1. Eho Matiusat dat ahamda Boehàda Daud labe aho vou faat lehe mekehàda Yesus lam abo Alat Gagu Fihasi Vimteme Oluhu Dat Boehàda labe Am im lam toedaha bak. Nehaha bak. Ame Boehàda Daud lam iho ozom di am abo Abraham labe aho vou faat leheda meida modem bak. Lahana Yesus labe Am vou faat lehe debu iademe faasi vou nom gago ledam di Am tai ahobada Abraham nasi gagomda am bak. Ame lab vou faat lehe debu neha:
2. Abraham labe aho faahada Isak am. Labi Isak labe aho faahada Yakub am. Labi Yakub labe aho faaha adam dua belas ehe bak. Meida Yehuda am.
3. Labi Yehuda Tamar ve adam ahim faa. Meida Peres am. Labi meida Zerah am. Labihasu faada. Labi ame da Peres labe aho faahada Hezron am. Labi Hezron labe aho faahada Ram am.
4. Labi Ram labe aho faahada Aminadab am. Labi Aminadab labe aho faahada Nahason am. Labi Nahason labe aho faahada Salmon am.
5. Labi Salmon labe aho faahada Boas am. Ame da Boas labe am oi Rahab am. Labi Boas labe aho Rut ve Obed faa. Labi Obed labe aho faahada Isai am.
6. Labi Isai labe aho faahada Boehàda Daud am. Labihasu nom vou gago usdam bak am. Ame da Abraham labet faasi ame dam debu vou ded ladume Boehàda Daud vi tau gagom di ame dam debu ab empat belasleham. Labi Boehàda Daud labe aho Uria elohona labe am maboe Batsyeba ve Salomo faa.
7. Labi Salomo labe aho faahada Rehabeam am. Labi Rehabeam labe aho faahada Abia am. Labi Abia labe aho faahada Asa am.
8. Labi Asa labe aho faahada Yosafat am. Labi Yosafat labe aho faahada Yoram am. Labi Yoram labe aho faahada Uzia am.
9. Labi Uzia labe aho faahada Yotam am. Labi Yotam labe aho faahada Ahas am. Labi Ahas labe aho faahada Hizkia am.
10. Labi Hizkia labe aho faahada Manasye am. Labi Manasye labe aho faahada Amon am. Labi Amon labe aho faahada Yosia am.
11. Labi Yosia labe aho faadaha adam Yekon meida am. Labi Yosia labe am adam faadume modeha Babel damat Israel dam tet siàdume Babel laba vou ladume ukbome seti ab vou esdamam. Labihasu ame da Boehàda Daud labet faasi ame dam debu vou ded ladume ame Israel dam Babel damat tet siàdume Babel bak laba vou ladume ukbome seddaha debu laba vi tau gagom di ame dam debu ab empat belasleham.
12. Labi Babel laba tet vou esdamehamdi afoezobe fa isi olulo vabalehe di labe Yekon labe aho faahada Sealtiel am. Labi Sealtiel labe aho faahada Zerubabel am.
13. Labi Zerubabel labe aho faahada Abihud am. Labi Abihud labe aho faahada Elyakim am. Labi Elyakim labe aho faahada Azur am.
14. Labi Azur labe aho faahada Zadok am. Labi Zadok labe aho faahada Akim am. Labi Akim labe aho faahada Eliud am.
15. Labi Eliud labe aho faahada Eleazar am. Labi Eleazar labe aho faahada Matan am. Labi Matan labe aho faahada Yakub am.
16. Labi Yakub labe aho faahada Mariam dat Yusuf am. Labi Maria labe aho faaha adat Yesus am. Am abo Alat Gagu Fihasi Vimteme Oluhu Dat Boehàda am.
17. Labihasu ame Israel dam damat tet siàdume Babel laba vou le ukbome seddaha debu labet faasi ame dam debu vou ded ladume fa Yesus abo Alat Gagu Fihasi Vimteme Oluhu Dat Boehàda vi tau gagom di ame dam debu ab empat belasleham.
18. Yesus abo Alat Gagu Fihasi Vimteme Oluhu Dat Boehàda faaha di nehaha bak. Amu Am oi Maria Yusuf aho valo ozome gagu esu. Labi esu vou faodameilahit Maria dat vaha vab nam Alat Am Aha Nutabe Neàna labe fa Maria bake modi vizi ab zubuleham. Labi Yusuf aho Maria valo vou faodameam aahat Maria zubulehe bak ab aame ozobohudeham.
19. Labihàmu Yusuf am gi Alat gagu fi hasi esuhu im zi ahebu ulohodesu vamdesu meedam dàt modem labe aho valo modem nam zubulehe bak aahemu fa ame nam valo modem bak lam faatom bak ab vi ozodamam. Lahana aho Maria mom bak ahate gagosome ozoha, Mariat ladem bak labna zohàme ahate gagom mu gi fa aa vameame faatom bak ab vi ozoham.
20. Labi ozome neàdi bisu iddameam uleha Alat Am im gagu vou usemda labe Yusuf aba am obe laba duzu nehame vameadamna ab uledamam. “Yusuf, abo Boehàda Daud vou faat leheda oa, Maria oho vam bak a odohali momule. Ame Mariam zu ad laba modesu datalehena lam meit modem kaio. Abo Alat Am Aha Nutabe Neànat modi vizi zubulehenat moz. Om Maria a momule.
21. Maria am ba daboseà faa tame. Daboseà faasi oho ba ee talulo modemeam dam bake Soat Vausu Fa Vei Neàdemda ee, ‘Yesus,’ lahame talule. Ame Da lam Am Yahudi dam totbaho labe iho faina meedàmu Alat beom bake Aho ba soat vausu fa vei neàdelo modemu ee, ‘Yesus,’ lahame talule.” Lahame duzu vameadamna ab uleham.
22. Ne, ame im lam ahebu gi dat ahamda Alat vameadaha im aime fa dam bake ahate vameaidahada Yesaya labe aho fet toeme esuhu im lam fa imbodem bake ahit labihaha bak.
23. Aham di iube Alat Yesaya bake neha: “Nam soaona damat modehe vab nam zubuli daboseà faa tame. Faasi damat ihimo ba, ‘Imanuel,’ lahada tame.” Lahame ame lab fet toeme esuhu im lam fa ab imbodeham. “Alat iba taumda,” laham bak fa Ibrani dae gagom di gi, “Imanuel,” laham bak.
24. Labi Yusuf keesi ame Alat Am im gagu vou usemda labe aba neha, “Maria vale,” lahame gagoho baket ab modeham. Maria ve am numa ab vou laham.
25. Lahana ba modem vaba gi daboseà faasi neàdehezobe ba modelo gi vou faoda. Labi vou faodameilahit Maria daboseà ab faaham. Faasi ee, “Yesus,” lahame ab taluham.
1. Boehàda Herodes labe aho Yudea bak laba azihi dam vuusu im vahokedam di labe Yudea bak labe aba zoho modesuhu num debu Betlehem laba Mariat Yesus ab faaham. Labi Yesus faasi vou esdameilahit falo modem bak ozobohu dam totbaho labe ala debu zizem bak labet kota Yerusalem laba ab ledaham.
2. Labi kota Yerusalem bake ledume lefusi neha, “Data faahana um Yahudi dama vuusu boehàdatebolelo modem Data akete? Im ame boehàdatebo faaseo modem di labe duzum falo ala debu zizem bak laba duzuhuna iho bak ibida iubet aaho. Im ame Data lam, ‘Feàte,’ lahame ozome ahu adat iedi vou baedalo leho,” lahame vabi iuba le gagu ai. Iuba le gagu ai. Lahada.
3. Labihadameilahit Boehàda Herodes ame im lam aime modeha vi ozoda. “Oo, em boehàda am bak. Akati Data etei faahana boehàdatelelo mode?” lahame àvodi vi ozoda. Labi kota Yerusalem laba azihi dam totbaho ahebu gi laha àvodi vi ozoda.
4. Labihàmu Yahudi dam labe ibi iho Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu Herodes labe aho gagome ab valadaham. Labi valadume li dozeadume neàdi Herodesat vabi vi ailo ab gut gagoham. “Alat aham di iube meia fet vameadume esuhu im toedahana lam Aho Gagu Fihasi Vimteme Olulo Modem Dat Boehàda lam ake faalo modem im toeme esuhela?”
5. Lahahat ame dam zi labe fa gago, “Yudea bak labe aba zoho num debu Betlehem laba faalo modem bake. Dat ahamda Alat vameadaha im aime fa dam bake ahate vameaidahada labe aho im nehasu fet toeme esuhu labe iho aame ozobohudehe bak.
6. ‘Yehuda bak labe am num debu meida Betlehem laba azim dam oa, Yehuda bak laba modesuhu num debu meiti num debu meiti labihasu azihi dam lam bisi um voou meit ihimo feà damalem vabak. Um laha feà damalem bak. Neham bak. Ba ubu meida labe boehàdatebolem bak ehe bak. Ame Boehàdatebo lam Aho fa Israel ahamda labe aho ba vou faat ladaha dam laba vuusu im vahokeda tame.’ Lahame fet toeme esuhu im ahum lam iho aame ozobohudehe bak,” lahame Herodes bake ab vameadaham.
7. Labi vameadume neàdi dam lada debu behàsu lam fa lada. Labi fa ladume seti Herodes labe aho dam falo modem bak ozobohu dam lam fa neo aa gagome leda. Ledume dozeadume neàdi Herodesat ab gagoham. “Ame falo ahamte futoi duzuhu di um adi diat aahela?”
8. Lahame labi gagu aime ozobohudi neàdi Herodesat fa neo vi gago, “Uho nasi Betlehem laba le iademe nabidamehamdi ame Data lam vi aale. Vi aameam làhà eba taho fa li gagole. Em laha ame Data laba, ‘Feàte,’ laham bak ozome ahu adat iedi vou baedalo mozo,” lahame ahi vageme ame dam lam Betlehem bake ab gagu oluham.
9. Labi ame dam labe ame im lam aime neàdi neo ab ladamam. Ladameam aaha amu ala debu zizem laba aaha falo lam neo futoi duzu nasi ladam bak vi aahemu ab deeli vàhàdeham. Labihàmu damat gi fako zisu vou vi vulada. Labi ame falo labe dam lam vou ladume ame Data vou aidam numa fuhuzobe num ahoba laba ab duzuham.
11. Labihàmu damat ame num laba oli vi aaha Data lam am oi Mariati ab aaham. Labi aahemu ame Data lam, “Feàte,” laham bak ozome ahu adat iedi ogomasu biti ab vou baedamam. Labi soa maehena dumna ame dam labe vou lehena lam fi stoi nazoh vihiladume ab lodaham. Emasti labi na ahana neàna vuahubulemna kemenyanti labi na ahana neàna ut àkti ulohona soa noimna murti labihasu vihiladume ab lodaham.
12. Labi lodume neàdi fa ibi esum bake bolohet ab laham. Alat dam laba neha, “Herodes bake fa a lamule,” lahame gagohona ulehemu gi bolohet fa ibi esum bake ab iliham.
13. Labi ame dam falo modem bak ozobohu dam lam fa ladume seti Yusufat ba bisu iddameam uleha Alat Am im gagu vou usemda meida labe aba usi im vameadam bak ab uledamam. “Om nasi keele. Boehàda Herodes labe aho om Data otem bak nabidalo mozo. Om nam Mariati ahili Data ve taho Mesir bake vou itale. Laba le azi faobe eho ba neo nom ilu oba gagohozobe fa vou lem neàte,” lahame labi vameadume neàdi esmozi ab tom iluham.
14. Labi Yusuf keesi am nam Maria am Datati ukeme ame aibu labe Mesir bake ab vou itaham.
15. Labi Mesir bake lafusi aidam di lam gi Boehàda Herodes elohozobe fa lam bake vou faoda. Ame da Yusuf am nam am Datati Mesir bake vou itaha bak lam gi dat ahamda Alat vameadaha im aime fa dam bake ahate vameaidahada labe aho nasi nehi fet toeme esu. “Em Adat fa vi gagome Mesir bak labet fa Aba bake vou lelo mozo.” Lahame labi fet toeme esuhu im lam imbodelo modem labe Data lam ab vou iliham.
16. Labi Boehàda Herodes labe aho amu ame dam falo modem bak ozobohu dam laba neha, “Aba fa li gagole,” lahame gagu oluhu bak lam vou faodaha dam ame Data laba le aame fa aba li gagom vaba ahi vageme setehemu faki feà bak fusi am meo dam zi ab gagome ledume li dozeadaham. Labi dozeadume neàdi gut vameada. “Um nasi num debu Betlehem lamti labi num debu netàda zi lamti ahebu le nabidume daboseà tahun behàsdeheda lamti labi daboseà tahun behàsdehe vabda lamti labihasu ahebu oddale,” lahame vameadume ab oluham. Ame Boehàda Herodes labe nehi ozo. Ame dam falo modem bak ozobohu dam labe amu aba lehe diat nehi gago, “Ame di lam iho falo alimeat aaha di am tame,” laham bak ozobohudi am meo dam labihasu vameadume olu le ame baket ab modeham. Abo num debu iudu odda. Labi num debu iudu neo odda. Labihadume daboseà tahun behàsdeheda lamti labi daboseà tahun behàsdehe vabda lamti ahebu ab oddume foleham. Labihàmu Betlehem laba azihi Yahudi lahi lamti labi num debu netàda zi laba azihi Yahudi lahi lamti im data daboseà damat oddume foli seddàmu meb dae feàna faasi meedam bak lam damat ab aidamam.
17. Labihàmu dat ahamda Alat vameadaha im aime fa dam bake ahate vameaidahada Yeremia labe aho aham di iube nehi fet toeme esuhu im nim ab imbodeham.
18. “Damat aiha, num debu Rama abo kota Yerusalem netàdehe bak laba meit ahu faidi meb dae feàna meedam bak damat aidalo. Abo Israel nam Rahel labe am data ilahu vi ozome medaom bak damat aidalo. Am data elodume foli seddàmu meit vabededam diat ba ahu neàdi dae vabalem bieho.” Lahame labi fet toeme esuhu im lam ab modi imbodeham.
19. Labi Yusuf am nam Maria am Datati Mesir bake aidam lahasuhu di labe Boehàda Herodes bak abada laba ab eloham. Labi eloi neàdehezobe aibu meida labe Yusuf bisu iddameam uleha Alat Am im gagu vou usemda meida labe nom ilu am obe laba li duzu im nehame vameadamna ab uledamam.
20. “Yusuf, om nasi keesi usai om nam am Datati fa Israel bak laba vou lam neàdeho. Dat boehàda labe am meo dam gagome data ahebu oddam labe ozo, ‘Data oboda laha vi tau otese,’ lahame ozohoda lam eloho,” lahame labi gagu neàdi fa ab tom iluham.
21. Labi Yusuf kehàm vaba usai Maria am Datati gagome Mesir vou esmozi Israel bak laba fa ab vou laham.
22. Labi fa vou le azi modeha ame Herodes labe am adat Arkelaus fa neo boehàdateli ame Yudea dam neo vuusu im vahokedam bak aihemu fa Israel bak zoho labe Yudea bak laba lam iedi fa itam bak neo ab vi ozodamam. Labi fa neo itam bak ozome bisu iddameam uleha Alat Am im gagu vou usemda labe neo nom ilu aba li duzu im nehame vameadamna ab uledamam. “Oho etei li aidam bak niba a aidamule. Om gi Israel bak zoho labe Galilea bak laba lale,” lahame labi gagoho bak lam aihemu ame baket ab modeham. Yusuf am Data Am oiti vahi bak lam vou esmozi Galilea bak laba ab laham.
23. Galilea bak zoho labe am num debu Nazaret laba le im Data Yesus ab vou aziham. Ame bak lam modehemu dam ahamda Alat vameadaha im aime fa dam bake ahate vameaidaha dam zi labe ibi iho amu nasi nehame fet toeme esuhu im nidi nim ab modi imbodeham. “Ame Da lam ba, ‘Nazaretda,’ lahame gago tame,” lahame fet toeme esuhu im lam ab modi imbodeham.
1. Labi num debu Nazaret laba le im Data Yesus vou azibehamdi tahun ba di iube Yesus busaoli aidam di labe Yohanes Mei Vuu Valo Baptisleiamda labe aho Yudea bak bàhàgo bak laba abo bak aotba baa bohu dam vaba alim bak abo Yordan Soabo laba le Alat amu aba gagoho im aho fa ot vai dam bake ab vameadume fi dedamam.
2. “Alat Aba Aho amu di iube fet gagu esuhu digat ab vou fuham bak. Aho Gagu Fihasi Vimteme Oluhu Dat Boehàda lam etei bak niba lehemu Ahamo Boehàdateboli dam bake deeli vame Am damali vuusu im vahokedam bak lam etei ab faasi gàhàli meedamam bak. Labihàmu uho faina meedam bak lam nasi voedume fa ahu neà bak vàmadi meedale,” lahame dam bake ab gut vameadume fi dedamam.
3. Yohanesat aho etei ame alim bak laba le lab vameadaha bak lam dat ahamda Alat vameadaha im aime fa dam bake ahate vameaidahada Yesaya labe aho aham di iube nehame fet toeme esuhu im nim ab modi imbodeham. “Dat bak aotba baa bohu dam vaba alim bak laba azi dam aba valadamda zi laba dae buduana nehi vameada. ‘Alat Gagu Fihasi Vimteme Olulo Modem Dat Boehàda lem zie laba uho nasi duzu zie fet vueme neàdehena ahum Am ba lese. Aho lem zie a kibuna vuemule. Abo vamdesuhuna bàneàna vuele.’ ” Lahame Yesayat aho aham di iube lab fet toeme esuhu im lam imbodi Yohanesat ab faasi meedamam.
4. Ame da Yohanes lam ba ibi iho bak damat modi baleàhà bakti uloho vabak. Aho gi nehada. Abo sue keàbebuna unta tau neme etehàsoali fa sue baabuli sue sona bohu tademe dusu. Labi am kemohode laba laha sapi sokbat gimsu. Labi na àm di gi sàgàhàti labi bonahi ila labe am vaksati àda. Gi labihasu meedam dàt modem bak.
5. Lahamda labe ame dam vaba alim bak laba azi vameadume fi dedam di labe dam feà bak aba fet lei fet leida. Neha: Dam Yudea bak labe am num debu meida Yerusalem laba azim dam zi lamti ame Yudea bak labe am num debu mei num debu meime esdam dam totbaho lamti Yordan Soabo valau obe modesuhu num debu mei num debu mei lahadume azihi dam lamti labihasu, “Imo iuba le Yohanesat lab vameadam im lam aidase,” lahame Yohanes bake abo gi dihasi valada. Dihasi valada.
6. Labihadam damat iho Yohanesat lab vameadaha im lam aime iho faina meedaha bak ahate gagodume afoezobe Yohanesat ame dam lam vame Yordan Soabo laba vuu valo ab baptisleidamam.
7. Labihasu meedam di labe Farisi damti Saduki damti laham Yahudi dam zi labe ozo, “Yohanesat iba laha vuu valo baptisleidase,” lahame aba neo valada. Ame dam zi labe aba valadam bak aahemu im nehasu ab gut vameadamam. “Um gi meoli fai bak tadi meedam dam labe fa ozbat meoli meedam bakti ulohona meedam damat modem bak. Uho vedi nehi git ozo, ‘Meit im vuu valo baptislemeam làhà Alat dam ba beodam diat imti beom vabak am tiba.’ Làhà um git ozo. Uho faina meedam bak voedume fa ahu neà bak vàmadem vabameam Alat um laha beolo modem bak.
8. Alat uba ba beom vabake uho gi nehame meedale. Uho neha, ‘Ibi iho faina meedam bak lam voedaha bak,’ laham bak lam imbodemeam làhà fa im neà bakta vàmadi meedale. Uho labi modemeam làhà damat aame ozo, ‘Aa làhà! Dam nim iho faina meedam bak lam voedume fa ahu neà bak vàmadehe?’ laham bak lam damat aame ozobohudem bake uho gi nasi im neà bakta meedale.
9. Labi um ahu a nehi git tu vi ozodamule. ‘Im tai ahamda Abrahamat vou faat ledaha dam zoho im Yahudi dam am bak. Labiha labe Alat iba ba beom vabak. Im neà bak,’ laham bak lam um ahu a git tu vi ozodamule. Alat ozomta gi ame bak labet neàdem vabak. Abrahamat vou faat ledaha dam dualem vabameam làhà Alat gi ke zi nim modi fa Abraham mekehà damalem meo bak.
10. Alat gi dat ut siemda labe aho ut debu laba olo bà ahamaesu vou duzu neàdeheda lamti uloho bak. Labi aho ame ut oo valem bak aameam ut oo neàna valem bak aam vabda ahebu siedume fa visomoame vua sutem gikina elum bohu vuusumna laba voeda tame. Abo uho faina meedam bak fa voou ahu vei neàdi vàmadi im neàna meedam vabameam eho etei uba lab gagoho bak lamti uloholi Alat labiham bak.
11. Dam giida labe iho uba aame ozo, ‘Um faina meedam bak lam uho voedume fa ahu neà bak meedalo vàmadi fa Ala bake tu vuzehe?’ laham bak aame ozobohudem bake eho uba gi vaota baptisleidam bak. Lahana Dat ba em ohuse vi vulelo modemda lam bisi feàda am bak. Em gi feà vab dàt modem bak. Abo Am naba dusumna lo tadehena lam eho ziamoi vou lam uloho vabak. Lahamda labe Aho ba vuli uho Aba tu vuzehi meedàmu Aho Alam Aha Nutabe Neàna lamti vuati labihasu uba modi vizi teudeda tame.
12. Ame Da ba vulelo modemda labe Aho ba dam faheme afoezobe dam faina meedam dam lam vua sutem gikina elum bohu vuusumna laba voeda. Labi dam ahu debu vei neàdi im neà bakta meedam dam lamota fi me vada. Labihadamdaleàmu Am gi dat gandum oo fet lamti naube amomoiti veimodam datti uloho bak. Ame Da nibe gandum fi kbodume vaheme dehaleheda laba na nekehàsonabut dalu tom voou oo goaitoi nutabet fetti naubeti veimome fa nuta ateme vou le am na gihoemda vahedam num laba vahedam bak. Lahana fet lamti naube amomoiti Naedat fa feàktoi vou le vua vahudam bak,” lahame Yohanesat ab vameadaham.
13. Labihadam digat meida labe Yesus Galilea bak labe lehe labe Yordan Soabo laba li Yohanes bake ab gagoham. “Om laha Em vuu valo baptislele.”
14. Lahame labi gagoha Yohanesat odohali mu gago, “Ai, gi Oho bisi feàda labe em vuu valo baptislem bak. Lam bisi neà bak am. Lahana akati Oho eba, ‘Om vuu valo baptislele,’ lahame eba labi gagohela?”
15. Lahahat Yesus fa gago, “Neà bak. Oho gi ozahit Em vuu valo baptislem neà bak. Oho Eba labihasu meedam labe Alat Aba Aho amu lab ozome esuhu bak lam ahebu gi ab modi imbodemam bak.” Lahame labi gagohemu Yohanesat Yesus ab vuu valo baptisleham.
16. Labi valo baptisli neàdi Yesusat gi etei vao labet sikisi duzu aaha asum ab fatahivaham. Labi tom aaha asum fatahivai bumatalehe bak labet Alam Aha Nutabe Neàna labe fa bume doleti ulohonali nom oaedume Yesus bake nom vousi nusu vizi ab teudeham.
17. Labi modeha Alat Aba Aho azihi bak asum ahoba iubet ab nom gagoham. “Da nim Em Adat vàmtea Ebe Eho bisi deelemda Am am tame. Em abo Aba Aho meedam bak lam Em aam deeleho,” lahame ab nom gagoham.
1. Labi Yesus modi vizi teudehe labe Alam Aha Nutabe Neàna labe Aho ozo, “Iblisit Yesus bake modi ozose,” lahame Aho neo Yesus bake modi bak lam vou esmozi fa bak aotba baa bohu dam vaba alim bak laba ab vou laham.
2. Labi ame bak laba vou le vou godam di lam Yesus ahit na koena àm vaba idaia ibzidamehamdehe labe usi empat puluh foli modeha idoali ab beoham.
3. Labi idoali aidam di labe Mei Ahu Modi Ozolo Modemda abo Iblisit Aba li ab gagoham. “Om, ‘Alam Adat,’ lahamda Om idoalehe bake nasi ke nidi nim gagome rotibu lemeta.”
4. Lahame labi gagoha Yesusat fa gago, “Vabà! Alat Vameadaha Im Toedahana laba meit im nehasu toeme fi hasi esuhu bak. ‘Dam gi na àm bakta ahedem vabak. Abo Alat Aho gagoho im ahebu aime meedam bakti labihasu meedam labe im ahedem bak.’ Lahame toeme esuhu labe Em moho bak.”
5. Lahame labi gagu neàdi Iblisit ba neo Yesus kota Yerusalem abo Alat fi hasi gagu esuhu num debu bak laba vou le ame Fihasi Ala Bake Vou Baedam Num Vàmteabu labe am bisi ohut baa kila bak laba vou zisi duzu ab gagoham.
6. “Om, ‘Alam Adat,’ lahamda Oho num ohut baa nibe so ateme feà bak niba nom ilu aamale. Alat Om gem bak malem zoaha bak. Ne, Oho ba modem im nim Alat Vameadaha Im Toedahana laba meit im nehasu fet toehena taia? ‘Alat Am im gagu vou usem dam laba gagu oluhu labe im anekehàt Om si soat vausu vuusu vousem bak. Ba kebu bake nom ilu Om naba vatfom vabak.’ Lahame toehena taia?”
7. Lahame labi gagoha Yesusat fa gago, “Vabà! Em ba Ala bake labihasu modi ozolo modem moho bak. Nehaha bak. Alat Vameadaha Im Toedahana laba im meida nehasu toeme fi hasi esuhu bak. ‘Boehàda ubu uho vou baedam Ala laba uho a, “Iba taueo? Iba taum vabao?” laham bak lam a modi ozolo meedamule.’ Lahame labi toeme esuhu labe Em moho bak.”
8. Labi im lada lam modeme neàdi Iblisit Yesus neo vou le nohu sibu feàda laba ab vou laisi duzuham. Labi vou duzu neàdi dam mei debu labe im boehàda am dam zi lamti im nazoh feà lamti labi dam mei debu labe im boehàda am dam zi lamti im nazoh feà lamti ahebu alihi fi seo fi himu modi fa setida.
9. Fiseo fi himu setidume neàdi Iblisit Yesus bake ab gagoham. “Om nasi ahit ogomasu biti ahu adat iedi eba, ‘Feàte,’ lahame vou baedale. Oho labihamta na zi feà nim ahebu eho Oba lodume Oho fa vame Om damali Ohomo boehàdateli ame dam lam Oho vuusdam bak. Om nazoh ziali Om naedatelem bak.”
10. Lahame labi gagoha Yesusat fa gago, “Vabà! Iblis om Mei Ahu Modi Ozolo Modemda om nasi itale. Em ba ahit ogomasu biti oba vou baedam vabak. Nehaha bak. Alat Vameadaha Im Toedahana laba im meida nehasu toeme fi hasi esuhu bak ehe bak. ‘Um ahu a meia adat iedi vou baedamule. Gi Boehàda ubu uho vou baedam Ala lamota, “Feàte,” lahame vou baedale. Im Aho gagomda lamota uledi meedale.’ Lahame labi toeme fi hasi esuhu labe Em moho bak.”
11. Lahame labi gagu neàdi Iblisit Yesus bake modi ozolo meedaha Yesus ba bedem vabamu utasi Yesus vou esmozi ab laham. Labi modeha Alat Am im gagu vou usem dam labe nom ilu fa Yesus bake im vi vameadume na àmna ab lodaham.
12. Labi ba di iube Yesusat aiha, “Yohanesat Boehàda Herodes bake im vahokedume modehat Herodesat faki am meo dam gagome Yohanes si sel ousuho,” laham bak damat vameadam im ahum aihemu Yudea bak lam vou esmozi fa Galilea bak labe am num debu meida Nazaret laba fa ab laham.
13. Labi Am vou budualehe num debu Nazaret lam neo vou esmozi fa Itea Galilea obe modesuhu num debu Kapernaum laba le ab aziham. Abo dat ahamda Zebulon labe aba aho vou faat lehe dam debu lamti labi dat ahamda Naftali labe aba aho vou faat lehe dam debu lamti labihasu ibi iho azihi num debu modealaha bak laba netàdehe siit moz. Laham bak laba tau azi ame dam laba Alat vameadaha im vahokeda.
14. Aho lab tau azi Alam im vou vahoketedam bak labet modi dat ahamda Alat vameadaha im aime fa dam bake ahate vameaidahada Yesaya labe aho aham di iube nehame fet toeme esuhu im nim ab modi imbodeham.
15. “Um gi Israel dam behàsu Zebulonti Naftaliti dam ahim labe ibi iho vou faat lehe dam debu abo Galilea bak labe am itea valau obe abo Yordan Soabo dumam tot valau obe laba azihi dam laba neo vi tau vahi azihi dam abo Israel debut modem vab dam oa,
16. Um etei aibuna azihina ozomom dam lam uma fau feàna um ab aadamam tame. Abo um etei Ala bake vaitesu geàdam bohu vuusdamna ozomom dam lam etei nim uma usime ab fauha neàdeham bak. Dat uba Soat Vausu Fa Vei Neàdemda ab leham bak.”
17. Lahame Yesayat lab fet toeme esuhu im lam Yesusat Aho etei Kapernaum laba le tau azi Alat Aba vameadume oluhu im lam ame dam laba faasi vameadume fi dedam labe ame fet toeme esuhu im lam ab modi imbodeham. Aho im nehasu vameadume fi deda. “Alat Gagu Fihasi Vimteme Oluhu Dat Boehàda lam etei bak niba lehemu Alat Ahamo Boehàdateboli dam bake deeli vame Am damali vuusu im vahokedam bak lam etei ab faasi gàhàli meedamam bak. Labihàmu uho faina meedam bak lam nasi voedume fa ahu neà bak vàmadi meedale,” lahame ab vameadume fi dedamam.
18. Labi ba neo digat meida iube Yesusat Itea Galilea labe am valau obet ladam labe aaha Simon Yesusat ba ee, “Petrus,” lahame taluhuda lamti am vahada Andreasti im bohe dek vou bulo meedamna ab aaham. Ame dam ahim labe ibi modi baleàhà bak bohe vadam bak am.
19. Làhàmu Yesusat ab gagoham. “Um ahim Ebe Eho vahokedam im ozobohudelo vi tau meedam damalele. Um ba etei bohe vam damalem vabak. Eho uba vahokedume uho fa ot vai dam nabime vame neo vahokedume ame dam labe fa Eba tu vuzehem bak modelo mozo.”
20. Lahame gi etei labi gagoha ame dam ahim labe im bohe dek gi ihe laba vou esmozi Yesusat vahokedam im ozobohudelo ab vi tau laham.
21. Labi neo vahi ladameam Yesusat vi aaha Zebedeusam adam behàsu Yakobusti Yohanesti im aiti iheba nusu im bohe dek vabiedamna ab aaham. Labihàmu Yesus neo ame dam ahim laba neo ab gagoham. “Um ahim Ebe Eho vahokedam im ozobohudelo vi tau meedam damalele,” lahame gi etei labi gagoha im aiti im iheti bohe dek lamti gi laba voedume esmozi Yesus bake ab tau vulaham.
23. Labi ba di iube Yesusat Galilea bak labe am num debu mei num debu mei lahadaha bak laba abo Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num dozeadaha bak laba olidume Alat Vameadaha Im Toedahana lam aame gagodume vi vahokeda. Labi laha, “Alat dam bake deeli vame Am damali vuusu im vahokedam bak lam, ‘Akatihasu modemna modela?’ ” laham Im Neàna lam vou vameatedume fi deda. Labi dam nisilehe bak ahaladi ahaladiame faidehe dam lamti labi dam ahaladi ahaladiame gailehe dam lamti ahebu Aho modi fa neàdeda. Labihada.
24. Labi Yesusat Aho lab meedam bak lam kehàm vaba Galilea bak vafozi dam Siria bak abo num debu mei num debu mei lahadume azim dam labe laha ab aidume valadamam. Abo dam ahaladi ahaladiame gaileheda zi lam dam aheda zi labe iho Yesus bake ab fet vou leidamam. Dam nehasu Yesus bake fet vou leida. Dam gaili feà bak fusi geàdam dam totbaho ame. Labi dam setan oli veimahada zi totbaho ame. Labi dam ahelemohoda zi totbaho ame. Labi dam nao zoho nutabedeheda zi modeo, anekehà zoho nutabedeheda zi modeo, laham dam zi totbaho ame. Labihasu dam aheda labe iho Yesus bake ab fet vou leidamam. “Im dam nim Yesusat Aho ulasi fà neàdedase,” lahame Yesus bake ab fet vou leidamam. Fet vou leidàmu Yesusat ame dam zi ahebu modi fa ab neàdedaham.
25. Labihadàmu dam dua bak fa Yesus bake vuladume ab vi tau godamam. Ame dam zoho Galilea bak labet leda. Labi dam zoho Dekapolis abo Num Debu Bak Sepuluh labet leda. Labi dam zoho Yudea bak labe am num debu meida Yerusalem labet leda. Labi dam zoho ame Yudea bak labe am num debu mei num debu meime esdam bak labet leda. Labi dam zoho Yordan Soabo dumam tot iubet leda. Labihasu Yesus bake vuladume ab vi tau godamam.
1. Labi Yesusat dam dua bak labe Aba valadam bak aahemu Aho bak buzoho laba laisi dam bake vahokedam bak ozome ab nusuham. Labi nusuha Aba Aho vahokedam im ozobohudelo vi tau meedam dam zi neo Aba lehemu Aho ame dam laba gagodume ab nusualadaham.
2. Labi nusualadume neàdi ab faasi vahokedamam.
3. “Uho neha, ‘Iho gi nehasu aidameam im ba Alam damalem vabiem bak. Alat fà iba vou aasu vabiedase,’ lahame uho Ala vàmtea lamota tu ahumdi vou faodam dam oa, Alat uba deeli vame Am damali Aho uba ab vuusu im vahokedamam bak. Labihadamdaleàmu um etei bisi deelehe bohu vuusdam dam um am bak.
4. Labi um etei na im uba ahu faidemna modem di mebe izidam dam oa, Alat fa uba ba diamut vabededume um fa neàdeda tame. Labihadamdaleàmu um etei bisi deelehe bohu vuusdam dam um am bak.
5. Labi um etei ahu ladehebeat esdam dam oa, bak nim Alat ba diamut modi fa gàhàdi Aba Aho amu di iube fet vameadume vàmadi esuhuna ahebu uba lu uho gi neà bak azi tame. Labihadamdaleàmu um etei bisi deelehe bohu vuusdam dam um am bak.
6. Labi um etei na vabali idoali meedam bakti valo àhàkedam bakti ulohona uho neha, ‘Alat Aba Aho ozome esuhu bak lam im ahu vàmadi ame baket ulohodesu meedase,’ lahame uho modelo àhàki meedam dam oa, uho lab modelo àhàki meedam bak lam Alat fa uba ba diamut modi vizi imbodi um fa asimdi neàdeda tame. Labihadamdaleàmu um etei bisi deelehe bohu vuusdam dam um am bak.
7. Labi um etei meia aame faobekesi im neà bak tau meedam dam oa, Alat ba diamut uba laha aame faobekesi im neà bak tau meeda tame. Labihadamdaleàmu um etei bisi deelehe bohu vuusdam dam um am bak.
8. Labi um etei Alat vameadaha im aime ahu vàmadi meedam dam oa, um ba diamut Alati ot aaiame vahi azi tame. Labihadamdaleàmu um etei bisi deelehe bohu vuusdam dam um am bak.
9. Labi um etei dam fi baeme neàdelo meedam dam oa, Alat ba diamut uba neha, ‘Um Em adam imboda am tame,’ lahame uba ba labi gagodam bak. Labihadamdaleàmu um etei bisi deelehe bohu vuusdam dam um am bak.
10. Labi uho Alat Aba Aho ozome esuhu bak laba ozome im vamdesu meedàmu meit uba vabidume modi geàdam di um gi ozahigeàmu keàtet lahasu meedam dam oa, Alat uba deeli vame Am damali Aho uba ab vuusu im vahokedamam bak. Labihadamdaleàmu um etei bisi deelehe bohu vuusdam dam um am bak.
11. Labi etei nim uho Eba tu vi tau meedàmu damat uba faki tozome feàtàdam bak modeo, uba neha, ‘Um gi faina meedam damat modem bak,’ lahame giomim uba vàlu meedam bak modeo, uba labihasu vabidamnàme um gi ozahigeàmu keàtet lahasu meedam dam oa, uho bak niba meedaha bake gohali lodamna Alat asum ahoba iuba esu ahumdehena abo feàte. Labihadamdaleàmu um etei bisi deelehe bohu vuusdam dam um am bak. Nehaha bak. Aham di iube Alat vameadaha im aime fa dam bake ahate vameaidaha dam lam laha dam Ala bake fakemoholehe damat fa iba vabidam meot. Labihàmu etei nim dam giida labe ba uba ame baket meedameam làhà um a àvodemule. Gi ozahigeàmu mahate deelehe bohu vuusu meedale,” lahame Yesusat ab vahokedaham.
13. Labi im lada lam vahokedume neàdi Yesusat im meida nehame neo vi vahokeda. “Uho Ebe Eho vahokedam im ozobohudelo meedam dam nibe uho bak niba esdam di uho lab neà bak meedam bak lam uho fa meia vizem labe um gi garam na voou àm neà bak lamti ulohona ozomom damat modem bak. Garam abo na àmna nu laba voou vizehe labe ame na nu lam àm di abo àm neàt. Labiha labe garam lam abo neàt. Um laha gi ame bak lamti ulohona meedale. Lahana ame garam labe ahamo na nua vizemna lam fa vei seti faidemeam làhà ame na fauha keobe lam ba akati modi garamli na nu laba vizemnalela? Labiham biem bak. Ame na lam faidehemu gi damat lailaiam tomba laba voom bak. Labihàmu uho meia modi vizem bak lam mahate bohulali meedale.
14. Labi laha uho Ebe Eho vahokedam im ozobohudelo meedam dam nibe uho bak niba esdam di um gi vuagat fauhaedam bak lamti ulohona ozomom damat modem bak. Uho lab neàna meedam bak lam dam giida labe vi aame ozo, ‘Yesus bake tu vuzehem bak ame?’ làhàmu fa neo ame bak laba ab vi tau meedamam bak. Neham bak. Bak buzoho ahoba iuba num debu bak moadume dozeadameam làhà ba ame num debu bak ba vasti fi olem vabiem bak. Tom aam neà labe labiham bak.
15. Labi laha meit vuagat usim di ba boloseh visoi ahoba nom suusum vabak. Gi damat oli aam neà laham bak ozome tom fi haba laba esu fauhaedam bak. Labiham labe damat ame numa oli aidam di gi fauha neàdi modesdamna damat aam bak.
16. Labihàmu ubu uho Eba lab tu vuzehi neà bak bohu meedam bak lam a vastemule. Gi ahate meedale. Uho labihasu ahate meedam labe dam giida labe vi aame um Ai Ala asum ahoba iuba, ‘Am abo feàte,’ lahame labi tom vou baedam bak am tame,” lahame Yesusat ab vahokedaham.
17. Labi im lada lam vahokedume neàdi Yesusat Aho neo ame dam zi laba neo vi vahokeda. “Uho ozom, Eho bak niba lehe bak nim gi dat ahamda Musat toedume fi hasi esuhu Im Feàna zi lam Eho fa faamome voedalo lehe? Laham vabameam dam ahamda Alat vameadaha im aime fa dam bake ahate vameaidaha dam labe ibi iho toedume esuhu im zi lam Eho fa faamome voedalo lehe? Vabà! Em ba labihalo lehe vabak. Eho gi ame im zi lam modi fa imbodelo lehe bak.
18. Lo, lamota imbot. Lahana Eho etei uba neo gagolo modem im imboda nidi nim laha nasi aima. Asum ahoba iuba modealahana zi lamti bak niba modealahana zi nimti ehe lahasuhu di nim Alat Vameadaha Im Toedahana zi lam ba ame na toehena keobe beà vàmtea setem vabak. Abo ame im zi lam ahebu imbodi vou mode ledume ba novam digat fuhuzobe vaitom di am bak.
19. Labihàmu uho meit neha, ‘Ame im nidi nim feà vab imot modem bak,’ lahame ame Alat fi hasi esuhu im meida buà modehe vaba zidazi meeda. Labi ame da labe laha vedi fa neo meia nehi vahokeda. ‘Alat fi hasi esuhu im lam feà vab imot modem bak. Um laha voom neàte,’ lahame meia labihasu vahokeda. Alam damaleheda labihasu meedamda labe am ee ba vousai ee feàda talum vabak. Lahana uho meit ame Alat fi hasi esuhu im meida buà vekehe vaba ahebu ulohodesu vouhodume meeda. Labi laha meia neha, ‘Ame im lam meida a voomule. Ahebu meedam tadele,’ lahame meia labihasu vahokeda. Alam damaleheda labihasu meedamda labe am ee ba vousai ee feàda talumda am bak.
20. Neham bak. Ame Farisi dam lamti labi dat ahamda Musat toedume fi hasi esuhu Im Feàna zi ozobohudi fa dam bake vahokedam guru zi lamti labihasu ibi iho ame Fihasi Esuhu Im Feàna zi lam ulohodesu meedam di meedamta meeda. Lahana, ‘Damat iba fà aame deelese,’ lahame gi ahobat neàdi meeda. Ame dam labe ibi iho meedaha bak lam um a vi tau meedamule. Uho nehi ozohe? Uho ame dam zi labe ibi iho lab meedaha bak lam uho ulohodesu meedam bak labet modi Alat um vame Am damale? Vabà! Um git ozoho bak. Ba labiham vabak. Neham bak. Uho gi, ‘Alat fà iba deelese,’ lahame ahu adat iedi im Aba Aho ozohoda lam iademe vamdesu meedam bak labet modi Alat uba deeli vame Am damali vuusu im vahokedam bak am bak. Laham bak ozodale,” lahame Yesusat ab vahokedaham.
21. Labi im lada lam vahokedume neàdi Yesusat neo ame dam zi laba nehame vi vahokeda. “Um amu Musat aho gagu fi hasi esuhu im nidi nim damat aham di iube faasi nehame vou vamea usehena uba vi fusi um aihina taia? ‘Mei a otemule. Uho labihameam meit um si vou le dat boehàda labet aba aho modem bak laba vou duzu ame da labe fa uba uloome vi aime neàdi gagu beom bak ehete.’ Lahame fi hasi esuhu im lam damat uba vou vamea usehe labe um aime ozobohudehena taia?
22. Lahana Em etei im gàhàna nehasu uba fa vi vahokedalo modem bak. Uho meit dat meidate ahu adat fakemeam làhà Alat uba uloome aim bak ehete. Labi laha uho meit dat meidate gameam làhà ame da lam si Yahudit Ibi Iho Modem Im Gagu Vàmadi Esum Dam Debu labe avaesdam laba vou le duzu uloome vi gagu aime neàdi modem bak ehete. Labi laha uho meit dat meidate neha, ‘Ahusobut,’ lahame meia labi vàlu feàtàmeam làhà Alat ba diamut uba vi gagu aime modi vua eludamna sutem gikina bohu laba voou vi vataum bak ehete.
23. Labihàmu uho meit neha, ‘Em na nim Ala bake lolo mozo,’ lahame Fihasi Ala Bake Vou Baedam Num Vàmteabu labe am ad oli aam bak tomba laba modesuhu vua vahudamnabu laba vou le it ozo, ‘Oo làhà! Eho meia faina modi ame da labe eba fakemda ehe?’ lahame it ozobohudemeam làhà ame na lam nasi Ala bake a lomule. Gi ame nabu modesdam obe laba vou esmozi nasi dat oba faki aidamda laba fa le im vameadume vei neàdi fa li ame na Ala bake lole.
25. Labi umti vahi esumda meida labe fa oba faki neha, ‘Om eba git modehemu om si meia uloome vi aime neàdi gagu modidam dat boehàda labe aho meia uloome vi aim num laba vou lalo modem bak,’ lahame uba vàlu gagomeam làhà uho gi ozahigeàmu etei vou ladam di labe gi zie doni laba taho fa nasi im ot vameaidume fa neàdele. Oho labiham vabameam oba faki vàlu gagomda labe om vou le dat boehàda laba ub lom bak. Labi ame boehàda labet fa neo am meo dam gagome om neo si mei si ousu teudi simtedem num abo sel laba voom bak.
26. Lo, lamota imbot. Lahana Eho etei uba neo gagolo modem im imboda nidi nim laha nasi aima. Om sel laba voomeam làhà ba taho futom vabak. Abo ousdamehamdi boehàdat aba aho gagu esuhu doi oho gohali lodume uloholehezobe ba futom bak. Labiham bake gi zie doni laba nasi ot vameaidume neàdele. Lam bisi fa ot vahiam bak am bak,” lahame Yesusat ab vahokedaham.
27. Labi im lada lam vahokedume neàdi Yesusat neo nehame vi vahokeda. “Um amu Musat aho gagu fi hasi esuhu im nidi nim damat aham di iube faasi nehame vou vamea usehena uba vou fusi um laha aihina taia? ‘Nam dat eheda modeo, dat nam eheda modeo, a modemule.’ Lahame amu mali fi hasi esuhu im lam damat uba vou vamea usehe labe um aime ozobohudehena taia?
28. Lahana Em etei im gàhàna nehasu uba fa vi vahokedalo modem bak. Uho meit nam amomoi laba gi fakot aame ahulat vi ozo, ‘Nam lam eho vase,’ lahame gi ahulat vi ozome àhàkedameam làhà Alat ozomta uho gi ame nam lam ab ve faina modeham bak.
29. Labihàmu om ahu labe oba modi om fako om vou fohome faina modi ubahi ubahidume Em mu voolo modemeam làhà om fako nasi valoi voole. Bak lam bisi neà bak am taia? Omti Alati vahi vou ali ahu vàmadi amedamalem bake etei bak niba godam di gi fako vàmtea vou godam bak lam bisi neà bak am taia? Ba akati modi fako ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela?
30. Labi laha om ahu labe oba modi om anekehàt om vou fohome faina modi ubahi ubahidume Em mu voolo modemeam làhà om anekehà nasi vaitoi voole. Omti Alati vahi vou ali ahu vàmadi amedamalem bake etei bak niba godam di gi anekehà vàmtea vou godam bak lam bisi neà bak am taia? Ba akati modi anekehà ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela?” lahame Yesusat ab vahokedaham.
31. Labi im lada lam vahokedume neàdi Yesusat neo nehame vi vahokeda. “Um amu Musat aho gagu fi hasi esuhu im nidi nim damat aham di iube nehame faasi vou vamea usehena uba vou fusi um laha aihina taia? ‘Uho meit am nam amu neàt vahana fa mu voolo modemeam làhà dat amu nasi, “Nam nim debu nehasu meedàmu eho mu vooho bak,” lahame sunit toeme ahate fi desi vameadume mu voomta neàte.’ Lahame fi hasi esuhu im lam damat uba vou vamea usehe labe um aime ozobohudehena taia?
32. Lahana Em etei im gàhàna nehasu uba fa vi vahokedalo modem bak. Meit am nam dat amomoit bako bake aa vaha vab nam aho naedat vedi ostame mu voohemu ame nam labe ozoha vabamu fa dat amomoi vameam làhà faina ab modeham bak. Lahana ame lab faina modehe bak lam debu am dàt modehe bak. Labi aho lab mu vooho nam lam labe aho vaha dat lam laha gi faina modehe bak,” lahame ab vahokedaham.
33. Labi im lada lam vahokedume neàdi Yesusat neo nehame vi vahokeda. “Um amu Musat aho gagu fi hasi esuhu im nidi nim damat aham di iube nehame faasi vou vamea usehena uba vou fusi um laha aihina taia? ‘Uho dat meidavat neha, “Ame bak lam eho mode tame,” lahame gagu vàmadi esumeam làhà a modehe vaba voomule. Abo uho Ala bake gagu vàmadi neha, “Ala amta nim. Ame bak lam eho mode tame,” lahame vi gagu esumeam làhà ame baket modem tadele.’ Lahame fi hasi esuhu im lam damat aham di iube faasi vou vamea usehe labe uba vou fusi um aime ozobohudehena taia?
34. Lahana Em etei im gàhàna nehasu uba fa vi vahokedalo modem bak. Uho im gagu vàmadi esulo modem di mei ee feàda a vi gagu esumule. Abo uho Alam ee gagom mu fi hasi ahit, ‘Asum ahoba ium ame nim. Eho mode tame,’ laham bak lam a vi gagu esumule. Asum ahoba iuba Alat azi dam bakdate vuusdam bak am bak.
35. Labi laha uho im gagu vàmadi esulo modem di Alam ee gagom mu fi hasi ahit, ‘Bak adba ame nim. Eho mode tame,’ laham bak lam a vi gagu esumule. Bak adba nim Alat laha naedateli vuusdam bak. Labi laha uho im gagu vàmadi esulo modem di kota Yerusalem laba a vi gagu esumule. Ame kota Yerusalem lam Alat bisi Boehàdateboleheda labe Aba Aho azi dam bake vuusu im vahokedam bak lam ehemu Aho neha, ‘Dam Aba, “Feàte,” lahame vou baedase,’ lahame gagu fi hasi esuhu num debu am bak. Laham bake na im gagu vàmadi esulo modem di na etei gagohoda lam a vi gagu vàmadi esumule.
36. Labi oho laha im gagu vàmadi esulo modem di om so laba odosu, ‘Em ame nim,’ lahame a vi gagu vàmadi esumule. Om so lam Ala naeda am bak. Om so lam om naedatelem vab labe om ohuta lam, ‘Fauhalele. Gihobulele,’ lahame labi gagu ame baket meedam biem bak.
37. Labihàmu fa gi nehale. Uho meit im gagu vàmadi esulo modem di, ‘Eho mode tame,’ lahame gi labihasu gagom neà. Laham vabameam, ‘Eho modem kaio,’ lahame gi labihasu gagom neà. Gi labihasu gagodale. Mei ee feàda a vi gagu esumule. Uho mei ee feàda vi gagu esumeam làhà um gi Iblis labe aba aho gagoho bak laba uho vi tau meedam bak am bak,” lahame Yesusat ab vahokedaham.
38. Labi im lada lam vahokedume neàdi Yesusat neo nehame vi vahokeda. “Um amu Musat aho gagu fi hasi esuhu im nidi nim damat aham di iube nehame faasi vou vamea usehena uba vou fusi um laha aihina taia? ‘Uho dam bohudemeam meit mei fako belu fako meida aibulemeam làhà dat fako aibuleheda fa neo dat aheda labe am fako laha belu fa vatau aibulem neàte. Labi laha meit mei adoha belu mo goaitomeam làhà dat mo belu goaitohoda labe fa neo dat aheda labe am adoha laha belu fa vatau am mo fa goaitom neàte.’ Lahame fi hasi esuhu im lam damat aham di iube faasi vou vamea usehena uba vou fusi um aime ozobohudehena taia?
39. Lahana Em etei im gàhàna nehasu uba fa vi vahokedalo modem bak. Oba fakemoholeheda labe oba fai bak modemeam làhà oho a modi fa vi vataumule. Meit oba faki eobu visoi om udehà ahi tot laba beomeam làhà oho gi teoli neo udehà soi totbaho ame da laba fi sule.
40. Meit oba nehi ozome tem vàlu gagomeam, ‘Om eba git modehe bake gohali om sue sona ad laba dusuhuda eho fa vase,’ lahame ame im lam fa meia uloome vi aime neàdi gagu beodam busaoda boehàda laba fi desi gagolo modemeam làhà oho gi ozahit sue obo oho ahoba dusuhuda sona bohu lamti vihitoi vi tau lole.
41. Labi laha Roma meo damat oba nehi gagomeam, ‘Em nazoh nim oho kilometer vàmtea lamota vou lale,’ lahame tet ooteme gagom di um gi ozahit kilometer behàsu lamota abo bak bohulana teo laha vou lale.
42. Meit oba neha, ‘Na lam eba lom neào?’ lahame ailo vi gagomeam làhà ame na lam a malemule. Gi lodale. Labi laha meit oba nehameam, ‘Om na lam eho teohe vou lam neào?’ laham di modeo, meit oba nehameam, ‘Om na lam eho vase. Labi eho ba vamda lam fa oba baleà vouhose,’ laham di modeo, lahame labi gagomeam làhà ame na a malemule. Gi lu olum neàte,” lahame Yesusat ab vahokedaham.
43. Labi im lada lam vahokedume neàdi Yesusat neo nehame vi vahokeda. “Um amu Musat aho gagu fi hasi esuhu im nidi nim damat aham di iube nehame faasi vou vamea usehena uba vou fusi um laha aihina taia? ‘Umti vahi ot vou aliam dam laba deelele. Lahana uba fakemoholehe dam laba uho fa faki ahu zoho beom neàte.’ Lahame fi hasi esuhu im lam damat aham di iube faasi vou vamea usehena uba vi fusi um aime ozobohudehena taia?
44. Lahana Em etei im gàhàna nehasu uba fa vi vahokedalo modem bak. Dam uba fakemoholehe dam laba uho gi ozahigeàmu fa vei deelele. Labi laha dam uba vabidume fai bak meedam dam laba uho gi ozahigeàmu fa Ala bake neha, ‘Ai oa, Oho ame dam laba im neà bak modi esule,’ lahame tom gagodale.
45. Uho labiham labe, ‘Um gi Alam damali abo um Aiat asum ahoba azimda labe Am itbaho fatoi meedam dam um am bak,’ laham bak uho vouhodam bak am bak. Eho gi neham bak ozome uba labi gagoho bak. Alat abo dam faasi gi dam totbaho lamota aame faobekesi vou aasdam vab Alat modem bak. Abo gi dam ahebu faobekesi vou aasdam Alat modem bak. Neham bak. Abo ala digadda fauhaedam di gi dam neà bak meedam dam lamota ozome fauhaedam vabak. Abo gi dam faina meedam dam lamti laha ozome fauhaedam bak. Labi abaedam di laha dam Alat Aba Aho gagoho im vuzehi vamdesu meedam dam lamota ozome abaedam vabak. Gi dam im vamdesu meedaha vab dam lamti laha ozome abaedam bak.
46. Uho gi dam uba deelem dam lamota fa ot deeliameam làhà ba akati Alat ame bak laba gohali ame baleà vouhoe? Labiham vabiem bak. Um ozom vaba? Meia teo vi gagome vaiam doi abo pajak atem dam lam gi ame baket modem meot. Ame dam labe gi dam iba deelem dam lamota abo uho neha, ‘Debu faina meedam dam,’ lahame feàtàhà dam totbaho laba ot deeliame meedam meo damat modem bak. Dam lamti ulohona a meedamule.
47. Labi laha uho meia ot tahiame im vameadam di uho, ‘Neàte. Alat oba neà bak modi esule,’ lahame gagom bak lam dam giidate gagodam vaba vedi gi um vou alem dam lamota gagomeam làhà uho ozom, Alat ba uba neha, ‘Um abo im neàna meedam damat modem bak,’ lahame uba deeli vou baedà? Vabà! Ba labiham vabak. Dam Ala bake tu vuzehi meedaha vab dam labihadam meot. Gi ibi iho vou alem dam lamota, ‘Neàte,’ lahame tahi gagodam damat modem bak.
48. Im Ai asum ahoba iuba azim Ala lam abo fai bak vaba abo dam ahebu deeli gi im neà bakta bohu meedam Alat modem labe um laha gi ame baket meedale,” lahame Yesusat ab vahokedaham.
1. Yesusat neo ame dam zi laba nehame vi vahokeda. “Uho Alat Aba Aho ozome esuhu im lam meedam di uho neha, ‘Iho im neà bak meedam labe damat fà iba aame vou baedase,’ laham bak a vi ozome meedamule. Uho labi modemeam làhà im Ai asum ahobada iube ba uba ame bak laba ozome neà bak baleà vouhodam vabak.
2. Labihàmu dam na vab dama na lolo modem di nasi a ahate nehi fet vameadume fi demule. ‘Eho etei modelo modem bak nim um nasi aadamale,’ lahame a fet vameadume fi demule. Gi ohomo ozome daleà lodale. Neham bak. Ahobat neàdi meedam dam labe iho Alat iba gagohona meedalo modem di ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di ba daleà meedam vabak. Vedi, ‘Dam dua bak iba fà aame vou baedase,’ lahame ame num laba oli meedam meot. Labi laha na ot loidam bak tomba laba lam di gi ame baket meedam damat modem bak. Ame dam ahobat neàdi meedam dam labe ibi iho meedam bakti ulohona a meedamule. Uho Eho etei uba gagolo modem im imboda nidi nim nasi aimale. Ame dam labe im dam totbahot iba fa vou baedaha bak labet modi im Ai Ala labe ba ame dam labe iho meedaha bak gohali ame baleà vouhodam vabak. Dam giida labe ame bak lam aame fa ame dam totbaho laba vou baedaha labe gi ame na baleà vouhom bak ab vaham bak. Ba iho vamna vabak.
3. Lahana uho dam na vab dama na lodam di gi daleà lodale. Dam totbaho aim bak laba ahate a vameadume lodamule.
4. Uho labi modem labe uho lab meedaha bak lam gi aa lohona ozomomnat modem bak. Lahamnàme im Ai asum ahoba iuba azim Ala labe dam bakda meedaha im ahebu aame ozobohudem tadem Alat modem labe uho lab daleà modehe bak lam laha vi aame ozobohudehe labe ba biem vabak. Fa uba ame bak gohali ame baleà vouhou uba neà bak mode tame,” lahame Yesusat ab vahokedaham.
5. Im lada lam vahokedume neàdi Yesusat neo nehame vi vahokeda. “Uho Ala bake tom gagolo modem di a, ‘Damat fà iba aame vou baedase,’ laham bak laba vi ozome damat aasdam bak laba duzu Ala bake tom gagodamule. Damat vedi nehada. ‘Damat fà iba aame vou baedase,’ lahame vi ozome Ala bake tom gagodalo modem di ame dam labe iho nehi deelehat meedam meote. Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di modeo, damat lailaiam bak laba duzum di modeo, abo dam dua bak odosdam bak laba le duzu Ala bake tom gagodam meo bak. Ame dam ahobat neàdi meedam dam labe ibi iho meedam bakti ulohona uho a meedamule. Uho Eho etei uba gagolo modem im imboda nidi nim nasi aima. Ame dam labe im dam totbahot iba fa vou baedam bak labet modi im Ai Ala labe ba ame dam labe iho lab tom gagoho bak lam ba ame baleà vi vouhom vabak. Lab modehe bak aahemu gi ab neàdeham bak. Ame dam labe damat iba vou baedaha im lam gi ab aime neàdeham bak.
6. Lahana uho Ala bake tom gagodalo modem di gi nehale. Num ubuda oli num bumat doo adda iuba neo oli doo it baguamdi im Ai iho aam biem Ala laba aa tom gagodale. Labiham labe im Ai iho aa meedaha bak ozobohu labe iba ba ame bak laba gohali ame baleà vouhodam bak.
7. Labi uho Ala bake tom gagodalo modem di a gi ame im vàmtea amu gago. Ba neo vi gago. A labihadamule. Dam Ala bake tu vuzehi meedaha vab dam labe iho labihadam meot. Abo ibi iho vuusdam ostam alalehena laba vou baedam di abo im bohulana vou baedam bak. Ame dam labe vedi nehi vi ozo, ‘Iho buuna tom gagodameam ibi iho vuusdam alalehena labe ba iba aim vabak. Abo bohulana tom gagodamehamdem labe iba aim bak am bak,’ lahame vi ozodam damat modem bak.
8. Uho dam labe meedam bak lam a vi tau meedamule. Gi modeme vanamai voom imot modem bak. Neham bak. Im im gagom bak ehena iho im Ai Ala bake tom gagoho vabna Ahamo nasi fet ozobohudi esum Alat modem bak. Labihaha bak.
9. Labihàmu uho Ala bake tom gagodalo modem di gi nehi tom gagodale. ‘Ai asum ahoba iuba azim Ala oa, Im dam bakda ahebu ee Oboda vousai, “Om abo feàte,” lahame tom vou baedase.
10. Om fa Boehàdateboli iba dam bakdate deeli vame fa Om damali Oho Iba vuusu im vahokedam bak lam nasi faasi meedale. Labiham labe im Obo Oho ozohoda lam ahebu iho uledi meedase. Abo asum ahoba iuba Oba tau azim dam zi labe iho Obo Oho ozoho bak meedam bak lamti ulohona iho laha bak adba niba neo ame baket meedase.
11. Labi im idoalem bake àmna iba dihasi lu àme neàde. Labi neo dihasi vi lu àme neàde. Labihadale.
12. Labi meit iba fai bak meedam bak lam iho gi ozahigeàmu fa vei neàdedam bak lamti ulohona Oho laha iba iho faina meedam bak lam gi ozahigeàmu fa vei neàdedale.
13. Labi naat iba, “Iho fai bak modem uledeo?” laham bak im ahu modi ozolo vabidam di iho bedi uledem vabak laba Oho modi esule. Labi laha abo Bisi Faina Meedamda labe aho iba, “Debu faina modem bak lam modele,” lahame ootedume iho bedem bak labna zohàme Oho iba soat vatohedale. [Neham bak. Om bisi feàda dam ahebu vuusdam Boehàdatebo Om naeda am bak. Iho ee Oboda gi labaha bohu vousai vou baedam bohu vuusdam bak. Neàde.]’ Uho labihasu tom gagodale,” lahame ab vahokedaham.
14. Labi im lada lam vahokedume neàdi Yesus Aho neo nehame vi vahokeda. “Meit uba fai bak meedam di uho gi ozahigeàmu fa vei neàdedale. Uho labihameam làhà im Ai Ala asum ahoba iube Aho laha ubu uho faina meedam bak lam gi ozahigeàmu fa vei neàdeda tame.
15. Lahana meit uba fai bak meedam di uho ame bak lam ozahigeàmu fa vei neàdedam vabameam làhà im Ai Ala labe Aho laha ubu uho faina meedam bak lam ba ozahigeàmu fa vei neàdedam vabak,” lahame ab vahokedaham.
16. Labi im lada lam vahokedume neàdi Yesusat neo nehame vi vahokeda. “Uho Ala bake ot netàdiame im ot vameaidalo ahit na àm mu tom gagolo modem di um dauha ladehebeat a meedamule. Labi um ohu fau visoi um ohu laba a nom gulamule. Labi sue kaobulehena a visoi dumule. Im lada lam dam ahobat neàdi meedam dam labe ibi iho meedam bak am bak. ‘Iho ahit na àm mu Ala bake tom gagodam bak nim damat fà iba aame vou baedase,’ lahame ahit labihasu gi ahobat neàdi meedam damat modem bak. Lahana ame dam labe ibi iho meedam bakti ulohona a meedamule. Uho Eho etei uba gagolo modem im imboda nidi nim nasi aima. Ame dam labe iho lab ahit na àm mu Ala bake tom gagodam bak lam im dam totbahot iba fa vou baedaha bak labet modi im Ai Ala labe ba ame dam labe iho lab meedaha bak laba gohali ba ame baleà vouhodam vabak.
17. Labihàmu uho Ala bake ot netàdiame im ot vameaidalo ahit na àm mu tom gagolo modem di gi ubu uho modi baleàhà im lamota modem neàte. Abo dihambe keesi anekehà valo kike. Labi dauha valo kike. Labihadamta neàte.
18. Uho lab Ala bake ot netàdiame im ot vameaidalo ahit na àm mu tom gagolo modem bak lam damat aame ozobohudem vabiem bak am tame. Gi uhumo aa daleà na àm bak mu tom gagodamta neàte. Neham bak. Im Ai iho aam biem Ala labe abo dam bakda iho aa daleà modehena lam ahebu ozobohudem Alat modem labe Aho uho lab daleà modehe bak gohali ame baleà vouhodam bak,” lahame Yesusat ab vahokedaham.
19. Labi im lada lam vahokedume neàdi Yesusat neo nehame vi vahokeda. “Um bak niba azim di bisi nazoh soa maehena duali bak niba vahedam bak lam a vi ozome meedamule. Neham bak. Bak nim nazoh àboziem meot. Boet aume fa hae vi vieme gihobuli vàhàdem meot. Meit um numa aa oli nazoh vam meot. Labihadàmu bak niba nazoh dualem bak bisi a azi vi ozodamule.
20. Meit aho soa maehe nazoh vahedaha bak laba am ahu laba it ozodam meo bak. Labiham bake gi im nehasu meedamta bisi neà bak am bak. Uho bak niba azim di gi im Alabadata meedale. Uho lab meedam bak labet modi Alat fa ame bak laba gohali ame baleà vouhou uba soa maehe nazoh asum ahoba iuba vaheme neàdi ahumdi esum bak am tame. Ame bak laba ba nazoh àboziem vabak. Boet aume fa hae vi vieme gihobuli vàhàdeme setem vabak. Meit aa oli vam vabak. Gi neàna modesdam bak,” lahame ab vahokedaham.
22. Labi im lada lam vahokedume neàdi Yesusat neo nehame vi vahokeda. “Meit am fako vuagat fauti uloho labe na alihi aadamna am bak. Labiham labe neham bak. Fako meibada neàdi im ozobohudi fi gatelo àhàkemeam làhà num vuagat fauhati uloholi na ahebu aadam bak. ‘Abo neà bak neame?’ laham bak ozobohudi meedam bak.
23. Lahana meit am fako faidemeam abo im ozobohudi fi gatem bak àhàkem vabameam làhà am gi aibu bakti uloholi na aam vabili modesdam bak. Ba, ‘Neà bak neame?’ laham bak vabili gi fai bak tadem bak. Labihàmu, ‘Neà bak neame?’ laham bak meit am ahu ozobohudi fi gatem vab labe am ahu ad laba aibuli modesdam bak lam gi feàna modesdam bak.
24. Labi im meida neham bak. Dat vàmtea labe meia na gagu meedamda behàsdemeam làhà ba na im ozome meedam vabiem bak. Neham labe labihaha bak. Meia na gagu meedamda behàsdemeam làhà dat meida laba faki ziesobuli aho gagoho bak lam gi tozome mu fa dat meida laba deeli aho gagoho im lamota aime uledi meedam bak. Labi laha um ahu Ala bake tu vuzehi vàmadi meedameam làhà ba ahu behàsdi fa nazoh zi lamti vahi tu vi ozodam biem bak. Labi laha um ahu bisi nazoh zi laba tu àvodi meedameam làhà ba ahu behàsdi fa Alati vahi tu vi ozodam biem bak,” lahame ab vahokedaham.
25. Labi im lada lam vahokedume neàdi Yesusat neo nehame vi vahokeda. “Um a bisi nehame vi ozodamule. ‘Im na àm bakti vao udem bakti vabalemeam làhà im ba akati modi ahedi na im meedàla? Im labihameam eloe taia?’ laham bak lam um bisi a àvodi vi ozodamule. Labi, ‘Im so bozbulehe bak nim im akati modi sueli dusuela?’ laham bak lam um bisi a àvodi vi ozodamule. Neham bak. Im ahedi na im meedam bak lamti na àm bak lamti na behàsu lam vi ozom di bisi tombuda im ahedi na im meedam bak am bak. Labi laha im so nimti sueti na behàsu lam vi ozom di bisi tombuda im so am bak.
26. Uho bumet meedam bak laba vi ozodale. Bume ba na debe soali modeme àm vabnat modem bak. Labi laha ba na modeme vahem num mome iho àmna laba vahedam vabak. Lahana im Ai Ala naedat Aho gi ozahit ame bume keobena laba vou faovoi dihasi na lu esu. Dihasi na lu esu. Labihadam bak. Labihàmu uho ozom, damti ame bume lamti na behàsu lam vi ozom di bisi tombuda akete? Gi im dam am bak. Labiham bake im Ai Ala naedat Aho laha iba dam bakdate vou faovoi aasdam Alat modem bak.
27. Uho ozom, um elom vaba gi ahe lahasu bohu vuusdam bak laba uho bisi lab it vou faovoi ozodam bak labet modi um elom vaba fa vi ahedidume bohu vuusdam meo. Vabà! Ba gi koena vi tau bohulalem vabak.
28. Uho koena vi tau bohulalem bak modem biem labe um akati neha, ‘Iho so bozbulehe bak nim akati modi sueli dusuela?’ lahame bisi dihasi vi ozoda. Dihasi vi ozoda. Labihadàla? Uho ut ava aam neàna ahamo usim di labe meedam bak laba vi ozodale. Ame ut ava lam damat dehe vabna gi ahamo usihinat modem bak. Labi laha ame ut ava labe anekehàli elu faitoi fi name beateli gimsum vabak. Lahana ame ut ava damat aam di abo aam neàna modem bak.
29. Lada lam labiha. Lahana dat ahamda Boehàdatebo Salomo labe aba aho vuusualaha nazoh feà lamota zi feàt. Lahana aba aho dusuhu sue neàna lamti ame ut ava lamti na behàsu lam vi ozodam di bisi aam neàda ut ava am bak.
30. Ame ut ava lam gi usdalo iahamu aladume seti fa damat vamateme fa vua vahudam bak lam Alat ozobohunàme gi ozahit aasu vabiedam labe damat aam neà bak modi esuidam bak. Alat labihasu modehelahit uho ozom, um so bozbulehe bak lam laha modi fa fi olem vaba? Vabà! Abo modem bak. Neham bak. Ame ut ava lam Alat modi aam neàdehe bak lamti um so bozbulehe bak lam Alat modi fa fi oli neàdem bak lamti na behàsu lam vi ozodam di uho ozom, bisi tombuda akete? Im dam am bak. Lahana um akati Eba mahate tu vuzehem vaba vedi gi im iudu ium ozo. Im iudu ium ozo. Lahadume vi ozodam bohu meedàla?
31. Neham bak. Ala bake tu vuzehe vab dam debu mei debu mei laham dam labe, ‘Im etei ana à? Vao ake le ude? Ana ve sueli dusuela?’ lahame àvodi vi ozodam bak abo feàte. Lahana ame dam labe ibi iho àvodi vi ozodam bak lam uho a vi tau meedamule. Dam bakda na àm vaba idoali elom bak lamti sue dusum bak vabalem bak lamti im Ai Ala Na Debu Modeheda labe Am ozobohu bak. Ba biem vabak. Labiham bake uho a bisi nehame àvodi vi ozodamule. ‘Im na àm bake im akati mode? Im vao udem bake im akati mode? Im sue vabalehe bake im akati mode?’ laham bak lam bisi a àvodi vi ozodamule.
33. Uho fa gi nehasu meedale. ‘Alat Ahamo Boehàdateboli iba deeli vame Am damali vuusu im vahokedàmu iho gi Aba Aho ozome esuhu bak lamota uledi im vamdesu meedase,’ laham bak laba nasi ahu vitasu vàmadele. Uho ame bak laba nasi vitasu vàmadi meedameam làhà Alat uho amu lab àvodi vi ozodamna lam ahebu uba ba vi loda tame.
34. Labihàmu uho etei nasi, ‘Em dihasi ana à? Em dihasi vao ake le ude? Em dihasi ana ve sueli dusuela?’ labihasu na im ba dihasi modiamda zi laba a nasi fet àvodi vi ozodamule. Uho gi na im uho etei di nibe àvodi meedume vou disimda lamota vi ozome meedale. Etei vi ozome meedamda nimti ba dihasi àvodi vi ozome meedamda lamti a vi tau valiheme dualemule. Ba dihasi modemda lam gi labihasu faode,” lahame Yesusat ab vahokedaham.
1. Labi im lada lam vahokedume neàdi Yesusat ame dam zi laba neo nehame vi vahokeda. “Uho meia a aame ozomsu gagodamule. Uho labiham labe Alat laha uba ba aame ozomsu gagodam vabak.
2. Lahana uho meia aame ozomsu gagodameam làhà Alat laha neha, ‘Uho faina meedàmu beose,’ lahame uba ozomsu gagodam bak. Aho gi ubu uho meia lab ozomsu gagodam bak labet fa zuhou ame baket neo uba ozomsu gagodam bak.
3. Um vahi azim dam meida labe am fako gi ut nu keobe bitehena uho bisi aame gagodamna akati modi fako ubuda ut gahebabu bitehena it aame gagom vaba mode?
4. Fako ubuda ut gahebabu bitehena uho it aame veiom vab dam akati um vahi azim dam meida labe am fako ut nu gi keobe bitehena aame nehame gagodàla? ‘Ba oa, om fako ut nu keobe bitehe bak eho aame veiose,’ lahame akati labi gagodàla?
5. Um abo gi ahit ahobat neàdi meedam damat modem bak. Um nasi fako ubuda lam ut gahebabu bitehena it veioi voole. Uho labi modemeam làhà fako ut nu keobe meibada bitehe bak fa aasu veiom neàte,” lahame Yesusat ab vahokedaham.
6. Labi im lada lam vahokedume neàdi Yesusat neo nehame vi vahokeda. “Uho Ala bake lolo fi hasi esuhuna lam ba veme a esumule. Vem lam gi vaktesi fa oba nohisi vee tame. Labi laha um soa modesu vou godamna lam abo doi feàna vamna lam ee gagom mutiara a doho fi ho esumule. Uho doho fi ho esumeam làhà dohot gi naot duzu duzuiame bake bauleme vàhàdeme setem bak. Neham bak. ‘Alat dam vuusu im vahokedam bak lam ab faasi meedamam bak,’ laham Im Neàna lam uho vameadume fi dedam di uba tozodume moudam dam laba a vi vameadamule. Fa dam iademe fi me uho lab vameadam im aim uledem dam laba vameadume fi dedam neàte,” lahame ab vahokedaham.
7. Labi im lada lam vahokedume neàdi Yesusat neo nehame vi vahokeda. “Meit Ala bake neha, ‘Im na nim vabalehe bak Oho iba na lodam neào?’ lahame Ala bake keàtet tom gagoidamda lam ame na vamda am bak. Labihàmu uho ozome valo modemna lam ehelemeam làhà, ‘Eba vàle,’ lahame Ala bake mahate tom gagoidale. Labiham labe ame na lam Alat uba lodam bak. Labi laha uho na meida, ‘Akatihasu modi vàla?’ laham bak Ala bake keàtet tom gagoidamda lam Alat ame da laba modi ame na vamda am bak. Labihàmu na meida, ‘Akatihasu modi vàla?’ laham bak lam uho Ala bake mahate tom gagoidale. Labiham labe ame na lam Aho uba modi uho ame na vam bak. Labi laha meit Ala bake neha, ‘Em na nim modem bak ozome Oba vi ailo leho. Om eba taum neào?’ lahame bisi tom gagoidamda lam Alat uledi taumda am bak. Labihàmu uho meit neha, ‘Em na nim modem bak ozome Oba vi ailo leho. Om eba taum neào?’ laham bak lam laha Ala bake mahate tom gagoidale. Labiham labe Alat uledi fa uba taum bak.
9. Um adam eheda um adat uba li nehame gagomeam, ‘Aia, eba roti vàle,’ lahame gagomeam uho fa ke ve lom meo? Vabà! Um ba labiham vabak. Gi ame roti lam visoi lom bak.
10. Laham vaba uba li nehame gagomeam, ‘Aia, eba bohe vàle,’ lahame gagomeam uho fa ostam mum ve lom meo? Vabà! Um ba labiham vabak. Gi ame bohe lam ve lom bak.
11. Um bisi fai bak meedamnàme na neàna vame um data bake lodam bak lam uhumo ozobohudi meedam meo damat modem bak. Im labihadam damat modem labe im Ai asum ahoba iuba azim Ala abo bisi neàboda labe iho meit Aba nehi gagomeam, ‘Ai oa, Om eba ame na lam lom neào?’ lahame gagu aimeam Ai labe uledi na neàna ame da laba lodam bak.
12. Uho ozom, ‘Da labe eba nehi meedase,’ lahame uho labi ozomeam làhà uho ozoho bak lam ame da laba nasi meedale. Neham bak. Iho dat ahamda Musat toedume fi hasi esuhu Im Feàna zi lamti dam ahamda Alat vameadaha im aime fa dam bake ahate vameaidaha dam labe ibi iho toedume esuhu im zi lamti labihasu vazisi ozodume meedam di eho etei ba lab gagoho bak lam bisi ame im zi labe im tombuda am bak,” lahame ab vahokedaham.
13. Labi Yesusat neo nehame vi vahokeda. “Uho meit neha, ‘Em gi Alati vahi ahe neàna bohu vuusdalo mozo,’ lahame ozome gagodam bak lam gi modesome modemeam modem biemnat modem bak. Neham bak. Alati vahi gi ahe neàna bohu vuusdam bak lam gi zie kekehena ladume fa doo kekehena laba lafum bakti uloho bak. Labiham labe gi dam koe zohota ame zie labe ladam bak. Lahana dam duada zoho labe fa zie olozehena baa abo lam neà labe laba ladam bak. Lahana ame zie labe ladume lafum di gi vua elum sutem gikina bohu vuusdam bak laba lafum bak. Labiham bake uho ame zie olozehena baa neàda voou fa zie kekeheda laba lam bake keàtet meedale,” lahame ab vahokedaham.
15. Labi im lada lam vahokedume neàdi Yesusat neo nehame vi vahokeda. “Dam uba li neha, ‘Alat iba vameadaha im iho aime fa uba li ahate vameaidalo modem bak,’ lahame giomim gagodam dam labe uba vizemo. Iademe it vou faovoi meedale. Ame dam uba lem di gi nut vemet fa domba sokbalehe bak. Ame bak lam neha: Uho ame dam labe iho vameadam im aim di dae meona vameadam vaba gi dae nemahuba neàt vameadam damat modemu vedi im Alam damalehe damti uloho tiba. Lahana ame dam lam gi nut vemti uloholi uba modi vàhàdedam bak.
