoba en eic gida gus dag mesouwa deit, kaba, gini dag en mesirebsa dous. Doba sug en mesouwa maires edreg en, kaba, en ogod ameiji dougwo en ogdoc aremer hom gin dous. Doba aremer gus augwan ga, naro. 19:10 Sug Yesus men logodeh len louman en dag gini dou leng Parisiohob, kaba, len leimiman dau gin namcir. Hanoba len lowun en mer an gini, lendagai: Sug emen emogod ameiji dougwo emen emsouwer ogdoc sug len merires edreg emen dous, kaba, eigouhw naugb sug emen ememeic emsouwero, doba emen emeigtou augwougb terimda. 19:11 Doba Yesus enara bauni len merir ucugb, endagai: Areg yen yen gini, kaba, naugb lusud laugwanero. Doba naugb sud hom yom dau gareg ELOHIM ouci len deb naugb ginohob. 19:12 Anai ligbum, kaba, ELOHIM eic len merdoc agadgeij dou len teitei sug merim louwadan lenohob. Dara ligbum, kaba, len lemeicimero, anai len gus lehilon ucina naugb len. Hang len lemeic mesouwa. Doba ligbum, kaba, len lemouwan ara ara emata dougwo meren geicara naugb ELOHIM sug en oiharaga lusud ucugwero. Hang len lemeicim touwero. Doba len lowun lenin merdoc mes dau gin terimda. Dangga gareg dau yen men goubesa inggebga naugb en aimo areg dan den dou yen gin, kaba, en aimo gin namcir. 19:13 Sug Yesus enara dou men logodeh dag graga ouwa dou lenohob, kaba, lusud lahwan len merihir logodeh dou Yesus. Dauntoba en ob mesira se len merugt, bocuncum dou ELOHIM aga len. Doba Yesus men logodeh, kaba, len len dougwo lusud ingga, lendagai: Yen yamahwan yen meijihir aud Yesusero. 19:14 Doba sug Yesus ouman gin, kaba, en etaha len merir an, endagai: Yen yemen dougwo lenlo, doba yen yamsoho logodeh ingga naugb len len aud dani. Anai lusud gedig len merdoc arjaga, aninim dag logodeh gin, kaba, len inggang lemeinesa ELOHIM men goiharaga. 19:15 Dangga sug lusud lahwan len merihir dou Yesusohob, kaba, en ob mesira deb se len merugt. Hanoba en ocuncum dou ELOHIM, endagai: ELOHIM, ban beic geigouhw dou logodeh gini. Sug en ocuncum aga len ouwohob, kaba, en eihwededau Yordan nagama gini aud cinogo gus deit. 19:16 Doba yen youman deigeigouhw. Lona hom deit, kaba, sud hom agasa dara Yesus. Sug en edebeij enohob, kaba, en eijidougwo eni, endagai: Adehsud, ban bemens dau indan geicara geigouhw dou dan naugb dan daimo toua, dauntoba ELOHIM eic maireseb huhugb dou dan. 19:17 Doba Yesus auni en mer ucugb dou en, endagai: Ban baimo ELOHIM men gomnomna augwan asesa terimda, kaba, en emeic maireseb menau geb huhugb dou ban toues. Dangga dagiro, naugwe hang, ban beijidougwo dan an areg geigouhw naugb ban baimo gina? Anai sud hom dous eng eigouhw namcir. Len gus laugwan, isnaro. 19:18 Doba sud hom graga en eijidougwo Yesus ucugb, endagai: Dan daimo ELOHIM men gomnomna dag ara, hang en emeic maireseb huhugb dou dana? Dangga Yesus ecic moho dou en, endagai: Ban bemes lusud, Dara ban absira emebsa ligida gus, dara ban bemeiyoho, dara sug ban bos badi aremer deseino lusud, kaba, ban bemereiyara mougwa hom touwero. Doba ban bos badi augwan se geica namcir. 19:19 Dara ban bemohoiya ban abina dara ban abim lan marir touwero. Doba ban bowun banin abdoc mes arjaga deseino len terimda. Dara ban abdoc gororougb len gus, aninim dag ban abdoc gororougb banin abaga toua. 19:20 Sug sud hom graga en ouman dag gin, kaba, en enara bauwun Yesus mer an, endagai: Dan daimo ELOHIM men gomnomna augwan gini teiteiyohob. Hang aremer areg geb naugb dan deita? 19:21 Doba Yesus auni en mer ucugb dou en, endagai: Ban bouwan baimo aremer augwan edeinyum naugb sug ELOHIM eic maireseb menau geb huhugb dou ban namcir, kaba, eigouhw naugb ban bedohw aban aremougb augwan bauma aregoufu dau len gusahabi. Hanoba ban bedohw an leng merunggwereij laugwan toua. Anai sug ban beicara dag gin, kaba, aban siouwa einyana emeb se bogo naugb ban toues. Dauwohob, kaba, ban bemen naugb ban bemaimo dan terimda. 19:22 Sug sud hom godeh mes graga en ouman gin, kaba, en eihwededau Yesus dara en medoc momogo medam namcir. Anai eni mesoho mougb an men aremougb einyana medamdaha. 19:23 Sug sud hom ingga eihwededau Yesusohob, kaba, Yesus eda mer dou men logodeh, endagai: Yen youman dan indir deigeigouhw namcir. Ogom medam naugb sug sud hom mesoho mougb en einesa ELOHIM men goiharaga gini. 19:24 Dan den dou yen deit. Ogom medam dau sug sud hom en eic igdebes mamaga naugb en ei se bugwa meides. Doba naugb sug sud hom mesoho mougb en einesa ELOHIM men goiharaga, kaba, ogom medam edreg dau gin namcir. 19:25 Sug men logodeh louman dau gin, kaba, len merdoc omom an namcir. Hanoba len leijidougwo en deit, lendagai: Sug ELOHIM emeigdoc leng merisoho mougb dau meren gogom naugb emoiharaga len ucugwero, kaba, en eigdoc gara dau men gogom naugb en oiharaga en ucugb gina? 19:26 Sug Yesus ouman gin, kaba, en ei mairesi dara len. Hanoba en enara dou len, endagai: Lusud meren goubesa emedeinyum naugb ginero. Doba gini ogdoc ELOHIM enin men goubesa dous. Anai men goubesa edeinyum naugb augwan namcirohob. 19:27 Sug Yesus men logodeh louman gin, kaba, Petrus eijidougwo en an ucugb deit, endagai: Ban beiya emen gin, anai emen emarges ara ara augwan deb naugb emaimo banohob. Dangga dagiro naugb emen gina? 19:28 Dangga Yesus enara bad len merdoc mes ucugb deit, endagai: Yen youman dan indir deigeigouhw namcir. Se lona sug ELOHIM esinsin cinogo dara bogo menauwohob, kaba, Lusud Meraguna Mebin dan deigtou se maija moc gedig gogouf cucugb erbacec gini. Hang se lona ingga, kaba, yen toua yeigtou se maija moc sisa hobjerai desij dan naugb yen yogod aremer aga leng Israel meren meijouhuda sisa hobjerai gin toua. Anai yen yarges dau ara ara augwan deb naugb yaimo danohob. 19:29 Dara gareg dau yen en arges men tu deb, dara en arges dau maguner dara magtor, dara medamouwer dara medemeitor, dara mena dara mem, dara men lo toua deb, kaba, emediyebeiya dau enero. Doba ELOHIM emedug astesda dau areg graga augwan bedebeij mougwa huntun hom icira ucugb dou en. Dara maireseb huhugb aos dara dou en toues. Anai en arges dau augwan gini naugb aicira danohob. 19:30 Dangga se lona sug ELOHIM oiharaga lusud ucugb, kaba, leng ledag mebin iteitogin, kaba, leinyana len ledag mahara. Dara leng ledag mahara iteitogin, kaba, leinyana len ledag mebin se lona ingga toues.

Matius 20

20:1 Hang ELOHIM men geicara se lona sug en oiharaga lusud ucugb, kaba, aninim dag sud hom gedag mougt mera naugb men lo anggur meda. Anai en kaba, en eisa edehilon lusud se usi gedig lohwaresa se lonamenmen naugb len leicara se men lo anggur meda ingga. 20:2 Dangga hang, sug en mer aninim dara len naugb sug en eic merumsi dag perag mogo hom se lona hom dou lenohob, kaba, en arougb len, endagai: Yen yeihweda yedeicara se indan lo anggur meda ingga. 20:3 Sug igda etrij besa taibohob, kaba, en eihweda bedogod dougwo usi graga deit. Dangga sug en eiya, doba ligbum deit len leigtou se usi gedig lusud lohwaresa ingga, kaba, en arougb len, endagai: 20:4 Yen yeihweda yedeicara se indan lo anggur meda toua. Doba naugb meijen siouwa, kaba, dan demeic dou yen yaugwan aninim se mer hom dag mougwu. Dangga len toua leihweda se men lo naugb ledeicara dou en. 20:5 Sug igdabogo dara igdedeij, kaba, mougt mera graga en en dau men tu deit naugb en arougb lusud ledeicara se men lo, aninim dag en arougb len gus se lonamen dara sug igda esa taiba graga touohob. 20:6 Sug deinyor igda obsaresa, kaba, en en dau men tu naugb edogod dougwo us graga deit. Dangga sug en eiya, doba lusud aibibra len leigtou augwougb se us graga debaba, kaba, en esa mer debin len, endagai: Yen yeigtou sugin se lona hom augwougb anara? 20:7 Doba len lenara launi en mer ucugb, lendagai: Emen emeigtou sugin augwougb, anai sud hom ingma emacgeij emen naugb emen emeicara dou enero. Dangga mougt graga en arougb len, endagai: Dag gin, kaba, yen toua yeihweda naugb yen yedeicara se indan lo anggur meda toua. 20:8 Sug deinyor lobohob, kaba, mougt mera enara dou sud hom gesedougwo men lo anggur meda graga, endagai: Ban beija lusud gedig len leicara se longga laugwan naugb ban bohw merumsi astesda dau len. Bebiji dara leng leicara dau sug igda obsaresa ucugb debin leng leicara se lonamen gini. 20:9 Dangga sug leng leicara dau sug igda obsaresa len len ledebeij sud hom gesedougwo lo gragohob, kaba, en ohw merumsi dag en eic aregoufu perag mogo hom dou astesda len laugwan. 20:10 Dangga hang, sug leng leicara dau sug acgunog len ledebeij mougt gesedougwo lo graga, kaba, len loudesa en eic merumsi edreg dau perag mogo hom dou len. Anai len leicara edreg dau leng leicara se igda obsaresohob. Dobnaro. Sud hom gesedougwo lo graga, kaba, en eic merumsi perag mogo hom dou len toua. 20:11-12 Sug len leic dau en mesira, doba emedregero, kaba, len lenara ucucugb an mougt mera gedig en men lo gini, lendagai: Len gedig leicara dau sug igda obsaresa, kaba, len leicara se ijam hom dous. Doba emen, kaba, emen emeicara emug erij medam namcir. Dara igdes ogod emen toua. Dangga dagiro, Adehsud, ban bohw emen emaugwan emumsi aninima? 20:13 Doba mougt mera en enara bauni ucugb dou sud hom dau len ingga, endagai: Insiya, dan demeicara dag dan demesenagan banero. Anai nanan nagod an gin debohob, dag dan deic siouwa perag mogo hom edeinyum ban abumsi se lona hom dou ban dous. 20:14 Dangga ban beic ban abumsi perag mogo hom gini, kaba, ban beihwedanda. Doba naugb leng leicara dou dan dau igda obsaresa gini, kaba, dan indoc agug naugb dan deic perag mogo hom dou len toua, aninim dag dan deic dou banohob. 20:15 Anai gomnomna hom emen dougwo ginero. Doba dan deic indan aregoufu gini dou lusud aimo dau areg dan douwan dou len dous. Sug dan indoc edag riseh an len dag ginohob, kaba, dagiro, naugwe hang, ban benara ucucugb dou dana? Ban bediseij len an ginei? 20:16 Dangga se lona sug ELOHIM oiharaga lusud ucugb, kaba, aninim dag gin toua. Anai leng leicara se igda obsaresa, kaba, len ledag len mebin. Doba leng leicara se lonamen, kaba, len ledag len mahara dous. 20:17 Sug Yesus dara men logodeh leisaugb ledebeij deinyor Yerusalemohob, kaba, en eija men logodeh merug sisa hobjerai led debinim hom. Dangga sug len led debinimohob, kaba, en esulou len se ucina mogumsi ingga deit, endagai: 20:18 Yen youman dan indir deigeigouhw namcir. Anai cum, kaba, maman madebeij Yerusalem ingga. Sug maman madebeij cinogo ginohob, kaba, lusud lemohw Lusud Meraguna Mebin dan debsa gembala gesa taij meren mougtir, dara leng meru ouforoho se Musa men gomnomna len merisira toua. 20:19 Dangga sug len logod aremer gomom deinaugb dan namcirohob, kaba, len lohw dan debsa sadodor dau lugmahara merisira deit, naugb len leic dan lacecim dara labosbos dan. Hanoba len letob dan dara sogo salib toua. Doba lona hwai debin gin, kaba, ELOHIM eigdoumesa dan dau leng lomom ucugb deit touohob. 20:20 Sug Yesus esulou men logodeh dag gragohob, kaba, Sebedeus mesouwa en en aud Yesus dara en meisi lan toua laicira en. Sug len ledebeij Yesusohob, kaba, lan marim en ecgun mohorbrida badedeij cinogo deseino Yesus naugb en acgeij aremer hom dau eni. 20:21 Dangga Yesus eijidougwo eni, endagai: Daneh, ban bacgeij ara dau dana? Doba gida ingga, kaba, en auni dou Yesus, endagai: Se lona sug ban boiharaga lusud ucugb, kaba, dan douwan ban beigdoumesa dan indisi lahwai gini lan maroho naugb homa, kaba, en eigtou dig ban absira misen. Doba homa, kaba, en eigtou dig ban absira metigi. Dara ban bos dangga dou dan deb iteitogin toua. 20:22 Doba Yesus etaha en mer an, endagai: Yen meiju emaijero namcir an areg yen yacgeij dau dan gini. Yen toua yaiyan meigdocesem naugb yen yeic yen meijug erij, aninim dag ELOHIM esedeb naugb dan deic gin touohobei? Hang len ingga len lousa deisa en mer dedemeda an gini, lendagai: Emen emaugwan emesedeb emdoc mes naugb emaimo dangga touohob. 20:23 Dangga Yesus ousa deisa len merir an gin toua, endagai: Gini asesa. Anai cum, kaba, yen yemaimo ucina mog erij gin toues. Doba eisaugb aremer gedig sud hom en eigtou dig dan insira misen dara insira metigi, kaba, dan indoho emagas emedeinyum naugb dan demouci gin dou yenero. Doba naugb lusud gedig len leigtou dig dan insira misen dara dan insira metigi gin, kaba, dan Indina ELOHIM enin eng emesedeb naugb gin dous. 20:24 Sug Yesus men logodeh merug sisa, len louman dangga, kaba, len merdoc esrougb medam an len mersi lahwai graga namcir. 20:25 Doba Yesus, kaba, en eija men logodeh laugwan len len aud eni naugb en en dougwo len eisaugb aremer graga. Sug len ledebeij enohob, kaba, en esulou len, endagai: Yen yecinaga dau lugmahara meren mougt mera medam meren geicara dou meren logodeh dag len leic mog erij dou len terimda. Dara lugmahara meren lusud gedig len meroho agas, kaba, len leigdoumesa gogom aingma aingma debin meren logodeh terimda toua. 20:26 Doba meijen geicara doum iteitogin deit, kaba, susugb dau gin augwan namcir. Dangga gareg dau yen gini en ouwan dag en moho agas deseino yen, kaba, en owun enin moho bedag meijen godeh gaugdoho deseino yen gus yaugwan. 20:27 Dara gareg dau yen en ouwan en moho eb taiba deseino yen yaugwan, kaba, en owun enin moho bedag meijen sogougb deseino yen yaugwan toua. 20:28 Aninim dag Lusud Meraguna Mebin dan demouwaden dau bogo aud yen naugb yen yemeicara dou dan touwero. Doba dan douwaden dau bogo gini naugb dan dowun dan indoho dedag sogougb naugb lusud se cinogo gin augwan. Dara dan dohw dan indugt naugb dan dancoho aga len leinyana dau sesar men gogom augwan gin toua. 20:29 Sug Yesus dara men logodeh len len dau cinogo Yeriko aud Yerusalem deit, kaba, lusud leinyana leila ucan en toua. 20:30 Doba sug len lagunya dau Yeriko ginohob, kaba, len leiya, doba lasud lahwai gedig lan mairires mougb lan laigtou se ucina mebera. Dangga sug lan lauman dag Yesus eraga ucina irir sug lan laigtou ingga, kaba, lan laiyagarij en, landagai: Daud Medebeito, ban abdoc eineg an aman gini. 20:31 Doba lusud leinyana gedig len leila ucan Yesus ingga, kaba, len letaha lan marir dougwo, lendagai: Maijirero. Doba lan lasa marir naugb laiyagarij edreg namcir, landagai: Daud Medebeito, ban abdoc eineg an aman gin toua. 20:32 Sug Yesus ouman lan marir, kaba, en esa. Hanoba en eija lan lan aud eni. Sug lan ladebeij enohob, kaba, en eijidougwo lan, endagai: Yan yauwan dag dan deic ara dou yana? 20:33 Dangga lan launi dou en, landagai: Adehsud, aman amouwan naugb ban besga aman amiresi, dauntoba aman ameiya lo asesa ucugb deit. 20:34 Sug Yesus ouman dau gin, kaba, en medoc eineg an lan medam namcir. Hanoba en ou mesira bos lan mairiresi. Sug en os lan mairires mesohob, kaba, lan mairires esga naugb lan laiya lo asesa ucugb deit. Dau, kaba, lan laicira en namcir.

Matius 21

21:1 Sug Yesus dara men logodeh len ledebeij deinyor Yerusalemohob, kaba, len ledebeij cinogo hom, moho Bedpage, geb se men maga moc deinyor menmougb, moho Saitun Meda. Dangga Yesus arougb men logodeh lahwai naugb lan laino en men aud cinogo hom geb ino ingga. 21:2 Hanoba en enara dou lan, endagai: Yan yaihwedig cinogo hom geb ino yan maijin ginda. Sug yan yadebeij inegohob, kaba, yan yameiya keledai gida hom gedig len lecba besan meh deinyor sungga debohob. Yan yasga aumaga an lahwas, kaba, yan yab mem aisa meh toua hwas dou dan sugini. 21:3 Doba sug sud hom eijidougwo yan icira gin, kaba, yan yauni dou en, yandagai: Aman mougt mera en ouwan lan. Hang aman amarei dou enda. Sug en ouman dag gin, kaba, en amsoho dou yan dedemeda naugb yan yameb lan aud dan toues. 21:4 Doba areg Yesus arougb lan an gin, kaba, esogwa deisa areg ELOHIM en arougb leng lesai en moro an deb sug nosa touohob, endagai: 21:5 Yen yen dou leng se cinogo Sion, yendagai: Yeng se Sion yen youman deigeigouhw. Anai se lona hom, kaba, meijen mougt mera medam en en aud yen naugb en eigdoc yen dau areg gogom geb debin yen yaugwan namcir. Dara en emeigdoumesa enin moho emagas deseino yen touwero. Doba en eisa keledai goho ara gogom men meh meijaba medgomori aud yen dous, anai en medoc arjaga namcir. 21:6 Sug Yesus men logodeh lahwai graga lan lauman dau areg Yesus arougb lan an ginohob, kaba, len laihweda laimo asesa dag areg Yesus en dou lanohob. 21:7 Hanoba lan lab keledai mem an meh lahwas aud Yesus toua. Sug lan ladebeij enohob, kaba, lan lag maran sansun ingma dau lan naugb lan lau keledai an meh meijaba graga lan maridgomori toua. Sug lan lau deinaugwohob, kaba, Yesus aimo deisa naugb en eihwedan se Yerusalem. 21:8 Dara lusud leinyana gedig len loucimdeb naugb en ingga, kaba, len leg meren sansun ingma dau len naugb len lau ucina ino deb naugb en. Dara ligbum, kaba, len leigteh sogo mesira an meh naugb len lau ucina deinaugb keledai sug eraga toua. 21:9 Dara lusud gedig len leino Yesus men. Dara lusud gedig len laimo ucan Yesus dig medigo, kaba, len laugwan lebiji naugb lesijaresa ELOHIM an en, lendagai: ELOHIM, ban besedougwo Daud Medebeito gini dau areg gogom augwan namcir. Dara ban beic geigouhw dou en toua terimda. Anai en en se Adehsud, ban aboho, naugb emenohob. Dangga hang, emen emagahugouhw an ban gedig ban beigtou se bogo geb taiba dau augwan gin namcir toua. 21:10 Dangga sug Yesus einesa se cinogo Yerusalem, kaba, lusud se cinogo ingga len laugwan merir eisa medam. Hanoba len leijidougwo lusud gedig len leila ucan Yesus ingga, lendagai: Garenggina? 21:11 Doba len launi dou len, lendagai: Sud hom gin, kaba, en en naugb en esai ELOHIM moro dou maman. En moho dag Yesus, dau cinogo Nasared, se leng Galilea meren hancob. 21:12 Sug Yesus einesa ELOHIM men igtiohob, kaba, en ocirma leng lohwara dara leng loumara acec ELOHIM Men Tuari maga len laugwan dau. Dara leng leic aregoufu laocagem ucucugb, kaba, en eineg meren boromei an meren aregoufu ingga augwan bobsara baisoboro. Dara leng lohw bohobei, kaba, en eigdoumesa meren maija moc bos badro dau len toua. 21:13 Hanoba en esa mer debin len toua, endagai: ELOHIM en og deb se Surad Injil Meb Mohon deb nosohob, endagai: Indan tu gini, kaba, dan douwan lusud leija dag tu locuncum se dous. Doba yen, kaba, yen yeperwei tu gini dag igdohos mes gedig lusud lecgoneh len merug dau lusud sug len lesma meren aremougb dau lenohob. 21:14 Doba sug eni moongga se ELOHIM men igtia ginaba, kaba, leng meriresmougb dara leng merohora agaim, len len aud en. Hang en eic geigouhw dou len gin toua. 21:15 Doba sug gembala gesa taij meren mougtir dara leng meru ouforoho se Musa men gomnomna len leiya dau Yesus men ganusbus gini, dara len louman dau logodeh sug len lesijaresa ELOHIM dag en eseyeiyo Daud Medebeito gini dau areg gogom namcir toua, kaba, len merdoc mog mog an Yesus icira gin namcir. 21:16 Hanoba len lesa merir debin Yesus an gini, lendagai: Ban bouman dau logodeh sug lesijaresa ELOHIM an ban dag bani Daud Medebeito ginohobei? Dagiro naugb ban bamsoho lena? Ban bemen dougwo leneroei? Doba Yesus ousa len merir, endagai: You, dan douman len merir an ginohob. Doba augwan gini aimo dau areg sud hom en erba ugwaremer an gin se Surad Injil Meb Mohon debohob, endagai: ELOHIM ban besedeb logodeh dara logodeh mahaniheni naugb len lagahugouhw an bani, dara len merdoc hom dous. Yen yemecic dau aiyad ginohobei? Naro, yen yecic dau gin touohob. 21:17 Sug en enara bauni dou len dangga dauwohob, kaba, en eihwededau len dig cinogo Betania naugb en edatou se loba hom sungga. 21:18 Sug lonamenmen, kaba, Yesus eisa bec mohora dau Betania ucugb dig Yerusalem deit. Doba sug en ec gin, kaba, sireben namcirohob. 21:19 Dangga sug en eiya sogo hom, moho ara, esa desij ucina mebera, kaba, en eihwedaud naugb en edec mera. Doba sug en edesa deinyor meiyohob, kaba, en emeiya mera hom touwero. Doba meh mogud dous. Dangga hang, en ouwara dougwo sogo ara ingga, endagai: Ban bemera mera deitero terim beb huhugb namcir. Sug en ouwara dougwo dangga inegohob, kaba, sogo graga agac dedemeda namcir. 21:20 Sug Yesus men logodeh len leiya, doba sogo ara graga en agac abeba len meriresi danggohob, kaba, len lomi dau gin namcir. Hanoba len leijidougwo Yesus an gini, lendagai: Ban beic ara dagiro, hang sogo ara gini emagac dedemeda namcir gina? 21:21 Doba Yesus auni ucugb dou len, endagai: Sug yen yod meijina debsa ELOHIM an men goubesa hom namcir, dareg yen yemeija meijuwesa men goubesa hom gin touwero, kaba, yen yebara dag dan deicara dou sogo ara ingga toua. Dara gin dousero. Doba meijen goubesa edeinyum naugb sug yen yenara dou menmod gin naugb en eisa dau mohw terimda bedobsaresa se dum mohu namcir. Hanoba en aimo debin yen meijir asesa dangga toua. Yen youman dan indir deigeigouhw namcir. Anai augwan gini asesa dag misen namcir. 21:22 Dangga hang, areg yen yacgeij dau ELOHIM dareg yen meigdoc ebdebin an en namcir, kaba, en emeic dou yens. 21:23 Sug Yesus enara dou men logodeh dag graga ouwohob, kaba, en ekirsa terim beinesa ELOHIM men igtia ucugb deit. Hanoba en esai ELOHIM moro dou lusud deit. Sug en ens aremeijouhw dou lusudohob, kaba, gembala gesa taij meren mougtir dara leng Yahudi meren mougt mera len len aud en naugb lehin merireseni. Dangga sug len ledebeij enohob, kaba, len lenara dou en, lendagai: Ban beicara graga augwan, kaba, ban bos bad ara? Era gareng arougb ban naugb gina? 21:24 Doba Yesus auni dou len, endagai: Dan toua deijidougwo yen dau indan hom naugb yen yauni dou danahabi. Sug Yohanes ebedbed dou lusud dara en ogun len se duhu debin gin toua, kaba, gareng arougb en naugb gina? ELOHIM se bogoei? Era lusud se cinogo gin eng larougb en an gin dousei? Sug yen yens meijouhw dau areg dan deijidougwo yen an gin asesa dou dan, kaba, dan toua demens meijouhw asesa dau areg yen yeijidougwo dan an graga dou yen toua. 21:25 Sug mougtir len louman gin, kaba, len lococim lendagai: Sug maman mauni dou en dag ELOHIM eng eigdoumesa Yohanes moho naugb ginohob, kaba, en auni dou maman endag, dagiro, naugwe hang, yen meigdoc emebdebin an en touwero? 21:26 Doba sug maman mauni dou en dag lusud eng larougb en dous, kaba, maman mahau dau lusud sugini meren geicara dou maman toua. Anai len louma debin en edag sud hom gesai ELOHIM moro dou lendaha. 21:27 Hang len lemauni dou Yesus, endagai: Emen ememecinaga endag gareng arougb Yohanes naugb en ogun lusud se duhu gin touwero. Dangga Yesus auni dou len, endagai: Sug yen yemens dau sud hom garougb Yohanes gini en moho dou danero, kaba, dan toua demens dau sud hom garougb dan naugb indan geicara augwan gini en moho dou yen touwero. 21:28 Sug Yesus enara dou mougtir dag graga ouwohob, kaba, en eic gainyenara hom agod len deit. Hanoba en enara dou len, endagai: Sud hom en meisi lahwai, kaba, en edenara dou meisud, endagai: Irogini, kaba, dan douwan ban bedeicara se indan lo anggur medahabi. 21:29 Doba meisud ingga, kaba, en ohoiya mena mer an gini, endagai: Dan demouwanero. Doba cum, kaba, en medoc momogo an enin mer graga, kaba, en eihwedesa se mena men lo anggur meda gragada. 21:30 Sug meisud ohoiya mena merohob, kaba, mena edenara dou meis godeh deit, endagai: Irogini dan douwan ban bedeicara se indan lo anggur medahabi. Dangga meis godeh en ousa deisa mena mer, endagai: Adehsud, dan demeihwedes. Doba en ousa mena mer baunun dangga dous. Anai en emedeicara se mena men lo mougwa hom touwero. 21:31-32 Sug Yesus eic gainyenara dag graga dou lenohob, kaba, en eijidougwo len ucan deit, endagai: Yen youdesa dagiro dau meisi lahwai gini, kaba, gareng en aimo mena mer dag misena? Doba gembala gesa taij meren mougtir, dara leng Yahudi meren mougtir len launi dou en, lendagai: Meisud. Sug len launi dangga dou Yesusohob, kaba, en esulou len debin gin ucan deit, endagai: Yen youman dan indir deigeigouhw namcir. Anai Yohanes Gogun Lusud Se Duhu, kaba, en en aud yen sug nosa naugb en esai areg asesa ELOHIM enin medoc mes dou yenohob. Doba yen yemouwan naugb yemaimo en mer an touwero. Doba lusud gedig len lacgeij lusud naugb len lohw cinogo dou leng Roma, dara ligida gedig len lohw lenin meraga aibibra dou ligiji gus, kaba, len gini len louman Yohanes mer an. Dara len laimo namcir toua. Dangga len gin eng, kaba, len leino yen meijin naugb ELOHIM oiharaga len. Doba dau len graga meren geicara dag len lesga meren sesar dara lahau an dougwo, kaba, gini emeic yen meigdoc emerleij aud gin touwero. Doba yen yaiyan yen meigdocesem namcir. Dara yen meigdoc emebdebin an areg Yohanes ebedbed dou yen touwero. Doba yen meigdoc agadgeij an en mer namcir. Augwan gini asesa dag misen namcir. 21:33 Sug Yesus auni dag graga dou mougtir ouwohob, kaba, en enara dou len deit, endagai: Yen youman deigeigouhw, anai dan deic gainyenara hom debin gin dou yen deitahabi. Sud hom mougt mera medam en arougb men lusud naugb len les anggur meda mogud se men lo hom. Sug len les bouwohob, kaba, en arougb len naugb len len liga dougwo dara log igdahab mes hom naugb sug len losugb anggur mohwesa. Dara en arougb len naugb len lohud boromei gagas geb taiba hom naugb sug len lesedougwo anggur meda augwan toua. Dangga sug len lesinsin lo augwan gin besohob, kaba, en og lo ingma dou len gus, dauntoba len lesedougwo men ingma deb naugb en toua. Dauwohob, kaba, en eihweda se cinogo gus dau len toua. 21:34 Dangga sug edebeij igda gehin bohoserohob, kaba, en arougb men sogougwir aud leng lesedougwo men longga naugb len lec men mera nagama ingma dou endahabi. 21:35 Doba leng lesedougwo mougt mera men lo deb graga, kaba, len lagaigeij sogougwir gini. Hom, kaba, len logod en. Hom, kaba, len leic gomom dou en. Dara hom, kaba, len led en dara igdahab toua. 21:36 Dangga mougt mera graga, kaba, en esa men sogougwir einyana medam edreg dau sogougwir gacgunog aud len deit. Doba leng lesedougwo longga, kaba, len leicara aninim dag leng leino graga an len laugwan toua. 21:37 En esa len. Dobnaro. Hanoba en esa enin meisi mohora hom ucan dou len deit. Anai en oudesa dau sug en esa enin meisi gin aud len, kaba, len lemeic gecgu dou enero. Doba len lemeigdoumesa en moho namcires. 21:38 Dobnaro. Anai sug leng lesedougwo lo graga len leiya, doba mougt mera meis misen en en aud len dangga, kaba, len lococim, lendagai: sud hom gin, kaba, cum, en mena ogugwo mecigbougb geb se lo augwan dou eni. Dangga hang, yen yen naugb maman maic gomom dou enda, dauntoba mecigbougb augwan gini eb dou maman dous. 21:39 Dangga sug len lagaigeij enohob, kaba, len lohugouhw en dig liga medigo. Hanoba len ledeic gomom dou en deb sungga toua. 21:40 Sug Yesus eic gainyenara dag gin dou mougtir bouwohob, kaba, en eijidougwo len ucan deit, endagai: Yen youdesa dagiro? Sug mougt mera naugb lo graga en ecicugwen, kaba, en eb ara dou leng lesedougwo men lo gina? 21:41 Dangga mougtir len launi ucugb dou en, lendagai: Sug mougt mera en ecicugwen, kaba, en eic gomom dou leng merug mog gini dag misen namcir. Hanoba en edohw men lo gini dou leng merdoc aninim dara eni. Dauntoba edebeij igda gehin gohoserohob, kaba, len ledug men mera nagama ingma ucugb dou en toua. 21:42 Sug mougtir launi dag graga dou Yesusohob, kaba, en enara bauwun len merir an gini, endagai: Yen youman dan indir an areg dan den dou yen gin deigeigouhw namcir. Anai yen yemedug ELOHIM men mera ingma ucugb dou enero. Hang en emoiharaga yen toua deitero. Doba en edoiharaga leng ledug men mera ucugb dou en dous. 21:43 Dara lusud lenara eisaugb aremer gini deb se Surad Injil Meb Mohon deb sug nosa touohob, lendagai: Igdahab hom areg leng lohud tu lerbahaba deb, kaba, maman Adehud ELOHIM enin eng eigdoumesa dag buc mandeij ucugwohob. Dangga hang, maman maimiman dau men geicara hom gin namcir toua. Yen yecic dau gin touohobei? Era yen yemecicbumei? Naro, yen yecic dau augwan gini dag misen touohob. 21:44 Dangga gareg dau yen en etohob igdahab gin, kaba, en obsara mor ohurohw namcir. Dara sug igdahab obsara bakebin en, kaba, en mor mor namcir toua. 21:45 Sug gembala gesa taij meren mougtir dara leng Parisi len louman gainyenara homoi gin, kaba, len lecinaga dag Yesus enara ceg ceg lenohob. 21:46 Dangga hang, len lehilon ucina naugb sug len lagaigeij en. Doba len lahau dau lusud leinyana. Anai len gin, kaba, len leigdoumesa Yesus moho dag eni sud hom gesai ELOHIM moro dou lenohob.

Matius 22

22:1-2 Sug Yesus eic gainyenara dau leng lesedougwo lo dag graga dou leng mougtir bouwohob, kaba, en eic gainyenara hom ucan dou len deit, endagai: Edebeij lona sug ELOHIM oiharaga lusud ucugb, kaba, aninim dag sud hom mougt mera medam en ougwan ared debin en meisi sug en eic mesouwa. 22:3 Sug en esedebohob, kaba, en arougb men sogougwir, endagai: Gareg dan dos dou len naugb sug len letara dara dan indisi sug nosohob, kaba, yen yedahwan len laugwan aud dan sugini. Dangga men sogougwir ingga len leihweda ledebeij lenohob, doba len ingga lemenero. 22:4 Dangga mougt mera medam arougb men sogougwir ingma ucan deit, kaba, en esulou len, endagai: Yen yecicugb aud leng graga deit naugb yedenara yedad merdoc mes, yendagai: Mougt mera medam ougwan ared augwan bouwa deb namcirohob. Anai en edgwa sapi giji dara aremeta gus gus gedig merij moto moto ingma dara toua debohob. Hang yen yen naugb maman maugwan matara aninim debin dan indisi sug en eic mesouwa gini. Anai dan desedeb augwan edeinyum deb namcirohob. 22:5 Dangga men sogougwir ingga len leihweda ledebeij len deit. Doba len lohoiya sogougwir ingga len merir an gin namcir. Hanoba ligbum len leihweda ledes meren lo. Dara ligbum, kaba, len leihweda naugb ledohwara. 22:6 Doba ligbum, kaba, len lagaigeij mougt mera men sogougwir gini. Hanoba len logodir dara leic gomom dou len toua. 22:7 Sug mougt mera medam ouman dau gini, kaba, en medoc esrougb medam an len namcir. Hanoba en arougb men sadodor leihweda naugb ledeic gomom dou len. Dara len lasaih meren cinogo toua mor mor namcir. Anai len leic gomom dou men sogougwir leinyanohob. 22:8 Sug mougt mera medam men sadodor laimo en mer an ginohob, kaba, en arougb men sogougwir gus deit, endagai: Dan dougwan ared debin dan indisi sug en eic mesouwa, kaba, augwan meij mogudohob. Doba leng dan dos dour nosa gini, kaba, meren geicara ecgu namcir. Dangga emedeinyum naugb len lemetara desij dan touwero. 22:9 Hang yen yemeihwedaud len deitero. Doba yen yeraga ucina gouji augwan dougwo lusud gus gus dous. Gareg yen yagaseni, kaba, yen yen dou en, yendagai: Emen mougt mera medam ougwan ared debin en meisi sug eic mesouwohob. Hang en emacgeij ban ben naugb bedetara desij en toua. 22:10 Sug men sogougwir gini laimo debin en mer naugb len leraga ucina gouji augwan dougwo lusudohob, kaba, len louci gareg len lagaseni dau leng merdoc arjaga dara leng merug mog len laugwan debinim hom. Dangga dimei letaresa atij an len laugwan namcir. 22:11 Doba yen youman deigeigouhw. Sug mougt mera medam einesa se dimei ingga naugb en edeiyer, kaba, en eiya sud hom, doba en emeg sansun leicim gin menero. 22:12 Dangga hang, en eijidougwo sud hom gini, endagai: Insiya, aban sansun naugb laicim gin, inggiro? Ban beinesa sugini augwougb, anara? Doba sud hom ingga, kaba, en eigtou dag osum namcir. 22:13 Dangga mougt mera medam arougb men sogougwir, endagai: Yen yahud sud hom gini mohora dara mesira hwas darem. Hanoba yen yerba en se lobeigbogo mes namcir. Sungga, kaba, en eb medam dara eg mogta terimda. 22:14 Sug Yesus eic gainyenara dag graga dou len bouwohob, kaba, en ens meijouhw dau gin ucan dou len deit, endagai: Dangga hang, ELOHIM eija len leinyana naugb sug len letara dara enohob. Doba en ouci hom yom dau len dous. Anai leng hom yom gin, kaba, len leg sansun naugb laicim ginohob. Doba len gus, kaba, len lohoiya en mer namcir. 22:15 Sug Yesus eic gainyenara dag graga ouwa dou leng mougtirohob, kaba, leng Parisi leihwededau en naugb ledohw meruwedoum, dauntoba sug len lerba mohoisa en. Anai len louwan dau sug en auni didi, kaba, enin mer gini edag gogomes naugb enin toua. 22:16 Hanoba len larougb lenin meren logodeh. Dara lusud gedig len leigdoumesa Herodes en moho naugb len lenara lahahumohumesa Yesus. Dangga sug len ledebeij Yesusohob, kaba, len larges merir merij dou en, lendagai: Adehsud, emen emecinaga ban bemereiyara dou lusudero. Doba ban benara misen dou lusud laugwan terimda. Dara ban bemesi lusud meroho agas emedreg dau lusud meroho eb tainya touwero. Doba ban bens dau ELOHIM men ucina dou len laugwan aninim se geica dou len dous. 22:17 Dangga hang, sug maman maohw cinogo dou leng Roma, kaba, maman maimo areg asesa ELOHIM men gomnomna dag misenohobei? Era maman madreg dau en mer ginohobei? Ban bens banin abdoc mes asesa dou emenahabi. 22:18 Doba Yesus ecinaga len lehilon ucina gecgu naugb en dous. Dangga hang, en esa mer debin len, endagai: Yen meigdoc dag hwai namcir, anara? Anai areg yen yeijidougwo dan an gin, kaba, dag yen yainyen dan dous. 22:19 Yen yens aregoufu gedig yen yeic dou mougt mera medam dau leng Roma naugb yen yohw cinogo dou danahabi. Sug Yesus enara gouji dou len danggohob, kaba, len lens aregoufu mogo hom dou en beiya. 22:20 Sug en eiya aregoufu ginohob, kaba, en eijidougwo len deit, endagai: Gareng mena dara en moho geb se gina? 22:21 Doba len launi dou en, lendagai: Leng Roma meren mougt mera medam eng mena dara moho inggeb se ingga. Dangga Yesus auni dou len ucugb, endagai: Areg mougt mera gin men, kaba, yen yeic dou eni. Doba areg ELOHIM men, kaba, yen yeic dou eni toua. 22:22 Sug len louman gin, kaba, len leimiman dau gin namcir. Hanoba len leihwededau en toua. 22:23 Se lona sug leng Parisi meren logodeh len lainyen Yesus dag graga dauwohob, kaba, leng Saduki merug hosa len toua len aud en naugb len leijidougwo en eisaugb leng leisa ucugb dau lomom. Doba gini dag len lainyen en toua. Anai len loudesa dag lusud lemeisa dau gomom ucugb deitero, doba lomom namcir. 22:24 Dangga sug len ledebeij Yesusohob, kaba, len lenara dou en, lendagai: Adehsud, Musa arougb emen se men gomnomna dau sug sud hom maguna en omom dau mesouwa, doba lan lameic marih hom touebma, kaba, magto geiseni eic maguna mesouwa ingga deit. Dauntoba sug lan laic marih, kaba, lan marih gini es maguna moro deb. 22:25 Dangga sug nosa, kaba, sud hom en mehir ligiji mogud merug senggai merugwengga desij emen. Meis eng sud, kaba, en eic mesouwa. Doba sug en omom dau en sug lan lameic marihebma, kaba, en eic mesouwa dou magto geiseni naugb en eic dag mesouwa deit. 22:26 Dara eng gedig hwai gin toua en omom dau sug lan lemeic merihebma. Dangga magto mogumsi geisu lan, kaba, en eic en deit. Doba en toua omom dau en sug lan lameic marih touebma. Gini eb naugb merug senggai graga len laugwan leic gida hom gini. Doba len laugwan lomom teitei dau en namcir. 22:27 Sug len laugwan lomom dau enohob, kaba, gida hom gin toua omom ucan len. 22:28 Sug leng Saduki lenara dag gin dou Yesusohob, kaba, len leijidougwo en ucan deit, lendagai: Edebeij lona sug lusud leisa dau gomom ucugb, kaba, gareg dau len gin eng emeic gida gin deita? Anai len laugwan lougb dag mersouwohob. 22:29 Doba Yesus etaha len merir an gini, endagai: Yen yauwam an didi, anara? Yen yemecinaga dau ELOHIM men mobisamougb dara areg en og se Surad Injil Meb Mohon deb touebmei? 22:30 Anai se lona sug ELOHIM eigdoumesa lusud dau gomom ucugwohob, kaba, len lemeicim deitero. Doba len ledag malaikad se bogo dous. 22:31 Dara aremer eisaugb lusud leisa dau gomom, kaba, yen yemecic dau areg ELOHIM enara se Surad Injil Meb Mohon eisaugb gini mougwa hom touebmei? 22:32 Anai en enara se Surad Injil Meb Mohon gin deb nosohob, endagai: Dani Abraham, Isag, Yakub meren ELOHIM. Sug ELOHIM enara dangga deb nosohob, kaba, gini ansins dag len gin merires inggebga naugb lusud laugwanohob. Anai en emedag leng lomom meren ELOHIM enero, doba en edag leng merireseb meren ELOHIM dous. 22:33 Sug lusud louman dau areg en en dou leng Saduki gin, kaba, len leimiman dau gin namcir. 22:34 Sug leng Parisi louman, doba leng Saduki len leigtou dag losum naugb Yesus mer namcirohob, kaba, len toua len len naugb loucimdeb dara en toua. 22:35 Hanoba sud hom dau len en mou ouforoho se Musa men gomnomna, kaba, en eijidougwo Yesus naugb ainyen en toua, endagai: 22:36 Bani sud hom abu ouforoho naugb ban bens aremeijouhw dag misen dou lusud. Dangga hang, ban bemens dau Musa men gomnomna hom gedig moho eb taiba dau men gomnomna gus augwan asesa dou emenahabi. 22:37 Dangga Yesus auni dou en, endagai: Yen meigdoc gororougb meijen Adehsud ELOHIM dara yen meigdoc augwan, dara yen meijireseb augwan, dara meijen gauwamara augwan toua. 22:38 Gomnomna hom gin, kaba, edag meiyo. Dara en moho eb taiba augwan namcir. 22:39 Dara gomnomna hom deit aninim dag meiyo gini men meijouhw, dag gini: Yen meigdoc gororougb len gus aninim dag yen meigdoc gororougb yenin toua. 22:40 Gomnomna hwai gin, kaba, lan maroho eb taiba naugb oiharaga areg Musa en og deb se men surad nosa. Dara areg leng lesai ELOHIM moro nosa len log deb se meren surad augwanohob. 22:41 Sug Yesus en auni dou leng Parisi dag graga ouwohob, kaba, en toua eijidougwo len ucugb deit. Anai len laugwan merugwengga desij enaba. Hanoba en eijidougwo len, endagai: 22:42 Yen youdesa dagiro eisaugb sud hom gedig en eigdoc lusud dau meren gogom augwana? Eni gareng medebeito ena? Doba len launi dou eni, lendagai: Sud hom ingga, kaba, eni Daud medebeito. 22:43 Dangga Yesus eijidougwo len ucan deit, endagai: Sug sud hom eni Daud medebeito, kaba, dagiro hang, Daud eigdoumesa en moho dag men Adehsuda? 22:44 Anai Mena Gogoufu arautut Daud naugb en erba ugwaremer an sud hom gin deb sug nosohob, endagai: Maman Adehsud Geis Huhugb en enara dou indan Adehsud, endagai: Ban beigtou dig dan insira misen naugb ban bedag mougt mera medam desij dan toua. Dara ban beigtou desij dan dag gini, terimda dan dowun aban moc augwan leb tainya se aban abohotimei namcir. 22:45 Dangga hang, sug Daud eigdoumesa sud hom gin dag men Adehsudohob, kaba, dagiro, naugwe hang, eni dag Daud medebeito gina? 22:46 Doba sud hom ingma dau leng Parisi ingga, kaba, en emauni dau areg graga hom ucugb dou Yesus touwero. Dara dau lona ingga, kaba, len lemeic merus naugb len lemeijidougwo Yesus an ara ara hom toua deitero.

Matius 23

23:1 Sug Yesus en eijidougwo leng Parisi dag graga ouwohob, kaba, en esulou lusud leinyana, dara men logodehir dougwo sug len laimo leng Parisi meren geicarero, endagai: 23:2 Leng meru ouforoho se Musa men gomnomna dara leng Parisi, kaba, len meroho edeinyum naugb sug len lens dau Musa men gomnomna meijouhw asesa dou yenohob. 23:3 Dangga areg len lens dou yen, kaba, yen yaimo dara yen yesogwesa len merir an namcir toua. Doba meren geicara, kaba, yen yemeicara yemaimo hom touwero. Anai len lens dou yen dangga. Doba lenin meren geicara, kaba, emaimo hom touwero. 23:4 Hang areg len lens moho aingma aingma debin gin dou lusud toua naugb sug len laimo, doba lenin, kaba, mesira gurei emos aguci medam geb debin lusud gin mougwa hom touwero. 23:5 Dara meren geicara augwan, kaba, dag eb ainyes dou lusud, dauntoba len leimiman len an gin dous. Dangga sug len lesinsin biruwa dara aumaga an ELOHIM en mer naugb sug len lahud len mersdemaga dara lagacgec len merisira metigi, kaba, len lemesinsin aninim dag len gus merenero. Doba len lesinsin augwan, kaba, ebehibera edreg dau len gus meren namcir. Hanoba len lemob aiyad se biruwa mes dousero, doba len log se aumaga gebehibera graga toua. Dara sug len lesinsin meren sansun mobroro, kaba, len lemesinsin dag misen touwero. Doba len lesinsin meren agas bedreg dau len gus meren namcir. Dauntoba lusud loudesa dag len laimo ELOHIM men gomnomna edreg dau len gus laugwanohob. Anai mobroro gin, kaba, ansins dag lusud merdoc moc dougwo ELOHIM men gomnomna touwero. Doba len laimo terimda. 23:6 Dara sug lusud lougwanara, kaba, len louwan naugb len ledeigtou ino dougwo boromei gedig lusud lesedeb naugb len meroho agas sug leigtousa dous. Dara sug len leinesa meren tuari, kaba, len louwan naugb len leigtou se maija moc gedig len meroho agas meren geb ino toua. 23:7 Dara sug len lec merohora se usi gedig lusud lohwaresa, kaba, len meru ehigehi naugb lusud lecguna dou len sungga toua. Dara len louwan naugb lusud leija len dag sud hom mou ouforoho naugb ens aremeijouhw asesa dou lusud toua. 23:8 Doba yen, kaba, yen meigdoc emagas naugb lusud lemeija yen dag sud hom mou gouforohoro. Anai meijen sud hom gedig en mou ouforoho naugb en ens aremeijouhw asesa dou yen, kaba, en moongga desij yenohob. Dangga yen yeijem ucucugb dag meijagunem dara meigdamouwem dous. 23:9 Dara yen yemeigdoumesa lusud gus len meroho dag yen meijiner misenero. Anai yen Meijina hom dous eng inggeis se bogo naugb yenohob. 23:10 Dara yen meigdoc emagas naugb lusud lemeija yen dag meren mougt mera medam touwero. Anai meijen mougt mera medam hom gin dous. Eni sud hom gedig ELOHIM os dou yen deb sug nosohob naugb en eigdoc yen dau meijen gogom augwan. 23:11 Dangga hang, gareg dau yen en ouwan naugb en moho eb taiba dau len gus laugwan, kaba, esloulougb naugb en owun enin medoc mes arjaga dag sogougb naugb len gus laugwan toua. 23:12 Anai gareg dau yen en eigdoumesa enin moho eb taiba augwougb dau enin dous, kaba, ELOHIM owun en moho eb tainya namcir. Doba gareg dau yen en owun enin moho eb tainya deseino len gus, kaba, ELOHIM eigdoumesa en moho eb taiba namcir. 23:13 Sug Yesus esulou lusud dara men logodeh dougwo leng Parisi meren geicara dag graga dou lenohob, kaba, en eineg aud leng Parisi naugb owun len deit. Hanoba en eigdoumesa gogom debin len namcir, endagai: Yeng meiju ouforoho se Musa men gomnomna dara yeng Parisi, kaba, ELOHIM esedeb gogom medam naugb yenohob. Anai areg yen yebedbed dou lusud, kaba, dag yen yarerei len dous. Dangga hang, yen yemeinesa ELOHIM men goiharaga ginero. Dara yen yedag sogo maga dougwo len gus naugb sug len lemeinesa touwero. Anai meijen gebedbed gini naugb yen youf misis dougwo ELOHIM men goiharaga an len laugwanohob. 23:14 Dara yen yocuncum yeiso meijir an bagas namcir toua. Doba augwan gini dag yen yaunun dou lusud dous. Anai sug yen yocuncum ouwohob, kaba, yen yeihwedesa debdes meren tu naugb yen yenara yaceca dara yeida meren ara ara dau len toua. Dangga hang, ELOHIM emamsoho yenero. Doba en emeic gogom medam gedreg dau len gus dou yen toua. Anai meijen geicara augwan gini dag yen yarerei lusud gin terimda. 23:15 Dara yeng meiju ouforoho se Musa men gomnomna dara yeng Parisi, kaba, yen yeic meijuwemougb esesa naugb yen yeisa ij se dum mohu naugb yeihweda sungga sungga. Dara yen yeic yen meijug erij naugb yec sungga sungga toua naugb yen yebedbed dou lusud. Dauntoba len lesogwesa yen meijohotimei mohw an areg yen meigdoc ebdebin an gin toua. Doba sug sud hom en einesa meijen uro mesohob, kaba, yen yebin en dag dum smougb meh mougwa cuhwai icira dou en dau yen namcir. Dangga hang, ELOHIM emamsoho yenero, doba en emeic gogom medam dou yens. Anai meijen geicara gini dag yen yarerei lusud dous. 23:16 Dara yen yens meijouhw dou lusud dau sug len louwara debin ara ara, kaba, yen yesulou len dag gini, yendagai: Sug yen you ELOHIM Men Tuari moho debin ara ara, kaba, gini dag yen yemogo hancob dougwo yenbuma. Doba sug yen you emas gedig geb se Tuari mes ingga en moho debin, kaba, yen yogo hancob dougwo yeninohob. 23:17 Doba areg yen yesulou len an gini, kaba, dag lusud gedig len meru edgom dara meriresmougb meren geicara dous. Anai sug yen you emas dara ELOHIM Men Tuari lan maroho debin, kaba, girong moho agasa? Emas ginei? Era ELOHIM Men Tuari enggei? Naro, ELOHIM Men Tuari eng dous moho agas dau emas. Anai Tuari gin eng oiharaga emas geb se dimei mes ingga becabeci namcir. 23:18 Dara yen yesulou len, yendagai: Sug yen you ELOHIM men boromei debin ara ara, kaba, gini dag yen yemogo hancob dougwo yenbuma. Doba sug yen you areg lusud leic dou ELOHIM se boromei ingga debin, kaba, yen yaimo gin toua, aninim dag yen yoc gouwara men aremeij ucugb dou enohob. 23:19 Doba areg yen yesulou len an gin, kaba, dag lusud gedig merires mougb meren geicara dous. Anai areg girong moho agasa? ELOHIM men boromei ginei? Era areg lusud lob deisa eng moho agasei? Naro, ELOHIM men boromei dous eng moho agas. Anai men boromei gin dous eng eic areg len lob deisa ingga becabeci namcir. 23:20 Dangga gareg dau yen en ou ELOHIM men boromei moho debin ara arohob, kaba, en ou ELOHIM men boromei moho an areg len lob deisa boromei ingga moho augwan debin gin touohob. 23:21 Dara gareg dau yen en ou ELOHIM Men Tuari moho debin ara arohob, kaba, en ou ELOHIM Men Tuari moho an sud hom geisa ingga en moho debin gini. 23:22 Dara gareg dau yen en ou bogo moho debin ara arohob, kaba, en ou bogo moho an maija moc geb se mes dara sud hom geigtou se maija moc lan maroho debin touohob. Dangga hang, ELOHIM emamsoho yenero, doba en emeic gogom medam dou yens. Anai yen yeigdoumesa yenin dag yen yeinoisa lusud aud areg se misenohob. Dobnaro. Yen yedag sud hom mairesmougb an len dous. 23:23 Dara yeng meiju ouforoho se Musa men gomnomna dara yeng Parisi, kaba, yen yoho meijen aremougb men ouwedebeda dag w selasih meh, dara w adas mogo, dara w jintan mogo, kaba, yen yekeba hom dau ara sisa dou ELOHIM terimda. Doba areg moho agas dau Musa men gomnomna dag yen yaimo areg gobosboro an lusud, dara yen meigdoc eineg an len, dara yen yaimo areg asesa ELOHIM enin medoc mes dara yen meigdoc hom terimda, kaba, yen yamsoho gin debohob. Dangga hang, yen yemekeba hom dau ara sisa dou ELOHIM gin dousero. Doba yen yaimo areg homoi gin toua, anai gini aimo dau areg ELOHIM en ouwan toua. 23:24 Dara yen yedag leng meriresmougb geinoisa lusud se ucina aud areg misen. Anai yen yocdo duhu dougwo aremes dag aremoslos dous. Doba aremeta gogor medam, moho w unta, kaba, yen yemocdo duhu dougworo. Doba yen yeg duhu an namcir. Dangga hang, ELOHIM emamsoho yen gin deb touwero. Doba en emeic gogom medam dou yens. Anai meijen geicara augwan gini dag yen yenara yarerei lusud dous. 23:25 Dara yeng meiju ouforoho se Musa men gomnomna dara yeng Parisi, kaba, yen yeic meijuwemougb esesa naugb yen yaimo areg geic yen meijaga ecabeci deseino ELOHIM gin dous terimda. Doba se yen meigdoc mes, kaba, atij an areg gogor dag gahamera dara gagungunara dau len gus terimda. Dangga meijen geicara gini aninim dag lusud sug len ledu mog dara igdebir, kaba, len ledu dig medigo dous. Doba areg gogor geb se mes, kaba, len lemeduero. 23:26 Dangga eigouhw naugb yen yedu mes eng nosahabi, emeigouhw an dig medigo toua. Anai yeng Parisi, kaba, meijen geicara augwan gin dag leng meriresmougb dous. Hang ELOHIM emamsoho yen touwero, doba en emeic gogom medam dou yens. Anai yen yedag leng lenara larerei lusud terimda. 23:27 Dara yeng meiju ouforoho se Musa men gomnomna dara yeng Parisi, kaba, yen yaimo Musa men gomnomna aud areg geic yen meijaga ecabeci deseino lusud gin toua terimda. Doba se yen meigdoc mes, kaba, yen yaiyeiyo dougwo dous dara yaiga ucucugb toua terimdohob. 23:28 Hang meijen geicara augwan gini aninim dag aremogougb moda dous. Anai sug lusud leic areg gogoufu lob debin dougwo, kaba, leiya, doba ecabeci namcir. Doba se mes, kaba, atij an merur dara areg geiyema gus gus augwan toua. Dangga ELOHIM emamsoho yen touwero, doba en emeic gogom medam dou yens. Anai meijen geicara augwan gini dag yen yenara yarerei lusud dous. 23:29-31 Dara yeng meiju ouforoho se Musa men gomnomna dara yeng Parisi, kaba, yen yeimiman yenin deseino len gus, yendagai: Sug emen toua emugwengga desij emen emjemouwer sug nosa ingga, kaba, emen emaimo len naugb emen emeic gogom dou leng lesai ELOHIM moro nosa dag ginero. Doba emen emen dougwo len an gin dous. Dobnaro. Areg yen yeimiman an gin, kaba, dag yen yarerei lusud meriresi namcir. Anai sug yen yoc tu meij geigouhw aga len meruda ginohob, dara yen yobungma leng laimo areg asesa ELOHIM enin medoc mes len meruda gin toua, kaba, gini ens dou lusud dag yen toua yedag leng les len gin nosa merdebeitor yen dag misen namcirohob. 23:32 Dangga hang, yen yemehig dau yen meijemouwer meren sesar gedig len larges moc deb ginlo. Doba yen yeic meijuwemougb esesa naugb yen yeicara yauloulo dangga terimda bedebeij sug bouwedocahabi. 23:33 Anai yen meijug mog dag yen yobob yen meijemouwer lenohob. Dangga, dagiro yen yemeigdoc yenin naugb yen meijina emagau dau dum smougwa? Naro, ELOHIM emamsoho yenero, doba en emeic gogom medam dou yens. Anai meijen geicara augwan gini dag hinogo an moto moto meren geicara gin toua terimdohob. 23:34 Hang yen youman dan indir deigeigouhw namcir. Cum, kaba, dan demesa lusud aud yen naugb len lemesai ELOHIM moro dou yen deits. Dara dan demesa leng meru aiso ELOHIM men aremeijouhw, dara leng meru ouforoho se ELOHIM men gomnomna dou yen toues. Doba ligbum dau len gin, kaba, yen yogod len lomom. Dara ligbum, kaba, yen yetob len se sogo salib. Dara ligbum, kaba, yen yeic mog erij dou len se meijen tuari. Dara ligbum deit, kaba, yen yeisor dau cinogo ingma terimda bedebeij cinogo ingma toua. 23:35 Dangga hang, ELOHIM emamsoho yen touwero. Doba en eic leng laimo areg asesa ELOHIM enin medoc mes len merugwihi augwan debinbinim debohob, naugb sug en eic gogom medam dou yen ebiji dau sug yen meijemouwer len logod Habel omom, terimda edebeij sug yen yogod Berekia meisi, moho Sakarias, omom toua. Anai Habel gini, kaba, en aimo areg asesa ELOHIM enin medoc mes namcir. Doba yen meijemouwer len logod en augwougb. Dara Sakarias, kaba, en toua esa se ELOHIM Men Tuari dara boromei maraufu naugb ouwaharo. Doba yen yeic meijus naugb yen yeic gomom dou en sungga touohob. 23:36 Dangga yen youman dan indir an areg dan den dou yen gin deigeigouhw deit. Anai gogom gin, kaba, emeb naugb len gus se lona gacinero. Doba augwan gini eb deinaugb yeng meijireseb gin dous. Augwan gini asesa dag misen namcir. 23:37 Sug Yesus owun leng Parisi dag graga ouwohob, kaba, en eiyaga an leng se cinogo Yerusalem ingga. Hanoba en enara dou len, endagai: Ayou, ayou, yeng Yerusalem. Anai mougwa einyana, kaba, ELOHIM en esa leng lesai en moro dou yenohob. Doba yen yogod len laugwan lomom namcir. Dara leng loho en mer dou yen, kaba, yen yeic igdahabi yad len lomom touohob. Dara mougwa einyana, kaba, dan douwan doiharaga yen dougwo areg gogom. Aninim dag berougb mem oiharaga moto se mebera meniha dougwo areg gogom augwan toua. Doba yenin yemouwanero. 23:38 Dangga yen youman deigeigouhw. Anai ELOHIM emeic gesgigouhwesa dou yen dougwo augwan toua deitero. Doba en ogugwo meijen cinogo gini se yenin meisira naugb yenin yesedougwo dous. 23:39 Hang dau lona gini, terimda lona sug yen yeigdoumesa dan indoho deit, kaba, yen yemeiya dan deitero. Anai se lona ingga, kaba, yen yagahugouhw an ELOHIM an dan, yendagai: ELOHIM, ban beic geigouhw dou sud hom gin namcir. Anai en en se Adehsud, ban aboho, naugb emenohob. Yen youman dan indir augwan gini deigeigouhw terimda.

Matius 24

24:1 Sug Yesus eiyaga an leng se Yerusalem dag gragohob, kaba, en agunya dau ELOHIM men igtien. Dangga sug en ec mohora asa ucina, kaba, men logodeh len len aud eni. Hanoba len lenara dou en lendagai: Ban beiya ELOHIM Men Tuari an areg geb acec gaihinda augwan ecabeci namcir. 24:2 Doba Yesus enara bauni len merir, endagai: Yen yeiya augwan gini deigeigouhwohobei? Anai yen youman dan indir. Se lona daiyamo, kaba, igdahab hom emeb se igdahab hom deb deitero. Doba augwan gini, kaba, len lot baisoboro dangga. Augwan gini asesa namcir toua. 24:3 Sug Yesus enara dou men logodeh dag graga bouwohob, kaba, en eisaugb aud menmougb hom, moho Saitun Meda, naugb en edeigtou sungga. Sug en eigtouohob, kaba, men logodeh ledebeij en naugb len ledecicara dara en dou lenin sungga. Hanoba len leijidougwo en, lendagai: Aiseba lusud lemot Tuari gaih bemaisoboro? Dara ban bens dau Lona Sug Gouwedoc, dara Lona Sug Ban Becicugwen men gansins augwan asesa dou emen touahabi. 24:4 Doba Yesus esulou len dougwo gin deb, endagai: Yen yebehnehino yenin meigdoc mes dougwo lusud namcir. Dauntoba len lemen naugb lemaugwohosa yen icira aremer augwan ginlo. 24:5 Anai se lona daiyamo gacin, kaba, lusud leinyana lemagunya debin yen naugb lemeic dan indoho lemaceca yen, lemendagai: Emen gin eng Mesias naugb emeigdoc yen dau meijen gogom augwan. Dangga len laugwohosa lusud leinyana laijahasero dau ucina misen gin toua. 24:6 Dara yen yemouman dag lusud logodim ucucugb. Dara yen yemouman loungmen dau sug len lesim se cinogo gus gus toues. Doba yen yemeijesan ginlo. Anai augwan gini emansins dag Lona Sug Ouwedocbuma. Doba ELOHIM esedeb augwan gin ebiji ino dauwahabi. 24:7 Dangga cum, kaba, meijouhuder lenin lesara darem. Dara mougt mera medam dau cinogo ingma lesara dara mougt mera medam dau cinogo ingma. Dara sir gogoufu einesa cinogo einyana. Dara inyomda eisa se cinogo sungga sungga toua. 24:8 Doba gogom augwan gini dag ebiji dousaba. Aninim dag gida hom menuhwa ererij dau sug en ouwadan en meh touebma. 24:9 Se Lona ingga, kaba, lusud lagaigeij yen naugb lodo yen deseino mougt mera. Dauntoba len leic mog erij dara leic gomom dou yen. Dara lusud se cinogo gin augwan len merinuhwa ecgwan yen toua, anai yen yaimo danohob. 24:10 Dangga leinyana dau leng laimo danohob sug len laimo ucina gin, kaba, gini dag ougb sogo maga dougwo merbes. Hanoba len lemaimo dan toua deitero. Doba len logod ameiji dougwo dan namcir. Dara len ledehin meraga anim ucucugb dara len merinuhwa ecgu anim terimda. 24:11 Dara lusud leinyana lagunya debin yen se Lona ingga naugb len lenara laceca yen yeinyana gougwa dau ucina misen gin toua. Anai len leigdoumesa lenin meroho dag len lesai ELOHIM moro dou yen. Dobnaro. Areg len lesai dou yen gini, kaba, dag mer areibahau dous. 24:12 Dangga se Lona ingga, kaba, lusud merdoc gororougwim toua deitero, doba len merdoc emtereta daum namcir. Anai len lemaimo areg misen deitero. Doba len laimo areg gecgu anim ucucugb terimda dous. 24:13 Doba gareg dau yen en emobsara dau ucina mog erij ginero. Hanoba en aiyan medocesem, terimda edebeij Lona Sug Ouwedoc gin toua, kaba, ELOHIM eigdoc en dau areg gogom augwan namcir. 24:14 Dara lusud lesai Mer Geigouhw eisaugb dan dou lusud se cinogo gini augwanahabi. Dara len lauma debin mer gin dou len toua. Dauntoba len lecinaga dag ELOHIM men lona naugb sug en oiharaga len ucugb ebijohob. Dauwohob, kaba, Lona Gouwedoc gin, kaba, ebeij deinyor touohob. 24:15-16 Doba sug yen yeiya lugmahara len leigdoumesa seiseij se ELOHIM Men Dimei Gecabeci naugb lesijareseni, kaba, yen yemeigtou se leng Yudea meijen hancob deitero. Doba yen yaugwan yougb dig menmod dau namcir. Anai sug len leigdoumesa seiseij gin, kaba, len leic ELOHIM moho lacecim dous. Dara len leic mor mor dou men Tuari, dara meijen cinogo augwan toua. Augwan gini esogwesa dau areg sud hom gesai ELOHIM moro, moho Daniel, en ens deb sug nosohob. 24:17 Dangga gareg dau yen en atou se tu mondudi se lona ingga, kaba, en emouwada se men dimei mes naugb emdeic men ara ara hom touwero. Doba en arges en maga bougb dig menmod dau namcir. 24:18 Dara gareg dau yen en edeicara se men lo, kaba, en emecicugb naugb emdeic men sansun geb se men tu touwero. Doba en arges maga bougb sunggada dau namcir toua. 24:19 Dara dan indoc erij an ligida gedig len meraga ogom dara len lohw arij dou merihir se lona ingga toua. Anai len lemougb dagiro, dau gogom augwan gina? 24:20 Dara yen yocuncum dou ELOHIM esesa terimda. Dauntoba yen yemougdedau gogom gini se lon gogoufu, era Lona Gemeicaresero touwero. 24:21 Anai gogom geb naugb yen se lona ingga, kaba, edreg dau gogom augwan dau lona sug ELOHIM esinsin cinogo dara bogo terimda iteitogini. Dara edreg dau gogom gen daiyamo augwan toua namcir. 24:22 Doba ELOHIM medoc an men lusud yen, anai en ouci yen debinim naugb enohob. Dangga hang, gogom gini emeb naugb yen terimda Lona Sug Ouwedoc touwero. Doba ELOHIM en ogod lona ingma an gogom dau yen, dauntoba yen yaugwan yemomomero. Anai sug en emogod lona ingma dauwero, kaba, yeni dara len gus yen yaugwan meijireseb emeb deitero. Doba yen yaugwan yomom namcir. Areg Yesus enara dou men logodeh eisaugb seiseij graga, kaba, eigouhw naugb yen yecinaga meijouhw augwan asesa namcir. Dauntoba sug yen yecic indan surad an areg graga dou meijen lusud, kaba, yen yens meijouhw augwan asesa debin gin dou len toua. 24:23 Dangga sug lusud lenara dou yen, lendagai: Yen yin, madeiya Mesias eng ouwada deb gini. Era len lenara dou yen, lendagai: Yen yin, madeiya Mesias eng ouwada deb gada. Yen yemaimo len merirero. 24:24 Anai se Lona ingga, kaba, lusud leinyana leigdoumesa lenin meroho deseino yen dag len leigdoc yen dau meijen gogom augwan namcir. Dara len leigdoumesa lenin meroho deseino yen dag len lesai ELOHIM mer misen dou yen. Hanoba len leic gansins dara len laben ganusbus medam debin gin dou yen toua naugb len lemaugwohosa leng medigo Yesus dousero. Doba len leic meruwemougb esesa naugb len laugwohosa yen gedig ELOHIM ouci yen debinim naugb enohob yen yaugwan toua. Dobnaro. Areg len len dou yen gin, kaba, dag len lereiyara dous. 24:25 Dan desulou yen dougwo aremer augwan gini sug emedebeij yenbuma. Dauntoba sug edebeij yenohob, kaba, yen yebehnehino yenin meigdoc mes dougwo namcir, dauntoba len lemaugwohosa yen touwero. 24:26 Hang sug lusud leden dou yen dag Mesias eni moongga se lomougwisohob, kaba, yen yemaimo len audero. Era sug len leden dou yen dag en ecgoneh en mog se dimei mes debohob, kaba, yen yemaimo len merir an gin touwero. Doba yen yarges dau len namcir. 24:27 Anai se Lona Sug Lusud Meraguna Mebin Dan Decicugb aud yen, kaba, dan demecgoneh dan indug dau lusudero. Doba dan dens danin ainyes abeba len laugwan meriresi. Aninim dag bagar mouf sug ehinya se igda agunya, kaba, leng dig igda obsaresa len laugwan leiya toua. 24:28 Dangga hang, sug dan decicugwen, kaba, lusud laugwan leiya dan dag misen namcir. Aninim dag sug lusud leiya bougena leinyana, kaba, len lecinaga aremeiyema ingmeb sungga touohob. 24:29 Doba sug Yesus esulou men logodeh dag graga ouwohob, kaba, en esulou len ucan deit, endagai: Sug gogom geb debin cinogo graga augwan obsara ineg dauwohob, kaba, igda lona emerba mohora deitero. Doba edag lobeigbogo namcir. Dara igda loba toua emeic moufesa deitero. Dara tebeij augwan eijeijesa bobsara namcir. Dara areg men goubesa geb se bogo, kaba, augwan einyeinya toua. 24:30 Sug augwan gini ouwa dauwohob, kaba, lusud lemeiya Lusud Meraguna Mebin dan demens danin indug ainyes dou len laugwan. Dangga len laugwan leb dara leiyogoseser namcir. Anai len leiya, doba dan douwaden dau bogo se umer an indan goubesa. Dara indan gogouf cucugb medam erbacec dan toua. 24:31 Dara sug malaikadir lohw higbei mougb medam touohob, kaba, dan darougb len naugb len ledouci indan lusud yen yaugwan dau dingan dingan dau sug igda obsaresa, dara igda agunya, dara dau dum mer, dara dau dum moho. Dara dan darougb len naugb len ledoci indan lusud dau bogo moc nagama terimda bogo moc nagama toua. 24:32 Dan deic dainyen dau sogo ara debin gin dou yen deit. Dauntoba yen meiju obgesa areg graga augwan meijouhw asesa touahabi. Anai sug yen yeiya sogo ara maga eh naugb mes gougb ed mesira ougo an merijohob, kaba, yen yecinaga dag igda goho lohos ebeij deinyorohob. 24:33 Toua sug yen yeiya gansins augwan dag graga eb debin yen dauwohob, kaba, yen yecinaga dag Lusud Meraguna Mebin dan desa deinyor misis moc namcirohob. 24:34 Dara yen yaugwan yemomom dauwahabero. Doba ligbum dau yen, kaba, yen meijireseb naugb yen yeiya augwan gini se yen meijiresahabi. Yen youman dan indir deigeigouhwahabi. Anai augwan gini asesa dag misen namcir. 24:35 Dangga bogo dara cinogo lamediyebeiyes. Doba dan indir gin, kaba, emediyebeiya deitero, doba eb huhugb namcir. 24:36 Doba indan Lona dara cumougt naugb sug dan decicugwen gini, kaba, sud hom ingma en emecinaga dau gin touwero. Dara malaikadir se bogo len toua lemecinagero. Dara ELOHIM Meisi danin toua, dan demecinaga dau gin touwero. Doba dan Indina se bogo enin dous eng ecinaga dau Lona dara cumougt gini dag misen namcir. 24:37 Dara Lona Sug Lusud Meraguna Mebin Dan Decicugwen, kaba, aninim dag lona sug Nuh en maireseb se cinogo gin toua. 24:38 Anai se men lona gini, kaba, lusud lemesedeb lenin merdoc mes naugb lona sug duhu aiyan len touwero. Doba len letara, dara legara, dara leicim terimda bedebeij lona sug Nuh einesa ingmes dau lenohob. 24:39 Hang duhu en baiyan len laugwan lomom louwa namcir, anai len lemesedeb len merdoc mes nosahabero. Doba len merdoc edgom terimda lona sug duhu aiyan len laugwan gini. Dangga toua, lusud lemesedeb len merdoc mes naugb Lona Sug Lusud Meraguna Mebin Dan Decicugwen gin touwero. Doba len letara, dara len legara, dara len leicim terimda Lona Sug Dan Decicugwen gin toua. 24:40 Se Lona ingga sug lahwai lades lo, kaba, malaikad len louci homa debinim naugb dan dous. Anai en esedeb en medoc naugb Lona Sug Dan Decicugwenohob. Doba homa, kaba, en eigtou deb. Anai en emesedeb medoc mes naugb sug dan demecicugwen ginero. 24:41 Dara lagida lahwai toua, sug lan laic tramdad mor se lona ingga, kaba, malaikad louci homa. Doba homa, kaba, en eigtou deb toua. 24:42 Dangga hang, yen yematou dau Lona Sug Meijen Adehsud Dan Demecicugb gin touwero. Doba yen yesedeh yauweila dougwo Lona gin esesa terimda. Anai yen yemecinaga Lona Sug Dan Demecicugb aud yen ginero. 24:43 Sug Yesus esulou men logodeh dougwo men lona dag graga dauwohob, kaba, en eic gainyenara hom ucan gin dou len deit, endagai: Sug sud hom gesedougwo men tu en ecinaga dau loba sug sud hom en en naugb eiyoho men aremougb, kaba, en atou dau ginei? Naro, en ematou dau ginero. Doba en maires agai dougwo namcir. Dauntoba sud hom gini emeinesa men tuero. 24:44 Dangga hang, yen yematou dau indan Lona Sug Dan Demecicugwen gin touwero. Doba yen meijires agai terimda. Anai se lona sug yen yemoudesanero, kaba, Lusud Meraguna Mebin dan demecicugb aud yens. 24:45 Sug Yesus esulou men logodeh dag graga ouwohob, kaba, en eic gainyenara dau mougt mera men sogougb hom men geicara dou len ucan deit. Hanoba en eijidougwo len, endagai: Yen youdesa dagiro? Gareng en edag sogougb gen mou ouforoho dara en medoc dag hom an men geicara gina? Eni sud hom sug men mougt mera eigdoumesa en moho naugb en eic ared dou men sogougwir gus, kaba, en emarges len debero, doba en eic mouwemougb esesa. Dara en medoc hom naugb en eic ared dou len astesda lona loba terimda. 24:46 Dangga sug men mougt mera gini en ecicugwen, kaba, en emeic gogom dou en touwero, doba en eic geigouhw dou en dous. Anai en eiya men sogougb gini, kaba, dag en emarges dau men geicarero, doba en aimo gin esesa terimdohob. 24:47 Hanoba en eigdoumesa men sogougb gini en moho, dauntoba en edag mougt naugb men ariloboc gus augwan toua. Yen youman dan indir an areg dan den dou yen gin deigeigouhw. Anai augwan gini asesa dag misen namcir. 24:48 Doba sug sogougb graga enara dou enin se medoc mes dag iteitogin, kaba, indan mougt mera en emen dedemedebma. 24:49-50 Hanoba en ebiji naugb en ogod men sogougwir gus. Dara en aimo leng leg ahwei mohu naugb len laugwan leg lahauwa icira namcir toua, kaba, men mougt mera gini en en bakugb debin en se lona sug en medoc emeiseisan enero. 24:51 Hang en ehigeij en moslos eb namcir. Dara en erba en se dum smougb desij leng meren geicara dag len larerei lusud toua. Anai en mog mog namcirohob. Sungga, kaba, len laugwan gini len ledeiyogoseser dara leg merugta terimda.

Matius 25

25:1 Sug Yesus eic gainyenara hwai dag graga dou men logodeh bouwohob, kaba, en eic gainyenara hom dara dou len deit, endagai: Lona Sug Lusud Meraguna Mebin Dan Decicugb naugb dan doiharaga lusud ucugb deit, kaba, deic dainyen dau ligida ligdob merug sisa gedig len lodo meren pelita naugb len ledagasa sgwiji hom gen dau aigusi naugb en edeic mesouwa. 25:2-4 Doba ligida graga merug sergem, kaba, len meru emaiyero. Anai len lemodo pelita an mani dara teiteiyero, doba len lodo meren pelita maga mogud dous. Doba ligida merug sergem, kaba, len lauwabara. Dangga hang, len lemodo meren pelita maga mogud dousero, doba len lodo ampo an mani toua dara teitei. 25:5 Doba sgwiji hom gen en naugb edeic mesouwa graga, kaba, en emen dedemedero. Dangga len laugwan cicireber, kaba, len latou dau enohob. 25:6 Doba se lobeingmod, kaba, sud hom en en naugb edebir len, endagai: Sgwiji hom gen en naugb edeic mesouwa graga, kaba, en agunyohob. Dangga yen yeisa naugb madagasa enda. 25:7 Sug ligida ligdob merug sisa graga louman dau gin, kaba, len leisa dedemeda. Hanoba sug len lesinsin meren pelita becabecohob, kaba, len lasaih toua. 25:8 Dangga ligida gedig len meru emaiyero graga, kaba, len lacgeij ligida gedig len lauwabara an mani, lendagai: Yen yeic mani ingma dou emen touahabi. Anai emen pelita ebeij deinyor sug os engga. 25:9 Doba leng lauwabara gin, kaba, len launi dou len ucugb, lendagai: Itog geb se maga gin, kaba, edeinyum emendaha. Hang emedeinyum naugb emen emeiri ingma dou yenero. Anai cum, kaba, maman pelita augwan os namcir. Dangga eigouhw naugb yen yeihweda naugb yedouma dau leng lohw mani dous. 25:10 Dangga ligida merug sergem graga, kaba, len leihweda naugb ledouma mani eda. Doba sug len ledebeij se ucina mogumsaba, kaba, sgwiji hom geic mesouwa graga en agunyen dig len meridigo aud ligida merug sergem gedig lauwabara gragohob. Dangga len ingga dous eng leinesa dara en se men gesrougb sug eic mesouwa. Anai len lesedeb meren augwan edeinyumohob. Sug len leinesohob, kaba, en ouf misis dougwo len namcir. 25:11 Sug en ouf misis dougwo len se dimei mesohob, kaba, ligida gedig ledouma mani graga, len toua len len naugb ledesa dig medigo. Hanoba len leija sud hom geic mesouwa graga, lendagai: Adehsud, ban bec misis dau emen touahabi. 25:12 Doba sgwiji graga, kaba, en auni dou len ucugb, endagai: Yeng gironggina? Anai dan demecinaga yenero. Augwan gini asesa dag misen namcir. 25:13 Sug Yesus eic gainyenara dag graga dou men logodehohob, kaba, en esulou len debin gin deit, endagai: Dangga hang, yen yesedeh yauweila dougwo Lona Sug Dan Decicugb aud yen gin toua. Anai yen yemecinaga cumougt sug dan decicugb dag misenero. 25:14 Sug Yesus eic gainyenara dau ligdob merug sisa dou men logodehohob, kaba, en eic gainyenara dau lona sug en ecicugb ucan dou len deit, endagai: Lona Sug Lusud Meraguna Mebin Dan Decicugb aud yen naugb dan dedag meijen mougt mera medam, kaba, aninim dag mougt mera hom sug en esedeb naugb en eihweda se cinogo gus dau men sogougwir. 25:15 Anai sug en eiya len len aud enohob, kaba, en eic men ariloboc dag aregoufu perag mogo ribu sergem dou sud hom. Dara sud hom, kaba, en eic aregoufu perag mogo ribu hwai dou en. Doba sud hom deit, kaba, en eic aregoufu perag mogo ribu hom dou en toua, aimo dau meren goubesa geb se len merdoc mes. Sug en eic dou lenohob, kaba, en eihwededau len. 25:16 Dangga mougt mera men sogougb gedig en eic aregoufu perag mogo ribu sergem dou en gragohob, kaba, en emeigtou anero. Doba sug en edohw dedemeda dou len gusohob, kaba, len leic aregoufu perag mogo ribu sergem laos dara ucugb dou en deit. 25:17 Dara sogougb gedig mougt mera eic aregoufu perag mogo ribu hwai dou en gragohob, kaba, en toua emeigtou anero. Doba en edohw dedemeda dou len gus. Hanoba len leic aregoufu perag mogo ribu hwai laos dara ucugb dou en toua deit. 25:18 Doba sogougb gedig mougt mera eic aregoufu perag mogo hom dou enohob, kaba, en emedohw dou len gusero. Doba en edogo cinogo mes naugb en ec mougt mera men aregoufu deisa se cinogo mes deb dous. 25:19 Sug lona einyana debin mougtohob, kaba, en ecicugb aud men sogougwir graga deit. Hanoba en eija len, endagai: Yen yecic dau aregoufu gedig dan deic dou yenohob men meijouhw asesa dou danahabi. 25:20 Dangga sogougb hom gedig mougt mera eic aregoufu mogo sergem dou en sug nosohob, kaba, en en naugb eic aregoufu perag mogo ribu sisa dou mougt mera ingga. Hanoba en ens meijouhw debin dou en toua, endagai: Adehsud, ban beic aregoufu perag mogo ribu sergem dou danohob. Doba ban beiya, dan deic ribu sergem dato aban ucugb dou ban deit. 25:21 Sug mougt mera ouman dau gin, kaba, en eigdoumesa en moho an namcir, endagai: Sug ban besedougwo indan aregoufu gurereito gini dag ginohob, kaba, dan deigdoumesa ban aboho naugb ban besedougwo indan aregoufu einyana deit. Anai aban geicara augwan gini eigouhw namcirohob. Dara ban beinesa naugb dan demeic areg geic dan indoc agahugouhw dou dan gini ingma dou ban toua. Anai bani indan sogougb gedag beim, dara ban baimo dan indir dara ban abdoc hom touohob. 25:22 Gin dauwohob, kaba, sogougb gedig men mougt mera eic aregoufu perag mogo ribu hwai dou en sug nosa en toua einesa naugb enara dou en, endagai: Adehsud, ban beic aregoufu perag mogo ribu hwai dou dan sug nosohob. Doba ban beiya dan deic aregoufu ribu hwai dato aban ucugb dou ban deit. 25:23 Sug mougt mera ouman dau gini, kaba, en eigdoumesa en moho an namcir toua, endagai: Sug ban besedougwo indan aregoufu gurereito gini dag ginohob, kaba, dan deigdoumesa ban aboho naugb ban besedougwo indan aregoufu einyana deit. Anai aban geicara augwan gini eigouhw namcirohob. Dara ban beinesen naugb dan demeic areg geic dan indoc agahugouhw dou dan gini ingma dou ban toua. Anai bani indan sogougb gedag beim. Dara ban baimo dan indir dara ban abdoc hom touohob. 25:24 Dau, kaba, sogougb gedig mougt mera eic aregoufu perag mogo ribu hom dou en sug nosohob, kaba, en toua einesa naugb enara dou en deit, endagai: Adehsud, dan decinaga ban bedag sud hom medoc oungmerema namcir, anai ban bemeba meijero. Doba sug emen emeba meijahabi, ban bemec mera augwan dau emen. 25:25 Dangga ban beiya aban aregoufu gedig ban beic dou dan sug nosa inggini, anai dan dahau dau ban namcirohob. Hang dan demec se cinogo mes deb dous, dauntoba emediyebeiyero. 25:26 Sug mougt mera ouman gini, kaba, en esa mer debin en, endagai: Bani sogougb abug mog dara besugrog namcir. Anai ban becinaga dag dan demeba meijero, doba dan dec mera augwan dous. Dara ban bemecinaga dag dan demouci tramdad merila dau touwero. Doba dan desedeh deic augwan naugb dan dous. 25:27 Dangga dagiro, naugwe hang, ban bemeic indan aregoufu gini dou leng leiji aregoufu mohw deb dauntoba sug dan decicugb, kaba, len leic meren ingma lato ucugb dou danero? 25:28 Sug mougt mera esa mer debin men sogougb dag gragohob, kaba, en arougb men sogougwir gus, endagai: Yen yedug indan aregoufu ingga augwan ucugb dau en. Hanoba yen yeic dou sud hom gedig en eic aregoufu perag mogo ribu sergem ato ucugb dou dan graga dous. 25:29 Anai gareg en eic einyana ato dou dani, kaba, dan deic einyana batij bobdaga dou en toua. Doba gareg en emeic ingma emato dou danero, kaba, dan dedug gurereito areg geb naugb enohob augwan ucugb dau en toua. 25:30 Sug mougt mera enara dou men sogougwir gus danggohob, kaba, en arougb len, endagai: Yen yederba sogougb gini se lobeigbogo mes namcir. Anai men geicara augwan emera mera dou danero. Hang en emeiyogoseser dara ecugwo mogta sungga toua terimda. 25:31 Sug Yesus eic gainyenara dag graga bouwa dou men logodehohob, kaba, en ens meijouhw dau sug en ogod aremer aga lusud se Lona Sug Ouwedoc ucan dou len deit, endagai: Sug Lusud Merguna Mebin dan demecicugwen dag lusud meren mougt mera medam gin, kaba, dan den dara indan gogouf cucugb erbacec dan namcir. Dara indan malaikad laugwan laimo dan toua. Se Lona ingga, kaba, dan deigtou se indan maija moc gedig gogouf cucugb erbacec namcirahabi, dan demogod aremer aga lusud se cinogo augwan toua. 25:32 Sug len louci lusud laugwan deseino danohob, kaba, dan dekeba len doum se moucina hwai. Aninim dag sud hom gesedougwo domba en ekeba domba misen debinim dau kambing toua. 25:33 Dangga gareg en aimo areg asesa ELOHIM enin medoc mes dag misen namcirohob, kaba, dan demouci en deb dig dan insira misen. Doba len gus, kaba, dan douci len debinim dig dan insira metigi dous. 25:34 Gin dauwohob, kaba, mougt mera medam dan denara dou leng lesa dig dan insira misen, dendagai: Yen yeinesa dan Indina men goiharaga gedig en esedeb naugb yen dau lona sug en ahasesei cinogo dara bogohob. Dauntoba en eic geigouhw dou yen namcir. 25:35 Anai sug sireba dan, kaba, yen yeic ared dou dan det. Dara sug merijeba dani, doba yen yeic duhu dou dan deg. Dara dan dedag lugmahara se yen meijufu, doba yen yebin dan se meijen tu toua. 25:36 Dara sug indan sansun ingmaro, kaba, yen yeic sansun edeinyum dou dan. Dara sug areba dan, kaba, yen yagauwesa dan namcir. Dara sug dan deisa tu gesisug, doba yen yousa dan sungga toua. 25:37 Sug leng laimo areg asesa ELOHIM enin medoc mes graga louman dangga, kaba, len louma merdocesero an dan indir gin namcir. Hanoba len lemeijidougwo dan, lendagai: Adehsud, emen emeiya sireba ban se lona giro? Hang emen emeic ared dou ban beta? Era emen emeiya merijeba ban se lona giro? Hang emen emeic duhu dou ban bega? 25:38 Era emen emeiya ban dag lugmahara se emen emufu se lona giro? Hang emen emebin ban se emen tu gina? Era emen emeiya ban abihw agaga sugiro? Hang emen emeic sansun dou ban bega? 25:39 Era emen emeiya areba ban se lona giro? Hang emen emagauwesa bana? Era emen emeiya ban beisa tu gesisug se lona giro? Hang emen emousa bana? 25:40 Dangga mougt mera medam dan demauni dou len dag gini, dendagai: Yen youman dan indir an deigeigouhw. Sug yen yeicara dag graga dou dan insir gedig lusud lowun len meroho eb tainya namcir, kaba, gini dag yen yeicara dag gin dou dan touohob. 25:41 Dau, kaba, mougt mera medam dan denara dou leng lesa dig dan insira metigi, dendagai: Yen yeihwededau dan aud dum smougb geb huhugb gedig ELOHIM esedeb naugb Bilis an men logodeh, anai en ouwara dougwo yen yaugwanohob. 25:42 Anai sug nosa, kaba, sireba dan, doba yen yemeic ared dou dan demetero. Dara merijeba dan, doba yen yemeic duhu dou dan demegero. 25:43 Dara dan dedag lugmahara se yen meijufu, doba yen yemebin dan se meijen tuero. Dara dan indihw agaga, doba yen yemeic sansun ingma dou dan demegero. Dara areba dan, doba yen yemagauwesa danero. Dara sug dan deisa tu gesisug, doba yen yemousa dan sungga touwero. 25:44 Sug leng lesa dig dan insira metigi len louman dan indir an gini, kaba, len leija merdocesa. Hanoba len leijidougwo dan, lendagai: Adehsud, sireba ban, era merijeba ban, era ban bedag lugmahara, era ban abihw agaga, era areba ban, era ban beisa tu gesisug, kaba, emen emeiya gin augwan se lona giro? Hang emen ememousa ban an ginero? 25:45 Dangga meren mougt mera medam dan demauni dou len dag gini, dendagai: Yen youman dan indir deigeigouhw. Sug yen yemousa dan insir gedig lusud lowun len meroho eb tainya namcirero, kaba, gini aninim dag yen yemousa dan touwerohob. 25:46 Sug dan denara dou len dangga dauwohob, kaba, dan deic gogom dou len se dum smougb geb huhugb namcir. Doba leng laimo areg asesa ELOHIM enin medoc mesohob, kaba, len leinesa maireseb menau geb huhugb terimda.

Matius 26

26:1 Sug Yesus ens meijouhw dau Lona Sug Ouwedoc dou men logodeh dag graga dauwohob, kaba, en ens dau lona sug en omom dou len deit, endagai: 26:2 Yen yecinaga dag lona hwai deit, kaba, maman maugwan ared debin lona sug ELOHIM esga maman mamjemouwer dau cinogo Mesir sug nosohob. Dangga se lona ingga, kaba, sud hom en emohw Lusud Meraguna Mebin dan se leng Yahudi meren mougtir merisira naugb len letob dan dara sogo salib toues. 26:3 Se lona sug Yesus enara dou men logodeh dag gin, kaba, gembala gesa taij meren mougtir dara leng Yahudi meren mougtir len laugwan loucimdeb se Gembala Gesa Taij Meren Mougt Mera Medam, moho Kayapas, men tu. 26:4 Sug len loucimdebohob, kaba, len lehilon ucina, dauntoba len lagaigeij Yesus naugb leic gomom dou en. Dara len lehilon ucina, dauntoba lusud leinyana lemecinaga dau gin touwero. 26:5 Doba sug len lehilon ucina dag ginohob, kaba, len len dougwom an ucucugb, lendagai: Maman mamagaigeij eni se Lona Gohw Bedreg gin, isnaro. Anai cum, kaba, lusud leic gecgu dou maman icira en namcir. 26:6 Se lona hom, kaba, Yesus moongga se sud hom, moho Simon, men tu se cinogo Betania. Simon gini, kaba, lusud leija en moho dag aremos gogoufu et en sug nosohob. Doba iteitogin, kaba, en eigouhwohob. 26:7 Dangga sug eni moongga se Simon men tu, kaba, gida hom en odo debecij hom dau igdahab gogoufu an aremoung mohu men ouwadebeda gedig mera eisaugb namcir aud Yesus. Sug en edebeij Yesusohob, kaba, en eir aremoung mohu gini se en mougt toua. 26:8-9 Doba sug Yesus men logodeh, len leiya dau gin, kaba, len letaha en an gini, lendagai: Ban beir aremoung mohu gini bamcirac icira en mougt, anara? Anai aremoung mohu ingga sug ban bohw dou len gus, kaba, mera eisaugb namcir. Dangga sug ban bauma aregoufu dau len gusahabi, kaba, ban bemohw aregoufu dou leng merunggwereij dous. 26:10-12 Doba Yesus ecinaga areg men logodeh lauwam an gini. Hang en etaha len dougwo, endagai: Leng merunggwereij gini, kaba, len leigtou desij yen terimda naugb sug yen yousa len. Doba dan, kaba, dan demeigtou desij yen deitero. Doba cum, kaba, dan domom dau yenohob. Anai sug gida gini ehin aremoung mohu men ouwadebeda se dan indugt gini, kaba, en esedeb dan indaga naugb lona sug lusud lec dan gini. Dangga dagiro, naugwe hang, yen yemeic igdebes dou ena? Anai men geicara geigouhw dou dan gini dag lusud leimiman en an namcir. 26:13 Hang yen youman deigeigouhw. Sug lusud lesai Mer Geigouhw eisaugb dan dou lusud se cinogo sugiro sugiro, kaba, len lecic dau gida gini men geicara dou len, dauntoba len merdoc eiseisan en terimda. Augwan gini asesa dag misen namcir. 26:14 Sug Yesus enara dag graga dou men logodeh ouwohob, kaba, sud hom dau Yesus men logodeh merug sisa hobjerai, en moho Yudas dau cinogo Keriod, kaba, en eihwedaud leng Yahudi meren mougtir naugb en ohw Yesus dou leni. 26:15 Sug en edebeij lenohob, kaba, en eijidougwo len, endagai: Sug dan dohw Yesus dou yen, kaba, yen yemeic ara dou dana? Dangga sug len lecic aregoufu perag mogo mos homoiyohob, kaba, len leic dou en. 26:16 Hang dau lona ingga, kaba, Yudas en ehilon ucina naugb en ohw Yesus dou len namcir. 26:17 Edebeij leng Yahudi meren Ari Gouji sug len let roti gemerisero se lona gaimougtut ingga, kaba, Yesus men logodeh len len aud en. Hanoba len leijidougwo en, lendagai: Ban bouwan emen emougwan ared naugb Lona Gohw Bedreg gin deb sugiro? 26:18 Dangga Yesus arougb len, endagai: Yen yeihweda yedeiya sud hom se Yerusalem gedig yen yecinaga enohob. Sug yen yedeiya enohob, kaba, yen yen dou eni, yendagai: Emen adehsud, kaba, en ouwan emen emougwan emetara debin Lona Gohw Bedreg gini se aban tu, anai men lona edagasohob. 26:19 Sug Yesus men logodeh louman en mer an danggohob, kaba, len leihweda naugb len lesedeb ared debin Lona Gohw Bedreg gini se sud hom graga men tu deb. 26:20 Sug edebeij lobohob, kaba, Yesus dara men logodeh merug sisa hobjerai len laugwan len toua len len. Hanoba len leigtou naugb letara se dimei mes se tu graga. 26:21 Sug len letaraba, kaba, Yesus enara dou len, endagai: Yen youman dan indir deigeigouhw. Sud hom dau yenin gin, kaba, en emohw dan dou len guses. Gini asesa dag misen namcir. 26:22 Sug men logodeh louman en mer an gin, kaba, len merdoc eijesa medam namcir. Hanoba astesda sud hom yom dau len, kaba, en auni ucugb dou Yesus, endagai: Adehsud, ban boudesa danei? Anai danis demohw banbuma. 26:23 Doba Yesus auni ucugb dou men logodeh sisa hobjerai gini, endagai: Gareg dau yen aman amatara se igdebir hom, kaba, eninggang emohw dans. 26:24 Anai areg lusud len log deb se Surad Injil Meb Mohon eisaugb Lusud Meraguna Mebin dan deb sug nosohob, kaba, dan daimo augwan gini aud gomom dag misen toua. Doba sud hom gohw dan gini, kaba, gogom medam eb naugb en namcir. Hang eigouhw naugb en mem emeh en deb touwero. 26:25 Doba sug Yudas gen ohw Yesus en ouman dau gini, kaba, en eijidougwo Yesus, endagai: Guru, ban boudesa dan dohw ban dou len gusei? Dangga Yesus enara bauni en mer, endagai: Areg banin benohob, kaba, teiyengga. 26:26 Sug Yesus etara dara men logodehaba, kaba, en os roti hom icira en mesira. Sug en os roti ginohob, kaba, en en sijo dou ELOHIM naugb en oiharaga roti ingga. Sug en en sijo dou ELOHIM enohob, kaba, en ekris roti naugb en eic dou len. Hanoba en enara dou len, endagai: Yen yet gini, anai roti gini dag danin indaga. 26:27 Sug en eic roti dou lenohob, kaba, en os mog an mohu deit. Sug en os mog an mohu ginohob, kaba, en en sijo dou ELOHIM naugb oiharaga ingga toua. Sug en en sijo dou ELOHIM enohob, kaba, en eic mog an mohu dou men logodeh naugb len leg toua. 26:28 Hanoba en enara dou len, endagai: Yen yeg mohu geb se mog gini. Anai mohu gini dag dan indugwihi gedig ororo naugb ELOHIM aigdougwo lusud leinyana se cinogo augwan meren sesar. Hang ouma debin areg ELOHIM os deb dou men lusud nosa debohob. 26:29 Dangga dau iteitogini, terim edebeij lona sug dan Indina en oiharaga lusud ucugb, kaba, dan demeg anggur mohu dag gin dara yen deitero. Doba se lona sug dan Indina en oiharaga yen ucugwohob, kaba, maman maugwan mameg anggur mohu menau aninim deit. Yen youman dan indir an gin deigeigouhw namcir. 26:30 Sug len letara ouwohob, kaba, len lei ugwaremer lagahugouhw an ELOHIM debin gini. Sug len lei ugwaremer ouwohob, kaba, len len dau tu naugb len leihwedig menmougb hom, moho Saitun Meda. 26:31 Sug len leisaugb menmougb ingga, kaba, Yesus enara dou men logodeh asa ucina, endagai: Areg len gus leic dou dan se loba gini, kaba, eic dag yen yaugwan meigdoc obsara dau dan namcir. Dara yen yougbdedau dan toua. Anai ELOHIM og deb se Surad Injil Meb Mohon sug nosa debohob, endagai: Dan demogod gembala en emomom dau men domber laugwan len lemougb lemaisoboro toues. 26:32 Doba sug ELOHIM eigdoumesa dan deisa dau domom ucugwohob, kaba, dan demeino yen meijen dig leng Galilea meren hancobes. 26:33 Doba sug Petrus ouman gini, kaba, en eic mos naugb en enara bauni Yesus mer dedemeda, endagai: Len gus laugwan, kaba, len lahau naugb len lougbdedau banda. Doba danin, kaba, dan demougdedau banero. 26:34 Doba Yesus en enara bauni en mer ucugb, endagai: Ban bouman dan indir deigeigouhw. Anai se loba gini sug berougwu emeba merbuma, kaba, ban baideido dougwo dan mougwa homoi icirohob dag ban bemecinaga danero. Augwan gini asesa dag misen namcir. 26:35 Doba Petrus eic mos naugb en enara bauwun Yesus mer terimda, endagai: Sug len gus logod dan domom aninim dara ban, doba dan demaideido danin dougwo banero. Sug Petrus enara danggohob, kaba, Yesus men logodeh gus len laugwan lousa deisa Petrus mer an gin dou en toua. 26:36 Sug Yesus dara men logodeh len ledebeij usi hom, moho Gedsemanohob, kaba, Yesus enara dou men logodeh, endagai: Yen yaugwan yeigtou sugini naugb dan, dauntoba danin didocuncum dou daninahabi. 26:37 Doba sug en eihweda naugb en edocuncum, kaba, en en dou Petrus dara Sebedeus meisi lahwai naugb len loucan en. Sug len lededau men logodeh gusohob, kaba, en ebiji naugb en medoc momogo dara en medoc eijesa medam namcir. 26:38 Hanoba en enara dou men logodeh merug homoi gini, endagai: Dan indoc momogo medam, kaba, eic dag dan domom icira gin namcir. Dangga hang, yen yeigtou desij dan naugb yen yesedougwo dan sugin namcir toua. 26:39 Sug en en dou men logodeh merug homoi dag gragohob, kaba, en asid enin gurereito dau len deit. Hanoba en ecguna bamuhumlo naugb en ocuncum dou en Mena, endagai: Akeinya, sug aban ucina ingma naugb dan demaimo gogom ginero, kaba, ban bedug mog an gogom gini dau dani, dauntoba dan demeg touwero. Doba areg danin douwan dau danin dag gini, ga, naro. Doba areg banin bouwan beic dou dan, kaba, dan daimo areg ban beic dou dan ingga dous. 26:40 Sug en ocuncum dag gragohob, kaba, en ecicugb aud men logodeh merug homoi graga deit. Doba cicireber, kaba, len laugwan latou dauwohob. Dangga sug en etaha lenohob, kaba, en ehin meresa Petrus, endagai: Dagiro naugb yen yemesedougwo dan gurereito sug docuncum gin touwero? 26:41 Esloulougb naugb yen yesedeh yauweila dougwo areg gainyen yen namcir, dauntoba yen yemobsara aud areg ginero. Dara yen yocuncum esesa terimda. Anai se yen meigdoc mes, kaba, yen youwan yaimo areg geigouhw dous. Doba se yen meijaga, kaba, cum, yen youwan yaimo areg gainyen yen gin dedemedohob. 26:42 Sug Yesus ehin meresa len danggohob, kaba, en ecicugb dau len naugb en edocuncum mougwa hwai dou en Mena ELOHIM deit, endagai: Akeinya, ban bouwan naugb dan deg mog an gogom gin namcir, kaba, ban bemedug dau danero. Anai dan douwan daimo areg ban bouwan gin dous. 26:43 Sug en ecicugb dau edocuncum gini aud men logodeh deit, kaba, en eija, doba len laugwan latou dau en deitohob. Anai len louwan lesga meriresi, doba cicir ogomcin len namcirohob. 26:44 Dangga en emebir lenero. Doba en eihwededau len naugb en edocuncum gedig mougwa homoi dou en Mena deit. Aninim dag en ocuncum mougwa hwai nosa graga dou enohob. 26:45 Sug en ocuncum gin ouwohob, kaba, en ecicugb aud men logodeh merug homoi graga deit. Hanoba en esa mer debin len, endagai: Yen yatou dara yeigtou debin yen meijug terimda, anara? Anai yen yeiya, doba indan cumougt naugb sug len lohw Lusud Meraguna Mebin dan debsa leng lebesesar merisira enohob. 26:46 Dangga yen yeisa naugb maman maihweda. Anai yen yeiya sud hom gohw dan se len ingga merisira, kaba, en ebeij deinyor danohob. 26:47 Irir sug Yesus en enara dou men logodeh merug homoi gragaba, kaba, Yudas, sud hom dau Yesus men logodeh merug sisa hobjerai, kaba, en agunyen. Dara mougt mera gouji dau gembala gesa taij dara mougtir dau leng Yahudi meren logodeh leinyana laicira en. Anai meren mougtir gin, kaba, len larougb len naugb len laimo Yudas an ginohob. Dangga hang, len laugwan gini, kaba, len lod meren krawan dara meren ijouhugwa toua. 26:48 Doba Yudas en acoci lusud leinyana laimo en graga debohob, endagai: Yen yemeiya sud hom gedig dan dou indufesa eni, kaba, aisa yen meisira naugb yen yagaigeij en namcir. Anai sud hom areg maman maihwedaud en gin engga. 26:49 Dangga sug Yudas eiya Yesus, kaba, en edesa deinyor. Hanoba en ou en, endagai; Adehsud, abiresou. Sug en enara dangga dou Yesusohob, kaba, en ou moufesa en namcir. 26:50 Doba Yesus enara bauni en mer ucugb dou en, endagai: Insiya, areg ban ben sugini naugwohob, kaba, ban baimo gin dedemeda. Sug en enara dou Yudas danggohob, kaba, len laugwan louwa debin en naugb lagaigeij en namcir. 26:51 Doba sud hom dau Yesus men logodeh gesa desij en ingga, kaba, en eigdesa men krawan dau meh. Hanoba en ogod Gembala Gesa Taij Meren Mougt Mera Medam men sogougb hom en moms edug dau en toua. 26:52 Doba Yesus esa mer debin en icira gini, endagai: Ban beis aban krawan se meh ucugb. Anai gareg en os men krawan naugb ogod len gus lomom, kaba, cum, len gus leic lagod en toua omom namcir. 26:53 Ban boudesa dan dag demeiyagarij dan Indina naugb en emousa daneroei? Dangga, isnaro. Anai sug dan deiyagarij eni, kaba, en emesa men malaikadir merug ribu mos senggai iteitogini naugb len leseyeiyo dan toua. 26:54 Doba areg lusud leic dou dan iteitogini esogwa deisa areg len log se Surad Injil Meb Mohon deb sug nosohob. Dangga sug dan dacgeij dan Indina naugb en esa malaikadir lousa dan dougwo augwan gin, kaba, dagiro esogwa deisa areg len log deb gina? 26:55 Sug Yesus en dougwo men godeh hom dag gragohob, kaba, en enara debin lusud leinyana gedig len len aud en naugb lagaigeij en ingga toua, endagai: Nosa, kaba, dan indugwengga se ELOHIM men igtia naugb dan dens en mer dou yen astesda lona terimda. Doba yen yemagaigeij danero. Dangga dagiro, naugwe hang, yen yemodo meijen krawan dara ijouhugwa naugb yen yagaigeij dan gina? Yen youdesa dan dedag sud hom mog mogei? 26:56 Doba inggaida. Meijen geicara augwan dou dan gin, kaba, esogwa deisa areg leng lesai ELOHIM moro sug nosa len log deb se Surad Injil Meb Mohon deb sug nosohob. Sug Yesus men logodeh len leiya, doba len lagaigeij Yesus danggohob, kaba, len laugwan lougb laisoboro dau en namcir. 26:57 Sug len lagaigeij Yesusohob, kaba, len lahwan en deseino Gembala Gesa Taij Meren Mougt Mera Medam, moho Kayapas, se men tu. Anai leng meru ouforoho se Musa men gomnomna dara leng Yahudi meren mougtir len laugwan loucimdeb sungga naugb enohob. 26:58 Dara Petrus toua edoumouma ucan Yesus dig medigo, terimda bedebeij Gembala Gesa Taij Mougt Mera Medam men igtia. Dangga sug en einesohob, kaba, en eigtou desij lusud gedig len lesedougwo mougt mera medam men tu maga ingga. Dauntoba en ouman len logod aremer dagiro deinaugb Yesusa? 26:59 Sug len lahwan Yesus deseino gembala gesa taij meren mougtir dara Majelis len laugwanohob, kaba, len lehilon ucina naugb lereiyareseni. Dauntoba len logod aremer gomom naugb en toua. 26:60 Dangga lusud leinyana len len naugb lereiyara amgemaseni namcir. Doba len lemesma aremer gemeica hom touwero. Sug len gus lenara ouwa dauwohob, kaba, lahwai lan lan daiyamo naugb lan toua lauma debin en deit, landagai: 26:61 Aman amouman en mer dag en ot ELOHIM Men Tuari baisoboro namcir. Doba se lona hwai debin, kaba, en ohud ucugb se mohw deit. 26:62 Sug lan lauma debin en danggohob, kaba, Gembala Gesa Taij Meren Mougt Mera Medam en eisa besa naugb en esa mer debin Yesus, endagai: Lan gini, kaba, lan laigdoumesa gogom debin ban deseino emenohob. Dangga ban bauni dagiro eisaugb gina? Era ban bosumei? 26:63 Doba sug Yesus eigtou dag osum namcir, kaba, Gembala Gesa Taij Meren Mougt Mera Medam gini en eijidougwo Yesus mougwa hom dara deit, endagai: Dan dacgeij naugb ban bou ELOHIM gedig en maireseb huhugb gini en moho debin dou emen, dauntoba emen emecinaga ban bedag ELOHIM Meisi mohora hom gedig en eigdoc lusud dau meren sesar dag misenohobei? Era naroei? 26:64 Dangga Yesus ousa deisa en mer an gini, endagai: Areg ban ben, kaba, moongga. Hang yen youman dan indir deigeigouhw namcir. Anai dau iteitogin, kaba, yen yemeiya Lusud Meraguna Mebin dan demeigtou dig ELOHIM Gedig En Mobisamougb en mesira misen naugb dan dedag mougt mera medam desij en. Dara yen yemeiya dan demecicugb se umer aud yen toues. 26:65 Sug Yesus auni dou mougt mera medam dag gragohob, kaba, mougt mera medam ingga en ekris enin men sansun dau enin mos, anai en mos eigeigan areg Yesus auni dou en gin namcir. Hanoba en eija Majelis gus, endagai: Sud hom gini, kaba, en eic ELOHIM moho acecim namcirohob. Dangga hang, maman mamehilon lusud gus ucucugb eisaugb en deitero. Anai maman maugwan mauman dau enin mer dag en eic ELOHIM en moho bacecimohob. 26:66 Sug mougt mera medam enara dag graga dou Majelisohob, kaba, en eijidougwo len deit, endagai: Yen youdesa naugb gin dagiro? Hanoba len launi dou en ucugb, lendagai: Enin mer gini edeinyum naugb sug maman maic gomom dou enohob. 26:67-68 Sug Majelis logod gomom deinaugb Yesus danggohob, kaba, len leigdores aih en mebes. Dara len lecgun merisira naugb logod en toua. Doba ligbum deit, kaba, len leh merusutimei naugb loto eni. Hanoba len lesbesan eni, lendagai: Bani Sud Hom Geigdoc Lusud Dau Meren Gogom Augwan, kaba, ban ben emen emoho dou emen dag gareg en oto ban gina? 26:69 Sug Yesus en moongga se dimei mesaba, kaba, Petrus en toua moongga se igtia mougwaba. Dangga mougt mera medam graga men sogougb dau gida hom, kaba, en en aud Petrus naugb eijidougwo en dag ehin mereseni, endagai: Dan decinaga dag ban baiceicira Yesus dau cinogo Galilea en touohoba? 26:70 Doba Petrus aideido dougwo en deseino len leinyana ingga namcir, endagai: Dan demecinaga areg ban beijidougwo dan an gini men meijouhw asesero. 26:71 Sug Petrus aideido dougwo Yesus danggohob, kaba, en aisacij aud misis geb dougwo igtia. Sug en ebeij deinyor misis inggohob, kaba, mougt mera medam men sogougb dau gida hom deit, kaba, en eiya Petrus. Hanoba en ens en dou leng lesa deinyor misis ingga, endagai: Yen yeiya sud hom gini. Dan decinaga en aiceicira Yesus dau cinogo Nasared ingga toua. 26:72 Doba Petrus aideido dara ouwara dougwo namcir, endagai: Dan demecinaga sud hom gedig ban ben inggaro. 26:73 Dangga sug emeb terberba debin inggabuma, kaba, leng leigtou se igtia ingga len len naugb lenara dou Petrus deit, lendagai: Indeic, ban gin toua sud hom dau leng laiceicira Yesus sug nosa. Anai ban benara, doba ban abir eineg an susugb dau emen lecohob. 26:74 Doba Petrus ouwara dou len namcir, endagai: Dan demecinaga sud hom gedig yen yehin meijiresa dan an ginero. Augwan gini asesa dag misen namcir. Ga, naro, kaba, dan dacgeij ELOHIM naugb en eic gogom medam debin gin dou dan toua. Sug en ouwara dangga inegohob, kaba, berougwu eba mer bagod dougwo en mer an toua. 26:75 Sug Petrus ouman berougwu eba merohob, kaba, en medoc eiseisan areg Yesus en dou enohob dag berougwu emeba mer mougwa hombuma, kaba, en aideido dougwo Yesus mougwa homoiyohob. Dangga sug en agunya dau mougt mera medam men igtia dig medigohob, kaba, en eb medam an gin namcir.

Matius 27

27:1 Sug lona esgohob, kaba, gembala gesa taij meren mougtir dara leng Yahudi meren mougtir, len laugwan loucimdeb deit naugb len lehilon ucina. Dauntoba leng Roma meren mougt mera, moho Pilatus, en toua ousa deisa len an naugb len leic gomom dou Yesus namcir. 27:2 Dangga sug len logod anohob, kaba, len larougb meren sadodor naugb len lahud Yesus mesira hwas daremahabi, len lemahwan en deseino leng Roma meren mougt mera, moho Pilatus, deit. 27:3 Doba sug Yudas, gen ohw Yesusohob, en eiya dag Majelis logod aremer gomom deinaugb enohob, kaba, en medoc eijesa medam an men geicara gin namcir. Dangga en en aud gembala gesa taij meren mougtir dara leng Yahudi meren mougtir gini, naugb en edug meren aregoufu dau perag mogo mos homoi ucugb dou len. 27:4 Hanoba en enara dou len, endagai: Sud hom Yesus gini men geicara gecgu homero. Hang dan debesesar namcir, anai dan dohw en se yen meisirohob. Doba len lenara lawun en mer ucugb dou en, lendagai: Gini emen aremer deitero. Dangga ban bemahacugb gini debin emenlo. Doba banin behilon ucina naugb banin dous. 27:5 Dangga Yudas eihwededau mougt mera medam men tu aud ELOHIM Men Tuari naugb en ederba aregoufu deb se ELOHIM men igtia deb dous. Sug en erba debohob, kaba, en eihwedaud usi hom naugb en era aumaga se enin morc mes. Hanoba en esogan beic debin enin morc mes bomom namcir. 27:6 Doba gembala gesa taij meren mougtir, kaba, len louci aregoufu mogo graga debinim. Hanoba len len dougwom, lendagai: Aregoufu gin, kaba, len laic sud hom en mogwihi doumohob. Dangga hang, maman mameic aregoufu gini mamobdeb se ELOHIM men dimei mes gedig len lob aregoufu se touwero. Anai gini edreg dau Musa men gomnomna namcir touohob. 27:7 Dangga sug len logod an aregoufu ginohob, kaba, len leic aregoufu graga naugb len lauma cinogo dau sud hom gen mou ouforoho gesinsin cinebcina dag debecij dau eni. Dauntoba len lec lugmahara mogud debsa sungga dous. 27:8 Hang dau lona ingga terim iteitogin, kaba, lusud leija cinogo gini en moho dag Cinogo Mogwihi. Anai len leic aregoufu, gedig len laic sud hom en mogwihi doum naugb len laumohob. 27:9-10 Augwan gini esogwa deisa areg sud hom gesai ELOHIM moro nosa, moho Yeremia, en og deb se Surad Injil Meb Mohon deb sug nosohob, endagai: Dan deic aregoufu dau perag mogo mos homoi dou leng Israel naugb len lauma cinogo dau sud hom gen mouf ouforoho naugb en esinsin cinebcina dag debecij dau eni. Anai gini aimo dau areg len logod an deb deinaugb sud hom ginohob. Dara aimo dau areg ELOHIM arougb dan an dangga touohob. 27:11 Sug len lahwan Yesus deseino leng Roma meren mougt mera Pilatusohob, kaba, en eijidougwo Yesus, endagai: Ban eng bedag leng Yahudi meren mougt mera medamei? Era naroei? Dangga Yesus auni dou en, endagai: Areg ban ben, kaba, moongga. 27:12 Dara gembala gesa taij meren mougtir, dara leng Yahudi meren mougtir, kaba, len lenara leinyana naugb loho blas Yesus deseino Pilatus toua. Doba Yesus emauni ara ara hom dou lenero. 27:13 Dangga Pilatus en medoc eineg an Yesus. Hanoba en eijidougwo en, endagai: Len lahacugb gogom dau aremer aingma aingma debin ban terimda. Doba ban bemauni len merirero. Ban abums etub dougwo ginohobei? 27:14 Doba Yesus eigtou dag osum namcir, dag emauni dau aremer hom dou en touwero. Hanoba Pilatus eimiman dau en namcir. 27:15 Doba edebeij astesda Lona Gohw Bedreg, kaba, leng Roma meren mougt mera Pilatus gini, en aimo dau men geicara naugb en esga sud hom yom dau tu gesisug dou leng Yahudi aimo dau gareg len louwan lacgeij dau eni. 27:16-17 Dangga sug leng Yahudi laugwan graga lacinimohob, kaba, en eijidougwo len, endagai: Yen youwan dan desga Yesus, Abbas meisi, dou yenei? Era yen youwan dan desga Yesus gin dou yenei? Anai yen yeigdoumesa en moho dag en eigdoc yen dau meijen gogom augwanohob. En eijidougwo len dag gini, anai se lona ingga, kaba, sud hom moho Yesus, Abbas meisi, en eisa tu gesisugohob. Anai en ouwan naugb ocirma leng Roma dau leng Yahudi meren hancob ucucugb terimda. Hang en moho agaha dou leng Yahudi se meren hancob augwan touohob. 27:18-19 Doba gembala gesa taij meren mougtir dara leng Yahudi meren mougtir len lenara lacoci meren lusud ingga deb nosohob, lendagai: Yen yacgeij naugb Pilatus esga Yesus, Abbas meisi, dou yen dous. Doba Yesus gini, kaba, yen yacgeij naugb en eic gomom dou en namcir. Dangga sug Pilatus eijidougwo len an dag graga, kaba, len launi dou en, lendagai: Ban besga Yesus, Abbas meisi, dou emen dous. Doba Yesus gin, kaba, ban beic gomom dou en namcir. Doba Pilatus en ecinaga leng Yahudi meren mougtir len merdoc esdigeij Yesusohob. Hang len lemogugwo en se en mesira naugb en eic gomom dou en toua. 27:20 Dara sug en eigtou se maija moc se tu gedig len logod aremeresa gini, kaba, en mesouwa esa mer dou en touohob, endagai: Ban bemod abagesa naugb ban bemousa deisa leng Yahudi meren mougtir len merir an sud hom ginlo. Anai dan datou daugwa se loba greb dag sud hom gini emebesesar mougwa hombuma. Doba en ecabeci namcir. Hang emeic dan indoc eijesa medam eisaugb enohob. 27:21 Dangga Pilatus eijidougwo len deit, endagai: Dau lahwai gini, kaba, yen youwan dan desga gara dou yena? Doba len launi ucugb dou en, lendagai: Emen emouwan ban besga Yesus, Abbas meisi, dou emen dous. 27:22 Doba Pilatus en auni len merir ucugb deit, endagai: Sug yen youwan dag gini, kaba, dan deb ara dara Yesus gina? Anai yen yeigdoumesa en moho dag en eigdoc yen dau meijen gogom augwanohoba? Doba len laugwan lesa merir medam an dou en ucugb, lendagai: En, kaba, ban barougb aban sadodor naugb len letob en dara sogo salib namcir. 27:23 Doba Pilatus eijidougwo len ucugb deit, endagai: Men geicara gecgu dagiro? Hang dan darougb indan sadodor naugb len letob en dara sogo saliba? Doba len laugwan lesa merir, aninim dag len leijara dou en namcir, lendagai: Ban barougb lusud naugb len letob en dara sogo salib namcir dous. 27:24 Sug Pilatus en ecinaga dag areg en enara dou len emasesa len merdoc mesero, kaba, en acgeij men lusud naugb len leic igdebir an duhu dou en. Dauntoba en edu en mesira an Yesus mogwihi dau en dou len. Hanoba en enara dou len, endagai: Dan demedag mougt naugb sud hom gini sug en omomero. Doba yenin yen yedag mougt naugb gin dous. En enara dag gin, anai en eiya dag cum, kaba, len logodim icira gin namcir. 27:25 Dangga len lebin augb leni, lendagai: Emen emedag mougt naugb en mogwihi gini, dara eb naugb emen emehir dara emdebeitor toua. 27:26 Sug Pilatus ouman len merir an danggohob, kaba, en arougb men sadodor naugb len labosbos Yesus. Sug len labosbos enohob, kaba, en ogugwo Yesus se leng sadodor merisira naugb len letob en dara sogo salib toua. 27:27 Sug Pilatus men sadodor labosbos Yesusohob, kaba, len lahwan en aud Pilatus se men tu deit. Hanoba len leija len mersir gus dau leng sadodor len laugwan naugb les acec Yesus toua. 27:28 Sug len laugwan les acec enohob, kaba, len leg men sansun dau en mos. Hanoba len leg mougt mera gouji men sansun gagas geijogor geirir medam hom dougwo en ucugb deit. 27:29 Sug len leg sansun geigouhw dougwo en ucugwohob, kaba, len lecgun lisug maga an mog naugb len leg se en mougt toua. Dara len leic ijongkebaga hom dag mougt mera medam men ijongkebaga dou en, bos dig mesira misen toua. Hanoba len lecguna dou en naugb leic en lacecim, lendagai: Ban bedag leng Yahudi meren mougt mera medam, kaba, emen emouwan ban bemomom dedemedero. Doba ban besedougwo len se arisogomoc einyana terimda. 27:30 Sug len lou en danggohob, kaba, len locuc aih en namcir. Dara len leic ijongkebaga graga dau en mesira naugb len lagod enin mougt mera ucucugb toua. 27:31 Sug len leic en lacecim danggohob, kaba, len leg sansun hom graga dau en mos ucugb deit. Sug len leg enin men sansun ucugb se deit, kaba, len lahwan en dig medigo naugb len ledetob en dara sogo salib toua. 27:32 Sug len len dau tuohob, kaba, len lagasa sud hom dau cinogo Kirene, en moho Simon, se ucina mogumsi. Dangga leng sadodor lagodgod en naugb en odo Yesus men sogo salib dau en ucan len toua. 27:33-34 Sug len ledebeij usi hom gedig leng Yahudi leija en moho dag Golgodohob, kaba, len leic anggur mohu lahurim dara duhu gedougdaha laganini en naugb en eg, dauntoba en mos oungmerema dougwo gerij sug len letob en. Sug en eg bainyen, doba edougdaha dangga, kaba, en oguro deb. Golgoda gini men meijouhw dag usi mougt mera mer. 27:35 Sug leng sadodor letob en dara sogo salibohob, kaba, len lerba nomor ucucugb naugb laic Yesus men sansun. 27:36 Sug len lerba nomor laic Yesus men sansunohob, kaba, len lesedougwo en terimda en omom. Dauntoba lusud lemesga en dau sogo salibero. 27:37 Dara len log se surad hom, lendagai: Eni leng Yahudi meren mougt mera medam. Hanoba len letob an dig Yesus mougt se sogo salib toua. 27:38 Dara len letob lasud lahwai desij Yesus toua. Anai lan gin, kaba, lan lauwan naugb lacirma leng Roma dau leng Yahudi meren hancob ucucugb terimdohob. Hang len letob laingma dig en mesira misen. Doba laingma, kaba, len letob dig en mesira metigi. 27:39 Dangga lusud gedig len leraga asa ucina sug len leiya Yesus taiba sogo salib, kaba, len letir len merugt an eni. 27:40 Hanoba len lasilagara en, lendagai: Bang ELOHIM Meisi ban misen, kaba, ban besogwen dau sogo salib iteitogini naugb ban beigdoc banin dau bomom toua. Anai nosa, kaba, ban ben dou emen dag ban boti ELOHIM Men Tuari gecabeci baisoborahabi, ban bemohud se lona homoi ucugb deisa mohwes. 27:41 Dara gembala gesa taij meren mougtir, dara leng meru ouforoho se Musa men gomnomna, dara leng Yahudi meren mougtir len laugwan lesilagara en dag gin toua. 27:42 Hanoba len lenara doum, lendagai: Len gus, kaba, en eigdoc len dau meren gogom einyana sug nosohob. Doba naugb enin, kaba, en emeigdoc enin dau gogom geb debin en ginero. Dangga sug en edag mamang Israel maman mougt mera medam dag misenohob, kaba, eigouhw naugb en esogwa dau sogo salib iteitogini. Dauntoba sug maman maiya gin, kaba, maman mamdoc ebdebin an en dag men goubesa edeinyum naugb en eigdoc maman dau maman gogom augwan toua. 27:43 Dara en enara dou maman dag en edag ELOHIM Meisi misen touohob. Dangga hang, eigouhw naugb maman masa mauweila dougwo sug ELOHIM emeigdoc en dau men gogom gin touesei? Era naroei? Anai nosa, kaba, en enara dou maman dag en od mena debsa en Mena ELOHIM naugb ginohob. 27:44 Dara lang marug mog gedig len letob lan desij Yesus gragohob, kaba, lan lasilagara en aninim dag len gin toua. 27:45 Doba sug edebeij igda aga bogohob, kaba, loba ecgun cinogo gin augwan terimda edebeij igda edeij toua. 27:46 Dangga sug edebeij deinyor igda edeijohob, kaba, Yesus eiyagarij en mena dara mer medam, endagai: w Eli, Eli, lama sabagtani. Gini men meijouhw dag: Indan ELOHIM, indan ELOHIM, dagiro naugb ban barges dan deb, anara? 27:47 Doba sug lusud gedig len lesa sungga len louman en mer an gini, kaba, merug hosa len lenara doum, lendagai: Yen youman, en eiyagarij Eliohob. 27:48 Dangga sud hom dau len, kaba, en obga bedeic augb keita geb se dum mohu. Hanoba en edogun se anggur mohu gedougdahabi, en emagasa ijongkebaga naugb en emout an dou Yesus naugb en emoutut. 27:49 Doba len gus, kaba, len len dougwo en dag leic en moho lacecim, lendagai: Ban bemeic dou enlobma. Doba maman masa mauweila dougwo endag Elias en emouwaden naugb emeigdoc en dau men gogom ginsei? Era naroei? Anai en eiyagarij enohob. 27:50 Doba Yesus, kaba, en eiyagarij en Mena dara mer medam mougwa hom deit. Hanoba enin esa mena bomom namcir. 27:51 Dangga minc geb dougwo ELOHIM Men Dimei Gecabeci agaga dau moc gada terim bedos gaih gedag hwai icira namcir. Dara inyomda eisa betitir cinogo augwan. Dara igdahab gouji augwan obrugb namcir toua. 27:52 Dara leng lomom gedig len laimo areg asesa ELOHIM enin medoc mes sug nosohob, kaba, ELOHIM ec aremoung moda dau len laugwan naugb len leisa toua. 27:53 Dangga sug Yesus eisa dau gomom ucugwohob, kaba, len gin toua laugwan lagunya dau meruda, aninim naugb len leinesa Cinogo Gecabeci, moho Yerusalem. Hanoba len lens lenin ainyes deseino lusud leinyana sungga toua. 27:54 Sug leng sadodor gedig len lesedougwo Yesus se sogo salib ingga dara meren mougt mera, len leiya dau inyomda etitir cinogo. Dara len leiya dau aremer gus augwan toua, kaba, len merdoc omom an gin namcir. Hanoba len lenara doum, lendagai: Sud hom gini ELOHIM Meisi misen namcir. 27:55-56 Dara Mariam dau cinogo Magdala, dara Yohanes dara Yusub lan marim, dara Sebedeus mehir len merim, dara ligida gus leinyana, kaba, len laugwan merugwengga naugb len lesa aigusi lauweila Yesus toua. Anai len gini, kaba, len laicira Yesus teitei dau Galilea naugb lousa enohob. 27:57 Sug deinyor lobohob, kaba, sud hom mesoho mougb, moho Yusub dau cinogo Arimatea, en toua en naugb edeiya Yesus medesa se sogo salib. Anai en toua dag Yesus men logodeh sug nosohob. 27:58 Sug en eiya, doba Yesus omomohob, kaba, en eihweda naugb en edacgeij Yesus maga dau Pilatus, endagai: Ban bouwan, kaba, ban beic Yesus maga dau sogo salib dou dani. Sug Pilatus ouman gin, kaba, en ousa deisa en mer an toua. Hanoba en arougb men sadodor, endagai: Yen yedeic Yesus medesa dau sogo salib dou enda. 27:59 Sug len leic Yesus medesa dou enohob, kaba, en eic minc gogoufu menau hom naugb en eic bagacgec dougwo Yesus maga augwan toua. 27:60 Dara Yusub men igdohos mes gedig len log deb menenauwaba, kaba, eb deinyor sungga touohob. Dangga sug len lagacgec Yesus maga dara mincohob, kaba, en arougb lusud naugb len ledec Yesus maga deb sungga toua. Sug len lob maga debohob, kaba, len legrij meh dougwo namcir. Sug len legrij dougwohob, kaba, len laugwan leihwededau namcir. 27:61 Doba Mariam dau cinogo Magdala, dara mesi Mariam homa, kaba, lan gini, lan laigtou dougwo igdohos mes an Yesus sungga terimda. 27:62 Doba edebeij lonamenmen se Lona Gemeicaresero gini, kaba, gembala gesa taij meren mougtir dara leng Parisi len loucimdeb dara Pilatus se men tu naugb len lesulou eisaugb Yesus dou eni. 27:63 Hanoba len lenara dou en, lendagai: Adehsud, emen emdoc eiseisan sud hom gaugwohosa lusud gini, en mer. Anai sug en mairesebaba, kaba, en enara dou emen, endagai: Lona hwai debin dau sug dan domomohob, kaba, dan deisa ucugwohob. 27:64 Dangga ban barougb aban sadodor naugb len lesedougwo igdohos mes ingga terimda se lona hwai gin ouwa dougwahabi. Dauntoba men lusud lemeiyoho en maga dau igdohos mes ginero. Anai sug aban sadodor len lemesedougworo, kaba, cum, men logodeh len leiyoho en maga dau sungga deitohob. Hanoba len lenara dou lusud, lendagai: En eisa ucugb dau gomomohob. Dangga meren gereiyara gouwedoc gin, kaba, gecgu medam edreg dau nosa. 27:65 Sug Pilatus ouman dau gini, kaba, en ousa deisa len merir an, endagai: Yen youci indan sadodor merug hosaiya naugb yen yeihweda yesedougwo ucina gedig yen yecinaga augwan deigeigouhw namcir. 27:66 Dangga sug len leihwededau Pilatus men tu ginohob, kaba, len leic sidgod ladra igdohos meh dara maga dougwo namcir. Hanoba len lohw sadodor naugb len lesedougwo deigeigouhw namcir, dauntoba lusud lemeinesa sunggaro.

Matius 28

28:1 Sug leng Yahudi meren Lona Gemeicaresero ouwa dauwohob. Hanoba edebeij Ari lonamenmen, kaba, Mariam dau cinogo Magdala dara en mesi Mariam homa, lan laihweda naugb ladeiya igdohos mes dougwo Yesus deit. Anai leng Yahudi meren Lona Gemeicaresero ouwa dauwohob. 28:2 Doba sug lan lac inegohob, kaba, inyomda eisa medam. Anai maman Adehsud men malaikad hom en ouwaden dau bogo. Dangga sug en edebeij igdohos mocohob, kaba, en egrij igdohos meh dau. Hanoba en eigtou taiba igdohos meh ingga toua. 28:3 Sug leng lesedougwo igdohos moc ingga len leiya dau gini kaba, len lahau dau en. Dara len leijesa medam dag lomom namcir toua. 28:4 Anai len leiya malaikad, doba en maires edag bagar mouf. Dara en men sansun toua dag cireg gogoufu namcir. 28:5 Dangga sug lagida lahwai graga lan ladebeij igdohos mocohob, kaba, malaikad oho mer debin lan, endagai: Yan yamahau dau danlo. Anai dan decinaga dag yan yan sugini naugb yan yahilon Yesus gedig len letob en se sogo salibohob. 28:6 Doba en moongga suginero. Anai en eisa dau gomom, aninim dag en en deb dou yen sug nosohob. Dangga yan yan yaiya dougwo igdohos mes sug len lob en debsa gini, doba mes mogudohob. 28:7 Hang yan yaihweda dedemeda naugb yan yaden dou men logodeh gus dag en eisa dau gomom ucugb. Dara yan yamen dou len dag en eino len merin dig leng Galilea meren hancob gin naugb len lemdeiya en sungga toua. Dara yan maigdoc moc dougwo areg dan den dou yen ginlo. Doba yan yaiseisan namcir. 28:8 Sug lagida graga lan lauman dau ginohob, kaba, lan laobga dau aremogougb moda ucugb dedemeda naugb lan laden dau areg graga augwan dou Yesus men logodeh gus laugwan toua. Doba sug lan laobga asa ucina gini, kaba, lan mardoc nagama ahau. Doba lan mardoc nagama, kaba, agahugouhw an areg lan lauman gragohob. 28:9-10 Dara sug lan laobga se ucina ginaba, kaba, Yesus enin agunya dagasa lan toua. Sug en ou lanohob, kaba, en oho mer debin lan, endagai: Yan yemahau dau danlo. Doba yan yaihweda naugb yan yaden dou dan indagtor naugb len leihweda se leng Galilea meren hancob. Anai sungga, kaba, len lemdeiya dans. Sug lan lauman en mer dag ginohob, kaba, lan lan aud en. Hanoba lan lacguna naugb lan laos en mohora dara lan lasijaresa en toua. 28:11 Doba yen youman deigeigouhw. Sug lagida graga laihwedohob, doba merug hosa dau leng lesedougwo aremoung moda graga toua lingma locucan lan dig cinogo Yerusalem naugb len ledecic dau aremer graga augwan asesa dou gembala gesa taij meren mougtir touahabi. 28:12 Sug gembala gesa taij meren mougtir louman ginohob, kaba, len loucimdeb dara leng Yahudi meren mougtir naugb len lohw merdocedoum. Dauntoba len lehilon ucina naugb aremer ginahabi. Sug len lohw merdocedoum naugwohob, kaba, len leic aregoufu einyana dou leng lesedougwo aremogougb moda gini, dauntoba len louf merires dougwo. 28:13 Hanoba len lococ len, lendagai: Sug lusud leijidougwo yen an aremer gini, kaba, yen yerei dou len dag se loba sug yen yatou dau, kaba, Yesus men logodeh len len naugb ledeigdoumesa en maga dau igdohos mesdohob. 28:14 Doba sug aremer gini agaha dou mougt mera Pilatus en toua ouman, kaba, emenin toua ememenara emat en medoc dau yens. Dauntoba en emeic gogom dou yen touwero. Hang yen meigdoc emeijesa dau ginlo. 28:15 Sug len louman dag gini, kaba, len leic aregoufu dau mougtir merisira namcir. Hanoba len laimo debin dag areg mougtir lesulou len an graga toua. Dangga dau lona ingga terimda iteitogini, kaba, leng Yahudi lecic len merir an gin doum terimdaba. 28:16 Sug lagida lahwai graga lan laden dau areg Yesus arougb lan an ingga dou men logodeh merug sisa hobjerem gragohob, kaba, len loucan en dig leng Galilea meren hancob naugb len leisaugb aud menmod hom dag areg Yesus ens dou lenohob. 28:17 Sug len leisaugb menmod ingga, kaba, len leiya eni. Dangga len lesijaresa en toua. Doba ligbum, kaba, len leija meruwesa enaba. 28:18 Doba sug Yesus esa deinyor lenohob, kaba, en enara dou len, endagai: ELOHIM eigdoumesa dan indoho dedag mougt naugb areg geb se bogo dara areg geb se cinogo augwan toua. 28:19 Hang yen yemeihweda naugb yen yesai dan induro dou lusud se cinogo gin augwan, dauntoba len laimo dan dag indan logodeh namcir. Dara leng laimo danohob, kaba, yen yogun len laugwan se duhu se dan Indina en moho, dara en Meisi dan indoho, dara se Mena Gogoufu en moho toua. 28:20 Hanoba yen yesulou len dauntoba len lesogwa deisa areg dan den dou yen gini augwan dag misen namcir. Anai dan indugwengga dara yen terimda edebeij sug lona ouwedoc dougwo namcir toua.

Markus 1

1:1-2 Mer Geigouhw gini eisaugb Yesus Krisdus, ELOHIM Meisi mohora hom sug ebiji, kaba, esogwa deisa areg sud hom gesai ELOHIM moro nosa moho Yesaya, en og deb se Surad Injil Meb Mohon deb nosohob, endagai: ELOHIM os dou en meisi, endagai: Ban bouman deigeigouhw. Anai dan demesa indan sud hom en emeino ban abin naugb en esedeb lusud merdoc mes obosboro naugb banohob. 1:3 En edag sud hom geija ara dou lusud se lomougwisa mer esesa terimda, endagai: Yen yesa yen meigdoc mes obosboro deb naugb ELOHIM sug en en. Aninim dag lusud lesa ucina obosboro naugb mougt mera medam sug en einesa aud len toua. 1:4 Dangga sug Yohanes agunya debin lusudohob, kaba, en eihwedig lomougwisa naugb en ogun len sungga toua, aimo dau areg Yesaya en og deb gragohob. Dara en ebedbed dou len, endagai: Yen yesga meijen sesar augwan moho asesa dou ELOHIM. Dara yen yahau an dougwo toua, kaba, ELOHIM emaigdougwo meijen sesar gini. Dara dan demogun yen se duhu dag ansins debin gin toues. 1:5 Sug len louman dag ginohob, kaba, lusud se leng Yahudi meren hancob dara leng dau cinogo Yerusalem, len len aud en naugb len lesga meren sesar augwan asesa dou en. Dau, kaba, en ogun len dag ansins debin gin se duhu Yordan toua. 1:6 Doba Yohanes gin, kaba, en eg sansun dau aremeta, moho w unta, mos. Dara areg en ohud meida moc, kaba, dau aremeta mos toua. Dara men ared naugb en et, kaba, en et amo dara omohu mogud dous. 1:7-8 Dara en ens dau aremer hom dara dou len deit, endagai: Dan, kaba, dan dogun yen se duhu, doba duhu misen dous. Doba cum, kaba, sud hom en emaimo ucan dan aud yens. En, kaba, en emesa Mena Gogoufu se yen meigdoc mes. Anai en moho agas medam bedreg dau dan namcir. Dangga hang, emedeinyum naugb dan demesga aumaga dau men hwigbeimos icira en mohora touwero. 1:9 Doba lona hosa debin sug Yohanes ebiji naugb en ogun lusud se duhu ginohob, kaba, Yesus toua en dau cinogo Nasared se leng Galilea meren hancob aud en se duhu Yordan naugb en ogun en sungga toua. 1:10 Dangga sug Yesus eisa dau duhu inegohob, kaba, en eiya, doba bogo ec dau. Hanoba en eiya Mena Gogoufu ohw dag bohobei dau bogaden aud en toua. 1:11 Dara en ouman en Mena ELOHIM enara dau bogaden ucan debin gin dou en toua, endagai: Bani dan Indisi gedig dan indoc gororougb ban. Dara dan indoc eigouhw an ban namcir toua. 1:12-13 Sug en Mena enara dou en inegohob, kaba, Mena Gogoufu einoisa en se lomougwisa naugb Setan ainyen en sungga se lona sud hwai debin ginahabi. Dara aremeta mog mog len louma debin en sungga toua. Doba malaikad lousa en toua terimda. 1:14 Doba edebeij sug Herodes en arougb men sadodor naugb len louf Yohanes se tu gesisug dauwohob, kaba, Yesus eihwedig leng Galilea meren hancob. Dangga sug en edebeij lenohob, kaba, en ebiji naugb en esai Mer Geigouhw dau ELOHIM dou len toua, endagai: 1:15 ELOHIM men lona ebeij deinyorohob naugb en oiharaga yen ucugb. Dangga hang, yen yod meijina debsa dan indir an ELOHIM Mer Geigouhw gini. Dara yen yesga meijen sesar augwan asesa dou en. Dara yen yahau an dougwo toua. 1:16 Se lona hom sug Yesus oci Galilea mebera, kaba, en eiya Simon dara en magto Andreas, lan larba diara debin hosei deb gini. Anai maran geicara dag lan lahilon hosei dous terimda. 1:17 Dangga Yesus en dou lan, endagai: Yan yaimo dan. Anai dan douwan dens meijouhw dou yan naugb yan yahwan lusud aud dan, dauntoba len ledag indan logodeh, aninim dag yan yarba diara debin hosei gin toua. 1:18 Sug lan lauman Yesus eija lan inegohob, kaba, lan larges maran diara deb. Hanoba lan laimo en dau namcir. 1:19 Sug Yesus an lahwai graga, len lec merohora gurerei deitohob, kaba, len leiya Sabedeus meisi lahwai. Lan maroho, Yakobus dara en magto, Yohanes. Lan eng lagon maran diara gobogougb dougwo deb se ing mes gini. 1:20 Sug Yesus eiya lan inegohob, kaba, en eija lan namcir, endagai: Yan toua yan naugb yaimo dan. Dangga lan ladedau lan marna Sebedeus an leng leicara dou en deb se ing mesedeb. Hanoba lan laicira Yesus toua. 1:21 Sug Yesus eija men logodeh ginohob, kaba, len leihwededau sungga terimda len ledebeij cinogo Kapernaum. Doba sug leng Yahudi meren Lona Gemeicaresero ebijohob, kaba, Yesus en toua einesa meren tuari naugb en edidib ELOHIM mer men meijouhw dou len sungga. 1:22 Sug len louman en mer an gini, kaba, len leimiman dau en namcir. Anai en emenara dag emeses meresa, aninim dag leng meru ouforoho se Musa men gomnomnero. Doba en os badi augwan dara goubesa dag misen dou len namcir. 1:23 Irir sug Yesus edidib ELOHIM mer dou len, kaba, sud hom gedig mena mog mog eisa en medoc mesohob, en toua einesa tuari mes debin len. Doba sug en eiya Yesus, kaba, en esa mer medam debin en, endagai: 1:24 Yesus dau cinogo Nasared, ban ben sugin naugb bedeberou emen eng gina? Ban ben naugb eic mor mor dou emen namcir danggei? Anai dan decinaga ban bedag sud hom gedig ELOHIM ouci ban douwoswos naugb ginohob. 1:25 Doba Yesus esa mer debin en, endagai: Abirero. Ban beihwededau sud hom ingga namcir. 1:26 Dangga sug mena mog mog etitir sud hom ingga en maga eijesa medamohob, kaba, en eiyaga mer medam. Hanoba en agunya beihwededau en toua. 1:27 Sug leng se tuari mes len leiya dau gini, kaba, len leimiman dau en namcir. Hanoba len leijidougwom, lendagai: Aringgina? En mer gini menenauwei? Anai sug en arougb merna mog mog gini, kaba, en enara dou len dara goubesa. Hang len lemaimo en mer naugb leihwededau en namcir toua. 1:28 Dangga Yesus men geicara gini agaha dedemeda becinten se leng Galilea meren hancob augwan namcir. 1:29 Sug Yesus ocirma mena mog mog dau sud hom ingga inegohob, kaba, eni dara men logodeh len len dau tuari naugb len leihweda se Simon dara Andreas maran tu. Dara Yakobus dara Yohanes, laicira len toua. 1:30 Doba Simon memba en areba dag mos esrougb medam namcir. Dangga sug Yesus dara men logodeh len leinesa maran tu inegohob, kaba, len len dau Simon memba gin dou en dedemeda toua. 1:31 Sug len len dou enohob, kaba, en einesa dimei aud enahabi. Dangga sug en os en mesira baigdoumesa enohob, kaba, mos esrougb edina dau en namcir. Hanoba en ousa len. Dara en ougwan ared naugb eic dou len toua. 1:32 Dangga se losog sug igda obsaresohob, kaba, leng Kapernaum, len lahwan leng areber, dara leng merna mog mog einesa len merdoc mesohob, len laugwan aud Yesus se dimei mes sug en eigtousa toua. Anai sug igda obsaresa dag ginohob, kaba, leng Yahudi meren Lona Gemeicaresero toua ouwohob. 1:33 Dara lusud gus se cinogo ingga, kaba, len laugwan lesesa misis moc naugb len toua leiya. 1:34 Dangga Yesus eic geigouhw dou leng areber aingma aingma. Dara en ocirma merna mog mog dau lusud toua. Hanoba en en dougwo merna mog mog, dauntoba len lemen en moho augwougb dou lusud lemouman touwero. Anai merna mog mog gini len lecinaga en dag misenohob. 1:35 Doba se loneinda, sug lona emesga namcirbuma, kaba, Yesus eisa dau sug atouda naugb en eihweda se usi hom gedig losneseba. Anai en enin ouwan edocuncum dou ELOHIM sungga. 1:36-37 Doba Simon dara mesir len laugwan lehilon Yesus terimda len ledeiya en. Sug len ledebeij enohob, kaba, len leic len merir laic en, lendagai: Ban beigtou sugin augwougb, anara? Anai lusud laugwan len louwan bani. 1:38 Doba Yesus enara bauni len merir ucugb dou len, endagai: Maman mamecicugb sunggaro. Doba yen yen naugb maman maihweda se cinogo gus geb acec gininda deit. Anai dan demen naugb dan demesai dou leng Kapernaum dousero. Doba dan den naugb dan desai dou lusud geb acec cinogo augwan gin toua. 1:39 Dangga sug Yesus ec mohora se leng Galilea meren hancob augwan dag gin, kaba, en esai ELOHIM moro se meren tuari dou len. Dara gareg merna mog mog einesa en medoc mesohob, kaba, en ocirma len dau lusud gin toua. 1:40 Doba sug Yesus ec mohora naugb en esai ELOHIM moro gini, kaba, sud hom aremos gogoufu et enohob, en en audi eni. Sug en edebeij Yesusohob, kaba, en eic mohorbrida badedeij cinogo deseino en. Hanoba en eiyagarij en, endagai: Adehsud, dan decinaga aban goubesa edeinyum naugb sug ban beic geigouhw dou dan. Dangga hang, ban bouwan, kaba, ban beic geigouhw dou danahabi. Anai sug aremos gogoufu et dan dag gini, kaba, emedeinyum naugb sug dan desijaresa ELOHIM deiterohob, doba dan dogor deseino en namcir. 1:41 Sug Yesus ouman dag gini, kaba, Yesus medoc eineg an en namcir. Hanoba en oho mer debin en, endagai: Dan douwan naugb deic geigouhw dou ban. Sug en enara dag gin dou enohob, kaba, en ou mesira os en toua. Dauwohob, kaba, en enara dou en deit, endagai: Ban beigouhwohob. 1:42 Sug Yesus enara dangga dou en inegohob, kaba, aremos gogoufu ingga ediyebeiya dau en. Hanoba en mos ecabeci ucugb se mohw deit. 1:43-44 Sug Yesus eic geigouhw dou enohob, kaba, en oungben en dougwo namcir, endagai: Ban bouf abirs dougwo gin namcir, dag ban bemecic dau gini dou sud hom touwero. Doba ban bedens banin dou gembala gesa taij nosahabi. Dauntoba en ouma debin ban dag ban abus ecabecohob. Gin ouwohob, kaba, ban beic ara ara bauwaharo dou ELOHIM, aimo dau areg Musa en og deb se Surad Injil Meb Mohon an gin debohob. Dauntoba lusud laugwan lecinaga dag ban becabeci deseino ELOHIM deitohob. Sug Yesus oungben en dougwohob, kaba, en arougb en, endagai: Ban beihweda dedemeda. 1:45 Doba sud hom gini, kaba, en emaimo Yesus mer an areg en en dou en gragero. Anai sug en eihwededau Yesusohob, kaba, en ecic dau sug Yesus eic geigouhw dou en gin bagaha dou lusud laugwan sungga sungga namcir. Dangga dougwodaha, kaba, Yesus emeic maga ainyes se meren cinogo toua deitero. Doba en eigtou se lomougwisa geb acec meren cinogo dous. Doba toua, dobnaro. Anai lusud len len dau dingan dingan aud en sungga toua terimda.

Markus 2

2:1-2 Lona aibibra debin sug Yesus eihweda se cinogo gusohob, kaba, en ecicugb se Kapernaum deit. Dangga sug lusud louman dag Yesus en moongga se men tuohob, kaba, len leinyana len len dau dingan dingan naugb louwa debin en se dimei mes. Dara len lohudebesim dougwo misis namcir toua. Hang mouf hom emeb naugb leng gus lemeinesa touwero. Sug len loucimdebohob, kaba, Yesus esai ELOHIM moro dou len toua deit. 2:3 Irir sug en ebedbed dou len, kaba, lusud merug hogu len lod boromei an sud hom maga omomtom namcir aud en sungga. 2:4 Sug len leiya, doba lusud leinyana lohudebesim dougwo misis an lendaha, kaba, len lodo sud hom ingga laisaugb se uf medgomori. Anai emedeinyum naugb sug len lemedebeij Yesuserodaha. Dangga sug len ledebeij uf medgomorohob, kaba, len logug uf dau. Hanoba len losus aumagan sud hom maga omomtom graga aud Yesus toua. 2:5 Sug Yesus eiya, doba len gin merdoc ebdebin an en medam gougwa dag ginohob, kaba, en enara dou sud hom maga omomtom ingga, endagai: Dan indisi, dan daigdougwo aban sesar augwan ediyebeiya dau banohob. 2:6 Doba leng meru ouforoho se Musa men gomnomna, kaba, merug aibibra len toua merugwengga desij len. Dangga sug len louman dau gini, kaba, len lenara se lenin merdoc mes, lendagai: 2:7 Dagiro, naugwe hang, sud hom gini en emeic mos naugb en emenara dag gina? Anai ELOHIM enin dous eng aigdougwo lusud meren sesar ediyebeiya dau len. Dangga areg en en gini, kaba, dag en eic ELOHIM moho bacecimohob. 2:8-9 Doba sug len lauwam an se len merdoc mes dag gin ineg, kaba, Yesus ecinaga augwan ginohob. Hang en etaha len merir an gin toua, endagai: Yen yowun dan indoho dag dan deic ELOHIM moho dacecimohob, anara? Anai sug dan den dou sud hom gini dag dan daigdougwo men sesar augwan ediyebeiya dau enohob, Era sug dan den dou en dag en eisa bod men sidgwa naugb ec mohoran, kaba, yen youdesa girong etetaha edreg dau homa? Naro, aremer gin hwas emetetahaitoro. Doba hwas ogom namcir. 2:10 Doba dan douwan dens dau sug ELOHIM eic goubesa dou Lusud Meraguna Mebin dan naugb dan daigdougwo lusud se cinogo augwan meren sesar dau len dou yen toua. Dauntoba yen yecinaga dag misen namcir. 2:11 Sug Yesus etaha len merir an danggohob, kaba, en arougb sud hom maga omomtom ingga, endagai: Dan den dou ban naugb ban beisa, bod aban sidgwa. Hanoba ban beihwedan dig aban tueda. 2:12 Sug Yesus arougb en dag gin inegohob, kaba, en eisa, bod men sidgwa. Hanoba en ec mohora abeba len laugwan meriresi dig men tueda. Sug lusud leiya gini, kaba, len merdoc omom dau namcir. Hanoba len lesijaresa ELOHIM, dara len lenara doum, lendagai: Nosa, kaba, maman mameiya aremer ganusbus gedag gini ingmebma. 2:13 Gin ouwohob, kaba, Yesus ec mohora dig Galilea mebera deit. Dangga sug lusud leinyana louwa debin en sungga deitohob, kaba, en esai dau ELOHIM moro dou len toua. 2:14 Doba sug Yesus oci Galilea mebera dag gin, kaba, en eiya dau sud hom, moho Lewi, Alpius meisi, en eigtou se tu meij se ucina mebera deb. Eni sud hom gedig en acgeij lusud naugb len lohw cinogo dou leng Roma. Dangga Yesus eija en, endagai: Ban baicira dan iteitogini. Sug Lewi en ouman gini, kaba, en eisa naugb aimo Yesus namcir. 2:15 Doba se lona ingma deit sug Yesus edetara desij Lewi se men tu, kaba, Lewi mesir gedig len lacgeij lusud naugb len lohw cinogo dou leng Roma, dara leng leicara gecgu, len leinyana toua merugwengga desij en naugb len letara aninim dara Yesus. Anai leinyana dau len, kaba, len laimo Yesus touohob. 2:16 Doba merug aibibra dau leng meru ouforoho se Musa men gomnomna dara leng Parisi, kaba, len leiya dau sug Yesus etara dara leng lacgeij lusud naugb len lohw cinogo dou leng Roma, dara leng leicara gecgu gini. Dangga hang, len lenara ucucugb dou Yesus men logodeh, lendagai: Dagiro naugb sud hom gini, en etara desij lusud gedig len lacgeij maman naugb maman maohw cinogo dou leng Roma, dara leng leicara gecgu gina? 2:17 Doba sug Yesus ouman len merir an gini, kaba, en auni len merir ucugb dou len, endagai: Leng leigouhwohob, kaba, lemehilon leng los merinuhwa lenero. Doba leng areber dous eng lehilon len. Dangga hang, leng leigdoumesa len meroho dag len laimo areg asesa ELOHIM enin medoc mesohob, kaba, dan demeija len naugb len lesga meren sesar dou ELOHIM enero. Doba leng lowun len meroho dag len lebesesarohob, kaba, dan deija len naugb len lesga meren sesar moho asesa dou ELOHIM dous. 2:18 Se lona hom deit, kaba, lusud merug hosa len ledebeij Yesus naugb len leijidougwo en, lendagai: Yohanes Gogun Lusud Se Duhu men logodeh dara leng Parisi meren logodeh, len lehig dau aredohob. Doba dagiro naugb aban logodeh, kaba, len lemehig dau aredero, anara? Len leijidougwo en dag gini, anai len leiya Yohanes men logodeh dara leng Parisi meren logodeh, kaba, len lehig dau aredaba. 2:19 Dangga Yesus enara bauni ucugb dou len, endagai: Yen youdesa dagiro? Sug sud hom eic mesouwa ougwanara debin lan, kaba, en en dougwo mesir naugb len lehig dau men ared gougwan ginei? Naro. Sug len merugwengga desij en, kaba, len lemehig dau men aredero. Doba len letara dara legara dara en terimda. 2:20 Doba cum, kaba, lusud lagaigeij en dau mesir. Se lona ingga, kaba, en mesir len lemet ared deitero. Doba len lebiji naugb lehig dau ared toua, anai len merdoc momogo an enohob. 2:21 Sug Yesus enara bauni len merir ucugwohob, kaba, en eic gainyenara hwai debin gin dou len deit, endagai: Sud hom ingma en emeic minc meti menau, hanoba en emogon dara sansun mohon touwero. Anai minc meti menau gin, kaba, odunggon. Hang sug en ogon minc meti menau dara sansun mohon ginohob, kaba, cum, menau gini eican sansun mohon badunggon bobogougb edreg dau nosa deit toua. 2:22 Dangga toua sud hom ingma, kaba, en emeic anggur mohu menau ameiri deisa aremeta mos mohonero. Doba en eic anggur mohu menau deisa aremeta mos menau dous. Anai sug en eic anggur mohu menau deisa aremeta mos mohon, cum, kaba, men goubesa ogod mos mohon bobogougb an anggur mohu menau baicarehiro namcir. Hang lusud larges hwas deb namcir. 2:23 Se lona hom deit, kaba, Yesus ec mohora asa ucina geragasa tramdad meda. Dara men logodeh laimo en toua. Sug len lec mohora dag gin, kaba, men logodeh lec tramdad naugb len let asa ucina. Doba se lona gini, kaba, leng Yahudi meren lona naugb len lemeicaresero. 2:24 Dangga sug leng Parisi len leiya dau gin, kaba, len merir laised Yesus icira gin namcir, lendagai: Ban beiya aban logodeh, anai meren geicara se Lona Gemeicaresero dag gin, kaba, edreg dau Musa men gomnomna ginohob. 2:25-26 Doba Yesus aisan medagas dau Daud benara dou len, endagai: Yen yecic dau Daud men logodeh meren geicara sug nosohobei? Era ingmebmei? Anai sug sirebeni, kaba, en einesa ELOHIM Men Tuari Dau Hugbei naugb en et roti gedig len louwaharo dou ELOHIM enohob. Dara en eic ingma dou men logodeh naugb len let toua. Hang len toua ledreg dau Musa men gomnomnohob. Anai roti gini, kaba, emedeinyum naugb leng aibibra lemetero. Doba naugb gembala gesa taij mogud dous eng len let. Augwan gini se lona sug Abiator en edag Gembala Gesa Taij Meren Mougt Mera Medam naugb lenaba. 2:27 Sug Yesus enara dag gin dou lenohob, kaba, en enara dou len deit, endagai: Sug Daud an men logodeh len toua ledreg dau Musa men gomnomna dag ginohob, kaba, indan logodeh, len toua leicara laimo dangga. Anai dan demeic Lona Gemeicaresero dou lusud emedag ara gogom naugb lusudero. Doba dan deic lona gin dou len naugb ousa len dous. 2:28 Sug dan deic Lona Gemeicaresero gini dou lusudohob, kaba, danin eng dedag mougt mera medam naugb augwan gin toua. Anai danin eng dedag Lusud Meraguna Mebinohob.

Markus 3

3:1 Se lona hom, kaba, Yesus einesa leng Yahudi meren tuari deit. Doba se tuari mes ingga, kaba, sud hom en mesira nagama omomohob, en toua moongga. 3:2 Dara sug len loucimdeb gini, kaba, lusud merug aibibra dau leng Yahudi, len toua merugwengga se tuari mes naugb len lauweila dougwo Yesus an men geicara dag en eicara edreg dau Musa men gomnomna deitei? Era naroei? Dangga hang, len lemocigei en terimda. Dauntoba sug len leiya, doba en eic geigouhw dou sud hom ingga se Lona Gemeicaresero gin deit, kaba, len ledoho ledas en dou meren mougtir toua namcir. 3:3 Doba Yesus eic mos naugb en eija sud hom graga, endagai: Ban bin naugb bidesa ainyes sugini. 3:4 Sug Yesus eija enohob, kaba, en eijidougwo leng Yahudi an Musa men gomnomna eisaugb lona gini, endagai: Maman gomnomna enara dagiro dou maman eisaugb lona gina? Maic geigouhw, era maic gecgu anirei? Era maic len merna agau, era maic gogom dou len dousei? Doba len lodinanir namcir. 3:5 Sug Yesus eiya, doba lodinanir namcir, kaba, en medoc momogo an len. Anai len laiyan merdocesem dougwo areg asesa ELOHIM enin medoc mes namcirohob. Dangga sug en ei maires dareg medoc esrougb an lenohob, kaba, en arougb sud hom ingga naugb en ou mesira. Sug en ou mesirohob, kaba, en mesira eigouhw se mohw ucugb deit. 3:6 Sug leng Parisi, len leiya gin, kaba, len lagunya dau tuari mes. Sug len lagunya dau tuari inegohob, kaba, len ledehilon mougt mera medam, moho Herodes, men lusud toua deit. Sug len ledeiya lenohob, kaba, len loucimdeb naugb lococ len, dauntoba len lehilon ucina naugb sug len leic gomom dou Yesus namcir toua. 3:7-8 Sug len lehilon ucina naugb leic gomom dou Yesus dag gini, kaba, eni dara men logodeh, len leisa ij dau cinogo ingga dig Galilea mebera deit. Dangga lusud leinyana gougwa dau leng Galilea meren hancob, len toua laimo en. Dara lusud leinyana dau leng Yudea meren hancob, dara cinogo Yerusalem, dara leng dau Idumea meren hancob, dara leng dau Yordan nagama dau sug igda eisaugb, dara leng dau cinogo Tirus, dara Sidon, kaba, len laugwan len len naugb louma debin Yesus sungga toua. Anai len louman dau men geicara dag en eic geigouhw dou lusud leinyanohob. 3:9 Doba sug Yesus eic geigouhw dou leng leinyanohob, kaba, leng areber gus len lebedbedim aud en naugb los en, dauntoba len toua leigouhw dedemeda. 3:10 Dangga hang, Yesus en en dou men logodeh naugb len lesedeb ij hom naugb en. Anai lusud leinyana lesa lohudebes en namcirdaha. 3:11 Dara astesda sug lusud gedig merna mog mog leinesa len merdoc mesohob len leiya Yesus, kaba, len leijeboho lamuhumlo deseino en. Hanoba len leijara dou en, lendagai: Emen emecinaga bani ELOHIM Meisi mohora hom misen namcir. 3:12 Doba Yesus etaha len dougwo, endagai: Yen yemeija dan indoho gini dou lusud naugb len lemecinagero. 3:13 Sug Yesus eic geigouhw dou leng areber leinyana dag gragohob, kaba, en ouci men lusud merug aibibra gedig en ouwan naugb len laimo en dig menmod hom. Sug en ouci lenohob, kaba, en einoisa len naugb len leisaugb se menmod hom gin toua. 3:14 Sug len ledebeij menmodohob, kaba, en ouci merug sisa hobjerai dau len ingga naugb len laimo en. Dara en eigdoumesa len meroho naugb len lesai ELOHIM moro dou lusud sungga sungga. 3:15 Hanoba en eic goubesa dou len naugb len locirma merna mog mog dau lusud toua. 3:16 Leng merug sisa hobjerai gini, kaba, len meroho dag gini: Hom en moho Simon, doba Yesus en esagai en moho deit dag Petrus, era igdahab moc. 3:17 Lahwai deit, kaba, lan maroho dag Yakobus dara en magto, Yohanes. Lan gin, kaba, Sebedeus meis lani. Doba Yesus esagai lan maroho dag Boanerges, era bagar mougb mehira deit. 3:18 Dara ligbum toua, kaba, len meroho dag Andreas, Pilipus, Bartolomeus en meisi, Matius, Tomas, Alpius meisi moho Yakobus, Tadeus, Simon Selotis. Lusud leija en moho dangga, anai sug nosa, kaba, en aimo lusud gedig len louwan locirma leng Roma dau meren cinogo. 3:19 Dara hom deit, kaba, en moho Yudas Iskariod. Anai eni dau cinogo Keriod. En gini, kaba, en ehin magan Yesus dou leng Yahudi meren mougtir naugb len leic gomom dou en toua. 3:20 Sug Yesus ouci men logodeh merug sisa hobjerai ginohob, kaba, en ecicugb se Kapernaum dig men tu deit. Sug en edebeij tuohob, kaba, lusud leinyana, len len naugb louma debin en namcir. Dangga cumougt ingma emeb naugb sug eni dara men logodeh len lemetara touwero. 3:21 Doba sug men lusud, len louman dag en emehig debin mog hom touwero, doba en ousa lusud terimda, kaba, len len naugb ledahwan en, dauntoba en ehig debin mogahabi. Anai len lenara doum, lendagai: Eni mereiyeba icira ginohob. 3:22 Dara leng meru ouforoho se Musa men gomnomna, kaba, len toua louwaden dau cinogo Yerusalem naugb len ledebeij len sungga toua. Dangga sug len leiya Yesus, doba en ocirma merna mog mog dau lusud leinyana terimda, kaba, len lococ len gus, lendagai: Yen yemeijesan ginlo. Anai meren mougt mera medam, moho Belsebul, en einesa en medoc mes naugb ginohob. Hang en ocirma merna mog mog dau lusud toua. 3:23 Doba sug Yesus ouman len merir an gin, kaba, en eija len naugb len len aud eni. Sug len ledebeij enohob, kaba, en eic gainyenara hwai debin gin dou len naugb agod len merbes dougwo, endagai: Dagiro naugb Setan enin ocirma men logodeh dau lusud merdoc mes, anara? 3:24 Anai sug lusud se hancob hom, lenin lebemocedoum, kaba, cum, len lemedag hom deitero. Doba len laisoboro daum dangga. 3:25 Era sug lusud se tu hom, len lohu merir doum, kaba, cum, len toua dag hom deitero. Doba len laisoboro daum namcir touohob. 3:26 Dangga toua, sug Setan enin ebemoc dou men logodeh, dara len leigdau, kaba, men goiharaga emebsugeb deitero. Doba eij baisoboro ediyebeiya namcir. Dobnaro. Men goiharaga ebsugeb terimda. Dangga hang, en emocirma men logodeh dau lusud merdoc mes touwero. 3:27 Dara lusud lemeinesa sud hom mobisamougb men tu naugb ledeida men aremougb augwougb touwero. Doba len lehilon ucina naugb sug len lohud en mesira nosahabi, len lemeinesa naugb lemedeida men aremougb toua. 3:28 Hang yen youman deigeigouhw. Gareg en ebesesar an ELOHIM, dara eic en moho acecim augwougb, kaba, ELOHIM aigdougwo men sesar ingga dau en toua. 3:29 Doba gareng en esedeb naugb en eic Mena Gogoufu en moho bacecim dag gin, kaba, ELOHIM emaigdougwo men sesar inggaro. Doba men sesar gin, kaba, eb naugb en beb huhugb terimda. Augwan gini asesa dag misen namcir. 3:30 (Yesus enara dag gini, anai merug hosa dau leng meru ouforoho seMusa men gomnomna gin, kaba, len leic Mena Gogoufu en moho bacecim dag en edag mena gogor einesa Yesus medoc mes naugb ginohob.) 3:31 Dara Yesus mem an men magtor len ledebeij tu gin toua. Sug len ledebeij tu ginohob, kaba, len leigtou dig medigo. Hanoba len larougb ligbum naugb len leden dou Yesus, dauntoba en edeiya len se medigohabi. 3:32 Dangga leng leigtou acec Yesus ingga, kaba, len lenara dou en, lendagai: Ban abim dara ban abagtor len leigtou se medigo naugb ledeiya ban. 3:33 Doba Yesus auni dou len, endagai: Dan indim dara dan indagtor, gareg lena? 3:34 Sug en enara dag gin dou lenohob, kaba, en auweila men lusud gedig len leigtou acec en ingga. Hanoba en ens len dou len laugwan, endagai: Len gin dous eng dan indim dara indagtor misen. 3:35 Anai gareg en eicara aimo areg asesa ELOHIM enin medoc mes, kaba, en dous eng dag dan indim, dara indagtor, dara indameitor misen.

Markus 4

4:1 Se lona hom deit, kaba, Yesus ens dau ELOHIM mer meijouhw dou lusud se Galilea mebera deit. Dangga sug lusud leinyana gougwa len len naugb louwa debin en namcirohob, kaba, en aingmo ing mes mogud hom se duhu modeda. Doba lusud laugwan, kaba, len lesa dig lonogeda. 4:2 Sug en eigtou se ing mesohob, kaba, en ens meijouhw dau ELOHIM mer se gainyenara einyana dou len. Hanoba en enara dou len dag gini: 4:3 Yen youman dau sud hom sug en eihwedaud men lo, kaba, en eic meij bargehilo dous. 4:4 Doba sug en eic meij bargehilo gin, kaba, meij igbum obsara se ucina mebera deb. Hanoba ba len lohwin naugb let meij gin bouwa namcir. 4:5 Doba meij igbum, kaba, obsara se cinogo geb se igdahab moc taiba dous. Dangga hang, meij gini eij dedemeda namcir, anai cinogo gurereito dous. 4:6 Doba sug igdes ohu desrougb, kaba, ogod mec ingga bagac dedemeda ucugb, anai igdahab eb dougwodaha. Hang men mom emeinesa cinogo touwero. 4:7 Dara meij igbum deit, kaba, obsara se ara mog mog meda. Dangga sug ara mog mog eijohob, kaba, eic baiyan dougwo mec gin bedehibera namcir. Hang en emera mera hom touwero. 4:8 Doba meij igbum, kaba, obsara se cinogo mog geigouhw. Dangga sug meij gini eiji dara orbesbes namcirohob, kaba, en era mera einyana toua. Maga hom men mera edebeij mos homoi. Maga hom deit, kaba, men mera edebeij mos senggem. Dara maga hom deit, kaba, men mera edebeij huntun hom toua. 4:9 Sug Yesus eic gainyenara gin dou len bouwohob, kaba, en esulou len debin gin dou len deit, endagai: Gareg dau yen, en moms ai, kaba, en ouman areg dan den dou en gini deigeigouhw namcir. 4:10 Sug Yesus esulou lusud dag gragohob, kaba, len laugwan leihwededau en namcir. Dangga sug Yesus eigtou naugb eninohob, kaba, ligbum dau leng louman men gainyenara graga, dara men logodeh merug sisa hobjerai toua. Len len naugb leijidougwo en, dauntoba en ens gainyenara graga men meijouhw dou lenahabi. 4:11 Doba Yesus enara bauni dou len, endagai: Yen, kaba, ELOHIM eigdoumesa yen meijoho naugb en ens dau sug en oiharaga lusud ucugb men meijouhw augwan asesa dou yen. Anai en emens dau augwan gini dou lusud sug nosa touebma. Doba len gus, kaba, en ecgoneh meijouhw gini augwan dau len terimda, anai len lemeinesa men uro mesbuma. Doba len leigtou dig medigaba. Hang dan demens augwan gin se gainyenara dou len dous. 4:12 Dauntoba sug len leiya dau indan geicara dag ganusbus, doba len lemeiya augwan asesa. Dara len louman dau sug dan desai ELOHIM moro dou len, doba len lemecinaga meijouhw augwan asesa touwero. Anai sug len leiya dara louman augwan asesa, kaba, len leineg aud ELOHIM naugb en aigdougwo meren sesar toua. Dobnaro. ELOHIM en emouwan dangga deitero, anai len ledreg en mer namcirohob. 4:13 Sug Yesus ens meijouhw dag graga dou len bouwohob, kaba, en enara bauni len merir ucugb dou len. Anai len lacgeij naugb en ens dau sud hom geic meij bargehilo graga men meijouhw asesa dou lenahabi. Hanoba en enara dou len, endagai: Yen yemecinaga gainyenara gini men meijouhwero, kaba, dagiro naugb yen yecinaga dau gainyenara gus men meijouhw gin toua? Naro, emedeinyum naugb yenero. 4:14 Sug Yesus enara bauwun len merir dag ginohob, kaba, en ens dau gainyenara graga men meijouhw dou len ucan toua, endagai: Sud hom gos meij bargehilo graga, kaba, eni dag sud hom gagaha ELOHIM mer dau sug en oiharaga lusud ucugb dou len. 4:15 Doba ligbum, kaba, len ledag meij gobsara se ucina. Anai sug len louman ELOHIM mer ginohob, kaba, Setan en en dedemeda naugb en esma mer gini dau len merdoc mes namcir. 4:16 Dara ligbum deit, kaba, merdoc mes aninim dag cinogo geb se igdahab moc taiba dous. Anai sug len louman ELOHIM mer inggohob, kaba, len lebin dedemeda dara lagahugouhw an namcir. 4:17 Doba mer gini emaga len merdoc mesero. Dangga hang, sug lusud leic gogom dara mog erij dou len icira ELOHIM mer gin, kaba, len lemes agadgeij terimdero. Doba len lobsara naugb len merdoc emebdebin an en mer gin deitero. 4:18 Dara lingma, kaba, len ledag meij gobsara se ara mog mog. Anai sug len louman dau ELOHIM en mer graga, kaba, len lebin mer gini se len merdoc mes namcir toua. Doba cum, kaba, ara mog mog gini aiyan ELOHIM mer augwan dau len merdoc mes deit. 4:19 Anai len lemarges dau sug len merdoc an areg geb se cinogo ginero. Doba sug len merdoc eijesa icira areg len let, dara areg len lohw dag gin terimda, kaba, eic dag len merdoc etrij naugb sug len merisoho mougb dara areg gus gus augwan toua terimda. Hang ELOHIM mer emera mera se len merdoc mes touwero. Doba len ledag maga mogud dous. 4:20 Doba ligbum, kaba, len ledag meij gobsara se cinogo mog. Anai sug len louman dau ELOHIM mer dag en ouwan oiharaga lusud ucugb, kaba, len lecinaga meijouhw asesohob. Hanoba len lebin en mer gini se len merdoc mes toua. Dangga ligbum, kaba, len lera mera edebeij mos homoi. Dara lingma, kaba, len lera mera edebeij mos senggem. Dara ligbum, deit, kaba, len lera mera edebeij huntun hom gin toua. 4:21 Sug Yesus ens meijouhw dau gainyenara graga dou len bouwohob, kaba, en eic gainyenara hwai dara dou len deit, endagai: Sug sud hom ei men smougwohob, hanoba en obo se men tu, kaba, en ob dabei mes baihiron dougwo mouf ginei? Era en obdeb se boromei meniha dousei? Naro, en obo ainyes, dauntoba lusud laugwan len leiya. 4:22 Dangga areg lusud lecgoneh iteitogini, kaba, cum, ELOHIM ens ainyes dou lusud laugwan lecinaga. Dara areg lusud ledu meru an daum, kaba, ELOHIM eic beb ainyes se mouf namcir toua. 4:23 Dangga gareg dau yen, en moms ai, kaba, en ouman areg dan den dou yen gin deigeigouhw namcir. 4:24 Sug Yesus esulou men logodeh dag gragohob, kaba, en esulou len ucan gin deit, endagai: Yen yauwam an ELOHIM mer areg dan desai dou yen gini deigeigouhw namcir. Anai areg eic ucugb dau yen gini, kaba, aimo dau sug yen yauwam an en mer gini deigeigouhwohobei? Era naroei? 4:25 Dangga sug yen yeic en mer gini dara yen meisira ogom, kaba, ELOHIM eic ara ara dara en mesira ogom baos dara dou yen toua. Doba sug yen yeic en mer gini dara yen meigdoc eigouhw dous, kaba, ELOHIM edug areg yen yeicohob gini ucugb dau yen toua. 4:26 Sug Yesus eic gainyenara dag graga dou men logodehohob, kaba, en eic gainyenara hom dou len deit, endagai: Sug ELOHIM oiharaga lusud ucugb, kaba, aninim dag sud hom sug en eic meij bargehilo gini. 4:27 Dangga sug en eic meij bargehilohob, kaba, en ohw medigo dou namcir. Hanoba en edeicara gus gus dauda. Doba mec gini, kaba, eiji dou enin terimda agas namcir. Dara en emecinaga meijouhw dau mec gini sug en eiji bagas gin touwero. 4:28 Anai cinogo enin eng ouwaha meij gini, hang emeiji naugb era mera toua. Dangga sug aimougtut, kaba, mec eiji bedag maga nosahabi, kaba, merij. Merij, kaba, an mera toua. 4:29 Dangga edebeij lona sug mera gin ohoserohob, kaba, sud hom graga en arougb men lusud naugb sug len ledogod augwan namcir toua. 4:30 Sug Yesus eic gainyenara dag graga dou men logodehohob, kaba, en enara dou len ucan deit, endagai: Dan douwan dens dau lona sug ELOHIM oiharaga lusud ucugb men meijouhw mougwa hom ucan dou yen deit. Doba maman maic gansins dagiro debin gin dou yen deita? Dara maman mainyen ara dou yen toua? 4:31 Sug Yesus eijidougwo len dag ginohob, kaba, en eic gainyenara dau sawi mogo ucan dou len deit, endagai: Lona sug ELOHIM oiharaga lusud ucugb, kaba, aninim dag sud hom geic sawi mogo hom naugb en eba se cinogo. Dara sawi mogo gini, kaba, mogo mogurereito bedreg dau aremerij gus gus geb se cinogo gin augwan namcir. 4:32 Doba sug eijohob, kaba, mon medam edreg dau aremec gus gus augwan toua. Dara en eba mesira einyana. Dangga hang, ba aingma aingma, len lohw naugb lohud mererum se mesira gini. Hanoba mon erba debin len namcir toua. 4:33 Dara en emeic gainyenara dau homoi graga dou lusud dousero. Doba en eic gainyenara dau sug ELOHIM oiharaga lusud ucugb einyana toua dou len deit, aimo dau areg len meru ouforoho edeinyum naugb ginohob. 4:34 Dara en emens meijouhw dau gainyenara augwan gini dou lusud gus gin touwero. Doba sug eni dara men logodeh, len ledeigtou dou leninohob, en ens meijouhw augwan asesa dou len toua. Len gus, kaba, en eic gainyenara mogud dou len dous. 4:35 Se lona ingga bedebeij losogohob, kaba, Yesus arougb men logodeh, endagai: Yen yin aud dan se ingmes gini, dauntoba maman maisa ij gin dig nagama gacdahabi. 4:36 Dangga sug men logodeh len len dau lusud leinyana deb se mebera inegohob, kaba, len ledeisa ij gen eisa graga an enda. Dara men logodeh gus, len leisa ij ingma ucan en toua. 4:37 Doba sug len leisa ij terberba debin enbuma, kaba, loungmen eisa dara duhu oc medam namcir. Hanoba duhu mogo erba se ing mes terimda, cum, atij toua. 4:38 Dangga men logodeh ledebir Yesus. Anai en atou bareb misidgwa se ing mohob. Hanoba len lenara dou en, lendagai: Adehsud, dagiro naugb ban bamsoho emen dag gina? Anai duhu en baiyan maman maugwan dangga. 4:39 Dangga sug Yesus eisohob, kaba, en etaha loungmen ingga, endagai: Ban bedina namcir. Dara en en dougwo duhu mogo toua, endagai: Ban bobsara bebtou namcirda. Sug Yesus enara dag graga ineg dag ginohob, kaba, loungmen mohora edina. Dara duhu mogo toua obsara namcir. 4:40 Gin dauwohob, kaba, Yesus esa mer debin len, endagai: Yen yahau, anara? Yen yemod meijina debsa dan iteitogin touebmei? 4:41 Doba men logodeh ingga, len merdoc omom dau gin namcir. Hanoba len lenara doum, lendagai: Sud hom gini garena? Hang en emenara dou loungmen dara duhu lamaimo en mer, gina?

Markus 5

5:1 Sug loungmen dara duhu obsara dau lenohob, kaba, len leisa ij terimda len ledebeij dig nagama se leng Gerasa meren hancobohob. 5:2 Dangga irir sug Yesus esogwa dau ij se lonogohob, kaba, sud hom en en dau igdohos mes gedig lusud lob aremogougb debsa naugb en agasa Yesus an men logodeh. Sud hom gini, kaba, merna mog mog esesa medoc mes namcirohob. 5:3 Dangga lusud len lainyen naugb len lahud en mohora dara mesira lahwas darem dara lanta mougwa einyanohob. Doba en eic magan lanta geb debin mesira dara mohora toua hwas obogougb namcir. 5:4 Hang en emdatou dou enin se igdohos mes gin dous. Anai sud hom men goubesa ingma naugb en emagaigeij enero. Dara lanta emedeinyum naugb sug len lahud en mesira dara mohora darem touwero. 5:5 Dara sug en esebesa se igdohos mes sungga sungga, dara sug en eisaugb se menmod, kaba, en eiyaga dara mer medam astesda lona loba terimda. Dara en eic igdahab agod enin maga toua. 5:6 Dangga sug en eiya Yesus aigusohob, kaba, en obgen naugb en ecguna dou Yesus dara esijaresa en toua. 5:7 Hanoba en eiyaga dougwo Yesus dara mer medam, endagai: Yesus, ban ben sugini naugb bedeberou dana? Anai dan decinaga bani Adehsud Gen Moho Eb Taiba Augwan en Meisi ban ginohob. Dangga hang, dan douwan naugb ban bou ELOHIM moho dougwo ban, dauntoba ban bemeic mog erij dou danero. 5:8 En enara dangga dou Yesus, anai Yesus arougb en eihwedau sud hom ingga namcir. 5:9 Doba Yesus eijidougwo en ucugb deit, endagai: Ban aboho dagiro? Hang en en moho dou Yesus, endagai: Dan indoho dag emeinyana. Anai emen emeinyana eng emugwengga desij sud hom ginohob. 5:10 Sug mena mog mog ens enin moho dou Yesusohob, kaba, en eiyaga dougwo Yesus dara medoc erleij deit, endagai: Sug emen emagunya dau sud hom ginohob, kaba, ban bemocirma emen dau emen hancob ginero. 5:11-12 Dara merna mog mog laugwan louma debin gin namcir toua, lendagai: Emen emacgeij ban barougb emen naugb emen emeinesa hweijir gada merdoc mes. Len len dag gin dou Yesus, anai len leiya, doba hweij leinyana len letara se men maga desij len sunggohob. 5:13 Dangga sug Yesus ousa len merir anohob, kaba, len leihwededau sud hom ingga namcir. Hanoba len ledeinesa hweing maga ribu hwai merdoc mes deit, kaba, hweijir ingga len laugwan lougb lesogwa se duhu bogo lomom namcirda. 5:14 Sug leng lesedougwo hweij ingga, len leiya dau gini, kaba, len lahau medam namcir. Hanoba len lougb dig meren guseda naugb len leden dau aremer gini dou leng sungga. Dara leng geb acec laugwan toua. Dangga, kaba, len laugwan len len naugb len ledeiya aremer ingga se len merires toua. 5:15 Sug len ledebeij Yesusohob, kaba, len leiya, doba sud hom gedig merna mog mog leinesa en medoc mes gragenggohob, kaba, en eigtou deb gini. Dara en eg sansun. Dara en mecdemaga toua esgiraha ucugwohob. Hang len lahau medam dau gin namcir. 5:16 Dara len leiya sug Yesus ocirma merna mog mog dau sud hom gini. Dara leng leiya dau sug hweijir lougb lesogwesa duhu, kaba, len eng lecic meijouhw dau augwan gini asesa dou lusud toua. 5:17 Dangga sug len louman dau ginohob, kaba, len lecicugb Yesus, lendagai: Ban bededau emen hancob gin namcir. 5:18 Sug Yesus ouwan eisa ij dau len, kaba, sud hom areg merna mog mog esogwa dau en gragohob, en acgeij dau Yesus dauntoba en aimo enda. 5:19 Doba Yesus en emouwanero. Dangga en arougb en, endagai: Ban becicugb aud aban lusud se aban cinogo dous. Hanoba ban bedecic dau maman Adehsud men geicara. Dara dau sug en medoc eineg an ban dag ginohob meijouhw augwan asesa dou len laugwan. 5:20 Dangga sug en eihwededau lenohob, kaba, en edens dau Yesus men geicara ganusbus hom gini dou leng se leng Dekapolis meren hancob laugwanda. Hang gareg en ouman dag gin, kaba, len laugwan leimiman dau gin namcir toua. 5:21 Sug len leisa ij an Yesus ucugb dig nagamohob, kaba, lusud leinyana gougwa, len len naugb louwa debin en deit sug eni moongga se Galilea meberaba. 5:22 Dangga sud hom gedag mougt mera naugb leng Yahudi meren tuari se cinogo ingga, en moho Yairus, en en aud Yesus sungga toua. Sug en edesma Yesusohob, kaba, en ecguna dou en toua. 5:23 Hanoba en eiyagarij en ucucugb dara medoc erleij terimda, endagai: Adehsud, dan indihida godeh hom en areba medam. Dangga hang, dan demacgeij naugb ban bidob ban absira deisa enahabi. Dauntoba en emomomlo, doba en maireseb desij danahaba. 5:24 Sug Yesus ouman dau gin, kaba, en aimo en namcir dig men tueda. Doba sug lan lac gini, kaba, lusud leinyana len leila ucan lan dau dingan dingan. 5:25-26 Sug len leila ucan lan dag gin, kaba, gida hom gedig en os mogwihi se arisogomoc sisa hobjeraiyohob, kaba, en toua moongga dara len. Gida gin, kaba, en acgeij leng meru ouforoho naugb len louci aremougb naugb en terimdohob. Doba augwan gini emousa en anero. Doba eic dag mog erij edreg dou en dous. Dangga hang, men gareba gini eihweda se gebeba namcir. Dara men aremougb augwan ouwa icira gin toua. 5:27 Doba en ouman dag Yesus men goubesa inggebga naugb sug en eic geigouhw dou lusudohob. Hang en aihagab lusud laugwan ucan Yesus dig medigo terimda en edos sansun icira Yesus mos namcir. 5:28 En os Yesus dangga, anai en oudesa se enin medoc mes dag en os sansun icira en mos dous, kaba, edeinyum naugb sug en emeigouhwes. 5:29 Dangga sug en os sansun icira Yesus mos inegohob en mogwihi graga toua arges docohob. Hang en ecinaga se en medoc mes dag en eigouhw namcirohob. 5:30 Doba Yesus en mos ecinaga dag men goubesa eihwededau en aud sud homohob. Dangga en eineg ucugb dig medigo dedemeda. Hanoba en eijidougwo len leinyana ingga, endagai: Gareg dau yen en os sansun icira dan indus gina? 5:31 Doba men logodeh len launi en mer ucugb dou en, lendagai: Ban bemeiya lusud leinyana gedig len lec lomdi ban gineroei? Dangga dagiro ban beijidougwo len, bendagai: Gareg en os sansun icira ban abusa? 5:32 Doba Yesus en mairesi bahilon dougwo len laugwan dag gareg os eni, hang men goubesa eihwededau en aud enohob, gina? 5:33 Dangga gida hom gini, en en aud Yesus dara medoc eijesa dara en ahau dau en namcir. Anai en ecinaga dag men goubesa eic geigouhw dou enohob. Sug en edebeij Yesusohob, kaba, en ecguna dou en. Hanoba en ecic dau sug en areba, dara sug en eigouhw gini meijouhw augwan asesa dou en toua. 5:34 Sug Yesus ouman augwan ginohob, kaba, en oho mer debin en, endagai: Dan indihida, ban bod abina debsa danohob, hang ban bemeigouhw gini, dangga ban beihweda. Dara ELOHIM eic gesgigouhwesa dou ban dougwo augwan toua, anai ban beic geingmos agauwesa namcirohob. 5:35 Sug Yesus enara dou gida ginaba, doba ligbum len len dau Yairus men tu naugb leden dou en, lendagai: Ban bemarerei Adehsud gini mohora emerijlo, anai ban abihida omomohob. 5:36 Doba Yesus oho mer debin sud hom gesedougwo leng Yahudi meren tuari gini, endagai: Ban abdoc emeijesero. Doba ban bod abina debsa dan dous. 5:37 Sug Yesus oho mer debin Yairus dag ginohob, kaba, en en dougwo lusud laugwan leigtou sungga deb. Hanoba en ouci Petrus, dara Yakobus, dara en magto Yohanes, len gin dous eng laicira landa. 5:38 Sug len ledebeij sud hom gesedougwo leng Yahudi meren tuari en men tuohob, kaba, Yesus en ouman, doba lusud len leb dara leiyogoseser medam terimda. Dara en eiya, doba len lebara eijideijo namcir toua. 5:39 Sug Yesus einesa touohob, kaba, en esa mer debin len, endagai: Yen yebara eijideijo, anaringgina? Yen yarges meijireda. Anai godeh gin, kaba, en emomomero, doba en atouda dous. 5:40 Sug len louman Yesus mer an gini, kaba, len lobohuba dagasges an en namcir. Doba Yesus ecicugb len laugwan dau, endagai: Yen yaugwan yeihwedig medigo dauwahabi. Sug len leihwededauwohob, kaba, Yesus, dara godeh ingga en mena dara en mem, dara men logodeh merug homoi graga leng leinesa dimei mes sug len lob en maga debsohob. 5:41 Sug len ledebeij en magohob, kaba, Yesus os godeh ingga mesira. Hanoba en enara dou en, endagai: w Talita kum. Meijouhw gini se maman leci dag: Daneh, gidob, dan darougb ban beisa. 5:42 Sug Yesus enara dangga ineg dou enohob, kaba, en eisa bec namcir. Anai en men arisogomoc sisa hobjeraiyohob. Dangga len gus, sug len leiya dau gini inegohob, kaba, len leimiman dareg merdoc omom namcir. 5:43 Doba Yesus oungben len dougwo, endagai: Yen yemdecic dau areg yen yeiya gini dou len gusero. Sug en oungben lenohob, kaba, en arougb len naugb len leic ared dou godeh ingga ben et toua.

Markus 6

6:1 Sug Yesus eigdoumesa Yairus mehida dau gomomohob, kaba, en eihwededau cinogo ingga dig en guneda. Dara men logodeh laicira en toua. 6:2 Dangga sug leng Yahudi meren Lona Gemeicaresero edebeijohob, kaba, en einesa meren tuari naugb en edidib ELOHIM mer geigouhw dou len toua. Doba sug lusud louman gini, kaba, len leinyana merdoc omom dau gin namcir. Hanoba len lenara doum, lendagai: Areg sud hom gini en edidib dou maman gini, kaba, en daugiro? Dara gareng geic mou gouforoho gin dou ena? Hang men geicara dag ganusbus dou maman gin toua? 6:3 Anai sud hom gini, kaba, eni Mariam meisi gen mou ouforoho naugb tu dous. Dara en magtor Yakobus, Yoses, Yudas, dara Simon, dara en medemeitor len laugwan toua merugwengga desij maman gina? Dangga len merdoc aihagab en an areg en ens dou len ingga toua terimda. 6:4 Sug Yesus eiya gini, kaba, en enara ceg ceg len, endagai: Sug sud hom en esai ELOHIM moro dou len gus, kaba, len louman en mer, dara len leigdoumesa en moho an gini toua. Doba sug en esai mer gini se enin men cinogo, dara men meijouhuda dara se enin men tu, kaba, len lemouman en mer. Dara len lemeigdoumesa en moho an gin touwero. 6:5 Dangga en emens ganusbus einyana dou len sungga touwero. Doba en ob en mesira deb se leng areber hom yom naugb eic geigouhw dou len dous. 6:6 Hanoba en edidib ELOHIM mer geigouhw dou lusud se cinogo gus gus geb acec ingga dous. Anai lusud se en gun gin, kaba, len merdoc emebdebin an enero. Hang en medoc eimiman meren geicara gin toua terimda. 6:7 Irir sug Yesus edidib ELOHIM mer geigouhw dou lusud se cinogo gin, kaba, en eija men logodeh merug sisa hobjerai len len aud eni. Dauntoba en ekeba lahwai laimom, lahwai laimom naugb len ledesai ELOHIM moro dou len gus deitda. Sug en ekeberohob, kaba, en ogugwo goubesa dou len toua, naugb sug len locirma merna mog mog dau len gus debin gin toua. 6:8-9 Hanoba en esulou len dougwo, endagai: Sug yen yeihweda, kaba, yen yemoho ared. Dara yemoho i naugb yen yemohwiaga lusud an ara ara. Dara yen yemeic hwigbeimos an aregoufu. Dara yen yemeg sansun hwai darem. Dara yen yemoho ara gus gus augwan hom dara yen touwero. Doba yen yos ijouhugwa hom se yen meisira. Dara yen yeg hwigbeimos hom geb dougwo yen meijohora dous. 6:10 Sug Yesus esulou len dag gin bouwohob, kaba, en esulou len eisaugb sug len ledebeij lusud se cinogo moho hom ucan gin dou len deit, endagai: Sug sud hom, en ebin yen se men tuohob, kaba, yen yemeihweda se tu gus dau enlo. Doba yen yeigtou desij en namcir, terimda edebeij lona sug yen yeihweda se cinogo gus dau len toua. 6:11 Sug yen yedebeij cinogo hom, doba lusud lemebin yen dara len lemouman yen meijir an ELOHIM merero, kaba, yen yemeigtou desij lenlo. Doba yen yarges len ingga deb namcir. Hanoba yen yetir yen meijohora an meren cinogo mor dag ansins debin len ucugb. Anai gini ansins dou len dag yen yemeic cumougt dou len deitero. Doba yen yarges len deb namcirohob. 6:12 Sug Yesus esulou len dag gin bouwohob, kaba, len leihweda naugb len lebedbed dou lusud, dauntoba len lesga meren sesar moho asesa dou ELOHIM. Dara len lahau an dougwo meren sesar augwan toua. 6:13 Dara len locirma merna mog mog einyana dau lusud. Dara len lehin mani se leng areber leinyana naugb laic geigouhw dou len toua. 6:14 Doba sug lusud lecic Yesus moho an men geicara gin dou lusud sungga sungga terimda, kaba, mougt mera medam moho Herodes, en toua ouman dau Yesus men geicara gini. Anai ligbum, kaba, len lenara, lendagai: Sud hom gini eni Yohanes Gogun Lusud Se Duhu gia, eng en eisa ucugwohob. Hang men goubesa inggebga naugb en emeic ganusbus einyana gin toua. 6:15 Doba ligbum deit, kaba, len leden deit, lendagai: Sud hom gini, eni Elia. Dara lingma, kaba, len leden deit, lendagai: Eni sud hom dau leng lesai ELOHIM moro sug nosa, eng eisa ucugb gini. 6:16 Sug Herodes en ouman gini, kaba, en toua medoc eica len merir an gini. Hanoba en enara dou men lusud, endagai: Sud hom gin, kaba, eni Yohanes Gogun Lusud Se Duhu dag misen. Anai sug nosa, kaba, dan darougb indan sadodor hom ogug en mougt dau. Doba iteitogin, kaba, en eisa ucugwohob. 6:17 Herodes enara dag graga, anai sug nosa, kaba, en eihwa en magto Pilipus mesouwa, moho Herodias, dau enohob. 6:18 Dangga Yohanes Gogun Lusud Se Duhu en en aud Herodes sug nosohob naugb en en dougwo en an gin ucucugb terimda, endagai: Emeigouhw naugb ban bemeic ban abagto en mesouwa ginero. Anai gin, kaba, dag ban bedreg ELOHIM men gomnomnohob. 6:19 Sug Yohanes owun Herodes en moho dag ginohob, kaba, Herodes arougb men sadodor naugb len louf Yohanes se tu gesisug. Dauntoba en eic Herodias medoc esgiraha dou en ucugb. Dobnaro. Herodias en ehilon ucina naugb en eic gomom dou Yohanes, anai en medoc esrougb an en terimdaba. 6:20 Doba Herodes en ahau dau Yohanes namcir. Anai en ecinaga Yohanes en aimo areg asesa ELOHIM enin medoc mesohob. Dara en ecinaga dag ELOHIM eigdoumesa en moho naugb en esai en moro dou lusud touohob. Dangga hang, en emarougb men logodeh naugb len lesedougwo tu gesisug an Yohanes deigeigouhw namcir. Dara en medoc eigouhw an Yohanes naugb sug en esai ELOHIM moro dou en toua. Dangga astesda sug en ouman ELOHIM mer gin, kaba, en ouman deigeigouhw. Doba se medoc mes, kaba, en ahau dau gin namcir. 6:21 Doba edebeij lona sug Herodes medoc eiseisan men lona sug mem ouwadan en sug nosohob, kaba, cumougt geigouhw hom gini naugb sug Herodias eic gomom dou Yohanes namcir engga. Anai se lona ingga, kaba, Herodes ougwan ared naugb men gedeijan, dara leng sadodor meren mougtir, dara leng meroho agas se leng Galilea meren hancob len laugwan toua. 6:22 Dangga sug len letara dara Herodesohob, kaba, Herodias mehida en eihwa deseino len toua. Sug en eihwa, kaba, en eic Herodes dara en mosur merdoc eigouhw dou len namcir. 6:23 Dangga hang, Herodes en os dou Herodias mehida gini, endagai: Areg ban bouwan naugb bacgeij dau dan, kaba, dan demeic dou bans. Dara en ouwara mougwa hom debin gin dou en deit. Hanoba en ou meresa mer graga deit, endagai: Areg ban bouwan naugb dan deic dou ban, kaba, dan demeic dou bans. Era ban bouwan naugb dan dekeba indan hancob nagama dou ban, kaba, dan dos dou ban dag dan demekeba dou ban toues. 6:24 Sug Herodias mehida en ouman gin, kaba, en eihwededau dimei mes ingga naugb edeijidougwo en mem an ginahabi, endagai: Ameinya, dan dacgeij ara dau Herodesa? Dangga Herodias en auni dou en mehida ucugb, endagai: Ban bacgeij naugb en eic Yohanes Gogun Lusud Se Duhu en mougt dou ban dous. 6:25 Sug mehida en ouman danggohob, kaba, en obga dedemeda beden dou Herodes, endagai: Dan dacgeij naugb ban beic Yohanes Gogun Lusud Se Duhu en mougt debsa igdebir meh gedouder dou dan iteitogini. 6:26 Sug mougt mera Herodes, en ouman gin, kaba, en medoc eijesa medam namcir. Doba en emohoiya en mer an gin dagiro? Anai en ouwara deseino men lusud laugwanohob. 6:27 Dangga hang, en arougb men sadodor hom namcir, endagai: Ban beihweda se tu gesisug naugb ban bededougb Yohanes mougt dau en. Hanoba ban bemodo dou dan sugini. Hanoba sadodor ingga en eihweda se tu gesisug naugb en edougb Yohanes mougt dau toua. 6:28 Sug en edougb mougt dauwohob, kaba, en obdeisa igdebir meh gedouder. Hanoba en edeic an dou gidob graga. Sug en eic dou gidob gragohob, kaba, gidob edeic dou mem deitda. 6:29 Sug Yohanes men logodeh louman dau gin, kaba, len leihweda naugb len ledeic maga dau tu gesisugwen. Hanoba len ledob en se igdohos mes deb toua. 6:30 Sug Yesus men logodeh merug sisa hobjerai len lecicugwohob, kaba, len ledecic dau sug len locirma merna mog mog dau lusud. Dara areg len lens meijouhw dou leng gus augwan gini dou Yesus toua. 6:31 Doba lusud leinyana ledregim debin len sungga terimda. Hang emedeinyum naugb sug len lemet ared touwero. Dangga Yesus enara dou men logodeh, endagai: Yen yisa, maihweda se losneseba gedig lusud lemeisero naugb maman madehig debin mamug sunggahabi. 6:32 Dangga, kaba, len laingmo ij. Hanoba len leihweda se losneseba hom naugb len ledeigtou debin lenin merug sungga toua. 6:33 Doba sug len leisa ij aud usi ingga, kaba, lusud leinyana dau cinogo geb acec Galilea mebera len lecinaga dag Yesus an men logodeh len leisa ij gini. Dangga hang, len len dau meren cinogo naugb len lobgei mebera. Hanoba len ledeigtou se usi deb ino naugb len deb touohob. 6:34 Dangga sug Yesus esogwa dau ij, kaba, en eiya, doba lusud leinyana gougwa eng leigtou deb ginohob, kaba, en medoc eineg dara erij an len namcir. Anai len ledag domba gedig meren gembala ingma naugb emesedougwo lenero. Hang en ebiji naugb en edidib ELOHIM mer moho einyana meijouhw dou len toua deit. 6:35-36 Doba sug losogohob, kaba, Yesus men logodeh len len naugb ledenara dou en, lendagai: Ban barougb len gini naugb len ledehilon ared se desa dara cinogo augwan geb acec maman gininda naugb lenahabi. Anai sugin, kaba, losneseba namcir dara deinyor lobohob gaihida. 6:37 Doba Yesus auni ucugb dou len, endagai: Yen eng yemeic ared dou len lemet. Doba len ledegeij merir an en namcir. Hanoba len leijidougwo en, lendagai: Ban boudesa endag emen emob aregoufu einyana deb. Hang emen ememauma ared emedeinyum naugb len gin laugwansei? Anai gini et aregoufu perag mogo huntun hwaiyohob gina? 6:38 Doba Yesus eija bauni len merir ucugb deit, endagai: Yen yedeiya dougwo dag yen yeisgoho roti mogo hosaiya, engga? Sug len ledeiya dougwohob, kaba, len launi ucugb dou Yesus, endagai: Areg emen emobdeb, kaba, roti mogo sergem dara hosei maga hwai dous. 6:39 Sug Yesus ouman ginohob, kaba, en arougb lusud ingga laugwan, endagai: Yen yeigtou debinim se aremon geigouhw gin gabedahabi. 6:40 Dangga, kaba, len ingga len leigtou led debinim se usi hwai. Usi hom, kaba, merug huntun hom. Dara usi hom deit, kaba, merug sud hwai sisedeisu len laugwan leigtou dara geigouhw namcir. 6:41 Sug len lekebem se usi dag gragohob, kaba, Yesus os roti mogo sergem dara hosei maga hwai graga icira en mesirahabi, en emeised mergo augb bogo dauntoba en en sijo dou ELOHIM naugb gin toua. Sug en ocuncum dou ELOHIM dauwohob, kaba, en ekris roti. Hanoba en eic dou men logodeh naugb len lohw an len ingga laugwan toua. Dara en ohw hosei graga toua ucan dou len deit. 6:42 Dangga len laugwan let beicer namcir. 6:43 Sug len let beicerohob, kaba, Yesus men logodeh len leihweda ledouci ared mougwu dau roti dara hosei augwan ucugb debinim se aigdaga mes sisa hobjerai batij namcir. 6:44 Dara len laugwan gedig len let roti gini, kaba, len lecic lusud mogud dous, edebeij merug ribu sergem gini. 6:45 Sug len letara bouwa inegohob, kaba, Yesus arougb men logodeh, dauntoba len laingmo ij ino en men dig cinogo Bedsaida gacda. Sug en arougb men logodeh leis ijohob, kaba, en arougb lusud leinyana graga toua len laugwan leihweda. 6:46 Doba sug en arges len dara ou lenohob, kaba, en eisaugb mengarougb hom naugb en edocuncum dou ELOHIM dou enin sungga toua. 6:47 Dangga sug loba od enohob, kaba, eninto moongga se mengarougb gin dous. Doba men logodeh, kaba, len merugwengga se Galilea mediaba. 6:48 Anai loungmen edeij len terimda. Hang en eiya men logodeh gin, kaba, dag len logo duhu termum naugb leihwedig mebera. Doba ij emeijeijo an lendero. Dangga edebeij sug bogo obrugwohob, kaba, Yesus ec mohora se duhu mod ucan len terimda en edacu len se duhu medi taij. 6:49-50 Doba sug len leiya en ec mohora se duhu mod ucan len dangga, kaba, len loudesa eni aremoung mena dous. Dangga len laugwan lomi medam dareg len lahau dau en toua. Anai len leiya en se len meriresohob. Doba Yesus oho mer debin len, endagai: Yen yemahaulo. Anai dani dag aremoung menero. Doba dang Yesus eng doucan yen gini. Hang yen yemomi touwero. 6:51 Sug en oho mer debin len danggohob, kaba, en toua aingmo ij desij len. Doba sug en aingmo desij len se ingmes inegohob, kaba, loungmen mohora edina namcir dau len toua. Sug men logodeh ingga, len leiya gini, kaba, len leimiman dau gin dag len merdoc omom dau gin namcir toua. 6:52 Anai sug Yesus ens ganusbus ogdoc roti dou len inohob, kaba, len merdoc agadgeij dougwo ginaba. Hang meijouhw dau augwan gin emeinesa len merdoc mes dag misen touebma. 6:53 Sug Yesus dara men logodeh len ledebeij dig nagama ginohob, kaba, leni merugwengga se leng Genasared meren hancob. Hanoba len leic ij deb sungga. 6:54 Doba sug Yesus dara men logodeh, len lesogwa dau ing mes inegohob, kaba, lusud lecinaga Yesus en eng ingga. 6:55 Dangga, kaba, len lobga dinga dingada se leng Genasared meren hancob augwan naugb len lodo boromei an leng areber aud Yesus se astesda sug len louman en meni sugiro toua. 6:56 Dara astesda cinogo, dara astesda beimes, dara astesda desa sug Yesus edebeij len, kaba, len ledob leng areber se astesda meren usmougb goujeiji hom yom dougwo ucina an en toua. Dauntoba sug en eraga irir len, kaba, len leiyagarij en naugb len los men sansun icira en mosahabi. Dangga gareg en os men sansun icira en mosohob, kaba, en eic geingmos agauwesa namcir.

Markus 7

7:1 Doba se lona hom, kaba, merug hosa dau leng Parisi dara leng meru ouforoho se Musa men gomnomna len ledebeij Yesus sungga toua. Anai len louwaden dau Yerusalem naugb ginohob. 7:2 Dangga sug len ledebeij enohob, kaba, len leiya, doba merug hosa dau Yesus men logodeh len letara dara len merisira ogor deseino ELOHIM namcir. Anai len lemedu len merisira lemaimo leng Parisi len merir an ginero. 7:3-5 Hang len lemeijidougwo Yesus an gini, lendagai: Dagiro, naugwe hang, aban logodeh len lemaimo maman mamjemouwer meren gomnomna ginero. Doba len letara dara len merisira ogor deseino ELOHIM dag gin dousa? Anai sug len lemedu len merisira dag ginero, kaba, len ledreg gomnomna gin namcir touohob. Len leija loung magai Yesus dag gini, anai leng Parisi dara leng Yahudi gus len laugwan, kaba, len los debin len merjemouwer meren gomnomna an gin terimdaba. Dangga sug len louwan letara, kaba, len ledu len merisira nosa dauwahabi. Dauntoba len letara dara len merisira ecabeci deseino ELOHIM. Doba sug len lemedu len meresirabuma, kaba, len lemet ared touwero. Dangga toua, sug len lecicugb dau usi gedig lohwaresohob, kaba, len lemet ared an ogorero. Doba len ledu len merisira dauwahabi, len lemet ared. Dara len lemaimo len merjemouwer meren gomnomna hom gin dousero. Doba len laimo meren gomnomna aingma aingma deit naugb len ledu areg len letaresa, dara legaresa dag mog naugb duhu, dara dabei, dara debecij dau kermum gohoseri augwan toua. 7:6 Doba Yesus enara bauni len merir ucugb, endagai: ELOHIM enara eisaugb yen ogdoc sud hom moho Yesaya deb nosohob, endagai: Lusud gini len leigdoumesa dan indoho augwougb se len merirs dous. Doba len merdoc mes, kaba, aigus gougwa dau dan namcir. 7:7 Dangga eigouhw naugb len lemesijaresa danlo. Anai len len dou lusud dag areg len lomnomnan dou len gini, kaba, dau dan ingga. Dobnaro. Areg len lomnomnan gini, kaba, dag lusud lenin meren gomnomna dous. 7:8 Dangga areg en og gin, kaba, misen namcir. Anai yen toua yarges ELOHIM men gomnomna deb namcirohob. Hanoba yen yeicara yaimo lusud meren gaben dous. Hang meijen geicara augwan toua, dag yen yeicara yarerei lusud meriresi terimda. 7:9 Sug Yesus owun leng Parisi dara leng meru ouforoho se Musa men gomnomna dag gragohob, kaba, en enara ceg ceg len deit, endagai: Yen meiju ouforoho namcir naugb yen yehilon ucina, dauntoba yen yemaimo ELOHIM men gomnomna gin terimdero. Doba yen yaimo yenin meijen gaben gin dous. 7:10 Anai Musa en og deb se Surad Injil Meb Mohon deb nosohob, endagai: Yen yagauwesa yen meijiner dara yen meijimir dara deigeigouhw namcir. Dara en og ingma debin gin toua deit, endagai: Gareg dau yen, en ouwareij mena dara mem, kaba, len gus leic gomom dou en toua. 7:11-12 Doba yen, kaba, yen yesulou lusud dag gini, yendagai: Gareg dau yen en enara dou mena dara mem dag areg en esedeb naugb ousa lan, doba en es moro dou ELOHIM enohob, kaba, gini dag en emousa lan toua deitero. Doba en arges dau namcirohob. 7:13 Hang meijen gaben gini aiyan ELOHIM men gomnomna graga dau len namcirohob. Dara yen yemeperwei ELOHIM men gomnomna hom gin dousero. Doba yen yeperwei men gomnomna gus gus einyana dag gin touohob. Hanoba yen yomnomnan gin dous eng dou yen meijihir, dara len gus toua terimda. 7:14 Sug Yesus enara dou leng Parisi dag gragohob, kaba, en eiya lusud leinyana len len naugb loucimdeb dara en deit. Sug len laugwan lou acec enohob, kaba, en esulou len ucan deit, endagai: Yen yaugwan youman dan indir an areg dan den dou yen gini deigeigouhw namcir. Dauntoba yen yecinaga meijouhw asesa toua. 7:15 Anai areg yen yet se yen meijirs, kaba, emeic gogor dou yen deseino ELOHIM enero. Doba areg gen dau meigdoc mes naugb agunya se meijirs, kaba, gin eng eic gogor dou yen deseino ELOHIM dous. 7:16 Gareg dau yen, en moms ai, kaba, en ouman areg dan den dou yen gini deigeigouhw namcir. 7:17 Sug Yesus eic gainyenara dag graga dou len bouwohob, kaba, en eihwededau len ingga deb. Hanoba en einesan men logodeh se tu hom. Sug len leinesohob, kaba, men logodeh leijidougwo en, lendagai: Gainyenara graga, kaba, men meijouhw dagiro? Ban bens dau gin dou emenahabi. 7:18-19 Doba Yesus enara debin len, endagai: Areg sud hom en et, kaba, emeic gogor dou enero. Anai emeinesa medoc mesero. Doba einesa menuhwa. Hanoba edagunya dig gaihida dous. Dagiro hang, yen yemecinaga ginero? Yen toua, meiju edgom, aninim dag len gusei? Dangga sug Yesus enara dag ared augwan emeic gogor dou lusudero, kaba, en eigdoumesa ared augwan dag ecabecohob naugb lusud let toua. 7:20 Sug Yesus enara debin len dag ginohob, kaba, en ens dau areg eic gogor dou lusud graga men meijouhw asesa dou len deit, endagai: Areg agunya dau sud hom medoc mes, kaba, inggang eic gogor dou en. 7:21 Anai sud hom men gauwamara ecgu emen dau menuhwero. Doba agunya dau medoc mes dous. Hang ahwan en naugb en ohw en maga aibibrida dou len gus, dara en eiyohora, dara en es len gus, dara en mesirebsa. 7:22 Dara en agungunara, dara en einegnegara, dara en erba mohoisa, dara en ogo ara gaihim naugb en aimo areg gecgu aibibra terimda. Dara en ediseij len gus, dara en ecic len gus meroho gouhw genes, dara en eimiman enin, dara en medoc emarjaga touwero. Doba en aimo areg enin ouwan terimda. 7:23 Aremer augwan gini emagunya dau en menuhwero, doba agunya dau en medoc mes, hang emeic gogor dou en toua. 7:24 Sug Yesus ens meijouhw dag graga dou men logodeh bouwohob, kaba, len leihwededau sungga dig cinogo Tirus dara Sidon maran hancob deit. Dangga sug len ledebeij sunggohob, kaba, Yesus einesa tu hom naugb en ecgoneh en mog dau lusud. Anai en emouwan naugb len lemecinaga dag en edebeij sunggohob touwero. Dobnaro. 7:25 Dangga sug gida hom en ouman, doba Yesus edebeij tu ginohob, kaba, en en dedemeda aud en naugb eden dou en. Anai en mehida godeh hom, kaba, mena mog mog einesa en medoc mesohob. 7:26 Sug en edebeij Yesusohob, kaba, en ecguna dou en. Hanoba en eiyagarij en, endagai: Ban bocirma mena mog mog dau dan indihidahabi. Doba gida hom gini, kaba, dau leng Yahudiero. Doba en gun se Pinisia se leng Siria meren hancob. Dara en emec Ibrani mer touwero, doba en ec leng Grika merir dous. 7:27 Dangga Yesus en dougwo en, endagai: Emeigouhw naugb dan demeic dan indihir meren ared naugb dan demerba dou mihero. Doba dan deic dou indihir, len let nosahabi. 7:28 Doba gida ingga, kaba, en enara bauni Yesus mer ucugb, endagai: Adehsud, sug sud hom ingga en mehir len letara se boromei, kaba, cum, moslos ebrera dou mihi gesesa boromei meniha let toua. 7:29 Sug Yesus ouman en mer an gini, kaba, en auni dou en, endagai: Ban abdoc ebdebin an dan dag ginohob, kaba, dan dousa deisa ban abir an gin toua. Hang ban becicugb dig aban tu, anai mena mog mog eihwededau ban abihidohob. 7:30 Dangga sug gida ingga en ecicugb bedebeij men tuohob, kaba, en eiya mehida sug atou se boromei. Doba mena mog mog eihwededau en dag misenohob. 7:31 Sug Yesus en ecicugb dau leng Tirus meren hancob, kaba, en eragasa leng Sidon meren cinogo aud Cinogo Sisa meren hancob terimda en edebeij Galilea mebera ucugb deit. 7:32 Sug en edebeij Galilea mebera deitohob, kaba, lusud lahwan sud hom moms etub dara ec mamaha aud eni. Sug len ledebeij enohob, kaba, len leiyagarij en, lendagai: Ban bou ban absira aga sud hom gini, dauntoba en ouman lo ucugb deit. Dara en enara moho asesa touahabi. 7:33 Doba Yesus, kaba, en ahwan en dau lusud leinyana ingga. Sug en ahwan en dau lenohob, kaba, en ou mesira mob se sud hom ingga moms mes hwas. Gin dauwohob, kaba, en eigdores se mesira mob baugb metemouwu toua. 7:34 Sug Yesus eicara dag ginohob, kaba, en eised mergo aud dig bogo dara en etin menesa namcir. Hanoba en enara dou sud hom ingga, endagai: w Epata. Gini aninim dag, yen yisga namcir. 7:35-36 Dangga sud hom gin, kaba, en moms hwas esga naugb en ouman lo asesa deit. Dara en metemouwu eijouhw naugb en enara moho asesa toua. Doba Yesus oungben len laugwan, dauntoba len lemecic dau sug en eic geigouhw dou sud hom gini dou lusud hom touwero. Doba edag en edarougb len naugb len lemecic aremer gini bagaha dou lusud gus laugwanero, kaba, len lagaha aremer gini becinten dou lusud laugwan toua terimda. 7:37 Dangga sug len gus louman dau gin, kaba, len leimiman dag len merdoc omom dau gin namcir. Hanoba len lenara doum, lendagai: Sud hom gini men geicara augwan eigouhw namcir. Anai en emousa aremer mogurei dousero. Doba en esinsin leng merums esga naugb len louman lo ucugb deit. Dara en esinsin leng losum naugb len lenara moho asesa ucugb deit toua.

Markus 8

8:1 Se lona sug Yesus moongga se Galilea meberaba, kaba, lusud leinyana louwa debin en deit sungga toua. Doba sug len louwa debin en gini, kaba, meren ared ingmaro. Dangga en eija men logodeh naugb len len aud eni. Sug len len aud enohob, kaba, en enara dou len, endagai: 8:2 Dan indoc erij an lusud leinyana gini. Anai len leigtou desij dan se lona homoiyohob. Hang meren ared toua ouwa dau lenohob. 8:3 Dara ligbum dau len, kaba, len len dau aigusi. Dangga dan demarougb len naugb len lemeihweda dara len merinuhwa mes mogud touwero. Anai sug dan darougb len leihweda, kaba, cum, len ledahauwa se ucina namcir. 8:4 Doba Yesus men logodeh, len launi en mer ucugb, lendagai: Gareg en ehilon ared edeinyum naugb en eic dou leng leinyana gougwina? Anai sugin lomougwisadaha. 8:5 Doba Yesus eijidougwo len, endagai: Meijen ared hosaiya inggebga? Dangga len launi dou en, lendagai: Emen roti mogo senggai dous. 8:6 Sug Yesus en ouman len merir an dag ginohob, kaba, en arougb lusud laugwan naugb len laugwan lecguna leigtou se cinogo. Sug len leigtouohob, kaba, Yesus os roti mogo senggai icira mesirahabi, en emen sijo dou ELOHIM. Sug en en sijo dou en dauwohob, kaba, en ekris roti. Sug en ekrisohob, kaba, en ohu dou men logodeh. Hanoba en arougb len, endagai: Yen yohw roti gin an lusud gin laugwan. Dangga, kaba, men logodeh laimo en mer an toua. 8:7 Dara men logodeh len lodo hosei maga hosa toua inggebga. Dangga sug Yesus en sijo dou ELOHIM naugb hosei gin touohob, kaba, en arougb men logodeh deit, endagai: Yen yohw hosei gini an lusud laugwan toua. 8:8-9 Hang lusud laugwan let roti dara hosei beicer namcir. Dara men logodeh len louci ared mougwu debin se aigdaga mes goujeiji mogud maga senggai batij namcir toua. Doba lusud gedig len let roti dara hosei gin, kaba, edebeij dag merug ribu hogu. 8:10 Sug lusud letara dauwohob, kaba, Yesus arougb len laugwan naugb len leihweda. Sug en arougb len leihwededau en inegohob, kaba, eni dara men logodeh, len leisa ij dig nagama aud leng Dalmanuta meren hancob toua deit. 8:11 Sug Yesus edebeij nagamohob, kaba, merug hosa dau leng Parisi len len audi eni. Dangga sug len ledebeij enohob, kaba, len lenara merir laised en namcir an areg en ebedbed dou lusudohob. Dara len lainyen en naugb en ens ganusbus ingma dau bogo dou len toua. Dauntoba len lecinaga dag ELOHIM esa en dau bogo dag misen aud lenohob. 8:12 Sug Yesus ouman dag len lacgeij ganusbus ingma dau en deit, kaba, en medoc aham an len merir namcir. Hanoba en auni dou len ucugb, endagai: Anara, hang, yen youwou dan an ganusbus terimda? Dangga yen youman dan indir an deigeigouhw. Anai dau iteitogini, kaba, dan demens ganusbus dou yen deitero. Areg dan den gini misen namcir. 8:13 Sug Yesus enara dou len dag gin inegohob, kaba, en eihwededau len. Hanoba eni dara men logodeh, len leisa ij dig nagama gacda dau len namcir. 8:14 Doba sug len leisa ij dedemeda dau len dag gin, kaba, men logodeh merdoc moc dougwo meren ared deb. Dangga len leiya, doba meren roti mogo hom inggeb se ing mes dous. 8:15 Doba Yesus esulou len, endagai: Yen yebehnehino yenin meigdoc mes dougwo leng Parisi dara Herodes meren gugdo mougb gin terimda. 8:16 Sug len louman eisaugb gini, kaba, len meru laiso en mer an gini. Hanoba len lenara doum ucucugb, lendagai: En enara baugtarera dougwo maman mamir, anara? Anai maman mamoho roti ingmaro ginei? 8:17 Doba Yesus en ecinaga areg len len doum ingga. Hanoba en etaha len merir an gini, endagai: Dagiro, naugwe hang, yen yenara doum dag ared ingmaro, anara? Yen meiju edgom namcir, hang yen yemecinaga meijouhw dara yen meigdoc emobgesa touweroei? 8:18 Yen meijires ai. Dangga, dagiro yen yemeiya asesero. Dara yen meijums ai. Dangga, dagiro yen yemouman touwero? 8:19 Anai sug dan dekris roti mogo sergem dou lusud merug ribu sergem sug nosa, kaba, yen youci mougwu deb se aigdaga mes hosaiya? Doba len launi dou en, lendagai: Emen emouci deb se aigdaga mes sisa hobjerai. 8:20 Dara sug dan dekris roti mogo senggai dou lusud merug ribu hogu sug nosa, kaba, yen youci mougwu deb se aigdaga mes hosa toua? Doba len launi dou en, lendagai: Emen emouci deb se aigdaga mes senggai. 8:21 Sug len launi dou Yesus dag ginohob, kaba, en enara debin len deit, endagai: Gedangga, kaba, dagiro, hang yen meigdoc emobgesa areg dan den dou yen gragero, anara? 8:22 Sug Yesus dara men logodeh leisa ij ledebeij cinogo Bedsaidohob, kaba, lusud lahwan sud hom mairesmougb aud en. Sug len ledebeij enohob, kaba, len leiyagarij en, lendagai: Ban bos sud hom gini, dauntoba en maires esga naugb en eiya lo asesahabi. 8:23 Doba Yesus os sud hom ingga en mesira. Hanoba en ahwan en dou lanin dig liga geb acec cinogo medigo. Sug lan laihwedig medigohob, kaba, Yesus eigdores aih en maires hwas. Sug en eigdores aihohob, kaba, en ob mesira hwas deb se en maires toua. Sug en ob deisohob, kaba, Yesus eijidougwo eni, endagai: Ban beiya mena erjeijohobei? 8:24 Doba sug sud hom ingga, en oho mergohob, kaba, en auni dou Yesus, endagai: Dan deiya lusud, doba len ledag sogo gecec se dan indires dousaba. 8:25 Dangga Yesus ob mesira se en maires hwas deit. Sug Yesus eicara dag gin dou en deitohob, kaba, en maires esga naugb en eiya lo asesa deit toua. Hang en emeiya lusud ledag sogo gecec toua deitero. Doba en eiya augwan dag misen namcir. 8:26 Sug Yesus esga en maires dag ginohob, kaba, en dougwo eni, endagai: Ban bemeinesa cinogo Bedsaida deitlo. Doba ban beihwedig aban tu dous. 8:27 Sug Yesus dara men logodeh, len leihwededau cinogo Bedsaidohob, kaba, len leihweda se cinogo geb acec cinogo Kaisarea Pilipi augwan deit. Dangga sug len leraga asa ucina aud cinogo augwan ingga, kaba, Yesus eijidougwo men logodeh, endagai: Yen youman sug lusud lecic dan indoho doum, kaba, len leija dan dag garena? 8:28 Hang len launi dou en, lendagai: Ligbum, kaba, len leija ban aboho dag Yohanes gogun lusud se duhu. Doba ligbum, kaba, len leija ban aboho dag Elias. Dara ligbum, kaba, len leija ban aboho dag sud hom dau leng lesai ELOHIM moro sug nosohob. 8:29 Sug len launi dau len gus merir dou enohob, kaba, Yesus eijidougwo len deit, endagai: Doba dagiro eisaugb yen yaugwana? Doba Petrus auni dou en, endagai: Bani Sud Hom Geigdoc Lusud Dau Meren Gogom Augwan. 8:30 Sug Yesus ouman, doba Petrus auni gasesa dag ginohob, kaba, en oungben len, dauntoba len lemedecic en moho gini se loro. 8:31 Sug Yesus oungben len dag graga dauwohob, kaba, en ens dau sug lusud leic gomom dou en ucan dou len deit, endagai: ELOHIM esedeb naugb sug leng Yahudi meren mougtir, dara gembala gesa taij meren mougtir, dara leng meru ouforoho se Musa men gomnomna, len laugwan leic mog erij aingma aingma dou dan, dara lotogoto dan daum. Hanoba len leic gomom dou Lusud Meraguna Mebin dan toua. Doba lona hwai debin, kaba, dan deisa indireseb ucugb deitohob. 8:32 Sug Yesus enara moho dou men logodeh danggohob, kaba, Petrus asbij Yesus aud en. Hanoba en oungben en dougwo, endagai: Ban bemenara moho dag ginlo. 8:33 Sug Yesus ouman Petrus en mer ginohob, kaba, en eineg medoc susugb aud men logodeh gus. Dara en ei maires dara len toua. Hanoba en enara debin Petrus deseino len laugwan toua, endagai: Setan, ban bihwededau dan namcir. Anai areg ban bauwam an gini, kaba, emaimo areg asesa ELOHIM medoc mesero. Doba aimo dau areg lusud lauwam an dou lenin dous. 8:34 Sug Yesus enara debin Petrus bouwohob, kaba, en eija lusud gus len toua len len aud en an men logodeh sungga toua. Sug len laugwan lacinimohob, kaba, en esulou len, endagai: Gareg en ouwan aimo dan, kaba, en emaimo areg enin ouwan deitero. Doba en ogod se enin medoc mes naugb en aimo ucina mog erij aud gomom ucan dan terimda. 8:35 Anai gareg dau yen en ebehnehino enin mena naugb en maireseb dous, kaba, cum, en mena toua ediyebeiya dau en namcir. Doba gareg dau yen en emebehnehino enin menero, doba en omom icira sug en aimo dan, dara icira sug en esai Mer Geigouhw eisaugb dan dou len gus, kaba, en mena emediyebeiya touwero. Doba en edesma mena maireseb menau geb huhugb namcir. 8:36 Dangga yen yemeic yenin meijina naugb yen yemamcirac icira areg geb se cinogo ginlo. Doba yen yasid yenin dau namcir. Anai sug yen yeic yen meijina naugb yen yamcirac icira areg geb se cinogo gini. Doba cum, maireseb huhugb ediyebeiya dau yenohob, kaba, ara ingma emeb naugb yen deita? Naro, ara ingmemeb naugb yen deitero, anai augwan ediyebeiya dau yenohob. 8:37 Dara sug yen yebeda maireseb huhugb bomom dau yenohob, kaba, yen yemeic ara naugb yen yemauma ucugb deita? Naro, yen yeic ara ara naugb gin touwero. 8:38 Dangga igdebes emeba yen naugb sug yen yos yadi dan indoho dara areg dan desai dou yenohob deseino leng merdoc aihagab ELOHIM dara leng ledis en mer touwero. Doba yen yeic meijus naugb yen yos yadi dan indoho dou len terimda. Anai sug igdebeseba yen, kaba, Lusud Meraguna Mebin dan toua igdebeseba dan dau sug dan demos demadi yen meijoho deseino lusud se lona sug dan demecicugb touwero. Anai se lona ingga, kaba, dan den dara dan Indina men gogouf cucugb erbacec dan. Dara men malaikadir gecabeci loucan dan toua.

Markus 9

9:1 Sug Yesus esulou len laugwan dag graga bouwohob, kaba, en esulou len eisaugb lona sug ELOHIM oiharaga lusud ucan dou len deit, endagai: Ligbum dau yen, kaba, yen yemomom dau lona sug ELOHIM oiharaga lusud ucugb. Dara sug yen yeiya dau men goubesa debin gin touwero. Doba yen yeiya augwan gini dara yen meijiresahabi, yen yemomom dau toua. Yen youman dan indir an areg dan den dou yen gini deigeigouhw. Anai gini asesa dara misen namcir. 9:2 Lona senggem debin gin deit, kaba, Yesus ahwan Petrus, dara Yakobus, dara Yohanes len laugwan leisaugb menmod gagas hom naugb len ledeigtou dou lenin sungga. Sug len ledebeij se men modohob, kaba, Yesus eperwei en mocbobaga deseino len. 9:3 Dangga len leiya, doba men sansun gogouf cucugb mouf esesilo namcir bedreg dau sansun gogouf cucugb misen areg lusud lesinsin se cinogo gin namcir. 9:4 Dauwohob, kaba, Yesus men logodeh merug homoi gini len leiya, doba Elias dara Musa lan lanara dou Yesus toua. 9:5 Sug len leiya dau ginohob, kaba, Petrus enara dou Yesus, endagai: Adehsud, eigouhw naugb emen emugwengga sugin touohob, dauntoba emen emohud tu meij homoi bedeinyum yen. Hom naugb bani, hom naugb Musa, hom naugb Elias toua. 9:6 Doba areg en en gini, kaba, en emauwam an nosa habero. Doba en enara augwougb se mers dous. Anai eni dara mesi lani len merdoc omom an areg len leiya gin namcirohob. 9:7 Doba sug Petrus enara dangga inegohob, kaba, umer obsara bosun len namcir. Hanoba len louman sud hom genara dau umer ingga dou len, endagai: Gini dan Indisi gedig dan indoc gororougb en namcir. Hang yen youman en mer an areg en en dou yen deigeigouhw namcir toua. 9:8 Sug len louman mer gini ineg dauwohob, kaba, len lesa lauweila dig meridigo dig meraga. Doba len lemeiya lingma lemesa desij lenero. Doba len leiya Yesus enin dous. 9:9 Dangga sug Yesus dara men logodeh merug homoi len louwaden dau menmod en, kaba, en oungben len, endagai: Yen yemdecic dau areg yen yeiya graga dour touwero. Doba edebeij lona sug Lusud Meraguna Mebin dan deisa dau gomom ucugwahabi, kaba, yen yemdecic dau areg graga augwan dou lusud toua. 9:10 Hang len lemdecic dou sud hom ingma mougwa hom touwero. Doba len laimo en mer an areg en en dougwo len gin toua terimda. Doba lenin, kaba, lereiragasem dougwo ucucugb an gini. Hanoba len lenara doum, lendagai: En enara eng gedag en eisa dau gomom ucugwohob gini, kaba, men meijouhw dagiro? 9:11 Sug len lauwam an, dobnaro, kaba, len leijidougwo Yesus an aremer gin deit, lendagai: Leng meru ouforoho se Musa men gomnomna, kaba, len len dou emen dag ELOHIM ogod anohob dag Elias eino nosahabi, kaba, Mesias emaimo ucan. Doba dagiro, naugwe hang, len lenara dag gin dou emen. Anai bang Mesias, ban benohob, gina? 9:12 Dangga Yesus ousa deisa len merir, endagai: Areg len len dou yen gin, kaba, misen namcirohob. Anai Elias, kaba, en eino naugb sug en esedeb augwan becabec deb nosahabi, Mesias emaimo ucan en deits. Doba sug Elias esedeb augwan ecabeci dag gin, kaba, dagiro Surad Injil Meb Mohon enara deb dag lusud leic mog erij aingma aingma dou Lusud Meraguna Mebin dan. Hanoba len lesbes an dan dara len lotogoto dan toua? 9:13 Doba yen youman dan indir deigeigouhw. Elias en einon asesa. Dara lusud meren geicara dou en gini, kaba, aimo dau areg lenin louwan toua. Anai augwan gini esogwa deisa areg len log deb se Surad Injil Meb Mohon deb naugb en sug nosohob. 9:14 Sug Yesus dara men logodeh merug homoi graga, len ledebeij men logodeh gus se dougwohob, kaba, len leiya, doba leng meru ouforoho se Musa men gomnomna len merir laised men logodeh deb gini. Hang lusud leinyana louwa debin len deb toua. 9:15 Sug lusud leiya, doba Yesus enin agunyen touohob, kaba, len merdoc eimiman medam dau gin namcir. Hanoba len lobga dedemeda naugb ledagasa eni. 9:16 Doba Yesus eijidougwo men logodeh, endagai: Yeni dara leng meru ouforoho se Musa men gomnomna, kaba, yen yenara doum eisaugb aringgina? 9:17-18 Dangga sud hom dau len ingga, kaba, en auni dou Yesus, endagai: Adehsud, dan dahwan dan indisi aud ban sugini, anai mena mog mog geic osum dou enohob, kaba, en einesa en medoc mes. Hanoba eic en badgedro, dara eic dag en eigdores mahac terimda. Dara en mogta ecugwom, dara en maga augwan ohosber namcir toua. Dangga hang, dan dacgeij aban logodeh naugb len locirma mena mog mog dau enohob. Anai ban abugwero. Doba meren goubesa emedeinyum naugb ginero. 9:19 Sug Yesus en ouman gini, kaba, en omi debin len. Hanoba en enara medam dou len, endagai: Dan deigtou desij yen, dara dan deigtou dateteij se lona hosa deitahaba? Anai dan dens dau ELOHIM men goubesa augwan bedeinyum dou yen touohob. Doba yen yemod meijina debsa en an aremer gin dag misenbuma. Sug Yesus enara gouji dangga dou lenohob, kaba, en arougb len, endagai: Yen yedahwan en meisi ingga dou dan suginahabi. 9:20 Dangga len lahwan godeh ingga aud Yesus. Doba sug mena mog mog eiya Yesus inegohob, kaba, en eisidged godeh ingga. Hanoba en eic en badgedro terimda en meigdores mahac namcir. 9:21-22 Sug Yesus eiya gini, kaba, en eijidougwo godeh ingga en mena an gini, endagai: Mena mog mog eba godeh gini aisohoba? Doba mena auni dou Yesus, endagai: Mena mog mog eba en sug en godehohob. Hang ahacugb en se smougb dara erba en se duhu naugb eic gomom dou en mougwa einyanohob. Dangga sug aban goubesa inggebga, kaba, ban abdoc erij an emen naugb ban bousa en touahabi. 9:23 Doba Yesus auni en mer ucugb, endagai: Dagiro, naugwe hang, ban beija dan dag indan goubesa edeinyum naugb gina? Anai astesda gareg en od mena debsa ELOHIM dag misen, kaba, men goubesa edeinyum naugb augwan touohoba? 9:24 Dangga sug godeh ingga en mena ouman gini inegohob, kaba, en eiyagarij dara medoc eijesa medam deseino Yesus. Hanoba en acgeij en, endagai: Adehsud, dan indoc ebdebin an ELOHIM. Doba ban bousa dan, dauntoba dan dod indina debsa ELOHIM dag misenahabi. Anai iteitogini, kaba, dan demod indina debsa en an gini dag misenbuma. 9:25 Doba sug Yesus en eiya lusud leinyana gougwa len len naugb louwa debin en deit, kaba, en arougb mena mog mog geisa godeh ingga, endagai: Dan darougb ban beihwededau godeh gin namcir. Hanoba ban bemecicugb aud en deitero. Anai ban beic gosum dara moms etub dou endaha. 9:26 Dangga sug mena mog mog ingga en ouwan esogwa dau godeh ingga ineg, kaba, en eiyaga dara mer medam. Dara en eised en bahauwa. Hanoba en eihwededau en toua. Sug lusud leiya, doba en ahauwohob, kaba, len lenara doum, lendagai: En omom namcirdaha. 9:27 Doba Yesus ou mesira bos godeh en mesira. Hanoba en eigdoumesa en, kaba, en eisa besa namcir. 9:28 Gin ouwohob, kaba, Yesus dara men logodeh len leinesa tu hom. Sug len leigtou dou leninohob, kaba, men logodeh leijidougwo en, lendagai: Dagiro, naugwe hang, emen goubesa emedeinyum naugb sug emen emocirma mena mog mog dau godeh gragero? 9:29 Doba Yesus auni dou len, endagai: Yen yemocirma mena mog mog gedag gini, kaba, augwougb dau yeninero. Doba yen yocirma eni ogdoc sug yen yocuncum dou ELOHIM hom dous. Areg gus augwan, kaba, men goubesa emedeinyum naugb ginero. 9:30 Sug Yesus ens dau aremer graga meijouhw asesa dou men logodehohob, kaba, len leihwededau tu ingga lekirsa leng Galilea meren hancob gin deit. Anai en ouwan ens dau lusud meren geicara dou en meijouhw asesa dou men logodeh merug sisa hobjerai len dous. Hang en emouwan naugb len gus lemecinaga ucina areg len leraga deb sugiro gin touwero. 9:31 Dangga sug len ledebeij se ucina mogumsohob, kaba, Yesus enara dou len, endagai: Se lona daiyamo gacin, kaba, sud hom en emohw Lusud Meraguna Mebin dan deb se leng merugmog merisira naugb len lemeic gomom dou dans. Doba se lona hwai debin, kaba, dan deisa dau gomom ucugb deitohob. 9:32 Doba men logodeh, kaba, len meru emobgesa en mer an areg en en dou len ginero. Dara len lemeijidougwo en an meijouhw gin touwero. Anai len lahau dau sug len leijidougwo en andaha. 9:33 Sug Yesus dara men logodeh, len ledebeij se cinogo Kapernaumohob, kaba, len leinesa tu hom. Sug len leinesohob, kaba, Yesus eijidougwo len, endagai: Yen meijir yaisedim eisaugb areng se ucina mogums graga? 9:34 Doba len lemauni en mer ucugb dou enero. Anai sug len merugwengga se ucina mogums graga, kaba, len merir laisedim icira meroho, endag gareg moho agas edreg dau len ingga laugwana? Hang len leigtou dag lodinanir namcir. 9:35 Dangga sug Yesus eigtouohob, kaba, en eija men logodeh merug sisa hobjerai len len aud en. Sug len len aud enohob, kaba, en esulou len an areg len merir laisedim graga men meijouhw dou len deit, endagai: Gareg dau yen, en ouwan en moho agas naugb edeino len gus laugwan merin, kaba, esloulougb naugb en owun enin moho eb tainya bedag sogougb naugb len laugwanahabi. 9:36 Sug Yesus esulou men logodeh dag ginohob, kaba, en ohugouhw godeh hom naugb en edeseino len laugwan. Sug en edeseino len laugwanohob, kaba, Yesus eigdoumesa en deisa mohora. Hanoba en esulou men logodeh debin gin toua deit, endagai: 9:37 Gareg dau yen, ogdoc dan indoho, hanoba en owun enin medoc mes arjaga naugb en ebin godeh gedag gin, kaba, gini aninim dag en ebin dan. Dara gareg dau yen en ebin dan, kaba, gini aninim dag en ebin sud hom gesa dan aud yen gin touohob. 9:38 Sug Yesus esulou men logodeh dag gragaba, doba Yohanes enara gus bagod dougwo Yesus mer an gini. Hanoba en enara, endagai: Adehsud, emen emeiya sud hom eic ban aboho bocirma merna mog mog dau lusud. Dangga hang, emen emen dougwo en an gini, anai en emaimo mamanero. 9:39 Doba Yesus enara dou Yohanes, endagai: Gareg en eic ganusbus ogdoc dan indoho dou lusud, kaba, en emeic dan indoho emamcirac augwougb dedemeda deb touwero. 9:40 Dangga ban bemen dougwo en an ginlo. Anai gareg en emeicara emecgwan mamanero, doba men geicara aimo maman namcir, kaba, en toua eigdara maman se meijouhuda homohob. 9:41 Hang yen youman deigeigouhw. Gareg en medoc eigouhw an yen, hanoba en eic mog hom an duhu dou yen yeg, anai yen yaimo danohob, kaba, men siouwa emediyebeiya dau enero. Doba ebsugeb naugb en terimda. Augwan gini asesa dag misen namcir. 9:42 Sug Yesus auni Yohanes mer an areg en eijidougwo enohob, kaba, en ou merisa eisaugb godeh graga dou len deit, endagai: Gareg dau yen en eicara barses godeh hom gedag gini naugb en medoc emebdebin an dan deitero, kaba, eigouhw dau sug en emeicara emaimo dangga an enbuma, kaba, dag lusud lera aumaga an igdahab gouji se en morcahabi len lemderba en an se dum mei toua. Anai sug len lamsoho en, hanoba en eicara baimo dag graga an indan godeh gin toua, kaba, ELOHIM eic gogom medam edreg dau gin dou en deit. 9:43 Dangga hang, sug yen meisira os areg gecgu naugb yen yebesesar terimda, hanoba eic dag yen meigdoc emebdebin an deitero. Doba yen yobsara dau dan, kaba, eigouhw naugb yen yogod yen meisira homa dau yen. Anai eigouhw naugb yen yeinesa maireseb menau geb huhugb dara yen meisira hom dous, dau gedag yen yamsoho hwas gin deb. Hanoba yen yeinesa dum smougb gedig emos touwero, an gin toua namcir. 9:44 Anai sungga, kaba, haga et yen beb huhugb namcir, doba yen yemomom touwero. Dara smougb emos dau yen touwero, doba ait yen beb huhugb terimda. 9:45 Dara sug yen meijohora ahwan yen aud gecgu naugb yen yebesesar terimda, hanoba eic yen meigdoc emebdebin an dan deitero. Doba yen yobsara dau dan, kaba, eigouhw naugb yen yogod yen meijohora homa dau yen toua. Anai eigouhw naugb yen yeinesa maireseb menau geb huhugb dara yen meijohora hom dous, dau gedag yen yamsoho hwas gin deb. Hanoba ELOHIM erba yen se dum smougb an gin toua namcir. 9:46 Anai sungga, kaba, haga et yen beb huhugb namcir, doba yen yemomom. Dara smougb emos dau yen touwero, doba ait yen beb huhugb terimda. 9:47 Dangga toua, sug yen meijiresi hom ehigehi areg gecgu naugb ahwan yen aud sesar, hanoba eic dag yen meigdoc emebdebin an dan deitero. Doba yen yobsara dau dan, kaba, eigouhw naugb yen yeihwa homa dau yen toua. Anai eigouhw naugb yen yeinesa ELOHIM men goiharaga dara yen meijires hom dous, dau gedag yen yamsoho hwas gin deb. Hanoba ELOHIM erba yen se dum smougb an gin toua namcir. 9:48 Anai sungga, kaba, haga et yen beb huhugb namcir, doba yen yemomom. Dara smougb emos dau yen touwero, doba ait yen beb huhugb terimda. 9:49 Dara astesda dau yen, kaba, ELOHIM eic gogom dag smougb dou yen toua naugb ainyen yen. Dauntoba yen yemaimo areg gecgu toua deitero. Doba gogom gini ousa yen naugb yen yaimo areg edag beim dara ecabeci gin dous. Aninim dau sug lusud leic mog lauwaharo dou ELOHIM, kaba, dag len lehin aremor debsa mog gini toua. Dauntoba emetaha touwero, doba ecabeci deseino ELOHIM namcir. 9:50 Dangga aremor, kaba, eigouhw namcir. Doba sug men gahaufo ediyebeiya dauwohob, kaba, yen yemeic bemahaufo deit dagiro? Anai emedeinyumero. Hang yen yebehnehino yenin meigdoc mes. Dauntoba yen yedag aremor gahaufo naugb sug yen yeic gesgigouhwesa doum dara yen meigdoc eigouhw anim ucucugb terimda toua.

Markus 10

10:1 Sug Yesus esulou men logodeh dag graga bouwohob, kaba, en eihwededau cinogo Kapernaum aud leng se Yudea meren hancob deit. Sug en edebeij lenohob, kaba, en aiga dig duhu Yordan nagama toua. Sug en edebeij sunggohob, kaba, lusud leinyana len len naugb louwa debin en dag nosa graga deit. Hanoba en edidib ELOHIM mer men meijouhw dou len dag nosa toua. 10:2 Sug en edidib meijouhw dag gin dou lusud, kaba, merug hosa dau leng Parisi len len aud en naugb lerba mohoisa en. Hanoba len leijidougwo en, lendagai: Sug sud hom en ouwan ogod ameiji dougwo en mesouwa, kaba, Musa men gomnomna ousa deisa en an inggei? Era naroei? 10:3 Doba Yesus auni len merir ucugb. Hanoba en eijidougwo len deit, endagai: Sug nosa, kaba, Musa en ogod an gin dagiro dou yena? 10:4 Hang len launi dou en, lendagai: Musa ogod an dou emen, endagai: Sug sud hom en ouwan ogod ameiji dougwo en mesouwa, kaba, en eic surad dag en ogod ameiji dougwo enohob teitei dou enahabi, en emarougb en naugb en emeihwedau en audi men lusudeda. 10:5 Doba Yesus ens meijouhw bauni len merir an ucugb, endagai: Musa eic gomnomna gini dou yen, anai yen meigdoc emedag beim an ELOHIM en mer ogdoc Musa gin terimdero. Doba yen meigdoc agadgeij dougwo namcir. 10:6 Anai sug aimougtut, kaba, ELOHIM en mer emogod an ingma deb dag ginero. Doba sug en esinsin lusud aimougtut, kaba, Surad Injil Meb Mohon enara endag en esinsin giji hom dara gida hom dous. 10:7 Dangga sug gida en audi gijohob, kaba, giji emeigtou desij mena mem toua deitero. Doba en arges lan deb namcir. Hang lan lamedag hwai deitero, doba lan ladag mog homohob. 10:8-9 Sug ELOHIM eic lan deb dag ginohob, kaba, emedeinyum naugb lusud lemedug lan daum deitero. Anai lan lamedag hwaiyero, doba lan ladag hom namcirohob. 10:10 Sug Yesus dara men logodeh leinesa tu ucugwohob, kaba, len leijidougwo en eisaugb aremer graga deit. 10:11-12 Hang en auni dou len, endagai: Gareg en ogod ameiji dougwo en mesouwa, hanoba en edeic gida gus deit, kaba, gini aninim dag en mesirebsa gida ginohob. Dangga toua, sug gida ogod ameiji dougwo en mesuwa, hanoba en edes giji gus deit, kaba, en mesirebsa giji gin touohob. 10:13 Dara ligida merug hosa, kaba, len loho merihir aud Yesus. Dauntoba en ob mesira deisa len naugb en eic geigouhw dou len toua. Doba Yesus men logodeh len dougwo lusud ingga, lendagai: Yen yemahwan yen meijihir aud Yesusero. 10:14-15 Sug Yesus ouman gini, kaba, en medoc esrougb an len namcir. Hanoba en enara dou len, endagai: Yen yemen dougwo lenlo. Doba yen yamsoho len naugb len loho logodeh ingga dou dan suginahabi. Anai sug ELOHIM oiharaga lusud ucugb, kaba, en oiharaga leng merdoc aninim dag lugdeh gin dous. Yen youman dan indir an areg dan den dou yen gini deigeigouhw. Anai gini asesa dag misen namcir. 10:16 Sug Yesus enara dou len dangga dauwohob, kaba, en os logodeh ingga hom yom se en mohora. Hanoba en ob mesira aga len merugt, kaba, en ocuncum dou ELOHIM an len, dauntoba ELOHIM eic geigouhw dou len toua. 10:17 Se lona hom deit, kaba, Yesus ouwan ec mohora dig cinogo gus deit. Dangga sug en edebeij ucina mogumsohob, kaba, sud hom en obga dagasa eni. Sug en edebeij Yesusohob, kaba, en eic mohorbrida badedeij cinogo deseino en. Hanoba en eijidougwo Yesus, endagai: Adehsud, bang abdoc eigouhw an lusud laugwan namcir. Dangga hang, ban bens dou dan dag dan deicara dagiro, dauntoba ELOHIM eic maireseb huhugb dou dana? 10:18 Doba Yesus auni ucugb dou en, endagai: Ban beigdoumesa dan indoho dag sud hom geigouhw, anara? Anai sud hom ingma emeigouhwero, doba ELOHIM enin dous eng ecabeci dara eigouhw namcir. 10:19 Doba sug ban bouwan ELOHIM eic maireseb menau geb huhugb dou ban, kaba, ban bemes lusud, dara ban absira emebsa ligida gus, dara ban bemeiyohora, dara ban bemaunun dara ban bemoho meh dougwo leng gus an meren aremer, dara sug ban bos badi aremer deseino lusud, kaba, ban bemereiyara mougwa hom touwero, doba ban bos badi augwan se geica namcir. Dara ban bemohoiya ban abina dara ban abim lan marir touwero, doba ban bowun banin abdoc mes arjaga deseino lan terimda. Ban becinaga dau ELOHIM men gomnomna augwan gini dag misenohob. 10:20 Sug sud hom graga en ouman gini, kaba, en enara bauwun Yesus mer an, endagai: Adehsud, ELOHIM men gomnomna augwan gin, kaba, dan daimo teitei sug dan dugdehohob. 10:21 Sug Yesus ouman dau en mer gin, kaba, en ei maires dara en dareg en medoc eineg an en toua. Hanoba en enara dou en, endagai: Ban bedis aremer hom inggebgaba. Hang ban beihweda naugb ban bedohw aban aremougb augwan bauma aregoufu dau len gusahabi, ban bemedohw an leng merunggwereij laugwan toua. Anai sug ban beicara dag gin, kaba, aban siouwa einyana emeb naugb ban se bogo toues. Dauwohob, kaba, ban bemen naugb bemaimo dan terimda. 10:22 Sug en ouman gin, kaba, en mecdemaga eingbon namcir. Hanoba en eihwededau Yesus. Dareg en medoc momogo toua, anai en mesoho mougb an men aremougb einyana medamdaha. 10:23 Sug Yesus eiya, doba sud hom graga en medoc acincin an men aremougb augwandaha, kaba, en eineg bauweila men logodeh laugwan. Hanoba en eda mer dou len, endagai: Indagtorija, ogom medam naugb sug sud hom mesoho mougb en einesa ELOHIM men goiharaga daha. 10:24 Sug Yesus men logodeh len louman gin, kaba, len leimiman dau gin namcir. Doba Yesus enara dou len deit, endagai: Dan indihirija, ogom medam naugb leng merisoho mougb len leinesa ELOHIM men goiharaga. 10:25 Ogom medam dau sug sud hom en eic igdebes mamaga naugb en ei se bugwa meides. Doba naugb sug sud hom mesoho mougb en einesa ELOHIM men goiharaga, kaba, ogom medam bedreg dau gin namcir. 10:26 Sug Yesus men logodeh len louman gin deit, kaba, len merdoc omom an namcir. Hanoba len leijidougwo Yesus, lendagai: Sug ELOHIM emeigdoc leng merisoho mougb dau meren gogom naugb emoiharaga len ucugwero, kaba, en eigdoc gara dau men gogom naugb en oiharaga en ucugb gina? 10:27 Sug Yesus ouman gini, kaba, en ei mairesi dara len. Hanoba en enara dou len, endagai: Augwan gini emedeinyum dau lusudero, doba dau ELOHIM dous. Anai men goubesa edeinyum naugb augwan namcirohob. 10:28 Sug Yesus men logodeh louman gin, kaba, Petrus en eijidougwo en an ucugb deit, endagai: Ban beiya emen gin, anai emen emarges ara ara augwan deb naugb emaimo banohob. Dangga dagiro naugb emen gina? 10:29-30 Doba Yesus enara bad len merdoc mes ucugb deit, endagai: Yen youman deigeigouhw. Gareg dau yen en arges dau men tu dara lo, dara en eihwededau maguner dara magtor, dara medamouwer dara medemeitor, dara mem dara mena, dara mehir laugwan, hanoba en aimo dan naugb en esai Mer Geigouhw eisaugb dan dou lusud laugwan toua, kaba, augwan gini emediyebeiya dau enero. Doba ELOHIM emeic tu, dara maguner dara magtor, dara medamouwer dara medemeitor, dara mem ara mehir, dara lo huntun hom icira dou en sug eni moongga se cinogo ginaba. Dara en aimo ucina mog erij debin gin toua. Dara se lona sug ELOHIM oiharaga lusud ucugb, kaba, en oiharaga en beb huhugb namcir toua. Augwan gini asesa dag misen namcir. 10:31 Dangga se lona sug ELOHIM oiharaga lusud ucugb, kaba, leng ledag mebin iteitogin, kaba, leinyana len ledag mahara. Dara leng ledag mahara iteitogin, kaba, leinyana len ledag mebin se lona ingga toua. 10:32 Sug Yesus esulou men logodeh dag graga bouwohob, kaba, len leragasa ucina deit. Doba Yesus men logodeh len lahau medam namcir. Dara len gus gedig len laicira len, kaba, len laugwan merdoc eijesa toua. Anai len leiya, doba Yesus eino len merin aud Yerusalem deit. Dangga sug Yesus eija men logodeh merug sisa hobjerai ginohob, kaba, en enara dou len, endagai: Yen yin naugb maman madeigtou dou mamaninahabi. Sug len leihwededau leng gusohob, kaba, en esulou len eisaugb areg edobsara debin en se Yerusalem mougwa hom deit, endagai: Yen youman deigeigouhw, anai maman maisaugb namcir dig Yerusalem enggenda. 10:33-34 Dangga sug maman madebeij Yerusalemohob, kaba, len lemohw Lusud Meraguna Mebin dan deisa gembala gesa taij meren mougtir dara leng meru ouforoho se Musa men gomnomna len merisira naugb len logod aremer gomom deinaugb dan. Hanoba len lohw dan debsa sadodor dau lugmahara merisira deit naugb len leic dan lacecim, dara len leigdores aih dan, dara len labosbos dan. Dauwohob, kaba, len lemeic gomom dou dan sungga toua. Doba lona hwai debin gin, kaba, dan deisa dau domom ucugwohob. 10:35 Sug Yesus arges mer an areg en esulou len graga dauwohob, kaba, Sebedeus meisi Yakobus dara Yohanes, lan ladebeij en naugb lacgeij dau en, landagai: Adehsud, aman amouwan naugb areg aman amacgeij dau ban gini, kaba, ban bousa deisa aman amir an namcir. 10:36 Doba Yesus eijidougwo lan ucugb an dous, endagai: Yan yauwan naugb dan deicara dou yana? 10:37 Dangga lan launi dou en, landagai: Sug ban beigtou se aban gogouf cucugb, kaba, ban beigdoumesa aman amaingma dig ban absira misen, dara amaingma dig ban absira metigi toua. 10:38 Doba Yesus etaha lan marir an, endagai: Yan yamecinaga areg yan yacgeij dau dan gini meijouhw dag misenbuma. Anai maijan goubesa edeinyum naugb yan yag mog an gogom aninim dag dan. Dara yan yasedeb yan maigdoc mes deb naugb sug lusud logun yan se duhu moho mog erij aninim dag cum, kaba, len logun dan se duhu moho mog erij gin touei? 10:39 Doba lan launi dou Yesus, landagai: Aman amesedeb aman amdoc mes naugb aman amaimo areg ban ben dou aman gin toua. Hang Yesus ousa lan marir an, endagai: Indeic, yan toua yaimo dan naugb yan yag mog an gogom aninim dag dan. Dara lusud logun yan se duhu moho mog erij, aninim dag len logun dan se duhu moho mog erij gin toua. 10:40 Doba eisaugb yaingma yaigtou dig dan insira misen dara dan insira metigi, kaba, dan demos gin dou yanero. Anai augwan gini aimo dau areg ELOHIM enin esedeb naugb lusud dous. 10:41 Sug Yesus men logodeh merug sisa hobjerai, len louman dau gini, kaba, len merdoc esrougb an Yakobus dara Yohanes namcir. 10:42 Dangga, kaba, Yesus eija len laugwan naugb len len aud en. Sug len len aud enohob, kaba, en esulou len, endagai: Yen yecinaga dau gareg lugmahara len leigdoumesa dag meren mougtir, kaba, len laresbes len terimda. Dara meren lusud gedig len meroho agas, kaba, len laiyan len toua terimda. 10:43 Doba yen, kaba, yen yemeicara dag ginero. Dangga gareg dau yen, en ouwan en moho agas, kaba, esloulougb naugb en owun enin medoc mes arjaga dag meijen sogougb naugb en eicara dou yen nosahabi. 10:44 Dara gareg dau yen en ouwan eino yen meijin, kaba, esloulougb naugb en owun enin medoc mes arjaga naugb en edag sogougb naugb yen yaugwan touahabi. 10:45 Aninim dag Lusud Meraguna Mebin dan toua demouwaden dau bogo naugb lusud lemeicara dou dan touwero. Doba dan douwaden dag bogo naugb dan deicara dou len. Dara dan dohw dan indugt edug naugb dancoho aga len leinyana dau sesar men gogom augwan toua. 10:46 Yesus dara men logodeh len ledebeij cinogo moho Yeriko. Dangga sug eni an men logodeh, dara lusud leinyana gougwa leihwededau cinogo ingga deit, kaba, len leiya, doba sud hom, moho Bartimeus gedig en maires mougb, en eigtou se ucina mebera naugb en ohwiaga lusud an aregoufu terimda. Len leija en Bartimeus, anai en Timeus en meisi. 10:47 Sug en ouman dag Yesus dau cinogo Nasared en eraga asa ucina gen eigtou dougwo gini, kaba, en eiyagarij en dara mer medam, endagai: Yesus, Daud medebeito, ban abdoc erij an danto ginahaba. 10:48 Doba lusud leinyana lesa merir debin en, lendagai: Ban barges abireda. Doba en eiyagarij dara mer medam edreg deit, endagai: Daud medebeito, ban abdoc erij an danto ginahaba. 10:49 Sug Yesus ouman en mer an gin, kaba, en esa deb sungga. Hanoba en arougb men logodeh, endagai: Yen yeija en aud dan suginahabi. Dangga, kaba, len ledeija en. Hanoba len lenara lad en medoc mes, lendagai: Ban beisa baiyan abdocesem, anai Yesus eija banohob. 10:50 Sug Bartimeus ouman dag gin, kaba, en eg men sansun gouji dedemeda dau eni. Hanoba en eisa maga eiloboro naugb edagasa Yesus namcir. 10:51 Sug en edebeij Yesusohob, kaba, Yesus eijidougwo en, endagai: Ban bouwan dan deic ara dou bana? Dangga sud hom mairesmougb, en auni ucugb dou Yesus, endagai: Adehsud, dan douwan ban besga dan indiresi, dauntoba dan deiya lo asesa ucugb deit. 10:52 Sug Yesus ouman en mer an gini, kaba, en arougb en namcir, endagai: Ban bod abina debsa dan. Hang ban beihweda, anai ban beigouhwohob. Sug Yesus arougb en dag gini inegohob, kaba, en maires toua esga namcir naugb en eiya lo asesa ucugb deit. Hanoba en medoc eirirga Yesus naugb aimo en toua.

Markus 11

11:1 Sug Yesus dara en men logodeh, len ledebeij deinyor Yerusalemohob, kaba, len ledebeij se cinogo moho Bedpage dara Betania. Cinogo hwai gini, eb desij mengarougb, moho Saitun Meda. Dangga Yesus arougb men logodeh lahwai naugb lan laino en men aud cinogo hom geb ino ingga. 11:2 Hanoba en enara dou lan, endagai: Yan yaihwedig cinogo hom geb ino yan maijin ginda. Sug yan yadebeijohob, kaba, yan yameiya keledai meijaba hom gedig lusud lemeisa medgomori mougwa hombuma. Ing lecba debohob, kaba, yan yasga aumaga an. Hanoba yan yarei aud dan sugini. 11:3 Doba sug sud hom eijidougwo yan an gini, endag: Yan yasga aumagan keledai gini naugb ara, kaba, yan yauni dou en, yandagai: Aman mougt mera en ouwan. Hang aman amarei dou enda. Sug en eisa ouwohob, kaba, en emesa en dedemeda ucugb sugins. Sug en ouman dag gin, kaba, en amsoho dou yan dedemeda naugb yan yameb aud dan toues. 11:4 Dangga sug lan laihwedohob, kaba, lan laiya, doba keledai meijaba hom eng len lecba deb se misis moc deinyor ucina deb gini. Hanoba lan lasga aumaga an. 11:5 Doba leng lesa sungga, kaba, len lomi debin lan, lendagai: Yan yasga aumaga an keledai meijaba ingga augwougb anara? 11:6 Dangga sug lan lainyen Yesus enin mer graga dou lenohob, kaba, len lamsoho lan ingga naugb laihwedan namcir. 11:7 Sug lan larei keledai ledebeij Yesusohob, kaba, lan lag maran sansun ingma dau lan naugb lan lau keledai meijaba hom graga medgomori. Sug lan lau deinaugwohob, kaba, Yesus eisa medgomori toua. 11:8 Dara leinyana, kaba, len leg meren sansun ingma naugb len lau ucina ino deb naugb en. Doba ligbum, kaba, len leigteh sogo mesira an meh naugb len lau ucina deinaugb keledai sug eraga toua. 11:9 Dara lusud gedig len leino Yesus en men. Dara lusud gedig len laimo ucan Yesus dig medigo, kaba, len laugwan lebiji naugb lesijaresa ELOHIM an en, lendagai: Emen emagahugouhw an ban eisaugb sud hom gini. Anai en en se Adehsud, ban aboho, naugb emenohob. Hang ban beic geigouhw dou en toua terimda. 11:10 Dara ban beic geigouhw dou emen emaugwan. Anai en eperwei emen emjemouwa Daud, en mohw, an emenohob naugb en esedougwo medebeitor emen emaugwan toua. Hang emen emagahugouhw an bang beigtou se bogo geb taiba dau augwan namcir. 11:11 Sug Yesus edebeij Yerusalemohob, kaba, en einesa ELOHIM Men Tuari. Dangga sug en esa bogmac augwanohob, kaba, en eij debin medigo an men logodeh merug sisa hobjerai dig Betania ucugb, anai deinyor loba namcirohob. 11:12 Se loneinda deit, kaba, Yesus dara men logodeh len len dau Betania se Yerusalem ucugb deit. Doba Yesus, kaba, en sireba medam namcirohob. 11:13 Dangga sug en ed mairesi, kaba, en eiya sogo ara hom gesa aigusi, doba en mon ebeibeij namcir. Hang en eihweda naugb edogmac dougwo, endag: Mera ingmanggei? Era naroei? Doba sug en edebeij sogo meiyohob, kaba, en eiya, doba meh mogud dous. Anai emebeij sug igda goho sogo merebma. 11:14 Dangga Yesus ouwara dougwo sogo ara ingga, endagai: Dau iteitogini, kaba, ban bemera mera dou sud hom ingma bemet deitero. Sug Yesus ouwara dougwo sogo ara gin, kaba, men logodeh len loc merums naugb en mer an gin toua. 11:15-16 Sug Yesus dara men logodeh, len ledebeij Yerusalem ucugwohob, kaba, en einesa ELOHIM Men Tuari deit. Dangga sug en eiya, doba leinyana lohwara dara loumara doum deb acec ELOHIM Men Tuari maga deb ginohob, kaba, en eineg meren boromei an aregoufu. Dara leng lohw bohobei, kaba, en os badro an meren boromei augwan namcir. Hanoba en ocirma len laugwan dau ELOHIM men igtia mougb gin toua. Dara en en dougwo lusud, dauntoba sud hom emoho men aremougb naugb en emeraga ELOHIM men igtia mougb gin deitero. 11:17 Sug en ocirma len laugwan dauwohob, kaba, en esa mer debin len toua, endagai: ELOHIM enara eisaugb men Tuari gini se Surad Injil Meb Mohon nosa debohob, endagai: Dan douwan meijouhuda se cinogo augwan len leigdoumesa indan Tuari naugb sug len locuncum se gini dou dan dous. En en dangga dag misenohobei? Era naroei? Naro, yen yecinaga dag en enara dag gini dag misenohob. Dangga dagiro, naugwe hang, yen yeperwei men Tuari gini dag tu gedig lusud lecgoneh len merug dau lusud gus sug len lesma meren aremougb dau len se hoba? 11:18 Doba sug gembala gesa taij meren mougtir dara leng meru ouforoho se Musa men gomnomna, len louman dau gini, kaba, len lehilon ucina naugb len leic gomom dou en. Anai lusud laugwan leimiman Yesus an men gebedbed namcir. Dangga hang, mougtir gini len lemahau dau en toua. 11:19 Doba sug deinyor lobohob, kaba, Yesus dara men logodeh, len leihwededau cinogo Yerusalem ingga dig Betania ucugb deit. 11:20 Sug lonamenmen, kaba, Yesus dara men logodeh, len lecicugb asa meruhw dig Yerusalem. Sug len lecicugb gini, kaba, len leiya sogo moho ara gia, eng agac bombrerij an men mom augwan namcir deb gini. 11:21 Dangga Petrus en eimiman dau gin namcir, anai en medoc eiseisan sug Yesus ouwara dougwo sogo gin giyohob. Hanoba en ens dou Yesus, endagai: Adehsud, ban beiya sogo giag ban bouwara dougwo en, kaba, agac namcirohob. 11:22 Doba Yesus en enara bauni en mer an ucugb, dou len laugwan, endagai: Esloulougb naugb yen yod meijina debsa ELOHIM naugb augwan dous. 11:23 Anai sug sud hom dau yen en enara dou menmod gini naugb en eisa dau mohw bederba enin se dum mohu. Hanoba en emeija mouwesa ELOHIM an gin touwero. Doba en od mena debsa en naugb gin dous, kaba, ELOHIM auni en mer an gin toua. Yen youman dan indir an areg dan den dou yen gini deigeigouhw. Anai gini asesa dag misen namcir. 11:24 Dangga hang, dan demenara dou yen, endagai: Areg yen yacgeij se gocuncum dau ELOHIM, kaba, dareg yen meigdoc ebdebin an en dag en ousa deisa yen an ginohob, kaba, en emeic areg yen yacgeij dau en gini dag misen dou yen toues. 11:25 Dara sug yen yocuncum gin, kaba, esloulougb naugb yen yaigdougwo len gus meren aremer dau yen nosahabi. Dauntoba sug yen yocuncum dou yen Meijina se bogo, kaba, en aigdougwo meijen sesar augwan dau yen toua. 11:26 Anai sug yen yemaigdougwo leng gus meren aremerero, kaba, yen Meijina se bogo en emaigdougwo meijen sesar dau yen touwero. 11:27 Sug Yesus dara men logodeh len ledebeij Yerusalemohob, kaba, len leinesa ELOHIM men igtia mougb deit. Dangga sug Yesus esebesa acec ELOHIM Men Tuari maga, kaba, gembala gesa taij meren mougtir, dara leng meru ouforoho se Musa men gomnomna, dara leng Yahudi meren mougtir len len aud en naugb leijidougwo en, lendagai: 11:28 Ban beicara graga augwan, kaba, ban bos bad ara? Era gareng arougb ban naugb gina? 11:29-30 Doba Yesus auni ucugb dou len, endagai: Dan toua deijidougwo yen dau indan hom naugb yen yauni dou danahabi. Sug Yohanes ebedbed dou lusud dara en ogun len se duhu debin gin toua, kaba, gareng arougb en naugb gina? ELOHIM se bogoei? Era lusud se cinogo gin eng larougb en an gin dousei? Sug yen yens meijouhw dau areg dan deijidougwo yen an gin asesa dou dan, kaba, dan toua demens meijouhw dau areg yen yeijidougwo dan an graga augwan dou yen toua. 11:31 Sug mougtir len louman gini, kaba, len lococim, lendagai: Sug maman mauni dou en dag ELOHIM eng eigdoumesa Yohanes moho naugb ginohob, kaba, cum en auni dou maman, endag: Dagiro, naugwe hang, yen meigdoc emebdebin an en touwero? 11:32 Doba sug maman mauni dou en dag lusud eng larougb en dous, kaba, cum, lusud lenara gouji dou maman toua. Len lenara dag gin doum, anai len lecinaga dag lusud louma debin Yesus en edag Sud Hom Gesai ELOHIM Moro dou lendaha. Hang len lahau dau len namcir toua. 11:33 Dangga, kaba, len launi dou Yesus, lendagai: Emen ememecinaga dag gareng arougb Yohanes naugb en ogun lusud se duhu gin touwero. Sug Yesus ouman len merir an dag ginohob, kaba, en auni dou len, endagai: Sug yen yemens dau sud hom areng en arougb Yohanes dou danero, kaba, dan demens dau sud hom areg en arougb dan naugb indan geicara augwan gini en moho dou yen touwero.

Markus 12

12:1 Sug Yesus auni dag graga dou mougtir bouwohob, kaba, en eic gainyenara hom dou len ucan deit, endagai: Sud hom arougb men lusud naugb len ledes anggur meda se men lo hom gini. Sug len les bouwohob, kaba, en arougb len naugb len len liga dougwo, dara len log igdahab mes hom naugb sug len losugb anggur mohwesa. Dauwohob, kaba, en arougb len naugb len lohud boromei gagas geb taiba hom naugb sug len lasedougwo anggur mec ingga augwan toua. Sug len lesinsin lo augwan gini besohob, kaba, en og lo ingma dou len gus, dauntoba lasedougwo men ingma deb naugb enin toua. Hanoba en eihweda se cinogo gus dau len namcir. 12:2 Doba edebeij lona sug igda gehin bohoserohob, kaba, en arougb men sogougb hom aud leng lesedougwo men lo graga naugb len lec men mera nagama ingma dou endahabi. 12:3 Doba leng lesedougwo men lo gin, kaba, len lagaigeij men sogougb gini naugb len logod en. Hanoba len lecicugb en beihweda dara mog mogud aud men mougt mera dous. 12:4 Hang mougt mera esa men sogougb hom deit aud len. Doba len logod en mougt mogwihi namcir. Hanoba len leic en lacecim toua. 12:5 Dauwohob, kaba, mougt mera en esa men sogougb hom dara ucan dou len ingga deit. Doba len leic gomom dou en namcir. Len leicara dag gini an men sogougb laugwanda. Ligbum, kaba, len leic mog erij dou len. Dara ligbum, kaba, leic gomom dou len toua. 12:6 Dangga sug en esa men sogougb len laugwan louwa dau enohob, kaba, en meisi mohora hom gedig en medoc gororougb en enin dous eng moongga naugb sug en esa en aud men lo ingga deit. Hang en esa en ucan toua. Anai en oudesa se enin medoc mes dag sug en esa meisi gini aud len, kaba, len lemeigdoumesa en moho namcires. 12:7 Dobnaro. Anai sug leng lesedougwo lo leiya enohob, kaba, len lococim, lendagai: Sud hom gin, kaba, cum, en mena ogugwo mecigbougb geb se lo augwan dou en. Hang yen yin naugb maman maic gomom dou enda. Dauntoba mecigbougb augwan gini eb dou maman dous. 12:8 Dangga sug len lagaigeij enohob, kaba, len leic gomom dou en toua. Hanoba len lerba en maga dig liga medigoda. 12:9 Sug Yesus ecic gainyenara dag graga dou lenohob, kaba, en eijidougwo len ucan deit, endagai: Yen youdesa dagiro? Sug mougt mera naugb lo graga en ecicugwen, kaba, en eberou dara leng lesedougwo lo gina? En eic geigouhw dou lenei? Naro. Doba sug en en, kaba, en eic gomom dou len laugwan namcir. Hanoba en ogugwo lo gini deb se len gus merisira naugb len lesedougwo deit. 12:10-11 Augwan gini aimo dau sud hom gerba ugwaremer an gin deb nosohob, endagai: Igdahab hom areg leng lohud tu lerbahaba debohob, kaba, maman Adehsud ELOHIM enin eng eigdoumesa dag buc mandeij ucugwohob. Hang maman maimiman dau men geicara hom gin toua namcir. Yen yemecic dau ginbumei? Naro, yen yecic dau augwan gini dag misen touohob. 12:12 Sug mougtir louman dau Yesus men gainyenara gin, kaba, len louwan lagaigeij en naugb louf en se tu gesisug. Anai len lecinaga dag en ens gainyenara gini dou lenohob naugb en enara ceg ceg len ingga. Doba len lahau dau sug len lagaigeij en, kaba, cum, lusud gus leic gogom dou len. Dangga hang, len larges en deb. Hanoba len leihwededau en namcir toua. 12:13 Sug leng Yahudi meren mougtir len leihwedohob, kaba, len ledesa merug hosa dau leng Parisi, dara merug hosa dau mougt mera Herodes men logodeh naugb len len aud Yesus deit, dauntoba len lerba mohoisa en. Anai len louwan dau sug en auni didi, kaba, enin mer gini dag gogomes naugb en toua. 12:14 Dangga sug len ledebeij enohob, kaba, len louseij merir dou en, lendagai: Adehsud, emen emecinaga ban bemereiyara dou lusudero. Doba ban benara misen dou lusud laugwan terimda. Dara ban bemesi leng meroho agas aiyei dau leng meroho eb tainya touwero. Doba ban bens dau ELOHIM men ucina dou len laugwan se geica dou len dous. Dangga hang sug emen emohw cinogo dou leng Roma meren mougt mera medam, kaba, emen ememedreg dau maman gomnomnohobei? Era naroei? Ban bens meijouhw asesa dou emenahabi. 12:15 Doba Yesus ecinaga se enin medoc mes dag len lenara larerei en dous. Hang en etaha len merir an gini, endagai: Dagiro, naugwe hang, yen yerba mohoisa dan se gogomes, anara? Yen yeic aregoufu perag hom naugb yens dou dan dideiyahabi. 12:16 Sug len leic dou en beiyohob, kaba, en eijidougwo len ucugb, endagai: Gareng mena dara en moho geb se gina? Doba len launi dou en, lendagai: Leng Roma meren mougt mera medam eng mena dara moho inggeb se ingga. 12:17 Dangga Yesus en dou len, endagai: Gedangga, kaba, areg mougt mera medam gin meni, kaba, yen yohw dou en. Doba areg ELOHIM men, kaba, yen yeic dou en toua. Sug len louman gin, kaba, len leimiman dau en namcir. 12:18 Sug Yesus auni dou leng Parisi dag graga dauwohob, kaba, leng Saduki merug hosa len len aud en naugb lainyen en eisaugb leng leisa dau gomom toua. Anai len gin, kaba, meren gauwamara dag lusud lemeisa dau gomom ucugb deitero, doba lomom namcir. Dangga sug len ledebeij Yesusohob, kaba, len leijidougwo en, lendagai: 12:19 Adehsud, Musa arougb emen se men gomnomna, endagai: Sug sud hom maguna en omom dau mesouwa sug lan lameic marih hom touebma, kaba, magto geiseni eic maguna mesouwa ingga deit. Dauntoba sug lan laic marih, kaba, lan marih gini es maguna moro deb. 12:20 Sug leng Saduki lens dau Musa men gomnomna dou Yesusohob, kaba, len leic gainyenara hom debin gin dou en deit, lendagai: Nosa, kaba, sud hom en mehir ligiji mogud merug senggai merugwengga. Lona hom, kaba, meis eng sud en eic mesouwa, doba en omom dau en sug lan lameic marihebma. 12:21-22 Hang magto geiseni en eic gida ingga deit doba en toua omom dau en sug lan lameic marih touebma. Dangga magto mogumsi geisu lan, kaba, eic en deit. Doba en toua omom dau en sug lan lameic marih touebma. Gini eb naugb merug senggai graga len laugwan leic gida hom gini. Doba len laugwan lomom teitei dau en namcir. Sug laugwan lomom dau enohob, kaba, gida en toua omom ucan len. 12:23 Sug leng Saduki leic gainyenara dag gin dou Yesusohob, kaba, len leijidougwo en ucan deit, lendagai: Edebeij lona sug lusud leisa dau gomom ucugb, kaba, gareg dau len gin eng emeic gida gin deita? Anai len laugwan lougb dag mersouwohob. 12:24 Doba Yesus etaha len merir an gini, endagai: Hang yen yauwam an didi dau augwan gin toua terimda. Yen youdesa gini miseneroei? Naro, gini misen namcir. Yen yemecinaga dau ELOHIM men mobisamougb dara areg en og se Surad Injil Meb mohon deb meijouhw augwan asesa touebma. 12:25 Anai se lona sug ELOHIM eigdoumesa lusud dau gomom ucugwohob, kaba, len lemeicim deitero. Doba len ledag malaikad se bogo dous. 12:26 Dara aremer dau sug ELOHIM eigdoumesa lusud dau gomom ucugb, kaba, yen yemecic se Musa men gomnomna dau areg ELOHIM enara dou en dau lisug mon gedig smougb mouf ebsa gin touebmei? Naro, yen yecic dau augwan gini dag misen touohob. Anai se men surad gin, kaba, ELOHIM enara dou en dag gin deb nosohob, endagai: Dani Abraham, Isag, Yakub meren ELOHIM. 12:27 Sug ELOHIM enara dangga deb nosohob, kaba, gini ansins dag len gini merires inggebgaba. Anai en emedag leng lomom meren ELOHIM enero. Doba en edag leng merireseb meren ELOHIM dous. Dangga hang, areg yen yauwam an gin, kaba, dag didi namcir. 12:28 Dara sud hom en mou ouforoho se Musa men gomnomna, kaba, en toua moongga sug leng Saduki dara Yesus len merir laisedim gragohob. Dangga sug en ouman, doba Yesus auni augwan deigeigouhw dou lenohob, kaba, en en aud Yesus naugb eijidougwo en toua, endagai: ELOHIM men gomnomna giro eng esloulougb edreg dau men gomnomna gus augwana? 12:29 Doba Yesus auni dou en, endagai: ELOHIM men gomnomna gesloulougb bedreg dau gus augwan, kaba, dag gini: Yeng Israel, yen youman deigeigouhw namcir. Maman Adehsud Geis Huhugb dous eng maman ELOHIM misen. ELOHIM gus, kaba, ingmaro. 12:30 Dangga hang, yen meigdoc gororougb eni dara yen meigdoc augwan, dara yen meijireseb augwan, dara meijen gauwamara augwan, dara meijen goubesa augwan toua. 12:31 Dara gomnomna hom ucan deit dag gini: Yen meigdoc gororougb leng gus, aninim dag yen meigdoc gororougb yenin toua. Gomnomna gus, kaba, ingma emesloulougb emedreg dau gomnomna hwai ginero. 12:32 Sug sud hom en mou ouforoho se Musa men gomnomna, en ouman dau gin, kaba, en ousa deisa Yesus mer an gini, endagai: Adehsud, areg ban ben gin, kaba, misen namcir. Anai ELOHIM gus, kaba, ingmaro. Doba enin hom dous. 12:33 Dangga eigouhw naugb lusud merdoc gororougb en dara len merdoc augwan, dara meren gauwamara augwan, dara meren goubesa augwan, dara len merdoc gororougb len gus, aninim dag len merdoc gororougb lenin toua. Anai gini esloulougb bedreg dau areg lusud leic lauwaharo, dara areg len leic dag mogud dou ELOHIM augwan namcir toua. 12:34 Sug Yesus ouman, doba en auni augwan gini dara deigouhw namcirohob, kaba, en eigdoumesa en moho an gini. Hanoba en enara dou en, endagai: Ban bedebeij deinyor naugb sug ban beinesa ELOHIM men goiharaga ginohob. Sug Yesus auni aremer hom gin dauwohob, kaba, sud hom ingma emeic mos naugb en emainyen Yesus an ara ara toua deitero. 12:35 Sug Yesus eni moongga se ELOHIM men igtia naugb en edidib ELOHIM mer dou lusud, kaba, en eijidougwo len, endagai: Dagiro, naugwe hang, leng meru ouforoho se Musa men gomnomna len lenara dou yen dag Mesias gedig eigdoc lusud dau meren gogom gini en edag Daud medebeito toua? 12:36 Anai sug Daud erba ugwaremer ogdoc Mena Gogoufu sug nosa, kaba, en eigdoumesa Mesias gini dag men Adehsud, endagai: Maman Adehsud Geis Huhugb en enara dou indan Adehsud, endagai: Ban beigtou dig dan insira misen naugb ban bedag mougt mera medam desij dan toua. Dara ban beigtou desij dan dag gini terimda dan dowun aban moc augwan len leb tainya se aban abohotimei namcir. 12:37 Dangga sug Daud eigdoumesa Mesias gini dag men Adehsudohob, kaba, dagiro, naugwe hang, Mesias gini dag Daud medebeito gin toua? Sug leng leinyana merugwengga se ELOHIM men igtia ingga, len louman gin, kaba, len merdoc agahugouhw debinir namcir. 12:38 Doba sug Yesus edidib ELOHIM mer men meijouhw dou len, kaba, en esulou len dougwo leng meru ouforoho se Musa men gomnomna debin gin deit, endagai: Yen yesedougwo yenin dau leng meru ouforoho se Musa men gomnomna meren geicara. Anai sug len lec, kaba, len meru ehigehi naugb len lesbesan meren sansun gagas gecabeci terimda. Dara len meru ehigehi naugb lesebesa se usmougb gedig lohwaresa. Dauntoba lusud gus leigdoumesa len meroho dara lecguna dou len toua. 12:39 Dara sug len leinesa tuari, kaba, len meru ehigehi naugb len leigtousa maija moc geb ino. Dara sug sud hom en ougwanara, kaba, len meru ehigehi naugb len letara se boromei geb naugb leng meroho agas eng len letaresa. 12:40 Dara len lerba mohoisa debdes an meren tu, dara areg geb se augwan. Dara len leiso merir an gocuncum, dauntoba lusud leimiman an meren gocuncum gin toua. Doba augwan gini naugb sug len leigdoumesa lenin meroho an dous. Dangga hang, se Lona Sug ELOHIM Ogod Aremer Aga Lusud, kaba, len gin meren gogom medam edreg dau len gus laugwan namcir. 12:41 Lona hom deit, kaba, Yesus en eigtou irir biruwa geb se ELOHIM Men Tuari. Hanoba en ehigdecin sug len lerba aregoufu debsa. Dangga en eiya, doba leng merisoho mougb leinyana lerba aregoufu debsa. 12:42 Dau, kaba, en eiya gida debdes hom en en naugb en erba men aregoufu mogo mogurereito hwai debsa biruwa gin toua. 12:43 Dangga, kaba, Yesus eija men logodeh. Hanoba en enara dou len, endagai: Gida debdes gedig monggwereij gin, kaba, en erba aregoufu edreg dau len gus laugwan se ELOHIM men biruwa gini. Yen youman dan indir gini deigeigouhw namcir. 12:44 Anai len gin, kaba, len lerba dau meren areg mougweb dous. Doba en, kaba, en erba men aregoufu augwan ito inggada. Hang men ingmemeb naugb auma ared get toua deitero, anai en monggwereij namcir.

Markus 13

13:1 Sug Yesus ehigdecin lusud lerba aregoufu se biruwa dauwohob, kaba, eni dara men logodeh len len dau ELOHIM men igtien. Dangga sug len lec merohora asa ucina, kaba, Yesus men godeh hom en edens dou en, endagai: Adehsud, ban beiya tu jeneg ginahabi. Anai augwan eigouhw namcir. Dara ban bauweila men igdahab touahabi. Anai augwan gini meb aingma, meb aingma, hanoba meb tintin namcirda. 13:2 Doba Yesus edemer dou en, endagai: Ban beiya Tuari medam gini deigeigouhwohobei? Anai areg ban beiya ginohob, kaba, igdahab hom emeb se igdahab hom deitero. Doba cum, kaba, len lot augwan baisoboro namcir dangga. 13:3 Sug Yesus dara men logodeh ledebeij mengarougb Saitun Medohob, kaba, len leigtou sungga dou lenin ainyes irir ELOHIM Men Tuari. Dangga Petrus, dara Yakobus, dara Yohanes, dara Andreas len len naugb ledenara dou en dou lenin. 13:4 Hanoba len leijidougwo en, lendagai: Adehsud, areg ban ben dou emen eisaugb Tuari gaih, kaba, aiseba emebija? Dara emen emeiya gansins dagiro, nosahaba? 13:5 Dangga Yesus esulou len dougwo gin augwan deb, endagai: Yen yebehnehino yenin meigdoc mes dougwo lusud, dauntoba len lemaugwohosa yen icira aremer augwan ginlo. 13:6 Anai se lona daiyamo, kaba, lusud leinyana lemagunya debin yen naugb len lemeic dan indoho lemaceca yens, lemendagai: Emen gin eng Mesias naugb emeigdoc yen dau meijen gogom augwan. Hang len laugwohosa lusud leinyana laijahasero dau ucina misen gin toua. 13:7 Dara yen yemouman mougb dau sug lusud logodim deinyori. Dara yen yemouman loungmen dau sug len lesim se cinogo aigus toues. Doba yen yemeijisan ginlo. Anai augwan gini emansins dag lona sug ouwedocbuma, doba ELOHIM esedeb augwan gini ebiji ino dauwahabi. 13:8 Dara cum, kaba, meijouhuder lenin lesara darem. Dara mougt mera medam dau cinogo ingma len lesara dara mougt mera medam se cinogo ingma. Dara inyomda toua eisa se cinogo sungga sungga. Dara sir gogoufu einesa cinogo einyana toua. Doba gogom augwan gin, kaba, dag ebiji dousaba, aninim dag gida hom en menuhwa ererij dau sug en emouwadan meh touebma. 13:9 Doba yen yesedeh yenin meigdoc mes deb naugb sug gogom ainyen yen toua. Anai cum, kaba, len lagaigeij yen. Hanoba len lahwan yen dou meren Majelis. Dara len lahwan yen se meren tuari naugb labosbos yen. Dara len lahwan yen dou leng meroho eb taiba dara len meroho agas. Dauntoba yen yos yadi Mer Geigouhw eisaugb dan deseino len toua, anai yen yedag indan logodehohob. 13:10 Doba augwan gini emansins dag Lona Gouwedoc emedebeijbuma, anai ELOHIM en ouwan naugb sug lusud lesai en Mer Geigouhw eisaugb dan dou lusud se cinogo augwanahabi, Lona Gouwedoc emedebeij toua. 13:11 Dara sug len lagaigeij yen. Hanoba len loho las yen deseino mougt mougt, kaba, yen meigdoc momogo icira areg yen yen dou lenlo. Doba yen yaimo dau areg ELOHIM ens dou yen se lona ingga dous. Anai areg yen yen dou len gini, kaba, emen dau yeninero, doba en dau Mena Gogoufu dous. 13:12 Se Lona ingga, kaba, meraguner dara meragtor lenin lehin meraga anim dou mougt mougt naugb eic gomom dou len. Dara merner lehin meragan merihir. Dara merihir lehin meragan merna dara merimir naugb mougtir leic gomom dou len toua. 13:13 Dara lusud laugwan merdoc ecgwan yen, anai yen yedag indan logodehohob. Doba gareg dau yen en es agadgeij terimda edebeij sug ouwedoc, kaba, ELOHIM eigdoc en dau sesar men gogom aud maireseb menau geb huhugb dou en toua terimda. 13:14 Doba sug yen yeiya lugmahara len leigdoumesa meren seiseij se usi gedig ELOHIM emouwanero naugb lesijaresa, kaba, yen yemeigtou se leng Yudea meren hancob deitero. Doba yen yaugwan yougb dig menmod dau namcir. Anai sug len leigdoumesa seiseij se usi ingga, kaba, len leic ELOHIM moho lacecim dous. Dara len leic mor mor dou men Tuari dara meijen cinogo augwan toua. 13:15 Dangga gareg dau yen en atou se tu mondudi se Lona ingga, kaba, en emouwada se men dimei mes naugb emdeic men ara ara hom touwero. Doba en arges en maga bougb dig menmod dau namcir. 13:16 Dara gareg dau yen sug en edeicara se men lo, kaba, en emecicugb naugb emdeic men sansun geb se men tu touwero. Doba en arges maga bougb sunggada namcir toua. 13:17 Dara dan indoc erij an ligida gedig len meraga ogom, dara leng lohw arij dou merihir se Lona ingga toua. Anai len lemougb dagiro dau gogom gina? 13:18 Dara yen yocuncum dou ELOHIM esesa terimda, dauntoba gogom gini emobsara debin yen se igda goho lon gogoufu touwero. 13:19 Anai gogom geb naugb yen se Lona ingga, kaba, edreg dau gogom augwan dau lona sug ELOHIM esinsin cinogo dara bogo terimda iteitogini. Dara edreg dau gogom gen daiyamo augwan toua namcir. 13:20 Doba ELOHIM medoc an men lusud yen, anai en ouci yen debinim naugb enohob. Dangga hang, gogom gini emeb naugb yen terimda lona sug ouwedoc touwero. Doba maman Adehsud en ogod lona ingma an gogom dau yen, dauntoba yen yaugwan yemomomero. Anai sug en emogod lona ingma dauwero, kaba, yeni dara len gus yen yaugwan meijireseb emeb deitero. Doba yen yaugwan yomom namcir. Areg Yesus enara dou men logodeh eisaugb seiseij graga, kaba, eigouhw naugb yen yecinaga meijouhw augwan asesa namcir. Dauntoba sug yen yecic indan surad dau areg graga dou meijen lusud, kaba, yen yens meijouhw asesa augwan debin gin dou len toua. 13:21 Dangga sug lusud lenara dou yen, lendagai: Yen yin, maman madeiya Mesias eng ouwada deb gin. Era len lenara dou yen, lendagai; Yen yin, maman madeiya Mesias eng ouwada deb gada, kaba, yen yemaimo len merirero. 13:22 Anai se lona ingga, kaba, lusud leinyana leigdoumesa lenin meroho deseino yen dag len leigdoc yen dau meijen gogom augwan namcir. Dara len leigdoumesa lenin meroho deseino yen dag len lesai ELOHIM mer misen dou yen toua. Hanoba len leic gansins dara len laben ganusbus medam debin gin dou yen naugb len lemaugwohosa leng medigo Yesus dousero. Doba len leic meruwemougb esesa naugb len laugwohosa yen gedig ELOHIM ouci yen debinim naugb enohob yen yaugwan toua. Dobnaro. Areg len len dou yen gin, kaba, dag len lereiyara dous. 13:23 Dan desulou yen dougwo aremer augwan gini sug emedebeij yenbuma. Dauntoba sug ebeij yenohob, kaba, yen yebehnehino yenin meigdoc mes dougwo namcir, dauntoba len lemaugwohosa yenlo. 13:24 Dangga toua sug gogom geb debin yen graga augwan obsara inegohob, kaba, yen yeiya, doba igda lona toua emerba mohora deitero. Doba dag lobeigbogo. Dara yen yeiya igda loba toua emeic moufesero. 13:25 Dara tebeij augwan og bobsara dau bogaden se cinogo gini. Dara areg men goubesa geb se bogo gacinda augwan einyeinya beijesa namcir toua. 13:26 Sug yen yeiya augwan gin dauwohob, kaba, yen yemeiya Lusud Meraguna Mebin dan douwaden dau bogo se umer an indan goubesa medam. Dara indan gogouf cucugb erbacec dan toua. 13:27 Hanoba dan darougb indan malaikadir len leihwedesa igda agunya, terimda igda obsaresa, dara dig dum moho, dara dum mer naugb len louci indan lusud yen yaugwan debinim dau cinogo moc ougbdesa, terimda edebeij bogo moc ougbdesa toua. 13:28 Dan deic dainyen dau sogo ara debin gin dou yen deitahabi. Dauntoba yen meiju obgesa gin namcir. Anai sug sogo ara maga eh naugb mes gougb ed mesira dara ougo an merijohob, kaba, yen yecinaga dag igda goho lohos ebeij deinyorohob. 13:29 Dangga toua, sug yen yeiya gansins augwan graga eb debin yen dauwohob, kaba, yen yecinaga dag indan Lona ebeij deinyor naugb sug dan desesa misis moc touohob. 13:30 Dara yen yaugwan yemomom dau aremer augwan gin touwero. Doba ligbum dau yen, kaba, yen meijireseb naugb yen yeiya augwan gini se yen meijiresahabi. Yen youman areg dan den dou yen gini deigeigouhw terimda. Anai augwan gini asesa dag misen namcir. 13:31 Dangga cinogo dara bogo lamediyebeiyes. Doba dan indir, kaba, emediyebeiya deitero, doba eb huhugb terimda. 13:32 Doba indan Lona dara cumougt naugb sug dan decicugb gin, kaba, sud hom ingma emecinaga dau gin touwero. Dara malaikadir se bogo len toua lemecinagero. Dara ELOHIM Meisi danin toua, demecinaga dau gin touwero. Doba dan Indina enin dous eng ecinaga dau Lona dara cumougt gin dag misen namcir. 13:33 Dangga hang, yen yematou dau Lona ginero. Doba yen yesedeh yauweila lona gin terimda. Anai yen yemecinaga Lona Sug Dan Decicugb aud yen ginero. 13:34 Sug Yesus esulou men logodeh eisaugb men lona dag graga bouwohob, kaba, en eic gainyenara hom debin gin dou len deit, endagai: Lona Sug Dan Decicugwen, kaba, aninim dag sud hom ouwan eihweda aigusi dau men tu deb. Sug en emeihwedebma, kaba, en ohw men sogougwir lesedougwo men tu deigeigouhw namcir deb naugb en. Dara en ekeber naugb len lesedougwo men ara ara augwan. Hanoba en esulou sud hom gedig en esedougwo misis, dauntoba en esedougwo misis dara geigouhw namcir toua. Gin dauwohob, kaba, en eihwedig cinogo gus dau lenda. 13:35-36 Dangga hang, yen toua yesedeh yauweila dougwo dan namcir. Dauntoba sug dan dagunya augwougb debin yen, kaba, yen yematou dau danlo. Doba yen meijires agai naugb dan terimda. Anai yen yemecinaga dau sug dang dedag mougt naugb tu gini dan decicugb aud yen se loba, era se lobeingmod, era sug berougwu eba mer, era se lonamen touwero. 13:37 Areg dan desulou yen an gini, kaba, dan demen dou yen dousero. Doba dan den dou lusud laugwan naugb len lematou touwero. Doba len leisa dau latouda naugb len lesedeh lauweila dougwo dan toua terimda.

Markus 14

14:1 Se lona sug Yesus esulou men logodeh dag graga bouwohob, kaba, gembala gesa taij meren mougtir, dara leng meru ouforoho se Musa men gomnomna len lococim deb naugb lagaigeij Yesus, dara leic gomom dou en toua. Anai lona hwai deit, kaba, leng Yahudi merdoc eiseisan lona sug ELOHIM esga len merjemouwer dau cinogo Mesir sug nosohob. Dara len logug domba dara let roti gemerisero debin gin toua. Dangga hang, leng mougtir gini len ledu meruwedau len gus naugb len lagaigeij Yesus se lona ingga. Dauntoba len gus lemecinaga naugb aremer emeijideijouhw touwero. 14:2 Anai len lahau dau sug len lagaigeij Yesus se Lona Gohw Bedreg gini abeba len laugwan meriresi, kaba, cum, en merir ledim dougwo dangga. 14:3 Sug Yesus esulou men logodeh se mengarougb Saitun Meda bouwohob, kaba, en ecicugb an len dig Betania geb deinyor Yerusalem deit naugb len ledatou desij sud hom, moho Simon, se men tu. Simon gini, kaba, lusud leija en moho dag sud hom garemos gogoufu et. Doba sug len leigtou naugb let ared, kaba, gida hom en einesa dimei aud Yesus toua. En odo debecij dau igdahab gogoufu hom an aremoung mohu men ouwedebeda gedig mera eisaugb namcir. Anai len lemeic aremoung mohu gus lemed se touwero, doba leic enin mohu mogud dous. Mohu gin, kaba, len lesinsin dau sogo mom gedig men ouwedebeda gini. Dangga sug en edesa desij Yesusohob, kaba, en eised debecij ingga mergomei dau. Hanoba en eir aremoung mohu men ouwedebeda ingga debin Yesus mougt toua. 14:4 Doba sug merug hosa dau leng leigtou desij Yesus ingga len leiya dau gin, kaba, len merdoc ehin an gida hom gin namcir. Hanoba len lenara doum, lendagai: En amcirac aremoung mohu men ouwedebeda gini se sud hom gin mougt anara? 14:5 Anai aremoung mohu gin, kaba, edeinyum naugb maman mauma aregoufu edreg dau perag mogo huntun homoi naugb maman mahu dou leng merunggwereij dousa. Dangga len lenara ucucugb an gida gin namcir. 14:6-8 Doba Yesus etaha len merir an gini, endagai: Gida men geicara dou dan gin, kaba, eigouhw meiyah. Anai sug en ehin aremoung mohu se dan indugt, kaba, gini dag en esedeb dan indaga deb naugb sug lusud lec dan ingga. Dangga dagiro, naugwe hang, yen yenara ucucugb dou en dag gin, anara? Naro, yen yamsoho en namcir. Anai leng merunggwereij, kaba, len leigtou desij yen terimda naugb yen yousa len astesda sug yen youwan. Doba dan, kaba, dan demeigtou desij yen terimda deitero. 14:9 Dangga astesda sug lusud lesai Mer Geigouhw eisaugb dan dou lusud sungga sungga, kaba, len lecic dau gida gin men geicara dou dan dou len. Dauntoba len lecinaga dau gin toua terimda. Yen youman dau areg dan den dou yen gin deigeigouhw. Anai augwan gini asesa dag misen namcir. 14:10 Sug Yesus enara bauni men logodeh merir an gida ginohob, kaba, sud hom dau men logodeh sisa hobjerai, en moho Yudas dau cinogo Keriod, en edu mouwedou enin naugb en edehin magan Yesus dou gembala gesa taij meren mougtir. Dangga sug en edebeij lenohob, kaba, en enara dou len, endagai: Yen youwan naugb dan dohw Yesus dou yenei? 14:11 Sug len louman dau gin, kaba, len merdoc eigouhw an en namcir. Hanoba len len aregoufu men dou en. Sug Yudas ouman gin, kaba, en ehilon ucina naugb en edens Yesus dou len toua. 14:12 Se leng leng Yahudi meren Ari Gouji sug len let roti gemerisero se lona gaimougtut ingga, kaba, Yesus men logodeh leijidougwo en, lendagai: Adehsud, ban bouwan emen emedougwan ared naugb Lona Gohw Bedreg gin deb sugiro? Len leijidougwo en an dangga, anai se lona gaimougtut ingga, kaba, aninim dag lona gouwedoc debin Lona Gohw Bedreg gin. Hang len logug domba se lona ingga debin toua. 14:13 Dangga Yesus arougb men logodeh lahwai, endagai: Yan yaihwedesa cinogo Yerusalem gacda. Sug yan yadebeij cinogo inggohob, kaba, yan yagasa sud hom odo debecij hom an duhu. Yan yaucan en terimda en edebeij tu sug en einesa, kaba, yan yainesa ucan en toua. 14:14 Sug yan yainesa tuohob, kaba, yan yanara dou sud hom men tu ingga, yandagai: Adehsud, eijidougwo ban, endagai: Dimei naugb dani dara indan logodeh emen emetara debin Lona Gohw Bedreg gini deb, sugiro? 14:15 Sug en ouman gin, kaba, en emens dimei hom gouji se taiba gen esedeb augwan mougb mogud debsohob dou yans. Sug en ens dou yanohob, kaba, yan yasedeb maman ara ara naugb maman maugwan matara debin Lona Gohw Bedreg gin toua. 14:16 Sug Yesus esulou lanohob, kaba, lan laihweda se cinogo Yerusalem. Sug lan ladebeijohob, kaba, lan lasa ared naugb Lona Gohw Bedreg gin augwan deb toua. Anai lan ladesma, doba augwan asesa dag areg Yesus arougb lan an gragohob. 14:17 Dangga sug igda obsaresohob, kaba, Yesus dara men logodeh merug sisa hobjerai len toua len len naugb ledetara deb se dimei ingga. 14:18 Doba sug len leigtou naugb letara inegohob, kaba, Yesus enara baga len merdoc mes, endagai: Yen youman dan indir deigeigouhw. Anai sud hom dau yeng yetara dara dan gini, kaba, en ohw dan se leng Yahudi meren mougtir merisirohob. 14:19 Sug len louman en mer an gin, kaba, len merdoc eijesa medam namcir. Hanoba astesda sud hom yom dau len, kaba, en auni ucugb dou Yesus, endagai: Ban boudesa danei? Anai danis demohw banbuma. 14:20 Doba Yesus auni dou men logodeh sisa hobjerai gini, endagai: Gareg dau yen aman amatara se igdebir hom, kaba, eninggang emeicara dangga dou dans. 14:21 Areg len log deb se Surad Injil Meb Mohon eisaugb Lusud Meraguna Mebin dan deb nosohob, kaba, dan daimo augwan gini aud gomom dag misen toua. Doba sud hom gohw dan gin, kaba, eigouhw naugb en mem emeh en deb touwero. Doba en ouwadan enohob. Hang iteitogin, kaba, gogom medam eb naugb en toua namcirohob. 14:22 Sug len letaraba, kaba, Yesus os roti mogo hom icira en mesirahabi, en emen sijo dou ELOHIM naugb gin toua. Sug en en sijo dou ELOHIM dauwohob, kaba, en ekris naugb en emohw dou men logodeh laugwan toua. Hanoba en ens meijouhw debin gin dou len, endagai: Yen yet gin, anai roti gini dag danin indaga. 14:23 Sug len let roti dauwohob, kaba, en os mog an anggur mohu deit. Hanoba en en sijo dou ELOHIM debin gin. Sug en en sijo dou ELOHIM dauwohob, kaba, en ohw mog an mohu dou astesda len laugwan leg toua. 14:24 Hanoba en ens meijouhw debin gin ucan dou len, endagai: Anggur mohu gini dag dan indugwihi gororo naugb yen yeinyana. Dauntoba yen yecinaga dag ELOHIM men gos dou menau gin, kaba, emediyebeiya dau yenero, doba ebsugeb naugb yen terimda. 14:25 Doba yen youman deigeigouhw. Anai dau iteitogini terimda edebeij lona sug ELOHIM oiharaga lusud ucugb deit, kaba, dan demeg anggur mohu dag gin dara yen deitero. Doba se lona sug ELOHIM oiharaga yen ucugwohob, kaba, maman maugwan mameg anggur mohu menau aninim deits. Augwan gini asesa dag misen namcir. 14:26 Sug len letara ouwohob, kaba, len lei ugwaremer naugb lagahugouhw an ELOHIM debin gin toua. Hanoba len leihwedig mengarougb moho Saitun Meda deitda. 14:27 Doba sug len leisaugb aud mengarougb gini, kaba, Yesus esulou men logodeh deb, endagai: Cum bahau, kaba, yen yaugwan yemougb yemaisoboro dau dans. Anai ELOHIM en og deb se Surad Injil Meb Mohon eisaugb gin debohob, endagai: Dan demogod meren gembala emomom dau men domba laugwan lemougb lemaisoboro toues. 14:28 Doba sug ELOHIM eigdoumesa dan dau gomom ucugwohob, kaba, dan demeino yen meijin dig leng Galilea meren hancobes. 14:29 Doba Petrus enara behirirmo dou Yesus, endagai: Leng gus, kaba, len laugwan lahau naugb len lougb dau banda. Doba danin, kaba, dan demougb dau banero. 14:30 Doba Yesus enara bauni en mer ucugb, endagai: Ban bouman deigeigouhw. Se loba gini sug berougwu emeba mer mougwa hwaibuma, kaba, ban baideido dan mougwa homoi icirohob. Augwan gini asesa dag misen namcir. 14:31 Doba Petrus ehirirmo dou Yesus namcir, endagai: Sug len gus leic gomom dou dan aninim dara ban, kaba, dan demaideido dougwo banero. Doba dan dohw dan indugt edug naugb domom dara ban toua. Sug Petrus enara dag gin, kaba, Yesus men logodeh gus len laugwan louwas Petrus mer an gini len dangga dou en toua. 14:32 Sug Yesus dara men logodeh len leisaugb mengarougb Saitun Meda gini, kaba, len ledebeij usmougb hom, moho Gedsemani. Sug len ledebeij se usi ginohob, kaba, Yesus ecug men logodeh gus deb sungga. Hanoba en enara dou len, endagai: Yen yeigtou sugini naugb dan, dauntoba dan didocuncumahabi. 14:33 Doba sug en ecug len gus debohob, kaba, en enara dou Petrus, dara Yakobus, dara Yohanes naugb len loucan enda. Sug len lededau men logodeh gusohob, kaba, en medoc ebiji naugb eijesa dara ahau medagam namcir. 14:34 Hanoba en enara dou men logodeh merug homoi graga, endagai: Dan indoc momogo medam, kaba, eic dag dani deinyor domom icira gin namcir. Dangga hang, yen yeigtou desij dan naugb yen yesedougwo dan sugin toua. 14:35 Sug Yesus enara dou len dag gragohob, kaba, en asid enin gurereito dau len deit. Hanoba en ecguna bahuhumlo naugb en ocuncum dou en Mena. Dauntoba sug ucina gus moongga naugb sug en arges dau ucina mog erij gin, kaba, en emens dou en toues. 14:36 Hang en emenara dou en, endagai: Akeinya, ban abubisamougb dau augwan. Dangga sug ban bouwan, kaba, ban bedug mog an gogom gini dau dan naugb dan demeg touwero. Doba areg danin douwan, kaba, ga, naro. Doba areg banin bouwan beic dou dani, kaba, dan douwan daimo gin dous. 14:37 Sug Yesus en ocuncum dag graga ouwohob, kaba, en ecicugb naugb edeiya men logodeh merug homoi graga. Doba len latou lamumi dau en namcirohob, Dangga sug en ebir Petrusohob, kaba, en esa mer debin en, endagai: Simon, dagiro, naugwe hang, ban batou bamumi dau dan dag gina? Ban bemesedougwo dan mougwa cumahaberoei? 14:38 Sug en esa mer debin Petrus dag ginohob, kaba, en esulou merug homoi gini ucan deit, endagai: Esloulougb naugb yen yesedeh yauweila dougwo areg ainyen yen. Dara yen yocuncum esesa debin gin terimda toua. Dauntoba yen yemobsara aud areg gainyen yen ginero. Anai se yen meigdoc mes, kaba, yen youwan yaimo areg geigouhw namcirohob. Doba se yen meijaga, kaba, cum, en ouwan aimo areg gainyen yen gin dedemeda terimda. 14:39 Sug Yesus esulou men logodeh dag gragohob, kaba, en eihweda deit naugb en edocuncum dou en Mena, aninim dag en ocuncum mougwa hom nosa graga dou enohob. 14:40 Sug en ocuncum ouwohob, kaba, en ecicugb aud men logodeh. Doba len latou lamumi deitohob. Anai cicireba len medam namcirdaha. Hang len lemauni ara ara ucugb dou en touwero. 14:41 Sug Yesus edecicugb aud men logodeh dag gin gedig homoiyohob, kaba, en esa mer debin len deit, endagai: Yen yatou debin yen meijug edeinyumohobei? Anai yen yeiya, doba indan cumougt naugb sug leng lohw Lusud Meraguna Mebin dan se leng merug mog merisira, kaba, enohob. 14:42 Dangga yen yisa, mada. Anai yen yeiya sud hom gohw dan en agunya an len deinyorohob. 14:43 Sug Yesus enara dou men logodeh dag gragaba, kaba, sud hom dau Yesus men logodeh merug sisa hobjerai, en moho Yudas, kaba, en agunyen. Dara mougt mera gouji dau gembala gesa taij, dara leng meru ouforoho se Musa men gomnomna, dara mougtir dau leng Yahudi meren logodeh leinyana laimo en. Anai meren mougtir gin, kaba, len larougb len naugb len laimo dara Yudas. Dangga hang, len gin laugwan, kaba, len lodo meren krawan dara meren ijouhugwa toua. 14:44 Dara sud hom gohw Yesus gini en ococi len deb touohob, endagai: Sug yen yemeiya sud hom gedig dan dou indufesa eni, kaba, aisa yen meisira naugb yagaigeij en namcir. Anai sud hom areg maman maihwedaud gin engga. Sug yen yagaigeij enohob, kaba, yen yesedougwo en deigeigouhw aud mougtir toua. 14:45 Dangga sug Yudas edebeij deinyor Yesus inegohob, kaba, en eic mos aud en namcir. Hanoba en eigdoumesa en moho, endagai: Adehsud, ban ingginei? Sug en eigdoumesa en moho danggohob, kaba, en ou moufesa Yesus bansins dou len toua. 14:46 Sug len leiya Yudas ou moufesa Yesus dag gin inegohob, kaba, aisa len merisira naugb lagaigeij en namcir. 14:47 Doba Yesus men godeh hom, kaba, en eigdesa men krawan dau meh. Hanoba en ogod Gembala Gesa Taij Meren Mougt Mera Medam men sogougb hom en moms edug dau en namcir toua. 14:48 Dauwohob, kaba, Yesus enara debin leng lagaigeij en gini, endagai: Yen youdesa dan gin indug mog, hang yen yemodo krawan dara sugb naugb yemagaigeij dan ginei? 14:49 Anai astesda lona dan indugwengga desij yen se ELOHIM Men Tuari naugb dan dedidib en mer dou yen. Doba yen yemagaigeij danero, anara? Doba inggaida. Anai meijen geicara dou dan gini, kaba, esogwa deisa areg len log deb eisaugb dan se Surad Injil Meb Mohon deb nosohob. 14:50 Sug Yesus men logodeh len leiya, doba len lagaigeij Yesus dag ginohob, kaba, len laugwan lougb laisoboro dau en namcir. 14:51-52 Doba sug len lahwan Yesus aud mougtir, kaba, godeh mes hom dous eng oucan len. Hang len louwan lagaigeij en toua. Doba en arges men sansun deb se len merisira deb. Hanoba en ougwan mougb mogud dau len namcir. Anai men sansun gogoufu homto gin dous eng eg dougwo en maga. 14:53 Doba Yesus, kaba, len lahwan en aud Gembala Gesa Taij Meren Mougt Mera Medam se men tu. Anai gembala gesa taij meren mougtir, dara leng Yahudi meren mougtir, dara leng meru ouforoho se Musa men gomnomna, kaba, len laugwan loucimdeb sungga naugb enohob. 14:54 Dara Petrus en toua edoumouma len dig len meridigo an Yesus. Hanoba en edeinesa ucan len se mougt mera medam men igtia mougb gin toua. Sug en einesohob, kaba, en ehi naugb smougb desij leng lesedougwo mougt mera medam men tu ingga. 14:55 Doba gembala gesa taij meren mougtir dara Majelis gus len laugwan leija kiki len gus dougwo Yesus men geicara gecgu ucucugb terimda. Dauntoba sug men geicara gecgu ingmangga, kaba, len leic gomom dou en icira gin namcir. Doba len lemesma Yesus men geicara gecgu hom naugb sug len laic gomom dou en touwero. 14:56 Anai len laugwan lemouma debin merir mohw homero. Doba len lauwogod meru naugb lereiyaresa en dous. Hang len lenara merir edregim dous. 14:57 Gin dauwohob, kaba, merug hosa len leisa naugb leineg Yesus mer ucan dou leng Majelis deit, lendagai: 14:58 Sud hom gin, kaba, emen emouman dag en ot ELOHIM Men Tuari gedig lusud lohud gini baisoboro namcir. Doba se lona hwai debin, kaba, en emohud tuari menau hom se mohw ucugb deit. Dara emen emouman dag tuari menau gini, kaba, lusud misen lemohud touwero. 14:59 Doba len toua lenara merir edregim eisaugb gin namcir. 14:60 Dangga Gembala Gesa Taij Meren Mougt Mera Medam en eisa besa deseino len laugwan. Hanoba en esa mer debin Yesus, endagai: Ban bauni ucugb dagiro dou len, anai len lahacugb gogom debin banohob gina? Era ban bosumei? 14:61 Doba Yesus en emauni ara ara mougwa hom dou enero. Doba en eigtou dag osum se len merufu dous. Dangga mougt mera medam gini, en eijidougwo Yesus deit, endagai: Bani ELOHIM gedig maman masijaresa en namcir, kaba, en Meisi banei? Dara ban ben dau eni naugb ban beigdoc emen dau emen gogom augwan gin touei? 14:62 Dangga Yesus ousa deisa en mer an gin, endagai: You, dan indugwenggini. Hang yen yaugwan yemeiya Lusud Meraguna Mebin dan demeigtou dig ELOHIM Gedig En Mobisamougb en mesira misen naugb dan dedag mougt mera medam desij en toua. Dara yen yemeiya dan demecicugb se umer dau bogo aud yen toues. 14:63 Sug Gembala Gesa Taij Meren Mougt Mera Medam en ouman gini, kaba, en agasa men sansun dau en. Anai en medoc esrougb medam an Yesus namcirohob. Hanoba en enara dou Majelisir, endagai: Emedeinyum naugb sug maman mahilon aremer dau len gus deitero. 14:64 Anai yenin youman dau sug en eic ELOHIM moho bacecim ginohob. Dangga yen yogod an dagiro naugb ena? Doba len laugwan merir logod an dou en, lendagai: Maman maic gomom dou en namcir, anai en eicara gecguohob. 14:65 Sug len merir logod an danggohob, kaba, merug aibibra dau leng ingga, kaba, len lebiji naugb locuc aih eni. Dara len leic minc meti lahud dougwo en maires toua. Dangga sug len logod enohob, kaba, len lobohuba leijidougwo en an, lendagai: Gareg en ogod ban gina? Dara leng lesedougwo mougt mera medam men tu, kaba, len lagaigeij en. Hanoba len logod en toua. 14:66 Doba sug Petrus en moongga se igtia mougwaba, kaba, mougt mera medam men sogougb gida hom, en eraga en. 14:67 Dangga sug en eiya Petrus ehi naugb smougb deb gini, kaba, en en naugb auweila en mebes toutou. Hanoba en ehin meresa eni, endagai: Dan decinaga Yesus dau cinogo Nasared men logodeh ban inggini. 14:68 Doba Petrus aideido dougwo en, endagai: Dan demecinaga dara dan indu emousa areg ban ben ginero. Hanoba en aisacij aud misis geb dougwo igtia ingga. Doba sug en aideido dougwo Yesus dag gin inegohob, kaba, berougwu eba mer toua. 14:69 Doba gida graga, kaba, en maires ebdebin en namcir. Hanoba en enara dou leng lesa sungga, endagai: Yen yeiya sud hom gabedahabi, anai en toua dau Yesus men logodeh. 14:70 Doba Petrus aideido dougwo dou en toua. Dangga sug emeb terberba debin inggebuma, kaba, len gus toua louwas gida ingga mer an deit, lendagai: Indeic, ban toua dau sud hom gin men logodeh. Anai ban toua dau leng Galilea. 14:71 Doba Petrus ouwara dou len namcir, endagai: Sud hom areg yen yen dou dan gin, kaba, dan demecinaga enero. Augwan gini asesa dag misen namcir. Ga, naro, kaba, dan dacgeij ELOHIM eic gogom medam dou dan debin gin toua. 14:72 Sug Petrus ouwara dou len dag gin inegohob, kaba, berougwu eba mer mougwa hom dara debin gin deitohob. Hang en medoc eiseisan Yesus mer gen dou enohob, endagai: Sug berougwu emeba mer mougwa hwaibuma, kaba, ban baideido dougwo dan mougwa homoiyohob. Dangga, kaba, en eb dara en medoc momogo namcir.

Markus 15

15:1 Sug lona esgohob, kaba, gembala gesa taij meren mougtir, dara leng Yahudi meren mougtir, dara leng meru ouforoho se Musa men gomnomna, dara Majelis gus gus, kaba, len laugwan lohw merdoc doum dedemeda naugb len lesa Yesus dou leng Roma meren mougt mera, moho Pilatus, dous. Dangga sug len lecba en mesira ucugwohob, kaba, len lahwan Yesus deseino en toua naugb en ouma debin areg len logod deb naugb Yesus dou len deit. 15:2 Sug len lahwan Yesus deseino Pilatusohob, kaba, en eijidougwo Yesus, endagai: Ban eng bedag leng Yahudi meren mougt mera medam indeijohobei? Dangga Yesus auni dou en, endagai: Areg ban benohob, kaba, moongga. 15:3 Sug Pilatus eijidougwo Yesus dag graga dauwohob, kaba, gembala gesa taij meren mougtir len lenara einyana ucan naugb loho las Yesus deseino en toua. Doba Yesus emauni ara ara hom dou lenero. 15:4 Dangga Pilatus medoc eineg an Yesus. Hanoba en esa mer debin en, endagai: Ban bemauni an leneroei? Anai ban bouman, doba len lenara loho las ban einyana deseino danohoba? 15:5 Doba Yesus emauni hom dou Pilatus en touwero. Hang en eimiman dau en namcir. 15:6 Doba edebeij astesda Lona Gohw Bedreg gini, kaba, Pilatus en aimo dau men geicara naugb en esga sud hom yom dau tu gesisug dou leng Yahudi aimo dau gareg len louwan lacgeij dau eni. 15:7 Se lona ingga, kaba, merug hosa dau leng Yahudi leng merugwengga se tu gesisugohob. Anai len gin, kaba, len louwan locirma leng Roma dau meren cinogo. Hanoba len les leinyana dau len touohob. Dara sud hom dau leng leisa se tu gesisug gini, kaba, eni Abbas meisi. 15:8 Dangga sug Lona Gohw Bedreg gini ebeijohob, kaba, leng Yahudi len len aud Pilatus naugb len lacgeij en. Dauntoba en esga sud hom dau tu gesisug dou len, aimo dau men geicara dag nosa an len deit. 15:9-10 Doba Pilatus en ecinaga dag gembala gesa taij meren mougtir, kaba, len lahwan Yesus aud en, anai len merdoc esdigeij enohob. Dangga hang, sug leng Yahudi len len aud enohob, kaba, en eijidougwo len, endagai: Yen youwan dan desga meijen mougt mera medam gin dou yenei? 15:11 Doba sug gembala gesa taij meren mougtir len louman gini, kaba, len locrurub dou meren lusud naugb len lemacgeij Yesusero. Doba len lacgeij naugb en esga Abbas meisi dou len dous. 15:12 Dangga Pilatus eijidougwo len deit, endagai: Yen youwan dan desga Abbas meisi dou yen, kaba, dan deb ara dara sud hom gedig yen yeija en dag meijen mougt mera medam gina? 15:13 Hang len lesa merir medam an dou en, lendagai: En, kaba, ban betob en se sogo salib dous. 15:14 Doba Pilatus ohoiya len merir an, endagai: Men geicara gecgu dag ara, hang dan detob en dara sogo saliba? Doba len lesa merir medam edreg dau nosa dou en deit, lendagai: Naro, ban betob en se sogo salib namcir. 15:15 Dangga Pilatus en esga Abbas meisi dou len, anai en ouwan eic leng Yahudi merdoc esgiraha dou len. Doba Yesus, kaba, en ogugwo en deb se men sadodor merisira naugb len labosbos enahabi, len lemetob en dara sogo salib toua. 15:16 Sug Pilatus ogugwo Yesus se men sadodor merisirohob, kaba, len lahwan en se men dimei mes gowunaresa. Hanoba len lemeija len mesir sadodor gus len laugwan toua len len. 15:17 Dangga sug len laugwan lacinimohob, kaba, len leic Yesus en moho lacecim dag len leg sansun gagas geijogor geirir seni. Hanoba len lecgun lisug mesira an mog leg se en mougt dag mougt mera medam gouji toua. 15:18 Sug len leg augwan se enohob, kaba, len leigdoumesa merisira naugb lou en. Hanoba len lenara lobohuba an en, lendagai: Abiresou, leng Yahudi meren mougt mera medam. Ban abireseb terimdahabi. 15:19 Dauwohob, kaba, len leic ijouhugwa lagod en mougt, dara len leigdores aih eni, dara len lecguna dou en naugb leic en lacecim toua. 15:20 Sug len leic en lacecim danggohob, kaba, len leg sansun gagas eijogor geirir hom graga dau eni. Hanoba len leg enin men sansun dougwo en deit. Sug len leg men sansun ucugb se enohob, kaba, len lahwan en dig medigo naugb ledetob en dara sogo salib toua. 15:21 Doba sug len merugwengga se ucina mogumsi, kaba, len lagasa Aleksander dara Rupus lan marna Simon, dau cinogo Kirene, sug en ecicugb dau men lo geb acec cinogo ingga. Dangga sug len lagasa enohob, kaba, len lagodgod en. Dauntoba en odo Yesus men sogo salib dau en naugb en aucan len toua. 15:22 Dauwohob, kaba, len lahwan Yesus aud usi hom, moho Golgoda. Gini men meijouhw dag mougt mera mer. 15:23 Sug len ledebeij se usi ginohob, kaba, len leic anggur mohu an sogo mod moho dag mur dou en, ben eg dougwo gerij. Doba en emouwanero. 15:24 Dangga sug Yesus emouwanerohob, kaba, len letob en se sogo salib namcir. Hanoba len lerba nomor naugb laic Yesus men sansun, dauntoba len lecinaga naugb sug len lekeba anim toua. 15:25 Doba sug len letob en gini, kaba, naugb inenihi sug igda etrij besa taibohob. 15:26 Dara len log se surad hom, lendagai: En edag leng Yahudi meren mougt mera medam. Len log dangga, anai gini aimo dau areg leng Yahudi loholas en an deseino Pilatusohob. Hanoba len letob an dig Yesus mougt se sogo salib toua. 15:27 Dara len letob lasud lahwai merug mog desij en toua. Anai lan gini, kaba, lan lauwan naugb lacirma leng Roma dau leng Yahudi meren hancob ucucugb terimdohob. Hang len lemetob laingma dig Yesus mesira misen. Dara laingma, kaba, dig en mesira medigi. 15:28 Augwan gini esogwa deisa areg ELOHIM en og deb eisaugb Yesus se Surad Injil Meb Mohon deb nosohob, endagai: Len loudesa en edag sud hom dau leng merug mog gin touohob. 15:29-30 Dangga lusud gedig len leraga asa ucina sug len leiya Yesus taiba sogo salib ingga, kaba, len letir merugt dag laresbes en. Hanoba len lasilagara en, lendagai: Wui, ban grag ben dag boti ELOHIM Men Tuari gouji baisoborahabi, ban bemohud se lona homoi ucugb deisa mohwes, kaba, ban beigdoc banin dau bomom se sogo salib ingga naugb ban bouwaden iteitogini toua. 15:31 Dara gembala gesa taij meren mougtir, dara leng meru ouforoho se Musa men gomnomna, kaba, len toua leic en moho lacecim namcir. Hanoba len lenara doum, lendagai: Leng gus, kaba, en eigdoc len dau meren gogomohob. Doba enin, kaba, en emeigdoc enin dau men gogomero. 15:32 Dangga hang, sug eni Mesias maman Israel maman mougt mera medam naugb en eigdoc maman dau maman gogom dag misenohob, kaba, eigouhw naugb en ouwaden dau sogo salib iteitogini. Dauntoba sug maman maiya, kaba, maman toua mamdoc ebdebin an en namcir. Dara lang marug mog lahwai graga, kaba, lan toua lasbes an en toua. 15:33 Doba sug edebeij igda aga bogohob, kaba, loba ecgun cinogo augwan terim edebeij igda edeij toua. 15:34 Dangga sug igda edebeijohob, kaba, Yesus eiyagarij en mena dara mer medam, endagai: w Eloi, Eloi, lama sabagtani? Gini men meijouhw dag: Indan ELOHIM, indan ELOHIM, ban barges dan deb, anara? 15:35 Doba sug lusud gedig len lesa sungga len louman en mer an gini, kaba, merug hosa lenara doum, lendagai: Yen youman, en eiyagarij Eliasohob. 15:36 Dangga sud hom dau len en obga bedeic augb keita geb se dum mohu. Hanoba en edogun se anggur mohu gedougdahabi, en emagasa ijongkebaga naugb en emout an dou Yesus naugb en outut toua. Sug en out an dou Yesusohob, kaba, en enara dou len gus dara gasilagara en, endagai: Maman maigtou mauweila endag, cum, kaba, Elia emen naugb emeigdoc en dau salibesei? Era naroei? 15:37 Doba Yesus, kaba, en eiyagarij en mena dara mer medam mougwa hom deit. Hanoba enin esa mena bomom namcir. 15:38 Dangga minc geb dougwo ELOHIM Men Dimei Gecabeci agaga dau moc gada terimda bedos gaih bedag hwai icira namcir toua. 15:39 Dara sadodor meren mougt mera hom, kaba, en esa irir sogo salib an Yesus toua. Dangga sug en ouman dara en eiya dau Yesus men geicara augwan deinyor sug en omom ginohob, kaba, en toua os badi, endagai: Sud hom gin, kaba, ELOHIM Meisi misen indeijohob. 15:40 Dara ligida merug hosa, kaba, len toua lesa aigusi naugb len leiya dau Yesus men geicara augwan gin toua. Dau len gini, kaba, lingma len meroho dag Mariam dau cinogo Magdala. Dara hom deit, kaba, en moho Mariam gedig Yakobus gigbaba dara Yoses lan marim. Dara hom deit, kaba, en moho dag Salome. 15:41 Ligida merug homoi gini, kaba, len laiceicira Yesus naugb sug len lougwan ared dou en sug en esai ELOHIM moro dou leng Galilea sug nosohob. Dara ligida gus leinyana, kaba, len laicira Yesus dig Yerusalem naugb Lona Gohw Bedreg gin touohob. Hang len toua lemesa desij ligida gus naugb len lemeiya Yesus sug en omom se sogo salib gin toua. 15:42-43 Doba lona sug len letob Yesus se sogo salib gin, kaba, leng Yahudi meren lona sug len lougwan ared deb naugb meren Lona Gemeicaresero ginohob. Dangga sud hom dau cinogo Arimatea, en moho Yusub, eic mos naugb en eihwedaud leng Roma meren mougt mera, moho Pilatus, naugb en acgeij Yesus medesa dau eni. Anai deinyor loba sug leng Yahudi meren Lona Gemeicaresero ebeij inggohob. Dara Yusub gini, kaba, en toua dag Majelis. Anai lusud leigdoumesa en moho an men geicara geigouhwohob. Dara en od mena deisa ELOHIM an lona sug en oiharaga lusud ucugb deit gin touohob. 15:44 Dangga sug Pilatus en ouman dag Yesus en omomohob, kaba, en eimiman dau gin namcir. Hanoba en eija leng sadodor meren mougt mera graga ucugb an gin deit, endagai: Ban toua beiya Yesus omom dag misenohobei? 15:45 Sug sadodor meren mougt mera ingga, en os badi dou Pilatus dag Yesus omom dag misenohob, kaba, Pilatus en ouwan Yesus medesa dou Yusub namcir. 15:46 Dangga sug Yusub en eihweda naugb en edouma minc gogoufu garjeijaga naugb Yesus medesohob, kaba, en eihweda naugb edeic Yesus maga dau sogo salib toua. Sug en eic Yesus maga dau sogo salibohob, kaba, en eic minc agacgec eni. Hanoba en edob en deisa igdohos mes gedig len log deb nosohob. Sug len lob debsa igdohos mesohob, kaba, len legrij igdahab meh dougwo namcir. 15:47 Doba Mariam dau cinogo Magdala, dara en mesi Yoses mem, moho Mariam, kaba, lan toua laiya sug len lob Yesus maga se igdohos mes inggohob.