16. Uho neha, ‘Ame giomim vou li vameadam dam lam iba fum di iho akatiham bak aame ozobohudela?’ laham bak lam gi ame dam labe ibi iho meedam bak laba aame im ozobohudem bak am bak. Neham bak. Bu modeo, oo modeo, aam labe ame utso vi ozobohudem bak. Uho ozom, dam gokio lo ali labe fa nigobuli sitom meo? Vabà! Ba labiham vabak. Gi ame nigo lo laba le sitom bak. Labi ile lo ali labe fa sei voeli faitom meo? Vabà! Labiham vabak. Gi le ame seiso laba am voe faitom bak.
17. Ut neàda oo neàna valem bak. Labi laha ut faida oo faina valem bak.
18. Ba ut neàda oo faina valem vabak. Labi laha ut faida ba oo neàna valem vabak.
19. Ut oo faina valemda ahebu damat sieme vua vahudam meo bak. Ame ut oo faina valemda lamti damat neha, ‘Im Alat vameadaha im aime fa dam bake ahate vameaidam dam im am bak,’ lahame giomim vameadam dam lamti ulohote. Alat laha ame dam lam vua elum sutem gikina laba voedam bak.
20. Neham bak. Ame dam lam, ‘Giomim meedalo,’ laham bak lam iho gi ame dam labe ibi iho faina meedam bak laba aame ozobohudi gagodam bak,” lahame ab vahokedaham.
21. Labi Yesusat im lada lam vahokedume neàdi fa neo nehame vi vahokeda. “Dam Eba neha, ‘Ai iba vuusdam Boehàda oa,’ lahame ostame ahobat neàdi gagodam dam lam ba Em Aiat deeli vame Am damali Aba Aho azim bak abo asum ahoba iuba le Aho vuusu im vahokedam vabak. Gi Em Aiat Aba Aho gagoho baket meedam dam lamota Am damali laba le Aho vuusu im vahokedam bak.
22. Neham bak. Alat ba diamut Dam Bake Uloodume Vi Aime Ozobohudi Neàdi Fime Fahedam Digat fum di dam dua bak Eba li im nehasu tauleme gagoida tame. ‘Ai iba vuusdam Boehàda oa, iho amu bak adba niba esdam diat meedaha im lam Om ozobohudehena taia? Iho amu dam bake neha, “Yesus labe Am im iba gagu iho ot vai fa uba ahate vameaidaha bak,” lahame amu ame im lam dam bake ahate vameaidaha bak. Labi laha mei ahu oli veimaha setan zi lam iho ee Oboda fa ve ame setan laba gagu futodume ilidaha bak. Labi laha iho ee Oboda fa ve damat ihimo modem biem im feàna lam meedaha bak,’ lahame Eba li labihasu tauleme gagoida tame.
23. Lahana Eho fa ame dam laba nehi ahate gagoda tame. ‘Vabà! Em um bieho. Um ana damat modela? Um bisi fai bak meedam dam em vou esmozi ilile,’ lahame Eho labi ba gagoda tame,” lahame ab vahokedaham.
24. Labi im lada lam vahokedume neàdi Yesusat im totobe meida nim neo nehame ab vi fi koadamam. “Meit Ebe Eho vameadam im lam aime meedamehamdemda lamti fa dat im ozobohuda nimti uloho bak. Da nibe num abada moho di abo bak sime neàdi bao nom ilu ke vame bakmat laba vou vahe làbome neàdi bak baule. Labi neo ame baket meedume bao ab vou zisit làbodume teudedume num ab moham. Labi abaa nom ilu vao duali feà bak fusi nutabe fai vi tau ame num laba beodamnàme ba nigome agutehe vaba gi teudi duzuhu bak. Ame num lam abo amu bao zi lam bak adba nom ilu ke vame ame bakmat laba vou vahe làbome bakti bauleme teudehe labe labihaha bak.
26. Lahana meit Ebe Eho vameadam im lam ailahigeàmomda lamti fa dat im biehebuda nimti uloho bak. Da nibe num abada moho di gi bao gi fota zisime afoezobe ahoba laba loat giame ame num ab moham. Labi abaa nom ilu vao duali feà bak fusi ame num laba zizeda. Labi neo nutabe fai labe lehe labe ame num laba beoda. Labihadume modeha ame num lam biti agube ab vàhàdeme seteham. Labihaha bak.”
28. Lahame Yesusat ame im zi lam labihasu vahokedam di labe damat aiha Yesusat ba dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi labe ibi iho ladehebeat vahokedam bakti ulohona vahokedam vaba Aho gi im dedateli vahokedàmu dam labet aime ab àvodeham.
1. Labi Yesusat bak buzoho labe lezehe di lam dam dua bak Aba tau lezeda.
2. Labi modeha dat sokba faidi vàhàdem bohu vuusdamda labe Aba ab gut tàham. Tàhi, “Yesus abo feàte,” lahame ozome Aho doudam obe laba ogomasu biti ab tauledamam. “Ai oa, Om eba faobekem vabao? Om uledemeam làhà em sokba faidi vàhàdem bohu vuusdam bak nimti damat eba fi hasi vaitesu esdam bak lamti Oho fa eba modi neàdem bak em ozobohu bak.”
3. Lahame labi tauledume gagohemu Yesusat gi ozahit Am anekehàt ame da laba nom ulasi gago, “Lo, Eho modi neàdem neà bak. Om sokba faidi vàhàdem bohu vuusdam bak lamti damat oba fi hasi vaitesu esdam bak lamti nasi setele,” lahame labi gagohoilahit ame da labe am sokba faidehe bak lam fa seti fa dam ahedati vahem bak ab neàdeham.
4. Labihahemu Yesusat ame da laba ab gagoham. “Om sokba faidi vàhàdem bohu vuusdàmu Eho modi fa neàdehe bak lam oho a dam bake vou vameatedume fi demule. Gi damat Ala bake lomna ve vua vahudam toheda laba le gagu ame da labe om sokba faidi vàhàdem bohu vuusdam bak lam, ‘Fa modi neàdeheo?’ laham bak aho gut nabidale. Labi nabidume neàdi fa dat ahamda Musat aham di iube Israel dam bake, ‘Nehame modidale,’ lahame vahokedaha bak lamti ulohona modele. Om fi ham bak neàdi fa vahem bake na fi ho oho etei si vou lalo modemna lam ame toheda laba vou le aho gut ve oteme vua vahusu om fa damti vahem bak modele. Labiham labe dam aheda aame ozo, ‘Da nim fa neàdi im fa vahem neàdehe?’ laham bak fet aame ozobohudi fa vahem bak am tame,” lahame Yesusat ab vi vameadume oluham.
5. Labi Yesus Aho num debu Kapernaum laba le modeha Roma meo dam seratus zi meida labe im boehàda labe aho Yesus bake gut tàhi, “Aba taule,” lahame ab vameadamam. Aho neha, “Ai Elaidamda oa, em na meedamda em num bake gaili feà bak fusi geàdam labe usam bili bisdalo,” lahame ab gut vameadamam.
7. Lahame labi gut vameadàmu Yesusat uledi fa ab gagoham. “Lo, Eho le om na meedamda laba ulasi fa neàde tame.”
8. Lahahat ame boehàda labe fa gago. “Ai, faode. Om bisi feàda nasi em num bake a lamule. Em feà vabda Oho em numa olemeam làhà em ladem bak. Gi Obo Oho lab duzuhu bak labet bak bohulana gagomeam em na meedamda nim modi fa ab neàdemam bak.
9. Em nehi ozo. Eba vuusdam boehàda labe eba na im gagom di em aime meedam bak. Labi em laha em meo dam niba eho na im gagom di ame dam labe laha aime meedam bak. Neham bak. Ebe eho vuusdam dam meida laba eho neha, ‘Iuba lale,’ lahame gagom di ame da labe lam meo bak. Labi eho laha dat meida amomoi laba neha, ‘Lele,’ lahame gagom di ame da labe lem meo bak. Labi em na meedam dam meida niba gago, ‘Na nim modele,’ lahame gagom di ame da labe modem meo bak. Em fota boehàdateli labihasu meedam bak. Lahana Oho meedam bak lam bisi feàda Om am bak. Labiham labe Oho gi laba duzu, ‘Em da nim fa neàdele,’ lahame Oho labi gagomeam làhà ame dat gaileheda nim modi fa ab neàdemam bak.”
10. Lahame labi vameadume modeha Yesusat ame im lam aime ab àvodeham. Àvodi Am fa vaktesi dam duada Aba vi tau godam dam laba ab gagoham. “Aa làhà! Da nim labi gagohe? Làhà um im imboda nidi nim nasi aima. Ame Romada abo Yahudi dàt modem vabda vàmtea nimota Eba bisi tuhudatebo am tame. Em Israel dam totbaho ahebu dat nidi vàmtea nibe aba aho lab bisi Eba tu vuzehehe bak lamti ulohoda Em ba aam kaio.
11. Neham bak. Ba diamut Alat Ahamo Boehàdateboli Am damalehe dam laba vuusu im vahokedam bak gàhà bak laba na feàna àlo meedam bak ehete. Ame na feàna àlo meedam di labe dam fa ame meo dam seratus labe im boehàda lamti uloholi Eba tu vuzehi meedam dam abo ala zizem tot iube le. Ala bozilem tot iube le. Labihadam Yahudi modem vab dam dua bak labe ame bak laba le Yahudi dam labe im tai ahobada Abrahamti Isakti Yakubti ame neà bak laba tau vahi deelehat meeda tame.
12. Aiee! Lahana um Yahudi dam totbaho abo Alat Aho neha, ‘Eho uba deeli vame Em damali Eho vuusu im vahokedase,’ lahame ahamte fi me vaha dam labe Eba tu vuzehehe vab labe ba ame baket tau meedam vabak. Alat ame dam lam gi bàhàgo bak iuba abo bisi aibu feà bak iuba voeda tame. Abo Alati fa vahem vaba gi ame bak laba voedàmu ahu faidi ahula it fu foelamdidume kikezi geàdam labe meb dae feàna faasi medda tame.”
13. Lahame labi gagu neàdi Yesusat fa vaktesi dat boehàda laba ab gagoham. “Nasi fa om num bake lale. Oho neha, ‘Eho gi niba duzu gagomeam om na meedamda lam fa neàde tame,’ lahame oho etei lab tu vuzehe bak lam Eho mode tame,” lahame gagu neàdi ame boehàda nibe kehàm vaba Yesus vou esmozi am num bake fa le aaha am na meedamda fa ahedi neàdi usahana ab aaham. Gi etei Yesusat lab gagoho di labe fa ahedi neàdi ab usaham.
14. Labi Yesus neo ladume Petrusam numa lafusi ab oleham. Oli aaha Petrusam boholeà so galihasi duana gaili bisdamna ab aaham.
15. Làhàmu Yesusat li nom bohusu ame nam labe Am anekehà laba nom odosu gago, “Om gailehe bak neàdele,” lahame labi mali gagoha ame gailehe bak fa ab seteham. Labi kehàm vaba fa usai duzu na ohume Yesus bake ab lu àham.
16. Labi dimatali aibulelo modem di labe dam aheda zi labe im setan oli veimaha dam zi lam Yesus bake vou ledume Aho ame setan zi laba gi Am ahat gagoha ab futodume ilime seddaham. Labi laha dam gi gaileheda zi lam Aho laha modi fa ab neàdedaham.
17. Labihasu meedaha im lam dat ahamda Alat vameadaha im aime fa dam bake ahate vameaidahada Yesaya labe aho aham di iube nehame fet toeme esuhu im nim ab modi imbodeham. “Iho faidehe bak lamti gailehe bak lamti abo iho kikezi geàdam bak lam ahebu ame Da labe Aho modi fa seddume neàdeda tame.” Lahame Yesayat aham di iube lab fet toeme esuhu im lam Yesusat ab modi imbodeham.
18. Labi Yesusat ame dam zi lam modi fa neàdedam labe aaha dam feà bak fusi Am so nutmadàmu Aba vi tau meedam dam laba ab gagoham. “Imo itea biou tot iuba lase.”
19. Lahame gi etei gagoha dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru meida labe Aba tàhi ab gagoham. “Guru oa, em, ‘Oho adi bake lào? Adi bake lào?’ laham di vi tau godalo mozo.”
20. Lahahat Yesusat ozo, “Da lam imboo?” laham bak vi ailo fa ab vi gagoham. “Nohubake azim vemta ibi iho im bak ehete. Labi bume laha ibi iho im ila ehete. Lahana Em Abo Asum Ahoba Iubet Bak Niba Li Dateleheda nim bitesu im bak kaio,” lahame ab gagoham.
21. Labi neo dat meida labe Aba Aho vahokedam im ozobohudelo vi tau meedamda meida labe neo ab vi gagoham. “Ai oa, faode. Em nasi em bake fa le em ai faina eloi baumsuhuzobe Oba ba vi tau meedase.”
22. Lahame labi gagoha Yesusat fa ab gagoham. “Vabo. Lada gi labihasu feidate. Damat Eba tu vuzehi meedaha vab damat abo Alati vaitesuhu damat fà baumsuse. Lahana om nasi etei Ebe Eho vahokedam im aime vi tau meedale,” lahame ab gagoham.
23. Labi Yesus neo Aba vi tau meedam damti iheba ziddume ab biodamam.
24. Biodam di labe Yesus lavoidume ab iddamam. Labi gi etei biodam labe nutabe fai iubet li itea laba modi fi tauledume bubaholedam labe ihe laba tom foadume vao ihe laba zizi noziali tezeo vabali dam folelo meedam di lam Yesus gi vabi iddam lahasu.
25. Làhàmu Aba vi tau meedam dam labe ihe zoho laba fi ai Yesus bake ukeme ab gagoham. “Ai Elaidamda, Om ade? Im ihe vao noziali im folelo mozo. Oho iba taule.”
26. Làhàmu Yesusat keesi ab gagoham. “Um ana modi iedi mode? Um Eba akati mahate tu vuzehem vaba mode?” lahame gagu neàdi usai nutabe fai lamti vao fi tauledume bubaholedamna lamti, “Setele,” lahame mali gagoha ab bagavai seteham.
27. Labi seti neàdi Aba vi tau meedam dam labe ame lab modehe bak lam aahemu ihimo vi ozome àvodi ab ot gagoidamam. “Aa làhà! Uho ozom, Da nim ana Dàt mode? Am gi nutabeti vao bubaholemna lamti, ‘Setele,’ lahame gagom di gi modi uledi setem meo Dàt modem bak,” lahame ab ot gagoidaham.
28. Labi neo biodume dumam tot Gadara bak laba fusi ab zituham. Labi zitu usdume ladume modeha setan zi oli veimaha dam ahim labe Yesus bake li ab gut tàham. Abo gi koei vahedam ke bumat zi laba azietem damat Aba ab li gut tàham. Ame dam ahim bisi meo feà labe dam giida labe iedi gi totobe iube labohoti laidam meo bak.
29. Labihadam dam ahim labe Yesus bake li gut tahi modeha ame setan zi labe iho ame dam ahim laba modi geàdam labe nehi ab gagodamam. “Yesus Alam Adat oa, akati modi Oho iba li ootedàla? Obo Oho ozome dam faheme beodam digat fuhu vabna akati Oho nasi iba li ootedume modi geàdalo modela?” lahame ab gagodamam.
30. Labi gagodam di labe doho fi ho zi gi netà bak nom otesuhu bak laba dozeadume bakbe àda.
31. Làhàmu ame setan zi nibe Yesus bake neo ab gagodamam. “Làhà Oho iba da nim mali gagu futodume ilidalo modem di im gi fa doho fi ho zi labe im ahu laba fa oedume veimadam neào?”
32. Lahame labi tauledume gagoha Yesusat uledi ame setan zi laba ab gagoham. “Nasi futodume ilidale.” Làhàmu ame setan zi nibe iho dam ahim nim futodume vou esmozi ilidume ame doho fi ho zi labe im ahu laba ab oedume veimadaham. Labi modeha ame doho zi lam bak nom otesuhu bak labet nom itaome valo nom ilu ab tezi elodaham.
33. Labi modeha dam doho fi ho vou aasdam dam labe aaha im doho valo tezi elodaha bak aahemu iedi ilime le im num debu bak laba ab vou fi det ladamam. Abo ame setan oli veimahada ahim lam Yesusat setan laba gagu futodume fa doho laba oedume itaome valo teddume elodaha bak lamti ame dam ahim fa neàdehe bak lamti labihasu dam bake ab vou fi det ladamam.
34. Lab vou fi det ladam labe dam laba azim dam labe im labihasu fi dehena lam aihemu fa Yesus bake aalo ab valadamam. Labi ledume Yesus bake li aame ozoha, na ibida neo vàhàdem bak labna zohàme ab gagoham. “Im bak nim Oho a tau azimule. Im maleho. Om taho itale.” Làhàmu Yesus Aba vi tau meedam damti fa biolo ihe ab ziddamam.
1. Labi iheba ziddume neàdi Yesusat Aba Aho amu li esdam bak laba abo num debu Kapernaum laba lam bak ozome fa ab bioham. Labi biou zitu aaha dam duada zi labe Aba li vou faodam bak ab aaham.
2. Ame di lam dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi laha laba tau dozeada. Labi Yesus zitu duzu modeha dam aheda labe dat nao zoho nutabedeheda ileba esu Yesus Aho avaesdam laba esum bak ozome ab vou li esuham. Dam labe ozo, “Im dat nao zoho nutabedeheda nim Yesusat modi fà neàdese,” lahame labi ozoho labe Yesus Aho avaesdam laba ab vou li nom esuham. Labi nom esuha Yesus ame dam labe iho ozom bak lam am ozobohudehemu dat nao zoho nutabedeheda niba ab gagoham. “Em adat ozomomda oa, om bisi a vi ozodamule. Obo oho faina meedàmu Alat beolo modem bak lam Eho gi vei mu fa faamome vei neàdeho.” Lahame labi gagoha netà niba dozeadaha guru zi labe ihimo ahulat aa nehi ozoda. “Oo, Da nim gi imti ulohoda baka ana modelo Aho ame da laba neha, ‘Obo oho faina meedàmu Alat beolo modem bak lam Eho gi vei mu fa faamome vei neàdeho,’ lahame labi gagodàla? Ame bak lam gi Alat Ahamo gagom bak akati Da nibe labi gagodàla? Da nibe gi Ala bake feàtàdam dàt mode taia?” lahame ab ozodamam.
4. Lahame aa ozodaha bak lam Yesusat Ahamo ozobohudi dam laba ab gagoham. “Um etei baka ana Eba faki, ‘Em git gagoho,’ lahame Eba ozomsu meedà?
5. Uho ozom, Eho ame nisileheda niba im gagom di im adida bisi damat aame ozobohudela? Eho nehameam, ‘Obo oho faina meedàmu Alat beolo modem bak lam Eho gi vei mu fa faamome vei neàdeho,’ lahame gagomeam damat aame ozobohudeo? Laham vabameam Eho gi neha, ‘Om nao zoho eloi nutabedehe bak lam Eho modi fa neàdeho. Nasi usai om ileba giame vuusu fa num bake lale,’ lahame gagomeam làhà damat aame ozobohudeo? Adida bisi damat aame ozobohudela?
6. Lahana Em Abo Asum Ahoba Iubet Bak Niba Li Dateleheda nim Ala naedat Eba gagu olu Eho fa im dedateli ot vai meit faina meedàmu Alat beolo modem bak lam Eho gi vei mu fa faamome vei neàdem meoda Em am bak. Lahana Eho labihasu meedam bak lam um biem bake Ebe Eho etei modelo modem bak nim um nasi aasu vou faomale. Labi dat nao zoho nutabedeheda nim Eho modi fa neàdi usam bak uho aameam làhà um laha neo, ‘Em meit faina meedàmu Alat beolo modem bak lam Eho gi vei mu fa faamome vei neàdem meoda Em am bak,’ laham bak etei um laha aame vi ozobohudem bak.” Lahame Yesus labi vameadume neàdi ame dat nao zoho nutabedeheda laba ab gagoham. “Om usai om ileba visoi vuusu fa om num bake vou lale.”
7. Lahame Yesusat gi etei labi gagoha ame da labe fa neàdi damat aasdahit amti usai am ileba visoi giame vuusu am num bake fa ab vou laham.
8. Labi ame bak lam ame dam duada zi labe aahemu àvodi anekehàso it gaadam labe ahu adat iedi Ala bake ab vou baedamam. “Im amu na im feàna lamohona ba aaha vabak. Gi etei alimeat Alat Am feàna dat bakdate vizi im dedateli fa dam bake im feàna meedam bak im ab aaham tame,” lahame àvodi Ala bake ab vou baedamam.
9. Labi Yesus ame bak lam vou esmozi ladam di labe aaha dat ee gagom Matius abo Yahudit modemda ab aaham. Im aho meedamda gi nehadam bak. Am Yahudi dam totbaho laba gagodume gi teo vi vaiam doi abo pajak lam aho vame fa Kaisarleheda laba loida. Ame doi lam atem dam meida Matius am bak. Am gi ame doi vadam num buà laba aidamna Yesusat am alihi aahemu ab gagoham, “Om Ebe Eho vahokedam im ozobohudelo vi tau meedam datelele,” lahame labi gagoha Matiusat usai Yesus bake ab vi tau meedam dateleham.
10. Labi ba neo Matiusat am na àdehena zi àlo Yesus Aba vi tau meedam dam lamti gagome am numa na àm bake ab leham. Di lam Matius bake tau meia gi teo vi vaiam doi vadam dam totbaho zi lamti labi damat neha, “Faina modeho,” lahame ozomsum dam totbaho lamti labihasu ba li tau vazisi ame na àdehena zi lam ab àdamam.
11. Laham bak lam Farisi dam labe aahemu Yesus bake vi tau meedam dam laba vi ailo ab gagoham. “Uba vuusdam guru labe akati modi meia gagu gi teo vi vaiam doi vadam dam zi lamti labi damat neha, ‘Faina modeho,’ lahame ozomsum dam lamti vazisi na zi vàmtea àdàla?”
12. Lahame vi ailo gagoha Yesusat fa dam laba im totobe nidi nim nehame ab fi koadamam. “Uho ozom, dam aheda dokter abo obat vuusumdate lam meo? Vabà! Gi dam gaileheda ihimo obat vuusumdate lam bak.
13. Ebe Eho bak niba li meedam bak um biem bake nasi meit Alat Vameadaha Im Toedahana laba im meida nim aame ozodale. Alat aham di iube Israel dam bake neha: ‘Uho bak niba esdam di bisi uho meedam im tombuda gi neham bak. Uho gi meia aame faobekesi im neà bak tau meedale. Uho labihasu meedam labe Em ahu bisi deelem bak am bak. Lahana ubu uho faina meedam bak fa faatom bak laba ozome na fi ho Eba lolo modemu oteme vua vahudam bak lam Em mahate deelem kaio.’ Lahame aham di iube toeme esuhu im lam uho mahate vi ozome ozobohudele. Neham bak. Eho bak niba lehe bak neham bak ozome lehe vabak. Damat neha, ‘Im abo Alat gagu fi hasi esuhu im zi ahebu ulohodesu vamdesu meedam dam im am bak,’ lahame ahobat neàdem dama Eho neha, ‘Uho faina meedam bak lam nasi voedume fa ahu neà bak vàmadi meedale,’ laham bak gagolo lehe vabak. Em gi damat neha, ‘Iho faina meedam damat modem bak,’ lahame it ozome gagodam dam laba neha, ‘Uho faina meedam bak lam nasi voedume fa ahu neà bak vàmadi meedale,’ laham bak gagolo lehe bak,” lahame Yesusat ab vameadaham.
14. Labi im lada lam vahokedume neàdi ba neo Yohanes Mei Vuu Valo Baptisleiamda labe aba aho vahokedam im ozobohudelo vi tau meedam dam labe ihimo Yesus bake li vabi vi ailo ab gagoham. “Im Yohanesat aba aho vahokedam im ozobohudelo vi tau meedam dam nimti Farisi dam lamti iho Ala bake tom gagodalo modemu ahit na àm mu izidam meo bak. Ne lahana akati modi dam Oba vi tau meedam dam lam labiham vaba modela?”
15. Lahame labi gagoha Yesusat gi damat Aba ba modem im laba ozome im totobe nidi nim nehame ab fi koadamam. “Dat soao labe nam soao valo na vahedam di labe ame da labe amti ot deeliam dam laba gagu vahi deelehat na àdam meo dam taia? Labi laha dat soao labe nam soao valo modemda ehe lahasuhu di lam am dam gi deeli na àm meo dam taia? Lahana ba diamut ame nam valo modemda lam modat li si utasi ve vou le setem di lam am dam totbaho labe im ahu faidi na àm mom di am taia?” lahame ab vi vameaham.
16. Labi im lada lam vameadume neàdi Aho neo Yahudi dam labe im tai ahamda zi labe ibi iho vou vahoke usehe im lamti fa Aba Aho etei li vou vahoketedam im gàhàna nimti ulohodesu fa vahem biem bak laba vi ozome neo im totobe nidi nim ab vi fi koadamam. “Meit am sue amu soa dusumda vàusi bumatalemeam làhà ba sue gàhàna baa amu valo kikeme modi koedehe vabna zoho vaitoi ame sue vàuhu bak laba taasu tadem vabak. Labihameam ame sue etei tadeheda lam fa valo kikeme àga bake esu dehalem di ame sue gàhàna zoho lam gi ahamo fa koedi etei tadehena etehàso lam ziambitoi vàusi bumat olozebalem bake ozome ahit moho bak.
17. Labi laha meit anggur oo gi etei unaha vaksa gàhàda fi kidi neàdehe vabda lam ba kambing fi ho sokba amu buhaleme bugeahana modi esu dehalehena laba fedem vabak. Meit labi modemeam ame na vaksa lam ba fi kidem labe ame na sokba amuda lam gi modi fi fasi ame na vaksa lam gi bake veàtom bak. Labi ame na sokba lab fedehena lamti gi amait vàhàdeme setem bak. Labiham bake meit ame na lam ba ozome modem vabak. Gi ame anggur vaksa gàhàda lam fa ame na sokba gàhàda buhaleme bugeahana modi laba fedem bak. Labi modem labe ame na sokba lamti ame na vaksa lamti gi amait iademe fi kidi neàna modesdam bak,” lahame Yesusat ame im totobe lam ab vameadaham.
18. Labi Yesus gi etei Yohanes Mei Vuu Valo Baptisleiamda laba vi tau meedam dam laba vameadam lahasuhu di labe dat meida abo Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba vou aasdamda meida labe Yesus bake lefusi ozo, “Yesus abo feàte,” lahame am ahu adat iedi Yesusam naba modesdam bak laba netàdi ogomasu ahit bake ab biteham. Ogomasu biti tauledume gago, “Om etei eba tau taho num ebedate lase. Em adnamat gi etei eloi bisdalo. Om eba tau le em adnamat koeiso laba Om anekehàt odosu gagomeam fat ahedi usam bak.”
19. Lahame labi gagoha Yesusat usai Aba vi tau meedam damti ame da laba tau vahi ab ladamam. Labi ladam di labe gi dam duali bak kekesi gi mei soat osiddam labe lada.
20. Labi ladam di labe zie doni laba nam abo bako itaha bak bohu vuusdume dua belas tahun fuhu nam nibe laha nem futoi tau Am ohuse duzu vi vueda. Vi vuedam labe ozo, “Em gi Yesusam sue ahoba dusuhuda sona bohu noma zoho aha obe laba ulameam làhà em bako itaha bak bohu vuusdam bak nim fa neàdem bak,” lahame ozome lehe labe Yesusam ohus tote aa vi vuli netàdi Am sue laba ab vi ulaham.
22. Labi vi ulaha Yesusat it vaktesi ame nam laba ab gagoham. “Oi, om a bisi vi ozodamule. Oho neha, ‘Yesusat eba modi fa neàdem bak,’ laham bak oho nasi tu vuzehehe labe om fa ab neàdeham bak,” lahame gi etei labi gagoha am bako itaha bak bohu vuusdam bak lam fa ab neàdeham.
23. Labi laha labe le ame da Yairus abo Yahudi damat ihimo fi hasi meedam num laba vou aasdamda labe am numa vou fusi oli aiha abo bisi dahobu bak ab aiham. Dam dua totbaho labe nimidam labe meb dae meeda. Labi dam totbaho labe im mabso fi stehena ee gagom suling lam laha vuusualame koei esulo modem di suling dae meeda. Labihadam dahobuna feà Yesusat ab aidamam.
24. Ame bak lam aihemu ab gagoham. “Um ahebu nasi futodale. Bisi a medaomule. Um adnamat eloho vabak. Gi iddalo,” lahame labi gagoha ame dam labe im koei nim eloho bak ozobohu labe fa Yesus bake vi igeame ab tozodamam.
25. Lahana ame dam futodume neàdi Yesusat gi ozahit ame num oula koei ousdamda laba vi oli koei laba netàdi am anekehà vuu visoi gago, “Ednamat oa, usale,” lahame labi gagoha adnamat nim it oazi lahana fa leheilahit ab ahedeham.
26. Labi etei Yesusat damat ihimo modem biem im feàna lam abo data elohona Aho lab modi fat ahedehe im lam kehàm vaba damat aime fa ame bak laba ab vou fi desi uloholeham.
27. Labi ame bak lam vou esmozi Yesus neo ladam di labe fako faidi na aam biem dam behàsu ame zie obe laba aidameam aiha Yesusat lebohotelo modem bak meit iba gagohemu fa nem futoi dam duada ohus laba vi duzu vulada. Vuladam labe Yesus bake vi budda. “Yesus abo Dat Ahamda Boehàda Daud Vou Faat Lehe Mekehàda oa, Om iba aame faobekesi im neà bak tau meedaleee. Alat Gagu Fihasi Vimteme Oluhu Dat Boehàda, ‘Om am tame,’ laham bak im ozobohuteee.”
28. Lahame labi vi bute ladameam Yesus le numa ab oleham. Làhàmu ame dam fako faida behàsu nibe neo vi vule ab oleham. Labi oli modeha Yesusat gut ailo gago, “Uho nehi ozome Eba lehe? ‘Um fako faidehe bak Eho modi fa neàdem bak,’ laham bak lam uho ozome Eba labi tuhu labe lehe?” Lahahat ame dam behàsu labe fa gago, “Lo, imbo bak. Ai Elaidamda, Oho labi modem bak lam im tuhu bak.”
29. Lahame labi gagohemu Yesus Am anekehà fa dam labe im fako laba odosu gago, “Uho Eba labihasu tu vuzehi meedàmu Eho ab modi neàdeham bak.”
30. Lahame gi etei labi gagoha ame dam ahim labe im fako faidehe bak lam modi fa na aam bak ab neàdeham. Labihazobe Yesusat fa dae meobeat mali ab vi gagoham. “Eho etei um fako faidehe bak modi fa neàdehe bak lam meia a le fi demule.”
31. Lahame mali gagoha ame dam ahim labe ame num labe futoi laha labe kehàm vaba dam bake ab vou fi det laham. Abo Yesusat iba im feàna modehe bak lam ame bak laba dam ahebu vou fi desi ab uloholeham.
32. Labi ame dam behàsu futoi neàdi dam aheda labe neo dat amu setan oli veimai dae vabaleheda labe am anekehà vuusu Yesus Aho avaesdam laba ab vou le vou duzuham.
33. Labi Yesusat ame da laba, “Setan taho futoi itale,” lahame labi gagoha ame setan lam futoi itame modeha ame da nibe fa dae faasi im ab vameadamam. Labi modeha dam duada zi labe ame bak lam aahemu àvodi ihimo im ab ot gagoi ot gagoidamam. “Aa làhà! Ibi iho Israel damat azihi bak niba im feàna lamohona im amu aaha vabak. Gi etei alimeat ab aaham bak.”
34. Lahana Farisi dam labe laha ame bak lam tau aahanàme ba labiham kai. Vedi neha, “Mei ahu oli veimam setan zi labe im boehàda Iblisit aho ame Da laba modi vizi teudehe labe Aho ame setan zi lam gagu futodume ilidam bak,” lahame ab ozomsu gagodamam.
35. Labi im lada lam modeme neàdi ba neo Yesus Aba vi tau meedam dam lamti iho vazisi ame bak lam vou esmozi num debu mei num debu meime godam di labe aho Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num dozeadaha bak laba olidume Alat Vameadaha Im Toedahana lam aame gagodume vi vahokeda. Labi laha, “Alat dam bake deeli vame Am damali vuusu im vahokedam bak lam, ‘Akatihasu modemna modela?’ ” laham Im Neàna lam vou vameatedume fi deda. Labi dam nisilehe bak ahaladi ahaladiame faidehe dam lamti labi dam ahaladi ahaladiame gailehe dam lamti ahebu Aho modi fa neàdeda. Labihada.
36. Labihadam labe aaha dam dua bak Aba valadam bak aam faimu ab faobekesi meedamam. Aho nehi ozo. Dam lam domba na vou aasdamda vabalehe bakti uloho bak. Ame dam lam iba vuusumda vabali naat iba vabidam labe, “Bisi im vamdesu meedam bak akete?” lahame gi ladehena dauhali meedam bak aahemu Yesusat ab aame faobekeham.
37. Faobekesi meedam labe Aba vi tau meedam dam laba ab gagoham. “Gandum dua bak amdi bozileho. Lahana ame gandum nim modeme vahedam dam koete.
38. Labihàmu uho utoho deda laba abo Em Ai Ala bake nasi nehi tom gagodale, ‘Ai oa, Oho fa dam na modeme vahem dam totbaho laha gagodume Om utoho laba oudume Om gandum fi kbodume vahedase. Abo dam Oba tuhuda amomoi laha gagome fa dam Oba tuhu vab dam labe iho azihi bak iuba oluidume Om Adat meedaha Im Neàna lam vou vameatedume uloholele,’ lahame mahate dihasi tom gagoda. Labi neo dihasi tom gagoda. Labihadale,” lahame ab vameadaham.
1. Labi ba digat meida iube Yesus Aba vi tau meedam dam dua belas gagome ledume ab li dozeadaham. Dozeadume neàdi Yesusat fa ame dam dua belas laba im nehasu modi vizi ab im dedamaleham. Mei ahu oli veimam setan mei setan mei laba gagu futodume ilidam bak ame. Labi meia vizi gailemna ahaladiahana ahebu laha modi fa neàdedam bak ame. Labi nisilehe bak ahaladiahana ahebu laha modi fa aodedam bak ame. Yesus Aho neha, “Uho labihasu modem neàte,” lahame Am dam dua belas laba ab gagu ab vizedaham.
2. Yesusat Aho gagu olu Am im vameadume esmozi laiam dam dua belas lam neha: Simon ee Yesusat ba taluhuda Petrus ame. Labi am vahada Andreas ame. Labi Zebedeusam adam behàsu Yakobusti am vahada Yohanesti labihasu ame.
3. Labi Filipus ame. Bartolomeus ame. Tomas ame. Matius ame. Ame da Matius lam gi meia teo vi gagome vaiam doi pajak atem dam meida am bak. Labi Alfeusam adat Yakobus ame. Tadeus ame.
4. Labi Simon Meohoda ame. Labi neo Yudas Iskariot ba Yesus otem bake vou foholo modemda ame. Labihasu Yesusat debe ab Aho gagu olu Am im vameadume esmozi laiam damaleham.
5. Labi Yesusat Aho gagu olu Am im vameadume esmozi laiam dam dua belas lam gagu olulo modem di labe im nehasu fet ab vi vameadamam. “Eho etei uba gagolo modem im nim uho le meedalo meedam di uho Yahudi damat modem vab dam labe im num debu mei num debu meime a ladamule. Labi laha Samaria bak labe am num debu mei num debu mei lahadume azihi dam laba a ladamule.
6. Gi im Yahudi dam abo dat ahamda Israel labe aba aho vou faat lehe dam totbaho abo domba vou aasdamda vabalehe bak lamti uloho dam laba ladale.
7. Uho ame dam laba ladume lafusi im vou vameatedam di labe im nehasu vameadale. ‘Alat Gagu Fihasi Vimteme Oluhu Dat Boehàda lam etei bak niba lehemu Alat Ahamo Boehàdateboli dam bake deeli vame Am damali vuusu im vahokedam bak lam etei ab faasi gàhàli meedamam bak,’ laham im lam uho ame Israel dam laba vou vameatedume fi dedale.
8. Labi laha dam gaileheda uho modi fa neàdeda. Labi dam gi etei elodahada zi uho modi fa ahedi usnada. Labi sokba faidi vàhàdem bohu vuusdam dam zi lam uho laha modi fa neàdedume fa dam aheda modi fa vahe vaheda. Labi mei ahu oli veimam setan uho fa gagu futodume ilidume fa vei neàdeda. Uho labihasu meedale. Labi uho lab meedaha bake gohali na a vi gagu vamule. Gi ule neàt meedam tadele. Neham bak. Amu Eho uba modi vizehe di lam uho Eba naat vaha vab labe abo Eho gi uba ule neàt modi vizehe bake ulohona labihadale.
9. Labi uho lam di gi saemea ladale. Damat emas modi doilehena lam modeo, perak modi doilehena lam modeo, tembaga modi doilehena lam modeo, labihasu a dume vou ladamule.
10. Labi laha nazoh dumna a vou ladamule. Labi laha sue sona ada dusumna modeo, sepatu modeo, gi ubu uho dusuhuda lamota vou ladam neàte. Labi laha um odoamso lam gi niba vou esmozi ladale. Neham bak. Uho ame dam laba le tau meedam bake ame dam labet uba gohali sue modeo, doi modeo, na àmna modeo, uba fà lodase.
11. Labi uho ame num debu bak modeo, sii bak modeo, iuba ladume lafusi, ‘Uho num amabadate tau azie?’ laham bak ozolo modem di nasi, ‘Amat am num uba uledi gagu azie?’ laham bak lam nasi nabidale. Nabidume aime neàdi ame num vàmtea lamota laba tau azile. A num iudu iuba le i. Num iudu iuba le i. A labihadamule. Gi num ubu uho azimda lamota azibe neo num debu amomoi bake neo le ame baket mode. Lahadale.
12. Labi uho ame num laba olelo modem di labe im nehasu num deda laba gagodale. ‘Neàte. Im Boehàda Alat Ahamo uba neà bak modi esuse,’ lahame gagu olele.
13. Labi uho ame num vàmtea laba azim di num dedamat uba iademe gut ve meedameam làhà uho amu lab oli gagoho im lam, ‘Im Boehàda Alat Ahamo uba neà bak modi esuse,’ lahame lab gagoho bak lam gi labihasule. Lahana uho ame num vàmtea laba azim di ame num dedamat uba iademe gut ve meedam vabameam làhà nasi uho amu lab gagoho bak lam fa vi faatoi vou esmozi neo ladale.
14. Labi uho mei num modeo, num debu bak modeo, uho ame bak laba lafusidam di aimeam num deda labe aho modeo, ame num debu laba azihi dam labe iho modeo, labihasu ubu uho vou lehe im lam aim moudume im bak malemeam làhà uho ame num debu bak lam vou esmozi fa neo ladale. Vou esmozi lalo modem di labe um naba bak itabe fau foamome vou esmozi fa neo iuba lale. Labi dam labe vi aame nehi ozom bak. ‘Aa làhà! Iho dam labe vou lehe im aihi vabake im bak itabe fau foamohe? Labihalahit Alat iba beoe taia?’ laham bak vi ozom bak am tame.
15. Em ba giomim gagoho vabak. Labi eho etei uba neo gagolo modem im imboda nidi nim laha iademe aime ozodale. Ba diamut Dam Bake Uloodume Vi Aime Ozobohudi Neàdi Fime Fahedam Digat fum di lam ubu uho vou lehe im lamti umti ule neàt vaha vab dam lam beodam di abo duana beoda tame. Lahana dam ahamda num debu Sodom laba azihi dam lamti labi num debu Gomora laba azihi dam lamti dam lada labe bisi faina meedaha bakta imbot. Lahana eho etei uba gagu olu ubu uho lab vou le meedaha bak lam aaha vab labe Alat ba beom di mahate duana beodam kaio. Gi fota beodalo modem bak,” lahame ab vameadaham.
16. Labi Yesusat neo vi susume nehame vameada. “Um nasi ozodale. Eho etei uba gagu olulo modem di nim um gi domba adatea nembedati ulohona fa dam abo serigala meo feà bakti ulohona laba olulo modem bak. Labihàmu uho mei bake lam di gi moket meedam bakti ulohona iademe ozome vatohedale. Labi uho dam laba le Eho uba lab gagu oluhu im lam meedam di gi bume dolet ilabdem bakti ulohona ahu nemahuba neàt meedale.
17. Labi laha Eho etei uba lab gagu oluhu bak lam uho mei bake le meedam di labe uho Eba tu vuzehi vi tau meedam damat modemu Yahudi dam labe ibi iho tu vuzehi meedam bak gagu faheme modiam dam labe fa uba faki vabidume fai baket meedam bak ehe labe iademe it vou faovoi meedale. Neham bak. Uba fakemoholehe dam labe um siàdume fa Yahudi dam labe ibi iho tu vuzehi meedam bak gagu faheme modiam dam labe ibi iho meit im modem diat ulooiame aim dam debu koeda laba ub loda tame. Labi ame dam labe uloodume aime neàdi fa uhumo fi hasi bakamta vahi Alat vameadaha im ahamda dogoit aidam bakti im meiti meedam num laba um vou oli na sokba nasbe ahit alibulehena labe uba foadume geàda tame.
18. Labi laha uho Eba tu vuzehi vi tau meedam damat modemu uba fakemoholehe dam labe ozo, ‘Im boehàda zi labe laha neo uba uloodume vi aime beodase,’ laham bak laba ozome um neo si bak ahaladiame vuusuidam boehàdatebo zi lamti dam eeda zi lamti laham dam laba vou le duzu uba uloodume aida tame. Lahana ame bak lam meedam di a iedemule. Neham bak. Uho ame dam laba neha, ‘Iho Yesus bake tu vuzeheho,’ laham bak ahate vameadam bake Alat ahit uba modi labihada tame. Abo Ebe Eho meedam im lam fi desi tombalehe labe fa ame Roma boehàda zi lamti Yahudi damat modem vab dam totbaho lamti iho fa aime ozobohudem bake labihadam bak.
19. Lahana ame Yahudi dam eeda labe um si vou ladume ame boehàda zi labe uba tet uloodam di labe uho fa dam laba fa gagom bak lam, ‘Iho im akatihasu fa vi gagoela?’ laham bak lam a bisi vi ozodamule. Neham bak. Em Ai Alat uba modi fi gatehe labe uho gi ame im lam fa ame dam laba fa gagoda tame.
20. Ame di lam ba uhumo gagodam vabak. Gi Em Ai labe Am Aha Nutabe Neàna Labe fa uba modi vizehe labe uho ot vai gagodam bak.
21. Labi ame di labe neham bak modem bak ehete. Um Eba vi tau meedam damat modemu dam duadat uba faki im nehasu meeda tame. Dat meida lam Eba tu vuzehe vabda labe am vahada Eba tu vuzeheda lam vou fohome meia ub lu otem bak ame. Labi dat meida lam Eba tu vuzehe vabda labe am dubu Eba tu vuzeheda lam fa vou fohome meia ub lu otem bak ame. Labi dat meida lam Eba tu vuzehe vabda labe am data Eba tu vuzeheda lam fa vou fohome meia ub lu otem bak ame. Labi mei data labe am ai modeo, am oi modeo, ibi iho gagoho im lam voou fa daet bohudi vou fohome meia ub lu otem bak ame. Labihada tame. Lahana Eba tu vuzehi meedam dam lam naat iba vabidam di iho gi ozahit keàtedi tu vuzehi meedam bohu vuusdume digat ba novai vaitomda laba fusi meedam lahasuhu dam lam Eho soat vausu fa vei neàdedam dam am bak.
23. Labihàmu uho bak mei bake lam di ame dam labe uba gut vabidume fai bak meedameam làhà dam lada lam vou esmozi fa bak mei bak iuba lale. Neham bak. Eho etei uba lab gagu uho meedalo meedam im lam uho Israel dam bake abo num debu mei num debu mei lahadaha dam laba uho le meedume gi neàdehe vabna Em Abo Asum Ahoba Iubet Bak Niba Li Dateleheda nim Em alihi damat ba fa aam bak.
24. Eho etei uba totobet fi koadalo modem im nim mahate vi aime ozobohudele. Neha: Meit vahokedam bak aidamda labe aho ba aba vahokedam guru laba fa vafozi feà datelem vabak. Labi laha mei na meedamda labe aho ba aba im gagu modiamda laba ba vafozi feà datelem vabak. Ame bak lam gi neham bak. Damat Eba fai bak meedameam làhà uho ozom, um Eho vahokedam dam niba ba damat fai bak laha meedam vaba? Vabà! Gi umti damat laha fai bak meedam bak. Neham bak. Em bak niba esdam di Em gi uba im gagomda Boehàda Em am bak. Labi uho Ebe Eho gagoho im aime vuzehi meedam dam um am bak. Labihàmu damat Eba neha, ‘Em gi setan zi ahebu vuusdam boehàda Beelzebul Em am bak,’ lahame Eba labihasu vàlu feàtàmeam làhà uho ozom, uba ba labiham vaba? Modem bak. Lahana uho Eba vi tau meedàmu uba fa duana feàtàdam bak,” lahame ab vameadaham.
26. Labi Yesusat neo nehame susume vi vameada. “Uho bak iuba le im Ebeda vou vameatedam di ame dam labe uba faki fai baket vabidume meedam di lam ame dam laba uho a iedi vi ozodamule. Neham bak. Alat Ahamo Boehàdateboli dam bakdate deeli vame Am damali vuusu im vahokedam bak lam, ‘Akatihasu modemna modela?’ laham bak lam amu fi zeam bitoi tombalehe vab im lam ba gi labihasu vastem bohu modesdam vabak. Abo ame im lam ahate vameame fi zeam bitoi tombali dam ozobohudem bak ehe bak.
27. Neham bak. Eho amu uba neha, ‘Alat Ahamo Boehàdateboli dam bake deeli vame Am damali vuusu im vahokedam bak lam ab faasi meedamam bak,’ laham im lam eho amu uba aa vameame fi gatehe im lam uho fa etei ot vai fa dam bake ahate fi desi vameadale. Abo Eho um dogoi bumat laba si aa vameadam im lam uho laha fa etei ot vai fa dam duadat odosdam bak laba le bisteat ahate vameadume fi dedale.
28. Labi uho dam bakda uba gi soabota oteme voom dam laba a àvodi vi ozome iedemule. Dam lam um otem di um so lam gi lab eloi vooho tadem bak. Ba neo um eloi it oazehena lam vi vabidam vabak. Labiham bake ame dam laba uho àvodi a iedemule. Fa gi nehale. Im so nim Alat modi elomnàme fa neo iho lab eloi it oazehena lam vi ve fa vua eludamna sutem gikina bohu laba voom bak ehete. Labiham bake ubu uho bisi àvodi vi ozome ahu adat iedelo modemeam làhà Na Debu Modehe Ala laba iedele.
29. Neham bak vi ozomale. Damat gena bume keobena nu vabna vam di, ‘Feà kaio,’ lahame ba doi oona tembagat modehena lam vam mom meote. Lahana ame bume keobena lam Alat faobekesi vou aasdam bak. Alat, ‘Ame bume lam biti elom neàte,’ laham bak uledem vabameam làhà ame bume lam meida buà ba bake biti elom vabak.
30. Lahana ame bume lamota vou aasdam vabak. Alat laha uba vou aasdam labe ba um meida buà vabiem vabak. Abo um ahebu vi ozobohu tadehe bak. Abo um ohuta tau keobebe lam Alat laha amu gi debe uloholi ozobohudi esuhu labe Alat um ba vàmtea vabiem vabak.
31. Labiham bake Alat ame gena bume keobe zi laba deeli vou aasdameam làhà im dam bakda laha tau vou aasdam bak. Lahana bisi aho deeli vou faovoemda im dam am bak. Labiha labe ame dam bakda amomoi labe uba otelo modem bak modeo, uba faina modelo modem bak modeo, uho a bisi vi ozodume iedemule.
32. Meit ladi iedehe vabna dam duada labe iho avaesdam laba le ahate duzu nehasu gagomeam, ‘Em Yesus bake tu vuzehi vi tau meedamda em meida am bak,’ lahame ahate labi gagomeam làhà Eho laha ba Em Ai asum ahoba iuba azim Ala labe Aho avaesdam laba Eho le duzu nehame gagom bak. ‘Da nim Eba tu vuzehi vi tau meedamda meida am am bak,’ lahame ba diamut Ala bake ahate labi gagoda tame.
33. Lahana meit ladi vei iedi dam duada labe iho avaesdam laba le duzu ahate nehameam, ‘Em Yesus bake tu vuzehi Aba vi tau meedamda modem kaio,’ lahame vei iedi Eba momeam làhà Eho ba Em Ai asum ahoba iuba azim Ala labe Aho avaesdam laba le duzu laha nehasu gagom bak. ‘Da lam Eba tu vuzehi vi tau meedamda modem kaio. Em bieho,’ lahame ba diamut ahate labi gagoda tame,” lahame Yesusat ab vameadaham.
34. Labi Yesusat neo nehame susume vi vameada. “Uho nehame ozohe? ‘Dam mei debuti dam mei debuti Eho fa vahe vahedalo bak niba leha,’ lahame uho labihasu ozohe? Làhà um git ozoho bak. Ba labiham vabak. Eho bak niba lehemu dam Eba tu vuzehe vab damat fa Eba tu vuzehe dam laba faki oddam bak.
35. Eho bak niba lehemu dam Eba tu vuzehe vab dam lamti fa Eba tu vuzehe dam lamti nehi ot fakiame ot beluidam bak. “Am adat fa am ai bake faki meeda. Labi am adnamat fa am oi bake faki meeda. Labi Am taai labe fa am tai bake faki meeda.
36. Labihadam labe iho nehi ozom bak. Uba fakemoho dam lam gi um dam debu am bak. Ba dam giida oba fakem vabak.”
37. Neham bak. Meit am ai modeo, am oi modeo, bisi duana deeli meeda. Labi Eba gi fota deeli meedamda lam ba neà vab labe Eho ba neha, ‘Ame da lam Eba tu vuzehi vi tau meedamda am am bak,’ lahame Eho ba labi gagom biem bak. Labi laha meit am adat modeo, am adnamat modeo, bisi duana deeli meeda. Labi Eba gi fota deeli meedamda lam ba neà vab labe Eho ba neha, ‘Eba tu vuzehi vi tau meedamda am am bak,’ lahame Eho ba labi gagom biem bak.
38. Labi laha meit neha, ‘Eho Yesus bake tu vuzehi im Abada meedàmu damat em si ut tetehesuhunaso lam ve lu vatu vou ladam di lam damat eba aasdamnàme gi ozahit vou le em paku dou elom neàte,’ lahame Eba labihasu tu vuzehi gagu vàmadem vaba vedi iedi momda abo Emti uloho vab labe Eho ame da laba, ‘Eba tu vuzehi vi tau meedamda am am bak,’ lahame Eho ba labi gagom biem bak.
39. Neham bak. Meit aba aho Eba lab tu vuzehehe bak lam ahate gagomeam damat am otem bak labna zohàme it vou faovoi vei iedi ahit biehenali, ‘Em Yesus bake tu vuzehi Am damalem kaio,’ lahame veibadamda lam ba Alati vahi gi ahe neàna bohu vuusdam vabak. Laham vaba meit bisi it vou faovoi elom bake vei iedem vaba ahatet neha, ‘Eho Yesus bake tu vuzehi Aba vi tau meedamda em am bak,’ lahame gagu afoezobe damat am otemeam làhà ame da lam ba Alati vahi gi ahe neàna bohu vuusdamda am am bak.
40. Uho bak mei bak iuba lameam meit uba ahu ule neàt gut vamda lam Alat ozom di ame da labe gi Eba laha ahu ule neàt ab vaham bak. Labi ame da labe Eba ahu ule neàt vameam làhà Eba Gagu Oluhuda lam abo Em Ai bake laha ahu ule neàt vaha bak.
41. Labi meit neha, ‘Da lam abo Alat gagu olu Am im ot vai fa iba ahate vameaidamda meida am bak,’ lahame am ahu ule neàt ame da labe etei iba leheda laba tu vuzehi gut vameam làhà Alat ba diamut ame da nibe aho lab tu vuzehehe bak lam gohali lomna lom di gi ame da nimti labi ame da nibe aho ule neàt gut vahada lamti amait ame na ulohona ba lodam bak. Labi meit neha, ‘Da lam abo Alat gagoho im vuzehi vamdesu meedamda meida am bak,’ lahame am ahu ule neàt ame da labe etei iba leheda laba tu vuzehi gut vameam làhà Alat ba diamut ame da nibe aho lab tu vuzehehe bak lam gohali lomna lom di gi ame da nimti labi ame da nibe aho ule neàt gut vahada lamti amait ame na ulohona ba lodam bak.
42. Ebe Eho vahokedam im ozobohudelo vi tau meedamda meida nim abo damat neha, ‘Feà vab dàt moz,’ lahamda nim meit ozo, ‘Da lam laha Yesus bake vi tau meedamda meida am bak,’ lahame ozome gi vaota noai lu udemeam làhà Alat ba diamut dam bake gohali lomna lodam di ame da laba laha tau lodam bak. Ba loho vaba alia modem vabak,” lahame Yesusat Aba vi tau meedam dam dua belas laba ame im zi lam ab vahokedaham.
1. Labi Yesus ame im zi lam Aba vi tau meedam dam dua belas laba vi vahokedume neàdi ab oudaham. Labi oudume neàdi Yesus ame bak lam vou esmozi Galilea bak labe am num debu iudu iumti num debu iudu iumti abo Yahudi dam lamota vou vahoketeda. “Alat Aho Ahamo Boehàdateli dam bake deeli vame Am damali vuusu im vahokedam bak lam etei Aho modi fa gàhàlehemu meit Aba Aho etei Gagu Fihasi Vimteme Oluhu Dat Boehàda laba tu vuzehi meedameam làhà ame da lam ab Alam damalemam bak,” laham Im Neàna lam vou vahoketedume vi vameadume fi deda. Labihada.
2. Labi ame di lam Yohanes Mei Vuu Valo Baptisleiamda labe gi damat amu si sel laba ousdam dàt meit li vameadahana ab aiham. “Obo oho neha, ‘Alat Gagu Fihasi Vimteme Oluhu Dat Boehàda am tame,’ lahame ozodamda labe Aho num debu iudu iumti num debu iudu iumti im vou vahoketedalo,” laham bak meit li vameadahana Yohanesat ab aiham. Labi ame im lam aihemu Yohanesat aba vi tau meedam dam gagome li duzu neàdi fa im nehasu vameame Yesus bake ab oluham.
3. “Uho Yesus bake le gagu aile. ‘Dam ahamda iube neha, “Alat ba diamut Aho Gagu Fihasi Vimteme Olulo Modem Dat Boehàda iba Israel dam bake olu tame,” lahame fet gagu vou vamea useheda Om ame Da ameo? Om ame Da modem vabameam làhà iho gi fa dat amomoi ba olum bake vou faodào?’ laham bak lam uho Yesus bake le gagu aile,” lahame labi vameadume neàdi Yesus bake ab oluham.
4. Labi ame dam labe Yesus bake le lafusi ame im lam gagoha Yesusat fa ab gagoham. “Uho etei li aaha bak nimti labi Eho vameadaha im uho aihi bak nimti labihasu fa le Yohanes bake vameadale. Eho nehasu meedam bak:
5. Dam fako faidi na aam biem dam labe im fako fa neàdedume na aada. Labi dam nao zoho nutabedehe dam lam laha fa neàdedume usnada. Labi dam sokba faidi vàhàdem bohu vuusdam dam lam laha modi fa neàdeda. Labi dam dogoi faidi ulaihàbulehe dam laha modi fa im aim neàdeda. Labi dam elodaha dam laha modi fat ahededume usnada. Labi laha Ebe Eho meedaha Im Neàna lam Eho li vameadam bak lam dam na vab dam labe iho aida. Eho labihasu meedam im zi lam uho fa Yohanes bake vou le vameadale.
6. Labi uho im nidi nim Yohanes bake vou le laha vameadale. Meit nehame ozo, ‘Alat Gagu Fihasi Vimteme Oluhu Dat Boehàda lem di im nehasu meedam bak,’ lahame aba aho ozoho bak lam Eho meedam vabnàme gi ozahit Eba tu vuzehemda lam Alat gi im neà bak modi esuiamda am bak,” lahame ame dam laba ab vameadume fa ab oluham.
7. Labi Yohanes bake fa ladam di labe Yesusat fa neo dam duada zi laba, “Yohanes ana dàt modela?” laham bak lam ab faasi vahokedamam. “Uho neha, ‘Imo le Yohanesam im aidase,’ lahame bak aotba baa bohu dam vaba alim bak laba lalo ladaha di lam um baka ana aalo ladahela? Uho gi ket et nutabet ulasi vou lai vou laidam bak aalo ladaheo? Vabà! Um ba labi ozome laha vabak. Yohanes abo meit vameadam im aim di ket et labe fi zuhusi bedem bakti uloho vabak. Am abo meit aba neha, ‘Im nehasu meedale,’ laham di am ba fa veimdem vab labe gi aba baket daetesu labaha bohu meedam dàt modem bak. Am abo teuda am bak.
8. Làhà um labiham vabameam baka ana aalo ladahela? Uho gi meit sue bisi neàna dusuhu bak aalo ladaheo? Vabà! Um ba labiham vabak. Dam nazoh duada labe iho sue bisi neàna dusuhu dam lam ba bak aotba baa bohu dam vaba alim bak azim vabak. Dam lamohoda gi boehàda labe im num bisi feàda lamota azim damat modem bak. Yohanes ba sue lamohoda dusu num feàda laba azim vabak.
9. Làhà labiham vabameam um baka ana aalo ladahela? Uho gi Alat vameadaha im aime fa dam bake ahate vameaidahadate aalo ladahe? Lo, imbote. Uho le aalo modemda abo ame da am bak. Lahana ame da Yohanes lam gi ame bak lamota modehe vabak. Abo ame bak labe vafozi bisi feàda am am bak.
10. Eho etei lab gagoho im lam Alat Vameadaha Im Toedahana laba im meida nim Yohanes bake nehasu vàlu gagoho bak ehe bak. Alat Am Adat Yesus bake neha: ‘Eho Em im le vameadamda nasi dam bake olu neàdi Om ba olu tame. Damat Om ule neàt gut vam bak laba ozome ame da labe nasi le duzu zie vueme neàdehena ahum Om ba vula tame.’ Lahame dat ahamda Alat vameadaha im aime fa dam bake ahate vameaidahada Maleaki labet aho fet toeme esuhu im lam ab imbodi Yohanesat ame baket ab meedaham bak. Labiha labe Eho uba neha, ‘Ame da lam ame bak labe vafozi bisi feàda am tame,’ lahame uba labi gagoho bak.
11. Lo, lamota imbot. Lahana Eho etei uba neo gagolo modem im imboda nidi nim laha nasi aima. Dam ahamda iumti dam bada nimti abo dam bakda ahebu fa vazisi Alat ozodam di bisi feàda dat vàmtea Yohanes Mei Vuu Valo Baptisleiamda am am bak. Lahana dam etei Eba tu vuzehi Alat deeli vame Am damali vuusu im vahokedam dam lam abo damat neha, ‘Feà kaio,’ lahame gagodam damat modemnàme Alat ozom di ame dam labe iho fa Yohanes vafozi feà damalem dam am bak.
12. Um im nidi nim laha aimale. ‘Damat iho faina meedam bak lam voedume fa ahu neà bak vàmadi meedam dam lam Alat fa deeli vame Am damali vuusu im vahokedam bak,’ laham im lam Yohanes Mei Vuu Valo Baptisleiamda labe aba aho amu dam bake lab vahokedam bak labet faasi vou mode ledume etei Eho neo fa ot vai vahokedam bak labet modi damat aime neha, ‘Im Alam damali Aho iba vuusu im vahokedase,’ lahame Alam damalehe dam laba dam amomoi labe meoli bohudi meedam labe geàda. Abo dam meoho damat fa ame Alat modi Am damali vuusu im vahokedam dam lam, ‘Fa iho vuusdase,’ lahame ot odosiame keàtedi meeda.
13. Eho etei Yohanes bake ozome lab vameadaha im lam abo imbote. Nehaha bak. Alat Vameadaha Im Toedahana ahebu lam dam ahamda labe neha, ‘Alat Ahamo Boehàdateboli dam bake deeli vame Am damali vuusu im vahokeda tame,’ lahame gagu vàmadi esuhu im lam gi amu aham di iube fet vameadume vou usehe bak. Labi neo Yohanes Mei Vuu Valo Baptisleiamda laba vou fusi aho fa neo ot vai ame im lam ahate vameadaha bak.
14. Labi Eho etei uba vameadalo modem im nim uho vuzeheo? Vuzehem vabao? Laham bak nasi aimale. Dat ahamda Alat vameadaha im aime fa dam bake ahate vameaidahada meida labe aho Alat gagoho im nehame fet toeme esuhu bak. ‘Alat Gagu Fihasi Vimteme Oluhu Dat Boehàda lam uho iademe gut vam bake Eho amu nasi Em im aime fa dam bake ahate vameaidamda Elia lam uba nasi olu uba le vabiedume ahumdi vou faodam bak mode tame.’ Lahame fet toeme esuhu im lam uho ule neàt vuzehemeam làhà, ‘Yohanes ame da am bak. Elia bake gi vàlu gagoho bak,’ laham bak lam um ozobohudem bak.
15. Um ahebu im ozobohuna taia? Um dogoi im aim bak ehena Eho etei lab vameadaha im lam mahate aime vi ozome ozobohudele.
16. Im meida neham bak. Dam etei bak niba esdamda ibi iho meedam bak lam Eho, ‘Akatiham bakti ulohote,’ lahame vouhome vameadàla? Làhà Eho gi neham bak vouhodase. Um dam bada nim gi data num bak tomba laba nusualadume dam busaot modem baket vouhom datati uloho bak. Ame data labe iho sikilo modem im lam fa data totbaho laba gagoha data lada labe mouda. Làhàmu ab faki tozodamam.
17. ‘Ea. Iho neha, “Imo bo foadume umti kuguidase,” lahame gagohat um akati mohela? Labi iho neo, “Umti vahi koei esum di medaom labe nimidase,” lahame gagoha um akati mohela?’ lahame ame data labe data totbaho laba faki tozome gagoda.
18. Um dam bada gi ame data labe modem bakti uloho bak. Nehaha bak. Amu Yohanes Mei Vuu Valo Baptisleiamda labe aho lehe di lam aho gi ahit na àm mu izidam bak. Labi laha ahit ba anggur oo vaksa meona uddam vabak. Labihamda modehe labe ame dam labe iho aame vi ozo, ‘Ibi iho na àme im gagu igeadam bak lam iho ame da laba gagoha akati aho modem vaba ahit na àm mu izidàla?’ lahame faki vedi mu nehi vi tozoda. ‘Ea, da lam gi setan oli veimai meedam dàt modem bak,’ lahame mu vi tozoda.
19. Labi laha Em Abo Asum Ahoba Iubet Bak Niba Li Dateleheda nibe Eho ba neo lehe di lam Em gi na àda. Labi laha anggur oo vaksa meona udda. Labi im gagu igeadam baket meeda. Eho labihamda modehe labe ame dam labe Eba aame vi ozo, ‘Ibi iho ahit na àm mu izidam bak lam iho ame da laba gagoha akati Aho modem vaba gi deeli igeadam labe na àdàla?’ lahame faki vedi Eba nehi vi tozoda. ‘Ea, Da lam abo gi dedehe geàmu na vi àdam bohu vuusdam Dàt moz. Labi laha anggur oo vaksa meona bisi duana uddume bak vabi bobidume iziam Dàt moz. Labi Da lam abo meia gagu gi teo vi vaiam doi pajak gut gagome vaiam damti labi damat neha, “Dam faina meedam damat moz,” lahame feàtàdaha dam totbaho lamti vazisi ot deeliame meedam Dàt moz,’ lahame Eba faki mu vi tozoda. Labihàmu Eho ozoha, um dam bada gi Yohanesti Emti li meedam im im gi mohet vanamai mom damat moz. Lahana Emti Yohanesti iho li Alat Aho ozobohudi meedam im lam iho fa dam bake lab vahokedaha di lam meit ame im lam aime tu vuzehi iademe ulohodesu meedameam làhà ame bak labet modi damat gi nehi ozome gagodam bak. ‘Làhà Alat Aba Aho ozobohudi meedaha bak labet modi Yohanesti Emti gagu oluhu bak lam gi ahole meedaha bak,’ lahame vi ozobohudi gagom bak am bak,” lahame Yesusat ame im lam ame dam zi laba ab vahokedaham.
20. Yesus Aho amu nehasu meeda. Num debu meida iuba le damat ihimo modem biem im feàna lam duana meeda. Labi neo num debu meida iuba le ame im feàna lam mahate duana modem kai. Gi labihada. Labihadamnàme Aho ame im feàna duana meedaha num debu laba azihi dam labe ame im lam aahanàme vedi ba ibi iho faina meedam bak lam voedume fa ahu neà bak vàmadi meedaha vaba gi Aba tum bakti mouda. Labihàmu Yesusat Aba Aho lab duzu vameadam lahasuhu di labe Aho ame num debu laba azim dam labe im alihi aasu gagodam vabna gi dae buduana faasi gagu butidam labe ab la vàlui le vàluidamam.
21. Aho nehame la vàlui le vàluidume buteme gagoda. “Aiee! Num debu Korazim lamti num debu Betsaida lamti laham bak behàsu laba azihi Yahudi dam oa, Alat uba ba diamut beodam bake nasi fet àvodi it ozodale. Nehaha bak. Eho etei ubu uho azihi num debu behàsu laba laha di lam na damat ihimo modem biem im feàna meedaha di lam uho aahanàme vedi Eba tuhu vaba aalahigeàmu mouda. Lahana uho nasi Em ehe vab di iube abo Yahudi damat modem vab dam num debu Tirus lamti num debu Sidon lamti azihi dam labe iho aham di iube meedaha im laba vi ozodale. Neha: Ame dam debu behàsu labe iho bisi faina meedàmu Alat gi amu aham di iube dam laba faki beodume ab vàhàdeme seddaham bak. Lahana Eho etei uba lab le meedaha im feàna lam fa ame dam ahamda debu behàsu laba amu le meedameam làhà ame dam labe gi amu di iube Eba tu vuzehi iho faina meedam bak lam voedume fa ahu neà bak vàmadi meedam bak. Labi neo ame bak lam dam giida labe fet aame ozo, ‘Làhà dam lam ibi iho faina meedam bak lam voedume fa ahu neà bak vàmadi meedà?’ laham bak aame ozobohudem bake ame dam labe laha gi amu di iube sue taubuna dusu. Fa ohu fau visoi im ohu laba nom gulada. Labihadam labe Alat ba beoho vaba gi labihasu vekehe bak.
22. Lahana Eho etei uba neo gagolo modem im imboda nidi nim laha nasi aima. Um num debu Korazim laba azihi dam lamti num debu Betsaida laba azihi dam lamti ubu uho faina meedam bak lam fa voou ahu vei neàdehe vab labe Alat ba diamut Dam Bake Uloodume Vi Aime Ozobohudi Neàdi Fime Fahedam Digat fum di labe uba beodam di bisi geàdam dam um am bak. Lahana num debu Tirus laba azihi dam lamti num debu Sidon laba azihi dam lamti ba Alat beodam di ame dam lam mahate geàdam vaba gi fota geàdam bak. Neham labe labihadam bak. Eho na damat ihimo modem biem im feàna lam dam labe aaha vab labe gi fota beodam bak.
23. Aiee! Um num debu Kapernaum laba azihi dam oa, uho vedi nehi vi ozodam damat modem bak. ‘Yesus bak ibida niba li na damat ihimo modem biem im feàna duana meedaha labe im abo bisi feàda im am bak. Damat iba aame im ee vousai vou baedam bak,’ lahame vi ozodam damat modem bak. Lahana um git ozoho bak. Ba labiham vabak. Eho amu bak ubuda laba le ame im feàna duana lab meedaha bak lam uho aahanàme ba Eba tu vuzehe vaba aalahigeàmu moudahemu ba diamut Alat um gi koei it oazehena le esdam bak laba vou nom ilu beodume sedda tame. Eho gi neham bak ozome uba labi gagoho bak. Amu aham di iube faina meedàmu Alat beodume vàhàdeme seddaha dam abo num debu Sodom laba azihi dam lam Eho uba le lab meedaha im feàna lam Eho amu ame dam laba le meedameam làhà ame dam labe gi amu di iube Eba tu vuzehi ibi iho faina meedam bak lam voedume fa ahu neà bak vàmadi meedam bak. Labiham labe im etei ba vou faat leheda zoho niba ame dam mekehà etei duzum lahasum bak.
24. Labihàmu um num debu Kapernaum laba azihi dam labe ubu uho faina meedam bak lam voedume fa ahu neà bak vàmadi meedam vab labe Alat ba diamut Dam Bake Uloodume Vi Aime Ozobohudi Neàdi Fime Fahedam Digat fum di bisi duana beodam dam um am bak. Lahana dam ahamda num debu Sodom laba azihi dam lam Alat ba beodam di ame dam lam mahate duana beodam kaio. Eho na damat ihimo modem biem im feàna lam dam labe aaha vab labe gi fota beodalo modem bak,” lahame Yesusat ab vameadaham.
25. Labi ame di labe Yesus fa Am Ai Ala bake ab tom vou baedamam. “Ai oa, Oho asum ahoba iumti fa bak nimti Om na debu modi vuusuhuda Boehàda Om am tame. Om abo neàte. Nehaha bak. Obo Oho dam bakdate deeli vame fa Om damali vuusu im vahokedam bak lam damat neha, ‘Im bisi sekolah vahokedam bak bohu vuusdam labe bisi ozobohu dam im am bak,’ lahame ihimo ozome it daetbadam dam laba Oho ahit modi vasteho. Lahana ame bak lam Oho fa dam sekolah vahokehe vaba im biehebu dam abo bisi feà vab dam laba Oho ahit ame dam laba modi im ozobohudi fi gatei meedam bak.
26. Ai oa, Oho lab meedaha bak lam Oho amu fet ozo, ‘Eho labi modelo àhàkehe bak,’ lahame labi fet ozoho labe Obo Oho modelo modemna lam Oho ab modi imbodeham bak. Labiha labe Eho, ‘Om abo neàte,’ lahame vou baedaho,” lahame ab tom vou baedaham.
27. Yesusat Aho labihasu Ala bake tom vou baedume neàdi fa ame dam giida zi laba neo vi vameada. “Em Ai aabot Aho modem im lam ahebu Aho Eba neha, ‘Oho fa im dedateli meedale,’ lahame Eba modi vizehe labe Eho fa im dedateli ab vuusdamam bak. Labiha labe Alam Adat nim, ‘Amat modela?’ laham bak lam dam giida ahebu biem bak. Gi Aiat Ahamo bisi ozobohudehe bak. Labi laha ame Adat labe am Ai lam, ‘Amat modela?’ laham bak lam dam giida ahebu biem bak. Gi Am Adat labe Ahamo bisi ozobohudehe bak. Labi laha ame Adat labe Aho fi me ve Am Aiat modem im modi fi gatehe dam lamota Am Ai laha ozobohu bak,” lahame ame dam zi laba ab vameadaham.
28. Labi Yesusat im lada lam vameadume neàdi Aho neo nehame vi vameada. “Uho meit im asimbuna meedam bak meedume bedali alihi nemahum dam lam um nasi Eba li Eho fa faamome modi dehabali neàdedase.
29. Em ahu neà labe meia im vahokedam di gi nemahuba neàt vameadam bak. Labi Ebe Eho uba vahokedam im lam ba meia modi asimbuli vanamam vabak. Em ba, ‘Uhumo meedale,’ lahame ba uba ahumdem vaba Eho vi tau meedam bak labet modi gi dehaba neàna vou ladam bak. Labihàmu Ebe Eho etei uba vahokedaha im lam uho ulohodesu meeda. Labi laha Ebe Eho bak niba esdam diat vou mode ledume baleàhà im nim uho laha vi vouhoda. Uho fa gi labihasu meedale. Uho labihasu meedam labe um ahu ba im iudu ium vi ozo. Im iudu ium vi ozo. Laham bak lam gi ab vabali vei seti aidamam bak,” lahame ab vameadaham.
1. Ame di labe ba hari Sabat abo Yahudi dam labe ibi iho gi azibe im digat meida labe Yesus Aba vi tau meedam damti iho bak mei bake lalo modemu gandum dee zie labe lada. Ladam di labe Aba vi tau meedam dam labe idoalehemu ame gandum oo amdeheda auet vi vuu footoi ab vou à ladamam.
2. Labi vou à ladam di labe Farisi dam totbaho labe ame bak lam aahemu Yesus bake ab gut gagoham. “Ne, etei nim gi hari Sabat abo im Yahudi dam labe ibi iho gi azibe im digat nim akati modi Oba vi tau meedam dam labe na oo auet vi vuu footoi vou à ledàla? Ne, im tai ahamda Musat aham di iube neha, ‘Hari Sabat fum di na a meedamule,’ lahame toeme fi hasi esuhuna akati modi Oba vi tau meedam dam labe ailahigeàmu na meedàla?”
3. Lahame labi gut vameadume modeha Yesusat fa ab gagoham. “Ne, im tai ahamda Boehàda Daud labe aho amu modehe im lam meit Alat Vameadaha Im Toedahana laba im meida nehi toehena nim um aame vi ozobohudehe vaba? Amu Daud Aba vi tau meedam damti idoalehemu dam ahamda labe iho Teohet Mome Fa Faatoiam Num Fihamna abo Alat Israel dam bake le tau im vameaidam num laba oli Ala bake lu fi haha beahuba laba esuhu roti lam aho visoi faheme am dam bake lodume iho vahi àdaha bak lam um vi ozobohudehe vaba? Ame roti lam dat ahamda Musat aho aham di iube neha, ‘Ame roti lam damat Ala bake lomna ve vua vahudam toheda zi labe ihimo àm rotit modem bak. Ba dam giida tau àm fi ham roti modem bak,’ lahame gagu fi hasi esuhu roti lam dam giida labe àhà bak. Lahana ame dam labe iho ba, ‘Faina modeho,’ lahaha vabak.
5. Labi um laha dat ahamda Musat aham di iube aho dam bake gagu fi hasi esuhu im zi toedahana laba im meida nehasu toehena lam um laha aame vi ozobohu vabali mode? Nehaha bak. Hari Sabat abo im Yahudi dam gi azibe im digat lam na modem fi ham digat labe ame damat Ala bake lomna ve vua vahudam toheda zi labe iho ame Fihasi Ala Bake Vou Baedam Num Vàmteabu laba oli na meedam meo bak. Lahana Alat ba neha, ‘Um faina modeho,’ lahame ba vàlu gagom vabak. Na Alat Aho gagu esuhuna meedam labe gi neà bak.
6. Lahana Eho etei nib doudamda nibe Eho ame Fihasi Ala Bake Vou Baedam Num Vàmteabu laba fa neo vafozi ab bisi feà Dateboleham bak.
7. Labihàmu Asum Ahoba Iubet Bak Niba Li Dateleheda nim Em ame Da amemu ame hari Sabat deda Em am bak. Labiham labe Ehemo neha, ‘Ame digat labe im nehasu modem neàte. Im nehasu a modemule,’ lahame ozome gagomda Em am bak. Labihàmu Eho nehi ozoho bak. Meit Alat Vameadaha Im Toedahana laba Alat Israel dam bake nehame vameadaha im meida nim uho laha vuzehi meedaha vab damat modem bak. ‘Uho bak niba esdam di bisi uho meedam im tombuda gi neham bak. Uho gi meia aame faobekesi im neà bak tau meedale. Uho labihasu meedam labe Em ahu bisi deelem bak am bak. Lahana ubu uho faina meedam bak fa faatom bak laba ozome na fi ho Eba lolo modemu oteme vua vahudam bak lam Em mahate deelem kaio.’ Lahame vameadaha im lam Eho ozoha, um Farisi dam labe vuzehi meedam vab damat modem bak. Uho vedi Eba vi tau meedam dam niba, ‘Git modeho,’ lahame ozomsuhu labe Eho labi vi ozome uba labi gagoho bak,” lahame Yesusat ab vameadaham.
9. Labi neo gi ame digat labe Yesus ame gandum dee zie labe labohoti vou esmozi neo ame num debu laba azim Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba neo ab oleham.
10. Ame di labe dat anekehà tot nutabedeheda laha ame num laba vi tau oli aida. Labihadam di labe Farisi dam laha laba tau oli nusualadaha labe ozo, “Imo Yesus bake vàlum im modi aase,” lahame labihasu ozoho labe Yesus bake ab vi ailo gagoham. “Guru oa, im tai ahamda Musat aho toedume fi hasi esuhu im lam akatihasu toedume esuhela? ‘Ame hari Sabat iho mei modi fa neàdem neàte,’ laham bak toeme esuheo? Laham vaba, ‘Hari Sabat iho mei modi fa neàdem fi ham bak,’ laham bak toeme esuheo? ‘Akatihasu modem neàte,’ lahame toedume esuhela?”
11. Lahame labi gagoha Yesusat fa ab vi gagoham. “Ne, um ame hari Sabat modemnàme nehi modem meo dam taia? Dat domba fi ho ousdamda labe am domba meida ame hari Sabat bak bumat laba subtem di uho naedamat abo gi àvodehat vi si fa vousai esum meo dam taia? Domba nom ilum di uho ozom, um gi labihasu aalahigeàmu voe? Vabà! Abo hari Sabat modemnàme uho naedamat gi ozahit fa vi si vihitoi fa bak ba neà bak laba olum bak.
12. Lahana Eho ozohat im damti dombati uloho vabak. Dam bisi aame àvodi tombulemda am bak. Labihàmu hari Sabat abo na modem fi ham digat nim mei modi fa neàdem neà bak.”
13. Lahame labi gagu neàdi fa dat nisileheda niba ab gagoham. “Om anekehà nasi vamdemale,” lahame gagoha da nibe am anekehà vamdeheilahit gi fa ab neàdeham. Abo gi anekehà neàda lamti ulohona fa ab modesuham.
14. Labi modeha ame Farisi dam labe iho ame bak lam aahemu ame num labe futodam labe neha, “Uho ozom, im akatihasu modi Yesus si otela?” lahame im aa ab odoadamam.
15. Ame Farisi dam labe Am otelo aa odoadaha im lam Yesus Ahamo naedat ozobohudi ame bak lam vou esmozi fa bak mei bake lam bak ozome ab ladamam. Ladam labe dam aheda ziti dam gaileheda ziti Aba vi tau vueda. Labihàmu Am aame faobekehemu dam gaileheda lam ahebu Aho modi fa ab neàdedaham.
16. Labihadam di labe Aho modi fa neàdedaha dam zi laba fa mali vi gagoda. “Eho uba modi fa neàdedaha bak nim uho meia neha, ‘Yesusat iba modi fa neàdedaho,’ lahame a ahate vou fi demule,” lahame mali vameadume neàdi ab oudaham.
17. Yesus Aho lab gagoho bak labet modi dat ahamda Alat vameadaha im aime fa dam bake ahate vameaidahada Yesaya labe aho aham di iube Yesusat Aho ba modelo modem im lam fet nehi toeme esuhu im nim ab modi imbodeham.
18. “Na Eho Gagohona Meedamda nim Ebe Eho fi hasi gagu olulo modemda Boehàda Am am bak. Ame Da lam Ebe Eho bisi deelemda am. Labi Aba Aho meedam im Eho aam di Em abo ahu deelem bak. Ame Da lam Eho Em Aha Nutabe Neàna labe Aba modi vizi teudehe labe Ebe Eho vamdesu meia uloome aim bak lam Aho fa dam debu meida iuba le ahate vameada. Dam debu meida iuba le ahate vameada. Labihada tame.
19. Labi Aho lab vou vameatedam bak lam Aho ba meia daetesu beàdam vabak. Labi laha Aho ba meia faki buteme vameadam dae vameadam vabak. Labi laha Aho ba zie tombuda laba le duzu dam bake bisteat buteme vameadam vabak.
20. Labi laha Am fasbaso fi zuhu bak aam di ba neha, ‘Faite,’ lahame ba voom vabak. Aho ba laha vuagat fauhalemna labe am sue zoho umahubuli sutelo vabalem di Am ba vi feume sutem vabak. Aho gi labihasu vou mode ledume damat Aba neha, ‘Ahole meedam Dàt modem bak,’ lahame deeli gagom bak laba vou fusi neàdi vaitom di am bak.
21. Labihadam labe dam debu mei dam debu mei lahadam dam ahebu Aba tu vuzeheda tame.” Lahame Alat gi Aba Aho Gagu Olulo Modemda Yesus labe Aho ba modelo modem im lam Yesayat aham di iube fet toeme esuhu im lam Yesus Aba Aho etei neha, “ ‘Eho Yesusat uba modi neàdedaho,’ laham bak lam meia a le fi demule,” lahame gagoho bak labet ame im lam ab modi imbodeham bak.
22. Labi ba digat meida iube dat amu setan oli veimai dae vabale. Labi laha am fako na aam vabile. Lahamda lam dam ahe damat anekehà vuusu Yesus bake ab vou le vou duzuham. Labihàmu Yesusat ame da laba neha, “Setan taho futoi itale,” lahame gagu ame setan lam futoi itame modeha ame da labe fa dae faasi im ab vameadamam. Labi am fako na aam biehe bak lam laha fa ab neàdeham.
23. Labi modeha dam duada zi labe ame bak lam aahemu àvodi ihimo im ab ot gagoi ot gagoidamam. “Aa làhà! Da nim abo mei modi neàdem feà Dàt modem bak. Làhà uho ozom, Da nim Dat Ahamda Boehàda Daud Vou Faat Lehe Mekehàda abo Alat amu neha, ‘Ebe Eho Gagu Fihasi Vimteme Olulo Modem Dat Boehàda abo Mesias uba ba olu tame,’ lahame amu fet vou vamea useheda ame Da am taia?” lahame àvodi ab ot gagoidamam.
24. Lahana ame Farisi dam labe laha ame bak lam aahana ba labiham vaba vedi nehi gagoda. “Yesus gi mei ahu oli veimam setan zi labe im boehàda Beelzebul labe fa Aba modi vizi teudehe labe Aho mei ahu oli veimaha setan mei setan mei laba gagu futodume ilidam bak,” lahame ab gagodaham.
25. Lahana ame Farisi dam labe im ahu ad labe ozodam bak lam Yesus Ahamo ozobohudi dam laba im ab faasi vahokedamam. “Eho etei uba vouhome vameadalo modem im nidi nim uhumo nasi aime neàdi ubu uho etei lab gagoho bak lam, ‘Imbo? Imbo vaba?’ laham bak nasi it ozodale. Bak amomoi vuusdam boehàda am damti ihimo fàsi ot beluidameam làhà ame dam lam gi ahebu foli seddam bak. Labi bak amomoi vuusdam boehàda am damti labihameam làhà gi neo ab vàhàdeme seddamam bak. Labi laha num debu vàmtea azihi dam labe ihimo fàsi iuba vahe iuba vahe labihadume ot beluidameam làhà gi dam ahebu foli ame num debu lam gi dam vabali alimdi seddam bak. Labi laha dat am lahi datati ihimo ot fakiame ot beluidameam làhà ame dam debu gi vabali setem bak.
26. Labihàmu uho Eba neha, ‘Beelzebulat Eba modi vizi Eho mei ahu oli veimaha setan mei setan mei laba gagu futodume ilidala,’ lahame Eba labi vàlu gagohemu Eho uba gi fa nehi gagom bak. Um git gagoho bak. Ame setan zi laba vuusdam boehàda Beelzebul labe aho Eba tau aba aho vuusdam setan zi lam Eho gagu futodume ilidameam làhà gi Beelzebul fa am damti ot beluiame foli seddamna ozomom bak. Labihameam ba ame debu lam ba akati teudi duzue? Gi vàhàdeme seddamna ozomom bak.
27. Labihàmu uho etei Eba lab gagoho bak lam, ‘Mei ahu oli veimaha setan mei setan mei lahamda zi lam Eho gagu futodume ilidam di Beelzebulat Eba tau modi ilidala,’ lahame uho Eba labihasu vàlu gagodam labe um gi uba it vàlu gagodam damat modem bak. Neham bak. Um Farisi dam totbaho laha mei ahu oli veimaha setan gagu futodume ilidam meo damat modem bak. Làhà uho Eba neha, ‘Beelzebulat Eba tau meedaha,’ lahame Eba vàlu gagomeam làhà um gi um Farisi dam zohoti vàlu gagoda taia? Labihàmu um dam zoho labe fa uba faki nehi gagom bak. ‘Uho Yesus bake git vàluho. Beelzebul iba tau setan gagu futodume ilidam vabna akati uho neha, “Beelzebul Yesus bake tau ame setan gagu futodume ilidala,” lahame labi gagodàla?’ lahame um Farisi dam zoho labe fa uba labi vàlu gagom bak.
28. Lahana Beelzebul ba Emti ahili meedam vabak. Gi Alat Am Aha Nutabe Neàna labe Eba modi vizi teudi Eho mei ahu oli veimaha setan mei setan mei laba gagu futodume ilidam bak. Ne, um gi neham bak ozome tu vuzehem vaba? Em abo Alat Gagu Fihasi Vimteme Oluhu Dat Boehàda Em am bak. Alat Eba gagu nom oluhemu Alat Ahamo Boehàdateboli dam bake deeli vame Am damali vuusu im vahokedam bak lam ab faasi meedamam bak. Laham bak um ozom vaba?
29. Mei ahu oli veimaha setan Eho gagu futodume ilidam meo bak lam Eho uba vouhodase. Neha: Dat teuda nibe am soa maehe nazoh vou faovoi num doo ozoho laba duzu ausdameam làhà ba meit am numa oli am nazoh vam vabak. Am nazoh gi ahe lahasum bak. Lahana dat bisi feàda labe fa da lada laba li nohisi beome si anekehà gia. Nao gia. Labihadume neàdi am num laba oli am nazoh gelevai voutam bak.
30. Meit Eba taum vabda lam Eba fakemda am bak. Labi laha Eho dam bake vahokedam labet modi meit Eba tu vuzehem bak lam meit Eba ame bak lam vi tau meedam vabda lam gi Ebe Eho lab meedam bak lam modi vàhàdeme dam fi goaitoi seddamda am bak.”
31. Labi Yesusat neo ame Farisi dam labe ibi iho amu gagoho bak lam, “Beelzebul Aba tau setan gagu futodume ilidam bak,” lahame gagoho bak lam vi ozome fa ame Farisi dam laba neo nehame vi vameada. “Eho teudi Beelzebul vafozi ame setan zi laba gagu futodume ilidam bakta imbot. Lahana uho im imboda nidi nim laha nasi aima. Meit faina meedam bak im meiti im meiti modeo, labi meit feàtàdam bak im meiti im meiti modeo, abo Asum Ahoba Iubet Bak Niba Li Dateleheda nim meit Eba feàtàdam bak modeo, meit labihasu faina meedam labe ahamo fa it ozobohudi Ala bake ahatet tom gagu neàdi voomeam làhà Alat gi ame da laba ozahigeàmu fa vei neàdedam meo bak. Lahana Alam Aha Nutabe Neàna Labe Eba lab tau modi vizi teudi Eho setan lab gagu futodume ilidam bak laba uho vedi neha, ‘Beelzebulat Eba tauha,’ lahame vàlu gagoho bak lam git gagom bak am bak. Um gi Alam Aha Nutabe Neàna laba feàtàdaha bak. Meit Alam Aha Nutabe Neàna laba feàtàmeam làhà ba Alat ozahigeàmu fa vei neàdedam vabak. Abo uho etei ahedi bak niba esdam di modeo, abo gi ba diamut bak gàhàdi modeo, ba Alat ozahigeàmu fa vei neàdedam vabak. Gi ab faidi vàhàdemam bak.
33. Uho im nidi nim laha vi ozomale. Iho utso, ‘Neào? Faio?’ lahame ozom di gi ame ut labe am oo modeo, am bu modeo, laba aame am so ozobohudem bak. Ut oo neàna valem bak aameam làhà am so laha neà bak. Lahana ut oo faina valem bak aameam làhà am so laha fai bak.
34. Um Farisi dam bisi meoli fai bak tadi meedam dam labe fa ozbat meoli meedam bakti ulohona meedam damat modem bak. Labiham labe ba akati aha ubuda labe im neàna futoe? Neham bak. Mei ahu laba vahedam im zi modi fa tombalemna im aha am bak.
35. Labiha labe da neàda am ahu gi im neà bakta vahedam labe aho im meedam di modeo, am aha labe im vameadam di modeo, gi im neà bakta meedam bak. Lahana dat bisi faina meedamda labe am ahu gi im fai bakta vahedam labe aho im meedam di modeo, am aha labe im vameadam di modeo, gi im fai bakta meedam bak.
36. Labihàmu um mahate um ahu it vou faovoi ozodale. Neham bak. Alat ba diamut Dam Bake Uloodume Vi Aime Ozobohudi Neàdi Fime Fahedam Digat fum di abo gi im aha labe ostame gagodam im keobe lam ahebu Alat iba fa gagu aidam bak.
37. Neham bak. Ame digat fum di lam Aho gi im dam ahat vameadam im laba ozome ame bak lam nehasu meedam bak. ‘Lada lam aha neàt. Làhà dat lada lam im vamdesu meedam dàt moz.’ Labi, ‘Lada lam aha fait. Làhà dat lada lam faina meedam dàt moz,’ lahame labi vi ozome ozobohudi gagodam bak,” lahame Yesusat ab vameadaham.
38. Labi ba neo digat meida labe Farisi dam lamti labi dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu Yesus bake li ab gagoham. “Guru oa, ‘Alat Gagu Fihasi Vimteme Oluhu Dat Boehàda Om ameo?’ laham bak lam im biem bake nasi na damat ihimo modem biem im feàna Oho fet modemale. Labi im aame ozobohudese,” lahame ab gagodamam.
39. Lahahat Yesusat fa gago, “Um etei dam bada nim gi bisi faina meedam bak tadem damat modem bak. Abo, ‘Em ba Alat gagu olum kaio,’ lahame Eba tu vuzehem mom damat modem bak. Um gi labihadam damat modem labe vedi Eba neha, ‘ “Om Alat Gagu Fihasi Vimteme Oluhu Dat Boehàda ameo?” laham bak lam im biem bake na damat ihimo modem biem im feàna Oho nasi fet modehemu im aame ozobohudese,’ lahame Eba gagodam damat modem bak. Lahana Em ba uledi ame bak lam uba etei di nibe fet modem moho bak. Ba nehi fet vouhodam bakti gagom kaio. Aham di iube Alat na damat ihimo modem biem im feàna abo Yunus bake modehe im lamti ulohona modemna uho ba aa tame.
40. Aham di iube Alat vameadaha im aime fa dam bake ahate vameaidahada Yunus lam Alat ahit modi bohe feàda labet Yunus visoi tolazi sete. Labi am gi bohe asum ad laba aidume usi làteladi modeha bohe labe ahamo zitu Yunus am asum laba bisdam bak fa it vooho bak. Ame bak lam Alat ba Eba modelo modem im nimti uloho bak. Em Abo Asum Ahoba Iubet Bak Niba Li Dateleheda nibe Em elohozobe damat Em koeiso ke bumat laba ub esu usi làteladi fat ahede tame.
41. Aham di iube Yunus Yahudi da labe aho Niniwe dam giida laba le Alat aba vameadaha im nehasu vou vameateda. ‘Alat uba beolo modem bake uho faina meedam bak lam nasi voedume fa ahu neà bak vàmadi meedale,’ lahame labi vou vameatedume fi dedaha di labe ame dam labe ame im lam aime uledi ame bak lam ab meedaham bak. Nehaha bak. Yunus aho amu vou vameatedaha bak lam feàta feàte. Lahana Yunus aho amu lab vou vameatedaha im lamti labi im Eho etei vou li vou vameatedahada nimti ozom di im bisi vafozi feàda im Ebeda nim am bak. Labihàmu Alat ba diamut damat iho bak niba meedaha im ahebu Aho Dam Bake Uloodume Vi Aime Ozobohudi Neàdi Fime Fahedam Digat fum di ame Niniwe dam ahamda amu elodaha dam labe iho fa ahedi usnadume Alat avaesdam laba le duzu uba dam badate vàlu nehi vameadam bak. ‘Um abo git modeho. Yunus iba li Alat vameadaha im vou vameatedaha di lam im gi kehàm vaba iho faina meedam bak lam voedume fa ahu neà bak vàmadi Ala bake tu vuzehedaha bak. Lahana um dam bada akati Yunus vafozi bisi feàda abo Alam Adat Yesusat uba li vou vameatedahana akati um aime tu vuzehem vaba modela?’ lahame uba ba diamut labi vàlu vameada tame.
42. Labi laha aham di iube Syeba bak laba azihi dam vuusdam boehà nam giida abo Yahudi modem vab nam labe aho ozo, ‘Yahudi dam vuusdam Boehàdatebo Salomo lam am abo bisi im ahebu ozobohudi meedam dàt modem bak. Salomot vameadam im aise,’ lahame aba aho azihi bak vou esmozi abo bak bohulana Salomot azihi bake ab laham. Labi doni bake vou id ladume Salomot azihi num feàda laba le lafusi Salomom im ab aidaham bak. Nehaha bak. Salomo bisi im ozobohudem bakta im ozobohudeheda am. Lahana etei nim bisi Salomo vafozeheda Em am bak. Labihàmu Alat ba diamut damat iho bak niba meedaha im ahebu Aho Dam Bake Uloodume Vi Aime Ozobohudi Neàdi Fime Fahedam Digat fum di ame Syeba bak laba azihi dam vuusdam boehà nam amu eloho nam labe fat ahedi usai Alat avaesdam laba le duzu uba dam badate vàlu nehi vameadam bak. ‘Um abo git modeho. Em abo Salomo bake le aho vameadaha im eho aihi bak. Lahana Salomo vafozi bisi feàda Yesusat uba li Am im vou vahoketedaha di lam akati um aime tu vuzehem vaba modela?’ lahame uba labi vàlu vameada tame,” lahame Yesusat ab vameadaham.
43. Labi im lada lam vameadume neàdi Yesusat im nehasu vi vameada. “Mei ahu oli veimaha setan labe futoi ame da lam vou esmozi itadam labe le meia oli odom bak ozome bak aotba baa bohu dam vaba alim bak le nabiteda. Labi nabitedume modeha meia oli odom bak aam biehemu ahamo aba it gago, ‘Làhà em gi ebe eho amu odoho bak laba fa li ame da labe am ahu laba olelo modem bak,’ lahame fa ab leham. Fa li ame da laba aaha am ahu ba Alam Aha Nutabe Neàna labet modi veimam vaba abo gi num naube feaktoi nazoh fa aba bake iademe vahehe labe boz neàdi gi num alim modesdam bakti ulohona ab li aaham.
45. Làhàmu fa neo le mei ahu oli veimam setan tujuh amomoi abo am fai bak vafozi bisi faida gagome fa vazisi vou ledume aba aho amu oli odoho bak laba ab vi oedume veimadaham. Labiha labe ame setan tujuh amomoi ame da labe am ahu laba ba vi oedaha labe aba amu fota neà bak vei seti fa abo bisi fai bak ab fuham. Um etei bisi faina meedam dam bada nim ubu uho faina meedam bak lam voedume fa ahu neà bak vàmadi meedam vabameam um laha gi ame baket modem bak,” lahame ab vahokedamam.
46. Labi Yesusat dam dua bake im vahokedam lahasuhu di labe Am oiti Am vahadam ziti labihasu, “Im vameadase,” lahame Yesus bake li netàdesome modeha dam Yesusat lab vameadam im lam ailo meedam labe dam bà tadi olem bili bak kekehemu num bako tot laba li dozeadume modesda.
47. Làhàmu dat meida labe bak lam aahemu le Yesus bake netàdi ab gagoham. “Om oiti Om vahadamti Oba im vameadalo bako iuba li dozeadume vou faodalo.”
48. Lahame labi gagoha Yesusat fa ab vi gagoham. “Ne, uho ozom, Em oiti Em vahadamti ame dam akete?” lahame gagu Am anekehà vousai Aba Aho vahokedam im ozobohudelo vi tau meedam dam zi laba vimtedam labe ab gagoham. “Ne, Em oiti Em vahadamti gi neam taia?
50. Meit Em Ai Alat Aba Aho ozoho bak vi ozome meedam dam lam Em vahada Em nà Em oi laham dam am bak,” lahame ab vameadaham.
1. Labi Yesus ame num lam vou esmozi itea valau obe laba lazi ab le nusuham.
2. Laba lazi nusu modeha dam zi feà neo Aba valadam labe gi soat osiddume Aba ab li vabousuham. Labihàmu dam bisi duali Aba soat nutmamna zohàme Aho fa ihe vihitoi koena vou bu duzu afoezobe ab zisi nusuham. Labi Aba valadam dam zi lam fa valau obe laba dozeada.
3. Labihazobe Yesusat im totobe tamehona ab faasi fi koadamam. “Nasi aimale. Dat utoho modemda nibe am na dem bak laba na oo neb ab le guladamam.
4. Labi na dem bak laba le guladam di labe ame na oo neb totbaho gi damat lailaidam zie tomba laba ab biddaham. Labi modeha bume faobuda labe li visoi àme ab seteham. Lada lam labiha.
5. Labi ame na oo neb totbaho lam ke baa bak laba ab biddaham. Labi modeha ke baa bak laba biddahada lam bak dua vab labe gi kehàm vaba ab loubedi usidaham.
6. Lahana ala faasi gaimeolehe di labe et loubedehena laba belu ab aladaham. Ke baa usihi labe am omnao bak vaksa bake nom lailaiam vab labe ab belu aladaham. Lada lam labiha.
7. Labi ame na oo neb totbaho lam aliho debu bak laba ab biddaham. Labi modeha na oo lamti alihosoti amediat usida. Amediat usihi labe na àm vabda labe nasi kilale. Labi kilalehe labe na àmda lam gi alihosot vi giame ab aladaham. Lada lam labiha.
8. Lahana ame na oo neb totbaho lam fa bak neà bake bidda. Bak neà bake biddaha labe abo neàna usidume kilali abo oo duana ab vaedaham. Labi oo vaedaha di labe na oo neb totbaho oo seratus vaeda. Labi na oo neb totbaho enam puluh vaeda. Labi na oo neb totbaho tiga puluh vaeda. Labihada. Ame na oo neb gi koena gulahanat oo tamehona ab vaedaham. Labihada.”
9. Lahame im totobe lada lam labihasu fi koadume neàdi Yesusat neo ab vi gagoham. “Um dogoi im aim bak ehena Eho etei lab vameadaha im lam mahate aime vi ozome ozobohudele,” lahame ab vi gagu esuham.
10. Lahame labi vi gagu neàdi Aba vi tau meedam dam labe dam dua bak vaitesu Yesus bake le netàdi duzu vi ailo ab gagoham. “Ai oa, Oho dam dua bake im vameadam di akati modi ame im tombu Oho vameadam vaba vedi bisi im totobet fi koadàla?”
11. Lahame vi ailo gagoha Yesusat fa neo ab vi vameadamam. “Alat Ahamo Boehàdateboli dam bake deeli vame Am damali vuusu im vahokedam bak lam etei modi fa gàhàlehe bak lam, ‘Akatihasu modemna modela?’ lahame dam amudate vastehe im lam Em Aiat Eba neha, ‘Eho ame im lam fa uba vameadume umota modi ozobohudi fi gatedase,’ lahame Eba labi gagohemu Eho im dedateli etei fa uba vameadume fi desi um ab ozobohudedamam bak. Lahana Eho dam giida abo Alam damalehe vab dam laba im vameadam di Eho gi ahit im totobet fi koadam bak.
12. Neham bak. Alat Ahamo Boehàdateboli dam bake deeli vame Am damali vuusu im vahokedam bak lam etei modi fa gàhàlem bak lam, ‘Akatihasu modemna modela?’ lahame Eho vahokedam im nim meit iademe ozome vi ozobohudi meedamda lam Alat fa ame da laba tau modi aho duana vi ozobohudedam bak. Lahana Eho etei ame im lam vahokedam bak lam meit ame im lam iademe ozome vi ozobohudi meedam vabda lam abo aho amu koena ozobohudehe bak lam Alat fa faatoi vei seti ba ame da labe vi ozome ozobohudedam vabak.
13. Neham labe Eho dam dua bake im vameadam di gi im totobet fi koadam bak. Ame dam labe iho aam bakta aa. Aim bakta ai. Lahana, ‘Iho etei aaha im nim akati modemna modela?’ Labi, ‘Iho etei aihi im nim akati modemna modela?’ laham bak lam ba fetehesu vi ozome ozobohudi meedam vab damat modem bak. Labihadam damat modem labe Eho ahit im totobet fi koadam bak.
14. Ame dam duada labe labihadàmu dat ahamda Alat vameadaha im aime fa dam bake ahate vameaidahada Yesaya labe aho aham di iube nehame fet toeme esuhu im nim ab modi imbodeham bak. ‘Alat Aho Israel dam bake neha, “Uho Ebe Eho meedam bak lam aam bakta aa. Lahana, ‘Uho etei aaha im nim akati modemna modela?’ laham bak lam ba vi ozome ozobohudedam vabak. Labi laha Em im uho aim bakta ai. Lahana, ‘Uho etei aihi im nim akati modemna modela?’ laham bak lam ba fetehesu vi ozome ozobohudedam vabak.
15. Um nehaha labe labihaha bak. Um ahu tamzohobuli im Ebeda ba ozobohudem biem damat modem bak. Labi um dogoi faidi ba im Ebeda aim biem bak. Labi laha um fako faidi ba Ebe Eho meedam bak lam ba aam biem bak. Labihadam labe ahusobulehe damat modem bak. Labiham vabameam làhà um fakot gi fa Ebe Eho meedam bak vi aada. Labi um dogoit ulaihàbulehe vaba gi im Ebeda vi aida. Labi um ahulat im Ebeda vi ozobohudeda. Labiham labe ubu uho faina meedam bak lam voedume fa ahu neà bak vàmadi Eba tu vuzehedàmu Eho beolo meedam bak lam fa mu soat vausu fa vei neàdedam bak.” Lahame Alat Aho Israel dam bake ab gagoham.’ Lahame Yesayat aham di iube fet toedume esuhu im lam dam duada nibe modi fa ab imbodeham bak,” lahame Yesusat ab vameadaham.
16. Labi im lada lam vameadume neàdi Yesus neo Aba vi tau meedam dam laba neo vi gago, “Lahana umota neàte. Um gi deelehe bohu vuusdam damat modem bak. Neham labe labiham bak. Fako ubuda im Ebe Eho meedam im nim um abo aada. Labi dogoi ubuda Ebe Eho vahokedam im nim um abo aida. Labihasu fetehesu vi ozome ozobohudi meedam labe um gi deelehe bohu vuusdam damat modem bak.
17. Lahana im imbona nidi nim nasi ozomale. Eho bak niba li im meedaha vab diat dam ahamda Alat vameadaha im aime fa dam bake ahate vameaidaha dam zi lamti dam ahamda totbaho labe iho Alat gagoho im aime vuzehi vamdesu meedam dam totbaho lamti labihasu ubu uho etei aadam bak nim ame dam zi labe iho aalo àhàki vou faodaha vabamu gi aham di iube eloi sedda. Labi ubu uho etei aidam im nim ame dam zi labe laha ailo àhàki vou faodaha vabamu gi aham di iube eloi sedda. Ame dam labe lab vou faodaha di lam Alat ame im lam taho modi fi gatehe vab labe gi aham di iube elodume seddaha bak,” lahame Yesusat ab vameadaham.
18. Labi Yesus Aba vi tau meedam dam laba aho neo vi vameada. “Um nasi aimale. Eho ame dat na oo neb gulaha bak laba vàlu totobet fi koadaha im labe am tombu uba fa ahate vameadalo mozo.
19. Neha: na oo neb zie tomba biti bumet visoi àhàda lamti dam Alam im nehi aime meedam dam nimti uloho bak. Alat Ahamo Boehàdateboli dam bake deeli vame Am damali vuusu im vahokedam bak lam etei modi fa gàhàlehe bak lam, ‘Akatihasu modemna modela?’ lahame meit vahokedaha Alam im lam ame dam labe iho aimta ai. Lahana ame im labe am tombu ba fetehesu vi ozome ozobohudi fi gatem vabak. Ame Bisi Faidatebo Iblis labe li ame dam labe ibi iho etei aihi im lam modi fa veioi setehe bak. Labiham bak.
20. Labi na oo neb ke baa bake biteheda lamti dam Alam im nehi aime meedam dam nimti uloho bak. Dam nibe iho Alam im lam aime deeli gi àvodehat tu vuzehe. Lahana abo mahate tu vuzehe vaba gi fota tu vuzehe.
21. Labi iho lab aihi im lam im ahu ad laba modesu teudi omnaoli abehamdehe vab labe naat iba vabidume geàdamna zi lam modeo, iho ame Alam im laba tu vuzehi meedàmu damat iba faki vabidamna modeo, labihasu iba meedam di labe iho Ala bake gi fota tuhu labe kehàm vaba ab mu voou seteham. Lada lam labiha.
22. Labi na oo neb aliho debu bak laba biteheda lamti dam Alam im nehi aime meedam dam nimti uloho bak. Dam nibe iho Alam im deelehat aime ve àdesda. Lahana ba bak niba esdam di gi, ‘Iba modi neàdemna modem vabna ozomo?’ lahame bisi àvodi azi ozoda. Labi laha im nazoh dualelo àhàki neo azi vi ozome meeda. Labihadam damat modem labe ibi iho amu Alam im aime vaha bak lam gi fa iho ozome meedam im lamti valiheme ab vàhàdeme seteham bak. Abo na oo neb usime bu vali amdehe vaba gi alihosot ot giaiame alai setem bak lamti uloho bak. Labiha labe Alam im lam ba ab vi ozome modem bieham bak. Lada lam labiha.
23. Labi na oo neb bak neà bake biti usihida lamti dam Alam im nehi aime meedam damti uloho bak. Dam nibe iho Alam im aim di abo gi ahu teudi ule neàt abo va. Abo vaha labe iho iademe ozome ozobohudi meeda. Labi damat ame Alam im lam lab aime ozobohudi meedam di labe gi veimdi veimdida. Neha: dam totbaho abo bisi duana ozobohudi meeda. Abo na oo neb bak neà bake biddahada labe usidume oo vaedaha di labe oo neb totbaho abo duana seratus vaedaha bak lamti uloho bak. Labi dam totbaho gi fota duana ozobohudi meeda. Abo na oo neb bak neà bake biddahada labe usidume oo vaedaha di labe oo neb totbaho fota duana enam puluh vaedaha bak lamti uloho bak. Labi dam totbaho gi koena ozobohudi meeda. Abo na oo neb bak neà bake biddahada labe usidume oo vaedaha di labe oo neb totbaho gi koena tiga puluh vaedaha bak lamti uloho bak,” lahame Yesusat Aba vi tau meedam dam laba ame im tombu lam ab vameadaham.
24. Labi Yesus ame iheba nusu dam bake vahokedam lahasuhu di labe aho ame valau obe laba dozeadaha dam zi laba im totobe nidi nim neo nehame vi fi koada. “Alat Ahamo Boehàdateboli Am damalehe dam laba vuusu im vahokedam di Aho ba diamut Dam Bake Uloodume Vi Aime Ozobohudi Neàdi Fime Fahedam Digat feàda labe meedam im lamti fa dat nidi nibe aho utoho abadate dat gagu olu gandum oo neàna guladaha bak lamti ulohote.
25. Neha: Ame da nibe aho utoho abada dam gagome le gandum oo neàna gulame esu fa aibuli num bake li ab beilame ab iddamam. Labi beilame iddam di labe dat utoho deda laba fakemoholeda labe aibut aa li iloho oo vou le dat naeda labe gandum oo gulaha bak laba aa vi tau gulame esmozi ab itaham.
26. Labi ba gandum loubedi usidume kilali oo vaedume modeha gi iloho lamti ab usdume kilaleham.
27. Labihàmu ame na meedam dam labe iho ame gandum dee laba le aaha bak lam fa iba na gagu meedamda laba fa ab li gagoham. ‘Aia, om gi gandum oo neàna iba lu iho gulahana taia? Ne, akati iho le aaha ilohoti usidume kilalehela?’
28. Lahahat dat naeda labe gago, ‘Vabà! Gi eba fakemoholeheda labe aa li vi tau gulaha bak.’ Lahahat am na meedam dam labe fa gago, ‘Làhà oho iba gagome fa le ame iloho vaome voedào?’
29. Lahahat dat gandum deda labet fa gago, ‘Vabà! Om iloho lam vaom di gi gandumti vaom bak.
30. Gi labihasu ame iloho lamti gandum lamti amait behàsu kilali fa amdi modeme vahem di eho ame gandum modeme vahedam dam laba eho nehi gagom bak. “Uho amu nasi iloho fi kbodume afoezobe vaheme dombuli vua vahudale. Labi ame gandum neo modeme am oota vame na gihoemda vahedam num laba vahedale,” ’ lahame eho labi gago tame,” lahame Yesusat im totobe lada lam ab fi koadaham.
31. Labi Alat Yesus bake gagu vimteme Aho Boehàdateboli dam bake deeli vame Am damali vuusu im vahokedam bak lam abo meit Aba tu vuzehi Am damalem bake vi taui vi tauidume dualem bak lam, “Akatihasu modem labe dam dualedàla?” laham bak lam damat ozobohudem bake Yesusat ame dam duada zi laba im totobe meida neo nehame ab vi fi koadamam. “Meit Ebe Eho vahokedam im tu vuzehi meedàmu Eho deeli vame Em damali vuusu im vahokedam bak lam gi dat nibe aho ut oo keobena rica oo vàmtea buà lam vou le am utoho laba dedesu esum bakti uloho bak.
32. Ame ut oo keobena vàmtea buà lam iho ozom di keobeta keobet. Lahana meit am utoho laba dedesu esu faobe le aam di na àmna totbaho gi bak adba laba buaedam meot. Lahana ame ut oo keobe lam kilali utsoti uloholi bume faobuda zi labe ut aaso laba li nusualadume ila moadam meo bak.”
33. Lahame ame im totobe lada lam fi koadume neàdi Yesusat gi meit Alat aba vuusu im vahokedam bak laba uledi meedamda laba meit vi aame fa vizedume dualedam bak lam vi ozome ame dam zi laba neo im totobe nidi nim vi vameada. Aho neha, “Alat Ahamo Boehàdateboli dam bake deeli vame Am damali vuusu im vahokedam bak lam gi nam nibe im nehasu meedam bakti ulohona modem bak. Nam nibe na ti fauti ulohona tepung ve afoezobe neo na ulasi fi kidemna keobena ragi lam laha laba vi tau esu valihedume seti vou faodameilahit deilemahi fi kidem bak lamti uloho bak. Dam Alat fa vahi vuusu im vahokedam dam amu debu koe bak lam fa dualem bak lamti ame na fi kidemna labe na ti fauti ulohoda laba modi vizi deilemahi fi kidi feà bak fum bak lamti uloho bak,” lahame ab vahokedaham.
34. Yesusat dam dua bak laba im vahokedam di lam aho ba im totobet fi koadaha vaba alia vahokedam vabak. Abo gi im totobet fi koadume vahokedam bak tadehe bak.
35. Yesus Aho ame dam dua bak laba labihasu vahokedam labet modi dat ahamda Alat vameadaha im aime fa dam bake ahate vameaidahada meida labe Alat aba vameadahana lam aho nehi fet toeme esuhu im nim Yesusat ab modi imbodeham bak. “Eho ame dam laba im vameadam di gi im totobet fi koada tame. Abo aham di iube Eho na ahebu modehe vab di iube Ehemo vastehena etei di nibe vou fuhuna Eho ame dam laba gi im totobet fi koada tame.” Lahame fet toeme esuhu im lam Yesusat Aba Aho etei lab meedaha bak labet modi ab imbodeham bak.
36. Labi ame im zi lam Yesusat fi koadume neàdi aho amu zihi ihe lam fa vou zitu usi ame dam duada zi lam vou esmozi aho amu futoi laha num laba fa li ab oleham. Labi Aba vi tau meedam dam lam laha vi tau vahi oeda. Oedume neàdi Yesus bake ab gagoham. “Ai oa, Oho amu gandumti ilohoti bak vàmtea laba usihi bak lam dam duada zi laba fi koadaha im lam iba ame im tombu ahate vameadale.”
37. Lahahat Yesusat fa ab vameadamam. “Lo, làhà nasi aimale. Ame gandum oo neàna gulahada lam Abo Asum Ahoba Iubet Bak Niba Li Dateleheda Em ame Da am bak.
38. Labi ame utoho lam gi dam bakda ahebu azihi bak am. Labi ame gandum oo neàna lam dam gi etei Eba tu vuzehi vahi im Ebeda meedume Alam damali Aho faasi vuusu im vahokedalo modem dam am bak. Lahana ame iloho lam gi Iblisim damali aho vuusu im abada gagome meedam dam am bak.
39. Labi dat utoho deda laba fakemoholeheda labe aibut aa li iloho oo neb vou le dat naeda labe amu gandum oo neb gulaha bak laba aa vi tau gulame esmozi itahada lam Iblis am. Labi ame gandum fa amdi modeme vahem di lam gi Alat ba diamut Dam Bake Uloodume Vi Aime Ozobohudi Neàdi Fime Fahedam Digat fusi meedam di am bak. Labi ame gandumti ilohoti fi kbodam dam lam gi Alat Am im gagu vou usem dam am bak.
40. Neham bak. Alat ba diamut Dam Bake Uloodume Vi Aime Ozobohudi Neàdi Fime Fahedam Digat fusi meedam di gi ame utoho deda labe aho iloho ateme vaheme vua vahudam bak lamti ulohona mode tame.
41. Neham bak. Em Abo Asum Ahoba Iubet Bak Niba Li Dateleheda niba Alat ba diamut Eba gagu Eho im dedateli fa ot vai Am damalehe dam laba vuusu im vahokedam di lam Eho Em im gagu vou usem dam bake gagome dam Eho vuusdam dam niba li ootedume modi fa faina meedam dam lamti labi dam bisi faina meedam meo dam debu lamti labihasu fi me vame vahe vahedalo modem bak.
42. Labi vahe vahedume neàdi ame dam zi lam fa vua elum sutem gikina laba voeda tame. Labi ame bak laba voedàmu ame dam labe kikezi geàdam labe ahu faidi meb dae feàna faasi meeda tame.
43. Lahana Alat Ahamo ozo, ‘Dam nim Ebe Eho gagoho im vuzehi vamdesu meedam dam am tame,’ lahame Aho vadaha dam lam ba diamut Aho vuusu im vahokedam bak gàhà bak laba Aho ame dam laba ala digadda labe fauhaedam bakti ulohona modi feà damali im ee vousai vou baeda tame. Labiham bake um dogoi im aim bak ehena mahate aime vi ozobohudele,” lahame ab vameadaham.
44. Labi Yesus ame dam duada zi laba neo im totobe meida nim neo nehame vi vameada. “Meit neha, ‘Alat eba deeli vame Am damali eba vuusu im vahokedam bak lam bisi eho modem im am bak. Ba akati eho im amomoi ozoe?’ lahame Alam damaleheda labe labihasu gagodamda lamti fa Eho etei neo vouholo modemda nimti uloho bak. Neha: Da meida nibe aho mei utoho laba le na meedameam aaha na soa maehena meit vastehena aho vi aame am ahu gelevai fa vasti esu fa am num bake li ab la ozoi le ozoidamam. ‘Eho akati modi na feàna nim taho và? Làhà em nazoh nim ahebu ozahit gelevai meia ot loidume fa doi vadume dualehezobe bak dedate le lu bak lam eho fa vase,’ lahame labi vi ozome deelehat vàhàdi ame baket ab meedaham. Na soa maehena vahemu am nazoh gelevai setehe bak laba ba vi ozoho vabak. Gi na feàna lam ab ve neàdeham bak.”
45. Lahame ame im totobe lada lam fi koadume neàdi Yesusat gi ame bak lam vi ozome neàdi ame dam zi laba im totobe nidi nim neo vi vameada. Aho neha, “Meit neha, ‘Alat eba deeli vame Am damali eba vuusu im vahokedam bak lam bisi eho modem im am bak. Ba akati eho im amomoi ozoe?’ lahame Alam damaleheda labe labihasu gagodamda lamti fa Eho etei neo vouholo modemda nimti uloho bak. Neha: Ke alihi voena abo na doi duana vamna ee gagom mutiara laham ke vadam bos labe aba aho modem bakti ulohote. Ame bos lam la nabizi le nabizi lahadam di lam abo mutiara doi feàna vamda laba nabida. Labi le nabidume modeha ame na ab aaham. Labi aame ahu gelevai fa am num bake ab leham. Num bake fa li ab la ozoi le ozoidamam. ‘Eho akati modi ame na lam taho và? Làhà em nazoh nim ahebu ozahit gelevai meia ot loidume fa doi vadume dualehezobe ame mutiara dedate le lu ame na lam eho fa vase,’ lahame labi vi ozome neàdi ame baket ab le meedaham. Mutiara doi feàna vamda vahemu am nazoh gelevai setehe bak laba ba vi ozom vabak. Gi na feàna lam ab ve neàdeham bak,” lahame im totobe lam ab fi koadaham.
47. Labi im totobe lada lam fi koadume neàdi Yesusat im totobe meida neo nehame vi vameada. “Ba diamut Alat Ahamo Boehàdateboli Am damalehe dam laba Aho vuusu im vahokedam di lam gi nehasu modem bakti ulohona meeda tame. Neha: Damat bohe dek itea vou bu ziamoi valo esu neàdi fa ab vou kea ledamam. Vou kea ledameam bohe ab vadamam. Labi bohe dek asimbuli fa nohula vou zitu aaha bohe mei bohe meime vaha bak ab aaham. Labihàmu ame dam labe ibi ihimo modi baleàhà bak lam ab faasi meedamam. Iho nusualadume bohe neàda vihilame boloseh vaheda. Labi bohe àm vabda fa veimome voeda. Labihada.
49. Alat ba diamut Dam Bake Uloodume Vi Aime Ozobohudi Neàdi Fime Fahedam Digat fum di Aho gi ame baket neo mode tame. Aho Am im vou usem dam gagome bak niba olu dam ab fahedamam bak. ‘Dam nim Ebe Eho gagoho im vuzehi vamdesu meedam dam am tame,’ lahame Aho ule neàt vadaha dam lam Aho fi me vahe. Labi dam bisi faina meedam dam lada lam fi hasi vua eludamna sutem gikina bohu laba le ab voedamam. Labi ame bak laba voedàmu ame dam labe kikezi geàdam labe ahu faidi meb dae feàna faasi meeda tame,” lahame im totobe lam ab fi koadaham.
51. Lahame im lada lam labi vameadume neàdi Yesusat Aba vi tau meedam dam laba vi ailo ab gagoham. “Eho etei lab vameadaha im totobe zi lam um ozome ozobohudeheo?” Lahame gagoha Aba vi tau meedam dam labe fa gago, “Lo, im vi ozome ozobohudehe bak.”
52. Làhàmu Aho fa neo gago, “Làhà Eho etei lab vameadaha im lam uho ame im labe am tombu lam um ozobohudehe bak lam abo neàte. Uho Alat Vameadaha Im Toedahana zi lam meit uba vahokedume um ozobohudehe bak. Labi laha Eho etei Alat Ahamo Boehàdateboli dam bake deeli vame Am damali vuusu im vahokedam bak lam, ‘Akatihasu modemna modela?’ laham bak lam um biem bake Eho uba vahokehena um laha ozobohudehe bak. Eho labihasu vahokedaha labe um im meida vàmtea ba vekehe vaba abo ozobohudehe labe fa dam im vekehe bak ehe dam laba uhumo fa vahokedam neà bak. Abo Alat Vameadaha Im Toedahana zi lamti Ebe Eho etei ba vahokeheda nimti fa vahi ame dam laba vahokedam neà bak. Abo dat na duada labe am soa maehe nazoh vahedam num oula labe vihilame vou futom di nazoh amu vahada lamti ba vahada lamti vame vou futodaha bak lamti ulohona meeda tame,” lahame ab vahokedume esuham.
53. Labi Yesusat ame im totobe zi lam fi koadume neàdi bak lam vou esmozi fa neo Am budualehe num debu Nazaret laba fa ab laham. Labi fa le aidam di labe Aho Am Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli ame dam laba Alat vameadaha im lam vahokeida. Labi ame im lam vahokeidume modeha damat ame im lam aidàmu ab àvodeham. Àvodi dam ihimo ot gagoidam labe ab tozodamam. “Aa làhà! Uho ozom, Da nim amat Aba modi Am ozobohudi fi gatei im dedateli iba li vahokedà? Aba amat am im vizi teudi na damat ihimo modem biem im feàna lam Aho meedà?
55. Ne, Da nim gi dat ut vame nazohaedamda labe am adat mode taia? Ne, labi laha Am oi gi Mariat mode taia? Labi Am vahadam zi abo Yakobus ame. Yusuf ame. Simon ame. Yudas ame. Labihasu ame dam zoho gi neam taia?
56. Ne, labi laha Am nà zi gi neam taia? Ba amat Aba vizi Am fa feà dateli fa na damat ihimo modem biem im feàna labihasu meedàla?”
57. Lahame Yesusat lab li vahokedaha im lam damat aim mu ab tozodamam. Labi mu tozodàmu Yesus fa ame dam laba ab gagoham. “Dat Alat vameadaha im aime fa dam bake ahate vameaidahada labe aho bak mei bake lam dita ame dam labe ahu adat iedi aho lab vou le vahokedaha im lam ule neàt gut ve aba vou baedam labe am im aime meedam meo bak. Lahana aho am vou budualehe bak modeo, am namti datati modeo, aho fa le vahokedam di am dam labe gi ailahigeàmodam meo bak. Ba ahu adat iedi aho lab li vahokedaha im lam aime aba vou baedam vabak,” lahame ab gagoham.
58. Yesus Am budualehe bak abo Nazaret laba azim dam labe Aba tu vuzehi meedaha vaba mu voohemu Aho ba ame bak laba na damat ihimo modem biem im feàna mahate duana meedaha vabak. Gi fota meeda.
1. Ame di labe Yesusat lab meedaha im lam meit li vameadaha im ahum lam Galilea bak vuusdam Boehàda Herodes Antipas laha ab vi aiham.
2. Labi ame im lam aihemu aho am na gagome meedam dam laba ab gagoham. “Eho ozoha, iho etei lab aidam im lam gi dat eho amu dam gagome bio vaitoi oteheda Yohanes Mei Vuu Valo Baptisleiamda labe aho fat ahedi usai ame im faasi meeda moio? Am fat ahedi usaha labe feà dateli ame na damat ihimo modem biem im feàna lam la modi le modida moio?” lahame ab gagoham.
3. Yohanes Mei Vuu Valo Baptisleiamda labe damat am otehe bak lam gi neha: Amu di iube Boehàda Herodesat aho aba meida Filipus labe am nam Herodias ab vaham. Labihàmu Yohanesat im lam ozobohudi Herodes bake neha, “Obo meida Filipusam nam oho vaha bak lam om git modeho. Ne, Musat aham di iube Alat aba vameadaha im nehasu toeme fi hasi esuhu bak. ‘Obo meida labe am nam a vamule,’ lahame toeme fi hasi esuhuna lam om akati vi modehe vaba voou fa obo meida labe am nam fa vahela?” lahame Herodes bake dihasi im vahokeda. Labi neo dihasi im vahokeda. Labihada. Labihadume modeha Herodesat faki am meo dam gagome Yohanes si anekehà ahim giame sel ab ousuham.
5. Ame di lam Herodes abo Yohanes bake otelo àhàki meeda. Lahana dam dua bak vedi neha, “Yohanes abo Alat vameadaha im aime fa dam bake ahate vameaidahada meida am bak,” lahame im abada aime tu vuzehi meeda. Labihàmu Herodesat Yohanes otem bak vei iedi gi si sel ousda.
6. Labi ba digat meida iube Herodes am faaha digat neo fuhemu dam gagome vahi na ab àdamam. Labi na vazisi àdam di labe Herodiasam adnamat ame dam labe iho avaesdam laba le duzu ab etoedamam. Etoedume modeha Herodes labe aho aaha am ahu gelevai ab deeli vàhàdeham.
7. Labihahemu aho voadam nam soao laba ab gagoham. “Oho etei lab etoedaha bak lam em aaha abo deeleho. Oho ozom, eho oba ana loela? Oho valo modemna lam gagomeam eho oba ame na lom bak. Em ba giomim gagom kaio,” lahame gagu vàmadi ohu ab vaham.
8. Lahame labi gagu vàmadi esu modeha nam soao nibe am oi Herodias bake le ab gagoham. “Oia, ai eho etoehemu deeli na lolo gagohona oho ozom, eho ai oho ba vahadate ana gagu vaela?” Lahahat am oiat aba aho ozoho bak lam nam soao laba ab vameame oluham. Labi nam soao labe fa am ai voamdate le ab gagoham. “Oho abo taho etei nibe om meo dam gagu Yohanes Mei Vuu Valo Baptisleiamda labe am bio vaitoi am ohubuta fi lihibabu esu eba fa vou lele. Labi, ‘Am oteho,’ laham bak em aase.”
9. Lahame labi gagu modeha Herodes am ahu ab faideham. “Em akati dam zi nim vou faodahit gagu vàmadi ohu vahela? Em gi feidam vabate. Eho nam soao niba lab gagoho bak lam ba voom vabiem bak,” lahame it ozodaha vabamu, “Ame baket modese,” lahame am meo dam gagome ab oluham. Labi ame meo dam labe sel laba le oli Yohanes si am bio ab vaitoham.
11. Labi vaitoi neàdi am ohubuta fi lihibabu esu fa vou li ame nam soao laba ab loham. Labi aho ve am oi bake vou le ab fi ham.
12. Labi ba meit dam Yohanes bake vi tau meedam dam laba le gagu dam labe fa sel laba le Yohanes koeiso lam ve vou futoi vou le koei esum ke bumat laba ab vou oli esuham. Labi esu neàdi Yesus bake le ab gagoham. “Yohanes damat oteho,” lahame ab le gagoham.
13. Labi Yesus Yohanes damat otehe bak aihemu, “Dam dua bak vou esmozi Ahamo dam vaba alim bak laba le aidam bak modese,” lahame ozome neàdi bak lam vou esmozi lazi iheba zisi ab laham. Labi gi etei ihe vihitoi ladam di lam damat aiha, “Yesus ihet laho,” laham bak aihemu dam num debu iudu iube le. Dam num debu iudu iube le. Labihadume vazisi neàdehezobe doait naot vi vule Yesusat zitum bak laba ozome le odosi ab vou faodamam.
14. Labi Yesus Aho le zitu usi aaha dam dua bak Aba doait li odosi faodamna ab aaham. Labihàmu dam laba aam faimu faobekesi dam gaileheda, “Fa iba modi neàdele,” lahame meedam dam laba modi fa ab neàdedamam.
15. Labihadume ab disilo meedamam. Làhàmu Aba vi tau meedam dam labe Aba li ab gagoham. “Disihi bak. Im bak nim dam vaba alim baket modem bak. Laham bake Ai Oho dam duada zi niba gagome fa dam sii modealaha bak iuba oudume dam nibe iho àmna fà le doit vame àdase. Lam bisi neà bak am tame.”
16. Lahahat Yesusat fa ab gagoham. “Vabà! Dam lam ba a gagome oudamule. Gi na àmna ubuda dam zi laba lodume àdameta.”
17. Lahame labi gagoha Am dam labe fa ab vi gagoham. “Aa! Im gi rotibu auohole. Labi bohe gi behàsu. Labihasu vasdam bak.”
18. Labi gagoha Yesusat fa gago, “Ame na àmna lam ve Eba fa vou lemale?”
19. Lahame labi gagu ame na lam vou lehezobe ame dam zi laba gagome sibe baa laba ab nusualadaham. Labi nusualadume neàdi Yesusat ame rotibu auohole lamti bohe behàsu lamti vame vuusualame neàdi ohu vousai tom avaesu Am ai aabo bake, “Neàte,” lahame tom gagu neàdi ame rotibu lamti bohe lamti visoi ab fahedume fa Aba vi tau meedam dam laba lodume iho fa ot vai vame dam duada zi laba lodume uloholi ab àdaham.
20. Labi ame dam zi fai labe ame na zi lam àdume modeha dam ahebu dedehemu zoho ab vahedaham. Labi Aba vi tau meedam dam labe damat lab àme dedehemu vahehena zoho lam fa vi ateti atetidume boloseh vahedume modeha boloseh dua belas ab bektoham.
21. Dam etei laba nusualadume na àhà dam lam gi dam aabota dem di abo lima ribu fuhu bak. Ba lahiti datati tau dem kaio.
22. Labi gi etei na àme neàdi Yesusat Aba vi tau meedam dam laba ab gagoham. “Um nasi fa iheba ziddume biole. Em ba vule tame,” lahame gagu ab oluham. Labi dam lada lam gagu olu neàdi neo dam duada zi lam neo gagome im num bake neo ab oudaham.
23. Labi oudume neàdi Yesus Ahamo Am Ai Ala bake tom gagom bak ozome bak buzoho laba ab laiteham. Labi laisi Ala bake tom gagodume modeha gi ab aibuleham. Ame di lam Yesus gi Ahamo tousda.
24. Labi ame aibu labe Aba vi tau meedam dam labe gi ihimo ihe vihitoi ladume itea tombu fusi modeha nutabe fai iubet li vao baho iho lam bak laba gut foadam labe ihe ab oke okedamam.
25. Labi ihe oke okedume dihalo vabalehe di labe abo jam tiga fusi jam enam fuhu vab di labe Yesusat gi ame aibu zoho labet vulezi gi itea ahoba laba duzui duzuidume dam ihe bake ab vi vuladamam.
26. Labi vi vuladume dam ihe bake fuseo vabali modeha damat it aame iedi ab geham. “Na aibu nim Nomaida Basit iba nohiseo mode taia?” lahame ab iedi geham.
27. Lahame labi geha Yesusat fa ab gagoham. “Um a iedi ahu faidi bisi vi ozodamule. Eho mozo.”
28. Lahahat Petrusat fa ab gagoham. “Boehàda oa, Om abo Yesusat modemeam làhà eba nasi gagome em usi Oba doait itea ahoba nibe Oba lese.”
29. Lahaha Yesusat fa ab gagoham, “Lahana nasi usi lele.” Làhàmu Petrusat ihe labet usi itea ahoba nom duzu Yesus bake doait ab ladamam.
30. Gi etei usi neàt ladam di labe aho vedi vaktesi nabime aaha nutabe fai labe vao beome bubaholedam bak aahemu iedi modeha ab vou teddamam. Labi vou teddàmu Yesus bake ab geham. “Boehàda oa, eba li em vi sile.”
31. Lahame labi geha Yesusat kehàm vaba Petrus ab vi si vousaham. Labi vi si vousai itea ahoba laba vou duzu neàdi gago, “Petrus, om akati Eba mahate tu vuzehi meedam vaba vedi, ‘Eho om soat vausueo? Vausum vabao?’ lahame ahu behàsdi bisi iedi meedàla?”
32. Lahame labi gagu neàdi ame dam behàsu lam fa iheba zisi modeha nutabe fai lamti vao bubaholedam bak lamti ab bagavai seteham.
33. Labi modeha dam ihe laba nusualadaha dam labe im ahu adat iedi iho Yesus bake ab vou baedamam. “Imbote. Om abo Alam Adat vàmtea Om am tame,” lahame ab vou baedaham.
34. Labi neo biodume num debu Genesaret laba lafusi ab zituham.
35. Labi zitu usdume modeha dam bak dedamat aaha, “Dat etei iba leheda nim Yesusat mode?” laham bak lam aame ozobohudi dam num debu bak netàda lam ahebu ab vou fi det ladume uloholeham. “Yesus iba leho,” lahame vou fi det ladume modeha dam ahe dam labe im dam gaileheda zi lam Yesus bake ab vou fet lei fet leidamam.
36. Labi fet lei fet leidume modeha dam duali feà bak fusi meedàmu ame dam labe fa Yesus bake ab tauledamam. “Om sue ahoba dusuhuda sona bohu nao bobusbe zoho labe am aha obe lam iho vi ulase?” lahame vi tauleda. Labi dam gaileheda ahebu ame sue gi koena vi ulaha modi fa ab neàdedaham.
1. Labi ba neo digat meida labe Farisi dam totbaho lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi totbaho lamti vazisi kota Yerusalem labe li Yesus bake ab vi ailo gagoham.
2. “Guru oa, dam ahamda ibi iho fi hasi vou mode usehe im lam Yahudi dam bake vuusu im vameame faheme modiam dam busaoda bada zi nibe iho fa vame ibi iho ozoho baket vi tauidume dualehe im lam akati modi Oba vi tau meedam dam labe tau modem vaba mode? Akati modi na àlo modem di ibi iho anekehà valo ekeme itatame neàdi na àiam baket modem vaba vedi anekehà gi labihasu na àdam damat modela?”
3. Lahame labi gagoha Yesusat fa ab vi gagoham. “Ne lahana um akati Alat Aba Aho gagu fi hasi esuhu im nim uho mu zidazi fa gi dam ahamda labe ibi iho fi hasi vou mode usehe im lam vame fa ubu uho ozoho bak vi tauidume tombuli meedàla?
4. Nehaha bak. Alat aham di iube nehi gagu fi hasi esuhu bak. ‘Um ai bake modeo, um oi bake modeo, ahu adat iedi uba gagoho im laba vuzehi meedale.’ Labi im meida neha: ‘Meit am ai modeo, am oi modeo, faki, “Seee. Taho elole,” lahame feàtàme vi uloome gagomeam làhà meit ame da laba fa neo oteme vataum bak.’ Lahame aham di iube Alat gagu fi hasi esuhu im lam uho akati meedam vaba vazidazehela?
5. Uho vedi fa nehi ozome vahokedam damat modem bak. Uho meit am ai bake modeo, am oi bake modeo, nehi gagomeam, ‘Ai oa, oi oa, em na nim oba lom neàte. Lahana eho amu Ala bake lolo gagu vàmadi fi hasi esuhu labe oba lom vabi mozo,’ lahame ame da labe labi gagomeam làhà uho vedi ame da labe aho lab gagoho bak laba, ‘Ahole modeho,’ lahame vi gagodam damat modem bak.
6. Uho labi vi gagodam labe ame da labe am ai bake modeo, am oi bake modeo, ahu adat iedi vou baedam vaba, ‘Gi voom neàte,’ lahame vi vahokedam damat modem bak. Um gi um tai ahamda labe ibi iho fi hasi vou mode usehe im lam um dam bada nibe fa vame meedume tombuli, ‘Iho ame im meedase,’ lahame meedam damat modem bak. Uho gi labihasu meedam labet um gi Alat Aba Aho amu lab gagu fi hasi esuhu im lam ab modi voou seteham bak.
7. Um gi ahobat neàdi meedam damat modem bak. Dat ahamda Alat vameadaha im aime fa dam bake ahate vameaidahada Yesaya labe aba aho aham di iube fet toeme esuhu Alam im meida nim gi um dam badate vàlu gagoho imot modem bak.
8. ‘Alat neha, “Ame Israel dam nim Em ee vousai Eba vou baedam di gi im ahat ahamo vou baeda. Ba ame dam labe im ahulat vi tau Eba deelem vabak.
9. Ame dam nibe iho, ‘Em abo feàte,’ lahame Eba vou baedam di gi modeme vanamai voom damat modem bak. Labi laha ibi iho lab vahokedam im lam ba Ebe Eho gagu fi hasi esuhu im vahokedam vaba vedi fa gi dam bakdat ihimo ahulat ozome gagu fi hasi vou vahoke usehe im vahokedam damat modem bak,” lahame Alat gagoho bak.’ Lahame Yesayat aho aham di iube lab fet gagu vàmadi esuhu bak labe imbodi uho ab meedamam bak,” lahame Yesusat ab vameadaham.
10. Labi im lada lam vameadume neàdi Yesusat neo dam dua bak laba, “Aba lele,” lahame gagodume li netàdi Aho ab vi vameadamam. “Um ahu iademe vi ozodume ozobohudem bake Eho etei uba vameadalo modem im nidi nim mahate iademe aidale.
11. Um Yahudi dam busaoda labe ubu uho nehi vahokedam im nim Alat ba uledem vabak. Uho vedi iho im ahat na ve àm bak labet modi it vàhàdeme faidi fi hasi modesda tiba. Lahana Alat ozomta ba im ahat na àm bak labet modi im it vàhàdeme faidi fi hasi modesdam vabak. Gi im ahat futom im labet iba modi im vàhàdeme faidedam bak.”
12. Lahame Yesus gi etei labi gagoha Aba vi tau meedam dam labe Aba li netàdi gago, “Aia, Oho etei lab vameadaha im lam Farisi damat vi aime Oba ahu adat fakehe bak Om ozodà?”
13. Làhàmu Yesusat fa ab gagoham. “Ne, um ozom vaba? Em Aiat Ahamo debe usihi vabna ahebu omnaoti vaome voedume dehalem meo bak.
14. Labihàmu ame Farisi dam laba gi ozahigeàmu mu vou esule. Dam lam guruta guru. Lahana ame dam lam gi fako faina modesdam bak. Neham bak. Dam fako faida behàsu labe dat meida anekehà vuusu vou lam biem bak. Labihameam dam ahim lam gi amait bak bumat laba nom ilum bak.”
15. Lahame labi gagoha Petrusat Yesus bake vi ailo ab gagoham. “Aia, Oho amu neha, ‘Alat ozomta ba im ahat na àm bak labet modi im it vàhàdeme faidi fi hasi modesdam vabak,’ lahame gagoho im lam am tombu iba fa ahate vameadale. Im ozom biem bak.”
16. Lahahat Yesusat fa ab gagoham. “Oo, um vi ozome ozobohudem vaba? Neha taia?
17. Na àmna gi ahat àme zulu esum bak. Labi vou faobe ba haeli vieme setem bak.
18. Lahana ibi iho im ahulat vi ozome neàdi futodam im lam iba modi it vàhàdeme faidedam im am bak.
19. Dam ahulat it ozome modi faidem im neha: Bisi fai bak meedam bak ozom bak ame. Mei otem bak ame. Nam dat eheda modeo, dat nam eheda modeo, aa modem bak ahebu ame. Ostame fi loholi ot vai ot vaidam bak ahebu ame. Mei na aa vam bak ame. Meia giomim vàlu gagodam bak ame. Meia feàtàdam bak ame.
20. Labihasu ame im zi lam iba modi it vàhàdeme faidemna am bak. Ba ame dam labe ibi iho ozoho baket anekehà valo ekeme itatam vaba na àm bak labet meia modi vàhàdeme faidem vabak,” lahame Yesusat ab vahokedaham.
21. Labi Yesusat ame bak lada vou esmozi neo ladume num debu Tirus lamti num debu Sidon lamti laha obe modesuhu bak laba ab laham.
22. Labi laba le lafusi modeha Kanaanda nam abo Yahudi namet modem vab nam busao labe aho azihi bak netàdehemu lehe labe Yesus bake li nehame tauleda. “Boehàda oa, Om abo Dat Ahamda Boehàda Daud Vou Faat Lehe Mekehàda am bak. Labihàmu Om eba aame faobekesi taule. Em adnamat mei ahu oli veimam setan am ahu laba veimai geàdam bohu modesdalo. Oho gagu futoi itale,” lahame ab tauledamam.
23. Lahame labi tauledume modeha Yesus ba dae bum kai. Gi daleà lada. Làhàmu Aba vi tau meedam dam labe fa Yesus bake vuli ab gagodamam. “Aia, Oho nam laba gagu fa lale. Nam lam bisi iba vi vaiti vaitidume imti vabidume im alihi nemahuseo mozo.”
24. Lahahat Yesusat fa gago, “Alat Eba gagu oluhu di lam gi Israel dam abo domba vou aasdam dam vabalehe bake Em gagome oluhu bak. Ba Yahudi damat modem vab dam laba gagu oluhu vabak.”
25. Lahame labi gagoha ame nam labe geàmu ozahit Yesus bake netàdi am ahu adat iedi, “Am abo feàte,” lahame vou baedalo Am naba modesdam bak laba ahit ogomasu ab biteham. Biti Yesus bake vou baedam labe neo tauleda. “Boehàda oa, eba taule,” lahame neo tauleda.
26. Lahahat Yesusat fa gago, “Data bake lu àlo modemna ba im veme esu àm vabak. Labiham fai bak.”
27. Lahahat ame nam labe fa neo gago, “Lo. Lamota imbot. Lahana Boehàda Om ozom vaba? Vem deda labe am na vaheme àm ut gaheba laba datalu na lu àm di na keobe goagoadamna lam am vem ad laba dozomna labe gi labaha àmna taia?”
28. Lahahat Yesusat fa ab gagoham. “Oia, oho etei Eba lab tu vuzehehe bak lam abo feàna modeho. Oho Eba lab gagoho bak lam Eho mode tame,” lahame uledi gagoha am adnamat lam gi omozit ame di labe fa ab neàdeham.
29. Labi Yesus neo ame bak lam vou esmozi fa neo ledume Itea Galilea valau obe lezi ab ladamam. Labi ladume bak buzoho laba laisi ab nusuham.
30. Labi nusu aaha dam aheda zi labe fa dam ahaladiame nisileheda zi vuusualame Aba vi valada. Neha: Abo nao zoho modeo, anekehà modeo, nutabedeheda zi ame. Labi fako faida zi ame. Labi dae vabda zi ame. Labi dam faida zi totbaho amomoi ame. Labihasu dam ahe damat Yesus bake vou ledume Am naba modesuhu bak laba oumahedume Yesusat ab uladdume modi fa ab neàdedaham.
31. Labi ame dam giida labe iho aaha, dam dae vabda fa modi im vameada. Labi dam nisileheda modi fa neàdeda. Labi nao nutabedeheda fa neàdedume usnadume lada. Labi dam fako faida modi fa na aam neàdeda. Labihasu ahebu meedume neàdedam bak aadahemu àvodi Israel dam vuusdam Ala bake, “Abo feàte,” lahame ab vou baedamam.
32. Labi ame di labe Yesusat Aho Aba vi tau meedam dam laba gagome li dozeadume neàdi ab gagoham. “Dam duada zi nim iba tau iddume usi làteladi im na àmna folehe labe idoali feà bak fuhu bak lam aam faimu Em faobekeho. Em ba dam nim na àhà vabna ideia olum kaio. Zie bohu nim fa ladameam gi doni bake ahadou faa susume lam bili la biti le bitiam zohàme ba labihasu olum maleho.”
33. Lahame labi gagoha Aba vi tau meedam dam labe fa ab vi gagoham. “Ne lahana dam vaba alim bak nim iho ake le na àmna aame vame fa vou li dam bake lodume uloholi àdàla?”
34. Lahahat Yesusat fa vi ailo gago, “Rotibu ubuda amamo vou lehela?” Lahahat Am dam labe fa ab vi gagoham. “Im rotibu tujuh ehete. Labi bohe koena ame. Gi labihasu vou lehe bak.”
35. Laham bak lam aime neàdi Yesusat fa ame dam duada zi laba gagome bak laba ab nusualadaham.
36. Labi nusualadume neàdi Aho ame rotibu tujuh lamti bohe koena lamti vame Ala bake, “Neàte,” lahame tom gagu neàdi fahedume Aba vi tau meedam dam laba lodume iho fa vame ame dam duada zi laba lodume uloholi ab àdaham.
37. Labi ame dam zi fai labe ame na zi lam àdume modeha dam ahebu dedehemu zoho ab vahedaham. Labi Aba vi tau meedam dam labe damat lab àme dedehemu vahehena zoho lam fa vi ateti atetidume boloseh vahedume modeha boloseh ab tujuhleham. Labi modeha ame boloseh lam ahebu ab bektoham.
38. Dam etei lab nusualadume na àhà dam lam gi dam aabota dem di abo empat ribu fuhu bak. Ba lahiti datati tau dem kaio.
39. Labi na lam àdume neàdi Yesus ame dam duada zi lam gagome fa ibi bake ab oudaham. Labi dam lada lam oudume neàdi Yesus Aba vi tau meedam dam lamti iheba ziddume Magadan bak laba ab bioham.
1. Labi Magadan bak laba biou zitu azibe modeha Farisi dam totbaho lamti labi Saduki dam totbaho lamti vazisi, “Iho im nehasu Yesus bake modi aase,” lahame fet ozome Yesus bake netàdi ootedam labe ab gagodamam. “ ‘Om abo Alat Gagu Fihasi Vimteme Oluhu Dat Boehàda am tame,’ lahamda nasi na damat ihimo modem biem im feàna fet modemale. Labi im aame ozobohudese,” lahame ab gagodamam.
2. Lahahat Yesusat fa gago. “Um dam abo dimataedam di asum iuba tom aame nehi gagodam meo dam taia? ‘Asum bozilehe bak. Etei dihameam di neà faam bak,’ lahame aame gagu diham di gi ame baket modem bak.
3. Laham vab di dihambe asum iuba aameam di ilemeam uho nehi aame gagom meo dam taia? ‘Asum di ilehe bak. Etei abaalem bak,’ lahame aame gagomeam gi ame baket modem bak. Um abo gi asum ahoba iuba modem bakta fet aame ozobohudi gagodam damat modem bak. Ne, um im labihamna meedam damat akati Eho etei li vahokedam im nimti labi Eho im feàna meedam bak lamti uho fet aadamna akati nehame vi ozodam vaba mode? ‘Elàhà! Alat iba vuusu im Am damali iba vahokedam bak ab faasi meedam ame?’ laham bak lam akati um ozobohudem vaba vabili ahusobuli modela?
4. Um etei dam bada nim gi bisi faina meedam bak tadem damat moz. Abo, ‘Em ba Alat gagu olum kaio,’ lahame Eba tu vuzehem mom damat modem bak. Um gi labihadam damat modem labe uho vedi Eba neha, ‘ “Om Alat Gagu Fihasi Vimteme Oluhu Dat Boehàda ameo?” laham bak lam im biem bake na damat ihimo modem biem im feàna Oho nasi fet modehemu im aame ozobohudese,’ lahame Eba gagodam damat modem bak. Lahana Em ba uledi ame bak lam uba etei di nibe fet modem moho bak. Ba fet vouhodam bak lamti gagom kaio. Neham bak. Aham di iube Alat na damat ihimo modem biem im feàna abo Yunus bake modehe im lam dam bake amu fet modehe bak lamti ulohona uho ba aa tame,” lahame labihasu vameadume neàdi dam lada lam vou esmozi Aba vi tau meedam damti iheba ziddume Itea Galilea labe ab biodamam.
5. Labi biou zituadume ladameam Aba vi tau meedam dam labe iho it ozoha, im roti vou lehe vab damat modem bak ab it ozobohudeham.
6. Labi ame di labe Yesusat Aba vi tau meedam dam laba ab gagoham. “Um iademe vou faovoehebeat meedale. Farisi dam lamti Saduki dam lamti ibi iho vou lehe na abo na vizi fi kidemna ragi lam ba a vamule.”
7. Lahame labi gagoha Aba vi tau meedam dam labe aime ihimo ab ot gagoidamam. “Uho ozom, iho roti vou lehe vabake Yesus iba labi gagohe?”
8. Lahame ame dam labe iho lab ot gagoidam im lam Yesusat ahamo ozobohudi ab vi gagoham. “Um akati Eho etei im totobet lab gagoho bak lam uho vabili vedi Eho uho roti vou lehe vabak laba ozome uba gagoho tiba vabi vi ozodàla? Làhà um mahate Eba tu vuzehi meedam vab damat mode?
9. Làhà um Eho amu meedaha bak lam uho fetehesu it ozodume vi ozobohudem vab damat mode? Um gi ozobohudehena ahit fa vabilehe damali mode? Eho amu dam lima ribu zi fai laba rotibu auohole faheme lodaha di lam damat àme neàdi vekehe roti zoho lam uho vi ateti atetidume boloseh amamo vahehela?
10. Labi laha Eho amu dam empat ribu zi fai laba laha rotibu tujuh faheme lodaha di lam damat àme neàdi vekehe roti zoho lam uho vi ateti atetidume boloseh amamo vahehela?
11. Lahana um akati Eho etei uba lab gagoho bak lam akati uho vedi Eho roti aabo gagoho tiba vi ozodàla? Eho gi nehasu ozome uba labi mali gagoho bak. ‘Farisi dam lamti Saduki dam lamti ibi iho vou lehe na vizi fi kidemna lam uba vizemo. Um iademe vou faovoele,’ lahaha bak ozome uba labi gagoho bak.”
12. Lahame labi gagoha Yesus Aba vi tau meedam dam labe fa ab vi ozobohudeham. “Elàhà! Yesusat gi ame Farisi dam lamti Saduki dam lamti ibi iho giomim vahokedam im lam, ‘A aime tu vuzehi meedamule,’ laham bak iba vahokelo Aho gi na vizi fi kidemna laba ahit vàlu im totobet fi koada taia?” lahame ab vi ozobohudeham.
13. Labi ba digat meida iube Yesus Aba vi tau meedam dam lamti ladume num debu Kaisarea Filipi laba netàdesome modeha gi aba zoho laba modealadaha num debu bak laba goda. Godam di labe Yesusat Aba vi tau meedam dam laba vi ailo ab gagoham. “Dam duada labe, ‘Asum Ahoba Iubet Bak Niba Li Dateleheda lam amat modela?’ lahame vameadaha bak uho akatihasu vi aidàla?”
14. Lahame labi vi gagu aiha Aba vi tau meedam dam labe fa ab gagoham. “Dam duada totbaho labe vedi neha, ‘Om gi Yohanes Mei Vuu Valo Baptisleiamda labe amu elohona fat ahedi mode moio?’ lahame vameada. Labi dam duada totbaho labe vedi neha, ‘Om gi aham di iube Alat vameadaha im aime fa dam bake ahate vameaidahada Elia amu ahena Alat vahada fa nom iluhe moio?’ lahame vameada. Labi neo dam dam duada totbaho labe vedi neha, ‘Om gi Yeremiat mode moio?’ lahame vameada. Labi neo dam zohot vedi neha, ‘Om gi dat ahamda Alat vameadaha im aime fa dam bake ahate vameaidahada meida eloho dàt fat ahedi lehe moio?’ lahame vameada. Dam zi labe Oba labihasu ozome otesi otesidam bak.”
15. Lahame labi vameadume modeha Yesusat fa neo vi ailo ab gagoham. “Ne lahana um akatiha? Um, ‘Em amat modela?’ laham bak um akatihasu ozome gagodàla?”
16. Lahahat Simon ee ba taluhuda Petrus labe fa ab gagoham. “Aia, Om abo Alat Gagu Fihasi Vimteme Oluhu Dat Boehàda am bak. Om abo elom giki Ala labe Am Adat am bak.”
17. Lahame labi gagoha Yesusat fa ab gagoham. “Yon labe am adat Simon oa, omota Alat abo neàna modehe bak. Oho etei lab gagu tombalehe bak lam damat oba vahokedume om ozobohudi fi gatei gagoho vabak. Gi Em Aiat asum ahoba iuba azim Ala labe Aho oba modi ozobohudi om fi gatehe labe oho gagu tombalehe bak.
18. Damat ke baana ahoba laba num mom bakti ulohona Eho oba modi teudi oho ba Ebe Eho meedaha Im Neàna vou vameateda tame. Oho labihadam labe dam dua bak labe obo oho etei lab ahate gagu tombalehe bak lamti ulohona Eba laha tu vuzehi teudi laodoamsu meeda tame. Ba elodam dam modemnàme meit ba Eba tu vuzehi vazisi meedume baleài meedam bak lam ba vàhàdeme setem vabak. Gi labahana bohu vuusdam bak. Labihàmu om abo ke teudati uloho bak laba ozome etei Eho om ee Petrus lahadalo modem bak.
19. Damat Eba tu vuzehi Em damalehe dam lam Alat Eba gagohemu Eho fa ot vai fa oba gagu oho fa im dedateli Em damalehe dam lam fa vuusu meedamda om am bak. Labiham labe oho bak adba niba na im ozome neàdi gagom di ame bak lam gi Alat amu asum ahoba iuba ozome neàdehena ahum om gi ba ozome gagodam bak. Neham bak. Oho nehi gagomeam, ‘Ba a modemule,’ lahame mali gagom di modeo, laham vaba, ‘Lo, modem neàte,’ lahame ozome uledi gagom di modeo, Alat gi amu ozome neàdi gagohona ahum om gi ba ozome gagodam bak.”
20. Lahame Yesusat Petrus bake labihasu vameadume neàdi Aho Aba vi tau meedam dam laba neo ab gagoham. “Petrusat etei Em ozobohudi neha, ‘Om abo Alat Gagu Fihasi Vimteme Oluhu Dat Boehàda am tame,’ lahame lab gagu tombalehe bak lam uho meia a le fi demule,” lahame Yesusat ab gagu mali esuham.
21. Ame digat labe Yesusat damat Aba ba modelo modem im lam Aba vi tau meedam dam laba alimeat fet ab vameadamam. Aho neha, “Em Ai Alat fet gagu esuhemu Em abo kota Yerusalem laba lalo modem bak. Labi laba le Yahudi damat ibi iho tu vuzehi meedam im vuusdam tohe dam zi labe vahi Em mu fa Eba fai bak bohu modi geàda tame. Labi laha meia gagu Em oteme eloi fa usi behàsdi Em eloho bak labet Alat modi fa ahedi usa tame,” laham im lam alimeat ab fet vameadume esuham.
22. Lahame labi vameadume modeha Petrusat Yesus vi vuu ubahi duzu gago, “Boehàda, ba a labi gagomule. Oho etei lab gagoho bak lam ba a damat oba vabidume geàdamule,” lahame Petrusat gi ostame ab vi vabededamam.
23. Lahame labi vabededume modeha Yesusat fa it vaktesi Petrus bake aasu gago, “Om gi Iblisit gagom im Eba gagohemu om fa Em ohuse duzule. Em Aiat Aba Ahamo ozome modelo modem bak ehena oho vedi Eba mali zie aum bakti ulohona meedam bak. Oho etei Eba lab gagoho bak lam gi dam bak damat ozom bak Eba gagoho bak. Ba Em Ai Alat Aba Aho fet ozoho bak gagoho vabak,” lahame Petrus bake ab vi gagoham.
24. Labi Petrus bake gagu neàdi Yesusat fa Aba vi tau meedam dam laba neo ab vi vameadamam. “Meit Ebe Eho vahokedam im ozobohudi vi tau meedalo àhàkedameam làhà ba im aba aho it ozome modelo àhàkemda lam ba it ozome meedam vabak. Ame da labe aho gi neham bak. ‘Eho Yesus bake tu vuzehi im Abada meedàmu damat em si ut tetehesuhunaso lam ve lu vatu vou ladam di lam damat eba aasdamnàme eho gi ozahit vou le em paku dou elom neà bak,’ lahame Eba labihasu tu vuzehi gagu vàmademda lam aho Eba tu vuzehi vi tau meedam neà bak.
25. Neham bak. Meit aba aho Eba lab tu vuzehehe bak lam ahate gagomeam damat am otem bak labna zohàme it vou faovoi vei iedi ahit biehenali, ‘Em Yesus bake tu vuzehi Am damalem kaio,’ lahame veibadamda lam ba Alati vahi ahe neàna bohu vuusdam vabak. Lahana meit neha, ‘Em Yesus bake tu vuzehi im Aba Aho ozohoda lamota meedam labe damat em otemeam làhà gi neà bak. Em ba àvodem vabak,’ lahame aba aho elom bak laba bisi it vou faovoi meedam vabda lam Alati vahi gi ahe neàna bohu vuusdamda am bak.
26. Iho bak niba esdam di meit nehi ozo, ‘Em gi nazoh zi nim vadume duali neàdese,’ lahame ozodamda labe aho vedi am ahu it vou faovoi Eba tu vuzehi Alati ahili ahena aabo laba vuusdam vabameam làhà aho amu modehe zoho ium gi meedume vanamai voom bak. Iho Alati ahili ahena aabo laba vuusdam bak lam iho ba anat vi lu và? Ba na ot loiam biem bak.