Markus 16

16:1 Sug leng Yahudi meren Lona Gemeicaresero ouwa dauwohob, kaba, Mariam Magdalena, dara Mariam Yakobus mem, dara Salome, len ledouma aremougb mohu men ouwadebeda, naugb len ledehin se Yesus medesa. 16:2 Dangga sug igda emerba mohora inenihi se lona gaimougtut naugb Ari inggabuma, kaba, len leihweda se aremougb moda. 16:3 Doba sug len lec asa ucina, kaba, len leijidougwom ucucugb, lendagai: Gareg emousa maman naugb emegrerij igdahab meh dau igdohos mes naugb mamana? 16:4 Sug len ledebeij deinyorohob, kaba, len leiya, doba igdohos meh medam graga enin egrij dauwohob. Anai igdahab gini medam namcir. 16:5 Dangga sug len leinesa igdohos mesohob, kaba, len leiya, doba sud hom gigbaba geg sansun gagas gogoufu hom, inggeigtou dig len merisira misen deb gini. Sug len leiya en, kaba, len leijesan en namcir. 16:6 Doba sud hom gigbaba ingga, kaba, en oho mer debin len, endagai: Yen meigdoc emeijesero. Dan decinaga yen yehilon Yesus dau cinogo Nasared gedig lusud letob en se sogo salib ben omomohob. Doba en moongga suginero, anai en eisa ucugwohob. Yen yedeiya sug len lob en deb gini, doba mes mogudohob. 16:7 Dangga yen yeihweda yeden dou Petrus dara Yesus men logodeh gus laugwan toua. Yendag en eino len merin dig Galileohob. Sungga, kaba, len lemdesma en dag en en dou len sug nosohob. 16:8 Sug len louman danggohob, kaba, len lagunya dau igdohos mes ingga ucugb. Hanoba len lobgada, anai len lahau dara leijesa medam namcirdaha. Dangga sug len lobga gini, kaba, len lemenara ara ara dou lusud se ucina mogumsi touwero. Anai len merug omom namcir. en og baulo deit 16:9 Dangga, kaba, ligida ingga len leihweda naugb ledebeij Petrus an mesir laugwan. Hanoba len merirs lagodgod dau areg sud hom gigbaba graga en dou lenohob augwan dou len toua. Dau, kaba, Yesus enin arougb men logodeh naugb len leihweda sungga sungga. Dauntoba len lesai mer gecabeci geisaugb enin gini dou lusud laugwan. Anai en mer gin, kaba, eic maireseb menau geb huhugb dou len namcir. Sug Yesus eisa dau gomom se Ari lonamenmenohob, kaba, en ens enin ainyes aimougtut dou Mariam dau cinogo Magdala. Mariam gin, kaba, Yesus ocirma merna mog mog merug senggai dau en sug nosohob. 16:10 Dangga en eihweda naugb en eden dou Yesus men logodeh gedig len laimo en sug nosohob len laugwan dau gin toua. Anai len gin, kaba, len leb. Dara len merdoc momogo an en terimdaba. Sug en edebeij lenohob, kaba, en oho mer debin len, endagai: Dan deiya Yesus, en eisa dau gomom. Hanoba en maireseb ucugwohob. 16:11 Sug len louman dau gini, kaba, len merdoc emebdebin anero. Doba len merdoc aihagab en mer an gin namcir. 16:12 Dau, kaba, Yesus ens enin ainyes dou men logodeh lahwai amomo se ucina mogumsi sug lan lan dau cinogo Yerusalem dig maran cinogoda. Doba sug en ens enin ainyes dou lan gini, kaba, men mocbobaga susugb deit dau sug en moongga dara lan sug nosohob. 16:13 Doba sug lan lacinaga dag eni Yesusohob, kaba, lan lacicugb dig cinogo Yerusalem naugb lan laden dou Yesus men logodeh gus laugwan toua, landagai: Graga, kaba, aman ameiya Yesus ens enin dou amanohob. Doba len merdoc aihagab lan marir an gin toua namcir. 16:14 Sug Yesus ens enin ainyes dou len graga dauwohob, kaba, en edens enin dou men logodeh merug sisa hobjerem ucan deit sug len letara. Sug en agunya debin lenohob, kaba, en esa mer debin len. Anai len merdoc aihagab dara agadgeij dougwo leng leiya en len merir an namcir. Hanoba en enara bauni len, endagai: Dagiro, naugwe hang, yen meigdoc aihagab leng gin merir, anara? Anai len leiya dan dag misenohob. 16:15 Sug Yesus enara bauni lenohob, kaba, en arougb len, endagai: Yen yeihweda naugb yen yesai Mer Geigouhw eisaugb dan dou lusud se cinogo augwan namcir. 16:16 Gareg en medoc ebdebin an dan, kaba, ELOHIM eic maireseb menau geb huhugb dou en. Hanoba yen yogun len debin gin toua. Doba gareg en medoc emebdebin an danero, kaba, ELOHIM eic mor mor se dum smougb dou en dous. 16:17 Dara gareg en medoc ebdebin an danohob, kaba, dan demeic goubesa dou en naugb en ocirma merna mog mog dau lusud. Dara dan demeic goubesa dou en naugb en emec len gus merir toues. 16:18 Dara sug en os hinogo bau en, dara en eg aregua toua, doba en emomom an gin touwero. Dara dan deic goubesa dou en naugb sug en ob mesira aga leng areber, kaba, len lemeigouhw toues. 16:19 Dangga sug maman Adehsud Yesus gini, en esulou men logodeh dag graga bouwohob, kaba, ELOHIM eigdoumesa en dau cinogo dig bogo naugb en eigtou desij dig ELOHIM mesira misen naugb en edag mougt mera medam desij en toua. 16:20 Doba men logodeh gin, kaba, len leihweda naugb len lesai en moro se cinogo sungga sungga terimda. Dara maman Adehsud, kaba, en ousa len an areg len lesai gini naugb en eic ganusbus baos dara dou len toua. Dauntoba lusud lecinaga dag areg len lesai gin, kaba, mer misen namcir. len log deb mohonohob laulo gini deit

Lukas 1

1:1-2 Adehsud, Teopilus, lusud leinyana leic meruwemougb esesa naugb len log dau areg emen emdoc ebdebin an gini augwan deb se surad sug nosohob, aimo dau areg leng nosa len len dou emenohob. Anai len gin, kaba, len leiya aremer augwan gini dau sug aimougtut, terimda edebeij sug ouwedoc toua. Dara len lesai augwan gini dou lusud sungga sungga touohob. 1:3-4 Dangga hang, dan toua indoc emesgirahesa naugb dan demog augwan gini audud dou ban toua. Dauntoba ban bemeija abuwesa gin touwero. Doba ban becinaga dag areg len lesai dou ban gini, kaba, misen namcir. Anai dan toua deic induwemougb esesa naugb dan dehilon aremer augwan gini ucugb se meiyo deit. Doba dag misen namcirohob. 1:5 Se lona sug Herodes en edag mougt mera medam naugb leng Yudea, kaba, gembala gesa taij hom, moho Sakarias, en toua moongga. Eni Abia men gedeijan naugb en eicara se ELOHIM Men Tuari. Dara en mesouwa Elisabed, en toua dau Harun medebeitor. 1:6 Lan gin, kaba, lan lamedreg dau maman Adehsud men gomnomna dara areg en arougb lan an gini mougwa hom touwero. Doba lan laimo areg asesa ELOHIM enin medoc mes augwan terimda. 1:7 Doba Elisabed, kaba, en edebdena namcir. Dara iteitogin, kaba, lan lahwas ladag lasudbod touohob. 1:8-9 Dangga ebeij sug Abia an men logodeh leicaresa se ELOHIM Men Tuari, kaba, Sakarias en eng eicaresa naugb en ec areg men ouwadebeda se boromei geb se Tuari men Dimei Gecabeci deseino ELOHIM toua. Anai sug len lerba nomor, kaba, ens en naugb ginohob. 1:10 Dangga sug Sakarias einesa Tuari men Dimei Gecabeci gini naugb en ec areg men ouwadebeda deseino ELOHIM enohob, kaba, len gus locuncum dig medigo gabinda toua. 1:11 Doba sug en ec areg men ouwadebeda se boromei gin, kaba, maman Adehsud men malaikad hom en agunya debin en besa desij boromei dig en mesira misen. 1:12 Sug Sakarias eiya en ineg, kaba, en medoc eijesa dara en ahau medam namcir. 1:13 Doba malaikad ingga oho mer debin en, endagai: Sakarias, ban bemahaulo. Anai ELOHIM en ouman ban abirohob. Dangga cum, kaba, ban absouwa Elisabed, en ouwadan ban abisi hom dou ban, hanoba ban beija en moho toua dag Yohanes. 1:14 En, kaba, emeic ban abdoc eigouhw medam dou bans. Dara sug mem ouwadan enohob, kaba, emeic lusud leinyana merdoc emagahugouhw an en toues. 1:15 En, kaba, en moho agas medam deseino maman Adehsud. Dara en emeg anggur mohu dara areg gedougdaha touwero. Anai dau sug mem ouwadan en inegohob, kaba, Mena Gogoufu edag mougt se en medoc mes teiteiyohob. 1:16 Dangga hang, en emahwan leng Israel leinyana aud meren Adehsud ELOHIM ucugb deit. 1:17 Anai en ino meren Adehsud en men se Elias men mobisamougb gini. Dauntoba en esedeb lusud merdoc mes naugb sug en en aud len toua. Hang en emenara emaic merner merdoc mes emeineg an mehir ucugb deit. Dara en arougb leng lohoiya meren Adehsud en mer ginohob naugb len lemedreg areg en arougb len an gin toua deitero. Doba meren gauwamara aninim dag leng laimo areg asesa meren Adehsud enin medoc mes gin toua terimda. 1:18 Doba sug Sakarias ouman dau ginohob, kaba, en enara bauni malaikad mer ucugb, endagai: Ban beic gansins dag ara dou dan, dauntoba dag decinaga gini acgunog dag misen, anai dan insouwa aman amedag lasudbodohob gina? 1:19 Dangga malaikad esa mer debin en, endagai: Dagiro naugb ban besbes an dan indira? Anai dan gini Gabriel. Dara dan desa desij ELOHIM se bogo naugb dan dousa en toua. Dara enin dous eng esa dan aud ban naugb dan dens dau mer geigouhw gin dou ban toua. 1:20 Dangga hang, ban bouman dan indir deigeigouhw. Dau iteitogin, terimda lona sug augwan gini ebijohob, kaba, ban bemenara moho hom deitero. Doba ban bedag bosum namcir, anai areg dan den dou ban gin, kaba, acgunog dag misen namcirohob. Doba ban abdoc emebdebin an areg dan den dou ban ginerohob. 1:21 Doba sug lusud leigtou dig medigo, kaba, len merdoc ebehibeh naugb Sakarias terimda. Dangga sug en emagunya dedemeda aud lenero, kaba, len merdoc omom dau gin namcir. Hanoba len lenara doum, lendagai: Areg edeba Sakarias se Dimei Gecabeci gaba? Hang en emdeinana gina? 1:22 Doba sug Sakarias agunya dau dimei mes aud lenohob, kaba, en emenara moho dou len deitero. Doba en eic mesira ainyenara dou len dous, anai eni osum namcir. Hang len lecinaga dag ganusbus agunya debin en se dimei mesohob. 1:23 Doba Sakarias, kaba, en eicara se ELOHIM Men Tuari edebeij men lona augwan ouwa dauwohob. Hanoba en ecicugb dig men tu deit. 1:24-25 Lona hosa debin gin, kaba, Sakarias mesouwa Elisabed en maga ogom naugb menuhwohob. Dangga en emeic maga ainyes touwero, doba en ecgoneh maga an gini se igda sergem se men tu dous. Hanoba en eimiman enin an gini deseino men lusud, endagai: ELOHIM medoc eineg an danohob. Hang en emamsoho dan touwero. Doba se lona gin, kaba, en eic dan indih dou dan naugb bogod dougwo len gus merir sug len lesmesman dan dag gini terimda. 1:26 Sug Elisabed en menuhwa se igda senggemohob, kaba, ELOHIM arougb malaikad Gabriel naugb en einesa cinogo Nasared se leng Galilea meren hancob deit. 1:27 En einesa sungga naugb en edenara dou gidob hom, en moho Mariam. Gidob hom gin, kaba, sud hom Yusub dau mougt mera medam, moho Daud, medebeito, en erba ara debin enohob. 1:28 Dangga sug Gabriel edebeij enohob, kaba, en enara dou en, endagai: Abiresou. Maman Adehsud eseyeiyo ban dougwo areg gecgu augwan terimda. Anai en, kaba, en eigdoumesa ban aboho agas medam deseino en. Dara en eigtou desij ban touohob. 1:29 Sug Mariam ouman gin, kaba, en medoc eijesa medam. Hanoba en eija medocesa, endagai: Areg en enara dou dan gin, kaba, men meijouhw dagiro inggina? 1:30 Doba malaikad oho mer debin en deit, endagai: Mariam, ban bemahaulo. Anai ELOHIM medoc esgiraha se banohob. 1:31 Dangga hang, ban boc abums naugb areg dan den dou ban gin deigeigouhw namcir. Anai cum, kaba, ban abinuhwa. Hanoba ban bemouwadan ban abisi hom, kaba, ban bemeija en moho dag Yesus. 1:32 Eni sud hom moho agas medam. Anai ELOHIM Gedig En Moho Eb Taiba Augwan, kaba, en emeija en dag en Meisi toues. Dangga hang, maman Adehsud ELOHIM en eigdoumesa en moho dag mougt mera medam naugb en eperwei en meijemouwa Daud en mohw naugb en edag leng Israel meren mougt mera medam gin deit. Anai sug nosa, kaba, Daud gini en edag mougt mera medam naugb len dag gin touohob. 1:33 Dara men goiharaga gini, kaba, emobsara toua deitero. Doba en edag mougt mera medam naugb en esedougwo Yakub medebeitor len laugwan dag gin beb huhugb namcir. 1:34 Doba Mariam en eijidougwo malaikad ucugb deit, endagai: Dan demouwadan dan indisi augwougb dagiro? Anai dan digdobaba gina? 1:35 Doba malaikad enara bauni en mer ucugb, endagai: Sug Mena Gogoufu, kaba, en emedebeij bans. Hanoba ELOHIM men goubesa emoiharaga ban naugb en emousa ban an gins, anai en moho eb taiba augwanohob. Dangga hang, godeh gedig ban bouwadan gini, kaba, ELOHIM emouci en debinim naugb enin men geicara dara emeija en edag en Meisi gin toues. 1:36 Dara ban becinaga dau ban abdamouwa Elisabed, dag nosa, kaba, lusud lowun en moho dag gida hom gedebdena namcir. Dara en edreg dau sug en ouwadan meh gin toua. Doba iteitogini, kaba, en menuhwa se igda senggem ginohob. 1:37 Anai dara ELOHIM, kaba, aremer hom emedreg dau men goubesero. Doba men goubesa edeinyum naugb augwan namcir. 1:38 Sug Mariam ouman gin, kaba, en ousa deisa malaikad mer an, endagai: Dan indoc esgirahesa, anai dan dedag maman Adehsud men sogougwohob. Dangga hang, areg ban ben dou dan gin, kaba, en emeic dou dan toues. Sug Mariam ousa deisa malaikad mer an ginohob, kaba, malaikad eihwededau en namcir. 1:39 Sug Mariam ouman dag en medamouwa Elisabed menuhwohob, kaba, en ec dedemeda aud en se men cinogo gebsa menmod hom se leng Yudea meren hancob. 1:40 Sug en edebeij se cinogo inggohob, kaba, en einesa Sakarias men tu. Hanoba en ou Elisabed, endagai: ELOHIM eic gesgigouhwesa dou ban dougwo areg gecgu augwan namcir. 1:41 Sug Elisabed ouman Mariam ou en dag gin inegohob, kaba, meh geisa Elisabed menuhwa ingga einyeinya dag agahugouhw medam namcir. Dara Mena Gogoufu atij en medoc mes toua. 1:42 Hanoba en esa mer medam an dou en, endagai: ELOHIM en eic geigouhw dou ban namcirohob edreg dau ligida gus laugwan. Dara en eic geigouhw dou ban abih geisa ban abinuhwa ingga touohob. 1:43 Dangga dagiro, naugwe hang, indan Adehsud en mem, ban bedebeij dantog gina? 1:44 Anai ban bouman deigeigouhw. Sug ban bou dan iteitograga, kaba, godeh geisa se dan indinuhwa gini, en agahugouhw beinyeinya medam naugb banohob. 1:45 Dara maman Adehsud eic geigouhw dou ban toua, anai ban bemohoiya en merero. Doba areg en os dou ban ginohob, kaba, ban bod abina debsa en an dag en emeic augwan gini dou ban toues. 1:46 Sug Elisabed agahugouhw an Mariam dag graga ouwohob, kaba, Mariam en ohwaresgwemer bagahugouhw an ELOHIM deseino Elisabed an men lusud deit, endagai: Dan deigdoumesa indan Adehsud en moho agas namcir. 1:47 Dara dan indoc agahugouhw an indan ELOHIM Gedig En Eigdoc Dan Dau Sesar Men Gogom Augwanohob toua. 1:48 Anai en medoc moc dougwo dantog indoho eb tainya gin touwero. Doba en medoc eineg an dantog ginohob. Dangga ban bouman deigeigouhw. Dau lona gin, kaba, lusud laugwan lagahugouhw an ELOHIM men geigouhw geb dou dan gin terimda toua. 1:49 Anai ELOHIM Gedig En Mobisamougb namcir naugb en eic areg mera eisaugb namcir dou danohob. Hang dan deigdoumesa en moho dag ecabeci. 1:50 Dara en medoc emeineg an maman gin dousero. Doba gareg dau maman mamehir dara maman mamdebeitor en ahau dau en, kaba, en medoc eineg an toua terimda. 1:51 Dara leng leimiman lenin an meren geicara deseino len gus, kaba, en os len laugwan bargehilo. Dara areg len lauwam an deb toua, kaba, en ougb sogo maga dougwo merbes an gin toua namcir. Anai en mobisamougb dau augwan namcir. 1:52 Dara en owun leng meroho eb taiba dau meren maija moc beb tainya namcir. Doba leng meroho eb tainya, kaba, en eigdoumesa len meroho eb taiba deit. 1:53 Dara en eic geigouhw dou leng merunggwereij. Doba leng merisoho mougb, kaba, en ecicugb len leihweda dau en dara len merisira mogud dous. 1:54-55 Dara en medoc eineg an men sogougb mamang Israel naugb en ousa maman terimda. Anai en medoc moc dougwo areg en os dou maman mamjemouwer dara Abraham en medebeitor maman touwero. Doba en eiseisan areg en os dou maman gini beb huhugb terimda. 1:56 Dangga sug Mariam eigtou desij Elisabed edebeij igda homoiyohob, kaba, en ecicugb dig men cinogoda. 1:57 Sug Mariam eihwedau Elisabed ginohob, kaba, Elisabed men igda edeinyum naugb sug en ouwadan meisi hom. 1:58 Dara Elisabed mena mehir, dara mem mehir, an mosur gus gus, sug len louman dag maman Adehsud en medoc eineg an Elisabed dag ginohob, kaba, len laimo en naugb len lagahugouhw medam an maman Adehsud en toua namcir. 1:59 Dangga lona senggai debin sug Elisabed ouwadan meh ginohob, kaba, en mosur laugwan, len len aud en naugb sug len lec meisi gin en mos dau. Sug len lec mos dauwohob, kaba, len louwan leic mena moho dag Sakarias debin gin dou en toua. 1:60 Doba Elisabed en en dougwo len, endagai: Yen yemeic en moho dag Sakarias, isnaro. Doba yen yeic en moho dag Yohanes dou en dous. 1:61 Doba len lenara launi dou en ucugb, lendagai: Ban abusur lingma meroho dag Yohanes gini, dauntoba ban beic baija danggero. 1:62 Dobnaro, kaba, len leic merisira lainyenara dou en mena Sakarias naugb laijidougwo en deit, lendagai: Ban beic ban abisi gini en moho baija ara? 1:63 Dangga Sakarias en eic mesira ainyen igdahab naugb len ledeic dou en. Sug len leic dou enohob, kaba, en og meisi moho dag Yohanes debsa dou len toua. Hang len laugwan leimiman dau gin namcir. 1:64 Doba sug en og meisi en moho gin inegohob, kaba, ELOHIM agaha en mers iteito sungga. Dara en metemouwu einyeinya naugb en enara moho toua. Hanoba en agahugouhw an ELOHIM namcir. 1:65 Doba sug len marsir leiya dau gin, kaba, len merdoc eijesa dara len lahau dau gin namcir. Dara len lecic dau aremer gin bagaha se menmod se leng Yudea meren hancob augwan toua. 1:66 Dangga lusud sug len louman dau gin, kaba, len leis deisa merdoc mes namcir. Anai len lecinaga dag maman Adehsud men goubesa oiharaga Yohanesohob. Hanoba len lauwam se merdoc mes, lendagai: Godeh gini sug edag sud, kaba, emedag aresa. 1:67 Doba Yohanes mena, Sakarias, kaba, Mena Gogoufu einesa en medoc mes deit. Hanoba en eic mou ouforoho dou Sakarias naugb en esai ELOHIM en mer eisaugb Yesus men geicara augwan asesa dou leng se men tu deb toua. Dangga en eic aresgwemer bahu dou len endagai: 1:68 Eigouhw naugb maman magahugouhw an maman Adehsud Geis Huhugb gedig en edag mamang Israel maman ELOHIM. Anai en ouwaden dau bogo naugb en encoho aga mamanohob. 1:69 Hanoba en eigdoumesa men sogougb Daud en medebeito hom en moho toua naugb en eigdoc maman dau sesar men gogom augwan dareg mobisamougb namcir. 1:70-71 Anai en os dou maman ogdoc leng lecabeci gedig len lesai en moro sug nosa deb dag en eigdoc maman dau maman moc meren goubesa. Dara en esga maman dau leng merdoc mog mog an maman len merisira gin touohob. 1:72 Dara en enara dou maman dag en medoc moc dougwo men gos dou gecabeci dou maman mamjemouwer gin touwero. Doba en aimo areg en os dou len naugb en eic geigouhw dou len an maman toua terimda. 1:73-74 Hanoba en ouwara debin gin dou maman mamjemouwa Abraham dau sug en esga maman dau maman moc merisira dag ginohob, kaba, dag maman mamahau dau len toua deitero. 1:75 Doba maman maicara maimo areg gecabeci dara areg asesa enin medoc mes terimda Lona Sug Ouwedoc deseino en toua. 1:76 Sug Sakarias ens dau Yesus men geicara dou leng leigtou se men tu dag ginohob, kaba, en ens dau en meisi Yohanes men geicara se lona daiyamo gacin dou len ucan deit. Hanoba en eic aresgwemer bahu dou len deit, endagai: Doba dan indisi, ban, kaba, ELOHIM Gedig En Moho Eb Taiba augwan namcir en emeigdoumesa ban aboho naugb ban besai en moro dou lusud laugwan toua. Anai en arougb ban naugb ban beino maman Adehsud, dauntoba ban besedeb len merdoc mes naugb sug en en aud len. Aninim dag lusud lesedeb ucina naugb mougt mera medam sug en en aud len toua. 1:77 Dangga hang, sug ban bedebeij lenohob, kaba, ban bedens meijouhw asesa dou len dag sug maman ELOHIM aigdougwo meren sesar augwan dau len. Hanoba en emeigdoc len dau sesar men gogom augwan toues. Anai en medoc eineg an len namcirohob. 1:78-79 Dangga en esedeb sud hom dag igda gerba mohora en ouwaden dau bogo naugb maman, dauntoba men mouf einyedei len gedig leigtou se lobeigbogo dara gomom meniha. Dara men mouf aisema maman se ucina naugb sug maman maic gesgigouhwesem ucucugb terimda toua. 1:80 Doba Yohanes gin, kaba, en mog eiloboro namcir. Dara en medoc agadgeij dougwo aremer augwan toua. Dangga hang, en emeigtou desij lusudero. Doba en eigtou dou enin se lomougwisa terim edebeij lona sug en ens enin ainyes dou leng Israel laugwan naugb sug en esai ELOHIM moro dou len toua.

Lukas 2

2:1 Se lona sug Elisabed ouwadan Yohanes gin, kaba, leng Roma meren mougt mera medam, moho Agusdus, en esa mer dou men lusud gen moho oiharaga len laugwan, dauntoba len lecicugb se meren cinogo naugb sug len ledeic len meroho dou en toua. Anai en ouwan naugb len lohw cinogo dou en. 2:2 Len lebiji naugb leic meroho aimougtut gini sug Agusdus men gedeijan, moho Kerenius, en edag w gubernor naugb leng se Siria meren hancob augwan gini. 2:3 Dangga astesda sud hom yom, kaba, en eihweda se enin men cinogo naugb sug en edeic en moho toua. 2:4 Dara Yusub dara Mariam, kaba, lan toua laiwhedau Nasared se leng Galilea meren hancob dig Daud men cinogo Bedlehem, geb se leng Yudea meren hancob naugb lan ladeic maroho sungga. Anai eni dau Daud men meijouhuda, dara Daud medebeito, en misen toua. 2:5 Dara Mariam, kaba, Yusub moho aiga en dousaba. Doba en menuhwa edaga goujohob. 2:6 Dangga sug lan ladebeij se Bedlehemohob, kaba, Mariam men lona edagasa naugb sug en ouwadohob. 2:7 Hanoba en ouwadan meis mebin hom. Dara en eic minc adinggon eni deb se mohoi aremeta letaresa. Anai tu misen augwan atij dougwo lanohob. Hang lan latou se tu meij garemeta meren dous. 2:8 Dara se loba ingga, kaba, leng gembala merug hosa len lesedougwo meren domba se lomougwisa geb acec cinogo Bedlehem gin toua. 2:9 Doba sug len lesedougwo meren domba gin, kaba, maman Adehsud men malaikad hom, en ens enin ainyes dou len. Dara men gogouf cucugb erbacec len toua. Dangga hang, len lahau dara leijesa medam namcir. 2:10 Doba ELOHIM men malaikad gin, kaba, en oho mer debin len, endagai: Yen yemahaulo. Anai mer gedig dan doho dou yen gin, kaba, eic yen yaugwan meigdoc agahugouhw dou yen dara naugb lusud se cinogo gin augwan toua. 2:11 Anai se loba gin, kaba, gida hom en ouwadan meisi hom se Daud men cinogo gini naugb en eigdoc yen dau meijen gogom augwan namcir. En moho Krisdus, meijen Adehsud. 2:12 Dara yen yemeiya mem en eic minc adinggon deb se mohoi debohob, dag ansins dou yen toua. 2:13 Sug malaikad hom graga en enara dou len dauwohob, kaba, malaikad leinyana gougwa dau bogo len lens lenin ainyes desij en deit. 2:14 Hanoba len lagahugouhw an ELOHIM, lendagai: Maman magahugouhw an ELOHIM se surga, ELOHIM se bogo. Grag eigtousa goucucugb mohw gada, gecabec meb gada. Moho agas gougwa, moho agas gouji. Dangga, kab, murid Krisden magahugouhw an ELOHIM se surga, ELOHIM se bogo an. Eic geigouhw naugb ma, ou geigouhw dou ma. 2:15 Sug malaikadir lecicugb se bogo dau lenohob, kaba, leng lesedougwo domba gini, len len doum, lendagai: Yen yin, maihwedig Bedlehem naugb maman madeiya areg Adehsud ens dou maman ginahabi. Anai aremer gini acgunog se Bedlehem dag indeicohob. 2:16 Dangga len lobga dedemeda se Bedlehem, kaba, len lesma Mariam dara Yusub, lan ladesedougwo mahaniheni atouda se mohoi deb gini. 2:17 Sug len leiya, doba augwan asesa namcirohob, kaba, len lecic dau areg malaikad en dou len eisaugb mahaniheni gini dou lusud laugwan toua. 2:18 Dangga sug len louman dau gin, kaba, len leimiman namcir. 2:19 Doba Mariam, kaba, en eic len merir an gin augwan se medoc mes. Hanoba en auwam an gin toua terimda. 2:20 Dara gembala sug len lecicugb aud meren domba se lomougwisa deit, kaba, len lagahugouhw an ELOHIM. Dara len leigdoumesa en moho an areg len leiya dara loumanohob gin ucucugb terimda. Anai augwan gini asesa dag malaikad enara dou lenohob. 2:21 Sug edebeij lona senggemoiyohob, kaba, gembala gesa taij en en naugb en ogod godeh en mos dau. Hanoba len leic en moho dag Yesus dou en toua. Anai gini aimo dau areg malaikad en dou Mariam sug godeh gini emeb se en menuhwebma. 2:22 Dangga edebeij lona sud hwai debin sug Mariam ouwadan dauwohob, kaba, Yusub dara Mariam lan laihwedesa ELOHIM Men Tuari se Yerusalem naugb gembala gesa taij eic gecabeci dou Mariam ucugb deit. Anai gini aimo dau areg Musa men gomnomna en ogod an gin deb nosohob. Dara lan laho Yesus naugb lan laic dou maman Adehsud sungga toua. 2:23 Anai maman Adehsud ogod an dangga dou Musa se men gomnomna deb sug nosohob, endagai: Astesda sug ligida louwadan merih ligiji mebin, kaba, yen yeic len dou meijen Adehsud dan nosa dauwahabi. 2:24 Dangga sug lan ladebeij Yerusalemohob, kaba, lan laic bohobei hwai naugb lauwaharo dou maman Adehsud, dauntoba Mariam en ecabeci deit. Anai maman Adehsud en mer gin, kaba, ogod an deb se gomnomna deb nosohob, endagai: Gareg en ogor deseino dan, kaba, en eic bousugb hwai, era bohobei moto hwai naugb auwaharo dou dan, kaba, gini dag en ecabeci deseino danohob. 2:25 Dara se lona ingga, kaba, sud hom, moho Simeon, en toua moongga se Yerusalem gini. Anai en eigtou ateteij naugb lona sug ELOHIM esa sud hom aud leng Israel naugb sug en ahahumohumesa len debin gogom deb debin lenohob. Dauntoba len merdoc ebtou dag nosa ucugb deit. Sud hom gin, kaba, en aimo areg asesa ELOHIM enin medoc mes namcir. Dara en esijaresa dara agahugouhw an ELOHIM esesa terimda. Dangga Mena Gogoufu eigtou desij en toua namcir. 2:26 Doba sug en eigtou ateteij naugb lona ingga, kaba, Mena Gogoufu en dou en deb dag en emomom dedemedero. Doba en eigtou terimda en eiya maman Adehsud men sud hom geigdoc leng Israel dau meren gogom se en mairesahabi, en emomom toua. 2:27 Dangga sug Yusub dara Mariam laimo Musa men gomnomna naugb sug lan laho Yesus mahaniheni aud ELOHIM se Men Tuari, kaba, Mena Gogoufu arougb Simeon naugb en eihweda se ELOHIM Men Tuari gin toua. 2:28 Sug en agasa lan se Tuari an godeh ginohob, kaba, en eigdoumesa en dau mem mesira. Hanoba en agahugouhw an ELOHIM namcir, endagai: 2:29-30 Adehsud, iteitogin, kaba, dan indoc obsarohob. Anai sud hom gedig ban besedeb naugb en eigdoc lusud dau meren gogom, kaba, dan deiya en se dan indiresohob. 2:31-32 Dara ban bemecgoneh en touwero. Doba ban bens en ainyes dou lusud laugwanohob naugb en ens ban abir dag mouf gaisema lugmahara, dauntoba len len aud ban toua. Dangga len leigdoumesa aban meijouhuda emeng Israel emoho an gin toua terimda. Hang dan indires emeb deitero. Doba ban barges aban sogougb dan domom dara indoc ebtou, ingginda. 2:33 Sug Yesus mena dara mem lan lauman Simeon mer an gin, kaba, lan laimiman dau gin namcir. 2:34 Sug Simeon en agahugouhw an ELOHIM eisaugb Yesus dauwohob, kaba, en ocuncum aga Yusub, dara Mariam, dara lan maraisi gini naugb ELOHIM eic geigouhw dou len toua. Hanoba en esulou Yesus mem Mariam ucan deit, endagai: Ban bouman deigeigouhw. ELOHIM esedeb ban abisi hom gini naugb en eigdoumesa dara en owun leinyana dau mamang Israel len meroho. Anai maman mainyana, kaba, maman mamdoc erleij aud ELOHIM ogdoc men geicara gini. Doba ligbum dau maman, kaba, len merdoc esges en naugb len lasid lenin dau ELOHIM toua. Dara ELOHIM esedeb en dag gansins dou maman, dauntoba maman macinaga en en dau ELOHIM enohob. Doba maman mainyana, kaba, maman mawun en moho an gin namcir. 2:35 Hang ELOHIM esedeb en naugb en ens dau areg geb se lusud leinyana merdoc mes augwan beb ainyes toua. Doba ban, kaba, augwan gini eic dag ketemei mec ogod ban abdoc gorougb mobog, obogougb namcir. 2:36 Dara gida debdes hom gedig en esai ELOHIM moro, moho Hana, eni moongga se ELOHIM Men Tuari gin. Eni Panuel mehida dau meijouhuda Haser. Dara eni sudbod namcir touohob. Sug nosa, kaba, en es mesuwohob, doba edebeij arisogomoc senggai dous, kaba, en omom dau enohob. 2:37 Dangga dau lona ingga, terimda edebeij men arisogomoc sud hogu hogu edeisu, kaba, en emes mesuwa deitero. Doba en ehig dag debdes bedag sudbod gin namcirohob. Hang en emarges dau ELOHIM Men Tuari gin mougwa hom deb touwero. Doba en ehig dau ared naugb en ocuncum dou ELOHIM dara esijaresa en astesda lona loba terimda toua. 2:38 Dangga se lona sug Yusub dara Mariam, lan laho Yesus aud ELOHIM se men Tuari ineg, kaba, Hana toua en en aud lan. Sug en edebeij lanohob, kaba, en agahugouhw an ELOHIM, endagai: ELOHIM, dan den sijo medam dou ban. Anai ban besa godeh gini dou emenohob naugb en eigdoc emen dau emen gogom augwan namcir. Hanoba en ens meijouhw eisaugb godeh gini dou lusud se Yerusalem ucan dou len toua. Anai leinyana dau len ingga, kaba, len leigtou lateteij naugb lona sug ELOHIM eigdoc len dau meren gogom augwan namcir. 2:39 Doba sug Yusub dara Mariam, lan laimo areg maman Adehsud ogod an deb se men gomnomna eisaugb lan dauwohob, kaba, lan lacicugb se maran cinogo, moho Nasared, se leng Galilea meren hancob ucugb deit. 2:40 Dara maran godeh gin, kaba, ELOHIM ousa en naugb eic en mou ouforoho eiseisaugb dou en. Dara en ousa en naugb en ecinaga areg asesa ELOHIM enin medoc mes augwan toua terimda. Anai ELOHIM medoc eigouhw an en namcir. 2:41 Doba edebeij astesda arisogomoc, kaba, Yesus mena dara mem lan laihwedig Yerusalem naugb lan mardoc eiseisan lona sug ELOHIM esga lan marjemouwer dau cinogo Mesir sug nosohob. Dara lan lougwan ared debin lona gin toua. 2:42 Dangga sug Yesus men arisogomoc edebeij sisa hobjeraiyohob, kaba, en toua aimo lan naugb len laimo aremeijouhw eisaugb Lona Gohw Bedreg gin augwan dag nosa deit. 2:43 Sug len merdoc eiseisan lona gin ouwa dauwohob, kaba, Yesus mena dara mem lan lacicugb dig maran cinogoda. Doba Yesus, kaba, en eigtou se Yerusalem deb. Dangga lan lamecinaga dau sug en eigtou deb gin touwero. 2:44 Anai lan laudesa en aimo lan marusur, era lan marsir aimimoba. Doba sug lan lac marohora terimda edebeij sug loba osun lanohob. Hanoba lan lameiya en mog touebma, kaba, lan laijidougwo lan marusur dara lan marsir gini an en. Doba en emaimo len touwero. 2:45 Dangga sug lan laijidougwo, doba lan lamesma enero, kaba, lan lacicugb dig Yerusalem naugb ladogod dougwo en sunggahabi. 2:46 Sug lan ladebeij Yerusalemohob, kaba, lan ladehilon en se lona homoiyahabi, lan lamdesma en se ELOHIM Men Tuari. Anai en eigtou desij leng meru ouforoho se Musa men gomnomna sungga naugb en ouman dau areg len ledidib dou lusud. Dara en eijidougwo len an areg len ledidib dou len gin toua deb gini. 2:47 Dangga lusud laugwan sug len louman dau areg en eijidougwo len an, dara auni dou len gin, kaba, len leimiman dau en namcir. Anai areg en auni gin, kaba, ens dag en mou ouforoho naugb en ecinaga Musa men gomnomna men meijouhw augwan asesa namcirohob. 2:48 Dara Yesus mena dara mem sug lan laiya dau gin, kaba, lan laimiman dau en namcir toua. Hanoba mem en omi debin en, endagai: Indihigba, ban berei aman dag gini, anara? Anai ban abina aman amehilon ban se lona homoi, dara aman amdoc momogo medam an ban ginohoba? 2:49 Doba Yesus auni mem mer ucugb, endagai: Yan yahilon dan, anara? Anai dan Indina en arougb dan naugb dan den se men Tuari gina? Yan yamecinaga dau ginbumei? 2:50 Doba mena dara mem lan maru emobgesa en mer an areg en en dou lan ginero. 2:51 Sug Yesus auni mem mer ucugb dou lanohob, kaba, en emohoiya lan marir debero. Doba en eisa baimo lan dig meren cinogo Nasared ucugbda. Dara sug len ledebeij cinogo ingga, kaba, en emohoiya lan marir touwero. Doba en owun enin medoc arjaga deseino lan naugb eicara dou lan terimda. Dara Yesus mem, kaba, en medoc moc dougwo aremer augwan graga touwero. Doba en eic augwan gin se en medoc mes namcir. 2:52 Doba Yesus, kaba, en edag sud se maga, dara en mou ouforoho ededau mohmoh namcir. Dangga emeic ELOHIM medoc emesgiraha se en dousero. Doba eic lusud laugwan merdoc esgiraha an en toua terimda.

Lukas 3

3:1-2 Sug leng Roma meren mougt mera medam, moho Tiberius, en esedougwo men lusud se arisogomoc soramohob, kaba, ELOHIM esa mer dou Sakarias meisi, moho Yohanes, sug en eigtou se lomougwisa naugb en esai ELOHIM en moro dou lusud. Augwan gini ebiji se lona sug Pontius Pilatus esedougwo leng se Yudea, dara Herodes esedougwo leng se Galilea, dara en maguna Pilipus esedougwo leng se Iturea dara Trakonitis, dara Lisanias esedougwo leng se Abilene. Dara Hanas dara Kayapas, lan ladag Gembala Gesa Taij Meren Mougt Mera Medam naugb leng Yahudi toua. 3:3 Dangga Yohanes ec mohora se cinogo geb acec duhu Yordan naugb en esai ELOHIM en mer gin dou lusud toua, endagai: Yen yesga meijen sesar moho asesa dou ELOHIM. Dara yen yahau an dougwo naugb en aigdougwo meijen sesar augwan dau yenahabi, dan demogun yen se duhu dag ansins debin gin toua. 3:4 Augwan gini esogwa deisa areg sud hom gesai ELOHIM moro sug nosa, en moho Yesaya, en og deb sug nosa touohob, endagai: Se lona daiyamo deit, kaba, sud hom en emen se lomougwisa naugb en eija mer esesa dou lusud, endagai: Yen yesa yen meigdoc mes obosboro naugb maman Adehsud sug en en. Aninim dag lusud lesa ucina obosboro naugb meren mougt mera medam sug en einesa aud len toua. 3:5 Dangga sug yen yeiya dougb mei, kaba, yen yerba cinogo debin bedouder augwan aninim namcir. Dara sug yen yeiya menmod dara menmougb, kaba, yen yogod augwan dag bedouder aninim. Dara sug yen yeiya areg gagabgebi, kaba, yen youti augwan bobosboro namcir. Era sug yen yeiya doba areg edougougblo, kaba, yen yesinsin augwan becabeci aninim toua. 3:6 Anai sug yen yesedeb augwan asesa dag gin debohob, kaba, ELOHIM emens enin ainyes dou lusud se cinogo gin augwan naugb sug en eigdoc len dau meren sesar augwan namcir toua. 3:7 Dangga lusud leinyana sug len louman Yohanes en mer an gini, kaba, len len dau meren cinogo aud en sungga naugb en ogun len se duhu. Doba dag augwougb dous. Hang en esa mer debin len, endagai: Gareg en dau ELOHIM men gogom dou yen, hang yen yemougwin aud dan gina? Anai meijen geicara augwan dag hinogo mehir yen smougb mougwaba. 3:8 Dangga yen yens dau meijen geicara dag yen yesga meijen sesar dag misenohob dou dan nosahabi, dan demogun yen se duhu debin gin toues. Dara yen yemenara doumlo, dau sug Abraham en edag yen meijemouwa, kaba, dag ELOHIM men gogom emeb naugb yen touwero. Doba yen yesa doc dau namcir. Anai sug ELOHIM en ouwan, kaba, en eic igdahabi augwan gini beperwei dag Abraham medebeitor misen dau yen deit. Yen youman dan indir gini deigeigouhw namcir. 3:9 Dangga hang, yen yera mera geigouhw bansins dag yen yesga meijen sesar dara yahau an dougwo dag misen toua terimda. Anai ELOHIM esedeb keita se sogo meiyo debohob. Gareg dau yen en emera mera geigouhwero, kaba, en eh en, aninim dag en eh sogo gemera merero naugb en ec se smougb toua. 3:10 Sug len louman gini, kaba, len merdoc momogo icira gin namcir. Hanoba len leijidougwo Yohanes an gin ucugb deit, lendagai: Ban benara dag gin, kaba, emen emeicara dagiro, dauntoba emen emera mera geigouhw deseino ELOHIM? 3:11 Dangga Yohanes auni dou len, endagai: Gareg dau yen men sansun hwai, kaba, en eic homa dou mesi gedig men sansun ingmaro. Dara gareg dau yen men ared ingmanggebga, kaba, en ekeba ingma naugb en eic dou mesi gedig men ared ingmaro toua. 3:12 Dara leng lacgeij lusud naugb len lohw meren cinogo dou leng Roma, kaba, merug hosa dau len toua, len len aud Yohanes naugb en ogun len se duhu. Sug len louman dau areg Yohanes en dou lusud dag gragohob, kaba, len toua leijidougwo en an meren geicara, lendagai: Adehsud, emen toua emeicara dagiro, dauntoba emen emera mera geigouhw deseino ELOHIM? 3:13 Dangga Yohanes auni dou len toua, endagai: Sug yen yacgeij lusud naugb len lohw meren cinogo dou leng Roma, kaba, yen yemacgeij emedreg dau areg pemerintah ogod deinaugb lenlo. Doba yen yacgeij asesa areg pemerintah ogod an deb naugb len dous. 3:14 Dara leng sadodor len toua leijidougwo en an meren geicara, lendagai: Emen, kaba, emen toua emeicara dagiro dauntoba emen emera mera geigouhw deseino ELOHIM? Dangga Yohanes auni dou len toua, endagai: Yen yemogod len gus, dara yen yemenara yematagaij len an meren aremougb dau len touwero. Doba yen meigdoc ebtou an areg pemerintah eic dou yen dous. 3:15 Doba leng leigtou lateteij naugb lona sug ELOHIM eigdoc len dau meren gogom augwan, sug len louman Yohanes mer an gin, kaba, len lenara se merdoc mes, lendagai: Sud Hom Geigdoc Maman Dau Maman Gogom Augwan inggeng ginei? Era naroei? 3:16 Doba Yohanes ecinaga dag lusud leinyana leigtou lateteij lona sug ELOHIM eigdoc len dau meren gogom dag ginohob. Hang en emen dougwo len, endagai: Dan, kaba, dan dogun yen se duhu misen dous. Doba cum, kaba, sud hom gus en emaimo ucan dan aud yens. En moho agas medam edreg dau dan namcir. Dangga hang, emedeinyum naugb sug dan demesga aumaga dau men hwigbeimos icira en mohora touwero. Doba dan darges dau namcir. Anai en gin, kaba, en emesa Mena Gogoufu dara smougb aud yen toues. 3:17 Hanoba en emekeba yen daums, aninim dag sud hom os aigdaga mes an tramdad naugb os berban augb bogo, dauntoba loungmen ohu merila eitrij dau mogo misen eb se aigdaga mes. Dangga gareg en edag mogo misen, kaba, en ouci en debinim naugb en, aninim dag sud hom en ob mogo misen se mougwa mes naugb enin toua. Doba gareg en edag merila, kaba, en erba en se smougb gedig lusud lemob touwero, aninim dag sud hom erba merila mogud augwan se smougb toua. 3:18 Dara Yohanes emeic gainyenara hom gin dou lusud touwero. Doba sug en esai Mer Geigouhw eisaugb Krisdus dou len gin, kaba, en edidib meijouhw einyana debin gin dou len toua. Hanoba en esulou len naugb len lemaimo meren geicara dag mohon toua deitero. Doba len leineg dau naugb len laimo areg geigouhw gin dous. 3:19-20 Dara Yohanes emesai Mer Geigouhw eisaugb Krisdus gin dou leng Yahudi dousero. Doba en owun leng Galilea meren mougt mera medam, moho Herodes, en moho an men geicara gecgu einyana. Dara en en dougwo en an maguna mesouwa Herodias, sug en eihwa dau en touohob. Doba Herodes en mos emobsara an ginero. Hang en eic mos ehig deit naugb en ouf Yohanes se tu gesisug debin men geicara gecgu mohon augwan gin toua. 3:21-22 Sug Yohanes ogun len gus se duhuohob, kaba, en ogun Yesus se duhu toua. Dangga sug Yesus enin ocuncum debin gin, kaba, bogo ec dau. Hanoba Mena Gogoufu ohw dag bohobei dau bogaden aud en toua. Dauwohob, kaba, ELOHIM enara dau bogo ucan dou en toua, endagai: Bani dan Indisi gedig dan indoc gororougb ban namcir. Dara ban beic dan indoc agahugouhw an ban toua. 3:23 Sug Yesus men arisogomoc edebeij deinyor sud hom sisedeisohob, kaba, en ebiji naugb sug en esai ELOHIM mer dou lusud. Doba lusud, kaba, len loudesa Yusub en Meisi Yesus, kaba, Eli en meisi Yusub. 3:24 Matat en meisi Eli. Lewi en meisi Matat. Malki en meisi Lewi. Yanai en meisi Malki. Yusub en meisi Yanai. 3:25 Matica en meisi Yusub. Amos en meisi Matica. Nahum en meisi Amos. Hesli en meisi Nahum. 3:26 Nagai en meisi Hesli. Maat en meisi Nagai. Matica en meisi Maat. Simei en meisi Matica. Yoseg en meisi Simei. Yoda en meisi Yoseg. 3:27 Yohanan en meisi Yoda. Resa en meisi Yohanan. Serubabel en meisi Resa. Sealtiel en meisi Serubabel. Neri en meisi Sealtiel. 3:28 Kaba, Malki en meisi Neri. Adi en meisi Malki. Kosam en meisi Adi. Elmadam en meisi Kosam. Er en meisi Elmadam. 3:29 Yesua en meisi Er. Eleasar en meisi Yesua. Yorim en meisi Eleasar. Matat en meisi Yorim. Lewi en meisi Matat. 3:30 Simeon en meisi Lewi. Yehuda en meisi Simeon. Yusub en meisi Yehuda. Yonam en meisi Yusub. Eliakim en meisi Yonam. 3:31 Melea en meisi Eliakim. Mina en meisi Melea. Matata en meisi Mina. Natan en meisi Matata. Daud en meisi Natan. 3:32 Kaba, Isai en meisi Daud. Obed en meisi Isai. Boas en meisi Obed. Sarmon en meisi Boas. Nahason en meisi Sarmon. 3:33 Aminadab en meisi Nahason. Admin en meisi Aminadab. Arni en meisi Admin. Hesron en meisi Arni. Peres en meisi Hesron. Yehuda en meisi Peres. 3:34 Yakub en meisi Yehuda. Isag en meisi Yakub. Abraham en meisi Isag. Terah en meisi Abraham. Nahor en meisi Terah. 3:35 Serug en meisi Nahor. Rehu en meisi Serug. Peleg en meisi Rehu. Eber en meisi Peleg. Salmon en meisi Eber. 3:36 Kenan en meisi Salmon. Arpagsad en meisi Kenan. Sem en meisi Arpagsad. Nuh en meisi Sem. Lameg en meisi Nuh. 3:37 Metusalah en meisi Lameg. Henog en meisi Metusalah. Yared en meisi Henog. Mahalelel en meisi Yared. Kenan en meisi Mahalelel. 3:38 Enos en meisi Kenan. Sed en meisi Enos. Adam en meisi Sed. ELOHIM en meisi Adam.

Lukas 4

4:1-2 Sug Mena Gogoufu atij Yesus medoc mesohob, kaba, en einoisa Yesus dau duhu Yordan mebera dig lomougwisa naugb Bilis ainyen en sungga se lona sud hwai debin gin toua. Dara se lona augwan gin, kaba, en eigtou menuhwa asesa namcir toua. Dangga sug lona sud hwai gin ouwohob, kaba, en sireba namcir. 4:3 Hang Bilis emarougb en, endagai: Bang ELOHIM Meisi misen, kaba, ban benara dou igdahab gini beperwei dag roti naugb ban bet. 4:4 Doba Yesus auni dou en, endagai: Musa en og deb se Surad Injil Meb Mohon deb nosohob, endagai: Lusud lemeic merireseb dau sug len let ared misen dousero. 4:5 Dobnaro, kaba, Bilis ahwan Yesus aud menmod gagas medam hom naugb en ens dau mougt mera medam se cinogo gin augwan meren hancob dou en deit. Sug lan ladebeij menmodohob, kaba, Bilis ens cinogo augwan dedemeda dag mericicib ehinyahinya dou en. 4:6-7 Hanoba en ainyen en deit, endagai: Sug ban becguna dou dan naugb besijaresa dan, kaba, dan deic areg dan dens dou ban gragohob augwan dou ban dag banin aban namcir. Dara dan dogugwo areg geb se cinogo augwan gini an men gogouf cucugb dou ban toua. Anai ELOHIM eic gin augwan dou dan dag danin indan sug nosohob. Dangga hang, edeinyum naugb sug dan deic dou gareg dan douwan toua. 4:8 Doba Yesus auni dou en, endagai: Musa en og deb eisaugb gin toua se Surad Injil Meb Mohon deb nosohob, endagai: Yen yesijaresa yecguna dou meijen Adehsud Geis Huhugb. Dara yen yeicara yaimo en dous. Anai enin dous eng meijen ELOHIM gin. 4:9 Dobnaro, kaba, Bilis ahwan Yesus dig Yerusalem naugb lan ladeisaugb se ELOHIM Men Tuari medgomori deit. Sug lan ladeisaugwohob, kaba, Bilis arougb Yesus, endagai: Bang ELOHIM Meisi misen, kaba, ban bahacugb banin dau sugin dig cinogo gaihida. 4:10 Anai sud hom en erba Ugwaremer se Surad Injil Meb Mohon deb sug nosohob, endagai: ELOHIM emarougb men malaikadir naugb len lemesedougwo bans. 4:11 Hang len lemoc merisira naugb ban, dauntoba ban abaga dara ban abohora augwan emoc igdahab touwero. 4:12 Doba Yesus auni dou en deit, endagai: Musa en og deb eisaugb gin se Surad Injil Meb Mohon deb touohob, endagai: Yen yemainyen Adehsud, meijen ELOHIM enlo. 4:13 Sug Bilis ainyen Yesus se aremer homoi ginohob, kaba, Bilis aisacij dau Yesus namcir. Hanoba en eigtou naugb lona ingmahabi, en emdainyen en deit. 4:14-15 Sug Bilis aisacij dau enohob, kaba, Yesus en toua eihwededau sungga dig leng Galilea meren hancob. Dara Mena Gogoufu eic goubesa dou en naugb en ens ELOHIM mer men meijouhw dou leng Yahudi se meren tuari augwan toua. Dangga hang, lusud lemeigdoumesa en moho an gin namcir. Dara len lagaha merir an en dou len geb acec cinogo ingga len laugwan toua. 4:16 Sug Yesus ens meijouhw dou len sungga sungga, kaba, en edebeij men cinogo gedag sud deisa Nasared toua. Dangga sug leng Yahudi meren Lona Gemeicaresero edebeijohob, kaba, en einesa meren tuari naugb en esai ELOHIM moro dou len sungga toua. Anai en eicara dangga terimdohob. 4:17 Sug en eisa besa naugb en ebedbed dou len, kaba, len leic sud hom gesai ELOHIM moro nosa, moho Yesaya, men surad dou en naugb en ecic toua. Sug en ehohob, kaba, en esma medagas hom geb se surad ingga. Hanoba en ecic dag gin dou len, endagai: 4:18 Maman Adehsud en esa Mena Gogoufu eigtou desij danohob. Anai en eigdoumesa dan indoho naugb sug dan desai en mer geigouhw dou leng merunggwereij laugwan. Dara en esa dan naugb dan desai en moro bagaha dou sogougwir se cinogo augwan toua. Dauntoba len lemedag sogougb deitero, doba len lecinaga dag lona naugb sug en ancoho len dau gin toua enohob. Dara en esa dan naugb dan desga lusud meriresmougb naugb len leiya lo asesa ucugb deit. Dara dan deigdoumesa aguci dau leng gedig gogom geb debin lenohob dau len. 4:19 Dara dan desai dou len dag maman Adehsud medoc eineg an len naugb sug en eicara dag gin an len, kaba, ebeij deinyor touohob. 4:20 Sug en ecic gin dou lenohob, kaba, en oud surad ingga debinim. Hanoba en eic surad dou sud hom gedeijan mougt se tuari ingga ucugb deit. Sug en eic dou en dauwohob, kaba, en ecguna beigtou se maija moc naugb en edidib meijouhw ucan dou len toua. Doba lusud, kaba, len laugwan len merires eb debin en toutou namcir. 4:21 Doba Yesus, kaba, en eic mos naugb ens meijouhw dou len namcir. Hanoba en enara dou len, endagai: Medagas gedig yen youman gini, kaba, ebiji naugb yen se lona sug yen youman irogini toua. 4:22 Sug len louman en mer an gini, kaba, len laugwan largomun, lendagai: Indeic, areg en ens dou maman gini, kaba, misen dara eigouhw namcir. Doba dagiro, hang, en ecinaga augwan gina? Anai eni Yusub meisi dous. 4:23 Doba Yesus auni len mer an ucugb, endagai: Dan decinaga yen youwan naugb dan dens ganusbus areg yen youman dan dens dou leng se Kapernaumohob ingma dou yen se indan cinogo gin touahabi. Anai dan decinaga yen yesedeb yen meigdoc mesohob naugb yen yens dau maman aremeijouhw dou dan, yendagai: Bani sud hom mou ouforoho naugb ban beic geigouhw dou len gusohob, kaba, ban beic geigouhw dou banin toua. 4:24 Doba dan demeic ganusbus ingma dou yenero. Anai yen youman dan indir deigeigouhw. Sud hom gesai ELOHIM moro dou men lusud se enin men cinogo, kaba, len lemeigdoumesa en moho an ginero. Doba len lowun en moho an gin dous. Augwan gini asesa dag misen namcir. 4:25 Anai yen yecinaga dau lona sug Elias en esai ELOHIM moro dou maman lusud sug nosa, kaba, ELOHIM ouf bogo dougwo los an len se cinogo augwan se arisogomoc homoi mougwu. Dangga sug sir gogoufu einesa cinogo augwan, kaba, debdes leinyana toua merugwengga se mamang Israel maman hancob gin toua. 4:26 Doba ELOHIM emesa Elias naugb emousa sud hom dau len ginero. Doba en esa en naugb en ousa debdes hom dau lugmahara se cinogo Sarpad se leng Sidon meren hancob gin dous. 4:27 Dangga toua, sug Elisa en esai ELOHIM moro dou maman lusud sug nosa, kaba, aremos ogoufu et lusud leinyana se mamang Israel maman hancob toua. Doba ELOHIM emarougb en naugb en emeic geingmos agauwesa dou sud hom dau len ginero. Doba en arougb en naugb en eic geingmos agauwesa dou sud hom dau lugmahara, moho Naaman, se leng Siria meren hancob gin toua dous. Yen youman dan indir an areg dan den dou yen gini deigeigouhw. Anai augwan gini asesa dag misen namcirohob. 4:28 Sug len louman, doba Yesus owun len dag ginohob, kaba, leng se tuari mes ingga len laugwan merdoc obgos an en namcir. 4:29 Hanoba len leisa lesa naugb locirma Yesus dau meren cinogo dig medigo. Dangga sug len lagaigeij en mesirohob, kaba, len lohugouhw en se menmod naugb sug len ledahacugb en se cigaha toua. Anai len lohud meren tu se cigaha mondudi ginohob. 4:30 Doba Yesus ehin maga se merisira mes dig len meridigo namcir. Hanoba en eihwededau len toua. 4:31 Dangga, kaba, Yesus en emeigtousa Nasared deitero. Doba en eisa dau namcir. Hanoba en eihweda se cinogo Kapernaum naugb en eigtou sungga dag en gun deit. Dangga sug leng Yahudi meren Lona Gemeicaresero ebijohob, kaba, en toua einesa meren tuari naugb en edidib ELOHIM mer men meijouhw dou len sungga toua. 4:32 Doba sug len louman dau areg en edidib dou len gin, kaba, len leimiman dau gin. Anai en emenara dag emeses meresa dou lenero. Doba en os badi augwan dara goubesa dag misen dou len namcir. 4:33 Dara sug Yesus edidib meijouhw dou len gin, kaba, sud hom mena mog mog eisa en medoc mesohob, kaba, en toua moongga desij len se tuari mes ingga. Dangga sug en eiya Yesusohob, kaba, en esa mer medam debin en, endagai: 4:34 Ayou, Yesus dau cinogo Nasared. Ban ben sugin naugb bedeberou emen eng, gina? Ban ben naugb beic mor mor dou emen namcir danggei? Anai dan decinaga ELOHIM ouci ban douwoswos debinim naugb ginohob. 4:35 Doba Yesus esa mer debin en, endagai: Abiresou. Ban beihwededau sud hom ingga namcir. Dangga mena mog mog os sud hom ingga badro abeba len laugwan meriresi. Hanoba en eihwededau en namcir. Dara en emeic sud hom ingga en mog emerij touwero. 4:36 Doba sug leng se tuari mes ingga len leiya dau gin, kaba, len merug omom dau gin namcir. Hanoba len leijidougwom ucucugb, lendagai: Areg geb se sud hom gin mers, hang merna mog mog lemaimo en mer naugb lemeihwededau sud hom gina? Anai en emenara dara mer garjaga dou lenero. Doba en edag sud hom moho agas naugb en enara se mer goubesa dou len dous. 4:37 Dangga len lecic Yesus men geicara gin doum terimda agaha becinten se cinogo geb acec cinogo Kapernaum ingga augwan namcir. 4:38 Sug Yesus ocirma mena mog mog dau sud hom gragohob, kaba, en eihwededau tuari aud Simon se men tu deit. Doba se Simon men tu gin, kaba, en memba toua areba mos esrougb medam namcir. Dangga, kaba, len lacgeij Yesus naugb en eic geigouhw dou en toua. 4:39 Sug Yesus einesa en men dimeiyohob, kaba, en esa desij en mougt. Hanoba en ocirma men gesrougb ingga beihwededau en namcir. Sug en mos gesrougb graga edinohob, kaba, en eisa dedemeda naugb ousa len toua. 4:40 Dangga ebeij deinyor sug igda obsaresohob, kaba, leng sungga loho leng areber aingma aingma aud Yesus naugb eic geigouhw dou len. Sug len loho len gin aud enohob, kaba, en ob mesira deisa astesda sud hom yom. Hanoba en eic geigouhw dou len laugwan toua. 4:41 Sug en eic geigouhw dou leng areber ginohob, kaba, merna mog mog leihwededau len gus toua. Hanoba sug len lagunya dau len ineg, kaba, len leija en moho dagasges, lendagai: Bang ELOHIM Meis mohora hom graga eng ban ben gini. Doba Yesus esa mer debin len, dauntoba len lemeigdoumesa en moho gin tairirlo. Anai len lecinaga eni Sud Hom Geigdoc Lusud Dau Meren Gogom Augwanohob. 4:42 Sug Yesus atou terimda lona esgohob, kaba, en eisa beihwededau Kapernaum naugb en edeigtou se losneseba dou enin dous. Doba leng se cinogo ingga len ledocigei en se losneseba gin toua. Sug len ledebeij en sunggohob, kaba, len ledenara lad en medoc mes, lendagai: Ban bemeihweda se cinogo gus dau emenlo. Doba ban beigtou an emen sugin dous. 4:43 Doba Yesus enara bauni len merir ucugb, endagai: Naro. ELOHIM en ouwan naugb dan desai en Mer Geigouhw dau lona sug en oiharaga lusud ucugb dou len se cinogo gus gus toua, anai gin, hang, en emesa dan se cinogo gini. 4:44 Dangga hang, en eihweda naugb en esai Mer Geigouhw gin astesda se leng Yahudi meren tuari geb se leng Yudea meren hancob augwan namcir.

Lukas 5

5:1 Se lona hom sug Yesus en moongga se Genasared meberohob, kaba, lusud leinyana louwa debin en sug en esai ELOHIM mer dou len sungga. 5:2 Dangga sug en eiya ij mes mogud hwai geb se dum mebera, kaba, en aingmo deisa hom. Anai leng meru ouforoho naugb lerba diara debin hosei, kaba, len ledogon meren diara deb se lonog dauwohob. 5:3 Doba ij gen aingmo gin, kaba, Simon men ij. Dangga Yesus arougb en, endagai: Ban barougb ij gin gurerei an dan dig mediahabi. Sug Simon arougb ij an en dig mediohob, kaba, Yesus eigtou se ij mes ingga. Hanoba en edidib ELOHIM mer men meijouhw dou leng leinyana ingga ucugb dig lonogeda. 5:4 Sug Yesus edidib aremeijouhw augwan dou len bouwohob, kaba, en arougb Simon deit, endagai: Ban bogo ij dig medi gacda naugb ban berba diara debin hosei deitahabi. 5:5 Doba Simon enara dougwo Yesus mer, endagai: Adehsud, emen emeic emen emug erij dau loba greb, terimda edebeij lona esga namcir. Doba emen ememesma hosei homero. Doba sug ban bouwan, kaba, dan daimo ban abir naugb derba diara debin hosei deitahabi. 5:6 Sug Petrus dara men logodeh len laimo Yesus mer an ginohob, kaba, len lesma hosei einyana atij diara mes bobogougb an namcir. 5:7 Dangga, kaba, len lasrad mersir dag Yakobus dara Yohanes, lan toua, laisa ij homa dau mebera en naugb lan ladeic hosei ingma dau lenahabi. Sug lan laisa ij enohob, kaba, len leic hosei deisa ij gini hwas batij bomdian namcir. 5:8-10 Sug Simon Petrus an men logodeh laugwan se ingmes len leiya, kaba, len merdoc omom dau gini. Dara en mesi Sebedeus meisi, Yakobus dara Yohanes, lan toua laiya gin, kaba, lan marug omom an namcir. Dangga Simon Petrus ecguna mohorbrida se ing mes deseino Yesus. Hanoba en enara dou en, endagai: Adehsud, ban bemeigtou desij dan deitero, doba ban beihwededau dan iteitogin. Anai bani sud hom gecabeci namcir. Doba dan, kaba, sud hom gebesesar dous. Doba Yesus enara bad Simon medoc mes, endagai: Ban bemahaulo. Anai dau iteitogin, kaba, ban bemerba diara debin hosei dag gin deitero. Doba ban bahwan lusud aud dan, dauntoba len ledag indan logodeh deit. 5:11 Dangga sug len ledec ij hwas deb se lonog dauwohob, kaba, len larges dau meren ara ara augwan deb sungga. Hanoba len laimo Yesus namcir. 5:12 Sug Yesus en moongga se cinogo hom dau leng Galilea meren hancob, kaba, sud hom aremos gogoufu et en maga augwanohob, kaba, en toua moongga sungga. Dangga sug en eiya Yesus, kaba, en ecguna bamuhumlo deseino en. Hanoba en eiyagarij en, endagai: Adehsud, dan decinaga aban goubesa edeinyum naugb sug ban beic geigouhw dou dan. Dangga hang, ban bouwan, kaba, ban beic geigouhw dou danahabi. Anai sug aremos gogoufu et dan dag gini, kaba, emedeinyum naugb sug dan desijaresa ELOHIM deiterohob, doba dan dogor deseino en namcir. 5:13 Sug Yesus ouman en mer dag gin, kaba, en ou mesira bos eni. Hanoba en ousa deisa en mer an, endagai: Dan douwan naugb deic geigouhw dou ban. Dauwohob, kaba, en enara dou en deit, endagai: Ban beigouhwohob. Sug Yesus enara dou en dangga inegohob, kaba, aremos gogoufu augwan ediyebeiya dau en maga namcir toua. 5:14 Sug en eigouhwohob, kaba, Yesus oungben en dougwo namcir, endagai: Ban bemedecic aremer gin dou len guserobma. Doba ban bidens ban abaga dou gembala gesa taij nosahabi. Dauntoba en ouma debin ban dag ban abaga ecabecohob. Dauwohob, kaba, ban beic ara ara bauwaharo dou ELOHIM, aimo dau areg Musa en og deb se Surad Injil Meb Mohon an gin debohob. Dauntoba lusud laugwan len toua lecinaga dag ban becabeci deseino ELOHIM deitohob. 5:15 Doba Yesus men geicara gin, kaba, agaha dou len gus laugwan bedreg dau nosa deit. Dangga hang, lusud leinyana gougwa len len aud en naugb len louman dau areg en ebedbed dou len dara eic geigouhw dou leng areber laugwan toua. 5:16 Sug Yesus ebedbed dara eic geigouhw dou len laugwanohob, kaba, en eihwededau len se losneseba naugb en edocuncum dou ELOHIM sungga. 5:17 Se lona hom sug Yesus edidib ELOHIM mer men meijouhw dou lusud se tu hom deit, kaba, leng Parisi dara leng meru ouforoho se Musa men gomnomna, len toua merugwengga desij en naugb len louman dau areg en edidib dou lusud gin toua. Ligbum dau len, kaba, len len dau astesda cinogo geb se leng Galilea meren hancob. Dara ligbum, kaba, len len dau astesda cinogo geb se leng Yudea meren hancob. Dara ligbum deit, kaba, len len dau cinogo Yerusalem toua. Dara maman Adehsud men goubesa ousa Yesus naugb sug en eic geigouhw dou leng areber leinyana toua. 5:18 Dangga ban bouman deigeigouhw. Irir sug Yesus edidib ELOHIM mer men meijouhw dou len se dimei mesaba, kaba, lusud merug hosa len lodo bigon sud hom maga omomtom naugb len ledarges en deseino Yesus, dauntoba Yesus eic geigouhw dou en touahabi. 5:19 Doba emedeinyum naugb sug len lemeinesero. Anai lusud leinyana lohudebesim dougwo misis an lendaha. Dangga, kaba, len lodo sud hom ingga laisaugb se uf medgomori. Sug len ledebeij se uf medgomorohob, kaba, len loguga uf dau. Hanoba len losus aumagan sud hom ingga deseino Yesus. 5:20 Sug Yesus eiya, doba len merdoc ebdebin an en dag ginohob, kaba, en enara dou sud hom maga omomtom gini, endagai: Insi, dan daigdougwo aban sesar augwan dau ban. 5:21 Doba sug leng meru ouforoho se Musa men gomnomna, dara leng Parisi, len louman dau gini, kaba, len lenara doum. Hanoba len leijidougwom, lendagai: Sud hom gini eigdoumesa enin moho dag ara, hang en emeic ELOHIM moho bacecim gina? Anai ELOHIM enin dous eng aigdougwo lusud meren sesar dau len. 5:22 Doba Yesus ecinaga dau areg len leijidougwom an ginohob. Hang en enara debin len, endagai: Yen yauwam se yen meigdoc mes dangga, anara? 5:23 Anai sug dan denara dou sud hom gin, dendag dan daigdougwo aban sesar dau banohob. Era, dan darougb en, dendag ban beisa besa naugb bec abohora, kaba, yen youdesa gedigirong eijouhwa? Naro, hwas ogom namcir. 5:24 Doba dan douwan dens dou yen dag ELOHIM eigdoumesa Lusud Meraguna Mebin dan indoho naugb dan daigdougwo lusud meren sesar augwan dau lenohob. Sug Yesus etaha len merir an danggohob, kaba, en arougb sud hom maga omomtom ingga, endagai: Ban beisa, bod aban sidgwa. Hanoba ban beihwedan dig aban tueda. 5:25 Sug Yesus arougb en dag gin inegohob, kaba, en eisa dedemeda abeba len ingga meriresi. Hanoba en eigdoumesa men sidgwa naugb en eihwedan se men tu, dareg en agahugouhw an ELOHIM terimda toua. 5:26 Sug lusud leiya dau gin, kaba, len merdoc omom an namcir. Hanoba len lagahugouhw an ELOHIM dareg medoc ahau dau en toua. Dauwohob, kaba, len lenara doum, lendagai: Se lona hom gin, kaba, maman mameiya aremer dag ganusbus namcirohob. 5:27 Sug Yesus eic geigouhw dou sud hom maga omomtom graga dauwohob, kaba, en eihwededau cinogo ingga se cinogo gus deit. Sug en ec, kaba, en eiya, doba sud hom, moho Lewi, en eigtou se tu meij se ucina mebera deb. Eni sud hom gedig en acgeij lusud naugb len lohw meren cinogo dou leng Roma. Dangga Yesus eija en, endagai: Ban baicira dan iteitogini. 5:28 Sug Lewi ouman gin, kaba, en arges men aremougb augwan sungga deb. Hanoba en eisa besa naugb aimo Yesus dau namcir. 5:29 Se lona hom deit, kaba, Lewi ougwan ared medam dou Yesus an men logodeh se men tu. Dangga leng lacgeij lusud naugb len lohw cinogo dou leng Roma, kaba, leinyana len len naugb letara aninim dara len. Dara lusud gus laimo len naugb len letara toua. 5:30 Doba sug leng Parisi dara leng meru ouforoho se Musa men gomnomna, len leiya dau gin, kaba, len lenara ucucugb an Yesus men logodeh, lendagai: Dagiro, naugwe hang, yen yetara dara yen yegara aninim dara leng lacgeij lusud naugb len lohw cinogo dou leng Roma dara leng lebesesar gina? 5:31 Doba sug Yesus ouman gin, kaba, en auni dou len. Hanoba en eic gainyenara hom dou len, endagai: Leng leigouhwohob, kaba, len lemehilon leng los merinuhwa ginero. Doba leng areber dous eng lehilon len. 5:32 Dangga hang, leng leigdoumesa lenin meroho dag len laimo areg asesa ELOHIM enin medoc mesohob, kaba, dan demeija len naugb len lesga meren sesar dou ELOHIM enero. Doba dan deija leng lebesesar dous, dauntoba len lesga meren sesar meren sesar dou ELOHIM. 5:33 Doba leng Parisi dara leng meru ouforoho se Musa men gomnomna graga, len lenara merir laised Yesus an aremer hom deit, lendagai: Dagiro naugb aban logodeh meren geicara aninim dag Yohanes dara emen logodeh touwero? Anai Yohanes men logodeh dara emen logodeh, kaba, len lehig dau ared mougwa einyana naugb len locuncum dou ELOHIM esesa terimda. Doba aban logodeh, kaba, len lemehig dau ared mougwa homero, doba len letara dara legara aibibrida namcir. 5:34 Dangga Yesus enara bauni ucugb dou len, endagai: Yen youdesa dagiro? Sug sud hom geic mesouwa ougwanara debin lan, kaba, en en dougwo mesir naugb len lehig dau men ared gougwan ginei? Naro. Sug len merugwengga desij en, kaba, len lemehig dau men aredero. Doba len letara dara legara dara en terimda. 5:35 Doba cum, kaba, lusud lagaigeij en dau mesir. Se lona ingga, kaba, en mesir len lemetara dara lemegara deitero. Doba len lebiji naugb lehig dau ared toua, anai len merdoc momogo an enohob. 5:36 Sug Yesus enara bauni len merir ucugwohob, kaba, en eic gainyenara hwai debin gin dou len, dag len lemeic areg mohon naugb lemahurim dara areg menauwero. Hanoba en enara dou len, endagai: Sud hom ingma en emagasa sansun menau, hanoba en emogun dara sansun mohon touwero. Anai sug en eicara dag gin, kaba, en emeic sansun menau gini obogougb dousero. Doba sansun met menau gin toua emehigehi sansun mohon touwero. 5:37-38 Dara sud hom ingma en emeic anggur mohu menau emeiri deisa aremeta mos mohonero. Doba en eic anggur mohu menau gini eir se aremeta mos menau dous. Anai sug en eir anggur mohu menau deisa aremeta mos mohon, kaba, cum, anggur mohu menau men oubesa bagan bobogougb an anggur mohu baicarehiro. Hang mos mohon toua ecgu namcir. 5:39 Dangga toua, sug sud hom en eg anggur mohu mohon bogod en medoc mesohob, kaba, cum, en mou emehigehi anggur mohu menau naugb en emeg touwero. Anai en enara, endagai: Anggur mohu mohon, kaba, ahaufo edreg dau menau gin namcir.

Lukas 6

6:1 Se lona hom deit sug Yesus ec an men logodeh asa ucina geragasa tramdad meda, kaba, men logodeh len leised tramdad mera. Hanoba len lehin se len merisira, dauntoba mera etrij dau mogahabi, len lemet toua. 6:2 Doba lona sug Yesus men logodeh, len leised tramdad se gin, kaba, leng Yahudi meren lona naugb len lemeicaresero. Dangga merug hosa dau leng Parisi sug len leiya dau gin, kaba, len len dougwo Yesus men logodeh an gini, lendagai: Dagiro, naugwe hang, yen yeic meijus naugb yen yeised tramdad mera se Lona Gemeicaresero gin. Anai lona gin, kaba, Musa men gomnomna en dougwo maman an ginohoba? 6:3 Doba Yesus aisan medagas dau Daud benara dou len, bendagai: Yen yecic dau Daud an men logodeh meren geicara sug nosohobei? Era, ingmebmei? 6:4 Anai sug sirebeni, kaba, en einesa ELOHIM Men Tuari Dau Hugbei naugb en et roti gedig len lauwaharo dou ELOHIM enohob. Dara en eic dou men logodeh naugb len let toua. Dangga len toua ledreg dau Musa men gomnomnohob. Anai roti gin, kaba, emedeinyum naugb leng aibibra len lemetero. Doba naugb gembala gesa taij mogud dous eng len let. 6:5 Sug Yesus enara dag gin dou lenohob, kaba, en enara dou len deit, endagai: Sug Daud an men logodeh, len toua ledreg Musa men gomnomna dag ginohob, kaba, eigouhw naugb indan logodeh leicara laimo dangga toua. Anai Lusud Meraguna Mebin danin dedag mougt mera medam naugb Lona Gemeicaresero gin touohob. 6:6 Se Lona Gemeicaresero hom deit sug Yesus einesa leng Yahudi meren tuari naugb en edidib ELOHIM mer men meijouhw dou lusud, kaba, sud hom mesira misen omom en toua moongga desij len. 6:7 Dara leng meru ouforoho se Musa men gomnomna dara leng Parisi, len toua merugwengga se tuari mes naugb len lauweila dougwo Yesus an men geicara dag en eicara bedreg dau Musa men gomnomna deitei? Era naroei? Anai len louwan lehilon ucina naugb len loho las en deseino meren mougtir. Dangga hang, len lemocigei en terimda. Dauntoba sug len leiya, doba en eic geigouhw dou sud hom ingga se Lona Gemeicaresero gin deit, kaba, len ledoho ledos en namcir. 6:8 Doba Yesus en ecinaga dau areg len lesedeb se len merdoc mes naugb en inggohob. Dangga en enara dou sud hom mesira omom ingga, endagai: Ban beisa besa. Hanoba ban bin naugb bidesa ainyes sugin toua. 6:9 Sug sud hom gini eisa bidesa desij Yesusohob, kaba, Yesus eijidougwo leng leigtou se tuari mes ingga, endagai: Musa men gomnomna enara dagiro dou maman eisaugb lona gina? Maic geigouhw, era maic gecgu anirei? Era maic len merna agau, era maic gomom dou len dousei? 6:10 Sug Yesus eijidougwo len an ginohob, kaba, en ei mairesi dara len laugwan. Hanoba en arougb sud hom mesira omom ingga, endagai: Ban bou absireda. Sug sud hom ingga en aimo Yesus mer naugb en ou mesirohob, kaba, en mesira eigouhw namcir. 6:11 Sug leng meru ouforoho se Musa men gomnomna dara leng Parisi, len leiya dau gin, kaba, len merdoc esrougb an Yesus namcir. Hanoba len lenara doum, lendagai: Maman mab ara dara sud hom gina? 6:12 Se lona hom sug Yesus edidib ELOHIM mer men meijouhw dou lusud gini, kaba, Yesus eisaugb dig menmougb hom naugb en edocuncum dou ELOHIM dou enin sungga. Sug en ocuncum dou enin gini, kaba, en emecicugb dedemedero, doba en ocuncum terimda bedebeij lona esga namcir. 6:13 Dangga sug lona esgohob, kaba, en eija men logodeh laugwan, len len aud eni. Sug len ledebeij enohob, kaba, en eijidougwo lusud merug sisa hobjerai dau len ingga len meroho naugb len lesai en moro dou lusud toua. 6:14-15 Leng merug sisa hobjerai gin, kaba, len meroho dag gini: Hom, kaba, en moho dag Simon, doba Yesus esagai en moho deit dag Petrus toua. Dara len gus, kaba, len meroho dag Andreas, Simon magto, Yakobus, Yohanes, Pilipus, Bartolomeus, Matius, Tomas, Yakobus, Alpius meisi. Dara Simon Selotis, lusud leija en moho dag gin, anai sug nosa, kaba, en aimo lusud naugb len lebehnehino meren cinogo dougwo leng Romohob. 6:16 Dara hom deit, kaba, en moho Yudas, Yakobus meisi. Dara sud hom deit, kaba, eni sud hom gohw Yesus se leng Yahudi meren mougtir merisira. En moho Yudas, dau cinogo Keriod. 6:17 Sug Yesus ouci men lusud merug sisa hobjerai ginohob, kaba, en ouwadan len dig dougweda. Sug len ledebeij dougwohob, kaba, en edebeij usi gedouder hom, kaba, en esa dei sungga. Anai en eiya, doba lusud leinyana gougwa dau men logodeh gus, dara lusud dau leng Yudea meren hancob, dara cinogo Yerusalem, dara cinogo Tirus, dara Sidon geb se dum mebera, len loucimdeb sungga naugb enohob. Anai len louwan naugb sug en esai ELOHIM moro dou len dara naugb sug en eic geigouhw dou len toua. Dangga sug en ebedbed dou lenohob, kaba, en eic geigouhw dou leng areber. 6:18 Dara leng merna mog mog einesa len merdoc mesohob, kaba, en ocirma len dau toua. 6:19 Sug lusud gus leiya Yesus eic geigouhw dou len danggohob, kaba, len laugwan lebedbedim icira naugb len los en maga toua. Anai len leiya, doba Yesus men goubesa agunya dau en naugb en eic geigouhw dou lusud leinyanohob. Dangga gareg dau len sug en os en magohob, kaba, len leigouhw dedemeda iteitongga toua. 6:20 Sug Yesus eic geigouhw dou lusud laugwan dauwohob, kaba, en auweila men logodeh toutou. Hanoba en enara bad len merdoc mes ucan deit, endagai: Gareg dau yen en monggwereij se cinogo gin, kaba, en medoc momogo an ginero. Doba en agahugouhw an dous, anai cum, kaba, ELOHIM emoiharaga yen ucugbs. 6:21 Dara yen meigdoc emeijesan sug sireba yen touwero. Doba yen meigdoc eigouhw an gin terimda, anai cum, kaba, ELOHIM emeic ared einyana dou yens. Dara gareg dau yen en medoc momogo, anai aremer einyana eb naugb en terimda, kaba, cum, en emeb deitero. Doba ELOHIM eic geigouhw dou en naugb en agahugouhw an namcir. 6:22-23 Dara yen meigdoc momogo dau sug lusud merdoc esrougb an yen, dara len lasidged yen, dara len lesmesman yen, dara len leic yen meijoho lacecim icira Lusud Meraguna Mebin dan indoho gin touwero. Doba yen yagahugouhw dara yen yesogwesa an gin dous. Anai ELOHIM esedeb siouwa medam deb se bogo naugb yenohob. Hang yen meigdoc momogo dau sug len leic gecgu dag gin dou yenero. Doba yen meigdoc eigouhw an gin dous. Anai len merjemouwer leicara dangga dau leng lesai ELOHIM en moro dou len sug nosa touohob. 6:24 Doba ogom medam naugb yeng meijisoho mougb gini. Anai yen yeic meijisoho mougb se cinogo gini beic yen meigdoc eigouhw dou yen bedeinyumohob. 6:25 Dara ogom medam naugb yeng yet ared se cinogo gin beica yen namcirohob. Anai cum, kaba, sireba yen beb huhugb terimda. Dara yen yehilon ucina naugb yen yagahugouhw an terimda, kaba, cum, yen yemagahugouhw toua deitero. Doba ELOHIM emeic gogom dou yen naugb yen yeb dara yeiyogoseser terimda. 6:26 Dara ogom medam naugb yen gedig lusud leigdoumesa yen meijoho se cinogo gini. Anai len merjemouwer leicara dangga dou leng lesai ELOHIM moro areibahau dou len sug nosa touohob. 6:27 Dangga yeng youman dan indir an gini, kaba, dan desulou yen dag gin toua, dendagai: Yen meigdoc emecgwan meijen moc deitero, doba yen meigdoc gororougb len den den dous. Dara gareg en medoc mog mog an yen, kaba, yen yemauni gecgu dou en touwero. Doba yen yauni areg geigouhw dou en. 6:28 Era sug lusud lesij meijoho se seiseij, kaba, yen yemauni dangga dou len touwero. Doba yen yacgeij ELOHIM naugb en eic geigouhw den den dou len dous. Era sug lusud leicara ecgwan yen, kaba, yen yemeicara ecgwan dou len ucugwero. Doba yen yacgeij ELOHIM naugb en eic geigouhw dou len. 6:29 Era sug sud hom oto ban abumin nagama, kaba, ban beineg an dig nagama dou en deit naugb en oto. Era sug sud hom esma meijen sansun gouji dau yen, kaba, yen yemagaigeij sansun gin dara meigdocero. Doba yen yeic mogurei geb se meijus yaos dara dou en. 6:30 Sug areg gesij lusud, hanoba len lougb aud yen, kaba, yen meigdoc emagadgeij an lenlo. Doba yen meigdoc eineg an len naugb yen yeic areg len lougb an aud yen ingga dou len toua. Dara sug len lagungun ara ara dau yen, kaba, yen yemacgeij gin ucugb dau len touwero. Doba yen meigdoc obsara dau gin dou len toua terimda. 6:31 Dangga sug yen youwan len gus leicara eigouhw an yen, kaba, yen toua yeicara eigouhw an len nosahabi. 6:32 Anai sug yen meigdoc gororougb leng merdoc gororougb yen aiyei dous, kaba, ELOHIM eigdoumesa yen meijoho an gin dagiro? Anai meijen geicara gini emeb susugb dau leng lebesesar meren geicara touwero, doba aninim dous. 6:33 Era sug yen yeicara eigouhw an leng leicara geigouhw an yen aiyei dous, kaba, ELOHIM eigdoumesa yen meijoho an gin dagiro? Anai meijen geicara gin, kaba, emeb susugb dau leng lebesesar meren geicara touwero, doba aninim dous. 6:34 Era sug yen yohw aremougb yesi leng gus aiyei, dauntoba yen youwan naugb len loc meijen aremougb dara cufu ucugb dou yen dous, kaba, ELOHIM eigdoumesa yen meijoho an gin dagiro? Anai leng lebesesar namcir, kaba, len toua lohw aremougb doum naugb yesi leng gus aiyei dangga terimdohob. 6:35 Dangga yen meigdoc emecgwan meijen mocero. Dara yen meigdoc emagadgeij an len gus touwero. Doba yen meigdoc gororougb meijen moc len laugwan den den dous. Dara yen meigdoc eigouhw an lusud toua. Dara yen Meijina emeiseisan areg yen yohw dou lusud touwero. Doba sug len lougb aud yen, kaba, yen yemeda moro ucugblo. Doba yen yarges yen meisira an len namcir. Anai sug yen yeicara dag gini yen Meijina Adehsud Gen Moho Eb Taiba Augwan se bogo en eic siouwa medam bauni ucugb dou yen. Dara en eigdoumesa yen dag en mogwihi mogo misen toua. Anai en, kaba, en medoc emagadgeij an leng merug mog dara leng merdoc agas naugb len lemen sijo dou en touwero. Doba en medoc eineg an len laugwan naugb en eic ara ara dou len toua. 6:36 Dangga yen meigdoc eineg an lusud terimda, aninim dag yen Meijina se bogo en medoc eineg an lusud laugwan touohob. 6:37 Dara yen meigdoc emagadgeij an lusud naugb yen yemowun lenlo. Dara yen yemahacugb gogom debin len touwero. Doba yen yaigdougwo meren aremer terimda. Anai sug yen yeicara dag gin, kaba, ELOHIM en toua medoc emagadgeij an yen naugb en emowun yenero. Dara en emahacugb gogom debin yen touwero, doba en aigdougwo meijen sesar augwan toua terimda. 6:38 Dara yen meigdoc emoungmerema an meijen aremougb touwero. Doba yen meigdoc edag liseh naugb yen yagaha yen meisira an meijen aremougb ingma dou lusud gus toua. Anai sug yen yeicara dag gin, kaba, ELOHIM en toua medoc edag liseh an yen naugb en eic ara ara gaiyansa dou yen toua. Dangga sug yen yeic arai meisira geijouhw dou len gus, kaba, ELOHIM eic arai mesira geijouhw dou yen toua. Doba sug yen yeic arai meisira gogom dou len gus, kaba, ELOHIM eicara dangga bauni dou yen toua. 6:39 Sug Yesus ens aremer gin augwan dou men logodeh dauwohob, kaba, en eic gainyenara hosa debin gin dou len deit, endagai: Yen yemedag len merires mougwero, doba yen yecinaga meijouhw augwan asesa nosahabi. Anai sug sud hom en mairesmougb, kaba, en einoisa en mesi mairesmougb toua, kaba, cum, lahwas laobsara se cigaha namcir. 6:40 Dara yen yemeigdoumesa yenin meijoho dag yen yecinaga augwan dag meijen guru touwero. Doba yen yowun yenin meigdoc mes arjaga naugb yen yaimo areg en ens dou yen dousahabi, kaba, yen yemedag en toua. 6:41 Dangga dagiro, naugwe hang, yen yemauweila len gus an meren aremoslos geb se len merires, doba yen yemauweila sogo meb mehir medam geb dougwo yenin meijires habero, anara? 6:42 Era dagiro, naugwe hang, yen yenara dou yen meisir len gus an meren aremoslos geb se len meriresi naugb yen yeic dau lena? Doba yen yemeiya sogo meb mehir medam geb dougwo yenin meijires habero, anara? Dangga, isnaro. Doba esloulougb naugb yen yeic sogo meb mehir geb dougwo yen meijires nosahabi, yen yemasid aremoslos geb se len gus merires toua. Anai sug yen yemeicara danggero, kaba, yen yedag lusud gedig len leicara larerei lusud merires dous. 6:43 Sug Yesus eic gainyenara gus graga dou men logodeh bouwohob, kaba, en eic gainyenara hom dau sug len lehigdecin lusud an meren geicara ucan dou len deit, endagai: Sug sud hom en edag sogo maga geigouhw, kaba, en emera mera gecgwero, doba en era mera geigouhw mogud dous. Dangga toua, sug sud hom en edag sogo maga gecgu, kaba, en emera mera geigouhw touwero, doba en era mera gecgu mogud dous. 6:44 Anai astesda sogo mera, kaba, maman mahigdecin maga toua. Dangga sug leng ledag imbrei, kaba, lusud lemec sogo ara mera dau lenero. Doba len lec imbrei mera dau len dous. Dangga toua, leng ledag lisug maga, kaba, lusud lemec anggur mera dau en touwero, doba len lec lisug mog dau en dous. 6:45 Hang sud hom gecabeci, kaba, ara geigouhw mogud agunya dau en medoc mes dous. Doba sud hom gedag mog mog, kaba, areg mog mog mogud agunya dau len toua. Anai areg agunya dau lusud merirs, kaba, aimo dau areg geb se len merdoc mes touohob. 6:46 Sug Yesus eic gainyenara dag graga dou men logodeh bouwohob, kaba, en eic gainyenara hom dau sug len laimo en mer dous ucan dou len deit, endagai: Sug yen yeigdoumesa dan indoho dag meijen mougt mera medamohob, kaba, yen yaimo dan indir an areg dan darougb yen an gin toua. Anai sug yen yemaimoro, kaba, yen yeigdoumesa dan dag meijen mougt mera medam naugb ara? 6:47-48 Dangga gareg en en aud dan naugb en ouman dan indir dousero, doba eicara baimo areg dan darougb en an gini, besesa terimda, kaba, dan deic ainyen dag sud hom gohud men tu, doba ogo doc moc an namcir. Hang sug duhu eh medam bougwan, doba men tu gin emeijero, anai en ogo doc moc an namcirohob. 6:49 Doba gareg en en aud dan naugb en ouman dous. Hanoba en emeicara bemaimo areg dan darougb en an ginero, kaba, eni aninim dag sud hom gemogo doc moc an men tuero. Doba en ohud men tu dag obreikei dous. Dangga sug duhu eh medam gohwan, kaba, eij dedemeda baisoboro namcir.

Lukas 7

7:1 Sug Yesus ens dau aremer dag graga dou lusud laugwan dauwohob, kaba, en eihwedig Kapernaum deit. 7:2 Doba se cinogo ingga, kaba, sadodor meren mougt mera en toua moongga. En men sogougb hom en ahauwa deinyor naugb sug en omom. 7:3 Dangga sug mougt mera ingga en ouman Yesus men endag en edebeij se Kapernaum ucugwohob, kaba, en arougb merug hosa dau leng Yahudi meren mougtir naugb len leden en mer dou Yesus. Dauntoba en en naugb eic geigouhw dou men sogougb ginahabi. Anai en medoc gororougb en namcirdaha. 7:4 Sug leng Yahudi meren mougtir ingga, len ledebeij Yesusohob, kaba, len leden mougt mera mer graga dou en toua. Hanoba len toua louma debin en mer ucugb, lendagai: Sud hom garougb emen aud ban gin, kaba, en moho agas edeinyum naugb ban bousa en mer an areg en acgeij dau ban gin toua. 7:5 Anai en medoc gororougb mamang Yahudi terimda. Hang en ohud maman tuari dou maman touohob. 7:6-8 Sug Yesus ouman len merir dag ginohob, kaba, en aicira len graga dig mougt mera men tu. Doba sug len ledebeij deinyor tuohob, kaba, mougt mera en arougb mesir len gus ucugb naugb len leden dougwo Yesus, dauntoba en emerei mohora erij aud en se men tuero. Dangga sug len ledagasa enohob, kaba, len len mougt mera mer gin dou eni, lendagai: Adehsud, mougt mera graga en emouwan ban bemeic ban abug erij naugb ban bemeihwedaud en se men tuero. Anai en auwam an, doba en moho emedeinyum naugb sug en ebin banero. Dangga hang, en emeic mos naugb en en aud ban sugin touwero. Doba en acgeij naugb ban benara se ban abir dousahabi, emedeinyum naugb sug men sogougb eigouhw deitohob. Anai en eic ainyen enin dag sug men mougt mera arougb en, kaba, en eicara baimo dangga toua. Dara en toua, sug en arougb men logodeh, kaba, len leicara laimo en mer toua. Dangga sug en arougb sud hom naugb en eihweda, kaba, en eihweda. Era sug en eija sud hom endag ban bin, kaba, en aimo en mer naugb en en aud en. Era sug en arougb men sogougb hom naugb en eicara dag gin, kaba, en eicara dag gin toua. 7:9 Sug Yesus ouman mougt mera graga enara dag gin naugb en, kaba, en eimiman dau en namcir. Hanoba en eineg aud lusud leinyana gedig len laimo en ingga naugb eimiman dou len toua, endagai: Yen youman ginohobei? Anai se leng Israel meren hancob, kaba, dan demeiya sud hom od mena debsa dan gedag gin ingmebma. 7:10 Dangga sug mougt mera mesir graga len lecicugb aud en ucugwohob, kaba, len leiya, doba men sogougb en eigouhwohob. 7:11 Lona hosa debin sug Yesus eic geigouhw dou mougt mera men sogougwohob, kaba, Yesus dara men logodeh, len leihwededau Kapernaum dig Nain deit. Dangga lusud leinyana laiceicira en isisi toua. 7:12 Sug len ledebeij deinyor liga mes geb dougwo cinogo inggohob, kaba, len leiya, doba len lodo hogon gomom hom lagunyen debin len sungga. Godeh hom gomom gini, kaba, debdes meisi mohora homto namcir. Hang lusud leinyana dau cinogo ingga len lec lomdi dougwo mem toua. 7:13 Sug maman Adehsud en eiya debdes gin, kaba, en medoc eineg an en namcir. Hanoba en enara dou en, endagai: Ban bemeb an abisi gin terimlo. 7:14 Sug Yesus en dougwo memohob, kaba, leng lodo hogo an meis ingga, len toua lesa. Dangga sug Yesus en en aud lenohob, kaba, en os hogo mobug an godeh ingga. Hanoba en arougb en, endagai: Adeh gin, dan darougb ban beisa iteitogini. 7:15 Dangga godeh ingga en eisa dedemeda dau gomom. Hanoba en ebiji naugb enara dou len. Sug en eisohob, kaba, Yesus arges en ucugb deisa mem mesira toua. 7:16 Sug lusud leiya dau gin, kaba, len merdoc ahau dara omom dau gin namcir. Hanoba len lagahugouhw an ELOHIM eisaugb aremer gin toua. Dara len leimiman aremer gin doum, lendagai: Sud hom gesai ELOHIM moro moho agas medam en en bagunya debin mamanohob. Dara ligbum deit, kaba, len lenara doum, lendagai: ELOHIM en en naugb en eigdoc men lusud maman dau maman gogom augwan dangga. 7:17 Hang len lecic Yesus moho an aremer gini becinten leng Yudea meren hancob dara cinogo geb acec augwan toua terimda. 7:18 Dara Yohanes men logodeh, len toua louman dau gini. Hanoba len ledecic dau aremer augwan ingga dou Yohanes se tu gesisug gin toua. 7:19 Dangga sug Yohanes en ouman dau Yesus men geicara augwan ginohob, kaba, en eiji men logodeh lahwai naugb lan lan aud en se tu gesisug. Sug lan ladebeij enohob, kaba, en arougb lan, endagai: Yan yaihweda naugb yadijidougwo maman Adehsud Yesusahabi, dag en eng sud hom gedig ELOHIM en os dou maman naugb en eigdoc maman dau maman gogom graga ingginei? Era maman maigtou naugb sud hom deitahabei? 7:20 Dangga sug lan laihweda naugb ladebeij Yesusohob, kaba, lan lanara dou en, landagai: Yohanes Gogun Lusud Se Duhu, kaba, en arougb aman naugb aman amdijidougwo ban endag ban eng sud hom gedig ELOHIM os dou emen naugb beigdoc emen dau emen gogom augwan graga ingginei? Era emen emeigtou naugb sud hom deitahabei? 7:21 Irir sug lan lan gin, kaba, Yesus eic geigouhw dou leng areber leinyana dara leng leijobur. Dara en ocirma merna mog mog dau len leinyana merdoc mes. Dara en esga leng meriresmougb naugb len leiya lo deit toua. 7:22 Dangga hang, Yesus arougb lan, endagai: Yan yaihweda naugb yadecic dau areg yan yauman dara yaiyohob gini augwan asesa dou Yohanes. Anai yan yaiya, doba leng meriresmougb, kaba, merires esga naugb len leiya lo deitohob. Dara leng merohora agaim toua, len leisa lec merohora namcir. Dara leng garemos gogoufu et lenohob, kaba, len merus eingmos agauwesa ucugb. Dara leng merums etub toua, len merums esga naugb len louman lo asesa. Dara leng lomom toua leised merna agau deit. Dara leng merunggwereij, kaba, len louman Mer Geigouhw dau ELOHIM gin touohob. 7:23 Dara yan yaden dou en endag gareg en emeija mouwesa danero, doba en od mena debsa dan dag Sud Hom Geigdoc Lusud Dau Meren Gogom Augwan, kaba, ELOHIM emeic geigouhw dou ens. 7:24 Sug Yohanes men logodeh lahwai ingga lan laihwededau Yesusohob, kaba, Yesus ebiji naugb ecic eisaugb Yohanes dou lusud gus deit, endagai: Sug yen yeihweda se lomougwisa naugb yedeiya dougwo Yohanes sug nosa, kaba, yen youdesa yen yemdeiya sud hom gin edag sogo geiror naugb meijir dedemedei? Naro, yen yemeiya sud hom dag ginero. Doba yen yeiya sud hom edag sogo ohumohumesa cinogo namcirohob. 7:25 Era sug yen yen yeihweda gin, kaba, yen youdesa yen yemdeiya sud hom geg sansun mohw gesisiloei? Naro, yen yemeiya sud hom dag gin touwero. Doba yen yeiya sud hom geg sansun mohw ousirij dous. Anai leng leg sansun mohw gesisilo dara areg mera eisaugb eb naugb len toua, kaba, len leigtou se mougt mera medam men tu geigouhw dous. 7:26 Sug yen yemeiya gin augwanero, kaba, yen yemdeiya dag garena? Yen yemdeiya sud hom gesai ELOHIM moroei? You, yen yeiya sud hom gesai ELOHIM moro dou len gus laugwan namcir. Dara yen yemeiya sud hom gesai ELOHIM moro gin dousero. Doba yen yeiya sud hom en moho agas edreg dau sud hom gesai ELOHIM moro gin toua. 7:27 Anai sud hom gin, kaba, ELOHIM enara eisaugb en dou en Meisi Mesias se Surad Injil Meb Mohon deb nosohob, endagai: Ban bouman deigeigouhw. Anai dan demesa sud hom gesai dan induro naugb en emeino ban abin, dauntoba en esa lusud merdoc mes dag ucina bedouder naugb ban toues. 7:28 Dangga yen youman deigeigouhw. Dau lusud se cinogo gin augwan, kaba, sud hom ingma en moho emedreg dau Yohanes ginero. Doba en eng moho agas dau len gedig merim louwadan an ginohob len laugwan namcir. Doba gareg en moho eb tainya namcir se ELOHIM men goiharaga, kaba, en moho agas edreg dau Yohanes gin toua. 7:29 Leng louman Yesus mer an gin, kaba, len laugwan lousa deisa en mer an namcir. Anai sug Yohanes esai ELOHIM moro dau sug nosa, kaba, len lemohoiya en mer an ginero, doba len lousa deisa ELOHIM mer dag en enara misen dou lenohob. Dangga, kaba, len lesga meren sesar. Hanoba Yohanes ogun len se duhu debin gin toua. Dara leng lacgeij lusud naugb len lohw meren cinogo dou leng Roma, kaba, len lemamsoho dau gini touwero. Doba len louma debin areg Yesus ebedbed dou lusud edreg dau len graga toua. Anai len toua laimo Yohanes en mer. Hang en emogun len se duhu sug nosa touohob. 7:30 Doba leng Parisi dara leng meru ouforoho se Musa men gomnomna, kaba, len lohoiya ELOHIM mer naugb sug len lesga meren sesar dou en namcir. Dangga hang, len lemouwan naugb sug Yohanes emogun len se duhu sug nosa touwero. 7:31-32 Dangga Yesus eic gainyenara hom dara ucan dou len deit, endagai: Meijen geicara, kaba, dan deic dainyen dag ara dou yena? Yen yedag logodeh gedig len lenara merir laisedim se us mougwa hom, lendagai: Emen emohw higbei naugb sug yainuhwera. Doba yen yemeinuhwerero. Dangga emen emeperwei naugb emen emeiyogoseser an gomom. Doba yen yemaimo emen naugb yemeb touwero. 7:33 Anai sug Yohanes Gogun Lusud Se Duhu en en aud yen sug nosa, kaba, en ehig dau ared. Dara en emeg anggur mohu touwero. Doba yen yowun en moho an gin namcir, endagai: Merna mog mog einesa en medoc mesohob, hang en emeicara dag gini. 7:34 Dangga toua, sug Lusud Meraguna Mebin dan den aud yen deit, kaba, dan demehig dau ared dara anggur mohwero. Doba dan det ared, dara dan deg anggur mohu an yen terimda. Doba yen yowun dan indoho an gin toua, yendagai: Yen yeiya sud hom gin, kaba, en menuhwa maga naugb en etara augwougb namcir. Dara en eg anggur mohu bed bomom. Hang en medoc aninim dara leng lacgeij lusud naugb len lohw cinogo dou leng Roma dara leng lebesesar len laugwan gin toua terimda. 7:35 Doba inggaida. Anai leng meru ouforoho dara leng meru auti aremeijouhw, kaba, len lemowun aman amoho an areg aman amesai dou len ginero. Doba len leigdoumesa aman amoho an gin terimda. 7:36 Sug Yesus eic gainyenara dag graga dou lusud bouwohob, kaba, sud hom dau leng Parisi, en moho Simon, en acgeij Yesus naugb en edetara desij en se men tu. Dangga, kaba, Yesus oucan en dig men tueda. Sug lan ladebeij tuohob, kaba, lan laigtou naugb latara. 7:37 Dara gida hom gedig en maga eijouhw naugb en ohw en maga dou len gus aibibrida, kaba, en toua moongga se cinogo ingga. Dangga sug en ouman dag Yesus en etara se sud hom dau leng Parisi men tuohob, kaba, en odo ampo dau igdahab gogoufu hom an mani men ouwadebeda aud Yesus se tu ingga. 7:38 Sug en einesa dimei mesohob, kaba, en eihweda bedesa desij Yesus mohora. Sug en esa desij Yesus mohorohob, kaba, en ebiji naugb en eb medam an men sesar. Dangga sug en medruh ororo bed Yesus mohora betaha namcirohob, kaba, en eic enin mougt modi naugb agun dau toua. Dauwohob, kaba, en ou moufesa Yesus mohora. Hanoba en ehin mani men ouwadebeda se en mohora deit toua. 7:39 Doba sug sud hom dau leng Parisi gebin Yesus se men tu graga en eiya dau gin, kaba, en auwam an se medoc mes, endagai: En edag sud hom gesai ELOHIM moro dag misen, kaba, en ecinaga gida gos en gin men geicara dag misen touohob. Anai gida hom gin, kaba, en maga eijouhw naugb en ebesesar terimdohob gina? 7:40 Doba Yesus ecinaga areg Simon en auwam an se medoc mes inggohob. Hanoba en enara dou en, endagai: Simon, dan douwan denara hom gin dou banahabi. Dangga Simon ousa Yesus mer, endagai: Adehsud, areg ban ben, kaba, ban binda. 7:41 Hang Yesus eic bainyenara dau sud hom men aremeij geb dou lahwai dou Simon, endagai: Sud hom eic men aremeij dag aregoufu mogo huntun sergem dou sud hom. Doba laingma, kaba, en eic mogo mos sergem dou en dous. 7:42 Doba lan gin, kaba, maran aregoufu ingmemeb naugb sug laoci ucugb dou enero. Dangga en enara dou lan, endagai: Dan daigdougwo indan aremeij augwan graga dag mogud dou yan namcir. Sug Yesus eic gainyenara dag graga dou Simonohob, kaba, en eijidougwo en ucan deit, endagai: Simon, ban boudesa dagiro dau lan gin, kaba, gareng en medoc gororougb sud hom gaigdougwo maran aremeij edreg dau mesi homa? 7:43 Simon auni dou Yesus, endagai: Dan doudesa en gedig men aremeij mogo huntun sergem geb dou en grageng, en medoc gororougb en edreg dau mesi homa namcir. Dangga Yesus ousa deisa en mer an, endagai: Areg ban ben gin, kaba, misen namcir. 7:44 Sug Yesus auni Simon mer dou enohob, kaba, en eineg medoc aud gida hom ingga. Dauwohob, kaba, en enara dou Simon ucugb deit, endagai: Ban beiya gida hom gin an men geicara dou dan ginohobei? Anai en, kaba, eic en medruh naugb adu dan indohora. Hanoba en eic enin mougt modi naugb agun dau touohob. Doba ban, kaba, ban bemarougb aban sogougwir naugb len lemeic duhu lemadu dan indohorero. 7:45 Dara en emarges dau sug ou mouhwesa dan indohora touwero. Doba ebiji dau sug dan deinesa aban tu, terimda iteitogin, kaba, en ou mouhwesa dan indohora ucucugb terimda. Doba ban, kaba, ban bemou abuhwesa danero. 7:46 Dara ban bemarougb aban sogougwir naugb len lemehin mani men ouwadebeda se dan indugtero. Doba en, kaba, en ehin mani men ouwadebeda se dan indohora touohob. 7:47 Dangga hang, ban bouman dan indir deigeigouhw namcir. Men geicara geigouhw einyana dou dan gin, kaba, ens ainyes dag ELOHIM aigdougwo men sesar augwan dau en touohob. Anai gareg en ecinaga dag ELOHIM aigdougwo men sesar einyana dau enohob, kaba, en medoc gororougb lusud naugb en eicara geigouhw einyana dou len toua. Doba gareg en oudesa dag ELOHIM aigdougwo men sesar gurereito, kaba, en toua medoc gororougb lusud gurereito dous. 7:48 Sug Yesus owun Simon an men geicara dauwohob, kaba, en enara dou gida graga deit, endagai: Aban sesar augwan ediyebeiya dau ban namcirohob. 7:49 Sug leng letara desij Yesus len louman dau gin, kaba, len lenara doum ucucugb, lendagai: Sud hom gini edag garena, hang en emaigdougwo lusud meren sesar gin toua? 7:50 Doba Yesus oho mer debin gida graga en deit, endagai: Ban abdoc ebdebin an dan dag ginohob, kaba, ELOHIM eigdoc ban dau sesar men gogom augwanohob. Dangga ban beihweda dareg ELOHIM eic gesgigouhwesa dou ban dougwo areg gecgu augwan toua namcir.

Lukas 8

8:1 Lona hosa debin sug Yesus etara se Simon men tuohob, kaba, eni dara men logodeh merug sisa hobjerai len lec merohora se beimes dara cinogo mogurei augwan naugb en esai Mer Geigouhw dau ELOHIM sug en oiharaga lusud ucugb dou len toua. 8:2 Dara ligida merug hosa, kaba, len toua laimo len isisi. Anai sug nosa, kaba, Yesus ocirma merna mog mog dau lingma. Dara lingma deit, kaba, en eic geigouhw dou len touohob. Len gin, kaba, hom en moho Mariam dau cinogo Magdala. En, kaba, Yesus ocirma merna mog mog merug senggai dau enohob. 8:3 Dara hom deit, kaba, Kusa mesouwa Yohana. Kusa gin, kaba, en esedougwo mougt mera medam, moho Herodes, men tu an men aremougb augwan. Dara hom deit dau ligida ingga, kaba, en moho Susana. Dara ligida gus gus toua laimo dara len. Ligida gin laugwan, kaba, len leic lenin meren aregoufu naugb lausa Yesus an men logodeh sug lasai ELOHIM moro gin toua. 8:4-5 Se lona hom, kaba, lusud leinyana len len dau cinogo dingan dingan naugb ledebeij Yesus. Dangga sug en eiya, doba leinyana gougwa louwa debin enohob, kaba, en eic gainyenara hom dou len, endagai: Sud hom sug en eihwedaud men lo, kaba, en edeic meij bargehilo se men longga dous. Doba sug en eic meij bargehilo gin, kaba, meij ingma obsara se ucina. Dangga sug lusud laiyan meij ginohob, kaba, ba let augwan bouwa namcir toua. 8:6 Dara ingma, kaba, obsara deisa cinogo geb se igdahab moc taiba. Dangga meij gin eij dara geigouhw. Doba cum, kaba, agac ucugb, anai mohu ingma naugb sug mom emeicero. 8:7 Dara meij ingma, kaba, obsara se ara mog mog meda. Dangga sug meij dara ara mog mog lahwas laiji iririmohob, kaba, ara mog mog eij baiyan meij geigouhw gin bagac namcir. 8:8 Doba meij igbum, kaba, obsara se cinogo mog geigouhw. Dangga sug meij gini eiji dara orbesbes namcirohob, kaba, men mera edebeij huntun hom toua. Sug Yesus eic gainyenara dag gin dou len bouwohob, kaba, en esulou len ucan gin deit, endagai: Gareg dau yen en moms ai, kaba, en ouman areg dan den dou en gin deigeigouhw namcir. 8:9 Doba Yesus men logodeh, kaba, len leijidougwo en an ucugb deit, lendagai: Areg ban bainyen dou lusud graga, kaba, men meijouhw dagiro? 8:10 Dangga Yesus enara auni dou len, endagai: Yen, kaba, ELOHIM eigdoumesa yen meijoho naugb en ens dau sug en oiharaga lusud ucugb men meijouhw augwan asesa dou yen. Anai en ens dau augwan gin dou lusud sug nosa touebma. Doba naugb len gus, kaba, dan dens augwan gini se gainyenara dou len dous. Dauntoba sug len leiya dau indan geicara dag ganusbus, doba len lemeiya augwan asesa terimdero. Dara sug len louman dau sug dan desai ELOHIM moro dou len, doba len lemecinaga meijouhw augwan asesa touwero. 8:11 Sug Yesus esulou men logodeh dag graga bouwohob, kaba, en enara dou len deit, endagai: Gainyenara graga, kaba, men meijouhw dag gini: Meij gin, kaba, aninim dag ELOHIM mer. 8:12 Meij gobsara se ucina, kaba, aninim dag lusud sug len louman ELOHIM mer dag en ouwan oiharaga lusud ucugb, kaba, len lemecinaga men meijouhw ginero. Dangga hang, Bilis en en naugb en esma mer augwan dau len merdoc mes deit. Dauntoba sug len merdoc emebdebin an ELOHIM enero, kaba, en emeigdoc len dau sesar men gogom aud maireseb menau geb huhugb touwero. 8:13 Dara meij gobsara se cinogo geb se igdahab moc taiba, kaba, aninim dag lusud sug len louman dau ELOHIM mer an areg graga, kaba, len lebin en mer gini se len merdoc dara gagahugouhw an namcir. Doba mer gin, kaba, emaga len merdoc mesero. Hanoba len merdoc emebdebin an ELOHIM en mer terimda touwero. Doba sug aremer gogom ainyen len, kaba, len lobsara dau namcir. 8:14 Dara meij gobsara se ara mog mog, kaba, aninim dag lusud sug len louman dau ELOHIM mer, kaba, len lebin en mer gini se len merdoc mes namcir toua. Doba cum, kaba, ara mog mog gini aiyan ELOHIM mer augwan dau len merdoc mes deit. Anai len lemarges dau sug len merdoc ebdebin an areg geb se cinogo ginero. Doba sug len merdoc eijesa icira areg len let dara areg len lohw gin terimda, kaba, len merdoc etrij naugb sug len merisoho mougb namcir. Dara len lauwam an areg geic len merdoc eigouhw dou len toua terimda. Hang meren mera augwan emedebeij dag eijogoij touwero. Doba eb dag mobouhw terimda dous. 8:15 Doba meij gobsara se cinogo mog, kaba, aninim dag lusud sug len louman ELOHIM en mer gin, kaba, len lecinaga meijouhw asesohob. Hanoba len lemebin en mer se len merdoc mes dousero. Doba sug len merdoc eigouhw an en mer dag ginohob, kaba, len laiyan meigdocesem naugb len laimo augwan toua terimda. Hang len lemedag meij maga mogud touwero. Doba len lera mera einyana namcir. 8:16 Sug Yesus ens meijouhw dau sud hom geic meij bargehilo dou men logodeh bouwohob, kaba, en eic gainyenara dau sug ELOHIM ens areg geb se lusud merdoc mes ainyes ucan dou lusud ingga deit. Hanoba en enara dou len, endagai: Sug sud hom ei men smougwohob, kaba, en emeic ara gus emaihiron dougwo mouf gin deitero. Dara en emecgoneh mouf gini se boromei meniha touwero, doba en ob mouf gini deb ainyes. Dauntoba sug lusud len leinesa men tu, kaba, mouf gini aisema len laugwan toua. 8:17-18 Hang yen yesedougwo areg dan den dou yen gini deigeigouhw namcir. Anai se lona sug ELOHIM oiharaga yen ucugb, kaba, en eic areg yen yecgoneh se yen meigdoc mes augwan naugb ens ainyes. Dara areg yen yod se simei, kaba, en agaha simei dau naugb lusud lecinaga toua. Dangga gareg dau yen en era mera geigouhwohob, kaba, ELOHIM eic ingma aos dou en toua. Doba gareg dau yen en emera mera geigouhw ingmaro, kaba, areg en od mena debsa endag ingma emeb naugb ens, doba ELOHIM eic augwan dau en namcir. 8:19 Sug Yesus ens meijouhw dau areg graga dou men lusud gini, kaba, en mem dara en magtor, len len naugb ledeiya en, doba lusud leinyana lohudebesim dougwo lendaha. 8:20 Dangga leng lesa desij Yesus, kaba, len len dou en, lendagai: Ban abim dara ban abagtor, len merugwengga se medigo naugb len ledeiya ban. 8:21 Doba Yesus enara auni len merir ucugb, endagai: Len gedig len louman ELOHIM mer, dara len leicara laimo toua, kaba, len ginin eng dan deija len dag dan indim dara dan indagtor len dous. 8:22 Se lona hom deit, kaba, Yesus en dou men logodeh, endagai: Maman maihwedig nagama gacda. Dangga sug len leisa ijohob, kaba, len logo duhu naugb leihweda toua. 8:23 Doba sug len logo duhu naugb leihweda, kaba, loungmen medam eisa obsara se duhu mod. Hang duhu mogo medam erba se ing mes, kaba, ij ebiji naugb omdia an len namcir. Doba Yesus, kaba, en atouda. 8:24 Dangga hang, men logodeh lebir en sug en atou gini. Hanoba len lenara dou en, lendagai: Adehsud, ban bisa. Anai ij omdian maman maugwan dangga. Doba sug Yesus eisohob, kaba, en etaha loungmen dara duhu mogo, endagai: Yan yadina namcir. Sug en enara ineg danggohob, kaba, loungmen edina. Dara duhu mogo toua ogor terimda. 8:25 Sug loungmen dara duhu mogo edinohob, kaba, Yesus enara debin men logodeh, endagai: Dagiro, naugwe hang, yen yemod meijina debsa danero? Doba Yesus men logodeh sug len leiya dau gin, kaba, len merug omom an namcir. Dara len leimiman dau gin toua. Hanoba len lenara doum, lendagai: Sud hom gini garena dag loungmen dara duhu mogo aimo en mer, hang emedina gina? 8:26 Sug Yesus etaha loungmen dara duhu mogo edinohob, kaba, men logodeh leisa ij terimda len ledebeij nagama se leng Gerasa meren hancobohob. 8:27 Doba sug Yesus ouwaden dau ij dig mebera, kaba, sud hom merna mog mog einesa en medoc mesohob, en en aud en. Sug nosa, kaba, sud hom gini en atou se men cinogo. Doba iteitogin, kaba, en ematou se men tu sungga deitero, doba en atou se aremogougb moda dous. Dara en emeg sansun touwero, doba en ec an meihw agaga se lona einyanohob, anai merna mog mog leic meresiresa en ucucugb terimda. 8:28-29 Dangga men lusud leic kermum naugb lohud en mesira dara mohora hwas darem mougwa einyana sug nosohob. Dara len lesedougwo en dara geigouhw touohob. Doba en eic magan kermum augwan etrij dau en namcir. Dangga, kaba, merna mog mog lerba en se lomougwisa toua, ucucugb terimda. Sug sud hom gini en eiya Yesus, kaba, en eiyaga medam dougwo en dara en ecguna deseino en toua. Hanoba en enara dou Yesus dara mer medam, endagai: Yesus, ban ben sugini naugb bedeberou dana? Ban ben naugb beic mog erij dou danei? Anai dan decinaga ban, kaba, Adehsud Gen Moho Eb Taiba Augwan en Meisi ban ginohob. Dangga dan dacgeij naugb ban bemeic mog erij dou danlo. Sud hom graga enara dag gini dou Yesus, anai en ecinaga Yesus arougb merna mog mog geigtou se en medoc mes ingga naugb len leihwededau en danggohob. 8:30 Doba Yesus eijidougwo sud hom gin deit, endagai: Ban aboho dagiro? Sug Yesus eijidougwo en dag ginohob, kaba, en auni dou en, endagai: Dan indoho dag emeinyana. En enara dag gin dou Yesus, anai merna mog mog leinyana leinesa en medoc mesohob. 8:31-33 Dara hweij leinyana letara se men maga desij len sungga. Dangga hang, merna mog mog len laugwan leiyaga dougwo Yesus, lendagai: Ban bemocirma emen se ijou mes, isnaro. Doba ban barougb emen emeinesa hweijir gada merdoc mes dous. Sug Yesus ousa len merir anohob, kaba, len lagunya dau sud hom gin medoc mes. Hanoba len ledeinesa hweijir graga merdoc mes toua. Hang hweijir ingga len laugwan lougb lesogwa se duhu bogor lomom namcirda. 8:34 Sug leng lesedougwo hweijir graga len leiya dau gini, kaba, len lougb dig meren guseda naugb len leden dau aremer augwan gini dou leng sungga, dara leng geb acec len laugwan toua. 8:35 Dangga, kaba, len len naugb ledeiya aremer ingga se lenin merires touahabi. Sug len ledebeij Yesusohob, kaba, len leiya, doba sud hom graga eng eg sansun ucugb. Dara en mecdemaga esgiraha. Hanoba en eigtou desij Yesus mohora deb gini, anai merna mog mog laugwan leihwededau enohob. Sug len leiya dau gin, kaba, len lahau namcir. 8:36 Dara leng leiya aremer augwan gini se len meriresohob, kaba, len lecic dau sug Yesus eic geigouhw dou sud hom gedig merna mog mog einesa en medoc mesohob meijouhw augwan asesa dou len toua deit. 8:37 Sug leng se Gerasa meren hancob len louman dau gin, kaba, len lahau medam namcir deit. Hanoba len lecicugb Yesus, lendagai: Ban bemeigtou suginlo, doba ban beihwededau emen namcir. Dangga Yesus aimo len merir. Hanoba en eisa ij ucugb dig nagama dau len namcir toua. 8:38-39 Sug Yesus ouwan eisa ij dau len, kaba, sud hom gedig merna mog mog esogwa dau en gragohob en acgeij Yesus, dauntoba en toua aimo dara enda. Doba Yesus arougb en, endagai: Ban becicugb dig aban cinogoda naugb ban bedecic dau areg ELOHIM eic geigouhw dou ban gin augwan dou aban lusud ucugb deitahabi. Dangga sug sud hom gin en ecicugb se men cinogohob, kaba, en edecic dau Yesus men geicara dou en gini augwan asesa dou len toua. 8:40 Sug Yesus en ecicugb dig nagamohob, kaba, lusud leinyana ledagaseni dara lagahugouhw naugb en namcir. Anai len log ucina deb naugb enohob. 8:41-42 Dangga sud hom gedag mougt mera naugb leng Yahudi meren tuari se cinogo ingga, en moho Yairus, en en aud Yesus sungga toua. Sug en edesan Yesusohob, kaba, en ecguna dou en toua. Hanoba en eiyagarij an Yesus medam, endagai: Ban bucan dan se indan tu naugb ben bedeic geigouhw dou dan indihidahabi. En enara dou Yesus dag gini, anai en mehida mohora hom, gedig en men arisogomoc sisa hobjeraiyohob, en areba medam deinyor sug en omom ingga. Sug Yesus ouman gin, kaba, en aimo en dig men tueda. Doba sug Yesus oucan en gin, kaba, lusud leinyana leila ucan en toua. Hanoba len lesa lomdi en namcir. 8:43 Dara gida hom gos mogwihi se arisogomoc sisa hobjeraiyohob, kaba, en toua oucan Yesus dig medigo. Anai en acgeij leng meru ouforoho, dauntoba len louci aremougb naugb en terimdohob. Doba meren aremougb gin, kaba, hom emousa enero. Dangga hang, sug en acu Yesusohob, kaba, en ou mesira naugb os sansun mobroro icira Yesus mos. 8:44 Sug en eicara dag gin inegohob, kaba, en mogwihi toua edina doc namcir. 8:45 Dangga Yesus eijidougwo leng leila ucan gini, endagai: Gareg dau yen, en os dan gina? Doba len laugwan laideido dougwo. Dara Petrus toua, sug en ouman Yesus mer an danggohob, kaba, en enara bauni en mer ucugb, endagai: Adehsud, ban beijidougwo len dag gin, anara? Anai lusud leinyana lec lomdi ban, gin eng los ban ginei? 8:46 Doba Yesus ohoiya en mer, endagai: Naro. Dan decinaga sud hom os danohob naugb sug dan deic geigouhw dou en. Anai indan goubesa ingma eihwededau dan naugb ginohob. 8:47 Sug gida hom ingga en ecinaga dag men aremer eb ainyes dou Yesus naugb en ecinagohob, kaba, en en aud en dara en eijeijesa namcir. Dangga sug en ecguna deseino Yesusohob, kaba, en ecic men aremer meijouhw augwan asesa dou Yesus deseino len laugwan, lendagai: Adehsud, dan dos ban, anai dan indugwihi ohw se arisogomoc sisa hobjeraiyohob. Doba sug dan dos ban inegohob, kaba, dan indugwihi edina namcir. 8:48 Sug Yesus ouman dau gin, kaba, en oho mer debin en, endagai: Dan indihida, ban bod abina debsa danohob, hang ban bemeigouhw gini. Dangga ban beihweda, dara ELOHIM eic gesgigouhwesa dou ban dougwo augwan toua. 8:49 Sug Yesus enara dou gida gragaba, kaba, sud hom dau mougt mera, moho Yairus, men tu en en naugb enara dou en. Sug en edebeij enohob, kaba, en enara dou en, endagai: Ban bemagogod Adehsud, en deitlo, anai ban abihida omomohob. 8:50 Doba sug Yesus en ouman dau gini, kaba, en oho mer debin Yairus, endagai: Ban abdoc emeijesero. Doba ban bod abina debsa dan, kaba, ban abihida en mena emagau ucugb deits. 8:51 Sug len ledebeij Yairus men tuohob, kaba, Yesus ouci Petrus, dara Yohanes, dara Yakobus, dara gida gomom graga mena dara mem len gin dous eng leinesa dimei aud gidob gomom ingga. Doba len gus, kaba, en ecicugb len laugwan deb naugb len leigtou dig medigo dous. 8:52 Dara en en dougwo leng leigtou se medigo gin naugb len lemeb dara lemeiyogoseser deitlo. Anai len laugwan leicara laimo dag gin terimda. Hanoba en enara dou len, endagai: Gidob gin, kaba, en emomomero, doba en atou dous. 8:53 Sug len louman Yesus mer an gin, kaba, len lobohuba dagasges an en namcir. Anai len lecinaga, doba gidob gini en omom namcirohob. 8:54 Doba sug Yesus en edesa desij en magohob, kaba, en os en mesira. Hanoba en ebir en, endagai: Dan indihirija, ban beisa besa namcir. 8:55 Dangga godeh gini en mena ecij se gidob en maga ucugb. Hanoba en eisa dedemeda toua. Sug en eisohob, kaba, Yesus arougb len gus naugb len leic ared dou en bet. 8:56 Sug mena dara mem lan laiya dau gin, kaba, lan laimiman dau gin namcir. Doba Yesus en en dougwo lan, endagai: Yan yamecic dau aremer gini dou sud hom touwero.

Lukas 9

9:1 Sug Yesus ebir Yairus mehida dau gomomohob, kaba, en eija men logodeh merug sisa hobjerai len loucimdeb desij eni. Sug len len aud enohob, kaba, en eigdoumesa len meroho naugb len locirma merna mog mog dau lusud. Dara en eic goubesa dou len naugb len leic geigouhw dou leng areber aingma aingma toua. 9:2 Sug en eic goubesa dou lenohob, kaba, en arougb len naugb len lesai ELOHIM moro dau sug en oiharaga lusud ucugb. Dara len leic geigouhw dou len debin gin toua. 9:3 Doba sug len lemeihwedebma, kaba, en en dougwo len, endagai: Sug yen yesai ELOHIM moro dou lusud, kaba, yen yemodo ijouhugwa, dara yen yemoho i naugb yen yemohwiaga lusud an ara ara, dara yen yemodo ared, dara aregoufu augwan gin dara yenlo. Dara yen yemeg sansun hwai debinim touwero. Doba yen yec dag yecus dous. 9:4 Dara sug sud hom en ebin yen se men tuohob, kaba, yen yemeihweda se tu gus dau enlo. Doba yen yeigtou desij en se men tu ingga, terimda edebeij lona sug yen yeihweda se cinogo gus dau en deit. 9:5 Dara astesda cinogo sug lusud lemebin yenero, kaba, yen yemeigtou desij len touwero. Doba yen yeihwededau len namcir. Dara sug yen yeihwededau len, kaba, yen yetir yen meijohora an meren cinogo mor dag ansins dou len toua. Dauntoba len lecinaga dag yen yemeic cumougt dou len deitero, doba yen yarges len deb namcirohob. 9:6 Sug Yesus esulou len bouwohob, kaba, len leihweda naugb len lesai Mer Geigouhw dau ELOHIM men lona sug en oiharaga lusud ucugb se astesda cinogo augwan. Dara len leic geigouhw dou leng areber astesda cinogo sug len ledebeij gin toua. 9:7 Sug leng Galilea meren mougt mera, moho Herodes, en ouman dau Yesus dag en eic geigouhw dou lusud leinyana, dara en ouman dag Yesus eigdoumesa merug hosa dau gomom touohob, kaba, en eija mouwesa len merir an gini. Anai ligbum, kaba, len leden, lendagai: Sud hom gin, kaba, Yohanes Gogun Lusud Se Duhu gia eng ELOHIM ebir en ucugb deit gini. 9:8 Dara ligbum, kaba, len leden deit, lendagai: Yesus gin, kaba, Elias ingga dogun gini. Doba ligbum deit, kaba, len leden, lendagai: Sud hom gin, kaba, en edag sud hom dau leng lesai ELOHIM moro nosa dous eng eisa dau gomom ucugwohob. 9:9 Sug Herodes en ouman lusud lenara aingma aingma dag gin, kaba, en medoc aihagab len merir an namcir. Hanoba en enara se enin medoc mes, endagai: Dan decinaga sud hom gin, kaba, Yohanes, isnaro. Anai en, kaba, dan darougb sud hom sug nosa naugb en edougb en mougt dauwohob? Dangga sud hom geicara dag gin, kaba, gara en inggina? Hang en toua ouwan naugb edeiya Yesus se enin mairesahabi. 9:10 Sug Yesus men logodeh merug sisa hobjerai len lecicugb aud enohob, kaba, len ledecic dau sug len leic geigouhw dou lusud. Dara sug len locirma merna mog mog dau len. Dara areg len lens meijouhw dou len ginohob augwan asesa dou en toua. Sug men logodeh lecic augwan gin dou enohob, kaba, en enara dou len, endagai: Yen yisa, maihwededau lusud gin se losneseba naugb madehig debin mamug sunggahabi. Sug en enara dou len danggohob, kaba, en einoisa len merin se lomougwisa hom deinyor cinogo Bedsaida. 9:11 Sug len gus louman, doba Yesus edan men logodeh se losnesebohob, kaba, len toua loucucan en sungga toua. Sug len ledebeij enohob, kaba, en emesenagan len naugb en emecicugb len touwero. Doba en ebin len dara medoc eigouhw an len. Hanoba en edidib dau lona sug ELOHIM oiharaga len ucugb men meijouhw asesa dou len. Dara gareg dau len en areba, kaba, en eic geigouhw dou en toua. 9:12 Doba deinyor sug igda obsaresohob, kaba, men logodeh merug sisa hobjerai graga len len aud Yesus naugb ledenara dou en, lendagai: Ban barougb lusud leinyana gini naugb len leihweda se cinogo dara tu geb acec maman gininda naugb len ledatou dara len ledetara desij len sungga touahabi. Anai sugin, kaba, losneseba namcir an aredaha. 9:13 Doba Yesus auni dou len ucugb, endagai: Lenin lemdehilon aredero. Doba yen eng yeic ared dou len dous. Dangga len lenara lawun Yesus mer an gini, lendagai: Ban boudesa endag emen emob aregoufu einyana deb, kaba, emen emouma ared emedeinyum naugb len laugwansei? Anai aredto geb gin, kaba, roti mogo sergem dara hosei hwai dousdaha, gina? 9:14 Len lenara dag gin dou en, anai len lecic len ingga, doba ledebeij ligiji merug ribu sergemohob. Gini len lemecic ligida dara logodeh dara touwero. Doba Yesus arougb men logodeh merug sisa hobjerai gini, endagai: Yen yekeba merug sud hwai sisedeisu len leigtou debinim hom, astesda len laugwan dangga. 9:15 Dangga men logodeh lekeba lusud laugwan gin leigtou debinim aimo dag Yesus arougb len an ginohob. 9:16 Sug len laugwan leigtouohob, kaba, Yesus os roti mogo sergem, dara hosei maga hwai graga icira en mesira. Hanoba en eised mergo augb bogo, dauntoba en en sijo dou ELOHIM naugb gini. Sug en ocuncum dou ELOHIM dauwohob, kaba, en ekris roti. Hanoba en eic dou men logodeh naugb len lohw an len ingga laugwan toua. 9:17 Dangga len laugwan let beicer namcir. Hanoba Yesus men logodeh ledouci ared mougwu augwan debinim se aigdaga mes sisa hobjerai batij an namcir. 9:18 Se lona hom deit sug Yesus en ocuncum se usi hom dou enin, kaba, men logodeh leigtou dougwo en sungga toua. Dangga sug en ocuncum gini, kaba, en eijidougwo len, endagai: Yen youman sug lusud lecic dan indoho doum, kaba, len leija dan dag garena? 9:19 Doba len launi dou en, lendagai: Ligbum, kaba, len leija ban dag Yohanes Gogun Lusud Se Duhu. Dara ligbum, kaba, len leija ban dag Elias. Doba ligbum deit, kaba, len leija ban dag sud hom dau leng lesai ELOHIM moro sug nosa geisa dau gomom ucugwohob. 9:20 Dangga Yesus eijidougwo len deit, endagai: Doba yenin, kaba, yen youdesa dani garena? Doba Petrus en auni dou Yesus, endagai: Ban, kaba, ELOHIM ouci ban deb naugb sug ban beigdoc emen dau emen gogom augwan namcir. 9:21 Sug Petrus auni dag gin dou Yesusohob, kaba, en oungben len dougwo namcir, endagai: Yen yemedecic dau gin dou sud hom ingma touwero. 9:22 Dauwohob, kaba, en enara dou len deit, endagai: Lusud Meraguna Mebin dan daimo ucina mog erij einyana dauwahabi. Dara leng Yahudi meren mougtir, dara gembala gesa taij meren mougtir, dara leng meru ouforoho se Musa men gomnomna len laugwan letogoto dara leic gomom dou dan touahabi. Doba lona hwai debin gin, kaba, ELOHIM eigdoumesa dan dau gomom ucugwohob. Anai augwan gini aimo dau areg ELOHIM esedeb naugb danohob. 9:23 Sug Yesus oungben men logodeh dougwohob, kaba, en esulou len laugwan ucan deit, endagai: Gareg dau yen en ouwan aimo dan, kaba, en emaimo areg enin ouwan deitero. Doba en ogod se enin medoc mes naugb en aimo ucina mog erij aud gomom ucan dan astesda lona terimda. 9:24 Anai gareg dau yen en ebehnehino enin mena naugb en maireseb dous, kaba, cum, en mena toua ediyebeiya dau en namcir. Doba gareg dau yen en emebehnehino enin menero, doba en omom icira sug en aimo dan, kaba, en mena emediyebeiya touwero. Doba en esma mena maireseb geb huhugb namcir. 9:25 Dangga yen yemeic yenin meijina naugb yen yemamcirac icira areg geb se cinogo ginlo. Doba yen yasid yenin dau namcir. Anai sug yen yeic yen meijina naugb yen yamcirac icira areg geb se cinogo ginohob. Doba cum, kaba, maireseb huhugb ediyebeiya dau yen namcir, kaba, ara ingma emeb naugb yen deita? Anai augwan ediyebeiya dau yenohob. 9:26 Dara igdebes emeba yen naugb yen yos yadi dan indoho deseino lusud dara sug yen yesai dan induro dou len touwero. Anai gareg dau yen igdebesebeni naugb en emos emadi dan indoho dara dan indir gin deseino lusudero, kaba, Lusud Meraguna Mebin dan demos demadi en moho deseino dan Indina se Lona Sug Dan Decicugwen gin touwero. Doba dan damsoho en toua terimda. Anai se Lona ingga, kaba, dan den dara dan Indina men gogouf cucugb erbacec dan dara men malaikadir gecabeci loucan dan toua. 9:27 Doba yen youman deigeigouhw. Anai ligbum dau yen, kaba, yen yemomom dau lona sug ELOHIM oiharaga yen ginbuma. Doba yen yeiya augwan gini dara yen meijiresahabi, yen yemomom dau toua. Augwan gini asesa dag misen namcir. 9:28 Ari hom debin sug Yesus esulou men logodeh dag gragohob, kaba, en eisaugb an Petrus, dara Yohanes, dara Yakobus, se menmod hom naugb en edocuncum sungga. 9:29 Sug en ocuncum gin, kaba, en mebes eperwei. Dara men sansun toua ogouf cucugb mouf esesilo namcir. 9:30-31 Doba ban bouman deigeigouhw. Sug Yesus men gogouf cucugb erbacec en dag gin, kaba, lasud lahwai, lan maroho Musa dara Elia, lan toua lans lanin desij Yesus se gogouf cucugb gin toua. Sug lan lagunya debin enohob, kaba, lan lanara dou en, landagai: Cum, kaba, ban bomom se cinogo Yerusalem, anai gini aimo dau areg ELOHIM enin mer ogod deinaugb banohob. 9:32 Irir sug Yesus en ocuncum gin, kaba, Petrus dara en mesi lahwai, len cicireber leinyeinyaha dau enohob. Dangga sug len lesga meriresohob, kaba, len leijesan, doba gogouf cucugb erbacec Yesus. Hanoba lasud lahwai lasa desij en toua. 9:33 Dangga sug len leiya, doba lan graga lad maraga naugb lan laihwededau Yesus engga, kaba, Petrus enara dou Yesus, endagai: Adehsud, eigouhw naugb emen toua emugwenggini. Dauntoba emen emahud tu meij homoi bedeinyum naugb yen. Hom naugb banin. Hom naugb Musa. Hom naugb Elias toua. (Doba areg en enara gin, kaba, dag augwougb dous, anai en emoudesan meijouhw nosahabero.) 9:34 Irir sug Petrus enara dag graga dou Yesus, kaba, umer mogo hom agunya debin len naugb oiharaga len. Sug umer osun lenohob, kaba, Yesus men logodeh lahau namcir. 9:35 Dangga hang, len louman, doba sud hom enara dau umer dou len, endagai: Yen youman dan Indisi gin en mer dara geigouhw namcir. Anai dan douci en naugb en eigdoc lusud dau meren gogom augwanohob. 9:36 Sug sud hom graga enara dau umer dou len bouwohob, kaba, len lemeiya lingma lemesa desij len deitero. Doba len leiya Yesus enin dous. Dangga se lona sug Yesus en moongga dara lenaba, kaba, len lemdecic dau aremer gin dou len gus touwero. Doba len letin augwan se len merdoc mes namcir. 9:37 Loba hom debin sug Yesus ens dau men gogouf cucugb dou merug homoi ginohob, kaba, eni dara men logodeh graga len louwaden dau menmod ingga dig dougb deit. Sug len louwaden se dougwohob, kaba, lusud leinyana lagasa eni. 9:38 Sug len ledebeij Yesusohob, kaba, sud hom dau len ingga en eiyagarij en, endagai: Adehsud, dan dacgeij ban naugb ban bedeiya dan indisi mohora hom ginahabi. 9:39 Anai sug mena mog mog eic mesireseni ineg, kaba, en eiyaga medam. Dara en os en betirker terimda. Hanoba en meigdores mahac toua. Dara mena mog mog emarges dau en dedemeda touwero. Doba eic mesiresa en terimda en mos ohu becbec namcirohob. 9:40 Dangga dan dahwan en aud aban logodeh suginohob naugb len locirma mena mog mog dau en, doba meren goubesa emedeinyum naugb ginero. 9:41 Sug Yesus ouman dau gin, kaba, en omi debin len. Hanoba en enara medam dou len, endagai: Dan deigtou desij yen, dara deigtou dateteij yen se lona hosa deitohoba? Anai dan dens dau ELOHIM mer dara men goubesa augwan bedeinyum dou yen touohob. Doba yen yemod meijina debsa en an aremer ginbuma. Dara yen yemaimo en mer touwero. Doba yen meigdoc aihagab en mer gin terimdaba. Sug Yesus enara gouji dangga dou lenohob, kaba, en arougb godeh en mena ucan deit, endagai: Ban bedahwan ban abisi dou dan suginahabi. 9:42 Sug godeh graga en en aud Yesus en, kaba, mena mog mog os en bad cinogo mougb. Hanoba os en betirker namcir toua. Doba Yesus esa mer debin mena gogor ingga, endagai: Ban beihwededau godeh gin namcir. Sug Yesus ocirma mena gogor dau en beigouhwohob, kaba, en ou mesira an godeh ingga dou mena ucugb deit. 9:43 Sug lusud leiya dau gin, kaba, len leimiman dau ELOHIM namcir. Anai en ens ELOHIM men goubesa ainyes dou len dag edreg dau augwanohob. Sug lusud leimiman dau Yesus men geicara gin doumaba, kaba, Yesus ens dau sug en omom mougwa hom dou men logodeh deit, endagai: Cum, kaba, sud hom en emohw Lusud Meraguna Mebin dan deb se leng gus merisira naugb len lemeic gomom dou dans. 9:44 Dan douwan naugb yen meigdoc moc dougwo ginlo. Doba yen meigdoc eiseisan gin terimda. 9:45 Doba men logodeh, len meru emobgesa en mer an areg en en dou len ginero. Anai ELOHIM ecgoneh meijouhw gin dou lenaba. Dara len lemeic merus naugb leijidougwo en an meijouhw touwero. Anai len lahau dau sug len leijidougwo en andaha. 9:46 Se lona hom deit, kaba, Yesus men logodeh lenin merir lauwim icira meroho endag gareng dau maman en moho agas edreg dau maman maugwanda? 9:47 Doba Yesus en ecinaga len merdoc mes an areg lenin merir lauwim an gin touohob. Dangga hang, en os godeh hom desij en maga. 9:48 Hanoba en ens meijouhw eisaugb gin ucan dou len toua, endagai: Gareg dau yen en eperwei dan indoho, hanoba en owun enin medoc mes arjaga naugb en ebin godeh gedig en medoc ebdebin an dan gin, kaba, en eng moho agas bedreg dau lusud se ELOHIM men goiharaga len laugwan namcir. Anai en owun enin medoc mes eb tainya lusud laugwan dag ginohob. Dangga toua, gareg en ebin godeh bedag gin, kaba, gini aninim dag en ebin dan. Dara gareg en ebin dan, kaba, gini aninim dag en ebin sud hom gesa dan aud yen gin touohob. 9:49 Doba Yohanes eijidougwo Yesus an ara gus, bogod dougwo Yesus mer an areg en en graga. Hanoba en enara dou en, endagai: Adehsud, emen emeiya sud hom eic ban aboho bocirma merna mog mog dau lusud. Dangga hang, emen emen dougwo en an gini, anai en emaimo mamanero. 9:50 Doba Yesus enara bauni en mer ucugb dou en dara men logodeh gus, endagai: Gareg en emeicara ecgwan yenero, doba men geicara ucan yen, kaba, ban bemen dougwo enlo. Anai en toua eigdara yen se meijouhuda homohob. 9:51 Sug lona edagasohob naugb sug ELOHIM eigdoumesa Yesus aud bogo ucugb, kaba, en aiyan medocesem naugb en eihwedig Yerusalem. Sug en ogod dag gin se en medoc mesohob, kaba, en ebiji naugb en ec mohora aud cinogo gin toua. 9:52 Doba sug len leraga asa ucina gin, kaba, Yesus arougb men logodeh lingma laimo en men. Hanoba en enara dou len, endagai: Yen yaimo dan indir naugb yen yesedeb tu hom se leng Samaria meren hancob naugb danahabi. Sug en arougb len dag ginohob, kaba, len leinesa leng Samaria meren cinogo hom naugb len lesedeb ara ara naugb Yesus toua. 9:53 Doba sug leng Samaria louman dag Yesus emougdoc sunggaro, doba en esedeb naugb eihwedig Yerusalem toua, kaba, len len dougwo men logodeh ingga, lendagai: Emen ememouwan naugb sud hom gini en emen suginero. 9:54 Dangga hang, sug Yesus men logodeh lahwai, lan maroho Yakobus dara Yohanes, lan lauman dau gin, kaba, lan lanara lases Yesus medoc mes, landagai: Adehsud, ban bouwan, kaba, aman amacgeij ELOHIM naugb en esa smougb dau bogaden naugb ait lusud ingga laugwanda. 9:55 Sug Yesus ouman gin, kaba, en eineg aud len. Hanoba en enara bauni lan merir ucugb, endagai: Yan yamenara dag ginero. 9:56 Sug Yesus en dougwo len dag ginohob, kaba, en eihwedan len laugwan se cinogo gus deit. 9:57 Sug Yesus dara men logodeh len ledec merohora deit aud Yerusalem, kaba, sud hom acgeij Yesus naugb aimo en, endagai: Adehsud, ban bouwan, kaba, dan daiseisa ban sug ban beihweda sugiro sugiro toua. 9:58 Doba Yesus auni dou en ucugb, endagai: Mihiloro, kaba, meren igdohos mes inggebga naugb len latousa. Dara ba toua len mererum inggebga naugb len leigtousa. Doba Lusud Meraguna Mebin dan, kaba, indan ara ara ingmemeb naugb sug dan dareb touwero. 9:59 Dara sug len lagasa sud hom gus deitohob, kaba, Yesus eija en, endagai: Ban ben naugb baimo dan iteitogini. Doba sud hom ingga en enara bauwun dou Yesus endagai: Adehsud, ban beic cumougt dou dan naugb sug dan dedec dan indina gomom dauwahabi, dan demen naugb demaiseisa ban toua. 9:60 Doba Yesus enara bogod dougwo en mer, endagai: Ban bemeihwedero. Doba ban bogugwo ban abina gomom gin deb se leng lomom merisira naugb len lec en dous. Doba ban, kaba, ban beihwedig sungga sungga naugb ban besai ELOHIM moro dau sug en oiharaga lusud ucugb gin dou len dous. 9:61 Dara sud hom gus deit, kaba, en acgeij dau Yesus naugb aimo en toua, endagai: Adehsud, ban bouwan, kaba, dan toua daiseisa ban. Doba beic cumougt dou dan naugb dan dedou leng leigtou desij dan se indan tuahabi. 9:62 Doba Yesus enara bauni en mer ucugb, endagai: Sud hom gareg en ebiji naugb en aimo ucina homohob. Doba cum, kaba, en medoc etrij icira ara ara dau gini terimda, kaba, emedeinyum naugb sug ELOHIM oiharaga en se lona daiyamo gacin touwero.

Lukas 10

10:1 Sug maman Adehsud enara dou merug homoi graga dauwohob, kaba, en eigdoumesa merug sud homoi sisedeisu dag men logodeh deit. Hanoba en ohw lahwai lagugum naugb len leino en men se astesda beimes dara astesda cinogo sug en ouwan eisasa toua. 10:2 Sug en emarges len debma, kaba, en esulou len, endagai: Yen yocuncum dou sud hom men lo gini, dauntoba en esa lingma dara yen naugb yec men meij augwan deb naugb en toua. Anai men meij gin einyana inggebga, doba leng lec, kaba, lemeinyanerodaha. 10:3 Dara sug yen yeihweda, kaba, yen yesedougwo deigeigouhw namcir. Anai dan darougb yen dag domba se leng ledag mihiloro mog mog merufu dangga. 10:4 Doba sug yen yeihweda, kaba, yen yemoho meijen i moto an aregoufu, dara i aga lusud. Dara yen yemodo hwigbeimos hom dara yen touwero, doba yen yecus dous. Dara sug yen yagasa lusud se ucina mogumsi, kaba, yen yemenara yemaciduhim touwero. Doba yen meijohora esesa naugb yen yesai ELOHIM moro dou lusud terimda. 10:5 Dara sug yen yeinesa sud hom en men tu, kaba, yen yemesai ELOHIM moro dou len sug nosa touwero. Doba yen you len dag ELOHIM eic gesgigouhwesa dou len dougwo augwan nosahabi. 10:6 Sug len lebin yen meijir an ELOHIM men gesgigouhwesa gin, kaba, gesgigouhwesa eb naugb len toua. Doba sug len lemebin yen meijir an ginero, kaba, yen yeic yen meijir an gin ucugb dau len toua. 10:7 Dara sug len lebin yen an ELOHIM men gesgigouhwesa ginohob, kaba, yen yemeihwedesa tu ingma dau lenlo. Doba yen yeigtou se tu hom ingga namcir dous. Dara areg len leic dou yen naugb yen yetara era yen yegara, kaba, yen yemoguro debin lenlo. Doba yen yeic yet dara yeg namcir. Anai sug yen yesai ELOHIM moro dou len, kaba, edeinyum naugb sug len lousa yen toua. 10:8 Dara areg lusud len lougwan deb naugb yen, kaba, yen yemesilo. Dangga sug yen yeinesa beimes homohob, hanoba lusud lebin yen naugb letara desij len, kaba, yen yetara aibibrida namcir. 10:9 Dara yen yeic geigouhw dou leng areber se cinogo ingga toua. Hanoba yen yesai ELOHIM mer debin gin dou len toua, yendagai: ELOHIM men lona naugb sug en oiharaga yen ucugb, kaba, ebeij deinyorohob. 10:10 Doba astesda beimes sug yen yeinesohob, doba len lemebin yenero, kaba, yen yeic meijaga se meren ucina augwan. 10:11 Hanoba yen yeijara dou len, yendagai: ELOHIM esedeb naugb en oiharaga yen ucugb touohob, doba yen yemouwanero. Dangga yen yauweila, anai emen emasid emenin dau meijen ara ara dousero. Doba emen emetitir emen emohora an meijen cinogo mor geira emohora ucugb aud yen ginbo toua. Dauntoba yen yecinaga dag emen emarges yen deb namcirohob. Anai emen emeic cumougt geigouhw dou yenohob, doba yen yoguro namcirdaha. 10:12 Sug Yesus esulou men logodeh graga debin gin bouwohob, kaba, en eic medagas hom dau leng Sodom bogod cinogo dou len deit, endagai: Yen youman deigeigouhw. Anai se Lona Sug ELOHIM Ogod Aremer Aga Lusud, kaba, cinogo areg len lemebin yenero gini, kaba, ELOHIM eic gogom medam edreg dau leng Sodom dou len laugwan namcir. 10:13-14 Sug Yesus esulou men logodeh icira meren geicara dauwohob, kaba, en ahandenda dau cinogo homoi an meren geicara, ucan deseino len deit, endagai: Ogom medam naugb yeng se cinogo Korasin, dara yen se cinogo Bedsaida. Anai dan dens dau ganusbus einyana daos debin ELOHIM mer dou yenohob. Doba yen yemesga meijen sesar naugb yemahau an dougworo. Doba yen meigdoc agadgeij dougwo namcir. Dangga hang, se Lona Sug ELOHIM Ogod Aremer Aga Lusud, kaba, en medoc eineg an leng se cinogo Tirus dara Sidon gini edreg dau en medoc eineg an yen toua. Anai dan decinaga dau sug dan demdens ganusbus ingma dag gin dou len sug nosa, kaba, len merdoc emagadgeij dag yen ginero. Doba len merdoc eijesa an meren sesar namcir. Hanoba len leg sansun morgor, dara leiyoiyo se hirog debin gin lansins dag len merdoc obsara dau sesar touohob. 10:15 Dara yeng se cinogo Kapernaum yen yeigdoumesa yenin meijoho bedebeij se bogo danggei? Naro. ELOHIM owun yen meijoho naugb en erba yen se dum smougb dous. 10:16 Sug Yesus ahandenda dau cinogo homoi deseino men logodehohob, kaba, en esulou men logodeh graga debin gin deit, endagai: Gareg en ouman yen meijir an areg yen yesai dou en gin, kaba, gini aninim dag en aimo dan indir touohob. Doba gareg en otogoto yen an gin, kaba, gini aninim dag en otogoto dan touohob. Dara gareg en otogoto dan indir gin, kaba, aninim dag otogoto sud hom gesa dan aud yen gini touohob. 10:17 Sug Yesus men logodeh merug sud homoi sisedeisu graga len ledecicugb dau sug len lesai ELOHIM moro dou lusudohob, kaba, len lecicugb dara merdoc agahugouhw an namcir. Hanoba len ledeimiman dou Yesus, lendagai: Adehsud, emen emesai ELOHIM moro dou lusud. Dara ememeic geigouhw dou leng areber aiyei dousero. Doba sug emen emeic ban aboho naugb emocirma merna mog mog geisa se lusud merdoc mesohob, kaba, len laimo emen emir naugb lougb dau lusud merdoc mes namcir toua. 10:18-19 Doba Yesus ousa len merir an gini. Hanoba en esulou len, endagai: Yen youman deigeigouhw. Anai dan deic goubesa dou yen naugb yen yaiyan hinogo dara arou mog mog augwan. Dara dan deic goubesa dou yen, dauntoba yen yes agadgeij dougwo meijen moc Setan gin toua. Anai dan deiya ELOHIM ahacugb en dau bogo obsara abeba dan indires bedag lehinyeinya terimda se cinogo ginohob. Dangga sug meren gogom en bainyen yen, doba yen yemeijeijero. 10:20 Doba yen yemeimiman dau sug merna mog mog laimo yen meijir ginlo. Doba yen meigdoc agahugouhw an ELOHIM, anai en og yen meijoho se bogohob. Hang yen yagahugouhw an en an gin dous. 10:21 Sug Yesus ens augwan dag graga dou men logodeh merug sud homoi sisedeisu gin dauwohob, kaba, Mena Gogoufu eic medoc agahugouhw an gin dou en toua. Hanoba en en sijo dou en Mena ELOHIM, endagai: Akeinya, ban bedag mougt mera medam naugb areg geb se bogo, dara areg geb se cinogo gin augwan toua. Dangga hang, dan demen sijo medam dou ban. Anai aban aremer areg ban besedebohob, kaba, ban bemens meijouhw augwan dou leng meru ouforoho dara leng lecinaga aremeijouhw augwanohob len touwero. Doba ban abdoc esgirahesa naugb ban bens augwan gini dou leng meroho emaiyero dous. Anai gini aimo asesa areg banin bouwan danggohob. 10:22 Sug Yesus en sijo dou en Mena bouwohob, kaba, en enara dou lusud laugwan, endagai: Areg dan Indina en esinsin se bogo dara cinogo ginohob, kaba, en ogugwo augwan dou dan. Dangga hang, sud hom ingma, kaba, en emecinaga areg asesa danin indoc mes augwan asesa touwero. Doba dan Indina enin eng ecinaga dau augwan gini asesa namcir. Dara sud hom ingma, kaba, en emecinaga areg asesa ELOHIM enin medoc mes augwan touwero. Doba en Meisi dara gareg dan dens dau areg asesa ELOHIM enin medoc mes dou enohob, kaba, emenin dous eng emecinaga dau augwan gini dag misen dous. 10:23-24 Sug Yesus enara dou lusud laugwanohob, kaba, en ed men logodeh laugwan debinim. Hanoba en enara dou len, endagai: Yen youman deigeigouhw. ELOHIM eigdoumesa yen meijoho edreg dau lusud laugwanohob. Anai leng lesai ELOHIM moro sug nosa, dara leng Israel meren mougt mera medam sug nosa, kaba, len laugwan merdoc eisa naugb len leiya dan an indan geicara. Dara len louwan louman dau areg dan desai dou yen gin toua. Dobnaro. Yenin dous eng yeiya dan an augwan gin dous. 10:25 Se loneinda deit, kaba, sud hom dau leng meru ouforoho se Musa men gomnomna en eic en maga ainyes deseino Yesus naugb enara baineino Yesus men. Hanoba en eijidougwo, endagai: Bani sud hom mou ouforoho naugb bens aremeijouhw augwan asesa dou lusud. Hang ban bemens dau indan geicara areg dan daimo naugb sug ELOHIM eic maireseb huhugb dou danahabi. 10:26 Doba Yesus auni en mer ucugb, endagai: Sug ban becic se Musa men gomnomna, kaba, ban becic meijouhw eisaugb ara naugb sug ELOHIM eic maireseb huhugb dou bana? 10:27 Dangga sud hom mou ouforoho gini en ecic dau areg geb se Musa men gomnomna dou Yesus ucugb, endagai: Ban abdoc gororougb ELOHIM, aban Adehsud, dara ban abdoc augwan, dara aban geicara augwan, dara aban goubesa augwan, dara aban gauwamara augwan toua. Dara ban abdoc gororougb len gus, aninim dag ban abdoc gororougb banin abaga toua. 10:28 Sug Yesus ouman en mer an gini, kaba, en ousa deisa en mer an, endagai: Areg ban becic moho augwan gin, kaba, asesa dag misen namcir. Dangga sug ban beicara besogwesa moho gin augwan namcir, kaba, ELOHIM eic maireseb huhugb dou ban toua. 10:29 Doba sud hom mou ouforoho graga, kaba, en eija Yesus baugb magai dougwo enin deit, endagai: Dan indoc gororougb insi, kaba, gara lena? 10:30 Dangga Yesus eic gainyenara hom ucan gin dou en deit, endagai: Se lona hom, kaba, sud hom en ouwaden dau Yerusalem dig Yeriko. Sug en edebeij se ucina mogumsi, kaba, lusud merug mog logod en naugb lesma men aremougb augwan dau en. Doba len larges en maga namcir bahauwouwa se ucina mes deb. 10:31 Arenggos, kaba, gembala gesa taiji hom, en toua ouwaden asa ucina hom gini. Doba sug en eiya sud hom graga ahauwouwa dougwo ucina, kaba, en emousa enero. Doba en eitig dig ucina nagama beihwededau en namcir. 10:32 Cum cum deit, kaba, sud hom dau Lewi merdebeitor, en toua eragasa ucina gini. Dangga sug en edebeij irir sud hom gahauwouwa ginohob, kaba, en emousa enero. Doba en esa bauweila dangga dous. Hanoba en eitig dig ucina nagama bededau en toua namcir. 10:33 Doba cum cum, deit, kaba, sud hom dau leng Samaria, en toua edebeij se usi ingga deit. Dangga sug en eiya sud hom graga, kaba, en esogwa dau keledai medgomori naugb ousa en toua. Anai en medoc erij an en medamdaha. 10:34 Dangga sug en edebeij enohob, kaba, en eir anggur mohu badu en meramera augwan. Dara en eir mani dag ariawen debin mera gini toua. Hanoba en eic minc meti, bahud dougwo meramera augwan namcir. Dauwohob, kaba, en eigdoumesa en se men keledai medgomori. Hanoba en en naugb ahwan en se tu dagam hom. Sug lan ladebeij tu ginohob, kaba, en esedougwo sud hom gin se loba hom sungga toua. 10:35 Sug edebeij lonamenohob, kaba, sud hom dau leng Samaria graga, en eic aregoufu perag mogo hwai dou sud hom gesedougwo tu dagam gini. Hanoba en esulou en debin gini, endagai: Ban bagauwesa sud hom gin deigeigouhw namcir. Sug ban beic aban ara ara edreg dau aregoufu perag mogo hwai gin dou en, kaba, dan democ aban moc ingga ucugb dou bans sug dan decicugwen gin toues. 10:36 Sug Yesus eic gainyenara dag gin dou sud hom mou ouforoho gragohob, kaba, en eijidougwo en ucan, endagai: Ban boudesa dagiro? Dau merug homoi gin, kaba, gareng medoc eineg an en dag en mesi misena? 10:37 Doba sud hom mou ouforoho gini en auni ucugb dou Yesus, endagai: Dan doudesa sud hom gedig en medoc erij an en naugb ousa enohob, kaba, gin eng en mesi misen. Dangga Yesus ousa deisa en mer an gini, endagai: Areg ban ben gini misen. Hang ban toua beihweda naugb beicara dag gin toua. 10:38 Sug Yesus dara men logodeh len lec merohora aud dig Yerusalem deit, kaba, len ledebeij se cinogo hom. Sug len ledebeijohob, kaba, gida hom, moho Marta, ebin len se men tu. 10:39 Marta medemeito hom, en moho Mariam, en moongga toua se tu ingga. Dangga sug Yesus edidib ELOHIM mer men meijouhw dou lusud, kaba, en emousa medamouwa an ared gougwanero. Doba en eigtou desij maman Adehsud Yesus naugb ouman dau areg en edidib gin dous. 10:40 Doba Marta en moms meijog icira ared gen ougwan namcir. Dangga, kaba, en mer aic Yesus, endagai: Adehsud, ban barougb dan indameito Mariam en ousa naugb aman amougwan ared an yenahaba. Anai danintodaha gina? Era ban abdoc emerij an daneroei? 10:41-42 Doba maman Adehsud en enara bauwun en mer, endagai: Marta, Marta, ban abdoc eijesa dara ban abums meijog icira aremer einyana, anara? Anai aremer hom dous eng esloulougb edreg dau aremer gus augwan namcir. Dangga sug Mariam en ouci aremer hom geigouhw ginohob, kaba, lusud lemesma dau en deitero, doba ebsugeb naugb en namcir toua.

Lukas 11

11:1 Se lona hom deit, kaba, Yesus en edocuncum se usi hom. Sug en ocuncum ouwohob, kaba, sud hom dau men logodeh en acgeij en, endagai: Adehsud, ban barautut emen naugb sug emen emocuncum asesa dou ELOHIM touahabi. Aninim dag Yohanes arautut men logodeh naugb sug len locuncum asesa dou ELOHIM sug nosa touohob. 11:2 Dangga Yesus auni dou en, endagai: Sug yen yocuncum dou ELOHIM, kaba, yen yocuncum dag gini, yendagai: Akeinya, emen emouwan naugb lusud laugwan leigdoumesa dara lesijaresa ban hom dous, anai bani ecabeci namcir. Dara emen emacgeij ban ben naugb boiharaga emen se cinogo gin toua. 11:3 Dara ban beic ared edeinyum astesda lona augwan dou emen toua. 11:4 Dara ban baigdougwo emen sesar augwan dau emen, aninim dag emen emaigdougwo len gus meren geicara gecgu dou emen dau len toua. Dara ban bemesa areg ainyen emen aud sesar touwero. Doba ban beseyeiyo emen dougwo augwan gin terimda. 11:5-6 Sug Yesus arautut men logodeh se gocuncumohob, kaba, en eic gainyenara hom debin gin dou len dag len lemarges dau gocuncum gin touwero, doba len locuncum esesa terimda. Hanoba en enara dou len, endagai: Sud hom dau yen, kaba, en eihwedaud mesi hom se lobeingmod naugb en edacgeij en, endagai: Insi, ban beic roti mogo homoi dou danahabi. Anai dan insi hom en en iteitograga naugb en atou desij dan se indan tuohob. Doba indan ared ingmemeb naugb sug demeic dou en deitero. 11:7 Doba en mesi ingga, kaba, en auni dau dimei mes dou en, endagai: Ban abir emebirker emen ucucugblo. Anai dan douf misis bagadgeijohob. Dara dan dacogo dan indihir se aboti hom touadaha. Dangga hang, dan demeisa naugb demeic ared dou ban dagiro? 11:8 Sug Yesus eic gainyenara dag graga dou men logodehohob, kaba, en eijidougwo len ucan gin deit, endagai: Sug sud hom gini en eisa dau gatouda naugb eic ared dou en, kaba, yen youdesa en eic dou en dag en mesi misenei? Naro, doba yen youman deigeigouhw, anai en eija merebin en terimda. Hang en emeisa naugb emeic augwan dou en toua. 11:9 Dangga hang, dan den dou yen, dendagai: Sug yen youwan yacgeij ara ara dau ELOHIM, kaba, yen yemouf yen meijirs an gin touwero. Doba yen yacgeij en an ucucugb terimda. Dara sug yen meigdoc etrij icira ara ara dau ELOHIM, kaba, yen meigdoc emtereta dau ginero. Doba yen meigdoc esrougb an gin namcir. Dara sug yen youwan youma misis se ELOHIM men tu naugb en ousa yen toua, kaba, yen yemarges dau gin touwero. Doba yen youma misis dougwo en terimda toua. 11:10 Anai gareg en emouf mers an areg en acgeij dau ELOHIM enero, doba en medoc esrougb an gin namcir, kaba, cum, ELOHIM emeic dou ens. Dara gareg en medoc emtereta dau sug en acgeij ara ara dau ELOHIM, doba en medoc etrij icira gin namcir, kaba, cum, yen yemesma dau ens. Dara gareg en emesa doc dau sug en ouma misis se ELOHIM men tuero, doba en ouma misis dougwo en toua terimda, kaba, cum, ELOHIM emousa en toues. 11:11-12 Anai gareg dau yen sug yen meijihir, len lacgeij hosei dau yen, kaba, yen yeic hinogo dou lenei? Era sug len lacgeij berougb mougb dau yen, kaba, yen yeic arou dou lenei? Naro, yen yemeicara dag gin dou lenero. 11:13 Dangga sug yen yeic ara geigouhw dou yen meijihir dag ginohob, kaba, yen Meijina se bogo en toua emeic areg gecgu dou yen touwero. Doba en eic Mena Gogoufu dag mogud dou yen dous. Anai yen, kaba, meijen geicara einyana dag mog mog namcir. Doba en, kaba, men geicara augwan ecabeci mogud an yen dous. 11:14 Se lona hom deit, kaba, Yesus ocirma mena mog mog dau sud hom gosum. Sug mena mog mog eihwededau enohob, kaba, sud hom graga enara moho ucugb deit. Dangga sug lusud leiya dau gin, kaba, len leimiman namcir. 11:15 Doba ligbum, kaba, len lesbes an Yesus men goubesa namcir, lendagai: En ocirma merna mog mog dau lusud ogdoc ELOHIM men goubesero. Doba ogdoc merna mog mog meren mougt mera medam, moho Belsebul, men goubesa dous. 11:16 Dara ligbum deit, kaba, len louwan lainyen en. Hanoba len lenara dou en, lendagai: Ban bens ganusbus ingma dau bogo dou emenahabi. Dauntoba emen emecinaga dag aban goubesa, kaba, en dau ELOHIM enin eng dag misenohobei? Era naroei? 11:17 Doba Yesus en ecinaga len merdoc mes an ginohob. Dangga hang, en enara dou len, endagai: Sug lusud se hancob hom lenin lebemocedoum, cum, kaba, len lemedag hom deitero. Doba len leigdaum laisoboro namcir. Era sug lusud se tu hom len lohw merir doum, cum, kaba, len toua lemedag hom deitero. Doba len leigdaum laisoboro dangga toua. 11:18 Dangga toua, sug Setan enin ebemoc dou men logodeh, kaba, men goiharaga ebsugebei? Naro, emebsugeb deitero. Doba cum, kaba, len leigdaum laisoboro dangga toua. Dara yen yowun dan indoho dag dan docirma Setan men logodeh dau lusud merdoc mes ogdoc Setan, era Belsebul, men goubesa gin dous. 11:19-20 Doba sug dan docirma merna mog mog dau lusud ogdoc Belsebul men goubesa dag gin, kaba, dagiro eisaugb yenin meijen lusud gina? Len toua locirma merna mog mog dau lusud ogdoc Belsebul men goubesa ginei? Hang len lenin lemowun yen meijoho dag areg yen yenara eisaugb danohob, doba augwan gini dag yen yauwam an didi namcirohob. Anai len lecinaga dag len lemocirma merna mog mog dau lusud emogdoc Belsebul men goubesa ginero, doba ogdoc ELOHIM enin men goubesa gin dous. Dangga hang, sug len locirma merna mog mog dau lusud ogdoc ELOHIM men goubesa gin, kaba, gini ansins dag dan docirma merna mog mog gini dau lusud ogdoc men goubesa gin touohob. Doba sug dan toua docirma merna mog mog dau lusud ogdoc ELOHIM men goubesa gin, kaba, gini ansins dag ELOHIM men lona naugb sug en oiharaga lusud ucugb edebeij touohob. 11:21 Sug Yesus owun len dag gragohob, kaba, en eic gainyenara hom ucan dou len deit, dag en emocirma merna mog mog emogdoc Setan men goubesero, doba ogdoc ELOHIM men goubesa dous. Hanoba en enara dou len, endagai: Sug sud hom mobisamougb en esedougwo enin men tu, kaba, lusud lemeinesa naugb lemeida aremougb dau men tu touwero. Anai en os men aregog augwan naugb ebehnehino dougwodaha. 11:22 Doba sug sud hom mobisamougb namcir en en naugb esara dara sud hom graga, kaba, men disij owun en an men aregog augwan gin obsara dau en namcir. Dangga sug en esma men aregog augwan dau enohob, kaba, en eida men ariloboc augwan leisum namcir. 11:23 Sug Yesus eic gainyenara dag graga dou len dauwohob, kaba, en esulou len ucan deit, endagai: Gareg dau yen en emesan danero, kaba, en ebemoc dou danohob. Dara gareg dau yen en emousa dan naugb aman amehilon lusud aud ELOHIM men goiharaga gin touwero, kaba, gini aninim dag en ocirma len dau ELOHIM men goiharaga ginohob. 11:24 Sug Yesus esulou lusud dag gragohob, kaba, en esulou len dougwo merna mog mog ecicugb se len merdoc mes deit, endagai: Sug mena mog mog hom en agunya dau sud hom medoc mesohob, kaba, en ohw acec miseda mougb, dauntoba en ehilon usi naugb sug en atousa. Doba sug en emesma ingmaro, kaba, en enara dou enin se medoc mes, endagai: Dan decicugb se indan tu mohon gedig dan den dau graga ucugb deit. 11:25 Dangga sug en ecicugwohob, kaba, en edeiya, doba sud hom men tu ingga, kaba, ecabeci deb namcir. Dara aremougb augwan debinim toua dauwohob. 11:26 Hang en emedehilon mesir merug senggai gedig len merug mog edreg dau en namcir naugb len leinesa leigtou se sud hom men tu gin deit. Dangga, kaba, sud hom men geicara ecgu edreg medam dau nosa deit toua. 11:27 Sug Yesus esulou len dougwo merna mog mog bouwohob, kaba, gida hom se len ingga merufu en omi an en, endagai: Gida hom gouwaden ban dara geic arij bauwaha ban gini, kaba, ELOHIM eic geigouhw dou en namcir. 11:28 Doba Yesus ousa deisa en mer an gini. Hanoba en enara, endagai: Areg ban ben gini, kaba, misen namcir. Doba gareg en ouman ELOHIM mer, dara eicara baimo toua, kaba, ELOHIM eic geigouhw medam bedreg dau gin dou en namcir. 11:29 Doba sug lusud louwa debin en eiseisaugb namcir, kaba, en owun len meroho. Hanoba en enara dou len, endagai: Yen youwan naugb dan deic ganusbus hom dou yen deit. Doba dan demens ganusbus hom deit dag Yunus dou yen dous. Anai meijen geicara augwan ecgu namcirohob. 11:30 Dangga aninim dag Yunus en edag gansins dou leng se Niniwe sug nosohob, kaba, Lusud Meraguna Mebin dan toua demedag gansins dou yen meijug mog gin toues. 11:31 Hang se Lona Sug ELOHIM Ogod Aremer Aga Lusud Laugwan deit, kaba, gida mougt mera medam dau dig dum mer, kaba, en toua emesa desij yen naugb emehin meresa yen an meijen geicara dou dan gin toues. Anai en, kaba, sug en ouman dau Solaiman en mou ouforoho naugb en edidib aremeijouhw asesa dou lusud, kaba, en medoc emesbesero. Doba en en aigus dau sug cinogo moc ougbdesa naugb en edouman areg en edidib gin toua. Doba areg dan desai dou yen gini, kaba, mera eisaugb namcir dau areg Solaiman en edidib dou lusud sug nosohob. Doba yen yemen aud dan naugb yen youman dau areg dan desai dou yen ginero. Hang en emehin meresan yen se lona ingga toues. 11:32 Dara se Lona ingga, kaba, leng se cinogo Niniwe len toua lemesa desij yen naugb len lemehin meriresa yen an meijen geicara dou dan gin toues. Anai sug Yunus ebedbed ELOHIM mer dou len, kaba, len lemaiyan merdocesem an meren sesarero. Doba len lesga dara lahau an dougwo dedemeda namcir. Doba areg dan desai dou yen gin, kaba, mera eisaugb namcir dau areg Yunus en esai dou leng se Niniwe sug nosohob. Doba yen yemesga meijen sesar dara yen yemahau an dougwo touwero. Doba yen yaiyan meigdocesem terimda. Hang len lemehin meriresan yen se lona ingga gin toues. Yen youman dan indir an areg dan den dou yen deigeigouhw namcir. Anai augwan gini asesa dag misen toua. 11:33 Sug Yesus owun lusud an meren geicara dauwohob, kaba, en eic gainyenara dau meren geicara, dag mouf gaisema lusud ucan dou len deit. Hanoba en esulou len, endagai: Sug sud hom en ei men smougwohob, kaba, en emecgoneh dara emeic ara gus bemaihiron dougwo mouf gin touwero. Doba en ob mouf gin deb ainyes. Dauntoba sug lusud gus leinesa men tu, kaba, mouf gini aisema len laugwan toua. 11:34 Dara yen meijires gin toua aninim dag mouf naugb yen meigdoc mes. Dangga sug yen meijires esgiraha, kaba, areg geb se yen meigdoc mes augwan toua edag mouf esesilo namcir. Doba sug yen meijires dag lobeigbogo, kaba, areg geb se yen meigdoc mes toua dag lobeigbogo namcirohob. 11:35 Dangga hang, yen yesedougwo yen meijires deigeigouhw dau areg gecgu namcir. Dauntoba lobeigbogo emaihiron dougwo mouf gin deitero. 11:36 Anai sug areg gecgu hom emeb dougworo, doba meijen geicara augwan dag mouf ginohob, kaba, mouf esgiraha baisema yen meigdoc mes augwan toua. Aninim dag lampu sug areg gogor emeb dougworo, kaba, mouf aisema yen toua terimda. 11:37 Sug Yesus eic gainyenara dag graga dou lusud bouwohob, kaba, sud hom dau leng Parisi en acgeij Yesus naugb ladetara se men tu. Sug lan ladebeij tuohob, kaba, lan laigtou naugb latara. 11:38 Sug Yesus etara dara en gin, kaba, en emaimo Musa men gomnomna naugb en emedu mesira dauwahabero. Doba en eic mesira gogor batara dous. Dangga, kaba, sud hom dau leng Parisi gini en eimiman dau gin namcir. 11:39 Doba maman Adehsud enara bauni dou en an en mesir, endagai: Yeng Parisi, kaba, yen yeic meijuwemougb esesa naugb yen yedu areg geb dig medigo augwan terimda. Doba yen meigdoc mes, kaba, atij an gagungunara, dara areg mog mog namcir. 11:40 Yen meiju edgomei? Anai yen youdesa endag sud hom gesinsin areg geb dig medigo, kaba, en emesinsin areg se mes touweroei? Naro. En emesinsin se medigo dousero. Doba en esinsin areg geb se mes toua. 11:41 Dangga hang, yen yeic areg yen yagungun len gus an ginohob, kaba, yen yagaha yen meisira ingma dou len merunggwereij dag mogud toua. Anai sug yen yeicara dag gini, kaba, emeic yen meijaga emecabeci deseino ELOHIM dousero. Doba eic yen meigdoc mes augwan ecabeci deseino en toua. 11:42 Dara yen yekeba hom dau ara sisa dag garemogus, dara mohumos, dara ara gus gus gedig lahurim dara seingmera moto dou ELOHIM toua. Doba naugb lusud, kaba, yen meigdoc emedag beim an laugwanero. Doba yen yesi sud hom yom aiyei dous. Dara yen meigdoc gororougb ELOHIM naugb yen yemaimo areg asesa enin medoc mes touwero. Dangga eigouhw naugb yen yaimo gin terimda. Dara yen yemasid yenin dau sug yen yekeba hom dau areg sisa dag graga dou ELOHIM touwero. Dobnaro, kaba, ELOHIM esedeb gogom medam deinaugb yen icira gin touohob. 11:43 Dara sug yen yeinesa tuari, kaba, yen meiju ehigehi naugb yen yeigtousa maija moc geb ino. Dara sug yen yec meijohora se us mougb gedig lusud lohwaresa, kaba, yen meiju ehigehi naugb len leigdoumesa yen meijoho dara lecguna dou yen toua. Dangga ELOHIM esedeb gogom medam deinaugb yen icira gin touohob. 11:44 Dara yen yedag aremogougb moda gedig lusud lemohud tu meij dougworo. Dangga sug len lesogwesa, kaba, eic gogor dou len deseino ELOHIM enohob. Anai len lemecinaga gin dag aremogougb modero. 11:45 Sug Yesus esa mer debin leng Parisi dag graga ouwohob, kaba, sud hom dau leng meru ouforoho se Musa men gomnomna, en enara baised Yesus ucugb, endagai: Adehsud, areg ban ben dou leng Parisi gin, kaba, aninim dag ban bowun emen emoho touohob. 11:46 Doba Yesus auni dou en, endagai: Yeng meiju ouforoho se Musa men gomnomna, kaba, ELOHIM esedeb gogom medam deinaugb yen touohob. Anai yen meigdoc emeineg an lusud naugb yen yemeic Musa men gomnomna dag eijouhw dou lenero. Doba yen meigdoc agadgeij an len, kaba, yen yeic men gomnomna gini dag aguci medam bogomcin len dous. 11:47-48 Dara yen toua yemasid yenin dau yen meijemouwer meren geicara gecgu touwero. Doba yen yousa deisa len an, dara yen yos debin meren geicara gecgu gin terimda. Anai len, kaba, len leic gomom dou leng lesai ELOHIM moro sug nosa leinyanohob. Dara yen, kaba, yen yohud tu meij dougwo leng lomom gini ucucugb terimda. Dangga ELOHIM esedeb gogom medam naugb yen icira gini touohob. Anai sug yen yobungma dara tu meij gini, kaba, gini ansins dag yen meigdoc aninim se yen meijemouwer meren geicara gin touohob. 11:49 Augwan gini aimo dau areg ELOHIM en og deb se men surad, moho ELOHIM Men Aremeijouhw, deb sug nosa touohob, endagai: Cum, kaba, dan demesa indan logodeh ligbum aud len meijemouwer naugb len lemesai dan induro dou len. Dara dan demesa indan logodeh ligbum aud len naugb len lemens areg asesa danin indoc mes augwan dou len toues. Doba ligbum, len gin, kaba, len lemeic gomom dou len. Dara ligbum deit, kaba, len lemeic mog erij dou len toues. 11:50-51 Dangga hang, ebiji dau sug ELOHIM en ahasesei cinogo ginohob, kaba, gareg yen meijemouwer leic gomom dou lenohob, kaba, ELOHIM en emacgeij naugb yen yeic yenin meijugwihi yemaohw len merugwihi augwan dou en ucugb toues. Ebiji dau sug yen meijemouwer leic gomom dou Habel, terimda sug len leic gomom dou gembala gesa taij, moho Sakarias, se boromei gouwaharo dara ELOHIM Men Tuari maraufu gin touwero. Dara dan den dou yen deit. ELOHIM emacgeij naugb yen yeic yenin meijugwihi yemaohw len merugwihi augwan dag misen dara en toues. Anai meijen geicara augwan dag yen yousa deisa yen meijemouwer an meren geicara gin touohob. Yen youman dan indir an areg dan den dou yen gin deigeigouhw namcir. Anai augwan asesa dag misen terimdohob. 11:52 Dara yeng meiju ouforoho se Musa men gomnomna gini, kaba, ELOHIM esedeb gogom naugb yen toua. Anai areg yen yedidib dau Surad Injil Meb Mohon gini, kaba, yen yemens se geica dou lusudero. Doba yen yens didi dou len dous. Dangga hang, yenin yemecinaga areg asesa ELOHIM enin medoc mesero. Dara yen yedag sogo maga dougwo len gus naugb len lemecinaga areg asesa ELOHIM enin medoc mes gin touwero. 11:53-54 Sug Yesus owun leng Parisi dara leng meru ouforoho se Musa men gomnomna dag graga dauwohob, kaba, en agunya dau sud hom dau leng Parisi graga men tu. Doba sug en ec mohora gini, kaba, len graga toua leila ucan en namcir. Hanoba len lowun en an areg en en dou lenohob. Anai len merdoc esrougb an en namcir. Dara len leijidougwo en laung magai dougwo ara ara se Musa men gomnomna toua. Dauntoba sug en auni, doba en edreg dau Musa men gomnomna gin, kaba, len lehin merisira en icira gin namcir.

Lukas 12

12:1 Sug Yesus, dara leng Parisi, dara leng meru ouforoho se Musa men gomnomna len lenara laisedim asa ucinaba, kaba, lusud leinyana gougwa loucimdeb dag nosa deinaugb en debohob. Anai len louwan en edidib ELOHIM mer meijouhw dou len toua. Dangga sug len loucimdeb gin, kaba, len lohudebesim namcir toua. Doba Yesus, kaba, en esulou men logodeh dougwo leng Parisi graga meren geicara nosa dauwahabi. Hanoba en enara dou len, endagai: Yen yebehnehino yenin meigdoc mes dougwo leng Parisi meren geicara dag len larerei lusud meriresi gin namcir. Anai meren geicara gini dag gugdo mougb, hang emobobo deisa yen yaugwan dedemeda toua. 12:2 Doba inggaida. Anai areg lusud lecgoneh, kaba, len lemecgoneh se len merdoc mes terimdero. Doba se Lona Sug ELOHIM Ogod Aremer Aga Lusud, kaba, en emens augwan gini deb ainyes deseino lusud laugwans. Dara areg lusud lod se simei, kaba, emeb se simei dangga terimda touwero. Doba se Lona Sug ELOHIM Ogod Aremer Aga Lusud, kaba, en agaha simei dau augwan gin toua. 12:3 Dangga areg yen yen doum se lobohob, kaba, emeb dou yenin dousero. Doba cum, kaba, lusud laugwan lemdouman toues. Dara areg yen yecluluf an doum se yen meijums se dimeiyohob, kaba, yen yemetin se yen meigdoc mes terimda touwero. Doba cum, kaba, lusud lemeijaran se ucina dou lusud laugwan toues. 12:4-5 Dara yen yemahau dau lusud gedig len les yen meijaga touwero. Doba dan dens sud hom en moho dou yen, dauntoba yen yahau dau enin dous. Anai lusud, kaba, meren goubesa eb naugb len les yen meijaga dous. Doba sug len les yenohob, kaba, meren goubesa ingmemeb bemedreg dau gin deitero. Doba sud hom gedig dan dens dou yen gini, kaba, men goubesa edeinyum naugb sug en es yen dousero. Doba edeinyum naugb sug en erba yen se dum smougb toua. Dangga, insirija, yen youman dan indir an areg dan den dou yen gin deigeigouhw namcir. Dauntoba yen yahau dau en hom dous. Anai gini asesa dag misen namcir. 12:6 Dara yen meigdoc emeijesa dag ELOHIM en medoc emougwo yen touwero. Anai yen yecinaga dau sug lusud leic beteresugb laum aregoufu, kaba, len leic sergem lauma aregoufu dag mogo hwai dous. Doba ELOHIM medoc emougwo ba mera ouwada gini hom touwero. 12:7 Dara en ecinaga yen meijugt modi augwan naugb ecinaga astesda augwan touohob. Dangga hang, yen yemahau dau lusudero. Anai sug ELOHIM esedougwo ba mogurereito mera ouwada gini dara geigouhw namcir, kaba, en esedougwo yen edreg dau len deit. Anai yen meijina mera eisaugb edreg dau ba rumem laugwan gin namcir. 12:8 Gareg dau yen en eic mos naugb en os badi dan indoho deseino lusud terimda, kaba, Lusud Meraguna Mebin dan toua demos demadi en moho deseino ELOHIM men malaikadir laugwan toues. 12:9 Doba gareg dau yen en aideido Lusud Meraguna Mebin dan indoho deseino lusud, kaba, dan toua demaideido en moho deseino ELOHIM men malaikadir toues. Yen youman dan indir an areg dan den dou yen gini deigeigouhw namcir. 12:10 Dangga toua, gareg dau yen en eic mos naugb en esmesman Lusud Meraguna Mebin dan indoho dou len gus, kaba, gini aremer emedreg dau sug ELOHIM emaigdougwo dau enero. Doba gareg dau yen en eic Mena Gogoufu moho bacecim deseino lusud, kaba, gini aremer edreg dau sug ELOHIM emaigdougwo dau en toua deitero. 12:11 Dara sug leng Yahudi lahwan yen aud meren Majelisir se meren tuari. Era sug lusud lahwan yen aud pemerintah. Era sug len lahwan yen aud lugmahara meren mougt mera naugb loho las yen deseino len, kaba, yen meigdoc emeijesan areg yen yedidib, dara areg yen yauni dou len touwero. 12:12 Anai se lona sug len loho las yen gini, kaba, Mena Gogoufu emarautut yen an areg yen yauni ucugb dou len toues. 12:13 Sug Yesus esulou men logodeh dag graga ouwohob, kaba, sud hom dau leng leinyana ingga, kaba, en acgeij Yesus naugb en enara dou maguna an mecigbougb, endagai: Adehsud, ban ben dou dan indaguna naugb en ekeba mecigbougb gedig akeinya omom dau gin ingma dou dan toua. 12:14 Doba Yesus eriyetahesa en mer an. Hanoba en enara, endagai: Gareg en emeigdoumesa dan indoho naugb sug dan dekeba maijen aremougb gedig yan maijina omom dau gini dobocija? Naro, sud hom ingma emeigdoumesa dan indoho naugb ginero. 12:15 Sug Yesus eriyetahesa sud hom graga en mer anohob, kaba, en esulou len laugwan, dauntoba len merdoc emetrij icira aremougwero. Hanoba en enara dou len, endagai: Yen yebehnehino yenin meigdoc mes, dauntoba yen yemagungun ara ara dau len gus terimdero. Anai yen meijireseb emougdoc areg yen yagungun dau lusud gin touwero. 12:16 Sug Yesus esulou lusud dag graga bouwohob, kaba, en eic gainyenara hom debin gin dou len deit, endagai: Sud hom mesoho mougb, kaba, men cinogo eh ared aingma aingma namcir. 12:17 Dangga en enara se enin medoc mes, endagai: Dan debara naugb indan aremeij geinyana gina? Anai indan tu meij augwan atij dougwodaha. 12:18 Sug en auwam an dag ginohob, kaba, en auni dou enin se medoc mes deit, endagai: Dan deicara dag gini. Dan dot indan tu meij augwan gin, kaba, dan dadedim dag medam deit. Hanoba dan dob indan aremeij dara indan aremougb augwan deb se toua. 12:19 Dara dan den dou danin dag dan demeicara toua deitero. Doba dan deigtou debin dan indug naugb dan detara dara degara dous. Anai indan aremougb edeinyum naugb arisogomoc einyanohob. 12:20 Doba ELOHIM enara dou en, endagai: Areg ban bauwam an gini, kaba, dag sud hom mou emaiyero. Anai se loba gin, kaba, dan deic gomom dou bani. Dangga areg ban bouci augwan debinim ingga, kaba, eb naugb gareng deita? 12:21 Sug Yesus eic gainyenara dag graga dou lusud dauwohob, kaba, en esulou len debin gin deit, endagai: Dangga gareg dau yen, en emouci aremougb naugb aiman mesoho mougb deseino ELOHIM enero, doba en ouci aremougb naugb aiman mesoho mougb se cinogo gin dous, kaba, en mou emaiyero, aninim dag sud hom graga touohob. 12:22 Sug Yesus esulou lusud dougwo mesoho mougb dauwohob, kaba, en esulou men logodeh dauntoba len merdoc emeijesan areg naugb len merireseb an touwero. Hang en emenara dou len, endagai: Yen youman dan indir an areg dan den dou yen gin deigeigouhw namcir. Dauntoba yen meigdoc emeijesa icira areg yen yet, dara areg yen yeg dougwo yen meijaga touwero, doba yen yesa doc dau namcir. 12:23 Anai yen meijireseb mera eisaugb dau sug yen yehilon ared naugb yen yet. Dara yen meijaga mera eisaugb edreg dau sug yen yehilon sansun naugb yen yeg toua. 12:24 Dara yen yeiya ba lawoi, anai len lemeba dara lemec meij debero. Dara meren hameij dara tu meij naugb sug len leic meij gin debsa, kaba, ingmemeb naugb len touwero. Doba ELOHIM eic ared edeinyum dou len terimda. Dangga hang, yen meigdoc emeijesan areg yen yet, dara areg yen yeg ginero. Anai yen meijina mera eisaugb edreg dau ba laugwan namcir. 12:25 Dara gareg dau yen, sug en medoc eijesan en maireseb, kaba, en eic lona hom baulo en maireseb gin dou en touei? Naro, en emeic lona hom emaulo dou en touwero. 12:26 Sug meijen goubesa emedeinyum naugb aremer mogurei ginero, kaba, dagiro naugb yen meigdoc eijesa icira aremer gus gus augwan gina? 12:27 Dara yen yeiya dau bideh sug len leiji toua. Anai len lemeic mog erij naugb lemeicaresero. Dara len lemou igdebes naugb sug len lesinsin sansun touwero. Doba hom dau bideh gin, kaba, merij mouf esesilo edreg medam dau Solaiman men sansun gogouf cucugb augwan ginohob. Yen youman dan indir an areg dan den dou yen gin deigeigouhw namcir. Anai Solaiman, kaba, en mesoho mougb, doba men ariloboc meb tintin hom aninim dag bideh hom merij mohw gesisilo gin touwero. 12:28 Doba sug ELOHIM eg sansun se aremerij geb se lomesmes dag ginohob, kaba, dagiro, naugwe hang, yen meigdoc ebdebin an ELOHIM gurereito dag gin dousa? Yen youdesa en emeic sansun dou yen naugb yen yemegeroei? Naro, en emeic sansun dag misen dou yen yemeg toues. Anai aremerij gin, kaba, eiji irogini. Doba lonehibi, kaba, lusud lec se smougb, hang ediyebeiya toua namcirohob. 12:29-31 Dara yen yemehilon areg yen yet dara areg yen yeg. Dara yen meigdoc emeijesan areg gus augwan gin touwero. Anai leng merdoc emebdebin an ELOHIM enero len leicara laimo dag gin terimda. Doba yen Meijina se bogo en ecinaga dag areg graga augwan, kaba, esloulougb naugb yenohob. Dangga hang, yen meigdoc emeijesa an areg yen yet dara areg yen yeg gin touwero. Doba yen yeic meijuwemougb esesa naugb yen yaimo areg geb se ELOHIM men goiharaga gin dous. Anai sug yen yeicara yaimo dag gin, kaba, en emeic areg graga augwan emaos dou yen toues. 12:32 Dara yeng yemeinyanero gini, kaba, yen yemahau dau lusud gus meren geicara gecgu dou yen touwero. Doba yen yaiyan meigdocesem namcir. Anai yen Meijina se bogo en medoc eineg an yen naugb en eigdoumesa yen meijoho dag mougt mera se men goiharaga ginohob. 12:33 Dangga yen yemecgun yen meisira debin meijen arilobocero. Doba yen yeic meijen ariloboc gini yauma aregoufahabi, yen yemagahan leng merunggwereij toua. Anai sug yen yeicara dag gini, kaba, gini aninim dag yen yob i moto an aregoufu se bogo debohob. Dara i moto geb se bogo gini, kaba, emobogougb an touwero. Doba aregoufu gini eb naugb yen beb huhugb namcir, anai lusud lemeiyoho, dara agur emerij touwero. 12:34 Hang yen meigdoc emetrij icira areg geb se cinogo gin toua deitero. Anai sug meijen ariloboc eb se cinogo gini, kaba, yen meigdoc ebdebin sugin toua. Doba sug meijen ariloboc eb se bogo, kaba, yen meigdoc ebdebin sungga toua. 12:35 Dara yen yematou dau Lona Sug Dan Demecicugwen gin touwero. Doba yen yesedeh yauweila dougwo Lona gin terimda. 12:36 Aninim dag mougt mera medam men sogougwir len lematou dau en touwero, doba len leigtou dara len merires agai. Dara len lec smougb mouf eririj terimda. Dauntoba sug en ecicugb ben ouma misis, kaba, len leisa lec misis dedemeda dau en namcir. Anai en eihweda bedougwanara debin mesouwa se cinogo gus dau lenohob. 12:37-38 Dangga sug en ecicugb se lobeingmod, era sug bogo edecdaha, doba en eiya len merires agai deinaugb en ginohob, kaba, en eic geigouhw medam dou len namcir. Dara en esa magan i dau en toua. Hanoba en arougb men sogougwir len leigtou se boromei, kaba, en ougwan ared dou len toua. Yen youman dan indir an areg dan den dou yen gin deigeigouhw namcir. 12:39 Anai sug sud hom gesedougwo men tu en ecinaga dau loba sug sud hom geiyoho en en naugb eic men aremougb, kaba, en atou bamumi dau enei? Naro. Yen yecinaga dag en ematou bamumi dau enero. Doba en maires agai, dauntoba sud hom geiyoho gini emeinesa men tu touwero. 12:40 Dangga yen toua sug yen yecinaga Lusud Meraguna Mebin dan decicugb aud yen, kaba, yen yematou yamumi dau dan touwero. Doba yen yesedeh yauweila dougwo indan Lona Sug Dan Decicugb aud yen gin toua terimda. Anai sug dan decicugb aud yen gin, kaba, dan demen se lona sug yen yemoudesanero. 12:41 Sug Yesus eic gainyenara hwai dou men logodeh dag gragohob, kaba, Petrus eijidougwo en an ucan deit, endagai: Adehsud, ban beic gainyenara hwai graga dou emenin dousei? Era ban beic gainyenara hwai gini deinaugb len gus touei? 12:42 Doba maman Adehsud eijidougwo Petrus deit, endagai: Petrus, ban boudesa dagiro? Gareng en edag sogougb gen mou ouforoho dara en medoc dag hom an men geicara gina? Sug Yesus eijidougwo en an danggohob, kaba, en eic gainyenara hom ucan dou en deit, endagai: Sogougb gen mou ouforoho gin, kaba, eni sud hom sug men mougt mera eigdoumesa en moho naugb en eic ared dou men sogougwir gus, kaba, en emarges len debero. Doba en eic mouwemougb esesa. Dara en medoc hom naugb en eic ared dou len astesda lona loba terimda. 12:43 Dangga sug men mougt mera gin en emecicugwen, kaba, en emeic gogom dou en touwero. Doba en eic geigouhw dou en dous. Anai en eiya men sogougb gini dag en emarges dau men geicara ginero. Doba en aimo men geicara gini dara medoc hom namcirohob. 12:44 Hang en eigdoumesa men sogougb gin en moho, dauntoba en edag mougt mera naugb men ariloboc gus augwan toua. Yen youman dan indir an areg dan den dou yen gin deigeigouhw, anai augwan gini asesa dag misen namcirohob. 12:45-46 Doba sug sogougb graga en enara se enin medoc mes dag men mougt mera medam en emen dedemedero. Hanoba en ebiji naugb en ogod mesir ligiji, dara ligida, dara sogougwir gus. Dara en ogo ara gaihim, dara en eg ahwei mohu bed bomom namcir, kaba, men mougt mera gini en ecicugb bakugb debin en se lona sug en emecinagero. Hanoba en ehigeij en moslos eb namcir. Dara en erba en desij leng medigo Yesus se dum smougb toua. 12:47 Dangga sogougb gedig en ecinaga areg asesa men mougt mera en medoc mesohob, doba en emesedeb en medoc mes naugb emaimoro dara en emeicara emesogwesa en mogtimei mohw touwero, kaba, mougt mera eic mog erij medam dou en namcir. 12:48 Doba sogougb gedig en emecinaga areg asesa men mougt mera medoc mesbuma, kaba, mougt mera eic mog erij gurereito dou en dous. Anai en aimo areg gecgu touohob, doba en emecinaga meijouhw asesa touebma. Dangga astesda gareg ELOHIM eic einyana dou enohob, kaba, en acgeij einyana dau en ucugb. Dara gareg ELOHIM od mena debsa en naugb en eic einyana bedreg dou en deit, kaba, en acgeij bedreg ucugb dau en toua. 12:49-51 Sug Yesus esulou men logodeh dag graga ouwohob, kaba, en ens meijouhw eisaugb enin sug en en se cinogo gini ucan dou len deit. Hanoba en enara dou len, endagai: Yen youdesa dan douwaden dau bogo se cinogo gin naugb dan deic lusud laugwan merdoc dag hom dou lenei? Naro, dan demouwaden dau bogo naugb demeic lusud merdoc dag homero. Doba dan douwaden dau bogo naugb dan dec smougb mouf eririj naugb dakeba lusud merdoc mes daum dous. Dara dan indoc eisa naugb dan deb smougb gin mouf eririj namcir toua. Doba aimougtut, kaba, dan daimo ucina mog erij medam nosa dauwahabi. Hang dan indoc esesa naugb dan daimo ucina mog erij gin dauwahabi, dauntoba dan demec smougb mouf emererij se cinogo gin augwan toues. 12:52 Dangga ebiji dau lona sug dan dec smougb gini, kaba, lusud merug sergem se tu hom len merdoc dag hom deitero. Doba lusud merug homoi len merir laised lahwai. Dara lan lahwai toua lan merir laised merug homoi graga toua. 12:53 Dangga mena mer aised meisi. Dara meisi en mer baised mena. Dara mem mer aised mehida. Dara mehida mer baised mem. Dara memba mer aised mebeba mer. Dara mebeba en toua mer aised memba mer ucugb toua. 12:54 Sug Yesus esulou men logodeh graga ouwohob, kaba, en owun lusud gus mougwa hom dara ucan deit. Anai len lecinaga meijouhw dau areg en en dou lenohob, doba len launun dougwo dous. Hang en emenara dou len deit, endagai: Sug yen yeiya umer eisa dig igda obsaresa, kaba, yen yenara doum, yendagai: Cum, kaba, los es engga. Hanoba los es asesa yen meijir dag yen yen ingga toua. 12:55 Dara sug yen yeiya lougb eisa dau dig dum mer, kaba, yen yenara doum, yendagai: Cum, kaba, lohos mougb obsara deb namcir. Hanoba lohos mougb obsara deb asesa yen meijir dag yen yen ingga toua. 12:56 Dangga hang, yen meiju ouforoho namcir dau sug yen yeiya gansins se cinogo dara bogo, kaba, dag yen yecinaga meijouhw augwan asesa dau ginohob. Doba sug yen youman dau areg asesa ELOHIM enin medoc mes, dara yen yeiya men ganusbus debin gin dou yen touohob, kaba, yen yenara yendag yen yemecinaga meijouhw asesa touwero. Doba augwan gini dag yen yenara yaunun dougwo dous. 12:57-59 Sug Yesus owun len meroho dag gin dauwohob, kaba, en eic gainyenara hom ucan dou len deit. Dauntoba len lemehig debin meren sesarero. Doba len lesga dau len sug len meriresebaba. Hanoba en enara dou len, endagai: Sug sud hom ahwan yen naugb en edahacugb gogom debin yen deseino sud hom gogod aremer aga lusud, kaba, yen yemaiyan meigdocesem an meijen geicara terimda en ahwan yen deseino sud hom ginahabero. Doba yen yahahumohumesa mesi gini sug yen yec se ucina mogumsaba. Anai sug yen yeic meijus, kaba, en ahwan yen deseino sud hom gogod aremer aga lusud. Dara sud hom gini, kaba, en ogugwo yen deb se men logodeh merisira naugb len louf yen se tu gesisug dous. Yen youman dan indir an areg dan den dou yen deigeigouhw namcir. Anai sug yen yeinesa tu gesisug ginohob, kaba, yen yemen dau deitero. Doba yen yeigtou sungga terimda yen yoc sud hom graga men aremeij augwan bouwa namcirahabi. Sug Yesus eic gainyenara dag graga dou lenohob, kaba, en esulou len debin gin ucan deit, endagai: Dangga, dagiro yen yemod se yenin meigdoc mes naugb yen yemaimo areg asesa ELOHIM enin medoc mes ginero? Anai sug yen yaunun dougwo terimda sug Lona Ouwedocohob, kaba, gogom medam eb naugb yen beb huhugb namcir.

Lukas 13

13:1 Sug Yesus esulou lusud dag graga bouwohob, kaba, merug hosa dau len ledebeij en deit. Hanoba len lecic dau leng Galilea meren geicara sug nosa dou en, lendagai: Sug nosa, kaba, merug hosa dau leng Galilea len leic aremeta naugb lauwaharo dou ELOHIM. Dangga, kaba, mougt mera, moho Pilatus, en arougb men sadodor leinesa ELOHIM men igtia naugb len leic gomom dou len debin gin toua. Anai meren geicara gecgu dou en nosohob. Sug len merugwihi ohu baihirir dara aremeta mogwihi touohob, kaba, dagiro naugb len gin toua? 13:2 Doba Yesus mou obga dagasa len merir an areg len leijidougwo en an ginohob. Hanoba en enara dou len, endagai: Yen youdesa sug Pilatus ogod len lomom debin meren geicara se ELOHIM men igtia ginohob, kaba, leng gin dous eng meren sesar edreg dau leng Galilea gus meren sesarohobei? Naro. 13:3 Dangga yen youman dan indir deigeigouhw namcir. Anai sug yen yemesga meijen sesar naugb yemahau an dougworo, kaba, ELOHIM eic mor mor dou yen se dum smougb, aninim dag len gin toua. 13:4 Era, dagiro sug tu gagas deinyor cinogo Siloam eij bogod merug sorama hobjeromoi nagama lomom nosohoba? Yen youdesa len gini toua meren sesar edreg dau lusud gus se Yerusalem laugwanohobei? Gin toua naro. 13:5 Dangga yen youman dan indir deigeigouhw namcir. Anai sug yen yemesga meijen sesar naugb yen yemahau an dougworo, kaba, ELOHIM eic mor mor dou yen se dum smougb, aninim dag len gin toua. 13:6 Sug Yesus esulou len eisaugb areg graga dag ginohob, kaba, en eic gainyenara dau sug len lera mera geigouhw debin gin ucan dou len deit, endagai: Sud hom men sogo ara gesesa men lo, kaba, en ebeibei astesda lona terimda se arisogomoc homoi, doba en emesma mera homero. 13:7 Hanoba en arougb men sogougb gesedougwo men lo ingga, endagai: Ban bouman dan indir deigeigouhw. Anai dan debeibei se arisogomoc homoiyohob, doba dan demesma sogo ara gin mera hom touwero. Dangga ban behi sogo gin dau indan lo gin namcir. Anai en esuan meh mogud dougwo indan lodaha. 13:8-9 Doba sud hom gesedougwo lo ingga, kaba, en auni ucugb dou sud hom men lo gini, endagai: Adehsud, ban bamsoho besa se arisogomoc hom gin deitahabi. Dauntoba dan dogod cinogo daihi dara dahariou deitahabi. Sug era mera, kaba, en emesa dangga. Doba sug emera merero, kaba, eigouhw naugb ban bemehi dau namcir. 13:10 Se Lona Gemeicaresero hom, kaba, Yesus eni moongga se leng Yahudi meren tuari naugb en edidib ELOHIM mer men meijouhw dou len toua. 13:11 Dara gida hom gedig mena mog mog ogod en medgomori agabgebi se arisogomoc sorama hobjeromoi nagama edeisohob, kaba, en toua moongga dara len. Dangga en emec dobosbororo, doba en ec dag ounyana mogud dous. 13:12-13 Sug Yesus eiya en dangga, kaba, en enara dou en, endagai: Daneh, iteitogin, kaba, ban beigouhwohob. Dangga sug Yesus ou mesira aga en deitohob, kaba, en medgomori obosboro se mohw ucugb namcir. Hanoba en agahugouhw an ELOHIM terimda. 13:14 Doba sug sud hom gesedougwo tuari ingga en eiya gini, kaba, en medoc esrougb medam an Yesus namcir. Anai en emeic geigouhw dou gida ingga se lona gusero, doba se Lona Gemeicaresero ginohob. Hanoba en enara debin lusud laugwan, endagai: Se lona senggem, kaba, yen yemen naugb en emeic geigouhw dou yenero, anara? Anai lona hom gin, kaba, emedeinyum naugb maman mameicaresero. Doba maman maicara ogdoc lona senggem dous. 13:15 Doba maman Adehsud en owun sud hom ingga en moho an men lusud laugwan namcir, endagai: Dagiro hang, yen yeicara yarerei lusud meriresi dag gina? Anai astesda Lona Gemeicaresero, kaba, yen yaugwan yesga aumagan meijen sapi dara keledai. Hanoba yen yerei len aud duhu naugb len leg se lona gin touohob. 13:16 Sug yen yeicara dangga se lona ginohob, kaba, ELOHIM emouwan naugb dan desga gida gedig Setan ohud en se arisogomoc sorama hobjerem nagama edeisohob gin toua. Anai en toua Abraham medebeito enohob. 13:17 Sug Yesus owun len dag ginohob, kaba, igdebeseba len gin namcir. Doba len gus, kaba, len merdoc agahugouhw medam an Yesus men geicara ganusbus gin terimda. 13:18 Sug Yesus eic gainyenara dau sogo gemera merero dou lusud bouwohob, kaba, en eic gainyenara dau lona sug ELOHIM oiharaga lusud ucugb dou len ucan deit, endagai: Sug ELOHIM oiharaga lusud ucugb, kaba, gini aninim dag ara? Era dan deic dainyen dau ara dou yena? 13:19 Sug Yesus eijidougwo len dag ginohob, kaba, en enara dou len, endagai: Lona sug ELOHIM oiharaga lusud ucugb, kaba, dan deic dainyen dau sud hom geba sawi meij mogo mogurei hom se men lo dou yen. Anai sug eij bagasohob, kaba, mon ebeibeij namcir. Dangga sug eiji edag magohob, kaba, ba len len, dauntoba len loho mererumesa se men mesira augwan toua. 13:20 Sug Yesus eic gainyenara dag graga dou lenohob, kaba, en eijidougwo len deit, endagai: Lona sug ELOHIM oiharaga lusud ucugb, kaba, dan deic dainyen dag ara dou yen deita? 13:21 Sug Yesus eijidougwo len dag ginohob, kaba, en enara dou len, endagai: Lona sug ELOHIM oiharaga lusud ucugb, kaba, dan deic dainyen dau gida hom sug en eic areg mogo mogurei, moho ragi, naugb baihiriri roti mor geb se bleg homoi dou yen. Anai aimougtut, kaba, mogo mogurei dous. Doba cum, kaba, ohu mougwesa. Dangga roti mor augwan berisa medam namcir. 13:22 Gin dauwohob, kaba, Yesus dara men logodeh len lec merohora aud Yerusalem deit. Doba sug len lec merohora gini, kaba, len leinesa beimes. Dara cinogo mogurei einyana naugb sug en edidib ELOHIM mer men meijouhw augwan asesa dou len toua. 13:23 Dangga sud hom en en beijidougwo Yesus, endagai: Adehsud, se Lona Sug ELOHIM Ogod Aremer Aga Lusud, kaba, en eigdoc lusud laugwan dau meren gogomei? Era en eigdoc sud hom yom dousei? 13:24 Dangga Yesus esulou len laugwan, endagai: Yen youwan ELOHIM eigdoc yen dau meijen gogom, kaba, yen yeic meijuwemougb esesa naugb yen yeinesa misis geinyim gin dous. Anai leinyana louwan naugb leinesa, doba emedeinyumero. Anai ogom naugb len leinesa misis geinyim gindaha. Hang len lemeinesa touwero. Yen youman dan indir gin deigeigouhw namcir. 13:25 Hang yen yemeisan gurog dau ginlo. Doba yen yeic meijuwemougb esesa naugb yen yeinesa misis gin terimda. Anai sug sud hom men tu en eisa naugb oung misis dougwo yenohob, kaba, emedeinyum naugb yen yemeinesa deitero. Dangga yen yesa dig medigo naugb youma misis terimda, yendagai: Adehsud, ban bec misis dau emen touahabi. Doba en auni dou yen dig medigo, endagai: Yen yen daugiro, inggina? Anai dan demecinaga yenero. 13:26 Dangga yen toua yauni dou en, yendagai: Sug nosa, kaba, emen emetara dara emegara desij ban se aban tu. Dara ban bedidib ELOHIM mer men meijouhw dou emen se emen cinogo gin touohob. 13:27 Doba sud hom men tu graga en auni dou yen ucugb deit, endagai: Yen yen daugiro inggina? Anai dan demecinaga yenero. Hang yen yeihwededau indan tu maga ginda. Anai yen yaugwan meijen geicara dag meijug mog namcirohob. 13:28 Hanoba yen yeiyogoseser an yenin. Dara yen yeg meijugta an sud hom graga. Anai yen yeiya yen meijemouwa Abraham, dara Isag, dara Yakub, dara leng lesai ELOHIM moro sug nosa len laugwan leigtou se ELOHIM men goiharaga ginohob. Doba yenin, kaba, sud hom men tu graga en ouf misis dougwo yen deb dig medigo namcir. 13:29-30 Dara yen yeiya lugmahara dau igda eisaugb, dara igda obsaresa, dara dau dig dum mer, dara dau dig dum moho len toua leinesa ELOHIM men goiharaga gin naugb len letara dara en toua. Doba yen, kaba, yen yeigtou dig medigo dous. Dangga hang, se lona ingga, kaba, leng ledag mahara iteitogin, kaba, len ledag mebin. Doba leng ledag mebin iteitogin, kaba, len ledag mahara. Yen youman dan indir gin deigeigouhw namcir. 13:31 Se lona hom sug Yesus moongga se leng Galilea meren hancobaba, kaba, merug dau leng Parisi len len aud en naugb lococ en. Dangga sug len ledebeij enohob, kaba, len lenara dou en, lendagai: Ban bemen suginlo, doba ban beihweda se cinogo guseda. Anai Herodes ococ men logodeh deb naugb len les banohob. 13:32 Doba Yesus auni dou len ucugb, endagai: Yen yeden dou sud hom mohotimei ebeh ingga, yendagai: Ban boumanahabi, anai dan demarges dau indan geicara ginero. Doba irogini dara lona mougwa hosa debin deit, kaba, dan docirma merna mog mog dau lusud dara dan deic geigouhw dou lenaba. Anai cum, kaba, indan geicara gin augwan ouwohob. 13:33 Sug Yesus enara dou leng Parisi naugb Herodes dag ginohob, kaba, en enara badedeij leng se Yerusalem an meren geicara ucan dou len deit, endagai: Sud hom gareg en esai ELOHIM moro dou lusud, kaba, en emdomom deisa cinogo gus gusero, doba en omom deisa Yerusalem hom dous. Dangga cum, kaba, dan toua deihweda sungga naugb len leic gomom dou dan toua. Anai gini aimo dau areg ELOHIM esedeb naugb dan danggohob. 13:34 Sug Yesus enara badedeij Yerusalem dangga dou leng Parisiohob, kaba, en ou Yerusalem deseino len laugwan, endagai: Ayou, yeng se cinogo Yerusalem. Anai ELOHIM en esa men lusud leinyana dou yen naugb len lesai en moro dou yenohob, doba yen yeic gomom dou len dous. Dara en esa leng lens dau areg asesa enin medoc mes leinyana dou yen touohob, doba yen yeic igdahabi yad len namcir toua. Dara dan toua douwan doiharaga yen mougwa einyanohob, aninim dag berougb mem gerba mebera debin motor. Doba yen yoguro dan namcir. 13:35 Dangga yen youman dan indir deigeigouhw. Anai ELOHIM emoiharaga yen deitero. Doba en arges yen deb dou yenin dous. Dara dau iteitogini terimda lona sug yen yeigdoumesa dan indoho deit, kaba, yen yemeiya dan toua deitero. Anai se lona ingga, kaba, yen yagahugouhw an ELOHIM an dan, yendagai: ELOHIM, ban beic geigouhw dou sud hom gin namcir. Anai en en se Adehsud, ban aboho, naugb emenohob.

Lukas 14

14:1-2 Se Lona Gemeicaresero hom deit, kaba, Yesus en eihweda naugb edetara desij leng Parisi meren mougt mera medam hom se men tu. Dara lusud laugwan lehigdecin Yesus endag en eic geigouhw dou lusud se Lona Gemeicaresero gin danggei? Era naroei? Doba yen youman deigeigouhw. Sug Yesus etara desij sud hom ginaba, kaba, sud hom mesira dara mohora erisa en einesa aud Yesus toua. 14:3 Dangga Yesus eijidougwo leng meru ouforoho se Musa men gomnomna dara leng Parisi, endagai: Sug maman maic geigouhw dou leng gareber se Lona Gemeicarero gini, kaba, maman maicara asesa Musa men gomnomnohobei? Era naroei? Yen yauni dou danahabi. 14:4 Doba len laugwan leigtou lodinanir namcir. Dangga sug Yesus ou mesira bos sud hom gareba gragohob, kaba, en eic geigouhw dou en namcir. Hanoba en arougb en, endagai: Ban becicugb dig aban tueda. 14:5 Sug Yesus eic geigouhw dou sud hom graga, hanoba en arougb en beihwededauwohob, kaba, en eijidougwo leng Parisi dara leng meru ouforoho se Musa men gomnomna ucan gin deit, endagai: Sug sud hom dau yen en meh, era men sapi hom obsara se duhu geb se cinogo mes se Lona Gemeicarero, kaba, en amsoho len debei? Naro, en emamsoho lenero. Doba en obga dedemeda naugb edeigdoc len dau cinogo mes se Lona Gemeicaresero gin toua. 14:6 Doba len ingga lemenara ara ara ingma naugb len lemauni en mer ucugwero. Doba len leigtou dag lodinanir namcir. Anai len lecinaga, doba en enara se misenohob. 14:7 Sug Yesus eni moongga se sud hom dau leng Parisi se men tu, kaba, en ehigdecin. Doba leinyana dau len gin, kaba, len louci boromei geb ino mogud naugb len leigtousa dous. Dangga hang, en esulou len laugwan dougwo gini, endagai: 14:8 Sug sud hom ougwan ared debin lona sug en eic mesouwa. Hanoba en acgeij yen naugb yedetara dara en se men tu, kaba, yen yemobga ineino naugb yemdeigtousa se boromei geb ino nosnosero. Doba yen youci boromei dig meridigo dousahabi. Anai yen yemecinaga, doba sud hom gougwan ared gin, kaba, en acgeij sud hom gen moho agas edreg dau yen touohobei? Era naroei? 14:9 Dangga sug yen yeigtou se boromei geb ino ginohob, kaba, sud hom gougwan ared graga, en en aud yen. Hanoba en enara dou yen, endagai: Insirija, yen yeisa dau boromei gin naugb sud hom moho agas gini eigtousa dous. Anai en eng moho edreg dau yenohob. Dangga gini eic igdebes dou yen namcir. Anai yen yeisa dau boromei geb ino gin naugb yen yedeigtou dig meridigo dous. 14:10 Dangga sug sud hom en acgeij naugb yen yedetara dara en, kaba, yen yemdeigtousa se boromei geb inoro, doba yen yeigtou se boromei geb dig meridigo dous. Anai sug yen yeicara dag gini, kaba, cum, sud hom gouwan ara gini en en aud yen. Hanoba en oho mer debin yen, endagai: Insirija, yen yemeigtou suginlo. Doba yen yin naugb yen yedeigtousa boromei geigouhw geb ino gada dous. Dangga en eigdoumesa yen meijoho agas deseino lusud laugwan meriresi toua namcir. 14:11 Anai gareg en eigdoumesa enin moho agas, kaba, ELOHIM owun en moho eb tainya namcir. Doba gareg en owun enin moho eb tainya, kaba, ELOHIM eigdoumesa en moho agas namcir toua. 14:12 Sug Yesus esulou len gus laugwan dauwohob, kaba, en esulou sud hom gougwanara naugb len ingga deit, endagai: Sug ban bougwan ared se igdabogo, era se loba, kaba, ban bemacgeij ban absir, dara ban abaguner, dara ban abagtor misen, dara ban abusur, dara leng merisoho mougb naugb len lemedetara dara banlo. Anai sug len lacgeij ban naugb ban bedetara dara len ucugb, kaba, gini dag yen yeic yaunyeinyim teiteiyohob. Hang siouwa ingma emeb naugb ban se lona gacin deitero. 14:13-14 Dangga sug ban bougwan ared, kaba, ban bemacgeij leng merisoho mougwero. Doba ban bacgeij leng merunggwereij, dara leng mecicgu, dara leng merohora agaim, dara leng meriresmougb len gin eng len ledetara dara bani. Anai len gini, kaba, meren ared ingma naugb sug len lemauni ucugb dou banero. Dangga edebeij lona sug ELOHIM eigdoumesa leng merdoc edag beim an en dau gomom ucugwohob, kaba, en emeic geigouhw dou ban naugb en emauni aban geicara geigouhw gini ucugb dou ban toues. 14:15 Doba sug sud hom getara desij len en ouman Yesus mer an gini, kaba, en auni en mer ucugb, endagai: Leng leinesa ELOHIM men goiharaga naugb ledetara desij en, kaba, len gin eng agahugouhw medam. Anai en eic geigouhw medam dou lenohob. 14:16 Doba Yesus eic gainyenara hom bauni ucugb dou en, endagai: Se lona hom, kaba, sud hom gen gesrougb en esa mer dou mosur laugwan deb. Anai en esedeb naugb en gesrougb medam. 14:17 Dangga sug edebeij cumougtohob, kaba, en arougb men sogougb hom naugb eden dou len endag len laugwan len len. Anai en esedeb augwan meij mogudohob. 14:18 Doba sug sogougb gini eihweda bedebeij lenohob, kaba, len laugwan leic meren ara ara gus naugb laiyeiyo dougwo lenin namcir. Dangga sud hom gaimougtut, kaba, en enara bauni dou sogougb, endagai: Dan douma indan lo menau homaba. Hang ban biden dou aban mougt dag en medoc emecgwan danlo. Anai esloulougb naugb dan deiya indan lo dauwahabi. 14:19 Dara sud hom gus en toua enara bauni dou en deit, endagai: Dan douma sapi maga sisohob. Hang ban biden dou aban mougt endag en medoc emecgwan danlo. Anai iteitogin, kaba, dan deihwededau naugb didainyen indan sapi ginahabi. 14:20 Dara sud hom gus ingma deit, kaba, en toua enara dou en, endagai: Len louf dan insouwa dou dan gragaba. Hang emedeinyum naugb dan demeihwedaud aban mougtero. 14:21 Sug len lenara launi dangga dou sogougwohob, kaba, en ecicugb naugb en edecic dau augwan gini asesa dou men mougt mera medam gin deit. Doba sug mougt mera en ouman, doba len laugwan leic meren ara ara gus naugb laiyeiyo dougwo lenindaha, kaba, en medoc esrougb medam an len namcir. Dangga hang, en emarougb men sogougb deit, endagai: Ban beihweda dedemeda naugb ban beraga ucina gouji dara ucina menesi augwan. Hanoba ban behilon leng merunggwereij, dara leng mecicgu, dara leng merires mougb, dara leng lagaimahabi, ban bemahwan len laugwan aud dan sugini. 14:22 Sug sogougb graga en aimo dag areg men mougt mera arougb en an ginohob, kaba, en ecicugb aud en deit. Hanoba en enara dou men mougt, endagai: Adehsud, areg ban barougb dan an gin, kaba, dan deicara daimohob. Doba aban dimei augwan mes mogudaha. 14:23 Dangga mougt mera en arougb men sogougb ingga deit, endagai: Ban beihwededau maman cinogo ginda, kaba, ban beiya indusur tog leigtou augwougb se ucina mebera, kaba, ban benara baimougwesa len laugwan len len sugini. Dauntoba indan dimei augwan atij namcirahabi. 14:24 Sug mougt mera arougb men sogougb dag ginohob, kaba, en enara dou leng graga gedig len leigtou desij en se men dimeiyohob, endagai: Yen youman dan indir deigeigouhw. Yenin dous eng yetara dara dan. Doba leng areg dan dacgeij len aimougtut, kaba, sud hom ingma emedetara dara danero. 14:25 Sug Yesus esulou leng se mougt mera dau leng Parisi men tu dauwohob, kaba, en eihwededau tu ingga naugb eihweda dig Yerusalem deit. Sug en ec asa ucina gin, kaba, lusud leinyana gougwa loucan en toua. Dangga Yesus en eineg ucugb. Hanoba en esulou len, endagai: 14:26 Gareg dau yen en ouwan aimo dan, doba en medoc acincin an mena dara mem, dara mesouwa dara mehir, dara magtor dara medemeitor, dara enin edreg dau dan namcir, kaba, emedeinyum naugb sug en aimo danero. 14:27 Dara gareg dau yen en emaimo ucina mog erij aud gomom ucan danero, doba en ahau dau namcir, kaba, dan demouwan naugb sug en aimo dan touwero. 14:28 Sug Yesus esulou len dag gragohob, kaba, en eic gainyenara hwai debin gin dou len deit. Dauntoba len lemaimo en augwougblo, doba len lauwam anahabi, endag len laimo ucina mog erij ucan en danggei? Era naroei? Hanoba en eic gainyenara hom hom dou len dag gini, endagai: Gareg dau yen en ouwan ohud men tu gagas hom, kaba, en emohud augwougblobma. Doba en ecic men aregoufu augwan deb nosahabi. Dauntoba en ecinaga men aregoufu edeinyum naugb sug en ohud tu gin bes enggei? Era naroei? 14:29 Anai sug en emeicara dangga deb nosahabero, kaba, cum, lusud gus leic en lacecim namcir. Anai len leiya, doba en ogo buc augwougb deb dous. Doba men ingma emeb naugb sug en ahud dedemedero. 14:30 Hanoba len lenara doum, lendagai: Yen yeiyahabi. Sud hom gin en ohud men tu gagas gini, doba en emecic men aregoufu nosahabero. Dangga aregoufu ingmemeb naugb sug en ohud dedemeda touwero. 14:31 Era sug mougt mera gouji hom en ouwan esara dara mougt mera gouji gus, kaba, en esara augwougwei? Naro, en auwam an meijouhw eisaugb men sadodor merug ribu sisa gin nosahabi. Dauntoba en ecinaga men sadodor gini edeinyum naugb sug len lesara dara mougt mera gouji gus men sadodor merug ribu sud hom gin enggei? Era naroei? 14:32 Dangga sug en auwam an eisaugb ginohob, doba emedeinyumero, kaba, en esa lusud aud mougt mera gouji gus sug en eigtou aigusaba. Dauntoba len leijidougwo en endag lan lasgigouhwesem dousei? Era naroei? 14:33 Sug Yesus eic gainyenara hwai dag graga dou len dauwohob, kaba, en esulou len ucan deit, endagai: Dangga toua, gareg dau yen en medoc emarges dau areg gin augwanero, kaba, emedeinyum naugb sug en aimo dan touwero. 14:34 Sug Yesus esulou lusud dag len merdoc eirirga en edreg dau areg gus augwan dag ginohob, kaba, en esulou len ucan deit dag meren geicara augwan dag aremor gahaufo namcir. Hanoba en enara dou len, endagai: Aremor sug eigouhwaba, kaba, ahaufo namcir. Doba sug men gahaufo ediyebeiya dauwohob, kaba, dagiro naugb sug lusud lemesinsin men gahaufo gin ucugb deita? 14:35 Naro, len lerba deb namcir dous. Anai aremor gemahauforo gin, kaba, emedeinyum naugb sug lusud lemeicara dousero. Doba emedeinyum naugb sug len laihirir aremeta mor naugb lahariou meren lo touwero. Gareg dau yen en moms ai, kaba, en oc moms naugb areg dan den dou yen gini deigeigouhw namcir.

Lukas 15

15:1 Doba sug Yesus edidib ELOHIM mer men meijouhw dou lusud, kaba, leng lacgeij lusud naugb len lohw cinogo dou leng Roma dara leng leicara gecgu, kaba, len laugwan len len naugb louman sug Yesus ebedbed dou len toua. 15:2 Dangga leng Parisi dara leng meru ouforoho se Musa men gomnomna, sug len leiya dau gin, kaba, len lenara doum ucucugb an Yesus, lendagai: Dagiro, naugwe hang, sud hom gin en emocirma len ginero, doba en ebin len lebesesar gini naugb len letara dara en dag gina? 15:3 Sug Yesus ecinaga dag len lenara ucucugb an enohob, kaba, en eic gainyenara eisaugb domba hom gediyebeiya dou len ucan deit, endagai: 15:4 Sug sud hom dau yen en men domba maga huntun hom, doba hom ediyebeiya dau len, kaba, yen youdesa dagiro? En amsoho domba hom gin namcirei? Naro, en arges men domba gedig maga mos senggegu senggegu edeisu se lomougwisa deb. Hanoba en edehilon hom gediyebeiya graga naugb edesma ucugb touahabi. 15:5 Dangga sug en esma ucugwohob, kaba, en medoc agahugouhw medam an namcir. Hanoba en odo domba gini se mebera aud men tu deb. 15:6 Sug en edebeij men tuohob, kaba, en eija mesir dara leng geb acec len laugwan toua. Hanoba en enara dou len, endagai: Yen meigdoc agahugouhw medam dara dan. Anai indan domba hom gediyebeiya gin, kaba, dan desma ucugwohob. 15:7 Dangga toua sug sud hom gebesesar en esga men sesar, dara en ahau an dougwo namcir, kaba, leng se bogo len laugwan lagahugouhw medam an en edreg dau leng merug mos senggegu senggegu edeisu gedig meren sesar ingmaro. Anai len laimo areg asesa ELOHIM enin medoc mesohob. Yen youman dan indir an areg dan den dou yen deigeigouhw namcir. 15:8 Era sug gida hom men aregoufu dau perag mogo sisa moonggeb naugb en. Doba hom obsara se aremoslos, kaba, en amsoho deb touei? Naro, en asaih lampu mouf aisema. Hanoba en ocirma aremoslos geb se dimei mes augwan debinim hom toua. Dauwohob, kaba, en ehilon aremoslos ingga deigeigouhw dougwo terimda en esma aregoufu gobsara graga ucugwohob. 15:9 Dangga sug en esma aregoufu hom gobsara graga ucugwohob, kaba, en eija mesir, dara leng geb acec, len laugwan toua. Hanoba en enara dou len, endagai: Yen toua, yen meigdoc agahugouhw medam dara dan. Anai indan aregoufu hom gobsara, doba dan desma ucugwohob. 15:10 Dangga toua sug sud hom gebesesar en esga men sesar, dara en ahau an dougwo namcir, kaba, ELOHIM men malaikad laugwan len lagahugouhw medam aninim dag gin toua. Yen youman dan indir an areg dan den dou yen gini deigeigouhw namcir. 15:11-12 Sug Yesus eic gainyenara hwai dag graga dou leng Parisi dara leng meru ouforoho se Musa men gomnomna ouwohob, kaba, en eic gainyenara hom dara ucan dou len deit, endagai: Sud hom en meisi lahwai. Dangga meisi godeh enara dou en mena, endagai: Akeinya, ban bekeba aban mecigbougb dobuc amanahabi. Hang mena aimo en mer naugb ekeba men mecigbougb dobuc lan toua. 15:13 Lona hosa debin gini, kaba, meis godeh ohw men mecigbougb graga augwan bauma aregoufu. Hanoba en eihwedan augwan se gus medam. Sug en edebeij cinogo gen eihwedaud inggohob, kaba, en eic men aregoufu augwan ingga bamcirac icira gogo ara gaihim, dara geicara gecgu augwan toua terimda. 15:14 Doba sir medam einesa cinogo ingga. Dangga sug men aregoufu augwan ouwa dau en enohob, kaba, sireben bahauwa namcir. 15:15 Dangga sug en eihweda naugb edeicara dou sud hom sunggohob, kaba, sud hom ingga arougb en naugb en edesedougwo men hweij se men lo dous. 15:16 Doba sug sireben namcir, kaba, en ouwan et ared mougb hweijeba. Dobnaro. Sud hom ingma emeic ared dou en touwero. 15:17 Doba se lona hom, kaba, en edouma medocesero. Hanoba en enara dou enin, endagai: Dag gin, kaba, dan indina men sogougwir laugwan letara beicer dau, hanoba mougweb inggina? Doba dan sugini, kaba, sireba dan dahauwa namcir. 15:18 Sug en enara dangga dau medocohob, kaba, en enara dou enin deit, endagai: Dan decicugb aud akeinya ucugbda. Hanoba dan dedenara dou en, dendagai: Akeinya, dan debesesar an ELOHIM se bogo dara ban touohob. 15:19 Hang emedeinyumero naugb sug ban bemeija dan dag ban abisi deitero. Doba ban beija dan dag aban sogougb dous. 15:20 Sug en enara dag gin dau medoc inegohob, kaba, en ecicugb aud meneda. Doba sug en ebeij se aigusaba, kaba, mena ed maires beiya enohob. Dangga en obga dagaseni. Hanoba en ani eni. Dara ou mouhwesa en toua. Anai en medoc erij an en namcirdaha. 15:21 Doba meisi gin, kaba, en en dougwo mena, endagai: Akeinya, dan debesesar an ELOHIM se bogo, dara ban touohob. Dangga hang, dan demedeinyum naugb sug ban beija dan dag ban abisi deitero. 15:22 Doba mena arougb men sogougwir bogod dougwo en mer an gini. Hanoba en arougb len, endagai: Yen yobga dedemeda naugb yen yedeic sansun geigeigouhw hom naugb yen yeg seni. Dara yen yeic cincin naugb yen yeg se en mesira mob. Dara yen yeg hwigbeimos se en mohora toua. 15:23 Dauwohob, kaba, yen yedeic sapi meijaba mering moto moto hom. Hanoba yen yougwan, dauntoba maman maugwan matara, dara magahugouhw medam an en toua. 15:24 Anai dan indisi hom gin, kaba, en edag omom dau danohob. Doba iteitogin, kaba, en edeisa ucugwohob. Dara en edag sud hom gediyebeiya dau dan touohob. Doba iteitogin, kaba, en edagunya ucugb deitohob. Sug mena agahugouhw an en meis gin dag ginohob, kaba, len lebiji naugb letara aninim dara en toua. 15:25 Irir sug magto en en gin, kaba, en maguna eni moongga se lo. Dangga sug en en dau lon, hanoba en edebeij deinyor tu magohob, kaba, en ouman, doba len lohw aresgwemer dara len leinuhwera dugmougb. 15:26 Dangga en eija mena men sogougb hom dougwo, endagai: Len lohwaresgwemer dara len leinuhwera dugmougb anara inggina? 15:27 Doba sogougb ingga en auni dou en, endagai: Ban abagto en ecicugwohob. Dangga ban abina en ogug sapi meijaba gedig mering moto moto hom naugb ougwanara debin en. Anai en ecicugwen dara mena agauwohob. 15:28 Sug maguna ouman dau gini, kaba, en medoc esrougb medam an mog mog namcir. Hanoba en emeinesa se dimei mes touwero. Doba en eigtou dig medigo dous. Dangga sug en mena en aud enohob, kaba, en enara bahumohumeseni, endagai: Ban toua, beinesa dimei mes en. 15:29 Doba meisud gin en ebara moumougb dou mena namcir, endagai: Dan deic indug erij dag sogougb dou ban se arisogomoc einyanohob. Dara dan demedreg ban abir mougwa hom touwero. Doba ban beic ara dou dan naugb ginohoba? Naro, ban bemeic kambing meh hom naugb dan didougwan an dan insir touwero. 15:30 Doba ban abisi hom gin, kaba, en eic aban aremougb augwan naugb oucira ligida dous. Doba sug en ecicugb, kaba, ban bogug sapi meijaba gedig mering moto moto hom naugb baugwanara debin enohob. 15:31 Doba mena enara bahumohumesa en terimda, endagai: Dan indisi, ban mebin, kaba, ban beigtou desij dan terimda. Dangga areg geb se indan tu augwan ebdodo banohob. 15:32 Doba ban abagto gin, kaba, en edag omom dau mamanohob. Doba iteitogin, kaba, en eisa ucugwohob. Dara en edag sud hom gediyebeiya dau maman touohob. Doba iteitogin, kaba, en edagunya ucugwohob. Dangga hang, eigouhw naugb maman maugwanara debin en naugb maman magahugouhw an en toua.

Lukas 16

16:1 Sug Yesus eic gainyenara dag graga dou leng Parisi dara leng meru ouforoho se Musa men gomnomna bouwa dauwohob, kaba, en eic gainyenara dau sug maman mamdoc ouforoho naugb mauhw areg geb se cinogo gini dou men logodeh ucan deit. Hanoba en enara dou len, endagai: Sud hom mesoho mougb en eigdoumesa sud hom dau men sogougwir naugb en esedougwo men aremougb augwan. Doba se lona hom, kaba, ligbum ledeineg dou en, lendagai: Sud hom gesedougwo aban aremougb augwan, kaba, en esedi aban aremougb einyana daudohob. 16:2 Sug mougt mera ouman gini, kaba, en eija men sogougb hom graga aud eni. Hanoba en eijidougwo en, endagai: Dan douman, doba ban besedi indan aremougb augwan dauwohob. Dangga hang, ban bemecic dau indan aremougb areg ban besedougwo ginohob meijouhw augwan asesa dou dan iteitoginahabi. Anai dan demouwan naugb ban bemesedougwo indan aremougb gin deitero. 16:3 Dangga sud hom gesedougwo aremougb graga, kaba, en enara se enin medoc mes, endagai: Indan mougt mera asid danohob. Gin, kaba, dan deicara dagiro deita? Anai sug dan dedeic lo, doba indan goubesa emedeinyum naugb ginero. Era sug dan dedohwiaga len gus an ared, kaba, igdebeseba dan an gin touadaha. 16:4 Dangga eigouhw naugb dan dehilon ucina naugb deic dan insir merdoc eigouhw an dan. Dauntoba sug mougt mera erba dan namcir, kaba, len lebin dan se meren tu toua. 16:5 Sug en oudesa se enin medoc mes edeinyum danggohob, kaba, en eija leng areg men mougt mera men aremeij eb dou lenohob len laugwan naugb len len aud eni. Sug len laugwan lacinimohob, kaba, en eijidougwo sud hom gaimougtut, endagai: Indan mougt mera men aremeij geb dou ban, kaba, hosaiya? 16:6 Dangga sud hom ingga en auni dou en, endagai: Aban mougt mera eic men mani se debecij huntun hom dag aremeij dou danohob. Dangga mougt mera men sogougb gini en auni dou en, endagai: Ban beigtou sugaih. Hanoba ban bog surad menau dedemeda iteitogini dag indan mougt mera men aremeij dou ban gini, kaba, dag debecij mos sergem dous. 16:7 Gin dauwohob, kaba, en eijidougwo sud hom gus deit, endagai: Indan mougt mera men aremeij geb dou ban toua, kaba, hosaiya? Dangga sud hom ingga en auni dou en, endagai: Aban mougt mera en eic men tramdad se karon maga huntun sisa dag aremeij dou danohob. Dangga mougt mera men sogougb gini en auni dou en, endagai: Aban surad an aremeij inggang gini. Hanoba ban bog surad menau dag indan mougt mera men aremeij geb dou ban, kaba, dag tramdad karon huntun senggemoi dous. 16:8 Sug mougt mera en ouman gini, kaba, en eimiman dau men sogougb hom gesedi men aremougb gin namcir. Anai en mou ouforoho naugb en ehilon ucina naugb enin terimda. 16:9 Sug Yesus eic gainyenara dag graga dou men logodeh bouwohob, kaba, en esulou len ucan deit, endagai: Dangga yen toua yemecgun yen meisira debin meijen aremougb geb se cinogo ginlo. Doba yen yagaha meisira an ingma dou len gus terimda. Anai sug yen yeicara dag gin, kaba, leng se bogo leigdoumesa yen meijoho dag len mersi misen namcir. Dangga sug meijen aremougb augwan ediyebeiya dau yenohob, kaba, len lebin yen deisa meren dimei maireseb huhugb gin toua. Hang yen meiju emedgomlo. Doba yen meiju ouforoho naugb yen yauhw meijen aremougb geb se cinogo gin toua. Anai len gedig Bilis oiharaga len se cinogo gin, kaba, len meru ouforoho namcir, edreg dau leng leb se mouf naugb len lohw meren ara geb se cinogo gin toua terimda. Yen youman dan indir an areg dan den dou yen gin deigeigouhw namcir. 16:10 Dangga esloulougb naugb yen yesedougwo areg mera ouwada geb se cinogo gini dara yen meigdoc hom namcir. Anai sug yen yeicara dangga, kaba, yen yesedougwo areg mera eisaugb gen dau bogo dara yen meigdoc hom toua. Doba sug yen meigdoc dag hwai an areg mera ouwada geb se cinogo gin, kaba, yen meigdoc dag hwai an areg mera eisaugb gen dau bogo toua. 16:11 Hang ELOHIM emod mena debsa yen naugb en ogugwo areg mera eisaugb gen dau bogo se yen meisira touwero. 16:12 Anai sug yen yemesedougwo ELOHIM men aremougb geb se cinogo gini dara yen meigdoc homero, kaba, en emeic yenin meijen dou yen toua dagiro? 16:13 Dangga yen yemeicara naugb mougt hwai daremlo. Doba yen yeicara naugb mougt hom dous. Anai sug yen yeicara naugb mougt hwai, kaba, cum, yen meigdoc gororougb homa. Doba yen meigdoc esges homa. Era sug yen meigdoc edag beim naugb yen yaimo mougt homa mer, kaba, cum, yen yohoiya mougt homa en mer gin toua. Dangga emedeinyum naugb yen yemeicara dou ELOHIM dara aremougb lahwas daremero. Doba yen yeicara dou mougt hom dous. 16:14 Sug leng Parisi len louman, doba Yesus esulou men logodeh dag len lemeigdoumesa aremougb emedag mougt naugb lenero, kaba, len leic Yesus mer lacecim namcir. Anai len merdoc gororougb aremougb namcirdaha. 16:15 Dangga Yesus enara bauwun len merir an gini, endagai: Sug len gus leiya yen meijaga debin, kaba, len leigdoumesa yen meijoho dag yen yaimo Musa men gomnomna augwanohob. Doba areg lusud leimiman dau cinogo gin, kaba, ELOHIM ocuc an, hang owun bobsara namcir toua. Anai en ecinaga areg se lusud merdoc mes augwan dag misenohob. 16:16 Doba Musa men gomnomna gini, dara areg leng lesai ELOHIM moro sug nosa len log deb se Surad Injil Meb Mohon debohob, kaba, augwan gini edougdoc sug Yohanes en ebedbed dou lusud se lomougwisa dous. Dangga dau lona ingga, kaba, lusud lemos debin Musa men gomnomna gin deitero. Doba len leic meruwemougb esesa naugb sug ELOHIM oiharaga len ucugb deit. Anai ebiji dau lona sug Yohanes ebedbed dou lusud se lomougwisa gin, kaba, lusud lesai mer geigouhw dau sug ELOHIM oiharaga len ucugb dou lenohob. 16:17 Dara areg ELOHIM en ens deb se Surad Injil Meb Mohon deb eisaugb ginohob, kaba, mer mohw hom emediyebeiya touwero, doba eb huhugb namcir. Dangga bogo dara cinogo lamediyebeiyes. Doba ELOHIM en mer gin, kaba, emediyebeiya terimdero. 16:18 Gareg dau yen en ogod ameiji dougwo en mesouwa, hanoba en edeic gida hom deit, kaba, gini dag en mesirebsa en dous. Dara gareg dau yen, en edeic gida gedig mesuwa ogod ameiji dougwo en deb ingga, kaba, gini dag en mesirebsa en toua. 16:19 Sug Yesus owun leng Parisi dag graga ouwohob, kaba, en eic gainyenara hom ucan dou len deit, endagai: Sud hom mesoho mougb sug nosa, kaba, en eg sansun geirir dara garjeijaga gedig mera eisaugb namcir. Dara en ogo ara gaihim naugb eic medoc eigouhw dou en astesda lona terimda toua. 16:20 Dara sud hom monggwereij, moho Lasarus, en toua eigtou deinyor sud hom mesoho mougb men misis moc. 16:21 Anai en oudesa endag sud hom mesoho mougb gini en etara dau moslos, kaba, en emeic ingma dou en toues. Dara sud hom Lasarus gini, kaba, geilet en toua namcir. Dangga sug en eigtou se misis moc gini, kaba, mihi len lomna en meramera augwan gin toua. 16:22 Doba sug sud hom monggwereij gini en omom, kaba, malaikad ledahwan en naugb en eigtou desij Abraham dig en mesira misen se bogo. Dara lona hosa debin gin deit, kaba, sud hom mesoho mougb en toua omom ucan Lasarus. Hanoba len ledec en toua. 16:23 Doba en, kaba, en edeic mog erij medam se dum smougb namcir. Dangga sug en oho en mergo ginohob, kaba, en eiya Abraham eigtou aigusi dau en namcir. Dara en eiya Lasarus en toua eigtou dig Abraham mesira misen toua. 16:24 Sug en eiya lan, kaba, en eiyagarij Abraham, endagai: Injemouwa Abraham, ban abdoc eineg an dan. Hang ban barougb Lasarus naugb en ogun mesira mob se duhu naugb en edargeh dan intemouwahabi. Anai smougb ait dan indaga augwan erij dara esrougb medam namcirdaha. 16:25 Doba Abraham auni en mer ucugb, endagai: Dan indebeito, sug ban abireseb se cinogo gaih, kaba, ban besma areg geigouhw mogud naugb eic ban abdoc eigouhw anohob. Doba absitog Lasarus, kaba, esma areg mecicgu mogud dous. Ban abdoc eiseisan ginohobei? Dangga iteitogini, kaba, Lasarus en eigtou se geigouhw dara medoc ebtou namcir. Doba ban, kaba, ban beigtou se dum smougb naugb beic ban abug erij sungga terimda. 16:26 Toua, ELOHIM en esinsin cigaha gebehibera medam bogod dougwo mamandaha. Dangga emedeinyum naugb sug emen sugini emedebeij yen sunggaro. Dara yen sungga, kaba, yen yemedebeij emen sugin touwero. 16:27-28 Sug sud hom mesoho mougb en ouman dag gini, kaba, en eiyagarij Abraham deit, endagai; Injemouwa, Abraham, dan dacgeij naugb ban barougb Lasarus en eihweda naugb en eden dou dan indaguner dara indagtor merug sergem merugwengga se dan indina men tu naugb en edesulou len dougwo ginahabi, dauntoba len lemaimo ucina gedig dan daimo ginlo. Anai sugin, kaba, mog erij medam namcirdaha. 16:29 Doba Abraham enara bauni en mer ucugb deit, endagai: Ban abaguner dara ban abagtor, kaba, Musa men gomnomna inggebga naugb lenohob. Dara areg leng lesai ELOHIM moro nosa len log deb se surad deb nosohob, kaba, eb deinaugb len touohob. Dangga eigouhw naugb len louman areg len len dougwo len an meren surad ingga nosahabi, dauntoba len lemedebeij usi ban beigtou sungga touwero. 16:30 Doba sud hom mesoho mougb en auni dou Abraham ucugb, endagai: Dan injemouwa, Abraham, dan doudesa gin, kaba, emedeinyumero. Doba sug sud hom gomom eihweda naugb edendara dou len, kaba, edeinyum naugb len lesga meren sesar dara lahau an dougwo namcir. 16:31 Doba Abraham enara bauni en mer ucugb namcir, endagai: Sug ban abaguner dara ban abagtor len merdoc emebdebin an areg Musa dara leng lesai ELOHIM moro len log deb se Surad Injil Meb Mohon naugb lenero, kaba, len merdoc emebdebin an sud hom sug en eisa dau gomom gin touwero.

Lukas 17

17:1 Sug Yesus eic gainyenara dou leng Parisi dag graga dauwohob, kaba, en esulou men logodeh ucan deit. Dauntoba meren geicara emaugwohosa men logodeh gedig len ledag mahanihenaba touwero. Doba len larges dau namcir. Hanoba en enara dou len, endagai: Areg eic lusud naugb len merdoc emebdebin an dan deitero, doba len lobsara dau dan icira gin, kaba, emagunya debin yen dag misen toues. Anai lusud merdoc etrij icira, hang arautut len naugb len leicara larses indan logodeh gin toua terimda. Doba gareg men geicara eic dag sud hom dau indan logodeh gin en obsara dau dan, kaba, ELOHIM eic gogom medam dou en toua namcir. 17:2 Dangga eigouhw dau sug en emeicara bemaimo dag gin an enbuma, kaba, dag lusud lera aumaga an igdahab gouji se en morcahabi, len lemerba en se dum mohu toua. Anai sug len lamsoho en, hanoba en eicara baimo dag gin an indan godeh hom gedig en medoc ebdebin an danohob, kaba, ELOHIM eic gogom edreg medam dau gin dou en deit. Hang yen yebehnehino yenin meigdoc mes dougwo meijen geicara augwan toua deigeigouhw namcir. 17:3 Dangga sug yen meijaguna, era yen meijagto hom, en eicara gecgu an yen, kaba, yen yen dougwo en. Doba sug en esga men sesar dou yenohob, kaba, yen meigdoc emagadgeij an en touwero. Doba yen yaigdougwo men aremer dag mogud namcir. 17:4 Dara yen yemaigdougwo men aremer mougwa hom gin dousero. Doba sug en ebesesar an yen mougwa senggai icira se lona hom, hanoba en en aud yen naugb en acgeij dag yen yesgigouhwesem, kaba, yen meigdoc emagadgeij an en touwero. Doba yen meigdoc an en naugb yen yaigdougwo men aremer mougwa senggai icira dag mogud dou en toua. 17:5 Sug maman Adehsud men logodeh len louman dau gin, kaba, len lacgeij en, lendagai: Adehsud, ban bousa emen, dauntoba emen emdoc ebdebin an ELOHIM edreg dau mohw deit. 17:6 Doba maman Adehsud en auni ucugb dou len, endagai: Yen meigdoc ebdebin an ELOHIM aninim dag sawi mogo mogurereito dous, kaba, edeinyum naugb yen yenara dou sogo berjag gini dag en ohoma enin dau sugini naugb en edesesa dum mohu deit. Hanoba en aimo yen meijir asesa dangga toua. 17:7-8 Sug Yesus auni men logodeh merir an areg len lacgeij en an graga dauwohob, kaba, en esulou len. Dauntoba len ledag ELOHIM men sogougb, kaba, len lemeigdoumesa lenin meroho an meren geicara dou en touwero. Hanoba en enara dou len, endagai: Sug sud hom dau meijen sogougb en ecicugb dau sug en eicara se meijen lo. Era dau sug en esedougwo meijen domba, kaba, yen yenara dou en dag en eigtou se boromei dedemeda naugb en etarahabei? Naro, yen yemenara dangga dou enero. Doba yen yarougb en naugb en ougwan ared naugb yenahabi. Gin dauwohob, kaba, yen yarougb en deit, yendagai: Ban beg sansun menau naugb ban bodo ared ingga dou dan. Hanoba ban behigdodo dan naugb dan degara dara detara bouwa dauwahabi, ban bemet aban ared deit. 17:9 Dara sug en aimo yen meijir an ginohob, kaba, yen yen sijo dou en touei? Naro, yen yemen sijo dou en touwero. Anai gini aimo areg yen yogod an deb naugb en danggohob. 17:10 Dangga yen toua, sug yen yaimo areg ELOHIM arougb yen anohob, kaba, yen yemeigdoumesa yenin meijoho an ginero. Doba yen yowun yenin meigdoc mes arjaga an gin dous. Hanoba yen yenara dou yenin, yendagai: Maman madag sogougb gemera mera hom dou maman mougtero. Anai maman maicara maimo areg en arougb maman an dousaba. 17:11-13 Sug Yesus esulou men logodeh dag graga bouwohob, kaba, en eraga audud dig Yerusalem deit. Sug en edebeij se Samaria dara Galilea maraufuohob, kaba, en eraga aud cinogo hom sungga. Sug en edebeij deinyor cinogo hom ginohob, kaba, leng aremos gogoufu et len merug sisa len agasa en sungga. Doba len lesa aigus dous. Anai sug aremos gogoufu et len dag gin, kaba, emedeinyum naugb sug len lemesijaresa ELOHIM. Dara sug len gus los len, kaba, eic dag len lemesijaresa ELOHIM touwero. Hang len leigtou aigusi dau len namcir. Dangga hang, len leiyagarij Yesus, lendagai: Adehsud Yesus, ban abdoc emeineg an emeneroei? 17:14 Sug Yesus eiya lenohob, kaba, en arougb len, endagai: Yen yeihweda naugb yen yedens yenin meijaga an aremos gogoufu ingga dou meijen gembala gesa taij ginahabi. Dangga sug len leihweda asa ucina, kaba, aremos gogoufu get len graga augwan ediyebeiya dau len namcir. 17:15 Sug sud hom dau leng merug sisa graga, en eiya enin maga, doba aremos gogoufu augwan obsara dau enohob, kaba, en agahugouhw an ELOHIM medam namcir. Hanoba en ecicugb aud Yesus. 17:16 Sug en edebeij Yesusohob, kaba, en eijeboho bamuhumlo deseino en mohora naugb en en sijo dou en toua. Sud hom gin, kaba, dau leng Yahudi misenero, doba lugmahara dau leng Samaria dous. 17:17-18 Sug Yesus eiya, doba lugmahara gin eng ecicugb aud en, kaba, en eimiman dau gin dou men logodeh. Hanoba en eijidougwo len, endagai: Dagiro, naugwe hang, sud hom dau lugmahara enin dous eng en ecicugb naugb agahugouhw an ELOHIM? Anai dan deic geigouhw dou merug sisohob graga. Dangga merug senggegu dau maman Israel, kaba, len merugwenggeroda? 17:19 Sug Yesus enara dangga dou men logodeh dauwohob, kaba, en arougb sud hom ingga, endagai: Ban beisa besa naugb beihwedig aban tueda. Anai ban bod abina debsa dani. Hang aremos gogoufu emobsara dau ban toua namcirohob. 17:20-21 Se lona ingma deit, kaba, leng Parisi leijidougwo Yesus, lendagai: Se lona giro, kaba, ELOHIM ebiji naugb sug en oiharaga maman ucugb deita? Doba Yesus auni dou len, endagai: Sug ELOHIM oiharaga yen ucugb, kaba, lusud lemens dau sug ebiji sugini dara sugaba dou yen touwero. Anai ELOHIM men goiharaga gini, kaba, ebiji se yen meigdoc mesohob. Dangga hang, yen yemeiya gansins augwan gini dara yen meijires touwero. 17:22-23 Sug Yesus auni dou leng Parisi dag graga bouwohob, kaba, en esulou men logodeh dougwo len gus, dauntoba len lemaugwohosa len dau men Lona Sug En Ecicugwen gin touwero. Hanoba en enara dou len, endagai: Se lona gacin, kaba, lusud leden dou yen, lendagai: Lusud Meraguna Mebin en moongga ouwada deb ginohob. Dara ligbum, kaba, len leden dou yen, lendagai: En moongga ouwada deb gadohob. Len len dangga dou yen, anai yen meigdoc ebehibeh naugb yen yeiya dan se lona homahabi. Doba yen yemeiya dan se lona inggaro. Dangga yen yemaimo len merir naugb yen yehilon dan augwougblo. 17:24 Anai se Lona Sug Lusud Meraguna Mebin Dan Decicugwen, kaba, dan demecgoneh dan indugt dau yenero. Doba dan dens danin ainyes abeba lusud laugwan meriresi. Aninim dag bagar mouf gehinya se bogo, kaba, sud hom dous emeiya gin touwero. Doba lusud dau sug igda agunya terimda sug igda obsaresa, len laugwan leiya gin toua. 17:25 Doba sug Lona gini emedebeijbuma, kaba, lusud lasidged dan dara len leic mog erij medam dou dan nosahabi. 17:26 Dara se Lona Sug Lusud Meraguna Mebin Dan Decicugwen, kaba, lusud lemesedeb len merdoc mes naugb dan touwero. Doba meren geicara aninim dag leng se Nuh men lona meren geicara gin toua terimda. 17:27 Anai len toua lemesedeb len merdoc mes naugb lona sug duhu en baiyan cinogo an len touwero. Doba len merdoc obdaranim naugb len letara, dara legara, dara leicim toua. Dara len leicara dag gini terimda edebeij lona sug Nuh einesa ingmes dau lenohob. Hang duhu eij baiyan len laugwan lomom louwa namcir toua. 17:28-29 Dara meren geicara toua, aninim dag leng se Lud men lona meren geicara toua terimda. Anai len toua lemesedeb len merdoc mesero. Doba len merdoc obdaranim naugb len letara, dara legara, dara len lohwara dara len loumara daum ucucugb, dara len lesara, dara lahud tu menau. Dara len leicara laimo dag gin, terimda edebeij lona sug Lud eihwededau cinogo Sodom an len toua. Hang smougb ait len laugwan louwa namcir. Anai len lemecinaga dau lona sug ELOHIM esa igdahab gohoseri an smougb dau bogo touwero. 17:30 Augwan gini toua, aninim se Lona Sug Lusud Meraguna Mebin Dan Decicugwen gin toua. Anai se Lona ingga, kaba, lusud lemesedeb lenin merdoc mes deinaugb lona sug dan dens danin ainyes dou len touwero. Doba meren geicara esogwa deisa leng se Nuh dara Lud maran lona meren geicara toua terimda. 17:31 Dangga se Lona ingga sug sud hom dau yen eni moongga se uf medgomorohob, kaba, en emouwaden naugb emdeic men aremougb geb se dimei mes deitlo. Doba en esogwa bougb dau namcir. Dara gareg dau yen en edeba se lo, kaba, en emecicugb se men tu touwero. Doba en toua esogwa bougb dau namcir. 17:32 Hang yen meigdoc moc dougwo Lud mesouwa touwero. Doba yen meigdoc eiseisan en terimda. 17:33 Anai gareg dau yen en ebehnehino enin mog dougwo sug gomom, kaba, en mena ediyebeiya dau en namcir. Doba gareg dau yen en emebehnehino enin mog dougwo sug en omomero, kaba, en mena emdagaus. 17:34 Dangga se Lona ingga sug lahwai lacogom se boromei hom, kaba, malaikad ledahwan laingmeda. Doba laingma, kaba, latou se boromei deb dous. 17:35 Era sug lagida lahwai laoci tramdad mor desijim, kaba, malaikad ledahwan laingmeda. Doba laingma, kaba, laigtou deb. 17:36 Era sug lahwai ladeba se lo hom, kaba, malaikad ledahwan laingmeda. Doba laingma, kaba, laigtou deb toua. 17:37 Sug Yesus ens dau men lona dou men logodeh dag ginohob, kaba, len leijidougwo en eisaugb lona ingga deit, lendagai: Adehsud, areg ban ben gini, kaba, ebiji deb sugiro? Doba Yesus auni aremeijouhw gen dou len, endagai: Lusud laugwan lecinaga dau gin dag misen namcir. Aninim dag sug lusud leiya bougena leinyana, kaba, len lecinaga aremeiyema ingmemeb sungga touohob.

Lukas 18

18:1-2 Sug Yesus ens dau men lona dou men logodeh dag graga bouwohob, kaba, en eic gainyenara hom dou len deit dag len lemarges dau sug len locuncum dou ELOHIM debero. Doba len locuncum dou en esesa terimda. Anai se lona hom, kaba, en emauni dou lens. Hanoba en enara dou len, endagai: Se cinogo hom, kaba, sud hom gogod aremer aga lusud en toua moongga. Sud hom gin, kaba, en emaimo areg asesa ELOHIM enin medoc mes. Dara en emeic len gus merir an areg len len dou en touwero. Doba en medoc agas edreg dau len laugwan namcir. 18:3 Dara se cinogo ingga, kaba, gida debdes hom en toua moongga. Dangga astesda lona, kaba, en en naugb ebeibei sud hom gini terimda, naugb en ogod aremer an enahabi. Hanoba en acgeij en, endagai: Ban bowun leng leicara ecgwan dan ginahabi. Anai len leicara ecgwan dan terimdaha. 18:4 Doba sud hom gini en amsoho en mer namcir. Doba sug debdes hom gini en en naugb ebeibei en se lona einyanohob, kaba, en auwam se enin medoc mes, endagai: Dan demahau dau ELOHIM naugb dan demaimo areg asesa ELOHIM enin medoc mes. Dara dan demeic len gus merir an areg len len dou dan touwero. 18:5 Doba debdes gin, kaba, en mohora ebeibei dan terimda. Dangga hang, eigouhw naugb dan dogod men aremer decog enda. Anai sug dan demogod decog enero, kaba, en eic dan indoc eriragasa en terimda toua. 18:6 Sug maman Adehsud ens dou sud hom medoc emedag beim an len gusero men geicara dou men logodehohob, kaba, en enara bad len merdoc mes ucan deit, endagai: Yen youman an sud hom men geicara dou debdes ginahabi. 18:7 Anai sug sud hom gedig en medoc emedag beimero en ogod aremer dou debdes hom dag ginohob, kaba, ELOHIM amsoho men lusud gin terimdei? 18:8 Naro, en emamsoho len terimda touwero. Doba en emogod aremer augwan dau len dedemeda toues. Anai len lemarges dau sug len leiyagarij enero. Doba len leicara laimo dangga an en astesda lona loba terimda. Doba sug Lusud Meraguna Mebin dan decicugb aud yen, kaba, dan demdacu leng merdoc ebdebin an dan lingma se cinogo ginsei? Era naroei? Yen youman dan indir an areg dan den dou yen gin deigeigouhw namcir. 18:9 Sug Yesus enara bad men logodeh merdoc mes dauwohob, kaba, en enara ceg ceg leng merdoc agas an meren geicara. Anai len loudesa lenin dous eng laimo ELOHIM men gomnomna augwan dag misen namcirohob. Dangga len lowun len gus dag len, kaba, len lemaimo augwan dag misenbuma. 18:10 Hanoba en eic gainyenara hom debin gin dou len toua, endagai: Se lona hom, kaba, sud hom dau leng Parisi dara sud hom gedig en acgeij lusud naugb len lohw cinogo dou leng Roma lan laihweda se ELOHIM Men Tuari naugb ladocuncum dou en. 18:11 Sug lan ladebeij se ELOHIM Men Tuariohob, kaba, sud hom dau leng Parisi, kaba, en en eisa besa dou enin. Hanoba en ocuncum dou ELOHIM dag gini, endagai: ELOHIM, dan den sijo dou ban dag dan, kaba, dan demagungunara. Dara dan demedreg dau aban gomnomna mougwa hom. Dara dan insira emebsa ligida gus, aninim dag lusud gus. Dara dan den sijo dou ban toua, anai indan geicara aninim dag sud hom gacgeij lusud naugb len lohw cinogo dou leng Roma gin touwero. Doba indan geicara eigouhw edreg dau en namcirohob. 18:12 Anai astesda ari, kaba, dan dehig dau ared mougwa cuhwai icira. Dara astesda indan aremougb augwan, kaba, dan dekeba hom dau ara sisa dou ban besesa terimda toua. 18:13 Doba sud hom gacgeij lusud naugb len lohw cinogo dou leng Roma gin, kaba, en medoc momogo an men sesar namcir. Dangga hang, en emeic mos naugb esa desij len gus touwero. Doba en edesa aigus se len meridigo dous. Dara en emeic mos naugb oho mergo aud bogo touwero. Doba en mergo omnen dous. Hanoba en ogod enin mohumes, kaba, en ocuncum dou ELOHIM, endagai: ELOHIM, ban abdoc eineg an dan iteitogini naugb ban baigdougwo indan sesar. Anai dan debesesar an ban mougwa einyana namcirohob. 18:14 Sug Yesus eic gainyenara dou leng merdoc agas dauwohob, kaba, en esulou len ucan gin deit, endagai: Yen youman deigeigouhw. Sud hom gacgeij lusud naugb len lohw cinogo dou leng Roma, kaba, enin dous eng ELOHIM eic en mer an men gocuncum ginohob sug en ecicugb aud men tu. Doba sud hom dau leng Parisi, kaba, ELOHIM emeic en merero. Anai gareg en eigdoumesa enin moho an men geicara deseino ELOHIM, kaba, ELOHIM owun en moho bobsara namcir. Doba gareg en owun enin moho an men geicara deseino ELOHIM, kaba, ELOHIM eigdoumesa en moho bagas toua. 18:15 Se lona hom, kaba, lusud merug hosa len loho meren logodeh mahaniheni aud Yesus naugb en ob mesira aga len. Hanoba en acgeij ELOHIM naugb en eic geigouhw dou len toua. Doba sug Yesus men logodeh len leiya dau gini, kaba, len len dougwo len, lendagai: Yen yemoho logodeh mahaniheni ingga suginlo. 18:16 Doba Yesus en eija lusud naugb len loho meren logodeh mahaniheni aud en. Hanoba en enara debin men logodeh, lendagai: Yen yemen dougwo lusud naugb len loho meren logodeh mahaniheni aud danero. Doba yen yamsoho len loho len aud danahabi. Anai se lona sug ELOHIM en oiharaga lusud ucugb, kaba, en oiharaga lusud gedig len merdoc aninim dag logodeh mahaniheni gin dous. 18:17 Dangga yen youman dan indir deigeigouhw. Anai gareg dau yen en emowun enin medoc mes aninim dag logodeh naugb sug ELOHIM oiharaga enero, kaba, en emdeinesa ELOHIM men goiharaga gin touwero. Augwan gini asesa dag misen namcir. 18:18 Se lona hom deit, kaba, leng Yahudi meren mougt mera hom en en naugb eijidougwo Yesus. Sug en edebeij enohob, kaba, en enara dou en, endagai: Adehsud, bang abdoc eigouhw an lusud laugwan namcirohob. Dangga hang, ban bens dou dan dag dan deicara dagiro, dauntoba ELOHIM ogugwo maireseb huhugb dou dana? 18:19 Doba Yesus auni ucugb dou en, endagai: Ban beigdoumesa dan indoho dag sud hom geigouhw, anara? Anai sud hom ingma emeigouhwero. Doba ELOHIM enin dous eng ecabeci dara eigouhw namcir. 18:20 Doba ban bouwan ELOHIM eic maireseb menau geb huhugb dou ban, kaba, ban absira emebsa ligida gus, dara ban bemes lusud, dara ban bemeiyohora, dara ban bemaunun dara bemouma debin len gus meren aremer, dara ban bemohoiya ban abina dara ban abim lan marir touwero. Doba ban bowun ban abdoc mes arjaga deseino lan terimda. Ban becinaga dau men gomnomna augwan gini dag misen touohob. 18:21 Doba sug sud hom graga en ouman gin, kaba, en enara bauwun Yesus mer an, endagai: ELOHIM men gomnomna augwan gin, kaba, dan daimo teitei sug dugdehohob. 18:22 Sug Yesus ouman en mer dag gin, kaba, en auni ucugb dou en deit, endagai: Aremer hom inggebga naugb sug ban baimo deit. Hang ban beihweda naugb ban bedohw aban aremougb augwan bauma aregoufu dau len gusahabi. Hanoba ban bedohw an len merunggwereij laugwan toua. Anai sug ban beicara dag gin, kaba, aban siouwa einyana eb naugb ban se bogo toues. Dauwohob, kaba, ban bemen naugb ban bemaimo dan terimda. 18:23 Doba sug sud hom gini en ouman dangga, kaba, en medoc momogo medam namcir. Anai en mesoho mougb an men aremougb einyana medamdaha. 18:24 Sug Yesus eiya, doba sud hom gin medoc momogo an men aremougwedaha, kaba, en eda mer dou men logodeh, endagai: Ogom medam naugb sug sud hom mesoho mougb en einesa ELOHIM men goiharaga gini. 18:25 Ogom medam dau sug sud hom en eic igdebes mamaga naugb en ei se bugwa meides. Doba naugb sug sud hom mesoho mougb en einesa ELOHIM men goiharaga, kaba, ogom medam edreg dau gin namcir. 18:26 Sug lusud louman gini, kaba, len leimiman an gin namcir. Hanoba len leijidougwo en an gini, lendagai: Sug ELOHIM emeigdoc leng merisoho mougb dau meren gogom naugb emoiharaga len ucugwero, kaba, en eigdoc gara dau men gogom naugb en oiharaga en ucugb gina? 18:27 Doba Yesus auni dou len, endagai: Lusud meren goubesa, kaba, emedeinyum naugb ginero. Doba ELOHIM men goubesa, kaba, edeinyum naugb ginohob. 18:28 Dangga Petrus en toua eijidougwo Yesus eisaugb aremer gin deit, endagai: Ban beiya emen gini. Anai emen emarges dau emen tu augwan deb naugb emaimo banohob. Dangga dagiro, naugb emen gina? 18:29-30 Doba Yesus auni dou en, endagai: Yen youman deigeigouhw namcir. Astesda gareg en arges men tu, dara en eihwededau mesouwa, dara maguner dara magtor, dara mena dara mem, dara mehir len laugwan deb, hanoba en esai ELOHIM mer dou lusud dau sug en ouwan oiharaga len ucugb, kaba, ELOHIM emeic areg gin augwan einyana gougwa ucugb dou en sug eni moongga se cinogo ginaba. Dara se lona sug en ecicugb naugb en oiharaga lusud ucugb, kaba, en emeic maireseb menau geb huhugb dou en toues. Augwan gini asesa dag misen namcir. 18:31 Sug Yesus auni dou men logodeh dag graga dauwohob, kaba, en eija men logodeh merug sisa hobjerai naugb len leigtou debinim hom. Sug len leigtou debinim homohob, kaba, en esulou len mougwa hom ucan deit, endagai: Yen youman dan indir deigeigouhw deitahabi. Anai cum, kaba, maman maisaugb dig Yerusalem ingga. Dangga hang, areg leng lesai ELOHIM moro len log deb eisaugb Lusud Meraguna Mebin dan se Surad Injil Meb Mohon deb sug nosohob, kaba, acgunog dara dan toua. 18:32 Anai sug leng Yahudi meren mougtir ledohw dan se lugmahara merisirohob, kaba, len lemasilagara dan, dara len lemeic dan lacecim, dara len leigdores aih dan. 18:33 Dara len lemobosbos dan. Hanoba len lemeic gomom dou dan toues. Doba lona hwai debin gin, kaba, dan deisa dau gomom ucugwohob. 18:34 Doba areg Yesus en dou len gini, kaba, len lemecinaga meijouhw homero. Dara len meru emobgesa en mer an areg en en dou len touwero. Doba len leija meruwesa en mer an areg en en dou len gin namcir. Anai ELOHIM ecgoneh meijouhw dau lenaba. 18:35 Sug Yesus dara men logodeh len ledebeij deinyor cinogo Yerikohob, kaba, len leiya, doba sud hom mairesmougb gohwiaga lusud an aregoufu en eigtou deinyor ucina mebera. 18:36 Sug en ouman, doba lusud leinyana lec ledreg eni, kaba, en eijidougwo len, endagai: Yen gin yebara, inggina? 18:37 Doba len launi dou en, lendagai: Yesus dau cinogo Nasared an men logodeh emen emeihwedig Yerusalem. 18:38 Sug en ouman len merir an gin, kaba, en eiyagarij Yesus dara mer medam, endagai: Yesus, Daud medebeito, ban abdoc erij an danto ginahaba. 18:39 Doba leng leino Yesus men, kaba, len merdoc esrougb an en namcir. Hanoba len letaha en, lendagai: Ban barges abireda. Doba en eiyagarij dara mer medam gedreg deit, endagai: Daud medebeito, ban abdoc eineg an dan iteitoginahabi. 18:40-41 Dangga Yesus en esedeb sungga. Hanoba en arougb men logodeh, endagai: Yen yedahwan en aud dan suginahabi. Sug len lahwan en desij enohob, kaba, Yesus eijidougwo eni, endagai: Ban bouwan dag dan deic ara dou bana? Doba en auni dou Yesus, endagai: Adehsud, dan douwan naugb ban besga dan indiresi, dauntoba dan deiya lo asesa ucugb deit. 18:42 Dangga Yesus ousa deisa en mer. Hanoba en arougb en, endagai: Ban abdoc ebdebin an dan dag ginohob, kaba, ban besga abires naugb beiya loda. 18:43 Sug Yesus arougb en dangga inegohob, kaba, en maires esga naugb en eiya lo asesa namcir. Dangga se lona ingga, kaba, en toua eicara baimo Yesus namcir. Dara en en sijo an ELOHIM terimda. Dara len gus toua, sug len leiya dau gin, kaba, len lagahugouhw an ELOHIM an gin toua.

Lukas 19

19:1 Sug Yesus esga sud hom mairesmougb graga dauwohob, kaba, en einesa cinogo Yeriko. Anai en ouwan ekirsa dig Yerusalem. 19:2 Doba se cinogo ingga, kaba, leng lacgeij lusud naugb len lohw cinogo dou leng Roma meren mougt mera, moho Sakeus, en toua moongga. Sud hom gin, kaba, en mesoho mougb namcir. 19:3 Dangga sug en ouman, doba Yesus ouwan ekirsa, kaba, en toua ouwan eiya Yesus endag Yesus gini edag garena? Doba lusud leinyana lesa lomdi dougwo en mairesi an Yesusdaha. Dangga en emeiya en touwero, anai en agarougb toua. 19:4 Dangga en obga eino len merin. Hanoba en edeisaugb sogo moho ara naugb en eiya Yesus. Anai sogo gini esa deinyor ucina areg len leraga ingga mebera. 19:5 Sug Yesus edebeij sogo meiyo inggohob, kaba, en oho mergo beiya en. Hanoba en arougb en, endagai: Sakeus, ban bouwaden dau sogo dedemeden. Anai ELOHIM en ouwan naugb dan dedeigtou desij ban se aban tu se lona ginahabi. 19:6 Sug Sakeus ouman gin, kaba, en ouwada dau sogo dedemeda. Hanoba en einoisa Yesus dig men tueda, kaba, en ebin en dara en medoc agahugouhw medam namcir. 19:7 Doba sug lusud leiya gin, kaba, len lecic Yesus moho gouhw genes, lendagai: Dagiro, naugwe hang, sud hom gini en edatou desij sud hom gebesesar gin se men tua? 19:8 Irir sug len letara, kaba, Sakeus en eisa besa. Hanoba en enara dou maman Adehsud endagai: Adehsud, indan aremougb augwan, kaba, dan demekeba nagama dou leng merunggwereij. Dara areg dan derba mohoisa dau lusudohob, kaba, dan demedug mougwa hogu icira ucugb dou len toues. 19:9 Sug Yesus ouman dau gin, kaba, en os badi Sakeus deseino len gus laugwan, lendagai: Se lona gin, kaba, ELOHIM eigdoc en dara leng leigtou desij en se men tu len laugwan dau meren gogom aud maireseb menau geb huhugwohob. Anai en emedag lugmaharero, doba en edag Abraham medebeito misen toua. 19:10 Anai Lusud Meraguna Mebin dan demouwaden dau bogo naugb demeic gogom dou lusudero. Doba dan douwaden dau bogo naugb dan dehilon leng laijahasero se sesarohob. Dauntoba dan deigdoc len dau sesar men gogom augwan aud maireseb menau geb huhugb gin toua. 19:11 Sug lusud louman dau areg Yesus enara dou len eisaugb Sakeus gin, kaba, en eic gainyenara hom ucan dou len deit. Anai en edebeij deinyor cinogo Yerusalemohob. Dangga len loudesa endag ELOHIM men lona naugb sug en oiharaga len ucugb, kaba, ebeij deinyor touohob. Dobnaro. 19:12 Hanoba en enara dou len, endagai: Sud hom moho agas en eihweda se cinogo aigus naugb sug men mougt mera medam eigdoumesa en moho dag mougt mera deitahabi. Dauwohob, kaba, en esedeb naugb en ecicugb, dauntoba en esedougwo men lusud namcir. 19:13 Doba sug en emeihwedebma, kaba, en eija men sogougwir merug sisa naugb en ekeba aregoufu mogo hom dau emas dou astesda len laugwan. Hanoba en esulou len ucan gini, endagai: Yen yeic aregoufu gini naugb yaha mera terimda edebeij lona sug dan decicugwen. 19:14 Doba sud hom gin, kaba, enin men lusud len merdoc emeigouhw an enero. Dangga len larougb meren logodeh aud sud hom gin men mougt mera gouji naugb len ledococ eni. Dauntoba en emeigdoumesa sud hom gin dag mougt mera naugb lenlo. 19:15 Dobnaro. Mougt mera medam gin, kaba, en emouman len merirero. Doba en eigdoumesa sud hom moho agas gini edag mougt mera naugb len laugwan namcir. Sug sud hom moho agas gini en edag mougt mera ginohob, kaba en ecicugb aud men lusud ucugb deit. Sug en edebeij se men cinogo inegohob, kaba, en arougb men sogougwir gus, endagai: Yen yedahwan indan sogougb merug sisa graga aud dan suginahabi. Dauntoba len lens dau indan aregoufu areg dan deic dou len nosohob endag len laha merohobei? Era narobmei? 19:16 Dangga sug sud hom gaimougtut en enohob, kaba, en enara dou mougt mera, endagai: Adehsud, aban aregoufu mogo hom dau emas gedig ban beic dou dan nosa, kaba, dan daha mera dag mogo sisa dau emas icirohob. 19:17 Sug mougt mera ouman en mer an dag ginohob, kaba, en eigdoumesa en moho an namcir. Hanoba en enara dou en, endagai: Bani indan sogougb geigouhw namcir. Dangga hang, dan deigdoumesa ban aboho naugb ban besedougwo indan cinogo sisa toua. Anai ban bemehig dau aremer mogurei ginero. Doba ban beicara baimo augwan gini dara ban abdoc hom namcirohob. 19:18 Gin dauwohob, kaba, men sogougb homa en en deit. Hanoba en enara dou men mougt mera, endagai: Adehsud, aban aregoufu mogo hom dau emas gedig ban beic dou dan sug nosa, kaba, dan daha mera dag mogo sergem dau emas icira gin touohob. 19:19 Sug men mougt mera ouman en mer an dag ginohob, kaba, en eigdoumesa en moho an namcir toua. Hanoba en enara dou en, endagai: Dan deigdoumesa ban aboho naugb ban besedougwo indan cinogo sergem toua. 19:20-21 Gin dauwohob, kaba, men sogougb ingma en en deit. Hanoba en edegeij mer an en namcir, endagai: Adehsud, bani dag sud hom medoc oungmerema namcir. Anai ban bemeic abug erij naugb aban ara ara naugb baninero. Doba ban besa mougwesa len gus an meren dous. Dara ban bemes aban meij deb touwero. Doba sug len gus les meren bera mera debahabi, ban bemec toua. Dan decinaga, dangga hang, dan demob aban aregoufu deb se un mougwa deb gini. Anai dan dahau dau ban namcirdaha. Dangga aban aregoufu ingginbo. 19:22 Sug mougt mera gouji ouman gin, kaba, en medoc esrougb medam an men sogougb hom gin namcir. Hanoba en enara dou en, endagai: Ban becinaga dani sud hom gedig en medoc oungmerema namcirohob. Hang dan demeic dan indug emerij naugb indan ara ara naugb daninero. Doba dan desa mougwisa len gus an meren dous. Dara ban becinaga dag dan demes indan meij deb touwero. Doba sug len gus les meren gera mera debahabi, dan demec touohob. Dangga hang, dan deic banin abir gin eng dag gogom dou banin. 19:23 Anai sug ban becinaga augwan gini dag misenohob, kaba, dagiro, naugwe hang, ban bemeic indan aregoufu dou len gus, dauntoba sug dan decicugb, kaba, len leic ingma lato dou danero, anara? Hang aban geicara gin augwan dag sud hom mog mog namcir. 19:24 Sug mougt mera gini en enara gouji dou men sogougb hom gin dauwohob, kaba, en arougb men sogougb gus gedig len lesa desij en ingga, endagai: Yen yedug indan aregoufu mogo hom dau emas gedig dan deic dou en aimougtutohob dau en namcir. Hanoba yen yedohw dou sud hom gahamera dag mogo sisa icira naugb danohob en dous. 19:25 Doba men sogougwir ingga len lenara dougwo en mer. Hanoba len lenara, lendagai: Adehsud, sud hom gini, kaba, men aregoufu mogo sisohoba. Dangga dagiro, naugwe hang, emen emeic mogo hom dau emas dou en deita? 19:26 Doba mougt mera ohoiya len merir namcir. Hanoba en esulou len, endagai: Yen youman dan indir gin deigeigouhwahabi. Anai gareg men ingmanggebga, kaba, dan demeic ingma, demaos dara dou en toua. Doba gareg men ingma, demaos darero, kaba, dan demeic men areg geb dou en dau en toues. 19:27 Doba indan moc gedig len loguro dan naugb dan demedag mougt mera naugb lenero, kaba, yen yedahwan len laugwan aud dan sugini. Hanoba yen yeic gomom dou len laugwan deseino dan namcir. 19:28 Sug Yesus eic gainyenara graga augwan dou len dauwohob, kaba, en einoisa men logodeh merin naugb len leisaugb dig Yerusalem deit. 19:29 Sug Yesus dara men logodeh len ledebeij cinogo Bedpage dara Betania geb desij mengarougb, moho Saitun Medohob, kaba, en arougb men logodeh lahwai laino en men. 19:30 Hanoba en arougb lan, endagai: Yan yaihwedig cinogo hom geb ino yan maijin ginda. Sug yan yadebeijohob, kaba, yan yameiya keledai merijaba hom gedig lusud lemeisa medgomori mougwa hombuma. Ing lacba debohob, kaba, yan yasga aumagan. Hanoba yan yarei aud dan sugin toua. 19:31 Doba sug yan yasga aumagan keledai gini, hanoba lusud leijidougwo yan, kaba, yan yauni dou len, yandagai: Aman mougt mera en ouwan, hang aman amarei dou enda. 19:32 Dangga sug Yesus arougb len laihwedohob, kaba, lan lasma augwan asesa dag areg Yesus en dou lan gragohob. 19:33 Doba sug lan lasga aumagan keledai meijaba ingga ineg, kaba, sud hom men keledai ingga en eijidougwo lan an, endagai: Yan yasga aumagan keledai ingga naugb ara? 19:34 Doba lan launi dou eni, landagai: Aman mougt mera en ouwan en. Hang aman amarei dou enda. 19:35 Sug lan lab keledai ingga dou Yesusohob, kaba, lan laic maran sansun ingma lau keledai medgomori. Hanoba lan laigdoumesa Yesus naugb en eigtousa toua. 19:36 Sug keledai obgan Yesus asa ucina, kaba, lusud leg meren sansun lau ucina ino deb naugb en toua. 19:37 Sug Yesus edebeij ucina gouwaden dau mengarougb Saitun Meda aud Yerusalemohob, kaba, men logodeh gedig len laimo en gin, kaba, len laugwan lebiji naugb lesijaresa ELOHIM an en. Anai len ledebeij deinyor Yerusalemohob. Dara len len sijo dou en dara merir medam an men ganusbus einyana gen ens dou len touohob. 19:38 Hanoba len lagahugouhw an en, lendagai: ELOHIM, ban beic geigouhw dou emen mougt mera medam gini. Anai en en se maman Adehsud, ban aboho, aud emenohob. Dara emen emeigdoumesa ban aboho. Anai ban beigtou se gesgigouhwesa se bogo. Dara ban aboho eb taiba augwan toua namcir. 19:39 Doba merug hosa dau leng Parisi se len merufu sug len louman dau gini, kaba, len lenara gouji dou Yesus, lendagai: Adehsud, ban ben dougwo aban logodeh gini, dauntoba len larges merirda. Anai sug len leic ban aboho dag gin, kaba, gini aninim dag len leic ELOHIM moho lacecimohob. 19:40 Doba Yesus auni len merir ucugb, endagai: Yen youman dan indir deigeigouhw. Anai sug dan den dougwo indan logodeh larges merir, kaba, igdahab augwan gini eperwei len meruhw naugb len lesijaresa ELOHIM an dan deit. 19:41 Doba sug Yesus edebeij deinyor naugb en eiya Yerusalemohob, kaba, en eb dara eiyagan men lusud se cinogo ingga laugwan namcir. 19:42 Hanoba en ou len, endagai: Ayou, yeng dau cinogo Yerusalem. Eigouhw naugb yen toua yecinaga ucina naugb sug ELOHIM oiharaga yen ucugb, aninim dag indan logodeh gin toua. Doba iteitogin, kaba, ELOHIM ecgoneh augwan dau yenohob. 19:43 Dangga se lona daiyamo gacin, kaba, meijen moc len len naugb len lerba dougwo ucina augwan an yen. Dara len lerbacec yen. Hanoba len lebehnehino dougwo yen namcir, kaba, yen yemesogwa yemougb dinga dingada dau len touwero. 19:44 Doba cum, kaba, len los yen an meijen logodeh yen yaugwan ladom meijur mor namcir. Dara meijen cinogo augwan gin, kaba, len lemamsoho igdahab hom emebdebin mesi hom deb touwero. Doba len lot augwan baisoboro namcir. Anai ELOHIM edebeij yen naugb sug en eigdoc yen dau meijen gogom augwanohob. Doba yen meiju emai naugb yen yemauwam an gin touwero. 19:45 Sug Yesus einesa ELOHIM Men Tuariohob, kaba, en ebiji naugb en ocirma lusud leinyana dau ELOHIM men igtia. Anai en eiya, doba len lohwara naugb laha mera doum se dous. 19:46 Dangga, kaba, en esa mer debin len, endagai: ELOHIM en og deb se Surad Injil Meb Mohon deb sug nosohob, endagai: Dan douwan lusud leigdoumesa indan Tuari naugb sug len locuncum se gin dou dan dous. Doba yen, kaba, yen yeperwei Tuari gini dag tu gedig lusud lecgoneh len merug dau lusud gus sug len lesma meren aremougb dau lenohob. 19:47 Sug Yesus ocirma len gin dauwohob, kaba, en edidib ELOHIM mer meijouhw astesda lona dou lusud terimda. Doba gembala gesa taij meren mougtir, dara leng meru ouforoho se Musa men gomnomna, dara leng Yahudi meren mougtir, kaba, len laugwan lehilon ucina deb naugb sug len leic gomom dou en toua. 19:48 Dobnaro. Anai lusud leinyana louwa debin en terimda naugb len louman dau areg en edidib gini dara geigouhw namcir. Dauntoba moho hom emediyebeiya dau len merdoc mes touwero. Doba len merdoc og debin augwan terimda. Dangga hang, emedeinyum naugb sug len leic gomom dou en touwero.

Lukas 20

20:1 Se lona hom sug Yesus edidib ELOHIM mer meijouhw dou lusud se ELOHIM Men Tuari, dara en esai ELOHIM moro dou len toua, kaba, gembala gesa taij meren mougtir, dara leng meru ouforoho se Musa men gomnomna, dara leng Yahudi meren mougtir len len aud en. 20:2 Hanoba len leijidougwo en, lendagai: Ban beicara gin augwan, kaba, ban bos bad ara? Era gareng arougb ban naugb gina? Ban bens meijouhw augwan asesa dou emenahabi. 20:3-4 Doba Yesus auni dou len, endagai: Dan toua, deijidougwo yen an aremer ginahabi. Sug Yohanes ogun lusud se duhu sug nosa, kaba, gareng en arougb en gina? ELOHIM se bogoei? Era lusud se cinogo gin eng larougb en an gin dousei? Yen yauni dou danahabi. 20:5 Sug len mougtir louman dau gini, kaba, len lococim, lendagai: Sug maman mauni dou en dag ELOHIM eng eigdoumesa Yohanes moho naugb ginohob, kaba, en auni dou maman endag dagiro, naugwe hang, yen meigdoc emebdebin an en touwero? 20:6 Doba sug maman mauni dou en dag lusud eng arougb en dous, kaba, lusud laugwan gini leic igdahab lad maman momom namcir. Anai len louma debin en endag sud hom gesai ELOHIM moro dou lendaha. 20:7 Dangga, kaba, len launi dou Yesus, lendagai: Emen ememecinaga gareng arougb Yohanes naugb en ogun lusud se duhu gin touwero. 20:8 Dangga hang, Yesus auni dou len, endagai: Yen yemens dau sud hom gareng en arougb Yohanes en moho dou danero, kaba, dan demens sud hom garougb dan naugb indan geicara augwan gin en moho dou yen touwero. 20:9 Sug Yesus auni dou mougtir graga dauwohob, kaba, en eic gainyenara hom debin gin dou lusud deit. Hanoba en enara dou len, endagai: Sud hom es anggur meda mogud se men lo hom. Sug en es bouwohob, kaba, en ehilon lusud merug hosa naugb en og ingma dou len, dauntoba len lesedougwo men ingma deb naugb en toua. Sug en og dou len dauwohob, kaba, en eihwedig cinogo gus dau lenda. Hanoba en eigtou sungga se lona einyana toua. 20:10 Dangga sug edebeij igda goho anggur mera ginohob, kaba, mougt graga en esa men sogougb hom aud len, dauntoba len lec men mera nagama ingma dou endahabi. Doba leng lesedougwo lo gin, kaba, len lagaigeij en naugb logod en dous. 20:11 Gin, kaba, mougt mera en esa men sogougb hom aud len deit. Doba len logod en dara leic igdebes dou en. Hanoba len lecicugb en beihweda dara mog mogud aud men mougt mereda toua. 20:12 Gin deit, kaba, mougt mera en esa men sogougb ingma dara aud len deit. Doba len logod en mogwihi ororo namcir. Hanoba len lerba en toua dig liga medigoda. 20:13 Dangga mougt gedig men lo gin, kaba, en enara se enin medoc mes, endagai: Dan dehilon ucina dagiro naugb len gin deitahaba? Eigouhw, kaba, dan desa dan indisi mohora hom gedig dan indoc gororougb eni aud len deitahabi. Anai dan decinaga dag len lemeigdoumesa en mohos. 20:14 Dobnaro. Sug leng lesedougwo lo graga len leiya en, kaba, len lococim, lendagai: Sud hom gin, kaba, cum, en mena ogugwo mecigbougb geb se lo augwan dou en. Dangga hang, yen yin naugb maman maic gomom dou enda, dauntoba mecigbougb augwan gini eb dou maman dous. 20:15 Dangga sug len lagaigeij enohob, kaba, len lohugouhw en dig liga medigo. Hanoba len ledeic gomom dou en deb sungga toua. Sug Yesus eic gainyenara dou len bouwohob, kaba, en eijidougwo len ucan deit, endagai: Yen youdesa dagiro? Sug mougt mera naugb lo gini en ecicugwen, kaba, en eb ara dou leng lesedougwo lo gina? En eic geigouhw dou lenei? 20:16 Naro. Sug en en, kaba, en eic gomom dou len laugwan namcir. Hanoba en ogugwo lo gini deb se len gus merisira naugb len lesedougwo deit. Sug lusud laugwan louman gin, kaba, len leiyaga dougwo en, lendagai: Adehsud, dangga, isnaro. 20:17 Doba Yesus auweila len toutou. Hanoba en ei mairesi dara len, bendagai: Gedangga, kaba, areg sud hom en erba Ugwaremer debin nosohob, kaba, men meijouhw dagiro? Anai en og dag gin debohob, endagai: Igdahab hom areg leng lohud tu lerbahaba debohob, kaba, ELOHIM enin eng eigdoumesa dag buc mandeij ucugwohob. 20:18 Dangga gareg en obsara bad igdahab gini, kaba, en mor ohurohw. Doba sug igdahab gini obsara bakebin eni, kaba, eic mor mor dou en namcir. 20:19 Sug leng meru ouforoho se Musa men gomnomna dara gembala gesa taij meren mougtir, len louman gainyenara gin inegohob, kaba, len louwan lagaigeij en. Anai len lecinaga, doba Yesus eic gainyenara gini oho irir meren geicarohob. Doba len lahau dau lusud leinyana lesa dougwodaha. Dangga hang, len lemagaigeij en touwero. 20:20 Doba mougtir, kaba, len lehilon ucina ingma deit naugb sug len leic gomom dou Yesus. Dangga hang, len lemohud sihwa ai len gus. Hanoba len lococ len, lendagai: Yen yeihwedaud Yesus naugb yen yerba mohoisa en dag yen meigdoc hom dara en. Dauntoba sug en enara didi bedreg dau leng Roma meren gomnomna, kaba, yen yeden dou emen naugb maman mahwan en aud leng Roma meren mougt mera, dauntoba en eic gomom dou en namcir. Anai en men goubesa edeinyum naugb ginohob. 20:21 Dangga sug leng lohud sihwa ai len gus gini, len ledebeij Yesusohob, kaba, len lenara louseij merir dou en namcir, lendagai: Adehsud, emen emecinaga ban bemereiyara dou lusudero. Doba areg ban bedidib, dara areg ban ben dou lusud, kaba, ban ben augwan asesa dag misen namcir. Dara emen emecinaga dag ban bemesi leng meroho agas aiyei dau leng meroho eb tainya touwero. Doba ban bens dau areg asesa ELOHIM enin medoc mes augwan asesa dou len se geica dous. 20:22 Dangga hang, emen ememeijidougwo ban sug emen emohw cinogo dou leng Roma meren mougt mera gouji, kaba, emen emedreg dau ELOHIM men gomnomnohobei? Era naroei? Ban bens meijouhw asesa eisaugb gin dou emen touahabi. 20:23 Doba Yesus ecinaga dau areg len leija en an gini, kaba, dag len lerba mohoisa en dous. 20:24 Dangga hang, en emarougb len, endagai: Yen yeic aregoufu perag mogo hom naugb yen yens dou dan didiyahabi. Dangga sug len leic dou en beiyohob, kaba, en eijidougwo len ucugb, endagai: Gareng mena dara moho geb se aregoufu gina? Doba len launi dou en, lendagai: Leng Roma meren mougt mera medam eng mena dara moho inggeb se ingga. 20:25 Dangga Yesus en dou len, endagai: Gedangga, kaba, areg mougt mera medam meni, kaba, yen yohw dou en. Doba areg ELOHIM meni, kaba, yen yeic dou en toua. 20:26 Sug len louman dag gin, kaba, len leimiman dau gin namcir. Hanoba len lemeijidougwo en an ara ara deitero. Doba len leigtou dag lodinanir namcir. Anai len lerba mohoisa en naugb en enara didi deseino lusud laugwan. Dobnaro. En emenara didi mougwa homero. 20:27 Sug Yesus auni dou leng Parisi dag graga dauwohob, kaba, leng Saduki merug hosa len len aud Yesus naugb lainyen en eisaugb leng leisa dau gomom toua. Anai len gini, kaba, meren gauwamara dag lusud lemeisa dau gomom ucugb deitero, doba lomom namcir. 20:28 Dangga sug len ledebeij Yesusohob, kaba, len leijidougwo en, lendagai: Adehsud, Musa arougb emen se men gomnomna, endagai: Sug sud hom maguna en omom dau mesouwa sug lan lameic marih hom touebma, kaba, magto geiseni eic maguna mesouwa ingga deit. Dauntoba sug lan laic marih, kaba, lan marih gini es maguna moro deb. 20:29 Sug leng Saduki lens dau Musa men gomnomna dou Yesusohob, kaba, len leic gainyenara hom debin gin dou en deit, lendagai: Naro, kaba, sud hom en mehir ligiji mogud merug senggai merugwengga. Lona hom, kaba, meis eng sud en eic mesouwa, doba en omom dau en sug lan lameic marihebma. 20:30-31 Dangga magto geiseni en eic gida ingga deit, doba en toua omom dau en sug lan lameic marih touebma. Dangga magto mogumsi geisu lan, kaba, eic en deit. Doba en toua omom dau en sug lan lameic marih touebma. Gini eb naugb merug senggai graga len laugwan leic gida hom gini. Doba len laugwan lomom teitei dau en namcir. 20:32 Sug len laugwan lomom dau enohob, kaba, gida en toua omom ucan len. 20:33 Sug leng Saduki len leic gainyenara dag gin dou Yesusohob, kaba, len leijidougwo en ucan deit, lendagai: Edebeij lona sug lusud leisa dau gomom ucugb, kaba, gareg dau len gin eng emeic gida gin deita? Anai len laugwan lougb dag mersouwohob. 20:34-35 Doba Yesus auni len merir an gini, endagai: Lusud se cinogo gin dous eng len leicim. Doba leng meroho edeinyum naugb sug ELOHIM eigdoumesa len dau gomom. Dara leng meroho edeinyum naugb sug en oiharaga len ucugb, kaba, len lemeicim deitero. 20:36 Doba len ledag malaikadir dous. Dangga, kaba, len lemomom toua deitero. Doba ELOHIM eigdoumesa len dag en mogwihi mogo len dag misen beb huhugb namcir. Anai en eigdoumesa len dau gomom ucugwohob. 20:37 Dara Musa en toua eic gansins ainyes dou maman dag maman Adehsud eigdoumesa lusud dau gomom deb naugb maman touohob. Anai sug en og se Surad Injil Meb Mohon dau sug maman Adehsud gini en ens enin dou en se lisug mon gedig smougb mouf ebsa deb nosohob, kaba, en eigdoumesa ELOHIM en moho dag Abraham, dara Isag, dara Yakub meren ELOHIM gin toua. 20:38 Sug Musa eigdoumesa ELOHIM en moho dag meren ELOHIM dag ginohob, kaba, gini ansins dag len gin lemomom deitero. Doba len merireseb huhugb terimda. Anai ELOHIM, kaba, en emedag ELOHIM naugb leng lomomero. Doba en edag ELOHIM naugb len merireseb dous. Anai deseino ELOHIM, kaba, sud hom en emomomero, doba len laugwan merireseb terimda. 20:39 Sug leng meru ouforoho se Musa men gomnomna len louman dau areg Yesus auni dou leng Saduki ginohob, kaba, merug hosa dau len gin, kaba, len lousa deisa en mer an gini. Hanoba len lenara dou en, lendagai: Adehsud, areg ban bauni dou len ingga, kaba, asesa namcir. 20:40 Dangga ogdoc gin, kaba, lingma lemeic merus naugb leijidougwo en an ara ara deitero. 20:41 Doba Yesus eijidougwo len ucugb deit, endagai: Dagiro, naugwe hang, yen yenara dou lusud dag Mesias gedig en eigdoc yen dau meijen gogom, kaba, en edag Daud medebeito dousa? 20:42-43 Anai Daud enin eigdoumesa sud hom gini dag en medebeitoro, doba dag men Adehsud dous. Dangga hang, en emerba Ugwaremer an en, endagai: Maman Adehsud Geis Huhugb en enara dou indan Adehsud, endagai: Ban beigtou dig dan insira misen naugb ban bedag mougt mera medam desij dan toua. Dara ban beigtou desij dan dag gini terimda dan dowun aban moc augwan dag hotingga deb tainya ban abohora namcirahabi. 20:44 Sug Daud eigdoumesa Sud Hom Geigdoc Yen Dau Meijen Gogom gini dag men Adehsudohob, kaba, dagiro, naugwe hang, Mesias gini Daud medebeito gina? 20:45 Sug Yesus eijidougwo leng meru ouforoho se Musa men gomnomna dag graga bouwohob, kaba, en enara ceg ceg leng Parisi dara leng Saduki dou men logodeh deseino lusud laugwan ucan deit, endagai: 20:46 Yen yebehnehino yenin meigdoc mes dougwo len gini meren geicara namcir. Anai sug len lec, kaba, len meru ehigehi naugb len lesebesan meren sansun gagas gogouf cucugb terimda. Dara len lec se usmougb gedig lusud lohwaresa. Anai len louwan naugb lusud leigdoumesa len meroho. Dara lecguna dou len toua. Dara sug len leinesa tuari, kaba, len leigtou se maija moc geb ino. Dara sug lusud lougwanara, kaba, len louwan naugb letara desij leng meroho agas dous. 20:47 Dara len merdoc emeineg an debdes touwero. Doba len lerba mohoisa len an meren aremougb augwan namcir. Hanoba len leicara launun dougwo meren geicara gini, kaba, len locuncum an debdes dagasges ucan debin gin toua. Dangga hang, se Lona Sug ELOHIM Ogod Aremer Aga Lusud, kaba, meren gogom medam edreg dau len gus namcir.

Lukas 21

21:1 Se lona hom sug Yesus en moongga se ELOHIM Men Tuari, kaba, en auweila leng merisoho mougb sug len lerba meren aregoufu deb se ELOHIM men biruwa. 21:2 Dara en eiya debdes hom toua, en erba men aregoufu mogo hwai dau w tembaga deb se ELOHIM men biruwa gini. Doba debdes hom gini, kaba, en monggwereij namcir. 21:3 Sug Yesus eiya dau gin, kaba, en eimiman debdes hom gin dou men logodeh. Hanoba en enara dou len, endagai: Yen youman dan indir ginahabi. Anai debdes hom gin, kaba, en erba aregoufu medam edreg dau len gus laugwan namcirohob. 21:4 Anai len gin, kaba, len lerba dau meren aregoufu mougweb dous. Doba debdes monggwereij namcir gin, kaba, en erba mento augwan teiyinggada. Dangga men ingma emeb naugb sug en ouma ared get deitero. Gini dag misen namcir. 21:5 Se lona hom deit, kaba, merug hosa dau Yesus men logodeh len leimiman dau ELOHIM Men Tuari dag men Tuari gini, kaba, igdahab augwan mera eisaugb dara meb tintin namcir. Dara en ouman dau sug len leimiman dag ELOHIM Men Tuari gin, kaba, atij an areg lusud lauwaharo dou en touohob. 21:6 Doba sug en ouman gini, kaba, en edemer dou len, endagai: Areg yen yeiya gin, kaba, cum, igdahab hom emeb se igdahab hom deitero. Doba len lot augwan baisoboro dangga, anai ELOHIM esedeb lona naugb ginohob. 21:7 Sug Yesus men logodeh len louman dau gin, kaba, len leijidougwo en, lendagai: Adehsud, areg ban ben dou emen eisaugb Tuari gaih, kaba, aiseba emebija? Dara emen emeiya gansins dagiro nosahaba? 21:8 Dangga Yesus esulou men logodeh dougwo gin augwan deb, endagai: Yen yebehnehino yenin meigdoc mes dougwo lusud namcir. Dauntoba len lemen naugb lemaugwohosa yen icira aremer augwan ginlo. Anai se lona daiyamo gacin, kaba, lusud leinyana len lemagunya debin yen naugb len lemeic dan indoho lemaceca yens, lemendagai: Emen gin eng Mesias naugb emeigdoc yen dau meijen gogom augwan. Dara ligbum deit, kaba, len ledenara dou yen, lendagai: ELOHIM Men Lona ebeij deinyor namcirohob. Doba yen yemaimo len merirero. Anai areg len len dou yen gin, kaba, dag len laugwohosa yen naugb yen yaijahasero dau ucina misen toua. 21:9 Dara sug yen youman lusud lebemocedoum naugb lesim. Dara sug yen youman len logodim ucucugb, kaba, yen yemeijesan ginlo. Anai augwan gini emansins dag ELOHIM men lona emedagasebma. Doba ELOHIM esedeb augwan gin ebiji ino dauwahabi. 21:10 Sug Yesus enara bad len merdoc mes dauwohob, kaba, en enara dou len deit, endagai: Dara yen yemeiya meijouhuder lenin lesara darem. Dara yen yemeiya mougt mera medam dau cinogo ingma len lesara dara mougt mera medam se cinogo ingma toua. 21:11 Dara inyomda medam eisa se cinogo sungga sungga. Dara sir gogoufu toua einesa cinogo einyana. Dara acar oho leinyana toua. Dara ELOHIM esa ganusbus medam se bogo naugb yen yeiya toua. Dangga eic dag ahau medam dou lusud namcir. 21:12 Doba sug augwan gini emedebeijbuma, kaba, lusud lagaigeij yen naugb len leic mog erij dou yen. Dara len lahwan yen aud meren Majelis se meren tuari naugb len logod gogom deinaugb yen. Hanoba len louf yen se tu gesisug. Dara len lahwan yen aud meren mougtir dara leng meroho agas naugb len logod aremer aga yen toua. Anai yen yedag indan logodehohob. 21:13 Doba augwan gini eic cumougt dou yen, dauntoba yen yos yadi Mer Geigouhw eisaugb dan deseino len toua. 21:14 Dara yen meigdoc emeijesa an areg yen yeden dou len gin touwero. Doba yen yaiyan meigdocesem namcir. 21:15 Anai se lona sug len lahwan yen deseino meren mougtir ginohob, kaba, danin eng demeic yen meiju mabrab edeinyum naugb sug meijen moc lemen dougwo yen. Dara len mesir lemaised yen an areg yen yemauni dou len touwero. 21:16 Dara se lona ingga, kaba, meijen moc emohobas yen deseino meren mougtir dousero. Doba yen meijiner, dara yen meijimir, dara yen meijaguner, dara meijagtor, dara yen meijusur, dara yen mesir len toua lodo yen deseino meijen mougtir gini. Hanoba len loholas yen naugb len leic gomom dou merug hosa dau yen toua. 21:17 Hang sud hom ingma, kaba, en medoc emeigouhw an yen touwero. Doba len laugwan merinuhwa ecgwan yen namcir. 21:18-19 Doba gareg dau yen en es agadgeij dara aiyan medocesem terimda Lona Sug Ouwedoc, kaba, en emdesma maireseb menau geb huhugb namcir. Dangga yen yemahau dau lusud an meren geicara gecgu dou yenlo. Anai yen meijugt modi hom emediyebeiya dau yen touwero. 21:20 Doba sug yen yeiya lugmahara meren sadodor len lerbacec Yerusalemohob, kaba, yen yecinaga lona ebeij deinyorohob naugb sug ELOHIM ahacugb cinogo gini mor mor namcir. 21:21 Dangga hang, se Lona ingga, kaba, eigouhw naugb leng se Yudea meren hancob len lemeigtou deb deitero. Doba len lougb dig menmod dau namcir. Dara leng leigtou se Yerusalem, kaba, eigouhw naugb len lemeigtou sungga toua deitero. Doba len lesogwa lougb dau. Dara len leigtou acec Yerusalem, kaba, len lemeinesa cinogo ingga touwero. Doba len lamsoho dau gin toua namcir. 21:22 Anai se lona sug leng sadodor lerbacec Yerusalem gin, kaba, gini dag lona edagasohob naugb sug ELOHIM auni leng Yahudi meren geicara ucugb dou len, aimo dau areg en og deb se Surad Injil Meb Mohon deb naugb ginohob. 21:23 Doba dan indoc erij an ligida gedig len meraga ogom se lona ingga. Dara dan indoc erij an leng merihir mahanihenaba. Anai se lona ingga, kaba, ELOHIM medoc ecgwan enin men lusud medam gougwa. Dara en emesa gogom medam gougwa naugb emaiyan cinogo gus augwan toua terimda. 21:24 Dangga ligbum dau len, kaba, lugmahara logod len dara kebta. Dara ligbum, kaba, len lagaigeij len dag sogougb. Hanoba len lahwan len se meren cinogo augwan. Dara len leic cinogo Yerusalem gini naugb lesesa dag lugun terim edebeij lona sug ELOHIM enin mer ogod an deb naugb len ouwahabi. 21:25 Doba lona sug ELOHIM mer ogod an deb naugb lugmahara gin ouwohob, kaba, en eic gansins se igda lona, dara igda loba, dara tebeij ucan dou lusud toua. Dangga len merdoc oboufbogo dara len lahau. Anai len leiya dum mogo sug eij bogod lonog, kaba, moung medam namcir. 21:26 Dara len merina omom dau gin toua. Anai len leiya areg se bogo augwan, doba emeb se mohw dag nosa deitero. Doba einyeinya beijeijesa abeba len meriresi namcirohob. Hang len lecinaga dag cum, kaba, gogom medam en baiyan len dangga. 21:27 Sug augwan gini acgunog dauwohob, kaba, yen yemeiya Lusud Meraguna Mebin dan douwaden dau bogo se umer an indan goubesa medam. Dara indan gogouf cucugb medam erbacec dan toua. 21:28 Dangga sug yen yeiya augwan ginohob, kaba, yen yeisa yoho meijirgo naugb yen yauweila dougwo dan. Anai meijen lona naugb sug dan deigdoc yen dau meijen gogom augwan, kaba, ebeij deinyorohob. 21:29-30 Sug Yesus ens meijouhw men Lona Sug Ouwedoc dou men logodeh dauwohob, kaba, en eic gainyenara hom ucan debin gin dou len deit, endagai: Yen yeiya dau sogo moho ara, dara sogo gus gus augwan gini. Anai yen yecinaga dau sug merijohob, kaba, dag igda goho lohos ebeij deinyorohob. 21:31 Dangga toua sug yen yeiya areg acgunog se cinogo dara bogohob, kaba, yen yecinaga ELOHIM men lona sug en oiharaga yen ucugb ebeij deinyorohob. 21:32 Doba yen youman dan indir deigeigouhw namcir. Anai sug lugmahara len len naugb laiyan Yerusalem gini, kaba, yen yaugwan yemomom dau ginbuma. Doba ligbum dau yen, kaba, len leiya augwan gini se len meriresahabi. Augwan gini asesa dag misen namcir. 21:33 Anai cinogo dara bogo lamediyebeiyes. Doba dan indir gini, kaba, emediyebeiya terimdero, doba eb huhugb namcir. 21:34 Dangga hang, yen yemaimo lusud naugb yen yemogo ara gaihimero. Dara yen yemaimo len naugb yen yemeg ahwei mohwero. Dara yen meigdoc ematij an areg geb se cinogo naugb yen touwero. Doba yen yebehnehino yenin meigdoc mes dougwo gin terimda. Dauntoba lona sug gogom augwan gin ebiji, kaba, emeica yen dag digoro augwougb deb touwero. 21:35 Anai Lona gin, kaba, agunya debin lusud se cinogo augwan augwougb dous. 21:36 Dangga yen yesedeh yauweila dara yen yocuncum esesa dougwo Lona gin terimda. Dauntoba sug gogom gini eb debin yen, kaba, yen yemobsara dau gin touwero. Doba ELOHIM eic yen meigdoc aiyansem dougwo augwan gin namcir. Anai sug yen yes agadgeij terimda Lona Sug Ouwedoc, kaba, yen yeic meijus naugb yagasa dara Lusud Meraguna Mebin dan se Lona Sug Dan Dogod Aremer Aga Lusud Laugwan toua. 21:37-38 Sug Yesus esulou men logodeh eisaugb aremer gogom gin dauwohob, kaba, en ecicugb dig ELOHIM Men Tuari naugb en edidib ELOHIM mer men meijouhw dou lusud sungga astesda lona terimda deit. Dangga astesda lonamen, kaba, lusud laugwan len loucimdeb se ELOHIM Men Tuari naugb len louman sug en edidib ELOHIM mer dou len. Doba astesda loba, kaba, en ecicugb se mengarougb Saitun Meda naugb en atou sungga dous.

Lukas 22

22:1-2 Doba sug leng Yahudi meren Ari Gouji naugb sug len let roti gemerisero ebeij deinyorohob, kaba, gembala gesa taij meren mougtir dara leng meru ouforoho se Musa men gomnomna len lehilon ucina naugb sug len leic gomom dou Yesus. Doba len louwan ledu meru dau leng gus, anai len lahau dag cum, kaba, lusud leic gogom dou len icira gindaha. Dara lona sug lusud let roti gemerisero gini, kaba, len leija lona gin toua dag Lona Gohw Bedreg. 22:3 Sug len lehilon ucina dag gin, kaba, Setan outi se sud hom dau Yesus men logodeh merug sisa hobjerai, en moho Yudas dau cinogo Keriod, medoc mes naugb en edohw Yesus se mougtir ingga merisira. 22:4 Dangga sug en eihwedaud gembala gesa taij meren mougtir dara sadodor gedig len lesedougwo ELOHIM Men Tuari meren mougtirohob, kaba, en eijidougwo len, endagai: Sug dan dohw Yesus dou yen, kaba, maman mahilon ucina dagiro naugb ena? 22:5 Sug len louman en mer an gin, kaba, len merdoc agahugouhw medam an en namcir. Hanoba len los dou en, lendagai: Sug ban bohw en dou emenohob, kaba, emen toua ememeic aregoufu ingma dou bans. 22:6 Sug Yudas ouman gini, kaba, en toua ousa deisa len merir. Hanoba en ehilon ucina naugb sug en edohw Yesus deb se len merisira toua. Doba en edu mou dau len gus, dauntoba len lemecinagero. 22:7-8 Dangga lona naugb sug leng Yahudi logug domba debin meren Lona Gohw Bedreg edebeijohob, kaba, Yesus arougb Petrus dara Yohanes naugb lan lasedeb ared, dauntoba len let debin meren lona gin toua. Hanoba en enara dou len, endagai: Yan yaihweda yasedeb ared debin Lona Gohw Bedreg gin deb naugb sug maman mat toua. Doba lona naugb sug leng Yahudi logug domba debin meren lona gin, kaba, lona hom se meren Ari Gouji sug len let roti gemerisero toua. Anai gini aimo dau areg ELOHIM arougb len an sug nosohob. 22:9 Sug en arougb lan danggohob, kaba, lan laijidougwo en, landagai: Ban bouwan aman amedesedeb ared gin deb sugiro? 22:10-11 Doba Yesus auni dou lan, endagai: Sug yan yainesa dig ginda aud Yerusalem, kaba, yan yamagasa sud hom godo debecij hom an duhwes. Yan yaucan en terimda en edebeij tu sug en einesa, kaba, yan yaijidougwo sud hom men tu ingga an dimei hom, yandagai: Aman Adehsud eijidougwo ban an dimei hom naugb sug emen emetara debin Lona Gohw Bedreg gini. 22:12 Sug yan yaijidougwo en an dag ginohob, kaba, en emens dimei gouji hom se taiba gen esedeb augwan meij mogudohob dou yans. Sug en ens dimei dou yanohob, kaba, yan yasedeb maman ara ara naugb sug maman matara debin Lona Gohw Bedreg gin toua. 22:13 Sug Petrus dara Yohanes lan laihwedohob, kaba, lan ladesma augwan asesa dag Yesus en dou lan graga namcir. Hanoba lan lasedeb ared augwan deb naugb sug len letara debin Lona Gohw Bedreg gin toua. 22:14 Dangga ebeij sug leng Yahudi let ared debin Lona Gohw Bedreg gini ebeijohob, kaba, Yesus dara men logodeh merug sisa hobjerai, len leigtou se boromei naugb letara aninim. 22:15 Sug len leigtouohob, kaba, Yesus enara dou len, endagai: Dan indoc ebehibeh naugb dan det ared debin Lona Gohw Bedreg gini dara yen sug dan demaimo ucina mog erijbuma. 22:16 Anai yen youman dan indir deigeigouhw. Dan demet ared debin Lona Gohw Bedreg dag gin dara yen deitero, terimda edebeij lona sug ELOHIM oiharaga yen ucugb. Anai se lona ingga, kaba, Lona Gohw Bedreg gin men meijouhw augwan edougdocohob. 22:17-18 Sug Yesus enara dag graga dou men logodeh dauwohob, kaba, en os mog an anggur mohu. Hanoba en en sijo dou ELOHIM naugb gin toua. Sug en en sijo dou ELOHIM dauwohob, kaba, en ens meijouhw debin anggur mohu gini dou men logodeh deit, endagai: Yen yeic mog an mohu gin doum. Hanoba yen yaugwan yeg toua. Anai ebiji dau irogini, terimda edebeij lona sug ELOHIM oiharaga lusud ucugb, kaba, dan demeg anggur mohu dag gin dara yen deitero. Yen youman dan indir an areg dan den dou yen gin deigeigouhw namcir. 22:19 Sug Yesus eic mog an mohu dou men logodeh dauwohob, kaba, en os roti mogo hom icira en mesira deitahabi, en emen sijo dou ELOHIM naugb gin toua. Sug en en sijo dou ELOHIM enohob, kaba, en ekrisahabi, en emohw an dou men logodeh. Hanoba en ens meijouhw debin gin dou len toua, endagai: Roti gini dag danin indaga gedig dan demeic demauwaharo dou ELOHIM naugb meijen sesar augwans. Hang astesda sug yen yet roti gin, kaba, yen meijina eiseisan indan geicara geb dou yen terimda. 22:20 Dangga toua sug len letara bouwohob, kaba, Yesus os mog an anggur mohu deit. Hanoba en eic an dou men logodeh toua, endagai: Mog an mohu gin, kaba, ELOHIM men gos dou menau gedig dan indugwihi ororo naugb dauma debin gin dou yen toua. 22:21 Doba yen youman dan indir deigeigouhw. Sud hom gohw dan deb se leng merug mog merisira, kaba, eni moongga desij dan se boromei ginohob. 22:22 Dangga cum, kaba, dan daimo ucina mog erij aud gomom aimo dau areg ELOHIM ogod an naugb Lusud Meraguna Mebin dan deb nosohob. Doba naugb sud hom gohw dan gin, kaba, gogom medam eb naugb en namcir. 22:23 Sug men logodeh louman gini, kaba, len leijidougwom ucucugb, lendagai: Dau maman gini, kaba, gareng en ohw enohoba? 22:24 Se lona hom, kaba, Yesus men logodeh merir laisedim icira meroho len dag gareg dau len, kaba, en mesir gus leigdoumesa en moho agas edreg dau len gus laugwana? 22:25 Doba Yesus enara bogod dougwo len merir an gini, endagai: Lugmahara meren mougt mera medam, kaba, len merdoc emedag beim an meren logodehero. Doba len leic gogom dou len terimda. Dara meren lusud gedig len meroho eb taiba len, kaba, len louwan meren lusud naugb len leigdoumesa len meroho dag adehsud naugb len toua. 22:26 Doba naugb yen, kaba, emedanggaro. Anai gareg dau yen en moho dag adehsudohob, kaba, en emaresbes len gusero. Doba en owun en moho dag logodeh naugb len dous. Dara gareg dau yen en edag mougt merohob, kaba, en owun enin moho dag sogougb naugb len toua. 22:27 Dangga hang, dan toua dedag meijen mougtohob, doba dan demeigdoumesa dan indoho an ginero. Doba dan dowun danin indoc mes arjaga dag sogougb naugb dan deicara dou yenohob. Anai sug lusud letara, kaba, gareng en moho agasa? Sud hom geigtou se boromei, era sud hom gohw ared dou enei? Naro. Yen yecinaga sud hom geigtou se boromei eng en moho agas dous. Doba sud hom gohw ared dou en, kaba, en moho eb tainya enohob. 22:28-29 Doba yen, kaba, yen yowun yenin meigdoc arjaga naugb yen yaimo dan se ucina mog erij gin terimdohob. Hang dan demeigdoumesa yen meijoho dag mougt mera naugb yen yemesedougwo ELOHIM men lusud laugwans. Aninim dag dan Indina ELOHIM eigdoumesa dan indoho naugb sug dan desedougwo men lusud laugwan touohob. 22:30 Dangga edebeij lona sug dan dedag mougt mera naugb dan doiharaga lusud ucugb, kaba, yen yeigtou desij dan naugb yen yetara dara yegara dara dan. Dara yen yeigtou se maija moc naugb yen yesedougwo leng Israel meren meijouhuder sisa hobjerai laugwan toua. 22:31 Sug Yesus esulou men logodeh merug sisa hobjerai dag graga bouwohob, kaba, en esulou Simon an men logodeh gus ucan debin gin deit, endagai: Simon, ban bouman dan indir deigeigouhw namcir. Anai ELOHIM mer aiyan yen dou Setan naugb en ainyen yen yaugwanohob. Dauntoba en ecinaga dag yen meigdoc akebin en terimda danggei? Era naroei? Aninim dag lusud letitir aigdaga mes an tramdad, dauntoba len leiya endag augwan dag mogo misenei? Era merila mogud touei? 22:32 Sug Yesus esulou len laugwan dauwohob, kaba, en esulou Simon dou enin deit, endagai: Simon, dan docuncum dou ELOHIM naugb banohob, dauntoba ban abdoc emobsara dau dan namcirlo. Doba cum, kaba, ban beineg aud dan deit. Dangga sug ban abdoc ebdebin an dan naugb ban beineg aud dan ucugwohob, kaba, ban benara bad ban absi len gus merdoc mes toua. Dauntoba len lemobsara dau danero, doba len merdoc ebdebin an dan namcir. 22:33 Doba Simon ehirirmo dou Yesus, bendagai: Adehsud, sug lusud louf ban se tu gesisug, era sug len leic gomom dou ban, kaba, dan dogod se dan indoc mesohob naugb dan daimo ban se ucina augwan gin toua terimda. 22:34 Doba Yesus enara bauwun en mer ucugb deit, endagai: Petrus, ban bouman dan indir ginahabi. Anai se loba gini sug berougwu emeba mer mougwa hombuma, kaba, ban baideido dan mougwa homoi icira deseino lusudohob. 22:35 Sug Yesus esulou Petrus an merir dag graga bouwohob, kaba, en eijidougwo men logodeh laugwan ucan gin deit, endagai: Sug dan darougb yen naugb yen yesai ELOHIM moro dou lusud sug nosa, kaba, dan den dougwo yen naugb yen yemodo meijen hwigbeimos an aregoufu, dara yen yemoho i an meijen sansunero, dara dan den dougwo yen naugb yen yemeg hwigbeimos dougwo yen meijohora touwero. Doba dan darougb yen naugb yen yeihwedan meijug mogud dous. Dangga sug yen yeihwedan meijug dag gini, kaba, yen yemdesma ara ara ingma touweroei? Doba len launi dou en, lendagai: Naro. Sug emen emesai ELOHIM moro dou len dag gini, kaba, emen emesma augwan edeinyum namcirohob. 22:36 Doba Yesus auni dou len deit, endagai: Iteitogini, kaba, yen yemeic dangga deitero. Doba gareg dau yen men hwigbeimos an aregoufu moongga, kaba, en odo. Dara gareg dau yen men i an sansun toua moongga, kaba, en oho. Dara gareg dau yen men krawan ingmaro, kaba, en ohw men sansun naugb auma toua. 22:37 Anai yen youman dan indir ginahabi. Areg sud hom en og deb se Surad Injil Meb Mohon deb sug nosohob dag lusud lowun dan indoho dag sud hom dau leng merug mog gin, kaba, lusud lesedeb naugb len leicara lesogwesa gin an dan. Anai augwan gini aimo dau areg ELOHIM en esedeb naugb danohob. Hang emedreg toua deitero, doba esogwesa namcir. 22:38 Sug Yesus men logodeh louman en mer an ginohob, kaba, len launi ucugb dou en, lendagai: Adehsud, ban beiya krawan hwai inggini. Doba Yesus etaha len merir an gini, endagai: Yen yin, teiyengga. Yen yemeiso yen meijir an gin terimdero. 22:39 Sug len letara debin Lona Gohw Bedreg gin bouwohob, kaba, Yesus eihwededau sungga naugb en eisaugb dig usi hom se mengarougb Saitun Meda dag moung mougb deit. Dara men logodeh toua laimo en. 22:40 Sug len ledebeij se us ginohob, kaba, Yesus esulou men logodeh, endagai: Yen yocuncum dou ELOHIM esesa terimda. Dauntoba en eseyeiyo yen dougwo sug Bilis ainyen yen. 22:41 Sug Yesus esulou men logodeh dag gragohob, kaba, en asid eninto aigus dau len, dag les hu homahabi, emdebeij. Sug en edebeij sunggohob, kaba, en ecgun mohorbrida badedeij cinogo. 22:42 Hanoba en ocuncum dou ELOHIM, endagai: Akeinya, sug ban bouwan, kaba, ban bedug mog an gogom geb naugb dan gini dau danahabi. Doba aimo areg danin dogod anohob, kaba, naro. Doba dan daimo areg banin bogod anohob, gin dous. 22:43-44 Doba sug en ocuncum dag gin, kaba, en medoc toua enmohomoho namcir. Dara mengebouf bororo dag mogwihi bed cinogo toua, kaba, en ocuncum termum edreg dau nosa namcir. Dangga malaikad hom en ouwaden naugb enara bad en medoc mes, dauntoba en medoc ongkogos naugb aimo gin terimda. 22:45 Sug en ocuncum bouwohob, kaba, en eisa besa. Hanoba en en aud men logodeh ucugb. Dangga en eiya, doba len laugwan latou lamumi dau enohob. Anai len merdoc momogo medam namcirdaha. 22:46 Doba Yesus ebir len. Hanoba en enara debin len, endagai: Dagiro, naugwe hang, yen yatou dag gina? Yen yisa yocuncum dou ELOHIM esesa terimda, dauntoba yen yemobsara se gainyenarero. 22:47 Sug Yesus esulou men logodehaba, kaba, sud hom dau Yesus men logodeh merug sisa hobjerai, en moho Yudas, esan lusud leinyana len len aud len. Dangga sug en edebeij deinyor Yesusohob, kaba, en eic mos aud en namcir. Hanoba en ou moufeseni. 22:48 Doba Yesus enara debin en, endagai: Ban bohw Lusud Merguna Mebin dan deb se leng merug mog merisira ogdoc sug ban bou abuhwesa danei? 22:49 Sug Yesus men logodeh gedig len lesa desij en sungga len leiya, doba len louwan lagaigeij Yesus, kaba, len leijidougwo en, lendagai: Adehsud, ban bouwan, kaba, emen emogodir dara krawan gindei? 22:50 Sud hom dau men logodeh eic krawan bagod Gembala Gesa Taij Meren Mougt Mera Medam men sogougb hom en moms dig mesira misen edug dau namcir. 22:51 Doba Yesus esa mer debin en dougwo, endagai: Ban barges abinadoc. Sug en esa mer debin en dag ginohob, kaba, en eic sud hom graga moms badra ucugb deisa mohw deit. 22:52 Sug Yesus eic sud hom graga en moms badra ucugb deisa mohwohob, kaba, en enara debin gembala gesa taij meren mougtir, dara sadodor gedig len lesedougwo ELOHIM Men Tuari meren mougtir, dara leng Yahudi meren mougtir toua an meren krawan dara kebtemaga, bendagai: Yen youdesa dani aninim dag sud hom mog mog. Hang yen yemodo krawan dara kebtemaga naugb yen yemdagaigeij dang ginei? 22:53 Anai dan indugwengga desij yen se ELOHIM Men Tuari astesda lona terimdohob. Doba yen yemagaigeij dan sunggaro, anara? Doba inggaida. Anai se lona gini, kaba, cumougt naugb sud hom gesedougwo lobeigbogo men geicara. Hang en out se yen meigdoc mes naugb yen yemagaigeij dan gini. 22:54 Sug len louman Yesus mer dag gin, kaba, aisa len merisira naugb len lagaigeij en namcir. Dangga len lahwan en se Gembala Gesa Taij Meren Mougt Mera Medam men tueda, kaba, Petrus en toua edoumouma len dig meridigo. 22:55 Doba se Gembala Gesa Taij Meren Mougt Mera Medam men igtia gini, kaba, len lec smougb taigemosis se tu magohob. Dangga Petrus en toua eihweda naugb en edehin naugb smougb desij len ingga. 22:56 Doba sogougb gida hom sug en eiya Petrus dag en ehin naugb smougb gini, kaba, en auweila en toutou. Hanoba en enara dou men lusud, endagai: Yen yeiya sud hom gini. Anai dan deiya, doba en toua aiseisa Yesus ginohob. 22:57 Doba Petrus aideido dou gida ingga, endagai: Daneh, dan demecinaga sud hom gin touwero. 22:58 Cum cum deit, kaba, sud hom gus toua auweila Petrus toutou. Hanoba en ehin mereseni, bendagai: Bang gin toua, Yesus men logodehohob. Doba Petrus etaha en mer an gini, endagai: Insiya, ban bemens danlo. Anai danes men logodehero. 22:59 Cumbahau deit, kaba, sud hom gus en toua ogo meresa Petrus namcir, endagai: Indeic, dan decinaga sud hom gin toua dau Yesus men logodeh. Anai en toua dau leng Galilea. 22:60 Doba Petrus etaha en mer an gin toua namcir. Hanoba en auni dou en, endagai: Ban abu dagiro, hang ban bemowun dan dag gina? Anai dan demecinaga areg ban ben gin touwero. Sug Petrus en aideido dou en dag gini inegohob, kaba, berougwu eba mer agod dougwo en mer namcir. 22:61 Sug berougwu eba merohob, kaba, maman Adehsud eineg bauweila Petrus toutou. Dangga Petrus medoc eiseisan areg maman Adehsud en en dou en deb sug nosohob, endagai: Se lona gini sug berougwu emeba mer mougwa hombuma, kaba, ban baideido dougwo dan mougwa homoi icirohob. 22:62 Sug Petrus eiseisan Yesus mer ginohob, kaba, en eihwedig medigo naugb en eb medam sungga namcir. 22:63 Doba leng lesedougwo Yesus se mougt mera medam men tu ingga, kaba, len leic en moho lacecim namcir. Dara len logod en toua. 22:64 Hanoba len leic minc meti naugb lahud dougwo en maires toua. Dangga sug len logod en mog erijohob, kaba, len leijidougwo en, lendagai: Ban bedag sud hom gedig en ecinaga areg ebdededelo augwanohob, kaba, ban bens leng logod ban gin meroho dou emenahabi. 22:65 Dara len lesbes an en se aremer einyana debin gin toua. 22:66 Sug edebeij lonamenohob, kaba, leng Yahudi meren mougtir, dara gembala gesa taij meren mougtir, dara leng meru ouforoho se Musa men gomnomna len laugwan loucimdeb hom naugb sug len logod aremer deb naugb Yesus. Hanoba len lahwan Yesus aud len sungga toua. 22:67-68 Sug len ledahwan Yesus deseino lenohob, kaba, len leijidougwo en, lendagai: Ban gin eng beigdoc emen dau emen gogom augwanei? Ban bauni asesa dou emenahabi. Doba Yesus auni ucugb dou len, endagai: Dan dauni dagiro dou yen deita? Anai sug dan dens danin ainyes dou yen dag dani Sud Hom Geigdoc Yen Dau Meijen Gogom Augwan toua, kaba, yen meigdoc emebdebin an danero. Era sug dan deijidougwo yen an gin ucugb, kaba, yen yemauni dag misen dou dan touwero. 22:69 Doba dau lona gin dig gacda, kaba, yen yemeiya Lusud Meraguna Mebin dan demeigtou desij ELOHIM Gedig En Mobisamougb en mesira misen naugb dan dedag mougt mera medam desij en toua. 22:70 Sug leng Majelis louman gini, kaba, len merir lauwi en namcir, lendagai: Indeic. Ban ben dag bang gin eng ELOHIM Meisi misenei? Dangga Yesus ousa deisa len merir an, endagai: Areg yen yen ingga, kaba, moongga. 22:71 Sug len louman gin, kaba, len lenara doum, lendagai: Maman mahilon ara deita? Anai mamanin maumanara dau enin mers teisisohob.

Lukas 23

23:1 Sug Majelis lenara doum danggohob, kaba, len laugwan leisa lesa. Hanoba len lahwan en aud Pilatus deit. 23:2 Sug len ledebeij se men tuohob, kaba, len loho las Yesus deseino en namcir, lendagai: Emen emouman sud hom gini en ococi emen lusud laugwan dag len lemaimo yeng Roma meijen gomnomna deitero. Doba len leicara ledreg namcir. Dara emen emouman dag en en dougwo emen lusud dag len lemohw cinogo dou meijen mougt mera medam toua deitero. Dara en eigdoumesa enin moho bedag emen mougt mera medam deit naugb en eigdoc emen dau emen gogom augwan toua. 23:3 Sug Pilatus ouman dau gin, kaba, en eijidougwo Yesus, endagai: Ban eng bedag leng Yahudi meren mougt mera medam indeicei? Doba Yesus auni dou en, endagai: Areg ban benohob, kaba, moongga. 23:4 Sug Pilatus ouman dau gini, kaba, en enara dou gembala gesa taij meren mougtir an meren lusud laugwan, endagai: Sud hom gin, kaba, dan demesma men aremer gecgu hom naugb sug dan didogod gomom naugb enero. 23:5 Doba len louma debin merir hom namcir dou Pilatus, lendagai: En ococi lusud se leng Yudea meren hancob naugb len lemaimo yen meijir deitero. Doba len ledreg yen meijir gin namcir. En ebiji dag gini se leng Galilea meren hancobohob. Dara en en sugini naugb en eicara baimo dag gini an lusud gin toua. 23:6 Sug Pilatus ouman len merir an gini, kaba, en eijidougwo len deit, endagai: Sud hom gin, kaba, dau leng Galilea meren hancobei? 23:7 Sug Pilatus en ouman, doba Yesus gini sud hom dau Herodes men hancob ginohob, kaba, en esa en aud en se men tu dous. Anai se Lona Gohw Bedreg gin, kaba, en toua moongga se Yerusalemohob. 23:8 Sug len lahwan Yesus aud Herodesohob, kaba, en medoc agahugouhw namcir. Anai lusud lecic dau Yesus men geicara mougwa einyana dou enohob. Hang en ouwan eiya Yesus toua. Anai nosa, kaba, en maires augou an en namcir. Dara en od mena debsa Yesus naugb sug en ens ganusbus hom dou en touahabi. 23:9 Hang, en emeijidougwo Yesus an ara moho einyana namcir. Doba Yesus en emauni hom dou en touwero. 23:10-11 Hanoba Herodes an men sadodor len lebiji naugb lesbes an en, kaba, len leg mougt mera medam men sansun mera eisaugb se en. Dara len leic en lacecim debin gin toua. Gin dauwohob, kaba, len lahwan en aud Pilatus se men tu deit. Dara gembala gesa taij meren mougtir dara leng meru ouforoho se Musa men gomnomna len toua merugwengga se Herodes men tu gini naugb sug len loho las Yesus deseino en namcir. 23:12 Dangga se lona ingga, kaba, Herodes dara Pilatus lan laic mardoc darem namcir. Anai sug nosa, kaba, lan lagad daumohob. Doba ogdoc Yesus men aremer gin, kaba, eic dag lan ladag hom ucugb toua. 23:13 Sug len lahwan Yesus aud Pilatus ucugwohob, kaba, en eija gembala gesa taij meren mougtir dara lusud meren mougtir an meren logodeh len laugwan len len aud en. 23:14 Sug len lenohob, kaba, en enara medam dou len, endagai: Yen youman dan indir ginahabi. Anai sug yen yahwan sud hom gin dou dan greb, kaba, yen yoho yas en dou dan dag en ococi meijen lusud laugwan dau emenohob. Doba augwan gini dag misenero. Anai dan dehilon en medoc mes an gin deseino yenohob. Doba areg yen yoho yas dou dan gin, kaba, dan demesma hom dau en touwero. 23:15 Dara Herodes en toua ehilon en medoc mes an augwan gin touohob. Doba en emesma aremer homero. Hang en emesa en ucugb aud dan gini. Sug aremer hom emeb naugb enero, kaba, emedeinyum naugb sug dan dogod gomom dou en touwero. 23:16 Dangga dan dabosbos en dous. Hanoba dan darges en ucugbda. 23:17 Pilatus enara dangga dou len, anai astesda Lona Gohw Bedreg, kaba, mougt mera sug nosa len laben deb dag len lesga sud hom dau tu gesisug dou leng Yahudi. Hang ohud Pilatus naugb en eicara baimo dangga an len toua. 23:18 Doba leng sungga len merdoc emesgiraha naugb sug en esga Yesus dou lenero. Dangga hang, len leijara dou en, lendagai: Ban besga Abbas meisi eng dou emen dous. Doba Yesus, kaba, ban beic gomom dou en namcir. 23:19 (Len lenara dangga, anai Abbas meisi gin, kaba, en ococi leng seYerusalem dau leng Roma. Dara en eic gomom dou ligbum dau len gin touohob. Hang leng Roma louf en se tu gesisug icira gini.) 23:20 Doba Pilatus en ou meresa dou len deit, anai en ouwan arges Yesus namcir. 23:21 Dobnaro. Len merir eb debin namcir, lendagai: Ban bemarges enlo. Doba ban betob en se sogo salib namcir. 23:22 Doba Pilatus, kaba, en eijidougwo len mougwa hom gedag homoi deit, endagai: Sud hom gini men geicara gecgu dagiro, hang dan demeic gomom dou ena? Anai dan dehilon en medoc mes an augwan ginohob. Doba dan demesma aremer hom naugb sug en omom touwero. Dangga hang, dan dabosbos en dous. Hanoba dan darges en ucubgda. 23:23 Doba len leija merir eb debin en terimda, dag en emesga touwero. Doba en etob Yesus se sogo salib namcir. 23:24 Sug len leicara dag gin terimda, kaba, eic dag en medoc eiriragasa len merir. Hanoba en ogod gomom naugb Yesus namcir, aimo dau areg len lacgeij dau enohob. 23:25 Dauwohob, kaba, en ogugwo en deb se len merisirahabi, len lemdeija merdoc an en sunggada. Doba sud hom ges lusud, dara gococ lusud dau leng Roma gin, kaba, en esga dou lenda, aimo dau areg en acgeij dau en touohob. 23:26 Sug Pilatus ogugwo Yesus se leng Yahudi merisirohob, kaba, leng sadodor lahwan en naugb len ledetob en se sogo salib. Sug len ledebeij ucina mogumsi, kaba, len lagaigeij sud hom, moho Simon dau cinogo Kirene, sug en en dau men lo dig Yerusalemeda. Dangga sug len leigdoumesa Yesus men sogo salib se enohob, kaba, len logodgod en naugb en odo sogo salib esougb Yesus naugb aimo lenda. 23:27 Dara lusud dara ligida leinyana leila ucan Yesus se ucina gin toua. Ligbum dau ligida, kaba, leb leingdara. Hanoba len louma meruhumes ucan en toua. 23:28 Doba Yesus eineg dig medigo aud ligida ingga. Hanoba en en dougwo len, endagai: Yigida dau cinogo Yerusalem, yen yemeb an danlo. Doba yen yeb an yenin dara yen meijihir dous. 23:29 Anai yen youman dan indir deigeigouhw. Se lona daiyamo gacin, kaba, yen yemowun leng ledebdena, dara leng meraga mogud, dara leng merih metaha ingmaro, len meroho deitero. Doba yen yeigdoumesa len meroho dag ELOHIM eic geigouhw dou len deitohob. Anai se lona ingga, kaba, gogom medam eb naugb yen namcir. 23:30 Hang se lona ingga, kaba, yen yeiyagarij menmod, yendagai: Ban beij bogod emenda. Dara yen yeiyagarij mengarougb, yendagai: Ban baihiron dougwo emen touahabi. 23:31 Anai sug len leicara dag gini an dang magauwohob, kaba, dagiro naugb yena? Anai yen yedag sogo magac namcirohoba? 23:32 Dara sug len lahwan Yesus aud sogo salib gin, kaba, enin dousero. Doba len lahwan lang marug mog lahwai dara en naugb sug len letob lan desij Yesus toua. 23:33 Dangga sug len ledebeij mengarougb, moho Mougt Merohob, kaba, len letob Yesus se sogo salib deb sungga. Dara len letob lan marug mog lahwai desij en toua, laingma dig Yesus mesira misen, laingma dig en mesira metigi. 23:34 Sug len letob en dauwohob, kaba, len lerba nomor laic men sansun daum toua. Doba Yesus medoc emecgwan len ginero. Hang en emenara dou Mena, endagai: Akeinya, ban bemeic gogom dou leng ginlo. Doba ban baigdougwo meren sesar augwan dau len namcir. Anai len lemecinaga areg len leic dou dan gini meijouhw asesebma. 23:35 Dara leng gus, kaba, len lesa lauweila dangga dous. Doba meren mougtir, kaba, len leic en moho lacecinim namcir, lendagai: En eigdoc len gus dau meren gogomohob. Dangga hang, sug ELOHIM eigdoumesa en moho naugb en eigdoc maman dau maman gogom augwan dag misenohob, kaba, eigouhw naugb en eigdoc enin mena agau ucugb dau sogo salib iteitogin toua. 23:36-37 Dara sadodor len toua leic en moho lacecinim namcir. Dangga sug len leic anggur mohu gedougdaha dou enohob, kaba, len lenara dou en, lendagai: Ban bedag leng Yahudi meren mougt mera medam dag misenohob, kaba, eigouhw naugb ban beigdoc ban abina agau ucugb dau sogo salib iteitogini. 23:38 Sug len lenara dou en dag gin dauwohob, kaba, len log se surad hom, lendagai: Sud Hom gin, kaba, eni leng Yahudi meren mougt mera medam. Hanoba len letob se sogo salib dig Yesus mougt gin toua. 23:39 Dara lang marug mog gedig len letob lan desij Yesus gragohob, kaba, laingma laresbes Yesus toua, endagai: Bani Sud Hom Geigdoc Emen Dau Emen Gogom graga ingginei? Gedangga, kaba, ban beigdoc banin dara aman toua, dauntoba maman mamina agau dau sogo salib gindahaba? 23:40 Doba mesi homa en etaha en mer an, endagai: Ban benara dangga dou en, anara? Ban bemahau dau ELOHIM eneroei? Anai len logod an gomom deb naugb nanan aninim dag enohob, gina? 23:41 Anai nanan, kaba, namom icira nanan geicara gecgu. Doba en, kaba, len leic en gomom dou en augwougb dous. Anai men geicara gecgu hom emeb naugb enero. 23:42 Sug en etaha mesi mer an ginohob, kaba, en eiyagarij Yesus, endagai: Yesus, sug ban becicugwen naugb ban boiharaga lusud ucugb, kaba, ban abdoc emougwo danto ginlo. 23:43 Dangga Yesus auni dou en, endagai: Dan dos dou ban dag irogini, kaba, ban abugwengga desij dan se w Pirdausohob. Augwan gini se geica namcir. 23:44 Doba ebeij deinyor igdabogo, terimda igda edeic, kaba, igda lona emeic mouf deitero. Doba loba ecgun cinogo augwan namcir. 23:45 Dara minc geb dougwo ELOHIM Men Dimei Gecabeci Namcir agaga dau moc gada, terimda bedos gaih bedag hwai icira namcir toua. 23:46 Dangga sug ebeij igda edeijohob, kaba, Yesus eiyagarij Mena, endagai: Akeinya, dan dogugwo danin indina deb se ban absira mes ucugb. Sug en eiyagarij danggohob, kaba, en esa mena bomom namcir. 23:47 Sug leng sadodor meren mougt mera en eiya dau augwan gin, kaba, en agahugouhw an ELOHIM an Yesus namcir. Hanoba en os badi en deseino len gus, endagai: Indeic, gini sud hom gedig en aimo areg asesa ELOHIM enin medoc mes augwan dag misen namcirohob. 23:48 Sug leng lou acec Yesus len leiya dau augwan gin, kaba, len lecicugb dara merdoc en moho moho dig meren tueda. 23:49 Doba Yesus mesir dara ligida gedig len laimo Yesus isisi dau Galileohob, kaba, len lemeiya aremer augwan gin toua. Anai len toua lesa sungga, doba aigusi. 23:50-52 Sug Yesus omomohob, kaba, sud hom, moho Yusub, en eihwedaud Pilatus naugb en edacgeij Yesus medesa dau en. Sud hom gin, kaba, eni dau cinogo Arimatea se leng Yudea meren hancob. En, kaba, en medoc edag beim namcir. Dara en aimo areg asesa ELOHIM enin medoc mes augwan toua terimda. Dara en eigtou bateteij naugb lona sug ELOHIM oiharaga lusud ucugb toua. Dangga sug leng Majelis logod gomom deinaugb Yesusohob, kaba, en emousa len merir an touwero. Doba en en dougwo len namcir. Anai en toua, sud hom dau Majelis gedig lusud leigdoumesa en moho agas namcirohob. 23:53 Sug Pilatus ousa deisa en merohob, kaba, en eihweda naugb en edeic Yesus medesa dau sogo salib toua. Sug en eic Yesus maga dau sogo salibohob, kaba, en eic minc meti bagacgec en. Hanoba en edob an debsa igdohos mes. Se igdohos mes gin, kaba, len lemob aremogougb gus deb sebma. Anai igdohos mes gini menenauwaba. 23:54 Doba lona sug Yesus en omom se gin, kaba, Sekolah Ouwohob. Dangga hang, sug losog gin touohob, kaba, len lec en se igdohos mes dedemeda namcir. Anai leng Yahudi meren Lona Gemeicaresero toua ebijohob. 23:55 Dara ligida gedig len laimo Yesus isisi dau Galileohob, kaba, len toua locucan Yoseb naugb len ledeiya sug len ledob Yesus maga se igdohos mes, dauntoba len lecinaga len lob en deb dagiro. Dara len louwan ledeiya igdohos mes sug lob en deb toua. 23:56 Dangga len leiya sug len lob Yesus maga debohob, kaba, len lecicugb dig meren tu naugb len lesedeb aremoung mohu dara mani men ouwedebeda naugb sug len ledehinsa Yesus medesa. Sug len lesedeb gin augwan, kaba, len laimo Musa men gomnomna naugb len lehig dau meren geicara augwan namcir. Anai meren Lona Gemeicaresero ebijohob.

Lukas 24

24:1 Doba edebeij Ari lonamenmen, kaba, ligida graga len lodo aremoung mohu gedig len lesedeb gibecohob. Hanoba len leihwedan dig aremogougb moda. 24:2 Sug len ledebeij deinyorohob, kaba, len leiya, doba igdohos meh eila dau debohob. 24:3 Dangga len leinesa naugb lehilon dougwo maman Adehsud Yesus maga, doba len lemeiya en maga ginero. 24:4 Doba yen youman deigeigouhw. Irir sug len lesa naugb louma merdocesero, kaba, lasud lahwai gedig lan lag sansun mohw esesilo lagunyen naugb lasa desij leni. 24:5 Sug len leiya lan, kaba, len merirgo omnen, anai len lahau dau lan namcir. Doba lasud lahwai gini lan laho marir debin len, landagai: Dagiro, naugwe hang, yen yehilon sud hom maireseb se leng lomom merufu gina? 24:6-7 Anai en eisa dau gomom ucugwohob, hang en moongga sugin touwero. Augwan gini aimo dau areg en en dou yen se Galilea sug nosohob, endagai: Se lona daiyamo, kaba, ELOHIM esedeb Lusud Meraguna Mebin dan naugb sug lusud lohw dan se leng lebesesar merisira. Hanoba len letob dan se sogo salib toua. Doba lona hwai debin gin, kaba, dan deisa dau gomom ucugwohob. Yen meigdoc eiseisan en mer ginohobei? Era yen meigdoc moc dougwohobei? 24:8 Sug lan lan Yesus mer dag gin dou lenohob, kaba, lan marir eica len merdoc mes namcir. 24:9 Dangga sug len lecicugb dau aremogougb modohob, kaba, len lecic dau areg len leiya graga augwan asesa dou Yesus men logodeh merug sisa hobjerem, dara Yesus men logodeh gus laugwan toua. 24:10 Doba ligida gedig len ledecic dau aremer graga augwan dou Yesus men logodeh gin, kaba, len meroho dag Mariam dau cinogo Magdala, dara Yohana, dara Yakobus mem, moho Mariam, an ligida gus gedig len laicira len toua. 24:11 Doba sug Yesus men logodeh len louman dau gin, kaba, len lemod merna debsa len anero. Doba len loudesa dag len lecic huhugb mer dous. 24:12 Doba Petrus, kaba, en eisa bobga dig aremogougb moda deit. Sug en edebeijohob, kaba, en ou mergo bogug se igdohos mes. Doba en eiya minc meti mogud dous eng inggeb se igdohos mes deb gini. Areg gus augwan, kaba, en emeiya hom dau ginero. Dangga sug en ecicugb dig men tu, kaba, en eija medocesa an augwan gin terimda. 24:13 Se Ari gin toua, kaba, Yesus men logodeh lahwai lac asa ucina geihwededau Yerusalem dig meren cinogo, moho Emaus. Cinogo Emaus gini, kaba, lusud lec merohora se ijam homoiyahabi, len lemdebeij. 24:14 Sug lan lac asa ucina gini, kaba, lan lacic aremer graga doum toua. 24:15 Doba sug lan lacic aremer gin doum, dara laiso marir an ginaba, kaba, Yesus acu lan sungga. Hanoba len lec hom. 24:16 Doba ELOHIM ouf lan mairiresi dougwo namcir. Hang lan lameiya Yesus mocbobaga asesa touwero. 24:17 Dangga sug len lec asa ucina gin, kaba, Yesus eijidougwo lan, endagai: Sug yan yac asa ucina graga, kaba, yan yacicara areng doum graga? Sug lan lauman Yesus eijidougwo lan dag gin, kaba, lan lasa dara lan marsdemaga esisug namcir. 24:18 Hanoba sud hom dau lan, en moho Kleopas, en eijidougwo bauwun en mer, bendagai: Ban hom gin ben daugiro, hang bemecinaga aremer gin augwanbumei? Anai leng loucimdeb se Yerusalem gin, kaba, len laugwan lecinaga areg acgunog gini se lona gacinohob. 24:19 Doba Yesus eijidougwo lan deit, endagai: Aremer dag ara? Dangga lan launi dou en, landagai: Aremer eisaugb sud hom, moho Yesus, dau cinogo Nasared. Anai en, kaba, en esai ELOHIM moro dou emen dara goubesa namcir. Dara en eic ganusbus einyana debin gin dou emen touohob. Dangga hang, emen emecinaga dag ELOHIM eigdoumesa en moho naugb ginohob. Dara emen toua emeigdoumesa en moho dag en esai ELOHIM moro dou emen dag misen touohob. 24:20 Dobnaro. Anai maman gembala gesa taij meren mougtir, dara maman mougt mera gouji len lohw en dou leng Roma meren mougt mera, moho Pilatus, naugb en ogod aremer gomom dou en. Hang len letob en bomom taiba sogo salib gin touohob. 24:21 Doba emen, kaba, emen emod emina debsa en dag enin eng sud hom gedig en eigdoc emen meijouhuda Israel dau leng Roma merisira gin terimda. Dara gin dousero. Doba irogini, kaba, loba hwai debin sug len letob en taiba sogo salib gin touohob. 24:22 Dara merug hosa dau emen ligida, kaba, len leic emen emdoc omom an areg len len dou emen gini. Anai se lonamenmen greb, kaba, len leihweda se aremogougb moda naugb len ledeiya Yesus gini se igdohos mes. 24:23 Doba len lemeiya en magero. Hang sug len lecicugb aud emenohob, kaba, len leden dou emen dag len lemeiya en magero. Doba len leiya malaikad hwai dous. Hanoba malaikad hwai lanara dou len dag Yesus en emomom namcirero. Doba en eisa maireseb ucugb touohob. 24:24 Dangga sug emen emsir merug hosa len toua leihweda naugb ledogod dougwo aremogougb moda, kaba, len leiya, doba areg ligida len dou emenohob, kaba, dag misen namcir. Anai len toua lemeiya Yesus maga se igdohos mes touwero. 24:25 Sug Yesus ouman dau ginohob, kaba, en enara bauwun lan marir an, endagai: Dagiro, naugwe hang, yan maigdoc emebdebin an areg leng lesai ELOHIM moro sug nosa len log deb se Surad Injil Meb Mohon deb nosahabero, anara? Yan maiju edgomei? 24:26 Anai ELOHIM esedeb naugb sug Sud Hom Geigdoc Yen Dau Meijen Gogom Augwan gin, kaba, en aimo ucina mog erij nosahabi, en emdeinesa men gogouf cucugb daiyamo. 24:27 Sug Yesus enara bauwun lan dauwohob, kaba, en ens dau areg len log deb se Surad Injil Meb Mohon deb eisaugb en meijouhw augwan asesa dou lan deit, ebiji dau areg Musa en og se men surad deb nosohob, terimda bedebeij areg len lesai ELOHIM moro nosa len log deb touohob. 24:28 Sug Yesus ens meijouhw augwan dou lanohob, kaba, len ledebeij deinyor cinogo Emaus touohob. Dangga Yesus eic mos barerei lan mairiresi dag en ouwan ekirsa landa. 24:29 Doba lan lan dougwo en, landagai: Ban bemekirsero, doba ban bin matou suginahabi. Anai deinyor sug igda obsaresohob naugb sug loba osun ban namcir ingga. Dangga Yesus en aimo lan marir naugb en atou desij lan sungga. 24:30 Sug len leigtou naugb letara, kaba, Yesus os roti. Sug en en sijo dou ELOHIM naugb ginohob, kaba, en ekris roti. Hanoba en eic dou lan toua. 24:31 Sug en eic roti dou lanohob, kaba, ELOHIM esga lan mairiresi naugb lan lacinaga en asesohob. Doba Yesus ediyebeiya dau lan namcir. 24:32 Sug en ediyebeiya dau lanohob, kaba, lan lahadahadim ucucugb, landagai: Nanan nacinaga en Yesus dag misenohob. Anai sug en enara dou nanan, dara en ens dau Surad Injil Meb Mohon men meijouhw eisaugb enin augwan asesa dou nanan se ucina mogums graga, kaba, eic dag nanan nandoc erleij namcir. 24:33 Sug lan lan gin doum dangga inegohob, kaba, lan laisa lac naugb loba ingga ucugb dig Yerusalemeda. Dangga sug lan ladebeijohob, kaba, lan leiya, doba Yesus men logodeh merug sisa hobjerem an men logodeh gus gus toua, len laugwan loucimdebohob. 24:34 Doba sug lan lameigtou debin marihebma, kaba, len ingga len dou lan, lendagai: Emen emecinaga maman Adehsud Yesus en eisa dau gomom dag misen. Anai en ens enin ainyes dou Simon grebohob. 24:35 Sug lan lauman dau ginohob, kaba, lan toua lacic dau Yesus men geicara dou lan se ucina mogumsi. Dara lan lacic dou len dag lan ladecinaga Yesus ogdoc sug en ekris roti dou lan toua. 24:36 Sug lan lacic dau aremer graga augwan dou lenaba, kaba, Yesus enin agunyen augwougb debin len toua. Hanoba en enara dou len, endagai: ELOHIM eic gesgigouhwesa dou yen dougwo areg gecgu augwan namcir. 24:37 Sug len leijesan en dangga, kaba, len laugwan lehimahama. Dareg len lahau medam namcir, anai len loudesa eni dag mena dous. 24:38 Doba Yesus oho mer debin len, endagai: Dagiro, naugwe hang, yen yahau? Dara yen yeija meigdocesa dan, anara? 24:39 Anai mena, kaba, mori dara mog emeb se touwero. Doba yen yeiya dan gin, kaba, dan induri dara dan indug inggeb se gini. Dangga yen yen naugb yen yeiya dan insira dara indohora mera inggini. Dara yen yousousa dan indus toua, dauntoba yen yecinaga dan demedag mernero. Doba danin indug asesa eng deisa ucugb ginohob. 24:40 Sug Yesus enara dag gin dou lenohob, kaba, en ens mesira mera dara mohora mera dou len laugwan toua. 24:41 Doba men logodeh gini, kaba, len merdoc emebdebin an enbuma. Anai len merdoc agahugouhw dara atij an ganusbus gin dougwodaha. Dangga Yesus eijidougwo len, endagai: Meijen ared ingma inggebgei? 24:42-43 Sug en eijidougwo len an aredohob, kaba, len leic hosei gedig len locro teitei mehir hom dou en. Sug en eic dau len merisirohob, kaba, en et abeba len meriresi sungga toua. 24:44 Sug en et hosei abeba len meriresohob, kaba, en enara dou len, endagai: Dagiro, naugwe hang, yen yeija meijuwesa dan an aremer augwan gina? Anai areg Musa dara leng lesai ELOHIM moro sug nosa, dara leng lerba Ugwaremer len log deb se meren surad eisaugb dan deb nosohob, kaba, dan demedu gin dau yen touwero. Doba dan dens augwan gini asesa dou yen sug dan indugwengga dara yen sug nosohob. Anai augwan gini aimo dau areg ELOHIM en esedeb naugb danohob. 24:45 Sug Yesus enara dou len dauwohob, kaba, en edidib dau areg leng nosa len log deb se meren surad eisaugb en men meijouhw mougwa hom ucan dou len deit. Dauntoba len lecinaga augwan gini dag misen namcir toua. 24:46 Hanoba en edidib dag gin dou len, endagai: Areg leng nosa len log deb eisaugb dan kaba, dag gini: Sug dan dedag Sud Hom Geigdoc Lusud Dau Meren Gogom Augwanohob, kaba, dan daimo ucina mog erij aud gomom nosa touahabi. Doba lona hwas debin gin, kaba, dan deisa dau gomom ucugwohob. Anai augwan gini aimo dau areg ELOHIM enin mer ogod an deb naugb dan touohob. 24:47 Dara leng log ingma deit dag yen yeperwei dan induhw, hanoba yen yesai dan induro dou leng se cinogo gin augwan. Dauntoba sug len lesga meren sesar moho asesa, dara len lahau an dougwo namcirohob, kaba, ELOHIM aigdougwo meren sesar augwan dau len toua. Anai augwan gini aimo dau areg ELOHIM enin mer ogod an naugb yenohob. Dangga hang, yen yebiji se Yerusalem gin nosahabi, emeihwedesa cinogo guseda. 24:48 Anai yen, kaba, yen yeiya aremer augwan gini se yen meijiresohob. 24:49 Dara dan demesa Mena Gogoufu gedig dan Indina ELOHIM os deb dou yen aud yen toues. Dangga hang, yen yemeihwedesa cinogo guserobma. Doba yen yeigtou se Yerusalem gini terimda ELOHIM esa Mena Gogoufu dau bogaden an men goubesa aud yen touahabi, yen yemeihwedanda. 24:50 Sug Yesus esulou men logodeh eisaugb aremer augwan dauwohob, kaba, en einoisa len deinyor cinogo hom, moho Betania. Sug len ledebeij deinyor cinogo inggohob, kaba, en ou mesira aga len naugb en acgeij ELOHIM, dauntoba en eic geigouhw dou len terimda. 24:51 Sug Yesus acgeij ELOHIM naugb en eic geigouhw dou len ineg, kaba, ELOHIM eigdoumesa en dig bogo dau len namcir. 24:52 Sug len leiya, doba ELOHIM eigdoumesa Yesus dig bogo dau lenohob, kaba, len lesa lesijaresa en. Sug len lesijaresa en dauwohob, kaba, len lecicugb dig Yerusalem dara len merdoc agahugouhw asa ucina an en toua. 24:53 Hanoba len leinesa ELOHIM Men Tuari naugb len len sijo dou en an Yesus astesda lona toua terimda.

Yohanes 1

1:1 Sug ELOHIM emahasesei augwanbuma, kaba, Sud Hom, moho Gesai Moro, en toua moongga sug nosohob. Dara en emehig dou enin touwero. Doba lan lahwas lais huhugb sug nosohob. Dangga maran geicara augwan toua emeba dahamero. Doba maran geicara augwan aninim namcir. Dara en moho ingma susugb dau ELOHIM touwero, doba en moho toua dag ELOHIM dau huhugwohob. 1:2 Dangga sug acgunog, kaba, Sud Hom Gesai Moro en toua moongga desij ELOHIM enohob. 1:3 Hang areg ELOHIM en auwam an deb naugb sug en ahasesei, kaba, en emahasesei hom dou eninero. Doba lan laohw maruwedoum naugwahabi, lan lamahasesei augwan emogdoc Sud Hom Gesai Moro gin toua. 1:4 Dara maireseb menau geb huhugb, kaba, emen dau len gus touwero, doba en dau Sud Hom Gesai Moro enin dous. Dangga gareg en einesa maireseb menau geb huhugb ginohob, kaba, en emeigtou se lobeigbogo deitero. Doba en ecinaga areg misen augwan toua. Anai maireseb menau geb huhugb gini edag mouf aisema enohob. 1:5 Hang lobeigbogo men goubesa emedeinyum naugb sug etohoi mouf dau lusud merdoc mes touwero. Doba mouf gini aisema len beb huhugb terimda. 1:6 Dara ELOHIM arougb sud hom, moho Yohanes, naugb en esai mer geigouhw eisaugb Sud Hom Gesai Moro gini dou lusud toua deb nosahabi. Dauntoba sug len louman dau mer gin, kaba, len lesedeb merdoc mes deb naugb sug len merdoc ebdebin an Sud Hom Gesai Moro gin toua. 1:7 Dangga sug Yohanes edebeij lenohob, kaba, en enara dou len, endagai: Cum, kaba, sud hom gedag mouf edebeij yen naugb en ens areg asesa ELOHIM enin medoc mes augwan dou yen toua. 1:8 Dangga Yohanes gin, kaba, en emedag sud hom geic mouf dou lusudero. Doba en en naugb en esedeb lusud merdoc mes naugb sud hom geic mouf dou lusud gin dous. 1:9 Doba Sud Hom Gesai Moro gedig en ouwaden dau bogo naugb aisema lusud se cinogo gin augwan, kaba, enin dous eng edag mouf misen gini. 1:10 Doba lusud, kaba, len lemeigdoumesa en moho dag mouf gaisema len touwero. Doba len letogoto en namcir. Dangga hang, ELOHIM esinsin lusud laugwan ogdoc Sud Hom Gesai Moro ginohob. Doba sug en edebeij len, kaba, len merdoc emebdebin an en touwero. 1:11 Dara sug en en aud enin men meijouhuder, kaba, len lemebin en touwero. 1:12 Doba gareg en ebin Sud Hom Gesai Moro gini, hanoba en medoc ebdebin an en toua, kaba, ELOHIM eigdoumesa len meroho dag en mogwihi mogo len dag misen namcir. 1:13 Hang len lemedag ELOHIM mehir emogdoc dau sug merna lauwam an, dara merimir louwadanir, dara lusud logod an deb touwero. Doba len ledag ELOHIM mehir gini dau ELOHIM enin medoc mes dous. 1:14 Dara emen toua emeiya dau Sud Hom Gesai Moro men gogouf cucugb gedig en Mena ogugwo dou en Meisi mohora hom gin touohob. Anai en emeigtou se bogo dou eninero. Doba en ouwaden dau bogo naugb en eigtou desij maman. Dara en emedag mena touwero, doba en mocbobaga toua dag lusud misen. Dangga emen emeiya dau men geicara sug en medoc eineg an lusud ucucugb terimda. Dara emen emecinaga areg asesa ELOHIM enin medoc mes. Anai en Meisi gin, kaba, en ens augwan gini asesa dou emen touohob. 1:15 Dara Yohanes gedig en ogun lusud se duhu, kaba, en toua ouma debin Sud Hom Gesai Moro ginohob. Anai sug en eiya Sud Hom Gesai Moro en en aud en sug nosa, kaba, en eija mer dou men logodeh, endagai: Dan den dou yen sug nosa dag cum, kaba, sud hom en emaimo ucan dan naugb en emeperwei dans. Dara dan den dou yen dag en moho agas medam edreg dau dan namcir touohob. Sug Yohanes enara dou men logodeh dag ginohob, kaba, en ens Sud Hom Gesai Moro enin mog dou len deit, endagai: Sud hom gedig dan den dou yen graga, kaba, inggada. 1:16 Dara sug Sud Hom Gesai Moro gini en ouwaden dau bogohob, kaba, en emecgun mesira debin areg geigouhw dau maman touwero. Doba en agaha mesira an dou maman naugb en eic geigouhw aingma aingma dou maman terimda. 1:17 Dangga areg ELOHIM eic dou lusud ogdoc Musa sug nosa, kaba, dag men gomnomna dous. Doba areg asesa ELOHIM enin medoc mes, kaba, en ens augwan gini dou maman ogdoc Yesus Krisdus enin. Anai en medoc eineg an maman namcirohob. 1:18 Dara sud hom ingma, kaba, en emeiya ELOHIM dara en maires touebma. Doba en Meisi mohora hom gin dous eng ens areg geb se ELOHIM enin medoc mes augwan asesa dou maman. Anai enin dous eng en moho aninim dag ELOHIM. Dara enin dous eng eigtou bogodgod Mena maga an areg gin augwan sug nosohob. 1:19 Sug Yohanes ogun lusud se duhu sug nosa, kaba, leng Yahudi meren mougtir larougb merug hosa dau gembala gesa taij dara Lewi medebeitor naugb len leihwedaud Yohanes. Hanoba len lenara dou len, lendagai: Yen yeihweda naugb yen yedeijidougwo Yohanes en eng Sud Hom Geigdoc Maman Dau Maman Gogom Augwan enei? Era naroei? Dangga sug len ledebeij enohob, kaba, len leijidougwo en, lendagai: Ban eng Sud Hom Beigdoc Emen Dau Emen Gogom Augwanei? 1:20 Doba Yohanes, kaba, en emaunun dougwo enin dou lenero. Doba en ens meijouhw asesa dag misen dou len namcir. Hanoba en enara dou len, endagai: Dani Sud Hom Geigdoc Yen Dau Meijen Gogom Augwan ginero, doba sud hom gus dous. 1:21 Dangga hang, len leijidougwo en deit, lendagai: Gedangga, kaba, ban, kaba, garena? Bang Elias eng beisa dau gomom ucugb ginei? Doba Yohanes auni len merir ucugb dou len, endagai: Dang Elias touwero. Sug len louman dau gini, kaba, len leijidougwo en deit, lendagai: Bani Eliasero, kaba, bani sud hom gesai ELOHIM moro eisaugb Mesias sug en en dou emen, ingginei? Doba Yohanes auni len merir ucugb dou len toua, endagai: Dani sud hom gesai ELOHIM moro eisaugb Mesias sug en en dou yen touwero. 1:22 Dangga len lenara dou en deit, lendagai: Ban bemauni areg emen emeijidougwo ban an gragero, kaba, ban beigdoumesa ban aboho dag garena deseino emena? Ban bens meijouhw asesa dou emen, dauntoba emen emedecic augwan asesa dou emen mougtir touahabi. 1:23 Doba sug Yohanes auni dou len, kaba, en ecic dau areg sud hom gesai ELOHIM moro nosa, moho Yesaya, en og deb se Surad Injil Meb Mohon deb sug nosohob. Hanoba en enara dou en, endagai: Dan dedag sud hom geija mer esesa dou lusud se lomougwisa, endagai: Yen yesa yen meigdoc mes bobosboro deb naugb maman Adehsud sug en en. Aninim dag lusud lesinsin ucina obosboro naugb meren mougt mera medam sug en einesa aud len toua. 1:24-25 Sug lusud gedig leng Parisi lesa len aud Yohanes graga len louman en mer an gini, kaba, len len dougwo en, lendagai: Ban bemedag Sud Hom Emeigdoc Emen Dau Emen Gogom, dara ban bemedag Elias, dara ban bemedag sud hom gesai ELOHIM moro eisaugb Mesias sug en en dou emen deit touwero, kaba, ban bogun lusud se duhu deb anara? 1:26 Dangga Yohanes auni dou len, endagai: Dan, kaba, dan dogun yen se duhu, doba duhu misen dous. Doba cum, kaba, sud hom en emaimo ucan dan aud yens. 1:27 En, kaba, dan indoho emedeinyum naugb sug dan demesga aumagan dau men hwigbeimos icira en mohora touwero. Dara en moongga se yen meijufu touohob, doba yen yemecinaga enbuma. 1:28 Aremer augwan gin, kaba, ebiji deinyor Betania dig duhu Yordan nagama aud dig igda eisaugb. Anai us gin, kaba, sug Yohanes ogun lusud se duhu deb se ingga. 1:29 Se loneinda deit, kaba, Yohanes en eiya Yesus sug en en aud en. Hanoba en enara dou men logodeh, endagai: Yen yeiya sud hom gagunya gaden, kaba, en eng ELOHIM Men Domba naugb en aigdougwo lusud se cinogo augwan meren sesar. 1:30 Eni sud hom gedig dan den dou yenohob, dag en emaimo ucan dans. Dara en moho agas edreg medam dau dan touohob. Anai en eis huhugb sug dan touebma. 1:31 Aimougtut, kaba, dan demecinaga sud hom goucan dan gin dag misenbuma. Doba sug ELOHIM arougb dan naugb dan dogun lusud se duhu sug nosa, kaba, en esulou dan ucan deit, endagai: Sug ban bogun lusud se duhu gini, kaba, ban bemeiya Mena Gogoufu emouwaden dau bogo naugb en eigtou desij sud hom dau len gini. En gin eng emesa Mena Gogoufu se lusud merdoc mes toues. 1:32-33 Dangga dan demecinaga sud hom goucan dan gini sug nosa touwero. Doba dan den naugb dan dogun lusud se duhuahabi. Dauntoba sug dan deiya Mena Gogoufu eigtou desij sud hom dau len gini, kaba, dan dens en dou mamang Israel dag en emeigdoc maman dau maman gogom augwans. Sug Yohanes ens Yesus dou men logodehohob, kaba, en ouma debin en ucan dou len deit, endagai: Sug dan dogun en se duhu, kaba, dan deiya Mena Gogoufu ohw dau bogaden dag bohobei eigtou desij enohob. 1:34 Dangga hang, dan decinaga en edag ELOHIM Meisi mohora hom gini. Anai dan deiya areg graga augwan se dan indires dag misen touohob. 1:35 Lona hom debin gin deit, kaba, Yohanes en moongga se usi sug en ogun lusud se duhu. Dara men logodeh lahwai lan marugwengga desij en sungga toua. 1:36 Dangga sug en eiya Yesus oudreg len, kaba, en ens en dou men logodeh lahwai gini, endagai: Yan yaiya ELOHIM men Domba graga inggadeinda. 1:37 Sug lan lauman Yohanes mer an gin, kaba, lan larges en deb sungga. Hanoba lan laucan Yesuseda. 1:38 Dangga sug Yesus eineg dig medigo, kaba, en eiya lan laucan en. Hanoba en eijidougwo lan, endagai: Yan yaucan dan naugb ara? Hang lan launi dou en, landagai: Adehsud, ban bedatou sugiro? 1:39 Sug Yesus ouman, doba lan laijidougwo en dag gin, kaba, en oho mer debin lan, endagai: Yan yaucan danahabi, yan yamedeiyes. Doba sug Yesus oho mer debin len dag gin, kaba, igda edeisameni deinyor lobohob. Dangga sug lan laucan en terimda, kaba, lan ladeiya sug en atoudohob. Hanoba lan laigtou desij en sungga terimda loba namcirahabi, lan lamecicugb. 1:40 Doba lang lauman Yohanes mer graga, dara laucan Yesus gini, kaba, laingma maroho dag Andreas, Simon Petrus magto. 1:41 Dangga sug lan lacicugb dau Yesus inegohob, kaba, Andreas en edehilon en maguna Simon. Sug en edesma enohob, kaba, en en dou en, endagai: Aman ameiya Sud Hom Geigdoc Maman Dau Maman Gogom Augwan enohob. (Meijouhw gini se leng Grika meren leci dag Krisdus.) 1:42 Sug en en dou en danggohob, kaba, en ahwan en aud Yesus toua. Sug Yesus eiya Simonohob, kaba, en auweila en augwougwu. Hanoba en enara dou en, endagai: Iteitogini ban aboho Simon, Yohanes meisi. Doba dan desagai ban aboho deit dag Kepas. (Kepas gini, kaba, men meijouhw se leng Grika meren leci aninim dag Petrus, era igdahab gouji gototo.) 1:43 Se loneinda deit, kaba, Yesus esedeb naugb en eihwedig leng Galilea meren hancob deit. Dangga sug en ec mohora asa ucina gin, kaba, en eiya sud hom moho Pilipus. Sug en edeiya enohob, kaba, en enara dou en, endagai: Ban toua bin, baimo dan. 1:44 Pilipus gini, dara Andreas, dara Simon, len laugwan dau cinogo Bedsaida. 1:45 Sug Yesus enara dou Pilipus naugb en aimo enohob, kaba, Pilipus edehilon en magto Nataniel toua. Sug en edebeij enohob, kaba, en enara dou en, endagai: Emen emesma sud hom areg Musa dara leng lesai ELOHIM moro nosa len log deb se ELOHIM men gomnomna eisaugb en sug nosa touohob. Eni Yusub meisi, moho Yesus, dau cinogo Nasared. 1:46 Doba sug Nataniel en ouman dag Yesus en dau cinogo Nasaredohob, kaba, en esbes Pilipus mer an gin namcir, endagai: Ara geigouhw hom ingma emen dau Nasaredei? Naro, areg geigouhw hom ingma emen dau Nasared ginero. Doba Pilipus enara ehin mougtai en, endagai: Ban bemenara danggerobma. Doba banin bin naugb bideiya en se ban abiresahabi. 1:47 Sug Yesus eiya Nataniel edagunyohob, kaba, en eigdoumesa en moho deseino len gus, endagai: Yen yeiya sud hom gen gaben. Eni edag sud hom dau leng Israel gedag beim namcir. Anai en aimo maman gaben augwan dag misenohob. Dangga hang, men geicara augwan, kaba, dag en emarerei lusud meriresi touwero. 1:48 Sug Nataniel ouman Yesus mer dag ginohob, kaba, en eijidougwo en, endagai: Gareng edecic indan geicara dou ban, hang ban bemecinaga gina? Doba Yesus auni dou en, endagai: Sug Pilipus emedebeij banbuma, doba dan deiya ban sug ban beigtou se sogo ara meiyohob. 1:49 Sug Nataniel en ouman Yesus mer dag gin deitohob, kaba, en ousa deisa Yesus mer an, endagai: Adehsud, ban beiya dan dag ginohob, kaba, gini ansins dag ban bedag ELOHIM Meisi mohora hom dag misenohob. Dara ban bedag mamang Israel maman mougt mera medam touohob. 1:50 Doba Yesus enara bauni ucugb dou en, endagai: Ban abdoc ebdebin an dan ogdoc sug dan den dou ban dag dan deiya ban se sogo ara meiyo graga dousei? Doba hom gin dousero. Anai cum, kaba, dan demens aremer einyana edreg dau gin dou ban deit. 1:51 Sug Yesus os dangga dou Nataniel dauwohob, kaba, en os dou men logodeh laugwan ucan deit, endagai: Yen youman dan indir gin deigeigouhwahabi. Anai cum, kaba, yen yemeiya misis se bogo emec dau ELOHIM men malaikadir lemeisaugb lemouwada naugb len lemesedougwo Lusud Maraguna Mebin dans. Augwan gini asesa dag misen namcir.

Yohanes 2

2:1-2 Lona hwai debin dau sug Yesus eija Pilipus dara Natanielohob, kaba, lusud lougwan ared debin leng leicim se cinogo Kana se leng Galilea meren hancob. Dangga len lesa merir dou Yesus an men logodeh, dauntoba len len naugb ledetara dara len toua. Sug len lougwan ara gin, kaba, Yesus mem en toua moongga desij leni. 2:3 Doba sug len letara, kaba, meren anggur mohu ouwohob. Dangga Yesus mem eisa bedenara dou meisi, endagai: Len gin, kaba, meren anggur mohu augwan ouwa dau lenohob. 2:4 Doba Yesus auni dou en mem, endagai: Daneh, ban bemarougb dan naugb dan demens danin dou lusudlobma. Anai indan lona emedeinyum naugb ginbuma. 2:5 Doba Yesus mem enara dou sogougwir, endagai: Areg dan indisi en arougb yen an, kaba, yen yeicara yaimo en mer an gin dous. 2:6 Doba debecij maga senggem inggeb an duhu desij len ingga naugb len ledu len meraga becabeci deseino ELOHIM dauwahabi, len lemetara. Anai gini aimo dau leng Yahudi meren gaben danggohob. Astesda debecij gin, kaba, oho ampo maga huntun hom an duhu ebsa. 2:7 Dangga, kaba, Yesus arougb sogougwir, endagai: Yen yedagain duhu debsa debecij gin augwan batij namcir. Sug len louman Yesus en mer an dag ginohob, kaba, len laimo en mer naugb len lagain duhu deb se augwan batij namcir toua. 2:8 Sug len lagain duhu debsohob, kaba, Yesus arougb len deit, endagai: Yen yagain duhu ingga ingma naugb yen yodo dou mougt mera gesedougwo gougwanara gini en eg bainyen nosahabi. Sug len lodo dou enohob, kaba, mougt mera ingga en ainyen duhu gini. Doba eperwei dag anggur mohu gahaufo namcirohob. 2:9-10 Dangga en eija sud hom geic mesouwa graga, hanoba en enara debin en, endagai: Astesda sud hom gougwanara, kaba, en eic anggur mohu gahaufo dou men lusud leg nosahabi. Dangga sug len leg gahaufo bedeinyum dauwohob, kaba, en emeic anggur mohu goubesebesa dou len lemeg ucan deit. Doba ban, kaba, ban bob geigouhw gin debahabi, ban bemeic dou len leg daiyamo gini. (En enara debin en dangga, anai en emecinaga dau sug duhu geperwei dag anggur mohu gin touwero. Doba sogougwir gedig len lagain duhu se dibecij, kaba, len dous eng lecinaga dau gini.) 2:11 Dangga sug Yesus men logodeh leiya dau gin, kaba, len merdoc ebdebin an en dag en en dau bogo naugb eigdoc len dau meren gogom augwanohob. Anai en ens men gogouf cucugb ogdoc ganusbus gin eb ainyes dou lenohob. 2:12 Sug len letara bouwohob, kaba, Yesus, dara mem an magtor, dara men logodeh, len laugwan leihwedig Kapernaum. Hanoba len ledeigtou sungga se lona aibibra toua. 2:13 Sug leng Yahudi meren Lona Gohw Bedreg ebeij deinyorohob, kaba, Yesus en toua eisaugb dig Yerusalem naugb len lougwan ared debin meren lona gin toua. Anai se lona ingga, kaba, leng Yahudi merna eiseisan lona sug ELOHIM esga len merjemouwer dau cinogo Mesir sug nosohob. 2:14 Dangga sug en einesa ELOHIM Men Tuariohob, kaba, en eiya, doba leng lohw sapi, dara domba, dara bohobei leigtou acec ELOHIM Men Tuari maga naugb lauma aregoufu daum deb gini. Dara en eiya leng leic aregoufu laocagem len toua leigtou se meren boromei acec ELOHIM Men Tuari maga ingga toua. 2:15 Sug en eiya lenohob, kaba, en ecgun aigdaga meida. Hanoba en ocirma aremeta dag sapi dara domba len laugwan dau ELOHIM men igtia gini. Dara en eineg boromei an leng leic aregoufu laocagem augwan etrij baisoboro namcir toua. 2:16 Sug en ocirma leng lohw sapi, dara leng leic aregoufu laocagem dauwohob, kaba, en ocirma len lohw bohobei toua, endagai: Yen yeihwedan meijen bohobei augwan dau sugin namcir toua. Anai dan demouwan naugb yen yesinsin dan Indina Men Tuari gin dag tu gedig lusud lohwaresero. 2:17 Sug Yesus men logodeh len leiya dau gini, kaba, len merdoc eiseisan areg Daud en erba Ugwaremer an deb nosohob, endagai: Dan indoc gororougb aban Tuari dag smougb gait dan indoc mes an namcir. 2:18 Doba leng Yahudi meren mougtir, kaba, len lenara gouji dou Yesus namcir, lendagai: Ban bens gansins ingma debin gin dou emen, dauntoba emen emecinaga dag ban aboho edeinyum naugb ban bocirma len gin dau ELOHIM Men Tuari gina? 2:19 Dangga Yesus enara bauni len merir ucugb, endagai: Sug yen yot ELOHIM Men Tuari gini baisoboro, doba se lona homoi, kaba, dan dohud se mohw ucugwohob. 2:20 Sug len louman dau gin, kaba, len lesbes an en namcir, lendagai: Dagiro, naugwe hang, ban ben dou emen dag ban bohud Tuari gini ucugb se lona homoi dousa? Anai sug emen emjemouwer lohud Tuari gini sug nosa, kaba, len lohud se arisogomoc sud hwai senggem edeisohob, gina? 2:21 Doba tuari gedig Yesus eic bainyen dou len gin, kaba, en aimeh an enin maga dou len dous. 2:22 Dangga edebeij lona sug ELOHIM eigdoumesa Yesus dau gomom ucugwohob, kaba, men logodeh merdoc eiseisan dag aremer gin, kaba, Yesus en dou len sug nosohob. Hang areg lusud len log deb se Surad Injil Meb Mohon eisaugb en debohob, dara areg Yesus enin enara dou len, kaba, len merdoc ebdebin an gin augwan namcir. 2:23 Dara irir sug Yesus en moongga se Yerusalem naugb Lona Gohw Bedreg gin, kaba, lusud leinyana merdoc ebdebin an en toua. Anai len leiya dau sug en eic ganusbus einyana dou lenohob. 2:24 Doba Yesus, kaba, en medoc emeica lenero. Anai en ecinaga len laugwan merdoc mes asesohob. 2:25 Dangga hang, emedeinyum naugb len gus lemens dau areg geb se lusud merdoc mes dou enero. Anai en eiya areg geb se lusud merdoc mes augwanohob.

Yohanes 3

3:1 Se cinogo Yerusalem gini, kaba, leng Yahudi meren mougt mera medam hom, moho Nikodemus dau leng Parisi, en toua moongga. 3:2 Dangga se loba hom, kaba, en edebeij Yesus naugb edenara dou eni. Sug en edebeij enohob, kaba, en enara baineino Yesus men, endagai: Adehsud, ban beic ganusbus einyana dou emenohob. Dangga hang, emen emecinaga dag ELOHIM esa ban aud emen naugb sug ban bedidib en mer meijouhw augwan asesa dou emen toua. Anai sug ELOHIM emesa sud hom aud emen dag misenero, kaba, en emeic ganusbus dag Adehsud bang ginero. 3:3 Doba Yesus enara bauni en mer gini, endagai: Ban bouman dan indir gin deigeigouhwahabi. Anai ban bouwan ELOHIM oiharaga ban ucugb, kaba, esloulougb naugb ban bedag godeh mahaniheni ucugb deitahabi. Augwan gini asesa dag misen namcir. 3:4 Sug Nikodemus ouman Yesus mer an gin, kaba, en ouma medocesero. Hanoba en eijidougwo Yesus ucugb deit, endagai: Adehsud, dan demedag lugdeh mahaniheni se indim menuhwa naugb en emouwadan dan deit, dagiro? Anai dan dedag sud bodohob gina? 3:5 Doba Yesus enara bauni en mer ucugb, endagai: Ban bouman dan indir deigeigouhw deitahabi. Sud hom ingma emeinesa ELOHIM men goiharaga ogdoc sug mem ouwadan en dous ginero. Doba ogdoc sug Mena Gogoufu einesa en medoc mes, hanoba eic maireseb menau geb huhugb dou en touahabi. 3:6 Anai gareg mem ouwadan en, kaba, en maireseb aimo maga men geicara se cinogo gin dous. Doba sud hom areg Mena Gogoufu einesa en medoc mesohob, kaba, men geicara aimo maireseb menau geb huhugb gin toua. 3:7 Dangga hang, ban bemeimiman dau sug dan den dou ban dag yen yaugwan yedag logodeh mahaniheni deit gin touwero. Anai augwan gini aimo dau areg ELOHIM enin esedeb naugb yenohob. 3:8 Dara maireseb menau gin, kaba, sud hom ingma emarougb Mena Gogoufu en an touwero. Doba en eic dou lusud aimo dau areg enin ouwan dous. Aninim dag loungmen sug en eisa, kaba, sud hom ingma emarougb en an touwero. Doba en eisa sungga sungga augwougb toua. Hang ban bemecinaga en eisa daugiro, beihwedig touwero. Doba ban bouman en mougb dangga dous. 3:9 Doba Nikodemus, kaba, en eijidougwo Yesus ucugb deit, endagai: Augwan gini emacgunog dagiro? 3:10 Doba Yesus enara debin en, endagai: Ban bedag sud hom gedig en edidib Musa men gomnomna men meijouhw augwan asesa dou leng Israel moho agas ginohob. Dangga dagiro, naugwe hang, ban bemecinaga areg graga augwan ginero? 3:11-13 Anai areg dan desai dou yen gin, kaba, dan deic areg geb se cinogo daimeh debin gin dou yen touohob. Dangga sug yen meigdoc emebdebin an dan sug dan decic dau areg geb se cinogo daimeh dou yenero, kaba, dagiro yen meigdoc ebdebin an dan sug dan decic dau areg geb se bogo dou yen toua? Naro, yen meigdoc emebdebin an dan sug dan decic dau areg se bogo dou yen touwero. Dara areg emen emesai dou yen dau bogo gin, kaba, emen emesai augwougb dou yen touwero. Doba emen emeiya dara emecinaga augwan dag misenohob. Hang emen emesai dou yen toua. Anai sud hom ingma, kaba, en emeisaugb dig bogo mougwa hom touebma. Doba Lusud Meraguna Mebin gedig dan douwaden dau bogo aud yenohob, kaba, danin dous eng eisaugb dig bogo ginohob. Dobnaro. Sud hom ingma dau yen, kaba, en emouwan naugb ebin areg emen emecic gin se en medoc mesero. Doba yen yotogoto augwan gin namcir. Ban bouman dan indir an areg dan den dou ban gini deigeigouhw terimda. Anai augwan gini asesa dag misen namcir. 3:14-15 Dara aninim dag Musa eigdoumesa sogo an hinogo dau kermum gohoseri naugb leng Israel se lomougwisa sug nosa, kaba, lusud lemeigdoumesa sogo an Lusud Meraguna Mebin dan toues, aimo dau areg ELOHIM esedeb naugb danohob. Dauntoba gareg en medoc ebdebin an dan dag dan domom taiba sogo salib naugb men sesarohob, kaba, ELOHIM eic maireseb menau geb huhugb dou en toua terimda. 3:16 Anai ELOHIM medoc gororougb lusud se cinogo gin augwan. Dangga hang, en emeic en Meisi dan dag mogud dou len toua. Dauntoba gareg en medoc ebdebin an dan, kaba, en emomom deitero. Doba ELOHIM eic maireseb menau geb huhugb dou en namcir. 3:17 Anai ELOHIM emesa en Meisi dan se cinogo gini naugb dan demogod gomom deb naugb lusudero. Doba en esa dan aud len naugb dan deigdoc len dau meren gogom augwan dous. 3:18 Dangga gareg en medoc ebdebin an ELOHIM Meisi danohob, kaba, ELOHIM emogod gomom deinaugb en se lona daiyamo gacin toua deitero, doba en arges dau namcirohob. Doba gareg en medoc emebdebin an danero, kaba, ELOHIM ogod gomom deinaugb en debohob. Anai en medoc emebdebin an ELOHIM Meisi mohora hom danero, doba en asidged danohob. 3:19 Dara ELOHIM emogod aremer gomom gini deinaugb lusud augwougb touwero. Doba en ogod deinaugb len, anai en ens areg asesa enin medoc mes augwan dag mouf dou len deb nosohob. Doba lusud merdoc mes gororougb meren geicara gecgu gin terimda. Dangga hang, len lemaimo areg se mouf gin touwero, doba len laimo areg geb se lobeigbogo dous. 3:20 Anai gareg en medoc gororougb men geicara gecgu gini, kaba, en emen naugb emeinesa mouf touwero. Doba en medoc esdigeij mouf gin namcir. Anai en ecinaga dau sug en einesa mouf ginohob, kaba, dag mouf ens men geicara gecgu gini eb ainyes dou en toua. Dangga hang, en emouwan gin touwero. 3:21 Doba gareg en ouwan eicara baimo areg asesa ELOHIM enin medoc mes, kaba, en emeigtou se lobeigbogo deitero, doba en einesa mouf. Dauntoba mouf ens men geicara eb ainyes dou lusud dag men geicara augwan gin, kaba, aimo areg asesa ELOHIM enin medoc mes dag misenohob. 3:22 Sug len lougwanaresa Lona Gohw Bedreg dauwohob, kaba, Yesus dara men logodeh leihweda se leng Yudea meren hancob naugb en eigtou desij men logodeh sungga se lona aibibra. Hanoba en ogun lusud se duhu toua. 3:23 Dara Yohanes en toua ogun lusud se duhu se usi hom moho Ainon deinyor cinogo Salim. Anai sungga, kaba, duhu einyana. Dangga lusud leinyana len len aud en naugb en ogun len se duhu toua. 3:24 Aremer augwan gini acgunog sug Herodes emouf Yohanes se tu gesisugbuma. 3:25 Doba sug Yohanes men logodeh len leiya Yesus en ogun lusud se duhu toua, kaba, len len aud en naugb leijidougwo en an gini. Anai len merir laised sud hom dau leng Yahudi endag gareng men ucina eic len merdoc ecabeci deseino ELOHIM ena? 3:26 Dangga sug len ledebeij enohob, kaba, len lenara dou en, lendagai: Adehsud, ban abdoc eiseisan sud hom grag ban bens dou emen sug en agunya debin maman se Yordan mebera dig igda eisaugb sug nosohobei? Anai iteitogin, kaba, en ogun lusud se duhu. Dara lusud laugwan louwa aud en toua. Hang men ucina gin toua eigouhwei? Era naroei? 3:27 Doba Yohanes auni dou len, endagai: Aremer augwan dag gin, kaba, emen dau lusud lenin merdoc mesero. Doba aimo dau areg ELOHIM enin ouwan naugb en eic dou lusud dous. 3:28 Dara yenin yecinaga sug dan den dou yen sug nosa, kaba, dag dan demeigdoumesa danin indoho dag Sud Hom Geigdoc Yen Dau Sesar Men Gogom deseino yen touwero. Doba dan den dou yen dag dan deino en men naugb desedeb ucina deb naugb en dous. 3:29 Anai sug sud hom eic mesouwa, kaba, en mesouwa gini emeb naugb en mesi ginero. Doba eb naugb mesuwa gin dous. En mesi misen, kaba, en eigtou se misis moc naugb en ouman dau sug mesi enara dou mesouwohob. Dangga sug en ouman, doba mesuwa enara geigouhw dou mesouwa ginohob, kaba, en medoc agahugouhw an mesi gin namcir. Hang iteitogin, kaba, dan indoc agahugouhw an sud hom gin toua terimda. Anai en, kaba, dag sud hom geic mesouwohob. Doba dan dedag en mesi misen dous. 3:30 Dara en moho, kaba, eisaugb dig gadeda namcir. Doba dan indoho, kaba, eb tainya dig gaihida dous. Anai augwan gini aimo dau areg ELOHIM esedeb sug nosohob. 3:31 Gareg en ouwaden dau bogo, kaba, en moho edreg dau areg gus augwan namcirohob. Anai gareg dau cinogo gin, kaba, eni aninim dag lusud se cinogo gin dous. Hanoba men geicara dara areg en en, kaba, augwan gini dag lusud meren geicara gin toua terimda. Doba gareg en en dau bogo, kaba, en moho agas bedreg dau augwan namcir. Anai en emen dau cinogo ginero, doba en dau bogo ginohob. 3:32 Hang en ens dau areg en eiya dara areg en ouman se bogo augwan asesa dou maman touohob. Doba sud hom ingma, kaba, en medoc emebdebin an areg en en dou maman gin touwero. 3:33 Doba gareg en ebin areg en esai dou maman gini se en medoc mes, kaba, en ouma debin ELOHIM dag en mer gin, kaba, mer areibahau touwero, doba mer misen namcirohob. 3:34 Dangga hang, sud hom gareg ELOHIM esa en aud mamanohob, kaba, en emereiyara dou maman touwero. Doba areg en esai dou maman gin, kaba, dag geica namcir. Anai sug ELOHIM esa Mena Gogoufu se en medoc mes, kaba, en emekeba ingma dauwero. Doba en esa augwan batij bobdaga se en medoc mes ginohob. 3:35 Dara en Mena medoc gororougb en Meisi. Hanoba en eigdoumesa en moho dag mougt mera medam naugb augwan gin touohob. 3:36 Dangga gareg en medoc ebdebin an ELOHIM Meisi mohora hom ginohob, kaba, ELOHIM eic maireseb menau geb huhugb dou en toua. Doba gareg en emaimo Meis gin en merero, kaba, en emdesma maireseb huhugb gin touwero. Doba ELOHIM medoc esrougb an en namcir naugb en eic gogom dou en toua terimda.

Yohanes 4

4:1 Dara leng Parisi len toua louman dau Yesus dag lusud leinyana lou audi en. Dara en ogun leinyana bedreg dau Yohanes gin touohob. 4:2 Dobnaro. Yesus enin, kaba, en emogun lusud se duhwero. Doba men logodeh len dous eng logun len se duhu gini. 4:3 Dangga sug Yesus ecinaga dag leng Parisi len toua louman dau ginohob, kaba, en emeigtou se leng Yudea meren hancob gin debero. Doba en eihwededau sungga dig leng Galilea meren hancob deitda. 4:4 Doba sug en eihweda, kaba, ELOHIM out en mebes naugb en eraga leng Samaria meren hancob. Anai gini aimo dau areg ELOHIM esedeb naugb en sug nosohob. 4:5 Dangga sug en eragasa leng Samaria meren hancob gin, kaba, en edebeij cinogo hom, moho Sikar. Cinogo gini, kaba, deinyor Yakub men sesa gen eic dou en meisi Yusub sug nosohob. 4:6 Dara Yakub men cinogo mes naugb duhu toua eb deinyor Sikar gini. Dangga sug Yesus en ec bedebeij cinogo mes inggohob, kaba, en eigtou debin en mog sungga. Anai deinyor igdabogo, dara en mog toua omsires namcirohob. 4:7 Sug en eigtou debin en mog dag gin, kaba, gida hom dau leng Samaria en en dau cinogo ingga naugb en edagain duhu se cinogo mes gini. Dangga Yesus acgeij en an duhu, endagai: Ban bagain duhu ingma dou dan didegahabi. 4:8 Yesus acgeij gida gini, anai men logodeh laugwan leihweda naugb ledouma ared se beimes dau enohob. 4:9 Sug gida ingga en ouman, doba Yesus acgeij en an duhu, kaba, en eija medocesa an gin namcir. Anai leng Yahudi, kaba, len lousan lenin dau leng Samaria namcir. Dangga hang, en enara bauni dou Yesus ucugb deit, endagai: Dagiro, naugwe hang, ban bacgeij dan an duhu. Anai ban, kaba, dau leng Yahudi. Doba dan, kaba, dau leng Samaria gina? 4:10 Doba Yesus enara bauni en mer ucugb deit, endagai: Ban bemecinaga dau areg ELOHIM esedeb naugb en eic dou ban dag misenbuma. Dara ban bemecinaga dang dacgeij ban an duhu gin dag misen touebma. Anai sug ban becinaga dan dag misenohob, kaba, ban bemeic duhu dou danero. Doba ban eng bacgeij duhu dau dan dous. Anai duhu gedig dan deic dou ban gini, kaba, eic maireseb geb huhugb dou ban namcir. 4:11 Sug gida ingga ouman dau gin, kaba, en enara baised Yesus mer, endagai: Adehsud, ban bemeic areng bemagain duhu geic maireseb huhugb gin dou dana? Anai cinogo mes gin, kaba, aga deisa medam namcirdaha. 4:12 Ban eng aboho agas edreg dau emen emjemouwa Yakubei? Anai enin eng ogo cinogo gin deb naugb emen. Hanoba enin an en mehir dara men aremeta, len laugwan leg dau duhu gin toua, doba len laugwan lomom dauwohoba? 4:13 Doba Yesus enara bauwun en mer ucugb deit, endagai: Gareg en eg duhu dau cinogo mes gini, kaba, cum merijeben ucugb deit. 4:14 Doba gareg en eg duhu gedig dan deic dou en gini, kaba, merijemeba en deitero. Anai duhu gedig dan deic dou en, kaba, aninim dag mer edeij bohw besesa se en medoc mes. Hang eic maireseb huhugb dou en toua namcir. 4:15 Sug gida graga en ouman Yesus mer an gin dangga, kaba, en acgeij en an duhu gini, endagai: Adehsud, ban beic duhu areg ban ben dou dan graga dou dan dideg iteitogini. Dauntoba merijemeba dan, kaba, dan demen naugb demdagain duhu sugin toua deitero. 4:16 Doba Yesus enara bauni en mer. Hanoba en arougb en, endagai: Ban beihwedesa aban tu naugb ban bedahwan ban absuwa toua en en suginahabi. 4:17 Doba gida enara dougwo en mer, endagai: Dan insuwa ingmaro. 4:18 Sug Yesus ouman dau gin, kaba, en ousa deisa en mer an, endagai: Areg ban ben dou dan gini, kaba, asesa dag misen namcir. Anai sug nosa, kaba, ban bes ban absuwa merug sergemohob. Doba giji hom geic ban daiyamo gini, kaba, en emedag ban absuwa misen touwero. Dangga areg ban ben dou dan gini, kaba, se geica namcirohob. 4:19 Sug gida ouman Yesus ens dau men geicara augwan asesa dou enohob, kaba, en ousa deisa en mer an, endagai: Indeic, ban, kaba, bedag sud hom gesai ELOHIM moro dou lusud dag misenohob. 4:20 Sug gida ingga eigdoumesa Yesus moho dauwohob, kaba, en eijidougwo en an deit, endagai: Emen emjemouwer, kaba, len lesijaresa ELOHIM se menmod gada. Doba yeng Yahudi, kaba, yen yen dougwo emen, yendagai: ELOHIM en ouwan naugb maman maugwan masijaresa en se men Tuari se Yerusalem hom dous. 4:21 Doba Yesus enara bakebin gida ingga en mer ucugb deit, endagai: Daneh, yeng Samaria, kaba, yen yesijaresa, doba yen yemecinaga sud hom gedig yen yesijaresa ginero. Emeng Yahudi, kaba, emenin dous eng emecinaga sud hom ginohob. Anai Sud Hom Geigdoc Lusud Dau Meren Gogom Augwan, kaba, en en dau emen meijouhuda hom gini. 4:22 Doba inggaida. Anai cum, kaba, lusud lemesijaresa maman Mamina ELOHIM se meijen menmod gini dara Yerusalem toua deitero. 4:23 Doba lona ebeij deinyorohob naugb sug len lesijaresa en se geica namcir engga. Anai Mena Gogoufu ens areg asesa enin medoc mes augwan dou lenohob. Anai augwan gin, kaba, aimo dau areg ELOHIM enin ouwan dangga. 4:24 Dara maireseb menau geb huhugb gini, kaba, en dau ELOHIM enin dous. Dangga leng louwan lesijaresa ELOHIM dag misen, kaba, esloulougb naugb Mena Gogoufu eic maireseb menau geb huhugb dou len, dara en ens areg asesa ELOHIM enin medoc mes dou len nosahabi, len lemesijaresa en toua dag misen namcir. Anai gini aimo dau areg ELOHIM ogod an deb sug nosohob. 4:25 Doba gida graga, kaba, en enara baunun Yesus mer deit, endagai: Dan decinaga sug Sud Hom Geigdoc Maman Dau Maman Gogom Augwan en en, kaba, en ens meijouhw dau aremer augwan dag misen dou maman toua. 4:26 Doba Yesus auni dou en. Hanoba en ens enin dou en, endagai: Dan indugweng, denara dou ban gini. 4:27 Sug Yesus auni dou gida ingga inegaba, kaba, men logodeh toua ledagunyohob. Dangga sug len leiya, doba Yesus enara dou gida gin, kaba, len leimiman dau gin namcir. Doba sud hom ingma emeijidougwo gida ingga an areg en ouwan. Dara sud hom ingma emeijidougwo Yesus an men mou genara dou gida gin touwero. Doba len laugwan lesa dag lodinanir namcir. 4:28 Dangga gida ingga en arges men debecij dougwo duhu deb sungga. Hanoba en obga ucugb dig beimes naugb en edenara dou men lusud. 4:29 Sug en edebeij lenohob, kaba, en enara dou len, endagai: Yen yin naugb yideiya sud hom geigtou dougwo Yakub men cinogo mes gadahabi. En edag Sud Hom Geigdoc Maman Dau Maman Gogom Augwan gragenggei? Era naroei? Anai en ens indan geicara augwan asesa dou danohob. 4:30 Sug len louman gida mer an ginohob, kaba, len laugwan len dau cinogo ingga naugb len ledeiya Yesus sug eigtou dougwo cinogo mes graga. 4:31 Irir sug gida graga edahwan men lusud dau beimes ingga, kaba, Yesus men logodeh leic ared laganini en, lendagai: Adehsud, ban bet ared ginahabi. 4:32 Doba Yesus enara bauni dou len ucugb, endagai: Indan ared inggeb dara dan ginohob. Doba yen yemecinaga dau ginbuma. 4:33 Sug men logodeh louman gin, kaba, len leijidougwom ucucugb, lendagai: En emouwan ared debin maman ginero, kaba, ligbum len len naugb ledeic ared dou en betohobei? 4:34 Sug Yesus ouman len merir an gin, kaba, en ens meijouhw eisaugb gini asesa dou len deit, endagai: Indan ared, kaba, dag dan daimo areg asesa ELOHIM enin medoc mes dous. Dara dan daimo en mer an areg en arougb dan an gini augwan terimda edebeij sug ouwedoc gin toua. 4:35 Sug Yesus ens meijouhw dau men ared asesa dou men logodehohob, kaba, en eic gainyenara hom ucan dou len deit. Dauntoba len lemeigtou lemateteij lusudero. Doba len lahwan len dedemeda naugb ELOHIM eic maireseb huhugb dou len touahabi. Hanoba en enara dou len, endagai: Sug yen yeba meij, kaba, yen yos igda doum, yendagai: Igda hogu deitahabi, kaba, maman ared se maman lo emohoseri naugb maman mameic meij deb. Doba dan denara dou yen naugb yen yemeigtou yemateteij deitlo. Doba yen yesa yauweilahabi. Anai ared se lo augwan ohoser namcir naugb sug yen yeic meij debohob. 4:36 Dangga yen yemeisan gurog dau ginlo. Doba yen yeic meijuwemougb esesa naugb yen youci meij gin debinim terimda. Anai meij gin, kaba, emetaha touwero, doba eb beb huhugb namcir. Dara meijen geicara gini, kaba, dag mogud touwero. Doba ELOHIM esedeb naugb en eic siouwa dou yen an gin touohob. Dangga, kaba, sud hom geba meij dara sud hom geic meij debinim, kaba, lan lahwas mardoc eigouhw an gin namcir toua. 4:37 Augwan gini aimo dau meijen aremeijouhw dag misen touohob. Anai yen yenara, yendagai: Sud hom en eba meij. Dara sud hom gus, kaba, en esedeh naugb sug en eic meij baihiro deb deit. 4:38 Dangga dan toua darougb yen naugb yen yedouci meij debinim se lo gedig yen yemeba meij ingma deb nosa habero. Anai len gus, kaba, len leic merug erij naugb leba meij gini deb nosohob. Doba yen, kaba, yen yedec mera dau gin dous. 4:39-40 Sug Yesus esulou men logodeh dauwohob, kaba, leng Samaria dau cinogo Sikar gini, len toua ledagunya debin len. Sug len lenohob, kaba, len laganini en, lendagai: Adehsud, ban batou desij emen suginahabi. Len lacgeij en dangga, anai gida graga edenara dou len dag Yesus ens dau men geicara augwan asesa dou enohob. Hang len toua lod merna deisa Yesus en edag sud hom Geigdoc Len Dau Meren Gogom Augwan. Sug len laganini en dag ginohob, kaba, Yesus aimo len merir. Hanoba en atou desij len se loba hwai sungga naugb en edidib ELOHIM mer men meijouhw augwan asesa dou len toua. 4:41 Dangga lusud leinyana deit sug len louman dau areg Yesus edidib dou len gin, kaba, len merdoc ebdebin an en, dag eni Sud Hom Geigdoc Len Dau Meren Gogom Augwan touohob. 4:42 Hanoba len lenara dou gida graga ucugb, lendagai: Iteitogini, kaba, emen emdoc ebdebin an en emogdoc areg ban beden dou emen deitero. Doba ogdoc areg enin edidib dou emenohob. Anai emenin ouman dau enin mers teisisohob. Dangga hang, emen emecinaga dag eni sud hom geigdoc mamang se cinogo augwan dau sesar men gogom aud maireseb menau geb huhugb dag misen namcirohob. 4:43 Sug Yesus eigtou desij leng Sikar graga se lona hwaiyohob, kaba, en emecicugb dig leng Yudea meren hancob deitero. Doba en eihwedig leng Galilea meren hancob dous. 4:44 Anai Yesus enin ens dau leng Yahudi meren aremeijouhw hom dou men logodeh deb nosohob, endagai: Sug sud hom en esai ELOHIM moro dou lusud, kaba, lugmahara lebin en mer an gini. Doba sug en ecicugb dig enin men cinogo, kaba, men lusud lemeigdoumesa en moho an gin touwero. Dangga hang, en eihweda naugb en eigtou desij lusud se leng Galilea meren hancob gin dous. 4:45 Sug en edebeij meren hancobohob, kaba, len leinyana lesa dagasa naugb lebin en. Dara len merdoc agahugouhw an en toua namcir. Anai sug len lougwanara debin Lona Gohw Bedreg se Yerusalem, kaba, len leiya dau men geicara dag ganusbus augwan touohob. 4:46 Sug len lesa dagasa Yesus dauwohob, kaba, en eihweda naugb en atou desij len se cinogo Kana se leng Galilea meren hancob deit. Sungga, kaba, en eperwei duhu dag anggur mohu deb nosohob. Dara se cinogo Kapernaum se leng Galilea hancob ingga, kaba, mougt mera medam men gedeijan en toua moongga. En meisi areba medam. 4:47 Sug en ouman dag Yesus ecicugb dau Yudea dig leng Galilea meren hancobohob, kaba, en eihwededau Kapernaum dig Kana naugb en edenara dou Yesus. Anai en meisi areba medam dag ahauwohob. Dangga sug en edebeij Yesusohob, kaba, en acgeij en, endagai: Ban baimo dani naugb ban bedeic geigouhw dou dan indisahabi. Anai eni deinyor omom se cinogo Kapernaum gaihohob. 4:48 Doba Yesus enara bagod dougwo en mer, endagai: Yen youwan dan dens ganusbus dara gansins dou yenahabi, yen meigdoc emebdebin an dani. Doba mogud, kaba, yen meigdoc emebdebin an danero. 4:49 Doba sud hom gedeijan mougt mera gouji gin, kaba, en agodgod Yesus namcir, endagai: Adehsud, ban baimo dan dedemeda sug dan indisi en emomombuma. 4:50 Doba Yesus en arougb en, endagai: Ban beihweda. Anai ban abisi eigouhwohob. Sug sud hom gini en ouman dag en meisi eigouhwohob, kaba, en od mena debsa Yesus mer an gin namcir. Hanoba en ecicugb dig men tueda. 4:51 Sug en ecicugb, doba en edebeij se ucina mogumsi, kaba, men sogougwir ledagaseni. Hanoba len len dou en, lendagai: Ban abisi eigouhwohob. 4:52 Sug en ouman dau gini, kaba, en eijidougwo len ucugb deit, endagai: Dan indisi eigouhw aisohoba? Hang len launi dou en, lendagai: Mos gesrougb augwan obsara dau en se igda ehin maga giyohob. 4:53 Sug sud hom gini en ouman men sogougwir merir an gin dangga, kaba, en mena eiseisan sug igda ehin maga gia, kaba, Yesus enara dou en dag en meisi eigouhw ginohob. Dangga hang, eni dara leng leigtou desij en se men tu, kaba, len laugwan merdoc ebdebin an Yesus toua. 4:54 Ganusbus hom gin, kaba, goucan ganusbus hom gedig Yesus aben dou leng Galilea se cinogo Kana gin nosohob.

Yohanes 5

5:1 Lona hom debin sug Yesus eic geigouhw dou sud hom en meisi ginohob, kaba, Yesus ecicugb dig cinogo Yerusalem naugb len ledougwanara debin leng Yahudi meren lona gouji hom sungga deit. 5:2 Doba se Yerusalem gin, kaba, cinogo mes hom eb deinyor misis sug lusud leb dombesa. Len leija cinogo mes gini se lec Ibrani mer dag Betesda, era Us Medoc An. 5:3-4 Len leija cinogo mes dag gini, anai se lona hom yom, kaba, ELOHIM men malaikad hom en ouwaden dau bogo naugb en ebir duhu geb se cinogo mes ingga bogrogro. Dangga gareg dau leng areber en esogwesa ino, kaba, men gareba augwan ediyebeiya dau en toua. Hang leng areber dag leng meraires mougb, dara leng merohora ecgu, dara leng lagaim, kaba, len laugwan leigtou se tu meij sergem geb acec cinogo mes ingga naugb sug malaikad en en. Hanoba en ebir duhu bogrogro naugb lenahabi. 5:5 Dara sud hom en mohora agaim se arisogomoc sud hom sorama hobjeromoi nagama edeisohob, kaba, en toua moongga desij len toua. 5:6 Dangga sug Yesus eiya sud hom gini, doba en atou namcir, kaba, en eijidougwo en, endagai: Ban bouwan naugb ban beigouhwei? En eija en dag gini, anai en ecinaga, doba sud hom gin, kaba, en eijobur se arisogomoc einyanohob. 5:7 Doba sud hom gagaim gini en enara bauni Yesus mer ucugb, endagai: Adehsud, astesda sug malaikad ebir duhu ogrogro, kaba, dan dainyen naugb desogwesa duhu ingga. Doba len gus lesogwesa ino dougwo dan terimda. Anai sud hom ingma en emousa dan naugb sug dan desogwesa touwero. 5:8 Dangga Yesus arougb en, endagai: Ban beisa bod aban sidgwa. Hanoba ban beihwedan dig aban tueda. 5:9 Sug Yesus arougb en dag gin inegohob, kaba, en mohora ouwasis namcir. Hanoba en eigdoumesa men sidgwa. Dauwohob, kaba, en eihwedanda. Doba lona sug Yesus eic geigouhw dou sud hom gin, kaba, leng Yahudi meren Lona Gemeicaresero. 5:10 Dangga sug leng Yahudi meren mougtir len leiya, doba sud hom ingga en odo men sidgwa se lona ingga, kaba, len letaha en an gini, lendagai: Ban bemodo aban sidgwa se lona ginlo. Anai lona gin, kaba, maman Lona Gemeicaresero, hang maman gomnomna emen dougwo ban an gin touohob. 5:11 Doba sud hom ingga, kaba, en ahacugb gogom, endagai: Sud hom geic geigouhw dou dan gin, kaba, en eng emarougb dan naugb dan demeigdoumesa indan sidgwahabi, dan demec an gin toua. 5:12 Sug mougtir len louman dau gin, kaba, len leijidougwo en ucugb deit, lendagai: Sud hom garougb ban gin, kaba, ban beija en dag garena? 5:13 Doba lusud leinyana ledregim dougwo en maires an Yesusohob. Dangga hang, en emecinaga gareg eic geigouhw dou en gin touwero. 5:14 Cum deit, kaba, Yesus edagasa en se ELOHIM Men Tuari. Hanoba en esulou en, endagai: Ban bouman dan indir gin deigeigouhwahabi. Anai iteitogin, kaba, ban abaga augwan eigouhw namcirohob. Dangga hang, ban bemaimo sesar toua deitero, doba ban beineg dau namcir. Anai sug ban bemeineg dauwero, kaba, ban besma gogom medam edreg dau gin deit. 5:15 Sug sud hom gini en ecinaga dag Yesus eng eic geigouhw dou enohob, kaba, en eihwededau ELOHIM Men Tuari. Hanoba en edens Yesus moho dou leng Yahudi meren mougtir toua. 5:16 Sug len louman, doba Yesus eng eic geigouhw dou sud hom ginohob, kaba, len lehilon ucina naugb sug len leic gogom dou en namcir. Anai en eic geigouhw dou sud hom gin se Lona Gemeicareserohob. 5:17 Doba Yesus enara bauni len merir an gini, endagai: Dan Indina ELOHIM, kaba, en emehig dau men geicara mougwa homero. Doba en eicara astesda lona naugb en agauwesa areg en ahasesei augwan terimda. Dangga hang, en Meisi dan toua demehig dau indan geicara touwero. Doba dan desogwa deisa en mohotimei mohw naugb dan deicara astesda lona toua terimda. 5:18 Sug leng Yahudi meren mougtir len louman Yesus mer an gini, kaba, eg len merug deit naugb sug len leic gomom dou en namcir. Anai en emedreg dau Lona Gemeicaresero hom gin dousero. Doba en eigdoumesa enin moho aninim dag ELOHIM, anai en eija en dag en Mena touohob. 5:19 Doba Yesus enara bauni dou len deit, endagai: Indan goubesa naugb sug dan deicara daimo areg graga augwan, kaba, dau daninero. Doba areg dan deiya dan Indina naugb en eicara baimo gin, kaba, en Meisi dan deicara daimo dag gini toua. Dara dan demedreg dau dan Indina men geicara hom touwero. Doba areg en aimo gin, kaba, en Meisi dan daimo en ucan an augwan gin toua terimda. Yen youman dan indir an areg dan den dou yen gini deigeigouhw. Anai augwan gin, kaba, asesa dag misen namcirohob. 5:20 Dara dan Indina gin, kaba, en emecgoneh ara ara hom dau dan touwero. Doba areg enin aimo gin, kaba, en ens dau augwan gini dou dan toua. Anai en medoc gororougb en Meisi dan ginohob. Dangga hang, en emens dau areg graga augwan dou dan dousero. Doba en esedeb naugb en ens dau aremer moho agas ingma dou dan deit. Dauntoba dan daimo gin toua. Hang yen yeimiman dau gin toua namcir. 5:21 Anai cum, kaba, dan demeic maireseb menau geb huhugb dou lusud, aimo dau areg danin douwan an len dous. Aninim dag dan Indina en toua eigdoumesa lusud dau gogom ucugb sug nosa naugb en eic maireseb menau geb huhugb dou len touohob. 5:22 Dangga dan Indina en emogod aremer gomom dara maireseb huhugb dou lusud toua deitero. Doba en ogugwo augwan gini se en Meisi dan insirohob. Dauntoba lusud laugwan leigdoumesa dan indoho agas namcir, aninim dag len leigdoumesa en moho agas touohob. 5:23 Dangga gareg en emeigdoumesa dan indoho an areg dan desai dou en ginero, kaba, gini aninim dag en emeigdoumesa dan Indina en moho touwero. Anai en eng esa dan aud yenohob. 5:24 Hang yen youman dan indir deigeigouhw deitahabi. Gareg en medoc edag beim an areg dan desai dou en ginohob. Hanoba en od mena debsa sud hom gesa dan aud yen gin toua terimda, kaba, en moho emeb se ucina gomom deitero. Doba eb se ucina maireseb menau geb huhugb ginohob. Hang dan demogod gomom deinaugb en touwero. Doba dan deic maireseb menau geb huhugb dou en dous. Augwan gini asesa dag misen namcir. 5:25 Dara yen youman dan indir deigeigouhw deit. Anai lona ebeij deinyor namcir touohob naugb sug leng lomom len laugwan louman dang ELOHIM Meisi dan indir engga. Dangga gareg en medoc edag beim an areg dan desai dou en gin, kaba, en emomom deitero. Doba dan demeic maireseb menau geb huhugb dou en toues. Augwan gini asesa dag misen namcir toua. 5:26 Anai dan Indina ogugwo men goubesa dou en Meisi dan naugb dan deic maireseb menau geb huhugb dou lusud. Aninim dag men goubesa eb dou eninohob naugb sug en eic maireseb menau geb huhugb dou len toua namcirohob. 5:27 Hang en emeigdoumesa en Meisi dan indoho naugb dan dogod aremer aga lusud laugwan gin toua. Anai dan dedag Lusud Meraguna Mebin danohob. 5:28-29 Yen yemeimiman dau areg dan den dou yen ginlo. Doba yen meigdoc eica terimda. Anai lona ebeij deinyorohob naugb sug leng leigtou debin len merug se meruda, kaba, len laugwan louman ELOHIM Meisi dan indir. Hanoba len leisa toua. Dangga gareg en eicara geigouhwohob, kaba, en eisa dau gomom aud maireseb menau geb huhugb namcir. Doba gareg en eicara gecgu sug nosa touohob, kaba, en eisa dau gomom naugb dan dogod gomom dag dum smougb deinaugb en dous. 5:30 Dara dan demeic augwan gini dau danin indoc mes touwero. Doba areg ELOHIM arougb dan an ginohob, kaba, dan dogod aremer aga lusud dag gin dous. Anai dan indoho emagas emedeinyum naugb ginero. Dangga areg dan dogod an gin, kaba, se geica namcir. Anai dan demaimo areg danin douwan touwero. Doba dan daimo areg sud hom gesa dan aud yen ginohob en ouwan dous. 5:31 Dara dan demos demadi danin an areg graga dou yen touwero. Anai sug dan dos dadi danin an areg dan den dou yen gini, kaba, emedeinyum naugb sug yen meigdoc emebdebin an gin touwero. 5:32 Doba sud hom gus en toua moongga naugb en os badi dan dou yen. Dara dan decinaga dag areg en os badi dan dou yen gini, kaba, dag misen namcirohob. 5:33 Anai sug yen yesa meijen lusud aud Yohanes naugb len leijidougwo en eisaugb dan sug nosa, kaba, en os badi dan dou yen dag areg dan den dou yen gin, kaba, se geica namcirohob. 5:34 Dan dens dau areg en enara eisaugb dan sug nosa gini dou yen. Dauntoba eic yen meigdoc eiloboro aud dan naugb dan deigdoc yen dau sesar men gogom augwan aud maireseb menau geb huhugb gin toua. Anai naugb danin, kaba, dan demehilon sud hom ingma naugb en os badi dan indoho dou lusud ginero. 5:35 Doba Yohanes, kaba, en edag mouf gaisema yen sug nosa. Hang yen meigdoc emesgiraha naugb yen yemaimo en se mouf gin gurereito touohob. 5:36 Dara areg gus geperwei dan induhw naugb os badi dan deseino yen edreg dau areg Yohanes os badi dan an gin dou yenohob, kaba, toua inggebga. Anai indan geicara areg dan Indina arougb dan an ginohob naugb dan deicara daimo, kaba, augwan gini eperwei dan induhw. Hanoba os badi dan indoho deseino yen. Dara ens dou yen dag dan Indina ELOHIM enin eng esa dan aud yen dag misenohob. Anai dan daimo augwan gini an yen touohob. 5:37 Dara dan Indina gedig en esa dan aud yenohob, kaba, en eperwei dan induhw naugb en os badi dan deseino yen sug nosa touohob. Doba yen yemouman en mer, dara yen yemeiya en mebes se yen meijires gin mougwa hom touebma. 5:38 Dara yen yemebin en mer areg dan desai dou yen se yen meigdoc mesero. Anai yen meigdoc emebdebin an sud hom areg en esa dan aud yen touwero. 5:39 Dara yen yeiya Surad Injil Meb Mohon, moho hom yom, astesda lona terimda. Anai yen yod meijina debsa endag yen yeicara dag gin, kaba, enin ens ucina aud maireseb huhugb dou yen toua. 5:40 Dangga dagiro, naugwe hang, yen yemen aud dan naugb dan deic maireseb huhugb dou yenero? Anai Surad Injil Meb Mohon gin, kaba, os badi dan deseino yen dag ginohob. Dobnaro. Yen yaiyan meigdocesem dougwo dan namcir naugb yen yemen aud dan touwero. 5:41-42 Anai dan decinaga areg geb se yenin meigdoc mes dag yen meigdoc gororougb ELOHIM terimdero. Hang dan demouwan naugb yen yemeigdoumesa dan indoho an indan geicara gin touwero. 5:43 Anai dan Indina ELOHIM, kaba, enin eng eigdoumesa dan indoho naugb dan desai en moro dou yen gini. Doba yen yemebin danero. Doba sug len gus len len aud yen, hanoba len leigdoumesa lenin meroho an areg len lesai dou yen gin, kaba, yen yemowun lenero. Doba yen yebin len namcir. 5:44 Dangga hang, yen yemeic meijuwemougb esesa naugb sug ELOHIM mohora hom gini en eigdoumesa yen meijoho an meijen geicara gin touwero. Doba yen youwan naugb sug yenin yeigdoumesa yenin meijoho an meijen geicara ucucugb doum dous. Sug yen yeicara dag gin terimda, kaba, dagiro, naugwe hang, yen meigdoc ebdebin an areg dan desai dou yen gina? Naro, yen meigdoc emebdebin an areg dan den dou yen touwero. 5:45 Dara yen youdesa dag dan eng demoho demas yen an meijen geicara gin dou dan Indina ELOHIM enei? Naro, dan demoho demas yenero. Doba meijen sud hom moho Musa gedig yen yod meijina debsa endag en eng emeigdoc yen dau meijen gogom augwans, kaba, enin eng emoho emas yen an meijen geicara gin dou ELOHIM dous. 5:46 Anai areg en og deb se men surad sug nosa, kaba, en emog eisaugb enin dou yenero. Doba en og baimeh an dan eng dou yen dous. Dangga sug yen meigdoc ebdebin an areg en og dou yen dag misenohob, kaba, yen yemotogoto dan indir an areg dan desai dou yen gin touwero. Doba yen yeic se yen meigdoc mes namcir toua. 5:47 Doba yen meigdoc emebdebin an areg Musa en og deb gin dag misenbuma. Dangga dagiro, naugwe hang, yen meigdoc ebdebin an areg dan desai dou yen gin toua? Naro, yen yemeicara yemaimo dag gin touwero.

Yohanes 6

6:1 Lona hosa debin gin, kaba, Yesus an men logodeh len leisa ij dig Galilea, era Tiberias, nagama deit. 6:2 Dara lusud leinyana leila ucan len toua. Anai len leiya dau ganusbus sug Yesus eic geigouhw dou leng areber leinyana sug nosohob. 6:3 Sug Yesus dara men logodeh len ledebeij nagamohob, kaba, len leisaugb se mengarougb hom naugb leigtou sungga. 6:4 Doba lona sug len leisaugb dig men gorougb gin, kaba, deinyor lona sug leng Yahudi len lougwan ared debin meren Lona Gohw Bedreg gin touohob. 6:5 Dangga sug Yesus esa bauweila, doba lusud leinyana len len aud en, kaba, en eijidougwo men godeh hom, moho Pilipus, endagai: Maman mameic ared daugiro naugb maman mameic dou lusud leinyana gouji gina? 6:6 Doba en eijidougwo Pilipus naugb en ainyen en dangga dous. Anai enin ecinaga men geicara an gin augwan edeinyumohob. 6:7 Doba Pilipus enara bauni Yesus mer ucugb, endagai: Maman mameic aregoufu edeinyum naugb sug maman mauma ared dou len leinyana gin dagiro? Anai gini et perag mogo huntun hom naugb sud hom et mehir mougwa hom dous dangga. 6:8-9 Dara sud hom dau Yesus men logodeh hom deit, en moho Andreas, Simon Petrus magto, en toua enara bouwasi Pilipus mer an gini, endagai: Eisaugb ared, kaba, godeh hom men roti mogo sergem dara hosei magac hwai, isinggini. Doba gini emedeinyum naugb lusud leinyana gouji gin dagiro? 6:10 Doba sungga, kaba, aremon geigouhw toua moongga. Dangga, kaba, Yesus arougb men logodeh, endagai: Yen yen dou lusud gin laugwan leigtouahabi. Sug len len dou lenohob, kaba, len laugwan leigtou se aremon ingga toua. Dau leng leigtou gin, kaba, len lecic ligiji mogud dous, kaba, merug ribu sergem. 6:11 Sug len laugwan leigtousohob, kaba, Yesus os roti graga. Hanoba en en sijo dou ELOHIM toua. Sug en en sijo dou en dauwohob, kaba, en eic roti dou men logodeh naugb len lohw anir toua. Gin dauwohob, kaba, en eic hosei dou men logodeh lohw anir dag gin toua. Hang len laugwan letara medam namcir. 6:12 Sug len laugwan letara beicer namcirohob, kaba, Yesus arougb men logodeh, endagai: Yen youci ared mougwu augwan debinim se aigdaga mes, dauntoba hom emebero. 6:13 Dangga sug len louci ared mougwu dau roti mogo sergem gedig lusud let dau gin debinimohob, kaba, len leisgoho se aigdaga mes sisa hobjerai atij an namcir. 6:14 Sug lusud leiya dau Yesus men ganusbus gini, kaba, len lenara doum, lendagai: Indeic, sud hom gin, kaba, sud hom grag ELOHIM esedeb en naugb en esai en moro eisaugb Mesias sug en en dou maman se cinogo gin deit, eng gini. 6:15 Doba Yesus ecinaga dag len louwan lagaigeij en deb naugb len leigdoumesa en moho dag mougt mera medam naugb len deit. Dangga hang, en asid enin aigus se menmod hom dau len toua. 6:16-17 Sug Yesus men logodeh leigtou naugb en terimda igdedeij deinyor lobohob, kaba, len louwada dig Galilea mebera naugb len leihwedig Kapernaum ucugb deitda. Dangga sug loba dougwo Yesus namcirohob, kaba, len leisa ij ino dau en dig Kapernaum toua. Anai en emen aud len touebma. 6:18 Sug len leisa ij ginda, kaba, loungmen medam eisa. Hang duhu toua oc medam namcir. 6:19 Doba sug len leisa ij ledebeij se duhu medi taijohob, kaba, len leiya Yesus ec mohora se duhu mod ucan len bedebeij deinyor lenohob. Dangga hang, len lahau dareg merug omom an namcir. 6:20 Doba Yesus oho mer debin len, endagai: Yen yemahaulo. Anai dan Yesus eng doucan yen ginin. 6:21 Sug len louman Yesus enin mer asesa, kaba, len merdoc emahau deitero. Doba len lebin en naugb en eigtou desij len se ingmes toua. Sug Yesus aingmo desij len se ingmes inegohob, kaba, ij toua edos us nagama ginohob. 6:22 Loneinda deit sug lusud gedig len latou deb dig nagama len leisa dau latouda, kaba, len merdoc eica dag loba greb, kaba, ij homto dous inggebga. Dara len lecinaga dau sug Yesus men logodeh len leisa ij, kaba, dag Yesus emaingmo desij len touwero, doba en eigtou deb dous. 6:23 Hang len merairesi lahilon dougwo Yesus, doba len lemeiya enero. Doba sug len leicara dag gin, kaba, leng dau cinogo Tiberias ingga len ledeic meren ij hosa deb se usi irir sug maman Adehsud en en sijo dou ELOHIM aga roti naugb len let giohob. 6:24 Dangga sug len lecinaga, doba Yesus mogero. Dara men logodeh toua len leisa ij dau lenohob, kaba, len laingmo leng Tiberias meren ij aibibra naugb len ledehilon Yesus an men logodeh se Kapernaum deitda. 6:25 Sug len ledebeij dig nagamohob, kaba, len ledeiya Yesus en toua moongga. Hanoba len leijidougwo en, lendagai: Adehsud, ban ben aisohoba? 6:26 Doba Yesus owun len meroho namcir. Hanoba en enara dou len, endagai: Yen yemehilon dan an ganusbus gedig dan dens dou yen gia ginero. Doba yen yehilon dan an ared gedig yen yet beijeijohob gin dous. Anai yen meiju emobgesa meijouhw dau ganusbus ingga augwan dag misen touebma. 6:27 Dobnaro. Yen yemeic meijuwemougb esesa icira ared misen ginlo. Doba yen yeic meijuwemougb esesa icira ared gedig Lusud Meraguna Mebin dan deic dou yen dous. Anai ared misen, kaba, etaha bediyebeiya ucugb dangga. Doba ared gedig dan deic dou yen, kaba, emetaha bemediyebeiya deitero. Doba eic maireseb huhugb dou yen terimda. Anai dan Indina ELOHIM ouma debin dan dag dan indoho agas edeinyum naugb ginohob. Yen youman dan indir an areg dan den dou yen gin deigeigouhw. Anai augwan gini asesa dag misen namcir. 6:28 Sug len louman dag gini, kaba, len leijidougwo en ucugb, lendagai; Emen emeicara dagiro, dauntoba emen emaimo areg asesa ELOHIM enin medoc mes gina? 6:29 Dangga Yesus auni dou len, endagai: Areg asesa ELOHIM enin medoc mes, kaba, dag yen meigdoc ebdebin an dan, en eng esa dan aud yenohob. 6:30 Doba len leija launi ucugb dou en deit, lendagai: Ban besedeb ganusbus dag ara naugb ban bens dou emen. Dauntoba sug emen emeiya dau gini, kaba, emen emdoc ebdebin an ban dag ELOHIM esa ban aud emen dag misenohob. 6:31 Anai emen emjemouwer, kaba, Musa eic ared, moho w mana dau bogo dou len se lomougwisa sug nosa naugb len letohoba? Augwan gini esogwa deisa areg len log deb se Surad Injil Meb Mohon deb sug nosa touohob, lendagai: En eic ared dau bogo dou len naugb len let. 6:32 Doba Yesus auni dou len, endagai: Yen youman dan indir deigeigouhwahabi. Areg Musa eic dou yen meijemouwer se lomougwisa sug nosa, kaba, ared misen dau bogo touwero. Doba areg dan Indina enin eng eic dou yen, kaba, gini ared misen dau bogo dous. 6:33 Anai ared misen gedig en eic dou yen gin, kaba, dag sud hom gen dau bogo naugb en eic maireseb menau geb huhugb dou yen se cinogo augwan toua. Areg dan den dou yen gini, kaba, asesa dag misen namcir. 6:34 Sug lusud louman en mer an gin, kaba, len lacgeij en, lendagai: Adehsud, emen emouwan naugb ban beic ared gin eng mogud dou emen besesa terimda. 6:35 Dangga hang, Yesus ens enin ainyes dag misen dou len toua, endagai: Gareg en en aud dan, kaba, sir emeba en deitero. Dara gareg en medoc ebdebin an dan, kaba, merij emeba en touero. Anai danin eng dedag ared geic maireseb menau geb huhugb dou lusud dous. 6:36 Dara yen yecinaga dan dedag roti misen geic maireseb menau geb huhugb dou lusud. Anai yen yeiya dau ganusbus areg dan daben deseino yenohob. Doba yen meigdoc emebdebin an dan touwero, aimo dau areg dan den dou yen touohob. 6:37 Doba astesda sud hom gareg dan Indina en eic len dou dan deb sug nosohob, kaba, len eng len aud dan toua. Dara gareg en en aud danohob, kaba, dan demecicugb en touwero. Doba dan debin en beigtou desij dan beb huhugb namcir. 6:38 Anai dan demouwaden dau bogo naugb dan demaimo areg dau danin indoc mesero. Doba dan douwaden dau bogo naugb dan daimo areg asesa sud hom gesa dan aud yen enin medoc mes gin dous. 6:39 Dara areg sud hom gesa dan aud yen en ouwan, kaba, dag dan insira emagada sud hom ingma dau gareg en eic dou dan deb gin touwero. Doba dan demeigdoumesa len laugwan dau gomom se lona gouwedoc toues. 6:40 Dangga gareg en medoc eica ELOHIM Meisi dan, hanoba en medoc ebdebin an dan toua, kaba, en emomom deitero. Doba dan demeigdoumesa en se Lona Gouwedoc naugb dan demeic maireseb menau geb huhugb dou en toues. Anai augwan gini aimo dau areg dan Indina enin ogod an deb sug nosohob. 6:41 Sug leng Yahudi graga len louman, doba Yesus ens enin dag roti misen gouwaden dau bogo dou lenohob, kaba, len logurgur an en mer gini namcir. 6:42 Hanoba len lenara doum, lendagai: Sud hom gin, kaba, Yusub en Meisi Yesus enei? Era naroei? Anai maman macinaga en mena dara mem lan toua asesohoba? Dangga dagiro, naugwe hang, en enara dou maman dag en edag ared misen gouwaden dau bogo naugb mamanohoba? 6:43 Doba Yesus etaha len merir an, endagai: Yen yemeijidougwom eisaugb dan doum ucucugblo. 6:44 Anai sud hom ingma, kaba, en emen aud dan augwougwero. Doba en en aud dan ogdoc sug dan Indina enin eng arautut en dous. Hang dan demeigdoumesa en dau gomom aud maireseb menau geb huhugb se Lona Gouwedoc toues. Anai dan Indina enin eng esa dan aud yenohob. 6:45 Augwan gini aimo dau areg leng lesai ELOHIM en moro sug nosa len log deb se Surad Injil Meb Mohon deb sug nosa touohob, lendagai: Se lona daiyamo gacin, kaba, ELOHIM enin emedidib aremeijouhw augwan asesa dou lens. Dangga gareg en medoc edag beim an dan Indina an en mer gini, hanoba en medoc eica en an toua, kaba, len lemotogoto danero, doba len len aud dan toua terimda. 6:46 Doba areg dan den dou yen graga, kaba, gini meijouhw dag len leiya dan Indina en mebes dara len merairesi gin touohobei? Naro, gini men meijouhwero. Anai sud hom ingma, kaba, en emeiya dan Indina dara en maires mougwa hom touebma. Doba danin dous eng deiya dan Indina dara dan indiresohob. Anai danin dous eng den dau ELOHIM aud yenohob. 6:47 Dangga yen youman dan indir ginahabi. Gareg en medoc ebdebin an dan, kaba, en emomom deitero, doba maireseb huhugb eb naugb enohob. 6:48 Anai danin eng dedag roti geic maireseb huhugb dou yen dous. Augwan gini asesa dag misen namcirohob. 6:49 Anai yen meijemouwer, kaba, len let ared, moho w mana se lomougwisa sug nosa. Doba len laugwan lomom andohob. 6:50 Doba gareg en et roti gen dau bogo gin, kaba, en emomom deitero. Doba maireseb huhugb eb naugb en namcir. 6:51 Danin eng dedag roti gouwaden dau bogo naugb dan deic maireseb menau geb huhugb dou lusud. Dangga gareg en et ared gin, kaba, en emomom deitero. Doba maireseb huhugb eb naugb en namcir. Dara ared gedig dan deic dou en gin, kaba, dag dan indug gedig dan deic dou lusud se cinogo augwan. Dauntoba len lemomom deitero, doba maireseb menau geb huhugb eb naugb len laugwan toua terimda. 6:52 Doba sug leng Yahudi louman dau gini, kaba, len merdoc esrougb medam an en namcir. Hanoba len lenara merir edregim ucucugb, lendagai: Sud hom gin, kaba, en eic en mog dag ara dou maman naugb maman mata? 6:53 Dangga Yesus ou mesira mougwa hom ucan dou len deit, endagai: Yen youman dan indir an gin toua deitahabi. Sug yen yemet Lusud Meraguna Mebin dan indug, dara yen yemeg dan indugwihi ginero, kaba, maireseb menau geb huhugb emeb naugb yen touwero. 6:54 Doba gareg dau yen en et dan indug, dara en eg dan indugwihi, kaba, en emomom deitero. Doba dan demeigdoumesa en dau gomom aud maireseb huhugb se lona gouwedoc gin toues. 6:55 Anai dan indug dag ared misen. Dara dan indugwihi dag duhu misen gin dous. 6:56 Dangga gareg en et dan indug, dara en eg dan indugwihi, kaba, aman amahwas dag homohob. Augwan gini asesa dag misen namcir. 6:57 Dan Indina gedig en eic maireseb huhugb dou lusud, kaba, enin eng esa dan aud yenohob. Sug maireseb huhugb eb naugb en dag ginohob, kaba, dan demomom touwero. Doba maireseb huhugb eb naugb dan ogdoc en touohob. Dangga gareg en et dan indug gin, kaba, en emomom toua deitero. Doba maireseb huhugb eb naugb en toua terimda. 6:58 Dangga roti gouwaden dau bogo gin, kaba, aninim dag ared gedig yen merjemouwer len let se lomougwisa sug nosa ginero. Anai areg len let gin, kaba, ared misen dous. Hang emeic maireseb huhugb dou len touwero, doba len lomom andohob. Doba gareg dau yen en et roti gouwaden dau bogo gini, kaba, en emomom deitero, doba maireseb huhugb eb naugb enohob. 6:59 Areg Yesus en en dou leng Yahudi meren mougtir gin, kaba, en ebedbed dou len se meren tuari se Kapernaum. 6:60 Doba Yesus men logodeh leinyana, kaba, len toua merugwengga desij len gini. Dangga sug len louman dau areg en enara dou lusud dag gragohob, kaba, len logurgur an en mer gini. Hanoba len lenara doum, lendagai: Maman mamouman en mer an areg en en dou len ginlo. Anai areg en en dou len gin, kaba, edreg dau maman mamdoc mes namcirohob. 6:61 Doba len lemenara dau gin dou Yesusero. Doba en, kaba, en ecinaga dag len logurgur eisaugb en mer graga dag len let en mog dara len leg en mogwihi ingga augwougb ginohob. Hanoba en eijidougwo len, endagai: Areg dan den dou lusud graga, kaba, eic yen meigdoc momogo dou yen, hang yen yemasid yenin dau dan touei? 6:62 Sug yen meigdoc momogo an areg dan den dou lusud gragohob, kaba, dagiro, naugwe hang, sug yen yeiya Lusud Meraguna Mebin dan decicugb se dan dugun deseino yen, kaba, yen meigdoc emebara an dana? 6:63 Doba yen meigdoc momogo an areg dan den dou lusud gragero. Anai lusud misen, kaba, meren goubesa emedeinyum naugb sug len leic maireseb menau geb huhugb dou lusudero. Doba maireseb menau geb huhugb gin, kaba, ogdoc Mena Gogoufu gen dau ELOHIM gin dous. Dangga hang, areg dan desai dou yenohob, kaba, ousa yen naugb Mena Gogoufu gin, kaba, en en aud yen naugb en eic maireseb menau geb huhugb dou yen toua. 6:64 Doba ligbum dau yen, kaba, yen meigdoc emebdebin dan an areg dan den dou yen ginero. Doba yen yotogoto dan indir an gini terimda. (Yesus enara dangga dou men logodeh, anai en ecinaga dau gareg dau len en medoc emebdebin an enero. Dara sud hom gareg en ohw en se len gus merisira len laugwan teiteiyohob.) 6:65 Sug Yesus enara dag graga dou men logodeh dag ginohob, kaba, en esulou len ucan deit, endagai: Dan decinaga dag areg dan den dou yen graga, kaba, edreg dau yen meigdoc mes namcirohob. Hang dan den dou yen dag sud hom ingma, kaba, en emen aud dan dau eninero. Doba ogdoc sug dan Indina arautut en dara eic goubesa dou en naugb gin dous. 6:66 Dobnaro. Ogdoc aremer hom gin, kaba, men logodeh leinyana len lemaimo en deitero, doba len lasid lenin dau en namcir. Anai en enara dou len dag len let en mog dara len leg en mogwihi touohob. 6:67 Dangga hang, Yesus eijidougwo men logodeh merug sisa hobjerai, endagai: Yen yasid yenin dau dan toua namcirei? 6:68 Doba Simon Petrus en enara bauni Yesus mer ucugb, endagai: Adehsud, emen emougbda dau ban aud gara en deita? Anai areg ban besai dou emen, kaba, gin dous eng ens ucina maireseb menau geb huhugb dou emeni. 6:69 Hang emen ememeija emouwesa ban toua deitero. Doba emen emod emina debsa ban namcir. Anai emen emecinaga dag ban eng Sud Hom Gecabeci Gen Dau ELOHIM aud emenohob. 6:70 Doba Yesus owun en mer an gini, endagai: Naro, dan douci yen meijug sisa hobjerai debinim naugb daninohob. Gini misenei? You, gini misenohob. Doba hom dau yen, kaba, en medoc dag Bilis en medoc an danohob. 6:71 Doba areg Yesus enara dou Petrus gin, kaba, en enara dou en eisaugb Simon dau cinogo Keriod en meisi Yudas gin dous. Anai Yudas gin, kaba, eni dau Yesus men logodeh merug sisa hobjerai gin toua. Doba eng sud hom gohw Yesus deb se leng Yahudi meren mougtir merisira gini.

Yohanes 7

7:1 Sug Yesus ens enin dag ared gouwaden dau bogo dou lusud se cinogo Kapernaum gin bouwohob, kaba, en eihweda sungga sungga se leng Galilea meren hancob naugb en esai ELOHIM moro dou len gus toua. Anai en ecinaga dag leng Yahudi meren mougtir se leng Yudea meren hancob, kaba, len lesedeb naugb leic gomom dou enohob. Dangga hang, en emouwan naugb en emecicugb sungga touwero. 7:2-3 Doba sug leng Yahudi meren lona naugb sug len len tu meijesa ebeij deinyorohob, kaba, Yesus magtor lenara lareineg en, lendagai: Ban beihwededau sugini dig leng Yudea meren hancob ucugbda. Dauntoba aban logodeh se cinogo ingga, kaba, len toua leiya dau aban geicara ganusbus gin touahabi. 7:4 Anai sug sud hom en ens ganusbus dag gini, kaba, en emecgoneh mog anero. Doba en eic maga ainyes an gin dou len gus, dauntoba len lecinaga en dag misen touahabi. Dangga sug ban beic ganusbus dag misenohob, kaba, ban bemecgoneh ban abug an gin dau lusud touwero. Doba ban beic ban abaga an ainyes dou len laugwan toua. 7:5 En magtor lenara dag gini anai len toua loududa lendag en emen naugb eigdoc lusud dau meren gogom touwero. 7:6 Doba Yesus enara bauwun len merir an gini, endagai: Indan lona areg ELOHIM esedeb naugb sug dan deihwedig Yerusalem gin, kaba, emedagasebma. Doba yen, kaba, yen meijohora ebeibei Yerusalem astesda lona terimda. Anai ara ara ingma emata dougwo yenero. 7:7 Hang lusud gedig Bilis oiharaga len se cinogo gin, kaba, len merdoc emecgwan yen touwero. Anai yen yeicara aninim dag lenohob. Doba dan, kaba, len gini len merdoc ecgwan dan terimda. Anai dan den dougwo len dag meren geicara augwan, kaba, mog mog namcirohob. 7:8 Dangga yen yeino dan indin naugb yen yedougwan ared debin lona sug maman mahud tu meijesa inggada. Doba dan, kaba, dan demeihwedebma. Anai indan lona areg ELOHIM esedeb naugb sug dan deihweda, kaba, emedagasebma. 7:9 Sug Yesus enara bedeinyum dou en magtor dangga dauwohob, kaba, en eigtou se leng Galilea meren hancob gini se lona hosa deitda. 7:10 Sug Yesus magtor leino en men naugb ledougwanara debin tu meij se Yerusalem dauwohob, kaba, en toua oucan lenda. Doba sug en eihweda gin, kaba, en emerba moc inoro. Doba en edeigtou augwougb dous. 7:11 Dangga astesda lona sug lusud lougwanara gin, kaba, leng Yahudi meren mougtir len lehilon en terimda. Hanoba len leijahaija dougwo len gus, lendagai: Yen yeiya sud hom gin, kaba, en toua moongginei? 7:12 Sug lusud louman gini, kaba, len merir laisedim eisaugb Yesus gin toua. Ligbum, kaba, len leigdoumesa en moho, lendagai: Eni sud hom gedag beim namcir. Doba laingma, kaba, len loto len merir an gini, lendagai: Naro. Sud hom gini, kaba, en eicara baugwohosa lusud naugb len laijahasero dous. 7:13 Doba areg len len doum gin, kaba, len lemen ainyes naugb len gus lemoumanero. Doba len lec luluf an doum dous. Anai len lahau dau sug len lenara doum ainyes, kaba, leng Yahudi meren mougtir leic gogom dou len toua. 7:14 Dangga sug lona naugb len lougwanara debin tu meij gini ebeij taitaijohob, kaba, Yesus en toua einesa ELOHIM Men Tuari naugb en edidib ELOHIM mer men meijouhw augwan asesa dou len deit. 7:15 Sug leng Yahudi meren mougtir len louman dau areg Yesus edidib dou lusud gin, kaba, len leimiman dau en namcir. Hanoba len leijidougwom, lendagai: Gareng arautut sud hom gini, hang en emecinaga aremeijouhw augwan dag gina? Anai sud hom ingma, kaba, en emens dau augwan gini dou en touebma. 7:16 Doba sug Yesus ouman dau areg len leijidougwom an gini, kaba, en enara bagod len merir, endagai: Areg dan dedidib gin, kaba, dan demeic dau danin indoc mes dou yenero. Doba en dau sud hom gesa dan aud yen enin medoc mes dous. 7:17-18 Hang dan demeigdoumesa dan indoho an gin dou yen touwero. Anai gareg en edidib ara ara dau enin medoc mes dou lusud, kaba, en ouwan naugb lusud leigdoumesa enin moho an gin dous. Doba gareg en ecinaga dag en esai sud hom gus en moro dou lusud dous, kaba, en emouwan naugb len lemeigdoumesa en moho an ginero. Doba en ehilon naugb len leigdoumesa sud hom gesa en aud len gini en moho dous. Dangga areg en esai dou len gini, kaba, dag en emereiyara dou len touwero. Doba en enara augwan se geica dou len terimda. Dara gareg dau yen en medoc erleij naugb en aimo areg asesa ELOHIM enin medoc mes namcir, kaba, en toua emdecinaga dag areg dan dedidib dou yen gini, kaba, emen dau danin indoc mesero. Doba en dau ELOHIM enin medoc mes dous, anai ELOHIM enin emens gin dou ens. 7:19 Musa eic ELOHIM men gomnomna dou yen sug nosohob. Gini misenei? You, augwan gini misenohob. Dangga dagiro naugwe hang, yen youwan yeic gomom dou dana? Anai en ens dau areg dan desai dau gin deb se men gomnoma sug nosohob. Dobnaro. Sud hom ingma dau yen, kaba, en emaimo areg en og gini augwan dag misen touebma. Doba yen yedreg namcirohob. Hang yen yemehilon ucina naugb sug yen yeic gomom dou dan toua. 7:20 Sug lusud louman Yesus mer an gin dag ginohob, kaba, len lenara gouji dou en, lendagai: Gareg en ouwan es ban, hang ban bemenara dag gin dou emena? Mena mog mog einesa ban abdoc mes namcirohobei? 7:21 Doba Yesus enara bauni dou leng Yahudi meren mougtir ucugb deit, endagai: Dan daben ganusbus hom deseino yen se Lona Gemeicaresero gin. Hang yen meigdoc emesrougb an dan naugb yen yemeic gomom dou dan icira gin toua. 7:22 Doba yen toua, sug lona naugb yen yec merus dau logodeh mahaniheni, kaba, yen yamsoho len se Lona Gemeicaresero gin touwero. Doba yen yeic meijus naugb yen yec len merus dau len se lona ingga toua. Anai gini aimo dau areg Musa arougb yen an ginohob. Hang yen yemedreg en mer gin touwero. Dobnaro. Areg Musa arougb yen an gini, kaba, emebiji dau enero. Doba ebiji dau yen meijemouwer sug nosohob. 7:23 Dangga hang, sug yen yec godeh mahaniheni hom en mos dau en se lona ingga, dauntoba yen yemedreg Musa men gomnomna an gin touwero, kaba, dagiro, naugwe hang, yen meigdoc mog mog an dan sug dan deic geigouhw dou sud hom mohora agaim se Lona Gemeicaresero gin toua? 7:24 Hang yen yemogod aremer aga lusud emaimo dau areg yen yeiya ginero. Doba yen yogod aremer aga len aimo dau areg edag beim se geica an len dous. 7:25-26 Doba ligbum dau leng se Yerusalem, kaba, len leijidougwom, lendagai: Sud hom graga, kaba, maman mougtir len lehilon en naugb leic gomom dou en gia ingginei? Dangga dagiro, naugwe hang, len lemen dougwo enero? Anai yen yeiya en eic mos naugb en edidib ELOHIM mer men meijouhw ainyes dou lusud terimda. Gedangga, kaba, len toua loudesa en edag Sud Hom Geigdoc Maman Dau Maman Gogom Augwanohobei? 7:27 Dobnaro. Anai Sud Hom Geigdoc Maman Dau Maman Gogom Augwan, kaba, maman mamecinaga sug en gun touwero. Doba en en aud maman augwougb dous. Doba sud hom gini, kaba, maman macinaga sug en gunohob. Hang en emedag Sud Hom Geigdoc Maman Dau Maman Gogom Augwan dag misen touwero. 7:28 Doba Yesus, kaba, en edidib ELOHIM mer men meijouhw se ELOHIM Men Tuari gin terimda. Dangga sug en ouman, doba lusud leijidougwom dag ginohob, kaba, en esa mer debin len. Hanoba en eijidougwo len, endagai: Yen youdesa yen yecinaga areg eisaugb dan dara dan dugun augwan dag misenohobei? Naro, yen yemecinaga dani dara sug dan dugun touebma. Anai sug dan den aud yen gini, kaba, dan demen augwougb dau danin indoc mesero. Doba sud hom gus en mer ogod an dan, hang dan demen aud yen gini naugb dan desai en moro dou yen toua. Dangga areg en en dou yen gin, kaba, eigouhw naugb yen yod meijina debsa en an gin terimda. Anai en emereiyara dou yen touwero, doba en enara se geica dou yen namcirohob. Dara yen yemecinaga sud hom gesa dan gini dag misen touebma. 7:29 Doba danin, kaba, dan decinaga en dag misenohob. Anai enin eng mer ogod an dan, hang dan demen aud yen toua. 7:30 Sug lusud louman en mer an gin, kaba, len louwan lagaigeij en. Doba sud hom ingma emeic mos naugb emagaigeij en touwero. Anai ELOHIM men lona areg en ogod deinaugb enohob, kaba, emedagasebma. 7:31 Doba leinyana dau lusud ingga, kaba, len lod merna debsa enohob. Hanoba len len dougwo lusud graga, lendagai: Yen youdesa dagiro? Sug Sud Hom Geigdoc Maman Dau Maman Gogom Augwan en en aud maman, kaba, en emeic ganusbus ingma bemedreg dau ginsei? Naro. 7:32 Doba leng Parisi, kaba, len louman dau areg lusud lec luluf eisaugb Yesus dag gin doumohob. Dangga hang, leni dara gembala gesa taij meren mougtir, kaba, len larougb leng lesedougwo ELOHIM Men Tuari naugb sug len ledagaigeij Yesus toua. 7:33 Dangga Yesus esulou lusud laugwan mougwa hom ucan deit, endagai: Dan demeigtou desij yen terberbahabero. Doba se lona hosa deit, kaba, dan decicugb aud sud hom gesa dan aud yen gini ucugb dangga. 7:34 Se lona ingga, kaba, yen yehilon dougwo dan, doba yen yemdeiya danero. Anai usi gedig dan deigtousa gin, kaba, yen yemdebeij touwero. 7:35 Sug leng Yahudi meren mougtir len louman dau gini, kaba, len leijidougwom ucucugb, lendagai: Sud hom gini en eihwedigiro, hang maman mamdeiya enero gina? En eihwedig lugmahara meren cinogo gedig maman lusud latou desij len naugb en edidib ELOHIM mer men meijouhw augwan dou len touei? 7:36 Anai en enara dou maman dag cum, kaba, maman mahilon dougwo en. Doba maman mamdeiya enero. Dara en enara dou maman toua dag usi sug en eigtousa, kaba, maman mamdebeij touwero. Augwan gini, kaba, meijouhw dagiro, inggina? 7:37 Se lona gouwedoc naugb sug leng Yahudi lougwanara debin tu meij gini, kaba, Yesus eisa besa naugb en enara dou lusud deit. Anai lona hom gini, kaba, moho agas edreg dau lona gus sug len lougwanara debin tu meij gin augwan namcir. Dangga sug en eisa besohob, kaba, en enara dou len dara mer medam, endagai: Gareg dau yen merijebeni, kaba, en en aud dan naugb dan deic duhu dou en beg. 7:38 Dara gareg en medoc ebdebin an dan, kaba, duhu geic maireseb menau geb huhugb dou lusud agunya dau en toua. Augwan gini esogwa deisa areg len log deb se Surad Injil Meb Mohon deb eisaugb dan sug nosa touohob. 7:39 Doba areg Yesus eic duhu bainyen dou len gini, kaba, en emen dau duhu misen dou lenero. Doba en en eisaugb Mena Gogoufu deb dou len dous. Anai gareg en medoc ebdebin an en, kaba, en os dou len naugb en emesa Mena Gogoufu aud len toues. Doba sug en enara gini, kaba, ELOHIM emeigdoumesa en dau gomom aud gogouf cucugb ucugbuma. Hang ELOHIM emesa Mena Gogoufu aud lusud touebma. 7:40 Sug lusud louman Yesus mer an gin, kaba, merug hosa len louma debin en, lendagai: Indeic, sud hom gin, kaba, eni sud hom gesai ELOHIM moro eisaugb Mesias sug en en dou maman. 7:41 Doba ligbum, kaba, len len dougwo len, lendagai: Sud hom gin, kaba, eni sud hom gesai ELOHIM moro eisaugb Mesias dou maman, isnaro. Doba en eng Mesias Geigdoc Maman Dau Maman Gogom Augwan ginohob. Doba ligbum deit, kaba, letaha len merir an gini, lendagai: Yen youdesa Sud Hom Geigdoc Maman Dau Maman Gogom Augwan, kaba, en en dau leng se Galileaei? Naro, en emen dau Galilea, isnaro. 7:42 Anai Surad Injil Meb Mohon en dou maman dag Mesias, kaba, eni sud hom dau Daud medebeitor len dous. Dangga hang, en emen dau leng se Galilea touwero. Doba sug mem ouwadan en, kaba, en ouwadan en se Bedlehem dous. Anai se Bedlehem gini, kaba, Daud en gun engga. 7:43 Dangga hang, len merdoc dag hom eisaugb Yesus ginero. Doba len merir laisedim endaha. 7:44 Dara lingma, kaba, len louwan lagaigeij en. Doba sud hom ingma dau len, kaba, en emeic mos naugb gin touwero. 7:45 Sug leng Yahudi meren mougtir len leiya, doba leng lesedougwo ELOHIM Men Tuari len lecicugb dara merug mogud en, kaba, len lehin merir se len, lendagai: Dagiro, naugwe hang, yen yemagaigeij sud hom graga aud emen suginero, anara? 7:46 Doba len lenara laugbtarera dougwo len merir, lendagai: Emen ememagaigeij enero. Anai men genara, kaba, aninim dag sud hom ingma men genara touwero, doba susugb dau lusud gus laugwan namcir. 7:47 Sug leng Parisi louman dau gin, kaba, len lenara debin len, lendagai: Sud hom gin, kaba, en augwohosa yen, aninim dag en augwohosa len gus laugwan touohobei? 7:48-49 Anai len gin, kaba, len lemecinaga Musa men gomnomna dag misenbuma. Hang ELOHIM ouwara dougwo len touohob. Doba yen yeiya dau mougtir gus dara emeng Parisi, kaba, dag emingma emobsara aud touohobei? Naro, sud hom ingma dau emen, kaba, en emobsara dou enero. 7:50-51 Doba sud hom dau leng Parisi, en moho Nikodemus, kaba, en owun len merir an gin namcir. Hanoba en enara dou len, endagai: Maman gomnomna en dou maman dag maman mamogod aremer gogom debin sud hom augwougblobma. Doba en ens dau men geicara dou maman. Dauntoba sug maman macinaga meijouhw augwan nosahabi, kaba, maman mamogod aremer gogom debin en daiyamo. Sud hom Nikodemus gin, kaba, eni sud hom gedebeij Yesus naugb loba sug nosohob. 7:52 Doba sug leng Parisi dara mougtir len louman Nikodemus en mer an gini, kaba, len merir eigdoc en icira gini. Hanoba len lenara dou en, lendagai: Ban toua dau leng Galilea, hang ban benara dangga dou emenei? Ban becic Surad Injil Meb Mohonahabi. Anai sug ban beicara baimo dag gin, kaba, ban becinaga dag sud hom gesai ELOHIM moro eisaugb Mesias dou maman, kaba, en emen dau leng se Galilea naugb enara dou mamanero.

Yohanes 8

8:1 Doba Yesus, kaba, en eisaugb aud mengarougb moho Saitun Meda naugb en atou sungga. 8:2 Se loneinda, kaba, en ouwaden naugb en einesa ELOHIM Men Tuari deit. Sug en einesohob, kaba, lusud laugwan lou acec en. Dangga sug len laugwan lacinimohob, kaba, en eigtou. Hanoba en edidib ELOHIM mer men meijouhw dou len toua. 8:3 Doba irir sug Yesus ens aremeijouhw dou len gin, kaba, leng meru ouforoho se Musa men gomnomna dara leng Parisi, len lahwan gida hom aud en. Hanoba len larougb en bedeseino lusud laugwan toua. Gida gin, kaba, lusud leiya en sug giji hom mesira ebsa enohob. 8:4 Dangga sug en edesohob, kaba, len lenara lainyen Yesus medoc mes an gin toua. Hanoba len leijidougwo en, lendagai: Adehsud, gida hom gin, kaba, lusud leiya sug giji hom lan laobsara animohob. 8:5 Hang ban bauwam an dagiro eisaugb gida gina? Anai Musa men gomnomna enara dou maman dag gida gedig en eicara dag gin, kaba, maman marba igdahab an en naugb maic gomom dou en toua? 8:6 Len leijidougwo en an dag gini, dauntoba sug en enara bedreg Musa men gomnomna ginohob, kaba, len ledehin meraga an en deseino meren mougt mera goujir toua. Doba Yesus, kaba, en eic mesira mob, hanoba en ogmen naugb aguci cinogo namcir. 8:7 Doba leng meru ouforoho se Musa men gomnomna dara leng Parisi graga, kaba, len merir lawun en terimda. Dangga Yesus en oho mergo. Hanoba en enara dou len, endagai: Gareg dau yen en emebesesar mougwa hombuma, kaba, en eng emeic igdahabi naugb en ed gida gin aimougtut. 8:8 Sug en enara dangga dou lenohob, kaba, en mergo omnen. Hanoba en eic mesira mob aguci cinogo ucugb deit. 8:9 Sug len louman Yesus enara dou len dag ginohob, kaba, len laugwan lemesa sungga debero. Doba ebiji dau lusudbod terimda logodeh, kaba, hom isisi, hwai isisi, terimda len laugwan louwa dau enohob. Dangga Yesus enin dous eng eigtou deb. Dara gida hom graga, kaba, en toua esedeb sunggaba. 8:10 Sug len laugwan louwa dau lanohob, kaba, Yesus oho mergo. Hanoba en eijidougwo gida graga, endagai: Daneh, ban beiya lusud graga len laugwan merug inggiroda? Sud hom ingma dau len, kaba, en emeigtou naugb emehin meresa ban deiteroei? 8:11 Doba gida ingga, kaba, en auni dou en, endagai: Adehsud, lingma, kaba, len lemesa sugin deb naugb lemehin merir se dan touwero. Sug gida enara dag gin dou enohob, kaba, en dou en, endagai: Sug len lemeic gogom dou banero, kaba, dan toua demeic gogom dou ban touwero. Hang ban beihweda dara ban bemebesesar toua deitero. 8:12 Sug gida graga eihwededau Yesusohob, kaba, Yesus enara dou leng Parisi deit, endagai: Danin dedag mouf naugb daisema lusud se cinogo gin augwan. Dangga gareg en aimo dan, kaba, en emec se lobeigbogo deitero. Doba dan induf gini aisema en aud maireseb menau geb huhugb namcir. 8:13 Sug leng Parisi louman gin, kaba, len lenara debin en, lendagai: Ban bos badi banin an gin deseino emen dous. Dangga hang, areg ban ben dou emen gin, kaba, dag misenero. Doba dag ban bereiyara dou emen terimda. 8:14 Doba Yesus owun len merir an gini namcir. Hanoba en enara dou len, endagai: Naro, areg dan dos dadi danin an gini deseino yenohob, kaba, augwan gini asesa dag misen namcir. Anai dan decinaga dan dugun sug dan den aud yen gin dau. Dara dan decinaga deb naugb sug dan decicugb touohob. Doba yen, kaba, yen yemecinaga dan sug dugun dara sug dan demecicugb gin touwero. 8:15 Dangga sug yen yogod aremer aga lusud, kaba, yen yowun len meroho aimo dau areg eb ainyes se yen meijires an len dous. Doba dan, kaba, dan demeicara dangga an sud hom ingma ginero. 8:16 Doba sug dan dogod aremer an lusud, kaba, dan decinaga dag areg dan dogod anir, kaba, augwan gini asesa se geica namcir. Anai dan demaimo augwan gini dau danin indoc mes an lenero. Doba dan Indina gedig en esa dan aud yen, kaba, en toua moongga dara dan an ginohob. 8:17 Lusud log se meijen gomnomna, lendagai: Sug lahwai logod sogo mera hom debin aremer homohob, kaba, areg len lenara augwan gini se geica namcir. 8:18 Dangga hang, areg dan den dou yen gin, kaba, augwan toua dag misen namcir. Anai danin demouma debin dan indir an gin dousero, doba dan Indina en toua ouma debin dan an ginohob. 8:19 Sug lusud louman en mer an gin, kaba, len leijidougwo en ucugb, lendagai: Ban Abina gin moonggiro? Doba Yesus auni len merir, endagai: Yen yemecinaga areg geb se danin dara dan Indina aman amahwas amdoc mes augwan asesabuma. Anai sug yen yecinaga areg asesa danin indoc mes augwan dag misenohob, kaba, yen yecinaga areg asesa dan Indina enin medoc mes augwan dag misen touohob. Doba yen yemecinaga areg asesa danin indoc mes augwan dag misenbuma. Hang yen yemecinaga areg asesa dan Indina enin medoc mes augwan dag misen touebma. Anai sug yen yecinaga dan dag misen, kaba, gini aninim dag yen yecinaga dan Indina touohob. 8:20 Areg Yesus en en gin, kaba, sug en edidib ELOHIM mer men meijouhw dou lusud se ELOHIM men igtia deinyor biruwa an aregoufu sug len lob deisa. Doba sud hom ingma, kaba, en emeic mos naugb emagaigeij en touwero. Anai ELOHIM men lona areg en ogod deinaugb enohob, kaba, emedagasebma. 8:21 Sug Yesus ens enin dag mouf gaisema lusud aud maireseb huhugb dou len dag gragohob, kaba, en esulou len mougwa hom ucan deit, endagai: Cum, kaba, dan deihwededau yenohob. Dangga se lona ingga, kaba, yen yehilon dan. Dobnaro. Anai meijen sesar ahwan yen aud gomom dau dan touohob. Hang yen yemedebeij dan se usi sug dan deigtou touwero. 8:22 Sug leng Yahudi meren mougtir len louman Yesus mer an gini, kaba, len leijidougwom, lendagai: Sud hom gini en ouwan ed enin. Hang en emenara endag usi sug en eihwedesa, kaba, maman mamdebeij enero, ginei? 8:23 Doba Yesus enara bauwun len merir, endagai: Yen, kaba, yen meigdoc aninim dag lusud se cinogo tainya gaih gini. Doba dan, kaba, dan den dau bogo gada aud yen. Dara yen yugun, kaba, se cinogo gin toua. Doba dan dugun, kaba, se cinogo ginero. 8:24 Hang dan demenara dou yen graga dag maireseb menau geb huhugb emeb naugb yen touwero. Doba meijen sesar gini ahwan yen aud gomom dous. Anai sug yen meigdoc emebdebin an dan dag dan demedag Adehsud Geis Huhugb namcirohob ginero, kaba, maireseb menau geb huhugb gini emeb naugb yen touwero. Doba meijen sesar eic gogom dou yen dous. 8:25 Sug leng Yahudi meren mougtir louman Yesus mer dau gini, kaba, len leijidougwo en dareg lehi rasahasa eni, lendagai: Ban bedag garena? Doba Yesus auni dou len ucugb, endagai: Dani sud hom gedig dan dens en dou yen dau acgunog ginohob. 8:26 Dangga hang, indan goubesa inggebga naugb sug dan dens dau meijen geicara. Dara dan dowun yen an gin toua. Anai meijen geicara einyana dag ecgu terimda. Dobnaro. Dan demen ara ara dau danin indoc mes dou yenero. Doba areg sud hom gesa dan aud yen en arougb dan an ginohob, kaba, dan dens dau augwan gini dou yen dous. Anai en, kaba, en emereiyara mougwa hom touwero. Doba areg en en gin, kaba, se geica namcir. 8:27 Doba len meru edgom dougwo gin terimda. Hang len lemecinaga dag en enara dou len eisaugb en Mena ELOHIM se bogo touwero. 8:28 Dangga Yesus enara dou len deit, endagai: Se lona sug yen yeigdoumesa sogo salib an Lusud Meraguna Mebin dan ainyesohob, kaba, yen meiju emedgom dougwo dan deitero. Doba yen yecinaga dan dedag Adehsud Geis Huhugb namcir gin dag misenohob. Hang se lona ingga, kaba, yen yecinaga toua dag dan demesai moho hom dau danin indoc mes dou yen touwero. Doba dan desai areg dan Indina enin eng arougb danohob gin dou yen dous. 8:29 Dangga sud hom gesa dan aud yenohob, kaba, en emarges dan deb touwero. Doba eni moongga dara dan terimda. Anai dan daimo areg geic en medoc eigouhw dou en gin dous. 8:30 Sug lusud louman dau areg Yesus enara dou len gin, kaba, len leinyana merdoc ebdebin an en toua namcir. 8:31 Sug Yesus eiya, doba merug hosa dau leng Yahudi len merdoc ebdebin an enohob, kaba, en esulou len ucan gin deit, endagai: Sug yen yeicara yaimo dan indir an areg dan desai dou yen graga, hanoba yen yedag beim an namcir toua, kaba, yen yedag indan logodeh misenohob. 8:32 Hang yen yemedag sogougb toua deitero. Doba sug yen yecinaga areg se geica ginohob, kaba, areg se geica gini eigdoc yen dau gin toua namcir. 8:33 Doba len lesa merir debin en. Hanoba len leijidougwo an, lendagai: Emen emedag Abraham medebeitor. Hang emen emedag sogougb dou sud hom ingma touebma. Dangga ban abu dagiro, hang ban bemenara dou emen dag emen emecinaga areg se geicohob, kaba, emesga emen dau sogougb gin toua? 8:34 Doba Yesus enara bauni len merir ucugb, endagai: Gareg dau yen en aimo sesar, kaba, en edag sesar men sogougb gin toua. Yen youman dan indir ginahabi, anai augwan asesa dag misen namcir. 8:35 Dara sogougb, kaba, en ematou desij mougt mera se men tu touwero. Doba mougt mera meisi enin dous eng atou desij mena se men tu terimda. 8:36 Dangga sug ELOHIM Meisi dan desga yen, kaba, yen yemedag sesar men sogougb toua deitero, doba yen yarges dau ginohob. 8:37 Dan decinaga yen yedag Abraham medebeitor gini. Doba yen yehilon ucina naugb sug yen yeic gomom dou danohob. Anai yen yemebin ELOHIM en mer areg dan desai dou yenohob augwan se yen meigdoc mes gin touwero, doba yen yotogoto namcir. 8:38 Areg dan Indina en ens dou danohob, kaba, dan desai dau augwan gin dou yen. Doba yen, kaba, yen yeicara yaimo dau areg yenin meijina en en dou yen gin dous. 8:39 Sug leng merdoc ebdebin an Yesus mer graga len louman dau gini, kaba, len lesa mer debin en deit, lendagai: Emen, kaba, emen emina Abraham hom gin dous. Doba Yesus enara bauni dou len ucugb, endagai: Sug yen yedag Abraham medebeitor dag misenohob, kaba, yen yemedreg dau men geicara sug nosa touwero. Doba yen yeicara yaimo eni aud augwan gin toua terimda. Doba meijen geicara augwan, kaba, emesogwa deisa men geicara touwero. Doba yen yedreg dau men geicara augwan namcirohob. Dangga hang, yen yemedag Abraham medebeitor misen touwero. 8:40-41 Anai dan, kaba, dan demedreg dau geica areg dan douman dau ELOHIM mougwa hom touwero. Doba dan dens dau augwan dou yen dous. Doba yen yehilon ucina naugb sug yen yeic gomom dou dan terimda. Abraham, kaba, en emeicara dag gin mougwa hom touebma. Doba len lenara launi ucugb dou en, lendagai: Emen, kaba, dag logodeh gaugwougwero. Doba ELOHIM enin eng emen Emina misen gini. 8:42 Doba Yesus auni dou len namcir, endagai: Sug yen yedag ELOHIM mehir misenohob, kaba, yen meigdoc gororougb dan toua terimda. Anai dan den dau ELOHIM aud yen, hang dan demedebeij yen toua. Dangga dan demedebeij yen emaimo dau danin indoc mes an ginero, doba ELOHIM enin eng esa dan aud yenohob. 8:43-44 Doba sug dan den dau ELOHIM aud yen dag ginohob, kaba, dagiro, naugwe hang, yen meigdoc emobgesa areg dan desai dou yen ginero? Yen meigdoc emobgesa areg dan den dou yen ginero, anai yen yemedag ELOHIM en mehirero. Doba yen yedag Bilis en mehir gin dous. Dara en edag yen meijina misen gin toua. Hang yen yemei meijums an areg dan desai gin dou yen touwero. Doba yen meigdoc erleij naugb yen yaimo yen meijina an areg en medoc etrij icira gin dous. En, kaba, en emaimo areg se geica mougwa hombuma. Doba dau acgunog, kaba, en ouwan eic gomom dou lusud namcir. Anai areg misen emeb se en medoc mes teiteiyero. Dangga hang, sug en ereiyara, kaba, gini dag aremer menau naugb enero. Doba gini dag moumougb dous. Anai en eng ebin gereiyara namcirohob. Dara en edag mebin naugb leng lereiyara len laugwan gin toua. 8:45 Doba dan, kaba, dan desai areg se geica mogud dou yen dous. Hang yen meigdoc emebdebin dan indir an gin touwero. Anai Bilis en edag yen meijina teitei ginohob. 8:46 Sud hom gareg dau yen en owun dan indoho an areg dan desai dou yen gin, kaba, dag dan demenara misen dou yenero? Naro, sud hom ingma en emens moho hom dag sesar dou dan se gin touwero. Dangga hang, sug dan denara areg se geica dou yen dous, kaba, dagiro, naugwe hang, yen meigdoc emebdebin dan indir an ginero? 8:47 Doba inggaida. Anai gareg en edag ELOHIM mogwihi mogo dag misenohob, kaba, en ei moms an en mer gin toua terimda. Doba yen, kaba, yen yemedag ELOHIM en mehir ginero. Hang yen yemei meijums an areg dan desai dou yen gin touwero. Doba yen yoc meijums dougwo augwan gini namcir. 8:48 Sug leng Yahudi graga len louman Yesus mer an gini, kaba, len lesa mer debin en deit, lendagai: Aban genara dou emen gini, kaba, dag sud hom dau leng Samaria gedig merna mog mog leisa se en medoc mes ginohob. Hang areg emen ememenara doum eisaugb ban sug nosa, kaba, augwan dag misen namcir. 8:49 Doba Yesus etaha len merir an gini, endagai: Dan, kaba, merna mog mog emeicara se dan indoc mesero. Anai dan demeic dan Indina en moho demacecimero. Doba se indan geicara augwan, kaba, dan deigdoumesa en moho gin terimda. Doba yen, kaba, yen yeic dan indoho yacecim namcirohob. 8:50 Dara dan demacgeij lusud naugb len leigdoumesa dan indoho gin touwero. Anai sud hom gus, kaba, eni moongga. En, kaba, en ousa deisa debin danohob. Hang en ehilon ucina naugb sug lusud leigdoumesa dan indoho gin toua terimda. 8:51 Dangga gareg en emotogoto dan indir an areg dan desai dou en ginero, doba en eicara baimo dag gin terimda, kaba, en emomom toua deitero. Doba maireseb menau geb huhugb eb naugb enohob. Yen youman dan indir an areg dan den dou yen gin deigeigouhw namcir. Anai augwan gini asesa dag misenohob. 8:52 Doba sug lusud graga len louman Yesus mer an gin, kaba, len lenara se merir gouji ucugb dou en deit, lendagai: Iteitogin, kaba, emen emecinaga dag merna mog mog leicara se ban abdoc mes dag misenohob. Anai Abraham, kaba, en omomohob. Dara leng lesai ELOHIM moro sug nosa, kaba, len laugwan lomom touohob. Doba ban benara dou emen dag gareg en eicara baimo areg ban ben dou emen gin, kaba, en emomom deitero, doba maireseb menau geb huhugb eb naugb enohob. 8:53 Ban beigdoumesa ban aboho agas edreg dau maman mamjemouwa Abraham ginei? Anai en, kaba, en omom namcirohoba? Naro, ban aboho emedreg dau enero. Dara leng lesai ELOHIM en moro sug nosa, kaba, len laugwan lomom touohob. Hang ban bens banin dag garena dou emen gina? 8:54 Doba Yesus auni dou len deit, endagai: Dan Indina gedig yen yeigdoumesa yenin meijoho an en dag en edag meijen ELOHIM ginohob, kaba, enin eng sud hom gedig en eigdoumesa dan indoho gini. Dan, isnaro. Anai sug dan deigdoumesa danin indoho an ara ara, kaba, gini aninim dag mera gouwada namcir dous. 8:55 Dara yen yemecinaga areg asesa ELOHIM enin medoc mes augwan mougwa hom touebma. Doba danin dous eng decinaga areg asesa enin medoc mes augwan ginohob. Dangga hang, sug dan denara dou yen dag dan demecinaga areg asesa ELOHIM medoc mes augwan dag misenbuma, kaba, dan dereiyara. Aninim dag yen yereiyara toua namcirohob. Dobnaro. Dan decinaga areg asesa enin medoc mes augwan dag misenohob. Hang dan demotogoto en mer gin touwero. Doba dan deicara daimo areg en arougb dan an ginohob augwan dag misen toua terimda. 8:56 Dara yen meijemouwa Abraham, kaba, en toua medoc agahugouhw medam an indan lona sug dan den aud yen gini. Anai ELOHIM os dou en dag en omom dau lona ginero, doba en eiya gin touahabi. Dangga iteitogini, kaba, en eiya ginohob. Hang en medoc agahugouhw an gin toua terimda. 8:57 Doba sug leng Yahudi gini len louman en mer an gin dangga, kaba, len lenara lawun en mer an gin namcir. Hanoba len lenara dou en, lendagai: Ban bedag sud aisohoba, hang ban bemenara dou emen endag ban beiya Abrahamohob gina? Anai aban arisogomoc emedebeij mos sergem touebma. 8:58 Doba Yesus auni len merir ucugb deit, endagai: Yen youman dan indir gin deigeigouhwahabi. Sug Abraham mem emouwadan enbuma, kaba, dan indugwengga sug nosohob. Anai dan dedag Adehsud Geis Huhugb Sugraga touohob. Areg dan den dou yen gin, kaba, dag misen namcir. 8:59 Doba sug leng Yahudi len louman en mer an gin deit, kaba, len louwan leic igdahabi lad eni. Doba Yesus eic len gus baihidida. Hanoba en eihwededau ELOHIM Men Tuari inggeda.

Yohanes 9

9:1 Sug Yesus dara men logodeh len lededau ELOHIM Men Tuariohob, kaba, len lec merohora ledreg sud hom mairesmougb teitei dau mem menuhwa gedig en eigtou se ucina mebera deb gini. 9:2 Dangga, kaba, Yesus men logodeh leijidougwo eni, lendagai: Adehsud, gareg en ebesesar, hang emeic en mairesmougb dag gina? Eninei? Era mena dara mem lanei? 9:3 Doba Yesus enara bauni len merir, endagai: Sud hom gin, kaba, en maires mougb emogdoc enin men sesar dara mena dara mem, maran sesar touwero. Doba en mairesmougb gin, kaba, eic cumougt dou dan naugb dan dens dau ELOHIM men goubesa dou lusud naugb len leiyahabi. 9:4 Anai sug loba osun dougwohob, kaba, sud hom ingma emeicara toua deitero. Dangga hang, eigouhw naugb maman mamarges dau sug maman maicara gin touwero. Doba sug lona ebaba gin, kaba, maman maimo areg sud hom gesa dan aud yen gini en arougb maman an gin terimda. 9:5 Anai sug dan indugwengga desij lusud se cinogo ginaba, kaba, dan dedag mouf naugb dan dens dau areg se geica dou len toua. 9:6 Sug Yesus esulou men logodeh dag ginohob, kaba, en eigdores se cinogo. Dauwohob, kaba, en mesira mob arilarahabi. Sug en mesira mob arilarohob, kaba, en eic mesira mob an cinogo graga. Hanoba en ehinsa sud hom ingga mairesi. 9:7 Sug en ehinsohob, kaba, en arougb en, endagai: Ban beihweda naugb bededu cinogo dau ban abiresi se duhu geindaredeb, moho Siloamahabi. Dangga sud hom graga, kaba, en aimo Yesus en mer naugb en eihwedig Siloam gin toua. Sug en edebeij duhu geindaredeb ginohob, kaba, en edu cinogo dau en mairesi. Hanoba enin eihwededau sugada dig men tueda, anai en maires esga namcirohob. 9:8 Sug en mesir dara len gus len leijesan, doba en maires esgohob, kaba, len leimiman dau gin namcir. Hanoba len leijidougwom, lendagai: Sud hom mairesmougb gohwiaga lusud an aregoufu grag, ingginei? Len leijidougwom dag gini, anai len lecinaga dag sug nosa, kaba, sud hom gin en eigtou se ucina mebera naugb ohwiaga lusud an aregoufu terimdohob. 9:9 Dangga ligbum, kaba, len lousa deisa merir, lendagai: You, sud hom inggangga. Doba ligbum, kaba, len loto merir, lendagai: Sud hom gin, kaba, en mocbobaga aninim dag sud hom ingga dous. Doba sud hom ingga, kaba, en auni len merir, endagai: Dani sud hom inggang gini. 9:10 Sug len louman en mer dag gin, kaba, len leijidougwo en ucugb, lendagai: Areg eberou ban, hang ban abires emesga naugb ban bemeiya lo asesa ucugb deit gina? 9:11 Dangga hang, en auni dou len, endagai: Sud hom, moho Yesus, kaba, en esinsin cinogo mor dag uluto. Hanoba en ehin se dan indires. Dauwohob, kaba, en arougb dan naugb dan dededu dan indibes an indiresi se duhu geindaredeb, moho Siloam, gin toua. Sug dan daimo en mer naugb dan dededu dan indibes se duhu ginohob, kaba, dan indires toua esga naugb dan deiya lo asesa ucugb namcir. 9:12 Sug len louman en mer an gin, kaba, len leijidougwo en, lendagai: Sud hom gini moonggiro? Doba en auni dou len, endagai: Dan demecinaga sug en eigtou touwero. 9:13-14 Doba lona sug Yesus eic cinogo mor dag uluto naugb asga sud hom gin maires egsa, kaba, leng Yahudi meren lona naugb len lemeicaresero. Dangga hang, en mesir graga, kaba, len lahwan en naugb en edens enin dou leng Parisi se meren tuari touahabi. 9:15 Sug len ledebeij leng Parisi se meren tuariohob, kaba, len toua leijidougwo en deit, lendagai: Ban abires esga naugb ban beiya lo asesa ucugwohob gini ogdoc ara? Dangga en emecic dau augwan dou len deit, endagai: Sud hom eic uluto baugb dan indiresi. Hanoba dan dededu dan indibes an gin se duhu. Dauwohob, kaba, dan indires toua esga naugb dan deiya lo asesa namcir. 9:16 Dangga ligbum dau leng Parisi, kaba, len lowun Yesus en moho an gin namcir, lendagai: Sud hom gin, kaba, ELOHIM emesa en aud maman, anai en emaimo maman gomnomna eisaugb Lona Gemeicaresero gin touwero. Doba ligbum, kaba, len loto merir, lendagai: Yen youdesa sud hom gebesesarohob, kaba, en aben ganusbus ingma dag ginohobei? Hang len merdoc dag hom se aremer ginero. Doba len lenara merir eisaugwim icira gin namcir. 9:17 Sug len merir eisaugwim icira gin terimda, kaba, len leijidougwo sud hom ingga enin deit, lendagai: Ban beigdoumesa sud hom graga en moho dag ara, anai ban bos badi en dag en esga ban abiresi dou emenohoba? Dangga hang, en auni dou len namcir, endagai: ELOHIM esa en aud maman naugb en esai en moro dou maman dag misenohob. 9:18 Doba leng Yahudi meren mougtir, kaba, len merdoc emebdebin an sud hom graga en mer dag en mairesmougb teiteiyohob ginero. Anai len leiya, doba en eiya lo asesa namcir. Hang len larougb lusud naugb len ledahwan sud hom graga en mena dara mem aud lenahabi. Dauntoba len leijidougwo lan eisaugb aremer gin toua deitahabi. 9:19 Dangga sug lan ladebeij lenohob, kaba, len leijidougwo lan, lendagai: Yan yaiya sud hom gin endag yan maijisi misen ingginei? Era naroei? Anai sug nosa, kaba, yan yan dou emen dag yan maijisi gini en mairesmougb teitei dau sug mem ouwadan enohoba? Gedangga, kaba, dagiro, naugwe hang, sud hom gini en eiya lo asesa ucugb dag gina? 9:20 Doba lan launi dou len, landagai: Sud hom gini, kaba, aman amecinaga eni aman ameisi misen. Dara aman amecinaga dag sug mem ouwadan en, kaba, en mairesmougb teitei touohob. 9:21 Doba ogdoc ara, hang en maires emesga naugb en emeiya lo iteitogini. Dara gareg en esga en maires gin, kaba, aman amecinaga dau ginero. Yen yeijidougwo enin anahabi. Anai en edag sudohob, hang emedeinyum naugb sug enin auni dou yen toua. 9:22 Lan laideido dag gin dou len, anai lan lacinaga dag gareg en os badi Yesus en edag Sud Hom Geigdoc Lusud Dau Meren Gogom Augwan, kaba, mougtir gini len lohw merdocedoumohob naugb len lerba sud hom gin dau meren tuari gini. Dangga lan lahau dau mougtir gin toua terimdohob. 9:23 Hang lan lamarougb len dag graga toua, landagai: Yen yeijidougwo en ai yenin meijir se dous, anai en edag sudohob. 9:24 Sug mougtir graga len louman lan marir an gini, kaba, len leija sud hom mairesmougb graga aud len deit. Sug en edebeij lenohob, kaba, len lenara lad en medoc mes, lendagai: Ban becic areg se geica dou emen dous. Hanoba ban bou ELOHIM en moho debin gini toua. Dauntoba emen emecinaga dag areg ban ben dou emen, kaba, misen namcir. Anai ban beigdoumesa sud hom graga dag en esga ban abiresohob. Doba emen emecinaga dag sud hom ingga, kaba, en ebesesar namcirohob, hang emedeinyum naugb sug en emesga ban abires gin touwero. 9:25 Doba sud hom graga, kaba, auni dou len ucugb, endagai: Sug sud hom gini en ebesesarohob, era en emebesesar touebma, kaba, dan demecinagero. Doba aremer hom, kaba, dan decinaga dag misen namcir. Anai sug nosa, kaba, dan indires mougb. Doba iteitogin, kaba, dan indires esga naugb dan deiya lo asesa ucugwohob. 9:26 Dangga len leijidougwo en ucugb deit, lendagai: En ebara dara ban, hang ban abires emesga gina? 9:27 Doba sud hom mairesmougb graga, kaba, en esa mer debin len, endagai: Dan decic augwan gini dou yen iteitogragohob. Doba yen meigdoc emebdebin an gin touwero. Dangga dagiro, naugwe hang, yen youwan naugb dan decic dau augwan gin dou yen deita? Yen youwan naugb yen yedag men logodeh gin touei? 9:28 Dangga len louwara debin en, lendagai: Bang hom dous eng bedag sud hom ingga men godeh gini. Doba emen, kaba, emen emaugwan emedag Musa men logodeh gin dous. 9:29 Anai emen emecinaga dag sug nosa, kaba, ELOHIM enara dou Musa dag misenohob. Doba eisaugb sud hom ingga, kaba, emen emecinaga dau sug en en ginero. 9:30 Doba sud hom mairesmougb graga, kaba, en owun len meroho an gin namcir. Hanoba en enara dou len, endagai: Sud hom gin, kaba, en esga dan indiresohob. Doba yen yenara dag yen yemecinaga sud hom gini sug en en dau sugiro touwero. Ara hom gin, kaba, dag ganusbus namcir. 9:31 Anai maman macinaga dau sug sud hom en ebesesar, kaba, dag ELOHIM en emouman en mer naugb ousa en touwero. Doba gareg en esijaresa eni, hanoba en aimo areg asesa enin medoc mes namcir, kaba, maman macinaga dag en ouman en mer naugb ousa en dous. 9:32-33 Dangga sug sud hom gini en emen dau ELOHIM enero, kaba, men goubesa naugb ara ara toua ingmaro. Doba men goubesa naugb ara ara inggebga ginohob. Hang emens dou maman dag sud hom gini en en dau ELOHIM aud maman dag misenohob. Anai dau sug ELOHIM en ahasesei cinogo terimda iteitogin, kaba, lusud lemouman dau sud hom ingma dag en esga leng meriresmougb gin touebma. 9:34 Sug mougtir gini len louman, doba sud hom mairesmougb graga en esbes an len dangga, kaba, len lenara gouji dou en, lendagai: Ban, kaba, ban bebesesar teitei dau sug ban abim ouwadan banohob. Dangga dagiro, naugwe hang, ban bouwan bens aremeijouhw dou emena? Sug len lenara gouji dangga dou en dauwohob, kaba, len locirma en dau meren tuari gin toua namcir. 9:35 Doba sug Yesus ouman dag leng Parisi locirma sud hom mairesmougb graga dau meren tuariohob, kaba, en ehilon en. Dangga sug en edagasa enohob, kaba, en eijidougwo eni, endagai: Ban abdoc ebdebin an Lusud Meraguna Mebin ginohobei? 9:36 Dangga sud hom mairesmougb graga, kaba, en eijidougwo Yesus ucugb deit, endagai: Adehsud, ban bens dau Lusud Meraguna Mebin gin dou danahabi. Dauntoba dan indoc ebdebin an en namcir toua. 9:37 Doba Yesus enara bauni en mer, endagai: Ban beiya enohob. Anai sud hom genara dou ban iteitogini, kaba, Lusud Meraguna Mebin en ingga. 9:38 Sug sud hom mairesmougb graga en ouman Yesus mer an gin, kaba, en auni dou en, endagai: Adehsud, dan indoc ebdebin an ban hom namcir. Sug en enara ineg dou en dag ginohob, kaba, en mohorbrida badedeijlo naugb en esijaresa Yesus toua. 9:39 Doba Yesus enara dou en deit, endagai: Dan douwaden dau bogo naugb dan dekeba lusud daum. Dangga gareg en ecinaga dag en mairesmougb dougwo augwan namcirohob, kaba, dan desga en mairesi naugb en ecinaga augwan asesa ucugb deit. Doba gareg en eigdoumesa enin moho deseino dan dag en ecinaga augwan dag misenohob, kaba, dan deic dou en dag en edag sud hom mairesmougb gini. 9:40 Dangga sug leng Parisi merug hosa gedig len lesa desij lan ingga, len louman Yesus mer an gin, kaba, len leijidougwo en, lendagai: Ban bauwam an dag emen gin toua emiresmougwei? Dangga, isnaro. Anai emen, kaba, emen emeiya augwan dag misen namcirohob. 9:41 Doba Yesus auni dou len, endagai: Sug yen yowun yenin meigdoc mes arjaga dag yen meijiresmougb dougwo augwan namcirohob, kaba, sesar men gogom emeb naugb yen touwero. Doba iteitogini, kaba, yen yeigdoumesa yenin meijoho dag yen meijires esga naugb yen yeiya augwan dag misenohob, hang sesar men gogom eb naugb yen toua terimda.

Yohanes 10

10:1 Sug Yesus enara dou leng Yahudi meren mougtir dag graga dauwohob, kaba, en eic gainyenara hom eisaugb gembala dara men domba ucan dou len deit. Hanoba en enara dou len, endagai: Yen youman dan indir an areg dan den dou yen gin deigeigouhwahabi. Gareg en emeinesa misis aud dombaro, doba en aiga uro mes aud len, kaba, en edag sud hom geiyohora dara gesma dous. 10:2 Doba gareg en einesa misis mandeij aud domba, kaba, en eng meren gembala misen ginohob. Augwan gini asesa dag misen namcir. 10:3 Dangga hang, sud hom gesedougwo misis, kaba, en emoung misis dougwo en touwero, doba en ec misis dau en. Anai en ecinaga eni gembala misenohob. Dara sug en eb men domber meroho astesda len laugwan, kaba, len louman en mer. Hanoba en ahwan len dig medigo toua. 10:4 Sug en ahwan len dig medigohob, kaba, en einoisa len. Hanoba len toua loucan en, anai len lecinaga en mer dag misenohob. 10:5 Doba sug sud hom gus, kaba, len lemoucan enero. Doba len lougbdedau en namcir. Anai len lemecinaga en mer asesa ginero. 10:6 Doba areg Yesus eic bainyen dou len gini, kaba, len meru emobgesa mougwa hom touwero. 10:7 Sug len meru emobgesa gainyenara gragero, kaba, Yesus ens meijouhw dau gin ucan dou len deit, endagai: Yen youman dan indir gin deigeigouhw deitahabi. Danin dous eng dedag misis naugb domber. 10:8 Dangga gembala areg len leino dan indin sug nosa, kaba, domber len lemouman len merir touwero. Anai len laugwan ledag leng leiyohora dara leng lesma aremougb dou domba len dous. 10:9 Dan dedag misis. Gareg en einesa uro mes ogdoc dan, kaba, sesar men gogom emeb naugb en toua deitero. Doba dan deigdoc en dau gogom augwan toua namcir. Dara dan deic ared edeinyum dou en, anai en einesa. Hanoba en agunya ucucugb naugb gin toua namcir. 10:10 Doba sud hom gedig en ouwan eiyohora lusud meren aremougb, kaba, en en aud len naugb en esma meren ara ara dau len dous. Hanoba en eic gomom, dara en eic mor mor dou len toua. Doba dan, kaba, dan den aud yen naugb dan demeic maireseb menau geb huhugb dou yen dousero. Doba dan deic maireseb gini batij bobdaga dou yen toua terimda. 10:11 Dan dedag domber meren Gembala Misen gini. Anai dan demesedougwo dan indina agau ginero. Doba dan dohw dan indugt edug naugb len terimda. 10:12-13 Doba sud hom gedig lusud lohw momsi dou en dous, kaba, en emesa naugb emebehnehino domber ginero. Doba sug en eiya mihiloro mog mog en agunyen, kaba, en arges maga bougbdedau len namcir. Anai en emedag meren gembala misen dara en moho aiga len touwero. Dangga hang, sug mihiloro en einesa uro mes debin domber ginohob, kaba, en au len. Dara en eic dag len lougb laisoboro dau uro mes gin toua namcir. 10:14-15 Doba dan, kaba, dan dedag gembala misen naugb domber ginohob. Hang dan decinaga areg geb se len merdoc mes. Dara len lecinaga areg geb se dan indoc mes augwan. Aninim dag dan Indina ecinaga areg geb se dan indoc mes. Hanoba dan decinaga areg geb se en medoc mes augwan toua. Dangga hang, dan demougbdedau indan domber gin touwero. Doba dan dohw dan indugt edug naugb len namcir. 10:16 Dara indan domber gus gedig len lemeinesa uro mes ginbuma, kaba, len toua merugwengga. Dangga hang, dan Indina en arougb dan naugb dan dedehilon lenahabi, dan dedahwan len se uro mes gini. Dauntoba len laugwan dag hom dara meren gembala hom gin toua. Dara len gin, kaba, len lemohoiya dan indir touwero. Doba len laimo dan an areg dan darougb len an gin toua terimda. 10:17 Sug dan dohw dan indugt edug aud gomom naugb indan domber dag gini, kaba, dan Indina medoc gororougb dan toua terimda. Hanoba en emeic dan indireseb ucugb dou dan toues. 10:18 Dangga sud hom ingma, kaba, men goubesa naugb sug en eic gomom dou dan touwero. Doba dan daimo ucina gomom dau danin indoc mes aud gin dous. Anai indan goubesa inggebga naugb sug dan deic gomom dou danin. Dara indan goubesa inggebga naugb sug dan deic maireseb dou danin ucugb toua. Augwan gini aimo dau areg dan Indina enin eng ogod deinaugb dan deb sug nosa touohob. 10:19 Sug lusud louman Yesus mer an gin, kaba, len lenara laisedim eisaugb areg Yesus en dou len gin deit. 10:20 Leinyana, kaba, len len dougwo leng gus, lendagai: Dagiro, naugwe hang, yen youman sud hom en mer gina? Anai merna mog mog einesa en medoc mes, hang merei emeba en naugb en emenara aibibra dag gini toua. 10:21 Doba ligbum loto len gin merir, lendagai: Sud hom merna mog mog einesa en medoc mesohob, kaba, en emenara dag ginero. Dara mena mog mog men goubesa inggebga naugb sug en esga leng meriresmougb toua dag ginei? Naro, mena mog mog men goubesa emedeinyum naugb gin touwero. 10:22-23 Lona hom deit, kaba, Yesus en esebesa se lomod geb acec ELOHIM Men Tuari se cinogo Yerusalem, moho Solaiman. Anai leng Yahudi len loucimdeb se cinogo ingga naugb len merna eiseisan len merjemouwer sug len leigdoumesa ELOHIM Men Tuari dag ecabeci ucugb. Anai leng Siria, kaba, leic gogor dou ELOHIM Men Tuari gin sug nosohob. Doba lona naugb sug len lougwan ared debin len merjemouwer meren geicara gin, kaba, igda goho dugurij namcirohob. 10:24 Dangga sug Yesus esebesa se lomod ingga, kaba, leng Yahudi len len naugb louwa debin en sungga deit. Hanoba len leijidougwo en, lendagai: Ban beigtou se lona hosa deitahabi, hang ban bemens areg se misen dou emena? Anai sug ban bedag Sud Hom Geigdoc Emen Dau Emen Gogom Augwan dag misenohob, kaba, ban bens dou emen iteitogini. Dauntoba emen emeija emuwesa ban deitero. 10:25 Doba Yesus enara dougwo len merir, bendagai: Dan dos dadi danin dag Sud Hom Geigdoc Yen Dau Meijen Gogom augwan mougwa einyana deseino yenohob. Anai ganusbus areg dan daben deseino yen ogdoc dan Indina men goubesa, kaba, auma debin gin dou yenohob. Doba yen meigdoc emebdebin an dan indir an ginero. 10:26 Anai yen, kaba, yen yemedag indan domba misenero. Hang yen meigdoc aihagab gin toua namcir. 10:27 Anai indan domber misen, kaba, len merdoc emaihagab dan indirero. Doba len louman dan indir naugb len laimo dan terimda. Dara dan decinaga len toua. 10:28 Hang len lemomom toua deitero, doba dan deic maireseb menau geb huhugb dou len terimda. Dara sud hom ingma, kaba, en emesma len dau dan insira mes touwero. 10:29 Anai dan Indina gedig en eic len dou danohob, kaba, men goubesa edreg dau augwan namcir. Hang sud hom en emesma len dau en mesira mes touwero, doba en esedougwo len beb huhugb terimda. 10:30 Anai dan Indina aman amahwas dag hom naugb augwan gin touohob. 10:31 Sug leng Yahudi louman Yesus mer an gin, kaba, len louwan leic igdahab naugb led en toua deit. 10:32 Doba Yesus eijidougwo len, endagai: Dan dens dau indan geicara geigouhw areg dan Indina mer ogod an deb sug nosa einyana dou yenohob. Dangga se indan geicara geigouhw augwan gin, kaba, ogdoc aremer ara, hang yen meigdoc emehin naugb yen yemed dan icira gina? 10:33 Doba leng Yahudi launi ucugb dou en, lendagai: Ogdoc aban geicara geigouhw augwan gin, kaba, emen ememed ban icirero. Doba ogdoc sug ban beic ELOHIM moho bacecim, hang emen ememed ban icira gini. Anai ban, kaba, lusud misen dous. Doba ban beigdoumesa banin aboho dag ELOHIM toua. 10:34 Doba Yesus enara bauwun len merir an gin deit, endagai: ELOHIM enara se meijen gomnomna sug nosohob, endagai: Yen meijoho toua, dag dan indoho ELOHIM gin touohob. Gini misenei? You, gini misenohob. 10:35-36 Dara maman macinaga dag areg len log se Surad Injil Meb Mohon deb ginohob, kaba, hom emouwedoc touwero, doba augwan ebsugeb beb huhugb namcir. Dangga sug ELOHIM eija len dag ELOHIM gin touohob, kaba, dagiro, naugwe hang, yen yowun dan indoho dag dan deic ELOHIM en moho dacecim sug dan deigdoumesa dan indoho dag en Meisi gina? Anai len, kaba, ELOHIM esa en mer dou len dous. Doba eisaugb danin, kaba, dan Indina enin eng ouci dan. Hang en emesa dan aud lusud se cinogo gini naugb dan desai en mer dou len toua. 10:37 Dangga sug yen yeiya, doba dan demeicara demaimo areg dan Indina arougb dan an gini asesero, kaba, eigouhw naugb yen yemod meijina debsa dan an touwero. 10:38 Doba sug dan deicara daimo augwan gini dag misen namcirohob, kaba, eigouhw naugb yen yod meijina debsa dan ogdoc indan geicara gin toua terimda. Dauntoba yen yemeija meijuwesa dan deitero. Doba dau iteitogin, kaba, yen yecinaga se misen dag dan Indina aman amahwas amdoc anim dag hom namcirohob. Dan dacgeij dau yen dangga, anai yen yemouwan naugb yen meigdoc ebdebin an dan ogdoc areg dan desai dou yen gin touwero. Doba yen meigdoc oududa dan an gin terimda. 10:39 Sug leng Yahudi louman Yesus mer an gin deit, kaba, len louwan lagaigeij en. Doba en arges maga bec dau len namcir. 10:40 Sug Yesus arges maga beihwedau lenohob, kaba, en emeigtou sungga deitero. Doba en eihwedig duhu Yordan mebera nagama deit, aud usi sug Yohanes en ogun lusud se duhu sug nosa. Sug en edebeij us ginohob, kaba, en eigtou sungga toua. 10:41 Doba lusud leinyana, kaba, len ledebeij en sungga toua deit. Dangga sug len lehigdecin en an men geicara dag ganusbus gini, kaba, len lenara doum, lendagai: Yohanes, kaba, en emens ganusbus ingma dag gin dou mamanero. Doba areg en os badi sud hom gin an men geicara dou maman sug nosa, kaba, augwan gini asesa dag misen namcirohob. 10:42 Hang lusud leinyana dau len ingga, kaba, len lod merna debsa Yesus toua terimda.

Yohanes 11

11:1 Se lona hom, kaba, sud hom en moho Lasarus, en areba medam namcir. En, kaba, en eigtou se cinogo Betania geb deinyor cinogo Yerusalem se leng Yudea meren hancob ingga. Betania gin, kaba, Mariam dara Marta sug lan lagun ingga toua. 11:2 Mariam gin, kaba, en eng gida hom gedig en ehin aremoung mohu men ouwadebeda se maman Adehsud en mohora sug nosa. Hanoba en eic enin mougt modi agunin dau en mohora touohob. En eng meijemeito Lasarus gareba medam gini. 11:3 Dangga sug en areba medam dag ginohob, kaba, en medamouwera gini lan lasa marir deinaugb Yesus, landagai: Adehsud, sud hom gedig ban abdoc gororougb en, kaba, en areba medam namcir. 11:4 Sug Yesus ouman dau gini, kaba, en auni dou men logodeh, endagai: Men gareba gin, kaba, emoho gomom namcirero. Doba en areba dag gin dauntoba lusud leigdoumesa ELOHIM aman amoho agas ogdoc gin namcir. Anai dan toua dedag Lusud Meraguna Mebin ginohob. 11:5 Yesus, kaba, en medoc gororougb Marta, dara Mariam, dara Lasarus len gin namcir. 11:6 Doba sug en ouman dag Lasarus areba medam, kaba, en emeihweda sungga dedemedero. Doba en eigtou lona hwai debin ginahabi, en emeihweda. 11:7 Dangga sug lona hwai debin ginohob, kaba, en enara dou men logodeh deit, endagai: Yen yin. Maman macicugb dig Yudea ucugbda. 11:8 Doba men logodeh len len dougwo en, lendagai: Adehsud, dagiro, naugwe hang, ban becicugb dig Yudea deita? Anai leng Yahudi lesedeb naugb len led ban sug nosohob. 11:9 Doba Yesus auni ucugb dou len, endagai: Sug mouf inggebga naugb lusud, kaba, augwan adedim dag ijam sisa hobjerai. Gini misenei? You, gini misenohob. Dangga hang, gareg en ec naugb mouf gini, kaba, en emetohobro touwero. Doba en ec dara geigouhw namcir. Anai en eiya, doba sud hom gedig en eic mouf naugb aisema lusud se cinogo gin augwan, kaba, eni moongga desij enaba. 11:10 Doba sug en ec se lobeigbogo mogud, kaba, en etohobro bobsara namcir. Anai sud hom gedag mouf gin, kaba, en edug dau enohob. 11:11 Sug Yesus enara dag gin dauwohob, kaba, en enara dou len ucan deit, endagai: Maman mamsi Lasarus graga en atoudohob. Dangga hang, dan demeihweda naugb demdebir ens. 11:12 Sug men logodeh louman gin, kaba, len len dougwo en, lendagai: Adehsud, sug en atoudohob, kaba, cum, eic eigouhw ucugb dou en. Hang maman mamderses en touwero. 11:13 Len loudesa Lasarus atou misen, hang len lemenara dangga. Doba areg Yesus enara dou len graga, kaba, en aimeh dag Lasarus en omom misenohob. 11:14 Hang Yesus emenara aimeh dou len deitero. Doba en enara misen namcir dou len, endagai: Lasarus en omom misenohob. 11:15 Doba eigouhw naugb yen dag dan indug sunggaro. Anai sug yen yeiya dau indan geicara dou en se lona daiyamo gin, kaba, eic dag yen yemeija meijuwesa dan deitero. Doba eic dag yen meigdoc ebdebin an dan toua terimda. Dangga dan indoc momogo touwero, doba dan indoc eigouhw an gin namcir. Hang yen yin, maihwedaud Lasarus iteitoginda. 11:16 Sug Yesus men logodeh len louman dau gini, kaba, sud hom dau len, en moho Tomas, en enara bad mesir len gus medoc mes, endagai: Yen yin. Maman maimo maman Adehsud gini, dauntoba len ledeic gomom dou maman toueda. Dara lusud leija Tomas en moho dag lang marogoc agacgecim gin toua. 11:17 Sug Yesus dara men logodeh len ledebeij se Betania ginohob, kaba, len leiya, doba lusud lec Lasarus se lona hoguohob. 11:18 Dara Betania gini, kaba, emeb aigus dau Yerusalemero. Doba eb deinyorim namcir. 11:19 Dangga hang, leng Yahudi leinyana dau cinogo ingga, kaba, len toua len len naugb ledenara lad Marta dara Mariam mardoc mes an marjemeito gomom gin toua. 11:20 Sug Marta ouman dag Yesus en toua edagunyohob, kaba, en obga dagasenda. Doba Mariam, kaba, en eigtou se tu deb naugb en ougwan ared namcir. 11:21 Sug Marta edagasa Yesusohob, kaba, en eiyagarij en, endagai: Adehsud, sug ban bemen sugraga, kaba, dan injemeito en emomom dag ginero. Doba ban beigtou aigusi dau aman, hang en emomom gini. 11:22 Doba inggaida. Anai dan decinaga dag areg ban bacgeij dau ELOHIM, kaba, en auni dou ban toua. 11:23 Doba Yesus oho mer debin en, endagai: Ban abjemeito en emeises. 11:24 Dangga Marta en auni en mer ucugb dou en, endagai: Dan decinaga dau sug ELOHIM eigdoumesa lusud dau gomom ucugb se lona sug ouwedocahabi, en emeigdoumesa dan injemeito Lasarus en toues. 11:25 Doba Yesus en dougwo en, endagai: Danin eng deigdoumesa lusud dau gomom ucugb. Dara dan deic maireseb menau geb huhugb dou len toua. Dangga gareg en medoc ebdebin an dan, kaba, en emomom namcirero. Doba sug en omom dag ginohob, kaba, dan demeigdoumesa en aud maireseb menau geb huhugb ucugb deits. 11:26 Dangga gareg dan deic maireseb menau dou enohob, kaba, en emomom deit touwero. Doba maireseb huhugb eb naugb en terimda, anai en medoc ebdebin an danohob. Ban bod abina debsa areg dan den dou ban ginohobei? 11:27 Doba sug Marta ouman Yesus eijidougwo en dag gin, kaba, en eigdoumesa en moho, endagai: Adehsud, dan dod indina debsa ban an areg ban ben dou dan graga gin namcir. Anai dan decinaga bang ELOHIM Meisi misen gouwaden dau bogo se cinogo gini naugb ban beigdoc emen dau emen gogom augwan namcir. Hang ban bedag sud hom gedig ELOHIM esedeb en naugb en esa en aud emen gin touohob. 11:28 Sug Marta auni dag graga dou Yesus dauwohob, kaba, en ecicugb dig tueda naugb edeija medemeito Mariam. Hanoba en ec luluf dou en, endagai: Nanan Adehsud eijidougwo ban, anai en toua moongginohob. 11:29 Sug Mariam ouman gin, kaba, en eisa dedemeda. Hanoba en eihweda naugb edagasa Yesus toua. 11:30 Anai Yesus, kaba, en emedebeij cinogo Betaniabuma. Doba en eigtou se ucina mogumsi sug Marta agasa en deb grag dousaba. 11:31 Sug leng Yahudi gedig len leigtou desij Mariam se men tu naugb lenara lad en medoc mes graga len leiya, doba Mariam eisa dedemeda dig medigo gabeda, kaba, len toua leisa ucan en. Anai len loudesa endag en eihweda naugb edeb se aremogougb moda dous. 11:32 Sug Mariam edebeij Yesus se us gragohob, kaba, en eic mohorbrida badedeij cinogo deseino en. Hanoba en eiyagarij en, endagai: Adehsud, sug ban bemen sugraga, kaba, dan injemeito en emomom dag ginero. Doba ban beigtou aigusi dau aman, hang en emomom gini. 11:33 Sug Yesus en eiya, doba Mariam eiyagarij en. Dara leng Yahudi gedig len loucan enohob len laugwan leb dangga toua, kaba, en medoc eisaugb namcir. Hanoba en medoc enmohomoho, kaba, en eijidougwo len dara mer medam, endagai: 11:34 Yen yedec en deb sugiro? Sug en eijidougwo len dangga, kaba, len launi dou en, lendagai: Adehsud, ban bin naugb emen emdens dou banahabi. 11:35 Len leicara dag gin, kaba, Yesus eb medam debin len namcir. 11:36 Sug leng Yahudi leiya, doba en eb dag gin, kaba, len loudesa endag en eb an Lasarus. Dangga hang, len lenara doum, lendagai: Yen yeiya en medoc gororougb Lasarus gin namcir, hang en toua emeb an en gini. 11:37 Doba ligbum, kaba, len lenara ceg ceg en, lendagai: Sud hom gin, kaba, en esga lusud gus merireseb naugb len leiya lo asesa ucugwohob. Dangga dagiro, naugwe hang, en emen dougwo Lasarus, dauntoba en emomom touwero? 11:38 Sug Yesus en ouman, doba len lenara ceg ceg en dag gini, kaba, eic en medoc enmohomoho medam deit. 11:39 Dangga sug en edebeij aremogougb modohob, kaba, en arougb len dara mer medam, endagai: Yen yegririj igdohos meh dau. En arougb len dag gini, anai aremogougb moda gin, kaba, dag igdohos mes dous. Dangga, kaba, len leic igdahab meh lauf dougwo toua. Doba Lasarus medamouwa Marta, kaba, en en dougwo Yesus, endagai: Adehsud, dangga, isnaro. Anai len lec en se lona hogu beiyemohob. 11:40 Doba Yesus enara bauwun en mer, endagai: Ban ben dougwo dan dag gin, anara? Anai dan den dou ban graga dag sug ban abdoc ebdebin an dan, kaba, dan demens dau ELOHIM men goubesa dou ban touesa? 11:41 Sug len louman Yesus mer an gin, kaba, len laimo en mer naugb legririj igdohos meh dau gin toua. Sug len leicara dag ginohob, kaba, Yesus oho mergo dig bogo. Hanoba en enara dou en Mena, endagai: Akeinya, dan den sijo medam dou ban, anai dan decinaga dag ban boc ban abums dou dan indir terimda. 11:42 Dangga hang, areg dan dacgeij dau ban iteitogini, kaba, dan demacgeij naugb danin touwero. Doba dan dacgeij dau ban, dauntoba sug lusud gini len leiya, kaba, len merdoc ebdebin an dan dag ban besa dan aud lenohob. Anai naugb danin, kaba, dan decinaga dag ban bemoc ban abums dougwo dan indir mougwa hom touwero. Doba ban bou dou dan an areg dan den dou ban terimdohob. 11:43 Sug Yesus enara dag gin dou en mena dauwohob, kaba, en eija Lasarus dara mer medam, endagai: Lasarus, ban beisa dau igdohos mes en. 11:44 Dangga sud hom gomom graga, kaba, en agunyen. Doba minc meti gedig lusud lahud en mesira dara mohora, dara minc meti gedig len laihiron dougwo mebes augwan eb smougb mougwaba. Dangga, kaba, Yesus arougb len deit, endagai: Yen yesga areg geb se mos gin augwan dau en. Hanoba yen yarges en beihweda. 11:45 Sug leng Yahudi gedig len loucan Mariam graga len leiya ganusbus gini, kaba, len leinyana merdoc ebdebin an Yesus toua. 11:46 Doba ligbum dau len, kaba, len leihweda naugb len ledoho ledas Yesus an men geicara gini dou leng Parisi toua. 11:47 Dangga sug leng Parisi len louman dau Yesus men ganusbus ginohob, kaba, leni dara gembala gesa taij meren mougtir an meren Majelis len laugwan loucimdeb naugb len lohw merdocedoum eisaugb Yesus toua. Sug len loucimdebohob, kaba, len leijidougwom, lendagai: Sud hom gini en aben ganusbus einyana terimdaha. Dangga maman mab ara dara sud hom gina? 11:48 Anai sug maman mamsoho en deb, kaba, lusud lemaimo maman deitero. Doba len laugwan merdoc ebdebin an en dous. Dangga cum, kaba, leng Roma meren mougtir len leinesa maman cinogo gin naugb len lod ELOHIM Men Tuari augwan baisoboro. Dara len leic mor mor dou maman hancob augwan toua dangga. 11:49 Doba Gembala Gesa Taij Meren Mougt Mera Medam se arisogomoc ingga, en moho Kayapas, kaba, en esa mer debin len, endagai: Yen yenara dag yen meiju edgom, anara? 11:50 Eigouhw naugb sud hom en omom dous dau gedag maman lusud laugwan lemomom, isnaro. 11:51 Doba areg Kayapas en en dou len gini, kaba, en emen dau enin medoc mesero. Doba sug en edag Gembala Gesa Taij Meren Mougt Mera Medam se arisogomoc inggohob, kaba, ELOHIM enin eng arautut en naugb en medoc ens deb eisaugb Yesus sug en omom naugb leng Yahudi meren sesar augwan toua. 11:52 Dara en emomom naugb leng Yahudi meren sesar hom gin dousero. Doba en omom naugb ELOHIM mehir geb se cinogo gus augwan toua. Dauntoba len lemaisobororo, doba en ouci len laugwan debinim hom dous. 11:53 Dangga sug mougtir len louman Kayapas mer an ginohob, kaba, len lohw merdocedoum se lona ingga naugb sug len leic gomom dou Yesus namcir. 11:54 Sug Yesus ecinaga ginohob, kaba, en emeic maga ainyes se leng Yahudi merufu dag nosa deitero. Doba en eihwedan men logodeh dau leng Yudea meren hancob gini dig cinogo hom, moho Epraim, geb deinyor lomougwisa naugb len leigtou sungga dous. 11:55 Doba lona ingga, kaba, irir sug leng Yahudi lougwan ared debin lona sug ELOHIM esga len merjemouwer dau cinogo Mesir sug nosohob. Dangga leinyana len len dau dingan dingan naugb leisaugb dig Yerusalem. Dauntoba len ledu lenin meraga ecabeci deseino ELOHIM nosa dauwahabi, len lemougwanara se lona gouji gin toua. 11:56 Dangga sug len graga ledoucimdeb se ELOHIM Men Tuari maga, kaba, len lehilon dougwo Yesus sungga. Hanoba len leijidougwom, lendagai: Yen youdesa dagiro? Sug maman maugwanara gini, kaba, en toua emensei? 11:57 Len len dangga doum, anai gembala gesa taij meren mougtir dara leng Parisi len lesulou len deb nosohob, dag gareg en eiya Yesus mog sugiro, kaba, len leden dou len toua, dauntoba len lagaigeij en namcir.

Yohanes 12

12:1 Sug lona senggem debin Lona Gohw Bedreg ginohob, kaba, Yesus en toua eisaugb dau cinogo Epraim dig cinogo Betania geb deinyor Yerusalem nosahabi. Anai cinogo gin, kaba, sud hom moho Lasarus gedig Yesus eigdoumesa en dau gomom nosohob, men cinogo ingga. 12:2 Sug en edebeij Betania ginohob, kaba, len sungga lougwan ared dou en an men logodeh toua. Dara Marta en toua ousa len sungga naugb ohw ared an len toua. Doba Lasarus, kaba, en eigtou desij len gus se boromei naugb letara desij Yesus dous. 12:3 Sug len letara, kaba, Mariam en edeic ampo taitaij hom an aremoung mohu men ouwedebeda. Men ouwedebeda gin, kaba, mera eisaugb namcir, anai len lemeic aremoung mohu gus lemed se touwero, doba len leic enin mohu mogud dous. Mohu gin, kaba, len lesinsin dau sogo mom gedig men ouwedebeda gini. Dangga sug en edebeij Yesusohob, kaba, en eir aremoung mohu men ouwedebeda gini se en mohora. Hanoba en eic enin mougt modi baihin aremoung mohu gin se Yesus mohora toua. Hang men gouwedebeda gin, kaba, ecinten se tu mes ingga augwan namcir. 12:4 Doba sud hom dau Yesus men logodeh, en moho Yudas dau cinogo Keriod, sug en eiya dau gini, kaba, en enara debin Mariam, endagai: 12:5 Ban beicara dag gin, anara? Eigouhw naugb maman maic mauma aregoufu, hanoba maman maohw an leng merunggwereij dousa? Anai mani men ouwadebeda gin, kaba, mera eisaugb namcir dag len leic aregoufu perag mogo huntun homoiyahabi, len lemauma gina? 12:6 Yudas en enara dag gini anai en medoc emerij an leng merunggwereij dag misenero. Doba en en len meroho baiyeiyo dougwo dous. Dauntoba sug len leic aregoufu dou len, kaba, en esedi ingma naugb enin. Anai en eng oho i moto an meren aregoufu augwan toua. Dara eni sud hom gedig en ehin magan Yesus dou leng Yahudi meren mougtir gini. 12:7-8 Doba sug Yesus ouman Yudas mer an gin, kaba, en en dougwo en, endagai: Ban bemen dougwo en danggero. Anai leng merunggwereij, kaba, len merugwengga desij yen terimda. Doba dan, kaba, dan demeigtou desij yen deitero. Anai lona hosa deit, kaba, dan domom dau yenohob. Dangga hang, men geicara gin, kaba, naugb lona sug len ledec dan dag gini touohob. 12:9 Sug leng Yahudi louman, doba Yesus en edebeij se Betaniohob, kaba, len toua leihweda sungga naugb ledeiya eni. Dara len lemeihweda sungga naugb lemedeiya Yesus hom dousero. Doba len leihweda se Betania gini naugb ledeiya Lasarus toua. Anai len louman dag Yesus eigdoumesa eni dau gomom sug nosohob. 12:10 Dangga sug gembala gesa taij meren mougtir len leiya, doba Lasarus en maireseb ucugwohob, kaba, len lohw merdocedoum naugb len lemeic gomom dou Yesus dousero. Doba len lohw merdocedoum naugb len leic gomom dou Lasarus en toua. 12:11 Anai lusud leinyana sug len leiya dau Lasarus dag Yesus eigdoumesa en dau gomom ucugwohob, kaba, len louwa dau mougtir gin namcir. Hanoba len merdoc ebdebin an Yesus dous. 12:12-19 Doba leng areg len lesa lauweila Yesus sug en eija Lasarus en en dau igdohos mes naugb maireseb deitohob, kaba, len ledecic dau gin dou leng louwa debin Lona Gohw Bedreg se cinogo Yerusalem len laugwan toua. Dangga se loneinda sug len louman, doba Yesus en toua en en aud cinogo Yerusalem engga, kaba, len leinyana len logod duleg meh. Hanoba len leihwedan naugb len ledagasa en se ucina mogumsi. Anai sug len louman dau men ganusbus dag ginohob, kaba, len merdoc erleij naugb len ledeiya en toua. Dangga sug len lec merohora aud en dag gini, kaba, len lagahugouhw an ELOHIM, lendagai: ELOHIM, emen emen sijo dou ban eisaugb sud hom gini. Dangga hang, ban beic geigouhw dou en terimda. Anai en en se Adehsud, ban aboho, naugb en eperwei ban abuhw, dauntoba en edag mougt mera medam naugb emeng Israel deit. Doba sug leng Parisi len leiya dau gin, kaba, len lomi an doum, lendagai: Maman mameba dagiro deita? Anai lusud se cinogo gin augwan len louwa audi en dau mamandohob gina? Doba Yesus, kaba, en eic keledai hom. Hanoba en eisa medgomori naugb en eihwedan dig Yerusalem, dauntoba men geicara augwan gin, kaba, esogwa deisa areg sud hom en og deb se Surad Injil Meb Mohon deb eisaugb sug nosa touohob, endagai: Yeng dau cinogo Yerusalem, yen yemahau deitero. Anai yen yeiya, doba meijen mougt mera medam en eisa keledai medgomori naugb en en aud yenohob. Dara Yesus men geicara augwan se lona ingga, kaba, men logodeh merdoc emobgesa mougwa hom touebma. Doba edebeij lona sug Yesus en omom. Hanoba ELOHIM eigdoumesa en aud gogouf cucugb se bogo ucugb touohob, kaba, len merdoc emdeiseisan lusud meren geicara dou en se lona ingga toua. Anai augwan gini esogwa deisa areg sud hom en og deb se Surad Injil Meb Mohon eisaugb en asesa sug nosohob. 12:20 Se lona sug leng Yahudi louwa debin Lona Gohw Bedreg se Yerusalem, kaba, merug hosa dau leng Grika len toua merugwengga desij len naugb len lesijaresa ELOHIM toua. 12:21 Dangga len ledebeij sud hom dau Yesus men logodeh, moho Pilipus, dau cinogo Bedsaida se leng Galilea meren hancob. Sug len ledebeij enohob, kaba, len lacgeij dau en, lendagai: Emen toua emouwan naugb emdeiya Yesusahabi. 12:22 Sug Pilipus ouman len merir an ginohob, kaba, en eihwedaud mesi hom, moho Andreas. Hanoba en eden aremer gin dou en, kaba, lan lahwas laihweda naugb ledecic aremer gin dou Yesus toua. 12:23 Doba Yesus auni dou len ucugb, endagai: Yan yamenara dou danlo. Anai lona naugb sug ELOHIM eigdoumesa Lusud Meraguna Mebin dan indoho ainyes deseino lusud laugwan, kaba, ebeij deinyorohob. 12:24 Anai tramdad mogo hom, doba lusud lemeba se gos habero, kaba, mogo hom smougb mougb, dangga dous. Doba sug len leba mogo hom gin se gos, hanoba en etaha, kaba, era mera einyana toua. Yen youman dan indir gin deigeigouhwahabi, anai augwan gini asesa dag misen namcir. 12:25 Dangga gareg dau yen en ebehnehino enin maga dougwo sug omom, kaba, cum, en mena toua ediyebeiya dau en namcir. Doba gareg dau yen, en eic enin maga baseslo se cinogo gini, kaba, en emdesma mena maireseb menau geb huhugb namcir toua. 12:26 Dara gareg dau yen en ouwan aimo dan, kaba, en emaimo enin men ucina deitero. Doba esloulougb naugb indan sogougb gin, kaba, en esogwa deisa dan induhw asa ucina gedig dan daimo gin terimda toua. Dauntoba sugiro dan indugwengga, kaba, en toua moongga desij dan sungga toua. Dara gareg en eicara baimo dan asa ucina gini terimda, kaba, dan Indina emeigdoumesa en moho agas an gin toues. 12:27 Sug Yesus esulou len laugwan dag graga dauwohob, kaba, en ens dau en omom mougwa hom dara dou len deit, endagai: Lona naugb sug lusud leic dan indug erij aud gomom dou dan, kaba, edagasa namcirohob. Dangga dan indoc eijesa medam an gin toua. Hang dan demacgeij ara ara dau dan Indina ena? Dan dacgeij dag en eigdoc dan dau ucina mog erij gindei? Naro, dan demeicara danggero. Doba dan daimo ucina gin terimda edebeij sug ouwedocahabi. Anai dan Indina enin eng esa dan sugini naugb dan daimo ucina aud gomom ginohob. 12:28 Sug Yesus enara dau sug en omom dag graga dou len bouwohob, kaba, en ocuncum dou en Mena ucan deit, endagai: Akeinya, ban bens banin aboho ainyes deseino len ginahabi, dag ban aboho gini agas medam namcirohob. Sug Yesus enara dag gin ineg dou en Menohob, kaba, en Mena auni dau bogaden dou en ucugb deit, endagai: Dan dens dau danin indoho dag agas medam ainyes dou len sug nosohob. Dara dan demens danin indoho ainyes dag gini dou len deit toues. 12:29 Sug leng lesa desij Yesus len louman mer gin, kaba, ligbum len lenara, lendagai: Yen youman bagar mougb engga. Doba ligbum, kaba, len loto merir, lendagai: Bagar mougb, isnaro, doba malaikad hom enara dou en. 12:30 Doba Yesus enara dou len, endagai: Mer dau bogo gin, kaba, naugb dan, isnaro. Doba naugb yen dous. 12:31 Anai lona naugb sug ELOHIM ogod aremer gogom deinaugb lusud se cinogo gini, dara sug en owun meren mougt mera medam, moho Bilis, bobsara dau len toua, kaba, edagasa namcirohob. 12:32 Dangga sug lusud leigdoumesa dan taiba ainyes se cinogo ginohob, kaba, dan debin lusud se cinogo augwan naugb len louwa aud dan toua. 12:33 Sug Yesus enara dag graga, kaba, en ens dau ucina areg lusud laimo an en naugb sug len leic gomom dou en dou len toua. 12:34 Doba lusud graga, kaba, len lenara dougwo en mer an gin, lendagai: Maman gomnomna enara deb, bendagai: Sug Sud Hom Geigdoc Emen Dau Emen Gogom Augwan en enohob, kaba, en emomom dau emen deitero. Doba en esan emen beb huhugb namcir. Dangga dagiro ban ben dou emen dau sug Lusud Meraguna Mebin en enohob, kaba, dag lusud leigdoumesa en beb ainyes se cinogo gini naugb en omom toua deita? Lusud Meraguna Mebin gin, kaba, eni garena? 12:35 Doba Yesus auni dou len, endagai: Iteitogini, kaba, mouf inggebga naugb aisema yenaba. Dangga yen yec meijohora se ucina gin dedemeda sug mouf ebaba, dauntoba loba emogod dougwo yenero. Anai gareg en ainyen naugb ec mohora se loba gin, kaba, en emecinaga ucina touwero. 12:36-37 Dangga hang, yen yemesbes an mouf gini touwero. Doba sug en moongga desij yen gin, kaba, yen yod meijina debsa en terimda. Dauntoba yen yemedag lobeigbogo men logodeh deitero, doba yen yedag mouf men logodeh dous. Sug Yesus enara dag graga dou len bouwohob, kaba, en emens enin dou len deitero. Doba en en aud enin dau len namcir. Anai en aben ganusbus einyana abeba len meriresi ginohob. Doba len merdoc emebdebin an en dag en eng Sud Hom Geigdoc Len Dau Sesar Men Gogom Augwan gin touwero. 12:38 Augwan gini aimo asesa dau areg sud hom gesai ELOHIM moro sug nosa, en moho Yesaya, en omi an dou ELOHIM sug nosa touohob, endagai: Adehsud, emen emesai ban aburo dou len terimdohob. Doba gareg en emod mena debsa gina? Dara aban goubesa mougb, kaba, ban bemens dou gara en deita? Anai, lingmaro. 12:39 Dangga hang, sug leng Yahudi graga leicara dag gini an Yesus toua terimdohob, kaba, ELOHIM eic len meriresmougb dara len merdoc agadgeij dougwo Yesus en mer dou len toua. Hang emedeinyum naugb sug len merdoc ebdebin an en touwero. Doba len lotogoto en mer gin namcir. Augwan gini aimo dau areg maman Adehsud ELOHIM en enara deb dou Yesaya gin sug nosa touohob, endagai: 12:40 Len lemod merna debsa dan indir ginero, kaba, dan deic dag len meriresmougb dougwo dan namcir. Dauntoba sug len leiya, doba len lemecinaga meijouhw asesero. Dara dan deic len merdoc agadgeij dougwo dan dou len toua. Dauntoba sug len lecinaga, doba len meru emobgesero. Anai dan demouwan naugb sug len lecicugb aud dan, dauntoba dan deic geigouhw dou lenlo. 12:41 Doba areg Yesaya en ens gin, kaba, en emens eisaugb men lusud se lona ingga dousero. Doba en og augwan gini eisaugb Yesus sug ELOHIM eigdoumesa en moho agas medam se lona daiyamo gacin toua. Anai en eiya augwan gin deb sug nosohob. 12:42 Dangga hang, edag mougtir, kaba, len leinyana lohoiya en mer namcir. Doba leinyana dau len, kaba, len merdoc ebdebin an Yesus touohob. Doba len ledu meruwedau lenin dous, anai len lemouwan naugb sug leng Parisi lemerba len dau meren goucimdebero. Hang len lemos lemadi Yesus moho deseino lusud touwero. 12:43 Anai len louwan naugb lusud se cinogo gini leigdoumesa len meroho dous. Doba ELOHIM, kaba, inggaida. 12:44 Sug Yesus esulou lusud naugb len merdoc ebdebin an mouf dag graga bouwohob, kaba, en enara se mer medam debin gin dou len deit, endagai: Gareg dau yen, en od mena debsa dan indir an areg dan desai dou yen gin, kaba, en emod mena debsa dan dousero. Doba en od mena debsa sud hom gedig en esa dan aud yen gin touohob. 12:45 Dangga toua, gareg dau yen en eiya dau indan geicara, kaba, en medoc eica sud hom gesa dan aud yen men geicara gini touohob. 12:46 Anai dan douwaden dau bogo dag mouf se cinogo gini. Dauntoba gareg en medoc ebdebin an areg dan desai dou en gini, kaba, en emeigtou se lobeigbogo deitero. Doba en ecinaga areg se geica men meijouhw augwan asesa namcir toua. 12:47-48 Gareg dau yen en ouman dau areg dan desai dou yen gini, doba en emaimoro, kaba, dan demasij gogom debin en touwero. Doba ara ara gus inggebga naugb sug ogod gogom deinaugb en. Ara ara gin, kaba, dag areg dan desai dou enohob. Dangga gareg en otogoto dan, hanoba en emebin dan indir an areg dan desai dou en touwero, kaba, dan indir gini emogod gogom deinaugb en se Lona Gouwedoc gin toues. Anai dan, kaba, dan demouwaden dau bogo naugb dogod gogom debin lusudero. Doba dan douwaden dau bogo naugb dan deigdoc len dau meren gogom augwan dous. 12:49 Augwan gini misen namcir. Anai areg dan desai dou yen gin, kaba, dan demeic dau danin indoc mes dou yenero. Doba dan Indina gedig en esa dan aud yen gin, kaba, enin eng ens dau areg dan denara dou yen augwan dou danohob. Hanoba en arougb dan naugb dan desai dou yen toua. 12:50 Dara dan decinaga dau areg en mer ogod an dou dan naugb dan desai dou yen gin, kaba, eic maireseb menau geb huhugb dou yen toua. Dangga areg dan desai dou yen gin, kaba, dan demeic dau danin indoc mesero. Doba dan daimo dau areg dan Indina en mer ogod an deb naugb danohob dous.

Yohanes 13

13:1 Lona hom dau sug leng Yahudi lougwan ared debin lona sug ELOHIM esga len merjemouwer dau cinogo Mesir sug nosa, kaba, Yesus en ecinaga dag men lona ebeij deinyorohob naugb sug en ededau cinogo gini aud en Mena ucugb dangga. Dara en medoc emarges men logodeh debero. Doba en medoc gororougb len dau lona sug en ouci lenohob terimda edebeij lona sug en omom dau len toua. 13:2 Dangga sug Yesus dara men logodeh len letara se loba, kaba, Bilis en outi se Simon meisi, moho Yudas dau cinogo Keriod, en medoc mes naugb en edehin magan Yesus dou leng Yahudi meren mougtir toua. 13:3 Doba Yesus en medoc momogo an ginero. Anai en ecinaga dag en Mena eic goubesa mougb naugb augwan dou enohob. Dara en ecinaga dau sug en en dau ELOHIM enohob, kaba, dag en emecicugb aud en toues. 13:4 Dangga sug len letara, kaba, Yesus en eisa besa. Sug en eisa besohob, kaba, en eg men sansun gouji deb. Hanoba en eic minc hom naugb ahud meiyo maga. 13:5 Sug en eic minc bahud meiyo magohob, kaba, en eir duhu deisa igdebir gouji hom. Hanoba en edu men logodeh merohora toua. Sug en edu len merohorohob, kaba, en eic minc graga dau meiyo maga naugb en agun duhu mohu dau len merohora toua. 13:6 Doba sug Yesus edebeij irir Simon Petrus naugb en edu en mohora toua, kaba, Simon Petrus en dougwo en, endagai: Adehsud, banin eng bedu dan indohora ginei? 13:7 Doba Yesus enara bauni en mer ucugb, endagai: Indan geicara dou yen gini, kaba, ban bemecinaga meijouhw augwan asesa touebma. Doba se lona daiyamo gacin, kaba, ban bemecinaga meijouhw eisaugb gin augwan dag misen toues. 13:8 Doba Petrus oungben dougwo Yesus, endagai: Dan demouwan naugb ban bedu dan indohora namcirero. Dangga Yesus auni ucugb dou en deit, endagai: Sug dan demedu ban abohora ginero, kaba, emedeinyum naugb ban bemedag indan logodeh touwero. 13:9 Sug Simon Petrus ouman Yesus mer an dag gini, kaba, en enara dou en, endagai: Adehsud, gedangga, kaba, ban bemedu dan indohora dousero. Doba ban bedu dan insira dara dan indugt toua. 13:10 Doba Yesus enara bauwun Petrus mer, endagai: Gareg en omceduhu ginohob, kaba, en emedu en maga dedemeda deitero. Doba en edu en mohora gini ucucugb dous, anai en maga gus augwan, kaba, ecabeci namcirohob. Dangga hang, iteitogin, kaba, sud hom dau yen enin dous eng ogoraba. Yeng gus, kaba, yen yaugwan gecabecohob. 13:11 Yesus enara dag graga dou len, anai enin ecinaga sud hom gohw en dou len gus en moho dag misenohob. Hang en enara dou len dag sud hom dous eng ogoraba. Doba len gus laugwan lecabecohob. 13:12 Sug Yesus edu men logodeh merohora dauwohob, kaba, en eg men sansun gouji ucugb. Hanoba en edeigtou se en mohw deit. Sug en edeigtouohob, kaba, en eijidougwo len, endagai: Yen meigdoc obgesa indan geicara dou yen gini men meijouhwohobei? Era anambei? 13:13 Anai sug yen yenara dou dan, kaba, yen yeija dan indoho dag Guru. Dara yen yeigdoumesa dan indoho dag meijen Adehsud touohob. Areg yen yeija dan dag gin, kaba, augwan asesa dag misen namcir. Anai dan dedag sud hom gens meijouhw asesa dou yen. Dara dan dedag meijen mougt mera medam naugb dan darougb yen an ara ara gin touohob. 13:14 Dangga hang, sug yen yeiya, doba meijen Guru, dara meijen Adehsud, en owun enin medoc mes arjaga anim naugb en edu yen meijohora dag ginohob, kaba, eigouhw naugb yen toua yowun yenin meigdoc mes arjaga naugb yen yedu yenin meijohora ucucugb toua. 13:15 Anai indan geicara gin, kaba, dag ansins dou yen, dauntoba yen yesogwa dan indohotimei mohw anim dag gin toua terimda. 13:16 Anai sud hom gedag sogougb, kaba, en moho emedreg dau men mougtero. Dara sud hom gesai moro, kaba, en moho emedreg dau sud hom garougb en an touwero. Doba en moho eb tainya dous. Yen youman dan indir an areg dan den dou yen gin deigeigouhwahabi, anai augwan gini asesa dag misen namcirohob. 13:17 Dangga hang, sug yen yecinaga areg graga dag misenohob, kaba, eigouhw naugb yen yaimo augwan gini anim ucucugb terimda. Anai sug yen yeicara dag gin, kaba, ELOHIM eic geigouhw dou yen toua namcir. 13:18 Areg dan den dou yen gin, kaba, dan demen eisaugb yen yaugwanero. Anai sug dan douci yen sug nosa, kaba, dan decinaga areg geb se yen meigdoc mes augwan debohob. Hang dan decinaga dag sud hom dau yen, kaba, en eineg mohotimei an dan toua. Doba dan douci en, dauntoba esogwa deisa areg Daud en eiyagarij an se Surad Ugwaremer deb sug nosa touohob, endagai: Dan insi hom gedig en et ared dara dan, kaba, en eineg en mohotimei an dan ucugwohob. 13:19 Dan dens dau gin augwan deb dou yen nosahabi. Dauntoba sug aremer augwan gini agunya ainyesohob, kaba, yen yod meijina debsa dan dag dan dedag Adehsud Geis Huhugb Sugraga gini. 13:20 Dangga gareg en ebin sud hom gedig dan desa en aud en naugb en esai dan induro dou en, kaba, en ebin dan touohob. Dara gareg en ebin dan, kaba, en ebin sud hom gesa dan aud en gin touohob. Yen youman dan indir an areg dan den dou yen gin deigeigouhwahabi, anai augwan gini asesa dag misen namcirohob. 13:21 Sug Yesus enara dag graga bouwa dou men logodehohob, kaba, en medoc momogo medam an gin deit. Hanoba en emenara dag aimeh dou len deitero. Doba en enara moho ainyes dou len namcir, endagai: Yen youman deigeigouhw deitahabi. Cum, kaba, sud hom dau yen en emohw dan dou len gus toues. Augwan gini asesa dag misen namcir. 13:22 Sug men logodeh len louman dau gin, kaba, len leineg lauweilem ucucugb namcir. Anai len leija meruwesa dag gareg dau len en eineg mohotimei an Yesus gina? 13:23-24 Dangga Simon Petrus en mesira bainyen dou godeh hom gedig en eigtou desij Yesus dig en mesira misen. Hanoba en enara dou en, endagai: Ban beijidougwo Yesus dag gareng dau maman en eineg mohotimei an en gina? En acgeij godeh hom gini naugb en eijidougwo Yesus an dangga, anai Yesus medoc gororougb godeh hom gin namcirohob. 13:25 Dangga godeh hom gin, kaba, en ocuc desij Yesus. Sug en ocuc desij enohob, kaba, en eijidougwo en, endagai: Adehsud, gareg dau emen en eineg mohotimei an ban gina? 13:26 Doba Yesus auni dou en, endagai: Ban beiya dau sug dan dogun roti mogo hom se mohu. Hanoba dan deic dou sud hom, kaba, sud hom, inggang, emeineg mohotimei an dans. Sug Yesus auni dag gin dou en dauwohob, kaba, en ekris roti naugb en ogun se mohu. Hanoba en eic an dou Simon meisi, moho Yudas dau cinogo Keriod, en toua. 13:27 Sug Yesus eic roti dou Yudas inegohob, kaba, Setan outi se Yudas en medoc mes toua. Dangga hang, Yesus arougb en, endagai: Areg ban besedeb se ban abdoc mesohob, kaba, ban bemamsoho deitero. Doba ban beicara baimo dedemeda iteitogini an gin namcir. 13:28 Doba areg Yesus arougb Yudas an gini, kaba, men logodeh gus gedig len leigtou desij en naugb letara, kaba, len lemecinaga meijouhw augwan asesero. 13:29 Dangga hang, ligbum, kaba, len loudesa endag Yesus arougb Yudas naugb en edouma ara ara naugb Lona Gohw Bedreg gini. Dara ligbum deit, kaba, len loudesa Yesus arougb en naugb en edohw aregoufu dou leng merunggwereij. Anai Yudas gin eng en edag mougt naugb meren aregoufu augwan. 13:30 Dangga sug Yudas eic roti dau Yesus mesira inegohob, kaba, en arges maga bec an namcir. Doba sug en eihwededau len gin, kaba, loba osunir touohob. 13:31 Sug Yudas eihwededau lenohob, kaba, Yesus enara dou men logodeh gus, endagai: Cum, kaba, ELOHIM emeigdoumesa Lusud Meraguna Mebin dan indoho, beb ainyes deseino lusud. Dara dan demeigdoumesa en moho beb ainyes deseino lusud laugwan toues. 13:32 Doba sug dan deigdoumesa ELOHIM en moho beb ainyes deseino lusud dag ginohob, kaba, en emamsoho dan deb touwero. Doba en emeigdoumesa Lusud Meraguna Misen dan indoho beb ainyes ucugb deseino len laugwan dedemeda toues. 13:33 Dan indihirija, dan demeigtou desij yen terberbahabero. Doba cum, kaba, dan deihwededau yenohob. Dangga yen yehilon dougwo dan, doba yen yemdeiya dan deitero. Dara ucina gedig dan deraga gini, kaba, yen yemaimo dan se ucina gin touwero. Gini aninim dag dan den dou leng Yahudi meren mougtir sug nosa touohob. 13:34 Hang iteitogin, kaba, dan deic gomnomna menau dou yen dag gini: Yen meigdoc gororougwim namcir. Dara yen meigdoc gororougwim gin, kaba, aninim dag dan indoc gororougb yen sug nosa touohob. 13:35 Anai sug yen meigdoc gororougwim dag gin ucucugb terimda, kaba, ens dou lusud laugwan dag yen yedag indan logodeh misen touohob. 13:36 Sug Yesus men logodeh len louman dag Yesus emeigtou desij len terberbahabero, kaba, Simon Petrus eijidougwo en eisaugb gini, endagai: Adehsud, ban beihwedigero? Doba Yesus auni dou en, endagai: Ucina gedig dan deraga gin, kaba, ban bemaimo dan se ginbuma. Doba se lona daiyamo gacin, kaba, ban beicara baimo dan se ucina gin toua. 13:37 Dangga Petrus auni Yesus mer ucugb, endagai: Adehsud, dagiro, naugwe hang, ban ben dougwo dan naugb dan demaimo ban asa ucina gini iteitoginero. Anai dan desedeb naugb sug dan dohw dan indugt edug naugb banohob, gina? 13:38 Doba Yesus auni en mer ucugb dou en, endagai: Ban bohw ban abugt edug aud gomom naugb danohobei? Naro, anai ban bouman deigeigouhwahabi. Sug berougwu emeba mer mougwa hombuma, kaba, ban baideido dougwo dan mougwa homoi icirohob. Augwan gini asesa dag misen namcir.

Yohanes 14

14:1 Sug Yesus esulou men logodeh dag graga bouwohob, kaba, en enara bad len merdoc mes ucan gin deit, endagai: Yen meigdoc emeijesa ucan danlo. Doba yen yod meijina debsa dan an areg dan den dou yen terimda. Aninim dag yen yod meijina debsa ELOHIM sug nosa touohob. 14:2 Anai se dan Indina men tu, kaba, dimei einyana inggebga. Dangga dan deihwedaud en naugb dan desedeb areg geb se dimei gini augwan naugb yen toua. Gini misenero, kaba, dan demen dau gin dou yen touwero. Doba misen namcir. 14:3 Dara dan demeihwededau yen terimda touwero. Doba sug dan desedeb ara ara se dimei naugb yen debohob, kaba, dan demecicugb aud yen deits. Hanoba dan dedahwan yen aud indan dimei graga. Dauntoba sugiro dan indugwengga, kaba, yen toua meijugwengga desij dan terimda. 14:4 Dara dan Indina men tu gedig dan deihwedaud gin, kaba, yen yecinaga ucina aud gin touohob. 14:5 Doba Tomas en eijidougwo ucina gini bagod dougwo Yesus mer an, endagai. Adehsud, emen ememecinaga ucina sug ban beraga aud dimei ginbuma. Dagiro, naugwe hang, emen emeraga ucina aud dimei gina? 14:6 Dangga Yesus enara dou en, endagai: Danin dous eng sud hom gedig en ens areg asesa ELOHIM enin medoc mes augwan dag misen dou lusud. Dara danin dous eng sud hom gedig en eic maireseb menau geb huhugb dou lusud toua. Dangga gareg en emeraga danin dag ucina ginero, kaba, en emedebeij dan Indina se bogo touwero. 14:7 Sug Yesus ens enin dag gini dou Tomasohob, kaba, en enara dou men logodeh laugwan deit, endagai: Doba yen gin, kaba, yen yeiya dara yen yecinaga areg geb se dan Indina enin medoc mes augwan dag misen namcir. Anai yen yecinaga dan touohob. Dangga hang, dau iteitogini, kaba, yen yeiya en dara yen yecinaga en toua terimda. 14:8 Doba sud hom dau Yesus men logodeh, moho Pilipus, en medoc emobgesa Yesus mer an ginbuma. Hanoba en acgeij Yesus, endagai: Adehsud, ban bens ban Abina gin dou emenahabi, dauntoba emen emeiya en dara emen emiresi. Anai gini edeinyum naugb emenohob. 14:9 Doba Yesus auni en mer an gini, endagai: Dan deigtou desij yen yaugwan igda einyanohob. Doba ban bemecinaga areg asesa danin indoc mes augwan dag misen touebma, anara? Anai gareg en ecinaga areg asesa danin indoc mes augwan dag misenohob, kaba, en ecinaga areg asesa dan Indina enin medoc mes augwan dag misen touohob. Dangga dagiro, naugwe hang, Pilipus, ban benara dou dan dag dan dens dan Indina ainyen dou yena? 14:10 Ban abdoc emebdebin an dag dan Indina aman amahwas amedag hom gineroei? Era ara? Anai areg dan desai dou yen gin, kaba, dan demeic ara moho hom dau danin indoc mes dou yen touwero. Doba dan Indina enin eng ens dau geicara augwan dou dan, hang dan demaimo toua. Anai eni moongga dara dan terimda. 14:11 Dangga sug dan denara dou yen dag dan Indina aman amahwas amdoc dag hom naugb augwanohob, kaba, yen meigdoc ebdebin dan an dan indir gin toua terimda. Anai augwan misen namcir. Dobnaro, kaba, yen meigdoc ebdebin an areg dan den dou yen gini ogdoc indan ganusbus dou yen dous. 14:12 Dangga gareg dau yen en medoc ebdebin an dan, kaba, men geicara augwan aninim dag indan geicara augwan gin toua. Dara gin dousero, doba men geicara einyana edreg dau gin deit. Anai dan demeihwedaud dan Indina se bogo naugb gin toues. Yen youman dan indir an areg dan den dou yen gini deigeigouhw. Anai augwan gini asesa dag misen namcir. 14:13 Dangga areg yen yacgeij se dan indoho dau dan Indina se lona ingga, kaba, dan demeic dou yens. Dauntoba dan deigdoumesa dan Indina en moho agas medam icira gin deseino yen namcir. 14:14 Hang areg yen yacgeij se dan indoho dau en, kaba, dan demeic dou yen toues. Anai yen yedag indan logodehohob. 14:15 Sug Yesus enara dag graga dou men logodeh bouwohob, kaba, en esulou len deit, endagai: Sug yen meigdoc gororougb dan dag misen, kaba, yen yemohoiya dan indir an areg dan darougb yen an touwero, doba yen yeicara yaimo augwan gin toua terimda. 14:16 Dara sug yen yaimo dan indir dag gin, kaba, dan dacgeij dan Indina naugb en esa sud hom gus dou yen. Dauntoba en eperwei dan induhw naugb en ousa yen se aremer graga augwan toua terimda. Anai en emamsoho yen debero, doba en eigtou desij yen beb huhugb namcir. 14:17 En, kaba, Mena Gogoufu gedig ELOHIM emesa en aud yens, hang en ens areg asesa ELOHIM enin medoc mes augwan dag misen dou yen toues. Doba lusud gedig Bilis oiharaga len se cinogo gin, kaba, emedeinyum naugb Mena Gogoufu gini einesa len merdoc mes ginero. Anai len lemeiya dau en dara len lemecinaga areg geb se en medoc mes augwan asesa touebma. Doba yen, kaba, cum, yen yecinaga areg geb se enin medoc mes augwan asesa terimda. Anai sug en enohob, kaba, en emamsoho yen debero. Doba en eigtou desij yen se yen meigdoc mes beb huhugb namcir. 14:18-19 Sug Yesus enara eisaugb Mena Gogoufu gini dou men logodeh dauwohob, kaba, en enara ad len merdoc mes ucan deit, endagai: Lona hom debin gin, kaba, lusud gedig Bilis oiharaga len se cinogo gini len lemeiya dan deitero. Anai dan domom dau lenohob. Doba yen, kaba, yen yemeiya dan deits. Anai sug dan deisa dau gomom ucugwohob, kaba, dan demens danin ainyes dou yen naugb dan demeic maireseb menau geb huhugb dou yens. Aninim dag dan deisa dau gomom aud maireseb menau geb huhugb se lona ingga touohob. Dangga hang, sug dan dededau yen, kaba, dan demamsoho yen dag adougwen deb touwero. Doba cum, kaba, dan demecicugb aud yen deits. 14:20 Dara se lona ingga, kaba, yen yemeija meijuwesa dan toua deitero. Doba sug yen yeiya dan deisa dau gomom ucugb dag ginohob, kaba, yen yecinaga dag dan Indina aman amdoc dag hom. Aninim dag yen meigdoc dag hom dara dan, dara dan indoc dag hom dara yen touohob. 14:21 Gareg dau yen en ebin areg dan darougb yen an ginohob, hanoba en eicara baimo toua, kaba, enin eng sud hom gedig en medoc gororougb dan dag misen namcir. Dara gareg en medoc gororougb danohob, kaba, dan Indina aman amdoc gororougb en. Hanoba dan demens dau areg geb se danin indoc mes augwan asesa dou en toues. 14:22 Doba sud hom dau Yesus men logodeh, moho Yudas, sug en ouman dag Yesus ens enin ainyes dou len dous, kaba, en eija mouwesa gin namcir. Dangga, kaba, en eijidougwo Yesus an gini, endagai: Adehsud, sug ban bens dau aban gogouf cucugb ainyes dou emen, kaba, emen dous eng emeiya dau gin se lona inggei? Doba dagiro, naugwe hang, len gedig Bilis oiharaga len se cinogo gini len lemeiya dau ginero, anara? Anai len toua merugwengga desij emen gina? (Yudas geijidougwo Yesus an gin, kaba, eni Yudas dau cinogo Keriod, isnaro. Doba en Yudas dau len gus dous.) 14:23 Doba Yesus auni dou en deit, endagai: Gareg en medoc gororougb dan, kaba, en emohoiya dan indir an areg dan desai dou yen touwero. Doba en eicara baimo gin terimda. Dara gareg en aimo areg dan dens dou enohob, kaba, dan Indina medoc gororougb en toua. Dara aman amen aud en naugb aman amaigtou desij en se en medoc mes gin toua namcir. 14:24 Doba gareg en medoc gororougb danero, kaba, en emeicara emaimo dan indir an areg dan den dou yen gin touwero. Dara areg dan den dou yen gin, kaba, dan demen dau danin indoc mes dou yenero. Doba en dau dan Indina gedig en esa dan aud yenohob en dous. 14:25 Dan dens dau areg graga augwan dou yen sug dan indugwengga dara yenaba. 14:26 Doba sug Mena Gogoufu enohob, kaba, en ens dau areg dan den dou yen gin augwan asesa dou yen. Dara en edidib aremeijouhw debin gin dou yen toua. Anai cum, kaba, dan Indina emesa en aud yen naugb en eperwei dan induhw, dauntoba en emousa yen se aremer augwan deits. 14:27 Doba sug dan demeihwededau yen dag ginbuma, kaba, dan douwan deic medoc agadgeij dougwo augwan dou yen toua. Dara medoc gebtou gini, kaba, susugb dau len gedig Bilis oiharaga len se cinogo gini len leic dou yen. Doba aimo dag danin toua indoc agadgeij dougwo augwan gin touohob. Dangga hang, yen meigdoc momogo dau sug dan deihwededau yenero. Dara yen meigdoc emeijesa dara yemahau dau augwan gin touwero, doba ebtou namcir. 14:28 Anai dan den dou yen dag dan demamsoho yen debero. Doba sug dan deihwededau yenohob, kaba, dan demecicugb aud yen toues. Dangga sug yen meigdoc gororougb dan dag misenohob, kaba, yen meigdoc momogo an dan sug dan deihwededau yen aud dan Indina touwero. Doba yen meigdoc agahugouhw an gin namcir. Anai dan Indina en moho agas bedreg dau danohob. Doba yen meigdoc gororougb dan dag misenbuma. Hang yen meigdoc emagahugouhw an dan sug dan deihwededau yen aud dan Indina touwero, doba yen meigdoc momogo namcir. 14:29 Dan dens dau augwan gini dou yen sug emedebeijbuma. Dauntoba sug acgunog, kaba, yen yemeija meijuwesa gin deitero. Doba yen yod meijina debsa dan an areg dan den dou yen gin dag misen namcir. 14:30 Dara dan denara dou yen dag gin deit, doba gurereito dous. Anai sud hom goiharaga lusud se cinogo gin, kaba, en en aud dan naugb en moho aiga dan. Dobnaro. En men goubesa emedeinyum naugb ginero. 14:31 Doba dan douwan naugb lusud se cinogo gin, kaba, len lecinaga dag dan indoc gororougb dan Indina dag misen namcirohob. Hang dan demaimo en mer an areg en arougb dan an gin toua. Dangga eigouhw naugb maman maihwededau suginda.

Yohanes 15

15:1 Sug Yesus esulou men logodeh eisaugb aremer graga augwan dauwohob, kaba, en eic gainyenara hom ucan dou len deit, endagai: Danin eng dedag anggur maga misen hom dous. Dara dan Indina, kaba, en edag mougt naugb en esedougwo sogo gin toua. 15:2 Dangga astesda mesira gemera merero, kaba, en eigteh dau. Doba astesda mesira gera mera, kaba, en aos meh dau becabeci namcir. Dauntoba era mera geigouhw edreg dau nosa deit. 15:3 Doba yen gin, kaba, yen yecabeci ogdoc areg dan desai dou yenohob. 15:4 Dangga hang, yen yemasid yenin dau dan touwero. Doba yen yedag hom dara dan namcir. Aninim dag dan demasid danin dau yen touwero, doba dan dag hom dara yen toua terimda. Anai sug yen yedag hom dara dan dag gini, kaba, yen yera mera geigouhw toua. Doba sug yen yasid yenin dau dan, kaba, yen yemera mera geigouhw deitero. Aninim dag sogo mesira sug eigteh dau maga, kaba, emera mera touwero. Doba sug mesira gini eb se maga, kaba, era mera geigouhw toua terimda. 15:5 Dan dedag sogo maga, dara yen yedag mesira. Gareg dau yen en edag hom dara dan. Hanoba dan dedag hom dara en toua, kaba, enin eng era mera geigouhw einyana namcir. Anai yen yemera mera dau yeninero, doba ogdoc danin dous. 15:6 Doba gareg dau yen en asid enin dau dan namcir, kaba, dan Indina erba en dau men lo gini, hanoba en agac namcir. Aninim dag lusud sug len lerba sogo mesira dig medigo, kaba, sogo mesira agac toua. Hanoba len louci mesira gin augwan debinim naugb len lec se smougb toua namcir. 15:7 Doba sug yen meigdoc dag hom dara dan terimda, dara yen yebin areg dan desai dou yen gini se yen meigdoc mes toua, kaba, yen yacgeij dan Indina an areg yen youwan. Hanoba en emeic dou yen toues. 15:8 Anai sug yen yera mera geigouhw einyana dag gini, kaba, yen yeigdoumesa dan Indina en moho deseino lusud. Dara yen yens yenin ainyes dou len dag yen yedag indan logodeh misen ginohob. 15:9 Dan indoc gororougb yen aninim dag dan Indina medoc gorougb dan touohob. Dangga hang, yen yemobsara dau sug yen yaimo areg dan darougb yen an gin touwero. Doba yen yeicara dag gini terimda, dauntoba dan indoc gororougb yen toua namcir. 15:10 Anai sug yen meigdoc edag beim an areg dan darougb yen an gini, kaba, dan demobsara dau sug dan indoc gororougb yen touwero. Doba dan deicara daimo dangga an yen namcir, aninim dag dan Indina emobsara dau sug en medoc gororougb dan touwero. Doba en eicara dangga toua terimda, anai dan daimo areg en arougb dan an ginohob augwan gin toua namcirohob. Doba sug yen yemaimo areg dan darougb yen an ginero, kaba, dan indoc gororougb yen toua deitero. 15:11 Dan dens dau areg graga augwan dou yen, dauntoba yen meigdoc momogo an ara hom touwero. Doba yen meigdoc agahugouhw an augwan mogud namcir. Aninim dag dan indoc momogo touwero, doba dan indoc agahugouhw an augwan touohob. 15:12 Dara dan deic gomnomna hom ucan dou yen toua dag yen meigdoc gororougwim namcir, aninim dag dan indoc gororougb yenohob. 15:13 Dara aremer gororougb edreg dau aremer gororougb gus augwan, kaba, dag sud hom eic en mougt edug aud gomom naugb en mesir gini. Anai aremer gus ingma emedreg dau sug en ohw en mougt edug naugb len ginero. 15:14 Dangga hang, sug yen yaimo dan indir an areg dan desai dou yen gin namcir, kaba, gini ansins dag yen yedag dan insir misen touohob. 15:15 Dara dan demeija yen dag sogougb toua deitero. Anai sogougb, kaba, en emecinaga dau men mougt mera men geicara meijouhw augwanero. Doba dau iteitogini, kaba, dan deija yen dag dan insir misen dous. Anai dan dens dau areg dan Indina en en dou dan meijouhw augwan asesa dou yenohob. 15:16 Dara yen yemedag dan insir dau sug yen yenin youci dan touwero. Doba dan danin douci yen. Hanoba dan deigdoumesa yen meijoho naugb yen yera mera einyana toua. Dara mera gin, kaba, emetaha dau yen touwero, doba eb naugb yen beb huhugb namcir. Sug yen yera mera dag gin, kaba, yen yacgeij ara ara dau dan Indina, hang en emeic dou yen toues. Anai yen yedag dan insir ginohob. 15:17 Dangga hang, areg dan darougb yen an gin, kaba, dag yen meigdoc gororougwim namcir. 15:18 Sug Yesus enara dou men logodeh dag graga bouwohob, kaba, en esulou len ucan gin deit, endagai: Sug lusud gedig Bilis oiharaga len se cinogo gini len merdoc obgos an yen, kaba, yen meigdoc eiseisan dag len merdoc obgos an dan touohob. 15:19 Anai sug yen meigdoc dag hom dara len, kaba, len merdoc mog mog an yenero. Doba len leigdoumesa yen meijoho dag meren lusud toua. Hanoba len merdoc gororougb yen toua namcir. Doba dan douci yen debinim dau len naugb danohob. Dangga hang, len merdoc gororougb yen toua deitero. Doba len merdoc mog mog an yen dous, anai yen meigdoc aninim dag len deit touwero. 15:20 Dara yen meigdoc moc dougwo areg dan denara dou yen sug nosa gin touwero. Doba yen yeiseisan terimda. Anai dan den dou yenohob dag sogougb, kaba, en moho emagas emedreg dau men mougt mera touwero, doba eb tainya namcir. Dangga hang, sug len leic mog erij dou dan sug nosa, kaba, len lemeic mog erij dou yen. Dara sug len laimo dan indir an areg dan desai dou len ginohob, kaba, len lemaimo yen meijir an areg yen yesai dou len toues. 15:21 Dara gecgu areg len leic dou yen gin, kaba, len leicara dangga an yeni, anai yen meigdoc aninim dara len deitero. Doba yen meigdoc dag hom dara dan dau lenohob. Dara len lemecinaga sud hom gesa dan aud len en medoc mes asesa touwero. 15:22 Sug dan demen aud len naugb dan demesai dan Indina en moro dou lenero, kaba, sesar men gogom ingmemeb naugb len touwero. Doba iteitogin, kaba, dan desai dan Indina en moro augwan dag misen dou lenohob. Hang meren ara ara naugb sug len launun dougwo meren sesar, kaba, ingmemeb naugb len toua deitero. 15:23 Gareg en medoc obgos an dan, kaba, en medoc obgos an dan Indina gin touohob. 15:24 Dangga toua, sug dan demaben ganusbus einyana debin areg dan desai gin dou lenero, kaba, sesar men gogom emeb naugb len touwero. Doba iteitogin, kaba, len leiya augwan gini dag misenohob. Hang meren ara ara naugb sug len launun dougwo meren sesar, kaba, ingmemeb naugb len toua deitero. Anai areg dan daben deseino len, kaba, sud hom ingma en emaben touebma. Dobnaro. Len merdoc emobgos an dan dousero. Doba len merdoc obgos an dan Indina en touohob. 15:25 Doba meren geicara dou dan gin, kaba, augwan esogwa deisa areg mougt mera medam, moho Daud, en eiyagarij ELOHIM se men Surad Ugwaremer deb sug nosa touohob, endagai: Indan aremer naugb sug len merdoc ecgwan dan icira gin, kaba, hom ingma touwero. Doba len merdoc ecgwan dan se gedis maga dous. 15:26 Doba cum, kaba, dan demesa sud hom dau dan Indina aud yen ucugb naugb en ousa yen se aremer augwan toua. En, kaba, Mena Gogoufu gedig en ens dau areg geb se ELOHIM enin medoc mes augwan asesa dou yen, anai en en dau en aud yen. Dangga hang, sug en edebeij yenohob, kaba, en emens dau areg geb se danin indoc mes augwan asesa dou yen toues. 15:27 Dara yen, kaba, dan douwan naugb yen yens dau areg yen yeiya dara youman dau danohob augwan asesa dou lusud toua. Anai yen yaimo dan dau sug acgunog ginohob.

Yohanes 16

16:1 Dara dan dens dau aremer gin augwan dou yen deb, dauntoba yen meigdoc emobsara dau danlo. Doba yen meigdoc ebdebin an dan terimda. 16:2 Anai cum, kaba, leng Yahudi lasid yen dau meren tuari. Dara lona ebiji naugb sug sud hom areg en ogod yen yomom, kaba, en eigdoumesa en moho dag en ousa ELOHIM ginohob. 16:3 Dobnaro. Len leicara dag gini dou yen, anai len lemecinaga areg geb se dan Indina aman amdoc mes augwan dag misenbuma. 16:4 Dan demens dau areg graga augwan dou yen acgunog touwero. Anai se lona ingga, kaba, dan indugwengga desij yen dougwaba. Doba dan dens dau augwan gin dou yen iteitogini, dauntoba sug meren lona naugb sug len leic mog erij dou yen edebeijohob, kaba, yen meigdoc eiseisan dag dan dens dau augwan gini dou yenohob. Hang emeic yen meigdoc aiyansem dou yen toua. 16:5-6 Anai iteitogini, kaba, dan demecicugb aud sud hom gesa dan aud yen gini. Dangga hang, yen meigdoc momogo medam an areg dan den dou yen gin toua namcir. Doba sud hom ingma dau yen, kaba, en emeijidougwo dan an usi sug dan decicugb aud gin touwero. 16:7 Doba eigouhw naugb dan deihwededau yen. Anai sug dan demeihwedero, kaba, Mena Gogoufu en emen aud yen touwero. Doba sug dan deihwededau yenohob, kaba, dan demesa en aud yen naugb en emousa yens. Yen youman dan indir an areg dan den dou yen gini deigeigouhwahabi. Anai augwan gini asesa dag misen namcir. 16:8 Dara sug en en aud yenohob, kaba, en ens ainyes dou lusud se cinogo gini dag meren gauwamara eisaugb sesar. Dara areg dan desai dou len, dara ELOHIM men gogom areg en ogod deinaugb len, kaba, len lauwam an augwan gini dag didi namcirohob. 16:9 Anai en emens dou len dau sug len merdoc emebdebin an danero, kaba, dag meren sesar emediyebeiya dau len touwero, doba eb naugb len terimda. 16:10 Dara en emens dou len dau sug dan decicugb aud dan Indina, kaba, gini ansins dag dan demereiyara dou len touwero. Doba dag areg dan den dou len gin, kaba, augwan asesa dag misen namcirohob. 16:11 Dara en emens dou len dau sug meren sesar eb naugb len terimdaba, kaba, dag ELOHIM emamsoho len touwero. Doba en emogod gogom deinaugb len toues. Anai en ogod gogom deinaugb meren mougt mera medam gedig en oiharaga len se cinogo gin touohob. 16:12 Dan douwan dens dau aremer einyana ucan gin dou yen deit. Doba iteitogin, kaba, emedeinyum naugb sug yen yeic augwan gini se yen meigdoc mes touebma. 16:13 Doba sug Mena Geica en en aud yenohob, kaba, en emens dau areg misen meijouhw augwan asesa dou yen toua. Anai en emens dau areg se enin medoc mes dou yenero. Doba en ens dau areg geb se ELOHIM enin medoc mes dou yen dous. Hang areg en ouman dau ELOHIM ginohob, kaba, en ens dau augwan gini dou yen. Dara en ens dau areg ELOHIM esedeb naugb lona daiyamo gacin augwan dou yen toues. 16:14 Dara en emeigdoumesa dan indoho agas medam deseino yen dag dan toua deigtou se gogouf cucugb gini. Anai en eic dau areg geb naugb danohob. Hanoba en emens dou yen toues. 16:15 En eicara dag gini, anai areg geb naugb dan Indina, kaba, augwan gini eb naugb dan touohob. Hang dan demen dou yen dag en eic dau areg geb naugb danahabi. Hanoba en emens dou yen toues. 16:16 Sug Yesus esulou men logodeh dag graga ouwohob, kaba, en esulou len deit, endagai: Cum, kaba, yen yemeiya dan deitero. Doba se lona hosa debin gin, kaba, yen yemeiya dan ucugb deits. 16:17 Sug Yesus men logodeh len louman en mer an gin, kaba, ligbum len leijidougwom ucucugb, lendagai: En enara dou maman dag cum, kaba, maman mameiya en deitero. Doba cum, kaba, maman maiya en ucugb deits. Dara en enara dou maman toua dag maman mameiya en touwero. Anai en eihwededau maman aud en Mena ucugb gini. 16:18 Dangga areg en enara dou maman dag cum gin, kaba, men meijouhw dagiro? Anai maman mamecinaga meijouhw asesebma. 16:19 Doba Yesus ecinaga dag len louwan leijidougwo en an areg en en dou len graga. Dangga hang, en emenara dou len, endagai: Dan den dou yen dag cum, kaba, yen yemeiya dan deitero. Dara dan den dou yen toua dag lona hosa debin gin, kaba, yen yemeiya dan ucugb deits. Yen yeijidougwom an areg dan den dou yen graga ingginei? 16:20 Doba yen youman dan indir an areg dan den dou yen gini deigeigouhwahabi. Anai cum, kaba, yen yeb dara yeingdara ucan dan. Doba lusud gedig Bilis oiharaga len se cinogo gini, kaba, len lagahugouhw debin dan namcir. Dangga sug aimougtut gini, kaba, yen meigdoc eijesa medam ucan dan namcir. Doba cum, kaba, yen meigdoc agahugouhw ucugb deitohob. Augwan gini asesa dag misen namcir. 16:21 Anai sug gida ouwadan meh, kaba, aimougtut en menuhwa erij medam namcir. Hanoba eic en medoc momogo dou en toua. Doba sug en ouwadan mehohob, kaba, en agahugouhw an gin dous. Hang en medoc emeiseisan areg geic momogo dou en graga deitero, doba en medoc ougwo namcirohob. 16:22 Dangga toua, dara yen iteitogini, kaba, yen meigdoc momogo ucan dan namcir. Doba cum, kaba, yen meigdoc momogo deitero. Doba yen meigdoc agahugouhw an dan, anai dan den aud yen deit. Dara yen meigdoc gagahugouhw gin, kaba, sud hom ingma emowun yen an gin toua deitero. Doba eb naugb yen toua beb huhugb terimda. 16:23 Dangga sug lona ingga edebeijohob, kaba, yen yemacgeij ara ara dau dan toua deitero. Doba dan Indina enin eng emeic areg yen yacgeij dau en dou yen toues. Anai yen yedag indan logodeh ginohob. 16:24 Dara yen yemesa doc dau gin touwero. Doba yen yemacgeij dau dan Indina terimda. Dauntoba meijen gagahugouhw emediyebeiya dau yen touwero. Doba yen meigdoc atij an gin namcir. Anai terimda iteitogin, kaba, yen yemacgeij ara hom dau dan Indina se dan indoho touebma. Yen youman dan indir an areg dan den dou yen deigeigouhw terimda, anai augwan gini asesa dag misen namcir. 16:25 Sug Yesus esulou men logodeh dag graga dauwohob, kaba, en enara bad len merdoc mes ucan deit, endagai: Lona ebeij deinyorohob naugb sug dan demenara demaimeh eisaugb dan Indina gin dou yen toua deitero. Doba dan demens areg geb se enin medoc mes augwan ainyes dag misen dou yen toua. Anai dau sugraga terim iteitogin, kaba, dan denara einyana dag daimeh dou yen dous. 16:26 Sug lona gin edagasohob, kaba, dan demacgeij ara ara dau dan Indina naugb yen toua deitero. Doba yenin yacgeij ara ara se dan indoho dau en dous. Anai yen yedag hom dara danohob. Hanoba en emeic dou yen toues. 16:27 Anai yen meigdoc gororougb dan dara yen yod meijina debsa dan dag dan den dau en touohob. Hang dan Indina medoc gororougb yen toua terimda. 16:28 Augwan gini misen namcir. Anai dan den dau dan Indina aud yen se cinogo ginohob. Dangga sug dan deihwededau cinogo gin, kaba, dan decicugb aud en toua deit. 16:29 Sug Yesus men logodeh louman en mer an gini, kaba, len lousa deisa en an. Hanoba len lenara dou en, lendagai: Adehsud, iteitogin, kaba, ban bemenara bemaimeh dou emen deitero. Doba ban bens aremer gini ainyes dag misen dou emenohob. 16:30 Dangga iteitogin, kaba, emen emecinaga dag ban abu ouforoho naugb ban becinaga areg geb se lusud merdoc mes augwan dag misen touohob. Anai sud hom ingma, kaba, en emeijidougwo ban an ara ara touwero. Doba ban becinaga areg len louwan leijidougwo ban an gini deb sug nosohob. Hang emen emecinaga dag ban ben dau ELOHIM aud emen dag misenohob. 16:31-32 Doba Yesus enara bauwun len merir an gini, endagai: Yen yod meijina debsa dan dag misen, ingginei? Naro, anai cumougt edagasohob naugb sug yen yaugwan yougb yaisoboro dig meijen tu dau daninto deb dangga. Dobnaro. Dan Indina eni moongga desij danohob. 16:33 Dan dens dau areg graga augwan dou yen, dauntoba yen yemahau dau ara ara touwero. Doba sug yen meigdoc dag hom dara dan dag ginohob, kaba, yen meigdoc ebtou namcir. Anai lusud gedig Bilis oiharaga len se cinogo gin, kaba, len lemeic mog erij dou yen toues. Doba yen yaiyan meigdocesem naugb yen yes agadgeij terimda. Anai dan daiyan len laugwan meroho eb tainya danohob.

Yohanes 17

17:1 Sug Yesus esulou men logodeh dag gin dauwohob, kaba, en eised mergo dig bogo naugb en ocuncum dou en Mena ucan gin deit. Hanoba en enara dou en, endagai: Akeinya, lona edagasa namcirohob. Dangga hang, ban bens dau ban Abisi indan gogouf cucugb dou lusud, dauntoba ban Abisi dan dens dau aban gogouf cucugb dou len toua. 17:2 Anai ban beigdoumesa ban Abisi dan indoho dag mougt mera medam naugb lusud se cinogo augwanohob. Dauntoba gareg ban beic dou dan, kaba, dan demeic maireseb menau geb huhugb dou len laugwan toua. 17:3 Dangga gareg en ecinaga ban dag misen dara en ecinaga Yesus Krisdus dan dag misen touohob, kaba, maireseb menau geb huhugb eb naugb enohob. Anai banin dous eng ELOHIM misen hom dous. Dara ban eng besa dan aud lusud gini naugb dan deigdoc len dau meren gogom augwan toua. 17:4 Hang dan demens dau aban gogouf cucugb augwan dou len se cinogo ginohob. Anai areg ban beic dou dan naugb dan desai dou len gini, kaba, dan deicara daimo augwan bedeinyum an len touohob. 17:5 Dangga, Akeinya, iteitogin, kaba, ban beigdoumesa dan indoho desij ban se gogouf cucugb deit. Aninim dag dan deigtou se gogouf cucugb sug ban bemesinsin cinogo dara bogo gin touebma. 17:6 Dara dan dens dau areg geb se banin abdoc mes augwan dou indan logodeh gin touohob. Anai ban bouci len laugwan debinim dau cinogo gini naugb banohob. Hang len lemedag lenin deitero, doba len laugwan ledag aban namcir. Dara len gin, kaba, ban bogugwo len laugwan deb se dan insira naugb dan dagauwesa len toua. Dangga areg dan desai dou len, kaba, len lemesbes an touwero. Doba len leicara laimo augwan gin terimda. 17:7 Anai iteitogin, kaba, len lecinaga dag areg dan desai gin, kaba, emen dau daninero. Doba augwan en dau banin dous. 17:8 Dangga areg ban beic dou dan naugb dan desai dou len, kaba, len lemotogoto dan indir an touwero. Doba len lebin se len merdoc namcir. Anai len lecinaga dag dan den dau ban aud len dag misenohob. Hang len lod merna debsa dan dag areg dan desai dou len gini, kaba, dan demeic dau danin indoc mes dou lenero. Doba banin eng besa dan aud len naugb dan desai dou len toua. 17:9 Dangga dan democuncum naugb lusud gedig Bilis oiharaga len se cinogo ginero. Doba dan docuncum naugb len gedig ban beic dou dan len gin dous. Anai len gin, kaba, aban logodehohob. 17:10 Dara aban dousero. Doba len gin, kaba, indan logodeh touohob. Anai areg geb naugb dan, kaba, aban. Dara areg geb naugb ban, kaba, indan toua. Hang len lemens dau indan gogouf cucugb dou lusud laugwan toua terimda. 17:11 Doba iteitogini, kaba, dan demeigtou an len se cinogo gin deitero. Anai cum, kaba, dan den aud ban ucugb dau lenohob. Doba len, kaba, len merugwengga se cinogo ginaba. Dangga hang, Akeinya Gedig Ban Becabeci Namcir, kaba, dan dacgeij ban naugb ban aboho oiharaga len dougwo areg gecgu augwan terimda. Dauntoba len ledag hom, aninim dag nanan nandoc dag hom toua. Anai ban aboho gin, kaba, mobisamougb namcir. Hanoba ban bogugwo dou dan touohob. 17:12 Dangga sug dan indugwengga an len se cinogo ginaba, kaba, sud hom ingma dau len en emobsara dau dan insira mes touwero. Doba sud hom gedag dum smougb meh teiteiyohob, kaba, enin eng obsara dau dan insira mes dous. Dauntoba areg len log deb se Surad Injil Meb Mohon deb sug nosohob, kaba, acgunog toua. Doba len gus, kaba, dan deseyeiyo len laugwan namcirohob. Hang len lemobsara dau dan insira mes touwero. Doba dan desedougwo len ogdoc ban aboho men goubesa gin terimda. Anai ban bogugwo ban aboho gin dou dan naugb lenohob. 17:13 Doba iteitogin, kaba, dan desedeb naugb sug dan deihwededau len aud banohob. Dangga hang, sug dan indugwengga desij len se cinogo ginaba, kaba, dan dacgeij augwan gin dau ban. Dauntoba sug len louman gin, kaba, eic dag len merdoc atij an gagahugouhw terimda. Aninim dag dan indoc atij an gagahugouhw gin toua namcirohob. 17:14 Dara areg ban bens dou dan, kaba, dan desai gin augwan dou len touohob. Hang lusud se cinogo gin, kaba, len merdoc emesgiraha an len dag nosa deitero. Doba len merdoc esrougb an len namcir. Anai sug len louman ban abir ginohob, kaba, len merdoc dag hom dara len toua deitero. Aninim dag dan indoc dag hom dara len touwero. 17:15 Dara dan demacgeij ban, dauntoba ban bemeigdoumesa len dau cinogo gin, isnaro. Doba dan dacgeij naugb ban beseyeiyo len dougwo Sud Hom Mobgos Maha dous. 17:16 Anai indan logodeh gin, kaba, len merdoc dag hom dara lusud gedig Bilis oiharaga len se cinogo gin deitero. Aninim dag dan indoc dag hom dara len gin touwero. 17:17 Dangga hang, ban beic ban abir misen gini, hanoba ban bouci len debinim naugb banin ogdoc ban abir misen gin toua. Anai ban abir gin, kaba, geica namcir. 17:18 Dara dan desa len naugb len lesai ban aburo dou lusud se cinogo gini. Aninim dag ban besa dan naugb dan desai ban aburo dou len se cinogo gini sug nosa touohob. 17:19 Dangga hang, dan dohw dan indugt edug dou ban naugb dan deicara daimo ban abir misen gini dag ansins dou len toua. Dauntoba sug len leiya, kaba, len lohw len merugt edug naugb sug len leicara laimo ban an areg ban barougb len an gin toua terimda. Anai ban abir gin, kaba, geica namcir. 17:20 Dara dan democuncum naugb indan logodeh gin dousero. Doba dan docuncum dou ban deb naugb len gedig merdoc ebdebin an dan se lona daiyamo gacin ogdoc sug indan logodeh gini len lesai dan induro dou len toua. 17:21 Akeinya, dan dacgeij naugb ban bousa len gini dara leng se lona daiyamo gacin gin toua. Dauntoba len laugwan merdoc emedregimlo, doba len laugwan merdoc dag hom namcir. Dara dan dacgeij naugb ban bousa len. Dauntoba len laugwan merdoc emedreg nanan touwero, doba len merdoc dag hom dara nanan terimda. Aninim dag nanan toua nandoc dag homohob. Dauntoba sug lusud se cinogo gini len leiya dau gin, kaba, len lod merna debsa dan dag ban besa dan aud lenohob. 17:22 Dangga hang, dan dogugwo gogouf cucugb areg ban bogugwo dou dan sug nosohob ingma dou indan logodeh gin toua. Dauntoba len merdoc emedregim touwero, doba len merdoc aninim dag hom terimda. Aninim dag nanan nandoc dag hom toua namcirohob. 17:23 Anai sug dan dedag hom dara indan logodeh gini, hanoba nanan nandoc dag hom toua terimda, kaba, eic dag len merdoc emedregim touwero. Doba len laugwan merdoc dag hom terimda. Hang len se cinogo gin, kaba, len lemeija meruwesa dan toua deitero. Doba len lod merna debsa dan dag ban besa dan aud len. Dara ban abdoc gororougb indan logodeh gini, aninim dag ban abdoc gororougb dan dag misen touohob. 17:24 Akeinya, ban beic logodeh augwan gini dag indanohob. Dangga hang, dan demacgeij dau ban, dauntoba len laugwan ledeigtou desij dan se indan usi naugb len ledeiya indan gogouf cucugb areg ban bogugwo dou danohob augwan toua namcir. Anai ban abdoc gororougb dan sug ban bemahasesei cinogo touebma. Hang ban bemogugwo aban gogouf cucugb gini dou dan touohob. 17:25 Akeinya, lusud se cinogo gin, kaba, len lemecinaga areg geb se banin abdoc mes augwan dag misen touebma. Doba danin, kaba, dan decinaga areg geb se ban abdoc mes augwan dag misenohob. Dara indan logodeh gin, kaba, len lecinaga dag ban besa dan aud len dag misen touohob. Anai ban, kaba, ban bedag beim an augwan namcir. 17:26 Dara dan demarges dau sug dan dens dau areg geb se banin abdoc mes augwan dou len gini touwero. Doba dan deicara daimo dangga dou len terimda bouwedoc gin toua. Dauntoba len merdoc gororougwim, aninim dag ban abdoc gororougb dan touohob. Dara emen emdoc toua dag hom namcir.

Yohanes 18

18:1 Sug Yesus ocuncum dangga dou en Mena dauwohob, kaba, en ouwadan men logodeh dau tu ingga aud lo medam hom geb dig duhu Kidron mebera nagama. Sug len ledebeijohob, kaba, len leinesa toua. 18:2 Doba sud hom gohw Yesus se leng Yahudi meren mougtir merisirohob, en moho Yudas, kaba, en ecinaga lo gin debohob. Anai sug nosa, kaba, Yesus dara men logodeh len loucimdeb debinbin sunggohob. 18:3 Dangga hang, en esan leng Roma meren sadodor merug aibibra aud lo ingga. Dara gembala gesa taij meren mougtir dara leng Parisi len toua lohw merug aibibra dau leng lesedougwo ELOHIM Men Tuari naugb laicira len toua. Sug len leihweda, kaba, ligbum len lodo meren pelita. Dara ligbum, kaba, len lei hiraga. Dara len lodo meren kebtemaga dara krawan edeinyum len laugwan toua. 18:4 Doba Yesus en ecinaga areg acgunog debin en gini augwan sug nosa debohob. Dangga sug len laugwan ledagunya debin en an men logodeh se lo gragohob, kaba, Yesus enin eisa dau men logodeh aud len. Hanoba en eijidougwo len, endagai: Yen yehilon garena? 18:5 Doba len launi en mer, lendagai: Emen emehilon sud hom, moho Yesus dau cinogo Nasared. Dangga Yesus ens enin ainyes. Hanoba en enara dou len, endagai: Dan indugwenggini. Dara Yudas gohw en gini, kaba, en toua moongga desij lengga. 18:6 Sug Yesus ens enin ainyes dag gin dou lenohob, kaba, len laugwan laisacij. Hanoba len leijeboho dig meridigo debinim se cinogo gabeda namcir. 18:7 Dangga Yesus eijidougwo len ucugb deit, endagai: Yen yehilon garena? Doba len launi ucugb dou en, lendagai: Emen emehilon sud hom moho Yesus dau cinogo Nasared. 18:8 Hang Yesus enara dou len dougwo, endagai: Sug yen yehilon danin dous, kaba, yen yamsoho indan logodeh gini. Dauntoba len laugwan leihwededauwahabi, anai dan dens dan indug ainyes dou yenohob. 18:9 Yesus enara dag gin dougwo men logodeh, dauntoba esogwa deisa enin mogtimei mohw an areg en ocuncum dou en Mena naugb len sug nosohob, endagai: Akeinya, indan logodeh gedig ban bogugwo dou danohob, kaba, sud hom ingma dau len en emobsara dau dan insira mes touwero. 18:10 Doba Simon Petrus en eigdesa men krawan dau meihw naugb en ogod Gembala Gesa Taij Meren Mougt Mera Medam men sogougb, moho Malkus, en moms dig mesira misen edug dau en namcir. Anai men krawan inggeb se meihw isisga. 18:11 Doba Yesus en dougwo Petrus, endagai: Ban bes aban krawan se meihw ucugb. Ban bauwam endag dan demeg areg gedougdaha geb se mog gin touweroei? Naro, areg dan Indina en esedeb naugb danohob, kaba, dan deg toua. 18:12 Sug Yesus enara dag gin inegohob, kaba, leng Roma meren sadodor, dara meren mougt, dara leng Yahudi gedig len lesedougwo ELOHIM Men Tuari len laugwan lagaigeij Yesus. Hanoba len lahud en mesira hwas darem namcir. 18:13 Sug lan lahud enohob, kaba, len lahwan en dou Kayapas maba, Hanas, se men tu nosahabi. Anai sug nosa, kaba, en edag Gembala Gesa Taij Meren Mougt Mera Medam naugb lenohob. Doba se arisogomoc ingga, kaba, en maba Kayapas en edag mougt mera medam naugb gembala gesa taij len laugwan deit. 18:14 Sud hom Kayapas gin, kaba, en eng esulou leng Yahudi meren mougtir laugwan sug nosa touohob, endagai: Eigouhw naugb sud hom en omom dous. Dau gedag maman lusud laugwan lemomom, isnaro. 18:15 Sug leng sadodor lahwan Yesus aud Hanas se men tu gin, kaba, Petrus dara sud hom gus dau Yesus men logodeh lan toua laucan len. Doba Yesus men godeh hom gin, kaba, eni Hanas mesi misen toua. Hang en emeinesa Hanas men tu oucan Yesus gin toua. 18:16 Doba Petrus, kaba, en esa se misis moc dig medigo deb. Sug Yesus men godeh hom graga en eiya dag gini, kaba, en ecicugb naugb en edenara dou gida hom gesedougwo misis ingga. Sug en enara dou en dauwohob, kaba, en ahwan Petrus dig uro meseda. 18:17 Sug lan lainesa uro mesohob, kaba, gida gesedougwo misis maga en enara bauwi Petrus, endagai: Ban eng giag baimo sud hom gada touohob. Doba Petrus enara bauwun en mer, endagai: Dan, isnaro. 18:18 Sug Petrus aideido dou en dauwohob, kaba, en eihweda naugb en edesa desij Hanas men sogougwir dara leng lesedougwo en men tu se smougb mebera naugb smougb esij en toua. Anai igda goho dugurij, hang len lemouci sisguraha debinim naugb lec se smougb debohob. Hanoba len lesa acec, dauntoba smougb esij len laugwan toua. 18:19 Sug len lahwan Yesus deseino Hanasohob, kaba, Hanas enara dou en, endagai: Ban bens dau aban logodeh dara areg ban besai dou lusud augwan asesa dou danahabi. 18:20 Doba Yesus enara bauni en mer ucugb, endagai: Sug dan desai ELOHIM moro dou lusud sug nosa, kaba, dan demecgoneh dan indug aingma dau lenero. Doba dan desai augwan se meren tuari dara ELOHIM Men Tuari dou len laugwan loumanohob. Anai se tuari gin, kaba, leng Yahudi len loucimdeb astesda lona terimda. 18:21 Dangga ban bemeijidougwo danlo. Doba ban beijidougwo leng louman dan indir anohob dous. Anai len lecinaga areg dan desai dou len augwan dag misen namcirohob. 18:22 Sug Yesus auni dag graga dou Hanasohob, kaba, sud hom dau leng lesedougwo Hanas en men tu ingga, kaba, en oto Yesus namcir. Hanoba en enara debin en, endagai: Dagiro, naugwe hang, ban beic abus naugb ban bauni Gembala Gesa Taij Meren Mougt Mera Medam en mer dag gina? 18:23 Doba Yesus auni dou en, endagai: Dan denara didi, kaba, ban bens augwan gini asesa dou leng se dimei mes gin len laugwan toua. Dauntoba len toua lecinaga dag misen namcir. Dobnaro, kaba, dagiro, naugwe hang, ban bogod dan gina? 18:24 Sug Yesus auni dag gin dou sud hom graga ginohob, kaba, Hanas arougb leng sadodor naugb len lahwan Yesus aud Gembala Gesa Taij Meren Mougt Mera Medam, en moho Kayapas, se men tu deit. Doba aumaga, kaba, eb se Yesus mesira terimdaba. 18:25 Doba Petrus, kaba, eni moongga desij len se smougb meberaba. Dangga leng lesa desij en se smougb mebera ingga, kaba, len lenara lauwi en deit, lendagai: Ban eng baimo sud hom graga en touohob. Doba Petrus aideido dougwo dou len namcir, endagai: Dan, isnaro. 18:26 Sug len lemenara merir emedug anbuma, kaba, sogougb hom dau Gembala Gesa Taij Meren Mougt Mera Medam en toua enara baised Petrus deit, endagai: Dan deiya dag ban toua abugwengga desij sud hom graga se lo gaihohoba. Sud hom gin, kaba, mesi eng Petrus en ogod moms edug dau gragohob. 18:27 Doba Petrus en aideido dougwo deit namcir, endagai: Dan, isnaro. Sug en aideido dougwo dag gin inegohob, kaba, berougwu eba mer bagod en mer an toua. 18:28 Sug lona esgohob, kaba, leng Roma meren sadodor lahwan Yesus dau Kayapas men tu ingga aud leng Roma meren mougt mera, moho Pilatus, se men tu deit. Dangga sug len ledebeij Pilatus men tu magohob, kaba, leng sadodor mogud dous eng lahwan Yesus aud Pilatus se men dimeiyeda. Doba leng Yahudi dara meren mougtir, kaba, len laugwan lesa dig medigo dous. Anai lona naugb sug len lougwanara debin meren Lona Gohw Bedreg gin, kaba, ebeij deinyor namcirohob. Dangga hang, len lemouwan naugb lugmahara meren tu gin, kaba, emeic gogor dou lenlo. Doba len lecabeci deseino ELOHIM, dauntoba edeinyum naugb sug len let ared se Lona ingga toua. 18:29 Dangga, kaba, Pilatus en en dau men dimei mes. Hanoba en eijidougwo len, endagai: Sud hom gini men geicara gecgu dagiro, hang yen yemahwan en aud dan gina? 18:30 Doba len launi dou en ucugb, lendagai: Ban boudesa endag sud hom ingga men geicara gecgu ingmaro, hang ban bemeijidougwo emen ucugb dag ginei? Naro. Sud hom ingga, kaba, en edreg emen gaben namcirohob. Hang emen emahwan en dou ban toua. Naro, kab, naro. 18:31 Dangga Pilatus asid dou len, endagai: Sug en edreg dau meijen gaben dag ginohob, kaba, yen yeihwedan en dau sugindahabi, yenin yemdogod gogom debin en yaimo dau meijen gomnomna an en dous. Doba leng Yahudi meren mougtir, kaba, len lenara dougwo en mer, lendagai: Emen emogod aremer gomom debin emen lusud deitero. Anai yeng Roma, kaba, yen yen dougwo emen an ginohob. 18:32 Doba aremer augwan gini acgunog, dauntoba esogwa deisa areg Yesus enara dou men logodeh sug nosohob. Anai en ens dou len dag leng Yahudi lemeic gomom dou enero. Doba dag leng Roma eng letob en se sogo salib dous, aimo dau meren gaben an en dangga. 18:33 Sug Pilatus ouman leng Yahudi merir an dag graga, kaba, en einesa men dimei ucugb. Hanoba en arougb men sadodor naugb len ledahwan Yesus aud eni. Sug len lahwan Yesus aud enohob, kaba, en eijidougwo Yesus, endagai: Ban eng bedag mougt mera medam naugb leng Yahudiei? 18:34 Doba Yesus eijidougwo en ucugb, endagai: Len gus len dangga dou ban, hang ban bemeijidougwo dan dag ginei? Era ban beic dau banin abdoc mes dousei? 18:35 Doba Pilatus enara bauwun Yesus mer an gini, endagai: Ban bauwam endag dan dau yeng Yahudi, hang ban bemeijidougwo dan an dag ginei? Naro. Banin aban lusud dara meijen gembala gesa taij meren mougtir len eng lemoho lemas ban dou dan gini. Areg len len dou dan gini, kaba, dag misenei? Era naroei? Ban bens augwan asesa dou danahabi. 18:36 Doba Yesus enara bauni en mer ucugb, endagai: Dan demedag mougt mera aninim dag mougt mera se cinogo ginero. Anai sug dan dedag mougt mera aninim dag len se cinogo gin, kaba, indan logodeh lemamsoho dan debero. Doba len lebehnehino dougwo dan terimda. Dauntoba len gus lemohw dan se leng Yahudi meren mougtir merisira touwero. Doba dan dedag mougt mera gedig susugb dau mougtir se cinogo gin namcir. Dangga hang, indan logodeh ingma, kaba, len lemebehnehino dougwo danero. Doba len lamsoho dan dou len gus naugb len lohw danohob. 18:37 Sug Pilatus ouman dau gin, kaba, en auni Yesus mer ucugb dou en, endagai: Ban benara dag gin, kaba, ban toua bedag mougt mera medamohoba? Era dagiro? Doba Yesus auni en mer ucugb dou en, endagai: Ban eng benara dangga. Dan, kaba, ga, naro, anai dan douwaden dau bogo. Hanoba dan indim ouwadan dan se cinogo gini naugb sug dan desai areg se geica dou lusud dous. Gareg en aimo ucina se geica gin, kaba, en ouman dan indir an areg dan desai dou en touohob. 18:38 Doba Pilatus, kaba, en esbesan Yesus naugb en eijidougwo en ucugb, endagai: Geica, kaba, gini dag ara? Sug Pilatus eijidougwo Yesus dag graga dauwohob, kaba, en eihwedig medigo naugb en edenara dou leng Yahudi deit, endagai: Dagiro, naugwe hang, dan dogod aremer gomom naugb sud hom gina? Anai dan dehilon en medoc mes an ginohob, doba men aremer gecgu hom naugb sug maman maic gomom dou en touwero gina? 18:39 Doba astesda se meijen Lona Gohw Bedreg gin, kaba, dan daimo yen meijir naugb dan desga sud hom dau tu gesisug dou yen ucugb. Dangga hang, yen youwan dan darges meijen mougt mera medam gin ucugb dou yenei? Era naroei? 18:40 Doba len laugwan lesa merir aninim, lendagai: Sud hom gin, isnaro. Doba ban besga Abbas meisi dou emen dous. (Len lenara dangga dou en, anai Abbas meisi gin, kaba, en mog mog namcir naugb sug en ouwan ocirma leng Roma dau meren hancob touohob.)

Yohanes 19

19:1 Sug leng Yahudi lesa merir aninim danggohob, kaba, Pilatus en einesa men dimei ucugb. Hanoba en arougb men sadodor, endagai: Yen yohugouhw Yesus gini naugb yen yedogod enda. 19:2 Dangga sug Pilatus men sadodor lohugouhw endohob, kaba, len lecgun lisug maga an mog. Hanoba len leg se en mougt, dara len leg sansun gagas geirir hom se en toua. 19:3 Sug len leicara dag gin dou en dauwohob, kaba, len legregim naugb leic en lacecim, lendagai: Ban abireseb huhugb naugb ban besedougwo leng Yahudi dag meren mougt mera medam terimda. Len lenara dag gin ineg, kaba, aisa len merisira naugb len loto en toua. 19:4 Sug len logod en dauwohob, kaba, Pilatus en eihwedig medigo naugb en edenara dou leng Yahudi deit, endagai: Yen yaugwan yeiya sug indan sadodor lahwan sud hom gin aud yenahabi. Dauntoba sug yen yeiya en, kaba, yen yecinaga dag dan dehilon en. Doba men aremer gecgu hom ingma naugb sug maic gomom dou en touwero. 19:5 Dangga sug men sadodor lahwan Yesus an lisug mog dara sansun geirir ainyes deseino leng Yahudiohob, kaba, Pilatus ens Yesus dou len. Hanoba en enara ceg ceg en dou len, endagai: Yen yeiya sud hom graga inggini. Dan demeic gomom dou en augwougb dagiro? 19:6 Doba sug gembala gesa taij meren mougtir, dara leng lesedougwo ELOHIM Men Tuari len leiya Yesus se len meriresi dangga, kaba, len lesa merir medam an dou Pilatus, lendagai: Ban barougb aban sadodor naugb len letob en dara sogo salib namcir. Doba Pilatus enara bauni len merir ucugb, endagai: Yen youwan dangga, kaba, yenin yedahwan en naugb yen yetob en se sogo salib dous. Anai dan dehilon en, doba men aremer hom naugb sug maic gomom dou en touwero. 19:7 Doba leng Yahudi len lenara launi ucugb dou Pilatus, lendagai: Emenin emen gomnomna ogod aremer gomom naugb en debohob. Anai en eigdoumesa enin moho dag ELOHIM Meisi mohora hom deseino emenohob. 19:8 Sug Pilatus ouman len merir an gin, kaba, en medoc ogom edreg deit naugb sug en ogod aremer gomom deinaugb Yesus gini. 19:9 Dangga sug en einesa men dimei ucan Yesusohob, kaba, en eijidougwo en deit, endagai: Ban daugiro? Doba Yesus en emauni ara ara hom dou enero. Doba en eigtou dag lodinanir namcir. 19:10 Sug Pilatus eiya, doba Yesus emauni dou enero, kaba, en enara dou en, endagai: Indan goubesa inggebga naugb dan darges ban ucugb. Dara dan detob ban dara sogo salib toua. Dangga dagiro, naugwe hang, ban bemens aremeijouhw asesa dou dan touwero? 19:11 Doba Yesus enara bauni dou en ucugb, endagai: Goubesa augwan gin, kaba, emen dau baninero. Doba dau sug ELOHIM eic dou ban, hang ban bemetob dan toua. Anai sug ELOHIM emeic goubesa dou banero, kaba, aban goubesa ingmemeb naugb dan touwero. Dangga gareg en ohw dan augwougb se ban absira, kaba, men sesar medam edreg dau ban toua namcir. 19:12 Sug Pilatus ouman Yesus mer an gini, kaba, en ahau medam. Dangga en ehilon ucina naugb en arges Yesus toua. Doba leng Yahudi lesa merir medam aninim deit, lendagai: Gareg en eigdoumesa enin moho dag mougt mera medam, kaba, en emeigdoumesa mougt mera medam dau yeng Roma en moho deitero. Doba en eicara bauwun en moho namcirohob. Dangga hang, sug ban barges sud hom gin, kaba, aban mougt mera medam gini en emeija ban dag en mesi toua deitero. Doba ban bedag men mocohob. Anai sud hom gin, kaba, en eigdoumesa enin moho dag mougt mera medam touohob. 19:13 Sug Pilatus ouman len merir an gin, kaba, en arougb men sadodor naugb len lahwan Yesus dig medigo aud men maija moc gowunaresa geb se usi moho Igdahab Geihwidua. (Era se lec Ibrani mer, kaba, Gabata.) Sug len ledebeij se maija mocohob, kaba, Pilatus en eigtousa naugb en ogod aremer naugb Yesus toua. 19:14 Doba sug Pilatus ogod aremer ingga, kaba, ebeij igdabogohob. Dara leng Yahudi meren Lona Gohw Bedreg toua ebeij deinyorohob. Dangga hang, Pilatus en ens Yesus dou leng Yahudi mougwa hom ucan deit, endagai: Meijen Adehsud, ingginbo. 19:15 Doba len lenara dara merir medam, lendagai: Naro, ban betob en dara sogo salib bomom namcir. Dangga Pilatus eijidougwo len ucugb deit, endagai: Yen youwan naugb dan deic gomom dou meijen Adehsud namcirdei? Doba gembala gesa taij meren mougtir len launi en mer ucugb, lendagai: Sud hom gin, isnaro. Doba emen emeigdoumesa yeng Roma meijen mougt mera medam hom dous eng edag mougt mera medam naugb emen gini. 19:16 Sug Pilatus ouman len merir dangga, kaba, en arges Yesus deb se men sadodor merisira naugb len letob en se sogo salib. Sug en arges en deb se len merisirohob, kaba, len lahwan en naugb ledetob en se sogo salib toua namcir. 19:17 Dangga sug len lagunya dau Yerusalemohob, kaba, len lahwan en aud mengarougb hom, moho Mougt Mera Mer. (Era se lec Ibrani mer, kaba, dag Golgoda.) Dara len larougb en naugb en odo men sogo salib teitei dara en aud us ingga toua. 19:18 Sug len ledebeij mengarougb inggohob, kaba, len letob en dara sogo salib namcir. Dara len letob lahwai desij en toua. Laingma, kaba, dig en mesira misen, doba laingma, kaba, dig en mesira metigi. Hanoba Yesus enin se meraufu. 19:19 Sug len letob Yesus dara sogo salibohob, kaba, Pilatus arougb men lusud, endagai: Yen yog se surad, yendagai: Sud hom gin, kaba, eni Yesus dau cinogo Nasared. En edag leng Yahudi meren mougt mera medam. Sug len log augwan se suradohob, kaba, en arougb len, endagai: Yen yetob surad an moho gini dara sogo salib dig en mougt toua. 19:20 Dara en arougb men lusud naugb len lemog surad an moho gini se lec Ibrani mer dousero. Doba len log se Latin mer, dara Grika mer toua. Dangga lusud leinyana lecic dau surad an moho gin. Anai us mougb gedig len letob Yesus se sogo salib se gin, kaba, emeb aigus dau Yerusalemero, doba deinyorto namcir. 19:21 Doba gembala gesa taij meren mougtir len len dougwo Pilatus, lendagai: Ban bemog en edag emeng Yahudi emen mougt mera medam se surad dangga, isnaro. Doba ban bog endag, enin eigdoumesa enin moho dag emen mougt mera medam dous. 19:22 Doba Pilatus en ohoiya len merir. Hanoba en enara dou len, endagai: Areg dan dogohob, kaba, ebsugeb namcir. 19:23 Sug len letob Yesus dara sogo salib dauwohob, kaba, len leg men sansun augwan dau en namcir. Hanoba len lekeba dag hogu icira daum toua. Hang astesda dau len, kaba, sud hom en oho hom dous. Dara len leg sansun gagas geb aimei dau en toua. Doba sansun hom gin, kaba, len lemogon mohw emebsero. Doba len lesinsin dag hom namcir dous. 19:24 Dangga sug leng sadodor len leiya, doba sansun gin mohw emebsero, kaba, len lenara doum, lendagai: Maman mamaga anim, isnaro. Doba maman marba nomor maic dous. Dauntoba gareg nomor ens en, kaba, enin gang en emoho dous. Len leicara dag gini, dauntoba esogwa deisa areg Daud en erba Ugwaremer an gin deb sug nosa touohob, endagai: Indan sansun augwan, kaba, len lekeba doumohob. Doba indan sansun geb aimei, kaba, len lemekeba doumero. Doba len lerba nomor laic dous. 19:25 Doba Yesus mem, dara mem medamouwa, dara Mariam, Klopas mesouwa, dara Mariam dau cinogo Magdala, kaba, len laugwan lesa deinyor sogo salib meiyo an Yesus toua. 19:26 Dangga sug Yesus eiya, doba en men dara godeh hom gedig en medoc gororougb en lan lasa deinyor sogo salib meiyo an en, kaba, en esulou mem, endagai: Daneh, dan decug indan godeh hom gini dag ban abisi naugb en esedougwo ban deit. 19:27 Gin ouwohob, kaba, en esulou men godeh hom gin toua deit, endagai: Dan decug Daneh gini se ban absira naugb ban besedougwo en dag ban abim toua. Dangga dau lona ingga, kaba, men godeh hom gini en ahwan Yesus mem se men tu toua namcir. 19:28 Sug Yesus esulou mem dara men godeh hom lahwas dauwohob, kaba, en eiyagarij lusud, endagai: Merijeba dani. En eicara dag gini, anai en ecinaga dau sug en eicara dag gin, kaba, en aimo areg ELOHIM ens deb naugb en augwan bouwedoc namcirohob. 19:29 Dangga sug len louman Yesus eiyagarij len dag gin, kaba, len leic augb keita geb se dum mohu naugb len logun se anggur mohu gedougdaha geb se igdebir sungga. Sug len logun sehob, kaba, len leihwi se aremerij w hisob maga. Hanoba len lemoutan dou Yesus naugb en outut toua. 19:30 Sug en oututohob, kaba, en enara, endagai: Augwan ouwedocohob. Sug en enara dag gini inegohob, kaba, en mergo obsara. Hanoba en esa mena deisa Mena mesira naugb en omom namcir. 19:31 Doba sug Yesus esa mena bomom gin, kaba, leng Yahudi meren Lona Gemeicaresero toua ebeij deinyorohob. Dara se Lona Gemeicaresero gini, kaba, len merna eiseisan Lona Gohw Bedreg naugb len lougwanara debin toua. Dangga sug lona hwas gini adedim dag ginohob, kaba, leng Yahudi leigdoumesa Lona Gemeicaresero gini agas edreg dau Lona Gemeicaresero gus augwan namcir. Hang leng Yahudi meren mougtir leihwedaud Pilatus. Anai len lemouwan naugb merdesa emeb se sogo salib se lona gouji ginero. Sug len ledebeij enohob, kaba, len ledenara dou en, lendagai: Ban barougb aban sadodor naugb len ledeised leng leb se sogo salib ingga len merohobaga bedug namcir, dauntoba len lomom dedemeda. Hanoba ban barougb len naugb len leic merdesa dau sogo salib naugb ledec toua. 19:32 Dangga sug leng sadodor leihwedaud usi ginohob, kaba, len ledeised sud hom dau lahwai gedig len letob lan desij Yesus graga en mohobaga bous nosahabi. Dauwohob, kaba, len ledeised en mesi homa mohobaga toua ucan. 19:33 Doba sug len ledebeij Yesusohob, kaba, len leiya en, doba en omomohob. Dangga hang, len lemeised en mohobaga touwero. 19:34 Doba sud hom dau len, kaba, en eic kebtemaga bedesugb Yesus se mocbo meniha. Sug en edesugb inegohob, kaba, mogwihi dara mohu ohw dau Yesus en mocbo meniha gin toua. 19:35-37 Aremer augwan gini esogwa deisa areg len log deb se Surad Injil Meb Mohon eisaugb Yesus deb sug nosa touohob, lendagai: Len lemeised en mori hom emousero. Dara len log ingma deit, lendagai: Sug len ledesugb en, kaba, lusud lesa lauweila en toua. (Aremer gin, kaba, sud hom en eiya augwan se en mairesohob. Dangga hang, en emesai gin augwan asesa dou yen toua. Dauntoba yen meigdoc ebdebin an areg en esai dou yen gini dag misen namcir. Anai sug en eiya augwan asesa gragohob, kaba, en ecinaga dag areg en esai dou yen gin, kaba, augwan toua se geica namcirohob.) 19:38 Sug Yesus omomohob, kaba, Yusub, dau cinogo Arimatea, en eihwedaud Pilatus naugb en edacgeij en an Yesus maga. Dangga sug en edebeij Pilatusohob, kaba, en acgeij en, endagai: Ban bouwan, kaba, dan dideic Yesus maga dau sogo salib naugb dan didecda. En eicara dag gini, anai en toua dag Yesus men logodehohob. Doba en ahau dau leng Yahudi meren mougtir. Hang en emens enin ainyes an gin dou len touwero. Doba en ecgoneh mog dau len namcir. Dangga sug Pilatus ousan dou enohob, kaba, en eihweda naugb en edec Yesus maga dau sogo salib toua. 19:39 Doba sug en eihwedaud sogo salib gin, kaba, sud hom, moho Nikodemus, en aimo en. Hanoba en arougb men sogougwir naugb len lodo aremoung mohu dau w mur dara w gaharu ucan lan toua. Dara aremoung mohu gin, kaba, men gogom augwan edebeij kilo mos homoiyohob. Nikodemus gin, kaba, eni sud hom gedig en edebeij Yesus se loba sug nosohob. 19:40 Sug lan ladebeij sogo salib meiyohob, kaba, lan laic Yesus maga dau toua. Hanoba lan laic minc lagacgec en maga. Dauwohob, kaba, lan lair aremoung mohu graga debin en maga ucan deit. Anai augwan gini aimo dau leng Yahudi meren gaben sug len lec aremogougb danggohob. 19:41 Doba deinyor sug len letob Yesus se sogo salib gini, kaba, lo hom toua moongga. Dara se lo gin, kaba, igdohos mes hom gedig lusud lemec aremogougb mougwa hom sebuma toua moongga. 19:42 Dangga sug Yusub dara Nikodemus lan laiya, doba igdohos mes gin deinyor, kaba, lan lado Yesus maga naugb ladec sungga toua. Anai leng Yahudi meren Lona Gemeicaresero ebeij deinyor namcirohob.

Yohanes 20

20:1 Doba edebeij Ari sug lona esgesgaba, kaba, Mariam dau cinogo Magdala en eisa lonamenmen naugb edogod dougwo igdohos mes an Yesus. Anai Lona Gemeicaresero ouwa dauwohob. Sug en edebeij aremogougb modohob, kaba, en eiya, doba len leila igdohos meh dauwohob. 20:2 Sug en eiya dau ginohob, kaba, en obga ucugb aud Simon Petrus, dara Yesus men godeh hom gedig en medoc gororougb en toua. Sug en edebeij lanohob, kaba, en en dou lan, endagai: Lusud leic maman Adehsud en maga dau igdohos mesdohob. Doba emen ememecinaga len ledob en deb sugiro deitohoba? 20:3 Sug lan toua lauman gin, kaba, lan labursa Mariam medigo naugb ladogod dougwo igdohos mes deit. 20:4 Dangga sug lan laobga, kaba, Yesus men godeh hom gedig en medoc gororougb en, kaba, en obga eino Petrus men. Hanoba en en edebeij igdohos mes nosa. 20:5 Sug godeh hom gini en edebeij igdohos mesohob, kaba, en emeinesa namcirdero. Doba en ou mergo bogug dous. Dangga en emeiya ara ingma emeb se igdohos mes touwero. Doba en eiya minc gedig len lagacgec Yesus maga inggeb se igdohos mes deb dous. 20:6 Doba sug Simon Petrus en toua edagunyohob, kaba, en emesa ucucugb se medigoro. Doba en eic mos namcir se igdohos meseda. Dangga en toua emeiya ara ingma emeb se igdohos mes touwero. Doba en eiya minc mogud inggeb dous. 20:7 Dara en eiya minc gedig len lahud dougwo Yesus mougt, kaba, emeb debin minc gedig len lagacgec en magero. Doba ebtoumou beb se mohw dangga. 20:8 Sug Yesus men logodeh gobgeino graga en eiya, doba Petrus einesa igdohos mes namcirohob, kaba, en eic mos naugb en einesa ucan en toua. Dangga en toua eiya minc dougwo mougt emebdebin se minc dougwo maga ginero, doba ebtoumou beb se mohw dangga dous. Hanoba en medoc ebdebin an dag Yesus eisa dau gomom dag misenohob. 20:9 (Dara sug Yesus eisa dau gomom ucugb dag gin, kaba, aimo dau aregELOHIM en ogod deb deinaugb en sug nosa. Hang lusud len log deb dau gini se Surad Injil Meb Mohon deb sug nosa touohob. Doba areg len log deb gin, kaba, Yesus men logodeh lahwai graga lan mardoc emobgesa meijouhw se lona ingga asesa touebma.) 20:10 Dangga hang, sug Petrus dara godeh hom gini lan laiya augwanohob, kaba, lan lacicugb dig maran tu ucugb deitda. 20:11 Doba Mariam, kaba, en esa beb dougwo igdohos moc deb. Sug en eb gin, kaba, en ou mergo bogug dougwo igdohos mes toua. 20:12 Dangga en eiya, doba malaikad lahwai eng laigtou se boromei gedig len lob Yesus maga deb se graga deb gini. Laingma, kaba, lahig dig mougt. Laingma, kaba, lahig dig mohora. Lang gin lahwai, kaba, lan lag sansun gogoufu namcir. 20:13 Dangga lan laijidougwo en, landagai: Daneh, ban beb an garena? Doba Mariam en auni dou lan, endagai: Dan deb an indan Adehsud. Anai len leiyoho en maga dau sugindohob. Hang dan demecinaga sug len ledob en deb touwero. 20:14 Sug en enara dag gin dou lanohob, kaba, en eineg dig medigo. Hanoba en eiya sud hom gesa dig en medigo. Doba en emecinaga dag en ingga Yesusero. 20:15 Dangga Yesus eijidougwo en, endagai: Daneh, ban behilon garena, hang ban bemeb an en gina? Doba Mariam en oudesa Yesus en edag sud hom gesedougwo lo ingga dous. Hang en emeijidougwo en ucugb, endagai: Adehsud, sug ban beic en maga dau sugindohob, kaba, ban bedens sug ban bedobdeb dou danahabi. Dauntoba dan dedeic en naugb dobdeb en se mohw gin ucugb deit. 20:16 Doba Yesus eija en moho, endagai: Mariam. Sug Mariam ouman Yesus mer asesohob, kaba, en eineg namcir beija Yesus moho se lec Ibrani mer, endagai: w Raboni. (Meijouhw gini dag indan Guru.) 20:17 Doba Yesus en dougwo en, endagai: Ban bemos danlobma. Anai dan demedebeij dan Indinabuma. Dangga ban becicugb aud dan indaguner dara dan indamouwer yen yaugwanahabi. Hanoba ban ben dou len dag iteitogin, kaba, dan deihwedaud maman Mamina ucugb. Anai eni dan Indina dousero, doba yen toua Meijina. Dara ban ben dou len dag dan decicugb aud maman ELOHIM. Anai en emedag indan ELOHIM dousero, doba yen toua meijen ELOHIM. 20:18 Sug Mariam dau cinogo Magdala en ouman dag ginohob, kaba, en ecicugb aud Yesus men logodeh. Hanoba en enara dou len, endagai: Dan deiya maman Adehsud en eisa ucugb dau gomomohob. Sug en en dou len danggohob, kaba, en ecic dau areg Yesus en en dou enohob graga augwan asesa ucan dou len deit. 20:19 Dangga edebeij se Ari loba, kaba, Yesus men logodeh len laugwan merugwengga se tu hom. Hang len louf misis augwan dougwo len namcir. Anai len lahau dau meren mougtir dau leng Yahudi sug len leic gogom dou len toua. Doba sug len leigtou dag gin, kaba, Yesus agunya debin len se dimei mes ingga. Hanoba en ou len, endagai: ELOHIM eic geigouhw dou yen dougwo areg gecgu augwan terimda. 20:20 Sug en ou len dauwohob, kaba, en ens mosutimei mes dara mocbo meniha mes dou len toua. Dangga hang, men logodeh merdoc agahugouhw namcir. Anai len leiya, doba meren Adehsud en eisa dau gomom ucugwohob. 20:21 Doba Yesus enara dou len deit, endagai: ELOHIM eic geigouhw dou yen dougwo areg gecgu augwan namcir. Sug en acgeij ELOHIM naugb en eic geigouhw dou len dag ginohob, kaba, en esulou len, endagai: Dan darougb yen naugb yen yesai dan induro dou lusud se cinogo augwan. Aninim dag dan Indina esa dan naugb dan desai en moro dou yen touohob. 20:22-23 Dangga gareg dau len en esga men sesar dou yen, hanoba yen toua meigdoc esgirahesa naugb yen yogod an namcir, kaba, ELOHIM toua aigdougwohob. Doba sug yen meigdoc emesgirahesa sesar ingga naugb yemogodero, kaba, ELOHIM toua emaigdougworo, doba eb naugb en terimda. Sug Yesus esulou len dauwohob, kaba, en esa mena se len. Hanoba en enara dou len deb, endagai: Dan desa Mena Gogoufu se yen meigdoc mes. 20:24 Doba sug Yesus ens enin ainyes dou men logodeh aimougtut se loba gin, kaba, sud hom dau Yesus men logodeh sisa hobjerai, en moho Tomas, kaba, en mogero. Lusud leija en moho toua dag lang marogoc agacgecim toua. 20:25 Dangga Yesus men logodeh gus len len dou en, lendagai: Emen emeiya maman Adehsud eisa dau gomom ucugwohob. Doba Tomas esbes len merir, endagai: Sug dan demeiya paku mohw icira en mesira, dara dan demob dan insira mob se en mesira mes dara mocbo meniha mesahabi, kaba, dan indoc emebdebin anero. Doba sug dan deiya augwan gini se dan indiresohob, kaba, dan indoc ebdebin an en dag en eisa dau gomom ucugb dag misenohob. 20:26 Ari hom debin gin, kaba, Yesus men logodeh len laugwan merugwengga se dimei mes hom gin deit. Dara Tomas en toua moongga desij len. Dara len louf misis augwan dougwo leng Yahudi namcir touohob. Doba Yesus agunya debin len augwougb se dimei mes ingga deit. Hanoba en ou len, endagai: ELOHIM eic gesgigouhwesa dou yen dougwo areg gecgu augwan namcir. 20:27 Sug en enara dou len dag gin dauwohob, kaba, en eija Tomas. Hanoba en enara dou en, endagai: Ban bin naugb ban beiya dan insira mes ingginahabi, ban bemou absira mob deisa. Hanoba ban bou ban absira bousousa dan inducba meniha mes gin toua. Dauntoba ban bemeija abuwesa dan deitero. Doba ban bod abina debsa dan namcir dag dan deisa dau domom ucugb dag misenohob. 20:28 Sug Tomas eiya gin, kaba, en argobin. Hanoba en enara, endagai: Indeic, ban, kaba, indan Adehsud dara indan ELOHIM ingginohob. 20:29 Doba Yesus enara bauni en mer ucugb, endagai: Ban beiya gini, hang ban abdoc emebdebin an danohobei? Naro. Dangga gareg en emeiya dan se en maires mougwa hombuma, doba en medoc ebdebin an dan augwougb dous, kaba, ELOHIM eic geigouhw medam dou en namcir. 20:30 Dara Yesus aben ganusbus einyana ingma dara abeba men logodeh meriresi. Doba dan demog augwan se indan surad ginero. 20:31 Doba ganusbus areg dan dens dou yen se indan surad ginohob, kaba, dan dog dauntoba yen yecinaga dag Yesus gini, kaba, en edag ELOHIM Meisi misen. Dara en edag Sud Hom Geigdoc Yen Dau Sesar Men Gogom Augwan gin toua. Dara dan dog augwan gini se surad, dauntoba yen yecinaga dau sug yen meigdoc ebdebin an en, kaba, dag en emeic maireseb menau geb huhugb dou yen toues.

Yohanes 21

21:1 Lona aibibra debin sug Yesus ens enin ainyes dou men logodeh se dimei gragohob, kaba, en edens enin ainyes dou men logodeh se Tiberias mebera deit. Doba areg en ens enin ainyes an gin, kaba, men meijouhw dag gini. 21:2 Se lona hom, kaba, Simon Petrus, dara Tomas gedig lusud leija en toua dag lang marogoc agacgecim, dara Nataniel dau cinogo Kana se leng Galilea meren hancob, dara Sebedeus meisi lahwai, dara Yesus men logodeh lahwai gus, kaba, len laugwan ledeigtou se Tiberias mebera. 21:3 Sug len leigtou se Tiberias mebera dag gini, kaba, Simon Petrus enara dou mesir, endagai: Dan dederba diara debin hosei dangga. Doba mesir toua launi dou en, lendagai: Maman maugwanda. Dangga len laugwan leihweda ledeisa ij hom naugb lederba diara debin hosei toua. Doba se loba hom sug len lerba diara gini, kaba, len lemesma hosei homero namcir. 21:4 Sug lona esgohob, kaba, Yesus en toua edesa Tiberias meberohob. Doba len lemecinaga en touwero. 21:5 Dangga Yesus eijidougwo len, endagai: Indihirija, yen yeic hosei ingma naugb sug matohobei? Doba len launi dou en, lendagai: Emen ememesma hom touwero. 21:6 Sug Yesus ouman len merir an gin, kaba, en arougb len, endagai: Yen yerba diara debin hosei dig ij nagama aud yen meisira misen, kaba, yen yemaic hosei ingmes. Dangga sug len laimo en mer naugb lerba diara debin hoseiyohob, kaba, len lesma hosei einyana atij diara mes namcir. Hang emedeinyum naugb sug len leigdoumesan touwero. 21:7 Dangga Yesus men godeh hom gedig en medoc gororougb en namcir, kaba, en enara dou Petrus, endagai: Ban beiya maman Adehsud eng inggesa gac. Sug Petrus en ouman dag meren Adehsud inggedesa gac, kaba, en eg men sansun gouji dougwo en ucugb. Hanoba en esogwesa se duhu aud enda. Anai sug en erba diara debin hosei, kaba, en eg men sansun gouji dau enohob. 21:8 Doba mesir gus, kaba, len leisa ing mes dangga. Hanoba len lohugouhw diara an hosei einyana dig lonogeda. Anai len lemdeba aigus dau lonogero, doba deinyor dag len lec merohora mougb huntun hom dous. 21:9 Sug len lesogwa dau ing mes se lonogohob, kaba, len leiya, doba hosei eb se smougb. Dara roti toua eb desij se smougb mebera deb gini toua. 21:10 Doba Yesus eijer, endagai: Yen yodo hosei gedig yen yerba diara debin menenau ingga ingmanahabi. 21:11 Sug Petrus ouman Yesus mer an gin, kaba, en toua aingma deisa ingmes. Hanoba len laugwan lesara diara an hosei dig lonogeda. Sug len lesara anim, kaba, len leiya, doba hosei medam mogud dag huntun hom mos sergem homoi edeisu atij diara mes namcir. Doba diara emobogougb an hosei einyana gin touwero. 21:12 Sug len lesara diara an hosei dig lonogohob, kaba, Yesus eija len, endagai: Yen yen naugb maman mat hosei dara roti ginahabi. Doba len lahau dau en. Hang sud hom dau len en emeic mos naugb emeijidougwo en ucugb touwero. Anai len laugwan lecinaga dag eni maman Adehsud misenohob. 21:13 Sug len laugwan lacinimohob, kaba, Yesus eic roti. Hanoba en ohw an len naugb len laugwan let. Dau, kaba, en eic hosei dou len toua deit. 21:14 Sug Yesus ens enin ainyes dou men logodeh se Tiberias mebera dag gin, kaba, gini dag mougwa homoi dau lona sug ELOHIM eigdoumesa en dau gomom ucugwohob. 21:15 Sug len letara bouwa dauwohob, kaba, Yesus eijidougwo Simon Petrus, endagai: Simon, Yona meisi, ban abdoc gororougb dan edreg dau len laugwan ginei? Doba Simon enara bauni ucugb dou en, endagai: Adehsud, ban becinaga dag dan indu ehigehi banohob. Dangga Yesus en dou en deit, endagai: Sug ban abu ehigehi danohob, kaba, ban bagauwesa indan domba. 21:16 Sug Yesus enara dou Simon Petrus dauwohob, kaba, en eijidougwo en mougwa hom dara deit, endagai: Simon, Yona meisi, ban abdoc gororougb dan dag misen ingginei? Doba Petrus enara bauni ucugb dou en deit, endagai: Adehsud, ban becinaga dag dan indu ehigehi ban dag misenohob. Dangga Yesus en dou en deit, endagai: Ban abu ehigehi dan dag misenohob, kaba, ban bagauwesa indan domba toua. 21:17 Doba Yesus eijidougwo Petrus mougwa hom dara deit, endagai: Simon, Yona meisi, ban abdoc gororougb dan dag misen namcir ingginei? Dangga Petrus medoc momogo medam, anai Yesus enara barauwi en mougwa homoi icira an ginohob. Hang en enara bauni Yesus mer ucugb dou en, endagai: Adehsud, ban becinaga augwan dag misen namcir. Dangga hang, ban becinaga dag dan indu ehigehi ban dag misenohob. Sug Petrus auni dangga dou Yesusohob, kaba, Yesus arougb en, endagai: Ban bagauwesa indan domba dara geigouhw namcir. 21:18 Doba ban bouman dan indir gin deigeigouhw deitahabi. Anai sug ban bugdeh mesaba, kaba, len gus lemen dougwo banero. Doba ban bec asa abu naugb ban beihweda sungga sungga baimo dau areg banin bouwan dous. Doba sug ban bedag sud bodohob, kaba, ban bou ban absira hwas dou len gus naugb len lohud darem dous. Hanoba len lahwan ban aud usi gedig banin bemouwanero namcir toua. Areg dan den gini, kaba, dag misen namcir. 21:19 Doba areg Yesus enara dou Petrus gin, kaba, dauntoba en ecinaga meijouhw deb sug len gus lemeic gomom dagiro dou ena? Anai gini dag en aigdoumesa ELOHIM moho namcir. Sug Yesus enara dangga dou Petrusohob, kaba, en enara mougwa hom dara dou en deit, endagai: Ban beicara baimo dan se indan ucina aud gomom ucan dan toua. 21:20-21 Sug Yesus ens ucina aud gomom dou Petrus dag gragohob, kaba, Petrus en eineg. Hanoba en eiya, doba godeh hom gedig Yesus medoc gororougb en namcir, kaba, en toua moongga se medigo. Dangga en eijidougwo Yesus, endagai: Adehsud, dagiro naugb godeh hom gina? En toua omomei? Era naroei? Petrus eijidougwo en dag gini, anai se loba sug len letara sug ouwedoc, kaba, godeh hom gin eng eigtou deinyor Yesus. Dara en eng toua eijidougwo maman Adehud se loba ingga dag gareg dau len en ohw en se len gus mesirohoba? 21:22 Doba Yesus enara bauni Petrus mer ucugb, endagai: Sug sud hom gini en mena agau terim bedebeij sug dan decicugwen, era en omom, kaba, gini aban aremer naugb ban binero. Doba gini ogdoc dan dous. Dangga ban abdoc momogo an ginero. Doba ban, kaba, ban beicara besogwa deisa aban ucina gedig dan dens dou banohob ucan dan dous. 21:23 Dangga mesir leigdoc loungmen an gini. Hanoba len ledecic dou mesir gus deit dag Yesus men godeh hom gin, kaba, en emomom deitero, doba en maireseb terimda. Dobnaro. Yesus emenara ingma dangga dou Petrusero. Doba en enara dou Petrus dag sud hom gini en omom, era en maireseb terimda edebeij Lona Sug Yesus En Edecicugb, kaba, gini Petrus men aremerero, doba ogdoc Yesus enin dous. 21:24 Gareg en ens dara en og augwan se surad gin, kaba, en toua dau Yesus men logodeh. Dangga emen emecinaga dag areg en ens dara en og gin, kaba, augwan se geica namcirohob. 21:25 Dara dan demog dau Yesus men geicara augwan se surad ginero. Anai sug dan dog dau men geicara astesda hom yom se surad gin, kaba, dan doudesa lusud meren hancob augwan emesa naugb gin touwero.

Watti'u Manga Rasul 1

1:1 Teopilus, sug nosa, kaba, dan dog dau Yesus men geicara sug ebiji terimda edebeij lona sug ELOHIM eigdoumesa en dig bogo augwan asesa dou banohob. Dara areg en edidib dou men logodeh sug nosa, kaba, dan dens dau augwan gini asesa dou ban touohob. 1:2 Dangga deinyor sug ELOHIM eigdoumesa en dig bogo gin, kaba, en arougb men logodeh ogdoc Mena Gogoufu men goubesa naugb len lesai en moro dou lusud se cinogo augwan. Anai en ouci len sug nosa naugb ginohob. 1:3 Dara sug en eisa dau gomom ucugwohob, kaba, en ens enin ainyes ucucugb dou len. Hanoba en eic ganusbus se lona sud hwai debin gin dou len toua. Dauntoba len lemeija meruwesa en deitero. Doba len lecinaga dag en eisa dau gomom ucugb dag misenohob. Dara en ens dau lona sug ELOHIM oiharaga lusud ucugb meijouhw augwan asesa dou len toua. 1:4 Dara en en dougwo len dag len lemesai en moro augwougb touwero. Doba len leigtou se Yerusalem dousahabi. Dangga sug en oucimdeb dara len sug ouwedoc dag ginohob, kaba, en enara dou len, endagai: Yen yemeihwededau Yerusalem naugb yen yemesai dan induro dou lusud augwougblobma. Doba yen yeigtou sungga terimda areg dan Indina en os dou yen sug nosohob, kaba, en esa dou yenahabi. 1:5 Anai Yohanes, kaba, en ogun yen se duhu dous. Doba lona hosa debin gin, kaba, dan Indina en emesa Mena Gogoufu emaos dara dou yens. Augwan gini aimo dau areg dan den dou yen sug nosa touohob. 1:6 Doba Yesus men logodeh sug len loucimdeb dara en sug ouwedoc gini, kaba, len leijidougwo en, lendagai: Adehsud, aiseba ban beigdoumesa mamang Israel maman madag mougt mera medam naugb len gus dag nosa deita? Iteitoginei? Era se lona daiyamo gacinei? 1:7 Doba Yesus enara bauni ucugb dou len, endagai: Lona dara cumougt naugb sug areg ebiji, kaba, dan Indina enin dous eng esedeb augwan. Hang en emouwan naugb yen yemecinaga dau gin touwero. Anai enin dous eng edag mougt naugb ginohob. 1:8 Doba sug Mena Gogoufu einesa yen meigdoc mesohob, kaba, yen yebiji naugb yen yos yadi dan indoho dou leng se Yerusalem, dara leng se Yudea, dara Samaria meren hancob augwan, terimda edebeij cinogo moc ougbdesa. Anai sug en einesa yen meigdoc mes dag ginohob, kaba, en emeic goubesa dou yen naugb gin toues. 1:9 Sug Yesus esulou len dangga dauwohob, kaba, ELOHIM eigdoumesa en dig bogo, abeba len meriresi, terimda umer ouf dougwo en namcir. Hanoba len lemeiya en toua deitero. 1:10 Doba sug len lauweila bogo toutou an en, kaba, lagiji lahwai gedig lan lag sansun gogoufu lagunya debin len augwougb naugb lan lan dougwo len. Anai len merires emedug dau bogoro, doba len merires eb debin Yesus sug en eisaugb dig bogo gin terimda. 1:11 Dangga hang, lan lamenara dou len, landagai: Yusud dau Galilea, yen yesa sugin yauweila bogo toutou, anara? Anai Yesus gini, kaba, ELOHIM eigdoumesa en dig bogo dau yenohob. Doba en emecicugb aud yens, aninim dag yen yeiya en eisaugb dig bogo dau yen gragohob. 1:12 Sug Yesus men logodeh louman lan graga marir an dag ginohob, kaba, len lecicugb dau mengarougb, moho Saitun Meda, dig Yerusalemeda. Anai mengarougb gini, kaba, emebijes dau Yerusalemero. Doba len lec merohora mougwa huntun sisa, kaba, len ledebeijohob. 1:13 Sug len ledebeij Yerusalemohob, kaba, Petrus, Yohanes, Yakobus, Andreas, Pilipus, Tomas, Bartolomeus, Matius, Alpius meisi Yakobus, Simon Patriot, dara Yakobus meisi Yudas, len laugwan leisaugb se dimei hom sug len latou sousougb naugb len locuncum. Anai len merdoc aninim naugb sug len locuncum dou ELOHIM sungga ucucugb terimda. 1:14 Dara astesda sug len loucimdeb dag gini, kaba, Yesus mem, dara magtor, an ligida gus gus, len toua laimo len naugb len locuncum dou ELOHIM toua. 1:15 Lona hosa debin dau sug ELOHIM eigdoumesa Yesus dig bogo ginohob, kaba, Yesus men logodeh lacinim deit. Doba leng loucimdeb gini, kaba, merug edebeij huntun hom sud hom edeisu. Dangga sug len laugwan lacinimohob, kaba, Petrus en eisa besa. 1:16 Hanoba en enara dou len, endagai: Dan indagunerij, dara dan indamouwerij, yen yecinaga eisaugb Yudas men geicara dag augwan gini esogwa deisa areg Mena Gogoufu ens dou Daud naugb en og se Surad Injil Meb Mohon debohob. Anai gini aimo dau areg ELOHIM enin ogod an deb touohob. Dangga hang, en emedag mougt beino leng sadodor naugb len lagaigeij Yesus sug nosa gini. 1:17 Dara yen yecinaga dag Krisdus eigdoumesa en moho, kaba, en toua aimo emen naugb emen emaugwan emesai Krisdus moro dou lusud laugwan sug nosa touohob. 1:18 (Doba sug leng Yahudi meren mougtir leic momsi dau men geicaragecgu gini dou enohob, kaba, en eic aregoufu gini naugb edauma lo naugb enin toua. Sug en ouma lo gini naugb eninohob, kaba, en edobsara menuhwa einya bomom se lo ingga namcir. 1:19 Sug leng se Yerusalem len louman dau gini, kaba, len leija Yudas men lo gini se meren leci dag Akeldama. Era Lo Gedig Mogwihi Ebsa, anai en mogwihi eir deb se lo ginohob.) 1:20-21 Dangga hang, sug en omom dag ginohob, kaba, ELOHIM en ouwan naugb maman mauci sud hom, dauntoba en eperwei Yudas en mohw deit. Hanoba en ousa emen naugb sug emen emaugwan emos emadi maman Adehsud Yesus en moho deseino lusud dag en eisa dau gomom ucugwohob toua. Anai augwan gini esogwa deisa areg ELOHIM en enara se Ugwaremer an gin deb ogdoc Daud sug nosa touohob, endagai: Dan demouwan sud hom ingma, kaba, en ematou se men tu deitero, doba eb bedinebena deb namcir. Dara en enara se Ugwaremer hom toua, endagai: Dan douwan sud hom gus eperwei en mohw deit. 1:22 Doba sug maman mauci sud hom gin, kaba, esloulougb dag en toua aimo emen se lona augwan sug maman Adehsud Yesus eni moongga desij emen, ebiji dau lona sug Yohanes ogun en se duhu, terimda edebeij lona sug ELOHIM eigdoumesa maman Adehsud ucugb dig bogo toua. 1:23 Sug Petrus esulou len dag gin dauwohob, kaba, len lens lahwai maroho doum. Laingma, kaba, en moho dag Matias. Laingma, kaba, en moho Yusub, gedig lusud lesagai en moho toua dag Sabas meisi. Dara ligbum, kaba, len lesagai en moho toua deit dag Yusdus. 1:24-25 Sug len lens lan maroho dauwohob, kaba, len locuncum an gin dou Yesus, endagai: Adehsud, ban, kaba, ban becinaga areg geb se lusud merdoc mes augwanohob. Dangga hang, ban bens dau lahwai gin dou emenahabi, dag gareng ban bouci en, dauntoba en eperwei Yudas en mohw naugb en esai ban aburo dou lusud toua deit. Anai Yudas gin, kaba, en obsara dau men geicara ginohob. Hanoba en eihwedig men usi gedig men geicara gecgu gini ahwan en aud gin sedohob. 1:26 Sug len locuncum dag gin dauwohob, kaba, len log lan gin maroho se igdahab geihwidua hwai naugb len lob se biruwa mes. Hanoba sug len letitir anohob, kaba, Matias eng moho agunya nosa. Dangga len leigdoumesa en toua desij Yesus men logodeh merug sisa hobjerem graga naugb sug len lesai Krisdus moro dou lusud deit.

Watti'u Manga Rasul 2

2:1 Sug Lona w Pentakosda edebeijohob, kaba, Yesus men logodeh len laugwan loucimdeb se tu hom deit. Anai se lona gin, kaba, leng Yahudi laugwan len len dau dingan dingan naugb len lougwanara debin meren ared geraimeij. Dara len len sijo dou ELOHIM naugb meren ared gin toua. 2:2 Doba sug len loucimdeb gin, kaba, moung medam dag loungmen eisa en dau bogo debin len augwougb becinten tu mes gedig len leigtousa augwan namcir. 2:3 Dangga len leiya, doba edag smougb mouf gou metemouwu doum, agaha bastesda len laugwan se tu mes ingga toua. 2:4 Sug edag smougb mouf gini eb se len laugwanohob, kaba, eic dag len merdoc atij an Mena Gogoufu men goubesa. Hanoba en eic mou ouforoho dou len naugb len lec merir aingma aingma se len gus meren leci augwan, aimo dau areg Mena Gogoufu ousa len naugb gin toua. 2:5 Dara se Yerusalem gin, kaba, leng Yahudi gedig len louwan naugb lesijaresa ELOHIM terimda, kaba, len len dau meren cinogo dingan dingan. Hanoba len ledag lugun se cinogo ingga toua. Anai len gin, kaba, len loudesa dag se ELOHIM Men Tuari geb se Yerusalem gin eng len lesijaresa en dag misen dous. 2:6 Dangga sug len louman moung medam en dau bogo debin Yesus men logodeh dag gin, kaba, leinyana len len naugb lou acec tu an Yesus men logodeh sug len loucimdeb se graga toua. Doba sug len louman dau areg Yesus men logodeh len lec gin, kaba, len lomi dau gin namcir. Anai astesda dau len, kaba, en ouman dau meren leci sug Yesus men logodeh len lenara gini. 2:7 Hang len leijidougwom ucucugb dareg len leimiman dau gini namcir, lendagai: Len gin, kaba, len laugwan dau leng Galilea mogud dous. 2:8 Dangga dagiro, naugwe hang, maman mamouman dag len leci dau maman mamir augwan gina? 2:9 Anai maman gin, kaba, maigbum dau leng Partia. Dara ligbum deit, kaba, dau leng Media, Elam, dara Mesopotamia. Dara ligbum deit, kaba, dau leng Yudea, Kapodokia, Pontus, dara Asia toua. 2:10 Dara ligbum, kaba, dau leng Prigia dara leng Pampilia. Dara ligbum, kaba, dau leng Mesir. Dara ligbum, kaba, len len dau leng Libia meren hancob deinyor cinogo Kirene. Dara ligbum dau mamang Yahudi. Dara ligbum dau lugmahara, kaba, len len dau cinogo Roma toua. Anai lugmahara gini, kaba, len lemecguna dou meren seiseij deitero. Doba len laimo maman naugb len lecguna dou maman ELOHIM touohob. 2:11 Dara ligbum dau maman, kaba, len dau lomos Kreta, dara leng Arab toua. Doba maman macinaga areg len lec gini men meijouhw augwan asesa namcir. Anai maman mauman, doba len leigdoumesa ELOHIM en moho agas medam an men geicara dag ganusbus gini se maman leci augwan touohoba? 2:12 Sug len leimiman doum dag gini, kaba, len leijidougwom an, lendagai: Len lebara dag gin, kaba, men meijouhw dagiro, inggina? Len leijidougwom dag gini ucucugb terimda, anai len merdoc eijesa dara len merdoc omom an namcirohob. 2:13 Doba ligbum, kaba, len lesbes anir, lendagai: Len gin, kaba, len leg ahwei mohwohob, hang len lemenara aibibra dag gin toua. 2:14 Sug Petrus ouman len merir dag len lesbes an Yesus men logodeh dag gin, kaba, en eisa besa. Dara en mesir merug sisa hobjerem len toua merugwengga desij en. Hanoba en enara dara mer goubesa dou len gedig lesbes an Yesus men logodeh gini, endagai: Yeng dau mamang Yahudi, dara yeng yugun se Yerusalem gini, dan douwan dens dau areg yen yeiya dara yen youman gini meijouhw augwan asesa dou yen, dauntoba yen yemauwam an didiero. Doba yen yecinaga dag misen toua. Dangga hang, yen yemoc yen meijums dougwo areg dan den dou yen touwero. Doba yen youman deigeigouhw namcir. 2:15 Anai yen youdesa dag len laugwan gin, kaba, len leg ahwei mohu bed len bomomohob. Dobnaro. Anai iteitogin, kaba, inenihi meijaba naugb sug maman masijaresa ELOHIM dauwahabi. Dangga hang, len gin, kaba, mersdemaga emembreijbuma, anai maman mameg dara mametara touebma. 2:16 Doba areg yen youman dara yen yeiya gin, kaba, augwan gini esogwa deisa areg ELOHIM en os deb dou maman mamjemouwer ogdoc sud hom gesai en moro, moho Yoel, se Surad Injil Meb Mohon deb sug nosa touohob, endagai: 2:17 Edebeij lona sug ouwedoc, kaba, dan demesa Mena Gogoufu dou lusud se cinogo augwans. Dangga hang se lona ingga, kaba, yen meigdebeitor ligib dara ligdob, kaba, Mena Gogoufu emeic mou ouforoho dou len naugb len lemesai dan induro dou lusud. Dara yen meigdebeitor ledag lugdeh mesaba, kaba, en emogod len dag lomom, hanoba en emens dau areg se geica dau dan augwan asesa dou len. Dara yen meigdebeitor gedig len ledag lusudbodohob, kaba, en emens dau areg asesa danin indoc mes augwan se augwa dou len, hanoba len lemens dau augwan gini dou len gus se lona ingga toua. 2:18 Dara gin dousero. Doba indan logodeh ligiji dara ligida, gedig len ledag sogougb, kaba, dan demesa Mena Gogoufu aud len se lona ingga naugb en eic mou ouforoho dou len, dauntoba len lemesai dan induro dou lusud. 2:19 Dara dan demaben ganusbus se bogo meniha taiba, dara dan demeic gansins se cinogo tainya debin areg len lesai gin toues. Anai sug meijen Adehsud indan lona gouji emedebeijbuma, kaba, dan demesa mogwihi, dara smougb, dara smougb mouf ocninim se bogo dara cinogo gin toua. 2:20 Dangga hang, igda lona emeic moufesa toua deitero. Doba edag lobeigbogo namcir. Dara igda loba emerba mouf touero, doba eperwei bedag mogwihi toua namcir. 2:21 Doba gareg en eiyagarij meijen Adehsud dan se lona ingga, kaba, dan demeigdoc en dau sesar men gogom aud maireseb menau geb huhugb gin toues. 2:22 Sug Petrus enara dara mer goubesa dou leng graga dauwohob, kaba, en enara ucan dou len deit, endagai: Yeng dau mamang Israel, yen youman dan indir an areg dan den dou yen gin deigeigouhw deitahabi. Anai ELOHIM ens ainyes dou yen dag Yesus dau cinogo Nasared, kaba, enin eng sud hom gedig en esai en moro eisaugb areg graga augwan dou yenohob. Dara ELOHIM ouma debin gin dou yen, anai en eic goubesa dou en naugb en aben ganusbus, dara en eic gansins, dara areg geic geimiman debin areg en esai gin dou yen toua. Dara yen yenin toua yecinaga dau gini dag misen namcir. Anai en aben augwan gini abeba yen meijiresi touohob. 2:23 Doba ELOHIM enin eng ogod deinaugb en debohob dag sud hom emohw en se yen meisira naugb yen yeic gomom dou en, aimo dau areg enin ouwan dous. Anai enin eng ecinaga aremer augwan dau acgunogohob. Dangga hang, sug sud hom gini ohw en deisa yen meisirohob, kaba, yen yogugwo en se lusud gedig len lebesesar len merisira toua deit naugb len letob en se sogo salib bomom namcir. 2:24 Doba gomom men goubesa emedeinyum naugb sug esedougwo en se tu gesisug, moho w Seol, gin touwero. Hang ELOHIM eigdoumesa en dau gomom ucugb, dauntoba gomom emeic mog erij dou en toua deitero. Doba en arges dau namcir. 2:25 Anai Daud en erba Ugwaremer eisaugb gin deb sug nosa touohob, endagai: Adehsud, dan deiya, doba ban abugwengga dara dan astesda lona loba. Hanoba ban beigtou desij dan dig dan insira misen naugb ban bousa dan toua terimda. 2:26 Dangga hang, dan indoc emesgiraha, dara dan demagahugouhw an ban toua terimda. Dara dan daimo ucina aud gomom, anai dan indaga toua dag getaha. Doba dan dod indina debsa ban. Hang dan indoc momogo touwero, doba dan indoc ebtou namcir. 2:27 Anai dan decinaga dag ban bemarges dan deb sug dan indugwengga se w Seol touwero. Dara dan decinaga dag ban bemamsoho dan gedig dan daimo ban dara dan indoc augwanohob naugb dan indaga etaha namcir touwero. Doba ban beigdoc dan dara ban besedougwo dan dau augwan gin toua namcir. 2:28 Anai ban bens aban ucina aud maireseb menau geb huhugb deb dou danohob. Dangga hang, dan dagahugouhw medam an ban namcir, anai ban abugwengga dara danohob. 2:29 Dan indagunerij, dan douwan dens dau maman mamjemouwa Daud gini meijouhw augwan asesa dou yenahabi. Dauntoba yen yemauwam an didi eisaugb ginlo, doba yen yecinaga dag misen namcir. Anai en, kaba, en omom sug nosohob, hanoba len lec en betahohob. Dara en emeisa dau gomom ucugb touwero. Anai en moda, kaba, inggebga desij maman terimda iteitoginaba. 2:30 Doba sug en mairesebaba, kaba, ELOHIM eic mou ouforoho dou en naugb en ens dau ELOHIM men geicara areg en esedeb naugb lona daiyamo gacin augwan asesa dou maman toua. Hang en emecinaga dag en medebeito hom, kaba, eperwei en mohw naugb en edag maman mougt mera medam deit. Aninim dag Daud en edag mougt mera medam naugb maman mamjemouwer sug nosa touohob. Anai ELOHIM os dangga dou enohob. Hanoba en ou en moho debin gin toua. Dauntoba Daud ecinaga dag augwan gin, kaba, asesa dag misen namcir. 2:31 Sug Daud ecinaga dau areg ELOHIM en esedeb naugb lona daiyamo gacin augwan deb dag ginohob, kaba, en ens deb dau sug Yesus en omomohob, kaba, dag en emomom terimda touwero. Doba en eisa dau gomom. Hanoba en eigdoc lusud dau sesar men gogom augwan toua namcir. Dangga hang, Ugwaremer areg Daud en erba an ginohob, kaba, en emerba eisaugb eninero. Doba sug en enara dag ELOHIM emarges en deb se w Seol. Dara en maga emetaha namcir touwero, kaba, en ens augwan gin deb eisaugb Yesus gin dous. 2:32 Dara emen, kaba, emen toua emecinaga dag ELOHIM eigdoumesa Yesus gini dau gomom ucugb dag misenohob. Anai emen emeiya augwan gin se emen emiresohob. Hang emen emouma debin gin dou yen toua. 2:33 Dauwohob, kaba, en eigdoumesa Yesus gini dig bogo naugb en eigtou dig en mesira misen, dauntoba en edag mougt mera medam desij ELOHIM namcir. Hanoba en Mena gin, kaba, en ogugwo Mena Gogoufu se en mesira toua. Anai gini aimo dau areg en Mena os dou en deb sug nosohob. Dangga hang, areg yen yeiya dara areg yen youman gini, kaba, emogdoc sug emen emeg ahwei mohu touwero. Doba ogdoc Mena Gogoufu gin dous. Anai sug ELOHIM ogugwo en se Yesus mesirohob, kaba, en esa en aud emen toua deit. 2:34-35 Dara Daud erba Ugwaremer an gin sug nosa touohob. Anai enin eng, kaba, en emeisaugb dig bogoro. Doba Krisdus enin dous eng eisaugb dig bogo. Hanoba en enara, endagai: Adehsud Geis Huhugb sugragohob, kaba, en enara dou indan Adehsud, endagai: Ban beigtou dig dan insira misen terimda dan dowun aban moc augwan dag hotingga tainya ban abohora namcirahabi. 2:36 Hang yeng dau mamang Israel, dan douwan naugb yen meigdoc eica namcir dag sud hom areg yen yetob en se sogo salibohob, kaba, ELOHIM eigdoumesa Yesus gin eng en moho, dauntoba en edag mougt mera medam naugb laugwan. Dara en eic goubesa dou en naugb en eigdoc lusud laugwan dau sesar men gogom aud maireseb menau geb huhugb gin toua. Anai sud hom areg dan dens dou yenohob, kaba, eni Yesus hom gin dous. 2:37 Sug len louman Petrus mer an gin, kaba, ogod len merdoc mes beijesa medam namcir. Hanoba len leijidougwo en dara mesir len laugwan, lendagai: Emagtorij, emen emebara dagiro naugb emen geicara gin deita? 2:38 Dangga, kaba, Petrus en emauni dou len, endagai: Eigouhw naugb astesda dau yen, kaba, yen yeineg dau meijen sesar. Hanoba yen yahau an dougwo namcir, kaba, emen emogun yen se duhu bansins se Yesus Krisdus en moho debin gin toua. Dauntoba lusud lecinaga dag yen yesga meijen sesar. Dara yen yedag men logodeh dag misenohob. Anai emen emeperwei en mohw naugb ginohob. Sug yen yemaimo sesar dag gin deitero, doba yen yobsara dau namcirohob, kaba, ELOHIM emaigdougwo meijen sesar augwan dau yen. Hanoba en emesa Mena Gogoufu dag mogud bansins se yen meigdoc mes toues. 2:39 Anai areg ELOHIM os dou yen naugb sug en aigdougwo meijen sesar, hanoba en esa Mena Gogoufu se yen meigdoc mes toua, kaba, augwan gini eb naugb yen, dara yen meijihir, dara yen meigdebeitor, yen yaugwan. Dara eb naugb lugmahara gedig leng leigtou aigusi dau maman len laugwan toua. Dangga gareg maman Adehsud ELOHIM eija enohob, kaba, areg en os gini emedeyebeiya dau en touwero. Doba eb naugb len laugwan toua namcir. 2:40 Dara Petrus emens meijouhw dau areg graga augwan dou len dousero. Doba en enara einyana bad len merdoc mes ucan gin toua deit. Hanoba en esulou len, endagai: Yen yemaimo leng letob maman Adehsud se sogo salib gin aud meren geicara gecgu gin touwero. Doba yen yeigdoc yenin dau meren geicara gin terimda. Dauntoba gogom areg ELOHIM esedeb naugb leng merug mog gin, kaba, emaiyan yen touwero. 2:41 Dangga lusud leinyana gougwa, kaba, len merdoc ebdebin an areg Petrus esulou len eisaugb Krisdus gin toua. Hanoba Petrus dara en mesir gembala gus len logun leng menenau gini len laugwan se duhu ansins debin gin deit. Dara leng Krisden menenau areg maman Adehsud eic bauloulo se lona ingga, kaba, len laugwan ladedim edebeij merug ribu homoi toua. 2:42 Sug Petrus dara en mesir logun len graga laugwan se duhuohob, kaba, len leic meruwemougb esesa astesda lona terimda naugb len louman areg leng merug sisa hobjerai gini len ledidib dou len. Dara len lemasid lenin dau mesir leng Krisden gus touwero. Doba len ledag hom naugb len loucimdeb dara letara aninim. Dara len ledag hom naugb len locuncum esesa toua terimda. 2:43 Dara Yesus men logodeh merug sisa hobjerai gin, kaba, len lens ganusbus dara gansins einyana debin meren gebedbed gin dou len toua. Hang lusud leinyana merdoc eijesa dara lahau medam dou len toua namcir. 2:44 Dara leng merdoc ebdebin an Yesusohob, kaba, len laugwan lemeigtou daum touwero. Doba len loucimdeb ucucugb terimda, anai len merdoc gororougwim namcir. Hang len lemecgun len merisira debin meren aremougb touwero. Doba len lagaha merisira an doum toua terimda. 2:45 Dangga gareg dau len sug en edohw men cinogo, era men tu, dara men aremougb naugb edauma aregoufohob, kaba, en emekeba ingma deb naugb enin touwero. Doba en ekeba dou len gus laugwan aimo dau leng meren ingmaro an len toua. 2:46 Dara len lemeigtou dau goucimdeb touwero. Doba astesda lona, kaba, len laugwan leihweda se ELOHIM Men Tuari naugb len louwaharo dou en. Dara astesda dau len, kaba, en emetara dou enin se men tu touwero. Doba len laugwan letara aninim se astesda meren tu augwan terimda. Dara sug len letara aninim dag gin, kaba, len lagahugouhw an maman Adehsud, dara len merdoc arjaga anim toua namcir. 2:47 Hanoba len lemarges dau sug len leigdoumesa ELOHIM en moho an men geicara geigouhw gini touwero. Doba len leicara laimo dangga astesda lona loba terimda. Dara lusud gus, kaba, len merdoc emesrougb an len touwero. Doba len leigdoumesa len meroho an meren geicara gin toua namcir. Dara astesda lona gareg maman Adehsud eigdoc len dau sesar men gogom aud maireseb menau geb huhugb ginohob, kaba, en eic leng Krisden menenau gini bauloulo beiseisaugb dara leng Krisden gus se cinogo Yerusalem gin toua.

Watti'u Manga Rasul 3

3:1 Se lona hom, kaba, sug igdedeijohob, kaba, Petrus dara Yohanes lan laisaugb dig ELOHIM Men Tuari. Anai se ijam gin, kaba, leng Yahudi laugwan len lacinim sungga naugb locuncum dou ELOHIM. 3:2 Se ELOHIM Men Tuari gin, kaba, misis hom moongga. Misis gini, kaba, lusud leija dag Misis Geigouhw. Astesda lona, kaba, lusud lodo sud hom mohora agaim teitei dau mem menuhwa beigtou deinyor misis moho Geigouhw gini naugb en acgeij aregoufu dau lusud laugwan toua. 3:3 Dangga sug en eiya Petrus dara Yohanes lan lauwan lainesa Tuari gin, kaba, en acgeij aregoufu dau lan. 3:4 Doba sug Petrus dara Yohanes lan laiya enohob, kaba, Petrus oho mer debin en, endagai: Ban boho abirgo naugb beiya aman dag ginahabi. 3:5 Dangga sud hom mohora agaim gini en oho mergo naugb auweila lan. Anai en oudesa dag lan lameic aregoufu ingma dou ens. 3:6 Doba Petrus en dou en deit, endagai: Indan aregoufu ingmemebero. Doba areg eb dou dan iteitogini, kaba, dan demeic dou ban toues. Sug Petrus enara dangga dou enohob, kaba, en arougb en, endagai: Se Yesus Krisdus dau cinogo Nasared men goubesa, kaba, dan den dou ban naugb ban beisa besa, bec abohora namcir. Anai dan deperwei Yesus en mohw naugb ginohob. 3:7 Sug Petrus arougb en danggohob, kaba, en os sud hom mohora agaim gin mesira misen. Hanoba en ousa en eisa besa toua. Sug en os en mesira inegohob, kaba, en mohora dara mohorigo hwas ouwasis boubesa namcir. 3:8 Sug sud hom mohora agaim en eiya, doba en mohora eigouhwohob, kaba, en eisa besogwa namcir. Hanoba en ainyen naugb ec ucucugb dig gabeda diginin toua. Sug en ec bainyenohob, kaba, en oucan Petrus dara Yohanes naugb len leinesa ELOHIM Men Tuari gin toua. Doba sug en oucan lan gini, kaba, en esogsogwa dara agahugouhw an ELOHIM, ben sijo dou en namcir. 3:9-10 Dangga sug lusud se ELOHIM Men Tuari mes len leiya, doba sud hom mohora agaim gini en ec. Dara len louman, doba en agahugouhw, ben sijo dou ELOHIM toua terimda, kaba, len leimiman dara len merdoc omom dau areg acgunog gin namcir. Anai len lecinaga dag nosa, kaba, en eigtou se misis moc, moho Geigouhw gini naugb en acgeij aregoufu dau lusud touohob. 3:11 Dangga len laugwan len lobga naugb lou acec Petrus, dara Yohanes, dara sud hom mohora agaim graga se lomod hom se ELOHIM Men Tuari, moho Solaiman, gin toua. Anai len leiya, doba sud hom mohora agaim gin, kaba, en agaigeij Petrus dara Yohanes maran sansun. Hang len leimiman dau gin toua namcir. 3:12 Sug Petrus en eiya, doba lusud laugwan lou acec lenohob, hanoba len merdoc omom dau areg acgunog dara len leimiman dau sud hom mohora agaim gin toua terimda, kaba, en eijidougwo len an gini, endagai: Yusud dau mamang Israel, dagiro, naugwe hang, yen yeimiman dau areg acgunog dara sud hom gina? Dara dagiro, naugwe hang, yen yauweila emen toutou dag gin toua? Yen youdesa dag aman ameic geigouhw dou en ogdoc amanin aman goubesa, era ogdoc aman amdoc gedag beim deseino ELOHIM enei? Naro, aman amemeic geigouhw dou sud hom gini ogdoc aman goubesa, dara ogdoc sug aman amdoc edag beim touwero. Doba aman ameic geigouohw dou sud hom gin, kaba, ogdoc sud hom, moho Yesus, enin men goubesa dous. 3:13 Anai en, kaba, en owun enin medoc mes arjaga naugb en aimo areg ELOHIM ogod an deb naugb enohob. Dangga hang, Abraham, dara Isag, dara Yakub, dara maman mamjemouwer meren ELOHIM, kaba, en emeigdoumesa men sogougb Yesus gini en moho agas se men gogouf cucugb ucugb toua. Doba yen, kaba, yen yohw en deb se maman mougtir merisira naugb len leic gomom dou enohob. Dara sug Pilatus ouwan esga en, kaba, yen yemousa deisa en mer an gin touwero. Doba yen yereiyaresa dara yen yaunun dougwo en deseino en toua namcir. 3:14 Dara Yesus gin, kaba, en emedreg dau areg asesa ELOHIM enin medoc mes dara areg ELOHIM arougb en an gin mougwa hom touebma. Doba en aimo augwan gini dara en medoc hom namcir. Doba yen, kaba, yen yotogoto en. Hanoba yen yacgeij Pilatus ucucugb dara yen meijir medam naugb en esga sud hom mog mog dou yen dous. 3:15 Dauwohob, kaba, yen yacgeij Pilatus naugb en eic gomom dou sud hom gedig en ahwan lusud aud maireseb menau geb huhugb gin toua. Doba ELOHIM eigdoumesa en dau gomom ucugb. Dara emen, kaba, emen emouma debin gin dou yen, anai emen emeiya dau augwan gini se emen emiresi touohob. 3:16 Sug ELOHIM eigdoumesa en dau gomom ucugb dag ginohob, kaba, areg yen yeiya dara areg yen youma debin gin, kaba, emogdoc amanin aman goubesa touwero. Doba ogdoc sug aman amdoc ebdebin an Yesus gin dous. Anai enin men goubesa edeinyum naugb sug en eic goubesa dou sud hom gedig en mohora hwas agaim gin, dauntoba en ec mohora ucugb toua. Dangga ogdoc sug aman amdoc ebdebin an Yesus gin dous eng, hang emeic geingmos agauwesa dou sud hom gini, abeba yen meijiresi touohob. 3:17 Doba dan indagunerij, dan decinaga dau sug yen yotogoto Yesus, hanoba yen yacgeij Pilatus naugb en eic mog erij dara gomom dou en toua, kaba, dag yen yemecinaga dau meijen geicara gini meijouhw augwan asesa dag misen touebma. Doba yen yaimo augwan dag augwougb an en dous. 3:18 Anai ELOHIM ens dau augwan gini deb ogdoc leng lesai en moro sug nosohob, endagai: Dan desedeb sud hom naugb sug en eigdoc lusud dau sesar men gogom augwan namcir. Doba aimougtut, kaba, en aimo ucina mog erij nosahabi, en emeigdoc len laugwan dau sesar men gogom ucan toua. Dangga hang, ogdoc sug yen yetob Yesus se sogo salib gin, kaba, augwan gini acgunog, aimo dau areg ELOHIM esedeb naugb en debohob. 3:19 Dangga hang, eigouhw naugb yen yesga meijen sesar moho asesa dou ELOHIM. Hanoba yen yeineg aud en ucugb. Dauntoba en aigdougwo dara en oguc dougwo meijen sesar augwan ediyebeiya dau yen toua. 3:20 Anai sug yen yeicara dag gin, kaba, maman Adehsud ELOHIM gin, kaba, en emesa Mena Gogoufu aud yen naugb en emeic yen meigdoc erleij dara ebtou debin gini dou yen toues. Hanoba en emesa Yesus se lona daiyamo gacin aud yen toua deit naugb en eigdoc yen dau sesar men gogom aud maireseb menau geb huhugb gin toua namcir. Anai ELOHIM eigdoumesa en moho dau acgunog naugb ginohob. 3:21 Doba ELOHIM ouwan naugb en eigtou se bogo terimda en esinsin cinogo dara bogo augwan ecabeci naugb enahabi, en emecicugb aud yen toues. Augwan gini aimo dau areg en ens deb dou maman mamjemouwer ogdoc leng lecabeci gedig len lesai en moro deb sug nosa touohob. 3:22 Anai Musa enara dou len se Surad Injil Meb Mohon, endagai: Se lona daiyamo gacin, kaba, meijen Adehsud ELOHIM en emesa sud hom aud yen naugb en esai en moro dou yen deit. Aninim dag en esa dan aud yen naugb dan desai en moro dou yen touohob. Sud hom gin, kaba, dau lugmahara touwero. Doba eni dau yenin meijen meijouhuda dous. Dangga hang, sug en edebeij yenohob, kaba, yen yemetogoto en mer an areg en esai dou yen gin touwero. Doba yen yebin en mer an gin se yen meigdoc mes namcir. Hanoba yen yesogwa deisa augwan deigeigouhw toua terimda. 3:23 Anai gareg en ohoiya en mer an areg en esai dou yen gin, kaba, en emedag ELOHIM men lusud toua deitero. Doba ELOHIM ecicugb en dau men uro mes. Hanoba en eic mor mor dou en se dum smougb toua namcir. 3:24 Dara Semuel an leng lesai ELOHIM en moro ucan en, dara leng lesai ELOHIM en moro gus gus, kaba, len laugwan lens dau areg acgunog se lona gin deb sug nosa touohob. 3:25 Dangga areg ELOHIM os dou yen meijemouwer ogdoc leng lesai en moro sug nosa, kaba, augwan gini eb naugb yen se lona gin toua. Anai yen toua yedag len merdebeitorohob. Hang ELOHIM men gos dou yen meijemouwer dag en eic geigouhw dou len ogdoc len merdebeito hom gin, kaba, augwan eb naugb yen toua. Anai augwan gini esogwa deisa areg ELOHIM os dou Abraham deb sug nosa touohob, endagai: Ogdoc ban abdebeitor gin, kaba, dan desedeb naugb dan demeic geigouhw dou lusud se cinogo gin augwan toues. 3:26 Sug ELOHIM os dangga dou Abraham ginohob, kaba, en ouci men sogougb mohora hom, moho Yesus. Hanoba en esa en aud yen toua aimougtut naugb en enara baineg yen meigdoc mes. Dauntoba yen yemaimo areg dag mog mog toua deitero, doba yen yarges dau namcir. Hanoba yen yahau an dougwo toua terimda. Anai sug yen yeicara dag gin, kaba, ELOHIM en medoc an yen naugb en emeic geigouhw areg en os dou Abraham sug nosa augwan dou yen toues. Dara ELOHIM ouci Yesus dag gini, anai en emedreg dau areg ELOHIM arougb en an gin mougwa hom touwero. Doba en owun enin medoc mes arjaga dag sogougb naugb en eicara baimo augwan dara medoc hom toua terimda.

Watti'u Manga Rasul 4

4:1 Irir sug Petrus dara Yohanes lan lanara dou lusud gini, kaba, ligbum dau gembala gesa taij meren mougtir, dara leng lesedougwo ELOHIM Men Tuari meren mougt mera, dara ligbum dau leng Saduki len laugwan len aud lan sungga toua. 4:2 Doba sug len louman dau areg Petrus dara Yohanes lan labedbed dou lusud gin, kaba, len merdoc esrougb medam an lan namcir. Anai lan lanara dou lusud dau sug ELOHIM eigdoumesa Yesus dau gomom ucugwohob, kaba, gini ansins dag len gus toua lemomom namcirero, doba len lemeisa dau gomom ucugb toues. 4:3 Dangga hang, len lagaigeij lan. Hanoba len louf lan se tu gesisug naugb lan laigtou sungga terimda edebeij lonamen toua, anai deinyor lobohob. 4:4 Doba lusud gedig len louman dau areg Petrus dara Yohanes lan labedbed dou lenohob, kaba, leinyana merdoc ebdebin an lan marir gin toua namcir. Dangga sug len lecic len gin laugwan ladedim, kaba, Yesus men logodeh se cinogo Yerusalem ingga edebeij merug ribu sergemohob. 4:5 Sug lona esgohob, kaba, leng Yahudi meren mougtir an meren gedeijan, dara leng meru ouforoho se Musa men gomnomna, dara mougtir gus, kaba, len laugwan len len naugb len lacinim se Yerusalem ingga. 4:6 Sug len lacinimohob, kaba, len loucimdeb dara leng meroho agas dag Hanas, dara Kayapas, dara Yohanes, dara Aleksander, dara Hanas mosur gus gus len laugwan toua. Anai Hanas, kaba, eni Gembala Gesa Taij Meren Mougt Mera Medam sug nosohob. Dara en maba Kayapas, kaba, en edag Gembala Gesa Taij Meren Mougt Mera Medam se lona ingga. Dara Yohanes dara Aleksander lani, kaba, Hanas en meisi lan toua. 4:7 Dauwohob, kaba, len larougb sadodor naugb len ledahwan Petrus dara Yohanes aud len toua. Sug lan lanohob, kaba, len larougb lan naugb lan lasa deseino len. Sug lan lasa deseino len laugwanohob, kaba, len leijidougwo lan eisaugb maran geicara dou sud hom mohora agaim gia, lendagai: Sug yan yaic geigouhw dou sud hom mohora agaim gia, kaba, yan yaimo ara, dara yan yaigdoumesa gara en moho debin gini, hang emeic goubesa dou yan naugb gin toua? 4:8 Sug len leijidougwo lan an dag ginohob, kaba, Mena Gogoufu eic mou ouforoho dara goubesa dou Petrus naugb en auni len merir ucugb dou len, endagai: 4:9-10 Yeng yedag maman mougtir, dara yeng yedag meiju ouforoho naugb maman gaben, sug yen yeijidougwo aman eisaugb geigouhw areg aman ameic dou sud hom mohora agaim gini, dara ucina areg aman amaimo an en naugb sug en ec mohora ucugb, kaba, aman amens dou yen dara yeng Israel yaugwan, dag sud hom emesa deseino yen dag gini emogdoc amanin aman goubesa touwero. Doba aman ameigdoumesa Yesus Krisdus dau cinogo Nasared, en moho, naugb en dous. Hang en emeic geingmos agauwesa ucugb dou en touohob. Anai moho hom gin eng men goubesa edeinyum naugb gin dous. En gin, kaba, yen yetob en se sogo salib ben omom. Doba ELOHIM eigdoumesa en dau gomom ucugb deitohob. 4:11 Augwan gini esogwa deisa areg sud hom erba Ugwaremer an en deb sug nosa touohob, endagai: Igdahab hom areg yeng yohud tu icira, doba yen yerbahaba deb, kaba, maman Adehsud enin eng eigdoumesa dag buc mandeij ucugwohob. 4:12 Dangga hang, se cinogo gin augwan, kaba, ELOHIM emeigdoumesa sud hom ingma, en moho, naugb sug en eigdoc maman dau sesar men gogom aud maireseb menau geb huhugb gin touwero. Doba en eigdoumesa Yesus enin dous eng, en moho, naugb gin dous. 4:13 Sug len Majelis len leiya dag Petrus dara Yohanes lan lamahau dau lenero, doba lan laic marus naugb lan lans aremeijouhw augwan asesa dou len, kaba, len leimiman dau lan namcir. Anai len lecinaga dag lan gini, kaba, lingma lemens aremeijouhw dou lan gin touebma. Hang emeic len merdoc eiseisan dag lan gin toua laimo Yesus sug nosa touohob. 4:14 Dara aremer hom naugb sug len launi Petrus dara Yohanes lan marir ucugb dou lan, kaba, toua ingmaro. Anai len leiya, doba sud hom mohora agaim graga en toua moongga desij lan dougwodaha. 4:15 Dangga, kaba, len larougb lan dig medigo dau len dous. Sug Petrus dara Yohanes lan laihwededau lenohob, kaba, len lohw merdocedoum eisaugb lan, lendagai: 4:16 Maman mahilon ucina naugb lan gin dagiro? Anai maran ganusbus gini, kaba, agaha dou lusud se cinogo Yerusalem laugwan lecinagohob. Hang emedeinyum naugb sug maman maunun dougwo lan an maran ganusbus gin deb touwero. 4:17 Doba maman man dougwo lan an namcir dag lan lemeigdoumesa Yesus, en moho, naugb ara ara dou sud hom ingma toua deitero. Dauntoba aremer gini emagaha dou len gusero, doba ogdoc sugin dous. 4:18 Sug len louci ucina dag gin naugb lanohob, kaba, len leija lan naugb lan lainesa aud len ucugb deit. Sug lan lainesohob, kaba, len len dougwo lan, lendagai: Emen emen dougwo yen dara goubesa namcir, dauntoba yan yemeigdoumesa Yesus, en moho, dou sud hom ingma toua deitero. Dara yan yamedidib aremeijouhw eisaugb en dou len touwero, doba yan yarges dau namcir. 4:19 Doba Petrus dara Yohanes lan lanara launi len merir an ucugb deit, landagai: Yen youdesa dag areg yen yen gin, kaba, asesa ELOHIM enin medoc mes, hang aman amaimo yen meijir an ginei? Era aman amaimo ELOHIM enin mer dousei? 4:20 Anai enin eng arougb aman naugb areg aman ameiya dara amoumanohob, kaba, aman amesai gin augwan dou len gus toua. Hang aman amemarges gin deb touwero. 4:21 Sug Majelis louman lan marir an gin, kaba, len len dougwo lan dara goubesa bedreg dau graga deit, lendagai: Sug yan yadreg emen emir, hanoba yan yasai sud hom gin en moho dou lusud deit, kaba, emen emeic mog erij medam dou yan namcir. Sug len len dougwo lan dara goubesa dag ginohob, kaba, len larges lan laihweda dous. Anai len leiya, doba lusud laugwan lagahugouhw an ELOHIM an sud hom gec mohora ucugb gin terimda. Hang emedeinyum naugb sug len leic gogom dou lan touwero. 4:22 Dara sud hom gedig Yesus eic geigouhw dag ganusbus dou en gin, kaba, men arisogomoc edreg dau sud hwai touohob. 4:23 Sug Majelis larges landohob, kaba, lan lacicugb aud lan marsir leng Krisden gus deit. Hanoba lan ladecic dau areg gembala gesa taij meren mougtir dara leng Yahudi meren mougtir gus, kaba, len len dougwo lanohob meijouhw augwan asesa dou len toua. 4:24 Sug lan marsir louman lan marir an ginohob, kaba, len laugwan locuncum an gin dou ELOHIM dara merdoc hom namcir. Hanoba len lenara dou ELOHIM, lendagai: Adehsud, ban abubisamougb naugb ban bahasesei bogo, dara cinogo, dara dum mohu. Dara ban besinsin areg geb se augwan gin touohob. 4:25 Dangga hang, ban bens dau len gin, kaba, meren geicara gecgu ogdoc Mena Gogoufu dou emen emjemouwa Daud deb sug nosa, anai en edag sogougb dou banohob. Hang en emerba Ugwaremer an gin deb sug nosa, endagai: Dagiro, naugwe hang, leng lecguna dou seiseij len merdoc esrougb an maman Adehsud, hanoba len lohw merdocedoum naugb len leic gogom dou men godeh gedig en esedeb en naugb en eigdoc maman dau sesar men gogom augwan gin toua? 4:26 Anai meren mougt mera medam se cinogo augwan, kaba, len lesedeb lenin merdoc mes. Hanoba len lacinim se usi hom naugb lesara dara lan touohoba? Dobnaro. Areg len lesedeb gin, kaba, emera mera dou len touwero. Doba dag augwougb dous. 4:27 Adehsud, areg ban bens deb gini, kaba, augwan acgunog dag misen namcirohob. Anai Herodes dara Pontius Pilatus an lugmahara, dara leng Israel, kaba, len laugwan lacinim se cinogo Yerusalem gin. Hanoba len lohw merdocedoum an aban sogougb Yesus gecabeci gini naugb len leic gogom dou en touohob. Anai en, kaba, en emedreg dau areg ban barougb en an gin mougwa hom touwero. Doba en owun enin medoc mes arjaga naugb en aimo augwan dara medoc hom an namcir. Hang ban beigdoumesa en moho naugb sug en eigdoc lusud dau sesar men gogom aud maireseb menau geb huhugb gin touohob. 4:28 Sug len lacinim gin, kaba, len lemedreg dau areg ban besedeb naugb aban sogougb Yesus gini hom touwero. Doba len laimo augwan an en, anai bani abubisamougb namcir. Hang ban barautut len merdoc mes. Dauntoba areg len logod an en, kaba, aimo dau areg ban bogod deinaugb en sug acgunog touohob. 4:29 Dangga, Adehsud, ban beiya dau areg len gin len len dougwo emen an ginohob. Hang ban beic goubesa dou emen, dauntoba emen ememahau dau sug emen emesai ban aburo dou lusud touwero. Doba emen emeic emus dara emen emaiyan emdocesem naugb gin terimda. Anai emen emedag sogougb dou ban touohob. 4:30 Dara sug emen emesai ban aburo dou lusud gin, kaba, emen emacgeij naugb ban beic goubesa dou emen, dauntoba emen emeic geingmos agauwesa dou leng areber. Dara emen aben ganusbus dara emen emeic gansins ogdoc aban sogougb Yesus, en moho, debin gin dou len toua. Anai en, kaba, en emedreg areg ban barougb en an gin touwero. Doba en aimo augwan dara en medoc hom touohob. 4:31 Sug len locuncum dag gin inegohob, kaba, ELOHIM etitir meren dimei sug len leigtousa ingga einyeinya an len namcir. Dangga hang, len lemahau toua deitero, doba len leic merus. Hanoba len lebiji naugb sug len lesai ELOHIM Mer Geigouhw eisaugb Krisdus dou lusud laugwan toua. Anai Mena Gogoufu atij an len merdoc mes, dauntoba en eic goubesa dou len naugb gin toua. 4:32 Dara leng merdoc ebdebin an Yesus, kaba, len merdoc dara meren gauwamara emedregim touwero. Doba len laugwan merdoc aninim se ucina hom naugb len laimo dous. Dangga hang, sud hom ingma, kaba, en emeigdoumesa enin men aremougb dag enin men touwero. Doba len lekeba meren aremougb augwan anim ucucugb terimda. 4:33 Dara Yesus men logodeh merug sisa hobjerai, kaba, len louma debin maman Adehsud Yesus dara goubesa namcir dag en emomom terimdero, doba en eisa dau gomom ucugwohob. Dara ELOHIM medoc an Yesus men logodeh len laugwan, hanoba en eic geigouhw aingma aingma einyana dou len toua namcir. 4:34-35 Hang sud hom ingma dau leng Krisden, kaba, en monggwereij touwero. Doba augwan edeinyum naugb enohob. Anai leng meren lo dara meren tu moongga, kaba, len ledohw ledauma aregoufu. Hanoba len lodo dou Yesus men logodeh merug sisa hobjerai len toua. Dauwohob, kaba, merug sisa hobjerai gini, len lekeba dou astesda sud hom dau len, aimo dau areg men ingmaro an en toua. 4:36-37 Dangga sud hom dau Lewi medebeitor dau Lomos Siprus, en moho Yusub, en toua ohw men cinogo bauma aregoufu. Hanoba en odo men aregoufu gini dou Yesus men logodeh merug sisa hobjerai gin toua. Dara merug sisa hobjerai gin, kaba, len leija en moho dag Barnabas. (Gini men meijouhw dag sud hom genara bad lusud merdoc mes terimda.)