27. Neham labe Eho uba labi gagoho bak. Em Aiat Am na fauha meona fako iedemna ogatei modealaha bak lam fa Eba abo Asum Ahoba Iubet Bak Niba Li Dateleheda niba modi vizi feà Dateli Alat Am im gagu vou usem dam lamti ba nom ilu duzum bak. Labi ame di lam damat bak niba esdam di labe meedaha im lam Eho fa vi ozome ame baleà vouhou dam im neà bakta meedam dam laba eho fa im neà bak vatauda. Labi dam im fai bakta meedam dam laba Eho fa im fai bak vatauda. Labihasu faheme meeda tame.
28. Lo, lamota imbot. Lahana Eho etei uba neo gagolo modem im imboda nidi nim laha nasi aima. Um dam etei nib dozeadaha dam totbahota taho elom vaba ahe lahasdamna uho Em Abo Asum Ahoba Iubet Bak Niba Li Dateleheda nibe Boehàdateboli dam bake vuusu im vahokedalo li duzum bak um dam zohota ame bak aa tame,” lahame Yesusat ab vahokedaham.
1. Labi usi enamli neàdi Yesus Aho Aba vi tau meedam dam Petrusti Yakobusti Yakobusam vahada Yohanesti labihasu gi dam lada làtela lamota gagome sibu bake ab vou laiteham.
2. Labi vou laisi modeha Yesus Am alihi veimdehe bak lam Aba vi tau meedam dam làtela labe ab aaham. Abo gi ala digadda meo fau fako aam iedem bakti ulohona Yesus Am dauha laba ab modesuham. Labi Am sue laha ab fauha meoleham.
3. Labi ame dam làtela labe iho neo vi aaha Alat vameadaha im aime fa dam bake ahate vameaidaha dam abo aham di iube eloi seddaha dam behàsu Musati Eliati iho lehe bak aaha vabna nom ilu Yesus Am obe laba vi tau duzu im vameadamna ab aaham.
4. Labi ame bak lam aahemu Petrusat Yesus bake ab gagoham. “Dat Boehàda oa, iho etei niba li odosi umti vahehe bak abo neàte. Oho ozom, eho im nehasu modem neào? Teohet mom num làtela eho niba mome meida Oba mo. Labi meida Musa bake mo. Labi meida Elia bake mo. Eho gi labiham neào?”
5. Lahame Petrusat gi etei labi vameadam lahasuhu di labe ulo fauha meona nom ilu ame dam lam ab baguamdi seteham. Labi modeha Alat Am dae ulo labe futoi gago, “Da nim Em Adat vàmtea Ebe Eho bisi deelemda Am am tame. Em abo Aba Aho meedam bak lam Em aam deeleho. Uho Aho vameadam im mahate aime meedale,” lahame ab vameadaham.
6. Labi dam làtela labe iho ame dae lam aiha udovai ahu adat iedi ahit ogomasu bake ab biddaham.
7. Lahana Yesus ame dam niba le ulasi ab gagoham. “Bisi a iedemule. Fa usai duzule.”
8. Lahame labi gagohemu dam labe fa im ohu vousai aaha dam behàsu lam fa alimdi seti gi Yesusta Ahamo doudamna ab aaham.
9. Labi im lam meedume neàdi sibu labe fa lezedam di labe Yesusat Am dam làtela niba ab gagoham. “Uho etei le aadaha bak lam Em Abo Asum Ahoba Iubet Bak Niba Li Dateleheda nim eloi Em eloho bak labet Alat modi fa ahedi usaha vab di ba meia a le fi demule.”
10. Lahame labi gagoha ame dam làtela labe fa vi ailo gago, “Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi labe nehi vahokedamna iho aihi bak. ‘Amu dat ahamda Alat vameadaha im aime fa dam bake ahate vameaidahada Eliat nasi bak niba fa le. Labi Alat Gagu Fihasi Vimteme Olulo Modem Dat Boehàda ba vule tame,’ lahame vahokehena iho aihi bak. Ne, ‘Om ame Da am tame,’ lahana iho etei Eliam alihi aahana aho Om ba vulem bak zie vuehe vabna akati nasi fa lahela? Làhà, gurut iba lab vahokedam im lam giomimot mode?”
11. Lahame labi gagoha Yesusat fa vi gago, “Lo, lamota imbot. Eliat nasi bak niba li dam bake nehi fet vameada. ‘Alat Gagu Fihasi Vimteme Olulo Modem Dat Boehàda le tame,’ lahame vameadume damat aime neàdi im ahu vabiedume ahumdi vou faodam bak ehe bak.
12. Lahana um ozom vaba? Ame da Eliati ulohoda amu gi Eho ba vulem bake nasi li duzu neàdehe bak. Nasi li duzuhunàme aho lab vahokedaha im lam damat aime tuhu vabak. Vedi ame dam labe ibi iho modelo àhàkehe bak labet modi aba fa fai bak meedume vabidume geàdaha bak. Labi laha kehàm vaba ame dam labe Em Abo Asum Ahoba Iubet Bak Niba Li Dateleheda nim Eba laha gi ame baket neo meeda tame.”
13. Lahame labi gagoha ame dam làtela labe ab vi ozobohudeham. “Oo làhà! Am gi Yohanes Mei Vuu Valo Baptisleiamda laba ozome Elia bake vàlu vameadaha taia?” lahame ab vi ozobohudeham.
14. Labi Yesus Aba vi tau meedam dam làtela lam iho vahi lezi aaha dam duada labe Aba doait li faodamna lezi ab aaham. Labi modeha dat vàmtea labe Yesusam naba modesdam laba ogomasu ahit bake biti tauleme ab gagodamam.
15. “Dat Boehàda oa, em daboseà nim Oho li aame faobekesi modi fa neàdele. Mei ahu oli veimam setan labet aba modi aheli kehanabu vaome geàdamehamdi itaida. Labi laha ame setan labe aba modi am vua bak modeo, vao bak modeo, ostame bitidam meote.
16. Labi modidàmu eho Oba vi tau meedam dam totbaho niba tauledume gago, ‘Uho ame setan laba gagu futoi itale,’ lahame gagoha dam labe modesome modeha modem bi moho,” lahame Yesus bake ab vameadaham.
17. Labi vameame modeha Yesusat fa ame lab odosdam dam zi laba ab gagoham. “Em abo uba tau azibehamdehena um eteida nim akati Eba mahate tu vuzehem vaba modela? Akati Alat Aba Aho ozoho baket uho modehe vaba akati bisi odohabuli git meedam bak bohu vuusdàla? Eho uba vuusdam di adi bake fusi um mu voe? Uho Eba tu vuzehem bak Eho ba gi labihasu vou faodà?” lahame gagu neàdi fa ame da niba ab gagoham. “Om daboseà nasi ve vou lele.”
18. Lahame labi gagohemu ame da labe le am daboseà ve fa ab vou leham. Labi Yesusat ame setan laba neha, “Om nasi daboseà nim vou esmozi itale,” lahame mali gagoha ame setan labe daboseà nim vou esmozi ab itame seteham. Labi modeha daboseà lam modi fa ab neàdeham.
19. Labihadume dam duada zi fa le seti Yesus Ahamo tousdam di Aba vi tau meedam dam labe Aba ab gagoham. “Oho ozom, akati modi iho ame setan lam iho gagu futoi itasome modeha modem bi mohela?”
20. Lahahat Yesusat fa gago, “Neham labe uho modem biehe bak. Uho Eba mahate tu vuzehi meedam vab labe labihaha bak. Lo, lamota imbot. Lahana Eho etei uba neo gagolo modem im imboda nidi nim laha nasi aima. Uho meit Eba tu vuzehe bak abo gi ut ahakebu oo keobeti uloholi gi koena tu vuzehemta làhà uho gi sibu feàda laba, ‘Fa iuba le duzule,’ lahame gagom di ame sibu feàda lam oho gagoho bak lam aime vuzehi fa iuba le duzum bak. Abo gi na ahebu gagom di modem tadem bak. [
21. Lahana mei ahu oli veimai ahelem setan lamohoda gagu futoi italo modem di gi modem vabak. Abo amu nasi na àm bak ahit mu Ala bake tom gagodume neàdi afoezobe ba ame setan lamohoda gagu futoi itam bak,]” lahame Yesusat ab vameadaham.
22. Labi Yesusat Aba vi tau meedam dam dua belas lam Aho neo vou ladume Galilea bak laba ab lafuham. Laba lafusi esdume modeha Yesusat Am dam dua belas laba ab gagoham. “Um aile. Em Abo Asum Ahoba Iubet Bak Niba Li Dateleheda nim kehàm vaba meit Em vou fohome dam bake ub lu ote tame. Labi oteme usi behàsdi Em eloho bak labet Alat modi fa ahedi usa tame,” lahame labi gagoha Aba vi tau meedam dam labe im ahu ab faideham.
24. Labi Yesusat Aba vi tau meedam dam lam Aho neo vou ladume num debu Kapernaum laba ab vou fuham. Labi vou fusi aidam di labe Fihasi Ala Bake Vou Baedam Num Vàmteabu faidehe bake vabielo modem doi pajak lam abo Yahudi damta gagome atem dam labe Petrus bake li vi ailo ab gagoham. “Guru ubuda lam ame Num Vàmteabu lam faidem bake vabiem doi pajak abo tahun ahebu gi lodam doi lam Aho lodào? Lodam vabao?”
25. Lahame labi gagoha Petrusat fa gago, “Lo, lodam bak.” Labi gagu neàdi Petrus giida labe ibi iho esdam num laba fa oli modeha Petrusat aho bako lab futoi doi vam bak vameaha im fa Yesus bake gagosome modeha Yesus gi Ahamo nasi ozobohudi ab gut vameadamam. “Simon, om akatihasu ozodà? Dam bakdate vuusu im vahokedam pemerintah boehàda zi labe ibi iho vam doi pajak lam dam bake gagome vam di oho ozom, ana dam bake gagome vadà? Gi im adam debuta ozome gagome ame doi pajak vadào? Gi dam ibi iho vuusdam dam lamota gagome ame doi pajak vadào? Oho ozom, akatihasu meedà?”
26. Lahame labi gagoha Petrusat fa gago, “Ame boehàda zi labe ibi iho vuusdam dam lamota gagome vadam bak.” Lahame labi gagoha Yesusat fa neo gago, “Làhà oho labihasu gagomeam làhà ba ame boehàda zi labe im adam debu laba gagome vadam vab taia? Neham bak. Em Alam Adat am bak. Labi um laha Alat Am damalehe dam um am bak. Labihàmu gi lodam doi pajak lam im ba tau lodam vab taia?
27. Lahamnàme damat iba ahu adat faki ozomsum bake gi ozahit ame pajak lodam neàte. Labihàmu oho nasi itea iuba lazi kas nom voou bohe ahamte vahada aha laba aameam emti omti ame doi pajak lodam bakti ulohona aa tame. Labi oho ame doi lam ve fa Fihasi Ala Bake Vou Baedam Num Vàmteabu laba ozome gi lodam doi pajak lam atem dam laba lodale,” lahame gagu neàdi ame baket ab modeham.
1. Labi ba digat meida iube Yesus Aba vi tau meedam dam labe Aba li vi ailo ab gagoham. “Aia, ba diamut Alat Oba modi Boehàdateboli dam bake deeli vame Om damali vuusu im vahokedam di lam im Om dam dua belas nim Oho da adidate gagu modi ee feàda talu Oba tau dam vuusu im vahokedàla?”
2. Lahame labi gagoha Yesusat fa data koena laba gagome li ame dam dua belas labe ibi iho avaelaha tot laba ab vou li duzuham. Labi vou li duzu neàdi ame dam laba ab faasi vameadamam.
3. “Nasi aima. Eho etei uba gagolo modem im imboda nidi nim mahate tu vi ozodam bohu meedale. Uho neha, ‘Bisi feàda im am bak,’ lahame ubu uho it daetbadam bak lam fa voedume fa data koena nidi nibe aba aho lab daleà azi meit aba vahokedam im aidam bak lamti ulohona meedam vabameam làhà Eho ba uba deeli vame Em damali Eho vuusu im vahokedam biem bak.
4. Labihàmu Eho gi uba nehi gagom bak. Um nasi ubu uho lab daetbadam bak lam voole. Labi fa ame data koena nimti uloholi ahu nemahuba neàt daleà azi meit vahokedam im lam vi aidam damalele. Uho labihamta Alat ba diamut Eba modi Ehemo Boehàdateboli Eho dam bake deeli vame Em damali vuusu im vahokedam di lam um laha feà damali ee taudume vousa tame.
5. Labihàmu meit Eba tu vuzehi meedàmu fa data koena nimti ulohoda lam meit ame da lam ule neàt vameam làhà gi Emti ule neàt ab vaham bak.”
6. “Lahana meit Eba tu vuzehi meedamda nim abo damat neha, ‘Gi data koena nimti ulohoda feà vab dàt moz,’ lahame ozomda lam meit am vou fohome faina modi ubahi ubahidume Em mu voohemu ame mei vou fohohoda lam ba diamut Alat bisi feàna beomda am bak. Dat labihalo modemda lam gi nasi nehasu meedam vaba? Dam gagome am si ke feàda bumatna visoi am bio laba vààsu asimbuli itea feàna tombu iuba vou le nobu feà bak iuba nasi nom voou tezi eloi setem vaba? Lam bisi neà bak am bak,” lahame ab vameadaham.
7. Labi im lada lam vameadume neàdi Aho neo nehame vi vahokeda. “Aiee! Bak niba azim dam Alat abo duana beoda tame. Neham bak. Bak adba niba esdam di naat li, ‘Meit fa faina modem neào?’ lahame modi ozolo modem di meia modi fa faina meedam bak ehete. Ame na meedam bak lam ba setem vabak. Lahana meit nehi ozo, ‘Eho da lada laba le modi, “Yesus fà mu voose,” ’ lahame modi ozolo modem di aho le modi da labe Em mu voomeam làhà da lada lam Alat bisi duana beomda am bak.
8. Labi laha om ahu labe oba modi om anekehà modeo, om nao modeo, om vou fohome faina modi ubahi ubahidume Em mu voolo modemeam làhà om anekehà modeo, om nao modeo, nasi vaitoi fa nisilele. Bak lam bisi neà bak am taia? Omti Alati vahi vou ali ahu vàmadi amedamalem bake etei bak niba godam di gi anekehà vàmtea modeo, nao vàmtea modeo, vou goda. Labi ba diamut gi nisilehena Alat Aba Aho azim bak laba le tau vahi azim bak lam bisi neà bak am bak. Ba akati modi anekehà ahimti nao ahimti labihasu modesuhu bak lahasu faina meedam bohu vuusu vou mode ladume ba diamut om so ahebu vua elum sutem gikina bohu laba voela?
9. Labi laha om ahu labe oba modi om fakot om vou fohome faina modi ubahi ubahidume Em mu voolo modemeam làhà om fako nasi valoi voou fa nisilele. Bak lam bisi neà bak am taia? Omti Alati vahi vou ali ahu vàmadi amedamalem bake etei bak niba godam di gi fako vàmtea vou goda. Labi ba diamut gi nisilehena Alat Aba Aho azim bak laba le tau vahi azim bak lam bisi neà bak am bak. Ba akati modi fako ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela?” lahame Yesusat ab vahokedaham.
10. Labi im lada lam vahokedume neàdi Aho neo Aba vi tau meedam dam laba neo im meida nehame vi vahokeda. “Iademe meedale. Damat um dam totbaho laba neha, ‘Gi data koena nimti ulohoda feà vab damat moz,’ lahame ozomom dam laba uho a vi feàtàme mu tozomule. Neham bak. Alat Am im gagu vou usem dam labe ame dam laba vou aasdam dam lam abo Em Aiat avaesdam laba gi labaha bohu vou faodam dam labe im dedamali Em Ai bake le fi dem bak ehete. Neham labe labiham bak. [
11. Em Abo Asum Ahoba Iubet Bak Niba Li Dateleheda bak niba lehe bak nim gi damat faina meedàmu Alat beolo modesdam dam lam Eho nabime soat vausu fa vei neàdedalo lehe bak. Abo dat domba vou aasdamda labe am domba zie fàusi git ub oedahemu fa vi nabime vame fa iademe oumahedam datti uloholelo Em bak niba lehe bak.]
12. Uho akatihasu ozodà? Dat domba vou aasumda labe am domba seratus ehena meida vàmtea ahamo utasi bak vabili le setemeam làhà uho ozom, dat naeda akati mode? Gi neha taia? Gi domba sembilan puluh sembilan zi totbaho lam iademe bak buzoho sibe baa bak laba oumahedume neàdi vou esmozi fa seteheda lam vi nabida taia?
13. Labi nabidamehamdi ame domba vi aam di abo duana deelem bak. Imbo bak. Ame domba sembilan puluh sembilan seddaha vabda zi lam deelem bak lamti vàmtea seteheda fa vi aame deelem bakti uloho vabak. Vàmtea seteheda fa vi aaha bak lam bisi duana deelemda am bak.
14. Labi um Ai asum ahoba iuba azim Ala lam laha labihaha bak. Meit Eba tu vuzehi meedamda nim abo damat neha, ‘Gi data koena nimti ulohoda feà vab dàt moz,’ lahame ozomda lam meida fa zie fàusi git ub oli meedam bak labna zohàme Aiat vou faovoi meedam bak,” lahame Yesusat ab vahokedaham.
15. Labi im lada lam vahokedume neàdi Yesusat Aba vi tau meedam dam laba im meida neo nehame vi vahokeda. “Umti vahi Eba tu vuzehi meedamda meida labe fa um meidate git modemeam làhà uho fa gi nehale. Amu nasi dat oba git modeheda laba le fi desi gagole. ‘Om akati eba nehasu git modehela?’ lahame omti ame da lamti gi uhumo um ahim labe duzu im ot vameaidale. Labi ame da labe fa im obo oho nib vou le gagohoda lam ule neàt gut aimeam làhà um ahim labe amu ot vaitesuiame ot fakiaha bak lam fa vahem bak am tame.
16. Lahana ame da laba le fi desi gagomeam obo oho nib vou lehe im lam aim mu ot fakiaha bohu lahasdameam làhà fa neo le dat vàmtea modeo, dam behàsu modeo, oba tau daetesu vameadam dam ve vou le vameame modi neàdele. Eho gi dat ahamda Musat aho Alat aba vameadaha im nehasu toeme fi hasi esuhu bak ozome uba labi gagoho bak. ‘Meit meia vàlu neha, “Da nim faina modeho,” lahame meia vàlu gagomeam làhà nasi oba ahamte vou lehe im laba a aime tu vuzehemule. Abo dam behàsu modeo, dam làtela modeo, vi tau aame vameadamta aime tu vuzehem neàte.’ Lahame Musat aham di iube toeme fi hasi esuhu im ehe labe Eho uba labi gagoho bak.
17. Labi oho etei lab vou laha dam labe oba vi tau daetesu vameadume aameam neo uho lab daetesuhu bak aim mu bohulalemeam làhà oho umti vahi Eba tu vuzehi meedam dam totbaho laba le bakamta vazisi ame da labe aho git modehe im lam ahate fi desi vameadale. Labi ame dam zi labe fa ame da laba im vahokeme aameam am neo ame dam zi labe iho lab im vahokehe bak lam aim momeam làhà ame da lam nasi gagu utasi dam meilele. Abo um Yahudi dam labe ubu uho modi baleàhà bak lamti ulohona modi ame da lam, ‘Imti vahi Ala bake tu vuzehemda modem bak,’ laham bak a gagomule. Ame da lam nasi di nibet vaitesu voole. Abo um Yahudi dam labe ubu uho doi pajak atem dam lamti vahem vabak laba ozome ulohona modele,” lahame Yesusat ab vahokedaham.
18. Labi im lada lam vahokedume neàdi Yesusat neo Aba vi tau meedam dam laba neo im meida nehame vi vahokeda. “Nasi aima. Eho etei uba gagolo modem im imboda nidi nim mahate tu vi ozodam bohu meedale. Uho bak adba niba na im ozome neàdi gagom di ame bak lam gi Alat amu asum ahoba iuba ozome neàdehena ahum um gi ba ozome gagodam bak. Neham bak. Uho nehi gagomeam, ‘Ba a modemule,’ lahame mali gagom di modeo, laham vaba, ‘Lo, modem neàte,’ lahame ozome uledi gagom di modeo, Alat gi amu ozome neàdi gagohona ahum um gi ba ozome gagodam bak.
19. Em laha im nidi nim uba gagolo. Nasi aimale. Um meida behàsuvat bak niba esdam di Ala bake tom gagolo modem di dat meida labe meia neha, ‘Imo im nidi nim Ala bake tom gagodase,’ lahame gagu ame da meida labe fa tau uledi ahu vàmadi neàdi um behàsu labe Em Ai Ala bake labihasu tom gagodameam làhà Em Ai Ala asum ahoba iuba azimda labe Aho uho lab tom gagoho bak lam aime uledi meedam bak.
20. Neham labe labihaha bak. Damat Eba tu vuzehi meedamda behàsu modeo, làtela modeo, labihasu bak niba modeo, bak amomoi bak iuba modeo, vazisi tom gagolo meedam di uhumo meedam vabak. Em laha laba ehe bak,” lahame ab vahokedaham.
21. Labi Yesusat im lada lam vahokedume neàdi Petrusat Yesus bake li netàdi vi ailo ab gagoham. “Boehàda oa, emti vahi Oba tu vuzeheda meida nibe aho eba git meedamehamdi eho fa ozahigeàmu fa vei neàdedam bak lam eho debe adi bake fusi novà? Ame bak gi tujuh fusi novà? Laham vaba eho akatihasu mode?”
22. Làhàmu Yesusat fa gago, “Vabà! Ba oho gi tujuh laba novam vabak. Meit oba git meedamehamdemnàme ba obo oho ame da laba ozahigeàmu fa vei neàdedam bak lam ba debe novam bak vaba gi ozahigeàmu fa vei neàdedam bohu vuusu meedale.
23. Eho gi neham bak ozome oba labi gagoho bak. Ba diamut Alat Eba modi Ehemo Boehàdateboli dam bake vuusu im vahokedam di Em gi Eho etei neo vouholo modem boehàda nidi nimti ulohona meedam bak. Neha: Ame boehàda labe aho amu am na meedam dam labe doi abada vaha bake, ‘Ame baleà vouhom bak taho modese,’ lahame am doi vaha dam labe im ee toedaha buku laba nabidume aaha ame dam labe ame bak lam taho baleà vouhom vabamu am meo dam gagome ame dam laba le siàdume ab fet vou li fet vou lidamam.
24. Labi ame bak lam faasi meedam di ame meo dam labe le dat meida amu boehàda labe am doi abo juta bak fotehena abo doi dem biem zoho fuhuna ozomomda bonleheda meida ab ve vou leham.
25. Labi ame boehàda labe aho avaesdam laba ab vou li duzuham. Labi vou li duzu gagu aiha ame na meedamda labe fa gago, ‘Em doi koedi ba debe ame baleà vouhom bieho.’ Lahame labi gagoha ame boehàda labe faki am meo dam bake ab gagoham. ‘Da lamti am namti am datati labihasu ahebu siàdale. Fa meia lu doi vadase. Labi laha im numa vahehe soa maehe nazoh feà lamti ahebu gelevai fa meia lu doi vadase. Labi ame doi lam ahebu eba fa lodume ame baleà vouhom bak am tame.’
26. Labi ame boehàda labe aho lab vameadaha im lam am na meedamda labe aihemu am ahu adat iedi ogomasu biti am boehàda laba ab tauledamam. Tauledam labe gago, ‘Laha faode. Em namti datati oho nasi a bisi faki meia lu doi feàna vadamule. Eho ba ame baleà vouhoda tame.’
27. Labihàmu ame boehàda labe ab aime aame faobekeham. Faobekesi am meo dam laba ab gagoham. ‘Làhà nasi a simule,’ lahame gagu neàdi fa am na meedamda laba neo ab gagoham. ‘Oho amu doi ebeda vaha bak lam ame baleà vouhom bak lam feidate. Em gi ozahigeàmu fa ab vei neàdeham tame,’ lahame vameadume neàdi ab isi oluham.
28. Labi ame am na meedamda labe aho usai boehàda labe am num labe futoi le aaha amti vahi ame boehàda labe am na meedamda meida ab ot tàhiaham. Ame da labe amu doi abada gi koena bonleheda ab ot tàhiaham. Ot tàhiame ame da bio si biogadam labe im vameada. ‘Oho amu eba bonlehe bake taho etei alihi ot aaiaha di nibe ame baleà vouhou neàdele.’
29. Lahame labi gagohemu ame da labe ahu adat iedi ogomasu bake biti fa ab tauledamam. ‘Laha faode. Eho ba ame baleà vouhoda tame.’
30. Lahame labi gagohonàme ba faobekesi vou faodam bak lam uledem vabak. Gi mu vou esmozi meo dam laba le gagome li si ame sel laba ab vooham. Voou ousulo modem di gago, ‘Oho ame da laba ame baleà vouhou doi lodume uloholehezobe im om fa vou futo tame,’ lahame ab ousuham.
31. Labi ame boehàda labe am na meedam dam dua totbaho labe iho ame bak lam aihemu faki iba vuusdam boehàda laba ab le fi deham. ‘Imti vahi na oboda meedamda meida nibe gi im vahemda meida fa meo dam gagome si sel ousuho,’ lahame ab le fi deham.
32. Laham bak ame boehàda aihemu faki gago, ‘Ame da mei gagome sihida ve vou lele,’ lahame gagu olu le ame da si ab vou leham. Labi vou li duzu neàdi boehàda labe ab gut vahokedamam. ‘Om abo bisi faina meedamda om am bak. Oho amu eba neha, “Laha faode,” lahame eba tauledume gagoho di lam em oba faobekesi oho eba bonlehe bak lam abo feànàme em gi ozahigeàmu fa vei neàdi om isi oluhu bak.
33. Lahana akati oho fa meit oba bonlehe bak gi koena modehena akati ebe eho amu oba modehe bakti ulohona modi ame da laba faobekesi gi ozahigeàmu fa vei neàdem vaba mode?’
34. Lahame faki am meo dam gagome ame da lam fa ab siham. Si gago, ‘Uho da nim ve sel ousule. Labi sel vou aasdam dam labe fa ame da niba dihasi fo. Dihasi fo. Labihadume ame da labe aho eba bonlehe bak fa ame baleà vouhou neàdehezobe fa isi olule,’ lahame ab gagu oluham,” lahame Yesusat ame im totobe lam ab vameadaham.
35. Labi im lada lam vameadume neàdi Yesusat neo vi vameada. “Meit uba git meedam di uho ame da laba gi ozahigeàmu um ahu ad lam fa vei neàdem vabameam làhà Em Ai asum ahoba iuba azimda labe fa uba laha gi ame baket modem bak. Uho Aba git meedaha bak lam Aho ba ozahigeàmu Am ahu fa vei neàdem vabak,” lahame ab vahokedaham.
1. Labi Yesusat im lada lam vahokedume neàdi Aba vi tau meedam dam lamti iho ame Galilea bak lam vou esmozi fa neo Yordan Soabo dumam tot Yudea bak labe am num debu meidati meidati laham bak lam ahebu goda.
2. Labi ame bak laba vou godam di labe dam duada zi Aba tau vi goda. Labi dam aheda zi labe iho dam nisileheda vou ledam di Yesusat gut ulasi modi fa neàdida. Labihada.
3. Labihadam di labe Farisi damat Yesusat git gagom bak aihizobe vàlulo ahit Aba netàdi duzu vi ailo ab gagoham. “Oho ozom, im Yahudi dam nibe ibi iho tu vuzehi meedam im labet vulam di meit aho amu vaha nam lam fa mu voom di gi ostame la vàlui le vàluidume mu voom neào? Akatihàla?”
4. Lahahat Yesusat fa gago, “Meit Alat Vameadaha Im Toedahana laba im nehi toehena nim um aame vi ozobohudehe vaba? ‘Ala Na Debu Modeheda labe ahamte alimeat na meedaha di iube dat mode. Nam mode. Lahaha bak.’
5. Labi Aho modi neàdi Aho lab modehe bak lam vi ozome ab gagoham. ‘Làhà etei di nim dat nam vam di am aiti am oiti vou esmozi da nim gi am nam laba akili ihimo ahili so vàmadi ab le azimam bak. Labi lab le azihi bak lam vi ozom di gi nubu ab vàmadeham bak.’ Laham bak lam um aame ozobohudehena taia?
6. ‘Ba so behàsuo?’ laham bak lam ba vi ozom vabak. Labihàmu Alat modi vàmadehena uho dam bakda a modi fàsi behàsdemule.”
7. Lahame labi gagohemu Farisi dam labe fa neo Yesus bake vi ailo gago, “Ne lahana im tai ahobada Musat akati modi im nehasu toehela? Aho aham di iube neha, ‘Uho meit am nam amu neàt vahana fa mu voolo modemeam làhà dat amu nasi, “Nam nim debu nehasu meedàmu em mu vooho bak,” lahame sunit toeme ahate fi desi vameadume mu voou fa olumta neàte,’ lahame akati modi labi toehela?”
8. Lahame labi gagoha Yesusat fa gago, “Um ahebu ahu tamzohobulehe labe meit im vahokem bak aim biem damat modem labe Musat gi ozahit uledi im lam toehe bak. Lahana bisi alimeat Alat datti namti modehe di labe labi gagoho vabak.
9. Um ozobohudem bake nasi Ebe Eho etei gagolo modem im nim aimale. Neha: Meit am nam dat amomoit bako bake aa vaha vab nam aho naedat vedi ostame mu voou fa nam amomoi vameam làhà ame da lam faina modehe bak.”
10. Lahame labi gagoha Aba vi tau meedam dam labe ihimo Yesus bake ab gagoham. “Làhà dam lahi vam di labiham bake imo lahi vam bak gi mose. Gi soaona aidase.”
11. Lahame labi gagoha Yesusat fa gago, “Ne lahana uho etei lab gagoho bak lam dam dua zoho ba modem biem bak. Abo gi dam nam vadam bak. Lahana Alat Aba Aho gagu fi hasi esuhu dam labe ihimo nam mom bak modi vizi esuhu dam ehe bak.
12. Dam totbaho labe im nehasu meedam labe nam vam bak mouda. Im oiat faaha di mei modem biemna faadam labe lahi vam bak mouda. Labi dam totbaho labe im àko meit tet si vaomoho labe lahi vam bak mouda. Labi dam totbaho labe ihimo ozo, ‘Im ab Alam Damali Aho Iba vuusu im vahokedamam bak. Labihàmu imo gi Alat Aba Aho gagohona ahu vàmadi meedase,’ lahame lahi vam bak mouda. Um labihasu meedam uledemeam làhà gi ame baket modele,” lahame Yesusat ab vameadaham.
13. Ame di labe dam totbaho labe ozo, “Yesusat fà im data niba Am anekehà odosu neha, ‘Ai oa, Oho data niba neà bak modi esule,’ ” lahame tom gagom bake ozome im data Yesus bake ab vou ledamam. Vou ledume modeha Aba vi tau meedam dam labe iho ame bak lam aahemu ab gut mali meedamam. “Um data Yesus bake a vou li vabidamule.”
14. Lahame labi gut mali gagoha Yesusat daetesu gago, “Ame data lam Eba vou ledam neà bak. Uho a mali gagomule. Neham bak. Damat ibi iho vou mode ledume baleàhà bak lam fa veimdi fa data koena zi nibe ibi iho lab vou mode ledume baleàhà bak lam abo daleà azi meit iba vahokedam im aidam bak lamti ulohona meedam dam lam Alat deeli vame Am damali vuusu im vahokedam dam am bak.”
15. Lahame labi gagu neàdi ame data zi laba Am anekehàt nom odosu, “Ai oa, Oho data niba vou aasdale,” lahame tom gagoidume neàdi fa ab oudaham. Labi ame im lam meedume neàdi fa bak mei bake ab laham.
16. Labi ba digat meida iube dat bas nibe Yesus bake li netàdi gago, “Guru oa, Om abo neàte. Eho ana im meedam labet Alat eba ba modi Amti vahi gi ahe neàna bohu vuusdàla?”
17. Lahame labi vabi vi ailo gagoha Yesusat fa ab vi gagoham. “ ‘Na im neà bak meedam bak akete?’ laham bak lam ohomo ozobohudehena akati Eba labi gagoela? Lahana im dam bakda nim ba im neà bak meedamda vabak. Gi Alat Ahamo im neà bakta meedam bak. Labihàmu Alat oba ba modi Amti vahi gi ahe neàna bohu vuusdam bak lam, ‘Oba modi vizese,’ lahame oho modelo àhàkemeam làhà oho gi Aba Aho gagu fi hasi esuhu im zi lamota meedale. Oho labihamta ame bak lam oba modi vizem bak.”
18. Lahahat ame dat bas labe fa gago, “Alat gagu fi hasi esuhu im zi adida eho meedam labe ame bak lam eba modi vizela?” Lahahat Yesusat fa gago, “Ame im neha taia? ‘Mei a otemule. Labi nam dat eheda modeo, dat nam eheda modeo, a modemule. Labi mei na a aa vamule. Labi na aaha vabda labe, “Eho nehi aaho,” lahame a ostame giomim vàlu gagomule.
19. Labi um ai bake modeo, um oi bake modeo, ahu adat iedi uba gagoho im laba vuzehi meedale. Labi uho meit aba it deeli vou faovoi vabiedam bak lamti ulohona vi ozome fa meia laha deeli vou faovoi vabiedale.’ Labihasu toedume fi hasi esuhu im lam om ozobohuna taia?”
20. Lahame labi gagoha dat bas nibe fa gago, “Oho etei lab gagoho im zi lam eho ahebu ulohodesu meedaha bak. Oho ozom, im meida ba eho neo modem bak eheo?”
21. Lahame labi gagoha Yesusat fa vi gago, “Lo, lahana om im meida vàmtea vekehe bak. Om abo neàbodelo àhàkemeam làhà om soa maehe nazoh zi lam ahebu gelevai doit ot loidume neàdi ame doi lam vadume fa faheme dam na vab dama iuba lo. Iuba lo. Lahadale. Oho labi modemeam làhà Alat Aba Aho azihi bak laba oba vahehe nazoh aabo ehete. Labihàmu oho ame doi lam dam na vab dama lodume neàdi fa li Eba tu tau godale.”
22. Lahame labi gagoha ame dat bas labe Yesusat lab gagoho im lam aiha am soa maehe nazoh zi abo feà dat modemu ahu faidi daleàdi ab laham.
23. Labi ame dat bas le seti Yesusat fa Aba vi tau meedam dam laba ab gagoham. “Lo, ame dat bas labiha. Lahana Eho etei uba gagolo modem im imboda nidi nim nasi aima. Meit am nazoh duada labe aho it ozo, ‘Eho Yesusam im aime vuzehi fa Alam dateli Aho eba vuusu im vahokedase,’ lahame it ozodamnàme am nazohti nehi ame bak lam uledi meedam biem meo bak.
24. Labi im nidi nim uba laha aimale. Im unta fi hobu labe aho sue tademna mo labe am bumat kekehena laba ba dalu lafutom biem bak. Labi dat na duada labe aho nehi ozo, ‘Alat laha eba deeli vame Am dateli eba vuusu im vahokedase,’ lahame gagu meedam bak lam laha modem biem bak. Lahana ba gagohoda lam bisi modem biemda am bak.”
25. Lahame labi gagu modeha Aba vi tau meedam dam labe ab aime àvodeham. Àvodi gago, “Aa làhà! Dam na duada labihalahit im dam totbaho ahebu Alat ba iba soat vausu im vei neàdi Amti vahi gi ahe neàna bohu vuusdam biehe taia!”
26. Lahame labi gagoha Yesusat Aba vi tau meedam dam laba aasdam labe ab gagoham. “Faode. Ame bak lam damat ihimo it modem biem bak. Lahana Ala bisi feàda abo na ahebu modem meo Ala labe ame bak lam modem meo bak.”
27. Lahame labi gagoha Petrusat fa ab vi gagoham. “Imota nehaha bak. Iho Oba vi tau meedam damalelo modemu nazoh ibida ahebu amu gi voedume vausi fa Oba tau vou godam bak. Lahana iho labihahemu ba diamut iho lab meedaha bak lam Alat ame baleà vouhom di im ana và?”
28. Lahame labi gagoha Yesusat fa ab gagoham. “Lo, oho lab gagoho bak lam imbota imbot. Lahana Eho etei uba gagolo modem im imboda nidi nim nasi aima. Ba diamut Em Ai Alat Aho bak nimti bak niba modealahana zi nimti ahebu Aho modi gàhàdehezobe Em Abo Asum Ahoba Iubet Bak Niba Li Dateleheda fa abobo Boehàdateboli boehàdat ahamo nusu meia im vahokedam di nusumna feàda laba nusu dam ahebu vuusu im vahokedam bak. Labi ame di lam uho Eba vi tau meedam dam dua belas nim um laha boehà damali fa ame nusumna feàda dua belas amomoi laba nusualadume dat ahamda Israel labe aho vou faat lehe dam debu dua belas laba faheme ahala vuusuiame im vahokeda tame.
29. Labi dam Eba vi tau meedam damalelo modemu im aiti im oiti im dubuti im vahadati im nàti im datati im dam zohoti im numti im utoho ziti im na fi ho ziti labihasu voedume esmomeam làhà ame dam labe im ahe lahasuhu di nibe Alat fa ame dam laba gi ame baleà vouhou na lodam di abo fetehesu duana vi loda tame. Labi laha ba diamut Alat ame dam laba modi Amti vahi gi ahe neàna bohu vuusda tame.
30. Alat ba diamut Aho Eba modi Eho Boehàdateboli dam vuusu im vahokedam di neham bak ehete. Damat etei bak niba esdam di vedi nehi it ozoda. ‘Ee feàda im am bak,’ lahame it daetbadam dam lam ba feà damalem vaba gi ee vousi ba duzum dam am bak. Laham vaba damat nehi it ozoda, ‘Ee feà vabda im ame?’ lahame it daetbadam vab dam lam ba feà damali fa ee vousai nasi duzum dam am bak,” lahame ab vahokedaham.
1. Labi Yesusat neo im meida nehame vi vahokeda. “Ba diamut Alat Eba modi Eho Boehàdateboli Em damalehe dam laba vuusu im vahokedam di Eho Em damalehe dam labe iho meedaha bak gohali lomna lodam di gi Eho etei neo vouholo modemda nibe Aba Aho meedaha bak lamti ulohona meeda tame. Neha: Bak deda nibe aho dihambe usai ozo, ‘Em anggur dee niba amat le na meedàla?’ laham bak ailo le dam bake nabida.
2. Labi le nabidume ame dam aame gago, ‘Uho anggur dee ebeda laba le na meedale. Labi eho uba doi perak oona vàmtea abo digat vàmtea na modehe bake vam doi uba lo tame,’ lahame gagu damat aime uledi ab ladaham.
3. Labi ba neo dihambe ala faasi jam sembilan fuhemu aho neo le damat na ot loidam bak laba le aaha dam na modem vaba gi esdamda aahemu gago, ‘Um laha anggur dee ebeda laba le na meedam neào? Uho le na modehezobe eho na meedume neàdehe bake ulohodesu lom doi uba loda tame.’
5. Labi gagoha ame dam labe uledi le dam amu lahadati vazisi na ab meedamam. Labi ame utoho deda labe neo ala tomali jam dua belas neo le dam amomoi gagome am anggur dee laba neo ame baket neo gagu olu. Labi neo ala vakidehezobe jam tiga labe dam gagome gi ame baket neo gagu olu.
6. Labi ame utoho deda labe neo ala boz fi olelo modem di labe jam lima labe aho neo damat na ot loidam bak laba le aaha dam na modem vaba gi esdamda aahemu gago, ‘Um di bohu nim na modem vaba akati gi esdahit disihela?’
7. Lahame labi gagoha ame dam labe fa gago, ‘Damat iba di bohu diat na modem bak gagoho vab labe im gi esdam bake.’ Lahahat ame utoho deda labe fa gago, ‘Làhà um laha anggur dee ebeda laba le na modem neàte,’ lahame gagohemu ame dam labe deeli neo le na ab meedamam.
8. Labi disi aibulelo modem di labe ame utoho deda labe am toheda laba ab gagoham. ‘Oho em na meedam dam laba le gagole. Aibuleho. Nasi ledale. Labi ame na meedam dam ledahazobe oho nasi ame dam labe iho lab le na meedaha bak gohali lom doi lam faheme lodale. Oho ame baket faasi lodam di amu nasi dam ba ala boz fi olelo vabali jam lima le na modem dam laba nasi doi lodale. Labihasu doi loidume dam dihambe nasi le na meedam dam laba lodume novale.’
9. Lahame labi gagohemu ame baket faasi ab meedaham. Neha: Dam ba ala boz fi olelo vabali jam lima le na faasi meedam dam labe iho nasi li dozeadume ame toheda labe doi perak oona vàmtea ame dam laba ab lodume uloholeham. Labi dam jam tiga le na faasi meedam dam labe neo li dozeadume gi ame baket neo mode. Labi dam jam dua belas le na faasi meedam dam labe neo li dozeadume gi ame baket neo mode.
10. Gi labihadume neo dam na dihambe faasi meedam dam gagome ab li dozeadaham. Li dozeadam di labe ozo, ‘Im na dihambe faasi modeme vou disilahit im doi duana vam bak,’ lahame ozodume modeha ame toheda labe gi doi perak oona vàmtea loia. Abo dam ba li na meedaha dam labe iho vaha bakti ulohona loia.
11. Labi modeha ame dam labe iho ame doi perak oona vàmtea vaha bake faki ihimo vahi utoho deda laba le ab feàtàdamam.
12. ‘Oo, oho ozom, oho iba neàna modehe? Ne, dam jam lima faasi na modehe dam lam gi jam vàmtea na tau modehe bak. Lahana im abo dihambe faasi meedahit vou disihi dam abo ala gaimeot beoho dam nim oho akati gi doi ulohodesu lodahela?’ lahame ab beàdamam.
13. Lahahat utoho deda labe aime ame dam meida laba ab vi gagoham. ‘Emti vou alemda oa, em ba uba git modehe vabak. Eho amu uba ahamte dihambe gagu olulo modem di labe neha, “Digat vàmtea le modehe bak gohali lom doi abo perak oona vàmtea loda tame,” lahame ahate uba gagohemu uho aime uledi le em na meedaha dam taia?
14. Akati eba beàdàla? Om gi ozahit ame doi ve om num bake fa vou lale. Em ba ame doi lom di ba fetehesu vi lodam kaio. Em gi dam ba le na modeheda modeo, amu le na modeheda modeo, gi ulohodesu lolo àhàkehe bak.
15. Eho etei lodaha doi lam em doi deda modem vaba? Um git ozoho. Ehemo naedat it ozome meedam neà bak. Em gi doi deda modem labe ehemo ozome da iudu iuba nehasu lo. Da iudu iuba neo nehasu lo. Gi labihadam bak. Ebe eho ilabdi meedam bak lam um eba teidi fakehe?’ lahame ab gagu esuham.” Lahame im totobe lada lam labihasu ab fi koadaham.
16. Labi fi koadume neàdi Yesusat neo ab vi gagoham. “Alat ba diamut Aho Eba modi Eho Boehàdateboli dam vuusu im vahokedam di neham bak ehete. Damat etei bak niba esdam di vedi nehi ozoda. ‘Da lada lam ee feà vabda ame?’ lahame feàtàdam dam lam Alat ahole gohali na lodam dam am bak. Lahana damat neha, ‘Da lada lam ee feàda ame?’ lahame vou baedam dam lam Alat ba gohali na lodam vab dam am bak,” lahame ab vahokedaham.
17. Labi ba neo Yesusat Aho kota Yerusalem laba zooledam di lam dam duana aba vi tau lada. Ladam di labe zie doni bake Yesusat Aba vi tau meedam dam dua belas lamota gagu fàsi damat Aba kota Yerusalem laba ba modem im neo fet ab vameadamam.
18. “Um nasi iademe aimale. Im etei vahi kota Yerusalem laba zoolelo ladam bak. Labi laba lafusi Em Abo Asum Ahoba Iubet Bak Niba Li Dateleheda nim meit Em vou foho tame. Labi vou fohome damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti laham dam laba ub lu ame dam labe fa Eba uloodume vi aime ozobohudi neàdi, ‘Nasi otele,’ lahame ahu vàmadi gagu esu tame.
19. Labi Em otem bak gagu neàdi fa neo Yahudi damat modem vab dam abo Ala bake tu vuzehem vab dam laba neo ub lu ame dam labe Em gut ve fu tozoidume neo vou futoi na sokba nasbe ahit alibulehena labe Eba foadume geàda tame. Gi labihadume ut tetehesuhunaso laba esu paku dou ote tame. Lahana fa usi behàsdi Em eloho bak labet Alat modi fa ahedi usa tame,” lahame fet ab vameadaham.
20. Labi ba neo Zebedeusam nam labe aho Yesus bake im ailo modemu am adam Yakobusti Yohanesti abo Yesus bake vi tau meedam dam behàsu lam gagu vou le Yesusat avaesdam laba netàdi am oiat ahu adat iedi ogomasu ahit bake ab biteham.
21. Làhàmu Yesusat ab gut gagoham. “Eho oba ana im modem bake om Eba lehela?” Lahahat nam nibe fa gago, “Vabà! Eho gi neham bak Oba gagu vi ailo leha. Ba diamut Alat Oba modi Ohomo Boehàdateboli Oho dam bake deeli vame Om damali Oho vuusu im vahokedam bak faaseo modem di em adam ahim nim Oho gagome fa neo tau boehà damali meida Om ahi tot laba nusu dam bake tau vuusda. Labi meida Om soi tot laba nusu dam bake tau vuusda. Labihadam neào?”
22. Lahame labi gagoha Yesusat fa ame dam ahim labe am oiti ab gagoham. “Ne lahana uho etei lab gagoho im lam um it ozom vaba? Na feàna Eba modi geàdamna etei Eba modi ozolo modem im ehe bak. Ame bak lam uba laha modi ozolo vouhom neào? Um laha geàdam ule?” Lahahat ame dam ahim labe fa gago, “Modem neà bak. Im ahumdi neàdehe bak.”
23. Lahahat Yesusat fa neo vi gago, “Lo, imbo bak. Na im feàna Eba modi geàdamna lamti ulohona uba laha modi geàdam bak ehe bak. Lahana meia gagu fa Em ahi tot modeo, soi tot modeo, laba tau nusu vahi dam bake vuusu im vahokedam bak lam Ehemo gagu modem biem bak. Lam gi Em Aiat Ahamo fi hasi ahumdi ozome gagodam bak.”
24. Lahame lab ot vameaidam im lam Aba vi tau meedam dam totbaho sepuluh labe vi aime modeha ame dam behàsu laba ab fakeham.
25. Labihàmu Yesusat Aba vi tau meedam dam gagu fa vazisi neàdi im ab vahokedamam. “Um ozobohuna taia? Yahudi damat modem vab dam labe vedi, ‘Im abo feàte,’ lahame iho vuusdam dam laba tet ootedam labe im vahokedam di gi dae meobeat vahokedam meo bak. Labi im ee dam labe iho vuusdam dam laba teubeat vuusdam labe iho gagom im damat meeda. Labihadam meo bak.
26. Lahana um ba a labihadamule. Um fa gi nehasu meedale. Uho meidavat nehi it ozo, ‘Alat fa eba modi ee feà datelese,’ lahame it ozomda lam amu nasi gi amti vahi Eba vi tau meedam dam totbaho laba daleà na meedam labe dam labe im na meedam datelele.
27. Labi laha uho meidavat nehi it ozo, ‘Alat fà eba ee feàda modi talu vousai dam totbaho ee vousi fa eho vafozi bisi feà datelese,’ lahame it ozomda lam amu nasi gi amti vahi Eba vi tau meedam dam totbaho laba daleà ladehebeat im na teo meedam datelele.
28. Eho gi neham bak ozome uba labi gagoho bak. Em Abo Asum Ahoba Iubet Bak Niba Li Dateleheda nim Eho laha labihaha bak. Eho bak niba lehe di ba nehi it ozom vabak. ‘Em feàda am bak. Dam feà vab dam fa bake nusu Eho gagom im aime meedam damali Eba taum bohu meedale,’ lahame it ozome lehe vabak. Em gi feà vab Dateli dam bake taum bak ozome lehe bak. Abo gi dam bake tau bohu vuusdume damat Em si otem bak. Dam ahebu iho faina meedam bak lam Alat beom bake Ehemo ahit uledi damat Em oteme vasea gohali ot vai fa faamom bake ozome lehe bak. Labihàmu uho Ebe Eho ozome lehe bak lamti ulohona meedale,” lahame ab vahokedaham.
29. Labi Yesus Aba vi tau meedam damti iho num debu Yeriko vou esmozi ladam di labe dam duada zi Aba vi tau vulada.
30. Labi ladam di labe dam fako faidi na aam biemda behàsu gi zie obe laba aida. Labi ame dam behàsu labe dam duada zi lebohotedam bak dae aidàmu ab gut gagoham. “Bak nim amat ana im meedàla?” lahame vabi ostame gagoha meit neha, “Ne, Yesus gi ab lebohotelo modemam bak.” Làhàmu dam fako faida behàsu nibe ab vi buddamam. “Dat Ahamda Boehàda Daud Vou Faat Lehe Mekehàda oa, Om iba aame faobekesi im neà bak tau meedaleee. Alat Gagu Fihasi Vimteme Oluhu Dat Boehàda, ‘Om am tame,’ laham bak im ozobohuteee.”
31. Lahame buddume modeha ame dam nasi dozeadaha dam labe fa gago, “Mm, a gagomule,” lahame mali modeha ame dam behàsu nibe ailahigeàmu fa bisteat neo ab vi buddamam. “Dat Ahamda Boehàda Daud Labe Vou Faat Lehe Mekehàda oa, Om iba aame faobekesi im neà bak tau meedaleee.”
32. Lahame bisteat neo vi buddameilahit Yesus gi laba ab duzuham. Duzu gago, “Le gagome vou lele,” lahame gagome le ve vou li netàdi vou duzu modeha Yesus dam ahim laba ab gut gagoham. “Eho uba akati modemna uho Eba buddàla?”
33. Lahame gagoha ame dam ahim labe fa gago, “Kaio. Ai oa, im gi fako na aam biehemu àvodi na aalo àhàki Oho iba ulasi modi fa neàdem bak ozome Oba vi buddalo.”
34. Làhàmu Yesusat aam faimu faobekesi ame dam ahim labe im fako laba ulasi modeha im fako fa na aam bak ab neàdeham. Labihàmu ame dam ahim labe fa Yesus bake tu ab vi tau vuladamam.
1. Labi Yesus Aba vi tau meedam dam lamti iho neo tom ladume kota Yerusalem fuseo vabali Zaitun Dee Dozeadaha Bak Buzoho labe modesuhu num debu Betfage laba tom le odo. Le odosi Aba vi tau meedam dam meida behàsu gagu ab olulo meedamam.
2. Labi olulo modem di labe Aho nehame vi vameada. “Um ahim nim num debu iba netàdeheda laba lafusi aameam keledai fi ho ameaso lo vààsdamda labe am adat gàhàda lamti laba doudamna aa tame. Uho le lo vuhatoi vuusu amait vou lele.
3. Lo vuhatolo modem di meit uba nehi gagomeam, ‘Im keledai baka uho ana modelo lo vuhatolo modela?’ labihameam làhà uho fa nehi gagole. ‘Boehàda Aba Aho ozoho baket modelo modemu vou lalo mozo,’ lahame uho labihasu gagomeam ame da labe gi uledi uba lu olum bak,” lahame ab vameadume oluham.
4. Etei lab gagoho bak lam dat ahamda Alat vameadaha im aime fa dam bake ahate vameaidahada labe aho aham di iube im nehi fet toedume esuhu bak lam modi imbodelo labihaha bak.
5. “Dam num debu Sion laba azihi dam laba gagole, ‘Nasi aamale. Uba vuusdam Boehàda labe etei uba ab ledamam tame. Abo daleà ladehebeat ahu nemahubat li im vameadalo modemu Am gi keledai adat gàhàda labe am toha laba nusu vou ledam bak uho ab aadamam tame,’ laham im lam Sion dam laba vameadale.” Lahame aham di iube labihasu fet toeme esuhu im lam ab modi imbodeham.
6. Labi Aba vi tau meedam dam behàsu labe le aaha Yesusat lab gagu oluhu bak lam ab imbodeham. Ame keledai fi ho ameaso lo vààsdamda labe am adat gàhàda lamti laba doudamna ab aaham. Làhàmu Yesusat vi gagu oluhu baket ab modeham. Lo vuhatoi ame na fi ho ahim lam Yesus bake fa ab vou leham. Labi fa vou li ibi iho dusuhu sue sona ahobada vihilame ame keledai adat dooda labe am toha laba ab nom gutaudaham. Labi gutaudume neàdi Yesusat zisi nusu ab ladamam.
8. Labi lab ladam di labe dam dua totbaho labe im sue sona ahoba duhuda lam laha vihilame ame keledai Yesus vou lam zie laba vou olualada. Labi dam totbaho labe laha bom dee bake le bom alahaso fi kbodume ame zie laba vou olualada. Labihada. Damat ozo, “Yesus abo Boehàda feàda am tame,” lahame ahu adat iedi labihada.
9. Labihadume Yesus lab vou ladam di lam dam dua zoho nasi dozeadume lada. Labi dam zoho ba ohuse vi dozeame mitaeda. Labihadam dam labe im nehasu buteme vou bae lada: “Hosana! Ala abo feàteee. Boehàda Daud Labe Aho Vou Faat Leheda Meida nim abo feàteee! Dat abo Alat Aho Gagu Olu Ot Vai Im Dedateli iba etei ledamda nim abo feàteee!” Lahame vou bae lada. Labi meit neo nehame vou bae lada. “Hosana! Imo dam ahebu ee bisi vousai feà Datebolehe Ala laba, ‘Am abo feàte,’ lahame vou baedaseee!” Lahame meit buteme vou bae lada. Labi neo meit buteme vou bae lada. Labihada.
10. Gi labihasu vou bae ladume kota Yerusalem laba vou fusi modeha dam bak deda labe ame bak lam gut aihemu àvodi ihimo ab ot gagoidamam. “Uho ozom, dam zi feà nim ama bake deeli vou bae ledàla?” lahame meit gago meit gago labihadume vabi ab ot gagoidamam.
11. Lahame labi ot gagoidume modeha dam etei leheda zi labe fa ab gagoham. “Um ozobohudem vaba? Da nim abo Alat vameadaha im aime fa dam bake ahate vameaidahada Galilea bak zoho labe num debu Nazaret labe leheda Yesus am bak,” lahame ab vameadaham.
12. Labi Yesus kota Yerusalem laba lafusi Fihasi Ala Bake Vou Baedam Num Vàmteabu labe am ad oli aam bak tomba laba le duzu aaha damat Ala bake vou baedalo na Ala bake lomna ot loidam bak aahemu meoli dam na ot loidam dam zi lamti na vadam dam lamti meoleme ootedume futoda. Labi laha damat dam debu mei doi vame fa dam debu mei doi ot loiam doi vaheme ot loidam beahuba lam vuu vaktemoda. Labi laha damat meki fi ho ot loiam di nusumna lam laha vuu vaktemoda. Labihasu ab veimodamam.
13. Aho meoli gago, “Um ozom vaba? Meit Alat Vameadaha Im Toedahana laba im meida nehame toehe bak. ‘Alat neha, “Em num nim gi Eba tom gagodam numat modem bak.” ’ Lahame toehena um akati aalahigeàmu meit na aa ve voutame fi olehe bak ozome vou oli vasti esdam bakti ulohona modi Em num feàda niba oli im mei faasi meedàla?” lahame faki meoli meedam labe ame beahuba zi lam veimome afoezobe dam soa neo odosi veimome dam ab ilidamam.
14. Labi ame di labe dam aheda labe fa dam fako faida zi lamti dam nao zoho nutabedeheda zi lamti labihasu ame Fihasi Ala Bake Vou Baedam Num Vàmteabu labe am ad oli aam bak tomba laba Yesus bake vou ledahemu Aho ulasi fa neàdeda.
15. Labihadume modeha ame Num Vàmteabu labe am ad oli aam bak tomba laba dozeadaha data zi labe ab faasi buddamam. “Imo dam ahebu Alat Gagu Fihasi Vimteme Oluhu Dat Boehàda bisi feàda nim abo Boehàda Daud Labe Aho Vou Faat Lehe Mekehàda nim, ‘Abo feàte,’ lahame vou baedase,” lahame ab buddamam. Labihadume modeha damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu iho Yesusat damat ihimo modem biem im feàna meedaha bak lam aaha bak lamti ame data buddaha bak aihi bak lamti labihasu meedam bak aahemu faki feà bak ab fuham.
16. Labi faki, “Yesus ame Dàt modem kaio,” lahame ozoho labe Yesus bake ab gagoham. “Om data zi nibe oba vou baedam bak om aidà? Oho taho meoleme fa dae vabalele.” Lahame labi gagoha Yesusat fa gago, “Lo, Em aidam bake. Ne, meit Alat Vameadaha Im Toedahana laba im meida nim um aaha vaba? Ame im neha taia? ‘Ai Ala oa, Om amu gi data vohomdati tatvamdati nehi fet ozome esuhu bak. Ame data zi labe Oba, “ ‘Om abo feàte,’ lahame Oba vou baedase,” lahame fet ozome esuhu bak.’ Lahame labihasu toehe im lam um aaha vaba? Data gi ahole meedam bak.”
17. Lahame Yesus labi gagu neàdi Fihasi Ala Bake Vou Baedam Num Vàmteabu labe am ad oli aam bak tomba labe futoi neo Aba vi tau meedam damti iho kota Yerusalem vou esmozi fa neo num debu Betania laba ab le iham.
18. Labi Betania laba le izi dihambe neo Aba vi tau meedam damti vahi kota Yerusalem laba fa ab ladamam. Ladam di labe Yesus idoali meeda.
19. Làhàmu aaha ut ara zie obe laba doudam bak ab aaham. Aahemu oo sitoi àm bak ozome le netàdi nabitedaha oo aam kai. Gi et but neàdi modesda. Labihàmu ab uloodamam. “Seee. Ut nim ba oo a valemule. Gi mailele,” lahame uloohoilahit gi ame di labe am et lam ab bozileham.
20. Labi modeha Aba vi tau meedam dam labe ab aame àvodeham. Àvodi gago, “Aa làhà! Ut lam akati modi Da nibe gi etei aame ulooha ame di labe ut et lam bozili alahela?”
21. Lahame labi gagohemu Yesusat fa ab gagoham. “Lo, ame ut et bozili alahanata ala. Lahana Eho etei uba gagolo modem im imboda nim nasi aima. Um ahu behàsdi vi ozodam vaba abo uho Eba mahate tu vuzehi ahu vàmadi meedameam làhà uho fa Eho ame araso lam aame gagu alaha bak lamti ulohona neo modem bak. Lahana gi im feàna lada lamota modem vabak. Abo gi im feàna amomoi laha uho neo modem bak. Abo gi bak buzoho niba neha, ‘Nasi itezeavai itea feàna laba nom ilu fi oli setele,’ lahame gagom di ame baket modem bak.
22. Abo ubu uho valo Ala bake tom gagodamna lam uho nehi fet ozo, ‘Ame na lam Alat iba lom bak,’ lahame ahu vàmadi tu vuzehemeam làhà ame na lam uho vam bak,” lahame ab vahokedaham.
23. Labi Yesusat im lam vameadume neàdi neo ladume ame Fihasi Ala Bake Vou Baedam Num Vàmteabu labe am ad oli aam bak tomba laba le ame bak laba lab dozeadaha dam zi laba vahokeda. Vahokedume modeha damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi lamti laham dam labe Yesus bake li netàdi daet beàdalo vabi vi ailo ab gagoham. “Ne, Oba amat modi vizi teudi im feàna lam Oho duzu meedàla? Oho nib li meedam im nim Oba amat gagu im dedateli Oho vuusu meedàla?”
24. Lahame labi gagu modeha Yesusat fa gago, “Im ubuda faode. Ebe Eho etei uba fi bovai vi ailo gagomda nim uba nasi vi gagu aise. Ne, Yohanes Mei Vuu Valo Baptisleiamda labe aba aho amu mei vuu valo baptisleiam bak lam amat Yohanes bake gagu aho ame bak lam meedahela? Alat aba gagu aho ame bak lam meedaheo? Laham vabameam damat aba gagu aho ame bak lam meedaheo? Akatihahela? Uho ame bak lam Eba fa gagomta uho etei Eba lab gagu vi ailo modem bak lam Eho fa uba vi gago tame.” Lahame labi gagu vou faoha ame Yahudi ee dam zi labe gi ihimo ot gagoida. “Uho ozom, iho akatihasu fa Yesus bake gagoe? Iho nehameam, ‘Alat Yohanes gagu olu meedaha bak,’ lahame labi gagomeam làhà Yesusat fa iba nehame vàlu gagom bak. ‘Ne, um lahana akati Yohanes am im aime tu vuzehem vaba moudume mohela?’ lahame iba labi fa gagom bak.
26. Laham vaba iho neo nehi gagomeam, ‘Damat gagu oluha,’ lahame labi gagomeam làhà dam etei iba tau dozeadaha dam totbaho zi nibe iba beom bak. Neham bak. Dam etei iba tau dozeadaha dam totbaho zi nim, ‘Yohanes ba damat gagu olu meedaha vabak. Am gi Alat vameadaha im aime fa dam bake ahate vameaidahada meida am am bak,’ laham bak lam ozobohu labe iho fa im mei gagomeam làhà dam iba faki beom bak.”
27. Lahame ame dam busaoda zi labe ihimo vou faovoi iedi fa vei biehenali Yesus bake fa ab vi gagoham. “Yohanes aho amu lab meedaha bak lam, ‘Amat aba gagu olu meedàla?’ laham bak lam im bieho.” Lahahat Yesusat fa dam laba ab gagoham. “Lo, làhà Eho li meedam im ahebu nim, ‘Amat Eba gagu olu Eho im dedateli meedàla?’ laham bak lam Em laha ba uba gagom vabak,” lahame ab vasteham.
28. Yesusat labi gagu neàdi fa ame Yahudi dam vuusdam eeda zi laba neo vi vahokeda. “Eho etei uba totobet fi koadalo modem im nidi nim uho mahate vi ozodale. Da nibe adam behàsu faasi vou buduali neàdi am aiat am adat datahida bake le gago, ‘Da adat busaoda oa, om etei em anggur dee laba le na modele.’
29. Lahame labi gagoha am adat fa gago, ‘Vab. Em moho,’ lahame gagohoda labe fa ba uledi am aiam anggur dee laba le fa na meeda.
30. Labi neo ame da labe am adat basdate neo le gago, ‘Da adat basda oa, om etei em anggur dee laba le na modele,’ lahame labi gagoha ame da labe uledi gago, ‘Lo, ai eho mode tame,’ lahame gagohoda labe fa vei mu am aiat gagoho bak lam ba le modehe vaba ab moham.”
31. Lahame Yesusat im totobe lam fi koadume neàdi fa neo vi ailo ab gagoham. “Làhà um etei akati ozoe? Adat adida am aiat im gagoho bak aime uledi modehela?” Lahame labi gagoha ame Yahudi busaoda zi labe fa gago, “Dat datahida labe uledi modehe bak.” Lahame labi gagohemu Yesusat fa neo gago, “Lo, uho abo imbona gagoho bak. Lahana Eho etei uba neo gagolo modem im imboda nidi nim laha nasi aima. Um gi ame adat basda labe aho meedam bak lamti ulohona meedam damat modem bak. Neham bak. Kaisarleheda bake lodam doi pajak atem dam lam abo uho neha, ‘Faite,’ lahame tozome umti vahem mu fi hasi esuhu dam zi lamti labi lahi fi lohoda zi lamti labihasu umti vahem biem dam labe um fa vafozi amu nasi Alam damali Aho vuusu im vahokedam dam am bak.
32. Neham labe labihadam bak. Yohanes Mei Vuu Valo Baptisleiamda labe aho amu nasi duzu lehe di lam aho uba neha, ‘Alat Aba Aho ozome esuhu bak lam bisi im vamdesu meedam bak gi neham bak,’ laham bak uba vahokedasome modeha aba aho vou lehe im lam um gi tu vuzehem mu voedaha bak. Lahana pajak doi gi teo vi atem dam zi lamti lahi fi lohoda zi lamti labihasu nasi tu vuzehi ibi iho faina meedam bak lam voedume fa ahu neà bak vàmadi meedaha bak. Lahana uho ame bak lam aahanàme ba im abada tu vuzehi ubu uho faina meedam bak lam voedume fa ahu neà bak vàmadi meedaha vabak,” lahame ab vahokedaham.
33. Labi Yesus im lada lam vameadume neàdi Aho ame Yahudi dam busaoda laba im meida nim neo nehame vi vahokeda. “Eho etei uba totobet fi koadalo modem im nim uho mahate aime vi ozodale. Dat utoho deda nibe am tat vueheba laba am na meedam dam gagome anggur neb zi deddume neàdi esu. Labi neo am na meedam dam laba neha, ‘Um laha em anggur dee nim ke vou vahe lame fi bovai esule. Labi afoezobe ame anggur oo amdehezobe vaheme meit duzu uname vaksa futom bake ozome ke baana nabime ve fa ahit feme bumatali esule. Labi neo damat em anggur dee aa li vam bake azi nom vou aasdam num kilana laha mome duzule,’ lahame gagu olu ame baket ab modeham. Labi modeme neàdi anggur deda labe bak mei bake lalo modemu dam na debe soali modeme vahem dam zoho laba gago, ‘Uho em anggur dee nim teohet vou aasdume amdehezobe modeme vahedam di zoho uho va. Zoho eba naedate vahedume esu. Labihadale,’ lahame it gagu esmozi bak bohu bake ab laham.
34. Labi le aidamehamdi ozoha, am anggur oo vaedam bak fuhemu fa am na meedam dam làtela gagome ab oluham. ‘Em anggur dee teohet vou aasdam dam labe iho ot loiame vaha doi ebe eho vam zoho eba esuhuda le vame fa vou lele,’ lahame gagu ab oluham.
35. Labi le gagoha ame anggur dee teohet vou aasdam dam labe ame dam làtela lam lehemu ab gut siàdaham. Siàdume meida abo ote. Labi meida neo ket beodume ote. Labi meida gi fota beome isi olu. Labihada.
36. Labi anggur deda labe gut aaha dat vàmtea gi saemea fa lehemu neo am na meedam dam dua totbaho neo gagome fa duali ab oudaham. Labi oudume lafusi modeha ame anggur dee teohet vou aasdam dam labe neo gi ame baket meeda.
37. Labihàmu ame anggur deda labe neo gut aaha neo dam zoho gi saemea fa ledahemu vi ozo, ‘Ne, em akati mode? Làhà gi em adat nim neo gagu oluse. Eho labihameam dam labe fa em adat bake vei ladi ahu adat iedi fa eba doi lu olum zoaha bak,’ lahame vi ozome neàdi am adat ab gagu oluham.
38. Olu ladume lafuseo vabalehe di labe ame anggur dee teohet vou aasdam dam labe gi bak bohulana gut aaha anggur deda labe am adat ledam bak aahemu neha, ‘Da nim ba am aiam na misia vamda am taia? Imo da nim oteme afoezobe anggur dee nim fa im na misialese,’ lahame im aa ab odoadaham.
39. Labi im aa odoadume neàdi ame da fuhuzobe neo gut si vou kea lame anggur dee natàh ke labe vou futoi bako iuba ab oteme vooham.”
40. Lahame Yesus ame im totobe lam fi koadume neàdi neo ame Yahudi dam busaoda zi laba vi ailo ab gagoham. “Uho ozom, ame anggur deda labe fa li am anggur dee teohet vou aasdam dam laba le akati modela?”
41. Lahame labi gagoha ame Yahudi dam busaoda zi labe fa gago, “Ame faina meedam dam lam aho beodume ohabededume setem bak. Labi beodume am anggur dee lam fa dam amomoi gagome fa vou aasdam bak. Abo am anggur oo amdehezobe modeme vahedam di damat iademe ot loiame doi aba naedate lom zoho lam lom meoda ozome fi me vadume vou aasdam bak.”
42. Lahame labi vameadume neàdi Yesusat fa neo vi gago, “Lo, um gi imbona gagoho bak. Lahana meit Alat Vameadaha Im Toedahana laba im meida nim um vi aame ozobohudehe vaba? Ame im lam gi uho Eba tu vuzehem mom bake nehame fet toeme esuhuna taia? ‘Dam num moadam dam labe, “Faite,” lahame mu vooho ke lam fa feà Dateli bisi num mome teudem ke am bak. Ame bak lam Boehàda Alat Ahamo ozome modehe bak. Labi Aho lab modehe bak lam iho aam di damat ihimo modem biem im feàna modehena aaha bak.’ Lahame toeme esuhu im lam um aame ozobohudem vaba? Ame im lam etei ab imbodi uho Eba ab moudamam bak.
43. Labihàmu Eho uba nehi gagom bak. Em Alat Gagu Fihasi Vimteme Oluhu Dat Boehàda niba uho Eba tu vuzehi Alat uba deeli vame Am damali vuusu im vahokedam bak lam uho modem mohemu Alat fa dam amomoi bake abo Aba Aho gagohona uledi meedam dam laba fa Am damali vuusu im vahokedalo modem bak. [
44. Eho gi neham bak ozome uba labi gagoho bak. Ame ke lam Alat Gagu Fihasi Vimteme Oluhu Dat Boehàda Em am bak. Meit Eba momda lam gi da nibe ke bake gitadi vàhàdemdati uloho bak. Laham vaba ame ke labe ame da laba fi tmai bake deebosi setemdati uloho bak.]” lahame Yesusat ab vameadaham.
45. Labi ame damat Ala bake lomna ve vua vahudam toheda zi laba vuusu im vameame faheme modiam dam lamti Farisi dam zi lamti iho Yesusat etei lab totobet fi koadaha im lam aihemu ab ozoham. “Oo, Yesusat etei lab vameadaha im lam gi iba vàlu vameada taia? Aho li vahokedaha im lam iho aim mu vooho bak laba ozome ame anggur dee teohet vou aasdam dam laba gi vàlu im totobet fi koadaha taia?
46. Imo Yesus sise,” lahame ahu gukeme modem faidi seti vi ozodaha dam duada totbaho labe vedi neha, “Ame Da Yesus abo Alat vameadaha im aime fa dam bake ahate vameaidahada meida am bak,” lahame tuhuda feà labe iedi sim bili gi vabedda.
1. Labi im totobe lada lam fi koadume neàdi Yesusat Aho ame Yahudi dam busaoda zi laba im totobe meida nim neo nehame ab fi koadamam.
2. “Alat neha, ‘Um Em damali Eho uba vuusu im vahokedam neàte,’ lahame fet gagu esuhu im lam damat aime uledi Alam damalem bak lam Eho uba vameadase. Ame bak lamti dat boehàda labe am adat nam vam bake vazisi na àm bake dam bake gagu oluhu im lam damat aime uledi lem bak lamti uloho bak. Neham bak. Dat boehàda labe am adat nam valo modemu fa vazisi na àm bak ab ozoham.
3. Làhàmu am na meedam dam laba gagodume aba aho ozoho dam iuba, ‘Lele,’ lahame fet gagu esu. Labi neo dam iudu iuba, ‘Lele,’ lahame fet gagu esu. Labihada. Labi ame na àdam digat fuhemu am na meedam dam laba neo gagome aho amu di iube, ‘Lele,’ lahame fet gagu esuhu dam laba ab gagu oluham. ‘Neàdeho. Nasi ledale,’ lahame gagu olu vou faoha dam lem mouda.
4. Làhàmu fa neo am na meedam dam totbaho neo gagome olu. ‘Uho dam eho amu fet gagoho dam laba le nehi gagole. “Nasi ledale. Na zi feà nim àdeho. Em abo sapi dooda zi nimti sapi adam eho amu na vaheme budualeheda zi nimti ahebu oddume ohume àdemahedume neàdeho. Nasi em adat nam vam bake ozome deeli vahi na àm bak niba nasi ledale.” Uho labihasu le gagodume vou ledale,’ lahame am na meedam dam neo gagome ab oluham.
5. Labi dat boehàdat aho amu fet gagu esuhu dam laba le gagoha dam ahebu gi ailahigeàmu fa im amomoi la modi le modida. Dat meida gi am utoho laba le na meeda. Labi dat meida labe aba aho doilem bak laba le na meeda.
6. Labi ame dam totbaho labe gi boehàda labe aho etei oluhu dam laba gut siàdume afoezobe beodume ab oddaham. Labihada.
7. Labihadàmu ame boehàda labe aho ame bak lam aihemu faki feà bak fusi am meo dam zi laba ab gagome oluham. ‘Dam lam le oddume fa vi vatause. Labi im num debu bak lam laha vuat beole,’ lahame gagu olu ame baket ab modeham.
8. Labi ame baket modi neàdi am na meedam dam totbaho neo gagome bakamta dozeadume neàdi neo ab gagu oluham. ‘Em adat nam vam bake damat deeli vazisi na àlo modemna zi nim àdeho. Lahana eho amu neha, “Lele,” lahame fet gagoha moudaha dam lam ahole lehe vaba vooho bak.
9. Labihàmu uho zie sedieba bak laba le dam gi laba goomda zi ahebu gagole. “Na àm bak niba li vazisi na àdase,” lahame gagu fa eba oluidale,’ lahame ab gagu oluham.
10. Labi am na meedam dam labe le ame baket ab meedamam. Abo zie sedieba bak laba le iho aaha dam ahebu gagodume na àm bake ab oudaham. Abo dam faina meedam dam modeo, dam im neà bak meedam dam modeo, gi ostame iuba le gagu olu. Iuba le gagu olu. Lahada. Labi oudume modeha ame num laba dam vazisi na àm bak kekesi guguai feà bak ab fuham.
11. Labi ame boehàda labe aho dam etei vazisi na àlo lehe damat esdam bak laba oli nabidume aaha meit nam vam di damat deeli vazisi na àm bak ozome dusum sue dusuhu vab dat labe am gi sue giida dusu li aidam bak ab aaham.
12. Ame bak lam aahemu ame da laba ab gagoham. ‘Om sue giida dusuhuda akati niba olehela?’ Lahame gagoha ame da labe ba dae bum kai. Gi daleà aida.
13. Làhàmu ame boehàda labe am im ot vai meedam dam laba ab gagoham. ‘Da nim nasi sile. Labi am anekehà ahim gia. Nao ahim gia. Labi vou futoi bàhàgo bak iuba bisi aibu feà bak laba voou ame da nibe fà kikezi geàdam labe ahu faidi meb dae feàna faasi meedase.’ ”
14. Lahame im totobe lam Yesusat ab fi koadaham. Fikoadume neàdi neo vi gago, “Um nasi ozomale. Alat neha, ‘Aho Am damali vuusu im vahokedase,’ lahame dam bake gagodam di gi dam dua bake gagodam bak. Lahamnàme ame dam zi lam bisi ahebu uledi Am damali ame bak lam meedam vabak. Gi dam zohota Am damali aho vuusu im vahokedam bak,” lahame ab vi vameadaham.
15. Labi ame Farisi dam totbaho labe iho Yesusat etei iba vàlu totobet fi koadaha im amudati badati aime faki ame Fihasi Ala Bake Vou Baedam Num Vàmteabu labe am ad oli aam bak tomba labe futoi ab ladamam. Ladam di labe ozo, “Im ba Yesus akatihasu modi vou fohome siela? Làhà imo gi nehase. Iho vou faobe Yesusam ahu ozolo ahit fi bovai vi aime Aho im git gagoho bak iho aihizobe vàlu sise,” lahame im aa ab odoadamam.
16. Labi im aa odoadume neàdi fa ame Farisi dam labe ibi iho vahokedam im ozobohudelo vi tau meedam dam zi ame. Labi Galilea bak laba azim dam laba vuusdam Boehàda Herodes Antipas bake taumda zi ame. Labihasu gagome Yesus bake ab oluham. “Yesusat git gagoho bak aime vàluse,” lahame im mei im meime vi ailo ahit Yesus bake ab oluham. Labi le Yesus bake ab gagoham. “Guru oa, Oho lab meedam bak lam im ahebu ozobohu bak. Om abo im vamdesu meedamda Om am bak. Labi Alat ozo, ‘Dam bakda nehasu meedase,’ lahame Aba Aho ozoho im lam Oho dam bake im vahokedam di Om laha gi im vamdesu imbona vahokedam bak. Om ba neham bak modem vabak. ‘Da lam ee feàda Eba im gagohe? Làhà aime tuse.’ Laham vab di, ‘Da lam ee vabda Eba im gagohe? Làhà Em aime tum bak mose,’ lahame ba dam fahedam vabak. Labiham labe damat Oba ozomsu gagom di Om ba ame im lam aime iedi vuzehem vabak.
17. Om labiham dàt modemu iho nehi Oba gagu vi ailo modem bak. Im Yahudi dam ihimo dat ahamda Musat toedume fi hasi esuhu Im Feàna zi lam iho tu vuzehi meedam labe Oho ozom, pemerintah iba vuusu meedam bak gohali lodam doi pajak lam iho ame doi lam fa Kaisarleheda laba lodam neào? Ame Im Feàna zi labet iba maleheo? Akatihà?”
18. Lahame labi gagoha Yesusat ame dam labe Aba vàlulo ahit keobaedume fi bovai vi ailo modem bak lam Ahamo ozobohudi fa ab gagoham. “Um gi ahobat neàdi Eba li vameadam damat modem bak. Uho akati, ‘Eho git gagose,’ lahame ahit Eba li gagu vi ailo meedà?
19. Uho ame gi vi tau lodam doi pajak oona perakat modehena lam Eba fi male.” Làhàmu ame dam labe le ame doi oona visoi fa vou li Yesus bake ab loham.
20. Labi Aho ve vousai dam bake fi si vimtedam labe ab vi gagoham. “Ame doi nim amam dauhati ulohona modesuhela? Labi amam ee laba toehela?”
21. Lahahat dam labe neha, “Dam ahebu vuusdam Kaisarleheda labe am dauhati am eeti modesuhu bak.” Lahame labi gagoha Yesusat fa neo vi gago, “Lo. Làhà uho dam ahebu vuusdam Kaisarleheda laba na abada lam fa naedate loda. Labi uho laha Alat Aba Aho gagohoda lam laha meeda. Labihadale.”