Watti'u Manga Rasul 5

5:1 Dara sud hom, en moho Ananias, en toua moongga desij Yesus men logodeh gini. Dara en mesouwa, kaba, en moho toua dag Sapira. En toua edohw mesouwa maran lo hom naugb bauma aregoufu. 5:2 Doba sug en auma aregoufohob, kaba, en esedi nagama deb naugb lanin. Hanoba en odo nagama dou Yesus men logodeh merug sisa hobjerai toua. Dara sug en esedi gin, kaba, mesouwa en toua ecinaga dau ginohob. 5:3 Doba sug en odo aregoufu nagama gin dou Yesus men logodehohob, kaba, Petrus enara debin en, endagai: Ananias, dagiro, naugwe hang, ban bog ban abdoc mes dou Setan, dauntoba en arautut ban naugb ban baunun dou Mena Gogoufu dag gina? Anai areg ban bodo dou emen gin, kaba, ban bemeic augwanero. Doba ban abdoc eb dou banin naugb ban bekeba nagama dauwohob. 5:4 Doba dagiro, naugwe hang, ban bog ban abdoc mes naugb ban beicara dag gina? Anai sug ban bemohw aban lo ginbuma, kaba, banin aban. Dara sug ban bauma aregoufu ginohob, kaba, banin aban toua. Hang ban bemaunun dou emenero, doba ban baunun dou ELOHIM enohob. 5:5 Sug Ananias ouman Petrus mer gini inegohob, kaba, en eijeboho bomom namcir. Dangga hang, astesda gareg en ouman dau gin, kaba, len laugwan merdoc dag omom an toua. 5:6 Sug Ananias omom dag ginohob, kaba, ligib len leinesa dimei naugb leic minc lagacgec en. Hanoba len lodo en dig medigo naugb ledec enda. 5:7 Eb debin terberba dougwo sug Ananias en omom ginohob, kaba, en mesouwa en einesa aud len deit. Doba en emecinaga dau sug en mesuwa en omom touwero. 5:8 Dangga Petrus en ainyen en naugb eijidougwo en deit, endagai: Cinogo areg yan yauma aregoufu graga, kaba, men mouf augwan eng ban absuwa odo dou dan ginei? Era naroei? Doba en auni ucugb dou Petrus, endagai: You, augwan teiyengga. 5:9 Sug en auni dag ginohob, kaba, Petrus enara debin en deit, endagai: Dagiro, naugwe hang, ban absuwa yan yaohw maigdocedoum naugb yan yainyen Mena Gogoufu areg maman Adehsud esa aud mamanohob dag gina? Yan youwan yeiya dau sug yan yaicara dag gin, kaba, en eic gogom dou yanei? Era en amsoho yan an gin touei? Naro. Dangga ban beiya, anai leng ledec ban absuwa, kaba, len lecicugwohob naugb sug len ledec ban toua. 5:10 Sug en ouman Petrus mer dag gin inegohob, kaba, en toua eijeboho bomom deb sungga namcir. Dangga hang, sug ligib graga len leinesa se dimei, doba len leiya en toua omomohob, kaba, len leigdoumesa en. Hanoba len lodo en dig medigo naugb ledec en desij mesuwa toua. 5:11 Dangga leng Krisden gedig leiya aremer gini dara leng louman dau gin toua, kaba, len laugwan merdoc omom an gin namcir. 5:12 Doba leng merdoc ebdebin an Yesusohob, kaba, len laugwan merdoc aninim naugb len lacinim se lomod hom se ELOHIM Men Tuari, moho Solaiman, astesda lona terimda naugb len lesijaresa ELOHIM sungga. Hanoba len louman dau areg Yesus men logodeh merug sisa hobjerai len lesai dara ledidib dou len toua. Dara sug merug sisa hobjerai len lesai ELOHIM Mer Geigouhw eisaugb Krisdus dou lusud dag gin, kaba, len laben ganusbus dara len leic gansins einyana debin gin toua. 5:13 Dangga hang, sug leng medigo Yesus len leiya dau gin, kaba, len leigdoumesa Yesus men logodeh len laugwan meroho agas medam an gin namcir. Doba naugb sug len loucimdeb dara len, hanoba len laimo len aud ara ara toua, kaba, len lemeic merus naugb ginero. Doba len lahau dau gin terimda. 5:14 Dara astesda lona gareg dau ligiji dara ligida menenau gedig len merdoc ebdebin an maman Adehsud ginohob, kaba, en esa lingma dara leng nosa gin toua. 5:15 Dara en eic goubesa dou Yesus men logodeh merug sisa hobjerai gin naugb len lens dau gansins dara ganusbus einyana gougwa debin gin dou len toua. Dangga, kaba, leng se Yerusalem len lodo leng areber laugwan. Hanoba len lob len se boromei dara sidgwa deinyor ucina mebera. Dauntoba sug Petrus eraga irir len, kaba, en mena aiga len toua. Anai len loudesa dau sug en mena aiga len, kaba, edeinyum naugb len leigouhwohob. 5:16 Dara leng leb acec Yerusalem, kaba, len toua merohora edregim an leng areber, dara leng merna mog mog einesa len merdoc mesohob. Hanoba len lodo len dou Yesus men logodeh merug sisa hobjerai gin toua. Dangga sud hom areg len lodo en aud len, kaba, len leic geigouhw dou len laugwan namcir. 5:17 Doba sug Gembala Gesa Taij Meren Mougt Mera Medam an mesir gus dau leng Saduki se Yerusalem ingga, len louman dau Yesus men logodeh merug sisa hobjerai meren geicara geigouhw gin, kaba, len lesedeb naugb len leic gogom dou len. Anai len merdoc esdigeij len an meren geicara gin namcir. 5:18 Dangga sug len lagaigeij lenohob, kaba, len louf len se tu gesisug areg eb naugb leng se Yerusalem len laugwan toua. 5:19-20 Doba se loba ingga, kaba, maman Adehsud men malaikad hom en en naugb en ec misis dau len. Hanoba en ahwan len dau tu gesisug ingga toua. Sug en ahwan len dig medigohob, kaba, en arougb len, endagai: Sug lona esgohob, kaba, yen yeihweda se ELOHIM Men Tuari. Hanoba yen yebedbed dau maireseb menau geb huhugb gin dou lusud deit. 5:21 Dangga sug lona esgohob, kaba, len leihwedesa ELOHIM Men Tuari naugb len lebedbed eisaugb maireseb menau geb huhugb areg malaikad arougb len anohob dou lusud toua. Irir sug len lebedbed se ELOHIM Men Tuari gin, kaba, Gembala Gesa Taij Meren Mougt Mera Medam an mesir graga, kaba, len lesa merir dou Majelis gus dara leng Yahudi meren mougtir naugb len laugwan loucimdeb hom. Dangga sug len laugwan loucimdebohob, kaba, len larougb meren sadodor naugb len ledahwan Yesus men logodeh merug sisa hobjerai graga dau tu gesisug aud len toua. 5:22 Doba sug leng sadodor graga len ledebeij se tu gesisugohob, kaba, len lemeiya dau Yesus men logodeh merug sisa hobjerai hom touwero. Doba tu gesisug mes mogud namcir. Dangga hang, sug len lecicugb aud Majelis ginohob, kaba, len ledecic meijouhw augwan asesa dou len deit. 5:23 Hanoba len lenara dou len, lendagai: Sug emen emedebeij tu gesisugohob, kaba, emen emeiya, doba misis eb smougb mougb dara agadgeij namcir. Dara emen emeiya leng lesedougwo tu gesisug, kaba, dag len toua merugwengga naugb lesedougwo terimda. Doba sug emen emec misis, kaba, emen emeiya sud hom ingma se dimei mes touwero. 5:24 Sug leng lesedougwo ELOHIM Men Tuari meren mougt mera dara gembala gesa taij meren mougtir, len louman dau gin, kaba, len leija merdocesa namcir. Hanoba len leijidougwom, lendagai: Aringgeba, len gin dag gina? 5:25 Irir sug len lenara doum dag gin, kaba, sud hom en en aud len, hanoba en enara dou len, endagai: Yen gina, lusud gedig yen youf leng se tu gesisug gia, kaba, len merugwengga se ELOHIM Men Tuari naugb len lebedbed dou lusud deitohob. 5:26 Sug len louman en mer an gini, kaba, leng lesedougwo ELOHIM Men Tuari meren mougt mera an men logodeh len leihweda naugb len ledahwan Yesus men logodeh merug sisa hobjerai aud leng Majelis ucugb. Doba len lemeic gog laic lenero. Doba len lougarij an len dous. Anai len lahau endag, sug len leic gog laic len, kaba, lusud leic igdahab lad len dangga. 5:27 Sug len lahwan len naugb ledebeij se dimeiyohob, kaba, len larougb len naugb len ledeseino Majelis toua. Sug len leseino Majelisohob, kaba, Gembala Gesa Taij Meren Mougt Mera Medam en enara medam dou len. Hanoba en eijidougwo len, endagai: 5:28 Emen emen dougwo yen dara goubesa namcirohob naugb sug yen yemos yemadi Yesus gin, en moho, dou lusud touwero. Doba yen yeiya, anai yen yos yadi en moho becinten dou leng se Yerusalem laugwan. Dara yen yasij gogom debin emen endag, emen eng emeic gomom dou sud hom gin touohoba? 5:29 Doba Petrus dara mesir len launi en mer ucugb dou len, lendagai: ELOHIM en arougb emen naugb sug emen emos bemadi Yesus moho dou lusud terimda. Dangga hang, emedeinyum naugb sug emen emaimo yen meijir an gin touwero. Doba emen emaimo areg ELOHIM enin esedeb naugb emen gin dous. 5:30 Anai yen, kaba, yen yetob en se sogo salib ben omom. Doba maman mamjemouwer meren ELOHIM en eng eigdoumesa en dau gomom ucugwohob. 5:31 Hanoba en eigdoumesa en aud bogo naugb en eigtou desij en se men maija moc dig en mesira misen, dauntoba en edag maman Mougt Mera Medam. Dara en edag Sud Hom Geigdoc Maman Dau Maman Gogom Augwan. Dangga hang, gareg en esga men sesar moho asesa dou en, hanoba en ahau an dougwo namcir, kaba, ELOHIM aigdougwo men sesar augwan ediyebeiya dau en, ogdoc Yesus gin toua. Anai en eic cumougt dou mamang Israel naugb ginohob. 5:32 Dara emen, kaba, emen toua emouma debin Yesus gini dag ELOHIM eigdoumesa en dau gomom dig bogo. Anai emen emeiya dau augwan gini se emen emiresi dag misen touohob. Dara Mena Gogoufu en toua ousa deisa emen an gini. Anai gareg en aimo areg asesa ELOHIM enin medoc mes terimda, kaba, en esa Mena Gogoufu gin se en medoc mes toua namcir. 5:33 Sug Majelis louman dau gin, kaba, len merdoc esrougb medam an len namcir. Hanoba len louwan leic gomom dou len toua. 5:34 Doba sud hom dau leng Majelis gini, en moho Gamaliel dau leng Parisi, en eisa beisa naugb en en dougwo len. Anai en mou ouforoho se Musa men gomnomna augwan namcirohob. Hang lusud leigdoumesa en moho agas medam toua. Dangga sug en eisa besohob, kaba, en arougb leng sadodor naugb len lahwan leng merug sisa hobjerai gin dig medigo dauwahabi. Sug len lahwan Yesus men logodeh gin dauwohob, kaba, en esulou mesir dau Majelis gus, dauntoba len lemeic gomom dou lenlo. 5:35 Hanoba en enara dou len, endagai: Indagunerij dau mamang Israel, yen meigdoc emoungmogorobma. Doba yen yauwam an deigouhw eisaugb len gin deitahabi. 5:36 Anai yen yecinaga dau sud hom, moho Teudas, sug nosa, kaba, dag en eigdoumesa enin moho dag mougt mera medam. Hanoba lusud merug huntun hogu laimo en toua. Doba cum, kaba, leng gus les en bomom dau len, kaba, men logodeh lougb laisoboro namcir. Dara men aremer toua emeisa deitero. 5:37 Dara yen yecinaga dau lona sug leng Roma meren mougt mera medam en arougb maman naugb maman maic maman mamoho dau en, dauntoba maman maohw cinogo dou en, kaba, dag sud hom, moho Yudas dau leng Galilea meren hancob, en toua eigdoumesa en moho dag mougt mera medam naugb esara. Hanoba en enara baic lusud leinyana aud en toua. Doba sug len leic gomom dou en dauwohob, kaba, men logodeh toua laisoboro namcir. 5:38 Dangga hang, dan demesulou yen, dauntoba yen yemeba ara ara dara len ginlo. Doba yen yamsoho len an meren geicara gindahabi. Anai sug augwan gini dau lenin merdoc mes dous, kaba, cum, emeisa deitero, doba ediyebeiya namcir. 5:39 Doba sug augwan gini en dau ELOHIM enin, kaba, meijen goubesa emedeinyum naugb ginero. Dangga yen yamsoho len namcir. Anai sug yen yeic gogom dou leni, doba meren geicara augwan gin en dau ELOHIM, kaba, gini aninim dag yen yesara dara ELOHIM touohob. 5:40 Sug Majelis louman en mer an ginohob, kaba, len lousa deisa en mer an toua. Hanoba len leija Yesus men logodeh merug sisa hobjerai graga naugb len leinesa aud len ucugb deit. Sug len leinesa aud lenohob, kaba, len larougb meren sadodor naugb len leic hwigbeimos an len toua. Dauntoba len lahau an dougwo meren geicara gin namcir. Sug len logod lenohob, kaba, len lesulou len dara goubesa deit, lendagai: Yen yemos yemadi eisaugb Yesus gini, en moho, mougwa hom dou lusud toua deitero. Sug len lesulou len dauwohob, kaba, len larges len leihweda. 5:41 Doba Yesus men logodeh merug sisa hobjerai gini, kaba, len leihwededau Majelis dara merdoc agahugouhw an ELOHIM namcir. Anai en eigdoumesa len meroho naugb len laimo ucina mog erij icira sug len los ladi Yesus, en moho, deseino lusud gin touohob. 5:42 Dara len lemarges dau sug len los ladi Yesus moho dou lusud touwero. Doba astesda lona, kaba, len lebedbed Mer Geigouhw eisaugb Yesus dou lusud se ELOHIM Men Tuari, dara lusud meren tu toua terimda. Dara len ledidib aremeijouhw eisaugb Yesus mer ucan gin dou len toua, dag en eng Sud Hom Geigdoc Len Dau Meren Gogom Augwan. Anai gini aimo dau areg ELOHIM os deb dou len sug nosohob.

Watti'u Manga Rasul 6

6:1 Lona hosa debin areg graga augwanohob, kaba, leng Yahudi gedig len lec Grika mer mogud dous, kaba, len merdoc emeigouhw an leng Yahudi gedig lugunero. Anai leng gin, kaba, len lemekeba ara an meren debdesir touwero. Hanoba len lenara ucucugb an len, lendagai: Yen yeiya meijen debdesir, kaba, yen yekeba ara anir deigeigouhw namcir. Doba emen debdesir, kaba, yen yeicara yesenagan anir dous. Len lenara dag gini, anai leng merdoc ebdebin an Yesusohob, kaba, leinyana gougwa leiseisaugb namcirohob. 6:2 Sug Yesus men logodeh merug sisa hobjerai len louman dau gini, kaba, len leija leng laimo Yesus len laugwan naugb len lacinim hom. Sug len lacinimohob, kaba, len lenara dou len, lendagai: Emeigouhw naugb emen emarges dau sug emen emesai ELOHIM Mer Geigouhw eisaugb Krisdus, hanoba emen emeic ared dou debdesir gin touwero. Doba esloulougb naugb sug emen emesai ELOHIM en mer gin dou lusud terimda. 6:3 Dangga hang, emen emagunerij, dara emdamouwerij, eigouhw naugb yenin youci lusud merug senggai se yen meijufu naugb sug len lekebaran debdesir gin toua. Dara yen yemouci len augwougb touwero, doba yen youci lusud gedig yen yecinaga dag Mena Gogoufu men goubesa atij namcir se len merdoc mes. Dara len meru ouforoho naugb ara ara augwan touohob. Sug yen youci lenohob, kaba, emen emeigdoumesa len meroho naugb gin toua. 6:4 Doba emen, kaba, emen emeic emouwemougb esesa naugb sug emen emocuncum dou ELOHIM. Dara emen emesai en mer dou lusud besesa dous. 6:5 Sug Yesus men logodeh len laugwan louman len merir an gini, kaba, len merdoc esgirahesa namcir. Hanoba len louci Sdepanus, anai en medoc ebdebin an Yesus dara en medoc augwan. Dara Mena Gogoufu men goubesa atij namcir se en medoc mes touohob. Dara len louci Pilipus, Prokorus, Nikanor, Timon, Parmenas, dara sud hom lugmahara, en moho Nikolaus, dau cinogo Antiokia. Anai en toua arges men seiseij deb, hanoba en aimo leng Yahudi naugb sug en esijaresa ELOHIM toua terimdohob. 6:6 Sug len louci merug senggai ginohob, kaba, len lahwan len aud leng merug sisa hobjerai gin toua. Sug len lahwan len gin aud lenohob, kaba, lusud merug sisa hobjerai gini len lob merisira deb se len merugt. Hanoba len lacgeij ELOHIM naugb en eic mou ouforoho dou len, dauntoba len lekeba ared an debdesir dareg edag beim an len laugwan toua. 6:7 Doba ELOHIM en mer eisaugb Krisdus gin, kaba, agaha becinten dou lusud leinyana namcir. Anai leng merug sisa hobjerai gini, kaba, len lemedug merirs dau sug len lesai ELOHIM moro dou lusud touwero. Doba len merirs ebdebin gin dou lusud terimda. Dangga hang, leng se Yerusalem, kaba, leinyana lemaimo Yesus beiseisaugb namcir. Dara gembala gesa taij leinyana, kaba, len merdoc ebdebin an en toua. 6:8 Dara sud hom dau merug senggai graga, en moho Sdepanus, kaba, en toua ens ganusbus dara en eic gansins einyana debin men gebedbed dou lusud. Anai ELOHIM medoc an en namcir, hang en emeic goubesa medam dou en naugb gin touohob. 6:9 Doba leng Yahudi merug hosa dau cinogo Kirene dara Aleksandria len toua merug se cinogo Yerusalem ingga. Sug nosa, kaba, len ledag sogougb dou len gusohob. Doba iteitogini, kaba, meren mougtir lesga len dau sogougb. Hang len lemedag lusud misen toua deitohob. Dangga lusud leija meren tuari toua dag Libertine, era lusud gedig len lesga dau sogougwohob. Sug len gini len louman dau areg Sdepanus esai dou lusud eisaugb Krisdus gin, kaba, len lenara laugbtarera dougwo leng Yahudi gus. Dauntoba len merdoc emebdebin an areg en ebedbed dou len ginero, doba len lotogoto en mer an gin dous. Hanoba len lenara laised en an men gebedbed gin toua namcir. Dara len mersir leng Yahudi merug hosa dau leng Kilikia dara leng Asia meren hancob, kaba, len toua lesa dara len naugb lousa len dougwo Sdepanus gin toua. 6:10 Doba Mena Gogoufu eic mou ouforoho medam dou Sdepanus naugb len lemowun en an men gebedbed, kaba, emobsarero. Doba len merdoc osum dougwo naugb len lemauni ara ara dou enero. Anai en auni augwan asesa dou len namcir. 6:11 Dangga sug len leiya dag len lemauni ara ara dou enero, kaba, len lococ lusud gus naugb len lereiyaresa en an men gebedbed deseino lusud dag en eic ELOHIM dara Musa lan maroho bacecim namcirohob. 6:12 Sug leng Yahudi, dara meren mougtir, dara leng meru ouforoho se Musa men gomnomna len louman dau gin, kaba, len leisa lagaigeij en. Hanoba len lahwan en aud meren Majelis, anai len merdoc esrougb medam an enohob. 6:13-14 Sug len lahwan Sdepanus aud meren Majelisohob, kaba, len lococ len gus naugb len lereiyaresa en deseino meren Majelis gin deit. Hanoba len lahwan len ucan Sdepanus aud len toua. Sug leng gin ledebeij Majelisohob, kaba, len loho las en deseino len, lendagai: ELOHIM Men Tuari se Yerusalem gini, kaba, ELOHIM men usi naugb sug maman masijaresa en se dous. Doba sud hom gin, kaba, en enara dou lusud dag cum, kaba, sud hom moho Yesus dau cinogo Nasared, en en naugb en od ELOHIM Men Tuari gini baisoboro namcir. Dara en enara dou len dag cum, kaba, sud hom gini en en naugb eperwei Musa men gomnomna augwan an maman toua. Dara emen emouman dag en eic ELOHIM Men Tuari dara Musa men gomnomna bacecim dag gin terimda touohob. 6:15 Sug leng leigtou se Majelis meren dimei len louman dau gin, kaba, len lauweila Sdepanus toutou. Hanoba len leiya, doba en mebes mouf esesilo dag malaikad mebes mouf esesilo toua.

Watti'u Manga Rasul 7

7:1 Sug len lauweila Sdepanus toutou dag gin, kaba, Gembala Gesa Taij Meren Mougt Mera Medam eijidougwo en, endagai: Areg lusud len len gin, kaba, ban ben dag misenohobei? Era naroei? 7:2 Sug Sdepanus ouman Gembala Gesa Taij Meren Mougt Mera Medam eijidougwo en dag gin, kaba, en enara bauni ucugb dou Majelis len laugwan, endagai: Indagunerij, dara dan indinerij, yen youman dan indir an areg dan dauni ucugb dou yen gin deigeigouhwahabi. Anai sug ELOHIM ens enin ainyes se men gogouf cucugb dou maman mamjemouwa Abraham sug nosa, kaba, en emens enin ainyes dou en se men tuari suginero, dara sug en moongga se mena men tu se Haran touebma. Doba en ens enin ainyes dou en sug en edag lugmahara se leng Mesopotamia meren hancobaba dous. Sug ELOHIM ens enin ainyes dou maman mamjemouwa se lugmahara meren hancob dag ginohob, kaba, dagiro, naugwe hang, yen yenara dou dan dag ELOHIM ens enin ainyes dou maman se men Tuari se Yerusalem gin dousa? Dara dan deic Tuari gin, en moho, dacecim touohoba? 7:3 Sug ELOHIM ens enin ainyes dou Abraham dag ginohob, kaba, en arougb en naugb en emeigtou se leng Mesopotamia meren hancob gin deitero. Doba en eisa dau men meijouhuda aud cinogo menau areg ELOHIM emens dou en toues. 7:4 Dangga hang, Abraham eisa dau leng Kasdim, era leng Mesopotamia, meren hancob. Hanoba en eihwedig mena men cinogo, moho Haran, naugb en atou desij en sungga deit. Doba sug en mena omom dau enohob, kaba, ELOHIM arougb en dau sungga naugb en en se meijen cinogo gedig yen yesesa gin toua. 7:5 Dara ELOHIM emeic meijen cinogo gini mohw gurerei hom dou Abraham sug aimougtut gin touwero. Doba en os dou en deb dag augwan gin, kaba, enin men dara en medebeitor meren deb dous. Dara se lona sug ELOHIM enara dangga dou en, kaba, en mesouwa Sarai emouwadan en meh hom touebma. 7:6 Sug ELOHIM os maman cinogo gin dou Abraham ginohob, kaba, en esulou en ucan deit dag gini, endagai: Cinogo augwan gin, kaba, dan deic dou ban naugb ban abdebeitor len laugwanohob. Doba aimougtut, kaba, len ledag irinya dara sogougb se len gus meren cinogo nosahabi. 7:7 Dangga sug len leic mog erij dou ban abdebeitor gin se arisogomoc huntun hogu dag ginohob, kaba, dan demesa gogom medam debin lugmahara gin toues. Dauwohob, kaba, ban abdebeitor len len dau cinogo ingga naugb len lesijaresa dan sugin toua deit. 7:8 Sug ELOHIM os gin augwan dou Abraham dauwohob, kaba, en arougb en an men lusud naugb len lec merus dau toua. Anai gini ansins dag len louma debin areg ELOHIM os dou len, hanoba len lebin dara laimo toua terimda. Dangga hang, sug Abraham mesouwa Sarai en ouwadan meisi Isag, hanoba lona senggemoi debin ginohob, kaba, Abraham ec mos dau en. Dara Isag, kaba, en eicara dangga dara en meisi Yakub. Hanoba Yakub en ec mamang Yahudi maman mamjemouwer mebin merug sisa hobjerai len merus dau toua. 7:9 Doba maman mamjemouwer mebin gin, kaba, len merdoc esdigeij len meragto hom, moho Yusub, en namcir. Hang len lemohw en dag sogougb dig cinogo Mesir toua. 7:10 Dobnaro. ELOHIM eseyeiyo en, hanoba en eigdoc en dau areg gogom geb debin en augwan. Dara en eic mou ouforoho dara gedag beim dou en sug en edeseino leng Mesir meren mougt mera medam, moho Piraun, naugb en enara dou en. Dangga hang, Piraun eigdoumesa en moho naugb en esedougwo en men tu dara men cinogo Mesir augwan toua. Anai Yusub men geicara eic dag Piraun medoc eigouhw an en namcirohob. 7:11-12 Doba cum, kaba, sir gogoufu medam einesa cinogo Mesir dara Kanaan augwan toua. Dangga hang, sug Yakub en ouman, doba tramdad einyana inggebga se cinogo Mesir, kaba, en arougb maman mamjemouwer merug sisa hobjerem len leihweda sungga aimougtut naugb ledouma tramdad dau len toua. Anai len lemesma ared hom se cinogo Kanaan ginero. Hang lusud leinyana sireber, lomom namcir toua. 7:13 Sug len leihweda se cinogo Mesir ucan deitohob, kaba, Yusub ens enin ainyes dou en magto dara en maguner. Hanoba se lona ingga, kaba, Piraun en ecinaga Yusub magto dara maguner gin dag misen toua. 7:14 Dauwohob, kaba, Yusub esa mer dou en mena Yakub naugb en eisan mosur len laugwan dau cinogo Kanaan dig Mesireda. Len laugwan gin, kaba, merug mos senggai sergem edeisu. 7:15 Sug Yakub ouman Yusub acgeij en dag gin, kaba, eni an maman mamjemouwer len laugwan leisa dig cinogo Mesir namcir. Hanoba len laugwan ledomom deb sungga toua. 7:16 Dangga sug len merdebeitor len ledecicugb dau Mesir, kaba, len lodo maman mamjemouwer merur toua ucugb naugb len ledec len se igdohos mes se Sikem toua. Igdohos mes gin, kaba, Abraham en ouma dara aregoufu dau Hemor medebeitor deb sug nosohob. 7:17 Doba sug ELOHIM men lona naugb sug en aimo areg en os dou Abraham an en medebeitor ebeij deinyorohob, kaba, maman mamjemouwer se cinogo Mesir ingga, kaba, lebedero medam namcirohob. 7:18-19 Dangga sug Piraun menau en eperwei Piraun mohon en mohw naugb en edag leng Mesir meren mougt mera medam deitohob, kaba, en augwohosa maman lusud ingga naugb en aresbes len. Hanoba en arougb maman mamjemouwer gini naugb len lerba merihir mahaniheni len laugwan dig medigo naugb len lomom dau len teitei toua. Anai en, kaba, en medoc emeiseisan Yusub men geicara naugb leng Mesir sug nosa deitero. Hang en medoc emeigouhw an len touwero. 7:20 Se lona ingga toua, kaba, Musa mem ouwadan eni, doba en mebes eigouhw namcir. Dangga hang, len lemerba en touwero, doba len lecgoneh en se mena men tu se igda homoi. Anai len lecinaga dau sug en mebes ecabeci dag ginohob, kaba, ELOHIM esedeb en naugb ara ara touohob. 7:21 Sug igda homoi gin dauwohob, kaba, len ledob en deb se duhu mebera. Dangga sug Piraun mehida eiya enohob, kaba, en eigdoumesa en naugb edouwaha en dag en meisi misen deit. 7:22 Hanoba en arougb leng meru ouforoho an ara ara se cinogo Mesir ingga naugb len larautut en eisaugb meren gaben augwan dou en toua. Dangga hang, sug en edag sudohob, kaba, en eic mos naugb en enara dou lusud dara goubesa namcir. Dara men geicara augwan aimo debin gin toua. 7:23 Doba sug men arisogomoc ebeij deinyor sud hwaiyohob, kaba, en medoc eineg an en maguner dau leng Israel. Dangga hang, en esebesa naugb en edeiya dougwo len endag len merugwengga dara geigouhwei? Era naroei? 7:24 Sug en edebeij lenohob, kaba, en eiya, doba sud hom dau leng Mesir eic mog erij dou sud hom dau leng Israel namcir. Dangga, kaba, en erba sud hom dau leng Israel dig medigo. Hanoba en auni gogom ucugb dou sud hom dau leng Mesir ben omom toua. 7:25 (Musa eicara dag gini anai en oudesa endag sug len leiya dau gin,kaba, len lecinaga dag ELOHIM eigdoumesa en naugb en emesga leng Israel dau sogougwes. Dobnaro. Len meru emobgesa meijouhw ginero, anai len meru emaiyero namcir.) 7:26 Loneinda deit, kaba, en eiya, doba lahwai dau leng Israel lanin logodim. Dangga en ouwan esesa lan marufu naugb en dougwo lan, endagai: Yan gin, kaba, yaingma dau meijouhuda susugb, hang yan yamogodim dag ginei? Naro, yan yahwas dau meijouhuda hom, hang yan yamogodim touwero. 7:27 Doba sud hom gogod mesi graga, kaba, en ahacugb Musa dau lan. Hanoba en en dougwo en, endagai: Gareg eigdoumesa ban bedag mougt, hang ban bemogod aremer se aman amufu gina? 7:28 Ban bouwan bogod dan toua domom, aninim dag sud hom dau leng Mesir gia, ingginei? 7:29 Sug Musa ouman en mer an gini, kaba, en arges maga bougbdedau cinogo Mesir namcir. Hanoba en edatou dag lugmahara se lomougwisa se leng Midian meren hancob sungga, kaba, en mesouwa ouwadan meisi lagiji lahwai dou en toua. 7:30 Sug Musa atou se Midian edebeij arisogomoc sud hwaiyohob, kaba, maman Adehsud Geis Huhugb edag malaikad agunya debin en se smougb mouf gousa sogomon hom se lomougwisa ingga deinyor menmod, moho Torsina. 7:31 Dangga sug Musa en eiya smougb mouf gousa sogomon gini, doba emaitero, kaba, en medoc omom dau gin namcir. Hanoba en eihweda bedesa deinyor naugb ogmac touahabi. Doba sug en edebeij deinyorohob, kaba, en ouman maman Adehsud Geis Huhugb enara dau smougb mouf ingga dou en, endagai: 7:32 Dan gini, kaba, ban abjemouwer Abraham, dara Isag, dara Yakub meren ELOHIM. Sug Musa ouman maman Adehsud enara dou en dag gin, kaba, en ahau beijesa medam namcir. Hang en emeic mos naugb emdogmac sogomon ingga deitero. 7:33 Doba maman Adehsud enara dou en deit, endagai: Ban beg hwigbeimos deb dau ban abohorahabi. Anai cinogo gedig ban besa se gini, kaba, ecabeci namcirohob. 7:34 Sug maman Adehsud en dougwo en dag graga dauwohob, kaba, en enara dou en ucan gin deit, endagai: Dan deiya dara dehigdecin, doba gogom medam akebin indan lusud se cinogo Mesirohob. Dara dan douman, doba len leiyagan gogom geb debin len touohob. Hang, ban bin, anai iteitogin, kaba, dan desa ban aud len ucugb deit. Anai dan douwaden dau bogo naugb dan deigdoc len dau gogom geb debinir gin toua namcir. 7:35 Dangga hang, Musa gin, kaba, eni sud hom gedig maman mamjemouwer len loguro en sug en ouwan ogod aremer se len merufu sug aimougtut gin toua. Anai len lesbesan en, lendagai: Gareg en eigdoumesa ban aboho dag emen mougt mera naugb ban bogod emen aremer se emen emufu gina? Dara en gin, kaba, eni sud hom gedig ELOHIM esa en aud maman mamjemouwer leng Israel se cinogo Mesir ucan toua deit. Dauntoba en edag meren mougt mera medam. Hanoba en ahwan len dau cinogo ingga, dauntoba len lemedag sogougb sungga deitero. Doba en eigdoc len dau gogom areg akebinir gin toua. Anai maman Adehsud Geis Huhugb graga, kaba, en ousa en se aremer augwan gin touohob. En, kaba, eni sud hom gedig en enara dou Musa se smougb mouf gousa sogomon dag malaikad sug nosa. 7:36 Dara enin eng sud hom gedig en aben ganusbus dara en eicara einyana dag geimiman deseino leng se cinogo Mesir. Hanoba en ahwan len dau cinogo ingga naugb len laiga Dum Gahani. Dara len lec merohora se lomougwisa se arisogomoc sud hwai gin toua. 7:37 Dara Musa gin, kaba, eni sud hom gedig en enara deb dou maman mamjemouwer leng Israel deb sug nosohob, endagai: Se lona daiyamo gacin, kaba, ELOHIM en emesa sud hom aud yen naugb en esai ELOHIM en moro dou yen deits. Aninim dag en esa dan naugb dan desai en moro dou yen touohob. 7:38 Dara sug maman lusud leng Israel len lacinim se lomougwisa sug nosa naugb len louman dau areg ELOHIM arougb len an gin, kaba, Musa gini en toua moongga desij len. Dara en eng sud hom gedig en esa taij se maman mamjemouwer dara malaikad merufu sug malaikad enara dou en taiba menmod, moho Torsina. Dara eni sud hom gedig malaikad ens ELOHIM men gomnomna dou en naugb sug en esai ELOHIM en mer gini dou len toua deit. Anai sug len laimo en mer gin, kaba, len lemomom touwero, doba eic dag maireseb menau geb huhugb eb naugb len toua terimda. 7:39 Dobnaro. Maman mamjemouwer gin, kaba, len louwan lecicugb dig cinogo Mesir dous. Anai len merdoc acincin an meren ared dara meren aremougb einyana sungga terimda. Dangga hang, len lemowun lenin merdoc mes arjaga deseino Musa naugb len lemaimo en an areg en arougb len an gin touwero. Doba len lotogoto en mer dara len lecicugb en dau len toua namcir. 7:40 Dangga sug Musa eisaugb se menmod Torsina se lona einyana dau lenohob, kaba, len larougb Gembala Gesa Taij Meren Mougt Mera Medam, moho Harun, naugb en esinsin seiseij hom dou len naugb eperwei Musa en mohw toua. Hanoba len lenara, lendagai: Ban besinsin seiseij merug aibibra naugb emenin. Dauntoba len leinoisa emen se lomougwisa, leperwei Musa en mohw deit. Anai en, kaba, en einoisa maman dau cinogo Mesir se lomougwisa ginohob. Doba iteitogini, kaba, en mog inggirodohoba? 7:41 Sug len larougb Harun an dag ginohob, kaba, en esinsin seiseij hom men mocbobaga dag sapi moto naugb len. Hanoba len leic ara ara naugb lauwaharo dou seiseij gin toua. Dauwohob, kaba, len logo ara gaihim dara leinuhwera naugb len lagahugouhw debin areg lenin lesinsin gin toua. 7:42 Dangga hang, ELOHIM ohw medigo dou len namcir. Hanoba en amsoho len naugb len lesijaresa tebeij geb se bogo augwan terimda. Augwan gini esogwa deisa areg en owun len an deb se Surad Injil Meb Mohon deb sug nosa touohob, lendagai: Yeng Israel, areg yen yogug naugb yauwaharo se arisogomoc sud hwai se lomougwisa ginohob, kaba, yen yemouwaharo dou danero. Doba yen youwaharo dou meijen seiseij dous. 7:43 Anai sug yen yodo hugbei naugb yec an, kaba, yen yemodo dou danero. Doba yen yodo hugbei an meijen seiseij, moho Molog. Dara yen yodo hugbei an meijen seiseij gedig men mocbobaga dag tebeij, moho Repan, naugb yen yesijaresa lan dous. Dangga hang, dan demarougb len gus naugb len lemdagaigeij yen dig cinogo Babel nagameda toua. Anai areg yen yesinsin se lomougwisa naugb yen yesijaresa gin, kaba, dag seiseijohob. 7:44 Doba len lodo hugbei an meren seiseij, anai ELOHIM en moongga desij leneroei? Naro, ELOHIM Men Tuari Dau Hugbei moongga desij len se lomougwisa ingga touohob. Dauntoba len lecinaga dag en moongga desij len terimda. Dara len lemesinsin hugbei gin dau lenin merdoc mes touwero. Doba len lesinsin hugbei gini, laimo dau areg ELOHIM ens dou Musa dara arougb en an gin dous. 7:45 Dara len lemarges ELOHIM Men Tuari Dau Hugbei deb touwero. Doba maman mamjemouwer gin, kaba, len logugwo hugbei gini se len merihir merisira deit. Dangga sug len merihir gini len laimo Yosua naugb len leinesa maman cinogo gin, kaba, len lodo hugbei gin toua. Anai ELOHIM ocirma len lugun laugwan dau cinogo ginohob. Dara sug len leinesa maman cinogo ginohob, kaba, len lemarges dau ELOHIM Men Tuari Dau Hugbei gin deb touwero. Doba inggebga desij len terimda edebeij lona sug Daud en edag meren mougt mera medam gin touohob. 7:46 Dara Daud gin, kaba, en men geicara augwan edag beim namcir. Hang ELOHIM en medoc eigouhw an en medam gougwa toua terimda. Dangga hang, Daud en acgeij ELOHIM, dauntoba sug en ouwan, kaba, en ohud tuari hom naugb en toua. Hanoba en enara dou en, endagai: Adehsud, ban bouwan, kaba, dan dohud tuari dau igdahab hom dou bani. Anai ban bedag emen emjemouwa mebin, moho Yakub, men ELOHIM ban touohob. 7:47 Dobnaro. Daud meisi, en moho Solaiman, enin eng emohud tuari dau igdahab gini naugb en dous. 7:48 Doba ELOHIM gin, kaba, en emeigtou se tu gedig lusud lesinsin naugb en ginero. Doba en eigtou se bogo dous. Anai en, kaba, en moho eb taiba augwan namcirohob. Augwan gini esogwa deisa areg maman Adehsud Geis Huhugb Sugraga en enara deb ogdoc sud hom gesai en moro, en moho Yesaya, se Surad Injil Meb Mohon deb sug nosa touohob, endagai: 7:49 Bogo, kaba, dag indan maija moc naugb dan deigtousa. Dara cinogo, kaba, dag indan hotingga naugb sug dan indohora ebsa toua. Dangga hang, yen yohud tu areng naugb dan gina, era dimei areng naugb sug dan datou se toua, 7:50 anai gareg en esinsin augwan ginohoba? Naro, danin dous eng desinsin augwan gin dous. 7:51 Sug Sdepanus ens dau leng Yahudi merjemouwer meren geicara dou Majelis ginohob, kaba, en owun len meroho an meren geicara ucan gin deit. Anai meren geicara augwan, kaba, ecgu aninim dag len merjemouwer meren geicara toua namcirohob. Hanoba en enara dou len, endagai: Yen, kaba, yen meijugt mera dag igdahab namcir. Dara yen yemec meijus dau yen meigdoc mes dara yen meijums touebma, doba ebdougwo augwan ginaba. Anai sug lusud lesai en mer eisaugb Krisdus dou yen, kaba, yen yemei meijums naugb, dara yen yemebin en mer gini se yen meigdoc mes touwero. Doba meijen geicara augwan aninim dag leng lemec merus daubuma meren geicara toua namcir. Anai len, kaba, len lemei merums naugb ELOHIM en mer. Dara len lemebin en mer se len merdoc mes touwero. Dangga hang, yen yemaimo areg Mena Gogoufu arougb yen an ogdoc leng lesai ELOHIM en mer dou yen gin touwero. Doba yen yohoiya en mer, aninim dag yen meijemouwer len lemaimo areg Mena Gogoufu arougb len an ogdoc leng lesai ELOHIM en moro sug nosa touwero. Doba len lohoiya en mer an areg en arautut len aud gin toua terimdohob. 7:52 Dara len lemohoiya len merir dousero. Doba astesda sud hom areg ELOHIM esa en aud yen meijemouwer gin, kaba, len leic mog erij dou len. Hanoba len leic gomom dou leng lesai ELOHIM en mer gini len laugwan toua. Anai len, kaba, len lens dau ELOHIM men Sogougb mohora hom gedig en eigdoc maman dau sesar men gogom augwan deb dou yen meijemouwer ginohob. Hanoba len lenara dou len, lendagai: Se lona daiyamo gacin, kaba, ELOHIM en emesa men Sogougb mohora hom aud yen meigdebeitor naugb en emeigdoc len laugwan dau sesar men gogom augwan aud maireseb menau geb huhugb gin toues. Anai en emedreg dau areg asesa ELOHIM enin medoc mes mougwa hom touwero. Doba en owun enin medoc mes arjaga naugb en aimo augwan dara medoc hom namcir. 7:53 Dara ELOHIM men gomnomna areg en eic dou Musa ogdoc malaikadir sug nosa, kaba, yen meijemouwer len logugwo augwan gini se yen meisira touohob. Dobnaro. Yen yemaimo areg ELOHIM arougb yen an se men gomnomna gini mougwa hom touebma. Doba yen yedreg dau gin toua namcirohob. Dangga hang, yen yemebin sud hom gedig en aimo areg asesa ELOHIM enin medoc mes gin touwero. Doba yen yohw en se leng Roma merisira. Hanoba yen yeic gomom dou en toua, anai yen yagodgod len an ginohob. 7:54 Sug Majelis len louman dau gin, kaba, len merdoc esrougb medam an en. Hanoba len leg merugta an en toua. 7:55 Doba Sdepanus, kaba, en auweila dig bogo. Hang en eiya ELOHIM men gogouf cucugb. Dara en eiya Yesus esa dig ELOHIM mesira misen toua. Dara Mena Gogoufu en toua eic goubesa medam dou en. 7:56 Hanoba en enara dou Majelis, endagai: Yen yeiyohobei? Dan deiya bogo ec dau. Dara dan deiya Maman Mamaguna Mebin Yesus en esa dig ELOHIM mesira misen naugb en edag mougt mera medam desij enohob. 7:57 Sug len louman Sdepanus en mer an gini, kaba, len lesa merir medam dougwo len merums. Hanoba len loc dou merums dougwo, dauntoba en mer gini emeinesa len merdoc mes naugb emeic gogor dou len deseino ELOHIM touwero. Doba len lecabeci deseino en terimda. Anai len loudesa dag areg en enara graga, kaba, dag en eic ELOHIM en moho bacecim namcirohob. Dangga len laugwan leisa anim naugb lobga aud en, dauntoba len lagaigeij en toua. 7:58 Sug len lagaigeij enohob, kaba, len lohugouhw en dig cinogo Yerusalem medigo naugb sug len leded eni. Sug len ledebeij dig medigohob, kaba, leng merisira ed en, kaba, len leg meren sansun gagas augwan dau len. Hanoba len leic dou gigbaba hom, moho Saulus, naugb en esan dougwo len toua. Sug len leg meren sansun dou en dauwohob, kaba, len led Sdepanus ben omom namcir. 7:59 Dangga irir sug len led Sdepanus dag ginaba, kaba, en eiyagarij maman Adehsud. Hanoba en enara dou en, endagai: Adehsud Yesus, ban boc ban absira naugb sug dan desa dan indina se ban absira mes. 7:60 Sug en eiyagarij maman Adehsud danggohob, kaba, en eic mohorbrida badedeij cinogo toua. Hanoba en esa mer medam mougwa hom ucan deit, endagai: Adehsud, ban abdoc emeiseisan meren sesar gin naugb ban bemauni ucugb dou len touwero. Sug en esa mer medam dag ginohob, kaba, en omom namcir.

Watti'u Manga Rasul 8

8:1 Dara gigbaba hom, moho Saulus graga, kaba, en emen dougwo len touwero. Doba en medoc aninim dara len naugb len leic gomom dou Sdepanus ben omom namcir toua. Dara se lona ingga, kaba, lusud lebiji naugb len leic mog erij dou leng Krisden gus laugwan se Yerusalem toua. Dangga hang, Yesus men logodeh merug sisa hobjerai lenin dous eng leigtou se cinogo ingga. Doba leng Krisden gus, kaba, len laugwan lougb laisoboro se leng Yudea dara Samaria meren hancob dous. 8:2 Dara leng Yahudi gedig len lesijaresa ELOHIM dara merdoc hom dag misen namcir, kaba, merug hosa dau len, kaba, len leic merus. Hanoba len len naugb len ledec Sdepanus en maga. Doba sug len ledec en, kaba, len leiyogoseser dara merir medam an en toua namcir. 8:3 Doba Saulus, kaba, en eic mouwemougb esesa naugb en eic mor mor dou leng Krisden len laugwan terimda. Hang en emeinesa astesda tu se Yerusalem ingga. Dauntoba en eiya, doba gareg dau len en medoc ebdebin an Yesusohobei? Era, naroei? Dangga sug en ecinaga dag gareg en edag Krisdenohob, kaba, en ohugouhw len laugwan dig medigo. Hanoba en ouf len se tu gesisug toua. 8:4 Doba leng lougb laisoboro dau cinogo Yerusalem ginohob, kaba, len lemahau dau sug len lemesai ELOHIM Mer Geigouhw gini dou lusud touwero. Doba len leic merus naugb len lesai en mer gini dou lusud sungga sungga terimda. 8:5 Dangga sud hom, en moho Pilipus, kaba, en toua eihwedig cinogo Samaria naugb en ebedbed Mer Geigouhw eisaugb Krisdus gini dou len toua. Hanoba en enara dou len, endagai: Sud hom areg ELOHIM os dou maman naugb sug en eigdoc maman dau sesar men gogom augwan, kaba, en en naugb mamanohob. 8:6 Sug leng Samaria louman dau gini, dara len leiya dau sug Pilipus en eic ganusbus einyana debin gin dou len toua, kaba, leinyana gougwa merdoc eica en mer an areg en esai dou len gin namcir. 8:7 Anai len leiya, doba sug merna mog lagunya dau lusud leinyana merdoc mes, kaba, len leiyaga dareg merir medam namcir. Dara len leiya, doba leng merohora omom dara leng merohora agaim, kaba, leinyana leigouhw ucugb touohob. 8:8 Dangga len laugwan se cinogo ingga, kaba, len lagahugouhw medam an ELOHIM toua. 8:9 Doba se cinogo Samaria ingga, kaba, sud hom, moho Simon, en toua moongga. En gin, kaba, en mou ouforoho dara men goubesa inggebga naugb en eic gomom dou lusud. Dara en agaresa len merdoc mes aud ara ara toua terimda. Dara en eicara baimo gini an len se igda aibibra touohob. Hang en eimiman enin deseino leng Samaria dag en moho agas medam namcir. Anai men gagaresa gin, kaba, eic dag len laugwan merdoc omom dau ginohob. 8:10 Dangga, kaba, leng meroho eb taiba dara leng meroho eb tainya len laugwan merdoc eica en mer an areg en en dou len toua terimda. Dara len lecic en moho doum, lendagai: Simon gin, kaba, en edag ELOHIM gedig maman maiya en dag mobisamougb namcir, gedig en ouwaden dau bogo naugb mamanohob. 8:11 Dara len lemarges dau sug len lei merums naugb areg en en dou len touwero. Doba len merdoc eica en an areg en en dou len terimda. Anai sug en agaresa lusud merdoc mes se igda einyana dag ginohob, kaba, eic dag len merdoc ouwarahara en icira gini namcir. 8:12 Doba sug Pilipus en esai Mer Geigouhw dau sug ELOHIM oiharaga lusud ucugb, dara en os badi Yesus Krisdus, en moho, dou len toua, kaba, len merdoc ebdebin an areg Pilipus en esai dou len gin dous. Hanoba en ogun ligida dara ligiji len laugwan se duhu bansins debin gin toua. 8:13 Dara Simon enin toua medoc ebdebin an areg Pilipus esai dou len ingga. Dangga sug Pilipus ogun en toua se duhuohob, kaba, en aiseisa en terimda. Hanoba sug en eiya Pilipus eic gansins dara ganusbus einyana dou lusud, kaba, en eimiman dau gin namcir. 8:14 Sug Yesus men logodeh merug sisa hobjerai se Yerusalem len louman dag leng Samaria, len toua, lebin ELOHIM en mer se len merdoc mesohob, kaba, len lesa Petrus dara Yohanes audi len toua. 8:15 Sug lan ladebeij lenohob, kaba, lan lacuncum an leng merdoc ebdebin an ELOHIM mer gini, dauntoba en esa Mena Gogoufu se len merdoc mes toua. 8:16 Anai terimda lona ingga, kaba, Mena Gogoufu emeinesa sud hom ingma dau len naugb en edag mougt mera se en medoc mes touebma. Doba sug Pilipus ogun len se duhu sug nosa, kaba, en ogun len se maman Adehsud Yesus en moho dous, dauntoba lusud lecinaga dag len ledag en men logodeh lenohob. 8:17 Dangga sug Petrus dara Yohanes lan laob marisira taiba len merugtohob, kaba, Mena Gogoufu einesa len merdoc mes toua. 8:18 Dangga sug Simon en eiya, doba ELOHIM esa Mena Gogoufu se leng Samaria merdoc mes, icira sug Petrus dara Yohanes laob marisira se len merugtohob, kaba, en odo aregoufu dou len. 8:19 Hanoba en enara dou lan, endagai: Yan yaic goubesa gin ingma dou dan toua, dauntoba astesda sud hom areg dan dob dan insira se en mougt, kaba, Mena Gogoufu einesa en medoc mes toua. 8:20 Doba Petrus etaha en mer an namcir, endagai: Ban beihweda an aban aregoufu augwan dig dum smougweda. Anai ban boudesa dau sug ban beic aregoufu dou ELOHIM, kaba, edeinyum naugb en eic goubesa dou ban dauntoba ban besa Mena Gogoufu se lusud merdoc mes toua. 8:21 Hang aban geicara gin, kaba, emedeinyum naugb sug ban baimo emen se emen geicara naugb sug emen emesai Mer Geigouhw eisaugb Krisdus dou lusud touwero. Doba ban beigtou dau emen, anai ban abdoc emedag beim deseino ELOHIM namcirero. 8:22 Dangga eigouhw naugb ban besga aban geicara gecgu augwan gini dou ELOHIM. Hanoba ban bacgeij maman Adehsud dag en medoc esgirahesa, kaba, en aigdougwo aban gauwamara graga dau ban touei? Era, naroei? 8:23 Anai dan decinaga ban bedag sesar men sogougb namciraba. Hang ban abdoc emetrij icira emen an emen goubesa dag gin touohob. 8:24 Doba sug Simon ouman Petrus mer an gini, kaba, en eiyaga dougwo Petrus dara Yohanes, endagai: Yan yacuncum dou maman Adehsud, dauntoba areg yan yan dou dan gini, kaba, ELOHIM emesa debin danlo. 8:25 Sug Petrus dara Yohanes laos ladi Yesus, en moho, deseino lusud, dara lan lasai maman Adehsud en moro dou len touohob, kaba, lan lacicugb dig Yerusalemeda. Doba sug lan ladebeij se ucina mogums, kaba, lan lasai Mer Geigouhw eisaugb Yesus dou lusud se cinogo einyana se leng Samaria meren hancob gin toua. 8:26 Doba Pilipus, kaba, maman Adehsud men malaikad hom agunya debin en. Hanoba en arougb en, endagai: Ban besedeb naugb ban bederagasa ucina gededau Yerusalem dig cinogo hom, moho Gasa. Hanoba ban beraga ucina hom gini aud dig dum mer. (Ucina gin, kaba, esugwes namcir. Anai lusud merohora emedregim se gin toua deitero.) 8:27 Dangga sug Pilipus en ouman malaikad mer an ginohob, kaba, en eihweda. Doba Teopilus, ban bouman deigeigouhwahabi. Sug en eraga ucina gin, kaba, en agasa sud hom, gedig dag gigbaba, dau cinogo Etiopia. En aimo men keropo naugb en ecicugb dig men cinogoda. Anai en en naugb edesijaresa ELOHIM se Yerusalemohob, hanoba en ecicugb dangga. Sud hom gin, kaba, en moho agas medam. Anai en edeijan gida mougt mera medam se leng Etiopia meren hancob, moho Kandake, naugb en esedougwo men ariloboc augwan toua. 8:28 Dangga sug en aimo men keropo gin, kaba, en ecic dau sud hom gesai ELOHIM moro nosa, moho Yesaya, men surad asa gec toua. 8:29 Hang Mena Gogoufu emarougb Pilipus, endagai: Ban bobga dagasa keropo ginindahabi. Hanoba ban bec desisij toua terimda. 8:30 Sug en obga dagasohob, kaba, en ouman sud hom ingga en mer an sug en ecic dau areg Yesaya en og deb nosohob. Anai Yesaya gin, kaba, en edag sud hom gedig en esai ELOHIM en moro sug nosohob. 8:31 Dangga areg en ecic gini, kaba, dag gini: Len lahwan en aud gomom, aninim dag len lerei domba naugb sug logug toua. Doba en emauni mougwa hom dou len lenero. Aninim dag domba sug len lereba en modi dau, kaba, en emeiyaga dougwo len touwero. 8:32 Dara len lowun en moho obsara namcir, kaba, len lemaimo ucina misen naugb sug len lagod aremer aga en touwero. Doba len logod aremer gomom augwougb naugb en dous. Dangga gareg en emdecic dau en medebeitor ingma dou lusud gus toua deita? Anai en omom beihwededau cinogo gindohob. 8:33 Sug Pilipus ouman en mer an gini, kaba, en eijidougwo en, endagai: Adehsud, ban becinaga areg ban becic ingga men meijouhwohobei? Doba sud hom ingga en auni ucugb dou en, endagai: Dan demecinaga meijouhw augwougb dagiro? Anai sud hom ingma naugb emens meijouhw dou danero, gina? Sug en auni dangga dou Pilipusohob, kaba, en acgeij en, endagai: Ban besaugwin naugb beigtou desij dan, dauntoba ban bedidib aiyad gin meijouhw asesa dou danahabi. 8:34 Sug Pilipus eisaugb desij enohob, kaba, sud hom ingga eijidougwo en an gini, endagai: Areg sud hom gesai ELOHIM moro en og gini, kaba, en og eisaugb eninei? Era eisaugb len gusei? Ban bens meijouhw asesa dou danahabi. 8:35 Dangga Pilipus en ebiji naugb en esai Mer Geigouhw eisaugb Krisdus dou en aimo dau areg sud hom gin en ecic ginohob. 8:36 Sug lan laingmo keropo terimda, kaba, lan ladebeij duhu geindaredeb se cinogo mes hom. Dangga mougt mera medam men gedeijan dau Etiopia gin, kaba, en eijidougwo Pilipus, endagai: Duhu ingmanggini. Hang ara eb dougwo dan naugb ban bemogun dan se duhu gineroei? 8:37 Doba Pilipus auni dou en, endagai: Sug ban abdoc ebdebin an Yesus, dara ban abdoc augwan, kaba, edeinyum naugb sug dan dogun ban se duhu iteitogin toua. Dangga mougt mera medam men gedeijan graga, kaba, en auni dou Pilipus, endagai: Dan indoc ebdebin an Yesus Krisdus dag eni ELOHIM Meisi mohora hom dag misenohob. 8:38 Sug en auni dangga dou Pilipusohob, kaba, sud hom gedeijan arougb sud hom gos kuda an keropo naugb esan lan deb sungga. Sug keropo esan lanohob, kaba, eni dara Pilipus, lan lasogwa dau keropo se duhu. Hanoba Pilipus ogun en se duhu, bansins dag en toua edag Krisdus men logodehohob. 8:39 Doba sug lan laisa dau duhu inegohob, kaba, mougt mera medam men gedeijan en emeiya Pilipus deitero. Anai Mena Gogoufu ahwan en dau sunggohob. Dangga mougt mera medam men gedeijan gin, kaba, en aingmo men keropo gin terimda. Dara medoc agahugouhw an ELOHIM toua namcir. 8:40 Doba Pilipus, kaba, en eijesan, doba eni moongga se cinogo Asdodohob. Dangga sug en ec mohora ucugb dig men cinogo Kaisarea gin, kaba, en ebedbed Mer Geigouhw eisaugb Yesus dou len, amomo terimda en edebeij men cinogo ingga toua.

Watti'u Manga Rasul 9

9:1 Doba se lona augwan gin, kaba, Saulus en emarges dau sug en medoc esrougb an leng merdoc ebdebin an maman Adehsud Yesus len touwero. Doba en eic mog erij dara gomom dou len laugwan terimda. 9:2 Dangga hang, en emeihwedaud Gembala Gesa Taij Meren Mougt Mera Medam naugb en edacgeij surad dau en toua, hanoba en enara dou en, endagai: Ban bog surad ingma dou dan naugb dan dedeic dou mougtir gesedougwo maman goucimdeb augwan se cinogo Damsigahabi. Dauntoba sug dan desma ligiji dara ligida gedig len lesogwa deisa Yesus se men ucina, kaba, len lousa dan naugb len lagaigeij len dou dan. Dauntoba dan dahwan len aud ban sugin toua. 9:3 Doba sug Saulus eihweda bedebeij deinyor cinogo Damsigohob, kaba, mouf medam dau bogo augwougb, hanoba agacgec en toua. 9:4 Dangga sug en eila dau kuda medgomori bainda cinogohob, kaba, en ouman mer hom enara dou en, endagai: Saulus, Saulus, ban beic mog erij dou dan anara? 9:5 Sug Saulus ouman mer gin, kaba, en auni ucugb dou en, endagai: Adehsud, bang gara? Doba sud hom en auni ucugb dou Saulus, endagai: Dang Yesus gedig ban beic mog erij dou danohob. 9:6 Doba ban beisa besa, hanoba ban beinesa cinogo Damsig gini. Anai sungga, kaba, lusud lemens dau areg dan desedeb naugb ban augwan asesa dou ban toues. 9:7 Dangga leng laimo Saulus graga, kaba, len lahau medam. Hanoba len lesa dag losum namcir. Anai len toua louman mer graga, doba len lemeiya sud homero. 9:8 Doba sug Saulus en eisa besa ucugwohob, kaba, en esga en mairesi naugb en auweila lo. Doba en emeiya lo deitero. Dangga, kaba, len gedig laimo en, len len los en mesira. Hanoba len lahwan en dig cinogo Damsigeda. 9:9 Dara en emeiya lo asesa se lona homoiyerohob. Dangga hang, en emetara dara emegara se lona homoi gin touwero. 9:10 Doba se cinogo Damsig ingga, kaba, sud hom dau Yesus men logodeh, moho Ananias, en toua moongga. Dangga maman Adehsud eic dag omom dou en. Hanoba en eija en, endagai: Ananias. 9:11 Sug Ananias ouman maman Adehsud en mer dag ginohob, kaba, en auni dou en, endagai: Adehsud, dan indugwenggini. Dangga, kaba, maman Adehsud enara dou en, endagai: Ban beihwedig ucina, moho Ucina Gobosboro, hanoba ban beijidougwo lusud se Yudas men tu an sud hom, moho Saulus, dau cinogo Tarsus. Anai en medoc emesrougb an dan deitero. Doba iteitogini, kaba, en ocuncum dou danohob. 9:12 Dara dan dens dou en dag ban ben aud en naugb ban bob ban absira deb se en mougt, dauntoba en eiya lo asesa ucugb toua. Anai dan deic dag gomom dou en, hang en emeiya augwan gini asesa touohob. 9:13 Doba sug Ananias ouman Adehsud en mer an dag gini, kaba, en auni en mer ucugb, endagai: Adehsud, lusud leinyana lecic dau men geicara dag en eic mog erij medam dou aban lusud leinyana se cinogo Yerusalem dou danohob. 9:14 Dara dan douman, doba Gembala Gesa Taij Meren Mougt Mera Medam en eic goubesa dou en naugb en agaigeij emen gedig emen emeigdoumesa ban aboho dag emen mougt mera medam se cinogo Damsig gin touohob. 9:15 Doba Adehsud arougb en namcir, endagai: Ban beihwedaud eni. Anai dan deigdoumesa en moho naugb en os badi dan indoho dou lugmahara, dara meren mougtir, dara leng Israel laugwanohob. 9:16 Dara danin demens dau ucina mog erij areg ELOHIM esedeb naugb enohob augwan asesa dou en toues. Anai sug en esai ELOHIM en mer geigouhw eisaugb dan dou lusud dara en os badi dan indoho dou len, kaba, len leic gogom medam dou en icira gin toua namcir. 9:17 Dangga, kaba, Ananias en edehilon se Yudas men tu. Sug en eiya Saulus se Yudas men tuohob, kaba, en ob mesira deb se en mougt. Hanoba en enara dou en, endagai: Indaguna Saulus, Yesus maman Adehsud enin eng arougb dan aud ban naugb dan dousa ban, dauntoba ban beiya lo asesa ucugb deit. Dara en emesa Mena Gogoufu einesa ban abdoc mes naugb en eic goubesa dou ban toues. Anai sug ban ben aud emen sugin, kaba, en ens enin ainyes dou ban se ucina mogumsi naugb en enara dangga dou ban touohob. 9:18 Sug Ananias enara dag graga dou en dauwohob, kaba, areg edag hosei merila obsara dau en maires namcir. Hanoba en eiya lo asesa ucugb deit. Dangga sug en eisa besa ucugwohob, kaba, Ananias ahwan en aud duhu naugb en ogun en se duhu, bansins dag en edag Yesus men logodeh touohob. 9:19 Sug Ananias ogun en se duhuohob, kaba, Saulus et ared. Hang goubesa einesa en maga ucugb se mohw deit. 9:20 Dangga Saulus, kaba, en emecicugb dig Yerusalem dedemeda touwero. Doba en eigtou desij Yesus men logodeh se Damsig se lona aibibra toua. Dara en emeigtou dau sug en os badi Yesus en moho deseino lusud touwero. Doba sug Ananias ogun en se duhu inegohob, kaba, en einesa leng Yahudi meren tuari naugb en esai Mer Geigouhw eisaugb Yesus dou len laugwan sungga toua. Hanoba en enara dou len, endagai: Yesus gin, kaba, en edag ELOHIM Meisi mohora hom, gedig en eigdoumesa en moho naugb en eigdoc maman dau sesar men gogom augwan dag misen namcirohob. 9:21 Sug leng Yahudi louman en mer an dag gini, kaba, len leimiman dau gin namcir. Hanoba len leijidougwom ucucugb, lendagai: Sud hom gin, kaba, en eic gomom dou lusud gedig len leigdoumesa Yesus, en moho, dag meren mougt mera medam se Yerusalem len laugwanohob. Dara en en sugini naugb en agaigeij leng leigdoumesa Yesus, en moho, dag meren mougt mera medam len laugwan sugin touohob. Hanoba en ahwan len aud gembala gesa taij meren mougtir naugb len leic mog erij dou len toua deit. Dangga, dagiro, naugwe hang, en os badi Yesus, en moho, gini dag en edag ELOHIM Meisi mohora hom dou maman dag gina? 9:22 Doba Mena Gogoufu ousa Saulus naugb en esai Mer Geigouhw eisaugb Yesus dara goubesa edreg beiseisaugb terimda. Dara en eic mou ouforoho dou en naugb en ens dau medagas einyana se Surad Injil Meb Mohon debin gin dou leng Yahudi, dag Yesus enin eng Sud Hom Geigdoc Lusud Dau Meren Gogom Augwan dous. Dara areg en ens gin, kaba, augwan eic dag leng Yahudi losum an en mer gin toua namcir. 9:23 Sug en ebedbed dangga dou leng Yahudi ingga se lona einyanohob, kaba, len loucimdeb, dauntoba len lehilon ucina naugb sug len leic gomom dou en dougwodaha. 9:24 Dangga hang, len lemesedougwo misis geb dougwo beimes ingga augwan an en astesda lona loba terimda naugb sug len leic gomom dou en namcir. Doba Saulus en ouman dau areg len lesedeb naugb en touohob. 9:25 Dangga se loba hom, kaba, Saulus men logodeh len lob en deb se aigdaga mes. Hanoba len losus aumagan en dau liga moro dig cinogoda. 9:26 Sug Saulus en ecicugb bedebeij cinogo Yerusalemohob, kaba, en ouwan edag hom dara Yesus men logodeh laugwan sungga toua. Doba len merdoc ahau dau en namcir. Anai len loududa en dag en emedag Yesus men logodeh dag misenbuma. 9:27 Doba sud hom, moho Barnabas, en edahwan Saulus. Hanoba en eino en men aud Yesus men logodeh merug sisa hobjerai toua. Sug lan ladebeij lenohob, kaba, en ecic dau sug maman Adehsud ens enin ainyes dara enara dou en se ucina mogumsi meijouhw augwan asesa dou len. Dara en ens dou len dau sug Saulus eni moongga se cinogo Damsig, kaba, dag en emahau dau leng Yahudi touwero. Doba en eic mos naugb en eperwei Yesus, en mohw. Hanoba en esai Mer Geigouhw eisaugb en dou len laugwan sungga touohob. 9:28 Sug len louman dau gin, kaba, len lebin en naugb en eigtou desij len toua. Dangga Saulus en eic mos naugb en eperwei maman Adehsud, en mohw, deit. Hanoba en esai Mer Geigouhw eisaugb Krisdus dou len laugwan sungga toua. 9:29 Dara en esai Mer Geigouhw eisaugb Yesus dou leng Yahudi gedig len lec Grika mer mogud len laugwan. Hanoba eni dara len, kaba, len lecic meijouhw laos denim ucan toua. Doba areg Saulus ens ainyes dou len gin, kaba, eic dag len merdoc esrougb medam an en. Dangga hang, len lehilon ucina terimda naugb sug len leic gomom dou en. Dobnaro. 9:30 Doba sug Saulus men maguner se Krisdus len lecinaga dau ginohob, kaba, len lahwan en dig cinogo Kaisarea. Hanoba len lesa en dau sungga dig men cinogo Tarsuseda. 9:31 Dangga goucimdeb se Yudea, dara Galilea, dara Samaria, kaba, len laugwan merdoc ebtou toua. Anai Saulus en aimo Yesus dauwohob. Hang lusud lemeic mog erij dou len toua deitero. Doba Mena Gogoufu ousa len naugb len leiji dag lusud mos se Krisdus namcir. Dara en esa lingmadara dou len toua, kaba, len laimo areg asesa maman Adehsud enin medoc mes dara merdoc ahau dau en toua terimda. 9:32 Dara Petrus, kaba, en toua ec mohora naugb en edoumuma goucimdeb sungga sungga. Dangga hang, se lona hom, kaba, en edebeij ELOHIM men lusud se cinogo Lida toua. 9:33 Sug eni moongga se cinogo ingga, kaba, en esma sud hom, moho Eneas. Sud hom gin, kaba, en mohora omom namcir. Hang en emeijobur se arisogomoc senggemoi gin touohob. 9:34 Dangga sug Petrus esma enohob, kaba, en arougb en, endagai: Eneas, ban beisa bod aban sidgwa, anai Yesus Krisdus eic geigouhw dou banohob. Sug Petrus arougb en dag gin inegohob, kaba, en eisa bec namcir. 9:35 Dangga leng se cinogo Lida ingga, dara leng leigtou se Saron meren hancob augwan sug len leiya dau gini, kaba, len toua merdoc ebdebin an maman Adehsud gin terimda. 9:36 Dara se cinogo hom, moho Yope, kaba, gida hom, moho Tabida, en toua moongga. En moho se lec Grika mer dag Dorkas, era rusa. En toua medoc ebdebin an Yesusohob. Dangga hang, astesda lona loba terimda, kaba, en eicara dag mogud einyana dou lusud aibibrida. Dara en eic aregoufu dou leng merunggwereij toua. 9:37 Doba se lona sug Petrus eni moongga se Lida, kaba, Dorkas en areba, hanoba en omom namcir. Dangga sug len ledu en magohob, kaba, len ledob en se dimei mes geb taiba. 9:38 Doba Yope gin, kaba, emeb aigus dau Lidero. Dangga sug Yesus men logodeh se Yope len louman dag Petrus eni moongga se Lidohob, kaba, len larougb lahwai dau len naugb lan laden dou Petrus dag en eijeijo dedemedahabi. 9:39 Dangga sug lan laden dou en inegohob, kaba, Petrus en eisa baimo lan namcir. Sug len ledebeij se Tabida men tu se Yopohob, kaba, len lahwan en se dimei geb taiba sug Dorkas maga eb se graga toua. Sug Petrus einesa dimeiyohob, kaba, ligida debdes laugwan lou acec en dara leb leingdara medam namcir. Hanoba len lens dau sansun geb aimei dara gagas gouji gedig en ogon sug mairesebaba augwan dou en toua. 9:40 Doba Petrus, kaba, en ocirma len laugwan dau dimei mes ingga namcir. Dangga sug len laugwan leihwedig medigo dau enohob, kaba, en eic mohorbrida adedeic dimei. Hanoba en ocuncum dou ELOHIM toua. Sug en ocuncum naugb gin dou ELOHIM dauwohob, kaba, en eineg medoc aud aremogougb. Hanoba en enara dou en, endagai: Tabida, ban bisa. Sug en arougb enohob, kaba, en maires esga. Dangga sug en eiya Petrusohob, kaba, en eisa beigtou namcir. 9:41 Sug en eisa beigtouohob, kaba, Petrus ou mesira bos en mesira. Hanoba en eigdoumesa en besa namcir. Sug en eigdoumesa enohob, kaba, en eija leng merdoc ebdebin an Yesus se tu ingga, dara leng debdes graga laugwan leinesa ucugb. Sug len leinesohob, kaba, en arges Dorkas deb se len merisira, anai en eisa dau gomom ucugwohob. 9:42 Sug leng se Yope louman dau ganusbus gin, kaba, len leinyana merdoc ebdebin an maman Adehsud, dag en eng Sud Hom Geigdoc Len Dau Sesar Men Gogom Augwan gin toua. 9:43 Dangga hang, Petrus en emecicugb dig cinogo Lida touwero. Doba en eigtou desij sud hom gedig en esinsin aremeta mos becabeci, en moho Simon, se lona hosa debin gin toua.

Watti'u Manga Rasul 10

10:1 Doba se cinogo hom, moho Kaisarea, kaba, sud hom, moho Kornelius, en toua moongga. Sud hom gin, kaba, en edag mougt mera naugb leng Roma meren sadodor merug huntun hom. Dara lusud leija men lusud merug huntun hom dara mersir merug huntun sergem len laugwan dag sadodor dau leng Italia meren hancob. Anai merug huntun senggem gin, kaba, len laugwan ledag hom namcir naugb sug len lesara. 10:2 Sud hom gin, kaba, en toua ahau dau ELOHIM naugb en aimo areg asesa enin medoc mes augwan namcir. Dangga hang, en emecguna dou seiseij toua deitero. Doba eni dara leng leigtou desij en se men tu, kaba, len laugwan laimo leng Yahudi naugb len lesijaresa ELOHIM. Dara en agaha mesira naugb sug en ousa leng Yahudi gedig len merunggwereij len laugwan. Hanoba en aimo meren gaben naugb sug en ocuncum dou ELOHIM esesa terimda toua. 10:3 Doba se lona hom sug en ocuncum se igdedeij, kaba, Mena Gogoufu eic dag omom dou en. Dangga en eiya, doba ELOHIM men malaikad hom en en aud en se men dimei mes ingga dag misen namcir. Sug malaikad edebeij enohob, kaba, en eija en, endagai: Kornelius. 10:4 Doba Kornelius eisan gahau baijidougwo en, endagai: Adehsud, ban beija dan, anara? Hanoba en auweila en toutou terimda. Doba malaikad ingga, kaba, en oho mer debin en, endagai: ELOHIM en medoc an ban namcir, anai en eiya dau areg ban beic dag mogud dou leng merunggwereij len laugwan. Dara en medoc eiseisan aban gocuncum. Anai ban besijaresa en dara ban abdoc hom besesa terimda touohob. Hang en emesedeb naugb en auni areg geigouhw ucugb dou ban toues. Anai areg ban beic dou lusud dara aban gocuncum dou en gin, kaba, eic dag en medoc an ban toua namcirohob. 10:5 Dangga iteitogin, kaba, ban barougb aban logodeh naugb len leihweda se cinogo, moho Yope, dauntoba len ledeija len sungga dougwo sud hom, moho Simon, gedig len leija en moho Petrusahabi. Hanoba len ledahwan en aud ban sugin toua. 10:6 Anai sud hom gin, kaba, en atou desij sud hom gesinsin aremeta mos becabeci, en moho toua dag Simon, se men tu geb deinyor dum mebera se cinogo ingga. 10:7 Sug malaikad enara dou Kornelius ouwa dauwohob, kaba, en eihwededau en namcir. Sug en eihwededau enohob, kaba, Kornelius en eija men sogougb lahwai gedig lan lasedougwo en men tu naugb lan lan aud eni. Hanoba en eija men sadodor hom gesedougwo en naugb en toua, en en aud eni. Anai men sadodor hom gin, kaba, en aimo areg asesa ELOHIM enin medoc mes augwan, dara en esijaresa en toua namcirohob. 10:8 Sug merug homoi gini ledebeij enohob, kaba, en ecic dau areg en eiya graga augwan meijouhw asesa dou len toua. Hanoba en arougb len dig cinogo Yopeda. 10:9 Dangga sug loneinda, kaba, merug homoi gini len lec merohora dig Yopeda. Doba irir sug len lec merohora terimda bedebeij deinyor Yopohob, kaba, Petrus en toua eisaugb se tu medgomori se igdabogo naugb en edocuncum dou ELOHIM. 10:10 Doba irir sug en ocuncum gini, kaba, en sireba namcir. Hang en ouwan etara, doba len lemougwan ared emecbuma. Dangga irir sug len lougwan ared gin, kaba, Mena Gogoufu eic dag en omom toua. 10:11 Hanoba en eiya, doba misis se bogo ec dau, kaba, len losus aigdaga an minc gebehibera meida hogu dig cinogon. 10:12 Dara minc meida graga, kaba, atij an aremeta aingma aingma dau areg mohora hogu, dara aremeta gedig mohumes agrigrilo, dara ba geigtou se lomesmes toua. Aremeta dara ba augwan gin, kaba, Musa men gomnomna en dougwo leng Yahudi an ginohob, dauntoba len lemet touwero. Anai sug len let, kaba, eic gogor dou len deseino ELOHIM namcirohob. 10:13 Sug Petrus eiya augwan ginohob, kaba, en ouman mer hom dau bogo arougb en, endagai: Petrus, ban beisa, bogug aremeta ingga ingma. Hanoba ban bet toua. 10:14 Doba Petrus agada mos dau namcir, endagai: Adehsud, dan doguro gin namcir. Anai areg Musa men gomnomna emoiharagabuma, dara areg eic gogor dou dan deseino ELOHIM, kaba, dan demet augwan gin mougwa hom touabuma. 10:15 Doba mer graga oho mer debin en deit, endagai: Areg ELOHIM en moho oiharaga becabecohob, kaba, ban bemowun augwan gini dag gogor touwero, doba ban beic bet namcir. 10:16 Sug mer dau bogo arougb en an areg graga augwan bedebeij mougwa homoiyohob, kaba, len lesera aigdaga an minc gebehibera meida hogu gini ucugb dig bogada. 10:17 Sug len lesara aigdaga an minc graga ucugb dig bogohob, kaba, Petrus eija mouwesa areg en eiya gini men meijouhw ucucugb namcir. Anai en mou emobgesa areg en eiya gini men meijouhw touebma. Doba sug Petrus auwam an ginaba, kaba, lusud merug homoi gedig Kornelius arougb len aud en, kaba, len ledebeij misis moc se Simon men tu, anai len leijidougwo leng se Yope an ginohob. 10:18 Sug len lesa se misis moc ginohob, kaba, len leijidougwo leng se Simon men tu an Petrus, lendagai: Sud hom, moho Simon gedig lusud leija en toua dag Petrus, kaba, en atou suginei? Era naroei? 10:19-20 Dangga Mena Gogoufu enara dou Petrus, endagai: Ban bouman dan indir gin deigeigouhwahabi. Anai lusud merug homoi len ledebeij misis mocohob naugb len lehilon dougwo ban. Hang ban bouwada se cinogo dedemeda, dara ban bemeija ban abdocesa len touwero. Doba ban baimo len namcir. Anai dan eng denara dou meren mougt, hanoba en arougb len aud ban sugin toua. Mena Gogoufu arougb Petrus an dag gini, anai en auwam an areg en eiya graga men meijouhw ucucugb terimdaba. 10:21 Sug Petrus ouman Mena Gogoufu arougb en an dag ginohob, kaba, en ouwada dig cinogoda. Dangga sug en edebeij merug homoi graga se misis mocohob, kaba, en eijidougwo len, endagai: Yen yen sugin naugb ara? Anai dani sud hom areg yen yeijidougwo lusud anohob. 10:22 Doba len launi ucugb dou en, lendagai: Gia, kaba, ELOHIM men malaikad hom ens enin ainyes dou emen mougt mera, moho Kornelius. Hanoba en arougb en naugb en acgeij ban beihwedaud en se men tuahabi. Dauntoba en toua ouman dau areg ban besai dou lusud augwan gini deigeigouhw toua. Dangga hang, emen mougt gin, kaba, en emarougb emen aud ban naugb emen emahwan ban aud en. Dauntoba ban bens dau areg ban besai dou lusud gini meijouhw augwan asesa dou en toua. Anai eni leng Roma meren sadodor huntun hom meren mougt mera. Doba en aimo areg asesa ELOHIM enin medoc mes namcir. Dara en esijaresa ELOHIM, dara en medoc ahau dau en toua terimda. Dara leng Yahudi laugwan, kaba, len leigdoumesa en moho an men geicara gedag beim dou len touohob. 10:23 Sug Petrus ouman len merir an dag ginohob, kaba, en ebin len naugb len latou desij en toua. Dangga sug loneindohob, kaba, en eisa baimo lenda. Dara leng merdoc ebdebin an Yesus se cinogo Yope gin, kaba, merug hosa laimo en toua. 10:24 Dangga sug len lec merohora se lona homohob, hanoba se loneinda deit, kaba, len ledebeij se Kaisareohob. Sug len ledebeij Kornelius men tuohob, kaba, len leiya, doba Kornelius en esa mer dou mosur dara mesir len laugwan lacinim deb se men tu naugb lenohob. 10:25 Doba sug Petrus ouwan einesa Kornelius men tu gini, kaba, Kornelius en agunya dedemeda dagaseni. Hanoba en eic mohorbrida badedeij cinogo naugb ecguna dou en toua. 10:26 Doba Petrus en dougwo en, endagai: Ban beisa besa. Anai dang gin toua lusud misen dous. 10:27 Hanoba en enara dou en asa lacahabi, lan lameinesa dimeiyeda. Sug lan lainesa dimeiyohob, kaba, Petrus en eiya, doba lusud leinyana loucimdeb naugb enohob. 10:28 Hanoba en enara dou len, endagai: Yenin yecinaga dag emeng Yahudi emen gomnomna en dougwo emen dag emen ememeinesa lugmahara meren tu. Dara emen ememedag hom dara len touwero. Doba emen emasid emenin dau len namcir. Doba ELOHIM ens dou danohob, dag sud hom ingma, kaba, emeic gogor dou dan deseino en, hang dan demasid danin dau en touwero. Doba ELOHIM moho oiharaga len laugwan lecabecohob. 10:29 Dangga sug ban besa ban abir dou dan naugb dan den aud ban sugini, kaba, dan demohoiya touwero. Doba dan daimo aban lusud aud ban sugin namcir. Dangga areg ban bacgeij dan naugb gini, kaba, ban bens meijouhw augwan asesa dou danahabi. 10:30 Sug Kornelius ouman Petrus eijidougwo en an dag ginohob, kaba, en ens dau aremer hosa graga meijouhw augwan asesa dou en toua, endagai: Se lona homoi nosa sug igdedeij dag gini, kaba, dan docuncum se indan tu. Sug dan docuncum gin, kaba, giji hom geg sansun gogouf cucugb en agunya augwougb debin dan naugb en esa desij dan toua. 10:31 Hanoba en enara dou dan, endagai: Kornelius, ELOHIM en ouman areg ban bacgeij en an ginohob. Dara en medoc moc dougwo aban geicara gedag beim an leng merunggwereij touwero. Doba en mena eiseisan terimda. 10:32 Dangga hang, ban barougb aban lusud aud cinogo Yope naugb len lehilon sud hom, en moho Simon gedig lusud leija en moho toua dag Petrus. Anai en, kaba, eni moongga desij sud hom gesinsin aremeta mos becabeci, en moho toua dag Simon, se men tu deinyor dum mebera se cinogo ingga. 10:33 Sug dan douman malaikad arougb dan an dag gin inegohob, kaba, dan demamsoho en mer an gin touwero. Doba dan desa indan lusud aud ban dedemeda. Dangga ban toua bemamsoho dan indir an areg dan dacgeij dau ban touwero. Doba ban abdoc esgiraha an dan indir naugb ban ben aud dan sugin touohob. Hang iteitogin, kaba, emen emaugwan emacinim deb sugini naugb emen emouman dau areg maman Adehsud arougb ban an naugb ban besai dou emen toua. 10:34 Sug Kornelius ecic dau aremer graga meijouhw augwan asesa dou Petrusohob, kaba, Petrus ousa deisa en mer an gin toua. Hanoba en enara dou en, endagai: Indeic, iteitogin, kaba, dan decinaga dag ELOHIM emeigdoumesa meijouhuda hom emedreg dau len gusero. Doba en aimo ucina hom an len laugwan dous. 10:35 Dangga hang, en emesi sud hom aiyei emaimo dau men meijouhuda touwero. Doba gareg en esijaresa en dara medoc ahau dau en, dara en aimo areg asesa enin medoc mes terimda, kaba, eigdoumesa en moho deseino en toua namcir. 10:36 Sug Petrus ousa deisa Kornelius an areg en ecic dou enohob, kaba, en esai Mer Geigouhw eisaugb Krisdus ucan dou len toua, endagai: Yen yecinaga dau ELOHIM, en mer, areg en esa dou emeng Israel meijouhw augwan asesohob. Anai en esa Yesus Krisdus aud emen naugb en esai ELOHIM Mer Geigouhw dou emen, dauntoba emen emecinaga dag en esedeb en medoc mesohob naugb sug en eic gesgigouhwesa ucugb dou emen ogdoc Yesus Krisdus men geicara taiba sogo salib gin toua. Anai Yesus gin, kaba, en edag mougt mera medam naugb lusud se cinogo gin augwanohob. 10:37 Dara yen yecinaga dau areg acgunog se lona sug Yohanes ebedbed dou emen meijouhw augwan asesa touohob. Anai sug en ebedbed dou emen dag emen emesga emen sesar, hanoba en ogun emen se duhu ansins debin gin, kaba, Yesus esai ELOHIM mer an areg graga dou emen ucan deit toua, ebiji se leng Galilea meren hancob, terimda agaha becinten se emeng Israel emen hancob augwan toua namcir. 10:38 Dara yen yecinaga dau sug Yohanes ogun Yesus dau cinogo Nasared se duhu, kaba, dag ELOHIM esa Mena Gogoufu se en medoc mes naugb en eic goubesa medam dou en. Hanoba en eihwedig sungga sungga naugb en eic geigouhw aingma aingma dou lusud. Dara leng ledag Bilis men sogougb, kaba, en esga len laugwan dau men goubesa toua. Anai ELOHIM moongga desij en naugb ginohob. 10:39 Dara emen emouma debin men geicara geigouhw se leng Israel meren hancob dara Yerusalem toua. Anai emen emeiya dau augwan gini se emen emiresohob. Dara leng Yahudi gin, kaba, len letob en se sogo salib, ben omom namcir. 10:40 Doba lona hwai debin gin, kaba, ELOHIM eigdoumesa en dau gomom ucugwohob. Hanoba en ens enin ainyes dou lusud toua. 10:41 Dara en emens en ainyes dou len laugwan touwero. Doba en ens en ainyes dou emenin dous, anai ELOHIM ouci emen naugb gin deb nosohob. Dauntoba emen emouma debin gin augwan dou lusud laugwan toua. Anai sug en eisa dau gomom ucugb, kaba, emen emetara dara emegara dara en touohob. 10:42 Hang en emarougb emen naugb sug emen emesai Mer Geigouhw eisaugb en dou lusud laugwan. Dara emen emouma debin en, dag ELOHIM eigdoumesa en moho naugb en ogod aremer aga leng merireseb dara leng lomom len laugwan touohob. 10:43 Augwan gin, kaba, esogwa deisa areg leng lesai ELOHIM moro sug nosa len laugwan log deb se Surad Injil Meb Mohon deb sug nosa touohob, lendagai: Gareg en medoc ebdebin an Krisdus, en moho, kaba, sesar men gogom emeb naugb en toua deitero. Doba ELOHIM aigdougwo men sesar augwan, ediyebeiya dau en toua. Anai sug Krisdus en moho aiga en dag ginohob, kaba, emedeinyum naugb sug sesar emogod en toua deitero. Doba Krisdus en moho oiharaga en dougwohob, anai en moho gin, kaba, dag mobisamougb namcir. 10:44 Doba irir sug Petrus ens meijouhw dau areg graga augwan dou lenaba, kaba, Mena Gogoufu einesa leng louman en mer gini len laugwan merdoc mes toua. 10:45 Sug leng Krisden dau leng Yahudi gedig len laimo Petrus dau Yope len leiya gin, kaba, len leimiman dau gin namcir. Anai len leiya, doba ELOHIM esa Mena Gogoufu gin dou lugmahara, aninim dag en esa en dou len sug nosa touohob. 10:46 Anai len louman, doba lugmahara gin toua lec merir susugb. Dara len leigdoumesa ELOHIM en moho agas medam an toua namcir. 10:47 Dangga Petrus enara dou leng Yahudi gedig len laimo en dau Yope gini, endagai: Yen yeiya len gini. Anai len toua, Mena Gogoufu einesa len merdoc mes, aninim dag maman touohob. Dangga gareg dau maman en en dougwo len naugb sug maman magun len se duhu debin gin toua? Naro, sud hom ingmaro. 10:48 Sug Petrus enara dou mesir leng Yahudi gini dauwohob, kaba, en arougb len naugb len logun Kornelius an men lusud len laugwan se Yesus Krisdus, en moho, ansins debin gin toua. Dauntoba lusud lecinaga dag len toua ledag Yesus men logodehohob. Anai eni an mesir, len leperwei Yesus en mohw naugb ginohob. Sug Petrus dara mesir logun len se duhu dauwohob, kaba, Kornelius dara men lusud len dougwo Petrus naugb en eigtou desij len se lona hosa debin gin deitahabi.

Watti'u Manga Rasul 11

11:1 Dara Petrus mesir merug sisa hobjerem, dara leng merdoc ebdebin an Yesus se leng Yudea meren hancob, len toua louman dag merug hosa dau lugmahara len lebin ELOHIM mer eisaugb Krisdus touohob. 11:2 Dangga hang, sug Petrus eisaugb dig Yerusalem ucugwohob, kaba, ligbum dau leng Krisden dau leng Yahudi ingga, kaba, len merdoc esrougb an en namcir. Anai len gin, kaba, len loudesa esloulougb naugb lugmahara len toua lec merus dau. Dara len laimo Musa men gomnomna aud gousanara touahabi, len merdoc emebdebin an Yesus lemaos dara ucan deit. 11:3 Hanoba len lenara gouji dou en namcir, lendagai: Dagiro, naugwe hang, ban beinesa lugmahara meren tu naugb ban beigtou desij lena? Anai len lemec merus daubuma. Dara gin dousero. Doba ban betara dara len, hang emeic gogor dou ban deseino ELOHIM touohoba? 11:4-5 Sug Petrus ouman len lenara gouji dou en dag gin, kaba, en ens meijouhw dau sug acgunog terimda ouwedoc augwan asesa dou len toua. Hanoba en enara dou len, endagai: Se lona hom sug dan docuncum se cinogo Yope, kaba, Mena Gogoufu eic dag dan domom. Hanoba dan deiya, doba len losus aigdaga an areg en mocbobaga dag minc gebehibera meida hogu dau bogo, terimda eb desij dan toua. 11:6 Dangga sug dan dogmac, kaba, dan deiya, doba aremeta geic gogor dou maman dag aremeta hogu gedig lusud louwaha, dara aremeta gedig len lemouwaharo, dara aremeta gedig mohumes agrigrilo, dara ba geigtou se lomesmes, len laugwan leb se meida gin toua. 11:7 Sug dan dogmac areg geb se minc meida ginohob, kaba, dan douman mer hom dau bogo arougb dan, endagai: Petrus, ban beisa, bogug aremeta ingga ingma, hanoba ban bet toua. 11:8 Doba dan dagada dan indus dau namcir, dendagai: Adehsud, dan doguro gin namcir. Anai areg Musa men gomnomna emoiharagabuma, dara areg eic gogor dou dan deseino ELOHIM, kaba, dan demet augwan gin mougwa hom touebma. 11:9 Doba mer en dau bogo naugb oho mer debin dan deit, endagai: Areg ELOHIM en moho oiharaga becbecohob, kaba, ban bemowun augwan gini dag gogor touwero. Doba ban beic bet namcir. 11:10 Sug dan deiya dara douman augwan graga bedebeij mougwa homoi icirohob, kaba, len lesera aigdaga an minc gebehibera meida gini ucugb dig bogada. 11:11 Doba yen youman deigeigouhw. Sug dan deiya dara douman augwan ginaba, kaba, lusud merug homoi dau cinogo Kaisarea len ledesesa misis moc se tu sug dan datousa. Anai meren mougt mera en esa len aud dan naugb len lahwan dan aud en se cinogo Kaisarea toua. 11:12 Dangga Mena Gogoufu arougb dan, endagai: Ban bemeija ban abdoc se lenlo. Doba ban baimo len namcir dig Kaisareada. Dara maman mamaguner merug senggem dau Yope, kaba, len laimo dan toua. Sug emen emedebeij Kaisareohob, kaba, emen emaugwan emeinesa sud hom, moho Kornelius, men tu. 11:13 Hanoba en ecic dou emen dag lona homoi nosa, kaba, en eiya malaikad hom en edebeij en se men tu. 11:14 Dara en ecic dou emen dag malaikad arougb en naugb en esa men lusud leihweda se Yope naugb len ledeiya sud hom, en moho Simon gedig lusud leija en moho toua dag Petrus. Dauntoba en esai dau areg geic maireseb huhugb dou en dara men lusud laugwan toua. 11:15 Doba irir sug dan debiji naugb dan desai Mer Geigouhw eisaugb Krisdus dou len, kaba, Mena Gogoufu einesa len laugwan merdoc mes, aninim dag en einesa maman mamdoc mes se Lona w Pentakosda sug nosa touohob. 11:16 Sug dan deiya dau gin, kaba, dan indoc eiseisan areg maman Adehsud en os dou maman sug nosa touohob, endagai: Yohanes, kaba, en ogun yen se duhu dous. Doba cum, kaba, ELOHIM emesa Mena Gogoufu se yen meigdoc mes namcir. 11:17 Sug ELOHIM esa Mena Gogoufu eb ainyes se lugmahara merdoc mes, aninim dag en esa en se maman mamdoc mes se lona sug maman mamdoc ebdebin an maman Adehsud Yesus Krisdus sug nosa touohob, kaba, dani garena, hang dan demen dougwo ELOHIM en an gina? Naro. 11:18 Sug len louman Petrus mer an ginohob, kaba, len lemenara gouji dou Petrus deitero. Doba len lagahugouhw an ELOHIM an gin dous. Hanoba len lenara doum, lendagai: Dag gin, kaba, ansins misen dou maman dag ELOHIM eic cumougt dou lugmahara naugb len lesga meren sesar asesa dou en. Dauntoba len lemomom se dum smougb touwero, doba en eic maireseb menau geb huhugb dou len. Aninim dag en eic cumougt dou mamang Yahudi sug nosa naugb gin touohob. 11:19 Doba leng gedig len lougb laisoboro dau Yerusalem sug leng Yahudi leic gomom dou Sdepanus, hanoba len lebiji naugb len leic mog erij dou leng Krisden gus toua, kaba, ligbum len lougb dig leng Pinisia meren hancob. Dara ligbum, kaba, len lougb se Lomos Siprus. Dara ligbum deit, kaba, len lougb laisoboro dig beimes, moho Antiokia, toua. Sug len ledebeij sungga sunggohob, kaba, len lesai Mer Geigouhw eisaugb Krisdus dou lusud. Doba dou mersir dau Yahudi aiyei dous. 11:20 Doba lingma, kaba, sug len ledebeij beimes Antiokiohob, kaba, len lebiji naugb len lesai Mer Geigouhw eisaugb maman Adehsud Yesus dou lugmahara toua. Anai len gin, kaba, dau leng Yahudi dau Yerusalemero. Doba leni Krisden gedag lugun dau Lomos Siprus dara beimes, moho Kirene, dous. 11:21 Dangga sug len lesai Mer Geigouhw dou lugmahara, kaba, ELOHIM ousa len dara men goubesa naugb gin toua. Hang leinyana gougwa dau len gin, kaba, len lemecguna dou meren seiseij dag nosa deitero, doba len leineg dau namcir. Hanoba len leigdoumesa maman Adehsud Yesus en moho dag meren mougt mera medam deit. 11:22 Sug leng se goucimdeb se Yerusalem len louman dau gin, kaba, len lesa Barnabas dig Antiokia naugb en edogod dougwo ginahabi. 11:23 Dangga sug en edebeij cinogo ingga, hanoba en eiya, doba ELOHIM eic geigouhw aingma aingma dou lugmahara touohob, kaba, en agahugouhw an ELOHIM toua terimda. Hang en emenara emad len merdoc mes ucan deit. Dauntoba len lemobsara dau maman Adehsud ginero. Doba len laiyan merdocesem naugb len laimo en dara len merdoc augwan namcir. 11:24 Barnabas eicara dag gini, anai en, kaba, en medoc edag beim an lusud. Dara en medoc ebdebin an maman Adehsud toua dag misen namcir. Anai Mena Gogoufu atij an en medoc mes naugb eic goubesa medam dou enohob. Dangga hang, enin toua arautut lusud leinyana aud maman Adehsud naugb len merdoc ebdebin an en toua. 11:25 Sug Barnabas esulou len dauwohob, kaba, en eihwedig cinogo Tarsus naugb en edehilon dougwo Saulus. 11:26 Sug en edebeij enohob, kaba, lan lacicugb dig Antiokia en deit. Dangga sug lan ladebeijohob, kaba, lan latou desij leng merdoc ebdebin an Yesus sungga se arisogomoc hom naugb lan ladidib meijouhw eisaugb Yesus augwan asesa dou len toua. Dara se cinogo Antiokia gini, kaba, lusud lebiji naugb leija Yesus men logodeh dag Krisden aimougtut toua. Anai len leigdoumesa en moho dag meren mougt mera medam dous. 11:27 Doba sug Barnabas dara Saulus lan marugwengga se cinogo Antiokia gin, kaba, merug hosa dau leng lesai ELOHIM moro naugb aremer. Dara len meru ouforoho naugb len lens dau areg se lona daiyamo gacin dou lusud toua, kaba, len len dau Yerusalem aud len sugin toua. 11:28 Sug len ledebeij lenohob, kaba, sud hom dau len, en moho Agabus, en eisa besa. Hanoba en enara dou goucimdeb len laugwan toua, endagai: Cum, kaba, sir gogoufu emeinesa cinogo augwans. En enara deb dag gini ogdoc Mena Gogoufu men goubesa. Anai Mena Gogoufu ens gin dou enohob. (Sir gini ebiji sug Klaudius en edag leng Roma meren mougt mera medam naugb lenohob.) 11:29 Sug leng Krisden se cinogo Antiokia len louman dau gini, kaba, len lohw merdocedoum naugb len lesa meren aregoufu dou len meraguner dara merdamouwer se leng Yudea meren hancob, aimo dau areg astesda sud hom yom en esma toua. Anai sir gogoufu ebiji se meren hancob ginohob. 11:30 Sug len louci augwan gini debinimohob, kaba, len larougb Barnabas dara Saulus lan an naugb lan loho dou mougtir se leng Yudea meren hancob gin toua.

Watti'u Manga Rasul 12

12:1 Doba irir sug Barnabas dara Saulus lan laho aregoufu graga dou leng Krisden se leng Yudea meren hancob gin, kaba, leng Yahudi meren mougt mera medam, moho Herodes Agripa, en ebiji naugb en eic mog erij dou leng Krisden merug hosa se Yudea dara Yerusalem gin deit. 12:2 Dangga en arougb men sadodor naugb len ledougb Yohanes maguna, moho Yakobus, en mougt dau bomom namcir. 12:3 Sug Herodes en eiya, doba men geicara gini eic leng Yahudi merdoc eigouhw an en namcir, kaba, en arougb men sadodor naugb len ledagaigeij Petrus toua. (Doba lona sug len ledagaigeij en gin, kaba, acgunog se lona sug leng Yahudi let roti gemerisero. Anai lona gin, kaba, len merdoc eiseisan lona sug ELOHIM esga leng merjemouwer dau cinogo Mesir sug nosohob.) 12:4 Sug Herodes men sadodor ledagaigeij Petrusohob, kaba, en arougb len naugb len ledouf en se tu gesisug namcir. Anai en esedeb en medoc mes dau sug Lona Gohw Bedreg dara lona sug len lemet roti gemerisero gin ouwa dauwohob, kaba, en ogod aremer gogom deb naugb Petrus deseino leng Yahudi laugwan toua. Hang en emarougb men sadodor merug sorama hobjerem nagama len lekebem dag hogu icira naugb ledregim dougwo en terimda. 12:5 Dangga sadodor len lesedougwo Petrus se tu gesisug ingga astesda lona loba terimda. Doba goucimdeb se Yerusalem, kaba, len locuncum se goubesa dou ELOHIM an en terimda toua. 12:6 Loba hom debin dau sug Herodes ouwan ogod aremer gogom deinaugb Petrus deseino leng Yahudi laugwan, kaba, en atou se sadodor lahwai maraufu namcir. Hanoba len leic lanta hwai lahud en mesira hwas, kaba, len leic moro hom naugb len lahud sadodor hom mesira. Dara len leic moro hom deit, kaba, len lahud sadodor laingma mesira toua. Dara misis geb dougwo dimei gin, kaba, sadodor lahwai lasedougwo namcir toua. 12:7 Doba sug Petrus atou gin, kaba, maman Adehsud men malaikad hom agunya augwougb ben esesa dimei gatou sengga. Hanoba men mouf einyedei dimei mes ingga augwan toua namcir. Dangga sug en ebir Petrusohob, kaba, en arougb en, endagai: Ban beisa besa dedemeda. Sug malaikad arougb en an dangga inegohob, kaba, lanta hwas graga obsara dau en mesira toua namcir. 12:8 Sug lanta obsara dau en mesirohob, kaba, malaikad arougb en deit, endagai: Ban beic aban hwigbeimos bakebin aban sansun, hanoba ban beg aban hwigbeimos se ban abohora toua. Sug Petrus eicara baimo en mer an ginohob, kaba, malaikad arougb en deit, endagai: Ban beg aban sansun gouji dougwo banahabi, ban bemaimo dan toua. 12:9 Sug Petrus eg men sansun gouji dougwo enohob, kaba, en aimo malaikad dau tu gesisug dig medigoda. Doba en eija medocesa endag, malaikad ahwan en dau tu gesisug gin dig medigo dag misenei? Era Mena Gogoufu eic dag omom dou en, hang en emeiya dangga dousei? 12:10 Dobnaro. Lan laudreg sadodor lahwai gedig lan lesedougwo misis gaimougtut gini. Hanoba lan ladoudreg lang lesedougwo misis geb desij deit, terimda lan ladebeij misis gouji dau kermum geb dougwo liga geihwedaud tu gesisug aud beimes ingga toua. Sug lan ladebeij misis gouji ginohob, kaba, lan laiya, doba misis ec dau naugb lan debohob. Dangga sug lan ladebeij dig medigohob, kaba, lan laragasa ucina hom geihwedig beimeseda. Doba eirir sug lan laragasa ucina gin, kaba, malaikad ediyebeiya augwougb dau en namcir. 12:11 Sug malaikad ediyebeiya dau enohob, kaba, Petrus en ecinaga dag Mena Gogoufu emeic dag omom dou enero. Doba augwan gini acgunog dara en dag misenohob. Hanoba en enara dou enin, endagai: Iteitogin, kaba, dan decinaga dag Mena Gogoufu emeic dag omom dou dan, hang dan demeiya gin dousero. Doba dan decinaga dag maman Adehsud esa men malaikad dou dan dag misenohob. Dauntoba en eigdoc dan dau Herodes men goubesa dara areg leng Yahudi lesedeb naugb dan augwan gin touohob. 12:12 Sug Petrus ecinaga dag en agunya dau tu gesisug dag ginohob, kaba, en eihweda se Yohanes mem, Mariam, men tu. Dara Yohanes gin, kaba, lusud leija en moho toua dag Markus. Doba se men tu ingga, kaba, lusud leinyana merugwengga naugb locuncum an Petrus esesa terimda. 12:13 Sug Petrus edebeij liga geb acec Mariam men tuohob, kaba, en eija len, hanoba ouma misis se liga ingga. Dangga gida gaugdoho hom, moho Roda, en en naugb edec misis dau en toua. 12:14 Sug en ouman sud hom geija len gini, doba en ecinaga mer gini dag Petrus en mer asesohob, kaba, en emec misis habero. Doba en obga dedemeda ucugb aud leng locuncum se dimei mes naugb en en dou len toua. Anai en medoc eigouhw an gin namcir dougwodaha. Dangga sug en edebeij lenohob, kaba, en enara dou len, endagai: Yena, Petrus moongga se misis moc se liga medigo gaba. 12:15 Doba len letaha en mer an, lendagai: Ban bemereiyara danggero. Doba en mer ebdebin dou len, endagai: Indeic, Petrus moongga se liga medigo gaba. Doba len launi dou en, lendagai: Petrus enin, isnaro. Doba ban bouman men malaikad en mer dous. 12:16 Doba irir sug Roda enara dou lusud se dimei mes ingga, kaba, Petrus en mesira eb debin misis, bouma terimda. Dangga sug en ouma misis dag gin terimdohob, kaba, len lec misis dau en toua. Sug len leiya Petrus en mog asesa, kaba, len leimiman dau en namcir. 12:17 Doba Petrus en ecgun mesira debin len, dauntoba len lemenara se merir goilo. Hanoba en ecic dau sug maman Adehsud ahwan en dau tu gesisug meijouhw augwan asesa dou len toua. Sug en ecic augwan gini dou lenohob, kaba, en arougb len, endagai: Yen yeihweda naugb yen yedecic dau aremer augwan gini dou maman Adehsud Yakobus an maman mamaguner dara mamdamouwer gus gus laugwan toua. Sug en arougb len an danggohob, kaba, en eihwededau tu ingga dig cinogo gus dau Herodes deitda. 12:18 Doba sug lona esgohob, kaba, sadodor gesedougwo Petrus se tu gesisug gin, kaba, len merdoc momogo medam. Dara ocnini len merdoc mes namcir. Anai len leiya, doba Petrus en mog se tu gesisug deiterohob. Dangga hang, lenin leijidougwom ucucugb, lendagai: Areg eba Petrus dau maman se tu gesisug gina? 12:19 Sug Herodes en ouman dag Petrus en esogwa bougb dau tu gesisug dag ginohob, kaba, en arougb men sadodor naugb len lehilon dougwo en. Doba len lemeiya en touwero. Dangga hang, en arougb men lusud naugb len labosbos leng lesedougwo tu gesisug gini len merug erij medam. Hanoba len leijidougwo len an Petrus graga, dauntoba len lecic moho asesa dou en. Dauwohob, kaba, en arougb men lusud naugb len leic gomom dou len toua namcir. Sug en eic gomom dou len dag ginohob, kaba, en eihwededau leng Yudea meren hancob gini dig men cinogo Kaisarea ucugb naugb en edeigtou sungga se lona hosa deit toua. 12:20 Se lona hom, kaba, Herodes en medoc esrougb medam an leng se cinogo Tirus dara Sidon len laugwan namcir. Dangga hang, merug hosa dau len ingga, kaba, len len naugb ledahahumohumesa Herodes naugb lesgigouhwesem ucugb. Doba aimougtut, kaba, len len naugb lenara lococ Herodes men sud hom gedig en esedougwo en men tu augwan, en moho Blasdus. Dauntoba en ousa deisa len merir an areg len len dou Herodes gin toua. Sug len leic Blasdus medoc dara lenohob, kaba, len len aud Herodes naugb lacgeij en, dauntoba len lesgigouhwesem ucugb toua. Len leicara dag gini, anai leng Tirus dara Sidon gin, kaba, meren ared ingmaro. Doba len lesemougwisa Herodes an men ared augwan dau men cinogo dous. 12:21 Dangga Herodes en os lona hom dou len naugb sug en ogod aremer aga len. Sug lona gini edebeijohob, kaba, Herodes en eg sansun mougt mera gouji merenahabi, en emeigtou an gini se men maija moc gowunaresa gin toua. Sug en eigtou se men maija moc ginohob, kaba, en ebiji naugb en enara dou lusud laugwan. 12:22 Doba sug en enara dou len, kaba, len leigdoumesa en moho agas medam an gin namcir. Hanoba len lenara doum, lendagai: Gin, kaba, dag lusud misen lemenara dou mamanero. Doba gini dag ELOHIM hom enin eng enara dou maman dous. 12:23 Dangga sug lusud leigdoumesa en moho dag gin inegohob, kaba, maman Adehsud esa men malaikad hom aud Herodes naugb ogod en dag en eic meta se en menuhwa. Anai en emeigdoumesa ELOHIM misen, en moho, naugb en emen dougwo len an gin touwero. Doba en amsoho len naugb len leigdoumesa en moho dag ELOHIM terimda. Hang meta gini et en menuhwa bomom an namcir toua. 12:24 Doba aremer augwan gin emedag sogo maga dougwo ELOHIM mer ginero. Doba ec dara goubesa becinten cinogo augwan namcir. Dangga eic leinyana merdoc ebdebin an Krisdus toua. 12:25 Doba Barnabas dara Saulus sug lan laic leng Antiokia meren aregoufu dou goucimdeb meren mougtir se Yudea dara Yerusalemohob, kaba, lan lacicugb dau Yerusalem ingga dig Antiokia deit. Hanoba lan lahwan Yohanes gedig lusud leija en moho toua dag Markus en aimo lan toua.

Watti'u Manga Rasul 13

13:1 Doba se goucimdeb se Antiokia gin, kaba, lusud merug hosa len toua merugwengga, gedig ELOHIM eigdoumesa len meroho naugb sug len lesai en moro eisaugb aremer aingma aingma. Dara en eic mou ouforoho dou len naugb len lens dau ara ara se lona daiyamo gacin augwan asesa dou lusud. Dara ligbum deit, kaba, en eic mou ouforoho dou len naugb len ledidib dau ELOHIM en Mer Geigouhw eisaugb Krisdus meijouhw augwan asesa dou lusud toua. Len meroho dag Barnabas, dara Simeon gedig len leija en moho toua dag Adeh Gogor, dara Lukius dau cinogo Kirene, dara Manahen gedig mougt mera medam Herodes lan laiji aninim, dara Saulus toua. 13:2 Dangga se lona hom sug len lesijaresa maman Adehsud, dara len lehig dau ared naugb locuncum dou en toua, kaba, Mena Gogoufu enara dou len, endagai: Yen youci Barnabas dara Saulus lan dou dan. Hanoba yen yeigdoumesa lan maroho, dauntoba lan laicara laimo dau areg dan desedeb naugb lan touohob. 13:3 Dangga sug len lehig dau ared dara len locuncum dou ELOHIM bouwa dauwohob, kaba, len lob len merisira se lan marugt, bansins dag ELOHIM ouci lan debinim naugb sug lan lasai Mer Geigouhw eisaugb Krisdus dou lusud toua. Hanoba len lesa lan laihweda namcir. 13:4 Dangga hang, sug Mena Gogoufu arougb lan dag ginohob, kaba, Barnabas dara Saulus lan laihwededau cinogo Antiokia dig cinogo hom se dum mebera, moho Seleukia. Sug lan ladebeij cinogo inggohob, kaba, lan laisa ij dau sungga dig lomos, moho Siprus. Hanoba lan ladebeij cinogo hom, moho Salamis, se lomos ingga toua. 13:5 Sug lan ladebeij Salamis ginohob, kaba, lan lasai ELOHIM en Mer Geigouhw eisaugb Krisdus dou leng Yahudi se meren tuari sungga augwan. Dara Yohanes gedig len leija en moho dag Markus, en ousa lan toua. 13:6 Sug lan lasai ELOHIM en mer dou leng se Salamisohob, kaba, lan lasai ELOHIM en mer gini dau sungga, terimda lan ladebeij cinogo hom, moho Papos, dig lomos ingga nagama toua. Sug lan ladebeij Papos ginohob, kaba, lan lagasa sud hom dau leng Yahudi gedig en mou ouforoho dara men goubesa inggebga naugb en eic gomom dou lusud. Dara en agaresa len merdoc mes aud ara ara sungga toua. En moho Bar-Yesus, era Yesus meisi. Sud hom gin, kaba, en eimiman enin moho deseino lusud se Papos ingga, dag ELOHIM eigdoumesa en moho naugb sug en esai en moro eisaugb aremer aingma aingma dou lusud. Dara en eic mou ouforoho dou en naugb en ens dau areg se lona daiyamo gacin augwan asesa dou len toua. Dobnaro. Eni sud hom dag areibahau dous. Dangga hang, areg en emesai gin, kaba, dag areibahau toua namcir. 13:7 Dara Bar-Yesus gin, kaba, Sergius Paulus gedig en edag mougt mera medam gesedougwo Lomos Siprus gin, kaba, en eija en dag en mesi touohob. Doba Sergius Paulus gin, kaba, en mou ouforoho dara en mou obrugb an aremer einyana namcir. Dangga hang, sug en ouman, doba Barnabas dara Saulus lan lasai Mer Geigouhw eisaugb Krisdus dou lusud, kaba, en acgeij lan lan aud en, dauntoba lan lasai ELOHIM en mer gini, ingma dou en toua. 13:8 Doba Elimas, kaba, en emouwan naugb Barnabas dara Saulus lan lamesai Mer Geigouhw eisaugb Krisdus dou Sergius Paulus touwero. Anai men gagaresa gin, kaba, eic dag Sergius Paulus od mena debsa en an gin toua terimdohob. Dangga hang, en emenara emaugtarera dougwo en, dauntoba en emouman Mer Geigouhw gin touwero, doba en eigtou dau namcir. (Elimas gini aninim dag Bar-Yesus, doba sug len leija en moho se Grika mer, kaba, len leija en dag Elimas.) 13:9 Doba Mena Gogoufu atij an Saulus medoc mes namcir naugb en eic goubesa medam dou en toua. Doba lugmahara, kaba, len leija Saulus en moho toua, dag Paulus. Dangga sug Mena Gogoufu eic geic mos dou enohob, kaba, en ei mairesi dara Elimas. 13:10 Hanoba en esa mer debin en, endagai: Ban bedag Bilis meh ban teiteiyohob. Anai ban bedag sogo maga dougwo lusud sug len louwan laimo areg asesa ELOHIM enin medoc mes. Dara ban abu agamgema, hang ban bemarges dau sug ban besma areg geigouhw dau lusud merisira touwero. Doba ban bouti maman Adehsud men ucina gobosboro gin naugb sug en eigdoc lusud dau sesar men gogom aud maireseb menau geb huhugb agabgebi dag gini toua namcir. 13:11 Dangga hang, ban bouman dan indir deigeigouhwahabi. Anai maman Adehsud, kaba, en eh mesira dougwo ban abiresohob, ban bemeiya lo asesa se lona aibibra touwero. Doba ban abires mougb dous. Sug Paulus enara dou Elimas dag gin inegohob, kaba, areg dag umer gogor eb dougwo en mairesi toua, bebeigbogo namcir. Dangga, kaba, en ou mesira baihiron dougwo lusud, dauntoba sud hom ingma dau len, en os en mesira naugb einoisa en dig men tueda toua. 13:12 Sug mougt mera medam Sergius Paulus en eiya dau gin, kaba, en medoc ebdebin an Yesus. Dara areg Barnabas dara Paulus lan lasai eisaugb maman Adehsud gin dou en, kaba, eic dag en medoc omom an gin toua namcir. 13:13 Sug Barnabas dara Paulus lan lasai Mer Geigouhw eisaugb Krisdus se Lomos Siprus edeinyumohob, kaba, Paulus an mesir len laugwan leisa ij dau Papos dig cinogo hom, moho Perga, se leng Pampilia meren hancob deit. Doba Yohanes gedig len leija en moho toua dag Markus, kaba, en ecicugb dau len sungga dig Yerusalemeda. 13:14 Doba leng gus, kaba, len lec merohora dau sungga terimda len ledebeij cinogo hom, moho Antiokia, se leng Pisidia meren hancob deit. Dangga sug leng Yahudi meren Lona Gemeicaresero edebeijohob, kaba, len leisa Ari dara len se meren tuari toua. Sug len leinesa tuari ginohob, kaba, len leigtou desij leng Yahudi gin toua. 13:15 Sug len lecic dau Musa men gomnomna dara leng lesai ELOHIM moro sug nosa meren surad ingma bouwa dauwohob, kaba, mougtir gesedougwo goucimdeb ingga, kaba, len larougb sud hom aud Paulus an mesir naugb en eijidougwo len, endagai: Emagunerij, yen youwan yebir emen emdoc mes dara yen youwan yenara yad emen medoc mes, kaba, emen emeic cumougt dou yen deit naugb yen yebedbed dou emen iteitogini toua. 13:16 Dangga sug Paulus en eisa besohob, kaba, en ecgun mesira debin len. Hanoba en enara dou len, endagai: Yeng dau mamang Israel, dara yugmahara gedig yen yesijaresa ELOHIM gin touohob, kaba, yen yaugwan youman dan indir deigeigouhwahabi. 13:17 Anai emeng Israel emen ELOHIM gin, kaba, en ouci maman mamjemouwer debinim dag enin men meijouhuda deb sug nosohob. Dara en oiharaga len sug len ledag lugmahara se cinogo Mesir naugb len leh merih terimda len lebedero toua namcirohob. Hanoba en esga len dara en ecgun mesira debin len naugb en ahwan len dau cinogo ingga ogdoc men goubesa medam gin toua. 13:18 Dara sug len lec merohora se lomougwisa se arisogomoc sud hwai, kaba, en emarges dau len touwero. Doba en eigtou ateteij len, hanoba en eseyeiyo len dara en agauwesa len sug len leicara gecgu an en toua terimda. 13:19 Dara en eic gomom dou meijouhuda senggai dau lugmahara se leng Kanaan meren hancob dou len toua. Hanoba en ekeba cinogo gini an men lusud maman mamjemouwer len laugwan dag lenin meren deit. 13:20 Doba sug len latou se cinogo Mesir, hanoba len lec merohora se lomougwisa arisogomoc sud hwai, terimda en ekeba leng Kanaan meren hancob dou len, kaba, augwan gini adedim bedebeij arisogomoc huntun hogu mos sergem edeisu toua. Dangga sug en ekeba hancob augwan graga dou lenohob, kaba, en eigdoumesa leng ledag mofu merug hosa naugb len, terimda edebeij lona sug sud hom gesai ELOHIM moro nosa, moho Semuel, en edag mofu naugb len toua deit. 13:21 Doba se lona sug Semuel en edag mofu naugb len gin, kaba, len lenara ucucugb dou ELOHIM dag en emeigdoumesa leng mofu naugb len deitero. Doba len lacgeij naugb en eigdoumesa sud hom edag mougt mera medam naugb len dous. Dangga hang, ELOHIM en emousa deisa len merir an. Hanoba en eigdoumesa Kis meisi, moho Saul, dau meijouhuda Benyamin, en edag meren mougt mera medam naugb en esedougwo len se arisogomoc sud hwai toua deit. 13:22 Doba sug ELOHIM asid en dauwohob, kaba, en eigdoumesa sud hom, moho Daud, en edag mougt mera medam naugb len deit. Anai en enara eisaugb en dag gin deb nosohob, endagai: Isai meisi Daud gin, kaba, en edag sud hom gedig dan indoc gororougb en namcir, anai en emedreg dan indir touwero. Doba en owun enin medoc mes arjaga naugb en aimo areg dan darougb en an gin toua terimda. 13:23 Dara en eigdoumesa Daud medebeito hom, moho Yesus, enin eng naugb en edag Sud Hom Geigdoc Mamang Israel Dau Sesar Men Gogom Augwan toua. Anai gini aimo dau areg en os dou maman mamjemouwer sug nosohob. 13:24 Doba sug Yesus emebiji naugb sug en esai ELOHIM en moro dou maman lusud Israel ginbuma, kaba, Yohanes en dou len deb, endagai: Yen yesga meijen sesar, dara yen yahau an dougwo namcir. Hanoba dan dogun yen se duhu, bansins debin gin deb naugb sud hom sug en en gin toua. 13:25 Dara deinyor sug Yohanes men geicara ouwedoc, kaba, en enara dou len deit, endagai: Yen youdesa dan dedag sud hom gedig yen meigdoc ebehibeh naugb en, dauntoba en eigdoc yen dau sesar men gogom augwan touei? Naro, dan demedag sud hom ginero. Doba yen youman dan indir deigeigouhwahabi. Anai cum, kaba, sud hom gin en emaimo ucan dans. Dara dan demedeinyum naugb sug dan demesga men aumaga dau hwigbeimos icira en mohora touwero. Anai en moho agas medam namcir. 13:26 Doba indagunerij, gedig yen yedag Abraham medebeitor yen, dara yeng yugmahara gedig yen yesijaresa emen ELOHIM dara yen yahau en touohob, sug ELOHIM esa en mer ogdoc Krisdus dou maman dag en ouwan eigdoc maman dau sesar men gogom aud maireseb menau geb huhugb gin deit, kaba, en emesa en mer gini dou leng se Yerusalem an meren mougtir len laugwan touwero. Doba en esa en mer gini dou maman dous. 13:27 Anai len gin, kaba, len merdoc emeica Yesus dag ELOHIM eigdoumesa en moho naugb en eigdoc len dau sesar men gogom augwan. Dara astesda Lona Gemeicaresero sug len lecic dau areg leng lesai ELOHIM en moro len log deb se meren surad eisaugb Krisdus gin, kaba, len meru emobgesa areg len lecic gini meijouhw augwan asesa touwero. Anai len meru emaiyero namcirohob. Doba inggaida. Anai sug len logod aremer gomom deinaugb en, hanoba len letob en se sogo salib, kaba, len laimo dau areg leng lesai ELOHIM en moro len log deb eisaugb Krisdus ginohob augwan an en toua. Doba areg len leicara laimo gin, kaba, dag augwougb dous. 13:28 Anai len lemesma aremer hom naugb sug len laic gomom dou en touwero. Doba len leic merus naugb logod aremer gomom deinaugb en. Hanoba len larougb Pilatus naugb en etob en se sogo salib toua. 13:29 Dangga sug len leicara lesogwa deisa areg leng lesai ELOHIM moro sug nosa len merugtimei mohw an enohob, kaba, len leic en maga dau sogo salib. Hanoba len ledec en se igdohos mes toua. 13:30-31 Doba ELOHIM, kaba, eigdoumesa Yesus dau gomom ucugb. Hanoba en edens enin ainyes dou men logodeh areg len laimo en dau Galilea dig Yerusalem len laugwan se lona einyana debin gin toua. Hang len lemouma debin gin dou leng Israel len laugwan toua, anai len leiya dau augwan gini dag misenohob. 13:32 Dangga emen toua, emedebeij yen sugini naugb emen emesai Mer Geigouhw eisaugb Yesus gin dou yen. 13:33 Anai sug ELOHIM eigdoumesa Krisdus dau gomom ucugb, kaba, esogwa deisa areg en os dou maman mamjemouwer augwan an maman. Anai maman madag len merdebeitor maman touohob. Dara areg ELOHIM os dou len deb, kaba, dag se lona daiyamo gacin en emesa sud hom aud maman, dauntoba maman mamom terimdero. Doba en eigdoc maman dau sesar men gogom augwan aud maireseb menau geb huhugb gin toua namcir. Dara sug ELOHIM eigdoumesa Yesus dau gomom ucugb gin, kaba, augwan gini esogwa deisa areg ELOHIM enara dou en se Ugwaremer gedig hwai an gin deb sug nosa touohob, endagai: Irogini, kaba, dan dedag ban Abina. Dara ban bedag dan Indisi toua deitohob. 13:34 Dangga toua, eisaugb sug Yesus emomom deitero, doba ELOHIM eigdoumesa en dau gomom ucugb naugb sug en maireseb huhugb terimda, kaba, ELOHIM enara se Surad Injil Meb Mohon dag gin dou en, endagai: Areg dan dos dou ban abjemouwa Daud dag ban beperwei en mohw se men maija moc beb huhugb terimda, kaba, dan demeperwei dan indoc mes an gin deitero, doba ebsugeb naugb ban namcir. Anai areg dan dos dou en gin, kaba, en dau danin indoc mes gecabeci. Hang se geica namcir touohob. 13:35 Dara Daud enin eng erba Ugwaremer an gin deb sug nosa touohob, endagai: Ban bemamsoho aban sogougb gedig en medoc hom dou banohob, kaba, en maga emetaha deb se cinogo mes touwero. Doba ban besedougwo en dau gin namcir. 13:36 Doba Daud gin, kaba, sug en aimo areg asesa ELOHIM enin medoc mes sug nosohob, doba en toua omom. Hanoba len lec en maga desij maman mamjemouwer ben etaha deb touohob. Hang areg Daud en erba Ugwaremer an gin, kaba, en emerba an eninero, doba eisaugb Yesus hom gin dous. 13:37 Anai en, kaba, ELOHIM eigdoumesa en dau gomom ucugwohob. Hang en maga emetaha deb touwero. Doba en maireseb huhugb terimda. 13:38 Dangga hang, dan indagunerij, emen emouwan dauntoba yen yaugwan yecinaga dag areg emen emesai dou yen naugb sug ELOHIM aigdougwo meijen sesar augwan dau yen namcir, kaba, dag augwan gini ogdoc sug Yesus en omom taiba sogo salib naugb meijen sesar gin dous. 13:39 Dara emen emouwan naugb yen yecinaga dag gareg en medoc ebdebin an Yesus dag misenohob, kaba, ELOHIM eigdoc en dau sesar men gogom augwan toua namcir. Anai Musa men gomnomna gin, kaba, emedeinyum naugb sug eigdoc yen dau sesar men gogom augwan ginero. 13:40 Dangga hang, eigouhw naugb yen yemesbes an areg emen emesai dou yen touwero. Doba yen yei meijums deinaugb gin deigeigouhw namcir. Dauntoba gogom areg maman Adehsud eic dou maman mamjemouwer sug nosohob, kaba, augwan emobsara debin yen, aninim dag len touwero. Doba en amsoho yen dau gin dous. Anai en enara dou len ogdoc sud hom gesai en moro se Surad Injil Meb Mohon deb sug nosa touohob, endagai: 13:41 Yen youman dan indir an areg dan den dou yen gini augwan deigeigouhw namcir. Anai cum, kaba, dan daben aremer hom abeba yen meijiresi sug yen meijiresebaba gedig yen meigdoc emeica. Dara yen meigdoc emobgesa sug sud hom ens meijouhw dou yen touwero. Doba yen meiju emaiyero an gin dous. Dangga hang, sug yen yeimiman dau ginohob, kaba, eic gomom dou yen toua. Anai yen yesbes dan an areg dan darougb yen an gini toua namcirohob. 13:42 Sug Paulus dara Barnabas lebiji naugb lan laihwededau leng Yahudi meren tuari, kaba, lusud laugwan lenara dou lan, lendagai: Lona Gemeicaresero gen daiyamo gacin, kaba, yan yan naugb yan yans meijouhw dau augwan gini ingma dou emen deitahabi. 13:43 Sug len lenara dou lan dag ginohob, kaba, len leihwededau tuari dig meren tueda. Doba leinyana dau leng Yahudi, dara lugmahara gedig len laimo leng Yahudi se Musa men gomnomna, dara len laimo len naugb len lesijaresa maman Adehsud gin touohob, kaba, len leila ucan Paulus dara Barnabas lan toua. Dangga sug len lec asa ucina dag gin, kaba, lan lanara lad len merdoc mes, dauntoba len lemobsara dau geigouhw areg ELOHIM eic dou lenohob gini touwero. Doba len laiyan merdocesem naugb len laimo augwan gin terimda. Anai ELOHIM medoc an len namcirohob. 13:44 Dangga edebeij Lona Gemeicaresero deit, kaba, leng se cinogo ingga len laugwan len len naugb len louman dau sug Paulus esai maman Adehsud en mer eisaugb Yesus dou len deit. 13:45 Sug leng Yahudi gus len leiya, doba leng Antiokia len laugwan len louwa aud Paulusohob naugb sug len louman dau areg en ebedbed dou len gin, kaba, len merdoc esdigeij en an namcir. Dangga hang, len lenara laugbtarera dougwo en mer an areg en enara dou len eisaugb Yesus. Dauntoba len merdoc emebdebin an Krisdus gin touwero, doba len leigtou dau gini namcir. Hanoba len lenara dou lusud, lendagai: Areg Paulus ebedbed dou yen gin, kaba, augwan dag misenero. Doba dag en ereiyara dou yen dous. Dau, kaba, len lenara ceg ceg en toua. 13:46 Doba Paulus dara Barnabas lan laic marus edreg dau nosa deit. Hanoba lan lanara dou leng Yahudi meren mougtir graga, landagai: Aman amesai Mer Geigouhw eisaugb Krisdus sug aimougtut gini dou yen. Anai gini aimo dau areg ELOHIM esedeb naugb aman sug nosohob. Doba yen, kaba, yen yemouwan en mer ginero. Dangga hang, emen emarges yen deb namcir. Hanoba emen emeihweda se cinogo gus naugb emen emdesai ELOHIM Mer Geigouhw gini dou meijouhuda dau lugmahara dous. Anai sug yen yohoiya en mer dag ginohob, kaba, yen yens yenin ainyes dag yen meigdoc emeisa naugb maireseb menau geb huhugb gin touwero. Doba yen youwan yeigtou dau gin dous. 13:47 Emen eicara dag gini, anai maman Adehsud arougb emen naugb sug emen emesai en mer eisaugb Krisdus dou lugmahara laugwan toua, aimo dau areg enin eng arougb Krisdus an se Surad Injil Meb Mohon deb sug nosa touohob, endagai: Dan deigdoumesa ban bedag mouf naugb lugmahara se cinogo augwan. Dauntoba ban bedag ucina geihwedaud maireseb huhugb naugb lusud se cinogo gin augwan toua. 13:48 Sug lugmahara graga len louman Paulus mer an gin, kaba, len merdoc agahugouhw an ELOHIM. Hanoba len lenara doum, lendagai: Adehsud en mer gini, kaba, eigouhw naugb maman namcir. Dangga gareg dau len ingga areg ELOHIM esedeb len dau acgunogohob naugb sug en eic maireseb menau geb huhugb dou len, kaba, len laugwan merdoc ebdebin an Yesus toua. 13:49 Hang Mer Geigouhw eisaugb maman Adehsud gin, kaba, agaha becinten leng se Pisidia meren hancob augwan namcir. 13:50 Doba leng Yahudi meren mougtir len lococ lusud gedig len meroho agas se cinogo ingga len laugwan. Dara len lococ ligida lugmahara gedig len meroho agas leinyana merdoc mes dau gin namcir. Anai len gin, kaba, len toua merdoc aninim dara leng Yahudi naugb len laimo Musa men gomnomna, dara lesijaresa ELOHIM enohob. Dangga hang, sug leng Yahudi meren mougtir leineg len laugwan merdoc mes naugb lebemocedou Paulus dara Barnabas lanohob, kaba, len leic mog erij dou lan. Hanoba len locirma lan dau meren cinogo ingga toua. 13:51 Doba Paulus dara Barnabas, kaba, lan latir marohora an leng Antiokia ingga meren cinogo mor ucugb debin len deb. Anai gini ansins dag lan, kaba, gogom emeb deinaugb lanero, doba eb naugb lenin dous. Hanoba lan laihwededau len dig cinogo Ikonium deit. 13:52 Doba leng merdoc ebdebin an Yesus se cinogo Antiokia ginohob, kaba, len lagahugouhw an ELOHIM namcir. Dara len merdoc atij an Mena Gogoufu men goubesa toua.

Watti'u Manga Rasul 14

14:1 Doba sug Paulus dara Barnabas lan ladebeij Ikonium, kaba, areg acgunog dara lan se Antiokia graga edacgunog dara lan se Ikonium gin toua. Anai sug lan lainesa leng Yahudi meren tuari se cinogo ginohob, kaba, lan lasai Mer Geigouhw eisaugb Yesus dou len toua deit. Dangga hang, leng Yahudi dara lugmahara leinyana, kaba, len merdoc ebdebin an Yesus, aninim dag leng Yahudi se Antiokia sug nosa toua. Anai Paulus en ebedbed dara goubesa namcir. 14:2 Doba leng Yahudi gedig len lemouwan naugb sug len merdoc ebdebin an Yesusero, kaba, len lococ leng lugmahara gus merdoc mes. Dauntoba len merdoc mog mog an Paulus, dara Barnabas, dara leng merdoc ebdebin an Yesusohob len laugwan toua. 14:3 Doba Paulus dara Barnabas lan latir mardoc mes naugb lan laigtou se cinogo ingga se igda einyana. Hanoba lan laic marus namcir naugb sug lan lasai Mer Geigouhw eisaugb maman Adehsud dou len toua terimda. Dara maman Adehsud gin, kaba, en eic goubesa dou lan naugb sug lan laben ganusbus dara gansins einyana debin maran gebedbed dou lusud se cinogo Ikonium gin toua. Dauntoba len lecinaga dau sug lan labedbed dou len dag maman Adehsud medoc gororougb len, kaba, dag lan lamereiyara dou len touwero. Doba lan lanara se geica dou len namcir. 14:4 Hang leng se cinogo Ikonium gini, kaba, len lemekebim dag hwai icira. Ligbum, kaba, len lousa deisa Paulus dara Barnabas an areg lan lasai dou len. Doba ligbum, kaba, len laimo leng Yahudi naugb len len dougwo lan an areg lan lasai dau Yesus dou len toua. 14:5 Doba leng Yahudi dara lugmahara gedig len lotogoto Paulus dara Barnabas lan marir an areg lan lasai dou len gin, kaba, len lohw merdocedoum naugb len leic mog erij dou lan. Anai len leiya, doba lan lambrera naugb laigtou sungga terimda. Dara lusud leinyana gougwa lobsara aud lan touohob. Dangga hang, sug len lohw merdocedoumohob, kaba, len logod an naugb len leic igdahab, lad lan lamom namcir toua. Dara meren mougtir, kaba, len lousa deisa len an gin touohob. 14:6 Doba sug Paulus dara Barnabas lan lauman dau gin, kaba, lan laugbdedau Ikonium dig cinogo Lisdra dara Derbe, se leng Likaonia meren hancob deit, dara cinogo geb acec ingga augwan toua. 14:7 Hanoba lan lasai Mer Geigouhw eisaugb Yesus dou len laugwan sungga toua deit. 14:8 Se cinogo Lisdra ingga, kaba, sud hom gedig en mohora hwas omom dau sug mem ouwadan en teitei, kaba, en toua moongga. Hang en emec mougwa hom touwero. Doba en eigtou namcir dous, anai mohora hwas arjaga namcir. 14:9 Dangga sug Paulus esai Mer Geigouhw gini dou leng se cinogo ingga, kaba, en toua moongga desij len naugb en ouman areg Paulus ebedbed dou len toua. Doba sug Paulus auweila en toutou, kaba, en ecinaga dag sud hom gini medoc ebdebin an areg Paulus esai dou enohob. Hang emedeinyum naugb sug ELOHIM eic geigouhw dou en toua namcir. 14:10 Dangga, kaba, Paulus enara se mer gouji dou en, endagai: Ban beisa besa namcir. Sug Paulus enara dou en dag gin inegohob, kaba, en eisa besa. Hanoba en ec mohora ucucugb se len merufu toua. 14:11 Sug leng se Lisdra laugwan len leiya, doba Paulus eic geigouhw dou sud hom mohora omom dag ginohob, kaba, len lesa merir an doum se meren leci, lendagai: Maman ELOHIM lahwai gin, kaba, lan laic maraga dag lusud misen. Hanoba lan lauwaden dau bogo se cinogo gin naugb mamanohob. 14:12 Dangga lan laija Barnabas en moho dag Seus. Doba Paulus, kaba, len leija en moho dag Hermes. Anai len leigdoumesa Seus, en moho, dag en edag mougt mera medam naugb meren ELOHIM laugwan. Dara len leigdoumesa Hermes gini, en moho, dag en esai Seus moro dou len toua. Hang len loudesa Paulus en edag Hermes, anai en eng enara dou len gragohob. 14:13 Dara tuari naugb sug len lesijaresa Seus gini, kaba, toua moongga deinyor liga geb acec leng Kisdra meren cinogo ingga medigo. Dangga gembala gesa taij gesedougwo Seus men tuari sug en ouman dau gini, kaba, en obungma sapi giji hosaiya merirgo dara aremerij. Hanoba en eb sapi augwan gini aud misis geb dougwo cinogo ingga toua. Dauntoba en aimo lusud leinyana gini naugb len ledogug sapi ingga lauwaharo dou Paulus dara Barnabas lan. 14:14-15 Doba sug Barnabas dara Paulus lan lauman dag len leic sapi naugb lauwaharo dou lanohob, kaba, lan lagasa maran sansun dau lan namcir. Dauntoba lusud lecinaga dag lan mardoc emeigouhw an meren geicara dou lan gin touwero. Hanoba lan laobga dagasa len naugb lan dougwo len dara marir medam namcir, landagai: Insirija, aman amemedag meijen seiseijero. Doba aman amedag lusud misen, aninim dag yen dous. Dangga dagiro, naugwe hang, yen yeicara dag gin dou amana? Anai aman amedebeij yen sugini naugb aman amesai Mer Geigouhw dau ELOHIM misen dou yen, dauntoba yen yemesijaresa meijen seiseij gin deitlo. Doba yen yeineg dau gin naugb yen yesijaresa ELOHIM Gedig En Eis Huhugb Sugragohob, enin dous. Anai meijen seiseij gini, kaba, len merireseb emebero. Hang len lemera mera hom dou yen touwero. Doba ELOHIM Gedig En Eis Huhugb Sugragohob gini, kaba, en eng ahasesei cinogo, dara bogo, dara dum mohu an areg geb se gin augwan toua. 14:16 Dara en emeic gogom dou yen dau sug yen yesijaresa seiseij sug nosa touwero. Doba en amsoho yen naugb yen yaimo areg yen meigdoc etrij icira gin terimda. Anai yen yemecinaga areg asesa enin medoc mes augwan dag misen touebma. 14:17 Dara en emecgoneh en mog dau yen touwero. Doba en ens enin ainyes dou yen naugb en aimo areg geigouhw an yen toua terimda. Anai sug yen yeba meij, kaba, en esa los dau bogo debin gin, dauntoba eiji dara geigouhw. Dara sug lona edagasohob, kaba, en eic ared edeinyum naugb yen, dauntoba yen meigdoc eigouhw an gin toua namcir. 14:18 Sug len louman Paulus en dougwo len an danggohob, kaba, len larges dau sug len louwaharo dou lan. Doba len merdoc eisa naugb len leicara dangga dou lan namcir. Dobnaro. 14:19 Doba sug leng Yahudi dau Antiokia se leng Pisidia meren hancob dara leng Yahudi dau Ikonium len louman, doba Paulus dara Barnabas lasai Mer Geigouhw eisaugb Krisdus gini dou leng se Lisdra touohob, kaba, merug hosa len len naugb lococ leng Lisdra se cinogo ingga len laugwan merdoc mes deit. Dangga sug len laugwan merdoc aninim dau Paulusohob, kaba, len leic igdahab naugb lad en bahauwa. Hanoba len lohugouhw en dig liga medigo toua, anai len loudesa dag en omom namcirohob. 14:20 Doba sug leng merdoc ebdebin an Krisdus se cinogo ingga les acec dougwo eni terimda, kaba, en eisa ucugb. Hanoba en einesa cinogo ingga ucugb deit. Dangga se loneinda, kaba, eni dara Barnabas lan laihwededau sungga dig Derbeda. 14:21 Sug lan ladebeij Derbe ginohob, kaba, lan lasai Mer Geigouhw eisaugb Krisdus dou len toua. Hang lusud leinyana dau cinogo ingga, kaba, len lobsara aud lan naugb len merdoc ebdebin an Yesus namcir toua. Sug lan lasai Mer Geigouhw gin dou len dauwohob, kaba, lan lacicugb asa maruhw dig Lisdra, dara Ikonium, dara Antiokia se leng Pisidia meren hancob deit. 14:22 Sug lan ladebeij astesda cinogo ingga ucugwohob, kaba, lan lanara lad leng merdoc ebdebin an Yesusohob len laugwan merdoc mes. Dara lan lasulou len, dauntoba len lemobsara dau areg len merdoc ebdebin an gin touwero. Doba lan laiyan merdocesem naugb len laimo gin terimda. Hanoba lan lanara dou len, landagai: Yen youwan yeinesa se ELOHIM men uro mes naugb en oiharaga yen, kaba, en esedeb yen naugb yen yaimo ucina mog erij nosahabi, yen yemeinesa men uro mes gin toua namcir. 14:23 Dauwohob, kaba, lan laigdoumesa mougtir naugb len lesedougwo goucimdeb graga augwan ucan gin toua. Dangga sug len lehig dau ared dara locuncum dou maman Adehsud Yesus, kaba, lan lagugwo mougtir gin se en mesira naugb en eseyeiyo len, anai len merdoc ebdebin an enohob. 14:24 Sug lan laigdoumesa mougtir naugb goucimdeb graga augwan dauwohob, kaba, lan laihwededau Antiokia toua. Hanoba lan laraga leng Pisidia meren hancob terimda lan ladagunya se Perga se leng Pampilia meren hancob ucugb deit. 14:25 Dangga sug lan lasai Mer Geigouhw gini dou lenohob, kaba, lan laihwedig Atalia. 14:26 Sug lan ladebeij Ataliohob, kaba, lan laisa ij dig Antiokia se leng Siria meren hancob ucugb deit. Anai goucimdeb se cinogo ingga, kaba, logugwo lan se ELOHIM mesira sug nosohob, dauntoba en eseyeiyo lan naugb lan lasai en moro dou lusud laugwan toua. Hang lan lamecicugb se maran goucimdeb gini, anai lan lasai en moro gini edeinyum dou lusud laugwanohob. 14:27 Dangga sug lan ladebeij Antiokia ginohob, kaba, lan lasa marir dou leng Krisden se goucimdeb ingga len laugwan len len naugb len loucimdeb dara lan toua. Sug len laugwan lacinimohob, kaba, lan lacic dau ELOHIM men geicara dag ganusbus ogdoc lan, dara dau sug en ec misis dau lugmahara naugb sug len merdoc ebdebin an Yesus meijouhw augwan asesa dou len toua. 14:28 Sug lan lacic augwan asesa dou lenohob, kaba, lan latou desij leng merdoc ebdebin an Yesus sugini se igda einyana toua.

Watti'u Manga Rasul 15

15:1 Sug Paulus dara Barnabas lan marugwengga se Antiokia gin, kaba, leng Krisden merug hosa dau leng Yahudi se leng Yudea meren hancob len naugb ledebeij len sungga toua. Doba sug len ledebeij lenohob, kaba, len lenara laineg leng Krisden dau lugmahara merdoc mes, lendagai: Sug yen yemaimo Musa men gomnomna naugb yen yec meijus dau, dara yen yemaimo men gomnomna aud gousanara touwero, kaba, ELOHIM emeigdoc yen dau sesar men gogom naugb en eic maireseb menau geb huhugb dou yen touwero. Doba meijen sesar eb naugb yen terimda toua. 15:2 Doba sug Paulus dara Barnabas lan lauman dau gini, kaba, lan lanara laugbtarera dougwo len merir an gin namcir. Sug len lenara laisedim eisaugb gin terimda, kaba, leng se goucimdeb se Antiokia gin, kaba, len larougb Paulus dara Barnabas an meren lusud merug hosa dig Yerusalem naugb len leden aremer gin dou Yesus men logodeh merug sisa hobjerai dara mougtir len laugwan sungga toua. Anai len ledag gembala mebin naugb lenohob. 15:3 Sug goucimdeb ingga larougb len an dag ginohob, kaba, len ledarges len dig liga medigo, hanoba len leihwedig Yerusalemeda. Doba sug Paulus, dara Barnabas, an mesir, len leraga leng Pinisia dara Samaria meren hancob aud Yerusalem dag gin, kaba, len lecic dau sug lugmahara se cinogo gus len leineg dau meren seiseij naugb len laimo ELOHIM enohob men meijouhw augwan asesa, amomo dou leng Krisden sungga sungga toua. Sug len meraguner dara len merdamouwer leng Krisden sungga sungga len louman dau gin, kaba, len lagahugouhw medam an ELOHIM icira gin toua namcir. 15:4 Dangga sug len ledebeij Yerusalem ginohob, kaba, leng merug sisa hobjerai dara mougtir gus an goucimdeb len laugwan lebin len. Hanoba Paulus dara Barnabas lacic dau ELOHIM men geicara areg ogdoc lan dou lugmahara meijouhw augwan asesa dou len toua. 15:5 Doba merug hosa dau leng Parisi gedig len merdoc ebdebin an Yesusohob, kaba, len leisa lesa. Hanoba len lenara dou len laugwan, lendagai: Esloulougb naugb maman man dou lugmahara gedig len merdoc ebdebin an Yesusohob, kaba, len toua lec merus dau. Dara len laimo Musa men gomnomna an gousanara augwan touahabi. Anai augwan gini aimo dau areg ELOHIM ogod an deb naugb maman sug nosohob. 15:6 Sug Yesus men logodeh merug sisa hobjerai dara mougtir louman dau gini, kaba, len led debinim naugb len lenara eisaugb aremer areg leng Parisi len len dou len gragohob. 15:7 Doba sug len merir agadadem eisaugb gin terimdohob, kaba, Petrus en eisa besa. Hanoba en enara dou len, endagai: Indagunerij, indagtorij, yen yecinaga dag sug nosa, kaba, ELOHIM en ouci dan naugb dan desai Mer Geigouhw eisaugb Krisdus dou leng lugmahara. Dauntoba sug len louman Mer Geigouhw gini, kaba, eic cumougt dou len naugb len merdoc ebdebin an Yesus toua. Anai gini aimo dau areg asesa ELOHIM enin medoc mes ginohob. 15:8 Dara en emouma debin gin toua naugb sug en esa Mena Gogoufu se len merdoc mes, aninim dag en esa Mena Gogoufu gin se maman mamdoc sug nosa touohob. Anai enin eng ecinaga areg geb se lusud merdoc mes augwan dag misen namcir. 15:9 Hang en emesi maman hom dous emedreg dau len touwero. Doba en edu len merdoc mes ecabeci dau sug len merdoc ebdebin an Yesus, aninim dag en edu maman mamdoc mes ecabeci dangga sug nosa touohob. 15:10 Sug ELOHIM edu len merdoc ecabeci, aninim dag mamanohob, kaba, dagiro, naugwe hang, yen yemarougb lugmahara gedig len merdoc ebdebin an Yesusohob naugb len lemec merus dau? Hanoba len lemaimo Musa men gomnomna an gousanara gin toua? Yen youwan yainyen ELOHIM naugb sug len ledreg dau gomnomna gin, kaba, yen yemeiya dag en emeic gogom dou lendei? Era naroei? Anai Musa men gomnomna gin, kaba, dag aguci medam namcir. Hang maman mamjemouwer dara maman toua mamaimo gin augwan touebma. 15:11 Dangga yen yemos debin gin terimlo. Anai ELOHIM emeigdoc mamang Yahudi dau sesar men gogom emogdoc sug maman mamec maman mamus dau, dara maman mamaimo Musa men gomnomna aud gousanara gin touwero. Doba en eigdoc maman dau sesar men gogom aud maireseb menau geb huhugb ogdoc sug maman mamdoc ebdebin an maman Adehsud Yesus gin dous. Aninim dag ELOHIM eigdoc leng lugmahara dau sesar men gogom ogdoc sug len merdoc ebdebin an maman Adehsud gin touohob. Anai maman Adehsud gin, kaba, en medoc an maman. Hang en omom taiba sogo salib naugb maman maugwan maman sesarohob. 15:12 Sug Petrus esulou len dougwo ginohob, kaba, len merir emagadadem deitero, doba len laugwan lodinanir namcir. Hanoba len leigtou loc merums naugb sug Paulus dara Barnabas lacic dau ganusbus dara gansins areg ELOHIM eic goubesa dou lan sug lan lasai Mer Geigouhw gini dou lugmaharohob dou len toua. 15:13-14 Sug lan lacic dau aremer augwan gin dou len dauwohob, kaba, Yakobus, Yesus magto, ouma debin ucan dou len deit, endagai: Dan indagunerij, Simon ecic dou maman dau sug ELOHIM ouci leinyana dau lugmahara dag enin men lusud touohob, kaba, en ens enin ainyes aimougtut dou maman dag en medoc an mamang Yahudi dousero, doba dag en medoc eineg an leng lugmahara toua namcir. Yen youman dan indir an areg dan den dou yen gin deigeigouhwahabi. 15:15-18 Anai areg Simon en ecic gin, kaba, misen namcir. Anai esogwa deisa areg maman Adehsud en enara deb dou sud hom gesai en moro, moho Amos, deb sug nosa touohob, endagai: Se lona daiyamo gacin, kaba, dan demecicugb naugb dan demouci Daud medebeitor len laugwan dag indan meijouhuda hom ucugb deits. Anai se lona ingga, kaba, len ledag tu geij gaisoborohob. Doba areg odgodohob, kaba, dan demesinsin augwan se mohw ucugb toues. Sug dan deigdoumesa Daud medebeitor len meroho agas ucugb dag ginohob, kaba, lusud se cinogo augwan len lehilon dan. Dara lugmahara gedig dan douci len debinim dag danin indan lusud deb sug nosohob, kaba, len laugwan len aud dan se lona ingga toua. Danin meijen Adehsud denara dangga dou yen. Hang dan demens dau augwan gini dou len deb touohob. 15:19 Sug Yakobus ecic dau areg graga augwan dou lenohob, kaba, en enara dou len ucan deit, endagai: Sug ELOHIM ouci lugmahara debinim dag enin men lusud dag gin touohob, kaba, dan dogod an dag maman mameigdoumesa gogom debin lugmahara gedig len leineg aud enohob naugb len lemaimo Musa men gomnomna toua deitero. 15:20 Doba maman mag surad dou len naugb maman man dougwo len, dauntoba len lemet mog gedig lusud lesijaresa dou seiseijero. Hanoba len lemogo ara gaihim, dara len lemohw meraga doum debin gini. Dara len lemet mog gedig mogwihi omgomsa, dara len lemeg aremeta mogwihi toua deitero. Doba len lehig dau gin namcir, anai sug len let mog gedig lusud lesijaresa dou seiseijohob, kaba, eic gogor dou len deseino maman Adehsud touohob. 15:21 Maman man dougwo len an dag gini, anai astesda Lona Gemeicaresero, kaba, maman macic dau Musa men gomnomna se maman tuari se arisogomoc einyana. Hang agaha dou lugmahara se meren cinogo augwan touohob. 15:22 Sug Yakobus ogod an dag gin dou lenohob, kaba, Yesus men logodeh merug sisa hobjerai dara leng se goucimdeb an meren mougtir len laugwan louci sud hom, moho Silas, dara Sabas meisi, moho Yudas, lan lahwai gini naugb lan laucan Paulus dara Barnabas dig Antiokia. Dauntoba lan lans dau areg len logod an ginohob, meijouhw augwan asesa dou len toua. Anai lan gini, kaba, lan meraguner se goucimdeb len laugwan leigdoumesa lan maroho agas medam an maran geicara touohob. 15:23 Sug len louci lanohob, kaba, len leic surad dou lan naugb lan lado toua. Dara areg len log se surad dou leng Krisden dau lugmahara ginohob, kaba, len log dag gini, lendagai: Emeng dau Yesus men logodeh emug sisa hobjerai, dara emen mougt mera se goucimdeb se Yerusalem, kaba, emen emaugwan emou emagunerij, dara emagtorij se cinogo Antiokia, dara leng Siria dara Kilikia meren hancob, gedig yen yedag yugmahara yen yaugwan namcir. Anai emen emedag yen meijaguner se Krisdus naugb yen touohob. 15:24 Emen emog surad gin dou yen, anai emen emouman dag merug hosa dau emen goucimdeb sugini, kaba, len lecbo aud yen naugb len leic yen meigdoc momogo dara eijesa dou yen touohob. Anai len lebedbed dou yen dag yen meigdoc emebdebin an Yesus gin dousero. Doba yen yec meijus dau dara yen yaimo Musa men gomnomna an gousanara yaos dara touahabi, ELOHIM emeigdoc yen dau sesar men gogom augwan aud maireseb menau geb huhugb gin touwero. Doba areg len lebedbed dou yen gin, kaba, emen ememarougb len an touwero. Doba len leic augwan dau lenin merdoc mes naugb len lebedbed dou yen dous. 15:25 Dangga hang, sug emen emoucimdeb, kaba, emen emohw emdocedoum. Hanoba emen emouci lahwai dau emen goucimdeb sugini naugb len laimo emen emsi Barnabas dara Paulus gedig emen emdoc gororougb lan aud yen se Antiokia toua. 15:26 Anai emen emsi lahwai gini, kaba, lan toua laohw marugt edug icira sug lan lasai maman Adehsud Yesus Krisdus en moro dou lusud mougwa einyana touohob. 15:27 Dangga hang, emen emarougb lahwai, lan maroho Yudas dara Silas, aud yen sungga. Dauntoba lan lans dau areg emen emog se surad gini meijouhw augwan asesa dou yen toua. 15:28-29 Anai Mena Gogoufu dara emen, kaba, emen emdoc dag homohob. Hang emen emen dougwo yen dag yen yemet mog gedig lugmahara lesijaresa dou seiseij, hanoba yen yemogo ara gaihim, dara yen yemohw yen meijaga doum debin gin, dara yen yemet mogwihi, dara yen yemet mog gedig mogwihi omgomsa touwero. Anai moho hogu gin, kaba, edag meiyo naugb maman maugwanohob. Doba Musa men gomnomna gus augwan, kaba, emen ememeigdoumesa gin debin yen naugb yen yemaimo toua deitero. Dangga hang, sug yen yehig dau moho hogu gin namcir, kaba, yen yaimo areg edag beim touohob. Gin dous. Meijiresou. 15:30 Dangga sug len lesulou lahwai graga debin ginohob, kaba, len larges len ingga dig Antiokieda. Sug len ledebeij Antiokiohob, kaba, len leija leng Krisden laugwan lacinim. Hanoba len leic surad graga dou len toua. 15:31 Sug leng se goucimdeb len louman dau areg leng se Yerusalem logod an lenohob, kaba, len merdoc agahugouhw medam an gin namcir. Anai areg len louman gin, kaba, eic dag len laiyan merdocesem deitohob. 15:32 Dangga, kaba, Yudas dara Silas lan laigtou desij lan maraguner dara mardamouwer se goucimdeb se Antiokia se lona einyana toua deit. Hanoba lan lans meijouhw dau areg mougtir len log se surad dou lenohob men meijouhw augwan asesa ucan dou len toua. Anai ELOHIM eigdoumesa lan maroho naugb sug lan lasai en moro eisaugb aremer gin dou lusud touohob. Sug lan lans meijouhw dou len dag gin, kaba, lan lanara lad leng Krisden ingga merdoc mes. Dauntoba len merdoc emomomtomero, doba len laiyan merdocesem naugb len les agadgeij terimda toua. 15:33 Sug lang laigtou desij len se ari aibibra dag ginohob, kaba, leng se goucimdeb ingga, kaba, len merdoc arges dau lan toua. Dangga sug len locuncum aga lan dou ELOHIM enohob naugb sug en eic gesgigouhwesa dou lan, kaba, len larges lan aud leng se Yerusalem ucugb. Anai len gin, kaba, len lesa lan aud leng se cinogo Antiokia sug nosohob. 15:34 Doba Silas, kaba, en medoc acincin an leng se Antiokia gin namcir. Hang en emaimo Yudas naugb en emecicugb dig Yerusalem touwero. Doba en eigtou desij len se Antiokia deitaba. 15:35 Dara Paulus dara Barnabas, kaba, lan lameihwedig cinogo gus touwero. Doba lan laigtou se cinogo Antiokia ingga se igda hosa naugb lan lasai Mer Geigouhw eisaugb maman Adehsud dou len sungga. Dara lan ladidib aremeijouhw augwan asesa dou len toua. Dara sug lan lasai Mer Geigouhw gini, kaba, lan marsir leinyana lousa lan se gin toua. 15:36 Sug Paulus dara Barnabas lasai Mer Geigouhw gini se igda hosa ginohob, kaba, Paulus enara dou Barnabas, endagai: Nanan naihweda naugb nanan nadoumouma dougwo nanaguner, dara nandamouwer se astesda cinogo sug nanan nasai Mer Geigouhw eisaugb nanan Adehsud dou lenohob. Dauntoba nanan naiya dag len merdoc ebdebin an maman Adehsud gin terimdei? Era len merdoc emtereta dau endohobei? 15:37 Dangga sug Barnabas ousa deisa Paulus an ginohob, kaba, en ouwan naugb Yohanes gedig len leija moho toua dag Markus en oucan lan toua. 15:38 Doba Paulus, kaba, en emouwan Markus gini en emoucan lanlo. Anai sug lan lasai Mer Geigouhw eisaugb Krisdus dou lusud sug aimougtut, kaba, en emoucan lan terimda edebeij sug ouwedocahabero. Doba en oguro dau lan se leng Pampilia meren hancob naugb en eisa ij ucugb dig Yerusalemohob. 15:39 Dangga sug lan lanara marir edregim icira en medam namcirohob, kaba, lan lamekebim. Barnabas, kaba, en ouci Markus. Hanoba lan laisa ij dig Lomos Siprus ucugbda. 15:40-41 Doba Paulus, kaba, en ouci Silas eperwei Barnabas graga en mohw naugb en aimo en deit. Dangga sug lan maraguner se Krisdus len locuncum aga lan naugb maman Adehsud eic geigouhw dou lanohob, kaba, lan lac acec leng Siria dara leng Kilikia meren hancob augwan gin toua. Hanoba lan lanara lad leng se goucimdeb sungga len laugwan merdoc mes toua, dauntoba len lemobsara dau Krisdus touwero. Doba len les agadgeij namcir.

Watti'u Manga Rasul 16

16:1 Sug Paulus dara Silas lanara lad leng se goucimdeb se leng Siria dara Kilikia meren hancob dauwohob, kaba, lan laihweda deit dig Derbe naugb lan lanara lad leng se goucimdeb sungga len laugwan merdoc mes toua. Dangga sug lan lanara lad len merdoc mes dauwohob, kaba, lan laihwedig cinogo Lisdra deit. Se Lisdra gin, kaba, Yesus men godeh hom, moho Timotius, en toua moongga se cinogo ingga. Sud hom gin, kaba, en mem dau leng Yahudi. Dara en medoc ebdebin an Yesus touohob. Doba en mena, kaba, lugmahara dau leng Grika. 16:2 Dara leng merdoc ebdebin an Yesus se cinogo Lisdra gini, kaba, sud hom ingma emowun Timotius en moho an men geicara touwero. Doba len laugwan leigdoumesa en moho agas namcir. Anai men geicara augwan edag beim terimda. Dara leng Krisden se cinogo Ikonium, kaba, len laugwan leigdoumesa en moho an men geicara gedag beim gin toua. 16:3 Dangga Paulus en ouwan Timotius naugb en aicira lan toua, kaba, en ec mos dau enahabi. Dauntoba gini emedag sogo maga dougwo leng Yahudi sug len lesai Mer Geigouhw eisaugb Krisdus dou lenero. Anai leng Yahudi se cinogo Lisdra dara Ikonium gini len laugwan lecinaga dag Timotius mena, kaba, eni lugmahara dau leng Grika. Hang en emec Timotius mos dau touebma. 16:4 Sug Paulus ec Timotius en mos dauwohob, kaba, len lecic dau areg Yesus men logodeh merug sisa hobjerai dara goucimdeb se Yerusalem meren mougtir len logod anohob, meijouhw augwan asesa dou leng merdoc ebdebin an Yesus se astesda cinogo areg len ledebeij gin toua. Hanoba len lesulou meraguner gini, dauntoba len lemedreg areg len logod an ginohob, kaba, mougwa hom touwero, doba len laimo augwan gin terimda. 16:5 Dangga goucimdeb len laugwan gin, kaba, len laiyan merdocesem naugb len merdoc ebdebin an Yesus bedreg dau nosa deit. Dara astesda lona, kaba, lusud leinyana lobsara aud len naugb len merdoc ebdebin an Yesus gin toua. 16:6 Sug len lecic dau areg mougtir se Yerusalem len logod an gini dou goucimdeb augwanohob, kaba, len leihwedig leng Prigia dara Galatia meren hancob deit. Anai len louwan lesai ELOHIM moro dou leng se Asia meren hancob. Doba Mena gogoufu en dougwo Paulus dara Silas naugb lan lamesai ELOHIM moro dou len sungga touwero. 16:7 Dangga sug len ledebeij leng Misia meren hancobohob, kaba, len lainyen naugb len leinesa leng Bitinia meren hancob deit, dauntoba len lesai ELOHIM moro dou len toua. Doba Mena Gogoufu areg Yesus esa dou lanohob, kaba, en en dougwo len an gin toua namcir. 16:8 Dangga hang, len leiwededau sungga, kaba, len larges meraga se leng Misia meren hancob, terimda len ledebeij cinogo moho Troas. 16:9 Doba sug len latou se loba, kaba, Mena gogoufu ogod Paulus dag en omom namcir. Hanoba en eiya, doba sud hom dau leng Makedonia meren hancob, en esa desij en naugb en acgeij en an ELOHIM mer eisaugb Krisdus gin, endagai: Yen gina, yen yeisa ij aud emen se Makedonia naugb yen yousa emen touahaba? 16:10 Sug Paulus eiya gin dangga inegohob, kaba, emen emesedeb naugb emen emeihweda se leng Makedonia meren hancob namcir. Anai emen emohw emen emdoc anim dag areg Paulus en eiya ginohob, kaba, gini ansins dag ELOHIM ouwan naugb emen emesai Mer Geigouhw eisaugb Krisdus gin dou len sungga toua. 16:11 Dangga sug emen emeisa ij dau Troas ginohob, kaba, emen emedebeij lomos Samotrake mougwo. Sug emen ematou sungga se loba homohob, kaba, emen emeisa ij dau sungga terimda emen emedebeij cinogo hom, moho Neapolis, se lonog deit. 16:12 Dau sungga, kaba, emen emec emohora terimda emen emedebeij leng Makedonia meren beimes hom, moho Pilipi, geb se meren hancob gaimougtut ingga. Dara cinogo Pilipi gin, kaba, leng Roma meren mougt mera medam en moho aiga len touohob. Sug emen emedebeij cinogo ginohob, kaba, emen emehigben se lona hosa deb sungga toua. 16:13 Dangga sug leng Yahudi meren Lona Gemeicaresero edebeijohob, kaba, emen emeihwededau cinogo ingga dig liga medigo aud usi hom geb deinyor duhu mebera. Anai emen emoudesa dag leng Yahudi meren usi naugb sug len locuncum dou ELOHIM, kaba, eb sunggohob. Sug emen emedebeijohob, kaba, emen emeiya, doba ligida mogud eng loucimdeb naugb locuncum sungga dous. Dangga, kaba, emen emeigtou naugb emen emesai Mer Geigouhw dau Yesus dou len toua. 16:14 Doba gida hom dau leng ingga, kaba, en moho Lidia, dau cinogo Tiatira. En gin, kaba, en ohw minc gedag lobeinya geirir mera eisaugb dou lusud. Dara en aimo leng Yahudi naugb en esijaresa ELOHIM sug nosa touohob. Dangga sug en ouman Paulus esai Mer Geigouhw gini dou len, kaba, Adehsud eses en medoc mes naugb en ebin en mer an areg Paulus esai dou len toua namcir. 16:15 Sug en medoc ebdebin an Yesus dag ginohob, kaba, emen emogun en dara leng leigtou desij en se men tu len laugwan se duhu toua. Sug emen emogun len laugwan se duhu dauwohob, kaba, Lidia oho mer debin emen, endagai: Indagunerij, yen youma debin dan, dag dan indoc ebdebin an maman Adehsud dag misenohob, kaba, yen yen naugb yatou desij dan se indan tu. Sug en aganini emen terimda, kaba, emen emousa deisa en mer toua. 16:16 Doba se lona hom sug emen emeihwedaud leng Yahudi meren usi gedig len locuncum dou ELOHIM se graga deit, kaba, emen emagasa gida sogougb hom gedig minderi eisa en medoc mesohob. Dangga hang, lusud lemeic aregoufu einyana dou men mougtir. Anai minderi eic mou ouforoho dou en naugb en ens areg acgunog dou lusud se lona daiyamo gacin dou len toua. 16:17 Dangga sug en agasa emenohob, kaba, en oucan Paulus emen namcir. Hanoba en ouma debin areg emen emesai dou lusud dara mer medam dou len toua, endagai: Lusud gin, kaba, len ledag Adehsud Gedig En Moho Eb Taiba Augwanohob meren sogougwir naugb len lesai en moro dou yen. Dauntoba yen yecinaga men ucina naugb sug en eigdoc yen dau sesar men gogom augwan aud maireseb menau geb huhugb gin toua. 16:18 Sug en eicara dangga se lona einyanohob, kaba, Paulus medoc eriragasa en namcir. Dangga, kaba, en emeigtou emateteij en deitero, doba en eineg aud en. Hanoba en arougb minderi geisa medoc mesohob, endagai: Dan darougb ban se moho Yesus Krisdus naugb ban beihwededau gida gin namcir. Anai dan deperwei en mohw naugb ginohob. Sug en arougb en dangga inegohob, kaba, mena mog mog eihwededau en toua. 16:19 Sug gida sogougb graga men mougtir len leiya, doba en mou ouforoho naugb sug en ens areg acgunog se lona daiyamo gacin dou lusud emeb se en deitero, kaba, len lagaigeij Paulus dara Silas. Anai len lecinaga dag meren cumougt naugb sug lusud leic aregoufu dou len, kaba, ediyebeiya dau len namcirohob. Hanoba len lohugouhw lan aud leng Roma meren mougt mera se usmougb, dauntoba len logod aremer naugb lan toua. 16:20 Dangga sug len lohugouhw lan deseino mougt mera goujir ginohob, kaba, len loho las lan deseino len toua, lendagai: Lahwai dau leng Yahudi gin, kaba, lan laho aremer debin maman se maman cinogo gin namcir. 16:21 Doba areg lan larautut emen naugb sug emen emaimo, kaba, augwan edreg dau maman Roma maman gaben gin terimda. Hang emedeinyum naugb sug emen emebin dara emaimo areg lan larautut emen aud gin touwero. Anai meijen mougt mera medam en moho aiga emen, aninim dag yeng Roma gin touohob. 16:22 Dangga sug leng gus louman len merir an ginohob, kaba, len laimo leng graga naugb len logod Paulus dara Silas lan toua. Dara leng Roma meren mougt mera, kaba, len toua lekris maran sansun dau lan. Hanoba len larougb meren sadodor naugb len leic dagamougb an lan namcir. 16:23 Sug len leic dagamougb medam an lanohob, kaba, len ledouf lan se tu gesisug toua. Sug len louf lan se tu gesisugohob, kaba, len lesulou sud hom gesedougwo tu gesisug gini, dauntoba en esedougwo lan dagadgeij namcir. 16:24 Dangga sug sud hom gesedougwo tu gesisug en ouman dau areg len larougb en an ginohob, kaba, en ouf lan se dimei mes geb taiji. Hanoba en eic sogomehir medam bakebin lan marohora toua. Anai len lesulou en ucucugb an lan ginohob. 16:25 Doba edebeij deinyor lobeingmod, kaba, Paulus dara Silas lan lacuncum dara lohwaresgwemer naugb lagahugouhw an ELOHIM terimda. Dara leng gus gedig len leigtou se tu gesisug hom ingga, kaba, len laugwan louman lan marir an gin toua. 16:26 Dangga sug lan lacuncum dara lagahugouhw an ELOHIM dag gin, kaba, inyomda eisa medam augwougb, betitir tu gesisug ingga an buc augwan beinyeinya namcir. Hanoba misis augwan ec dau len. Dara ranta geb debin leng se tu gesisug ingga, kaba, augwan esga dau len merohora dara len merisira toua. 16:27 Sug sud hom gesedougwo tu gesisug gini en eisa beijesan, doba misis augwan ec dau lendohob, kaba, en ouwan eigdesa men krawan dau meihw naugb edesugb enin namcir. Anai en oudesa endag lusud laugwan lougb dau tu gesisugdohob. 16:28 Doba Paulus eiyaga dougwo en dara mer medam namcir, endagai: Ban bemedesugb baninlo. Anai emen emaugwan emug ingginaba. 16:29 Sug sud hom gesedougwo tu gesisug gini en ouman Paulus eiyaga dougwo en danggohob, kaba, en eija men gedeijan, dauntoba en ei smougb ingma dou enahabi. Dangga sug gedeijan odo smougb dou enohob, kaba, en obga se dimei mes namcir. Hanoba en eij amuhumlo deseino Paulus dara Silas, anai en eijesa dara ahau medam namcir. 16:30 Sug en eisa ucugwohob, kaba, en ahwan lan dig medigoda. Hanoba en eijidougwo lan, endagai: Yasuda, dan deb ara, dauntoba ELOHIM eigdoc dan dau sesar men gogom augwan aud maireseb menau geb huhugb gina? 16:31 Doba Paulus dara Silas lan launi ucugb dou en, landagai: Ban abdoc ebdebin an emen Adehsud Yesus dag en omom naugb aban sesar augwanohob, kaba, ELOHIM emeigdoc ban, dara leng leigtou desij ban se aban tu, yen yaugwan dau sesar men gogom augwan aud maireseb menau geb huhugb gin toues. 16:32 Sug lan launi dangga dou enohob, kaba, lan ladidib maman Adehsud en mer meijouhw augwan asesa ucan gin dou en dara leng leigtou desij en se men tu, len laugwan toua. 16:33 Sug lan ladidib meijouhw augwan dou len dauwohob, kaba, sud hom gesedougwo tu gesisug ingga, kaba, en ahwan lan se dimei hom naugb en edu marlo mera se loba ingga toua. Sug en edu lan marlo mera dauwohob, kaba, Paulus dara Silas lan lagun en dara leng leigtou desij en se men tu len laugwan se duhu toua. 16:34 Dangga enin dara men lusud, kaba, len laugwan lagahugouhw medam an ELOHIM namcir. Anai len merdoc ebdebin an enohob. Sug lan lagun len laugwan se duhu dauwohob, kaba, sud hom gesedougwo tu gesisug gini en ahwan lan se men tu naugb en eic ared dou lan toua. 16:35 Sug lona esgohob, kaba, leng Roma meren mougtir graga, len larougb meren sadodor aud sud hom gesedougwo tu gesisug, dauntoba en arges Paulus dara Silas dau tu gesisugeda. 16:36 Sug en ouman len merir an ginohob, kaba, en eihweda naugb en eden aremer gin dou lan toua. Dangga sug en edebeij lanohob, kaba, en enara dou lan, endagai: Yasud gina, leng Roma meren mougtir larougb dan naugb dan darges yan dau tu gesisug gini. Hang yan yaihweda iteitoginda, kaba, yan maijiresou. 16:37 Doba Paulus enara bauwun sadodor len merir an, endagai: Naro, aman amemeihwedau sugin augwougwero. Doba yen yeihweda naugb yedarougb leng Roma meren mougtir graga len laugwan suginahabi. Dauntoba lenin eng lemesga aman dau tu gesisug ginda. Anai len lemehilon aremer dau aman nosahabero. Doba len larougb yen naugb yen yesa dagamougb an aman ainyes abeba lusud laugwan merires namcir. Hanoba len larougb yen naugb yen youf aman se tu gesisug gin touohob. Dangga dagiro, naugwe hang, len louwan naugb aman ameihwededau sugin augwougb dag gina? Anai aman gin, kaba, toua yeng Roma meijen mougt mera medam en moho aiga aman touahaba? 16:38 Sug leng sadodor louman Paulus mer an gin, kaba, len leden augwan dou leng Roma meren mougtir graga laugwan toua. Dangga sug len louman dag meren mougt mera medam en moho aiga lan touohob, kaba, eic dag len lahau medam namcir. 16:39 Hang len leihweda naugb lesgigouhwesa lan ucugb deit. Sug len lesgigouhwesa lanohob, kaba, len lahwan lan dau tu gesisug. Hanoba len larougb lan dara geigouhw, dauntoba lan lamaitou se cinogo ingga debero, doba lan laihweda namcir. 16:40 Doba Paulus dara Silas sug lan laihwededau tu gesisugohob, kaba, lan lameihweda namcirdero. Doba lan laihweda se Lidia men tu deitahabi. Dangga sug lan lagasa dara leng merdoc ebdebin an Yesus len laugwan se tu inggohob, kaba, lan lanara lad len merdoc mes, dauntoba len les agadgeij namcir. Sug lan lasulou len gin dauwohob, kaba, lan larges maraga lac namcir.

Watti'u Manga Rasul 17

17:1 Sug Paulus dara Silas leihwededau cinogo Pilipi ginohob, kaba, lan laragasa cinogo Ampipolis dara Apolonia terimda lan ladebeij cinogo hom, moho Tesalonika, deit. Se cinogo ingga, kaba, leng Yahudi meren tuari hom toua moongga. 17:2-3 Sug leng Yahudi meren Lona Gemeicaresero edebeijohob, kaba, Paulus einesa meren tuari naugb len lens meijouhw dau medagas se Surad Injil Meb Mohon men meijouhw ucucugb doum toua. Anai astesda cinogo hom yom sug leng Yahudi meren tuari moongga, kaba, en eicara dag gin terimdohob. Dangga hang, se meren Lona Gemeicaresero mougwa homoi goucucanim gin, kaba, en eic medagas dau Surad Injil Meb Mohon bagodro. Dara en edidib meijouhw se geica dou len dag Sud Hom Geigdoc Len Dau Meren Gogom Augwan areg ELOHIM os dou len, kaba, en aimo ucina mog erij aud gomom nosahabi. Doba lona hwai debin gin, kaba, en eisa dau gomom ucugwohob. Hanoba en ouma debin gin dou len toua, endagai: Sud hom Yesus gedig dan desai dou yen gin, kaba, enin eng sud hom gedig ELOHIM os dou yenohob naugb sug en eigdoc yen dau sesar men gogom augwan toua namcir. 17:4 Sug Paulus ens dau areg se geica dag gin dou lenohob, kaba, merug hosa dau len merdoc ebdebin an areg en en dou len gin namcir. Hanoba len lobsara aud Paulus dara Silas lan. Dara lugmahara dau leng Grika gedig len laimo leng Yahudi naugb len lesijaresa ELOHIM, dara ligida meroho agas, kaba, leinyana merdoc ebdebin an areg Paulus ebedbed dou len se lona ingga toua. 17:5 Doba sug leng Yahudi gus leiya dau gin, kaba, len merdoc eigdud lan an gin namcir. Hang len lehilon leng lesebesa merei augwougb len laugwan debinim hom. Hanoba len lahwan len ingga aud sud hom, moho Yason, se men tu toua. Anai len lecinaga dag Paulus dara Silas lan latou desij enohob. Sug len ledebeij Yason en men tu, kaba, leng Yahudi len leinesa naugb len lehilon dougwo lan. Dauntoba sug len leiya Paulus dara Silas lan, kaba, len lohugouhw lan aud leng lesebesa merei gini naugb len logod lan toua. Dangga len lebara eijideijo medam se cinogo ingga augwan namcir. 17:6 Doba sug len lemeiya Paulus dara Silas lan marug se Yason men tu ginero, kaba, len lagaigeij Yason enin dara merug hosa dau en maguner se Krisdus. Hanoba len lohugouhw len gin laugwan aud meren mougt mera gouji se cinogo ingga toua. Sug len lahwan Yason an mesir laugwan deseino mougtir ginohob, kaba, len loho las len gin dou len dara merir medam namcir, lendagai: Yen yeiya len ginahabi. Anai astesda sug len lec sungga sungga, kaba, len loho aremer debin lusud terimda. Dangga iteitogini, kaba, len leinesa maman cinogo gini naugb len loho aremer debin maman deitohob. Doba areg len lebedbed dou emen, kaba, augwan edreg dau maman mougt mera medam se Roma men gomnomna ginohob. Anai len lenara dou emen dag maman mougt mera medam se Roma en emedag mougt naugb maman deitero. Doba sud hom, moho Yesus, eng eperwei en mohw naugb en edag mougt mera medam naugb maman dous. 17:7 Doba Yason gin, kaba, en ebin len laugwan se men tu touohob. 17:8 Sug mougtir graga dara lusud gus len louman dau gin, kaba, eic dag len merdoc ehin medam an len gin namcir. 17:9 Dangga mougtir, kaba, len lacgeij Yason dara mesir an aregoufu dag ansins dougwo len, dauntoba len lemeicara dag gin deitero. Sug len leic aregoufu dou lenohob, kaba, len largesir naugb leihweda. 17:10 Dangga se loba ingga, kaba, leng merdoc ebdebin an Yesus se cinogo ingga, len laugwan larougb Paulus dara Silas namcir dig cinogo Berea. Sug lan ladebeij se Bereyohob, kaba, lan lainesa leng Yahudi meren tuari naugb lan lasai Mer Geigouhw eisaugb Yesus dou len toua. 17:11 Doba leng Yahudi se Berea gin, kaba, len merdoc edag beim edreg dau leng se Tesalonika namcir. Dangga sug Paulus esai Mer Geigouhw eisaugb Krisdus dou len gin, kaba, len lemotogoto en mer an gin touwero. Doba len loc merums naugb areg en esai dou len gini, dara merdoc eigouhw an namcir. Hanoba astesda lona, kaba, len toua logmac Surad Injil Meb Mohon debinbin an areg Paulus ebedbed dou len gin, kaba, dag augwan misenohobei? Era naroei? 17:12 Hang leinyana dau leng Yahudi, dara ligiji dara ligida gedig len meroho agas dau leng Grika, kaba, len laugwan merdoc ebdebin an Yesus namcir. 17:13 Sug leng Yahudi se cinogo Tesalonika len louman, doba Paulus esai ELOHIM en mer eisaugb Yesus dou leng se Berea touohob, kaba, len toua locuc anir sungga. Sug len ledebeij se Bereyohob, kaba, len lenara lad len sungga merdoc mes, dauntoba len merdoc ehin medam an Paulus toua namcir. 17:14 Sug en maguner se Krisdus len louman dau gin inegohob, kaba, en maguner se Krisdus len larougb merug hosa naugb len lobgan en dig dum mebereda, dauntoba en aingmo ij dig Atena dau leng Yahudi gin namcir. Doba Silas dara Timotius, kaba, lan laigtou se Berea deb. 17:15 Doba leng lahwan Paulus gin, kaba, len lobgan en dig Atena toua. Dangga sug len laugwan ledebeij Atenohob, kaba, len lecicugb dig Bereda. Sug len lecicugb, kaba, Paulus esulou len, endagai: Yen yen dou Silas dara Timotius lan dag lan lameigtou se Berea deitero. Doba lan toua laijeijo dedemeda ucan danin. 17:16 Doba irir sug Paulus eigtou naugb Silas dara Timotius lan se cinogo Atena gin, kaba, en medoc momogo medam an len sungga. Anai en eiya, doba cinogo ingga atij an meren seiseij einyana namcir. 17:17 Dangga hang, en emeinesa dara leng Yahudi, dara lugmahara gedig len laimo leng Yahudi naugb lesijaresa ELOHIM enohob, se meren tuari naugb en enara baga len merdoc mes eisaugb Yesus dou len. Dara astesda lona, kaba, en aimo lusud gedig len lesebesa se leng Atena meren usmougb naugb en enara baga len merdoc mes an gin dou len toua deit. 17:18 Doba ligbum dau leng meru ouforoho se leng Epikuris dara Sdoa meren gomnomna, kaba, len lesbesan en, lendagai: Areg sud hom gin en enara dou maman, kaba, men meijouhw dagiro? Anai areg en en dou maman gin, kaba, dag en eic meijouhw aingma aingma bedgesem dou maman dous. Dangga dagiro, naugwe hang, en emeigdoumesa enin moho an gin dag gina? Dara ligbum, kaba, len lesbes an en toua, lendagai: Sud hom gin, kaba, en eng enara ganusbus gedag gina? Anai seiseij, kaba, en emeisa dau gomom ingma dag ginbuma. Era sud hom gin, kaba, en ebedbed eisaugb len gus meren seiseij eng dou maman ginei? Anai maman mamouman gedag gin mougwa hom touebma. Len lesbes an en dag gini, anai en esai Mer Geigouhw eisaugb Yesus dou len dag en omom naugb lusud laugwan meren sesar. Doba lona hwai debin gin, kaba, en eisa dau gomom ucugwohob. 17:19 Sug len lesbes an Paulus dag ginohob, kaba, len lahwan en aud meren mougtir gedig len lesedougwo meren gaben se menmougb, moho Ares, toua deit. Sug len ledebeij sunggohob, kaba, mougtir lenara dou en, lendagai: Emen emouwan naugb ban becic areg ban ben dou emen lusud graga dou emen emaugwan sugin deitahabi. 17:20 Anai hom yom dau areg ban besai dou emen graga, kaba, emen emouman, doba ganusbus namcir. Dangga hang, ban bens meijouhw asesa dau augwan gini dou emen deitahabi. 17:21 (Len lacgeij Paulus an gin dangga, anai leng Atena dara lugmaharagedig len leigtou desij len sungga, kaba, len laugwan lemeicara mougwa hom touwero. Doba dau lonamen terimda loba, kaba, len leigtou se us mougb gin naugb len louman areg menenau, dara len len areg menenau ingga doum dous.) 17:22 Sug len lacgeij Paulus an gin dag ginohob, kaba, en eisa besa deseino mougtir graga len laugwan. Hanoba en enara dou len, endagai: Yeng se Atena gini, dan deiya, doba yen yeic meijuwemougb esesa naugb sug yen yesijaresa meijen seiseij dara yen meigdoc augwan namcir. 17:23 Anai sug dan dec acec meijen cinogo gin, kaba, dan deiya dau meijen tuari naugb sug yen youwaharo dou meijen seiseij, kaba, einyana toua inggebga. Dangga dan deiya meijen boromei hom naugb sug yen youwaharo, doba yen yog meb se dag gin touohob, yendagai: Boromei gin, kaba, naugb ELOHIM gedig emen emecinaga enero. ELOHIM areg yen yesijaresa en augwougb dag gin, kaba, en eng dan desai dou yen gini. 17:24 En, kaba, en edag mougt mera medam naugb areg geb se bogo dara cinogo augwan namcir. Anai enin eng ahasesei bogo dara cinogo. Hanoba en esinsin areg geb se bogo dara cinogo augwan gin touohob. Dangga hang en emeigtou se tuari gedig lusud misen lesinsin naugb meren seiseij touwero. Anai enin eng ahasesei cinogo, dara en esinsin areg geb se cinogo gin augwan. Hang en emedag mougt mera medam naugb areg geb se bogo dara cinogo augwan touohob. 17:25 Dangga emedeinyum naugb sug lusud lousa en, dara lemeic ara ara dou en touwero. Anai enin eng esa mena dara eic maireseb dou len dous. Dara en eic areg edeinyum naugb ousa len sug len merireseb toua terimda. 17:26 Dara enin eng esinsin lusud laugwan, kaba, len len dau len merjemouwa hom dous. Hanoba en arougb len naugb len lagaha se cinogo augwan toua. Anai enin eng ogod an meren lona, dara en ekeba meren hancob augwan dou lenohob sug en emahasesei cinogo dara bogo touebma. 17:27 En esinsin lusud, dauntoba sug en eic maireseb dou lenohob, kaba, len lehilon en. Hanoba len lemdebeij en touei? Era naroei? Anai en, kaba, en emeigtou aigus dau mamanero. Doba eni moongga dara maman terimda. 17:28 Augwan gini esogwa deisa areg sud hom en og dangga deb sug nosohob, endagai: Sug maman mamugwengga se cinogo gini dara maman mamireseb naugb maicara toua, kaba, gin augwan ogdoc ELOHIM enin men goubesa dous, anai maugwan madag hom dara enohob. Dara meijen lusud gedig len lerba ugwaremer, kaba, lingma lerba ugwaremer an dangga deb sug nosa touohob, lendagai: Maman maugwan madag en mehir teiteiyohob. 17:29 Dangga hang, sug maman madag ELOHIM mehir dag ginohob, kaba, maman mamoudesa endag ELOHIM gin toua, aninim dag seiseij areg leng meru ouforoho len lesinsin dau emas, dara perag, dara igdahab touwero. 17:30 Sug nosa, kaba, ELOHIM emeic gogom debin lusud an meren geicara gecgu ginero. Doba en amsoho len an namcir. Anai len lemecinaga areg asesa enin medoc mes touebma. Doba iteitogini, kaba, ELOHIM en en dougwo lusud se cinogo gin augwan, dauntoba len lemaimo meren geicara gecgu gin deitero. Doba len lesga, hanoba len lahau an dougwo namcir. 17:31 Anai en esedeb lona hom naugb sug en ogod aremer aga lusud laugwan dara medoc edag beim an len, ogdoc sud hom areg en ouci en deb sug nosohob. Hanoba en ens gini ainyes dou maman ogdoc sug en eigdoumesa en dau gomom ucugb toua. 17:32 Sug mougtir dara lusud len louman dag lusud leisa dau gomom ucugb dangga, kaba, len lobohuba an en namcir. Doba ligbum, kaba, len merdoc eica en mer an gini. Hang len lemenara dou en, lendagai: Ban bens dau areg ban ben dou emen gini meijouhw augwan asesa dou emen deitahabi. 17:33-34 Dangga sug Paulus eihwededau leng loucimdeb ingga, kaba, sud hom dau mougtir graga, moho Dionisius, dara gida hom, moho Damaris, dara merug hosa dau len gus, kaba, len laugwan lobsara aud en naugb len merdoc ebdebin an Yesus toua.

Watti'u Manga Rasul 18

18:1 Sug Paulus ens aremer graga augwan dou leng se Atena dauwohob, kaba, en emeigtou se cinogo ingga deitero. Doba en eihwededau sungga dig Korintuseda. 18:2 Sug en edebeij cinogo ingga, kaba, en agasa dara sud hom dau leng Yahudi, moho Akwila, sungga toua. Anai leng Roma meren mougt mera medam, moho Klaudius, en ocirma leng Yahudi laugwan leisa dau men cinogo Roma ginohob. Hang eni dara mesouwa, moho Priskila, kaba, lan toua lamen dau leng Italia meren hancob se Korintus gin toua. Doba Akwila gini sug en gun, kaba, dau leng Pontus meren hancob. 18:3 Sug lan ladebeij Korintus ginohob, kaba, Paulus edebeij lan se maran tu. Hanoba en atou desij lan dara en ousa lan. Anai len laugwan meren geicara aninim dag len logon hugbei naugb laumara dou len gus toua. 18:4 Dara astesda leng Yahudi meren Lona Gemeicaresero, kaba, Paulus einesa meren tuari naugb en enara baga leng Yahudi, dara leng Grika gedig len lesijaresa ELOHIM, len laugwan merdoc mes. Dauntoba len merdoc eica areg en esai dou len eisaugb Yesus gin, kaba, augwan se geica namcirohob. 18:5 Doba sug Silas dara Timotius lan toua lan dau Makedoniohob, kaba, en emogon hugbei deitero. Doba en arges deb namcir naugb en esai Mer Geigouhw eisaugb Krisdus dou leng Yahudi astesda lona terimda. Dara en os badi dou len dag Yesus gin, kaba, enin eng Sud Hom Geigdoc Len Dau Meren Gogom Augwan, aimo dau areg ELOHIM os dou len sug nosohob. 18:6 Doba sug leng Yahudi gin, kaba, len lenara laised en mer, dara leic en moho lacecim an gin toua terimda, kaba, en etitir men sansun an meren aremoslos ucugb debin len. Hanoba en enara dou len, endagai: Sug ELOHIM eic mor mor dou yen, kaba, yen meijugwihi emeb se dan insira deitero, doba ogdoc yenin dous. Anai dan desai augwan dag misen dou yen, doba yen yasid dan indir an namcirohob. Dangga hang, dau iteitogini, kaba, dan demebedbed dou yeng Yahudi deitero. Doba dan deihwedaud lugmahara naugb dan desai Mer Geigouhw eisaugb Krisdus dou len dous. 18:7 Sug Paulus enara debin len dag gin dauwohob, kaba, en ematou desij Akwila dara Priskila se maran tu deitero. Doba en eihwededau lan namcir. Anai gini ansins dag en arges dau leng Yahudi namcirohob. Hanoba en edatou desij sud hom dau lugmahara, en moho Titius Yusdus, se men tu deit. En men tu gin, kaba, eb deinyor leng Yahudi meren tuari. Dara en toua aimo leng Yahudi naugb en esijaresa ELOHIM touohob. 18:8 Doba Krispus gedig en esedougwo leng Yahudi meren tuari gin, kaba, en medoc ebdebin an maman Adehsud. Dara leng leigtou desij en se men tu, dara leng Korintus leinyana gus sug len louman dau areg Paulus esai dou lenohob, kaba, len merdoc ebdebin an maman Adehsud gin toua namcir. Hanoba Paulus dara mesir logun len laugwan se duhu ansins debin gin toua. 18:9-10 Doba se loba hom hom, kaba, Mena Gogoufu ogod Paulus dag en omom. Dangga en eiya maman Adehsud sug en oho mer debin en, endagai: Ban bemahau dau leng Yahudi ginero. Anai dan indugwengga desij ban naugb dan deseyeiyo ban dougwo len. Hang sud hom ingma en emeic gomom dou ban touwero, doba ban abina agau terimda. Dangga hang, ban bemarges dau sug ban besai Mer Geigouhw eisaugb dan dou lusud se cinogo gin touwero. Doba ban beic abus naugb gin namcir. Anai indan lusud gedig dan desedeb len naugb len merdoc ebdebin an dan, kaba, leinyana merugwengga se cinogo ginaba. 18:11 Sug Paulus ouman Adehsud oho mer debin en dag ginohob, kaba, en aiyan medocesem. Hanoba en eigtou sungga se arisogomoc hom mougwu deit naugb en edidib ELOHIM mer eisaugb Yesus meijouhw augwan asesa dou len toua. 18:12 Doba sug leng Roma meren mougt mera medam eigdoumesa sud hom, moho Galio, en edag mougt mera dougwo leng se Akaya meren hancob augwan deit, kaba, leng Yahudi dau Korintus len lohw merdocedoum naugb len loho ledas Paulus deseino en. Sug len lagaigeij enohob, kaba, len lahwan en aud Galio gin toua. 18:13 Sug len ledebeij enohob, kaba, len lahacugb gogom debin en, lendagai: Sud hom gin, kaba, en enara baic emeng Yahudi emen emdoc mes, dauntoba emen emesijaresa ELOHIM, emaimo dau areg Musa arougb emen an se men gomnomnohob gin toua deitero. Doba en arautut emen, dauntoba emen emaimo ucina menau gini naugb sug emen emesijaresa ELOHIM dous. 18:14 Dangga Paulus en ouwan enara bauni len merir gin ucugb dou Galio deit. Doba Galio enara bagod dougwo en mer. Hanoba en enara gouji dou leng Yahudi gin toua, endagai: Sug areg yen yoho yes en an deseino dan dau sug en edreg emen Roma emen gomnomna. Era en aimo areg mog mog medam an lusudohob, kaba, dan indoc esgirahesa naugb dan douman dau areg yen yahacugb gogom debin sud hom gin toua. Anai gin, kaba, esogwa deisa ucina gobosboro naugb sug dan daimo yen toua namcir. 18:15 Dobnaro. Areg yen yoho yes en an deseino danohob, kaba, augwan gini eisaugb medagas dara moho meren meijouhw. Dara areg meijen gomnomna arougb yen an gin dous. Dangga hang, dan indoc emesgirahesa naugb dan dogod aremer ginero. Doba dan douwan naugb yen yenin yogod aremer gin dous. 18:16 Sug Galio owun len meroho an dag ginohob, kaba, en arougb men sadodor naugb len lecicugb leng Yahudi len laugwan dau men tu gouji gedig len lowunaresa gin toua namcir. 18:17 Sug leng Yahudi len leiya, doba Galio ecicugb len laugwan dau men tuohob, kaba, len lagaigeij sud hom gesedougwo meren tuari, en moho Sosdenes. Hanoba len logod en debin Galio sungga toua, anai en edag mougt naugb aremer ginohob. Doba Galio amsoho len namcir. 18:18 Doba Paulus, kaba, en aiyan medocesem naugb en eigtou se cinogo Korintus debin gin terimda. Dangga sug en eigtou desij leng merdoc ebdebin an Yesus sungga se lona einyanohob, kaba, en ou len. Hanoba eni, dara Priskila, dara Akwila len leihwededau len sungga dig Kenkrea naugb len leisa ij dau sungga dig leng Siria meren hancob ucugb deit. Sug len ledebeij Kenkreohob, kaba, Paulus en egina mougt modedau. Anai men lona areg en ouwara debin naugb en ehig dau ara dou ELOHIM, kaba, edeinyumohob. 18:19 Dauwohob, kaba, len len leisa ij dau Kenkrea deit, terimda len ledebeij cinogo Epesus. Sug len ledebeij Epesusohob, kaba, Paulus en arges Priskila dara Akwila lan deb sungga. Hanoba en aimo leng Yahudi se meren tuari naugb en enara baga len merdoc mes eisaugb Yesus dou len toua deit. 18:20-21 Dangga, kaba, len lacgeij en, dauntoba en eigtou desij len terberbahabi, doba en emousa len merirero. Doba ebeij deinyor sug en ecahabi, en emenara dou len, endagai: Sug ELOHIM ouwan, kaba, dan demecicugb aud yen deits. Sug en enara dangga dou len dauwohob, kaba, en eisa ij dau Epesus dig Kaisareada. 18:22 Sug en edebeij Kaisareohob, kaba, en eisaugb dig Yerusalem naugb en edou leng Krisden se goucimdeb sungga nosahabi. Sug en ou len dauwohob, kaba, en eihwedig Antiokieda. 18:23 Dangga sug en eigtou debin mog desij len sungga se lona aibibrohob, kaba, en eihwededau sungga dig leng Galatia dara leng Prigia meren hancob deit naugb en enara bad leng se goucimdeb len laugwan merdoc mes toua. Dauntoba len laiyan merdocesem dara les agadgeij namcir. 18:24 Sug Paulus eihwededau Epesusohob, kaba, sud hom dau leng Yahudi, en moho Apolos, en en se Epesus deit. Sud hom gin sug en gun, kaba, dau cinogo Aleksandria. En mers ohos naugb sug en enara dou lusud. Dara en mou ouforoho namcir naugb en ecinaga Surad Injil Meb Mohon men meijouhw augwan asesa toua. 18:25 Dara leng Krisden gus, kaba, len lens dau maman Adehsud men ucina areg maman maimo gin hom yom dou en sug nosa touohob. Doba eisaugb ELOHIM men ucina naugb sug en ouwan eic maireseb menau geb huhugb dou lusud ogdoc Yesus, dara en ouwan esa Mena Gogoufu se len merdoc mes, kaba, en emecinaga meijouhw augwan asesa touebma. Doba en ecinaga dau Yohanes men geicara sug en ogun lusud se duhu deb gin dous. Dara sug en esai maman Adehsud men ucina gin dou lusud dara en edidib aremeijouhw dou len toua, kaba, en aimo augwan gin dara gerleij namcir. 18:26 Dangga hang, en eic mos naugb en einesa leng Yahudi meren tuari, dauntoba en esai maman Adehsud men ucina moho hom yom areg en ecinagohob gini dou len toua. Doba sug Priskila dara Akwila lan lauman en mer an gin, kaba, lan lahwan en dig maran tu naugb lan lans augwan asesa dou en deit, dag ELOHIM emouwan naugb emeigdoc lusud dau meren gogom dousero. Doba en ouwan eic maireseb menau geb huhugb dou len, dara esa Mena Gogoufu se len merdoc mes toua. 18:27 Sug en esai maman Adehsud men ucina gin dou leng se Epesus dauwohob, kaba, en ogodan naugb en eihwedig leng Akaya meren hancob deit naugb en esai maman Adehsud men ucina gin dou len toua. Dangga leng merdoc ebdebin an Yesus se Epesus ingga, kaba, len log surad dara en dou len meraguner dara merdamouwer se Krisdus se leng Akaya meren hancob gini. Dauntoba sug en edaud lenohob, kaba, len lebin en dara geigouhw namcir. Sug Apolos edebeij cinogo Korintus se leng Akaya meren hancob, kaba, en ousa leng merdoc ebdebin an Yesus ogdoc ELOHIM medoc an len, len laugwan dara goubesa namcir. 18:28 Anai eni dara leng Yahudi, kaba, len lenara laisedim eisaugb Yesus deseino lusud se usmougb. Doba en eic medagas dau Surad Injil Meb Mohon bagadro. Hanoba en ens se geica dara goubesa dou len dag Yesus enin eng Sud Hom Geigdoc Len Dau Sesar Men Gogom Augwanohob. Dangga en mer gin, kaba, eic dag en owun len lobsara dou en namcir.

Watti'u Manga Rasul 19

19:1 Sug Apolos eni moongga se Korintus, kaba, Paulus ec mohora se leng Galatia dara leng Prisgia meren hancob naugb en enara bad leng se goucimdeb len laugwan merdoc mes amomo terimda en edagunya se Epesus deit. Sug en edebeij se Epesus ginohob, kaba, en agasa merug hosa dau leng merdoc ebdebin an Yesusohob sungga toua. 19:2 Hanoba en eijidougwo len, endagai: Sug yen meigdoc ebdebin an Yesus gini, kaba, en esa Mena Gogoufu se yen meigdoc mes touohobei? Doba len launi ucugb dou en, lendagai: Naro, anai emen ememouman dau Mena Gogoufu gini moho mougwa hom touebma. 19:3 Dangga Paulus en eijidougwo len deit, endagai: Sug len logun yen se duhu gin, kaba, len laimo gara men geicara an yena? Doba len launi dou en deit, lendagai: Sug len logun emen se duhu gini, kaba, len laimo Yohanes men geicara an emen dous. 19:4 Dangga Paulus ens meijouhw dau Yohanes men geicara asesa dou len deit, endagai: Yohanes, kaba, en esedeb lusud merdoc mes naugb len merdoc ebdebin an sud hom Yesus dous. Anai en enara dou len dag cum, kaba, sud hom gini en emaimo ucan ens. Dangga en arougb len naugb len lesga meren sesar dara len lahau an dougwo dauwahabi, en emogun len se duhu debin gin toua. 19:5 Sug len louman dau gin, kaba, len lacgeij Paulus naugb en ogun len se duhu. Sug len lacgeij Paulus dag gin, kaba, en ogun len se duhu se maman Adehsud Yesus moho debin gin toua. Dauntoba lusud lecinaga dag len ledag Yesus men logodeh touohob. 19:6 Dangga sug Paulus ogun len se duhuohob, kaba, en ob mesira se len merugt toua. Sug en ob en mesira se len merugtohob, kaba, Mena Gogoufu einesa len laugwan merdoc mes namcir. Hanoba Mena Gogoufu eic mou ouforoho dou len naugb len lec merir susugb. Dara en eic goubesa dou len naugb len lesai ELOHIM moro dou lusud toua. 19:7 Doba len gedig Mena Gogoufu einesa len merdoc mes gini, kaba, len laugwan merug edebeij sisa hobjerai. 19:8 Sug Paulus ogun lusud merug sisa hobjerai gin se duhuohob, kaba, en einesa leng Yahudi meren tuari naugb en enara baga len merdoc mes toua. Dangga se igda homoi gin, kaba, en eic mos naugb en enara bad len merdoc mes terimda. Dauntoba len merdoc eica en mer dag ELOHIM men lona naugb sug en oiharaga len ucugb, kaba, edebeij lenohob. 19:9 Doba ligbum dau len, kaba, len merdoc agadgeij dougwo areg Paulus ebedbed dou len ingga namcir. Dangga, kaba, len lesbes an maman Adehsud men ucina naugb sug en eigdoc len dau meren gogom augwan ogdoc Yesus gin namcir. Anai len lemouwan naugb sug len merdoc emebdebin an Yesus touwero. Sug len leicara dag gin, kaba, Paulus arges len ingga deb. Hanoba en eihwedan leng merdoc ebdebin an Yesusohob laugwan se sud hom, moho Tiranus, men dimei gouji hom naugb en enara baga lusud merdoc mes sungga astesda lona an areg graga deit. Anai Tiranus men dimei gouji hom gin, kaba, naugb sug en edidib aremeijouhw dou men logodeh se toua. 19:10 Sug Paulus ens meijouhw dau sug ELOHIM ouwan oiharaga lusud ucugb se arisogomoc hwai dou len, kaba, leng Yahudi dara lugmahara se leng Asia meren hancob, len laugwan lecinaga Mer Geigouhw eisaugb maman Adehsud augwan dag misen namcir. 19:11 Dara ELOHIM ens men ganusbus edreg dau mohw ogdoc Paulus dou lusud naugb en auma debin areg Paulus esai dou len toua. 19:12 Anai Paulus enin emaben ganusbus deseino lusud dousero. Doba sug len loho Paulus men minc gahud mecdemaga dougwo mengebouf, dara men sansun geg gaicara naugb leng areber, kaba, goubesa geb se sansun gin, kaba, eic geingmos agauwesa dou leng areber len laugwan. Dara merna mog mog agunya dau lusud toua. 19:13 Dara merug hosa dau leng Yahudi gedig len lesebesa naugb locirma merna mog mog dau lusud merdoc mes, kaba, len toua merugwengga se Epesus. 19:14 Leng leicara dag gin, kaba, Gembala Gesa Taij Meren Mougt Mera Medam dau leng Yahudi, moho Skewa, meisir merug senggai gini. Dangga sug len leiya, doba Paulus ocirma merna mog mog dau lusud, ogdoc maman Adehsud Yesus en moho dag gin, kaba, len toua louwan leicara lainyen dangga. Hanoba len larougb mena mog hom, lendagai: Se moho Yesus gedig Paulus esai dou lusud gin, kaba, emen emarougb ban naugb ban beihwededau sud hom gin namcir. 19:15 Doba mena mog mog gin, kaba, en enara bauni len merir ucugb, endagai: Yesus, kaba, dan decinaga enohob. Dara eisaugb Paulus toua, kaba, dan decinaga touohob. Doba yen gin, kaba, yen meijoho dagiro? Anai dan demecinaga yenero. 19:16 Sug mena mog mog auni dou len dangga ineg dauwohob, kaba, en eic goubesa se sud hom gin naugb en ougb debin len dara mobgos maha namcir. Hanoba en esa debin len laugwan toua. Dangga len laugwan lesogwa lougwan merug mogud dau tu ingga. Anai sud hom gin, kaba, en ekris meren sansun dau len. Hanoba en asgun len toua merugwihi aijahasem namcirohob. 19:17 Sug leng Yahudi dara lugmahara se Epesus ingga len louman dau gin, kaba, len leigdoumesa maman Adehsud Yesus en moho agas medam bedreg dau nosa namcir. Anai len laugwan merdoc ahau dau enohob. 19:18 Dangga leng merdoc ebdebin an Yesus ginohob, kaba, leinyana lesga dau meren geicara gecgu areg len laimo nosohob, augwan asesa deseino lusud laugwan toua. 19:19 Dara leng meru ouforoho naugb len lagaresa lusud merdoc mes, dara leng loho aremoung mohu, dara leng lohudara, kaba, len laugwan lemaimo meren geicara gin toua deitero. Doba len leineg dau namcir. Hanoba len louci meren surad an aremeijouhw debinim hom naugb len lec se smougb abeba lusud laugwan merires toua. Doba areg len lec se smougb gin, kaba, sug len lecic men mera augwan ladedim, kaba, edebeij aregoufu perag mogo ribu mos sergem toua. 19:20 Dangga aremer graga augwan, kaba, eic dag maman Adehsud en mer gin agaha becinten cinogo augwan dara goubesa terimda. Hanoba eic lusud leinyana lou aud maman Adehsud gin toua. Anai aremer augwan gin, kaba, edag ganusbus namcir. 19:21 Sug aremer graga augwan ouwa dauwohob, kaba, Paulus ogod an naugb en edoumuma dougwo leng merdoc ebdebin an Yesusohob len laugwan se leng Makedonia dara leng Akaya meren hancob deit. Hanoba en eihweda terimda en edebeij cinogo Yerusalem toua deit. Dangga, kaba, en enara dou leng se Epesus gini, endagai: Sug dan dedebeij Yerusalemohob, kaba, dan douwan naugb dan dedesai Mer Geigouhw eisaugb Yesus dou leng se Roma toua. Anai gini aimo dau areg ELOHIM esedeb naugb danohob. 19:22 Sug en enara dag gin dou leng Epesus ginohob, kaba, en arougb men gedeijan lahwai, lan maroho Timotius dara Erasdus, naugb lan laino en men dig leng Makedonia meren hancob naugb lan lasedeb leng merdoc ebdebin an Yesusohob len laugwan merdoc mes sungga deb. Doba enin, kaba, en eigtou se leng Asia meren hancob ingga deb se lona aibibra deitaba. 19:23 Doba se lona sug en eigtou gin, kaba, len lebara eijideijo medam dougwo Paulus an areg en esai dou lusud eisaugb maman Adehsud men ucina gini. 19:24 Anai se Epesus gini, kaba, sud hom gedig en mou ouforoho naugb en esinsin ara ara dau w perag, en moho Demetrius, en toua moongga. Dangga men geicara gini ahwan aremougb einyana dou en an men logodeh laugwan namcir. Anai len lesinsin perag dag tuari mogurei hom, aninim dag meren seiseij gida, moho Artemis, men tuari misen gouji hom dou lusud laugwan toua. Doba sug Paulus esai Mer Geigouhw eisaugb Yesus dou leng se Epesus gin, kaba, leinyana lemouma tuari mogurei dau w perag gin deitero, anai len merdoc ebdebin an Krisdus ginohob. 19:25 Hang Demetrius en eiya men logodeh dara mesir gus gedig len lesinsin tuari mogurei dau w perag len laugwan naugb len lacinim hom. Sug len laugwan lacinimohob, kaba, en ococi len, endagai: Dan insirija, yen yecinaga sug maman masinsin Artemis men tuari mogurei dau w perag dou lusud, kaba, ahwan aremougb einyana dou maman toua. 19:26 Doba iteitogini, kaba, yenin yen yeiya dau sud hom, moho Paulus, men geicara. Dara yen youman dau areg en esai dou lusud gin touohob. Anai en ococi len dag areg maman masinsin dag seiseij gin, kaba, ELOHIM misenero, doba dag areibahau dous. Doba areg en eic bagadro dou len gin, kaba, eic dag leinyana gougwa dau leng se Epesus dara maman hancob se Asia len merdoc eica en mer an ginohob. 19:27 Dangga maman mamsoho gin touwero. Anai sug maman mamen dougwo ginero, kaba, cum, lusud leic maman mamoho an areg maman masinsin gin lacecim toua namcir. Dara gin dousero. Doba cum, kaba, len loudesa dag maman seiseij gida Artemis, moho agas gini, men tuari emesloulougb. Hang len lemoumara dau maman dag nosa toua deitero. Doba len larges dau gin namcir. Hanoba lusud lemeigdoumesa en moho emagas toua deitero. Doba len lowun en moho eb tainya namcir dous. Augwan gini ogom medam naugb maman. Anai maman seiseij gida hom gin, kaba, maman se mamang Asia maman hancob gini. Dara lusud se cinogo gus augwan, kaba, maman maugwan masijaresa en terimdohob. 19:28 Sug men lusud louman dag gini, kaba, eic len merdoc esrougb medam namcir. Hang len lesa merir, lendagai: Emeng Epesus emen seiseij Artemis gin, kaba, en moho emobsara deitero, doba en moho agas terimda. 19:29 Doba sug len lesa merir an dag gin terimda, kaba, eic dag lusud se cinogo ingga len laugwan lenara merir eisa medam an gin namcir. Dangga sug len laugwan lacinim debohob, kaba, len lagaigeij Paulus men mougt lahwai dau Makedonia, lan maroho Gayus dara Arisdarkus, lan namcir. Anai len lecinaga dag lan toua laimo Paulus naugb len lesai Krisdus moro sungga sungga touohob. Hanoba len lohugouhw lan deb se meren usmougb medam hom toua. 19:30 Doba sug Paulus en ouman gin, kaba, en toua ouwan eihwedaud len se usmougb ingga naugb en edenara bad len merdoc mes toua. Doba mesir leng Krisden gus, kaba, len len dougwo en namcir, lendagai: Ban bemeihwedero. 19:31 Dara mesir mougt mera gouji dau leng Asia meren hancob merug hosa, kaba, len toua lesa merir dougwo en. Dauntoba en emeic maga ainyes touwero, doba en ecgoneh en mog namcir. 19:32 Doba irir sug len lesa merir dou Paulus gin, kaba, leng se usmougb ingga len lenara merir ecgwetagam terimda. Dangga ligbum, kaba, len lesa merir an aremer ingma dag gini. Doba lingma, kaba, len lesa merir an aremer ingma dag gaba. Anai len lemecinaga aremer areg len loucimdeb an gin touwero. 19:33 Dara lingma deit, kaba, len loudesa dag sud hom dau leng Yahudi, en moho Aleksander, en eng oho aremer gin debin len. Anai leng Yahudi gus larougb en naugb en eisa besa deseino leng se usmougb gini. Dauntoba en en dougwo len dag leng Yahudi len lemoho aremer gin debin lenero. Dangga sug en eisa besa deseino lenohob, kaba, en ecgun mesira debin len naugb sug en enara dou len toua. 19:34 Doba sug len leiya dag eni sud hom dau leng Yahudi, kaba, len laugwan leisa lesa merir medam deit, lendagai: Emeng Epesus emen seiseij Artemis gin, kaba, en moho emobsara touwero. Doba en moho agas terimda. Dara len merir eb debin gin terimda edag sug len los ared se smougb, kaba, ec dougwo namcir. Danggahabi, len lemarges merir an gin toua. 19:35 Doba sug len leigdoumesa Artemis en moho terimda dag ginohob, kaba, mougt mera gouji se Epesus men meijouhugwa hom en agunyen naugb en esa mer debin len an gin namcir. Dangga sug len lobsara dou en naugb lodina anirohob, kaba, en en dougwo len, endagai: Yeng dau Epesus, lusud se cinogo gin augwan, kaba, len lecinaga dag mamanin dous eng masedougwo seiseij moho agas Artemis men tuari gini. Dara mamanin dous eng masedougwo men igdahab gecabeci gouwaden dau bogo toua. 19:36 Dangga yen yemeicara ecgu dedemedero. Doba yen yowun yen meigdoc mesahabi. Anai aremer eisaugb Artemis dara men igdahab gouwaden dau bogo gin, kaba, sud hom ingma emen dougwo maman an ginero. Anai len laugwan lecinaga dag mamanin dous eng masedougwo ginohob. 19:37 Dangga dagiro, naugwe hang, yen yohugouhw lahwai sugini naugb ara? Anai lan lamesma ara ara dau maman seiseij men tuariero. Dara lan lameic Artemis en moho lamacecim touwero. 19:38 Sug Demetrius an men logodeh len louwan lahacugb gogom debin sud hom, kaba, eigouhw naugb len lahwan en deseino mougtir lenahabi, len lemderba ara debinim sungga toua. Anai len lesedeb lona naugb sug len logod aremer aga lusud debohob. 19:39 Dara yen toua, sug meijen ara ara ingmanggebga naugb sug lusud logod, kaba, yen yemouci dau yenin dag gin lo. Doba yen yodo augwan gini se usmougb gouji hom, dauntoba mougtir merir ocem an ginahabi, len lemogod toua. 19:40 Anai sug maman maicara dag gin, kaba, leng Roma lauwoho maman dag maman mabara eijideijo dou len se cinogo gin touohob. Dangga hang, maman mamauni dagiro dou lena? Anai maman bui mogu ingma emeb naugb gin touwero. 19:41 Sug mougt mera gouji men meijouhugwa gin en en dougwo lenohob, kaba, en arougb len laugwan leihwedig meren tueda.

Watti'u Manga Rasul 20

20:1 Sug aremer se Epesus gini edinohob, kaba, Paulus eija leng merdoc ebdebin an Yesusohob len laugwan lacinim desij en naugb en enara bad len merdoc mes, dauntoba len les agadgeij namcir. Sug en enara bad len merdoc mes dauwohob, kaba, en ou len. Hanoba en eihwededau len dig leng Makedonia meren hancob deit. 20:2 Sug en edebeij se leng Makedonia meren hancob ginohob, kaba, en edoumuma leng merdoc ebdebin an Yesus len laugwan sungga sungga toua naugb en esulou len ucucugb, dauntoba len merdoc emomomtom touwero. Doba len laiyan merdocesem naugb les agadgeij terimda. 20:3 Sug en enara bad len sungga laugwan merdoc mes dauwohob, kaba, en eihwededau len aud leng Krisden se leng Grika meren hancob deit. Sug en edebeij lenohob, kaba, en eigtou desij len se igda homoi sungga. Hanoba en esedeb naugb sug en eisa ij dig leng Siria meren hancob deitda. Doba sug en ouman dag leng Yahudi lesedeb naugb sug len leic gomom dou enohob, kaba, en emeisa ijero. Doba en ogod se medoc mes naugb en oho asa leng Makedonia meren hancobahabi, en emdagunya se Siria dous. 20:4-5 Dangga Arisdarkus dara Sekundus dau cinogo Tesalonika, dara Gayus dau cinogo Derbe, dara Timotius, dara Tikikus, dara Tropimus dau leng Asia meren hancob len laugwan leino emen emin dig Troas. Dauntoba len ledeigtou naugb emen sungga. Doba Sopater, Pirus meisi, en aimo Paulus emen, anai eni dau cinogo Berea. 20:6 Dangga sug emen emedebeij cinogo Pilipi deitohob, kaba, emen emeigtou sungga terimda leng Yahudi lougwan ared debin meren lona naugb sug len let roti gemerisero dauwahabi, emen emeisa ij dau sungga dig Troaseda. Sug emen emeisa ij se lona sergemohob, kaba, emen emedebeij leng leino emen emin se cinogo ingga. Hanoba emen emaugwan emeigtou sungga se ari hom deit. 20:7 Dangga sug leng Yahudi meren Lona Gemeicaresero ouwa dau, hanoba se loba, kaba, emen emaugwan emoucimdeb se dimei hom naugb emen emetara aninim dara leng Krisden se Troas gini. Anai sug lona esgohob, kaba, emen emesedeb naugb sug emen emeisa ij dau lenohob. Hang Paulus en emarges dau sug en esulou leng Krisden se Troas gin touwero. Doba en mers eb debin areg en en dou len sungga dau loyeiyo terimda edebeij lobeingmod namcir. 20:8 Dara dimei sug emen emetara se gini, kaba, len lei hiraga mouf eseririm se touohob. 20:9 Doba sug Paulus ebedbed dou len dag gin terimda, kaba, gigbaba hom, en moho Eutikus, cicirebeni. Hanoba en atou bamumiyohob, kaba, en obsara dau dimei sug emen emetara se gin, bedainda cinogo gaih. Anai en eigtou irir cugwen mes se dimei ingga. Dangga sug len leihweda naugb ledeigdoumesa en, kaba, len leiya, doba en omom namcirohob. Anai dimei areg en obsara dau gin, kaba, dimei gedig homoi geb se tu gauloulom inggohob. 20:10 Doba Paulus, kaba, en ouwada aud gigbaba en maga gini. Hanoba en eij bamuhum enahabi, en emagaigeij en dara mohumes toua. Sug en agaigeij en dara mohumes dauwohob, kaba, en oho mer debin lusud, endagai: Yen meigdoc emeijesero. Anai en emomom deitero, doba en eisa mena agau ucugwohob. 20:11 Sug en oho mer debin len dauwohob, kaba, en eisaugb se dimei se taiba ucugb. Hanoba en ekeba ared dou emen naugb sug emen emaugwan emet ared dag sogomera mohu ucan gin toua. Sug emen emetara bouwohob, kaba, Paulus esulou lusud se tu ingga, dara enara bad len merdoc mes deit, terimda lona esgohob, kaba, emen emeihwededau len toua. 20:12 Doba Eutikus mosur, kaba, len lahwan en ucugb se mena men tu, dara len merdoc esgiraha namcir. Anai en emomom deitero, doba en eisa mena agau ucugwohob. 20:13 Doba sug emen emeihwededau Troas gini, kaba, Paulus arougb emen, endagai: Yen yeisa ij ino dan indin dig Asos. Hanoba yen yeigtou sungga naugb dan terimda dan dedacu yenahabi, maman maugwan mamaingmo ij dau sungga deitda. Anai dan, kaba, dan doci mebera dous. Sug en arougb emenohob, kaba, emen emeisa ij dau sungga terimda emen emdeigtou naugb en se Asos. 20:14 Dangga sug en toua edacu emen inegohob, kaba, en aingmo ij desij emen. Hanoba emen emaugwan emeisa ij dau sungga dig cinogo Metilene geb se lomos hom, moho Asos. 20:15 Dau sungga, kaba, emen emeisa ij terimda loneindahabi, emen ememedebeij cinogo hom geb irir lomos Kios. Dara lona hom debin gin deit, kaba, emen emedebeij lomos, moho Samos. Hanoba emen emeisa ij dau sungga terimda lona hom debin gin deitahabi, emen ememedebeij cinogo Miletus toua. 20:16 Emen emaimo dag gini, anai Paulus en emouwan naugb emeba terberba se leng Asia meren hancob deitero. Doba en ouwan eijeijo dedemeda se Yerusalem naugb lougwanara debin Lona w Pentakosdahabi. Dangga hang, emen emedebeij cinogo Epesus touahabero. Doba emen emekirsa namcir dig Miletus dous. 20:17 Dangga sug emen emedebeij Miletus inggohob, kaba, Paulus en esa mer naugb mougtir dau goucimdeb se Epesus, dauntoba len laugwan len aud en sungga dous. 20:18 Sug len laugwan ledebeij enohob, kaba, en enara dou len, endagai: Dan indagunerij, dara dan indamouwerij, yenin yecinaga dau indan geicara sug dan deinesa leng Asia meren hancob gin sug aimougtut terimda edebeij lona sug dan deihwededau yen, kaba, dag dan demeigdoumesa danin indoho an indan geicara mougwa hom deseino yen touwero. 20:19 Doba sug dan desai maman Adehsud en moro dou yen sug nosa gini, kaba, dan deicara daimo augwan gini dara dan indoc arjaga deseino yen dous. Anai enin eng eigdoumesa dan naugb ginohob. Dangga hang, dan demarges dau indan geicara gin deb touwero. Doba dan deicara daimo augwan gini dara dan indidruh eisa dan indiresi toua terimda. Anai leng Yahudi lohw merdocedoum naugb len leic gogom dou dan mougwa einyanohob. 20:20 Dara yen yecinaga dag areg maman Adehsud en arougb dan naugb dan desai dou yen gin, kaba, dan demaiyan moho hom deb dau yen touwero. Doba dan desai Mer Geigouhw gini augwan dou yen dous. Anai augwan gin, kaba, oho geigouhw dou yen namcir. Dara dan dedidib men meijouhw augwan asesa se usmougb goujeiji dara meijen tu dou yen touohob. 20:21 Hang dan desulou leng Yahudi dara lugmahara len laugwan dara goubesa namcir dag len lemaimo meren sesar toua deitero. Doba len leineg dau aud ELOHIM naugb len laimo areg en arougb len an gin dous. Hanoba len merdoc ebdebin an maman Adehsud Yesus gin terimda. 20:22 Doba iteitogin, kaba, dan deihwededau yen dig Yerusalem ucugb deit. Anai gini aimo dau areg Mena Gogoufu arougb dan an ginohob. Dara dan demecinaga dau areg obsara debin dan sungga touebma. 20:23 Doba dan decinaga dau astesda cinogo areg dan deinesa naugb dan desai Mer Geigouhw eisaugb Yesus dou lusud, kaba, len leic mog erij dou dan, dara len louf dan se tu gesisug toua. Aremer hom gin, kaba, dan decinaga dag misen namcir. Anai gini aimo dau areg Mena Gogoufu ens dou dan sug nosa touohob. 20:24 Doba sug lusud leic gomom dou dan, era sug len lamsoho dan indina agau toua, kaba, gini emesloulougb naugb danero. Doba areg esloulougb namcir, kaba, dag dan demarges dau areg maman Adehsud Yesus en arougb dan an gin deb touwero. Doba dan daimo augwan gin terimda edebeij sug ouwedocahabi. Anai en ouwan naugb dan desai Mer Geigouhw gin dou lusud, dauntoba len lecinaga dag ELOHIM medoc eineg an lenohob naugb sug en oiharaga len ucugb toua deit. 20:25 Dara sug dan dedebeij yen sug nosa, kaba, dan desai dau sug ELOHIM oiharaga lusud ucugb men meijouhw augwan dou astesda yen yaugwanohob. Doba dan decinaga dag dau lona gin, kaba, sud hom ingma dau yen en emeiya dan indibes toua deitero. 20:26 Dangga hang, sug sud hom dau yen en eihweda se dum smougb, kaba, en mogwihi emeb se dan insira touwero, doba ogdoc enin dous. Dan dacgeij ELOHIM ouma debin gini se lona gin toua, dag areg dan den dau gini, kaba, augwan se geica namcirohob. 20:27 Anai dan demaiyan areg ELOHIM esedeb naugb lusud gini moho hom dau yen touwero. Doba dan desai gin augwan dag misen dou yenohob. 20:28 Dangga hang, yen yebehnehino yenin meigdoc mes dougwo areg gecgu augwan namcir. Dara yen yesedougwo meijen logodeh se goucimdeb len laugwan dau gin toua. Anai Mena Gogoufu eigdoumesa yen dag mougt naugb yen yesedougwo lenohob. Dara yen yemarges len debero. Doba yen yagauwesa ELOHIM men lusud gini dara geigouhw namcir, aninim dag gembala sug en agauwesa men domba toua. Anai sug ELOHIM Meisi mohora hom gini en omom naugb meren sesar dag gin, kaba, ELOHIM eigdoumesa len laugwan dag en mogwihi mogo len dag misen, ogdoc en Meisi men geicara gin touohob. 20:29 Dan desulou yen dag gini, anai dan decinaga dau sug dan deihwededau yenohob, kaba, dag gembala areibahau leinyana leinesa debin meijen domber gin toua. Dara len gin, kaba, len merdoc emeineg an meijen logodeh touwero. Doba len lesai mer areibahau dou len, dauntoba len laugwohosa len naugb len laijahasero dau ucina aud maireseb menau geb huhugb gin dous. Hang meren geicara gin, kaba, dag mihiloro, anai len merdoc toua mog mog namcirohob. 20:30 Dara gin dousero. Doba lona daiyamo gacin, kaba, merug hosa dau yenin meijen mougtir, len toua lebiji naugb len laugwohosa meijen domber gini. Dauntoba len lemaimo yen deitero, doba len lobsara dau yen naugb len laimo len dous. 20:31 Dangga hang, yen yemarges dau sug yen yemesedougwo meijen domber ginero. Doba yen yesedeh yauweila dougwo len terimda. Dara yen meigdoc moc dougwo areg dan desai dou yen touwero. Doba yen meigdoc eiseisan terimda toua. Anai dan, kaba, dan demarges dau areg dan desai dou yen gin mougwa hom touwero. Doba astesda lona loba se arisogomoc homoi, kaba, dan desai augwan gin dara dan indidruh eisa dan indires dou yen touohob. Anai len gus leic mog erij mougwa einyana dou dan icira ginohob. 20:32 Dangga iteitogini, kaba, dan dogugwo yen yaugwan deb se ELOHIM en mesira, naugb en eseyeiyo yen dougwo areg gecgu augwan namcir. Anai dan demeigtou desij yen deitero. Dara dan dogugwo yen se en mer areg dan debedbed dou yenohob, dag ELOHIM medoc eineg an yen, hanoba emoungben yen dougwo areg gecgu augwan toua. Anai ELOHIM men goubesa edeinyum naugb en ousa yen, dauntoba yen yeiji dag lusud mos se Krisdus toua namcir. Dara areg en esedeb naugb en eic dou yen se lona daiyamo gacin, kaba, en mobisamougb naugb en emeic geigouhw augwan gini dou yen toues. Anai en ouci yen debinim naugb enohob. 20:33 Dara sug dan desai Mer Geigouhw gin dou yen sug nosa gin, kaba, dan demebedbed naugb demarei meijen perag, dara emas, dara sansun mougwa hom dau yen touwero. 20:34 Doba yen yenin yecinaga dag dan deic dan indug erij naugb dan deicarahabi, dan demauma ara ara naugb danin dara dan insir gedig len laimo dan touohob. 20:35 Dangga indan geicara augwan gini, kaba, dag ansins deinaugb yen. Dauntoba sug yen yeic meijuwemougb esesa, aninim dag dan, kaba, meijen ara ara inggebga naugb sug yen yousa leng areber, dara leng meraga omomtom, dara leng mecicgu len laugwan toua namcir. Anai gini aimo dau areg ELOHIM ogod an deinaugb yenohob. Hang eigouhw naugb maman mamdoc eiseisan areg maman Adehsud Yesus enin en dou men logodeh sug nosa touohob, endagai: Gareg en emecgun mesira debin men aremougwero, doba en agaha mesira an dou leng mecicgu dara leng lomomtom, kaba, ELOHIM eic geigouhw dou en edreg dau sud hom areg en ehig debin. Hanoba en ouwan naugb sug leng gus leic ara ara dou en dous. 20:36 Sug Paulus enara dou len bouwa dauwohob, kaba, len laugwan lecgun merohorbrida ladedeij cinogo. Hanoba en ocuncum aga len toua. 20:37 Sug len leisa lesa ucugwohob, kaba, len laugwan lani en, dareg len leb medam namcir. Anai en enara dou len dag len lemeiya en mebes deitero. 20:38 Hang areg en en gin, kaba, eic dag len merdoc momogo edreg dau areg gus augwan touohob. Sug len lani enohob, kaba, len lou merufesa en. Hanoba len lahwan en se ij mes toua.

Watti'u Manga Rasul 21

21:1 Sug mougtir dau goucimdeb se Epesus graga lahwan emen se ijohob, kaba, emen emou len. Hanoba emen emaingmo ij dau len toua. Sug emen emeisa ij dau lenohob, kaba, emen emeisa ij namcir se lomos hom, moho Kos. Dangga se loneinda deit, kaba, emen emeisa ij dau sungga terimda emen emedebeij lomos hom, moho Rodos. Dau sungga deit, kaba, emen emeisa ij namcir terimda emen emeigdoc leng Likia meren hancob hom, moho Patara. 21:2 Se Patara gin, kaba, emen emesma ing medam hom geihwededau sungga dig leng Pinisia meren hancob deit. Dangga sug emen emeisaugb ingmesohob, kaba, emen emededau sungga toua. 21:3 Sug emen emaingmo ij dag ginohob, kaba, emen emogod dobogougb dig leng Siria meren hancob namcir. Dangga sug emen emeiya Lomos Siprus, doba eb ucugb dig emsira metigohob, kaba, ij edreg an emen namcir, terimda emen emedos leng Siria meren usi hom, moho Tirus toua. Anai leng leisa ij ingga len louwan leida meren aremougb ingma deb sungga dauwahabi. 21:4 Dangga sug emen emesogwa dau ij dig lonogohob, kaba, emen emehilon dougwo leng merdoc ebdebin an Yesus sungga toua. Sug emen emesma lenohob, kaba, emen ematou desij len se ari hom deb sungga toua. Doba sug emen emeigtou desij len dag gini, kaba, len len dougwo Paulus dag en emeihwedig Yerusalem touwero. Anai Mena Gogoufu ens dou len dag leng Yahudi lesedeb gogom naugb enohob. 21:5 Doba Paulus en emouman len merir an areg len len inggaro. Dangga sug emen lona naugb sug emen emeigtou desij len sungga edeinyumohob, kaba, emen ememeigtou deitero. Doba emen emeihwededau len naugb emdaingmo ij deitda. Sug leng Krisden sungga leiya dau gini, kaba, len leilan mersouwer dara merihir laugwan naugb len larougb emen terimda dig liga medigo toua. Dangga sug emen emedebeij dum meberohob, kaba, emen emaugwan emohorbrida emadedeij cinogo. Hanoba emen emocuncum deb sungga. 21:6 Sug emen emocuncum dauwohob, kaba, emen emoum. Hanoba emen emaingmo ij dau len toua. Doba len, kaba, len lecicugb dig meren tueda. 21:7 Sug emen emaingmo ijohob, kaba, emen emeisa ij namcir dau Tirus ingga dig Pitolemais deit. Sug emen emedebeij cinogo inggohob, kaba, emen emdeiya leng merdoc ebdebin an Yesus sungga naugb emen emou len. Hanoba emen ematou desij len sungga se lona hom toua. 21:8 Se loneinda deit, kaba, emen emeisa ij dau sungga terimda emen emedebeij Kaisarea. Dangga sug emen emesogwa dau ijohob, kaba, emen emeihweda se sud hom gesai Krisdus moro, moho Pilipus, en men tu naugb emen ematou desij en sungga. Sud hom gin, kaba, dau lusud merug senggai gedig goucimdeb se Yerusalem louci len naugb len lekeba aremougb an leng debdesir sug nosohob. 21:9 Dara en mehider ligdob merug hogu sungga, kaba, ELOHIM eic mou ouforoho dou len naugb len lesai ELOHIM Mer Geigouhw eisaugb Krisdus gin dou lusud touohob. 21:10 Doba sug emen emeigtou sungga se lona aibibrohob, kaba, sud hom gesai ELOHIM moro, moho Agabus, en en dau Yudea naugb en edebeij emen sungga toua. 21:11 Sug en edebeij emenohob, kaba, en eic Paulus men hwigbei mos dau meihw. Hanoba en ohud enin mohora dara mesira darem toua. Sug en ohud dag ginohob, kaba, en enara dou emen debin gini, endagai: Sud hom gedig men hwigbeimos gin sug en edebeij Yerusalemohob, kaba, leng Yahudi lemohud en mohora dara mesira hwas darem dag dan gins. Hanoba len lemohw en se lugmahara merisira toua. Anai gini aimo dau areg Mena Gogoufu ens deb dou danohob. 21:12 Sug emen emouman Agabus mer an ginohob, kaba, leng Krisden se Kaisarea emen emaugwan emen dougwo Paulus dara goubesa namcir, dag en emeihwedig Yerusalem touwero. 21:13 Doba Paulus enara bauni emen emir ucugb, endagai: Dagiro, naugwe hang, yen yeb an dan dag gina? Yen youwan yeic dan indoc meh obogougb dou danei? Era dagiro? Naro, yen yemeicara dag gini dou danero. Anai sug leng se Yerusalem lagaigeij dan, hanoba len leic gomom dou dan toua. Doba augwan gin, kaba, inggaida. Anai dan desedeb dan indoc mes naugb dan dohw dan indugt edug icira sug dan dedag maman Adehsud Yesus men sogougb ginohob. 21:14 Dangga sug emen emeiya, doba en ohoiya emen emir dag gin namcir, kaba, emen ememen dougwo en deitero. Doba emen emamsoho en. Hanoba emen emenara doum, endagai: Inggaida, maman maimo areg maman Adehsud enin ouwan naugb en dous. 21:15 Sug emen ematou sungga se lona aibibra debin ginohob, kaba, emen emed emen aremougb augwan debinim. Hanoba emen emeihwededau len dig Yerusalemeda. 21:16 Sug emen emeihweda, kaba, emen emsir leng Krisden merug hosa dau Kaisarea ingga len toua laimo emen naugb lahwan emen aud sud hom dau Lomos Siprus, moho Menason, se men tu. Anai en edag Yesus men logodeh sug aimougtutohob. Hang emen emesedeb naugb sug emen emdatou desij en toua. 21:17 Sug emen emedebeij se Yerusalemohob, kaba, emen emsir leng Krisden sungga len laugwan lebin emen dara len merdoc agahugouhw an emen namcir. 21:18 Se loneinda deit, kaba, Paulus dara emen emaugwan emeihweda naugb emen emdeiya Yakobus dara mougtir dau goucimdeb len laugwan se men tu toua. Anai len laugwan lacinim deb sungga naugb emenohob. 21:19 Sug Paulus ou len laugwanohob, kaba, en ecic dau ELOHIM men geicara dou lugmahara ogdoc en meijouhw augwan asesa dou len toua. 21:20 Sug len louman dau augwan ginohob, kaba, len lagahugouhw an ELOHIM namcir. Doba sug len lagahugouhw an ELOHIM dauwohob, kaba, len lesulou Paulus an aremer hom ucan gin deit. Hanoba len lenara dou en, lendagai: Emsi, eigouhw naugb emen emens dau leng Yahudi se cinogo gini merdoc mes augwan asesa dou banahabi. Dauntoba ban becinaga dag misen namcir. Anai leinyana gougwa dau len, kaba, len merdoc ebdebin an Yesus dag misenohob. Doba len lemarges dau Musa men gomnomna gin touebma. Doba len leic meruwemougb esesa naugb len laimo augwan gin toua terimda. 21:21 Hang len merdoc esrougb medam an ban. Anai len louman dag ban ben dougwo leng Yahudi gedig len leigtou se lugmahara meren cinogo dag len lemaimo Musa men gomnomna augwan deitero. Dara len louman dag ban besulou leng Yahudi ingga naugb len lemec len merihir merus dau, dara len lemaimo mamang Yahudi maman gaben augwan toua deiterohob. 21:22 Dangga emen emehilon ucina dagiro naugb bana? Anai emen emecinaga dag cum, kaba, leng Yahudi gini len louman dag ban abugwengga se cinogo gin touohoba? 21:23 Doba emen emsir merug hogu gedig len lehig dau ared, kaba, len toua merugwengga sugini. Dara meren lona naugb sug len legina merugt modi dau, kaba, toua ebeij deinyorohob. Dara emen emsir gedig len los dou ELOHIM dag len lehig dau ara ara, kaba, len toua merugwengga sugini. Doba len laimo areg gogor deitohob. Dangga hang, areg emen emesulou ban an, kaba, dag gini: 21:24 Lonehibi, kaba, ban bahwan len dig ELOHIM Men Tuari. Hanoba ban bouma ara ara dou len naugb len laimo ucina areg Musa men gomnomna arougb maman anohob naugb sug len lecabeci deseino ELOHIM toua deit. Dara ban bousa len dag gini se lona senggai, aimo dau areg Musa arougb maman an touohob. Dangga sug len lecabeci deseino ELOHIM namcirohob, kaba, ban bouma aremeta dou len toua. Dauntoba len leic lauwaharo dou ELOHIM naugb meren areg gogor sug edouwedoc gin toua. Hang len legina len merug modi dag ansins debin gin, dauntoba lusud lecinaga dag len lemogor deseino ELOHIM deitero, doba len lecabeci deseino en namcirohob. Hanoba len laimo areg len lehig dau terimda sug edebeij toua deit. Dara ban toua baimo merug hogu gin audi ucina gecabeci gini, anai ban beigtou desij leng lugmahara touohob. Ban beicara baimo dag gini, dauntoba sug leng Yahudi leiya dau gin, kaba, len lecinaga dag areg len gus len dou len eisaugb banohob, kaba, augwan dag misenero. Doba dag len lereiyaresa ban dous. Anai aban geicara gin, kaba, ens dou len dag ban toua bemarges dau Musa men gomnomna touebma. Doba ban bos agadgeij terimdaba. 21:25 Doba eisaugb lugmahara gedig len merdoc ebdebin an Yesusohob, kaba, emen emog surad dou lenohob dag len lemet areg lusud lasijaresa dou seiseij. Dara len lemeg mogwihi. Dara len lemet mog gedig mogwihi omgomsa. Dara len lemohw len meraga aibibra doum touwero, anai gini aimo dau areg maman magod an deb dangga naugb lenohob. 21:26 Dangga se loneinda, kaba, Paulus, en aimo merug hogu graga se ELOHIM Men Tuari. Hanoba len laimo areg Musa men gomnomna arougb len anohob, dauntoba len lecabeci deseino ELOHIM toua. Sug Paulus aimo augwan dag en ecabeci deseino ELOHIM deitohob, kaba, en einesa ELOHIM Men Tuari, dauntoba en ens dau merug hogu graga meren lona naugb sug len louwaharo dou ELOHIM deit dou leng Yahudi laugwan sungga toua. Dangga sug en edebeij lenohob, kaba, en enara dou len, endagai: Ari hom debin gin, kaba, astesda dau merug hogu gini len louwaharo dou ELOHIM. Anai meren lona naugb sug len lecabeci deseino en deit, kaba, augwan edeinyumohob. 21:27 Doba sug ari hom gini deinyor sug ouwedocohob, kaba, leng Yahudi merug hosa dau leng Asia meren hancob len leiya Paulus se ELOHIM Men Tuari gini. 21:28 Dangga sug len leiya en inegohob, kaba, len lagaigeij en. Hanoba len longgoij lusud debin en toua, lendagai: Yeng dau mamang Israel, yen yousa emenahabi. Anai sud hom gin, kaba, en eihwedig sungga sungga, hanoba en enara bedegeing mer an mamang Israel, dara Musa men gomnomna, dara ELOHIM Men Tuari gin toua terimda. Dara en emedegeing mer dag gin dousero. Doba iteitogini, kaba, en eic gogor dou ELOHIM men usi gecabeci gini. Anai en ahwan lugmahara len leinesa usi gin touohob. 21:29 (Len longgoij leng Yahudi gus dag gini, anai dag gibeca, kaba,len leiya Paulus mesi hom dau lugmahara, en moho Tropimus dau cinogo Epesus, en oucan Paulus se cinogo Yerusalem inggohob. Hang len loudesa endag Paulus ahwan en toua se Tuariohob.) 21:30 Sug leng Yahudi louman dau gin, kaba, eic dag leng se Yerusalem len laugwan lebara eijideijo medam namcir. Hanoba len laugwan lobgen naugb louwa debin Paulus naugb lagaigeij en. Sug len lagaigeij enohob, kaba, len lohugouhw en dau Tuari mes ingga dig medigada. Sug len lohugouhw en dig medigo inegohob, kaba, len louf misis gouji geb dougwo Tuari ingga dougwo en namcir. Dauntoba en emeinesa Tuari dougwo lenlo. Anai sug en einesa dougwohob, kaba, len merisira ogom naugb len lemogod en deitero. 21:31 Dangga sug len louf misis dougwo enohob, kaba, len louwan leic gomom dou en namcir. Anai len laugwan mereiyeba lenohob. Doba ligbum, kaba, len lesa merir laic mougt mera medam dau leng Roma meren sadodor dag leng se Yerusalem len laugwan lebara eijideijo medam namcirohob. 21:32 Sug mougt mera ingga ouman dau gin inegohob, kaba, en ouci meren gedeijan, dara men logodeh merug aibibra, dara eni. Hanoba len laugwan locda dedemeda aud leng lebara eijideijo gragada. Sug leng lebara eijideijo ingga len leijesan, doba en agunyen an men logodehohob, kaba, len lemogod Paulus deitero. Doba len larges merisira dau en namcir. 21:33 Sug len ledebeij lenohob, kaba, sadodor meren mougt graga, en en aud Paulus naugb en agaigeij en toua. Hanoba en arougb men logodeh naugb len leic lanta hwas lahud mesira hwas darem namcir. Sug len lecba enohob, kaba, mougt mera ingga, en eijidougwo leng Yahudi ingga an en ucan gin toua, endagai: Sud hom gini garena? Dara men geicara toua dagiro? 21:34 Doba len lemens aremer ingga ingma dou en touwero. Anai ligbum, kaba, len lenara dag gaih. Doba ligbum, kaba, len lenara dag gaba, terimda len laugwan lenara merir edregim namcir. Dangga sug mougt mera ingga en emecinaga areg acgunog gin meijouhw asesa touwero, kaba, en arougb men sadodor naugb len lahwan Paulus aud meren tueda. 21:35-36 Doba leng lebara eijideijo gin, kaba, len leila ucan len namcir. Hanoba len leija se mer gouji dou sadodor ingga, lendagai: Yen yarges dou emen naugb emen emeic gomom dou en dous. Dangga sug len lahwan Paulus terimda edebeij igdecgwa meiyohob, kaba, len leigdoumesa en taibeibahabi, len lemeisaugb an dig tueda. Anai leng Yahudi gin, kaba, len leicara dag mereiyeba len namcirohob. 21:37 Sug len leisaugb an en terimda len ledebeij misis mocohob, kaba, Paulus ec Grika mer bacgeij mougt mera ingga naugb en enara dou enahabi. Sug mougt mera ingga en ouman Paulus acgeij en se Grika mer dag gini, kaba, en eimiman dau gin namcir. Hanoba en enara dou en, endagai: Dan douman dag ban becinaga Grika merohob. 21:38 Dangga hang, dan decinaga ban bemedag sud hom dau leng Mesir gia gin touwero. Anai sug nosa, kaba, sud hom gini en ococi leng Yahudi merdoc mes naugb len locirma emen Roma dau meren cinogohob. Hanoba en ougwan merug ribu hogu dau leng merug mog se lomougwisa toua. 21:39 Doba Paulus auni en mer ucugb, endagai: Dan toua dau leng Yahudi dau cinogo moho agas hom, moho Tarsus, se leng Kilikia meren hancob. Dangga hang, sug ban abdoc esgirahesa, kaba, dan douwan denara dou leng Yahudi gaihahabi. 21:40 Sug mougt mera ingga ousa deisa Paulus mer an ginohob, kaba, Paulus eihweda besesa igdecgwa mougt. Hanoba en eh mesira dougwo len, dauntoba len lodina anirahabi. Dangga sug len lodina anirohob, kaba, en ec Ibrani mer benara dou len toua. Hanoba en enara dou len, endagai:

Watti'u Manga Rasul 22

22:1 Dan indagunerij, dara dan indinerij, yen youman sug dan dens dau danin meijouhw augwan asesa dou yenahabi. 22:2 Sug len louman, doba Paulus ec lenin merir benara dou len dangga, kaba, len laugwan lodinanir namcir. 22:3 Sug len lodinanir namcirohob, kaba, Paulus ebiji naugb enara dou len deit, endagai: Dan toua dau mamang Yahudi. Dara dan indim ouwadan dan deb se Tarsus, se leng Kilikia meren hancob. Doba dau sug dan dedag dugdeh terimda dan dedag sudohob, kaba, dan deigtou se Yerusalem gin dous. Dara sud hom, moho Gamaliel, en ens dau gomnomna gedig Musa eic dou maman mamjemouwer meijouhw augwan asesa dou dan toua. Anai en mou ouforoho se Musa men gomnomna gin namcir. Hanoba en arautut dan toua, dauntoba dan demedreg Musa men gomnomna gini mougwa hom touwero. Doba dan daimo gin augwan dara dan indoc hom toua terimda. Hang dan demobsara dau gomnomna gin hom touwero. Doba dan deic gerleij naugb dan daimo areg ELOHIM arougb dan an gini augwan, aninim dag yen se lona gin toua. 22:4 Dangga, kaba, ligiji dara ligida areg en esogwesa sud hom moho Yesus se men ucina menau gin, kaba, dan dagaigeij len. Hanoba dan douf len laugwan se tu gesisug namcir. Dara ligbum dara len, kaba, dan deic mog erij dou len terimda len lomom icira gin toua. 22:5 Eisaugb aremer gin, kaba, Gembala Gesa Taij Meren Mougt Mera Medam an Majelis laugwan, len toua lecinaga dag areg dan den dou yen gin, kaba, dag dan demereiyara dou yen touwero. Doba dan denara augwan se geica dou yen namcir. Anai sug nosa, kaba, len log surad dara dan naugb maman mamsir leng Yahudi se cinogo Damsig touohob. Dauntoba len lousa dan naugb emen emagaigeij leng lesogwa deisa Yesus men ucina sungga toua. Dangga sug len leic surad gin dou danohob, kaba, dan deihwedan naugb dedagaigeij len. Hanoba dan dahwan len se Yerusalem gin naugb sug leic gogom dou len toua. 22:6-7 Doba sug dan deihweda dedebeij deinyor Damsig se igdabogohob, kaba, mouf gohonohona medam hom ouwaden dau bogo augwougb. Hanoba erbacec dan sungga toua. Dangga sug dan deila dau kuda medgomori dainda cinogohob, kaba, dan douman mer hom enara dou dan, endagai: Saulus, Saulus, ban beic mog erij dou dan, anara? 22:8 Dangga dan dauni en mer deit, endagai: Adehsud, bang gara? Doba en auni ucugb dou dan, endagai: Dang Yesus dau cinogo Nasared gedig ban beic mog erij dou danohob. 22:9 Dara dan insir gedig len loucan dan gin, kaba, len toua leiya mouf graga. Doba sud hom genara dou dan gin, kaba, len lemouman en merero. 22:10 Sug en auni dag graga dou danohob, kaba, dan deijidougwo en deit, dendagai: Adehsud, ban bouwan dan deicara dagiro naugb ban deita? Hang en emauni dou dan, endagai: Ban beisa beihwedig Damsigedahabi. Anai sungga, kaba, lusud lemens dau areg ELOHIM esedeb naugb sug ban beicara baimo augwan asesa dou ban toues. 22:11 Dangga, kaba, dan insir len los dan insira dig Damsigeda. Anai mouf medam graga, kaba, ogod dan indires ebeigbogo dougwo sug dan demeiya lo asesa deiterohob. 22:12 Doba se cinogo Damsig gini, kaba, sud hom, moho Ananias, en toua moongga. En esijaresa ELOHIM dara en medoc augwan namcir. Dara en aimo Musa men gomnomna augwan toua. Dangga leng Yahudi se cinogo Damsig ingga, kaba, len laugwan leigdoumesa en moho agas medam toua namcir. 22:13 Enin eng en en aud dan se tu sug dan deigtousa. Sug en edebeij danohob, kaba, en enara dou dan, endagai: Indaguna, Saulus, ban besga ban abires naugb ban beiya lo asesa ucugb deit. Sug en enara dou dan dag gin inegohob, kaba, dan indires esga. Hanoba dan doho dan indirgo naugb dan deiya en toua. 22:14 Sug dan indires esgohob, kaba, en enara dou dan deit, endagai: Maman mamjemouwer meren ELOHIM en ouci ban naugb en ens dau areg en esedeb naugb lusud meijouhw augwan asesa dou ban. Dara en eigdoumesa ban aboho naugb en ens men sogougb mohora hom gen aimo areg asesa enin medoc mes, moho Yesus, en mog dou bani. Hanoba en ouci ban naugb sug ban bouman men sogougb gin en mer touohob. 22:15 Anai ELOHIM en ouwan naugb areg ban beiya dara boumanohob gin, kaba, ban bos badi dou lusud se cinogo augwan toua terimda. 22:16 Dangga hang, ban bemeigtou terimlo. Doba ban beisa naugb lusud logun ban se duhu. Hanoba ban bacgeij ELOHIM naugb sug en oguc dougwo aban sesar augwan ediyebeiya dau ban toua. 22:17 Sug Ananias esulou dan dag gin dauwohob, kaba, dan decicugb se Yerusalem gini. Dangga sug dan dedocuncum se ELOHIM Men Tuari gin, kaba, Mena Gogoufu ogod dan dag domom namcir. 22:18 Hang dan deiya Adehsud Yesus sug en enara dou dan, endagai: Ban bemeigtou se Yerusalem gin deitlo. Doba ban beihwededau len dedemeda namcir. Anai areg ban besai dou len eisaugb dan, kaba, len lemeic ban abir an gin deitero. Doba len lasidged ban an gin terimda. 22:19 Doba dan dauni ucugb dou en deit, endagai: Adehsud, dan deihwedaud len dagiro? Anai leng Yahudi gini len lecinaga dag sug nosa, kaba, dan deinesa meren tuari augwan naugb dan dagaigeij, dara dan deic mog erij dou leng merdoc ebdebin an ban len laugwan touohob, gina? 22:20 Dara sug Sdepanus os badi ban aboho deseino len sug nosa, hanoba len leic igdahab lad en bomom, kaba, len lecinaga dag dan toua indoc aninim dara lenohob. Anai sug len leic gomom dou en, kaba, dan toua indugwengga desij len. Hanoba dan dos meren sansun augwan dau len, bansins dag dan dousa deisa len an sug len leic gomom dou en touohob. 22:21 Doba Adehsud en auni ucugb dou dan deit, endagai: Ban bemehig debero. Doba ban beihwededau suginda. Anai dan desa ban aud lugmahara gedig len lemec merus daubuma naugb ban besai dan induro dou len toua. 22:22 Sug Paulus ecic dau aremer gus augwan, kaba, len lesa lodinanir namcir. Doba sug len louman dag Adehsud eigdoumesa en naugb en edesai en moro dou leng lemec merus daubuma, kaba, len lemesa lodinanir deitero. Doba len lesa merir medam, lendagai: Sud hom gedag gin, kaba, yen yemamsoho en debero. Doba yen yeic gomom dou en namcir. Anai emedeinyum naugb sud hom gin en maireseb emeb touwero. 22:23 Sug len lesa merir medam dag gin, kaba, ligbum len lekris sansun icira merus. Dara ligbum, kaba, len lasgun cinogo mor. Hanoba len lerba augb bogo mor ouf namcir toua. Anai len lauwam endag Paulus mer hom gini, kaba, eic ELOHIM moho bacecimohob. 22:24 Sug sadodor meren mougt mera medam en ouman dau gin, kaba, en arougb men logodeh, endagai: Yen yahwan sud hom gin se dimei mes. Hanoba yen yabosbos en sungga, dauntoba en esga dau areg leng Yahudi leisadesan graga moho asesa dou mamanahabi. 22:25 Doba sug leng sadodor ledohud en mesira hwas darem naugb sug labosbos enohob, kaba, Paulus eijidougwo leng sadodor meren mougt hom gesa deinyor en sungga, endagai: Eigouhw naugb yen yabosbos sud hom gedig leng Roma meren mougt mera medam en moho aiga enohob augwougb sug yen yemogod aremer naugb enbumei? 22:26 Sug mougt gesa desij en ingga ouman dag gin, kaba, en eihwedaud men mougt mera naugb en edecic dau aremer ingga dou en toua. Dangga sug en edebeij men mougt mera ginohob, kaba, en en dougwo en, endagai: Ban barougb emen naugb emen emabosbos sud hom gin augwougb anara? Anai leng Roma meroho aiga en touohob, gina? 22:27 Sug mougt mera ingga ouman dau gin, kaba, en eihwedaud Paulus naugb edeijidougwo en an gin deit, endagai: Ban ben dou danahabi, leng Roma meroho aiga ban dag misenohobei? Era naroei? Dangga Paulus ousa deisa en mer an, endagai: You, leng Roma meroho aiga dan touohob. 22:28 Sug mougt mera ingga en ouman gini, kaba, en ousa deisa Paulus mer, endagai: Dan toua leng Roma meroho aiga danohob. Doba dan deic aregoufu einyana dou lenahabi, len lemeigdoumesa dan toua. Doba Paulus auni dou en deit, endagai: Dan, kaba, leng Roma meroho aiga dan teitei, dau sug dan indim ouwadan danohob. Anai dan indina dara dan indim lan, kaba, leng Roma meroho aiga lan sug nosohob. 22:29 Sug sadodor louman dau gin, kaba, len lemobosbos enero. Doba len laisacij dau en namcir. Dara mougt mera graga en toua ahau medam. Anai en ecba sud hom gedig leng Roma meroho aiga enohob en mesira augwougb dara ranta touohob. 22:30 Doba mougt mera graga, kaba, en ouwan ecinaga dag aremer ara, hang leng Yahudi lemahacugb gogom debin Paulus gina? Dangga se loneinda deit, kaba, en esa mer dou gembala gesa taij meren mougtir dara Majelis, dauntoba len laugwan lacinimahabi. Sug len laugwan lacinimohob, kaba, en arougb men sadodor naugb len lesga ranta dau Paulus mesira. Hanoba en ahwan Paulus deseino len laugwan toua.

Watti'u Manga Rasul 23

23:1 Sug Paulus esa deseino len laugwanohob, kaba, en auweila len toutou. Hanoba en enara dou len, endagai: Indagunerij, indagtorij, dan decinaga dau sug nosa terimda edebeij iteitogini, kaba, aremer hom emagunya dau dan deseino ELOHIM touwero. Doba dan indoc ouma debin dan dag indan geicara esogwa deisa men gomnomna augwan dag misenohob. 23:2 Sug Gembala Gesa Taij Moho Agas, moho Ananias, en ouman dag gin, kaba, en arougb leng lesa deinyor Paulus ingga, endagai: Yen yoto en mer an gin, anai en ereiyara namcirohob. 23:3 Dangga Paulus owun en moho an gin namcir, endagai: Ban beigtou sugini naugb ban bogod aremer naugb dan, aimo dau ELOHIM men gomnomna an dan toua. Doba sug ban barougb lusud naugb len loto dan dag gin, kaba, ban bedreg dau ELOHIM men gomnomna gin touohob. Dangga hang, ELOHIM emeic mor mor dag misen dou ban toues. Anai ban bedag sud hom gedig lusud leiya en maga debin dous. 23:4 Doba sug leng lesa deinyor Paulus graga len louman dau gin, kaba, len lenara debin en, lendagai: Wui. Ban beic ELOHIM men Gembala Gesa Taij Moho Agas en moho bacecimohoba? 23:5 Sug Paulus ouman dau gin, kaba, en ousa len merir an ucugb, endagai: Indagunerij, indagtorij, dan demecinaga endag sud hom gin, kaba, Gembala Gesa Taij Moho Agas ingginero. Hang dan demenara gouji dou en, anai ELOHIM en dougwo gini se Surad Injil Meb Mohon deb sug nosa touohob, endagai: Gareg en edag mougt naugb yenohob, kaba, yen yemecic en moho gohw genes touwero. 23:6 Sug Paulus ousa en mer an gin dou len dauwohob, kaba, en eija, doba ligbum dau Majelis gin, kaba, len dau leng Saduki. Dara ligbum, kaba, len dau leng Parisi toua. Hanoba en enara se mer goubesa dou len laugwan, endagai: Dani dau leng Parisi. Dara dan injemouwer, kaba, len laugwan toua dau leng Parisi. Dangga dagiro, naugwe hang, yen yahacugb gogom debin dan dag gina? Anai dan toua indoc ebdebin an lusud dag Lona Sug Ouwedoc gin, kaba, len laugwan lemeisa dau gomom ucugb toues. 23:7 Sug Paulus enara dangga dou len inegohob, kaba, leng Saduki dara leng Parisi lebiji naugb len lenara laisedim namcir. 23:8 (Anai leng Saduki, kaba, len lauwam an endag lusud lemeisa daugomom ucugb deitero. Dara len loudesa dag malaikad dara merna mog mog toua ingmaro. Doba leng Parisi, kaba, len merdoc ebdebin an homoi gin terimda. Hang Majelis laugwan lakebim dag hwai icira toua.) 23:9 Doba sug leng Saduki dara leng Parisi merir eisaugwim dag gin terimda, kaba, leng meru ouforoho se Musa men gomnomna dau leng Parisi merug hosa len leisa lesa. Hanoba len lenara lagod dougwo len merir namcir, lendagai: Emen emoudesa endag gin, kaba, malaikad era merna mog mog ingma lenara dou enohobei? Anai emen emecinaga, doba en emedreg dau gomnomna hom touwero. 23:10 Doba sug len lenara merir edregim medam namcir dag gin, kaba, leng sadodor meren mougt mera graga, en ahau endag cum, kaba, len leic Paulus anim dangga. Hang en arougb men sadodor naugb len ledahwan Paulus dau len ingga merufu dig meren tueda. 23:11 Doba se loba ingga, kaba, maman Adehsud en en besa desij Paulus. Hanoba en oho mer debin en, endagai: Ban baiyan abdocesem. Anai ban beic abus naugb ban bos badi dan dou leng se Yerusalemohob. Hang dan douwan naugb ban bos badi dan indoho dou leng se cinogo Roma dangga toua. 23:12 Dangga se loneinda deit, kaba, leng Yahudi merug hosa lacinim hom. Hanoba len lohw merdocedoum naugb sug len leic gomom dou Paulus toua. Sug len lehilon ucinohob, kaba, len louwara debin gin toua dag len lemetara dara lemegara touwero, terimda len leic gomom dou Paulus dauwahabi, len lemet dara lemeg deit. 23:13 Dara leng lohw merdocedoum dag gin, kaba, edreg dau merug sud hwai touohob. 23:14 Sug len louwara debin ginohob, kaba, len leihwedaud gembala gesa taij meren mougtir dara leng Yahudi meren mougtir gus len laugwan toua. Sug len ledebeij lenohob, kaba, len lenara dou len, lendagai: Emen emoucimdeb, hanoba emen emouwara debin gin toua namcirohob, dag emen emetara dara emegara touwero. Doba emen emehig dau terimda emen emeic gomom dou Paulus dauwahabi, emen ememet dara ememeg deit. 23:15 Hang emen emouwan naugb yeni dara Majelis yen yaugwan yog surad dou leng Roma meren mougt mera graga. Hanoba yen yerba mohoisa en, yendag en ahwan Paulus aud yen deit, dauntoba yen yehilon en an aremer gin deigeigouhw deitahabi. Dangga sug en ahwan en aud yen sugini, kaba, emen emesedeb naugb emeic gomom dou en sungga dougwohob. 23:16 Doba Paulus medamouwa meisi en ouman dau sug len lohw merdocedoum naugb sug len leic gomom dou Paulusohob. Dangga hang, en emeihweda se sadodor meren tu naugb en eden aremer gin dou Paulus toua. 23:17 Sug Paulus en ouman dau gin, kaba, en eija leng sadodor meren mougt hom. Hanoba en enara dou en, endagai: Ban bahwan godeh hom gini dou mougt merahabi. Anai aremer hom inggebga naugb sug en ens dou en toua. 23:18 Dangga sug mougt ingga ahwan godeh aud mougt mera gragohob, kaba, en enara dou en, endagai: Sud hom, moho Paulus, gedig en eigtou se tu gesisug sugin, kaba, en eija dan. Hanoba en acgeij dan naugb dan dahwan godeh hom gini aud ban toua. Anai en enara dou dan dag aremer hom inggebga naugb sug godeh gini ens dou ban touahabi. 23:19 Sug mougt mera ouman dau gin, kaba, en os godeh hom ingga mesira. Hanoba en augwohosa dou enin naugb eijidougwo en toua, endagai: Ban bouwan benara eisaugb ara dou dana? 23:20 Dangga godeh hom ingga enara dou en, endagai: Leng Yahudi meren mougtir lohw merdocedoumohob naugb sug len lacgeij ban. Dauntoba lonehibi, kaba, ban bahwan Paulus deseino Majelis naugb len lehilon en an aremer graga augwan deigeigouhw deitahabi. Doba augwan gin, kaba, dag len lerba mohoisa ban dous. 23:21 Hang ban bemobsara dou len an areg len lacgeij dau ban gin touwero. Anai lona gin, kaba, lusud merug edreg dau sud hwai len lesedebohob naugb sug len leic gomom dou en se ucina mogumsi. Dara len louwara debin gin touohob dag len lemetara dara lemegara touwero, terimda len leic gomom dou Paulus dauwahabi, len lemet dara lemeg deit toua. Dangga len leigtou naugb sug ban bousa len merir an gin dous, anai len lesedeb naugb enohob. 23:22 Sug mougt mera graga ouman dau ginohob, kaba, en oungben Paulus medamouwa meisi dougwo namcir, endagai: Areg ban ben dou dan gini, kaba, ban bemen dou leng gus hom touwero. Sug en oungben en dougwohob, kaba, en arougb godeh ingga beihweda. 23:23 Sug godeh ingga eihwededau enohob, kaba, mougt mera graga en eija men gedeijan lahwai naugb en arougb lan, endagai: Yan yasedeb sadodor merug huntun hwai. Dara leng leisa kuda, kaba, yan yauci merug dag sud homoi sisedeisu. Dara leng los kebtemaga naugb lesara, kaba, yan yasedeb merug huntun hwai. Dangga edebeij loyeiyo, kaba, yen yesedeb naugb yen yededau sugin toua. 23:24 Dara yan yasedeb kuda maga hosa naugb Paulus sug en eisa. Hanoba yan yahwan en aud w Gubernor Piliks dig Kaisareada, kaba, yen yesedougwo en dara en mena agau aud en toua. 23:25 Sug mougt mera graga arougb lan an dag ginohob, kaba, en og surad naugb Piliks en toua. Dara areg en og deinaugb en, kaba, dag gini: 23:26 Surad gini dau dang, Klaudius Lisias, naugb bang, w Gubernor Piliks, gedig ban aboho eb taiba augwan namcir, dara dan dou ban toua. 23:27 Sud hom gedig dan desa en aud ban gin, kaba, leng Yahudi lagaigeij enohob. Hanoba len louwan leic gomom dou en toua. Doba sug dan douman dag maman Roma maman mamoho aiga en touohob, kaba, dan desan indan sadodor naugb emen emeigdoc en dau len merisira, dauntoba len lemeic gomom dou enero. 23:28 Sug dan deigdoc en dau len merisira mesohob, kaba, dan dahwan en aud meren Majelis toua. Anai dan douwan decinaga dau areg len lahacugb gogom debin en an gini meijouhw augwan asesahabi. 23:29 Doba sug dan dahwan en aud Majelis lenohob, kaba, dan douman. Doba areg len lahacugb debin en gin, kaba, emedeinyum naugb sug maman maic gomom dou en, era mouf en se tu gesisug touwero. Anai areg len lahacugb debin en gin, kaba, eisaugb lenin meren gomnomna dous. 23:30 Doba sug dan douman dag leng Yahudi merug hosa lohw merdocedoumohob naugb sug len leic gomom dou en, kaba, dan dogod deinaugb en naugb dan desa en aud ban sungga dedemeda. Hanoba dan den dou Majelis dau sug len louwan lerba ara ara debin sud hom gin, kaba, dag len lenin len aud banahabi, len lemderba ara debinim deseino ban toua. Surad gini ouwedoc sugini. Dan den dou ban dag ban abiresi. 23:31 Sug mougt mera og surad dag gini dou len dauwohob, kaba, men sadodor laimo dau areg en arougb len an ingga namcir. Hanoba len lahwan Paulus terimda len ledebeij cinogo hom, moho Antipatris, toua. 23:32 Se loneinda deit, kaba, sadodor gedig len lec merohora, kaba, len lecicugb dau leng leisa kuda. Hanoba len leihweda se meren tu dig Yerusalemeda. Doba leng leisa kuda gin, kaba, len lahwan Paulus terimda len ledebeij se Kaisarea toua. 23:33 Sug len ledebeij Kaisareohob, kaba, leng leisa kuda gin, kaba, len leic mougt mera men surad dou w Gubernor Piliks. Hanoba len larges Paulus se en mesira toua. 23:34 Sug Piliks ecic surad gin dauwohob, kaba, en eijidougwo Paulus an sug en gun ucan deit. Dangga sug en ouman, doba Paulus endag en gun se leng Kilikia meren hancob, kaba, en enara dou en, endagai: 23:35 Eigouhw naugb leng loho las ban deseino dan len toua lenahabi, dan demogod aremer naugb ban toua. Sug Piliks enara dangga dou Paulus dauwohob, kaba, en arougb men sadodor naugb len lahwan en se mougt mera medam, moho Herodes, men tu gouji homahabi, len lemesedougwo en sungga toua.

Watti'u Manga Rasul 24

24:1 Lona hogu debin ginohob, kaba, Gembala Gesa Taij Moho Agas, moho Ananias, dara leng Yahudi meren mougtir merug hosa, dara sud hom genara an lusud, en moho Tertules, len laugwan leihwededau cinogo Yerusalem dig Kaisareada. 24:2 Sug len ledebeij Kaisareohob, kaba, len leisaugb aud w Gubernor Piliks naugb len loho las Paulus deseino en toua. Dangga sug len laugwan lacinimohob, kaba, Piliks eija Tertules naugb en ens dau areg leng Yahudi loho las Paulus an gini dou en touahabi. Sug Piliks eija en dag ginohob, kaba, Tertules enara bahasij gogom debin Paulus dag gini, endagai: Adehsud gedig ban aboho eb taiba augwanohob, kaba, ban abu ouforoho se aremer augwan namcir. Dangga hang, aremer gogom emeb naugb emen toua deitero. Doba ban beseyeiyo emen dougwo augwan se arisogomoc einyana. Dara sug emen emesma gecgu, kaba, ban bousa emen an gin mougwa einyana touohob. 24:3 Augwan gin, kaba, eic dag emen emaugwan emeigdoumesa ban aboho agas medam astesda lona loba an gin namcir. Dara emen emen sijo medam dou ban an gin toua namcir. 24:4 Doba dan demouwan naugb sug dan demenara emaciduhwa Adehsud ban, dau aban areg ban beicero. Dangga hang, dan dacgeij naugb ban abdoc eigouhw an emen. Hanoba ban boc ban abums naugb areg emen emerba debin sud hom gin toua. Anai emen emainyen naugb sug emen emen areg se garougb dou ban dous. 24:5 Doba sud hom gin, kaba, emen emesma en dag sud hom mog mog namcirohob. Anai se astesda cinogo sug en eihweda sungga sungga, kaba, en oho aremer debin leng Yahudi laugwan dag len lebara eijideijo terimda. Dara en edag leng laimo sud hom, moho Yesus, dau cinogo Nasared len laugwan meren mougt mera medam hom gin touohob. 24:6 Dara en emeicara gecgu dag gin dousero. Doba en ainyen naugb en eic gogor dou ELOHIM Men Tuari. Hang emen emagaigeij en icira gini. Dauwohob, kaba, emen emouwan naugb sug emen emogod gogom debin en icira gini, aimo dau emen gomnomna an en toua. 24:7 Doba sadodor meren mougt mera hom, moho Lisias, en es an men logodeh naugb len leigdoc sud hom Paulus gin dau emen emsira dara goubesa namcir. 24:8 Hanoba en arougb emen naugb sug emen emen aud ban naugb emen emerba ara debinim deseino ban dous. Sug ban beijidougwo Lisias an gin, kaba, en ousa deisa emen dag areg emen emerba ara debin en deseino ban gin, kaba, emen ememereiyara hom dou ban touwero. Doba emen emenara augwan se geica dou banohob. 24:9 Dara leng Yahudi gus, kaba, len laugwan toua louma debin Tertules an areg en enara dou Piliks, dag en emereiyara dou en touwero. Doba en enara augwan se geica namcirohob. 24:10 Sug Tertules ahacugb gogom debin Paulus dauwohob, kaba, w Gubernor Piliks en ou mesira debin Paulus, dauntoba en enara dau enin deseino en touahabi. Hanoba Paulus enara dou en, dag gini: Dan decinaga ban bedag mofu naugb ban bogod aremer an emeng Yahudi se arisogomoc einyanohob. Dangga hang, dan demahau dau sug dan demens dau aremer augwan gini meijouhw asesa dou ban touwero. Doba dan decic augwan dag misen dou ban namcir. 24:11 Anai sug dan deisaugb dig Yerusalem, kaba, dan demeigtou se lona einyanahabero. Doba dan dideisa lona sisa hobjerai naugb dedocuncum se ELOHIM Men Tuari sungga dous. Dangga hang, sug Adehsud, ban bouwan naugb behilon aremer gin deit, kaba, eigouhw naugb ban bedeijidougwo len gus an gin touahabi. Anai sug ban beicara dag gin, kaba, ban besma dag areg dan den dou ban ginohob, kaba, augwan asesa dag misen namcir. 24:12 Dara sug dan deinesa ELOHIM Men Tuari naugb dan dedocuncum dou en sungga, kaba, sud hom ingma dau leng Yahudi gin len lemeiya dau sug dan denara daised lingma dau len touwero. Doba dan docuncum dou ELOHIM dous. Dara len lemeiya dau dan sug dan doho aremer debin len se meren tu dara meren tuari, dauntoba len lebara eijideijo icira gin touwero. 24:13 Dangga hang, areg len loho las dan dou ban gin, kaba, len loho las dan augwougb dou ban dous. Anai len lemos ara hom se geica naugb gin touwero. 24:14 Doba aremer hom, kaba, dan dos dadi dou ban gin dag dan desijaresa emen emjemouwer meren ELOHIM, aimo dau areg sud hom Yesus ens dou emeng Krisden ginohob. Hang leng Yahudi gin, kaba, len lemowun emen an gin endag ucina gin, kaba, dag areibahau namcir. Dobnaro. Anai augwan gin, kaba, aimo dau areg Musa ens dou emen touohob. Dangga dan demarges dau areg eni dara leng lesai ELOHIM moro nosa len log deb gin touwero. Doba dan indoc ebdebin an augwan gin namcir. 24:15 Hang dan toua dod indina debsa ELOHIM, aninim dag leng Parisi gini, dag se lona daiyamo gacin, kaba, en emeigdoumesa leng leicara geigouhw dara leng leicara gecgu len laugwan dau gomom naugb en emogod aremer debin len laugwan toues. 24:16 Dangga hang, dan demeic induwemougb esesa, dauntoba dan indoc emowun dan an aremer hom touwero. Doba ouma debin dan dag dan daimo augwan edag beim dara obosboro an ELOHIM dara lusud len laugwan namcirohob. Anai sug dan deicara dag gin, kaba, aremer hom emdagunya debin dan se lona daiyamo gacin touwero. Doba dan decabeci deseino ELOHIM dara lusud laugwan dous. 24:17 Sug Paulus ens dau areg len merdoc edregim icira gin dauwohob, kaba, en ou meresa aremer graga ucugb se meiyo deit, endagai: Dangga hang, areg dan dedebeij Yerusalem gin, kaba, dan demen an gecgwero. Doba dan doho leng Krisden dau lugmahara meren aregoufu naugb dan insir leng Krisden dau emeng Yahudi se cinogo ingga dous. Anai sireba len namcirohob. Dara dan deisaugb se Yerusalem gada naugb dan douwaharo dou ELOHIM se men Tuari ingga toua. Anai dan dedesesa lugmahara meren cinogo gini se arisogomoc einyana dau ginohob. 24:18 Dara sug leng Yahudi leiya dan icira sug dan douwaharo dou ELOHIM se Men Tuari gin, kaba, dan daimo emen gomnomna naugb sug dan decabeci deseino ELOHIM touohob. Dangga dagiro, naugwe hang, dan demeic gogor dou ELOHIM Men Tuari gina? Dara indan geicara naugb sug leng Yahudi lebara eijideijo, kaba, hom toua ingmaro. Anai sug dan deinesa ELOHIM Men Tuari gin, kaba, sud hom ingma dau lugmahara emaimo dan touwero. Doba merug hosa dau emeng Yahudi len laimo dan dous. 24:19 Doba merug hosa dau leng Yahudi dau leng Asia meren hancob, kaba, len loudesa dag dan dahwan sud hom dau lugmahara se ELOHIM Men Tuari gini. Hang dan demeic gogor dou men Tuari gin touohob. Anai len leiya sud hom dau lugmahara en aimo dan naugb sug aman amesebesa se Yerusalem inggohob. Dangga sug len leiya, doba indan geicara gecgu ingma se Tuari mes, kaba, eigouhw naugb len inggang len len naugb lahacugb gogom debin dan deseino ban toua. Anai len toua merugwengga desij dan se ELOHIM Men Tuari ginohoba? 24:20 Ga, naro, kaba, dan douwan naugb Majelis gini len lens dau indan geicara gecgu dou ban areg len lowun dan an sug dan desa deseino len sug nosa gin toua? Naro, dan decinaga dag indan aremer hom, kaba, ingmaro. 24:21 Era len lahacugb gogom debin dan areg dan deijidougwo len an grag ingginei? Anai dan deijidougwo len, dendagai: Yen yogod aremer gogom debin dan sugini dau sug dan dod indina debsa ELOHIM dag en eigdoumesa lusud dau gomom ucugb gin dousei? Era ara? Dangga ban beijidougwo leninahabi, endag len lahacugb gogom debin dan ogdoc hom gininggei? Era dagiro? Anai dan doudesa, doba ara gus ingmaro. 24:22 Doba Piliks, kaba, en ecinaga dau maman Adehsud men ucina areg en esai dou lusud sug nosa meijouhw einyana asesa touohob. Dangga hang, sug Piliks ouman Paulus mer an dag gin, kaba, en emogod aremer ingga touwero. Doba en ogugwo debahabi. Anai en ecinaga dag areg leng Yahudi los ladi Paulus dou enohob, kaba, augwan dag misen touwero. Hanoba en enara dou len, endagai: Yen yeigtou naugb sadodor meren mougt mera, moho Lisias, en toua enahabi, maman mamogod aremer gini deit. 24:23 Sug Piliks ogugwo aremer gin debohob, kaba, en arougb men sadodor, endagai: Yen yesedougwo Paulus ingga, doba yen yesga aumaga dau en, dauntoba sug en ouwan, kaba, en esebesa gurereito. Era en eigtou dag misen. Dara sug en ouwan ara ara, kaba, yen yemen dougwo en touwero. Doba yen yamsoho mesir naugb len leic ara ara dou en toua. 24:24 Lona hosa debin ginohob, kaba, Piliks dara en mesouwa Drusila lan ladebeij tu sug Paulus en atousa graga deit. Mesouwa gin, kaba, en toua dau leng Yahudi. Dangga sug lan ladebeij se tu inggohob, kaba, Piliks acgeij men sadodor naugb len lahwan Paulus aud lan, dauntoba lan louman dau sug Paulus ecic eisaugb Krisdus Yesus men ucina sug lusud merdoc ebdebin an en meijouhw augwan asesa dou lan toua. 24:25 Doba sug Paulus edidib meijouhw dau sug maman maimo areg asesa ELOHIM enin medoc mes ucan dou lan. Dara en ebedbed dou lan dag ELOHIM ouwan naugb maman mabehnehino mamanin mamdoc mes dougwo areg maman mamdoc etrij icira. Dara en ens dau sug ELOHIM esedeb lonohob naugb sug ogod gogom deinaugb lusud meren sesar dou lan toua, kaba, Piliks medoc ahau medam dau gin namcir. Anai Paulus mer gini oihirir men geicara namcir. Hang en emarougb Paulus, endagai: Iteitogini, kaba, ban bihwedahabi. Sug cumougt ingmanggebga, kaba, dan demeija ban naugb nanan namecicara eisaugb augwan gin deits. 24:26 Piliks enara dangga dou Paulus, anai en od mena debsa en dag cum, kaba, en emeic aregoufu ingma naugb emahud sihwa ai ens. Dauntoba en esga Paulus dau tu gesisug gin toua. Hang en emarougb men sadodor naugb len lahwan Paulus aud en ucucugb terimda naugb en enara dou en eisaugb Krisdus gin toua. 24:27 Dobnaro. Dangga sug arisogomoc hwai debin ginohob, kaba, sud hom, moho Porkius Pesdus, en eperwei Piliks en mohw dag w Gubernor deit. Doba Piliks, kaba, en ouwan eic leng Yahudi merdoc eigouhw an en. Dangga hang, en emesga Paulus dau tu gesisug touwero. Doba en amsoho en se tu gesisug terimda.

Watti'u Manga Rasul 25

25:1 Lona homoi debin dau sug Pesdus ebiji en edag mougt mera se men hancob ginohob, kaba, en eisaugb dau Kaisarea dig Yerusalem naugb en eijidougwo leng Yahudi an Paulus deit. 25:2 Sug en edebeij Yerusalemohob, kaba, gembala gesa taij meren mougtir dara leng Yahudi meren mougtir, len laugwan len len aud en naugb loho las Paulus deseino en toua deit. 25:3 Sug len loho las Paulus deseino enohob, kaba, len lerba mohoisa dou en an Paulus toua, lendagai: Ban abdoc eigouhw an emen, kaba, ban besa ban abir dou leng lesedougwo Paulus se tu gesisug naugb len lahwan en aud maman sugini, dauntoba maman magod aremer sugin dous. Len lerba mohoisa dau en dangga, anai len lesedebohob dau sug len lahwan Paulus aud Yerusalem, kaba, dag len leic gomom dou en se ucina mogums gin toua. 25:4 Doba Pesdus, kaba, en enara baugtarera dougwo len merir, endagai: Paulus, kaba, en eigtou se tu gesisug se Yerusalem ginei? Naro, en emeigtou suginero, doba en eigtou se tu gesisug se Kaisarea dous. Dangga dan demouwan naugb len lemahwan en sugin touwero. Doba en eigtou sungga namcir. Dara dan, kaba, dan demeigtou sugin terberbero. Doba cum, kaba, dan decicugb dig Kaisarea ucugb dangga. 25:5 Dangga sug yen youdesa endag men aremer ingmanggebga, kaba, yen yen dou meijen mougtir naugb len laimo dan teitei, dauntoba len lederba ara debinim deseino dan sugaih toua. 25:6 Sug Pesdus enara baugtarera dougwo len merir dag ginohob, kaba, en eigtou se Yerusalem se lona senggemoi, era sisa deit. Hanoba en ecicugb dig Kaisarea. Dangga se loneinda deit, kaba, en eigtou se men maija moc gowunaresa naugb en ogod aremer se Paulus dara leng Yahudi merufu toua. 25:7 Sug en eigtou se men maija mocohob, kaba, en arougb men sadodor naugb len ledahwan Paulus aud en. Sug Paulus edeseino men maija mocohob, kaba, leng Yahudi gedig len louwaden dau Yerusalem len les acec en sungga. Hanoba len lahacugb gogom einyana debin en toua namcir. Doba len lemens men aremer se geica hom touwero. 25:8 Doba Paulus auni len merir ucugb dou len, endagai: Dan demedreg emeng Yahudi emen gomnomna, dara dan demeic gogor dou ELOHIM Men Tuari, dara dan demowun leng Roma meren mougt mera medam en moho mougwa hom touwero. Doba se aremer augwan gin, kaba, dan deicara dag beim an namcirohob. 25:9 Doba Pesdus, kaba, en ouwan eic leng Yahudi merdoc eigouhw an len. Dangga hang, en eijidougwo Paulus, endagai: Ban abdoc esgirahesa naugb nanan nacicugb dig Yerusalem, hanoba dan dogod aremer areg leng Yahudi lahacugb gogom debin banohob gin deseino dan sungga deitahabei? 25:10 Doba Paulus emouwanero. Hanoba en auni ucugb dou Pesdus, endagai: Dan toua leng Roma meroho aiga danohob. Dangga hang, dan demouwan naugb maman mamdogod aremer gin se Yerusalem deitero. Doba dan douwan naugb maman mougt mera medam se Romahabi, enin eng emogod aremer debin dan sungga dous. Anai banin becinaga dag dan demeba aremer hom dou leng Yahudi mougwa hom touebma. 25:11 Sug dan dedreg dau leng Yahudi meren gomnomna edeinyum naugb sug len leic gomom dou dan, kaba, dan demougb dau gin touwero. Doba dan dehi naugb gin namcir. Doba sug areg len lahacugb gogom debin dan gin, kaba, augwan dag misenero. Hang sud hom ingma men goubesa ingmaro naugb sug en ogugwo dan se len merisira augwougb touwero. Dangga hang, dan demouwan naugb sug len lemogod aremer aga danero. Doba dan douwan naugb ban besa dan aud maman mougt mera medam se Romahabi, enin eng emogod aremer aga dan dous. 25:12 Sug Pesdus ouman dau ginohob, kaba, en eijidougwo men lusud gedig len louti aremeijouhw dou en len laugwan an ginahabi. Sug len toua lousanohob, kaba, Pesdus auni dou Paulus, endagai: Ban bouwan maman mougt mera medam se Roma enin eng ogod aremer aga ban. Dangga dan desa ban aud enda. Gubernor Pesdus ens dau Paulus men aremer dou mougt mera medam, moho Agripa 25:13 Lona hosa debin areg graga, kaba, leng Yahudi meren mougt mera medam hom, moho Agripa, dara en medemeito Bernike, lan lan se Kaisarea naugb lan lados Pesdus mesira toua. 25:14 Dangga sug lan laigtou desij Pesdus se lona aibibrohob, kaba, Pesdus ens dau Paulus men aremer dou Agripa. Hanoba en enara, endagai: Sug w Gubernor Piliks en eihweda, kaba, en arges sud hom dau yeng Yahudi gedig en eigtou se tu gesisug deb naugb danohob. 25:15 Dangga sug dan deihweda se Yerusalem naugb dan dedijidougwo len sungga an gin, kaba, gembala gesa taij meren mougtir, dara leng Yahudi meren mougtir gus len laugwan len len naugb lahacugb gogom debin en dou dan terimda. Hanoba len lagodgod dan naugb dan dagod aremer gogom debin en toua. 25:16 Doba dan dohoiya len merir an gin namcir. Hanoba dan dauni dou len, dendagai: Emen Roma, kaba, emen emogugwo sud hom dou lusud naugb len leic gogom dou en augwougwero. Doba emen emahwan sud hom ingga aud leng lahacugb gogom debin en naugb len lerba aremer debinim. Dauntoba en auni areg len loho las en an gini moho asesa ucugb dou len touahabi. 25:17 Dangga sug leng Yahudi meren mougtir len len aud dan se Kaisarea ginohob, kaba, dan demeigtou demateteij len an touwero. Doba se loneinda, kaba, dan deigtou se indan maija moc gowunaresa naugb dan dogod aremer se len merufu. Hanoba dan darougb indan sadodor naugb len ledahwan Paulus deseino dan toua. 25:18 Doba sug leng Yahudi lahacugb gogom debin en gin, kaba, len lemen areg asesa danin indoc mes touwero. Anai sug len loho las en gin, kaba, len lemoho lemas an areg gogom ingmaro. 25:19 Doba areg len loho las en an deseino dan, kaba, eisaugb lenin meren gomnomna dous. Dara len lenara laisedim eisaugb sud hom, moho Yesus, gedig Paulus ouma debin en dag sud hom gin, kaba, en eisa dau gomom ucugwohob. Doba leng gus, kaba, len louma debin en dag en omom namcirohob. 25:20 Sug len lenara dangga terimda, kaba, dan deijidougwo Paulus endag sug en medoc esgirahesa, kaba, aman ameihwedig Yerusalem naugb dan dogod aremer an en sungga dous. Anai dan deija induwesa aremer gini men meijouhw terimdaba. 25:21 Doba Paulus en emouwanero. Doba en ouwan naugb dan desa en aud emen mougt mera medam se Roma naugb enin eng emogod aremer aga en dous. Dangga hang, en emacgeij naugb en eigtou se tu gesisug gin terimda edebeij lona sug mougt mera medam ogod aremer aga en toua. Sug en acgeij dag ginohob, kaba, dan darougb indan sadodor naugb len lesedougwo en se tu gesisug gini terimda edebeij cumougt ingma, kaba, dan demesa en aud emen mougt mera medam ginda. 25:22 Sug Agripa ouman dau gin, kaba, en acgeij Pesdus, endagai: Dan douwan Paulus enin ens aremeijouhw augwan asesa dou en touahabi. Sug Pesdus ouman dau gin, kaba, en ousa deisa Agripa en mer an, hanoba en enara dou en endagai: Lonehibi, kaba, banin bemouman ara dau enin mers teisis. 25:23 Hang se loneinda, kaba, Agripa dara Bernike lan lan se Pesdus men tu. Doba sug lan lan, kaba, lusud leigdoumesa lan maroho dara lagahugouhw naugb lan toua. Sug lan ladebeij Pesdus men tuohob, kaba, sadodor meren mougtir dara leng meroho agas se Kaisarea ingga, len laugwan leinesa men dimei gouji hom gedig en ebin lusud deisa. Sug len laugwan leinesohob, kaba, Pesdus arougb men sadodor naugb len ledahwan Paulus deseino len toua. 25:24 Sug len lahwan Paulus deseino len laugwanohob, kaba, Pesdus ens en dou len ingga laugwan, hanoba en enara dou len, endagai: Adehsud Agripa, dara yeng yacinim gin, kaba, yen yaugwan toua. Yen yeiya dau sud hom gini, anai leng Yahudi se Yerusalem, dara leng sugin, kaba, len laugwan loho las en deseino danohob. Hanoba len lesa merir medam an dou dan toua, dag dan demamsoho en maires emeb touwero. Doba dan deic gomom dou en toua namcir. 25:25 Doba sug dan dehilon en medoc mes, kaba, dan demesma aremer hom naugb sug daic gomom dou en touwero. Doba sud hom gin, kaba, enin acgeij naugb dan desa en aud emen mougt mera medam se Roma. Dauntoba en eng ogod aremer gini an en sungga dous. Dangga hang, dan demousa deisa en mer an toua naugb dan demesa en aud emen mougt mera gouji enda. 25:26 Doba sug dan desa sud hom gin aud emen Adehsud se Roma, kaba, dan demog men geicara areg se surad naugb demesa enda? Anai dan deija induwesa an areg len loho las en gin augwan terimdaba. Dangga hang, dan demahwan en deseino Agripa, ban, nosahabi. Anai ban aboho eb taiba augwan namcir. Dara dan dahwan en deseino mougt mougt yeng gus yaugwan toua, dauntoba yen yehilon en. Hanoba yen yesma ara ara dag misen dau enohob, kaba, yen yens dou dan naugb dan dog se surad dou emen mougt mera medam se Roma gin toua. 25:27 Anai dan doudesa sug dan desa sogougb hom dou indan mougt mera medam se Roma gini, doba dan demog dau areg len loho las en an gini ingma se suradero, kaba, gini emedeinyum touwero.

Watti'u Manga Rasul 26

26:1 Sug Pesdus enara bouwa dauwohob, kaba, Agripa acgeij Paulus, endagai: Iteitogini, kaba, dan deic cumougt dou bani naugb banin benara dau banin abdoc mes dou emen deitahabi. 26:2 Adehsud Agripa, dan indoc esgirahesa namcir naugb se lona gin, kaba, dan decic dau areg leng Yahudi loho las dan an ginohob meijouhw augwan asesa dou ban toua. 26:3 Anai ban becinaga dau mamang Yahudi maman gaben. Dara ban becinaga dau areg maman mamir maisedim eisaugb maman gomnomna augwan asesa touohob. Dangga hang, dan dacgeij naugb ban beigtou bateteij. Dauntoba dan decic aremer gin augwan ouwa dou ban dauwahabi. 26:4 Anai leng Yahudi, kaba, len laugwan lecinaga dau indan geicara dau sug dan dedag dugdeh mesaba augwan dag misenohob. Anai dau sug dan indim ouwadan dan, terimda dan dedag sud, kaba, dan demec se lugmahara meren hancob touwero. Doba dan dos indan cinogo dara se Yerusalem gin dous. Hang len lecinaga dau indan geicara dau acgunog augwan asesa touohob. 26:5 Dangga sug len merdoc esgirahesa, kaba, len louma debin dan dag dau sug aimougtut, kaba, dan demaimo len gus meren gomnomna touwero. Doba dan daimo leng Parisi merir an Musa men gomnomna gin dous. Anai len lecinaga dag dan demedreg gomnomna hom gin touwero. Doba dan daimo augwan edreg dau leng Yahudi gus laugwan namcirohob. Anai gini emeng Parisi emen geicara dangga terimdohob. 26:6 Sug dan daimo maman gomnomna dag gin namcirohob, kaba, dan demarges dau aremer hom areg ELOHIM os dou maman mamjemouwer gin touwero. Doba dan dod indina debsa en an gin toua terimda. Anai en os dou len dag len lemomom namcirero. Doba se lona daiyamo gacin, kaba, en emeigdoumesa lusud laugwan dau gomom aud maireseb menau geb huhugb ucugb toues. Dangga eisaugb aremer hom gin eng dan desa deseino Adehsud, ban, naugb ban bogod gogom deinaugb dan toua. 26:7 Dara dan demod indina debsa ELOHIM an gin dousero. Doba mamang Israel meijouhuda sisa hobjerai gin, kaba, len laugwan lod merna debsa ELOHIM an gin touohob. Dangga astesda lona loba sug len lesijaresa ELOHIM, kaba, len merdoc moc dougwo gin touwero. Doba len merdoc leiseisan gini deseino en terimda. Sug len lod merna debsa ELOHIM an dag ginohob, kaba, dagiro, naugwe hang, leng Yahudi lahacugb gogom debin dan deseino Adehsud bana? Anai areg len los ladi dan an deseino ban gin, kaba, dau sug dan dod indina debsa ELOHIM dag en eigdoumesa lusud dau gomom ucugb touohoba? 26:8 Doba sug ELOHIM os dou maman dag en eigdoumesa lusud dau gomom ucugb dag ginohob, kaba, dagiro yeng Yahudi yen youduda en an gin terimda? Dara yen yesbes an dan sug dan dos dadi Krisdus dag ELOHIM eigdoumesa en dau gomom deseino lusud touohoba? Yen youdesa endag men mobisamougb emedeinyumeroei? Era ara? 26:9 Doba Adehsud, sug nosa, kaba, dan toua denara daugtarera dougwo lusud sug len loho las Yesus dau cinogo Nasared en moho deseino lusud. Anai dan doudesa dau sug len louma debin en dag ELOHIM eigdoumesa en dau gomom ucugb, kaba, dag augwan gini edreg dau Musa men gomnomna namcirohob. Hang dan deic induwemougb esesa naugb dan deic mor mor dou leng Krisden len laugwan toua. 26:10 Dan deicara dag gin sug dan indugwengga se cinogo Yerusalem sug nosa. Dangga hang, sug gembala gesa taij meren mougtir leigdoumesa dan indoho naugb ginohob, kaba, dan dagaigeij ELOHIM men lusud leinyana gougwa. Hanoba dan douf len laugwan se tu gesisug. Dara sug leng Majelis logod gomom naugb len, kaba, dan indoc aninim dara len an gin toua. 26:11 Dara dan deinesa maman tuari augwan naugb dan dehilon leng merdoc ebdebin an Yesusohob sug len lesijaresa en sungga toua. Dangga sug dan dehilon lenohob, kaba, dan darougb len gus naugb len labosbos len merug erij medam. Dauntoba len merdoc emebdebin an Yesus deitero, doba len laideido dougwo en namcir. Dara dan deicara dag gin mougwa hom dousero. Doba dan deicara daimo dag gini astesda lona ucucugb an len terimda. Dara dan demeic mog erij dou leng Krisden se Yerusalem gin dousero. Doba dan desedeb naugb dan docigei len se lugmahara meren beimes toua. Anai dan indoc esrougb medam an len namcirohob. 26:12 Dangga sug gembala gesa taij meren mougtir eic surad dou danohob, kaba, dan deihwedig cinogo Damsig naugb dan deic mog erij dou leng merdoc ebdebin an Yesusohob len laugwan sungga toua. Anai mougtir meren surad eic goubesa dou dan naugb ginohob. 26:13 Doba, Adehsud, Agripa, sug dan dedebeij deinyor cinogo Damsig gini naugb igdabogo, kaba, dan deiya mouf medam gouji hom edreg dau igda mohora namcir ouwaden dau bogo. Hanoba erbacec dan an leng laimo dan ingga emen emaugwan toua. 26:14 Dangga sug emen emaugwan emobsara dau kuda medgomori naugb emainda cinogohob, kaba, dan douman sud hom enara dou dan se lec Ibrani mer, endagai: Saulus, Saulus, ban beic mog erij dou dan dag gin terimda, anara? Anai sug ban bohoiya aban mougt mera en mer dag gin terimda, kaba, cum, aban geicara gini eic mog erij eiseisaugb dou banin ucugb toua. 26:15 Doba dan deijidougwo en ucugb, dendagai: Adehsud, bang gara? Hanoba en ens enin moho dou dan, endagai: Dang Yesus, gedig ban beic mog erij dou danohob. 26:16 Doba ban beisa besa ucugb. Anai dan dens danin ainyes dou ban naugb dan deigdoumesa ban dag indan sogougb. Dauntoba areg ban beiya dau dan iroginohob, dara areg dan demens dou ban se lona daiyamo gacin, kaba, ban bos badi dau augwan gini dou lusud gus len laugwan toua. 26:17 Dara sug ban besai dan induro dou lusud, kaba, len lemeic gomom dou ban icira gin touwero. Doba dan deigdoc ban dau leng Yahudi dara lugmahara meren goubesa augwan toua namcir. Anai dan desedeb naugb dan demesa ban aud len toues. 26:18 Dara dan desa ban aud len naugb ban besga len meriresi, dauntoba len meriresmougb deitero. Doba len leiya lo asesa ucugb. Hanoba ban bahwan len dau lobeigbogo aud mouf, dara dau Setan men uro mes aud ELOHIM men uro mes toua. Dauntoba Setan men goubesa dara sesar men gogom emoiharaga len toua deitero. Doba sug len merdoc ebdebin an danohob, kaba, ELOHIM aigdougwo meren sesar. Hanoba en eigdoumesa len meroho naugb len leigtou desij men lusud gus gedig en ouci len debinim naugb eninohob len laugwan toua namcir. 26:19 Dangga hang, Adehsud Agripa, sug dan douman Yesus arougb dan an dau bogo dag ginohob, kaba, dan demohoiya en mer gin touwero. 26:20 Doba ebiji se Damsig dara Yerusalem, kaba, dan debedbed dou len dag len lemaimo meren sesar deitero. Doba len lesga meren sesar moho augwan asesa dou ELOHIM namcir. Dara len leineg dau toua naugb len laimo areg asesa ELOHIM enin medoc mes augwan deit. Hanoba len lens meren geicara debin gin dag len lahau an dougwo meren sesar augwan dag misen touohob. Dauwohob, kaba, dan debedbed dau augwan gini dou lusud se leng Yudea dara lugmahara meren hancob ucan dou len toua. 26:21 Dangga ogdoc aremer hom gin, hang leng Yahudi lemagaigeij dan sug dan indugwengga se ELOHIM Men Tuari. Hanoba len louwan leic gomom dou dan toua. 26:22 Doba dau sug nosa, terimda iteitogini, kaba, ELOHIM eseyeiyo dan gin namcir. Hang dan demesa deseino yen naugb dan douma debin areg dan deiya dara doumanohob augwan asesa dou yeng meijoho eb taiba dara yen meijoho eb tainya yen yaugwan sugin toua. Dara areg dan douma debin dou yen gin, kaba, ingma susugwero. Doba aimo dau areg Musa dara leng lesai ELOHIM moro len lesai dou maman mamjemouwer augwan deb sug nosa touohob. 26:23 Anai len len dou len deb dag Krisdus gin, kaba, en aimo ucina mog erij aud gomom naugb yen nosahabi. Hanoba en edag mebin dau leng lomom laugwan naugb eisa dau gomom ucugb toues. Dara len len dou len deb dag en eic mouf dou leng Yahudi dara lugmahara len laugwan. Dauntoba len lecinaga ucina naugb sug ELOHIM eigdoc len dau meren gogom augwan gin toua namcir. 26:24 Doba sug Paulus en mer eb debin naugb en enara an enin dag gin terimda, kaba, Pesdus etaha en mer an. Hanoba en enara dou en dara mer gouji, endagai: Paulus, ban becic surad meijouhw aingma aingma, hang emeic dag mereiyeba ban touohob. 26:25 Doba Paulus en auni en mer ucugb, endagai: Adehsud, mereiyemeba danero. Doba dan indoc misen eng denara dou yen gini. Dara dan demereiyara dou yen touwero. Doba dan denara augwan gini se geica namcir. 26:26 Sug Paulus auni dou Pesdus dauwohob, kaba, en mer eb debin areg en en graga dou Agripa deit. Hanoba en enara dou en, endagai: Adehsud Agripa, dan decinaga dag areg dan den dou yen gin, kaba, ban becinaga dau augwan gini dag misen namcirohob. Dangga dan demaudud augwan gini dau ban touwero. Doba dan deic indus naugb dan dens augwan eb ainyes dou ban toua. Anai aremer augwan gin, kaba, hom emebdededero touwero. Doba eb ainyes dou lusud laugwan lecinagohob. Hang dan decinaga dag ban abdoc eica augwan dag misen toua. 26:27 Anai, Adehsud, Agripa, dan decinaga dag areg leng lesai ELOHIM en moro len log deb se Surad Injil Meb Mohon eisaugb Krisdus deb sug nosa, kaba, ban abdoc ebdebin an augwan gin toua terimdohob. Gini misenei? You, gini asesa dag misen namcir. 26:28 Doba Agripa enara debin Paulus mer an gin namcir, endagai: Areg ban bebedbed dou dan gini, kaba, ban boudesa endag dan dobsara aud Krisdus iteitogin danggei? Naro. 26:29 Doba Paulus auni ucugb dou en, endagai: Ban bobsara aud Krisdus iteitogini, era se lona daiyamo gacin toua, kaba, augwan gini inggaida. Doba areg esloulougb, kaba, dag Adehsud, bani dara yeng youman dan indir gini yen yaugwan meigdoc ebdebin an Yesus, aninim dag dan gin toua. Dangga hang, dan docuncum dou ELOHIM, dauntoba en arautut yen meigdoc mes aud gin toua terimda. Lanta gin dous eng dan democuncum dou ELOHIM naugb emahud yen aninim dag danero. 26:30 Sug Paulus enara dou len dag graga dauwohob, kaba, mougt mera medam Agripa, dara w Gubernor Pesdus, dara Agripa medemeito Bernike, dara leng gus laugwan, kaba, len leisa lesa. Hanoba len leihwedig medigoda. 26:31 Sug len ledebeij se medigohob, kaba, lenin lenara doum ucucugb, lendagai: Sud hom gin, kaba, men aremer ingma naugb sug maman mauf en se tu gesisug, era maic gomom dou en toua, kaba, ingmaro. 26:32 Sug len lenara doum dangga dauwohob, kaba, Agripa enara dou Pesdus ucan deit, endagai: Edeinyum naugb sug nanan nasga sud hom ginohob. Doba sug en acgeij naugb maman masa en aud maman mougt mera medam se Romohob, Dangga hang, en eigtou se tu gesisug dous, terimda cumougt ingmahabi, maman mamesa enda. Anai nanan namen dougwo en dagiro?

Watti'u Manga Rasul 27

27:1 Sug leng Roma meren mougtir len logod an dag emen emeisa ij dig leng Italia meren hancobohob, kaba, len logugwo Paulus dara leng leigtou se tu gesisug ingga merug hosa se sud hom, moho Yulius, en mesira deit. Dauntoba en ahwan len aud mougt mera medam se cinogo Roma toua. Yulius gin, kaba, en edag mougt mera naugb sadodor merug sud sergem. Dara len leija Yulius an men sadodor gini len laugwan dag mougt mera medam se Roma enin men sadodor toua. 27:2 Dangga sug emen emesma ij hom gen dau cinogo Adramitiumohob, kaba, emen emaugwan emaingmo ij ingga toua. Anai ij ingga esedeb naugb sug oho aremougb ucugb se astesda leng Asia meren usi augwanohob. Sug emen emaingmo ij ginohob, kaba, ij ingga eihwedan emenda. Dara sud hom dau leng Makedonia meren hancob, moho Arisdarkus gen dau beimes Tesalonika, kaba, en toua eisa ij desij emen. 27:3 Dangga se loneinda, kaba, emen emdos se cinogo Sidon. Doba Yulius, kaba, en medoc eigouhw an Paulus namcir. Hang en arges Paulus naugb en edeiya mesir sungga, dauntoba len leic ara ingma dou en naugb lousa en toua. 27:4 Sug len lob aremougb deisa ijohob, kaba, emen emeihwededau sungga dig leng Asia meren hancob deitda. Doba loungmen medam eisa dougwo emen namcir. Dangga, kaba, emen ememeisa ij dosusdero, doba emen emeisa ij emoci lomos Siprus ucugb aud dum moho dous. Anai sungga, kaba, loungmen mohora arjaga namcir. 27:5 Sug emen emaihad Siprus mebesohob, kaba, emen emoho se medi irir leng Kilikia dara Pampilia meren hancob, terimda emen emaidoc Mira se leng Likia meren hancob toua. 27:6 Sug emen emedebeij Mirohob, kaba, mougt mera Yulius en esma leng Aleksandria meren ij geihwedig leng Italia meren hancob hom deit. Dangga sug en edesma ij ginohob, kaba, en ahwan emen. Hanoba en arougb emen naugb emen emdaingmo ij ingga toua. 27:7 Sug emen emeihwededau Mirohob, kaba, emen emeisa ij se lona aibibra deit. Doba ij emeijeijo an emendero, anai loungmen edeij emen namcir. Dangga sug emen emeteij duhu se lona hosa ginohob, kaba, emen emen egeiga beimes Snidus. Doba sug loungmen eisa bedeij emen dag gin terimda, kaba, emedeinyum naugb sug emen emeisa ij dosusdero. Hang emen emebib ij ucugb aud lomos Kreta naugb sug emen emaihad Salmone mebes se lomos ingga dous. Anai sungga, kaba, loungmen emeisa goujero. 27:8 Hanoba emen emoci lomos Kreta gin toua terimda. Sug emen emeteij duhu dag gin terimdohob, kaba, emen emdos usi hom geb se mougwa mes, moho Usi Geigouhw, deinyor beimes, moho Lasea, gin toua. Lusud leija usi gini dag Usi Geigouhw, anai ij augwan eb dara geigouhw dau duhu mogo dara loungmen namcir. 27:9 Dangga emen emeigtou se Usi Geigouhw gini se lona einyana toua terimda. Doba sug emen emeigtou sungga terimda, kaba, lona naugb sug lusud leisa ij dara gesgirahesa, kaba, obi toua namcirohob. Anai leng Yahudi meren Lona Gouji naugb sug len leic aremeta mogwihi dou ELOHIM, dauntoba en aigdougwo meren sesar augwan dau len, kaba, edreg touohob. Dangga hang, Paulus en esulou mougt mera dara leng lesedougwo ij, dauntoba len lemekirsero. Doba len leigtou terimda igda goho dugurij ouwa dau lenahabi, len lemeisa ij deitda. Hanoba en enara dou len, endagai: 27:10 Insirija, eigouhw naugb sug maman mamekirsedero. Doba maman maigtou sugin dousahabi. Anai dan indoc eiya debohob dau sug maman maihweda deit, kaba, dag maman madesma gecgu dag ij obrugb an aremougb augwan ediyebeiya namcir. Dara masud maigbum toua madomom dangga. 27:11 Doba sud hom gesedougwo ij, dara sud hom men ij gin, kaba, lan lanara laugbtarera dougwo areg Paulus esulou len an gin namcir. Dangga, kaba, mougt mera Yulius en toua emouman Paulus mer an areg en esulou len an ingga touwero. Doba en obsara dou len dous. 27:12 Dara Usi Geigouhw gin toua, kaba, emeigouhw deinaugb sug lusud leigtousa dau igda goho dugurij touwero. Dangga hang, lusud leinyana se ij ingga, kaba, len toua lemouwan lemeigtou se usi gin deitero. Doba len louwan emen emeisa ij bemainyen bemedebeij cinogo hom se lomos Kreta ingga, moho Piniks, naugb emen emdeigtou sungga terimda igda goho dugurij augwan ouwa dauwahabi, emen emeisa ij deitda. Anai cinogo Piniks gin, kaba, edag mougwo, doba eb ainyes irir aud dig dum mer dara dum moho maraufu toua. 27:13 Dangga sug len lesedougwo ij ingga, kaba, len leiya, doba loungmen ebiji naugb eisa dau dum mer dara mohora arjeijaga dous. Sug len leiya dag gin, kaba, len loudesa dag areg len logod anohob, kaba, len laimo toua. Hang sug len leic kemantu dau duhu se ing mesohob, kaba, emen emeisa ij emacuci mebera, terimda aud Pinikseda. 27:14 Doba cum, kaba, loungmen eineg bobsara dau dig lonog dara mohora oubesa. Hang oto ij an emen toua namcir. Loungmen medam gini, kaba, lusud leija dag Matan. 27:15 Leng lesedougwo ij ingga, kaba, len lainyen naugb lebib ij lagod loungmen mohora ingga terimda. Doba emedeinyum naugb touwero. Hang emen emarges emsira dau ij naugb loungmen enin oho ij an emen dous. 27:16 Sug loungmen oho emen aud lomos mogurei, moho Kauda, nagama aud dig dum merohob, kaba, emen emeic emug erij icira ij mogurei naugb emesera aumagan deb se ing mes toua. Anai lomos nagama aud dum mer gin, kaba, loungmen mohora edina gurerei dau emenohob. 27:17 Dangga sug emen emesera aumagan ij mogurei naugb emeigdoumesa se ing mesohob, kaba, emen emeic aumagasa dagadgeij dara ing maga namcir. Dauntoba duhu mogo emos bemadro touwero. Sug emen emahud ij mogurei dagadgeij dara ing magohob, kaba, leng lesedougwo ij ingga len ledug sarwir dau ij toua. Dauntoba loungmen oto ij mogud ebeij se duhu mod dous. Anai len lahau dag cum, kaba, loungmen oho ij an emen aud dibo mougb se usi, moho Sirtis, se leng Libia meren hancob dangga. 27:18 Doba loungmen medam gini emedina dau emenero. Dangga sug loneinda, kaba, leng lesedougwo ij gini len lebiji naugb lahacugb aremougb dau ij se dum mohu namcir. Dauntoba ij eijouhw an emenahabi. Dobnaro. 27:19 Hang edebeij lona hom debin deit, kaba, leni leic ij men aremougb geb se mes ingga ingma dau. Hanoba len lahasij augwan se duhu namcir toua. 27:20 Doba sug loungmen eisa dara goubesa ebsugeb debin emen dag gin terimda. Hanoba se lona einyana emen emeiya igda lona dara tebeij mougb touwero, kaba, emen emod emina debsa dag emen emina emagau deitero. Doba cum, kaba, emen emaugwan emomom dangga. Anai sug emen ememeiya igda dara tebeij mougb dag ginero, kaba, eic dag emen ememecinaga ucina naugb sug emen emeisa ij touwero. Doba emen emeisa ij augwougb dangga dous. 27:21 Dara leng lesedougwo ij, kaba, len toua lemet ared se lona einyana touwerohob. Anai sug len lainyeinyen naugb ij emobrugb an emenero, kaba, emeic cumougt dou len naugb len let ared touwero. Doba len leigtou dau namcir. Dangga hang, Paulus en eisa besa se len merufu. Hanoba en ahadahada len, endagai: Indagunerij, eigouhw naugb yen yemeisa ij dau Lomos Kreta ginero. Doba yen yaimo dan indir an areg dan desulou yen an gin dous. Anai sug maman maigtou sungga terimda, kaba, maman mamesma gecgu. Dara maman aremougb emediyebeiya dau maman dag gin touwero. Doba augwan eb naugb maman toua terimda. Dobnaro. Yen yohoiya dan indir an namcir. Hang maman mamesma gecgu dag gin touohob. 27:22 Doba inggaida. Anai ij gin dous eng ediyebeiya namcir. Doba masud, kaba, maigbum mamomom deitero. Dangga hang, dan dacgeij dauntoba yen meigdoc emeijesa touwero, doba yen yaiyan meigdocesem. 27:23 Anai se loba greb, kaba, ELOHIM gedig dan desijaresa en dara en moho aiga danohob, kaba, en esa men malaikad hom aud dan naugb en enara dou dan. 27:24 Dangga sug malaikad edebeij danohob, kaba, en oho mer debin dan toua, endagai: Paulus, ELOHIM emeperwei medoc mes an banero. Doba en ouci ban naugb ban bedesai en moro dou leng Roma meren mougt mera medam se Roma namcir. Dangga hang, ban abdoc emeijesa touwero, doba ban baiyan abdocesem terimda. Anai ban bemomom deitero. Dara leng leisa ij dara ban, gin toua, kaba, len laugwan lemomom touwero. Doba len laugwan merna agau toua namcir. Anai ELOHIM en medoc eigouhw an banohob, hang en emoiharaga len laugwan toua. 27:25 Sug ELOHIM men malaikad os dangga dou danohob, kaba, yen meigdoc emeijesero, doba yen yaiyan meigdocesem namcir. Anai dan dod indina debsa ELOHIM an areg men malaikad en dou dan ginohob, kaba, emedreg mogtimei mohw ginero. Doba obsara se mogtimei mohw gin augwan dangga toua. 27:26 Hang ij gini emomdia an maman deb sug ginero. Doba eihwedan mamandahabi, emdoclo deb se lomos homs. Anai gini aimo dau areg ELOHIM ogod deb deinaugb mamanohob. 27:27 Sug loungmen odo emen naugb emen emeigbib se ari hwai se dum mod Adria ginohob. Hanoba edebeij se lobeingmod, kaba, leng lesedougwo ij gini len loudesa endag emen emedebeij deinyor meberohob. 27:28 Dangga sug len leic aumaga naugb len lan duhu meiyohob, kaba, len leiya, doba edebeij w meter sud hwaiyaba. Doba emeb terba debin ginbuma, kaba, len leic aumaga lan duhu mei deit. Hang len leiya, doba edebeij w meter sud hom sisedeisu dous. 27:29 Hang len lahau endag cum, kaba, ij oc lohoi an len. Dangga len lerba kemantu hogu dig ing moho. Dauntoba ij emec an len deitero. Hanoba len lesijaresa meren seiseij, dauntoba lona esga dau len dedemeda toua. 27:30 Sug leng lesedougwo ij ingga len lesijaresa meren seiseij dauwohob, kaba, len losus aumaga an ij mogurei se duhu ucan deit. Sug len losus an dauwohob, kaba, len lenara dou emen, lendagai: Emen emouwan emerba kemantu dig ing mebes toua deit. Doba areg len lenara dou emen gini, kaba, dag len launun dou emen dous. Anai len lohw merdocedoumohob naugb sug len lougb dig lonog dau emen toua, dauntoba len merna agau dous. 27:31 Doba Paulus en dougwo leng sadodor meren mougt mera an men logodeh len laugwan, endagai: Sug leng lesedougwo ij gini len lemeigtou se ij mes namcirero, kaba, yen gin yaugwan toua meijina emagau deitero. 27:32 Sug leng sadodor louman dau gini, kaba, len logod aumaga an ij mogurei graga dau len toua. Hanoba len lamsoho duhu augwan dau len namcir. 27:33-34 Dangga ebeij deinyor sug lona esgohob, kaba, Paulus oho mer debin len laugwan, endagai: Yen yecinaga ELOHIM os dou yen dag yen meijugt modi hom emog dau yen touwero. Hang dan demacgeij naugb yen yetara ingmahabi. Dauntoba yen meijaga emomomtomlo, doba yeic goubesa deitahabi. Anai se ari hwai gin, kaba, yen yemetara touwero, doba yen yeigtou augwougb dousohob. 27:35 Sug en oho mer debin len dag gin dauwohob, kaba, en eic ared. Hanoba en en sijo dou ELOHIM deseino len laugwan toua. Sug en en sijo dou ELOHIM dauwohob, kaba, en eic ared ingma naugb en et aisa len laugwan toua. 27:36 Sug len leiya icira en dangga, kaba, oho gagadgeij dou len naugb len toua letara aninim. 27:37 Doba emeng emeisa ij gini, kaba, emen emug edebeij huntun hwai mos senggai senggem edeisu. 27:38 Sug len laugwan letara eicerohob, kaba, leng lesedougwo ij gini len lahasij tramdad mougweb augwan se dum mohu namcir. Dauntoba ij eijouhw se duhu mod an emen toua. 27:39 Sug lona esga goujohob, kaba, leng lesedougwo ij ingga len leiya lonogohob. Doba len lemecinaga asesa touwero. Anai len lemedebeij gin mougwa hom touebma. Dangga sug len leiya mougwa hom, doba dibo eb se mebera, kaba, len laugwan lohw merdocedoum. Dauntoba sungga edeinyum, kaba, len ledeic ij deb sungga toua. 27:40 Dangga hang, sug len logod aumaga an kemantu geb se ing moho augwanohob, kaba, len lamsoho bomdia namcir. Hanoba len lesga aumaga dau gurei hwai geb se ing moho toua. Dauwohob, kaba, len leh sarwir se ij mebes ucugb, dauntoba loungmen oto ij an emen aud lonogeda. 27:41 Doba sug loungmen oto ij an emen dag gin, kaba, ing mebes edahatit dibo mougb namcir. Hang duhu mogo medam eisa bogod ing moho bobrugb an emen toua, anai ij ogodro bebsugebohob. 27:42 Dangga sug leng sadodor leiya, doba ing mebes edohudebes dibo anir deb dag ginohob, kaba, len lohw merdocedoum naugb leic gomom dou sogougwir laugwan toueda. Anai len lahau endag cum, kaba, len lesogwa lougb duhu dau len dangga. 27:43 Doba meren mougt mera en dougwo len namcir, anai en ouwan eseyeiyo dougwo Paulus. Dauntoba en mena agau dous. Dangga hang, en arougb lusud, endagai: Yeng yecinaga yougb duhu, kaba, yen yesogwesa duhu. Hanoba yen yougb duhu ino dig lonogeda. 27:44 Doba yen gus, kaba, yen yeic sogo mehir dara ing mehir, hanoba yen yemougb duhu ucan len toua. Emen emehilon ucina dag gin, hang emen emaugwan emedebeij lonog dara emen emina agau toua.

Watti'u Manga Rasul 28

28:1 Sug emen emaugwan emedebeij lonog dara emen emina agauwohob, kaba, lugun sungga len len dou emen endag lomos gin moho Malta. 28:2 Hanoba len lebin emen toua, anai len merdoc eineg an emen namcir. Dangga sug los ebiji, kaba, len lec smougb medam naugb lebin emen toua. Anai dugurij toua eba emen namcirohob. 28:3 Sug len lec smougb debohob, kaba, Paulus en toua ousa len naugb en oho sugwa deisa smougb. Doba sug en odo naugb ec se smougb ineg, kaba, hinogo agunya dau sugwa marani. Hanoba au en mesira behinena icira namcir, anai smougb esij enohob 28:4 Sug lugun len leiya, doba hinogo ehinena icira Paulus mesira dag gin, kaba, len lenara doum, lendagai: Sud hom gin, kaba, surer namcir. Dangga maman seij, moho danehsud, os en mebes dagasa dum mohu. Doba en mena agau dauwunohob. Hang iteitogin, kaba, en emdos en mebes dagasa hinogo emau en deit gini. Anai maman seij gin, kaba, emouwan naugb en maires emeb deitero. Doba en maga ocron en bomom dous. 28:5 Dangga len lauweila en toutou terimda. Anai len loudesa dag cum, kaba, en erisa, hanoba en eijeboho bomom dangga. Doba Paulus mos emecinaga dag emerij touwero, kaba, en etir mesira an hinogo ingga se smougb namcir. 28:6 Dangga sug len leiya, doba en mesira emerisa dara en emomom touwero, kaba, len leperwei len merdoc mes. Hanoba len leigdoumesa en moho doum, lendagai: Sud hom gin, kaba, en edag adeh goho seijohob. 28:7 Doba sug leng Malta meren mougt mera medam, moho Publius, en toua ouman dag ij obrugb an emen dag ginohob, kaba, en ebin emen dara medoc eigouhw naugb emen emeigtou desij en sungga se lona homoi. Anai men sesa dara men tu eb deinyor us gedig emen emdos gin touohob. 28:8 Doba sug emen emeigtou desij Publius gin, kaba, en mena areba dag en mos esrougb dara en ejiseresa toua. Dangga sug Paulus einesa dimei aud enohob, kaba, en ob mesira se en mougt. Hanoba en ocuncum dou ELOHIM an en toua. Sug en ocuncum an en inegohob, kaba, men gareba augwan obsara dau en namcir. 28:9 Dangga leng areber gus sug len louman dau aremer gin, kaba, len toua len len aud Paulus. Hanoba en eic geigouhw dou len laugwan toua. 28:10 Hang len lemeic aremougb einyana dag mogud dou emen. Dara edebeij lona sug emen emeihwededau len, kaba, len leic ara ara dou emen se ing mes naugb sug emen emet asa ucina toua. 28:11 Dangga sug emen emeigtou desij leng se Lomos Malta ingga se igda homoiyohob, kaba, emen emeisa leng Aleksandria meren ij hom deit. Anai se igda goho dugurij gin, kaba, len ledeic meren ij se lomos Malta gin debohob. Ij gin, kaba, len leg Kasdor dara Poluks, lan marucbobaga se mebes toua. Hang len lemeija ij gin en moho toua dag seingmebec. 28:12 Sug emen emeihwededau sunggohob, kaba, emen emdebeij beimes Sirakusa. Hanoba emen emdeigtou sungga se lona homoi toua. 28:13 Dau sungga, kaba, emen emeisa ij terimda emen emedebeij cinogo hom se lonog, moho Regium. Se loneinda deit, kaba, emen emeisa ij dau sungga aud beimes moho, Putioli, deit. Anai loungmen ebiji naugb eisa dau dum merohob. Dangga sug emen emaimo loungmen gin se lona hwaiyohob, kaba, emen emedebeij cinogo ingga toua. 28:14 Doba se cinogo ingga, kaba, merug hosa dau leng merdoc ebdebin an Yesusohob len toua merugwengga. Dangga sug emen emagasa lenohob, kaba, len lebin emen naugb emen ematou desij len se ari hom deb sungga. Hang emen emedebeij se cinogo Roma gin touohob. 28:15 Sug emen ematou desij leng merdoc ebdebin an Yesus se Putioli se ari homohob, kaba, emen emec emohora dau sungga dig Romeda. Doba sug emen emaguner dara emdamouwer se Krisdus len louman emen emin, kaba, len len dau Roma naugb ledagasa emen toua. Dangga ligbum, kaba, len lekirsa naugb ledagasa emen se Apius men usi sug lusud lohwaresa. Doba lingma, kaba, lemeigtou se usi, moho Tu Mebec Homoi, naugb emen sungga toua. Sug emen emagasa lenohob, kaba, Paulus mena eisa mecdemaga namcir. Hanoba en en sijo dou ELOHIM an len toua. 28:16 Sug emen emdebeij se Romohob, kaba, leng Roma meren mougtir len lemouf Paulus se tu gesisugero. Doba len lebin en naugb en atou se tu hom dou eninahabi, len lemohw sadodor hom naugb en emesedougwo en dous. 28:17 Sug Paulus eigtou debin en mog se lona homoiyohob, kaba, en eija leng Yahudi meren mougtir naugb len loucimdeb dara en se men tu ingga. Dangga sug len laugwan lacinimohob, kaba, en ens dau men aremer geisaugb enin meijouhw augwan asesa dou len toua, hanoba en enara dou len, endagai: Dan indagunerij, dau mamang Israel, dan demeicara demaihagab mamang gaben. Dara dan demedreg maman mamjemouwer meren gomnomna gedig len lomnomnan dou mamanohob augwan mougwa hom touebma. Doba dan deicara daimo augwan gini dag misenohob. Doba maman mougtir se Yerusalem, kaba, len lagaigeij dan augwougb. Hanoba len lohw dan se leng Roma merisira naugb len logod gomom deinaugb dan toua. 28:18 Doba sug leng Roma meren mougtir len leijidougwo dan an ara ara ginohob, kaba, len lemesma aremer hom ingma naugb sug len leic gomom dou dan touwero. Hang len louwan larges dan dous. 28:19 Doba leng Yahudi meren mougtir, kaba, len lenara laugbtarera dougwo leng Roma merir dag len lemamsoho dan deb touwero. Doba len leic gomom dou dan namcir. Hang emederougb dan naugb dan demacgeij dau leng Roma gini, dauntoba len lemogod indan aremer gin deitero. Doba len lesa dan aud meren mougt mera medam se Roma ginahabi, enin eng emogod aremer naugb dan dous. Dangga hang, dan demen sugini naugb dan demoho demas leng Yahudi graga deseino mougt mera medam ginero. Doba dan den sugini naugb dan dens dau areg maman mougtir loho las dan an deseino leng Roma se Yudeohob men meijouhw augwan asesa dou en dous. 28:20 Hanoba dan dacgeij yen naugb yen yen sugini, dauntoba dan dens sud hom, moho Yesus, gini meijouhw augwan asesa dou yen toua. Anai enin eng sud hom gedig mamang Israel maman maod mamina debsa ELOHIM anohob naugb sug en esa en dou maman. Dauntoba en eigdoc maman dau sesar men gogom aud maireseb menau geb huhugb gin toua. Hang lusud lahud dan insira dara lanta emeigdoc dan insira icira gin touohob. 28:21 Sug leng Yahudi meren mougtir len louman gin, kaba, len launi ucugb dou Paulus, lendagai: Leng Yudea, kaba, len lemog surad hom dou emen, dara leng dau sungga, kaba, lingma lemdecic dau aban aremer, dara lemesmesman ban dou emen touebma. 28:22 Doba eisaugb sud hom, moho Yesus, men ucina menau gin, kaba, emen emouman dag lusud sungga sungga lesbes an gin namcir. Hang emen emacgeij, dauntoba ban becic dau areg geb se ban abdoc mes eisaugb gini meijouhw augwan asesa dou emenahabi. Anai emen emecinaga dag ban toua baimo ucina ginohob. 28:23 Dangga sug len louci lona hom naugb ginohob, kaba, leng Yahudi leinyana gougwa len loucimdeb se tu sug Paulus eigtou se graga deit. Dauntoba en ens meijouhw eisaugb Yesus augwan asesa dou len toua. Hang dau lonamen terimda edebeij losog, kaba, en ens dou len dag ELOHIM men lona naugb sug en oiharaga lusud ucugb, kaba, edagasohob. Hanoba en edidib meijouhw eisaugb gin augwan asesa dou len toua. Dara en eic mouwemougb esesa naugb en eic medagas dau Musa men gomnomna, dara areg leng lesai ELOHIM moro nosa, len log deb eisaugb Yesus bagodro ucan dou len toua. Dauntoba len lemoududa Yesus ginero. Doba len lobsara aud en dag eni Sud Hom Gedig En Eigdoc Len Dau Meren Gogom Augwan touohob. 28:24 Sug Paulus ens meijouhw dau augwan dag graga dou lenohob, kaba, len leisa lesa naugb leihwededau tu ingga. Hanoba len lenara merir eisaugwim icira gin toua namcir. Anai lingma, kaba, len merdoc eica Paulus mer an ginohob. Doba ligbum, kaba, len merdoc emeica en mer an gin touwero. 28:25 Sug Paulus eiya, doba ligbum, len merdoc emeica en mer an dag ginero, kaba, en enara debin len, endagai: Meijen geicara gin, kaba, esogwa deisa areg ELOHIM esa mer dou Yesaya ogdoc Mena Gogoufu naugb en enara dou maman mamjemouwer sug nosa touohob. Anai en, kaba, eni sud hom gedig en esai ELOHIM en moro sug nosohob. 28:26 Anai ELOHIM enara dou en, endagai: Dan demouwan naugb indan lusud gin, kaba, len lemeiya dau indan geicara. Dara len lemouman dan indir. Hanoba len meru emobgesa, dara len lemeineg aud dan toua deitero. 28:27 Anai len leic len meru edgom. Dara len loc dou lenin merums dougwo dan indir. Dara len leic lenin meriresmougb dougwo indan geicara augwan namcirohob. Dangga hang, ban bemenara dou len dag dau iteitogini, kaba, len louman dan indir ucucugb terimda. Doba len meru emobgesa deitero. Dara ban ben dou len dag len leiya dau indan geicara augwan. Doba len lemecinaga meijouhw augwan asesa touwero. 28:28 Sug Paulus enara debin len dag graga dauwohob, kaba, en esulou len debin deit, endagai: Sug yen meigdoc emeica dan indir an ginerohob, kaba, dan denara se misen dou yen namcir dag ELOHIM mer eisaugb maireseb huhugb gin, kaba, dan demesai dou yen deitero. Doba dan desai dou lugmahara dous. Anai len, kaba, len lemoc dou merums dougwo dag yen ginero. Doba len leic dan indir an, hanoba len laimo namcir toua. 28:29 Sug Paulus enara debin len dag ginohob, kaba, leng Yahudi graga leihwededau en. Dara len merir eisaugwim icira gin medam toua terimda. 28:30 Doba Paulus, kaba, en eigtou se tu hom ingga se arisogomoc hwai. Anai en ohw aregoufu dou lusud gedig meren tu ingga dauwohob. Hang gareg en ouwan naugb edebeij en, kaba, en ebin len toua. 28:31 Hanoba en eic mos naugb en ens dau sug ELOHIM oiharaga lusud ucugb. Dara en esai Mer Geigouhw eisaugb maman Adehsud Yesus Krisdus dou len toua. Dara leng Roma meren mougtir, kaba, len lemen dougwo en an gin touwero. Doba len lamsoho en an gin namcir.

Roma 1

1:1 Surad gini dau dang, Paulus, gedig dan dedag Krisdus Yesus men sogougb, dou yeng se cinogo Roma yen yaugwan. Anai ELOHIM medoc gororougb yen. Hanoba en ouci yen debinim dag en men lusudohob. Dan dog surad gini dou yen, anai ELOHIM enin eng ouci dan deb sug nosohob. Hanoba en eigdoumesa dan douwoswos naugb dan desai en Mer Geigouhw eisaugb Krisdus dou lusud se cinogo augwan toua. 1:2 Mer Geigouhw gin, kaba, menenau touwero. Doba ELOHIM os augwan gini ogdoc men lusud gedig len lesai en moro sug nosa. Hanoba len log areg en os gini augwan se Surad Injil Meb Gecabeci sug nosa touohob. 1:3 Mer Geigouhw gin, kaba, eisaugb en Meisi Yesus Krisdus gedig en edag maman Adehsud naugb mamanohob. Anai sug en edag lusud misen se cinogo gin, kaba, en edag Daud medebeito misen. 1:4 Doba se en medoc mes, kaba, en edag ELOHIM gedig en eigtou se gogouf cucugb en Meisi mohora hom en toua teiteiyohob. Dara ELOHIM ens ainyes dau augwan gini dara goubesa namcir. Anai en eigdoumesa en dau gomom ucugb sug nosa touohob. 1:5 Ogdoc Krisdus gin hom, hang ELOHIM medoc eigouhw an dan. Hanoba en eigdoumesa dan indoho naugb dan desai Mer Geigouhw eisaugb Krisdus dou lugmahara se cinogo augwan toua. Dauntoba len laugwan merdoc ebdebin an en. Dara len laimo en mer an areg en arougb len an gini toua namcir. Anai dan deperwei Krisdus en mohw naugb ginohob. 1:6 Dangga hang, areg ELOHIM arougb dan an ginohob, kaba, eb naugb yen se cinogo Roma toua. Anai yen toua yedag lugmahara. Hang en emeija yen dara eigdoumesa yen meijoho dag Yesus Krisdus men lusud touohob. 1:7 Sug ELOHIM eija yen, dara en eigdoumesa yen meijoho dag ginohob, kaba, dan dog indan surad gini dou yen se cinogo Roma yen yaugwan toua. Hanoba dan dacgeij maman Mamina ELOHIM dara maman Adehsud Yesus Krisdus naugb lan mardoc eigouhw an yen. Dara lan laseyeiyo yen dara laic gesgigouhwesa dou yen dougwo areg gecgu augwan toua terimda. 1:8 Aimougtut, kaba, dan den sijo medam dou ELOHIM naugb yen. Anai yen yemobsara dau sug yen meigdoc ebdebin an Krisdus touwero. Doba yen yes agadgeij naugb yen yaimo en terimda. Dara lusud se cinogo augwan, kaba, len leimiman dau meijen geicara gin. Anai meijen geicara gin, kaba, agaha dou len laugwan touohob. Dangga hang, sug dan denara dou ELOHIM, kaba, dan demesai dan indus augwougb touwero, doba ogdoc Krisdus men geicara naugb dan. Hang dan demeic indus naugb dan demenara dou en eisaugb yen toua namcir. 1:9-10 Dara dan demarges dau sug dan docuncum dou ELOHIM naugb yen touwero. Doba astesda sug dan docuncum dou en, kaba, dan dens yen meijoho dou en toua terimda. Dara ELOHIM en toua ouma debin dan dag areg dan den dou yen gin, kaba, dan demereiyara touwero, doba dan den se misen namcir. Anai dan dedag men sogougb gedig dan desai Mer Geigouhw eisaugb en Meisi dara dan indoc augwan dou lusud ginohob. Dara dan dacgeij en, dauntoba sug en medoc esgirahesa dan, kaba, en ec misis dau dan iteitogini naugb dan dedebeij yen sungga toua. 1:11 Anai dan indoc erleij namcir naugb sug dan dedeiya yen, kaba, dan douwan deic dau areg Mena Gogoufu eic dou danohob gin ingma dou yen toua. Dauntoba areg yen meigdoc ebdebin anohob, kaba, yen yemobsara dau gin touwero. Doba yen yes agadgeij se gin terimda. 1:12 Doba areg dan den dou yen gin, kaba, dag dan demens dou yen den den, isnaro. Doba yen toua yenara yad dan indoc mes toua. Dauntoba sug yen yeiya dag dan indoc ebdebin an Krisdus namcir dara dan deiya dag yen meigdoc ebdebin an Krisdus deigeigouhw touohob, kaba, gini eic dag maman maugwan maiyan mamdocesem ucucugb terimda. 1:13-14 Dan indagunerij, dara dan indamouwerij, mougwa einyana, kaba, dan deic induwemougb esesa naugb dan dedeiya yen sungga. Dauntoba dan dahwan lingma dau yen aud Krisdus. Aninim dag dan dahwan leinyana dau lugmahara aud Krisdus se cinogo gus touohob. Anai leng mesinsin era leng lemedag mesinsinero, dara len leiya surad, era leng lemeiya suradero, kaba, len laugwan meren aremeij eb dou dan naugb dan desai Mer Geigouhw eisaugb Krisdus dou len toua. Doba terimda iteitogin, kaba, sogo maga eb dougwo danaba. Dan douwan dens dau augwan gini meijouhw asesa dou yen. Dauntoba yen yemeija meijuwesa gin deitero, doba yen yecinaga meijouhw augwan asesa toua. 1:15 Dangga hang, sug lusud meren aremeij eb naugb dan dag ginohob, kaba, dan indoc erleij naugb dan desai Mer Geigouhw eisaugb Krisdus gin dou yeng se cinogo Roma yen yaugwan toua. 1:16 Anai Mer Geigouhw gin, kaba, aninim dag ELOHIM men goubesa naugb sug en eigdoc gareg en medoc ebdebin an Krisdus len laugwan dau sesar men gogom augwan namcir. Aimougtut, kaba, emeng Yahudi dara yeng yugmahara toua. Hang igdebes emeba dan naugb sug dan desai Mer Geigouhw gini dou lusud touwero. Doba dan deigdoumesa mer gini moho agas namcir. 1:17 Anai ogdoc Mer Geigouhw gin, kaba, ELOHIM ens ucina dou maman naugb sug en eic gesgigouhwesa dou maman ucugb deit. Ucina dag gini: Gareg en medoc ebdebin an ELOHIM, hanoba en emobsara dau gin touwero, doba en es agadgeij namcir naugb sug en medoc ebdebin an en terimda, kaba, sesar men gogom emeb naugb en toua deitero. Doba ELOHIM eic gesgigouhwesa dou en ucugb deit. Augwan gini aimo dau areg ELOHIM en os dou maman se Surad Injil Meb Mohon deb sug nosa touohob, endagai: Gareg en medoc ebdebin an dan, kaba, dan deic gesgigouhwesa dou en ucugb deit. Hang en emomom touwero. Doba maireseb menau geb huhugb eb naugb en beb huhugb namcir. 1:18 Doba lusud gedig len lebesesar dara meren geicara toua dag mog mog anim ucucugb terimda, kaba, ELOHIM medoc esrougb medam an len namcir. Hang en emamsoho len deb touwero. Doba en ens ainyes dou len dag en esedeb gogom medam deinaugb lenohob. Anai meren geicara gecgu gini, kaba, edag sogo maga dougwo lusud naugb len lemecinaga areg asesa ELOHIM enin medoc mes augwan dag misen touwero. 1:19-20 ELOHIM eicara baimo dag gin an len, anai ebiji dau lona sug en ahasesei cinogo dara en esinsin areg geb se cinogo gin toua, kaba, lusud lecinaga dag enin dous eng ELOHIM misen mohora hom. Dara enin dous eng mobisamougb beb huhugb namcir. Anai ELOHIM ens augwan ogdoc areg en ahasesei gini dag misen dou lenohob. Dangga hang, len leic ara ara ingma naugb sug len launun dougwo meren geicara gecgu gin toua deita? Naro, len lemeic ara ara hom naugb sug len launun dougwo meren geicara dag mog mog gin touwero. Anai areg len meru edeinyum naugb sug len lecinaga eisaugb ELOHIM gin, kaba, enin eng ens dou len. Hang len lemeija meruwesa en toua deitero. Doba len lecinaga areg eisaugb en augwan gini dag misen namcirohob. 1:21 Doba sug len lecinaga areg eisaugb ELOHIM augwan dag ginohob, kaba, len lemesijaresa en dara len lemeigdoumesa en moho dag ELOHIM misen, dara len lemen sijo dou en eisaugb areg en ahasesei, dara esinsin gin touwero. Doba len lamsoho dau gin namcir. Dangga hang, len lemauwam an areg gobosboro toua deitero. Doba meren geicara gin, kaba, arautut len naugb len lauwam an areg dag edgom mogud dous. Anai mouf emaisema len merdoc mes deit touwero. Doba augwan edag lobeigbogo terimda. 1:22 Hanoba len leigdoumesa lenin meroho an meren geicara gini dag len meru ouforoho namcir touohob. Dobnaro. Areg len leicara laimo gin, kaba, dag lusud gedig len meru emaiyero dous. 1:23 Anai sug len merdoc dag lobeigbogo ginohob, kaba, len lemesijaresa ELOHIM Geis Huhugb sugraga toua deitero. Doba len leperwei en mocbobaga naugb len lesijaresa seiseij gedig len merucbobaga aninim dag lusud getaha, dara ba, dara aremeta gedig mohora hogu, dara aremeta gagrigrilo gin dous. 1:24 Sug len leic merus naugb len laimo areg len meru edgom an dag ginohob, kaba, ELOHIM emesedougwo len toua deitero. Doba en amsoho len debin gin namcir. Hang len lemaimo areg geigouhw toua deitero. Doba len laimo areg len merdoc etrij icira aud areg gogor dara areg lusud locuc an augwan anim terimda. 1:25 Anai sug len lecinaga areg asesa ELOHIM enin medoc mes dag misenohob, kaba, len lemaimo areg se geica gin touwero. Doba len leic merus naugb len laimo areg areibahau dag seiseij gin dous. Hang len lemesijaresa ELOHIM dara len lemeigdoumesa en moho an areg en ahasesei dara esinsin gin touwero. Doba len lesijaresa dara leicara laimo areg ELOHIM en esinsin dara ahasesei gin terimda. Dobnaro. ELOHIM enin dous eng edeinyum naugb sug lusud maman maugwan magahugouhw an en beb huhugb terimda. Augwan gini asesa dag misen namcir. 1:26 Dangga sug lusud lesijaresa areg ELOHIM ahasesei dara esinsin augwan dag gin terimda, kaba, ELOHIM emesedougwo len toua deitero. Doba en amsoho len debin gin naugb len laimo areg len merdoc etrij icira dag areg gogor toua namcir. Hang ligida len lemaimo meren geicara naugb len lohw len meraga dou ligiji toua deitero. Doba len ledreg dau gin naugb len lohw len meraga dou ligida lenin ucucugb dous. 1:27 Dangga toua, ligiji len lemaimo meren geicara naugb len laimo ligida touwero. Doba sug len merdoc etrij icira ligiji lenin dag ginohob, kaba, len lohw len meraga doum aibibra toua terimda. Sug len laimo areg eic igdebes dou lusud ucucugb dag gin, kaba, ELOHIM esedeb en medoc mes naugb en eic gogom medam dou len, aimo dau meren geicara gecgu gin an len toua. Anai meren geicara augwan gini dag mog mog namcirohob. 1:28 Doba sug len lemouwan naugb len lemebin areg asesa ELOHIM enin medoc mes augwan se len merdoc mes deitero, kaba, en emesedougwo len meru naugb len laimo areg geigouhw toua deitero. Doba en amsoho len debin gin. Hanoba len laimo areg en en dougwo len anohob augwan terimda, anai len meru eiyema namcirohob. 1:29 Dangga hang, len lemaimo areg edag beim anim toua deitero. Doba len laimo areg gecgu anim dag len lagungun len gus meren aremougb. Dara len loho aremer debinim toua terimda. Dara len merdoc esdigeijim. Hanoba len merdoc emeigouhw an lusud touwero, doba len les len dara len lesara darem. Dara len lerba mohoisa, kaba, len lehilon ucina naugb leic gogom doum toua terimda. 1:30 Dara len lemeigdoumesa len gus meroho touwero. Doba len lecic len gus meroho gouhw genes, dara len lesmesmanim toua namcir. Dara len merdoc mog mog an ELOHIM. Hang len lemaimo en mer gin touwero. Doba sug len leic merus, dara len merdoc agas dag ginohob, kaba, len leimiman lenin an meren geicara deseino lusud. Dara len lehilon ucina naugb sug len leic gogom dou len gus aibibrida. Dara len lemaimo merner dara merimir len merir touwero. Doba len lohoiya len merir toua terimda. 1:31 Dara len meru emaiso ara ara toua deitero. Doba sug len merdoc oungmogo namcirohob, kaba, len merdoc dag hom se areg len leic dara areg len los dour touwero. Doba len laimo augwan gini dara merdoc hwai an gin terimda. Dangga hang, len merdoc emerij an lusud naugb len lemaigdougwo lusud an meren aremer touwero. Doba len merdoc agadgeij naugb len leic gogom dou len namcir. 1:32 Dara len lecinaga dau areg Musa men gomnomna enara eisaugb lusud gini men meijouhw augwan asesa touohob. Anai men gomnomna gini enara endag astesda gareg en eicara gecgu dag gin, kaba, ELOHIM esedeb gomom deinaugb lenohob. Dobnaro. Len lemarges dau meren geicara gecgu gin debero. Doba len leic merus naugb len leicara laimo terimda. Dara len lemaimo ucina gin naugb lenin dousero. Doba lusud gedig len leicara aninim dag gin toua, kaba, len lousa deisa, hanoba len leigdoumesa len meroho an gin toua namcir.

Roma 2

2:1 Dangga, dan insirija, sug yen yecinaga dag ELOHIM esedeb gomom deinaugb len gragohob, kaba, ehin yen meigdoc mes naugb yen yowun len gus meroho an meren geicara gecgu gin touei? Naro, yen yemeicara danggero. Anai sug yen yowun len gus an meren geicara gecgu, doba meijen geicara toua aninim dag len, kaba, gini aninim dag yen yeic gogom debin yenin touohob. Hang sud hom dau yen, kaba, en emaunun dougwo naugb sug en owun len gus an meren geicara gecgu dag gin toua deitero. Doba en arges dau gin namcir. Anai en emeic ara ara naugb en emaihiron dougwo enin an men geicara gina? Naro, en emeicara hom ingma touwero. 2:2 Dara maman macinaga dau sug ELOHIM ogod aremer deinaugb lusud, kaba, dag en emobsara aud sud hom touwero. Doba gareg en eicara gecgu dag gin, kaba, en eic gogom dou len, aimo areg se geica dara gedag beim an len namcir. 2:3 Dangga hang, dan insirija, sug ELOHIM aimo areg se geica an lusud dag gin dous, kaba, yen youdesa dag en emogod gogom deinaugb yeneroei? Doba en amsoho yen namcirei? Naro, en emarges dau gin touwero. Doba en ogod gogom medam deinaugb yen toua terimda. Anai meijen geicara toua aninim dag len gragohob. 2:4 Doba ELOHIM medoc eigouhw an yen, hanoba en emeic gogom dou yen dedemeda touebma. Doba en eigtou ateteij yen an meijen geicara gecgu gin terimda. Dangga yen youdesa dagiro? Edeinyum naugb sug yen yesbes an ELOHIM, hanoba yen yeic meijus naugb yen yaimo meijen geicara gecgu gin toua namcirei? Naro, yen yemauwam an didi danggero. Anai sug ELOHIM ens men geicara geigouhw dou yen dag ginohob, kaba, en ouwan naugb men geicara gini arautut yen. Dauntoba yen yesga meijen sesar dareg yen yahau an dougwo toua. 2:5 Dobnaro, yen yemeineg dau meijen sesar dara yen yemahau an dougwo touwero. Doba yen yeic meijus naugb yen meigdoc agadgeij an gin terimda. Dangga hang, edebeij Lona Sug ELOHIM Ogod Aremer Aga Lusud laugwan, kaba, en eic gogom medam bedreg dou yen namcir. Anai meijen geicara gin, kaba, dag yen yobdeb debinim beisaugblo naugb yeninohob. ELOHIM eicara dag gini, anai se Lona ingga, kaba, en ens enin ainyes dou lusud dag en medoc emesgiraha an sesar hom touwero. Doba en medoc esrougb an augwan gini namcirohob. 2:6 Hang en emobsara aud sud hom touwero. Doba en ogod aremer augwan se geica dara gedag beim an len namcir, aimo dau astesda sud hom yom men geicara dou en toua. 2:7 Dangga gareg en ouwan naugb ELOHIM ogugwo men gogouf cucugb ingma dou en, dara en ouwan naugb sug ELOHIM eigdoumesa en moho, dara en ehilon ucina naugb sug ELOHIM eic maireseb menau geb huhugb dou en toua, kaba, ELOHIM eic maireseb huhugb gin dou len namcir. Anai len lemarges dau meren geicara geigouhw gin touwero. Doba len los debin gin terimda, hang ELOHIM emeic gini naugb emauni dou len toua. 2:8 Doba gareg en eic mos naugb en ed enin deseino len gus terimda, hanoba en emaimo areg asesa ELOHIM enin medoc mes touwero. Doba en aimo areg gecgu gin dous, kaba, ELOHIM en medoc obgos an len naugb en eic gogom medam dou len toua. 2:9 Dangga gareg en medoc etrij icira naugb en aimo areg gecgu dara mog mog an lusud namcir, kaba, ELOHIM eic gogom dara mog erij dou len laugwan. Aimougtut, kaba, dau emeng Yahudi dara yeng yugmahara yen yaugwan toua. 2:10 Doba len gedig merdoc erleij naugb leicara eigouhw an lusud terimda, kaba, ELOHIM emeic mog erij dou len touwero. Doba en ogugwo men gogouf cucugb ingma dou len dara en eigdoumesa len meroho agas namcir. Hanoba en eic gesgigouhwesa dou len ucugb toua. Aimougtut, kaba, dou emeng Yahudi dara yeng yugmahara yen yaugwan toua. 2:11 Anai sug en ogod aremer aga lusud, kaba, en emeigdoumesa sud hom ingma en moho emedreg dau len gus touwero. Doba sug en ogod aremer gin, kaba, en aimo ucina hom an len laugwan toua terimda. 2:12-13 Dangga emeng Yahudi gedig ELOHIM eic men gomnomna ogdoc Musa dou emenohob. Hanoba sug emen emebesesar bedreg dag gin, kaba, en ogod gomom dara en eic mor mor se dum smougb deinaugb emen namcir, aimo dau areg en og se men gomnomna eisaugb gini an emen toua. Anai ELOHIM emeic gesgigouhwesa dou emen sug emen emouman men gomnomna gin dousero. Doba en eic gesgigouhwesa dou emen dau sug emen emaimo areg en arougb emen an se men gomnomna gin toua terimda. Doba yeng yugmahara, kaba, ELOHIM emeic men gomnomna ogdoc Musa dou yenero. Dangga hang, sug yen yebesesar, kaba, en emaimo gogom areg en og se men gomnomna eisaugb gini an yen touwero. Doba en ogod gogom dara en eic mor mor se dum smougb dou yen, aimo dau meijen geicara augwougb dou yen dous. 2:14-15 Anai meijen geicara ens ainyes dag areg ELOHIM arougb lusud an se men gomnomna, kaba, en og deb augwan se yen meigdoc mes teiteiyohob. Dara meijen gauwamara toua ouma debin gin terimda. Anai sug yen yaimo areg ELOHIM arougb lusud an se men gomnomna augwan dag gin, kaba, meijen gauwamara gini eigdoumesa yen meijoho. Doba sug yen yedreg men gomnomna gin, kaba, meijen gauwamara owun yen meijoho an gin toua namcir. Dangga hang, yeng yugmahara, kaba, yen yemecinaga ELOHIM men gomnomna areg en eic dou emeng Yahudi ogdoc Musa gin touwero. Doba sug yen yeic dau yenin meigdoc mes naugb yen yaimo areg ELOHIM arougb lusud an se men gomnomna gin augwougb dag gin, kaba, yen yens yenin ainyes dag yen yecinaga areg ELOHIM ouwan dara emouwanero augwan dag misen namcirohob. Hang gini emeperwei ELOHIM men gomnomna ogdoc Musa dag gomnomna se yen meigdoc mes, anai yen yemecinaga men gomnomna gini men meijouhw asesa touebma. 2:16 Areg graga, kaba, aimo ELOHIM men ucina naugb maman se lona sug en ogod areg maman macgoneh se maman mamdoc mes dara areg maman mauwaman augwan ogdoc Yesus Krisdus gini. Anai en esedeb lona hom naugb ginohob. Gin, kaba, aimo dau areg dan dens dou lusud sug dan desai Mer Geigouhw eisaugb Krisdus dou len sug nosa touohob. 2:17 Sug ELOHIM eicara dag gin an lusud laugwan se lona ingga, kaba, dagiro naugb yeng Yahudi yenina? Anai yen yeigdoumesa yenin meijoho dag leng Yahudi misen. Hanoba yen yod meijina debsa Musa men gomnomna dag buc gototo namcir. Dara yen yeimiman yenin deseino len gus dag ELOHIM ouci yenin dag men lusud touohob. 2:18 Dara men gomnomna gin, kaba, ens aremeijouhw augwan asesa dou yen. Dangga hang, yen yecinaga areg asesa ELOHIM enin medoc mes augwan dag misen namcir. Dara eic dag yen meiju ouforoho naugb yen yed areg gecgu dau areg geigouhw gin touohob. 2:19 Sug yen yecinaga meijouhw augwan asesa dag ginohob, kaba, yen yeigdoumesa yenin meijoho dag yen meiju ouforoho edeinyum naugb sug yen yeinoisa leng meriresmougb, dauntoba len leiya lo asesa ucugb. Dara yen youdesa yen yedag mouf naugb yen yaisema leng leigtou se lobeigbogo, dauntoba len lecinaga ucina aud mouf gin toua. 2:20 Dangga hang, yen yemen dougwo leng laimo areg gecgu terimda, kaba, dag len lemeicara lemaimo gin deitero. Doba len larges dau namcir. Dara yen yedidib meijouhw dau Musa men gomnomna dou logodeh, dauntoba len lecinaga augwan asesa toua. Anai yen meigdoc eica dag se gomnomna gin, kaba, areg se geica eisaugb ELOHIM ebsohob. Dara edeinyum naugb sug yen yecinaga aremeijouhw augwan asesa toua terimda. 2:21 Doba sug yen yesulou, dara yen yen dougwo, dara yen yedidib meijouhw augwan dou lusud dag gin terimda, kaba, dagiro, naugwe hang, yen yemesulou dara yen yemen dougwo yenin an meijen geicara ginero? Anai yen yen dougwo lusud dag len lemeiyoho len gus meren aremougwero. Doba yenin, kaba, yen yeiyohora namcirohob. 2:22 Dara yen yen dougwo lusud dag len merisira emebsa ligida gus aibibra touwero. Doba yenin, kaba, yen meisira ebsa ligida gus ucucugb terimda. Dara yen yesulou lusud dara goubesa namcir naugb sug len lemecguna dou dara lemesijaresa seiseij touwero. Doba yenin, kaba, yen yeinesa meren tuari naugb yen yesma aremougb areg lusud leic dou seiseij gin touohob. 2:23 Dara yen yeimiman yenin an Musa men gomnomna deseino lugmahara gin toua terimda. Doba yen yedreg en mer gin namcir. Hang yen yeic igdebes dou en touohob. 2:24 Augwan gini aimo dau areg sud hom, moho Yesaya, en owun yen meijemouwer len meroho an se Surad Injil Meb Mohon sug nosa touohob, endagai: Ogdoc yen gin meijen geicara, hang lugmahara leic maman Adehsud en moho lacecim terimda, anai yen yedreg men gomnomna gin mougwa einyanohob. 2:25 Dangga sug yen yaimo areg ELOHIM arougb yen an se men gomnomna gin terimda, kaba, gec mos dau ousa yen deseino ELOHIM. Anai gec mos gin, kaba, ansins dag yen meigdoc esgirahesa naugb yen yaimo en mer gin toua terimda. Doba sug yen yedreg en mer dag gin namcir, kaba, en owun yen meijoho dag lusud gedig len lemec merus dauwebma deseino en dous. 2:26 Doba leng lugmahara, kaba, len lemec len merus dau dag ansins debin ELOHIM men gomnomna gin touebma. Anai en emeic men gomnomna gin dou lenbuma. Doba sug len laimo areg ELOHIM arougb lusud an se men gomnomna augwougb dous, kaba, en owun len meroho dag lusud gedig len lemec merus dauwebma dag gin terimdei? Naro, en emeicara danggero. Doba sug len laimo en mer augwougb dag gin, kaba, en eigdoumesa len meroho dag lusud gedig len lec merus dauwohob deseino en toua namcir. 2:27 Dangga hang, se Lona Sug ELOHIM Ogod Aremer Aga Lusud laugwan, kaba, leng lugmahara gini len lowun yeng Yahudi yen meijoho an meijen geicara gin toua namcir. Anai len gin, kaba, ELOHIM emeic men gomnomna ogdoc Musa dou lenbuma. Hang len lemec merus dau lemauma debin gin touebma. Doba len laimo areg ELOHIM arougb yen an se men gomnomna augwan augwougb namcirohob, aimo dau areg len merdoc arautut len aud gin dous. Doba yeng Yahudi, kaba, ELOHIM eic men gomnomna ogdoc Musa dou yen. Hanoba en og areg en arougb yen an gini se igdahab naugb yen. Dara yen yec yen meijus yauma debin gin touohob. Doba yen yedreg dau en mer gin terimda. Hang se lona ingga, kaba, leng lugmahara gini len lowun yen meijoho an gin toua namcir. 2:28 Anai gareg en edag leng Yahudi misen. Dara en ec mos dau dag misen touohoba? Sud hom gedig en aimo Musa men gomnomna aud gousanara. Hanoba en ec mos dau en maga gin dousei? 2:29 Naro, sud hom gin, kaba, en emedag leng Yahudi misenero. Doba sud hom areg Mena Gogoufu ec mos dau en se en medoc mesohob, kaba, en eng edag leng Yahudi misen. Anai gec mos dau gin, kaba, emogdoc sug en aimo Musa men gomnomna ginero, doba ogdoc Mena Gogoufu men goubesa gin dous. Sud hom gin, kaba, lusud lemeigdoumesa en moho an gin touwero. Doba ELOHIM enin eng eigdoumesa en moho an gin namcir. Anai gec mos se medoc mes gin, kaba, eic dag en emaimo areg dag sesar toua deitero. Doba en esedeb medoc mes naugb en aimo areg asesa ELOHIM enin medoc mes dous.

Roma 3

3:1 Doba ligbum dau yen, kaba, yen yesbes an dan, yendagai: Sug ELOHIM emeigdoumesa mamang Yahudi maman mamoho emedreg dau leng lugmahara len meroho dag ginero, kaba, maman mara mera ara edreg dau len sug maman madag ELOHIM enin men meijouhuda mamang Yahudi gina? Dara sug maman mac mamus dau naugb mauma debin gin, kaba, gin toua emeigouhw dagiro? 3:2 Naro, ELOHIM eigdoumesa mamang Yahudi maman mamoho edreg dau lugmahara se aremer einyanohob. Anai aimougtut, kaba, en eic enin men gomnomna ogdoc Musa dou mamanin dous eng naugb sug maman maimo augwan gini dara maman mamdoc hom namcir. 3:3 Doba ligbum dau yen, kaba, yen yauni dou dan, yendagai: Leinyana dau leng Yahudi, kaba, len lemaimo ELOHIM men gomnomna areg en ogugwo dou lenohob dara len merdoc hom deitero. Doba len larges dau namcirohob. Areg yen yen gini, kaba, misen namcir. Doba dagiro naugb sug leinyana len lemaimo areg ELOHIM ogugwo dou maman gini dara merdoc mes deitero? Yen youdesa dau sug len leicara danggohob, kaba, eic dag ELOHIM en emaimo areg en os dou mamanohob dara en medoc hom toua deiteroei? Doba en arges dau gin toua namcirohobei? 3:4 Naro, en emarges dau ginero. Doba areg en os dou lusud dag ginohob, kaba, en aimo augwan gini dara en medoc hom an len terimda. Anai lusud, kaba, len laugwan lereiyara mougwa einyana namcirohob. Doba naugb ELOHIM, kaba, maman macinaga dag en emereiyara mougwa hom touwero. Doba en aimo areg se geica an maman terimda dous. Augwan gini esogwa deisa areg Daud en erba Ugwaremer an deb se Surad Injil Meb Mohon deb sug nosa touohob, endagai: Astesda sug ban benara dou lusud, kaba, len leiya, doba ban benara augwan se geica dou lenohob. Dangga hang, astesda sug len loho las ban an aban geicara doum, kaba, len lemogod gogom ingma deinaugb ban touwero. Doba len larges dau terimda, anai len leiya dag ban baimo areg edag beim dara obosboro an len namcirohob. 3:5-6 Doba sug maman geicara gecgu ens ainyes dou lusud dag ELOHIM aimo augwan edag beim an maman dag ginohob, kaba, maman man ara eisaugb gina? Dag ELOHIM ebesesar sug en ogod gogom deinaugb maman an maman geicara gecgu gin touohobei? Naro, maman mamenara dangga touwero. Anai sug ELOHIM emaimo areg edag beim dara obosboro an lusudero, doba en edreg touohob, kaba, dagiro, naugwe hang, en emogod aremer aga mamana? Naro, en emeicara emaimo dag gin an maman touwero. Doba en esedeb naugb sug en ogod aremer aga mamanohob. Hang gini ens ainyes dou maman dag en emebesesar mougwa hom touebma. Doba en aimo augwan edag beim an maman namcir. Doba areg dan denara dou yen gin, kaba, aimo dau lusud se cinogo gini meren gauwamara dous. 3:7 Doba ligbum dau yen, kaba, yen yesbes an dan deit, yendagai: Sug maman geicara dag amcirac gini ens ainyes dou lusud dag ELOHIM aimo areg en os gini se geica namcirohob, kaba, dagiro, naugwe hang, en owun maman mamoho dag maman mabesesarohoba? Anai maman geicara gecgu gin, kaba, eic dag lusud leigdoumesa en moho an men geicara geigouhw gin touohob. 3:8 Doba sug areg graga augwan dag misen namcirohob, kaba, eigouhw naugb maman masulou lusud dag len laimo areg gecgu terimda. Dauntoba meren geicara gin, kaba, era mera areg geigouhw dag lusud leigdoumesa ELOHIM en moho an gin toua terimda. Dara ligbum, kaba, len lowun dan indoho dag dan desulou lusud dag gin touohob. Hang emedeinyum naugb ELOHIM emogod gogom deinaugb len toues. Anai meren geicara dag gini, kaba, edeinyum naugb ginohob. 3:9 Dangga areg dan den dou yen graga, kaba, men meijouhw dagiro? Dag emeng Yahudi, kaba, emen emoho eb taiba deseino ELOHIM edreg dau yeng yugmaharahobei? Naro, dan demenara dangga dou yenero. Anai dan dens dou yenohob dag emeng Yahudi dara yeng yugmahara maman maugwan madag sogougb dou sesarohob. 3:10 Augwan gini esogwa deisa areg lusud len log deb se Surad Injil Meb Mohon deb sug nosa touohob, lendagai: Sud hom ingma, kaba, en emaimo areg asesa ELOHIM enin medoc mes. 3:11 Hang en emecinaga en mer gini men meijouhw dara en medoc emerleij aud en touwero. 3:12 Doba len laugwan lohw meridgo dou enohob. Hang sud hom ingma dau len, kaba, en emaimo areg geigouhw an lusud touwero. Doba len laugwan lobsara dau ucina misen, hanoba len laimo areg ogor anim toua terimda. 3:13 Len merir toua, aninim dag aremogougb moda gedig lusud lemerba cinogo mor debinbuma. Dangga hang, len lemenara misen touwero, doba len lerba mohoisa. Dara meren genara augwan, kaba, eic gomom dou lusud toua, aninim dag hinogo sug au lusud, kaba, len lomom an toua namcir. 3:14 Dara len merdoc obgos an lusud naugb len louwaran len toua terimda. 3:15 Dara len merohora eijouhw naugb sug len leic mog erij dou lusud, dara len les len, dara lohud len toua. Hang len lemaimo ucina gesgigouhwesa an lusud touwero. 3:16-17 Doba astesda cinogo sug len leihweda, kaba, len logod lusud merur mor namcir. Dara len leic gogom dou len toua terimda. 3:18 Anai len lemahau dau ELOHIM an meren geicara ginero, doba len leic merus naugb len laimo gin toua namcir. 3:19 Doba areg leng nosa len logod deb se Surad Injil Meb Mohon ginohob, kaba, len log dou emeng Yahudi gedig Musa men gomnomna oiharaga emenohob. Dauntoba sud hom ingma dau emen, kaba, en emaunun dougwo men geicara deseino ELOHIM toua deitero. Doba en owun emen an yugmahara maman maugwan mamoho dag maman maugwan mabesesarohob. 3:20 Dangga hang, ELOHIM emeic gesgigouhwesa dou sud hom ingma ogdoc sug en aimo Musa men gomnomna gin touwero. Doba men gomnomna gini ens dou maman dag maman mabesesar namcirohob. 3:21 Doba iteitogini, kaba, ELOHIM ens ucina dou mamanohob naugb sug en eic gesgigouhwesa dou lusud ucugb deit. Dara men ucina gin, kaba, emogdoc Musa men gomnomna gin touwero. 3:22 Doba en eic gesgigouhwesa dou len ogdoc sug len merdoc ebdebin an Yesus Krisdus gin dous. Dara en emesi emeng Yahudi aiyei touwero. Doba gareg dau emeng Yahudi dara yeng yugmahara en medoc ebdebin an Krisdus dag en omom naugb men sesarohob, kaba, en emomom deitero. Doba ELOHIM eic gesgigouhwesa dou en ucugb deit. 3:23 Anai maman maugwan mabesesarohob. Hang sud hom ingma en emedebeij ELOHIM men gogouf cucugb touwero. Doba maman maugwan madebeij taij dous. Augwan gin, kaba, aimo dau areg Musa dara leng lesai ELOHIM moro sug nosa len log deb se meren surad deb sug nosa touohob. 3:24 Dara sug ELOHIM eic gesgigouhwesa dou maman, kaba, en emacgeij aremougb dau maman touwero. Doba ogdoc en medoc an maman gin dous, hang en emeic gesgigouhwesa dag mogud dou maman ogdoc Krisdus men geicara gin toua namcir. Anai Krisdus enin eng esga maman dau sesar men gogom augwanohob. 3:25 Dangga hang, gareg en medoc ebdebin an Krisdus ginohob, kaba, sesar men gogom emeb naugb en toua deitero. Doba ELOHIM aigdougwo men sesar augwan dau en namcirohob. Anai en ens Krisdus ainyes deseino maman dag enin dous eng omom taiba sogo salib naugb maman sesarohob. Dauntoba maman sesar emeb naugb maman toua deitero. Doba ELOHIM oguc dougwo maman sesar augwan bediyebeiya dau maman ogdoc Krisdus an mogwihi gin toua. ELOHIM esa en naugb en omom taiba sogo salib dag gini, dauntoba maman macinaga dag ELOHIM emaimo sesar hom touwero. Doba dag se men geicara augwan, kaba, en aimo areg edag beim dara obosboro an gin dous. Anai sug nosa, kaba, ELOHIM emecic dau lusud meren sesarero, doba en amsoho len an meren sesar gin dous. Hanoba en emeic gogom dou len touwero. Doba en eigtou ateteij len an namcir. 3:26 Doba iteitogin, kaba, en emamsoho lusud an meren sesar gin deitero. Hanoba en emeigtou emateteij an meren geicara gecgu gin touwero. Doba en ehilon ucina naugb sug en aigdougwo lusud meren sesar dau len toua. Dangga hang, gareg en medoc ebdebin an Krisdus dag en omom taiba sogo salib naugb men sesar ginohob, kaba, en emomom deitero. Doba ELOHIM eic gesgigouhwesa dou en ucugb deit. En eicara dag gin, dauntoba en ens enin ainyes dou maman dag en emaimo sesar hom touwero. Doba en aimo areg edag beim dara obosboro an augwan dous. 3:27 Sug ELOHIM eicara dag ginohob, kaba, maman maigdoumesa mamanin mamoho an ara deseino en deita? Naro, maman marges dau namcir. Dara dagiro, naugwe hang, maman maicara dag gina? Maman maicara dag gini, anai ELOHIM emeic gesgigouhwesa dou maman emogdoc sug maman maimo Musa men gomnomna ginero. Doba ogdoc sug maman mamdoc ebdebin an Krisdus en dous. 3:28 Dangga areg maman macic ginohob, kaba, men meijouhw dag gini: ELOHIM emeic gesgigouhwesa dou lusud dau sug len laimo Musa men gomnomna ginero. Doba en eic gesgigouhwesa dou len ogdoc sug len merdoc ebdebin an Krisdus hom dous. 3:29 Dara en eicara dangga dou yeng lugmahara yen toua. Anai eni edag ELOHIM naugb emeng Yahudi emen dousei? Naro, eni ELOHIM naugb emeng Yahudi emen dousero, doba eni ELOHIM naugb yeng yugmahara yen touohob. 3:30 Dangga sug eni maman maugwan maman ELOHIM hom dag ginohob, kaba, en eic gesgigouhwesa dou emeng Yahudi ogdoc sug emen emdoc ebdebin an Krisdus. Dara en eic gesgigouhwesa dou yeng yugmahara ogdoc sug yen meigdoc ebdebin an en toua. 3:31 Doba sug ELOHIM eic gesgigouhwesa dou maman ogdoc dau sug maman mamdoc ebdebin an Krisdus gin dous, kaba, gini men meijouhw dag emen emerba Musa men gomnomna dau emen touohobei? Dangga, isnaro. Doba sug emen emdoc ebdebin an Krisdus dag gin, kaba, emen emauma debin men gomnomna dag augwan gini dag misen namcirohob.

Roma 4

4:1 Doba sug ELOHIM eic gesgigouhwesa dou lusud dau sug len merdoc ebdebin an gin dous, kaba, dan deic dau emeng Yahudi emen emjemouwa Abraham en aimo ucina dag ara naugb ELOHIM eic gesgigouhwesa dou ena? 4:2 Anai sug ELOHIM eic gesgigouhwesa ucugb dou en ogdoc men geicara, kaba, men goubesa inggebga naugb sug en eic ara ara baigdoumesa en moho deseino ELOHIM namcir. Dobnaro. En emeic ara ara ingma naugb sug en eigdoumesa en moho deseino ELOHIM mougwa hom touwero. 4:3 Anai lusud log se Surad Injil Meb Mohon eisaugb en deb sug nosohob, lendagai: Abraham, kaba, en medoc ebdebin ELOHIM an areg en os dou en dous. Hang en emeigdoumesa Abraham en moho naugb en emeic gesgigouhwesa ogdoc gini dag mogud dou en toua. 4:4 Anai sug sud hom eicara naugb sug lusud lohw en momsi dou en, kaba, len lemeigdoumesa en moho an dag len lemoho en momsi dag mogudero. Doba gini aimo dau enin mesira eigdara dous. 4:5 Doba gareg en emeicara naugb sug ELOHIM eic gesgigouhwesa dou enero, hanoba en medoc ebdebin an areg ELOHIM os dou en gin dous, kaba, ELOHIM eic gesgigouhwesa dag mogud ucugb dou en, aimo dau areg sud hom gini en medoc ebdebin an gin toua. Anai en od mena debsa ELOHIM dag enin eng men goubesa inggebga naugb en ouma debin dou lusud dag meren sesar emeb naugb len deitero. Doba augwan ediyebeiya dau len namcirohob. 4:6-8 Augwan gini aimo dau aremeijouhw areg Daud erba Ugwaremer an deb sug nosohob. Anai en ens dau sud hom areg en emaimo Musa men gomnomna naugb sug ELOHIM eic gesgigouhwesa dou en deitero, doba en od mena debsa ELOHIM an gin dous, kaba, dag en medoc momogo deitero, doba en medoc agahugouhw namcirohob. Hang en emenara dou maman, endagai: Lusud areg ELOHIM aigdougwo meren sesar dau len, kaba, len merdoc agahugouhw namcir. Anai len gin, kaba, ELOHIM oguc dougwo meren geicara gecgu augwan gin dau lenohob. Dara sud hom areg ELOHIM emecic dau men sesar toua deitero, kaba, en medoc agahugouhw toua terimda. 4:9 Doba merdoc gagahugouhw areg Daud erba Ugwaremer an ginohob, kaba, en erba eisaugb emeng Yahudi gedig emen emec emus dauwohob emen dousei? Naro, en emerba an gini eisaugb emen dousero, doba naugb yeng yugmahara gedig yen yemec meijus daubuma yen toua. Anai Surad Injil Meb Mohon enara deb, endagai: Abraham medoc ebdebin an areg ELOHIM os dou en dous, kaba, edeinyum naugb sug ELOHIM eic gesgigouhwesa dou en ucugb. Dan dens dau aiyad gini dou yen graga touohob. Hang medoc gagahugouhw gin, kaba, emediyebeiya dau yen yugmahara touwero. Doba eb naugb yen yaugwan toua namcir. 4:10 Anai sug ELOHIM eic gesgigouhwesa dou Abraham ucugb, kaba, en eic gini dou en se lona giro? Sug en ec mos dauwohobei? Era, narobmei? Naro, ELOHIM eic gesgigouhwesa dou en ucugb sug en emec mos daubuma. 4:11 Hanoba en arougb Abraham naugb sug en ec mos dau se lona daiyamo ansins debin gin toua. Dauntoba Abraham ecinaga dag ELOHIM eic gesgigouhwesa dou en ucugwohob sug en emec mos daubuma. Anai en emohoiya ELOHIM en mer an areg en os dou enero. Doba en medoc ebdebin an areg ELOHIM os dou en gin namcirohob. Dangga hang, gareg en emec mos daubuma, hanoba en medoc ebdebin an areg ELOHIM os dou en eisaugb Krisdus gin toua, kaba, Abraham en edag len meraguna mebin goc ino naugb len laugwanohob. Anai ELOHIM eic gesgigouhwesa dou len ucugb, aninim dag en eic gesgigouhwesa dou Abraham sug en emec mos dau sug nosa touebma. 4:12 Dara en emedag leng lemec merus daubuma len meraguna mebin gin dousero. Doba en edag mamang Yahudi gedig maman mac mamus dauwohob, maman mamaguna mebin goc ino naugb maman toua. Dara en emedag maman mamaguna mebin dau sug maman mac mamus dau gin touwero. Doba en edag maman mamaguna mebin goc ino naugb maman, anai maman toua mamohoiya ELOHIM en mer an areg en enara dou maman eisaugb Krisdus gin touwero. Doba maman masogwa deisa Abraham mohotimei mohw naugb maman mamdoc ebdebin an areg ELOHIM os dou maman gini toua terimda. Aninim dag Abraham emohoiya ELOHIM en mer an areg en os dou en eisaugb en medebeito hom, moho Krisdus gin, sug nosa touwero. Doba en medoc ebdebin an areg ELOHIM os dou en terimda touohob. 4:13 Dangga areg ELOHIM os dou Abraham an en medebeitor dag en eic cinogo augwan dou len dag lenin meren, kaba, en emos dou Abraham dau sug en emaimo ELOHIM men gomnomna geic dou Musa ginero. Doba en os dou Abraham dau sug en medoc ebdebin an areg en os dou en dous. Hang emogdoc gini, kaba, ELOHIM emeic gesgigouhwesa dou en ucugb touohob. 4:14 Anai sug ELOHIM eic areg en os gini dou lusud gedig len laimo Musa men gomnomna gin dous, kaba, maman mamdoc ebdebin an en naugb ara? Naro, emera mera dau maman touwero. Dara areg ELOHIM en os dou mamanohob, kaba, dag augwougb toua namcir. 4:15 Dobnaro. ELOHIM emeic areg en os dou maman dau sug maman maimo men gomnomna geic dou Musa ginero. Doba en eic gogom medam ogdoc gini dou maman dous. Anai maman madreg dau gini mougwa einyanohob. Doba sug maman mamaimo gomnomna gin deitero. Hanoba maman mamdoc ebdebin an areg ELOHIM os dou maman dous, kaba, eic dag maman mamedreg gomnomna hom. Hang gogom emeb naugb maman touwero, doba maman marges dau gin namcirohob. 4:16 Dangga hang, areg ELOHIM en os dou Abraham sug nosa, kaba, en emos dou en dau sug en aimo ELOHIM men gomnomna ginero. Doba ELOHIM os dou en ogdoc sug Abraham medoc ebdebin an en dous. Dauntoba areg ELOHIM os dou en gin, kaba, emeb naugb en medebeitor gedig len laimo ELOHIM men gomnomna geic dou Musa gin dousero. Doba eb naugb en medebeitor dau lugmahara gedig len merdoc ebdebin an ELOHIM dous len laugwan toua, aninim dag Abraham medoc ebdebin an ELOHIM sug nosa touohob. Anai Musa men gomnomna gin, kaba, emeb naugb lenero. ELOHIM eicara dag gini dauntoba areg en os dou Abraham gini, kaba, emediyebeiya dau en medebeitor hom touwero. Doba en eic dou len laugwan dag mogud namcir, aimo dau areg en medoc eigouhw an lenohob. Dangga Abraham gin, kaba, en edag meijemouwa mebin naugb emen gedig emen emec emen emus dau dousero. Doba en edag mebin naugb yen gedig yen yemec meijus dauwero maman maugwanohob. 4:17 Augwan gini esogwa deisa areg ELOHIM en os deb dou Abraham se Surad Injil Meb Mohon deb sug nosa touohob, endagai: Dan deigdoumesa ban bedag meijemouwa mebin naugb lusud leinyana se cinogo augwanohob. Dara ELOHIM gin, kaba, en mobisamougb namcir naugb sug en eigdoumesa lusud dau gomom aud maireseb ucugb. Dara areg emagunyabuma, kaba, en esa augwan agunya toua, aimo dau areg enin mer ogod an dous. Dangga hang, Abraham emesbes an areg ELOHIM os dou en gini touwero. Doba en medoc ebdebin an en terimda. Anai en ecinaga dau sug ELOHIM en mobisamougb dag ginohob, kaba, dag en emarges dau areg en os dou en gin touwero. Doba en eigdoumesa augwan gini deseino en namcir naugb en aimo an en toua terimda. 4:18-21 Dangga Abraham en emeija medocesa an enin maga dag eni deinyor omom touwero. Doba en medoc ebdebin an areg ELOHIM os dou en gin namcir. Anai se lona sug ELOHIM os meisi hom dou en, kaba, men arisogomoc edebeij deinyor huntun homohob. Dara en emeiya dau Sarai en maga dag en edreg dau sug en ouwadan mehohob gin touwero. Doba en od mena debsa ELOHIM dag cum, kaba, Sarai en ouwadan meisi hom toues. Anai en medoc eica dag areg ELOHIM os dou en ginohob, kaba, en mobisamougb edeinyum naugb sug en emaimo augwan gini an en toua. Hang en emarges dau areg ELOHIM os dou en dara en emeija medocesa augwan gin mougwa hom touwero. Doba en medoc ebdebin an gin, kaba, eic goubesa dou en naugb en es agadgeij namcir. Dara en eigdoumesa ELOHIM en moho an areg en os dou en gin toua terimda. Hang en emedag meijemouwa mebin naugb lusud areg len merdoc ebdebin an ELOHIM se cinogo augwan toua. Anai en medoc ebdebin an areg ELOHIM os dou en ginohob. Dara sug en medoc obsara dau, doba en od mena debsa areg ELOHIM os dou en gini terimda, aimo dau areg ELOHIM enara dou en se Surad Injil Meb Mohon deb sug nosa touohob, endagai: Cum, kaba, ban abdebeitor leinyana gougwa aninim dag tebeij se bogo meniha augwan namcir. 4:22 Sug en medoc ebdebin an ELOHIM dag gin terimda, kaba, Surad Injil Meb Mohon enara dag ELOHIM eic gesgigouhwesa dou en ucugb touohob. 4:23 Doba areg len log gin, kaba, len lemog naugb Abraham enin dousero. 4:24 Doba len log gin, kaba, naugb maman toua. Dangga sug maman mamdoc ebdebin an ELOHIM dag en eigdoumesa maman Adehsud Yesus dau gomom ucugwohob, kaba, en emeic gesgigouhwesa dou maman maugwan ucugb toues. 4:25 Anai ELOHIM ogugwo en se lusud merisira, dauntoba len leic gomom dou en icira maman sesar. Hanoba en eigdoumesa en dau gomom ucugb, dauntoba en edag maman gembala gesa taij naugb sug ELOHIM eic gesgigouhwesa dou maman ucugb touohob.

Roma 5

5:1 Dangga sug maman mamdoc ebdebin an Krisdus dag ginohob, kaba, sesar men gogom emeb naugb maman toua deitero. Doba ELOHIM eic gesgigouhwesa dou maman ucugb ogdoc Krisdus men geicara taiba sogo salib naugb mamanohob. Hang maman mamedag ELOHIM men moc toua deitero, doba maman madag hom dara en namcir. 5:2 Anai sug maman mamdoc ebdebin an Krisdus dag ginohob, kaba, en ahwan maman aud ELOHIM ogdoc maman geicara gini naugb en eic areg geigouhw aingma aingma dou maman toua, aimo dau sug en medoc eigouhw an mamanohob. Dara en emarges dau gin touwero, doba en eicara baimo dag gini an maman toua terimda. Dangga hang, maman mamdoc agahugouhw medam an en namcir. Anai maman macinaga dau sug en eicara dag gin an mamanohob, kaba, dag en emogugwo men gogouf cucugb ingma se lona daiyamo gacin dou maman toues. 5:3 Dara gin dousero. Doba sug maman maimo ucina mog erij icira Krisdus gin, kaba, maman mamdoc momogo dau gin touwero. Doba maman magahugouhw naugb gin toua namcir. Anai maman macinaga dau sug maman maimo ucina gin, kaba, eic dag maman mamdoc aiyansem dougwo areg gecgu terimda. 5:4 Dara sug maman mamdoc aiyansem dougwo areg gecguohob, kaba, eic dag ELOHIM eigdoumesa maman mamoho an gin deseino en. Dara sug en eigdoumesa maman mamoho deseino enohob, kaba, eic dag maman macinaga dag areg en os dou mamanohob, kaba, en emeic augwan dou maman toues. 5:5 Dara sug maman macinaga dag areg ELOHIM os dou mamanohob. Hanoba en emdeic dou maman toua, kaba, igdebes emeba maman se lona ingga touwero. Doba maman mamdoc ebtou namcir. Anai en esa Mena Gogoufu dag mogud se maman mamdoc mes naugb en ens dou maman dag ELOHIM medoc gororougb maman medamohob. 5:6 Dangga sug lona edagasohob, kaba, en esa Yesus se cinogo gini. Dauntoba en omom taiba sogo salib naugb leng merug mog maman maugwan toua. Anai maman goubesa ingma naugb sug maman maimo areg geigouhw, kaba, ingmaro. Doba maman mamdoc dag omomtom namcir naugb sug maman maimo areg gecgu mogud terimda. 5:7 Augwan gini ens ainyes dou maman dag ELOHIM medoc gororougb maman dag misen namcirohob. Anai ogom medam naugb lusud leperwei sud hom en mohw aud gomom sug en aimo areg asesa ELOHIM enin medoc mes augwan namcirohob. Dara gareg en medoc edag beim an lusud, kaba, lusud leinyana lemohw len merugt edug aud gomom naugb en touwero. Doba sud hom yom eng eicara dag gin naugb en dous. 5:8 Doba ELOHIM ens medoc mes ainyes dou maman dag en medoc gororougb maman namcirohob. Anai en esa Krisdus bomom taiba sogo salib sug maman maimo areg gedag beim ginero. Doba en esa en aud maman naugb gini sug maman mabesesaraba. 5:9 Dangga sug Krisdus omom taiba sogo salib edeinyum naugb sug ELOHIM eic gesgigouhwesa dou maman ucugwohob, kaba, men geicara gini edeinyum naugb sug en eigdoc maman dau ELOHIM men gogom areg en esedeb naugb lusud se Lona Gouwedoc gin toua namcir. 5:10 Anai sug nosa, kaba, maman madag ELOHIM men moc namcir. Doba sug en Meisi omom taiba sogo salib naugb maman sesar dag ginohob, kaba, ELOHIM eigdoumesa maman mamoho dag en mesir misen deit. Dangga sug Krisdus men gomom gini eic dag maman madag ELOHIM en mesir dag ginohob, kaba, Krisdus men geicara edreg dau gin deit naugb sug en eigdoc maman dau sesar men gogom aud maireseb menau geb huhugb gin toua. Anai en eisa dau gomom ucugb naugb maman touohob. 5:11 Dara gin dousero. Doba sug ELOHIM eigdoumesa maman mamoho dag en mesir misen ogdoc maman Adehsud Yesus Krisdus men geicara dag ginohob, kaba, eic dag maman mamdoc momogo toua deitero. Doba maman magahugouhw an en toua terimda. 5:12 Dangga hang, sesar, kaba, einesa cinogo gini ogdoc sud hom men geicara dous. Dara sesar gin, kaba, oho gomom, hanoba agaha becinten lusud laugwan. Anai len laugwan lebesesar touohob. 5:13 Doba dagiro eisaugb lusud gedig len merireseb sug ELOHIM emeic men gomnomna ogdoc Musa dou leng Israelbuma? Len toua lebesesarohobei? Era, naroei? Anai sug gomnomna hom emeb naugb lusudero, kaba, ELOHIM emecic meren geicara emadedim dag sesar naugb en emeic gomom dou len icira gin touwero, doba en amsoho len namcirda? 5:14 Naro, len laugwan toua lebesesarohob. Doba meren sesar susugb dau Adam men sesar gini. Anai Adam gin, kaba, en edreg sug ELOHIM arougb en an ara ara dau enin mersohob. Doba len graga, kaba, len ledreg ELOHIM men gomnomna geb se len merdoc mes gin dous. Hang ebiji dau Adam mehir, terimda edebeij lona sug ELOHIM eic men gomnomna ogdoc Musa dou leng Israel, kaba, gomom oiharaga lusud gedig meren sesar susugb dau Adam men sesar len laugwan gin touohob. Dangga eisaugb men geicara hom gin, kaba, Adam dag aimeh eisaugb Krisdus gedig ELOHIM esedeb en naugb en eperwei Adam en mohw an men geicara gin toua. 5:15 Doba areg ELOHIM eic dag mogud dou maman ogdoc Krisdus men geicara hom, dara areg eb naugb maman ogdoc Adam men sesar hom gin, kaba, hwas aninimero, doba susugb namcir. Anai Adam men sesar hom gin, kaba, eic dag lusud laugwan lomom icira men sesar hom gini, anai len laugwan laimo en aud ginohob. Doba Yesus men geicara geigouhw hom taiba sogo salib gin, kaba, eic dag ELOHIM medoc eineg an maman medam bedreg ucugb naugb sug en eigdoc maman dau gomom. Hanoba en eic gesgigouhwesa dag mogud ucugb dou maman ogdoc sud hom misen, moho Yesus Krisdus, en medoc an maman gin touohob. 5:16 Dara areg ELOHIM eic dag mogud dou maman gin, kaba, men mera aninim dag sud hom moho Adam men sesar gin touwero. Doba susugb namcir toua. Anai men sesar hom gin, kaba, edeinyum naugb sug ELOHIM ogod aremer gomom deb naugb enohob. Doba sug ELOHIM eic gesgigouhwesa dou maman ucugb gin, kaba, en emaigdougwo maman sesar hom dousero. Doba en aigdougwo maman sesar augwan dag mogud ediyebeiya dau maman namcir. Anai Yesus Krisdus en medoc an maman. Hang en emohw en mougt edug bomom taiba sogo salib naugb maman sesar gin touohob. 5:17 Dangga toua, sug sud hom, moho Adam, en ebesesar mougwa hom dag ginohob, kaba, eic dag gomom ebiji naugb sug en oiharaga lusud laugwan ogdoc men geicara gecgu hom gin toua. Doba sug sud hom misen, moho Yesus Krisdus, en omom taiba sogo salib naugb maman sesar dag ginohob, kaba, eic dag ELOHIM esedeb maman naugb sug maman madag mougt mera desij Krisdus se cinogo gini sug en ecicugwen gin toua. Anai men geicara geigouhw hom gin, kaba, eic dag ELOHIM en medoc medam gougwa an mamanohob. Hang gomom emedag mougt naugb maman toua deitero. Doba ELOHIM eigdoc maman dau gomom men goubesa naugb en eic gesgigouhwesa dag mogud dou maman deitohob. 5:18 Dangga hang, Adam men sesar hom gin, kaba, eic dag ELOHIM ogod aremer gomom deinaugb lusud maman maugwanohob. Doba Krisdus men geicara geigouhw hom taiba sogo salib gin, kaba, eic dag maman mamedag sesar men sogougb deitero. Doba en esga maman maugwan dau sesar men gogom aud maireseb menau geb huhugb ginohob. Anai Krisdus gin, kaba, en emedreg areg asesa ELOHIM enin medoc mes augwan mougwa hom touwero. Doba en aimo areg ELOHIM arougb en an gini naugb en eic en mogwihi bauwaharo aga maman dou ELOHIM naugb maman sesar ginohob. 5:19 Dangga sug ELOHIM owun maman maugwan mamoho dag maman mabesesar an en ogdoc sug sud hom moho Adam en edreg en mer dag ginohob, kaba, en eic gesgigouhwesa ogdoc sud hom moho Krisdus men geicara dou maman maugwan toua. Anai Krisdus gin, kaba, en emedreg ELOHIM en mer mougwa hom touwero. Doba en owun enin medoc mes arjaga naugb en aimo areg ELOHIM arougb en an gini augwan namcirohob. 5:20 Sug ELOHIM eic gesgigouhwesa ogdoc Krisdus men geicara dou maman dous, kaba, en eic men gomnomna ogdoc Musa naugb ara dou maman deita? En eic men gomnomna dou maman dauntoba maman macinaga dag maman madreg ELOHIM men gomnomna mougwa einyanohob. Anai sug maman mauman dau en mer gin, kaba, maman mamaimo touwero. Doba sesar men goubesa ederougb maman naugb sug maman madreg dau men gomnomna gini beiseisaugb bedreg namcir deit. Doba sug maman mabesesar edreg dag gin terimda, kaba, ELOHIM en toua medoc eineg an maman edreg dau gin beiseisaugb namcir toua. 5:21 Dangga hang, areg dan den dou yen gin, kaba, men meijouhw dag gini: Sug nosa, kaba, gomom oiharaga maman namcir, anai maman maugwan mabesesarohob. Doba sug ELOHIM en medoc geineg an maman gini oiharaga mamanohob, kaba, gomom men goubesa emoiharaga maman toua deitero. Doba en medoc geineg an maman gin, kaba, ahwan maman aud maireseb menau geb huhugb ogdoc maman Adehsud Yesus Krisdus men geicara naugb maman gin dous. Anai sug en omom taiba sogo salib naugb maman sesar dag gin, kaba, ELOHIM eic gesgigouhwesa dou maman ucugb touohob.

Roma 6

6:1 Doba sug maman sesar eic dag ELOHIM medoc eineg an maman beiseisaugb dag ginohob, kaba, maman man dagiro eisaugb gina? Maman manara dag maman mabesesar terimda, dauntoba ELOHIM en medoc eineg an maman beiseisaugb namcir dag gin terimda touei? 6:2-3 Dangga, isnaro. Anai sug lusud logun maman se duhu sug nosa, kaba, gogun se duhu gini ansins dag maman mamdoc dag hom dara Krisdus Yesus naugb sug maman mamom dara en dau areg mohon ginohob. Anai men gomom taiba sogo salib gin, kaba, oiharaga maman. Hang maman mamom dau sesar men gogom augwan touohob. Sug maman mamom dau sesar dag ginohob, kaba, dagiro, naugwe hang, maman mamaimo areg dag sesar gin deita? Naro, maman marges dau augwan gin namcir. Yen yemecinaga augwan gini dag misenbumei? Naro, yen yecinaga augwan gini dag misenohob. 6:4 Dangga hang, sug lusud logun maman se duhu sug nosa, kaba, gini ansins dag maman momom dara Krisdus dau areg mohon ginohob. Hanoba len lec maman desij en toua. Dauntoba maman mamaimo areg mohon gin toua deitero. Doba maman maimo areg se maireseb menau gin dous. Aninim dag Krisdus sug en omom sug nosa, kaba, en emomom terimda touwero. Doba en Mena eigdoumesa en dau gomom aud maireseb menau geb huhugb ogdoc men goubesa gogouf cucugb gin touohob. 6:5 Maman maimo areg menau gini, anai sug maman madag hom dara Krisdus naugb sug maman momom dau sesar men gogom dag ginohob, kaba, maman macinaga dag maman mamdoc dag hom dara en naugb sug ELOHIM emeigdoumesa maman dau gomom aud maireseb menau geb huhugb. Aninim dag ELOHIM eigdoumesa Krisdus dau gomom aud maireseb menau geb huhugb sug nosa touohob. 6:6 Dara gin dousero, doba maman macinaga dag sug nosa, kaba, maman mamdoc getrij icira edag mougt mera naugb ahwan maman aud sesar toua terimdohob. Doba sug Krisdus en omom taiba sogo salib naugb maman sesar dag ginohob, kaba, en etob maman mamdoc getrij icira gini se sogo salib bomom namcir. Hanoba en eic mor mor dou gin touohob, dauntoba maman mamedag sesar men sogougb deitero. Doba maman madag lusud misen dous. 6:7 Anai sug sud hom en omomohob, kaba, sesar men goubesa ingma emarautut en aud areg gecgu toua deitero. Doba ediyebeiya dau en namcirohob. 6:8 Dangga hang, sug maman mamom dara Krisdus dau areg mohon dag ginohob, kaba, maman maod mamina debsa en dag maman mamaimo en se maireseb menau geb huhugb gin toues. 6:9 Anai maman macinaga dau sug ELOHIM eigdoumesa Krisdus dau gomom aud maireseb menau sug nosa, kaba, dag en emomom deitero, doba en maireseb huhugb namcir. Hang gomom men goubesa emoiharaga en toua deitero. 6:10 Anai sug Krisdus en omom naugb maman sesar sug nosa, kaba, en emomom mougwa einyana touwero. Doba en omom mougwa cum dous. Anai gini ogodlo naugb sesar augwan beb huhugb namcirohob. Dangga sug en omom naugb sesar mougwa hom dag ginohob, kaba, en emecicugb aud sesar gin toua deitero. Doba en maireseb menau iteitogin, kaba, naugb sug en aimo areg ELOHIM arougb en an gin dous. 6:11 Sug Krisdus asid enin, hanoba en edag omom dau sesar dag gin, kaba, yen toua yogod se yenin meigdoc mes dag yen yemaimo sesar deitero. Doba yen yedag yomom dau gin namcir toua. Hanoba yen yaimo areg ELOHIM arougb yen an gin toua terimda, anai yen yedag hom dara Krisdus Yesus ginohob. 6:12 Dangga hang, yen yemeigdoumesa sesar dag mougt mera naugb yen meijaga getaha gin toua deitero. Doba yen yarges deb namcir. Anai sug yen yemarges debero, kaba, cum, en ehin yen meigdoc etrij icira aud areg gecgu naugb yen yaimo toua deit. 6:13 Dara yen yemohw yen meisira, dara yen meijohora, an areg geb se yen meijaga gus gus augwan dou sesar naugb en arautut yen aud areg mog mog gin touwero. Doba sug ELOHIM eigdoumesa yen dau gomom aud maireseb menau geb huhugb dag ginohob, kaba, yen yohw yenin an yen meijaga augwan dou en naugb en arautut yen aud areg asesa enin medoc mes augwan dous. 6:14 Dangga hang, sug Musa men gomnomna emeb naugb yen deiterohob, kaba, yen yemedag sogougb naugb sesar deit touwero. Doba sug ELOHIM en medoc eineg an yen dag ginohob, kaba, yen yedag sogougb dou en naugb yen yaimo areg en ouwan dous. 6:15 Sug Musa men gomnomna emoiharaga maman deitero, doba ELOHIM medoc eineg an maman dag ginohob, kaba, maman man dagiro eisaugb gina? Maman manara dag maman mabesesar terimdei? Naro, maman mamenara dangga touwero. 6:16 Anai sud hom areg yen yowun yenin meigdoc mes arjaga deseino en naugb yen yaimo en mer terimda, kaba, gini aninim dag yen yedag sogougb dou enohob. Yen yemecinaga gin touweroei? Naro, yen yecinaga dag gareg yen yeicara yaimo en mer, kaba, yen yedag men sogougb dag misen touohob. Dangga hang, sug yen yaimo sesar aud areg en arougb yen an gin terimda, kaba, cum, yen yomom se dum smougb namcir. Doba sug yen yaimo ELOHIM aud areg en arougb yen an gin dous, kaba, en emeic gesgigouhwesa dou yen ucugb toues. Yen yemecinaga augwan gin dag misenbumei? Naro, yen yecinaga augwan gini dag misen toua namcirohob. 6:17-18 Dangga maman man sijo medam dou ELOHIM besesa terimda. Anai sug nosa, kaba, yen yedag sesar men sogougb. Doba sug yen yebin ELOHIM en mer an areg len lesai dou yen sug nosa, hanoba yen yaimo areg se geica gini dara yen meigdoc augwan toua terimda, kaba, en ancoho yen dau sesar men goubesa augwan toua namcirohob. Hang yen yemedag sesar men sogougb toua deitero. Doba yen yedag ELOHIM men sogougb naugb yen yaimo areg asesa enin medoc mes gin dous. 6:19 Anai sug nosa, kaba, yen yedag gogor dara mog mog maran sogougb naugb yen yaimo len aud areg lan larougb yen an gini dara yen meigdoc augwan beiseisaugb namcir. Doba iteitogini, kaba, ELOHIM esga yen dau sesar men gogom augwanohob. Dangga hang, yen yemeic yen meijaga dou gogor dara mog mog dag maran sogougb naugb yen yemaimo lan aud areg gecgu dag nosa toua deitero. Doba yen yeic yen meijaga dou ELOHIM dag men sogougb naugb yen yaimo areg asesa enin medoc mes augwan dous. 6:20 Anai sug yen yedag sesar men sogougb dag gin terimda, kaba, yen yemaimo areg asesa ELOHIM enin medoc mes mougwa hom touwero, doba yen yarges deb namcir. Areg dan den dou yen gin, kaba, dan deic gainyenara dau areg eb ainyes dou yen. Dauntoba yen meigdoc obgesa men meijouhw toua. Anai yen yemedag lusud mos se Krisdusbuma, doba yen yedag mahanihenaba. 6:21 Dangga toua, sug yen yaimo areg gogor dara mog mog dag gin terimda, kaba, era mera dag ara dou yena? Era mera dag maireseb menau geb huhugwei? Naro, augwan gini era mera dag yen yedomom se dum smougb dous. Hang emeic dag igdebeseba yen toua an namcir. 6:22 Doba iteitogin, kaba, ELOHIM esga yen dau sesar men gogom augwanohob. Hang yen yemedag gogor dara mog mog maran sogougb toua deitero. Doba yen yedag ELOHIM enin men sogougb dous. Dangga sug en ouci yen debinim naugb enin dag ginohob, kaba, yen yemaimo areg gecgu toua deitero. Doba yen yeicara yaimo areg edag beim dara ecabeci naugb yen yera mera dous. Anai sug yen yaimo dag gini, kaba, gomom se dum smougb emeb naugb yen toua deitero. Doba sug yen yaimo ucina gedag beim dara gecabeci gini terimda edebeij Lona Sug Ouwedoc, kaba, yen yesma maireseb menau geb huhugb ogdoc gin toua namcir. 6:23 Anai sesar, kaba, eic momsi dag gomom se dum smougb dou maman dous. Doba sug maman madag hom dara maman Adehsud Krisdus Yesus ginohob, kaba, ELOHIM eic maireseb menau geb huhugb dag mogud dou maman terimda.

Roma 7

7:1 Dan indagunerij, dara dan indamouwerij, yen yaugwan yecinaga dau Musa men gomnomna meijouhw augwan asesa touohob. Hang yen yecinaga dag gomnomna gini men goubesa eb naugb sud hom sug en mairesebaba dous. Doba sug en omomohob, kaba, gomnomna men goubesa toua ediyebeiya dau en namcir. 7:2 Dangga dan deic dainyen dau gida hom sug en es mesuwohob debin gin dou yen toua. Anai yen yecinaga dag Musa men gomnomna gini, kaba, ohud en dag mesouwa sug en mesuwa mairesebaba dous. Doba sug en mesuwa omom dau enohob, kaba, gomnomna emohud en dag gin deitero, doba en esesa gedisi namcirohob. 7:3 Dangga toua, sug en mesuwa mairesebaba, hanoba en edag hom dara ligiji gus deitohob, kaba, gomnomna owun en moho dag gida gedig en maga eijouhw namcir. Doba sug en mesuwa omom dau eni, hanoba en edes mesuwa ingma deit, kaba, gomnomna emowun en dag gin deitero. Anai en esesa gedisi dau gomnomna ginohob. 7:4 Dan indagunerij, dara dan indamouwerij, areg graga augwan, kaba, aninim dag yen toua. Anai sug Krisdus eic en maga dag omom taiba sogo salib naugb meijen sesar dag ginohob, kaba, Musa men gomnomna emohud yen naugb ara ara toua deitero. Doba yen meigdoc omom dau gin namcirohob. Dangga hang, Musa men gomnomna emoiharaga yen naugb yen yemedag en mesouwa toua deitero. Doba yen yedag Krisdus gedig ELOHIM eigdoumesa en dau gomom ucugwohob en mesouwa dous. Dauntoba maman mara mera dag areg gecgu deitero. Doba se maman geicara augwan, kaba, maman mara mera geigouhw mogud naugb ELOHIM dous. 7:5 Anai sug nosa, kaba, maman mainyen naugb sug maman maimo Musa men gomnomna gin terimdohob. Doba maman mamdoc getrij icira edag mougt se maman mamdoc mes. Hang maman mamaimo areg Musa men gomnomna arougb maman anohob hom touwero. Doba maman maimo areg maman mamdoc etrij icira gin dous. Anai areg Musa men gomnomna arougb maman an gin, kaba, eic dag ederougb maman mamdoc getrij icira gini naugb maman maimo sesar augwan toua terimdohob. 7:6 Sug maman madreg dau Musa men gomnomna dag ginohob, kaba, men gomnomna gini agaigeij maman dag sud hom geigtou se tu gesisug naugb sug ELOHIM eic gomom dou maman icira gin toua namcir. Doba ELOHIM esga maman dau Musa men gomnomna ginohob. Anai Krisdus men gomom taiba sogo salib, kaba, oiharaga maman. Hang Musa men gomnomna gin, kaba, emeb naugb maman toua deitero, doba maman toua mamom dauwohob. Dangga hang, maman mamaimo men gomnomna geb se igdahab toua deitero. Doba maman maimo Mena Gogoufu aud areg en arautut maman se ucina menau gin dous. 7:7 Doba sug Musa men gomnomna ederougb maman mamdoc getrij icira gini naugb maman mabesesar terimda dag ginohob, kaba, maman man dagiro eisaugb gina? Maman manara dag Musa men gomnomna gin toua dag sesarohobei? Dangga, isnaro. Anai Musa men gomnomna gini, kaba, ens dou maman dag maman mabesesarohob. Anai sug men gomnomna gini emen dougwo dan dag dan indoc emetrij icira len gus meren ara ara touwero, kaba, dagiro dan decinaga gini dag sesarohoba? Naro, dan demecinaga dau gin touwero. 7:8 Doba sug gomnomna en dougwo dan dag gini, kaba, eic cumougt dou sesar naugb ococi dan indoc mes naugb dan indoc etrij icira len gus meren ara ara aibibra namcir. Anai sug gomnomna ingmaro, kaba, sesar toua ebtou namcir. 7:9 Aimougtut, kaba, dan toua doudesa dag dan indina agau namcir. Anai dan demecinaga Musa men gomnomna gini dag misenbuma. Doba sug dan decinaga men gomnomna gini dag misenohob, kaba, sesar eisa maireseb deit. 7:10 Hang emogod dan demomom toua. Dangga gomnomna gedig ELOHIM esedeb naugb eic merna agau dou lusud, kaba, emeic maireseb dou danero. Doba naugb dan, kaba, eic gomom dou dan dous. 7:11 Anai ogdoc gomnomna gin, hang emeic cumougt dou sesar naugb augwohosa dan. Hanoba eic gomom dou dan toua. 7:12 Dangga hang, ELOHIM men gomnomna ogdoc Musa gin, kaba, augwan ecabeci namcir. Dara areg men gomnomna arougb maman an gin, kaba, augwan ecabeci, edag beim, dara geigouhw mogud toua. 7:13 Doba sug ELOHIM men gomnomna augwan eigouhw dag ginohob, kaba, men meijouhw dag areg geigouhw gini eic gomom dou danohobei? Naro, gini men meijouhw danggero. Doba sesar eng eicara dag gini debin dan dous, anai en os areg geigouhw gini. Hanoba en aic gomom dou dan touohob, dauntoba maman macinaga dau sesar men geicara augwan asesa toua. Anai sug sesar os gomnomna geigouhw gini, hanoba eic gomom dou dan ogdoc gin dou dan touohob, kaba, men geicara gini ens ainyes dou maman dag sesar gin, kaba, ecgu medam namcirohob. 7:14 Dangga maman macinaga dag Musa men gomnomna gini, kaba, dau Mena Gogoufu naugb ahwan maman mamdoc mes aud areg geigouhw gin toua. Doba dan dedag sesar men sogougb, anai dan indaga getaha gin, kaba, eb naugb danaba. 7:15 Hang indan geicara augwan, kaba, eic dag dan deija induwesa an toua namcir. Anai areg dan deigdoumesa en moho dag geigouhwohob, kaba, dan demaimo ginero. Doba areg dan dowun en moho dag ecgu, kaba, inggang dan daimo augwan gin dous. 7:16 Doba sug dan daimo areg dan dowun en moho dag ecguohob augwan gin terimda, kaba, dan douma debin ELOHIM men gomnomna ogdoc Musa gini eb ainyes dag augwan eigouhw namcirohob. 7:17 Dangga sug dan demaimo areg dan douwanero, doba dan daimo areg dan demouwanero gin terimda, kaba, gini ansins dag danin demarautut dan indoc mes aud areg gecgu ginero. Doba sesar geb se dan indoc mes, hang emarautut dan aud gin dous. 7:18 Hang dan decinaga dau sug dan deb se dan indaga dag lusud misen gin, kaba, dag dan demaimo areg geigouhw hom touwero. Doba dan indaga gin, kaba, ahwan dan aud areg gecgu gin dous. Anai se dan indoc mes, kaba, dan douwan naugb daimo areg geigouhw gin terimda. Doba sug dan daimo, kaba, indan goubesa ingmemeb naugb gin touwero. 7:19 Anai geigouhw areg dan douwan naugb dan daimo, kaba, dan demaimo ginero. Doba gecgu areg dan demouwan naugb dan demaimoro, kaba, dan daimo gin dous. 7:20 Doba sug dan daimo areg dan demouwanero gin namcir, kaba, gini meijouhw dag danin demeicara dau danin indoc mes dag gin deitero. Doba sesar edag mougt mera se dan indoc mes, hang emarautut dan indoc mes aud gin toua. 7:21 Dangga hang, dan deiya, doba gomnomna hom eb naugb dan dag gini: Dan douwan daimo areg geigouhw terimda. Doba areg dan dogod an gini, kaba, dag dan daimo areg gecgu mogud dous. 7:22 Anai se dan indoc mes, kaba, dan dagahugouhw an ELOHIM men gomnomna geic dou Musa gin namcir. 7:23 Doba se dan indaga gini, kaba, gomnomna gus toua moongga. Gomnomna gin, kaba, ebemoc dou Musa men gomnomna gedig dan indoc eicohob gin namcir. Hang dan demaimo areg geigouhw touwero. Doba gomnomna gini, kaba, agaigeij dan dag men sogougb, hanoba ahwan dan aud sesar terimda. Anai gomnomna gin, kaba, edag mougt naugb dan indaga augwanohob. 7:24-25 Dangga hang, indan geicara, kaba, dag gini: Dan danin, kaba, dan douwan daimo ELOHIM men gomnomna gin terimda. Doba dara dan indaga, kaba, dan daimo gomnomna geb se dan indaga gini aud sesar dous. Ayou, dantogini. Gareg mog eng emeigdoc dan dau dan indaga gahwan dan aud gomom gina? Anai gini eic dan indoc eijesa medamdaha. Doba dan den sijo medam dou ELOHIM. Anai ogdoc sug maman Adehsud Yesus Krisdus en omom taiba sogo salib naugb indan sesar, kaba, en eigdoc dan dau areg gahwan dan aud gomom gin toua namcirohob.

Roma 8

8:1 Dangga gareg en medoc dag hom dara Krisdus Yesus, kaba, ELOHIM emogod gomom deinaugb en toua deitero. Doba en mena agau dau gin namcirohob. 8:2 Anai sug Mena Gogoufu oiharaga maman dag gin, kaba, sesar dara gomom lamoiharaga maman deitero. Doba maman marges dau lan namcirohob. Hang maireseb menau geb huhugb emediyebeiya dau maman touwero. Doba eb naugb maman toua terimda. Anai sug maman madag hom dara Krisdus Yesus dag ginohob, kaba, Mena Gogoufu oho maireseb menau geb huhugb gini deinaugb maman toua namcir. 8:3 Dangga hang, maireseb menau geb huhugb gin, kaba, emogdoc Musa men gomnomna men goubesa ginero. Doba ogdoc ELOHIM men goubesa gin dous. Anai sug maman mamdoc etrij icira naugb sug maman mabesesar dag gini terimda, kaba, eic dag Musa men gomnomna omomtom namcir touohob. Doba ELOHIM, kaba, en esa enin Meisi ouwaden dau bogo se cinogo gini naugb en aiyan sesar men goubesa geb se maman mamaga mor mor dau maman ogdoc en Meisi gini. Hanoba en eic en maga bauwaharo dou ELOHIM naugb maman sesar gin toua. Dauntoba sesar men goubesa emahud maman toua deitero. Doba ediyebeiya dau maman namcir. Anai en maga gin, kaba, dag masud misen gedig maman mabesesar terimda maman mamaga gin touohob. 8:4 ELOHIM eicara dag gini, dauntoba maman mamedreg areg asesa enin medoc mes toua deitero. Doba maman maimo areg en ens dou maman se men gomnomna ogdoc Musa gin toua terimda. Anai sug Mena Gogoufu en edag mougt mera se maman mamdoc mesohob, kaba, maman mamaimo areg maman mamdoc etrij icira aud sesar gin toua deitero. Doba maman maimo en mer aud areg en ouwan dous. 8:5 Anai gareg en aimo areg en maga mou ehigehi gin terimda, kaba, en medoc augwan ebdebin an gin toua. Doba gareg en aimo Mena Gogoufu en mer aud areg en arougb en an gin, kaba, en medoc augwan sungga dous. 8:6 Dara gareg en mou augwan ebdebin an areg en maga mou ehigehi, hanoba en aimo toua terimda, kaba, men geicara gini ahwan en aud gomom beb huhugb namcir. Doba gareg en mou augwan ebdebin an areg Mena Gogoufu arougb en an gini, hanoba en aimo toua, kaba, ELOHIM eic gesgigouhwesa dou en ucugb. Hang maireseb menau geb huhugb emediyebeiya dau en touwero, doba en esma namcir. 8:7 Dangga gareg en mou augwan ebdebin an areg en maga mou ehigehi gin terimda, kaba, en edag ELOHIM men moc namcirohob. Anai sug en aimo areg en maga mou ehigehi dag gin terimda, kaba, men goubesa ingma naugb sug en aimo ELOHIM men gomnomna emeb naugb en touwero, doba en eicara baihagab en mer gin dous. 8:8 Hang leng leicara dag gini, kaba, ELOHIM medoc emeigouhw an len touwero. Doba en medoc esrougb an len namcir. 8:9 Doba yen, kaba, yen yemaimo areg yen meijaga mou ehigehi gin deitero. Doba sug Mena Gogoufu einesa yen meigdoc mes dag misenohob, kaba, yen yeicara yaimo areg en ens dou yen gin terimda. Naro, kab, naro. Anai sud hom areg Krisdus emesa Mena Gogoufu se en medoc mesbuma, kaba, en emedag men godeh touwero, doba en eigtou dau namcir. 8:10 Dangga hang, yen meijaga, kaba, aimo ucina aud gomom namcir. Anai yen yebesesar terimdohob. Doba sug Krisdus einesa yen meigdoc mes dag ginohob, kaba, Mena Gogoufu emeic maireseb menau geb huhugb dou yen toues. Anai ELOHIM eic gesgigouhwesa dou yen ucugb touohob. 8:11 Hang yen meijaga getaha gin, kaba, emomom terimda touwero. Doba sug ELOHIM esa Mena Gogoufu se yen meigdoc mes naugb en eigtou sungga dag ginohob, kaba, en eigdoumesa yen meijaga getaha gini dau gomom aud maireseb menau geb huhugb ogdoc Mena Gogoufu geigtou se yen meigdoc mes men goubesa gin toua. Anai en, kaba, en eigdoumesa Krisdus dau gomom aud maireseb menau geb huhugb ogdoc Mena Gogoufu men goubesa sug nosa touohob. 8:12 Dangga dan indagunerij, dara dan indamouwerij, sug ELOHIM eigdoc maman dau maman mamaga gahwan maman aud sesar dag ginohob, kaba, maman mamaimo areg maman mamaga mou ehigehi gin toua deitero. Doba maman maimo areg Mena Gogoufu ens dou maman dous. Anai maman mamaga gin, kaba, men aremeij ingmemeb naugb maman deitero. Doba maman marges dau namcirohob. 8:13 Anai sug yen yaimo areg yen meijaga mou ehigehi gin terimda, kaba, cum, yen yedomom se dum smougb beb huhugb dangga. Doba sug yen yaiyan meijen geicara dag sesar gini ogdoc Mena Gogoufu men goubesa bomom dau yen terimda, kaba, yen yesma maireseb menau geb huhugb toues. 8:14 Anai leng leicara laimo Mena Gogoufu aud areg en arougb len an gin, kaba, len ingga dous eng ledag ELOHIM mogwihi mogo len dag misen namcir. 8:15 Sug maman madag ELOHIM mogwihi mogo maman dag ginohob, kaba, Mena Gogoufu arautut maman naugb sug maman maigdoumesa ELOHIM en moho dag maman Mamina toua terimda. Anai sug ELOHIM esa en dou yen sug nosa, kaba, en emowun yen meijoho dag ELOHIM men sogougb naugb yen yahau dau en touwero. Doba en eigdoumesa yen meijoho dag ELOHIM mogwihi mogo yen dag misen namcirohob. 8:16 Hanoba en auma debin gini se maman mamdoc mes toua terimda dag maman gin, kaba, madag ELOHIM mehir maman misenohob. 8:17 Hang areg ELOHIM esedeb se bogo naugb maman, dara areg en esedeb naugb Krisdusohob, kaba, augwan gini emediyebeiya dau maman touwero. Doba en emeic areg geigouhw gini dou maman aninim dara en toues. Anai sug maman maimo Krisdus se men ucina mog erij gin terimda, kaba, maman mamaigtou desij en se men gogouf cucugb gin toua namcir. 8:18 Dangga hang, sug ELOHIM esedeb maman naugb maman maigtou se men gogouf cucugb dag ginohob, kaba, dan demeigdoumesa gogom areg maman maimo iteitogini en moho emagas aninim dag gogouf cucugb gin touwero. Doba dan dowun gogom en moho eb tainya dau gin namcir. 8:19 Dara areg ELOHIM en esinsinohob, kaba, len gus laugwan leigtou lebehibeh naugb lona sug ELOHIM ens en mogwihi mogo maman mab ainyes deseino len laugwan toua. 8:20-21 Anai sug ELOHIM agaresa cinogo sug nosa, kaba, en agaresa areg en esinsin augwan gin toua. Hang len lemaimo areg ELOHIM ogod deinaugb len toua deitero, doba len leigtou augwougb dous. Doba sug en agaresa augwan dag ginohob, kaba, en eic ara se len merdoc mes naugb len lod merna debsa en dag getaha gin, kaba, emoiharaga len dag sogougb beb huhugb touwero. Doba dag se lona daiyamo gacin, kaba, len laugwan larges dau getaha gini naugb len leigtou desij ELOHIM en mehir maman se gogouf cucugb gin toua namcir. Anai gagaresa gin, kaba, emoiharaga len dau lenin merdoc mesero. Doba ELOHIM enin eng ogod dag gin deinaugb len dous. 8:22 Augwan gini misen namcir. Anai maman macinaga dau sug acgunog terimda iteitogin, kaba, areg ELOHIM en esinsin gin, kaba, len laugwan leigtou dareg letagarij terimdohob. Aninim dag gida hom sug en ouwadan meh, kaba, en etagarij terimda toua. 8:23 Dara len gin, kaba, len lemetagarij dousero. Doba maman gedig ELOHIM erba Mena Gogoufu dag lougb debin maman sug acgunogohob, kaba, maman toua matagarij dareg mamdoc mabehibeh naugb lona sug ELOHIM esga maman mamaga augwan dau areg getaha. Hanoba en eigdoumesa maman dag en mehir misen gin toua namcir. 8:24 Anai ogdoc sug maman maod mamina debsa ELOHIM an gin sug aimougtut, hang en emeigdoc maman dau sesar men gogom aud maireseb menau geb huhugb gin touohob. Anai sug maman maiya dau areg ELOHIM os dou maman dag ginohob, hanoba maman maod mamina debsa ELOHIM an gin toua terimda, kaba, gini emedag areg maman mamina debsa gin deitero. Doba dag maman macinaga dag misen namcirohob. Anai gareg en emod mena debsa areg en eiyohob gina? Naro, sud hom ingma emeicara dag gini touwero. 8:25 Doba sug maman mameiya areg ELOHIM os dou maman augwan dag misenbuma. Hanoba maman maod mamina debsa an gini terimda, kaba, maman mamobsara dau gin touwero, doba maman maigtou mateteij namcir. 8:26 Dangga toua, sug maman maigtou mateteij naugb areg ELOHIM os dou maman dag gini, kaba, Mena Gogoufu en toua moongga desij maman naugb en ousa maman. Anai mamanin, kaba, maman mamu emedeinyum naugb sug maman macgeij areg asesa ELOHIM enin medoc mes an areg naugb maman touwero. Doba maman maija mamuwesa gin terimda. Hang Mena Gogoufu enin eng eperwei maman mamuhw naugb en enara dou ELOHIM an maman. Dara sug en enara dou ELOHIM an maman gini, kaba, en emenara dag lusud meren leci dou en touwero. Doba en enara dag engkingkan dou en dous. 8:27 Dara ELOHIM ecinaga dau areg geb se lusud lenin merdoc mes augwan dag misen namcirohob. Dangga hang, en ecinaga dau areg Mena Gogoufu acgeij en an naugb maman augwan dag misen toua. Anai Mena Gogoufu eperwei maman mamuhw naugb en enara dou ELOHIM an areg naugb men lusud maman, aimo dau areg ELOHIM enin ouwan naugb maman toua terimda. 8:28 Sug Mena Gogoufu ocuncum dou ELOHIM naugb maman, aimo dau areg ELOHIM enin ouwan dag gin dous, kaba, maman macinaga dag se aremer augwan, kaba, ELOHIM ousa maman gedig maman mamdoc gororougb en naugb maman madera mera geigouhw dau augwan gin toua. Anai en, kaba, en eija maman aud en sug nosa. Dauntoba maman madag men lusud, aimo dau areg enin eng esedeb sug aimougtut naugb maman ginohob. 8:29 Dara sug ELOHIM esedeb maman deb dag men lusud sug nosohob, kaba, en ouci maman deb debinim dau sug acgunog naugb maman madag en Meisi mohora hom gin toua namcir. Dauntoba en Meisi gin, kaba, en edag Maman Mamaguna Mebin naugb maman toua terimda. Anai en ecinaga deb dau sug maman mauman en mer eisaugb en Meisi gin, kaba, dag maman mamohoiya en mer gin touwero. Doba maman mamdoc emebdebin an en Meisi gin toues. 8:30 Dara sug en ouci maman debinim dag ginohob, kaba, en eija maman dauntoba maman maimo en aud areg en esedeb naugb maman deb sug nosohob gin toua. Dara sug en eija maman aud enohob, kaba, en eic gesgigouhwesa dou maman ucugb toua namcir. Dara sug en eic gesgigouhwesa dou mamanohob, kaba, en ekeba dau men gogouf cucugb ingma dou maman touohob. 8:31 Sug ELOHIM ogugwo areg graga augwan dou maman dag ginohob, kaba, maman man dagiro eisaugb gina? Maman manara dag lusud meren goubesa inggebga naugb sug len laiyan maman mamoho eb tainya len deitei? Naro, anai sug ELOHIM eija maman debinim naugb enin dag ginohob, kaba, gara mog eng emaiyan maman deita? Naro, sud hom ingma men goubesa emedeinyum naugb sug en owun maman touwero. Doba len laugwan leb tainya maman dous. 8:32 Anai sug ELOHIM en medoc emagaigeij en Meisi misen dau mamanero. Doba en medoc ohw en naugb en eic en maga bauwaharo naugb maman sesar dag gin touohob, kaba, en emeic ara gus graga augwan dou maman touweroei? Naro, en emeic gin augwan dag mogud dou maman toues. 8:33 Dangga gara mog eng emoho bemas maman deseino ELOHIM en deita? Naro, sud hom ingma en emoho bemas maman touwero. Anai ELOHIM enin eng ouma debin maman dag maman sesar emeb naugb maman deitero. Doba augwan ediyebeiya dau maman namcirohob. 8:34 Sug ELOHIM ouma debin maman dag ginohob, kaba, gara mog eng emowun maman an sesar deita? Naro, sud hom toua ingmaro. Anai Krisdus enin eng omom taiba sogo salib naugb maman sesar ginohob. Hanoba en edag maman gembala gesa taij naugb en ogod aremer aga maman deseino ELOHIM. Anai ELOHIM enin eng eigdoumesa en dau gomom ucugb naugb en edeigtou desij en se en mesira misen dag mougt mera medam naugb maman touohob. 8:35-37 Dangga sug Krisdus medoc gororougb maman dag ginohob, kaba, areng emasid maman dau gin deita? Yen youdesa dag aremer, era ara gogom, era maman masma mog erij, era sireba maman, era maman mamunggwerij, era maman masma gecgu, era gomom eb naugb maman touei? Naro, aremer augwan gini, kaba, emasid maman dau en touwero. Doba maman maiyan augwan gini ogdoc sud hom, moho Krisdus, gedig en medoc gororougb mamanohob, men goubesa gin toua terimda. Dara sug maman maimo ucina mog erij icira Krisdus gin, kaba, augwan gini esogwa deisa areg lusud lerba Ugwaremer an gin deb se Surad Injil Meb Mohon deb sug nosa touohob, lendagai: ELOHIM, lusud lowun emen emoho dag domba gedig lusud lesedeb naugb leic gomom dou len. Hang astesda lona, kaba, gomom eb naugb emen toua terimda, anai emen emedag aban logodehohob. 8:38 Dangga hang, sug maman maiyan augwan gini ogdoc Krisdus men goubesa terimdohob, kaba, dan indoc eica dag sug maman mamiresebaba era sug maman mamomohob, dara malaikadir dara merna mog mog an meren mougt mera, dara aremer areg geb naugb maman iteitogini dara areg eb naugb maman se lona daiyamo gacin, 8:39 dara areg geb se bogo meniha dara areg geb se cinogo mei, dara areg ELOHIM en esinsin gus gus, kaba, augwan gini meren goubesa emedeinyum naugb asid maman dau sug ELOHIM medoc gororougb maman gin touwero. Anai en ens dau en medoc gororougb gini eb ainyes ogdoc maman Adehsud Krisdus Yesus dou mamanohob.

Roma 9

9:1-2 Dan indoc erij medam an dan indaguner dara dan indamouwer dau indan meijouhuda dau leng Israel gin namcir. Hang dan demarges dau gin touwero. Doba dan deb dara dan indoc esesa an len terimda. Anai len lemedag hom dara Krisdus touebma. Areg dan den dou yen gini, kaba, dag dan demereiyara dou yen touwero, doba se misen namcir. Hanoba dan indoc ouma debin gin toua, aimo dau areg Mena Gogoufu ens dou dan. Anai dan dedag hom dara enohob. 9:3 Dangga hang, sug ELOHIM en ouwan, kaba, en asid dan eng dau Krisdus. Hanoba en eic mor mor dou dan eng se dum smougb dous. Dauntoba indan lusud gin, kaba, len lemeihwedig dum smougb touwero. Doba len merdoc dag hom dara Krisdus leperwei dan induhw ucugb toua. 9:4 Anai len, kaba, ELOHIM ouci len debinim dag enin men meijouhuda sug nosa. Dara en eigdoumesa len meroho dag en mogwihi mogo len dag misen touohob. Hanoba en ens dau men gogouf cucugb ucucugb dou len. Dara sug en os ara ara dou len, kaba, en eic men gomnomna ogdoc Musa baos dara dou len toua. Dauntoba len lecinaga ucina naugb sug len lesijaresa en dag misen namcir. Dara en os dou len dag en eigdoc len dau meren gogom. Hanoba en eic maireseb geb huhugb dou len. Dara en ousa len se aremer gus augwan toua terimda. 9:5 Dara len gin, kaba, len ledag Abraham, Isag, dara Yakub len merdebeitor len toua. Dara Krisdus sug en edag lusud misen se cinogo gin, kaba, enin toua dau meijouhuda gini. Dangga hang, eigouhw naugb maman magahugouhw an ELOHIM beb huhugb terimda. Anai en, kaba, en moho eb taiba augwanohob. Augwan gini asesa dag misen namcir. 9:6 Dangga areg dan den dou yen graga, kaba, gini aninim dag ELOHIM emaimo areg en os dou leng Israel gin toua deiteroei? Doba en arges dau namcirohobei? Naro, dan demenara dangga dou yenero. Anai ELOHIM emouci len laugwan dag enin men lusud teiteiyero. 9:7 Dara en emecic Abraham medebeitor len laugwan dag enin men lusud touwero. Doba en ecic leng nagama dag enin men lusud gin dous. Anai en enara dou Abraham deb sug nosa dag gin touohob, endagai: Dan decic Isag medebeitor dous eng dag ban abdebeitor misen naugb dani. 9:8 Dangga hang, areg graga, kaba, men meijouhw dag gini: Abraham en mehir gedig en aimo dau areg en medoc etrij icira mesouwer an len, kaba, ELOHIM emeigdoumesa len meroho dag Abraham mehir misen ginero. Doba ELOHIM ecic Abraham en meisi Isag an en meisi lahwai dara en medebeitor, len laugwan dag Abraham mehir misen dous. Anai len gin, kaba, len lemedag Abraham mehir gedig en aimo dau areg en medoc etrij icira mesouwer an lenero. Doba len ledag en mehir, aimo dau areg ELOHIM os dou en gin dous. 9:9 Anai sug ELOHIM os en meisi hom dou en sug nosa, kaba, en enara dou en deit, endagai: Edebeij lona areg dan dos deb dou ban ginohob, kaba, dan demecicugb aud ban deits. Se lona ingga, kaba, Sarai emouwadan meisi hom gin toua. 9:10-12 Dara hom gin dousero. Doba sug Ribga en menuhwa an meisi lahwai dau maman mamjemouwa hom, moho Isag, ginaba, kaba, ELOHIM enara dou en, endagai: Dan douwan naugb maguna mebin en edag sogougb dou magto. ELOHIM enara dou en dag gini, kaba, sug en emouwadan lanbuma. Hanoba lan lemaimo areg geigouhw era areg gecgu mougwa hom touebma. Dauntoba areg ELOHIM en ouci gin, kaba, emaimo dau lusud misen meren geicara touwero. Doba aimo dau areg en ouci se enin medoc gin dous. Dangga hang, sug ELOHIM eigdoumesa magto en moho dag mougt, hanoba en owun maguna en moho dag sogougb dou en magto, kaba, augwan gini emaimo dau maran geicara gin touwero. Doba dau areg ELOHIM en ogod se enin medoc mes an lanohob dous. 9:13 Augwan gini aimo dau areg ELOHIM enara eisaugb lan se Surad Injil Meb Mohon deb sug nosa touohob, endagai: Yakub, kaba, dan indoc eigouhw an en teiteiyohob. Doba Esau, kaba, dan indoc emeigouhw an enero. 9:14 Sug ELOHIM emaimo lusud meren geicara ginero, doba en medoc eigouhw era gecgu an len dau enin medoc mes dag gin dous, kaba, maman man dagiro eisaugb gina? Maman manara dag ELOHIM medoc emedag beim an lusuderoei? Doba en obsara dau gin augwougb an lenohobei? Dangga, isnaro. 9:15 Anai ELOHIM enara dou Musa sug nosohob, endagai: Sud hom areg dan dogod se dan indoc mes naugb dan indoc eineg an en, kaba, dan deicara daimo dangga an en. Dara sud hom areg dan dogod se dan indoc mes naugb dan indoc erij an en, kaba, dan deicara daimo dangga an en toua. Naro, kab, naro. 9:16 Dangga hang, sug ELOHIM ouci sud hom, era en emouci enero, kaba, augwan gini emogdoc sug sud hom ogod dangga se enin medoc mes. Era sug en eic mouwemougb esesa naugb gin touwero, doba aimo dau sug ELOHIM medoc an en, era naro, gin dous. 9:17 Augwan gini aimo dau areg ELOHIM enara dou Piraun se Surad Injil Meb Mohon deb sug nosa touohob, endagai: Danin eng deigdoumesa ban aboho dag leng Mesir meren mougt mera medam naugb dan dens dau indan goubesa dou lusud ogdoc ban. Dauntoba lusud se cinogo augwan, kaba, len leigdoumesa dan indoho an gin toua namcir. 9:18 Dangga hang, sud hom areg ELOHIM ogod se enin medoc mes naugb en medoc eineg an en, kaba, en eicara aimo dangga an en. Dara sud hom areg ELOHIM ogod se enin medoc mes naugb en eic en medoc aiyansem dou en, kaba, en eicara aimo dangga an en toua. 9:19 Doba sud hom dau yen, kaba, en esbes an dan, endagai: Sug ELOHIM aimo areg augwougb an lusud dag gin dous, kaba, dagiro en owun maman mamoho dag maman mabesesar terimda. Anai gareg men goubesa edeinyum naugb sug en en dougwo ELOHIM an areg en ogod deinaugb enohoba? 9:20 Doba dan insirija, bani garena, hang ban bemen dougwo ELOHIM an areg en ogod deinaugb ban gina? Ban aboho agas edeinyum naugb ginei? Naro, ban aboho emedeinyum naugb ginero. Dangga hang, ban bemen dougwo areg ELOHIM esedeb naugb ban gin touwero. Doba ban barges dau namcir. Anai sug sud hom en esinsin debecijohob, kaba, debecij ingga en dougwo en naugb sug en esinsin en dag ginei? Naro, debecij emenara dag gin dou en touwero. Doba en arges dau gin toua terimda. 9:21 Anai sud hom gedig en mou ouforoho naugb en esinsin debecij, kaba, men goubesa inggebga naugb sug en esinsin debecij hwai dau cinebcina mogo hom gin toua. Homa, kaba, naugb lona gouji. Doba homa, kaba, naugb lona gus gus gin toua, aimo dau areg enin ouwan dous. 9:22 Areg graga augwan, kaba, aninim dag ELOHIM men geicara an maman toua. Anai ligbum dau maman, kaba, len ledag debecij gedig ELOHIM medoc esrougb an len teiteiyohob. Hang en esedeb len naugb en eic mor mor se dum smougb dou len. Dara meren lona naugb gin, kaba, ebeij deinyor namcir touohob. Doba ELOHIM en ouwan ens dau sug en medoc esrougb an sesar. Dara sug men goubesa edeinyum naugb sug en ogod aremer gomom deinaugb lusud hwas gini asesa dou len toua. Dangga hang, en emerba len se dum smougb ingga dedemeda touwero. Doba en eigtou ateteij len. Dauntoba sug lusud leiya dau men geicara dou len gini, kaba, len lecinaga dag en medoc emeigouhw an sesar hom touwero. Doba en medoc esrougb an terimda. Dara men goubesa edeinyum naugb sug en eic gogom dou len toua. 9:23 Doba ligbum dau maman, kaba, len ledag debecij gedig ELOHIM esedeb len naugb en medoc eineg an len teitei touohob. Anai en emouwan naugb sug lusud lecinaga dag en medoc esrougb an sesar dousero. Doba en ouwan ens dou lusud dau sug len laimo areg edag beim dara ecabeci, kaba, dag en medoc eigouhw an len beiseisaugb namcir toua. Dangga hang, en emeic gogom dou maman touwero. Doba en eic areg geigouhw aingma aingma dou maman terimda. Hanoba en esedeb maman naugb sug en ogugwo men gogouf cucugb ingma dou maman toua. 9:24 Anai sug en eija maman aud en naugb maman madag enin men lusud, kaba, en emeija emeng Yahudi emen dousero. Doba en eija yeng yugmahara aud en touohob. 9:25 Augwan gini esogwa deisa areg ELOHIM enara eisaugb yeng yugmahara se surad Hosea deb sug nosa touohob, endagai: Leng lemedag indan lusud nosahabero, kaba, dan demeija len dag indan lusud. Dara meijouhuda gedig dan indoc gororougb lenero, kaba, dan demeija len dag dan insir len toues. 9:26 Dara en enara dou lugmahara se surad Hosea gin deit, endagai: Se usi gedig dan dowun yen meijoho dag yen yemedag indan lusudero, kaba, se usi ingga dang ELOHIM Geis Huhugb dan demeija yen dag indan lusud deits. 9:27-28 Doba eisaugb emeng Israel, kaba, Yesaya en eimiman dau emen dag gini, endagai: Leng Israel, kaba, leinyana gougwa, aninim dag geria se dum mebera namcir. Doba maman Adehsud Geis Huhugb gin, kaba, en eigdoc sud hom yom dau len dau sesar men gogom aud maireseb menau geb huhugb gin dous. Anai en emamsoho len deb deitero. Doba en emogod meren aremer dedemeda debin len se meren hancob augwan, dara en medoc agadgeij dougwo len toua namcir. 9:29 Augwan gini acgunog dau areg Yesaya ens deb dou emen sug nosa touohob, endagai: Sug ELOHIM Gen Mobisamougb namcir en emarges maman mamdebeitor ingma debero, kaba, maman madag lusud se cinogo Sodom dara Gomora touohob. Dobnaro. En amsoho lingma debohob. Hang maman mamedag leng se Sodom dara Gomora touwero. Doba ligbum, kaba, len meriresebaba. 9:30 Dangga hang, areg dan den dou yen ginohob, kaba, men meijouhw dag gini: Lugmahara gedig len lemainyen naugb sug ELOHIM eic gesgigouhwesa dou lenero, kaba, ELOHIM eic gesgigouhwesa dou len ucugb. Anai sug len louman Mer Geigouhw eisaugb Krisdus gin, kaba, len lemotogoto en gin touwero. Doba len merdoc ebdebin anohob. 9:31 Doba ELOHIM men lusud leng Israel gin, kaba, len lehilon ucina dau lenin dous. Dauntoba ELOHIM eic gesgigouhwesa dou len ogdoc gin toua. Dobnaro. Len lemesma ucina ginero. 9:32 Doba dagiro, naugwe hang, len lemesma ucina ginero? Len lemesma ucina ginero, anai len merdoc emebdebin an ELOHIM men Mer Geigouhw eisaugb Krisdus gin touwero. Doba len louwan ELOHIM eic gesgigouhwesa dou len dau sug len laimo Musa men gomnomna gin dous. Dangga hang, len lemetohob igdahab hom, moho Igdahab Getohob, gin touohob. 9:33 Augwan esogwa deisa areg ELOHIM en enara se Surad Injil Meb Mohon deb sug nosa touohob, endagai: Yen youman deigeigouhw namcir. Se lona daiyamo gacin, kaba, dan demob igdahab hom se cinogo Sion gini. Dangga gareg en medoc ebdebin an igdahab gin, kaba, dan demeic igdebes dou enero. Doba gareg en medoc emebdebin an igdahab ginero, kaba, igdebeseba eni, anai en etohob bobsara icira igdahab gin namcirohob.

Roma 10

10:1 Dan indagunerij, dara dan indamouwerij, dan indoc erij an indan lusud leng Israel gin namcir. Dauntoba ELOHIM eigdoc len dau sesar men gogom aud maireseb menau geb huhugb gin toua. Dangga hang, dan demarges dau sug dan docuncum dou ELOHIM naugb len touwero. Doba dan deicara daimo dag gin an len dara dan indoc augwan terimda. 10:2 Anai dan douma debin len dag len leic meruwemougb esesa naugb len leicara dou ELOHIM terimda. Doba meren geicara gin, kaba, len lemecinaga meijouhw augwan asesero. 10:3 Dangga hang, len lemecinaga ELOHIM men ucina naugb sug en eic gesgigouhwesa dou lusud ucugb gin dag misen touwero. Doba len lehilon ucina naugb gini dau lenin terimda. Hanoba len lemowun lenin medoc mes naugb len laimo ELOHIM men ucina areg en ens dou lenohob gin touwero. Doba len louwan naugb ELOHIM eic gesgigouhwesa dou len ogdoc meren geicara gin dous. 10:4 Dobnaro. Anai sug Krisdus enohob, kaba, en ogod dougwo Musa men gomnomna dag augwan gini ediyebeiya dau lusud laugwan namcirohob. Hang ELOHIM emeic gesgigouhwesa dou len ogdoc sug len laimo Musa men gomnomna gin toua deitero. Doba en eic gesgigouhwesa dou len ogdoc sug len merdoc ebdebin an Krisdus gin dous. 10:5 Augwan gini aimo dau areg Musa en og deb se men surad deb sug nosa touohob. Anai sug en enara eisaugb lusud gedig len louwan naugb ELOHIM eic gesgigouhwesa dou len ogdoc sug len laimo men gomnomna gin, kaba, en esulou len an dag gini, endagai: Gareg dau yen en ouwan ELOHIM eic maireseb menau geb huhugb dou en ogdoc sug en aimo ELOHIM men gomnomna gin, kaba, eigouhw naugb en emedreg men gomnomna mougwa hom touwero. Doba en aimo augwan gin terimda toua. Naro, kab, naro. 10:6 Doba sug en enara eisaugb lusud gedig len louwan naugb ELOHIM eic gesgigouhwesa dou len ogdoc sug len merdoc ebdebin an en dous, kaba, en emesulou len an dag len leija meruwesa lendag gareg en eisaugb dig bogo naugb en edeic ELOHIM en mer dou maman ginero. (Anai gini aninim dag maman madahwan Krisdus dau bogo ucugwohob.) 10:7 Dara en emenara dou len dag len leijidougwo se lenin merdoc mes lendag gareg en ouwaden dig Seol naugb gin touwero. (Anai gini aninim dag maman madahwan Krisdus dau gomom ucugb gin touohob.) 10:8 Doba en enara dagiro dou lena? En enara, endagai: ELOHIM en mer edebeij yenohob. Hang yen yemehilon gin toua deitero. Doba yen yebin en mer gini se yen meigdoc mes namcir dous. Hanoba yen yos yadi augwan gini deseino lusud toua terimda. Dara mer areg Musa enara dou len gini, kaba, emen emesai gin eng dou yen sug nosa touohob. Anai sug emen emesai Mer Geigouhw eisaugb Krisdus dou yen, kaba, emen emenara dou yen dag yen yemeic yen meijug erij naugb gin deitlo. Doba yen meigdoc ebdebin an gin dous. 10:9 Dangga sug yen yos yadi Yesus enin eng edag meijen mougt mera medam deseino lusud terimda, dara yen meigdoc ebdebin an ELOHIM dag en eigdoumesa en dau gomom ucugwohob, kaba, yen toua yemomom namcirero. Doba ELOHIM eigdoc yen dau sesar men gogom aud maireseb menau geb huhugb gin touohob. 10:10 Anai sug maman mamdoc ebdebin an Krisdus ginohob, kaba, edeinyum naugb sug ELOHIM eic gesgigouhwesa dou maman. Dara sug maman maos madi dau en deseino lusud, kaba, edeinyum naugb sug ELOHIM eigdoc maman dau sesar men gogom aud maireseb menau geb huhugb gin toua. 10:11 Augwan gini esogwa deisa areg ELOHIM en os deb se Surad Injil Meb Mohon deb sug nosa touohob, endagai: Gareg dau yen en medoc ebdebin an Krisdus gin, kaba, igdebes emeba en touwero. Doba en medoc esgirahesa namcir. 10:12 ELOHIM enara dag gini, anai en emesi emeng Yahudi emaiyei dau yeng yugmahara touwero. Doba en edag mougt mera medam naugb maman maugwan. Dangga gareg en eiyagarij en, kaba, ELOHIM eic geigouhw aingma aingma beiseisaugb dou en toua. 10:13 Augwan gini esogwa deisa areg sud hom en og deb se Surad Injil Meb Mohon deb sug nosa touohob, endagai: Gareg en eiyagarij maman Adehsud, kaba, en eigdoc len laugwan dau sesar men gogom aud maireseb menau geb huhugb gin toua. 10:14 Doba dagiro, naugwe hang, lusud lemeiyagarij maman Adehsud sug len merdoc emebdebin an enbuma? Dara dagiro naugb sug len merdoc ebdebin an en, doba len lemouman en Mer Geigouhw eisaugb Krisdus gin touebma? Dara dagiro naugb len louman ELOHIM en mer gini dau sug lusud lemesai dou len touwero? 10:15 Dara dagiro naugb sug len lesai en mer dou lusud sug len gus lemesa len aud len touebma? Naro, len lemeicara danggero. Augwan gini esogwa deisa areg Yesaya en og deb se Surad Injil Meb Mohon deb sug nosa touohob, endagai: Eigouhw namcir, kaba, sug lusud leihwedig sungga sungga naugb len lesai Mer Geigouhw dau ELOHIM dou lusud toua. 10:16-17 Dangga hang, lusud merdoc emebdebin an Krisdus augwougb touwero. Doba len merdoc ebdebin an en dau sug len louman en mer gin dous. Dara len louman en mer gin, kaba, dau sug lusud lesai dou len toua. Doba leinyana, kaba, len merdoc emebdebin an areg lusud lesai dou len ginero. Doba len letogoto en mer gin terimda. Augwan gini aimo dau areg Yesaya en eiyagarij maman Adehsud sug nosa touohob, endagai: Adehsud, gareg en medoc ebdebin an areg emen emesai dou lenohoba? Naro, sud hom ingma en medoc emebdebin an gin touwero. 10:18 Doba dan deijidougwo yen, dendagai: Sug lusud merdoc emebdebin an Krisdusbuma, kaba, gini dau sug len lemouman Mer Geigouhw eisaugb en touebmei? Naro, len laugwan louman Mer Geigouhw gini augwan asesa dag misen namcirohob. Anai Daud en erba Ugwaremer an gin deb sug nosa touohob, endagai: Leng lesai ELOHIM Mer Geigouhw eisaugb Krisdus gin, kaba, len merir agaha becinten cinogo augwan. Dara areg len lebedbed gin, kaba, edebeij cinogo moc ougbdesa touohob. 10:19 Dangga hang, dan deijidougwo yen deit, dendagai: Sug Mer Geigouhw gini edebeij cinogo moc ougbdesa dag ginohob, kaba, dagiro naugb emeng Israel emena? Emen toua ememecinaga meijouhw augwan dag misen touebmei? Naro, emen emecinaga meijouhw augwan asesa dag misen touohob. Anai ELOHIM enin eng auni acgunog eisaugb gin deb ogdoc Musa sug nosa touohob, endagai: Cum, kaba, dan demeic yen meigdoc esdigeij dou yen an lusud gedig len lemedag indan lusudero. Dara dan demeic yen meigdoc esrougb an lusud gedig len meru emobgesa areg eisaugb dan dag misenbuma touwero. Anai dan demeigdoumesa len meroho naugb len leperwei yen meijuhw dag indan lusud toues. 10:20 Dara sug maman Adehsud en enara dou leng Israel ogdoc Yesaya sug nosa, kaba, en eic mos naugb en enara gouji bedreg dau graga dou len toua deit, endagai: Leng lemehilon dan mougwa hombuma, kaba, len lesma danohob. Dara leng lemeija dougwo dan mougwa hom touebma, kaba, dan dens danin ainyes dou len touohob. 10:21 Doba eisaugb leng Israel lenin, kaba, maman Adehsud enara dag gini ogdoc Yesaya dou len, endagai: Dan dou dan insira astesda lona terimda naugb dan deic gesgigouhwesa dou len ucugb. Doba len lemouwanero, anai len ledreg dan indir dara len loududa dan toua terimdohob.

Roma 11

11:1-2 Dangga dan deijidougwo yen deit, dendagai: Sug leng Israel loududa ELOHIM dag gin terimdohob, kaba, en asid len laugwan dau en namcirohobei? Naro, ELOHIM emerba men lusud gedig en ouci len dau acgunog naugb eninohob dau en touwero. Doba en medoc an len terimdaba. Anai dan toua dau leng Israel, dara Abraham medebeito dan, dara dani dau meijouhuda Benyamin toua. Augwan gini aimo dau areg lusud len log deb se Surad Injil Meb Mohon eisaugb Elias deb sug nosa touohob. Anai en, kaba, en ohobas leng Israel gini deseino ELOHIM, endagai: 11:3 Adehsud, len lot aban boromei augwan baisoboro namcir. Dara emen gedig emen emesai ban aburo dou len, kaba, daninto dous eng dan indireseb gini. Doba len gus, kaba, len logod len laugwan lomomohob. Hang len lehilon ucina naugb sug len leic gomom dou dan toua. 11:4 Doba ELOHIM en auni dagiro dou ena? En auni dou en, endagai: Lusud gedig dan insira akebin len deb, kaba, merug ribu senggai merugwengga ginaba. Anai len lemecguna dou seiseij, moho Bael, mougwa hom touebma. Doba len lasid lenin dau namcir. Yen yemecinaga gini dag misenbumei? Naro, yen yecinaga augwan gini dag misen touohob. 11:5 Dangga toua, iteitogin, kaba, ELOHIM en mesira akebin merug hosa dau emeng Israel len ledag moro len toua merugwenggaba. 11:6 Dara sug en ouci len dag gini, kaba, en emaimo dau meren geicara dou en touwero. Doba en aimo dau areg en medoc eineg an len dous. Anai sug ELOHIM mesira akebin len, aimo dau meren geicara dou en, kaba, en medoc geineg an len gin, kaba, emen dau en medoc mes dag misenero, doba dag augwougb dous. 11:7 Dangga areg graga augwan, kaba, men meijouhw dag gini. Ligbum dau emeng Israel gedig ELOHIM ouci lenohob, kaba, len dous eng lehilon ELOHIM men ucina naugb sug en eic gesgigouhwesa dou len ucugwohob. Doba len gus, kaba, en eic medoc agadgeij dou len, anai len lemaimo men ucina naugb sug en eic gesgigouhwesa dou len ucugb touwero. Doba len lehilon ucina dau sug len laimo Musa men gomnomna naugb ELOHIM eic gesgigouhwesa dou len ucugb dous. Hang len lemesma touwero. 11:8 Augwan gini aimo dau areg lusud len log deb se Surad Injil Meb Mohon deb sug nosa touohob, lendagai: ELOHIM eic len merdoc dara len meru toua dag emaiyero namcirohob. Dangga hang, dau sug aimougtut terimda edebeij iteitogin, kaba, len lemeiya dau men geicara dara len lemouman en mer touwero. 11:9-10 Dara Daud en toua erba Ugwaremer an meren geicara gini. Hanoba en enara dou ELOHIM, endagai: Adehsud, len leic ara ara dag lauwaharo dou ban terimda. Hanoba len letara deseino ban toua. Doba dan dacgeij naugb ban beperwei areg len leic dou ban naugb lasijaresa ban dag gogomes dara digoro naugb lenin, dauntoba eica len merur mor namcir. Hanoba eic len merug erij ogdoc gin toua terimda. Dara dan dacgeij ban naugb ban beic len merdoc ebeigbogo dou len, dauntoba len lemecinaga meijouhw augwan asesa touwero, doba len meru edgom namcir. Hanoba ban beigdoumesa gogom medam debin len, dauntoba len meridgomori eninuan beb huhugb terimda toua. 11:11 Doba dan deijidougwo yen ucan gin deit, dendagai: Sug leng Israel letohob Krisdus dag ginohob, kaba, eic dag ELOHIM eic mor mor dou len beb huhugb namcirohobei? Naro, en emeic mor mor dou len beb huhugb namcirbuma. Doba sug len lohoiya ELOHIM en mer eisaugb Krisdus dag gin terimda, kaba, eic cumougt dou lugmahara, dauntoba ELOHIM eigdoc len dau sesar men gogom aud maireseb menau geb huhugb gin toua. ELOHIM eicara dangga, dauntoba sug men lusud leng Israel len leiya dau gin, kaba, len merdoc esdigeij lugmahara. Hanoba aic len naugb len merdoc ebdebin an Krisdus toua deit. 11:12 Doba sug meren geicara gedreg ELOHIM en mer gin, kaba, eic dag en eic geigouhw aingma aingma dou lusud se cinogo augwan. Dara meren gotogoto Krisdus gin, kaba, eic toua dag ELOHIM eic geigouhw aingma aingma dou lugmahara laugwan touohob, kaba, dagiro sug en eigdoumesa leng Israel len laugwan dag men lusud ucugb deita? Gini aninim dag en eic geigouhw aingma aingma edreg medam dau gin dou lusud laugwan se lona ingga toua. 11:13 Doba areg dan dog tainya gin, kaba, dan dog naugb yeng yugmahara yen dous. Anai ELOHIM eigdoumesa dan indoho naugb dan desai Mer Geigouhw eisaugb Krisdus dou yenohob. Hang dan deigdoumesa dan indir an gini deseino lusud laugwan toua terimda. 11:14 Anai dan dod indina debsa dau sug indan lusud leng Israel len toua louman dau areg dan den dou yen gin, kaba, eic dag esdigeij len merdoc mes. Hanoba eic cumougt dou dan naugb dan dahwan hom yom dau len aud ELOHIM. Dauntoba en eigdoc len dau sesar men gogom aud maireseb menau geb huhugb gin toua. 11:15 Anai sug ELOHIM men gotogoto gini eic dag en eic gesgigouhwesa dou lusud se cinogo augwan ucugwohob, kaba, dagiro sug en eigdoumesa leng Israel dag men lusud gin deita? Men geigouhw dou maman gini, kaba, aninim dag lusud leisa dau gomom ucugb toua. 11:16 Anai sug ELOHIM ouci len merjemouwer debinim naugb en sug aimougtutohob, kaba, eb naugb medebeitor len laugwan toua dangga. Aninim dau sug lusud leic roti mehir hom naugb lauwaharo dou ELOHIM enohob, kaba, mougb geb augwan en men. Era sug len leic mom lauwaharo dou en, kaba, mesira augwan en men touohob. 11:17 Dangga ELOHIM, kaba, en eigteh mesira aibibra dau sogo saitun misen gini. Hanoba en edeic mesira dau sogo saitun geb se lomesmes bad se sogo saitun misen gin touohob. Emeng Israel, kaba, dag sogo saitun gin mesira teisis. Doba yeng yugmahara, kaba, yen yedag sogo saitun geb se lomesmes mesira gini. Dangga hang, sug ELOHIM eic yen bad se sogo saitun misen dag ginohob, kaba, geigouhw aingma aingma areg geb naugb emeng Israel, kaba, augwan eb naugb yen iteitogin touohob. 11:18 Sug ELOHIM eic yen bad se saitun misen maga dag ginohob, kaba, yen yemehirirmo debin mesira gedig ELOHIM eigteh dau maga misen gin touwero. Doba yen yowun yenin meigdoc mes arjaga an gin namcir. Anai yen yecinaga dag yen, kaba, yen yedag mesira. Hang mesira, kaba, emeic mohu dau mom touwero. Doba mom eng eic mohu dou mesira augwan dous. 11:19 Doba ligbum dau yeng yugmahara, kaba, yen yauni ucugb dou dan, yendagai: ELOHIM eigteh mesira misen gin dau, hanoba en eic emen bad maga ucugb dougwo lendohob. 11:20 Indeic, areg yen yen gin, kaba, misen namcir. Doba len merdoc emebdebin an ELOHIM mer eisaugb Krisdus ginero, hang en emeigteh len dau gini. Doba yen, kaba, yen meigdoc ebdebin an en mer eisaugb Krisdus ginohob, hang en emaic yen bemad maga misen gin toua. Dangga hang, yen meigdoc emagas an gin touwero. Doba yen yesa decicijahabi. 11:21 Anai sug ELOHIM emamsoho mesira misen leng Yahudi ginero, doba en eigteh len dau, kaba, yen youdesa endag en amsoho yen debei? Naro, en emamsoho yen touwero. 11:22 Dangga hang, yen yemeiya dau sug ELOHIM medoc eigouhw an lusud gin dousero. Doba yen yesa yeiya dau sug en medoc agadgeij dougwo lusud gin touahabi. Anai leng merdoc emebdebin an enero, doba len lotogoto en mer gin terimda, kaba, en medoc agadgeij an len namcir. Doba yen, kaba, en medoc eigouhw an yen. Anai yen yemotogoto en mer ginero, doba yen meigdoc ebdebin an en mer ginohob. Doba esloulougb naugb yen meigdoc ebdebin an en mer gin esesa terimda. Anai sug yen yeicara yaimo dangga, kaba, ELOHIM medoc eigouhw an yen toua. Ga naro, kaba, ELOHIM emamsoho yen touwero, doba en eigteh yen dau sogo maga misen gin toua namcir. 11:23 Dangga toua, leng Israel sug len lemotogoto en mer eisaugb Krisdus gin deitero, doba len merdoc ebdebin an en toua, kaba, ELOHIM eic len bad maga se mohw dag nosa graga deit. Anai en mobisamougb edeinyum naugb ginohob. 11:24 Areg dan den dou yen graga, kaba, augwan men meijouhw dag gini: Yeng yugmahara, kaba, yen yedag mesira gedig ELOHIM eigteh yen dau sogo saitun geb se lomesmes gin dous. Hanoba en eic yen bad se sogo saitun misen gin touohob. Doba emeng Israel, kaba, emen emedag mesira gedig ELOHIM eigteh len dau sogo saitun misen gini. Dangga hang, naugb sug ELOHIM eic emeng Israel bad maga ucugb se mohw deit, kaba, gini emagadgeij touwero, doba etetahaito namcir. Anai emeng Israel, kaba, dag sogo saitun misen men mesira teisisohob. Doba yeng yugmahara, kaba, yen yedag sogo saitun geb se lomesmes men mesira dous. 11:25 Dan indagunerij, dara dan indamouwerij, dan douwan decic dau aremer hom areg ELOHIM esga dou danohob meijouhw augwan asesa dou yen deit. Dauntoba yen yemeigdoumesa yenin meijoho dag yen yecinaga aremer augwan eisaugb leng Israel gini touwero. Doba yen yarges dau gin namcir. Anai meijouhw hom gin, kaba, ELOHIM emens dou sud hom ingma sug nosa touebma. Doba en ecgoneh dau len terimda iteitoginohob. Aremer hom dag gini: Leng Israel, kaba, len lemotogoto ELOHIM en mer eisaugb Krisdus beb huhugb terimdero. Doba len leicara laimo dangga, terimda edebeij lona sug yeng yugmahara areg ELOHIM ouci yen deb dau acgunogohob yen yaugwan yeinesa men uro mes ginahabi. Se lona ingga, kaba, len lemotogoto en mer eisaugb Krisdus gin toua deitero. Doba len toua merdoc ebdebin an Krisdus namcir. 11:26-27 Hang se lona ingga, kaba, sesar men gogom emeb naugb len toua deitero. Doba ELOHIM eigdoc len dau sesar men gogom aud maireseb menau geb huhugb gin toua namcir. Augwan gini aimo dau areg Yesaya en og deb se Surad Injil Meb Mohon deb sug nosa touohob, endagai: Se lona daiyamo gacin, kaba, Sud Hom Geigdoc Leng Israel Dau Sesar Men Gogom Augwan, kaba, en emdagunya debin len dau cinogo Sion aud len toua. Se lona ingga, kaba, len lemotogoto ELOHIM en mer toua deitero. Anai sud hom graga, kaba, en erba areg mog mog augwan dau Yakub medebeitor len laugwanohob. Dara ELOHIM enin os dangga ogdoc Yesaya se Surad Injil Meb Mohon deb sug nosa touohob, endagai: Se lona sug dan doguc dougwo meren sesar augwan dau lenohob, kaba, se lona ingga dan daimo areg dan dos dou len merjemouwer ginohob augwan asesa an len toua. 11:28 Dangga icira yen, kaba, ELOHIM owun leng Israel len meroho dag men moc, anai len lotogoto en Mer Geigouhw eisaugb Krisdus gin namcir. Doba icira len merjemouwer, kaba, en eigdoumesa leng Israel len meroho dag en mesir gin terimda. Anai en os dangga dou len merjemouwer sug nosohob. 11:29 Anai gareg ELOHIM esedeb en naugb sug en eija en aud en, dara areg ELOHIM en os dou lusud naugb sug en eic dou len, kaba, en emeperwei en medoc mes an gin touwero. Doba en aimo augwan gini an len terimda toua. 11:30 Dangga sug nosa, kaba, yeng yugmahara yen yedreg dau ELOHIM en mer gin namcir. Doba sug leng Israel lotogoto ELOHIM en Mer Geigouhw eisaugb Krisdus dag gin, kaba, eic dag en medoc an yen naugb en eic gesgigouhwesa dou yen ucugb, anai yen yaimo en mer eisaugb Krisdus ginohob. 11:31 Dangga toua, dau sug ELOHIM medoc eineg an yen dag ginohob, kaba, eic dag leng Israel ledreg dau en mer gin toua namcirohob. Dauntoba se lona daiyamo gacin, kaba, ELOHIM medoc eineg an len naugb en emdeic gesgigouhwesa dou len ucugb toues. 11:32 Anai sug nosa, kaba, ELOHIM en amsoho lusud laugwan debin meren sesar namcir. Dauntoba sug len ledag sesar men sogougb dag ginohob, kaba, eic dag en medoc eineg an len laugwan ucugb toua. 11:33 Dangga hang, eigouhw naugb maman mamarges dau sug maman magahugouhw an ELOHIM dara maigdoumesa en moho touwero. Doba maman maigdoumesa en moho beb huhugb namcir. Anai areg en eicara baimo an maman ginohob, kaba, gini ens dou maman dag en medoc eigouhw an maman beiseisaugb namcir. Dara ens ainyes dou maman toua dag en mou ouforoho naugb en ecinaga meijouhw dau augwan gin deb sug nosa touohob. Hang sud hom ingma, kaba, en emecinaga dau areg en ogod aga lusud, dara areg en aimo an len meijouhw augwan asesa touwero. 11:34-35 Augwan gini aimo dau areg len log deb se Surad Injil Meb Mohon deb sug nosa touohob, lendagai: Gareng en ecinaga ELOHIM en mou, dara en esulou en an areg en ogod an, era eic men aremeij dou en naugb sug en oci ucugb dou en toua? Naro, sud hom ingmaro. 11:36 Anai enin dous eng ahasesei dara esinsin augwan. Hanoba en esedougwo dauntoba emedregim touwero. Doba augwan ec dara gesgiraha terimda. Dara areg en ahasesei dara esinsin gin, kaba, naugb sug enin moho aiga toua. Augwan gini asesa dag misen namcir.

Roma 12

12:1 Dan indagunerij, dara dan indamouwerij, sug ELOHIM medoc eineg an maman eiseisaugb dag ginohob, kaba, dan desulou yen dara goubesa namcir dag yen yemaimo areg yenin youwan deitero. Doba yen yogod se yenin meigdoc mes naugb yen yaimo areg ELOHIM enin ouwan dous. Dauntoba meijen geicara augwan, kaba, eic ELOHIM medoc eigouhw an yen. Anai sug yen yedag ELOHIM men lusud dag ginohob, kaba, esloulougb naugb yen yeicara yaimo dangga terimda. Augwan gini aninim dag lusud sug len leic ara ara lauwaharo dou ELOHIM. Anai sug len leic ara ara dou enohob, kaba, emedag meren toua deitero, doba ELOHIM enin men augwan namcirohob. 12:2 Dangga hang, yen yemaimo lusud gedig Bilis oiharaga len se cinogo gini se meren gaben toua deitero. Doba yen yacgeij ELOHIM naugb en eperwei yen meigdoc mes dara yen meiju augwan namcir. Dauntoba yen yecinaga areg asesa ELOHIM enin medoc mes augwan gin toua. Anai sug yen yecinaga augwan dag misenohob, kaba, eic dag yen yemedreg areg ELOHIM en arougb yen an gini hom touwero. Doba yen yaimo areg edag beim dara areg geic ELOHIM medoc agahugouhw an yen augwan gin toua terimda. 12:3 Dara yen yemeigdoumesa yenin meijoho emagas augwougb touwero. Doba dan desulou yen, dauntoba yen yeigdoumesa yenin meijoho, aimo dau areg yen meiju ens dou yen gin dous. Anai gini aimo dau areg ELOHIM enin ouwan toua. Dan desulou yen dag gini, anai ELOHIM eigdoumesa dan indoho naugb dan desai Mer Geigouhw eisaugb Krisdus dou yenohob. Dangga hang, astesda dau yen, kaba, en auwam an mou ouforoho areg ELOHIM eic dou enahabi. Hanoba en eigdoumesa enin moho aimo dangga toua. 12:4 Anai maman mamaga, kaba, homto dous. Doba areg geb se maga hom gin, kaba, einyana. Dara areg geb se maga gin, kaba, meren geicara dag hom touwero, doba susugb toua namcir. 12:5 Gini aninim dag mamang Krisden toua. Anai maman, kaba, mainyana gougwa. Doba sug maman maugwan dag hom dara Krisdusohob, kaba, maman madag maga hom toua. Dangga sug maman madag maga homohob, kaba, astesda dau maman en medoc dag hom darem se maga hom gin toua. 12:6 Sug ELOHIM eic mou ouforoho dou astesda dau mamanohob, kaba, maman marges dau gin touwero. Doba maman maimo augwan gini anim ucucugb terimda toua. Anai mou ouforoho areg ELOHIM eic dou maman gin, kaba, augwan aninim touwero. Doba susugb toua namcir, aimo dau areg ELOHIM enin medoc eigouhw an maman icira dous. Dangga hang, gareg ELOHIM eic mou ouforoho dou en naugb sug en esai en moro dou lusud, kaba, en esai en moro gini, aimo dau mou ouforoho areg ELOHIM eic dou enohob naugb gin toua. 12:7 Era sug ELOHIM eic mou ouforoho dou sud hom naugb sug en ousa lusud, kaba, en ousa len. Era sug en eic mou ouforoho dou sud hom naugb sug en edidib meijouhw eisaugb Krisdus augwan asesa dou lusud, kaba, en aimo dangga esesa terimda toua. 12:8 Era sug ELOHIM eic mou ouforoho dou sud hom naugb sug en esulou lusud dara enara bad len merdoc mes, kaba, en emarges dau gin touwero. Doba en es agadgeij naugb en eicara baimo dangga an lusud. Dara gareg ELOHIM eic mou ouforoho dara goubesa dou en naugb sug en esma aremougb einyanohob, kaba, en emecgun mesira debin gin touwero. Doba en agaha mesira an besesa dou lusud. Dara gareg ELOHIM eic mou ouforoho dou en naugb sug en edag mougt, kaba, en emeigtou an moho ginero. Doba sug en esedougwo lusud, kaba, en eic mouwemougb esesa naugb len terimda. Dara sud hom areg ELOHIM eic mou ouforoho dou en naugb en medoc eineg an lusud, kaba, en emaimo ucina gini dareg emarerei ara an len touwero. Doba en eicara baimo dangga dareg en medoc esgiraha an len dous. 12:9 Dara yen yemeicara yemarerei lusud meriresi dag yen meigdoc gororougb len touwero. Doba yen meigdoc gororougb len dag misen namcir. Dara areg gogor, kaba, yen meigdoc emeigouhw an touwero. Doba yen meigdoc esdigeij dau yen namcir. Hanoba yen yebin areg geigouhw se yen meigdoc mes naugb yen yaimo gin dous. 12:10 Dangga hang, sug yen yedag meijagunem dara meigdamouwem se Krisdus dag ginohob, kaba, yen meigdoc mog mog anim toua deitero. Doba yen meigdoc gororougwim deigeigouhw namcir. Dara yen meigdoc erleij naugb yen yeigdoumesa yen meijoho ucucugb toua terimda. 12:11 Dara gurog emeba yen touwero. Doba sug yen meigdoc erleij aud maman Adehsud enohob, kaba, yen yeicara yaimo areg en arougb yen an gini dara yen meigdoc augwan toua namcir. 12:12 Dangga toua, sug yen yaimo ucina mog erij, kaba, yen yemobsara dau gin dedemeda touwero. Doba yen yaiyan meigdocesem naugb yen yes agadgeij namcir. Dara yen meigdoc moc dougwo areg ELOHIM os dou yen gin touwero. Doba yen meijina eiseisan gin terimda. Anai sug yen yod meijinesa ELOHIM an areg en os dou yen gin, kaba, eic dag yen meigdoc momogo touwero. Doba eic dag yen meigdoc agahugouhw namcir. Hang yen yemarges dau sug yen yocuncum dou ELOHIM touwero. Doba yen yaimo dangga esesa terimda toua. 12:13 Dara yen yemecgun yen meisira debin meijen aremougb dau yen meijaguner dara yen meigdamouwer leng Krisden gus gedig len merunggwereij touwero. Doba yen yagaha yen meisira an gini dou len dag mogud dous. Dara sug leng Krisden gus gedig lugmahara len len aud yen, kaba, yen yemoung misis dougwo len touwero. Doba yen yebin len, hanoba yen yec misis dau len toua. 12:14 Dara sug lusud leic gogom dou yen, kaba, yen yemacgeij ELOHIM naugb en emouwara dougwo len touwero. Doba yen yacgeij en naugb en eic geigouhw dou len dous. 12:15 Dara leng merdoc agahugouhw an meren ara ara, kaba, yen yaimo len naugb yen meigdoc agahugouhw an gin. Dara sug len leb an ara ara, kaba, yen yousa len naugb yen yeb an gin toua. 12:16 Dara yen yemesi sud hom aiyei naugb yen meigdoc eigouhw an en emedreg dau lusud gus touwero. Doba yen meigdoc eigouhw an len laugwan aninim dous. Hang yen meigdoc emagas naugb yen yesbes an leng meroho eb tainya dau yen touwero. Doba yen yeigdoumesa len dag yen meisir misen gin toua. Dara yen yemeigdoumesa yen meijoho dag yen yecinaga meijouhw augwanohob touwero. Doba yen yaimo dau areg yen meiju ens dou yen dous. 12:17 Sug sud hom eic gecgu dou yen, kaba, yen yemauni gecgu ucugb dou en touwero. Doba yen yauwam an aremer areg lusud leigdoumesa dag geigouhwahabi, yen yemaimo gini an lusud terimda dous. 12:18 Dangga toua, yen yehilon ucina dara meijen goubesa augwan namcir naugb sug yen yaic lusud merdoc mes, dauntoba len merdoc emesrougb an yenero. Doba yen yaugwan meigdoc edouder anim ucucugb terimda dous. Naro, kab, naro. 12:19 Dangga hang, dan insirija, yen yemauni gecgu dou sud hom ingma mougwa hom touwero. Doba yen yogugwo len se ELOHIM en mesira naugb enin eng auni ara ara ucugb dou len dous. Anai en enara deb se Surad Injil Meb Mohon deb dag gini sug nosa touohob, endagai: Danin dous eng dauni gecgu dou lusud. Dara danin dous eng dauni meren gogom ucugb dou len toua. 12:20 Sug ELOHIM en dougwo maman dag ginohob, kaba, maman mamauni gogom ucugb dou leng leic gogom dou maman toua deitero. Doba maman maimo areg Solaiman esulou maman an se Surad Injil Meb Mohon deb sug nosa an len dous, anai en esulou maman, endagai: Sug aban moc sirebeni, kaba, ban beic ared dou en. Era sug merijebeni, kaba, ban beic duhu dou en toua. Anai sug ban beicara dag gini, kaba, ban beic igdebes dou en namcirohob. 12:21 Dangga hang, yen yaiyan meigdocesem dougwo areg gecgu namcir, dauntoba areg gecgu gini emaiyan yen touwero. Doba yen yaiyan areg gecgu ogdoc meijen geicara geigouhw gin dous.

Roma 13

13:1 Astesda dau yen, kaba, en emotogoto pemerintah mer ginero. Doba en owun enin medoc mes arjaga naugb en aimo areg len larougb en an gin toua terimda. Anai gareg en edag mougt mera naugb yenohob, kaba, en emeigdoumesa enin moho naugb ginero. Doba ELOHIM enin eng eigdoumesa astesda dau len, hang len lemesedougwo yen toua. 13:2 Dangga hang, gareg en ohoiya len merir an areg len larougb en an gin, kaba, gini aninim dag en eic mos dougwo areg ELOHIM esedeb naugb en gini touohob. Dara gareg en eic mos dougwo areg ELOHIM esedeb gini, kaba, gogom medam eb naugb en namcir. 13:3 Anai len gedig lowun len merdoc arjaga deseino mougt mera naugb len laimo en an areg en arougb len an gini terimda, kaba, len lemahau dau en touwero. Doba leng leicara gecgu dous eng lahau dau mougtir gini. Dangga hang, sug yen youwan naugb yen yemahau dau mougt mera ginero, kaba, eigouhw naugb yen yaimo areg geigouhw mogud dous. Anai sug yen yeicara yaimo dag gin, kaba, mougt mera emeic gogom dou yen touwero, doba en eigdoumesa yen meijoho an gin terimda. 13:4 Anai ELOHIM eigdoumesa en moho dag men gedeij an naugb en ousa yen, dauntoba yen yera mera areg geigouhw terimda. Doba sug yen yaimo areg gecgu gin, kaba, yen yahau dau en namcir. Anai ELOHIM emeigdoumesa en moho naugb en eic gogom dou yen augwougwero. Doba sug en edag ELOHIM men gedeij an dag misenohob, kaba, ELOHIM eic goubesa dou en naugb en eic men gogom dag misen dou yen toua, aimo dau areg ELOHIM en esedeb naugb gini touohob. 13:5 Sug pemerintah eperwei ELOHIM en mohw naugb eic men gogom dou yen dag ginohob, kaba, yen yemeic meijus dou len naugb yen yohoiya len merir an areg len larougb yen an gin touwero. Doba yen yowun yenin meigdoc mes arjaga naugb yen yaimo len merir gin terimda. Dara yen yemaimo len merir dau sug len leperwei ELOHIM en mohw naugb sug len leic men gogom dou yen dousero. Doba yen yaimo len merir an areg len larougb yen an gini. Anai yen yecinaga se yen meigdoc mes dag ucina gin, kaba, edag beim dara misen touohob. 13:6 Sug yen meigdoc mes ens dou yen naugb yen yaimo pemerintah len merir dag ginohob, kaba, eic dag yen yemamsoho naugb sug yen yohw cinogo dou len touwero. Doba yen yeicara yaimo dangga toua terimda. Anai yen yecinaga dau sug len leic geigouhw dou leng merdoc edag beim dara len leic gogom dou leng leicara gecgu, kaba, gini dag len leicara lesogwa deisa areg ELOHIM arougb len an gin dag misen namcirohob. 13:7 Dangga hang, sug len lacgeij naugb yen yohw cinogo aingma aingma dou len, kaba, yen yemohoiya len merir an touwero. Doba yen yowun yenin meigdoc mes arjaga naugb yen yeicara yaimo dangga toua terimda. Hanoba yen yemesbes len dara yen yemowun len meroho an gin touwero. Doba yen yeigdoumesa len meroho se aremer augwan namcir. 13:8 Dara yen yemahud yenin dara cufu hom touwero. Doba yen yohud yenin dara cufu dag yen meigdoc gororougwim naugb yen yoc gin dous. Areg gus, kaba, yen yoc dedemeda, dauntoba lusud meren aremeij hom emeb dou yen touwero. Doba augwan ediyebeiya dau yen namcir. Anai gareg en medoc gororougb len gusohob, kaba, en aimo areg ELOHIM arougb en an se men gomnomna geic dou Musa augwanohob. 13:9 Anai areg ELOHIM arougb maman an dag maman mamsira emebsa ligida gus aibibra, dara maman mamohud len gus, dara maman mameiyohoro, dara maman mameclulan len gus an meren aremougb, dara areg en arougb maman an gus gus toua, kaba, augwan gini ebsa ELOHIM men gomnomna hom dag maman mamdoc gororougb len gus, aninim dag maman mamdoc gororougb mamanin touohob. 13:10 Dangga gareg en medoc gororougb lusud, kaba, en emaimo ucina gecgu an len mougwa hom touwero. Doba en asid enin dau namcir. Hanoba en aimo areg edag beim an len dous. Anai sug en eicara dag gin, kaba, en aimo areg ELOHIM arougb en an se men gomnomna geic dou Musa augwanohob. 13:11 Yen yeicara yaimo dag gini, anai lona naugb sug ELOHIM eigdoc maman dau sesar men gogom aud maireseb menau geb huhugb, kaba, ebeij deinyor bedreg dau lona sug maman mamdoc ebdebin an Krisdus sug aimougtut gin touohob. Sug yen yecinaga dag lona gini edagasa dag ginohob, kaba, yen yematou toua deitero. Doba yen yeisa dau yatouda. 13:12 Anai cum, kaba, loba deitero, doba lona esga namcirohob. Dangga hang, maman mamaimo lusud gedig len leigtou se lobeigbogo aud meren geicara gin toua deitero. Doba maman mas mouf men aregog augwan icira maman mamsira. Hanoba maman masara dara loba men geicara dag areg gecgu augwan toua terimda. 13:13 Dara maman mamogo ara gaihim, dara mameg ahwei mohu bemad maman, dara maman mamsira emebsa ligida gus aibibra, dara maman mamaimo areg ogor, hanoba maman mamir emeisaugwum ucucugb, dara maman mameclulan len gus meren aremougb touwero. Doba sug maman mainesa mouf dag ginohob, kaba, maman geicara augwan aninim dag lusud gedig len leigtou se lonohob meren geicara gin dous. 13:14 Hang yen yesedougwo yenin dau areg geic yen meigdoc etrij icira aud sesar naugb yen yemaimo toua deitero. Doba yen yeg maman Adehsud Yesus Krisdus dag sansun kermum dougwo yen meijagahabi, yen yemeicara yemaimo en mohotimei mohw se men geicara augwan toua terimda.

Roma 14

14:1 Sug sud hom Krisden gedig en eija mouwesa an ara ara ginaba en edebeij yen, kaba, yen yemenara yemaisid en an areg en eija mouwesa gin touwero. Doba yen meigdoc an en, hanoba yen yebin en dara geigouhw namcir dous. 14:2 Anai sud hom, kaba, en medoc esgiraha namcir naugb sug en et mog gedig lusud lesijaresa dou seiseijohob. Doba sud hom gus deit, kaba, en eija mouwesa ginaba. Hang en medoc emesgiraha naugb sug en et mog gin touwero. Doba en et ared gus mogud dous. 14:3 Sud hom gedig en et mog gedig len lesijaresa dou seiseijohob, kaba, en emesbes an sud hom gedig en emet mog ginero. Dara sud hom gedig en emet mog ginero, kaba, en emowun sud hom gedig en et mog gini dag en obsara dau Krisdusohob touwero. Anai ELOHIM eigdoumesa lahwas dag en mogwihi mogo lan dag misenohob. 14:4 Sug ELOHIM eigdoumesa lahwas dag en mogwihi mogo lan dag ginohob, kaba, dagiro, naugwe hang, yen yowun sud hom en moho dag en obsara dau maireseb menau geb huhugb ginohoba? Yen eng yen yogod gogom deinaugb sud hom gus men sogougb ginei? Naro, meijen goubesa naugb gin touwero. Doba enin men mougt mera dous eng emogod deinaugb en dag en einesa se maireseb huhugb, era obsara dau toua. Dara en emobsara dau ucina maireseb geb huhugb gin touwero. Doba en aimo ucina gini terimda en edebeij usi gin toua namcir. Anai men Adehsud gin, kaba, men goubesa edeinyum naugb ginohob. 14:5 Dangga toua, sud hom, kaba, en oudesa dag lona hom en moho agas edreg dau lona gus augwanohob. Doba sud hom gus, kaba, en oudesa dag lona augwan aninim dous. Doba sug sud hom eigdoumesa lona hom edreg dau lona gus, era en eigdoumesa lona augwan aninim, kaba, augwan gini emesloulougwero. Doba esloulougb, kaba dag astesda sud hom en emeija mouwesa ginero. Doba en ogod se enin medoc mes dag areg en aimo gin, kaba, ucina misen naugb enohob. 14:6 Gareg en eigdoumesa lona hom edreg dau lona gus augwan, kaba, en eicara dangga naugb en eigdoumesa maman Adehsud en moho se lona ingga. Dara gareg en et mog gedig lusud lesijaresa dou seiseijohob, kaba, en eicara dangga naugb en eigdoumesa maman Adehsud en moho toua. Anai en en sijo dou ELOHIM naugb en eic mog gini dou enohob. Dangga toua, dara sud hom gedig en emet mog ginero, doba en et ared gus mogud dous. En toua en sijo dou ELOHIM debin men geicara gini. Anai en oudesa dag men geicara gin, kaba, eigdoumesa maman Adehsud en moho gin touohob. 14:7 Dara sud hom ingma dau maman, kaba, en maireseb naugb eninero. Era sug maman mamom, kaba, maman mamom naugb mamanin touwero. 14:8 Doba sug maman maireseb, kaba, maman mamireseb naugb maman Adehsud. Era sug maman mamom, kaba, naugb en toua. Dangga hang, sug maman mamireseb, era sug maman mamom, kaba, maman madag maman Adehsud menohob. 14:9 Anai Krisdus en omom. Hanoba en eisa dau gomom ucugb, dauntoba en edag mougt mera medam naugb leng merireseb dousero. Doba naugb leng lomom len laugwan toua namcir. 14:10 Sug Krisdus en edag len laugwan meren mougt mera medam dag ginohob, kaba, dagiro, naugwe hang, yen yowun yen meijaguner len meroho dag len lobsara dau maireseb huhugb, dara yen yesbes an len sug len let mog, era len lemet mogero gin toua? Anai se lona hom, kaba, astesda dau maman en edeseino ELOHIM men maija moc naugb en ogod aremer meijouhw augwan asesa dou en, aimo dau men geicara an en toua. 14:11 Augwan gini aimo dau areg maman Adehsud en enara deb ogdoc Yesaya se Surad Injil Meb Mohon deb sug nosa touohob, endagai: Se lona hom, kaba, astesda sud hom en ecgun mohorbrida adedeij cinogo deseino dan. Hanoba len leigdoumesa dan indoho dag dan hom dous eng ELOHIM misen. Dan dou danin indireseb debin gin toua, dauntoba yen yecinaga dag augwan gini acgunog dag misen namcirohob. 14:12 Dangga hang, se lona hom, kaba, astesda sud hom dau maman en emenara aremeijouhw dau men geicara augwan asesa dou ELOHIM gin toues. 14:13 Sug maman madenara aremeijouhw asesa dou ELOHIM dag gin, kaba, eigouhw naugb maman mamowunim dag maman mamobsara dau maireseb huhugwohob gin touwero. Doba maman magod se mamanin mamdoc mes dag maman geicara augwan, kaba, edeinyum naugb sug maman mamaguner dara maman mamdamouwer len laugwan lemetohob dau Krisdus, dara len lemobsara aud sesar icira maman geicara gin touwero. 14:14 Anai sug dan dedag hom dara maman Adehsud Yesus dag ginohob, kaba, dan decinaga dag areg dan det, era areg dan dos, kaba, augwan emeic gogor dou dan deseino ELOHIM enero. Doba sug sud hom en oudesa dag areg en et, era areg en os gin, kaba, eic gogor dou en deseino ELOHIM. Hanoba en eic mos naugb en et, era en os toua, kaba, gini eic ogor dou en deseino ELOHIM enohob. 14:15 Doba deciciji, dauntoba areg yen yet gin, kaba, emdeic gogom dou yen meijaguner dara yen meigdamouwer gedig len leija meruwesaba ginero. Anai sug yen yet areg len leija meruwesa gin aisa len, hanoba len toua leic merus naugb len let, kaba, ELOHIM eic mor mor dou len se dum smougb namcir. Anai len ledreg dau areg len merdoc esa docohob. Hang gini dag yen meigdoc gororougb len gin touwero. Doba yen yobsara aisa lendohob. Anai len toua Krisdus omom taiba sogo salib naugb lenohob. 14:16 Dangga hang, areg yen yeigdoumesa en moho dag geigouhwohob naugb sug yen yaimo, kaba, yen yemaimo augwan gini augwougb touwero. Doba yen yesedougwo dara geigouhw namcir. Dauntoba lusud lemowun geigouhw areg yen yaimo gin dag gecgu touwero. Doba len leigdoumesa yen meijoho an gin terimda. 14:17 Anai sug ELOHIM oiharaga maman ucugb, kaba, gini emeisaugb areg maman mat dara areg maman mag ginero. Doba eisaugb sug Mena Gogoufu arautut maman naugb maman maimo areg asesa ELOHIM enin medoc mes, dara sug maman maic gesgigouhwesem, dara sug maman magahugouhw an ELOHIM gin dous. 14:18 Dara gareg en eicara dag gin an Krisdus terimda, kaba, ELOHIM medoc agahugouhw an en. Hanoba lusud leigdoumesa en moho an gin toua namcir. 14:19-20 Dangga hang, yen yemeic mor mor dou ELOHIM men lusud areg en ohud len dag men tu ogdoc mog areg yen yet ginero. Doba yen yehilon ucina aud areg geic lusud merdoc mes erleij dou len naugb len leic gesgigouhwesem ucucugb terimda. Dara yen yousa len naugb len laiyan merdocesem. Dauntoba len lemobsara dau Krisdus touwero. Doba len les agadgeij naugb len merdoc ebdebin an en terimda. Ared augwan, kaba, emeic gogor dou yen deseino ELOHIM enero, hang yen yet toua. Doba sug areg yen yet gin, kaba, eic dag len gus letohob yen dau maireseb huhugb, kaba, yen yebesesar an lenohob. 14:21 Dangga sug yen yet mog gedig lusud lesijaresa dou seiseijohob, era sug yen yeg ahwei mohu, era sug yen yaimo areg gus, doba ara ara dau augwan gini eic dag yen meijaguner dara yen meigdamouwer len lobsara dau maireseb huhugb, kaba, eigouhw naugb yen yemeicara yemaimo gin deitero. Doba yen yarges dau namcir. Anai sug yen yeicara dag gin, kaba, yen yaimo ucina gobosboro an lenohob. 14:22 Hang areg yen meigdoc eiloboro icirohob naugb sug yen yet, era naugb sug yen yeg, kaba, yen yemens gini ainyes dou lusud gedig len leija meruwesa ara ara ginero. Doba gini eb se yen meigdoc mes naugb ELOHIM yen yecinaga dous. Dara gareg en emedreg dau areg en medoc ouma debin en naugb en et dara en eg ginero, doba en aimo gin dous, kaba, ELOHIM eic geigouhw dou en namcir. Anai en emaimo augwan dau sug en eija mouwesa touwero, doba dau sug en medoc esgiraha an ginohob. 14:23 Doba gareg en oudesa dag areg en et, era areg en eg gin, kaba, eic gogor dou en deseino ELOHIM, hanoba en eic mos naugb en et, era eg toua, kaba, ELOHIM eic mor mor se dum smougb dou en namcir. Anai en emet dara medoc esgiraha an ginero. Doba en etara dara egara dareg en eija mouwesa gin dousaba. Hang en ebesesar. Anai gareg en emaimo ara ara dareg en medoc emebdebin anero, doba en eija mouwesaba, kaba, gini dag en obsara aud sesar namcirohob.

Roma 15

15:1 Sug Krisdus en omom taiba sogo salib naugb leng leija meruwesa dag gin touohob, kaba, eigouhw naugb maman mamaimo areg geic maman mamdoc eigouhw dou maman ginero. Doba sug maman macinaga meijouhw eisaugb mog era mohu augwan dag misenohob, kaba, maman mausa len dara areg len leija meruwesa gini. Dauntoba len lecinaga meijouhw asesa toua. Anai meren geija mouwesa gin, kaba, edag aguci naugb len terimdaba. 15:2 Dangga hang, astesda dau maman, kaba, en emaimo areg geic medoc eigouhw dou enin touwero. Doba en aimo ucina aud areg geic geigouhw dou en maguner dara medamouwer gin dous. Dauntoba len leiji dag lusud mos se Krisdus gin toua terimda. 15:3 Anai Krisdus en toua emaimo ucina areg geic en medoc eigouhw dou enin touwero. Doba en aimo ucina naugb sug en eic geigouhw dou lusud gus dous. Augwan gini esogwa deisa areg Krisdus en enara deb dou ELOHIM an gini se Surad Injil Meb Mohon deb sug nosa touohob, endagai: Areg lusud lesedeb naugb len loududa ban an gini, kaba, augwan emaiyan banero, doba aiyan dan dous. 15:4 Dan dens dau areg len log se Surad Injil Meb Mohon gin dou yen, dauntoba sug maman macinaga dau areg ELOHIM esedeb naugb maman meijouhw augwan dag misenohob, kaba, eic dag maman mamobsara dau ucina mog erij ginero. Doba maman maigtou mateteij. Dara maman mas agadgeij naugb maman maiyan mamdocesem toua namcir. Hang emousa maman naugb sug maman mamobsara dau Krisdus gin touwero. Doba maman maod mamina debsa ELOHIM an areg en os dou maman ogdoc Krisdus gin toua terimda. 15:5-6 Dara dan docuncum dou ELOHIM naugb en ousa yen, dauntoba yen yemowunim toua deitlo. Doba yen yesogwa deisa Krisdus Yesus en mohotimei mohw naugb yen meigdoc anim ucucugb terimda. Dauntoba sug yen yaugwan yaimo ucina hom dag ginohob, kaba, eic dag yen yagahugouhw an maman Adehsud Yesus Krisdus en Mena ELOHIM. Dara yen yeigdoumesa en moho dara yen meigdoc hom toua namcir. Anai ELOHIM, kaba, en edag mebin naugb en enara bad maman mamdoc mes. Dauntoba maman mamobsara dau Krisdus touwero. Doba maman maigtou mateteij dara maiyan mamdocesem naugb mas agadgeij toua terimda. 15:7 Dangga hang, sug Krisdus ebin yen yaugwan dag men lusudohob, kaba, yen yemowunim dara yemesbes anim dag graga toua deitlo. Doba yen yebinim dara yen meigdoc anim ucucugb dag gin terimda. Dauntoba yen yeigdoumesa ELOHIM en moho ogdoc meijen geicara gin toua namcir. 15:8 Dara yen yemobsara dau gin touwero. Doba yen yeicara dag gin ucucugb anim terimda. Anai ELOHIM esa Krisdus aud leng lec merus dau dag meren sogougb ginohob naugb sug en aimo areg ELOHIM os dou len merjemouwer augwan audud an len toua. Dauntoba maman macinaga dag areg ELOHIM en os dou len gin, kaba, en emereiyara dou len touwero. Doba en aimo areg en os gini dara en medoc hom an len namcir. 15:9 Dara ousa lugmahara len toua. Dauntoba sug len leiya dag ELOHIM medoc eineg an len dag gin touohob, kaba, eic dag len leigdoumesa en moho agas medam an gin toua terimda. Yen youman dan indir an areg dan den dou yen gini deigeigouhw namcir. Anai augwan gini esogwa deisa dau areg Daud en erba Ugwaremer eisaugb gin deb se Surad Injil Meb Mohon deb sug nosa touohob, endagai: Sug ban bousa dan dag ginohob, kaba, dan dos dadi ban bedag ELOHIM misen deseino leng lugmahara. Dara dan derba Ugwaremer an ban aboho deb dou len laugwan toua terimda. 15:10 Dara Musa en toua arougb leng lugmahara se Surad Injil Meb Mohon dag gin deb sug nosa touohob, endagai: Yeng yugmahara, kaba, yen toua yaimo emen gedig ELOHIM ouci emen debinim naugb enohob, dauntoba maman maugwan magahugouhw an en namcir. 15:11 Dara leng gus, kaba, len lerba Ugwaremer dag gin deb sug nosa touohob, lendagai: Yeng yugmahara, kaba, yen toua yagahugouhw an maman Adehsud gin toua namcir. Dara yeng se cinogo gus, kaba, yen yaugwan yeigdoumesa en moho bagas medam toua terimda. 15:12 Dara Yesaya en ens dau gin deb se men surad sug nosa touohob, endagai; Se lona daiyamo gacin, kaba, Isai medebeito hom en emagunyen. En, kaba, ELOHIM eigdoumesa en moho naugb en edag leng lugmahara meren mougt mera medam. Hang len toua lod merna debsa en dag en eigdoc len dau sesar men gogom aud maireseb menau geb huhugb gin toua. 15:13 Dangga hang, sug ELOHIM men geicara eic dag yen yod meijina debsa en an areg en os dou yen ginohob, kaba, dan dacgeij en naugb en eic yen meigdoc agahugouhw dara ebtou naugb ara ara augwan dou yen toua. Dauntoba yen yemobsara dau areg yen yod meijina debsa ELOHIM an gin touwero. Doba yen yeicara yaimo dag gin bedreg dau nosa ogdoc Mena Gogoufu men goubesa gin toua terimda. 15:14 Dan indagunerij, dara dan indamouwerij, dan decinaga dag meijen geicara augwan edag beim dara obosboro an lusud, dara dan decinaga dag yen meiju ouforoho naugb yen yedidib meijouhw dau ELOHIM en mer eisaugb Krisdus doum toua. Anai yen yecinaga augwan gini dag misen namcirohob. 15:15 Doba eisaugb aremer hom yom se surad gin, kaba, dan denara dou yen dara goubesa, dauntoba yen meigdoc moc dougworo, doba yen yeiseisan terimda. 15:16 Dan deic indus dag gin dou yen, anai ELOHIM eigdoumesa dan indoho naugb dan dedag Krisdus Yesus men sogougb dou yeng yugmahara naugb dan dousa yen. Dauntoba sug Mena Gogoufu ouci yen debinim naugb ELOHIM enohob, kaba, yen yedag gouwaharo gedig en medoc eigouhw an yen toua terimda. Anai sug dan desai ELOHIM en Mer Geigouhw eisaugb Krisdus dou yen, kaba, dan dedag gembala gesa taij naugb yen touohob. 15:17 Dangga hang, sug dan dedag hom dara Krisdus Yesus ginohob, kaba, dan demowun danin indoho an indan geicara areg ELOHIM eic dou danohob gin touwero. Doba dan deimiman danin an gini deseino lusud namcir. 15:18-19 Anai en, kaba, en ousa dan naugb dan dahwan leng lugmahara aud ELOHIM. Dauntoba len lemedreg en mer gin deitero, doba len leicara laimo en aud areg en arougb len an gin toua terimda. Dangga dan demeimiman danin an ara ara gus touwero. Doba dan deic indus naugb dan deimiman danin an indan geicara areg Krisdus ousa dan an gin dous. Augwan gini ogdoc sug dan desai ELOHIM en Mer Geigouhw eisaugb Krisdus dara indan geicara geigouhw dou len. Dara dan daben ganusbus dara gansins debin areg dan desai dou len. Dara len leiya dau Mena Gogoufu men goubesa gin toua. Sug Krisdus ousa dan dag ginohob, kaba, dan desai en Mer Geigouhw gini dou lusud laugwan, ebiji dau Yerusalem terimda dan dedebeij leng Ilirikum meren hancob gin touohob. 15:20 Anai dan demouwan naugb dan desai Mer Geigouhw eisaugb Krisdus dou leng louman dau enohob touwero. Doba dan indoc erleij namcir naugb dan desai en mer gini dou leng lemouman dau en mougwa hom touebma. Dauntoba dan demohud tuesa len gus meren buc meb gedig len logo ginero. Doba dan dogo buc naugb dan dohud indan tuesa dous. 15:21 Augwan gini esogwa deisa areg Yesaya en og deb se Surad Injil Meb Mohon deb sug nosa touohob, endagai: Leng gedig lemouman eisaugb en mougwa hombuma, kaba, len lemecinaga meijouhw aseses. Dara len gedig lusud lemecic eisaugb en dou len touebma, kaba, len merdoc emobgesa dau gin toues. 15:22 Sug dan indoc erleij aud lusud dag gin, kaba, dan demedebeij yen se Roma touebma. Anai dan desedeb mougwa einyana naugb dan den aud yenohob. Doba len gedig lemouman Mer Geigouhw eisaugb Krisdus mougwa hombuma gin, kaba, len lata dougwo dan namciraba. 15:23-24 Doba iteitogin, kaba, lusud se hancob gini len laugwan louman Mer Geigouhw eisaugb Krisdus ginohob. Dangga hang, dan dod indina debsa dag cumougt inggebga naugb dan dekirsa yen sug dan deihwedig leng Sbanyol meren hancob gini. Dauntoba sug maman maic mamdoc agahugouhw doum ucucugb lona aibibra dag ginohob, kaba, yen yousa dan dara ara ara naugb ucina mogumsi sug dan deihwedig cinogo ingga toua. Anai dan indoc erleij naugb dan dedeiya yen se arisogomoc einyanohob. 15:25 Doba aimougtut, kaba, dan decicugb dig cinogo Yerusalem naugb dan dedousa ELOHIM men lusud sunggahabi. 15:26 Anai leng Krisden se leng Makedonia dara leng Akaya meren hancob, kaba, len logod an naugb len lousa ELOHIM men lusud gedig len merunggwereij namcir se Yerusalem dara aregoufu toua. Dara dan demogodgod len an gin touwero. Doba len logod dag gini se lenin merdoc mes teiteiyohob. 15:27 Dangga hang, len leic aregoufu augwan dara len merdoc esgiraha an namcir. Doba areg len lesa dou len, kaba, aninim dag len loc leng Krisden dau leng Yahudi meren aremeij gin dous. Anai sug leng Krisden dau leng Yahudi leic dau areg ELOHIM eic dou len ingma dou lugmahara naugb sug len merna maireseb dag ginohob, kaba, eigouhw naugb leng Krisden dau lugmahara len leic dau meren aremougb areg ELOHIM eic dou lenohob ingma dou leng Krisden dau leng Yahudi naugb len meraga toua. 15:28 Dangga sug dan dodo aregoufu areg leng se Makedonia dara Akaya meren hancob len leic ladedim dou dan naugb leng se Yerusalem dauwohob, kaba, dan deisa ij aud leng Sbanyol meren hancob gin toua. Anai sug dan deic aregoufu gini deb se len merisirohob, kaba, indan geicara se Yerusalem toua ouwa namcirohob. Hanoba dan demekirsa yen touwero. Doba dan deigtou desij yen sungga touahabi. 15:29 Dara dan decinaga dau sug dan dedebeij yen, kaba, dag dan demeic areg geigouhw dau Krisdus augwan dou yen toua. 15:30 Dan indagunerij, dara dan indamouwerij, sug maman mamdoc ebdebin an maman Adehsud Yesus Krisdus aninim dag gin, dara Mena Gogoufu ousa maman naugb maman mamdoc gororougwim dag gin touohob, kaba, dan desulou yen dara goubesa namcir naugb yen yemarges dau sug yen yocuncum dou ELOHIM naugb dan touwero. 15:31 Doba yen yousa dan naugb maman macuncum dou en esesa terimda. Dauntoba en eseyeiyo dan dougwo leng medigo Yesus se leng Yudea meren hancob naugb len lemeic gogom dou danero. Dara en arautut men lusud leng Krisden merdoc mes se Yerusalem naugb len merdoc esgirahesa an dan sug dan deic lugmahara meren aregoufu dou len toua. 15:32 Sug ELOHIM ousa dan dag gin dara en medoc gesgiraha naugb dan den aud yen dag gin touohob, kaba, dan demedebeij yen dara dan indoc momogo touwero. Doba dan dedebeij yen dara dan indoc agahugouhw an gin namcir. Hang sug dan deigtou desij yen sungga, kaba, dan indoc emomomtomero, doba dag eiloboro terimda toua. 15:33 Dan dacgeij ELOHIM naugb en eseyeiyo yen yaugwan dougwo areg gecgu augwan terimda. Anai eni mobisamougb naugb ginohob. Augwan gini asesa dag misen namcir.

Roma 16

16:1 Dan douma debin maman mamdamouwa hom, moho Pibi, anai en, kaba, en ousa leng se goucimdeb se cinogo Kenkrea namcirohob. 16:2 Dangga hang, sug en edebeij yenohob, kaba, yen yemasid en touwero. Doba yen yebin en, anai en medoc dag hom dara maman Adehsud en touohob. Dara sug ara ara emeb naugb enero, kaba, yen yousa en dara gini. Anai en, kaba, en ousa lusud leinyana dara danin mougwa einyana sug nosa touohob. Yen yeicara dangga an en, anai gini aimo dau areg mamang Krisden maman maicara dag gini aninim ucucugb terimda. 16:3 Yen yen dou Priskila dara Akwila gedig lan lausa dan naugb emen emesai Mer Geigouhw eisaugb Krisdus Yesus dou lusud dag lan mairiresi. 16:4 Anai lan laohw lan marugt edug naugb danohob. Hang dan den sijo medam dou lan. Dara dan dousero, doba lugmahara meren goucimdeb, kaba, len laugwan len sijo medam naugb lan toua. 16:5 Dara yen yen dou leng loucimdeb se maran tu dag len laugwan meriresi toua. Dara yen yen dou Epenetus gedig dan indoc gororougb en dag en mairesi toua. Anai en, kaba, eni sud hom gedig en medoc ebdebin an Krisdus aimougtut se leng Asia meren hancob inggohob. 16:6 Dara yen yen dou Mariam dag en toua mairesi, anai en eic mog erij medam naugb sug en ousa yen toua terimdohob. 16:7 Dara yen yen dou Andronikus dara Yunias gedig lan toua dau emeng Yahudi dag lan toua mairiresi. Anai len louf lan se tu gesisug desij dan sug nosa. Dara leng lesai Krisdus moro len laugwan, kaba, lecinaga lan. Dara sug dan indoc emebdebin an Krisdusbuma, kaba, lan eng mardoc ebdebin an en sug nosa touohob. 16:8 Dara yen yen dou dan insi misen se maman Adehsud, moho Amplias, dag en toua mairesi. 16:9 Dara yen yen dou Urbanus gedig en ousa emen naugb sug emen emesai Mer Geigouhw eisaugb Krisdus dou lusud. Dara yen yen dou dan insi misen, moho Sdakis, dag lan toua mairiresi. 16:10 Dara yen yen dou Apeles dag en toua mairesi. Anai en, kaba, en aimo ucina mog erij medamohob, doba en es agadgeij namcir. Hang en ens enin ainyes dou maman dag en medoc ebdebin an Krisdus dag misenohob. Dara yen yen dou leng leigtou desij Arisdobolus se men tu dag len laugwan meriresi toua. 16:11 Dara yen yen dou Herodion gedig en toua dau emeng Yahudi. Dara yen yen dou dan indaguner, dara dan indamouwer gedig len leigtou desij Narkisus se men tu dag len laugwan meriresi. Anai len toua dag hom dara Krisdus aninim dara mamanohob. 16:12 Yen yen dou Tripena dara Triposa lagida lahwai gini dag lan mairiresi. Dara yen yen dou Persis gedig dan indoc gororougb en namcir dag en toua mairesi. Anai len, kaba, len leic merug erij icira maman Adehsud ginohob. 16:13 Dara yen yen dou Rupus dag en toua mairesi. Anai en, kaba, men geicara icira Krisdus eigouhw edreg dau lusud gus laugwan ginohob. Dara yen yen dou en mem dag en toua mairesi. Anai en mem gin, kaba, en ebin dan dag dan indim misen gin touohob. 16:14 Dara yen yen dou Asinkritus, Plagon, Hermes, Patrobus, Hermas, dara dan indaguner dara dan indamouwer gedig len merdoc ebdebin an Krisdus desij len dag len laugwan meriresi toua. 16:15 Dara yen yen dou Pilologus, Yulia, Nereus an mesgwida, dara Olimpas, dara ELOHIM men lusud gedig len leigtou desij len se meren tu dag len laugwan toua meriresi. 16:16 Dara yen toua sug yen yagasem, kaba, yen youm dareg yen meigdoc anim ucucugb. Dara Krisdus men goucimdeb sugin, kaba, len laugwan lou yen toua. 16:17 Dan indagunerij, dara dan indamouwerij, dan den dougwo yen dara goubesa namcir dauntoba yen yemaimo lusud gedig len loholas lusud daum, dara len laugwohosa len naugb len laijahasero dau ucina misen, dara len lenara laised yen an areg emen emesai dou yen sug nosa gin touwero. Doba yen yogmac len. Hanoba yen yasid yenin dau len toua namcir. 16:18 Anai len leicara laimo dag gin, kaba, len lemauwam an ucina naugb sug len lousa maman Adehsud Krisdus en touwero. Doba meren gauwamara augwan naugb areg len let dara areg len leg gin dous. Hang len lenara laceca, dara len louseij merir larerei lusud gedig meru emaiyero naugb len laugwohosa len dau ucina misen gin toua. 16:19 Doba yen, kaba, dan indoc agahugouhw an yen. Anai yen yemobsara dau Mer Geigouhw eisaugb Krisdus ginero. Doba yen yes agadgeij naugb yen yeicara yaimo en mer gin namcir. Hang meijen geicara gin, kaba, agaha becinten dou lusud se cinogo augwan touohob. Dangga dan douwan yen meiju ouforoho naugb yen yaimo areg geigouhw gin dous. Doba eisaugb areg gecgu, kaba, dan douwan yen yedag lusud gedig len meru edgom dougwo gin terimda. 16:20 Sug yen yeicara dag gin, kaba, ELOHIM en aiyan Setan eb tainya yen meijohora dedemeda toua. Dauntoba en emedag mougt mera naugb yen deitero. Doba yen yedag mougt dougwo en dous. Anai ELOHIM en mobisamougb namcir naugb en eseyeiyo yen dougwo areg gecgu augwan toua. Dan dacgeij maman Adehsud Yesus Krisdus naugb en medoc eigouhw an yen yaugwan terimda. 16:21 Timotius gedig en ousa dan naugb aman amesai Mer Geigouhw eisaugb Krisdus dou lusud, kaba, en ou yen yaugwan. Dara Lukius, Yason, dara Sosipater len lou yen toua. Anai emen emaugwan dau meijouhuda leng Yahudi gini. 16:22 Dang Tertius gedig dan dog surad gini, kaba, dan dou yen yaugwan. Anai dan dedag hom dara maman Adehsud, aninim dag yen touohob. 16:23 Gayus gedig en ebin dang Paulus, dara leng Krisden gedig len loucimdeb se men tu, kaba, len laugwan lou yen. Dara Erasdus gedig en esedougwo leng Korintus meren aregoufu dag meiyo, dara maman mamaguna se Krisdus, moho Kwartus, kaba, lan lau yen toua. 16:24 Maman Adehsud Krisdus en medoc eigouhw an yen yaugwan terimda. Augwan gini asesa dag misen namcir. 16:25 ELOHIM, kaba, en mobisamougb namcir naugb en eseyeiyo yen. Dauntoba yen yemobsara dau sug yen meigdoc ebdebin an Krisdus gin touwero. Doba yen yes agadgeij terimda. Augwan gini aimo dau Mer Geigouhw eisaugb Yesus Krisdus areg dan desai dou yen sug nosa. Dara aimo dau areg ELOHIM ens dou maman an touohob. Anai sug nosa, kaba, en ecgoneh mer eisaugb Krisdus gini dau lusud se arisogomoc einyanohob. 16:26 Doba iteitogini, kaba, leng lesai ELOHIM moro dou lusud len lens mer gini eb ainyes ogdoc areg len log se meren surad ginohob. Hanoba en arougb men lusud naugb len lesai mer gini dou lusud se cinogo augwan toua. Dauntoba sug len louman, kaba, len merdoc ebdebin an Krisdus. Dara len laimo areg en arougb len an gin toua terimda. Anai ELOHIM gin, kaba, en eis huhugb sugragohob. 16:27 Dangga hang, eigouhw naugb maman maugwan magahugouhw an en, dara maigdoumesa en moho ogdoc Yesus Krisdus beb huhugb namcir. Anai enin dous eng ELOHIM misen. Dara en mou ouforoho naugb augwan touohob. Augwan gini asesa dag misen namcir.

1 Korintus 1

1:1 Surad gini dau dang, Paulus, anai ELOHIM enin eng eija dan, hanoba en eigdoumesa dan indoho naugb dan desai Mer Geigouhw eisaugb Krisdus Yesus dou lusud laugwan toua, aimo dau areg enin eng ogod deinaugb dan sug nosohob. Dara areg dan dog se surad gini, kaba, maman maguna Sosdenes en moongga desij dan an gin toua. 1:2 Dan dog surad gini dou ELOHIM men lusud se cinogo Korintus, yen yaugwan. Anai sug yen meigdoc dag hom dara Krisdus Yesus dag ginohob, kaba, ELOHIM edu yen meigdoc mes ecabeci. Hanoba en ed yen debinim naugb enin, aninim dag en ed len leinyana se cinogo gus gus augwan debinim naugb en touohob. Anai gareg en eigdoumesa maman Adehsud Yesus Krisdus en moho dag ELOHIM naugb en esijaresa en dag misen, kaba, Krisdus en edag men mougt mera medam naugb en oiharaga en. Aninim dag en edag maman mougt mera medam naugb en oiharaga maman gin touohob. 1:3 Dangga hang, aman amacgeij maman Mamina ELOHIM dara maman Adehsud Yesus Krisdus naugb lan mardoc eigouhw an yen. Dara lan laic gesgigouhwesa dara laseyeiyo yen dougwo areg gecgu augwan toua terimda. 1:4-5 Dan demarges dau sug dan den sijo dou ELOHIM naugb yen touwero. Doba dan deicara daimo dag gini astesda lona loba esesa terimda. Anai sug yen meigdoc dag hom dara Krisdus Yesusohob, kaba, ELOHIM medoc eigouhw medam an yen. Hanoba en eic mou ouforoho dou yen naugb yen yens dau Mer Geigouhw eisaugb Krisdus dou lusud. Dara en eic mou auti dou yen naugb yen yedidib meijouhw dau augwan gini dag misen dou len toua. Hang se aremer augwan gin, kaba, yen yedag leng merisoho mougb ogdoc men geicara taiba sogo salib ginohob. 1:6 Anai sug dan desai Mer Geigouhw eisaugb Krisdus dou yen sug nosa, kaba, yen yemohoiya dan indir an gin touwero. Doba yen yogo augwan gini dag buc gototo se yen meigdoc mes namcirohob. 1:7 Hang areg geigouhw geb se bogo, kaba, augwan emediyebeiya dau yen touwero. Doba sug yen yeigtou yateteij naugb lona sug ELOHIM ens maman Adehsud Yesus Krisdus ainyes dou maman deit, kaba, ELOHIM eic areg geigouhw gini dou yen toua. 1:8 Dangga hang, en emamsoho yen touwero. Doba en eseyeiyo yen terimda edebeij Lona Sug Maman Adehsud Yesus Krisdus En Ecicugwen. Hanoba en eic yen meigdoc aiyansem dougwo areg gecgu dou yen. Dauntoba se Lona ingga, kaba, aremer hom emdagunya debin yen touwero. Doba yen yecabeci deseino ELOHIM namcir. 1:9 Anai enin eng eija yen sug nosa naugb yen yedag hom dara en Meisi maman Adehsud Yesus Krisdus ginohob. Hang areg en os dou yen graga, kaba, en emereiyara dou yen touwero. Doba en aimo augwan gini dara medoc hom an yen toua terimda. 1:10 Dan indagunerij, dara dan indamouwerij, sug yen yedag hom dara maman Adehsud Krisdus dag ginohob, kaba, yen yemenara yemaisedim ucucugb touwero. Doba se aremer augwan, kaba, yen yenara dara yen meijir arjaga doum terimda. Dauntoba yen meijir emedregim dag gin mougwa hom deitlo. Doba se aremer augwan, kaba, yen meigdoc dag hom naugb yen yenara dara yen meijir aninim se namcir. Dara dan desulou yen toua, dauntoba yen yemauwam an ucina einyana darem touwero. Doba yen meigdoc aninim naugb yen yaimo ucina hom dous. Anai maman Adehsud Yesus Krisdus enin eng eigdoumesa dan indoho. Hang en emeic goubesa dou dan naugb dan demen dougwo yen an areg graga augwan ginohob. 1:11 Dan indagunerij, dara dan indamouwerij, dan desulou yen an dag gini, anai ligbum dau Kloe men lusud, kaba, len leden dou dan dag yen meigdoc dag hom deitero. Doba yen yeic lusud yaigeigem ucucugwohob. 1:12 Areg dan den dougwo yen an gini, kaba, dag sud hom ingma dau yen en enara dag en aimo Paulus. Dara sud hom deit, kaba, en eigdoumesa enin moho dag en aimo Apolos an men gebedbed gini. Hom, kaba, en ens enin ainyes deseino yen dag en esogwa deisa Petrus mohotimei mohw. Dara hom deit, kaba, en ouci naugb en aimo Krisdus enin dous. 1:13 Dangga, isnaro. Anai yen youdesa endag yen yaga Krisdus mehir naugb yen yekeba animei? Naro, yen yemaga touwero. Doba Krisdus maga hom dous eng eb naugb yen terimda. Dara yen youdesa endag lusud letob dan eng se sogo salib naugb meijen sesarei? Naro, len lemetob danero, doba len letob Krisdus enin eng naugb meijen sesar dous. Dangga toua, sug lusud logun yen se duhu sug nosa, kaba, len logun yen se dan indohoei? Era, dagiro? Naro, len lemogun yen se dan indoho touwero. Doba len logun yen se Krisdus enin moho dous. 1:14 Dangga hang, dan den sijo medam dou ELOHIM dau sug dan desai en Mer Geigouhw eisaugb Krisdus dou yen sug nosa, kaba, dag dan demogun yen se duhu debin gin touwero. Doba dan dogun Krispus dara Gayus lan dous eng se duhu. 1:15 Dauntoba sud hom ingma dau yen, kaba, en emeigdoumesa enin moho dag eni indan godeh dau sug dan dogun en se duhu gin touwero. Doba en arges mer dau namcir. 1:16 You, dan indoc moc dougwo sud hom deit, anai dan dogun Sdepanus an en mesouwa, dara en mehir, dara leng leigtou desij en se men tu len laugwan toua. Doba leng gus, kaba, dan demecinaga endag dan dogun lingma se duhuohobei? Era, naroei? 1:17 Anai Krisdus, kaba, en emesa dan aud lusud naugb dan dogun len se duhwero. Doba en esa dan aud len naugb dan desai Mer Geigouhw eisaugb Krisdus dou len dous. Dara sug dan desai en moro gin dou len, kaba, dan demeic lusud meren gauwamara ingma demaos dara gin touwero. Doba dan desai dau sug Krisdus en omom taiba sogo salib naugb meren sesar dag mogud hom gin dou len dous. Dauntoba ELOHIM mer eisaugb Krisdus gomom taiba sogo salib gini men goubesa emediyebeiya touwero, doba ebsugeb terimda. Anai sug dan deic lusud meren gauwamara daos gin, kaba, cum, mer eisaugb Krisdus gini emeica lusud merdoc mes toua deitero. Doba dan debedbed augwan gini dag augwougb dou len dous. 1:18 Doba sug dan desai dau sug Krisdus en omom taiba sogo salib dag mogud dou lusud, kaba, len gedig laimo ucina aud dum smougwohob, kaba, len lesbes an dan dag areg dan desai gin, kaba, gini aninim dag sud hom gedig en mou emaiyero men genara dous. Doba naugb maman gedig ELOHIM esedeb maman naugb sug en eic maireseb menau geb huhugb dou mamanohob, kaba, en Mer Geigouhw eisaugb Krisdus gin, kaba, maman maigdoumesa ELOHIM en mer gini dag mobisamougb namcir. Anai arautut maman naugb sug maman maimo ucina hom gin terimda. 1:19 Augwan gini esogwa deisa areg ELOHIM en og deb se Surad Injil Meb Mohon deb sug nosa touohob, endagai: Areg leng meru ouforoho len lauwam anohob, kaba, dan daiyan augwan gin deb dous. Dara leng lecinaga aremeijouhw augwan asesa se cinogo gin, kaba, dan dowun bediyebeiya dau len. Hanoba dan dens dou len dag augwan gin, kaba, moho emaiyero namcirohob. 1:20 Dangga hang, sug ELOHIM eperwei leng meru ouforoho meren gauwamara dag meru emaiyero dag ginohob, kaba, leng meru ouforoho naugb areg geb se cinogo, dara leng merdoc obrugb an areg geb se surad, dara len meru auti naugb len merir laised lusud, kaba, inggiroda? Hanoba len lens dau areg geb se ELOHIM enin medoc mes dara men mobisamougb meijouhw augwan asesa dou lusud toua? Naro, sud hom ingmaro. Doba ELOHIM owun meren gauwamara dag len meru edgom dougwo augwan namcirohob. 1:21 Anai ELOHIM en emouwan naugb sug lusud lecinaga areg geb se enin medoc mes emogdoc lenin meren gauwamara, hanoba len merdoc ebdebin an en naugb en eigdoc len dau sesar men gogom augwan ogdoc gin touwero. Doba en esedeb naugb en eigdoc len dau sesar men gogom ogdoc sug emen emasai Mer Geigouhw eisaugb Krisdus areg len lowun emen emoho dag emen emirs ogdogdem an dou len gin dous. Hang en emaiyan leng meru ouforoho dara len meru auti graga meren gauwamara augwan deb namcir. Dauntoba emedeinyum naugb sug len lemecinaga en ogdoc meren gauwamara gin touwero. 1:22 Anai leng dau emeng Yahudi, kaba, len lacgeij naugb emen emens ganusbus debin areg emen emebedbed dou len eisaugb Krisdus gin dou len. Dauntoba len lecinaga dag areg emen emesai dou len gin, kaba, en dau ELOHIM dag misenohob. Dara leng Grika dara lugmahara gus gus, kaba, len louwan dag emen emens dau areg dag mou ouforoho dou len toua. 1:23 Doba emen, kaba, emen emesai Krisdus omom taiba sogo salib naugb lusud meren sesar mogud dou len dous. Dangga hang, leng Yahudi gin, kaba, len merdoc esrougb an emen. Anai sug len louman dau sud hom geigdoc len dau meren gogom augwan dag en omom taiba sogo salib, kaba, eic dag len laisacij dau gini namcir. Dara leng Grika dara lugmahara gus gus sug len louman, doba emen ememeic mou ouforoho ingma ememaos dara areg emen emesai dou len eisaugb Krisdus gini dou len touwero, kaba, len lowun emen emoho dag emen emenara emirs obdobdem toua terimda. 1:24 Doba naugb emeng Yahudi dara yeng yugmahara areg ELOHIM ebin maman aud enohob, kaba, areg emen emesai eisaugb Krisdus gin, kaba, ens ainyes dou maman dag ELOHIM en mou ouforoho namcirohob. Dara en mobisamougb edeinyum naugb sug en eigdoc lusud dau sesar men gogom augwan aud maireseb menau geb huhugb gin toua. 1:25 Dangga hang, ELOHIM men ucina areg leng graga lowun en moho an dag en mou emaiyero, kaba, en eng mou ouforoho bedreg dau areg lusud gedig len meru ouforoho se cinogo gini len lauwam an toua namcir. Anai meren mou gouforoho gin, kaba, emeigdoc lusud dau sesar men gogom touwero. Doba ELOHIM men ucina hom gin dous eng eigdoc lusud dau sesar men gogom augwan dous. Dara len lowun ELOHIM en moho dag men ucina naugb sug Krisdus omom taiba sogo salib gin, kaba, ens dou len dag en mobisamougb touwero. Doba dag en omomtom namcirohob. Dobnaro. Anai lusud meren ucina augwan, kaba, emahwan len aud maireseb menau geb huhugb touwero. Doba ELOHIM enin men ucina hom gin dous eng ahwan len aud maireseb gini. Hang ELOHIM enin men ucina areg lusud lowun en moho an dag omomtom gin, kaba, mobisamougb medam edreg dau lusud meren goubesa augwan dous. 1:26 Dan indagunerij, dara dan indamouwerij, yen yecinaga dag areg graga, kaba, augwan dag misen namcirohob. Anai yen yauwam an se lona sug ELOHIM eija yen naugb en eigdoc yen dau sesar men gogom augwan sug nosa, kaba, en eija leinyana dau yen gedig lusud leigdoumesa len meroho dag leng meru ouforoho ginohobei? Naro, en emeija leinyana dau len ginero. Doba en eigdoumesa hom yom dau len dous. Dara en eija leinyana dau leng ledag mougt mera medam, dara len gedig len meroho eb taiba toua ingmohobei? Naro, en emeija lingma dau len touebma. 1:27 Doba en ouci len gedig lusud se cinogo gini len lowun len meroho dag len meru edgom, era emaiyero dous. Anai en ouwan naugb en eic igdebes dou len gedig lusud leigdoumesa len meroho dag len meru ouforoho ginohob. Dara en ouci len gedig lusud lowun len meroho dag leb dindin dara lomomtom gin naugb en eic igdebes dou len gedig lusud se cinogo gini len leigdoumesa len meroho dag merug mog toua. 1:28 Dara en ouci len gedig lusud se cinogo gini len lowun len meroho eb tainya. Dara len gedig lusud lesbes an len dag leng mesinsinero len toua. Dauntoba en ens ainyes dou len dag areg len leigdoumesa dag moho eb taiba, kaba, moho emagas deseino en touwero, doba eb tainya namcir. 1:29 ELOHIM eicara dag gini, anai en emouwan naugb sug sud hom ingma, kaba, en emeigdoumesa enin moho deseino en an ara ara touwero. Doba len laugwan lowun lenin meroho eb tainya deseino en dous. 1:30 Doba yen, kaba, ELOHIM enin eng eigdoc yen dau sesar men gogom augwan ogdoc Krisdus gomom taiba sogo salib ginohob. Hanoba en eic gesgigouhwesa dou yen, dara en ed yen debinim naugb enin, kaba, en eic mou ouforoho dara mou auti dou yen naugb yen yecinaga areg asesa enin medoc mes ogdoc Krisdus Yesus men geicara gin toua namcir, anai yen yedag hom dara enohob. Dangga hang, yen yemeigdoumesa yenin meijoho an ara ara touwero. Doba yen yeigdoumesa yenin meijoho an ELOHIM enin men geicara geb dou yen gin dous. 1:31 Augwan gini esogwa deisa areg Yeremia en og deb se Surad Injil Meb Mohon sug nosa touohob, endagai: Gareg en ouwan eigdoumesa enin moho an ara ara deseino lusud, kaba, eigouhw naugb en eigdoumesa enin moho an maman Adehsud men geicara geb dou en deseino lusud dous.

1 Korintus 2

2:1 Dangga dan indagunerij, dara dan indamouwerij, sug ELOHIM aiyan lusud meren gauwamara dara mou gouforoho augwan eb tainya dag ginohob, kaba, dan demen aud yen sug nosa naugb dan demebedbed se moho geb taiba dara dan demeic lusud meren gauwamara an mou gouforoho ingma demaos dara augwan gin dou yen touwero. 2:2 Doba dan desedeb se dan indoc mes dau sug dan indugwengga desij yen, kaba, dag dan dens dau Yesus Krisdus men gomom taiba sogo salib naugb lusud meren sesar hom gin dou yen dous. Dara areg dan desai dou yen gin, kaba, ELOHIM emens meijouhw dau augwan gini mougwa hom dou lusud sug nosa touebma. Doba en ens dou dan, hang dan demesai dou yen toua. 2:3 Dara sug dan indugwengga desij yen sug nosa, kaba, dan demeigdoumesa dan indoho an areg dan desai gin dou yen touwero. Doba dan dowun danin indoc mes arjaga deseino yen namcir. Hanoba dan dahau dareg dan indoc eijesa icira gin toua terimda. Dauntoba dan demesai ELOHIM en mer dag areibahau dou yen touwero. Doba dan debedbed augwan gini se geica mogud dou yen dous. 2:4-5 Dangga hang, dan demeic lusud meren gauwamara an mou gouforoho, dara dan demenara demaic yen meigdoc mes naugb sug yen meigdoc ebdebin an Krisdus gin touwero. Doba sug dan desai ELOHIM mer misen eisaugb Krisdus dou yen sug nosa, dara dan dedidib meijouhw dau augwan gini asesa dou yen, kaba, dan daben ganusbus dara dan deic gansins ogdoc Mena Gogoufu men goubesa debin gin dou yen toua. Dauntoba yen yemod meijina debsa ELOHIM an en mer emogdoc lusud meren gauwamara gin touwero. Doba yen meigdoc ebdebin an en ogdoc sug yen yeiya dau men goubesa gaimo en mer gin dous. Anai en esa Mena Gogoufu se dan indoc mes naugb ginohob. 2:6 Doba sug dan demeic lusud se cinogo gini meren gauwamara debin areg dan desai dou lusud ginero, kaba, gini men meijouhw dag areg dan desai gin, kaba, dag dan indu emaiyero dousei? Naro, gini men meijouhw danggero. Anai sug dan desai ara dou leng ledag lusud mos se Krisdusohob, kaba, dan deic mou gouforoho misen ingma daos gin dou len toua. Doba mou gouforoho misen gin, kaba, emen dau lusud dara merna mog mog gedig len loiharaga lusud se cinogo gin touwero. 2:7 Doba mou gouforoho misen areg emen emesai dou leng ledag lusud mos gin, kaba, en dau ELOHIM enin dous. Anai merna mog mog gin, kaba, len lemedag mougt mera naugb lusud se cinogo gin deitero. Doba meren goubesa, kaba, augwan ebiji naugb ediyebeiyohob. Dara areg ELOHIM en esedeb naugb maman ogdoc en mou gouforoho gin, kaba, menenau touwero. Doba en esedeb augwan gini dau sug en emahasesei cinogo ginbuma. Dara areg graga gin, kaba, dag en eigdoc maman dau sesar men gogom. Hanoba en eigdoumesa maman mamoho naugb sug maman maigtou desij en se men gogouf cucugb gin toua namcir. Hang en emens dau augwan gini dou merna mog mog an lusud len laugwan touwero. Doba en ecgoneh augwan dau len terimda. 2:8 Anai sug merna mog mog graga len lecinaga deb dag Yesus omom taiba sogo salib gin, kaba, eic areg graga augwan dou maman, kaba, len lemarautut meren lusud se cinogo naugb len lemetob maman Adehsud Moho Agas gini se sogo salib touwero. Doba len larges dau namcir. Doba len lemecinaga dau areg ELOHIM en esedeb naugb maman sug nosohob gin touwero. Hang len lemarougb meren lusud naugb len lemetob maman Adehsud se sogo salib toua namcir. 2:9 Augwan gini esogwa deisa areg sud hom, moho Yesaya, en og deb se Surad Injil Meb Mohon deb sug nosa touohob, endagai: Areg ELOHIM en esedeb naugb leng merdoc gororougb en, kaba, sud hom gus ingma en emeiya dara en emouman. Dara en emauwam an ELOHIM men ucina gini mougwa hom touebma, doba ELOHIM ecgoneh augwan gini dau en namcir. 2:10 Doba naugb maman, kaba, ELOHIM ens dau areg en esedeb gini augwan ogdoc Mena Gogoufu dou maman. Anai Mena Gogoufu gin, kaba, en ecinaga areg geb se ELOHIM enin medoc mes dara areg ELOHIM esedeb augwan toua dag misen namcirohob. 2:11 Anai gareg en ecinaga areg geb se sud hom enin medoc mesa? Naro, sud hom ingmaro. Doba enin dous eng ecinaga dau men gauwamara augwan dag misen dous. Dangga toua, sud hom ingma emecinaga dau areg geb se ELOHIM enin medoc mes touwero. Doba Mena Gogoufu enin dous eng ecinaga dau augwan gini dag misen namcir. Anai enin dous eng en dau ELOHIM aud mamanohob. 2:12-13 Dangga hang, sug emen emesai dau areg ELOHIM en esedeb dag mogud naugb maman gini, kaba, emen ememeic dau lusud se cinogo gini meren gauwamara, dara emen emaimo dau areg len ledidib gini naugb emen emaos dara dou yen touwero. Doba emen emaimo meijouhw dau areg Mena Gogoufu enin ens dou emen naugb augwan gin dous. Anai ELOHIM en emesa merna gedig len larautut lusud se cinogo gin se maman mamdoc mesero. Doba en esa Mena Gogoufu enin eng se maman mamdoc mes. Dauntoba maman macinaga dau areg en esedeb dag mogud naugb maman augwan dag misen toua. 2:14 Dangga sud hom areg Mena Gogoufu emeinesa en medoc mesbuma, kaba, en emebin areg Mena Gogoufu ens dou en touwero. Doba en otogoto an dous. Anai areg Mena Gogoufu eic dou maman, kaba, en ousa maman an naugb maman mamu obgesa meijouhw augwan asesa toua. Hang sud hom areg Mena Gogoufu emeinesa en medoc mes touebma, kaba, en medoc emobgesa meijouhw touwero. Doba en owun augwan gini dag moho emaiyero namcir. 2:15 Doba sud hom areg Mena Gogoufu einesa en medoc mes dag misenohob, kaba, en mou obgesa naugb en ecinaga dau areg ELOHIM esedeb gini meijouhw augwan asesa toua. Hang en mou ai naugb en ogod an lusud gus meren geicara augwan asesa toua terimda. Doba naugb enin, kaba, lusud gedig Mena Gogoufu emeinesa len merdoc mesbuma, kaba, sud hom ingma dau len en mou emai naugb emouma debin en an men geicara hom touwero. Doba en amsoho en deb dous. Anai en mou emobgesa men geicara augwan dag misen touebma. 2:16 Augwan gini esogwa deisa areg sud hom, moho Yesaya, en og deb se Surad Injil Meb Mohon deb sug nosa touohob, endagai: Dau leng se cinogo gin, kaba, gareng en ecinaga dau areg geb se maman Adehsud enin medoc mesa? Dara gareg dau len en esulou en se aremer hom touohoba? Naro, sud hom ingma dau len, kaba, en emecinaga areg geb se enin medoc mes. Hanoba en emesulou en an aremer hom touebma. Doba maman, kaba, maman macinaga areg geb se Krisdus medoc mes augwan dag misen namcir. Anai Mena Gogoufu einesa maman mamdoc mes naugb ginohob.

1 Korintus 3

3:1 Doba dan indagunerij, dara dan indamouwerij, yen, kaba, emedeinyum naugb sug dan denara dou yen dag lusud gedig len leiji dag lusud mos se Krisdusohob touebma. Doba eigouhw naugb dan denara dou yen aninim dag lugdeh mahaniheni se Krisdus dous. Anai meijen geicara emedag lusud gedig Mena Gogoufu einesa len merdoc mesohob meren geicara touwero. Doba meijen geicara augwan aninim dag lusud gedig Bilis oiharaga len se cinogo gini meren geicara namciraba. 3:2 Dangga hang, sug dan dedebeij yen sug aimougtut. Hanoba ucan deit, kaba, dan demens dau ELOHIM en mer meijouhw gebdededero dou yen touwero. Doba dan dens dau en mer meijouhw geb ainyes dag meiyo dou yen terimdaba. Aninim dag lusud lemeic ared misen dou lugdeh mahaniheni touwero, doba len leic aring mohu dou len dous. Dara iteitogin, kaba, emedeinyum naugb sug dan dens dau ELOHIM en mer meijouhw gebdededero gin dou yen touebma. 3:3 Anai yen yemarges dau sug yen yaimo lusud aud areg len merdoc etrij icira ginbuma. Doba yen yaimo len aud augwan gin terimdaba. Anai sug yen meigdoc esdigeijim, dara yen yenara yaisedim ucucugb, kaba, gini ansins dag yen yomom dau areg yen meigdoc etrij icira ginohobei? Naro, doba gini ansins dag yen meigdoc dag hom dara lusud se cinogo gin smougb mougwaba. 3:4 Anai sug merug hosa dau yen, kaba, len lenara dag len laimo dani aud areg dan debedbed dou yen gin dous. Dara lingma, kaba, len lenara dag len laimo Apolos enin dous eng an areg en edidib dou yen, kaba, gini ansins dag yen yedag lusud mos se Krisdusohobei? Naro, doba meijen geicara aninim dag lusud gedig Mena Gogoufu emeinesa len merdoc mesbuma meren geicara gin dousaba. 3:5 Doba dagiro, eisaugb Apolos aman gina? Aman eng amedag mougt mera medam naugb yenei? Naro, aman amedag ELOHIM men sogougb gedig aman amahwan yen aud Krisdus naugb yen meigdoc ebdebin an en dous, aimo dau ucina areg maman Adehsud enin eng ogod an deb naugb amanohob. 3:6 Anai dan, kaba, dan deba Mer Geigouhw eisaugb Krisdus dag meij se yen meigdoc mes aimougtut. Dara Apolos, kaba, en oucan dan naugb en eir duhu debin meij gin. Anai en, kaba, en edidib meijouhw dau areg dan desai dou yenohob augwan asesa ucan dou yen toua. Doba ELOHIM enin dous eng men goubesa edeinyum naugb sug en eic meij gini eiji se yen meigdoc mes toua namcir. 3:7 Dangga sud hom geba meij dara sud hom geir duhu debin meij ingga, kaba, lan maroho emesloulougwero. Doba ELOHIM enin dous eng en moho esloulougb namcir. Anai enin eng esedougwo meij gini naugb eiji se yen meigdoc mes terimda. 3:8 Dangga hang, gareg en eba meij dara gareg en eir duhu debin meij gin, kaba, laingma maran geicara emesloulougb emedreg daum touwero. Doba ELOHIM eic siouwa dou lan lahwas, aimo dau maran geicara dou lan toua. 3:9 Anai Apolos aman, kaba, aman amahwas amedag ELOHIM men sogougb naugb aman ameicara dou en dous. Dara yen, kaba, yen yedag ELOHIM men lo naugb sug aman ameicara. Dara yen yedag ELOHIM men tuari gedig aman amousa en naugb amohud deb naugb en toua. 3:10 Dangga hang, sug yen yedag ELOHIM men tuariohob, kaba, dan dogo buc gototo geigouhw naugb yen sug nosa toua, aimo dau mou gouforoho areg ELOHIM en eic dou dan naugb ginohob. Dau, kaba, sud hom gus en ucan dan naugb en ohud tu icira buc gin toua. Doba astesda sud hom gareg en ohud tu icira buc gin, kaba, eigouhw naugb en mou auti an areg en ohud gini decicijahabi. 3:11 Anai ELOHIM, kaba, en eic Yesus Krisdus dag buc gototo hom eng dou maman dous. Buc gus, kaba, ingmaro. 3:12 Dangga lingma, kaba, eic emas, era perag, era igdahab mera eisaugb naugb len lahud meren tu icira buc gototo gini. Dara lingma, kaba, len leic sogo, era loung meh magaci, era tramdad maga mogud dous. 3:13 Doba inggaida. Krisdus en emens dau areg len lahud tu icira buc gini augwan asesa dou len se men Lona sug en ecicugwen naugb en ogod aremer aga lusud gin toues. Anai se Lona ingga, kaba, en eic smougb naugb en ainyen astesda sud hom yom men tu an men geicara dag men tu gin, kaba, en eic areg misen bahudohobei? Era en eic areibahau bahud dousei? 3:14 Dangga sug sud hom gareg smougb emait en men tu mor morero, kaba, ELOHIM eic siouwa dou en icira gini. 3:15 Doba sud hom gareg smougb ait en men tu mor mor namcir, kaba, ELOHIM emeic siouwa hom dou en touwero. Doba augwan ediyebeiya dau en namcir. Doba enin mog, kaba, smougb emait enero. Doba ELOHIM eigdoc en dau. Hanoba en eic maireseb menau geb huhugb dou en toua. Anai en ainyen naugb ohud men tu icira buc gini, doba emedeinyumero. Hang en emedag sugwa gedig lusud leic dau smougb sug smougb emait mor mor touebma. 3:16 Dara yen yaugwan, kaba, yen yedag ELOHIM men tuari. Hang Mena Gogoufu en eigtou se yen meigdoc mes. Anai en, kaba, en en dau ELOHIM aud yenohob. Yen yemecinaga augwan gini dag misenbumei? Naro, yen yecinaga augwan gini dag misen namcirohob. 3:17 Dangga hang, yen yemenara meijir emedregim. Dara yen yemekebim dag nosa toua deitlo. Doba yen meigdoc dag hom namcir. Anai gareg dau yen en ot ELOHIM men tuari gini baisoboro ogdoc sug en arautut lusud merdoc mes naugb len lekebem, kaba, ELOHIM emamsoho en deb touwero. Doba en emot en dag tu emaisoboro se dum smougb toues. Anai en ouci tuari gin deb dag menohob. Hang yen yedag men tuari gini toua. 3:18 Dangga hang, eigouhw naugb sud hom ingma dau yen, kaba, en emauwam an didi eisaugb ELOHIM men geicara graga touwero. Doba en medoc obgesa namcir. Anai gareg dau yen en oudesa dag en mou ouforoho an areg lusud se cinogo len leigdoumesa dag mou gouforoho ginohob, kaba, eigouhw naugb en owun en moho dag en mou edgom an augwan gin namcir. Dauntoba sug areg se geica einesa en medoc mesohob, kaba, eic dag en mou ouforoho dag misen toua terimda. 3:19 Anai areg lusud se cinogo gini len leigdoumesa dag mou gouforoho, kaba, ELOHIM en owun augwan gini dag mou emaiyero dous. Augwan gini esogwa deisa areg sud hom, moho Elipas, en enara deb dou Ayub se Surad Injil Meb Mohon deb sug nosa touohob, endagai: Leng meru ouforoho se cinogo gin, kaba, len lou meren digoro naugb eica lusud. Doba ELOHIM eic lenin meren digoro naugb eica lenin dous. 3:20 Dara sud hom gus, kaba, en erba Ugwaremer se Surad Injil Meb Mohon eisaugb gin deb sug nosa touohob, endagai: Maman Adehsud en ecinaga dag areg leng meru ouforoho se cinogo gini len lauwam an, kaba, augwan emedeinyum naugb sug len lera mera ara ara geigouhw hom touwero, doba len lera mera areg gecgu mogud dous. 3:21-23 Doba yen, kaba, yen meigdoc dag hom dara Krisdus. Aninim dag Krisdus, kaba, en medoc dag hom dara ELOHIM touohob. Dangga hang, yen yemeigdoumesa yenin meijoho an sud hom ingma dag yen yaimo en deitlo. Doba yen yarges dau gin deb namcir. Anai sug yen yedag hom dara Krisdus dag ginohob, kaba, dani, dara Apolos, dara Kepas, dara lusud se cinogo gini, dara maireseb, dara gomom, dara areg ELOHIM en esedeb naugb lona iteitogini, dara areg en esedeb naugb lona daiyamo gacin, kaba, augwan gini emedag mougt naugb yen touwero. Doba yen yedag mougt naugb augwan gini, dauntoba ousa yen dous.

1 Korintus 4

4:1 Sug areg graga augwan eb naugb yenohob, kaba, yen yemeigdoumesa emen emoho touwero. Doba yen yeija emen dag Krisdus men sogougwir gedig len lesai ELOHIM mer eisaugb Krisdus gin augwan asesa dou yen dous. Anai sug nosa, kaba, ELOHIM emens dau areg en esedeb naugb maman gini hom dou lusud touebma. Doba en ens dou emen dous. Hang emen ememens mer misen gini dou yen touohob. 4:2 Dangga hang, emen ememarges dau sug emen emesai Mer Geigouhw eisaugb Krisdus gin dou lusud touwero. Doba emen emeic emouwemougb esesa naugb emen emens areg se geica gini augwan dou lusud toua terimda. Anai aremer hom gesloulougb edreg dau aremer gus gus augwan namcir, kaba, dag sud hom gedag sogougb, kaba, en emehig dau areg men mougt mera medam arougb en an gin touwero. Doba en aimo augwan gini dara en medoc hom namcir. 4:3 Sug dan dedag Krisdus men sogougb dag ginohob, kaba, areg yen yogod deinaugb dan toua hom emogom naugb dan touwero. Doba augwan eigouhw toua. Dangga sug yen yeigdoumesa dan indoho an areg dan desai gini, era yen yowun dan indoho an gin toua. Doba augwan inggaida. Anai yen yemogod aremer aga dan touwero. Doba maman Adehsud, enin dous eng emogod aremer deinaugb dan dag dan daimo areg en arougb dan an gini augwan dara geigeigouhwohobei? Era narobmei? Hang dan demauwam an dag dan desai ELOHIM en mer eisaugb Krisdus gin, kaba, eigouhw era ecgu touwero. Doba dan deicara daimo gin augwan dous. 4:4 Anai sug dan doudesa dag dan desai augwan eigouhw namcirohob, kaba, indan gauwamara gini edeinyum naugb sug maman Adehsud eic gesgigouhwesa dou dan enggei? Naro, augwan gin emedeinyumero. Doba enin dous eng emogod aremer deinaugb dan, aimo dau areg enin auwam an deb naugb dan dous. 4:5 Dangga hang, yen yemeigdoumesa, era yemowun, sud hom ingma en moho an men geicara dag eigouhw era gecgu dedemeda touwero. Doba yen yeigtou yateteij terimda edebeij Lona Sug Maman Adehsud En Ecicugwen, kaba, enin eng emogod aremer aga maman maugwans. Anai se Lona ingga, kaba, en eic areg geb se lobeigbogo augwan eb ainyes dou lusud laugwan leiya namcir. Dara en ens dau areg lusud len lauwam an se lenin merdoc mes augwan eb ainyes dou len toua. Hanoba en eigdoumesa, era en owun, astesda sud hom yom en moho aimo dau men geicara dou en toua. 4:6 Dan indagunerij dara dan indamouwerij, areg dan dog dou yen graga eisaugb Apolos aman geicara, kaba, dan deic augwan gini dag ansins dou yen. Dauntoba yen yemedreg dau areg ELOHIM en arougb yen an se Surad Injil Meb Mohon eisaugb aremer hom gin toua deitero. Doba sug yen yecinaga meijouhw augwan asesohob, kaba, yen yaimo dara yen meigdoc hom namcir toua. Hang eigouhw naugb yen yemeimiman yenin meijoho an sud hom ingma deseino lusud deitlo. Dara yen yemowun sud hom ingma en moho naugb yen yesbesan en touwero. Doba yen yarges dau augwan namcir. 4:7 Anai gareg en eigdoumesa yen meijoho edreg dau len gus, hang yen yemogod ara ara deinaugb len gus toua? Naro, sud hom ingma emeigdoumesa yen meijoho emedreg dau len gus touwero. Doba yen yaugwan meijoho aninim dous. Anai areg geb naugb yenohob, kaba, hom emen dau yenin meijen goubesa touwero. Doba augwan gini, kaba, en dau ELOHIM enin dous. Dangga sug ELOHIM eic augwan dou yenohob, kaba, dagiro, naugwe hang, yen yeigdoumesa yen meijoho an meijen ara ara dag augwan gini en dau yenin dousa? 4:8 Era dagiro yen youdesa dag yen meiju ouforoho edeinyum, hanoba yen meijisoho mougb se yen meigdoc mes an augwan. Dara yen youdesa dag yen yebiji naugb yen yesedougwo lusud se maman Adehsud men goiharaga edreg dau emendohobei? Naro. Dangga hang, eigouhw naugb yen yedag mougt mera medam dag misen. Dauntoba emen toua emedag mougt naugb emedeij an yen toua. 4:9 Anai emen, kaba, emen emedag Krisdus men lusud gedig len meru edgom an en mer dous. Doba yen, kaba, yen youdesa dau sug yen yedag hom dara Krisdus ginohob, kaba, dag yen meiju ouforoho naugb augwanohob. Dara emen, kaba, emen emedag leng lomomtom namcir. Doba yen, kaba, yen youdesa dag yen meijubisamougb an augwan touohob. Dara yen, kaba, lusud leigdoumesa yen meijoho agas medam namcir toua. Doba emen, kaba, len leic emen emoho lacecim terimda. 4:10 Dangga hang, emen gedig emen emesai ELOHIM en moro dou lusud, kaba, dan doudesa en ogod deinaugb emenohob dag emen emoho eb tainya lusud laugwan. Hanoba leni dara malaikad leic emen emoho lacecim dara lobohuba an emen toua namcir. Aninim dag lusud gedig len gus logod gomom deinaugb lenohob, kaba, len lens len ainyes deseino lusud naugb len leic len meroho lacecim dara lobohuba an len toua. 4:11 Anai dau sug acgunog terimda iteitogini, kaba, sir dara merijeba emen terimda. Dara emen sansun geigouhw, kaba, hom emeb naugb emen touwero. Doba areg emen emeg, kaba, augwan obogougb an emen. Dara lusud logod emen emug ocboci toua namcir. Hanoba emen tu hom emeb naugb emen touwero. Doba emen emougb dag irinya sungga sungga terimda. 4:12 Hang, terimda iteitogin, kaba, emen emedag aremoslos gedig lusud los dimei an emen dous. Dara emen toua emedag duhu mecicgu gedig lusud ledu meren dabei dara meren igdebir se toua. Doba inggaida. Anai sug lusud lacgeij meren ELOHIM naugb en eic gecgu dou emen, kaba, emen ememacgeij emen ELOHIM misen naugb en emeic gecgu dou len touwero. Doba en eic geigouhw dou len den den dous. Dara sug len leic mog erij dou emen, kaba, emen ememeic mog erij ucugb dou len touwero. Doba emen emeigtou naugb gin toua. 4:13 Dangga hang, sug lusud lesmesman emen, kaba, emen ememenara dara emen emir mog mog ucugb dou len touwero. Doba emen emenara dara emen emir arjaga dou len dous. Dauntoba sug len merus obsara an meren geicara ginohob, kaba, len ledag hom dara emen toua terimda. Dara sug emen emesai Krisdus moro dou lusud, kaba, emen ememacgeij aregoufu dau len icira gin touwero. Doba emen emeic emen emug erij icira areg emen emeic se emen emsirahabi, emen ememouma ara ara dau len toua. Dauntoba emen emesai ELOHIM mer augwan dag mogud dou len dous. 4:14 Areg dan dog dou yen gin, kaba, dag dan demeic igdebes dou yenero. Anai yen yedag dan indihir se Krisdus gedig dan indoc gororougb yen namcirohob. Hang dan demog augwan gini dou yen naugb dan dasulou yen dous. Dauntoba yen yemaimo meijen geicara gecgu gini deitero. Doba yen yarges dau namcir. 4:15 Anai lusud leinyana gedig lebedero namcir, kaba, len len aud yenohob naugb len ledidib meijouhw dau Krisdus ucan dan dou yen deit. Doba yen meijina se Krisdus, kaba, lemeinyanero. Anai danin dous eng desai Mer Geigouhw eisaugb Krisdus dou yen sug aimougtut. Hanoba dan dahwan yen naugb yen meigdoc dag hom dara Krisdus Yesus gin touohob. Dangga hang, danin eng dedag yen meijina misen se Krisdus gin dous. Leng gus, kaba, naro. 4:16 Sug dan dedag yen meijina se Krisdus dag ginohob, kaba, dan desulou yen dara goubesa namcir. Dauntoba yen meigdoc emagas icira areg dan den dougwo yen an gin deitlo. Doba yen yesogwa deisa dan indohotimei mohw an indan geicara augwan toua terimda. 4:17 Hang dan demesa Timotius aud yen naugb en ens dau indan geicara se Krisdus Yesus areg dan desai se goucimdeb augwanohob dou yen toua. Dauntoba yen meigdoc moc dougworo. Doba yen meigdoc eiseisan gin terimda. Anai en, kaba, en edag dan indisi se Krisdus gedig dan indoc gororougb en namcirohob. Dangga en emasid enin dau dan touwero. Doba en aimo dan dara en medoc hom terimda. 4:18 Doba ligbum dau yen, kaba, len les merus debin danohob. Anai len loudesa dag dan demen aud yen deiterohob. Doba dan deigtou dau yen namcir. 4:19 Dobnaro. Anai sug maman Adehsud en ouwan, kaba, dan demen aud yen dedemeda toues. Dangga sug dan dedebeij yenohob, kaba, dan deiya dau leng les merus debin dan graga, kaba, dag Mena Gogoufu eic goubesa dag misen dou lenohobei? Era len lenara dangga se len merirs dousei? 4:20 Anai sug lusud leigdoumesa lenin meroho dous dag ELOHIM oiharaga lenohob, kaba, gini ansins dag ELOHIM emoiharaga len touebma. Doba sug lusud leiya dau Mena Gogoufu men goubesa se meren geicara augwan, kaba, gini ansins dag ELOHIM oiharaga len dag misenohob. 4:21 Dangga hang, yen youwan dagiro? Dan den aud yen naugb dan deic gogom debin yen an meijen geicara gecgu ginei? Era dan den aud yen dara dan indir arjaga naugb dan denara geigouhw dou yen dousei? Yenin youci dau gini.

1 Korintus 5

5:1 Dan denara dag graga dou yen, anai lusud leden dou dan dag aremer mesira ebsa moonggebga se meijen goucimdebohob. Dara aremer gin, kaba, ogom medam edreg dau areg leng medigo Yesus laimo namcir toua. Anai len leden dou dan dag sud hom obsara an mena mesouwa godeh ucucugb terimdohob. Hang aremer gin, kaba, dag loungmen touwero, doba dag misen namcir. 5:2 Dangga dagiro, naugwe hang, yen yeimiman yenin deseino lusud dag yen yaimo augwan namcirohoba? Naro, eigouhw, kaba, yen meijus obsara naugb yen meigdoc momogo an gin terimda. Hanoba yen yocirma sud hom gedig en aimo men geicara gecgu gini dau meijen goucimdeb toua. 5:3-5 Dan darougb yen an dangga, anai ogdoc goubesa areg maman Adehsud Yesus eic dou danohob, kaba, dan dogod gogom deinaugb sud hom gedig en aimo sesar gecgu gini, aninim dag dan toua indugwengga desij yen touohob. Anai dan indug, kaba, aigusi dau yen namcir. Doba se dan indoc mes, kaba, dan indugwengga desij yenaba. Dangga sug yen youcimdeb, kaba, yen yemamsoho en deb touwero. Doba ogdoc maman Adehsud Yesus men goubesa gin, kaba, yen yogugwo sud hom gini se Setan mesira ucugb. Dauntoba sug Setan eic mor mor dou en maga, kaba, en emomom namcir se dum smougb touwero. Doba en mena agau se Lona Sug Maman Adehsud En Ecicugwen gin toua namcir. Anai sug yen yaimo dan indir naugb yen yogod gogom deinaugb en dag gin, kaba, gini aninim dag dan indugwengga desij yen icira aremer gin touohob. 5:6 Dangga hang, yen yemeimiman yenin an meijen geicara augwan graga deseino lusud deitlo. Doba yen meijus obsara an gin namcir. Anai sug areg geic gerisa dou roti gurereito eb se gin, kaba, cum, roti augwan erisa touohob. Yen yemecinaga aremeijouhw gini dag misenbumei? Naro, yen yecinaga gini dag misenohob. 5:7 Hang yen yemaimo areg dag sesar gin deitero. Doba yen yocirma areg geic gerisa dou roti augwan gini dau meijen goucimdeb toua namcir. Dauntoba yen yedag roti gedig areg geic erisa dou roti gin, kaba, hom emeb se touwero. Doba yen yedag roti gemerisero naugb yen yaimo areg gecabeci gin dous, aninim dag sug nosa toua, kaba, yen yaimo areg ecabeci gini touohob. Anai Krisdus, kaba, en omom taiba sogo salib naugb en mogwihi esga maman dau sesar men gogom augwan ginohob. Aninim dag sug nosa, kaba, leng Israel leic domba mogwihi naugb mogwihi gini oiharaga len dau gomom touohob. 5:8 Dangga sug Krisdus mogwihi esga maman dau sesar men gogom dag ginohob, kaba, maman masedeb mamanin mamdoc mes naugb maman mamet roti gerisa gin toua deitero. Doba maman mat roti gemerisero mogud debin men Lona Gohw Bedreg gin dous. Anai roti gerisa, kaba, dag maman maimo areg dag sesar dara mog mog terimda. Doba roti gemerisero, kaba, dag maman maimo areg gecabeci dara areg se geica namcir. 5:9 Augwan gini aimo dau areg dan desulou yen an se indan surad sug nosa touohob. Anai se surad ingga, kaba, dan den dougwo yen naugb yen yemeigtou desij leng lohw meraga doum aibibra touwero. Doba yen yasid yenin dau len namcir. 5:10 Doba areg dan dog dou yen gin, kaba, men meijouhw dag yen yemasid yenin dau leng medigo Yesus ginero. Doba men meijouhw dag yen yasid yenin dau yen meijaguner se Krisdus gedig len leicara gecgu gin dous. Anai sug yen yasid yenin dau leng medigo Yesus gedig len lohw meraga doum aibibra, era leng lagungunara, era leng leiyohora, era len gedig len lecguna dou seiseij, kaba, emedeinyum naugb yen yemeigtou se cinogo gin deitero. Doba yen yeihwededau namcir. 5:11 Dangga hang, yen yemasid yenin dau leng medigo Yesus gedig len leicara gecgu ginero. Doba sug sud hom eigdoumesa enin moho dag yen meijaguna se Krisdusohob. Hanoba en ohw en maga aibibra, era en agungunara, era en ecguna dou seiseij, era en esmesman len gus, era en eg ahwei mohu ed bomom, era en eiyohora, kaba, yen yemeigtou desij en deitero. Doba yen yasid yenin dau en namcir. Hanoba yen yemetara desij en mougwa hom touwero. 5:12-13 Dara yen yemamsoho en touwero. Doba Surad Injil Meb Mohon arougb yen naugb yen yocirma en dau meijen goucimdeb toua terimda. Anai leng medigo Yesus, kaba, len leigtou dig medigo. Hang maman mamogod aremer debin len touwero. Doba ELOHIM enin dous eng ogod aremer gogom debin len. Doba leng se goucimdeb, kaba, meijen goubesa inggebga naugb yen yogod aremer gogom debin len. Anai len leinesa Krisdus men uro mes ginohob.

1 Korintus 6

6:1 Dangga sug sud hom dau yen men aremer inggebga dara en mesi hom se Krisdus, kaba, dagiro, naugwe hang, en emacgeij leng Krisden gus naugb len logod men aremer ginero? Doba en eic mos naugb en eihwedaud len medigo Yesus, dauntoba len logod men aremer se lan marufu gina? Anai len, kaba, len lemaimo areg asesa ELOHIM enin medoc mes gin touwero. Doba len ledreg dau en mer gin namcir. Doba mamang Krisden, kaba, ELOHIM ouci maman debinim naugb enohob. 6:2 Hang en esedeb maman naugb maman magod aremer aga lusud gedig Bilis oiharaga len se Lona Gouwedoc gin touohob. Yen yemecinaga ginbumei? Naro, yen yecinaga augwan gin dag misenohob. Dangga sug ELOHIM esedeb maman deb naugb sug maman magod aremer gouji se Lona Gouwedoc dag ginohob, kaba, yen meiju emouforoho naugb yen yogod aremer mogurei se yen meijufuero. Hang yen yemougwan meijen aremer aud leng medigo Yesus gin touei? Naro, dan decinaga dag yen meiju ouforoho edeinyum naugb augwan ginohob. 6:3 Dara ELOHIM emesedeb maman naugb sug maman magod lusud meren aremer gin dousero. Doba en esedeb maman naugb sug maman magod aremer aga malaikad len laugwan se lona daiyamo gacin gin touohob. Dangga sug maman mamu ouforoho edeinyum naugb sug maman magod aremer aga malaikad len laugwan, kaba, maman mamu ouforoho edeinyum naugb sug maman magod aremer mogurei anim ucucugb se maman mamufu gin toua terimda. Yen yemecinaga gin touebmei? Naro, yen yecinaga augwan gini dag misen touohob. 6:4 Hang yen yemacgeij leng medigo Yesus naugb len lemogod meijen aremer se yen meijufu toua deitero. Doba sug astesda aremer eb debin yen, kaba, yen yacgeij lusud dau meijen goucimdeb dous. Anai leng medigo Yesus gin, kaba, yen yemeigdoumesa len meroho deseino yen touwero. Doba yen yowun len meroho eb tainya namcirohob. 6:5 Dan dog areg graga augwan dou yen dauntoba yen yemeigdoumesa yenin meijoho an meijen geicara gin deitero. Doba igdebeseba yen an namcir. Anai sug yen yacgeij leng medigo Yesus naugb len logod meijen aremer, kaba, gini aninim dag yen youdesa sud hom ingma se meijen goucimdeb en mou ouforoho emedeinyum naugb sug en ogod aremer augwan gineroei? Naro, lusud gedig len meru ouforoho naugb len logod meijen aremer, kaba, leinyana merugwengga se meijen goucimdeb touohob. 6:6 Dangga dagiro, naugwe hang, yen yacgeij leng medigo Yesus naugb len logod meijen aremer gina? Anai dan decinaga dag yen yeihwedaud len naugb yen yoho yasim deseino len toua terimdohob. Hanoba yen yacgeij len gedig merdoc emebdebin an Krisdus ginbuma naugb len logod meijen aremer gin toua. 6:7 Doba sug yen yoho yasim dag gin terimda, kaba, gini ansins dag yen yemaimo ELOHIM en mer anim toua deitero. Doba yen yobsara dau augwan gin namcirohob. Dangga hang, sug lusud lemaimo ucina gedag beim an yenero, hanoba len lerba mohoisa yen naugb len lesma ara ara dau yen, era len leiyoho, era len lecinc, era len lesedi meijen aremougb, kaba, yen yemen dougwo len an ginero. Doba yen yamsoho len an gin dous. Anai gin eng eigouhw bedreg dau sug yen yoho yasim deseino leng medigo Yesus toua namcir. 6:8 Dobnaro. Yenin toua yaimo ucina mageb an len gus. Hanoba yen yerba mohoisa, dara yen yeiyohora, dara yen yecincara, dara yen yesedi meren aremougb toua terimda. Dara yen yemaimo ucina agabgebi gini an len medigo Yesus dousero. Doba yen yeicara yaimo dangga an yen meisir se Krisdus len laugwan toua namcirohob. 6:9 Doba yen yemauwam an didi eisaugb ginero. Anai gareg en aimo ligida gus aibibra, dara en ecguna dou seiseij, dara en mesira ebsa mesi mesouwa, dara men geicara dag mihi dara hweij naugb aidem ucucugb. 6:10 Dara en eiyohora, dara en agungunara, dara en eg ahwei mohu ed en bomom namcir, dara en esmesman len gus, dara en eteij mocges naugb ogod len batagaij aremougb, kaba, sud hom ingma dau len, kaba, en emeinesa ELOHIM men goiharaga touwero. Doba en eigtou dig medigo beb huhugb namcir. Yen yemecinaga dau gin touebmei? Naro, yen yecinaga dau sug sud hom emaimo areg asesa ELOHIM enin medoc mesero, kaba, dag en emeinesa men goiharaga touwero, meijouhw augwan dag misenohob. 6:11 Dara sug nosa, kaba, ligbum dau yen len leicara dag gin toua namcirohob. Doba iteitogin, kaba, yen meigdoc ebdebin an maman Adehsud Yesus Krisdus. Dara ELOHIM esa Mena Gogoufu einesa yen meigdoc mes touohob. Dangga hang, yen yemedag ELOHIM men moc deitero. Doba en eic gesgigouhwesa dou yen. Hanoba en ouci yen debinim naugb en. Anai en eic Yesus mogwihi edu yen yecabeci dau sesar augwanohob. 6:12 Doba sud hom dau yen, kaba, en esbes an dan, endagai: Sug dan dedag Krisdenohob, kaba, gomnomna hom emen dougwo dan deitero. Doba dan daimo areg dan douwan augwan gin terimda. Areg ban ben gin, kaba, misenohob. Doba sug ban baimo areg ban abdoc etrij icira gin, kaba, augwan gini eic dag ban bera mera geigouhw dau gin touei? Naro, mera einyana dau gini, kaba, onggoij loungmen medam debin ban dous. Hang ban bemaimo touwero, doba ban barges dau namcir. Dara sud hom gus, kaba, en esbes an dan deit, endagai: Sug dan dedag Krisdenohob, kaba, gomnomna hom emeb naugb dan deitero. Doba dan dedag mougt naugb dan daimo areg dan douwan terimda. Areg ban ben gin, kaba, misen touohob. Doba deciciji, anai sug ban baimo areg ban abdoc etrij icira gin, kaba, cum, aban geicara gini eineg bedag mougt naugb ban deit. Hang naugb danin, kaba, dan demaimo augwan gin touwero, doba dan darges dau namcir. Anai dan demouwan naugb indan geicara hom emedag mougt naugb dan touwero. 6:13 Dara sud hom gus, kaba, en esbes an dan deit, endagai: Dagiro, naugwe hang, dan demohw dan indaga dou len gus aibibrero, anai maman Adehsud ELOHIM eic dan indaga dou danohob gina? Dangga hang, sug dan indoc etrij, kaba, dan dohw dou len gus. Dauntoba dan indoc emetrij deitero, doba ebtou namcir, aninim dag en eic dan indinuhwa dou dan. Dauntoba sug dan det aredohob, kaba, siremeba dan toua deitero. Doba dan darges dau namcir toua. Dobnaro. Anai maman Adehsud ELOHIM gin, kaba, en eic ban abinuhwa dou ban naugb ared. Dara en eic ared dou ban naugb einesa ban abinuhwa touohob. Gini misen namcir. Dara cum, kaba, ELOHIM eic mor mor dou hwas gin toua. Doba ban abaga, kaba, maman Adehsud ELOHIM emeic gin dou ban naugb ban bohw dou len gus aibibrero. Doba en eic dou ban naugb ban bohw dou en dous. Dauntoba sug ban baimo areg en arougb ban an gin, kaba, en esedougwo ban abaga deigeigouhw dau areg gecgu toua. 6:14 Anai ELOHIM en esedeb dag cum, kaba, en eigdoumesa maman mamaga dau gomom ogdoc men goubesa ucugb. Aninim dag en eigdoumesa maman Adehsud Yesus Krisdus dau gomom ogdoc men goubesa sug nosa touohob. 6:15 Hang yen yemohw yen meijaga dou ligida gedig len meraga eijouhw toua deitero. Anai sug yen meigdoc dag hom dara Krisdusohob, kaba, en moho aiga yen meijaga touohob. Yen yemecinaga gin touebmei? Naro, yen yecinaga augwan gini dag misenohob. Dangga sug Krisdus en moho aiga dan indaga dag ginohob, kaba, dan deic dan indaga en men gini. Hanoba dan dohw dou gida gedig en maga eijouhw naugb aman amedag hom darem toua deitei? Naro, dan demeicara dag gin mougwa hom touwero. Doba dan darges dau namcir. 6:16-17 Anai gareg en edag hom dara maman Adehsud gin, kaba, lan mardoc emedregim deitero. Doba lan mardoc dag hom namcirohob. Doba sug en ohw en maga dou gida gedig en maga eijouhw gini ucugb deit, kaba, en medoc dag hom dara maman Adehsud toua deitero. Doba en medoc aninim dara gida gedig en maga eijouhw ginohob. Augwan gini aimo dau areg Surad Injil Meb Mohon enara deb sug nosa touohob, endagai: Sug giji hom obsara an gida gin, kaba, lan mardoc emargesim deitero. Doba lan mardoc dag aninim namcirohob. Yen yemecinaga augwan gini dag misenbumei? Naro, yen yecinaga augwan gini dag misen touohob. 6:18 Dangga hang, yen yemaimo ligida gedig len meraga eijouhw gin toua deitero. Doba yen yarges dau namcir. Anai sesar gus augwan, kaba, an len gus dous. Doba gareg en ohw en maga dou ligida aibibra, kaba, gini aninim dag en ebesesar an enin magohob. 6:19 Dobnaro. Yen meijaga, kaba, aninim dag tu naugb Mena Gogoufu en eigtousa. Anai ELOHIM esa en se yen meigdoc mesohob. Hang yen yemedag mougt naugb yenin deitero. Doba ELOHIM enin dous eng edag mougt naugb yen terimda. 6:20 Anai en eic Krisdus mogwihi ancoho aga yen bedug namcirohob. Dangga yen yeic yen meijaga naugb yen yaigdoumesa ELOHIM en moho se meijen geicara augwan toua terimda. Yen yemecinaga augwan gini dag misenbumei? Naro, yen yecinaga gin augwan dag misen touohob.

1 Korintus 7

7:1 Doba areg yen yeijidougwo dan an se meijen surad dag yen yeic meisouwa, era naro, kaba, dan dauni dag gin dou yen, dendagai: Gareg dau yen en edag ligigbaba, kaba, eigouhw naugb en emeic mesouwa touwero, doba en eigtou dangga terimda. 7:2 Doba aremer mesirebsa einyana moonggebga se meijen cinogo ingga. Dangga hang, eigouhw naugb astesda ligiji, kaba, en eic en mesouwa. Dara ligida toua, kaba, len les mersuwa touahabi. 7:3 Doba sug giji hom en eic mesouwohob, kaba, en emecicgo enin maga dau en. Dara en mesouwa toua, kaba, en emecicgo en maga dau en touwero. Doba lan laohw maraga doum ucucugb terimda aimo dau areg lan lauwan dous. 7:4 Anai mesouwa, kaba, en emedag mougt naugb enin magero, doba en mesuwa edag mougt naugb gini. Dangga toua, en mesuwa, kaba, en emedag mougt naugb enin maga touwero. Doba en mesouwa edag mougt naugb gin toua. 7:5 Dangga hang, sug yen yeicimohob, kaba, yen yemasid yenin meijaga daum augwougb touwero. Doba yen yens aremeijouhw eisaugb gin doumahabi, yen yemasid yenin daum toua. Dauntoba gini emedag sogo maga dougwo yen sug yen yocuncum dou ELOHIM, era ara gus touwero. Doba yen yeicara yaimo augwan gin dara gesgiraha dous. Doba lona sug meijen ara gus ouwohob, kaba, yen yedag hom dara meisouwer ucugb deit. Dauntoba Setan emaugwohosa yen naugb yen meisira emebsa ligida aibibra touwero. Doba yen meigdoc emtereta dau sesar gin namcir. Anai meijen goubesa naugb sug yen yebehnehino yenin dougwo sesar, kaba, ingmaro. 7:6 Doba areg dan desulou yen an gin, kaba, dag gomnomna dau ELOHIM, isnaro. Doba dan dens ucina meijouhw eisaugb gin dou yen dous. 7:7 Dangga sug yen yeicim era yen yemeicimero, kaba, gini dag sesarero, doba hwas hwas eigouhw namcir. Anai sud hom yom, kaba, ELOHIM eic goubesa dou en naugb en emeic mesouwero doba en eigtou dag abges terimda. Doba lingma, kaba, ELOHIM emeic goubesa dou en naugb ginero, doba en eic mou ouforoho dou en. Dauntoba sug en eic mesouwohob, kaba, en esedougwo en deigeigouhw toua. Hang dau danin indoc mes, kaba, dan demouwan naugb yen yemeicim touwero. Doba yen yeigtou abges aninim dag dan terimda. Doba eigouhw naugb astesda sud hom, kaba, en aimo men goubesa areg ELOHIM eic dou enohob dous. Anai maman maugwan aninimero. 7:8 Dangga yeng yemeicimbuma, era yeng yedag debdesohob, kaba, dan dens ucina dau danin indoc mes dou yen dag yen yemeic meisouwa, era yen yemes meisuwa touwero. Doba yen yeigtou dag yigib dara yigdob aninim dag dan dous. Anai dan doudesa gin, kaba, eigouhw bedreg dau sug yen yeicim toua. 7:9 Doba sug meijen goubesa emedeinyum naugb sug yen yebehnehino yenin meigdoc mes dougwo gin touwero, kaba, eigouhw naugb yen yeicimahabi. Anai gini eigouhw bedreg dau sug yen meigdoc etrij icirim terimda. 7:10 Doba yeng Krisden gedig yen yeicimohob, kaba, mesouwa emasid enin maga dau mesuwero. 7:11 Doba sug mesouwa asid enin dau mesuwohob, kaba, en emdes mesuwa deitero. Doba en eigtou naugb enin, era lan laic gesgigouhwesem ucugb dous. Dara mesuwa en toua emogod ameiji dougwo en mesouwa touwero. Doba lan ladag hom terimda. Areg dan den dou yen gin, kaba, dan demens dau danin indoc mes dou yenero. Doba maman Adehsud enin eng arougb dan. Hang dan demens dou yen toua. 7:12 Doba eisaugb gida Krisden gedig en mesuwa dau leng medigo Yesusaba. Era giji Krisden gedig en mesouwa medoc emebdebin an Krisdus touebma, kaba, maman Adehsud en emens ucina meijouhw dau enin medoc mes eisaugb gin dou danero. Doba dan dens ucina dau danin indoc mes dou yen dous. Dangga sug sud hom dau yen en edag Krisdenohob, doba en mesouwa emedag Krisdenbuma. Hanoba mesouwa medoc esgiraha naugb en eigtou desij en mesuwa terimda, kaba, en emogod ameiji dougwo en touwero. Doba en eigtou desij en namcir. 7:13 Dara sug gida hom dau yen en edag Krisdenohob, doba en mesuwa emedag Krisdenbuma. Hanoba mesuwa medoc esgiraha naugb en eigtou desij en, kaba, mesouwa emogod ameiji dougwo en touwero. Doba en eigtou desij en terimda toua. 7:14 Anai sug lan ladag hom namcir, kaba, mesouwa gedag Krisdenohob gini men gecabeci erba debin mesuwa men gogor naugb ELOHIM eigdoumesa en moho dag ecabeci deseino en. Dara mesuwa Krisden men gecabeci erba debin mesouwa men gogor naugb ELOHIM eigdoumesa en moho dag ecabeci deseino en toua. Naro, kaba, lan marihir emecabeci deseino ELOHIM touwero, doba len logor deseino en terimda. Doba sug mena, era mem, ladag Krisdenohob, kaba, maran gecabeci oiharaga lan marihir naugb len lemogor deseino ELOHIM touwero. Doba en eigdoumesa len meroho dag len toua lecabeci deseino enohob. 7:15 Doba sug mesouwa dau leng medigo Yesus en ouwan asid enin dau mesuwa Krisden, kaba, mesuwa emen dougwo enero. Doba en ousa deisa gin namcir. Dara sug mesuwa dau leng medigo Yesus en ouwan ogod ameiji dougwo mesouwa Krisden, kaba, mesouwa Krisden en emen dougwo gin touwero, doba en ousa deisa toua. Anai ELOHIM en emouwan naugb yen meigdoc emedregimero. Doba en ouwan naugb yen meigdoc ebtou anim dous. Hang areg mesouwa Krisden os dou mesuwa naugb en aimo en, era areg mesuwa Krisden en os dou mesouwa naugb en esedougwo en, kaba, augwan gini emen dougwo lan toua deitero. Doba lan larges dau namcirohob. 7:16 Dangga gida Krisden sug ban absuwa dau leng medigo Yesus en ouwan ogod ameiji dougwo ban, kaba, ban bemen dougwo en touwero. Doba ban bousa deisa en mer an gin namcir. Anai sug ban ben dougwo en terimda, kaba, ban boudesa dag ban bahwan en aud Yesus naugb en eigdoc en dau sesar men gogom inggei? Naro, ban bemecinaga gini dag misenero. Dara giji Krisden sug ban absouwa dau leng medigo Yesus en ouwan asid enin dau ban, kaba, ban bemenara gouji dou en icira gin touwero. Doba ban bamsoho en namcir. Anai sug ban baiyan abdocesem an gin, kaba, ban boudesa ban bahwan en aud Yesus gin touei? Naro, ban bemecinaga gini dag misen touebma. 7:17 Doba sug yen yeigtou desijim, era yen yargesim, kaba, esloulougb dag astesda dau yen, kaba, en emarges dau men ucina areg en aimo sug ELOHIM eija en sug aimougtut touwero. Doba en aimo men ucina areg maman Adehsud esedeb naugb enohob gin terimda. Aremer gin, kaba, aimo dau areg dan debedbed dou lusud se astesda goucimdeb augwan touohob. 7:18 Dangga sud hom dau yen areg ELOHIM eija en sug nosa, doba en ec mos dauwohob, kaba, en emehilon ucina naugb sug en ec mos gin dougwo ucugb touwero. Doba en aimo ELOHIM an gin terimda. Era sud hom dau yen areg ELOHIM eija en sug nosa, doba en emec mos dauwebma, kaba, en emehilon ucina naugb sug en ec mos dau touwero. Doba en aimo ELOHIM an gin toua namcir. 7:19 Anai sug sud hom en ec mos dauwohob, era en emec mos daubuma, kaba, augwan gini emesloulougb deseino ELOHIM enero. Doba areg esloulougb medam namcir deseino en, kaba, dag maman maimo areg en arougb maman an gin dous. 7:20 Hang ucina areg yen yaimo sug ELOHIM eija yenohob, kaba, yen yemarges dau gin touwero. Doba yen yaimo gin terimda. 7:21 Dangga se lona sug ELOHIM eija ban, doba ban bedag sogougb teiteiyohob, kaba, ban abdoc momogo an gin. Hanoba ban bemehilon ucina naugb sug ban barges dau gin touwero. Doba ban baimo ucina gini dara ban abdoc edag beim an namcir. 7:22 Anai sug maman Adehsud en eija sud hom gedag sogougb naugb en aimo en, kaba, sud hom gini en emedag sogougb deseino en toua deitero. Doba en edag lusud misen deseino maman Adehsud ginohob. Dangga toua, sud hom gareg en edag lusud misen se lona sug Krisdus eija en, kaba, en emedag lusud misen deseino en toua deitero. Doba en edag sogougb deseino en touohob. 7:23 Dangga hang, yen yemedag lusud misen meren sogougb naugb yen yaimo len aud areg len merdoc etrij icira toua deitero. Doba yen yedag ELOHIM men sogougb naugb yen yaimo en aud areg en arougb yen an dous. Anai en, kaba, en eic Krisdus enin mogwihi ancoho aga yen bedug namcirohob. 7:24 Dan indagunerij, dara dan indamouwerij, sug ELOHIM eija yen dag ginohob, kaba, yen yemarges dau meijen ucina areg yen yaimo se lona ingga touwero. Doba astesda dau yen, kaba, en esogwa deisa en mohotimei mohw se men ucina gin dous. Anai yen meigdoc dag hom dara enohob. 7:25-26 Doba eisaugb ligib dara ligdob, areg yen yeijidougwo dan an se meijen surad ginohob, kaba, eigouhw naugb len lemeicim touwero. Doba len lehig dag ligib dara ligdob dangga terimda. Anai lona naugb augwan sug ouwedoc, kaba, ebeij deinyorohob. Doba areg dan desulou yen an gin, kaba, dag gomnomna dau maman Adehsud, isnaro. Doba dan dens ucina meijouhw gini dau danin indoc mes dou yen dangga dous. Doba maman Adehsud, kaba, en medoc an dan medamohob. Hang edeinyum naugb sug yen yod meijina debsa dan an areg dan den dou yen gin toua namcir. 7:27 Dangga sug ban beic ban absouwohob, kaba, ban bemogod ameiji dougwo en touwero. Doba sug ban bigibaba, kaba, eigouhw naugb ban bemeic absouwero. Doba ban behig dag gin terimda. Anai leng leicimohob, kaba, aremer einyana eb naugb len. Hang dan demens gin dou yen, anai dan demouwan naugb yen yaimo areg gogom ginero. 7:28 Doba sug ban bouwan beic absouwa, kaba, gini dag sesarero. Dara sug gida ligdob toua en ouwan es mesuwa, kaba, gini dag sesar naugb enero. Anai maman Adehsud men gomnomna emen dougwo yen an gin touwero. Doba en amsoho yen an ucina areg yen youwan yaimo gin terimda. 7:29 Doba dan indagunerij, dara dan indamouwerij, Lona Sug Ouwedoc, kaba, ebeij deinyorohob. Dangga hang, indan gauwamara dag gini: Gareg dau yen en eic mesouwohob, kaba, medoc augwan emeb se en deitlo. Doba en ekeba mou dau gini, aninim dag sud hom gemeic mesouwero touahabi. 7:30 Dara yeng meigdoc momogo an ara ara geb se cinogo gin, kaba, yen meigdoc augwan emeb sungga deitlo. Doba yen yedug yen meigdoc dau. Dara yeng yeimiman yenin an areg geb se cinogo gini, kaba, yen yemeicara dangga terimlo. Doba yen yowun meigdoc mes obsara dau gin. Dara yeng youma ara ara, kaba, yen yemeigdoumesa yenin meijoho dag augwan gin meijen touwero. Doba yen yowun yenin meigdoc mes dau. 7:31 Dara yeng meigdoc acincin an areg geb se cinogo gin, kaba, yen yemeicara dangga toua terimlo. Doba yen yedug yen meigdoc dau gini augwan toua namcir. Anai cinogo areg maman maiya gin, kaba, emeb terberbero. Doba cum, kaba, ediyebeiya dangga. 7:32 Dan desulou yen an dag gini, anai dan demouwan naugb yen meigdoc momogo eisaugb areg geb se cinogo gin deitero. Doba sug lona ebeij deinyor dag ginohob, kaba, dan douwan naugb yen meigdoc eiloboro se ELOHIM men ucina hom gin dous. Anai sud hom gemeic mesouwero, kaba, en mou emauti areg geb se cinogo gin touwero. Doba en mou augwan auti maman Adehsud men ucina hom gin dous. Hanoba en ehilon ucina naugb sug en eic maman Adehsud medoc agahugouhw dou en toua. 7:33 Doba sud hom geic mesouwohob, kaba, en mou augwan emauti ELOHIM men ucina hom gin dousero. Doba en ekeba mou naugb aiso areg geb se cinogo gini. Dauntoba en eic mesouwa medoc eigouhw dou en toua. Hang en emekeba medoc icira gin toua terimda. 7:34 Dangga toua, gida ges mesuwohob, kaba, en mou augwan emauti maman Adehsud men ucina touwero. Doba en ekeba mou naugb aiso areg geb se cinogo gini. Anai en ouwan eic mesuwa medoc eigouhw dou en toua. Doba debdes dara ligdob, kaba, len louwan naugb leic meraga dara merdoc augwan dou maman Adehsud dag en men dous. Dangga hang, len lemekeba meru icira areg geb se cinogo gin touwero. Doba len meru augwan auti maman Adehsud men ucina hom gin terimda. 7:35 Doba areg dan den dougwo yen graga, kaba, emedag sogo maga dougwo yenero. Doba gini dag dan dehilon ucina geigouhw naugb yen. Dauntoba ara ara ingma emata dougwo yen an ELOHIM men ucina gin touwero. Doba yen meiju eiloboro naugb yen yeicara dou ELOHIM dara yen meigdoc hom namcir, aimo areg enin ouwan dous. 7:36 Doba eisaugb sud hom gedig en erba aruler debin gida homohob, hanoba en emouwan naugb en emeic en touwero. Doba cum, kaba, en medoc etrij icira medam an en deit. Hang arautut en naugb en ouwan eic en dag en mesouwa misen, kaba, eigouhw naugb lan laicim dous, aimo dau areg giji enin ouwan. Anai en ecinaga, doba men geicara emobosboro an en deitero. Dara men geicara gin, kaba, emedag sesarero, doba eigouhw toua namcirohob. 7:37 Doba sug sud hom gin, kaba, en ogod se enin medoc mes dag buc gototo namcirohob naugb sug en emeic gida gini dag en mesouwa misenero. Dara en medoc emetrij icira gin, kaba, emedag mougt naugb emarautut en touwero. Doba men goubesa inggebga naugb en esedougwo enin maga terimda, kaba, eigouhw naugb en emeic gida gini dag mesouwa misen touwero. Doba en eigdoumesa en moho dag ligdob desij en dous, aimo dau areg en esedeb se enin medoc mes naugb ginohob. 7:38 Dangga gareg dau yen en eic mesouwa, kaba, gini eigouhw. Doba gareg en emeic mesouwero, kaba, gini eigouhw bedreg dau gin namcir. 7:39 Dara gida toua, sug en es mesuwohob, kaba, en emasid enin dau en touwero. Doba eigtou desij en terimda en omom dau enahabi. Dangga, kaba, men ucina esgiraha naugb sug en ehilon mesuwa menau deit aimo dau areg enin ouwan toua. Doba sug en es mesuwa menau gini, kaba, en emes sud hom dau leng medigo Yesusero, doba dau leng Krisden dous. 7:40 Doba sug en eigtou dag debdes terimda, kaba, dan doudesa en medoc esgiraha namcir edreg dau sug en es mesuwa menau deit. Anai sug en emes mesuwero, kaba, en emekeba mou icira mesuwa an areg geb se cinogo gin touwero. Doba en mou augwan auti ELOHIM men ucina hom terimda. Augwan gin, kaba, dag maman Adehsud men gomnomnero. Doba dan dens ucina meijouhw dau danin indoc mes dou yen dous. Doba ELOHIM esa Mena Gogoufu se dan indoc mes, aninim dag en esa en se yen meigdoc mes gin touohob. Dangga hang, areg dan desulou yen an gin, kaba, emen dau danin indoc mes touwero. Doba aimo dau mou gouforoho areg Mena Gogoufu eic dou dan naugb gin touohob.

1 Korintus 8

8:1 Doba eisaugb mog gedig lusud lesijaresa dou seiseijohob, kaba, yen yog se meijen surad dou dan dag yen yecinaga meijouhw augwan asesa namcirohob. Doba decicijahabi, anai sug yen youdesa dag yen yecinaga meijouhw augwan dag ginohob, kaba, gini eic dag yen yeimiman yenin meijoho an dous. Doba sug yen meigdoc gororougb lusud, kaba, gini eic dag yen yousa len naugb len leiji dag lusud mos se Krisdus toua. 8:2 Dangga gareg en oudesa dag en ecinaga meijouhw augwan asesa dag misen, hanoba eic dag en medoc agas an gin touohob, kaba, en emaimo dau areg ELOHIM esedeb naugb sug en ecinaga augwan dag misen touebma. Doba en mou edgom namciraba. 8:3 Doba gareg dau yen en ecinaga areg asesa ELOHIM enin medoc mes. Hanoba en aimo terimda toua, kaba, enin eng ELOHIM eigdoumesa en moho dag en ecinaga enohob. Anai men geicara gin, kaba, ens ainyes dag en medoc gororougb ELOHIM dag misen namcirohob. 8:4 Doba eisaugb areg yen yeijidougwo dan an se meijen surad dag sug sud hom et mog gedig lusud lesijaresa dou seiseijohob, kaba, maman macinaga dag seiseij hom emedag lusud misenero. Doba maman macinaga dag ELOHIM enin dous eng dag lusud misen namcir. 8:5 Indeic, dau areg geb se bogo dara cinogo gin, kaba, areg lusud leija dag ELOHIM dara mougt mera medam, kaba, len merugwengga naugb len. Dara len lemeigdoumesa hom yom dag gin dousero. Doba len leigdoumesa leinyana gougwa dag meren ELOHIM dara meren mougt mera medam naugb len touohob. 8:6 Doba naugb maman, kaba, maman macinaga ELOHIM hom dous eng dag ELOHIM misen namcir. En edag maman Mamina. Anai areg geb se bogo dara cinogo, kaba, augwan en dau en dous. Hang en emesinsin maman, dauntoba maman maicara maimo areg en esedeb naugb maman gin augwan terimda. Dara maman Adehsud, kaba, hom dous eng moongga naugb maman toua. En, kaba, Yesus Krisdus. Anai enin dous eng ahasesei bogo dara cinogo. Dara en esinsin areg se bogo dara cinogo augwan toua. Hang maman mamireseb toua ogdoc enin dous. 8:7 Doba ligbum, kaba, len lemecinaga dau sug seiseij emedag lusud misenero meijouhw asesa touebma. Dangga sug len let mog gedig lusud lesijaresa dou seiseijohob, kaba, len loudesa dag seiseij oiharaga dag misenohob. Anai sug len lecguna dou seiseij se arisogomoc einyana sug nosohob, kaba, eic dag len meru esa doc seiseij gini dag lusud misen touaba. Hang sug len let mog gin, kaba, len loudesa endag len logor deseino ELOHIM deitohob. Anai len lemedag lusud mos se Krisdus dag misenbuma. Doba len leija meruwesa gin terimdaba. 8:8 Dobnaro. Anai ared augwan gin, kaba, emousa maman naugb sug ELOHIM medoc esgiraha era esrougb an maman touwero. Doba augwan gini augwougb dous. Dangga sug maman matarero, kaba, ara hom emediyebeiya dau maman. Era sug maman mat ared, kaba, maman mamesma ara ara hom icira gin touwero. 8:9 Doba ligbum dau yen, kaba, len meru esa doc seiseij dag lusud misenaba. Dangga hang, yen yemeic meijus naugb yen yemet mog gedig lusud lesijaresa dou seiseij gini aisa lenlo. Doba yen yebehnehino yenin meigdoc mes dougwo namcir. Dauntoba yen gedig yen meiju obgesa gin, kaba, yen yemedag igdahab dougwo leng meru esa doc seiseij naugb len lemetohob yen dau Krisdus touwero. Doba len laimo en terimda. 8:10 Anai sug sud hom gedig en mou esa doc seiseijaba en eiya icira ban gedig ban abu obgesohob dag ban beigtou se seiseij men tuari naugb ban bet mog gedig lusud lesijaresa dou seiseijohob, kaba, ban boudesa dagiro? En eigtou dau ban anei? Naro, aban geicara gin, kaba, eic geic mos dou en naugb en et mog gedig lusud lesijaresa dou seiseijohob gin toua deit. 8:11 Doba Krisdus en omom taiba sogo salib naugb ban abaguna men sesar gin touohob. Dangga hang, ban bemaimo areg ban abu obgesa ginohob aisa enlo. Doba ban besa doc gin deciciji an enahabi. Dauntoba aban geicara gin, kaba, emahwan en aud dum smougb touwero. Anai sug ban absi se Krisdus gedig en mou esadoc seiseij ginaba en eiya, doba ban bet mog gin, kaba, en eic mos naugb en et toua. Hang ELOHIM eic mor mor se dum smougb dou en icira gin toua namcir. Anai sug en eic mos dag gin, kaba, gini aninim dag en ebesesar touohob. 8:12 Doba sug ban beicara dag gini aisa ban abaguner dara ban abdamouwer se Krisdus, kaba, ban beic merdoc momogo dou len dougwo Krisdus sug len meru esa doc seiseij ginaba. Hang ban bemebesesar an len dousero. Doba ban bebesesar an Krisdus toua namcirohob. 8:13 Dangga sug areg dan det gini edag sogo maga dougwo dan indaguna dara dan indamouwa naugb en etohob dan dau Krisdus, kaba, dan demet mog graga mougwa hom toua deitero. Doba dan dehig dau namcir. Dauntoba en emobsara aud sesar touwero. Doba en toua, medoc eiloboro naugb en aimo ucina gin terimda.

1 Korintus 9

9:1 Doba ligbum dau yen, kaba, len loudesa endag dan daimo Musa men gomnomna naugb gousanara terimda. Hanoba dan demet mog gedig lusud lesijaresa dou seiseijohob gin touwero. Naro, dan darges dau Musa men gomnomna gin namcirohob. Hang indan goubesa toua inggebga naugb dan det mog gini. Doba dan demaimo indan goubesa ginero, dauntoba lusud lemetohob dan dag igdahab dau Krisdus touwero. Doba en laimo en terimda. Dara ligbum dau yen, kaba, len lowun dan indoho dag maman Adehsud Krisdus emeigdoumesa dan indoho naugb dan desai en moro dag misenero. Anai dan demeiya en se dan indires touebma. Dobnaro. Dan toua deiya en se dan indires dag misenohob. Hang en emeigdoumesa dan dag gembala naugb dan demesai en moro dou lusud dag misen toua. Naro, kab, naro. Dara yen toua, yedag Krisden augwougb dau yeninei? Naro, yen yemedag Krisden augwougb dau yenin touwero. Doba yen yedag hom dara Krisdus ogdoc sug dan desai Mer Geigouhw eisaugb en dou yen sug nosohob. Hang yen yemedag Krisden toua. 9:2-3 Dangga sug lusud loududa dan dag dan demedag gembala misenero, kaba, dan dens dau sug yen meigdoc dag hom dara Krisdusohob gini ucugb dou len dous. Anai leinyana, kaba, len lowun dan indoho dag gembala areibahau namcir. Doba naugb yen, kaba, yen yecinaga dan dedag gembala misenohob. Anai sug yen meigdoc dag hom dara maman Adehsud dag ginohob, kaba, gini ansins dag dan demedag gembala areibahauero. Doba dan dedag gembala misen naugb dan desai Krisdus mer misen dou yen touohob. 9:4 Hang Barnabas aman goubesa inggebga naugb sug aman amacgeij ared ingma dau yen naugb yen yousa aman toua. Anai aman amesai Mer Geigouhw eisaugb Krisdus dag mogud dou yenohob. 9:5 Dara aman goubesa toua inggebga naugb sug aman amahwan amsouwer naugb lan laimo aman isisi sug aman amesai Krisdus moro dou lusud. Aninim dag maman Adehsud magtor, dara Petrus, dara gembala gus len laugwan lahwan len mersouwer naugb len laimo len isisi sug len lesai Krisdus moro dou lusud sungga sungga touohob. 9:6 Era yen youdesa endag Barnabas aman dous eng ameic ara ara dara amsira terimda dousei? Naro, aman goubesa toua inggebga naugb aman ameigtou dau areg aman ameic dara aman amsira, aninim dag len gin toua. 9:7 Anai sug sud hom en edag sadodor naugb esara, kaba, en eic aregoufu dau enin naugb bauma aredei? Naro, doba men mougt en eng eic aregoufu dou en dous. Era sug sud hom en es anggur mec se lo, kaba, en emec mera ingma naugb emeteroei? Naro, en ec mera ingma naugb et bagadgeijahabi, en emes menenau. Era sug sud hom en esedougwo domba naugb aha, kaba, en emesugb marij mohu naugb emeg touweroei? Naro, en esugb marij mohu naugb en eg toua. 9:8 Doba areg dan den dou yen gin, kaba, emaimo dau lusud misen meren gauwamara dousero. Doba aimo dau areg len log deb se Surad Injil Meb Mohon deb dangga sug nosa touohob. 9:9 Anai se Musa men gomnomna gin, kaba, ELOHIM arougb en, endagai: Sug sapi aiyan tramdad mogo etrij dau mos, kaba, yen yemeg aigdaga mes dougwo mers touwero. Doba yen yamsoho en naugb en et ingma toua. Doba areg ELOHIM en en dougwo Musa an ginohob, kaba, en enara dou en, anai en medoc erij an sapi misen ginei? 9:10 Naro, en emenara dou en, anai en medoc emerij an sapi misen ginero. Doba en enara dou en eisaugb emen gedig emen emesai en moro eisaugb Krisdus dou lusud gin dous. Dauntoba sug emen emogo Krisdus dag buc gototo naugb lusud. Dara emen emedidib meijouhw augwan asesa dou len toua, kaba, emen emod emina debsa len naugb len lekeba ara ara ingma dou emen. Aninim dag sud hom sug en ogo cinogo. Hanoba en eba meij dara en ouci mera debinim ucan gini, kaba, en od mena debsa men mougt dag cum, kaba, en emekeba mera ingma ucugb dou en toues. 9:11 Dangga hang, sug emen emeba Mer Geigouhw eisaugb Krisdus dag meij dou yen sug nosa, kaba, emen emedreg dau emen goubesa sug emen emacgeij ara ara geb se cinogo gin ingma dau yenohobei? Naro, emen emedreg dau emen goubesa gin ingma an yen touwero. Doba emen emaimo emen goubesa gini an yen dous. Anai sug emen emesai Krisdus moro dou yen sug nosa, kaba, eic dag ELOHIM esa Mena Gogoufu se yen meigdoc mes. Hang yen yera mera einyana geigouhw ogdoc en touohob. 9:12 Dangga sug gembala gus meren goubesa inggebga naugb len lacgeij ara ara dau yen, kaba, Barnabas aman goubesa naugb gini edreg dau len ingga namcir. Anai aman eng amesai Mer Geigouhw eisaugb Krisdus dou yen aimougtutohob. Dobnaro. Aman amemaimo aman goubesa gini mougwa hom an yenero. Doba sug aman ara ara emedeinyum naugb sug aman ameigtouwero, kaba, aman amaiyan aman amdocesem dau augwan gin namcir. Dauntoba areg aman amacgeij gin, kaba, emedag sogo maga dougwo yen dau Mer Geigouhw eisaugb Krisdus ginero. Doba yen meigdoc esgiraha naugb yen yaimo mer gin terimda. 9:13 Augwan gini aimo dau areg ELOHIM ogod an naugb men lusud gedig len lesedougwo men tuari dara men boromei gin deb sug nosa touohob. Anai men lusud areg leicara se men tuari gini, kaba, len lemehilon ared dau lenin touwero. Doba len lekeba dau areg lusud lodo dou ELOHIM ingma dou len toua. Dara leng lesedougwo men boromei gin, kaba, len lemeic lenin meren aregoufu naugb lemauma ara ara touwero. Doba areg len lob se boromei naugb len lauwaharo dou ELOHIM, kaba, len lekeba ingma naugb len let toua. 9:14 Dangga toua, maman Adehsud en mer ogod an deb sug nosa touohob, endagai: Gareg en esai Mer Geigouhw eisaugb dan dou len gus, kaba, len gedig louman en mer an gini, kaba, len leic ara ara edeinyum dou en toua. Yen yemecinaga areg gin augwan dag misenbumei? Naro, yen yecinaga augwan gini dag misenohob. 9:15 Hang indan goubesa inggebga naugb sug dan dacgeij ara ara dau yen terimda. Doba dan demaimo indan goubesa gini an yen mougwa hom touebma. Dangga areg dan dog dou yen gini, kaba, aninim dag dan demebiji naugb dan daimo indan goubesa an yen touwero. Anai dan deigdoumesa danin indoho an dou lusudohob, dag dan demacgeij ara ara hom dau len touebma. Doba dan desai Krisdus moro augwan dag mogud dou len dous. Gedangga, kaba, dan demebiji naugb sug dan dacgeij ara ara dau yen touwero. Anai sug dan deicara dag gin, kaba, areg dan deigdoumesa danin indoho an ginohob, kaba, dag augwougb dous. Dobnaro. Eigouhw naugb dan domom dauwahabi, dau sug dan demacgeij ara ara dau yen toua. Dauntoba areg dan deigdoumesa dan indoho an ginohob, kaba, emediyebeiya dau dan touwero. Doba eb naugb dan terimda. 9:16 Doba sug dan deigdoumesa dan indoho an gini, era dan demeigdoumesa dan indoho an ginero, kaba, augwan inggaida. Anai sug dan desai Mer Geigouhw eisaugb Krisdus gin dou lusud, kaba, dan demeic dau danin indoc mesero. Doba enin eng arougb dan, hang dan demesai dou lusud toua. Dangga sug Krisdus enin eng arougb danohob, kaba, dagiro, naugwe hang, dan deigdoumesa danin indoho an gin dou lusud dag dan desai en moro dag mogud dou lena? Naro, dan demeigdoumesa danin indoho an gin dou lenero, doba dan daimo dag gin terimda. Anai sug dan darges gin deb, kaba, ELOHIM eic gogom medam dou dan icira gin toua namcir. 9:17 Dangga sug dan deic dau danin indoc mes naugb dan debedbed dou lusud, kaba, indan goubesa inggebga naugb dan dacgeij ara ara dau len toua. Dobnaro, kaba, dan demohoiya dagiro? Anai areg dan desai gin, kaba, dau danin indoc mesero. Doba Krisdus enin eng ogugwo gini se dan insirohob. Hang en emarougb dan naugb dan demesai dou lusud toua. 9:18 Dangga, dagiro naugb indan siouwa gina? Indan siouwa, kaba, dag ingmaroei? Naro, indan siouwa, kaba, dag dan demaimo indan goubesa naugb dan demacgeij ara ara dau lusud touwero. Doba dan desai Mer Geigouhw eisaugb Krisdus dag mogud dou len dous. 9:19 Anai dan demouwan naugb areg len leic dou dan gini, kaba, emahud danero. Doba dan desesa gedisi namcir. Hang dan demedag sogougb naugb sud hom ingma touwero. Doba dan dowun danin indoc mes dag sogougb naugb len laugwan terimda. Dauntoba dan dahwan lusud leinyana aud Yesus Krisdus, aimo dau indan goubesa gedeinyum naugb len toua. 9:20 Dangga hang, sug dan desai Mer Geigouhw eisaugb Krisdus dou leng Yahudi, kaba, dan demedreg meren gaben touwero. Doba dan daimo len an augwan toua terimda, dauntoba dan dahwan len toua aud Krisdus. Dara sug dan desai Krisdus moro dou leng laimo Musa men gomnomna gin, kaba, dan demehig dau len an gin touwero. Doba dan dowun dan indoc mes arjaga naugb dan daimo len se meren gomnomna aud gousanara gin toua. Dauntoba dan dahwan len aud Krisdus gin toua. Doba naugb danin, kaba, dan darges dau augwan gin namcirohob. 9:21 Dangga toua, sug dan desai Krisdus moro dou lugmahara gedig len lemaimo Musa men gomnomna ginero, kaba, dan demaimo gomnomna gin aud gousanara an len touwero. Doba dan darges dau namcir naugb dan daimo len aud areg len let gin dous. Dauntoba dan dahwan len laugwan aud Krisdus toua. Dangga yen yauwam endag dan darges dau ELOHIM men gomnomna augwanohobei? Naro, doba areg dan den dou yen gini, kaba, men meijouhw dag dan darges dau gomnomna eisaugb gousanara deseino len dous. Anai Krisdus moho aiga danohob. Hang dan demaimo en mer aud areg en arougb dan an gin toua terimda. 9:22 Dangga toua, sug dan datou desij leng Krisden gedig len leija meruwesa ara ara, kaba, dan demesbes an len touwero. Doba dan dowun danin indoc mes arjaga naugb dan daimo len se areg len leija meruwesa gin toua. Dauntoba len lemetohob dan icira ginero. Doba len toua leiji dag lusud mos se Krisdus terimda. Hang se indan geicara augwan, kaba, dan demedreg dau lusud meren gaben touwero. Doba dan daimo len se meren gomnomna augwan namcir. Dauntoba len laugwan lemeihwedig dum smougb ginero. Doba dan dehilon ucina einyana dagiro naugb len, dauntoba merug hosa dau len, kaba, Krisdus eigdoc len dau sesar men gogom augwan toua? 9:23 Dangga hang, dan demarges dau sug dan desai Mer Geigouhw eisaugb Krisdus dou lusud touwero. Doba dan deic induwemougb esesa naugb dan dedidib meijouhw augwan asesa dou len. Dauntoba areg ELOHIM en os dou lusud ogdoc Mer Geigouhw eisaugb Krisdus ginohob, kaba, hom emediyebeiya dau dan touwero. Doba augwan eb naugb dan namcir toua. 9:24 Anai yen yecinaga dau sug lusud lobga lateijim, kaba, dag leinyana gougwa len laimo gin toua. Doba sud hom areg aiyan menesem naugb obga bedreg dau len gus laugwan, kaba, enin dous eng lusud lecgun sogo mesira an merij se en mougt dous. Doba len gus laugwan, kaba, naro. Dangga hang, yen meijina emarjaga dau ELOHIM men ucina aud maireseb huhugb gin touwero. Doba yen yen meijinesem naugb yen yobga asa ucina gini dara meijen goubesa augwan namcir. Dauntoba areg ELOHIM en esedeb naugb yenohob, kaba, emerses dau yen touwero. Doba sug yen yedebeij men usi ginohob, kaba, en eic augwan dou yen toua. 9:25 Dangga toua, gareg en esedeb naugb en obga asa ucina ginohob, kaba, en emaimo areg en medoc etrij icira gin toua deitero. Doba en ebehnehino enin maga dougwo areg gecgu augwan namcir. Anai en ouwan edesma sogo mesira an merij geigouhw areg len lesedeb naugb enohob. Doba sogo mesira an merij areg len lesedeb naugb en se cinogo gin, kaba, cum, ombrerij namcir. Doba areg ELOHIM en esedeb naugb mamanohob, kaba, emombrerij touwero, doba eb huhugb terimda. 9:26-27 Sug areg ELOHIM esedeb gini emediyebeiya dau mamanerohob, kaba, dan demamsoho dan indaga naugb emahwan dan aud areg dan indoc etrij icira touwero. Doba dan dowun dan indoc mes dau gin namcir. Dauntoba ELOHIM emdecicugb dan dau touwero. Doba dan dedesma toua. Anai sug dan dens aremeijouhw eisaugb sug lobga se ucina gini dou lusudohob. Hanoba cum, kaba, dan dedreg dau gin toua, kaba, ELOHIM emebin dan touwero. Doba en ecicugb dan namcir. Dangga hang, dan demobga asa ucina gini augwougb touwero. Doba dan daiyan indocesem terimda dan dedebeij se men usi gin toua. Aninim dag sud hom sug en ouwan ogodir, kaba, en emogodir aibibra touwero. Doba en ed mesira beijouhw, dauntoba en ogod beica namcir toua.

1 Korintus 10

10:1 Dangga dan indagunerij, dara dan indamouwerij, sug ELOHIM esedeb ara ara naugb maman dag ginohob, kaba, yen yemamsoho yenin meijaga naugb ahwan yen aud areg yen meigdoc etrij icira deitero. Doba yen yowun yenin meigdoc mes arjaga dau augwan gin namcir. Dauntoba ELOHIM emdecicugb yen touwero. Doba areg en esedeb naugb yenohob, kaba, ebsugeb naugb yen namcir. Anai yen yecinaga dau sug maman mamjemouwer lagunya dau cinogo Mesir sug nosa, kaba, ELOHIM men umer oiharaga len laugwan. Dara sug len laiga duhu, kaba, en eic duhu besa dau len namcir. Hanoba len laugwan leraga se medi terimda len ledos dig nagama toua. 10:2 Dara len laugwan gin, kaba, Musa en edag mougt mera medam naugb len touohob. Anai sug umer oiharaga len dara len leraga se duhu medi, kaba, gini aninim dag ELOHIM ouci len laugwan dig nagama dou Musa ginohob. 10:3-4 Dara len laugwan gin, kaba, len let ared, dara len leg duhu dau bogo toua. Anai Krisdus enin eng aiseisa len laugwan terimda. Hang sug merijeba len, kaba, en eperwei enin dag igdahab naugb eic duhu dou len toua. 10:5 Dangga sug aimougtut, kaba, ELOHIM eic geigouhw dou len laugwan toua terimda. Doba se lona daiyamo deit, kaba, en eic gomom dou leinyana se lomougwisa. Anai len lemaimo en merero. Doba len leicara laihagab en mer gin namcir. Hang en medoc emeigouhw an len toua deitero. Doba en medoc esrougb an len terimda. Dan demouwan naugb yen meigdoc moc dougwo ELOHIM men geicara areg geb dou maman mamjemouwer gin touwero. Doba dan douwan naugb yen meigdoc eiseisan gin terimda. 10:6 Anai augwan gini esulou maman, dauntoba maman mamdoc emetrij icira areg gecgu aninim dag len ginlo. Doba maman mabehnehino mamanin mamdoc mes dougwo augwan gin namcir. 10:7-8 Hang maman toua, mamesogwa deisa meren geicara naugb maman mamecguna dou seiseij. Dara maman mamohw maman mamaga doum, aninim dag merug hosa dau len touwero. Doba maman mabehnehino mamanin mamaga dau gin terimda. Anai sug len leicara dag gin, kaba, ELOHIM en ogod merug ribu sud hom homoi edeisu se lona hom naugb len lomom debin gin touohob. Augwan gini esogwa deisa areg lusud len log deb se Surad Injil Meb Mohon eisaugb meren geicara gin deb sug nosa touohob, endagai: Sug len lougwan ared debin meren seiseijohob, kaba, len leigtou naugb len letara dara legara aninim debin gin. Hanoba len leisa naugb leinuhwera dara lohw meraga doum deseino meren seiseij gin toua. 10:9 Dara maman mamainyen maman Adehsud naugb sug en ens men goubesa augwougb dou maman. Aninim dag maman mamjemouwer len lainyen ELOHIM sug nosa touwero. Doba se aremer augwan, kaba, maman maod mamina debsa en dous. Anai sug len leicara dag gin, kaba, ELOHIM esa hinogo debin len naugb len lau leinyana dau len lomom toua namcir. 10:10 Dara maman mamenara ucucugb an maman Adehsud eisaugb areg en eic dou maman mougwa hom aninim dag leng nosa gin touwero. Doba areg en eic dou maman, kaba, maman mamdoc ebtou an gin namcir. Anai sug len merdoc aihagab en an areg en eic dou len dag gin terimda, kaba, en esa men malaikad hom aud len naugb en eic gomom dou leinyana dau len toua. 10:11-12 Dangga hang, gareg dau yen en oudesa endag en ogo Yesus dag buc gototo se en medoc mesohob, kaba, eigouhw naugb en emeicara bemaimo areg gecgu graga augwan touwero. Doba en ebehnehino enin medoc mes dougwo augwan gin namcir. Dauntoba maireseb menau geb huhugb emediyebeiya dau en touwero, doba eb naugb en namcir. Anai ELOHIM men geicara geb dou maman mamjemouwer gin, kaba, dag ansins dou maman. Hang len lemog dau augwan gini se Surad Injil Meb Mohon deb naugb maman toua deit. Dauntoba maman mameicara aninim dag len inggaro. Doba areg len log eisaugb len gin, kaba, esulou maman dougwo. Dauntoba maman masid mamanin dau meren geicara augwan gin namcir. Anai lona naugb sug augwan ouwedoc, kaba, ebeij deinyorohob. 10:13 Dangga yen yemaimo areg gecgu ginlo. Doba yen yebehnehino yenin meigdoc mes dougwo namcir. Anai areg ainyen yen, kaba, susugb dau areg ainyen lusud gus touwero. Doba ELOHIM medoc an yen medam namcir, hang en emamsoho yen touwero. Doba sug ara ara ainyen yen, kaba, en ehilon ucina susugb dau gin naugb yen toua. Dauntoba gainyenara gini emaiyan yen touwero. Doba yen yaiyan meigdocesem dougwo gin terimda. Anai en emouwan naugb sug gainyenara hom ingma emedreg dau meijen goubesa touwero. 10:14 Dangga hang, dan indagunerij, dara dan indamouwerij gedig dan indoc gororougb yeni, sug ELOHIM eic gomom dou maman mamjemouwer ansins dou maman dag ginohob, kaba, yen yemaimo leng medigo Yesus naugb yen yemet mog gedig len lesijaresa dou meren seiseij se men igtia touwero. Doba yen yousan yenin dau augwan gin namcir. Anai sug yen yet, kaba, gini aninim dag yen yesijaresa dara yen meigdoc dag hom dara meren seiseij gin touohob. 10:15 Yen yecinaga dag areg dan desulou yen an gin, kaba, dag misen namcir. Anai yen meiju auti aremer augwan ginohob. 10:16 Hang yen yecinaga dau sug maman man sijo dou ELOHIM debin mog an Sogo Mera Mohu. Hanoba maman mag gin toua, kaba, gini aninim dag maman maugwan mamdoc dag hom dara Krisdus naugb en mogwihi oiharaga mamanohob. Dara sug maman makris roti, hanoba maman mat gin toua, kaba, gini aninim dag maman maugwan mamdoc dag hom dara Krisdus naugb sug en maga oiharaga maman gin touohob. 10:17 Anai maman mainyana, doba sug maman matara aninim, kaba, gini dag maman mameinyana deitero. Doba maman maugwan madag maga hom, anai maman maugwan mat dau roti mogo hom ginohob. 10:18 Dara yen meigdoc eiseisan maman mamjemouwer leng Israel meren geicara gin toua. Anai sug len let dau areg gembala gesa taij en eic bauwaharo ingma, kaba, gini aninim dag len laugwan merdoc dag hom dara ELOHIM. Anai areg gembala en ob se boromei gin, kaba, en eic bauwaharo dou ELOHIM enohob. 10:19 Dangga hang, areg dan den dou yen graga, kaba, men meijouhw dag seiseij toua, aninim dag ELOHIM misenei? Era sug len leic mog lauwaharo dou en, kaba, dag en oiharaga mog gin dag misen, hanoba len merdoc dag hom dara seiseij gin touohobei? 10:20 Naro, dan demenara dangga dou yenero. Doba dan den dou yen dag areg lusud leic lauwaharo dou meren seiseij gin, kaba, len lemauwaharo dou ELOHIM misenero, doba len louwaharo dou merna mog mog dous. Dangga hang, yen yemaimo leng medigo Yesus naugb yen yemet mog gedig len lesijaresa dou meren seiseijero. Doba yen yasid yenin dau gin namcir. Anai dan demouwan naugb yen meigdoc dag hom dara merna mog mog touwero. 10:21-22 Era yen youdesa dagiro? Meijen goubesa edreg dau maman Adehsud gini, hang yen youwan naugb yen yeic en medoc eclul dou en touei? Naro, meijen goubesa emedeinyum naugb ginero. Dangga emedeinyum naugb sug yen yeg maman Adehsud men mog an mohu dara merna mog mog meren mog an mohu hwas darem. Dara yen yet dau areg geb se men boromei dara areg geb se merna mog mog meren boromei hwas darem touwero. 10:23 Doba ligbum dau yen, kaba, len lesbes an dan, lendagai: Sug emen emedag Krisdenohob, kaba, gomnomna hom ingma emen dougwo emen toua deitero. Doba ediyebeiya dau emen namcirohob. Dangga areg emen emouwan, kaba, emen emaimo toua terimda. Gini misen. Doba igbum, kaba, dag sogo maga dougwo yen naugb sug yen yemera mera geigouhw touwero. Dara ligbum dau yen, kaba, len lesbes an dan deit, lendagai: Sug emen emedag Krisdenohob, kaba, gomnomna hom ingma emedag mougt naugb emen toua deitero. Doba emen emedag mougt naugb emen emaimo areg emen emouwan gin terimda. Gini misen toua. Doba ingma, kaba, emeinoisa len gus naugb len lemeiji dag lusud mos se Krisdus touwero. 10:24 Hang se meijen geicara augwan, kaba, yen yemed yenin an meijen aremer hom eng emesloulougb naugb yenin dousero. Doba yen yed len gus se meren aremer augwan, dauntoba len lera mera geigouhw terimda toua. 10:25 Sug yen yedouma mog gedig lusud len lohw se usmougb gedig lohwaresa, kaba, yen yemeija meigdocesa gin. Hanoba yen yemeijidougwo len an mog ingga dag lusud leic gini naugb lasijaresa dou seiseijohob touwero, doba yen yet augwan dareg yen meigdoc esgiraha namcir. 10:26 Anai Daud en erba Ugwaremer an gini deb se Surad Injil Meb Mohon deb sug nosa touohob, endagai: Cinogo dara areg geb se gin, kaba, maman Adehsud en moho aiga augwanohob. 10:27 Dangga toua, sug sud hom dau leng medigo Yesus en acgeij yen naugb yen yetara desij en se men tu. Hanoba yen yousa deisa en mer naugb yen yedetara desij en toua, kaba, yen yemeija meigdocesa gin. Hanoba yen yemeijidougwo en an ared ingga dag lusud leic gini naugb lesijaresa dou seiseijohob touwero, doba areg en eic dou yen, kaba, yen yet augwan gini dara yen meigdoc esgiraha an dous. 10:28 Doba sug sud hom geigtou desij yen se sud hom graga men tu en en dou yen dag ared ingga, kaba, lusud lesijaresa dou seiseijohob, kaba, yen yemeic meijus naugb yen yemet ginero. Doba yen yesga deb namcir. Dauntoba yen yemeic medoc momogo dou sud hom areg en en dougwo yen gin touwero. Doba yen yeic medoc esgiraha dou en. Anai yen, kaba, yen meigdoc esgiraha naugb ared ginohob. Doba en, kaba, en eija mouwesa ared ingga, anai en ecinaga dag lusud lesijaresa dou seiseijohob. Hang en oudesa dag seiseij oiharaga dag misen touohob. 10:29 Doba sud hom dau yen, kaba, en auni dan indir ucugb dou dan, endagai: Dagiro, naugwe hang, sud hom areg en eija mouwesaba gin, kaba, men goubesa inggebga naugb en en dougwo dan an areg dan indoc esgirahesohob gin anara? 10:30 Anai sug dan det gini, kaba, dan den sijo dou ELOHIM naugb ginohob. Dangga hang, sug dan deicara dag ginohob, kaba, dagiro, naugwe hang, sud hom gus en owun dan indoho icira areg dan det gina? 10:31 Dobnaro. Anai sug yen yet, era sug yen yeg, dara se meijen geicara gus gus augwan, kaba, esloulougb dag yen yemeic lusud merdoc mes naugb len lesbes an ELOHIM se aremer hom touwero. Doba eic dag len merdoc agahugouhw an en dous. 10:32 Dangga se meijen geicara augwan, kaba, yen yemeic merdoc momogo dou leng Yahudi, dara lugmahara, dara leng se ELOHIM men goucimdeb len laugwanlo. Doba yen yaimo ucina gedag beim dara obosboro an len, dauntoba yen yeic len merdoc esgiraha dou len terimda. 10:33 Aninim dag dan toua daimo ucina gedag beim dara obosboro an lusud laugwan. Dauntoba len merdoc momogo icira indan geicara homero. Doba dan deic len merdoc esgiraha dou len terimda toua. Dangga hang, se aremer augwan, kaba, dan demed danin deseino lenero. Doba dan ded len gus se meren aremer augwan namcir, dauntoba len lemetohob dan aud dum smougb touwero. Doba indan geicara augwan, kaba, ahwan len naugb ELOHIM eigdoc len dau sesar men gogom augwan dous.

1 Korintus 11

11:1 Dangga hang, yen yemarges dau gin touwero. Doba se meijen geicara augwan, kaba, yen yesogwa deisa dan indohotimei mohw se gin terimda. Aninim dag dan toua demarges dau Krisdus en mer gin touwero. Doba dan desogwa deisa en mohotimei mohw an areg en arougb maman an gin toua terimdohob. 11:2 Dan den sijo medam dou yen, anai yen yen dou dan dag yen meigdoc moc dougwo areg dan desai dou yen sug nosa touwero. Doba yen meigdoc eiseisan augwan gin naugb yen yaimo terimdohob. 11:3 Danggohob, kaba, dan douwan naugb yen meigdoc moc dougwo ligida len lemedag mougt naugb ligiji touwero. Doba yen meigdoc eiseisan dag ligiji, kaba, len ledag mougt naugb ligida dous. Aninim dag Krisdus, kaba, en edag mougt naugb ligiji. Dara ELOHIM, kaba, en edag mougt naugb Krisdus touohob. 11:4 Sug yen yedag mougt naugb ligida dag ginohob, kaba, yen yemeic serei naugb yen yemohud yen meijugt sug yen yocuncum, era sug yen yesai ELOHIM en moro se tuari touwero. Doba yen yeicara yaimo dangga dara yen meijugt mogud dous. Anai sug yen yeic serei naugb yen yohud yen meijugt, kaba, gini aninim dag yen yowun yenin meijoho dag ligida. Hang yen yeic igdebes dou Krisdus meijen mougt gin touohob. 11:5 Dangga toua, yigida sug yen yocuncum se tuari, era sug yen yesai ELOHIM en moro dou lusud se meijen goucimdeb, kaba, eigouhw naugb yen yeic serei naugb yen yahud dougwo yen meijugt nosahabi, yen yemacuncum, era yemasai ELOHIM moro dou len toua. Anai sug yen yocuncum dara yen yesai ELOHIM en moro dou lusud dara yen meijugt mogud dous, kaba, yen yeic igdebes medam dou meijen mougtir dau ligiji laugwan namcir. Anai sug yen yeicara dag gin, kaba, yeni aninim dag ligida gedig len legina len merugt modi dau. Hanoba len lohw len meraga dou ligiji gus aibibrida touohob. 11:6 Doba sug meijen geicara aninim dag ligida gedig len meraga eijouhw dag ginohob, kaba, eigouhw naugb yen yegina yen meijugt modi dau, aninim dag len toua. Dobnaro. Anai sug yen yeicara dag gin, kaba, eic igdebes medam dou yen toua namcir. Dangga hang, yen yemocuncum dara yen yemesai ELOHIM en moro dara yen meijugt mogud touwero. Doba yen yeic serei naugb yen yahud dougwo yen meijugt nosahabi, yen yemacuncum dara yemasai ELOHIM en moro dou lusud toua. 11:7 Doba ligiji, kaba, ELOHIM emouwan naugb len lemeic serei naugb lemahud dougwo len merugt touwero. Doba yen yehig dau namcir, anai en esinsin ligiji eng se men obob. Hanoba en ogugwo enin men gogouf cucugb ingma dou len touohob. Doba ligida, kaba, ELOHIM ogugwo ligiji men gogouf cucugb ingma dou len. 11:8 Anai en emesinsin ligiji dau ligida ginero. Doba en esinsin ligida dau ligiji dous. 11:9 Dara en emesinsin ligiji naugb ledeijan ligidero. Doba en esinsin ligida dous eng naugb ledeijan ligiji. 11:10 Dangga hang, sug ELOHIM esinsin ligida naugb len ledeijan ligiji dag ginohob, kaba, en emouwan naugb len locuncum dara len lesai en moro dara len merugt mogud touwero. Doba sug len leicara dangga se men goucimdeb, kaba, en ouwan len leic serei naugb len lahud len merugt nosahabi, len lemaimo toua. Anai sug yen yeis Ari, kaba, malaikadir toua merugwengga desij yenohob. Dangga sug len leija ligida dag len lemeigdoumesa len meroho aninim dag ligijero. Doba len lowun lenin merdoc mes arjaga naugb len leb tainya len terimda, kaba, gini ansins dou len naugb len laimo toua. 11:11-15 Yenin toua yauwam an ginahabi. Anai sug gida hom en ocuncum dou ELOHIM se men tuari. Hanoba en esai en moro dou lusud. Doba augwan gini dara en mougt mogud dous, kaba, gini eic dag yen meigdoc esgirahesa gin touohobei? Naro, gini emeigouhw deseino yenero. Doba yen yowun men geicara gini dag gecgu namcirohob. Dara areg ELOHIM en esinsin, kaba, ens meijouhw dag gin dou yen touohob. Anai sug giji en mougt modi agas, kaba, en owun enin moho dag ligidohob. Hang eic igdebes medam dou en toua namcir. Doba naugb ligida, kaba, ELOHIM eic mougt modi agas dag serei dou len teiteiyohob. Hang emeic igdebes dou len touwero. Doba eic dag len leic merus an gin deseino lusud terimda. Dangga sug yen youcimdeb naugb yen yeis Ari, kaba, ligiji dous eng ledag mougt naugb ligida. Anai ELOHIM esinsin len dau ligiji ginohob. Doba se Krisdus, kaba, ligiji len meroho emagas emedreg dau ligida. Era ligida toua, len meroho emedreg dau ligiji touwero. Doba deseino maman Adehsud, kaba, len laugwan meroho aninim namcir. Anai aimougtut, kaba, ligida len len dau ligiji. Doba iteitogin, kaba, ligiji toua, len len dau ligida. Dangga gini, kaba, dau mamanin touwero. Doba dau ELOHIM enin dous. 11:16 Doba sug sud hom dau yen, en ohoiya dan indir an areg dan dog dou yen gini, kaba, dan dauni dou en dag ELOHIM men goucimdeb se cinogo gus augwan, kaba, len lemaimo ucina gus touwero. Doba len laimo ucina hom gin terimdohob. Anai emen emesa ucina gus darero. Doba emen emesa ucina hom gin eng dou lusud dous. 11:17-18 Doba eisaugb areg dan desulou yen an ginda, kaba, dan demeigdoumesa yen meijoho an ginero. Doba dan den dougwo yen an gin namcir. Anai aimougtut, kaba, dan douman dau sug yen yeis Ari, kaba, dag yen meigdoc aninim touwero. Doba yen meigdoc edregim naugb yen yenara yaisedim terimda. Dangga hang, meijen geicara gin, kaba, emahwan lusud naugb len leiji dag lusud mos se Krisdus touwero. Doba augwan gini eic dag len merdoc omomtom dau en dous. Dara areg len lenara dou dan eisaugb ginohob, kaba, dan decinaga dag lingma, kaba, len leigdoc loungmen an dous. Doba lingma, kaba, dan dod indina debsa len merir an dag len lenara se misen dou danohob. 11:19 Anai dan decinaga ELOHIM en ouwan dag leng areibahau, kaba, len merdoc agas naugb len lenara laised an areg lusud lebedbed se tuari gin toua terimda. Dauntoba maman maiya dau leng Krisden misen len laugwan asesa toua. Anai len, kaba, len lemenara lemaised lusud merir an areg len lebedbed ginero. Doba len lowun lenin merdoc mes arjaga naugb len laimo augwan gin toua. Hang ELOHIM ouma debin len dag len ledag men lusud misenohob. 11:20-21 Dara lusud leden dou dan toua, dau sug yen youcimdeb naugb yen yeg Sogo Mera Mohu, kaba, dag yen yemeigtou naugwim habero. Doba astesda sud hom sug en einesa tuari mesohob, kaba, en etara dara egara ineino dou enin dous toua. Dangga eic dag cum, kaba, ligbum len mersdemaga embreij an namcir. Doba ligbum, kaba, sireber lenaba, anai yen yemekeba ared ingma an lenero. Doba yen yet augwan bouwa dau lenohob. Hang areg yen yet se ELOHIM men tuari gin, kaba, dag Sogo Mera Mohu misen touwero, doba susugb namcir. 11:22 Doba dagiro, naugwe hang, yen yeicara dag gina? Meijen tu naugb sug yen yetara dara yegara sungga, kaba, ingmaro, hang yen yemebara danggei? Era yen youwan naugb yen yowun ELOHIM men goucimdeb. Dara yen yeic igdebes dou leng meren ara ara emeb naugb lenero len laugwan toua ingginei? Yen youdesa endag dan deigdoumesa yen meijoho an gini touei? Naro, dan demeigdoumesa yen meijoho an ginero. Doba dan dowun yen meijoho an gin dous. 11:23-24 Anai maman Adehsud enin eng ens dou dan dag se loba sug Yudas ohw en se leng Yahudi meren mougtir merisirohob, kaba, en os roti mogo hom icira en mesira. Hanoba en en sijo dou ELOHIM naugb gin toua. Dauwohob, kaba, en ekris roti ingga. Hanoba en enara dou men logodeh, endagai: Astesda sug yen yet roti dag gin se lona daiyamo gacin, kaba, yen yeiseisan dan. Anai roti gin, kaba, dan indaga gedig dan deic dou ELOHIM naugb meijen sesar augwanohob. 11:25 Dangga toua, sug len let roti dauwohob, kaba, en os mog an anggur mohu. Hanoba en enara dou len deit, endagai: Astesda sug yen yeg anggur mohu dag gin se lona daiyamo gacin, kaba, yen meijina eiseisan dan indugwihi gin terimda. Anai anggur mohu gini, kaba, ansins dag dan indugwihi eir naugb meijen sesar augwan touohob. Hang ELOHIM men gos dou menau gin, kaba, emediyebeiya dau yen touwero. Doba ouma debin gin dag ebsugeb naugb yen terimda. Aremer gin, kaba, dan dens augwan gini dou yen sug nosa touohob. 11:26-27 Dangga gareg dau yen en et roti dara en eg sogo mera mohu, doba dag augwougb dous, kaba, gini aninim dag en owun maman Adehsud en moho. Hang en ebesesar an en maga dara en mogwihi gin touohob. Anai astesda sug yen yet roti dara yen yeg sogo mera mohu, kaba, gini ansins dou lusud dag maman Adehsud en omom taiba sogo salib naugb meijen sesarohob. Dara yen yemeigtou dau sug yen yeg sogo mera mohu gin touwero. Doba yen yeicara yaimo dangga terimda edebeij Lona Sug En Ecicugwen toua. 11:28 Dangga hang, esloulougb medam naugb sug astesda sud hom yom dau yen, kaba, en ehilon enin medoc mes nosahabi, en emet roti dara en emeg sogo mera mohu gin toua. 11:29 Anai sug yen yetara dara yegara yaunun, kaba, cum, ELOHIM eic gogom dou yen namcir. Anai yen yemeigdoumesa roti dara sogo mera mohu dag Yesus maga dara en mogwihi touwero. Doba yen youdesa dag roti dara sogo mera mohu gin, kaba, dag misen dous. 11:30 Hang leinyana dau yen, kaba, len meraga omomtom dara areber. Dara ligbum, kaba, len lomom icira gin touohob. 11:31 Dangga eigouhw naugb mamanin mahilon mamanin mamdoc mes nosahabi. Dauntoba maman mameg Sogo Mera Mohu gin augwougblo. Doba maman mag dara maman mamdoc ecabeci namcir. Anai sug maman maogmac mamanin mamdoc mes dag gin terimda, kaba, ELOHIM emogod gogom deb naugb maman touwero. Doba en amsoho maman namcir. 11:32 Doba sug maman Adehsud eic mog erij dou maman icira ginohob, kaba, maman mamen dougwo gogom areg en eic dou maman gin touwero. Doba maman maimo ucina gin terimda. Anai en eicara dangga an maman, dauntoba en emeic mor mor se dum smougb dou maman. Aninim dag lusud gedig Bilis oiharaga len se cinogo gin touwero. Doba sug maman marges dau maman geicara gecgu augwan debohob, kaba, maman mamoubro oho dau gin namcir. 11:33-34 Dangga dan indagunerij, dara dan indamouwerij, sug yen youcimdeb naugb yen yeg Sogo Mera Mohu, kaba, yen yemet roti, dara yen yemeg sogo mera mohu ineino dau len gus touwero. Doba yen yeigtou naugb len gus laugwan lacinimahabi, yen yaugwan yemeg Sogo Mera Mohu aninim toua. Anai sug yen yacinim naugb yen yogo ara gaihim se ELOHIM men tuari dag gin, kaba, en eic gogom medam dou yen. Hang gareg dau yen sug sirebeni, kaba, eigouhw naugb en etara teitei se men tuahabi, en emeg Sogo Mera Mohu ucan gin toua. Doba aremer gus, kaba, yen yeigtou yateteij terimda dan dedebeij yenahabi, dan demens augwan asesa dou yen toues.

1 Korintus 12

12:1-2 Dan indagunerij, dara dan indamouwerij, yen yecinaga dag sug nosa, kaba, lusud lahwan yen aud seiseij gedig len lemenara mohoro naugb yen yesijaresa len terimda. Anai se lona ingga, kaba, yen meigdoc emebdebin an Krisdus touebma. Doba yen yedag leng medigo Yesusaba. Hang dan douwan dens dau mou gouforoho dara goubesa areg Mena Gogoufu eic dou mamanohob meijouhw augwan asesa dou yen toua. Dauntoba yen yemeija meijuwesa gin deitero. Doba yen meigdoc eica gin namcir. Anai gini aimo dau areg yen yeijidougwo dan an se meijen suradohob. 12:3 Dangga aimougtut, kaba, dan douwan naugb yen yecinaga dag gareg en ouwara dougwo Yesus terimda, kaba, gini ansins dag Mena Gogoufu emeinesa en medoc mes touebma. Doba en aimo merna mog mog len merir smougb mougwaba. Anai sud hom areg en eicara baimo Mena Gogoufu en mer, kaba, en emeicara dag gin deitero. Doba en arges dau namcirohob. Dangga toua, sud hom areg en eic mos naugb en os badi Yesus moho dag men mougt mera medam deseino lusud, kaba, gini ansins dag Mena Gogoufu einesa en medoc mes dag misen touohob. Anai sug Mena Gogoufu emeinesa se en medoc mesbuma, kaba, men goubesa naugb gin toua ingmaro. Doba en ahau dau gin namcir. 12:4 Doba mou gouforoho dara goubesa areg geb naugb maman gin, kaba, naugb aremer hom dousero, doba naugb aremer aingma aingma augwanda. Dara emen dau merna mog mog einyana touwero, doba en dau Mena Gogoufu hom gin dous. 12:5 Hang ucina naugb sug maman maicara, kaba, emedag hom touwero. Doba susugb namcir. Doba augwan gini, kaba, naugb maman Adehsud hom gin dous. 12:6 Dara mou gouforoho dara goubesa naugb sug maman maimo maman ucina gin, kaba, augwan aninim touwero, doba susugb toua terimda. Doba ELOHIM hom eng eic gin augwan dou maman dous. 12:7 Dangga hang, astesda sud hom dau maman, kaba, Mena Gogoufu eic mou ouforoho era goubesa naugb ara ara dou en. Hanoba ens dou maman dag en einesa maman mamdoc mes toua namcirohob. Dara mou gouforoho dara goubesa areg en eic dou maman ginohob, kaba, naugb mamanin touwero, doba naugb sug maman mausem ucucugb terimda. 12:8 Anai dou sud hom, kaba, Mena Gogoufu eic mou ouforoho dou en. Dauntoba sug en ecinaga areg asesa ELOHIM enin medoc mes augwanohob, kaba, dag en ens ucina se geica asesa dou lusud. Dara sud hom gus, kaba, Mena Gogoufu eic mou auti dou en naugb sug en edidib meijouhw augwan asesa debin gin dou len toua. 12:9 Dara sud hom deit, kaba, Mena Gogoufu eic goubesa dou en. Dauntoba sug en acgeij ara ara dau ELOHIM naugb len gus, kaba, en emeija mouwesa gin touwero. Doba en od mena debsa en an gin namcir. Hang ELOHIM emeic dou en. Dara sud hom gus, kaba, Mena Gogoufu eic goubesa dou en naugb sug en eic geingmos agauwesa dou leng areber toua. 12:10 Dara sud hom gus, kaba, Mena Gogoufu eic mou ouforoho dou en naugb sug en esai ELOHIM moro dou lusud. Dara sud hom deit, kaba, en eic goubesa dou en naugb en aben ganusbus debin areg lusud lesai gin toua. Dauntoba len lecinaga dag augwan gin, kaba, dau ELOHIM dag misenohob. Dara sud hom deit, kaba, Mena Gogoufu eic mou aiso dou en. Dauntoba en ecinaga dag areg lusud lesai dou len gus, kaba, en dau ELOHIM era en dau merna mog mog dousei? Hanoba en ed aremer meijouhw daum asesa dou lusud toua. Dara sud hom gus, kaba, en eic mou ouforoho dou en naugb en enara se leci aingma aingma. Dara sud hom deit, kaba, Mena Gogoufu eic mou auti dou en. Dauntoba sug en ecinaga sud hom graga en mer gec aingma aingma ginohob, kaba, en ens meijouhw augwan asesa dou leng se goucimdeb toua. 12:11 Doba aremer gin augwan, kaba, en dau Mena Gogoufu hom dous. Hang en emaimo maman an areg mamanin mauwam an touwero. Doba en eic mou ouforoho era goubesa dou maman aimo dau areg enin ouwan toua. 12:12 Dangga hang, maman maugwan madag hom se Krisdusohob. Doba maman geicara, kaba, susugb namcir. Aninim dag maman mamaga, kaba, dag hom. Doba areg ged maga hom gin, kaba, einyana toua. Dara areg ged maga hom gin, kaba, meren geicara naugb lenin touwero. Doba augwan naugb maga hom gin dous. 12:13 Dangga toua, sug nosa, kaba, emen dau leng Yahudi. Dara yen, kaba, dau lugmahara. Dara lingma deit, kaba, len ledag lusud misen. Dara merug hosa, kaba, len ledag sogougb toua. Doba sug Mena Gogoufu einesa maman mamdoc mesohob, kaba, maman mamoho emedregim toua deitero. Doba maman maugwan madag Krisdus en maga hom dous. Anai sug ELOHIM esa Mena Gogoufu dou maman, kaba, en emesa mena einyana susugb aud mamanero. Doba en esa Mena Gogoufu hom dous eng naugb en oiharaga maman se maga hom gin toua terimda. 12:14 Hang maman maugwan dag Krisdus maga hom dous. Doba maman geicara, kaba, susugb namcir, aninim dag maman mamaga dag hom. Doba areg ged maga hom gini, kaba, einyana toua. 12:15 Dangga sug sud hom en enara dou maga, endagai: Dan demedag mesirero, doba dan dedag mohora dous, kaba, gini aninim dag eni susugb dau magahobei? Naro, eni susugb dau maga touwero. Doba en toua ed maga gin terimda. 12:16 Era sug sud hom en enara dou maga, endagai: Dan demedag mairesero, doba dan dedag moms dous, kaba, gin edeinyum naugb en susugb dau maga gin touohobei? Naro, eni susugb dau maga touwero. Doba en ed se maga hom gin toua terimda. 12:17 Anai sug maga augwan edag mairesi dous, kaba, dagiro, naugwe hang, sug en oumana? Era sug augwan edag moms, kaba, dagiro, naugwe hang, sug en ohu mebes an ara ara gin toua? 12:18 Dobnaro. Anai ELOHIM en emesinsin maga augwan dag hom ginero, doba en eic augwan susugb. Hanoba len laugwan led maga hom gin namcir, aimo dau areg enin ouwan toua. 12:19-20 Dangga hang, maga, kaba, dag hom namcir. Doba areg ged maga gin, kaba, einyana. Anai sug maga augwan edag moms, era mairesi, era mohora dous, kaba, dagiro naugb maga gina? Maga toua moonggei? Naro, maga toua ingmaro. 12:21 Dangga hang, sud hom en edag mairesi, kaba, en emowun sud hom gedag mesira dag eni emesloulougb naugb en. Dara sud hom en edag mougt, kaba, en emesbes an lusud gedig len ledag mohora dag len lemesloulougb naugb en touwero. Doba len larges merir dau gin namcir. 12:22 Anai maman maugwan, kaba, masloulougb animohob. Dara gin dousero, doba areg edag omomtom se maman mamaga, kaba, maman maigdoumesa augwan gini dag esloulougb naugb maman. 12:23 Hang areg meroho eb tainya se maga gin, kaba, maman mamesbes an len touwero. Doba maman masedougwo len deigeigouhw edreg dau len gus laugwan namcir. Dara areg geic igdebes dou maman, kaba, maman mamens ainyes dou lusud touwero. Doba maman mag sansun maihiron dougwo edreg dau areg geb se maga hom gini augwan toua terimda. 12:24 Hang ELOHIM esinsin maga edeinyum naugb maman maigdoumesa areg geb tainya dara areg geic igdebes dou maman edreg dau areg geb se maga gus gus augwan toua. Anai areg gus augwan gin, kaba, eigouhw teiteiyohob. 12:25 Anai en emouwan naugb maman mamdoc emedregim se maga hom ginero. Doba en ouwan naugb maman mamdoc anim ucucugb namcir dous. 12:26 Dangga sug gogom eb debin sud hom dau yen, kaba, yen yaugwan yaimo en se ucina mog erij gini. Dara sug len gus leigdoumesa sud hom dau yen en moho, kaba, yen yaugwan yaimo en se gin toua. 12:27 Anai astesda dau yen, kaba, en ed Krisdus maga ginohob. Hang yen yemedag hom gin toua. 12:28 Sug yen yedag hom se Krisdus maga dag ginohob, kaba, ELOHIM eic mou ouforoho dara goubesa susugb dou yen toua. Dangga aimougtut, kaba, en eic mou ouforoho dou ligbum dau yen naugb len lesai Mer Geigouhw eisaugb Krisdus meijouhw augwan asesa dou lusud. Anai hom gin, kaba, esloulougb edreg dau areg gus augwan namcir. Dauwohob, kaba, en eic mou ouforoho dou lingma deit naugb len lens en mer dou yen sug aremer inggebga, era naugb areg gen daiyamo toua. Ucan deit, kaba, en eic mou ouforoho dou ligbum naugb len ledidib ELOHIM men meijouhw augwan asesa dou yen. Doba lingma, kaba, en eic goubesa dou len naugb len laben ganusbus lauma debin en mer. Dara lingma deit, kaba, en eic goubesa dou len naugb len leic geigouhw dou leng areber. Hanoba len locirma merna merna mog mog dau lusud toua. Dara merug hosa dau yen, kaba, ELOHIM eic goubesa dou len naugb len merdoc erij an lusud namcir. Hanoba len lousa leng merunggwereij dara leng mecicgu toua terimda. Doba lingma deit, kaba, en eic mou ouforoho dara goubesa dou len dauntoba len ledag mougt naugb goucimdeb. Dara ligbum dau yen, kaba, en eic mou ouforoho dou len naugb sug len lec merir aingma aingma toua. 12:29 Dangga hang, astesda dau yen, kaba, emedeinyum naugb sug en esai Mer Geigouhw eisaugb Krisdus. Dara en ens areg asesa ELOHIM enin medoc mes. Dara en edidib meijouhw eisaugb Krisdus augwan asesa dou lusudero. 12:30 Dara astesda dau yen, kaba, men goubesa emedeinyum naugb sug en aben ganusbus. Dara en eic geigouhw dou leng areber. Dara en mou ouforoho emedeinyum naugb sug en ec merir aingma aingma. Dara en ens dau areg len lec gini meijouhw asesa dou lusud touwero. Doba ELOHIM eic mou ouforoho dara goubesa bedreg dou astesda sud hom yom se meijen goucimdeb ginohob. 12:31 Dangga hang, yen meigdoc emerleij icira naugb sug yen yaben ganusbus. Dara yen yec merir aingma aingma gin touwero. Anai augwan gini, kaba, moho eb tainya dous. Doba yen yacgeij ELOHIM ucucugb terimda. Dauntoba en eic mou ouforoho dou yen naugb sug yen yesai Mer Geigouhw eisaugb Krisdus. Dara yen yens areg asesa ELOHIM enin medoc mes. Dara yen yedidib meijouhw eisaugb Krisdus augwan asesa dou lusud. Anai augwan gin, kaba, moho eb taiba namcir. Doba sug yen yaimo mou ouforoho era goubesa areg ELOHIM ekeba dou yenohob, kaba, areg esloulougb edreg dau ara gus augwan, kaba, dag yen meigdoc gororougwim debin gin toua.

1 Korintus 13

13:1 Dan dens ucina gini dou yen, anai sug dan indu ouforoho edeinyum naugb sug dan dec leng se cinogo dara malaikad len merir augwanohob. Doba dan indoc gororougb lusudero, kaba, dan dedag bleg mes gohulugb era areg lusud louma mougb eisa augwougb dangga dous. 13:2 Era sug ELOHIM ens dau areg asesa enin medoc mes dou dan, hanoba en eic mou ouforoho dou dan naugb dan desai dou lusud. Era sug en esga areg en esedeb naugb lusud dou dan. Dara dan decinaga areg gus meijouhw augwan asesa. Dara dan indoc an ELOHIM edeinyum naugb sug en eic goubesa dou dan naugb dan denara dou menmod augwan leisa dau meruhw toua. Doba dan indoc gororougb lusudero, kaba, emeigdoumesa dan indoho an gin touwero. Doba eic dag dan indoho eb tainya namcir. 13:3 Era sug dan dekeba indan ariloboc augwan dou lusud, hanoba dan dohw dan indugt edug naugb lusud lec dan indaga se smougb icira sug dan indoc ebdebin an Krisdus gin toua. Doba dan indoc gororougb lusudero, kaba, dan demec mera hom icira gin touwero. Doba augwan dag augwougb dous. 13:4 Dangga hang, yen yemeimiman yenin meijoho, hanoba yen yemeisidged yenin meijaga an deseino lusud, dara yen meigdoc emeclul an len gus sug areg geigouhw eb naugb len, dara yen yemauni gogom ucugb dou lusud dedemeda touwero. Doba yen yeigtou yateteij len. Hanoba yen yauni geigouhw ucugb dou len dous. Anai sug yen yeicara dag gin, kaba, yen meigdoc gororougb lusud dag misen namcirohob. 13:5 Dara yen yemeigdoumesa yenin meijoho dedemeda touwero. Doba sug yen meigdoc gororougb lusud dag misen, kaba, yen yed len deseino dauwahabi, yen yemohw yenin daiyamo. Dangga toua, sug lusud leic gogom dou yen, kaba, yen meigdoc emesrougb naugb yen yemenara mog mog dou len. Dara yen meigdoc emeiseisan gogom areg len leic dou yen gin touwero. Doba sug yen meigdoc gororougb lusud dag misen, kaba, yen youf meijirs dougwo augwan gin namcir. Hanoba yen meigdoc ougwo toua. 13:6 Hang yen yemeimiman dau lusud sug len ledreg dau areg asesa ELOHIM enin medoc mes gin touwero. Doba sug yen meigdoc gororougb len dag misen, kaba, yen yagahugouhw an len sug len laimo areg asesa ELOHIM enin medoc mes se geica namcir. 13:7 Dara sug yen meigdoc gororougb lusud, kaba, yen yemobsara dau ucina gini sug len leic mog erij dara leicara gecgu an yen touwero. Doba yen yaiyan meigdocesem naugb yen yes agadgeij terimda. Dara sug yen yaimo ucina medoc gororougb an lusud, kaba, yen yemens dau lusud meren aremer dedemeda dou lusud gus touwero. Doba yen yod aremer gecgu augwan gini se simei. Hang yen meiju emogdogda len gus an meren geicara augwougb touwero. Doba sug yen yemeiya gansins ingmaro, kaba, yen yeigdoumesa meren geicara augwan dag eigouhw dous. Dara yen yemasid lusud an meren gecgu dedemeda touwero. Doba sug yen meigdoc gororougb len dag misen, kaba, yen yod meijina debsa len dag lona daiyamo gacin, kaba, len lemaimo areg geigouhw dara obosboro ucugb deits. 13:8 Dangga hang, yen yemobsara dau sug yen meigdoc gororougb lusud touwero. Doba yen yeicara yaimo dag gini an len terimda. Anai areg yen yesai dou lusud gin, kaba, cum, emdouwedoc. Dara areg Mena Gogoufu eic mou ouforoho dou yenohob naugb sug yen yec meijir susugb aingma aingma gin, kaba, cum, arges doc. Dara areg yen meiju auti meijouhw ginohob, kaba, cum, ediyebeiya namcir toua. Doba sug yen meigdoc gororougb lusud, kaba, gini emouwedocero, doba eb huhugb terimda. 13:9 Dangga toua, areg yen yesai, dara areg yen meiju auti meijouhw gin, kaba, augwan emedeinyumbuma. 13:10 Doba sug Krisdus en ecicugwen, kaba, en emens meijouhw dau augwan asesa dou maman toua. Hang se lona ingga, kaba, yen yemesai ara ara dou lusud, dara yen meiju emauti aremeijouhw dag gin toua deitero. Doba augwan ouwedoc, anai yen yecinaga augwan dag misen namcirohob. 13:11 Augwan gin, kaba, aimo dau sug dan dedag dugdehaba. Anai se lona ingga, kaba, dan indoc toua dag dugdeh. Hang indan gauwamara dara indan genara, kaba, augwan dag logodeh meren gauwamara dara meren genara toua terimda. Doba sug dan dedag lusud mosohob, kaba, dan demeicara dag logodeh deitero. Doba dan darges augwan gin deb namcir. 13:12 Dangga hang, iteitogin, kaba, maman toua mameiya areg naugb lona daiyamo gacin dag misen touebma. Aninim sug maman maiya maman mamina se duhu, kaba, maman mameiya mambes dag misen touebma. Doba edebeij Lona Sug Krisdus En Ecicugwen, kaba, maman maiya augwan asesa dag misen namcir. Dara iteitogin, kaba, maman mamecinaga augwan dag misen touebma. Doba se Lona ingga, kaba, maman macinaga augwan dag misen, aninim dag ELOHIM ecinaga areg eisaugb dan augwan dag misen touohob. 13:13 Dangga hang, aremer mamdoc ebdebin an ELOHIM, dara maman maod mamina debsa en an areg en esedeb naugb maman augwan. Dara maman mamdoc gororougwim, kaba, homoi gin dous eng ebsugeb naugb sug maman maimo terimda. Doba hom areg moho agas edreg dau gin, kaba, dag maman mamdoc gororougwim namcir.

1 Korintus 14

14:1 Dangga hang, yen yemasid yenin dau sug yen meigdoc gororougb len gus touwero. Doba yen yaimo ucina gini anim ucucugb terimda. Hanoba yen yacgeij Mena Gogoufu naugb en eic mou ouforoho dara goubesa aingma aingma ucan gin dou yen toua. Doba areg esloulougb edreg dau areg gus augwan namcir, kaba, dag yen yacgeij en naugb en eic mou ouforoho dou yen. Dauntoba yen yesai ELOHIM en moro dou lusud terimda. 14:2 Anai gareg dau yen en mou ouforoho naugb en eci mer susugb, kaba, en emenara dou men lusud se meijen goucimdeb touwero. Doba en eic banara dou ELOHIM enin dous. Anai en eci dau areg misen gedig Mena Gogoufu ens dou enohob. Doba se mer susugb dou len dous. Hang len lemecinaga meijouhw augwan asesa touwero. 14:3 Doba gareg en esai ELOHIM en moro dou lusud, kaba, en emenara dou ELOHIM enero, doba en enara dou lusud. Anai areg en ens dou len gin, kaba, se mer susugwero, doba se lenin meren leci dous. Hang emousa len naugb len leiji dag lusud mos se Krisdus. Dara len laiyan merdocesem, hanoba enara bad len merdoc mes toua terimda. 14:4 Dangga gareg en eci mer susugb, kaba, en ousa enin dous naugb en eiji se Krisdus. Doba gareg en esai ELOHIM moro se lenin meren leci dou lusud, kaba, en ousa len laugwan naugb len leiji dag lusud mos se Krisdus toua. 14:5 Hang areg esloulougb bedreg dau areg gus augwan namcir, kaba, dag dan douwan naugb yen yaugwan yesai ELOHIM moro dou lusud nosahabi. Anai gareg en esai en moro dou lusud, kaba, en ousa len edreg dau sud hom areg en eci mer susugb gin namcir. Anai en esai ELOHIM moro se lenin meren leci dou lenohob. Gin dauwohob, kaba, eigouhw naugb yen yaugwan yec meijir susugb ucan gin toua. Doba sug yen yec meijir susugb gin se meijen goucimdebohob, kaba, esloulougb naugb sud hom gedig en mou ouforoho en toua moongga se goucimdeb naugb en ens meijouhw ucan gini dou lusud. Dauntoba ousa len naugb len leiji se Krisdus toua. 14:6 Anai sug dan dedebeij yen se meijen goucimdeb. Hanoba, dan desai dau areg ELOHIM en esedeb naugb lusud, dara dan dens meijouhw dau gini dou yen. Dara dan dens dau aremer areg ELOHIM en ouwan, hanoba dan dedidib meijouhw augwan ucan dou yen toua. Doba augwan gini se mer susugb, kaba, dan demousa yen naugb yen yemeiji dag lusud mos dagiro? Naro, dan demousa yenero. Doba sug sud hom en eperwei areg dan debedbed dou yen gini se meijen leci. Hanoba en ens meijouhw dau augwan gin dou yen, kaba, gini dag dan dousa yen naugb yen yeiji dag lusud mos se Krisdus gin touohob. 14:7 Dangga toua, sug lusud lohw sulin era lod isadum, doba augwougb dous, kaba, dagiro, naugwe hang, lusud lemecinaga men meijouhw gina? Anai hwas gin, kaba, emedag lusud naugb lenara mohoro. Doba lan marir augwougb dangga dous. Doba sug lusud lohw hwas gini aimo dau mer aududi, kaba, lusud lecinaga moho asesa toua. 14:8 Era sug lusud lohw higbei mougb, doba augwougb dous, kaba, dagiro, naugwe hang, sadodor lesedeb naugb len lesara dara meren moca? Naro, len lemesedeb touwero. Doba sug len lohw higbei mougb sug sadodor lecinaga meijouhw asesa, kaba, eic dag len lesedeb naugb lesara dara meren moc toua. 14:9 Dangga toua, sug yen yebedbed dou lusud, doba augwan gini se meijir susugb, kaba, dagiro, naugwe hang, len lecinaga meijouhw asesa dau areg yen yen dou lena? Naro, len lemecinaga meijouhw augwan dag misenero. Hang areg yen yen gini, kaba, dag yen meijirs obdobdem an gin dangga dou len dous. 14:10 Anai se cinogo gin, kaba, lusud lemeci merir hom dousero, doba leci merir einyana inggebga. Hanoba astesda meren leci gin, kaba, men meijouhw toua moongga. 14:11 Doba sug dan demecinaga meijouhw dau areg sud hom en eci dou dan ginero, kaba, dan deija en dag lugmahara. Hanoba en toua eija dan dag lugmahara namcir. 14:12 Dangga hang, sug yen meigdoc erleij naugb Mena Gogoufu eic mou ouforoho dara goubesa aingma aingma dou yenohob, kaba, yen yacgeij en naugb en eic mou ouforoho dara goubesa areg ousa goucimdeb dou yen toua. Dauntoba yen yousa len naugb len leiji dag lusud mos se Krisdus, anai gini esloulougb edreg dau areg gus augwan namcir. Hanoba yen yecgun meisira debin gini naugb yen yaimo augwan an len toua terimda. 14:13 Dangga gareg dau yen en mou ouforoho naugb en eci mer susugb ginohob, kaba, esloulougb medam naugb en acgeij Mena Gogoufu. Dauntoba en eic mou ouforoho dou en naugb en ens dau areg en eci se mer susugb gini men meijouhw asesa dou goucimdeb toua. 14:14 Anai sug dan dec dan indir susugb dag gin, kaba, dan indu emauwam an meijouhw naugb sug dan dedidib dou lusud touwero. Doba gini aninim dag dan denara se dan indoc mes dou ELOHIM dous. 14:15 Dangga hang, areg dan den dou yen gragohob, kaba, men meijouhw augwan dag gini. Sug dan docuncum dou ELOHIM se mer susugb ginohob, kaba, dan docuncum dou en se goucimdeb meren leci. Era sug dan dohw aresgwemer naugb dagahugouhw an ELOHIM se mer susugwohob, kaba, dan dohw aresgwemer se goucimdeb meren leci gin toua. 14:16 Anai sug yen yagahugouhw dara yen yen sijo dou ELOHIM. Doba se mer susugb mogud dous, kaba, dagiro, naugwe hang, len gus lemouma debin areg yen yen sijo gin dag augwan asesa dara misen toua? Anai Mena Gogoufu emeic mou ouforoho dou len naugb len lecinaga meijouhw asesa touebma. 14:17 Hang yen yemousa len naugb len leiji dag lusud mos se Krisdus touwero. Doba gini naugb yenin dous. Anai areg yen yen dou ELOHIM se mer susugb gin, kaba, eigouhw namcirohob. Doba len gus, kaba, len lemecinaga meijouhw ginero. 14:18 Dan den sijo dou ELOHIM, anai dan denara dou en se mer susugb edreg dau yen yaugwan namcir. 14:19 Doba sug dan doucimdeb dara len gus, kaba, eigouhw naugb dan denara gurereito se meren leci edreg dau sug dan denara einyana se mer susugb dou len toua. Anai sug dan denara einyana dou len. Doba se mer susugb mogud dous, kaba, dan demens meijouhw ara dou lena? Doba sug dan denara gurereito dou len se lenin meren leci, kaba, gini dag dan dens areg se misen dou len, anai len lecinaga meijouhw augwan asesa touohob. 14:20 Dangga dan indagunerij, dara dan indamouwerij, yen meiju edag logodeh meren gauwamara, doba eisaugb areg gecgu dous. Doba eisaugb aremer gec mer susugb, kaba, yen yemedag logodeh deitero. Doba meijen gaugwanara edag lusud mos se gin namcir. 14:21 Anai maman Adehsud, kaba, en og deb se Surad Injil Meb Mohon deb sug nosa touohob, endagai: Dan desa dan indir se mer aingma aingma ingma dara dou indan logodeh. Hanoba dan desa lugmahara toua dou len naugb len lesai dan induro se meren leci dou len toua. Doba len merdoc emeica dan indir ogdoc len gin touwero. 14:22 Dangga hang, mer susugb gin, kaba, emedag ansins dou leng medigo Yesusero. Doba gini dag ansins naugb mamang Krisden misen. Dara gesai Mer Geigouhw eisaugb Krisdus, kaba, edag ansins naugb mamanero, doba edag ansins naugb leng medigo Yesus dous. 14:23 Dangga sug yen youcimdeb, kaba, yen yemec mer susugb mogud dousero. Doba yen yec ara ara se meijen leci toua. Anai sug len gus era leng medigo Yesus len leinesa, hanoba len louman, doba yen yaugwan yec mer susugb mogud dous, kaba, len leigdoumesa yen meijoho an ginei? Naro, len lowun yen meijoho dag mereiyeba yen yaugwan namcirohob. 14:24-25 Doba sug sud hom dau leng medigo Yesus era dau len gus en einesa meijen goucimdeb, hanoba en ouman dau sug yen yaugwan yesai ELOHIM en moro se meijen leci dou len, kaba, areg yen yesai gin, kaba, ogod en medoc mes dag en ebesesarohob. Hang en esga men sesar augwan asesa dou ELOHIM toua. Anai areg en ouman gin, kaba, ens dou en dag ELOHIM ogod gogom medam deinaugb enohob. Hanoba en toua esijaresa ELOHIM. Dara en ouma debin yen dag ELOHIM en toua moongga desij yen dag misenohob. 14:26 Dangga dan indagunerij, dara dan indamouwerij, areg dan den dou yen gragohob, kaba, men meijouhw augwan dag gini. Sug yen youcimdeb naugb yen yesijaresa ELOHIM, kaba, sud hom en einoisa yen naugb yen yaugwan yougbdemer. Dauwohob, kaba, sud hom en edidib meijouhw dau Surad Injil Meb ucan gin deit. Dara sud hom gus deit, kaba, en esai ELOHIM moro ucan gin dou yen toua. Dau, kaba, sud hom gus en eci dau areg se geica se mer susugb gin dou len. Dara sud hom gus, kaba, en ens dau areg en eci se mer susugb gini meijouhw augwan asesa dou goucimdeb naugb sug len lecinaga toua. Anai esloulougb medam dau sug yen yeis Ari gin, kaba, dag augwan ousa lusud. Dauntoba len leiji dag lusud mos se Krisdus namcir. 14:27 Dangga toua, sug lusud merugwengga se meijen goucimdeb gedig len louwan leci merir susugb, kaba, yen youci lahwai era merug homoi dau len dous. Hanoba len lemenara sesem touwero. Doba sud hom enara mer obsara dauwahabi, sud hom en emenara deit. Hanoba sud hom en eisa naugb en ens dau areg len leci se mer susugb gini meijouhw augwan asesa dou len toua. 14:28 Doba sug sud hom ingma en mou emouforoho naugb ginero, kaba, leng leci merir susugb gin, kaba, len lemenara se goucimdeb touwero. Doba len lenara se lenin merdoc mes dou ELOHIM dous. 14:29 Dangga toua, dau leng lesai ELOHIM en moro, kaba, yen youci lahwai era merug homoi dous naugb sug len lens en mer dou yen toua. Dara leng meru aiso gin, kaba, len louma debin len dag areg len lesai gin, kaba, dau ELOHIM dag misenohobei? Era dau mena mog mog dousei? Anai Mena Gogoufu eic mou ouforoho dou len naugb ginohob. 14:30 Doba sug ELOHIM esa en mer menau dou sud hom sug yen yeis Ari, kaba, sud hom graga en emenara terimdero. Doba en arges mer cum dauwahabi. Hanoba en eic cumougt dou sud hom gin deit naugb sug en esai ELOHIM mer menau gin dou yen toua. 14:31 Anai aremer gesai ELOHIM moro gin, kaba, naugb sud hom yom gin dousero. Doba gareg ELOHIM en esa en mer dou enohob, kaba, len laugwan meren goubesa inggebga naugb sug len lesai en mer gin toua. Doba esloulougb medam naugb yen yeicara yaimo gini hom yom aududi dous. Dauntoba sug lusud louman deigeigouhwohob, kaba, len lecinaga dau areg ELOHIM en ouwan meijouhw augwan asesa toua. Dara eic len merdoc aiyansem dou len naugb sug len les agadgeij toua terimda. 14:32 Dangga mer areg ELOHIM esa dou sud hom ginohob, kaba, emedag mougt naugb enero, doba en edag mougt naugb gini. Hang en emesai ELOHIM moro gini augwougb touwero. Doba en esedeb naugb sug en aimo augwan gini aududi namcir. 14:33 Anai ELOHIM en emouwan dau sug maman maucimdeb, kaba, dag maman mamsdemaga emembreij touwero. Doba en ouwan dag maman geicara augwan, kaba, eic maman mamdoc edouder anim terimda. Hang en emouwan naugb maman mamenara sesem touwero. Doba en ouwan naugb maman maimo augwan gin aududi dous. 14:34 Dara dan demouwan ligida, kaba, dag len lemeic merus naugb len lemenara augwougb se meijen goucimdeb toua deitero. Doba len leigtou dag losum dous. Anai gini aimo dau areg ELOHIM en ogod deinaugb len se Surad Injil Meb Mohon deb sug nosa touohob. Hang len lemeigdoumesa lenin meroho dag mougt se goucimdeb touwero. Doba len lowun lenin meroho eb tainya namcir. Anai sug len lenara augwougb dag gin, kaba, eic igdebes dou len gus laugwan toua. Areg dan dens dou yen gini, kaba, susugb dau goucimdeb gus touwero. Doba len laugwan laimo dag gin touohob. 14:35 Dangga sug ligida leija meruwesa an areg len louman dau ELOHIM en mer gin, kaba, len lemeijidougwo mougtir eisaugb gin se goucimdeb ingga touwero. Doba len leigtou terimda len ledebeij se meren tuahabi, len lemdeijidougwo len mersuwer, era sud hom dau len merusur an gin dous. Anai sug ligida leic merus naugb len leijidougwo mougtir an ara ara augwougb se goucimdeb, kaba, meren geicara gini edeinyum naugb eic igdebes dou lusud laugwan toua namcirohob. 14:36 Era dagiro? Sug ELOHIM esa en mer se cinogo gin, kaba, en esa mer gin dou yen hom dousei? Era en dau yen hom touei? Naro, en mer gini, kaba, edebeij len gus laugwan naugb len laimo touohob. 14:37 Gareg dau yen en oudesa Mena Gogoufu eic mou ouforoho dou enohob naugb en esai ELOHIM en moro dou lusud, kaba, en ecinaga dag areg dan den dou yen gin, kaba, dan demen dau danin indoc mes dou yenero. Doba gini dag maman Adehsud enin eng arougb yen an ginohob. 14:38 Dangga hang, sug yen yeiya, doba sud hom graga en emaimo gomnomna ginero, kaba, yen yemebin en touwero. Doba yen yasid en dau yen namcir. 14:39-40 Anai esloulougb medam naugb sug yen yeis Ari, kaba, meijen geicara augwan edouder anim terimda. Hanoba lusud merdoc mes dag len lagahugouhw an toua. Dangga hang, dan indagunerij, dara dan indamouwerij, yen yemen dougwo lusud an sug len leci merir susugb gin touwero. Doba naugb sug yen yesai ELOHIM en moro dou lusud, kaba, yen yecgun mesira debin gin namcir.