22. Lahame labi gagohemu ame dam labe Yesus git gagom bak aiesome ame im lam gagoha Yesusat git gagom vabamu àvodi gi daleàdi Yesus vou esmozi ab iliham.
23. Labi ame digat zoho labe Saduki dam labe laha neo Yesus bake gagu vi ailo ab li dozeadaham. Ame Saduki dam labe iho ozome tuhu im gi neha: “Mei elom di ba fat ahedi usam kaio,” lahame tu ozodam dam am bak. Laham dam labe Yesus bake li vi ailo ab gagoham.
24. “Guru oa, dat ahamda Musat aho toedume fi hasi iba esuhu Im Feàna zi lam im meida nehame toeme fi hasi esuhu bak. ‘Meit am itbaho fatoho vaba elomeam làhà fa ame nam maboe lam am dam zohot fa ve data faasi, “Ame koei labe am data am tame,” laham bak ozome debu bohulalelo ame maboe lam koei labe am vahadat modeo, am dubut modeo, fa vale,’ lahame Musat aham di iube labi toeme fi hasi iba esuhu bak.
25. Ne lahana iho etei vouholo modem im nim Oho nasi aimale. Amu di iube ame dam tujuh ehet. Datahida ame. Labi donida auoholehena ame. Labi domuàda ame. Labihasu ame dam tujuh labe dat datahida nam ab vaham. Labi ve modeha ame nam lam data faaha vabna dat ab eloham. Labi ame maboe lam ame koei laba vi tusuhu dàt fa neo ab vaham.
26. Labi ve modeha ame nam lam data faaha vabna dat neo ab eloham. Labi ame maboe lam dat doni dàt fa neo ab vaham. Labi ve modeha ame maboe lam data faaha vabna neo dat ab eloham. Gi labihasu vou mode ledume dat domuàdate ab vou fuham. Labi vou fusi modeha gi neo ame baket modi ame maboe lam data faaha vabna dat ab eloham. Labiha ladume ame dam tujuh ahebu ab foli seteham.
27. Labi ame maboe lam ba neo ab vi eloham.”
28. Lahame ame Saduki dam labe iho ame im lam vouhome neàdi, “Im elom di ba ahedi usào?” laham bak lam tozolo Yesus bake neo vi ailo ab gagoham. “Làhà Oho lab gagoho bak lam, ‘Mei elom di fat ahedi usam bak,’ lahame Oho lab tu ozome gagoho im lam imbodemeam làhà ba diamut dam ahebu elodaha dam fat ahededume usnadam di lam ame dam tujuh labe ototo vaidume ba vi eloho nam lam Oho ozom, amam namet mode?”
29. Lahahat Yesusat fa ab gagoham. “Vabà! Um git ozome gagoho bak. Alat Vameadaha Im Toedahana zi lam uho mahate aame vi ozome ozobohudehe vab damat modem bak. Labi Ala laha im feàna modem Alat modem labe dam elohonàme Aho modi fa neàdem meo bak um laha vabiem damat modem bak.
30. Ba diamut dam elodaha dam im elodaha bak labet Alat modi fa ahedi usnadam di lam dam ba lahi vam vabak. Labi laha lahi ba dam vam vabak. Gi Alat Am im gagu vou usem dam labe iho asum ahoba iuba azim di gi soaona esdam bakti uloho bak.
31. Ne, meit Alat Vameadaha Im Toedahana laba im meida nehi toehena nim, ‘Mei elom di fat ahedi usam bak,’ lahame toehe im lam Alat uba gagohona lam um aame ozobohudi neàdehe vaba Eba vabi vi ailo gagodà?
32. Alat aham di iube uba Yahudi dama nehasu vameadahana taia? ‘Em abo Abrahamti Isakti Yakubti labihasu Eho vuusuhu labe ame dam labe Eba vi ozome vou baedam Ala Em am bak.’ Lahame Alat aham di iube lab gagoho bak lam ame dam làtela lam gi elodahanàme fat ahedi Aba vou baedam lahasuhu bak lam Aho vameadaha bak. Labiham labe Eho vi ozom, dam elodahada zi labe ba Ala bake vou baedam vab taia? Gi dam ahe damat ihimo Ala bake vou baeda taia?”
33. Labi dam duada zi labe iho Yesusat Aho Saduki dam bake lab vi vahokedaha im lam aidume modeha ab àvodi meedamam.
34. Labi ame Saduki dam labe iho Yesusat etei lab vameadaha im lam aiha Yesus teudi gi im vamdesu vameadàmu ba dae bum kai. Labihàmu Farisi dam labe iho ame bak lam aihemu, “Iho akatihasu Yesus bake gagu aime Yesus git gagoho bak iho aihizobe iho siela?” laham bak neo vi ozome ihimo aa odoadalo fa bakamta ab vazisiham.
35. Labi vazisi im vameadume neàdi dat meidavat abo dat ahamda Musat toedume fi hasi esuhu Im Feàna zi lam bisi ozobohuda labe aho Yesus bake netàdi duzu Am ahu modi ozolo keobaeda. Aho neha, “Guru oa, Oho ozom, Musat aham di iube toedume fi hasi esuhu Im Feàna zi lam bisi im tombuda iho modemda akete? Oho nasi gagomale.”
37. Lahahat Yesusat fa gago, “Meit Alat Vameadaha Im Toedahana laba im meida nehaha bak. ‘Im dam ahebu meit am ahu vàmadi Ala bake deeli gi labaha bohu vuusda. Labi meit laha gi ame baket mode. Labihadale.’
38. Im lada lam bisi iho nasi vi ozome modi tombulemda am bak.
39. Labi ame im bisi tombuda lamti ulohoda meida laha nehi toehe bak. ‘Uho meit aba it deeli vou faovoi vabiedam bak lamti ulohona vi ozome fa meia laha deeli vou faovoi vabiedale.’ Lahame toehe bak.
40. Meit im tombuda behàsu lam meedam labet modi gi ame dat ahamda Musat toedume fi hasi esuhu Im Feàna zi lamti dam ahamda Alat vameadaha im aime fa dam bake ahate vameaidaha dam labe ibi iho lab toedume esuhu im lamti labihasu ame im zi feà lam gi ab vi tau meedamam bak,” lahame ab vameadaham.
41. Labi ame Farisi dam lam laba dozeadam lahasuhu di labe Yesusat vi ailo ab gagoham.
42. “Uho ozom, Alat Gagu Fihasi Vimteme Oluhu Dat Boehàda lam amam mekehàda modela?” Lahame labi gagoha ame dam labe fa gago, “Abo dat boehàda Israel dam bake vuusdam dat ahamda amu gi eloi seteheda abo Daud labe am mekehàda modem bak.”
43. Lahahat Yesusat fa vi gago, “Ne lahana aham di iube akati modi Daud vedi Alat Ba Gagu Fihasi Vimteme Olulo Modem Dat Boehàda laba, ‘Eba vuusdam Boehàda,’ lahame gagodàla? Nehaha bak. Amu Alam Aha Nutabe Neàna labe Daud bake modi vizi teudi aho nehasu toehe bak.
44. ‘Na Debu Modehe Ala labe Aho fa eba vuusdam Boehàda laba gago, “Om Em ahi totbaho niba nusu Eba tau feà Dateli dam vuusu im vahokedase. Labi Eho dam Oba fakemoholehe dam zi lam Eho ahit modi bedi fà Oba iedi uledi im Oboda fà aime meedase.” ’ Lahame Daud aham di iube labi toeme esuhu bak.
45. Daud ahamo Alat Ba Gagu Fihasi Vimteme Olulo Modemda Boehàda laba neha, ‘Eba vuusdam Boehàda,’ lahame labi gagodàmu ba akati meit Alat Gagu Fihasi Vimteme Oluhu Dat Boehàda laba neha, ‘Boehàda Daum mekehàda modem bak,’ lahame labi gagodàla? Labihameam làhà Alat Gagu Fihasi Vimteme Oluhu Dat Boehàda lam fa Boehàda Daud vafozi bisi feà Dateleheda Am taia?”
46. Lahame Yesusat labi im vamdesu vameadaha labe ame Farisi dam labe, “Iho akatihasu vi ozome fa vi gagoela?” lahame ba dae koena buhu vabak. Labihàmu ame Yahudi busaoda zi labe iba neo modi vi ladem bak labna zohàme ame digat labe faasi im dam meidavat ba Yesus bake im vi gagu aim bak ab moham.
1. Labi im lada lam vameadume neàdi Yesusat fa neo dam duada zi lamti Aba vi tau meedam dam lamti im meida bohu neo nehame faasi ab vahokedamam.
2. “Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labi ame Farisi dam lamti iho Alat amu Musa bake vameadume Musat fa ot vai vameadaha im lam iho neo ot vai im dedamali dam bake vahokedam bak.
3. Labihàmu ame dam labe iho lab vahokedam im lam uho mahate vuzehi meedale. Lahana ame dam labe ibi iho meedam bak uho a vi vouhodamule. Gi aalahigeàmole. Ame guru zi labe ibi iho meedam bak gi nehadam bak. Ame dam labe iho ame im lam vahokedamta vahokeda. Lahana naedamat gi ozahigeàmu fa im mei meedam bak ame.
4. Labi ame dam lam meia na asimbuna lu vohom di ba ot vam vaba gi meia ahumdem bak ame. Ame bak lam gi neham bak. Ame dam labe gi Musat aham di iube lab toedume fi hasi esuhu im lamota meia vahokedam kaio. Abo dam iho ahulat vi ozodam im zi lamti vi tau vahokedume meia modi vanamam damat modem bak. Lahana ame im zi lam, ‘Akatihasu modi neàdela?’ laham bak lam ba iho fet vouhodam vabak. Gi meia ahumdeda.
5. Labi ame dam labe ozo, ‘Dam amomoit fà iba aame vou baedase,’ lahame meedam labe iho Ala bake tom gagodam di vedi iho dauha gimsumna koena buà fi stoi Alat Vameadaha Im Toedahana nom dumna buà lam dam ihimo veimdi fa baa buduali gimsuidam bak ame. Labi laha, ‘Im bisi Musat toedume fi hasi esuhu im ulohodesu meedam dam im am bak,’ lahame im sue ahoba dusumda sona bohu lam dusum di vedi veimdi fa obuso bohulali vààudume duadam bak ame.
6. Labi laha ame dam labe vedi na zi vaheme àlo modem di vedi dam feàda nusu na àm bak laba bisi netàdi vi tau nusu na àdam meo bak ame. Labi laha iho Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di vedi dam feàda ihimo nusum bak laba deeli nusualadam meo meo bak ame.
7. Labi laha ame dam labe iho dam duana zi dokbuedam bak laba labohotelo modem di damat nom bohualame, ‘Ai Guru oa, om abo neàte,’ lahame iba labi gagom bak ozome deeli meedam bak ame. Labihasu meedam damat modem bak.
8. Lahana um Eba vi tau meedam dam nim damat im ahu adat iedi uba, ‘Ai guru,’ lahame gagom bak lam uho malele. Neham bak. Um guru ba tameho vabak. Um guru bisi imboda gi vàmtea bak. Labi um laha ubu mei dam zi laba gagom di gi um dubu ziti um vahada ziti lahadam bak.
9. Labi laha uho bak niba esdam lahasuhu di nim a dam amomoi laba ee vousai, ‘Aia,’ lahame a labi gagodamule. Um ai ba tameho vabak. Um Ai gi Vàmtea asum ahobada ium bak.
10. Labi laha damat uba, ‘Boehàda,’ laham bak lam uho laha malele. Um Boehàda ba tameho vabak. Gi vàmtea bak. Alat Gagu Fihasi Vimteme Oluhu Dat Boehàda vàmtea Em am bak.
11. Um meidavat neha, ‘Em fa feà datelese,’ lahame ozome modelo àhàkemeam làhà gi fa feà vab dateli mei na meedam datelele.
12. Eho gi neham bak ozome uba labi gagoho bak. Meit neha, ‘Em abo bisi feàda am tame,’ lahame it daetbadume am ee vousai gagomda laba Alat modi fa ee vou usi feà vab datelemda am bak. Lahana meit neha, ‘Em feà vabda am bak,’ lahame it ozome am ahu nemahuba neàt ee vousam vabda lam Alat ame da laba modi fa ee vousai feà datelemda am bak
13. Aiee! Um dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti um Farisi dam lamti labihasu ba vàhàdem bak vabili meedalo. Um gi ahobat neàdi meedam damat mozo. Meit neha, ‘Em abo Alam damali Aho eba vuusu im vahokedase,’ lahame ozodam dam lam uho vedi fa zie audam bakti ulohona modi ame dam labe iho Alam damalem bak uho maedam bak. Ebe eho lab vahokedam im gàhàna lam uho vuzehi Alam damali Aho uba vuusu im vahokedam mom damat modem labe uho vedi ubu uho ahulat vi ozodam im zi lam fa Musam im laba vi tau vahokedam labe meit, ‘Alam damalese,’ laham bak modelo meedam dam lam uho zie audam bak. [
14. Aiee! Um guru zi lamti Farisi dam zi lamti um ba vàhàdem bak vabili meedalo. Um gi ahobat neàdi meedam damat modem bak. Uho gi maboe zi laba ahit neha, ‘Im om vou aasdalo mozo,’ laham dam labet vedi ahi vageme netàdi maboe nazoh fetehesu vi vadume dualem damat modem bak. Lahana uho Ala bake tom gagodam di uho lab faina modehe bak lam vedi ahit vasti uhumo neà damali gi Ala bake la gagoi le gagoidam labe bohulaleda. Aiee! Um labihasu meedam damat modem labe Alat ba diamut uba, ‘Fà duana modi geàdase,’ lahame na asimbuna feà meeda tame.]
15. Aiee! Um guru zi lamti um Farisi dam zi lamti um ba vàhàdem bak vabili meedalo. Um gi ahobat neàdi meedam damat modem bak. Uho vedi neha, ‘Imo meia le ibi iho Farisi damat meedam bak modi vizese,’ lahame ozome gi ozahit bak bohula bake le dat vàmtea buà laba modi vizem meo damat modem bak. Lahana ubu uho lab modem bak labet modi ame dat vàmtea labe aho vizi meedàmu gi vua eludamna sutem gikina bohu laba voomda am bak. Labi um laha laba voom bak. Lahana uho ba modi vizeheda lam bisi abobo ame vua eludamna sutem gikina bohu laba voomda am am bak.
16. Aiee! Uho vedi, ‘Im abo Alat vameadaha im vahokedam damat modem bak,’ lahamna um ba vàhàdem bak vabili meedalo. Um abo gi fako faidi na aam biem bakti uloholi meedam damat vedi fa dam fako faida laba neha, ‘Neà bak neam tame,’ lahame vahokedam damat modem bak. Uho vedi nehi dam bake git vahokeda. ‘Meit im fet gagu vàmadi esulo modem di labe im nehasu gagoda, “Fihasi Ala Bake Vou Baedam Num Vàmteabu ame nim. Eho ba mode tame,” lahame ame num buduabo laba vàlu ee gagu vàmadehena fa vazidazemeam làhà Alat ba ame da laba neha, “Om ohu vaha bak zidazeho,” lahame ba gagom vabak. “Gi voom neàte,” ’ lahame uho labi git vahokedam damat modem bak. Lahana uho vedi neo nehi vi vahokeda. ‘Meit im fet gagu vàmadi esulo modem di labe damat ame Num Vàmteabu laba vahedam emas laba aho vàlu gagomeam làhà ba ame bak lam veimdi voom vabiem bak. Gi abobo ab gagu vàhàdeham bak.’
17. Uho labihasu vahokedam damat um akati fa vei ahusobuli meedà? Uho ozom, ame emas lam fa ame Num Vàmteabu labe fa vafozi feà nazohalehe? Vabo. Um git ozoho bak. Gi ame num buduabo labet modi ame emas lam modi fi hasi Alam nazohalehe bak.
18. Labi laha uho vedi nehi dam bake git vahokedam bak. ‘Meit im fet gagu vàmadi esulo modem di labe ame Num Vàmteabu labe am ad oli aam bak tomba laba modesu Ala bake lomna vua vahudamnabu laba vàlu ee gagu vàmadehena fa vazidazemeam làhà Alat ba ame da laba neha, “Om ohu vaha bak zidazeho,” lahame ba gagom vabak. “Gi voom neàte,” ’ lahame uho labi git vi vahokedam damat modem bak. Labi uho laha vedi neo nehi vi vahokeda. ‘Meit im fet gagu vàmadi esulo modem di ame vua vahudamnabu laba esuhu fi ho laba vàlu gagomeam làhà ba ame bak veimdi voom vabiem bak. Gi abobo ab gagu vàhàdeham bak,’ lahame git vahokedam damat modem bak.
19. Aiee! Um gi fako faidi na aam biem bakti uloholi meedam damat modem bak. Um ozom vaba? Na adida bisi feànalehela? Ame na fi hot feànalehe? Vabo. Um git ozoho bak. Gi ame vua vahudamnabu labet modi ame na fi ho modi fi hasi Alam nazohalehe bak.
20. Labihàmu um ozom vaba? Meit neha, ‘Eho ame bak mode tame,’ lahame fet gagu vàmadi esulo modem di ame na vahudamnabu laba vàlu gagomeam làhà aho gi ame na fi ho lamti vahi vàlu gagodam bak. Ba na vàmtea lamota vàlu gagom vabak.
21. Labi laha ame da labe aho lab fet gagu vàmadi esulo modem di lam aho ame Fihasi Ala Bake Vou Baedam Num Vàmteabu laba vàlu gagomeam làhà aho gi ame num lam Ala ehe bakti vahi vàlu gagoho bak.
22. Labi laha ame da labe aho lab fet gagu vàmadi esulo modem di lam aho asum ahoba iuba vàlu gagomeam làhà aho gi Alat nusu dam bake vuusu im vahokedam di nusumna feàda lamti Alati vahi vàlu gagoho bak.
23. Aiee! Um dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti um Farisi dam lamti um ba vàhàdem bak vabili meedalo. Um gi ahobat neàdi meedam damat modem bak. Uho vedi Ala bake vou baedam di Musat lab gagoho bak lamti ulohona meedam damat modem labe um utoho laba usihina keobe lam ahebu vame vou li debe vàmtea utasi Ala bake esu. Labi sembilan totbaho lam uho naedamat va. Labi neo ame na totbaho lam neo debe vàmtea utasi Ala bake neo esu. Labi sembilan totbaho lam uho naedamat va. Um gi im lada lamota meedam damat modem bak. Abo na et nakbe ahana neàna vizemna modeo, ut àhàkebu oo keobena modeo, nae modeo, labihasu debe ulohodesu fahedam damat modem bak. Lahana dat ahamda Musat aho toedume fi hasi esuhu Im Feàna zi labe im tombuda nim uho mu voedam damat modem bak. Abo dam bake iademe ahu vamdesu meedam bak ame. Labi meia aame faobekesi im neà bak tau meedam bak ame. Labi im gagom di ba vageme ame bak lam vàmtea buà voom vaba ahebu meedam tadem bak ame. Labihasu uho meedam vab damat modem bak. Uho im keobe lab meedaha bak lam meedamta neàt. Lahana ba gagoho zoho nimti vahi meedam bak lam bisi neà bak am tame.
24. Um abo gi fako faidi na aam biem bakti uloholi meedam damat vedi fako faida meida laba neha, ‘Neà bak neam tame,’ lahame vahokedam damat modem bak. Eho ahole uba vi tozohona ozohomu gagodam bak. Uho vedi uho udemna lam udelo modem di vo gatbe lam feàktoi na buduada untata vekesi udem dam taia? Uho vedi gi im totobe vi ozome meedam damat modem labe im tombuda uho gi fa ab voedaham bak.
25. Aiee! Um guru zi lamti um Farisi dam lamti um ba vàhàdem bak vabili meedalo. Um ahu abo meia ozom vaba gi, ‘Nazoh dualese,’ lahame meia mali soat ziemausi vadam damat modem bak. Um gi, ‘Meit fà aase,’ lahame ahobat neàdi meedam damat modem bak. Labiham labe um abo mokzohti fi lihibati kikem di am ad totbaho gi gihobu lahasuhu bak lam kikehe vaba gi toha totta kikem bakti uloho damat modem bak.
26. Um Farisi dam gi fako faidi na aam biem bakti uloholi meedam damat modem bak. Lahana um gi neham bak vi ozome meedam vaba? Amu nasi adahu tot kikeme boz neàdemeam làhà toha totbaho lam gi ahamo boz neàdem bak. Um abo ahu meia ozom vaba gi, ‘Nazoh dualese,’ lahame meia mali soat ziemausi vadam bak lam nasi voedale. Uho labihasu modemeam làhà ahobati vahi neàdem bak am bak.
27. Aiee! Um guru zi lamti um Farisi dam lamti um ba vàhàdem bak vabili meedalo. Um gi ahobat neàdi meedam damat modem bak. Um gi Yahudi damat koei ilehà ehe bak vabi gohatemeam faidi vàhàdeme fi ham bak labna zohàme koei ilehà ahoba laba na fauhana foom bakti ulohona meedam bak. Ame koei ilehà num lam damat aam dita fauha neà bakta aadam bak. Lahana bak ad ium dam faati meia modi vizi faidi vàhàdemna na meiti na meiti ehe bak.
28. Um laha gi ame bak lam modem bakti uloho bak. Neha: Ubu uho Yahudi damat meedume baleàhà im lam meedam bak lam damat aam dita uho gi im Alat Aba Aho gagoho im vuzehi vamdesu meedam bakta aada. Lahana um ahu ad labe meedam bak lam gi neha: uho bisi faina meedam bak ame. Labi meia ahi vageme ahobat neàdi meedam bak ame. Um gi fai bak ad laba vasti meedam damat modem bak.
29. Aiee! Um guru zi lamti um Farisi dam zi lamti um ba vàhàdem bak vabili meedalo. Um gi ahobat neàdi meedam damat modem labe uho vedi nehi ozo, ‘Imo dam ahamda Alat vameadaha im aime fa dam bake ahate vameaidaha dam aham di iube meit oddume elodaha dam zi laba vi ozome faobekese,’ lahame im koei baumahe bak laba ilehà moadume gàhàdi aam neàdedam damat modem bak. Labi laha, ‘Dam ahamda Alat Aba Aho gagoho im vuzehi vamdesu meedam dam amu elodaha bak laba vi ozome ozobuhudese,’ lahame dam zi labe im koei ilehà modesuhu bak laba laha vi vabiedume fa aam neàdedam damat modem bak. Um gi, ‘Damat fà iba aase,’ lahame labihadam damat meedam bak.
30. Uho vedi daetbadam labe nehi ot gagoida. ‘Mit ahea! Im ame di lam ehelemeam làhà im tai ahobada laba vi tau vazisi fa ame Alat vameadaha im aime fa dam bake ahate vameaidaha dam zi lam ba oddume im vasea bake veàmodam vabak,’ lahame vi ozome it daetbadam bak meedam damat modem bak.
31. Lahana um ozom vaba? Um laha Alat etei uba oudaha dam labe iho vou lehe im lam ailahigeàmu meedam damat modem labe vedi ahobat neàdi Alat amu oudaha dam ahamda labe im koei ilehà vabiedume fa neàdedam damat modem bak. Uho labihasu meedam bak labet modi um tai ahobada labe ame Alat amu oudaha dam ahamda zi laba oddaha bak lam ab modi tombaleham bak.
32. Làhà um tai ahobada zi labe ibi iho mei oddaha bak laba vi ozome uho laha nasi neo ame baket vi susume dam neo vi oddume neàdemeta.
33. Ea, um gi meoli fai bak tadi meedam dam labe fa ozbat meoli meedam bakti ulohona meedam damat modem bak. Um ahu vabali nehi ozohe? Alat uba ba uloodume vi aime ozobohudi neàdi gagu vua eludamna sutem gikina bohu laba um ba olum vaba moe? Ba oluhu vaba mom vabak. Abo olum bak.
34. Eho gi neham bak ozome uba labi gagoho bak. Um tai ahobada zi labe iho dam im fai bak meedaha vab dam abo Alat Aba Aho gagoho im vuzehi vamdesu meedam dam zi lam abo duana oddaha bak. Abo Alat na ahebu ahamte modehe di iube um tai ahobada zi labe iho dat im vamdesu meedamda ahamda Habel amu nasi alimeat oteheda am bak. Labi neo gi vou ote usdume Berekiam adat Zakaria ab oteham bak. Ame da Zakaria lam uho Fihasi Ala Bake Vou Baedam Num Vàmteabu labe am ad oli aam bak tomba laba abo ame num lamti labi na Ala bake lomna nom vaheme vua vahudamnabu lamti laha donibu laba otehe bak. Labihàmu um dam bada zoho nim Eho neo ahit damat Alat vameadaha im aime fa dam bake ahate vameaidaha dam amomoi ziti dam busaoda Alat vameadaha im ozobohu dam ziti Em im ozobohudi dam bake vahokedam guru ziti labihasu uba neo ouda tame. Oudahemu uho fa neo ame dam zoho lam odda. Labi ame dam zoho lam uho neo dam bake gagu ut tetehesuhunaso lam bake esu ame dam labe im anekehà vuu kidadesu paku dodume eloda. Labi ame dam zoho lam uho neo um Yahudi damat uhumo fi hasi bakamta vahi Alat vameadaha im ahamda dogoit aidam bakti im meiti meedam num laba na sokba nasbe ahit alibulehena labe ame dam laba foadume geàda. Labi ame dam zoho lam uho laha neo dam iho le esdam num debu bak laba vi nohisi dam lam neo ilime num debu meida laba neo le esu. Gi labihadam bohu meeda. Um labihasu lab meedam bak lamti um tai ahobada zi labe iho aham di iube dam im vamdesu meedam dam zi laba oddaha bak lamti labihasu Alat fa ame baleà vouhou um dam bada niba fa vi beoda tame.
36. Imbo bak. Em ba giomim gagom kaio. Um tai ahobada zi labe iho ame dam lab oddaha bak lam Alat vi ozome ame baleà vouhom di gi uho Eho li meedaha im nim aaha aiha laham dam lam vàlu beom dam um am tame.”
37. Lahame labi vi vahokedume neàdi Yesusat neo kota Yerusalem laba vahi azim Yahudi dam labe ibi iho aham di iube meedaha im lam vi ozome ahu faidi gi bak kiat ab vameadamam. “Aiee! Um kota Yerusalem laba azim dam Eho uba faobekesi meedalo. Nehaha bak. Dam ahamda Alat vameadaha im aime fa dam bake ahate vameaidaha dam zi lam um tai ahobada labe odda. Labi neo Aho gagu olu Am im vameadume esmozi laiam dam uba neo oudume modeha uho neo ame dam lam laha gi ket beodume oddume eloda. Um gi labihadam dam debut modem bak. Um Yahudi dam labihadàmu Alat uba ba beom bake Eho kuk ameaso labe am adambe meia vou faovoi am busehà labe delai dae kokoadam labe fa baguamdi vamatem bakti ulohona modi Eho uba soat vaususome iuba le modeme leidaha um gi Eba mohet vanamai moho bak.
38. Iumeee! Um Em moholahit um kota Yerusalem iumti ame uho Fihasi Em Ai Ala Bake Vou Baedam Num Vàmteabu lamti labihasu Alat vou esmozi ab alimdeham bak.
39. Em uho ba aam vaba vausi modesdamehamdi ba diamut uho Em alihi aahazobe fa um ahu uledi nehasu Eba gut gago, ‘Alat Aho Gagu Olu Ot Vai Im Dedateli iba etei ledamda nim abo feàteee!’ lahame uho ule neàt Eba gut valo modem di lam uho Em alihi ba aam di am tame,” lahame Yesusat fet ab vameadume esuham.
1. Labi Yesusat ame Fihasi Ala Bake Vou Baedam Num Vàmteabu labe am ad oli aam bak tomba lam vou esmozi futoi ladam labe Aba vi tau meedam dam labe iho it aame Yesus bake ab gagoham. “Guru oa, ame Num Vàmteabu nim susume moadahana feà nim Om aadào?”
2. Lahame labi gagoha Yesusat fa ab vi gagoham. “Uho etei lab aadamna zi lam bisi labaha bohu modesdam vabak. Eho etei uba gagolo modem im imboda nidi nim nasi aima. Ame ke mei ahoba vou vahe zihina zi lam ba fa faamome gi alimdi seddam bak,” lahame ab gagoham.
3. Labi neo ladume kota Yerusalem vou esmozi bàhàgo obe labet le Zaitun Dee Dozeadaha Bak Buzoho laba ab laiteham. Laisi laba odosi esdam di labe Aba vi tau meedam dam nibe ihimo Yesus bake li aa vi ailo ab gagoham. “Guru oa, Oho etei lab vi ozome gagoho im lam adi diat modemna gagohela? Labi laha Oho ba fa lem di bak niba modealahana meedume novai vaitolo modem digat lam Alat ana nasi iba fet vouhom bak iho aame ozo, ‘Ame bak lam ab modelo modem ame?’ lahame iho ana aame ozobohudela?”
4. Lahahat Yesusat fa ab gagoham. “Iho bak niba esu meedam im zi ahebu ba novai vaitolo modem digat fuseo modem di lam amu im nehamda nasi meeda tame. Amu dam duada totbaho labe uba nasi li neha, ‘Em abo Alat Gagu Fihasi Vimteme Oluhu Dat Boehàda am tame,’ lahame uba li ahit vageme keobaedam labe damat vabi imbo tibame dam dua zoho vi ozome tu vuzeheda tame. Labiham bake uho iademe vou faovoi esdam labe vou faodale.
6. Labi laha ame ba novai vaitolo modem digat fuseo modem di lam damat uba nasi li im nehasu vameada tame. ‘Dam bak kia bak ium ot fakiame ot belui ot beluidalo.’ Labi, ‘Dam bak netà bak niba ot fakiame ot belui ot beluidalo.’ Labihasu uba nasi li vameadam bak ehete. Lahana uho im labihasuhuna aim di um ahu a bisi iedi vi ozodamule. Ame ba novai vaitom digat lam di labe taho fum vabak.
7. Labi ame di labe im nehasu laha meeda tame. Dam debu fa vàmadiaha bak lamti dam debu fa vàmadiaha bak lamti ot fakiame ot belui ot beluidam bak ame. Labi bak amomoi vuusdam boehàda am damti bak amomoi vuusdam boehàda am damti labihasu ot fakiame ot belui ot beluidam bak ame. Labi bak iuba modeo, bak iuba modeo, di neà faasi bak aotbali na debe soali àm vabili idoali ibzidume dam elodam bak ame. Labi bak iuba modeo, bak iuba modeo, balim feàna nigome dam beodume foedam bak ame.
8. Labihasu ahamte faasi meedam im zi am bak. Abo lahit data faaseo modem di labe ahamte vi ozome vàzbudam bak lamti uloho bak. Lahana a bisi iedi vi ozodamule. Eho etei lab vameadaha im lam nasi meedamta meeda. Lahana dam bakda zi ahebu foli seddam digat lam di labe taho fum kaio. Ame bak lam vou meedamehamdi ba vou fuse tame.
9. Labi laha ame di labe uho Eba tu vuzehi vi tau meedam damat modemu dam mei debuti dam mei debuti ahebu uba faki meeda tame. Abo dam giida labe neha, ‘Imo dam nim siàdume meo damat esuhu bak iuba vou le ub lodume damat fai bak vabidam labe geàdam bohu meedume vi oddase,’ lahame vi ozome um siàdume vou lada tame.
10. Labi ame di labe laha dam amu Eba tu vuzeheda dua totbaho lam laha fa Em mu bak mei bake avaesu lada tame. Labi Eba mu itaha dam labe fa Eba tu vuzehi vi ozodam lahasuhu dam totbaho laba vei faki vou fohome meia ub lu odda tame.
11. Labi ame di labe laha damat neha, ‘Im nim Alat iba gagu iho ot vai fa uba vameaidalo mozo,’ lahame gi ahit giomim vameadam dam labe uba lailaidam labe dam dua zoho labe vedi imbo tiba vi tu vuzeheda tame.
12. Labihasu meedam labe dam bakda dua totbaho labe ibi iho lab bisi faina meedam bak lam vi taui vi tauidume dualedam labe ibi iho amu meia deeli meedam bak lam gi fa voou ab seddamam bak.
13. Lahana Eba tu vuzehi meedam dam lam naat iba vabidam di iho gi ozahit keàtedi tu vuzehi meedam bohu vuusdume digat ba novai vaitomda laba vou fusi meedam dam lam Eho soat vausu fa vei neàdedam dam am bak.
14. Labi laha, ‘Alat dam bake deeli vame Am damali vuusu im vahokeda tame,’ laham Im Neàna lam meit bak mei bak iuba le vou vameatedume fi deda. Meit bak mei bak iuba laha neo le vou vameatedume fi deda. Labihadume dam mei debuti dam mei debuti vou vameatedume uloholi neàdi ame ba novai vaitolo modem digat lam ab vou fumam tame,” lahame fet ab vameadaham.
15. Labi Yesusat neo susume vi vameada. “Ame ba novai vaitom digat fuseo modem di labe uho nehi fet aame ozobohudemna aa tame. Aham di iube dat ahamda Alat vameadaha im aime fa dam bake ahate vameaidahada Daniel labe aho aham di iube im tai ahobada zi laba nehi fet vameame vàmadi esuhu bak. ‘Ba diamut aam ahasbeamna abo Alat aam fakemda lam fa ame Fihasi Ala Bake Vou Baedam Num Vàmteabu laba oli duzu vàhàdehemu damat ame num lam gi mu vou esmo tame.’ Lahame Daniel lab fet vameame vàmadi esuhu im lam imbodi amena aam ahasbeamna labe ame Num Vàmteabu labe am Fota Fiham Zoho abo duzum maem zoho laba duzuhu bak uho aameam làhà ame digat ab fuseo meedamam bak. (Damat Daniel aho fet toeme esuhu im lam aame ozom di, ‘Akatihasu modem bake labi gagohela?’ lahame mahate fetehesu vi ozome ozobohudele).
16. Labihàmu uho Daniel lab gagohona lam uho ame num laba duzum bak aameam làhà Yudea bak laba azim dam labe uho laba a esdamule. Um foli seddam bak labna zohàme ahedem bak laba ozome gi taho sibu bak iuba iitaole.
17. Labi laha ame digat fuseo meedàmu um num ohut vabna baa ahoba laba zisi esdam dam lam a fa um numa oli na koena it ve voutamule. Gi labihasu vou esmozi iitaole.
18. Labi laha ame digat fuseo meedàmu dam utoho bake le godam dam labe a nehi ozo, ‘Em nutahalem bake num bake fa emoeme em sue sona ahoba dusumda it visoi vou itase,’ lahame a um num bake fa lamule. Gi vou esmozi taho iitaole.
19. Aiee! Lahana lahi zubuleheda zi lamti data tatvamda do àm lahasuhuda eheda zi lamti iitaom vanamam bak akati modelo. Làhà gi emoem vabilemnàme taho ozahit betea iitaole.
20. Labi laha uho lab iitaom digat vi ozom di uho mahate Ala bake nehame tom gagodale. ‘Ai Ala oa, ame digat fuseo meedam di Oho hari Sabat abo im Yahudi dam labe ibi iho gi azibe im digat abo lam bak bohula bake lam fi ham digat lam a modemule. Labi laha di faidi emoem biem digat lam a modemule. Gi fa digat amomoi ozome iba modi iitaole,’ lahame mahate Ala bake labihasu tom gagodale.
21. Eho gi neham bak vi ozome uba labi gagoho bak. Ame digat fuseo meedam di lam ba dam bakdate modi geàdamna lam ba koena modi geàdam kaio. Abo duana modi geàda tame. Amu Alat alimeat bak nim ahamte modehe di labe faasi vou mode ledume etei vou fusi meedam digat nim dam bakdate labihasu modi geàdamna lam ba na vabak. Gi ba novai vaitolo modem digat fum di ame im meedam di am bak. Labi laha ba diamut neo vi meedam bak na vabak.
22. Lahana Alat Aho fi hasi vame Am damalehe dam laba Aho bisi vi ozome deeli faobekesi meedàmu ame geàdam bak lam Aho ahit modi fa zohobuli vaito tame. Aho faobekesi ame bak lam zohobulem vabameam dat meida so lam vàmtea vekehe vaba gi dam ahebu modi vàhàdedume seddam bak.
23. Labi laha ame ba novai vaitolo modem digat fuseo meedam di meit uba nehi gagomeam, ‘Nime! Alat Gagu Fihasi Vimteme Oluhu Dat Boehàda neam tame,’ labi gagom bak modeo, ‘Iume! Ame Da lam am tame,’ lahame uba labi gagom bak lam modeo, um nasi a aime imbo tibame vuzehemule. Giomimot modem bak.
24. Eho gi neham bak ozome uba labi gagoho bak. Ame di labe damat lehe bak aaha vab dàt im nehasu vameadamna uho ai tame. ‘Em abo Alat Gagu Fihasi Vimteme Oluhu Dat Boehàda am tame,’ lahame giomim gagodamda modeo, ‘Alat Am im eba gagu eho ot vai dam bake ahate vameaidahada em ame Da am tame,’ lahame giomim gagodamda modeo, labihasu duzu vameadam dam uho aa tame. Ame dam labe nehi ozo, ‘Damat fà im ibida aime iba tuse,’ lahame ozome ahit na damat ihimo modem biem im feàna lamti abo damat fet aame àvodi meedamna lamti labihasu meedam labe dam duada zoho vedi imbo tibame ame im laba tu vuzeheda tame. Ame giomim vameadam dam labe iho lab vou li vameadam im lam Alat Aho fi hasi vame Am damalehe dam labe aime vuzehem bak mom bak lam ame dam labe iho ozobohuna ahit, ‘Modi aase,’ lahame vameada tame. Labihadamnàme Alat fi hasi vame Am damalehe dam labe ba ame bak lam modem vabak.
25. Labihàmu mahate it vou faovoele. Eho ame im zi lam vameadam bak lam uho vi ozome ozobohudem bake Eho ahit uba nasi fet labihasu vameadume esulo modem bak.
26. Labihadàmu meit uba li nehi gagomeam, ‘Iumeee! Alat Gagu Fihasi Vimteme Oluhu Dat Boehàda lam Aho bak aotba baa bohu dam vaba alim bak doudalo,’ lahame labi gagom bak modeo, ‘Nime! Ame da Aho gi aa niba li num bumat tuoho bake doudalo,’ lahame labi gagom bak modeo, um nasi a aime imbo tibame tu vuzehi laba ladamule. Giomimot modem bak.
27. Em Abo Asum Ahoba Iubet Bak Niba Li Dateleheda ba fa lem di gi neham bak. Asum boz vekesi fauhali asum ahebu veibai seti dam ahebu aam bakti ulohona modem labe dam ihimo ahebu aadam tadem bak. Ba akati meit li gagom im uho aie?
28. Neham bak. Na koei àm bume zi oaedam bak laba damat aam di nehame ozo, ‘Bume zi oaedam adba laba na koei ehe bak,’ lahame labi aame ozobohudem bak. Labi laha Em fa bak niba lem di Em ba aa lem vabak. Em fa lem di gi dam ahebu ozobohudem bak,” lahame Yesusat fet ab vameadume esuham.
29. Labi Yesusat neo vi susume vameada. “Ame ba novai vaitolo modem digat fuseo meedam di labe dam bakdate modi geàdamna zi lam foli neàdi kehàm vaba im nehasuhuda neo meeda tame. Ala digadda fa aibuli ba fauhaedam vaba modesda. Labi ala useheda lam ba fauhaedam vaba gi aibuli modesda. Labi falo zi lam fa bake nom fi goaitoi bidda. Labi asum ahoba iuba modealahana zi feà lam betea bakamta modealadam vaba gi ihevoulai ihevoulaida. Labihasu meeda tame.
30. Labi ame di labe, ‘Em Abo Asum Ahoba Iubet Bak Niba Li Dateleheda fa bak niba li dam bake vuusu im vahokedam bak ab fuhame?’ lahame damat fet aame ozobohudemna Eho ahit asum ahoba iuba modesu tame. Labi dam debu mei vàmadi vàmadiaha bak ahebu ame na lam aahemu im ahu faidi meb dae feàna faasi meeda tame. Neham bak aam labe labihaha bak. Damat ame na lam tom aam di Em Abo Asum Ahoba Iubet Bak Niba Li Dateleheda Em Aiat Am na fauha meona fako iedemna ogatei modealaha bak lam fa Eba modi vizi feà Dateli uloti nom iludam bak lam damat aame ozo, ‘Im ab folelo modem ame?’ lahame ahu faidi meb dae feàna faasi meeda tame.
31. Labi ame di labe na oma daeti ulohona trompet lahamna labe nom buddam labe Em im gagu vou usem dam zi laba gagu nom oudume Eho fi hasi vame Em damalehe dam lamota dam debu iudu iuba le vada. Dam debu iudu iuba neo le vada. Labihadume damat azihi bak ahebu ulohole tame,” lahame Yesusat fet ab vameadaham.
32. Labi Yesusat neo susume nehame vi vameada. “Eho etei ut ara laba vàlu totobet fi koadalo modem im nidi nim uho laha aime ozodume ozobohudele. Bak ibida niba ut ara labe am mekehà aaso faasi et nakbedem bak damat aam di nehi ozom bak. ‘Ab di neà faalo modem ame?’ laham bak iho aame ozobohudem bak am.
33. Labi laha Eho etei lab fet vameadaha im zi lam modesum bak uho aameam làhà uho nehi ozom bak am bak. ‘Eho amu lab fet vameadaha im lam ab imbodelo ahazobuleham bak,’ laham bak um ab ozobohudemam bak.
34. Nasi aima. Eho etei uba gagolo modem im imboda nidi nim mahate tu vi ozodam bohu meedale. Eho etei lab vameadaha im zi lam ahebu meedume neàdehe vabna um eteida nim ahe lahasuhuna ame im zi lam imbodehe bak aadume neàdi ba eloda tame.
35. Asumti asum ahoba iuba modealahana zi lamti labi bak nimti bak niba modealahana zi nimti labihasu ahebu ba beodume foedume sedda tame. Lahana Ebe Eho vameadam im zi lam ahebu ba setem vabak. Gi labaha bohu vuusdume imbodedam imot modem bak,” lahame fet ab vameadaham.
36. Labi im lada lam vameadume neàdi Yesusat neo vi susume vameada. “Eho etei uba lab vameadaha im zi lam ahebu vou fum di lam, ‘Adi diat modemna modela?’ laham bak lam ame digat labe am jam lamti im dam bakda zi nim ba vàmtea buà ozobohuda na vabak. Im ahebu gi vabiem tadehe bak. Labi Alat Am im gagu vou usem dam zi lam laha vabilem bak. Em gi Am Adàt modemnàme Em laha vabilem bak. Gi Em Ai Alat Ahamo ozobohudehe bak.
37. Uho Nuh ehe di labe meedaha im lam nasi vi ozomale. Aham di iube Nuhti vahi esdam dam lam vao zisi dam beoho vab di labe damat vedi na feàna iba ba beom bak vab tiba vabili esdam di labe gi ibi iho ozom bak lamota la modi le modidam bak. Na àda. Vao udda. Dam lahi vada. Lahi dama loda. Gi labihasu bohu modesdume Nuh am namti am adam lahiti ihe feàda numalehenabu laba ziddaha bak laba ab vou fuham. Labi ziddume modeha vao zisi bak ahebu fi oli dam ihe laba tau ziddaha vab dam lam ahebu ab belu elodume seddaham bak. Ame dam labe gi di labe it ozo, ‘Iho git la modi le modidaha bake im ab beodume elodalo modem ameo?’ lahame ozobohudi geàdaha bak. Labi laha Em abo Asum Ahoba Iubet Bak Niba Li Dateleheda nibe Eho ba fa bak niba lelo modem di damat gi ame dam ahamda labe iho ahumdehe vaba vabi gi esdaha bak lamti ulohona meedahit Em lem bak.
40. Em lem di gi neham bak. Dam behàsu na modelo utoho bake le meedam di labe meidata vuu visoi meida gi laba voou veke.
41. Labi laha lahi behàsu ti feàdam di lam meidata vuu visoi meida gi laba voou veke. Gi labihada tame.
42. Labihadam bak ehemu uho mahate it vou faovoi ozodam labe ahumdi vou faodale. Em um Boehàda ba fa lem digat labe am jamti um vabilem bake labihadale.
43. Uho im totobe nidi nim laha aime mahate vi ozome ozobohudele. Dat num deda labe am num laba meit am na aa li vam bak ozobohudemeam làhà ba ame aibu lam ba bisu im vabak. Abo vou faovoi aasdam labe ba meit am numa oli am nazoh aa li vam vabak.
44. Labihàmu um laha gi ame baket meedale. Em Abo Asum Ahoba Iubet Bak Niba Li Dateleheda nibe Eho ba lem digat lam um laha vabilem bake gi vou faovoi ahumdi ibzidale,” lahame fet ab vameadaham.
45. Labi im lada lam vameadume neàdi Aho neo ozo, “Dam Aba tu vuzehi im Abada meedam lahasuhuna ahum Aho fa li aase,” laham bak vahokedalo im totobe nidi nim neo nehame ab faasi fi koadamam. “Mei na meedamda nibe aho aba na gagu meedamda laba na gagom di aho gi ule neàt meedam tadem dàt moz. Aba na gagome meedam di ba gi modem vaba abo iademe ozobohu aabodi meedam bak. Labihadam dàt modem labe aba na gagu meedamda labe aho bak mei bake lalo meedàmu aho ame da laba fa neo ab gagoham. ‘Em na meedam dam totbaho zi nim oho fa ot vai vou aasdume na meedam bake ohomo vi ozobohudi vameadale. Labi ame dam labe na àdalo modem di oho na àmna faheme dihasi iuba loda. Dihasi iuba loda. Lahadale,’ lahame am na meedamda ahida laba ab gagu esmozi ab laham.
46. Labi le azibe fa li aaha aho am na meedamda ahida laba, ‘Nehame modele,’ lahame amu fet gagu esuhuna lam aho uledi meedamna li aahemu aho deeli am na meedamda laba gi neà bak bohu tadem bak.
47. Lahana ba gi lada lamota meedam vabak. Meia na gagu meedamda labe am na meedamda laba laha neha, ‘Em soa maehe nazoh ziti doi ziti oho fa ot vai iademe vou aasdale,’ lahame ab gagomam bak.
48. Lahana ame mei na meedamda labe ahida modehe vaba soida bisi faina meedamda modemeam làhà aba na gagu meedamda le setem di am ahulat gi nehi it ozo taia? ‘Aa! Ne, eba na gagome meedamda lam taho fa lem vaba? Akati kehàdà?’ lahame alamdi vedi aho vuusu na meedam damti na meedam lahiti ame dam laba faki beodume geàda. Labi laha vao meona uddume bak vabili bobidam meo dam laba tau vazisi na àda. Labi vao meona udda. Labihada.
50. Labi ame ot vai meedamda labe vedi aba na gagu meedamda lam ba fa lem digat labe am jam vabili esdameam làhà aho ozom vab digat labe dat naeda fa li ame da labe aho lab meedam bak lam aame faki feàna foadume dam ahobat neàdi meedam dam labe ibi iho esdam bak iuba voou kikezi geàdam labe ahu faidi meb dae feàna faasi medda tame,” lahame Yesusat im totobe lada lam ab vi vameadaham.
1. “Ba diamut Alat Ahamo Boehàdateli Dam vuusu im vahokedam di dam adidate Aho uledi Am Damali Aho vuusu im vahokedàla?” laham bak lam Yesusat vahokedalo im totobe nidi nim ab faasi fi koadamam. “Eho ba fa Boehàdateboli li Em damalehe dam laba vuusu im vahokedam di gi im totobe Eho etei fi koadalo modemda nimti uloho bak. Lahi soaona sepuluh zi labe ozo, ‘Dat nam etei valo modemda lam damat vou dozeadume dokbuedam labe vi vihitoadam dam zi lam imo doait le gut tau vou lase,’ lahame ozome im vua fauhaedamna zohobubeà ahala vuusu vuusuiame doait ab laham.
2. Ame lahi soaona sepuluh lam fàsi auohole totbaho ahusobu lahi soaot moz. Labi lahi soaona auohole totbaho lamota im ozobohu lahi soaot moz.
3. Laham lahi soao ahusobuda labe vedi vua fauhaedamna ibida abo zaitun oo modi minyaklehena folem di ba fedeme fauhaedam bake ozome fetehesu vame vou ladam kai. Vedi gi iho etei lab fedeme fauhaedamda lamota labihasu vou lada.
4. Lahana lahi soao im ozobohuda labe im vua fauhaedamna ibida amu fedeme fauhaedamda lamota ahumdi tu vou ladam vaba abo ba neo minyak folem di fedeme fauhalem bakti ozome fetehesu vame ab vou ladaham.
5. Labiham lahi soaona sepuluh labe le vou faodaha ame dat nam etei valo modemda lam taho vou fuhu vaba kehàdume modeha ame lahi soaona lam iho izeo àhàki lavoidume ab idaomam.
6. Labi idaomeam usi neisoat damat ab buteham. ‘Dat nam etei valo modemda ledalo. Imo nasi doait le gut tau vazisi vou ladase,’ lahame butedam bak aihemu keeddume im vua fauhaedamna lam vabiedume neàdi fa neo usidume ab fauhaedamam.
8. Lahana lahi ahusobuda labe vua ibida minyak vabali sutelo meedàmu fa lahi im ozobohuda laba ab gagoham. ‘Iba minyak zohovat vàle. Vua fau ibida suti seddalo mozo,’ lahame tauleda.
9. Lahahat lahi im ozobohuda nibe fa gago, ‘Vabo. Minyak ibida uba lomeam ibida ba uloholem vabak. Labiham bake ibida ba uba lom kaio. Uho nasi minyak ot loiam bak laba le doit vale.’
10. Lahame labi gagohemu ame lahi ahusobuda auohole lam fa minyak valo ab ladaham. Gi etei iumà ium ladam di labe dat nam etei valo modemda ab lefuham. Labihàmu lahi soaona im ozobohuda labe im vua fauhaedamna lam fetehesu modi ahumdi vou faodam labe ame da lefuhemu vi tauidume ame na vahi àdalo modem num laba ab vi oedaham. Labi vi oedume neàdi num doo lam ab it baguamdi teudeham.
11. Labihadam di labe lahi soaona ahusobuda labe minyak vame neàdi fa vou li aaha dam num doo teude. Doo teudehemu bako laba dozeadume budda. ‘Ai oa, doo fi stole. Im vi tau oedase.’
12. Lahame butidaha dat nam etei valo modemda labe fa ab gagoham. ‘Imbote. Em um biehemu ba doo fi stom vabak.’ ”
13. Lahame Yesusat ame im totobe lam fi koadume neàdi ab vi gagoham. “Ame bak lam labihahemu uho mahate it vou faovoi ozodam labe ahumdi vou faodam labe ibzidale. Eho ba fa lem digat labe am jamti um vabilem bake labihadale,” lahame Yesusat fet ab vameadume esuham.
14. Labi im lada lam vameadume neàdi Yesusat Aho ba Boehàdateboli bak niba fa li Am damalehe dam vuusu im vahokedalo modem di Aho li aameam, “Dam bakda Aho gagoho im uledi meedào? Meedam vabao?” lahame vi gagu aim bak ehedaleàmu im totobe nidi nim neo nehame ab vi vameadamam. “Eho ba fa lem di gi im totobe Eho etei uba fi koadalo modemda nimti uloho bak. Dat am soa maehe nazoh duada labe aho bak mei bake le ibzidalo modemu am na meedam dam gagome li dozeadume neàdi fet ab vameadamam. ‘Em soa maehe nazoh abo emas nim uho omozit iademe meedume emas fa duali vou faodale. Em bak iuba le koena azibehamdi fa le tame.’
15. Lahame labi gagu neàdi ahamo ozo, ‘Da lada lam na meedam di keàteda ame. Da nidi nim na meedam di keàtet meedam vabda ame?’ laham bak laba ozome doi oona emas ab ahaladi ahaladiame lodume ab vou esmoham. Nehasu faheme loda: Am na meedamda meida laba doi oona emas dom abo auohole loda. Labi am na meedamda meida laba neo doi oona emas dom behàsu loda. Labi am na meedamda meida laba neo doi oona emas dom gi vàmtea lo. Labihasu am emas lam lodume esmozi ab laham.
16. Dat naeda labe gi etei le setehe omozit am na meedamda ame emas dom auohole vahada labe ozo, ‘Em akati modem labe em aiam emas dualela?’ lahame le nabime aaha emas modi dualem bak aahemu laba meedume doi oona emas dom auohole amomoi neo ve vi tau ab sepuluhleham.
17. Labi dat meida ame emas dom behàsu vahada labe aho neo abada vou le meedume doi oona emas dom behàsu neo ve vi tau ab ahialeham.
18. Lahana dat meida ame emas dom gi vàmtea vahada labe aho am aiam emas lam meedume dualem bake nabidam vaba vedi gi ve bak sime baumsu ab esuham.
19. Labi ibzidume aaha dat naeda fa ab leham. Fa li ozo, ‘Eho dam niba ahumdi esuhu bak lam em emas iademe na meedume dualeheo?’ laham bak gagu vi ailo am na meedam dam làtela niba ab gagu fet lei fet leidamam.
20. Leidam di labe dat ame emas dom amu auohole vahada lam aba aho ba meedume ve vi tauhuda auohole lamti vahi sepuluhlehena lam am ai bake ab vou li duzu gagoham. ‘Ai oa, oho nasi aamale. Oho amu eba lodume vou esmoho emas dom auohole lam eho ve fa omozit meedume emas dom auohole amomoi neo vi tau ab sepuluhleham tame.’
21. Lahame labi gagoha dat naeda labe fa gago, ‘Lo, neàte. Eho oba lu vou esmohona lam oho abo iademe vuusu vou meedaha bak lam abo neàte. Eho oba gi koena lohona oho iademe vamdesu meedaha bake eho oba neo na buduada neo oba lu oho neo vou aasdalo mozo. Oho nasi ebe eho deelehat azim neà bak niba vi tau azile,’ lahame gut gagu ve aba ab tau aziham.
22. Labi vou faodameilahit dat meida emas dom amu behàsu vahada lam aba aho ba meedume ve vi tauhuda behàsu lamti vahi ahiali am ai bake ab vou li duzu gagoham. ‘Ai oa, oho nasi aamale. Oho amu eba lodume vou esmoho emas dom behàsu lam eho ve fa omozit meedume emas dom behàsu amomoi neo vi tau ab ahialeham tame.’
23. Lahame labi gagoha dat naeda labe fa gago, ‘Lo, neàte. Eho oba lu vou esmohona lam oho abo iademe vuusu vou meedaha bak lam abo neàte. Eho oba gi koena lohona oho iademe vamdesu meedaha bake eho oba neo na buduada neo oba lu oho neo vou aasdalo mozo. Oho nasi ebe eho deelehat azim neà bak niba vi tau azile,’ lahame gut gagu ve aba ab tau aziham.
24. Labi neo vou faodameilahit dat meida emas dom amu vàmtea vahada lam neo ab li duzu gagoham. ‘Ai oa, oho iba meedam bak lam em ozobohu bak. Om abo dae teuna meedam dàt iba vuusu meeda. Om bisi meit debe soalehena gi ahum gagome vada. Meit ahamo meedume vanamai nuhatehena oho vedi gi ahum vada.
25. Labihàmu oho eba loho emas dom lam eho meedume ame emas lam dualehe vaba setemeam làhà oho eba faki beom bak labna zohàme em fa iedi oho eba loho emas dom vàmtea lam eho le bak sime fa baumsuhu bak. Ame emas dom neam tame. Oho naedat nasi fa vale.’
26. Lahahat dat naeda labe ame lab gagoho bak lam aime faki ab gagoham. ‘Om abo eho na gagom di au vabali odohabulehe dàt modem labe bisi faina meedam dat om am bak. Oho eba neha, “Em bisi meit debe soalehena gi ahum gagome vada. Meit ahamo meedume vanamai nuhatehena eho vedi gi ahum vada.”
27. Laham bak lam om ozobohudehena akati eho oba loho emas lam oho neo ve damat mei emas modi duaedam num laba vou oli esu eho fa lehezobe ame emas fa dualehena oho eba gut lom vaba modela?’
28. Lahame gagu neàdi am im ot vai meedamda meida laba ab gagoham. ‘Oho nasi da labe vuusuhu emas dom vàmtea lam si vietoi fa em na meedamda meida labe aho em emas modi sepuluhleheda laba taho fa lole.
29. Neham bak. Eho meia neha, “Em na nimota oho vou aasdale,” lahame gagu ame da labe aho iademe vuusu vou aasdameam làhà eho ame da laba neo neha, “Em na nidi nim oho laha vou aasdale,” lahame gagu ame na vi tau duali feà bak fusi vuusu vou aasdam bak. Laham vabameam eho meia neha, “Em na nimota oho vou aasdale,” lahame gagu ame da labe aho iademe vuusu vou aasdam vabameam làhà eho naedat ame da laba gagu meedam im lam gi fa faatoi vei setem bak.
30. Labihadàmu oho nasi em na meedamda nim abo na im vi ozome modem biemda nim nasi si vou futoi bàhàgo bak iuba bisi aibu feà bak laba voou ame da nibe fà kikezi geàdam labe ahu faidi meb dae feàna faasi meddase,’ ” lahame Yesusat im totobe lam ab fi koadaham.
31. Labi im totobe lada lam Yesusat fi koadume neàdi ame im zoho lam Aba vi tau meedam dam niba neo nehame vi vahokeda. “Em Abo Asum Ahoba Iubet Bak Niba Li Dateleheda nim Em Aiat Eba gagu Eho ot vai Boehàdateboli fa bak niba lem di Em Aiat Am na fauha meona fako iedemna ogatei modealaha bak lam Eba modi vizi feà Dateli le tame. Labi Em im gagu vou usem dam zi laha Eba vi tau le tame. Labi ame di labe Eho Boehàdat nusumna abo Em Aiat Am na fauha meona fako iedemna ogatei modealahana nusumna laba Eho nusu dam vahi vuusu im vahokeda tame.
32. Labi ame di labe Eho Em im gagu vou usem dam laba gagu le dam mei debuti dam mei debuti ahebu atetedume vou li Eho avaesdam laba dozeadume neàdehezobe Eho faheme dam debu behàsdelo mozo. Abo na fi ho vou aasdamda labe aho am domba zi fàsi bak mei bake vahe. Labi am kambing zi fàsi bak mei bake neo vahe. Labiham bakti ulohona mode tame.
33. Eho ame bak lam meedam di labe Eho dam Alat Aho ozome gagoho im lam uledi meedaha dam lam abo dombati uloho dam lam Eho ve fi hasi fa Em anekehà ahi totbaho niba oumaheda. Labi dam Am im mu voedaha dam lam abo kambingti ulohoda lam Eho neo ve fa Em anekehà soi totbaho laba oumaheda. Labihada tame.
34. Labi Eho Boehàdatebo nibe Eho dam Em anekehà ahi totbaho niba oumaheda zi niba nehi gagom bak. ‘Um abo neàte. Eho dam vuusu im vahokedam bak niba nasi oedale. Em Aiat Aho uba faobekesi neà bak ozome meedalo modemna zi uba etei ab modelo modemam bak. Abo Em Ai Alati ahili aham di iube na ahebu alimeat meedaha vab di iube iho im behàsut fet ozome ahumdi esuhuna ziat modem bak. Nasi oedume um naedamalele.
35. Nehaha bak. Eho amu idoalehe di labe uho Eba na àmna lodume Eho ve àda. Labi neo Eho valo àhàki modehe di labe uho laha Eba vao noai Eba lu eho ude. Labi Eho bak mei bak iube fa uba lehe di labe uho Eba ule neàt gut ve um num laba ousu idda.
36. Labi laha Em sue vabali so bozbulehemu uho Eba sue lome duada. Labi laha Eho gaili meedaha di labe uho Eba li faobekesi vabieda. Labi laha damat Em si sel ousuhemu uho Eba li Em ahu faidem bak labna zohàme uho Eba vabededa.’
37. Lahame Eho labi gagodam di labe ame dam Alat Aba Aho gagoho im vuzehi vamdesu meedam dam Em anekehà ahi totbaho labe fa Eba nehi gagom bak. ‘Ai Boehàda oa, Om adi diat idoali iho aame Oba faobekesi na lome àdàla? Om adi diat valo àhàkehemu iho aame Oba faobekesi vao noai Oba lu uddàla?
38. Om adi diat bak mei bake iube iba li iho Om ule neàt gut ve num ibida vou oli iddàla? Om adi diat sue vabali so bozbulehemu iho aame Oba faobekesi sue lome duadàla?
39. Om adi diat gaili meedàmu iho aame Oba faobekesi li vabiedàla? Om adi diat damat Om si sel ousuhemu iho Oba li om ahu faidem bak labna zohàme iho Oba vabededahela?’
40. Lahame ame dam labe labi gagodàmu Eho Boehàdatebo nibe fa nehi gagom bak. ‘Nasi ozomale. Bisi imbo bak gi neham bak. Dam Eba vi tau meedam dam nim abo Em dam nim abo gi ee feà vab dam meida buà niba uho ame bak laba vi ozome ame dam niba tauhu di labe uho gi ame bak lam Eba laha modehena ozomom bak.’
41. Lahame labi gagu neàdi Eho dam Em anekehà soi totbaho niba oumaheda zi niba Eho nehi gagom bak. ‘Um Em Aiat amu gagu uloodume esuhu dam nim uho nasi bak nidi nim vou esmozi ilile. Abo gi vua eludamna sutem gikina bohu laba nasi le beodume geàdale. Ame bak lam Em Ai Alat Aho aham di iube nehi fet ozo, “Gi Iblisti Em im gagu vou usem dam totbaho aba tauhu dam lamti labihasu gi Eba vaitesu nasi vua eludamna sutem gikina bohu laba le beodume geàdase,” lahame ozome ahumdi esuhu bak laba le geàdale.
42. Nehaha bak. Eho amu idoalehe di labe uho ba Eba faobekesi na àmna lodaha vabak. Labi neo Eho valo àhàki modehe di labe uho laha Eba faobekesi vao noai Eba lu udehe vabak.
43. Labi laha Eho bak mei bak iube fa uba lehe di labe uho ba Eba ule neàt gut ve um numa vou oli ousu ihi vabak. Labi laha Em sue vabali so bozbulehemu uho ba Eba sue lome duadaha vabak. Labi laha Eho gaili meedaha di labe uho ba Eba li faobekesi vabiedaha vabak. Labi laha damat Em si sel ousuhu di labe uho ba Eba li Em ahu faidem bak labna zohàme Eba vabededaha vabak. Um gi labihadam dam tadehe bak.’
44. Lahame Eho labi gagom di labe ame dam Em anekehà soi totbaho niba oumaheda zi nibe fa Eba nehi gagom bak. ‘Ai Boehàda oa, Om adi diat idoali iho aame faobekesi na lu àhà vaba mohela? Om adi diat valo àhàki meedàmu iho aame faobekesi vao noai lu udehe vaba mohela? Om adi diat bak mei bak iube iba lehemu iho ule neàt gut vaha vaba num ibida malehela? Om adi diat sue vabali so bozbulehemu iho aame faobekesi sue lome duhu vaba mohela? Om adi diat gaili meedàmu iho aame faobekesi li vabiedaha vaba mohela? Om adi diat damat si sel ousuhemu iho li vabededaha vaba mohela?’
45. Lahame ame dam labe labi gagodàmu Eho Boehàdatebo nibe nehi fa gagom bak. ‘Nasi ozomale. Bisi imbo bak gi neham bak. Dam Eba vi tau meedam dam nim abo gi ee feà vab dam meida buà niba uho ame bak laba vi ozome ame dam niba tauhu vab labe uho gi ame bak lam Eba laha modehe vab damat ozomom bak.’
46. Lahame Eho labi gagu neàdi ame dam lam gi Eba vaitesu vua eludamna sutem gikina bohu laba ab le geàdam bohu modesdamam bak. Lahana ame dam Alat Aba Aho gagoho im vuzehi vamdesu meedam dam laba Eho modi dam lam Emti vahi gi ahe neàna bohu vuusda tame,” lahame ab vahokedaham.
1. Labi ame im zi lam ahebu vahokedume neàdi Yesusat Aba vi tau meedam dam duabelas laba ab gagoham.
2. “Uho neham bak ozobohudehena taia? Im Yahudi dam bada nibe iho im tai ahobada zi labe Im Adam Datahida Alat Oddaha Vabat Labohotehe Bake Vi Ozome Roti Fikidehe Vabna Àme Iziam di ee gagom Paskah lam neo fa ab vou fuseo vabaleham bak. Abo etei usi behàsdi ab fumam bak. Labi ame di labe Em Abo Asum Ahoba Iubet Bak Niba Li Dateleheda nim damat si meia ub lu damat ut tetehesuhunaso laba esu paku dodume elo tame,” lahame fet ab vameadume esuham.
3. Labi ame di labe damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi lamti labihasu vazisi neàdi damat Ala Bake Lomna Ve Vua Vahudam Tohe Dam Zi Labe Bisi Boehàdatebo Kayafas labe aho azihi num feàda laba ab laham.
4. Laba le vazisi im aa ab odoadamam. “Uho ozom, iho akatihasu modi zila audume Yesus si otela?
5. Lahana ibi iho dam vahi na àme iziam di nim imo nasi Yesus a simule. Aba tu vuzehehe dam duada kota Yerusalem niba esdamda ehete. Iho di nibe aba simeam làhà dam dae gai fai ziddume iba beomo. Gi ba digat meit sise,” lahame im aa ab odoadaham.
6. Amu Yesus num debu Betania laba le dat amu sokba faidi vàhàdem bohu vuusdamda modi fa neàdeheda Simon labe am num laba le aidam di labe nam meida vàmtea iba ab leham. Labi Yesus ame num laba vahi na àdam di labe ame nam labe aho doi duana vaha minyak ahana neàna amu ke fauhana ee gagom pualam meit modeme botolilehena laba fedehena aho vou le Yesusam ohu laba ab nom veàtoham. “Yesus abo feàte,” lahame ame bak laba vi ozome ab modeham.
8. Veàtoi modeha Yesus Aba vi tau meedam dam labe iho ame bak lam aahemu faki dam ihimo aa ab voe voedamam. “Oo, akati modi doi feàna vaha minyak labi gi vàhàdedàla?
9. Gi meia doi feàna ot loiame neàdi fa ame doi lam dam na vab dam laba fa lodam vaba mode?”
10. Lahana ame lab voe voedam bak lam Yesusat Ahamo ozobohudi fa dam laba ab gagoham. “Um ana modi nam niba faki vabidàla? Um ozom vaba? Aho Eba lab modehe bak lam gi neàna modehe bak.
11. Um dam na vab dam gi labaha bohu tau esdam labe vi taui vi tauidam labe esdam bohu meedam bak. Lahana Em etei nim ba uba tau azim bohu meedam vab Dàt modem bak.
12. Eho ozoha, Em ba elom di koei noimna noime afoezobe ke bumata vou oli esum bakti uloho bak laba ozome Em so niba na lam ahit nasi fet veosi ahumdi esulo modem bake ahole modehe bak.
13. Aho neàna modehe bakta imbote. Lahana Eho etei uba neo gagolo modem im imboda nidi nim laha nasi aima. Eho meedaha Im Neàna lam meit bak iudu iuba le vameadào? Bak iudu iuba le vameadào? Labihadam di ame nam nibe aba aho etei Eba lab modehe im lam damat laha aime ozobohudi fa ame im lamti vou vameatedam bak. Ba setem vaba gi labaha bohu vou aid ledam bak,” lahame Yesusat Aba vi tau meedam dam laba fet ab vameadaham.
14. Ame di labe Yesus Aba vi tau meedam dam duabelas labe dat meida Yudas Iskariot labe aho damat Ala bake lomna ve vua vahudam toheda zi laba vuusu im vameame faheme modiam dam laba le vi ailo ab gagoham. “Eho Yesus vou fohome uba ub lomeam uho eba ana loela?” Lahame labi gagoha ame dam labe uledi iho doi oona perak ibida debe tiga puluhli ab loham.
16. Labi Yudas ame doi lam ve neàdi aho ahit neà dateli le, “Yesus adi diat vou fohome dam bake ub loela?” lahame gi vou faoda.
17. Labihadam di labe vou faodameilahit Yahudi Dam Vahi Ame Roti Fikidehe Vabna Àme Iziam di ab vou fuham. Vou fuhemu digat ahamteda labe Yesus Aba vi tau meedam dam labe Aba li ab gagoham. “Boehàda oa, im Paskah fuhemu iho vahi na àm bake iho ake le na modeme vaheme ahumdi esuela?”
18. Lahahat Yesusat fa ab vi gagoham. “Uho kota Yerusalem laba le dat eho amu na àm bak gagu esuhuda laba nehi gagole. ‘Im gurut oba neha, “Am geàdume elom bak ab vou fuham bak. Labihàmu Aho Aba vi tau meedam damti vahi om num laba na àme iziam di Paskah fuhemu vahi na àlo modem bake na àmna modeme vahedume ahumdelo mozo,” lahaho,’ laham bake laba le gagole.”
19. Lahame labi gagohemu Aba vi tau meedam dam labe Yesusat etei iba lab gagoho bak lam le ame Paskah vi ozome àdamna lam modeme vaheme ahumdi neàdi ab esuham.
20. Labi disi aibulehemu Yesus Aba vi tau meedam dam dua belas lamti vahi ame num laba le na ab faasi àdamam.
21. Faasi na àdam di labe Yesusat ab gagoham. “Um nasi iademe aima. Um etei niba na vahi àdam dam nim meida vàmtea labe Em vou fohome meia ub lomda niba ehete.”
22. Lahame labi gagoha Aba vi tau meedam dam nibe im ahu faidi Yesus bake neha, “Ai oa, Oho ozom, eho modem im Oho gagohe?” lahame meit Yesus bake vi gagu ai. Meit neo vi gagu ai. Lahada.
23. Lahahat Yesusat fa gago, “Ne, ame Eba vou fohomda lam gi Eba neab tau na vaksa fi lihibabu niba roti zoho ekeme ab àdamam bak.
24. Lahana gi labihasule. Em Abo Asum Ahoba Iubet Bak Niba Li Dateleheda nim Eho ba modem im meit Alat Vameadaha Im Toedahana laba im meida nehasu toehe bak. ‘Elo tame,’ lahame fet toeme vàmadi esuhu labe ame bak ab imbodelo modemam bak. Aiee! Lahana ame da Em vou foholo modemda nim am oiat am faaha bak feidam vabate. Ame da nim Alat ba gi fai bak bohu tadelo modemda am bak.”
25. Lahame labi gagoha Yudasat abo Yesus etei vou foholo modemda labe ab gagoham. “Ai Guru oa, Oho etei lab gagoho im lam eho modemna Oho nasi fet gagohe?” Lahahat Yesusat fa neha, “Lo, ohomo ab ozobohudi gagoham taia?” lahame ab gagoham.
26. Labi ame lab vazisi na àdam di labe Yesusat neo roti ve Am Ai Ala bake, “Neàte,” lahame tom gagu neàdi ame rotibu lam agube faheme Am dam bake ab lodaham. Lodam labe nehame vi vameada. “Roti nim Em so am tame. Uho roti nim ve àm di Eba vi ozome àdale.”
27. Labi roti lam àdume neàdi Yesusat neo anggur oo vaksa mokzoho fedehena ve Am Ai Ala bake, “Neàte,” lahame tom gagu neàdi dat meidate lu vuusu vameada. “Uho ame anggur oo vaksa nim um ahebu uddam labe ototo vaidale.
28. Uho etei uddamna anggur oo vaksa nim nehi vi ozomna vaksa am tame. Amu Alat dam amudate gagu gohalemna lam fa vei seti etei nim Em vasea veàtolo modemna nim fa dam bakdate gohalemna Alat ab modi gàhàdeham bak. Dam bakda dua totbaho labe ibi iho faina meedam bak lam Alat ozahigeàmu im beodam vaba fa vei neàdedam bak vi ozome veàtolo modem vasea am bak.
29. Lahana im imboda nidi nim iademe aime tu ozodale. Iho etei vahi uddam anggur oo vaksa nim Em etei nib udehe tade tame. Lahana ba diamut Em Ai Alat Eba modi Boehàdateboli dam bake abobo vuusu im vahokedam di labe ba udem bakti gagom kaio.”
30. Lahame labi vameadume neàdi vou ladeedaha bak vàmadi ame num labe futoi kota Yerusalem vou esmozi Zaitun Dee Dozeadaha Bak Buzoho laba laitelo ab ladamam.
31. Labi ladam di labe Yesusat Aba vi tau meedam dam laba ab gagoham. “Etei aibu nim damat Em simeam làhà Eho geàdam bak lam uho aahemu um ahu gelevai ubu uho amu Eba lab vi tau meedam bak lam fa seti Em vou esmozi ili tame. Eho meit Alat Vameadaha Im Toedahana laba im meida nehi toehe labe uba labi gagoho bak. ‘Ame da domba fi ho vou aasdamda lam Eho dam bake modi damat ote tame. Labi am domba gi fi goaitoi sete tame.’ Lahame labihasu toehe bak ehemu uba labi gagoho bak.
32. Lahana Em eloho bak labet Alat modi fa ahedi usai Em Galilea bak laba nasi le uho ba vulem bake vou faoda tame.”
33. Lahame labi gagoha Petrusat fa ab vi gagoham. “Vabà! Dat Boehàda oa, dam totbaho nibe im ahu gelevai ibi iho Oba tu vuzehi meedam bak lam fa seti Om vou esmozi ili tame. Lahana em vàmtea nim ba Om vou esmozi itam bak em ba vi ozom vabak.”
34. Lahahat Yesusat fa gago, “Lo, oho lab gagoho bak ame. Lahana im imboda nidi nim nasi aima. Om ba labiham vabak. Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi tem veibam bak làtelademeam kuk ab aaumam tame,” lahame ab fet gagu esuham.
35. Lahahat Petrusat fa neo vi gago, “Dat Boehàda oa, Omti emti damat amediat otemta neàte. Em ba àvodem vabak. Lahamnàme em ahe lahasuhu di nim em ba meia neha, ‘Em Om bieho,’ lahame vageme Om mom vabak,” lahame labi gagoha Yesus bake vi tau meedam dam totbaho labe ame im lam aihemu gi Petrusat lab gagoho bak lamti ulohona Yesus bake neo ab vi gagodaham.
36. Labi Yesus Aho neo Aba vi tau meedam dam lam ve Getsemani laba ab vou laham. Laba lafusi gago, “Uho niba nusualadume faode. Em iumà iuba le Em Ai Ala bake tom gagodalo mozo.”
37. Lahame labi gagu neàdi Aho Petrusti Zebedeusam adam behàsu lamti labihasu dam làtela lamota, “Aba tau lele,” lahame gagu dam totbaho laba vou esmozi ab laham. Labi laba le lafusi modeha Yesusat Am ahu faidi feà bak fusi admahi ab meedamam.
38. Làhàmu Aho Am dam làtela niba ab gagoham. “Em ahu faidi feà bak fuho. Em gi ab elom ahulaleham tame. Um niba faode. Em Ehemo iumà iuba le tom gagodalo mozo. Labi um niba esdam di a imule. Gi vou faovoi aasdale.”
39. Lahame labi gagu neàdi Ahamo iumà iuba le ogomasu bake biti Am Ai Ala bake ab tom gagodamam. “Ai oa, em geàdalo modem bak nim Oho fa faatoi vei setem neào?” lahame gagu ozoha vabamu fa neo gago, “Vabo. Ebe Eho ozom bak fa feidate. Gi Obo Oho ozoho baket modem neàte,” lahame ab tom gagoham.
40. Lahame labi tom gagu neàdi usai fa Aba vi tau meedam dam làtela laba fa le aaha dam gi beilame idaomna le aa. Le aame Petrus bake ukeme ab gagoham. “Petrus, Em kehàm vabna gi jam vàmteadehena um akati vou faovoi aasdam vaba idaoe?
41. Iblisit uba li, ‘Um faina modem bak modeo,’ laham bak uba li um ahu ozolo modem di um ahu a bedemule. Gi mahate it vou faovoi Ala bake tom gagodale. Neham bak. Im ahu it ozomta gi neà bak modelo àhàki vi ozodam bak. Lahana im ahu nibet ihimo fatahivai bedem meo bak.”
42. Lahame labi im vahokeme neàdi Yesusat Am dam làtela lam fa neo vou esmozi iumà iuba le Am Ai Ala bake Aba Aho amu tom gagoho baket neo ab tom gagodamam. “Ai oa, Em geàdalo modem bak nim Oho fa faatoi vei setem bak momeam làhà gi labihasuse. Ebe Eho ozoho bak fa feidate. Em geàdam neàte. Obo Oho ozoho baket modem neàte.”
43. Lahame labihasu tom gagu neàdi usai fa Aba vi tau meedam dam làtela laba neo le aaha dam gi neo izeo àhàki feà bak fusi lavoidume fa idaomna le aa.
44. Làhàmu gi le aame vou esmozi fa le Am Ai Ala bake Aba Aho amu tom gagoho bak lamti ulohona fa neo ame baket tom gagu ab làteladeham.
45. Labi tom gagodume neàdi usai fa Aba vi tau meedam dam làtela laba fa neo le aaha dam gi beilame idaom lahasuhuna le aa. Làhàmu ukeme ab gagoham. “Ne, um akati bedali idaom lahasuhela? Nasi keesi usnadale. Asum Ahoba Iubet Bak Niba Li Dateleheda nim vou fohome dam faina meedam dam laba ub lomda iba ab fuseo vabaleham bak.
46. Nasi usnadume ladase. Em vou fohome meia ub lolo modemda etei iubet ab ledamam bak.”
47. Lahame Yesus gi etei vameadam lahasuhu di labe Aba vi tau meedam dam dua belas meida Yudas lam ab lefuham. Ahamo lem kai. Dam ae tot mo tot mo lahamna vuusualaha dam zi lamti labi eobu vuusualaha dam zi lamti labihasu aba tau mitaedume ab lefusi dozeadaham. Ame dam lam gi damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi totbaho lamti labihasu amu vameame ahumdi oudaha labe ame dam zi lam ab le omsuham.