1 Korintus 15

15:1-2 Dan indagunerij, dara dan indamouwerij, dan douwan dens dau Mer Geigouhw eisaugb Krisdus areg dan desai dou yen sug nosohob meijouhw augwan asesa dou yen mougwa hom deit. Dauntoba yen meigdoc moc dougworo, doba yen yeiseisan gin terimda. Anai Mer Geigouhw gin, kaba, ens ucina dou yen naugb sug ELOHIM eigdoc yen dau sesar men gogom aud maireseb menau geb huhugb ginohob. Hang esloulougb medam naugb yen yemarges dau gin touwero. Doba yen yaiyan meigdocesem naugb yen meigdoc ebdebin an gin terimda. Anai yen yebin augwan gini dag buc gototo se yen meigdoc mes dag misen sug nosohob. Ga naro, kaba, areg yen yod meijina debsa ginohob, doba dag augwougb dous. Hanoba yen yemera mera hom touwero. 15:3 Dangga hang, sug dan desai Mer Geigouhw eisaugb Krisdus dou yen sug nosa, kaba, dan dens dou yen sug aimougtut dag Krisdus en omom naugb maman sesarohob. Anai gini, kaba, esloulougb edreg dau areg gus augwan namcir, aimo dau areg len log deb se Surad Injil Meb Mohon deb naugb mamanohob. Dara dan desai gin dau danin indoc mes dou yen touwero. Doba Krisdus enin eng ens dou dan. Hang dan demesai dou yen toua. 15:4 Dau, kaba, dan desai dou yen dau sug en omomohob, kaba, dag len lec eni. Doba lona hwai debin gin, kaba, ELOHIM eigdoumesa en dau gomom ucugwohob, aimo dau areg len log deb se Surad Injil Meb Mohon eisaugb gin deb sug nosa touohob. 15:5 Dara dan den dou yen toua dau sug en eisa dau gomom ucugwohob, kaba, dag en ens enin dou Petrus aimougtut. Dau, kaba, en ens enin dou men logodeh merug sisa ucan deit. 15:6 Hanoba en edens enin dou maman mamaguner dara mamdamouwer, merug huntun sergem, len laugwan se lona hom toua. Len gin, kaba, merug aibibra len lomomohob. Doba leinyana, kaba, len merires inggebga iteitoginaba. 15:7 Dauwohob, kaba, en edens enin dou Yakobus. Hanoba en edens enin ucan dou leng lesai Krisdus moro len gus laugwan toua deit. 15:8 Daiyamo namcir, kaba, en ens enin ainyes dou dan toua. Anai dan demedag lugdeh misen gedig merimir louwadanir sug meren cumougt emedeinyum anir touwero. Doba dan dedag godeh hom gedig areised mem an en dous. 15:9 Dangga hang, emeigouhw naugb sug lusud lemeigdoumesa dan indoho dag sud hom gesai Mer Geigouhw eisaugb Krisdus touwero. Doba len lowun dan indoho eb tainya dau len laugwan namcir. Anai sug nosa, kaba, dan deic mog erij medam dou ELOHIM men lusud leinyanohob. 15:10 Doba ELOHIM medoc an dan namcir. Hang en emeigdoumesa dan indoho naugb sug dan desai Mer Geigouhw eisaugb Krisdus dou lusud toua. Dangga, kaba, dan demeigtou an gin deb touwero. Doba dan deic induwemougb esesa naugb dan desai Krisdus moro gin dou lusud edreg dau leng lesai Krisdus moro leng gus laugwan namcirohob. Doba areg dan deic gin, kaba, dau danin indan goubesa touwero. Doba ELOHIM medoc eineg an dan. Hang en emeic enin men goubesa dou dan naugb gin toua terimda. 15:11 Doba sug dan debedbed dou yen, era sug leng lesai Krisdus moro gus len lebedbed dou yen toua, kaba, augwan eigouhw namcir. Anai emen emaugwan emeiya Krisdus dag en eisa dau gomom dag misen ucugwohob. Hang emen ememouma debin gin dou yen toua, dauntoba yen yod meijina debsa gin toua terimda. 15:12 Doba sug emen emouma debin Krisdus dou yen dag ELOHIM eigdoumesa en dau gomom aud maireseb menau geb huhugb dag misenohob, kaba, dagiro, naugwe hang, ligbum dau yen len lenara dag ELOHIM emeigdoumesa lusud dau gomom ucugwero gina? 15:13 Anai sug lusud lemeisa dau gomom ucugwero, kaba, ELOHIM emeigdoumesa Krisdus dau gomom ucugb touwero. Doba en omom terimdaba. 15:14 Dangga toua, sug ELOHIM emeigdoumesa Krisdus dau gomom ucugwero, kaba, areg emen emesai dou yen gin, kaba, augwan dag augwougb. Dara areg yen yod meijina debsa ginohob, kaba, augwan dag augwougb namcir toua. 15:15 Dara gin dousero, doba areg emen emebedbed eisaugb ELOHIM dou yen gin, kaba, augwan gini dag emen emereiyara toua. Anai emen emouma debin en dag en eigdoumesa Krisdus dau gomom ucugb dag misenohob. Doba sug ELOHIM emeigdoumesa lusud dau gomom ucugb dag misenero, kaba, en emeigdoumesa Krisdus dau gomom ucugb dag misen touwero. 15:16 Dangga sug ELOHIM emeigdoumesa lusud dau gomom ucugwero, kaba, en emeigdoumesa Krisdus dau gomom ucugb touebma, doba en omom namciraba. 15:17 Hang areg yen meigdoc ebdebin an ginohob, kaba, augwan dag augwougb dous. Dara ELOHIM emaigdougwo meijen sesar gin touebma. Doba sesar men gogom augwan, kaba, eb naugb yen touaba. 15:18 Dangga toua, leng Krisden gedig len lomomohob, kaba, maireseb menau geb huhugb emeb naugb len touwero. Doba cum, kaba, len laugwan merur mor se dum smougb dous. 15:19 Dara mamang Krisden gedig maman mamiresebaba, kaba, eigouhw naugb lusud merdoc erijan maman edreg dau len gus laugwan namcir toua. Anai sug Krisdus emeisa dau gomom ucugwero, kaba, areg maman maod mamina debsa Krisdus an ginohob, kaba, naugb mamireseb huhugb touwero. Doba naugb maireseb se cinogo gin dous. 15:20 Dobnaro. ELOHIM eigdoumesa en dau gomom dag misenohob. Dangga kaba, maman macinaga dag en emeigdoumesa leng latou debin len merug se Krisdusohob len laugwan aud maireseb menau geb huhugb gin toues. 15:21 Anai sud hom, moho Adam, kaba, en oho gomom deb naugb lusud laugwanohob. Doba sud hom, moho Krisdus, kaba, en ehilon ucina naugb lusud laugwan deit. Dauntoba len lemeigtou se gomom terimdero. Doba len leisa dau gomom ucugb toua. 15:22 Dangga gareg en medoc dag hom dara Adamohob, kaba, en omom namcir. Doba gareg en medoc dag hom dara Krisdus, kaba, en emomom terimdero. Doba ELOHIM emeigdoumesa en dau gomom aud maireseb menau geb huhugb toues. 15:23 Doba augwan audud dag gini: Aimougtut, kaba, ELOHIM eigdoumesa Krisdus dau gomom ucugwohob. Dauntoba en edag sogo mera mebin naugb maman toua. Hanoba se Lona Sug Krisdus En Ecicugwen gin, kaba, en emeigdoumesa maman toues. Anai en moho aiga mamanohob. 15:24 Gin dauwohob, kaba, lona toua augwan ouwedoc namcir. Anai se Lona ingga, kaba, en ahacugb merna mog mog dara meren mougt mera medam an meren goiharaga dara meren goubesa augwan merur mor se dum smougb namcir. Hanoba en ogugwo maman maugwan deb se en Mena mesira ucugb naugb en oiharaga maman beb huhugb terimda toua. 15:25 Anai ELOHIM esedeb Krisdus naugb sug en edag mougt mera medam terimda en aiyan men moc laugwan leb tainya en mohorohob. 15:26 Dau, kaba, en eic mor mor dou men moc, moho Gomom, debin gin, kaba, ouwedoc namcir. 15:27 Anai ELOHIM os deb dangga dou Krisdus se Surad Injil Meb Mohon deb sug nosa touohob, endagai: Dan demogugwo augwan dou bans naugb ban bedag mougt mera medam dougwo augwan gin terimda. Doba sug ELOHIM os dou Krisdus, dauntoba en edag mougt mera medam naugb augwan dag ginohob, kaba, gini aninim dag ELOHIM owun enin moho naugb en eb tainya Krisdus gin touei? Dangga isnaro. 15:28 Anai sug ELOHIM owun augwan eb tainya en Meisi Krisdus, hanoba en edag mougt mera medam naugb augwan gin toua namcirohob, kaba, en Meisi owun enin moho an augwan eb tainya en Mena ELOHIM gin toua deit. Dauntoba ELOHIM enin eng edag mougt mera medam naugb augwan dous. Anai sug nosa, kaba, en Mena owun augwan eb tainya en Meisi gin touohob. 15:29 Doba sug areg graga augwan dag misenero, kaba, dagiro eisaugb ligbum dau yen meren geicara gina? Anai len louwan naugb leng merusur gedig len lomomohob, kaba, dag maireseb menau geb huhugb eb naugb len. Hang len lemarougb gembala naugb en ogun len se duhu an len gin toua? Doba sug lusud louma debin leng lomom gini dag len lemeisa dau gomom ucugwero, kaba, areg len leic gin, kaba, men meijouhw dagiro? 15:30 Dangga toua, sug lusud lemeisa dau gomom ucugwero, kaba, dagiro naugb emen emohw emen emougt edug gin toua namcirda? 15:31 Anai dan indagunerij, dara dan indamouwerij, sug emen emesai dou lusud dag Krisdus eisa dau gomom ucugwohob, kaba, lusud leic mog erij dag emen emahauwa icira gin dou emen toua terimdohob. Augwan gini asesa dag misen namcir. Hang dan demeic indan gagahugouhw an yen gini naugb dauwara debin gin dou yen toua. Anai maman maugwan dag hom dara Krisdus Yesus maman Adehsud ginohob. 15:32 Dangga toua, sug lusud lemeisa dau gomom ucugwero, kaba, dan daimo mog erij medam se cinogo Epesus gin augwougb naugb ara? Anai lusud meren geicara dou dani sugin, kaba, aninim dag aremeta mog mog an dan toua namcirohob. Naro, dan demesma ara hom dau gin touwero. Hang eigouhw naugb sug maman mamaimo ucina mog erij gin toua deitero. Doba maman maimo areg aremeijouhw esulou maman an ginohob, endagai: Sug maman mamireseb se cinogo gin dous, kaba, eigouhw naugb maman mago ara gaihim terimda. Anai cum, kaba, maman maugwan mamom namcir dangga. Dobnaro. Augwan gini dau lusud misen se cinogo gini meren gauwamara dous. 15:33-34 Doba sug Krisdus eisa dau gomom ucugb dag misenohob, kaba, yen yemaimo leng loududa yen aud meren sesar gin toua deitero. Doba yen mecdemaga esgiraha naugb yen yaimo areg se geica gin dous. Anai sug yen yemasid yenin dau lenero, doba yen yeigtou desij len terimda, kaba, aremeijouhw ens dou yen dag cum, kaba, meijen geicara augwan ecgu aninim dag len toua. Dan denara dag gin dou yen, dauntoba eic igdebes dou yen dougwo gin namcir. Hang yen yemauwam an didi eisaugb gin deitlo. Anai ligbum dau yen, kaba, len lemecinaga ELOHIM dag misen touebma. 15:35 Doba ligbum dau yen, kaba, yen yesbes an dan, yendagai: Sug ELOHIM eigdoumesa lusud dau gomom ucugb, kaba, en eigdoumesa len ogdoc ara? Dara len meraga menau gin toua dag ara deita? 15:36 Doba dagiro yen yeijidougwo dan dag gina? Yen meiju emai touweroei? Anai yen yecinaga dau sug yen yeba meij, kaba, mocdo eiji dag mec menau augwougwei? Naro, doba aimougtut, kaba, meij gini en mer etaha dauwahabi, kaba, mocdo emeiji dag mec menau toua. Dangga toua, sug meiji gini eb mei augwougb dous, kaba, mocdo gini emeiji touwero. 15:37 Dangga areg yen yeba gin, kaba, yen yemes an magero. Doba yen yeba mogo mogud dous. Aninim dau sug yen yeba tramdad era ara mogo gus, kaba, yen yemes an maga touwero. Doba yen yeba mogo dous. Hanoba mocdo menau emeiji dag mec menau toua. 15:38 Dara astesda meij gin, kaba, men mec menau aninim touwero. Doba sug ELOHIM eic meij, kaba, en eic maga menau susugb dou astesda mec augwan gin toua aimo dau areg enin ouwan dous. 15:39 Dara lusud an aremeta, dara ba, dara hosei, kaba, len laugwan merug aninim touwero. Doba astesda dau len, kaba, len merug toua susugb namcir. 15:40 Dangga toua, leng se bogo meren gogouf cucugb aninim dag maman se cinogo gin touwero. Doba lahwas susugb toua. 15:41 Dara igda lona an igda loba, dara tebeij, kaba, augwan meruhw aninim touwero, doba susugb namcir. Dara gini dousero, doba astesda tebeij, kaba, men mouf susugb dau tebeij gus augwan toua deit. 15:42 Areg graga augwan, kaba, aninim dag ELOHIM men geicara se lona sug en eigdoumesa leng lomom aud maireseb menau geb huhugb toua. Anai areg lusud len lec gin, kaba, etaha namcir. Doba sug ELOHIM eigdoumesa maman dau gomom ucugb, kaba, maman mamaga menau gini emetaha deitero, doba eb huhugb namcir. Aninim dag sug lusud leba meij, kaba, len leba mogo dous. Doba sug mogo etahohob, kaba, cum, mocdo eiji dag mec menau deit toua. 15:43 Hang areg lusud lec gin, kaba, men goubesa emebsero. Anai cum, kaba, omom toua. Doba sug ELOHIM eigdoumesa maman ucugb, kaba, gogouf cucugb dara mobisamougb eb se maman mamaga menau gini teitei. 15:44 Dangga areg len lec gin, kaba, maga cinogo meni. Doba sug ELOHIM eigdoumesa maman ucugwohob, kaba, maman mamaga menau gini edeinyum naugb areg se bogo meni toua. Anai sug ELOHIM eic mamaga dou maman naugb maman mamireseb se cinogo ginohob, kaba, en emeic mamaga dou maman naugb sug maman mamireseb se bogo gin toues. 15:45 Augwan gini esogwa deisa areg sud hom en og deb se Surad Injil Meb Mohon deb sug nosa touohob, endagai: Adam gaimougtut, kaba, en emedangga teiteiyero. Doba ELOHIM enin esinsin en. Hang maireseb emeb naugb en toua, anai ELOHIM esa en mena debsa enohob. Doba sud hom goucan Adam, moho Krisdus gin, kaba, enin men goubesa inggebga naugb sug en eic maireseb menau geb huhugb dou lusud. Anai en, kaba, ELOHIM emesinsin enero. Doba en toua eis huhugb sugraga teiteiyohob. 15:46 Dangga hang, sug aimougtut, kaba, ELOHIM emesinsin maga naugb bogoro. Doba en esinsin maga naugb cinogo men nosahabi. Dau, kaba, en emesinsin maga naugb bogo meni ucan gin naugb maman toua. 15:47 Dangga toua, Adam gaimougtut, kaba, eni dau bogo touwero. Doba eni dau cinogo gini, anai ELOHIM esinsin en maga dau areg geb se cinogo gin dous. Doba sud hom goucan Adam gin, kaba, en en dau bogo teisis. 15:48 Dangga iteitogini, kaba, maman mamaga aninim dag Adam gaimougtut men maga ginaba. Anai ELOHIM esinsin en dau cinogo dous. Hang en maga dau cinogo gin, kaba, eb naugb en medebeitor maman maugwan toua. Doba sug maman mamdoc dag hom dara sud hom gen dau bogo ginohob, kaba, cum, maman mamaga aninim dag en maga toua. Anai maman mamedag magun se cinogo gin deitero. Doba maman magun se bogo ginohob. 15:49 Hang se lona ingga, kaba, maman mamucbobaga toua aninim dag sud hom gen dau bogo men mocbobaga. Aninim dag iteitogin, kaba, maman mamucbobaga dag sud hom gen dau cinogo men mocbobaga gin touohob. 15:50 Dangga dan indagunerij, dara dan indamouwerij, areg dan den dou yen graga, kaba, men meijouhw augwan dag gini. Iteitogin, kaba, maman mamaga eb se getaha menaba. Doba cum, kaba, ELOHIM en eperwei maman mamaga. Dauntoba maman mamaga gin, kaba, emeb se getaha deitero, doba ebsa gesgiraha beb huhugb namcir. Anai sug maman mamaga getaha gini eb dangga terimda, kaba, emedeinyum naugb sug ELOHIM oiharaga maman beb huhugb touwero. 15:51 Dangga toua, iteitogini, kaba, maman mamaga eb se gomom namciraba. Doba cum, kaba, ELOHIM eperwei maman mamaga. Dauntoba emeb se gomom gin deitero. Doba eb beb huhugb terimda, aimo dau areg enin mer ogod an deb sug nosohob. Anai sug areg gomom gini eb naugb maman terimda, kaba, maireseb huhugb emeb naugb maman touwero. 15:52 Dangga sug malaikad ohw higbei mougb se Lona Gouwedoc gin, kaba, ELOHIM eperwei maman mamaga, aninim dag lusud mericicib ehinyeinya namcir. Anai sug malaikad en ohw higbei mougwohob, kaba, ELOHIM eigdoumesa leng lomom se Krisdus len laugwan aud meraga menau gini nosahabi. Hanoba se Lona ingga, kaba, len lemomom deitero, doba len leis huhugb namcir. Doba ligbum dau maman, kaba, len lemomom se Lona ingga touebma, doba inggebgaba. Dangga sug ELOHIM eigdoumesa leng lomom ginohob, kaba, en eperwei maman gedig maman mamiresebaba maman mamaga menau, aninim dag leng lomom len meraga menau gin toua. 15:53 Anai ELOHIM en ouwan dag areg getaha gin, kaba, eperwei dag areg geb huhugb. Dara en ouwan dag areg dag gomom, kaba, eperwei dag areg omom deitero toua, aimo dau areg enin esedeb naugb ginohob. Yen yauwam an areg dan den dou yen gini deigouhw namcir. Anai sug nosa, kaba, ELOHIM emens dau augwan gin dou lusud mougwa hom touebma. Doba en ens dou dan. Hang dan demesai dou yen, dauntoba yen yecinaga augwan asesa dag misen toua namcir. 15:54 Dangga hang, se lona sug ELOHIM eperwei maman mamaga getaha se gagadgeij, hanoba en ogod gomom obsara dau maman touohob, kaba, gomom emaung maga dougwo maman toua deitero. Doba areg sud hom gesai ELOHIM moro sug nosa, moho Yesaya, en og deb se Surad Injil Meb Mohon eisaugb gin deb sug nosohob, kaba, augwan acgunog namcirohob. Anai en og deb, endagai: Adehsud, gomom emoung maga dougwo maman deitero. Doba ban bemahacugb gomom augwan mor mor dau emen emaugwan namcirohob. 15:55 Dangga augwan gini esogwa deisa areg sud hom gesai ELOHIM en moro sug nosa, moho Hosea, en og deb se Surad Injil Meb Mohon deb sug nosa touohob, endagai: Gomom aban mog mog dara goubesa eb sugiro? Naro, ban aboho obsara namcirohob. 15:56-57 Dangga eigouhw naugb sug maman man sijo dou ELOHIM esesa toua terimda. Anai ogdoc maman Adehsud Yesus Krisdus men geicara taiba sogo salib gin, kaba, ELOHIM ousa maman. Dauntoba gomom emedag mougt naugb maman deitero. Doba maman maiyan en dau maman namcir. Anai sug maman madreg ELOHIM men gomnomna ginohob, kaba, eic dag sesar edag maman mougt mera medam. Dara sug sesar edag maman mougt mera medamohob, kaba, eic dag gomom oiharaga maman touohob. 15:58 Dangga dan indagunerij, dara dan indamouwerij gedig dan indoc gororougb yeni, sug yen yecinaga augwan gini dag misenohob, kaba, yen meigdoc emeijeijlo. Doba yen yes agadgeij se areg dan desai dou yen gin namcir. Hanoba yen yeic meijuwemougb esesa naugb yen yeicara yaimo areg asesa ELOHIM enin medoc mes augwan toua terimda. Anai yen yecinaga dau sug yen yeicara yesogwesa areg enin en ouwan dag gin, kaba, yen yemeic yen meijug erij augwougb touwero. Doba yen yemdesma mera einyana toues.

1 Korintus 16

16:1 Doba eisaugb aregoufu naugb sug yen yousa ELOHIM men lusud se leng Yudea meren hancob, kaba, dan douwan naugb yen yaimo goucimdeb se leng Galatia meren hancob len laugwan an areg dan den dou len se aremer ginohob toua namcir. 16:2 Dangga hang, astesda Ari se lonamenmen, kaba, yen yekeba ingma dau meijen aregoufu, era ariloboc, aimo dau areg yen yesmohob. Hanoba yen yobdeb debinim naungmei, dauntoba sug dan dedebeij yen, kaba, yen yemehilonim an gin touwero, doba eb naugb dan debohob. 16:3 Gin dauwohob, kaba, yen youci merug hosa gedig yen yod meijina debsa lenohob naugb gin toua. Hanoba yen yesa len naugb len lodo meijen aregoufu an indan surad aud leng se Yerusalemeda. Anai sug dan dedebeij yenohob, kaba, dan dog surad dou len. Dauntoba leng se Yerusalem ingga, kaba, lecinaga len gin asesa toua. 16:4 Era edeinyum naugb sug dan deihweda se Yerusalem toua, kaba, eigouhw naugb len laimo danin dous. 16:5 Doba aimougtut, kaba, dan desedeb naugb dan dedeiya goucimdeb se leng Makedonia meren hancob len laugwanahabi. Dangga sug dan dedebeij goucimdeb se leng Makedonia meren hancobohob, kaba, dan dedeiya yen yaugwan se cinogo Korintus gin toua. 16:6-7 Dara sug dan dedebeij yenohob, kaba, dan deigtou desij yen se igda hom era hwaiyahabi. Era se igda goho dugurij augwan touei? Dan demecinaga gini dag misen touebma. Anai dan demouwan naugb dan dedebeij yen se lona hom, era hwai dousero. Doba sug maman Adehsud en ouwan, kaba, dan deigtou desij yen se lona einyanahabi. Dangga sug dan deigtou desij yen bedeinyumohob, kaba, yen yousa dan dara ared, era aregoufu naugb dan deihwedig cinogo gus gus, aimo dau areg dan dogod an ginohob toua. 16:8-9 Doba iteitogin, kaba, dan douwan deigtou se cinogo Epesus terimda Lona w Pentakosda gin ouwa dauwahabi. Anai ELOHIM ec misis dau danohob naugb dan dera mera einyana. Dara indan moc, kaba, leinyana merugwenggini naugb len lebehnehino dougwo dan toua. 16:10 Sug Timotius edebeij yenohob, kaba, yen yebin en dara geigouhw namcir, dauntoba en medoc momogo touwero. Doba en medoc esgirahesa yen, anai en esai maman Adehsud en moro, aninim dag dan touohob. 16:11 Dangga hang, yen yemesbes an en. Dara yen yemowun en moho dau sug en edag godeh mesaba gin touwero. Doba sug en esai dan induro augwan dou yenohob, kaba, yen yousa en. Dauntoba en ecicugb aud dan dara en mena agau toua. Anai dani dara maman mamaguner gus, kaba, emen emaugwan emeigtou sugini naugb en. Dauntoba en ecic dau meijen geicara augwan asesa dou emenahabi, emen ememen aud yen toues. 16:12 Doba eisaugb maman mamaguna Apolos, kaba, dan denara dad en medoc mes mougwa einyanohob naugb sug en aimo Timotius an maman mamaguner gus len laugwan aud yen toua. Doba en medoc emesgirahesa gin namcirbuma. Anai en auwam an dag ELOHIM emousa deisa en an gin touebma. Dangga hang, ebeij lona sug ELOHIM ens cumougt dou enohob, kaba, dan decinaga dag en emedebeij yen sungga toues. 16:13 Doba naugb yenin, kaba, dan desulou yen naugb yen meiju auti augwan terimda. Dauntoba yen yemobsara dau sug yen meigdoc ebdebin an Krisdus touwero. Doba yen yaimo ucina gin esesa terimda. Hang yen yemahau dau sug lusud leic mog erij dou yen touwero. Doba yen yaiyan meigdocesem naugb yen yes agadgeij naugb gin toua namcir. 16:14 Dara se meijen geicara augwan, kaba, yen meigdoc gororougwim terimda toua. 16:15 Doba eisaugb Sdepanus, kaba, yen yecinaga eni dara leng leigtou desij en se men tu, kaba, dag len laugwan ledag mebin se yeng Akaya meijen hancobohob. Dara yen yecinaga dau sug len merdoc ebdebin an Krisdus ginohob, kaba, dag len lemaimo areg gus augwan toua deitero. Doba len leic meruwemougb esesa naugb len leicara dou ELOHIM men lusud len laugwan terimda touohob. 16:16 Dangga hang, dan indagunerij, dara dan indamouwerij, dan desulou yen dara goubesa namcir. Dauntoba yen yemohoiya len merir touwero. Doba yen yesogwa deisa len meruhotimei mohw an aremer areg len larougb yen an gin toua terimda. Dara yen yemeicara yemaimo dag gin dou Sdepanus an men lusud gin dousero. Doba gareg en ousa len naugb en esai Krisdus moro dou lusud, kaba, yen yesogwa deisa len merir an areg len larougb yen an gin toua namcir. 16:17 Dan indoc eigouhw sug yen yesa Sdepanus an Portunatus dara Akaikus aud dan sugini. Anai sug len ledebeij dan dara meijen suradohob, kaba, len leperwei yen meijuhw naugb len lenara lagaha dan indoc mes terimda. Aninim dag dan decinaga len lenara laded yen meigdoc mes sug nosa touohob. 16:18 Dangga hang, sug len lecicugb aud yenohob, kaba, yen yemowun len meroho touwero. Doba yen yeigdoumesa len meroho terimda. Anai iteitogin, kaba, ara ara gus emata dougwo dan deitero. Doba len leic dan indoc esgiraha ucugwohob. 16:19 Goucimdeb se leng Asia Mogurei meren hancob sugin, kaba, len laugwan lou yen. Dara Akwila an Priskila dara leng leis Ari se maran tu, kaba, len laugwan lou yen dara merdoc an yen toua. Anai len toua, laugwan ledag hom dara maman Adehsud ginohob. 16:20 Dara maman mamaguner dara maman mamdamouwer se goucimdeb sugin, kaba, len laugwan lou yen toua. Dara yen toua sug yen youcimdeb, kaba, yen you meijufesem, dara yen meigdoc ecabeci anim terimda. 16:21 Dara danin toua dou yen. Hang dan demog hom gini ai dan insira dou yen toua. 16:22 Gareg en medoc gororougb maman Adehsud ginero, kaba, dan douwara dougwo en namcir. Hanoba dan dogugwo en se maman Adehsud enin mesira naugb en eic mor mor dou en dous. w Maranata. Gini meijouhw dag maman Adehsud en ecicugwen dedemeda. 16:23 Maman Adehsud Yesus en medoc an yen terimda. 16:24 Dan indoc gororougb yen yaugwan, anai maman maugwan mamdoc hom dara Krisdus Yesus gin touohob. Augwan gini asesa dag misen namcir.

2 Korintus 1

1:1 Surad gini dau dang, Paulus, anai ELOHIM enin eng ouci dan. Hanoba en eigdoumesa dan indoho naugb dan desai Mer Geigouhw eisaugb Krisdus dou lusud laugwan toua. Dan dog surad gini dou ELOHIM men goucimdeb se cinogo Korintus. Dara men lusud se leng Akaya meren hancob, yen yaugwan. Dara maman mamaguna Timotius en ouma debin areg dan dog dou yen gin toua. 1:2 Dangga hang, aman amacgeij maman Mamina ELOHIM dara maman Adehsud Yesus Krisdus naugb lan mardoc eigouhw an yen. Dara lan laseyeiyo yen dougwo areg gecgu augwan toua terimda. 1:3 Dan den sijo medam dou maman Adehsud Yesus Krisdus en Mena ELOHIM gini. Anai en, kaba eni maman Mamina gedig en medoc eineg an maman. Dara en edag maman ELOHIM gedig en ousa maman se aremer augwan toua namcirohob. 1:4 Hang astesda sug emen emaimo ucina mog erij icira Krisdus gin, kaba, en enara bad emen emdoc mes toua. Dauntoba sug en aiyan emen emdocesem dag ginohob, kaba, emen toua emenara emad lusud gus merdoc mes sug len laimo ucina mog erij icira Krisdus gini toua. Dauntoba len lemobsara dau gin touwero. Doba len laiyan merdocesem naugb len les agadgeij se gin terimda, aimo dau ELOHIM men geicara geb dou emenohob an len toua. 1:5 Dangga sug emen emesogwa deisa Krisdus mohotimei mohw se ucina mog erij mougwa einyana dag ginohob, kaba, emen emaimo en naugb sug ELOHIM enara bad emen emdoc mes ucucugb terimda toua, aninim dag ELOHIM enara bad Krisdus en medoc mes sug nosa touohob. Anai emen emedag hom dara enohob. 1:6 Dangga hang, sug emen emaimo ucina mog erij dag gin, kaba, emen emaimo augwan gini naugb emenin dousero. Doba naugb sug emen emousa yen, dauntoba yen yemobsara dau ucina aud maireseb menau geb huhugb gin touwero. Doba yen yaiyan meigdocesem naugb yen yes agadgeij namcir. Anai sug ELOHIM enara bad emen emdoc mes se ucina mog erij dag ginohob, kaba, emen emu ouforoho naugb sug emen emenara emad yen meigdoc mes sug yen yaimo ucina mog erij aninim dara emen gin toua. 1:7 Sug emen emecinaga dag yen yemaimo emen se ucina mog erij gin dousero. Doba yen yaimo emen naugb yen yaiyan meigdocesem dag gin touohob, kaba, emen ememeija emuwesa yen toua deitero. Doba emen emod emina debsa yen dag yen yemobsara dau ucina maireseb menau geb huhugb gin touwero. Doba yen yes agadgeij naugb yen yaimo gin terimda. 1:8 Dan indagunerij, dara dan indamouwerij, sug ELOHIM eigdoc emen dau gogom medam einyana dag ginohob, kaba, dan douwan dens dau gogom areg emen emaimo se leng Asia meren hancob augwan dou yenahabi. Dauntoba yen yecinaga dag misen toua. Anai gogom areg emen emaimo gin, kaba, medam gougwa edreg namcir. Hang emen emoudesa endag lusud logod aremer gomom deinaugb emen touohob. 1:9 Dangga emen emesai emen emdoc mes ohwohu dag emen emires emeb toua deitero. Doba augwan gini acgunog, dauntoba emen ememod emen emina debsa emenin emen goubesa touwero. Doba emen emod emen emina debsa ELOHIM enin an men goubesa dous. Anai enin dous eng mobisamougb edeinyum naugb sug en eigdoumesa lusud dau gomom ucugb toua. 1:10 Dangga hang, emen ememod emen emina debsa emenin emen goubesa toua deitero. Doba emen emod emen emina debsa ELOHIM enin an men goubesa gin dous. Anai sug en eigdoc emen dau gogom dag ginohob, kaba, emen emecinaga dag men goubesa edeinyum naugb sug en eigdoc emen dau gogom gus gus augwan se lona daiyamo gacin toues. 1:11 Anai dan decinaga dag yen toua yousa emen naugb sug yen yocuncum dou ELOHIM naugb emenohob. Dangga sug yen yeiya, doba en auni yen meijir naugb en ousa emen dag gin touohob, kaba, eic dag lusud leinyana lagahugouhw an en namcir. 1:12 Emen emacgeij naugb yen yousa emen dara yocuncum dag gini, anai emen emecinaga se emen emdoc mes dau sug emen emesai Mer Geigouhw eisaugb Krisdus dou lusud, kaba, dag emen ememaimo areg gecgu mougwa hom an len touwero. Doba emen emesogwa deisa ELOHIM mohotimei mohw naugb emen emaimo areg edag beim dara gecabeci dara emen emdoc dag hom an len se aremer augwan toua terimdohob. Hang emen emeimiman emen an gin toua namcir. Dara emen ememeicara dangga dou len gin dousero. Doba emen emaimo augwan gini edreg dou yen sug nosa touohob. Dangga toua, sug emen emesai ELOHIM moro dou lusud, kaba, emen ememaimo lusud meren gauwamara emaos dara dou len touwero. Doba emen emaimo mou gouforoho areg ELOHIM enin eic bedeinyum dou emenohob naugb gin dous, anai en medoc an emen naugb ginohob. 1:13-14 Sug emen emaimo areg edag beim dara ecabeci an lusud laugwan dag ginohob, kaba, yen yemeija meijuwesa emen an areg emen emog dou yen toua deitero. Doba yen yod meijina debsa emen dag areg emen emog dou yenohob, kaba, augwan se geica namcir. Anai areg emen emog dou yen gin, kaba, emen emaunun dougwo, dara emen emecgoneh aremer hom dau yen touwero. Doba areg yen yecic, kaba, men meijouhw ingga dous eng naugb yen yecinaga toua. Dan den dou yen dag gini, anai dan decinaga dag iteitogin, kaba, yen yemecinaga dau areg emen emog gini meijouhw augwan asesa touebma. Doba yen meigdoc ogdogda emen an einyana ginaba. Doba dan dod indina debsa yen dag cum, kaba, yen yecinaga dau areg emen emog dou yen ginohob meijouhw augwan asesa toua namcir. Anai dan decinaga dau sug yen meigdoc obgesa dag areg emen emog dou yen gini. Doba augwan edag beim an yenohob, kaba, yen meigdoc emogdogda emen toua deitero. Doba eic dag yen yeimiman emen se Lona Sug Maman Adehsud En Ecicugwen. Hanoba emen emeimiman yen se Lona ingga toua. 1:15 Sug dan decinaga dag cum, kaba, yen yecinaga dag areg emen emog dou yen gini, doba augwan se geica namcirohob, kaba, dan desedeb aimougtut dau sug dan deihwededau cinogo gin, kaba, dag dan dedebeij yen nosahabi. Hanoba dan demeihwedig len gus meren hancob deitda. Dauntoba dan deic geigouhw dag mougb cuhwai icira dou yen toua. 1:16 Anai dan desedeb dau sug dan deihwedig leng Makedonia meren hancob, kaba, dag dan dedebeij yen nosahabi. Dara dan demdebeij yen sug dan decicugb dau meren hancob gin toua deit. Hanoba yen yousa dan dara ara ara sug dan deihwedig leng Yudea meren hancob toua. Dobnaro. Anai meijen aremer edag sogo maga eb dougwo dan. Hang dan demdebeij yen touwero. Doba dan deihwedaud se leng Makedonia meren hancob nosahabi. 1:17 Dangga hang, sug dan demaimo augwan gini an yenero, kaba, gini ansins dag dan indoc agag dau yenohobei? Era dan dedag lusud gedig Mena Gogoufu emeinesa len merdoc mesbuma naugb dan dousa yen meijir dag you, era naro, naugb dan daunun yen touei? 1:18 Naro, areg dan dog dou yenohob, kaba, dan indoc emagag an gin touwero. Doba dan dog augwan gini dara indoc hom dou yen dous. Hang dan demeinegneg dan indiresa dag you dara naro dou yen touwero. Doba se aremer augwan, kaba, dan dousa dou yen dag you mogud dous. 1:19 Anai sug Silas dara Timotius, emen emesai Mer Geigouhw eisaugb ELOHIM Meisi Yesus Krisdus dou yen sug nosa, kaba, emen ememens en dag sud hom areg einegneg merisa dag you, era naro, dou yen touwero. Doba emen emens en edag sud hom gousa dou yen dag you mogud dous. Dara dan dou ELOHIM en moho debin gin toua. Dauntoba yen yecinaga dag areg dan den dou yen gin, kaba, misen namcir. Anai en, kaba, en emereiyara mougwa hom touwero. Doba areg en os dou mamanohob, kaba, en aimo augwan gini dara medoc hom an maman toua terimda. 1:20 Anai sug ELOHIM esa en dau bogo se cinogo gin, kaba, maman macinaga dag areg en os dou maman ogdoc enohob, kaba, en medoc emagag an hom dau maman touwero. Doba en aimo augwan gini dag misen an maman terimda. Dangga hang, sug ELOHIM ousa dag you mogud ogdoc Krisdus dou maman dag ginohob, kaba, maman mamarges dau sug maman maigdoumesa ELOHIM en moho agas medam touwero. Doba astesda sug maman macuncum dou en, kaba, maman mauma debin dou en dag men geicara augwan gin, kaba, asesa dag misen namcirohob. 1:21 Dara gin dousero, doba enin eng ogo Yesus dag buc gototo se maman mamdoc mes. Hanoba en aiyan maman mamdocesem. Dauntoba maman mamobsara dau Krisdus touwero, doba maman mas agadgeij namcir. Dara enin eng ouci maman debinim naugb en. Dauntoba sug maman madag men lusudohob, kaba, maman masai en moro dou len gus. Dara maicara maimo en se areg en arougb maman an gin toua terimda. 1:22 Hanoba en esa Mena Gogoufu dag ansins se maman mamdoc mes. Dauntoba maman macinaga dag en moho aiga mamanohob. Dara maman mamdoc eica dag areg en os dou maman, kaba, hom emediyebeiya dau maman touwero. Doba eb naugb maman beb huhugb namcir. 1:23-24 Dangga sug dan demedebeij yenero, kaba, gini ansins dag dan demagag dan indoc mes dau yen touwero. Doba dan douwan naugb deic cumougt dou yen, dauntoba yenin yogod meijen aremer augwan ouwa dauwahabi, dan demedebeij yen toua. Anai dan demouwan naugb demeic yen meigdoc momogo dou yen dag nosa deitero. Doba dan indoc erleij naugb dan deic yen meigdoc esgiraha dou yen dous. Dauntoba yen meigdoc agahugouhw an ELOHIM edreg dau nosa deit. Anai dan decinaga dag yen yes agadgeij naugb yen yaimo Krisdus namcirohob. Hang dan demesedeb naugb dan dedag meijen mougt naugb yen deitero, doba dan desedeb naugb dan dousa yen dangga dous. Dan dacgeij ELOHIM naugb en ouma debin gin dou yen toua. Dauntoba yen yecinaga dag areg dan den dou yen gin, kaba, augwan asesa dag misen namcir. Anai en, kaba, en ecinaga areg geb se danin indoc mes augwan dag misenohob.

2 Korintus 2

2:1 Dangga sug dan douwan deic yen meigdoc dag agahugouhw dou yen dous, kaba, dan dogod se dan indoc mes naugb dan demedebeij yen sungga touwero. Doba dan deigtou dateteij terimda yen yogod meijen aremer augwan dauwahabi. Dauntoba dan demeic yen meigdoc momogo dou yen dag nosa deitlo. 2:2 Anai yen dous eng meijugwengga naugb yen yeic dan indoc agahugouhw dou dan. Dangga sug dan deic yen meigdoc eijesa dag gini dou yen terimda, kaba, gareg en moongga naugb en eic dan indoc agahugouhw dou dan toua? Naro, sud hom gus ingmaro. 2:3 Hang dan demedebeij yen touwero. Doba dan dog dau meijen aremer augwan se surad dou yen dous naugb yen yogod augwan dauwahabi. Dauntoba sug dan dedebeij yen, kaba, yen yemeic dan indoc momogo dou dan deitero. Doba yen yeic dan indoc agahugouhw mogud dou dan dous, aimo dau areg ELOHIM en toua ouwan danggohob. Anai dan decinaga dau sug dan indoc esgiraha dag ginohob, kaba, yen meigdoc momogo deitero. Doba eic dag yen yaugwan yagahugouhw mogud toua terimda. 2:4 Dangga sug dan dog surad gin dou yen, kaba, dan demog dareg dan indoc agahugouhw dou yenero. Doba dan dog dareg dan indidruh ebrera debin gin dou yen. Dara dan indoc eijesa dara erij medam an yen toua namcir. Anai dan decinaga dag areg dan dog gin, kaba, emeic yen meigdoc emagahugouhw dou yenero, doba eic yen meigdoc eijesa deit. Doba dan douwan dens dan indoc mes dou yen dag dan indoc gororougb yen medam. Hang dan demog dag gin dou yen toua. 2:5 Doba eisaugb sud hom gedig en eihwa en mena mesouwa godeh ginohob, kaba, dan doudesa dag yen yeic gogom edeinyum dou en namcir. Anai yen yeinyana yen meigdoc aninim dara dan eisaugb enohob. 2:6 Dangga hang, dan dacgeij naugb yen yemeic gogom dou en deitero. Doba yen yaigdougwo men sesar dau en namcir. 2:7 Hanoba yen yenara yad en medoc mes naugb yen yens yen meigdoc mes dou en, dauntoba en ecinaga dag yen meigdoc emesrougb an en deitero. Doba yen meigdoc gororougb en terimda. Dauntoba en medoc emobsara dau sug en medoc ebdebin an Krisdus touwero. Doba en medoc esgiraha ucugb toua. 2:8 Dan dacgeij yen an dangga, anai sud hom gin, kaba, en emeic dan indoc momogo dou danero. Doba en eic yen meigdoc momogo dou yen yaugwan sungga dous. Dan den dag yen yaugwan, dauntoba dan demeic igdebes dou sud hom yom se yen meijufu touwero. Anai hom yom dau yen, kaba, lenin dous eng merdoc momogo an aremer ginohob. Yeng gus, kaba, igdebes emeba yen touwero, doba yen yeimiman en an men geicara gini terimdohob. 2:9 Dangga hang, dan dacgeij yen naugb yen yaigdougwo sud hom gin men sesar augwan ediyebeiya dau en namcir. Anai dan demog indan surad dou yen naugb dan demens meijen ucina dou yen dousero. Doba dan dog indan surad gin dou yen naugb dan dainyen yen meigdoc mes toua. Dauntoba dan deiya, doba yen yaimo dan se aremer augwan gin touei? Era yen yohoiya dan indir dag nosa terimdei? 2:10 Dangga sud hom areg yen yaigdougwo men sesar, kaba, dan toua daigdougwo men sesar dau enohob. Anai en emebesesar an danero. Doba en ebesesar an yen dous. Hang dan demaigdougwo men sesar ara ara dau en deita? Dara areg dan daigdougwo gin, kaba, dan dacgeij Krisdus naugb en ouma debin gini dag augwan se geica namcir toua. Anai dan indoc gororougb yenohob. 2:11 Dan deicara dag gini, dauntoba maman mameic cumougt dou Setan naugb sug en augwohosa maman icira aremer gin deitlo. Anai maman macinaga dau men ucina areg en aimo an maman meijouhw augwan asesa dag misen namcirohob. 2:12 Sug dan desa Titus an indan surad dou yenohob, kaba, dan deihwedig cinogo Troas naugb dan desai Mer Geigouhw eisaugb Krisdus dou len sungga toua. Anai dan deiya, doba maman Adehsud en ec misis dau dan naugb ginohob. 2:13 Doba dan indoc emebtou touwero. Anai dan darougb maman mamagto Titus dau sug en ecicugb dau yen, kaba, dag en edagasa dan se Troas. Dauntoba dan decinaga dag yen yaimo areg dan darougb yen an se indan surad gini augwan dag misenohobei? Era narobmei? Doba en emedebeij danero. Dangga hang, dan demebedbed dou leng se Troas toua deitero. Doba dan dacgeij maman mamaguner dara mamdamouwer sungga. Hanoba dan dekirsa len terimda dan dedebeij leng Makedonia meren hancobohob, dauntoba dan dagasa dara Titus sungga dedemeda namcir. Anai dan indoc ebehibeh naugb sug en ens dau meijen geicara meijouhw augwan asesa dou dan toua. 2:14 Dangga sug dan douman, doba yen yaimo dan indir se aremer graga augwanohob, kaba, dan den sijo medam dou ELOHIM, anai en mobisamougb dau augwanohob. Hang sug emen emedag hom dara Krisdusohob, kaba, en einoisa emen naugb sug emen emaiyan emen moc dara areg gogom augwan eb tainya emen namcir. Hanoba en eigdoumesa emen naugb emen emesai Mer Geigouhw eisaugb Krisdus dag men ouwadebeda dou lusud sungga sungga, len laugwan toua. 2:15 Anai sug Krisdus ouci emen debinim dag areg men ouwadebeda dou ELOHIM dag ginohob, kaba, en esa emen dou lusud gedig len laimo ucina aud maireseb dara len laimo ucina aud dum smougb len laugwan. Dauntoba sug emen emesai en moro dou len, kaba, emen emedag Krisdus men lusud gedig len merin ouwadebeda naugb emaic lusud aud en toua. 2:16 Dangga hang, gareg en ohu mebesesa areg men ouwadebeda gin, kaba, en emomom touwero. Doba cum, kaba, en esma maireseb menau geb huhugb dau gin toua. Doba gareg en ougb mebes an, kaba, areg men ouwadebeda gin, kaba, eperwei bedag mena eiyema naugb enin deit. Hang emeic maireseb menau geb huhugb dou en touwero, doba eic gomom beb huhugb se dum smougb dou en dous. Sug areg emen emesai gin, kaba, eic maireseb menau geb huhugb dou lingma. Doba lingma, kaba, arougb len naugb len lomom se dum smougb dous kaba, gareg eni edeinyum naugb geicara gina? 2:17 Naro, emenin dous eng emedeinyum naugb gini. Anai ELOHIM enin eng eigdoumesa emen. Hanoba en arougb emen naugb emen emesai en Mer Geigouhw eisaugb Krisdus dou lusud toua. Dangga hang, emen ememowun ELOHIM en mer gini, aninim dag aremougb naugb emen ememarerei lusud an aregoufu dag leinyana icira gin touwero. Doba sug ELOHIM eigdoumesa emen emoho dag ginohob, kaba, emen emesai en mer gini dara emen emdoc hom dara obosboro deseino en dous. Anai emen emedag hom dara Krisdusohob.

2 Korintus 3

3:1 Doba areg dan dog dou yen gin, kaba, aninim dag emen emacgeij surad dau yen naugb yen youma debin emen dou len gus. Hang emen ememeimiman emenin an emen geicara deseino yen dag graga deitei? 3:2 Naro, emen ememacgeij surad dau goucimdeb gus naugb len louma debin emen dou yen. Dara emen ememacgeij surad dau yen naugb yen youma debin emen dou len gus aninim dag len gus touwero. Doba meijen geicara menau gin, kaba, dag emen surad naugb len gusohob. 3:3 Anai sug emen emesai Mer Geigouhw eisaugb Krisdus dou yen sug nosa, kaba, en emog en mer gini se surad era igdahab geihwidua dag nosa deitero. Doba yen yens ainyes dag Krisdus og en mer gini ogdoc Mena Gogoufu se yen meigdoc mesohob. Anai ELOHIM gedig en eic maireseb dou lusud, kaba, en esa en aud yen naugb gin touohob. Hang emen emdoc og debin meijen geicara menau gini dag surad naugb emen emens dou lusud sungga sungga toua. Dauntoba len lecinaga dag emen gin, kaba, gembala areibahau touwero. Doba emen emedag gembala misen dous. 3:4 Emen emenara dag gin dou yen, anai emen emecinaga dag ELOHIM enin eng eija emen naugb sug emen emesai Mer Geigouhw eisaugb Krisdus gin dou lusud. Hang igdebes emeba emen touwero. Doba emen emeic emus an gin deseino ELOHIM namcir. Anai sug en emedag hom dara Krisdusohob, kaba, en ouma debin emen an gin toua. 3:5 Dara areg dan den dou yen gin, kaba, emen ememeic ara ingma naugb emen emaigdoumesa emen emoho dag emen goubesa gini en dau emenin naugb gin touwero. Doba augwan gin, kaba, en dau ELOHIM enin dous. 3:6 Anai enin dous eng eic mou ouforoho dara goubesa dou emenohob naugb sug emen emesai men gos dou menau gini dou lusud laugwan. Dara men gos dou menau gin, kaba, emeb se igdahab geihwidua naugb maman maimo dag nosa toua deitero. Doba dag maman maimo areg Mena Gogoufu arautut maman mamdoc mes aud gin dous. Anai sug maman maimo ELOHIM men gos dou mohon areg geb se igdahab gin, kaba, ahwan maman aud gomom se dum smougb dous. Anai maman madreg en mer gin mougwa einyanohob. Doba sug maman maimo areg Mena Gogoufu arougb maman an gin, kaba, ahwan maman aud maireseb menau geb huhugb gin namcir. 3:7-8 Dangga toua, sug ELOHIM eic men gomnomna geb se igdahab dou leng Israel sug nosa, kaba, men gogouf cucugb ouma debin men gos dou mohon gin toua. Anai sug Musa ouwaden dau menmod Torsinohob, kaba, leng Israel meren goubesa emedeinyum naugb sug len lesa lauweila en mebes touwero. Doba len leineg merbes dau en. Anai gogouf cucugb geb se en mebes, kaba, ohonohona len merires namcir. Doba sug ELOHIM men gogouf cucugb ouma debin gomnomna geic gomom dou lusud dag ginohob, kaba, men gogouf cucugb emouma debin gomnomna geic maireseb menau geb huhugb ogdoc Mena Gogoufu gin touweroei? Naro, gogouf cucugb areg gouma debin gomnomna menau gin, kaba, edreg medam dau gogouf cucugb areg ouma debin gomnomna mohon ingga toua namcir. Anai gogouf cucugb geb se Musa men mebes ingga, kaba, emeb terberbero. Doba cum, kaba, ebiji naugb ediyebeiya deitohob. 3:9 Dangga sug gogouf cucugb medam geb debin gomnomna mohon dag ginohob, kaba, gogouf cucugb geb debin gomnomna menau gin toua edreg medam deit. Anai gos dou mohon, kaba, ogod gomom deinaugb maman dous. Doba gos dou menau gin, kaba, ens ucina dou maman naugb sug ELOHIM aigdougwo maman sesar. Hang emeic gesgigouhwesa dou maman ucugb toua. 3:10 Doba sug gogouf cucugb geb debin gos dou menau gini edreg medam dag ginohob, kaba, maman manara ingma dag gogouf cucugb gini aihiron dougwo gogouf cucugb geb debin gos dou mohon augwan touohob. Hang iteitogin, kaba, gogouf cucugb mohon gini emeb toua deitero, doba dag ediyebeiya namcirohob. 3:11 Anai gomnomna mohon, kaba, cum cum dous. Doba gomnomna menau gini, kaba, eb huhugb terimda. Dangga hang, sug gogouf cucugb medam erba debin areg emeb terberbero dag ginohob, kaba, gogouf cucugb geb debin areg geb huhugb gin, kaba, edreg medam dau gin deit toua. 3:12-13 Sug emen emecinaga dag gos dou menau gini emediyebeiya touwero, kaba, emen ememeicara aninim dag Musa sug nosa touwero. Doba emen emeic emus naugb emen emesai Mer Geigouhw eisaugb Krisdus gin dou lusud terimda. Anai sug Musa en eiya, doba gogouf cucugb geb se en mebes graga ebiji naugb sug ediyebeiyohob, kaba, en eic minc naugb aihiron dougwo en mebes. Dauntoba leng Israel lemecinaga dau gin touwero. Doba len merdoc ebdebin an ELOHIM mer gin terimda. 3:14 Dobnaro. Len merdoc agadgeij dougwo areg en ebedbed dou len gini namcir. Anai sug Musa eic minc ehi dougwo en mebes dag gin, kaba, eic dag aihiron len merdoc mes dougwo en mer gin touohob. Dangga, kaba, minc gini emediyebeiya dau len merdoc mes touebma. Doba eb dougwo len merdoc mes terimda iteitoginaba. Hang astesda sug len lecic dau ELOHIM men gos dou mohon sug nosa gin, kaba, len lemecinaga meijouhw augwan asesa touwero. Doba eic dag len meru emaiyero namcir. Anai Krisdus enin eng men goubesa edeinyum naugb sug en asid minc gini ediyebeiya dau len merdoc mes dous. 3:15-16 Dobnaro. Dangga astesda sug len lecic areg Musa og deb se Surad Injil Meb Mohon deb nosohob, kaba, len merdoc emobgesa touwero. Anai minc gin eb dougwo len merdoc mes terimda iteitoginaba. Hang len lemecinaga meijouhw augwan asesa touwero. Doba len ledag leng meru edgom namcir toua. Anai minc gini ediyebeiya dau len merdoc mes, kaba, ogdoc sug len merdoc ebdebin an Krisdus gin dous. Dangga gareg en medoc dag hom dara maman Adehsud ginohob, kaba, minc emaihiron dougwo en medoc mes toua deitero. Doba maman Adehsud asid minc gini dau en medoc mes naugb en ecinaga meijouhw augwan asesa toua namcir. 3:17 Hang Musa men gomnomna, dara sesar men gogom, dara gomom, kaba, augwan emeb naugb maman toua deitero. Doba sug maman Adehsud esa Mena Gogoufu se maman mamdoc mes ginohob, kaba, en esga maman dau augwan. Anai maman Adehsud gini dara Mena Gogoufu, kaba, lan maroho aninim namcir. 3:18 Dara maman maugwan sug maman maiya dau maman Adehsud men geicara dag gogouf cucugb gin, kaba, eic dag Mena Gogoufu arautut maman an maman geicara toua terimda. Dauntoba maman geicara emedag mohon deitero, doba eperwei beiseisaugb, aninim dag maman Adehsud men geicara gedag gogouf cucugb gin toua namcir. Anai sug maman Adehsud asid minc dau maman dag ginohob, kaba, maman mamiresmougb deitero. Doba maman mamires esga naugb maman maiya lo asesa ucugb toua. Augwan gini dau maman Adehsud, anai eni dara Mena Gogoufu, kaba, lan mardoc dag hom naugb ginohob.

2 Korintus 4

4:1 Dangga sug maman Adehsud eigdoc maman dau areg gogom aud areg geigouhw dag ginohob, kaba, emen emdoc emomomtom naugb sug emen emesai Mer Geigouhw eisaugb Krisdus gin dou lusud touwero. Doba emen emeic emouwemougb esesa naugb sug emen emebedbed dau Mer Geigouhw gin dou len terimda. Anai ELOHIM medoc eineg an emen. Hanoba en eigdoumesa emen emoho naugb sug emen emesai en mer eisaugb Krisdus gin dou lusud laugwan toua. 4:2 Dangga hang, emen ememaimo gembala areibahau aud areg gogor. Dara emen ememecgoneh emen geicara dau lusud aninim dag len touwero. Doba emen emens dau emen geicara augwan eb ainyes dou lusud terimda. Hanoba emen ememerba mohoisa dara emen ememarerei lusud an aregoufu. Dara emen ememeperwei ELOHIM en mer naugb sug len laijahasero dau ucina misen gin touwero. Doba emen emeic emouwemougb esesa deseino ELOHIM en mairesi. Dauntoba se emen geicara augwan, kaba, lusud merdoc emogdogda emen an aremer hom touwero. Doba len merdoc ouma debin lendag emen geicara augwan ecabeci namcirohob. Emen emeicara dag gini, anai gembala areibahau ingga, kaba, len laimo areg gecgu terimda. Dara len leperwei ELOHIM en mer eisaugb Krisdus naugb len lerba mohoisa lusud an meren aremougb touohob. Hanoba len lecgoneh meren geicara gecgu gini dau len namcir, dauntoba len lemeiyero. Anai meren geicara augwan gin, kaba, eic igdebes dou lusud dous. 4:3 Doba leng leraga ucina aud dum smougb gin, kaba, minc eb dougwo len merdoc mes smougb mougwaba. Dangga hang, len meru emobgesa Mer Geigouhw eisaugb Krisdus areg emen emesai dou lusud touwero. Doba eic dag len meriresmougb dougwo gin terimda. 4:4 Anai leng medigo Yesus meren mougt mera medam gedig en oiharaga len se cinogo gin, kaba, en ouf len meru dougwo ginohob. Hang edag sogo maga dougwo len an gin namcir. Dauntoba len lemeiya dau Krisdus men gogouf cucugb areg emen emesai dou lusud gini touwero. Doba len meriresmougb dougwo gin terimda. Anai Krisdus gin, kaba, en mog toua dag ELOHIM teiteiyohob. 4:5-6 Doba maman, kaba, ELOHIM enin eng esa men mouf se maman mamdoc mesohob. Dauntoba maman macinaga dau men geicara, kaba, dag augwan ecabeci naugb mamanohob. Anai sug maman maiya dau Krisdus men geicara se cinogo gin, kaba, maman macinaga areg eisaugb ELOHIM augwan asesa dag misen touohob. Augwan gini esogwa deisa areg ELOHIM enin eng enara deb se Surad Injil Meb Mohon deb sug nosa touohob. Anai sug en ahasesei cinogo sug acgunog, kaba, en enara, endagai: Dan douwan mouf agunya dau lobeigbogo naugb einyedei augwan beb ainyes namcir. Dangga areg emen emesai gin, kaba, dau emenin naugb emaigdoumesa emen emoho deseino yen touwero. Doba emen emens Yesus Krisdus enin eng edag meijen mougt mera medam dou yen dous. Hang emen emens emenin dag meijen sogougb debin gin dou yen. Anai enin eng eigdoumesa emen emoho. Hanoba en arougb emen naugb sug emen emesai en mer gin dou lusud laugwan toua. 4:7 Doba sug ELOHIM ogugwo en mer eisaugb Krisdus dou emen naugb sug emen emesai dou lusud dag ginohob, kaba, en eic augwan gin dou emen gedig emen emedag debecij dau cinogo naugb gin dous. Anai en ouwan dau sug lusud leiya, doba goubesa medam ouma debin emen gebedbed ginohob, kaba, len lecinaga dag goubesa gin, kaba, emen dau emenero, doba en dau ELOHIM enin dous. 4:8 Anai lusud leic gogom aingma aingma dou emen toua terimdohob. Doba gini emedag sogo maga dougwo emen naugb sug emen emesai Mer Geigouhw eisaugb Krisdus dou lusudero. Dara mougwa einyana, kaba, emen emeija emdocesa gin toua namcirohob. Doba gini emeic dag emen emdoc emobsara dau sug emen emod emina debsa ELOHIM touwero. 4:9 Dara lusud lahacugb gogom debin emen terimda. Doba ELOHIM enin moongga desij emen dougwo augwan gin toua. Dara len logod emen toua bemahauwa namcir. Doba emedeinyum naugb sug len leic gomom dou emen touwero. 4:10 Dara len lemeicara dag gin dou emen se lona hom dousero. Doba astesda sug emen emec sungga sungga, kaba, gomom gini aiceicira emen toua terimda. Dauntoba sug lusud leiya, doba emen ememomomero, kaba, ens ainyes dou len dag Yesus en emomom terimda touwero. Doba en eisa dau gomom ucugb touohob. 4:11 Hang sug emen emireseb gin, kaba, emen emedag sogo maga gesesa ucina mes naugb lusud len len, doba laha terimda. Dauntoba sug len leiya emen emaga getaha gini, doba emomom dau ginero, kaba, ens ainyes dou len dag Yesus en emomom terimda touwero. Doba en eisa dau gomom ucugb touohob. Dara meren geicara augwan dou emen dag gini, anai Yesus en moho aiga emen dag men logodehohob. 4:12 Dangga hang, gomom eb naugb emen terimda, doba maireseb menau geb huhugb eb naugb yen dous. Anai emen emaimo ucina aud gomom icira Krisdus mer naugb yenohob. 4:13 Augwan gini esogwa deisa areg Daud en erba ugwaremer an deb sug nosa touohob, endagai: Dan dod dan indina debsa ELOHIM an areg en os dou danohob, kaba, augwan dag misen namcir. Hang dan demens dau augwan gin dou lusud toua terimda. Sug emen emod emina debsa ELOHIM an areg en os dou emen aninim dag sud hom gini touohob, kaba, emen ememarges dau sug emen emesai en Mer Geigouhw eisaugb Krisdus gin dou lusud touwero. Doba emen emeic emus an naugb sug emesai augwan dou len toua terimda. 4:14 Anai emen emecinaga dau sug ELOHIM eigdoumesa maman Adehsud Yesus dau gomom aud maireseb menau geb huhugb sug nosohob, kaba, dag en emeigdoumesa emen emaugwan dau gomom aud maireseb menau geb huhugb, aninim dag Yesus gini. Hanoba en emahwan emen dara yen maman maugwan aud Yesus naugb maman maigtou desij en se bogo toues. 4:15 Dangga hang, ucina mog erij areg emen emaimo gin, kaba, naugb emeninero. Doba emen emaimo augwan gini naugb yen dous. Dauntoba sug ELOHIM medoc eigouhw an lusud eic bauloulo dou lusud terimda, kaba, eic dag len len sijo dou en. Hanoba len leigdoumesa en moho bagas lauloulo dangga toua. Anai len leiya, doba en eigdoc len dau sesar men gogom augwan aud maireseb menau geb huhugb dag gin touohob. 4:16-17 Sug emen emecinaga dag cum, kaba, ELOHIM eigdoumesa maman aud maireseb menau geb huhugb dag gin, kaba, emen emdoc emobsara dau sug emen emesai Mer Geigouhw eisaugb Krisdus dou lusud touwero. Doba emen emeic emouwemougb esesa naugb gin terimda. Anai emen emecinaga dau sug emen emaimo ucina mog erij gurereito se lona aibibra dag ginohob, kaba, cum edaran gogouf cucugb edreg medam dau areg gus augwan eb naugb emen beb huhugb namcir toua. Dangga hang, emen emaga, kaba, aimo ucina aud getaha dous. Doba se emen emdoc mes, kaba, areg emen emdoc ebdebin an ginohob, kaba, eic emen emdoc erleij dou emen astesda lona terimda. 4:18 Anai emen emdoc emebsa areg geb se cinogo gin deitero. Doba emen emdoc erleij aud areg geb se bogo gedig emen ememeiya se emen emiresero gin dous. Anai areg emen emeiya gin, kaba, emeb terberbero. Doba areg emen ememeiyero gin, kaba, eb beb huhugb namcir.

2 Korintus 5

5:1 Dangga hang, emen emdoc emomomtom dau sug emen emaimo ucina mog erij icira Mer Geigouhw eisaugb Krisdus gin touwero. Doba emen emaiyan emdocesem naugb emen emeicara emaimo gin terimda, anai emen emecinaga dau sug emen emomom, kaba, dag ELOHIM esedeb emen emaga menau geb huhugb se bogo naugb emenohob. Maga gin, kaba, lusud lemesinsin touwero. Doba ELOHIM enin eng esinsin gin dous. Hang emetaha touwero, doba eb beb huhugb namcir. 5:2-3 Dangga sug emen emeb se emen emaga getaha ginaba, kaba, emen emougwaha aud terimda. Anai emen emdoc erleij naugb emen emdeic emen emaga geb se bogo naugb emen emeg se emen toua. Dauntoba sug emen emegohob, kaba, emen ememedag mena touwero. Doba maga gin, kaba, eb naugb emen beb huhugb namcir. 5:4 Hang emen gedig emen emeb se emen emaga getaha gin, kaba, emen emougwahan gin terimda. Anai gini akebin emen namcir. Dara emen ememouwan naugb sug emen emarges dau emen emaga getaha gini touwero. Doba emen emouwan naugb emen emaga menau geb se bogo en baihiron dougwo emen emaga getaha gin dous. Dauntoba eperwei areg getaha gini dag menau beb huhugb toua terimda. 5:5 Dara sud hom areg en esedeb emen naugb ginohob, kaba, eni ELOHIM enin dous. Hanoba en esa Mena Gogoufu se emen emdoc mes. Dauntoba emen emecinaga dag areg en os dou emen ginohob, kaba, en emereiyara hom dou emen touwero. Doba en emeperwei emen emaga menau dag misen toues. 5:6-7 Dangga toua, sug emen emebsa emen emaga getaha gin, kaba, emen emecinaga dag emen emedebeij maman Adehsud touebma. Doba emen emeigtou aigusi dau enaba. Hang areg emen emaimo se cinogo gin, kaba, emogdoc sug emen emeiya en se emen emiresi touwero. Doba dau sug emen emdoc ebdebin an en dous. Doba emen emecinaga dag emen emaga menau eb naugb emen se bogo dag ginohob. Dangga hang, emen emdoc emomomtom dau emen geicara touwero. Doba emen emaiyan emdocesem naugb emen emaimo ucina mog erij gin terimda. 5:8 Hang naugb emenin, kaba, emen ememouwan naugb sug emen emeigtou se cinogo gin deitero. Doba emen emarges dau emen emaga getaha gin deb. Anai gin, kaba, aninim dag emen emugwengga desij emen Adehsud enohob. Dobnaro, kaba, emen emdoc momogo an touwero, doba emen emdoc ebtou namcir. 5:9 Dangga sug emen emugwengga se cinogo ginaba, era sug emen emugwengga desij en, kaba, emen emeic emouwemougb esesa namcir naugb sug emen emeic en medoc eigouhw dou en terimda. 5:10 Anai ELOHIM mer ogod an debohob dag astesda dau maman, kaba, en emesa deseino Krisdus men maija moc. Dauntoba en ogod geigouhw era gecgu deinaugb en, aimo dau enin men geicara dou en toua. 5:11 Sug emen emecinaga dag maman Adehsud en ogod aremer aga emen dag ginohob, kaba, gini eic dag emen emahau dau en toua namcir. Dangga hang, emen emarges dau sug emen emenara emaic lusud touwero. Doba emen emeic emouwemougb esesa naugb gini terimda. Dauntoba len lecinaga dag emen emereiyara dou len touwero. Doba dag areg emen emesai dou len gin, kaba, se geica dara emen emdoc hom dou len namcir. Hanoba len merdoc ebdebin an Krisdus gin toua. ELOHIM ecinaga dag emen emdoc mes an gin augwanohob. Dara dan dod dan indina se yen dag yen yousa deisa emen an gin toua terimda. 5:12 Areg dan dog dou yen gini, kaba, aninim dag emen emeigdoumesa emen emoho deseino yen deitei? Naro, doba dan dog augwan gini dou yen, dauntoba sug yen yecinaga gin dag misenohob, kaba, eic dag yen yeimiman emen an gin dou len gus toua. Hanoba yen yenara yaugtarera dougwo lusud gedig len lemeigdoumesa lusud meroho an areg geb se merdoc mesero. Doba len leigdoumesa lusud meroho an areg geb se len meraga dous. 5:13 Dangga hang, sug lusud lowun emen emoho endag mereiyeba emen, kaba, gini dag emen emeicara dou ELOHIM se aremer augwan dous. Era sug emen emdoc dag misen toua, kaba, augwan gini naugb sug emen emousa yen toua terimda. 5:14 Anai emen emdoc eica Krisdus dau sug en eperwei maman mamuhw. Hanoba en omom naugb maman maugwan maman sesar augwan dag gin, kaba, gini aninim dag maman maugwan maimo ucina aud gomom dau sesar men gogom augwan dara en touohob. Sug Krisdus medoc gororougb maman dag ginohob, kaba, emen ememarges dau sug emen emesai Mer Geigouhw eisaugb en dou lusud touwero. Doba en medoc gororougb gin, kaba, arautut emen naugb sug emen emesai en mer gini dou lusud terimda. 5:15 Dara en omom taiba sogo salib naugb maman sesar, dauntoba maman gedig maman mamiresebaba, kaba, maman mamaimo areg maman mamdoc etrij icira dag mohon toua deitero. Doba maman masogwa deisa en mohotimei mohw se aremer augwan toua terimda. Anai enin dous eng ohw en mougt edug naugb maman sesar. Hanoba ELOHIM eigdoumesa en dau gomom aud maireseb menau geb huhugb naugb maman touohob. 5:16 Dangga hang, emen ememaimo lusud meren gauwamara eisaugb ara ara toua deitero. Doba emen emarges dau augwan namcir. Anai sug nosa, kaba, emen emaimo lusud meren gauwamara an Krisdus dag misen toua namcirohob. Doba se lona sug emen emedag hom dara enohob, kaba, emen ememaimo len dag gin deitero. Doba emen emarges dau len touohob. 5:17 Anai gareg en edag hom dara Krisdusohob, kaba, en edag sud hom menau. Hang areg mohon, kaba, augwan ediyebeiya namcir, doba areg menau enohob. 5:18-19 Dara maman madag lusud menau gin, kaba, emogdoc mamanin maman goubesa touwero. Doba ELOHIM enin eng ehilon ucina naugb sug en eic gesgigouhwesa dou maman ogdoc Krisdus men geicara taiba sogo salib naugb maman dous. Hanoba en arougb emen naugb emen emens dau areg graga meijouhw augwan asesa dou lusud toua. Dauntoba len lecinaga dau sug Krisdus en omom naugb meren sesarohob, kaba, dag ELOHIM medoc emeiseisan meren sesar augwan toua deitero. Doba en esedeb len naugb sug en eic gesgigouhwesa ogdoc Krisdus men geicara taiba sogo salib dou len ucugb toua. Hanoba en eigdoumesa emen emoho naugb sug emen emesai en mer gesgigouhwesa gini dou lusud laugwan toua terimda. 5:20 Sug ELOHIM eigdoumesa emen emoho naugb sug emen emesai en mer eisaugb Krisdus dou lusud dag ginohob, kaba, areg emen emesai gin, kaba, aninim dag ELOHIM enin eng esulou yen ogdoc emen dou len toua. Hang emen emesulou yen dara goubesa namcir. Dauntoba yen yemohoiya ELOHIM en mer eisaugb Krisdus gini touwero. Doba yen yen aud en naugb yen yacgeij en, dauntoba en eic gesgigouhwesa dou yen ucugb deit. Anai emen emeperwei Krisdus en mohw naugb ginohob. 5:21 Emen emesulou yen dag gini, anai Krisdus gin, kaba, en emaimo sesar mougwa hom touwero. Hang ELOHIM emeigdoumesa maman sesar augwan deb se eni. Dauntoba sug maman madag hom dara enohob, kaba, sesar men gogom emeb naugb maman toua deitero. Doba ELOHIM aigdougwo maman sesar augwan, hanoba en eic gesgigouhwesa dou maman ucugb ogdoc men geicara taiba sogo salib gin toua namcir.

2 Korintus 6

6:1 Sug emen emousa ELOHIM naugb sug emen emesai en Mer Geigouhw eisaugb Krisdus dou lusud dag gin, kaba, emen ememarges dau sug emen emesulou yen ucucugb touwero. Doba emen emeicara dag gin dou yen terimda, dauntoba yen yemamsoho geigouhw areg ELOHIM eic dou yenohob augwan gin deb touwero. Doba yen yecgun meisira debin gin naugb yen yera mera einyana toua. Anai en medoc an yen namcirohob. 6:2 Augwan gini aimo dau areg ELOHIM en enara dou yen se Surad Injil Meb Mohon deb sug nosa touohob, endagai: Sug lona edagasa naugb dan indoc eigouhw an yen, kaba, dan douman yen meijir an areg yen yacgeij dau dan. Dara sug lona edebeij naugb sug dan deigdoc yen dau meijen gogom, kaba, dan dousa yen touohob. Yen youman areg ELOHIM enara debohob gin augwan deigeigouhwahabi. Anai lona naugb sug en medoc eigouhw an yen, kaba, edagasa. Dara lona naugb sug en eigdoc yen dau sesar men gogom augwan, kaba, edebeij namcir touohob. 6:3-4 Sug emen emedag ELOHIM men sogougb dag ginohob, kaba, emen emeic emouwemougb esesa, dauntoba lusud lemowun emen emoho an aremer homero. Doba len leigdoumesa emen emoho se aremer augwan toua terimda. Anai emen ememouwan naugb sug emen geicara hom edag sogo maga dougwo len aud Krisdus touwero. Doba emen geicara augwan eic len merdoc eiloboro aud en dous. Dangga hang, sug lusud leic mog erij dara len leigdoumesa gogom debin emen, hanoba len loho aremer einyana debin emen. 6:5 Era sug len labosbos emen dara len louf emen se tu gesisug, era len lebara eijideijo debin emen icira sug emen emesai ELOHIM mer eisaugb Krisdus dou len, kaba, emen ememobsara dau emen geicara gin touwero. Doba emen emaiyan emdocesem naugb sug emen emeicara emaimo dag gin terimda. Dauntoba sug lusud len leiya gin, kaba, len lecinaga dag emen ememedag gembala areibahauero. Doba emen emedag ELOHIM men sogougb dag misen namcirohob. Dara sug emen emesai ELOHIM en mer gini dou lusud, kaba, cicir dara sireba emen icira gin mougwa einyana touohob. Anai emen ememarges dau gin touwero. Doba emen emeic emen emug erij naugb gin terimda. Hang emedeinyum naugb sug emen ematou debin emen emug se loba touwero. Doba emen emaimo emen geicara gini naugb lona loba namcir. 6:6 Dara emen ememaimo ucina gecgu hom an len touwero. Doba se emen geicara augwan, kaba, emen emaimo ucina gecabeci dara gedag beim an len dous. Dara sug lusud lenara gouji dou emen, kaba, emen emdoc mogmog an len touwero. Doba emen emeigtou emateteij len an meren geicara. Hanoba emen emauni areg geigouhw dou len dous. Dauntoba sug len leiya dau gin, kaba, len lecinaga dag emen emdoc gororougb len dara emen emirs dousero, doba emen emdoc gororougb len dag misen namcirohob. Dara sug emen emedidib meijouhw eisaugb Krisdus asesa dou len, kaba, Mena Gogoufu eic ganusbus bauma debin areg emen emebedbed gini dou len toua. Dauntoba sug len leiya, doba emen emu ouforoho naugb emen emecinaga meijouhw augwan asesohob, kaba, len lecinaga emen emedag ELOHIM men sogougb misenohob. 6:7 Hang emen ememebedbed areg dag mer areibahau dou len touwero. Doba emen emesai areg se geica dou len dous. Hanoba emen emaimo areg asesa ELOHIM enin medoc mes augwan an len. Anai emen geicara gin, kaba, dag krawan mec dara kebtemaga gedig sud hom os se en mesira misen dara metigi naugb en esara dara men moc toua. Dara emen emens dau ELOHIM men goubesa debin areg emen emesai dou len gin toua. Dauntoba len lecinaga dag ELOHIM enin men lusud emenohob. 6:8 Dangga sug lusud leigdoumesa emen emoho, era len lowun emen emoho. Dara len louma debin emen, era len lecic emen emoho gouhw genes. Era sug len lesbesan emen dag emen emaugwohosa lusud naugb len laijahasero, kaba, emen emarges dau areg misen ginero. Doba emen emesai mer misen gin dou lusud terimda. 6:9 Dara lusud lowun emen emoho toua dag sogougb. Doba emen emoho, kaba, agaha becinten dou lusud laugwanohob. Dara len leic mog erij medam dou emen. Doba meren goubesa emedeinyum naugb sug len leic gomom dou emen touwero. Dangga emen emaimo ucina aud gomom mougwa einyanohob. Doba yen yeiya emen emina agau namcir. 6:10 Hang meren geicara, kaba, eic momogo dou emen toua namcir. Doba emen ememarges dau sug emen emagahugouhw an ELOHIM touwero. Dara emen emedag leng merunggwereij. Doba emen gebedbed gin, kaba, eic dag leinyana merisoho mougb icira ginohob. Dara se cinogo gin, kaba, emen aremougb hom touwero. Doba se bogo, kaba, augwan eb naugb emenohob. Se aremer augwan gin, kaba, emen emens emenin ainyes dou yen dag emen emedag gembala areibahau touwero. Doba emen emedag ELOHIM men gembala dag misenohob. 6:11 Yeng Korintus, emen emens dau areg geb se emen emdoc mes augwan dou yen. Dauntoba yen yecinaga dag emen emdoc emarges dau yenero. Doba emen emdoc gororougb yen namciraba. 6:12-13 Sug emen emens emen emdoc mes dag gini dou yenohob, kaba, yen yemog yen meigdoc mes gurereito dou emen touwero. Doba yen yens yen meigdoc mes augwan ainyes dou emen dag yen meigdoc gororougb emen toua namcir. Anai emen, kaba, emen emouf misis dougwo yenero. Doba yen yenin eng youf misis dougwo emen naugb sug yen meigdoc gororougb emen deiterohob. Dan denara dag gini dou yen, anai dan deija yen dag dan indihir yen misenohob. 6:14 Sug dan dedag yen meijina dag ginohob, kaba, dan den dougwo yen, dauntoba yen yemaimo leng medigo Yesus se meren geicara augwan toua deitero. Doba yen yasid yenin dau len namcir. Anai sud hom areg en aimo areg asesa ELOHIM enin medoc mesohob. Dara sud hom areg en edreg dau ELOHIM en mer gin terimdaba, kaba, lan mardoc dag hom se maran geicara ginei? Naro, lan mardoc aninim se maran geicara gin touwero. Era dagiro, eisaugb sud hom areg en einesa moufohob, dara sud hom areg en eigtou se lobeigbogaba, kaba, lan toua laigtou desijimei? Naro, lan lemeigtou desijim touwero. 6:15 Era dagiro eisaugb Krisdus dara Bilis lan gina? Lan gin toua mardoc dag homei? Naro, lan mardoc dag hom touwero. Era dagiro eisaugb leng merdoc ebdebin an Krisdus dara leng medigo Yesus len gina? Len gini toua leraga ucina homei? Naro, len lemaimo ucina hom touwero, doba meren ucina edregim namcir. 6:16 Era dagiro, eisaugb ELOHIM men tuari, dara seiseij men tuaria? Hwas toua aninimei? Naro, hwas aninimero. Dangga hang, yen yemaimo leng medigo Yesus deitlo. Doba yen yasid yenin dau len namcir. Anai mamanin dous eng madag ELOHIM gedig en maireseb huhugb teiteiyohob men tuari misen gini. Augwan gini esogwa deisa areg ELOHIM enara deb dou sud hom gesai en moro sug nosa, moho Hiskia, se Surad Injil Meb Mohon deb sug nosa touohob, endagai: Dan desedeb naugb dan demen aud len. Dara dan deigtou desij len. Hanoba dan dedag meren ELOHIM. Dara len ledag indan lusud toua terimda. 6:17 Dangga hang, maman Adehsud Gedig En Mobisamougb namcir, kaba, en arougb maman an gini se Surad Injil Meb Mohon deb sug nosa touohob, endagai: Yen yemeigtou desij leng lecguna dou seiseij. Dara yen yemaimo len aud areg geic gogor dou yen toua deitero. Doba yen yasid yenin dau augwan gin namcir. 6:18 Anai sug yen yeicara dag gin, kaba, dan debin yen deit. Hanoba dan dedag yen Meijina. Dara yen yedag dan indisir dara dan indihider yen toua terimda.

2 Korintus 7

7:1 Dangga dan indagunerij, dara dan indamouwerij gedig dan indoc gororougb yen. Sug ELOHIM os areg graga augwan dou mamanohob, kaba, maman mamdoc emetrij icira areg geb se cinogo. Dara maman mamauwam an areg gecgu toua deitero. Doba maman marges dau augwan gin namcir. Hanoba maman maic mamuwemougb esesa naugb maman maicara maimo areg ELOHIM arougb maman an gini augwan dag lusud mos dous. Dareg maman mahau dau en toua terimda. 7:2 Dara yen yemouf misis dougwo emen toua deitero. Doba yen yec misis dau yen meigdoc mes. Dauntoba emen emecinaga dag yen meigdoc gororougb emen terimdaba. Anai emen, kaba, emen ememaimo areg gecgu an yen dara areg eic mor mor dou yen mougwa hom touebma. Doba emen emaimo areg gobosboro an yen dous. Dara sug emen emahwan yen naugb yen meigdoc ebdebin an Krisdus sug nosa, kaba, emen ememerba mohoisa yen an meijen aremougb touwero. Doba emen emowun emen emdoc mes dau gin toua namcirohob. 7:3 Dan demog areg graga naugb dan demaic igdebes dou yenero. Doba dan dog augwan gini dou yen dareg emen emdoc gororougb yen dous. Dangga sug maman mamom era maman mamina agau toua, doba emen emdoc gororougb yen terimda. Dan den dau augwan gini dou yen sug nosa touohob. 7:4 Dara dan dod indina debsa yen dag yen yemarges dau sug yen meigdoc gororougb dan touwero. Doba yen meigdoc gororougb dan toua terimda. Sug dan indoc eica yen dag ginohob, kaba, dan deimiman yen deseino leng gus toua namcir. Anai dan douman dag areg dan den dou yenohob, kaba, yen yemohoiya dan indir an hom touwero. Doba yen yaimo augwan ginohob. Dangga hang, sug emen emaimo ucina mog erij icira Krisdus gin, kaba, emen emdoc momogo touwero. Doba meijen geicara geigouhw gin, kaba, eic dag emen emagahugouhw an yen. Dara eic dag emen emdoc ebtou dou emen toua. 7:5 Anai sug emen emeicara se leng Makedonia meren hancob gin, kaba, emen ematou debin emen emug touwero. Doba lusud loho gogom debin emen dara len leic mog erij dou emen astesda lona loba terimda. Dara emen emdoc emebtou touwero. Doba emen emeija emuwesa yen dag yen yaimo indan surad ginohobei? Era naroei? 7:6 Doba ELOHIM gedig en enara bad lusud merdoc mes ucucugb, kaba, en enara bad emen emdoc mes. Anai en esa Titus dau yen naugb en agasa dara emen se leng Makedonia meren hancob gin touohob. Dangga hang, sug emen emeiya en mebes, kaba, emen emdoc agahugouhw an en namcir. 7:7 Dara ELOHIM emenara emad emen emdoc mes ogdoc sug en esa Titus aud emen dara mena agau dousero. Doba sug Titus ecic dau meijen geicara dou emen dag augwan gini eic en medoc esgiraha dou en touohob, kaba, ELOHIM enara ad emen emdoc mes ogdoc gin toua. Anai en esai yen meijuro dou dan dag yen meigdoc erleij naugb maman maic gesgigouhwesem ucugb. Dara en ecic dou emen dag yen meigdoc emagas an sud hom geic mena mesouwa graga toua deitero. Doba yen yowun yenin meigdoc mes arjaga dau gin. Dara yen meigdoc momogo an touohob. Dara en ecic dou emen dag yen yamaimo lusud gedig len lowun dan indoho toua deitero. Doba yen meigdoc an dan naugb yen yoho meh dougwo dan toua terimda. Dangga sug dan douman dau gin, kaba, eic dan indoc agahugouhw medam an yen bedreg deit. 7:8 Sug dan douman, doba yen meigdoc momogo an meijen geicara dag ginohob, kaba, dan indoc emeijesa icira indan surad gedig dan dog dou yen gin toua deitero. Doba dan indoc ebtou ucugwohob. Anai dan demog surad graga dareg dan indoc gesgiraha dou yenero. Doba dan dog surad gini dou yen dareg dan indoc eijesa medam namcir. Dara dan douman, doba indan surad gin, kaba, emeic yen meigdoc momogo dou yen terimda touwero. Doba dag cum cum dous. 7:9 Dangga hang, iteitogini, kaba, dan indoc emeijesa an indan surad gin deitero. Doba dan dagahugouhw medam ucugwohob. Dara areg dan dagahugouhw an yen gin, kaba, emaimo dau sug yen meigdoc momogo gin touwero. Doba aimo dau sug yen meigdoc momogo an gin, kaba, dag yen yemaimo sud hom geic mena mesouwa graga se men sesar toua deitero. Doba eic dag yen yasid yenin dau en namcirohob. Dara yen meigdoc momogo dag gin, kaba, aimo areg asesa ELOHIM enin medoc mes touohob. Hang indan surad gin, kaba, emoho gecgu dou yen touwero. Doba oho geigouhw dou yen dous. 7:10 Anai gareg en medoc momogo an men sesar, hanoba en esga dara en ahau an dougwo, kaba, gin eng ahwan en naugb sug ELOHIM esga en dau sesar men gogom aud maireseb menau geb huhugb toua. Anai men geicara gin, kaba, aimo areg asesa ELOHIM enin medoc mesohob. Hang se lona daiyamo gacin, kaba, en medoc momogo an gin toua deitero. Doba en medoc ebtou namcir. Doba gareg en medoc momogo an men geicara gecgu, aimo dau lusud se cinogo gini meren gauwamara an gin dous, kaba, en medoc momogo gin, kaba, emahwan en aud maireseb menau geb huhugwero. Doba ahwan en naugb sug en omom se dum smougb dous. Anai emarautut en naugb sug en esga men sesar dara emahau an dougwo touwero. 7:11 Dara yen yenin yecinaga dau sug yen meigdoc momogo asesa ELOHIM enin medoc mes gin, kaba, dag yen yera mera einyana icira gin touohob. Anai yen yemamsoho sud hom ingga an men sesar deb touwero. Doba sug yen meigdoc esdigeij dara yahau dau ginohob, kaba, yen yecgun meisira debin gin namcir. Hanoba yen yowun en naugb yen yasid en dau meijen goucimdeb toua. Anai yen meigdoc erleij naugb yen yasid aremer gogor gini emeb se meijen goucimdeb touwero, doba ediyebeiya dau yen terimda. Dauwohob, kaba, yen meigdoc ebehibeh naugb sug maman maic gesgigouhwesem ucugb toua. Dangga hang, se aremer augwan gin, kaba, yen yens yenin ainyes dou dan dag yen yemaimo sud hom graga an men sesar gin toua deitero. Doba yen yarges dau namcirohob. 7:12 Augwan gini esogwa deisa dau indan gauwamara sug dan dog indan surad dou yen sug nosa touohob. Anai dan demog surad gini dougwo sud hom gebesesar. Dara naugb sud hom gedig en medoc momogo icira men sesar gin dousero. Doba dan dog indan surad gin dou yen, dauntoba sug yen yaimo areg dan darougb yen an ginohob, kaba, ens ainyes dou yenin deseino ELOHIM dag yen meigdoc edag beim an emen dag misen namcirohob. 7:13 Dangga hang, sug emen emecinaga, doba yen meigdoc edag beim an areg dan darougb yen an ginohob, kaba, emen emdoc emeijesa an yen toua deitero. Doba eic dag emen emdoc ebtou ucugwohob. Dara meijen geicara gin, kaba, emeic emen emdoc emebtou dousero. Doba sug emen emouman dag meijen geicara eic Titus medoc esgiraha dara agahugouhw dou en touohob, kaba, eic emen emdoc agahugouhw bedreg deit. 7:14 Anai dan deimiman danin an meijen geicara gini dou en sug nosohob. Dangga hang, sug yen yaimo areg dan deigdoumesa yen meijoho an gin toua terimdohob, kaba, eic dag yen yemeic igdebes dou dan touwero. Anai meijen geicara esogwa deisa dag areg dan den dou en, kaba, dag misenohob. Aninim dag areg emen emesai dou yen sug nosa, kaba, emen ememesai mer areibahau dou yen touwero. Doba areg emen emebedbed dou yen gin, kaba, dag misen touohob. 7:15-16 Dangga hang, dan indoc agahugouhw an yen medam namcir. Anai dan decinaga dag se aremer augwan gin, kaba, yen yemedreg dan touwero. Doba yen yaimo dan indir an areg dan darougb yen an gin toua terimdohob. Dara Titus, en toua, sug en medoc eiseisan meijen geicara gin, kaba, eic dag en medoc erleij aud yen bedreg deit. Anai en medoc eiseisan dau sug en edebeij yen sug nosa, kaba, dag yen yemeic meijus deseino en touwero. Doba yen yebin en dareg yen meigdoc ahau dau en toua namcir. Dangga yen meigdoc emedreg en mer touwero. Doba yen yowun yenin meigdoc mes arjaga naugb yen yaimo en mer an areg en esai dou yen toua.

2 Korintus 8

8:1 Dan indagunerij, dara dan indamouwerij, dan douwan dens dau ELOHIM men geigouhw areg en eic dou goucimdeb se leng Makedonia meren hancob meijouhw augwan asesa dou yenahabi, dauntoba yen yecinaga dag misen toua. 8:2 Anai len gin, kaba, mog erij medam en bainyen lenohob. Doba sug len laimo ucina mog erij gin, kaba, emeic len merdoc emeijesan touwero. Doba eic dag len merdoc agahugouhw eiseisaugb an gin terimda. Dara len gin, kaba, len toua merunggwereij namcir. Doba sug len merdoc agahugouhw dag gin, kaba, eic dag len lemecgun merisira debin meren ara ara touwero. Doba eic dag len merdoc erera naugb len lagaha merisira an meren aremougb gurereito gini dou len gus toua besesa terimda. 8:3 Dan douma debin len dag gini. Anai dan decinaga dag len lemeic bedeinyum dau areg len lobdebero. Doba len leic aremougb medam bedreg dau gin namcir. Dara aremougb gin, kaba, lusud lemagodgod len an touwero. Doba len leic augwan gini dau lenin merdoc mes dou lusud dous. 8:4 Hanoba len lagodgod emen ucucugb. Dauntoba len laimo len gus naugb len lousa leng Krisden se leng Yudea meren hancob gin toua. Anai sir gogoufu einesa sunggohob. 8:5 Dara areg len laimo gin, kaba, len lemaimo augwougb touwero. Doba aimougtut, kaba, len laimo areg asesa maman Adehsud enin medoc mes naugb len lohw lenin merugt edug dou en nosahabi. Dau, kaba, len lemohw lenin merugt edug naugb lousa emen toua. Hang se aremer augwan gin, kaba, len lemaimo areg emen emod emina debsa len an dousero. Doba len leicara laimo edreg medam dau gin namcir. 8:6 Sug leng Makedonia lagaha merisira an meren aremougb dou leng Krisden se leng Yudea meren hancob dag ginohob, kaba, emen emesulou Titus dara goubesa sug en odo indan surad geino graga dou yen, kaba, dag en oho mer debin yen. Dauntoba yen yemarges meisira dau sug yen youci aregoufu naugb leng Krisden se leng Yudea meren hancob gin touwero. Doba sug yen meigdoc eineg an lenohob, kaba, en ousa yen naugb yen youci aregoufu naugb len gini terimda edebeij sug ouwedoc toua. Anai en arautut yen naugb yen yebiji dag gin deb sug nosohob. 8:7 Dara se aremer medoc ebdebin an Krisdus, dara gesai en moro, dara mou ouforoho, dara yousa len gus, dara yen meigdoc gororougb emen, kaba, meijen geicara edreg dau leng Krisden gus laugwanohob. Dangga hang, sug yen yedreg leng Krisden gus se aremer augwan ginohob, kaba, emen emouwan naugb yen yagaha yen meisira an aregoufu naugb leng sireber gini edreg dau leng Krisden gus len laugwan toua namcir. 8:8 Eisaugb aremer gin, kaba, dan demagodgod yen an touwero. Doba dan douwan deic cumougt dou yen. Dauntoba yen yens yen meigdoc dou dan dag yen meigdoc gororougb lusud dag misenohobei? Era naroei? Hang dan demens dau leng se Makedonia meren geicara graga naugb daimo yen meijin toua. 8:9 Anai yen yecinaga maman Adehsud Yesus Krisdus gin, kaba, dag en mesoho mougb namcirohob. Doba en medoc an maman, hang en emowun enin dag sud hom monggwereij naugb maman. Dauntoba ogdoc en monggwereij gin, kaba, eic dag maman mamsoho mougb icira gin toua. 8:10 Dangga indan gauwamara eisaugb aremer gin, kaba, dag gini: Sug yen yebiji naugb yen youci aregoufu naugb leng Krisden se leng Yudea meren hancob se arisogomoc gragacinohob, kaba, eigouhw naugb yen yemarges debero. Doba yen yaulo mougwu gini terimda edebeij sug ouwedoc toua. Anai sug nosa, kaba, yen yeinoisa leng Krisden laugwan naugb yen meigdoc erleij an aremer graga. Hanoba yen yeic meijuwemougb esesa naugb yen youci aregoufu debinim bedebeij taitaij touohob. 8:11 Hang yen yemarges gin deb touwero. Doba yen meisira eb debin terimda aimo dau areg yen yesmohob dous. Hanoba yen yeic gerleij se gini terimda edebeij sug ouwedoc toua, aimo dau areg yen yogod an deb sug nosohob. 8:12 Anai ELOHIM, kaba, en emaimo dau sug maman aremougb geinyana era gurereito touwero. Doba en aimo dau sug maman maic ara ara dou en dara maman mamdoc erleij an dou en dous. Dangga hang, gareg dau maman en eic ara ara dou ELOHIM dara en medoc erleij, aimo dau areg en esmohob toua, kaba, ELOHIM medoc agahugouhw an en icira gin namcir. 8:13-14 Doba areg dan den dou yen graga naugb sug yen yeic einyana dou leng se Yudea, kaba, gini dag dan deigdoumesa gogom debin yen. Hanoba len gus kab, naroei? Dangga isnaro. Doba iteitogin, kaba, meijen einyana inggebga naugb yen. Hang eigouhw naugb yen yousa lenahabi. Anai sireba len namcir. Dauntoba sug sireba yen se lona daiyamo gacin, doba meren ara ara einyana inggebga naugb len deit, kaba, len lousa yen toua. Sug yen yeicara dag gin anim, kaba, yen yemeigdoumesa gogom dau yingma dousero. Doba yen yeigdoumesa gogom areg geb debin yen daum ucucugwohob. 8:15 Augwan gini esogwa deisa areg Musa en og deb se Surad Injil Meb Mohon deb sug nosa touohob, endagai: Gareg en ouci men ared einyana edreg medam debohob, kaba, en ekeba ingma dou len gus. Hang men emedreg dau len gus touwero. Dara sud hom gareg en ouci men ared gurereito dous, kaba, len gus lekeba dau meren gedreg ingma dou en. Dauntoba men gurereito, doba edeinyum naugb en toua. 8:16 Dan den sijo medam dou maman ELOHIM, anai en arautut Titus medoc mes dag en medoc esesa aud yen deitohob. Aninim dag emen toua, emdoc mes esesa an yenohob. 8:17 Dangga hang, en emohoiya emen emir touwero. Doba sug emen emesulou en naugb en ecicugb aud yen, kaba, en medoc edag beim an emen emir namcir. Anai sug en medoc esesa an yen dag ginohob, kaba, eic dag en ogod se enin medoc mes dangga touohob. 8:18 Dara emen emesa maman maguna hom naugb en aimo Titus aud yen. Dauntoba en ousa Titus sug en arautut yen naugb yen youci aregoufu graga augwan debinim toua. Anai sud hom gin, kaba, en ohw en mougt edug naugb sug en esai Mer Geigouhw eisaugb Krisdus dou lusud mougwa einyanohob. Hang en moho toua agaha becinten se goucimdeb augwan toua namcir. 8:19-21 Dara en moho emagaha becinten se goucimdeb augwan dousero. Doba goucimdeb se leng Makedonia meren hancob sugin, kaba, len laugwan leigdoumesa en moho naugb en ousa emen icira sug emen emaimo ucina geigouhw an leng sireber se Yudea touohob. Dauntoba sug emen emoho aregoufu einyana gini dou leng se Yudea, kaba, lusud merdoc emogdogda emen an touwero. Doba len merdoc esgirahesa emen an gin namcir. Anai emen ememeic emouwemougb esesa naugb sug emen geicara edag beim deseino maman Adehsud dousero. Doba emen emainyen naugb sug lusud laugwan louma debin emen geicara gin toua terimda. Hang emen ememacgeij maman maguna hom graga naugb en ousa emen se aremer geijouhw gin toua. Dauntoba emen geicara augwan gin, kaba, eic dag emen emeigdoumesa maman Adehsud en moho agas medam namcir. Dara eic dag leng se Yudea, kaba, len toua lecinaga dag emen emdoc emagadgeij an len touwero. Doba emen emdoc eineg an len naugb emen emousa len touohob. 8:22 Dara emen emesa maman maguna hom dara deit naugb en aimo Titus lan aud yen toua. Anai en toua, kaba, emen emainyen en se aremer einyanohob. Doba astesda sug emen emainyen en dag gin, kaba, en ens enin ainyes dou emen dag en medoc erleij naugb augwan namcirohob. Dangga hang, sug en ouman dau areg Titus ecic eisaugb yen dou emenohob, kaba, eic dag en medoc erleij edreg deit naugb en ousa yen sug yen youci aregoufu naugb leng sireber se Yudea gin toua. Anai sug en ouman dau meijen geicara, kaba, en od mena debsa yen dau sug yen yebiji naugb yen youci aregoufu debinimohob, kaba, dag yen yaimo augwan gini terimda edebeij sug ouwedoc toua. 8:23 Doba eisaugb Titus, kaba, eni dan insi gedig en ousa dan naugb aman amahwas amesai Mer Geigouhw eisaugb Krisdus dou lusud. Dara en edag meijen sogougb naugb en ousa yen aninim dag en ousa dan touohob. Dara lan gedig lan laimo dara en gin, kaba, goucimdeb se leng Makedonia meren hancob gini len leigdoumesa lan maroho naugb lan laperwei len meruhw aud yen. Anai se maran geicara augwan, kaba, eic dag lan laigdoumesa Krisdus en moho toua namcirohob. 8:24 Dangga hang, yen yemesbes an leng merug homoi gin touwero. Doba yen yens yenin meigdoc mes ainyes dou len dag yen meigdoc gororougb len dag misen terimda. Dauntoba sug goucimdeb sugini len laugwan louman dau gin, kaba, len lecinaga dag dan demereiyara dou lenero. Doba dan denara misen dou len, anai dan deimiman yen deseino len an ginohob.

2 Korintus 9

9:1 Sug dan desulou yen eisaugb aregoufu naugb ELOHIM men lusud se Yudea dag graga bedeinyumohob, kaba, dan demog eisaugb aremer gin dou yen deitero. Doba dan darges dan indir dau namcir. 9:2 Anai dan decinaga dag yen meigdoc erleij naugb yen yousa leng sireber se Yudea dau sug aimougtut. Hang dan deimiman yen an gin dou leng Krisden se leng Makedonia meren hancob sugin touohob, endagai: Leng Krisden se leng Akaya meren hancob, kaba, len lesedeb merdoc mes se arisogomoc gragacinohob naugb sug len lousa leng sireber se Yudea toua. Dangga hang, sug leng Krisden sugin len louman dau gin, kaba, eic dag len toua laseseijim namcir. 9:3 Doba dan desa Titus dara maman mamaguna lahwai graga len leino dan indin aud yen naugb len lousa yen sug yen yesedeb aregoufu gini. Dauntoba areg emen emeimiman yen an dou leng Krisden suginohob, kaba, augwan dag areg emen ememenara augwougb dou len touwero. Doba esogwa deisa dag emen emen dou len gin toua namcir. 9:4 Anai sug merug hosa dau leng Makedonia len laicira dan aud yen. Hanoba len leiya, doba yen yemesedeb aregoufu naugb leng se Yudea augwan debbuma, kaba, meijen geicara gini eic igdebes dou emen namcir. Anai dan deimiman yen an gini deseino len laugwanohob. Dara emeic igdebes dou emen dousero. Doba eic igdebes dou yen toua. Doba dan demenara dau gini dou yenero. Anai yenin yecinaga dau ginohob. 9:5 Dangga hang, sug dan dogod se dan indoc mes debohob. Doba esloulougb medam naugb yen youci aregoufu augwan debinim deb nosa touahabi, kaba, dan desulou Titus an maman mamaguna lahwai graga naugb len leino dan indin aud yen. Hanoba len lousa yen an aregoufu graga, dauntoba areg yen meigdoc edugsa gin deb sug nosohob, kaba, yen youci augwan gini terimda edebeij sug ouwedoc toua. Dauntoba sug dan dedebeij yen, kaba, yen yemehilon aregoufu deitero. Doba yen yesedeb augwan meij mogudohob. Anai sug yen yeicara dag gin, kaba, gini ens ainyes dou lusud dag yen youci augwan gini dau sug dan demagodgod yen an touero. Doba aimo dau areg yen meigdoc erleij naugb gin dous. 9:6 Areg dan desulou yen an graga, kaba, men meijouhw dag gini: Gareg en eic ara ara dou lusud, doba dau sug len gus lagodgod en an, kaba, gini dag en eic gurereito dous. Doba gareg en eic ara ara dou lusud dara en medoc erera, kaba, gini dag en mesira emakebin ingma debero. Doba en eic einyana dou lusud toua. Anai en ogod dangga se enin medoc mes sug nosohob. Augwan gini aimo dau maman aremeijouhw dangga touohob. Anai mer gini esulou maman dau sug maman maba meij gurereito, kaba, maman mac mera gurereito. Doba sug maman maba meij einyana, kaba, maman mac mera einyana toua. 9:7 Dangga hang, sug yen youci meijen aregoufu naugb leng se Yudea, kaba, yen yemeic aregoufu dara yen meigdoc momogo, dara yen yemoudesa dag emen emagodgod yen an touwero. Doba yen yeic aregoufu gini dara yen meigdoc esgiraha an dous, aimo dau areg astesda sud hom yom dau yen en ogod se enin medoc mes naugb ginohob. Anai sug yen yeic aregoufu dara yen meigdoc esgiraha dag gin, kaba, ELOHIM medoc agahugouhw an yen icira gini toua terimda. 9:8 Dara men goubesa edeinyum naugb sug en eic ara ara bedreg medam dou yen toua. Dauntoba meijen ara ara gini emedeinyum naugb yen dousero. Doba edeinyum beiseisaugb namcir naugb sug yen yaimo ucina geigouhw dara edag beim an lusud se aremer augwan toua terimda. 9:9-10 Anai sug ELOHIM eic meij edeinyum dou lusud naugb sug len leba, hanoba en eic ared edeinyum dou len naugb sug len let astesda lona terimda toua, kaba, en eic meij edeinyum dou yen naugb sug yen yeba an len gus. Hanoba en ousa yen naugb yen yera mera geigouhw einyana gougwa an len toua terimda. Augwan gini aimo dau areg sud hom gerba Ugwaremer en og deb se Surad Injil Meb Mohon deb sug nosa touohob, endagai: Gareg en aimo areg asesa ELOHIM enin medoc mes, kaba, en emecgun mesira debin men aremougb touwero. Doba en agaha en mesira an dou len gus dara en ousa len merunggwereij toua. Hanoba en emarges dau gin touwero, doba en eicara baimo dangga esesa an len toua terimda. 9:11 Sug ELOHIM men goubesa edeinyum naugb sug en eic ara ara einyana gougwa dou yen dag ginohob, kaba, yen yemarges dau sug yen yagaha meisira an dou leng sireber se Yudea touwero. Doba yen yeicara yaimo dangga an len terimda. Dauntoba sug emen emeic einyana gini dou len, kaba, aic len merdoc mes naugb len len sijo medam dou ELOHIM icira gin toua. 9:12 Anai meijen geicara geigouhw gin, kaba, emousa len an areg emebdebin len dousero. Doba arautut len merdoc mes naugb len lagahugouhw an ELOHIM icira areg yen yagaha aibibra dou len eiseisaugb namcir toua. 9:13 Dara ens ainyes dou len dag yen yemos yemadi Mer Geigouhw eisaugb Krisdus deseino lusud dousero. Doba sug len leiya dag yen yagaha meisira an meijen aremougb dou len dara len gus laugwan dag ginohob, kaba, ens ainyes dou len dag yen yaimo Mer Geigouhw gini se meijen geicara augwan touohob. 9:14 Hang len merdoc esesa an yen, kaba, len locuncum dou ELOHIM naugb en eic geigouhw dou yen. Dara len leigdoumesa en moho an gin toua terimda. Anai sug len leiya dau meijen geicara gin, kaba, len lecinaga dag ELOHIM medoc eigouhw an yen eiseisaugb namcir touohob. 9:15 Dangga hang, maman mamarges dau sug maman man sijo dou ELOHIM naugb areg en eic dou maman ogdoc Krisdus gin touwero. Doba maman maicara maimo dangga esesa terimda toua. Anai areg en eic dou maman ginohob, kaba, mera eisaugb medam edreg dau areg maman mamu edeinyum naugb sug maman macic toua namcir.

2 Korintus 10

10:1 Doba areg dan desulou yen an se tainya gin, kaba, dau len gusero. Doba dang, Paulus, eng denara eisaugb gin dou yen. Anai dan douman dag ligbum dau yen, kaba, len lesbes an danohob dag indan geicara emedag Krisdus men gembala misenero. Doba edag lusud se cinogo gini meren geicara dous. Hanoba len lenara, lendagai: Sug Paulus eigtou ai gusi dau maman, kaba, en eic mos dou maman namcir. Doba sug en eigtou desij maman, kaba, en emeic mos touwero. Doba en enara dara mer arjaga dou maman dous. 10:2 Dangga hang, dan dacgeij dara goubesa naugb yen yemesbes an dan dag gin deitero. Doba yen yarges dau namcir. Dauntoba sug dan dedebeij yenohob, kaba, yen yemeicara yemaic dan indoc mes naugb sug dan deic gogom dou yen touwero. Anai dan demouwan naugb dan denara gouji dou yen dag nosa deitero. Doba dan douwan desogwa deisa Krisdus mohotimei mohw an yen naugb dan dowun danin indoc mes arjaga deseino yen se aremer augwan. Aninim dag Krisdus eicara dangga sug nosa touohob. Hang dan demens dau men geicara gin eng dou yen toua. Dobnaro, kaba, indan goubesa inggebga naugb sug dan deic gogom dou lusud areg len lowun dan indoho len laugwan toua namcir. Anai len lesbesan dan dag se indan geicara augwan, kaba, dan daimo lusud gedig Bilis oiharaga len se cinogo gini meren gauwamara an lusud dous. 10:3 Dobnaro. Anai emen emaga dous eng aimo areg geb se cinogo gini. Doba sug emen emesara dara Bilis an men logodeh gin, kaba, emen ememaimo lusud se cinogo gin meren gauwamara. Dara emen ememeic meren ariloboc naugb gin touwero. 10:4 Doba emen emeic ariloboc areg ELOHIM eic dou emen naugb gin dous. Dangga hang, lusud meren geicara dag los es medam dougwo emen terimda. Doba ELOHIM men ariloboc gini dag sidgwa naugb sug emen emoho emainesa gin namcir. Dara ousa emen naugb sug emen emaiyan mer areibahau augwan mor mor toua. 10:5 Dara gembala areibahau gin, kaba, len lob sogo maga dougwo lusud aimo dau len merdoc agas. Dauntoba len lemecinaga areg asesa ELOHIM enin medoc touwero. Doba ELOHIM men ariloboc gin, kaba, edeinyum naugb sug emen emagririj sogo maga augwan dau len. Hanoba emen emeigdoc meren gauwamara, dauntoba len laimo areg asesa Krisdus enin medoc mes toua terimda. 10:6 Sug ELOHIM eic goubesa dag gin dou emenohob, kaba, yen yemesbes an emen toua deitero. Doba yen yaimo areg emen emarougb yen an ginohob augwan deigeigouhw namcir. Anai sug emen emedebeij yenohob, hanoba gareg dau yen en edreg emen emir terimda, kaba, emen emesedeb emen emdoc mes naugb sug emen emeic gogom medam dou en toua. 10:7 Dangga hang, sug yen yemogod ara ara eisaugb emen, kaba, yen yemaimo dau areg yen yeiya se emen emaga ginlo. Doba yen yaimo areg se geica an emen dous. Anai sug sud hom dau yen en eimiman enin moho deseino yen dag Krisdus eigdoumesa en moho naugb en esai en mer dou lusudohob, kaba, eigouhw naugb sud hom gin, kaba, en ecinaga dag Krisdus emeigdoumesa enin moho naugb gin dousero. Doba Krisdus eigdoumesa emen emoho naugb sug emen emesai en moro dou lusud touohob. 10:8 Hanoba en eic enin men goubesa debin gin dou emen touohob. Doba men goubesa areg en eic dou emen gin, kaba, naugb sug emen emaic mor mor dou yenero. Doba naugb sug emen emousa yen. Dauntoba yen yeiji dag lusud mos se Krisdus dous. Dan decinaga dag dan deimiman dan indoho an goubesa areg maman Adehsud eic dou dan edreg gurereito dou yen sug nosohob. Doba dan decinaga dag augwan gini misen namcir, hang emeic igdebes dou dan touwero. 10:9 Dan dens dau indan goubesa gin dou yen. Dauntoba yen yecinaga dau sug dan dog se indan surad gini dag dan deic gogom dou yen, kaba, dag dan demeic gemahau dou yen dousero. Doba indan goubesa inggebga naugb dan deic gogom augwan gini dag misen dou yen toua. 10:10 Anai ligbum dau yen, kaba, len lesbes an danohob, lendagai: Sug Paulus og surad deinaugb maman, kaba, en og dara mer goubesa dou maman. Dara men surad augwan, kaba, mougb ogum naugb en ogod maman mamdoc mes ahau namcir toua. Doba sug en eigtou desij maman naugb en enara se enin mer dou maman, kaba, en enara dag sud hom gobob deisara dou maman dous. Dara men geicara augwan, kaba, dag sud hom ogonten deseino maman toua terimda. 10:11 Dan douwan naugb len gin, kaba, len lemauwam an didi deitero. Doba len merdoc eica dag areg emen emog se emen surad dou yen sug emen emeigtou aigusi dau yen gin, kaba, emen emaimo augwan gini an yen dag misen an yen sug emen emugwengga desij yen toua deit. 10:12 Anai emen ememeic emus naugb sug emen emeigdoumesa emenin emoho, dauntoba emen emoho agas, aninim dag ligbum gedig len leigdoumesa lenin meroho an meren geicara deseino lusud. Dara emen ememeic meren geicara naugb sug emen ememainyen emen geicara touwero. Doba cinogo dara lusud areg ELOHIM ens dou emenohob naugb sug emen emesai en moro dou len, kaba, emen emaimo ucina gini an len dous. Anai len gin, kaba, len lemeic areg ELOHIM enin ouwan naugb len lemainyen lenin se meren geicara ginero. Doba len leic lenin meren gauwamara, hanoba len leic gin eng naugb len lainyen lenin. Dauntoba len lecinaga dag meren geicara geigouhw edeinyumohobei? Era narobmei? Hang meren geicara gin, kaba, aninim dag leng meru edgom meren geicara toua namcirohob. 10:13 Doba emen, kaba, emen emedreg dau hancob areg ELOHIM ens dou emen naugb sug emen emeicara se ginero. Doba emen emaimo gin dous. Dara hancob areg en ogugwo dou emen, kaba, edebeij yen se cinogo Korintus gin touohob. 10:14 Dangga hang, sug emen emesai Mer Geigouhw eisaugb Krisdus dou yen sug nosa, kaba, emen ememedreg dau areg asesa ELOHIM enin medoc mes touwero. Doba emen emaimo augwan gini dag misen namcirohob. Anai en emogugwo yen se gembala gus gus len merisirero. Doba sug aimougtut, kaba, en ogugwo yen se emenin emsira dous. 10:15 Dara emen ememeigdoumesa emenin emoho an len gus meren geicara dag emenin emen geicara, aninim dag len gin touwero. Doba emen emeigdoumesa emen emoho an emenin emen geicara, aimo dau ucina areg ELOHIM ogod deinaugb emenohob naugb sug emen emaimo gin dous. Dangga hang, emen emod emina debsa ELOHIM. Dauntoba sug emen emedebeij yen deit, kaba, dag en ousa emen naugb sug emen emesma mera einyana edreg dau nosa dou yen toua. Dauntoba sug yen meigdoc ebdebin an Krisdus dag lusud mosohob, kaba, en esa emen dig cinogo gus naugb emen emesai Mer Geigouhw eisaugb Krisdus dou len toua deit, aimo dau cinogo areg ELOHIM ogod an deinaugb emen touohob. 10:16 Anai emen ememouwan naugb sug emen emeigdoumesa emenin emoho an len gus meren geicara dag emenin, aninim dag ligbum se meijen gusi ingga touwero. Doba emen emouwan naugb sug emen emesai Krisdus moro se cinogo sug lusud gus lemesai en mer dou lenbuma, gin dous. 10:17 Augwan gini aimo dau areg sud hom en og deb se Surad Injil Meb Mohon deb sug nosa touohob, endagai: Gareg en ouwan eigdoumesa enin moho an ara ara, kaba, eigouhw naugb en eigdoumesa enin moho an maman Adehsud men geicara geb dou en dous. 10:18 Anai sud hom areg en eigdoumesa enin moho an men geicara, kaba, maman Adehsud emeigdoumesa en moho touwero. Doba en eigdoumesa sud hom areg en medoc eigouhw an men geicara ginohob en dous.

2 Korintus 11

11:1 Sug leng gembala areibahau graga se meijen gusi leigdoumesa lenin meroho an meren geicara deseino yen dag ginohob, kaba, dan dacgeij yen, dauntoba yen yeigtou yateteij dan sug dan deimiman danin an indan geicara deseino yen toua. Dan decinaga dag areg dan deimiman danin an deseino yen gin, kaba, eic dag dan indu edgom namcirohob. Doba dan dod indina debsa yen. Dauntoba yen yeigtou yateteij sug dan deimiman danin an indan geicara dou yen gini. 11:2 Anai dan daijero an yen, aninim dag ELOHIM aijero an men lusud gin toua terimda. Dara len gus, kaba, len lemouf yen aud Krisdus dag misenero. Doba danin dous eng douf yen aud Krisdus dag misenohob. Dangga hang, dan demouwan naugb sug yen yemohw yenin meijaga dou gembala areibahau graga touwero. Doba yen yebehnehino yenin meijaga dara yen meigdoc mes dougwo meren geicara gin namcir. Dauntoba sug dan dahwan yen aud Krisdus enin eng se Lona Sug En Ecicugwen, kaba, yen yedag ligdob hom gecabeci namcir naugb en sug en eic yen dag en mesouwa se Lona ingga toua. 11:3 Doba dan dahau dag cum, kaba, gembala areibahau gini len laugwohosa yen dau Krisdus naugb yen yemaimo en dara yen meigdoc hom dag nosa deitero. Doba yen yobsara dau en naugb yen yaimo areg dag susugb gin dous. Aninim dag Setan augwohosa Epa sug nosa naugb en emaimo ELOHIM en mer toua deitero, doba en edreg dau en mer gin touohob. 11:4 Anai sug gembala areibahau gin, kaba, len ledebeij yen dig emen emedigo, kaba, len lens dau Yesus, dara Mena Gogoufu, dara len lesai Mer Geigouhw eisaugb Krisdus dou yen toua. Doba augwan gin, kaba, susugb dau areg emen emesai dou yen sug nosohob. Doba inggaida, yen yemohoiya len merir, dara yen yemen dougwo len an gini touwero. Doba gareg en ebedbed mer areibahau gin dou yen, kaba, yen yebin en mer dara yen meigdoc an en toua terimda. 11:5-6 Dobnaro. Se aremer gebedbed hom gin dous eng dan indoho eb tainya len. Anai dan decinaga dau sug dan debedbed, kaba, dag dan indir emahaufo aninim dag lenero. Doba se aremer gus augwan, kaba, dan toua, dan indoho aninim dag gembala graga, gedig yen yeigdoumesa len meroho agas medam gin touohob. Anai sug emen emesai Mer Geigouhw eisaugb Krisdus dou yen sug nosa, kaba, emen emens emenin ainyes dou yenohob dag emen emu emaiyero. Doba dag emen emu ouforoho se aremer augwan gin namcirohob. Hang emen emens meijouhw dau augwan gini asesa dou yen toua. 11:7-9 Dara sug dan desai ELOHIM Mer Geigouhw eisaugb Krisdus dou yen sug nosa, kaba, dan demacgeij aregoufu mougwa hom dau yen touwero. Doba dan dagodgod goucimdeb gus naugb len lousa dan dara aregoufu dous. Dauntoba dan debedbed ELOHIM en mer gini dag mogud dou yen terimda. Hang indan geicara gin, kaba, aninim dag dan dasma aregoufu dau len toua. Anai yen yecinaga dau sug dan deigtou desij yen sug nosa, kaba, dag dan demacgeij ara ara mougwa hom dau yen touwero. Doba sug indan aregoufu deinyor ouwa dau danohob, kaba, maman mamaguner dau goucimdeb se leng Makedonia meren hancob len eng len len naugb len leic aregoufu laos dara indan mougb geb bedeinyum dou dan toua. Dangga se indan geicara augwan, kaba, dan dowun danin indoho eb tainya namcir. Dauntoba indan geicara gin, kaba, ousa yen naugb sug ELOHIM eigdoumesa yen meijoho agas deseino en toua. Doba sug yen youdesa dag areg dan deicara daimo an yen gini, doba dag sesarohob, kaba, dan dacgeij naugb yen yaigdougwo indan sesar gini dau dan toua. 11:10 Dangga sug dan dedebeij yen ucan deit, kaba, dan demacgeij aregoufu dau yen touwero. Doba dan dehig dau gin toua namcir, aninim dag dan demacgeij aregoufu dau yen sug aimougtut touwero. Doba dan damsoho yen sug nosa touohob. Anai dan demouwan naugb sug sud hom ingma dau yeng se leng Akaya meren hancob gin, kaba, en emowun dan indoho dag dan dacgeij aregoufu dau lusud touwero. Doba dan douwan deigdoumesa danin indoho an indan geicara se meijen hancob dag dan debedbed Mer Geigouhw eisaugb Krisdus dag mogud dou yen dous. Hang dan dou Krisdus en mer geica debin gin toua. Anai en mer misen gin, kaba, einesa dan indoc mesohob naugb dan daimo terimda. Aninim dag Krisdus aimo areg se geica an lusud sug nosa touohob. 11:11 Doba sug dan denara dag dan demacgeij yen an aregoufu touwero, kaba, yen yenara endag dan indoc gororougb yeneroei? Naro, ELOHIM ecinaga dag dan indoc gororougb yen namcirohob. 11:12 Dara areg dan daimo an lusudohob dag dan demacgeij aregoufu dau lenero, kaba, dan dos debin gin terimda. Dauntoba dan demeic cumougt dou ligbum se meijen gusi ingga naugb len lemeic meren geicara lemaos dara emen geicara touwero. Doba len lobsara dau areg len leigdoumesa lenin meroho an gin toua namcir. Anai len lenara dou yen, lendagai: Areg emen emebedbed, hanoba emen emacgeij aregoufu icira gin dau yen, kaba, augwan gini aninim dag Paulus men gebedbed dara men geicara gin touohob. 11:13 Dobnaro. Len lemedag gembala misenero. Doba len lesohw len merucbobaga dangga dous. Hang areg len lesai gin, kaba, mer misen touwero, doba mer areibahau mogud. Dara se meren geicara augwan, kaba, len laugwohosa yen toua terimda. 11:14-15 Dara yen yemeimiman dau gin touwero. Anai sug Setan men goubesa edeinyum naugb sug en esohw enin mocbobaga dag malaikad geigtou se gogouf cucugwohob, kaba, etetahaito naugb men logodeh len toua lesohw merucbobaga, aninim dag ELOHIM men logodeh gedig len laimo areg asesa enin medoc mes gin toua. Doba sug meren geicara edebeij sug ouwedocohob, kaba, ELOHIM emeic gogom dou len laugwan, aimo dau meren geicara gecgu gin dou len toues. 11:16 Dangga hang, dan demen dou yen deit. Dauntoba sud hom ingma dau yen, kaba, en emoududa dan dag sud hom mou emaiyero touwero. Doba sug yen yowun dan indoho dag ginohob, kaba, dan dacgeij naugb yen yebin dan dag sud hom mou emaiyero gini. Dauntoba dan deimiman danin an indan geicara gurereito deseino yenahabi, aninim dag len gus leimiman lenin an meren geicara deseino yen touohob. 11:17 Areg dan den dou yen gin, kaba, emaimo areg maman Adehsud en arougb dan an ginero. Doba aimo leng meru emaiyero meren geicara dous. Anai sug dan deigdoumesa danin indoho an indan geicara dag gin deseino yen, kaba, dan dedag sud hom mou emaiyero touohob. 11:18 Doba leinyana, kaba, len leimiman lenin meroho an meren geicara deseino yenohob, aimo dau lusud se cinogo gini meren gauwamara an gin dous. Sug len leicara laimo dag gin deseino yen terimdohob, kaba, arautut dan naugb dan deigdoumesa danin indoho an indan geicara deseino yen toua. 11:19 Dangga dan dacgeij naugb yen yebin dan dag sud hom mou emaiyero gin toua. Anai yen yeigdoumesa yenin meijoho dag yen meiju ouforoho an augwan namcirohob. Hang yen yemen dougwo lusud gedig len meru emaiyero touwero. Doba yen yebin len laugwan dara yen meigdoc agahugouhw an len terimda. 11:20 Dangga sug lusud lowun yen meijoho dag meren sogougb naugb len laresbes yen, era sug len lagungun meijen aremougb dau yen, dara sug len lenara laceca yen, era sug len leigdoumesa lenin meroho eb taiba dau yen, era sug len lesbes an yen, hanoba len logod yen toua, kaba, yen yemen dougwo len an meren geicara gin touwero. Doba yen yamsoho len an toua namcir. 11:21 Augwan gini, kaba, eic igdebes dou dan. Anai sug emen emugwengga desij yen sug nosa, kaba, emen ememeic emus naugb emen ememeicara dag graga dou yenero. Doba emen emowun emenin emdoc mes dag arjaga deseino yen dous. Hang dan deiyaga dougwo emen geicara gini dou yen toua namcir. Doba areg len leic merus naugb len leimiman lenin meroho an deseino yen, kaba, dan deic indus naugb dan deimiman danin indoho an gin deseino yen. Anai eb naugb dan touohob. Dan decinaga dag areg dan dog gin, kaba, aninim dag sud hom mou emaiyero namcir. Doba meren geimiman gin, kaba, arautut dan naugb dan deicara dag gini toua. 11:22 Anai len, kaba, len leigdoumesa lenin meroho deseino yen dag leni dau leng Ibrani dara len ledag Abraham dara Israel mardebeitor toua. Doba dan toua dau leng Ibrani. Dara dan dedag Abraham dara Israel mardebeito dan touohob. 11:23 Dara len leigdoumesa lenin meroho deseino yen dag Krisdus men sogougb toua. Doba dan gini, kaba, dan dedag Krisdus men sogougb misen edreg dau len namcir. Anai dan dohw dan indugt edug naugb dan desai Krisdus moro dou lusud edreg dau len. Hang len lemouf dan se tu gesisug. Dara len labosbos dan dahauwa mougwa einyana icira gini edreg dau len touohob. Dara sug len labosbos dan gini, kaba, emedeinyum naugb sug dan demecic dau gin touwero. Areg dan dog gini, kaba, aninim dag sud hom mereiyeba enohob. Doba gin dag misen namcir. 11:24 Anai mougwa sergem, kaba, leng Yahudi meren mougtir larougb meren lusud naugb len labosbos dan indus ohubecbec mera mos homoi senggegu edeisu icira. 11:25 Dara mougwa homoi deit, kaba, leng Roma meren mougtir larougb meren lusud naugb len leic sogo mesira lagod dan indromera einyana astesda icira gin touohob. Mougwa cum, kaba, lusud leic igdahab led dan dahauwa icira namcir. Mougwa homoi, kaba, duhu mogo ogod ij bobrugb an dan se dum medi. Dara mougwa cum deit, kaba, duhu mogo otogoto dan se lona hom dara loba hom touohob. 11:26 Dangga toua, sug dan deihwedig sungga sungga naugb dan desai Krisdus moro dou lusud, kaba, duhu eh bougwan dan dara leng merug mog len lesma indan aremougb. Dara dan insir dau leng Yahudi, dara lugmahara, dara leng Krisden areibahau, kaba, len leic gogom einyana dou dan. Dara sug dan indugwengga se beimes, era sug dan deraga se lomougwisa, era sug dan deisa ij, kaba, dan daimo ucina mog erij mougwa einyana ogdoc gin touohob. 11:27 Dara loba einyana, kaba, dan dematou debin dan indug touwero. Anai dan deicara esesa terimda. Dangga hang, dan indug toua erij namcir. Dara sir dara merijeba dan toua mougwa einyana, anai indan ared augwan ouwa dau danohob. Dara indan sansun gesrougb ingmemeb naugb dan touwero. Hang dugurijeba dan mougwa einyana touohob. 11:28 Dara gogom gus einyana eb naugb dan toua. Doba dan demecic dau augwan gin dou yenero. Dara gin dousero. Doba astesda lona, kaba, dan dognogna an indan goucimdeb augwan terimda. Hang augwan gini dag aguci medam naugb dan touohob. 11:29 Dangga sug sud hom Krisden en eija mouwesa an ara ara, kaba, dan toua dowun danin indoc mes arjaga naugb dan dedag sud hom geija mouwesa desij en toua. Era sug sud hom ahwan len gus aud sesar naugb len merdoc emebdebin an Krisdus deitero, kaba, dan demeigtou ateteij en touwero. Doba dan indoc esrougb an en toua namcirohob. 11:30 Sug lusud gus meren geicara arautut dan naugb sug dan deimiman danin indoho an indan geicara deseino yen dag ginohob, kaba, dan demouwan naugb dan demens dau indan goubesa an areg graga dou yen dousero. Doba dan douwan naugb dan deimiman danin indoho an indan geicara sug indan goubesa emeb naugb dan se ara gusero dou yen toua. 11:31-33 Dangga hang, sug dan indugwengga se Damsig sug nosa, kaba, mougt mera medam, moho Aretus, men gedeijan en arougb men sadodor naugb len lesedougwo liga misis geb acec cinogo ingga dougwo dan. Dauntoba len lagaigeij dan toua. Anai sud hom ingga, kaba, Aretus eigdoumesa en moho naugb en edag meren mougt mera naugb len se Damsig laugwanohob. Doba dan insir leng Krisden se cinogo ingga, kaba, len lob dan se aigdaga mes. Hanoba len losus aigdaga mes an dan dau liga moro taiba dig cinogo gaihida naugb dan dougbdedau len toua. Maman Adehsud Yesus en Mena ELOHIM gin, kaba, en ecinaga dag areg dan den dou yen graga, kaba, dan demereiyara dou yen touwero. Doba dan denara augwan gini se geica dou yenohob. Hang dan dou ELOHIM en moho debin gin toua. Anai en moho gini edeinyum naugb sug maman magahugouhw an en toua beb huhugb namcir.

2 Korintus 12

12:1 Dan decinaga dag areg dan deimiman danin indoho an deseino yenohob, kaba, emera mera geigouhw hom touwero. Doba sug gembala areibahau graga leimiman lenin meroho an meren geicara deseino yen dag ginohob, kaba, eic dag dan deicara daimo dangga dou yen toua. Dangga hang, iteitogini, kaba, dan douwan dens dau sug maman Adehsud ogod dan dag domom. Dara sug en ens areg asesa enin medoc mes dou dan touohob meijouhw augwan asesa dou yen deit. Dauntoba yen yecinaga dag misen namcir. 12:2 Anai dan decinaga dag arisogomoc sisa hobjerogu gragacin sug dan dedag hom dara Krisdus ginohob, kaba, en ogod dan dag domom. Hanoba en ahwan dan aud ELOHIM se bogo gedig homoi gin toua. Sug en ahwan dan gini, kaba, dan demecinaga dag en ahwan dan dousei? Era en ahwan dan an dan indaga touei? ELOHIM enin dous eng ecinaga dau gini dag misen namcir. 12:3-4 Dangga sug en eigdoumesa dan aud w Pirdaus ginohob, kaba, dan douman dau aremer einyana gougwa toua. Doba areg dan douman gin, kaba, emedeinyum naugb sug dan dens meijouhw dau augwan dou yen touwero. Anai ELOHIM en emouwan naugb sug sud hom ingma, kaba, en emenara eisaugb aremer gini dou lusud touwero, doba ouf mers dougwo namcir. Doba sug en ahwan dan gin, kaba, dan demecinaga dag en ahwan dan dousei? Era en ahwan dan an dan indaga touei? ELOHIM enin dous eng ecinaga dau gini dag misen namcir. 12:5-6 Sug ELOHIM ens dau areg graga einyana dou danohob, kaba, edeinyum naugb sug dan deimiman danin indoho an augwan gini deseino yen toua. Anai areg dan den dou yen gin, kaba, se geica namcir. Hang gini ansins dag en emowun dan indoho dag sud hom mou emaiyero deseino yen touwero. Dara ara gus naugb sug dan deimiman danin indoho deseino yen, kaba, toua inggebga. Doba dan darges dau augwan gin namcir. Dauntoba yen yemecic dan indoho emagas an ginlo. Doba yen yecic dan indoho aimo dau areg yen yeiya dau indan geicara dara areg yen youman sug dan desai ELOHIM mer dou yen dous. Dangga hang, areg dan deimiman danin indoho an deseino yen gin, kaba, eisaugb ELOHIM enin men geicara dou dan graga dous. Doba eisaugb danin, kaba, dan deigdoumesa danin indoho deseino yen an areg ens ainyes dou yen dag indan goubesa ingmemeb naugb ginero eng dou yen terimda. 12:7 Anai sug ELOHIM ens dau areg mera eiseisaugb einyana gougwa dou danohob, kaba, en amsoho Bilis, dauntoba en esa men godeh hom aud dan naugb en eic ara dag mog beihwi dan indaga toua. Dauntoba areg en ens dou dan ginohob, kaba, emeic dan indoc agas medam dou danero. Doba ousa dan naugb dan dowun dan indoc mes arjaga toua namcir. 12:8 Dangga hang, dan dacgeij maman Adehsud mougwa homoiyohob naugb sug en edug ara mog gini dau dan indaga toua. 12:9 Dobnaro. En amsoho dan indir an gin namcir. Hanoba en auni dou dan, endagai: Edeinyum naugb sug dan indoc an banohob. Anai sug aban goubesa ingmaro, kaba, eic cumougt dou dan naugb dan dousa ban dara indan goubesa terimda. Dangga hang, dan indoc momogo emogdoc ara mog geihwi dan indaga gomomtom gin toua deitero. Doba dan dagahugouhw an dan indaga gomomtom gini. Dara dan deimiman dan indoho an gin deseino lusud toua namcir. Dauntoba Krisdus men goubesa emediyebeiya dau dan touwero, doba oiharaga dan toua terimda. 12:10 Dangga sug dan indaga omomtom, kaba, dan indoc emeijesan. Era sug lusud leic dan indoho lacecim, era len leic mog erij, era len leigdoumesa gogom, era len laiyan dan indur mor icira Krisdus gin, kaba, dan demen dougwo len an touwero. Doba dan indoc agahugouhw an gin dous. Anai sug indan goubesa ingmaro, kaba, Krisdus men goubesa aihiron dougwo dan naugb dan daimo augwan gini toua terimda. 12:11 Doba dagiro, naugwe hang, dan deimiman danin indoho an indan geicara deseino yen dag gin terimda? Naro, eigouhw naugb yen eng yeimiman yenin meijoho an dan deseino len gus dous. Anai leinyana, kaba, len lowun dan indoho eb tainya deseino yen toua namcirohob. Dobnaro, se indan geicara augwan, kaba, dan indoho agas aninim dag gembala gedig len leigdoumesa lenin meroho agas bedreg dau laugwan gin touohob. 12:12 Anai yen yecinaga dau sug dan indugwengga desij yen sug nosa naugb dan desai Mer Geigouhw eisaugb Krisdus dou yen, kaba, dag ELOHIM eic goubesa dou dan naugb dan daben ganusbus, dara dan deic gansins einyana debin en mer gin dou yen. Dara indan geicara einyana, kaba, eic dag lusud leimiman dau gin touohob. Dauntoba yen yecinaga dag dan demedag gembala areibahauero. Doba yen yeigdoumesa dan indoho dag gembala misen namcir. Dobnaro. Meijen geicara gin, kaba, eic dag dan dedag sud hom mou emaiyerohob. Anai sug yen yemeigdoumesa dan indoho deseino len gusero, kaba, arautut dan naugb dan deimiman danin indoho an indan geicara deseino yen toua. 12:13 Doba areg dan daimo an goucimdeb gus gus, kaba, dan daimo an yen touohob. Se aremer hom dous eng dan dowun yen meijoho eb tainya goucimdeb gus gus laugwan. Anai len gus, kaba, dan dacgeij aregoufu naugb dan intemouwu gerij dau lenohob. Doba yen, kaba, dan demeicara dag gin an yen mougwa hom touebma. Doba dan desai ELOHIM en moro dag mogud dou yen dous. Dangga sug yen youdesa dag dan debesesar an yenohob, kaba, dan deiyaga dougwo yen an gini namcir. 12:14 Gedig mougwa homoi gin, kaba, dan douwan naugb dedoumouma yen deit. Dangga hang, sug dan dedebeij yenohob, kaba, dan demacgeij aregoufu dau yen dag nosa touwero. Doba dan dousa yen dag mogud deit toua. Anai dan demouwan meijen aremougwero. Doba dan douwan dag yen meigdoc gororougb dan dous. Anai logodeh, kaba, len lemouwaha merna dara merimero. Doba merna dara merim eng len louwaha len dous. 12:15 Hang dan indoc emesgirahesa namcir naugb dan dagaha dan insira an indan aremougb augwan dou yen. Dara dan indoc eigouhw an yen naugb dan dousa yen se aremer gus gus augwan toua. Anai dan dedag yen meijinohob. Dangga sug dan indoc gororougb yen beiseisaugb dag gin terimdohob, kaba, dagiro, naugwe hang, yen meigdoc gororougb dan ouwouwada dag gina? 12:16-18 Anai sug dan indugwengga desij yen sug nosa, kaba, dan denara daceca yen an meijen aregoufu, era meijen aremougb, ucucugb ingma dau yenohobei? Naro, dan demenara demaceca yen an meijen ara ara mougwa hom touebma. Era sug dan desa indan logodeh aud yen sug nosa, kaba, dan dococi len naugb len ledenara laceca meijen aremougb dau yen touohobei? Naro, dan demeicara dag gin an yen touwero. Dara sug dan darougb Titus an maman mamaguna hom aud yen sug nosa, kaba, en enara aceca yen an meijen aregoufu touohobei? Naro, en emeicara dag gin an yen touwero. Doba yen yecinaga dau Titus aman amdoc mes dara aman geicara, kaba, dag augwan aninim aud yenohob. Dangga sug yen youma debin dan dag dan demenara demaceca yen an ara ara mougwa hom touebma, kaba, dagiro, naugwe hang, yen meigdoc ogdogda dana? Anai yen yesuloum dougwo dan ucucugb terimdohob, yendagai: Deciciji, anai Paulus, kaba, en mou ouforoho namcir. Hang en emerba ara bemarerei maman se men gogomes naugb en eic ara ara dau maman toua. 12:19 Dangga dan insirija, yen youdesa dag areg dan dog dou yen ginohob, kaba, dag emen emenara emaunun dougwo emen geicara dou yenei? Naro, dan demog dag gin dou yenero. Doba sug maman madag hom dara Krisdusohob, kaba, dan dog areg graga augwan eb ainyes deseino ELOHIM dou yen naugb dan dousa yen dous. Dauntoba yen yemaimo areg gecgu deitero. Doba yen yeiji dag lusud mos se Krisdus gin dous, aimo dau areg en arougb dan an naugb dan dog dou yen toua. 12:20 Doba dan dahau dau sug dan dedebeij yen, kaba, dag dan demeiya, doba meijen geicara edreg dau areg dan indoc esgirahesa yen an. Dara yen toua yeiya, doba indan geicara edreg dau areg yen meigdoc emesgirahesa dan an touwero. Anai dan dahau dag yen yemobsara dau meijen geicara gecgu augwan touebma. Doba yen yenara yaisedim dara yen meijir yedregim dara yen yeclul, dara yen meigdoc esrougb anim. Dara yen yed yenin deseino dau len gus. Dara yen yesmesmanim, dara yen yecic len gus meroho gouhw genes, dara yen meigdoc agas naugb yen yeigdoc ara audim ucucugb terimda toua. 12:21 Hang dan dahau dag indan ELOHIM owun dan indoho deseino yen deit naugb dan deb an leinyana dau yen an meren geicara gecgu. Aninim dag en owun dan indoho deseino yen naugb dan deb an leinyana dau yen an meren geicara gecgu dag gin sug nosa touohob. Anai sug nosa gin, kaba, leinyana dau yen len lemobsara dau meren geicara gecgu gin touwero. Doba len leic merus naugb len laimo areg gogor naugb len merisirebsem dara len logo ara gaihim toua terimdohob.

2 Korintus 13

13:1-2 Doba Surad Injil Meb Mohon enara, endagai: Sug lahwai era merug homoi len louma debin sud hom men aremer ginohob, kaba, edeinyum naugb sug lusud logod gogom deinaugb en toua. Dangga hang, dan desulou yeng yebesesar dau mohonohob, dara yeng yebesesar menenau gini yen yaugwan dara goubesa namcir, dag dan demamsoho yen deitero. Doba sug dan dedebeij yen, hanoba yen yemarges dau meijen sesar touwero, kaba, dan dogod gogom medam deinaugb yen yaugwan toua namcir. Anai sug dan dedebeij yen mougwa hom gin, kaba, aninim dag mougwa cumoi enggohob. Dan desulou yen dangga sug dan dedebeij yen mougwa cuhwai sug nosohob. Dara iteitogin, kaba, dan desulou yen dag gin deit sug dan deigtou aigusi dau yenaba. 13:3 Anai yen yagodgod dan naugb dan deic gansins dou yen, dauntoba yen yecinaga dag Krisdus eigdoumesa dan indoho dag misenohob. Hang dan demesai en moro gin dou yen toua. Dangga se lona sug en ogod gogom deinaugb yen ogdoc dan icira meijen sesar gin, kaba, yen yeiya dag en emomomtom dou yen touwero. Doba en mobisamougb namcir naugb en eic gogom medam dou yen toua. 13:4 Anai sug lusud letob en se sogo salib sug nosa, kaba, en owun enin medoc mes arjaga dag en maga omomtom namcir deseino len toua. Doba en maireseb menau gini, kaba, ogdoc ELOHIM men goubesa dous. Dangga hang, emen gedig emen emesai Krisdus moro dou lusud, kaba, emen emowun emenin emdoc mes arjaga dag emen emaga omomtom deseino lusud aninim dara en. Anai emen emdoc dag hom dara enohob. Doba emen toua sug emen emogod gogom deinaugb yen an meijen sesar, kaba, emen emaimo ELOHIM men goubesa an yen. Anai emen dag hom dara Krisdus se en maireseb menau gin touohob. 13:5 Dangga hang, eigouhw naugb yen yeiyahaiya dara yen yogmac yenin meigdoc mes debinbin toua terimda. Dauntoba yen yecinaga dag yen meigdoc ebdebin an Krisdus dag misenohobei? Era yen yedag Krisden areibahau dousei? Anai sug yen yedag Krisden misenohob, kaba, Krisdus einesa yen meigdoc mes. Hang ens ainyes dou yen dag yen yedag Krisden misen touohob. Doba sug yen yedag Krisden areibahau dous, kaba, en emeigtou se yen meigdoc mes touebma. Yen yemecinaga dau augwan gini dag misenbumei? Naro, yen yecinaga augwan gini dag misen namcirohob. 13:6 Doba eisaugb emenin, kaba, dan decinaga dau sug emen emedebeij yenohob, kaba, dag yen yeiya, doba emen emedag gembala misen dous. Anai emen emens dau ELOHIM men goubesa dou yen toua. 13:7 Doba sug emen emens eminin dag gembala misen ogdoc ELOHIM men goubesa dou yen. Era sug lusud lowun emen emoho dag gembala areibahau ogdoc sug emen emamsoho dau men goubesa an yen toua, kaba, augwan gini emesloulougwero. Doba areg esloulougb, kaba, dag yen yaimo areg asesa ELOHIM enin medoc mes an gin terimda. Hang dan docuncum dou ELOHIM, dauntoba yen yemaimo meijen sesar deitero. Doba yen yarges dau augwan gin deb namcir. 13:8 Anai ELOHIM emeic men goubesa dou emen naugb sug emen ememedag sogo maga dougwo lusud sug len laimo areg se geica ginero. Doba naugb sug emen emousa len icira sug len laimo ucina se geica gin terimda dous. 13:9 Dangga sug lusud leigdoumesa yen meijoho dag meijubisamougb, anai yen yaimo areg asesa ELOHIM enin medoc mes gin terimdohob. Era sug len lowun emen emoho dag emomomtom dous. Anai emen emens dau ELOHIM men goubesa dou lenero, kaba, augwan gini inggaida. Doba sug yen yaimo areg asesa ELOHIM enin medoc mes dag gin, kaba, emen emdoc eigouhw an gin namcir. Hang emen ememarges dau sug emen emocuncum dou ELOHIM naugb yen touwero. Doba emen emocuncum dou en, dauntoba yen yeiji dag lusud mos se Krisdus esesa terimda toua. 13:10 Dan dog dau sug yen yobsara dau meijen sesar dag graga dou yen, dauntoba sug dan dedebeij yen, kaba, dan demaimo maman Adehsud men goubesa areg en eic dou danohob augwan an yen touwero. Doba dan damsoho yen namcir. Anai en emeic men goubesa gin dou dan naugb sug dan daic gogom dou yenero. Doba en eic men goubesa gini dou dan naugb dan dausa yen. Dauntoba yen yeiji dag lusud mos se Krisdus dous. 13:11 Dan indagunerij, dara dan indamouwerij, sug dan dog surad gini sug ouwedoc, kaba, dan dou yen yaugwan meijiresou toua. Dangga hang, yen yemohoiya dan indir an areg dan desulou yen an se indan surad gin touwero. Doba yen yeic meijuwemougb esesa naugb yen yogod meijen aremer augwan ouwa dau yen namcir. Hanoba yen yaigdougwo meijen aremer gin daum toua terimda, dauntoba yen meigdoc emedregim deitero. Doba se aremer augwan, kaba, yen meigdoc anim ucucugb dous. Anai sug yen yeicara dag gin, kaba, ELOHIM en toua moongga desij yen. Hanoba en medoc gororougb yen dara en eseyeiyo yen dougwo areg gecgu augwan toua namcir. 13:12 Dara sug yen youcimdeb, kaba, yen you meijufesem dara yen meigdoc ecabeci anim terimda. ELOHIM men lusud sugini len laugwan lou yen toua. 13:13 Dan dacgeij maman Adehsud Yesus Krisdus naugb en medoc an yen. Hanoba dan dacgeij ELOHIM naugb en medoc gororougb yen. Dara dan dacgeij Mena Gogoufu naugb en ousa yen se aremer augwan toua terimda.

Galatia 1

1:1 Surad gini dau dang, Paulus, gedig dan desai Mer Geigouhw eisaugb Krisdus dou lusud. Dara lusud misen, kaba, len lemouci dan. Hanoba len lemeigdoumesa dan indoho naugb gin touwero. Doba Yesus Krisdus dara maman Mamina ELOHIM gedig en eigdoumesa Krisdus dau gomom ucugwohob, kaba, lan eng laigdoumesa dan indoho naugb gin dous. 1:2 Dara leng Krisden gedig len leigtou desij dan sugini, kaba, len laugwan lou yeng se goucimdeb se leng Galatia meren hancob yen yaugwan toua. 1:3 Hang emen emaugwan emacgeij maman Mamina ELOHIM dara maman Adehsud Yesus Krisdus naugb lan laic geigouhw dou yen, dara lan laseyeiyo yen dougwo areg gecgu augwan toua terimda. 1:4 Anai Krisdus gin, kaba, en eic enin mogwihi ancoho aga maman dou maman Mamina ELOHIM naugb maman sesarohob. Dauntoba maman mamaimo lusud gedig Bilis oiharaga len se cinogo gini aud meren geicara gecgu toua deitero. Doba maman marges dau augwan gini namcir, aimo dau areg maman Mamina ELOHIM ogod an deb naugb en sug nosohob. 1:5 Dangga hang, eigouhw naugb maman maugwan magahugouhw an ELOHIM beb huhugb terimda. Augwan gini asesa dag misen namcir. 1:6 Dan deimiman dau yen namcir, anai Krisdus, kaba, en medoc an yen naugb en eic en maga bauwaharo aga yen dou ELOHIM naugb meijen sesar. Hang ELOHIM eija yen aud en naugb en eigdoc yen dau sesar men gogom augwan aud maireseb menau geb huhugb ginohob. Doba yen, kaba, yen yeineg dau en dedemeda deit. Hanoba yen yaimo areg lusud leigdoumesa dag mer geigouhw susugb eisaugb Krisdus gin touohob. 1:7 Dobnaro. Mer geigouhw gus, kaba, ingmaro, doba hom dous. Dan denara dangga dou yen, anai lusud gedig len louwan lauti mer geigouhw eisaugb Krisdus gini didi dou yen, kaba, len merugwengga desij yenohob. Dangga hang, emeic dag yen meigdoc emebdebin an Krisdus dag nosa toua deitero. Doba eic dag yen yeija meijuwesa areg emen emesai dou yen augwan toua deitohob. 1:8 Doba gareg en esai mer geigouhw eisaugb Krisdus ingma susugb dau areg emen emesai dou yen sug nosohob, kaba, dan dacgeij ELOHIM naugb en eic mor mor dou en se dum smougb namcir. Dangga toua, sug emen, era malaikad hom dau bogo, emen toua emesai mer geigouhw eisaugb Krisdus ingma susugb dau areg emen emesai dou yen sug nosohob, kaba, dan dacgeij ELOHIM naugb en eic mor mor dou emen se dum smougb aninim dag len ingga toua. 1:9 Emen emenara dag gin dou yen sug nosohob. Doba iteitogin, kaba, dan douma debin gin dou yen toua deit, dendagai: Gareg en esai mer geigouhw eisaugb Krisdus ingma susugb dau Mer Geigouhw eisaugb Krisdus areg yen yebin sug nosohob, kaba, dan dacgeij ELOHIM naugb en eic mor mor dou en se dum smougb namcir. 1:10 Dangga areg dan den dou yen graga, kaba, gini ansins dag dan douwan naugb lusud leigdoumesa dan indoho, dara len merdoc eigouhw an dan touei? Era dagiro? Naro, dan demainyen danggero. Doba dan douwan naugb ELOHIM enin eng eigdoumesa dan indoho, dara en medoc eigouhw an dan dous. Anai sug dan dainyen naugb deic lusud merdoc esgiraha an dan, kaba, dan demedag Krisdus men sogougb toua deitero. Doba dan dobsara dau gin namcirohob. 1:11-12 Dan indagunerij, dara dan indamouwerij, dan douwan naugb yen yecinaga dag Mer Geigouhw eisaugb Krisdus areg dan desai dou lusud gin, kaba, emen dau lusud misen merdoc mes. Hang len lemeic dou dan. Dara len lemedidib meijouhw dau augwan gini dou dan touwero. Doba Yesus Krisdus enin eng ens dau augwan gini dou dan dous. 1:13-14 Areg graga augwan, kaba, se misen namcir. Anai yen yecinaga dau sug dan daimo emeng Yahudi emen gomnomna sug nosa, kaba, dag dan demeisan gurog dau gin touwero. Doba dan deic induwemougb esesa naugb dan daimo emen gomnomna gini edreg dau dan insir gus len laugwan. Anai dan indoc ehin gunini icira emen emjemouwer meren gomnomna gin namcirohob. Dangga sug dan daimo emen gomnomna dara dan indoc augwan dag ginohob, kaba, dan indoc emeigouhw an ELOHIM men lusud dau leng Krisden touwero. Doba dan dehilon ucina terimda naugb sug dan deic mog erij dara mor mor dou len laugwan. Anai dan indoc esrougb an len medamohob. 1:15-17 Doba ELOHIM medoc eineg an dan. Hang en emens en Meisi mohora hom gini dou dan naugb dan decinaga areg asesa enin medoc mes augwan dag misen namcir. Hanoba en eija dan dara en eigdoumesa dan indoho naugb dan desai Mer Geigouhw eisaugb en Meisi gini dou lusud laugwan toua. Anai sug dan demesogwen dau dan indim mohorabuma, kaba, en ouci dan teitei naugb ginohob. Dangga sug ELOHIM ens en Meisi ainyes dou dan dag ginohob, kaba, dan demeija sud hom ingma naugb sug en ens aremeijouhw ara ara hom dou dan. Dara dan demeisaugb dig Yerusalem naugb dan demdehilon aremeijouhw dau merug sisa hobjerai gedig len lesai Krisdus moro nosohob len touwero. Doba dan deihwededau cinogo Damsig aud leng Arabia meren hancob naugb dan dedeigtou dou danin sungga. Hanoba dan decicugb se cinogo Damsig ucugb toua deit. 1:18 Arisogomoc homoi debin gin, kaba, dan deisaugb dig Yerusalem naugb dan dedens dan indug dou Kepas. Hanoba dan datou desij en sungga se lona sorama toua. 1:19 Doba dau merug sisa hobjerai gus, kaba, dan demeiya lenero. Doba dan deiya maman Adehsud magto Yakobus hom dous eng desij Kepas. 1:20 Areg dan dog dou yen gin, kaba, dag dan demereiyara dou yen touwero. Doba ELOHIM ecinaga dag augwan gin, kaba, se geica namcir. 1:21 Dangga sug dan datou desij Kepas se lona sorama ginohob, kaba, dan deihwededau en dig leng Siria dara Kilikia meren hancob deitda naugb dan desai Mer Geigouhw eisaugb Krisdus dou len toua. 1:22 Anai se lona sug dan dedebeij Petrus gin, kaba, ELOHIM men goucimdeb se leng Yudea meren hancob len laugwan lemeiya dan indibes mougwa hom touebma. 1:23 Doba len louman dag dan demeic mog erij dara mor mor dou len dag nosa deitero, doba dan darges dau gin namcirohob. Hanoba dan desai areg len merdoc ebdebin an gini dou lusud laugwan toua. 1:24 Dangga hang, sug len lecinaga dag areg len louman gini, doba dag misenohob, kaba, len lagahugouhw an ELOHIM an dan terimda.

Galatia 2

2:1-2 Arisogomoc sisa hobjerogu debin sug dan dedens dan indug dou Kepas sug nosohob, kaba, Barnabas aman ameisaugb dig Yerusalem deit. Anai augwan gin, kaba, aimo dau areg ELOHIM enin eng ens dou danohob. Dara Titus en toua aimo aman sungga toua. Dangga hang, sug emen emedebeij se Yerusalemohob, kaba, dan demens dau areg dan desai dou lugmahara gin dou lusud laugwanero. Doba dan deiya sug mougtir emenin emoucimdeb dou emeninahabi, dan demens dau areg dan desai gini meijouhw augwan asesa dou len toua. Dauntoba len lousa deisa dan an ginahabi. Anai dan demouwan naugb dan demeic dan indug erij augwougb sug nosa dara naugb lona daiyamo gacin touwero. 2:3 Dara mougtir sug len leiya, doba Titus en toua moongga desij dan, kaba, len lemagodgod emen naugb sug emen emec en mos dau touwero. Doba len lamsoho en namcir. Anai en, kaba, lugmahara dau leng Grika meren hancob gin. Hang en emec mos dau touebma. Doba ligbum dau leng Krisden dau leng Yahudi ingga, kaba, len lagodgod emen dara goubesa namcir naugb sug emen emec Titus en mos dau toua. 2:4 Anai len gin, kaba, len lesohw meraga dag maman mamaguner misen se Krisdus. Hanoba len toua leinesa aud emen se goucimdeb ingga naugb len leigtou lagrogra dougwo areg emen emohw emdoc doum an ingga toua. Dauntoba len lehigdecin endag sug maman madag hom dara Krisdusohob, kaba, maman toua mac mamus dau, dara maimo Musa men gomnomna naugb mousanara debin gin touei? Era maman mamsoho dau gin namcirei? Dangga hang, sug len louman, doba maman mamaimo Musa men gomnomna debin ginero, kaba, len lagodgod maman, dauntoba maman madag sogougb naugb maman maimo Musa men gomnomna debin gin toua deit. 2:5 Dobnaro. Emen, kaba, emen ememobsara aud len se aremer gini mougwa hom touwero, doba emen emes agadgeij dougwo len namcir. Dauntoba Mer Geigouhw eisaugb Krisdus gin, kaba, emahurim dara ara ara hom touwero. Doba eb se geica mogud naugb yen terimda. 2:6 Dara leng gedig lusud leigdoumesa len meroho dag mougtir, sug len louman dau areg dan desai dou lugmahara ginohob, kaba, len lemenara hom lemaos debin indan gebedbed augwan gin touwero. Doba len louma debin dan dag areg dan debedbed gin, kaba, augwan edeinyum namcirohob. Doba naugb dan, kaba, sug sud hom en moho eb taiba, era naro, kaba, augwan inggaida. Anai ELOHIM emesi lusud an merohoro. Doba en aimo dau areg geb se len merdoc mes gin dous. Dangga dan den dou yen deit. Sug mougtir graga len louman dau areg dan debedbed gin, kaba, len lemowun dan indoho an hom touwero. 2:7 Doba len toua louma debin dan dag ELOHIM eigdoumesa dan indoho naugb dan desai Mer Geigouhw eisaugb Krisdus gin dou lugmahara, aninim dag en eigdoumesa Petrus en moho naugb en esai Mer Geigouhw eisaugb Krisdus dou leng Yahudi sug nosa touohob. 2:8 Anai len leiya, doba sud hom gedig en eic goubesa dou Petrus naugb sug en esai Mer Geigouhw eisaugb Krisdus dou leng Yahudi gin, kaba, enin eng eic goubesa dou dan naugb sug dan desai Mer Geigouhw eisaugb Krisdus dou lugmahara gin touohob. 2:9 Dangga hang, sug Yakobus, dara Petrus, dara Yohanes merdoc eica dag ELOHIM eigdoumesa dan teisis naugb dan desai Krisdus moro dou lugmahara dag ginohob, kaba, len los Barnabas aman amsira ansins dag emen emaugwan emdoc aninim dag hom naugb sug emen emesai Mer Geigouhw eisaugb Krisdus dou lusud laugwan toua. Anai len eng meroho eb ainyes dag buc naugb goucimdeb se Yerusalem ginohob. Sug len los Barnabas aman amsirohob, kaba, emen emogod an dag Barnabas aman amedag mougt naugb aman amesai Krisdus moro dou lugmahara. Doba len gin, kaba, len ledag mougt naugb len lesai Krisdus moro dou leng Yahudi dous. 2:10 Sug emen emekebimohob, kaba, len lesulou aman ucan deit dag aman amdoc moc dougwo leng merunggwereij sungga touwero. Doba aman amdoc an len naugb aman amesa ara ara dou len toua. Doba aremer gin, kaba, dan desedeb dan indoc mes naugb gin touohob. 2:11 Doba sug Petrus edoumouma emen se Antiokia se lona daiyamo deit, kaba, dan denara debin en an men geicara deseino leng Krisden laugwan toua. Anai men geicara augwan, kaba, dag en arerei lusud meriresi ginohob. 2:12 Anai aimougtut, kaba, en etara dara maguner dara medamouwer leng Krisden dau lugmahara terimda. Doba sug Yakobus esa men logodeh merug hosa naugb len ledebeij emen sunggohob, kaba, en emetara dara lugmahara gin deitero, doba en asid enin dau len namcir. Anai Yakobus men logodeh dau leng Yahudi gin, kaba, len len dougwo leng Krisden dau lugmahara dag len merdoc emebdebin an Krisdus hom dousero, doba len lec merus dau. Hanoba len laimo Musa men gomnomna naugb lousanara nosahabi, kaba, maireseb huhugb emeb naugb len toua. Naro, kab, naro. Hang Petrus ahau dau Yakobus men lusud gin toua namcir. 2:13 Sug leng Krisden gus dau leng Yahudi se goucimdeb ingga len leiya dau Petrus men geicara gin, kaba, len toua leicara larerei lusud meriresi naugb len lemetara dara lugmahara toua deitero, doba len lasid lenin dau len toua. Dangga, kaba, gini eic dag Barnabas enin toua obsara aud len se meren geicara gin toua namcir. 2:14 Sug dan deiya, doba len gin laugwan lemesogwa deisa Mer Geigouhw eisaugb Krisdus dag misenero, kaba, dan denara debin Petrus deseino lusud laugwan sungga toua namcir. Hanoba dan denara dou en, dendagai: Ban toua dau mamang Yahudi. Doba sug leng dau Yerusalem lemedebeij mamanbuma, kaba, ban bemaimo Musa men gomnomna gin toua deitero. Doba ban barges dau namcir naugb ban betara dara lugmahara, dara ban bemaimo men gomnomna aud gousanara touwero. Doba aban geicara aninim dag lugmahara meren geicara augwan gin touohob. Dangga dagiro, naugwe hang, ban bagodgod lugmahara naugb len laimo mamang Yahudi maman geicara gin deita? Anai sug ban basid banin dau len dag gin, kaba, gini arautut len naugb len laimo Musa men gomnomna gin toua? 2:15 Indeic, se maman mamaga, kaba, maman mamedag lugmahara ginero, doba maman mamedag leng Yahudi teisis. Hang maman mawun len meroho dag leng sesar toua namcirohob. 2:16 Doba maman macinaga dag ELOHIM emeic gesgigouhwesa dou sud hom ingma emogdoc sug en aimo Musa men gomnomna ginero. Doba ogdoc sug en medoc ebdebin an Yesus Krisdus hom dous. Dangga hang, mamang Krisden dau mamang Yahudi, kaba, maman mamaimo Musa men gomnomna naugb sug ELOHIM eic esgigouhwesa dou maman toua deitero. Doba maman mamdoc ebdebin an Krisdus Yesus enin dous. Dauntoba ELOHIM eic gesgigouhwesa dou maman ogdoc gin toua. Anai en emeic gesgigouhwesa dou sud hom ingma emogdoc sug en aimo Musa men gomnomna ginero, doba ogdoc sug en medoc ebdebin an Krisdus hom dous. 2:17 Doba sug maman mamaimo Musa men gomnomna gin deitero, doba maman mahilon ucina naugb sug ELOHIM eic gesgigouhwesa dou maman ogdoc sug maman madag hom dara Krisdus gin dous, kaba, gini aninim dag Krisdus ousa deisa maman naugb sug maman maimo sesar toua namcirohobei? Anai sug maman mamaimo Musa men gomnomna gin deitero, kaba, maman madag lugmahara gedig maman mawun len meroho dag leng sesar gin touohoba? Dobnaro. Augwan gin, kaba, dag misenero. 2:18 Anai sug gomnomna mohon ediyebeiya dau danohob, kaba, sesar toua emeb naugb dan deitero. Doba sug dan deigdoumesa gomnomna gini naugb dan daimo ucugb deit, kaba, gini aninim dag dan decicugb aud sesar toua deitohob. Anai gomnomna gin, kaba, owun dan indoho an gin namcir. 2:19-20 Dangga hang, dan demaimo Musa men gomnomna gin toua deitero. Doba dan dedag domom dau gin namcir. Hanoba dan daimo areg asesa ELOHIM enin medoc mes gin terimda. Anai Musa men gomnomna gin, kaba, eic gomom dou dan dous. Doba sug Musa men gomnomna etob dan domom se sogo salib aninim dara Krisdusohob, kaba, dan indires emeb dou danin toua deitero. Doba Krisdus maireseb se danohob, kaba, dan indireseb se dan indaga gini ogdoc dan indoc ebdebin an ELOHIM Meisi grag en medoc an dan. Hang en emeic enin maga bauwaharo dou ELOHIM naugb dan toua. 2:21 Dangga hang, dan demeic sogo maga demata dougwo ELOHIM medoc an dan gin touwero. Doba dan indoc ebdebin an Krisdus terimda. Anai sug ELOHIM eic gesgigouhwesa dou maman ogdoc sug maman maimo Musa men gomnomna gin dous, kaba, Krisdus en omom naugb ara deita? Anai Musa men gomnomna edeinyum naugb ginohob.

Galatia 3

3:1 Doba sug yeng Galatia yen yecinaga dag Krisdus omom taiba sogo salib naugb meijen sesar dag misenohob, kaba, gareng ei yen meigdoc mes, hang yen meiji emosum naugb yen yemaimo Krisdus deitero gina? Anai dan demecgoneh gin dau yen touwero, doba dan dens dau sug Yesus Krisdus en omom taiba sogo salib gin augwan eb ainyes dou yenohob. 3:2 Dangga hang, dan deijidougwo yen endag sug ELOHIM esa Mena Gogoufu se yen meigdoc mes sug nosa, kaba, en esa en dou yen ogdoc sug yen yaimo Musa men gomnomna ginei? Era ogdoc sug yen youman Mer Geigouhw eisaugb Krisdus, hanoba yen meigdoc ebdebin an en touei? Era dagiro? Yen yauni ucugb dou danahabi. Naro. ELOHIM esa Mena Gogoufu se yen meigdoc mes ogdoc sug yen meigdoc ebdebin an Krisdus hom dous. 3:3 Doba sug yen yebiji naugb yen yaimo ucina aud maireseb menau geb huhugb ogdoc Mena Gogoufu men goubesa dag ginohob, kaba, dagiro, naugwe hang, yen youwan yec meijus dau. Hanoba yen yaimo Musa men gomnomna aud gousanara debin gin toua? Yen youdesa endag areg yen yaimo se yen meijaga, kaba, edeinyum naugb ahwan yen se ucina aud maireseb menau gini terimda edebeij sug ouwedoc enggei? Naro. Anai yen yecinaga augwan gini ogdoc Mena Gogoufu men goubesa gin dous. Dangga dagiro yen yeicara yaimo dag gina? Yen meiji osum namcirohobei? 3:4 Anai sug yen meigdoc ebdebin an Krisdus gin, kaba, yen yeic yen meijug erij. Dara Mena Gogoufu eic einyana aingma aingma dou yen touohob. Dangga yen youdesa augwan gini emesloulougwero, hang yen yobsara dau gin touei? Anai sug yen yaimo Musa men gomnomna aud gousanara ucugb deit, kaba, areg yen yaimo se yen meijireseb menau se Krisdus ginohob, kaba, augwan ediyebeiya dau yen, hang yen yeic yen meijug erij dag augwougb toua namcirohob. Dobnaro. Dan decinaga yen yemeicara dag ginero. Doba yen yaimo Krisdus men ucina gin terimda. 3:5 Anai sug ELOHIM esa Mena Gogoufu dou yen sug nosa naugb en eigtou se yen meigdoc mes namcir. Hanoba en aben ganusbus dara eic gansins ogdoc Mena Gogoufu men goubesa dou yen toua, kaba, en eicara dangga dau sug yen yaimo Musa men gomnomna aud gousanara gin enggei? Era ogdoc yen meigdoc ebdebin an areg emen emesai eisaugb Krisdus dou yen gin dousei? Naro. Yen yecinaga ELOHIM eic ganusbus dara gansins dou yen ogdoc sug yen meigdoc ebdebin an areg emen emesai dou yen gin dous. 3:6 Augwan gini aninim dag Abraham men geicara sug nosa touohob. Anai Surad Injil Meb Mohon enara deb, endagai: Abraham medoc ebdebin an areg ELOHIM os dou en. Hang ELOHIM eic gesgigouhwesa dou en ucugb ogdoc gin toua. 3:7 Dangga hang, gareg en medoc ebdebin an Musa men gomnomna naugb sug ELOHIM eic gesgigouhwesa dou en ogdoc gin, kaba, en emedag Abraham medebeito misen touwero. Doba gareg en medoc ebdebin an ELOHIM en mer eisaugb en Meisi Yesus gin, kaba, sud hom ingga dous eng edag Abraham medebeito misenohob. Dan douwan naugb yen yemauwam an didi eisaugb ginero. Doba dan douwan naugb yen yecinaga augwan gini dag misen namcir. 3:8 Dara sug ELOHIM eic gesgigouhwesa dou yeng yugmahara toua ogdoc sug yen meigdoc ebdebin an Krisdus gin, kaba, en ens dau augwan gini dou Abraham sug nosa touohob. Anai en os dou en deb se Surad Injil Meb Mohon deb, endagai: Ogdoc ban abdebeito hom, kaba, dan demeic geigouhw dou lusud se cinogo gin augwan toues. 3:9 Dangga hang, gareg en medoc ebdebin an areg ELOHIM os dou en eisaugb Krisdus gin, kaba, ELOHIM eic geigouhw dou en aninim dag en eic geigouhw dou Abraham sug en od mena debsa ELOHIM an areg en os dou en sug nosa touohob. 3:10 Doba gareg en aimo Musa men gomnomna, hanoba en od mena debsa ELOHIM, dauntoba en eic gesgigouhwesa dou en ogdoc gin dous, kaba, ELOHIM men gagaresa eb naugb en namcir. Dara Musa enara deb dangga dou emeng Yahudi emen emjemouwer se Surad Injil Meb Mohon sug nosa touohob, endagai: Gareg dau yen, en emaimo ELOHIM men gomnomna augwan terimdero, doba en edreg dau homohob, kaba, ELOHIM men gagaresa eb naugb en namcir. 3:11 Dangga areg graga augwan, kaba, ens ainyes dou maman dag sud hom ingma, kaba, ELOHIM emeic gesgigouhwesa dou en ogdoc sug en aimo Musa men gomnomna ginero. Doba ELOHIM eic gesgigouhwesa dou en ogdoc sug en medoc ebdebin an en dous. Augwan gini esogwa deisa areg ELOHIM ens deb se Surad Injil Meb Mohon deb sug nosa touohob, endagai: Gareg en medoc ebdebin an areg dan den dou en gin, kaba, enin dous eng dan deic gesgigouhwesa dou en ucugb toua. Len gus, isnaro. Hang en emomom terimda touwero, doba maireseb menau geb huhugb eb naugb en namcir. 3:12 Doba eisaugb sud hom areg en ouwan naugb ELOHIM eic gesgigouhwesa dou en dau sug en aimo Musa men gomnomna gini dous, kaba, Surad Injil Meb Mohon esulou en an dag gini, endagai: Gareg en ouwan naugb ELOHIM eic maireseb menau geb huhugb dou en dau sug en aimo Musa men gomnomna gin dous, kaba, esloulougb naugb en emedis mougwa homero, doba en aimo augwan gini audud namcir. Naro, kaba, maireseb menau geb huhugb emeb naugb en touwero, doba ELOHIM men gagaresa eb naugb en terimda. Dangga hang, sud hom areg en aimo Musa men gomnomna naugb sug ELOHIM eic gesgigouhwesa dou en ucugb. Dara sud hom gedig en medoc ebdebin an areg ELOHIM os dou en eisaugb gin dous, kaba, lahwas maran geicara aninimero, doba susugb namcir. Anai homa, kaba, en medoc ebdebin an enin men geicara. Doba homa, kaba, en medoc ebdebin an Krisdus men geicara naugb en dous. 3:13 Doba Krisdus, kaba, en esga maman dau gomnomna mohon men gagaresa augwan namcirohob. Anai en eperwei maman mamuhw naugb gagaresa gini akebin en se sogo salib dau maman. Augwan gini aimo dau areg Surad Injil Meb Mohon enara dag gin deb sug nosa touohob, endagai: Sud hom areg lusud leic gomom dou en, hanoba len letob en se sogo salib, kaba, ELOHIM men gagaresa eb debin enohob. 3:14 Krisdus esga maman dau gomnomna men gagaresa. Dauntoba ogdoc Krisdus men geicara gin, kaba, maireseb menau geb huhugb emediyebeiya dau yeng yugmahara touwero. Doba areg ELOHIM os dou Abraham naugb yen sug nosohob, kaba, augwan eb naugb yen toua terimda. Dangga hang, sug maman mamdoc ebdebin an Krisdus men geicara naugb maman gin, kaba, ELOHIM esa Mena Gogoufu se maman mamdoc mes, aimo dau areg en os deb sug nosa an maman toua. 3:15 Dan indagunerij, dara dan indamouwerij, dan deic dau lusud meren geicara eisaugb areg len los doum, kaba, dan dainyenara hom dou yen. Anai yen yecinaga dag areg len los doum, hanoba len louwara debin ginohob, kaba, sud hom emerses naugb en emeic men ingma emaulo gini toua deitero. Doba augwan ebsugeb namcir. 3:16 Augwan gini aimo dau ELOHIM men geicara dou Abraham gin toua. Anai sug ELOHIM os ara ara dou enohob, kaba, en ou enin moho debin dou en. Hang emediyebeiya dau en touwero. Doba eb naugb en toua namcir. Doba areg ELOHIM os dou Abraham naugb sug en eic geigouhw dou lusud se cinogo augwan, kaba, Surad Injil Meb Mohon emenara dag en eic geigouhw dou len ogdoc en medebeitor leinyana touwero. Doba Surad Injil Meb Mohon enara dag en os augwan gini dou Abraham an en medebeito hom dous. Dara en medebeito hom gin, kaba, eni Krisdus. Yen youman areg dan den dou yen gini deigeigouhw namcir. 3:17 Dangga areg dan den dou yen gin, kaba, men meijouhw dag gini: Sug ELOHIM os ara ara dou Abraham, hanoba en ou enin moho debin gin touohob, kaba, Musa men gomnomna emerses dara emoguc dougwo areg ELOHIM os dou Abraham gin touwero. Doba ebsugeb namcir. Anai Musa men gomnomna gin, kaba, emeinoisa ELOHIM men gos dou Abraham gin touwero. Doba sug arisogomoc huntun hogu mos homoi edeisu ginahabi, kaba, ELOHIM emesa men gomnomna ogdoc Musa gini dou emeng Yahudi emen emjemouwer daiyamo deit. 3:18 Dangga toua, sug ELOHIM eic ara ara dou Abraham dau sug en aimo Musa men gomnomna an gin dous, kaba, areg ELOHIM eic dou en gin, kaba, emogdoc ELOHIM men gos dou gin deitero. Doba ogdoc Abraham men geicara an gin dous. Dobnaro. ELOHIM os dou enohob. Hang en emeic augwan dag mogud dou Abraham gin toua. 3:19 Doba sud hom dau yen, kaba, en eijidougwo dan, endagai: Sug ELOHIM os dou Abraham naugb en eic geigouhw dou maman ogdoc en medebeito Krisdus hom gini dous, kaba, dagiro, naugwe hang, en eic men gomnomna menau dou Musa ucan gin dou maman deita? Ingga, kaba, dan dauni dou en dag gini: ELOHIM eic gomnomna gin dou Musa naugb en ens lusud meren geicara dou len dag len lebesesar namcirohob. Hang gomnomna gin, kaba, emeb terberber touwero. Doba ELOHIM eic gini dou maman terimda edebeij lona sug Abraham medebeito hom graga, moho Krisdus, en agunyenohob. Dau, kaba, gomnomna mohon gini ediyebeiya toua namcir. Anai areg ELOHIM os dou Abraham gin, kaba, eisaugb Krisdus gin dous. Dangga toua, sug ELOHIM eic men gomnomna gini dou leng Israel sug nosa, kaba, en emeic teisis dou len touwero. Doba en eic dou sud hom gesa taij naugb lenahabi, en emdeic dou len toua. Anai sug malaikad lesai ELOHIM men gomnomna gin, kaba, len lesai gin dou Musa nosahabi, en emdesai dou leng Israel deitda. 3:20 Doba areg ELOHIM os dou Abraham gin, kaba, sud hom ingma emesa taij naugb gin touwero. Doba ELOHIM enin enara teisis dou en. Anai areg ELOHIM os gin, kaba, emaimo dau sug Abraham eic dau ELOHIM mesira naugb en esai dou len gus touwero. Doba aimo dau areg ELOHIM enin os deb dou en dous. Hang gin, kaba, moho agas bedreg dau Musa men gomnomna toua namcir. 3:21 Sug ELOHIM os ara ara teisis dou Abraham, doba en eic men gomnomna dou leng Israel ogdoc sud hom gesa taij, moho Musa, gin dous, kaba, gini men meijouhw dag Musa men gomnomna dara ELOHIM men gos dou hwas edregim namcirohobei? Dangga, isnaro. Anai sug ELOHIM eic gomnomna hom dou maman, doba edeinyum naugb sug ahwan maman aud maireseb menau geb huhugb gin, kaba, en eic gesgigouhwesa ucugb dou maman ogdoc sug maman maimo men gomnomna hom gin toua. Dobnaro. ELOHIM men gomnomna ogdoc Musa gin, kaba, en emeic dou maman naugb sug ahwan maman aud maireseb menau geb huhugb ginero. Doba en eic dou maman, dauntoba maman macinaga dag maman mabesesar. Hang mamom icira gin toua namcirohob. 3:22 Augwan gini esogwa deisa areg Surad Injil Meb Mohon enara deb sug nosa touohob, endagai: Lusud se cinogo gin augwan, kaba, sesar oiharaga len. Hang len ledag sogougb dou en touohob. Dangga hang, areg ELOHIM os dou Abraham naugb sug en eic gesgigouhwesa dou lusud ogdoc en medebeito Krisdus gin, kaba, en emeic dou len ogdoc sug len laimo Musa men gomnomna gin touwero. Doba gareg en od mena debsa ELOHIM an areg en os ginohob. Hanoba en medoc ebdebin an Yesus Krisdus gin toua, kaba, ELOHIM eic gesgigouhwesa dou en ogdoc gin namcir. 3:23 Anai sug lona emedagasa naugb sug maman mamdoc ebdebin an Krisdus ginbuma, kaba, Musa men gomnomna edag sud hom gedig en ouf maman se tu gesisug. Dauntoba maman maigtou sungga naugb gogom toua terimda. Hanoba en esedougwo maman naugb sug maman mamarges dau gin touwero. Doba maman maigtou se tu gesisug ingga terimda edebeij lona sug ELOHIM ens cumougt ainyes dou maman naugb sug maman mamdoc ebdebin an Krisdusahabi, en emesga maman dau gin toua namcir. 3:24 Dangga hang, Musa men gomnomna gin, kaba, en edag sud hom gedig en ogod maman an sesar dous. Dauntoba maman mamedreg gomnomna gin touwero. Doba maman mahau dau gin namcir. Dara en eicara dag gini terimda edebeij lona sug Krisdus en enahabi, ELOHIM emeic gesgigouhwesa dou maman ucugb toua namcir. Anai maman mamdoc ebdebin an Krisdus ginohob. 3:25 Doba iteitogin, kaba, cumougt naugb sug maman mamdoc ebdebin an Krisdus edebeij mamanohob. Dangga kaba, Musa men gomnomna emebehnehino dougwo maman toua deitero, doba maman marges dau namcir. 3:26 Sug yen meigdoc ebdebin an Krisdus Yesus dag ginohob, kaba, yen yemedag sogougb dou Musa men gomnomna toua deitero. Doba yen yedag hom dara en. Hang ELOHIM emeigdoumesa yen yedag en mogwihi mogo yen dag misen touohob. 3:27 Dara Krisdus men maireseb augwan eb naugb yen toua. Anai sug gembala ogun yen se duhu sug nosa, kaba, gini ansins dag yen yedag hom dara en toua namcirohob. 3:28 Dangga hang, iteitogin, kaba, yen yemeija leng Yahudi susugb dau lugmahara, dara sogougb susugb dau lusud misen, dara ligiji susugb dau ligida touwero. Doba se Krisdus Yesus gin, kaba, yen yaugwan yedag hom terimda. 3:29 Sug Krisdus moho aiga yen dag ginohob, kaba, yen toua yedag Abraham medebeitor misen namcir. Hang areg ELOHIM os dou en sug nosa, kaba, emediyebeiya dau yen touwero, doba eb naugb yen toua terimda.

Galatia 4

4:1-2 Dangga areg dan den dou yen graga, kaba, men meijouhw dag gini: Sug mena ecug mecigbougb deb dodo en meis mebinohob, doba sug en edag godehaba, kaba, lusud gus lesedougwo en. Hanoba len laresbes en edebeij lona sug mena medoc agug deb naugb enahabi, mena emeic augwan dou en toua. Dangga hang, mecigbougb augwan gin, kaba, en men namcirohob. Doba sug en edag godeh dag ginaba, kaba, len lowun en moho dag sogougb dous. 4:3 Augwan gini aninim dag maman touohob. Anai sug nosa, kaba, maman toua mamedag sudbuma, doba maman madag lugdehaba. Dangga hang, se lona ingga, kaba, mecigbougb areg ELOHIM esedeb naugb mamanohob, kaba, en emeic dou maman touebma. Doba merna mog mog gedig len loiharaga lusud se cinogo gin, kaba, len laresbes maman aud ara ara terimda, anai maman madag sogougb dou lenaba. 4:4-5 Doba sug cumougt edagasohob, kaba, ELOHIM esa enin Meisi mohora hom naugb en ouwaden dau bogo se cinogo gini. Dara sug en ouwaden gin, kaba, en emedag merna touwero. Doba mem ouwadan en dag lusud misen. Dangga sug mem ouwadan enohob, kaba, en emedreg ELOHIM men gomnomna mougwa hom touwero. Doba en owun enin medoc mes arjaga naugb en aimo augwan gini an maman toua terimda. Dauntoba maman mamedag gomnomna men sogougb deitero. Doba ELOHIM eigdoumesa maman dag en mogwihi mogo maman ucugb deit. Anai sug en eic en maga ancoho aga maman dou ELOHIM naugb maman sesar dag ginohob, kaba, en eigdoc maman dau gomnomna men gogom toua namcir. 4:6 Sug yen yedag ELOHIM mogwihi mogo misen dag ginohob, kaba, en esa Mena Gogoufu ogdoc en Meisi gini bansins se yen meigdoc mes toua. Hanoba en arautut maman naugb maman magahugouhw an ELOHIM dag maman Mamina gedig maman mamdoc gororougb en toua namcir. 4:7 Dangga hang, ELOHIM men mecigbougb areg en esedeb naugb en mehir yenohob, kaba, en emerses dau yen touwero, doba en obdeb naugb yen terimda. Anai yen yemedag sogougb dou merna mog mog dara Musa men gomnomna gin deitero. Doba yen yedag ELOHIM mogwihi mogo yen dag misen namcirohob. 4:8 Dara sug nosa, kaba, yen yemecinaga areg asesa ELOHIM misen enin medoc mes augwan dag misenbuma. Doba yen yedag len gedig lusud leigdoumesa len meroho dag ELOHIM misen meren sogougb naugb yen yaimo len aud areg len larougb yen an gin toua terimda. Dobnaro. Len laugwan lemedag ELOHIM misen teiteiyero. Doba len ledag merna mog dous. 4:9 Doba iteitogin, kaba, yen yecinaga areg asesa ELOHIM enin medoc mes augwan dag misen namcirohob. Era eigouhw edreg, kaba, dan denara dou yen dag ELOHIM enin ecinaga yen yaugwan dag misen touohob. Dangga dagiro, naugwe hang, yen youwan yeineg dau en naugb yen yedag sogougb dou merna mog mog gedig len loiharaga lusud se cinogo gin deita? Anai len, kaba, len lemedag ELOHIM misenero, doba len ledag merna dous. Hang meren goubesa emedeinyum naugb sug len lemeic ara ara dou yen touwero. Doba len lomomtom namcir. 4:10-11 Dan dahau dag dan deic dan indug erij icira yen, doba dag augwougb dousei? Anai yen yeigdoumesa lona gouji, dara igda loba, dara cumougt, dara arisogomoc augwan an meren lona naugb yen yesijaresa dara yen yougwan ared debin augwan gini ucugb deitohob. 4:12 Dangga hang, dan indagunerij, dara dan indamouwerij, dan desulou yen dara goubesa namcir. Dauntoba yen yemedag sogougb naugb yen yaimo merna mog mog dara Musa men gomnomna gin deitero. Doba yen yedag dan naugb yen yarges dau augwan gin namcir, aninim dag dan dedag sud hom dau yeng yugmahara gin touohob. Anai dan demaimo Musa men gomnomna dag nosa toua deitero, doba dan darges dau gin toua terimdohob. 4:13 Dan dacgeij yen dag gini, anai yen yemeic gecgu an dan mougwa hom touebma. Doba yen meigdoc eigouhw an dan terimdohob. Anai yen yecinaga dag aimougtut, kaba, dan demesedeb naugb dan desai Krisdus moro dou yenero. Doba sug dan dedebeij se meijen hancob ingga, kaba, areba dan medam gougwa. Hang emeic cumougt dou dan naugb dan demesai Krisdus moro sug aimougtut ingga dou yen toua. 4:14 Dangga hang, sug areba dan dag gin, kaba, yen yemeigdorus meimeij dara yen yemesdigeij dan touwero. Doba yen yeic meijus naugb yen yagauwesa dan terimda. Hanoba yen yebin dan, aninim dag sug ELOHIM men malaikad, era Yesus Krisdus enin ladebeij yen toua. Anai yen meigdoc agahugouhw medam naugb dan sug dan desai Krisdus moro dou yenohob. 4:15 Doba iteitogin, kaba, meijen gagahugouhw gini inggiro deitohoba? Era ediyebeiya dau yendohobei? Anai dan decinaga dag sug nosa, kaba, yen yemeija meigdocesa sug yen yeihwa yen meijiresi dauwero. Doba emedag dan demacgeij dau yen, kaba, yen yaimo dan indir an. Hanoba yen yeic dou dan toua. 4:16 Dangga dagiro, naugwe hang, yen yowun dan indoho aninim dag meijen moca? Anai dan desai areg se geica dou yen danggangei? Era dagiro? 4:17 Doba yen yesa decicijahabi, anai dan decinaga dau leng Krisden dau leng Yahudi gin, kaba, dag len leic meruwemougb esesa naugb len lenara laineg yen meigdoc mes terimda. Doba meren gauwamara an yen, kaba, ecgu namcir. Anai len louwan lasid yen dau emen, dauntoba yen yemaimo emen aud areg se geica gin touwero. Doba yen yeic meijuwemougb esesa desij len se Musa men gomnomna dous. 4:18 Doba areg dan den dou yen eisaugb genara gaineg gin, kaba, dag ecgu namcir inggei? Naro. Anai sug sud hom en mou en dou eigouhw an lusud, kaba, ara ingma emeb dougwo gin touwero. Doba en enara baineg len merdoc mes aud gin terimda. Doba areg esloulougb, kaba, aud areg geigouhw dous. Naro, kab, naro. Dangga sug dan indugwengga an yen, era dan indugwero toua, doba sug lusud meru en dou eigouhw an yen, hanoba len lenara laineg yen meigdoc mes, kaba, eic gerleij dou yen naugb yen yaimo len terimda. 4:19 Dan indihirija, dan indoc erij an yen deit, aninim dag gida sug en ouwadan meh, kaba, en menuhwa mogo erij an en toua. Dara dan demarges dau gin touwero. Doba dan indoc erij an yen terimda Krisdus men maireseb augwan ens ainyes se meijen geicara augwan ucugb deitahabi. Anai yen yobsara dau gin namcirohob. 4:20 Dangga hang, dan indoc esesa an yen terimda naugb dan douwan dedeiya yen sungga iteitogin toua. Dauntoba dan demenara se goubesa dou yen dag nosa deitero. Doba dan denara dara garjaga dou yen dous, kaba, gini eic dag yen yecicugb aud Krisdus enggei? Era naroei? Anai dan demeb ara naugb yen deita? 4:21 Sug yen meigdoc erleij naugb yen youwan yaimo Musa men gomnomna naugb sug ELOHIM eic gesgigouhwesa dou yen ucugb, kaba, dagiro, naugwe hang, yen yemouman dau areg Musa men gomnomna ens dou yen ginero? Yen yauni gin ucucugb dou danahabi. 4:22 Anai men gomnomna gin, kaba, enara, endagai: Abraham, kaba, en meisi lahwai. Laingma, kaba, dau mesouwa men sogougb. Doba laingma, kaba, dau mesouwa sud misen. 4:23 Dara gida gedag sogougb gin, kaba, en aimo dau areg lusud misen merdoc etrij icirim an dous. Hang en emouwadan meh gini. Doba gida gedig sud misen en meh gin, kaba, emen dau lusud misenero. Doba aimo dau areg ELOHIM enin eng os dou en sug nosohob. Hang en emouwadan en toua. 4:24 Dangga lagida lahwai gin, kaba, aimeh an dag ELOHIM men gos dou hwai geb naugb mamanohob. Gida gedig en mehir dag sogougb gin, kaba, en moho Hagar. Hang eni aimeh an dag ELOHIM men gos dou mohon gedig en eic dou Musa se menmod Torsina sug nosohob. Anai gareg en aimo ELOHIM men gos dou mohon gin, kaba, en toua dag sogougb. Aninim dag Hagar en medebeitor len laugwan, kaba, len ledag sogougb namcir. Anai Hagar enin toua dag sogougb an len teiteiyohob. 4:25 Sug Hagar eni aimeh an menmod Torsina geb se leng Arabia meren hancob dag ginohob, kaba, en toua dag aimeh an Yerusalem geb se cinogo gini an men lusud dau leng Yahudi len laugwan toua. Anai len laugwan gin, kaba, len laimo ELOHIM men gomnomna geic dou Musa se menmod Torsina. Hang len ledag sogougb, anai len ledag Hagar medebeitor touohob. 4:26 Doba leng leinesa Yerusalem geb se bogo, kaba, len lemedag sogougb dou Musa men gomnomna toua deitero. Doba len larges dau gin namcirohob. Hang Hagar, kaba, en emedag mem naugb maman toua deitero. Doba Sarai enin eng edag mem naugb maman, anai en aimeh an Yerusalem geb se bogo gedag mem naugb mamanohob. 4:27 Augwan gini esogwa deisa areg maman Adehsud en ens deb se Surad Yesaya deb sug nosa touohob, endagai: Bang bedebdena naugb ban bemeic abihero, kaba, ban abdoc edeigouhw deit. Era ban gedig ban abinuhwa emerij an ban abih ingmebma, kaba, ban bagahugouhw namcir. Anai ban gedig ban absuwa arges ban debohob, kaba, cum, ban abihir leinyana medam edreg dau gida hom gedig mesuwa eigtou desij en terimda. 4:28 Dangga hang, dan indagunerij, dara dan indamouwerij, yen yemedag ELOHIM mogwihi mogo dau sug yen yaimo Musa men gomnomna ginero. Doba yen yedag en mehir dau areg en os dou yen ogdoc Krisdus gin dous. Aninim dag Sarai en emouwadan Isag dau areg lusud louwan touwero. Doba en ouwadan meisi gini, aimo dau areg ELOHIM enin os dou en dous. 4:29 Dangga se lona ingga, kaba, Hagar meisi Ismael eic gecgu an Sarai meisi Isag gin toua. Anai Ismael gin, kaba, mem ouwadan en, aimo dau areg lusud misen merdoc icirim an en. Doba Isag, kaba, en ouwaden dau mem, aimo dau areg Mena Gogoufu enin ouwan dous. Hang iteitogin, kaba, leng Yahudi leic mog erij dou yen toua. Anai len, kaba, len ledag Hagar medebeitor naugb len laimo Musa men gomnomna gin terimdaba. Doba naugb yen, kaba, yen yarges dau gomnomna gin namcir. Anai yen meigdoc ebdebin an areg ELOHIM os dou yen ogdoc Krisdus ginohob. 4:30 Doba gida gedag sogougb an en meh, kaba, Surad Injil Meb Mohon enara dagiro eisaugb lana? En enara dag gini, endagai: Ban berba gida sogougb gin an en meh namcirda. Anai sogougb meisi gin, kaba, en emesma mena mecigbougb aninim dara gida gedig sud misen en meh touwero. Doba en edag sogougb terimda. 4:31 Dangga hang, dan indagunerij dara dan indamouwerij, maman gedig maman madag Krisdenohob, kaba, maman mamedag gida sogougb gini en mehir maman toua deitero. Doba maman madag gida gedig sud misen en mehir maman dous.

Galatia 5

5:1 Sug Krisdus esga maman dau Musa men gomnomna ginohob, kaba, yen yemamsoho gembala areibahau naugb len lagaigeij yen. Hanoba len lahwan yen naugb yen yedag Musa men gomnomna men sogougb toua deitero. Doba yen yaiyan meigdocesem naugb yen yes agadgeij dougwo len namcir. Anai sug Krisdus esga maman dag ginohob, kaba, en emouwan naugb maman mamedag sogougb deitero. Doba en ouwan naugb maman madag lusud misen terimda. 5:2 Dangga yen yemousa deisa gembala areibahau naugb len lemec yen meijus dau yen touwero. Doba yen yes agadgeij dau gin namcir. Anai sug yen yamsoho len an gin, kaba, Krisdus men geicara taiba sogo salib emeb naugb yen toua deitero. Doba augwan ediyebeiya dau yen deitohob. Yen youman dan indir an areg dan den dou yen gini deigeigouhw namcir. Anai dang, Paulus, eng desulou yen an gini. 5:3 Dan den dougwo yen mougwa hom deit, dendagai: Gareg dau yen en amsoho len gus naugb len lec en mos dau, kaba, esloulougb medam naugb en emedreg dau Musa men gomnomna hom touwero. Doba en aimo augwan aududi terimda. Naro, kaba, sesar men gogom eb naugb en toua deitohob. 5:4 Dangga gareg dau yen en aimo Musa men gomnomna gin ucugb, hanoba en ouwan ELOHIM eic gesgigouhwesa dou en ogdoc men geicara gin toua, kaba, en ogod ameiji dougwo Krisdus enohob. Hang ELOHIM medoc an en emoiharaga en toua deitero, doba en edreg dau gin namcirohob. 5:5 Doba emen, kaba, emen emdoc ebdebin an Krisdus men geicara naugb emen gin dous. Dangga hang, emen emod emina debsa ELOHIM naugb en eic gesgigouhwesa dou emen ogdoc sug emen emaimo Musa men gomnomna ginero. Doba emen emod emina debsa en dag en eic gesgigouhwesa dou emen ogdoc Krisdus men geicara gin dous. Hang emen emobsara dau gin touwero. Doba ogdoc Mena Gogoufu men goubesa, kaba, emen emaiyan emdocesem naugb emen emeigtou emateteij naugb gin toua terimda. 5:6 Anai sug maman madag hom dara Krisdus Yesus ginohob, kaba, emesloulougb naugb sug maman mac mamus dau, era sug maman mamec mamus daubuma. Doba aremer hom esloulougb namcir, kaba, dag maman mamdoc ebdebin an Krisdus hom gin dous. Hanoba arautut maman naugb sug maman mamdoc gororougwim toua terimda. 5:7 Sug nosa, kaba, yen meigdoc ebdebin an Krisdus eiseisaugb namcirohob. Dangga gareg en agaresa yen meigdoc mes, hang yen yobsara dau mer misen eisaugb Krisdus naugb yen yemaimo gin toua deitero? 5:8 Anai gini dau ELOHIM gedig en eija yen aud en sug nosa ginero, doba dau sud hom gus dous. 5:9 Dara sud hom dous eng edeinyum naugb sug en ahwan lusud leinyana dau ucina se geica gin toua. Anai yen yecinaga dau aremeijouhw dag augwu mei getaha hom eb se iyohob, kaba, cum, esij geigouhw augwan betaha namcir toua. 5:10 Doba dan, kaba, dan decinaga yen yaugwan dag misenohob. Dangga hang, dan dod indina debsa yen dag yen yemobsara aud sud hom areg en arougb yen naugb yen yec meijus dau gin touwero. Doba yen yobsara aud dan se aremer hom gin dous. Anai maman maugwan madag hom se maman Adehsud ginohob. Dara sud hom areg en enara baic yen meigdoc mes dau gin, kaba, dan decinaga dag ELOHIM emeic gogom medam dou en toues. 5:11 Dara yen yauweila dau leng Krisden dau leng Yahudi meren geicara dou dan toua. Anai len gin, kaba, len lerei dou lusud, lendagai: Paulus, kaba, en emebedbed dou lusud dag len merdoc ebdebin an Krisdus toua dousero. Doba en arougb len dag len lec merus dau. Hanoba len laimo Musa men gomnomna aud gousanara laos dara ginahabi, kaba, emedeinyum naugb sug ELOHIM eic gesgigouhwesa dou len ucugb toua. Naro, kab, naro. Doba dan indagunerij, dara dan indamouwerij, sug dan debedbed dou lusud dag gin, kaba, dagiro, naugwe hang, leng Yahudi gini len leic gogom dou dan terimda? Naro, len lemeic gogom dou dan icira ginero. Anai indan gebedbed gin, kaba, eic len merdoc esgiraha an gin namcirohob. Dobnaro. Dan debedbed dou lusud dag len lemec merus dauwero. Doba len merdoc ebdebin an Krisdus dous, kaba, edeinyum naugb sug ELOHIM eic gesgigouhwesa dou len ucugwohob. Hang leng Yahudi gini len lemeic mog erij dou dan toua terimda. Anai len merdoc esrougb an indan gebedbed gin namcir. 5:12 Dangga leng lenara lai yen meigdoc mes dag gin terimda. Hanoba eic dag yen meigdoc eijesa dou yen touohob, kaba, eigouhw naugb len lemec merus dau dousero, doba len letin lenin namcir toua. 5:13 Doba dan indagunerij, dara dan indamouwerij, yen, kaba, yen yemedag sogougb naugb Musa men gomnomna gin deitero. Doba sug ELOHIM eija yen sug nosa naugb yen meigdoc ebdebin an Krisdus, kaba, en esga yen dau gin toua namcirohob. Doba deciciji. Sug gomnomna hom emeb naugb yen dag gin deiterohob, kaba, yen yemeic gini naugb yen yemaiyeiyo dougwo areg yen meigdoc etrij icira gin touwero. Doba yen yeic gini naugb yen yeicara yaimo anim dareg yen meigdoc gororougwim dous. 5:14 Anai ELOHIM men gomnomna augwan, kaba, eb debin gomnomna hom dag gini: Yen meigdoc gororougwim, aninim dag yen meigdoc gororougb yenin toua. 5:15 Doba sug yenin yaum, era yetim terimda, kaba, decicijahabi. Anai cum, kaba, yen yaugwan yediyebeiya dau cinogo gin dangga. 5:16 Dangga areg dan den dou yen gin, kaba, men meijouhw dag gini: Eigouhw naugb yen yaimo Mena Gogoufu en mer an areg en arautut yen aud gin dous. Anai sug yen yeicara dag gin, kaba, yen yemaimo areg yen meigdoc etrij icira gin toua deitero, doba yen yarges dau namcir. 5:17 Anai areg yen meigdoc etrij icira gin, kaba, susugb dau areg Mena Gogoufu ouwan. Dangga toua, areg Mena Gogoufu arautut yen aud gin, kaba, susugb dau areg yen meigdoc etrij icira arautut yen aud gin toua namcir. Hang yen youwan yaimo ara geigouhw toua dagiro? Anai lan labemocedoum se yen meigdoc mes terimda. 5:18 Doba sug Mena Gogoufu en edag meijen mougt naugb yen yaimo areg en arautut yen aud gin dous, kaba, Musa men gomnomna emedag mougt, hang emeic gogom dou yen toua deitero. Doba yen yarges dau namcirohob. 5:19 Dara leng laimo areg len merdoc etrij icira gin, kaba, maman macinaga dau meren geicara augwan dag misen touohob. Anai len, kaba, meren geicara dag mihi meren geicara naugb len lohw len meraga doum, dara len laimo areg gogor anim toua terimda. 5:20 Dara len lesijaresa seiseij. Dara len meru ouforoho an ara moung mohu naugb len lagaresa lusud merdoc mes. Dara len lemarges dau sug len lebemocedoum touwero. Doba len lenara ledregim, dara laisedim. Dara len merdoc mog mog anim, dara len merdoc etrij icira len gus meren aremougb toua terimda. Hang len lemauwam an len gus meren aremer naugb len lemousa len touwero. Doba len lauwam an lenin dous. Dangga sug lusud lemobsara aud lenero, kaba, len lenara lakeba lusud naugb len largesim namcir toua. 5:21 Dara len lehigdud len gus an meren aremougb. Dara len leg ahwei mohu ed len lomom. Hanoba len logo ara gaihim, dara areg gecgu gus gus dag gin toua terimda. Dara leng leicara dag gin, kaba, len lemeinesa ELOHIM men uro mes naugb en oiharaga len touwero. Doba len leigtou dig medigo namcir dous. Dan desulou yen an aremer gini sug nosohob, hanoba dan demesulou yen ucan deit toua. 5:22 Doba leng laimo Mena Gogoufu aud areg en arautut len aud ginohob, kaba, len lemesenagan lusud toua deitero. Doba len merdoc gororougwim. Dara len merdoc agahugouhw anim. Dara len laigdougwom dara leic gesgigouhwesem toua terimda. Dangga hang, len merdoc mog mog naugb len lemeic gogom dou len gus dedemeda touwero. Doba len leigtou lateteij an meren geicara. Hanoba len merdoc an len dara len merdoc edag beim anim toua. Dara len lemaimo ucina agabgebi an lusud touwero. Doba se meren geicara augwan, kaba, len merdoc dag hom an len toua namcir. 5:23 Dara len lemenara gouji dou lusudero. Doba len lenara dara mer arjaga dou len dous. Dara len lemobsara aud areg len merdoc etrij icira dedemeda touwero. Doba len lebehnehino lenin merdoc mes dougwo augwan gin terimda. Dara meren geicara gin, kaba, gomnomna hom ingma emen dougwo len an gin touwero, doba ousa deisa len an gin dous. 5:24-26 Dangga hang, eigouhw naugb maman mameimiman mamanin an maman geicara deseino len gus. Dara maman mameic gesrougb doum. Dara maman mamehigdudim an aremougb touwero. Doba sug Mena Gogoufu eic maireseb menau geb huhugb dou maman dag ginohob, kaba, en edag mougt naugb maman maimo en aud areg en arougb maman an gin dous. Anai sud hom areg en edag Krisdus Yesus men logodehohob, kaba, en emaimo areg en medoc etrij icira, dara areg edarougb en gin toua deitero. Doba en ogod se enin medoc mes dag en omom dau gin namcirohob.

Galatia 6

6:1 Dangga dan indagunerij, dara dan indamouwerij, sug sud hom dau yen en eitig dau ucina misen aud sesarohob, kaba, yen gedig yen yaimo Mena Gogoufu en merohob, kaba, yen yemenara se meijir gouji dou en touwero. Doba yen yahwan en aud ucina misen gin ucugb dara yen meigdoc arjaga an en namcir. Hanoba yen toua yebehnehino dougwo yenin meigdoc mes. Dauntoba yen meigdoc emetrij naugb yen yobsara se sesar gin touwero, doba yen yaimo areg se geica terimda. 6:2 Dara yen yemamsoho yen meisir gus an meren gogom geb debin len touwero, doba yen meigdoc anim naugb yen yeigdoumesa gogom daum ucucugb toua. Anai sug yen yeicara dag gini, kaba, yen yaimo areg asesa Krisdus enin medoc mes augwan namcirohob. 6:3 Dara yen meigdoc emagas an augwan touwero. Anai sug sud hom en oudesa endag en moho eb taiba dau augwanohob, doba men geicara emedeinyum naugb ginero, kaba, gini aninim dag en augwohosa enin dous. 6:4-5 Hang maman mameic len gus meren geicara mamaos dara mamanin maman geicara touwero. Doba astesda sud hom dau maman, kaba, en ogmac enin medoc mes an men geicara dous. Anai sug gogom eb debin maman, kaba, maman mameigdoumesa daumero. Doba sud hom yom enin esemougwisa enin mos an gin toua. Dangga sug sud hom enin men geicara augwan eigouhwohob, kaba, en emeic men geicara gini naugb en emeiya dau len gus meren geicara touwero. Doba en eigdoumesa enin moho an men geicara gin dous. 6:6 Gareg en ebedbed Mer Geigouhw eisaugb Krisdus dou yen, kaba, yen yemehig debin meijen aremougb dau en touwero. Doba yen yesi areg geigouhw ingma dau gin dou en toua. 6:7 Dara se meijen geicara augwan gin, kaba, yen yemauwam an didi dag yen meiju ouforoho edeinyum naugb sug yen yarerei ELOHIM en mairesi touwero. Doba yen yarges dau sug yen yeicara dag gin namcir. Anai areg yen yeba meij gin, kaba, en emauni gini ucugb dou yen toues. 6:8 Dangga hang, gareg en aimo areg en medoc etrij icira gin terimda, kaba, en edec mera gecgu naugb enin se dum smougb dous. Doba gareg en aimo Mena Gogoufu mer aud areg geigouhw, kaba, en edesma mera maireseb menau geb huhugb dau Mena Gogoufu ingga toua. 6:9 Dara yen yemeisan gurog dau areg geigouhw gin touwero, doba yen yeic meijuwemougb esesa se gin terimda. Anai sug yen yemarges dau ginero, doba yen yes agadgeij namcir, kaba, mera areg ELOHIM esedeb naugb yenohob, kaba, augwan emediyebeiya dau yen touwero. Doba edebeij lona sug ELOHIM esedeb naugb ginohob, kaba, yen yedec mera dau en toua. 6:10 Dangga sug cumougt mougb gebaba gin, kaba, maman maicara geigouhw an lusud laugwan toua terimda. Doba areg gesloulougb aimougtut, kaba, dag maman maic geigouhw an maman mamsir se Krisdus nosahabi. 6:11 Dara yen yeiya dau sug dan dog surad sug ouwedoc naugb yen gin, kaba, dag dan dog ai danin insira dara meb gouji dou yen toua. Dauntoba dan desulou yen eisaugb leng Krisden dau leng Yahudi gedig len leigtou desij yen sungga mougwa hom ucan deit. 6:12 Anai len gin, kaba, len lahau dau sug len lebedbed Krisdus omom taiba sogo salib gin dou lusud dous, kaba, dag cum, kaba, leng Yahudi gus leic mog erij dou len icira gin toua. Hang len lagodgod yen naugb yen yec meijus dau dara yen yaimo Musa men gomnomna aud gousanara gin toua. Dauntoba sug leng Yahudi gus len leiya dau gin, kaba, len lemeic gogom dou lenero, doba len merdoc esgiraha an len namcir. Dangga hang, areg len lagodgod yen an gin, kaba, dougwo sug leng Yahudi gus len lemeic mog erij dou lenero gin dous. 6:13 Dobnaro. Anai leng laimo ucina naugb len lec merus dau dag gini terimda, kaba, ousa len naugb len laimo Musa men gomnomna augwan namcirohobei? Naro, augwan gini emousa len naugb ginero. Anai len ledis gomnomna gin ucucugb terimda touohob. Dangga hang, areg len lagodgod yen an gin, kaba, naugb len laigdoumesa lenin meroho, dauntoba leng Yahudi gus leimiman len an gini dous. 6:14 Doba naugb dan, kaba, dan deigdoumesa danin indoho an maman Adehsud Yesus Krisdus sug en omom taiba sogo salib naugb maman sesar gin dous. Areg gus, kaba, dan demeigdoumesa dan indoho an touwero. Anai sug dan domom dara Yesus se sogo salibohob, kaba, dan domom dau areg gus augwan toua. Hang areg geb se cinogo gin toua len lomom dau dan namcir. 6:15 Sug dan domom dau augwan dag ginohob, kaba, dagiro, naugwe hang, dan demeigdoumesa dan indoho an areg geb se cinogo gin ucugb deita? Anai deseino ELOHIM, kaba, sug sud hom ec mos dau era en emec mos dauwero toua. Doba inggaida. Esloulougb, kaba, dag maireseb menau geb huhugb eb naugb en dous. 6:16 Dangga gareg en os debin areg dan dens dou yen gin terimda, kaba, dan dacgeij dau ELOHIM naugb en eseyeiyo en dara eic gesgigouhwesa dou en dougwo areg gecgu augwan toua namcir. Hanoba en medoc eineg an en toua terimda. Anai len laugwan gin, kaba, ledag ELOHIM men meijouhuda leng Israel dag misenohob. 6:17 Dara sug ouwedoc gin, kaba, dan douwan den dougwo yen, dauntoba yen yemeic momogo dou dan deitlo. Anai dan dedag Krisdus men sogougb naugb dan desai en moro dou lusud, kaba, dan deic indiswes aigteim icira gin touohob. 6:18 Dan dacgeij maman Adehsud Yesus Krisdus eic geigouhw dou dan indagunerij, dara dan indamouwerij, yen yaugwan terimda. Augwan gini asesa dag misen namcir.

Efesus 1

1:1 Surad gini dau dang, Paulus, dou ELOHIM men lusud se cinogo Epesus yen yaugwan. Anai ELOHIM enin eng ouci dan. Hanoba en eigdoumesa dan indoho naugb dan desai Mer Geigouhw eisaugb Krisdus Yesus dou lusud laugwan toua, aimo dau areg enin eng ogod deb deinaugb dan sug nosohob. Dan dog surad gin dou yen, anai sug yen yedag hom dara Krisdusohob, kaba, yen yemobsara dau en touwero. Doba yen yes agadgeij namcir naugb yen yeicara yaimo en aud areg en arougb yen an gin toua terimda. 1:2 Hang dan demacgeij maman Mamina ELOHIM dara maman Adehsud Yesus Krisdus naugb lan mardoc eigouhw an yen. Dara lan laseyeiyo dara laic gesgigouhwesa dou yen dougwo areg gecgu augwan toua namcir. 1:3 Eigouhw naugb maman maugwan magahugouhw an dara man sijo dou maman Adehsud Yesus Krisdus en Mena ELOHIM gini esesa terimda. Anai sug maman madag hom dara Krisdus dag ginohob, kaba, en eic areg geigouhw geb se bogo augwan ogdoc Mena Gogoufu dou maman toua. 1:4 ELOHIM eicara dangga an maman, anai sug en emahasesei cinogo augwanbuma, kaba, en ouci maman debinim dag enin men lusud. Dauntoba sug maman mamdoc dag hom dara Krisdusohob, kaba, areg gogor emeb se maman toua deitero. Doba maman madag ecabeci dara edag beim deseino en dous. 1:5 Sug ELOHIM medoc gororougb maman dag ginohob, kaba, en esedeb maman dau sug acgunog naugb en eigdoumesa maman dag en mogwihi mogo maman ogdoc Krisdus men geicara taiba sogo salib, aimo dau areg en medoc esgiraha an gin toua. 1:6 Dangga hang, sug ELOHIM en medoc eigouhw an maman medam gougwa dag ginohob, kaba, maman mamarges dau sug maman maigdoumesa en moho touwero. Doba maman magahugouhw an areg en eic dou maman ogdoc en Meisi gin besesa terimda. Anai en emacgeij aregoufu naugb areg graga dau mamanero. Doba sug maman mamdoc dag hom dara en Meisi ginohob, kaba, en eic augwan dag mogud dou maman ogdoc en Meisi gedig en medoc gororougb en gin toua. 1:7-8 Hang sesar men gogom augwan emeb naugb maman toua deitero. Doba sug maman madag hom dara en Meisi dag ginohob, kaba, en medoc eigouhw an maman eiseisaugb terimda naugb en aigdougwo maman sesar augwan dau maman toua. Anai Krisdus eic enin mogwihi ancoho aga maman dou ELOHIM naugb maman sesar augwanohob. 1:9 Hanoba en ens dau areg en esedeb naugb maman se lona daiyamo gacin ogdoc Krisdus augwan asesa dou maman toua. Anai en emens dau augwan gini dou sud hom ingma sug nosa touebma. Doba en ecgoneh augwan dau len namcir. Dangga hang, sud hom ingma, kaba, en emens ucina dou en naugb gini touwero. Doba en aimo augwan gini dau enin medoc mes an gin dous, aimo dau areg en medoc esgiraha an gin toua. Anai en mou ouforoho dara auti naugb augwanohob. 1:10 Dara areg en esedeb naugb lona daiyamo gacin, kaba, augwan dag gini: Sug lona edagasohob, kaba, en ouci areg en ahasesei dara areg en esinsin se bogo dara cinogo augwan debinim. Hanoba en eigdoumesa Krisdus en edag mougt mera medam naugb augwan gin toua. Anai gini aimo dau areg en ogod deb deinaugb en sug nosohob. 1:11 Sug maman madag hom dara Krisdus dag ginohob, kaba, ELOHIM ouci maman dau sug acgunog. Hanoba en esedeb maman naugb sug maman madag enin men lusud, aimo dau areg enin eng ogod an gin toua. Anai sud hom ingma, kaba, en emens ucina naugb ara ara hom dou enero. Doba areg en ouci deb dara areg en esedeb naugb sug en aimo, kaba, en aimo augwan gini dau enin medoc mes dous. 1:12 Dangga hang, eigouhw naugb mamang Krisden maman maugwan maigdoumesa ELOHIM en moho agas medam. Dara maman magahugouhw an men geicara geigouhw gini beiseisaugb beb huhugb namcir toua. Anai maman, kaba, maman maod mamina debsa en an Krisdus dag en eigdoc maman dau sesar men gogom dau lusud gus laugwan sug aimougtut ginohob. 1:13 Maman maugwan maicara dag gini, anai yeng yugmahara, kaba, yen yedag ELOHIM men lusud touohob. Anai sug lusud lesai en mer geica dou yen sug nosa, kaba, yen yemohoiya len merir gin touwero. Doba sug yen youman Mer Geigouhw eisaugb Krisdus gin, kaba, yen meigdoc ebdebin an en dag misen toua namcir. Hang ELOHIM esa Mena Gogoufu bansins se yen meigdoc mes. Dauntoba yen yecinaga dag en moho aiga yen toua, aimo dau areg en os dou yen sug nosa. Anai Mer Geigouhw eisaugb Krisdus gin, kaba, ahwan yen aud en. Hanoba en eigdoc yen dau sesar men gogom augwan aud maireseb menau geb huhugb gin touohob. 1:14 Sug Mena Gogoufu einesa maman mamdoc mes dag ginohob, kaba, maman macinaga dag areg ELOHIM os dou men lusud maman, kaba, augwan emediyebeiya dau maman touwero, doba eb naugb maman toua beb huhugb namcir. Anai en, kaba, en edag ansins naugb ginohob. Hanoba maman mamdoc eica dag maman mamedag sesar men sogougb toua deitero. Doba sug maman madag men lusud ginohob, kaba, en eigdoc maman dau sesar men goubesa augwan toua. Dangga hang, eigouhw naugb maman maigdoumesa en moho agas medam. Dara maman magahugouhw an men geicara gin toua eiseisaugb terimda. Anai men geicara augwan gin, kaba, eigeigouhw namcirohob. 1:15-16 Sug ELOHIM eic areg graga augwan dou yen touohob, kaba, dan demarges dau sug dan den sijo dou en naugb yen touwero. Doba astesda sug dan docuncum dou en, kaba, dan deicara dangga besesa terimda. Anai dan douman dau sug len lesai Mer Geigouhw eisaugb maman Adehsud Yesus dou yen sug nosa, kaba, dag yen yemohoiya len merir anero, doba yen meigdoc ebdebin an en. Dara dan douman dag yen yemarges dau sug yen meigdoc gororougb ELOHIM men lusud gin touwero. Doba yen yeicara yaimo dag gin an len esesa terimda touohob. 1:17 Dangga hang, dan dacgeij maman Adehsud Yesus Krisdus men ELOHIM naugb en esa Mena Gogoufu dou yen. Dauntoba en ens dau areg asesa ELOHIM enin medoc mes. Dara en eic mou ouforoho dou yen naugb yen yecinaga areg geb se ELOHIM enin medoc mes gini meijouhw augwan asesa toua. Anai ELOHIM gin, kaba, en edag maman Mamina gedig en eigtou se gogouf cucugb namcirohob. 1:18-19 Dara dan dacgeij en naugb en esa men mouf se yen meigdoc mes. Dauntoba yen yecinaga dag areg yen yod meijina debsa en anohob, kaba, meijouhw augwan asesa toua. Anai en ouci yen debinim naugb ginohob. Hanoba dan dacgeij en naugb en ens dau areg en os dou men lusud mamanohob augwan asesa dou yen. Dauntoba yen yecinaga dag misen toua. Anai areg en esedeb naugb maman gin, kaba, einyana dag mouf esisilo dara mera eisaugb namcir. Dara sug maman mamdoc ebdebin an Krisdus dag ginohob, kaba, dan dacgeij ELOHIM naugb en ens dau men mobisamougb geb se maman mamdoc mes augwan asesa dou yen, dauntoba yen yecinaga dag misen toua. 1:20 Anai men mobisamougb geb se maman mamdoc mes gin, kaba, aninim dag men mobisamougb gedag ganusbus gedig en eic baigdoumesa Krisdus dau gomom sug nosa touohob. Hanoba en eigdoumesa en dig bogo naugb en eigtou desij en se men maija moc dig en mesira misen, dauntoba en edag mougt mera medam dara en toua namcir. 1:21 Dangga hang, en edag mougt mera medam naugb malaikadir dara merna mog mog an meren mougt mera medam laugwan. Dara en moho agas edreg dau leng meroho agas iteitogini se cinogo gini dara leng meroho agas se lona daiyamo gacin len laugwan toua namcirohob. 1:22-23 Anai areg ELOHIM en ahasesei dara areg en esinsin se bogo dara cinogo ginohob, kaba, en ogugwo augwan gini se Krisdus en mesira. Dauntoba en edag mougt mera medam naugb augwan beb huhugb namcir. Hanoba en eigdoumesa en edag maman mougt mera medam gin toua. Dauntoba en emeigtou dou eninero, doba maman maigtou desijim. Anai maman madag men maga gini, hang emeic dag en maga omnen an maman. Aninim dag areg en ahasesei dara esinsinohob, kaba, lemeigtou dou lenin touwero. Doba en eigtou desij len laugwan toua terimda.

Efesus 2

2:1-2 Sug nosa, kaba, yen yaimo lusud gedig Bilis oiharaga len se cinogo gin aud sesar dara meren geicara gecgu gin toua namcir. Dara yen yesogwa deisa merna mog mog meren mougt mera medam en mohotimei mohw an men geicara gecgu toua terimda. Anai en edag leng lohoiya ELOHIM en mer gini len laugwan meren mougt mera medam touohob. Dangga hang, se lona ingga, kaba, yen meijina dag agau naugb yen yaimo areg Mena Gogoufu arautut yen aud gin touwero. Doba yen yedag yomom dau gin namcir, anai yen yaiga ELOHIM men hancob dara yen yebesesar an en toua terimdohob. 2:3 Dara yeng Krisden dau yeng yugmahara, kaba, yen yemeicara dangga sug nosa dousero. Doba emeng Krisden dau emeng Yahudi, kaba, emen emaugwan toua emaimo leng lohoiya ELOHIM en mer gini aud meren geicara gecgu gini. Anai emen toua emaimo areg emen emdoc etrij icira gin toua terimdohob. Hang emen ememebehnehino emenin emaga dara emen gauwamara dougwo areg gecgu touwero. Doba emen emaimo emen emaga dara emen gauwamara aud areg len larautut emen aud gin dous. Dangga sug maman maimo leng lohoiya ELOHIM en mer gini len laugwan aud areg gecgu dag gin terimda, kaba, en medoc esrougb an maman dau acgunog, aninim dag en medoc esrougb an len gus laugwan dau acgunog touohob. 2:4 Doba ELOHIM medoc eineg an maman medam gougwa. Dara en medoc gororougb maman beiseisaugb terimda toua namcirohob. 2:5 Dangga hang, en emamsoho maman deb touwero. Doba en eigdoc maman dau sesar men gogom aud maireseb menau geb huhugb. Aninim dag en eigdoumesa Krisdus dau gomom aud maireseb menau geb huhugb sug nosa touohob. Anai sug nosa, kaba, maman mamaimo areg Mena Gogoufu arougb maman aud touwero. Doba maman mahoiya en mer terimda. Hang eic dag maman mamom dau en ogdoc maman sesar gin toua namcirohob. 2:6 Doba sug maman madag hom dara Krisdus dag ginohob, kaba, ELOHIM eigdoumesa maman dau gomom aud maireseb menau geb huhugb. Dauntoba se lona daiyamo gacin, kaba, maman maigtou desij Krisdus se bogo dag mougt mera medam naugb maman masedougwo lusud dara malaikad len laugwan toua namcir. Anai sug Krisdus en omom sug nosa, kaba, en emomom terimdero. Doba ELOHIM eigdoumesa en dau gomom aud maireseb menau geb huhugb ginohob. 2:7 ELOHIM eicara dag gini dou maman dauntoba sug lusud dara malaikad len leiya dag en medoc gororougb maman beiseisaugb bedreg dag ginohob, kaba, len lecinaga beb huhugb terimda dag en medoc gini. Doba edreg dau areg len lecic augwan toua namcirohob. Dara len lecinaga dag en medoc gororougb maman beiseisaugb gin, kaba, dag augwougb touwero. Doba en eicara dangga dou maman, aimo dau sug maman mamdoc dag hom dara Krisdus Yesus ginohob. 2:8 Anai ELOHIM emeigdoc maman dau sesar men gogom aud maireseb menau geb huhugb ogdoc mamanin maman geicara touwero. Doba en eigdoc maman dau augwan gini dau sug enin medoc gororougb maman dous. Hang maireseb menau geb huhugb gin, kaba, emeb naugb maman ogdoc sug maman maic mamuwemougb esesa se ara ara gin touwero. Doba ELOHIM eic augwan gini dag mogud dou maman, anai maman mamdoc dag hom dara Krisdusohob. 2:9 ELOHIM eicara dag gini, dauntoba sud hom ingma, kaba, en emeimiman enin moho an maireseb menau geb huhugb gini ogdoc men geicara deseino ELOHIM touwero. Doba len laugwan larges dau namcir. 2:10 Anai maman mamesinsin mamanin mamdoc mes dara maman mamu menenau ogdoc maman geicara ginero. Doba sug maman madag hom dara Krisdus Yesus dag ginohob, kaba, ELOHIM enin eng esinsin maman mamdoc dara maman mamu menau dou maman dous. Dauntoba maman mamaimo areg mohon toua deitero. Doba maman maimo areg gedag beim dara geigouhw gedig ELOHIM en esedeb dau acgunog naugb mamanohob gin toua terimda. 2:11 Dara yeng Krisden dau yugmahara, kaba, yen meigdoc moc dougwo areg mohon touwero, doba yen yeiseisan terimda. Anai se lona ingga, kaba, yen yemeigtou desij Krisdus touebma. Doba dau lona sug yen meijim ouwadan yen, kaba, yen yedag lugmaharohob. Hanoba yen yemedag hom dara emen meijouhuda Israel. Dara ELOHIM misen men gomnomna areg en os dou emen sug nosa, kaba, augwan emeb naugb yen touwero, doba eb naugb emeng Yahudi emen dous. Sug areg graga augwan emeb naugb yen namcirero, kaba, ELOHIM misen gini en emedag meijen ELOHIM. Dara yen yemod meijina debsa en an areg geigouhw naugb en eic dou yen se lona daiyamo gacin touwero. Doba yen yeigtou augwougb dag gin terimda. 2:12 Dangga hang, emeng Yahudi, kaba, emen emesbes an yen dag lusud gedig len lemec merus dauwero toua namcir. Anai areg graga augwan, kaba, eb naugb emen. Hang emen emec emen emus gansins debin gin. Dara emen emeigdoumesa emenin emoho dag lusud gedig len lec merus dauwohob gin toua terimda. Doba yen, kaba, areg graga augwan emeb naugb yenero. Hang yen yemec yen meijus dau touwero. Doba inggaida, anai areg emen emec dau gin, kaba, emen emec se emen emaga dara emen emsira gin dous. 2:13 Doba iteitogin, kaba, yen meigdoc dag hom dara Krisdus Yesus touohob. Dangga hang, yen yemeb aigusi dau ELOHIM misen gin toua deitero. Doba sug Krisdus eic en mogwihi bauwaharo dou ELOHIM naugb meijen sesar dag ginohob, kaba, men geicara gini eic dag yen yeigtou desij ELOHIM, aninim dag emeng Yahudi gin touohob. 2:14-15 Anai sug nosa, kaba, ELOHIM men gomnomna dara areg en arougb emen an, kaba, edag sogo maga bagod dougwo yen namcir. Hang maman madag hom touwero. Doba maman madag moc naugb mabemocedoum terimda. Doba sug Krisdus eic enin maga bomom taiba sogo salib naugb mamanohob, kaba, en egrij sogo maga geb dougwo maman gini. Dauntoba emen emedag leng Yahudi dara yen yemedag lugmahara toua deitero. Doba sug maman madag hom dara enohob, kaba, en eic maman daihim dag meijouhuda menau hom se en toua. Dangga hang iteitogin, kaba, maman mabemocedoum toua deitero. Doba men geicara gin, kaba, eic dag maman mamdoc edag hom namcirohob. 2:16 Dauwohob, kaba, en ahwan maman dou ELOHIM naugb en eic gesgigouhwesa dou maman maugwan ucugb toua. Anai sug en omom taiba sogo salib dag ginohob, kaba, en egrij sogo maga geb dougwo maman gini, dauntoba maman mabemocedoum deitero. Doba maman madag meijouhuda hom se en ogdoc men geicara taiba sogo salib gin terimda. 2:17 Hang en emen naugb en esai Mer Geigouhw dau areg graga augwan dou yeng yugmahara gedig yen yeigtou aigusi dau ELOHIM sug nosa dara emeng Yahudi gedig emen emeigtou deinyor ELOHIM maman maugwan toua. Dauntoba sug maman macinaga dau Mer Geigouhw ginohob, kaba, maman mabemocedoum toua deitero. Doba eic dag maman daihim naugb sug maman maic gesgigouhwesem ucugb. Dara arautut maman naugb sug maman man aud ELOHIM, dauntoba en eic gesgigouhwesa dou maman ucugb ogdoc Mer Geigouhw gin toua. 2:18 Anai sug Krisdus en omom taiba sogo salib naugb maman sesar dag ginohob, kaba, maman mamahau naugb sug maman madebeij maman Mamina ELOHIM toua deitero. Doba ogdoc Krisdus men geicara gin, hang yeng yugmahara dara emeng Yahudi maman maugwan maic mamus naugb sug maman macuncum dou en dara masijaresa en. Anai Mena Gogoufu hom gin, kaba, en einesa maman maugwan mamdoc mesohob. Hang en emarautut maman naugb sug maman man aud maman Mamina ELOHIM gin toua terimda. 2:19 Dangga hang, sug yen yedag hom dara emenohob, kaba, yen yemedag lugmahara dara leng medigo dau emen toua deitero. Doba maman maugwan madag ELOHIM men meijouhuda hom. Hanoba maman maugwan madag men logodeh gedig len leigtou desij en se men tu touohob. 2:20 Sug yen yeigtou desij ELOHIM se en men tu dag ginohob, kaba, en ohud yen toua dag en men tu icira leng lesai ELOHIM moro sug nosa dara leng lesai Mer Geigouhw eisaugb Krisdus, aninim dara emeng Yahudi gin touohob. Anai meren geicara gin, kaba, edag buc gototo naugb yen. Doba Krisdus Yesus enin eng edag buc mandeij naugb augwan toua. 2:21 Dangga hang, enin eng edag sud hom gesedougwo tu gini dara men goubesa. Dauntoba tu gini emaic baisoboro touwero, doba ebsugeb. Hanoba en ohud bauloulo dag maman Adehsud men tu gecabeci gin toua namcir. 2:22 Dara en emohud emeng Yahudi gin dousero. Doba en ohud yeng yugmahara gin toua. Dauntoba yeni dara leng gus maman maugwan madag ELOHIM men tu naugb sug en eigtousa ogdoc Mena Gogoufu gin toua terimda, anai yen toua yedag hom dara Krisdus Yesus ginohob.

Efesus 3

3:1-3 Sug maman maugwan madag ELOHIM men meijouhuda hom dag ginohob, kaba, dan demarges dau sug dan docuncum dou en naugb yen touwero. Doba dan deicara daimo dag gin esesa an yen terimda. Anai areg ELOHIM en esedeb naugb yeng yugmahara, kaba, en ogod dan dag domom sug nosa. Hanoba en ens meijouhw dau gin augwan asesa dou dan. Dauwohob, kaba, en eigdoumesa dan indoho naugb dan desai augwan gini dou yen toua. Sug dan deicara dag gin naugb yen, hang lusud lemouf dan se tu gesisug icira gin touohob. (Yen yemecinaga dau areg graga augwan dag misen touebmei? Naro, yen yecinaga dau augwan gini dag misen. Anai sug nosa, kaba, dan dog dau gini gurereito dou yenohob. 3:4 Dangga sug yen yecic dau gini se indan surad gin, kaba, yen yecinaga dag dan demog augwougb dou yen touwero. Doba dag dan decinaga meijouhw eisaugb Krisdus men geicara dau augwan gini asesa dag misen namcirohob. Hang dan demog dou yen toua.) 3:5 Anai ELOHIM emens dau areg en esedeb naugb lusud ogdoc Krisdus gin, kaba, dou sud hom ingma dau len sug nosa touebma. Doba iteitogin, hang en emens dau augwan ogdoc Mena Gogoufu dou leng lesai Mer Geigouhw eisaugb Krisdus, dara leng lesai ELOHIM en moro dou lusud emen emaugwan, anai en ouci emen debinim naugb ginohob. 3:6 Dara areg en ens dou emen, kaba, dag gini: Sug yen yedag hom dara Krisdus ginohob, kaba, yen yemedag lugmahara toua deitero. Doba yen yeigtou desij emen se men uro mes. Hanoba en ekeba geigouhw areg en esedeb naugb emeng Yahudi gin dou yen. Dara en eic dau areg en os dou emeng Yahudi ogdoc Krisdus augwan gin dou yen toua. En eicara baimo augwan gini an yen ogdoc sug emen emesai en Mer Geigouhw eisaugb Krisdus dou yenohob. 3:7 Mer Geigouhw gin, kaba, ELOHIM eigdoumesa dan indoho dag men sogougb. Hanoba en eic mou ouforoho dara men goubesa dou dan naugb dan desai augwan gini dou lusud toua. Anai en medoc eigouhw an dan naugb ginohob. 3:8 Dara en eicara dangga dou dan gedig dan indoho eb tainya se men lusud laugwan merufu namcir. Anai sug nosa, kaba, dan deic mog erij dou men lusud laugwan touohob. Doba en medoc eineg an dan. Hang en emarougb dan naugb dan desai Mer Geigouhw eisaugb Krisdus gin dou yeng yugmahara gin toua. Dauntoba yen yecinaga dau areg en esedeb ogdoc Krisdus naugb yenohob augwan asesa dag misen toua. Anai augwan gin, kaba, mera eisaugb edreg dau areg lusud lauwam an gin toua namcirohob. 3:9-10 Dara en arougb dan naugb dan dens dau men ucina areg en esedeb naugb lusudohob meijouhw augwan asesa dou yen toua. Dauntoba sug leng se bogo dara merna mog mog se bogo meniha an meren mougt mera len louman dau areg ELOHIM en esedeb naugb men goucimdeb maman dag gin, kaba, len lecinaga dag en mou ouforoho an aingma aingma augwan toua namcirohob. Anai sug nosa, kaba, ELOHIM emens dau areg en esedeb naugb maman ogdoc Krisdus gini dou sud hom ingma touebma. Doba en ecgoneh augwan gini dau acgunog terimda iteitogini dau len namcir. Anai en, kaba, en sud hom gedig en ahasesei dara en esinsin augwanohob. 3:11 Dara areg en esedeb gin, kaba, dag menenau touwero. Doba en esedeb augwan gin dau acgunog naugb mamanohob. Hanoba en ogugwo augwan gini se maman Adehsud Krisdus Yesus mesira naugb en aimo areg ELOHIM esedeb gini an maman toua. 3:12 Sug maman madag hom dara Krisdus dag ginohob, kaba, maman mamahau dau sug maman madebeij ELOHIM touwero. Doba sug maman mamdoc ebdebin an Krisdus dag misenohob, kaba, maman maic mamus naugb maman man aud ELOHIM en toua namcir. Anai maman macinaga dag areg ELOHIM en os dou maman ogdoc Krisdus ginohob, kaba, en emobsara dau hom touwero. Doba en aimo augwan gini an maman toua terimda. 3:13 Dara sug yen yeiya dag dan deigtou se tu gesisug icira yenohob, kaba, yen yemeija meigdocesa gin touwero. Doba yen yagahugouhw naugb gin namcir. Anai areg dan daimo gin, kaba, naugb yen yera mera dag yen yeigtou se gogouf cucugb gin toua terimda. 3:14-16 Dangga hang, dan demarges dau sug dan docuncum dou maman Mamina naugb yen touwero. Doba sug yen yedag men lusud, aninim dara emeng Yahudi dag gin touohob, kaba, dan dacgeij en naugb en ekeba dau men geigouhw aingma aingma geinyana gougwa areg geb se bogo ingma dou yen toua. Dauntoba yen meigdoc emomomtomlo. Doba areg en eic dou yen gin, kaba, ousa yen naugb yen yaiyan meigdocesem dougwo areg gecgu. Dara arautut yen naugb yen yes agadgeij se ucina aud maireseb menau geb huhugb ogdoc Mena Gogoufu men goubesa, areg en esa se yen meigdoc mesohob gin toua namcir. Anai ELOHIM gin, kaba, en esinsin leng se bogo dara leng se cinogo len laugwan. Hanoba en eic moho dou astesda len laugwan touohob. 3:17 Dara dan dacgeij ELOHIM dau sug yen meigdoc ebdebin an Krisdus ginohob, kaba, dag en ousa yen, dauntoba Krisdus emeihwededau yen touwero. Doba en eigtou se yen meigdoc mes ogdoc yen meigdoc ebdebin an gin terimda. Hanoba en arautut yen meigdoc mes, dauntoba yen yemobsara dau sug yen meigdoc gororougwim touwero. Doba yen yogod se yenin meigdoc mes naugb yen yeicara yaimo dangga, anim ucucugb edag buc gototo namcir. Aninim dag sogo dara tu lan lamedreg dau lan maruhw touwero. Doba labsugeb se maruhw hom ingga toua terimda. 3:18-19 Dara dan dacgeij ELOHIM dau sug Krisdus eigtou se yen meigdoc mes touohob, kaba, dag en eic mou ouforoho dara mou auti dou yen. Dauntoba ELOHIM men lusud yen yaugwan yecinaga dau sug Krisdus medoc gororougb yen men meijouhw geiyara, geisaugb, gagas, dara gouwada augwan asesa toua terimda. Anai men medoc gororougb gin, kaba, edreg dau lusud meren goubesa naugb sug len lauwam an ara ara namcir. Dara dan dacgeij ELOHIM naugb en ousa yen, dauntoba yen meigdoc eica Krisdus men medoc gororougb augwan gini dag misen toua. Anai sug yen meigdoc obgesa augwan gini asesa dag misen namcir, kaba, eic dag yen meigdoc atij an areg geb se ELOHIM enin medoc mes augwan gin touohob. 3:20-21 Dangga hang, sug maman madag hom dara Krisdus dag ginohob, kaba, eigouhw naugb maman maugwan maigdoumesa ELOHIM en moho, dara maman masijaresa en beb huhugb ogdoc Krisdus Yesus gin toua terimda. Anai ogdoc men goubesa geb se maman mamdoc mes, kaba, en ousa maman edreg medam dau areg maman mauwam an dara macgeij dau en touohob. Augwan gini asesa dag misen namcir.

Efesus 4

4:1 Sug ELOHIM eic areg graga augwan ogdoc Krisdus men geicara taiba sogo salib dou yenohob, kaba, dan desulou yen dara goubesa namcir. Dauntoba yen yemobsara dau areg ELOHIM arougb yen anohob se lona sug en eija yen gin touwero. Doba yen yeic meijuwemougb esesa naugb yen yaimo augwan gini esesa terimda. Anai gini ucina areg en esedeb naugb mamanohob. Dan desulou yen an dag gini, anai dan indugwengga se tu gesisug icira sug dan desai maman Adehsud en moro dou yen gin touohob. 4:2 Dangga hang, yen meigdoc emagas toua deitero, doba yen yowun yenin meigdoc mes arjaga anim. Dara yen yemenara gouji dou len gus touwero. Doba se meijen geicara augwan, kaba, yen yaimo dara yen meigdoc eijouhw an len namcir. Dara yen meigdoc emesrougb anim dedemeda touwero. Doba yen yeigtou yateteijim terimda. Anai sug yen yeicara dag gin, kaba, yen yens yenin ainyes dou lusud dag yen meigdoc gororougwim dag misen namcirohob. 4:3 Dara yen yemenara yemaisedim toua deitlo. Doba sug Mena Gogoufu arautut yen naugb yen meigdoc dag homohob, kaba, yen yos debin gin naugb yen meigdoc dag hom esesa terimda toua. 4:4-5 Anai mamang Krisden, dara Mena Gogoufu, dara areg ELOHIM eija maman aud ginohob naugb sug maman maod mamina debsa en an, dara maman Adehsud, dara sud hom gareg maman mamdoc ebdebin an enohob, dara gogun se duhu, kaba, augwan gin toua emeinyanero, doba hom dous. 4:6 Dangga toua, lusud se cinogo gin augwan, kaba, meren ELOHIM misen dara len Merna misen lemeinyana touwero, doba hom dous. En, kaba, en edag len laugwan meren mougt mera medam. Hanoba en arautut len naugb len laimo areg enin ouwan gin toua. Anai en toua moongga se len merdoc mes naugb en eic goubesa dou len touohob. 4:7 Dangga hang, sug ELOHIM en moho aiga maman dag ginohob, kaba, Krisdus en medoc eineg an maman naugb en eic mou ouforoho dara goubesa dou astesda dau maman, aimo dau areg enin ogod deb an gin touohob. 4:8 Augwan gini aimo dau areg Daud en erba Ugwaremer eisaugb gin deb sug nosa touohob, endagai: Sug en eisaugb dig bogo geiseisum ucugb, kaba, en ahwan men moc leinyana aud usi ingga, anai en aiyan len laugwan eb tainya en namcirohob. Hanoba en ekeba dau men moc meren aremougb ingma dag mogud dou enin men lusud len laugwan toua. 4:9 Doba sug Daud enara dag Krisdus eisaugb dig bogo geiseisum ucugb dag ginohob, kaba, gin men meijouhw dag en ouwaden dau bogo se cinogo gini. Hanoba en edebeij se cinogo mei touohob. 4:10 Dangga hang, sud hom gedig en ouwaden dau bogo, kaba, eni sud hom gedig en eisaugb dig bogo geiseisum gin toua. Dauntoba sug en eisaugb ucugwohob, kaba, en esedougwo areg ELOHIM en ahasesei augwan naugb emedregim touwero. Doba augwan ebsugeb naugb aimo dau areg enin ouwan terimda edebeij Lona Sug Ouwedoc gin toua. 4:11 Sug Krisdus eic mou ouforoho, dara goubesa, dara ara ara dag mogud dou mamanohob, kaba, en eigdoumesa ligbum len meroho naugb len lesai mer geigouhw eisaugb en dou lusud gus. Dara lingma, kaba, en eigdoumesa len meroho naugb len lesai ELOHIM en mer eisaugb aremer aingma aingma dou len toua. Ligbum deit, kaba, en eigdoumesa len meroho naugb len leihwedig cinogo aigusi. Dauntoba len lesai Mer Geigouhw Eisaugb Krisdus dou len sungga. Dara lingma, kaba, en eigdoumesa len meroho dag gembala dara pembela naugb len lesedougwo goucimdeb. Hanoba len lebedbed dara ledidib meijouhw eisaugb ELOHIM en mer gin augwan dou lusud toua. 4:12 Krisdus eicara dangga dou ELOHIM men lusud maman dag gini naugb en ousa maman dara ara ara augwan edeinyum namcir. Dauntoba maman maimo areg maman Adehsud en arougb maman an gin augwan. Hanoba maman mausem ucucugb terimda, dauntoba maman mamdoc emomomtom touwero. Doba maman maiyan mamdocesem naugb mas agadgeij namcir. Dara maman mebir lusud ingma dara naugb maman maiji dag Krisdus enin maga beiseisaugb terimda toua. 4:13 Anai sug maman maicara anim dag gin, kaba, eic dag maman mamdoc emedregim toua deitero. Doba maman maugwan mamdoc gebdebin an. Dara maman mamu aiso ELOHIM Meisi gini aninim dag hom namcir. Hanoba maman maiji dag lusud mos eiseisaugb terimda maman geicara augwan aninim dag Krisdus enin men geicara augwan gin toua. 4:14-15 Sug maman maiji dag lusud mos se Krisdus dag ginohob, kaba, maman mamedag lugdeh mahaniheni gedig lusud leicara larei maman dig gacda dig ginda toua deitero. Doba maman mamdoc gororougwim, hanoba maman maimo areg se geica anim. Dauntoba se aremer augwan, kaba, maman maiji dag lusud mos se maman mougt mera medam, moho Krisdus, men ucina gin toua terimda. Anai areg leng gin len lebedbed dou maman, kaba, edag duhu mogo gougwan maman, dara edag loungmen goto maman dous. Hang emaugwohosa maman naugb maman maijahasero dau ucina misen gin toua namcir. Anai len gin, kaba, len meru ouforoho naugb len lenara laceca dara lerba mohoisa lusud namcir. 4:16 Doba Krisdus, kaba, en esedougwo maman, dauntoba astesda dau maman mameigtou naugb mamaninero. Doba astesda dau maman, kaba, en eigtou se men usi areg Krisdus ens dou enohob. Hanoba maman maimo maman geicara se usi gini anim toua terimda. Anai maman maugwan, kaba, maman geicara aninimero, doba susugb namcir. Dangga hang, sug maman maimo geicara areg Krisdus eic dou mamanohob anim ucucugb dara maman mamdoc gororougwim dag gin terimda toua, kaba, maman mamedag lugdeh mahaniheni toua deitero. Doba maman mausem naugb maman maiji dag lusud mos se Krisdus, dauntoba maman madag tu geigouhw naugb enin toua. 4:17-18 Sug ELOHIM eija yen dag men lusudohob, kaba, dan den dougwo yen dara goubesa se maman Adehsud en moho gini. Dauntoba yen yemaimo leng medigo Yesus aud meren geicara deitero. Doba yen yasid yenin dau len terimda. Anai len, kaba, len meru obeigbogo namcir. Hang areg len lauwam an, kaba, emera mera geigouhw hom touwero. Doba meren geicara augwan dag augwougb dous. Dangga maireseb menau geb huhugb areg ELOHIM ouwan eic dou lusud, kaba, emeb naugb len touwero. Doba len leigtou ijes dau gin namcir, anai len leic merus dou en terimda. Hang ELOHIM Mer Geigouhw eisaugb Krisdus gin, kaba, len lemecinaga touwero. Doba len ledag lusud gedig len meru emaiyero gin dous. 4:19 Dara sug len laimo dag gin, kaba, igdebes emeba len an meren geicara gin touwero. Doba len leic merus naugb len laimo dag gin terimda. Hang gini eic dag len lemebehnehino lenin merdoc mes dougwo areg gecgu augwan touwero. Doba len merdoc etrij naugb sug len logo ara gaihim dara len lohw lenin meraga doum ucucugb toua terimda. 4:20-21 Doba naugb yen, kaba, sug yen youman eisaugb Krisdus sug nosa, kaba, len lens en dou yen dag en ogo ara gaihim, era aimo areg gogor gin touohobei? Naro, len lemens en dag gin dou yenero. Doba dan decinaga len lens en dou yen dag Yesus aimo areg edag beim dara areg gecabeci mogud an lusud dous. Dangga sug yen meigdoc ebdebin an enohob, kaba, len lens dau areg geb se enin medoc mes augwan dag misen ucan gin dou yen toua. Anai augwan gini se geica namcirohob. 4:22-24 Dangga hang, yen yemaimo areg yen meigdoc etrij icira. Dara yen yemauwam an areg mohon toua deitero. Doba yen yacgeij ELOHIM, dauntoba en esinsin yen meigdoc mes dara meijen gauwamara augwan dag menau deit. Anai sug yen meigdoc etrij icira namcir, kaba, ahwan yen naugb yen yaimo areg gecgu gin terimda. Hang emaugwohosa yen naugb yen yaimo ucina aud mor mor se dum smougb gin toua. Doba sug ELOHIM esinsin yen meigdoc mes dara meijen gauwamara menauohob, kaba, eic dag meijen geicara dara meijen gauwamara aninim dag en medoc mes dara men gauwamara toua. Hang emahwan yen naugb yen yemaimo areg mohon toua deitero. Doba ahwan yen naugb yen yaimo areg asesa ELOHIM enin medoc mes, dara areg edag beim, dara ecabeci an lusud laugwan toua terimda. Sug yen yeicara dag gin, kaba, ens ainyes dou lusud dag yen yaimo maireseb menau dag misen touohob. 4:25 Sug yen yeinesa maireseb menau dag ginohob, kaba, yen yemereiyara, era yemaideidora, dara yen yemerba mohoisem toua deitero. Doba yen yenara misen doum se aremer augwan namcir. Anai maman maugwan madag Krisdus en maga hom ginohob. 4:26-27 Dara yen yemebin areg yen meigdoc esrougb an se meigdoc mes touwero. Doba sug igda emobsara sebuma, kaba, yen meigdoc obsara dau touohob. Dauntoba yen meigdoc gesrougb gin, kaba, emeic cumougt dou Bilis naugb en emahwan yen aud sesarero. 4:28 Dangga toua, gareg dau yen en esedi dara eiyoho len gus meren aremougb dau len sug nosohob, kaba, dan den dougwo en naugb en emeicara dag gin toua deitero. Doba dan douwan dag en mesira eicara naugb enin, aimo areg se geica an lusud dous. Dauntoba sug ara ara eb naugb enohob, kaba, en agaha mesira an dou leng gedig meren ara ara emeb naugb len touwero. 4:29 Dara dan demouwan naugb areg gogor emagunya dau yen meijirs touwero. Doba dan douwan dag areg geigouhw eng agunya dau yen meijirs dous, dauntoba ousa lusud. Anai areg ogor gini, kaba, emousa lenero. Doba sug lusud louman dau areg geigouhw, kaba, ousa len naugb len leiji dag lusud mos se Krisdus toua namcir. Dara yen yemenara augwougb dou len touwero. Doba yen yehigdecin dau aremer augwan nosahabi, yen yemenara dou lusud aimo dau meren aremer ingga dou len toua. 4:30 Dangga se meijen geicara augwan, kaba, yen yemeic Mena Gogoufu medoc momogo dou en touwero, doba yen yeic en medoc esgiraha dou en dous. Anai ELOHIM esa en se yen meigdoc mes ansins dag en moho aiga yenohob. Hang yen yemeija meijuwesa en an ara ara toua deitero. Doba yen yod meijina debsa en dag se Lona Sug En Ogod Aremer Aga Lusud, kaba, en emeic gogom dou yen touwero. Doba en eigdoc yen dau gogom augwan namcir. 4:31 Dara yen meigdoc emedougdaha, dara emesrougb, dara mog mog anim toua deitero. Doba yen yarges dau augwan gin namcir. Dara yen yemenara emedregim, dara yen yemeihwim, dara yen meigdoc emobgos anim touwero. 4:32 Doba yen meigdoc eigouhw dara eineg anim dous. Hanoba yen yaigdougwo meijen geicara gecgu anim dag mogud ucucugb terimda. Aninim dag ELOHIM aigdougwo meijen sesar augwan ogdoc Krisdus men geicara dag mogud dau yen touohob.

Efesus 5

5:1 Dangga hang, yen yemaimo areg gecgu dag mohon deitero. Doba sug ELOHIM eigdoumesa yen dag en mogwihi mogo yen dag ginohob, kaba, yen yesogwa deisa en mohotimei mohw se aremer augwan toua terimda, anai en medoc gororougb yen namcirohob. 5:2 Dara yen meigdoc gororougwim toua ucucugb terimda. Aninim dag Krisdus medoc gororougb maman sug nosa touohob. Anai en emougbda dau ucina mog erij touwero, doba en ohw enin mougt edug naugb maman. Hang en emeic enin maga dag gauwaharo gouwedebeda dou ELOHIM naugb maman sesar augwan toua. Anai men geicara gini, kaba, eic ELOHIM medoc eigouhw dou en toua namcirohob. 5:3 Dara sug yen yedag ELOHIM men lusud dag ginohob, kaba, yen yemohw yen meijaga doum, dara meijen geicara emedag mihi, dara yen yemogungun len gus an meren aremougb. Hanoba yen yemecic dau gin mougwa hom doum touwero. Doba yen yarges dau gin namcir. Dauntoba yen yemeic cumougt dou lusud naugb len lemecic yen meijoho an gin touwero. Anai augwan gini, kaba, emaimo lusud gedig ELOHIM ouci len debinim naugb enohob meren geicarero, doba edreg dau gin namcirohob. 5:4 Dangga toua, yen yemogmohosa naugb ligida dara ligiji meraga. Hanoba yen yemeicir yemacecim, dara yen yemobohuba an len, dara yen yemecic len dag len gedig len meru emaiyero touwero. Doba areg agunya dau yen meijirs, kaba, dag yen yen sijo dou ELOHIM an areg en eic dou yenohob gin dous. 5:5 Anai gareg en ohw en maga dou len gus, dara men geicara dag mihi men geicara, dara gareg en agungun len gus an meren aremougb terimda, kaba, en emeinesa Krisdus dara ELOHIM maran goiharaga touwero. Doba en eigtou dig medigo beb huhugb namcir. Dara gareg en agungun lusud an meren aremougb, kaba, en eigdoumesa aremougb gini dag seiseij naugb en ecguna dou touohob. Yen youman dan indir areg dan den dou yen gini deigeigouhw namcir. 5:6-7 Dangga yen yemaimo lusud gedig len ledarougb yen se areg graga augwan touwero. Doba yen yasid yenin dau len namcir. Anai leng leic merus sug lugdeh teiteiyohob, kaba, len leicara dag gin terimda. Hang ELOHIM esedeb gogom medam naugb len, anai en medoc obgos an lenohob. 5:8-9 Sug nosa, kaba, yen yaugwan yedag lobeigbogo men logodeh toua namcir. Doba sug yen yedag hom dara maman Adehsud dag ginohob, kaba, yen yemedag lobeigbogo men lusud toua deitero. Doba yen yedag mouf men lusud dous. Dangga hang, meijen geicara augwan, kaba, emedag lobeigbogo men geicara toua deitlo. Doba sug yen yedag mouf men lusudohob, kaba, yen yera mera areg geigouhw, dara areg asesa ELOHIM enin medoc mes, dara areg se geica terimda. Anai gin, kaba, aimo lusud gedig len leinesa moufohob meren geicara toua namcir. 5:10 Hang yen yemarges dau gin touwero. Doba yen yeic meijuwemougb esesa naugb yen yecinaga areg geic maman Adehsud medoc eigouhw dou en, hanoba yen yaimo augwan toua terimda. 5:11-13 Dangga hang, yen yemaimo lusud aud areg len leicara se lobeigbogo gin toua deitero. Doba yen yowun yenin dau gin namcir. Anai meren geicara augwan gin, kaba, emera mera geigouhw hom dou yen touwero. Doba era mera gecgu dou yen dous. Hang yen yemaimo len touwero. Doba yen yens meren geicara gin augwan ainyes dou len dous. Dauntoba sug len leiya dau gin, kaba, len lecinaga dag augwan gin, kaba, ecgu namcirohob. Anai geicara areg geb se mouf, kaba, dag lobeigbogo deitero, doba eperwei dag moufohob. Hang maman mamecinaga areg geigouhw, era gecgu augwan dag misen toua. Dara yen yemecic dau meren geicara areg len laimo se lobeigbogo ucucugb toua deitlo. Anai areg len laimo gin, kaba, eic igdebes dou lusud namcir. 5:14 Hang sud hom enara eisaugb gin deb sug nosa, endagai: Bang bedag bomomohob, kaba, ban bemomom deitero. Doba ban beisa besa namcir. Anai sug ban beicara dag gin, kaba, Krisdus esa mouf se ban abdoc mes toua. 5:15 Dangga sug yen yeiya, doba leng lobeigbogo meren geicara emera mera geigouhw dou yenero, kaba, yen yemaimo len touwero. Doba yen yebehnehino yenin meigdoc mes dougwo meijen geicara augwan namcir. Dauntoba yen yemedag leng meru emaiyero touwero. Doba yen yedag lusud gedig len meru auti ara ara dous. 5:16 Dara yen yemaisan gurog dau sug yen yos yadi Krisdus en moho deseino lusud laugwan touwero. Doba astesda sug cumougt eb naugb yen, kaba, yen yesai en moro dou len terimda. Anai iteitogin, kaba, lusud leinyana meren geicara dag mog mog namcirohob. 5:17 Dara yen meiju emedgom dougwo geicara areg asesa maman Adehsud enin medoc mes gin touwero. Doba yen yeic meijuwemougb esesa naugb yen meiju obgesa augwan dag misenahabi, yen yemaimo toua terimda. 5:18 Dara yen yemeg ahwei mohu emed yen yemomom touwero. Doba yen yebin Mena Gogoufu naugb en edag mougt se yen meigdoc mes dous. Hanoba yen yaimo en mer an areg en arougb yen an gin toua terimda. Anai sug yen yeg ahwei mohu, kaba, ahwan yen naugb sug yen yogo ara gaihim. Hang eic dag yen yaimo areg gecgu toua namcir. 5:19 Doba sug Mena Gogoufu batij yen meigdoc mesohob, kaba, yen yeic Ugwaremer, dara aresgwemer, dara areg Mena Gogoufu ens dou yenohob naugb sug yen yohu, kaba, yen yeic gin eng yerba doum dous. Hanoba yen yerba Ugwaremer dara yen yohu aresgwemer dou maman Adehsud dareg yen meigdoc agahugouhw an en toua namcir. 5:20 Dara yen yemarges dau sug yen yen sijo dou maman Mamina ELOHIM touwero. Doba se aremer augwan, kaba, yen yen sijo dou en se maman Adehsud Krisdus Yesus, en moho, besesa terimda. Anai yen yedag hom dara enohob. 5:21 Dara yen meigdoc emagas anim ucucugb touwero. Doba sug yen yeigdoumesa Krisdus dag meijen mougt mera medamohob, kaba, yen yowun yenin meigdoc mes arjaga anim ucucugb terimda. 5:22 Dangga hang, yigida yen, kaba, yen meigdoc emagas emedreg dau yen meisuwer touwero. Doba yen yowun yenin meigdoc mes arjaga naugb yen yaimo len merir se aremer augwan toua terimda. Aninim dag yen yemohoiya maman Adehsud en mer an areg en arougb yen an gin touwero. Doba yen yaimo en mer se aremer augwan gin toua namcirohob. 5:23 Anai yen meisuwer gini, kaba, len ledag mougt naugb yen, aninim dag Krisdus en edag mougt mera medam naugb maman maugwan touohob. En, gin, kaba, en ohw en mougt edug naugb en eigdoc maman dau sesar men gogom augwan aud maireseb menau geb huhugb, anai maman maugwan madag en maga ginohob. 5:24 Dangga hang, yigida yen yemeicara yemedreg yen meisuwer len merir touwero. Doba astesda dau yen, kaba, en aimo en mesuwa en mer se aremer augwan toua namcir. Aninim dag maman mamedreg dau Krisdus en mer gin touwero, doba maman maimo en mer an areg en arougb maman an gin toua terimda. 5:25-26 Dara yigiji yen, kaba, yen meigdoc emesrougb dara mog mog an yen meisouwer touwero. Doba astesda sud hom yom dau yen, kaba, en medoc gororougb en mesouwa. Aninim dag Krisdus en medoc gororougb maman, hang en emohw en mougt edug aud gomom naugb mamanohob. Dauntoba sesar men gogom emeb naugb maman toua deitero. Doba en edu maman becabeci namcir ogdoc en mogwihi, aimo dau areg en os deb se en mer geigouhw gini an maman toua. Anai en ouci maman debinim dag enin mesouwa touohob. 5:27 En eicara dag gini, dauntoba areg gecgu dara areg gogor gus gus augwan mohw hom emeb naugb maman. Dara en emowun maman an aremer hom toua deitero. Doba maman madag en mesouwa gecabeci deseino en namcir. 5:28 Sug Krisdus medoc gororougb maman dag ginohob, kaba, esloulougb medam dag astesda dau yen en medoc gororougb en mesouwa aninim dag en medoc gororougb enin maga toua. Anai yan yamedag hwai deitero, doba yan yedag homohob. Dangga gareg dau yen en medoc gororougb en mesouwa, kaba, gini dag en medoc gororougb enin maga touohob. 5:29-30 Anai sud hom ingma, kaba, en medoc emesdigeij enin maga touwero. Doba en agauwesa dara esedougwo enin maga dougwo areg gecgu augwan namcir. Aninim dag Krisdus medoc emesdigeij maman touwero. Doba en agauwesa dara en esedougwo maman dougwo areg gecgu augwan toua terimda, anai maman madag en maga gin touohob. 5:31 Augwan gini esogwa deisa areg len log deb se Surad Injil Meb Mohon deb sug nosa touohob, endagai: Sug ELOHIM esinsin gida dau giji dag ginohob, kaba, giji emeigtou desij en mena dara en mem toua deitero. Doba en eihwededau lan naugb en eigtou desij en mesouwa. Hang lan lamedag hwai touwero, doba lan ladag hom namcir dous. 5:32 Se aiyad gin, kaba, ELOHIM ens dau areg se geica dag meiyo dou maman toua. Anai dan doudesa dag men meijouhw, kaba, emeisaugb mesuwa dara mesouwa sug lan lamedag hom ginero. Doba men meijouhw dau sug Krisdus dara maman madag hom gin dous. 5:33 Doba inggaida. Aiyad gin, kaba, naugb yen toua. Dangga hang, yigiji astesda dau yen, kaba, en medoc gororougb en mesouwa, aninim dag en medoc gororougb enin maga. Dara yigida, kaba, astesda dau yen en eigdoumesa en mesuwa en moho terimda toua.

Efesus 6

6:1 Yugdeh sug yen yedag hom dara Krisdusohob, kaba, yen yemohoiya yen meijina dara meijim len merir touwero. Doba yen yaimo len an areg len larougb yen an augwan toua terimda. Anai gini, kaba, aimo dau areg asesa ELOHIM enin medoc mesohob. 6:2-3 Augwan gini aimo dau areg ELOHIM arougb yen an se men gomnomna sug nosa touohob, endagai: Yen yeigdoumesa yen meijina dara yen meijim len meroho deseino yen terimda. Anai sug yen yeicara dag gin, kaba, yen yemomom dedemeda touwero. Doba dan deseyeiyo yen dougwo areg gecgu augwan namcir. Dauntoba yen meijireseb terberba se cinogo gin toua terimda. Hang yen yemowun yen meijina dara yen meijim len meroho touwero. Doba yen yeigdoumesa len meroho namcir. Anai ELOHIM men gomnomna gin, kaba, gomnomna gaimougtut gedig ELOHIM os ara ara ingma dara debin gin naugb yen touohob. 6:4 Dangga toua, yen gedig yeic meijirohob, kaba, meijen geicara emeic len merdoc emesrougb ucucugb dou len touwero. Doba yen yesedougwo len. Hanoba yen yomnomnan dau areg maman Adehsud en arougb maman an ginohob augwan dou len toua. Dara sug len ledreg maman Adehsud men gomnomna gin, kaba, yen yen dougwo len. Dobnaro, kaba, yen yogod len, dauntoba len lahau an dougwo. Hanoba len laimo men gomnomna augwan toua terimda. 6:5 Dara yeng Krisden gedig yen yedag sogougb, kaba, yen yemohoiya meijen mougtir len merir touwero. Doba yen yeigdoumesa len meroho dara yen yahau dau len namcir. Hanoba yen yaimo len merir an areg len larougb yen an dara yen meigdoc hom toua terimda. Aninim dag yen yemohoiya Krisdus en mer touwero. Doba yen yaimo en mer an areg en arougb yen an dara yen meigdoc hom touohob. 6:6 Dara yen yemaimo len merir an areg len larougb yen an sug len lauweila yen. Dauntoba len leigdoumesa yen meijoho an gin touwero. Doba sug yen yedag Krisdus men sogougb dag ginohob, kaba, yen yeic meijuwemougb esesa naugb yen yaimo len merir dara yen meigdoc augwan sug len lemauweila yenero toua terimda. Anai gini aimo dau areg asesa ELOHIM enin medoc mes ginohob. 6:7 Dara sug yen yeicara yaimo areg meijen mougtir larougb yen anohob, kaba, yen meigdoc momogo an gin touwero. Doba yen yaimo augwan dara yen meigdoc agahugouhw an dous. Anai yen yemeicara dou meijen mougtir se cinogo gin dousero. Doba yen yeicara dou maman Adehsud gin toua. 6:8 Anai sug yen yedag sogougb, era yen yedag sogougwero, kaba, augwan gini inggaida deseino maman Adehsud. Doba gareg en aimo men geicara dara geigouhw namcir, kaba, en emeic areg geigouhw dag siouwa dau en toues. 6:9 Dangga toua, yeng yedag mougt mera, kaba, yen yemeic kwag dou meijen sogougwir dag yen yeic mog erij dou len ucucugb touwero. Doba meijen geicara augwan dou len, kaba, aninim dag ELOHIM arougb meijen sogougwir an meren geicara augwan dou yen toua. Anai en emedag meijen sogougwir meren mougt mera medam gin dousero. Doba en edag yenin meijen mougt mera medam gedig en eigtou se bogo naugb yen touohob. Hang en emobsara aud yen se Lona Sug En Ogod Aremer Aga Lusud touwero. Doba en medoc edag beim naugb en ogod aremer aga lusud laugwan aninim dous. 6:10 Dangga hang, sug ouwedoc gin, kaba, dan desulou yen dauntoba yen yes agadgeij se maman Adehsud men goubesa namcir. Anai yen yedag hom dara enohob. 6:11 Dara yen yacgeij ELOHIM naugb en eic enin men ariloboc kermum dou yen, dauntoba Bilis emaugwohosa yen aud areg gecgwero. Doba yen yes agadgeij terimda. 6:12 Anai maman mamesara dara lusudero. Doba maman masara dara merna mog mog geb se bogo meniha, dara meren mougt mera, an meren gedeijan len laugwan toua terimda. Anai len merubisamougb medam gougwa dara len loiharaga lusud gedig len leigtou se lobeigbogo len laugwan dara goubesa toua namcir. 6:13 Sug len merubisamougb dag gin, kaba, yen yacgeij ELOHIM naugb en eic enin men ariloboc kermum dou yen. Dauntoba edebeij lona sug Bilis ainyen yen, kaba, meijen moc gini en emaiyan yen touwero. Doba yen yes agadgeij dougwo en namcir. Dara ousa yen naugb sug yen yemobsara dou en touwero. Doba yen yeic meijimihec mougb erebero dou en terimda edebeij lona sug ouwedoc gin toua. 6:14 Dangga yen yeic ELOHIM en mer gini dag hwigbeimos naugb yen yohud yen meijida moc. Dauntoba yen yesedeb yen meigdoc mes naugb yen yesara dara Bilis terimda. Anai ELOHIM en mer gin, kaba, dag geica namcir. Hanoba yen yaimo areg asesa ELOHIM enin medoc mes toua terimda. Anai gini edag sansun kermum dougwo yen meigdoc mes. 6:15 Dara yen yesedeb yen meigdoc mes naugb yen yesai Mer Geigouhw eisaugb Krisdus dou lusud. Dauntoba len lecinaga dag ELOHIM esedeb en medoc mes naugb en eic gesgigouhwesa dou len ucugb. Anai sug yen yeicara dag gin, kaba, aninim dag yen yeg hwigbeimos dougwo yen meijohora touohob. 6:16 Dara yen yemarges dau sug yen meigdoc ebdebin an Krisdus touwero, doba yen meigdoc ebdebin an en terimda. Anai sug yen yeicara dangga, kaba, Sud Hom Mobgos Maha men hu smougb emeinesa yen meigdoc mes touwero. Doba yen meigdoc ebdebin an gini dag tomeh dougwo sug hu augwan en, doba ousros icira namcir. 6:17 Dara yen yemarges dau maireseb menau geb huhugb areg ELOHIM eic dou yenohob gin touwero, doba yen yecgun meisira debin gin terimda. Anai gini dag topi kermum dougwo yen meijugt. Dauntoba Bilis emogod yen naugb yen yomom deit touwero, doba maireseb eb naugb yen namcir. Hanoba yen yesai ELOHIM en Mer Geigouhw eisaugb Krisdus dou lusud terimda. Anai gini dag krawan gedig Mena Gogoufu eic dou yen naugb yen yasara dara Bilis toua. 6:18 Dara sug yen yeicara dag gin, kaba, yen yacgeij ELOHIM naugb en ousa yen toua. Dara astesda sug yen yocuncum dou en, kaba, yen yemocuncum augwougb touwero. Doba yen yaimo dau areg Mena Gogoufu arautut yen se dous. Dangga hang, yen yemeisan gurog dau sug yen yacgeij ELOHIM an ara ara touwero. Doba yen meiju auti naugb yen yocuncum esesa naugb gin terimda. Dara yen yemocuncum naugb yenin dousero, doba yen yeicara yaimo dag gini an ELOHIM men lusud laugwan esesa toua terimda. 6:19 Dara yen yocuncum dou ELOHIM naugb dan toua. Dauntoba astesda sug cumougt inggebga naugb dan desai Mer Geigouhw eisaugb Krisdus dou lusud, kaba, en eic mou ouforoho dou dan naugb dan dens dau areg dan denara dou len meijouhw augwan asesa dou len toua namcir. Dara yen yocuncum dou en, dauntoba en ousa dan naugb dan demahau dau gin touwero. Doba en aiyan dan indocesem naugb dan desai Mer Geigouhw gini dara goubesa dou len toua. Anai ELOHIM emens dau mer gin men meijouhw dou sud hom ingma sug nosa mougwa hom touebma. Doba iteitogin, kaba, en ens dau meijouhw augwan gin dou danohob. 6:20 Sug en ens meijouhw gin dou dan dag ginohob, kaba, en eigdoumesa dan indoho naugb dan desai en moro eisaugb Krisdus dou lusud laugwan. Hang len lemouf dan se tu gesisug icira en mer gin toua. Dangga yen yocuncum dou ELOHIM naugb dan, dauntoba sug dan desai Mer Geigouhw eisaugb Krisdus dou lusud, kaba, dan demahau touwero. Doba dan deic indus naugb dan desai mer gin terimda, aimo dau areg ELOHIM esedeb naugb danohob. 6:21-22 Tikikus en emdecic dau aremer geisaugb dan augwan asesa dou yen, dauntoba yen yecinaga meijouhw augwan asesa toua. Anai dan indoc edangga, hang dan demarougb en aud yen. Dauntoba yen yecinaga dau emen geicara augwan dag misen namcir. Dara en enara bad yen meigdoc mes, dauntoba yen yaiyan meigdocesem dara yes agadgeij toua terimda. Dan desa en aud yen, anai en edag maman mamaguna se Krisdus gedig maman mamdoc gororougb en namcir. Dara en emobsara dau sug en edag maman Adehsud men sogougb gin touwero. Doba en aimo en an areg en arougb en an gini dara en medoc augwan terimda touohob. 6:23 Dan dacgeij maman Mamina ELOHIM dara maman Adehsud Yesus Krisdus naugb lan lausa yeng se goucimdeb yaugwan, dauntoba yen meigdoc dag hom namcir. Dara yen meigdoc gororougwim, hanoba yen meigdoc ebdebin an Krisdus toua terimda. 6:24 Dara gareg en emobsara dau sug en medoc gororougb maman Adehsud Yesus Krisdus gin touwero, doba en eicara baimo dangga beb huhugb namcir, kaba, dan dacgeij ELOHIM naugb en medoc eigouhw an en toua terimda. Augwan gini asesa dag misen namcir.

Filipi 1

1:1 Surad gini dau dang, Paulus, dou yeng yedag ELOHIM men goucimdeb se cinogo Pilipi, an meijen mougtir, dara meren gedeijan yen yaugwan. Anai yen yedag hom dara Krisdus Yesusohob. Dara dan insi, Timotius, en toua esa mer deb se surad gini naugb en ou yen. Anai aman amahwas amedag Krisdus Yesus men sogougb naugb aman amasai en moro dou lusud touohob. 1:2 Dangga hang, aman amacgeij maman Mamina ELOHIM dara maman Adehsud Yesus Krisdus naugb lan mardoc eineg an yen. Dara lan laseyeiyo yen. Dara lan laic gesgigouhwesa dou yen dougwo areg gecgu augwan toua namcir. 1:3-5 Astesda sug dan indoc eiseisan meijen geicara an dan sug nosa, kaba, dan den sijo dou ELOHIM naugb yen toua. Anai sug dan desai Mer Geigouhw eisaugb Krisdus dou yen sug aimougtut, kaba, yen yemamsoho dan touwero. Doba dau lona ingga terimda iteitogini, kaba, yen yousa dan terimdohob. Dangga hang, astesda sug dan docuncum dou ELOHIM naugb yen, kaba, dan indoc momogo touwero. Doba dan docuncum dou en dara dan indoc agahugouhw an yen namcir. 1:6 Anai dan decinaga dau sug en ebiji naugb en ens meijen geicara geigouhw dou yen sug aimougtutohob, kaba, dag en emamsoho yen touwero. Doba en arautut yen se gin terimda edebeij Lona Sug Krisdus Yesus En Ecicugwen toua. 1:7 Areg graga augwan, kaba, oihirir areg se misen namcir. Anai sug ELOHIM eigdoumesa dan indoho naugb dan desai Mer Geigouhw eisaugb Krisdus dou lusud sug nosa, kaba, yen yemehig dau dan touwero. Doba sug dan doho meh dougwo gini, era dan dos dadi Mer Geigouhw gini se geica dou lusud, hanoba len louf dan se tu gesisug iteitogin icira gin toua, kaba, yen yemamsoho dan an gin touwero. Doba yen yedag hom dara dan se indan geicara gin terimdohob. Dangga hang, dan indoc moc dougwo yen touwero. Doba dan damimiri an yen terimda toua. 1:8 Hang dan indoc gororougb yen medam dag gin, kaba, aninim dag Krisdus Yesus enin medoc gororougb maman sug nosa touohob. Dan dacgeij ELOHIM naugb en ouma debin gin dag dan denara se misen namcir. 1:9 Sug dan indoc gororougb yen dag ginohob, kaba, dan docuncum dou ELOHIM, dauntoba en ousa yen naugb yen meigdoc gororougwim. Dara en eic mou ouforoho dou yen, dauntoba yen yecinaga areg asesa ELOHIM enin medoc mes. Dara yen yed aremeijouhw aingma aingma augwan daum terimda toua. 1:10 Anai sug yen meiju auti dag ginohob, kaba, eic goubesa dou yen naugb yen yemaimo areg gecgu toua deitero. Doba se aremer augwan gin, kaba, yen yaimo ucina gedag beim dara gobosboro anim ucucugb toua terimda. Hang se Lona Sug Krisdus En Ecicugwen, kaba, en emowun yen meijoho an aremer hom touwero. Doba yen yecabeci deseino en. 1:11 Anai ogdoc Yesus Krisdus men goubesa gin, kaba, yen yaimo areg geigouhw atij bobdaga an lusud laugwan namcirohob. Hang emeic dag len leigdoumesa dara lagahugouhw an ELOHIM icira meijen geicara gin toua terimda. 1:12 Dan indagunerij, dara dan indamouwerij, dan douwan dens dau lusud meren geicara dou dan sug nosa meijouhw augwan asesa dou yen touahabi. Dauntoba yen yecinaga dag augwan gini, kaba, emedag sogo maga dougwo Mer Geigouhw eisaugb Krisdus gin touwero. Doba eic dag agaha becinten leng lesedougwo mougt mera gouji en men tu dara lusud gus laugwan namcirohob. 1:13 Dangga hang, len laugwan gin, kaba, lemecinaga dag lusud lemouf dan se tu gesisug emogdoc indan geicara gecgwero. Doba ogdoc sug dan desai Krisdus moro dou lusud gin dous. 1:14 Dara dan insir se Krisdus, kaba, sug len leiya dag dan demahau dau sug dan deigtou se tu gesisug ginero. Doba dan deic indus naugb dan dos dadi Krisdus moho deseino lusud laugwan terimda, kaba, eic leinyana dag len toua lemahau dau sug len lesai Krisdus moro dou lusud touwero. Doba len laiyan meigdocesem naugb len lebedbed en mer gini edreg dau nosa dou lusud deit. 1:15-17 Dara ligbum, kaba, dan decinaga dag len lemesai Krisdus moro dou lusud dareg len merdoc emeigouhw an danero. Doba len lebedbed dou lusud, anai len leclulan indan mera einyanohob. Dara len louwan lenara laisedim eisaugb areg dan debedbed gin toua terimda. Dangga hang, len lemesai Krisdus moro dou lusud dara len merdoc emecabeci touwero. Doba len lebedbed dara merdoc hwai dous. Anai len louwan dau sug len lebedbed dou lusud, kaba, lusud gini leigdoumesa len meroho an gin toua namcir. Dara len loudesa dau sug dan douman dau gini se tu gesisug, kaba, dag augwan gini eic dan indoc momogo dou dan toua deitahabi. Doba len gus, kaba, len lecinaga dag ELOHIM eigdoumesa dan indoho naugb dan debehnehino dougwo Mer Geigouhw eisaugb Krisdus gin dag misenohob. Hang len lemebedbed Krisdus mer dareg merdoc emecgu an danero. Doba len lesai Krisdus moro, anai len merdoc gororougb dan toua terimdohob. 1:18 Doba sug lusud lesai Krisdus moro naugb sug len leic momogo dou dan. Era len lebedbed en mer, aimo dau sug len merdoc gororougb dan, kaba, augwan gini inggaida. Doba areg esloulougb, kaba, dag len lesai Krisdus moro dou lusud hom dous. Anai sug len leicara dag gini, kaba, eic dag dan indoc eigouhw an gin namcirohob. 1:19 Dara dan demarges dau gin touwero. Doba dan indoc agahugouhw terimda. Anai dan decinaga ogdoc sug yen yocuncum dou ELOHIM naugb dan, dara ogdoc sug Mena Gogoufu men goubesa ousa dan toua, kaba, dag dan demeigtou se tu gesisug gin terimdero. Doba dan indina agau dau aremer gin augwan namcir. Anai Krisdus en esa Mena Gogoufu se dan indoc mesohob. 1:20 Doba sug dan indina agau dau aremer gini, era len leic gomom dou dan toua, doba augwan gin, kaba, inggaida. Anai areg dan douwan dara dan indoc erleij icira gin, kaba, dag dan demahau dau aremer gogom hom touwero. Doba sug aremer gakebin dan iteitogini, era aremer gus augwan gen aud dan se lona daiyamo gacin, kaba, dan deic indus naugb dan demobsara dau hom touwero. Doba dan daimo areg ELOHIM esedeb naugb dan augwan toua terimda. Dauntoba se indan geicara augwan, kaba, dan deicara naugb daigdoumesa Krisdus enin moho dous. Anai dan decinaga dau sug dan deicara dag gin, kaba, dag igdebes emeba dan se aremer hom touwero. Doba dan indoc ebtou namcir. 1:21 Anai naugb dan, kaba, sug indireseb gini dag dan deicara daimo Krisdus hom dous. Era sug len leic gomom dou dan, doba indan mera einyana eb naugb dan touohob. 1:22 Doba sug dan indina agau, kaba, dan dec mera einyana icira gin toua deit. Dangga dan douci ara deita? 1:23 Anai dan indoc erleij naugb dan domom dous, dauntoba dan deigtou desij Krisdus. Anai gini eigouhw edreg dau areg gus augwan namcir. 1:24 Doba naugb yen, kaba, esloulougb dag dan indireseb an yen, dauntoba dan desedougwo yen dara dan dousa yen terimdahabi. Hang iteitogin, kaba, gomom dara maireseb laic dan anim terimdaba. 1:25 Sug dan decinaga, doba esloulougb naugb dan deigtou an yenahabi, kaba, dan dod indina debsa dag dan indina agau an yen toua. Dauntoba dan darautut yen naugb yen meigdoc mes eiloboro aud Krisdus edreg dau nosa deit. Dara dan dousa yen naugb yen meigdoc ebdebin an en edreg dau nosa. Dauntoba sug yen meigdoc ebdebin an en bedreg dag ginohob, kaba, eic dag yen yagahugouhw an en eiseisaugb terimda toua. 1:26 Dan douwan deicara dag gini dou yen, dauntoba sug dan dedebeij yen deitohob, kaba, eic dag yen yeimiman Krisdus Yesus an dan edreg dau nosa namcir toua. Anai yen yedag hom dara en touohob. 1:27 Doba sug dan dedebeij yen sungga, era dan demedebeij yenero, kaba, dan douwan naugb lusud ledecic dou dan dag yen yemarges dau Krisdus men ucina gin touwero. Doba yen meiju hom anim namcir naugb yen yes agadgeij terimda. Dara dan douwan naugb len ledenara dou dan dag yen yemobsara dau sug yen meigdoc ebdebin an Krisdus gin touwero. Doba yen meigdoc dag hom naugb yen yehin gunini icira gin terimda toua. Anai sug yen yeicara dag gin, kaba, yen yaimo areg Mer Geigouhw eisaugb Krisdus arougb yen an gin augwan bedeinyumohob. Anai augwan gini, kaba, esloulougb medam edreg dau areg gus augwan namcir. 1:28-29 Dangga sug meijen moc leic mog erij dou yen, kaba, yen yemahau dau gin touwero. Doba yen yaiyan meigdocesem naugb yen yes agadgeij terimda. Anai sug ELOHIM eija yen sug nosa, kaba, en emeija yen naugb yen meigdoc ebdebin an Krisdus dousero. Doba en esedeb yen naugb yen yesogwa deisa Krisdus mohotimei mohw se ucina mog erij gin touohob. Dangga sug len leiya dag yen yemahau dau lenero, doba yen yes agadgeij namcir, kaba, gini eb ainyes dou len dag se lona daiyamo gacin, kaba, ELOHIM eic mor mor se dum smougb dou len toua. Doba yen, kaba, dag en eic maireseb menau geb huhugb dou yen dous. Anai len leiya, doba ELOHIM enin eng eic goubesa dou yen. Hang yen yemahau dau len touwero, doba yen yeic meijus dou len terimda. 1:30 Dangga yen yemobsara dau ucina mog erij gin touwero. Doba yen yes agadgeij namcir naugb yen yaimo dan se ucina gin toua terimda. Aninim dag yen yeiya dag dan daimo ucina mog erij gini sug nosa touohob. Dara yen youman dag iteitogin, kaba, dan daimo Yesus se ucina mog erij gin touaba.

Filipi 2

2:1-2 Dan denara daino yen meijin an areg dan dog dou yen graga, dendagai: Sug yen meigdoc dag hom dara Krisdus gin, kaba, eic dag yen meigdoc ongkogos naugb aremer augwan. Dara sug en medoc gororougb yen, kaba, eic dag en oho geigouhw se yen meigdoc mes. Dara sug yen meigdoc dag hom ucucugb dara Mena Gogoufu, dara sug yen meigdoc eigouhw, dara eineg anim dag gin touohob, kaba, dan desulou yen dara goubesa namcir. Dauntoba yen yemobsara dau gin touwero. Doba yen yedag hom naugb yen yohw yen meiju anim se aremer augwan. Dara yen meigdoc anim ucucugb. Hanoba yen meijir dag hom naugb yen meiju, aimo ucina hom gin toua terimda. Anai sug yen yeicara dag gin, kaba, eic dag dan indoc eigouhw medam, dara ebtou dou dan touohob. 2:3 Dangga hang, se meijen geicara augwan, kaba, yen yemaugb meijaga dougwo len gus. Dara yen yemeic ara ara naugb yemaimiman yenin an gin deseino len gus touwero. Doba yen yowun yenin meigdoc mes arjaga anim ucucugb. Hanoba yen yeicara yaigdoumesa len gus meroho agas bedreg dau yenin toua. 2:4 Dara yen yemauwam an yenin meijen aremer eng esloulougb emedreg dau len gus touwero. Doba yen yauwam an len gus meren aremer ucucugb ginahabi, yen yemauwam an yenin meijen aremer gin toua. 2:5 Dangga hang, se meijen geicara augwan, kaba, yen yemedreg dau Krisdus men geicara hom touwero. Doba yen meiju aninim dag en toua namcir. Hanoba yen yesogwa deisa en mohotimei mohw an meijen geicara augwan toua terimda. 2:6 Anai en, kaba, en mog toua dag ELOHIM teiteiyohob. Doba en emauwam an en moho dag ELOHIM gin touwero. 2:7 Doba en arges gin augwan deb, aimo dau areg enin ogod an deb sug nosohob. Hanoba sug en eic en maga dag lusud misenohob, kaba, en owun enin moho dag sogougb toua. 2:8 Dangga sug en edag lusud misen dag ginohob, kaba, en owun enin medoc mes arjaga naugb en aimo ELOHIM en mer aud sug en omom taiba sogo salib naugb maman toua. 2:9 Hang ELOHIM emeic moho dou en, hanoba eigdoumesa en moho agas medam bedreg dau lusud gus laugwan namcir. 2:10 Dauntoba leng se bogo, dara leng se cinogo gini, dara leng leigtou se cinogo mei len laugwan lecguna dou en dara lesijaresa en. 2:11 Hanoba len los ladi Yesus Krisdus en moho deseino len gus dag meren Adehsud toua terimda. Anai sug len leicara dag gin, kaba, eic dag lusud leigdoumesa en Mena ELOHIM en moho agas terimda touohob. 2:12 Dangga dan indagunerij, dara dan indamouwerij gedig dan indoc gororougb yen, sug Krisdus medoc edag beim an ELOHIM en mer dag ginohob, kaba, dan dacgeij yen naugb yen yemarges dau areg dan darougb yen an gin touwero. Doba yen yaimo dan indir sug dan deigtou aigusi dau yen gin bedreg dau nosa deit. Aninim dag yen yaimo dan indir sug dan indugwengga desij yen sug nosa touohob. Hanoba yen yemarges dau ucina aud maireseb menau geb huhugb gin touwero. Doba yen yeic meijuwemougb esesa naugb yen yaimo ucina gin dareg yen meigdoc eijesa dara yahau dau ELOHIM toua terimda. 2:13 Anai enin eng moongga se yen meigdoc mes naugb en arautut yen meigdoc mes. Hanoba en eic goubesa dou yen naugb yen yaimo areg enin ouwan toua namcir. 2:14 Hang se meijen geicara augwan, kaba, yen yemenara ucucugb anim. Dara yen meijir yemauwim touwero. 2:15 Doba sug yen yeigtou desij lusud gedig len merdoc agabi, dara len merdoc ogor naugb leicara ecgu se cinogo gin, kaba, yen yedag beim naugb yen yaimo areg gecabeci dara obosboro an len terimda. Anai sug yen yeicara dag gin, kaba, yen yens yenin ainyes dou len dag yen yedag ELOHIM mogwihi mogo gedig yen yedag lusud mos ginohob. Hanoba len lemowun yen meijoho an aremer hom touwero. Doba len leigdoumesa yen meijoho an meijen geicara gin terimda. 2:16 Dangga hang, sug yen yesai mer geic maireseb menau geb huhugb dou len gin, kaba, yen yedag tebeij mouf gaisema len se ucina gin toua namcir. Sug yen yeicara dag gin, kaba, eic cumougt dou dan naugb dan deigdoumesa dan indoho an yen se Lona Sug Krisdus En Ecicugb gin toua. Anai meijen geicara geigouhw gini, kaba, ens ainyes dou dan dag dan demeic dan indug erij augwougwero. Doba mera einyana eb naugb danohob. 2:17 Doba sug ELOHIM ogod an dan dag len gus leir dan indugwihi debin meijen geicara gini dag gauwaharo dou en, kaba, gini emeic dan indoc emeijesa dou danero. Doba eic dag dan indoc agahugouhw medam an gin namcir. Hanoba dan douwan dag dan indoc gagahugouhw gin, kaba, aga gerleij se yen toua. Anai meijen geicara geigouhw gin, kaba, ansins dag yen meigdoc ebdebin an Krisdus dag misen. Hang edag gauwaharo misen dou ELOHIM touohob. 2:18 Dara dan douwan naugb sug yen meigdoc agahugouhw an ginohob, kaba, dag yen yeic gerleij dou dan toua. 2:19 Doba sug maman Adehsud Yesus en ouwan, kaba, dan demesa Timotius aud yen. Dauntoba sug en ecicugb, hanoba en edens dau meijen geicara augwan dou dan, kaba, eic dag dan indoc ebtou dou dan. Anai dan dod indina debsa maman Adehsud dag dan demomom dau yen touwero. Doba dan indina agau an yen terimdahabi. 2:20-21 Dara dan desa Timotius enin eng aud yen. Anai len gus laugwan, kaba, len lemehilon areg esloulougb naugb Yesus Krisdusero. Doba len lehilon areg esloulougb naugb lenin dous. Doba Timotius gin, kaba, en hom eng medoc amimiri an meijen geicara augwan namcir. Anai en hom eng aman amdoc an yen dous. Dangga hang, dan demesa en aud yen toua. 2:22 Anai yenin yen yecinaga dau sug aman amesai Krisdus moro dou lusud sug nosa, kaba, dag en emobsara dau sug mog erij eb naugb aman touwero. Doba en aiyan medocesem naugb en es agadgeij namcir. Hang en edag areg mera eisaugb naugb dan, aninim dag meisi edeijan mena toua. 2:23 Dangga sug dan douman, doba len logod an dan dag dan indina agauwohob, kaba, dan demesa en dedemeda aud yen toues. Naro, kab, naro. 2:24 Dara dan dod indina debsa maman Adehsud dau sug dan indina agauwohob, kaba, dag en ousa dan naugb dan danin toua demdeiya yen dedemeda toues. 2:25 Doba len lemogod indan aremer deinaugb danbuma. Gin, kaba, dan dogod se dan indoc mes naugb dan desa maman mamaguna Epaproditus ucugb aud yen naugb en edesa baihnehina dougwo yenahabi. Anai en ouman dag yen toua yecinaga dau sug en areba medam desij dan suginohob. Dangga hang, en medoc erleij naugb en edens enin mog dedemeda dou yen, dauntoba en enara bad yen meigdoc mesahabi. Anai en medoc momogo eisaugb gin terimda. 2:26 En ouwan dangga, anai sug nosa, kaba, yen yesa en aud dan naugb en eperwei yen meijuhw an dan. Dauntoba areg ingmemeb naugb danero, kaba, en eic dou dan toua. Dara en emousa dan se dan indaga dousero. Doba en aimo dan naugb aman amahwas amesai Krisdus moro dou lusud. Dara en eic mos naugb sug aman amebehnehino dougwo Krisdus mer misen gin touohob. 2:27 Eisaugb en, kaba, en areba medam naugb sug en omom an namcir. Doba ELOHIM medoc eineg an en naugb en eigdoumesa en ucugwohob. Dara ELOHIM medoc emeineg an en dousero, doba en medoc eineg an dan toua. Dauntoba gini emeic dan indoc momogo ingma dara dou dan touwero. 2:28 Dangga sug yen toua youman eisaugb gareba ginohob, kaba, dan indoc eiloboro medam naugb dan desa en audi yenbo dedemeda toua. Dauntoba sug yen yeiya en mog se yen meijiresohob, kaba, yen meigdoc momogo deitero. Doba yen meigdoc ebtou namcir. Hanoba eic dan indoc ebtou dou dan toua. 2:29-30 Dangga sug en edebeij yenohob, kaba, yen yebin en dara yen meigdoc agahugouhw naugb en toua. Anai en ohw en mougt edug naugb en esai yen meijuro. Dauntoba en ousa dan icira Krisdus mer, hang aremebeni naugb en emahauwa icira gin touohob. Dara yen yemeicara dag gin dou en dousero. Doba gareg men geicara aninim dag enohob, kaba, yen yeicara dag gin dou len toua.

Filipi 3

3:1 Dan indagunerij, dara dan indamouwerij, sug dan dog surad gin sug ouwedoc, kaba, dan douwan desulou yen mougwa hom deit, dauntoba yen yemobsara dau Krisdus touwero. Doba sug yen yedag hom dara maman Adehsud ginohob, kaba, yen meigdoc eigouhw medam an en toua terimda. Dara sug dan dog surad ucucugb dou yen gin, kaba, emeic dag indoc emogom touwero. Doba dan indirs eijouhw naugb dan desulou yen dag gin namcir. Anai dan decinaga dau sug yen yaimo gin terimda, kaba, dag gogom emeb naugb yen toua deitero. Doba maireseb menau geb huhugb eb deinaugb yenohob. 3:2 Dangga hang, yen yebehnehino yenin meigdoc mes dougwo leng Krisden dau leng Yahudi gedig len louwan naugb lehigeij lusud meraga dau toua namcir. Anai len loudesa dau sug len lec merus dau dara len laimo Musa men gomnomna aud gousanara laos dara toua, kaba, gin eng eic dag len ledag ELOHIM mehir misenohob. Hanoba len merug mog dag mihi naugb len lagodgod lusud, dauntoba len lec merus dau toua terimda. 3:3 Dobnaro. Len lemedag ELOHIM mehir misen emogdoc sug len leicara dag ginero. Doba mamang Krisden eng madag ELOHIM mehir misen dous. Anai maman, kaba, maman mamod mamina debsa Musa men gomnomna aud gousanara. Dara maman mamec maman mamus dau naugb sug ELOHIM eic maireseb menau geb huhugb dou maman touwero. Doba sug maman mamdoc dag hom dara Krisdus Yesus dag ginohob, kaba, maman magahugouhw an en terimda. Hanoba maman mamesijaresa ELOHIM emogdoc areg Musa men gomnomna arougb maman an gin toua deitero. Doba maman masijaresa ELOHIM ogdoc areg Mena Gogoufu arautut maman aud gin dous. Hang gin eng edag lec merus dau dag misenohob. 3:4 Doba gareg en ec mos dau dara en aimo Musa men gomnomna aud gousanara. Hanoba en od mena debsa augwan gini edeinyum naugb sug ELOHIM eic maireseb huhugb dou en, kaba, dan eng daimo augwan gini edreg dau len laugwan namcirohob. Hang emedeinyum naugb sug dan dod indina debsa gin dag misen toua. 3:5 Anai lona senggemoi debin dau sug dan indim ouwadan dan, kaba, len lec dan indus dau. Dangga dan dedag leng Yahudi toua teisis namcirohob. Dara sug macic mameijouhuda, kaba, dani Benyamin medebeito dan toua. Anai dan injemouwer, kaba, ingma susugwero, doba len laugwan dau leng Ibrani. Hang dan toua dedag leng Ibrani misenohob. Dara eisaugb Musa men gomnomna gin, kaba, dan daimo augwan edreg dau len gus laugwan toua. Anai dan toua dedag sud hom dau leng Parisi ginohob. 3:6 Dangga eisaugb Musa men gomnomna gin, kaba, lusud lemowun dan indoho an aremer hom touwero. Anai dan deic induwemougb esesa naugb dan daimo augwan gin namcirohob. Hang dan indoc emesgiraha an leng Krisden touwero. Doba dan deic mog erij dou len terimda. Anai dan doudesa endag sug dan daimo gini, kaba, eic ELOHIM medoc esgiraha an dan. Hanoba emeic gerleij dou dan se gin terimda toua. 3:7-8 Dangga sug nosa, kaba, dan insoho mougb an Musa men gomnomna gin augwan namcirohob. Doba ogdoc Krisdus gin hom, hang dan indoho emobsara dau augwan. Dauntoba dan decinaga areg geb se indan Adehsud Krisdus Yesus en medoc mes augwan asesa toua. Anai gin, kaba, mera eisaugb medam edreg dau areg mohon graga augwan namcir. Dangga ogdoc en, hang dan demaimo areg mohon toua deitero, doba dan darges dau augwan. Hanoba dan dowun augwan graga dag mihi mor meiyema toua. Dauntoba sug dan deic Krisdus dag danin indanohob, kaba, dan dedag hom dara en toua terimda. 3:9 Hang dan demeic induwemougb esesa naugb ELOHIM eic gesgigouhwesa dou dan dau sug dan demaimo Musa men gomnomna gin toua deitero. Doba sug dan indoc ebdebin an Krisdus dag gin, kaba, edeinyum naugb sug ELOHIM eic gesgigouhwesa dou danohob. Anai en emeic gesgigouhwesa dou maman emogdoc mamanin maman geicara ginero. Doba dau sug maman mamdoc ebdebin an Krisdus hom dous. 3:10 Sug dan dedag hom dara Krisdus dag ginohob, kaba, dan indoc erleij aud aremer hom gin dous. Aremer hom gin, kaba, dag dan decinaga areg geb se Krisdus enin medoc mes augwan asesa namcir. Hanoba dan deicara daimo en an ELOHIM men goubesa areg en eic naugb aigdoumesa Krisdus dau gomom sug nosa. Dara dan indoc erleij naugb dan daimo en asa ucina mog erij. Dauntoba indan gauwamara augwan, kaba, aninim dag en men gauwamara aud sug en omom gin toua. 3:11 Anai sug dan deicara dag gin, kaba, dan dod indina debsa ELOHIM dag dan domom terimdero. Doba en eigdoumesa dan dau gomom aud maireseb menau geb huhugb gin toues. 3:12 Dangga hang, dan demarges dau ucina gin touwero. Doba dan deic induwemougb esesa. Dauntoba areg Krisdus Yesus os dou danohob sug en agaigeij dan sug nosa, kaba, augwan emediyebeiya dau dan touwero. Doba dan desma augwan gini dag misen namcir. Anai iteitogini, kaba, dan demdaimo deisa usi naugb demesma gin. Hang emedeinyum naugb sug ELOHIM emeigdoumesa dan indoho naugb gin touebma. 3:13 Dan indagunerij, dara dan indamouwerij, sug dan decinaga dag dan demesma augwan gini dag misenbuma, kaba, dan demaimo indan geicara mohon augwan toua deitero. Doba dan dohw dan indidgo dou namcir. Hanoba dan dobga audi areg geb ino dan indin dara dan den indinesa naugb dan desma augwan gin toua. 3:14 Dangga hang, dan demeitig dau ucina misen gin touwero. Doba dan dobga dobosboro asa ucina gin namcir. Dauntoba maireseb menau geb huhugb se bogo emediyebeiya dau dan touwero. Doba dan dedesma toua. Anai sug ELOHIM eija dan naugb dan dedag hom dara Krisdus sug nosa, kaba, en os augwan gini dag mogud dou danohob. 3:15 Dara gareg dau yen, en edag lusud mos se Krisdus touohob, kaba, eigouhw naugb en emeitig enin dau ucina misen gin touwero. Doba en medoc aninim dara dan naugb aman amobga asa ucina misen aud maireseb menau geb huhugb gin toua terimda. Doba gareg dau yen, en mou baiso ara gus dougwo ucina misen gin, kaba, dan dacgeij ELOHIM naugb en ens areg se misen dou en touahabi. 3:16 Doba sug sud hom medoc aninim dara danohob, era en mou aiso ara gus dougwaba, kaba, gini emesloulougwero. Doba esloulougb dag areg maman macinagohob, kaba, maman mamarges deb touwero. Doba maman maicara maimo gin terimda. 3:17 Dangga hang, dan indagunerij, dara dan indamouwerij, yen yemarges dau dan indohotimei mohw an indan geicara gin touwero. Doba yen yeicara yaimo dan terimda. Dara gareg dau yen en emaimo ginbuma, kaba, yen yehigdecin leng laimo emenohob, dauntoba yen yeicara yaimo dangga toua. 3:18-19 Anai leinyana merugwengga desij yen, kaba, len leigdoumesa areg len merdoc etrij icira dag seiseij naugb lenin terimdaba. Dara areg eic igdebes dou lusud, kaba, len leimiman lenin an gin terimda toua. Anai len merdoc emebdebin an areg gen dau bogoro, doba len merdoc ebdebin an areg geb se cinogo gin dous. Dangga hang, edebeij Lona Sug Ouwedoc gin, kaba, ELOHIM ahacugb len merur mor se dum smougb namcir toua. Anai meren geicara, kaba, aiyan Krisdus an men gomom taiba sogo salib gin debohob. Hang len lemedag en mesir misen toua deitero. Doba len ledag men moc dous. Dan desulou yen dougwo len gin sugragohob. Doba dan desulou yen dougwo len deit dara dan deb dara dan indoc momogo an gin terimda toua. 3:20 Doba maman, kaba, maman mamdoc emebdebin an areg geb se cinogo gin deitero. Doba maman mamdoc ebdebin an areg geb se bogo hom dous. Anai maman madag magun sunggohob. Dangga hang, maman maigtou mateteij dara mabehibeh dougwo Lona Sug Maman Adehsud Yesus Krisdus En Ecicugwen gin toua namcir. Anai enin, kaba, en eigdoc maman dau sesar men gogom augwanohob. 3:21 Hanoba sug en en gin, kaba, en eperwei maman mamaga gomomtom dara getaha gini aninim dag enin maga gebsa gogouf cucugb gini, aimo dau men goubesa an maman toua. Anai men goubesa gin, kaba, edeinyum naugb sug en aiyan ara ara augwan eb tainya en mohora gin toua namcirohob.

Filipi 4

4:1 Dangga dan indagunerij, dara dan indamouwerij gedig dan indoc gororougb yen, sug maman madag magun se bogo dag ginohob, kaba, maman mamobsara dau maman Adehsud gin touwero. Doba maman maiyan mamdocesem naugb maman madag hom dara en terimda. Dan desulou yen dag gin ucucugb. Anai dan indoc gororougb yen dousero. Doba meijen geicara eigdoumesa dan indoho. Hang dan dagahugouhw dara dan indoc emerleij aud yen toua namcir. 4:2 Dara dan desulou Yodia dara Sintiki yan, dauntoba yan maijir emedregim toua deitero. Doba yan maigdoc aninim terimda. Anai yan yahwas yadag hom dara maman Adehsud gin touohob. 4:3 Dara dan dacgeij dan insi ban, dauntoba ban bemarges lan gin deb touwero. Doba ban besa se lan marufu, dauntoba lan ladag hom deit. Anai lan gini dara Klemens an dan insir gus sungga, kaba, len laugwan leic len merug erij desij dan naugb emen emesai Krisdus moro dou lusud sug nosohob. Aninim dag ban bemarges dan deb touwero. Doba ban beic ban abug erij desij dan sug nosa naugb nanan nasai Krisdus moro dou lusud terimda touohob. Hang len gin, kaba, ELOHIM emogu len meroho deb se Surad Maireseb Huhugb gin toua namcir. 4:4 Dangga hang, sug yen meigdoc dag hom dara Krisdus dag ginohob, kaba, yen meigdoc momogo touwero. Doba yen meigdoc agahugouhw namcir. Dara dan dou dan indir se hom gin deit dag yen meigdoc momogo touwero. Doba yen meigdoc agahugouhw terimda. 4:5 Hang yen yemeicara ohonohobo touwero. Doba yen yeb ara arjaga an len gus laugwan. Anai Lona Sug Maman Adehsud En Ecicugwen, kaba, ebeij deinyor namcirohob. 4:6 Dara yen meigdoc emeijesa an ara ara touwero. Doba sug meijen ara ara ingmemeb naugb yenero, kaba, yen yacgeij augwan gin dau ELOHIM enin dous. Hanoba yen yen sijo debin gin dou en toua terimda. 4:7 Anai sug yen yeicara dag gin, kaba, yen meigdoc emeijesa icira ara ara touwero. Doba sug yen yedag hom dara Krisdusohob, kaba, ELOHIM eic yen meigdoc ebtou dou yen. Dara yen meigdoc gebtou gin, kaba, edreg dau areg mamanin mamou maiso toua terimda. 4:8 Dan indagunerij, dara dan indamouwerij, sug areg dan dog dou yen se surad gini deinyor sug ouwedoc gin, kaba, dan douwan desulou yen mougwa hom deit, dauntoba yen yemamimiri an areg gecgu mougwa hom toua deitero. Doba yen yauwan an areg gedag beim dara areg lusud leigdoumesa yen meijoho an gin dous. Dangga hang, yen yemereiyara dara yen yemerba mohoisa toua deitero. Doba yen yaimo areg se geica, dara areg mera eisaugb, dara areg obosboro, dara areg gecabeci, dara areg geic lusud merdoc eigouhw an, dara areg len leigdoumesa dag moho agas augwan gini dous. Hanoba yen yeicara yaimo anim toua terimda. Anai sug yen yeicara dag gin, kaba, yen yaimo areg mera eisaugb dara areg geic lusud merdoc agahugouhw an yen icira gin toua namcirohob. 4:9 Dara areg gus gedig dan desulou yen an gin, hanoba yen yeiya dau indan geicara sug nosa touohob, kaba, yen yemehig dau gin touwero. Doba yen yeicara yaimo augwan gin terimda. Anai sug yen yeic meijuwemougb esesa se gin dangga, kaba, maman ELOHIM eseyeiyo yen dara eic gesgigouhwesa dou yen dougwo areg gecgu augwan toua namcir. 4:10 Dara dan indoc esgiraha an yen toua. Anai yen yens dag yen meigdoc an dan mougwa hom dou dan deitohob. Dan decinaga dag yen meigdoc moc dougwo danero. Doba dau sug nosa terimda iteitogin, kaba, cumougt ingmemeb naugb yenero. Hang yen yemens yen meigdoc mes dou dan touwero gini. Dan denara dou yen dag gin, anai dan dedag hom dara maman Adehsud gin touohob. 4:11 Areg dan den dou yen gini, kaba, dag dan demenara ucucugb an yen touwero. Anai sug ared moongga, era sug mogero naugb dan, kaba, dan dainyen se augwan. Hang emeic dan indoc eijesa dou dan touwero. Doba areg eb naugb dan, kaba, dan indoc ebtou an ginohob. 4:12 Dangga sug dan det ared geigouhw, era sireba dan toua, dara sug dan desma ara einyana, era desma gurereito, kaba, augwan gini emeic dan indoc momogo dou dan deitero. Doba sug dan dainyen se aremer augwan dag ginohob, kaba, eic dag dan indoc esgiraha an namcir. Anai dan decinaga dau sug ared ingmaro, era ared einyana eb naugb dan men meijouhw augwan asesa dag misen namcirohob. 4:13 Dara dan indoc emebtou icira ared gin dousero. Doba sug dan dedag hom dara Krisdus dag ginohob, kaba, en eic goubesa dou dan naugb dan daiyan indocesem se aremer gus augwan toua terimda. 4:14 Dangga areg dan dog dou yen graga, kaba, yen youdesa dag dan dowun yen meijoho an gin touei? Naro, dan demowun yen meijoho an ginero. 4:15 Anai yen yenin yecinaga dau sug dan deihwededau yen se leng Makedonia meren hancob naugb dan desai Mer Geigouhw eisaugb Krisdus dou len gus sug aimougtut, kaba, dag goucimdeb hom ingma emousa dan touwero. Doba yen dous eng yousa dan dara aregoufu ucucugb terimdohob. 4:16 Dangga sug dan desai Krisdus moro dou leng se cinogo Tesalonika, kaba, yen yemehig dau dan touwero. Doba yen yousa dan dara aregoufu mougwa hom icira touohob. Dangga hang, areg yen yesa dou dan gin, iteitogin, kaba, dag dan demesbes an gin touwero. Doba dan deigdoumesa yen meijoho an gin namcir. 4:17 Dara areg dan den dou yen dag yen yousa dan ucucugb dag ginohob, kaba, dag dan demenara dematagaij yeng Pilipi an meijen aremougb touwero. Doba dan dahilon, dauntoba yen meijisoho mougb namcir. Anai dan decinaga dau sug yen yousa dan dara aremougb dag gin terimda, kaba, yen yeised huga medam deinaugb yeninohob. 4:18 Dara areg yen yesa dou dan ogdoc Epaproditus gin, kaba, aninim dag yen yemoc indan aremeij dou dan dousero. Doba yen yeic edreg dau gin dou danohob. Dangga hang, ELOHIM en ohu mebesesa gin namcir. Anai augwan gini dag yen yeic areg mena ouwedebeda naugb yen yauwaharo dou en touohob. 4:19 Hang ogdoc Krisdus, kaba, indan ELOHIM en emeic areg emeb naugb yenbuma augwan dou yen toua. Anai en mesoho mougb namcir. 4:20 Dangga eigouhw naugb maman maigdoumesa maman Mamina ELOHIM en moho an gin toua beb huhugb terimda. Augwan gini asesa dag misen namcir. 4:21-22 Dara yen yen dou ELOHIM men lusud hom yom sungga dag len laugwan meriresi. Anai len toua ledag hom dara Krisdusohob. Dara dan indaguner gedig len leigtou desij dan an leng Krisdus sugin, kaba, emen emaugwan emou yen. Doba aimougtut, kaba, leng leigtou se mougt mera medam men tu len lou yen toua. 4:23 Maman Adehsud Yesus Krisdus eic geigouhw dou yen yaugwan toua terimda.

Kolose 1

1:1 Surad gini dau dang, Paulus, dou ELOHIM men lusud se cinogo Kolose yen yaugwan. Anai ELOHIM enin eng ouci dan, hanoba en eigdoumesa dan naugb dan desai Mer Geigouhw eisaugb Krisdus Yesus dou lusud laugwanohob. Dara maman mamaguna Timotius en ouma debin areg dan dog dou yen gin toua. 1:2 Dan dog surad gini dou yen, anai yen toua yedag aman amaguner dara aman amdamouwer se Krisdus. Dara yen yemobsara dau en touwero, doba yen yaiyan meigdocesem. Hanoba yen yes agadgeij naugb yen yaimo en dara yen meigdoc hom toua namcirohob. Dangga hang, aman amacgeij maman Mamina ELOHIM naugb en medoc eigouhw an yen, dara en eseyeiyo yen dougwo areg gecgu augwan toua terimda. 1:3 Dara emen ememarges dau sug emen emocuncum dou maman Adehsud Yesus Krisdus en Mena ELOHIM naugb yen touwero. Doba astesda sug emen emocuncum dou en, kaba, emen emen sijo medam dou en naugb yen terimda. 1:4 Anai emen emouman dag yen meigdoc ebdebin an Krisdus dara yen meigdoc gororougb ELOHIM men lusud len laugwan toua namcirohob. 1:5 Yen yeicara dag gini, anai sug lusud lesai Mer Geigouhw eisaugb Krisdus dou yen sug aimougtut, kaba, len lens dau areg ELOHIM esedeb naugb lusud ogdoc Krisdus augwan asesa dou yen touohob. Dangga hang, sug yen youman dau areg se geica gin, kaba, yen yemobsara dau sug yen meigdoc ebdebin an Krisdus dara sug yen meigdoc gororougb ELOHIM men lusud gini touwero. Doba arautut yen naugb yen yeicara yaimo dag gin toua terimda. Anai yen yecinaga dag areg ELOHIM os dou yenohob, kaba, augwan emediyebeiya dau yenero. Doba eb naugb yen beb huhugb se bogo namcir. Hang yen yemetogoto en mer an areg en os dou yen gin touwero. Doba yen yod meijina debsa en an gini toua terimda. 1:6 Dara ELOHIM en Mer Geigouhw eisaugb Krisdus gin, kaba, era mera bagaha becinten dou lusud se cinogo augwan. Aninim dag yen toua, sug yen youman dau ELOHIM medoc an yen. Hanoba yen meigdoc obgesa augwan dag misen, kaba, eic dag yen yera mera einyana icira gin toua namcirohob. 1:7 Mer Geigouhw gin, kaba, yen youman dau emen emsi hom, moho Epapras, sug en esai mer augwan gini dou yen sug nosa. En, kaba, emen emdoc gororougb en namcirohob. Anai en, kaba, en emobsara dau sug en esai Mer Geigouhw eisaugb Krisdus gin touwero, doba en aimo augwan gini dara en medoc hom an terimda. Hanoba en eperwei emen emuhw naugb en ens augwan dou yen toua. 1:8 Dangga sug en ecicugb aud emen suginohob, kaba, en ecic dau meijen geicara sug yen meigdoc gororougb lusud ogdoc Mena Gogoufu men goubesa meijouhw augwan asesa dou emen toua. 1:9 Sug emen emouman dag ginohob, kaba, emen ememarges dau sug emen emocuncum dou ELOHIM naugb yen touwero. Doba ebiji dau lona sug emen emouman dau meijen geicara ginohob, kaba, emen emacgeij en naugb en eic mou ouforoho dara mou auti bauloulo ogdoc Mena Gogoufu men goubesa dou yen. Dauntoba yen yecinaga areg ELOHIM esedeb naugb sug yen yaimo augwan asesa dag misen toua namcir. 1:10 Anai sug yen meiju ouforoho dag ginohob, kaba, yen yemeigtou augwougb touwero. Doba eic dag se aremer augwan, kaba, yen yera mera areg geigouhw einyana. Dara yen yecinaga areg geb se ELOHIM enin medoc augwan bauloulo. Hang ELOHIM medoc emesrougb an yen touwero, doba eic dag en medoc eigouhw an yen esesa terimda. Anai yen yemedis dau areg en ouwan mougwa hom touwero. Doba yen yaimo areg en arougb yen an augwan dag misen namcir touohob. 1:11 Dangga hang, emen emacgeij ELOHIM naugb en eic men goubesa geigouhw medam gini augwan dou yen. Dauntoba sug yen yaimo ucina mog erij gin, kaba, yen yemahau dau gin touwero. Doba yen yaiyan meigdocesem naugb yen yaimo gin terimda. Dara sug lusud leic mog erij dara gogom dou yen dag gin, kaba, yen yemauni gogom ucugb dou len touwero. Doba yen yeigtou yateteij dara yen meigdoc agahugouhw an gin toua namcir. 1:12 Dara yen yemarges dau sug yen yen sijo dou maman Mamina ELOHIM gin touwero. Doba yen yeicara yaimo dangga besesa terimda. Anai areg en esedeb naugb men lusud se men goiharaga dag gogouf cucugb ginohob, kaba, augwan emediyebeiya dau yen touwero. Doba en eigdoumesa yen meijoho naugb en ogugwo areg en esedeb gin augwan dou yen toua namcir. 1:13-14 Anai sug maman madag hom dara Krisdus gin, kaba, maman sesar emeb naugb maman toua deitero. Doba sug Krisdus eic enin maga ancoho aga maman dou ELOHIM naugb maman sesar dag ginohob, kaba, ELOHIM eigdoc maman dau sesar men gogom augwan. Hanoba en aigdougwo gin augwan dau maman toua namcir. Dangga hang, maman mamedag lobeigbogo men sogougb toua deitero. Doba ELOHIM eigdoc maman dau men goubesa augwan. Hanoba en esohw maman se en Meisi men uro mes deb naugb sug en oiharaga maman ucugb toua terimda. Anai en medoc gororougb en Meisi gin toua namcirohob. 1:15 Dara maman, kaba, maman mameiya ELOHIM se maman mamires mougwa hom touebma. Doba Krisdus, kaba, en ens ELOHIM eb ainyes dou maman. Anai en, kaba, en edag ELOHIM en mog teiteiyohob. Dangga hang, en emedag ELOHIM en Meis Mebin Geis Huhugb gedig en moho agas edreg dau areg ELOHIM ahasesei dara esinsin augwan toua namcir. 1:16 Anai areg geb se bogo dara areg geb se cinogo, dara areg maman maiya dara areg maman mameiyero dag malaikad, dara merna mog an meren mougtir, dara leng lesedougwo lusud, dara leng meroho agas, kaba, ELOHIM emahasesei dara emesinsin augwan gini dau enin dousero. Doba en esinsin augwan ogdoc en Meis mebin gin, hang en emedag mougt naugb augwan toua. Anai areg ELOHIM en ahasesei dara en esinsin gin, kaba, augwan ogdoc en Meisi gin dous. 1:17 Sug en edag mougt naugb augwan dag ginohob, kaba, areg en ahasesei dara esinsin augwan toua emedregim touwero. Doba men goubesa edeinyum naugb augwan ec dara gesgiraha namcir. Anai sug augwan gini emebbuma, kaba, eni moongga sug nosohob. 1:18 Dara en edag mamang Krisden maman mougt mera medam. Hanoba en eic maireseb menau geb huhugb dou maman, aninim dag mougt eic maireseb dou maga toua. Anai en emomom terimdero. Doba ELOHIM eigdoumesa en Meisi mebin gini acgunog dau leng lomom len laugwan ucugb touohob. Dauntoba se aremer augwan, kaba, en moho eb taiba dau augwan toua namcir. 1:19 Anai ELOHIM enin eng ogod an deb dag en Meisi mebin gin, kaba, men goubesa emeb tainya men goubesa touwero. Doba en medoc esgirahesa en namcir naugb en ogugwo men goubesa augwan dou en. Dauntoba areg geb se ELOHIM enin medoc mes, kaba, augwan eb se en Meisi gini en medoc mes toua. 1:20 Hanoba en ogod an toua dag ogdoc en Meisi mebin gin, kaba, en eic gesgigouhwesa dou leng se bogo dara maman se cinogo gin maman maugwan toua namcir. Anai sug en Meisi gini en omom taiba sogo salib dag ginohob, kaba, leng se bogo dara leng se cinogo len laugwan lemedag ELOHIM men moc toua deitero. Doba maman maugwan mamdoc dag hom dara en ucugb touohob. 1:21 Sug nosa, kaba, ELOHIM eija yen dag men moc ginohob. Anai areg yen yauwam an, dara areg yen yeicara yaimo, kaba, augwan dag mog mog terimda. Dangga hang, se lona ingga, kaba, yen yemeigtou desij ELOHIM touwero, doba yen yeigtou aigusi dau en namcir. 1:22 Doba iteitogin, kaba, ELOHIM eic gesgigouhwesa dou yen ucugb. Anai en Meisi hom gin, kaba, en ohw en mougt edug se sogo salib naugb meijen sesar augwan dau yenohob. Hang aremer hom emdagunya debin yen, dara sud hom ingma emowun yen an ara ara toua deitero. Doba se lona sug Krisdus ahwan yen aud ELOHIM, kaba, yen yecabeci deseino en namcirohob. Dara sug en omom taiba sogo salib gin, kaba, en emedag merna touwero. Doba sug en ouwaden dau bogo, hanoba en edomom taiba sogo salib gin, kaba, en omom an maga dag lusud misen toua. 1:23 Dangga yen yesedougwo yenin, dauntoba len gus lemerses yen dau Mer Geigouhw eisaugb Krisdus areg yen yod meijina debsa dag misenohob gin touwero. Doba yen yaimo augwan gini dara yen meigdoc hom terimda. Anai mer gin, kaba, edag buc gototo naugb yen. Hang lusud lemesai bagaha becinten dou len se cinogo augwan. Dara ELOHIM enin eng eigdoumesa dan toua dag men sogougb. Hanoba en arougb dan naugb dan desai dou lusud laugwan touohob. 1:24 Sug Mer Geigouhw eisaugb Krisdus agaha becinten dag ginohob, kaba, dan indoc momogo an danin sug dan deigtou se tu gesisug icira yen gin touwero. Doba dan dagahugouhw an gin namcir. Anai sug dan deicara daimo dag gin, kaba, gini dag dan toua deic dan indug erij desij Krisdus naugb dan douci men lusud laugwan dahidahim naugb en. Anai men lusud gin, kaba, dag en maga, doba augwan emouwesebma. 1:25 Ogdoc men maga gini, hang ELOHIM emeigdoumesa dan indoho dag meren sogougb naugb len. Dauntoba dan desai en Mer Geigouhw eisaugb Krisdus meijouhw augwan asesa dou yeng yugmahara toua, aimo dau areg en ogugwo dou danohob. Dauntoba yen yera mera icira gin toua terimda. 1:26 Dara Mer Geigouhw eisaugb Krisdus gin, kaba, ELOHIM emens dou sud hom ingma dau sug acgunog touebma. Doba iteitogin, hang en emens dau augwan gini dou men lusud emeng Yahudi. Anai en ouci emen debinim naugb en deb sug nosohob. 1:27 En ens dau areg en ecgoneh gini dou men lusud emen. Dauntoba emen emecinaga dag augwan gini naugb emen dousero. Doba naugb lusud se cinogo gus gus len laugwan toua. Anai areg en ens gin, kaba, dag mera eisaugb dara moho agas namcir. Dara areg en ens dou emen ginohob, kaba, dag Krisdus ouwan einesa yeng yugmahara yen yaugwan meigdoc mes toua. Dangga hang, yen yemeigtou augwougb dag nosa toua deitero. Doba yen yod meijina debsa en an men gogouf cucugb gin toua terimda. Anai sug Krisdus einesa yen meigdoc mesohob, kaba, yen yecinaga dag ELOHIM men gogouf cucugb gini emesa ijes dau yen touwero, doba eb naugb yen toua namcir. 1:28-29 Sug ELOHIM ouwan naugb Krisdus einesa lusud laugwan merdoc mes dag ginohob, kaba, dan demarges dau sug dan desai Mer Geigouhw eisaugb en dou lusud touwero. Doba ogdoc Krisdus men goubesa geb se dan indoc mes. Hang dan demeic dan indug erij dara dan demohw dan indugt edug naugb dan dedidib aremeijouhw debin gin dou lusud laugwan terimda, aimo dau mou ouforoho gedig ELOHIM eic dou dan an gin toua. Hanoba dan desulou len toua dara goubesa namcir. Dauntoba len lemobsara dau sug len merdoc ebdebin an Krisdus gin touwero. Doba len les agadgeij namcir naugb len leiji dag lusud mos se en toua terimda. Anai dan demouwan naugb sug dan dahwan len aud ELOHIM enohob, kaba, dag sud hom ingma dau len en emedag mahaniheni se Krisdus touwero, doba len laugwan ledag lusud mos deseino en dous.

Kolose 2

2:1 Dan dog dau areg graga augwan dou yen, anai dan douwan naugb yen yecinaga dag dan indoc emebtou touwero. Doba dan indoc egregra an yen, dara leng se Laodikia, dara leng gus gedig len lemeiya dan se len merires mougwa hom touebma, yen yaugwan namcir. 2:2 Anai dan demouwan naugb yen yemobsara dau Krisdus aud ara ara gus touwero. Doba dan douwan naugb yen yaiyan meigdocesem. Hanoba yen meigdoc yedag hom naugb yen meigdoc gororougwim beiseisaugb terimda. Anai sug yen yeicara dag gin, kaba, yen yecinaga areg ELOHIM en ecgoneh dau lusud gus men meijouhw augwan asesa touohob. Hang yen yemeija meijuwesa Krisdus toua deitero, doba yen yod meijina debsa en terimda. Anai areg ELOHIM ecgoneh dau lusud gin, kaba, emeisaugb ara gusero, doba eisaugb Krisdus gin dous. 2:3 Enin dous eng emens dau mou gouforoho dara mou auti areg geb se ELOHIM enin medoc mes augwan asesa dou maman toua. Anai gini dag mesoho mougb areg ELOHIM ecgoneh dau lusud laugwan sug nosohob. 2:4 Dangga hang, dan demesulou yen, dauntoba sug lusud lenara louseij merir dou yen, kaba, dag yen yemobsara dou sud hom ingma dau len touwero. Doba yen yaiyan meigdocesem naugb yen yes agadgeij se Krisdus men ucina gin terimda. 2:5 Anai edag dan indug, kaba, aigusi dau yenohob. Doba se dan indoc mes, kaba, dan indugwengga desij yen terimda naugb dan deiya dag yen yemenara emedregimero, doba yen meigdoc dag hom namcir. Dara dan deiya dag yen yemobsara dau Krisdus touwero. Doba yen meigdoc ebdebin an en dag buc gototo terimda touohob. Hang dan dagahugouhw an meijen geicara gin toua namcir. 2:6 Sug yen yebin Krisdus Yesus se yen meigdoc mes dag meijen mougtohob, kaba, yen yemobsara dau en touwero. Doba yen yeicara yaimo en an areg en arougb yen an toua terimda. Anai yen yedag hom dara enohob. 2:7 Hanoba yen yogo en dag buc gototo se yen meigdoc mes, kaba, yen yeiji dag lusud mos se en toua. Dara yen meigdoc emarges dau en touwero. Doba yen meigdoc ebdebin an en, aimo dau areg emen emedidib dau gini dou yen sug nosohob. Dara yen yen sijo dou en besesa terimda toua. 2:8 Dangga hang, yen yesedougwo yenin, dauntoba sud hom ingma dau yen, kaba, en emeic dau lusud meren gauwamara naugb emahud yen dag sogougb touwero. Doba yen yebehnehino yenin dougwo gin terimda. Anai areg len lesai dou yen gin, kaba, emen dau Krisdusero. Doba aimo dau lusud meren gomnomna dara areg merna mog mog dara mindiri larautut len an dous. Anai len gin, kaba, len loiharaga lusud se cinogo gin augwan namcirohob. Hang meren gomnomna gin, kaba, emera mera geigouhw hom dou len touwero, doba dag augwougb dous. 2:9 Anai areg geb se ELOHIM enin medoc mes, kaba, en emogugwo dou sud hom ingma touwero. Doba en ogugwo augwan gini dou Krisdus en hom gin dous. Dara sug en ouwaden dau bogo se cinogo gin, kaba, en emarges dau gin deb touwero. Doba sug en edag lusud misen se cinogo gin, kaba, augwan gini eb se en medoc mes toua teiteiyohob. 2:10 Dangga hang, sug yen yedag hom dara enohob, kaba, areg eisaugb maireseb menau geb huhugb, kaba, hom emediyebeiya dau yen touwero. Doba en eic augwan batij bobdaga dangga dou yen toua. Anai sug ELOHIM men goubesa augwan eb se Krisdus teitei dag ginohob, kaba, en moho eb taiba dau merna mog mog dara mindiri an meren mougt mera medam len laugwan toua namcirohob. 2:11 Dara sug yen yedag hom dara Krisdus dag gin, kaba, en ec yen meigdoc mes an areg gecgu dau yen toua. Hang augwan gin, kaba, emogdoc sug lusud misen lec yen meijus dauwero, doba ogdoc Krisdus enin men goubesa an yen dous. Sug en ec yen meigdoc mes an areg gecgu dau yen dag ginohob, kaba, areg yen meigdoc etrij icira emedag mougt naugb yen toua deitero. Doba en esga yen dau augwan gin namcirohob. Anai yen meigdoc getrij icira gin, kaba, ahwan yen aud sesar terimda. 2:12 Augwan gini aimo dau sug lusud logun yen se duhu sug nosa. Anai gini ansins dag yen yomom dara Krisdus dau areg mohon augwanohob. Dangga toua, sug len leigdoumesa yen dau duhu ucugb, kaba, gini aninim dag ELOHIM eigdoumesa yen dau gomom aud maireseb menau dara Krisdus gin touohob. Doba augwan gin, kaba, ogdoc sug yen meigdoc ebdebin an ELOHIM men goubesa gin dous. Anai en, kaba, en eigdoumesa Krisdus dau gomom sug nosohob. Hang yen yod meijina debsa en dag en mobisamougb gin, kaba, edeinyum naugb sug en eigdoumesa yen dau gomom aud maireseb menau geb huhugb gin toua. 2:13 Dangga sug nosa, kaba, yen yaugwan yomom namcirohob. Anai yen yemec areg yen meigdoc etrij icira dau yen meigdoc mes touebma. Doba yen yaiga ELOHIM men hancob naugb yen yebesesar ucucugb terimdaba. Doba iteitogin, kaba, ELOHIM eigdoumesa yen dau gomom aud maireseb menau geb huhugb dara Krisdus ucugb deit. Anai en aigdougwo maman sesar augwan ediyebeiya dau mamanohob. 2:14 Gin dauwohob, kaba, en oguc dougwo men gomnomna ogdoc Musa gedag aremeij dou maman augwan dau maman toua. Anai sug maman madreg areg men gomnomna arougb maman an ginohob, kaba, gomnomna gini edag aremeij naugb maman dous. Doba ELOHIM, kaba, en eic aremeij gedag sogo maga dougwo maman gini. Hanoba en etob se sogo salib bediyebeiya dau maman toua namcir. 2:15 Danggohob, kaba, en ogod mougtir dau merna mog mog dara mindiri meren goubesa obsara dau maman ogdoc sungga toua. Dauntoba len lemoiharaga maman naugb len lemarautut maman aud ara ara gecgu toua deitero, doba len larges merisira dau maman namcir. Hanoba en eino len merin naugb en ens len ainyes dou maman. Dauntoba maman macinaga dag meren goubesa ingmemeb naugb len toua deitero. Doba en aiyan len an meren goubesa augwan obsara dau lenohob. 2:16 Sug ELOHIM aigdougwo gomnomna gedag aremeij gini dau mamanohob, kaba, yen yemousa deisa sud hom ingma naugb sug en emens dau ared areg yen yet dara areg yen yeg. Dara yen yemaimo en aud men geicara sug en arougb yen naugb yen yougwan ared debin Lona Gouji dara igda loba menau. Dara yen yemobsara aud en sug en agodgod yen naugb yen yeigtou debin yen meijug se Lona Gemeicaresero gin touwero. Doba yen yeic meijus dougwo en namcir. 2:17 Anai augwan gin, kaba, edag mena bansins dou lusud sug nosa eisaugb Krisdus men geicara se lona daiyamo gacin dous. Doba mog misen, kaba, Krisdus enin. Hang areg dag mena gin, kaba, ediyebeiya dau maman toua namcir, anai Krisdus enin mog enohob. 2:18 Dara yen yemaimo sud hom ingma sug en arougb yen naugb yen yehig dau ared, dara yen yesijaresa malaikadir touwero, doba yen yes agadgeij dau en mer gin toua terimda. Anai sug yen yaimo en mer, kaba, areg ELOHIM esedeb se bogo naugb yenohob, kaba, augwan emeb naugb yen toua deitero. Doba en augwohosa yen dau augwan gin toua namcirohob. Anai en eigdoumesa enin moho deseino yen dag areg en arougb yen an gin, kaba, malaikadir logod en dag bomom. Hanoba len lens dou en touohob. Dobnaro. Areg en eimiman enin an deseino yen, kaba, dau sug en medoc etrij icira gin dous. Anai en emaimo maman mougt mera medam Krisdus gin deitero, doba en asid enin dau en namcirohob. Hang men buimogu ingma emeb naugb gin touwero, doba dag augwougb dous. 2:19 Anai Krisdus enin dous eng eic maman maugwan daihim naugb maman madag hom namcir. Hanoba maman maiji dag lusud mos se en toua, aimo dau areg ELOHIM enin esedeb naugb maman. Aninim toua dag mougt eb, naugwe hang, mesira dara mohora mom, dara mesira dara mohora mohw augwan gini lemeijebdi en dag homohob, kaba, maga eiji dag lusud mos ogdoc mougt men goubesa gin toua. 2:20 Doba sug yen yomom dara Krisdus dau merna mog mog dara mindiri meren goubesa dag ginohob, kaba, dagiro, naugwe hang, meijen geicara aninim dag lusud gedig Bilis oiharaga len se cinogo gin deita? Anai len gin, kaba, merna mog mog dara mindiri loiharaga len terimdaba. 2:21 Dangga toua, dagiro, naugwe hang, yen yousa deisa lusud merir sug len len dougwo yen dag yen yemos dara yemet dara yemousousa ara ara touwero? 2:22 Anai areg len len dougwo yen an gin, kaba, emeb huhugwero. Doba cum, kaba, ediyebeiya ucugb dangga. Dara emen dau ELOHIM touwero. Doba areg len len dougwo yen, dara ledidib dou yen toua, kaba, en dau lusud misen lenin meren gauwamara dous. 2:23 Hang areg len larougb yen an naugb sug yen yecguna dou malaikadir, dara yen yehig dau ared, dara yen yogod yen meijaga dougwo ara ara deseino len, kaba, lusud leigdoumesa len meroho an dag len meru ouforoho namcirohob. Dobnaro. Areg len len dougwo lusud an gin, kaba, dau len meru edgom dous. Anai emousa len naugb sug len merdoc omom an areg len merdoc etrij icira gin touwero, doba eic dag len laimo augwan gin terimda.

Kolose 3

3:1 Doba yen, kaba, ELOHIM eigdoumesa yen dau gomom aud maireseb menau geb huhugb dara Krisdus ginohob. Dangga hang, yen meigdoc emetrij icira areg geb se cinogo gin toua deitero, doba yen meigdoc erleij aud areg geb se bogo dous. Anai sungga, kaba, Krisdus en eigtou se ELOHIM men maija moc dig en mesira misen naugb en edag mougt mera medam toua. 3:2 Dara meijen gauwamara augwan, kaba, emeb debin areg geb se cinogo gin toua deitlo, doba eb debin areg geb se bogo toua terimda. 3:3 Anai yen yomom dau areg mohon augwan naugb yen yeinesa maireseb menau geb huhugb ginohob. Dara yen meijireseb menau gin, kaba, lusud lemeiya touebma. Doba eb desij ELOHIM, aninim dag len lemeiya dau Krisdus men gogouf cucugb touabuma. Doba en moongga desij ELOHIM en touaba. 3:4 Doba edebeij lona sug ELOHIM ens en ainyes dou lusud, kaba, en ens yen toua ainyes dou len laugwan dag yen yeinesa maireseb menau geb huhugb. Dara yen yeb se men gogouf cucugb naugb erbacec yen touohob. Anai maireseb menau gin, kaba, en dau Krisdus enin dous. 3:5 Dangga hang, sug yen meijireseb menau dara Krisdus desij ELOHIM dag ginohob, kaba, yen meisira emebser, dara meijen geicara emedag mihi, dara yen meigdoc emetrij icira ara ara, dara yen meigdoc emehigehi naugb yen yoho areg gecgu dou lusud, dara yen yemagungun len an meren aremougb toua deitero. Doba yen yogod an se yen meigdoc mes dag yen yemaimo areg arautut yen aud gecgu gini augwan deitero. Doba yen meigdoc dag omom dau gin namcir. Anai areg graga augwan, kaba, aninim dag lusud gedig Bilis oiharaga len se cinogo gini meren geicara dous. Dara gagungunara gin, kaba, dag yen yecguna dou seiseij touohob. 3:6 Yen yemaimo augwan gin deitero. Anai gareg en emaimo areg ELOHIM arougb en an ginero, doba en eic mos naugb en en edreg dau en mer gin namcir, kaba, ELOHIM medoc esrougb medam an en. Hanoba en esedeb naugb en eic gogom medam dou en toua. 3:7 Sug nosa, kaba, yen yaimo areg graga augwan touohob. Dara yen meigdoc emarges dau gin touwero. Anai yen meigdoc getrij icira gin, kaba arautut yen naugb yen yaimo gin toua ucucugb terimda. 3:8 Doba iteitogin, kaba, yen yerba areg gecgu gini augwan dau yenohob. Dangga kaba, yen meigdoc mog mog dara emesrougb an len gus, dara yen meiju emehigehi naugb yen yeicara yarses lusud, dara yen yemeic len gus yemacecim, dara yen yemeihwur dara yen yemobob deisara toua deitlo, doba yen yarges dau augwan gin namcir. 3:9-10 Dara yen yemereiyara doum ucucugb toua deitlo. Doba yen yesa doc gin terimda. Anai ELOHIM en mer an yen gin, kaba, eic dag yen yehino dau meijus mohon dag menau deitohob. Hanoba en eic areg menau bauloulo astesda lona dou yen toua. Dauntoba meijen geicara augwan aninim dag men geicara toua terimda. Anai sug yen yeiji se areg menau dag ginohob, kaba, yen yecinaga areg asesa ELOHIM enin medoc mes augwan dag misen toua namcir. 3:11 Hang meijouhuda dau leng Yahudi, dara meijouhuda gus, dara len lec merus dau, dara leng lemec merus dauwero, dara leng lugmahara, dara leng leigtou se lomesmes, dara leng ledag sogougb, dara leng ledag lusud misen, kaba, maman maugwan mameijem dag maingma susugb toua deitero, doba maman maugwan maijem dag hom dous. Anai Krisdus einesa maman maugwan mamdoc mes. Hanoba enin dous eng en moho eb taiba naugb maman maugwan touohob. 3:12 Sug yen yehino dau yen meijus mohon aud areg menau dag ginohob, kaba, yen yemaimo areg gecgu anim ucucugb toua deitero. Doba yen meigdoc eineg dara eigouhw anim ucucugb terimda dous. Anai ELOHIM en medoc agug yen sug nosa. Hanoba en ouci yen debinim dag men lusud naugb enin, dara en medoc gororougb yen toua namcirohob. Dangga hang, yen meigdoc emagas anim touwero, doba yen yowun yenin meigdoc mes arjaga. Dara yen yougarij anim ucucugb. Dara yen yeigtou yateteijim terimda toua. 3:13 Hanoba yen yemauni gecgu dedemeda doum touwero. Doba sug aremer inggebga naugb yen, kaba, yen yesogwa deisa maman Adehsud en mohotimei mohw an men geicara dag yen yeigtou naugb denden dous. Dara yen yaigdougwo meijen aremer anim dag mogud toua terimda. Aninim dag maman Adehsud en emauni gogom dou yen sug yen yebesesar touwero, doba en eigtou ateteij terimda naugb en aigdougwo meijen sesar augwan dag mogud dau yen touohob. 3:14 Doba aremer gesloulougb edreg dau aremer gus augwan, kaba, dag yen yemarges dau sug yen meigdoc gororougwim touwero. Doba yen yaimo gini anim ucucugb debin areg graga augwan toua terimda. Anai gini edag aigdaga naugb ohud yen yaugwan darem dag hom namcir. 3:15 Dangga yen meigdoc emedregim touwero. Doba sug Krisdus eic yen meigdoc ebtou dou yenohob, kaba, yen yaimo dag gin anim ucucugb toua terimda. Anai ELOHIM ouci yen debinim naugb yen yedag maga homohob. Hang en emouwan naugb yen meijir edregim toua deitero, doba yen meigdoc ebtou anim dag gin dous. Dara yen yemarges dau sug yen yen sijo dou ELOHIM touwero, doba yen yeicara dangga toua terimda. 3:16 Dangga toua, sug yen yedidib Mer Geigouhw eisaugb Krisdus men meijouhw doum, dara sug yen yesuloum an, aimo dau mou ouforoho areg geb dou yenohob, kaba, yen yemebin augwan gini dag gurerei se yen meigdoc mes touwero. Doba yen meigdoc eisa naugb man, dauntoba era mera se yen meigdoc mes beiseisaugb namcir. Dara yen yen sijo dara yagahugouhw an ELOHIM se yen meigdoc mes besesa toua terimda, aimo dau areg len lei ugwaremer an deb, dara areg len lagahugouhw an Yesus, dara areg Mena Gogoufu ens dou yen touohob. 3:17 Dara sug yen yen sijo dou maman Mamina ELOHIM eisaugb areg en eic dou yen ogdoc Krisdus men geicara ginohob, kaba, yen yemedreg maman Adehsud Yesus en mer touwero. Doba se meijen geicara dara areg agunya dau yen meijirs, kaba, yen yesogwa deisa en mohotimei mohw an gin dous. Anai yen yeperwei en mohw naugb ginohob. 3:18 Yigida sug yen yes meisuwohob, kaba, yen yemeicara yemaihagab en mer touwero. Doba yen yowun yenin meigdoc mes arjaga naugb yen yaimo en mer se aremer augwan terimda. Anai sug yen yedag hom dara Krisdusohob, kaba, yen yeicara yaimo dangga toua namcir. 3:19 Dara yigiji, kaba, yen yemenara gouji dara mog mog dou yen meisouwer touwero, doba yen meigdoc gororougb len terimda. 3:20 Dangga toua, yugdeh sug yen yedag hom dara maman Adehsud ginohob, kaba, yen yemeicara yamaihagab yen meijiner dara yen meijimir len merir touwero. Doba yen meigdoc edag beim naugb len merir terimda. Anai sug yen yeicara dag gini, kaba, eic dag maman Adehsud en medoc agahugouhw an yen toua namcirohob. 3:21 Dara yigiji gedig yen yeic meijihirohob, kaba, yen yemowun len meroho an meren geicara ucucugb touwero. Doba yen yeimiman len an meren geicara dou yen toua. Anai sug yen yesbes len an meren geicara terimda, kaba, eic dag len merdoc edougdaha dou len. Hang len lemeicara dag graga dou yen toua deitero, doba len merdoc obsara dau augwan namcir. 3:22 Dangga toua, yeng Krisden gedig yen yedag sogougb, kaba, yen yemeicara yemaihagab meijen mougtir len merir touwero. Doba yen yowun yenin meigdoc mes arjaga naugb yen yaimo len merir se aremer augwan toua terimda. Dara yen yemaimo len merir sug len merugwengga desij yen naugb len leigdoumesa yen meijoho an meijen geicara dousero. Doba sug yen meigdoc ahau dau ELOHIM, kaba, yen yaimo meijen geicara augwan dara yen meigdoc hom namcir sug len merugwero toua. 3:23-24 Anai yen yecinaga dag yen yemeicara dou leng se cinogo gin dousero. Doba yen yeicara dou maman mougt mera misen, kaba, Krisdus enin dous. Hang areg maman Adehsud gini en esedeb se bogo naugb yenohob, kaba, augwan emediyebeiya dau yen touwero. Doba enin eng emeic dou yen toues. Dangga hang, areg yen yeicara yaimo, kaba, yen yaimo augwan gini dara yen meigdoc augwan namcir. Anai yen yemeicara dou lusud se cinogo ginero, doba yen yeicara gini aninim dag dou maman Adehsud enin dous. 3:25 Hang yen yemedreg dau areg meijen mougt mera arougb yen an touwero. Doba yen yaimo len merir an terimda. Anai gareg en edreg men mougt mera en mer gin namcir, kaba, maman Adehsud emauni men geicara gecgu gini ucugb dou en toues. Anai en emos medoc an sud hom ingma touwero, doba en aimo augwan dara en medoc edag beim an len dous.

Kolose 4

4:1 Dara yeng Krisden gedig yen yedag mougtir, kaba, yen yemesenagan meijen sogougwir touwero, doba sug len leicara dou yenohob, kaba, yen yeic areg edeinyum dou len. Dara yen meigdoc edag beim an len se aremer augwan toua. Anai yen yecinaga dag meijen mougt mera medam eni moongga se bogo naugb yen touohob. 4:2 Dara yen yaugwan, kaba, yen yemarges dau sug yen yocuncum dou ELOHIM touwero, doba yen yeicara yaimo gini besesa terimda. Hanoba yen yauweila ucan areg yen yocuncum an dou en toua. Dara yen yemarges dau sug yen yen sijo dou en debin augwan gin touwero. Doba yen yagahugouhw an en eisaugb augwan toua namcir. 4:3 Dara yen yocuncum dou ELOHIM naugb emen toua, dauntoba en ec misis dau emen naugb sug emen emesai Mer Geigouhw eisaugb Yesus meijouhw augwan asesa dou lusud toua. Anai sug nosa, kaba, en ecgoneh meijouhw augwan gini dau len. Hang len lemouf dan se tu gesisug icira gin touohob. 4:4 Dara yen yocuncum dou ELOHIM naugb dan toua. Dauntoba sug dan desai Mer Geigouhw eisaugb Krisdus gin dou lusud, kaba, dag dan demaiyan moho ingma deb dau touwero. Doba dan deic indus naugb dan dens meijouhw augwan asesa dou len toua. Anai ELOHIM en ouwan naugb dan deicara dangga dous. 4:5 Dara yen toua, sug yen yeicara yaimo ara ara an leng medigo Yesus, kaba, yen meiju ouforoho naugb yen yauwam an aremeijouhw augwan an len toua. Dangga sug cumougt mougwebaba gin, kaba, yen yemeisan gurog dau sug yen yesai Krisdus moro dou len touwero, doba yen yos yadi en moho dou len toua terimda. 4:6 Dara sug yen yesai Mer Geigouhw eisaugb Krisdus dou leng medigo Yesus gin, kaba, yen yeic meijuwemougb esesa. Dauntoba areg yen yesai dou len gini, kaba, emeic dag len merdoc emecbeca yen an touwero, doba eic len merdoc eisa, dara erleij naugb areg yen yens dou len toua. Dangga toua, sug len leijidougwo yen an ara ara, kaba, yen yemauni augwougb dou len touwero. Doba yen yauwam an meijouhw augwan asesa nosahabi, yen yemauni se geica dou len toua. Anai gini aimo dau areg ELOHIM ouwan dangga naugb yen dous. 4:7-8 Doba aremer eisaugb danin, kaba, maman mamaguna Tikikus, en emens dau augwan gini asesa dou yen toues. Anai dan darougb en aud yen, dauntoba sug en edecic meijouhw eisaugb dan augwan asesa dou yenohob, kaba, yen meigdoc momogo deitero. Doba yen meigdoc esgiraha ucugb deit. Dan desa en aud yen, anai en, kaba, en emarges dau sug en esai Mer Geigouhw eisaugb Krisdus dou lusud touwero. Doba emen emaugwan emesai dou lusud terimdohob. Hang emen emdoc gororougb en toua namcir. 4:9 Dara dan darougb sud hom, moho Onesimus, naugb en aicira Tikikus, dauntoba lan lamens dau emen geicara sugini meijouhw augwan asesa dou yens. Anai en, kaba, dau meijen cinogo sungga toua. En toua edag maman mamaguna gedig en aimo Krisdus dara medoc homohob. Hang emen toua, emdoc gororougb en namcir. 4:10-11 Arisdarkus gedig en toua moongga se tu gesisug desij dan, dara Barnabas mem meisi Markus, dara Yosua gedig lusud leija en moho toua dag Yusdus, kaba, len lou yen yaugwan. Anai dau leng Yahudi gedig len merdoc ebdebin an maman Adehsud Yesus ginohob, kaba, merug homoi gin dous eng len lousa dan naugb sug emen emesai ELOHIM en mer eisaugb men goiharaga dou lusud toua. Dangga meren geicara augwan gin, kaba, ousa dan toua namcir. Doba len gus, kaba, len lemousa emen an ginero. Dara eisaugb Markus en, kaba, dan dog surad eisaugb en dou yen sug nosohob. Hang sug en edebeij yen sungga, kaba, yen yebin en dara geigouhw toua. 4:12 Dara Epapras gedig en toua dau meijen cinogo sungga, kaba, en ou yen. Anai en toua dag Krisdus Yesus men sogougb enohob. Hang en emarges dau sug en ocuncum dou ELOHIM naugb yen touwero, doba en acgeij en esesa terimda naugb en ousa yen. Dauntoba yen yemobsara dau sug yen meigdoc ebdebin an Krisdus touwero, doba yen yes agadgeij naugb yen yaimo en terimda. Dara en acgeij ELOHIM naugb en ousa yen, dauntoba yen yemeija meijuwesa en an areg en arougb yen an gin touwero. Hanoba yen yaimo augwan gini yedag lusud mos se toua namcir. 4:13 Dangga hang, dan douma debin gin dou yen toua. Anai dan deiya dau sug en ocuncum naugb yen, kaba, dag en emarges dau gin touwero. Doba en eicara baimo dangga esesa naugb yen terimda. Dara dan decinaga dag en eicara dangga naugb leng se Laodikia dara leng se Hierapolis len laugwan touohob. 4:14 Lukas gedig emen emdoc gororougb en, dara Demas, kaba, lan lau yen toua. Dara Lukas gin, kaba, en mou ouforoho naugb aremougb toua namcir. 4:15 Dara yen yeden dou maman mamaguner leng Krisden se Laodikia, dara Nimpa an leng leis Ari se men tu, dag emen emou len laugwan toua. 4:16 Sug yen yecic indan surad ginohob, kaba, yen yemehig debin gin deb touwero, doba yen yesa dou leng se Laodikia naugb len lecic toua deit. Dara dan dog surad dou leng se Laodikia touohob. Dangga hang, sug len lesa dou yen, kaba, dan douwan naugb yen yecic dau gin toua. 4:17 Dara yen yen dou Arkipus dag en emarges dau areg maman Adehsud arougb en an gin touwero, doba en eic mouwemougb esesa naugb en aimo augwan gini terimda edebeij Lona Sug Ouwedoc toua namcir. 4:18 Dara danin toua dou yen dag yen meijiresi. Meb hom gini, kaba, danin dog ai dan insira dou yen. Yen meigdoc moc dougwo sug dan deisa tu gesisug gin touwero. ELOHIM medoc eigouhw an yen yaugwan terimda.

1 Tesalonika 1

1:1 Surad gini dau dang, Paulus, dara Silas, dara Timotius dou yeng se goucimdeb se Tesalonika. Anai yen meigdoc dag hom dara maman Mamina ELOHIM dara maman Adehsud Yesus Krisdus lan touohob. Dangga hang, emen emacgeij lan naugb lan laic geigouhw dou yen, dara lan laseyeiyo yen dougwo areg gecgu augwan toua terimda. 1:2 Astesda sug emen emocuncum dou ELOHIM, kaba, emen emen sijo dou en an yen. Dara emen emarges dau gin touwero. Doba astesda sug emen emocuncum dou en, kaba, emen emdoc eiseisan yen naugb emen emeigdoumesa yen meijoho deseino en toua terimda. 1:3 Anai emen emdoc eiseisan dau lona sug yen meigdoc ebdebin an Krisdus sug nosohob, kaba, dag yen meigdoc emebdebin an en augwougb touwero. Doba yen yeic meijuwemougb esesa naugb yen yeic meijen geicara geigouhw yaos dara debin gin toua namcirohob. Dangga hang, yen meigdoc emagadgeij an lusud touwero. Doba yen meigdoc gororougb len, hanoba yen yeic yen meijug erij naugb yen yousa len touohob. Dara emen emdoc eiseisan dau sug yen yaimo ucina mog erij, kaba, dag yen yemobsara dau gin touwero, doba yen yod meijina debsa maman Adehsud Yesus Krisdus gin terimda. Anai yen yecinaga dag se lona hom, kaba, en emecicugb aud mamans. Hang astesda sug emen emocuncum dou maman Mamina ELOHIM, kaba, emen emens dau meijen geicara geigouhw gini dou en toua. 1:4 Dan indagunerij, dara dan indamouwerij, emen emecinaga dag ELOHIM medoc gororougb yen dara en ouci yen debinim naugb enin dag misen touohob. 1:5 Anai sug emen emesai Mer Geigouhw eisaugb Krisdus dou yen sug nosa, kaba, emen ememebedbed mer gini se emen emirs dou yen dousero. Doba Mena Gogoufu eic goubesa dou emen naugb sug emen emeic gansins emauma debin gin dou yen toua. Dara emen ememeija emuwesa an areg emen emebedbed dou yen touwero. Doba emen emouma debin dag areg emen emebedbed dou yen gin, kaba, se geica namcirohob. Dara yen yecinaga dau sug emen emeigtou desij yen sug nosa, kaba, dag emen geicara gecgu ingma deseino yen touwero. Doba emen geicara augwan edag beim dara obosboro an yen dous. Hang emen geicara augwan gin, kaba, naugb sug emen emehilon ara ara dau yen touwero. Doba eic dag yen yera mera einyana icira ginohob. 1:6 Dara emen emecinaga dag ELOHIM ouci yen debinim naugb en dag misenohob. Anai sug emen emesai Mer Geigouhw eisaugb Krisdus dag graga dou yen sug nosa, kaba, yen yebin Mer Geigouhw gini se yen meigdoc mes. Hanoba yen yesogwa deisa maman Adehsud an emen se emen geicara augwan toua namcir. Dangga sug lusud leic mog erij dou yen ucucugb icira gin terimda, kaba, yen yemobsara dau ucina mog erij gin touwero. Doba yen yaimo ucina gini dara yen meigdoc erleij namcir. Anai Mena Gogoufu eic goubesa se yen meigdoc mes naugb ginohob. 1:7 Hang yen yemedag gansins dou leng merdoc ebdebin an Krisdus se leng Makedonia dara Akaya meren hancob, len laugwanohob. 1:8 Anai meijen geicara graga, kaba, emeic dag Mer Geigouhw eisaugb maman Adehsud gini emagaha becinten leng se Makedonia dara Akaya meren hancob hom dousero. Doba lusud se cinogo augwan, kaba, len louman dau sug yen meigdoc ebdebin an ELOHIM dag misen touohob. Dangga sug emen emesai Krisdus moro dou lusud sungga sungga, kaba, emen ememens dau meijen geicara gin dou lusud mougwa hom touwero. 1:9 Doba len lenin eng lecic dau meijen geicara gin augwan dou emen dag yen yemoc dou meijums dougwo areg emen emesai dou yen touwero. Doba sug emen emeinesa meijen cinogo Tesalonika gin, kaba, dag yen yebin Mer Geigouhw eisaugb Krisdus dara goubesa toua namcirohob. Dara len lens dou emen dau sug yen yebin Mer Geigouhw ginohob, kaba, dag yen yemesijaresa seiseij augwan toua deitero. Doba yen yesijaresa ELOHIM misen dara yaimo en mer gin dous. Anai enin dous eng eis huhugb sugragohob. 1:10 Dara len lecic dou emen dag yen toua yeigtou yateteij naugb lona sug ELOHIM Meisi mohora hom, moho Yesus, en ecicugwen. Hanoba yen yod meijina debsa en toua dag se lona ingga, kaba, en eigdoc yen dau ELOHIM men gogom areg en esedeb naugb sesar augwan toua namcir. Anai yen yecinaga dag ELOHIM eigdoumesa en Meisi Yesus dau gomom aud maireseb menau geb huhugb ucugb naugb ginohob.

1 Tesalonika 2

2:1 Dan indagunerij, dara dan indamouwerij, leng gus, kaba, len lemecic dau meijen geicara graga dou emen dousero. Doba yenin toua yecinaga dau sug emen emesai Mer Geigouhw eisaugb Krisdus dou yen sug nosa, kaba, dag emen emirs emobdobdem an augwougb dou yen touwero. Doba eic dag yen yera mera einyana icira ginohob. 2:2 Dara yen yecinaga dau sug emen emedebeij yen sunggabuma, kaba, dag leng se cinogo Pilipi len leic mog erij. Hanoba len leic emen emoho lacicim toua namcirohob. Dangga hang, sug lusud leinyana lougb sogo maga dougwo emen an dag ginohob, doba maman ELOHIM eic emen emdoc aiyansem dou emen naugb emen emesai en Mer Geigouhw eisaugb Krisdus gin dou lusud toua terimda. 2:3 Dara sug emen emesai Mer Geigouhw eisaugb Krisdus gin dou yen, kaba, emen emeic mer areibahau naugb emen emahurim dara gin touwero. Doba sug emen emenara emaic yen meigdoc mes aud en mer gin, kaba, emen emebedbed augwan se geica mogud dou yen dous. Dara emen emdoc emetrij icira ligida dara ligiji dau yen mougwa hom touwero. Doba emen emebedbed augwan dou yen dara emen gauwamara gecabeci dou yen toua. Dara sug emen emebedbed dou yen gin, kaba, emen emereiyara, dara emerba mohoisa, hanoba emen emaugwohosa yen an ara ara hom dau yen touwero. Doba emen geicara augwan, kaba, emaimo ucina gobosboro an yen dous. 2:4 Dangga emen ememaimo areg gecgu an lusud touwero. Doba areg ELOHIM arougb emen anohob, kaba, emen emesai gin augwan dou lusud toua terimda. Anai enin eng eiya emen emdoc mes, doba edeinyum naugb ginohob. Hang en emeigdoumesa emen emoho naugb emen emebedbed en mer gin dou yen toua. Sug en eigdoumesa emen emoho dag ginohob, kaba, emen ememouwan naugb sug emen emeic lusud merdoc eigouhw dou len touwero. Doba emen emouwan naugb sug emen emeic ELOHIM enin medoc eigouhw dou en dous. Anai enin eng eicara bainyen emen emdoc mes an areg emen emebedbed dou lusud gin, kaba, dag emen emdoc hwai, era hom an gin dousei? 2:5 Dara yen yecinaga dag misen dau sug emen emebedbed dou yen sug nosa, kaba, dag emen ememouseij emen emir naugb emaunun dougwo emen emdoc getrij icira meijen aremougb touwero. Doba ELOHIM ouma debin emen geicara gini dag emen emens emen emdoc mes an augwan beb ainyes dou yen dag misen. Dara yen toua yecinaga dag emen geicara augwan dag gin touohob. 2:6 Dara se emen geicara augwan, kaba, emen ememainyen naugb sug sud hom ingma dau yen en emeigdoumesa emen emoho. Dara emen ememeic emouwemougb esesa naugb sug sud hom ingma dau len gus en emeigdoumesa emen emoho an gini touwero. Doba emen emouwan naugb sug ELOHIM enin eng eigdoumesa emen emoho an emen geicara augwan gin dous. Anai enin eng eigdoumesa emen emoho. Hanoba en arougb emen naugb sug emen emesai Mer Geigouhw eisaugb Krisdus dou lusud toua. 2:7 Sug en eigdoumesa emen emoho dag ginohob, kaba, emen goubesa inggebga naugb sug emen emacgeij ara ara einyana dau yen toua. Dobnaro. Emen ememouwan naugb sug emen emeic aguci dou yen touero. Dangga sug emen emugwengga desij yen sug nosa, kaba, emen emug arjaga an yen namcir, aninim dag mem en mog arjaga an mehir naugb en agauwesa len toua terimda. 2:8 Doba emen emdoc an yen. Hang emen emesedeb naugb sug emen ememesai ELOHIM Mer Geigouhw eisaugb Krisdus dou yen dousero. Doba emen emesedeb naugb emen emohw emen emougt edug naugb yen toua. Anai emen emdoc gororougb yen medam namcirohob. 2:9 Dangga hang, sug emen emugwengga desij yen sug nosa, kaba, emen ememacgeij ara ara hom dau yen touwero. Doba emen emeic emen emug erij astesda lona loba naugb emen emeicara naugb emenin terimda. Dauntoba sug emen emesai ELOHIM Mer Geigouhw eisaugb Krisdus dou yen, kaba, gini emedag ara gogom geb dougwo sud hom ingma dau yen touwero. Doba ucina esgiraha naugb yen dous. Yen meigdoc moc dougwo ginohobei? Naro, yen meigdoc eiseisan gin toua terimdaba. 2:10 Hang emen geicara augwan deseino yen, kaba, dag lusud lemowun emen emoho an aremer hom touwero. Anai yeni dara ELOHIM, yen youma debin emen dag emen emaimo areg ecabeci dara edag beim an yen. 2:11 Dara yen yecinaga dag emen geicara augwan dou yen astesda, kaba, toua aninim dag mena men geicara dou en mehir touohob. 2:12 Anai sug emen emugwengga desij yen sug nosa gin, kaba, emen emesulou yen ucucugb, dara emen emahahumohumesa yen, dara emen emenara emad yen meigdoc mes toua terimda. Dauntoba se meijen geicara augwan, kaba, yen yeic ELOHIM medoc eigouhw dou en dous. Anai enin eng eija yen naugb yen yeinesa men goiharaga dara en ekeba men gogouf cucugb dou yen touohob. 2:13 Dara emen ememen sijo dou ELOHIM naugb areg graga augwan gin dousero. Doba emen emen sijo esesa dou en eisaugb meijen geicara augwan toua namcir. Anai sug emen emesai ELOHIM mer eisaugb Krisdus dou yen sug nosa, kaba, yen yebin en mer gini se yen meigdoc mes. Anai yen yecinaga dag areg emen emebedbed dou yen gin, kaba, emen dau lusudero. Doba en dau ELOHIM dag misenohob. Hang sug yen meigdoc ebdebin an en mer ginohob, kaba, yen yera mera areg geigouhw toua terimda. Anai ELOHIM enin eng arautut yen meigdoc mes ogdoc en mer gin toua. 2:14 Dangga dan indagunerij, dara dan indamouwerij, sug yen yebin ELOHIM en mer se yen meigdoc mes dag ginohob, kaba, gogom areg geb dou ELOHIM men goucimdeb se leng Yudea meren hancob gin, kaba, eb naugb yen touohob. Anai sug len merdoc dag hom dara Krisdus Yesus sug nosa, kaba, leng Yahudi gus len leineg merohotimei an len. Hanoba len leic mog erij medam dou len icira gin toua namcir. Aninim dag leng Yahudi se meijen cinogo ingga, kaba, len lococ yenin meijen lusud naugb len leic mog erij medam dou yen sug yen meigdoc dag hom dara Krisdus gin touohob. 2:15 Anai leng Yahudi gin, kaba, len merdoc eigouhw an lusud gus len laugwan touwero. Doba gareg en emaimo len se meren gomnomna ginero, kaba, len merdoc esrougb medam an len laugwan namcir. Dangga sug ELOHIM esa men lusud aud len merjemouwer sug nosa naugb len lesai en mer dou len, kaba, len lemebin en mer ginero. Doba len leic gomom dou men logodeh len laugwan. Dara sug maman Adehsud Yesus en esai ELOHIM en mer dou len merner sug nosa, kaba, len merner gini len merdoc emesgiraha an en touwero. Doba len letob en se sogo salib toua. Dara emen toua, sug emen emesai Mer Geigouhw eisaugb Krisdus dou len mersir dau leng Yahudi gin, kaba, len lamsoho emen touwero. Doba len leic mog erij dou emen. Hanoba len locirma emen dau meren tuari dara cinogo gus gus augwan toua terimdohob. Hang ELOHIM medoc emesgiraha an len touwero. Doba en medoc esrougb medam an len namcir. 2:16 Dara gin dousero, doba sug emen emouwan naugb emesai Mer Geigouhw gini dou lugmahara, kaba, len lebehnehino emen dougwo len toua. Anai len lemouwan naugb ELOHIM emeigdoc len dau sesar men gogom aud maireseb menau geb huhugb touwero. Dangga hang, ELOHIM emamsoho len toua deitero. Doba en medoc mog mog medam an len. Hanoba en esedeb gogom deb naugb len touohob. Anai meren geicara gecgu gin, kaba, edag duhu gatij duga moc toua namcirohob. 2:17 Doba dan indagunerij, dara dan indamouwerij, ebiji dau sug len graga leiso emen dau meijen cinogo, kaba, emen emdoc eiseisan yen terimda. Anai emen dag sud hom gedig en ougbdedau en mehir laisoboro deb dous. Dangga hang, emen emagodgod lo terimda naugb sug emen emdeiya yen toua deit. Anai emen ematou se igda hosa dau yen. Doba se emen emaga dous. Doba se emen emdoc mes, kaba, emen emugwengga desij yen terimda. 2:18 Hang emen emainyen naugb sug emen emecicugb aud yen. Dara danin toua dainyen naugb dan dedebeij yen mougwa hosa touohob. Dobnaro. Bilis ougb sogo maga dougwo emen terimdaba. 2:19 Emen emainyen naugb emecicugb aud yen dag gini. Anai se Lona Sug Maman Adehsud Yesus En Ecicugwen, kaba, emen ememagahugouhw dara ememeimiman emenin an gareng deseino en se lona ingga? Yen youdesa leng gus dousei? 2:20 Naro, emen emagahugouhw dara emeimiman emenin an yen deseino en se lona ingga. Anai yen yedag emen mera touohob. Dara yen yedag ansins dou emen dag emen emeic emen emug emerij augwougb touwero. Doba emen emaingmo deb se usi namcirohob. Hang emen emod emina debsa maman Adehsud gini dag en emecgun sogo mesira an merij naugb en emeg se emen emugt toues.

1 Tesalonika 3

3:1 Sug emen emdoc esesa an yen dag gin terimdohob, kaba, emen ememouwan emeigtou emateteij deitero. Doba emen emogod an dag Silas aman, kaba, aman amanin ameigtou se cinogo Atena gini deb. 3:2-3 Doba Timotius, kaba, en edeiya yen sungga naugb en enara bad yen meigdoc mes, dauntoba yen yemobsara dau ucina mog erij ginero. Doba yen yes agadgeij naugb yen meigdoc ebdebin an Krisdus terimda. Anai maman mamaguna Timotius gin, kaba, en toua eicara baimo ELOHIM en mer se aremer augwanohob. Hang en emousa Silas aman naugb sug emen emaugwan emesai Mer Geigouhw eisaugb Krisdus dou lusud toua. Dara eisaugb ucina mog erij gin, kaba, yen yenin yecinaga dag augwan gini aimo dau areg ELOHIM enin ogod deb naugb mamanohob. 3:4 Anai sug emen emugwengga desij yen sug nosa, kaba, emen emesulou yen deb dag cum, kaba, maman maimo ucina mog erij gin toua. Hang areg emen ememesulou yen an ingga, kaba, yen yecinaga dag augwan gini acgunog dou yen dag misenohob. 3:5 Dangga sug dan decinaga dag yen yaimo ucina mog erij dag ginohob kaba, dan demeigtou demateteij toua deitero. Doba dan darougb Timotius aud yen naugb en edogod dougwo yen endag yen meigdoc ebdebin an Krisdus terimdei? Era mog erij gini eic dag yen yobsara dau endohobei? Anai dan dahau dag cum, kaba, Bilis augwohosa yen dau Krisdus men ucina gini. Hang emen emeic emen emug erij augwougb touohob. 3:6 Doba iteitogin, kaba, Timotius en ecicugb an mer geigouhw aud amanohob. Hanoba en edecic dou aman dag yen yemobsara dau Krisdus touebma, doba yen yes agadgeij naugb yen meigdoc ebdebin an en. Dara yen meigdoc gororougwim toua terimdaba. Dara en edecic dou aman dag yen meigdoc esesa an aman toua naugb yen yedeiya aman deit. Aninim dag aman amdoc esesa an yen naugb aman amdeiya yen toua. 3:7 Dangga dan indagunerij, dara dan indamouwerij, sug Timotius ens dau areg graga augwan dou amanohob, kaba, aman amdoc momogo sug aman amaimo ucina mog erij dara ara gogom toua deitero. Doba aman amdoc ebtou naugb aman amaimo ucina gini toua terimda. Anai sug aman amouman dag yen yemobsara dau Krisdusero, doba yen yes agadgeij naugb yen meigdoc ebdebin an en terimda, kaba, eic dag aman amdoc ebtou toua namcirohob. 3:8 Hang aman amdoc amomomtom toua deitero. Doba sug aman amecinaga dag yen meigdoc dag hom dara Krisdus dag ginohob, kaba, eic gerleij dou aman naugb sug aman amaimo ucina gin toua terimda. Naro, kab, naro. 3:9 Sug yen yeic aman amdoc erleij dou aman dag ginohob, kaba, aman amen sijo dag ara dou ELOHIM naugb yen toua deita? Naro, meijen geicara geigouhw gin, kaba, eic dag aman amdoc agahugouhw medam gougwa deseino enohob. 3:10 Hang aman amemarges dau sug aman amocuncum dou ELOHIM touwero. Doba aman amocuncum astesda lona loba dara aman amdoc augwan dou en. Dauntoba en ousa aman amir naugb sug aman amdeiya yen se aman amires touahabi. Anai aman amdoc erleij naugb aman amousa yen. Dauntoba areg aman amarges mougwa deb graga, kaba, aman amaulo gin deit, terimda augwan edeinyum dou yen toua namcirohob. 3:11 Dangga hang, aman amacgeij dau maman Mamina ELOHIM enin dara maman Adehsud Yesus naugb lan lagririj sogo maga augwan dau ucina an aman, dauntoba aman amedebeij yen toua. 3:12 Dara aman amocuncum dou maman Adehsud naugb en ousa yen. Dauntoba yen meigdoc gororougwim an len gus laugwan toua eiseisaugb terimda. Dara yen meigdoc gororougwim gin, kaba, edeinyum dag aman amdoc gororougwim yen sug nosa touohob. 3:13 Anai sug yen yeicara dag gin, kaba, eic dag maman Adehsud eic gototo se yen meigdoc mes dougwo areg gecgu augwan toua namcir. Hang edebeij Lona Sug Maman Adehsud Yesus En Ecicugwen an men logodeh laugwan, kaba, lusud lemowun yen an aremer hom deseino maman Mamina ELOHIM touwero. Doba meijen geicara augwan ecabeci deseino en terimda.

1 Tesalonika 4

4:1 Dangga dan indagunerij, dara dan indamouwerij, sug surad gini deinyor ouwedoc, kaba, emen emesulou yen. Hanoba emen emarougb yen dara goubesa namcir, dauntoba yen yemarges dau areg emen emens dou yen sug emen emugwengga desij yen sug nosa gin touwero. Doba yen yeicara yaimo augwan gini ucucugb terimda. Anai gini dau areg ELOHIM esedeb naugb yenohob. Dangga hang, sug yen yesogwa deisa areg emen emesai dou yen gini terimda, kaba, eic dag yen yeic ELOHIM medoc eigouhw dou en toua. Emen emesulou yen an dag gini, anai emen emeperwei maman Adehsud en mohw naugb ginohob. Dara emen emecinaga dag yen yaimo augwan gin touohob. Doba emen emouwan, kaba, yen yemarges debero, doba yen yeicara yaimo augwan gini beiseisaugb namcir. 4:2 Anai areg maman Adehsud Yesus en eigdoumesa emen emoho naugb sug emen emesai dou lusud, kaba, emen emens dau augwan gini dou yen sug nosa. Hang yen yemecinaga dag misen touohob. 4:3-6 Dangga hang, astesda dau yen, kaba, yen yemaiga hancob naugb yen meisira emebsa yen meisir mersouwer augwougblo. Anai gareg en eicara dag gin, kaba, aninim dag en aiga hancob naugb en eiyoho dau enohob. Dara yen meigdoc emetrij icira ligida gus aibibra aninim dag leng lohw meridgo dou ELOHIM touwero. Doba astesda dau yen, kaba, yen yaimo ucina gecabeci dara areg eic ELOHIM dara lusud merdoc geigouhw dou len an yen meisouwer dous. Anai ELOHIM en emouwan naugb yen yemaimo ligida gus. Dara yen yemohw yen meijaga dou len gus aibibra touwero. Doba sug ELOHIM ouci yen debinim naugb enohob, kaba, en ouwan naugb meijen geicara augwan edag beim an len gus terimda. Hang yen yemaimo areg graga augwan mougwa hom touwero. Doba yen yowun yenin meigdoc mes dau gin namcir. Anai emen emesulou yen dara emen dougwo yen dara goubesa sug nosohob dag gareg en eicara dag gini, kaba, ELOHIM esedeb gogom medam deinaugb en namcir. 4:7 Dangga eigouhw naugb maman mamaimo areg gecgu touwero. Anai sug ELOHIM eija maman aud en sug nosa, kaba, en emeija maman naugb sug maman maimo areg maman mamdoc etrij icira touwero. Doba en eija maman naugb maman maimo areg asesa enin medoc mes gin dous. Anai en ouci maman debinim naugb enohob. 4:8 Hang gareg dau yen en otogoto emen emir an gin, kaba, en emotogoto emen emusud misen emen emirero. Doba gini dag en otogoto ELOHIM gedig en esa Mena Gogoufu gecabeci se yen meigdoc mes en mer ginohob. 4:9 Doba eisaugb aremer medoc gororougwim, kaba, dan demog dau gin dou yen ucucugwero. Anai ELOHIM enin eng ens meijouhw dau augwan gin dou yen. 4:10 Hang yen yemaimo dangga an yen meijaguner dara yen meigdamouwer se yeng Makedonia meijen hancob augwan ingga touohob. Sug yen yaimo dag ginohob, kaba, emen emesulou yen dara goubesa namcir. Dauntoba yen yemarges deb touwero, doba yen yeicara dag gini beiseisaugb terimda. 4:11 Dara yen yemodo yen meijaga se len gus meren aremer touwero. Doba yen yowun yenin meigdoc mes naugb yen yeigtou dau gin namcir. Dara yen yemeisan gurog dau meijen areg yeic touwero. Doba yen yeic meijuwemougb esesa naugb yen meisira eicara an yenin terimda, aimo dau areg emen emarougb yen an sug nosohob. 4:12 Anai sug yen yeicara dag gin, kaba, leng medigo Yesus len lemowun yen meijoho an ara ara touwero. Doba len leigdoumesa yen meijoho an meijen geicara augwan gini terimda. Hanoba eic dag yen yemesa mougwisa len gus an ara ara touwero. Doba meijen ara ara edeinyum naugb yen touohob. 4:13 Dan indamouwerij, dara dan indagunerij, emen ememouwan naugb yen meiju emedgom dougwo maman mamsir leng Krisden gedig len ledatou debin len merug se cinogo mes touwero. Doba emen emouwan naugb yen yecinaga meijouhw augwan gini dag misen namcir. Dauntoba yen meigdoc emerij an leng lomom gini, aninim dag leng medigo Yesusero, doba yen meigdoc ebtou namcir. Anai len gin, kaba, len lemod merna debsa ELOHIM dag en eigdoumesa len dau gomom ucugb deitero. Dangga hang, sug sud hom dau len en omomohob, kaba, len merdoc erij an en terimda. 4:14 Doba maman, kaba, maman macinaga dau sug Krisdus en omom sug nosa, kaba, dag en emomom namcirero, doba en eisa dau gomom ucugwohob. Sug maman macinaga gin dag misenohob, kaba, maman maod mamina debsa ELOHIM dag gareng dau maman en medoc ebdebin an Krisdus. Hanoba en atou debin en mog se cinogo mes, kaba, en emomom terimda touwero. Doba ELOHIM emeigdoumesa en, hanoba, ahwan en dig bogo naugb eni eigtou desij Krisdus sungga toua. Anai en edag hom dara enohob. 4:15 Dangga edebeij Lona Sug Maman Adehsud En Ecicugwen, kaba, maman gedig maman mamiresebaba, kaba, maman mameino leng latou debin len merug se cinogo mes gini len merin touwero. 4:16 Doba se Lona ingga, kaba, ELOHIM en arougb men malaikad moho agas hom, en eino naugb en eiyaga mer medam. Hanoba en ohu ELOHIM men higbei mougb nosahabi, maman Adehsud enin emouwaden dau bogo naugb en eigtou se bogo meniha naugb maman toua. Sug en eigtou sunggohob, kaba, ELOHIM ebir leng merdoc ebdebin an Krisdus sug nosohob len laugwan leisa nosa. 4:17 Dau, kaba, en eigdoumesa maman gedig maman mamireseb se Lona ingga, aninim dara len naugb maman maugwan magasa dara maman Adehsud se umer taiba toua. Hang se Lona ingga, kaba, maman mamargesim toua deitero. Doba maman maigtou desij en beb huhugb namcir. 4:18 Dangga hang, yen yemeic yen meigdoc momogo ucan maman mamsir leng Krisden gedig len latou debin len merug gin touwero. Doba areg dan den dou yen gin, kaba, yen yecic naugb yaic gototo doum, dauntoba yen meigdoc aiyansem namcir. Anai areg dan den dou yen gin, kaba, dan demeic dau danin indoc mesero. Doba maman Adehsud enin eng ens meijouhw dau augwan gin dou dan. Hang dan demog dou yen toua.

1 Tesalonika 5

5:1 Doba eisaugb Lona Sug Maman Adehsud En Ecicugwen, kaba, emen ememog eisaugb gin dou yen deitero. 5:2 Anai emen emens dau augwan gini dou yen sug nosohob. Hang yen yenin yecinaga dag maman Adehsud, kaba, en emens dau men cumougt dou maman touwero. Doba en en augwougb debin maman dous. Aninim dag sud hom geiyohora se loba, kaba, en emens men lona sug en eiyohora gin dou lusud touwero. Doba en en naugb eiyohora augwougb dousahabi, len lemeijesan toua. 5:3 Dangga hang, se lona sug lusud merdoc obdara anim dag areg gogom emeb naugb len deiterohob, kaba, se lona ingga ELOHIM esa gogom en baiyan len merur mor namcir. Hanoba len lemougb dau gogom ginero, doba len laugwan lesa naugb gin terimda. Aninim dag gida hom sug en menuhwa erijohob, kaba, en emougbdedau gin touwero, doba en aimo gerij gin terimda ouwedoc toua. 5:4 Doba dan indagunerij, dara dan indamouwerij, yen, kaba, yen yemeigtou se lobeigbogo deitero. Dangga hang, Lona Sug Maman Adehsud En Ecicugwen gin, kaba, emobsara debin yen augwougb dag sud hom geiyohora gin touwero. Doba yen yecinaga augwan dag misen. 5:5 Anai yen yaugwan yedag mouf dara lona maran logodehohob. Sug yen yedag mouf dara lona maran logodeh dag ginohob, kaba, maman mamaimo loba dara lobeigbogo aud areg lan larougb maman aud gin toua deitero. Doba maman marges dau gin toua terimda. Anai maman mamedag maran logodeh deitero, doba maman masid mamanin dau lan namcirohob. 5:6 Dangga hang, sug maman mamedag loba dara lobeigbogo maran logodeh dag gin deiterohob, kaba, eigouhw naugb maman mamatou dau ELOHIM men Lona sug en ecicugwen, aninim dag leng gus gin touwero. Doba maman masedeh mauweila, hanoba maman mamu mauti eisaugb Lona gin toua terimda. 5:7 Anai leng latou gin, kaba, len latou se loba. Dara leng leg ahwei mohu bed len lomom, kaba, len leicara dag gin se loba toua. 5:8 Doba maman gin, kaba, maman madag lona men logodehohob. Dangga hang, maman mamsdemaga emembreij dag len gus touwero. Doba maman mamu maiso aremeijouhw augwan terimda. Hanoba maman mamarges dau sug maman mamdoc ebdebin an ELOHIM dara maman mamdoc gororougb lusud touwero. Doba maman mas agadgeij se gin namcir. Anai sug maman maicara dag gin, kaba, aninim dag maman mag sansun kermum se mamus dougwo Bilis men hu smougwohob. Dara maman mamarges dau sug maman maod mamina debsa ELOHIM an maireseb menau geb huhugb gin touwero. Doba maman maiyan mamdocesem naugb gin terimda toua. Anai sug maman maicara dag gin, kaba, aninim dag maman mag topi dau kermum dougwo maman mamugt. Dauntoba Bilis emeic gomom dou maman dau maireseb menau geb huhugb gin touwero. Doba maman mamina agau naugb madesma touahabi. 5:9 Anai ELOHIM emouci maman deb naugb sug en eic gogom dou mamanero. Doba en ouci maman naugb en eigdoc maman dau sesar men gogom aud maireseb menau geb huhugb ogdoc maman Adehsud Yesus Krisdus gin dous. 5:10 Anai enin dous eng omom naugb maman sesarohob. Dauntoba sug maman mamina agau, era sug maman mamomohob, kaba, maman maugwan mamireseb huhugb dara en se Lona Sug En Ecicugwen gin toua. 5:11 Dangga hang, yen yemarges dau sug yen yenara yad yen meigdoc mes naugb yeic gototo doum touwero. Doba yen yeicara yaimo dag gin anim terimda. Aninim dag yen yeicara yaimo iteitoginohob. 5:12 Dan indagunerij, dara dan indamouwerij, emen emesulou yen dara goubesa namcir, dauntoba yen yemamsoho leng ledag mougt naugb lesedougwo yen, dara leng lens ucina misen dou yen, len laugwan touwero. Doba sug len leic merug erij naugb yenohob, kaba, yen yeigdoumesa len meroho naugb yen yeic ara ara bedeinyum dou dou len toua. 5:13 Hang yen yemesbes an len touwero. Doba sug len leicara dangga dou yenohob, kaba, yen meigdoc gororougb len. Hanoba yen yeigdoumesa len meroho agas medam toua namcir. Dara yenin, kaba, yen yemoho aremer doum touwero. Doba se meijen geicara augwan, kaba, yen meigdoc anim ucucugb terimda. 5:14 Dangga toua, emen emesulou yen dara goubesa namcir. Dauntoba yen yemamsoho leng leisan gurogero. Doba yen yenara dou len dag len lemeisan gurog dag gin deitero, doba len toua merisira eicara naugb lenin terimda. Dara yen yeiya dau leng Krisden gus dag len lahau dau ucina mog erij, kaba, yen yemarges len gin deb touwero. Doba yen yenara yad len merdoc mes, dauntoba len les agadgeij namcir. Dara leng leija meruwesa Krisdus men ucina gin, kaba, yen yemowun len dedemeda toua. Doba yen yarautut len naugb len lecinaga areg se geica touwero. Dara sug yen yenara eisaugb ara ara dou lusud, kaba, yen yemenara se goubesa dou len touwero. Doba yen yenara dara meijir arjaga dou len dous. 5:15 Hang se meijen geicara augwan, kaba, yen yemauni gecgu doum ucucugb touwero. Doba yen yeic meijuwemougb esesa naugb yen yoho geigouhw anim. Dara yen yeicara dangga dou len gus laugwan toua terimda. 5:16-18 Dara yen meigdoc emeijesa eisaugb ara hom touwero. Doba se aremer augwan, kaba, yen yagahugouhw an ELOHIM, dara yen yocuncum dou en, dara yen yen sijo dou en besesa terimda. Anai gareg en medoc dag hom dara Krisdusohob, kaba, ELOHIM ouwan naugb en eicara dag gin toua namcir. 5:19 Dangga hang, se meijen geicara augwan, kaba, yen yemob Mena Gogoufu dag smougb mouf dau yen meigdoc mes touwero. Doba yen yebin en edag smougb mouf gererij se yen meigdoc mes terimda. 5:20 Dara sug lusud lesai ara ara dou yen, kaba, yen yemebin augwan gini augwougb se yen meigdoc mes touwero. Doba yen yainyen augwan nosahabi. Dauntoba yen yecinaga dag areg len lesai gin, kaba, dau Mena Gogoufu era dau merna mog mog dousei? Dangga hang, sug yen yecinaga dag areg len lens dou yen, doba dau Mena Gogoufohob, kaba, yen yemeicara yemaihagab gin touwero. Doba yen yaimo terimda. Doba sug yen yecinaga dag areg len lebedbed dou yen gini en dau merna mog mog dous, kaba, yen yemaimo touwero. Doba yen yasid yenin dau namcir. 5:21-22 Dara yen yemaimo ara ara gus augwan toua augwougblo. Doba yen yainyen nosahabi. Dauntoba yen yecinaga dag augwan gini eigouhwei? Era, naroei? Sug eigouhw, kaba, yen yeicara yaimo. Doba sug ecgu, kaba, yen yasid yenin dau augwan gin namcir toua. 5:23 Dangga hang, dan dacgeij ELOHIM naugb en ousa yen. Dauntoba se meijen geicara augwan, kaba, yen yemaimo areg gogor touwero. Doba yen yaimo areg gecabeci dag lusud mos terimda. Anai enin eng sud hom geic gesgigouhwesa dou maman dougwo augwan namcirohob. Dara dan dacgeij en, dauntoba en ebehnehino dougwo yen meijaga, dara yen meijina, dara yen meigdoc mes terimda edebeij Lona Sug Maman Adehsud Yesus Krisdus En Ecicugwen gin toua. Dauntoba se Lona ingga, kaba, meijen geicara gecgu hom emdagunya dau yen touwero, doba augwan ecabeci deseino en namcir. 5:24 Dan dacgeij en an yen dag gini. Anai dan decinaga dau sug en eija yenohob, kaba, dag en emarges dau gin touwero. Doba en aimo augwan gin an yen toua terimda. 5:25 Dara dan dacgeij naugb yen yemarges dau sug yen yocuncum naugb emen touwero. Doba yen yocuncum an emen esesa terimda. 5:26 Dara yen yen dou emen emaguner dara emdamouwer se Krisdus dag emen emou len dara emen emdoc mes an len. Hang sug yen youcimdeb, kaba, yen you meijufesem dara yen meigdoc ecabeci anim toua terimda. 5:27 Dara indan surad gini, kaba, yen yemobdeb touwero. Doba dan desulou yen dara dan dou maman Adehsud en moho debin gin dou yen. Dauntoba yen yecic indan surad gin dou dan indaguner dara dan indamouwer len laugwan toua. 5:28 Maman Adehsud Yesus Krisdus en medoc an yen naugb en eic geigouhw dou yen terimda.

2 Tesalonika 1

1:1 Surad gini dau dang, Paulus, dara Silas, dara Timotius dou yeng se goucimdeb se Tesalonika. Anai yen meigdoc dag hom dara maman Mamina ELOHIM, dara maman Adehsud Yesus Krisdus, lanohob. 1:2 Dangga hang, emen emacgeij lan naugb lan laic geigouhw, dou yen, dara lan laseyeiyo yen dougwo areg gecgu augwan toua terimda. 1:3 Dan indagunerij, dara dan indamouwerij, meijen geicara augwan, kaba, eic emen emdoc mes naugb emen emen sijo dou ELOHIM an yen toua terimda. Anai yen meigdoc emobsara dau sug yen meigdoc ebdebin an en touwero. Doba yen meigdoc ebdebin an en, dara yen meigdoc gororougwim beiseisaugb toua terimda. Dangga hang, sug emen emen sijo dou en dag gin, kaba, emen ememedreg dau gin touwero. Doba emen emaimo areg se geica an gin touohob. 1:4 Sug yen yeicara anim dag gin namcir, kaba, emen emdoc moc dougwo yen meijoho touwero. Doba astesda sug emen emedebeij ELOHIM men goucimdeb augwan, kaba, emen emeimiman yen meijoho an meijen geicara deseino len. Anai sug mog erij dara gogom eb naugb yen, kaba, yen yemobsara dau ucina gin touwero. Doba yen yes agadgeij naugb yen meigdoc ebdebin an ELOHIM terimda. 1:5-6 Dara yen yemaimo ucina mog erij gini augwougb touwero. Doba sug yen yeic yen meijug erij naugb Krisdus dag gin, kaba, eic dag yen yemeinesa ELOHIM men goiharaga toua. Anai meijen geicara edeinyum naugb ginohob. Doba leng leic mog erij dou yen iteitogini, kaba, ELOHIM emauni yen meijug gerij gini ucugb dou len toues. Anai en oudesa, doba aimo areg gedag beim an lenohob. Augwan gini ens ainyes dou maman dag ELOHIM emobsara aud sud hom touwero. Doba en medoc edag beim namcir naugb sug en ogod aremer debin lusud laugwan dag misen terimda. 1:7 Anai edebeij Lona sug maman Adehsud ens enin ainyes dau bogo an men malaikadir gedig len merubisamougb len laugwan, kaba, yen yemaimo ucina mog erij gini toua deitero. Doba ELOHIM esga yen dau augwan. Dara en emesga yen dousero. Doba en esga emen dau mog erij augwan se Lona ingga toua. 1:8 Doba leng lohw meridgo dou ELOHIM terimda, dara leng lemaimo Mer Geigouhw eisaugb maman Adehsud Yesus gin touwero, kaba, en esa gogom medam debin len. Anai sug en ouwaden gin, kaba, en edag smougb mouf gererij naugb ait len laugwan toua terimda. 1:9 Dangga hang, se Lona ingga, kaba, len lemeigtou desij maman Adehsud naugb len lemeiya men gogouf cucugb medam gin touwero. Doba ELOHIM ecicugb len dig medigo naugb en eic mor mor dou len se dum smougb beb huhugb namcir. 1:10 Augwan gini acgunog se Lona Sug Maman Adehsud En Ecicugwen. Anai se Lona ingga, kaba, maman gedig maman mamdoc ebdebin an enohob, kaba, maman maugwan maigdoumesa en moho agas medam namcir. Dara maman maimiman dau en moho doum ucucugb terimda toua. Anai en ouci maman debinim dag enin men lusud naugb enohob. Dara yen toua meijugwengga desij emen se lona ingga toua. Anai sug emen emesai Krisdus moro dou yen sug nosa, kaba, yen yemotogoto emen emir an gin touwero. Doba yen yod meijina debsa areg emen emesai dou yen gin toua namcirohob. 1:11 Sug yen toua meijugwengga desij emen se Lona ingga dag gin, kaba, emen ememarges dau sug emen emocuncum dou ELOHIM naugb yen touwero. Doba emen emeicara emaimo dangga esesa an yen terimda. Hang emen emacgeij en naugb en ousa yen. Dauntoba meijen geicara augwan edeinyum areg en esedeb naugb yen, sug en eija yen aud en sug nosa gin toua. Dara emen emacgeij en naugb en arautut yen, dauntoba yen yaimo geigouhw, areg yen yesedeb se yen meigdoc mesohob augwan gini toua terimda. Dara emen emacgeij en naugb yen yemobsara dau leng Krisden meren geicara gedag beim gin touwero. Doba sug yen meigdoc ebdebin an Krisdus dag ginohob, kaba, emen emacgeij en naugb en eic goubesa dou yen, dauntoba yen yaimo ucina gini terimda yen yedebeij usi an augwan gin toua namcir. 1:12 Anai sug yen yeicara dag gin, kaba, eic dag yen yeigdoumesa maman Adehsud Yesus en moho agas deseino lusud. Hanoba en toua eigdoumesa yen meijoho agas medam deseino lusud laugwan toua namcir. Augwan gini acgunog, anai maman Mamina ELOHIM dara maman Adehsud Yesus Krisdus, lan mardoc eigouhw an yen terimda toua namcirohob.

2 Tesalonika 2

2:1 Doba eisaugb maman Adehsud Men Lona Sug En Ecicugwen, dara sug maman macinim desij en, kaba, dan desulou yen dara goubesa namcir. Dauntoba yen meigdoc emeijesa dara yen meijdemaga emembreij eisaugb aremer gin dedemeda touwero, doba yen yaiyan meigdocesem terimda. 2:2 Anai dan douman dag ligbum, kaba, len ledenara dou yen dag maman Adehsud men Lona naugb sug en ecicugwen, kaba, edagasa namcirohob. Hanoba dan douman dag lingma, kaba, len louma debin gin dou yen, dag Mena Gogoufu ens dou len. Dara lingma, kaba, len louma debin dou yen dag meijouhw gini eb se Surad Injil Meb. Dara ligbum deit, kaba, len ledereiyara dou yen, dag emen emog augwan gini se surad dou yen touohob. Dobnaro. Augwan gini dag len lerba mohoisa yen dous. 2:3 Dangga hang, yen yemouman len merir an gin touwero, doba yen yebehnehino yenin meigdoc mes dougwo augwan gin terimda. Dauntoba meren genara gin, kaba, emaugwohosa yen touwero. Anai maman Adehsud, kaba, en emen debin maman augwougb touwero. Doba aimougtut, kaba, leng Krisden leinyana len merdoc obsara dau en naugb len leicara laihagab en mer. Dara Sud Hom Gagada Mos Dau Krisdus gedig ELOHIM esedeb en naugb en erba en se dum smougb teiteiyohob, kaba, ens enin ainyes dou lusud touahabi. 2:4 Sud hom gin, kaba, en owun seiseij dara areg lusud lesijaresa augwan moho obsara namcir. Hanoba en eigdoumesa enin moho eb taiba dau augwan gin toua terimda. Dara en emahau dau ELOHIM misen touwero. Doba sug en ens enin moho dag ELOHIM misen dou lusud laugwanohob, kaba, en einesa ELOHIM Men Tuari naugb en eigtou se men maija moc gin toua. 2:5 Yen meigdoc moc dougwo augwan ginohobei? Anai sug dan indugwengga desij yen sug nosa, kaba, dan dens dau augwan gin dag misen dou yen touohob. 2:6 Dara Sud Hom Gagada Mos Dau Krisdus, kaba, en emens enin ainyes dou lusud augwougb touwero. Doba ebeij Lona sug ELOHIM ogod an deb naugb enohob, kaba, en agunyen naugb ens enin ainyes dou lusud namcir. Anai iteitogini, kaba, ara gus eng edag sogo maga dougwo enaba. Dara sud hom gin, kaba, yen yecinaga dau en touohob. 2:7 Dangga hang, terimda Lona sug ELOHIM asid areg gedag sogo maga dau Sud Hom Gagada Mos Dau Krisdus gin, kaba, en emens enin ainyes touebma. Doba en mena, kaba, eisa se lusud leinyana merdoc mesohob naugb en ahwan len aud areg gecgu dousaba. 2:8 Doba ebeij Lona sug ELOHIM asid areg gedag sogo maga gin dau enohob, kaba, se Lona ingga en ens enin ainyes dou lusud laugwan. Doba se Lona Sug Maman Adehsud Yesus En Ecicugwen naugb en ens enin ainyes an men gogouf cucugb dou lusud laugwan, kaba, se Lona ingga en men bahu en omom. Hanoba men gogouf cucugb eic mor mor dou en toua namcir. 2:9 Anai sug Sud Hom Gagada Mos gini en en, kaba, en agunyen an Bilis men goubesa augwan. Dauntoba en aban ganusbus dara gansins gareibahau naugb auma debin enin deseino lusud laugwan. 2:10 Hanoba en eic men gereiyara aingma aingma gedag mog mog gini naugb en augwohosa leng lesedeb naugb len laimo ucina aud dum smougb teiteiyohob len laugwan toua namcir. Anai len gin, kaba, len lemebin dara len merdoc gororougb ELOHIM mer misen geic maireseb menau geb huhugb dou len se len merdoc mes touwero. Doba len lotogoto en mer misen gin dau len merdoc mes namcirohob. 2:11 Dangga hang, sug len lemebin areg se geica ginero, kaba, ELOHIM edug merdoc misen dau len. Dauntoba len lemod merna debsa areg se geica gin toua deitero. Doba len lod merna debsa areg dag areibahau gin dous. 2:12 Dau, kaba, en ogod gogom dag dum smougb deinaugb len toua. Anai len merdoc emebdebin an areg se geica ginero. Doba len merdoc gororougb areg gecgu terimdohob. 2:13-14 Doba dan indagunerij, dara dan indamouwerij, eisaugb yen, kaba, ELOHIM emesedeb yen naugb sug en eic mor mor se dum smougb dou yenero. Doba en ouci yen deb dau sug acgunog. Dauntoba sug yen meigdoc ebdebin an aremer se geica ginohob, kaba, en eigdoc yen dau sesar men gogom aud maireseb menau geb huhugb gin ogdoc Mena Gogoufu men goubesa naugb yen yedag ELOHIM men lusud gecabeci gin toua namcir. ELOHIM eija yen aud gini ogdoc sug emen emesai en mer gin dou yen sug nosohob. Anai en ouwan naugb en ogugwo maman Adehsud Yesus Krisdus men gogouf cucugb ingma dou yen toua. Augwan gini eica emen emdoc mes. Hang emen ememarges dau sug emen emen sijo dou ELOHIM an yen touwero. Doba emen emeicara emaimo dangga an yen besesa terimda. Anai maman Adehsud medoc gororougb yen toua namcir. 2:15 Dangga hang, dan indagunerij, dara dan indamouwerij, sug ELOHIM ouci yen deb naugb sug en eic maireseb menau geb huhugb dou yen dag ginohob, kaba, yen yemobsara dau ucina misen gin touwero. Doba areg emen emesai dou yen se emen emir sug nosa, dara areg emen emesulou yen an se emen surad gin touohob, kaba, yen yes agadgeij namcir naugb yen yecgun yen meisira debin gin toua terimda. 2:16-17 Dara emen emocuncum dou maman Adehsud Yesus Krisdus enin dara maman Mamina ELOHIM, dauntoba lan laic yen meigdoc aiyansem dou yen. Dara lan lanara lad yen meigdoc mes toua. Dauntoba yen yemobsara dau meijen geicara geigouhw gin touwero. Doba meijen geicara dara areg agunya dau yen meijirs, kaba, augwan edag beim dara obosboro an lusud terimda. Emen emocuncum dou lan dag gini, anai ELOHIM en medoc gororougb dara en medoc an maman toua namcirohob. Hang maman mamdoc emeijesa toua deitero, doba maman mamdoc ebtou namcir. Dara maman mameija mamuwesa en touwero. Doba maman maod mamina debsa endag areg en os dou mamanohob, kaba, en emeic dou maman toues.

2 Tesalonika 3

3:1 Dan indagunerij, dara dan indamouwerij, sug surad gin ouwedoc, kaba, dan dacgeij naugb yen yocuncum naugb emen toua. Dauntoba maman Adehsud en mer gin, kaba, emebtou touwero, doba ec bagaha dedemeda sungga sungga namcirahabi. Dara yen yocuncum naugb emen, dauntoba sug emen emesai Mer Geigouhw eisaugb Krisdus gin dou lusud, kaba, dag len lemesbes emen emir an touwero. Doba len lebin dara geigouhw namcir, aninim dag yen yebin en mer gin dara geigouhw sug nosa touohob. 3:2 Dara yen yocuncum naugb emen toua, dauntoba ELOHIM eigdoc emen dau areg gecgu augwan toua namcir. Anai leinyana, kaba, len merdoc emebdebin an maman Adehsud en mer ginero. Doba len merdoc esrougb dara merug mog an emen toua terimda. 3:3 Doba maman Adehsud, kaba, en medoc dag hom an mamanohob. Dangga hang, en emamsoho yen touwero. Doba en eic goubesa dou yen, dauntoba yen yaiyan meigdocesem. Dara en eseyeiyo yen dougwo Sud Hom Mobgos Maha toua terimda. 3:4 Dara emen emod emina debsa maman Adehsud dara goubesa dag en arautut yen. Dauntoba yen yemehig dau areg emen emarougb yen an gin touwero, doba yen yeicara yaimo augwan gin toua namcir. 3:5 Hang emen emacgeij en, dauntoba yen yemobsara dau sug yen yaimo ucina mog erij gin touwero. Doba en eic yen meigdoc aiyansem dou yen naugb yen yaimo gin terimda. Aninim dag enin toua aimo ucina mog erij naugb yen sug nosa touohob. Dara emen emacgeij en naugb en ousa yen, dauntoba yen yecinaga dau sug ELOHIM medoc gororougb yen gini meijouhw augwan bedreg dau sug nosa toua deit. 3:6 Doba dan indagunerij, dara dan indamouwerij, eisaugb leng lesbes emen emir an areg emen emesai dou yenohob. Hanoba len lagaij merisira dougwo sug len leicara terimda, kaba, emen emesulou yen se maman Adehsud Yesus Krisdus, en moho, dag yen yemeigtou desij lenero. Doba yen yasid yenin dau len namcir, anai emen emeperwei en mohw naugb ginohob. 3:7 Dara yen yenin yecinaga dag ELOHIM emouwan naugb yen yesogwa deisa leng lagaij merisira len meruhotimei mohw aud meren geicara gin touwero. Doba en ouwan naugb yen yaimo emen aud emen geicara gin dous. Anai sug emen emugwengga desij yen sug nosa, kaba, emen ememagaij emen emsira touwero. 3:8 Doba emen emeic emen emug erij naugb emenin astesda lona loba terimda. Dauntoba emen ememedag areg gogomcin sud hom ingma dau yen touwero. Doba yen meigdoc ebtou naugb ucina hom gin dous. Dangga hang, sug emen emacgeij ara ara dau yen, kaba, emen ememacgeij dag mogud dau yen touwero. Doba emen emouma augwan teitei dau yen namcir. 3:9 Emen goubesa inggebga naugb sug emen emacgeij ara ara dag mogud dau yen. Doba emen ememeicara dag gin dou yenero. Anai emen emouwan dauntoba emen emedag gansins dou yen naugb yen yesogwa deisa emen emohotimei mohw an emen geicara gin toua terimda. 3:10 Augwan gini aimo dau areg emen emesulou yen an sug emen emugwengga desij yen sug nosa touohob. Anai emen emenara dou yen, dag gareg en agaij mesira namcir dougwo sug en eicara, kaba, eigouhw naugb yen yemeic ared dou en touwero. Doba yen yamsoho namcir. 3:11 Emen emesulou yen an dag gini, anai emen emouman dag merug hosa se meijen cinogo ingga, kaba, len lemeicara deitero. Doba len lesugrog namcir, hanoba len lemehigdog touwero. Doba len merohora esesa naugb len lodo len meraga se len gus meren aremer toua namcirohob. 3:12 Dangga hang, se maman Adehsud Yesus Krisdus men goubesa, kaba, emen emen dougwo len. Hanoba emen emesulou len dara goubesa toua. Dauntoba len lemeicara dag gin deitero. Doba len lehigdog naugb len merisira eicara an lenin terimda. 3:13 Doba dan indagunerij, dara dan indamouwerij, yen, kaba, yen yemehig dau sug yen yaimo areg gedag beim dara obosboro an lusud touwero. Doba yen yos debin gin terimda. 3:14 Doba gareg en emaimo emen emir an areg emen emesulou yen an se surad ginero. Hanoba en eic mos terimda, kaba, yen youmesem dougwo en naugb yen yemeigtou desij en touwero. Doba yen yasid en dau yen. Dauntoba sug meijen geicara gini eic igdebes dou enohob, kaba, eic dag en mos obsara an men geicara gin toua namcir. 3:15 Doba yen yemowun en moho dag meijen moc touwero. Doba yen yesulou en an men geicara dag yen meijaguna se Krisdus dous. 3:16 Dan dacgeij maman Adehsud en eng, dauntoba en moongga desij yen naugb en eseyeiyo yen dougwo aremer augwan toua terimda. Anai enin eng eic gesgigouhwesa dou lusud dous. 3:17 Dang, Paulus, dan dou yen toua. Dan dog moho hom gini ai danin insira naugb yen. Anai astesda surad gus gus augwan, kaba, danin deic dan insira mena eb debin dag gin dou lusud terimda. 3:18 Maman Adehsud Yesus Krisdus medoc eigouhw an yen yaugwan namcir.

1 Timotius 1

1:1-2 Surad gini dau dang, Paulus, dou Timotius, ban, gedig dan deija ban dag dan indisi misen se Krisdusohob. Anai ELOHIM dara Krisdus Yesus lan laigdoumesa dan indoho, hanoba lan larougb dan naugb dan desai Mer Geigouhw eisaugb Krisdus Yesus dou lusud laugwan toua. Hang dan dacgeij maman Mamina ELOHIM dara maman Adehsud Krisdus Yesus naugb lan mardoc an ban namcir. Dara lan mardoc eineg an ban, hanoba lan laseyeiyo ban dougwo areg gecgu augwan toua terimda. Anai ELOHIM gin, kaba, eni Sud Hom Geigdoc Maman Dau Sesar Men Gogom Augwan namcir. Dara Krisdus, kaba, eni sud hom gedig maman maod mamina debsa en naugb en eic maireseb menau geb huhugb dou maman toua. 1:3 Dan dog surad gini dou ban, dauntoba ban bemeihwededau cinogo Epesus inggaro. Doba ban beigtou sungga terimda naugb ban ben dougwo lusud merug aibibra dag len lemamimiri an areg dag huhugb, dara maman mamjemouwer, dara malaikadir len meroho. Hanoba len lemebedbed mer areibahau eisaugb Krisdus debin gin touwero, doba len larges dau namcir. Anai areg len lamimiri an gin, kaba, emousa ELOHIM an areg en esedeb naugb en eigdoc lusud dau sesar men gogom ginero. Doba eic dag len lenara laisedim dous. 1:4 Hang ban ben dougwo len dara goubesa namcir, dauntoba len lemedidib dau areg graga dou lusud deitero. Doba len merdoc ebdebin an Krisdus terimda. Anai areg ELOHIM en esedeb naugb mamanohob, kaba, eb naugb maman ogdoc sug maman mamdoc ebdebin an Krisdus hom gin dous. Dan denara dau areg graga augwan dou banohob sug dan demeihwededau ban dig leng Makedonia meren hancob touebma, doba dan deigtou desij banaba. Hang dan demens dau leng lebedbed mer areibahau gini len meroho dou ban touwero. Anai ban becinaga len laugwan dag misenohob. 1:5 Dara indan gauwamara dau sug dan den dougwo leng graga an meren geicara, kaba, dag len lemarges dau gin dousero. Doba ousa maman naugb sug maman mamdoc gororougwim toua terimda. Dangga hang, dan demouwan naugb sug len lemeisa merir an ara ara deitero. Doba len leic meruwemougb esesa naugb len merdoc emogdogda len an aremer hom touwero. Doba lousa deisa len an dag len merdoc ecabeci namcir. Dara dan demouwan naugb sug len lemekeba merdoc hwai icira touwero. Doba len merdoc ebdebin an Krisdus dag misen namcirahabi, len lemaimo en an areg en arougb len an gini dara merdoc hom toua terimda. Anai sug len leicara dag gin, kaba, eic dag maman mamdoc gororougwim toua namcir. 1:6-7 Dan den dangga dou len, anai ligbum dau leng lesai mer areibahau gin, kaba, len leigdoumesa lenin meroho dag len meru ouforoho naugb len ledidib meijouhw dau ELOHIM men gomnomna areg en eic dou Musa augwan asesa dou lusud touohob. Dobnaro. Areg len louma debin gin, kaba, len lemecinaga moho hom dara meijouhw dau augwan gin touwero. Doba len merirs obdobdem an gin dous. Dangga hang, len lemaimo ucina an areg ousa len naugb len merdoc gororougb lusud toua deitero. Doba len laijahasero dau augwan gin namcirohob. Hanoba len lenara laisedim eisaugb huhugb dara meroho gin toua terimda. 1:8 Doba maman macinaga dag ELOHIM men gomnomna areg en eic dou Musa ginohob, kaba, augwan eigouhw namcir. Dangga hang, esloulougb naugb sug maman maimo gomnomna gini an lusud, kaba, dag maman mamedreg ELOHIM men gauwamara eisaugb men gomnomna gin touwero. Doba maman maimo men gauwamara gini an lusud gin dous. 1:9 Anai maman macinaga dau sug ELOHIM eic men gomnomna dou Musa, kaba, dag en emeic men gomnomna gini dou en naugb len gedig laimo areg asesa ELOHIM enin medoc mes ginero. Doba en eic men gomnomna gin dou en naugb leng lohoiya dara laiga gomnomna gin terimda. Dara len gedig lemaimo areg ELOHIM arougb len an ginero, doba lebesesar abeba en mer gin namcir. Dara leng ledegeij merir an en, hanoba len lemesijaresa en touero. Doba len laimo areg geb se cinogo gin dous. Dara leng logod merner, dara leng merimir, dara leng lohudara. 1:10-11 Dara leng merisirebsem, dara ligida dara ligiji gedig len leicara dag mihi naugb laidim aibibrida, dara leng los lusud dag sogougb naugb latagaij aremougb terimda, dara leng laideidoro, dara leng lerba mohoisa, dara leng loho meh dougwo leng gus, dara areg gedreg dau mamang Krisden maman gomnomna gus gus augwan gin toua. Anai gomnomna gin, kaba, eic lusud merdoc erleij dou len dous, aimo dau Mer Geigouhw eisaugb Krisdus areg ELOHIM en ogugwo dou danohob naugb sug dan desai dou lusud laugwan toua. En, kaba, en moho agas medam namcir. Hang en eigouhw naugb maman magahugouhw an en dareg masijaresa en toua terimda. 1:12 Dan den sijo medam dou maman Adehsud Krisdus Yesus, anai en eic mou ouforoho dara goubesa dou dan naugb dan desai Mer Geigouhw eisaugb en dou lusud. Anai en eiya dan indoc mes, doba edeinyum naugb ginohob. Hang en emeigdoumesa dan indoho naugb gin toua. 1:13 En eicara dangga dou dan gedig dan indug mog mog an en, hanoba dan deic en moho bacecim. Dara dan deic mog erij dou men lusud len laugwan sug nosa touohob. Doba en medoc eineg an dan. Hanoba en aigdougwo indan geicara gecgu gin augwan dau dan toua. Anai dan daimo augwan gini dau sug dan demecinaga meijouhw eisaugb en dag misen touebma. Doba dani moongga se lobeigbogaba, 1:14 Dara maman Adehsud emarges dau sug en medoc eineg an dan gin touwero. Doba en medoc eineg an dan beiseisaugb terimda. Hang en emeic dan indoc aiyansem dou dan naugb sug dan indoc ebdebin an en. Dara dan indoc gororougb lusud toua terimda. Anai sug maman madag hom dara Krisdus Yesusohob, kaba, areg gin augwan eb naugb maman toua namcir. 1:15 Anai Krisdus Yesus gin, kaba, en emouwaden dau bogo naugb leng ledag beimero. Doba en ouwaden dau bogo naugb en eigdoc leng lebesesar len laugwan dau meren gogom dous. Augwan gini asesa dag misen namcir. Dangga yen yemetogoto en mer gini touwero. Doba yen yebin se yen meigdoc mes, anai se geica namcirohob. Hang eigouhw naugb lusud laugwan merdoc ebdebin an dara laimo toua terimda. Doba gareg Yesus eigdoc en dau sesar men gogomohob, kaba, dan eng debesesar edreg dau len laugwan namcirohob. 1:16 Doba Krisdus Yesus, kaba, en ouwan dan dedag gansins naugb lusud se lona daiyamo gacin toua. Dauntoba sug len leiya dag en emeic gogom dou dan gedig dan debesesar edreg dau len laugwanohob gin dedemedero. Doba en eigtou bateteij dan dag gin terimda, kaba, eic len merdoc erleij dou len naugb len merdoc ebdebin an en. Dauntoba en eic maireseb menau geb huhugb dou len toua. Hang en medoc emeineg an dan naugb en emaigdougwo indan sesar augwan dau dan toua namcir. 1:17 Dangga hang, eigouhw naugb maman magahugouhw dara maigdoumesa ELOHIM en moho agas beb huhugb terimda. Anai enin eng edag ELOHIM hom dous gedig maman mameiya en se maman mamiresi mougwa hombuma. Dara en emomom touwero. Doba en edag mougt mera medam beb huhugb terimda toua. Augwan gini asesa dag misen namcir. 1:18 Timotius, dan indisi, areg leng lesai ELOHIM moro len lens deb dou leng se goucimdeb eisaugb ban sug len leigdoumesa ban dag gembala sug nosohob, kaba, dan desulou ban dara goubesa namcir naugb ban abdoc moc dougwo gin touwero. Doba ban abdoc eiseisan gin namcir. Dauntoba areg len louma debin ban ginohob, kaba, ousa ban naugb sug ban bemahau touwero. Doba eic geic mos dou ban naugb sug ban besara dara areg gecgu deigeigouhw terimda. 1:19 Dara ban bemobsara dau sug ban abdoc ebdebin an Krisdus touwero. Doba ban bes agadgeij naugb ban baimo en terimda. Hanoba ban bebehnehino banin abdoc mes dougwo areg gecgu augwan toua, dauntoba aremer hom emen dougwo ban touwero. Doba aban geicara augwan ecabeci namcir. Anai ligbum, kaba, len merdoc emogdoc aremer augwan ginero, doba len ledreg ginohob. Hang len merdoc emebdebin an Krisdus toua deitero. Doba len ledag ij mebes ocro bobrugb naugb len lobsara dau en namcir touohob. 1:20 Lahwai dau len gin, kaba, lan maroho dag Himeneus dara Aleksander. Hang dan dogugwo lan deb se Setan mesira ucugwohob. Dauntoba sug en eic mog erij medam dou lan, kaba, lan lameic ELOHIM en moho lamacecim dag gin toua deitero. Doba lan lahau an dougwo namcir.

1 Timotius 2

2:1-2 Dangga hang, sug yen youcimdeb, kaba, dan desulou yen ucucugb terimda, dag aimougtut, kaba, yen yocuncum dou ELOHIM naugb mougt mera gouji an meren gedeijan len laugwan. Dauntoba len lemeic gogom augwougb dou maman touwero. Doba len merdoc eigouhw an maman, kaba, maman mamdoc ebtou naugb sug maman masijaresa ELOHIM. Dara maman maimo areg obosboro an lusud toua terimda. Anai aremer hom gin, kaba, esloulougb medam edreg dau areg gus augwan namcir. Hanoba yen yacgeij ELOHIM naugb en eic ara ara gedeinyum dou len. Dara en ousa len an meren aremer. Dara yen yen sijo dou en naugb len toua terimda. 2:3 Sug yen yeicara dag gin, kaba, yen yeic ELOHIM en medoc dag en agahugouhw an yen toua. Anai augwan gin, kaba, eigouhw namcir deseino enohob. 2:4 Anai en, kaba, en emouwan naugb sug sud hom ingma emeihwedig dum smougb touwero. Doba en ouwan naugb sug en eigdoc len laugwan dau sesar men gogom augwanohob, kaba, dag en eic maireseb menau geb huhugb dou len laugwan. Hanoba en ouwan naugb len lecinaga areg se geica meijouhw augwan asesa ucan gin toua. 2:5 Anai enin eng ELOHIM hom dous. Dara en eigdoumesa sud hom dous eng naugb en edag maman gembala gesa taij deseino en touohob. En ingga sud hom misen, moho Krisdus Yesus, gedig en eic enin maga bancoho aga lusud laugwan dou ELOHIM naugb meren sesarohob. 2:6 Augwan gini ens ainyes dou maman dag ELOHIM esedeb en medoc mesohob naugb sug en eigdoc maman dau sesar men gogom augwan gin toua. Dangga hang, sug cumougt edagasohob, kaba, en ens dau augwan gini asesa dou maman touohob. 2:7 Sug ELOHIM esedeb medoc mes naugb gin dag ginohob, kaba, en eigdoumesa dan indoho. Hanoba en arougb dan naugb dan desai Mer Geigouhw eisaugb Krisdus dou lugmahara. Dara dan dedidib meijouhw dau augwan gini dou len toua. Dauntoba len toua merdoc ebdebin an en. Anai augwan gini se geica mogud dous. Hang dan demereiyara dou yenero. Doba dan denara se misen dou yen namcir. 2:8 Dangga hang, dan demouwan naugb yen yemarges dau sug yen yocuncum naugb mougtir dara lusud se cinogo augwan touwero. Doba se astesda goucimdeb sug yen yeisa Ari, kaba, dan douwan naugb ligiji mogud len locuncum an len terimda. Dara sug len lou merisira aud bogo naugb len locuncum dou ELOHIM, kaba, dan demouwan naugb len merdoc emesrougb anim, dara len merir emedregim eisaugb ara ara touwero. Doba len merusutimei ogoufu namcir. 2:9-10 Dangga toua, sug yen youcimdeb, kaba, dan demouwan naugb ligida len lemeic areg mera eisaugb naugb lemacgun merugt. Dara len lemobungma lenin meraga dara emas dara sariou mogo touwero. Doba len lobungma lenin dara meren geicara gedag beim dous. Anai gini aimo dau ligida areg len leigdoumesa lenin meroho dag len lesogwa deisa ELOHIM mohotimei mohw se men geicara augwan dag misenohob. Dara dan demouwan naugb sug len loucimdeb, kaba, dag len lemeg sansun mera eisaugb touwero. Doba len leg sansun misen areg mera ouwada gedig lusud merdoc esgiraha an gin dous. 2:11 Dara hom deit, kaba, dan demouwan naugb sug len lemens aremeijouhw dau Surad Injil Meb dou lusud se goucimdeb touwero. Doba len lowun lenin merdoc mes arjaga naugb len louman dau sug lusud lens aremeijouhw dau gin dou len. 2:12 Hanoba len lemeigdoumesa lenin meroho dag mougt se goucimdeb touwero. Doba se aremer augwan, kaba, len leigtou dag osum namcir. 2:13 Anai ELOHIM emesinsin Epa aimougtutero. Doba en esinsin Adam eng aimougtut. Hang en emedag mougt naugb en. 2:14 Dangga toua, Bilis en emainyen Adam sug aimougtut touwero. Doba en ainyen Epa, hang en emobsara se sesar toua. 2:15 Doba inggaida. Anai sug len lemobsara dau sug len merdoc ebdebin an Krisdus touwero, doba len merdoc ebdebin an en terimda. Hanoba len merdoc gororougb lusud naugb len ledag us mod mod an len. Dara len meru aiso naugb len lemaimo areg gecgu touwero. Doba len laimo areg asesa ELOHIM enin medoc mes dous, kaba, maireseb menau geb huhugb emediyebeiya dau len touwero. Doba eb naugb len toua terimda. Hang len lemahau dau sug len leis an merihir touwero, doba len laimo gin terimda. Anai gini emedag sogo maga dougwo len an merireseb menau geb huhugb touwero. Doba sug len laimo areg graga augwan esesa terimda, kaba, eb naugb len namcir.

1 Timotius 3

3:1 Gareg en ouwan naugb en edag mougt naugb goucimdeb, kaba, gini dag en ouci areg mera eisaugb naugb enohob. Aremeijouhw gini misen namcir. 3:2 Dangga gareg en ouwan naugb yen yeigdoumesa en dag mougt, kaba, ELOHIM en ouwan naugb lusud lemehin meriresa en icira aremer hom touwero. Doba men geicara augwan ecabeci namcir. Dara en eic mesuwa toua hom dous. Dara en medoc ouforoho se aremer augwan namcir. Hanoba en esedougwo enin medoc mes dougwo sug en aimo areg gecgu augwan. Dara en medoc edag beim an lusud laugwan toua teitei. Dara en ebin len gus. Dara en mou ouforoho naugb en edidib meijouhw augwan asesa dou lusud. 3:3 Hang en medoc gororougb ahwei mohu. Dara en mer emeised lusud naugb en emogod len gus dedemeda touwero. Doba ELOHIM ouwan dag en medoc arjaga namcir naugb en oho geigouhw se lusud merdoc mes terimda. Dara en medoc emetrij icira aregoufu dara aremougb naugb en emenara ucucugb dou lusud touwero. Doba en enara dara medoc arjaga namcir. 3:4 Dangga toua, ELOHIM en ouwan naugb en edag mougt naugb en ens ucina geigouhw dou leng leigtou desij en se men tu. Dara en omnomna dou en mehir naugb len lowun lenin merdoc mes arjaga deseino en. Hanoba len leigdoumesa en moho toua terimda. 3:5 Anai sug sud hom en mou emouforoho naugb en esedougwo lusud se men tu dara geigouhwero, kaba, dagiro, naugwe hang, en esedougwo ELOHIM men lusud dara geigouhwa? Naro. 3:6 Dara ELOHIM emouwan naugb sug yen yemeigdoumesa sud hom Krisden menau dag gembala touwero. Doba yen yeigdoumesa sud hom gedag lusud mos dous. Anai sug yen yeigdoumesa sud hom Krisden menau edag mougt, kaba, cum, en agahugouhw beimiman enin an gin namcir. Dangga en esma gogom, aninim dag gogom areg Bilis esma sug nosa touohob. 3:7 Dangga toua, ELOHIM en ouwan sud hom gedag mougt naugb yen, kaba, dag eni sud hom areg leng medigo Yesus leigdoumesa en moho an men geicara gedag beim sug nosa touohob. Anai sug yen yeigdoumesa sud hom areg men geicara gecguohob, kaba, cum, lusud lesbes an en. Hanoba en obsara se Bilis men digorobei ucugb toua. 3:8 Dangga toua, sug yen yeigdoumesa sud hom dag pembela, kaba, yen yemeigdoumesa sud hom gedig en metemouwu maraida. Dara en medoc gororougb ahwei mohu dara en medoc etrij icira aremougb touwero. Doba yen yeigdoumesa sud hom gedig lusud leigdoumesa en moho an aremer augwanohob, dag pembela dous. Anai gareg en medoc etrij icira naugb en agungun lusud an meren aremougb, kaba, men geicara gini eic dag lusud igdebeseba len an namcir. 3:9 Dara yen yemeigdoumesa sud hom gedig en eija mouwesa areg ELOHIM ens dou maman eisaugb Krisdus gin touwero. Doba yen yeigdoumesa sud hom gedig en esetoto se mer gin namcirohob dous. Anai sug nosa, kaba, ELOHIM emens dau areg eisaugb Krisdus dou sud hom ingma touebma. Doba en ecgoneh augwan dau len terimda. Doba iteitogin, kaba, en ens augwan gini ainyes dou mamanohob. 3:10-13 Dara sud hom areg yen yeigdoumesa en dag pembela, kaba, en mesouwa toua hom dous. Hanoba en esedougwo en mehir dara men sogougwir laugwan dara geigouhw toua. Dara yen, kaba, yen yemeigdoumesa en namcirlobma. Doba yen yehigdecin en mairesebahabi. Dauntoba sug yen yeiya, doba men geicara edeinyum naugb augwanohob, kaba, yen yeigdoumesa en dag pembela misen deit toua. Anai sug pembela aimo men ucina gin dareg gedag beim an lusud namcir, kaba, eic dag len leigdoumesa en moho an gini terimda. Hang eic geic mos dou en naugb en os badi Krisdus Yesus en moho se goubesa dou len toua. Dangga toua, sug yen yeigdoumesa ligida dag pembela, kaba, ELOHIM en emouwan naugb yen yemeigdoumesa ligida gedig len loc desan aremer touwero. Doba en ouwan naugb yen yeigdoumesa ligida gedig lusud leigdoumesa len meroho an aremer augwanohob dag pembela dous. Hanoba yen youci ligida gedig len lebehnehino lenin merdoc mes dougwo areg gecgu augwan. Dara len lemesediara touwero. Doba meren geicara augwan edag beim an lusud terimda toua. 3:14 Dan desedeb naugb dan dedeiya ban sungga. Dauntoba dan dens dau gin augwan ai dan indirs dou ban touahabi. Dobnaro, kaba, dan dog dau augwan gini se surad gin dou ban. Dauntoba ban becinaga dau maman geicara areg ELOHIM esedeb naugb men lusud maman men meijouhw augwan asesa toua. 3:15 Anai maman mainesa ELOHIM gedig en maireseb huhugb men uro mesohob. Hang en emogugwo en mer geica gini se maman mamsira toua. Dauntoba maman madeijan en mer misen gini. Dara maman masedougwo deigouhw dougwo areg gecgu toua. 3:16 Dangga areg ELOHIM en ens dau Krisdus dou mamanohob, kaba, sud hom ingma dau maman, kaba, en emaideido dougwo gin touwero. Doba maman maugwan mauma debin dag en mer gin, kaba, moho agas namcir. Anai enin eng ouwaden dau bogo naugb en edag lusud misen. Dara sug Mena Gogoufu eigdoumesa en dau gomom ucugwohob, kaba, gini dag en ouma debin Krisdus dag en emereiyara dou maman mougwa hom touwero. Doba en edag ELOHIM Meisi mohora hom dag misen namcirohob. Dara malaikad len toua, merugwengga desij en naugb len leiya dau men geicara augwan gin toua. Hang Mer Geigouhw eisaugb en, kaba, agaha becinten lugmahara len laugwan naugb len merdoc ebdebin an en toua. Anai maman macinaga dag ELOHIM eigdoumesa en ucugb dig bogo aud en. Dauntoba en edag mougt mera medam naugb augwan namcir.

1 Timotius 4

4:1 Doba Mena Gogoufu ens se misen dou mamanohob, dag se lona daiyamo gacin, kaba, ligbum dau maman len merdoc emebdebin an Mer Geigouhw eisaugb Krisdus areg maman mabedbed dou len gini deitero. Doba len lei merums naugb merna gaugwohosa dara merna mog mog an areg len lebedbed dou len ogdoc lusud gedig len merdoc omom dau mer misen eisaugb Krisdus gin namcirohob. 4:2 Hang len lemebedbed areg se geica dou lusud toua deitero. Doba len lebedbed mer areibahau dou len. Hanoba len leicara larerei len meriresi naugb len laijahasero dous. 4:3 Anai len len dougwo lusud dag len lemeicim deitero. Dara len lagodgod len naugb len lousan areg ELOHIM en esinsin gin toua. Dobnaro. Maman gedig maman mamdoc ebdebin an Krisdus dag misenohob, kaba, maman maic augwan dareg man sijo dou en dauwahabi, maman mamet toua. Anai maman macinaga areg se geica augwanohob. 4:4-5 Anai areg ELOHIM en ahasesei dara en esinsin naugb maman gin, kaba, en ouma debin dag augwan gini ecabeci namcirohob. Dangga hang, maman mamousan hom touwero. Doba maman maic augwan dara man sijo dou en toua. Anai sug maman man sijo dag gin, kaba, gini aninim dag maman mauma debin en mer dag hom emogor touwero. Doba augwan ecabecohob. Hang en emowun maman an areg maman mat hom touwero. Doba en eigdoumesa augwan dag eigouhw deseino en toua terimda. 4:6 Ban bens dau areg dan desulou ban an graga augwan asesa dou nanan nanaguner dara nandamouwer len laugwan toua. Anai sug ban beicara dag gin, kaba, ban bedag Krisdus Yesus men sogougb hom gedig en aimo en deigeigouhw namcirohob. Dara ban bemeisan gurog dau mer misen eisaugb Krisdus. Dara meijouhw areg lusud ledidib dou banohob gin touwero. Doba ban abir ebdebin areg ban abdoc ebdebin an dara baimohob gin toua terimda. Anai sug ban beicara dag gin, kaba, eic gerleij dou ban toua. 4:7 Hang ban bemaimo leng lecic huhugb dara len merjemouwer meroho graga touwero. Doba ban basid banin aigusi dau leng merirs obdobdem ingga namcir. Anai areg len lecic gin, kaba, dag lusud gedig len meru emaiyero meren genara. Hang emousa ban naugb ban bemaimo ELOHIM en mer se aremer augwan touwero, doba ahwan ban dau gin dous. 4:8 Dara ban bemeic abuwemougb esesa naugb ban abaga eiji dag goubesa touwero. Doba ban beicara baimo naugb ban abdoc ecabeci. Dara ban beic abuwemougb esesa naugb ban baimo ELOHIM en mer se men aremer augwan toua terimda. Anai sug ban becgun ban absira naugb ban abaga eiji dag goubesa, kaba, gini ousa ban. Doba cum cum dous. Doba sug ban beic abuwemougb esesa naugb ban baimo ELOHIM en mer se men aremer augwan dag gin, kaba, ban bemec mera sug ban abireseb gin dousero. Doba os dou ban dag ban bemdec mera beb huhugb se lona daiyamo gacin toua. Hang gini emedeinyum naugb aremer hom graga dousero. Doba edeinyum naugb aremer augwan toua namcir. 4:9-11 Dangga sug maman macinaga dau ginohob, kaba, maman mamarges dau sug maman maimo ELOHIM se aremer augwan gin touwero. Doba maman maic mamug erij dara maic mamuwemougb esesa se gin terimda. Anai maman macinaga dau sug maman maicara dag gin, kaba, dag maman mamom touwero. Doba ELOHIM eigdoc maman dau sesar men gogom aud maireseb menau geb huhugb gin toua. Dangga hang, maman mamarges en deb touwero. Doba maman maod mamina debsa en terimda. Anai en, kaba, mobisamougb namcir naugb en eic maireseb huhugb dou maman. Dara maman macinaga dag en emeigdoc maman dau sesar men gogom gin dousero. Doba astesda gareg en medoc ebdebin an en dara od mena debsa en dag misen, kaba, en eigdoc len laugwan dau sesar men gogom augwan aud maireseb menau geb huhugb gin toua. Ban bens dau augwan gini meijouhw esesa dou aban goucimdeb. Hanoba ban barougb len, dauntoba len lemobsara dau gin touwero. Doba len leicara laimo gin terimda. Anai areg dan den dou ban gini, kaba, augwan asesa dag misen namcir. Hang yen yemohoiya touwero, doba yen yebin se yen meigdoc mes. Dara yen meigdoc ebdebin an dara yen meigdoc augwan toua terimda. 4:12 Dangga ban bemaimo areg gecgu homero. Doba areg agunya dau ban abirs. Dara aban geicara augwan, kaba, edag beim dara ecabeci namcir. Hanoba ban bemarges dau sug ban abdoc gororougb lusud. Dara ban abdoc ebdebin an Krisdus touwero. Doba se aremer gin augwan, kaba, ban bedag gansins naugb len gedig len merdoc ebdebin an Krisdusohob len laugwan toua terimda. Hang dan demouwan naugb lusud lowun ban dag bugdeh mesaba touwero. 4:13 Doba astesda sug yen youcimdeb, kaba, dan douwan naugb ban becic dau Surad Injil Meb dou len. Hanoba ban bebedbed dara bedidib meijouhw ucan dou len toua. Dara ban bemarges dau gin touwero. Doba ban bos debin augwan gin terimda dan dedacu ban sungga toua. 4:14 Dangga hang, ban bemeisan gurog an mou gouforoho areg ELOHIM eic dou banohob sug en esa men lusud aud ban gin touwero. Doba ban beic abuwemougb esesa naugb ban beicara baimo gini terimda. Anai ELOHIM en esa en mer dou ban ogdoc leng lesai en moro sug nosohob dag en ouwan naugb ban besai en mer eisaugb Krisdus dou lusud. Dara ban bens meijouhw augwan dou len toua. Dangga hang, sug mougtir se goucimdeb len lob merisira se ban abugtohob, kaba, ELOHIM eic mou ouforoho dou ban naugb gin touohob. 4:15 Dangga hang, ban bemarges dau areg ELOHIM eic dou banohob ginlo. Doba ban bogoncin hom gin terimda. Anai sug ban beicara baimo dag gin, kaba, ban beiji dag lusud mos se Krisdus namcir. Hanoba eb ainyes naugb lusud laugwan leiya toua. 4:16 Doba esloulougb medam naugb ban bebehnehino banin abdoc dougwo areg gecgu augwan. Dara ban besedougwo areg ban bebedbed ingga toua. Dauntoba areg misen mogud eng agunya dou lusud dous. Anai sug ban beicara baimo dangga, kaba, ban bemeigdoc banin dau sesar men gogom dousero. Doba ban beigdoc leng louman ban abir an gin len laugwan dau sesar men gogom gin touohob.

1 Timotius 5

5:1 Sug sud bod hom dau leng Krisden en ebesesar, kaba, ban bemesa ban abir debin enlo. Doba ban benara baded en medoc mes dous, aninim dag ban benara baded ban abina misen toua. Dangga toua, sug lugdeh mes len lebesesar, kaba, ban bemenara gouji dou len touwero. Doba ban benara dara garjaga dou len dous. Aninim dag ban benara dara ban abir arjaga dou ban abaguner dara ban abagtor misen len toua. 5:2 Dangga toua, sug ligida lusudbod laimo areg gecguohob, kaba, ban abir bemaic len touwero. Doba ban besulou len aninim dag ban besulou ban abim misen toua. Dara sug ligdob toua leicara gecgu, kaba, ban bemenara medam dou len touwero. Doba ban ben dougwo len dara ban abir arjaga. Aninim dag ban ben dougwo banin abdemeitor toua. Doba sug ban besulou len dag gin, kaba, ban besedougwo banin abdoc mes agadgeij dau len namcir. 5:3 Doba eisaugb debdesir, kaba, dan demouwan naugb yen yemousa len aibibrero. Doba yen yousa debdes misen dous. 5:4 Anai en, kaba, en mehir dara medebeitor lingma naugb sug lousa en touwero. Doba en eigtou dou enin terimda. Hang men ara ara hom emeb naugb enero, kaba, en acgeij ELOHIM astesda lona loba terimda naugb sug en eic ara ara dou en toua. Anai en od mena debsa en hom dous. 5:5 Doba debdes gedig en mehir dara medebeitor toua merugwengga, kaba, eigouhw naugb lenin eng merdoc an en naugb len lagauwesa en nosahabi. Dauntoba len ledug men geicara geigouhw dou len ingma ucugb dou en toua. Anai sug len leicara dangga, kaba, len leicara laimo ELOHIM en mer se ginohob. Hang emeic en medoc esgiraha an len toua. 5:6 Doba debdes hom gedig en ohw en maga dou lusud naugb en arei aremougb dau len dous, kaba, yen yemousa en touwero. Doba yen yasid en dau goucimdeb. Anai se maga, kaba, en mairesebaba. Doba se en medoc mes, kaba, en omom dau Krisdus namcirohob. 5:7 Ban bens dau augwan gini dou debdes an en mehir dara en medebeitor len laugwan. Hanoba ban barougb len naugb len laimo toua terimda. Dauntoba ogdoc aremer gin, kaba, lusud lemowun len touwero. 5:8 Anai gareg en emagauwesa mosur, hanoba en emeigdoumesa enin men lusud naugb en emagauwesa len debinbin touwero, kaba, gin dag en aideido dougwo Krisdusohob. Hang en moho eiyema edreg dau leng medigo Yesus len laugwan toua namcirohob. 5:9 Dangga hang, debdes gedig en men arisogomoc sud homoi, hanoba en es mesuwa hom terimda en omom dauwohob, kaba, enin dous eng yen yog en moho se surad naugb yen yousa en. Debdes gus, kaba, ban bemog len meroho se suradero. 5:10 Dara esloulougb toua dag lusud leigdoumesa en moho an men geicara geigouhw dag en emedag medehidera touwero, doba en edag hweij lomoumougb an en mehir. Dara en ebin leng Krisden gus. Hanoba en owun enin medoc mes arjaga dag sogougb deseino len naugb en ousa len dara ara ara. Dara en eigdoumesa gogom dau leng gedig meren aremer eb debin len. Dara en ecgun mesira naugb en aimo ucina geigouhw an lusud gus len laugwan toua terimdohob. 5:11 Doba debdes gedig en edag ligdobaba, kaba, yen yemog en moho se surad ginero. Anai cum, kaba, en medoc etrij icira ligiji deit. Hanoba en emeicara dou Krisdus toua deitero. Doba en arges dau en namcir naugb en edes mesuwa menau toua. 5:12 Dangga hang, ELOHIM eic gogom dou en toua namcir. Anai sug yen yog en moho se surad gin, kaba, gini aninim dag en os dou Krisdus dag en emdes mesuwa deitero, doba en eicara naugb en hom dous. Doba sug en edes mesuwa deit, kaba, gini dag en edreg dau areg en os dou Krisdus aimougtut augwan gini touohob. 5:13 Dara len lemedreg dau gin dousero. Doba sug yen yousa debdes ligdobaba dag gin, kaba, eic dag len lesebesa augwougb naugb len loc desan len gus meren aremer se len gus meren tu toua terimda. Dara gin dousero, doba eic dag len lecic len gus meroho gouhw genes. Dara len lodo meraga se len gus meren aremer. Hang len merirs emogom an ara ara touwero. Doba len merirs eijouhw naugb len lecic dau areg ELOHIM en dougwohob gin toua namcir. 5:14 Dangga hang, dan douwan naugb debdes ligdobaba, kaba, len ledes mersuwa deit, dara len lemouwadan merihir, hanoba len ledag hweij lomoumougb an len. Dara len leicara edag beim an leng se meren tu len laugwan toua terimda. Anai sug len leicara dag gin, kaba, emeic cumougt dou maman moc dau leng medigo Yesus naugb len lemeic maman mamoho lemacecim touwero. 5:15 Anai ligbum dau debdes ligdobaba gin, kaba, len lobsara dau ucina gini. Hanoba len laimo Setan aud areg gecgu ucugb touohob. 5:16 Doba sug debdes merugwengga desij ligida gedig len merdoc ebdebin an Krisdusohob, kaba, dan douwan naugb len lenin lousa debdes ginahabi. Dauntoba augwan emogomcin goucimdebero. Doba ebsa laugwan merbera toua. Anai sug len leicara dag ginohob, kaba, eic goubesa dou goucimdeb naugb len lousa debdes hom yom gedig len merihir dara merdebeitor ingmaro len dous. 5:17 Leng lesedougwo meijen tuari, doba leic meruwemougb esesa se gin terimda, kaba, yen yeigdoumesa len meroho edreg dau mougtir gus gus laugwan namcir. Hanoba yen yousa len dara ara ara edreg dou len toua. Anai len leic len merug erij medam naugb len lesedougwo meijen tuari deigeigouhwohob. Dara leng lemesedougwo meijen tuari gin dousero. Doba len leic meruwemougb esesa dara len leic merug erij laos dara naugb len lebedbed dara ledidib meijouhw asesa dou yen toua, kaba, yen yed len gin eng ino naugb yen yousa len edreg dau len gus laugwan toua namcir. 5:18 Anai augwan gini esogwa deisa areg Musa en og deb se Surad Injil Meb Mohon deb sug nosa touohob, endagai: Ban bemeg aigdaga mes dougwo sapi mers sug en aiyan tramero. Doba ban bamsoho en naugb en et toua. Dara maman Adehsud Yesus enara dangga dou men logodeh sug nosa touohob, endagai: Gareg en esai ELOHIM moro dou lusud, kaba, eigouhw naugb leng louman en mer gini, kaba, len lousa en toua. 5:19 Sug sud hom ohobas mougt hom en moho deseino ban, kaba, ban bemeic en mer an gin dedemedero. Doba sug lahwai era merug homoi len louma debin aremer gin dou ban, kaba, ban bemousa deisa len merir an gin toua. 5:20 Dangga sug ban becinaga, doba mougt hom gini en ebesesar dag misenohob, kaba, ban bemod aremer gini se simei touwero. Doba ban ben dougwo len deseino goucimdeb laugwan dara goubesa namcir. Dauntoba sug leng se goucimdeb len louman, kaba, len lemeicara danggero. Doba len lahau an dougwo toua. Dau, kaba, ban bowun en moho, dauntoba en emesedougwo goucimdeb toua deitero. 5:21 Hang se aremer augwan, kaba, ban bemobsara aud sud hom ingma mougwa hom touwero. Doba deseino ELOHIM dara Krisdus Yesus an men malaikad gecabeci len laugwan, kaba, dan darougb ban naugb ban bagod meren aremer augwan dara ban abdoc gedag beim an len dous. 5:22 Dara sug ban bowun mougt hom en moho ginohob, kaba, ban bemob ban absira se sud hom ingga en mougt naugb ban bemeigdoumesa en ucugb dedemeda touwero. Doba ban beigtou bateteijahabi. Dauntoba ban bemaimo en se men sesar ginero. Doba ban baimo ucina gecabeci dara gedag beim an gin dous. 5:23-25 Anai ligbum, kaba, meren aremer ens ainyes naugb lusud logod an ginohob. Doba lingma, kaba, meren aremer emdagunya se lona daiyamo gacin deits. Aninim dag lusud meren geicara geigouhw, kaba, ligbum eb ainyes deseino lusud naugb len lecinaga dedemeda. Doba lingma, kaba, ban bemeiya dau meren geicara geigouhw gin dedemedero. Doba emdagunya se lona daiyamo gacin. Anai emedeinyum naugb sug len lemecgoneh gin touwero. Dangga sug ban beigdoumesa sud hom graga en mougt dedemeda deit. Doba en medoc emobsara dau men sesar augwan touebma, kaba, gini aninim dag ban baimo men sesar gin touohob. Dara naugb banin, kaba, ban bemeg duhu mogud toua deitero. Doba ban beg anggur mohu gurereito dag ariawen debin duhu gin, dauntoba edis areg geb se ban abdoc mes augwan dau ban toua. Anai areba ban ucucugb terimdohob.

1 Timotius 6

6:1 Doba mamang Krisden gedig lusud lowun len meroho dag sogougwohob, kaba, ban besulou len, dauntoba len lemedreg mougtir dau leng medigo Yesus len merir mougwa hom touwero. Doba se aremer augwan, kaba, len leigdoumesa meren mougtir gini len meroho naugb len laimo areg len larougb len an gini toua terimda. Dauntoba mougtir ingga, kaba, len lemeic ELOHIM en moho lemacecim. Dara len lemesbes an en mer gin touwero. Doba len merdoc esgiraha se gin namcir. 6:2 Dara sogougb gedig meren mougtir len toua ledag Krisdenohob, kaba, ban besulou len. Dauntoba len lemesbes an len sug len ledag meragunem se Krisdus touwero. Doba len leic meruwemougb esesa edreg dau nosa deit. Dauntoba meren mougtir gini lec mera einyana dau len. Anai meren mougtir gin, kaba, len merdoc ebdebin an Krisdus. Hang len ledag lusud gedig maman mamdoc gororougb len touohob. Aremer augwan gin, kaba, ban bens meijouhw asesa dou len. Hanoba ban barougb len naugb len laimo dangga toua terimda. 6:3 Doba gareg en emouma debin maman Adehsud Yesus Krisdus mer geic gerleij dou maman. Dara en medoc emeica areg emen emedidib dou yen gin touwero. Hanoba en ebedbed mer susugb dau areg ELOHIM arougb maman an gin, kaba, en medoc agas. Hanoba en emecinaga meijouhw augwan asesa touebma. Doba en mou edgom namcir. 6:4 Dangga areg en ebedbed gin, kaba, emahwan lusud naugb len lemaimo ELOHIM en mer gin touwero. Doba eic dag len lekebem, dara leclul anim, dara lesmesmanim. Hanoba eic dag len merdoc ogdogdem an areg gecgu ucucugb terimda toua. Anai len lemaimo areg se geica deitero. Doba len lerba augwan dau len merdoc mesohob. 6:5 Hang len merdoc etrij naugb len lenara laisedim dara len merir edregim ucucugb. Anai len mersdemaga emesgiraha toua deitero. Doba dag embreij namcir naugb len lenara lauwim icira ara ara toua terimda. Dara gin dousero. Doba sug len meru emaiyero dag ginohob, kaba, len loudesa dag sug len laimo maman se ELOHIM men ucina gin, kaba, eic dag len merisoho mougb an aremougb toua. 6:6 Dobnaro. Anai sug maman maimo ELOHIM se men ucina gin, kaba, maman mamamsoho mougb an aremougb ginero. Doba gareg en eic mouwemougb esesa naugb en esogwa deisa ELOHIM mohotimei mohw an areg en arougb en an gin terimda. Hanoba en medoc ebtou an aremougb areg ELOHIM eic dou en toua, kaba, men geicara gini eic dag en mesoho mougb namcirohob. 6:7 Dangga sug ared, dara sansun, dara tu eb naugb mamanohob, kaba, eigouhw naugb maman mamdoc ebtou an gin namcir. 6:8 Anai sug maman mamimir louwadan maman se cinogo gin, kaba, maman mamen an ara ara ingma. Dara sug maman mamom, kaba, maman mamodo ara ara ingma naugb maisa augwan touwero. Doba maman mamug mogud namcir dous. 6:9 Doba leng merdoc etrij icira naugb len merisoho mougb, kaba, len mersdemaga emesgiraha naugb ara ara deitero. Doba sug len meru emaiyero namcirohob, kaba, eic dag len lobsara se Bilis men digorobei dedemeda naugb len laimo areg geic gogom einyana debin lenin terimda. Dara ahwan len naugb len merur mor se dum smougb beb huhugb toua. Anai sug len merdoc gororougb aregoufu dag ginohob, kaba, eic dag len lemaimo areg geigouhw an lusud touwero. Doba eic dag len leicara laimo areg gecgu einyana an len dous. 6:10 Dangga ligbum dau maman, kaba, len merdoc emebdebin an Krisdus toua deitero. Doba sug len mersdemaga embreij icira aremougb dag ginohob, kaba, eic dag len lobsara dau men ucina gin toua namcir. Hang len merdoc emebtou touwero. Doba len merdoc momogo dara eijesa an aremer einyana toua terimda. 6:11 Doba ban, kaba, ban bedag ELOHIM men lusudohob. Dangga hang, ban bemaimo len gin an meren geicara. Dara ban abdoc emetrij icira mesoho mougb aninim dag len touwero. Doba ban basid banin aigusi dau gin namcir. Hanoba ban beic abuwemougb esesa naugb ban baimo areg asesa ELOHIM enin medoc mes. Dara aban geicara augwan, kaba, aninim dag ELOHIM enin men geicara augwan toua terimda. Dara ban bemobsara dau sug ban abdoc ebdebin an Krisdus touwero. Doba ban bes agadgeij namcir naugb ban baimo en dara ban abdoc augwan namcir. Hanoba ban bemarges dau sug ban abdoc gororougb len gus touwero. Doba ban beicara baimo dangga dara ban abdoc arjaga an len terimda. 6:12 Dara ban bemedis dau ucina aud maireseb menau geb huhugb gin touwero. Doba sug ban bedag hom dara Krisdusohob, kaba, ban becgun ban absira dara ban baiyan abinesem naugb ban bobga asa ucina gini dara aban goubesa augwan namcir. Anai ebiji se lona sug ban bos badi Yesus dag aban mougt mera medam deseino lusud leinyana sug nosa, kaba, ELOHIM esedeb ban naugb ban baimo ucina gin touohob. 6:13-14 Hang ban bemobsara dau areg dan darougb ban anohob augwan gin touwero. Doba deseino ELOHIM gedig en eic maireseb dou augwan. Dara Krisdus Yesus gedig en os badi en mer augwan asesa deseino Pilatus sug nosohob, kaba, dan desulou ban dara goubesa namcir, naugb ban baimo augwan gini dara gedag beim dara gecabeci terimda edebeij Lona Sug Maman Adehsud Yesus Krisdus En Ecicugwen gin toua. 6:15 Dangga sug ban beicara baimo augwan gini dara gedag beim terimdohob, kaba, ELOHIM emowun ban aboho an aremer hom touwero. Doba en eigdoumesa ban aboho an augwan terimda. Anai enin dous eng, kaba, mobisamougb naugb en esedougwo augwan namcir. Hanoba en edag mougt mera medam naugb mougtir dara leng meroho agas len laugwan toua. 6:16 Dara enin dous eng eis huhugb sugragohob. Dara en eigtou se gogouf cucugb gedig sud hom ingma emedebeij naugb sug en emeiya en touwero. Hang maman magahugouhw an en. Dara maman maigdoumesa en moho agas beb huhugb terimda toua. Augwan gini asesa dag misen namcir. 6:17 Doba eisaugb leng Krisden gedig len merisoho mougb, kaba, ban besulou len dara goubesa namcir. Dauntoba len merdoc emagas an meren aremougb areg emeb terimdero naugb len lemod merna debsa gin touwero. Doba ban besulou len naugb len lod merna debsa ELOHIM gedig en eic maireseb dou lusud an augwan dous. Anai en, kaba, en emecgun mesira an ara ara dau maman touwero. Doba en agaha mesira an dou maman beiseisaugb namcir, dauntoba maman mamdoc eigouhw an augwan gin toua terimda. 6:18 Hanoba ban barougb len naugb len lemecgun merisira debin meren aremougb touwero. Doba len leicara eigouhw an lusud naugb len lagaha merisira an dou len. Hanoba len lekeba ara ara beiseisaugb dou len terimda toua. Dauntoba meren geicara geigouhw gin, kaba, eic dag len ledesma merisoho mougb misen icira gin toua namcir. 6:19 Anai sug len leicara dag gin, kaba, meren geicara geigouhw gini dag len leised huga medam naugb lenin se lona daiyamo gacin. Hang len lemobsara dau ucina aud maireseb menau geb huhugb gin touwero. Doba meren geicara gin, kaba, dag deic, dauntoba len les agadgeij naugb laimo toua terimda. 6:20 Dangga Timotius, ban bemaimo leng lenara laisedim. Dara lenara lauwim meren geicara mougwa hom touwero. Doba ban basid banin dau len namcir. Hanoba ban besedougwo areg ELOHIM ogugwo dou banohob naugb sug ban besai gin augwan deigeigouhw dou lusud toua terimda. Anai leng lenara laisedim gin, kaba, len leigdoumesa lenin meroho dag areg len ledidib gin, kaba, eic dag lusud meru ouforoho an ara ara touohob. Dobnaro. Areg len lebedbed gin, kaba, emahwan lusud naugb len lera mera geigouhwero. Doba ahwan len naugb len merdoc edregim dous. Dara emarautut len naugb len lemaimo ELOHIM en mer dara lemesijaresa en dag misen touwero. Doba einoisa len naugb len laijahasero dau en terimda. 6:21 Hang ligbum dau maman, kaba, len merdoc emebdebin an Krisdus toua deitero. Doba len lobsara dau en namcirohob. Anai len leigdoumesa lenin meroho dag len laimo leng laisedim gini se meren gebedbed dag huhugb augwanohob. ELOHIM medoc eigouhw an ban terimda.

2 Timotius 1

1:1 Surad gini dau dang, Paulus, dou dan indisi bang, Timotius gedig dan indoc gororougb ban namcir. Anai ELOHIM enin eng ouci dan, hanoba en eigdoumesa dan indoho naugb dan desai Mer Geigouhw eisaugb Krisdus Yesus dou lusud toua. Anai gareg en medoc dag hom dara enohob, kaba, ELOHIM os dou en dag en emomom deitero. Doba ELOHIM eigdoc en dau sesar men gogom augwan aud maireseb menau geb huhugb toua namcir. 1:2 Dangga hang, dan dacgeij maman Mamina ELOHIM dara maman Adehsud Krisdus Yesus naugb lan mardoc eigouhw dara eineg an ban. Dara lan laseyeiyo ban dougwo areg gecgu augwan toua terimda. 1:3-4 Dan demarges dau sug dan den sijo dou ELOHIM an ban touwero. Doba astesda sug dan docuncum dou en, kaba, dan denara dou en eisaugb ban astesda lona loba terimda. Anai dan indoc eiseisan dau sug dan deihwededau ban sug nosa, kaba, dag ban abdoc momogo dara ban beb ucan dan touohob. Hang dan indoc esesa naugb dan dideiya ban deit, dauntoba dan indoc agahugouhw ucugb toua. Dan docuncum dangga dou ELOHIM, anai sug dan deicara daimo areg en arougb dan an gini, kaba, dan indoc emogdogda dan an aremer hom touwero. Doba ouma debin dan dag dan indoc ecabeci namcirohob. Aninim dag dan injemouwer merdoc emogdogda lenin an aremer hom sug nosa touwero. Doba ouma debin len dag len laimo ELOHIM men gomnomna augwan dag misen touohob. 1:5 Dara dan den sijo dou ELOHIM an ban, anai dan indoc eiseisan dau sug ban abdoc ebdebin an Krisdus sug nosa, kaba, dag ban bemobsara dau gin touwero. Doba ban baimo en se ucina gini dag misen namcir. Aninim dag dan decinaga dau ban abauwa Lowes, dara ban abim Unike, kaba, dag lan lamobsara dau sug lan mardoc ebdebin an Krisdus sug nosa touwero. Doba lan laimo en se ucina gini dag misen toua namcirohob. Hang dan demecinaga dag areg lan mardoc ebdebin an gin, kaba, dag augwan gini ebsa ban abdoc mes iteitogin touohob. 1:6 Sug dan decinaga dag ban baimo Krisdus se men ucina gini dag misenohob, kaba, dan desulou ban, dauntoba ban bemahau dau sug ban besai Mer Geigouhw eisaugb Krisdus dou lusud touwero. Doba ban bebir ban abdoc mes edag smougb mouf gererij ucugb deit, dauntoba ban bebedbed mer gini dou len terimda, aimo dau mou ouforoho dara goubesa areg ELOHIM eic dou ban se lona sug dan dob dan insira se ban abugt naugb ginohob. 1:7 Anai sug ELOHIM esa Mena Gogoufu se maman mamdoc mes sug nosohob, kaba, en emeic gahau dou maman touwero. Doba en eic geic mos dara goubesa dou maman naugb sug maman masai Mer Geigouhw eisaugb Krisdus dou lusud terimda. Hanoba en arautut maman naugb maman mamdoc gororougb lusud. Dara en eic mamdoc aiyansem dougwo areg gecgu augwan dou maman toua namcir. 1:8 Dangga hang, igdebes emeba ban naugb sug ban bos badi maman Adehsud en moho deseino lusud. Dara igdebes emeba ban an dan sug dan indugwengga se tu gesisug icira en gin touwero. Doba sug ban besai Mer Geigouhw eisaugb Krisdus gin dou lusud, kaba, ban beic abus naugb ban baimo ucina mog erij ogdoc ELOHIM men goubesa, aninim dag dan daimo ucina mog erij icira gin touohob. 1:9 Anai enin eng eigdoc maman dau sesar men gogom augwan aud maireseb menau geb huhugb. Hanoba en ed maman debinim dag men lusud touohob. Dara en emeic augwan gini dou maman emogdoc maman geicara touwero. Doba en esedeb naugb en eic augwan gini dou maman ogdoc Krisdus Yesus enin men geicara taiba sogo salib gin dous, aimo dau areg enin ogod an deb sug en emahasesei bogo dara cinogo touebma. Anai en medoc eineg an maman teiteiyohob. 1:10 Hang iteitogin, kaba, en emens dau en medoc geineg an maman gini eb ainyes dou maman, anai en esa Krisdus Yesus ouwaden dau bogo naugb en eigdoc maman dau sesar men gogom augwan ginohob. Anai sug Krisdus ens Mer Geigouhw eisaugb enin dou maman gin, kaba, maman macinaga dag gomom men goubesa emoiharaga maman toua deitero. Doba en oho maireseb menau geb huhugb naugb en eic dou maman dous. Anai sug en omom taiba sogo salib, kaba, en aiyan gomom men goubesa gini dau maman toua namcirohob. 1:11 Hang ELOHIM eigdoumesa dan indoho naugb dan desai Mer Geigouhw eisaugb Krisdus gini dou lusud. Dara dan dedidib meijouhw eisaugb gin augwan asesa dou len toua. 1:12 Ogdoc gin, hang dan demeic dan indug erij se tu gesisug icira gin touohob. Doba igdebes emeba dan dau ginero. Anai dan decinaga sud hom areg dan indoc ebdebin an en dag misenohob. Dangga hang, dan decinaga dag areg dan dogugwo dou en se lona sug dan indoc ebdebin an en sug nosa, kaba, hom emediyebeiya dau en mesira touwero. Doba en esedougwo augwan deb naugb dan terimda edebeij Lona Sug En Ecicugwen gin toua. 1:13 Dangga areg dan debedbed dou ban sug nosohob, kaba, ban bemobsara dau gin touwero. Doba sug ban bebedbed dara ban bedidib meijouhw dou lusud, kaba, dan besogwa deisa dan indugtemei mohw an gin aisa lusud toua terimda. Anai mer gin, kaba, eic lusud merdoc erleij icira gin namcir. Dara ban bemarges dau sug ban abdoc ebdebin an Krisdus Yesus dara ban abdoc gororougb lusud touwero. Doba ban bes agadgeij naugb sug ban baimo augwan gin terimda. Anai sug maman madag hom dara enohob, kaba, augwan gini eb naugb maman dag misen toua. 1:14 Dangga hang, ban bemeisan gurog dau Mer Geigouhw eisaugb Krisdus areg ELOHIM ogugwo dou ban gin touwero. Doba ogdoc Mena Gogoufu men goubesa gedig en moongga se maman mamdoc mesohob, kaba, ban beic naugb ban babehnehino dougwo areg se geica gedig mera eisaugb gin terimda. Dauntoba mer areibahau emahurim dara gin touwero. Doba ecabeci bebsugeb namcir. 1:15 Anai ban becinaga dau leng se Asia meren hancob, kaba, dag sud hom ingma emaimo dan toua deitero. Doba len laugwan larges dan debohob. Dara lahwai dau len gin, kaba, lan maroho dag Pigelus dara Hermogenes toua. 1:16 Doba Onesiporus an leng leigtou desij en se men tu, kaba, dan dacgeij maman Adehsud naugb en medoc eineg an len terimda. Anai len leic dan indoc eigouhw mougwa einyana dou dan sug nosohob. Dara sug dan indugwengga se tu gesisug se cinogo Roma gin, kaba, igdebes emeba en dau dan touwero. 1:17 Doba sug en edebeij suginohob, kaba, en eic mouwemougb esesa naugb en ehilon dan terimda en edesma dan toua. 1:18 Dara ban becinaga dau sug nanan nanugwengga se cinogo Epesus sug nosa, kaba, dag en emarges nanan deb touwero. Doba en eic mouwemougb esesa naugb en agauwesa nanan mougwa einyana touohob. Dangga hang, dan dacgeij maman Adehsud, dauntoba se Lona Sug En Ogod Aremer deinaugb lusud laugwan, kaba, dag en emogod gogom deinaugb en touwero, doba en medoc eineg an en namcir.

2 Timotius 2

2:1 Doba dan indisi, Timotius, naugb ban, kaba, ban bemeicara dag Pigelus dara Hermogenes dara len gus ginlo. Doba ban baiyan abdocesem naugb ban baimo Krisdus gin terimda. Anai en medoc eigouhw an maman. Hanoba en eic goubesa dou maman naugb gin toua. Anai maman madag hom dara enohob. 2:2 Dangga hang, ban bemarges dau sug ban besai Mer Geigouhw eisaugb Krisdus gin dou lusud touwero. Doba Mer Geigouhw areg ban bouman dau dan deseino lusud leinyana sug nosohob, kaba, ban bogugwo augwan gini dou lusud areg len laimo Krisdus dara merdoc hom dag misenohob len laugwan toua. Dauntoba sug len merdoc ouforoho se ginohob, kaba, len ledidib meijouhw dau Mer Geigouhw gini augwan asesa dou len gus toua deit. Anai dan dens dau augwan gini dou ban sug emen emeigdoumesa ban aboho naugb gin sug nosohob. 2:3 Dara sug lusud leic mog erij dou ban icira Krisdus gin, kaba, ban bemobsara dau en naugb ban bemaimo ara gus touwero. Doba sug ban bedag Krisdus Yesus men sadodor dag ginohob, kaba, ban bes agadgeij naugb ban baimo en se ucina gini dara ban abdoc hom namcir. Aninim dag emen toua emaimo ucina mog erij ginohob. 2:4 Anai gareg en edag sadodor, kaba, en emaimo leng gus se meren geicara hom toua deitero. Doba en eic mouwemougb esesa. Dauntoba men geicara augwan, kaba, eic men mougt mera medam medoc esgiraha an en dous. 2:5 Doba esloulougb dau sug ban besai mer Geigouhw eisaugb Krisdus gin dou lusud, kaba, dag ban bemedreg dau areg asesa ELOHIM enin medoc mes gin touwero. Doba ban baimo augwan gini dara ban abdoc edag beim an namcir. Anai sug ban besai Krisdus moro dou lusud, doba aban geicara edreg dau ELOHIM men gomnomna terimda, kaba, maireseb huhugb emeb naugb ban toua deitero. Aninim dag sud hom sug en obga bainyen len gus. Doba en edreg dau areg mougtir logod anohob, kaba, len lemecgun sogo mesira an merij geigouhw naugb lemeg se en mougt touwero. Doba len lowun en moho an gin toua namcir. 2:6 Dara ban bemaisan gurog dau sug ban besai Mer Geigouhw eisaugb Krisdus gin touwero. Doba ban beic ban abug erij naugb ban baimo ucina hom gin terimda. Anai sug ban beicara dangga namcir, kaba, aban siouwa emediyebeiya dau ban touwero, doba eb naugb ban. Aninim dag sud hom areg en eic mog erij naugb sug en eicara se men lo terimda, kaba, enin eng eic mera ino, aimo dau areg ELOHIM enin ogod an deinaugb en touohob. 2:7 Ban bauwam an areg dan den dou ban gragohob augwan deigeigouhw namcir. Anai sug ban beicara dag gin, kaba, aman Adehsud emeic mou ouforoho dou ban naugb ban becinaga meijouhw augwan asesa dag misen toues. 2:8 Dara ban abdoc moc dougwo Yesus Krisdus en edag Daud medebeito gedig ELOHIM eigdoumesa en dau gomom ucugwohob gin touwero. Doba ban abdoc eiseisan gin terimda. Anai sug dan desai Mer Geigouhw eisaugb Krisdus gin dou lusud, kaba, dan den dag gin dou len touohob. 2:9 Ogdoc gin, hang lusud lemeic mog erij dou dan. Dara len lemahud dan insira hwas darem dara kermum, aninim dag leng merug mog touohob. Doba ELOHIM en Mer Geigouhw eisaugb Krisdus gin, kaba, lusud lemohud gini dara kermumero, doba agaha becinten lo namcir. 2:10 Dangga hang, sug Mer Geigouhw gini agaha becinten lo dag ginohob, kaba, dan demarges dau sug dan daimo areg gogom icira gin touwero. Doba dan daiyan indocesem naugb dan daimo gin terimda. Dauntoba len gedig ELOHIM ouci len deb naugb enohob, kaba, sud hom ingma dau len en emomom touwero. Doba Krisdus eigdoc len laugwan dau sesar men gogom aud maireseb menau geb huhugb naugb len toua leigtou se gogouf cucugb se bogo beb huhugb namcir. 2:11-13 Anai sug maman maimo en aud gomomohob, kaba, maman mamireseb emeb dara en. Dara sug maman mas agadgeij terimda, kaba, maman mamedag mougt desij en toues. Dara sug maman maideido dougwo en, kaba, en aideido dougwo maman toua namcir. Doba sug maman mamaimo en dara mamdoc hom deitero, kaba, en emagag en medoc mes an men geicara hom an maman touwero. Doba en, kaba, en aimo men geicara augwan an maman terimda. Anai sug en emeicara emaimo dag ginero, kaba, en emedag ELOHIM toua deitero. Doba gini dag en aideido dougwo men gobob namcirohob. Areg dan dog gin, kaba, ban bod abina debsa, anai augwan gini asesa dag misen namcir. 2:14 Dangga hang, ban bemarges dau sug ban bens areg graga augwan asesa dou aban lusud touwero. Doba ban besulou len an gin ucucugb. Dauntoba len merdoc emougworo, doba len merdoc eiseisan gin terimda. Hanoba ban ben dougwo len se goubesa namcir toua. Dauntoba len lemenara lemaisedim icira ara moho hom yom men meijouhw terimlo. Doba len larges dau gin namcir. Anai sug lusud louman dau gin, kaba, emousa len naugb len lemera mera geigouhw touwero. Doba ahwan len naugb len lobsara dau Krisdus dous. Dara ban ben dou len dag areg ban besulou len an gin, kaba, aninim dag deseino ELOHIM touohob. Dauntoba len lecinaga dag areg ban ben gin, kaba, misen namcir. Dara len lahau an dougwo toua. 2:15 Doba naugb ban, kaba, sug ban besai Mer Geigouhw eisaugb Krisdus dou lusud, kaba, ban bebehnehino banin abdoc mes, dauntoba ban bemeic areibahau mer bemahurim darero. Doba ban besai augwan gini se geica mogud dou len dous. Anai sug ban beicara dag gini, kaba, ELOHIM eigdoumesa ban aboho an gin namcir. Hang igdebes emeba ban dau gin touwero. 2:16 Dangga hang, ban bemaimo leng lenara laisedim dara lenara lauwim eisaugb ara moho hom yom gin terimdero. Doba ban basid banin dau len ingga namcir. Anai meren geicara gin, kaba, emahwan len naugb sug len laimo ELOHIM en mer dara lesijaresa en touwero, doba ahwan len naugb len ledreg dau en mer eiseisaugb bedreg dau mohw deit. 2:17 Hang meren gebedbed gin, kaba, edag ugwar bet lusud merdoc mes. Hanoba agaha becinten lusud laugwan toua namcir. Lahwai dau leng leineg dau areg se geica aud mer areibahau ginohob, kaba, lan maroho dag Himeneus dara Piletus. 2:18 Anai lan lan dougwo lusud, landagai: Maman mamaisa dau gomom se lona daiyamo gacin deitero, doba ouwa dau mamanohob. Anai sug gembala ogun maman se duhu, hanoba maman maisa dau duhu ucugb, kaba, gini aninim dag maman maisa dau gomom ucugb touohob. Dangga maran gebedbed gareibahau gin, kaba, eic dag merug hosa dau leng Krisden len merdoc emebdebin an Krisdus dag misen toua deitero. Doba len lobsara dau enohob. 2:19 Doba mamang Krisden misen, kaba, gembala areibahau lemougdud mamanero. Anai ELOHIM en ogo maman dag buc mandeijohob. Hang emesa se gototo namcir. Dara en og se buc gini dag ouma debin maman touohob, endagai: Dang, Adehsud, dan decinaga indan logodeh len laugwan dag misen namcir. Anai dan dedag meren mougt mera medam naugb lenohob. Dara en og deit, endagai: Gareg en eigdoumesa dang, Adehsud, dan indoho dag men mougt mera medamohob, kaba, dan douwan naugb en emaimo sesar toua deitero. Doba en eineg dau augwan namcir. 2:20 Augwan gini toua, aninim dag tu medam hom. Anai se tu gouji hom gin, kaba, debecij dau emas dara perag emeb se dousero. Doba debecij dau sogo dara cinogo toua inggeb se tu hom gini. Dara debecij gedig mera eisaugb mogud, kaba, emeb se tu gin touwero. Doba debecij gedig mera ouwada, kaba, einyana ahurim se tu hom gin toua. 2:21 Dangga sug sud hom emeigtou desij debecij mera ouwada gin deitero, doba en asid enin dau augwan gin namcir, kaba, en edag debecij gedig mera eisaugb mogud dous. Hanoba men mougt mera medam ouci en deb naugb aremer geigouhw augwan toua. Anai en edag debecij gecabeci naugb enohob. 2:22 Dangga hang, ban bemaimo areg ban abdoc etrij icira gin touwero. Doba sug ban bedag lugdeh mesaba, kaba, ban beic abuwemougb esesa naugb ban baimo areg asesa ELOHIM enin medoc mes gin dous. Dara ban bemobsara dau sug ban abdoc ebdebin an Krisdus touwero. Doba ban bes agadgeij naugb ban baimo en terimda. Hanoba ban becgun ban absira naugb ban abdoc gororougb len gus. Dara ban abdoc dag hom dara laugwan toua namcir. Dara ban bemeicara bemaimo dangga dou banin dousero. Doba gareg en aimo maman Adehsud dara medoc hom dag ginohob, kaba, ban bedag hom dara len naugb yen yacgeij en. Dauntoba en ousa yen se aremer augwan gin toua. 2:23 Dara ban bemaimo leng meru edgom dara meru emaiyero sug len lenara merir edregim icira ara moho hom yom touwero. Doba ban basid banin dau len namcir. Anai meren genara gin, kaba, eic dag lusud lenara merir edregim icira dous. 2:24 Doba maman Adehsud, kaba, en emouwan naugb men sogougb emenara emaisedir touwero. Doba en ouwan naugb men sogougb gini en enara dara mer arjaga dou lusud laugwan dous. Dara sug en esai Mer Geigouhw eisaugb Krisdus dou lusud, kaba, en emesai gin augwougb dou lusud touwero. Doba en mou ouforoho naugb en ens meijouhw augwan asesa dou len. Hanoba en eigtou ateteij len se aremer augwan gin toua terimda. 2:25 Dangga toua, sug en owun leng lohoiya en mer eisaugb Krisdus an meren geicara, kaba, en emenara dara mer mog mog dou len touwero. Doba en ens meren geicara gecgu gini dara merdoc arjaga dou len dous. Dauntoba edebeij lona hom, kaba, ELOHIM eic cumougt dou len naugb len lesga meren sesar moho asesa dou en. 2:26 Hanoba sug len lecinaga areg se geica augwan dag misen touohob, kaba, len lemeb se Bilis men digoro toua deitero. Doba edeinyum naugb sug len lesga lenin dau touei? Era, naroei? Anai sug nosa, kaba, en agaigeij len. Hanoba len laimo en aud areg en arougb len an gin toua namcirohob.

2 Timotius 3

3:1 Doba edebeij Lona Sug Ouwedoc gin, kaba, gogom medam eb naugb mamang Krisden toua deit. Hang dan demouwan naugb ban abdoc moc dougwo gin touwero. Doba ban abdoc eiseisan gini terimda. 3:2 Anai se Lona ingga, kaba, lusud leinyana len lemed len gus an ara ara toua deitero. Doba len merdoc gororougb lenin dous. Dangga hang, len lemousa lusud touwero. Doba len lagungun len an meren aremougb dau len terimda. Anai len merdoc etrij icira gin namcirohob. Dara len merdoc emarjaga touwero. Doba len merdoc agas namcir, kaba, len leimiman lenin an meren geicara deseino lusud. Hanoba len lemeigdoumesa lusud gus len meroho touwero. Doba len lowun len meroho toua terimda. Hang len lemaimo merner dara merimir len merir an areg len larougb len an gin touwero. Doba len lohoiya len merir. Dara len lemesijaresa ELOHIM touwero. Doba len merdoc esdigeij en mer an men geicara augwan toua namcir. 3:3 Dangga len merdoc emeineg an lusud touwero. Doba len merdoc agadgeij an len, hanoba len lemaigdougwo meren aremer. Dara len lemeic gesgigouhwesa dou len touwero. Doba len lecic len meroho gouhw genes dous. Dara len merdoc emagadgeij dau areg gecgu touwero. Doba sug len merdoc etetaha naugb len laimo ara ara aibibrida dag ginohob, kaba, len merdoc oung mogo naugb len leic gogom dou len gus toua terimda. Hang len lemouwan naugb len lemaimo areg geigouhw touwero. Doba len merdoc esdigeij gin namcir. 3:4 Hang maman mamod mamina debsa len an areg len len dou maman touwero. Doba maman mamdoc obsara dau gin namcir. Anai areg len len gin, kaba, augwan dag augwougb dous. Dara len lemed aremeijouhw daum toua habero. Doba sug len leigdoumesa lenin meroho agas naugb augwanohob, kaba, len merdoc agas naugb len laimo areg len louwan augwan toua dedemeda terimda. Dangga len merdoc gororougb ELOHIM touwero. Doba len merdoc gororougb areg eic len merdoc eigouhw dou len se cinogo gin dous. 3:5 Hang len lemouwan naugb ELOHIM men goubesa arautut len aud areg gedag beim touwero. Doba len laimo en an areg geb ainyes gin dous. Sug len leicara dag gin terimda, kaba, ban bemaimo len se meren geicara gin touwero. Doba ban basid banin dau len namcir. 3:6 Ligbum dau len gin, kaba, len ledu len meraga naugb len leinesa lusud gus meren tu aud ligida. Hanoba len lagaigeij len dag meren sogougb ogdoc areg len lebedbed gin dou len toua. Anai ligida gin, kaba, len lemaiyan merdocesem dougwo areg gecgu touebma. Doba len merdoc etrij icira ara ara namcir, kaba, ahwan len aud areg gecgu einyana gin touohob. 3:7 Dangga hang, len louwan naugb lusud gus lens ucina dou len. Dauntoba sesar men gogom emeb naugb len toua deitero, doba ediyebeiya dau len toua. Anai len merdoc ogod len an meren sesar gin terimdohob. Dobnaro. Len lemecinaga ELOHIM men ucina naugb sug en eigdoc len dau sesar men gogom touwero. Doba len meru emaiyero dangga terimda. Anai areg gembala areibahau len lebedbed dou ligida gin, kaba, dag mer areibahau dous. 3:8 Dara len lemaugwohosa ligida gin dousero. Doba gareg en esai mer misen eisaugb Krisdus dou lusud, kaba, len lenara laugbtarera dougwo len merir an mer misen gin toua terimda. Anai len lemaimo ucina se geica gin deitero. Doba len lobsara dau gin namcirohob. Hang eic dag len mersdemaga emesgiraha touwero, doba dag embreij dous. Augwan gini aninim dag Musa sug en esai ELOHIM en moro dou Piraun sug nosa. Anai se lona ingga, kaba, lasud lahwai lan maroho Yanes dara Yambres lan lamenara lamouma debin Musa en mer an areg en esai gin touwero. Doba lan lanara laugbtarera dougwo Piraun mebes an gin toua namcir. 3:9 Dobnaro. Leng areibahau gin, kaba, len lemeicara dag gin an lusud terimda touwero. Anai cum, kaba, lusud lecinaga dag areg len lebedbed gin, kaba, en dau areg len meru edgom an dous. Aninim dag Yanes dara Yambres maran geicara ens ainyes dou lusud dag meren ganusbus augwan, kaba, dag misen touwero. Doba dag len leic naugb laugwohosa lusud dous an gin touohob. 3:10 Doba ban, kaba, ban becinaga dau areg dan desai dou lusud, dara indan geicara, dara areg dan decgun dan insira debin naugb dan daimo augwan dag misenohob. Dara banin beiya dag dan demobsara dau Krisdus touwero. Doba dan daimo en dara dan indoc augwan namcir. Dara dan indoc gororougb en dara lusud laugwan touohob. 3:11 Dara sug lusud leic mog erij dara gogom dou dan, kaba, ban becinaga dag dan demobsara dau gin touwero. Doba dan daiyan indocesem naugb dan daimo gin terimda. Anai ban becinaga dau sug dan desai Mer Geigouhw eisaugb Krisdus dou leng se Antiokia, dara Ikonium, dara Lisdra, kaba, dag len leic gogom medam dou dan, dara len logod dan dag dan dahauwa an touohob. Doba maman Adehsud, kaba, en eigdoc dan dau gogom augwan gini. Hanoba dan indina agau namcir. 3:12 Dara ucina mog erij gin, kaba, emeb dou danin dousero. Doba gareg en edag hom dara Krisdusohob, hanoba en ouwan aimo areg ELOHIM arougb en an gin toua terimda, kaba, en toua emaimo ucina mog erij gin dag misen toues. 3:13 Doba leng merug mog dara leng laugwohosa lusud gin, kaba, len lemobsara dau meren geicara gecgu gin touwero. Doba len leicara dangga beiseisaugb terimda. Dangga gini dag len lamaugwohosa lusud gus dousero. Doba len augwohosa lenin toua se ara gecgu namcir. 3:14 Doba, Timotius, naugb ban, kaba, ban bemobsara dau mer misen areg lusud lomnomnan dou banohob touwero. Doba ban becgun ban absira debin naugb ban baimo augwan gin terimda. Anai ban bogo augwan gini dag buc gototo se ban abdoc mes sug nosohob. Dara ban becinaga dau leng lesai mer misen gin dou ban, kaba, dag meren geicara, doba edag beim an gin touohob. 3:15 Dangga hang, ban abdoc moc dougwo areg len ledidib dau Surad Injil Meb Mohon dou ban sug ban bedag bugdehaba touwero. Doba ban abdoc eiseisan augwan gin toua terimda. Anai areg len log se Surad Injil Meb Mohon ginohob, kaba, eic mou ouforoho dou ban. Hang ban bemecinaga dag gareg en medoc ebdebin an Krisdus Yesusohob, kaba, en emomom touwero. Doba ELOHIM eigdoc en dau sesar men gogom augwan aud maireseb menau geb huhugb gin toua namcir. 3:16-17 Anai areg len log se Surad Injil Meb Mohon gin, kaba, len lemog dau lenin merdoc mes touwero. Doba len log augwan gini aimo dau areg ELOHIM enin eng ens dou len dous. Hang edeinyum naugb astesda dau ELOHIM men lusud maman maimo areg geigouhw augwan dag lusud mos an len gus toua terimda. Anai en mer gin, kaba, eic mou ouforoho dou maman naugb sug maman masai areg se geica dou len. Dara man dougwo len an meren sesar, dara marautut len asa ucina misen, dara mans dau areg asesa ELOHIM enin medoc mes augwan dag misen dou len toua.

2 Timotius 4

4:1 Timotius, sug Surad Injil Meb men goubesa edeinyum naugb maman dag ginohob, kaba, dan desulou ban deseino ELOHIM dara Krisdus Yesus dara goubesa namcir, naugb ban bemarges dau sug ban besai Mer Geigouhw eisaugb Krisdus gin dou lusud touwero. Doba sug aremer eb dougwo ban, era emeb dougwo banero, kaba, ban beic abuwemougb esesa naugb ban baimo gin terimda. Anai cum, kaba, Krisdus Yesus en ecicugwen naugb en ogod aremer deinaugb leng merireseb dara leng lomom. Dara en edag mougt mera medam naugb en oiharaga len laugwan toua deit. 4:2 Dangga toua, sug lusud leija meruwesa an ara ara eisaugb ELOHIM en mer gin, kaba, ban bedidib meijouhw augwan asesa dou len, dauntoba len merdoc eica namcir. Dara sug lusud lebesesar, kaba, ban ben dougwo len. Hanoba ban bahwan len naugb len laimo areg se geica ucugb. Dara gareg en medoc omomtom sug len laimo ucina mog erij gin, kaba, ban benara bad len merdoc mes, dauntoba len merdoc erleij toua deit. Dara sug ban bedidib mer misen men meijouhw gin dou len, kaba, ban abdoc emetrij naugb sug ban benara dedemeda dara mog mog dou len touwero. Doba sug ban besai ELOHIM en mer gin dou len, kaba, ban beigtou bateteij len, aimo dau aban goubesa an len toua terimda. 4:3 Anai lona ebeij deinyorohob, kaba, naugb sug lusud lemouman areg geij merdoc erleij dou len deitero. Doba len merums ehigehi naugb len louman mer susugb deit. Hanoba len louci gembala einyana debinim naugb len lebedbed areg len merums ehigehi gin dou len toua. 4:4 Dangga hang, len loc dou merums dougwo areg se geica gin deit touwero. Doba len laijahasero icira areg lusud lecic dag huhugb mer gin dous. 4:5 Doba naugb ban, kaba, ban bemarges dau sug ban besai Mer Geigouhw eisaugb Krisdus gin touwero. Doba areg ELOHIM arougb ban an ginohob, kaba, ban baimo augwan gini dara ban abdoc augwan namcir. Dangga hang, ban absdemaga emembreij icira ara ara hom touwero. Doba se aremer augwan, kaba, ban abu aiso augwan deigeigouhw toua. Dara ban bemahau dau sug ban baimo ucina mog erij icira sug ban besai Krisdus moro gin touwero. Doba ban baiyan abdocesem naugb ban baimo gini toua terimda. 4:6 Anai dan, kaba, lusud lesedeb dan naugb sug len leic gomom dou danohob. Doba meren geicara gin, kaba, aninim dag len leic dan dag gauwaharo dou ELOHIM dous. Hang indan lona naugb sug dan deihwededau sugini aud bogo, kaba, ebeij deinyor namcir touohob. 4:7 Anai dan demedis dau ucina aud maireseb menau geb huhugb gin touwero. Doba dan decgun dan insira dara dan daiyan indinesem naugb dan dobgasa ucina gini terimda dan dedebeij usohob. Dara dan demobsara dau sug dan indoc ebdebin an Krisdus gin touwero. Doba dan daimo en dara dan indoc hom toua namcirohob. 4:8 Hang maireseb menau geb huhugb gini, kaba, emediyebeiya dau dan touwero. Doba sug dan daimo areg asesa ELOHIM enin medoc mes dag ginohob, kaba, maman Adehsud emeic maireseb gini se Lona Sug En Ogod Aremer Aga Lusud laugwan dou dan toues. Anai en, kaba, en emobsara aud sud hom touwero. Doba en ogod aremer augwan dara medoc edag beim an lusud laugwan namcir. Dara en emeicara dag gini dou dan dousero. Doba gareg en medoc ebehibeh naugb en sug en ecicugwen, kaba, maireseb menau geb huhugb gini emediyebeiya dau en touwero. Doba maman Adehsud emeic dou en se Lona ingga toues. 4:9 Dangga sug ban becinaga dag lusud lesedeb naugb len leic gomom dou danohob, kaba, ban bemeigtou bemateteijlo. Doba ban beijeijo dedemeda sugin toua. 4:10 Anai Demas, kaba, en medoc etrij icira areg geb se cinogo gin ucugb. Hang en emousa dan deitero. Doba sug en ohw en medigo dou danohob, kaba, en eihwedig cinogo Tesalonika dau dan touohob. Dara Kresges en, kaba, en eihwedig leng Galatia meren hancob. Dara Titus en eihwedig leng Dalmatia meren hancob toua. 4:11-12 Doba Tikikus, kaba, dan desa en aud ban dig cinogo Epesus sungga naugb en eperwei ban abuhw. Dangga hang, sug ban ben aud dan, kaba, ban bahwan Markus teitei naugb en ousa dan an ara ara toua. Anai Lukas enin dous eng eigtou desij dan deb gini. 4:13 Dara ban bodo indan sansun gesrougb gedig dan darges se Karpus men tu se Troas, dara indan surad dau mangkerum augwan toua. Doba areg gesloulougb edreg dau areg gus augwan namcir, kaba, dag ban bodo indan surad dau aremeta mos hom naugb dan dous. 4:14-15 Doba ban abires badeijlo dougwo sud hom, moho Aleksander, gedig en mou ouforoho naugb en esinsin ara ara dau kermum gohoseri en namcir. Anai en, kaba, en ehigdud maman icira sug maman masai Mer Geigouhw eisaugb Krisdus dou lusud terimda. Hang en eic gecgwan dan mougwa einyana touohob. Doba maman Adehsud enin, kaba, en emauni men geicara gecgu gini ucugb dou en toues. 4:16-17 Doba eisaugb dan insir leng Krisden sugin, kaba, dan dacgeij ELOHIM dauntoba en emowun len meroho an meren geicara dou dan touwero. Anai sug dan denara an danin dou leng Roma meren mougt mera medam sug aimougtut gin, kaba, sud hom ingma dau len en emouma debin dan indir an areg dan den dou en touwero. Doba maman Adehsud enin dous eng moongga dara dan. Len gus, kaba, len laugwan lougbdedau dan namcir. Hanoba en eic goubesa dara mou ouforoho dou dan naugb dan desai Mer Geigouhw eisaugb Krisdus men meijouhw augwan asesa dou leng medigo Yesus len laugwan toua. Hang dan dobsara se len merisira mes namcir. Doba maman Adehsud enin eng eigdoc dan indina agau ucugwohob. 4:18 Dara en emeigdoc dan dau len gin merisira mes dousero. Doba en eseyeiyo dan dougwo len gus meren geicara gecgu augwan. Hanoba en ahwan dan dara dan indina agau se bogo naugb en oiharaga dan sungga toua namcir. Dangga eigouhw naugb maman maigdoumesa en moho dara magahugouhw an en beb huhugb terimda. Augwan gini asesa dag misen namcir. 4:19 Ban ben dou Priskila, dara Akwila, dara leng leigtou desij Onesiporus se men tu dag len laugwan meriresi. 4:20 Erasdus eni moongga se Korintusaba. Tropimus, kaba, dan darges en se Miletus deb, anai arebeni. 4:21 Ban beijeijo dedemeda naugb ban bedebeij dan sugini sug igda goho dugurij gini emebijebma. Anai ebijohob, kaba, ban bemeisa ij sugin deitero. Eubulus, Pudens, Linus, Klaudia, dara leng Krisden gus gus sugin, kaba, len laugwan lou ban toua. 4:22 Maman Adehsud Yesus Krisdus eseyeiyo ban dougwo augwan ucucugb terimda. ELOHIM enin eng medoc eineg an yen yaugwan sungga toua.

Titus 1

1:1 Surad gini dau dang, Paulus, anai ELOHIM enin eng eigdoumesa dan indoho dag men sogougb. Hanoba en arougb dan naugb dan desai Mer Geigouhw eisaugb Yesus Krisdus dou lusud laugwan toua. En ouci dan dag gini naugb dan dousa ELOHIM men lusud, dauntoba len lemobsara dau sug len merdoc ebdebin an Krisdus touwero. Doba len laiyan merdocesem naugb len les agadgeij namcir. Anai en ouci len debinim naugb enin dau sug acgunog ginohob. Hang en arougb dan naugb dan dedidib dau en mer areg maman mamdoc ebdebin anohob meijouhw augwan asesa dou len. Dauntoba se meren geicara augwan, kaba, len lesogwa deisa ELOHIM en mohotimei mohw an men geicara augwan toua. Anai en mer gin, kaba, geica namcir. 1:2 ELOHIM ouwan naugb dan deicara dangga dou men lusud, dauntoba sug len lecinaga areg se geica dag ginohob, kaba, ousa len naugb len lemarges dau sug len lod merna debsa en an maireseb menau geb huhugb gin touwero. Doba len les agadgeij terimda. Anai augwan gini dag buc gototo namcir. Dara maireseb menau geb huhugb areg ELOHIM os ginohob, kaba, en emos menenau touwero. Doba en os augwan gini sug en emahasesei cinogo dara bogo touebma. Hang misen namcir. Anai ELOHIM gin, kaba, en emereiyara mougwa hom touwero. Doba areg en os gin, kaba, dag misen dous. 1:3 Dangga hang, edebeij lona sug ELOHIM enin medoc mes edug se ginohob, kaba, en esa Krisdus se cinogo gini naugb en esai areg ELOHIM os dou maman eisaugb maireseb menau geb huhugb augwan dou maman toua. Dau, kaba, ELOHIM ogugwo areg en os gini se dan insira. Hanoba en arougb dan naugb dan desai dou lusud laugwan toua. Anai enin eng sud hom gedig en eigdoc lusud laugwan dau sesar men gogom aud maireseb menau geb huhugb gin dous. 1:4 Dan dog surad gini dou bang, Titus, anai sug nanan nahwas nandoc ebdebin an Krisdus dag ginohob, kaba, ban bedag dan indisi misen touohob. Dangga hang, dan dacgeij maman Mamina ELOHIM dara Krisdus Yesus Gedig En Eigdoc Maman Dau Sesar Men Gogom Augwanohob naugb lan mardoc an ban. Dara lan laseyeiyo ban dougwo areg gecgu augwan toua terimda. 1:5 Dan darges ban se Lomos Kreta deb, dauntoba sug ban bogod aremer gus gus augwan dauwohob, kaba, ban beigdoumesa lusud merug hosa dag mougt se astesda cinogo sug tuari ebsa augwan gin toua. Anai gini aimo dau areg dan darougb ban an sug nosohob. 1:6 Dangga sug ban beigdoumesa mougt naugb len, kaba, ban beiya dag lusud lemowun en moho an men geicara hom touwero. Doba augwan edag beim namcir. Anai gareg en esedougwo ELOHIM men goucimdeb, kaba, ELOHIM emouwan aremer hom emdagunya dau en touwero. Doba men geicara augwan dag lusud merdoc esgiraha an namcir. Dara ban beiya toua dag en ogod ameiji dougwo mesouwa, era eic mesouwa ingma dara deitei? Era eic mesouwa hom dousei? Anai gareg en ogod ameiji dougwo mesouwa, hanoba en eic mesouwa ingma deit, era en eic mesouwa hwai, kaba, yen yemeigdoumesa en dag mougt touwero. Doba sud hom areg en eic mesouwa hom dous eng, kaba, edeinyum naugb sug yen yeigdoumesa en dag mougt. Dara en mehir, kaba, esloulougb naugb len lemogo ara gaihim. Dara len lemohoiya en mer touwero. Doba len merdoc ebdebin an Krisdus dag misen toua terimda. Dauntoba lusud lemowun len meroho an meren geicara hom touwero. 1:7 Anai sug sud hom en edag mougt mera, kaba, ELOHIM emouwan naugb lusud lemowun en an aremer hom, dara en medoc emagas, dara en emenara mog mog, dara en emeg ahwei mohu, dara en mesira emeijouhw naugb en emogod leng gus, dara en medoc emetrij naugb en emagungun ara ara dau len gus touwero. 1:8 Doba ELOHIM ouwan naugb mougt gin, kaba, en ebin lusud se men tu, dara en aimo areg geigouhw an len, dara en emobsara dou lusud dedemeda touwero. Doba en mou aiso aremer augwan deigeigouhwahabi, en emaimo toua. Dangga se men geicara augwan, kaba, en emaimo areg gecgu gin touwero. Doba en ebehnehino enin medoc mes dougwo augwan. Hanoba en aimo areg edag beim dara ecabeci an lusud toua terimda. 1:9 Dara ELOHIM en ouwan naugb sud hom gedig en edag mougt, kaba, dag en emobsara dau mer misen areg lusud lesai dou en sug nosohob gin touwero. Doba en es agadgeij se gin namcir. Anai sug en eicara dag gin, kaba, en mou ouforoho naugb en edidib mer misen gini meijouhw augwan asesa dou lusud. Dauntoba len merdoc erleij icira gin toua namcir. Dara en ens dou leng lohoiya en mer misen gin, kaba, dag areg len lebedbed gin, kaba, dag mer areibahau dous. Anai mer misen hom gin dous eng edag buc gototo namcir. Hang edeinyum naugb sug lusud lod merna deisa toua terimda. 1:10 En eicara dangga, anai leinyana, kaba, len lohoiya mer misen ginohob. Hanoba len lemaimo areg se geica gin toua deitero. Doba len merirs obdobdem an areg dag huhugb mer gini naugb len laugwohosa lusud dau areg se geica gin toua. Leng leicara dag gin, kaba, dau len gus dousero. Doba leinyana gougwa, kaba, dau leng Krisden dau leng Yahudi gin toua. 1:11 Dangga hang, ELOHIM emouwan naugb ban bemamsoho len gin deb touwero. Doba en ouwan naugb ban bosun len merirs dougwo namcir. Anai sug len lens dau areg edreg dau ELOHIM enin medoc mes dag gin terimda, kaba, emeic dag sud hom yom emobsara dau Krisdus dousero. Doba eic lusud leinyana an merihir len laugwan lobsara dau en namcir touohob. Dara sug len lebedbed gin, kaba, len lemebedbed dag mogud touwero. Doba len lebedbed mer areibahau dag huhugb gini naugb larei lusud an aremougb dous. Dangga hang, meren geicara augwan, kaba, emeigouhw touwero, doba ecgu namcirohob. 1:12-13 Augwan gini esogwa deisa areg sud hom gesai seiseij moro dau leng Kreta lenin, kaba, en ecic meijouhw dag gin deb sug nosa touohob, endagai: Leng se Kreta gin, kaba, len lereiyara dara lerba mohoisa ucucugb. Dara meren geicara augwan toua dag aremeta mog mog naugb laum ucucugb toua terimda. Hang len lemeic meruwemougb esesa se aremer augwan touwero. Doba len lasugrog naugb len letara laiyan se merinuhwa dous. Areg sud hom gesai seiseij moro en en ginohob, kaba, misen namcir. Dangga, kaba, ban beiya leng lobsara aud mer areibahau ginohob, kaba, ban bemenara dara ban abir arjaga dou len touwero. Doba ban benara se goubesa dou len. 1:14 Hanoba ban ben dougwo len, dauntoba len lemos debin leng Yahudi meren mer areibahau gedag huhugb gini. Dara len lemaimo len naugb len lemehig dau ara ara touwero. Doba ban ben dou len naugb len laimo areg se geica dous, dauntoba len merdoc erleij ucugb deit. 1:15 Anai gareg en medoc ecabecohob, kaba, en emowun areg ELOHIM esinsinohob gini hom dag ogor touwero. Doba en eigdoumesa augwan dag ecabeci naugb en namcir. Doba gareg en aimo areg gecgu ucucugb terimda, hanoba en medoc emebdebin an ELOHIM touwero, kaba, en emeigdoumesa areg ELOHIM en esinsinohob gin hom dag ecabeci touwero. Doba en owun augwan gini dag ogor dous. Anai areg len lauwam an dara areg len logod an se lenin merdoc mes, kaba, augwan dag ogor namcir touohob. 1:16 Dangga toua, sug gembala areibahau gini len lenara se len merirs, kaba, len leigdoumesa len meroho dag len lecinaga ELOHIM dag misenohob. Doba se meren geicara, kaba, len lens lenin ainyes dag len lemecinaga areg asesa ELOHIM enin medoc mes augwan dag misen touebma. Anai se meren geicara augwan gin, kaba, len lemaimo ELOHIM en mer mougwa hom touwero. Doba len laimo areg geic en medoc ecgwan dous. Hang meren goubesa naugb sug len laimo areg geigouhw, kaba, hom toua ingmaro. Doba augwan ediyebeiya dau len namcirohob.

Titus 2

2:1 Doba ban, kaba, ban bebedbed areg geic lusud merdoc erleij dou len dous. 2:2 Dangga hang, ban besulou leng Krisden ligiji gedig len ledag lusudbodohob, kaba, dag len merdoc emetrij icira ara ara touwero. Doba len leses meraga se dous. Hanoba len meru aiso augwan dara geigouhw toua namcir. Anai sug len leicara dag gin, kaba, edeinyum naugb lusud leigdoumesa len meroho an toua. Dara ban besulou len, dauntoba len merdoc erleij icira mer misen gin toua. Hanoba len lemarges dau sug len merdoc gororougb lusud. Dara sug len laimo ucina mog erij gin touwero. Doba len les agadgeij se augwan terimda. 2:3 Dara ligida Krisden gedig len ledag lusudbodohob, kaba, ban besulou len, dauntoba len lemecic len gus meroho gohw genes. Dara len lemedag sogougb naugb ahwei mohu touwero. Doba meren geicara augwan aninim dag lusud gedig len laimo ELOHIM dag misenohob dous. 2:4 Hanoba len lomnomnan areg geigouhw dou ligida ligdob gedig len les mersuwohob. Dauntoba sug len lecinaga meijouhw augwan dau ginohob, kaba, len lemesenagan len mersuwer touwero. Doba len leicara edag beim an len dara len merihir laugwan toua terimda. 2:5 Dara len lesulou ligida ligdob gini, dauntoba len meru aiso aremer augwan. Dara meren geicara augwan toua ecabeci namcir. Dara len larautut len eisaugb lesara dara lohwara, dauntoba len lesedougwo meren tu toua dara geigouhw. Dara len lesulou len, dauntoba len lemeicara lemaihagab mersuwer touwero. Doba len lowun lenin merdoc mes arjaga deseino len terimda. Anai sug len leicara dag gin, kaba, lusud lemeic ELOHIM mer eisaugb Krisdus gin lemacecim touwero, doba len leigdoumesa len meroho an namcir. 2:6 Dangga toua, lugdeh mes, kaba, ban besulou len dara goubesa namcir. Dauntoba len lemaimo areg len merdoc emetrij icira touwero. Doba len meru aiso aremer augwan toua terimda. 2:7 Dara banin, kaba, aban geicara augwan toua obosboro dara edag beim an len gus. Dauntoba sug len leiya icira ban, kaba, len lesogwa deisa ban abohotimei mohw an gin toua namcir. Dangga toua, sug ban bedidib Krisdus mer meijouhw dou lusud, kaba, ban bemeicara ara ara bemahurim dara gin touwero. Doba ban bens areg se geica dara ban abdoc hom an dou len. Hanoba ban bemagahugouhw debin gin dou len touwero. 2:8 Doba ban benara se misen dou len dous. Anai sug ban beicara dag gin, kaba, emata lusud naugb len lemaijahasero touwero. Doba eic dag len merdoc erleij icira mer misen gin namcir. Dangga hang, len lemeic areg ban besai gin naugb len lemacecim touwero. Doba len lod merna debsa terimda. Dara eic igdebes dou maman moc toua. Anai maman aremer naugb sug len lowun maman mamoho an gin, kaba, hom touwero. 2:9 Dara leng Krisden gedig len ledag sogougb, kaba, ban besulou len. Dauntoba len lemohoiya meren mougtir merir touwero. Doba len laimo len merir se aremer augwan terimda. Hanoba len leic meruwemougb esesa, dauntoba meren geicara augwan, kaba, eic meren mougtir merdoc esgiraha dou len toua. 2:10 Dara ban besulou len, dauntoba len lemenara ucucugb, dara len lemesedi meren mougt men aremougb touwero. Doba se meren geicara augwan, kaba, len lens lenin ainyes dou len dag len lemeicara dara merdoc hwaiyero, doba len leicara dou len dara medoc hom dous. Dauntoba meren geicara augwan gini, kaba, emeic dag lusud lemesbes an ELOHIM en mer gin touwero. Doba len leigdoumesa gin moho agas terimda. Anai en, kaba, en eigdoc maman dau sesar men gogom augwan namcir. 2:11 Mamang Krisden maicara dag graga, anai ELOHIM ens en medoc ainyes dou lusud se cinogo augwanohob, dag en medoc an len naugb en eigdoc len dau sesar men gogom augwan toua. 2:12 Dangga hang, maman mameicara mamaihagab areg ELOHIM arougb maman an. Dara maman mamdoc emetrij icira areg geb se cinogo gin toua deitero. Doba sug ELOHIM medoc an maman dag ginohob, kaba, arautut maman naugb sug maman mabehnehino mamanin mamdoc mes dougwo areg gecgu. Hanoba maman maimo areg gedag beim dara obosboro an lusud. Dara areg ELOHIM arougb maman an sug maman mamugwengga se cinogo ginaba, kaba, maman masogwa deisa en mohotimei mohw an augwan toua terimda. 2:13 Dauwohob, kaba, maman maigtou mateteij. Hanoba maman maod mamina debsa Yesus Krisdus an Men Lona Geigouhw Sug En Ecicugwen gin toua. Anai en, kaba, en edag maman ELOHIM Gedig En Moho Agas Medam. Dara en edag Sud Hom Gedig En Eigdoc Maman Dau Sesar Men Gogom Augwan aud maireseb menau geb huhugb gin toua namcir. Dangga hang, se lona ingga, kaba, en ens enin ainyes dou maman. Dara men gogouf cucugb erbacec en toua. 2:14 Anai en, kaba, en eic enin maga bancoho aga maman dou ELOHIM naugb sug en eigdoc maman dau areg gecgu augwan ginohob. Hanoba en ouci maman dag enin men lusud gedig len lemaimo sesar deitero. Doba len leic meruwemougb esesa naugb len laimo areg geigouhw mogud dous. 2:15 Ban bens dau aremer graga augwan dou aban lusud naugb len louman. Hanoba ban besulou len naugb len laimo. Dara sug len ledreg gin, kaba, ban ben dougwo len, aimo dau goubesa areg ELOHIM ogugwo dou banohob an len toua. Anai dan demouwan naugb sud hom ingma emowun ban aboho touwero. Doba len laugwan leigdoumesa ban aboho an gin terimda.

Titus 3

3:1 Dara ban besulou aban lusud, dauntoba len lemohoiya mougtir dau pemerintah an meren gedeijan len merir touwero. Doba len lowun lenin merdoc mes arjaga naugb len laimo len merir aududi an areg len larougb len an gin toua terimda. Hanoba len lesedeb len merdoc mes naugb len laimo len se aremer geigouhw augwan toua. 3:2 Dara ban besulou len, dauntoba len lemecic sud hom ingma en moho gohw genes deseino lusud, dara len lemenara lemaised sud hom touwero. Doba len lowun lenin merdoc mes arjaga. Dauntoba meren geicara augwan, kaba, dag edouder an len gus toua namcir. 3:3 Ban besulou len dangga, anai sug nosa, kaba, maman geicara augwan toua dag leng meru edgom naugb maman mamaimo areg ELOHIM arougb maman an gin touwero. Doba maman mahoiya en mer naugb maman mabesesar terimda. Dara maman madag sogougb naugb maman maimo areg maman mamdoc etrij icira. Dara areg eic maman mamdoc oungmogo aud gini dous. Dangga hang, maman mamdoc edag beim an lusud touwero. Doba astesda lona, kaba, maman maho aremer debin len. Hang len merdoc mog mog an maman. Dara maman mamdoc mog mog an len toua namcirohob. 3:4 Doba ELOHIM ens enin ainyes dou maman dag en medoc eigouhw an maman. Dara en medoc gororougb maman. Anai en esa Krisdus ouwaden dau bogo se cinogo gini, hanoba en eigdoc maman dau sesar men gogom augwan aud maireseb menau geb huhugb gin touohob. Anai enin dous eng Sud Hom Geigdoc Lusud Dau Meren Gogom Augwan namcir. 3:5 Dangga hang, ELOHIM emeigdoc maman dau sesar men gogom ogdoc maman geicara geigouhw touwero. Doba en eigdoc maman dau sug en medoc eineg an maman gin dous. Hanoba en esa Mena Gogoufu se maman mamdoc mes naugb en edu areg gecgu dau maman. Dauntoba maman mamireseb dara maman gauwamara augwan toua dag mohon deitero. Doba sug Mena Gogoufu einesa maman mamdoc mes dag ginohob, kaba, en arautut maman naugb maman mamireseb dara maman gauwamara augwan dag menau namcir. 3:6 Anai sug Yesus Krisdus eigdoc maman dau sesar men gogom augwan dag ginohob, kaba, ELOHIM esa Mena Gogoufu gini batij bobdaga an men goubesa se maman mamdoc mes touohob. 3:7 Hang maman mamedag ELOHIM men moc toua deitero. Doba ogdoc Krisdus medoc an maman dag gin, kaba, ELOHIM eic gesgigouhwesa dou maman toua. Sug en eicara dag gin naugb mamanohob, kaba, maman macinaga dag maireseb menau geb huhugb areg en esedeb naugb maman, kaba, augwan emediyebeiya dau maman touwero. Doba maman maod mamina debsa en an gin terimda. Areg graga augwan, kaba, asesa dag buc gototo namcir. Hang ban bemeija abuwesa ginero, doba ban bod abina debsa gin terimda. 3:8 Dangga hang, ban bemamsoho gin deb touwero. Doba dan douwan naugb ban bou abiresa gini ucucugb dou aban lusud. Dauntoba leng gedig merdoc ebdebin an ELOHIM enohob, kaba, len lemaimo areg gecgu an lusud toua deitero. Doba len leic meruwemougb esesa naugb len laimo areg edag beim dara obosboro an len laugwan. Dauntoba len lesa mera geigouhw einyana icira len. Anai augwan gin, kaba, mera eisaugb toua namcir. 3:9 Doba lusud gedig len lenara laisedim eisaugb maman mamjemouwer, era malaikad len meroho, dara leng lenara lauwim dara lenara merir edregim eisaugb ara moho hom yom men meijouhw se Musa men gomnomna, kaba, ban bemaimo len aud ginero. Doba ban basid banin dau len. Anai meren geicara gin, kaba, aninim dag leng meru emaiyero dara leng meru edgom meren geicara dous. Hang emeic dag lusud lemera mera geigouhw icira gin touwero, doba augwan dag augwougb namcir. 3:10 Dangga toua, gareg en ouwan ekeba lusud se goucimdeb daum, kaba, ban ben dougwo en mougwa cuhwai dous. Dobnaro, kaba, ban basid en dau goucimdeb. Hanoba ban bemedag hom dara en touwero. 3:11 Anai ban becinaga dag sud hom gin, kaba, en emaimo areg se geica toua deitero. Doba en medoc mes eiyema an areg gecgu namcirohob. Hang ens ainyes dou enin dag ELOHIM men gogom eb naugb en touaba. Anai en emarges dau sug en ebesesar touwero, doba en eicara dangga terimda. 3:12 Dan desedeb Artemas, era Tikikus laingma laperwei naugb ban abuhw se lomos Kreta inggohob. Dangga hang, sug sud hom dau lan en edebeij banohob, kaba, ban bobursa en medigo dedemeda naugb ban bedebeij dan se cinogo Nikopolis gin toua. Anai dan dogod anohob dag dan deigtou sugini terimda igda goho dugurij augwan obsara dauwahabi, dan demeihwedig cinogo gus deita. 3:13 Doba sug Senas gedig en mou ouforoho se Musa men gomnomna, dara Apolos, lan ladebeij ban, kaba, ban abdoc an lan toua. Hanoba sug lan laihwededau ban deit, kaba, ban besedeb ara ara naugb lan. Dauntoba lan mardoc emecgu asa ucina touwero. Doba areg ban beic, kaba, edeinyum naugb lanohob. 3:14 Dara ban benara barautut maman logodeh, dauntoba len lemehig dau sug len lousa lusud touwero. Doba len leicara lainyeinyen naugb len laimo areg geigouhw an len terimda. Dauntoba sug len leiya, doba gareg men ara ara emedeinyum naugb sug en eigtouero, kaba, len toua lecinaga naugb lousa len. Anai dan demouwan naugb len lemaimo Krisdus men ucina augwougwero, doba len lera mera geigouhw an len gus toua. 3:15 Leng leigtou desij dan sugini, kaba, emen emaugwan emou ban. Dara ban ben dou nanan nansir gedig len merdoc ebdebin an Krisdusohob, kaba, dag emen emaugwan emou len toua. ELOHIM enin eng medoc eineg an yen yaugwan namcir.

Pilemon 1

1:1 Surad gini dau dang, Paulus gedig dan deigtou se tu gesisug icira sug dan desai Krisdus Yesus en moro dou lusud. Dan dog surad gini deinaugb emen emsi bang, Pilemon. Anai ban toua baimo emen naugb maman maugwan maicara dou maman Adehsud Yesus Krisdus ginohob. Dara maman mamaguna Timotius en toua ouma debin areg dan dog deinaugb ban gin toua. 1:2 Dara dan dog surad gini toua deinaugb leng Krisden gedig len loucimdeb se aban tu, dara maman mamdamouwa Apia, dara Arkipus gedig en ohw en mougt edug dara maman naugb Krisdusohob len laugwan toua. 1:3 Dangga hang, emen emacgeij maman Mamina ELOHIM dara maman Adehsud Yesus Krisdus naugb lan laic geigouhw dou yen. Dara lan laseyeiyo yen dougwo areg gecgu augwan toua terimda. 1:4 Astesda sug dan docuncum dou ELOHIM, kaba, dan indoc moc dougwo ban touwero. Doba dan den ban aboho dou en, hanoba dan den sijo dou en an ban toua terimda. 1:5 Anai dan douman dag ban abdoc ebdebin an maman Adehsud Yesus dag misen namcir. Dara dan douman toua dag ban abdoc gororougb ELOHIM men lusud len laugwan touohob. 1:6 Dara dan docuncum dou ELOHIM dau sug maman mamdoc dag homohob naugb sug maman mamdoc ebdebin an Krisdus, kaba, arautut maman. Dauntoba maman mamdoc eica geigouhw areg ELOHIM esedeb naugb maman se Krisdus augwan asesa edreg dau nosa deit. Anai maman mamdoc dag hom dara Krisdus ginohob. 1:7 Dangga dan indaguna, sug dan douman dag ban abdoc gororougb ELOHIM men lusud laugwanohob, kaba, eic dan indoc agahugouhw, hanoba eic gerleij dou dan namcir. Dara dan dousero, doba ELOHIM men lusud len laugwan, kaba, len merdoc eigouhw an ban medam touohob. 1:8 Sug ban abdoc dag hom dara Krisdus dag gin touohob, kaba, indan goubesa inggebga naugb dan darougb ban an areg ban baimo gin toua. Anai dan dedag ban abaguna misen se Krisdus gini. 1:9 Doba dan indoc gororougb ban namcir. Hang dan demarougb ban icira aban geicara hom touwero. Doba dan dacgeij dau ban dangga dous. Indan goubesa inggebga naugb sug dan darougb ban icira ara ara. Anai Krisdus Yesus enin eng eigdoumesa dan indoho naugb dan desai en moro dou lusud laugwan. Hang iteitogin, kaba, len louf dan se tu gesisug icira en mer gin touohob. 1:10 Doba dang, Paulus, dan demaimo indan goubesa gin an banero. Hang dan demagodgod ban an aban sogougb Onesimus gin touwero. Doba areg dan den dou ban eisaugb en gini, kaba, dag dan dacgeij dous. Anai sug dan deigtou se tu gesisug gin, kaba, dan dahwan en aud Krisdusohob. Hang se Krisdus, kaba, dan deija en dag dan indisi misen. Hanoba en toua eija dan dag mena misen toua. 1:11 Sug nosa, kaba, en moho emeigouhw deseino ban touwero. Doba en moho eiyema namcir. Doba iteitogin deit, kaba, en moho eigouhw deseino ban dara dan, nanan nahwasohob. 1:12-13 Dangga hang, dan indoc emagaigeij en namcir naugb en eperwei ban abuhw, dauntoba en agauwesa dan sug dan deisa tu gesisug sugini icira sug dan desai Mer Geigouhw eisaugb Krisdus dou lusud gini toua. Doba iteitogin, kaba, dan desa en aud ban ucugb dareg dan indoc en mohomoho ucan en namcir. 1:14 Anai dan demouwan naugb sug dan dagodgod ban anahabi, ban bemousa deisa dan indir an gin touwero. Doba dan douwan naugb sug ban abdoc esgiraha anahabi, ban abir emaijan dou dan toua. Hang aremer geisaugb Onesimus, kaba, dan demeic hom dau danin indoc mes touwero. Doba dan daimo dau areg banin beic dou dan dous. 1:15 Anai dan doudesa endag ELOHIM asid en se lona hom dau banohob. Dauntoba sug en esa en ucugb aud ban deit, kaba, en emasid enin dau ban deitero. Doba en eigtou desij ban beb huhugb namcir. 1:16 Dangga hang, iteitogin, kaba, ban bemeija en dag sogougb toua deitero. Doba edreg dau gin, kaba, ban beija en dag ban abagto misen se Krisdus, gedig ban abdoc gororougb en deitohob. Hang dan decinaga dau sug en ousa ban, kaba, dag ban bera mera einyana ogdoc en toua. Aninim dag dan dera mera einyana dau en touohob. Anai en emedag aban sogougb dousero, doba en edag ban abagto misen se maman Adehsud Krisdusohob. 1:17 Dangga sug ban beija dan toua dag ban abaguna se Krisdusohob, kaba, dan dacgeij naugb ban bebin en ucugb aud ban deit. Aninim dag ban bebin dan sug nosa touohob. Anai nanan nahwas naicara naugb Krisdus hom dous. 1:18 Toua sug en eicara ecgu an banohob, era aban aremeij ingmanggeb dou enaba, kaba, ban bog dan indoho debinahabi, dan demdoc dou bans. 1:19 Areg dan dos dou ban gin, kaba, dan dog ai danin insira dou ban toua, Dauntoba ban bemeija abdocesa touwero, doba ban abdoc eica gin namcir. Doba ban abdoc moc dougwo dag indan aremeij geb dou ban toua inggebga. Anai sug dan dahwan ban aud Krisdus sug nosa naugb en eic maireseb menau geb huhugb dou ban, kaba, maireseb gini dag indan aremeij dou banohob. 1:20 Dangga ban bemeic dan indoc momogo dou danero. Doba sug ban bedag hom dara Krisdus dag gin touohob, kaba, ban beic dan indoc eigouhw dou dan se aremer gin toua namcir. Hang ban bemohoiya dan indir an areg dan dacgeij ban an eisaugb Onesimus gin touwero. Doba icira sug ban beicara baimo maman Adehsud dag ginohob, kaba, ban bousa deisa dan naugb ban bebin en ucugb deit toua. 1:21 Dara dan decinaga dag ban bemaimo areg dan dacgeij ban an gin dousero. Doba sug dan desa surad gin dou banohob, kaba, dan dod indina debsa ban dag ban beicara baimo bedreg dau gin an en toua. 1:22 Dangga se lona sug ban bebin Onesimus en ucugwohob, kaba, ban besedeb dimei hom naugb dan toua. Anai dan dod indina debsa ELOHIM dau sug yen yocuncum dou en an dan terimda, kaba, en emesa dan aud ban toues. 1:23 Epapras, kaba en ou ban. Anai en moongga se tu gesisug desij dan icira Krisdus Yesus gin touohob. 1:24 Markus, Arisdarkus, Demas dara Lukas, kaba, len toua laugwan lou ban. Anai len toua, ledag hom desij dan se Krisdus men geicara ginohob. 1:25 Maman Adehsud Yesus Krisdus medoc eigouhw an yen yaugwan terimda.

Ibrani 1

1:1 Sug ELOHIM enara dou maman mamjemouwer sug nosa, kaba, en emens dau areg geb se enin medoc mes augwan dou len se lona homero. Doba en ekeba naugb en ens moho hom yom dou leng lesai en mer ginahabi, len lemens dau mer gini dou len ucucugb toua. Dara sug en enara dou maman mamjemouwer gin, kaba, en emaimo ucina hom an len touwero. Doba en enara ogdoc ara aingma aingma dou len toua. 1:2 Doba edebeij lona sug ouwedoc gin, kaba, ELOHIM en esa en mer dou maman ogdoc en Meisi mohora hom gini naugb en esai augwan dag misen dou maman deit. Anai areg ELOHIM en ahasesei dara en esinsin, kaba, en emesinsin hom dau eninero. Doba eni dara en Meisi, lan lahwas laohw mardocedoum naugb augwanahabi, en Meisi emesinsin toua. Dauwohob, kaba, ELOHIM esedeb en dara eigdoumesa en naugb en moho aiga augwan se Lona Gouwedoc gin toua namcir. 1:3 Anai en, kaba, ELOHIM men gogouf cucugb augwan ebsa eni. Dara en mog toua dag ELOHIM teiteiyohob. Hanoba en mer ogod an deb toua. Dauntoba areg en ahasesei dara esinsinohob, kaba, emedregim touwero, doba ec dara gesgiraha terimda. Anai en mer gin, kaba, mobisamougb toua namcirohob. Dangga sug en eic en mogwihi bauwaharo dou ELOHIM naugb maman sesar augwanohob, kaba, en eisaugb dig bogo bedreg dau malaikad laugwan naugb en edeigtou desij ELOHIM se en mesira misen. Hanoba en edag mougt mera medam desij en toua. Anai ELOHIM gin, kaba, en mobisamougb edreg dau augwan namcir. 1:4 ELOHIM eigdoumesa en Meisi en moho naugb en eigtou se maija moc edreg dau malaikad laugwan dag gini. Anai en moho gedig ELOHIM eic dou en gin, kaba, agas medam edreg dau malaikad len meroho gedig ELOHIM eic dou lenohob augwan toua namcir. 1:5 Anai ELOHIM emenara dou sud hom ingma dau men malaikad, endag: Se lona gin, kaba, ban bedag dan Indisi. Hanoba dan dedag ban Abina. Dara en emenara eisaugb men malaikad hom ingma dag cum, kaba, en edag en Mena dara en edag en Meisi mougwa hom touebma. Doba en enara dag gini dou en Meisi mohora hom gini dous. 1:6 Dangga edebeij lona sug ELOHIM esa en Meisi mebin mohora hom gini se cinogo, kaba, en arougb len, endagai: Dan douwan naugb indan malaikad yen yaugwan yesijaresa dan Indisi hom gin terimda. 1:7 Doba eisaugb men malaikadir gin, kaba, ELOHIM owun len meroho dag gini, endagai: Dan dos len laugwan dag loungmen mohora dara smougb mouf, anai len laugwan ledag sogougb desij danohob. 1:8 Doba eisaugb en Meisi, kaba, ELOHIM eigdoumesa en moho aninim dag enin touohob. Hanoba en enara dou en, endagai: Areg ban boiharaga, kaba, augwan emediyebeiya dau ban touwero. Doba eb naugb ban beb huhugb namcir, anai ban aboho toua bedag ELOHIM danohob. Dara ban bemaimo ucina agabgeb an lusud touwero. Doba areg ban boiharaga gin, kaba, ban baimo ucina edag beim an len dous. 1:9 Anai ban abdoc erleij naugb ban baimo areg asesa danin indoc mes terimda. Doba areg gecgu, kaba, ban abdoc esdigeij gin namcir. Dangga hang, dan demeigdoumesa ban aboho agas medam edreg dau ban absir len laugwan. Dauntoba ban abdoc agahugouhw an gin toua terimda, anai dan dedag aban ELOHIM dag misenohob. 1:10 Dara ELOHIM emeigdoumesa en Meisi en moho aninim dag enin moho dousero. Doba en eigdoumesa en moho edag sud hom gahasesei augwan toua. Hang en og deb se Surad Injil Meb Mohon deb dag gin sug nosa touohob, endagai: Adehsud, banin dous eng bahasesei cinogo augwan deb sug acgunog. Dara bogo, kaba, ban bahasesei augwan dara banin absira touohob. Hang banin dous eng bedag mougt mera medam naugb augwan gin toua. 1:11 Dara areg ban bahasesei dara besinsinohob, kaba, cum, augwan ediyebeiya ucugb dangga. Aninim dag sansun sug lusud leg se merus terimda, kaba, emeb terberba touwero, doba cum, kaba, edugdug toua. Doba banin, kaba ban beis huhugb namcir. 1:12 Hang ban bemouwedoc dara bemeperwei touwero. Doba ban bebsugeb, dara ban abireseb huhugb toua. Doba areg ban bahasesei dara besinsin gin, kaba, cum, ban bodunggon augwan naugb berba dous. Hanoba ban beperwei augwan dag menau ucugb deit toua. 1:13 Dara ELOHIM enara dou en Meisi gin deit, endagai: Ban beigtou desij dan dig dan insira misen terimda dan dowun aban moc len laugwan dag hotingga leb tainya ban abohora nosahabi, ban bemedag mougt mera medam desij dan beb huhugb namcir toua. Doba dou men malaikadir, kaba, ELOHIM emenara dangga dou sud hom ingma dau len touebma. 1:14 Anai len, kaba, meren geicara dag ara dousa? Len, kaba, len ledag ELOHIM men sogougb gedig en esa len aud maman naugb len lousa maman. Anai maman, kaba, ELOHIM esedeb maman naugb en eic maireseb menau geb huhugb dou mamanohob.

Ibrani 2

2:1 Dangga hang, sug ELOHIM esedeb maman naugb maireseb menau geb huhugb dag ginohob, kaba, en emouwan naugb sug maman mamoc dou mamums dougwo mer misen areg len lesai dou maman sug nosa ginero. Doba en ouwan dag maman mai mamums naugb augwan gini dara geigouhw terimda. Dauntoba maman mamedreg dau usi maireseb menau geb huhugb gin touwero, doba maman madebeij namcir. 2:2 Anai gareg en emaimo ELOHIM men gomnomna areg en eic dou maman mamjemouwer ogdoc malaikad sug nosa ginero, doba en eicara baihagab terimda, kaba, len leic gogom dou en, aimo dau enin men geicara ingga an en toua. Anai ELOHIM ens ainyes dag areg en eic dou len gin, kaba, augwan se geica namcirohob. 2:3 Sug lusud leic gogom dou sud hom areg en edreg dau Musa men gomnomna dag ginohob, kaba, yen youdesa dau sug maman mamei mamums naugb ELOHIM en mer an maireseb menau geb huhugb mera eisaugb ginero, kaba, dag gogom emeb naugb maman touweroei? Naro. Maman mamarges dau gin touwero, doba gogom medam edreg dau gin eb naugb maman toua namcir. Anai en emesa en mer eisaugb maireseb menau gini dou maman emogdoc malaikad lenero. Doba maman Adehsud enin eng esai dau augwan gini teisis dou men logodeh sug aimougtutohob. Hang len lemesai mer gini dou maman. Dara len louma debin dag areg len lesai gin, kaba, augwan se geica namcirohob. 2:4 Anai ELOHIM enin eng aben gansins dara ganusbus einyana auma debin meren gebedbed gin toua. Hanoba en esa Mena Gogoufu se maman mamdoc mes naugb en eic aremer aingma aingma dag gansins debin gin dou maman toua, aimo dau areg enin ouwan dous. 2:5 Dangga hang, naugb maireseb menau geb huhugb gin, kaba, ELOHIM emeigdoumesa malaikad hom ingma edag mougt mera medam naugb ginero. Doba en eigdoumesa maman eng madag mougt mera medam naugb maireseb menau geb huhugb ginohob. Anai areg dan den dou yen graga, kaba, emeisaugb maman mamireseb se cinogo ginero. Doba eisaugb mamireseb menau gen daiyamo se lona gacin dous. 2:6 Augwan gini esogwa deisa areg sud hom, moho Daud, en erba Ugwaremer deb se Surad Injil Meb Mohon eisaugb maman deb sug nosa touohob, endagai: Adehsud ELOHIM, emen, kaba, emen emedag lusud misen dous. Doba ban abdoc eiseisan dara eineg an emen terimda. Hang ban bemeigdoumesa emen emoho agas medam deseino banohob. 2:7-8 Anai iteitogin, kaba, emen emoho eb tainya malaikadir len meroho dousaba, doba cum, kaba, ban besedeb naugb ban bogugwo aban gogouf cucugb ingma dou emen toua namcir. Dara ban beigdoumesa emen emoho. Hanoba ban beic goubesa dou emen naugb sug emen emedag mougt mera medam naugb areg ban bahasesei dara besinsin augwan toua namcirohob. Doba sug sud hom gerba Ugwaremer en enara dag ELOHIM eigdoumesa maman mamoho naugb augwan dag ginohob, kaba, gini meijouhw dag ara hom emeb naugb enin touwero. Doba augwan eb tainya mamanohob. Sug ELOHIM esedeb augwan gini naugb mamanohob, kaba, gin dag maman madag mougt mera medam naugb augwan dag misenohobei? Naro, maman mameiya augwan gini dag misen touebma. 2:9 Doba maman maiya Yesus dau sug en aimo ucina mog erij aud gomom naugb lusud laugwanohob, kaba, dag ELOHIM ogugwo men gogouf cucugb. Hanoba eigdoumesa en moho agas medam dag misen touohob. Anai ELOHIM owun en moho eb tainya malaikad len meroho dag gini cum cum dous. Dauntoba en omom naugb lusud laugwan, aimo dau areg ELOHIM en medoc esgiraha an ginohob. 2:10 ELOHIM ouci ucina mog erij aud gomom naugb Yesus dag gini, anai ucina hom gin dous eng edeinyum naugb sug maman mainesa bogo. Hang en emogod an deb naugb sug Yesus aimo ucina mog erij. Dauntoba sug en aimo ucina mog erij gini terimda sug ouwedocohob, kaba, en ahwan lusud leinyana naugb len leigtou desij en se men gogouf cucugb gin toua namcir. Anai ELOHIM gin, kaba, en ahasesei, dara en esinsin augwan. Hanoba en esedougwo augwan dara geigouhw toua, dauntoba ec dara gesgiraha namcir. Dangga hang, Krisdus enin eng edag sud hom geinoisa len se ucina gin naugb sug ELOHIM eigdoc len dau sesar men gogom augwan aud maireseb menau geb huhugb gin dous. 2:11 Sug en edu maman, hanoba en ouci maman debinim dag ginohob, kaba, maman mamedag susugb dau en toua deitero. Doba sud hom gedu len dara len gedig en edu lenohob, kaba, len laugwan Merna ELOHIM hom dous. Dangga hang, igdebes emeba en an len touwero. Doba en eigdoumesa len meroho dag en magtor dara medemeitor laugwan toua namcir. 2:12 Augwan gini esogwa deisa areg Yesus enara deb se Surad Injil Meb Mohon dou ELOHIM deb sug nosa touohob, endagai: Dan demens dau aban geicara augwan dou dan indagtor dara indameitor len laugwan. Dara sug len loucimdeb naugb leisa Ari, kaba, dan demeigdoumesa ban aboho deseino len toues. 2:13 Dara en enara deit, endagai: Danin toua dod indina debsa ELOHIM, bani, aninim dag dan indagtor dara indameitor len toua lod merna debsa banohob. Hanoba en enara ucan gin deit, endagai: Danin indugwenggini an indan logodeh gedig ELOHIM ban beic dou danohob, len laugwan toua. 2:14 Dangga hang, sug len gedig en eija len dag men logodeh len laugwan ledag lusud misen teiteiyohob, kaba, enin toua ouwaden dau bogo naugb en edag lusud misen desij len toua. En eicara dag gin, dauntoba sug en omom taiba sogo salib naugb meren sesarohob, kaba, en esma Bilis men goubesa augwan dau en. Dauntoba en emeic gomom dou lusud gin deitero, doba en arges dau len namcir. Anai sug nosa, kaba, Bilis gini en mobisamougb naugb en eic gomom dou len laugwan terimdohob. 2:15 Sug en esma Bilis men goubesa augwan dau en dag ginohob, kaba, Bilis emagaigeij len dag sogougb toua deitero. Doba Krisdus eigdoc len laugwan dau en mesira mesohob. Anai se meren lona augwan, kaba, len lahau dau sug en eic gomom dou len. Hang emeic dag len lemedag sogougb dou en toua terimda. 2:16 Sug en eicara dag ginohob, kaba, gini ens ainyes dou maman dag en emouwaden dau bogo naugb malaikadir touwero. Doba en ouwaden dau bogo naugb en eigdoc maman masud misen dous. Augwan gini esogwa deisa dau areg Yesaya en og deb se Surad Injil Meb Mohon deb sug nosa touohob, endagai: En emen naugb len gusero. Doba en en naugb en ousa Abraham medebeitor len dous. 2:17 Sug en en naugb en ousa Abraham medebeitor maman dag ginohob, kaba, esloulougb medam naugb en edag lusud misen, aninim dag en magtor dara medemeitor maman se aremer augwan. Dauntoba en edag maman Gembala Gesa Taij Moho Agas deseino ELOHIM naugb maman toua. Anai ucina gus naugb sug en ogod maman aremer deseino ELOHIM, kaba, ingmaro. Doba hom gin dous. Dara esloulougb naugb en emarges dau gin touwero. Doba en aimo augwan gini an maman dara en medoc hom. Hanoba en medoc eineg an maman toua terimda. Anai sug en eicara dangga, kaba, eic dag ELOHIM aigdougwo maman sesar. Dara en eic gesgigouhwesa dou maman ucugb toua namcir. 2:18 Dangga hang, sug Bilis ainyen Yesus enin, dara en aimo ucina mog erij dag gin touohob, kaba, edeinyum naugb en ousa maman sug Bilis ainyen maman toua. Anai en emobsara dou Bilis mougwa hom touwero, doba en es agadgeij namcirohob.

Ibrani 3

3:1 Dan indagunerij, dara dan indamouwerij se Krisdus, sug ELOHIM ouci yen debinim naugb enin, hanoba en eija yen naugb yen yaimo maireseb menau se bogo dag gin touohob, kaba, yen meigdoc emougwo Yesus gin touwero. Doba yen yehigdecin en an men geicara augwan deigeigouhw terimda. Anai ELOHIM esa en aud maman, dauntoba en edag Gembala Gesa Taij Moho Agas naugb en ousa maman se areg maman mamdoc ebdebin an ginohob augwan toua namcir. 3:2 Sug ELOHIM eigdoumesa en moho naugb ginohob, kaba, en emarges dau gin touwero. Doba en aimo areg ELOHIM arougb en an gini dara en medoc hom toua terimda. Aninim dag sug nosa, kaba, Musa emarges dau areg ELOHIM arougb en an touwero. Doba en esedougwo ELOHIM men tu dag leng Israel. Dara en agauwesa len laugwan dara en medoc hom an len touohob. 3:3-6 Doba men geicara augwan dou leng Israel gin, kaba, edag ELOHIM men sogougb dous. Hanoba en ouma debin areg ELOHIM esedeb naugb sug en ens dou lusud se lona daiyamo gacin ogdoc en Meisi gini augwan deb dou len deb sungga touohob. Doba Krisdus, kaba, en esedougwo ELOHIM men tu gini dag mougt mera medam, anai en, kaba, en edag ELOHIM Meisi misen namcirohob. Hang en emarges dau gin touwero, doba en esedougwo ELOHIM men tu gini dara en medoc hom an toua. Dara maman, kaba, maman madag ELOHIM men tu gin touohob. Doba esloulougb naugb maman mamobsara dau sug maman maod mamina debsa ELOHIM an areg en os dou maman gin touwero. Doba maman maic mamus naugb maman mas agadgeij se gin terimda. Anai sug maman mamdoc emebdebin an ELOHIM gin deitero, kaba, maman mamedag en men tu gin deit touwero. Doba maman maobsara dau en namcirohob. Dangga hang, sug Krisdus en edag mougt mera medam naugb ELOHIM men tu dag ginohob, kaba, eigouhw naugb maman maigdoumesa Yesus en moho agas medam edreg dau Musa en moho. Aninim dag lusud leigdoumesa sud hom gohud tu, en moho edreg dau tu gen ohud ingga toua terimda. Anai astesda tu, kaba, lemohud leninero. Doba sud hom ohud toua. Dara gareg en ahasesei dara esinsin augwanohob, kaba, ELOHIM enin dous. 3:7 Dangga hang, sug maman madag ELOHIM en men tu dag ginohob, kaba, maman mameic mamus dou ELOHIM sug en enara dou maman touwero. Doba maman mamus obsara naugb maman maimo en mer se aremer augwan toua terimda. Anai gini esogwa deisa areg ELOHIM esulou maman deb se Surad Injil Meb Mohon ogdoc Mena Gogoufu sug nosa touohob, endagai: 3:8 Se lona sug dan denara dou yen, kaba, yen meigdoc emaihagab dan indir, aninim dag yen meijemouwer sug nosa touwero. Doba yen yei meijums naugb yen yaimo areg dan darougb yen an gin toua terimda. 3:9 Anai se arisogomoc sud hwai, kaba, dan dens dau gansins dara ganusbus einyana dou len naugb len leiya touohob. Doba sug len lec se lomougwisa, kaba, len loududa dan naugb len leicara lainyen dan ucucugb terimda. Anai len louwan leiya dag indan goubesa edeinyum naugb lenei? Dara dan deic gogom do len naugb meren geicara gecgu touei? Era naroei? Hanoba len lemaimo dan indir touwero, doba len leic merus dou dan toua terimda. 3:10-11 Hang dan indoc esrougb medam an len toua terimda, kaba, dan dogod an dou len toua dag len lemeigtou debin len merug desij dan se indan uro mes touwero. Doba len leigtou dig medigo terimda dous. Hanoba dan dou dan indoho debin areg dan dogod an gin dou len toua. Anai dan denara se dan indoc mes endag len lemaimo indan ucina gin terimdero. Doba len merdoc oungmogo naugb len laijahasero dau dan namcirohob. 3:12 Dangga hang, dan indagunerij, dara dan indamouwerij, sug ELOHIM enara dag graga dou maman mamjemouwer sug nosohob, kaba, esloulougb medam naugb yen yemaimo areg gecgu dara yen meigdoc emaihagab areg ELOHIM arougb yen an gin touwero. Doba yen yebehnehino yenin meigdoc mes dougwo augwan gin namcir. Dauntoba yen yemeineg dara yen yemasid yenin dau ELOHIM Geis Huhugb gin touwero, doba yen meigdoc ebdebin an en terimda. Anai sug yen yeicara gecgu dara yen yaihagab en mer dag gin namcir, kaba, eic dag yen yemaimo en toua deitero. Doba eic dag yen yobsara dau en toua terimda. 3:13 Hang yen yemehig dau sug yen yenara yad yen meigdoc mes doum touwero. Doba sug areg lusud leija dag lona mohw hom geb naugb maman ginaba, kaba, yen yesuloum ucucugb terimda. Dauntoba sesar emaugwohosa yen, hanoba eic yen meigdoc oungmerema dougwo ELOHIM en mer gin touwero. Doba yen meigdoc ebdebin an en namcir. 3:14 Anai sug maman mamdoc emebdebin an en toua deitero, kaba, en moho emaiga maman touwero. Doba sug maman mamdoc ebdebin an en sug aimougtutohob, hanoba maman mamarges dau ginero. Doba maman maicara maimo dag gini terimda edebeij Lona Sug Ouwedoc gin toua, kaba, maman madag hom dara en toua namcir. Naro, kab, naro. 3:15 Dangga hang, yen yemaiyan meigdocesem naugb yen yeic meijus dou ELOHIM touwero. Doba sug yen youman en mer se lona mohw hom gin, kaba, yen yowun yenin meigdoc mes arjaga naugb yen yaimo en mer an areg en arougb yen an toua terimda. Augwan gini esogwa deisa areg sud hom, moho Daud, en erba Ugwaremer an deb se Surad Injil Meb Mohon deb sug nosa touohob, endagai: Sug yen youman ELOHIM en mer se lona mohw hom gin, kaba, yen meigdoc emagadgeij dougwo en mer gini aninim dag maman mamjemouwer sug nosa touwero. Doba yen yei meijums naugb yen yaimo en mer gini terimda. 3:16 Anai gara leng lohoiya ELOHIM mer sug nosa gina? Len gusei? Naro. Doba maman mamjemouwer gareg Musa einoisa len dau cinogo Mesir ginohob, kaba, len eng lohoiya en mer gin dous. 3:17 Dara gareg len leic ELOHIM medoc esrougb an len se arisogomoc sud hwai gina? Len gusei? Naro. Doba en medoc esrougb an maman mamjemouwer, anai len lebesesar an en terimda. Hang len laugwan lemomom deb se lomougwisa deb touohob. 3:18 Dara gareg ELOHIM ouwara dougwo len dag len lemeigtou debin len merug se men uro mesero gin toua? Len gusei? Naro. Doba en ouwara dougwo maman mamjemouwer hom gin dous. Anai len lemaimo en mer touwero, doba len leic merus dou en terimda. 3:19 Dangga hang, maman macinaga dag len lemeinesa se ELOHIM men uro mesero. Anai len merdoc emebdebin an areg ELOHIM enara dou lenero. Doba len lesbesan areg en os dou len gin namcir.

Ibrani 4

4:1 Doba areg ELOHIM os dou maman mamjemouwer naugb len leigtou debin len merug se men uro mes gin, kaba, augwan gini eb naugb maman touaba. Dangga hang, esloulougb medam naugb maman mamaimo maman mamjemouwer meren geicara, dauntoba maman mamohoiya ELOHIM en mer an gin touwero. Doba maman mabehnehino mamanin mamdoc mes naugb gin terimda. Dauntoba sud hom ingma dau yen, kaba, ELOHIM emowun en dau areg en os dou maman gini touwero. Doba edeinyum naugb sug ELOHIM ousa deisa en naugb gin toua namcir. 4:2 Anai lusud lesai ELOHIM Mer Geigouhw eisaugb geigtou debin mog gini dou maman. Aninim dag len lesai Mer Geigouhw gini dou maman mamjemouwer sug nosa touohob. Doba len, kaba, len merdoc emebdebin an areg len louman ginero. Doba len merdoc agadgeij naugb len leic merus dougwo gin terimda. Hang emedeinyum naugb sug len leinesa ELOHIM men uro mes gin touwero, doba len leigtou dig medigo namcir. 4:3 Doba maman, kaba, areg ELOHIM os dou maman mamjemouwer gin, kaba, maman macinaga dag en emeic augwan gini dou maman dag misen toues. Anai maman, kaba, maman mamohoiya en mer aninim dag lenero. Doba maman mamdoc ebdebin an en mer ginohob. Dangga hang, maman mameigtou dig medigo, aninim dag len ingga touwero. Doba maman mainesa ELOHIM men uro mes naugb maman maigtou debin maman mamug sungga toua namcir. Doba eisaugb maman mamjemouwer meren geicara gin, kaba, augwan gini esogwa deisa areg ELOHIM enara se Surad Injil Meb Mohon eisaugb len deb sug nosa touohob, endagai: Dan indoc esrougb medam an len, anai len lohoiya dan indir an areg dan dos dou lenohob terimda. Hang dan demouwara dougwo len dendag len lemeigtou debin len merug desij dan se indan uro mes beb huhugb touwero. Doba areg ELOHIM enara dou maman mamjemouwer gin, kaba, en emenara dou len sug en emahasesei dara emesinsin augwan touebma. Doba en enara dou len sug en arges en mesira dau augwan gini namcirohob. Hang uro mes naugb sug maman maigtou debin maman mamug se gin, kaba, toua inggebga naugb maman terimda. 4:4 Augwan gini esogwa deisa areg len log deb se Surad Injil Meb Mohon deb sug nosa touohob. Anai len lenara eisaugb lona gedig senggai se medagas hom, lendagai: Edebeij lona gedig senggai, kaba, ELOHIM en arges dau areg en ahasesei dara esinsin augwan namcir. Hanoba en eigtou debin en mog touohob. 4:5 Dara ELOHIM enin eng enara eisaugb uro mes gini se medagas hom toua deit, endagai: Len lemeinesa indan uro mes naugb sug len leigtou debin len merug desij dan beb huhugb touwero. 4:6 Dangga hang, naugb leng louman en mer aimougtut gin, kaba, ELOHIM ouf misis dougwo len. Anai len merdoc emebdebin an areg en os dou len naugb sug len leigtou debin len merug se men uro gin touwero. Doba len ledreg en mer gin namcirohob. Doba naugb len gus, kaba, ELOHIM emouf misis dougwo lenbuma. Doba en ec misis dau len naugb len leigtou debin len merug se men uro mes ginaba. 4:7-8 Sug ELOHIM ec misis naugb lingma deit dag ginaba, kaba, en esedeb lona mohw hom naugb len toua deitaba. Anai sug Yosua einoisa maman mamjemouwer naugb len leigtou debin len merug se cinogo Kanaan sug nosohob, kaba, ELOHIM enara eisaugb lona mohw hom se lona daiyamo gacin dag gin deitei? Naro, en emenara eisaugb lona mohw hom naugb lusud gus deitero. Doba en arges mers dau namcirohob. Anai areg en os gin, kaba, ebsugeb naugb lenohob. Dobnaro. Yosua, kaba, en emeinoisa maman mamjemouwer naugb len lemeigtou debin len merug se cinogo areg ELOHIM os dou len ginero. Hang arisogomoc einyana debin gin, kaba, ELOHIM arougb Daud naugb en erba Ugwaremer an areg dan dens dou yen gragohob deit, endagai: Irogini sug yen youman ELOHIM en mer, kaba, yen yemeic meijus naugb yen yemohoiya en mer gin touwero. Doba yen yowun yenin meigdoc mes arjaga naugb yen yaimo terimda. 4:9 Dangga hang, naugb ELOHIM men lusud maman, kaba, uro mes naugb sug maman maigtou debin maman mamug, kaba, inggeb naugb mamanaba. Aninim dag se lona gedig senggai, kaba, ELOHIM emeicara toua deitero. Doba en arges en mesira dau augwan naugb en eigtou debin en mog se lona gin touohob. 4:10 Anai sud hom areg ELOHIM ec misis dau en, hanoba en ousa deisa en naugb en einesa men uro mes gini toua, kaba, sud hom gini en emeic mog erij naugb ara ara toua deitero. Doba en eigtou debin en mog se ELOHIM men uro mes beb huhugb namcir. Aninim dag ELOHIM sug en ahasesei dara esinsin augwanohob, kaba, en emeic mog erij toua deitero. Doba en eigtou debin en mog namcirohob. Anai gini aimo dau areg en os dou mamanohob. 4:11 Dangga hang, sug misis ec naugb maman dag gin terimdaba, kaba, maman mamaimo maman mamjemouwer se meren geicara sug nosa ginero. Doba maman maic mamuwemougb esesa. Dauntoba maman mamdobsara taij dau ucina geihwedaud uro mes gini, aninim dag leng nosa ingga touwero. Doba maman mas agadgeij terimda naugb maman madeigtou debin maman mamug desij ELOHIM se men uro mes gini toua namcir. Anai leng nosa gin, kaba, len merdoc emebdebin an areg ELOHIM os dou len. Hang len lemeinesa men uro mes touwero. Doba len ledobsara deb taij dau ginohob. 4:12 Dara maman mamohoiya ELOHIM en mer gin touwero. Doba maman maimo augwan gini terimda. Anai en mer gin, kaba, edag maireseb dara mobisamougb edreg dau krawan mec ineinagas. Hang emogod an areg maman mamu en dou dara areg maman mauwam an, kaba, dag augwan gini eigouhw era ecgu dou maman toua. Anai en mer gin, kaba, men goubesa edeinyum naugb ekeba maman mamina dau mamin, dara maman mamori dau maman mamucdo toua namcirohob. 4:13 Dangga areg ELOHIM en ahasesei dara en esinsin ginohob, kaba, hom emecgoneh en mog dau en touwero. Doba augwan eb ainyes deseino en. Hang se Lona Gouwedoc gin, kaba, enin eng sud hom gedig maman mans aremeijouhw augwan asesa dou en toua namcir. 4:14 Sug uro mes naugb sug maman maigtou desij maman mamug eb naugb maman dag ginaba, kaba, maman mamarges dau areg maman mamdoc ebdebin anohob gin touwero. Doba maman maiyan mamdocesem naugb maman maimo augwan toua terimda. Anai maman Gembala Gesa Taij Moho Agas moongga naugb mamanohob. Hanoba en eisaugb dig bogo naugb en ogod maman aremer deseino ELOHIM beb huhugb namcir toua. En, kaba, eni Yesus gedig en edag ELOHIM Meisi mohora hom gin dous. 4:15 Dara maman Gembala Gesa Taij Moho Agas gin, kaba, Bilis ainyen en se aremer augwan, aninim dag en ainyen maman touohob. Doba en emobsara aud Bilis naugb en ebesesar mougwa hom touwero. Dangga hang, sug maman maobsara se sesarohob, kaba, en emehig dau maman touwero. Doba en medoc eineg an maman namcir. Anai en ecinaga dag maman goubesa naugb sug maman mas agadgeij dougwo Bilis, kaba, emedeinyumero, doba gurereito dous. 4:16 Sug Yesus medoc eineg an maman dag ginohob, kaba, maman mamahau dau sug maman man audi ELOHIM se men maija moc, moho medoc eineg an, gin touwero. Doba maman maic mamus naugb maman madebeij en. Dauntoba se lona sug aremer eb debin maman, kaba, en ousa maman an, aimo dau en medoc geineg an dara eigouhw an maman toua.

Ibrani 5

5:1 Dangga hang, maman mameigtou dau sug maman mamdebeij ELOHIM touwero. Doba maman madebeij en debinbin terimda. Anai astesda gembala gesa taij moho agas gedig ELOHIM ouci en, kaba, en ouci en dau lusud misen dous. Dauntoba en eic areg lusud leic dag mogud dara aremeta mogwihi bauwaharo dou ELOHIM naugb len toua. Anai en eperwei len meruhw deseino ELOHIM naugb ginohob. 5:2 Sug gembala gesa taij dau lusud misen dag gin dous, kaba, en medoc emagadgeij an en mesir gedig len lebesesar augwougb dara len laijahasero dau ELOHIM men ucina misen gin touwero. Doba en medoc arjaga an len namcir. Anai se aremer einyana, kaba, enin toua emaiyan medocesem dau touwero. Doba en obsara aud gin mougwa einyana touohob. 5:3 Sug en emes agadgeij dau sesar dag gin touwero, kaba, en emeic aremeta mogwihi bauwaharo dou ELOHIM naugb lusud meren sesar dousero. Doba esloulougb naugb en eic ingma dou ELOHIM naugb enin men sesar gin toua. 5:4 Dara sud hom ingma, kaba, en emeigdoumesa enin moho naugb en edag gembala gesa taij moho agas gini touwero. Doba ELOHIM enin eng eija en, hanoba eigdoumesa en moho naugb gin toua. Aninim dag sug nosa, kaba, Harun emeigdoumesa enin moho dag Gembala Gesa Taij Meren Mougt Mera Medam augwougb dau enin touwero. Doba ELOHIM enin eija en, hanoba eigdoumesa en moho naugb ginohob. 5:5 Dangga, kaba, Krisdus en toua emeigdoumesa enin moho dag Gembala Gesa Taij Moho Agas augwougb touwero. Doba ELOHIM enin eng eigdoumesa en moho naugb gini. Hanoba en enara dou en se Surad Injil Meb Mohon deb sug nosa touohob, endagai: Ban bedag dan Indisi. Hanoba se lona gin, kaba, dan dedag ban Abina toua. 5:6 Dara se medagas hom deit, kaba, ELOHIM enara dag gini dou en toua, endagai: Dan deigdoumesa ban bedag gembala gesa taij beb huhugb namcir. Aninim dag dan deigdoumesa Melkisedeg dag gembala gesa taij sug nosa touohob. Hanoba ban beicara augwan aninim dag men geicara gin toua terimda. 5:7 Sug ELOHIM eigdoumesa Krisdus en moho dag gembala gesa taij beb huhugb dag ginohob, kaba, en emarges dau sug en aimo ucina mog erij aud gomom touwero. Doba sug en moongga se cinogo gin, kaba, en owun enin medoc mes arjaga deseino ELOHIM naugb en aimo ucina gin toua terimda. Dangga hang, sug Yesus acgeij dau en, dauntoba en emomom terimdero, kaba, ELOHIM emoc dou moms dougwo en mer touwero. Doba en ouman en mer an gin toua namcir. Anai en emacgeij gin dareg en medoc emagasero. Doba en owun enin medoc arjaga naugb en acgeij augwan dareg eiyagarij dou en dous. 5:8 Hang en edag ELOHIM Meisi mohora hom dag misen namcir. Doba en owun enin medoc mes arjaga naugb en aimo ucina mog erij gin toua terimda. Anai gin, kaba, eic dag en aimo areg ELOHIM esedeb naugb enohob. 5:9 Dangga sug en aimo areg ELOHIM esedeb naugb en bedebeij sug ouwedocohob, kaba, en edag mebin naugb en eigdoc lusud leinyana dau sesar men gogom augwan aud maireseb menau geb huhugb gin toua. Anai len lemohoiya en mer touwero. Doba len laimo en an areg en arougb len an gin toua namcirohob. 5:10 Anai ELOHIM eigdoumesa en moho dag gembala gesa taij moho agas naugb len. Aninim dag en eigdoumesa sud hom, moho Melkisedeg, dauntoba en esa taij naugb lusud sug nosa touohob. 5:11 Dara eisaugb Krisdus en edag gembala gesa taij. Aninim dag Melkisedeg gin, kaba, meijouhw einyana ingma inggebga naugb dan dedens dou yen toua deit. Doba ogom naugb yen meiju obgesa, anai yen meigdoc eisem dougwo augwan ucugwohob. 5:12 Dangga hang, lona naugb sug yen yedidib meijouhw dau Surad Injil Meb dou len gus, kaba, edeinyumohob. Dobnaro. Esloulougb naugb sug sud hom edens dau ELOHIM en mer areg edag meiyo dou yen deitahabi. Anai yen yedag mahaniheni terimda. Hang emedeinyum naugb yen yet ELOHIM en mer gini dag ared misen touebma. Doba yen yeg en mer gini dag aring mohu dousaba. 5:13 Anai gareg en edag mahanihenaba, kaba, en emet ared misen touwero. Doba en eg arij mohu dous. Hang en mou emauti naugb sug en ecinaga areg geigouhw dara areg gecgu touebma. 5:14 Doba gareg en edag sud se Krisdusohob, kaba, en emeija mouwesa areg geigouhw dara areg gecgu gini toua deitero. Doba en mou auti naugb augwan namcirohob. Hang en emeg arij mohu touwero, doba en et ared misen mogud dous.

Ibrani 6

6:1-3 Dangga hang, areg emen emesai dou yen sug nosa dag yen yemaimo meijen geicara aud areg geic gomom dou yen toua deitero, doba yen yesga namcir dou Krisdus. Dara yen meigdoc ebdebin an ELOHIM. Dara areg emen emedidib dou yen eisaugb yedu meijaga, dara lusud logun yen se duhu, dara lob merisira deb se lusud merugt, dara areg emen emesulou yen eisaugb lusud leisa dau gomom dara sug ELOHIM ogod gomom, era eic maireseb beb huhugb dou lusud, kaba, yen yemauwam an augwan gin, dara yen yemogo dag buc gototo se yen meigdoc toua deitero. Doba sug ELOHIM en ouwan, kaba, maman maineg dau namcir. Anai areg graga, kaba, dag meiyo dous. Hanoba maman maic mamuwemougb esesa naugb maman maiji dag lusud mos se Krisdus gin toua terimda. 6:4 Maman maic mamuwemougb esesa dag gini, anai gareg en einesa ELOHIM men mouf, dara ELOHIM aigdougwo men sesar augwan dag mogud dau en, hanoba Mena Gogoufu einesa en medoc mes. 6:5 Dara en ecinaga ELOHIM en mer dara geigouhw namcir. Dara en ecinaga ELOHIM men goubesa naugb sug en oiharaga lusud ucugb ingma eb dou en touohob. 6:6 Doba cum, kaba, en ohw medigo dou areg en medoc ebdebin an ginohob ucugb deit, kaba, ELOHIM dara lusud len laugwan meren goubesa emedeinyum naugb len larautut en medoc mes, Dauntoba en esga men sesar dara ahau an dougwo toua deitero. Anai sug en ocirma ELOHIM Meisi dau enin medoc mes dag ginohob, kaba, gini aninim dag en etob en se sogo salib naugb lusud lesmesman en deitohob. Hang maireseb menau geb huhugb emeb naugb en toua deitero, doba ediyebeiya dau en namcir. 6:7 Anai sug los es se lo, doba cum, kaba, lisug mog dara ara mog mog gus augwan eiji dous, kaba, lona ebeij deinyorohob naugb sug ELOHIM ouwara dougwo lo gini. Hanoba en emesa smougb naugb smougb ait lo gin toua mor mor namcir. Anai lo gini era mera, doba mera gin emeigouhw naugb ara deita? 6:8 Doba sug los es se lo gini, hanoba aremec eiji borbesbes, dara era mera geigouhw naugb leng les lo gin toua, kaba, ELOHIM eic geigouhw dou lo gin terimda. 6:9 Dan indagunerij, dara dan indamouwerij gedig dan indoc gororougb yen, sug emen emenara dag gini dou yenohob, kaba, yen meigdoc momogo an gin touwero. Doba yen meigdoc ebtou namcir. Anai emen emecinaga dag yen, kaba, yen yemaimo len gus se ucina gragero. Doba yen yaimo maireseb menau geb huhugb ginohob. Hang emen emdoc eica dag yen yera mera areg geigouhw debin gin toua terimda. 6:10 Anai ELOHIM medoc edag beim. Hang en medoc moc dougwo meijen geicara dag yen yeic yen meijug erij naugb en, dara sug yen yousa men lusud gus dau nosa terimda iteitogin touwero. Doba en medoc eiseisan gin namcir. Anai meijen geicara gin, kaba, ens ainyes dag yen meigdoc gororougb enohob. 6:11 Dara emen emouwan naugb yen yemehig dau sug yen meigdoc gororougb dara yen yousa len gus dag gin touwero. Doba yen meigdoc erleij naugb gin namcir. Anai sug yen yeicara dag gini terimda edebeij Lona Sug Ouwedoc, kaba, areg yen yod meijina debsa ELOHIM an ginohob, kaba, augwan emediyebeiya dau yen touwero, doba eb naugb yen toua. 6:12 Dangga hang, emen ememouwan naugb sug yen yeisan gurog touwero, doba emen emouwan naugb yen yesogwa deisa leng mohon meruhotimei mohw se meren geicara augwan terimda. Anai len, kaba, len lemobsara dau sug len merdoc ebdebin an areg ELOHIM os dou len. Dara len lemarges dau sug len lod merna debsa ELOHIM an gin touwero. Doba len laiyan merdocesem naugb len les agadgeij namcir. Hang areg ELOHIM os dou lenohob, kaba, augwan emediyebeiya dau len touwero. Doba en eic dou lenohob. 6:13 Anai sug ELOHIM os dou Abraham sug nosa dag en eic geigouhw dou lusud laugwan ogdoc en medebeito hom ginohob, kaba, en ou enin moho debin gin toua. Anai sud hom ingma en moho emagas emedreg dau en touwero. 6:14 Hanoba en enara dou en, endagai: Dan demeic ban abdebeitor leinyana dou bans. Dara dan demereiyara dou ban touwero. Doba dan denara dag misen dou ban namcir. 6:15 Sug Abraham ouman dau areg ELOHIM os dou en ginohob, kaba, en emarges dau sug en medoc ebdebin an areg ELOHIM os dou en gin touwero. Doba en es agadgeij naugb en od mena debsa en an gini terimda. Dangga hang, areg ELOHIM os dou en gin, kaba, emediyebeiya dau en touwero. Doba eb naugb en toua namcir. 6:16 Augwan gini aninim dag lusud meren geicara toua. Anai sug lusud lenara merir ledregim eisaugb aremer hom, hanoba len lou sud hom moho agas en moho debin gin touohob, kaba, len merir emedregim an gin deitero. Doba len merdoc obsara dau gin namcir. 6:17 Dangga hang, ELOHIM en toua sug en os areg graga augwan dou Abrahamohob, kaba, en ou enin moho debin gin toua. Dauntoba maman mameija mamuwesa en an gin touwero. Doba maman macinaga dag areg en os gini, kaba, en aimo augwan dag misen an maman toua. Anai areg en os gini, kaba, en emos dou Abraham hom dousero, doba en os dou en medebeito maman maugwan toua. 6:18 Hang maman mamdoc emomomtom touwero. Doba sug ELOHIM oiharaga maman dau areg gogom dag ginohob, kaba, maman maiyan mamdocesem. Hanoba maman mamarges dau areg en ens ainyes dou maman augwan gin touwero. Doba maman maod mamina debsa dareg maos agadgeij namcir. Anai sug ELOHIM os dou maman, hanoba en ou enin moho debin men gos dou gin touohob, kaba, hwas gini ens ainyes dou maman dag en emereiyara dara en emeperwei en medoc mes an gin touwero, doba ebsugeb terimda. 6:19 Dangga hang, sug areg ELOHIM os dou maman emeperwei deitero, kaba, areg maman maod mamina debsa en an gin, kaba, edag w kemantu gogod maman mamdoc ebtou namcir. Anai w kemantu gin, kaba, emogdoc minc geb dougwo ELOHIM Men Dimei Gecabeci se men tuari geb se bogo diginda dousero. Doba einesa terimda bedogod ELOHIM men maija moc geb se men Dimei Gecabeci ingga an maman. 6:20 Anai Yesus, kaba, en einoisa maman naugb en einesa ELOHIM Men Dimei Gecabeci ginohob. Hanoba en edag Gembala Gesa Taij Moho Agas beperwei maman mamuhw naugb en ogod maman aremer deseino ELOHIM beb huhugb namcir toua, aimo dag Melkisedeg men geicara sug nosa an maman toua. Anai Melkisedeg gin, kaba, en toua edag gembala gesa taij sug nosa se cinogo gini naugb en ogod lusud meren aremer deseino ELOHIM touohob.

Ibrani 7

7:1 Melkisedeg gin, kaba, en edag leng se cinogo Salem meren mougt mera medam. Dara en edag Adehsud Gedig En Moho Eb Taiba Augwan men Gembala Gesa Taij Moho Agas touohob. Dangga hang, sug Abraham en ecicugb dau sug en aiyan mougt mera medam merug hogu an meren lusud laugwanohob, kaba, Melkisedeg agaseni. Hanoba en ocuncum dou ELOHIM aga en, dauntoba ELOHIM eic geigouhw dou en. 7:2 Dauwohob, kaba, Abraham ekeba hom dau ara sisa dau areg en ogod mougt mera medam an graga ingma dou Melkisedeg en toua. (Melkisedeg men meijouhw dag mougt mera medam gedag beim namcir. Dara sug en edag leng Salem meren mougt mera medam dag gini touohob, kaba, len leija en moho toua dag mougt mera medam gedig en eic gesgigouhwesa dou lusud dougwo areg gecgu augwan toua namcir. Anai moho Salem gin, kaba, men meijouhw dangga.) 7:3 Dara Melkisedeg gin, kaba, Surad Injil Meb emens dau en mena, dara en mem, dara en meijemouwer, dara sug mem ouwadan en, era sug en omom dou maman touwero. Dangga se aremer augwan gin, kaba, en mog aninim dag ELOHIM Meisi Yesus gini touohob. Hang en emarges dau sug en edag gembala gesa taij ginero. Doba en eicara baimo dag gini beb huhugb namcir. Aninim dag Yesus emarges dau sug en edag gembala gesa taij gin touwero. Doba en eicara baimo dag gin toua beb huhugb terimda. Anai ELOHIM enin eng eigdoumesa Melkisedeg en moho naugb ginohob. 7:4 Yen youman areg graga augwan deigeigouhw namcirahabi. Anai Abraham, kaba, en edag maman mamjemouwa mebin. Hang en moho agas medam namcirohob. Doba sug en agasa Melkisedeg gini, hanoba en ekeba hom dau ara sisa dau areg en ogod mougt mera medam merug hogu anohob dou en toua, kaba, gini ens ainyes dou maman dag Melkisedeg en moho agas medam edreg dau Abraham en moho touohob. 7:5 Dangga toua, Musa men gomnomna ogod an Lewi medebeitor gedig len ledag gembala gesa taij, kaba, dag len lacgeij hom dau ara sisa areg leng Israel lesma dau len toua. Doba areg len lacgeij gin, kaba, len lemacgeij dau leng lugmahara touwero. Doba len lacgeij dau len meraguner dara len merdamouwer leng Israel lenin gedig len ledag Abraham medebeitor len touohob. 7:6 Doba Melkisedeg gin, kaba, en emedag gembala gesa taij dau Lewi medebeitor ginero. Doba inggaida, sug en agasa dara Abraham sug nosa, kaba, Abraham en ekeba hom dau ara sisa dau areg en ogod mougt mera mera medam merug hogu anohob dou Melkisedeg toua. Sug Abraham eic hom dau ara sisa augwan dou Melkisedeg dauwohob, kaba, Melkisedeg en ocuncum aga Abraham dou ELOHIM. Dauntoba ELOHIM eic geigouhw dou en toua. Doba Abraham en, kaba, ELOHIM eigdoumesa en moho agas touohob. Anai areg ELOHIM esedeb naugb en eic geigouhw dou lusud se cinogo augwan, kaba, en eng ELOHIM os gin augwan dou en dous. 7:7 Dangga hang, augwan gin, kaba, ens ainyes dou maman dag Melkisedeg en moho agas edreg dau Abraham en moho toua namcirohob. Anai sud hom areg en acgeij ELOHIM naugb en eic geigouhw dou sud hom, kaba, en eng moho agas edreg dau sud hom areg en acgeij ELOHIM naugb en eic geigouhw dou en touohob. Hang sud hom ingma dau yen, kaba, en emenara ucucugb an gin touwero. 7:8 Dara gembala gesa taij gedig len lacgeij meraguner dara meragtor leng Israel naugb len leic hom dau ara sisa dou len sug nosa, kaba, len laugwan ledag lusud gedig len lomom dous. Doba eisaugb Melkisedeg gedig lusud leic hom dau ara sisa dou en gin, kaba, Surad Injil Meb Mohon ouma debin en dag en emomom touwero, doba en eis huhugb namcir. 7:9 Dangga hang, sug Abraham ekeba hom dau ara sisa dou Melkisedeg sug nosa, kaba, maman manara dag Abraham medebeito Lewi enin ekeba hom dau ara sisa dou Melkisedeg. Aninim dag Lewi medebeitor len lacgeij hom dau ara sisa dau leng Israel sug nosa touohob. 7:10 Anai sug Melkisedeg agasa dara Lewi meijemouwa Abraham sug nosa gin, kaba, Lewi mem emouwadan en touebma. Doba maman manara dag en eb se Abraham en maga ginaba. Hang gini aninim dag en eic hom dau ara sisa ogdoc Abraham dou Melkisedeg gin touohob. 7:11 Doba sug ELOHIM eigdoumesa Lewi medebeitor len ledag gembala gesa taij naugb leng Israel dag ginohob, kaba, dagiro, naugwe hang, en eigdoumesa gembala gesa taij susugb dau len naugb maman deita? Anai sug en eigdoumesa Lewi medebeitor len meroho dag gin, kaba, en eic men gomnomna ogdoc Musa debin gin dou leng Israel len laugwan toua. Dangga sug Lewi medebeitor len laimo Musa men gomnomna augwan bedeinyum an lenohob, kaba, ELOHIM eigdoumesa gembala gesa taij menau dou maman toua deitei? Naro, en emeigdoumesa gembala gesa taij menau dou maman deitero. Dobnaro. Lewi medebeitor gin, kaba, len ledreg dau Musa men gomnomna gin terimdohob. Hang ELOHIM emeigdoumesa gembala gesa taij menau naugb maman deit. Dara gembala menau gin, kaba, men geicara emedag Harun medebeitor meren geicara gin touwero. Doba men geicara augwan, kaba, esogwa deisa Melkisedeg men geicara an maman dous. 7:12 Sug ELOHIM eigdoumesa gembala gesa taij menau hom naugb maman dag ginohob, kaba, Musa men gomnomna mohon emeb naugb en toua deitero. Anai sug gembala gesa taij menau agunyen, kaba, esloulougb dag gomnomna menau agunya oucan en naugb en aimo an maman toua. 7:13 Dara maman Adehsud gin, kaba, en emedag gembala gesa taij dau Lewi medebeitor dousero. Doba eni dau meijouhuda gus toua. Anai areg Surad Injil Meb Mohon enara eisaugb gembala gesa taij menau gini, kaba, en enara eisaugb maman Adehsud en gin dous. Dara dau men meijouhuda gin, kaba, sud hom ingma en emedag gembala gesa taij mougwa hom touebma. 7:14 Anai maman maugwan macinaga dag maman Adehsud gin, kaba, eni dau meijouhuda Yehuda. Hang Musa en toua sug en enara eisaugb gembala gesa taij dou leng Israel sug nosa, kaba, en emenara eisaugb Yehuda medebeitor hom dou len touwero. Doba en enara eisaugb Lewi medebeitor dou len dous. 7:15 Doba sug maman Adehsud en agunyen debin maman dag gembala gesa taij menau dag ginohob, kaba, gini ens ainyes dou maman dag gembala gesa taij mohon an meren geicara, kaba, augwan obsara namcirohob. Anai maman Adehsud gin, kaba, en emedag Lewi medebeitor ginero. Doba en mog toua aninim dag Melkisedeg teiteiyohob. 7:16 Dangga sug ELOHIM eigdoumesa en moho dag gembala gesa taij naugb maman, kaba, en emaimo Musa men gomnomna eisaugb meijouhuda dara gousanara an en touwero. Doba sug maireseb menau geb huhugb eb se en dag gin namcirohob, kaba, en edag gembala gesa taij, aimo men goubesa gini an maman beb huhugb terimda toua. Anai maireseb menau gin, kaba, emouwedoc touwero, doba eb huhugb namcir. 7:17 Augwan gini esogwa deisa areg ELOHIM os dou maman Adehsud gin se Surad Injil Meb Mohon deb sug nosa touohob, endagai: Dan deigdoumesa ban aboho dag gembala gesa taij beb huhugb terimda. Dara aban geicara augwan, kaba, esogwa deisa gembala gesa taij, moho Melkisedeg, men geicara augwan toua namcir. 7:18-19 Sug ELOHIM eigdoumesa gembala gesa taij menau naugb maman dag ginohob, kaba, Musa men gomnomna mohon emeb naugb maman toua deitero. Doba ELOHIM oguc dougwo gin augwan dau mamanohob. Anai gomnomna mohon gin, kaba, emebehnehino maman dougwo sesarero. Hang emedeinyum naugb sug maman mamera mera geigouhw, dara emahwan maman aud usi naugb sug ELOHIM eic gesgigouhwesa dou maman touwero. Sug Musa men gomnomna men goubesa emedeinyum naugb areg graga augwanero, kaba, ELOHIM eic men gos dou menau dou maman deit. Anai gomnomna mohon gin, kaba, emeic dag maman mamod mamina ELOHIM an ara ara touwero. Doba men gos dou menau gin, kaba, eic dag maman maod mamina debsa en an ara ara terimda. Hang gini edeinyum naugb sug ahwan maman aud ELOHIM toua. 7:20 Dara ELOHIM men gos dou menau gin, kaba, emousa maman naugb maman maod mamina debsa en an ara ara dousero. Doba ELOHIM ouwara debin men gos dou menau gin dou maman touohob. Anai sug en eigdoumesa Lewi medebeitor len ledag gembala gesa taij naugb maman mamjemouwer sug nosa, kaba, en emou enin moho debin dou lenero. 7:21 Doba sug en eigdoumesa Yesus dag gembala gesa taij naugb mamanohob, kaba, en ou enin moho debin en an gin toua. Hanoba en erba Ugwaremer deb se Surad Injil Meb Mohon deb an gin sug nosa touohob, endagai: Dang Adehsud demeigdoumesa ban aboho dag gembala gesa taij beb huhugb namcir. Dara dan demeperwei dan indoc mes an gin touwero. Doba dan daimo augwan gin an ban terimda. Anai dan dou dan indoho debin gin touohob. 7:22 Dangga sug ELOHIM ou enin moho debin Yesus dag ginohob, kaba, maman macinaga dag ELOHIM men gos dou menau gin, kaba, emediyebeiya dau maman touwero. Doba Yesus aimo augwan gini an maman toua terimda. Hang gos dou menau gin, kaba, eigouhw edreg dau gomnomna mohon augwan toua namcir. 7:23 Dara aremer hom susugb deit toua, kaba, dag gini: Lewi medebeitor gin, kaba, leinyana gougwa ledag gembala gesa taij naugb maman mamjemouwer touohob. Anai len lemaimo meren geicara gin bemeb huhugwero, doba len lomom dauwohob. Hang len lemeperweiyim ucucugb terimda toua. 7:24 Doba Yesus, kaba, en emomomero, doba en eis huhugb terimda. Dangga hang, sud hom ingma, kaba, en emeperwei en mohw dag gembala gesa taij naugb maman toua deitero. Doba en edag gembala gesa taij beb huhugb an maman namcir. 7:25 Sug en omom deit dag ginero, kaba, men goubesa edeinyum namcir naugb en eigdoc gareg en edebeij ELOHIM ogdoc en len laugwan dau sesar men gogom augwan aud maireseb menau geb huhugb gin toua. Anai sug en maireseb huhugb dag gin, kaba, en einoisa maman an maman aremer augwan deseino ELOHIM beb huhugb toua namcir. 7:26 Dangga se aremer augwan, kaba, en edag gembala gesa taij moho agas bedeinyum naugb mamanohob. Anai en, kaba, en emaimo lusud aud meren sesar. Dara en emauwam an areg gecgu mougwa hom touebma. Doba en asid enin dau namcir. Sug en aimo areg gecabeci dag ginohob, kaba, ELOHIM asid en dau leng lebesesar se cinogo gini. Hanoba en eigdoumesa en dig bogo naugb en eigtou sungga toua terimda. Anai men geicara gin, kaba, eic dag ELOHIM medoc eigouhw an enohob. 7:27 Hang men geicara emedag gembala gesa taij gedig len meroho agas sug nosa meren geicara touwero. Anai sug len leic aremeta mogwihi astesda lona dag lauwaharo dou ELOHIM naugb lusud meren sesar dag gin, kaba, len leic aremeta mogwihi bauwaharo dou ELOHIM naugb lusud meren sesar dousero. Doba len leic aremeta mogwihi lauwaharo dou en naugb lenin meren sesar nosahabi. Hanoba len lemeic aremeta mogwihi naugb lusud meren sesar ucan dou ELOHIM toua. Doba sug Yesus eic enin mogwihi bauwaharo dou ELOHIM naugb maman sesar gin, kaba, en eic enin mogwihi bauwaharo mougwa cum dou ELOHIM naugb maman sesar dous. Hanoba en arges dau gin toua, anai gini edeinyum naugb maman sesar augwan beb huhugb namcirohob. 7:28 Dara Musa men gomnomna gin, kaba, eigdoumesa gembala gesa taij moho agas gedig len lemaimo areg ELOHIM arougb len an ginohob augwan asesa touwero. Doba len ledreg mougwa einyana dau gin toua terimdohob, anai leni toua dag lusud misen dous. Hang meren goubesa naugb sug len les agadgeij, kaba, toua ingmaro. Doba sug ELOHIM eigdoumesa en Meisi Yesus dag Gembala Gesa Taij Moho Agas naugb maman, kaba, en ou enin moho debin gin. Hang enin eng edag Sud Hom Geigdoc Maman Dau Sesar Men Gogom aud maireseb menau geb huhugb gini beb huhugb namcir. Anai en emedreg dau areg ELOHIM arougb en an eisaugb maireseb huhugb gini mougwa hom touwero. Doba en aimo augwan gini an maman terimda edebeij sug ouwedoc touohob. Dara ELOHIM men gouwara gin, kaba, aimo ucan Musa men gomnomna gin toua. Dangga hang, gomnomna gin, kaba, emeb naugb maman toua deitero, doba ediyebeiya dau maman namcir. Anai gomnomna menau gin, kaba, en baihiron dougwo areg mohon augwanohob.

Ibrani 8

8:1 Dangga hang, areg dan den dou yen graga, kaba, men meijouhw augwan dag gini: Iteitogini, kaba, maman Gembala Gesa Taij Moho Agas en eigtou desij ELOHIM gedig en moho agas namcir se men maija moc dig en mesira misen naugb mamanohob. 8:2 Dara en emedag Gembala Gesa Taij Moho Agas se cinogo gin touwero. Doba en eicara baimo dag Gembala Gesa Taij Moho Agas se tuari misen gecabeci se bogo gedig lusud lemohud se len merisira touwero, doba gedig maman Adehsud enin eng esinsin dous. 8:3 En eicara baimo dag gini, anai astesda Gembala Gesa Taij Moho Agas areg ELOHIM eigdoumesa en moho se cinogo gin, kaba, en arougb sud hom gini naugb en eic aremeta mogwihi bauwaharo dou en naugb lusud meren sesar. Dara en eic areg lusud leic dag mogud dou ELOHIM naugb auwaharo dou en toua. Dangga hang, sug Yesus en edag maman Gembala Gesa Taij Moho Agas se bogo naugb maman dag ginohob, kaba, esloulougb dag men ara ara ingma inggebga naugb sug en eic bauwaharo dou ELOHIM naugb maman toua. 8:4 Dangga toua, sug Yesus eni moongga se cinogo ginaba, kaba, en emedag Gembala Gesa Taij Moho Agas naugb maman touwero. Anai se cinogo gin, kaba, gembala gesa taij leinyana merugwengga. Hanoba len leic areg lusud leic dag mogud dou ELOHIM naugb lauwaharo dou en toua, laimo dau areg Musa men gomnomna arougb len anohob. Doba Yesus, kaba, eni moongga se cinogo gin deitero, doba en eisaugb dig bogohob. Hang en edag Gembala Gesa Taij Moho Agas se tuari misen sungga naugb maman toua namcirohob. 8:5 Doba areg gembala gesa taij len leicara laimo an lusud se cinogo gin, kaba, dag ansins era edag mena dau gembala gesa taij men geicara se tuari misen geb se bogo naugb maman dous. Augwan gini aimo dau areg ELOHIM enara dou Musa deb sug nosa touohob. Anai sug en esedeb naugb en ohud ELOHIM Men Tuari Dag Hugbei se lomougwisa sug nosa, kaba, ELOHIM esulou en dara goubesa namcir dag en emedreg hom touwero. Doba en eicara baimo areg ELOHIM ens dou enohob augwan dag misen namcir. Hanoba en enara dou Musa, endagai: Sug ban bohud indan tuari dag hugbei gin, kaba, ban bemedreg dau tuari geb se bogo areg dan dens dou ban se menmod Torsina hom touwero. Doba ban bohud men mocbobaga augwan aimo dau areg dan dens dou banohob ingga dous. 8:6 Doba iteitogin, kaba, ELOHIM eigdoumesa Yesus dag Gembala Gesa Taij Moho Agas se men tuari se bogo naugb mamanohob. Dangga hang, areg en eicara baimo an maman sungga, kaba, moho agas edreg dau areg gembala gesa taij se cinogo gini len leicara laimo an lusud sugin toua namcir. Aninim dag gos dou areg en ogod an se ELOHIM dara men lusud merufu gin, kaba, moho agas edreg dau areg gembala gesa taij len logod an se ELOHIM dara leng Israel merufu sug nosa touohob. Anai areg ELOHIM en os dou men lusud maman se men gos dou menau gin, kaba, era mera geigouhw medam naugb maman bedreg dau areg en os dou leng Israel se men gos dou mohon sug nosa namcir. 8:7 Dangga toua, sug Musa men gomnomna gini edeinyum naugb sug eigdoc maman dau sesar men gogom aud maireseb menau geb huhugwohob, kaba, ELOHIM emeic men gos dou menau ucan dou maman deit touwero. Anai gos dou mohon augwan edeinyum naugb mamanohob. Dobnaro. Gos dou mohon gin, kaba, emedeinyum naugb augwan ginero. Hang ELOHIM emeic men gos dou menau dou maman gin deit. 8:8 Augwan gini aimo dau areg ELOHIM en enara dou Yeremia se Surad Injil Meb Mohon deb sug nosa touohob. Anai sug maman Adehsud owun leng Israel meroho deseino enohob, kaba, en os dou en, endagai: Lona ebeij deinyor namcirohob naugb sug dan deic indan gos dou menau dou leng Israel dara leng Yehuda len laugwan deit. 8:9 Dara indan gos dou menau gin, kaba, emedag indan gomnomna gedig dan deic dou len merjemouwer ogdoc Musa se lona sug dan deinoisa len dau cinogo Mesir ingga touwero. Doba susugb dau gin namcir. Anai len lemaimo indan gomnomna gogdoc Musa gin touwero. Doba len ledis terimda. Hang se lona ingga, kaba, dan demeinoisa len toua deitero. Doba dan damsoho len deb namcir dous. 8:10 Hang dan demog indan gos dou menau gin se igdahab naugb len toua deitero. Doba areg dan dos dou leng Israel naugb lona daiyamo gacin gin, kaba, dan dog augwan gin se len merdoc mes dous. Dauntoba len merdoc moc dougworo, doba len lauwam an areg dan dos dou len gini terimda. Dara se lona ingga, kaba, dan demamsoho len toua deitero. Doba dan dedag meren Adehsud. Hanoba len ledag indan lusud toua terimda. 8:11 Dara se lona ingga, kaba, len lemens dau areg asesa danin indoc mes dou len mersir dau meren cinogo dara meren hancob dag nosa toua deitero. Dara len lemarougb len aud gin touwero. Doba len larges merir dau gin namcir. Anai se lona sug dan deic indan gos dou menau dou len gin, kaba, len laugwan lecinaga areg asesa danin indoc mes augwan dag misenohob, ebiji dau leng meroho agas terimda edebeij leng meroho eb tainya len laugwan toua. 8:12 Dara se lona ingga, kaba, dan indina emeiseisan dau sug len lohoiya dan indir dara len ledreg indan gomnomna dag nosa toua deitero. Doba dan indoc moc dougwo augwan gin namcirohob. 8:13 Sug ELOHIM os men gos dou menau dou maman dag ginohob, kaba, gini aninim dag en owun Musa men gomnomna edag mohon. Hang emeb naugb maman toua deitero. Anai areg dag mohon, hanoba mohw ousirij, kaba, cum ediyebeiya namcir.

Ibrani 9

9:1 Dara ELOHIM emeic men gomnomna ogdoc Musa gin augwougb dou maman mamjemouwer sug nosa touwero. Doba sug en eic men gos dou mohon gin dou lenohob, kaba, en ens dau gembala gesa taij dara lusud meren geicara aud gousanara debin gin dou len toua. Dauntoba sug len lesijaresa en dara leic ara ara naugb lauwaharo dou en, kaba, len laimo augwan asesa toua namcir. Dara len lesinsin ELOHIM Men Tuari Dau Hugbei debin gini naugb sug len lesijaresa en se gin toua. 9:2 Sug len lesinsin Tuari Dau Hugbei gin debohob, kaba, len lekeba dag dimei hwai icira. Dimei geb ino ginda, kaba, len leija dag Dimei Gecabeci. Se dimei mes ingga, kaba, len lob smougb mouf maga senggai, dara boromei naugb sug gembala gesa taij en ob roti mogo sisa hobjerai areg len leic dou ELOHIM dag lauwaharo deb se toua. 9:3 Se dimei geb ino gin medigo, kaba, dimei hom toua inggebga. Dimei gin, kaba, len leija dag Dimei Gecabeci Namcir. Hang len leh minc medam hom dougwo gin toua. Anai dimei gin, kaba, ELOHIM men dimei sug en eigtousa. Dara len leija minc gini toua dag minc geb ucan. 9:4 Se dimei gin, kaba, len lob boromei dau emas debsa. Se boromei gin, kaba, len leic areg men ouwadebeda naugb len lasaih dou ELOHIM. Dara Biruwa hom dau sogo gedig len leic emas mogud lasinsin dougwohob, kaba, len lob se dimei gin toua. Se Biruwa mes ingga, kaba, len lob dabei hom dau emas an ared, moho w mana. Dara Harun men ijouhugwa gedig mesgougb agunya se nosohob. Dara igdahab mehir hwai gedig Musa en og ELOHIM men gomnomna sisa debsa toua. Dangga hang, lusud lemeija Biruwa gini dag ELOHIM Men Biruwa Gos Dou. 9:5 Dara se Biruwa moc gin, kaba, len lesinsin emas hwai lan marucbobaga dag malaikad. Hanoba laingma lasa dig nagama, kaba, laingma lasa dig nagama toua. Lan maroho dag Kerub, anai ansins dag Adehsud Geis Huhugb eni toua moongga se dimei mes inggohob. Dara lan laih marbera naugb laihiron dougwo Biruwa meh gin toua. Anai meh gin, kaba, dag Adehsud Geis Huhugb men usi geigtousa naugb sug en aigdougwo lusud meren sesar sungga terimda. Dan douwan dens dau areg graga augwan meijouhw ingma dou yen deit, anai einyana inggebga. Doba iteitogin, kaba, cumougt ingma naugb sug dan dens dou yen touwero. 9:6 Sug len lesinsin areg graga augwan bouwohob, kaba, gembala gesa taij len lebiji naugb len leinesa dimei mes geb dougwo Adehsud Men Dimei Gecabeci Namcir graga astesda lona toua. Hanoba len leicara laimo areg ELOHIM arougb len an ginohob naugb lasijaresa en se dimei mes gin toua terimda. 9:7 Doba se Adehsud Men Dimei Gecabeci Namcir geb dig medigo gin, kaba, Gembala Gesa Taij Meren Mougt Mera Medam enin eng einesa astesda arisogomoc mougwa cum dous. Dara sug en einesa dimei mes gin, kaba, en emeinesa augwougb touwero, doba en odo dabei an aremeta mogwihi toua. Hanoba en eic mogwihi gini bauwaharo dou ELOHIM naugb enin men sesar dauwahabi, en emeic ingma bemauwaharo dou en naugb lusud gus meren sesar ucan gin toua. Dara en emeic aremeta mogwihi gini dou ELOHIM naugb lusud meren sesar gedig len lesedeb dara leic merus an gin touwero. Doba en eic naugb lusud an meren sesar gedig len laimo augwougb dous. Anai len lemecinaga meijouhw dag meren geicara gin, kaba, dag sesar touwero. 9:8 Ogdoc areg graga augwan, hang Mena Gogoufu ens meijouhw asesa dou maman dag misis emec dau lusud naugb sug len leinesa Dimei Gecabeci Namcir aud ELOHIM touebma. Doba eb dougwo len terimdaba. Anai sug Dimei Gecabeci geb dougwo moc eb naugb len terimda, kaba, gini ansins dou maman dag lusud lemeic merus naugb sug len ledebeij ELOHIM touebma. Doba len leigtou aigusi dau enaba. 9:9 Hang areg graga, kaba, men meijouhw dag areg gembala gesa taij leic dag lauwaharo dau aremeta mogwihi dou ELOHIM naugb lusud meren sesar. Dara areg lusud leic dag mogud dou en naugb len lesijaresa en, kaba, augwan emedeinyum naugb edu len merdoc mes dau sesar augwan touwero. Doba gini dag aihnehina deb naugb maman daiyamo gin dous. 9:10 Anai meren geicara graga augwan, kaba, eisaugb areg len let dara leg. Dara eisaugb sug len ledu len meraga augwan, dauntoba len lecabeci deseino ELOHIM toua. Dobnaro. Augwan gin, kaba, dag gousanara dous gedig ELOHIM eic dou len terimda edebeij lona sug men gos dou menau agunya toua. 9:11 Doba Krisdus, kaba, en agunyen dag Gembala Gesa Taij Moho Agas naugb mamanohob. Hanoba en ogod an areg geigouhw einyana dau ELOHIM naugb maman touohob. Dara tuari gedig en edag Gembala Gesa Taij Moho Agas se gin, kaba, aninim dag ELOHIM men tuari gedig leng Israel lohud se cinogo gin touwero. Doba moho agas dara eigouhw bedreg dau tuari geb se cinogo gin namcir. Anai tuari gin, kaba, lusud lenin lemohud se merisira. Hang emen dau areg ELOHIM en ahasesei dara esinsin gin touwero. 9:12 Dara sug Krisdus einesa tuari geigouhw gin, kaba, en emogdoc Dimei geb ino ginda touwero. Doba en edreg Dimei gini naugb en edeinesa ELOHIM Men Dimei Gecabeci Namcir mougwa cum beb huhugb namcir. Sug en einesa dimei gin, kaba, en emodo dabei an kambing giji dara sapi meh meijaba mogwihi dag gauwaharo dou ELOHIM naugb maman sesar touwero. Doba en odo dabei an enin mogwihi naugb asga maman dau sesar men gogom beb huhugb namcir. 9:13 Anai sug lusud logor deseino ELOHIM sug nosa, kaba, gembala gesa taij en eic kambing dara sapi giji mogwihi. Dara sapi gida meijaba gedig smougb ait mor mor namcirohob, kaba, en eic mor ingma toua. Hanoba sug en eic mogwihi dara mor bahurimohob, kaba, en eic mogwihi ingga argeh leng logor gin toua. Dauntoba len lemogor deseino ELOHIM deitero, doba len lecabeci deseino en deit. 9:14 Sug aremeta mogwihi edu lusud meraga ecabeci deseino ELOHIM dag ginohob, kaba, Krisdus en mogwihi era mera einyana edreg dau aremeta mogwihi gin toua namcir. Anai ogdoc Mena Gogoufu Geis Huhugb men goubesa gin, kaba, en eic enin maga dag gauwaharo gecabeci dou ELOHIM naugb maman sesar ginohob. Dangga hang, maman mamdoc emeijesan sesar men gogom toua deitero. Doba Krisdus edu maman mamdoc mes an maman geicara dag gousanara augwan dau maman toua namcirohob. Dauntoba maman mamaimo augwan gin toua deitero. Doba maman maimo areg asesa ELOHIM gedig en maireseb huhugb enin medoc mes gin terimda. Anai maman geicara dag gousanara gin, kaba, emahwan maman aud maireseb menau geb huhugb ginero. Doba ahwan maman aud gomom dous. 9:15 Doba Krisdus, kaba, en eic enin mogwihi bauwaharo dou ELOHIM naugb maman sesar ginohob. Dangga hang, areg ELOHIM os dou maman se men gos dou menau gin, kaba, emediyebeiya dau maman touwero. Doba Krisdus en edag maman Gembala Gesa Taij Moho Agas naugb en ogod areg geigouhw gini augwan aga maman gedig ELOHIM eija maman aud enohob beb huhugb namcir. Anai sug Krisdus en omom taiba sogo salib naugb maman sesar dag ginohob, kaba, gos dou mohon men gogom emeb naugb maman toua deitero. Doba en esga maman dau augwan gini namcirohob. 9:16 Dara areg sud hom en os dou lusud, kaba, emeb naugb len augwougb touwero. Doba esloulougb naugb len louma debin dag en omom dauwahabi, len lemeic toua. 9:17 Anai sud hom areg en os ara ara dou len gus sug en mairesebaba, kaba, areg en os gini emeb naugb len touebma. Doba sug en omom dauwohob, kaba, eb naugb len dag misen namcir. 9:18 Dangga hang, areg ELOHIM os dou maman mamjemouwer acgunog ogdoc Musa sug nosa, kaba, en emeic augwan gini augwougb dou len touwero. Doba sug len logug aremeta an mogwihi debin ginohob, kaba, areg en os gini eb naugb len touohob. 9:19 Anai sug Musa ecic dau areg ELOHIM arougb len an se men gomnomna ginohob, kaba, en eic sapi meh meijaba dara kambing giji mogwihi bahurim dara duhu. Hanoba en eic igdebes mog gahani naugb en ahud aremerij dau w hisob darem. Dauwohob, kaba, en ogun w hisob ingga se aremeta mogwihi naugb en eic bargeh surad an ELOHIM men gomnomna dara lusud meraga augwan toua. 9:20 Sug en eic mogwihi bargeh surad dara lusud laugwan dauwohob, kaba, en esulou len debin gin toua, endagai: Ara mogwihi gini, kaba, ansins dag areg ELOHIM os dou yen gin, kaba, hom emediyebeiya dau yen touwero. Doba augwan ebiji naugb yenohob. Dangga hang, yen yemedreg men gomnomna gin hom touwero. Doba yen yaimo augwan terimda. Anai gini aimo dau areg en arougb yen anohob. 9:21 Dangga toua, sug len lohud ELOHIM Men Tuari Dau Hugbei sug nosohob, kaba, Musa eic aremeta mogwihi. Hanoba en eic bargeh tuari maga dara areg geb se dimei mes augwan gin toua. 9:22 Hang ara moho hom yom dous eng len lemeic ara mogwihi debin ginero. Doba areg gus augwan, kaba, ELOHIM men gomnomna arougb gembala gesa taij naugb len leic ara mogwihi largeh augwanda, dauntoba ecabeci deseino ELOHIM namcir toua. Dangga hang, ELOHIM emaigdougwo sesar hom augwougb touwero. Doba ogdoc sug len leir ara mogwihi nosahabi, en emaigdougwo meren sesar dou len ucan gin toua. Naro, kab, naro. 9:23 Doba tuari an areg geb se graga augwan, kaba, men mocbobaga aimo dau tuari geb se bogo dous. Hang edeinyum naugb len leic aremeta mogwihi largeh augwan, dauntoba ecabeci deseino ELOHIM toua. Doba naugb tuari geb se bogo an areg geb se dimei sungga, kaba, aremeta mogwihi emedeinyumero. Doba esloulougb naugb len leic ara mogwihi gedig mera eisaugb bedreg dau ingga namcir, dauntoba eic gecabeci dou tuari gin toua. 9:24 Dangga sug Krisdus eic enin mogwihi ancoho aga mamanohob, kaba, en emeinesa ELOHIM Men Dimei Gecabeci Namcir se tuari gedig lusud lohud se merisira gin touwero. Doba en einesa ELOHIM Men Dimei Gecabeci Namcir se tuari geb se bogo naugb en edag maman Gembala Gesa Taij Moho Agas deseino ELOHIM sungga toua terimda. Anai tuari geb se cinogo gin, kaba, mocbobaga lainyen dous. Doba tuari se bogo, kaba, tuari misen namcir. 9:25 Hang en emesogwa deisa Gembala Gesa Taij Meren Mougt Mera Medam an men geicara se tuari se cinogo gin touwero. Anai Mougt Mera Medam gin, kaba, en einesa ELOHIM Men Dimei Gecabeci Namcir an aremeta mogwihi mougwa hom astesda arisogomoc terimda. 9:26 Doba Krisdus, kaba, en emeinesa ELOHIM Men Dimei Gecabeci Namcir se tuari geb se bogo ucucugb terimda dag ginero. Hanoba en emeic en mogwihi bauwaharo dou ELOHIM naugb maman sesar ucucugb dag gin touwero. Doba en einesa ELOHIM men dimei gini mougwa cum dous. Anai sug en eicara dag gin ucucugb terimda, kaba, gini aninim dag en omom naugb maman sesar mougwa einyana touohob, ebiji dau lona sug ELOHIM ahasesei cinogo, terimda edebeij lona gin toua. Dobnaro. Edebeij sug Lona Ouwedoc gin, kaba, en ens enin ainyes dou maman mougwa cum dag gin dous. Dangga hang, sug en eic enin maga ancoho aga maman dou ELOHIM mougwa cum dag ginohob, kaba, en eigdoc maman dau sesar men gogom augwan toua beb huhugb namcir. 9:27-28 Dangga hang, Krisdus en emomom mougwa einyana touwero. Doba sug en eic enin maga bauwaharo dou ELOHIM mougwa cum dag ginohob, kaba, edeinyum naugb sug en esga lusud leinyana dau sesar men gogom augwan toua beb huhugb namcir. Aninim dag ELOHIM ogod an lusud dag len lemomom mougwa einyana touwero. Doba sug len lomom mougwa cumohob, kaba, en ogod aremer naugb len toua. Dara leng leigtou lateteij naugb Krisdus sug en ecicugwen, kaba, en en aud len mougwa cum deit. Doba sug en ecicugb gin, kaba, en emomom naugb meren sesar toua deitero. Doba en en aud len naugb en ahwan len aud maireseb menau geb huhugb gin dous.

Ibrani 10

10:1 Dangga Musa men gomnomna emedag mog misen dau geigouhw areg ELOHIM esedeb naugb maman se lona daiyamo gacinero. Doba edag mena dau augwan gin dousaba. Hang leng Israel len lemarges dau sug len leic aremeta mogwihi lauwaharo dou ELOHIM naugb meren sesar gin touwero. Doba astesda lona, kaba, len leicara laimo dangga naugb arisogomoc augwan beb huhugb namcirohob. Sug len leicara dag gini terimda, kaba, gini ansins dou maman dag Musa men gomnomna men goubesa emedeinyum naugb oguc dougwo leng Israel meren sesar augwan ecabeci dau len deseino ELOHIM touwero. Doba ens ainyes dou len dau sug len len aud en naugb len lesijaresa en dag meren sesar augwan eb naugb len terimdaba. 10:2 Anai sug meren sesar augwan ediyebeiya dag misen dau lenohob, kaba, len leic aremeta mogwihi dou ELOHIM ucucugb dag gini terimdei? Naro, len lemeic ara ara dou en ucucugb dangga deitero, doba len larges dau namcir. Anai len lecinaga dag meren sesar augwan, kaba, ediyebeiya dau lenohob. Hang len merdoc mes emeijesa an meren sesar touwero. Doba sug len lesijaresa ELOHIM dag gini, kaba, len merdoc ebtou namcir dous. 10:3 Dobnaro. Sug len leic aremeta mogwihi lauwaharo dou ELOHIM naugb meren sesar astesda lona se arisogomoc augwan dag gin terimda, kaba, ens dou len dag meren sesar emediyebeiya dau len touebma, doba eb naugb len terimdaba. 10:4 Anai sapi dara kambing merugwihi meren goubesa emedeinyum naugb oguc dougwo lusud meren sesar augwan dau len touwero. 10:5-6 Dangga hang, sug lona ebeij deinyorohob naugb sug Krisdus ouwaden dau bogo se cinogo gin, kaba, en enara dou ELOHIM, endagai: Sug lusud lec aremeta mog se smougb, era sug len leic ara ara lauwaharo dou ban naugb ban baigdougwo meren sesar augwan dau len, kaba, ban abdoc emesgirahesa len an gin touwero. Dangga hang, ban besedeb maga hom naugb dan, dauntoba dan deic dan indaga gini omom naugb lusud meren sesar gin toua. Anai ban bemouwan naugb sug lusud leic aremeta mogwihi dara ara ara gus dag mogud dou ban deiterohob. 10:7 Dara sug Krisdus edebeij se cinogo ginohob, kaba, en enara dou ELOHIM deit, endagai: Dan indugwenggini naugb dan daimo areg asesa banin abdoc mes augwan terimda, aimo dau areg len log deb se Surad Injil Meb Mohon eisaugb dan deb sug nosa touohob. 10:8 Dangga hang, sug Krisdus enara aimougtut dag ELOHIM emouwan aremeta mogwihi dara ara ara dag mogud naugb lauwaharo dou en deitero. Dara en medoc emesgiraha an lusud sug len lec sapi mog se smougb lauwaharo dou en naugb en aigdougwo meren sesar touwero. 10:9 Dara en enara ucan deit dag eni moongga naugb en aimo areg asesa ELOHIM enin medoc mes augwan terimda, kaba, gini ansins dag ELOHIM oguc dougwo men gos dou acgunog se Musa men gomnomna. Hanoba en eic men gos dou menau naugb maman toua deitohob. Anai sug Krisdus enara dag gin, kaba, en emenara dau sug leng Israel lemedreg dau Musa men gomnomna an gin touwero. Doba dau sug len laimo gomnomna gini an gin terimdaba. Dangga hang, sug ELOHIM oguc dougwo Musa men gomnomna dau maman dag ginohob, kaba, en emouwan naugb maman mameic aremeta mogwihi mauwaharo dou en naugb maman sesar toua deitero. Doba en ouwan naugb maman maperwei gini. Hanoba maman maic Krisdus mogwihi hom gin eng mauwaharo dou en naugb maman sesar dous. 10:10 Anai Krisdus, kaba, en emedreg dau areg ELOHIM arougb en an gin touwero. Doba en owun enin medoc mes arjaga naugb en aimo areg asesa ELOHIM enin medoc mes augwan terimda. Hanoba en eic enin maga bauwaharo dou ELOHIM naugb maman sesar augwan toua. Dangga hang, sesar men gogom emeb naugb maman toua deitero. Doba ELOHIM ouci maman debinim dag enin men logodeh naugb enin touohob. Anai sug Krisdus en omom naugb maman sesar mougwa cum dag ginohob, kaba, edeinyum naugb en edu sesar augwan dau maman beb huhugb namcir toua. 10:11 Dangga toua, gembala gesa taij dau Lewi medebeitor, kaba, len leinesa se dimei astesda lona naugb len leic ara ara lauwaharo dou ELOHIM. Doba areg len leic dou en gin, kaba, dag aremeta mogwihi hom eng naugb lusud meren sesar dous. Dobnaro. Areg len leic dag lauwaharo dou ELOHIM gin, kaba, augwan emedeinyum naugb sug oguc dougwo meren sesar dau len touwero, doba ebsugeb namcir. 10:12 Doba Krisdus, kaba, en eic enin mogwihi bauwaharo dou ELOHIM naugb maman sesar mougwa cum dous. Dau, kaba, en eisaugb dig bogo naugb en edeigtou desij ELOHIM se men maija moc dig en mesira misen. Hanoba en edag mougt mera medam desij en toua. Anai en mogwihi gin, kaba, edeinyum naugb edu lusud meren sesar augwan dau len beb huhugb namcirohob. 10:13 Dara en eigtou desij ELOHIM sungga terimda edebeij lona sug ELOHIM owun men moc len laugwan dag hotingga naugb len leb tainya en mohora touahabi, en emecicugwen. 10:14 Hang maman sesar hom emeb naugb maman toua deitero. Doba sug Krisdus eic enin mogwihi bauwaharo dou ELOHIM naugb maman sesar mougwa cum dag ginohob, kaba, edu maman sesar augwan dau maman beb huhugb namcir. Hanoba ELOHIM ouci maman debinim dag enin men lusud naugb en beb huhugb terimda touohob. 10:15-17 Augwan gini esogwa deisa areg maman Adehsud en enara dou Yeremia se Surad Injil Meb Mohon deb sug nosa touohob. Anai aimougtut, kaba, en enara dou en eisaugb leng Israel, endagai: Se lona daiyamo gacin, kaba, dan deic indan gos dou menau dou len deit. Dara dan demog indan gos dou menau gin se igdahab dou len toua deitero. Doba dan dog areg dan dos gini se len merdoc mes dous, dauntoba len merdoc moc dougwo augwan gin touwero. Doba len lauwam an augwan gin ucucugb terimda. Sug en enara dag graga dou Yeremiyohob, kaba, en enara ucan dou en deit, endagai: Se lona sug dan dog indan gos dou menau se len merdoc mes dag ginohob, kaba, dan indoc emeiseisan meren sesar dara meren geicara gecgu augwan toua deitero. Doba dan indoc moc dougwo augwan gin namcir. Areg graga augwan, kaba, misen namcir. Anai aimo dau areg Mena Gogoufu ouma debin gin dou maman touohob. 10:18 Sug ELOHIM aigdougwo maman sesar dara maman geicara gecgu augwan dau maman dag ginohob, kaba, gembala gesa taij lemeic ara ara lemauwaharo dou ELOHIM naugb maman sesar toua deitero, doba len larges dau namcir. 10:19-21 Dangga dan indagunerij, dara dan indamouwerij, sug Yesus eic enin mogwihi bauwaharo dou ELOHIM naugb maman sesar, hanoba en edag maman Gembala Gesa Taij Moho Agas se tuari se bogo naugb maman dag gin touohob, kaba, maman mamahau dau sug maman mainesa ELOHIM Men Dimei Gecabeci Namcir gin touwero. Doba maman maic mamus naugb maman mainesa dimei gini aud en namcir. Anai sug Yesus eic enin maga bauwaharo dou ELOHIM dag ginohob, kaba, en ogod minc geb dougwo ELOHIM Men Dimei gin dau maman. Hanoba en esa ucina menau aud ELOHIM Men Dimei naugb en eic maireseb menau geb huhugb dou maman sungga toua. 10:22 Dangga hang, sug Yesus esa ucina geihwedaud ELOHIM Men dimei naugb maman dag ginohob, kaba, maman mameija maman mamdocesa ELOHIM en toua deitero. Doba sug maman mamdoc ecabecohob, kaba, maman maic mamus naugb madebeij en namcir. Anai en eic Krisdus mogwihi bargeh maman mamdoc mes an areg gecgu dau maman. Dara en edu maman mamaga dara duhu gecabeci touohob. Hang maman mamdoc emeijesa an maman sesar toua deitero. Doba maman macinaga dag augwan gini ediyebeiya dau maman dag misen namcirohob. 10:23 Dara maman mamarges dau areg en os dou mamanohob gini touwero. Doba maman maod mamina debsa en an areg maman maos madi deseino lusudohob gin toua namcir. Anai areg ELOHIM en os dou mamanohob, kaba, en emarges dau gin touwero. Doba en aimo augwan gini an maman terimda. 10:24 Hanoba maman mamehig daum touwero. Doba maman mahilon ucina naugb maman maic mamdoc erleij doum ucucugb. Dauntoba maman mamdoc gororougwim dara maman maimo areg edag beim dara obosboro anim toua terimda. 10:25 Dara maman mamahau dau sug maman maucimdeb se tuari aninim dag ligbum gin touwero. Doba sug yen yecinaga dag maman Adehsud Men Lona Naugb Sug En Ecicugwen ebeij deinyorohob, kaba, maman manara mad mamanin mamdoc mes ucucugb terimda edreg dau nosa deit. Dauntoba maman maobsara dau sug maman mamdoc ebdebin an Krisdus gin touwero, doba maman mas agadgeij namcir. 10:26 Anai gareg dau maman, en ouman Mer Geigouhw eisaugb Krisdus. Hanoba en aimo en se men ucina se geica gin touohob. Doba cum, kaba, en eic mos naugb en eineg dau men ucina gin aud sesar ucugb deit, kaba, Krisdus en mogwihi ingma emeb naugb en toua deitero. 10:27 Doba en eigtou dara en medoc ohwohu an enin deb naugb Lona sug ELOHIM ogod aremer aga lusud gin dous. Anai se Lona ingga, kaba, gareg en eic mos dou ELOHIM dag ginohob, kaba, ELOHIM medoc esrougb an en, hanoba en erba en se smougb gesrougb medam namcir toua. 10:28 Anai gareg en eic mos naugb en edreg dau Musa men gomnomna sug nosa, kaba, mougtir merdoc emeineg an en deitero. Doba sug lahwai, era merug homoi louma debin dag en edreg dau gomnomna gin dag misenohob, kaba, len leic gomom dou en toua. 10:29 Dangga hang, sug lusud leic gomom dou gareg en edreg dau Musa men gomnomna dag ginohob, kaba, dagiro eisaugb sud hom areg en eic mos naugb en obsara dau Krisdus aud sesar dag gin ucugb deita? ELOHIM amsoho enei? Naro, en emamsoho sud hom gin touwero. Doba en eic gogom medam dou en bedreg dau leng nosa gin namcir. Anai men geicara augwan gin, kaba, dag en owun ELOHIM Meisi Krisdus en moho. Dara en eic Mena Gogoufu en moho bacecim toua namcirohob. Anai Krisdus, kaba, en mogwihi edu men sesar augwan dau enohob. Dara en eir en mogwihi debin ELOHIM men gos dou menau. Dauntoba areg ELOHIM os gin, kaba, eb naugb sud hom gin toua terimda. Dara Mena Gogoufu, kaba, en medoc eineg an en naugb en eic areg geigouhw einyana dou en touohob. 10:30 Dara maman macinaga dau gin dag misen namcir. Anai augwan gini esogwa deisa areg maman Adehsud en enara dou maman mamjemouwer se Surad Injil Meb Mohon deb sug nosa touohob, endagai: Gareg dau yen en eicara gecgu, kaba, dan demamsoho en deb touwero. Doba dan demauni men geicara gecgu gini ucugb dou ens. Dara en enara deit, endagai: Dan demogod indan lusud meren aremer aga len toues. 10:31 Dangga hang, maman mameic mamus dou ELOHIM gin touwero. Doba sug maman maobsara se en mesira mesohob, kaba, maman mahau dau en. Anai enin, kaba, maireseb, hanoba en mobisamougb namcirohob. 10:32-33 Doba yen, kaba, yen meigdoc eiseisan lona sug lusud lesai Mer Geigouhw eisaugb Krisdus dou yen gin terimda. Anai sug yen yebin mouf gini se yen meigdoc mes dag misenohob, kaba, lusud lesmesman yen, dara len logod yen abeba len gus meriresi terimda toua. Hang yen toua yaimo ucina mog erij ginohob, doba yen yemobsara dau gin touwero. Dara yen yemasid yenin dau yen meisir leng Krisdus gus sug lusud lesmesman len dara leic mog erij dou len touwero. Doba yen yeic meijus desij len naugb gin toua. 10:34 Anai sug len lerba ligbum dau yen meisir gini se tu gesisug, kaba, yen yemohw meijidgo dou len touwero. Doba yen yaimo len se ucina mog erij gin toua. Dara sug leng medigo Yesus leida meijen tu an meijen aremougb, kaba, yen meigdoc momogo an gin touwero. Doba yen meigdoc agahugouhw an ELOHIM icira gin toua terimda. Anai yen yecinaga dag areg ELOHIM os dou yenohob, kaba, hom emediyebeiya dau yenero. Doba eb se bogo beb huhugb naugb yen. Dara men mera gin, kaba, edreg medam dau meijen aremougb areg geb se cinogo gin toua namcirohob. 10:35 Dangga hang, yen yemahau dau sug lusud leic mog erij dou yen touwero. Doba yen yeic meijus naugb yen yaimo ucina mog erij gin toua. Anai sug yen yeicara yaimo dag gin terimda edebeij lona sug ouwedocohob, kaba, ELOHIM emeic siouwa einyana medam dou yen toues. 10:36 Hang yen yemehig dau sug yen yaimo areg asesa ELOHIM enin medoc mes touwero. Doba yen yaiyan meigdocesem naugb yen yaimo gin terimda. Anai sug yen yeicara dangga namcirohob, kaba, en emeic areg en os dou yenohob augwan dou yen toua. 10:37 Augwan gini esogwa deisa areg maman Adehsud en og deb se Surad Injil Meb Mohon deb sug nosa touohob, endagai: Cum, kaba, sud hom areg en esedeb naugb en en aud yenohob, kaba, en emeigtou dau yen toua deitero. Doba en emen aud yen toues. 10:38 Dara enin eng esulou maman se Surad Injil Meb Mohon dag gin deit. Dauntoba maman mamobsara dau en touwero, doba maman maimo en mer gin toua terimda. Hanoba en enara dou maman, endagai: Gareg en aimo areg asesa danin indoc mes terimda, kaba, dan demeic maireseb menau geb huhugb dou en toues. Anai en medoc ebdebin an dan indir ginohob. Doba gareg en medoc emebdebin an dan deitero, hanoba en ohw en medigo dou danohob, kaba, dan indoc emesgiraha an en touwero. Doba dan indoc esrougb an en namcir. 10:39 Doba maman gin, kaba, maman mamaimo leng laisacij dau ELOHIM naugb len merur mor se dum smougb gin touwero. Doba maman mamdoc ebdebin an en terimda. Dangga, kaba, en emeic mor mor dou mamanero. Doba en eic maireseb menau geb huhugb dou maman dous.

Ibrani 11

11:1 Dangga sug maman mamdoc ebdebin an ELOHIM dag misen namcirohob, kaba, maman mameija mamdocesa en an areg en os dou maman gin touwero. Doba maman maod mamina debsa en dag areg en os dou maman ginohob, kaba, en emeic augwan dou maman toues. Hang maman mamdoc toua ebtou namcir dag areg maman mameiya dara maman mamiresebma, kaba, inggebga naugb maman touohob. 11:2 Aninim dag maman mamjemouwer, kaba, len lemeija merdocesa ELOHIM an areg en en dou len sug nosa touwero. Doba len merdoc ebdebin en mer an gin terimda. Hang eic dag ELOHIM medoc agahugouhw an len toua namcirohob. 11:3 Sug maman mamdoc ebdebin an ELOHIM en mer gin dag misenohob, kaba, maman macinaga dag bogo, dara cinogo, dara areg gus augwan, kaba, lemeb augwougb dag gin touwero. Doba augwan gini, kaba, ebiji namcir dau sug ELOHIM en mer an ginohob. Hang maman macinaga dag areg maman maiya gin, kaba, emen dau areg maman macinaga ginero, doba en dau areg maman mamecinaga gin dous. 11:4 Dangga Habel en toua, sug en eic ara ara bauwaharo dou ELOHIM naugb men sesar sug nosa, kaba, ELOHIM emotogoto en an ginero. Doba en eigdoumesa en moho an gin namcir. Anai en emedreg ELOHIM en mer an areg graga augwan touwero. Doba sug en medoc ebdebin an en mer ginohob, kaba, en aimo areg asesa ELOHIM enin medoc mes se gin toua terimda. Hang areg en eic dou ELOHIM gin, kaba, eigouhw edreg dau areg en maguna Kain eic dou ELOHIM toua namcir. Anai Kain, kaba, en medoc emebdebin an areg ELOHIM arougb en an ginero. Doba en eic ara ara bauwaharo dou en augwougb dau enin medoc mes dous. Dangga Habel gin, kaba, en toua omom dau ginohob. Doba men geicara gin, kaba, dag gansins eb deinaugb maman terimda. 11:5 Dangga toua, sud hom, moho Henog, kaba, en emomom touwero. Doba sug eni moongga se cinogo ginaba, kaba, ELOHIM eperwei en maga, hanoba eigdoumesa en dig bogoda. Anai en emobsara dau sug en medoc ebdebin an ELOHIM touwero. Doba en od mena debsa en an areg en os dou en gin toua terimda. Hang Surad Injil Meb Mohon enara dou maman dag lusud lehilon dougwo en, doba len lemeiya en touwero. Anai ELOHIM eigdoumesa en dau lenohob. Dara Surad Injil Meb enara dou maman toua dau sug ELOHIM emeigdoumesa enbuma, kaba, dag ELOHIM medoc agahugouhw an en namcir touohob. 11:6 Dangga gareg en en aud ELOHIM naugb en acgeij ara ara dau en, kaba, esloulougb medam dag en emeija mouwesa ELOHIM dag en moongga, era mogero touwero. Doba en en aud en dara medoc eica namcir dag en eis huhugwohob, anai gini aimo dau areg ELOHIM en ouwan dangga. Dara esloulougb toua dag en od mena debsa ELOHIM dau sug en medoc etrij icira naugb ehilon en terimda, kaba, dag en emeic areg en acgeij en an ingga dou en toues. Anai gareg en en aud ELOHIM, doba en eija mouwesa endag ELOHIM maires inggebgei? Era en emauni en meresei? Era naroei? Kaba, ELOHIM medoc emeigouhw an enero, doba en medoc esrougb an en namcir. Hang en emeic ara ara hom dou en touwero. 11:7 Dara Nuh en toua emeiya dau gogom areg ELOHIM en esedeb naugb lusud se lona daiyamo gacin touebma. Doba sug ELOHIM esulou en an ginohob, kaba, en medoc emaihagab en mer an gin touwero. Doba en medoc eiseisan gin namcir. Hanoba en esinsin ij medam hom. Dauntoba ij eigdoc en an en mesouwa, dara en mehir merug homoi an len mersouwer len laugwan toua. Dangga sug Nuh medoc ebdebin an ELOHIM en mer dag ginohob, kaba, ELOHIM eigdoumesa en dag en eic gesgigouhwesa dou en ucugwohob. Doba len gus, kaba, Nuh men geicara geigouhw gini owun len meroho namcir. Anai len lemaimo en naugb len leicara geigouhwero. Doba len leic merus naugb len laimo areg gecgu terimda. Hang gogom emeb dau len touwero, doba obsara baiyan len laugwan namcir. 11:8 Dangga toua, Abraham sug ELOHIM arougb en naugb en eihwedig cinogo menau areg ELOHIM os dou enohob, kaba, en emeija medocesa ELOHIM en mer gin touwero. Doba en medoc hom naugb en aimo areg ELOHIM arougb en an gin toua namcir. Hanoba en eihwededau men cinogo mohon augwougb dous. Anai en emecinaga ucina aud cinogo menau gin touebma. 11:9 Dara sug en edebeij cinogo menau areg ELOHIM os dou en ginohob, kaba, en emohud tu misen naugb sug en atou se touwero. Doba en ohud hugbei naugb en eigtou dag lugmahara desij lugun sungga dous, aimo dau areg ELOHIM os dou enohob gin terimda. Dara en meisi Isag dara en medebeito Yakub, kaba, ELOHIM os cinogo gin dou lan touohob. Hang lan toua lameigtou se tu misen touwero. Doba len latou desij Abraham se men tu hugbei gin toua terimda. 11:10 Anai Abraham, kaba, en eigtou bateteij naugb cinogo misen gedig ELOHIM enin eng esedeb, hanoba ohud deb naugb enohob. Hang gin, kaba, emediyebeiya dau en touwero, doba eb naugb en beb huhugb namcir. 11:11 Dara Abraham, kaba, en edag sudbod. Dara Sarai, kaba, en toua edag duga mec namcir. Hang emedeinyum naugb lan laic marih deiterohob. Doba Abraham, kaba, en emeija medocesa ELOHIM an areg en os dou en gini touwero. Doba en medoc ebdebin an en dag areg en os dou en ginohob, kaba, en emeperwei medoc mes an gini touwero. Doba en aimo augwan gini an en toua terimda. 11:12 Dangga hang, Abraham, kaba, deinyor sug en omom. Doba sug en medoc ebdebin an ELOHIM dag ginohob, kaba, en medebeitor lebedero dag tebeij se bogo, dara lebedero dag geria se dum mebera toua namcir. 11:13 Doba len gin laugwan, kaba, len lomom dau cinogo areg ELOHIM os dou len ginohob. Anai areg en os dou len gin, kaba, en emeic dou len se cinogo ginero. Doba len leiya cinogo gin dag eb aigusaba se len merdoc mes dous. Hanoba len merdoc erleij aud gin toua. Dangga hang, igdebes emeba len sug len los ladi lenin deseino lugun se cinogo gin touwero. Doba len los ladi lenin dag lugmahara dara lusud gedig len latou sousougb se ucina mogumsi aud cinogo menau deseino len terimda. 11:14-15 Sug len los ladi lenin dou lusud dag gin, kaba, gini ansins dou maman dag len lemoudesan lugun se cinogo gin deitero. Doba len merdoc erleij aud lugun se cinogo menau hom gin dous. Anai sug len merdoc acicin an meren cinogo areg len leihwededau ginohob, kaba, cumougt inggebga naugb len lecicugb aud meren cinogo mohon ucugb deit. 11:16 Dobnaro. Len merdoc erleij aud cinogo menau geb se bogo hom dous. Anai cinogo menau gin, kaba, eigouhw bedreg dau meren cinogo mohon geb se cinogo gin namcir. Dangga hang, sug len merdoc erleij aud ELOHIM men cinogo dag ginohob, kaba, igdebes emeba en dau sug len leija en dag meren ELOHIM touwero. Doba en ouma debin len an gin namcir. Anai enin eng esedeb cinogo menau gin deb naugb lenohob. 11:17 Dangga toua, sug ELOHIM ainyen Abraham naugb en eic en meisi Isag bauwaharo dou en sug nosa, kaba, Abraham medoc emagadgeij dau en touwero. Doba en medoc ebdebin an areg ELOHIM os dou en gin namcir. Hang en esedeb naugb en eic en meisi mohora hom gini bauwaharo dou en toua. 11:18-19 Anai en ogod se enin medoc mes dag ELOHIM men goubesa edeinyum naugb sug en eigdoumesa Isag dau gomom ucugb dou en toua. Dangga hang, en emen dougwo ELOHIM en mer an gin touwero. Doba en esedeb naugb en aimo en mer an gin namcir. Anai en ecinaga dag ELOHIM os dou en sug nosohob, endagai: Ban abdebeitor areg dan dos dou banohob, kaba, dan deic len laugwan dou ban ogdoc ban abisi Isag gini dous. Hang maman manara dag ELOHIM eic en meisi gini aninim dag sud hom geisa dau gomom ucugb dou en toua. Anai se medoc mes, kaba, Abraham eic gomom dou en meisi ginohob. 11:20 Dara Isag, kaba, en toua acgeij ELOHIM naugb en eic geigouhw dou Yakub dara Esau. Anai en medoc ebdebin an ELOHIM dag areg en os dou Abraham eisaugb cinogo Kanaan naugb lona daiyamo gacin, kaba, eb naugb en meisi lan. Hang en ouma debin gin dou lan toua. 11:21 Dara Yakub en toua medoc ebdebin an areg ELOHIM os dou Abraham eisaugb cinogo Kanaan gin toua. Dangga hang, sug en deinyor omomohob, kaba, en os ijouhugwa adedeij mohumes naugb en esijaresa ELOHIM. Hanoba en acgeij ELOHIM naugb en eic geigouhw dou Yusub meisi lahwai, lan maroho Epraim dara Menase, eisaugb cinogo Kanaan gin toua. 11:22 Dangga toua, Yusub sug eni deinyor omomohob, kaba, en ens dou leng Israel dag se lona daiyamo gacin, kaba, len leihwededau cinogo Mesir aud Kanaan gin toua deit. Anai en medoc ebdebin an ELOHIM dag areg en os dou Abraham eisaugb cinogo ginohob, kaba, en emereiyara touwero. Doba en enara se misen namcirohob. Hang en emenara dou leng Israel dau sug len leihwededau cinogo Mesir gin, kaba, dag len lodo en mori dau cinogo ingga dig Kanaan toua. 11:23 Dara Musa mena dara mem, kaba, lan toua mardoc ebdebin an areg ELOHIM os dou Abraham ginohob. Dangga hang, lan lamahau dau Piraun an areg en arougb leng Israel naugb len logod meren logodeh ligiji laugwan lomom gin touwero. Doba sug Musa mem ouwadan enohob, kaba, lan lacgoneh en dau Piraun se igda homoi toua. Anai lan laiya, doba en mebes ecabeci namcir. Hang lan lacinaga dag ELOHIM esedeb en naugb ara ara touohob. 11:24 Dangga toua, Musa sug en edag sudohob, kaba, en emouwan naugb lusud lemeigdoumesa en moho dag Piraun mehida mogwihi mogo en toua deitero. Doba en ouwan naugb len larges merir dau gin namcir. Anai en toua medoc ebdebin an areg ELOHIM os dou Abraham eisaugb cinogo Kanaan ginohob. 11:25 Hang en emaimo leng Mesir meren geicara dag sesar aud areg eic en medoc eigouhw dou en dag cum cum dous gin toua deitero. Doba en ouci naugb en aimo ELOHIM men lusud leng Israel se ucina mog erij gin terimda. 11:26 Anai en toua medoc eiseisan areg ELOHIM os dou leng Israel ginohob. Hang en emogod se enin medoc mes naugb en emaimo leng Israel se meren ucina gesmesman gini. Aninim dag Krisdus aimo ucina gesmesman se lona daiyamo gacin gin touohob. Anai en eigdoumesa ELOHIM men gos dou gin, kaba, mera eisaugb medam edreg dau leng Mesir meren aremougb augwan namcirohob. 11:27 Dangga hang, en emahau dau sug Piraun medoc esrougb an en touwero. Doba sug en medoc ebdebin an areg ELOHIM os dou Abraham dag ginohob, kaba, arges maga dau Mesir gin deb namcir. Hanoba en emecicugb aud cinogo Mesir gin toua deitero. Doba en eihwedaud cinogo Kanaan gin dous. Anai en emeiya ELOHIM dara en mairesero, doba en ecinaga eni moongga desij enohob. 11:28 Hanoba en arougb leng Israel naugb len leic domba mogwihi largeh meren misis mecdemaga augwan dougwo malaikad. Dauntoba en emogod len merisi mebin lemomom touwero, doba len merna agau namcir. Anai en medoc ebdebin an areg ELOHIM os dou Abraham eisaugb Kanaan gin terimda. Dangga hang, en emenara dou leng Israel, dauntoba len merdoc moc dougwo Lona Gohw Bedreg gin touwero. Doba len merna eiseisan naugb len lougwan ared debin gin se lona daiyamo gacin toua terimda. Anai sug malaikad en eiya, doba mogwihi eb se misis mecdemaga ginohob, kaba, en emogod meis mebin se tu ingga touwero, doba en edreg namcir. 11:29 Dara leng Israel len toua lod merna debsa ELOHIM an areg en os dou Abraham gin touohob. Dangga hang, sug len ledebeij se Duhu Gahani meberohob, kaba, duhu eij dau len. Hanoba len leraga se medi, aninim dag len leraga se lonog gin toua. Doba sug Piraun men sadodor len lainyen naugb len leraga ucan leng Israel se medi gini, kaba, duhu eij baijahasem debin len laugwan lomom louwa namcir. 11:30 Dangga toua, sug leng Israel lec merohora acec cinogo Yeriko se leng Kanaan meren hancob se lona senggai, kaba, ELOHIM ahacugb liga geb acec cinogo ingga augwan mor mor dau len namcir. Anai len merdoc emaihagab ELOHIM mer an areg en en dou len eisaugb gin touwero. Doba len merdoc ebdebin an en mer gin terimda, hanoba len laimo touohob. 11:31 Dara gida hom gedig en maga eijouhw se cinogo Yeriko ingga, en moho Rahab, kaba, sug lahwai dau leng Israel laino len merin naugb ladogmac dougwo lusud se cinogo ingga, kaba, en emens lan dou men mougtir touwero. Doba en ebin lan dara geigouhw se men tu. Hanoba en ecgoneh lan toua. Anai sug en ouman dag ELOHIM os cinogo Kanaan ingga dou leng Israel ginohob, kaba, en medoc emaihagab gin touwero. Doba en toua medoc ebdebin an gin namcir. Dangga hang, sug leng Israel leinesa cinogo ingga, kaba, len lemogod en touwero. Doba len logod leng gus laugwan eng lomom dous. Anai len loududa ELOHIM en mer an areg len louman dau len gusohob. 11:32 Dara dan douwan decic dau Gideon, Barag, Simson, Yebta, Daud, Semuel, dara leng lesai ELOHIM moro sug nosa, len laugwan meren geicara dou yen toua. Doba cumougt emedeinyum naugb sug dan dens dau meren geicara augwan dou yenero. 11:33 Anai len toua merdoc emaihagab ELOHIM mer an areg en os dou Abraham gin touwero. Doba len merdoc ebdebin an en mer gin toua terimda. Dangga hang, ELOHIM en emamsoho lenero. Doba en eic goubesa dou len naugb len laiyan mougt mera goujir an meren logodeh leinyana, dara len laimo areg asesa ELOHIM enin medoc mes augwan an len gus toua terimda. Hang areg ELOHIM os dou lenohob, kaba, augwan emediyebeiya dau len touwero. Doba len lesma namcir. Dara len lemahau dau sug aremeta mog mog au len touwero. Doba sug len merdoc ebdebin an ELOHIM dag ginohob, kaba, meren goubesa inggebga naugb len lagaigeij len merirs dougwo namcir. 11:34 Dara len lob smougb dau len naugb smougb emait len. Dara lusud lemedesugb len touwero, doba len merna agau dau augwan gin terimda. Len laugwan gin, kaba, lenin meren goubesa ingmaro. Doba sug len merdoc ebdebin an ELOHIM en mer dag ginohob, kaba, ELOHIM eic goubesa medam dou len. Dangga hang, sug len lesara dara lugmahara meren sadodor, kaba, len locir len laugwan lougb dau len toua namcir. 11:35 Dara ligida merug hosa, kaba, ELOHIM eigdoumesa len merusur merug aibibra dau gomom ucugb. Hanoba en eic len ucugb dou len toua. Anai len merdoc emaihagab ELOHIM mer touwero. Doba sug len merdoc ebdebin an areg ELOHIM arougb len an ginohob, kaba, len laimo en mer gin toua. Dara lusud merug hosa deit, kaba, leng merug mog lenara dou len, lendagai: Sug yen yobsara dau ELOHIM naugb yen yemesijaresa en deitero, doba yen yesijaresa emen seiseij gin dous, kaba, emen emeic mog erij medam dou yenero. Doba emen emarges dau yen namcir. Dobnaro. Len lemousa deisa len merir an touwero. Doba len louci naugb len laimo ucina mog erij aud gomom gin dous. Anai len merdoc ebdebin an ELOHIM dau sug len lomomohob, kaba, dag en emeigdoumesa len aud maireseb menau geb huhugb gin toues. Anai maireseb menau gin, kaba, eigouhw bedreg dau maireseb se cinogo gin toua namcir. 11:36 Dara ligbum, kaba, lusud lesmesman len, hanoba len labosbos len. Doba lingma, kaba, len louf len se tu gesisug. Hanoba len leic kawamab naugb len lohud len merisira dara merohora darem sungga toua. 11:37 Dara lingma, kaba, len leic igdahab lad len lomom. Dara lingma deit, kaba, len leic sigigeser, hanoba len lougb len meraga dag hwai icira. Dara ligbum, kaba, len leic krawan naugb ladesugb len lomom toua. Anai len laugwan gin, kaba, len lemouwan naugb lemobsara dau ELOHIM enero. Doba len louwan naugb len merdoc ebdebin an areg en os dou len gin dous. Dara ligbum, kaba, lusud lerba len dau meren tu, hanoba len leida meren aremougb augwan dau len toua. Hang len ledag irinya naugb len leg domba dara kambing mos dag sansun dougwo len. Dara sireba len toua namcir. Dara lusud lemamsoho len touwero. Doba len losos ucucan len naugb len leic mog erij dou len toua terimda. 11:38 Dara lingma deit, kaba, len lougb dau leng merug mog gini. Hanoba len lesebesa se lomougwisa dara menmod. Dara len latou se cinogo dara igdohos mes dau len gin toua namcir. Anai len merdoc emarges dau areg ELOHIM os dou len gin touwero. Doba len lod merna debsa en an gin terimda. Dangga hang, len laugwan gin, kaba, emedeinyum naugb sug len leija lusud gedig Bilis oiharaga len se cinogo gin dag len mersir deitero, doba len merdoc susugb dau lenohob. 11:39-40 Dara ELOHIM enin toua ouma debin meren geicara gini se Surad Injil Meb Mohon deb sug nosa touohob. Anai len lemobsara dau areg en os dou len gin touwero, doba len les agadgeij namcir. Anai areg ELOHIM os dou maman se lona daiyamo gacin gin, kaba, augwan eigouhw edreg dau areg en os dou len graga sug nosa ingga toua namcir. Dangga hang, areg en os gacgunog dou len gin, kaba, en emeic dou len touebma. Doba en eigtou naugb sug gos dou menau gin eb naugb maman touahabi, en emeic dou len dara maman maugwan cum dous. Anai en emouwan naugb leng nosa gin, kaba, lemedebeij usi ino maman mamin touwero. Doba en ouwan naugb maman maugwan madebeij usi gin mougwa cum aninim dous.

Ibrani 12

12:1 Dangga hang, sug leng graga leino maman mamin se ucina mog erij aud gomom dag ginohob, kaba, eigouhw naugb maman mamobsara dau ucina gin touwero. Doba maman marba areg gougb sogo maga dougwo maman asa ucina gin. Dara sesar gahud maman augwan dau maman toua. Dauntoba sug maman mamug mogud naugb maman maobga mateijim se ucina mog erij areg ELOHIM arougb maman an gin toua terimda. Anai len gini, kaba, len lesa acec maman se ucina gini naugb loho merir debin maman icira gin toua. 12:2 Dara sug maman maobga se ucina mog erij gin, kaba, maman mamdoc moc dougwo Yesus men geicara naugb maman sug nosa gin touwero. Doba sug maman mamdoc ebdebin an en aimougtutohob, kaba, maman mamdoc ebdebin an en terimda edebeij Lona Sug Ouwedoc gin toua. Anai en, kaba, en emobsara dau ucina mog erij aud gomom taiba sogo salib gin touwero. Doba en aiyan medocesem naugb en aimo ucina gin terimda ouwedoc toua. Dara sug lusud lesmesman en icira gin, kaba, igdebes emeba en an touwero. Doba en eic mos naugb gini namcir. Anai en ecinaga dau sug en aimo ucina mog erij gin terimda sug ouwedocohob, kaba, areg eic en medoc agahugouhw dou en, kaba, augwan emediyebeiya dau en touwero, doba emeb naugb ens. Hang iteitogin, kaba, en edeigtou desij ELOHIM se men maija moc dig en mesira misen naugb en edag mougt mera medam gin touohob. 12:3 Dangga hang, yen meigdoc emomomtom naugb sug yen yobsara dau ucina mog erij gin touwero. Doba yen meigdoc eiseisan mog erij areg leng lebesesar leic dou Yesus an yenohob. Hanoba yen yaiyan meigdocesem naugb yen yaimo ucina mog erij gin toua terimda. 12:4 Anai leng lebesesar gin, kaba, len lemeic gomom dou yen touebma. Doba len leic mog erij misen dou yen dousaba. 12:5-6 Era dagiro? Yen meigdoc moc dougwo areg ELOHIM enara dou yen se Surad Injil Meb Mohon deb sug nosohobei? Anai sug yen yedag en mogwihi mogo yen dag ginohob, kaba, en enara bad yen meigdoc mes dag gini, endagai: Dan indihirija, yen yemesbes an dan sug dan deic mog erij dou yen debin meijen geicara gecgu touwero. Doba yen yesedoc gin namcir. Dara sug dan den dougwo yen sug yen yaimo areg dag sesar, kaba, yen meigdoc emobsara icira gin touwero. Doba yen yaiyan meigdocesem naugb yen yes agadgeij namcir. Anai gareg dan indoc gororougb en, kaba, dan den dougwo en an men geicara sug en ebesesar. Dara gareg dan deigdoumesa en moho dag dan indugwihi mogo enohob, kaba, dan deic mog erij dou en icira sug en aimo areg gecgu ingga toua. 12:7-8 Augwan gini aimo dau merner se cinogo gini meren geicara toua. Anai mena gareg en emogod en mehir dougwo meren geicara gecgu ginero? Naro, sud hom ingma emeicara dag gin touebma. Dangga hang, yen yemobsara dau sug yen yaimo ucina mog erij gin touwero, doba yen yes agadgeij namcir naugb yen yaimo mog erij gin terimda. Hanoba yen yeigdoumesa mog erij gini, aninim dag en dau yen Meijina se bogo gin touohob. Anai sug yen yemaimo ucina mog erij ginero, kaba, gini ansins dag yen yemedag ELOHIM mogwihi mogo dag misen touwero. Doba yen yedag len gedig merna emaiyero dous. Doba sug yen yaimo ucina mog erij gin, kaba, gini ansins dag ELOHIM eigdoumesa yen dag en mogwihi mogo yen dag misenohob. Anai astesda gareg ELOHIM eigdoumesa en moho dag en mogwihi mogo enohob, kaba, en eicara dangga an en toua terimda. 12:9 Dara maman mamina se cinogo gini, sug len logod maman dougwo maman geicara gecgu gin, kaba, maman mamen dougwo len an touwero, doba maman macguna dou len. Hanoba maman maimo len merir an ara ara augwan toua terimda. Dangga hang, sug maman maigdoumesa maman mamina se cinogo len meroho dag ginohob, kaba, eigouhw naugb maman mameic mamus dou maman Mamina se bogo sug en eic mog erij dou maman touwero. Doba maman macguna dou en icira gin toua namcir. 12:10 Anai maman mamina se cinogo gin, kaba, len leic mog erij dou maman cum cum dous, laimo dau areg len lauwam an se lenin merdoc mes an maman toua. Doba maman Mamina se bogo gin, kaba, en eic mog erij dou maman. Dauntoba sug maman marges dau areg gecgu ginohob, kaba, en eic maireseb menau geb huhugb dou maman. Hanoba en ogugwo areg geb se enin medoc mes ingma dou maman toua. Dauntoba maman geicara augwan aninim dag men geicara toua terimda. Anai en ouwan naugb areg geigouhw gini eb naugb maman dous. 12:11 Dara aimougtut, kaba, mog erij gini emeic dag maman mamdoc emeigouhw touwero, doba eic dag maman mamdoc momogo icira gin namcir. Doba sug maman maimo ucina mog erij gin terimda edebeij sug ouwedocohob, kaba, ousa maman naugb sug maman maimo areg asesa ELOHIM enin medoc mes. Hanoba ousa maman naugb sug maman maic gesgigouhwesa dou lusud toua terimda. Anai mog erij gin, kaba, eic bagad dougwo maman mambes. Dauntoba maman mamaimo areg gecgu deitero, doba maman marges dau namcir. 12:12 Dangga hang, sug mog erij gini ens dou yen dag yen yedag ELOHIM mogwihi mogo yen dag misenohob, kaba, yen yemobsara dau ucina gin touwero. Doba yen yaiyan meigdocesem naugb yen yes agadgeij namcir. Dara yen meijohora emomcirec naugb yen yemeigtou touwero. Doba yen yeisa yesa. Hanoba yen yaimo ucina gin dara goubesa terimda edebeij sug ouwedoc toua. 12:13 Dara sug yen yeraga ucina gin, kaba, yen yemeraga deiyogeh touwero. Doba yen yec dobosboro asa ucina gini terimda. Dauntoba yen meijohora gomcirec gini ouwasis toua. Anai sug yen yaimo ucina gagabgeb terimda, kaba, cum eic dag yen meijohora omcirec medam edreg dau mohw deit. 12:14 Hang yen yemoho aremer debinim touwero. Doba se meijen geicara augwan, kaba, yen yaimo areg geic gesgigouhwesa doum ucucugb dous. Dara yen yemaimo areg gecgu mougwa hom touwero. Doba se meijen geicara augwan, kaba, yen yeic meijuwemougb esesa naugb yen yeicara yaimo areg ELOHIM enin ouwan dous. Anai gareg en emaimo areg gecabecero, kaba, en emdeiya maman Adehsud gin touwero. 12:15 Dara yen yebehnehino yenin meigdoc mes ucucugb terimda. Dauntoba sud hom ingma dau yen, kaba, en emohw medigo dou areg geigouhw gedig ELOHIM eic dou enohob gin touwero. Doba areg ELOHIM ogugwo dou enohob, kaba, en eicara baimo augwan gin toua terimda. Anai ELOHIM, kaba, medoc eineg an enohob. Dara yen yesedougwo yenin meigdoc mes. Dauntoba sud hom ingma dau yen, kaba, areg gedougdaha emeiji se en medoc mes touwero, doba en arges dau namcir. Anai cum, kaba, gedougdaha gini ehin leinyana merdoc mes, hanoba eic gogor dou len laugwan deseino ELOHIM touohob. 12:16 Dangga hang, sud hom ingma dau yen, kaba, en emaimo areg gecgu. Hanoba en emesbes an mecigbougb areg ELOHIM esedeb naugb enohob, aninim dag Esau en touwero. Anai en, kaba, en edag meis mebin, doba en eic mecigbougb areg mena ogugwo debdodo enohob naugb en auma ared geb se igdebir hom dous. 12:17 Dara yen yecinaga dag se lona daiyamo deit, kaba, en aganini en mena naugb en ocuncum dou ELOHIM, dauntoba ELOHIM eic geigouhw dou en. Dara en eb batagaij an toua, doba mena asidged en deb. Anai sug en medoc dag liseh an mecigbougb dou en magto dag ginohob, kaba, mecigbougb gin emeb naugb en toua deitero, doba ediyebeiya dau en beb huhugb namcir. 12:18 Dangga hang, eigouhw naugb yen yemesbes an mecigbougb areg ELOHIM esedeb naugb yenohob, aninim dag Esau gin touwero. Doba yen yesedougwo gin deigeigouhw namcir. Anai sug yen yedebeij ELOHIM gin, kaba, yen yemedebeij en se menmod Torsina, aninim dag maman mamjemouwer leng Israel sug nosa touwero. Doba yen yedebeij en se menmod Sion dous. Anai menmod Torsina gin, kaba, eb se cinogo gini, hang emedeinyum naugb lusud lemos toua. Dara sug nosa, kaba, smougb mouf eisa, dara umer bebeigbogo namcir, dara loungmen eisa medam se menmod gin toua terimda. 12:19-20 Dara len louman higbei mougb medam. Dara len louman ELOHIM enin eng esulou len dau lobeigbogo mofu gin toua, dauntoba len lemos menmod ingga touwero. Doba len lesa aigusi dau gin namcir. Hanoba, en enara dou len, endagai: Sud hom gareg dau yen en edos menmod gin, kaba, yen gus yeic igdahab yad en bomom namcir. Dara yen yemeicara dangga dou lusud dousero. Doba sug aremeta hom edesa desij menmod gin, kaba, yen yeic igdahabi yad en bomom toua. Dangga hang, sug maman mamjemouwer louman dau areg ELOHIM esulou len an gin, kaba, len lemaiyan merdocesem naugb en mer gin touwero. Doba len len dougwo en, dauntoba en emenara dou len deitero, doba en arges mer dau len. Anai areg len leiya gin, kaba, eic dag len merdoc omom dau gin namcirohob. 12:21 Dara Musa enin toua ouma debin gin, endagai: Dan toua indoc eijesa medam. Dara dan dahau dau augwan gin toua terimda. 12:22 Doba se menmod Sion gin, kaba, areg dau nosa ingga augwan emedebeij yen touwero. Doba sungga, kaba, yen yedebeij malaikad leinyana gougwa. Anai menmod Sion gini, kaba, aninim dag cinogo moho Yerusalem eb se bogo naugb sug ELOHIM Gedig En Eis Huhugb en eigtousa. 12:23 Dara yen yedebeij lusud gedig ELOHIM og len meroho se Surad Maireseb Huhugb sungga toua. Anai en eigdoumesa len meroho dag en meis mebin len laugwan touohob. Hang len merdoc agahugouhw an gin toua namcir. Dara yen yedebeij ELOHIM gedig en ogod aremer aga lusud laugwan se menmod Sion gin toua. Dara yen yedebeij lusud gedig len lemarges dau ucina gin touwero. Doba ELOHIM ahwan len laugwan naugb len laimo ucina gini terimda len ledebeij usi gin touohob. 12:24 Dara yen yedebeij Yesus gedig en edag gembala gesa taij naugb en ogod areg geb se ELOHIM men gos dou menau augwan an maman sungga toua. Dangga hang, areg geb naugb mamanohob, kaba, augwan eigouhw bedreg dau areg geb dou lusud se ELOHIM men gos dou mohon sug nosa toua namcir. Anai sug Habel eic aremeta mogwihi bauwaharo dou ELOHIM naugb men sesar sug nosa ingga, kaba, mogwihi gini edu en maga dous eng ecabeci deseino ELOHIM. Doba sug Yesus eic enin mogwihi bauwaharo dou ELOHIM naugb maman sesar. Hanoba en eic en mogwihi bargeh maman touohob, kaba, edeinyum naugb edu maman mamdoc mes ecabeci dau maman sesar augwan. Hang sesar men gogom emeb naugb maman toua deitero, doba augwan ediyebeiya dau maman namcir. 12:25 Dangga hang, sug yen yedebeij ELOHIM men cinogo moho Yerusalem geb se bogo dag ginohob, kaba, yen yemeicara yemaihagab en mer gin touwero. Doba yen yei meijums deinaugb en mer gin terimda. Anai sug ELOHIM eic gogom dou maman mamjemouwer gareg en aihagab en mer sug nosohob, kaba, dagiro, naugwe hang, yen youdesa en emamsoho maman sug maman maohw mamidgo dou en mer menau gin toua? Naro, en emamsoho maman touwero. Doba en eic gogom medam dou maman edreg dau len deit. Anai sug nosa, kaba, en enara dou maman mamjemouwer, doba se menmod Torsina geb se cinogo gin dous. Doba areg en enara dou maman iteitogin, kaba, en enara dou maman dau bogo. 12:26 Dangga hang, eigouhw naugb maman mamesbes an en mer gin touwero, doba maman maimo terimda. Anai en esulou maman dag se lona daiyamo gacin, kaba, en emetitir cinogo gin hom dousero. Doba en etitir areg geb se bogo meniha augwan toua. Aninim dau sug en enara dou maman mamjemouwer se menmod Torsina sug nosa, kaba, en mer etitir cinogo an len sungga touohob. Hanoba en os dou len se Surad Injil Meb Mohon deb sug nosa ingga, endagai: Se lona gacin, kaba, dan demetitir cinogo gin dousero. Doba dan demetitir areg geb se bogo meniha augwan mougwa hom dara toues. 12:27 Sug ELOHIM enara dag en etitir augwan mougwa hom dag gin deit, kaba, gini ens dou maman dag areg ELOHIM ahasesei dara esinsinohob, kaba, augwan gini ediyebeiya dau maman namcir. Dauntoba areg emeinyeinyaro, kaba, augwan ebsugeb naugb maman terimda. Anai areg en ahasesei dara esinsin gin, kaba, augwan dag areg geinyeinya dous. 12:28 Dangga hang, sug ELOHIM eigdoumesa maman mamoho naugb sug maman mainesa men goiharaga dag ginohob, kaba, maman man sijo dou en esesa terimda. Dara maman marges dau sug maman maimo areg en arougb maman an gin touwero. Doba maman masijaresa en dara maman mahau dau en toua namcir. Hanoba maman maimo areg geic en medoc eigouhw dou en an augwan toua terimda. Anai men goiharaga gin, kaba, emeinyeinya naugb emediyebeiya dau maman touwero, doba ebsugeb naugb maman namcir. 12:29 Maman maicara dou en dag gini, anai maman ELOHIM gin, kaba, en edag smougb mouf. Hang gareg en emaimo en mer ginero, doba eicara aihagab en mer gin terimda, kaba, en eic mor mor dou en toua namcir.

Ibrani 13

13:1 Dangga hang, yen toua, sug yen yedag hom se Krisdusohob, kaba, yen yemarges dau sug yen meigdoc gororougb yen meijaguner dara yen meigdamouwer lenero. Doba yen yeicara yaimo dag gin anim terimda. 13:2 Dara yen yemehig dau sug yen yebin lugmahara touwero. Doba yen yeicara yaimo dangga an len toua terimda. Anai ligbum sug len lebin lusud dag gin sug nosa, kaba, len lebin malaikadir augwougb touohob. Anai sug len lebin len, kaba, len lemecinaga dag len lebin malaikadirero. 13:3 Dara yen meigdoc moc dougwo leng Krisden gedig len leigtou se tu gesisug icira Krisdus gin touwero. Doba yen meigdoc eiseisan len naugb yen yousa len dara ara ara augwan toua. Aninim dag yen toua sug yen yeigtou se tu gesisug, kaba, yen youwan len gus merdoc moc dougwo yen touwero, doba yen youwan len merna eiseisan yen naugb lousa yen toua. Dara yen yemehig dau sug yen yousa leng laimo ucina mog erij touwero. Doba yen meigdoc eiseisan len naugb yen yousa len toua. Aninim dag sug yen yaimo ucina mog erij, kaba, yen youwan lusud lemehig dau yen touwero. Doba yen youwan naugb len lousa yen toua terimda. 13:4 Dara gareg dau yen en eic mesouwohob, kaba, en emaimo ligida gus toua deitero. Doba en eigdoumesa mesouwa en moho naugb en eic en hom dous. Dara yigida, gareg dau yen en es mesuwohob, kaba, en emohw en maga dou ligiji gus touwero. Doba en eigdoumesa mesuwa en moho naugb en es en hom dous toua. Anai gareg en medoc edreg dau mesuwa era mesouwa, hanoba en mesira ebsa len gus aibibra, kaba, ELOHIM ogod gogom medam deb naugb enohob. 13:5 Dara se meijen geicara augwan, kaba, yen meigdoc emetrij icira aremougb dara aregoufu mougwa hom touwero. Doba areg geb naugb yenohob, kaba, yen meigdoc ebtou an gin namcir. Anai ELOHIM oho mer debin maman se Surad Injil Meb Mohon deb sug nosa touohob, endagai: Dan demarges danin dau yen dara dan demamsoho yen deb touwero. Doba dan deigtou desij yen naugb dan deseyeiyo yen beb huhugb namcir. 13:6 Dangga hang, sug ELOHIM eni moongga desij maman naugb en eseyeiyo maman dougwo areg gecgu dag ginohob, kaba, maman mamahau dau sug len gus leic gecgu dou maman touwero. Doba maman maic mamus naugb augwan gin toua terimda. Hanoba maman manara dou len toua, maimo dau areg sud hom erba Ugwaremer an deb sug nosa touohob, mandagai: Emen Adehsud, kaba, en en aud emen naugb en eseyeiyo emen dougwo areg gecgu ginohob. Hang emen emahau dau aremer areg yen yeic dou emen gin touwero. Doba emen emeic emus naugb yen an gin namcir. 13:7 Dara yen meigdoc moc dougwo meijen mougtir meren geicara sug len meriresebaba touwero. Doba yen meigdoc eiseisan meren geicara gin terimda. Anai sug len lesai ELOHIM en mer eisaugb Krisdus dou yen sug nosa, kaba, len lemobsara dau sug lusud leic mog erij medam dou len icira ginero. Doba len les agadgeij naugb len laimo gin terimda edebeij lona sug len lomom touohob. Dangga hang, yen toua yemobsara dau sug yen meigdoc ebdebin an ELOHIM touwero. Doba yen yesogwa deisa len merohotimei mohw se ucina mog erij gin toua. 13:8 Aninim dag Yesus Krisdus, en emobsara dau men geicara touwero. Doba en aimo augwan gini dau sug aimougtut terimda beb huhugb an maman toua namcirohob. 13:9 Dangga hang, sug lusud lesai mer areibahau aingma aingma dou yen, kaba, yen yemaimo len merir an gin touwero. Doba yen yebehnehino yenin meigdoc mes dougwo len merir gin namcir. Anai areg len ledidib dou lusud dau sug len lousan lenin dau ara ara, dara len lehig dau ared, kaba, emousa len naugb len les agadgeij se ucina se geica ginero. Doba ahwan len naugb len laijahasero dau gin dous. Doba sug yen yaimo geigouhw areg ELOHIM eic dou yenohob gini terimda, kaba, yen yemobsara dau ucina misen ginero, doba yen yes agadgeij se gin namcir. Anai areg en eic dou yen gin, kaba, aimo dag en medoc eigouhw an yenohob. 13:10-11 Dara areg maman mabdeb se boromei naugb mauwaharo dou ELOHIM iteitogini, kaba, toua susugb dau areg leng lesedougwo ELOHIM men tuari sug nosa len lobdeb se boromei naugb len lauwaharo dou en touohob. Anai sug len logug aremeta an mogwihi, kaba, Gembala Gesa Taij Meren Mougt Mera Medam en odo dabei an mogwihi gini bainesa ELOHIM Men Dimei Gecabeci Namcir. Hanoba en eic mogwihi gini bauwaharo naugb enin dara lusud meren sesar dou ELOHIM. Gin dauwohob, kaba, len lodo aremeta medesa dau igtia dig medigo naugb ledec se smougb se boromei taiba sungga toua. Doba maman, kaba, maman mameic aremeta mogwihi mauwaharo dou ELOHIM dag gin deitero. Doba maman maic dau sug maman magahugouhw an ELOHIM dag mauwaharo dou en dous. Hang gembala gesa taij gesedougwo ELOHIM men tuari sug nosa, kaba, meren goubesa ingma naugb sug len let ara ara dau maman boromei touwero. 13:12 Sug gembala gesa taij lodo aremeta medesa dig medigo naugb ledec se smougb bansins dag lusud meren sesar ediyebeiya dau lenohob, kaba, Yesus en omom taiba sogo salib naugb maman sesar se Yerusalem medigo dag gini touohob. Dauntoba sesar men gogom eb naugb maman toua deitero. Doba en edu maman mamdoc mes ecabeci dau augwan gin namcir, aninim dag gembala gesa taij leic aremeta mogwihi naugb lusud meren sesar sug nosa touohob. 13:13 Hang igdebes emeba maman dau Yesus touwero. Doba maman maisa dau igtia mougb ucan en dig medigo naugb maman masogwa deisa en mohotimei mohw se ucina gesmesman gin toua terimda. 13:14 Anai se cinogo gin, kaba, maman mameigtou dag magun deb se terimdero. Doba maman mamdoc erleij aud cinogo menau geb naugb maman se lona daiyamo gacin beb huhugb namcir dous. 13:15 Dangga hang, sug Yesus eic en mogwihi ancoho aga maman naugb ELOHIM dag ginohob, kaba, maman mamarges dau sug maman masijaresa ELOHIM dara magahugouhw an en touwero. Doba sug maman maos madi en moho dag maman mougt mera medam dou lusud dag gin, kaba, maman maicara dangga dou en besesa terimda. Anai gini dag maman maic ara ara mauwaharo dou en touohob. 13:16 Dara yen meigdoc moc dougwo dau sug yen yeicara yaimo areg geigouhw anim touwero. Doba yen yehilon ucina naugb yen yousem ucucugb. Dara yen yeigdoumesa areg gogom geb debin yen daum toua. Anai meijen geicara gin, kaba, aninim dag yen yeic areg mena ouwedebeda yauwaharo dou ELOHIM. Hang eic dag en medoc agahugouhw an yen toua namcirohob. 13:17 Dara yen yemeicara yemaihagab meijen mougtir, len merir touwero. Doba yen yowun yenin meigdoc mes arjaga deseino len naugb yen yaimo len merir an areg len len dou yen gin toua. Anai len leic meruwemougb esesa naugb len leseyeiyo yen dougwo areg gecgu augwan namcir. Dauntoba yen yemaimo gin deitero, doba yen yaimo areg geigouhw mogud dous. Dangga hang, sug yen meigdoc edag beim an len merir terimda, kaba, len lagauwesa yen dara merdoc agahugouhw an yen toua. Doba sug yen yohoiya len merir, kaba, len lesedougwo yen dara merdoc momogo. Hang emeic dag yen yemesma geigouhw icira gin touwero. Doba eic dag yen yesma gogom medam dau gin dous. Anai se lona daiyamo gacin, kaba, ELOHIM arougb len naugb len lens aremeijouhw astesda dau yen dou en toua. 13:18 Doba naugb danin, kaba, dan decinaga dag aremer hom emdagunya debin dan an yen touwero. Anai dan deic induwemougb esesa naugb dan daimo areg gedag beim dara areg obosboro an yen dara len gus laugwan touohob. Dangga hang, yen yemarges dau sug yen yocuncum dou ELOHIM naugb dan touwero. Doba yen yeicara yaimo dangga besesa naugb dan terimda. 13:19 Dara dan dacgeij yen edreg dau nosa deit, dag yen yocuncum termum namcir, dauntoba ELOHIM esedeb ucina naugb dan dedebeij yen sungga dedemeda toua. 13:20 Dara dan toua docuncum dou ELOHIM gedig en eic gesgigouhwesa dou maman dougwo areg gecgu augwanohob, naugb en eic men goubesa edeinyum dou yen. Dauntoba se meijen aremer augwan, kaba, yen yaimo areg asesa enin medoc mes dag lusud mos toua terimda. Anai en, kaba, mobisamougb namcir. Hang en emeigdoumesa maman Adehsud Yesus en eisa ucugb dau leng lomom laugwan touohob. 13:21 Dara dan docuncum dou en naugb en arautut yen meigdoc mes, dauntoba areg yen yaimo deseino en ogdoc Yesus Krisdus en men goubesa gin, kaba, eic dag en medoc agahugouhw an yen toua. Anai en, kaba, en eir en mogwihi debin ELOHIM men gos dou maman ginohob. Dauntoba areg ELOHIM os dou maman, kaba, augwan emediyebeiya dau maman touwero, doba eb naugb maman beb huhugb namcir. Dangga hang, eigouhw naugb maman mamarges dau sug maman magahugouhw an Krisdus gin touwero. Doba maman maigdoumesa en moho beb huhugb terimda. Anai sug en eic enin mogwihi bauwaharo dou ELOHIM naugb maman sesar dag ginohob, kaba, en edag Gembala Gesa Taij Moho Agas medam naugb maman touohob. Augwan gini asesa dag misen namcir. 13:22 Dan indagunerij, dara dan indamouwerij, yen meigdoc emesrougb an areg dan dog dou yen ginlo. Doba yen yeigtou yateteij naugb gin terimda. Anai areg dan dog dou yen gin, kaba, naugb dan denara dad yen meigdoc mes, dauntoba yen yaiyan meigdocesem naugb yen yes agadgeij namcir. Dangga hang, dan demog surad gini emagas naugb yen touwero. Doba dan dog dag agarougb naugb yen dous. 13:23 Dara dan douwan dens dau maman maguna Timotius men meijouhw augwan asesa dou yen toua. Dauntoba yen yecinaga dag en emeigtou se tu gesisug toua deitero, doba en agunya dauwohob. Dangga hang, sug en edebeij dan sug dan demdeiya yenbuma, kaba, dan dacgeij en naugb en aimo dan. Dauntoba aman amahwas amdoumouma yen toua. 13:24 Dara yen yen dou meijen mougtir dara len gedig ELOHIM ouci len debinim naugb enohob, kaba, dag emen emou len laugwan. Dara leng dau leng Italia meren hancob sugin, kaba, len laugwan lou yen toua. 13:25 ELOHIM medoc eineg an yen yaugwan toua terimda.

Yakobus 1

1:1 Surad gini dau dang, Yakobus, dou ELOHIM men lusud gedig len laisoboro sungga sungga yen yaugwan. Dan dog surad gini dou yen, anai dan dedag ELOHIM dara maman Adehsud Yesus Krisdus maran sogougb ginohob. Hang dan demou yen toua. 1:2 Dan indagunerij, dara dan indamouwerij, sug yen yaimo ucina mog erij aingma aingma, kaba, yen meigdoc emeijesan ginlo. Doba yen meigdoc agahugouhw naugb gin namcir. 1:3 Anai yen yecinaga dau sug lusud lainyen yen, doba yen yeic meijus naugb len. Hanoba yen meigdoc ebdebin an Krisdus terimda, kaba, dag cum, kaba, yen yaiyan meigdocesem dougwo augwan toua namcir. Hang yen yemobsara dau Krisdus men ucina touwero, doba yen yes agadgeij se gin terimda. 1:4 Dara sug yen yaiyan meigdocesem dag ginohob, kaba, yen yemobsara dau gin touwero. Doba yen yes agadgeij naugb sug yen yeiji dag lusud mos se Krisdus. Anai sug yen yeicara dag gin, kaba, yen yemedis aremer geigouhw hom touwero. Doba yen yaimo augwan dag misen toua namcirohob. 1:5 Dangga gareg dau yen en emecinaga areg edag beim dara gobosboro an lusud dag misenbuma, kaba, eigouhw naugb en acgeij ELOHIM. Dauntoba en eic mou ouforoho dara mou auti se aremer augwan gini dou en toua. Anai ELOHIM, kaba, en medoc emagaigeij ara ara dau lusud laugwan, hanoba en emehig debin dau len touwero. Doba en medoc erera naugb en agaha mesira an dou len terimda. Dangga hang, gareg en acgeij mou ouforoho dara mou auti dau en, kaba, en emeic bedeinyum augwan dou en toua. 1:6 Doba esloulougb naugb sug sud hom en acgeij ara ara dau ELOHIM, kaba, en emeija medocesa en an touwero. Doba en od mena debsa en an gin dag misen namcir. Anai gareg en eija medocesa ELOHIM an areg en acgeij dau en terimda, kaba, en edag duhu mogo gedig loungmen oto dig gacda, dig ginin dous. 1:7-8 Sud hom dag gin, kaba, emedeinyum naugb sug en od mena debsa ELOHIM dag en emeic ara ara hom dou en touwero. Anai en edag sud hom gedig en medoc hwai namcirohob. Hang en medoc eijeij icira aremer gus augwan toua terimda. 1:9 Dara yeng Krisden gedig yen meijoho eb tainya, kaba, yen meigdoc momogo dau sug yen yaimo ucina mog erij gin touwero. Doba yen meigdoc agahugouhw an gin namcir. Anai gini ansins dag ELOHIM eigdoumesa yen meijoho agas medam deseino enohob. 1:10 Dangga toua, yeng Krisden gedig yen meijisoho mougb, kaba, yen meigdoc momogo dau sug len gus leic mog erij dou yen. Dara len leiyoho meijen aremougb augwan dau yen touwero. Doba sug ELOHIM owun yen meijoho dag gin, kaba, yen meigdoc agahugouhw an gin dous. Anai yen yemeigtou dougwo meijen aremougb gin terimdero. Doba cum, kaba, yen yomom dau augwan gin namcir. Aninim dag aremerij emeb terberba touwero, doba cum, kaba, og ucugb toua. 1:11 Anai sug igdes ohu desrougb inegohob, kaba, en mohora obesa bogod aremerij maga ombrerij. Dara men merij geigouhw gin, kaba, toua mohw ousirij. Hanoba og an toua. Dangga toua, naugb leng merisoho mougb. Anai len leihweda dinga dingada naugb len lehilon aremougb terimda. Doba cum, kaba, len lomom dau augwan gin toua namcirohob. 1:12 Gareg en emobsara dau ucina mog erij ginero, doba en aiyan medocesem naugb en es agadgeij se gini terimda, kaba, ELOHIM eic geigouhw dou en. Anai sug en aimo ucina mog erij gin terimda edebeij Lona Sug Ouwedocohob, kaba, ELOHIM eic maireseb menau geb huhugb dou en toua, aimo dau areg en os deb naugb mamanohob. Anai gareg en es agadgeij dag gin terimda, kaba, en ens enin ainyes dag en medoc gororougb ELOHIM dag misenohob. 1:13 Doba sug ucina mog erij gini ainyen yen, hanoba eic dag yen yobsara aud sesar, kaba, yen yemahacugb gogom debin ELOHIM dag enin eng ainyen yen aud sesar gin touwero. Doba yen yarges meijir dau gin namcir. Anai ELOHIM, kaba, sud hom ingma emainyen en audi areg gecguero. Dara enin, kaba, en emainyen sud hom ingma aud sesar touwero. 1:14 Doba astesda sud hom, kaba, en medoc etrij dau enin medoc mes dous. Hang emahwan en aud areg gecgu. Anai en medoc etrij icira gin, kaba, dag digorobei naugb eica en toua. 1:15 Sug en aimo areg en medoc etrij icira ginohob, kaba, ahwan en naugb en obsara se sesar. Dara sug en aimo sesar ginohob, kaba, eic gomom dou en se dum smougb toua namcir. 1:16 Dangga hang, dan indagunerij, dara dan indamouwerij gedig dan indoc gororougb yen, eigouhw naugb yen yemauwam an didi eisaugb ELOHIM men geicara ginlo. 1:17 Anai en, kaba, en esinsin igda lona, dara igda loba, dara tebeij naugb sug len leic meruf touohob. Hang areg en esa dou maman dau bogo, kaba, hom emecgu touwero. Doba augwan eigouhw dara ecabeci namcir. Anai en emeineg dau maman, dara en emohw medigo dou maman deb se lobeigbogo touwero. Doba en eineg medoc aud maman terimda. 1:18 Hanoba en eic maireseb menau geb huhugb ogdoc en mer geica gin dou maman. Dauntoba maman madag mebin naugb areg en ahasesei augwan toua, aimo dau areg enin eng ogod an deinaugb mamanohob. 1:19 Dangga hang, dan indagunerij, dara dan indamouwerij gedig dan indoc gororougb yen, sug ELOHIM eigdoumesa yen dag mebin ogdoc en mer dag ginohob, kaba, yen yemeigdoumesa yenin meijoho naugb yen yemesai en mer eisaugb Krisdus gini dedemeda dou lusud touwero. Doba yen youman en mer gini terimda yen yecinaga men meijouhw augwan asesa nosahabi, yen yemedidib dou lusud gus toua. Yen meigdoc moc dougwo gin touwero, doba yen meigdoc eiseisan gin terimda. 1:20 Dara sug yen yebedbed en mer gin dou lusud, doba len lemeic yen meijir an gini se len merdoc mesero, kaba, yen meigdoc esrougb an len dedemeda touwero. Doba yen meigdoc eigouhw an len naugb yeigtou yateteij len terimda. Anai sug yen yens dau areg ELOHIM en esedeb naugb lusud dara yen meigdoc esrougb an len, kaba, yen yemahwan len naugb len laimo areg ELOHIM en esedeb naugb len gin touwero. Doba yen yedag sogo maga dougwo len namcir. 1:21 Dangg hang, yen yemaimo areg gecgu dara areg mog mog augwan dag gini toua deitero. Doba yen yerba augwan dau yen meigdoc mes. Hanoba yen yowun yenin meigdoc mes arjaga naugb yen yeicara yaimo ELOHIM en mer areg en esa se yen meigdoc mesohob gin toua terimda. Anai en mer gin, kaba, men goubesa inggebga naugb ahwan yen aud maireseb menau geb huhugb gin toua. 1:22 Dara sug yen youman ELOHIM en mer gin, kaba, esloulougb medam naugb sug yen yemouman dousero. Doba yen yeicara yaimo en mer gin toua terimda. Anai sug yen youman ELOHIM en mer, doba yen yemaimoro, kaba, gini aninim dag yen yaugwohosa yenin dau ucina geihwedaud maireseb menau geb huhugb gin touohob. 1:23-24 Anai gareg en ouman dous, hanoba en emaimoro, kaba, en edag sud hom geiya en mena se sogomehir dag misen. Doba sug en arges sogo mehir debohob, kaba, en medoc moc dougwo en mena dedemeda namcir toua. Anai en emeiyahaiya debinbinero. Doba en eiya cum cum, dangga dous. 1:25 Doba gareg en ogmac ELOHIM en mer eisaugb Krisdus gini dara geigouhw namcir, hanoba en medoc moc dougwo areg en mer arougb en an gin touwero. Doba en aiyan medocesem naugb en aimo terimda, kaba, ELOHIM eic geigouhw dou en se men geicara augwan toua namcir. Anai en mer gin, kaba, moho agas medam edreg dau gomnomna gus augwan namcir. Hang emedeinyum naugb sug emeigdoc maman dau sesar men gogom augwan. Dara ahwan maman terimda maman madebeij maireseb menau geb huhugb gin toua. 1:26 Dangga gareg dau yen en oudesa dag en aimo areg asesa ELOHIM enin medoc mes augwan dag misenohob, kaba, eigouhw naugb en ebehnehino enin mers dougwo areg gecgu augwan toua. Anai gareg en eigdoumesa enin moho dag en aimo areg ELOHIM arougb en an ginohob, hanoba en emebehnehino enin mers touwero. Doba en mers ogor naugb en enara ecgu dou lusud terimda, kaba, en emdec mera hom touwero. Doba men geicara augwan dag augwougb dous. Anai gini aninim dag en augwohosa enin dau ucina geihwedaud maireseb huhugb ginohob. 1:27 Doba gareg en eigdoumesa gogom areg eb debin debdes dara leng adougweni naugb en ousa len dag mogud. Hanoba en emaimo lusud gedig Bilis oiharaga len se cinogo aud areg gecgu touwero. Doba en ebehnehino enin medoc dougwo meren geicara augwan gin toua terimda, kaba, maman Mamina ELOHIM eigdoumesa en moho dag en emedreg en mer hom touwero. Doba en aimo areg asesa enin medoc mes augwan dag misen namcirohob.

Yakobus 2

2:1 Dan indagunerij, dara dan indamouwerij, sug yen meigdoc ebdebin an maman Adehsud Yesus Krisdus gedig en eigtou se gogouf cucugb dag misenohob, kaba, yen yemesi lusud aiyei touwero. Doba yen yeigdoumesa len laugwan meroho aninim dous. 2:2 Anai sug sud hom geg sansun geigouhw dara gob cincin dau emas se en mesira, en einesa meijen tuari. Dara sud hom geg sansun mecicgu einesa tuari ucan en naugb eis Ari toua. 2:3-4 Hanoba yen yeigdoumesa sud hom geg sansun gecabeci naugb yen yenara dou en dag en eigtou se maija moc moho agas. Doba yen yowun sud hom geg sansun ogor naugb yen yenara dou en dag en esa sunggahabi, era en eigtou se cinogo desij yen meijohora dous, kaba, gini dag yen yeigdoumesa lahwas maroho aninimohobei? Naro, yen yowun sud hom geg sansun ogor en moho. Hanoba yen yesi sud hom mesoho mougb aiyei dau en touohob. Hang meijen gauwamara dara meijen geicara gin, kaba, augwan ecgu. Anai gin, kaba, eic dag yen yekeba goucimdeb hwai icira toua namcir. 2:5 Dangga dan indagunerij, dara dan indamouwerij gedig dan indoc gororougb yen, eigouhw naugb yen youman dan indir ginahabi. Anai sug ELOHIM ouci lusud debinim naugb len ledag enin men logodeh misen, kaba, en ouci leng merisoho mougb naugb ginei? Naro, en emouci len ginero. Doba en ouci lusud areg leng se cinogo gin, kaba, len lowun lendag merunggwereij dara leng mecicgu dous. Anai len gin, kaba, len merdoc hom naugb len merdoc ebdebin an Krisdus namcir. Hang en emebin len se men uro mes naugb en oiharaga len. Dara en eigdoumesa len meroho naugb en ogugwo mesoho mougb aingma aingma geb se bogo dou len toua. Anai gareg en medoc gororougb en, kaba, ELOHIM os dag gini deb dou enohob. 2:6 Doba yen, kaba, yen yowun lentog merunggwereij gini len meroho, hanoba yen yeic len toua yacecim namcir. Anai yen yesi leng merisoho mougb aiyei dau lenohob. Doba gareg len logod yen naugb latagaij aremougb dau yen, hanoba len laiyan yen dara lahacugb gogom debin yen deseino sud hom gogod aremer aga lusuda? Leng merunggwereijei? Naro, leng merunggwereij lemeicara lemaimo dangga an yen touwero. Doba leng merisoho mougb dous eng leicara laimo dag gin an yen terimda. 2:7 Dara gareg en eic Krisdus moho gagas gedig ELOHIM eic dou yenohob naugb sug oiharaga yen bacecim toua? Leng merunggwereijei? Naro, leng merunggwereij lemeicara mougwa hom dangga dou yen touwero. Doba leng merisoho mougb dous eng leicara laimo dag gin an yen dous. 2:8 Dangga yen yemowun leng merunggwereij meroho eb tainya mougwa hom touwero. Doba yen meigdoc gororougb lusud laugwan namcir. Anai sug yen yeicara dag gin, kaba, yen yaimo areg edag beim dara obosboro an len. Hang yen yaimo ELOHIM men gomnomna hom geb taiba augwan dag misen touohob. Anai Surad Injil Meb Mohon arougb yen an, endagai: Yen meigdoc gororougb lusud laugwan, aninim dag yen meigdoc gororougb yenin toua namcir. 2:9 Doba sug yen yesi leng merisoho mougb aiyei dau leng merunggwereij dag gin terimda, kaba, gomnomna gini owun yen meijoho dag yen yebesesarohob. 2:10 Anai gareg dau yen en aimo ELOHIM men gomnomna augwan terimda. Doba en edreg se aremer hom gin dous, kaba, gini aninim dag en edreg ELOHIM men gomnomna gus augwan touohob. 2:11 Anai ELOHIM emen dougwo maman dag maman mamsira ebsa ligida dousero. Doba en en dougwo maman dag maman mames dara mamohud lusud touwero. Dangga gareg dau yen en ebehnehino enin medoc mes dougwo ligida. Doba cum, kaba, en es len gus era en ohud len, kaba, en edreg dau ELOHIM men gomnomna gus gus augwan toua namcirohob. 2:12 Dangga yen yemeic leng merisoho mougb aiyei dau leng merunggwereij touwero. Doba areg agunya dau yen meijirs dara meijen geicara an lusud, kaba, yen yaimo ELOHIM men gomnomna hom geb taiba augwan gini an len terimda. Anai men gomnomna gin, kaba, edeinyum naugb eigdoc yen dau sesar men gogom augwan namcir. Hang sug en ogod aremer aga yen se lona daiyamo gacin, kaba, en aimo men gomnomna gini an meijen geicara augwan toua. 2:13 Dangga gareg en medoc emeineg an leng merunggwereij ginero. Doba en medoc agadgeij an len terimdohob, kaba, ELOHIM medoc emeineg an en se lona daiyamo gacin touwero. Doba en medoc agadgeij an en naugb en ogod gogom medam debin en dous. Doba gareg en medoc eineg an leng merunggwereij gin terimda, kaba, ELOHIM emogod gogom debin en touwero. Doba en eic geigouhw dou en namcir. Anai sug sud hom medoc eineg an lusud, kaba, men geicara geigouhw gini aiyan areg gogom dau enohob. 2:14 Dangga hang, dan indagunerij dara dan indamouwerij, yen yemarges dau sug yen meigdoc eineg an leng merunggwereij gin touwero. Doba yen yeicara yaimo dag gin terimda. Anai gareg dau yen en eigdoumesa en moho dag en medoc ebdebin an Krisdus dag misenohob, hanoba en emeicara geigouhw debin ginero. Doba en medoc agadgeij an mesir len gus namcir, kaba, en medoc ebdebin an Krisdus gin, kaba, edeinyum naugb sug ELOHIM eic maireseb menau geb huhugb dou enei? Naro, emedeinyum naugb sug ELOHIM eic maireseb huhugb dou en touwero. 2:15-16 Anai sug sud hom dau yen, kaba, en eiya en maguna hom, era en medamouwa hom eg sansun mecicgu dara men ared ingma emeb naugb enero. Doba en ohw mer misen dou en. Hanoba en enara baseda en, endagai: ELOHIM eseyeiyo ban naugb sug ban beda, kaba, ban bedeg sansun gesrougb dara ban betara beiceb toua, kaba, gini emeigouhw dagiro? Anai sug sud hom gohw mer dou len dag gini dous, kaba, emedeinyum naugb sug ELOHIM eic maireseb menau geb huhugb dou en touwero. Doba en asid en deb dig medigo namcir. Anai sud hom gin, kaba, men ara ara inggebga. Doba en medoc agadgeij an mesir naugb en emousa lenero. 2:17 Dangga gareg en medoc ebdebin an Krisdus, doba men geicara emaimo debin gin naugb en ousa lusud dara ara ara touwero, kaba, en medoc ebdebin an gin, kaba, dag omom dau enohob. Hang emahwan en aud maireseb menau geb huhugb gin touwero. 2:18 Doba sud hom dau yen, kaba, en etaha dan an areg dan dog dou yen graga, endagai: Ligbum, kaba, len merdoc ebdebin an ELOHIM dous. Doba ligbum, kaba, len laimo areg edag beim an lusud toua. Hwas gini edeinyumohob. Doba dan dauni dou ban, dendagai: Sug ban bemeicara bemaimo areg edag beim dara obosboro an lusudero, kaba, dagiro, naugwe hang, ban bens dou lusud dag ban abdoc ebdebin an Krisdus dag misenohoba? Naro, ban bemens dou lenero. Doba sug dan daimo areg geigouhw an lusud dag gin terimda, kaba, dan dens danin ainyes dou len dag dan indoc ebdebin an Krisdus dag misen naugb ginohob. 2:19 Ban abdoc eica ELOHIM dag enin dous eng ELOHIM misenei? Ban abdoc eica dag gin, kaba, eigouhw namcir. Doba merna mog mog, kaba, len toua merdoc eica ELOHIM dag en edag ELOHIM misen hom gin dous. Dangga len merdoc ahau dau en toua. Anai len lemaimo areg geigouhw an lusud debin ginero. Doba len leicara laimo areg gecgu an len terimda. Hang len lecinaga dag ELOHIM esedeb gogom medam deinaugb len touohob. 2:20 Dangga hang, areg ban ben dou graga, kaba, dag sud hom mou edgom namcirohob. Anai sud hom gareg en medoc ebdebin an Krisdus, hanoba en emeicara geigouhw debin ginero, kaba, en emec mera maireseb menau geb huhugb gini touwero. Ban bouwan naugb dan dens gansins hwai debin gin dou ban toua, dauntoba ban becinaga dag misen namcir. 2:21 Anai maman mamjemouwa Abraham, kaba, ELOHIM eic gesgigouhwesa dou en dau sug en medoc ebdebin an areg ELOHIM os dou en dousei? Era dau sug en esedeb naugb en eic en meisi Isag bauwaharo debin gin dou ELOHIM touei? Naro, ELOHIM eic gesgigouhwesa dou en sug en esedeb naugb en eic en meisi bauwaharo debin en medoc ebdebin an gini dou en touohob. 2:22 Dangga hang, Abraham medoc emebdebin an areg ELOHIM os dou en dousero. Doba sug en medoc ebdebin an areg ELOHIM os dou enohob, kaba, en eicara baimo areg ELOHIM arougb en an debin gin toua. Sug en eic men geicara geigouhw baos dara dag ginohob, kaba, eic dag en medoc ebdebin an gin toua edeinyum namcir. Hang emedeinyum naugb sug ELOHIM emeic gesgigouhwesa dou en toua. Naro, kab, naro. Ban abdoc eica ginohobei? Era anambei? 2:23 Anai augwan gini esogwa deisa areg Surad Injil Meb Mohon ouma debin gin deb sug nosa touohob, endagai: Abraham medoc ebdebin an areg ELOHIM os dou en naugb en aimo toua terimda. Hang ELOHIM emeic gesgigouhwesa dou en. Dara en emeija en dag en mesi misen toua. 2:24 Aremer graga augwan, kaba, ens ainyes dou maman dag ELOHIM eic gesgigouhwesa dou lusud emogdoc sug len merdoc ebdebin an en dousero. Doba ogdoc sug len leicara laimo geigouhw debin gin touahabi. 2:25 Dangga toua, dara gida hom gedig en maga eijouhw, en moho Rahab. ELOHIM eic gesgigouhwesa dou en emogdoc sug en medoc ebdebin an areg ELOHIM os dou leng Israel eisaugb cinogo Kanaan gin dousero. Doba ogdoc sug en eicara geigouhw baos dara gin toua. Anai sug lahwai dau leng Israel lan laihweda se meren cinogo Yeriko naugb ladogmac cinogo ingga, kaba, en ebin lan se men tu. Dara en ecgoneh lan toua. Hanoba en edidib ucina susugb dou lan, dauntoba lan lamagasa sadodor dau cinogo ingga touwero. 2:26 Dangga gareg en medoc ebdebin an Krisdusohob, doba men geicara geigouhw emaos dara ginero, kaba, men medoc gebdebin an gini emedeinyum naugb sug ELOHIM eic maireseb menau geb huhugb dou enero. Doba dag omom dous, aninim dag maga emec augwougb dau enin touwero. Doba sug mena einesa, hang emeic goubesa dou maga naugb emec mohora toua. Naro, kaba, maga omom namcir.

Yakobus 3

3:1 Dan indagunerij dara dan indamouwerij, deciciji dau sug leinyana dau yen len merdoc erleij naugb len ledidib ELOHIM mer men meijouhw dou lusud. Anai yen yecinaga dag se Lona Sug ELOHIM Ogod Aremer Aga Lusud, kaba, en ogod aremer aga maman gedig maman madidib aremeijouhw dou lusud edreg dau maman mamsir leng Krisden gus laugwan toua. 3:2 Anai maman maugwan, kaba, maman mabesesar ogdoc maman mamirs mougwa einyanohob. Doba sug sud hom areg dag sesar emagunya dau en mers gin deitero, kaba, gini ansins dag en edag lusud mos se Krisdusohob. Hang men goubesa inggebga naugb sug en ebehnehino enin maga gus augwan dougwo areg gecgu augwan namcir toua. 3:3 Dara yen yeiya dau maman geicara dou kuda gin touahabi. Anai sug maman mauwan naugb kuda aimo maman mamir, kaba, maman maic aumaga macba kuda mers. Hanoba sug maman maseranohob, kaba, edeinyum naugb sug maman mahwan kuda maga augwan dig gacda, dig ginin, toua terimda. 3:4 Dara yen yauwam an kapal. Anai kapal maga, kaba, toua medam gougwa. Dara loungmen medam eisa naugb oto kapal dara goubesa toua. Doba gurei mogurei edeinyum naugb auti kapal mebes aimo dau areg sud hom gos gurei en ouwan dous. 3:5 Dangga toua, maman mamtemouwu, kaba, mogurei dous. Doba edeinyum naugb sug maman maimiman mamanin an aremer medam deseino lusud terimda. Dara yen yauwam an dau sug lusud len lasaih smougb toua. Anai aimougtut, kaba, smougb gini mogurei dous. Doba cum, kaba, edeinyum naugb ait lomos augwan bouwa namcir. 3:6 Dara maman mamtemouwu gin, kaba, toua aninim dag smougb gini. Dara aninim dag mougt mera medam gedig en mog mog namcir naugb en arautut lusud laugwan. Dauntoba len lemaimo areg asesa ELOHIM enin medoc mes touwero. Doba len ledreg dau en mer gin terimda. Anai sug en eb se maman mamaga dag gin, kaba, en oho areg gecgu debin maman mamaga. Hanoba eic gogor dou lusud se cinogo augwan toua namcir. Hang men meiyo gin, kaba, emen dau eninero. Doba en dau Bilis se dum smougb dous. 3:7 Dangga astesda aremeta geb se lomesmes, dara ba, dara aremeta gagrigrilo, dara areg geb se dum mohu, kaba, maman goubesa inggebga naugb maman maosnih len laugwan. Hanoba maman maicara dag gin an len touohob. 3:8 Doba maman mamtemouwu, kaba, sud hom ingma dau maman en emosnihero. Anai atij an aregua namcirohob. Hang en aninim dag sud hom gemehigdoc touwero. Doba en mohora esesa dinga dingada naugb en edoho aremer gecgu debin lusud laugwan toua terimda. 3:9 Dara ogdoc maman mamtemouwu gin, kaba maman maic naugb magahugouhw an maman Adehsud gedig en edag maman Mamina. Dara maic naugb maman mauwara an lusud, dauntoba ELOHIM eic gecgu dou len gedig en esinsin len se men obob aninim dag maman touohob. 3:10 Dangga dara maman mamirs hom gin, kaba, maman magahugouhw an ELOHIM. Dara maman macgeij en naugb en eic gogom dou lusud toua. Doba, dan indagunerij dara dan indamouwerij, augwan gini emeigouhwero. Hang yen yemaimo touwero, doba yen yarges dau namcir. 3:11 Anai duhu getougtoro dara duhu gedougdaha, kaba, hwas ohw dau duhu mer homei? Naro, hwas emohw dau duhu mer hom touwero. 3:12 Dara sogo moho ara, kaba, era mera dag sogo moho saitun, era sogo moho anggur, kaba, era mera dag sogo moho ara gin touei? Naro. Dangga toua, sug duhu gedougdaha ebsa duhu mer, kaba, dagiro duhu getougtoro agunya dau duhu mer hom gina? 3:13 Gareg dau yen en mou ouforoho naugb en edidib meijouhw dau Surad Injil Meb dou lusud, hanoba en mou auti naugb en ecinaga areg geigouhw dara areg gecgu, kaba, en emaimo areg gecgu an lusud toua deitero. Doba en aimo areg edag beim dara obosboro an len dous. Dara en emeimiman enin an gin deseino len touwero. Doba en edidib augwan gini dou len dara en medoc arjaga an dou len terimda. Anai sug en eicara dag gini, kaba, en ens enin ainyes dou lusud dag en mou ouforoho dara en mou auti dag misen namcirohob. 3:14 Doba sug yen yeclul an, hanoba yen meigdoc edougdaha anim, dara yen yed yenin deseino len gus toua terimda, kaba, yen yemereiyara dag augwan gini aimo ucina se geica. Dara yen yemeigdoumesa yenin meijoho an gin touwero. Doba yen yarges dau namcir. 3:15 Anai mou ouforoho naugb gin, kaba, emen dau ELOHIM se bogo. Dara Mena Gogoufu emarautut yen se gin touwero. Doba en dau Bilis dara lusud gedig en oiharaga len se cinogo gin dous. 3:16 Hang emahwan yen aud areg geigouhw touwero. Doba ahwan yen aud areg gecgu mogud namcir. Anai sug yen yediseijim, dara yen yed yenin deseino len gus dag gin terimda, kaba, cum ahwan yen naugb yen yenara edregim. Hanoba eic areg gecgu aingma aingma debin yen toua terimda. 3:17 Doba mou ouforoho gen dau bogo, kaba, ahwan maman aimougtut naugb sug maman maimo areg ecabeci dara esgiraha anim. Dara maic gesgigouhwesem gin dous. Dara sug aremer inggebga, kaba, emahwan maman naugb maman maic mamus dara mamed mamanin deseino lusud touwero. Doba ahwan maman naugb maman mamus obsara an. Dara maman maimo areg edeinyum an len toua. Hang ahwan maman naugb sug maman mamdoc eineg an len. Dara maman mara mera geigouhw an len laugwan toua. Dangga hang, maman mamesi leng merisoho mougb aiyei touwero. Doba maman mausa leng leb se hugaiyebeiya laugwan toua terimda. Dara mou ouforoho dau bogo, kaba, emahwan maman naugb maman mameicara mamarerei lusud meriresi touwero. Doba se maman geicara augwan, kaba, maman maimo areg se geica an len dous. 3:18 Anai gareg en esedeb se enin medoc mes naugb en eic gesgigouhwesa dou lusud se aremer augwan. Hanoba en eba meij dag gin toua terimda, kaba, cum, en era mera areg asesa ELOHIM enin medoc augwan touohob.