48. Yudas amu aho gi iumà ium ledam labe ame dam zi laba nehame fet gagu esu, “Uho aameam im Yahudi damat meia tàm di oode totti totti tomoamdem bak lam eho ame Da laba modehe bak uho aameam làhà ame Da am tame. Uho ame Da lam nasi sile,” lahame amu fet gagu ahumdi esuhu bak ehete.
49. Labihàmu etei li dozeadaha di labe Yudasat gi taho Yesus bake ub fetu duzu ab gagoham. “Ai Guru oa, Om abo neàte,” lahame gagu Am oode totti totti ab tomoamdeham.
50. Labi modeha Yesusat fa ab gagoham. “Oo làhà! Om Emti vou alemda om labihalo ozome Eba ab lehame? Làhà ame bak lam taho modele.” Lahame labi gagoho di labe dam duada zi labe vi feddume Yesus ab siham.
51. Labi modeha Aba vi tau meedamda meida labe ae goha dusuhuna vuu vihitoi Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am na meedamda lam beoha biou gi dogoi baata fatoi bake ab biteham.
52. Labi modeha Yesusat fa ame da laba mali ab gagoham. “Aa! Ba meia a beomule. Neàdeho. Meit am ae tot mo tot mo lahamna labe meia belu elomeam làhà meit fa neo ame ae labe fa ame da laba belu eloi vi vataum meote. Gi feidate.
53. Um ozom vaba? Eho Em Ai bake nehi tauleme gagomeam, ‘Eba taule,’ lahame gagom di Aho gi uledi Eba Am im gagu vou usem dam meo dam zi feà abo tujuh puluh dua ribu oudume Eba taum bak.
54. Lahana Em Ai bake tom gem bak moho bak. Neham labe labihaha bak. Eho ame bak lam meedameam làhà meit Alat Vameadaha Im Toedahana laba im nehasu toehe im nim ba akati modi imbodela? ‘Alat Gagu Fihasi Vimteme Oluhu Dat Boehàda lam damat nehasu Aba mode tame,’ lahame lab toehe im lam ba akati modi imbode? Eho labiham bak vi ozome Em moho bak.”
55. Lahame Yesusat Aba vi tau meedamda meida laba im vahokedume neàdi fa neo dam Aba silo lehe dam zi laba im ab vi vahokedamam. “Um Em otelo vabeddamna akati Eho amu Fihasi Ala Bake Vou Baedam Num Vàmteabu labe am ad oli aam bak tomba laba Eho Alam im vahokeme leidamehamdehena abo umti vahi meedamna akati ame di labe Em taho si otem vaba mode? Uho ozomta vedi Em dat aa li ausume mei beome im nazoh gelevai esmozi laiam dàt mode tiba uho etei aeti eobuti ab vou lehame?
56. Lahana uho etei nib meedalo meedam im nim ahebu gi ahole meedalo modem bak. Neham bak. Dam ahamda Alat vameadaha im aime fa dam bake ahate vameaidaha dam zi labe iho amu fet toeme esuhu im lam imbodelo modem labe uho vabili etei ab meedamam bak.” Lahame labi vameadume neàdi modeha Aba vi tau meedam dam lam ahebu iedi Am vou esmozi fi goaitoi ab ilime seteham.
57. Labi Yesus sihi dam labe Am vou duzu vou ladume Damat Ala Bake Lomna Ve Vua Vahudam Tohe Dam Zi Labe Bisi Boehàdatebo Kayafas labe am num feàda laba ab vou laham. Amu dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti Yahudi dam bake vuusu im vameame faheme modiam dam busaoda zi lamti labihasu ame num bumat laba amu le ahumdi vou faoda. Labi dam lam gi laba esdamna ahum Yesus ab vou fuham.
58. Ame di labe Petrusat gi vaitesu ba aa vi duzu vulada. Labi ame num feàda labe am ad oli aam bak tomba laba vi fusi ame meo dam labe num feàda laba vou aasdam dam lamti gi aa valiheme laba vi tau nusda. “Damat Yesus bake akati modela?” laham bak aalo aa nusu vou faoteda.
59. Ame di labe damat Ala bake lomna ve vua vahudam toheda zi laba vuusu im vameame faheme modiam dam abo Yahudit Ibi Iho Modem Im Gagu Vàmadi Esum Dam Debu labe im dam zi lam vahe vahedume Kayafasam num laba im neham bak gagolo àhàki bakamta vahi vou faoda. Damat neha, “Yesus git modeho,” lahame gagu Yesus bake giomim vàlum damat li im gagom bake aihizobe Roma eeda laba ub lu, “Yesus fà beome elose,” laham bak gagolo àhàki vou faoda.
60. Labi vou faodaha giomim vàlum dam duanàme ame eeda zi labe ibi iho aime vàlum neàda aihizobe vàlusome vou faoha ba ame bak lam taho vi aim kai. Labi neo vou faodameilahit dam behàsu labe lehe labe ame dam eeda labe iho avaesdam laba li ab duzuham.
61. Li duzu gago, “Iho aiha ame Da nibe Aho nehi gagoha. ‘Ame Fihasi Ala Bake Vou Baedam Num Vàmteabu nim Aho beodume fa faamome seti usi behàsdi Aho fa mo tame,’ lahame gagoho bak lam iho aiho.”
62. Lahame labi vàlu gagohemu Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am ahu gukeme usai tomba duzu Yesus bake netàdi vi ailo ab gagoham. “Om dam nibe etei Oba vàlu gagoho im nim Om taho veibame fa gagom vaba?”
63. Lahame gagoha Yesus ba dae buhu vaba gi daleàdi vou faoda. Làhàmu ame Tohe Dam Zi Labe Bisi Boehàdatebot aho fa neo vi ailo gago, “Om, ‘Alat Gagu Fihasi Vimteme Oluhu Dat Boehàda abo Alam Adat am bak,’ laham bak lam imbodemeam làhà taho fa Ala elom giki Ala abo gi labaha bohu modesdam Ala labe Am ee gagu, ‘Om ame da am tame,’ laham bak taho gagu vàmadi esule.”
64. Lahame labi gagoha Yesusat fa ab vi gagoham. “Lo, oho etei Eba lab gagoho bak lam ohomo imbo bak ab gagoham bak. Alat Gagu Fihasi Vimteme Oluhu Dat Boehàda lam Em ame Da am bak. Lahana, ‘Em laha Alam Adàt modem bak,’ laham bak lam um biem bake Em ba diamut nehi meedam labe uho laha, ‘Imbote,’ lahame neo gago tame. Ba diamut uho Em Abo Asum Ahoba Iubet Bak Niba Li Dateleheda nim uho Eba aam di Em fa feà Dateli Ala Bisi Feàda labe Am ahi totbaho laba tau nusu na ahebu vuusdam bak lamti Em asum ahoba iube fa uloti bak niba lem bak lamti labihasu uho aa tame.”
65. Lahame labi gagohemu ame boehàdatebo labe aho aime faki am sue ahoba dusuhuda lam gi ahamo naedat auet it vome geleme ab faheham. Faki dam eeda totbaho niba ab gagoham. “Um aim vaba? Da nim gi Ala bake feàtàhà bak. Aho vedi, ‘Amti Alati ulohote,’ lahame gagoho bak lam uhumo ab vi aiham taia? Ba akati meit neo li vàlu gagom im lam iho aie? Ame da nibe Aho gi Ala bake lab feàtàhà bak lam uho ozom, Da nim akatihà?” Lahame labi gagoha ame dam eeda totbaho labe vazisi fa ab gagoham. “Lo, ibi iho fi hasi baleàhà bak lam Da nibe vazidazehemu gi gagu otem neàdehe bak,” lahame ab gagu vàmadeham.
67. Lahame labi gagu neàdi dam zi totbaho nibe Yesusam dauha laba keha beàdam labe aumbut vi foida. Labi dam totbaho nibe iho sue baa visoi Yesusat iba aam bak labna zohàme Am fakode laba baguamdi meit au baat Am oode laba vi fu tozome gago, “Hohoa. ‘Om Alat Gagu Fihasi Vimteme Oluhu Dat Boehàda am tame,’ lahamda Oho ozom, Oba amat beo. Taho iba fa gagoma,” lahame meit vi fu tozome gago. Meit vi fu tozome gago. Lahada.
69. Ame di labe Petrusat gi ame num labe am ad oli aam bak tomba laba nusda. Nusdume modeha mei na meedam nam labe aba li netàdi ab gagoham. “Om Yesus Galileada bake vi tau meedam dam meida om am taia?”
70. Lahame labi ahate gagoha Petrusat, “Damat fà aise,” lahame ab tem veibadamam. “Vabo. Oho etei lab gagoho im lam em ozom vabili mozo.”
71. Lahame gagu neàdi aho usai ame num feàda labe am ad oli aam bak tomba ub futom doo obe laba le duzu modeha na meedam nam meida labe neo aame dam dua bak laba ahate fi desi ab gagoham. “Imbot. Ame da nim gi Nazaretda Yesus abo damat etei sihida laba vi tau meedamda meida am bak.”
72. Lahame neo labi ahate gagoha Petrusat fa ohu vame tem ab veibadamam. “Ame Nazaretda lam em bieho. Eho giomim gagomeam làhà Alat fà eba beose.”
73. Labi gagu neàdi neo duzu vou faodameilahit dam am obe laba dozeadaha dam labe aba neo li netàdi ab gagoham. “Mm, abo imbote. Om abo damat etei sihida laba vi tau meedamda meida am bak. Iho gi oho im gagom bak vi aim di om gi Galilea damat im gagom bakti uloho bak.”
74. Lahame dam labe neo ahate gagoha Petrusat, “Damat fà aise,” lahame fa neo ohu vame ab tem veibadamam. “Uho etei gagohoda lam em bieho. Eho giomim gagomeam làhà Alat fà eba beose.” Lahame gi etei tem veibaha bak làteladeha kuk ab aauham.
75. Labi kuk aauha Petrusat Yesusat aba amu nehame fet gagoho bak lam fa ab vi ozobohudeham. “Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi tem veibam bak làtelademeam kuk ab aaumam tame,” lahaha bak lam ab vi ozobohudeham. Làhàmu dam dua bak vou esmozi futoi iumà iuba le ahu faidi nom bohusu bisteat meb dae ab faaham.
1. Labi dihambe damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi lamti labihasu vazisi ozome ahu vàmadi ab gagoham. “Neàdehe bak. Yesus gagome otem neàte.”
2. Lahame labi gagu neàdi Yesusam anekehà ahim giame vou duzu vou futoi ozo, “Roma dàt gubernurli Yudea bak vuusdam boehàda laba vou le ub lu aho uloome aise,” laham bak ozome Gubernur Pilatus bake ab vou ladamam.
3. Ame di labe Yudas abo Yesus vou fohome meia ub lohoda labe aho vi aaha damat Yesus uloodume vi aime ozobohudi neàdi, “Yesus otese,” laham bak ab gagohamemu am ahu it ozo, “Eho git modehe,” lahame ahu faidi fa aho amu neàt vaha doi lam ve vuusu fa damat Ala bake lomna ve vua vahudam toheda zi laba im vameame faheme modiam dam lamti Yahudi dam bake vuusu im vameame faheme modiam dam busaoda zi lamti laham dam zi laba le, “Doi fa voedase,” lahame ab laham.
4. Le gago, “Eho faina modeho. Dat faina modehe vabda im neàna meedamda eho vabili meia ub lu vasea veàtolo mozo.” Lahame labi gagoha ame dam zi labe fa gago, “Akati ba fa iba li vameada. Ame bak lam ohomo amu modi vàhàdehe bak.”
5. Lahahat Yudasat aho vi ozoha, ba modem biehemu doi zi lam gi ame Fihasi Ala Bake Vou Baedam Num Vàmteabu laba gi ab voou fi goaitoi esmozi ab itaham. Labi itame le, “Ahamo modi elose,” lahame lo visoi ut aaso laba vààsu. Labi zoho am bio laba it vààsu labihadume nom ziagahuha loat kidademe biogai ab eloham.
6. Labi damat Ala bake lomna ve vua vahudam toheda zi laba vuusu im vameame faheme modiam dam labe iho Yudas le setehemu ame lab vou fi goaitoho doi lam fa vi ateme gago, “Doi nim mei oteme vasea veàtom bak ozome loho doi nim ba iho ve Fihasi Ala Bake Vou Baedam Num Vàmteabu laba vahedam doi laba vi tau esum biem bak. Dat ahamda Musat aho aham di iube iba labi mali toeme esuhu bak.”
7. Lahame ot vameaidume ahu vàmadi neàdi ab gagoham. “Imo doi nim ve fa gi nehase. Dam Yahudi damat modem vab dam elodam di baumahedam bak vabalehemu imo dat ohanu ve am anekehàt modeme nazohaedamda labe am utoho bae lam fa doi nibet fa vase,” lahame gagu neàdi ame baket ab modeham.
8. Amu ame bak lam labi modehemu ame bak gagom di, “Vasea bak,” lahame vou gago usdume dam bada niba ab vou fuham bak.
9. Labiha labe dat ahamda Alat vameadaha im aime fa dam bake ahate vameaidahada Yeremia labe aho aham di iube fet nehi toeme esuhu im nim ab modi imbodeham bak. “Ba diamut ame lab voedaha doi oona perakat modehena tiga puluh lam Israel damat neha, ‘Ame Da lam iba ub lomeam iho doi nehasu oba lo tame,’ lahame ahu vàmadi gagu loho doi lam vi ateme fa dat ohanu ve am anekehàt modeme nazohaedamda labe am bak ame doi labet vaha bak. Abo Boehàdat Alat eba labi fet gagu esuhu bakti ulohona modehe bak.” Lahame Yeremiat aham di iube fet toeme esuhu im lam ab modi imbodeham.
11. Labi dam eeda zi labe Yesus vou laha labe le Gubernur Pilatus aho avaesdam laba vou duzu neàdehezobe Pilatusat Yesus bake ab faasi uloodamam. “Imbo? Oho neha, ‘Em Yahudi dam debu vuusu im vahokedam boehàda am tame,’ lahame Oho labihasu gagodàmu damat Oba vàluhu bak lam imboo? Om ame da ameo?” Lahahat Yesusat fa gago, “Lo, oho etei lab gagoho bak lam imbote. Em ame da am bak.”
12. Lahahat ame damat Ala bake lomna ve vua vahudam toheda zi laba vuusu im vameame faheme modiam dam lamti ame Yahudi dam bake vuusu im vameame faheme modiam dam busaoda zi lamti iho vazisi im meiti im meiti Yesus bake la vàlui le vàluidume modeha Yesus ba dae bum kai.
13. Labihàmu Pilatus Yesus bake neo ab gagoham. “Dam etei Oba nib la vàlui le vàluidam bak nim Om aidamna akati taho fa veibam vaba mode?” Lahame labi gagoha damat Aba lab la vàlui le vàluidam bak lam Yesusat ba im vàmtea buà ot vai vi gagom kai. Gi ailahigeàmoda. Labi modeha Yesusat it veibam vabamu Pilatus ab aame àvodeham.
15. Ame Roma dam zoho vuusdam gubernur labe aba aho tahun ahebu modi baleàlehe bak gi nehadam bak. Yahudi dam ibi iho na àme iziam bak abo Paskah fum di Yahudi dam amu si sel oumahehe dam lam, “Dat adida isi oluela?” laham bak lam dam bake gagu aime gi damat iho ee gagohoda vàmtea lamota aho fa gagu vou futoi Yahudi dam bake olum meot.
16. Ame di labe amu ame sel oumahehe dam dat meida Barabas laba ehet. Ame da Barabas lam aba aho amu meedaha bak lam dam ahebu aime ozobohudehe labe elaidam dàt moz. Lahamda etei sel laba ousda.
17. Labihàmu ame gubernur labe aba aho amu modi baleàlehe bak fa neo vou fuhemu dam duada zi lam am num labe am ad oli aam bak tomba laba vazisi neàdehezobe Pilatusat vi ailo ab gagoham. “Em etei dat adida gagu vou futoi uba oluela? Barabas modeo? Yesus Aba damat neha, ‘Alat Gagu Fihasi Vimteme Oluhu Dat Boehàda am tame,’ lahamda modeo, dat adida eho gagu vou futoi uba oluela? Uho ame da gagole.”
18. Pilatus neham bak amu gi ozobohu labe vi ailo gagoho bak. Yesusat ba git modehe bak na vabak. Gi ame Yahudi dam busaoda eeda zi labe iho nehi ozo, “Akati modi dam dua totbaho labe fa Yesus bake tu vuzehi Am damali meedà?” lahame ahu adat faki teidi aba ub loho bak lam am ozobohu labe gagu vi aihi bak.
19. Labi Pilatus aba aho meia uloome vi aime neàdi fa dam bake gagolo modem diat ahamo nusumna gi etei laba nusu vi ozodam lahasuhu di labe am namet aba im gagu am im vou leheda labe ab li gagoham. “Om namet oba nehi vi gagu oluho. ‘Aho iddameam ame Da laba ulehe im modi ahu faidi azi vi ozodam bohu meedalo. Debu faina modehe vabda ba meia a gagu beomule,’ lahame oba vi gagoho.”
20. Lahana Pilatus gi etei am namet vi gagu oluhu im aidam di labe ame damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi lamti labihasu vazisi iho ozahit dam duada zi laba neha, “Gubernur uba neha, ‘Am dat adida gagu vou futoi iba oluela?’ lahame gagom di uho gi gubernur laba fa nehi gagole, ‘Iba Barabas gagu vou futole. Labi oho om meo dam gagome fa Yesus otele,’ lahale,” lahame tet ootedam labe ame dam duada zi labe ab uledeham.
21. Uledi vou faodam labe Gubernur Pilatus neo ab gagoham. “Em etei dam behàsu nim dat adida eho gagu vou futoi uba oluela? Taho gagole.” Lahahat dam zi labe fa ab gagoham. “Iba gi Barabas gagu vou futoi iba olule.”
22. Lahame labi gagoha Pilatus neo vi ailo gago, “Làhà eho ame da Yesus nim damat neha, ‘Alat Gagu Fihasi Vimteme Oluhu Dat Boehàda am tame,’ lahamda nim eho akati modela?” Lahahat dam zi labe vi ozome dae vàmadi fa ab vi gagoham. “Làhà gi ut tetehesuhunaso laba esu paku dodume elole.”
23. Lahahat Pilatus fa neo gago, “Ne lahana eho Da nim uloodume aiha Aho faina modehe bak aihi vabna akati eho gagu ote?” Lahame labi gagoha ame dam duada zi labe Yesus gi ut tetehesuhunaso laba esu paku dolo àhàki meedàmu dae duali dae gai ab ziddamam. “Vabo. Gi om meo dam gagome ut tetehesuhunaso laba esu paku dodume elole,” lahame ab daetesu meedamam.
24. Labi Pilatus ozo, “Dam duada zi nibe daetesu meoli feà bak fusi gukedam bak tadi meedàmu eho ba akati modi dam laba male,” lahame vi ozodaha vabamu Pilatusat am na meedamda meida laba gagu fi lihiba vao noai vou li dam ahebu aasdahit am anekehà ahim valo ab kikeham. “Ame Da nim beome vasea veàtolo modem bak nim, ‘Em tau gagu modeho,’ laham bak lam ba eba a gagomule. Uhumo meedume Da nim ab otelo modemam bak.”
25. Lahame am anekehà valo kikedam di labe ame dam duada zi labe fa vazisi ab gagoham. “Lo, Om mom neà bak. Am vasea veàtolo modem bak lam gi imti iho ba vou faat ladam dam lamti labihasu meit fà iba vàlu gagom neà bak.”
26. Lahame labi gagohemu Pilatus am meo dam gagome Barabas sel ousuhuda laba gagu vou futoi ab oluham. Labi Yesus fa meo dam laba ub lu na sokba nasbe ahit alibulehena labe Aba foadume ab geàdamam. Labi foadume neàdi Pilatusat neo, “Yesus ut tetehesuhunaso laba esu paku dole,” lahame am meo dam lam gagu ab oluham.
27. Labi ame Gubernur Pilatusam meo dam labe iho Yesus si gubernur labe am im meedam num feàda labe am zoho laba abo meo damat vahi esdam bak laba neo vou le duzu neàdi im meo dam totbaho ahebu laba gagome ledume Yesusam obe laba ab ahilesu dozeadamam.
28. Dozeadume neàdi Yesusam sue vihilame fa sue sona boz gihona bohu abo boehàdat ahoba dusum sue lamohoda ve Yesus bake nom dusu.
29. Labi neo lo alibuna vabome vuihàli neàdi Yesusam ohu laba neo nom usulo vi gago, “Nim gi boehàdat am ohula nom usumnat modem bak,” lahame gagu ab nom usuham. Labi neo boehàda labe aho vuusum odoamso lamohoda Yesusam anekehà ahi tot laba neo tet lu ab vuusuham. Labihadume neàdi ame meo dam labe iho neo ahit neà damali ogomaladume Yesus bake ab gagu tozoidamam. “Looo. Yahudi dam debu vuusu im vahokedam boehàda abo neàteee,” lahame meit gagu tozo. Meit gagu tozo. Lahada.
30. Labi neo keha vi dou gagu tozoida. Labi neo ame odoamso fa vi vietoi Am ohu laba vi foada.
31. Labi fu tozoidume neàdi ame sue bohu lam fa vuu vihitoi sue Abada fa duadume neàdi damat Am esu paku dolo modem ut tetehesuhunaso lam visoi Aba nom vatu kota Yerusalem vou esmozi fa bàhàgo iuba Yesus ab vou ladamam.
32. Labi lab vou ladam di labe dat ee gagom Simon abo Kireneda labe aho kota Yerusalem bàhàgo bak laba godam dàt fa kota bake ledamda ab ot tahiaham. Ot tahiame modeha Yesusat Am vanamai alihi nemahuhemu ame meo dam labe Simon bake tet gut ooteme Yesusat Aho vatu vou ladam ut tetehesuhunaso lam fa visoi Simon bake tet ab nom vatuham. Labi Simon ame utso lam vatu ab vou ladamam.
33. Labi vou ladume Golgota laba ab vou fuham. “Golgota,” laham di gi, “Ohu Fetahabu,” laham bak.
34. Labi Golgota laba vou fusi dam nibe anggur oo vaksa na amomoi àhàkebuti valihehena lam vou li Yesus valo àhàkem bak laba ozome, “Lu udese,” lahame Yesus bake lu Aho koena udeme ozoha, “Na nim àhàkebunat moz,” làhàmu ab moham.
35. Labi ame meo dam labe neo Yesusam sue ahoba dusuhuda lam ab vome vihilaham. Labi vihilame neàdi neo ame ut tetehesuhunaso lam visoi bake esu afoezobe Yesus tom gaesu nom esu neàdi Am anekehà meida kidadesu paku do. Labi anekehà meida neo kidadesu paku do. Labi Am naba bakamta modesu paku do. Labihadume neàdi vi vuu vousai bak bumata ab zisuham. Labi zisu teudi neàdi ame meo dam labe iho Yesusam so laba amu lab vihilaha sue lam, “Amat vaela?” lahame ibi iho fi mam baket modeme neàdi ab vadaham.
36. Labi sue vadume neàdi ame meo dam zi labe ozo, “Meit bak iubet li Yesus fa vi vuhatoi ahede moio?” lahame Yesus bake nusu vou aasda.
37. Labi, “Da nim ana im modehe bake damat vàlu otehela?” lahame ut gaheba ve nehi toeme Yesusam ohu vazidazi toma zoho laba taasu paku dou esu. “DA NIM YESUS MOZO. ABO YAHUDI DAM VUUSU IM VAHOKEDAM BOEHÀDA AM TAME,” lahame toeme ab taasu esuham.
38. Labi Yesus ve paku doho di lam ame meo damat ut tetehesuhunaso meida ahim neo visoi dam mei nazoh vietomoadume vou itam dam ahim lam vame Yesusat modehe bakti ulohona modi paku dodume neàdi Yesusam anekehà ahi totti soi totti modesuhu tot laba bak bumata ab nom zisitdaham.
39. Labi Yesus taasu modesdam di labe dam duada zi labe labohotedam labe tom aame ohu bobodam labe
40. nehi tozome gagoida. “Làhà, ‘Ame Fihasi Ala Bake Vou Baedam Num Vàmteabu lam Om feàda modem labe Ohomo beodume fa faamome seti usi làteladi fa mo tame,’ lahame gagodamda am taia? Lahana Om Alam Adat laham bak imbodemeam làhà Ohomo naedat soat it vausu taho Ohomo paku it vi vuu veioi usemeta,” lahame tozome labohotida.
41. Labi laha ame di labe Yahudi damat ibi iho tu vuzehi meedam im vuusdam tohe dam zi labe iho laha Yesus bake tom aame tozome gagoida. “Ea, Da nim mei modi fa neàdemda ame? Akati Ahamo naedat taho it vabieme neàdem vaba mode? ‘Israel dam vuusu im vahokedamda boehàda Am am tame,’ lahamda Ahamo nasi paku it vi vuu veioi usi neàdemeta. Labihamta iho aame, ‘Imboo,’ laham bak ozome tu vuzehem bak.
43. Ame Da nibe Aho Ala bake tu vuzehemda Am am bak. Labi Aho amu neha, ‘Am abo Alam Adat Am am tame,’ lahame gagomda am bak. Làhà imo nasi aamase. Alat uledemta Aho modi Am fa faatoi usem bak,” lahame tozome gagoida.
44. Labi damat lab tozome gagodam di labe dam Yesusam obe laba tau paku doho dam behàsu labe vedi fa Yesus bake laha feàtàda. Labihada.
45. Gi labihadume ala tomaleha bak ahebu ala fauhaedam bak fa vei seti ab aibuleham. Labi aibulehemu vou faodameilahit ala vakidem bak fuha fa ab fauha neàdeham.
46. Labi jam tiga abo ala vakidehe di labe Yesusat bisteat Ibrani daet, “Eloi, Eloi, lama sabaktani,” lahame buteme ab geham. (Ame lab gagoho bak lam gi, “Eba vuusdam Ala oa, Om akati Em vou esmohela?” lahame gagoho imot moz.)
47. Lahana damat Yesus paku doho bak laba netàdi dozeadaha dam labet ame lab buteme gehe bak lam aihemu vedi neha, “Laha vi aima. Da lam gi dat ahamda Alat vameadaha im aime fa dam bake ahate vameaidahada Elia am ee gagoda taia?”
48. Lahame labi gagohemu meit emoeme le kohu lasobuti ulohona visoi anggur oo vaksa àhàkebuna laba nom ekeme neàdi ut aaso bohu laba taasu giame, “Yesusat fà udese,” lahame Yesusam aha laba ab tom fi sdamam.
49. Lahana dam totbaho labe mu fa mali gago, “Gi labihasu vou faodase. Da labe gagoho bak lam imbodi, ‘Eliat Aba tau soat vausu fa vei neàdeo?’ laham bak aasu vou faodase.”
50. Labihadameilahit Yesusat neo bisteat buteme ab geham. Labi etei lab buteme geheda labe Yesus ab fi sivai eloham.
51. Labi fi sivai eloho di labe ame Fihasi Ala Bake Vou Baedam Num Vàmteabu donibu laba tetehesdam sue tamzohobuna baa lam ahamo ahoba zoho iube fàsi nom vou li busbe nom zoho iuba ab fi tatoham. Labi ame di labe balim feàna neo nigo nigodume ke feàda fai ahamo fi fa fi fada.
52. Labi laha Alat Am damalehe dam aham di iube elodaha dam zi labe fat ahededume im baumahe ke bumat labe fa neo usnadume futodume fa neo goda.
53. Labi godam labe Yesus Am eloho bak labet Alat modi fa ahedi usahazobe ame dam zi labe iho kota Yerusalem abo Alat fi hasi esuhu bak laba le godam bak lam dam duada labe laha aadaha bak.
54. Lahana etei nim Yesus eloho di labe ame meo dam zi labe iba vuusdamda boehàda lamti iho vahi Yesus bake vou aasdam dam labe iho ame balim nigoho bak lamti labi na meida ziti labihasu ame bak lam aadahemu iedi modem faidi ab ot gagoidamam. “Làhà imbote. Da nim abo Alam Adàt modem bak,” lahame ab ot gagoidaham.
55. Labihadam di labe lahi dua totbaho labe vaitesu dozeadume damat Yesus paku dome meedam bak laba vou dozeadume aasda. Ame lahi lam amu Galilea bak labe faasi Yesus bake tau godam labe na meedam lahi zi am.
56. Ame lahi zi lam nam meida Maria abo num debu Magdala labet lehe nam am. Labi nam meida Yakobusti Yusufti faaha oi Maria am. Labi nam meida Zebedeusam adam labe im oi am. Labi lahi amomoi totbaho zi am. Labihasu gi vaitesu dozeadume vou aasda.
57. Labihadume disi aibulelo modem di labe dat Yusufti ee fatahivahada lam abo num debu Arimatea laba azihida labe aho Yesus koei visom bak ozome fa Pilatus bake ailo ab laham. Ame da Yusuf lam nazoh dua dàt moz. Ame da lam amu Yesusat Aba Aho vahokedaha im ozobohudelo vi tau meedamda meida am. Laham dàt Pilatus bake le gago, “ ‘Im etei Yesus koei ve vou le baumsum neào?’ laham bak oba gagu ailo leho,” lahame labi gagoha Pilatus uledi am meo dam laba fa gago, “Yusufat ame koeiso lam ve baumsum neàte,” lahame ab gagoham.
59. Làhàmu Yusuf am dam totbaho lamti laha labe le Yesus paku doho bak laba zisi ame koeiso vi vuu vuazi vou usi sue fauhana baa alimna visoi Yesus koei ab giaham.
60. Labi giame neàdi ke bumat alimda abo Yusuf aho ba elohozobe am koei vou oli esum bake ozome amu kebitem laba fet sime bumataeme esuhuna ahum laba Yesus koei lam ab vou oli esuham. Labi vou oli esu neàdi fa futoi ke baana am doo laba tusum ulohoda lam vou ogi ogialame tusu baguamdi esu neàdi ab vou esmozi ladaham.
61. Labi ame di labe Magdala labe lehe nam Mariati am ee fatahivaha nam Maria meidati labihasu aasdahit Yesus koei vou oli esu ke baana ab tusu baguamdeham.
62. Labi izi dihasi hari Sabat abo im Yahudi dam labe ibi iho gi azibe im digat vou fuhemu damat Ala bake lomna ve vua vahudam toheda zi laba vuusu im vameame faheme modiam dam lamti Farisi dam lamti labihasu vazisi Pilatus bake ab laham.
63. Le gago, “Ai gubernur oa, iho vi ozoha, ame Da Yesus lam abo meia vagemda labe Aba Aho amu ahe diat nehi gagodam bakvat ehete. ‘Am eloi usi behàsdi Am eloho bak labet Alat modi fa ahedi usa tame,’ lahame gagodam bak ehe bak.
64. Làhàmu oho nasi im ibida nim aime uledi modem neào? Oho om meo dam totbaho gagome Yesus koeiso esuhu ke bumat obe laba le mahate vou aasdume usi izi dihasidase. Iho neham bak ozome vou faovoi oba labi gagoho bak. Aba vi tau meedam damat aa li Am koei aa vihitoi vou le dam bake neha, ‘Am eloho bak labe fat ahedi usaho,’ lahame dam bake vageme dam duada labet vedi imbo tibame Aba tu vuzehem bak labna zohàme iho oba labi gagoho. Oho om meo dam gagu vou aasdam vabameam Aba vi tau meedam dam labe iho etei vagemda nibe modi bisi dam aime tu vuzehi fi di feà bak fusi duali meedam bak am bak. Amu di iube Aho neha, ‘Am Alat Gagu Fihasi Vimteme Oluhu Dat Boehàda Am am tame,’ lahame vageme gagoho di lam damat Aba tu vuzeheda gi koena tu vuzeheda. Lahana etei ba vagemda nim bisi dam duada vi tau tu vuzehedam bak lab tame.”
65. Lahame labi gagohemu Pilatus uledi fa ab gagoham. “Lo, làhà em meo dam totbaho nim uho nasi ve vou le, ‘Ame koei esuhu ke bumat neam tame,’ lahame gagu afoezobe em meo dam nibe mahate vou aasdale,” lahame gagu ab oluham.
66. Làhàmu le ame baket ab modeham. Ame Yahudi eeda labe ame koei esuhu ke bumat am ahazo baa laba le, “Ke baana nim ba a ogizi osoktomule,” lahame mali ibi iho utou bugeame esum bak lamti ulohona ab modi itoeme esuham. Labi ame bak lam modeme neàdi iho etei vou lehe meo dam zi lam gagome ab vou aasdamam.
1. Labi hari Sabat izi dihasi dihambe aibubet hari Minggu labe Magdala labe lehe nam Mariati labi am ee fatahivaha nam Maria meida lamti labihasu iho Yesus koei esuhu ke bumat laba ab laham.
2. Le lafusi modeha Alat Am im gagu vou usemda meida labe asum ahoba iube nom ilu modeha balim feàna belu bak ab nigo nigodamam. Labi modeha Alat Am im gagu vou usemda labe aho ame koei esuhu ke bumat laba le ke ahazo baana tusdamna lam osoktoi vou ogi ogialame neàdi ame ke ahazo baa ahoba laba ab nusdamam.
3. Ame Alat Am im gagu vou usemda lam am alihiti am sueti na fauha meona abo asum boz velem bakti ulohona damat fako aam iedemna modesu aida.
4. Labihadume modeha ame meo dam laba vou aasdam dam lam ame bak lam aahemu iedi modem faidi faa gukedume nigom bakti vei seti gi elom bakti uloholi modesda.
5. Labi ame Alat Am im gagu vou usemda labe aho lahi behàsu niba ab gagoham. “Um a iedemule. Em ozobohute. Um gi Yesus damat paku dome elohodate nabitaom bak em ozobohu bak.
6. Lahana Yesus nib kaio. Am eloho bak labet fa ahedi usaho. Abo gi Aho amu fet gagoho baket imbodi ab usaham tame,” lahame gagu usi ame ke bumat laba oli fa it vameada. “Um behàsu nasi Am koei amu esuhu bak niba vi oli aamale. Am nib kaio.
7. Uho vi oli aame neàdi taho futoi Aba vi tau meedam dam laba fa le nehasu gagole. ‘Am eloho bak labet fa ahedi usai Galilea bak laba nasi le dam labe ba vulem bake vou faodalo. Ame dam labe laba vule Am alihi neo aa tame,’ laham im lam le gagole. Neàde. Eho etei lab gagoho bak lam uho a vabili setemule. Abo mahate vi ozo ladale.”
8. Lahame labi gagohemu ame lahi behàsu labe ame koei esuhu ke bumat lam vou esmozi gi iedehena ozahit fa ahu deelehat vàhàdi, “Taho emoeme Yesus bake vi tau meedam dam laba ame im lam fi dese,” laham bak gagolo àhàki fa ab ladamam.
9. Gi etei emoedam di labe iho ladam zie donibu laba fuha Yesusat Aho lehe bak aaha vabna gi laba duzuhuna ab gut tàham. Ame lahi behàsu laba gut tàhi gago, “Neàte,” lahame labi gagoha ame lahi behàsu nibe Yesus bake fetu nusu ogomaladume biddume Yesusam naba laba vuusualame ab vou baedamam.
10. Labi modeha Yesusat neha, “Um a iedemule. Uho nasi Eba vi tau meedam dam laba le gagole. ‘Um nasi Galilea bak laba le aameam Em alihi uho aa tame,’ laham bak lam le gagole,” lahame ab gagu oluham.
11. Labi ame lahi behàsu etei ladam lahasuhu di labe ame meo dam Yesus koei esuhu ke bumat vou aasdam dam totbaho labe fa kota Yerusalem bake le ame damat Ala bake lomna ve vua vahudam toheda zi laba vuusu im vameame faheme modiam dam laba le ibi iho aaha im lam ahebu ab faasi vameadamam.
12. Labi ame im lam aime neàdi damat Ala bake lomna ve vua vahudam toheda zi laba vuusu im vameame faheme modiam dam labe iho fa im dam totbaho lam abo ame Yahudi dam bake vuusu im vameame faheme modiam dam busaoda zi laba neo gagu vazisi im aa odoada. “Iho etei aihi im lam iho akatihasu modela?” lahame im aa odoadume neàdi ozobohudi ab gagu vàmadeham. “Làhà imo gi nehase. Dam meo damat ame im lam fi dem bak labna zohàme imo dam laba doi duana lodume ame im lam fi dem bak fà setese.”
13. Lahame ozobohudi neàdi ame meo dam laba ab gagoham. “Uho etei aame iba li gagoho im lam meia a vameadamule. Gi nasi vastese. Vasti fa nehasu dam bake vameadase. ‘Ame koei lam gi dam Aba vi tau meedam dam labe usi neisoat aibut uho iddam di labet aa li koei lam vihitoi aa vou ilime seteho,’ lahame fa dam bake fi dese.
14. Lahana uho lab meedaha bak lam gubernur aime uba fakem bak labna zohàme a iedemule. Iho fa tohe duzu fi baedume neàdi ba uba beodam kaio.”
15. Lahame labi gagohemu ame meo dam labe uledi ame doi lam vame dam eeda labe iba etei lab gagoho baket ab faasi meedamam. Labi ame im giomimna lam vou fi det laha labe Yahudi dam dua bak ahebu aidume imbo tibame tu vuzehi baleài vou gago usdume Yahudi dam badate etei vou fusi ame im lam aidume vi tu vuzehedam lahasuhu bak.
16. Labi ame lahi behàsu labe Yesus bake vi tau meedam dam sebelas laba le Yesusat iba doni bake tàhi vameadaha im lam vou le vameadume neàdi ame dam sebelas labe usnadume Galilea bak laba ab laham. Abo Yesusat iba lab gagoho sibu lam Galilea bak laba modesuhemu laba ab ladaham.
17. Laba ladume lafusi aaha Yesusam alihi laba ab aaham. Aahemu im ahu adat iedi Aba vou baeda. Lahana im dam totbaho labe vedi neha, “Abo imboo? Yesus eloho Dàt fat ahedehe?” laham bak lam mahate tum kai.
18. Labihàmu Yesusat fa dam laba netàdi ab gagoham. “Asum ahoba iuba feà Dateli meedam im modeo, bak niba feà Dateli meedam im modeo, labihasu ahebu Em Aiat Eba gagu Eho im dedateli ame im zi lam ab meedaham bak.
19. Labihàmu uho fa neo ot vai ladume bak ahebu iuba, ‘Eba tu vuzehi meedale,’ lahame uho vou vahoketedume uloholedale. Labi laha dam Eba tuhuda labe iho fa Ai Alati Am Adatti Am Aha Nutabe Neàna lamti fa vazisi vou ali ahu vàmadehemu uho ve vuu valo baptisleidale.
20. Labi laha Ebe Eho uba gagodaha im lam ahebu uho laha ot vai, ‘Ame im lam tu vuzehi meedale,’ lahame ame dam laba laha vi vahoketedale. Labi laha im nidi nim mahate vi ozome ozobohudele. Em Ehemo vàmtea uba vou aasdume ba damat iho bak niba esu meedam im zi ahebu ba novai vaitolo modem digat laba vou fu tame,” lahame Yesusat it vameadume ab neàdi esuham.
1. Alam Adat Yesus abo Alat Gagu Fihasi Vimteme Oluhu Dat Boehàda labe Aho meedaha Im Neàna lam eho Markusat faasi toedaha bak debu nehaha bak:
2. Dat ahamda Alat vameadaha im aime fa dam bake ahate vameaidahada Yesaya labe aho Alat Am Adat Yesus bake vameadaha im aho nehame fet toeme esuhu bak. “Eho Em im le vameadamda nasi dam bake olu neàdi Om ba olu tame. Damat Om ule neàt gut vam bak laba ozome ame da labe nasi le duzu zie vueme neàdehena ahum Om ba vula tame.
3. Ame da labe aho bak aotba baa bohu dam vaba alim bak laba azi dam aba valadamda zi laba dae buduana nehi vameada. ‘Alat Gagu Fihasi Vimteme Olulo Modem Dat Boehàda lem zie laba uho nasi duzu zie fet vueme neàdehena ahum Am ba lese. Aho lem zie a kibuna vuemule. Abo vamdesuhuna bàneàna vuele.’ ”
4. Lahame Yesayat aho aham di iube lab fet toeme esuhu im lam imbodi Yohanesat ab faasi meedamam. Ame da Yohanes lam ba ibi iho bak damat modi baleàhà bakti uloho vabak. Aho gi nehada. Abo sue keàbebuna unta tau neme etehàsoali fa sue baabuli sue sona bohu tademe dusu. Labi am kemohode laba laha sapi sokbat gimsu. Labi na àm di gi sàgàhàti bonahi ila labe am vaksati àda. Gi labihasu meedam dàt modem bak. Lahamda labe aho dam vaba alim bak laba le azi Alat amu aba gagoho im aho fa ot vai dam bake ab vameadume fi dedamam. Labi laba azi vameadume fi dedam di labe dam feà bak aba fet lei fet leida. Neha: Dam Yudea bak labe am num debu meida Yerusalem laba azim dam zi lamti ame Yudea bak labe am num debu mei num debu meime esdam dam totbaho lamti labihasu, “Imo iuba le Yohanesat lab vameadam im lam aidase,” lahame Yohanes bake abo gi dihasi valaida. Labihàmu aho im nehasu ab gut vameadume fi dedamam. “Ubu uho faina meedam bak lam nasi voedume fa ahu neà bak meedale. Labi um ahu vàmadehezobe eho um vuu valo baptisleidase. Labi dam totbaho fà vi aame ozobohudese. Uho faina meedam bak lam Alat ozahigeàmu fa faamome uba beolo meedam bak lam fa vei mu neàdem bake labihadale,” lahame ab gut vameadume fi dedamam. Labi aho lab vameadaha im lam damat aime iho faina meedaha bak ahate gagodume afoezobe Yohanesat ame dam lam vame Yordan Soabo laba vuu valo ab baptisleidamam.
7. Labi aho neo dam bake im vameadam di gi im nehasu vou vameateda. “Dat ba em ohuse vi vulelo modemda lam bisi feàda am bak. Em gi feà vab dàt modem bak. Ba akati eho mei na teo meedamdati uloholi fa fota nusu Am naba dusumna lo tadehena lam eho ba ziamoe? Em ba labiham uloho vabak.
8. Dam giida labe iho uba aame ozo, ‘Uho faina meedam bak lam voedume fa ahu neà bak meedalo vàmadi fa Ala bake tu vuzehehe?’ laham bak aame ozobohudem bake eho uba gi vaota baptisleidam bak. Lahana Dat ba lemda labe li uho Aba tu vuzehi meedàmu Aho Alam Aha Nutabe Neàna lam uba modi vizi teudeda tame,” lahame vou vameateda.
9. Labihadam digat meida labe Yesus Galilea bak labe am num debu meida Nazaret labe lehe labe Yordan Soabo laba li Yohanesat Yesus ab vuu valo baptisleham.
10. Labi valo baptisli neàdi Yesus gi etei vao labet sikisi duzu aaha asum ab fatahivaham. Labi tom aaha asum fatahivai bumatalehe bak labet Alam Aha Nutabe Neàna labe fa bume doleti ulohonali nom vou oaedume Aba nom vousi nusu vizi ab teudeham.
11. Labi modeha Alat Aho asum ahoba iube Yesus bake ab nom gagoham. “Om Em Adat vàmtea Ebe Eho bisi deelemda Om am tame. Em abo Obo Oho meedam bak lam Em aam deeleho,” lahame ab nom gagoham.
12. Labi Yesus baptisli neàdi Alam Aha Nutabe Neàna labe Aho neo Yesus modi ame bak lam vou esmozi fa ame bak aotba baa bohu dam vaba alim bak labe aba zoho laba ab vou laham.
13. Labi vou le aidam di labe Iblisit Aba modi ozolo modidume usi ab empat puluhleham. Labi Aba modi ozolo modidam di labe Yesus gi nohubake esumna meona ziti aida. Labi Alat Am im gagu vou usem dam zi labe Aba laha li im vi vameadume na àmna loida. Labihada.
14. Labi ba di iube Yohanesat Boehàda Herodes bake im vahokedume modehat Herodesat faki am meo dam gagome Yohanes si sel ab ousuham. Damat Yohanes si sel ousu neàdehezobe Yesus Galilea bak laba fa ab laham. Le Aho Ala bake ot vaha Im Neàna lam ab faasi vameadume fi dedamam.
15. Aho im nehasu dam bake vameada. “Alat Aba Aho amu di iube fet gagu esuhu digat ab vou fuham bak. Aho Gagu Oluhu Dat Boehàda lam etei bak niba lehemu Ahamo Boehàdateboli dam bake deeli vame Am damali vuusu im vahokedam bak lam etei ab faasi gàhàli meedamam bak. Labihàmu uho faina meedam bak lam nasi voedume fa ahu neà bak vàmadi Alat gagu oluhu Im Neàna nim tu vuzehele,” lahame ab vameadume fi dedamam.
16. Labi ba neo digat meida iube Yesusat Itea Galilea labe am valau obet ladam labe aaha Simon am vahada Andreasti im bohe dek vou bulo meedamna ab aaham. Ame dam ahim labe ibi modi baleàhà bak bohe vadam bak am.
17. Làhàmu Yesusat ab gagoham. “Um ahim Ebe Eho vahokedam im ozobohudelo vi tau meedam damalele. Um etei ba bohe vam damalem bak modem vabak. Eho uba vahokedume uho fa ot vai dam nabime vame neo vahokedume ame dam labe fa Eba tu vuzehem bak modelo mozo.”
18. Lahame gi etei labi gagoha ame dam ahim labe im bohe dek gi ihe laba vou esmozi Yesusat vahokedam im ozobohudelo ab vi tau vulaham.
19. Labi neo vahi ladume koena ub le Yesusat vi aaha Zebedeusam adam behàsu Yakobusti Yohanesti ihe laba nusu im bohe dek vabiedamna ab aaham.
20. Gi etei lab aaha labe Yesusat ab gagoham. “Um ahim Ebe Eho vahokedam im ozobohudelo vi tau meedam damalele,” lahame labi gagoha dam ahim labe im ai Zebedeusti iba tau bohe meedam dam lamti ihe laba vou esmozi Yesus bake ab tau vulaham.
21. Labi Yesus Aba vi tau meedam dam lamti neo ladume num debu Kapernaum laba ab lafuham. Laba lafusi modeha hari Sabat abo Yahudi dam labe ibi iho gi azibe im digat fuhemu Yesusat Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli Alam im ab faasi vahokedamam.
22. Labi lab vahokedam di labe damat aiha Yesusat ba dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi labe ibi iho ladehebeat vahokedam bakti ulohona vahokedam vaba Aho gi im dedateli vahokedàmu dam labet aime ab àvodeham.
23. Labi Yesus ame num laba dam bake vahokedam lahasuhu diat setan oli veimahada amu ame num laba tau olehe dat labe dae meona Yesus bake gut alamdi ab gagu geham.
24. “Aa! Yesus Nazaretda oa, Om giida akati meit ihimo modem im tau meedalo modela? Oho iba li modi vàhàdeme seddalo lehe taia? Em abo Om ozobohu bak. Om abo Alat Gagu Fihasi Vimteme Oluhu Dat Boehàda bisi Neàboda Vàmtea Om am bak.”
25. Lahahat Yesusat dae meot fa ame setan laba ab gagoham. “Dae vabalele. Om taho futoi ame da nim vou esmozi itale.”
26. Lahame dae meot gagoha ame setan labe futolo da laba modi aheli faa gukedume dae feàna geàdume futoi ab itaham.
27. Labi modeha dam zi labe ame bak lam aahemu àvodi ab ot gagoi ot gagoidamam. “Aa làhà! Etei lab modehe bak lam im amu im lamohona aaha vab taia? Ame Da nibe Aho lab modehe bak lam gi im gàhàna modehe bak. Abo Aho im dedatelehe labe teudi ame setan zi laba, ‘Futodale,’ lahame gagom di ame setan zi lam aime uledi futodume ilidam meo bak,” lahame ab ot gagoidamam.
28. Labi kehàm vabna ame dam labe Yesusat etei modehe im lam aahemu fa Galilea bak laba modealadaha num debu bake le vou vameatedume ab uloholeham.
29. Labi Yesusat ame setan laba gagu futoi itame neàdi Aho Yakobusti Yohanesti Aba vi tau meedam dam totbaho lamti vazisi ame num labe futoi esmozi fa Simonti Andreasti dam ahim labe im num laba ab laham.
30. Labi le oli modeha Aba vi tau meedam dam labe Aba li ab gagoham. “Simonam boholeà so galihasi duana gaili bisdalo. Oba li aamale.”
31. Làhàmu Yesusat Simonam boholeà gaili bisdam num bumat laba oli ame nam laba neha, “Om gailehe bak neàdele,” lahame labi mali gagoha ame gailehe bak lam fa ab seteham. Labi kehàm vaba fa usai duzu na ohume Yesus Am damti ab lodume àdaham.
32. Labi dimatali aibulelo modem di labe dam aheda zi labe im dam gaileheda ziti dam setan oli veimahada ziti labihasu Yesus bake ab vou valadamam.
33. Labi valadume modeha ame num doo obe laba dam dua totbaho laba li ab dozeadamam.
34. Labi dozeadume modeha ame dam zi labe im gailehe bak ahaladi ahaladiaha bak lam Yesusat modi fa ab neàdedaham. Labi dam setan oli veimahada zi lam laha Aho neo ame setan zi laba gagu ab futodume ilidamam. Labi ame setan zi labe lab futodume ilidam di labe, “Am abo Alat Gagu Fihasi Vimteme Oluhu Dat Boehàda am tame,” laham bak gagomna zohàme Aho mali gi gagome ab oudaham.
35. Labi dihambe di fi zeadam diat Yesusat keesi usai ame num labe futoi num debu bak vou esmozi fa dam vaba alim bak laba le Ala bake ab tom gagodamam.
36. Labi tom gagodam lahasuhu di labe Simon am dam totbahoti Yesus bake ab le nabidamam.
37. Labi le nabidume Yesus aahemu ab gagoham. “Dam ahebu Oba vi nabidalo.”
38. Lahame gagoha Yesusat fa gago, “Lo, Em ozobohu bak. Lahana iba netàdehe num debu mei num debu mei lahadaha bake le dam laba Alat vameadaha im vameadume fi dedalo modem bak ehe bak. Alat amu Eba neha, ‘Labihadale,’ lahame Eba gagu oluhemu Eho ame bak lam ab meedalo modemam bak.”
39. Lahame labi gagu neàdi Yesusat ame num debu lam vou esmozi fa Galilea bak laba esdam dam totbaho labe im num debu mei num debu mei lahadaha bak laba le ame Yahudi damat ihimo ot vahiame im meedam num dozeadaha bak laba olidume Alat vameadaha im lam le vameadume fi deda. Labi ame di labe Aho laha mei ahu oli veimaha setan zi laba gagu futodume ilida. Labihada.
40. Labi ba neo digat meida iube Yesus num debu bak meidate le aidam di labe dat sokba faidi vàhàdem bohu vuusdamda labe ame bak laba godam labe Yesus bake li, “Yesus abo feàte,” lahame ozome Aho doudam obe laba ogomasu biti ab tauledamam. “Om eba faobekem vabao? Om uledemeam làhà em sokba faidi vàhàdem bohu vuusdam bak nimti damat eba fi hasi vaitesu esdam bak lamti Oho fa eba modi neàdem bak em ozobohu bak.”
41. Lahame labi tauledume gagohemu Yesusat Aho aahat aam faimu faobekesi gi ozahit Am anekehàt ame da laba nom ulasi gago, “Lo, Eho modi neàdem neà bak. Om sokba faidi vàhàdem bohu vuusdam bak lamti damat oba fi hasi vaitesu esdam bak lamti nasi setele.”
42. Lahame labi gagoha ame da labe am sokba faidehe bak lam fa seti fa dam ahedati vahem bak ab neàdeham.
43. Labi seti neàdehemu da labe dam bake fi dem bak labna zohàme Yesusat mali ab vi vameame olulo gagoham.
44. “Om sokba faidi vàhàdem bohu vuusdàmu Eho modi fa neàdehe bak lam oho a dam bake vou vameatedume fi demule. Gi damat Ala bake lomna ve vua vahudam toheda laba le gagu ame da labe om sokba faidi vàhàdem bohu vuusdam bak lam, ‘Fa modi neàdeheo?’ laham bak aho gut nabidale. Labi nabidume neàdi fa dat ahamda Musat aham di iube Israel dam bake, ‘Nehame modele,’ lahame vahokedaha bak lamti ulohona modele. Om fi ham bak neàdi fa vahem bake na fi ho oho etei si vou lalo modemna lam ame toheda laba vou le aho gut ve oteme vua vahusu om fa damti vahem bak modele. Labiham labe dam aheda aame ozo, ‘Da nim fa neàdi im fa vahem neàdehe?’ laham bak fet aame ozobohudi fa vahem bak am tame,” lahame Yesusat ab vi vameadume oluham.
45. Lahana ame da labe vedi am dam totbaho bake Yesusat aba neha, “Meia a le vou vameatedamule,” lahame gagoho bak lam geàmu dam bake, “Yesusat eba modi neàdeho,” lahame fa ab vou vameatedume fi dedamam. Làhàmu damat ozobohudi Aba valadam bak labna zohàme Yesusat ba num debu bak laba laha vaba gi bàhàgo bak dam vaba alim bak laba aida. Lahana dam vaba alim bak laba aidume modeha damat gi geàmu Aba valada. Dihasi bak iube Aba valada. Dihasi bak iube Aba valada. Labihada.
1. Labi ba neo digat meida iube Yesusat fa num debu Kapernaum laba ab laham. Le modeha kehàm vaba dam ahebu, “Yesus fa num debu bake leho,” lahaha bak lam ab aidaham.
2. Yesus lehe bak aihemu dam ahebu ame num laba valadume modeha num bumat keke. Labi num doozoh laha keke. Labihada. Labihadam di lam Yesus im nehasu dam bake vameada. “Alat Aba Aho Gagu Fihasi Vimteme Olulo Modem Dat Boehàda lam etei bak niba oluhemu Aho dam bakda modi Am damali vuusu im vahokedam bak lam etei ab faasi gàhàli meedalo modemam bak,” lahame dam bake ab faasi vameadamam.
3. Labi ame im lam vameadam di labe dam amomoi labe im dat nao zoho eloi nutabedeheda lam ileba esu dam ahim labe ahim labe zoho vuusui vuusuiame Yesus bake ab vou ledamam.
4. Labi vou ledume numa olesome modeha dam bà tadi num kekesi olem biehemu fa num ohut vabna baa ahoba laba vou zisi ame numa suusuhuna baa lam feàkmome bumatali afoezobe ame dat ileba lamti loa vààsu num ohut bumat labe fa damat nusualadaha tomba laba abo Yesusat avaesdam laba nom vousdume ab nom esuham.
5. Labi nom esuha Yesusat ozo, “Ame dam labe bisi Eba tu vuzehi meedà?” laham bak aame ozobohudehemu Aho fa dat nao zoho eloi nutabedeheda niba ab gagoham. “Em adat ozomomda oa, om ade? Obo oho faina meedaha bak lam Eho ozahigeàmu fa vei neàdeho,” lahame ab gagoham.
6. Lahame Aho etei lab gagoho di lam dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi laba laha tau nusualadaha dam ehet. Labi Yesus etei lab gagoho bak lam ame guru zi labe aime ihimo ahulat aa nehi ozoda. “Oo, da nim gi imti ulohona baka ana modi feà Dateli nehi gagodàla? ‘Obo oho faina meedàmu Alat beolo modem bak lam Eho gi vei mu fa faamome vei neàdeho,’ lahaha bak lam gi Alat Ahamo gagom bak akati Da nibe labi gagodàla? Da nim gi Ala bake feàtàdam dàt mode taia?” lahame ab ozodamam.
8. Lahame aa ozodaha bak lam Yesusat Ahamo ozobohudi ab gagoham. “Um ana modi um ahulat labi ozodàla?
9. Uho ozom, Eho ame nisileheda niba im gagom di im adida bisi damat aame ozobohudela? Eho nehameam, ‘Obo oho faina meedàmu Alat beolo modem bak lam Eho gi vei mu fa faamome vei neàdeho,’ lahame gagomeam damat aame ozobohudeo? Laham vabameam Eho gi neha, ‘Om nao zoho eloi nutabedehe bak lam Eho modi fa neàdeho. Nasi usai om ileba giame vuusu fa num bake lale,’ lahame gagomeam làhà damat aame ozobohudeo? Adida bisi damat aame ozobohudela?
10. Lahana Em Abo Asum Ahoba Iubet Bak Niba Li Dateleheda nim Ala naedat Eba gagu olu Eho fa im dedateli ot vai meit faina meedàmu Alat beolo modem bak lam Eho gi vei mu fa faamome vei neàdem meoda Em am bak. Lahana Eho labihasu meedam bak lam um biem bake Ebe Eho etei modelo modem bak nim uho nasi aasu vou faomale. Labi dat nao zoho nutabedeheda nim Eho modi fa neàdi usam bak uho aameam làhà um laha neo, ‘Em meit faina meedàmu Alat beolo modem bak lam Eho gi vei mu fa faamome vei neàdem meoda Em am bak,’ laham bak lam etei uho laha aame vi ozobohudem bak,” lahame Yesusat labihasu vameadume neàdi ame dat nao zoho nutabedeheda laba ab gagoham.
11. “Om usai om ileba visoi vuusu fa om num bake vou lale.”
12. Lahame Yesusat gi etei labi gagoha ame da labe fa neàdi damat aasdahit amti usai am ileba visoi giame vuusu ame num labe futoi fa am num bake ab laham. Labi modeha dam ahebu ame lab modehe bak lam aame àvodi anekehàso it gaadam labe ahu adat iedi Ala bake ab vou baedamam. “Aa làhà! Im amu im feàna lamohona ba aaha vabak. Gi etei alimeat ab aaham bak,” lahame àvodi Ala bake ab vou baedamam.
13. Labi Yesus ame num lam vou esmozi fa Itea Galilea valau obe laba neo lada. Labi ladam di labe dam duada labe aaha Yesus lehemu ab valadamam. Aba valadàmu Aho ame dam laba faasi ab vahokedamam.
14. Labi vahokedume neàdi neo ladameam aaha meia gagu gi teo vi vaiam doi pajak lam atemda abo Alfeusam adat Lewi labe aho gi am pajak vadam num buà laba aidamna ab aaham. Làhàmu ab gagoham. “Lewi oa, oho Ebe Eho vahokedam im vi tau meedam datelele,” lahame labi gagoha Lewit usai Yesus bake ab vi tau meedam dateleham.
15. Labi ba neo Yesus Aba vi tau meedam dam lamti Lewim num laba le na tau àda. Di lam Lewi bake tau meia gi teo vi vaiam doi vadam dam totbaho zi lamti labi damat neha, “Faina modeho,” lahame ozomsum dam lamti labihasu ba li ame dam laba vi tau vazisi na àda. Ame dam zi lam iho Yesusat Aba Aho vahokedam im ozobohudelo meedàmu laba tau vazisi na ab àdamam.
16. Laham bak lam Musat toedaha im ahamda vahokedam guru zi abo Farisi dam bake vi tau meedam dam labe iho ba li aaha ame bak lam aahemu Yesus bake vi tau meedam dam laba ab gagoham. “Yesus Dat neàda modem bak akati modi um fa meia gagu gi teo vi vaiam doi vadam dam ziti labi damat neha, ‘Faina modeho,’ lahame ozomsum dam lamti vazisi na zi vàmtea àdàla?”
17. Lahame vi ailo gagoha Yesusat fa dam laba im totobe nidi nim nehame ab vi fi koadamam. “Uho ozom, dam aheda dokter abo obat vuusumdate lam meo? Vabà! Gi dam gaileheda ihimo obat vuusumdate lam bak. Bak lam gi neham bak. Eho bak niba lehe bak neham bak ozome lehe vabak. Damat neha, ‘Im abo Alat gagu fi hasi esuhu im zi ahebu ulohodesu vamdesu meedam dam im am bak,’ lahame ahobat neàdem dama Eho neha, ‘Uho faina meedam bak lam nasi voedume fa ahu neà bak vàmadi meedale,’ laham bak gagolo lehe vabak. Em gi damat neha, ‘Iho faina meedam damat modem bak,’ lahame it ozome gagodam dam laba neha, ‘Uho faina meedam bak lam nasi voedume fa ahu neà bak vàmadi meedale,’ laham bak gagolo lehe bak,” lahame ab vameadaham.
18. Di labe Farisi dam zohoti dam Yohanes Mei Vuu Valo Baptisleiamda labe aba aho vahokedam im ozobohudelo vi tau meedam damti labihasu Ala bake tom gagodalo modemu ahit na àm mohonale. Lahana ame di labe Yesus Aba vi tau meedam dam labiham kai. Labi modeha dam amomoit Yesus bake li vabi vi ailo ab gagoham. “Yohanes bake vi tau meedam dam lamti Farisi dam bake vi tau meedam dam lamti labihasu Ala bake tom gagodalo modemu ahit na àm mu izidam meo bak. Lahana akati modi dam Oba vi tau meedam dam lam labiham vaba modela?”
19. Lahame labi gagoha Yesusat gi damat Aba ba modem im laba ozome im totobe nidi nim nehame ab fi koadamam. “Dat soao labe nam soao valo na vahedam di labe ame da labe amti ot deeliam dam laba gagu vahi deelehat na àdam meo dam taia? Labi laha dat soao labe nam soao valo modemda ehe lahasuhu di lam am dam gi deeli na àm meo dam taia?
20. Lahana ba diamut ame nam valo modemda lam naat aa si utasi vou le setem di lam am dam totbaho labe im ahu faidi na àm mom di am taia?” lahame ab vi vameaham.
21. Labi im lada lam vameadume neàdi Aho neo Yahudi dam labe im tai ahamda zi labe ibi iho vou vahoke usehe im lamti fa Aba Aho etei li vou vahoketedam im gàhàna nimti ulohodesu fa vahem biem bak laba vi ozome im totobe nidi nim ab vi fi koadamam. “Meit am sue amu soa dusumda vàusi bumatalemeam làhà ba sue gàhàna baa amu valo kikeme modi koedehe vabna zoho vaitoi ame sue vàuhu bak laba taasu tadem vabak. Labihameam ame sue etei tadeheda lam fa valo kikeme àga bake esu dehalem di ame sue gàhàna zoho lam gi ahamo fa koedi etei tadehena etehàso lam ziambitoi vàusi bumat olozebalem bake ozome ahit moho bak.
22. Labi laha meit anggur oo gi etei unaha vaksa gàhàda fi kidi neàdehe vabda lam ba kambing fi ho sokba amu buhaleme bugeahana modi esu dehalehena laba fedem vabak. Meit labi modemeam ame na vaksa lam ba fi kidehe labe ame na sokba amuda lam modi fi fasi ame na vaksa lam gi bake veàtom bak. Labi ame na sokba lab fedehena lamti gi amait vàhàdeme setem bak. Labiham bake meit ame na lam ba ozome modem vabak. Gi ame anggur vaksa gàhàda lam fa ame na sokba gàhàda buhaleme bugeame afoezobe laba fedem bak. Labi modem labe ame na sokba lamti ame na vaksa lamti gi amait iademe fi kidi neàna modesdam bak,” lahame Yesusat ame im totobe lam ab vameadaham.
23. Labi ba hari Sabat abo Yahudi dam labe ibi iho gi azibe im digat meida labe Yesus Aba vi tau meedam damti iho bak mei bake lalo modemu gandum dee zie labe lada. Ladam di labe Aba vi tau meedam dam labe idoalehemu ame gandum oo amdeheda lam auet vi vuu footoi ab vou à ladamam.
24. Labi vou ladam di labe Farisi dam totbaho labe ame bak lam aahemu Yesus bake ab gut gagoham. “Ne, etei nim gi hari Sabat abo im Yahudi dam labe ibi iho gi azibe im digat nim akati modi Oba vi tau meedam dam labe na oo auet vi vuu footoi vou à ledàla? Ne, im tai ahamda Musat aham di iube neha, ‘Hari Sabat fum di na a meedamule,’ lahame toeme fi hasi esuhuna Oba vi tau meedam dam labe akati ailahigeàmu na meedàla?”
25. Lahame labi gut vameadume modeha Yesusat fa ab gagoham. “Ne, im tai ahamda Boehàda Daud labe aho amu modehe im lam meit Alat Vameadaha Im Toedahana laba im meida nim um aame ozobohudehe vaba? Amu Daud aba vi tau meedam damti idoalehemu dam ahamda labe iho Teohet Mome Fa Faatoiam Num Fihamna abo Alat Israel dam bake le tau im vameaidam num laba oli Ala bake lu fi haha beahuba laba esuhu roti lam aho visoi faheme am dam bake lodume iho vahi àdaha bak lam um vi ozobohudehe vaba? Ame di lam Abiatar aho Damat Ala Bake Lomna Ve Vua Vahudam Tohe Dam Zi Labe Bisi Boehàdateboli meedam bak. Labihadam di labe ame roti lam dat ahamda Musat aho aham di iube neha, ‘Ame roti lam damat Ala bake lomna ve vua vahudam toheda zi labe ihimo àm rotit modem bak. Ba dam giida tau àm fi ham roti modem bak,’ lahame gagu fi hasi esuhu roti lam dam giida labe àhà bak. Lahana ame dam labe iho ba, ‘Faina modeho,’ lahaha vabak.
27. Eho gi neham bak ozome uba labi gagoho bak. Alat aham di iube na totbaho meedume neàdi dam alimeat ab modeham bak. Labi ba ame hari Sabat abo gi azibe im digat lam ba modehe bak. Labiha labe Eho ozoha, ame gi azibe im digat lam bisi feà vab labe ba dam fa vafozem vabak.
28. Labihàmu Alat Gagu Fihasi Vimteme Olu Asum Ahoba Iubet Bak Niba Li Dateleheda nim Em ame Da amemu ame hari Sabat deda Em am bak. Labiham labe Ehemo neha, ‘Ame digat labe im nehasu modem neàte. Im nehasu a modemule,’ lahame ozome gagomda Em am bak,” lahame ab gagoham.
1. Labi ba neo hari Sabat meida labe Yesusat ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba ab oleham. Ame di labe dat anekehà tot nutabedeheda laha ame num laba amu vi tau oli aida.
2. Labi ame di labe dam ame num laba olehe dam zi totbaho labe Yesusat ame hari Sabat abo ibi iho gi azibe im digat nibe mei modi fa neàdem bak labna zohàme vou faovoi Yesus bake fakot zisda. “Yesusat ame da niba modi fa neàdem bak aahazobe fa vàluse,” lahame fakot zisda.
3. Lahamnàme Yesus Aho dat anekehà tot nutabedeheda laba ab gagoham. “Om usai tomba niba li duzule,” lahame labi gagoha dat nisileheda labe usai damat nusualadaha doni tomba laba le ab duzuham.
4. Labihazobe Yesusat ahit gi dam labe iho modem bak ozobohuna fi bovai ame lab nusualadaha dam laba ab vameadamam. “Ne, uho ozom, hari Sabat abo gi azibe im digat nim im tai ahamda Musat, ‘Akatihasu modem neàte?’ lahame gagu fi hasi esuhela? ‘Im neàna modem bak modele,’ lahaheo? ‘Im fai bak modem bak modele,’ lahaheo? Im adida Musat gagu fi hasi esuhela? Laham vaba, ‘Mei elolo modem di iho modi fa neàdem neà bak,’ lahaheo? ‘Mei otem bak modem neà bak,’ lahaheo? Im adida Musat gagu fi hasi esuhela?” Lahame labi vi ailo gagoha dam ba Aba im vi gagomda vab. Làhàmu faki fakot Ahamo vi nabidume vi ozolaha vabamu ahu ab faideham. “Eho im meedam di dam nim akati modi Eba tu vuzehem vaba bisi odohali meedàla,” lahame ahu faidi vi ozolaha vabamu fa dat nisileheda niba ab gagoham. “Om anekehà nasi vamdemale,” lahame labi gagoha da nibe am anekehà vamdeheilahit gi fa ab neàdeham.
6. Labi modeha ame Farisi dam labe faki num lam vou esmozi fa dam Boehàda Herodes bake tauhu dam totbaho laba le neha, “Uho ozom, im akatihasu modi Yesus si otela?” lahame im aa ab odoadamam.
7. Labi Yesus Aba vi tau meedam dam lamti ihimo le esdalo modemu bak lada lam vou esmozi Itea Galilea valau obe laba le goda. Laba le godam di labe dam Galilea bak laba esdam dam dua totbaho labe aiha Yesus lehe bak aihemu ab valadamam. Aba valadam dam lam gi Galilea dam lamota ledaha vabak. Abo dam Yudea bak laba esdam dam lam laha tau leda. Labi Yudea bak labe am num debu meida Yerusalem labet laha tau leda. Labi laha dam Idumea bak laba esdam dam lamti Yordan Soabo biou ala zizem tot laba esdam dam lamti labi num debu Tirus labe am bak obe esdam dam lamti num debu Sidon labe am bak obe esdam dam lamti labihasu tau leda. Ame dam zi labe iho Yesusat meedaha im zi lam aihemu Aba valada.
9. Ame dam zi labe Aba valadàmu Aho ahamte dam ahaladi ahaladiame gaileheda lam ahebu modi fa neàdeda. Labihàmu dam totbaho labe aame ozo, “Iho laha Yesus bake netàdi Aho fà iba ulasi modi fa neàdedase,” lahame dam totbaho lebe vou ogia leda. Labi vou ogia ledam labe dam zi duali fai bak fuhemu Yesus Aba vi tau meedam dam laba fet ab gagoham, “Dam nim nehadume Em soat nutmalo mozo. Imo Eho gi iheba ziti nusu dam bake im vahokedam bak meedase. Um ihe vihitoi valau obe labe vou bu duzu vou faode,” lahame ab fet gagu esuham.
11. Labi Yesus ame dam zi laba uladdume fa neàdedam di lam mei ahu oli veimaha setan zi labe Yesus bake aam di Yesusat iba ooteme gagoho vabna, “Yesus abo feàte,” lahame nasi fet iedi dam laba ahit modi Yesusam naba modesdam laba ogomasu bake biti ab geàdamam. “Om abo Alam Adat Am tameee,” lahame meit bute meit bute lahada.
12. Lahana Yesus ame setan zi laba neha, “ ‘Em Amat modela?’ laham bak meia a le fi demule,” lahame mali dae meona gagu futodume ab ilidaham.
13. Labi ba digat meida iube Yesusat bak buzoho bake laisi afoezobe Aba Aho ozome fi me valo modem dam lamota neo gagome Aba ab vi laitedaham.
14. Labi laisi neàdi dam dua belas ab fi me vaham. Fime vame neàdi Aho neha, “Uho Eba tau vi gohatedam bak ame. Labi Eho uba gagu olu uho Ebe Eho meedaha Im Neàna lam dam bake vou vameatedam bak ame. Labi Eho uba gagu uho ot vai im dedamali fa mei ahu oli veimam setan laba fa gagu futodume ilidam bak ame. Uho labihasu meedam bake Eho etei ahit uba gagu um ab Em im vameadume esmozi laiam damaleham bak,” lahame ame dam dua belas lam ab vaham.
16. Ame Aho lab fi me vaha dam dua belas lam neha: Simon ee Yesusat ba taluhuda Petrus ame.
17. Labi Zebedeusam adam behàsu Yakobusti am vahada Yohanesti labihasu ame. (Yesusat Aho dam ahim labe iho bisi meo bak laba vi ozome asum meo fam bakti ulohona modem damat meedàmu ba ee, “Boanerges,” lahame taluhuda ahim am).
18. Labi Andreas ame. Filipus ame. Bartolomeus ame. Matius ame. Tomas ame. Labi Alfeusam adat Yakobus ame. Tadeus ame. Simon Meohoda ame.
19. Labi Yudas Iskariot ba Yesus otem bake vou foholo modemda ame. Labihasu Yesusat debe ab Aho gagu olu Am im vameadume esmozi laiam damaleham.
20. Labi Yesus amu dam dua belas fi me vame neàdi fa Aho amu azibe lehe num debu Kapernaum laba fa ab laham. Labi ame num laba oli modeha dam dua bak labe Yesus lehe bak aihemu neo ame num laba valadume modeha Yesus Am damti vanamai na ab àm bieham.
21. Labi ame di labe dam laba tau leheda totbaho labe ab gagoham. “Da nim ahusobuli mode taia?” laham bak lam meit aime fa Nazaret laba le Yesusam dam totbaho laba ab vameadamam. Vameadàmu Yesusam dam totbaho labe iho Yesus ve fa Nazaret vou lalo ab ozoham.
22. Ame di labe dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lam amu kota Yerusalem labet lazi num debu Kapernaum niba li ame num laba vahehe dam laba vedi nehi gagoda. “Yesus gi mei ahu oli veimam setan zi labe im boehàda Beelzebul labe fa Aba modi vizi teudehe labe Aho ame setan zi laba gagu futodume ilidam bak,” lahame dam bake ab gagodaham.
23. Labihasu vameadaha bak lam Yesusat aime fa ame dam lam gagome vazisi ab dozeadaham. Dozeadume neàdi Yesusat dam laba im totobe nidi nim ab vi fi koadamam. “Eho etei uba vouhome vameadalo modem im nidi nim uho nasi aime neàdi ubu uho etei lab gagoho bak lam, ‘Imbo? Imbo vabao?’ laham bak nasi it ozodale. Eho setan gagu futodume ilidam di uho vedi Eba neha, ‘Iblisit Eba tau modi ilidala,’ lahame gagodam bak lam Eho ba labi modem biem bak. Neham bak. Iblis labe am setan ziti gi debu vàmtea bak. Ba akati am dam totbaho fa gagu futodume ilidàla?
24. Ne, bak amomoi vuusdam boehàda am damti ihimo fàsi ot beluidameam làhà ame dam lam gi ahebu foli seddam bak. Labi bak amomoi vuusdam boehàda am damti labihameam làhà gi neo ab vàhàdeme setemam bak.
25. Labi laha dat am lahi datati ihimo ot fakiame ot beluidameam làhà ame dam gi vabali setem bak.
26. Labihàmu uho Eba neha, ‘Beelzebulat Eba modi vizi Eho mei ahu oli veimaha setan mei setan mei laba gagu futodume ilidala,’ lahame Eba labi vàlu gagohemu Eho uba gi fa nehi gagom bak. Um git gagoho bak. Ame setan zi laba vuusdam boehàda Beelzebul labe aho Eba tau aba aho vuusdam setan zi lam Eho gagu futodume ilidameam làhà gi Beelzebul fa am damti ot beluiame foli seddamna ozomom bak. Labihameam ba ame debu lam ba akati teudi duzue? Gi vàhàdeme seddamna ozomom bak.
27. Uho Eba gi ostame vàluho. Mei ahu oli veimaha setan Eho gagu futodume ilidam meo bak lam Eho uba vouhodase. Neha: Dat teuda nibe am soa maehe nazoh vou faovoi num doo ozoho laba duzu ausdameam làhà ba meit am numa oli am nazoh vam vabak. Am nazoh gi ahe lahasum bak. Lahana dat bisi feàda labe fa da lada laba li nohisi beome si anekehà gia. Nao gia. Labihadume neàdi am num laba oli am nazoh gelevai voutam bak.”
28. Labi Yesusat neo ame guru zi labe ibi iho amu gagoho bak lam, “Beelzebulat Aba tau setan gagu futodume ilidam bak,” lahame gagoho bak lam vi ozome fa ame guru zi laba nehame vi vameada. “Eho teudi Beelzebul vafozi ame setan zi laba gagu futodume ilidam bakta imbot. Lahana uho im imboda nidi nim laha nasi aima. Meit faina meedam bak im meiti im meiti modeo, labi meit feàtàdam bak im meiti im meiti modeo, iho labihasu faina meedam dam labe iho nasi it ozobohudi fa Ala bake ahatet tom gagu neàdi voomeam làhà Alat gi ame da laba ozahigeàmu fa vei neàdedam meo bak.
29. Lahana Alam Aha Nutabe Neàna Labe Eba lab tau modi vizi teudi Eho setan lab gagu futodume ilidam bak laba uho vedi neha, ‘Beelzebulat Eba tauha,’ lahame vàlu gagoho bak lam git gagom bak am bak. Um gi Alam Aha Nutabe Neàna laba feàtàdaha bak. Meit Alam Aha Nutabe Neàna laba feàtàmeam làhà ba Alat ozahigeàmu mu fa vei neàdedam vabak. Aba aho lab faina modehe bak lam faatoho vaba gi am ahu laba labaha bohu vizi modesdam bak.”
30. Yesusat neham bak vi ozome labi gagoho bak. Ame guru zi labe Aba neha, “Da lam ba Alam Aha Nutabe Neàna labe Aba modi vizi teudi setan gagu futodume ilidam vabak. Gi setan Aba oli veimaha labe ame baket meedam bak,” lahame labi gagohemu Aho gi labihasu ab vameadaham bak.
31. Labi gi etei vameadume neàdi modeha Yesusam oiti Am vahadam ziti labihasu ame num laba lafusi olesome modeha dam Yesusat lab vameadam im lam ailo meedam labe dam bà tadi olem bili bak kekehemu gi num bako tot laba li dozeadume vou faoda. Faodaha vabamu, “Yesus bake im vameadase,” lahame meia gagu ab oluham. Olu Yesus bake le ab gagoham. “Ai oa, Om oiti Om vahadam ziti Oba nabidam labe bako iuba li dozeame vou faodalo.”
33. Lahame labi gagoha Yesusat fa ab vi gagoham. “Ne, uho ozom, Em oiti Em vahadamti ame dam akete?”
34. Lahame labi gagu neàdi dam Aba netàdi nusualadaha dam zi laba aasu vi nabidam labe ab gagoham. “Ne, Em oiti Em vahadamti gi neam taia?
35. Meit Em Ai Alat Aba Aho ozoho bak vi ozome meedam dam lam Em vahada Em nà Em oi laham dam am bak,” lahame ab vameadaham.