Yakobus 4

4:1 Dangga yen yemaimo areg yen meigdoc etrij icira gin toua deitero. Doba yen yaiyan augwan gini dau yen meigdoc mes namcir. Anai sug yen yenara ucucugb anim dara yogodim, kaba, augwan gini en dau sug yen meigdoc ebtouei? Naro augwan gini emen dau ginero. Doba en dau sug yen meigdoc etrij icira lusud meren aremer se cinogo gin dous. 4:2 Dangga hang, yen yemeigtou yemateteij len touwero. Doba sug yen meigdoc etrij icira dag ginohob, kaba, yen yehilon ucina naugb sug yen yohud len dau meren aremougb. Dara eic dag yen yedim dara yogodim naugb sug yen yesma meren aremougb dau len toua. Anai yen meigdoc ediseijim terimda. Dobnaro. Meijen geicara augwan gin, kaba, emeic dag yen yesma ara ara touwero. Anai augwan gin, kaba, dau sug yen yemacgeij dau ELOHIM an nosahabero. Doba ogdoc meijen geicara gecgu gin dous. 4:3 Dara sug yen yacgeij en an ara ara, kaba, en emeic dou yen touwero. Doba en ecgun mesira debin gin dau yen namcir. Anai areg yen yacgeij dau en gin, kaba, naugb areg yen meigdoc etrij icira gini dous. Hang meijen gauwamara augwan gin, kaba, ecgu namcir touohob. 4:4 Meijen geicara augwan gin, kaba, aninim dag gida gedig en medoc emakebin mesuwa toua deitero. Doba en maga eijouhw naugb en ohw en maga dou ligiji gusohob. Anai gareg en medoc dag hom dara lusud gedig Bilis oiharaga len se cinogo gin, kaba, en medoc dag hom dara ELOHIM toua deitero. Doba en edag men moc dous. Yen yemecinaga gineroei? Naro, yen yecinaga augwan gini dag misenohob. Dangga hang, gareg en medoc etrij naugb en medoc dag hom dara lusud se cinogo gin, kaba, en ens enin ainyes dag en edag ELOHIM men moc toua namcirohob. 4:5 Augwan gini aimo dau areg Surad Injil Meb Mohon enara eisaugb gin deb sug nosa touohob, endagai: Maman mamin areg ELOHIM eic dou mamanohob, kaba, arautut maman aud areg maman mamdoc etrij icira dara goubesa terimda. 4:6 Doba ELOHIM medoc an maman. Hang en eic goubesa edreg dau maman mamin men goubesa gini dou maman touohob. Anai Surad Injil Meb Mohon enara, endagai: Gareg en medoc agas, kaba, en edag sogo maga dougwo sud hom gin namcir. Doba gareg en owun enin medoc mes arjaga, kaba, ELOHIM medoc an en naugb emousa en se aremer augwan toua. Yen youdesa dag areg Surad Injil Meb Mohon enara gin, kaba, en enara augwougb dousei? Naro, yen yecinaga dag areg en enara gin, kaba, dag misen namcirohob. 4:7 Sug ELOHIM men mobisamougb eb naugb yen dag ginohob, kaba, yen yemeic meijus dou en naugb yen yaimo areg yen meigdoc etrij icira gin toua deitero. Doba yen yowun yenin meigdoc mes arjaga naugb yen yaimo areg asesa enin medoc mes dous. Hanoba yen yemaimo Bilis aud areg en arautut yen an gin touwero. Doba yen yaiyan meigdocesem dougwo en mer terimda. Anai sug yen yeicara dag gin, kaba, en emougbdedau yen toues. 4:8 Dangga hang, yen yemeigtou aigus dau ELOHIM toua deitlo. Doba yen yen aud en, dauntoba yen meigdoc dag hom dara en ucugb deit. Anai sug yen yen aud en, kaba, en en aud yen toua. Hanoba yen yemaimo areg gecgu gin toua deitero. Doba yen yarges dau, anai yen yebesesar terimdohob. Dara yen meigdoc hwai hwai an en touwero. Doba yen yerba augwan gin dau yen meigdoc mes. Hanoba yen yaimo ELOHIM men ucina dara yen meigdoc hom toua namcir. 4:9 Dara yen yemaimo areg yen meigdoc agahugouhw an. Dara eic yen meigdoc eigouhw dou yen gin toua deitero. Doba yen meigdoc ogbogpo an yenin, kaba, yen yeb an dareg yen meigdoc esdigeij meijen sesar augwan toua namcir. 4:10 Hanoba yen yowun yenin meigdoc mes arjaga deseino maman Adehsud ELOHIM naugb yen yesga meijen sesar augwan moho asesa dou en toua. Anai sug yen yeicara dag gin, kaba, en emeigdoumesa yen meijoho agas deseino en toua deit. 4:11 Dan indagunerij, dara dan indamouwerij, yen yemecic yen meijoho gouhw genes dara yen yemowunim eisaugb meijen geicara ucucugb touwero. Doba yen yarges dau namcir. Anai gareg en eicara dag graga an en maguner dara en medamouwer se Krisdus, kaba, en owun ELOHIM men gomnomna. Hang en edag sud hom geic ELOHIM men gomnomna gini bacecim touohob. Anai men gomnomna gin, kaba, arougb maman naugb sug maman mamdoc gororougwim dous. Dangga sug yen yowun ELOHIM men gomnomna dag ginohob, kaba, yen yemaimo ELOHIM men gomnomna gini dag misen toua deiterohob. Doba yen yeigdoumesa yenin meijoho dag sud hom gedig en ogod an ELOHIM men gomnomna gini dag emeigouhw touwero. 4:12 Dobnaro. Anai ELOHIM enin dous eng moho agas edeinyum naugb sug en eic gomnomna dou maman. Dara enin dous eng men goubesa inggebga naugb sug en ogod aremer aga maman toua. Hang enin dous eng men goubesa inggebga naugb sug en emeic mor mor dou lusud, era emeigdoc len dau dum smougb toues. Doba sug ELOHIM enin dous eng men goubesa inggebga naugb augwan ginohob, kaba, dagiro naugwe hang, yen yeigdoumesa yenin meijoho naugb yen yogod ara ara an yen meijaguner dara meigdamouwer se Krisdus dag gina? Yen yedag ELOHIM, hang yen yemowun len ginei? Naro, yen yemedag ELOHIM touwero. 4:13 Dara yeng yehilon aremougb, kaba, yen youman dan indir an areg dan den dou yen gini deigeigouhw namcir toua. Anai yen yeigdoumesa yenin meijoho an meijen geicara toua terimda, yendagai: Irogini, era lonehibi, kaba, emen emeihwedig cinogo hom. Hanoba emen emdohwara sungga se arisogomoc hom naugb emen emdehilon aregoufu ingma touahabi. 4:14 Dobnaro. Yen yemecinaga an loneg areg obsara debin yenero. Anai yen meijireseb dag ara? Yen meijireseb aninim dag lohos moro eisa cum, dangga dous. Doba cum, kaba, osahabaha ucugb dangga. 4:15 Dangga hang, yen yemeigdoumesa yenin meijoho an meijen geicara se lona daiyamo gacin touwero. Doba yen yenara doum dag gini, yendagai: Sug maman Adehsud en ouwan, kaba, emen emireseb, naugb emen emohwara sugini, era se cinogo gusahabi. Naro, kab, naro. 4:16 Dobnaro. Yen meigdoc agas, hanoba yen yeimiman yenin an meijen geicara se lona daiyamo gacin deseino lusud toua terimda. Hang meijen gauwamara augwan, kaba, ecgu namcirohob. 4:17 Dangga gareg en ecinaga areg asesa ELOHIM enin medoc mes naugb en aimo, hanoba en eic mos naugb en emaimoro, doba en amsoho namcir, kaba, gini aninim dag en ebesesar touohob.

Yakobus 5

5:1 Dara yeng meijisoho mougb, kaba, yen toua youman dan indir an areg dan den dou yen gin deigeigouhw namcir. Dauntoba yen yemeija meijuwesa meijen aremougb gin terimlo. Doba yen meigdoc ohwohu dara yeb an yenin teitei. Anai lona gacin, kaba, ELOHIM esa ara gogom en baiyan yen dangga. 5:2 Anai meijen aremougb augwan, kaba, etaha. Dara meijen minc, kaba, agur et. 5:3 Dara meijen emas dara perag, kaba, prab et augwan touohob. Dangga hang, se Lona Sug ELOHIM Ogod Aremer Aga Lusud, kaba, prab gini emet yen yaugwan toues, aninim dag smougb ait lusud laugwan louwa namcir toua. Anai se Lona ingga, kaba, prab gini edag sud hom naugb ehin merisa yen dag yen yemagaha yen meisira an meijen aremougb gini dou leng merunggwereij touwero. Doba yen meigdoc agadgeij an len. Hanoba yen yob augwan gin deb naugb yenin dous. 5:4 Dara yen youman dan indir an areg dan den dou yen gin deigeigouhw deit. Anai leng leic merug erij dou yen se meijen lo, kaba, yen yerei len. Hanoba yen yemeic meren siouwa dou len touwero. Doba yen yesedi meren siouwa dau len toua terimdohob. Dangga leng louci meijen areg geb se lo debinim se meijen tu meij gin, kaba, len leiyagarij ELOHIM naugb en ousa len. Hang meren geiyagarij gin, kaba, edebeij en touohob. Hang en emauni gogom medam dou yen toues. Anai en, kaba, en edag mougt mera medam naugb areg geb se bogo augwan toua namcir. 5:5 Dara yen, kaba, yen yemarges dau areg yen meigdoc agahugouhw an, dara geic yen meigdoc eigouhw dou yen augwan se cinogo gin touwero. Doba yen yogo ara gaihim, hanoba yen yaimo augwan gini ucucugb terimda toua. Hang gini dag yen yod aror se yenin dag hweij mering moto moto debohob. Doba deb naugb lona sug ELOHIM eic gomom dou yen dous, aninim dag hweij sug lusud lod aror se en toua. 5:6 Dara yen yemogo ara gaihim dousero. Doba yen yoho yas lusud deseino sud hom gogod aremer an lusud. Hanoba yen yeic cicmogo dou en naugb en eic gomom dou len touohob. Dobnaro. Len gedig yen yoho yas len gin, kaba, meren geicara gecgu hom dou yen touwero. Doba len merdoc ogoufu namcir. Anai len lemen dougwo yen se aremer hom touwero. Doba len ledag ara gosum naugb yen dous. 5:7 Dangga dan indagunerij, dara dan indamouwerij, sug ELOHIM esedeb gogom naugb leng merisoho mougb dag ginohob, kaba, yen yemobsara dau men ucina gin sug len leic mog erij dou yen touwero. Doba yen yes agadgeij dara yeigtou yateteij terimda Lona Sug Maman Adehsud Yesus Krisdus En Ecicugwen. Aninim dag sud hom areg en es meijohob, kaba, en emera mera dou en se lona ingga touwero. Doba en eigtou ateteij naugb sug ELOHIM esa los debin meij gini sug aimougtut dara lona daiyamo gacinahabi, en emera mera dou en toua. 5:8 Sug sud hom geba meij en eigtou ateteij naugb ELOHIM esa los debin meij dag gin, kaba, yen yemobsara dau ucina mog erij gin touwero. Doba yen yaiyan meigdocesem naugb yen yes agadgeij dara yeigtou yateteij namcir toua. Anai Lona Naugb Sug Maman Adehsud Yesus Krisdus En Ecicugwen gin, kaba, ebeij deinyorohob. 5:9 Dara sug aremer eb debin yen dag gin, kaba, yen yemenara ucucugb anim. Hanoba yen yemahacugb gogom debinim touwero. Doba yen yarges dau namcir. Dauntoba se lona gacin, kaba, ELOHIM emowun yen, hanoba en emogod gogom debin yen touwero. Doba en amsoho yen namcir. Anai men Lona Naugb Sug En Ogod Aremer Aga Lusud gin, kaba, ebeij deinyor touohob. Yen youman dan indir an areg dan den dou yen gini deigeigouhw namcir toua. 5:10 Dara yen meigdoc moc dougwo leng leperwei maman Adehsud en mohw naugb len lesai en moro sug nosa an meren geicara gin touwero. Doba yen meigdoc eiseisan len toua. Anai len ledag gansins dou maman dau lusud gedig len lemobsara dau ucina mog erij gin touwero. Doba len laiyan merdocesem naugb len les agadgeij namcirohob. 5:11 Sug len les agadgeij dag ginohob, kaba, maman mamowun len meroho an gini touwero. Doba maman maigdoumesa len meroho an gin toua namcir. Anai lusud lecic dau Ayub men geicara dou yen dag en toua aimo ucina mog erij medam sug nosa touohob. Hanoba yen yecinaga dag en emobsara dau sug en medoc ebdebin an maman Adehsud gin touwero. Doba en aiyan medocesem naugb en es agadgeij terimda. Dangga hang, maman Adehsud medoc emagadgeij an en touwero. Doba sug Ayub aimo ucina mog erij gini terimda edebeij sug ouwedocohob, kaba, maman Adehsud eigdoc en dau mog erij augwan gin toua. Anai maman Adehsud gin, kaba, en medoc eigouhw. Hanoba en medoc eineg an maman toua namcirohob. 5:12 Doba dan indagunerij, dara dan indamouwerij, aremer gesloulougb edreg dau aremer gus augwan namcir, kaba, dag yen yemou areg geb se bogo, dara areg geb se cinogo, dara areg gus augwan len meroho debin areg yen yos dou lusud, dara debin meijen aremer gus gus augwan touwero. Doba sug aremer misenohob, kaba, yen yenara, endag: You. Era sug misenero, kaba, yen yauni, endag: Naro. Anai sug yen youwara dougwo meijen aremer, era yen youwara debin areg yen yos dou lusudohob, hanoba yen yemaimo ginero, era misen touwero, kaba, cum, ELOHIM ogod aremer gogom deinaugb yen namcir. 5:13 Dangga toua, sug sud hom dau yen en aimo ucina mog erij, era areg gecgu eb naugb en touohob, kaba, en emenara ucucugb an ginlo. Doba en ocuncum dou ELOHIM naugb gin dous. Era sug sud hom en medoc ebtouohob, kaba, en emeigtou augwougb touwero. Doba en agahugouhw an ELOHIM terimda toua. 5:14 Era sug sud hom dau yen en areba, kaba, en emeigtou augwougb touwero. Doba en acgeij mougtir se goucimdeb naugb len len aud en, dauntoba len lehin mani se en maga. Hanoba len locuncum dou ELOHIM aga en, aimo dau areg maman Adehsud en mer ogod an gin deb naugb len. Anai len leperwei en mohw naugb ginohob. 5:15 Sug len locuncum dou maman Adehsud dara len merdoc ebdebin an naugwohob, kaba, en eic geingmos agauwesa dou sud hom gin ucugb. Dara sesar areg en aimohob, kaba, en aigdougwo augwan gini ediyebeiya dau en toua. 5:16 Dangga hang, sug meijen sesar eic dag areba an yenohob, kaba, yen yemecgoneh meijen sesar gin daum touwero. Doba yen yesga doum. Hanoba yen yocuncum anim ucucugb toua. Dauntoba aremeba yen touwero. Doba ELOHIM eic geingmos agauwesa dou yen ucugb deit. Anai gareg en medoc edag beim deseino ELOHIM naugb en aimo areg asesa enin medoc mes augwan namcirohob, kaba, men goubesa inggebga naugb en eic ara ara dau ELOHIM toua terimda. 5:17 Augwan gini aninim dag Elias men geicara sug nosa. Anai en, kaba, en toua dau maman masud misen. Doba sug en acgeij ELOHIM dauntoba los emes se leng Israel meren hancob ginero, kaba, ELOHIM ouf misis se bogo dougwo los toua. Anai en emacgeij augwougwero. Doba en acgeij dara medoc ebdebin an namcir. Hang los emes se meren hancob se arisogomoc homoi mougwu toua deitero. 5:18 Dauwohob, kaba, en acgeij ELOHIM naugb los es ucugb deit. Hang sir emeb se leng Israel meren hancob toua deitero. Doba ared dara sogo mera dara ara gus gus augwan, kaba, eb naugb len terimda. Anai ELOHIM ec misis se bogo, hanoba los es deitohob. 5:19 Dangga dan indagunerij, dara dan indamouwerij, sug sud hom dau yen en obsara dau ucina misen ginohob, kaba, yen yemamsoho en touwero. Doba yen yahwan en ucugb dedemeda. 5:20 Anai gareg dau yen en ahwan sud hom gebesesar dau ucina gecgu gin, kaba, yen yecinaga dag sud hom gini eigdoc en dau gomom ucugb touohob. Hanoba en ousa en naugb ELOHIM aigdougwo men sesar areg en aimohob augwan ediyebeiya dau en toua.

1 Petrus 1

1:1-2 Surad gini dau dang, Petrus, anai Yesus Krisdus enin eng eigdoumesa dan. Hanoba en arougb dan naugb dan desai Mer Geigouhw eisaugb en dou lusud laugwan toua. Dan dog surad gini dou yeng yedag irinya se Pontus, Galatia, Kapadokia, Asia, dara Bitania meren hancob yen yaugwan. Anai maman Mamina ELOHIM en ecinaga deb dau sug yen youman Mer Geigouhw eisaugb Krisdus gin, kaba, dag yen yemesbes an en mer gin touwero. Doba yen meigdoc ebdebin an en terimda. Sug en ecinaga augwan deb dag ginohob, kaba, en ouci yen deb toua, aimo dau areg enin esedeb dangga naugb yen sug acgunogohob. Hanoba Mena Gogoufu ouci yen debinim dag ELOHIM enin men lusud. Dauntoba sug Yesus Krisdus en mogwihi edu yen meigdoc mes ecabeci dau sesar augwanohob, kaba, yen yemohoiya en mer toua deitero. Doba yen yowun yenin meigdoc mes arjaga naugb yen yaimo en mer se areg en arougb yen an gin toua terimda. Dangga hang, dan dacgeij ELOHIM naugb en medoc eigouhw an yen beiseisaugb namcir. Dara en eseyeiyo yen dara en eic gesgigouhwesa dou yen dougwo areg gecgu augwan terimda toua. 1:3 Eigouhw naugb maman man sijo dou maman Adehsud Yesus Krisdus en Mena ELOHIM gin besesa terimda. Anai sug en medoc eineg an maman beiseisaugb namcir dag ginohob, kaba, maman mamomom toua deitero. Doba en eigdoumesa maman dau gomom aud maireseb menau gin touohob. Dara maman macinaga dag maireseb menau gin, kaba, emediyebeiya dau maman touwero. Doba eb naugb maman beb huhugb namcir. Anai maman macinaga dau sug Yesus Krisdus en omom sug nosa, kaba, dag en emomom terimda touwero. Doba ELOHIM eigdoumesa en dau gomom aud maireseb menau geb huhugb gin touohob. Hang emeic dag maman maod mamina debsa ELOHIM an gin dag buc gototo toua namcir. 1:4 Dangga hang, yen yemeija meijuwesa en an areg en esedeb naugb men lusud yen gin touwero. Doba sug en eic maireseb menau geb huhugb dou yen dag ginohob, kaba, yen yod meijina debsa en dag en emeic augwan gini dou yen toues. Anai en obdeb augwan gini se bogo naugb yenohob. Hang emetaha, dara emogor, dara emombrerij dau yen touwero. Doba ebsugeb naugb yen terimda. 1:5 Anai sug yen meigdoc ebdebin an Krisdus dag ginohob, kaba, ELOHIM esedougwo yen dara men goubesa namcir. Dauntoba yen yemobsara dau ucina aud maireseb menau geb huhugb gin touwero. Doba yen yaimo ucina gini terimda edebeij Lona Sug Ouwedoc gin toua. Anai en esedeb naugb sug en ens dau maireseb menau geb huhugb gini eb ainyes se Lona ingga dou yen toues. Hang areg en esedeb se bogo naugb yenohob gin, kaba, hom emediyebeiya dau yen touwero. Doba en esedougwo augwan naugb yen terimda. 1:6 Dangga hang, sug aremer aingma aingma eb naugb yen, kaba, yen meigdoc emeijesan gin touwero. Doba sug ELOHIM esedeb areg geb se bogo augwan naugb yen dag ginohob, kaba, yen meigdoc erleij icira gin namcir sug yen yaimo ucina mog erij gin toua. Anai gogom gin, kaba, eisa bainyen yen cum cum dangga dous, aimo dau areg ELOHIM enin eng esedeb naugb yenohob. 1:7 Anai en eicara dag gini dou yen, dauntoba yen yens yenin ainyes dou en dag yen meigdoc ebdebin an en dag misenohobei? Era dag aibibra dousei? Anai sug lusud louwan lecinaga emas misen, kaba, len lec se smougb toua. Sug edag emas misenohob, kaba, smougb emait touwero. Doba sug emedag emas misenero, kaba, cum smougb ait bediyebeiya namcir. Dangga hang, sug lusud lainyen emas misen dag ginohob, kaba, ELOHIM ainyen yen toua. Dauntoba yen yaiyan meigdocesem naugb yen yes agadgeij terimda. Anai emas misen gin, kaba, cum ediyebeiya dous. Doba yen meigdoc ebdebin an gin, kaba, mera eisaugb bedreg dau emas misen gin namcir. Dangga hang, sug ELOHIM en eiya dag yen yemobsara dau ucina mog erij ginero, doba yen yes agadgeij naugb yen meigdoc ebdebin an en terimdohob, kaba, eic dag en eimiman dau meijen geicara gini se Lona sug en ens Yesus Krisdus ainyes dou lusud laugwan toua. Hanoba en ogugwo men gogouf cucugb ingma dou yen. Dara en eigdoumesa yen meijoho agas se Lona ingga toua namcir. 1:8 Sug nosa, kaba, yen yemeiya Yesus gini en mog mougwa hom touwero. Doba yen meigdoc gororougb enohob. Dara iteitogini, kaba, yen yemeiya en touebma. Doba yen meigdoc ebdebin an en terimda. Dangga hang, eic dag yen meigdoc erleij dara agahugouhw medam an en bedreg dau areg yen yecic dou lusud gini toua namcir. 1:9 Anai yen yecinaga dau sug yen yemobsara dau Krisdusero. Doba yen meigdoc ebdebin an en terimda, kaba, dag maireseb menau geb huhugb emediyebeiya dau yen touwero. Doba ELOHIM emeic dou yen toues. 1:10 Eisaugb maireseb menau geb huhugb gin, kaba, leng lesai ELOHIM en moro sug nosa len logmac. Hanoba len lesa lauweila dougwo namcir naugb len lecinaga meijouhw dau augwan gini asesa toua. Anai len lens deb dau areg geigouhw gini gedig ELOHIM esedeb naugb yen dou lusud sug nosa touohob. 1:11 Len leicara dag gin, anai sug Krisdus esa Mena Gogoufu se len merdoc mes sug nosa, kaba, en enara dou len deb, endagai: Cum, kaba, sud hom en emagunya debin yen. Hanoba en aimo ucina mog erij naugb yen, dauntoba en eigdoc yen dau sesar men gogom augwan. Dauwohob, kaba, ELOHIM emeigdoumesa en moho agas medam ucugb toues. Dangga hang, sug len louman dau ginohob, kaba, len meru laisa naugb len lecinaga dau areg Mena Gogoufu ens dou lenohob meijouhw augwan asesa toua. Hanoba len leijidougwo ELOHIM an gin toua, lendagai: Areg Mena Gogoufu en ens dou emen endag sud hom en emen naugb en eigdoc emen dau sesar men gogom augwan, kaba, gini naugb emen touei? Era naugb lusud se lona daiyamo gacin dousei? 1:12 Doba ELOHIM auni dou len dag areg len lesai gin, kaba, emousa len se lona inggaro. Doba eb naugb yeng daiyamo gin dous. Dara areg Mena Gogoufu ens deb dou len sug nosa ingga, kaba, yen youman dau augwan gini dag misen touohob. Anai ELOHIM esa en dau bogo. Hanoba en eic mou ouforoho dara goubesa dou leng lesai Mer Geigouhw eisaugb Krisdus naugb len ledidib meijouhw dau augwan gini asesa dou yen touohob. Dara leng lesai ELOHIM en moro sug nosa, kaba, len louwan lecinaga dau meijouhw augwan gin dousero. Doba malaikadir len toua louwan lecinaga meijouhw dau augwan gini asesa toua. Dobnaro. 1:13 Dangga hang, sug ELOHIM en esedeb areg geigouhw augwan deb naugb yen dag ginohob, kaba, yen yemeisan gurog touwero. Doba yen yesedeb yen meigdoc mes dara yen meiju naugb yen yaimo areg geigouhw toua terimda. Hanoba yen meiju auti ucina aud maireseb menau geb huhugb. Dara yen yod meijina debsa ELOHIM an areg en os dou yenohob dara yen meigdoc augwan toua namcir. Anai se Lona sug en ens Yesus ainyes dou lusud, kaba, en emogugwo areg geigouhw gini dou yen toues. 1:14-15 Dara yen yemeicara yemaiga ELOHIM men hancob touwero. Doba yen yeicara yaimo en an areg en arougb yen an gini terimda. Hang yen yemaimo areg yen meigdoc etrij icira aud areg gecgu hom toua deitero. Doba se meijen geicara augwan, kaba, yen yeicara yaimo areg asesa ELOHIM enin medoc mes dous. Aninim dag ELOHIM enin toua emaimo areg gecgu touwero. Doba se men geicara augwan, kaba, en aimo areg gedag beim dara obosboro an lusud toua terimda. Yen yeicara dag gini terimda, anai se lona sug yen yemecinaga en dag misenbuma, kaba, yen yaimo areg gecgu ginohob. 1:16 Augwan gini esogwa deisa areg ELOHIM arougb maman an se Surad Injil Meb Mohon deb sug nosa touohob, endagai: Indan geicara augwan ecabeci namcirohob. Dangga hang, meijen geicara augwan, kaba, ecabeci namcir toua. 1:17 Dara ELOHIM gin, kaba, en emobsara aud sud hom touwero. Doba sug en ogod aremer aga lusud, kaba, en ogod augwan gini dara en medoc edag beim an gin terimda, aimo dau meren geicara an len toua. Dangga sug yen meijireseb sousougb se cinogo ginaba, kaba, yen yaimo areg en ouwan dareg yen meigdoc ahau dau en toua namcir. Anai sug yen yocuncum dou en, kaba, yen yeigdoumesa en moho dag yen Meijina ginohob. 1:18-19 Hang yen yemedreg dau en mer gin mougwa hom touwero. Doba yen yeicara yaimo augwan gini dara yen meigdoc hom terimda. Anai yen yecinaga dau sug Krisdus encoho aga yen sug nosa, kaba, en emeic areg getaha dag emas era perag naugb en emancoho aga yen touwero. Doba en eic enin dag domba gedig mougb mogud. Hanoba ecabeci namcir naugb en eigdoc yen dau yen meijemouwer meren gomnomna ogdoc en mogwihi mera eisaugb gin dous. Anai areg len lomnomnan deb naugb yen gin, kaba, mera emeisaugwero. Doba dag augwougb namcir. 1:20 En, kaba, ELOHIM emouci en dau iteitogin touwero. Doba en ouci en deb naugb gini sug en emahasesei cinogo dara bogo touebma. Dangga se Lona Gouwedoc gin, hang ELOHIM emesa en ainyes se cinogo gini naugb en ousa yen. Dauntoba en eigdoc yen dau sesar men gogom aud maireseb menau geb huhugb gin toua. 1:21 Ogdoc en, hang yen yemod meijina debsa ELOHIM an areg gin augwan touohob. Hang gini emedag augwougb touwero. Doba areg yen meigdoc ebdebin an dara areg yen yod meijina debsa en an ginohob, kaba, augwan dag buc gototo naugb yen namcir. Anai ELOHIM gin, kaba, eni sud hom gedig en eigdoumesa Krisdus dau gomom ucugb. Hanoba en eigdoumesa en moho se gogouf cucugb naugb yen touohob. 1:22 Dangga hang, yen meigdoc mog mog anim touwero. Doba yen yeic meijuwemougb esesa naugb yen meigdoc gororougwim dara yen meigdoc augwan toua terimda. Anai gareg en aimo ELOHIM mer misen gin, kaba, en emaimo areg gecgu an en maguner dara en medamouwer se Krisdus len toua deitero. Doba en edu enin medoc mes dau aremer graga augwan namcirohob. Hanoba en aimo areg ecabeci dara obosboro an len dous. 1:23 Dara yen yemobsara dau gin touwero. Doba yen yeicara dag gini doum terimda. Anai ELOHIM en mer gin, kaba, edag maireseb dara eb huhugb namcir. Hang emahwan yen aud en naugb en emeic maireseb menau geb huhugb dou yen toua. Dangga hang, yen yedag ELOHIM mehir menau gin, kaba, emogdoc yen meijiner misen se cinogo gin touwero. Doba ogdoc yen Meijina ELOHIM hom gin dous. Anai enin eng eis huhugb namcir. 1:24 Augwan gini esogwa deisa areg Yesaya en og deb se Surad Injil Meb Mohon deb sug nosa touohob, endagai: Lusud laugwan, kaba, ledag arec mec dous. Dara meren areg moho agas augwan, kaba, dag aremerij toua. Anai arec mec, kaba, cum en maga agaci. Dara merij toua, cum og an namcir. 1:25 Doba areg maman Adehsud en en deb ginohob, kaba, augwan emediyebeiya touwero, doba eb huhugb terimda. Dara yen, kaba, yen youman dau en mer gin touohob. Anai sug lusud lesai Mer Geigouhw eisaugb Krisdus dou yen sug nosa, kaba, len lens en mer gin eng dou yen dous.

1 Petrus 2

2:1 Sug yen yedag ELOHIM mehir menau dag ginohob, kaba, yen yerba areg gecgu dara mog mog augwan dau yen namcir. Hang yen yemereiyara doum, dara yen yemeicara yemarerei len gus meriresi, dara yen meigdoc emetrij icira ara ara daum, dara yen yemowunim ucucugb toua deitero. 2:2 Doba yen meigdoc erleij naugb yen yebin ELOHIM en mer areg Mena Gogoufu eic dou yenohob se yen meigdoc mes dous. Aninim dag godeh mahaniheni en mers emagad dau aring mohu touwero. Doba en mers ebdebin terimda toua. Anai sug yen yebin en mer gini se yen meigdoc mes terimda, kaba, yen yeiji dag lusud mos se Krisdus toua namcir. Hang maireseb menau geb huhugb emediyebeiya dau yen touwero. Doba ELOHIM emeic dou yen toues. 2:3 Yen yeicara dangga, anai yenin yecinaga dag maman Adehsud, kaba, en medoc emecgwan yen mougwa hom touwero. Doba en medoc eigouhw an yen namcirohob. Gini esogwa deisa areg Daud en erba Ugwaremer an deb sug nosa touohob, endagai: Yen yenin yecinaga dag maman Adehsud Geis Huhugb gin, kaba, en medoc eigouhw an maman namcirohob. 2:4-5 Sug maman Adehsud en medoc eigouhw an yen dag ginohob, kaba, yen yemasid yenin dau en touwero. Doba yen yedag igdahab gedig maireseb menau naugb en toua namcir. Hanoba yen yen aud en, dauntoba en eic yen naugb en ahud yen dag ELOHIM men tuari ogdoc Mena Gogoufu men goubesa gin toua. Yen yen aud en dag gini, anai enin eng edag buc mandeij gedig lusud lerbahaba deb dag emeigouhw naugb lahud meren tu touwero. Doba ELOHIM, kaba, en ouci en deb dag buc mandeij mera eisaugb gedig en maireseb naugb eninohob. Sug yen yedag ELOHIM men tuari dag ginohob, kaba, yen yedag gembala gesa taij gecabeci se men tuari gini naugb yen yeic areg geic ELOHIM medoc eigouhw dou en sungga toua terimda, aimo dau areg Mena Gogoufu arautut yen aud gin toua. Anai yen yedag Yesus Krisdus men logodeh ginohob. 2:6 Augwan gini esogwa deisa areg ELOHIM enara deb se Surad Injil Meb Mohon ogdoc Yesaya sug nosa touohob, endagai: Dan douci igdahab mera eisaugb hom debohob. Hanoba dan dogo dag buc mandeij naugb indan tuari se mengarougb, moho Sion, gin toua. Dangga gareg en medoc ebdebin an en, kaba, igdebes emeba en touwero, doba en eic mos namcir. 2:7 Dangga hang, naugb yen gedig yen meigdoc ebdebin an enohob, kaba, buc mandeij gini mera eisaugb naugb yen toua terimda. Doba naugb len gedig merdoc emebdebin an enero, kaba, areg sud hom en erba Ugwaremer an gin deb, kaba, esogwa deisa an lenohob. anai en enara deb, endagai: Igdahab areg lusud lerbahaba deb dag emeigouhw naugb lahud meren tuero, kaba, ELOHIM eigdoumesa en dag buc mandeij bedreg dau igdahab gus augwan namcirohob. 2:8 Dara Yesaya enin toua og deb eisaugb gini se Surad Injil Meb Mohon deb sug nosa touohob, endagai: Igdahab gin, kaba, lusud letohob en. Hanoba len lobsara icira en toua. Len letohob igdahab gini, anai len merdoc emebdebin an enero. Dangga hang, ELOHIM emesedeb len deb naugb len lobsara icira en namcir toua. 2:9 Doba yen, kaba, ELOHIM ouci yen dag enin men meijouhuda. Dara en eigdoumesa yen dag enin men gembala gesa taij. Dauntoba yen yeic ara ara dag yauwaharo dou en terimda. Anai en, kaba, en edag mougt mera medam naugb yenohob. Hanoba en ouci yen debinim dag enin men lusud. Dauntoba yen yens dau men geigouhw dag ganusbus gini dou lusud laugwan toua. Anai en eija yen dau lobeigbogo naugb yen yeinesa men mouf gecabeci ginohob. 2:10 Anai sug nosa, kaba, yen yemedag men meijouhuda gin touebma. Doba iteitogin, kaba, yen yedag enin men meijouhuda. Dara sug nosa, kaba, en medoc emeineg an yen touebma. Doba iteitogin, kaba, en medoc eineg an yen namcirohob. 2:11 Dangga hang, dan indagunerij, dara dan indamouwerij gedig dan indoc gororougb yen, sug yen yedag lugmahara dara irinya se cinogo dag ginohob, kaba, dan desulou yen dara goubesa. Dauntoba yen yemaimo areg yen meigdoc etrij icira se cinogo gin toua deitero. Doba yen meigdoc obsara dau augwan gin namcir. Anai yen meigdoc etrij icira gin, kaba, ebemoc dou yen naugb aiyan yen terimda. 2:12 Dara meijen geicara deseino leng medigo Yesus, kaba, augwan toua edag beim namcir. Dauntoba sug len lowun yen meijoho dag yen meijug mogohob, kaba, len lemeicara lemaimo dangga an yen se Lona Sug ELOHIM En Ecicugwen toua deitero. Doba len louma debin yen se Lona Sug En Ogod Aremer deinaugb lusud, kaba, dag meijen geicara augwan edag beim namcirohob. Anai len leiya dau meijen geicara geigouhw gini augwan sug nosohob. Hanoba len leigdoumesa ELOHIM en moho an men geicara dou maman gin, kaba, dag augwan eigouhw touohob. 2:13-14 Dangga toua, sug mougt mera medam en arougb yen an ara ara, kaba, yen yemohoiya en mer touwero. Doba yen yaimo en mer toua terimda. Anai en moho eb taiba yen yaugwanohob. Dara sug en esa men gedeijan naugb len lesedougwo yen, kaba, yen yemohoiya len merir touwero. Doba yen yobsara dou len naugb areg len larougb yen an gin toua namcir. Anai en esa len aud yen naugb len leic gogom dou leng meru mog. Hanoba len leigdoumesa leng leicara edag beim len meroho toua. Dangga hang, yen yemedreg gareg en edag mougt naugb yen en mer an areg en arougb yen an touwero. Doba sug yen yedag maman Adehsud men lusudohob, kaba, yen yaimo len merir toua terimda. Dauntoba yen yemowun maman Adehsud en moho gin deseino len touwero. 2:15 Anai ELOHIM en ouwan dau sug yen yeicara dag gin, kaba, dag leng meru edgom gin, kaba, len lemesmesman dara lemenara ceg ceg yen touwero. Doba meijen geicara geigouhw gini, kaba, eic dag ouf dougwo len merirs an yen namcir. 2:16 Anai yen yemedag Musa men gomnomna men sogougb deitero. Doba Krisdus eigdoc yen dau ginohob. Dangga hang, sug yen yedag lusud misenohob, kaba, meijen geicara aimo dag gin toua terimda. Doba yen yemeic lusud misen gini naugb yen yemaiyeiyo yen dougwo meijen geicara gecgu touwero. Doba yen yowun yenin meigdoc mes arjaga dag ELOHIM men sogougb deit naugb yen yaimo areg en arougb yen an gin dous. 2:17 Dara yen yemowun sud hom en moho touwero. Doba yen yeigdoumesa lusud laugwan len meroho. Dara yen meigdoc mog mog an yen meijaguner dara yen meigdamouwer se Krisdus len touwero. Doba yen meigdoc gororougb len laugwan. Hanoba yen yahau dau ELOHIM. Dara yen yeigdoumesa meijen mougt mera medam se cinogo gini en moho eb taiba toua terimda. 2:18 Dara yeng Krisden gedig yen yedag sogougb, kaba, yen yemeic meijus deseino meijen mougtir touwero. Doba yen yeigdoumesa len meroho eb taiba namcir. Hanoba yen yowun yenin meigdoc arjaga naugb yen yaimo len an areg len larougb yen an gini toua terimda. Dara yen yemeicara dag gin dou meijen mougtir gedig len merdoc arjaga dara len ledag isgwerec an yen dousero. Doba yen yeicara dag gin toua dou meijen mougtir gedig len lesenagan yen namcir toua. 2:19 Anai sug yen yauwam an areg ELOHIM en ouwan, hanoba yen yemobsara dau ucina mog erij icira leng lesenagan meren geicara gin touwero, doba yen yes agadgeij namcir, kaba, ELOHIM eic geigouhw dou yen toua terimda. 2:20 Anai sug yen yeicara gecgu, hanoba yen yes agadgeij sug len leic mog erij dou yen icira gin, kaba, gini emeigouhw dagiro? Doba sug yen yaimo areg meijen mougtir larougb yen an augwan asesohob, hanoba yen yes agadgeij sug len leic mog erij dou yen augwougb dous, kaba, ELOHIM eic geigouhw dou yen icira gin toua terimda. 2:21 Anai sug en eija yen aud en sug nosa, kaba, en esedeb yen naugb sug yen yaimo ucina mog erij dag gin, aninim dag Krisdus enin toua aimo ucina mog erij naugb meijen sesar sug nosohob. Dangga hang, en eic gansins dou yen. Dauntoba sug yen yecinaga, kaba, yen yemobsara dau ucina mog erij areg yen yaimo augwougb gin touwero. Doba yen yesogwa deisa en mohotimei mohw se men ucina gini toua terimda. 2:22 Anai en, kaba, en emebesesar mougwa hom. Dara lusud louman, doba gereiyara dara gerba mohoisa hom emagunya dau en mers dou len touwero. 2:23 Dangga toua, sug lusud lenara gecgu dou en, kaba, en emenara gecgu ucucugb dou len. Dara sug len leic mog erij dou enohob, kaba, en emenara mog mog dag en eic mog erij ucugb dou len touwero. Doba en ogugwo aremer graga augwan se ELOHIM enin mesira dous. Anai en ecinaga dau sug ELOHIM ogod aremer aga lusud, kaba, dag en emobsara aud sud hom touwero. Doba en aimo augwan dara gedag beim an len dous. 2:24 Dara Krisdus enin eng ohw en mougt edug naugb oho sesar men gogom augwan se men medgomori taiba sogo salib dau mamanohob. Dauntoba maman mamireseb emeb se sesar deitero. Doba maman mamom dau gini naugb maman maimo areg asesa ELOHIM enin medoc mes gin dous. Anai ogdoc Krisdus en mos ohubecbec gin, kaba, edeinyum naugb sug ELOHIM eic yen meigdoc mes geingmos agauwesa dou yen ucugwohob. 2:25 Anai sug nosa, kaba, yen yedag domba gedig len laijahasero namcirohob. Doba iteitogin, kaba, ELOHIM ahwan yen aud Krisdus gin ucugwohob naugb yen yaimo en terimda. Anai en eng meijen gembala gedig en agauwesa yen. Hanoba en esedougwo yen meijina dara geigouhw toua namcir.

1 Petrus 3

3:1-2 Dangga toua, naugb yigida Krisden gedig yen yes meisuwohob, kaba, yen yemeic meijus dou len touwero. Doba yen yowun yenin meigdoc mes arjaga naugb yen yaimo len merir an areg len larougb yen an toua terimda. Dauntoba sug yen meisuwer gedig len merdoc emebdebin an ELOHIM en Mer Geigouhw eisaugb Krisdus ginbuma len leiya, doba meijen geicara augwan ecabeci dara edag beim terimda, kaba, aic len naugb len merdoc ebdebin an Krisdus toua. Hang emedeinyum naugb sug yen yemenara yemagodgod len touwero. Doba meijen geicara geigouhw gin, kaba, edeinyum naugb ahwan len aud Krisdusohob. 3:3-4 Dara yen yemeic areg mera eisaugb naugb yen yobungma yen meijaga touwero. Doba yen yobungma yen meigdoc mes gebdededero gedig lusud lemeiyero gin dous. Hang yen yemecgun areg geigouhw se yen meijugt, dara yen yemed areg dag emas, dara perag, era sariou mogo. Dara yen yemeg sansun meb tintin gedig mera eisaugb touwero. Doba yen meigdoc arjaga an len gus. Dara yen meigdoc ebtou dau augwan toua terimda. Anai gobungma gin, kaba, mera eisaugb deseino ELOHIM dara emediyebeiya touwero, doba eb beb huhugb namcir. 3:5 Augwan gini esogwa deisa ligida meren geicara gedig len lesijaresa ELOHIM dara len lod merna debsa en sug nosa touohob. Hang len lemohoiya len mersuwer merir an areg len larougb len an gin touwero. Doba len lobungma lenin merdoc mes naugb len laimo len merir se aremer augwan toua terimda. 3:6 Augwan gini dag Sarai men geicara sug nosa touohob. Anai en, kaba, en emeic mos dou en mesuwa Abraham sug nosa touwero. Doba en owun enin medoc arjaga deseino en naugb en aimo en an areg en arougb en an gin toua terimda. Hanoba en eija en moho toua dag Adehsud. En eicara dag gini, anai en toua gida hom dau leng lesijaresa ELOHIM sug nosa dara lod merna debsa en an ara ara touohob. Dangga hang, sug yen yeicara yaimo areg geigouhw an lusud, dara yen yemahau dau ara ara touwero, doba yen meigdoc ebtou namcir, kaba, yen yedag Sarai medebeitor misen touohob. 3:7 Dangga toua, yigiji gedig yen yeic meisouwohob, kaba, yen meijires gor emeiyeiya len touwero. Doba yen meiju ouforoho naugb yen meijires oucan len an areg ebdebin len toua. Anai se aremer augwan, kaba, meren goubesa dag yenero, doba len merisira moc dous. Hang yen yemowun len meroho an ara ara touwero. Doba se aremer augwan, kaba, yen yeigdoumesa len meroho an terimda. Dauntoba meijen geicara emedag sogo maga dougwo yen sug yen yocuncum dou ELOHIM touwero. Doba yen yocuncum dara goubesa dou en namcir. Anai en medoc eigouhw an yen meisouwer, hanoba en eic maireseb menau geb huhugb dou yen yaugwan aninim toua. 3:8 Sug indan surad ouwedoc gin, kaba, dan desulou yen yaugwan, dauntoba yen meijir anim. Dara meijen gauwamara toua dag hom. Dara yen meigdoc eineg anim ucucugb. Dara yen meigdoc gororougwim. Dara yen meigdoc eigouhw anim. Dara yen yowun yenin meigdoc mes arjaga deseinom ucucugb toua terimda. Anai yen yedag meijagunem dara yen meigdamouwem se Krisdusohob. 3:9 Dangga toua, sug lusud leic gogom dou yen, kaba, yen yemauni gogom ucugb dou len. Era sug len lenara gecgu dou yen, kaba, yen yemenara gecgu ucugb dou len touwero. Doba yen yacgeij ELOHIM naugb en eic geigouhw dou len dous. Anai sug en eija yen aud en sug nosa naugb yen yaimo areg en esedeb naugb yenohob augwan gin toua, kaba, en emeija yen naugb yen yeic gecgu dou lusudero. Doba en eija yen naugb yen yeic geigouhw dou len terimda. Sug yen yeicara dag gini, kaba, ELOHIM emeic geigouhw dou yen toues. 3:10 Augwan gini esogwa deisa areg Daud en erba Ugwaremer an deb se Surad Injil Meb Mohon deb sug nosa touohob, endagai: Gareg en ouwan, dauntoba areg geigouhw eb naugb en terberba, dara en ouwan naugb areg geic medoc agahugouhw dou en emediyebeiya dau en touwero, kaba, esloulougb naugb en emenara gecgu dou lusud dara en emerba mohoisa len. 3:11 Dara en emaimo areg mog mog an len touwero. Doba en eineg dau augwan namcir, hanoba en aimo areg geigouhw an len. Dara en eic mouwemougb esesa naugb en eic gesgigouhwesa dou len se aremer augwan toua. 3:12 Anai gareg en aimo areg asesa Adehsud enin medoc mes dag gin terimda, kaba, en maires oucucan sud hom gini naugb en eseyeiyo en dougwo areg gecgu augwan. Dara en oc moms naugb areg en acgeij dau en toua. Doba leng merug mog an lusud, kaba, Adehsud en edag sogo maga dougwo len namcir. 3:13 Dangga hang, yen yemarges dau sug yen yeic geigouhw dou lusud gin touwero. Doba yen meigdoc erleij naugb yen yaimo augwan gini terimda. Anai sug yen yeicara dag gin, kaba, gara mog eng eic gecgu dou yen, hanoba ahwan yen dau maireseb menau geb huhugb gin toua? Naro, sud hom ingmaro. 3:14 Doba sug yen yaimo areg geigouhw an lusud, hanoba yen yaimo ucina mog erij icira gin toua, kaba, augwan inggaida. Anai augwan gini emeic dag yen yera mera geigouhw toues. Hang yen yemahau dau sud hom ingma sug en eic gecgu dou yen. Dara yen meigdoc emeijesa an gin touwero. 3:15 Doba yen yed Krisdus enin dous eng se yen meigdoc mes desei ineinohabi, yen yemesijaresa dara yen yemeigdoumesa en dag meijen Adehsud naugb yen toua. Hanoba yen yesedeb yenin meigdoc mes naugb yen yens dau areg yen yod meijina debsa ginohob meijouhw augwan asesa dou lusud areg len leijidougwo yen an gin toua terimda. Dara sug yen yos yadi Krisdus deseino lusud, kaba, yen yemeic yen meijir yemaic len touwero. Doba sug yen yens meijouhw augwan asesa dou len, kaba, yen meigdoc arjaga, dara yen yeigdoumesa len meroho toua namcir. 3:16 Dara yen yeic meijuwemougb esesa dag meijen geicara augwan, kaba, edeinyum naugb sug yen meigdoc emogdoc yen an aremer hom touwero. Doba ouma debin yen dag augwan ecabeci namcirohob. Yen yeicara dangga, dauntoba sug lusud lowun yen meijoho augwougb an meijen geicara geigouhw icira sug yen yedag Krisdus men logodeh dag gin, kaba, meren geicara gini eic igdebes dou lenin dous. 3:17 Anai sug ELOHIM ouwan naugb yen yaimo ucina mog erij, kaba, eigouhw naugb yen yaimo ucina gini dau sug yen yemeicara gecgu dou lusudero. Doba dau sug yen yaimo areg geigouhw an len dous. 3:18 Anai Krisdus, kaba, en toua emebesesar mougwa homero. Doba en aimo ucina mog erij augwougb aud gomom naugb maman sesar sug nosa touohob. Hang sug en ohw en mougt edug mougwa cum bedeinyum naugb maman sesar beb huhugb dag ginohob, kaba, en ahwan maman aud ELOHIM. Dauntoba en eic gesgigouhwesa dou maman ucugb toua. Dara sug lusud leic gomom dou en, kaba, en edag lusud misen se cinogo gin touaba. Doba sug ELOHIM eigdoumesa en aud maireseb menauwohob, kaba, en edag mena deit. 3:19-20 Sug en edag mena dag ginohob, kaba, en eihwedig usi hom gedag tu gesisug, moho w Seol, naugb en esai Mer Geigouhw eisaugb enin men geicara taiba sogo salib dou leng laihagab ELOHIM mer se lona sug Nuh eg men ij gini len laugwan sungga toua. Anai len gin, kaba, ELOHIM eigtou ateteij len se lona ingga naugb len lesga meren sesar dara lahau an dougwo toua. Doba len lohoiya Nuh en mer an areg en esai dou len gini terimda. Dangga hang, sug duhu erisa, kaba, ELOHIM eigdoc merug senggemoi se ing mes gin dous. Len gus, kaba, duhu aiyan len laugwan ingga namcirda. 3:21-22 Areg graga augwan, kaba, edag ansins naugb lona sug gembala ogun yen se duhu gin toua. Anai sug en ogun yen se duhu, hanoba en eigdoumesa yen dau duhu ucugb, kaba, gini ansins dag ELOHIM eigdoc yen dau sesar men gogom aud maireseb menau geb huhugb. Aninim dag sug nosa, kaba, duhu eigdoumesa ij an merug senggemoi merna agau dau gogom areg aiyan len gus gin touohob. Dara ELOHIM eicara baimo dangga an yen. Anai Krisdus, kaba, en eisa dau gomom aud maireseb menau geb huhugb sug nosa naugb ginohob. Hanoba en eisaugb dig bogo naugb en edeigtou desij ELOHIM dig en mesira misen. Dauntoba en edag mougt mera medam naugb malaikad, dara merna mog mog gedig len meroho agas, dara leng merubisamougb se bogo meniha len laugwan toua. Dangga hang, sug gembala ogun yen se duhu sug nosa, kaba, gini dag en emedu areg gogor dau yen meijaga ginero. Doba gini dag yen yos dou ELOHIM dag yen yemaimo areg dag sesar deitero. Doba yen yaimo areg en arougb yen an gin dous. Anai yen yecinaga dag sesar hom emeb naugb yen touwero, doba yen yeineg dau augwan namcirohob.

1 Petrus 4

4:1 Dangga hang, sug Krisdus emobsara dau ucina mog erij ginero, doba en aiyan medocesem naugb en aimo ucina gin aud gomom dag gin touohob, kaba, yen yeic men gauwamara gini se yen meigdoc mes naugb sug yen yemobsara dau ucina mog erij gin touwero. Doba yen yaiyan meigdocesem naugb yen yaimo ucina mog erij aninim dag en toua. Anai gareg en aimo ucina mog erij dag gin, kaba, eic dag en emaimo sesar toua deitero. Doba en arges dau sesar gin namcirohob. 4:2 Hang sug cumougt mougwebaba, kaba, yen yemaimo areg yen meigdoc etrij icira toua deitlo. Doba yen yaimo areg ELOHIM en arougb yen an gin dous. 4:3 Anai sug nosa, kaba, yen yaimo leng medigo Yesus aud areg len meru ehigehi se lona einyana bedeinyum touohob. Hang se lona augwan gin, kaba, yen yemaimo areg geigouhw hom touwero. Doba yen meigdoc etrij naugb yen yohw yen meijaga doum aibibra namcir. Dara yen meigdoc oungmogo naugb yen yaimo areg gecgu gus gus toua. Dara yen yemarges dau sug yen yeg ahwei mohu touwero. Doba yen yeg ahwei mohu bed yen yomom icira gin namcir. Dara yen yogo ara gaihim. Dara yen yegara yaigeigem. Dara yen yecguna dou seiseij. Hanoba yen yaimo areg lusud merus eijeij dau debin gin toua namcir. 4:4 Doba iteitogin, kaba, yen yemaimo len aud meren geicara dag mihi. Dara edag duhu ohw baihagab gin toua deitero. Doba yen yasid yenin dau gin namcirohob. Dangga hang, sug leng medigo Yesus len leiya dau gin, kaba, len lomi, hanoba len lowun yen meijoho an meijen geicara menau gin toua terimda. 4:5 Doba inggaida. Anai cum, kaba, len ledens dau meren geicara gecgu gini meijouhw augwan asesa dou ELOHIM toua. Anai en, kaba, en esedeb Lona naugb sug en ogod aremer deb naugb leng merna agau dara leng lomom len laugwanohob. 4:6 Sug ELOHIM esedeb Lona naugb len dag ginohob. Hang Krisdus en emeihwedig w Seol naugb en esai Mer Geigouhw eisaugb enin dou leng lomom laugwan sungga toua. Dauntoba sug len ledag merna gini len merdoc ebdebin an en, kaba, len lemomom namcirero. Doba len merireseb aninim dag ELOHIM en maireseb huhugb gin toua. Krisdus eicara dag gini, anai sug len merna agau sug nosa, kaba, len lebesesarohob. Hang ELOHIM emogod gomom deb naugb len, aninim dag en ogod gomom deb naugb lusud gus laugwan touohob. 4:7 Dara lona naugb sug areg se cinogo gini ediyebeiya, kaba, ebeij toua deinyor namcirohob. Dangga hang, yen yematou touwero, doba yen meiju auti. Hanoba yen yogmac yenin meigdoc mes dougwo aremer augwan toua. Dauntoba ara ara emedag sogo maga dougwo yen naugb yen yocuncum dou ELOHIM touwero. Doba yen yocuncum esesa dou en terimda. 4:8 Doba aremer gesloulougb edreg dau aremer gus augwan namcir, kaba, dag yen yemarges dau sug yen meigdoc gororougwim touwero. Doba yen yeic meijuwemougb esesa naugb yen yeicara yaimo dag gin anim terimda. Anai sug yen meigdoc gororougwim, kaba, yen yemecic dau sug yen yebesesar anim ucucugb touwero. Doba yen yeic gesgigouhwesem naugb yen yaihiron dougwom augwan toua namcir. 4:9 Dara sug yen yebin yen meijaguner dara yen meigdamouwer se Krisdus, kaba, yen yemenara ucucugb an len touwero. Doba yen yebin len laugwan dara yen meigdoc eigouhw an len terimda. 4:10 Dara yen yemeisan gurog dau mou ouforoho era goubesa aingma aingma areg ELOHIM eic dou yenohob gin touwero. Doba yen yesedougwo augwan gin deigeigouhw namcir. Dara yen yemeic gini naugb yenin dousero. Doba yen yeic gini naugb yousem ucucugb terimda toua. Anai mou gouforoho dara goubesa gedig maman masma, kaba, augwan aninimero, doba susugb toua namcir. 4:11 Dangga hang, gareg dau yen en mou ouforoho naugb sug en esai ELOHIM enin mer eisaugb Krisdus dou lusud, kaba, en emarges dau gin touwero. Doba en ebedbed en mer gin dou lusud. Dara gareg dau yen ELOHIM eic goubesa dou en naugb en ousa leng lentog moc moho dara leng mecicgu, kaba, en aimo augwan gini dara medoc hom an len. Dauntoba se meijen geicara augwan, kaba, yen yeigdoumesa ELOHIM en moho gin terimda. Anai en, kaba, en eigtou se gogouf cucugb. Dara en edag mougt mera medam naugb augwan beb huhugb toua. Yen yeicara dangga, anai yen yedag hom dara Krisdusohob. Augwan gini asesa dag misen namcir. 4:12 Dan indagunerij, dara dan indamouwerij gedig dan indoc gororougb yen, sug yen yaimo ucina mog erij medam iteitogin, kaba, yen yemeija meigdocesa dag aremer ganusbus inggeb debin yen touwero. Doba yen yaiyan meigdocesem naugb yen yaimo gin terimda. Anai ELOHIM eic gini bainyen yen meigdoc mes, endag yen meigdoc ebdebin an en dag misenohobei? Era anambei? Aninim dag lusud lec ara ara se smougb naugb lainyen toua. Dangga areg misen, kaba, smougb emaitero. Doba areg misenero, kaba, smougb ait bediyebeiya namcir. 4:13 Hang yen yemeija meigdocesa areg gainyen yen touwero. Doba sug yen yesogwa deisa Krisdus mohotimei mohw se men ucina mog erij gin, kaba, yen meigdoc eigouhw an. Dara yen yagahugouhw naugb gin toua. Anai sug yen yes agadgeij se gini terimda, kaba, yen meigdoc emeijesa se lona sug ELOHIM ens Krisdus se gogouf cucugb ainyes dou lusud touwero. Doba yen meigdoc agahugouhw se lona ingga toua namcir. 4:14 Dangga sug yen yedag hom dara Krisdusohob, hanoba lusud lowun yen meijoho icira gin, kaba, yen meigdoc momogo an touwero. Doba yen meigdoc ebtou namcir. Anai gini ansins dou yen dag ELOHIM esa Mena Gogoufu gedig en eigtou se gogouf cucugb se yen meigdoc mes touohob. Hang geigouhw areg ELOHIM esedeb naugb yenohob, kaba, hom emediyebeiya dau yen touwero, doba en emeic augwan dou yen toues. 4:15 Doba sug yen yaimo ucina mog erij gin, kaba, eigouhw naugb yen yemaimo gini ogdoc sug yen yeic gomom dou len gus, dara yen yeiyohora, dara yen yodo yen meijaga se len gus meren aremer, dara sug yen yeicara gecgu gus gus touwero. 4:16 Doba yen yaimo ucina mog erij gini dau sug yen yedag Krisdus men logodeh gin dous. Anai sug yen yaimo ucina mog erij icira gin, kaba, igdebes emeba yen dau gin touwero. Doba yen yen sijo dou ELOHIM, anai gini ansins dag Krisdus en moho aiga yenohob. 4:17 Anai Lona ebeij deinyorohob naugb sug en ogod aremer aga lusud laugwan ebiji dara men lusud maman nosahabi. Dangga hang, sug ELOHIM emedreg maman debero. Doba en ogod aremer aga maman nosahabi, kaba, dagiro eisaugb leng merdoc aihagab en Mer Geigouhw eisaugb Krisdus gina? En amsoho lenei? Naro, en emamsoho len deb namcirero. Doba en emeic gogom medam dou len se lona ingga toues. 4:18 Augwan gini esogwa deisa areg sud hom en og deb se Surad Injil Meb Mohon deb sug nosa touohob, endagai: Ogom medam naugb leng laimo areg asesa ELOHIM enin medoc mes len leinesa maireseb menau geb huhugb gini. Dangga dagiro eisaugb leng leic ELOHIM moho lacecim. Hanoba len ledreg men gomnomna gin toua terimda? Len toua leinesa maireseb menau geb huhugb ginei? Naro, len lemeinesa namcirero, doba ELOHIM eic mor mor dou len dous. 4:19 Dangga hang, sug ELOHIM esedeb naugb yen yaimo ucina mog erij dag ginohob, kaba, yen yemarges dau gin touwero. Doba yen yaimo areg asesa enin medoc mes sug yen yeraga asa ucina gin terimda. Hanoba yen yogugwo yenin debsa enin mesira toua. Anai en emamsoho yenero, doba sug en esinsin yenohob, kaba, en eseyeiyo yen dougwo areg gecgu augwan. Anai en emereiyara dou yen touwero. Doba en aimo areg en os dou yenohob, augwan dag misen an yen toua namcir.

1 Petrus 5

5:1-2 Dara yeng yedag mougt naugb yen yesedougwo ELOHIM men lusud se goucimdeb, kaba, dan desulou yen dara goubesa namcir. Dauntoba yen yemaisan gurog dau sug yen yagauwesa lusud dag domba gedig ELOHIM ogugwo deb se yen meisirohob gin touwero. Doba yen yeic meijuwemougb esesa naugb yen yesedougwo len dara geigouhw namcir. Dara sug yen yesedougwo len, kaba, yen yemecbec se gin touwero. Doba yen yaimo augwan gini dara yen meigdoc erleij an len dous. Anai gini aimo dau areg asesa ELOHIM enin medoc mes namcirohob. Dara sug yen yesedougwo len, kaba, yen yemarerei aremougb dau len touwero. Doba yen yagauwesa len dareg yen meigdoc esgiraha an gin terimda. Dan desulou yen dag gini, anai dan toua dedag mougt naugb dan desedougwo ELOHIM men lusud. Dara sug len leic mog erij dou Krisdus sug nosa, kaba, danin deiya se dan indires touohob. Dangga hang, ebiji dau lona sug ELOHIM ens Krisdus se men gogouf cucugb ainyes dou lusud, kaba, en emogugwo men gogouf cucugb gini ingma dou dan, aninim dag en emogugwo men gogouf cucugb ingma se lona ingga dou yen toua. 5:3 Dara len gedig ELOHIM ogugwo se yen meisirohob, kaba, yen yemeigdoumesa yenin meijoho dag mougt mera medam naugb yen yemaiyan len touwero. Doba yen yedag gansins deinaugb len terimda. 5:4 Sug yen yes agadgeij se gin terimda, kaba, gogouf cucugb areg ELOHIM esedeb naugb yenohob, kaba, emediyebeiya dau yen touwero. Doba ebiji dau lona sug en ens maman Gembala Moho Gagas dou lusud, kaba, en emogugwo dau gogouf cucugb gini ingma dou yen toues. Dara men gogouf cucugb gin, kaba, mohw emousireij touwero, doba eb huhugb namcir. 5:5 Dangga toua, naugb yeng yedag yugdeh mesaba, kaba, yen yemeic meijus deseino meijen mougtir naugb yen yohoiya len merir touwero. Doba yen yaimo len merir se aremer augwan toua terimda. Dara yen yaugwan, kaba, yen meigdoc emagas anim touwero. Doba yen yowun yenin meigdoc mes arjaga doum. Hanoba yen yei iremeb aiyim terimda toua. Anai gareg en medoc agas, kaba, ELOHIM ougb sogo maga dougwo en mebes namcir. Doba gareg en owun enin medoc mes arjaga, kaba, ELOHIM medoc eineg an en. Hanoba en eic geigouhw dou en toua terimda. Augwan gini aimo dau areg len log deb se Surad Injil Meb Mohon deb sug nosa touohob. 5:6 Hang yen meigdoc emagasero. Doba yen yowun yenin debsa ELOHIM enin mesira mes naugb yen yaimo en terimda. Dauntoba edebeij lona areg en medoc edug sehob, kaba, en eigdoumesa yen meijoho toua. Anai enin eng mobisamougb dau augwan namcir. 5:7 Dangga sug yen meigdoc momogo an ara ara, kaba, yen yogugwo augwan gini deb se ELOHIM enin mesira dous. Anai en, kaba, en medoc eineg an yen. Hanoba en agauwesa dara eseyeiyo yen dougwo areg gecgu augwan toua. 5:8 Dara yen yesedeh yauweila dougwo meijen moc Bilis gin toua terimda. Anai en, kaba, en edag mihiloro medam gowi asa ucina naugb en au yen. 5:9 Dangga hang, yen yemobsara dau sug yen meigdoc ebdebin an Krisdus touwero. Doba yen yaiyan meigdocesem. Hanoba yen yes agadgeij dougwo Bilis toua namcir. Anai yen yecinaga dag yenin dous eng yemaimo ucina mog erij ginero. Doba eb naugb yen meijaguner dara yen meigdamouwer se cinogo gus augwan touohob. 5:10 Doba ELOHIM, kaba, en eija yen aud en. Dauntoba sug yen meigdoc dag hom dara Krisdusohob, kaba, yen yeigtou desij en se men gogouf cucugb beb huhugb namcir toua. Anai eni sud hom gedig en medoc an lusud naugb en eic geigouhw dou len toua terimda. Dangga hang, sug en medoc gororougb yen dag ginohob, kaba, en emarges dau yen. Doba en ousa yen, dauntoba yen yemobsara dau ucina aud maireseb menau geb huhugb gin touwero. Doba en eic goubesa dou yen naugb yen yaiyan meigdocesem. Hanoba yen yes agadgeij naugb yen yaimo ucina gini terimda yen yedebeij men usi gin toua namcirohob. Anai ucina mog erij areg yen yaimo iteitogin, kaba, dag cum cum dous. 5:11 Dangga eigouhw naugb maman maigdoumesa en moho agas taiba augwan beb huhugb terimda. Augwan gini asesa dag misen namcir. 5:12 Dan dog surad agarougb dag gini dou yen, dauntoba dan denara dad yen meigdoc mes. Dara dan dauma debin dag areg yen yaimohob gin, kaba, dag augwougwero. Doba esogwa deisa areg ELOHIM medoc eigouhw an yen augwan dag misen touohob. Dangga hang, yen yemobsara dau ucina mog erij gin touwero. Doba yen yes agadgeij namcir naugb yen yaimo terimda. Dara areg dan dog gini, kaba, dan demog ai danin insirero. Doba dan darougb maman mamaguna Silas en og dou dan naugb dasulou yen. Anai dan decinaga en toua edag sud hom gedig en emobsara dau Krisdus touwero. Doba en aiyan meigdocesem naugb en aimo Krisdus dara en medoc augwan toua terimdohob. 5:13 Leng se goucimdeb se cinogo Babel sugin, kaba, len laugwan lou yen. Anai ELOHIM ouci len debinim naugb en, aninim dag yen touohob. Dara dan indisi se Krisdus, moho Markus, en ou yen toua. 5:14 Sug yen youcimdeb, kaba, yen yanim dara you meijufesem toua. Anai gini ansins dag yen yedag hom dara Krisdusohob. Dara gareg dau yen en edag hom dara en dag ginohob, kaba, dan dacgeij ELOHIM naugb en eseyeiyo en dougwo areg gecgu augwan toua terimda.

2 Petrus 1

1:1 Surad gini dau dang, Simon Petrus, gedig dan dedag Yesus Krisdus men sogougb naugb dan desai en moro dou lusud laugwan toua. Dan dog surad gini dou yen gedig yen meigdoc ebdebin an Yesus Krisdus ginohob yen yaugwan. Anai en, kaba, en emobsara dou sud hom touwero. Doba en medoc edag beim an lusud laugwan namcir. Dangga hang, en eic goubesa dou yen naugb yen meigdoc ebdebin an en. Dara yen meigdoc gebdebin an gin, kaba, moho emeb tainya dau emen gedig emen emdoc ebdebin an Krisdus aimougtut gin touwero. Doba mera eisaugb aninim dag emen toua. Anai en, kaba, en edag maman ELOHIM. Dara en eigdoc maman dau sesar men gogom augwan aud maireseb menau geb huhugb gin touohob. 1:2 Dangga hang, sug yen meiju aiso Yesus en edag maman ELOHIM dara maman Adehsud dag ginohob, kaba, dan dacgeij en naugb en medoc eigouhw an yen beiseisaugb terimda. Hanoba en eseyeiyo yen dougwo areg gecgu augwan toua namcir. 1:3 Dan dacgeij Krisdus an dag gini, anai sug en moho edag ELOHIM teitei dag ginohob, kaba, en ogugwo enin men goubesa augwan dou maman toua. Dauntoba maman mamaimo areg gecgu dag nosa deitero. Doba sug maman macinaga areg asesa enin medoc mes augwan dag misenohob, kaba, arautut maman naugb maman geicara augwan, aninim dag enin men geicara augwan toua namcir. Anai sug en eija maman sug nosa, kaba, en eija maman naugb sug maman maigtou desij en se men gogouf cucugb. Dara maman masogwa deisa en mohotimei mohw aud areg edag beim, dara obosboro, dara ecabeci gin dous. 1:4 Sug en eija maman aud augwan ginohob, kaba, en eic men gos dou gedig mera eisaugb dara moho agas namcir einyana baos dara debin gin dou maman toua. Dauntoba sug maman macinaga dau gin, kaba, eic goubesa dou maman naugb maman mamaimo lusud aud areg len merdoc etrij icira se cinogo gin toua deitero. Doba maman mamug augwan aninim dag ELOHIM enin mog gin toua namcir. Anai areg lusud se cinogo len laimo gin, kaba, etaha aisa len dangga. 1:5 Sug Yesus eicara dangga dou yenohob, kaba, yen meigdoc emobsara dau en touwero. Doba yen meigdoc ebdebin an en terimda. Hanoba yen yeic meijuwemougb esesa naugb meijen geicara augwan edag beim dara obosboro an lusud. Dara sug meijen geicara augwan edag beimohob, kaba, yen yainyen naugb yen yecinaga ucina areg ELOHIM esedeb naugb yen yaos dara gin toua. 1:6 Dara sug yen yaimo ucina areg ELOHIM esedeb naugb yenohob, kaba, yen yebehnehino yenin meigdoc mes dougwo areg gecgu augwan toua namcir. Dara sug yen yebehnehino yenin meigdoc mes dougwo areg gecgu augwanohob, kaba, yen yemobsara dau sug lusud leic mog erij dou yen touwero. Doba yen yaiyan meigdocesem naugb yen yes agadgeij terimda. Dara sug yen yaiyan meigdocesem naugb ginohob, kaba, yen yeic meijuwemougb esesa naugb yen yaimo areg ELOHIM arougb yen an gini toua namcir. 1:7 Dara sug yen yaimo areg ELOHIM arougb yen an gin, kaba, yen meigdoc eineg an yen meijaguner dara yen meigdamouwer len laugwan. Dara sug yen meigdoc eineg an len dag gin, kaba, yen meigdoc gororougb lusud laugwan yaos dara toua. 1:8 Anai sug augwan gini eb se yen meigdoc mes, hanoba yen yeic gerleij naugb gini beiseisaugb terimda, kaba, yen yemedag sogo maga mogud touwero. Doba sug yen yecinaga areg geb se maman Adehsud Yesus Krisdus enin medoc mes augwan dag misen namcir, kaba, eic dag yen yera mera areg graga augwan bedreg dau nosa toua deit. 1:9 Doba gareg dau yen en emeicara emaimo areg graga augwanero, kaba, en edag sud hom maires ebeigbogo ucugwohob. Dangga hang, en emeiya lo asesa toua deitero. Doba en eiya areg geb deinyor en dous. Anai en medoc emeiseisan ELOHIM men geicara dou en dag en aigdougwo dara edu men sesar mohon augwan dau enohob touwero. Doba en medoc moc dougwo augwan gin namcirohob. 1:10 Dangga hang, dan indagunerij, dara dan indamouwerij, sug Krisdus eija yen, hanoba en ouci yen naugb yen yeigtou desij en se men gogouf cucugb dag ginohob, kaba, yen yeic meijuwemougb esesa naugb yen yaimo areg graga augwan edreg dau nosa deit. Anai sug yen yeicara yaimo dag gini esesa terimda, kaba, yen yemobsara dau sug yen meigdoc ebdebin an Krisdus touwero, doba yen yes agadgeij namcir. 1:11 Hang maman Adehsud Yesus Krisdus gin, kaba, en emouf misis dougwo yen touwero, doba en eigdoumesa yen meijoho. Hanoba en ec misis gouji dau yen, dauntoba yen yeinesa men Goiharaga Beb Huhugb toua terimda. Anai en, kaba, en eigdoc yen dau sesar men gogom augwanohob. 1:12 Yen yecinaga areg graga augwan dag misen namcirohob, anai lusud lesai dau augwan gini dou yen sug nosa. Hang yen meigdoc ebdebin an dara yen yogo areg misen gini dag buc gototo se yen meigdoc mes touohob. Doba inggaida. Dan demarges dau sug dan desulou yen an augwan gin touwero. Doba dan deicara dangga ucucugb an yen terimda. 1:13-14 Anai maman Adehsud Yesus Krisdus en ens ainyes dou dan dag cum, kaba, dan indina emagau an yen deitero. Doba dan domom dau yenohob. Dangga hang, sug dan indiresebaba gin, kaba, dan douwan debir yen meigdoc mes ucucugb an gin toua terimda. Anai dan decinaga dag gin, kaba, ucina obosboro naugb yenohob. 1:15 Dara gin dousero. Doba dan deic induwemougb esesa naugb dan deic ara ara dou yen. Dauntoba sug dan domom dau yenohob, kaba, yen meigdoc emougwou areg dan desulou yen an gin touwero. Doba eic dag yen meigdoc eiseisan gini augwan terimda toua. 1:16 Dan deicara daimo dangga an yen, anai sug emen emesai dou yen sug nosa dag maman Adehsud Yesus Krisdus en ecicugb aud maman dara goubesa namcir, kaba, emen ememaimo emu gouforoho naugb emen emecic dag huhugb dou yenero. Doba emen emeiya dau men gogouf cucugb sug erbacec en se emenin emires sug nosohob. Hang emen emecinaga dag en emecicugb aud maman dag misen toues. 1:17-18 Dara sug en Mena ELOHIM agahugouhw an en, hanoba en eigdoumesa en moho deseino emen, kaba, emen emouman mer gen dau bogo gin toua. Anai emen emugwengga desij en se menmod gecabeci ingga touohob. Anai ELOHIM Gedig En Eigtou Se Gogouf Cucugb namcir, kaba, en ouma debin en dau bogaden dou emen, endagai: Gini dan Indisi hom gedig dan indoc gororougb en. Anai en eic dan indoc eigouhw dou dan namcirohob. 1:19 Sug emen emeiya dau augwan ginohob, kaba, emen ememeija emuwesa areg leng lesai ELOHIM moro sug nosa len log deb se Surad Injil Meb Mohon naugb maman gin toua deitero. Doba emen emdoc ebdebin an augwan gini bedreg dau nosa deit. Anai areg emen emeiya gin, kaba, esogwa deisa areg len log deb gini toua namcirohob. Dangga hang, eigouhw naugb yen yemoc dou meijums dougwo areg len log deb gin touwero. Doba yen yei meijums naugb gin terimda. Anai areg len log gin, kaba, edag padoumara mouf gererij naugb aisema yen se lobeigbogo terimda edebeij sug lona esga. Hanoba singmur ohobo se yen meigdoc mes touohob. Anai sug Krisdus en ecicugwen, kaba, gini aninim dag lona esgohob. Hang se lona ingga, kaba, en erba mouf se yen meigdoc mes naugb yen yecinaga meijouhw augwan asesa. Aninim dag sug singmur ohobohob, kaba, cum, lusud leiya augwan asesa toua, anai lona esga namcirohob. 1:20 Doba aremer hom gesloulougb edreg dau aremer gus augwan namcir, kaba, dag yen yemaimo yenin meijen gauwamara an areg len log deb gin touwero. Doba yen yacgeij Mena Gogoufu naugb en ens meijouhw dou yen naugb ginahabi, yen yemaimo augwan gin toua terimda. 1:21 Anai areg len lesai gin, kaba, len lemeic dau lenin merdoc mes dou lusudero. Doba Mena Gogoufu enin eng ens dau augwan gini dou lenohob. Hanoba en arautut len naugb len lesai dou lusud gin toua. Anai areg en arautut len se gin, kaba, ELOHIM enin mer dous.

2 Petrus 2

2:1 Doba cum, kaba, gembala areibahau len lagunya augwougb debin yen. Aninim dag sug nosa, kaba, gembala areibahau agunya augwougb debin leng lesai ELOHIM moro dou leng Israel sug nosa touohob. Dangga sug len lagunya debin yenohob, kaba, len ledidib dau ara ara dou yen toua. Doba areg len lens dou yen gin, kaba, augwan dag areibahau mer dous. Hang emeic dag lusud merdoc emebdebin an Krisdus toua deitero. Doba eic dag len lobsara dau en aud mor mor namcir. Dara len lemebedbed dau mer areibahau gin dou yen dousero. Doba len lagada merus dougwo Krisdus dag en emedag meren mougt mera medam toua deitero. Anai sug nosa, kaba, en eic enin bancoho aga len dau sesar men gogom augwan aud maireseb menau geb huhugb gin touohob. Dobnaro. Len leic merus terimda. Dangga hang, ELOHIM emamsoho len toua deitero. Doba en esedeb len naugb en ahacugb len merur mor se dum smougb dedemeda icira gin toua namcir. 2:2 Dangga se lona ingga, kaba, leinyana dau maman len lesogwa deisa gembala areibahau ingga len meruhotimei mohw an meren geicara naugb len laimo areg gogor. Dara len lohw len meraga aibibra doum, aninim dag len toua terimda. Hang leng medigo Yesus, kaba, len lemousa deisa maman an areg maman mamdoc ebdebin an gin touwero. Doba len leic Ucina Geica areg maman maimo ginohob augwan lacecim namcir. 2:3 Dara len merdoc etrij icira aremougb toua terimda. Hang len lemeic areg dag huhugb dau lenin merdoc mes naugb len larerei aregoufu einyana dau yen toua. Dangga hang, gogom areg ELOHIM ogod deb naugb len sug nosohob, kaba, augwan emesijes dau len. Dara areg eic mor mor dou len, kaba, emougbdedau len touwero. Doba eb naugb len toua namcir. 2:4 Anai yen yecinaga dau sug malaikad len toua lebesesar sug nosa, kaba, dag ELOHIM emamsoho len touwero. Doba en ohud len merisira darem. Hanoba en erba len se w Seol ai mei, moho Tartarus, naugb len leigtou se lobeigbogo mes ingga terimda edebeij Lona Sug En Ogod Gogom deinaugb len toua. 2:5 Dara yen yecinaga dag se Nuh men lona, kaba, ELOHIM emamsoho lusud touwero. Doba en esa duhu erisa baiyan len laugwan namcir. Anai len lemaimo areg asesa enin medoc mesero. Doba len laimo areg gecgu terimda. Hang sug en esa duhu debin len, kaba, en eigdoc Nuh an merug senggai dau duhu men gogom gin dous. Anai en, kaba, en emaimo len ingga an meren geicara gecgu touwero. Doba en esulou len, hanoba en ens dau areg asesa ELOHIM enin medoc mes dou len touohob. Doba len lemaimo en an areg en esai dou len ginero. 2:6 Dara yen yecinaga dau sug leng se cinogo Sodom dara Gomora len lohw len meraga doum ucucugb terimda, kaba, dag ELOHIM emamsoho len deb touwero. Doba en owun len meroho an gin. Hanoba en esa smougb dau bogaden naugb ait len laugwan merur mor namcir. Dangga hang, augwan gin, kaba, dag ansins dou leng laiga men hancob se lona daiyamo gacin len laugwan toua. Dauntoba sug len louman dau ELOHIM men geicara gin, kaba, len lecinaga dag en emamsoho len an meren geicara gecgu gin deb touwero. Doba en emeic mor mor dou len icira gin toues. 2:7 Dara yen yecinaga dau Lud, kaba, dag en aimo areg asesa ELOHIM enin medoc mesohob. Dangga hang, sug leng Sodom dara Gomora len lohw len meraga doum, dara len leic merus naugb len leicara laihagab ELOHIM men gomnomna dag gin terimda, kaba, en medoc eijesa medam. Hang smougb emait en touwero. Doba ELOHIM eigdoc en mena agau dau cinogo ingga namcir. 2:8 Anai sug sud hom gedag beim gini en eigtou se len merufu se cinogo ingga, kaba, en eiya, hanoba en ouman dau meren geicara gecgu gini astesda lona terimda. Hang emeic en medoc momogo medam dou en toua. 2:9 Sug ELOHIM eicara dangga an leng graga len laugwan dag ginohob, kaba, gini ens ainyes dou maman dag men goubesa edeinyum naugb sug en eigdoc leng leicara edag beim dau gogom areg ainyen len. Dara men goubesa edeinyum naugb sug en esedougwo leng merug mog len laugwan debinim se usi hom. Dauntoba en emeic gogom dou len se Lona Sug En Ogod Aremer Aga Lusud gin toua. 2:10 Doba gembala areibahau graga gedig len lagada merus dougwo ELOHIM naugb en emedag meren mougt mera medam gin deitero. Hanoba len laimo areg len merdoc etrij icira naugb len lohw len meraga doum ucucugb, kaba, ELOHIM ogod gogom deinaugb len edreg dau gogom gus augwan namcir. Anai len louwan naugb len laimo areg geic gogor dou lenin toua terimda. Sug len leic merus naugb len laimo areg lenin louwan dag ginohob, kaba, len lemahau dau sug len leic leng leigtou se gogouf cucugb len meroho lacecim touwero. Doba len lombrera naugb len lesbesan len dag gini toua terimda. 2:11 Hang meren geicara augwan gin, kaba, edreg dau malaikad meren geicara touohob. Anai len, kaba, len merubisamougb edreg dau gembala areibahau gin namcir. Hanoba len meroho agas edreg dau len toua. Doba sug aremer eb naugb leng mesir gus gedig len leigtou se gogouf cucugb, kaba, len lemeic merus naugb len lahacugb gogom debin len deseino maman Adehsud ELOHIM dag gin touwero. Doba len lamsoho len an dous. 2:12 Doba gembala areibahau gin, kaba, len ledag aremeta gedig mem oho mehir debohob, kaba, eb naugb sug lusud lagaigeij. Hanoba len let teitei dous. Anai len gin, kaba, len lemauwam an ara ara nosa habero. Doba len merdoc oungmogo naugb len laimo areg len merdoc etrij icira augwougb dous. Aninim dag aremeta, kaba, len lemauwam an ara ara touwero. Doba len merdoc oungmogo naugb len laimo areg len merdoc etrij icira gini augwan augwougb toua terimda. Hang areg len meru emobgesero, kaba, len leisa deisa an gini. Hanoba len leic lacecim toua. Dangga ELOHIM emamsoho len deb touwero, doba en eic mor mor dou len namcir. Aninim dag lusud lemamsoho aremeta graga deb touwero, doba len logod len teitei toua. 2:13 ELOHIM eic gini dag siouwa bauni gogom areg len leic dou len gusohob ucugb dou len. Anai len lemowun len merdoc mes dau areg len merdoc etrij icira gin touwero. Doba areg eic len merdoc geigouhw dou lenohob, kaba, len merdoc ehin gunini icira gini naugb len laimo toua terimda. Dara len lemeicara dangga se loba dousero. Doba len logo ara gaihim ai gini se lona toua. Dangga hang, len lemedag uluto gargeh yen. Dara len lemedag areg geic gogor dou yen toua namcir. Anai sug yen yeg sogomera mohu dara yen yougwan ared naugb yetara aninim, kaba, len lemeigtou dau yen touwero. Doba len leic merus naugb len logo ara gaihim debin yen. Hanoba len leigdoumesa lenin meroho an areg len merdoc etrij icira gin toua terimda. 2:14 Dara len merires emedug dau ligida touwero. Doba astesda sug len leiya lenohob, kaba, len merdoc etrij icira naugb len laimo len toua. Anai len lemeigtou dau sesar mougwa hom touwero, doba len louwan laimo areg ecgu besesa terimda. Dangga hang, sug len leiya lusud gedig len lemogo Krisdus dag buc gototo se len meigdocbuma, doba len leija meruwesa enaba, kaba, len lemarges dau len touwero. Doba len leic meren gebedbed dag digorobei naugb eica len, dauntoba len merdoc emedebin an Krisdus deitero. Doba len lobsara dau en naugb len laimo len aud meren geicara gecgu gin dous. Dara len meru ouforoho naugb len lenara larerei lusud an meren aremougb gin toua. Anai sug len merdoc etrij icira aremougb dag gini terimda, kaba, len lecinaga ucina aud gin augwan dag misen touohob. Hang ELOHIM emamsoho len touwero, doba en ouwara dougwo len. Hanoba en ahacugb len merur mor se dum smougb toua namcir. 2:15 Anai len gin, kaba, len lemaimo ucina gobosboro an lusud touwero. Doba len laijahasero dau ucina geica gin namcir. Hanoba len lesogwa deisa Beor meisi, moho Bileam, en mohotimei mohw se men ucina areg en aimo sug nosa gin touohob. Anai en, kaba, en medoc gororougb aremougb toua terimda. Hang en emaimo ucina obosboro an leng Israel touwero. Doba en esedeb naugb en ahwan len aud sesar. Dauntoba len lemecguna dou ELOHIM deitero, doba len lecguna dou seiseij gin dous. 2:16 Doba aremeta hom etaha en an men geicara gecgu gin. Anai men keledai gosum, kaba, enara dag lusud misen naugb en dougwo en. Dauntoba en emaimo men geicara dag mereiyeba gin touwero, doba en arges dau namcir. Anai en, kaba, en edag sud hom gesai ELOHIM en moro ginohob. 2:17 Dangga hang, leng lebedbed mer areibahau gin, kaba, len ledag cinogo mes gedig duhu mer emeb se touwero. Dara len ledag umer mohora gedig loungmen oho taibeiba dous. Hang ELOHIM emamsoho len touwero. Doba en esedeb usi geb se lobeigbogo mes ai mei deinaugb lenohob. 2:18 Anai len lenara laceca dara len leisa desa an gin dou lusud toua. Hanoba len lococ leng Krisden menenauwaba naugb len laic len. Dauntoba len lemaimo Krisdus deitero, doba len lobsara dau en namcir naugb len laimo meren geicara gin ucugb deit. Anai leng Krisden menenau gin, kaba, len lemogo Krisdus dag buc gototo se len merdoc mes termumbuma. Doba len lasid lenin dau leng laijahasero iteitonggaba. Dobnaro. Areg gembala areibahau len len gin, kaba, augwan dag augwougb dous. 2:19 Anai len los dou leng Krisden menenau gini, lendagai: Gomnomna hom, kaba, emedag mougt naugb yen deitero. Doba yen yarges dau augwan gin namcirohob. Hang yen yemedag sogougb naugb ara ara deitero, doba yen yedag lusud misen naugb yen yaimo areg yen youwan dous. Len los dangga dou len, doba lenin, kaba, len ledag sogougb naugb areg len merdoc etrij icira gin terimdaba. Hang ahwan len aud mor mor toua namcir. Anai yen yecinaga dau areg maman aremeijouhw en dou mamanohob, endagai: Sud hom areg ara ara hom agaigeij en, kaba, en emedag mougt naugb enin men geicara deitero. Doba en edag sogougb dou areg agaigeij en ingga namcirohob. 2:20-21 Dangga hang, eigouhw naugb len lemecinaga areg asesa ELOHIM enin medoc mes mougwa hom touwero, dau sug len lecinaga en mer gecabeci areg en eic dou lenohob. Doba cum, kaba, len lobsara dau gin deit. Anai sug maman Adehsud Yesus Krisdus eigdoc lusud dau sesar men gogom aud maireseb menau geb huhugb, dara len lecinaga en dag misen, hanoba len larges dau areg gogor dara areg geic mor mor dou len ogdoc gin touohob. Doba cum, kaba, areg gogor gini eica len. Hanoba ohud len dag men sogougb ucugb, kaba, meren geicara gecgu se lona ingga, kaba, edreg dau nosa deit. 2:22 Hang meren geicara gin, kaba, esogwa deisa maman aremeijouhw dag misen touohob, endagai: Mihi, kaba, ersa deb. Doba cum, kaba, en et ucugb. Era hweij, kaba, sug lusud ledu enohob. Doba cum, kaba, en ecicugb naugb en edasa du ucugb deit toua.

2 Petrus 3

3:1 Dan indagunerij, dara dan indamouwerij gedig dan indoc gororougb yen, dan dog surad gini ucan gin dou yen naugb dan debir yen meigdoc mes deit. Dauntoba yen yemauwam an mer areibahau gin touwero. Doba yen yauwam an areg se geica gedig eic yen meigdoc geiloboro dou yen dous. Aninim dag dan debir yen meigdoc mes aud gini se indan surad gaimougtut gin touohob. 3:2 Dan deicara dag gin dauntoba yen meigdoc moc dougwo areg leng lesai ELOHIM moro sug nosa len log deb se Surad Injil Meb Mohon eisaugb maman Adehsud Men Lona Sug En Ecicugwen gin touwero. Doba yen meigdoc eiseisan gin terimda. Anai ELOHIM enin eng ouci len debinim naugb ginohob. Dara yen meigdoc moc dougwo areg maman Adehsud enin arougb maman an ogdoc leng lesai en moro dou yen gin touwero. Doba yen meigdoc eiseisan augwan gin toua namcir. Anai enin eng Sud Hom Geigdoc Maman Dau Sesar Men Gogom aud maireseb menau geb huhugb gin dous. 3:3-4 Dan desulou yen an dag gini, anai se Lona Sug Maman Adehsud En Ecicugwen, kaba, lusud gedig len laimo areg len merdoc etrij icira namcir, kaba, len lagunya debin yen toua. Aremer hom gini, kaba, esloulougb edreg dau aremer gus augwan namcir naugb yen yecinaga deb toua. Anai sug len lagunya debin yenohob, kaba, len lesbes an yen, lendagai: Krisdus en os dou maman dag en ecicugwen, kaba, moongga en en girohoba? Anai maman mamjemouwer, kaba, len laugwan lomom dau ginohob. Doba augwan eb smougb mougb dag graga. Aninim dag dau lona sug ELOHIM en ahasesei dara en esinsin cinogo dara bogo, kaba, augwan emeperwei touebma. Doba eb smougb mougb terimda iteitogin toua ingginaba? Len lesbes an yen dag gini, anai len lemouwan naugb len lemaimo areg ecabeci dara edag beim ginero. Doba len louwan laimo areg len merdoc etrij icira aud areg gecgu dous. 3:5 Dobnaro. Areg len lesbes yen an gin, kaba, dag len launun dou yen dous. Anai len lecinaga sug ELOHIM en mer an bogo, kaba, bogo acgunog. Dara sug en mer an duhu, kaba, edgom bedag cinogo. 3:6 Dara sug en mer an duhu gin deit, kaba, erisa baiyan cinogo ingga an ara ara augwan toua namcirohob. 3:7 Dara gin dousero. Doba len lecinaga dag bogo dara cinogo geb iteitogin, kaba, en mer ogod an deb dag smougb emait augwan mor mor touebma. Doba en omomu deb ogdoc en mer gogod an gini terimda edebeij lona sug en eic mor mor dou leng merug mog len laugwan toua namcir. Dangga sug areg ELOHIM ogod an, hanoba acgunog dag ginohob, kaba, areg en os eisaugb lona naugb sug maman Adehsud en ecicugwen, kaba, emedreg dau en mer touwero. Doba emacgunog namcir toues. 3:8 Doba dan indagunerij, dara dan indamouwerij gedig dan indoc gororougb yen, dan douwan dag yen meigdoc moc dougwo aremer hom deit touwero. Doba yen meigdoc eiseisan gin terimda. Anai deseino maman Adehsud, kaba, lona hom aninim dag arisogomoc huntun sisa. Dara arisogomoc huntun sisa, kaba, aninim dag lona hom toua. 3:9 Sug maman Adehsud ecic lona dara arisogomoc dag ginohob, kaba, en emeigtou dau areg en osohob gin touwero. Doba en amsoho yen, hang en emecicugb touebma. Anai en emouwan naugb sug sud hom ingma, kaba, en mor mor se dum smougb touwero. Doba en eic cumougt dou len laugwan naugb len lesga meren sesar dara lahau an dougwo touahabi, en emecicugb toues. Dangga hang, areg ligbum loududa endag en eigtou dau gini namcirohob, kaba, dag augwougb dous. 3:10 Doba maman Adehsud Men Lona Sug En Ecicugwen gin, kaba, en emens gini dou maman nosa habero. Doba en agunya debin maman augwougb dous. Aninim dag sud hom geiyoho len gus meren aremougb, kaba, en emens men lona dou len touwero, doba en agunya debin len augwougb toua. Hang se Lona ingga, kaba, bogo emeb toua deitero, doba ediyebeiya namcir dara mougb medam. Dara areg geb se bogo dara cinogo an areg geb se gin, kaba, smougb ait augwan merur mor namcir se Lona ingga toua. 3:11-12 Sug ELOHIM esedeb cinogo dara bogo naugb smougb ait augwan mor mor dag ginohob, kaba, en ouwan naugb meijen geicara dag ara sug yen yeigtou yateteij naugb men Lona gina? En ouwan naugb yen yemedreg dau areg en arougb yen an gini mougwa hom touwero. Doba yen yesogwa deisa en mohotimei mohw, dauntoba meijen geicara augwan aninim dag enin men geicara naugb yen yaimo areg edag beim, dara obosboro, dara ecabeci an lusud laugwan toua namcir. Anai sug yen yeic meijuwemougb esesa dag gin terimda, kaba, eic dag en emecicugb aud yen dedemeda toues. ELOHIM ouwan dag gini, anai se Lona ingga, kaba, en esa smougb naugb smougb ait bogo augwan mor mor. Dara mougb esij areg geb se bogo meniha augwan ohw bediyebeiya toua namcir. 3:13 Doba maman, kaba, maman maigtou naugb bogo dara cinogo menau gin dous. Augwan gini aimo dau areg maman Adehsud en os dou mamanohob. Dara se cinogo dara bogo menau ingga, kaba, lusud lemeicara lemohoiya en mer toua deitero. Doba len merdoc edag beim naugb len laimo areg asesa enin medoc mes augwan toua terimda. 3:14 Dangga hang, dan indagunerij, dara dan indamouwerij gedig dan indoc gororougb yen, sug yen yeigtou yateteij naugb ELOHIM Men Lona dag gin, kaba, yen yebehnehino yenin meigdoc mes terimda. Dauntoba sug yen yedebeij enohob, kaba, en emowun yen meijoho an aremer hom touwero. Doba en eiya dag meijen geicara augwan, kaba, ecabeci namcirohob. Dara yen yeic meijuwemougb esesa, dauntoba ELOHIM men gesgigouhwesa emediyebeiya dau yen touwero, doba eb naugb yen toua namcir. 3:15 Doba sug ELOHIM eigtou ateteij yen dag gin, kaba, yen yemeic gini dag cumougt geigouhw naugb sug yen yebesesar touwero. Doba yen yeigdoumesa men geicara gin, kaba, dag cumougt naugb sug en eigdoc yen dau sesar men gogom aud maireseb menau geb huhugb gin dous. Dara eisaugb Lona sug maman Adehsud en ecicugwen gin, kaba, maman mamsi Paulus gedig maman mamdoc gororougb en namcir, kaba, en og meijouhw dau augwan gini se men surad dou yenohob, aimo dau mou ouforoho areg maman Adehsud eic dou en toua. 3:16 Aremer graga augwan, kaba, en emog dou yen dousero. Doba en og dau gini se men surad gus augwan touohob. Doba ligbum, kaba, len lemogo Yesus dag buc gototo se len merdoc mesbuma. Dara len leija merdocesa areg lusud lesai dou len gin toua terimdaba. Hang len lemeperwei areg Paulus en og eisaugb gini men meijouhw didi toua. Anai areg en og gin, kaba, hom yom ogom medam namcir. Dara len lemeicara dag gin an Paulus men surad augwan gin dousero. Doba len leperwei hom yom dau Surad Injil Meb gus didi dag gin touohob. Hang meren geicara gin, kaba, ahwan len naugb sug ELOHIM eic merur mor se dum smougb se Lona dou len ingga namcir toua. 3:17 Dangga hang, dan indagunerij, dara dan indamouwerij gedig dan indoc gororougb yen, sug yen yecinaga deb dag se lona daiyamo gacin, kaba, gembala areibahau len lagunyen debin yen engga, kaba, yen yebehnehino yenin meigdoc mes. Dauntoba meren gebedbed dag areibahau gin, kaba, emahwan yen dau areg yen yogo dag buc gototo se yen meigdoc mesohob gin touwero. Doba yen yes agadgeij terimda. Anai meren geicara augwan, kaba, dag len ledreg dau areg ELOHIM arougb maman an gin toua namcirohob. 3:18 Sug yen yes agadgeij se ginohob, kaba, yen yecgun meisira debin. Dauntoba meijen geicara augwan, kaba, eic dag maman Adehsud Yesus Krisdus en medoc eigouhw an yen. Hanoba yen yecinaga areg asesa enin medoc mes augwan eiseisaugb terimda toua. Anai en, kaba, en eigdoc maman dau sesar men gogom augwan aud maireseb menau geb huhugb ginohob. Hang eigouhw naugb maman maigdoumesa en moho agas medam beb huhugb terimda toua. Augwan gini asesa dag misen namcir.

1 Yohanes 1

1:1 Surad gini eisaugb Sud Hom Gesai ELOHIM En Moro dou maman. En, kaba, en eic maireseb geb huhugb dou lusud. Sug ELOHIM ahasesei dara esinsin bogo dara cinogo, kaba, en toua moongga desij en sug acgunogohob. Dara emen, kaba, emen emeiya dau Sud Hom Gesai ELOHIM En Moro dara geic maireseb menau geb huhugb dou lusud gini. Hanoba emen emouman dau areg en esai dou emen. Dara emen emehigdecin en an men geicara deigeigouhw namcir. Dara emen emousousa en mos dara emen emsira touohob. 1:2 Sug ELOHIM ens sud hom geic maireseb menau geb huhugb dou lusud ainyes dou len se cinogo gin, kaba, emen eng emeiya dau en toua. Hang emen emos emadi en dou yen. Dara emen emouma debin en dag enin eng sud hom geic maireseb menau geb huhugb dou lusud dous. Anai ELOHIM ens en ainyes dou mamanohob. Dara en, kaba, eni sud hom gedig eni moongga desij en Mena dau acgunog toua namcir. 1:3 Dangga men geicara areg emen emeiya, dara areg emen emouman dau sug en esai ELOHIM en mer dou emen, kaba, emen emog dau augwan gini se surad gin dou yen toua. Dauntoba sug yen yecic dau men geicara augwan gin, kaba, arautut yen naugb yen yaimo emen. Dauntoba maman maugwan mamdoc aninim dara ELOHIM Mena dara en Meisi Yesus Krisdus lan toua terimda. Aninim dag emen emdoc dag hom dara lan toua sug nosohob. 1:4 Anai sug yen yeicara yaimo dag gin, kaba, eic dag emen emdoc agahugouhw medam an namcir. Hang emen emogu augwan dou yen toua. 1:5 Doba areg ELOHIM Meisi Yesus Krisdus en esai dou emen sug nosohob, kaba, dag ELOHIM men geicara hom ingma emaimo areg se lobeigbogo ginero. Doba men geicara augwan, kaba, aimo areg geb se mouf dous. Hang emen emesai dou yen toua. 1:6 Dangga gareg dau maman en eigdoumesa enin moho dag en medoc dag hom dara ELOHIM enohob, doba men geicara aimo lobeigbogo men ucina gini terimdaba, kaba, en ereiyara dous. Anai men geicara ens ainyes dag en emaimo areg asesa ELOHIM enin medoc mes touebma. Doba en aimo areg gecgu augwan dag smougb mougwaba. 1:7 Doba sug maman maimo areg se mouf, aninim dag ELOHIM aimo areg se mouf ginohob, kaba, gini eic dag maman mamdoc emedregim toua deitero. Doba maman mamdoc gororougwim namcir. Hang sesar men gogom emeb naugb maman touwero. Doba ELOHIM Meisi Yesus en mogwihi edu augwan dau maman toua terimda. 1:8 Dangga gareg dau maman en aideido dougwo men sesar dag ingmaro, kaba, areg misen hom ingma emebsa en medoc mes touebma. Doba gini dag en augwohosa enin dous. 1:9 Doba sug maman masga maman sesar moho asesa dou ELOHIM, kaba, en medoc dag hom namcir naugb en aigdougwo maman sesar. Dara en medoc edag beim an maman naugb en oguc dougwo sesar augwan dau maman toua. Anai maman madreg areg asesa enin medoc mes toua mougwa einyanohob. 1:10 Dangga gareg dau maman en ens enin ainyes dou lusud dag en emebesesar mougwa hombuma, kaba, en owun ELOHIM en moho dag en ereiyara namcir. Anai en eng, kaba, en owun maman mamoho dag maman mabesesar dag misenohob. Hang ELOHIM en mer areg en Meisi esai dou mamanohob, kaba, hom emeb se en medoc mes touwero. Doba en medoc dag mes mogud dous.

1 Yohanes 2

2:1 Dan indihirija, dan dog dau areg graga augwan dou yen, dauntoba yen yemaimo sesar mougwa hom touwero. Doba yen yeineg dau namcir. Doba sug sud hom dau yen en obsara aud sesarohob, kaba, Yesus Krisdus en edag gembala gesa taij naugb en ogod maman aremer augwan deseino en Mena. Anai en, kaba, en emedreg areg asesa ELOHIM enin medoc mes mougwa hombuma. Doba en aimo augwan asesa namcirohob. Hang edeinyum naugb sug en ogod maman aremer augwan deseino ELOHIM toua terimda. 2:2 Anai sug Krisdus eic enin mogwihi bauwaharo dou ELOHIM naugb maman sesar dag ginohob, kaba, edeinyum naugb sug ELOHIM aigdougwo maman sesar augwan dau maman toua namcir. Dara en mogwihi gin, kaba, emedeinyum naugb sug ELOHIM emaigdougwo mamanin maman sesar augwan dousero. Doba edeinyum naugb sug en aigdougwo lusud se cinogo augwan meren sesar augwan dau len toua. 2:3 Dangga hang, sug maman maimo ELOHIM en mer an areg en arougb maman an gin terimda, kaba, gini ansins dag maman macinaga areg asesa ELOHIM enin medoc mes augwan dag misen touohob. 2:4 Doba sud hom areg en eigdoumesa en moho dag en medoc dag hom dara ELOHIM namcirohob, hanoba eni edreg dau en mer gin toua terimda, kaba, gini aninim dag en ereiyara. Anai gini ansins dag areg misen hom emeb se enin medoc mes touebma. Doba en medoc dag mes mogud dous. 2:5-6 Doba sud hom gareg en aimo ELOHIM en mer augwan gin terimda, kaba, gini ens ainyes dag en medoc gororougb ELOHIM dara en medoc augwan dag misenohob. Dangga gareg en eigdoumesa enin moho dag en medoc dag hom dara ELOHIM enohob, kaba, esloulougb medam naugb men geicara augwan aninim dag Yesus Krisdus men geicara gin toua namcir. Anai sug maman maicara dag gin, kaba, maman macinaga dag maman mamdoc dag hom dara ELOHIM dag misen touohob. 2:7 Dan indagunerij, dara dan indamouwerij gedig dan indoc gororougb yen, areg ELOHIM arougb yen an gin, kaba, dag mer menenauwero. Doba yen youman dau augwan gini aimougtut sug emen emesai en mer dou yen sug nosohob. 2:8 Dangga yen yemehig dau en mer gin touwero. Doba yen yaimo en mer augwan gini eb ainyes esesa terimda, aninim dag Krisdus aimo ELOHIM en mer augwan eb ainyes sug nosa touohob. Anai sug yen yeicara dag gin, kaba, yen yedag mouf misen gowun lobeigbogo men goubesa ediyebeiya namcir. Hang areg dan dog dou yen gin, kaba, dag mer mohon touwero, doba dag mer menau naugb yenohob. 2:9 Doba sud hom gareg en eigdoumesa en moho dag en einesa mouf ginohob. Hanoba en medoc mog mog an en maguner dara en medamouwer se Krisdus terimda, kaba, en emeinesa mouf dag misen touebma. Doba en eigtou se lobeigbogo smougb mougb terimda iteitoginaba. 2:10-11 Anai gareg en medoc mog mog an en maguner dara en medamouwer, kaba, en edag sud hom gedig loba osun dougwo en maires namcirohob. Hang en emaimo areg se mouf touwero. Doba en eigtou se lobeigbogo naugb en eraga men ucina gin dous. Doba gareg en medoc gororougb en maguner dara medamouwer gin terimda, kaba, en emeigtou se lobeigbogo deitero. Doba en ec se mouf dag misenohob. Hang en emedag sogo maga naugb sug sud hom ingma emetohob en aud sesar touwero. 2:12 Dan indihirija, dan dog surad gin dou yen, anai Krisdus omom naugb meijen sesar. Hang ELOHIM aigdougwo meijen sesar augwan ogdoc men geicara gin dau yenohob. 2:13 Yusud, dan dog surad gin dou yen, anai yen yecinaga areg asesa Sud Hom Geis Huhugb Sugraga en medoc mes augwan dag misen. Dara yugdeh, dan dog surad gin dou yen, anai yen yemaimo areg Sud Hom Mobgos Maha arautut yen aud gin toua deitero. Doba yen yaiyan en dau yen namcir touohob. 2:14 Dan indihirija, dan dog surad gin dou yen, anai yen yecinaga areg asesa maman Mamina ELOHIM en medoc mes augwan dag misen. Dara yusud, dan dog surad gin dou yen, anai yen yecinaga areg asesa Sud Hom Geis Huhugb Sugraga en medoc mes augwan dag misen touohob. Dara yugdeh, dan dog surad gini dou yen, anai yen yemobsara aud Bilis touwero. Doba yen yes agadgeij dougwo en toua namcirohob. Hang ELOHIM en mer emediyebeiya dau yen meigdoc mes touwero. Doba yen yebin en mer gini se yen meigdoc mes, dara yen yaiyan Sud Hom Mobgos Maha dau yen toua terimda. 2:15-16 Sug yen meigdoc dag hom dara ELOHIM dag ginohob, kaba, yen meigdoc gororougb lusud gedig Bilis oiharaga len se cinogo gini. Dara yen meigdoc emetrij naugb yen yaimo len aud meren geicara gecgu gin touwero. Doba yen yasid yenin dau namcir. Anai areg lusud se cinogo gin len merdoc etrij icira, dara areg len lauweila toutou, dara areg len merdoc agas an, kaba, augwan gini emen dau maman Mamina ELOHIM enero. Doba en dau lusud gedig Bilis oiharaga len se cinogo gin dous. Dangga gareg en medoc gororougb lusud gedig Bilis oiharaga len se cinogo gin, kaba, en medoc gororougb maman Mamina ELOHIM touwero. Doba en edag ELOHIM men moc dous. 2:17 Dara lusud gedig Bilis oiharaga len, dara areg len merdoc etrij icira se cinogo gin, kaba, augwan emeb terberba touwero. Doba cum, kaba, ediyebeiya namcir. Doba gareg en medoc edag beim naugb en aimo areg ELOHIM arougb en an gin, kaba, en eis huhugb terimda. 2:18 Dan indihirija, lona naugb sug aremer augwan ouwedoc, kaba, ebeij deinyorohob. Anai emen emesulou yenohob dag sug Sud Hom Eic Geic Mos dougwo Krisdus en agunyen, kaba, lona augwan ouwedoc namcir toua. Doba iteitogin, kaba, maman maiya dau men lusud leinyana lagunya debin mamanohob naugb sug len leic merus dou Krisdus toua terimda. Dangga hang, maman macinaga dag Lona Gouwedoc gini ebeij deinyor namcir touohob. 2:19 Sug nosa, kaba, len toua leis Ari dara maman. Doba len merdoc aninim dara maman se aremer areg maman mamdoc ebdebin an ginero. Dangga hang, len lemeigtou desij maman touwero. Doba len lasid lenin dau maman namcir naugb len lemeis Ari dara maman toua deitero. Anai sug len merdoc dag hom dara maman se aremer areg maman mamdoc ebdebin an dag misenohob, kaba, len lemasid lenin dau maman touwero. Doba len leigtou desij maman terimda. Dobnaro. Len lasid lenin dau mamanohob. Hang len lens lenin ainyes dou maman dag len merdoc dag hom dara maman touwerohob. Doba len merdoc dag hom dara Sud Hom Eic Geic Mos dougwo Krisdus gin dous. 2:20 Doba yen, kaba, Yesus Krisdus gedig en ecabeci namcir, kaba, en esa Mena Gogoufu se yen meigdoc mesohob. Hang yen meiju emedgom dougwo aremer hom gin touwero. Doba en eic mou ouforoho dou yen naugb yen yecinaga meijouhw augwan asesa dag misen dau gin touohob. 2:21 Dangga areg dan dog dou yen gin, kaba, dan demog dou yen dau sug yen yemecinaga areg se geica gin touebma. Doba dan dog surad gin dou yen dau sug yen yecinaga areg misen ginohob. Hang yen yecinaga areg dag gereiyara, kaba, hom emeb se geica gin touwero. Doba areg se misen mogud dous. 2:22-23 Dangga gareg en emos emadi Yesus deseino lusud dag en emouwaden dau bogo dag lusud misen naugb en eigdoc len dau sesar men gogom augwan ginero. Doba en aideido dougwo en namcir kaba, en emaimo areg se geica touwero. Doba en edag sud hom gereiyara namcirohob. Hang en emedag ELOHIM mogwihi mogo en dag misen touwero. Doba en edag Sud Hom Eic Geic Mos dou Krisdus en mogwihi mogo en dous. Anai gareg en aideido dougwo Yesus en edag ELOHIM Meisi misen, dara en aideido dougwo ELOHIM en edag Yesus en Mena misen gin toua, kaba, en medoc dag hom dara Krisdus touwero, doba en edag men moc gin dous. Doba gareg en os badi Yesus en edag ELOHIM Meisi misen deseino lusud, kaba, en medoc dag hom dara en Meisi gini dousero. Doba en medoc dag hom dara en Mena gin touohob. 2:24 Dangga areg yen youman dau emen sug emen emesai Mer Geigouhw eisaugb Krisdus dou yen dau aimougtutohob, kaba, yen meigdoc emobsara dau ginlo. Doba yen yebin en mer gini se yen meigdoc mes namcir. Anai sug yen yeicara dag gin, kaba, yen yemobsara dau en Meisi dara Mena lan touwero. Doba yen meigdoc dag hom dara lan terimda toua. 2:25 Hang maireseb menau geb huhugb emediyebeiya dau maman touwero, doba eb naugb maman toua namcir. Anai gin, kaba, aimo dau areg Krisdus en os dou mamanohob. 2:26 Dan dog areg graga augwan dou yen, anai ligbum gedig len leic meruwemougb esesa naugb len laugwohosa yen dau ucina misen gin, kaba, len lagunyen debin yenohob. 2:27 Dobnaro. Yen, kaba, Krisdus esa Mena Gogoufu se yen meigdoc mesohob. Dangga hang, emedeinyum naugb sug sud hom ingma en emedidib aremeijouhw hom dou yen touwero. Doba Mena Gogoufu gin, kaba, en ens aremeijouhw augwan dou yenohob. Anai en, kaba, en emarges dau yen touwero. Doba en eigtou se yen meigdoc mes namcir. Dara areg en ens dou yen, kaba, dag en emereiyara mougwa hom dou yen touwero. Doba areg en ens gin, kaba, en ens augwan se geica dou yen dous. Hang yen yemohoiya Mena Gogoufu en mer an areg en ens dou yen gin touwero. Doba yen yaimo augwan gin terimda. Anai sug yen yeicara dag gin, kaba, yen yemobsara dau Krisdus touwero. Doba yen meigdoc dag hom dara en namcir. 2:28-29 Dangga hang, dan indihirija, eigouhw naugb yen yemobsara dau Krisdusero. Doba yen meigdoc dag hom dara en terimda. Hanoba yen yemedreg dau areg ELOHIM arougb yen an gin touwero. Doba yen yaimo areg asesa enin medoc mes gin dous. Aninim dag yen yecinaga dag ELOHIM en Meisi gin, kaba, en emedreg areg asesa ELOHIM enin medoc mes mougwa hom touwero. Doba en aimo en mer se aremer augwan toua namcirohob. Anai yen meigdoc eica dag gareg en aimo ucina gedag beim gin terimda, kaba, en dous eng edag ELOHIM mogwihi mogo en dag misenohob. Sug yen yeicara dag gin, kaba, igdebes emeba maman dau en sug en ens enin ainyes gini touwero. Doba maman maic mamus naugb magasa eni se Lona Sug En Ecicugwen gin toua namcir.

1 Yohanes 3

3:1 Sug maman Mamina ELOHIM eigdoumesa maman mamoho dag en mogwihi mogo maman dag ginohob, kaba, ens ainyes dou maman dag en medoc emarges maman touwero. Doba en medoc gororougb maman dag misen namcir. Dara ens ainyes dou maman dag en emeigdoumesa maman aibibra touwero, doba en eigdoumesa maman dag misen touohob. Hang lusud gedig Bilis oiharaga len se cinogo gin, kaba, len merdoc dag hom dara maman touwero. Anai len lemedag hom dara ELOHIM touebma. 3:2 Dan indagunerij, dara dan indamouwerij gedig dan indoc gororougb yen, sug maman madag ELOHIM mogwihi mogo maman dag ginohob, kaba, maman macinaga dau sug Krisdus ens enin ainyes dou maman gin, kaba, dag maman aninim dag en toua namcir. Anai se lona ingga, kaba, maman maiya en mog se maman mamiresi dag misen namcir. Aremer hom gin, kaba, maman macinaga dag misen toua. Doba ara gus areg ELOHIM esedeb naugb mamanohob, kaba, maman mamecinaga augwan dag misen touebma. 3:3 Dangga gareg en od mena debsa dag lona hom, kaba, eni aninim dag Krisdus gin, kaba, en emaimo sesar toua deitero. Doba en asid enin dau areg gecgu augwan namcir. Aninim dag Krisdus, kaba, en emaimo sesar touwero. Doba en asid enin maga dau areg gecgu augwan terimda touohob. 3:4 Doba gareg en ebesesar, kaba, gini dag en eic mos baihagab ELOHIM men gomnomna. Anai sug en ebesesar, kaba, gini aninim dag en edreg dau ELOHIM men gomnomna gin namcir touohob. 3:5 Doba yen yecinaga dau sug Krisdus en ouwaden dau bogo, kaba, dag en emouwaden naugb en aimo sesar touwero. Doba en ouwaden dau bogo naugb en eic en mogwihi bauwaharo dou ELOHIM naugb lusud meren sesar dous. Dauntoba sesar men gogom emeb naugb len toua deitero. Doba en oguc dougwo meren sesar augwan dau len. Dara yen yecinaga dag en, kaba, sesar hom emeb se en medoc mes touwero, doba en ecabeci namcirohob. 3:6 Dangga hang, gareg en medoc dag hom dara Krisdusohob, kaba, en emebesesar toua deitero, doba en eineg dau terimda. Doba gareg en ebesesar namcir, kaba, en emecinaga Krisdus, hanoba en medoc dag hom dara en mougwa hom touebma. 3:7 Dan indihirija, sug Krisdus ouwadan dau bogo naugb oguc dougwo maman sesar dag ginohob, kaba, yen yemaimo gembala areibahau len merir an areg len lebedbed dou yen touwero. Doba yen yebehnehino yenin meigdoc mes dougwo areg len ledidib dou yen gin namcir. Dauntoba areg len lebedbed dou yen gin, kaba, emaugwohosa yen dau ucina misen touwero. Anai gareg en aimo areg asesa ELOHIM enin medoc mes augwan terimda, kaba, enin dous eng eraga ucina se geica gini. Aninim dag Krisdus en aimo ucina se geica an maman touohob. 3:8 Doba gareg en ebesesar namcir, kaba, en emedag ELOHIM mogwihi mogo en dag misen touebma. Doba en edag Bilis mogwihi mogo en dousaba. Anai Bilis gin, kaba, en ebesesar dau sug aimougtutohob. Hang ELOHIM Meisi, kaba, en emouwaden dau bogo naugb en emeic mor mor dou Bilis an men geicara augwan gini toua. 3:9 Dangga sud hom gareg ELOHIM eigdoumesa en moho dag en mogwihi mogo enohob, kaba, en emebesesar touwero. Doba en arges doc dau augwan gin terimda. Anai areg geb se ELOHIM enin medoc mes, kaba, augwan eb se sud hom medoc mes gin touohob. Hang en emebesesar toua deitero, anai ELOHIM edag en Mena ginohob. 3:10 Dau gini, hang maman mamecinaga ELOHIM dara Bilis lan marihir dag misen toua. Gareg en aimo areg asesa ELOHIM enin medoc mes terimda, kaba, eni ELOHIM mogwihi mogo en dag misenohob. Doba gareg en emaimo areg asesa ELOHIM enin medoc mesero, hanoba en medoc gororougb en maguner dara en medamouwer se Krisdus touwero, kaba, en emedag ELOHIM mogwihi mogo en dag misen touebma. Doba en edag Bilis mogwihi mogo en smougb mougwaba. 3:11-12 Aremer graga augwan, kaba, aimo dau areg emen emenara dou yen sug nosa touohob. Anai sug emen emesai Mer Geigouhw eisaugb Krisdus dou yen se lona ingga, kaba, emen emesulou yen ucan gin deit, dag yen meigdoc emecgwanim, aninim dag Kain en medoc ecgwan en magto Habel touwero. Doba yen meigdoc gororougwim dous. Anai Kain, kaba, en edag Sud Hom Mobgos Maha en mogwihi mogo en teiteiyohob. Hang en emamsoho en magto touwero. Doba en ogod en bomom dous. Doba dagiro, naugwe hang, en ogod en magto gina? En ogod en, anai men geicara augwan dag mog mog namcir. Doba en magto, kaba, en aimo areg asesa ELOHIM enin medoc mes augwan dag misen terimdohob. 3:13 Dangga dan indagunerij, dara dan indamouwerij, sug Kain medoc mog mog an en magto dag ginohob, kaba, yen yemomi dau sug lusud gedig Bilis oiharaga len se cinogo gini len merdoc mog mog an yen touwero. Anai len toua ledag Sud Hom Mobgos Maha en mogwihi mogo len teitei, aninim dag Kain gini touohob. 3:14 Doba maman, kaba, maman mamdoc mog mog anim deitero. Doba maman mamdoc gororougwim dous. Hang maman macinaga dag maman maigtou se gomom toua deitero. Doba maman mainesa maireseb menau beb huhugb ginohob. Doba gareg en medoc mog mog an en maguner dara en medamouwer se Krisdus namcir, kaba, en emeinesa maireseb menau geb huhugb gin touebma. Doba en eigtou se gomom beb huhugb terimdaba. 3:15 Anai gareg en medoc mog mog an en maguner dara medamouwer gin, kaba, en edag sud hom ges lusudohob. Dangga maireseb menau geb huhugb emeb naugb en touwero. Anai yen yecinaga dau sud hom areg en es len gus, kaba, dag maireseb menau huhugb emeb naugb en toua deitero, doba ediyebeiya dau en namcirohob. 3:16 Dara eisaugb aremer medoc gororougb, kaba, maman maugwan macinaga dau gini dag misenohob. Anai sug Krisdus ohw en mougt edug naugb en omom taiba sogo salib naugb maman sesar dag gin, kaba, en ens aremer medoc gororougb dou maman dag misen touohob. Dangga hang, sug Krisdus ohw en mougt edug naugb maman dag ginohob, kaba, esloulougb medam naugb maman toua maohw maman mamugt edug naugb maman mamsir se Krisdus gin toua terimda. 3:17 Dangga gareg dau maman men aremougb edeinyum naugb sug en eigtouohob, hanoba en eiya en maguner dara en medamouwer se Krisdus meren ara ara emedeinyum naugb sug len leigtouwero. Doba en medoc agadgeij naugb en emousa lenero, kaba, dagiro, naugwe hang, sud hom gini en eigdoumesa en moho dag en medoc gororougb ELOHIM dag misenohoba? Naro, en medoc gororougb en touebma. 3:18 Dangga hang, dan indihirija, eigouhw naugb maman mamdoc gororougwim dara maman mamir dousero. Doba sug maman mamdoc gororougwim dag misen, kaba, maman geicara aimo dangga toua. 3:19 Sug maman maicara dag gin, kaba, maman mamdoc emeijesa dau lona sug maman man aremeijouhw augwan asesa dou ELOHIM touwero. Doba maman mamdoc ebtou deseino en namcir. Anai sug maman mamdoc gororougwim dara maman mamir dousero, doba maman geicara aimo dangga dag misen toua, kaba, maman macinaga dag maman masogwa deisa areg se geica augwan dag misenohob. 3:20 Dangga sug maman mamdoc owun mamanin an maman geicara, kaba, maman mamdoc momogo an gini touwero. Anai ELOHIM, kaba, en ecinaga dau maman geicara augwan dag misen. Hang en moho eb taiba dau areg maman mamdoc owun mamanin an gin toua namcirohob. 3:21 Dan indagunerij, dara dan indamouwerij gedig dan indoc gororougb yen, sug maman mamdoc ebtou deseino ELOHIM dag ginohob, kaba, maman mamahau dau sug maman macgeij ara ara dau en touwero. Doba maman maic mamus naugb maman macgeij ara ara dau en terimda. 3:22 Dara areg maman macgeij dau enohob, kaba, maman macinaga dag en emeic augwan dou maman toues. Anai maman mamedreg en mer gin touwero. Doba maman maicara maimo areg en arougb maman an, dara areg eic en medoc eigouhw dou en augwan dag misen namcirohob. 3:23 Dara men gomnomna hom areg en arougb maman an gin, kaba, dag maman mamdoc ebdebin an en Meisi Yesus Krisdus. Hanoba maman mamdoc gororougwim toua terimda, aimo dau areg Krisdus en arougb maman an gini sug nosohob. 3:24 Dangga gareg en aimo ELOHIM en mer an areg en arougb en an gin terimda, kaba, en medoc dag hom dara ELOHIM. Hanoba ELOHIM en medoc dag hom dara en toua. Dara maman macinaga dau sug ELOHIM en medoc dag hom dara maman, anai en esa Mena Gogoufu se maman mamdoc mes naugb en ouma debin maman an gin touohob.

1 Yohanes 4

4:1 Dan indagunerij, dara dan indamouwerij gedig dan indoc gororougb yen, gembala einyana lagunya debin yen naugb len lebedbed ara ara dou yen bagaha se cinogo augwanohob. Doba areg len ledidib dou yen gin, kaba, dag mer areibahau dous. Dangga hang, yen yemebin areg lusud lebedbed dou yen se yen meigdoc mes augwougb touwero. Doba yen yainyen len dag areg len lebedbed dou yen gin, kaba, en dau Mena gedig ELOHIM esa se len merdoc mesohob, era en dau mena gus dousei? 4:2 Dara yen yecinaga dau sug Mena gen dau ELOHIM en eigtou se sud hom medoc mes augwan dag misen touohob. Anai men gansins dag gini: Gembala areg en os badi Yesus Krisdus dag en ouwaden dau bogo, hanoba en edag lusud misen se cinogo gin toua, kaba, yen yecinaga dag sud hom gin, kaba, Mena gen dau ELOHIM eigtou se en medoc mesohob. 4:3 Doba gembala areg en aideido dougwo Yesus dag en emouwaden dau bogo, hanoba en emedag lusud misen se cinogo gin touwero, kaba, sud hom gin, kaba, Mena gen dau ELOHIM emeigtou se en medoc mes touwero. Doba Sud Hom Eic Geic Mos dougwo Yesus en mena dous eng eigtou se en medoc mes. Dara en mena gin, kaba, agaha se cinogo augwan naugb eigtou se lusud leinyana merdoc mesohob. Augwan gini aimo dau areg emen emesulou yen sug nosa touohob. Anai emen emenara dou yen dag lona hom, kaba, merna dag gini emen aud lusud toues. 4:4-5 Dangga areg gembala areibahau len lebedbed gin, kaba, augwan aimo dau areg lusud gedig Bilis oiharaga len se cinogo gini len lauwam an dous. Anai gembala areibahau gin, kaba, len len dau lusud gedig Bilis oiharaga len se cinogo gin touohob. Hang areg len ledidib gin, kaba, lusud se cinogo gini len loc merums naugb toua terimda. Doba dan indihirija, yen, kaba, ELOHIM en moho aiga yen. Hang yen yemaimo areg gembala areibahau len ledidib dou yen gin touwero. Doba yen yaiyan len an gin namcir. Anai Mena areg en eigtou se yen meigdoc mes, kaba, en mobisamougb edreg dau sud hom goiharaga lusud se cinogo ginohob. 4:6 Dangga hang, gareg en ecinaga areg asesa ELOHIM enin medoc mes augwanohob, kaba, en emotogoto areg maman masai dou en touwero. Doba en ei moms naugb augwan gini deigeigouhw namcir. Anai maman, kaba, maman madag ELOHIM mogwihi mogo maman dag misenohob. Doba sud hom areg ELOHIM en moho emaiga enero, kaba, en emei moms naugb areg maman masai dou en gin touwero. Doba en otogoto maman mamir an gin terimda. Dau gini, hang maman mamecinaga sud hom areg Mena Geica dara mena gaugwohosa eigtou se medoc dag misen toua. Anai sud hom areg en os badi Yesus en ouwaden dau bogo dag lusud misen, kaba, Mena Geica eigtou se medoc mesohob. Doba sud hom areg en emos bemadi Yesus dag en emouwaden dau bogo, hanoba en emedag lusud misen touwero, kaba, Sud Hom Eic Geic Mos dougwo Krisdus en mena eigtou se en medoc mes dous. 4:7 Dan indagunerij, dara dan indamouwerij gedig dan indoc gororougb yen, sug ELOHIM medoc gororougb maman dag ginohob, kaba, eigouhw naugb maman mamarges dau sug maman mamdoc gororougwim touwero. Doba maman maicara maimo dangga esesa anim terimda. Anai aremer medoc gororougwim, kaba, augwan en dau ELOHIM enin dous. Dangga gareg en medoc gororougb lusud, kaba, en edag ELOHIM mogwihi mogo en dag misen. Hanoba en medoc dag hom dara en touohob. 4:8 Doba gareg en medoc gororougb lusudero, kaba, en emecinaga areg asesa ELOHIM enin medoc mes touebma. Anai ELOHIM, kaba, men geicara augwan dag en medoc gororougb lusud namcir. 4:9 Hanoba en ens dau en medoc gororougb eb ainyes dou mamanohob. Anai en esa en Meisi mohora hom se cinogo gini, dauntoba maman maic maireseb menau geb huhugb ogdoc en Meisi men geicara naugb maman toua. 4:10 Dangga aremer medoc gororougb gin, kaba, maman mamens dou ELOHIM touwero. Doba enin eng ens dou maman. Hang en emesa en Meisi se cinogo gini naugb en eic en mogwihi bauwaharo dou ELOHIM naugb maman sesar augwan toua. Dauntoba sesar men gogom emeb naugb maman toua deitero. Doba en aigdougwo maman sesar augwan dau maman ogdoc en Meisi men geicara gin toua namcir. 4:11 Dangga dan indagunerij, dara dan indamouwerij gedig dan indoc gororougb yen, sug ELOHIM medoc gororougb maman dag ginohob, kaba, eigouhw naugb maman toua mamdoc gororougwim terimda. 4:12 Anai sud hom ingma, kaba, en emeiya ELOHIM mougwa hom touebma. Doba sug maman mamdoc gororougwim, kaba, gini ansins dag ELOHIM eni moongga se maman mamdoc mes dag misenohob. Hang men medoc gororougb gin, kaba, emousa maman naugb sug maman mamdoc gororougwim dara maman mamdoc augwan toua terimda. 4:13 Dara maman macinaga dag ELOHIM eni moongga se maman mamdoc mes. Hanoba maman mamdoc dag hom dara en toua. Anai en esa Mena Gogoufu bansins se maman mamdoc mes naugb ginohob. 4:14 Dara emen, kaba, emen toua emouma debin Krisdus en Mena gini, dag en esa en Meisi se cinogo ginohob naugb en eigdoc lusud se cinogo gin augwan dau sesar men gogom augwan toua. Anai emen emeiya en Meisi gini dara emen emiresohob. 4:15 Dangga gareg en ouma debin Yesus dag eni ELOHIM Meisi misen, kaba, eni dara ELOHIM lan mardoc edagasem toua namcirohob. 4:16 Hang maman mameija mamuwesa ELOHIM toua deitero. Doba sug maman maiya dau en medoc gororougb maman dag ginohob, kaba, maman maod mamina debsa en an gin toua terimda. Anai maman macinaga dag se men geicara augwan, kaba, en medoc gororougb lusud dous. Dangga gareg en medoc gororougb lusud, kaba, eni dara ELOHIM lan mardoc edagasem namcir touohob. 4:17 Dara sug maman mamdoc dag hom dara en dag ginohob, kaba, ousa maman naugb sug maman mamdoc gororougb lusud dara maman mamdoc augwan toua terimda. Hang maman mamahau dau Lona Sug Yesus Ogod Aremer Aga Lusud gin toua deitero. Doba maman maic mamus naugb magasen namcir. Anai sug maman mamdoc gororougb lusud dara maman mamdoc augwan terimda, kaba, maman geicara aninim dag Krisdus men geicara augwan an lusud sug nosa touohob. 4:18 Dangga gareg en medoc eijesa, hanoba en ahau dau ELOHIM dag en ogod aremer gogom deinaugb en se Lona ingga, kaba, gini ens ainyes dou maman dag en medoc gororougb lusud dara medoc augwan touebma. Anai gareg en medoc gororougb lusud dara medoc augwanohob, kaba, en emahau dau sug ELOHIM eic gogom dou en toua deitero. Doba men geicara gedag beim gin, kaba, erba gahau augwan dau en namcir. Hang gareg en medoc gororougb lusud dara medoc augwanohob, kaba, emedeinyum naugb sug en ahau dau ELOHIM touwero, doba en medoc ebtou toua terimda. 4:19 Dara maman mamdoc gororougb lusud dau mamanin touwero. Doba ELOHIM medoc gororougb maman sug aimougtut. Hang emousa maman naugb sug maman mamdoc gororougb len gus toua. 4:20 Dangga gareg en eigdoumesa en moho deseino lusud dag en medoc gororougb ELOHIM enohob, doba en medoc mog mog an en maguner dara en medamouwer terimda, kaba, en medoc gororougb ELOHIM touwero. Doba en ereiyara dous. Anai sug sud hom medoc gororougb en maguner dara en medamouwer ginero, kaba, dagiro, naugwe hang, en medoc gororougb ELOHIM gin toua? Anai en maguner dara en medamouwer gin, kaba, en emeiya len laugwan se en mairesohob. Hang emedeinyum naugb sug en eicara geigouhw toua terimda. Doba ELOHIM, kaba, en emeiya en se en maires mougwa hom touebma. 4:21 Dangga gareg en medoc gororougb ELOHIM, kaba, esloulougb naugb en medoc gororougb en maguner dara medamouwer gin toua terimda. Anai gini aimo dau areg Krisdus en arougb maman an gin sug nosa touohob.

1 Yohanes 5

5:1 Astesda gareg en medoc ebdebin an Yesus dag enin eng Sud Hom Geigdoc Maman Dau Sesar Men Gogom Augwan, kaba, ELOHIM eigdoumesa en moho dag en mogwihi mogo en dag misen touohob. Hang en medoc mog mog an ELOHIM mehir gus touwero. Doba en medoc gororougb len toua terimda. Anai gareg en medoc gororougb mena, kaba, en medoc gororougb en mehir gus laugwan toua. 5:2 Dangga gareg en medoc gororougb ELOHIM mehir dag ginohob, kaba, gini ansins dag en medoc gororougb ELOHIM. Hanoba en aimo ELOHIM en mer an areg en arougb en an gin augwan toua dag misenohob. 5:3 Anai sug maman mamdoc gororougb ELOHIM dag misenohob, kaba, maman mamedreg en mer gin touwero. Doba maman maicara maimo en mer gin toua. 5:4 Hang en mer gin, kaba, emogom naugb maman touwero. Doba maman maimo augwan gini dara maman mamdoc esgiraha namcir. Anai sug maman madag ELOHIM mogwihi mogo maman dag misenohob, kaba, maman mamobsara dou lusud gedig Bilis oiharaga len se cinogo gini an meren geicara dag mog mog gin toua deitero. Doba maman maiyan len an gin augwan dau maman namcirohob. Anai sug maman mamdoc ebdebin an Yesus en edag ELOHIM Meisi misen, kaba, gin eng eic goubesa dou maman naugb sug maman maiyan augwan gini dau maman toua. 5:5 Dangga gareg en medoc ebdebin an Yesus dag eni ELOHIM Meisi misenohob, kaba, enin dous eng men goubesa edeinyum naugb sug en aiyan lusud gedig Bilis oiharaga len se cinogo gin toua. Ara gus, kaba, men goubesa emedeinyum naugb ginero. 5:6 Dara sud hom gedig en ouwaden dau bogo naugb en eigdoc maman dau sesar men gogom augwan, kaba, en emedag Krisdus dousero. Doba sug en ouwaden dau bogo, kaba, en edag Yesus dara Krisdus toua teiteiyohob. Dangga sud hom gedig Yohanes ogun en se duhu, dara sud hom gedig len leir en mogwihi taiba sogo salib naugb maman sesar gin, kaba, eni Yesus dousero. Doba eni Yesus Krisdus teitei touohob. Hang sug en en gin, kaba, en emen naugb sug Yohanes ogun en se duhu dousero. Doba en en naugb sug len leir en mogwihi taiba sogo salib naugb maman sesar gin toua. Dara Yesus gin, kaba, Mena Gogoufu en toua ouma debin en dag en edag Krisdus teitei touohob. Anai Mena Gogoufu gin, kaba, en emereiyara dou maman touwero. Doba en enara areg se geica dou maman namcir. Hang maman macinaga dag en edag Krisdus sug Yohanes ogun en se duhu dousero. Doba en edag Krisdus sug en eic en mogwihi taiba sogo salib naugb maman toua. 5:7-8 Dangga duhu dara mogwihi dara areg Mena Gogoufu ouma debin gin, kaba, homoi gini ens dou maman dag Yesus enin eng ELOHIM Meisi misen gouwaden dau bogo. Hanoba en omom taiba sogo salib naugb maman sesar gin touohob. Anai duhu dara mogwihi maran gansins. Dara areg Mena Gogoufu ouma debin gin, kaba, ingma susugwero, doba dag hom namcir. 5:9 Dara ELOHIM enin toua ouma debin Yesus en edag en Meisi misen gin touohob. Dangga hang, sug maman maod mamina debsa lusud an areg len louma debin ginohob, kaba, eigouhw naugb maman maod mamina debsa ELOHIM en mer gouma debin Yesus dag eni Meisi misen gin toua terimda. Anai areg en ouma debin gini, kaba, mera eisaugb bedreg dau areg lusud misen len louma debin gin toua namcirohob. 5:10 Dangga gareg en medoc ebdebin an Yesus en edag ELOHIM Meisi misen, kaba, en emesbes ELOHIM an areg en ouma debin Yesus gin touwero. Doba en ebin augwan gini se enin medoc mes toua terimda. Doba gareg en medoc emebdebin an areg ELOHIM ouma debin Yesus ginero, kaba, en owun ELOHIM en moho dag eni sud hom gereiyara dous. Anai en emod mena debsa ELOHIM en mer an areg en ouma debin Yesus dag eni en Meisi misen gin touwero. Doba en esbes an enohob. 5:11 Dara areg ELOHIM ouma debin en Meisi dou maman, kaba, dag en eic maireseb menau geb huhugb ogdoc en Meisi gin dou maman. Anai maireseb menau geb huhugb gin, kaba, eb se en Meisi gin teiteiyohob. 5:12 Dangga gareg en ebin ELOHIM Meisi gini se en medoc mes, kaba, maireseb menau geb huhugb eb naugb enohob. Doba gareg en emebin ELOHIM en Meisi gin se en medoc mesero, kaba, maireseb menau geb huhugb emeb naugb en touwero. 5:13 Dan dog dau areg graga augwan dou yen, dauntoba yen yemeija meijuwesa maireseb menau geb huhugb gin toua deitero. Doba yen meigdoc eica namcir, anai yen meigdoc ebdebin an ELOHIM Meisi ginohob. 5:14 Hang igdebes emeba maman dau sug maman macgeij ara ara dau ELOHIM touwero. Doba maman maic mamus naugb gin terimda. Anai maman macinaga dau sug maman macgeij areg asesa enin medoc mes, kaba, en emoc dou moms dougwo maman mamir an gin touwero. Doba en ouman maman mamir toua namcir. 5:15 Dara sug maman macinaga dag areg maman macgeij dau en, doba en ouman maman mamir an ginohob, kaba, maman macinaga dag en ousa deisa maman, hang en emeic augwan dou maman toua. 5:16 Dangga sug sud hom dau yen, kaba, en eiya en maguna era en medamouwa hom dag en ebesesarohob. Doba sesar gin, kaba, dag sesar gemahwan en aud gomom ucugb namcir touebma, kaba, eigouhw naugb en acgeij ELOHIM, dauntoba en eic maireseb menau geb huhugb ucugb dou en. Hanoba ELOHIM ousa deisa en an gin toua. Anai sesar gin, kaba, eic dag gudec eba en dougwohob. Hang emahwan en aud gomom ucugb namcir touebma. Sesar gudec emeba lusud dougworo, kaba, toua moongga. Dangga sug sud hom dau yen en eiya en maguna era en medamouwa dag en aimo sesar ginohob, kaba, dan den dougwo en dauntoba en emacgeij ELOHIM naugb en eic maireseb menau geb huhugb dou en ucugb touwero. Doba amsoho en deb namcir. Anai sesar hom gin, kaba, ahwan en aud gomom ucugb namcirohob. 5:17 Areg edreg ELOHIM enin medoc mes, kaba, dag sesarohob. Doba astesda dau sesar augwan gin, kaba, sug gudec eba maman dougwohob, hang emahwan maman aud gomom ucugb touebma. Doba cumougt inggebga naugb mamanaba. 5:18 Gareg en edag ELOHIM en mogwihi mogo ginohob, kaba, en emebesesar toua deitero. Doba en arges dau namcir. Anai ELOHIM Meisi eseyeiyo en dougwo areg gecgu terimdohob. Hang Sud Hom Mobgos Maha, kaba, en emen aud en naugb eic gecgu dou en touwero. 5:19 Anai maman, kaba, maman macinaga dag ELOHIM en maga aiga mamanohob. Doba lusud gus, kaba, Sud Hom Mobgos Maha gini en oiharaga len terimdaba. 5:20 Doba naugb maman, kaba, maman macinaga dag ELOHIM Meisi gin, kaba, en ouwaden dau bogo naugb en ens ucina dou maman. Dauntoba maman macinaga areg geb se ELOHIM enin medoc mes augwan dag misen. Anai en, kaba, sud hom geica namcir. Dangga sug maman mamdoc dag hom dara en Meisi Yesus Krisdus ginohob, kaba, maman mamdoc dag hom dara ELOHIM misen. Anai en Meisi gin, kaba, en moho aninim dag ELOHIM misen gin touohob. Hang maireseb menau geb huhugb gin, kaba, ogdoc en Meisi gin toua. 5:21 Dan indihirija, sug yen yedag hom dara ELOHIM dag ginohob, kaba, yen yemaimo seiseij aud areg gecgu toua deitero. Doba yen yasid yenin aigus dau augwan gini namcir.

2 Yohanes 1

1:1 Surad gini dau dang, Adehsud, dou bang, Danehsud, an ban abihir, gedig dan indoc gororougb yen yaugwan. 1:2 Anai sug maman mauman mer misen eisaugb Krisdus sug nosa, kaba, maman mamohoiya mer geica gin touwero. Doba maman mabin mer gini se maman mamdoc mes namcirohob. Hang areg se geica gin, kaba, emediyebeiya dau maman touwero. Doba eb beb huhugb terimda. Dara dan indoc gororougb yen dousero. Doba leng gus gedig leng lebin mer misen eisaugb Krisdus se len merdoc mesohob, kaba, len laugwan merdoc gororougb yen toua. 1:3 Dangga hang, sug maman maimo areg se geica, hanoba maman mamdoc gororougwim dag gin touohob, kaba, dan dacgeij maman Mamina ELOHIM, dara en Meisi Yesus Krisdus naugb lan mardoc eigouhw dara eineg an yen. Dara lan laic gesgigouhwesa dou yen dougwo areg gecgu augwan toua terimda. 1:4 Dan indoc eigouhw namcir. Anai dan douman dag ligbum dau ban abihir, kaba, len lemobsara dau areg se geica gin touwero. Doba len laimo mer misen areg maman Mamina ELOHIM en arougb maman an ginohob augwan toua terimda. 1:5 Hang dan desulou Danehsud ban dara goubesa namcir, dauntoba maman mamobsara dau sug maman mamdoc gororougwim gin touwero. Doba maman maos debin gin namcir. Dara areg dan desulou ban an gin, kaba, mer menenau touwero. Doba eb naugb maman dau sug maman mamdoc ebdebin an Krisdus aimougtutohob. 1:6 Dara medoc gororougb gin, kaba, men meijouhw misen dag maman mamedreg dau areg ELOHIM arougb maman an gin touwero. Doba maman maimo augwan dara maman mamdoc hom namcir. Dara areg en arougb maman an gin, kaba, dag maman mamdoc gororougwim toua terimda. Augwan gin, kaba, menenau touwero. Doba yen youman augwan gini dau sug len lesai Mer Geigouhw eisaugb Krisdus dou yen sug acgunogohob. 1:7 Yen yeicara yaimo anim dag gin terimda. Anai lusud gedig len laugwohosa yen naugb sug yen yaijahasero dau ucina misen gin, kaba, leinyana laisoboro se cinogo augwanohob. Anai len, kaba, len lemeigdoumesa Yesus Krisdus dag en emouwaden dau bogo dag lusud misen touwero. Doba len laideido dougwo en namcir. Hang len lemedag Sud Hom Eic Geic Mos dougwo Krisdus en mehir misen gin touohob. Anai sug en en, kaba, en emaugwohosa lusud naugb len laijahasero dau ucina misen gin toua. 1:8 Dangga hang, yen yebehnehino yenin meigdoc mes dougwo mer areibahau areg len lesai dou yen gin toua terimda. Dauntoba areg yen yaimohob gin, kaba, hom emediyebeiya dau yen touwero. Doba ELOHIM eic meijen siouwa augwan dou yen toua namcir. 1:9 Gareg en emaimo Yesus en mer ginero, doba en edreg dau areg en arougb maman an namcir, kaba, en medoc dag hom dara ELOHIM toua deitero. Doba gareg en aimo Krisdus en mer augwan gin terimda, kaba, en medoc dag hom dara maman Mamina ELOHIM dara en Meisi Krisdus lahwas dag misen touohob. 1:10 Dangga gembala gareg en edebeij meijen tu, hanoba en emesai Krisdus dag en emouwaden dau bogo dag lusud misen dou yenero. Doba en ebedbed susugb dou yen, kaba, yen yemebin en. Dara yen yemos en mesira touwero, doba yen yen dougwo en namcir. 1:11 Anai gareg en os en mesira, kaba, gini aninim dag en ousa deisa en an men gebedbed gecgu ginohob. 1:12 Aremer einyana ingma inggebga naugb dan desulou yen an gini. Doba dan demouwan naugb dan demog augwan gin se surad ginero. Anai danin demenbo sungga augwougb dous naugb dan demen ai danin indirs dou yen toues. Dauntoba maman mamdoc agahugouhw anim ucucugb terimda. 1:13 Ban abdamouwa Danehsud sugini en mehir len laugwan lou ban toua.

3 Yohanes 1

1:1 Surad gini dau dang, Adehsud, dou bang, Gayus, gedig dan indoc gororougb ban dag misen namcir. 1:2 Hang dan dacgeij ELOHIM naugb en eseyeiyo ban dougwo areg gecgu augwan. Dauntoba areg geigouhw mogud eb naugb ban toua terimda. Anai bani dan insi gedig dan indoc gororougb ban dag misenohob. Dara dan dacgeij ELOHIM, dauntoba en eic ban abug esgiraha, aninim dag dan decinaga ban abdoc mes, kaba, eigouhw touohob. 1:3 Anai astesda sug ban absir se Krisdus len ledebeij dan, kaba, len louma debin ban dag ban bemobsara dau ucina se geica touwero. Doba ban baimo augwan gini esesa terimda. Hanoba len lenara dou dan, lendagai: Gayus hom gin, kaba, en esogwa deisa areg se geica dag misen terimda. 1:4 Hang emeic dan indoc agahugouhw an ban toua. Anai sug dan douman, doba indan logodeh lesogwa deisa areg se geica dag misen terimda, kaba, eic dag dan indoc agahugouhw edreg dau aremer gus augwan toua namcir. 1:5 Dan insirija, gedig dan indoc gororougb ban, dan douman dau sug lusud lesai Mer Geigouhw eisaugb Krisdus dou lusud sungga sungga, kaba, dag ban bemebin ban abaguner dara ban abdamouwer misen dousero. Doba ban bebin leng lesai Krisdus moro dau lugmahara len laugwan esesa terimda toua. 1:6 Anai sug len ledebeij emen sugin, kaba, len lens dau ban abdoc gororougb gini meijouhw augwan asesa dou emen se goucimdeb sugin touohob. Hang ban bemarges dau aban geicara geigouhw gin touwero. Doba ban beic ara ara dou len naugb ucina mogumsi baimo dau areg geic ELOHIM medoc agahugouhw dou en toua terimda. 1:7 Anai sug len leihweda sungga sungga naugb len lesai Mer Geigouhw eisaugb Krisdus dou lusud, kaba, len merirs emohos naugb lemacgeij ared, dara aregoufu, dara areg gus augwan dau leng medigo Krisdus touwero. Doba len laiyan merdocesem dougwo gini namcir. 1:8 Dangga hang, esloulougb medam naugb maman mamarges dau sug maman maic ara ara dou len touwero. Doba maman mabin len naugb mausa len toua terimda. Anai sug maman maicara dag gin, kaba, gini aninim dag maman maimo len naugb maman masai mer geica dou lusud touohob. 1:9 Dara dan dog surad gagarougb eisaugb aremer graga augwan dou lusud se aban goucimdeb touohob. Doba Diotrepes, kaba, en ouwan eigdoumesa enin moho edag mougt mera medam naugb yen. Hang en emebin dan dag meijen majelis touwero. Doba en esbes an areg dan dog dou yen gin terimda. 1:10 Dangga hang, sug dan dedebeij yenohob, kaba, dan dens dau men geicara ecgu augwan eb ainyes dou yen toua. Anai men geicara ecgu gin, kaba, dag en ecic dan indoho gouhw genes dou lusud terimda. Dara en medoc emobsara doc aremer hom gin dousero. Doba sug maman mamsir gedig len lesai Krisdus moro dou lusud len ledebeij men cinogo, kaba, en emebin len touwero. Doba en ohw medigo dou len namcir. Hanoba en ebehnehino dougwo lusud gus toua, dauntoba len lemebin len ingga touwero. Dangga gareg en aihagab en mer an gin, kaba, en ocirma len dau men goucimdeb toua. 1:11 Dan indagunerij, dara dan indamouwerij gedig dan indoc gororougb yen, eigouhw naugb yen yemaimo lusud aud areg gecgu touwero. Doba yen yaimo leng leicara geigouhw an meren geicara dous. Anai gareg en aimo areg geigouhw, kaba, en edag ELOHIM mogwihi mogo en dag misenohob. Doba gareg en aimo areg gecgu terimda, kaba, en emecinaga areg asesa ELOHIM enin medoc mes augwan mougwa hom touebma. 1:12 Doba Demetrius, kaba, lusud laugwan lecic en moho dag men geicara augwan edag beim terimda. Dara men geicara se geica, kaba, augwan gini ouma debin en toua. Anai en aimo areg dag misen gin namcirohob. Dara danin toua douma debin en dag men geicara augwan eigouhwohob. Augwan gin, kaba, se misen namcir, anai ban becinaga dag dan demereiyara dou ban touwero, doba dan denara misen dou ban dous. 1:13 Aremer gus einyana inggebga naugb dan desulou ban an gini. Doba dan demouwan naugb dan dog augwan gini se surad ginero. 1:14 Anai danin demenbo dedemeda naugb dan demdenara ai danin indirs dou ban toues. 1:15 ELOHIM eseyeiyo ban dougwo areg gecgu augwan namcir. Ban absir se goucimdeb sugini len laugwan lou ban. Hang ban besai emen emuro naugb ban bou emen emsir len laugwan sungga toua.

Yudas 1

1:1 Surad gini dau dang, Yudas, Yakobus magto, gedig dan dedag Yesus Krisdus men sogougb. Dan dog surad gini dou yeng Krisden yaugwan, anai yen, kaba, maman Mamina ELOHIM en eija yen dag men lusudohob. Hang en medoc gororougb yen namcir. Dara en agauwesa yen deb naugb en emohw yen dou Yesus Krisdus se Lona Sug En Ecicugwen gin toua. 1:2 Dangga dan dacgeij ELOHIM naugb en medoc eineg an yen. Dara en eseyeiyo yen dougwo areg gecgu augwan. Dara en medoc gororougb yen eiseisaugb terimda toua. 1:3 Dan indagunerij, dara dan indamouwerij gedig dan indoc gororougb yen, aimougtut, kaba, dan douwan naugb dan dog dau sug Yesus eigdoc maman dau sesar men gogom aud maireseb menau geb huhugb men meijouhw augwan asesa dou yen. 1:4 Doba leng leperwei ELOHIM mer meijouhw dag areibahau mer, kaba, len leinesa se meijen goucimdeb augwougwohob. Dangga sug dan douman dau gin, kaba, dan demog eisaugb aremer maireseb menau geb huhugb gin dou yen deitero. Doba aremer gini eic dan indoc ehin. Hang dan demesulou yen dara goubesa, dauntoba yen yemobsara aud len gin touwero. Doba yen yes agadgeij dougwo len merir namcir. Hanoba yen yaimo areg yen meigdoc ebdebin an ginohob augwan terimda. Anai leng gin, kaba, len lemeigdoumesa maman Adehsud Yesus Krisdus dag meren mougt mera medam deitero. Doba len laideido dougwo enohob. Hang len lemaimo areg gedag beim dara gecabeci gin touwero. Doba len leic merus naugb len merisira ebsa ligida aibibrida. Dara len laimo areg gecgu gus augwan toua terimda. Anai len lauwam an dag sug ELOHIM medoc gororougb mamanohob, kaba, en emeic gogom dou len icira sug len lebesesar gin touwero. Doba en amsoho an len dous. Dobnaro. Anai ELOHIM en mer areg en esa dou maman aimougtutohob, kaba, en emeic mer hom ingma ucan dou maman deitero, doba ebsugeb namcir. Dangga hang, en emamsoho leng leperwei en mer naugb laimo areg gecgu gin touwero. Doba en emeic gogom medam se dum smougb dou len toues, aimo dau areg en og deb se Surad Injil Meb Mohon eisaugb len deb sug nosohob an len toua. 1:5 Eisaugb aremer gin, kaba, yen yecinaga augwan dag misenohob. Doba dan douwan dens gini dou yen deit. Dauntoba yen meigdoc moc dougworo, doba yen meigdoc eiseisan terimda. Anai yen yecinaga dau sug maman Adehsud en eigdoc men lusud leng Israel len laugwan dau meren gogom se cinogo Mesir sug nosa, kaba, dag en emeigdoc hom yom dau len dousero. Doba en eigdoc len laugwan dau cinogo ingga toua. Doba sug len merdoc emebdebin an en se lona daiyamo gacin deitero, kaba, en emamsoho len deb touwero. Doba en eic mor mor dou len laugwan namcir toua. 1:6 Dara en emamsoho malaikad gedig len lemesedougwo meren usi gin touwero. Doba sug len larges dau areg ELOHIM ogugwo dou lenohob. Hanoba len louwaden dau bogo naugb len leic ligida dau lusud misen dag len mersouwer, kaba, en erba len laugwan se lobeigbogo mes se w Seol, dauntoba len lemagunya toua deitero. Doba len leigtou se usi ingga terimda edebeij Lona Gouji hom sug en ogod gogom deinaugb lusud laugwan gin toua. 1:7 Dara leng se cinogo Sodom dara Gomora an cinogo geb acec ingga augwan, kaba, ELOHIM emamsoho len touwero. Doba en esa smougb debin len naugb smougb ait len laugwan beb huhugb namcir. Anai len, kaba, len lemarges dau meren geicara gecgu touwero. Doba len lesogwa deisa malaikad graga merohotimei mohw naugb len merisira ebsa ligida gus aibibrida. Dara meren geicara gus, kaba, dag mihi men geicara toua terimdohob. Hang gogom areg ELOHIM eic dou len ginohob, kaba, dag gansins dou lusud. Dauntoba sug len leiya dau gin, kaba, len lemaimo meren geicara gecgu deit touwero. Doba len lahau an dougwo namcir. 1:8 Dobnaro. Gembala areibahau gedig len leinesa meijen goucimdeb graga, kaba, len lemahau dau ELOHIM dara mougt mera gus len laugwan touwero. Doba len leic merus naugb len leicara laihagab len merir an areg len larougb len an gin terimda. Dara len lemahau dau malaikad gedig len leigtou se gogouf cucugb touwero. Doba len leic len gin laugwan meroho lacecim toua namcir. Hanoba len lemarges dau meren geicara gecgu gin debero. Doba len lebesesar naugb len leic areg gogor debin lenin meraga, aninim dag malaikadir dara leng se Sodom dara Gomora graga, kaba, len leic areg gogor debin lenin meraga gin touohob. Dara len lens dau meren geicara gecgu gin dou lusud, kaba, dag len lemaimo augwan augwougb touwero. Doba len louma debin dag Mena Gogoufu enin eng ogod len dag lomom. Hang len lemeiya augwan gini dag misen touohob. 1:9 Dangga meren geicara augwan gin, kaba, edreg dau malaikad meren mougt mera medam, moho Mikel, men geicara gin toua namcirohob. Anai en, kaba, en moho agas medam namcir toua. Doba sug eni dara Bilis lan lanara laisedim icira Musa medesa sug nosa, kaba, en emedag mougt naugb en emowun Bilis moho, dara en emesbes an en touwero. Doba en enara dou en, endagai: Nanan Adehsud enin eng emen dougwo ban an gins. 1:10 Doba gembala areibahau gin, kaba, areg len meru emobgesero, kaba, len lesbes an namcir. Dara areg len meru obgesa ginohob, kaba, augwan gini ahwan len merur mor se dum smougb dous. Anai areg len meru ouforoho se gin, kaba, dag len merisira ebsa ligida gus aibibrida. Dara len merdoc oungmogo naugb len laimo areg len merdoc etrij icira aud areg gecgu augwan toua terimda. Hang meren geicara augwan aimo dag aremeta mog mog meren geicara gin toua terimda. Anai aremeta gin, kaba, len meru emaiyero toua namcirohob. 1:11 Dangga, kaba, ELOHIM esedeb gogom medam deinaugb lenohob. Anai len, kaba, len merdoc eclul an ara ara namcir. Hang meren geicara gini, kaba, esogwa deisa sud hom, moho Kain, en mohotimei mohw an men geicara dag len leic gecgu dou lusud toua terimda. Hanoba len lemaimo ucina se geica gin toua deitero. Doba sug len merdoc etrij icira aregoufu dag ginohob, kaba, len laimo sud hom, moho Beliam, men geicara dau ucina misen naugb len lerba mohoisa lusud an meren aregoufu touohob. Aninim dag Beliam sug en medoc etrij icira aregoufu sug nosa, kaba, en erba mohoisa leng Israel naugb len lemecguna dou ELOHIM toua deitero. Doba len lecguna dou lugmahara meren seiseij dous. Hang ELOHIM emamsoho len gin touwero, doba en esedeb naugb en emeic mor mor se dum smougb dou len toues. Anai len leicara laihagab en mer an areg en arougb len an gin terimda. Aninim dag sug nosa, kaba, en emamsoho sud hom, moho Korah, an men geicara touwero. Doba sug en owun Musa en moho dauntoba en emedag mougt mera medam naugb len deitero, kaba, ELOHIM eic mor mor dou en touohob. 1:12 Dangga hang, len ledag uluto gogor gaic dareh yen toua. Anai sug yen youcimdeb naugb yen yetara aninim, kaba, len lemeigtou dau yen touwero. Doba len leic merus naugb letara dag logo ara gaihim debin yen terimda. Hanoba len lemauwam an len meraguner dara len merdamouwer se Krisdus touwero. Doba se aremer augwan, kaba, len led lenin deseino len. Hang len lemedag umer mogo goho los touwero. Doba len ledag umer mohora gedig loungmen oho dig gacda, dig ginin dous. Anai len lemebehnehino lenin merdoc mes dougwo ara ara augwan touwero. Doba areg len merdoc etrij icirohob, kaba, len laimo gin terimda. Dara len ledag sogo maga hom gedig igda ehin naugb sug era merohob. Dangga sug lusud louwan ledeiya dougwo, doba len lemec mera hom touwero. Hang len lemedag sogo gombrerij bagac namcir. Anai len ledag sogo gedig lusud lohoma an mom augwanohob. 1:13 Sug len leicara dag gin ucucugb terimda, kaba, ELOHIM emamsoho len gini deb touwero. Doba en esedeb lobeigbogo mes geb ai mei se w Seol naugb lenohob. Anai sug len laimo areg geic igdebes dou lusud dag gin terimda, kaba, len ledag duhu mogo medam gerba mesis an gogor se lonog. Dara len ledag tebeij gemec asa mohw hom touwero, doba eineg maga naugb ec augwougb sungga sungga toua. Anai sug len loududa ELOHIM en mer dag gin namcir, kaba, len lemaimo men ucina misen touwero. Doba len ledis naugb len laimo areg len merdoc etrij icira gin dous. 1:14 Augwan gini esogwa deisa areg Adam medebeito gedig senggai, en moho Henog, en og deb se Surad Injil Meb Mohon eisaugb len deb sug nosa touohob, endagai: Yen youman dan indir an areg dan den dou yen gin deigeigouhw namcirahabi. Anai se lona daiyamo gacin, kaba, maman Adehsud en emouwaden dau bogo an men malaikadir leinyana gougwa naugb en emogod aremer aga lusud laugwan toues. 1:15 Dangga gareg en ohoiya en mer, hanoba en ecic en moho gouhw genes, dara eic en moho bacecim, kaba, en ogod aremer gogom medam deinaugb len laugwan se lona ingga toua. Anai len lemaimo en mer gin touwero. Doba len merdoc mog mog an en, hanoba len ledreg dau areg en arougb len an gin toua namcirohob. 1:16 Dara gembala areibahau gin, kaba, len merdoc emesgiraha an areg geb naugb len touwero. Doba len lenara ucucugb an gin. Dara sug aremer inggebga, kaba, len lemos lemod lenin touwero. Doba len lasij gogom debin leng gus terimda. Hanoba len lemauwam an len gus touwero. Doba len laimo areg len merdoc etrij icira aud areg gecgu gini dous. Dara len lemowun lenin touwero. Doba len leigdoumesa lenin meroho deseino lusud dag len lecinaga meijouhw augwan asesa namcirohob. Hanoba len lenara laceca lusud an aremougb toua terimda. 1:17 Dangga dan indagunerij, dara dan indamouwerij gedig dan indoc gororougb yen, eigouhw naugb yen meigdoc moc dougwo areg maman Adehsud Yesus Krisdus men lusud len lesulou yen an gin sug nosohob augwan touwero. Doba yen meigdoc eiseisan gin terimda. 1:18 Anai sug len lesai en mer dou yen sug nosa, kaba, len lens dau gembala areibahau gini meren geicara deb dou yen touohob, lendagai: Edebeij Lona Sug Ouwedoc gin, kaba, lusud gedig len leic yen lacecim an areg yen meigdoc ebdebin an ginohob, kaba, len lagunya debin yen toua. Anai len, kaba, len lemouwan naugb len lesogwa deisa ELOHIM mohotimei mohw an men geicara gin deitero. Doba len louwan laimo areg len merdoc etrij icira gin dous. Hang sug len leiya, doba yen yeic meijuwemougb esesa naugb yen youwan yaimo areg ELOHIM arougb yen an gini terimda, kaba, len lobohuba dara len lesbes an yen toua namcir. 1:19 Dangga hang, len gin, kaba, len lemeic meruwemougb esesa naugb sug len merdoc dag hom dara yen touwero. Doba len louwan naugb lekeba yen daum dous. Anai len lemaimo Mena Gogoufu en mer aud areg en arougb len an ginero. Doba len laimo areg len merdoc etrij icira se cinogo gin dous. 1:20 Doba dan indagunerij, dara dan indamouwerij, naugb yen, kaba, areg yen meigdoc ebdebin an ginohob, kaba, yen yogo augwan gini dag buc gototo se yen meigdoc mes. Anai areg yen meigdoc ebdebin an gin, kaba, ecabeci. Hanoba mera eisaugb edreg dau areg gus augwan toua namcirohob. Hang yen yousem naugb yen yohud meijen tu icira buc misen gin toua. Dauntoba yen yedag lusud mos se gin toua terimda. Dara yen yemarges dau sug yen yocuncum dou ELOHIM touwero. Doba yen yeicara dangga esesa terimda, aimo dau areg Mena Gogoufu arautut yen aud gin toua. 1:21 Anai sug yen yeicara dag gin, kaba, ELOHIM medoc emesrougb an yen touwero. Doba sug yen yeigtou yateteij naugb Lona Sug Maman Adehsud En Ecicugwen, kaba, eic dag en medoc an yen toua. Hang se Lona ingga, kaba, maman Adehsud Yesus Krisdus emeic maireseb menau geb huhugb dou yen toues. Anai en medoc eineg an yen namcirohob. 1:22 Dara yen yemenara ucucugb an yen meisir se Krisdus gedig len leija meruwesaba gin touwero. Doba yen meigdoc eineg an len naugb yen yenara yad len merdoc mes. Dauntoba len toua merdoc eica areg yen meigdoc ebdebin an ginohob augwan toua terimda. 1:23 Dara leng laimo ucina aud dum smougb ucugwohob, kaba, yen meigdoc emagadgeij an len touwero. Doba yen meigdoc eineg an len naugb yen yeigdoc len dau ucina aud dum smougb gini aud ucina misen ucugb toua. Doba sug yen yahwan len dau dum smougb aud maireseb menau geb huhugb ucugb dag gin, kaba, yen meijus eiseisem dau len. Hanoba yen yebehnehino yenin dau meren geicara sug nosa gini toua namcir. Dauntoba meren geicara gini emeic gogor dou yen touwero. Anai meren geicara augwan, kaba, ecgu namcirohob. 1:24 Doba ELOHIM, kaba, en mobisamougb namcir naugb sug yen yemobsara dau ucina aud maireseb menau geb huhugb gin touwero. Doba en ahwan yen terimda yen yedebeij en se men maija moc gogouf cucugb gin touohob. Hanoba en eseyeiyo yen se ucina gin toua, dauntoba aremer hom emdagunya debin yen touwero. Doba yen yecabeci deseino en. Dara yen yagahugouhw an en beb huhugb namcir toua. 1:25 Dangga hang, maman mamarges dau sug maman magahugouhw an ELOHIM dara maman maigdoumesa en moho agas medam touwero. Doba sug maman madag hom dara maman Adehsud Yesus Krisdus dag ginohob, kaba, maman maicara maimo dag gin beb huhugb namcir. Anai enin dous eng ELOHIM mohora hom gedig en eigdoc maman dau sesar men gogom augwan ginohob. Dara enin dous eng eigtou se gogouf cucugb. Hanoba enin eng edag mougt mera medam naugb en moho aiga augwan. Dara enin eng mobisamougb naugb en esedougwo areg en ahasesei augwan dau sugraga terimda beb huhugb gin toua. Augwan gini asesa dag misen namcir.

Sondapa 1

1:1 Areg dan dog se surad gini, kaba, ELOHIM enin eng ecic dau augwan gini dou Yesus Krisdus sug nosa. Dauntoba en ens meijouhw augwan asesa dou men sogougb maman toua. Anai lona naugb sug aremer augwan gin agunya, kaba, ebeij deinyor namcirohob. Hang Yesus en emesa men malaikad hom dou men sogougb dang, Yohanes, naugb en ens dau aremer augwan gini asesa dou dan deiyesa indires dag misen toua. 1:2 Dara ELOHIM en mer areg Yesus Krisdus ens ainyes dou dan, kaba, dan douma debin dag augwan gini se geica namcir. Anai dan deiya dara dan douman augwan gini dag misen touohob. 1:3 Dangga gareg en ecic dau surad gini dou goucimdeb. Dara gareg en medoc edag beim an areg en ouman gini. Hanoba en eicara baimo toua, kaba, ELOHIM emeic geigouhw dou ens. Anai lona naugb sug areg graga augwan ebiji, kaba, ebeij deinyor namcirohob. 1:4 Dang, Yohanes, dog surad gini dou yeng se goucimdeb senggai se leng Asia meren hancob. Hang dan dacgeij ELOHIM naugb en medoc eineg an yen. Dara en eseyeiyo yen dougwo areg gecgu augwan toua terimda. Anai en, kaba, en eis huhugb dau sugragohob. Hanoba en emediyebeiya dau maman touwero. Doba en emecicugb aud maman toues. Dara merna senggai gedig len lesa deseino ELOHIM men maija moc naugb len laimo en mer, kaba, dan dacgeij len naugb len merdoc eineg an yen. Dara len leic gesgigouhwesa dou yen dougwo augwan. 1:5 Dara dan dacgeij Yesus Krisdus naugb en medoc eineg an yen, hanoba en eseyeiyo yen dougwo areg gecgu augwan gin toua terimda. Anai enin, kaba, en emahau dau sug en esai ELOHIM moro dou lusud touwero. Doba en eicara baimo augwan gini aud gomom. Hang en emedag mougt mera medam naugb mougt mera se cinogo gini len laugwan toua. Anai en emomom namcirero. Doba eni sud hom geisa dau gomom acgunogohob, hang en emeis huhugb terimda. 1:6 Dangga hang, eigouhw naugb maman mamarges dau sug maman magahugouhw an Yesus Krisdus ginero. Doba maman maigdoumesa en moho agas medam edag maman mougt mera medam beb huhugb namcir. Anai en medoc gororougb maman. Hanoba en eic enin mogwihi emancoho aga maman dau sesar men gogom augwan toua. Dauwohob, kaba, en eigdoumesa maman mamoho naugb maman masedougwo lusud. Dara maman madag gembala gouwaharo deseino en Mena ELOHIM toua terimda. Augwan gini asesa dag misen namcir. 1:7 Anai cum, kaba, maman se cinogo gin, kaba, maman maugwan mameiya en sug en ecicugb se umer en toues. Dangga gareg en edesugb en, dara gareg en eic mog erij dou en enohob, kaba, len laugwan leiyaga medam se lona ingga. Anai len lecinaga dag cum, kaba, en eic mog erij medam auni gin ucugb dou len toua. Yen youman areg dan den dou yen gini deigeigouhw. Anai augwan asesa dag misen namcirohob. 1:8 Augwan gini aimo dau areg maman Adehsud, ELOHIM Gedig En Mobisamougb namcir, en toua ouma debin ginohob. Anai enin, kaba, en eis huhugb sug nosa, hang en emediyebeiya touwero. Doba cum, kaba, en emecicugb aud maman deit. Hanoba en enara dou maman, endagai: Dan indugwengga sug acgunog terimda edebeij sug augwan ouwedoc toua. 1:9 Dang, Yohanes, gedig dan toua daimo yen se ucina mog erij. Dara dan deigtou dateteij dara yen naugb lona sug ELOHIM oiharaga maman ucugb. Anai dan dedag yen meijaguna se Krisdus gin touohob. Dan indugwengga se Lomos Padmos gini, anai dan demarges dau sug dan desai ELOHIM en Mer Geigouhw eisaugb Krisdus dou lusud touwero. Doba dan deic indus naugb dan deicara daimo dag gini. Hanoba dan douma debin Yesus en edag ELOHIM Meisi gedig en eigdoc maman dau sesar men gogom augwan toua terimda. Hang len lemouf dan icira gin toua. 1:10 Dangga se Ari hom, kaba, Mena Gogoufu en ogod dan dag domom. Anai gini maman Adehsud men lona naugb sug maman masijaresa en toua. Sug Mena Gogoufu ogod dan dag domomohob, kaba, dan douman, doba sud hom gedig en mer dag higbei medam, kaba, en enara dou dan dig dan indidgo. 1:11 Hanoba en arougb dan, endagai: Areg dan demens dou ban, kaba, ban bog augwan gini se surad hom. Hanoba ban besa surad gini dou goucimdeb senggai se cinogo Epesus, Smirna, Pergamus, Tiatira, Sardis, Piladelpia, dara Laodikia len laugwan toua. 1:12 Sug en arougb dan an gin dauwohob, kaba, dan deineg naugb dan deiya sud hom genara dou dan gini. Dangga sug dan deineg aud enohob, kaba, dan deiya, doba mohora senggai dau emas an smougb mouf ebsa. 1:13 Dara sud hom gedig en mocbobaga dag lusud misen, kaba, en esesa se mohora senggai gin merufu toua. En, kaba, en eg sansun gagas hom bedebeij en mohotimei. Dara en eic hwigbei mos dau emas ahud en mogumsi toua. 1:14 En mougt modi augwan ogoufu namcir, aninim dag domba modi, era incgwida gogoufu toua. Dara en maires hwas toua, aninim dag smougb mouf gererij. 1:15 En mohora hwas esisilo, aninim dag kermum gohoseri sug lusud lec se smougb, kaba, en mougb enena toua. Dara en mer, kaba, aninim dag duhu medam gesogwa dau mesihwa. 1:16 En gin, kaba, en os tebeij senggai se en mesira misen. Dara krawan hom mec ineinagas agunya dau en mers. Dara en mebes aninim dag igda lona sug erba mohora besisilo namcir toua. 1:17 Sug dan deiya augwan dau en dag ginohob, kaba, dan deijeboho damuhumlo desij en mohora, aninim dag sud hom gomom namcir. Doba en ou mesira misen bos dan. Hanoba en enara dou dan, endagai: Ban bemahau danlo. Anai dani sud hom geigtou sug acgunog terimda sug gin augwan ouwedoc toua. 1:18 Hang indan goubesa edeinyum naugb sug dan dedec misis dau leng leigtou se w Seol. Hanoba dan deic maireseb menau geb huhugb dou len toua. Anai dan domom sug nosa, doba ban beiya dan deisa dau gomom aud maireseb huhugwohob. Dangga hang, maireseb augwan ogdoc danin dous. 1:19 Sug en oho mer debin dan dag ginohob, kaba, en arougb dan deit, endagai: Areg ban beiya dau aremer naugb lona gini, dara areg ban beiya dau aremer naugb lona daiyamo gacin, kaba, ban bog augwan gini se surad hom toua. 1:20 Doba tebeij senggai areg ban beiya geb se dan insira misen gin, kaba, aninim dag gembala gesedougwo goucimdeb senggai. Dara emas mohora senggai, kaba, aninim dag meren lusud laugwan toua. Sug nosa, kaba, lusud lemecinaga meijouhw augwan gini asesa touebma. Anai dan decgoneh augwan dau len namcir. Doba iteitogin, kaba, dan dens augwan gini dou ban, dauntoba ban becinaga dag misen toua.

Sondapa 2

2:1 Sug en enara dag graga dou dan dauwohob, kaba, en arougb dan deit, endagai: Ban bog surad hom dou gembala gesedougwo goucimdeb se cinogo Epesus, bendagai: Mer gini dau dang, Yesus, gedig dan dos tebeij senggai se dan insira misen. Dara dan dec indohora se emas mohora senggai merufu naugb dan dogmac len laugwan toua. 2:2 Dangga hang, dan deiya dau sug gembala areibahau len lagunya debin yen sug nosa, kaba, dag yen yemaimo len aud areg gecgu mougwa hom touebma. Doba yen yeic yen meijug erij naugb yen yes agadgeij dau areg len lagodgod yen an toua terimdohob. Anai len, kaba, len leigdoumesa lenin meroho deseino yen, dag len lesai dan induro dag misen dou yen. Doba sug yen yehigdecin len an areg len lenara dou yen, kaba, yen yecinaga dag len lemebedbed areg se geica dou yenero. Doba len lereiyara naugb len laugwohosa yen dous. 2:3 Dara dan deiya dau sug len leic gogom dou yen, kaba, dag yen yemobsara dau ucina mog erij gin touwero. Doba yen yes agadgeij namcir naugb yen yaimo ucina mog erij gin toua, besesa terimdohob. Anai sug yen meigdoc ebdebin an dan dag ginohob, kaba, len leicara laimo dangga an yen toua. 2:4 Doba eisaugb aremer hom dag medoc gororougb, kaba, dan indoc emesgirahesa yen an deitero. Doba dan dowun yen an gin ucucugb terimda. Anai yen meigdoc gororougb dan dag nosa touwero. Doba yen meigdoc obsara dau gin namcirohob. 2:5 Dangga hang, eigouhw naugb yen meijina eiseisan meijen geicara gini se mohw deit, kaba, yen yesga meijen sesar augwan moho asesa dou dan toua. Hanoba yen yeicara yaimo aremer meigdoc gororougb augwan dag nosa deit. Anai sug yen yemeicara dag ginero, kaba, yen yemedag emas mohora hom gedig smougb mouf ebsa gini deitero. Doba dan den aud yen naugb dan dohoma yen yaugwan dau meijen usi gin namcir. Doba sug yen yesga meijen sesar augwan moho asesa dou dan namcir. Hanoba yen meigdoc gororougb dan dag nosa ucugb deit, kaba, dan demohoma yen touwero. Doba yen yedag emas mohora hom gedig yen yei yaisema lusud terimda. 2:6 Doba aremer hom, kaba, dan douma debin yen an gin namcir. Anai yen yemaimo Nikolaus men logodeh an meren geicara gecgu mougwa hom touwero. Doba yen meigdoc ecgwan len terimda. Aninim dag dan indoc emesgirahesa len an meren geicara gecgu gin touwero. Doba dan indoc ecgwan len namcirohob. 2:7 Dangga gareg dau yen en moms ai, kaba, en oc moms naugb Mena Gogoufu en mer an areg en en gin terimda. Anai gareg en ebehnehino enin mos dougwo areg gecgu augwan namcir, kaba, dan demeic sogo geic maireseb menau geb huhugb geb se ELOHIM men Lo w Pirdaus men mera dou en bemet toues. 2:8 Sug Yesus ens dau areg dan dog se surad dou leng se cinogo Epesus dauwohob, kaba, en arougb dan ucan deit, endagai: Ban bog surad hom dou gembala gesedougwo goucimdeb se cinogo Smirna, bendagai: Surad gini dau dan gedig deis huhugb sugragohob. Hang edebeij lona sug augwan ouwedoc, kaba, dan toua indugwengginaba. Anai sug nosa, kaba, dan domom, doba dan deisa dan indireseb ucugb deitohob. 2:9 Dangga hang, dan deiya dau lusud meren geicara dag len leic mog erij medam dou yen. Dara dan deiya dau sug len lesma meijen aremougb augwan dau yen touohob. Doba inggaida. Anai cum, kaba, yen meijunggwereij deitero. Doba yen meijisoho mougb namcir. Dara dan deiya dau leng leigdoumesa lenin meroho dag leng Yahudi misen, kaba, dag len leic yen meijoho belacecim touohob. Dobnaro. Len lemedag leng Yahudi misenero. Doba len ledag Setan men logodeh dous naugb len lesijaresa en terimda. 2:10 Yen youman dan indir an areg dan den dou yen gin deigeigouhw namcir. Anai cum, kaba, Bilis en emarougb men logodeh gini naugb len naugb len louf yen se tu gesisug naugb en emeic gogom medam se lona sisa dou yen toues. Anai en ouwan eiya dau sug en eic mog erij dag gin dou yen, kaba, yen yemes agadgeij sei? Era, yen yemobsara dau danei? Doba yen yemahau dau sug yen yaimo ucina mog erij ginlo. Anai sug len logod yen, era len leic gomom dou yen, doba yen yes agadgeij naugb yen yaimo dan terimda, kaba, maireseb menau geb huhugb emediyebeiya dau yen touwero. Doba ebsugeb naugb yen terimda. 2:11 Anai gareg en emobsara dau ucina mog erij ginero, doba en aiyan medocesem naugb en es agadgeij terimda, kaba, dan demerba en se dum smougb naugb en emomom mougwa cuhwai touwero. Doba en mena agau dau namcirohob. Gareg dau yen en moms ai, kaba, en oc moms naugb Mena Gogoufu en mer an areg en en dou goucimdeb augwan gini. 2:12 Sug en ens dau areg dan dog se surad dou leng se cinogo Smirna dauwohob, kaba, en arougb dan ucan deit, endagai: Ban bog surad hom dou gembala gesedougwo goucimdeb se cinogo Pergamum toua, bendagai: Surad gini dau dan gedig dan dos krawan mec ineinagas. 2:13 Dangga hang, dan decinaga dau meijen cinogo dag yen yeigtou se lusud gedig Bilis oiharaga len laugwan merufu namcirohob. Dara dan decinaga dau sug len leic mog erij dou yen, kaba, dag yen yemaideido dougwo dan touwero. Doba yen yes agadgeij naugb yen yaimo dan terimda. Dara yen yeicara dangga se lona sug len leic gomom dou Antipas sug nosa touohob. Anai en, kaba, en emarges dau sug en os badi dan indoho deseino lusud touwero. Doba en eicara baimo dangga dara en medoc hom namcir. Hang len lemeic gomom se Bilis men cinogo ingga icira gin dou en touohob. 2:14 Doba aban geicara aibibra, kaba, dan indoc emesgirahesa an ginero. Doba dan den dougwo ban an namcir, anai ligbum dau aban logodeh, kaba, meren geicara esogwa deisa sud hom, moho Bileam, an areg en edidib dou mougt mera medam, moho Balag, sug nosa touohob. Anai areg Bileam en ens dou Balag sug nosa gin, kaba, eic mou ouforoho dou en naugb en enara baceca leng Israel. Dauntoba len lemasid lenin dau sug len let mog gedig lusud lesijaresa dou seiseij touwero. Doba en mer edag digoro beica len, hanoba en ahwan len naugb len let mog gini. Dara len merisirebsem aibibrida debin gin toua terimda. 2:15 Dangga toua, ligbum dau aban logodeh, kaba, len laimo sud hom, moho Nikolaus, aud areg en ebedbed dou len touohob. Hanoba len lemasid lenin dau seiseij touwero. Doba len lecguna dou dara len merisirebsem aibibra debin gin toua, aninim dag leng Israel leicara dangga sug nosa touohob. Doba ban bebin len se aban goucimdeb terimda. 2:16 Dangga hang, eigouhw naugb ban besga aban sesar, dara ban bahau an dougwo toua. Hanoba ban bemebin len toua deitero. Doba ban basid len dau aban goucimdeb namcir. Naro, kaba, dan den aud yen dedemeda naugb dan dogod leng laimo Nikolaus an men geicara dara krawan mec gen dau dan indirs naugb len laugwan lomom namcir toua. 2:17 Gareg dau yen en moms ai, kaba, en oc moms naugb Mena Gogoufu en mer an areg en en dou goucimdeb augwan gin terimda. Anai gareg en emaimo lusud naugb sug en emecguna dou seiseij, dara en mesirebsa aibibra debin gin touwero. Doba en ebehnehino enin medoc mes dougwo augwan gin namcir, kaba, dan demeic dau ared, moho w mana, gedig lusud lemeiyebma dou en. Hanoba dan demeic igdahab gogoufu hom gedig dan dog en moho menau se ginohob, dou en toues. Dara lusud gus, kaba, sud hom ingma en emecinaga en moho menau geb se igdahab gogoufu hom gin touwero. Doba enin dous eng emecinaga moho gini. 2:18 Sug Yesus ens dau areg dan dog dou leng se cinogo Pergamum augwan dauwohob, kaba, en arougb dan deit, endagai: Ban bog surad hom dou gembala gesedougwo goucimdeb se cinogo Tiatira deit, bendagai: Surad gini dau dang, ELOHIM Meisi mohora hom, gedig dan indires aninim dag smougb mouf gererij. Dara dan indohora, aninim dag kermum gohoseri gedig en mougb enena namcir toua. 2:19 Dangga hang, dan deiya, doba meijen geicara augwan dag yen meigdoc gororougwim ucucugb terimda. Dara yen yaimo areg dan darougb yen an gin dara yen meigdoc hom touohob. Dara sug lusud leic mog erij dou yen, kaba, yen yemobsara dau gin touwero. Doba yen yaiyan meigdocesem, dara yen yes agadgeij namcir naugb yen meigdoc ebdebin an dan toua terimda. Dara dan deiya ucan meijen geicara gin, doba yen yaimo augwan gini edreg dau nosa touohob. 2:20 Doba aremer hom, kaba, dan indoc emesgiraha an banero. Anai ban bemen dougwo gida hom, moho Isabel, an men geicarero. Doba ban bamsoho en deb. Hanoba en ahwan indan logodeh leinyana naugb sug len let mog gedig lusud lesijaresa dou seiseij. Dara len merisirebsem aibibrida ucucugb debin gin touohob. Gida hom gin, kaba, en eigdoumesa enin moho deseino yen, dag en esai ELOHIM moro dag misen dou yen toua. Dobnaro. Areg en edidib gin, kaba, augwohosa yen naugb yen yaijahasero dau ucina misen aud sesar dous. 2:21 Doba dan demeic cumougt dou en naugb en emebedbed mer areibahau gin deitero, doba en esga men sesar dou dan. Hanoba en eineg dau, dara ahau an dougwo toua. Dobnaro. En emahau an dougwo sug en mesirebsa aibibra gin touwero. Doba en eic mos naugb en eicara baimo dangga terimda. 2:22 Dangga hang, dan demamsoho en deb deitero. Doba dan desa acar debin en namcir. Dara leng laimo en naugb len lesijaresa seiseij. Hanoba len merisirebsem aibibrida debin gin toua terimda, kaba, dan desa gogom medam debin len. Doba sug len lahau an dougwo, hanoba len lemaimo en aud areg gecgu gin deitero, kaba, dan demesa gogom medam debin len touwero. Doba dan damsoho len namcir. Yen youman dan indir an areg dan den dou yen gin deigeigouhw namcir toua. 2:23 Doba gida men logodeh gedig len lemahau an dougwo meren sesar ginero, doba len leic merus naugb gin terimda, kaba, dan demamsoho len debero. Doba dan desa acar debin len toua lomom namcir. Dauntoba yeng se goucimdeb augwan yen yecinaga dag dan demamsoho yen an meijen geicara gecgu hom touwero. Doba dan dauni gogom dou astesda dau yen, aimo dau men geicara dou yen toua. Anai dan eng sud hom gedig dan decinaga dau areg lusud lauwaman, dara areg geb se len merdoc mes, augwan toua namcirohob. 2:24-25 Doba yeng se goucimdeb Tiatira gedig yen yemaimo Isabel aud areg en ebedbed dou yen mougwa hombuma, kaba, dan demarougb yen icira ara gus ingma darero. Doba dan dacgeij naugb yen yeicara yaimo areg dan darougb yen an aimougtut graga augwan, terimda edebeij lona sug dan decicugb aud yen dous. Anai yen, kaba, yen meiju emauti areg lusud len leija dag Setan men gauwamara geb ai mei augwan gini mougwa hom touebma. Doba yen yebehnehino yenin meijus dougwo augwan namcirohob. 2:26 Dangga gareg dau yen en emaimo areg gecgu gragero, doba en ebehnehino enin medoc mes dougwo augwan namcir. Hanoba en aimo areg dan darougb en an gini terimda edebeij Lona Sug Ouwedoc toua, kaba, dan demeigdoumesa en moho dag mougt mera medam naugb en esedougwo leng se cinogo augwan dara goubesa medam namcir. 2:27 Aninim dag dan Indina eigdoumesa dan indoho dag mougt mera medam naugb dan desedougwo lusud laugwan dara goubesohob. Anai dan dogugwo ijouhugwa dau kermum bansins deb se en mesira naugb ginohob. Dangga hang, gareg dau len en eicara gecgu, kaba, en ogod en mor mor. Aninim dag sud hom sug en esinsin debecij, doba emeigouhwero, kaba, en eic badro mor mor. 2:28 Dara dan demeic singmur mouf gesiabaga dou en toues. Anai en ebehnehino enin mos dougwo areg gecgu augwan toua namcirohob. 2:29 Gareg dau yen en moms ai, kaba, en oc moms naugb Mena Gogoufu en mer an areg en en dou goucimdeb augwan gin terimda.

Sondapa 3

3:1 Sug en ens dau areg dan dog dou leng se cinogo Tiatira augwan dauwohob, kaba, en arougb dan deit, endagai: Dou gembala gesedougwo goucimdeb se cinogo Sardis, kaba, ban bog dag gini, bendagai: Surad gini dau dan gedig dan indoho aiga ELOHIM men merna senggai. Dara dan dos tebeij senggai se dan insira gin toua. Hang dan decinaga dau meijen geicara augwan, kaba, dag lusud leimiman dau gin namcir, lendagai: Leng Krisden se goucimdeb gin, kaba, len laimo areg se maireseb menau geb huhugb augwan dag misen terim dangga. Dobnaro. Dan decinaga dag maireseb emeb naugb yen toua deitero. Doba yen yomom dau gin namcirohob. 3:2 Dara dan deiya dau areg indan ELOHIM en arougb yen anohob, naugb sug yen yaimo, kaba, dag yen yemaimo augwan terimda deitero. Doba yen yaimo hom yom dous. Areg gus augwan, kaba, yen yarges dauwohob. Dangga hang, yen yematou deitero. Doba yen yeisa dau gomom ucugb dedemeda. Hanoba yen yaiyan meigdocesem dara yen yos agadgeij se areg dag mougb geb gini naugb yen yeicara yaimo dag misen toua deit. Anai mougb geb gin, kaba, deinyor naugb sug yen yedag yomom dau gin touohob. 3:3 Sug yen yeisohob, kaba, yen yesga meijen sesar an areg yen meigdoc omom icira gin augwan moho asesa dou dan. Dara yen yahau an dougwo namcir toua. Hanoba yen meigdoc eiseisan areg lusud lesai dou yen. Dara areg yen yebin se yen meigdoc mes sug nosohob, kaba, yen yaimo augwan gini toua deitahabi. Anai sug yen yemeisa dau yematoudero, kaba, dan den aud yen augwougb naugb dan deic mor mor dou yen augwan namcir. Aninim dag sud hom geiyohora, kaba, en emens mog ainyes dou lusudero. Doba en en augwougb debin len dous. Hang yen yemecinaga lona sug dan den aud yen gin touwero. 3:4 Doba merug hosa dau aban lusud se Sardis, kaba, len laimo areg asesa ELOHIM enin medoc mes augwanohob. Dangga hang, dan demeic mor mor dou len touwero. Doba sug dan decicugwen, kaba, dan deigdoumesa len meroho naugb len laimo dan an meren sansun gogoufu dinga dingada toua. Anai len lemaimo areg gogor ginero. Doba len lebehnehino lenin meren sansun gogoufu dau gin namcir. Hang len meroho emedeinyum naugb gin touohob. 3:5 Dangga gareg en ebehnehino enin medoc dougwo areg gecgu augwan namcir, kaba, dan demeic sansun gogouf cucugb demeg seni. Hanoba dan demoguc en moho dau Surad Maireseb Menau Geb Huhugb touwero. Doba dan dos dadi en moho deseino dan Indina an men malaikadir, dendagai: Sud hom gin, kaba, en edag indan lugdeh misenohob. 3:6 Gareg dau yen en moms ai, kaba, en oc moms naugb Mena Gogoufu en mer an areg en en dou goucimdeb augwan gin dareg geigouhw namcir. 3:7 Sug en ens dau areg dan dog dou leng se cinogo Sardis augwan dauwohob, kaba, en arougb dan deit, endagai: Dou gembala gesedougwo goucimdeb se cinogo Piladelpia, kaba, ban bog dag gini, bendagai: Surad gini dau dan gedig ELOHIM ouci dan debinim naugb enohob. Dauntoba dan deigdoc lusud dau sesar men gogom augwan namcir. Dara dan dedag sud hom gedig dan demereiyara mougwa hom touwero. Doba areg dan dos dou yenohob, kaba, dan deicara daimo augwan gini dag misen an yen toua. Anai danin dous eng dos Daud men gusin naugb dan dec misis dau ELOHIM men goiharaga. Anai dan dedag mougt mera medam naugb ginohob. Dangga hang, sud hom areg dan dec misis dau enohob, kaba, sud hom gus ingma en emouf misis dougwo enero. Era sud hom areg dan douf misis dougwo enohob, kaba, sud hom gus ingma emec misis dau en touwero. Doba en eigtou dig medigo namcir. 3:8 Dangga dan decinaga dau meijen geicara dag yen yemaideido dougwo dan mougwa hom touebma. Doba yen yos yadi dan indoho deseino lusud terimdohob. Dara areg dan darougb yen anohob, kaba, yen yemobsara dau gin touwero. Doba yen yes agadgeij naugb yen yeicara yaimo augwan gin esesa terimda toua. Dara dan decinaga dag meijen goubesa toua dag goujero. Doba yen youman dan indir gini deigeigouhwahabi, anai dan dec misis dau augwan dou yenohob naugb sug yen yesai Mer Geigouhw eisaugb dan dou lusud sungga toua terimda. Hang sud hom ingma, kaba, en emouf misis gin dougwo yen deitero, doba eb naugb yen namcir. 3:9 Doba eisaugb leng leigdoumesa lenin meroho deseino yen dag len ledag leng Yahudi misen, kaba, dan dowun len meroho eb tainya yen namcir. Hanoba dan darougb len naugb len leic len merohorbrida ladedeij cinogo naugb len lecguna dou yen toua. Dauntoba len lecinaga dag dan indoc gororougb yen dag misenohob. Anai len, kaba, len lemedag leng Yahudi misenero. Doba len ledag Setan men goucimdeb dous. 3:10 Sug yen yemobsara dau sug lusud leic gogom dou yen touwero. Doba yen yaiyan meigdocesem naugb yen yeraga ucina gini terimda, aimo dau areg dan darougb yen an ginohob, kaba, gogom areg ELOHIM esa debin lusud se lona gouwedoc naugb en ainyen len, kaba, augwan gini emogod yen touwero. Doba dan demoiharaga yen dougwo augwan gin toues. 3:11 Dangga hang, areg yen yaimohob, kaba, yen yemobsara dau touwero. Doba yen yes agadgeij namcir. Dauntoba lusud lemaugwohosa yen dau areg dan desedeb naugb yenohob gin touwero. Doba eb naugb yen beb huhugb terimda. Anai lona naugb sug dan decicugb aud yen, kaba, ebeij deinyorohob. 3:12 Gareg dau yen en emobsara dau ucina mog erij ginero. Doba en aiyan medocesem naugb en aimo gin terimda, kaba, dan deigdoumesa en moho dag buc gototo se dan Indina men tuari gecabeci se bogo. Dara en emerses dau mohw ingga touwero. Doba en eb sungga beb huhugb namcir. Hanoba dan dog dan Indina aman amoho, dara Yerusalem menau moho gedig dan Indina esa dau bogo se cinogo gini se en toua. 3:13 Gareg dau yen en moms ai, kaba, en oc moms naugb Mena Gogoufu en mer an areg en en dou goucimdeb augwan gin dareg geigouhw namcir. 3:14 Sug en ens dau areg dan dog dou leng se cinogo Piladelpia augwan dauwohob, kaba, en arougb dan deit, endagai: Dou gembala gesedougwo cinogo Laodikia, kaba, ban bog dag gini, bendagai: Surad gini dau dan gedig dan indoho dag w Amin. Anai ELOHIM esa dan aud yen, dauntoba yen yecinaga dag areg en os dou yenohob, kaba, hom ediyebeiya dau yen touwero. Doba eb naugb yen dag misen namcir. Dara surad gini dau dan gedig dan desai ELOHIM en moro dou yen toua. Dara areg dan douma debin dara dan dos dadi dou yen gin, kaba, dan demereiyara mougwa hom dou yen touwero. Doba dan denara se geica mogud dou yen dous. Hanoba dan demarges dau gin touwero. Doba dan deicara daimo augwan gini dara dan indoc hom an yen toua. Dara surad gini dau dan gedig dan dahasesei dara desinsin augwan touohob. Anai areg ELOHIM en esedeb naugb en ahasesei dara en esinsin ginohob, kaba, augwan acgunog ogdoc dan dous. 3:15 Dangga dan decinaga dau meijen geicara augwanohob. Doba yen meigdoc ememtereta dau dan. Dara yen meigdoc emesrougb icira dan touwero. Doba yen meigdoc mes edag duhu gemta dara gesrougb larbem dousaba. Dan demouwan danggero. Doba dan douwan naugb meijen geicara dag duhu gemta, kaba, gemta namcir. Era gesrougb, kaba, gesrougb namcir toua. 3:16 Dangga sug meijen geicara emedag duhu gemta, era gesrougb mogudero, doba yen yedag duhu gemta dara gesrougb larbem dous, kaba, dan dersa an meijen geicara augwan. Hanoba dan dotogoto yen dau dan toua namcir. 3:17 Anai yen yeigdoumesa yenin meijoho deseino lusud dag yen meijisoho mougb namcirohob, hang len gus lemousa yen touwero. Anai meijen aremougb augwan edeinyum naugb sug yen yeigtou touohob. Dobnaro. Yen yedag lusud moc moho gedig lusud merdoc eineg an len. Anai se yen meigdoc mes, kaba, yen yedag sud hom monggwereij, dara meihw agaga, dara mairesmougb dous. Doba yen yemecinaga gin touwero. Anai yen youdesa dag areg geb naugb yen, kaba, augwan eigouhw namcirohob. 3:18 Dangga hang, dan desulou yen naugb yen yacgeij emas gecabeci mogud dau dan. Dauntoba yen meijunggwereij deitero. Doba yeni meijisoho mougb se yen meigdoc mes toua terimda. Dara dan den dou yen naugb yen yacgeij sansun gogoufu dau dan. Dauntoba sug yen yeg dougwo yenohob, kaba, igdebes emeba yen touwero. Doba yen yeic meijus namcir. Dara yen yacgeij ariawen dau dan toua. Dauntoba sug yen yehin se yen meijiresohob, kaba, yen meijiresmougb dag nosa deitero. Doba yen meijires esga naugb yen yeiya lo asesa ucugb deit. 3:19 Areg dan desulou yen an graga, kaba, men meijouhw dag dan indoc emesrougb an yen namcirbuma. Doba ansins dag dan indoc gororougb yenaba. Anai gareg dan indoc gororougb en, kaba, dan demamsoho en touwero. Doba dan den dougwo en an men geicara gecgu. Hanoba dan desa gogom debin en toua. Dauntoba en emaimo men geicara gecgu gin deitero, doba arges namcir. Dangga hang, yen yemeic meijus dougwo areg dan desulou yen an ginlo. Doba yen yeic meijuwemougb esesa terimda naugb yen yesga meijen sesar augwan asesa dou danahabi, yen yemaimo areg dan desulou yen an gin dag misen toua. 3:20 Anai dan desa deinyor meijen misis naugb dan douma touohob. Dangga gareg dau yen en ouman dan indir, hanoba en ec misis dau dan, kaba, dan deinesa aud en naugb aman amatara hom toua. Yen youman dan indir an areg dan desulou yen an gin deigeigouhw namcir. 3:21 Gareg dau yen en emaimo areg gecgu ginero, doba en ebehnehino enin medoc mes dougwo, kaba, dan demotogoto en touwero. Doba dan deigdoumesa en moho naugb en eigtou desij dan se indan maija moc hom namcir. Aninim dag dan deigtou desij dan Indina se men maija moc homohob. Anai dan demaimo areg gecgu mougwa hom sug nosa touwero. Doba dan debehnehino danin indoc mes dougwo augwan gini touohob. 3:22 Dangga gareg en moms ai, kaba, en oc moms naugb Mena Gogoufu en mer an areg en en dou goucimdeb augwan gin dareg geigouhw namcir.

Sondapa 4

4:1 Sug dan dog areg graga augwan dauwohob, kaba, dan deiya deit, doba yen youman deigeigouhw, anai len lec misis hom se bogohob. Hanoba dan douman sud hom genara dou dan sug acgunog graga en mer dag higbei mougb naugb en eija dan deit, endagai: Ban beisaugb aud dan se bogo gini. Dauntoba dan dens dau aremer areg ELOHIM en esedeb naugb lona daiyamo gacin augwan dou banahabi. 4:2 Sug en eija dan dag gin inegohob, kaba, Mena Gogoufu ogod dan dag domom ucugb deit. Hanoba dan deiya, doba len lob maija moc hom se bogo. Dara sud hom eigtou se maija moc ingga toua. 4:3 En mebes esesilo aninim dag igdahab gaugweda mera eisaugb, moho w baiduri pandan. Dara igdahab gahani mera eisaugb, moho w delima. Dara sidgodgo hom gesisilo, aninim dag igdahab gaugweda mera eisaugb, moho w samrud, erbacec men maija moc gin toua. 4:4 Dara maija moc sud hom hogu edeisu leb acec sud hom graga men maija moc. Dara mougtir merug sud hom hogu edeisu, len leigtou se maija moc augwan ingga toua. Len gin, kaba, len leg sansun gogouf cucugb. Dara len leg topi dau emas, aninim dag mougt mera medam meren topi toua. 4:5 Dara dan deiya se maija moc hom graga, doba bagar mouf ehinya. Dara dan douman bagar mougb oucuc anim dau maija moc. Dara dan deiya, doba smougb mouf senggai lesa deseino sud hom graga men maija moc gini toua. Mouf senggai gin, kaba, dag ELOHIM men merna senggai. 4:6 Dara dan deiya dum mohu, doba edag sogo mehir eb ino men maija moc ingga, aninim dag cireg gogoufu namcir. Dara acec sud hom men maija moc gin, kaba, dan deiya ara hogu merireseb, gedig len meriresi amgema ehihim se len meraga dig merdoc dara dig meridigo augwan, len lesa toua. 4:7 Hom dau ara hogu graga, kaba, en mebes aninim dag mihibei mog mog medam hom, en moho w singa. Hom deit, kaba, en mebes aninim dag sapi mena. Dara hom, kaba, en mebes dag lusud misen. Dara hom deit, kaba, en mebes aninim dag bemihi medam sug en ohw toua. 4:8 Dara astesda dau ara hogu merireseb gin, kaba, mebera senggem edagaser namcir. Dara en maga dig medoc, dara medigo, dara mebera meniha, kaba, meriresi amgema ehihim se augwan gin toua. Dara len lemarges dau sug len lohwaresgwemer laineg en touwero. Doba astesda lona loba, kaba, len lagahugouhw an sud hom geigtou se maija moc gin terimda. Hanoba len lenara dou en, lendagai: Adehsud ELOHIM Gedig Ban Abubisamougb namcir, kaba, sesar hom emeb se banero. Doba ban becabeci beb huhugb terimda. Anai ban beis huhugb dau sugragohob. Hanoba ban bemediyebeiya dau lusud touwero. Doba cum, kaba, ban bemen aud len toues. 4:9-11 Dara mougtir merug sud hom hogu edeisu graga, kaba, len lemarges dau sug len lesijaresa sud hom geis huhugb sugraga geigtou se maija moc ingga touwero. Doba astesda sug ara hogu merireseb len lesijaresa en, dara len leigdoumesa en moho, dara len len sijo dou en, kaba, len leijeboho lamuhumlo deseino sud hom geigtou se maija moc gin toua. Hanoba len lohwaresgwemer lagahugouhw an en, lendagai: Banin eng dous edeinyum naugb sug emen emagahugouhw an ban Anai ban bedag emen Adehsud dara emen ELOHIM touohob. Hang emen emeigdoumesa ban aboho dag ban abubisamougb namcir toua. Anai cinogo dara bogo an areg geb se gini, kaba, ban bahasesei dara ban besinsin augwan. Dara ban beic maireseb dou augwan gin toua, aimo dau areg banin bogod an gin sug nosohob. Dangga sug len lagahugouhw an sud hom geigtou se maija moc dag gini, kaba, len lesera topi dau emas, aninim dag mougt mera medam meren topi, dau len merugt. Hanoba len lob deb deseino en se maija moc ucucugb toua.

Sondapa 5

5:1 Sug dan douman areg graga augwan dauwohob, kaba, dan deiya, doba sud hom geigtou se maija moc en ou mesira misen an surad meh goud hom deit. Surad gin, kaba, len log meb dig medoc dara medigo. Hanoba len leic sidgod ladra debin mougwa senggai icira toua. 5:2 Dangga dan deiya, doba malaikad hom gedig en moho agas medam, kaba, en esa beiyaga dara mer medam dou leng se bogo, dara cinogo, dara leng se cinogo mei, len laugwan toua. Hanoba en eijidougwo len, endagai: Gareg dau yen en mog eng edeinyum naugb sug en emeila sidgod dau surad gini naugb en emeha? 5:3 Doba se bogo, dara cinogo, dara cinogo mei gin, kaba, sud hom ingma en moho agas emedeinyum naugb en emeh surad, dara en emecic areg len log se gin touwero. 5:4 Dangga sug dan deiya, doba len lemesma sud hom ingma en moho agas edeinyum naugb sug en eh surad dara en ecic areg len log se gin touwero, kaba, dan deb medam an gin namcir. 5:5 Doba sud hom dau mougtir merug sud hom hogu edeisu graga, kaba, en oho mer debin dan. Hanoba en enara dou dan, endagai: Ban bemeblo. Anai ban beiya, doba meijouhuda Yehuda meren mihibei mena hom, kaba, en aiyan augwan eb tainya enohob. Hang en moho agas emedeinyum naugb sug en eila sidgod senggai dau surad meh gini. Dara en eh toua, anai eni Daud medebeito mohora hom gedig en eigdoc maman dau sesar men gogom augwan namcir. 5:6 Sug en oho mer debin dan dag ginohob, kaba, dan deiya deit, doba sud hom, gedig en mocbobaga dag Domba, kaba, en esa deseino maija moc ingga. Dara ara hogu merireseb, dara mougtir merug sud hom hogu edeisu graga, len laugwan leigtou acec en toua. En momboung mog senggai. Dara en maires toua senggai. Gin, kaba, ELOHIM men merna senggai, gedig en esa len aud cinogo gus gus, naugb len leiya augwan asesa toua. Dara dan deiya, doba len logug Domba gini bomom sug nosohob. Doba en eigouhw ucugwohob. 5:7 Dangga, kaba, en eihwedaud sud hom geigtou se maija moc ingga. Hanoba en eic surad meh goud graga dau en mesira misen toua. 5:8 Gin dauwohob, kaba, ara hogu merireseb, dara mougtir merug sud hom hogu edeisu graga, kaba, len laugwan leijeboho lamuhumlo deseino Domba gini. Astesda dau len, kaba, en os isadum. Dara mohoi aibibra dau emas atij an areg men ouwadebeda icira en mesira toua. Men ouwadebeda gini, kaba, ansins dag ELOHIM men lusud meren gocuncum. 5:9 Sug len leijeboho lamuhumlo deseino Domba dag ginohob, kaba, len lohwaresgwemer lagahugouhw an en. Dara areg len lohu gini, kaba, sud hom ingma en emohu touebma, doba dag menenau namcir. Hanoba len lohu dou en, lendagai: Banin eng ban aboho agas edeinyum namcir naugb sug ban beic surad hom gini. Hanoba ban bemeila sidgod dau toua. Anai ban beic ban abugwihi bancoho aga lusud dau astesda meijouhuda, dara leci, dara merusur, dara mougt mera medam meren hancob augwan dou ELOHIM. Anai len logug ban bomom debin ginohob. 5:10 Dauwohob, kaba, ban beigdoumesa len meroho dag gembala naugb len leic ara ara dag lauwaharo dou ELOHIM. Dara ban besedeb len naugb len ledag lusud se cinogo gini meren mougt mera medam se lona sug ban becicugwen gin toua. 5:11 Sug dan douman gin dauwohob, kaba, dan deiya deit, doba malaikad ribu einyana gougwa gedig emedeinyum naugb sug lusud lecicero, kaba, len lesa acec maija moc, dara ara hogu merireseb, dara mougtir laugwan gin toua. Hanoba dan douman. 5:12 Doba len laugwan lagahugouhw an Domba dara merir medam toua, lendagai: Ban aboho agas edeinyum naugb sug emen emagahugouhw an ban. Anai ban aboho eb taiba, dara aiga augwan, dara ban absoho mougb namcir. Dara ban abu ouforoho naugb ban becinaga meijouhw augwan asesa. Dara ban abubisamougb naugb ban bahasesei dara ban besinsin augwan touohob. Dangga hang, emen emeigdoumesa ban aboho, dara emesijaresa ban, dara emen emen sijo dou ban toua terimda. 5:13 Dauwohob, kaba, dan douman deit, doba leng se bogo, dara cinogo, dara cinogo mei, dara dum mohu an areg ELOHIM esinsin se ginohob, kaba, len laugwan lagahugouhw an ELOHIM dara Domba lan ucan gin toua, lendagai: Emen emagahugouhw an bang beigtou se maija moc gini dara Domba, yan yahwas namcir. Hanoba emen emeigdoumesa yan maijoho agas medam, dara emen emesijaresa yan beb huhugb terimda toua. Anai yan maijubisamougb naugb augwan toua namcirohob. 5:14 Sug len laugwan lagahugouhw an ELOHIM dara Domba dag ginohob, kaba, ara hogu merireseb graga len louma debin gin ucan toua deit, lendagai: Areg yen yohu gin, kaba, asesa dag misen namcir. Dauwohob, kaba, mougtir graga len toua leijeboho lamuhumlo naugb len lesijaresa lan toua deit.

Sondapa 6

6:1 Sug dan douman areg graga augwan dauwohob, kaba, dan deiya deit, doba Domba en eila sidgod hom dau surad ingga. Hang dan douman sud hom dau ara hogu merireseb graga en arougb sud hom dara mer dag bagar mougb ucan gin deit, endagai: Ban bida. 6:2 Dangga dan deiya, doba sud hom geigtou se kuda medgomori en ouwaden dau bogo dig cinogo naugb en aiyan men moc len laugwan meroho obsara namcir. Anai dan deiya, doba en os hu hom icira en mesira. Dara len leic sogo mesira an meh dou en toua naugb sug en eg se mougt. Dara men kuda, kaba, ogoufu toua. 6:3 Sug Domba eila sidgod gedig hwai dauwohob, kaba, dan douman deit. Doba ara hogu merireseb gedig hwai en arougb sud hom ucan gin toua, endagai: Ban bida. 6:4 Dangga dan deiya kuda hom agunya deit. Dara sud hom geigtou se kuda medgomori ingga, kaba, len leic goubesa dou en naugb en edug gesgigouhwesa dau lusud se cinogo augwan. Dauntoba len merdoc dag hom deitero. Doba len lesim ucucugb terimda. Anai dan deiya, doba len leic krawan gagas medam hom dou en. Dara men kuda toua gahan namcir. 6:5 Sug Domba eila sidgod gedig homoi dauwohob, kaba, dan douman, doba ara hogu merireseb gedig homoi en arougb sud hom ucan gin deit, endagai: Ban bida. Dangga dan deiya, doba kuda gogor hom, dara sud hom geigtou se kuda medgomori ingga, kaba, en os ara hom icira en mesira naugb en aing ara men gogom. Anai en, kaba, men goubesa inggebga naugb en eic sir dou lusud se cinogo augwan toua. 6:6 Dauwohob, kaba, dan douman, doba sud hom se ara hogu merireseb merufu, en esulou sud hom geigtou se kuda gogor medgomori ingga ucan deit, endagai: Cum, sir medam, kaba, sud hom men siouwa se lona hom augwan edeinyum tramdad mougb hom, dara wobera mougb homoi dous. Doba mani labora dara anggur mohu, kaba, ban bemogod dau lenlo. Doba ban barges ban absira dau namcir. 6:7 Sug Domba eila sidgod gedig hogu dauwohob, kaba, dan douman ara hogu merireseb gedig hogu en arougb sud hom ucan deit, endagai: Ban bida. 6:8 Dangga dan douman, doba yen youman deigeigouhw. Anai dan deiya, doba kuda gedecdaha hom agunya. Dara sud hom, moho Gomom, en eigtou se kuda medgomori ingga toua. Dara sud hom, moho w Seol, en toua oucan en dig medigo. Hang len leic goubesa dou lan naugb lan lagod lusud hom dau ara hogu se cinogo augwan ogdoc krawan, dara sir, dara acar, dara aremeta mog mog lomom namcir toua. 6:9 Sug Domba eila sidgod gedig sergem dauwohob, kaba, dan deiya deit. Doba lusud leinyana gougwa len leigtou se ELOHIM men boromei geb se bogo meniha. Anai len, kaba, len lemarges dau sug len lesai ELOHIM en mer eisaugb Yesus. Dara los ladi en moho deseino lusud touwero. Doba len les agadgeij naugb len leicara laimo dag gin terimda. Hang len gus lemeic gomom dou len icira gin toua. 6:10 Dangga hang, len leiyagarij ELOHIM dara merir medam esesa terimda, lendagai: Banin, kaba, ban abubisamougb, dara becabeci namcir. Dara ban baimo areg se geica an lusud toua terimda. Dangga aiseba ban bemauni emen emugwihi ucugb dou leng se cinogo gaiha? Anai len leic gomom dou emenohob gina? 6:11 Doba ELOHIM oho mer debin len, endagai: Yen yeigtou yateteij gurerei deit, terimda len leic gomom dou yen meijaguner dara yen meigdamouwer gedig mougweb, aninim dag yen touahabi. Anai len toua lemobsara dau danero. Doba len laimo yen naugb len leicara laimo dan touohob. Sug len toua louwasohob, kaba, dan demauni yen meijugwihi dou leng leic gomom dou yen len laugwan ucugb toues. Sug en oho mer debin len dag ginohob, kaba, en eic sansun gogouf cucugb gansins debin gin dou len toua. Anai len lemobsara dau ELOHIM touwero. Doba len les agadgeij naugb len leicara laimo en terimdohob. 6:12 Sug Domba eila sidgod gedig senggem dauwohob, kaba, yen youman deigeigouhw deit. Anai dan deiya, doba inyomda medam eisa betir cinogo. Dara igda lona toua eperwei ogorgor dag lobeinya namcir. Dara igda loba, kaba, eperwei ahanihen, aninim dag mogwihi toua. 6:13 Hanoba tebeij geb se bogo, kaba, len laugwan log dau gaden se cinogo gabeda. Aninim dag sogo moho ara men mera moboubouhw ebrera se cinogo sug loungmen medam eisa betitir toua. 6:14 Dara bogo toua oud debinim bediyebeiya namcir. Aninim dag surad meh sug lusud loud debinim. Dara menmod, dara lomos, kaba, len laugwan locuc dau len meruhw toua. 6:15 Dangga lusud meren mougt mera medam, dara leng meroho agas, dara sadodor meren mougt mera medam, dara leng merisoho mougb, dara leng merug mog an sogougwir, dara lusud misen, len laugwan len lougb aud menmod dara igdahab gouji naugb sug len lecgoneh len merug se igdohos mes dara igdahab maran toua. 6:16 Hanoba len leiyagarij len, lendagai: Yen yeij naugb yen yaihiron dougwo emen, dauntoba sud hom geigtou se maija moc ingga en emeiya emen touwero. Dara yen yaihiron emen dougwo Domba men gogom areg en esedeb naugb emen gin toua. 6:17 Anai lona naugb sug lan lagod gogom deinaugb emen, kaba, ebijohob. Hang sud hom ingma emaiyan medocesem naugb gin touwero.

Sondapa 7

7:1 Sug dan douman dau areg len leiyagarij menmod dara igdahab an ginohob, kaba, dan deiya deit. Doba malaikad merug hogu len lesa se cinogo menmougb hogu naugb len lesedougwo loungmen mohora hogu. Dauntoba len lemeisa naugb lemogod lonog, dara dum, dara sogo augwan augwougb touwero. Doba len leigtou naugb cumougt sug edagasahabi. 7:2 Dauwohob, kaba, dan deiya deit, doba malaikad hom areg en os ELOHIM Geis Huhugb Sugraga men hugba se en mesira, kaba, en agunya dau sug igda eisaugb. Sug en edebeij malaikad merug hogu gragohob, kaba, en en dougwo len, dauntoba len lemogod areg geb se cinogo dara dum mohu ginlobma. Doba len leigtou lateteijahabi, anai ELOHIM eic goubesa dou len naugb ginohob. 7:3 Hanoba en enara dou len, endagai: Yen yemogod areg geb se lonog an sogo, dara areg geb dig dum mohu augwanlobma. Doba yen yeigtou yateteij terimda emen emeic maman ELOHIM men hugba naugb emen emadi hugba se men sogougwir len laugwan mersdemaga nosa dauwahabi, yen yemogod augwan daiyamo. 7:4 Dara dan douman dau merug hosa gedig malaikadir len lesedeb naugb len led hugba se len mersdemaga toua. Anai malaikad graga, kaba, en enara dou dan, endagai: Emen emesedeb naugb sug emen emedi hugba se astesda meijouhuda dau leng Israel len laugwan ribu sud senggem hogu edeisu len mersdemagohob. 7:5-8 Hang dau meijouhuda Yehuda, Ruben, Gad, Aser, Nabtali, Manasi, Simion, Lewi, Isakar, Sebulon, Yusub, dara Benyamin, kaba, emen emeic hugba emadi merug ribu sisa hobjerai len mersdemaga toues. 7:9 Sug dan deiya areg graga dauwohob, kaba, dan deiya deit. Hanoba dan douman toua. Doba yen youman deigeigouhw, anai dan deiya lusud leinyana gougwa dau astesda mougt mera gouji meren hancob, dara astesda meijouhuda, dara astesda dau merusur, dara astesda dau leci augwan, kaba, len laugwan lesa deseino sud hom geigtou se maija moc dara Domba lan namcir. Dangga sud hom ingma en emecic len touwero. Leng gin, kaba, len laugwan leg sansun gogoufu. Hanoba len los duleg meh icira len merisira toua. Anai len merdoc eigouhw an sud hom geigtou se maija moc dara Domba lan namcirohob. 7:10 Hanoba len lagahugouhw an lan dara merir medam, lendagai: Emen emagahugouhw an bang emen ELOHIM, gedig ban beigtou se aban maija moc, dara emen Domba yan namcir. Anai yan yaigdoc emen dau sesar men gogom augwan aud maireseb menau geb huhugwohob. 7:11 Dangga malaikadir gedig len lesa acec mougtir merug sud hom hogu edeisu dara ara hogu merireseb sug len louman lusud leinyana graga len merir an ginohob, kaba, len leijeboho lamuhumlo deseino ELOHIM se men maija moc naugb len louma debin gin dou en toua. 7:12 Hanoba len lagahugouhw an en, lendagai: Areg len gin leigdoumesa ban aboho an ginohob, kaba, augwan asesa dag misen namcir. Anai banin eng abu ouforoho naugb ban becinaga aremeijouhw augwan asesa namcir. Dara ban aboho eb taiba dara aiga augwan. Dara ban abubisamougb naugb ban bahasesei dara ban besinsin augwan touohob. Dangga hang, emen emen sijo, dara emen emeigdoumesa ban aboho agas medam namcir toua. Dara emen emesijaresa ban toua terimda. Augwan gini asesa dag misen touohob. 7:13 Sug malaikadir lagahugouhw an ELOHIM dag ginohob, kaba, sud hom dau mougtir merug sud hom hogu edeisu en eijidougwo dan ucan gin deit, endagai: Gara len eng len leg sansun gogoufu gina? Dara len len daugiro toua? 7:14 Doba dan dauni en mer ucugb, dendagai: Adehsud, ban bens meijouhw gin dou danahabi. Anai banin dous eng becinaga augwan asesa dau ginohob. Dangga en ens meijouhw augwan asesa dou dan toua, endagai: Len gin, kaba, len lemobsara dau gogom medam areg lusud leic dou lenohob gin touwero. Doba len laiyan merdocesem naugb len laimo ucina mog erij aud gomom icira ginohob. Hang meren geicara gin, kaba, eic dag sesar men gogor hom emeb se len toua deitero. Doba Domba en mogwihi edu meren sansun augwan becabecohob. 7:15 Hang len lemesa deseino ELOHIM men maija moc naugb len lemeic ara ara dag lauwaharo dou en se men tuari gini besesa terimda toua. Dara areg gogom hom emeb naugb len toua deitero. Anai sud hom geigtou se maija moc gin, kaba, en oiharaga len. Hanoba en eseyeiyo len dougwo areg gogom augwan beb huhugb namcirohob. 7:16 Hang sir, dara merij emeber, dara igdes mohora emogod len. Hanoba cinogo men emesij len toua deitero. Doba augwan gini arges dau len namcir. 7:17 Anai Domba gedig en eigtou se maija moc medi ingga, kaba, en edag gembala naugb lenohob. Hanoba en einoisa len aud duhu hom, gedig mer edeij bohw besesa terimda, naugb eic maireseb menau geb huhugb dou len toua. Hanoba len lemeb toua deitero, doba len merdoc ebtou namcir. Anai ELOHIM enin ogunin len meridruh augwan dau lenohob.

Sondapa 8

8:1-2 Sug Domba eila sidgod gedig senggai dauwohob, kaba, dan deiya deit, doba ELOHIM eic higbei senggai dou men malaikad merug senggai, gedig len lesa deseino men maija moc graga naugb len laimo en mer an namcir. Dangga sug leng se bogo leiya dag gin, kaba, len lemenara touwero. Doba len leigtou dag lodinabena anir itoterba toua. 8:3 Dauwohob, kaba, malaikad hom gos dabei hom dau emas icira en mesira, kaba, en agunyen deit naugb en esa deseino ELOHIM men boromei gouwaharesa. Sug en edebeij boromei ginohob, kaba, len leic areg mena ouwadebeda einyana dou en naugb en eic augwan gini, bahurim dara areg leng lomom graga len laugwan leiyagarij ELOHIM an gragohob. Anai meren gomom gini dag gouwaharo toua. Sug en eic areg mena ouwadebeda dara leng lomom graga meren gocuncum, bahurim se men dabeiyohob, kaba, en etiniha gin augwan taiba ELOHIM men boromei geb ino men maija moc ingga toua. 8:4 Dangga smougb moro eisaugb an gin augwan dau malaikad geigtou deseino ELOHIM en mesira aud ELOHIM terimda. 8:5 Sug en asaih smougb moro edinohob, kaba, en eic dabei naugb en asgun smougb mor dau boromei graga ucugb se dabei mes. Hanoba en os dabei an smougb mor ingga naugb en etiniha augwan gini se cinogo gin toua. Dangga dan douman, doba bagar mougb ebiji. Dara mer medam oucuc anim. Dara dan deiya bagar mouf ehinya. Dara inyomda medam eisa ucan gin toua. 8:6 Sug malaikad graga en etiniha smougb mor se cinogo ginohob, kaba, malaikad merug senggai graga, len lesedeb naugb len lohw meren higbei senggai geb icira len merisira ingga toua. 8:7 Dangga sug malaikad hom gaimougtut en ohw men higbeiyohob, kaba, los an mogo dara smougb gahurim dara mogwihi obsara dau bogo debin cinogo augwan. Hang hom dau ara homoi dau sogo dara arec mec an areg geb se cinogo gus gus, kaba, smougb ait augwan gini mor mor namcir. 8:8 Sug malaikad gedig hwai en ohw men higbei ucan deit, kaba, malaikad gus len lerba smougb medam, aninim dag menmod gouji, se dum mohu. Dangga dum mohu augwan ekeba dau ara homoi eperwei dag mogwihi namcir. 8:9 Dauwohob, kaba, areg geb se dum mohu, kaba, hom dau ara homoi len lomom. Dara ij, kaba, smougb ait hom dau ara homoi dau augwan mor mor namcir toua. 8:10 Sug malaikad gedig homoi en ohw men higbeiyohob, kaba, tebeij medam hom gedig en mouf eririj dag smougb mouf en obsara dau bogaden se cinogo gin toua. Sug en obsara dau bogo se cinogo ginohob, kaba, en ekeba hom dau ara homoi dau astesda duhu mem dara duhu mer augwan namcir. 8:11 (Tebeij gin, kaba, en moho dag Gedougdaha.) Hang hom dau ara homoi dau duhu mem dara duhu mer eperwei dag gedougdaha toua. Dangga lusud leinyana sug len leg duhu gin, kaba, len laugwan gini lomom. Anai duhu eperwei dag gedougdaha namcirohob. 8:12 Sug malaikad gedig hogu en ohw men higbei deitohob, kaba, len logod igda lona, dara igda loba, dara hom dau ara homoi dau tebeij augwan meren mouf nagama dau toua. Dangga hang, igda lona emerba mohora dau lonamen terimda edebeij loba toua deitero. Doba sug edebeij se losogohob, kaba, eic dag lobeigbogohob. Dara igda lona dara tebeij len lemerba meruf dag nosa toua deitero. Doba deinyor sug lona esga, kaba, len larges meruf doc sungga touohob. 8:13 Dauwohob, kaba, dan deiya bemihi medam hom sug en ohw bainoc se bogo meniha. Hanoba dan douman, doba en eiyaga dara eiman dou lusud, endagai: Ayou, dan indoc erij an yeng yeigtou se cinogo yen yaugwan namcir. Anai malaikad merug homoi merugwengginaba. Sug len lohw meren higbei, kaba, gogom medam en baiyan yen yaugwan dangga.

Sondapa 9

9:1 Sug malaikad gedig sergem en ohw men higbei, kaba, dan deiya deit. Doba tebeij hom en og dau bogaden se cinogo gini. Sug en og se cinogo ginohob, kaba, len leic gusin dou en naugb en ec misis dau ijou mes toua. 9:2 Sug en ec misis dau ijou mesohob, kaba, smougb moro medam agunya dau ijou mes ingga. Aninim dag smougb moro medam agunya dau smougb meiyo gouji hom toua. Dangga moro eisaugb baihiron dougwo igda lona dara bogo meniha augwan ebeigbogo namcir. 9:3 Hanoba eic dag amo einyana gougwa len lagunya dau smougb moro ingga naugb leberera se cinogo gin toua. Dauwohob, kaba, malaikad gec misis dau len graga, kaba, en eic goubesa dou len naugb len lau lusud, aninim dag arou geb se cinogo gini sug len lau lusud toua. 9:4 Sug en eic goubesa dou lenohob, kaba, en esulou len debin gin deit, endagai: Yen yemau areg geb se cinogo gini dag arec, dara aremec, dara sogo hom touwero. Doba yen yeiya dau lusud areg malaikad lemedi ELOHIM men hugba se en mecdemagaro, kaba, yan yau len ingga dous. 9:5-6 Hanoba yen yemeic gomom dou len touwero. Doba yen yeic mog erij medam dou len se igda sergemahabi. Dangga se lona ingga, kaba, lusud meru en dour naugb len lomom dedemeda dau ginda. Anai sug amo au len, kaba, erij medam, aninim dag sug arou au len toua. Hang len louwan lehilon ucina, dauntoba len lomom dau gin toua. Dobnaro. Anai gomom ougbdedau len namcirohob. 9:7 Amo gin, kaba, len merucbobaga aninim dag kuda sug lusud lesedeb len naugb sug len lesara. Dangga hang, len lemeg sogo mesira an meh dau emas se len merugt. Dara len merbes, kaba, aninim dag lusud misen len merbes toua. 9:8 Hanoba len merugt modi, kaba, agas medam, aninim dag ligida merugt modi. Dara len merugtimei eririj, aninim dag mihibei mog mog medam hom, moho w singa, en mogta toua. 9:9 Dara areg len leg dougwo len meruhumes men mocbobaga, kaba, aninim dag merila einyana dau kermum. Dara sug len lohw, kaba, len merubisamougb, aninim dag kuda merohora mougb sug len lohugouhw keropo an sadodor naugb sug lesara toua. 9:10 Dara len mersera toua, meren goubesa inggebga naugb len leic mog erij medam dou lusud se igda sergem gini. Anai len mersera gin, kaba, aninim dag arou meismobo naugb sug len lau lusud toua. 9:11 Amo gin, kaba, meren mougt mera medam lusud leija en moho se lec Ibrani mer dag Abadon, era Sud Hom Geic Mor Mor Dou Lusud. Doba se lec Grika mer, kaba, len leija en dag Apolion. Anai en, kaba, en edag malaikad hom gesedougwo ijou mes graga an len toua. 9:12 Gogom hom gin geino obsara dauwohob, kaba, yen youman deigeigouhw namcir. Anai gogom hwai ucan deit inggebgaba. 9:13 Dangga sug malaikad gedig senggem en ohw men higbeiyohob, kaba, dan douman. Doba sud hom en mer agunya dau boromei dau emas men mobog hogu geb deseino ELOHIM men maija moc ingga naugb en enara dou malaikad gedig senggem gos higbei ucan gin toua. 9:14 Hanoba en arougb en, endagai: Ban beihweda se duhu Eprata mebera naugb ban bedesga aigdaga dau merna mog mog merug hogu gedig len lecba len deb se duhu mebera ingga toua. 9:15 Dangga sug malaikad en esga aigdaga dau merna mog mog merug hogu ginohob, kaba, len leda naugb len logod lusud hom yom dau astesda homoi len laugwan lomom toua. Anai arisogomoc, dara igda, dara lona, dara cumougt naugb sug len logod lusud lomom dag gin, kaba, ELOHIM esedeb augwan gini naugb len debohob. 9:16 Dara men sadodor gedig len laimo merna mog mog merug hogu gin, kaba, len merug ribu einyana dag lebedero namcir. Anai dan douman, doba len laugwan ladedim dag ginohob. 9:17 Dara dan deiya len laugwan leigtou se kuda meridgomori. Dara len leg sansun dau kermum toua. Ligbum, kaba, len leg sansun gahandidi dag smougb mouf. Lingma, kaba, len leg sansun gaugweda, aninim dag igdahab mera eisaugb, moho w nilam. Dara ligbum deit, kaba, len leg sansun gohoseri dag igdahab gohoseri toua. Doba meren kuda, kaba, len merugt aninim dag mihibei mog mog medam hom, moho w singa, en mougt. Hanoba smougb mougb, dara smougb moro, dara smougb moro dau igdahab gohoseri augwan agunya dau kuda merirs esesa terimda toua. Dan decinaga gini, anai Mena Gogoufu ogod dan domom. Hang dan demeiya kuda len merucbobaga dara areg leng leigtou se kuda meridgomori ingga, len leg augwan dag misen touohob. 9:18 Dangga ogdoc smougb mouf, dara smougb moro, dara smougb mouf dau igdahab gohoseri gin, kaba, len logod lusud hom dau merug homoi len laugwan lomom ogdoc gin toua. Anai areg gagunya dau len merirs, kaba, men goubesa edeinyum naugb ginohob. 9:19 Goubesa gin, kaba, emeb se len merirs dousero. Doba eb se len mersera toua naugb sug len leic mog erij medam dou lusud namcir. Anai se len mersera mob, kaba, edag hinogo einyana merugt mera esa iririm naugb sug len lau lusud touohob. 9:20 Doba lusud gedig len lemomom ogdoc gogom homoi ginero, kaba, len lemarges dau sug len lesijaresa merna mog mog. Hanoba len lemasid lenin dau sug len lecguna dou meren seiseij dau emas, dara perag, dara kermum gohoseri, dara igdahab, dara sogo augwan touwero. Doba len leic merus naugb len lecguna dou seiseij areg len lesinsin se len merisira gin terimda. Doba areg len lecguna dou gin, kaba, len meriresi emai naugb len lemeiya lo asesa. Dara len lemouman areg lusud lacgeij dau len. Dara len lemec merohora naugb sug len lousa len touwero. Doba len leb augwougb dous. 9:21 Dara len lemahau dau sug len lohudara, dara les len gus. Dara len lagaresa lusud merdoc mes. Dara len merisira ebsa ligida aibibrida. Dara sug len leiyohora, dara lecincara, dara lesedi len gus meren aremougb touwero, doba len leic merus naugb len leicara laimo augwan gini smougb mougb terimda.

Sondapa 10

10:1 Sug dan deiya areg graga augwan dauwohob, kaba, dan deiya, doba malaikad hom deit, gedig en mobisamougb namcir, kaba, en ouwaden dau bogo se cinogo gini. Sug en en, kaba, umer odundun en maga. Dara sidgodgo toua ecgun aga en mougt. Dangga en mebes toua esesilo, aninim dag igda lona mohora. Dara en mohora hwas toua mouf eririj aninim dag smougb mouf gererij namcir. 10:2 Dara en os surad meh mogurei hom geh teiteiyohob icira en mesira toua. Dangga sug en ouwaden se cinogo ginohob, kaba, en erba mohora misen baiyan dum mohu. Hanoba en erba mohora metigi baiyan dig lonog. 10:3 Dauwohob, kaba, en eijara dour. Dara en mer gin, kaba, aninim dag mihibei mena, moho w singa, sug en esa mer toua. Sug en eijara gin, kaba, bagar mougb senggai mougb eiseisum len launi malaikad graga en mer ucugb dou en deit. 10:4 Sug len lenara merir edinohob, kaba, dan desedeb naugb dan dog areg len launi dou malaikad graga augwan se indan surad gini toua. Doba dan douman mer hom dau bogo en dougwo dan, endagai: Areg ban bouman dau bagar mougb senggai len merir ginohob, kaba, ban bemog augwan se aban surad touwero, doba ban betin se banin abdoc mes dous. 10:5-7 Sug mer hom dau bogo en dougwo dan dag ginohob, kaba, malaikad graga en os dou dan ucan gin deit, endagai: Areg ELOHIM esedeb naugb Lona Gouwedoc gin, kaba, en emeigtou emateteij. Dara en emecgoneh augwan gini dau lusud toua deitero. Doba se lona sug malaikad gedig senggai en ohw men higbei, kaba, en eicara esogwa deisa enin mogtimei mohw an augwan gin namcir, aimo dau areg en ens deb dou leng lesai en moro sug nosa touohob. Sug malaikad graga os augwan gini dou danohob, kaba, en ou mesira misen augb bogo. Hanoba en ou ELOHIM en moho debin gin toua. Anai ELOHIM, kaba, en eis huhugb sugragohob. Hang en ahasesei bogo, dara cinogo, dara dum mohu. Dara en esinsin areg geb se gin augwan toua. 10:8 Dauwohob, kaba, dan douman mer hom genara dau bogo dag graga, en enara dou dan ucugb deit, endagai: Ban beihwedaud malaikad gedig en mohora homa esesa dum mohu, dara en mohora homa esesa lonog gini. Hanoba ban bedeic surad meh mogurei hom geh teitei dau en mesira toua. 10:9 Dangga sug dan deihwedaud malaikad ginohob, kaba, dan dacgeij en naugb en eic surad meh mogurei hom gini dou dan toua. Doba en arougb dan, endagai: Ban beic surad meh gini, hanoba ban bet toua namcir. Sug ban bet, kaba, ahaufoufo se ban abirs dag mohu. Doba sug edebsa ban abinuhwa, kaba, edougdaha namcir. 10:10 Dangga sug dan deic surad meh mogurei gini dau en mesirohob, kaba, dan det toua. Sug dan det dag gini, kaba, ahaufoufo se dan indirs. Doba sug bedebsa dan indinuhwa mesohob, kaba, edougdaha namcir. 10:11 Dauwohob, kaba, sud hom graga en arougb dan ucan gin deit, endagai: Ban bida naugb ban besai ELOHIM en moro an gogom areg en esedeb se surad gini augwan dou lusud, dara merusur, dara astesda len leci an meren mougt mera medam, len laugwan toua. Anai gini aimo dau areg ELOHIM esedeb naugb banohob.

Sondapa 11

11:1 Sug sud hom mer graga arougb dan dag ginohob, kaba, en eic ameiji maga hom dag ijouhugwa dou dan. Hanoba en arougb dan deit, endagai: Ban bodo gini naugb ban bedeij ELOHIM men tuari dara men boromei geb acec augwan. Dara ban becic lusud areg en esijaresa ELOHIM se men tuari gini len laugwan toua. 11:2 Doba acec ELOHIM men tuari dig nena, kaba, ban bemen ginero. Anai en eic augwan gini dou lugmahara naugb len laiyan men Cinogo Gecabeci ingga se igda sud hwai hwai edeisu ginohob. 11:3 Doba se lona sug len laiyan men cinogo gin, kaba, dan desa indan logodeh lahwai aud len. Hanoba dan deic goubesa dou lan naugb lan lesai ELOHIM en moro areg en esedeb ginohob se lona ribu hom huntun hwai mos senggem edeisu dou len toua. Hang sug lan lemesai ELOHIM en moro dou len gin, kaba, lan lag sansun gogor dag lobeinya dau aremeta mos, dag gansins dou len se lona augwan gin toua terimda. Dauntoba sug lusud len leiya, kaba, len lesga meren sesar. Anai areg lan lesai dou len, kaba, ogom medam namcir. 11:4 Anai lan, kaba, lan ladag sogo Saitun maga hwai, dara lan ladag mohora hwai smougb mougb ebsa gin toua. Hanoba lan lasa deseino ELOHIM gin terimda naugb sug lan laimo en mer an areg en arougb lan an gini. Anai en, kaba, en edag lusud se cinogo augwan meren mougt mera medam enohob. 11:5 Dangga gareg en esedeb naugb en eic mog erij dou lan, kaba, smougb agunya dau lan marirs naugb ait maran moc. Hang gareg en eic mog erij dou lan ingga, kaba, hom en mena agau touwero. Doba len laugwan merur mor namcir toua. Anai gini aimo dau areg ELOHIM en esedeb naugb len danggohob. 11:6 Dara sug lan lasai ELOHIM moro dou lusud ingga, kaba, ELOHIM eic goubesa dou lan naugb lan lauhw dougwo bogo. Dauntoba los emes se lona augwan gin touwero. Hanoba en eic goubesa dou lan naugb lan laperwei duhu augwan dag mogwihi. Dara astesda sug lan lauwan, kaba, maran goubesa inggebga naugb lan lagod cinogo augwan an areg geic gogom dou lusud aingma aingma toua. 11:7 Doba sug lan lasai ELOHIM en moro gin bouwohob, kaba, aremeta gen dau ijou mes, kaba, en esara dara lan naugb en aiyan lan. Hanoba en eic gomom dou lan toua. 11:8 Sug aremeta eic gomom dou lanohob, kaba, en emec lan touwero. Doba en owun lan maroho naugb amsoho lan mardesa se cinogo moho agas hom men usmougb ingga deb. Lusud leija cinogo ingga laimeh an dag Sodom dara Mesir. Anai len letob lahwai graga maran mougt mera medam taiba sogo salib se cinogo ingga sug nosa touohob. 11:9 Dangga lusud dau astesda cinogo, dara meijouhuda, dara meren leci augwan sug len louman dau gin, kaba, len len naugb len louwa debin lan ingga mardesa se lona homoi mougwu gin toua. Dara gareg en esedeb naugb en ec lan mardesa, kaba, len lebehnehino dougwo en toua namcir. 11:10 Sug lusud se cinogo augwan len leiya, doba lahwai graga lan lamom dag misenohob, kaba, len logo ara gaihim debin lan. Hanoba len leic aremougb naugb len laic lan doum toua. Anai lan, kaba, lan laic mog erij medam dou len laugwanohob. Hang len merdoc emagahugouhw debin lan lamom gin toua. 11:11 Doba sug lona homoi mougwu gin ouwa dauwohob, kaba, ELOHIM en esa mena deb se lan naugb lan laisa dau gomom ucugb deit. Dangga sug lusud leiya dau gin, kaba, len laugwan merdoc omom namcir. 11:12 Sug lan laisa ucugwohob, kaba, lan lauman mer gouji hom dau bogo eija lan, endagai: Yan yaisaugb dig bogon. Sug en eija lan, kaba, umer eisaugb an lan abeba maran moc len laugwan meriresi dig bogo toueda. 11:13 Irir sug lan laisaugb dig bogo, kaba, inyomda medam eisa betir cinogo moho agas ingga, beinyeinya namcir. Dangga hang, lusud gedig len lemomombuma, kaba, len lemeic merus dou ELOHIM deitero. Doba len lesga meren sesar dou en, anai len lahau dau inyomda medam gini. Hanoba len leigdoumesa sud hom geigtou se gogouf cucugb se bogo en moho agas medam toua namcir. Anai len leiya, doba inyomda eisa betir hom dau ara sisa dau areg geb se meren cinogo ingga, eij baisoboro. Dara eic gomom dou leng mesir merug ribu senggai len laugwan touohob. 11:14 Hang gogom gedig hwai obsara dauwohob. Doba yen youman deigeigouhw. Anai gogom gedig homoi emagunya ucan gin dedemedes. 11:15 Dangga sug malaikad gedig senggai en ohw men higbeiyohob, kaba, dan douman, doba malaikad leinyana lagahugouhw medam se bogo, lendagai: Lusud se cinogo augwan, kaba, Bilis emoiharaga len deitero. Doba maman Adehsud, dara Krisdus, lan laperwei en mohw dag mougt mera medam naugb len laugwan deit. Dangga lan maroho emobsara deitero. Doba lan loiharaga len laugwan beb huhugb terimda. Anai maman Adehsud, kaba, en eigdoumesa Krisdus naugb en eigdoc lusud laugwan dau sesar men gogom augwanohob. 11:16 Sug malaikad lagahugouhw dag ginohob, kaba, mougtir merug sud hom hogu edeisu, gedig len leigtou se maija moc deseino ELOHIM, kaba, len leijeboho lamuhumlo deseino en, naugb len lesijaresa en ucan gin toua. 11:17 Hanoba len lagahugouhw an ELOHIM, lendagai: Bang ELOHIM Gedig Ban Beis Huhugb sugragohob, kaba, emen emen sijo dou ban terimda, anai ban abubisamougb namcir. Dara ban bedag Adehsud naugb ban aboho oiharaga augwan toua. Dangga ban bemamsoho lusud se cinogo augwan debero, doba ban bebiji naugb ban boiharaga len ucugb deitohob. 11:18 Hang leng medigo Yesus len laugwan merdoc esrougb an ban. Anai len leiya, doba lona edagasohob naugb sug ban bogod gogom deb naugb len an leng lomom len laugwan toua. Dangga gareg dau len en esara, dara gareg en ohudarohob, kaba, ban bemeic mor mor dou len toues. Anai ban abdoc esrougb an lenohob. Doba naugb leng lesai ban aburo, dara leng lahau dau ban, dau leng meroho eb taiba dara leng meroho eb tainya, kaba, ban besedeb len naugb sug ban beic meren siouwa dou len dous. Anai len lemedreg dau ban abir gin touwero. Doba len leicara laimo areg ban barougb len an gini augwan terimda. Hang ban bemouci len debinim naugb banohob. 11:19 Sug len lesijaresa ELOHIM dag gin dauwohob, kaba, misis se bogo ec dau. Hanoba lusud len leiya, doba ELOHIM Men Biruwa Gos Dou eb se men tuari mes ingga. Dauntoba len lecinaga dag areg en os deb dou len sug nosohob, kaba, en emedreg dau hom touwero, doba en aimo augwan an len namcir. Hang emeic dag bagar mouf, dara bagar mougb, dara inyomda, dara los an mogo medam, dara mougb aingma aingma eisa ucan sug len lec misis dau gin toua.

Sondapa 12

12:1 Dauwohob, kaba, gansins medam hom agunya se bogo deit. Anai dan deiya, doba igda lona mouf edag sansun gerba debin gida hom namcir. Dara en mohora hwas esesa igda loba, kaba, tebeij sisa hobjerai ehihim acec en mougt toua. 12:2 Eni deinyor sug en ouwadan meh. Dangga hang, en etarerij an namcir, anai en menuhwa erij medamohob. 12:3 Dara dan deiya gansins hom deit agunya se bogo meniha. Doba yen youman deigeigouhw. Anai dan deiya Wor medam hom sug en esa deseino gida graga naugb sug en ouwan omga en meh gin toua. En mos augwan ahan namcir. Dara en mougt senggai, dara en momboung mog sisa, dara astesda men mougt senggai gin, kaba, en eg topi hom, aninim dag mougt mera medam meren topi toua. Anai en moho eb taiba lusud laugwanohob. 12:4-5 Dara dan deiya deit, doba en esedougwo gida ingga. Dauntoba sug en ouwadan meh ginohob, kaba, en omga toua. Anai meh gin, kaba, ELOHIM esedeb en naugb en edag lusud se cinogo augwan meren mougt mera medam ginohob. Dauntoba en esedougwo len dara goubesa medam namcir. Dangga hang, Wor en medoc esrougb medam an gida meh gini. Anai dan deiya, doba sug en esedougwo gida ingga, kaba, en ebib mesira naugb agig tebeij hom dau ara homoi se bogo augwan terimda lobsara se cinogo gin toua. Dobnaro. Anai sug gida ouwadan meisi hom inegohob, kaba, malaikad esma en dau Wor graga. Hanoba en oho en aud ELOHIM se men maija moc gin toua. 12:6 Dara gida graga, kaba, en toua ougb dig lomougwisa dau Wor ingga namcir. Dauntoba ELOHIM eseyeiyo dara agauwesa en sungga se lona ribu hom huntun hwai mos senggem edeisu gin toua. Anai en esedeb usi hom sungga naugb enohob. 12:7 Sug gida ougb dig lomougwisa dau Wor ginohob, kaba, malaikad meren mougt mera medam hom, moho Mikel, an men logodeh len lebiji naugb len lesara dara Wor an men merna mog mog toua. Dauntoba len locirma len laugwan dau bogo namcir. Anai en, kaba, en augwohosa lusud se cinogo augwan naugb len lemaimo ELOHIM en mer deitero. Doba len laijahasero dau en naugb len lebesesar terimda. Hang meren usi ingma emeb naugb len se bogo toua deitero. Dangga Wor, kaba, en esan men merna mog mog ingga naugb len lebemocedou Mikel an men logodeh len laugwan icira gin toua. 12:8 Dobnaro. Mikel dara men logodeh len laiyan Wor an men merna mog mog len laugwan namcir. 12:9 Hanoba len lerba Wor medam gini dau bogo toua. Anai en, kaba, en edag hinogo gaimougtut. Hang en augwohosa lusud se cinogo augwan naugb len laijahasero dau ucina geica aud sesar touohob. Dara lusud leija en moho toua dag Bilis. Anai en, kaba, en ohobas ELOHIM men lusud maman deseino en lona loba. Dara len leija en toua dag Setan, anai eni sud hom gesedeh dougwo lusud toua terimda. Dauwohob, kaba, Mikel an men sadodor len lerba Wor medam se cinogo gini. Dara len lerba men merna mog mog len laugwan dau bogo ucan en toua. 12:10 Sug len locirma Wor an men merna mog mog len laugwan dau bogohob, kaba, dan douman, doba sud hom dau leng lomom se bogo icira sug len los ladi Yesus en moho se cinogo gini sug nosa, kaba, en ouma debin gin toua dara mer medam namcir, endagai: Lona naugb sug ELOHIM eigdoc maman mamsir se cinogo dau meren sesar men gogom augwan. Hanoba en oiharaga len ucugb dara men goubesa medam. Dara lona sug Krisdus en edag mougt mera medam, dara en moho aiga lusud laugwan toua, kaba, augwan edagasa namcirohob. Anai sud hom areg en ohobas maman mamsir an meren aremer deseino maman ELOHIM lona loba terimda, kaba, len lerba en dau bogohob. Hang en emdohobas len dag nosa deitero, doba len laiyan en bobsara namcir. 12:11 Anai en ahacugb gogom debin len terimdohob. Doba Domba, kaba, en mogwihi aihiron dougwo meren gogom augwanohob. Hang len lemahau dau sug lusud leic gomom dou len touwero. Doba len leic merus naugb len los ladi Domba en moho deseino len terimda. 12:12 Dangga yeng yeigtou se bogo gin, kaba, yen yaugwan yagahugouhw medam an gin namcir. Doba yeng se lonog, dara dum mohu, kaba, gogom medam eb naugb yen dous, anai Bilis en en aud yenohob. Dareg en medoc obgos medam toua, anai en ecinaga men lona gouji augwan ebeij deinyor sug ouwedocohob. 12:13 Sug sud hom graga enara dag gin dou leng se bogo dauwohob, kaba, dan deiya, doba Wor en osos ucucan gida hom gouwadan meh graga naugb sug en eic gogom dou en toua. Anai en ecinaga dag en emeinesa bogo deitero. Doba len locirma en dau namcirohob. 12:14 Dobnaro. Anai ELOHIM esedeb usi hom se lomougwisa naugb enohob, dauntoba sug en eseyeiyo en sungga se arisogomoc homoi mougwu dau hinogo gacgunog gini. Hang ELOHIM emeic mebera hwai, aninim dag bemihi medam mebera dou en naugb en ohw se lomougwisa dau hinogo gin toua. 12:15 Hang hinogo en esa duhu medam dau en mers ucan gida ingga, dauntoba duhu ougwan en namcir. 12:16 Dobnaro. Anai lonog oiharaga gida ingga. Hanoba en aga mers naugb en om duhu areg agunya dau Wor graga en mers ingga namcir. 12:17 Dangga sug Wor en eiya, doba gida graga ougb dau enohob, kaba, en medoc esrougb medam an en. Hanoba en eihweda naugb en osos ucucan gida graga en mehir gus gus areg en aimo ELOHIM men gomnomna. Dara areg os badi Yesus en moho deseino lusud len laugwan, dauntoba en esara dara len toua.

Sondapa 13

13:1 Dauwohob, kaba, dan deiya deit, doba aremeta hom en agunya dau dum mohu. Anai dan deiya Wor sug en esa se dum mebera naugb en eija enohob. Aremeta gin, kaba, en mougt senggai dara en momboung mog sisa. Se momboung mog gin, kaba, topi eb se astesda augwanda. Topi gin, kaba, aninim dag mougt mera medam meren topi. Dara se mougt augwan, kaba, len log moho hom areg eic ELOHIM moho bacecim se astesda gin toua. 13:2 Doba aremeta areg dan deiyohob gin, kaba, en maga dag mihibei mog mog, moho w tutul, en maga. Dara en mohora hwas aninim dag aremeta mog mog, moho w beluang, en mohora. Dara en mers, kaba, aninim dag mihibei mog mog, moho w singa, en mers gin toua. Dangga sug aremeta agunyohob, kaba, Wor eigdoumesa en moho naugb en eigtou desij en se men maija moc. Hanoba en eic men goubesa augwan dou en. Dara en eigdoumesa en moho agas medam naugb en esedougwo men lusud laugwan toua. 13:3-4 Dangga sug lusud leiya, doba Wor eigdoumesa aremeta graga dag meren mougt mera medamohob, kaba, len len sijo dou en. Hanoba len lesijaresa en an gin toua terimda. Dara len lesijaresa aremeta gen dau dum mohu gin toua. Anai len leiya, doba mougt hom dau men mougt senggai graga, kaba, mera egriri medam dag en omom an namcir, doba eingmos agauwesa ucucgwohob. Dangga hang, emeic lusud se cinogo augwan dag len louwa ucan en naugb len leimiman dau en terimda toua. Anai len leiya dag en emomom deitero. Doba en eisa dau gomom ucugwohob. Hanoba len lagahugouhw an en, lendagai: Sud hom ingma, kaba, en emaiyan ban touwero. Anai aban goubesa edreg dau lusud laugwan namcirohob. 13:5 Dara Wor eic goubesa dou aremeta graga naugb en enara dag lusud misen toua. Dauntoba en eic ELOHIM en moho bacecim namcir. Dara en eimiman enin moho deseino lusud an ara ara einyana. Hanoba en eic goubesa dou en naugb en aimo areg en ouwan augwan gin toua terimda, doba se igda sud hwai hwai edeisu dous. Anai se igda augwan gin, kaba, ELOHIM emen dougwo enero. Doba en amsoho en debin men geicara gin namcir. 13:6 Dangga sug Wor eic goubesa dou aremeta graga naugb en enara dag lusud misenohob, kaba, en ebiji naugb en eic ELOHIM dara leng leigtou se bogo len laugwan meroho bacecim toua terimda. 13:7 Hanoba en esara dara ELOHIM men lusud areg en ouci len debinim naugb enin se cinogo ginohob len laugwan naugb eic gomom dou len toua. Anai Wor eic goubesa dou en naugb ginohob. Dauwohob, kaba, en edag mougt mera medam dougwo lusud se astesda meijouhuda, dara merusur, dara meren leci, dara meren hancob augwan toua terimda. Anai ELOHIM emen dougwo enero. Doba se igda sud hwai hwai edeisu gin, kaba, en amsoho aremeta debin men geicara augwan gin namcir. 13:8 Dangga hang, lusud se cinogo augwan gareg ELOHIM emog len meroho se Domba men surad maireseb huhugb dau sug en esinsin cinogo ginbuma, kaba, len laugwan lesijaresa aremeta ingga terimda. Doba len gedig len meroho eb se Domba men surad maireseb huhugwohob, kaba, len laugwan lemesijaresa aremeta ginero. Doba len lasid lenin dau namcir. Anai Domba gin, kaba, len leic gomom dou en sug nosa. Doba en eisa dau gomom ucugwohob. 13:9-10 Gareg dau yen en moms ai, kaba, yen youman areg dan den dou yen graga augwan deigeigouhw namcir. Dauntoba sug aremer gin ebiji, kaba, yen yemobsara dau ucina mog erij gin touwero. Doba sug ELOHIM ouci yen debinim naugb enohob, kaba, yen yes agadgeij naugb yen yaimo ucina mog erij gin toua terimda. Anai sug yen yemesijaresa aremeta ginero, kaba, en agaigeij yen. Hanoba en eic gomom dou yen toua. Doba eigouhw naugb yen yemowun yenin dau ginero. Doba yen yaimo ucina gin terimda, anai augwan gini aimo dau areg ELOHIM enin esedeb naugb yen deb sug nosohob. 13:11 Dauwohob, kaba, dan deiya aremeta hom deit en agunyen dau cinogo mei. En momboung mog hwai aninim dag domba mena. Doba en mer, kaba, aninim toua dag Wor. 13:12 Sug en agunyohob, kaba, aremeta gen dau dum mohu nosa graga, kaba, en ogugwo men goubesa areg Wor eic dou enohob augwan dou aremeta gen dau cinogo mei gin toua. Dauntoba sug en eihwedig cinogo gus gus augwan, kaba, en enara baic lusud laugwan merdoc mes, dara en arougb len naugb len lecguna dou aremeta gacgunog gin toua terimda. Anai en mera egriri, doba eingmos agauwesa ucugb namcirohob. 13:13 Dara sug en arougb lusud naugb len lecguna dou aremeta gacgunog gin, kaba, en aben ganusbus medam aingma aingma debin gin toua. Dara gin dousero. Doba men goubesa inggebga naugb sug en esa smougb dau bogaden, abeba len meriresi toua. 13:14 Dangga hang, ogdoc ganusbus areg en aben se aremeta gacgunog en moho gin, kaba, en augwohosa lusud se cinogo augwan naugb len laijahasero dau ucina misen aud sesar terimda. Anai ELOHIM emen dougwo ginero, doba en amsoho en an gin namcir. Dauwohob, kaba, en arougb len naugb len lesinsin seiseij hom men mocbobaga, aninim dag aremeta gen dau dum mohu graga men mocbobaga toua. Anai en, kaba, lusud ledesugb en mougt mera egriri dara krawan sug nosa, doba eingmos agauwesa ucugb deitohob. 13:15 Sug len lesinsin aremeta gacgunog men mocbobaga ginohob, kaba, ELOHIM amsoho aremeta gen dau cinogo mei naugb en esa mena deb se mocbobaga. Dauntoba seiseij gini enara dag lusud misen dou len toua. Dangga hang, gareg en emecguna dou mocbobaga ginero, kaba, mocbobaga arougb sadodor naugb len leic gomom dou sud hom ingga toua namcir. 13:16 Dauwohob, kaba, aremeta gen dau cinogo mei graga en agodgod leng meroho eb taiba, dara leng meroho eb tainya, dara leng merisoho mougb, dara leng merunggwereij, dara leng ledag lusud misen, dara leng ledag sogougb naugb len led aremeta gen dau dum mohu graga men hugba se len merusutimei dig mesira misen, era se len mersdemaga toua. 13:17 Dangga gareg en ed aremeta gen dau dum mohu en moho, era men nomor se mosutimei, era mecdemagohob, kaba, len ingga eng lohw meren ara ara, dara len ledouma aremougb toua. Doba gareg en agada mos dau gin namcir, hanoba en emed aremeta gen dau dum mohu men nomor, era en moho ginero, kaba, len lemohw dara lemdoumara touwero. Doba len leigtou merei augwougb dous. 13:18 Doba areg gin augwan, kaba, naugb len gedig len merdoc obrugbsa meijouhw gin dous. Dangga gareg dau yen en mou ouforoho edeinyum naugb ginohob, kaba, en ecic aremeta gen dau dum mohu men nomor gin toua. Doba edag huntun senggem mos senggem senggem edeisohob, kaba, en ecinaga aremeta graga en moho dag misen touohob. Anai men nomor gin, kaba, aninim dag sud hom misen en moho ingga.

Sondapa 14

14:1 Sug dan deiya areg graga augwan dauwohob, kaba, dan deiya deit, doba yen youman deigeigouhw namcir. Anai dan deiya Domba graga sug en esa taiba mengarougb, moho Sion. Hanoba dan deiya lusud merug ribu huntun hom mos hogu hogu edeisu, gedig Domba ed enin moho dara en Mena moho se len mersdemagohob, len laugwan lesa desij en se mengarougb ingga toua. 14:2 Dauwohob, kaba, dan douman, doba mougb aninim dag lusud sug len lod isadum einyana se bogo. Isadum mougb gin, kaba, mougb eiji aninim dag duhu gesog ai mesihwa dara bagar mougb medam toua. 14:3 Dangga dan deiya, doba lusud merug ribu huntun hom mos hogu hogu edeisu graga, kaba, len laugwan lohu aresgwemer menau hom deseino ELOHIM se men maija moc. Dara ara hogu merireseb, dara mougtir merug sud hom hogu edeisu len laugwan toua. Aresgwemer menau hom gin, kaba, sud hom ingma en emohu gin mougwa hombuma. Dara en emecinaga meijouhw dau augwan gini asesa touebma. Doba lusud merug ribu huntun hom mos hogu hogu edeisu gin dous eng lecinaga meijouhw augwan asesa. Anai lenin dous eng Domba ancoho aga len dau leng se cinogo augwan. Hang ELOHIM eigdoc len dau sesar men gogom aud maireseb menau geb huhugb ginohob naugb sug len ledag enin men lusud toua namcir. 14:4 Anai len gin, kaba, len lemohw len meraga dou ligida gus mougwa hombuma. Doba len ledag ligib gedig len lemebarebma mogud dous. Dara len lemaihagab en mer touwero. Doba astesda ucina sug Domba eraga dagiro, kaba, len lesogwa deisa en mohotimei mohw dangga toua. Hang dau lusud gus se cinogo augwan, kaba, lenin dous eng Domba eic en mogwihi ancoho aga len. Hanoba en ouci len debinim dag mera mebin naugb len ledag ELOHIM maran lusud gin toua terimda. Aninim dag lusud louci mera mebin naugb len leic augwan gini dag lauwaharo dou ELOHIM toua. 14:5 Dangga aremer hom emdagunya debin len touwero. Doba len lecabeci deseino ELOHIM namcir. Anai len lemaideido dougwo Domba mougwa hom touwero. Doba len los ladi en moho deseino lusud aud gomom ginohob. 14:6 Dauwohob, kaba, dan deiya deit, doba malaikad hom ohw bainoc se bogo meniha naugb en esai Mer Geigouhw dau ELOHIM augwan gini dou lusud se astesda hancob, dara meijouhuda, dara merusur, dara meren leci, len laugwan mougwa hom deit. Anai ELOHIM en mer gin, kaba, emeperwei touwero, doba ebsugeb beb huhugb namcir. 14:7 Hanoba en enara dou leng se cinogo augwan dara mer medam, endagai: ELOHIM men lona naugb sug en ogod aremer gogom debin yen yaugwan, kaba, edagasohob. Dangga hang, yen yemeic meijus dou en deitero. Doba yen yahau dau en namcir. Hanoba yen yesijaresa en terimda, anai en eng ahasesei bogo dara cinogo dous. Dara enin eng esinsin dum mohu dara duhu mer augwan toua. 14:8 Gin dauwohob, kaba, dan deiya, doba malaikad hom agunya oucan malaikad geino graga deit. Dangga sug en agunyohob, kaba, en owun cinogo Babel an men geicara gecgu augwan toua. Hanoba en enara gouji dou en, endagai: Babel, ban, kaba, ban bedag cinogo moho agas medam. Dara ban abubisamougb naugb augwan toua. Doba aban lona naugb sug ELOHIM od ban baisoboro namcir, kaba, ebeij deinyorohob. Anai ban bemebehnehino banin abdoc mes dougwo areg gecgu mougwa hom touwero. Doba ban beic mog an areg gecgu gini dag ahwei mohu dou lusud se cinogo augwan naugb len laimo ban aud areg gogor. Dara len lecguna dou seiseij augwan touohob. 14:9 Dauwohob, kaba, dan deiya malaikad gedig homoi en agunya ucan malaikad hwai graga. Dangga sug en agunyohob, kaba, en en dougwo lusud, dauntoba len lemesijaresa aremeta gen dau dum mohu deitero. Doba len lasid lenin dau namcir. Hanoba en enara dou len dara mer medam, endagai: Gareg dau yen en esijaresa aremeta gen dau dum mohu, dara en ecguna dou men mocbobaga. Hanoba en emen dougwo lusud sug len louwan led men hugba se en mecdemaga, era en mosutimei medigo touwero. Doba en amsoho len an gin namcir, kaba, ELOHIM emamsoho en deb touwero. Doba en eic mog erij an men gogom medam dag anggur mohu dou en naugb en eg augwan toua. 14:10 Anai en medoc esrougb medam an sud hom gin namcirohob. Hang en emeic duhu bemaihirir anggur mohu gin touwero. Doba en eic anggur mohu gobgos mogud se mogahabi, en emeic dou en, bemeg. Hanoba en ederba en se dum smougb gedig igdahab gohoseri ebsa naugb smougb eic mog erij dou en, abeba malaikadir gecabeci dara Domba len laugwan meriresi toua. 14:11 Sungga, kaba, en emarges dau mog erij gin touwero. Doba smougb eic mog erij dou en beb huhugb namcir. Anai en emebehnehino enin medoc mes dau sug en esijaresa aremeta gen dau dum mohu. Dara en emecguna dou en mocbobaga. Hanoba en emen dougwo lusud sug len led en moho se en mecdemaga touwero. Doba en aimo augwan gin terimdohob. 14:12 Dangga hang, sug malaikad en dougwo lusud dag ginohob, kaba, esulou maman. Dauntoba maman mamobsara dau sug maman mamdoc ebdebin an Yesus. Dara maman mamarges dau sug maman maimo ELOHIM mohotimei mohw an areg en arougb maman an. Dara maman mamahau dau sug lusud leic gomom dou maman icira gin touwero. Doba sug ELOHIM ouci maman debinim naugb enohob, kaba, maman maiyan mamdocesem naugb maman maimo ucina mog erij gin terimda. Anai sug maman mahau dau sug lusud leic gomom dou maman, dara maman masijaresa aremeta gen dau dum mohu, dara maman mad men nomor se maman mamsdemaga, kaba, ELOHIM erba maman se dum smougb beb huhugb namcir toua. 14:13 Dauwohob, kaba, dan douman deit, doba sud hom esulou dan dau bogo icira gin toua. Hanoba en enara dou dan, endagai: Gareg en edag hom dara maman Adehsud ginohob, hanoba en emobsara dau gin touwero. Doba en es agadgeij se ucina mog erij gini terimda sug ouwedoc, kaba, ELOHIM emasidged en touwero, doba en eic geigouhw dou en namcir. Sug en esulou dan dag ginohob, kaba, en arougb dan naugb dan dog areg en en dou dan gini augwan se indan surad toua. Gin dauwohob, kaba, dan douman Mena Gogoufu en mer sug en ouma debin gin deit. Hanoba en enara dou dan, endagai: Areg sud hom graga esulou ban an gin, kaba, augwan asesa dag misen namcir. Anai gareg en emobsara dau ucina mog erij gini, hanoba en emahau dau sug lusud leic gomom dou en touwero. Doba en es agadgeij terimda, kaba, men geicara gini aiseisa en deseino ELOHIM. Hang en emaimo ucina mog erij toua deitero. Doba ELOHIM eic geigouhw dou en naugb en eigtou debin en mog erij beb huhugb namcir. 14:14 Sug dan douman aremer graga augwan dauwohob, kaba, dan deiya deit, doba yen youman deigeigouhw. Anai dan deiya sud hom men mocbobaga dag Lusud Meraguna Mebin en eigtou se umer mogo gogoufu hom. Se en mougt, kaba, en eg topi hom dau emas, aninim dag mougt mera medam meren topi. Dara en os kebta mecohw magab hom icira en mesira toua. 14:15 Dara dan deiya deit, doba malaikad hom en agunyen dau ELOHIM men tuari. Sug en agunyenohob, kaba, en arougb sud hom geigtou se umer mogo hom graga dara mer medam, endagai: Ban beij aber an aban kebta magab ingga naugb ban bagod areg gohoserohob dau cinogo augwan. Anai lona edagasa naugb gin namcirohob. Hanoba ban bouci meij augwan debinim toua. 14:16 Sug malaikad gini en arougb sud hom geigtou se umer mogo hom gragohob, kaba, en eic mebera an kebta magab. Hanoba en ogod meij areg gohoserohob se cinogo augwan toua. 14:17 Dauwohob, kaba, malaikad hom deit en agunyen dau ELOHIM men tuari se bogo. En toua os kebta mecohw magab hom icira en mesira, aninim dag sud hom geigtou se umer hom graga. 14:18 Sug en agunyenohob, kaba, malaikad gesedougwo ELOHIM men boromei naugb en ec areg mena ouwedebeda dou en, kaba, en toua en en. Dangga sug en enohob, kaba, en arougb malaikad gos kebta mecohw magab hom graga dara mer medam, endagai: Ban beij aber an aban kebta magab ingga naugb ban bagod anggur mera dau maga se cinogo augwan toua. Anai augwan eijogoij namcirohob. 14:19 Sug en arougb malaikad gin inegohob, kaba, en eic mebera an men kebta magab ingga naugb en agod anggur mera augwan dau maga namcir. Hanoba en erba augwan gini se ELOHIM men cinogo mes medam naugb en aiyan len toua. Anai cinogo mes gini, kaba, ansins dag gogom medam areg ELOHIM esedeb naugb leng merug mog ginohob. 14:20 Dangga sug en aiyan leng merug mog len laugwan dag anggur mohu se cinogo Yerusalem medigo dag ginohob, kaba, len merugwihi ohw beindaredeb eisaugb edebeij irir lusud merugt. Dara ohw baisoboro aigusi dag lusud lec se lona senggaiyahabi, len lemdebeij sug ouwedoc toua.

Sondapa 15

15:1 Gin dauwohob, kaba, dan deiya, doba gansins medam eb ainyes se bogo ucan areg graga deit. Gansins gini eic dan indoc omom dou dan namcir. Anai dan deiya, doba malaikad merug senggai sug len los ELOHIM men gogom senggai gouwedoc icira len merisira toua. Dangga sug len letiniha augwanohob, kaba, ELOHIM emeic gogom dou lusud toua deitero. Doba en arges mesira dau namcir. 15:2 Hanoba dan deiya, doba lusud leinyana gedig len los isadum icira len merisira len lesa se dum mohu hom mebera toua. Isadum gin augwan, kaba, ELOHIM enin eng eic dou lenohob, naugb sug len lagahugouhw an en terimda. Anai len gin, kaba, len lemesijaresa aremeta gen dau dum mohu. Dara len lemecguna dou men mocbobaga, dara len lemousa deisa lusud merir naugb len led aremeta men nomor se len mersdemaga touwero. Doba len lebehnehino lenin merus dau gin augwan namcirohob. Doba dum mohu gin, kaba, mei esgiraha aninim dag sogo mehir. Dara areg gahani dag smougb mouf aihiriri se dum mohu gin toua. 15:3 Dangga sug len lesa se dum mohu mebera gin, kaba, len lagahugouhw an ELOHIM toua, aimo dau areg ELOHIM men sogougb, moho Musa, dara ELOHIM men Domba, Yesus, lan lagahugouhw an en sug nosohob. Hanoba len lohwaresgwemer, lendagai: Adehsud ELOHIM Gedig Ban Abubisamougb, emen emeigdoumesa ban aboho an aban geicara. Anai augwan eigouhw medam dara moho agas namcir. Hang ban bemaimo ucina gagabgebi an lusud laugwan. Dara ban bemobsara aud sud hom touwero. Doba se aremer augwan, kaba, ban baimo ucina se geica dara gedag beim an len dous. Anai ban bedag Mougt Mera Medam Geis Huhugb Sugraga naugb lusud se cinogo augwanohob. 15:4 Dangga, kaba, gareng en mou emesbes an ban, dara en emowun ban aboho gin toua? Naro, sud hom ingma en emeic mos naugb ginero. Doba len laugwan lahau dau Adehsud, ban. Dara len leigdoumesa ban aboho agas medam toua terimda. Anai banin dous eng becabeci namcir. Hang lusud se cinogo augwan, kaba, len len aud ban naugb len lesijaresa ban toua. Anai len leiya dau sug ban bogod aremer aga lusud, kaba, dag ban bemobsara aud sud hom touwero, doba ban baimo augwan edag beim an len namcir dous. 15:5 Sug dan douman dau areg len lagahugouhw an ELOHIM gin dauwohob, kaba, dan deiya deit. Doba malaikad se ELOHIM men tuari se bogo, kaba, len lasid minc dau dimei hom sug ELOHIM men biruwa an areg en os dou lusud ebsa toua. 15:6 Dangga sug len lasid minc dau dimei ginohob, kaba, dan deiya. Doba malaikad merug senggai graga, sug len lagunyen dau dimei ingga len laugwan leg sansun gecabeci mohw esisilo namcir. Hanoba len leic hwigbei mos dau emas lahud se len merogumsa toua. 15:7 Gin dauwohob, kaba, dan deiya deit, doba sud hom dau ara hogu merireseb en eic mohoi senggai dau emas gatij an ELOHIM Geis Huhugb Sugraga men gogom dou malaikad merug senggai ingga toua. 15:8 Sug en eic mohoi senggai gini dou lenohob, kaba, ELOHIM men gogouf cucugb ocninim se dimei mes graga augwan ucan gin toua. Anai eni mobisamougb naugb augwan ginohob. Dangga, kaba, sud hom ingma emeinesa dimei mes gin touwero. Doba len laugwan leigtou dig medigo terimda malaikad merug senggai graga, len letiniha mohoi an gogom senggai bouwa dauwahabi, len lemeinesa dimei mes gini toua deit.

Sondapa 16

16:1 Dauwohob, kaba, dan douman ELOHIM sug en arougb malaikad merug senggai dau dimei graga naugb len letiniha meren mohoi gin toua. Hanoba en enara dou len dara mer gouji, endagai: Yen yihweda naugb yen yedetiniha meijen mohoi senggai an indan gogom areg dan desedeb naugb lusudohob. 16:2 Dangga sug malaikad gaimougtut en edetiniha men mohoi debin lusud se cinogo ginohob, kaba, bugwo gerij dara men geiyema agunya se lusud areg en ed aremeta gen dau dum mohu graga men nomor se en mecdemaga. Dara en ecguna dou men mocbobagohob, len laugwan meraga toua namcir. 16:3 Dauwohob, kaba, malaikad gedig hwai en edetiniha men mohoi se dum mohu. Dangga hang, areg geb se dum mohu, kaba, augwan omom namcir toua. Anai mohu augwan eperwei aninim dag sud hom gomom en mogwihi ginohob. 16:4 Gin ouwohob, kaba, malaikad gedig homoi en edetiniha men mohoi an gogom se duhu mer dara duhu geindaredeb augwan deit. Hang duhu mer dara duhu geindaredeb augwan toua eperwei dag mogwihi namcir. 16:5 Dangga dan douman deit, doba malaikad hom gesedougwo duhu augwan ingga, kaba, en eimiman dau ELOHIM men geicara an gin toua. Hanoba en enara dou en, endagai: Adehsud, banin dous eng beis huhugb sugragohob. Dara ban becabeci namcir toua. Dangga hang, gogom areg ban besa debin lusud se cinogo ginohob, kaba, augwan dareg beim terimda. 16:6 Anai len gini, kaba, len logod aban lusud areg ban bouci len debinim naugb ban. Dara len leic gomom dou leng lesai ban aburo sug nosa len laugwan touohob. Hang ban bemamsoho len gin deb touwero. Doba ban bedug leng lomom gini merugwihi dag siouwa ucugb dou len, dauntoba len leg toua. 16:7 Gin dauwohob, kaba, dan douman leng lomom ogdoc aremeta graga gedig len leigtou se ELOHIM men boromei louwaharesa se bogo, kaba, len toua louma debin malaikad graga en mer an gini. Hanoba len lenara dou ELOHIM, lendagai: Adehsud ELOHIM Gedig Ban Abubisamougb terimda, kaba, areg malaikad agahugouhw an ban gin, kaba, augwan asesa dag misen namcir. Anai gogom areg ban bogod deinaugb lusud se cinogo ginohob, kaba, augwan dareg beim. Dara aimo ucina se geica an len touohob. 16:8 Sug len louma debin malaikad graga en mer dauwohob, kaba, malaikad gedig hogu en edetiniha men mohoi an gogom debin igda lona deit. Dangga hang, ELOHIM ousa deisa igda lona gini naugb en esij lusud merus, aninim dag smougb esij lusud merus toua. Anai gogom areg geb se mohoi gin, kaba, eic dag igda lona mohora oubesa namcirohob. 16:9 Doba lusud, kaba, len lemesga meren sesar, hanoba len lemahau an dougwo meren geicara gecgu. Dara len lemeigdoumesa ELOHIM en moho touwero. Doba sug igdes mohora esij len merus dag gin, kaba, len louwareij ELOHIM an gin terimda. Anai men goubesa inggebga naugb sug en esa gogom medam aingma aingma dag graga debin lenohob. 16:10 Sug malaikad gedig sergem en edetiniha men mohoi an gogom, kaba, en etiniha men gogom gini debin aremeta gen dau dum mohu men maija moc sug en eigtousa. Dangga hang, aremeta an men lusud, kaba, len laugwan leg merugta an gogom gini. Anai gogom gini eic dag aremeta graga men hancob augwan edag lobeigbogo namcirohob. 16:11 Hanoba len louwareij ELOHIM an lobeigbogo dara meren bugwo geb se len meraga toua. Anai bugwo eic mog erij medam dou lenohob. Dara len lemesga meren sesar dara len lemahau an dougwo meren geicara gecgu touwero. Doba len leic merus naugb len leicara laimo dangga esesa terimda. 16:12 Dauwohob, kaba, malaikad gedig senggem en edetiniha men mohoi an gogom debin duhu medam hom moho Eprata. Dangga duhu ingga esa berouhw namcir. Dauntoba medibo gini edag ucina naugb leng medigo Yesus meren mougt mera medam dau dig igda eisaugwu an meren sadodor, len laugwan leraga toua. 16:13 Dara dan deiya merna mog mog merug homoi len merucbobaga aninim dag arobo, len lagunyen ucan gin toua. Homa, kaba, en agunyen dau wor mers. Homa, kaba, en agunyen dau aremeta gen dau dum mohu en mers. Dara homa deit, kaba, en agunyen dau gembala areibahau en mers toua. 16:14-16 Len gin, kaba, len ledag merna mog mog. Dangga hang, sug len lagunyenohob, kaba, len leihweda se cinogo gus gus augwan namcir naugb sug len ledouci mougt mera medam an meren sadodor debinim hom. Dara meren goubesa inggebga naugb sug len lens ganusbus einyana debin gin dou len toua. Sug len ledouci len laugwan debinimohob, kaba, len lahwan len aud usi hom, en moho se leci Ibrani mer dag Harmagedon, naugb sug len lesara dara ELOHIM Gedig En Mobisamougb se men Lona Gouji Sug En Ogod Aremer Aga Lusud sungga toua. Sug dan deiya dau areg graga augwan dauwohob, kaba, dan douman maman Adehsud Yesus Krisdus sug en esulou maman ucan gin toua. Hanoba en enara dou maman, endagai: Yen youman dan indir gin deigeigouhwahabi. Dauntoba yen yematou dau lona sug dan decicugb aud yen gin touwero. Doba yen meijires agai namcir. Anai dan demens dau indan lona gin dou yen touwero. Doba dan den aud yen augwougb, aninim dag sud hom geiyoho lusud meren aremougb, kaba, en emens dau men lona gin dou len touwero. Doba en en augwougb debin len toua. Dangga gareg dau yen en esedougwo men sansun naugb indan lona gin terimda, kaba, dan deic geigouhw dou en namcir. Anai en emec an mougb mogud abeba lusud merires naugb sug len leic igdebes dou en touwero. 16:17 Dauwohob, kaba, malaikad gedig senggai en edetiniha men mohoi an gogom se bogo meniha taiba augwan. Hanoba dan douman ELOHIM sug en enara dau men maija moc geb se tuari se bogo dou lusud laugwan deit, endagai: Gogom areg dan desedeb naugb lusud, kaba, augwan ouwa dougwo namcirohob. 16:18-19 Sug en esulou len dag ginohob, kaba, dan deiya, doba bagar mouf ehinya men mougb toua oucuc anim. Hanoba dan douman bagar mougb sug ebiji namcir, dara mer medam oucuc anim. Dara inyomda medam gougwa eisa sug ucan gin toua. Dangga, kaba, eic cinogo medam ingga obrugb homoi icira. Dara lugmahara meren beimes, kaba, inyomda etitir augwan mor mor toua. Anai dau lona sug ELOHIM en esinsin lusud terimda lona ingga, kaba, inyomda gouji gedag gini ingma emeisa touebma. Doba inyomda hom gin, kaba, edreg dau gus augwan namcir. Dara ELOHIM medoc moc dougwo cinogo medam, moho Babel, an men geicara gecgu touwero. Doba en eic mog an men gogom dag anggur mohu naugb en eg augwan toua. Anai en medoc esrougb medam an men geicara gecgu augwan ginohob. 16:20 Dara lomos dara menmod, kaba, augwan ediyebeiya toua. Anai inyomda etir augwan mor mor touohob. 16:21 Dara los an mogo medam obsara dau bogo. Astesda los an mogo men mogo hom, kaba, men gogom edebeij dag mos sergem. Dangga hang, emeic dag lusud lemouwareij ELOHIM toua terimda. Anai gogom areg en esa debin len, kaba, medam gougwa dag len merdoc ohudibed an namcir.

Sondapa 17

17:1 Dauwohob, kaba, malaikad hom dau merug senggai graga gos mohoi hom an gogom, kaba, en en aud dan. Hanoba en enara dou dan, endagai: Ban bin suginahabi. Dan demens dau gogom areg ELOHIM esedeb naugb cinogo Babel moho agas medam gini meijouhw augwan asesa dou ban. Anai en edag gida hom gedig en maga eijouhw namcir. Dara en eigtou boiharaga duhu mohu augwan toua. 17:2 Hang en ohw en maga dou lusud se cinogo augwan meren mougt mera medam. Dara len toua merisira ebsa en terimda. Anai len laimo en naugb len lecguna dou seiseij. Dara len lesogwesa en mohotimei mohw aud areg gecgu gus gus augwan toua terimda. Hanoba en eic mog an men geicara gecgu gini dag anggur mohu dou mougt mera medam graga meren lusud len laugwan. Dauntoba sug len mersdemaga embreij anohob, kaba, len merisira ebsa en naugb len lecguna dou seiseij, dara len laimo en aud areg gecgu gus gus augwan toua. 17:3 Sug malaikad enara dou dan dag graga dauwohob, kaba, Mena Gogoufu en ogod dan dag domom debin gin toua. Hanoba malaikad graga en eigdoumesa dan dig lomougwisa hom deit. Dangga sug dan dedebeij se lomougwisa ginohob, kaba, dan deiya, doba gida hom, gedig en maga eijouhw graga, en aingmo beigtou se aremeta gen dau dum mohu graga medgomori. Aremeta gin, kaba, en maga augwan dag gahan namcir, dara en mougt senggai, dara en momboung mog sisa. Hanoba en og moho einyana areg eic ELOHIM en moho bacecim se en maga augwan toua. 17:4 Dara gida graga, kaba, en toua eg sansun gahan misen dara gahan geijor namcir. Anai en eigdoumesa en moho agas dag mougt mera medam naugb augwanohob. Hanoba en obungma en maga dara emas dara igdahab mera eisaugb aingma aingma. Dara en ed sariou mogo einyana. En os mog hom dau emas atij an men geicara gecgu augwan sug en ohw en maga dou lusud icira en mesira toua. Hang areg geb se mog gin, kaba, dag ogor dara eiyema namcir. 17:5 Dara en ed moho homoi dag aimeh se en mecdemaga toua, ed gendagai: Dan dedag cinogo Babel gedig moho agas namcir. Dangga hang, dan demedag ligida gedig len meraga eijouhw laugwan merim dan. Dara areg dag geiyema se cinogo gin, kaba, dan darautut lusud aud gin toua, anai dan indubisamougb naugb augwan ginohob. 17:6 Dara dan deiya, doba len gedig ELOHIM ouci len debinim naugb enohob, kaba, gida graga eg len laugwan merugwihi touohob. Anai len lemobsara aud enero. Doba len les agadgeij namcir naugb len merdoc ebdebin an Yesus. Hanoba len los ladi en moho deseino lusud toua terimda. Hang gida medoc emesrougb an len naugb en emogod len laugwan toua. Dangga sug dan deiya dau men geicara gin, kaba, dan deimiman dau gin namcir. Anai dan deiya, doba en mecdemaga embreij an len graga laugwan merugwihi touohob. 17:7 Doba malaikad gahwan dan graga, kaba, en enara debin dan, endagai: Dagiro, naugwe hang, ban bemeimiman dau gida an men geicara gina? Ban bemecinaga meijouhw gin touebmei? Dangga dan dens dau gida geigtou se aremeta medgomori dara aremeta, gedig en mougt senggai dara momboung mog sisa graga, meijouhw augwan asesa dou banahabi, dauntoba ban becinaga dag misen toua. 17:8 Aremeta gedig ban beiya gragohob, kaba, men meijouhw dag gini: Nosa, kaba, en toua maireseb. Doba iteitogin, kaba, en omomohob. Hang lusud lemeiya en touwero. Doba cum, kaba, en emdagunya dau ijou mes debin len toues. Dangga, kaba, lusud areg ELOHIM emog len meroho se Surad Maireseb Menau Geb Huhugb dau sug en ahasesei cinogo ginbuma, kaba, len laugwan leimiman dau en namcir. Anai sug nosa, kaba, en omom dau len, doba len leiya en eisa maireseb deitohob. Dobnaro. Anai ELOHIM en esedeb naugb en eic mor mor dou en se dum smougb teiteiyohob. Hang en ens mog dou lusud, doba cum cum dous. 17:9 Doba areg gin augwan, kaba, naugb len gedig merdoc obrugbsa meijouhw gin dous. Dangga gareg dau yen en mou ouforoho, kaba, aremeta graga men mougt senggai gin, kaba, aninim dag menmod senggai gedig gida graga en eigtou taiba naugb oiharaga len laugwanohob. Anai mougt senggai gin, kaba, aninim dag mougt mera medam merug senggai toua. 17:10 Merug sergem dau mougt mera senggai gin, kaba, len lomomohob. Doba hom, kaba, en edag mougt mera medam iteitogini. Dara hom deit, kaba, en emagunya debin lusudbuma. Doba sug en agunyohob, kaba, en edag mougt mera medam, cum cum, naugb len dous. Anai gini aimo dau areg ELOHIM esedeb naugb enohob. 17:11 Dara aremeta gen dau dum mohu gin, kaba, enin eng sud hom dau mougt mera medam merug senggai gin toua. Dangga sug en agunya debin lusudohob, kaba, en eperwei mougt mera gedig senggai graga, en mohw, naugb en edag mougt mera medam gedig senggemoi gin an len deit. Anai sug nosa, kaba, en omom dau men lusudohob. Hang len lemeiya en toua deitero. Doba cum, kaba, en eisa dau gomom ucugb naugb en oiharaga len laugwan mougwa hom deit. Dara en emesedougwo len terberbahabero. Doba sug men lona augwan edagasohob, kaba, ELOHIM erba en se dum smougb ucugb deit. 17:12 Dara momboung mog sisa gedig ban beiya graga, kaba, gini aninim dag lusud merug sisa gedig len lemagunyabuma. Doba sug len lagunyohob, kaba, aremeta eigdoumesa len meroho dag mougt mera medam naugb len lesa desij en. Hanoba en eic goubesa dou len naugb len lesedougwo lusud laugwan toua, doba cum cum, dous. 17:13 Sug aremeta eigdoumesa len meroho ginohob, kaba, len lemohoiya en mer touwero. Doba len lohw meru doum naugb len leic len meroho dara meren goubesa augwan ucugb dou en. 17:14 Hanoba len laimo en naugb len lesara dara maman Domba an men lusud toua. Doba Domba dara men logodeh gedig len laimo en mer gin terimdohob, kaba, len lesa debin aremeta dara men gedeijan len laugwan louwa namcir. Anai Domba, kaba, en moho agas edreg dau leng meroho agas augwan. Dara en edag mougt mera medam edreg dau mougt mera medam se cinogo augwan toua. Dara men lusud gin, kaba, len lemobsara aud aremeta graga mougwa hom touebma. Doba len les agadgeij toua namcirohob. Hang en emouci len debinim naugb en, anai en eija len naugb len len aud en sug nosa touohob. 17:15 Sug malaikad ens dau gida dara aremeta graga meijouhw augwan asesa dou danohob, kaba, en ens dau duhu areg gida eigtou boiharaga graga meijouhw augwan asesa ucan dou dan deit. Hanoba en enara dou dan, endagai: Duhu areg ban beiya graga, kaba, aninim dag cinogo an meijouhuder, dara merusur, dara lusud meren leci augwan. Anai ban beiya gida gedig en maga eijouhw gin, kaba, dag en eigtou boiharaga len laugwanohob. 17:16 Dangga hang, aremeta dara momboung mog sisa gedig ban beiya graga, kaba, len laugwan merdoc esrougb an gida gedig en maga eijouhw gin namcir. Hanoba len leic men aremougb, dara len leg men sansun augwan dau en naugb en eigtou an mog mogud deb dous. Dauwohob, kaba, len let en mog igbum. Doba igbum, kaba, len lec se smougb naugb smougb ait mor mor namcir toua. 17:17 Doba sug mougt mera gedeijan merug sisa graga len leic len meroho dou aremeta ucugb, dara len lohw meru doum naugb len leic meren goubesa augwan dou en. Hanoba len laimo en naugb len leic gomom dou gida graga toua, kaba, augwan gini dau lenin merdoc mes dousero. Doba aimo dau ELOHIM enin mer gin toua. Anai enin eng outi se len merdoc mes. Hang len leicara dangga, terimda areg en esedeb naugb gida gin, kaba, augwan acgunog namcirohob. 17:18 Dara gida maga eijouhw gedig ban beiya graga, kaba, eni aninim dag cinogo moho agas medam hom gedig en moho oiharaga lusud se cinogo gin augwanohob. Anai en, kaba, mobisamougb namcir.

Sondapa 18

18:1 Sug malaikad graga ens meijouhw augwan asesa dou danohob, kaba, dan deiya, doba malaikad hom ouwaden dau bogo se cinogo ucan en deit. En moho agas medam namcir. Hanoba men gogouf cucugb einyedei cinogo augwan toua. 18:2 Dangga sug en ouwaden se cinogo ginohob, kaba, en eija cinogo Babel, en moho. Hanoba en enara dou en dara mer medam namcir, endagai: Babel, ban bedag cinogo moho agas medam. Doba aban lona naugb sug ELOHIM ot ban baisoboro namcir, kaba, edebeijohob. Anai ban beic mog an areg gecgu dag ahwei mohu dou lusud se cinogo augwan naugb len laimo ban aud seiseij. Dara ban bohw ban abaga dou lusud meren mougtir naugb len laimo ban aud areg gecgu augwan touohob. Dara leng lohwaresa ban, kaba, len merisoho mougb dau ban namcir. Anai ban toua, abdoc etrij medam icira aremougb areg mera eisaugb naugb ban bouma dau len toua terimda. 18:3 Dangga cum, kaba, ban bedag losneseba namcir naugb sug merna mog mog leigtousa. Dara ban bedag usmougb sug merna gogor dara ba gogor gedig lusud merus eiseisem dau len lesebesa se ban sungga toua. 18:4 Sug dan douman malaikad eijara dou Babel dag ginohob, kaba, dan douman mer hom dau bogo esulou ELOHIM men logodeh gedig len leigtou se Babel ingga ucan deit, endagai: Dan indihirija, yen yemeigtou se cinogo Babel naugb yen yemaimo men sesar touwero. Doba yen yeisa yeihweda dau namcir, dauntoba gogom areg ELOHIM esedeb naugb en gin, kaba, emaiyan yen touwero. 18:5 Anai men sesar augwan, kaba, eiseisum bedebeij bogohob. Hang maman ELOHIM medoc moc dougwo men geicara gecgu augwan gin touwero. Doba en medoc eiseisan naugb en esedeb gogom medam deinaugb enohob. 18:6 Dangga yen yeic mog an gogom areg Babel eic dou yenohob, kaba, yen yahurim dara ELOHIM men gogom an areg en esedeb naugb enohob, dag mougwa cuhwai icira se men mog gin toua. Hanoba yen yeic augwan gin dou en beg namcir, aimo dau men gogom areg en eic dou yen sug nosohob. 18:7 Anai en eimiman enin deseino lusud dag en moho agas medam namcir. Dara en ohw en maga dou len naugb len laimo en aud areg gecgu dara gogor augwan ucucugb touohob. Hang yen yemarges yen meisira dau gogom areg yen yesedeb dou en gin touwero. Doba yen yeic mog erij dara medoc geijesa edeinyum dag en medoc agas dara men geicara gecgu ucugb dou en toua. Anai en enara se enin medoc mes, endagai: Dan dedag mougt mera medam naugb dan doiharaga lusud terimda dangga. Hang dan indoc emeijesa, aninim dag leng debdes touwero. Doba dan daimo areg geic dan indoc eigouhw dou dan gin terimda. 18:8 Sug en eigdoumesa en moho agas medam dag ginohob, kaba, yen yemarges yen meisira dau en touwero. Doba yen yesa acar dara sir medam debin en namcir, dauntoba en medoc eijesa medam namcir touahabi. Dara yen yesa smougb debin en naugb smougb ait en mor morohob, kaba, yen yeic gogom augwan gini se lona hom dou en toua. Anai maman Adehsud ELOHIM, kaba, en mobisamougb namcir. Hang en emogod gogom augwan gini deb naugb en touohob. 18:9 Dangga sug mougt mera gouji se cinogo augwan len leiya, doba smougb ait Babel mor morohob, kaba, len leiyaga dara leb medam an en namcir. Anai sug nosa, kaba, len laimo en naugb len lesijaresa men seiseij. Hanoba len merdoc aninim dara en naugb len merdoc etrij icira areg gecgu dara gogor gin touohob. 18:10 Doba sug len leiya smougb ait Babel dag gin, kaba, len lesa aigusi dau en namcir. Anai len lahau dag cum, kaba, men gogom gini en baiyan len toua. Hanoba len leiyaga en, lendagai: Ayou, ayou, Babel, nosa, kaba, ban aboho agas namcir. Dara aban goubesa medam gougwa toua. Doba emedag merdoc ememtahabero, kaba, ELOHIM men gogom eic mor mor dou banohob. 18:11-12 Dara leng loho aremougb dou Babel dau cinogo augwan, kaba, len laugwan leb. Dara len merdoc eijesa medam an en toua. Anai meren aremougb dag emas, dara w perag, dara igdahab mera eisaugb, dara sariou mogo, dara minc garjeijaga, dara sansun gahan geijor, dara sansun gedig len lesinsin dau igdecigba meda, dara minc gahan misen namcir, dara sogo gedig men ouwedebeda, dara areg len lesinsin dau aremeta, moho w gajah, men mogta gagas, dara areg len lesinsin dau sogo mera eisaugb, dara areg len lesinsin dau w tembaga dara kermum, dara areg len lesinsin dau igdahab gogor geirir gogoufu aingma aingma. 18:13 Dara aremougb, moho lirib, dara aremoung mohu men ouwadebeda, dara sogo mod gedig len lec se smougb men eiseisa, dara sogo mod naugb len lehin dougwo areg eiyema, dara sogo mod gedig men eigouhw namcir, dara anggur mohu, dara mani, dara roti mor garjeijaga namcir dau tramdad, dara sapi aingma aingma, dara domba, dara kuda gohugouhw keropo an lusud, dara sogougb aingma aingma, kaba, gareg en emouma dau len deita? Anai lusud laugwan lomom louwa dau lenohob. 18:14 Hanoba len lenara dou Babel, lendagai: Areg ban abdoc etrij icira sug nosa, kaba, augwan ediyebeiya dau ban namcir. Dara areg merij mogud, dara sansun, dara aremougb gecabeci, kaba, augwan gin emeb huhugb dou banero. 18:15 Dauwohob, kaba, len leb an Babel. Dara len merdoc eijesa medam an en toua. Anai areg len lohw dou en sug nosa, kaba, eic dag len merisoho mougb dau gin toua. Doba iteitogini, kaba, augwan ediyebeiya dau len namcirohob. Hang len lemeiyaga an en deit, lendagai: 18:16 Ayou, ayou, Babel. Anai sug nosa, kaba, ban bedag cinogo hom moho agas namcir. Dara ban abubisamougb dougwo augwan toua terimda. Hang ban bemeg sansun garjeijaga dara gahan geijor, dara minc gahan misen augwan toua. Dara ban bobungma banin abaga dara emas, dara igdahab mera eisaugb aingma aingma. Dara ban bed sariou mogo einyana toua. 18:17 Doba emedag merdoc ememtahabero, kaba, smougb ait areg ban absoho mougb an gini augwan ediyebeiya dau ban namcirohob. Sug len leiyagarij en dag gin, kaba, len lemesa deinyor en touwero. Doba len lesa aigusi dau en namcir. Anai len lahau endag cum, kaba, men gogom gini en baiyan len toua. 18:18 Dara mougtir gedig len lesedougwo ing medam an leng leisa ij, dara logodeh gedig len leicara se ing mes ingga, dara leng lob meren aremougb se ing medam gin, kaba, len laugwan leiyagarij an Babel gin toua. Anai len leiya, doba smougb ait cinogo ingga mor mor namcirohob. Dara smougb moro einyana toua eisaugb terimda. Dangga hang, len lemesa deinyor en touwero. Doba len lesa aigusi dau en namcir. Anai len lahau dag cum, kaba, men gogom gini en baiyan len toua. Hanoba len leiyaga an en, lendagai: Cinogo girong en moho emagas dag ban gina? Naro, cinogo gus ingma emedreg banero. Anai banin dous eng aboho agas edreg augwan namcir. 18:19 Sug len lenara dangga dau len merdoc mesohob, kaba, len lasga cinogo mor debsa len merugt, ansins dag len merdoc eijesa medam an en toua. Hanoba len leiyaga, deit, lendagai: Ayou, ayou, cinogo Babel. Sug nosa, kaba, ban aboho agas medam namcir. Dara ban abubisamougb an augwan. Dangga hang, emen emaugwan emeic emsoho mougb dau ban toua. Anai emen toua, emeis ij an aremougb mera eisaugb einyana dou banohob. Doba augwan gini emedag merdoc ememtahabero, kaba, smougb ait areg ban absoho mougb an gini augwan ediyebeiya dau bandohob. 18:20 Sug malaikad graga esulou ELOHIM men lusud geigtou se cinogo Babel naugb len len dauwohob, kaba, en arougb leng se bogo len laugwan naugb len lagahugouhw an gogom areg ELOHIM esa debin Babel gin toua. Hanoba en enara dou len, endagai: Yeng se bogo, kaba, yen yaugwan yagahugouhw debin cinogo Babel gin namcir. Anai ELOHIM eic mor mor dou enohob. Dangga yen gedig ELOHIM ouci yen debinim naugb en, dara yeng yesai Krisdus moro, dara yeng yesai ELOHIM moro sug nosa areg Babel eic gomom dou yenohob, kaba, yen yaugwan meigdoc eigouhw dara yagahugouhw debin en toua. Anai yen gin, hang ELOHIM emauni gogom areg en eic dou yen sug nosa augwan ucugb dou en toua. 18:21 Sug dan douman malaikad graga enara bouwohob, kaba, dan deiya malaikad hom gedig en mobisamougb namcir eigdoumesa igdahab medam hom naugb en erba se dum mohu. Hanoba en eda mer dou Babel, endagai: Babel, sug nosa, kaba, ban bedag cinogo moho agas namcir. Doba iteitogin, kaba, ban bedag igdahab gedig dan derba se dum mohu ginohob. Anai cum, kaba, lusud lehilon ban, doba len lemesma ban deitero. Anai ELOHIM eic mor mor dou ban namcirohob. 18:22 Dangga leng louma isadum, dara leng lohw aresgwemer, dara leng lohw sulin dara higbei, kaba, lusud lemouman dag nosa deitero, doba lodinabena namcir. Dara leng meru ouforoho an ara ara, kaba, lusud lemeiya se aban cinogo touwero. Doba len laugwan lediyebeiyohob. Dara len lemouman ago mes emohulugb an tramdad mor toua deitero. 18:23 Dara lusud lemeiya smougb mouf emererij. Dara leng leicim, kaba, ban bemouman len merir sug len lagahugouhw debin gin toua deitero. Doba augwan gini ediyebeiya namcirohob. Anai ban, kaba, ban abu ouforoho naugb ban bagaresa lusud se cinogo augwan naugb len lemaimo ucina misen toua deitero. Doba len laijahasero dau naugb len laimo ban aud areg gecgu toua terimdohob. Anai aban gagaresa gin, kaba, emedag misenero. Doba dag areibahau mogud dous. Dara aban lusud gedig len lohwara se ban, kaba, len merdoc toua agas medam namcir. Hang len lemowun len merdoc mes arjaga touwero. Doba len leigdoumesa lenin meroho eb taiba lusud laugwan touohob. 18:24 Dara leng lesai ELOHIM moro sug nosa, dara ELOHIM men lusud areg ban bogod len lomom, dara len gedig ban besir se cinogo gus gusohob, kaba, ban boho len laugwan merugwihi se aban cinogo gini, anai ban bedag mougt mera medam naugb augwan ginohob.

Sondapa 19

19:1 Sug malaikad graga owun cinogo Babel an men geicara gecgu dag ginohob, kaba, dan douman mer medam se bogo, aninim dag lusud leinyana merir sug len lagahugouhw ucan gin toua. Dangga len lenara, lendagai: ELOHIM, emen emagahugouhw an ban, anai ban beigtou se gogouf cucugb namcir. Dara ban bedag emen ELOHIM Gedig En Mobisamougb naugb ban beigdoc emen dau gogom gedig gida eic dou emen augwan gin touohob. Anai ban, kaba, ban bemobsara aud sud hom ingma touwero. Doba areg ban bogod an deb, kaba, augwan dareg beim. Dara aimo ucina se geica terimda toua. 19:2 Dangga hang, ban bemamsoho gida hom gedig en maga eijouhw gin touwero. Doba ban bogod gogom debin en naugb ban bauni emen emugwihi areg en eir dou emen sug nosohob, augwan ucugb dou en toua. Anai en eic en maga barerei lusud se cinogo augwan naugb len lecguna dou seiseij. Dara len laimo en aud areg gecgu dara gogor gus gus augwan touohob. 19:3 Dauwohob, kaba, dan douman, doba len lagahugouhw an ELOHIM mougwa hom ucan gin deit, lendagai: ELOHIM, emen emaugwan emagahugouhw an ban namcir. Anai smougb gait cinogo Babel gin, kaba, emos touwero. Doba moro eisaugb beb huhugb namcirohob. 19:4 Dara mougtir merug sud hom hogu edeisu dara ara hogu merireseb, kaba, len toua laugwan louma debin len graga merir an areg len lagahugouhw an ELOHIM gini. Dangga sug len leijeboho lamuhumlo deseino men maija moc ginohob, kaba, len lenara dou en, lendagai: ELOHIM, emen toua emagahugouhw an ban. Anai gogom areg ban besa debin cinogo Babel ginohob, kaba, augwan asesa dag misen namcirohob. 19:5 Sug dan douman leng se bogo len laugwan lagahugouhw an ELOHIM dag ginohob, kaba, dan douman mer hom dau maija moc graga, en arougb ELOHIM men lusud se cinogo augwan naugb len toua lagahugouhw an en. Hanoba en enara dou len, endagai: Yeng yedag ELOHIM men sogougb, dara yeng meijoho eb taiba, dara yeng meijoho eb tainya, dara yeng yahau dau en, kaba, yen yaugwan yagahugouhw an en terimda. 19:6 Sug dan douman sud hom graga en arougb ELOHIM men lusud se cinogo augwan dag ginohob, kaba, dan douman deit. Doba len laugwan merir eisa, aninim dag duhu gesogwa ai mesihwa dara bagar mougb naugb len lagahugouhw an ELOHIM en toua, lendagai: ELOHIM, emen emaugwan emagahugouhw an ban namcir. Anai ban bedag emen mougt mera medam naugb ban boiharaga augwan. Dara ban bedag emen ELOHIM gedig ban abubisamougb naugb augwan touohob. 19:7-8 Dangga hang, eigouhw naugb emen emdoc eigouhw, dara emen emagahugouhw an ban. Hanoba emen emeigdoumesa ban aboho dareg emen emen sijo dou ban terimda. Anai ban baigdougwo emen sesar augwan dau emen, dara ban bouci emen debinim naugb ban. Hang ban beic sansun garjeijaga, dara mohw esisilo, dara gogouf cucugb gansins dou emen naugb emen emeg dougwo emen touohob. Anai Domba men lona naugb sug en eic emen dag en mesouwa, kaba, ebeij deinyorohob. Hang mesouwa emen toua emobungma emenin emaga deigeigouhw naugb en namcir. 19:9 Dag gin dauwohob, kaba, malaikad gahwan dan dig lomougwisa graga, kaba, en enara dou dan deit, endagai: Gareg ELOHIM esa mer naugb en, dauntoba en etara dara Domba se lona sug en ougwan ared debin mesouwa gin, kaba, len ingga dous eng ELOHIM eic geigouhw dou len. Len gus laugwan, ga, naro. Sug en esulou dan dag gin dauwohob, kaba, en arougb dan ucan deit, endagai: Areg dan desulou ban an gin, kaba, bog augwan se aban surad namcir. Anai dan demenara augwan gini dau danin indoc mes dou banero. Doba augwan gini en dau ELOHIM enin dous. Hang se geica namcir. 19:10 Sug dan douman en mer an dag ginohob, kaba, dan douwan deijeboho damuhumlo desij en naugb dan desijaresa en toua. Doba en en dougwo dan, endagai: Ban bemesijaresa danlo. Doba ban besijaresa ELOHIM enin dous. Anai dan toua, dedag ELOHIM men sogougb naugb dan desai Yesus Krisdus en moro dou lusud, aninim dag ban abaguner yen yaugwan gedig yen yesai Krisdus moro dou lusud toua. Anai areg Yesus en ens dou mamanohob, kaba, goubesa medam namcir. Hang emarautut maman naugb maman masai augwan gini dou lusud toua terimda. 19:11 Gin dauwohob, kaba, dan deiya deit. Doba yen youman deigeigouhw namcir, anai len lec misis dau kuda gogoufu hom se bogo. Dara sud hom en eigtou se kuda ingga medgomori toua. En moho dag Medoc Hom Dara Geica. Anai areg en esai dou lusud, kaba, en emarges deb touwero. Doba en esai augwan gini dara medoc hom namcir. Dara en emereiyara touwero, doba en esai augwan dag misen toua terimda. Dangga sug en ogod aremer naugb lusud, dara sug en esara dara leng merug mog, kaba, en emobsara aud sud hom touwero. Doba en aimo augwan gini dareg en medoc edag beim an gin toua namcir. 19:12 Dara en maires, kaba, mouf eririj, aninim dag smougb mouf. Dara lusud lecgun sogo mesira einyana an meh se en mougt toua. Anai enin dous eng edag mougt mera gouji naugb augwanohob. Dara len log moho hom se en maga toua. Doba moho gin, kaba, sud hom ingma emecinaga meijouhw touwero. Doba enin dous eng ecinaga moho gini men meijouhw asesa. 19:13 En eg sansun gagas hom edogod debin mohotimei. Hanoba merugwihi oukougb men sansun ingga augwan. Anai en aiyan men moc laugwanohob. Dara en moho toua dag Sud Hom Gesai ELOHIM En Moro. Anai en ens dau areg geb se ELOHIM enin medoc mes augwan asesa dou lusudohob. 19:14 Dara dan deiya, doba leng lomom icira enohob, kaba, len laugwan leg sansun garjeijaga, dara gecabeci, dara gogouf cucugb se leni. Hanoba len leisa kuda medgomori naugb len laimo en dag men sadodor ucan en toua. 19:15 Dara dan deiya deit, doba krawan mecohw ineinagas agunya dau en mers naugb en aiyan lusud se cinogo augwan len meroho eb tainya namcir. Hanoba en esedougwo len dara goubesa medam toua. Anai dan deiya, doba en os dagamougb dau kermum icira en mesirohob. Dangga gareg en ohoiya en mer, kaba, en eic gogom medam areg ELOHIM Gedig En Mobisamougb en esedeb sug nosohob debin namcir. Aninim dag lusud sug len laiyan anggur mera se cinogo mes toua. 19:16 Hang se men sansun dara men meida moc gin, kaba, len log endag mougt mera medam naugb mougt mera se cinogo augwan, dara en moho edreg dau leng meroho agas len laugwan toua. 19:17-18 Dauwohob, kaba, dan deiya malaikad hom sug en esa se igda lona naugb en omgoij ba gedig len lohw se bogo meniha len laugwan toua. Hanoba en arougb len dara mer medam, endagai: Yen yaugwan yen yin naugb yen yet lusud meren mougt mera medam, dara sadodor meren mougt mera medam, dara leng meroho agas naugb lesara, dara kuda, dara leng leisa kuda medgomori naugb lesara, dara sogougb, dara lusud misen, dara logodeh, dara lusud bod gareg en obsara aud aremeta ginohob, len laugwan merug namcir. Anai ELOHIM esedeb len laugwan gini dag ared naugb yenohob. 19:19 Dangga dan deiya, doba aremeta gen dau dum mohu, dara lusud se cinogo augwan meren mougt mera medam an meren sadodor, len laugwan loucimdeb se usi hom. Hanoba len lesedeb naugb sug len lesara dara sud hom geisa kuda graga medgomori an men sadodor len laugwan toua. 19:20 Doba sud hom geisa se kuda medgomori gin, kaba, en agaigeij aremeta gen dau dum mohu, dara men gembala areibahau. Hanoba en erba lan an marna agau se dum smougb gedig igdahab gohoseri eb se gin namcir toua. (Anai gembala areibahau, kaba, aremeta eigdoumesa en moho dag men gedeijan. Hanoba en eic goubesa dou en naugb en ens men ganusbus einyana dou lusud. Dauntoba en arerei leng led aremeta men hugba se len mersdemaga, dara leng lecguna dou men mocbobaga, len laugwan toua.) 19:21 Doba mougt mera medam an meren sadodor, kaba, sud hom geisa se kuda medgomori graga en eic krawan mec ineinagas gagunya dau en mers graga. Hanoba en edesugb len laugwan louwa namcir. Dangga ba len let sadodor graga len merug merdoumara eigug an namcir toua.

Sondapa 20

20:1 Sug sud hom geisa kuda medgomori graga en erba aremeta dara gembala areibahau lahwas se dum smougwohob, kaba, dan deiya deit, doba malaikad hom gos gusin naugb ijou mes. Dara en odo aumaga dau kermum icira en mesira, kaba, en ouwaden dau bogo. 20:2 Dangga sug en ouwadenohob, kaba, en agaigeij Wor naugb en ahud en mesira dara en mohora darem. Hanoba en erba en deb se ijou mes naugb arisogomoc huntun sisa gin toua. Anai Wor gin, kaba, en augwohosa lusud. Dara en ohobas len. Dara en esedeh lo dougwo len toua namcirohob. Hang lusud lemeija en moho dag Hinogo Medam Gacgunog, dara Bilis, era Setan toua. 20:3 Sug malaikad erba Wor se ijou mesohob, kaba, en eic meh baihiron dougwo. Hanoba en eic sidgod gedig mesira mena ebsohob, adra dougwo meh gin toua. Dauntoba Wor ingga, kaba, en emagunya ucugb dau ijou mes naugb en emaugwohosa lusud toua deitero. Doba en eigtou se ijou mes se arisogomoc huntun sisa gin terimda. Dangga sug en eigtou se ijou mes se arisogomoc augwan gin bouwohob, kaba, len lec misis dau en naugb en augwohosa lusud mougwa hom dara deit, doba se lona aibibra dous. Anai gini aimo dau areg ELOHIM en esedeb naugb enohob. 20:4 Dauwohob, kaba, dan deiya dau leng lomom icira Krisdus en moho gin, kaba, dag ELOHIM eigdoumesa len laugwan aud maireseb menau geb huhugb deitohob. Anai len lemesijaresa aremeta gen dau dum mohu, dara len lemecguna dou men mocbobaga, dara len lemousa deisa men lusud naugb len led men hugba se len mersdemaga dara len merisira touwero. Doba len les agadgeij namcir naugb len los ladi Yesus en moho deseino lusud. Dara len lesai ELOHIM en moro dou len toua terimdohob. Dangga sug en eigdoumesa len dau gomom ucugwohob, kaba, en eigdoumesa len meroho dag mougt mera gedeijan desij Krisdus naugb len lesedougwo lusud laugwan se arisogomoc huntun sisa. Hanoba len logod aremer aga len laugwan toua, anai dan deiya maija moc einyana. Dara lusud gedig ELOHIM eic goubesa dou len naugb ginohob, kaba, len leigtou se maija moc ingga augwan toua. Aremer geino gin augwan, kaba, lusud leija dag geisa dau gomom gaimougtut. 20:5-6 Dangga len gedig laimo geisa dau gomom gaimougtut gin, kaba, len gin dous eng ELOHIM ouci len debinim naugb en. Dara en eic geigouhw beb huhugb namcir dou len toua. Hang gomom gedig mougwa cuhwai se dum smougb, kaba, emeb naugb len toua deitero. Doba len ledag gembala gesa taij naugb len leic meren gesijaresa dag louwaharo dou ELOHIM dara Krisdus lan terimda. Dara len ledag mougt mera gedeijan naugb len lesedougwo lusud desij Krisdus se arisogomoc huntun sisa gin toua. (Doba leng lomom gus gus, kaba, len laugwan latou debin len merug terimda arisogomoc huntun sisa gini ouwa dauwahabi, ELOHIM emeigdoumesa len dau gomom deit.) 20:7 Sug arisogomoc huntun sisa gin ouwohob, kaba, len lec ijou mes dau Setan gin toua. 20:8 Dangga sug en agunyohob, kaba, en eihweda sungga sungga naugb en edaugwohosa len laugwan mougwa hom dara deit. Hanoba en ahwan len aud usi hom naugb len lesara dara ELOHIM men lusud, gedig en ouci len debinim naugb enohob, len laugwan mougwa hom deit toua. Dara lusud areg Setan esa len deb naugb len lesara gin, kaba, emedeinyum naugb sug lusud lemecic len touwero. Doba len lebedero dag geria se dum mebera namcir. Hang len meroho dag Gog dara Magog, anai len laugwan ledag ELOHIM men mocohob. 20:9 Sug Setan ouci len laugwan debinimohob, kaba, len lasij se ucina augwan. Hanoba len ledebeij ELOHIM men cinogo gedig en medoc gororougb ginohob, kaba, len lerbacec men cinogo ingga an men lusud gedig en ouci len debinim naugb eninohob, len laugwan toua. Doba ELOHIM en esa smougb dau bogaden naugb ait Setan men sadodor ingga, len laugwan merur mor namcir. 20:10 Doba Bilis gedig en augwohosa len graga, kaba, len lerba en desij aremeta gen dau dum mohu, dara gembala areibahau lan se dum smougb naugb sug smougb dau igdahab gohoseri gini eic gerij medam dou len astesda lona loba beb huhugb namcir. 20:11 Dauwohob, kaba, dan deiya maija moc gogouf cucugb medam hom. Dara sud hom eigtou se maija moc gin toua. Dangga sug cinogo dara bogo lan laiya en, kaba, lan laugb dau en terimda en maires ecib dau lan namcir. 20:12 Dara dan deiya leng lomom dau leng meroho agas, dara leng meroho eb tainya areg len latou debin len merug se arisogomoc huntun sisa ginohob, kaba, len laugwan leseino ELOHIM men maija moc gin toua. 20:13 Anai dum mohu, dara gomom, dara w Seol len ledug leng lomom len laugwan ucugwohob naugb ELOHIM ogod aremer debin len, aimo dau meren geicara dou len toua. 20:14 Dauwohob, kaba, en eh surad meh an meren geicara gin dou len. Dara en eh surad meh hom en moho maireseb menau geb huhugb dou len deit. Hanoba en ogod aremer debin len laugwan, aimo dau meren geicara areg en og deb se meren surad ingga toua. Dangga en ecic, doba gareg en moho emeb se Surad Maireseb Menau Geb Huhugb ginero, kaba, en erba len laugwan se dum smougb namcir. 20:15 Dara gomom dara w Seol, kaba, sug lan ladug leng lomom len laugwan ucugwohob, kaba, ELOHIM erba lan toua se dum smougb namcir. (Hang dum smougb gin, kaba, lusud leija gini dag gomom mougwa cuhwai icira toua.)

Sondapa 21

21:1 Sug dan deiya areg graga augwan dauwohob, kaba, dan deiya, doba ELOHIM en esinsin bogo dara cinogo menau deit. Anai areg geb se bogo dara cinogo mohon, kaba, augwan ediyebeiya namcirohob. Dara dum mohu toua emeb deitero. 21:2 Gin dauwohob, kaba, dan deiya, doba ELOHIM en esa Cinogo Gecabeci hom, moho Yerusalem Menau, gouwaden dau bogo se cinogo gini. Hanoba en obungma bemtemta namcir, aninim dag lusud lobungma gida hom bemtemta naugb sug len lahwan en aud en mesuwa toua. 21:3 Hanoba dan douman mer medam hom dau ELOHIM men maija moc sug en esulou lusud debin gin toua, endagai: Yen yesa, yauweila. Anai ELOHIM men cinogo ouwaden dau bogo se cinogo ginohob. Hang en emeigtou aigusi dau lusud toua deitero. Doba en edag meren ELOHIM naugb en oiharaga, dara eseyeiyo len, dara len ledag enin men lusud toua terimda. Anai en eigtou desij len beb huhugb namcirohob. 21:4 Dangga len lemeb toua deitero, doba en ogunin len meridruh dau len meriresi. Anai len lemomom deit touwero, doba len leis huhugb terimda. Hang len merdoc momogo naugb len lemeb dara len lemeic len merug erij toua deitero. Anai areg mohon, kaba, augwan ediyebeiya namcir dau lenohob. 21:5 Dauwohob, kaba, sud hom geigtou se maija moc en ouma debin areg sud hom graga esulou dan an ginohob. Hanoba en enara dou dan, endagai: Indeic, cum, kaba, dan desinsin augwan menau deit. 21:6 Dauwohob, kaba, en esulou dan ucan gin deit, endagai: Indan geicara areg dan desedeb acgunog naugb lusud, kaba, augwan ouwedocohob. Anai dan dedag w Alpa dara w Omega. Hang dan indugwengga sug acgunog. Dara dan indugwengga sug augwan ouwedoc toua. Dangga gareg merijebeni naugb en ehilon maireseb huhugb dag duhu dau dan, kaba, dan deic maireseb gini dag duhu mer gededeic dag mogud dou en toua. 21:7 Dara gareg en emaimo areg gecgu touwero, doba en ebehnehino enin mos dougwo augwan gini namcir, kaba, dan deigdoumesa en moho dag dan indugwihi mogo en dag misen. Hanoba dan dedag men ELOHIM naugb dan doiharaga dara deseyeiyo en terimda, kaba, dan deic areg graga augwan dag mecigbougb dou en toua namcir. 21:8 Doba gareg en ahau dau sug lusud leic mog erij dou en, hanoba en emos emadi dan indoho deseino lusud deitero, doba en aideido dougwo dan namcir. Dara gareg en medoc emebdebin an dan toua deitero, doba en ens enin ainyes dou lusud dag en obsara dau danohob. Dara gareg en aimo areg gogor dara men geicara toua dag mihi men geicara, dara gareg en ohudara, dara gareg en mesira ebsa ligida gus gus aibibrida, dara gareg en agaresa lusud merdoc mes, dara gareg en ecguna dou seiseij, dara gareg en ereiyara, dara en erba mohoisa, kaba, len laugwan gin, kaba, ledomom mougwa cuhwai icira toua. Anai dan dogod dum smougb gedig igdahab gohoseri eb se naugb len debohob. Sug en enara dag graga dou danohob, kaba, en arougb dan deit, endagai: Areg dan desulou ban an gragohob, kaba, ban bog gini se aban surad toua. Anai augwan gini asesa dag misen namcir. 21:9 Dauwohob, kaba, malaikad hom dau merug senggai graga, gedig len los mohoi senggai an gogom gouwedoc gin, kaba, en en aud dan. Dangga sug en edebeij danohob, kaba, en eija dan, endagai: Ban bin. Anai dan douwan dens dau gida areg Domba esedeb en naugb en eic en dag en mesouwa dou banahabi. 21:10 Sug en enara dag gin dou danohob, kaba, Mena Gogoufu ogod dan dag domom gin deit. Hanoba malaikad ahwan dan se menmod gagas medam hom naugb en edens dau Yerusalem Menau Gecabeci graga, gedig ELOHIM esa dau bogaden se cinogo ginohob, dou dan toua. 21:11 Dangga dan deiya, doba cinogo hom ingga, kaba, atij an ELOHIM men gogouf cucugb. Hanoba men mouf esisilo, aninim dag igdahab mera eisaugb, moho w baiduri pandan, men mouf. Dara eni ecabeci dara esgiraha namcir, anai dag igdahab gogoufu, moho w krisdal, gini toua. 21:12-13 Dara len leic igdahab naugb len len liga gebehibera dara gagas medam acec dougwo cinogo Yerusalem ingga. Hanoba len log mes medam sisa hobjerai dag misis se liga gin toua. Dig igda agunya, kaba, len log mes homoi. Dara aud dig dum mer, kaba, len log mes homoi. Dara aud dig dum moho, kaba, len log mes homoi. Dara dig igda obsaresa, kaba, len log mes homoi toua. Sug len log misis augwanohob, kaba, len log moho hom dau leng Israel meijouhuda sisa hobjerai se astesda misis sisa hobjerai mersdemaga ingga toua. Dauwohob, kaba, malaikad merug sisa hobjerai len lekebem naugb len lesedougwo astesda misis gin augwan toua namcir. 21:14 Doba naugb liga ingga, kaba, len leic igdahab medam maga sisa hobjerai. Hanoba len logo dag buc naugb gin touohob. Dauwohob, kaba, len log moho hom dau Domba men logodeh merug sisa hobjerai gaimougtut se astesda buc gin toua. 21:15 Dara dan deiya deit, doba malaikad genara dou dan graga, kaba, en os ijouhugwa hom dau emas icira en mesira naugb en an cinogo dara misis, dara men liga augwan asesa namcir. 21:16 Dangga sug en eic ijouhugwa graga an cinogo Yerusalem Menau ginohob, kaba, dan deiya, doba men gebehibera, dara geisaugb, dara gagas, kaba, augwan aninim namcir. Anai en ecic, doba mougwo dara mebera hwas, dara meis, kaba, dag lusud lec merohora se, kaba, edebeij w juta hwai ribu huntun hogu astesda augwan toua. 21:17 Dauwohob, kaba, en eic ijouhugwa an liga men gebehibera toua. Hang dan deiya, doba men gebehibera gini aninim dag w meter mos senggem. Anai ijouhugwa areg malaikad en os gini naugb en eic ban liga, kaba, susugb dau lusud misen meren ijouhugwa touwero, doba aninim namcir. 21:18 Dara liga geb acec cinogo Yerusalem Menau gin, kaba, len leic igdahab mera eisaugb, moho w baiduri pandan, mogud eng lou dougwo dous. Dara areg geb se cinogo ingga, kaba, augwan dau emas misen mogud gedig men mouf dag sogomehir gesgiraha gin toua. 21:19 Dara buc sisa hobjerai graga, gedig len logo naugb liga geb acec Yerusalem Menau ingga, kaba, astesda igdahab mera eisaugb namcir naugb len lobungma toua. Dangga hang, se buc gedig hom, kaba, len leic igdahab moc gogoufu, en moho w baiduri pandan. Se buc gedig hwai, kaba, len logo igdahab moc geirir, en moho dag w nilam. Se buc gedig homoi, kaba, len logo igdahab moc gaugweda, aninim dag mireh. Se buc gedig hogu, kaba, len leic igdahab moc gaugweda misen, moho w samrud. 21:20 Se buc gedig sergem, kaba, len logo igdahab moc gahani, moho w baiduri sepah. Se buc gedig senggem, kaba, len leic igdahab moc gahan misen, moho w delima. Se buc gedig senggai, kaba, len logo igdahab moc gohoseri dag emas, moho w ratna cempaka. Se buc gedig senggemoi, kaba, len leic igdahab moc dag geirir dara gaugweda, moho w pirus. Se buc gedig senggegu, kaba, len logo igdahab moc gohoseri misen, moho w topas. Se buc gedig sisa, kaba, len leic igdahab moc gaugweda, moho w krisopras. Se buc gedig sisa hobjerem, kaba, len logo igdahab moc geirir, moho w lasuardi. Dara se buc gedig sisa hobjerai, kaba, len logo igdahab moc gahan geijor, moho w kecubung. 21:21 Dara misis sisa hobjerai geb se liga graga, kaba, len leic sariou mogo sisa hobjerai naugb misis meh gin toua. Doba astesda misis meh gin, kaba, len lesinsin sariou mogo hom naugb dous. Dara ucina geb se cinogo Yerusalem Menau ingga, kaba, augwan dau emas mogud. Dangga men mouf, kaba, aninim dag sogomehir gesgiraha namcir. 21:22 Dara dan demeiya tuari emeb se cinogo ingga toua deitero, doba augwan ediyebeiya namcir. Anai maman Adehsud, ELOHIM Gedig En Mobisamougb, dara Domba, kaba, lan ladag tuari naugb lusud ginohob. 21:23 Dara igda lona, dara igda loba, kaba, lan toua lamerba marufesa deitero. Doba lan laos dauwohob, anai ELOHIM men gogouf cucugb einyedei cinogo augwan. Dara Domba, en toua, edag mouf naugb aisema lusud laugwan toua namcir. 21:24 Dangga, kaba, maran lusud len lemec dara lemeicara se lobeigbogo toua deitero. Doba astesda sug len lec, era len leicara, kaba, mouf gini aisema len terimda. Dara lusud meren mougt mera medam dau cinogo augwan, kaba, len lodo meren aremougb mera eisaugb areg len leimiman lenin an gin dou ELOHIM dara Domba se cinogo Yerusalem Menau ingga besesa terimda toua. 21:25 Dara sug ELOHIM men gogouf cucugb dara Domba men mouf aisema len beb huhugb dag ginohob, kaba, len lemouf misis dougwo areg gecgu dag nosa toua deitero. Doba misis eb dangga terimda, anai loba ediyebeiya dau len namcirohob. 21:26 Hang aremougb areg lusud leimiman lenin an gini, dara areg mera eisaugb, kaba, len lemedug merohora an touwero. Doba len merohora esesa an terimda sungga toua. 21:27 Dangga gareg en aimo areg gogor, hanoba en ecguna dou seiseij, dara en aideidora, dara en ereiyara, kaba, len lemeinesa cinogo Yerusalem Menau gin touwero. Doba len gedig Domba og len meroho se men Surad Maireseb Menau Geb Huhugb ginohob, kaba, len eng lemeinesa cinogo menau gini dous.

Sondapa 22

22:1 Dauwohob, kaba, malaikad graga en ens duhu hom geic maireseb menau geb huhugb dou lusud gagunya dau ELOHIM dara Domba maran maija moc dou dan deit. Duhu gini, kaba, ohw se cinogo Yerusalem Menau men ucina medi gin toua. Hanoba en mei esgiraha namcir, aninim dag igdahab gogouf cucugb, moho w krisdal. 22:2 Dara se ucina medi, kaba, sogo hom, moho maireseb menau geb huhugb, gedig gerba mom dig duhu nagama nagama se toua. Hanoba astesda igda, kaba, en era mera mougwa cum. Hang se arisogomoc hom, kaba, en era mera edebeij mougwa sisa hobjerai icirohob toua. Dara sogo ingga meh, kaba, men goubesa inggebga naugb sug eic geingmos agauwesa dou lusud se cinogo augwan toua terimda. 22:3 Dangga lusud areg ELOHIM men gagaresa oiharaga lenohob, kaba, len lemeigtou se cinogo Yerusalem Menau gin touwero. Doba ELOHIM men sogougwir lenin dous eng leigtou se cinogo ingga naugb len lesijaresa en beb huhugb terimda. Anai ELOHIM dara Domba, lan laigtou se maran maija moc sungga an lenohob. 22:4 Hang len leinyohw mernesa en terimda, kaba, en ed en moho dag hugba se len mersdemaga toua. Anai en moho aiga lenohob. 22:5 Dara sungga, kaba, loba toua, naro. Hang len lemouwan padoumara mouf dara igda mouf toua deitero. Doba len larges dau namcir, anai meren Adehsud ELOHIM en edag mouf naugb aisema lenohob. Hanoba len ledag mougt mera medam gedeijan desij en beb huhugb namcir toua. 22:6 Dauwohob, kaba, malaikad hom gos mohoi hom an gogom graga, kaba, en esulou dan ucan gin deit, endagai: Areg ban bouman dara beiya gragohob, kaba, augwan gini asesa dag misen namcir. Dangga hang, ban bemeija abuwesa gini toua deitero. Doba ban bod abina debsa gin terimda. Anai ELOHIM, meijen Adehsud, enin eng esa men malaikad hom dou yen gedig yen yesai en moro gini, naugb en ens dau areg edagasohob augwan dou yen. Dauntoba men sogougb yen yecinaga dau areg en esedebohob gini meijouhw augwan asesa. Hanoba yen yesai dou lusud laugwan toua, anai en esa Mena Gogoufu se yen meigdoc mes debin ginohob. 22:7 Sug malaikad esulou dan dag ginohob, kaba, dan douman Yesus enin mer sug en ouma debin augwan gin toua. Hanoba en enara dou dan, endagai: Indeic, Lona Naugb Sug Dan Decicugwen, kaba, edagasa namcirohob. Dangga hang, gareg en emetogoto areg geb se aban surad ginero, doba en eicara baimo gin terimda, kaba, ELOHIM eic geigouhw dou en toua. Ban bouman areg dan den dou ban gini deigeigouhw namcir. 22:8 Dangga sug dan douman dara dan deiya areg gin augwanohob, kaba, dan deijeboho damuhumlo deseino malaikad hom gedig en ens areg graga augwan dou dan naugb dan desijaresa en toua. Anai dang, Yohanes, eng douman dara deiya augwan gini dag misen namcirohob. 22:9 Doba malaikad graga en en dougwo dan, endagai: Ban bemeijeboho bamuhumlo deseino dan naugb ban besijaresa danlo. Doba ban besijaresa ELOHIM enin dous. Anai dan toua, dedag ELOHIM men sogougb, aninim dag ban abaguner yen yaugwan gedig yen yesai ELOHIM Mer Geigouhw eisaugb Yesus dou lusud, dara len gedig len leicara laimo areg ban bog se aban surad len laugwan gin toua. 22:10 Sug en en dougwo dan dag ginohob, kaba, en arougb dan ucan gin deit, endagai: Areg ban bog se aban surad ginohob, kaba, ban bemecgoneh dau lusud touwero. Doba ban bens dau augwan gini meijouhw asesa dou len terimda. Anai lona naugb sug augwan gini agunya ainyes, kaba, ebeij deinyor namcirohob. 22:11 Dangga hang, gareg en aimo areg asesa ELOHIM enin medoc mesohob, kaba, en emarges dau gin touwero, doba en eicara baimo augwan gini esesa terimda. Dara gareg ELOHIM ouci en debinim naugb enohob, kaba, en emarges dau sug en esogwa deisa ELOHIM mohotimei mohw touwero, doba en eicara baimo areg ELOHIM arougb en an gin toua terimda. Doba gareg en medoc etrij naugb en ouwan aimo areg gecgu, kaba, eigouhw naugb en emarges dau gin touwero, doba en eicara baimo dangga. Dara gareg en ouwan naugb areg gogor eb se en toua, kaba, eigouhw naugb en emedu augwan gini dau en touwero, doba eb dangga terimda toua. Anai lona naugb areg geb se aban surad gini sug ebiji, kaba, edagasa namcirohob. 22:12 Sug malaikad enara dag graga dou danohob, kaba, Yesus ouma debin en mer mougwa hom ucan dou dan deit, endagai: Indeic, Lona Naugb Sug Dan Decicugwen, kaba, edagasa namcirohob. Hang dan demeic lusud meren siouwa dou astesda dau len, aimo dau meren geicara augwan dou len toua. 22:13 Anai danin eng deis huhugb acgunog, terimda dedebeij sug ouwedoc toua. Hang dan demedag w Alpa dara w Omega, kaba, areg acgunog dara ouwedoc augwan toua ogdoc dan namcir. 22:14 Dangga gareg en edu men sansun augwan ecabecohob, kaba, en emeigtou dig Yerusalem Menau gin medigo touwero. Doba ELOHIM ec misis dau en naugb en einesa namcir. Hanoba en eic goubesa dou en naugb en et dau sogo geic maireseb menau geb huhugb mera gin toua terimda. 22:15 Doba gareg men geicara aninim dag mihi men geicara, dara gareg en agaresa lusud merdoc mes, dara en ohw en maga dou len gus aibibra, dara gareg en es len gus, era ohud len toua, dara gareg en ecguna dou seiseij, dara gareg en medoc gororougb naugb en ereiyara dara erba mohoisa, hanoba en aimo gin toua terimda, kaba, len gini len lemeinesa Yerusalem Menau ginero. Doba len leigtou dig medigo beb huhugb namcir. 22:16 Dang, Yesus, dan demesa indan malaikad hom dou yeng se goucimdeb senggai gini naugb en esai areg graga augwan dou yen toua. Dauntoba yen yecinaga meijouhw augwan asesa namcir. Anai dan dedag Daud medebeito mohora hom gini naugb dan deigdoc lusud dau sesar men gogom augwan. Dara dan dedag singmur mouf gesiabaga, ansins dag cum, kaba, areg menau toua agunya. 22:17 Sug dan douman Yesus esulou yen yaugwan dag ginohob, kaba, dan douman Mena Gogoufu dara Yesus men lusud sug len lacgeij Yesus naugb en ecicugb dedemeda toua. Anai men lusud gin, kaba, en esedeb len naugb en eic len dag en mesouwohob. Hanoba len leija en, lendagai: Adehsud, ban becicugb aud emen dedemeda namcir. Dara yeng se goucimdeb senggai gini sug len lecic dau areg geb se surad gin dou yenohob, kaba, yen toua yeiyagarij maman Adehsud naugb en ecicugb dedemeda toua. Dara gareg en medoc erleij naugb Yesus eic maireseb menau geb huhugb dou en, kaba, en emamsoho gin touwero. Doba en en dedemeda naugb en acgeij gini dau maman Adehsud. Aninim dag sug sud hom merijebeni, kaba, en emeigtou augwougb touwero, doba en en naugb en eg duhu gin toua. Anai maireseb menau geb huhugb areg Yesus esedeb naugb en eic dou yen, kaba, yen yemouma dau en touwero. Doba en eic dag mogud dou yen dous. 22:18 Dangga gareg en ouman dau areg geb se surad ginohob, kaba, dan desulou en dara goubesa dougwo gin namcir. Dauntoba en emeic moho hom ingma naugb en emaulo debin mer gin touwero, doba en esa doc namcir. Anai sug en eicara dag gin, kaba, ELOHIM eic men gogom areg dan dog se surad gini aulo debin dou en toua. 22:19 Dara gareg dau yen en edug moho hom dau areg geb se surad gin, kaba, ELOHIM emeic areg en os dou en se indan surad gin dou en touwero. Doba en edug augwan dau en namcir toua. Hanoba en emeinesa cinogo gecabeci gini, dara en emet dau sogo maireseb menau geb huhugb men mera gin touwero. Doba en eigtou dig medigo dau augwan beb huhugb namcir. 22:20 Dauwohob, kaba, dan douman maman Adehsud en mer ucan gin deit dag en emamsoho maman debero. Doba en ecicugb dedemeda aud maman toua. Anai areg geb se surad gin, kaba, augwan dau enohob. Hang en emenara dou dan, endagai: Indeic, dan demamsoho yen deitero, doba dan demecicugb aud yen dedemedes. You, Adehsud Yesus, emen emaugwan emouwan naugb ban becicugb aud emen dedemeda toua, anai ban bedag emen mougt mera medamohob. 22:21 Dan dacgeij maman Adehsud Yesus gini naugb en medoc eineg an yen yaugwan toua. Anai en ouci maman debinim naugb enohob. Augwan gini asesa dag misen namcir.