1. Ba di iube Yesus neo Itea Galilea valau obe laba le im ab vahokedamam. Labi Aho lab vahokedam di labe dam zi feà neo Aba valadam labe gi soat osidda. Làhàmu Am dam gagome ihe laba zisi nusu valau obe laba vou bu ab duzuham. Labi Aba valadam dam zi lam gi valau obe laba dozeada.
2. Labihazobe Yesusat Aho im totobe tamehona ab faasi fi koadamam. Labi Aho dam bake neo nehame ab fi koadamam.
3. “Um nasi aimale. Dat utoho modemda nibe am na dem bak laba na oo neb ab le guladamam.
4. Labi na dem bak laba le guladam di labe ame na oo neb totbaho gi damat lailaidam zie tomba laba ab biddaham. Labi modeha bume faobuda labe li visoi àme ab seteham. Lada lam labiha.
5. Labi ame na oo neb totbaho lam ke baa bak laba ab biddaham. Labi modeha ke baa bak laba biddahada lam bak dua vab labe gi kehàm vaba ab loubedi usidaham.
6. Lahana ala faasi gaimeolehe di labe et loubedehena lam belu ab aladaham. Ke baa usihi labe am omnao bak vaksa bake nom lailaiaha vab labe ab belu aladaham. Lada lam labiha.
7. Labi ame na oo neb totbaho lam aliho debu bak laba ab biddaham. Labi modeha na oo neb lamti alihosoti amediat usida. Amediat usihi labe na àm vabda labe nasi kilale. Labi kilalehe labe na àmda lam gi alihosot vi giame ab aladaham. Lada lam labiha.
8. Lahana na oo neb totbaho lam fa bak neà bake bidda. Bak neà bake biddaha labe abo neàna usidume kilali oo duana ab vaedaham. Labi oo vaedaha di labe na oo neb totbaho oo tiga puluh vaeda. Labi na oo neb totbaho oo enam puluh vaeda. Labi na oo neb totbaho seratus vaeda. Labihada.”
9. Lahame im totobe lada lam labihasu fi koadume neàdi Yesusat neo ab vi gagoham. “Um dogoi im aim bak ehena Eho etei lab vameadaha im lam mahate aime vi ozome ozobohudele,” lahame ab vi gagu esuham.
10. Yesusat ba Ahamo aidam di labe Am dam dua belas lamti Aba tu vuzehe dam totbaho lamti ihimo Yesus bake le netàdi Aho amu dat na oo neb gulahada laba vàlu fi koadaha im labe am tombu vi ailo ab gagoham. “Ame im labe am tombu akete?”
11. Lahame vi ailo gagoha Yesusat fa neo ab vi vameadamam. “Alat Ahamo Boehàdateboli dam bake deeli vame Am damali vuusu im vahokedam bak lam etei modi fa gàhàlehe bak lam, ‘Akatihasu modemna modela?’ lahame dam amudate vastehe im lam Em Aiat Eba neha, ‘Eho ame im lam fa uba vameadume umota ozobohudi fi gatedase,’ lahame Eba labi gagohemu Eho im dedateli etei fa uba vameadume fi desi um ab ozobohudedamam bak. Lahana Eho dam giida abo Alam damalehe vab dam laba im vameadam di Eho ahit im totobet fi koadam bak.
12. Eho gi dat ahamda Alat vameadaha im aime fa dam bake ahate vameaidahada labe aba aho fet toeme esuhu im nim fa imbodem bake Eho ahit dam giidate im totobet fi koadam bak. Aham di iube Alat Yesaya bake neha: ‘Ame dam labe Ebe Eho meedam bak lam aam bakta aa. Lahana, “Iho etei aaha im nim akati modemna modela?” laham bak lam ba vi ozome ozobohudedam vabak. Labi laha Em im aim bakta ai. Lahana, “Iho etei aihi im nim akati modemna modela?” laham bak lam ba fetehesu vi ozome ozobohudedam vabak. Labiha labe ame dam labe ba ibi iho faina meedam bak lam voedume seti fa vei neàdedam vab labe Eho ba ame dam laba ba ozahigeàmu vei neàdedam vabak.’ Lahame Yesayat aho aham di iube lab fet toedume esuhu im lam imbodelo Eho dam giida abo Alam damalehe vab dam laba im vameadam di Eho ahit im totobet fi koadam bak,” lahame ab vameadaham.
13. Labi im lada lam vameadume neàdi Yesusat neo ab vi vameadamam. “Làhà uho etei neha, ‘Ame im labe am tombu akete?’ lahame Eba vi ailo gagoho bak Em àvodeha. Eho etei uba im totobe lab fi koadaha bak lam um ozobohudem vabali mode? Uho im lada lam ozobohudehe vab labe Eho ba neo uba im totobe amomoi fi koadam di um ba vi ozome ozobohudem vab taia?
14. Làhà Eho ame dat na oo neb gulaha bak laba vàlu totobet fi koadaha im labe am tombu uba fa ahate vameadase. Neham bak. Ame da na oo neb gulahada lam gi dat Alam im dam bake ahate vou vameatedamda am bak.
15. Labi na oo neb zie tomba biti bumet visoi àhàda lamti dam Alam im nehi aime meedam dam nimti uloho bak. Dam nibe iho Alam im lam aimta ai. Lahana kehàm vaba Iblisit li dam labe iho etei lab aime ahula esuhu im lam li modi ab seteham. Lada lam labiha.
16. Labi na oo neb ke baa bake biteheda lamti dam Alam im nehi aime meedam dam nimti uloho bak. Dam nibe iho Alam im lam aime gi àvodehat deeli tu vuzehe. Lahana abo mahate tu vuzehe vaba gi fota tu vuzehe. Labi iho lab aihi im lam im ahu ad laba modesu teudi omnaoli abehamdehe vab labe naat iba vabidume geàdamna zi lam modeo, iho ame Alam im laba tu vuzehi meedàmu damat iba faki vabidamna modeo, labihasu iba meedam labe iho Ala bake gi fota tuhu labe kehàm vaba ab mu voou seteham. Lada lam labiha.
18. Labi na oo neb aliho debu bak laba biteheda lamti Alam im nehi aime meedam dam nimti uloho bak. Dam nibe iho Alam im deelehat aime ve àdesda. Lahana ba bak niba esdam di, ‘Gi iba modi neàdemna modem vabna ozomo?’ lahame bisi àvodi azi ozoda. Gi ibi iho vi ozome meedamna meedume baleàhà im lamota bisi dihasi azi ozodume meeda. Labi laha im nazoh dualelo àhàki neo azi vi ozome meeda. Labihadam damat modem labe ibi iho amu Alam im aime vaha bak lam gi fa iho ozome meedam im lamti valiheme ab vàhàdeme seteham bak. Abo na oo neb usime bu vali amdehe vaba gi alihosot ot giaiame alai setem bakti uloho bak. Labiha labe Alam im lam ba ab vi ozome modem bieham bak. Lada lam labiha.
20. Labi na oo neb bak neà bake biti usihida lamti dam Alam im nehi aime meedam damti uloho bak. Dam nibe iho Alam im aim di abo gi ahu teudi ule neàt abo va. Abo vaha labe iho iademe ozome ozobohudi meeda. Labi damat ame Alam im lab aime ozobohudi meedam di labe gi nehame veimdi veimdida. Dam totbaho gi koena ozobohudi meeda. Abo na oo neb bak neà bake biddahada labe usidume oo vaedaha di labe oo neb totbaho gi koena tiga puluh vaedaha bak lamti uloho bak. Labi dam totbaho fota duana ozobuhudi meeda. Abo na oo neb bak neà bake biddaha labe usidume oo vaedaha di labe oo neb totbaho gi fota duana enam puluh vaedaha bak lamti uloho bak. Labi laha dam totbaho abo bisi duana ozobohudi meeda. Abo na oo neb bak neà bake biddahada labe usidume oo vaedaha di labe oo neb totbaho abo duana seratus vaedaha bak lamti uloho bak,” lahame Yesusat Aba vi tau meedam dam laba ame im tombu lam ab vameadaham.
21. Labi im lada lam vameadume neàdi Yesusat im totobe meida nidi nim neo faasi ab vi fi koadamam. “Meit vuagat usim di ba boloseh visoi ahoba nom suusum vab taia? Labi laha damat iho im beahuba ad laba vou oli esum vab taia? Gi damat oli aam neà laham bak ozome tom fi haba laba esu fauhaedam bak.
22. Neham bak. Alat Ahamo Boehàdateboli dam bake deeli vame Am damali vuusu im vahokedam bak lam, ‘Akatihasu modemna modela?’ laham bak lam amu fi zeam bitoi tombalehe vab im lam ba gi labihasu vastem bohu modesdam vabak. Abo ame im lam ahate vameadume fi zeam bitoi tombali dam ozobohudem bak ehe bak.
23. Um ahebu im ozobohuna taia? Um dogoi im aim bak ehena Eho etei lab vameadaha im lam mahate aime vi ozome ozobohudele.
24. Eho etei uba lab vahokedaha im lam uho mahate iademe aime vi ozodale. Neham bak. Ebe Eho lab vahokedaha im lam uho aime vi ozo ladam bak lam Alat laha gi ame baket uba ulohodesu neo modi um ozobohudi fi gatedam bak. Lahana gi ba im lada lamota modem vabak. Aho neo vi tau modi fi gateidam bak.
25. Neham bak. Alat Ahamo Boehàdateboli dam bake deeli vame Am damali vuusu im vahokedam bak lam etei modi fa gàhàlem bak lam, ‘Akatihasu modemna modela?’ lahame Eho vahokedam im nim meit iademe ozome vi ozobohudi meedamda lam Alat fa ame da laba vi tau modi aho im duana vi ozobohudedam bak. Lahana Eho etei ame im lam vahokedam bak lam meit ame im lam iademe ozome vi ozobohudi meedam vabda lam abo aho amu koena ozobohudehe bak lam Alat fa faatoi vei seti ba ame da labe vi ozome ozobohudedam vabak,” lahame ab vi vameadaham.
26. Labi im lada lam vameadume neàdi Yesusat im totobe nidi nim neo vi vameada. “Alat Ahamo Boehàdateboli dam bake deeli vame Am damali vuusu im vahokedam bak lam meit Am damali vi taui vi tauidume dualem bak lam, ‘Alat Ahamo meedam bak,’ laham bak lam uho ozobohudem bake Eho ahit im totobe nidi nim neo uba fi koadalo mozo. Da nibe am utoho laba le na oo neb ab gulaham.
27. Labi aibu di lam fa num bake li bitesu idda. Lahana na oo neb lam loubedi usidam di lam, ‘Akati modi usidàla?’ laham bak lam da na oo neb deheda lam ba ozobohu vabak.
28. Bak labet ahamo modi usim bak. Ba ame da labe vi tau modi usim vabak. Amu nasi loube futom bak. Labi ba neo avalem bak. Labi avali neàdi ba neo oo vali budualem bak.
29. Labi oo vali buduali neàdi amdehe bak aahazobe dat naeda labe ozo, ‘Modeme vahem bak fuho,’ lahame ozobohudi am na meedam dam gagome ab modeme vahedamam,” lahame ab vameadaham.
30. Labi im totobe lada lam vameadume neàdi Yesusat dam dua bak laba neo nehame vi vameada. “Alat Eba gagu vimteme Eho Boehàdateboli dam bake deeli vame Em damali vuusu im vahokedam bak lam abo meit Eba tu vuzehi Em damali vi taui vi tauidume dualem bak lam, ‘Akatihasu modem labe dam dualedàla?’ laham bak lam damat ozobohudem bake Eho neo ana im vàlu uba totobet vi fi koadàla? Làhà Eho im nidi nim vouhodase.
31. Bak damat ibi iho bak niba dem ut bisi oo koeda rica abo ut àhàkebu oo am bak.
32. Lahana ame ut oo neb lam iho bak damat im utoho laba tau dezi usim di bisi usime kilalemda ut àhàkebu am bak. Labi kilali aasoaledume neàdi bumet li am aaso bohu lam nutabedehe bak laba ila mome azim meo bak,” lahame im totobe lada lam ab vameadaham.
33. Alat Aho dam bakda modi Am damali vuusu im vahokedam bak lam, “Akatihasu modemna modela?” laham bak lam damat biem bake Yesusat gi im mei im meime totobet dam bake ab vameadaham. Gi damat ibi iho aime ozome ozobohudem neàdata ozome dam bake ab vameadaham.
34. Yesusat dam dua bak laba im vahokedam di lam aho ba im totobet fi koadaha vaba alia vahokedam vabak. Lahana Amti Aba vi tau meedam damti vazisi dam dua bak lam voedume dam ihimo tadem di ame im totobe labe am tombu lam Aho Am dam laba vameadume ab ozobohudi fi gatedamam.
35. Labi ame digat dimatahe zoho labe Yesusat Aba vi tau meedam dam laba ab gagoham. “Imo itea biou tot iuba lase.”
36. Làhàmu Aba vi tau meedam dam labe dam duada zi vou esmozi vi buadume Yesusat nusuhu ihe laba ab vi ziddume biodamam. Labi ame di lam dam duada zi totbaho labe laha neo ihe ibida ziddume vaitesu ba vi bioda.
37. Biodam di labe Yesus gi ihe tahabu zoho laba bitesu na ohu vi taasumna vi taasu idda. Bisu iddam di labe nutabe fai iubet li itea laba modi fi tauledume bubaholedam labe ihe laba tom foadume vao ihe laba zizi noziali tezeo vabali dam folem bak ab fuham. Làhàmu Aba vi tau meedam dam labe ihe zoho laba fi ai Yesus bake ukeme ab gagoham. “Guru oa, Om iba aame faobekem vaba? Im ihe vao noai im ab folelo modemam bak.”
39. Làhàmu Yesusat keesi usai nutabe fai lamti vao fi tauledume bubaholedamna lamti, “Setele,” lahame mali gagoha ab bagavai seteham.
40. Labi seti neàdi Yesusat Aba vi tau meedam dam laba ab gagoham. “Um akati bisi iedi modela? Um Eba akati mahate tu vuzehem vaba mode?”
41. Lahame labi gagoha ame dam labe Yesusat lab modehe bak lam aame iedi modem faidi ab ot gagoidamam. “Aa làhà! Uho ozom, Da nim ana Dàt mode? Am gi nutabeti vao fi tauledume bubaholedamna lamti, ‘Setele,’ lahame gagom di gi modi uledi setem meo Dàt modem bak,” lahame ab ot gagoidaham.
1. Labi Yesus Aba vi tau meedam dam lamti iho Itea Galilea laba neo biodume bak ee gagom Gerasa laba fusi ab zituham.
2. Labi zitu neàdi Yesus Aho usi aaha dat setan zi duana oedam ahe damat am si fa vou li bes botehà niz labe am anekehà ahim gia. Labi nao ahim gia. Lahamnàme ame setan zi labe veimai meolehe labe aho ame bes lam ahamo tet ukbodume koei vahedam ke bumat zi laba itaidume azietem meot. Ba dam ahe damat vi si ame bes botehà niz labe fa neo vi giam biehe bak.
5. Ame bak lam meedam di nehadam bak. Digad diat modeo, aibu diat modeo, gi ahusobuli bak vabili nohu sibu bake le biti geàda. Labi ke eimeoda visoi fa am soa it beome vasea bozieda. Labi ba neo koei vahedam ke bumat zi laba le gi ame baket meeda. Labihada.
6. Labihadam dàt aho Yesusam alihi gi bak bohulat aame Yesus bake emoeme netàdi Yesusat avaesdam bak laba ogomasu ahit bake ab biteham. Labi ogomasu biti modeha Yesus fa ame setan laba ab gagoham. “Om taho futoi da nim vou esmozi itale,” lahame labi gagoha ame da labe dae buduana Yesus bake ab geme vameadamam. “Yesus abo Ala Bisi Feàda labe Am Adat oa, meit ahamo modem im akati Oho li modi faatolo modela? Oho nasi Ala bake gagole. ‘Oho ba iba beodume modi vàhàdem kaio,’ laham bak lam ohu vam bakti ulohona gagu vàmadi esule.”
9. Lahame labi gagoha Yesusat fa gago, “Lahana om ee Eba gagomale.” Lahahat ame da labe fa gago, “Em ee gagom Legion. Im setan zi duana ame da nibe am ahu oedume veimaha bake labihasu taluhu bake,” lahame gagoda.
10. Ame setan zi labe ozoha, “Yesusat iba gagu futodume ibi bak nim vou esmozi ilidale,” lahame gagu oudam bak labna zohàme iedi, “Iba bak mei bake a oudamule,” lahame tauleda.
11. Labi ame di labe aaha doho fi ho zi gi netà bak nom otesuhu bak laba dozeadume bakbe àda.
12. Làhàmu ame setan zi nibe Yesus bake neo ab gagodamam. “Làhà Oho iba da nim mali gagu futodume ilidalo modem di im fa doho fi ho zi labe im ahu laba fa oedume veimadam neào?”
13. Lahame labi tauledume gagoha Yesusat uledi ame setan zi laba gagu futodume ilidume ame doho fi ho labe im ahu laba ab oedume veimadaham. Labi modeha ame doho zi lam bak nom otesuhu bak labet nom itaome valo nom ilu ab tezi elodaham. Abo ame doho dua ribu ehena ozomom bak. Lahana ab elodaham.
14. Labi modeha dam doho fi ho vou aasdam dam labe aaha im doho valo tezi elodaha bak aahemu iedi ab iliham. Ilime le im num debu ibidati bàhàgo bake numaedaha damti ab vou fi det ladamam. Lab vou fi det ladam labe dam laba azihi dam labe ame im lab modehe bak aalo ab valadamam.
15. Valadam labe Yesus bake li aaha dat setan zi amu oedume veimahada lam gi Yesusam naba modesdam laba sue fa dusu fa im ozobohudi aidamna aahemu àvodi ab iedeham.
16. Dam na aahada nibe Yesusat ame setan zi laba gagu futodume ilidaha bak lamti fa doho fi ho zi laba veimadume valo teddaha bak lamti labihasu fa dam iube lehe dam laba vou duzu gut vameada.
17. Labi vameadume modeha Gerasa bak laba azihi dam labe iho dae vazisi Yesus bake ab gagoham. “Om iba a tau azimule. Om taho fa lale.”
18. Lahame labi ootedàmu Yesusat fa biolo iheba ab ziham. Zisi fa lasome modeha ame setan zi futodume ilidahada labe Yesus bake neha, “Em Oba tause,” lahame vi tauleda.
19. Lahana Yesusat fa mali vi gago, “Obo oho azihi bak laba fa le ame dam laba Alat oba aam faimu im neà bak tauhu bak lam vameadale.”
20. Làhàmu ame da labe bak lada vou esmozi fa neo Dekapolis bak abo Num Debu Bak Sepuluh laba le Yesus Aba modehe im feàna lam ab vou vameatedume uloholeham. Labi modeha dam ahebu ab aime àvodeham.
21. Labi Yesus Gerasa bak vou esmozi fa Itea Galilea labe Aba Aho amu lehe tot iuba fa ab bioham. Labi fa biou zitu aaha dam zi labe Yesusat fa lem bake li dozeadume vou faodamna ab li zituham.
22. Labi Aho laba li zitu modeha dat meida ee, “Yairus,” lahamda labe ab lefuham. Ame da Yairus lam Yahudi dam labe ibi iho fi hasi bakamta vahi Alat vameadaha im ahamda dogoit aidam bakti im meiti meedam num laba vou aasdamda meida am. Lahamda labe ame bak laba li vi tau doudamna modehe labe Yesusam alihi aahemu, “Yesus abo feàte,” lahame ahu adat iedi Yesusam naba modesdam laba netàdi ogomasu ahit bake ab biteham.
23. Ogomasu biti bisteat tauledam labe gagoda. “Aia, em adnamat abo duana gaili elolo vabili bisdalo. Om eba tau em num bake le Om anekehàt ulasi fà aodese.”
24. Làhàmu Yesusat uledi Aba vi tau meedam damti vahi ab tau ladamam. Labi ladam di labe gi dam duali bak kekesi gi mei soat osiddam labe lada.
25. Labihadam di labe nam abo bako itaha bak bohu vuusdume dua belas tahun fuhu nam nibe laha ba duzu tau vueda.
26. Ame nam labe abo bako itaha bak bohu vuusdàmu dokter iudu iuba vou le doi lu vabiedaha neàdem bie. Labi neo dokter iudu iuba neo vou le doi lu vabiedaha neàdem bie. Gi labihadume am doiti ahebu ab teoledaham. Vedi gi fa vasea duali feà bak ab fuham.
27. Labihadam namet Yesusat amu mei modi fa neàdedam bak aime ozobohudehe labe vi ozo, “Eho gi Yesusam sue sona ahoba dusuhuda vi ulameam em fa neàdem bak,” lahame ozome lehe labe Yesusam ohus tote aa vi vuli Am sue laba ab vi ulaham.
29. Labi vi ulaha am bako itaha bak bohu vuusdam bak lam fa vaitoi ab neàdeham. Labi nam labe ahamo it ozo, “Em geàdam bak ab neàdehame?” lahame ab ozoham.
30. Labi ame nam nibe Yesusam sue ulaha di labe Yesusat ab it ozoham. “Eho meia modi vizi mei neàdemna futoho,” laham bak lam Ahamo naedat ozobohudi it vaktesi dam duadate ab gagoham. “Eba amat li Em sue ulahela?”
31. Lahahat Aba vi tau meedam dam labe fa gago, “Mm, dam dua labe Oba ulam bak tadehe taia? Oho akatiham bake iba vi ailo labi gagohela?”
32. Lahahat Yesusat geàmu, “Amat Eba ulahela?” lahame dam zi niba it nabida.
33. It nabidume modeha ame nam nibe Yesusat aba modi fa neàdehe bak lam aho naedat it ozome ozobohudehemu ahate fi ozi li Yesusat naba modesdam laba ogomasu biti faa dododam labe aba aho modehe bak lam fa ahate ab vameadamam.
34. Labi vameadume neàdi Yesusat nam niba ab gagoham. “Oi, oho nehame ozoho labe, ‘Yesusat eba modi fa neàdem bak,’ laham bak lam oho nasi tu vuzehehe labe om fa ab neàdeham bak. Ame bako itaha bak bohu vuusdam bak lam ba oba modi vabidume geàdam kaio. Om fa Alati vahehemu obo bake nasi lale,” lahame ab gagoham.
35. Labi Yesus im lada lam vameadam lahasuhu di labe ame da Yairus abo Yahudi damat ihimo fi hasi meedam num laba vou aasdamda labe am dam totbaho labe doait ab leham. Labi li Yairus bake ab gagoham. “Om adnamat eloho. Ba Guru bake a gagu vou lemule. Gi feidate.”
36. Lahana Yesusat ame dam labe iho lab gagoho bak lam gi ailahigeàmu ozahit fa Yairus bake ab gagoham. “A àvodi vi ozodamule. Om gi ahu teudi Eba tu vuzehi faode.”
37. Lahame gagu neàdi ozahit ladam labe dam duada zi lam Aba vi tauidume Yairusam numa lam bak mali gi Aba vi tau meedam dam làtela lamota ihimo tau ab laham. Petrus ame. Yakobus ame. Labi am vahada Yohanes ame. Labihasu Aba vi tau ladume Yairusam num bake ab vou le vou fuham.
38. Labi vou fusi bàhàgo laba duzu Yesusat vi aaha damat nimidume medaom labe dahobuedam bak ab aaham.
39. Làhàmu Yesusat ame num laba oli dam bake ab gagoham. “Um akati bisi nimidume medaom labe dahobuedàla? Um data nim elom kaio. Gi iddalo.”
40. Lahame labi gagoha ame dam labe im koei nim eloho bak ozobohu labe gi Yesus bake vi igeame ab tozodamam. Lahana Yesusat gi ozahigeàmu dam duada zi fa gagome futodume neàdi gi ame koei labe am oiti am aiti labi Aba vi tau meedam dam làtela lamti ihimo num oula koei ousdamda laba ab vou oleham.
41. Labi vou oli koei laba netàdi am anekehà vuu vousai dae Abada Aram daet, “Talita kum,” lahame ab gagoham. “Ednamat oa, usale,” lahame ab gagoham.
42. Lahame labi gagoha adnamat nim it oazi lahana fa leheilahit ahedi usai iehe lai iehe laidamam. Ame data dua belas tahun fuhuna elohona Yesusat etei modi fa ahedehemu dam ahebu aame àvodi feà bak ab fuham.
43. Làhàmu Yesus ame adnamat labe am aiti am oiti mali gago, “Etei modehe im nim, ‘Eho modeho,’ laham bak lam meia a le fi demule,” lahame mali ab vi gagu esuham. Labi fa am aiti am oiti gago, “Um adnamat niba na àmnavat lu àle,” lahame ab gagoham.
1. Labi Yesus Aba vi tau meedam dam lamti iho bak lada lam vou esmozi fa Am budualehe num debu Nazaret laba fa ab laham.
2. Laba fa le aidume hari Sabat abo Yahudi dam labe ibi iho gi azibe im digat neo fuhemu Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli Yesusat ab vahokedamam. Labi oli vahokedume modeha Aho lab vahokedam dam duada labe iho ame im lam aidume modeha ab àvodeham. “Aa làhà! Da labe Aho etei iba vahokedaha im lam Aba amat adi diat modi vizehela? Amat adi diat Aba modi vizi na damat ihimo modem biem im feàna Aho meedàla?
3. Ne, da lam gi im dam bakdati uloho taia? Am gi ut gaheba vame modeme nazohaedamda taia? Labi Am faaha oi Maria gi imti vahi azihi nam neam taia? Labi Am vahada zi gi ahebu neam tai. Abo Yakobusti Yosesti Yudasti Simonti ahebu neam tai. Labi laha Am nà zi gi neam tai,” lahame tozome vameadume Yesus bake tum bak ab moham.
4. Làhàmu Yesusat fa ab gagoham. “Dat Alat vameadaha im aime fa dam bake ahate vameaidahada labe aho bak mei bake lam dita ame dam labe ahu adat iedi aho lab vou le vahokedaha im lam ule neàt gut ve aba vou baedam labe am im aime meedam meo bak. Lahana aho am vou budualehe bak modeo, am dam zoho bake modeo, dat am namti datati modeo, aho fa le am dam laba im vahokedam di am dam labe gi ailahigeàmodam meo bak. Ba ahu adat iedi aho lab li vahokedaha im lam aime aba vou baedam vabak,” lahame ab gagoham.
5. Yesus Am budualehe bak abo Nazaret laba azim dam labe Aba tu vuzehi meedaha vaba mu voohemu Aho ba ame bak laba na damat ihimo modem biem im feàna mahate duana meedaha vabak. Am gi dam faidi nisileheda koe zoho laba ulasi neàdeda. Bisi dua bak modem kai.
6. Ame bak laba azim dam lam Aba tu vuzehem mohemu Am ab àvodeham. Labi bak Abada vou esmozi num debu amomoi bake ab laham. Num debu meida iuba le dam bake vahokeda. Labi num debu iudu iuba le dam bake neo vahokeda. Labihada.
7. Labi Aho ba neo Aba vi tau meedam dam dua belas lam gagome fa Aba li bakamta ab vaheham. Bakamta vahi neàdehezobe Yesusat Aho mei ahu oli veimam setan mei setan mei laba gagu futodume ilidam bak lam fa Am dam dua belas laba modi vizi ab im dedamaleham. Labi im dedamali neàdehezobe ame dam dua belas lam gagu faheme dam ab behàsdi behàsdiaham.
8. Labi behàsdi behàsdiame neàdi dam gagu faheme olulo modem di labe Yesusat im nehasu fet ab vi vameadamam. “Uho etei lalo modem di um nazoh ahebu niba vaheme gi saemea ladale. Gi um odoamsota vuusu laiale. Um na àmnati um nazoh vadum dekti doiti a vou lamule.
9. Gi um naba duhu sepatu lamti sue ubu uho sona soa ada duhuda lamti vou lam neàte. Lahana sue sona ada dusumna gi esuhuda a vou lamule.
10. Labi uho num debu mei iuba le lafusidam di labe aimeam dam labe uho vou laha im lam aime uledi num deda meida labe nehameam, ‘Uho num ebeda niba azim neàte,’ lahameam làhà gi num obo oho azimda lamota azile. A num iudu iuba le i. Num iudu iuba le i. A labihadamule. Gi num ubu uho azimda lamota azibe neo num debu amomoi bake le ame baket mode. Lahadale.
11. Laham vabameam uho num debu mei iuba le lafusidam di labe aimeam dam labe uho vou laha im lamti um soti moudume im bak malemeam làhà uho ame num debu bak lam vou esmozi lale. Vou esmozi lalo modem di labe um naba bak itabe fau foamome esmozi lale. Labi dam labe vi aame nehi ozom bak. ‘Aa làhà! Iho dam labe vou lehe im aihi vabake im bak itabe fau foamohe? Labihalahit Alat iba beoe taia?’ laham bak vi ozom bak am tame,” lahame vi vameadume faheme ab oudaham.
12. Labihàmu dam dua belas lam faheme behàsdi behàsdiame num debu iudu iuba olu. Labi num debu iudu iuba neo olu. Labihadume dam labe Yesusat gagu oluhu im lam ab vou vameatedamam. “Uho faina meedam bak lam nasi voedume fa ahu neà bak vàmadi meedale,” lahame dam bake vou vameateda.
13. Labi ame di labe laha setan mei setan mei laba gagu futodume ilida. Labi laha dam faidi nisileheda zi laba iho zaitun oo vaksa minyaklehena lam dam laba noime tom gagu modi fa neàdeda. Gi bak ahebu labihateda.
14. Labihadam di labe Yesus Aba vi tau meedam dam lamti iho im feàna lab meedaha im lam meit aime fa meia vamea. Meit aime fa meia vamea. Labihadume Yesus elaidam datelehemu Galilea bake vuusdam Boehàda Herodes Antipas laha ab vi aiham. Damat nehasu otesi otesidam bak ab vi aiham. Dam totbaho labe vedi vabili nehame vameada, “Yohanes Mei Vuu Valo Baptisleiamda labe fat ahedehe labe Alat aba modi vizi na damat ihimo modem biem im feàna lam meeda moio?” lahame vabi vameada.
15. Labi dam totbahot laha vedi vabili nehame vameada. “Dat ahamda Alat vameadaha im aime fa dam bake ahate vameaidahada Elia labe fa nom olu ame im lam meedam moio?” lahame vabi vameada. Labi dam totbahot laha vedi vabili nehame vameada. “Dat ahamda Alat vameadaha im aime fa dam bake ahate vameaidahada meida lamti uloholi ame im lam meedam moio?” lahame vabi vameada.
16. Labihasu otesi otesidam labe Herodes laha ab vi aime gagoham. “Vabo. Eho ozoha, iho etei lab aidam im lam gi dat eho amu dam gagome bio vaitoi oteheda Yohanes Mei Vuu Valo Baptisleiamda labe aho fat ahedi usai ame im lam meedam bak,” lahame ab gagoham.
17. Ame Boehàda Herodesat lab gagoho bak lam aho amu nehi modehe im nim ehe labe aho vi ozome labi gagoho bak. Amu di iube Boehàda Herodesat aho aba meida Filipus labe am nam Herodias ab vaham. Labihahemu Yohanesat im lam ozobohudi Herodes bake neha, “Obo meida Filipusam nam oho vaha bak lam om git modeho. Ne, Musat aham di iube Alat aba vameadaha im nehasu toeme fi hasi esuhu bak. ‘Obo meida labe am nam a vamule,’ lahame toeme fi hasi esuhuna lam om akati vi modehe vaba voou fa obo meida labe am nam fa vahela?” lahame Herodes bake dihasi im vahokeda. Labi neo dihasi im vahokeda. Lahada. Labihadume modeha Herodesat faki am meo dam gagome Yohanes si anekehà ahim giame sel ab ousuham.
19. Ame di labe Herodias laha Yohanes bake faki ahu zoho beoho labe, “Yohanes otese,” lahame modeha am dàt mali gi vou faoda.
20. Am dat Herodes nehi vi ozome mali, “Alat Yohanes bake, ‘Im Aba Aho gagohoda meedase,’ lahame fi hasi im vamdesu meedamda am bak,” laham bak ozobohu labe am ahu adat iedi, “Yohanes abo feàte,” lahame Yohanes bake vou baedam labe otem biehemu gi am meo dam gagome ame sel laba vou aasda. Labi Yohanesat aho Alat aba vameadume oluhu im lam Herodes bake vahokedam di lam aho ozobohudem biemnàme ozahit ame im lam neo vi ailo àhàki vou faodam meot.
21. Labi ba digat meida iube Herodes am faaha digat neo fuhemu, “Dam vahi na àdase,” lahame na àlo modem di labe aho dam eeda zi nehamda gagome leda. Galilea dam vuusdamda eeda zi ame. Labi am meo dam labe im boehàda zi ame. Labi am dam eeda totbaho zi ame. Labihasu vazisi na ab àdamam.
22. Labi na vazisi àdam di labe Herodiasam adnamat ame dam labe iho avaesdam laba le duzu ab etoedamam. Etoedume modeha Herodes labe aho gagome lehe dam ziti ame nam labe etoedam bak aahemu im ahu gelevai ab deeli vàhàdeham. Labihàmu Boehàda Herodes labe aho voadam nam soao laba ab gagoham. “Oho etei lab etoedaha bak lam em aaha abo deeleho. Oho ozom, eho oba ana loela? Oho valo modemna lam gagomeam eho oba ame na lom bak.
23. Abo em nazoh feà ahebu fàsi totbaho oba lo tame. Abo gi eho vuusdam dam lam ahebu fàsi totbaho oba lu om damale tame,” lahame gagu vàmadi ohu ab vaham.
24. Labi ame nam soao labe am aiat labi gagohemu oi Herodias bake le ab gagoham. “Oi, ai eho etoehe bake deeli na lolo gagohona oho ozom, eho ai oho ba vahadate ana gagu vaela?” Lahahat am oiat fa ab gagoham, “Oho gi ai bake le gagome aho fà am meo dam gagu Yohanes Mei Vuu Valo Baptisleiamda labe am bio vaitoi am ohubuta fi lihibabu esu eba vou li fi le. Labi eho aame ozo, ‘Ame da otehe?’ laham bak em aame ozobuhudese. Oho labihasu le gagole.”
25. Lahame labi gagohemu ame nam soao labe fa taho emoeme am ai voamdate li am oiat aba gagoho im lam ab gagoham. “Oho abo taho etei nibe om meo dam gagu Yohanes Mei Vuu Valo Baptisleiamda labe am bio vaitoi am ohubuta fi lihibabu esu eba fa vou lele. Labi, ‘Am oteho,’ laham bak em aase.”
26. Lahame labi gagu modeha Herodes am ahu faidi feà bak ab fuham. “Em akati dam zi nim vou faodahit gagu vàmadi ohu vahela? Em gi feidam vabate. Eho nam soao niba lab gagoho bak lam ba voom vabiem bak.”
27. Lahame ozoha vabamu aho mei otidamda laba gago, “Oho Yohanes ousdam sel laba le Yohanes am bio vaitoi am ohubuta fi lihiba esu fa vou lele,” lahame gagu ab oluham. Làhàmu meo damat le oli Yohanes si am bio ab vaitoham. Labi vaitoi am ohubuta fi lihibabu esu fa vou li ame nam soao laba ab loham. Labi aho ve am oi bake vou le ab fi ham.
29. Labi dam Yohanesat aba vi tau meedam dam labe aiha Yohanes otehe bak aihemu sel laba le Yohanes koeiso lam ve vou futoi vou le koei esum ke bumat laba ab vou oli esuham
30. Labi Yesusat Aho gagu olu Am im vameadume esmozi laiam dam dua belas labe iho iuba le mode iuba le mode labihadume neàdi fa li bakamta vahi iho iuba le meedaha im lamti iho iuba le dam bake vahokedaha im lamti ahebu Yesus bake li ab vameadaham.
31. Labi im lam vameadume neàdi modeha dam giida duali feà bak fusi meit Yesus bake li im abada modeme neàdi fa la. Meit li im abada modeme neàdi fa la. Labihadume modeha Yesus Aba vi tau meedam damti iho ba na koena zagum vabamu Yesus Am dam dua belas laba ab gagoham. “Um Eba tau ihimo dam vabak nutabe bak iuba le vaitesu esdase.”
32. Lahame labi gagohemu Yesus Am damti iheba ziddume dam vaba alim bak laba ab ladamam.
33. Lahana ame bak labe aba zoho num debu meiti num debu meiti laham dam dua bak labe vi aaha Yesus Am damti ihe vihitoi ladam bak vi aahemu vedi, “Dam ihimo nasi emoeme lafuse,” lahame naot ab vi vuladamam. Labi vi vuladume Yesus Am damti iho le zitum bak laba doait ab le vou faodamam. Labi Yesus laba zitu aaha dam dua bak vuli Aba vou foadam bak aahemu gi domba na vou aasdamda vabalehe bakti ulohona abo ame dam laba vuusdamda vabali naat vabidam labe, “Bisi im vamdesu meedam bak akete?” lahame gi ladehena dauhali meedam bak aahemu aam faimu faobekesi im mei im mei lahadume ab vahokedamam.
35. Labi vahokedume modeha ab disilo meedamam. Làhàmu Aba vi tau meedam dam labe Aba li ab gagoham. “Disihi bak. Im bak nim dam vaba alim baket modem bak.
36. Laham bake Ai Oho dam duada zi niba gagome fa dam sii modealaha bak iuba oudume dam iho àmna fà le doit vame àdase. Lam bisi neà bak am tame.”
37. Lahame labi gagoha Yesusat fa ab gagoham. “Gi na àmna ubuda dam zi laba lodume àdameta.” Lahahat Am dam labe fa ab vi gagoham. “Aa! Dam zi feà nimohona iho na ake vame ve lu àdàla? Dam bisi feà labe abo meit na modeme ala delapan foli vam doi lamohoda vou le na àmna vame vou li lodam labe uloholem bak. Abo gi ame doi oona perak dua ratus lamohoda mei bake vou le na àmna ot loiame ve fa vou li dam niba lome àm bake Oho labi ozome gagoheo?”
38. Lahame labi gagoha Yesusat fa ab vi ailo gagoham. “Uho etei vou lehe dek laba le nabime aama. Rotibu amamohela?” Làhàmu Am dam labe le aame neàdi fa li gago, “Nim gi rotibu auohole. Labi bohe gi behàsu. Labihasu vasdam bak.”
39. Lahahat Yesusat fa Aba vi tau meedam dam laba ab gagoham. “Uho dam zi nim gagome lima puluh iuba nusu lima puluh iuba nusu. Labi dam totbaho neo gagome seratus iuba nusu seratus iuba nusu. Labihadale,” lahame vameadume neàdi ame baket ab modeham.
41. Labi dam nusualadume neàdi Yesusat ame rotibu auohole lamti bohe behàsu lamti vame vuusualame neàdi ohu vousai tom avaesu Am ai aabo bake, “Neàte,” lahame tom gagu neàdi ame rotibu auohole lam fahedume fa Aba vi tau meedam dam laba lodume iho fa ot vai vame dam duada zi laba ab lodume uloheleham. Labi neo bohe lam laha gi ame baket meeda. Labihadume ab uloholeham.
42. Labi lodume uloholehezobe damat ab àdamam. Àdume modeha dam zi lam dedebuli na zoho gi vaheme esu.
43. Làhàmu Aba vi tau meedam dam labe damat lab àme dedehemu vahehena zoho lam fa vi ateti atetidume boloseh vahedume modeha boloseh dua belas ab bektoham.
44. Dam etei laba nusualadume na àhà dam lam dam aabota dem di abo lima ribu fuhu bak.
45. Labi gi etei na àme neàdi Yesusat Aba vi tau meedam dam laba ab gagoham. “Um nasi fa iheba ziddume dumam tot Betsaida laba biole. Em ba vule tame,” lahame gagu ab oluham. Labi dam lada lam gagu olu neàdi neo dam duada zi lam neo gagome im num bake neo ab oudaham.
46. Labi oudume neàdi Yesus Ahamo Am Ai Ala bake tom gagom bak ozome bak buzoho bake ab laiteham.
47. Laba laisi Ala bake tom gagodume modeha gi ab aibuleham. Ame aibu di lam Yesus gi Ahamo tousda. Labi Aho bak bohulat nom vi aaha Aba vi tau meedam dam labe gi amu ihe vihitoi ladume itea tombu fusi modeha nutabe fai iubet li vao baho iho lam bak labet gut foadam labe ihe ab oke okedamam. Labi damat, “Taho ibi tum bake fuse,” lahame tet vaedam bak ab vi aaham. Ame di lam dihalo vabali jam tiga fusi jam enam fuhu vab di labe meeda. Labihadam aibu zoho labet Yesusat vulezi itea ahoba laba duzu duzuidume dam ihe bake ab vi vuladamam. Labi vi vuladume dam ihe vafozesome modeha damat aame iedi ab geham. “Na aibu nim Nomaida Basit iba nohiseo mode taia?” Lahame labi geha Yesusat gi àvodehat fa ab gagoham. “Um a iedi ahu faidi bisi vi ozodamule. Eho mozo.”
51. Lahame labi gagu neàdi iheba fa vi zisi modeha nutabe fai lamti vao foadam bak lamti bagavai ab seteham. Labi modeha Aba vi tau meedam dam labe ab àvodi feà bak ab fuham.
52. Ame dam labe iho amu Yesusat rotibu auohole lam modi zi dualehe bak aame àvodehenàme, “Yesus amat modela?” laham bak lam biem lahasuhu bak. Dam labe mahate vi ozom vaba im ozom bak zohobuli meedam labe labihaha bak.
53. Labi neo biodume bak ee gagom Genesaret laba lafusi ab zituham.
54. Labi zitu usdume modeha dam bak dedamat aaha, “Dat etei iba leheda nim Yesusat mode?” laham bak lam aame ozobohudi dam num debu bak netàda lam ahebu ab vou fi det ladume uloholeham. Labi damat aimeam, “Yesus iuba laho,” laham bak aim di dam ahe damat dam gaileheda ileba vaheme ame bak laba vi vou vulada. “Yesus fa iuba laho,” laham di neo laba vi vou vulada. Lahada.
56. Labi Yesusat bak iuba lào? Bak iuba lào? Abo num debu bak modeo? Sii bak modeo? Gi bàhàgo bak modeo? Laham bak laba lam di dam ahe damat aime ozo, “Yesusat im dam gaileheda nim ulasi modi fa neàdedase,” laham bake vi ozome fa im dam gaileheda visomoame damat na ot loiam bak tomba laba oumaheda. Labi ame lab gailehe dam zi labe Yesusat lebohotelo modem di labe gi nehame gut tauleda, “Om sue sona ahoba dusuhuda labe am nao bobusbe zoho labe am aha obe lam iho vi ulase,” lahame Yesus bake vi tauleda. Labi dam gaileheda ahebu ame sue gi koena vi ulaha modi fa ab neàdedaham.
1. Labi ba neo digat meida labe Farisi dam totbaho lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi totbaho lamti vazisi kota Yerusalem labe lehe labe li aaha Yesus Aba vi tau meedam dam totbaho lamti iho na àdam di im Yahudi damat ibi iho fi hasi modem baket modehe vaba abo anekehà valo ekeme itatadume neàdi na àdam vaba gi labihasu na àdam bak ab aaham.
3. Ame Farisi dam lam abo Yahudi dam ahebu iho na àm di ba im anekehà valo ekeme itatam vaba alia na àdam vabak. Ame bak lam gi dam ahamda ihimo ostame vi tau fi hasi vou mode usehe im lam im Yahudi dam bake vuusu im vameame faheme modiam dam busaoda bada zi nibe iho fa vame meedume baleàhà im meida am bak.
4. Labi dam labe iho na ot loidam bak laba le fa lem di na àlo modem di vedi dam ahamda labe ibi iho modem im vi ozome anekehà vao nom ekeme itatame neàdi afoezobe ba na àdam bak. Abo gi dam ahamda ibi iho fi hasi vou mode usehe im lada lamota meedam vabak. Abo im asa na vahelo modem di modeo, mokzoho vao noai udelo modem di modeo, fi lihiba na vaheme àlo modem di modeo, abo ame nazoh lam ahebu valo ekeme itatame neàdi ame nazoh lam ve ame im modem bak.
5. Ame eeda zi labe labihasu meedam damat modem labe Yesus bake vi ailo ab gagoham. “Guru oa, dam ahamda ibi iho fi hasi vou mode usehe im lam im Yahudi dam bake vuusu im vameame faheme modiam dam busaoda bada zi nibe iho fa vame ibi iho ozoho bak vi tauidume dualehe im lam akati modi Oba vi tau meedam dam labe tau modem vaba mode? Akati modi na àlo modem di ibi iho anekehà valo ekeme itatame neàdi na àiam baket modem vaba vedi anekehà gi labihasu na àdam damat modela?”
6. Lahame labi gagoha Yesusat fa ab vi gagoham. “Um gi ahobat neàdi meedam damat modem bak. Dat ahamda Alat vameadaha im aime fa dam bake ahate vameaidahada Yesaya labe aba aho aham di iube fet toeme esuhu Alam im meida nim gi um dam badate vàlu gagoho imot modem bak. ‘Alat neha, “Ame Israel dam nim Em ee vousai Eba vou baedam di gi im ahat ahamo vou baeda. Ba ame dam labe im ahulat vi tau Eba deelem vabak.
7. Ame dam nibe iho, ‘Em abo feàte,’ lahame Eba vou baedam di gi modeme vanamai voom damat modem bak. Labi laha ibi iho lab vahokedam im lam ba Ebe Eho gagu fi hasi esuhu im vahokedam vaba vedi fa gi dam bakda labe ihimo ozome gagu fi hasi esuhu im vahokedam damat modem bak.” ’ Lahame Yesayat aho aham di iube lab fet gagu vàmadi esuhu bak labe imbodi uho ab meedamam bak.
8. Um gi Alat aba aho gagu fi hasi esuhu im lam uho modehe vaba vooho bak. Uho vedi fa gi bak damat ibi iho fi hasi vou mode usehe im lam fa vame meedume baleài tombuli meedam damat modem bak.”
9. Lahame labi gagu neàdi neo vi vameada. “Uho vedi neha, ‘Imo gi dam ahamda labe ibi iho fi hasi vou mode usehe im lam im dam busaoda eeda labe iho fa vame meedume baleàhà im lam iho fa vi meedase,’ lahame im lada lam modi fa tombuli keàtet meedam labe fa Alat Aba Aho amu lab gagu fi hasi esuhu im lam modi fa obedi voou setem damat modem bak.
10. Nehaha bak. Musat aham di iube Alat aba gagu fi hasi esuhu im nim ot vai fa dam bake nehasu vameadaha bak. ‘Um ai bake modeo, um oi bake modeo, ahu adat iedi uba gagoho im laba vuzehi meedale.’ Labi im meida neha: ‘Meit am ai modeo, am oi modeo, faki, “Seee. Taho elole,” lahame feàtàme vi uloome gagomeam làhà meit ame da laba fa neo oteme vataum bak.’
11. Lahame aham di iube Alat Musat bake gagu fi hasi esuhu im lam uho akati meedam vaba vazidazehela? Uho vedi fa nehi ozome vahokedam damat modem bak. Uho meit am ai bake modeo, am oi bake modeo, nehi gagomeam, ‘Ai oa, oi oa, em na nim oba lom neàte. Lahana eho amu Ala bake lolo gagu vàmadi fi hasi esuhu labe oba lom vabi mozo,’ lahame ame da labe labi gagomeam làhà uho vedi ame da labe aho lab gagoho bak laba, ‘Ahole modeho,’ lahame vi gagodam damat modem bak.
12. Uho labi vi gagodam labe ame da labe am ai bake modeo, am oi bake modeo, ahu adat iedi vou baedam vaba, ‘Gi voom neàte,’ lahame vi vahokedam damat modem bak.
13. Um gi um tai ahamda labe ibi iho fi hasi vou mode usehe im lam um dam bada nibe fa vame meedume tombuli, ‘Iho ame im meedase,’ lahame meedam damat modem bak. Uho labihasu meedam labet um gi Alat Aba Aho amu lab gagu fi hasi esuhu im lam ab modi voou seteham bak. Uho gi im lada lamota meedaha vabak. Ubu uho git modi baleàhà im amomoi laha vi tau meedam damat modem bak,” lahame ab vameadaham.
14. Labi im lada lam vameadume neàdi Yesusat neo dam dua bak laba, “Aba lele,” lahame gagodume li netàdi ab vi vameadamam. “Um ahu iademe vi ozodume ozobohudem bake Eho etei uba vameadalo modem im nidi nim mahate iademe aidale.
15. Um Yahudi dam busaoda labe ubu uho nehi vahokedam im nim Alat ba uledem vabak. Uho vedi iho im ahat na ve àm bak labet modi it vàhàdeme faidi fi hasi modesda tiba. Lahana Alat ozomta ba im ahat na àm bak labet modi im it vàhàdeme faidi fi hasi modesdam vabak. Gi im ahat futom im labet modi im vàhàdeme faidedam bak. [
16. Um dogoi ehena mahate aime vi ozobohudedume ozobohudele.”]
17. Lahame Yesusat ame im lam vameadume neàdi dam dua bak vou esmozi Aba vi tau meedam dam lamti ihimo numa ab le oedaham. Oedume neàdi Aba vi tau meedam dam labe Yesus bake vi ailo ab gagoham. “Oho etei na àm bake lab vàlu im totobet fi koadaha bak lam am tombu akete?”
18. Lahahat Yesusat fa ab gagoham. “Oo, um vi ozome ozobohudem vaba? Neha taia? Na àmna gi ahat àme gi zulu esum bak. Labi vou faobe ba haeli vieme setem bak. Bak labet modi meia it vàhàdeme faidi fi hasi modesdam vabak. (Yesus etei labi gagohemu iho ozom, ba na àmna ahebu fi hamda vabak. Gi ahebu àm neàna tadehe bak.)
20. Lahana ibi iho im ahulat vi ozome neàdi futodam im lam iba modi it vàhàdeme faidedam im am bak.
21. Dam ahulat it ozome modi faidem im neha: Bisi fai bak modem bak ozodam bak ame. Ostame fi loholi ot vai ot vaidam bak ahebu ame. Mei na aa vam bak ame. Mei otem bak ame. Nam dat eheda modeo, dat nam eheda modeo, aa modem bak ahebu ame. ‘Nazoh dualese,’ lahame meia mali soat ziemausi vadam bak ame. Meia faki bisi fai bak la modi le modidam bak ame. Meia giomim vameadam bak ame. Abo bisi fi loho feà bak fusi ladem bak ozom vaba fako bueme vou vabodam bak ame. Meit modehe im ahu adat faki teidi meedam bak ame. Meia feàtàdam bak ame. Aba it daetbadam bak ame. Meit im vameadam di vamdesum bili ahusobuli meedam bak ame.
23. Labihasu ame im zi lam iba modi it vàhàdeme faidemna am bak. Ba ame dam labe ibi iho ozoho baket anekehà valo ekeme itatam vaba na àm bak labet meia modi vàhàdeme faidem vabak,” lahame ab vahokedaham.
24. Labi Yesusat ame bak lada vou esmozi neo ladume num debu Tirus laba netàdehe bak laba ab laham. Le meit Aba aamna zohàme num meidate aa oli aidasome modeha vastem vabili kehàm vaba damat am alihi ab aame fi desi vàhàdeham.
25. Labihadam di labe Yahudi namet modem vab nam abo Siria bak zoho Fenisia laba faaha nam labe laha aiha Yesus lehe bak aihemu Yesus bake le netàdi am ahu adat iedi Yesusam naba modesdam laba ogomasu ahit bake ab biteham. Ame nam nibe am adnamat buà mei ahu oli veimam setan labe am ahu laba veimai geàdam bohu modesdam bak ehet. Làhàmu am oiat Yesus bake li neha, “Em adnamat mei ahu oli veimam setan labe am ahu laba veimai geàdam bohu modesdalo. Oho gagu futoi itale,” lahame ab tauledamam.
27. Lahame labi tauledume modeha Yesusat ame nam laba fa ab gagoham. “Na àmna data bake nasi lu àm bak. Data bake lu àlo modemna ba im veme esu àm vabak. Labiham fai bak.”
28. Lahahat ame nam labe Yesusat lab gagoho bak lam ailahigeàmu fa neo vi gago, “Lo. Lamota imbot. Lahana Boehàda Om ozom vaba? Num deda labe am na vaheme àm ut gaheba laba datalu na lu àm di na keobe goagoadamna lam vem ad laba dozomna labe gi labaha àmna taia?”
29. Lahahat Yesusat fa ab gagoham. “Oia, oho etei Eba fa lab gagoho im lam Eho aiha om abo Eba tu vuzehehemu om fa nasi num bake lam neàdeho. Ame setan lam futoi om adnamat lam vou esmozi itame setehe bak.”
30. Lahame labi gagohemu ame nam nibe Yesus fa vou esmozi am num bake ab laham. Le aaha am adnamat gi amu ame setan lam futoi itame seti fa neàdi nuzuba bisdamna ab le aaham.
31. Labi neo Yesus num debu Tirus lam vou esmozi neo ladume num debu Sidon labe labohoti Itea Galilea laba lazi Dekapolis bak abo Num Debu Bak Sepuluh vou id lada.
32. Ame Num Debu Bak Sepuluh vou id ladam di labe damat dat dae vabali ulaihàbuleheda lam ve Yesus bake ab vou leham. “Oho da nim Om anekehàt ulasi fa neàdele,” lahame ab tauledamam.
33. Labi modeha Yesusat ame da lam si Ahamo dam dua bak vaitesu vou duzu afoezobe Am anekehàso ahim ame da dogoi bumat ahim laba dusu afoezobe fa vi vihitoi neo Am anekehà laba keha dou fa ame da labe am iso laba ab ulaham.
34. Labi ulasi neàdi Am ohu vousai asum ahoba iuba tom aasu bisteat omeeme dae Abada Aram daet, “Efata,” lahame ab gagoham. (Aram dae, “Efata,” laham di gi, “Figatele,” lahame gagom bak am.) “Efata,” lahame labi gagoha ame da labe am dogoi ab fi gatei im ab aidamam. Labi am iso im gagom bak biehe bak lam laha fa ab neàdi im aim neàna ab vameadamam.
36. Labi modeha dam zi labe ame bak lam aahemu àvodi ab ot gagoidamam. “Aa làhà! Ame Da nim Aho modem im gi neà bak tadem Dàt moz. Abo dam im aim biemda modeo, dam im gagom biemda modeo, laham dam laba ulasi modi fa neàdemda Am am bak,” lahame ab vou baedamam. Labihadàmu Yesusat ame dam laba ab gagoham. “Eho etei lab modehe bak lam uho meia a le fi demule,” lahame mali ab vi gagu esuham. Lahana, “Meia a le gagu fi demule,” lahame vi mali gagomna damat geàmu fa vi fi de. Labi neo vi mali gagomna damat geàmu fa neo vi fi de. Labihada.
1. Labi ba di iube dam zi fai neo Yesus bake li vadokbueda. Ame dam zi fai labe na àmna vabalehemu Yesusat Aho Aba vi tau meedam dam laba gagome li dozeadume neàdi ab gagoham. “Dam duada zi nim iba tau iddume usi làteladi im na àmna folehe labe idoali feà bak fuhu bak lam aam faimu Em faobekeho. Em ba dam nim na àhà vabna ideia olum kaio. Dam zoho bak bohulana lehe bak. Laham bake zie bohu nim fa ladameam gi doni bake ahadou faa susume lam bili la biti le bitiam zohàme ba labihasu olum maleho.”
4. Lahame labi gagoha Aba vi tau meedam dam labe fa ab vi gagoham. “Ne lahana dam vaba alim bak nim iho ake le na àmna aame vame fa vou li dam bake lodume uloholi àdàla?”
5. Lahahat Yesusat fa vi ailo gago, “Rotibu ubuda amamo vou lehela?” Lahahat Am dam labe fa ab vi gagoham. “Im rotibu tujuh ehete. Labi bohe koena ame. Gi labihasu vou lehe bak.”
6. Laham bak lam aime neàdi Yesusat fa ame dam duada zi laba gagome bak laba ab nusualadaham. Labi nusualadume neàdi Aho ame rotibu tujuh lam vuusu Ala bake, “Neàte,” lahame tom gagu neàdi fahedume Aba vi tau meedam dam laba lodume iho fa vame ame dam duada zi laba lodume ulohole.
7. Labi neo Am dam labe iho vou lehe bohe koena lam laha Aho neo ve Ala bake, “Neàte,” lahame tom gagu neàdi neo ame baket ab modeham.
8. Labihadume uloholehezobe ame dam zi fai labe ame na zi lam àdume modeha dam ahebu dedehemu zoho ab vahedaham. Labi Aba vi tau meedam dam labe damat lab àme dedehemu vahehena zoho lam fa vi ateti atetidume boloseh vahedume modeha boloseh ab tujuhleham. Labi modeha ame boloseh lam ahebu ab bektoham.
9. Dam etei lab nusualadume na àhà dam lam gi dam aabota dem di abo empat ribu fuhu bak. Ba lahiti datati tau dem kaio. Labi na lam àdume neàdi Yesusat ame dam duada zi lam gagome fa ibi bake ab oudaham.
10. Labi dam lada lam oudume neàdi Yesus Aba vi tau meedam damti iheba ziddume bak ee gagom Dalmanuta laham bak laba ab ladamam.
11. Labi Dalmanuta bak laba lafusi zitu azibe modeha Farisi dam totbaho labe vazisi, “Iho im nehasu Yesus bake modi aase,” lahame fet ozome Yesus bake netàdi ootedam labe ab gagodamam. “ ‘Om abo Alat Gagu Fihasi Vimteme Oluhu Dat Boehàda am tame,’ lahamda nasi na damat ihimo modem biem im feàna fet modemale. Labi im aame ozobohudese,” lahame ab gagodamam.
12. Lahaha bak lam Yesusat vi aime ahu faidi bisteat ab omeham. Omeeme gago, “Um etei dam bada nim gi bisi faina meedam bak tadem damat moz. Um gi labihadam damat modem labe vedi Eba neha, ‘ “Om Alat Gagu Fihasi Vimteme Oluhu Dat Boehàda ameo?” laham bak lam im biem bake na damat ihimo modem biem im feàna Oho nasi fet modehemu im aame ozobohudese,’ lahame Eba gagodam damat modem bak. Lahana imbote. Em ba uledi ame bak lam uba etei di nibe fet modem moho bak.”
13. Lahame labi gagu neàdi ame Farisi dam lam vou esmozi Aba vi tau meedam damti ihe neo ziddume Itea Galilea labe ab biodamam.
14. Labi biou ladameam Aba vi tau meedam dam labe iho it ozoha, im roti vou lehe vab damat modem bak ab it ozobohudeham.
15. Labi vou biou ladam di labe Yesusat ozo, “Soo! Ame Farisi dam lamti Herodes Antipas lamti ibi iho ozom bak lam fa neo Eba vi tau meedam dam laba vizi vàhàdemna ozomo?” laham bak vi ozome vahokelo ahit Aba vi tau meedam dam laba im totobet ab fi koadamam. “Um iademe vou faovoehebeat meedale. Farisi dam lamti Boehàda Herodesti ibi iho vou lehe na abo na vizi fi kidemna ragi lam ba a vamule.”
16. Lahame labi gagoha Aba vi tau meedam dam labe aime ihimo ab ot gagoidamam. “Uho ozom, iho roti vou lehe vabake Yesus iba labi gagohe?”
17. Lahame ame dam labe ihimo lab ot gagoidam im lam Yesusat ahamo ozobohudi ab vi gagoham. “Um akati Eho etei im totobet lab fi koadaha bak lam uho vabili vedi Eho uho roti vou lehe vabak laba ozome uba gagoho tiba vabi vi ozodàla? Làhà um amu Ebe Eho meedam bak um vi ozome ozobohudehe vab labe fi gatehe vabali mode? Um akati bisi im ozom bak zohobuli mode?
18. Làhà damat ihimo modem biem im feàna lam Eho modemna um fako ehena na aam bi mode? Um dogoi ehena Eho gagoho im uho aim bi mode? Akati um ahu zohobuli mahate Eba tu vuzehi meedam vab damat mode? Um gi ozobohuna ahit fa vabilehe damali mode?
19. Eho amu dam lima ribu zi fai laba rotibu auohole faheme lodaha di lam damat àme neàdi vekehe roti zoho lam uho vi ateti atetidume boloseh amamo vahehela?” Lahahat Aba vi tau meedam dam labe fa gago, “Boloseh dua belas vahehe bak.”
20. Lahahat Yesusat neo vi gago, “Labi laha Eho amu dam empat ribu zi fai laba laha rotibu tujuh faheme lodaha di lam damat àme neàdi vekehe roti zoho lam uho vi ateti atetidume boloseh amamo vahehela?” Lahahat Am dam labe fa neha, “Boloseh tujuh vahehe bak.”
21. Lahame gagoha Yesusat neo vi gago, “Làhà Eho uba lab gagoho im lam um ozom biem lahasuhe?” lahame ab gagu esuham.
22. Labi neo ladam labe fa num debu Betsaida laba ab lafuham. Lafusi modeha dam aheda labe fa dat fako faida na aam biemda lam anekehà vuusu Yesus bake ab vou leham. “Yesusat fà ulasi neàdese,” lahame ab vou li tauledamam.
23. Labihàmu Yesusat ame dat fako faida lam neo anekehà vuusu num debu bak vou esmozi fa bàhàgo bak iuba ab vou laham. Labi vou le vou duzu neàdi Yesusat ame da labe am fakode laba keha ab doham. Keha dou neàdi Yesusat Am anekehà ahim ame da so laba odosu gago, “Om na aam neàdeheo?”
24. Lahahat ame da labe am ohu vousai nabime gago, “Lo, em dam alihi vi aadalo. Lahana gi utsoti ulohona goom bakta aadalo.”
25. Labi gagohemu Yesusat neo Am anekehà ahim fa ame da labe am fakode laba neo odosdume ab iteham. Labi modeha am fako keesi na aam bak ab neàdeham. Labi na ahebu ab aam tombali neàdeham.
26. Labi neàdehemu Yesusat ab vi gagoham. “Om num bake fa nasi lale. Lahana om ba num debu bake vi oli om neàdehe bak lam a vameadamule. Gi labohoti om num bake lale,” lahame ab gagu mali oluham.
27. Labi Yesus Aba vi tau meedam dam lamti iho Betsaida vou esmozi neo ladume num debu Kaisarea Filipi laba netàdesome modeha gi aba zoho laba modealaha num debu bak laba goda. Godam di labe Yesusat Aba vi tau meedam dam laba vi ailo ab gagoham. “Dam duada labe, ‘Em amat modela?’ lahame vameadaha bak uho akatihasu aidàla?”
28. Lahame labi gagu aiha Aba vi tau meedam dam labe fa ab vi gagoham. “Dam duada totbaho labe vedi neha, ‘Om gi Yohanes Mei Vuu Valo Baptisleiamda labe amu elohona fat ahedi mozo,’ lahame vameada. Labi dam duada totbaho labe vedi neha, ‘Om gi aham di iube Alat vameadaha im aime fa dam bake ahate vameaidahada Elia amu ahena Alat vahada fa nom iluhe moio?’ lahame vameada. Labi dam zohot neo vedi neha, ‘Om gi dat ahamda Alat vameadaha im aime fa dam bake ahate vameaidahada meida amu eloho dàt fat ahedi lehe moio?’ lahame vameada. Dam zi labe Oba labihasu ozome otesi otesidam bak.”
29. Lahame labi vameadume modeha Yesusat fa neo vi ailo ab gagoham. “Ne lahana um akatiha? Um, ‘Em amat modela?’ laham bak um akatihasu ozome gagodàla?” Lahahat Petrusat fa ab vi gagoham. “Aia, Om abo Alat Gagu Fihasi Vimteme Oluhu Dat Boehàda am bak.”
30. Lahame Petrusat labihasu gagohemu Yesusat Aho Aba vi tau meedam dam laba ab gagoham. “Petrusat etei lab gagu tombalehe bak lam, ‘Em abo Alat Gagu Fihasi Vimteme Oluhu Dat Boehàda am tame,’ lahaha bak lam uho meia a le fi demule,” lahame ab gagu mali esuham.
31. Ame digat labe Yesusat damat Aba ba modelo modem im lam Aba vi tau meedam dam laba alimeat fet ab vameadamam. Aho neha, “Em Ai Alat fet gagu esuhemu Yahudi damat ibi iho tu vuzehi meedam im vuusdam tohe dam zi labe vahi Em abo Asum Ahoba Iubet Bak Niba Li Dateleheda niba mu fa Eba fai bak bohu modi geàda tame. Labi laha meia gagu Em oteme eloi fa usi behàsdi Em eloho bak labet Alat modi fa ahedi usa tame.”
32. Lahame Yesusat gi damat Aba ba meedam im ahate fi desi vameadume ab tombaleham. Lahame labi vameadume modeha Petrusat Yesus vi vuu ubahi duzu gago, “Boehàda, ba a labi gagomule,” lahame gi ostame ab vi vabededamam.
33. Lahame labi vabededume modeha Yesusat fa it vaktesi Aba vi tau meedam dam laba aasu Petrus bake ab gagoham. “Om gi Iblisit gagom im Eba gagohemu om fa Em ohuse duzule. Oho etei Eba lab gagoho bak lam gi dam bak damat ozom bak Eba gagoho bak. Ba Em Ai Alat Aba Aho fet ozoho bak gagoho vabak,” lahame Petrus bake im ab vahokeham.
34. Labi Petrus bake gagu neàdi Yesusat fa Aba vi tau meedam dam lamti labi dam mei zi lamti gagome fa vazisi neo ab vi vameadamam. “Meit Ebe Eho vahokedam im ozobohudi vi tau meedalo àhàkedameam làhà ba im aba aho it ozome modelo àhàkemda lam ba it ozome meedam vabak. Ame da labe aho gi neham bak. ‘Eho Yesus bake tu vuzehi im Abada meedàmu damat em si ut tetehesuhunaso lam ve lu vatu vou ladam di lam damat eba aasdamnàme eho gi ozahit vou le em paku dou elom neà bak,’ lahame Eba labihasu tu vuzehi gagu vàmademda lam aho Eba tu vuzehi vi tau meedam neà bak.
35. Neham bak. Meit aba aho Eba lab tu vuzehehe bak lam ahate gagomeam damat am otem bak labna zohàme it vou faovoi vei iedi ahit biehenali, ‘Em Yesus bake tu vuzehi Am damalem kaio,’ lahame veibadamda lam ba Alati vahi ahe neàna bohu vuusdam vabak. Lahana meit neha, ‘Em Yesus bake tu vuzehi Aba Aho Meedaha Im Neàna lam eho dam bake vou vameatedam labe damat em otemeam làhà gi neà bak. Em ba àvodem vabak,’ lahame aba aho elom bak laba bisi it vou faovoi meedam vabda lam Alati vahi gi ahe neàna bohu vuusdamda am bak.
36. Iho bak niba esdam di meit nehi ozo, ‘Em gi nazoh zi nim vadume duali neàdese,’ lahame ozodamda labe aho vedi am ahu it vou faovoi Eba tu vuzehi Alati ahili ahena aabo laba vuusdam vabameam làhà aho amu modehe zoho ium gi meedume vanamai voom bak.
37. Iho Alati ahili ahena aabo laba vuusdam bak lam iho ba anat vi lu và? Ba na ot loiam biem bak.
38. Etei bak damat bisi faina meedume Eba mu tozodam di nibe meit neha, ‘Em abo Yesus bake tu vuzehi Aho vahokedaha im aime meedamda modem kaio,’ lahame ladi vei iedi Eba momeam làhà ba diamut Em Abo Asum Ahoba Iubet Bak Niba Li Dateleheda nibe Em Aiat Am na fauha meona fako iedemna ogatei modealaha bak lam fa Eba modi vizi feà Dateli Aho Am im gagu vou usem dam zi lamti ba neo amediat bak niba nom ilu meedam di lam Eho laha ame da laba neha, ‘Om Eba tu vuzehi Em damalehe vabda am tame,’ lahame mu voo tame,” lahame ab vameadaham.
1. Labi im lada lam vameadume neàdi Yesusat fa neo vi vameada. “Eho lab gagoho bak lam ba imbodemta imbode. Lahana Eho etei uba neo gagolo modem im imboda nidi nim laha nasi aima. Um dam etei nib dozeadaha dam totbahota taho elom vaba ahe lahasdamna uho ba Alat Boehàdateboli dam bake vuusu im vahokedalo li duzum bak um dam zohota ame bak aa tame,” lahame Yesusat ab fet gagu esuham.
2. Labi usi enamli neàdi Yesus Aho Aba vi tau meedam dam Petrusti Yakobusti Yohanesti labihasu gi dam lada làtela lamota gagome sibu bake ab vou laiteham. Labi vou laisi modeha Yesus Am alihi veimdehe bak lam Aba vi tau meedam dam làtela labe ab aaham.
3. Abo gi ala digadda meo fau fako aam iedem bakti ulohona Yesusam sue laba modesu ab fauha meoleham. Ba bak damat iho sue fauhana kikeme bisi fauha neàdem bakti uloho vabak. Abo bisi vafozi meona fau feà modesu ogatedam bak.
4. Labihàmu ame dam làtela labe iho vi aaha Alat vameadaha im aime fa dam bake ahate vameaidaha dam abo aham di iube eloi seddaha dam behàsu Musati Eliati iho lehe bak aaha vabna nom ilu Yesus Am obe laba vi tau duzu im vameadamna ab aaham.
5. Labi ame bak lam aahemu Petrusat Yesus bake ab gagoham. “Ai Guru oa, iho etei niba li odosi umti vahehe bak abo neàte. Imo teohet mom num làtela mose. Meida Oba mo. Labi meida Musa bake mo. Labi meida Elia bake mo. Labihadase.”
6. Petrusti aba mei dam behàsu lamti iho iedi modem faidi Petrusat gi ahulat ozom im ostame fa num mom bak lam ab gagoham.
7. Lahame Petrusat gi etei labi vameadam lahasuhu di labe ulo fauha meona nom ilu ame dam lam ab baguamdi seteham. Labi modeha Alat Am dae ulo labe futoi gago, “Da nim Em Adat vàmtea Ebe Eho bisi deelemda Am am tame. Uho Aho vameadam im mahate aime meedale.”
8. Lahame gi etei labihasu vameadameilahit ame dam làtela labe vi nabime aaha ulo fau lamti ame dam behàsu lamti fa seti gi Yesus Ahamo doudamna ab aaham.
9. Labi im lam meedume neàdi sibu labe fa lezedam di labe Yesusat Am dam làtela niba ab gagoham. “Uho etei le aadaha bak lam Em Abo Asum Ahoba Iubet Bak Niba Li Dateleheda nim eloi Em eloho bak labet Alat modi fa ahedi usaha vab di meia a le fi demule,” lahame ab gagu mali esuham.
10. Làhàmu ame dam làtela labe iho etei le aaha bak lam ba meia fi dehe vaba ab vasteham. Lahana Yesusat etei neha, “Em eloi fat ahedi usam bak,” lahaha bak lam, “Akati modemna gagohela?” laham bak ozom vabili ot vameaida.
11. Labi ot vameaidam labe fa neo Yesus bake vi ailo ab gagoham. “Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi labe nehi vahokedamna iho aihi bak. ‘Amu dat ahamda Alat vameadaha im aime fa dam bake ahate vameaidahada Eliat nasi bak niba fa le. Labi Alat Gagu Fihasi Vimteme Olulo Modem Dat Boehàda ba vule tame,’ lahame vahokehena iho aihi bak. Ne, ‘Om ame Da am tame,’ lahana iho etei Eliam alihi aahana aho Om ba vulem bak zie vuehe vabna akati nasi fa lahela? Làhà, gurut iba lab vahokedam im lam giomimot mode?”
12. Lahame labi gagoha Yesusat fa vi gago, “Lo, lamota imbot. Eliat nasi bak niba li dam bake nehi fet vameada. ‘Alat Gagu Fihasi Vimteme Olulo Modem Dat Boehàda le tame,’ lahame vameadume damat aime neàdi im ahu vabiedume ahumdi vou faodam bak ehe bak. Lahana um ozom vaba? Ame da Eliati ulohoda amu gi Eho ba vulem bake nasi li duzu neàdehe bak. Nasi li duzuhunàme aho lab vahokedaha im lam damat aime tuhu vabak. Vedi ame dam labe ibi iho modelo àhàkehe bak labet modi aba fa fai bak meedume vabidume geàdaha bak. Ame bak lam meit Alat Vameadaha Im Toedahana laba labihasu fet toeme esuhu im ehe labe labihaha bak. Lahana Em Abo Asum Ahoba Iubet Bak Niba Li Dateleheda nibe Ebe Eho ba modem im akatihà? Meit Alat Vameadaha Im Toedahana laba nehasu fet toeme esuhu bak. ‘Asum Ahoba Iubet Bak Niba Li Dateleheda lam damat Aba modi geàdume mu voo tame,’ lahame toehe bak lam akati modi um ozom vaba modela?” lahame ab vameadaham.
14. Labi Yesus Aba vi tau meedam dam làtela lam iho vahi lezi Aba vi tau meedam dam totbaho bake ab lefuham. Lefusi aaha dam duada zi totbaho lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu vahi fa Aba vi tau meedam dam totbaho laba vabousu daet beàdam bak ab li aaham.
15. Labi modeha dam duada zi labe iho it vaktesi aaha Yesusat ledam bak aahemu àvodi Yesus bake, “Neàte,” lahalo ab emoeham.
16. Labi emoeme Yesus bake lefuhemu Yesusat ab gut gagoham. “Um ana im beàdàla?”
17. Lahame gut gagohemu dat meida labe fa ab gagoham. “Vabà! Ai Guru oa, em daboseà nim mei ahu oli veimam setan labet modi dae vabaleho.
18. Ame setan labe aba modiam bak fum di aba modi bake biti geàda. Labi fa neo aba modi aheli kehanabu vaome geàda. Labi neo modi am mo uzimtedi so teilemahi modida. Labi modidàmu eho Oba vi tau meedam dam totbaho niba tauledume gago, ‘Uho ame setan laba gagu futoi itale,’ lahame gagoha dam labe modesome modeha modem bi moho,” lahame Yesus bake ab vameadaham.
19. Labi vameadume modeha Yesusat fa ame lab odosdam dam zi laba ab gagoham. “Em abo uba tau azibehamdehena um eteida nim akati Eba mahate tu vuzehem vaba modela? Alat Aba Aho ozoho baket uho modehe vaba akati bisi odohabuli git meedam bak bohu vuusdàla? Eho uba vuusdam di adi bake fusi um mu voe? Uho Eba tu vuzehem bak Eho ba gi labihasu vou faodà?” lahame gagu neàdi fa ame da niba ab gagoham. “Om daboseà nasi ve vou lele.”
20. Lahame labi gagohemu dam labe le ame daboseà ve fa ab vou leham. Labi Yesus bake vou le netàdeha ame setan labe Yesusam alihi aahemu ame daboseà niba modi ab tufa tufadamam. Labi bake biti vakte vaktedam labe kehanabu vaome ab geàdamam.
21. Labi geàdam di labe Yesusat ame daboseà labe am ai bake ab gagoham. “Om daboseà nim adi diat faasi ame im nim meedàla?” Lahahat ame da labe fa gago, “Amu gi koe diat faasi meedume etei ab vou fuham bak.
22. Ame setan labe, ‘Em adat nim otese,’ lahame aba modi vua bak modeo, vao bak modeo, ostame bitidam meote. Lahana Obo Oho modem im ehelemeam làhà iba faobekesi tau modele.”
23. Lahame labi gagoha Yesusat àvodi fa gago, “Lo, Eho modem im ehe bak. Ne, anat? Meit Eba tu vuzehi meedameam làhà na ahebu Eho modem neà tadehe bak.”
24. Lahame labi gagoha ame daboseà nibe am aiat ab gagoham. “Lo, em Oba tu vuzehemta tu vuzehehe bake. Lahana mahate tu vuzehem kaio. Oho eba laha vi modi Oba tu vuzehem bak mahate modi dualele.”
25. Lahame labi gagoha dam amomoi zi neo, “Imo vi tau aase,” lahame emoeme lefuseo meedam bak lam Yesusat aahemu ame setan laba ab mali ootedamam. “Meia modi dae vabalehe bakti ulaihàbulehe bakti labihasu modem setan oho taho daboseà nibe futoi vou esmozi itale. Ba a fa li oli veimamule.”
26. Lahame labi mali ooteha ame setan labe ame daboseà laba neo modi geàda. Gagada. Kehanabu vaoda. Labi modi tufa tufadume vou esmozi ab itaham. Lahana damat aaha ame daboseà lam koeisoti uloholi bisdam bak aahemu, “Eloho,” lahame àvodi ab gagodamam.
27. Lahana Yesusat geàmu ame daboseà lam neàdehe bak ozobohu labe am anekehà vi vuu vousai ab vou duzuham.
28. Labi ame daboseà lam modi fa neàdi Yesus Aba vi tau meedam dam lamti ihimo vahi dam dua bak vaitesu fa num ibi iho azimdate ab vou oedaham. Vou oedume neàdi Aba vi tau meedam dam labe Yesus bake ab gagoham. “Oho ozom, akati modi iho ame setan lam iho gagu futoi itasome modeha modem bi mohela?”
29. Lahahat Yesusat fa gago, “Mei ahu oli veimai ahelem setan lamohoda gagu futoi italo modem di gi modem vabak. Abo amu nasi Ala bake tom gagodume neàdi afoezobe ba ame setan lamohoda gagu futoi itam bak,” lahame ab vi gagu esuham.
30. Labi Yesusat Aba vi tau meedam dam lamti iho ame bak lam vou esmozi neo ladume Galilea bak laba modealaha num debu meida laba labe i. Num debu meida neo laba labe i. Labihada. Labi izi labohotidam di labe damat aime Aba valadam bak labna zohàme iho fusidam bak laba fum di ba fi dem vabak. Gi aa labohoti laida. Am abo Aba vi tau meedam dam laba im duana vi vahokedalo labihadam bak. Labi digat meida iube Aho neha, “Um aile. Em Abo Asum Ahoba Iubet Bak Niba Li Dateleheda nim kehàm vaba meit Em vou fohome dam bake ub lu ote tame. Labi oteme usi behàsdi Em eloho bak labet Alat modi fa ahedi usa tame.”
32. Lahame labi gagoha Aba vi tau meedam dam labe Yesusat etei lab gagoho im lam ozom bili vi ozodamnàme fa vi gagu aim iedi moh.
33. Labi neo ladume num debu Kapernaum ab vou fuham. Laba vou fusi num bake vou oedume neàdi Yesusat Aba vi tau meedam dam laba ab gagoham. “Iho etei zie doni laba lab leom di uho ana im vou otesi otesia ledàla?”
34. Lahame labi gagu aiha dam lam ba im vi gagom kai. Ame dam labe iho etei lab ledam di labe meit neha, “Alat iba ozom di eho feà datelem bak,” lahame vou otesi otesia lehemu Yesus bake vi gagu fi dem lade.
35. Làhàmu Yesusat fa nusu Aba vi tau meedam dam dua belas laba im ab vi vahokedamam. “Uho meidavat nehi it ozo, ‘Alat eba, “Em feà,” laham bak modese,’ lahame it ozome modelo àhàkemeam làhà ame da labe fa feà vab dateli meit gagohona uledi meedam tadele.”
36. Lahame labi gagu neàdi Aho fa data koena laba gagome li ame dam dua belas labe ibi iho avaelaha tot laba ab vou li duzuham. Labi vou li duzu neàdi ame data visoi sivai vou nusu Am dam laba nehame ab faasi vameadamam.
37. “Meit Eba tu vuzehi meedàmu fa damat neha, ‘Feà vab dàt moz,’ lahame gagomda lam abo data koena nimti ulohoda lam meit ame da lam ule neàt vamda lam Alat ozom di ame da lam gi Eba laha ahu ule neàt ab vaham bak. Labi Eba ahu ule neàt vamda lam gi Emota ule neàt vaha vabak. Abo Eba Gagu Oluhuda lam abo Em Ai bake laha ahu ule neàt vaha bak,” lahame ab vameadaham.
38. Lahame labi gagu modeha Yohanesat Yesus bake ab vi gagoham. “Ai Guru oa, iho amu iuba le aaha da meida labe Om ee gagodume mei ahu oli veimaha setan laba gagu futoi itaha bak im aaho. Lahana ame da lam imti vahi Oba vi tau meedam vab dàt labi modehemu iho malesome modeha vaba moho.”
39. Lahame labi gagoha Yesusat fa gago, “Mm, vabà! Meit labihameam uho a malemule. Modem neàte. Neham bak. Eho meia gagu im dedateli fa na damat ihimo modem biem im feàna modemeam làhà ame di labe ame da labe ba kehàm vaba Eba vi feàtàm biem bak.
40. Neham bak. Meit imti ot odosiam vabda lam iba taumda am bak.
41. Um mahate ozobohudele. Meit Eba tu vuzehi Em damaleheda meida iube uba nehi ozo, ‘Uho Eba Alat Gagu Fihasi Vimteme Oluhu Dat Boehàda niba tu vuzehi meedam dam um ame?’ lahame uba faobekesi gi vaota noai lu udemeam làhà Alat ba diamut um Eba tu vuzehi meedam dam niba gohali lomna lodam di ame da laba laha tau lodam bak. Ba loho vaba alia modem vabak,” lahame ab gagoham.
42. Im lada lam vameadume neàdi Yesusat im meida nim neo vi vameada. “Lahana meit Eba tu vuzehi meedamda nim abo damat neha, ‘Gi data koena nimti ulohoda feà vab dàt moz,’ lahame ozomda lam meit am vou fohome faina modi ubahi ubahidume Em mu voohemu ame mei vou fohohoda lam ba diamut Alat bisi feàna beomda am bak. Dat labihalo modemda lam gi nasi nehasu meedam vaba? Dam gagome am si ke feàda bumatna visoi am bio laba vààsu asimbuli itea feàna tombu iuba vou le nobu feà bak iuba nasi nom voou tezi eloi setem vaba? Lam bisi neà bak am bak.
43. Labi laha om ahu labe oba modi om anekehàt om vou fohome faina modi ubahi ubahidume Em mu voolo modemeam làhà om anekehà nasi vaitoi fa nisilele. Bak lam bisi neà bak am taia? Omti Alati vahi vou ali ahu vàmadi amedamalem bake etei bak niba godam di gi anekehà vàmtea vou goda. Labi ba diamut gi nisilehena Alat Aba Aho azim bak laba le tau vahi azim bak lam bisi neà bak am bak. Ba akati modi anekehà ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela? [
44. Ba akati modi om so ahebu koeili fomsoali geàdamna bohu abo vua elum sutem gikina bohu laba voela?]
45. Labi laha om ahu labe oba modi om naot om vou fohome faina modi ubahi ubahidume Em mu voolo modemeam làhà om nao nasi vaitoi fa nisilele. Bak lam bisi neà bak am taia? Omti Alati vahi vou ali ahu vàmadi amedamalem bake etei bak niba godam di gi nao vàmtea vou goda. Labi ba diamut gi nisilehena Alat Aba Aho azim bak laba le tau vahi azim bak lam bisi neà bak am bak. Ba akati modi nao ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela? [
46. Ba akati modi om so ahebu koeili fomsoali geàdamna bohu abo vua elum sutem gikina bohu laba voela?]
47. Labi laha om ahu labe oba modi om fakot om vou fohome faina modi ubahi ubahidume Em mu voolo modemeam làhà om fako nasi valoi voou fa nisilele. Bak lam bisi neà bak am taia? Omti Alati vahi vou ali ahu vàmadi amedamalem bake etei bak niba godam di gi fako vàmtea vou goda. Labi ba diamut gi nisilehena Alat Aba Aho azim bak laba le tau vahi azim bak lam bisi neà bak am bak. Ba akati modi fako ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela?
48. Ba akati modi om so ahebu koeili fomsoali geàdamna bohu abo vua elum sutem gikina bohu laba voela?” lahame Yesusat ab vameadaham.
49. Im lada lam vameadume neàdi Yesusat neo vameada. “Eba tu vuzehi meedam dam lam ahebu, ‘Mahate tu vuzeheo?’ laham bak modi ozolo Alat ahit vuat modi geiam bakti ulohona modi geàdalo modem bak. Ibi iho lab tu vuzehe bak lam, ‘Fà vi teudese,’ lahame labihalo meedam bak. Neham bak.
50. Garam abo na àmna nu laba voou vizehe labe ame na nu lam àm di abo àm neàt. Labiha labe garam lam abo neàt. Lahana ame garam labe ahamo na nua vizemna lam fa vei seti faidemeam làhà ame na fauha keobe lam ba akati iho modi fa garamli na nu laba vizemnalela? Labiham biem bak. Uho Eba tu vuzehem dam laha garam na àmna modi vizem bakti ulohona meedale. Neham bak. Umti vahi esdam dam lamti ot fakiam vaba gi vahi esdam bak laba ozome iademe neà bak bohu meedale,” lahame ab vahokedaham.
1. Labi Yesusat im lada lam vahokedume neàdi Aba vi tau meedam dam lamti iho num debu Kapernaum vou esmozi fa neo, “Yudea bake lase,” lahame Yordan Soabo dumam tot laba biou num debu meidati num debu meidati modealadaha bak laba goda. Labi ame bak laba godam di labe dam duada zi labe neo Yesus bake valada. Abo dihasi valada. Dihasi valada. Labihada. Labihadàmu Yesusat laha Aba Aho amu modi baleàlehe baket neo ame dam zi laba im vi vahokeda. Labihada.
2. Labihadam di labe Farisi damat Yesusat git gagom bak aihizobe vàlulo ahit Aba netàdi duzu vi ailo ab gagoham. “Oho ozom, im Yahudi dam nibe ibi iho tu vuzehi meedam im labet vulam di meit aho amu vaha nam fa mu voom neào? Fa mu voom maleheo? Akatihasu vi vulaela?”
3. Lahahat Yesusat fa ab gagoham. “Dat ahamda Musat aho toedume fi hasi esuhu Im Feàna zi laba, ‘Akatihasu modem neàte,’ lahame toehela?”
4. Lahahat ame Farisi dam labe fa gago, “Im tai ahobada Musat aham di iube neha, ‘Uho meit am nam amu neàt vahana fa mu voolo modemeam làhà amu nasi, “Nam nim debu nehasu meedàmu em mu voolo modem bak,” lahame sunit toeme ahate fi desi vameadume mu voomta neàte.’ Lahame labi toehe bak.”
5. Lahame labi gagoha Yesusat fa ab gagoham. “Um ozom vaba? Um ahebu ahu tamzohobulehe labe meit im vahokem bak aim biem damat modem labe Musat gi ozahit uledi im lam toehe bak. Lahana bisi alimeat Alat datti namti modehe di labe labi gagoho vabak. Alat Vameadaha Im Toedahana laba uho im nidi nim aame ozobohudehe vaba? ‘Ala Na Debu Modeheda labe ahamte na modehe vab di iube dam bakda ahamte alimeat na meedaha di iube dat mode. Nam mode. Lahaha bak.’
7. Labi Aho modi neàdi Aho lab modehe bak lam vi ozome ab gagoham. ‘Làhà etei di nim dat nam vam di am aiti am oiti vou esmozi da nim gi am nam laba akili ihimo ahili so vàmadi ab le azimam bak. Labi lab le azihi bak lam vi ozom di gi nubu ab vàmadeham bak.’ Lahaha bak lam um aame ozobohudehena taia? ‘Ba so behàsuo?’ laham bak lam ba vi ozom vabak.
9. Labihàmu Alat modi vàmadehena uho dam bakda a modi fàsi behàsdemule,” lahame ab mali vameadaham.
10. Labi im lam vameadume neàdi ibi iho esdam num laba fa oli modeha Aba vi tau meedam dam labe Aba neo dat nam mu voom im vi ailo ab gagoham.
11. Vi ailo gagu modeha Yesusat fa ab vi vameadamam. “Meit am nam aho neàt vahana fa mu voou fa nam amomoi vameam làhà ame da labe gi nam aba amu vahada laba faina modehe bak. ‘Nam ehena fa nam amomoi vaho,’ lahame Alat vàlu gagom bak.
12. Labi laha namet am dat aho neàt vahana fa mu voou fa dat amomoi vameam làhà ame nam lam faina modeho. ‘Dat ehena fa dat amomoi vaho,’ lahame Alat vàlu gagom bak,” lahame ab vahokedaham.
13. Ame di labe dam totbaho labe ozo, “Yesusat fà im data niba Am anekehà odosu neha, ‘Ai oa, Oho data niba neà bak modi esule,’ ” lahame tom gagom bake ozome im data Yesus bake ab vou ledamam. Vou ledume modeha Aba vi tau meedam dam labe iho ame bak lam aahemu ab gut mali meedamam. “Um data Yesus bake a vou li vabidamule.”
14. Lahame labi gut mali gagoha Yesusat aime faki daetesu gago, “Ame data lam Eba vou ledam neà bak. Uho a mali gagomule. Neham bak. Damat ibi iho vou mode leme baleàhà bak lam fa veimdi fa data koena zi nibe ibi iho lab vou mode leme baleàhà bak lam abo daleà azi meit iba vahokedam im aidam bak lamti ulohona meedam dam lam Alat deeli vame Am damali vuusu im vahokedam dam am bak.
15. Imbote. Labi Eho etei uba neo gagolo modem im imboda nidi nim laha nasi aima. Meit ibi iho vou mode ledume baleàhà bak lam fa veimdi fa data koena zi nibe ibi iho lab vou mode ledume baleàhà bak lam abo daleà azi meit iba vahokedam im aime meedam bak lamti ulohona meedam vabameam làhà ba Alat ame dam laba modi Am damali vuusu im vahokedume neà bak modi esuiam biem bak.”
16. Lahame labi gagu neàdi ame data zi lam vamateme sivai meida Am anekehàt nom odosu, “Ai oa, Oho data niba neà bak modi esule,” lahame ab tom gagoham. Labi data totbaho laha gi ame baket neo meeda. Labihada.
17. Labi Yesus Aba vi tau meedam damti iho ame num labe futoi ladasome modeha da meida labe, “Yesus bake im gagose,” lahame emoehe labe le Yesus bake gut tàhi, “Yesus Am abo feàte,” lahame ahu adat iedi Yesusam naba modesdam bak laba ogomasu ahit bake biti ab gagoham. “Guru bisi neàda oa, eho ana im meedam labet Alat eba modi Amti vahi gi ahe neàna bohu vuusdàla?”
18. Lahame labi vabi vi ailo gagoha Yesusat fa ab vi gagoham. “Om akati Eba, ‘Bisi neàda oa,’ lahame eba labi gagohela? Bak niba azim dam ahebu bisi neàda kaio. Gi Ala vàmteata bisi neàda am tame.
19. Alat dam bake neha, ‘Nehame meedale. Nehame meedale,’ laham im dat ahamda Musat toedume fi hasi iba esuhu Im Feàna zi lam om ozobohuna taia? Ame im neha: ‘Mei a otemule. Labi nam dat eheda modeo, dat nam eheda modeo, a modemule. Labi mei na a aa vamule. Labi na aaha vabda labe, “Eho nehi aaho,” lahame a ostame giomim vàlu gagodamule. Labi meit vahana, “Eho fa vase,” lahame a teidi vi modeme vamule. Labi um ai bake modeo, um oi bake modeo, ahu adat iedi uba gagoho im laba vuzehi meedale.’ Labihasu toedume fi hasi esuhu im lam om ozobohuna taia?”
20. Lahame labi gagoha da nibe fa gago, “Guru oa, em gi amu bos diat ame im lam faasi vou meedume etei busaolehe bak.”
21. Lahame labi gagoha Yesusat ame da laba aame faobekesi ab gagoham, “Lo. Lahana om im meida vàmtea vekehe bak. Om soa maehe nazoh zi lam ahebu gelevai doit ot loidume neàdi ame doi lam vadume fa faheme dam na vab dama iuba lo. Iuba lo. Lahadale. Oho labi modemeam làhà Alat Aba Aho azihi bak laba oba vahehe nazoh aabo ehete. Labihàmu oho ame doi lam dam na vabdate lodume neàdi fa li Eba tu tau godale.”
22. Lahame labi gagoha ame dat labe Yesusat lab gagoho im lam aiha am soa maehe nazoh zi abo feà dat modemu ahu faidi daleàdi ab laham.
23. Labi ame da lam le seti Yesusat fa Aba vi tau meedam dam laba aasumtedi ab gagoham. “Dam nazoh duada labe iho it ozo, ‘Iho Yesusam im aime vuzehi fa Alam damali Aho iba vuusu im vahokedase,’ lahame it ozodamnàme im nazohti nehi ame bak lam uledi meedam biem meo bak.”
24. Lahame labi gagoha Aba vi tau meedam dam labe ab aime àvodeham. Àvodi meedàmu Yesus im Abada neo vi vameada. “Em dam oa, dam nazoh duada labe iho nehi it ozo, ‘Imo Yesusam im aime vuzehi fa Alam damali Aho iba vuusu im vahokedase,’ lahame it ozodamnàme am nazohti nehi ame bak lam uledi meedam biem meo bak.
25. Im unta fi hobu labe aho sue tademna mo labe am bumat kekehena laba ba dalu lafutom biem bak. Labi dat na duada labe aho nehi ozo, ‘Alat laha eba modi Am Dateli Aho eba Vuusu Im Vahokedase,’ lahame gagu meedam bak lam laha modem biem bak. Lahana ba gagohoda lam bisi modem biemda am bak.”
26. Lahame labi gagu modeha Aba vi tau meedam dam labe aime àvodi modem faidi ab ot gagoi ot gagoidamam. “Aa làhà! Dam na duada labihalahit im dam totbaho ahebu Alat ba iba soat vausu im vei neàdi Amti vahi gi ahe neàna bohu vuusdam biehe taia!”
27. Lahame labi ot gagoidaha Yesusat Aba vi tau meedam dam laba aasdam labe ab gagoham. “Faode. Ame bak lam damat ihimo it modem biem bak. Lahana Ala bisi feàda abo na ahebu modem meo Ala labe ame bak lam modem meo bak.”
28. Lahame labi gagoha Petrusat fa ab vi gagoham. “Imota nehaha bak. Iho Oba vi tau meedam damalelo modemu nazoh ibida ahebu amu gi voedume vausi fa Oba tau vou godam bak.”
29. Lahame labi gagoha Yesusat fa ab vi gagoham. “Lo, oho lab gagoho bak lam imbota imbot. Lahana Eho etei uba neo gagolo modem im imboda nidi nim laha nasi aima. Uho meit neha, ‘Eho Yesus bake vi tau meedalo mozo.’ Labi neo, ‘Eho, “Alat meia soat vausu fa vei neàde tame,” laham Im Neàna lam eho tau vou vameatedalo mozo.’ Labihasu uledi modelo modemu am ai modeo, am oi modeo, am dubu modeo, am vahada modeo, am nà modeo, am lahiti datati modeo, am num modeo, am na utoho modeo, labihasu ahebu voedume esmomeam làhà ame da labe am ahe lahasuhu di nibe Alat fa ame da laba gi ame baleà vouhou na lodam di abo fetehesu duana vi loda tame. Lahana ba neà bakta gi labihasum vabak. Abo aho bak niba esdam diat damat aba vabidamna bohu modesdam bak laha ehe bak. Labi laha ba diamut ame da lam gi elomnàme Alat modi fa Amti vahi gi ahe neàna bohu vuusda tame.
31. Alat ba diamut Aho Eba modi Eho Boehàdateboli dam vuusu im vahokedam di neham bak ehete. Damat etei bak niba esdam di vedi nehi it ozoda. ‘Im ee feàda ame?’ lahame it daetbadam dam lam ba feà damalem vaba gi ee vousi ba duzum dam am bak. Lahana damat nehi it ozoda, ‘Im ee feà vabda ame?’ lahame it daetbadam vab dam lam ba feà damali fa ee vousai nasi duzum dam am bak,” lahame Yesusat ab vahokedaham.
32. Labi Yesusat Aba vi tau meedam damti dam gi vi tauhuda lamti iho kota Yerusalem zoolelo lada. Labi ladam di labe Yesus koena vaitesu nasi duzu lada. Labi dam duada ba vulada. Labihada. Labihadam di labe Aba vi tau meedam dam labe ozo, “Yesus akati modi nasi duzu ladà?” lahame ab àvodi vi ozo laomam. Labi dam giida totbaho labe neo vei iedi vi vulada. Làhàmu zie doni bake Yesusat Aba vi tau meedam dam dua belas lamota gagu fàsi damat Aba kota Yerusalem laba ba modem im neo fet ab vameadamam.
33. “Um nasi iademe aimale. Im etei vahi kota Yerusalem laba zoolelo ladam bak. Labi laba lafusi Em Abo Asum Ahoba Iubet Bak Niba Li Dateleheda nim meit Em vou foho tame. Labi vou fohome damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti laham dam laba ub lu ame dam labe fa Eba uloodume vi aime ozobohudi neàdi, ‘Nasi otele,’ lahame ahu vàmadi gagu esu tame. Labi Em otem bak gagu neàdi fa neo Yahudi damat modem vab dam abo Ala bake tu vuzehem vab dam laba neo ub lu dam labe Em gut ve fu tozoidam labe keha vi dome afoezobe fa vou futoi na sokba nasbe ahit alibulehena labe Eba foadume geàda tame. Gi labihadume ut tetehesuhunaso laba Em nom esu paku dou ote tame. Lahana fa usi behàsdi Em eloho bak labet Alat modi fa ahedi usa tame,” lahame fet ab vameadaham.
35. Labi ba neo Zebedeusam adam Yakobusti Yohanesti le Yesusat avaesdam laba netàdi duzu ab gagoham. “Guru oa, ‘Oho iba nehi modem neào?’ laham bak Oba gagu vi ailo mozo.”
36. Lahahat Yesusat fa ab gagoham. “Eho oba ana im modem bake um ahim Eba lehela?”
37. Lahahat dam ahim labe fa ab vi gagoham. “Vabà! Im gi neham bak Oba gagu vi ailo leha. Ba diamut Alat Oba modi Ohomo Boehàdateboli dam bake deeli vame Om damali vuusu im vahokedam bak faaseo modem di Oho iba gagome fa neo tau boehà damali meida Om ahi tot laba nusu dam bake tau vuusda. Labi meida Om soi tot laba nusu dam bake tau vuusda. Labihadam neào?”
38. Lahame labi gagoha Yesusat fa ame dam ahim laba ab gagoham. “Ne lahana uho etei lab gagoho im lam um it ozom vaba? Na im feàna Eba modi geàdamna etei Eba modi ozolo modem bak ehe bak. Ame bak lam uba laha modi ozolo vouhom neào? Um laha geàdume elom ule?”
39. Lahahat ame dam ahim labe fa gago, “Modem neà bak. Im ahumdi neàdehe bak.” Lahahat Yesusat fa neo vi gago, “Lo, imbo bak. Na feàna eba modi geàdume elom bakti ulohona uba laha modi geàdume elom bak ehe bak.
40. Lahana meia gagu fa Em ahi tot modeo, soi tot modeo, laba tau nusu vahi dam bake vuusu im vahokedam bak lam Ehemo gagu modem biem bak. Lam gi Em Aiat Ahamo fi hasi ahumdi ozome gagodam bak.”
41. Lahame lab ot vameaidam im lam Aba vi tau meedam dam totbaho sepuluh labe vi aime modeha Yakobusti Yohanesti ame dam behàsu laba ab fakeham.
42. Labihàmu Yesusat Aba vi tau meedam dam gagu fa vazisi neàdi im ab vahokedamam. “Um ozobohuna taia? Yahudi damat modem vab dam labe vedi, ‘Im abo feàte,’ lahame iho vuusdam dam laba tet ootedam labe im vahokedam di gi dae meobeat vahokedam meo bak. Labi im ee dam labe iho vuusdam dam laba teubeat vuusdam labe iho gagom im damat meeda. Labihadam meo bak.
43. Lahana um ba a labihadamule. Um fa gi nehame meedale. Uho meidavat nehi it ozo, ‘Alat fa eba modi ee feà datelese,’ lahame it ozome modelo àhàkemeam làhà amu nasi gi amti vahi esdam dam labe im na daleà meedam datelele.
44. Labi laha uho meidavat nehi it ozo, ‘Alat fà eba ee feàda modi talu vousai dam totbaho ee vousi fa eho vafozi bisi feà datelese,’ lahame it ozomda lam amu nasi gi amti vahi bak niba esdam dam zi labe im na daleà ladehebeat teo meedam datelele.
45. Eho gi neham bak ozome uba labi gagoho bak. Em Abo Asum Ahoba Iubet Bak Niba Li Dateleheda nim Eho laha labihaha bak. Eho bak niba lehe di ba nehi it ozom vabak. ‘Em feàda am bak. Dam feà vab dam fa bake nusu Eho gagom im aime meedam damali Eba taum bohu meedale,’ lahame it ozome lehe vabak. Em gi feà vab Dateli dam bake taum bak ozome lehe bak. Abo gi dam bake tau bohu vuusdume damat Em si otem bak. Dam ahebu iho faina meedam bak lam Alat beom bake Ehemo ahit uledi damat Em oteme vasea gohali ot vai fa faamom bake ozome lehe bak. Labihàmu uho Ebe Eho ozome lehe bak lamti ulohona meedale,” lahame Yesusat ab vameadaham.
46. Labi Yesus Aba vi tau meedam damti iho num debu Yeriko laba le ab lafuham. Labi lafusi bak lada lam vou esmozi ladam di labe dam duada zi iba vi tau vulada. Labi ladam di labe dat fako faida Bartimeus abo Timeusam adat lam gi zie obe laba aidam labe gut tauleda.
47. Labihamda labe dam duada zi lebohotedam bak dae aidàmu ab gut gagoham. “Bak nim amat ana im meedàla?” lahame vabi ostame gagoha meit neha, “Ne, Yesus Nazaretda gi ab lebohotelo modemam bak.” Làhàmu dat fako faida nibe ab vi buddamam. “Yesus abo Dat Ahamda Boehàda Daud Vou Faat Lehe Mekehàda oa, Om eba aame faobekesi im neà bak tau modeleee. Alat Gagu Fihasi Vimteme Oluhu Dat Boehàda, ‘Om am tame,’ laham bak em ozobohuteee.”
48. Lahame buddume modeha ame dam nasi dozeadaha dam labe fa gago, “Mm, a gagomule,” lahame mali modeha ame da nibe ailahigeàmu fa bisteat neo ab vi buddamam. “Dat Ahamda Boehàda Daud Vou Faat Lehe Mekehàda oa, Om eba aame faobekesi im neà bak tau modeleee.”
49. Lahame bisteat neo vi buddameilahit Yesus gi laba ab duzuham. Duzu gago, “Le gagome vou lele.” Lahame labi gagohemu dam labe fa le ame da laba gago, “A ahu faidemule. Nasi usai duzule. Yesus oba, ‘Lele,’ lahaho.”
50. Lahame labi gagohemu Bartimeus am sue sona ahoba dusuhuda vihitoi voou àvodehat usai Yesus bake ab vulaham.
51. Vule duzu modeha Yesus ab gut gagoham. “Eho oba akati modemna oho Eba buddàla?” Lahame gagoha ame da labe fa gago, “Kaio. Ai Guru oa, em gi fako na aam biehemu àvodi na aalo àhàki Oho eba ulasi modi fa neàdem bak ozome Oba vi buddalo.”
52. Làhàmu Yesusat fa ab vi gagoham. “Oho neha, ‘Yesusat eba modi fa neàdem bak,’ laham bak lam oho nasi fet Eba tu vuzehe labe om fako faidehe bak lam Eho modi fa na aam ab neàdeham bak. Om nasi fa lale,” lahame gi etei labi gagoha Bartimeusam fako fa na aam bak ab neàdeham. Labihàmu ame da labe fa zie doni laba Yesus bake gut tau ab vi vuladamam.
1. Labi Yesus Aba vi tau meedam dam lamti iho neo tom ladume kota Yerusalem laba fuseo vabali Zaitun Dee Dozeadaha Bak Buzoho labe modesuhu num debu behàsu Betfageti Betaniati lahaha doni laba tom le odo. Le odosi Aba vi tau meedam dam meida behàsu gagu ab olulo meedamam.
2. Labi gagu olulo modem di labe Aho nehame vi vameada. “Um ahim nim num debu iba netàdeheda laba lafusi aameam keledai fi ho adat gàhàda lo vààsdam bak aa tame. Ame keledai lam amu damat nusu gohatehe vaba alimda modem bak. Keledai lam lo vuhatoi vuusu vou lele.
3. Lo vuhatolo modem di meit uba nehi gagomeam, ‘Im keledai uho ana modelo lo vuhatolo modela?’ labihameam làhà uho fa nehi gagole. ‘Boehàda Aba Aho ozoho baket modelo modemu gi teohet vou le fa vou lelo mozo,’ lahame uho da laba labi gagole,” lahame ab vameadume oluham.
4. Labi le aahat Yesusat lab gagu oluhu bak lam ab imbodeham. Ame keledai fi ho adat gàhàda lam gi num doo futom zie obe lo vààsdam bak ab aaham. Aahemu Yesusat vi gagu oluhu baket ab le lo vuhatosome modeha damat ab gagoham. “Aa! Im keledai uho ana modelo lo vuhatolo modela?”
6. Lahame labi gagoha dam behàsu nibe fa ab gagoham. “Mm, vabà! Boehàda Aba Aho ozoho baket modelo modemu gi teohet vou le fa vou lelo mozo,” lahame labihasu gagohemu ame dam labe uledi ab lu oluham.
7. Labi fa Yesus bake vou li ibi iho sue sona ahoba dusuhuda vihilame ame keledai adat gàhàda labe am toha laba ab nom gutaudaham. Labi gutaudume neàdi Yesusat zisi nusu ab ladamam.
8. Labi ame dam dua totbaho labe im sue sona ahoba dusuhuda lam laha vihilame ame keledai Yesus vou lam zie laba vou olualada. Labi dam totbaho labe laha bom dee bake le bom alahaso fi kbodume ame zie laba vou olualada. Labihada. Damat ozo, “Yesus abo boehàda feàda am tame,” lahame ahu adat iedi labihada.
9. Labihadume Yesus lab vou ladam di lam dam dua zoho nasi dozeadume lada. Labi dam zoho ba ohuse vi dozeame mitaeda. Labihadam dam labe iho im nehasu buteme vou bae lada: “Hosana! Ala abo feàteee. Dat abo Alat Aho Gagu Olu Ot Vai Im Dedateli iba etei ledamda nim abo feàteee!”
10. “Im tai ahobada Boehàda Daud labe aho amu meedaha bak lamti ulohona aho vou faat lehe mekehàda nibe neo etei iba vuusu im vahokedalo modemda nim abo feàteee! Hosana! Imo dam ahebu ee bisi vousai feà datebolehe Ala laba, ‘Am abo feàte,’ lahame vou baedaseee!” Lahame meit buteme vou bae lada. Labi neo meit buteme vou bae lada. Labihada.
11. Gi labihasu vou bae ladume kota Yerusalem laba ab vou fuham. Labi laba lafusi ame Fihasi Ala Bake Vou Baedam Num Vàmteabu labe am ad oli aam bak tomba le duzu nabidam labe aaha disi aibulelo modemu Am dua belasti fa futoi Betania laba ab laham.
12. Labi Betania laba le izi dihambe neo Aba vi tau meedam damti vahi Betania vou esmozi fa kota Yerusalem laba ab ladamam. Ladam di labe Yesusat idoali meeda.
13. Làhàmu Yesusat gi bak bohulat aaha ut ara abo mekehà faasi etali neàdehena zie obe laba doudam bak ab aaham. Aahemu oo sitoi àm bak ozome le netàdi nabitedaha oo aam kai. Gi et but neàdi modesda. Oo valem di fuhu vabak.
14. Làhàmu ab uloodamam. “Seee. Ut nim ba oo a valemule. Gi maileleee,” lahame ab uloome esuham. Labi Aho lab uloome esuhu bak lam Aba vi tau meedam dam labe ab vi aime esuham.
15. Labi neo ladume Yesus kota Yerusalem laba lafusi Fihasi Ala Bake Vou Baedam Num Vàmteabu labe am ad oli aam bak tomba laba le duzu aaha damat Ala bake vou baedalo na Ala bake lomna ot loidam bak aahemu meoli dam na ot loidam dam zi lamti na vadam dam lamti meoleme ootedume futoda. Labi doi meit iube vou leheda abo na vam biem doi vame fa ame Num Vàmteabu laba na ba vam neà doi lam ot loiam dam iho doi vahedam beahuba lam vuu vaktemoda. Labi laha damat meki fi ho ot loiam di nusumna lam laha vuu vaktemoda. Labihasu ab veimodamam.
16. Gi im lada lamota meedam vabak. Fa neo ame na lam vame fa ame Fihasi Ala Bake Vou Baedam Num Vàmteabu labe am ad oli aam bak tomba olem doo laba vou olem bak laha ab maleham bak.
17. Labi Yesusat dam duada laba vahokedam labe meoli neha, “Meit Alat Vameadaha Im Toedahana laba im meida nim um aam vaba? ‘Alat neha, “Em num nim gi dam debu mei dam debu mei labihasu ahebu Eba tom gagodam numat modem bak.” ’ Lahame toehena um akati aalahigeàmu meit na aa ve voutame fi olehe bak ozome vou oli vasti esdam bakti ulohona modi Em num feàda niba oli im mei faasi meedàla?” lahame faki meoli meedam labe ame beahuba zi lam veimome afoezobe dam soa neo odosu veimome dam ab ilidamam.
18. Labi ame di labe damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti iho Yesusat etei lab gagoho bak lam aihemu faki, “Imo Yesus otese,” lahame ozom bak faasi im aa ab odoadamam. Dam dua bak fa Yesusat vahokedaha im laba àvodi fa ibi iho vahokedaha im mu voou fa Yesus bake tum bak labna zohàme iedi vou faovoi, “Yesus otese,” lahame vi ozoda.
19. Yesus Aba vi tau meedam damti disi aibulehemu aibut am damti kota Yerusalem vou esmozi ibi iho esum bak laba fa ab laham.
20. Labi izi dihasi dihambe Yesus Aba vi tau meedam dam lamti iho usai neo kota Yerusalem laba fa ladameam labe aaha ut ara Yesusat màt ulooho ut lam alai bozili seti modesdam bak ab aaham.
21. Làhàmu Petrusat vi ozobohudi Yesus bake ab gagoham. “Ai Guru oa, nasi aama. Oho màt ulooho ut araso lam gi ab alai bozili doudamam bak.”
22. Lahame labi gagoha Yesusat fa ab gagoham. “Nasi Ala bake tu vuzehele. Uho Ala bake gagom im lam Alat uledi modem bak.
23. Imbote. Ala bake mahate tu vuzehele. Labi Eho etei uba neo gagolo modem im imboda nidi nim laha nasi aima. Um ahu behàsdi vi ozodam vaba abo ahu vàmadi nehi gagomeam, ‘Bak buzoho nim itezeavai itea feàna laba nom ilu fi oli setele,’ lahame ahu vàmadi tu vuzehi gagom di uho lab gagoho bak lam ame baket modem bak.
24. Labihàmu Eho uba nehi gagolo modem bak. Ubu uho valo Ala bake tom gagodamna lam uho nehi fet ozo, ‘Ame na lam Alat iba lom bak,’ lahame ahu vàmadi tu vuzehemeam làhà ame na lam uho vam bak.
25. Labi uho laha duzu Ala bake tom gagolo modem di meit uba git modehemu uho fakemda ehelemeam làhà nasi ame da laba ozahigeàmu vei neàdi ba tom gagodale. Ubu uho faina meedam bak lam um Ai Ala asum ahoba iube Aho gi vei mu fa faamome vei neàdem bake labihadale. [
26. Lahana meit uba fai bak modeheda lam uho fa ozahigeàmu fa vei neàdem vabameam làhà um Ai Ala asum ahoba iube ba ubu uho faina meedam bak lam laha ba gi vei mu fa faamome vei neàdem vabak,”] lahame Yesusat ab vahokedaham.
27. Labi vahokedume neàdi Yesus Aba vi tau meedam damti iho neo ladume kota Yerusalem laba lafusi Yesus ame Fihasi Ala Bake Vou Baedam Num Vàmteabu labe am ad oli aam bak tomba laba le godam di labe Yahudi damat ibi iho tu vuzehi meedam im vuusdam tohe dam zi labe Yesus bake li netàdi daet beàdalo vabi vi ailo ab gagoham.
28. “Ne, Oba amat modi vizi teudi im feàna lam Oho duzu meedàla? Oho nib li meedam im nim Oba amat gagu im dedateli Oho vuusu meedàla?”
29. Lahame labi gagu modeha Yesusat fa gago, “Im ubuda faode. Ebe Eho etei uba fi bovai vi ailo gagomda nim uba nasi vi gagu aise. Ne, Yohanes Mei Vuu Valo Baptisleiamda labe aba aho amu mei vuu valo baptisleiam bak lam amat Yohanes bake gagu aho ame bak lam meedahela? Alat aba gagu aho ame bak lam meedaheo? Laham vabameam damat aba gagu aho ame bak lam meedaheo? Akatihahela? Uho ame bak lam Eba fa gagomta uho etei Eba lab gagu vi ailo modem bak lam Eho fa uba vi gago tame.”
31. Lahame labi gagu vou faoha ame Yahudi ee dam zi labe gi ihimo ot gagoida. “Uho ozom, iho akatihasu fa Yesus bake gagoe? Iho nehameam, ‘Alat Yohanes gagu olu meedaha bak,’ lahame labi gagomeam làhà Yesusat fa iba nehame vàlu gagom bak. ‘Ne, um lahana akati Yohanes am im aime tu vuzehem vaba moudume mohela?’ lahame iba labi fa gagom bak.
32. Laham vaba iho neo nehi gagomeam, ‘Damat gagu oluha,’ lahame labi gagomeam dam etei iba tau dozeadaha dam totbaho zi nibe iba beom bak. Neham bak. Dam etei iba tau dozeadaha dam totbaho zi nim, ‘Yohanes ba damat gagu olu meedaha vabak. Am gi Alat vameadaha im aime fa dam bake ahate vameaidahada meida am am bak,’ laham bak ozobohu labe iho fa im mei gagomeam làhà dam iba faki beom bak.”
33. Lahame ame dam busaoda zi labe ihimo vou faovoi iedi fa vei biehenali Yesus bake fa ab vi gagoham. “Yohanes aho amu lab meedaha bak lam, ‘Amat aba gagu olu meedàla?’ laham bak lam im bieho.” Lahahat Yesusat fa dam laba ab gagoham. “Lo, làhà Eho li meedam im zi nim, ‘Amat Eba gagu olu Eho im dedateli meedàla?’ laham bak lam Em laha ba uba gagom vabak,” lahame ab vasteham.
1. Labi Yesus im lada lam gagu neàdi Aho ame Yahudi dam eeda zi laba im meida nim neo nehame vi vahokeda. “Eho etei uba totobet fi koadalo modem im nim uho mahate aime vi ozodale. Dat utoho deda nibe am tat vueheba laba am na meedam dam gagome anggur neb zi deddume neàdi esu. Labi neo am na meedam dam laba neha, ‘Um laha em anggur dee nim ke vou vahe lame fi bovai esule. Labi afoezobe ame anggur oo amdehezobe vaheme meit duzu uname vaksa futom bake ozome ke baana nabime ve fa ahit feme bumatali esule. Labi neo damat em anggur dee aa li modem bake azi nom vou aasdam num kilana laha mome duzule,’ lahame gagu olu ame baket ab modeham. Labi modeme neàdi anggur deda labe bak mei bake lalo modemu dam na debe soali modeme vahem dam zoho laba gago, ‘Uho em anggur dee nim teohet vou aasdume amdehezobe modeme vahedam di zoho uho va. Zoho eba naedate vahedume esu. Labihadale,’ lahame it gagu esmozi bak bohu bake ab laham.
2. Labi le aidamehamdi ozoha, am anggur oo vaedume amdem bak fuhemu fa am na meedamda meida laba gagu ab oluham. ‘Em anggur dee teohet vou aasdam dam labe iho ot loiame vaha doi ebe eho vam zoho eba esuhuda lam le vame fa vou lele,’ lahame gagu ab oluham.
3. Labi le gagoha ame anggur dee teohet vou aasdam dam labe ame da lam lehemu gut si foadume saemea fa ab oluham.
4. Labi anggur deda labe gut aaha dat gi saemea fa lehemu am na meedamda meida laba neo gagu fa ab oluham. Labi olu lafusi modeha ame anggur dee teohet vou aasdam dam labe neo gi ohula gut fu game ladi ab oluham.
5. Labihàmu ame anggur deda labe neo gut aaha neo dat gi saemea fa lehemu dat meida laba neo ab gagu oluham. Olu fusi modehat ab gut oteham. Gi ame baket neo modidam labe ame anggur dee vou aasdam dam labe neo dam zoho gut odda. Labi dam zoho gi foadume fa saemea ouda. Gi labihada.
6. Gi labihadume modeha am adat abo aho bisi deeleheda lamota ab vekeham. Làhàmu ab ozoham. ‘Ne, em akati mode? Làhà gi em adat nim neo gagu oluse. Eho labihameam dam labe fa em adat bake vei ladi ahu adat iedi fa eba doi lu olum zoaha bak,’ lahame vi ozome neàdi am adat ab gagu oluham.
7. Olu ladume lafuseo vabalehe di labe ame anggur dee teohet vou aasdam dam labe gi bak bohulana gut aaha anggur deda labe am adat ledam bak aahemu neha, ‘Da nim ba am aiam na misia vamda am taia? Imo da nim oteme afoezobe anggur dee nim fa im na misialese,’ lahame im aa ab odoadaham.
8. Labi im aa odoadume neàdi ame da fuhuzobe neo gut si oteme am koeiso vou kea lame anggur dee natàh ke labe vou futoi bako iuba ab vooham.”
9. Lahame Yesus ame im totobe lam fi koadume neàdi neo ame Yahudi dam busaoda zi laba vi ailo ab gagoham. “Uho ozom, ame anggur deda labe fa li am anggur dee teohet vou aasdam dam laba li akati modela? Gi neha taia? Dat naeda fa li ame anggur dee teohet vou aasdam dam laba oddam bak. Labi oddume am anggur dee lam fa dam amomoi gagome fa vou aasdam bak.
10. Imbo bak. Eho etei uba lab gagoho bak lam abo imbote. Lahana meit Alat Vameadaha Im Toedahana laba im meida nehi toehena nim um aame vi ozobohudehe vaba? ‘Dam num moadam dam labe, “Faite,” lahame mu vooho ke lam fa feà Dateli bisi num mome teudem ke am bak.
11. Ame bak lam Boehàda Alat Ahamo ozome modehe bak. Labi Aho lab modehe bak lam iho aam di damat ihimo modem biem im feàna modehena aaha bak.’ Lahame toeme esuhu im lam um vi aame ozobohudehe vaba? Ame im lam etei ab imbodi uho Eba ab moudamam bak.”
12. Lahame labi vameadume modeha ame Yahudi dam eeda zi labe iho Yesusat etei lab totobet fi koadaha im lam aihemu ab ozoham. “Oo, Yesusat etei lab vameadaha im lam gi iba vàlu vameada taia? Aho li vahokedaha im lam iho aim mu vooho bak laba ozome ame anggur dee teohet vou aasdam dam laba gi vàlu im totobet fi koadaha taia? Imo Yesus sise,” lahame ahu gukeme modem faidi seti vi ozodaha, dam duada totbaho Yesus bake tuhuda feà labe iedi Am sim bili Yesus vou esmozi fa ab laham.
13. Labi ame Yahudi dam eeda zi labe fa le vou faobe neo im aa odoadume neàdi dam iba taumda ab gagu ledaham. Neha: Farisi dam totbaho ame. Labi Galilea bak laba azim dam laba vuusdam Boehàda Herodes Antipas bake taumda zi ame. Labihasu gagome ledahazobe im nehasu vameame Yesus bake ab oluham. “Uho Yesus bake ahit fi bovai im mei im meime gagu vi aimeam Yesusat git gagoho bak aihizobe sile,” lahame vameadume neàdi Yesus bake ab oluham.
14. Labi le Yesus bake ab gagoham. “Guru oa, Oho lab meedam bak lam im ahebu ozobohu bak. Om abo im vamdesu meedamda Om am bak. Labi Alat ozo, ‘Dam bakda nehasu meedase,’ lahame Aba Aho ozoho im lam Oho dam bake im vahokedam di Om laha gi im vamdesu imbona vahokedam bak. Om ba neham bak modem vabak. ‘Da lam ee feàda Eba im gagohe? Làhà Em aime tuse.’ Laham vab di, ‘Da lam ee vabda Eba im gagohe? Làhà Em aime tum bak mose,’ lahame ba dam fahedam vabak. Labiham labe damat Oba ozomsu gagom di Om ba ame im lam aime iedi vuzehem vabak. Om labiham dàt modemu iho nehi Oba gagu vi ailo modem bak. Im Yahudi dam ihimo dat ahamda Musat toedume fi hasi esuhu Im Feàna zi lam iho tu vuzehi meedam labe Oho ozom, pemerintah iba vuusu meedam bak gohali lodam doi pajak lam iho ame doi lam fa Kaisarleheda laba lodam neào? Ame Im Feàna zi labet iba maleheo? Akatihà?” Lahame labi gagoha Yesusat ame dam labe Aba vàlulo ahit keobaedume fi bovai vi ailo modem bak lam Ahamo ozobohudi fa ab gagoham. “Um gi ahobat neàdi Eba li vameadam damat modem bak. Uho akati, ‘Eho git gagose,’ lahame ahit Eba li gagu vi ailo meedà? Uho ame pajak abo gi vi tau lodam doi oona perakat modehena lam Eba fi male.”
16. Làhàmu ame dam labe le ame doi oona visoi fa vou li Yesus bake ab loham. Labi Aho ve vousai dam bake fi si vimtedam labe ab vi gagoham. “Ame doi nim amam dauhati ulohona modesuhela? Labi amam ee laba toehela?” Lahahat dam labe neha, “Dam ahebu vuusdam Kaisarleheda labe am dauhati am eeti modesuhu bak.”
17. Lahame labi gagoha Yesusat fa neo vi gago, “Làhà uho dam ahebu vuusdam Kaisarleheda laba na abada lam fa naedate loda. Labi uho laha Alat Aba Aho gagohoda lam laha meeda. Labihadale.” Lahame labi gagohemu ame dam labe Yesus git gagom bak aiesome ame im lam gagoha Yesusat git gagom vabamu ab àvodeham.
18. Labi ame digat zoho labe Saduki dam labe laha neo Yesus bake gagu vi ailo ab li dozeadaham. Ame Saduki dam labe iho ozome tuhu im gi neha, “Mei elom di ba fat ahedi usam kaio,” lahame tu ozodam dam am bak. Laham dam labe Yesus bake li vi ailo ab gagoham.
19. “Guru oa, dat ahamda Musat aho toedume fi hasi iba esuhu Im Feàna zi lam im meida nehi toeme fi hasi esuhu bak. ‘Meit am itbaho fatoho vaba elomeam làhà fa ame nam maboe lam am dam zohot fa ve data faasi, “Ame koei labe am data am tame,” laham bak ozome debu bohulalelo ame maboe lam koei labe am vahadat modeo, am dubut modeo, fa vale,’ lahame Musat aham di iube labi toeme fi hasi iba esuhu bak.
20. Ne lahana iho etei vouholo modem im nim Oho nasi aimale. Amu di iube ame dam abo tujuh ehet. Datahida ame. Labi donida lima ame. Labi domuàda ame. Labihasu ame dam tujuh labe dat datahida nam ab vaham. Labi ve modeha ame nam lam data faaha vabna dat ab eloham.
21. Labi ame maboe lam ame koei laba vi tusuhu dàt fa neo ab vaham. Labi ve modeha ame maboe lam data faaha vabna dat neo ab eloham. Labi ame maboe lam dat doni dàt fa neo ab vaham. Labi ve modeha ame maboe lam data faaha vabna neo dat ab eloham.
22. Gi labihasu vou mode ledume dat domuàdate ab vou fuham. Labi vou fusi modeha gi neo ame baket modi ame maboe lam data faaha vabna dat ab eloham. Labiha ladume ame dam tujuh ahebu ab foli seteham. Labi ame maboe lam ba neo ab vi eloham.”
23. Lahame ame Saduki dam labe iho ame im lam vouhome neàdi, “Im elom di ba ahedi usào?” laham bak lam tozolo Yesus bake neo vi ailo ab gagoham. “Làhà Oho lab gagoho bak lam, ‘Mei elom di fat ahedi usam bak,’ lahame Oho lab tu ozome gagoho im lam imbodemeam làhà ba diamut dam ahebu elodaha dam fat ahededume usnadam di lam ame dam tujuh labe ototo vaidume ba vi eloho nam lam Oho ozom, amam namet mode?”
24. Lahahat Yesusat fa ab gagoham. “Vabà! Um git ozome gagoho bak. Alat Vameadaha Im Toedahana lam uho mahate aame vi ozome ozobohudehe vab damat modem bak. Labi Ala laha im feàna modem Alat modem labe dam elohonàme Aho modi fa neàdem meo bak um laha vabiem damat modem bak.
25. Ba diamut dam elodaha bak labet Alat modi fa ahededume usnadam di lam dam ba lahi vam vabak. Labi laha lahi ba dam vam vabak. Gi Alat Am im gagu vou usem dam labe iho asum ahoba iuba azim di gi soaona esdam bakti uloho bak.
26. Ne lahana uho neha, ‘Dam elodaha dam labe im elodaha bak labet Alat modi fa ahededume usnadam vabak,’ lahame uho lab gagoho bak lam git ozome gagoho bak. Eho ozoha, uho Musat aham di iube toedume esuhu im lam vi aame ozodam vab damat modem bak. Aham di iube ut aabadehena buà lam vuat eludam bak Musat vi aadàmu aasuhat vua elum bak lam taho faali setem vabamu Musat le netàdi ab aasdamam. Labi aasdume modeha Alat am dae vua labe futoi Musa bake nehame vameadaha bak. ‘Em abo Abrahamti Isakti Yakubti labihasu Eho vuusuhu labe ame dam labe Eba vi ozome vou baedam Ala Em am bak.’ Lahame vameadahana toeme esuhu im lam uho mahate vi ozodam vab damat modem bak. Alat aham di iube lab gagoho bak lam ame dam làtela lam gi elodahanàme fat ahedi Aba vou baedam lahasuhu bak lam Aho vameadaha bak.
27. Labiham labe Eho vi ozom, dam elodahada zi labe ba Ala bake vou baedam vab taia? Gi dam ahe damat ihimo Ala bake vou baeda taia? Um abo git ozoho damat modem bak,” lahame ab vameadaham.
28. Labi Yesusti ame Saduki dam lamti daet ot beidam di lam dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru meida vàmtea labe aho ba vuli tau duzu aiha Yesusat gi im neàt fa vameadàmu aho neo aba aho ozohoda lam fa Yesus bake vi ailo ab gagoham. “Guru oa, Oho ozom, Alat neha, ‘Meedale,’ lahame gagu esuhu im zi lam bisi im tombuda iho modemda akete? Oho nasi gagomale.”
29. Lahahat Yesusat fa gago, “Eho ozoha, Alat Vameadaha Im Toedahana zi labe im bisi tombuda gi nehaha bak. ‘Israel dam oa, Boehàda iba vuusdamda iho vou baedam Ala lam gi vàmtea bak. Ba amomoi kaio.
30. Labihàmu im dam ahebu meit am ahu vàmadi Ala bake deeli gi labaha bohu vuusda. Labi meit laha gi ame baket mode. Labihadale.’ Lahame Musat laba toehe im lada lam bisi tombuda am bak.
31. Labi im meida nehi toehe bak. ‘Uho meit aba it deeli vou faovoi vabiedam bak lamti ulohona vi ozome fa meia laha deeli vou faovoi vabiedale.’ Ba ame Musat aho toedume fi hasi esuhu Im Feàna zi abo damat vou vamea usehena lam iho vi ozom di ba modi tombulemda amomoi vabak. Gi ame im behàsu am bak.”
32. Lahame labi gagoha ame guru labe fa neo vi gago, “Lo, Om abo neà gagoho. Oho neha, ‘Iba vuusdamda iho vou baedam Ala lam gi vàmtea bak. Ba amomoi kaio,’ lahame Oho etei lab gagoho bak lam imbote.
33. Labi Oho neha, ‘Im dam ahebu gi ahu vàmadi Ala bake deeli gi labaha bohu vuusdale,’ lahaha bak lamti labi, ‘Iho naedamat it deeli vou faovoi vabiedam bak lamti ulohona vi ozome fa dam amomoi bake laha ame baket meedale,’ lahaha bak lamti bisi iho vi ozome vuusu tombulemda am bak. Lahana, ‘Iho Ala bake vi ozome na fi ho vua vahudamda modeo, na amomoi Ala bake vi ozome lomda modeo, labihasu meedale,’ lahame vamea usehe im lada lam bisi tombuda modem vabak.”
34. Lahame labi gagoha Yesusat aime vi ozo, “Làhà da lam abo im ozobohudi gagohe?” lahame vi ozobohudi ame da laba fa ab vi gagoham. “Alat dam bake deeli vame Am damali vuusu im vahokedam bak lam abo gàhà bak lam om ozobohudi ab fi gatelo vabaleham bak. Eho ozoha, om kehàm vaba Eba tu vuzehi ab Alam damalelo modemam bak.” Yesusat gi neà bak labihasu gagodàmu Yahudi dam eeda zi labe iho git neo vi gagomeam iba neo modi ladem bak labna zohàme ame digat labe faasi im dam meidavat ba Yesus bake im vi gagu aim bak ab moham.
35. Labi ame Fihasi Ala Bake Vou Baedam Num Vàmteabu labe am ad oli aam bak tomba laba Yesusat dam bake vahokedam lahasuhu di labe Am gi ozobohunàme neo ahit dam bake vi ailo ab gagoham. “Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi labe iho akati modi ame Alat Gagu Fihasi Vimteme Oluhu Dat Boehàda laba im nehasu gagodàla? ‘Am abo boehàda Israel dam bake vuusdam dat ahamda amu gi eloi seteheda abo Daud labe am mekehàdat modem bak,’ lahame labi gagodàla?
36. Ne, aham di iube Alam Aha Nutabe Neàna labe Aho Daud bake modi vizi teudi Daud ahamo nehi gagohona taia? Aho neha: ‘Na Debu Modehe Ala labe Aho fa eba vuusdam Boehàda laba gago, “Om Em ahi totbaho niba nusu Eba tau im dedateli dam vuusu im vahokedase. Labi Eho dam Oba fakemoholehe dam zi lam Eho ahit modi bedi fà Oba iedi uledi im Oboda fà aime meedase.” ’ Lahame Daud aham di iube labi toeme esuhu bak.
37. Daud ahamo Alat Ba Gagu Fihasi Vimteme Olulo Modemda Boehàda laba neha, ‘Eba vuusdam Boehàda,’ lahame labi gagodàmu ba akati meit Alat Gagu Fihasi Vimteme Oluhu Dat Boehàda laba neha, ‘Boehàda Daum mekehàda modem bak,’ lahame labi gagodàla? Labihameam làhà Alat Gagu Fihasi Vimteme Oluhu Dat Boehàda lam fa Boehàda Daud vafozi bisi feà Dateleheda Am taia?” Lahame Yesusat labihasu vameadàmu ame dam duada zi labe iho gi deelehat ab vi aidamam.
38. Yesusat dam duada zi laba neo nehame vi vameada. “Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi labe ibi iho meedam bak uba vizemo. Labiham bake um abo iademe it vou faovoi meedale. Ame guru zi labe ibi iho meedam bak gi nehadam bak. ‘Dam totbaho iba fà gut baedase,’ laham bak ozome sue sona ahoba dusumda bohuna duadume damat im vameadam bak tomba laba le it aai it aaidam labe deeli goom bak ame. Labi iho neo dam duana zi dokbuedam bak laba le damat fà, ‘Neàte,’ lahame iba gut gagom bake deeli meedam bak ame.
39. Labi neo im Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di vedi dam feàda ihimo nusum bak laba deeli nusualadam meo bak ame. Labi laha na zi vaheme àlo modem di vedi dam feàda ihimo nusu na àm bak laba bisi netàdi vi tau nusu na àdam meo bak ame.
40. Labi maboe zi laba ahit neha, ‘Im om vou aasdalo mozo,’ laham dam labet vedi ahi vageme netàdi maboe nazoh fetehesu vi vadume dualem bak ame. Labi laha Ala bake tom gagodam di iho lab faina modehe bak lam vedi ahit vasti ihimo neà damali gi Ala bake la gagoi le gagoidam labe bohulaledam bak ame. Aiee! Ame dam labe labihasu meedam damat modem labe Alat ba diamut, ‘Fa duana modi geàdase,’ lahame na asimbuna feà ame dam laba meeda tame,” lahame Yesusat ab vameadaham.
41. Labi Yesusat im lada lam vameadume neàdi Aho ame Fihasi Ala Bake Vou Baedam Num Vàmteabu labe am ad oli aam bak tomba abo damat Ala bake lodamna vahedamnabu modesuhu bak laba netàdi nusu dam duada labe iho Ala bake doi duadam bak laba vi aasda. Vi aasdameam aaha dam na duada labe iho doi duana duadam bak ab aaham.
42. Labi neo gut aaha na vab nam maboe labe neo li aba aho Ala bake lolo modemna abo doi oona koena behàsu tembagat modehena ab vou li tau dusuham. Ame doi lam ozom di na vam biemna ozomomnat modem bak.
43. Yesusat ame bak lam aahemu Aba vi tau meedam dam laba, “Aba netàdi li dozeadale,” lahame gagu ab li dozeadaham. Li dozeadume neàdi ab gagoham. “Eho etei uba gagolo modem im imboda nidi nim nasi aima. Na vab nam maboe labe aba aho etei Ala bake loho doi lamti dam duada labe ibi iho Ala bake lodaha doi lamti labihasu ozom di bisi na duana Ala bake lohona ozomomda gi maboe abada am bak. Neham bak.
44. Ame nazoh dua dam labe vedi doi dua totbaho iho naedamat vada. Labi gi totbaho Ala bake loda. Lahana ame nam maboena nim labiham kai. Ame maboe lam na vab nam modemnàme abada gi ahebu loho bak. Aba aho modi ahedelo modem bak gi ab lu seteham bak,” lahame ab vameadaham.
1. Labi Yesusat ame Fihasi Ala Bake Vou Baedam Num Vàmteabu labe am ad oli aam bak tomba lam vou esmozi futoi lalo modem di labe Aba vi tau meedam dam meida vàmtea labe aho it aame Yesus bake ab gagoham. “Guru oa, ame Num Vàmteabu nim kebu feàna susume moadaha na feà nim Om aadào?”
2. Lahame labi gagoha Yesusat fa ab vi gagoham. “Uho etei lab aadamna zi lam bisi labaha bohu modesdam vabak. Ame ke mei ahoba vou vahe zihina zi lam ba fa faamome gi alimdi seddam bak,” lahame ab gagoham.
3. Labi neo ladume kota Yerusalem lam vou esmozi bàhàgo obe labet le Zaitun Dee Dozeadaha Bak Buzoho laba ab laiteham. Ame bak lam ame Fihasi Ala Bake Vou Baedam Num Vàmteabu labe doudam bak dum aam neà bak laba laisi odosi esdam di lam Petrusti Yakobusti Yohanesti Andreasti labihasu ihimo Yesus bake li aa vi ailo ab gagoham. “Guru oa, Oho etei lab vi ozome gagoho im lam adi diat modemna gagohela? Labi ame bak lam modelo modem diat amu ana nasi iba fet vouhoho bak iho aame ozo, ‘Ame bak lam ab modelo modem ame?’ lahame iho ana aame ozobohudela?”
5. Lahahat Yesusat fa ab gagoham. “Iho bak niba esu meedam im zi ahebu ba novai vaitolo modem digat fuseo modem di lam amu im nehamda nasi meeda tame. Amu dam duada totbaho labe uba nasi li neha, ‘Em abo Alat Gagu Fihasi Vimteme Oluhu Dat Boehàda am tame,’ lahame uba li ahit vageme keobaedam labe damat vabi imbo tibame dam dua zoho vi ozome tu vuzeheda tame. Labiham bake uho iademe vou faovoi esdam labe vou faodale.
7. Labi laha ame ba novai vaitolo modem digat fuseo modem di lam damat uba nasi li im nehasu vameada tame. ‘Dam bak kia bak ium ot fakiame ot belui ot beluidalo.’ Labi, ‘Dam bak netà bak niba ot fakiame ot belui ot beluidalo.’ Labihasu uba nasi li vameadam bak ehete. Lahana uho labihasuhuna aim di um ahu a bisi iedi vi ozodamule. Ame ba novai vaitom digat lam di labe taho fum vabak.
8. Labi ame di labe im nehasu laha meeda tame. Dam debu fa vàmadiaha bak lamti dam debu fa vàmadiaha bak lamti ot fakiame ot belui ot beluidam bak ame. Labi bak amomoi vuusdam boehàda am damti bak amomoi vuusdam boehàda am damti labihasu ot fakiame ot belui ot beluidam bak ame. Labi bak iuba modeo, bak iuba modeo, di neà faasi bak aotbali na debe soali àm vabili idoali ibzidume dam elodam bak ame. Labi bak iuba modeo, bak iuba modeo, balim feàna nigome dam beodume foedam bak ame. Labihasu ahamte faasi meedam im zi am bak. Abo lahit data faaseo modem di labe ahamte vi ozome vàzbudam bak lamti uloho bak. Lahana a bisi iedi vi ozodamule. Eho etei lab vameadaha im lam nasi meedamta meeda. Lahana dam bakda zi ahebu foli seddam digat lam di labe taho fum kaio. Ame bak lam vou meedamehamdi ba vou fuse tame.
9. Labi laha uho mei bake le meedam di labe uho Eba tu vuzehi vi tau meedam damat modemu uba nehada tame. Uba fakemoholehe dam labe um siàdume fa Yahudi dam labe ibi iho tu vuzehi meedam bak gagu faheme modiam dam labe ibi iho meit im modem diat uloodume aim dam debu koeda laba ub lodam bak ame. Labi laha uloodume aime neàdi fa uhumo fi hasi bakamta vahi Alat vameadaha im ahamda dogoit aidam bakti im meiti meedam num laba um vou oli na sokba nasbe ahit alibulehena labe uba foadume geàdam bak ame. Labi laha uho Eba tu vuzehi vi tau meedam damat modemu uba fakemoholehe dam labe ozo, ‘Im boehàda zi labe laha dam nim uloodume vi aime beodase,’ laham bak laba ozome um siàdume bak ahaladiame vuusuidam boehàdatebo zi lamti dam eeda zi lamti laham dam laba vou le duzu uba uloodume aidam bak ame. Lahana ame bak lam meedam di a iedemule. Neham bak. Uho ame dam laba neha, ‘Iho Yesus bake tu vuzeheho,’ laham bak ahate vameadam bake Alat ahit uba modi labihada tame. Labihasu meedam im zi lam uba meedam bak ehe bake iademe it vou faovoi meedale.
10. Eho meedaha Im Neàna lam meit bak mei bak iuba le vou vameatedume fi deda. Meit bak mei bak iuba le vou vameatedume fi deda. Labihadume dam mei debuti dam mei debuti vou vameatedume uloholi neàdi ame ba novai vaitolo modem digat lam ab vou fumam tame.
11. Lahana uba fakemoholehe dam labe uho Eba tu vuzehe bake faki um si damat bakamta vahi uloodume aidam debu laba vou le ub lodume ame damat fa uba uloodam di lam uho neha, ‘Iho im akatihasu fa vi gagoela?’ laham bak a bisi àvodi vi ozodamule. Gi ahu keahumtedesu vou faodale. Damat uba uloodume gagu vi ailo modem di lam uho fa vi gagolo modem di gi Alat Aho uba modi vizi fi gatehe im lamota uho iedem vabna fa vi gagodale. Ame di lam ba uhumo gagodam vabak. Gi Em Ai labe Am Aha Nutabe Neàna Labe fa uba modi vizehe labe uho ot vai gagodam bak.
12. Labi laha ame di labe uho Eba tu vuzehi vi tau meedam damat modemu dam duadat uba faki im nehasu meeda tame. Dat meida lam Eba tu vuzehe vabda labe am vahada Eba tu vuzeheda lam fa vou fohome meia ub lu otem bak ame. Labi dat meida lam Eba tu vuzehe vabda labe am dubu Eba tu vuzeheda lam fa vou fohome meia ub lu otem bak ame. Labi dat meida lam Eba tu vuzehe vabda labe am data Eba tu vuzeheda lam fa vou fohome meia ub lu otem bak ame. Labi mei data labe fa am ai modeo, am oi modeo, ibi iho gagoho im voou fa daet bohudi fa vou fohome meia ub lu otem bak ame. Labihada tame. Lahana Eba tu vuzehi meedam dam lam naat iba vabidam di iho gi ozahit keàtedi tu vuzehi meedam bohu vuusdume digat ba novai vaitomda laba vou fusi meedam dam lam Eho soat vausu fa vei neàdedam dam am bak,” lahame Yesusat fet ab vameadaham.
14. Labi Yesusat neo nehame susume vi vameada. “Ba novai vaitom digat fuseo modem di labe uho nehi fet aame ozobohudemna Eho uba ab fet gagolo modemam bak. ‘Ba diamut aam ahasbeamna abo Alat aam fakemda lam fa ame Fihasi Ala Bake Vou Baedam Num Vàmteabu laba oli duzu vàhàdehemu damat ame num lam gi mu vou esmo tame.’ Lahame Daniel lab fet vameame vàmadi esuhu im lam imbodi amena aam ahasbeamna labe ame Num Vàmteabu labe am Fota Fiham Zoho abo duzum maem zoho laba duzuhu bak uho aameam làhà ame digat ab fuseo meedamam bak. (Damat Daniel aho fet toeme esuhu im lam meit aame ozom di, ‘Akatihasu modem bake gagohela?’ lahame mahate fetehesu vi ozome ozobohudele). Labihàmu amena aam ahasbeamna lam uho ame num laba duzuhu bak aameam làhà um Yudea bak laba azim dam labe uho laba a esdamule. Um foli seddam bak labna zohàme ahedem bak laba ozome gi taho sibu bak iuba iitaole.
15. Labi laha ame digat lam fuseo meedàmu ubu uho num ohut vabna baa ahoba laba zisi esdam dam lam a fa um numa oli na koena it ve voutamule. Gi ahebu vou esmozi iitaole.
16. Labi laha ame digat fuseo meedàmu dam utoho bake le godam dam labe a nehi ozo, ‘Em nutahalem bake num bake fa emoeme em sue sona ahoba dusumda it visoi vou itase,’ lahame fa um num bake a lamule. Gi labihasu vou esmozi taho iitaole.
17. Aiee! Lahana lahi zubuleheda zi lamti data tatvamda do àm lahasuhuda eheda zi lamti iitaom vanamam bak akati modelo? Làhà gi emoem vabilemnàme taho ozahit betea iitaole.
18. Labi laha uho lab iitaom digat vi ozom di uho mahate Ala bake nehame tom gagodale. ‘Ai Ala oa, ame digat fuseo meedam di a di faidi emoem biem digat lam a modemule. Gi fa digat amomoi ozome iba modi iitaole,’ lahame mahate Ala bake labihasu tom gagodale.
19. Eho gi neham bak vi ozome uba labi gagoho bak. Ame digat fuseo meedam di lam ba dam bakdate modi geàdamna lam ba koena modi geàdam kaio. Abo duana modi geàda tame. Amu Alat alimeat bak nim ahamte modehe di labe faasi vou mode ledume etei vou fusi meedam digat nim dam bakdate labihasu modi geàdamna lam ba na vabak. Gi ba novai vaitolo modem digat fum di ame im meedam di am bak. Labi laha ba diamut neo vi meedam bak na vabak.
20. Lahana Alat Aho fi hasi vame Am damalehe dam laba Aho bisi vi ozome deeli faobekesi meedàmu ame geàdam bak lam Aho ahit modi fa zohobuli vaito tame. Aho faobekesi ame bak lam zohobulem vabameam dat meida so lam vàmtea vekehe vaba gi dam ahebu modi vàhàdedume seddam bak.
21. Labi laha ame ba novai vaitolo modem digat fuseo meedam di lam meit uba nehi gagomeam, ‘Nime! Alat Gagu Fihasi Vimteme Oluhu Dat Boehàda neam tame,’ lahame labi gagom bak modeo, ‘Iume! Ame Da lam tame,’ lahame uba labi gagom bak lam modeo, um nasi a aime imbo tibame tu vuzehemule. Giomimot modem bak.
22. Eho gi neham bak ozome uba labi gagoho bak. Ame di labe damat lehe bak aaha vab dàt im nehasu vameadamna uho ai tame. ‘Em abo Alat Gagu Fihasi Vimteme Oluhu Dat Boehàda am tame,’ lahame giomim gagodamda modeo, ‘Alat Am im eba gagu eho ot vai dam bake ahate vameaidahada em ame Da am tame,’ lahame giomim gagodamda modeo, labihasu duzu vameadam dam uho aa tame. Ame dam labe nehi ozo, ‘Damat fà ibi iho vameadaha im aime iba tuse,’ lahame ozome ahit na damat ihimo modem biem im feàna lamti abo damat fet aame ozome àvodi meedamna lamti labihasu meedam labe dam duada zoho vedi imbo tibame ame im laba tu vuzehe tame. Ame giomim vameadam dam labe iho lab vou li vameadam im lam Alat fi hasi vame Am damalehe dam labe aime vuzehem bak mom bak lam ame dam labe iho ozobohuna ahit, ‘Modi aase,’ lahame vameada tame. Labihadamnàme Alat fi hasi vame Am damalehe dam labe ba ame bak lam tu vuzehem vabak.
23. Labihàmu mahate it vou faovoele. Eho ame im zi lam vameadam bak lam uho vi ozome ozobohudem bake Eho ahit uba nasi fet labihasu vameadume esulo modem bak,” lahame Yesusat fet ab vameadaham.
24. Labi Yesusat neo susume vi vameada. “Ame ba novai vaitolo modem digat fuseo meedam di labe dam bakdate modi geàdamna zi lam foli neàdi kehàm vaba im nehasuhuda neo meedam bak aada tame. Ala digadda fa aibuli ba fauhaedam vaba modesda. Labi ala useheda lam ba fauhaedam vaba gi aibuli modesda.
25. Labi falo zi lam fa bake nom fi goaitoi bidda. Labi asum ahoba iuba modealahana zi feà lam betea bakamta modealadam vaba gi ihevoulai ihevoulaida. Labihasu meeda tame.
26. Labi ame di labe damat tom aam di Em Abo Asum Ahoba Iubet Bak Niba Li Dateleheda Em Aiat Am na fauha meona fako iedemna ogatei modealaha bak lam fa Eba modi vizi feà Dateli uloti nom vousdam bak lam damat aada tame.
27. Labi ame di labe Eho laha Em im gagu vou usem dam zi laba gagome nom oudume Eho fi hasi vame Em damalehe dam lamota dam debu iudu iuba le vada. Dam debu iudu iuba le vada. Labihadume damat azihi bak ahebu ulohole tame,” lahame Yesusat fet ab vameadaham.
28. Labi Yesusat neo susume nehame vi vameada. “Eho etei ut ara laba vàlu totobet fi koadalo modem im nidi nim uho laha aime ozodume ozobohudele. Bak ibida niba ut ara labe am mekehà aaso faasi et nakbedem bak damat aam di nehi ozom bak. ‘Ab di neà faalo modem ame?’ laham bak iho aame ozobohudem bak am.
29. Labi laha Eho etei lab fet vameadaha im zi lam modesum bak uho aameam làhà uho nehi ozom bak am bak. ‘Eho amu lab fet vameadaha im lam ab imbodelo ahazobuleham bak,’ laham bak um ab ozobohudemam bak.
30. Nasi aima. Eho etei uba gagolo modem im imboda nidi nim mahate tu vi ozodam bohu meedale. Eho etei lab vameadaha im zi lam ahebu meedume neàdehe vabna um eteida nim ahe lahasuhuna ame im zi lam imbodehe bak aadume neàdi ba eloda tame.
31. Asumti asum ahoba iuba modealahana zi lamti labi bak nimti bak niba modealahana zi nimti labihasu ahebu ba beodume foedume sedda tame. Lahana Ebe Eho vameadam im zi lam ahebu ba setem vabak. Gi labaha bohu vuusdume imbodedam imot modem bak,” lahame fet ab vameadaham.
32. Labi im lada lam vameadume neàdi Yesusat neo vi susume vameada. “Eho etei uba lab vameadaha im zi lam ahebu vou fum di lam, ‘Adi diat modemna modela?’ laham bak lam ame digat labe am jam lamti im dam bakda zi nim ba vàmtea buà ozobohuda na vabak. Im ahebu gi vabiem tadehe bak. Labi Alat Am im gagu vou usem dam zi lam laha vabilem bak. Em gi Am Adàt modemnàme Em laha vabilem bak. Gi Em Ai Alat Ahamo ozobohudehe bak.
33. Eho etei uba lab vameadaha im zi lam ahebu vou fum di lam, ‘Adi diat modemna modela?’ laham bak lam ame digat labe am jam lamti um vabilem bake mahate it vou faovoi ozodam labe ahumdi vou faodale.
34. Eho ba fa lem di neham bakti uloho bak vi ozome uba im totobe nidi nim neo vi vameadase. Dat num deda labe aho bak mei bake lalo modemu am na meedam dama it gagu esmo. ‘Uho em num vou aasu vabiedale,’ lahame am dam laba im mei im meime ab lodume esmoham. Labi neo num doo vou aasdamda laba neha, ‘Em num oho iademe vou aasdale,’ lahame neo gagu esmo. Labihasu gagu esmozi ab laham.
35. Labi le setehe di labe ame dam labe ba gi aidam vabak. Iba im gagu modiamda labe aho fa lem di abo etei disim diat modeo, usi neisoat modeo, diham ozoho modeo, dihambe modeo, aho fa lem di lam ame dam labe iho biem bake abo vou faovoi aasdam bak. ‘Ame da labe fa lem diat im gi aho gagu vou esmoho bak modehe vaba gi idaom bak li aamna zohàme imo vou faovoi aasdase,’ laham bak ozome meedam bak. Um laha Eho fa lem digat biem bake vou faovoi aasdale.
37. Eho etei uba neha, ‘Mahate vou faovoi aasdale,’ lahaha bak lam gi umota gagoho vabak. Abo dam ahebu gagoho bak,” lahame fet ab vameadaham.
1. Labi neo usi behàsdi Yahudi dam bada nibe im tai ahobada zi labe Im Adam Datahida Alat Oddaha Vabat Labohotehe Bake Vi Ozome Roti Fikidehe Vabna Àme Iziam di ee gagom Paskah laham di fuseo meedàmu damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti vazisi im aa odoada. “Uho ozom, iho akatihasu modi zila audume Yesus si otela?
2. Lahana ibi iho dam vahi na àme iziam di nim imo nasi Yesus a simule. Aba tu vuzehehe dam duada kota Yerusalem niba esdamda ehete. Iho di nibe Aba simeam làhà dam dae gai fai ziddume iba beomo. Gi ba digat meit sise,” lahame aa ab odoadaham.
3. Amu Yesus num debu Betania laba le dat amu sokba faidi vàhàdem bohu vuusdamda modi fa neàdeheda ee gagom Simon labe am num laba le aidam di labe nam meida vàmtea iba ab leham. Labi Yesus ame num laba vahi na àdam di labe ame nam labe aho narwastu omnao aaboda labe modehe minyak abo doi duana vahana ahana neàna amu ke fauhana ee gagom pualam meit modeme botolilehena laba fedehena aho vou le ame botoli omtobe feolehe bak labe aguti Yesusam ohu laba ab nom veàtoham. “Yesus abo feàte,” lahame ame bak laba vi ozome ab modeham.
4. Labi dam ame bak laba esdamda totbaho labe ame bak lam aahemu faki dam ihimo ab ot gagoidamam. “Oo, akati modi doi feàna vaha minyak lam gi vàhàdedàla?
5. Gi fa meia ot loiame doi feàna abo dat vàmtea na meedume tahun vàmtea foli gohali vam doiti ulohona fa vame ame doi lam dam na vab dam laba fa lodam vaba modela?” lahame ame nam laba faki im ab vahokedamam.
6. Lahana Yesusat fa dam laba ab gagoham. “Gi labihasule. Um ana modi nam niba faki im vahokedàla? Um ozom vaba? Aho Eba vou baedalo gi im neà bak modehe bak.
7. Um dam na vab dam gi labaha bohu tau esdam labe vi taui vi tauidam labe esdam bohu meedam bak. Lahana Em etei nim ba uba tau azim bohu meedam vab Dàt modem bak.
8. Nam nibe aba aho ozome modelo modem bak ahamo ab modeham bak. Eho ozoha, Em ba elom di koei noimna noime afoezobe ke bumata vou oli esum bakti uloho bak laba ozome Em so niba na lam ahit nasi fet veosi ahumdi esulo modem bake ahole modehe bak.
9. Aho neàna modehe bakta imbote. Lahana Eho etei uba neo gagolo modem im imboda nidi nim laha nasi aima. Eho meedaha Im Neàna lam meit bak iudu iuba le vameadào? Bak iudu iuba le vameadào? Labihadam di ame nam nibe aba aho etei Eba lab modehe im lam damat laha aime ozobohudi fa ame im lamti vou vameatedam bak. Ba setem vaba gi labaha bohu vou ai ledam bak,” lahame fet ab vameadaham.
10. Ame di labe Yesus Aba vi tau meedam dam dua belas labe dat meida Yudas Iskariot labe aho damat Ala bake lomna ve vua vahudam toheda zi laba vuusu im vameame faheme modiam dam laba aho Yesus vou fohome ame dam laba ub lom bake aa ab le odoadaham.
11. Labihàmu ame dam labe Yudasat etei li gagoho im lam aiha uledi, “Iho doi oba lo tame,” lahame fet gagu ab esuham. Làhàmu Yudas aho ahit neà dateli le, “Yesus adi diat vou fohome dam bake ub loela?” lahame gi vou faoda.
12. Labihadam di labe vou faodameilahit Yahudi Dam Vahi Ame Roti Fikidehe Vabna Àme Iziam di ab vou fuham. Vou fuhemu digat ahamteda labe abo damat ame Paskah vi ozome àlo modem domba otem digat fuhemu Yesus Aba vi tau meedam dam labe Aba li ab gagoham. “Boehàda oa, im Paskah fuhemu iho vahi na àm bake iho ake le na modeme vaheme ahumdi esuela?”
13. Làhàmu Yesusat am dam behàsu laba fa ab vi gagoham. “Uho kota Yerusalem laba lefusi duzu aameam dat vao noai vou lemda omti ot gausiamda labe lam bak laba uho am ohuse vi duzu vulale.
14. Uho laba vi duzu vulame aameam num da labe aho olemda laba um laba vi olele. Labi vi oli num deda laba nehi gagole. ‘Im gurut oba neha, “Aho amu oba Paskah fum diat Am damti vahi na àdam bak gagu esuhu bak akete?” lahaho.’
15. Uho labi gagomeam làhà dat num deda labe um vou le ame num zuhuba baa duana lam gi vabieme neàdi esdamna le aam bak. Uho gi ame tom fi hababu laba ibi iho ame bak vi ozome vahi àmna lam laba modeme vahedale,” lahame ab gagu oluham.
16. Làhàmu Aba vi tau meedam dam behàsu labe kota Yerusalem laba le aaha Yesusat lab gagoho bak lam abo imbona le aa. Làhàmu ame Paskah vi ozome àdamna lam modeme vahedume ahumdi neàdi esu fa Yesus bake ab laham.
17. Labi fa le disi aibulehemu Yesus Aba vi tau meedam dam dua belas lamti vahi ame num laba le na ab faasi àdamam.
18. Faasi na àdam di labe Yesusat ab gagoham. “Um nasi iademe aima. Um etei niba na vahi àdam dam nim meida vàmtea labe Em vou fohome meia ub lomda niba ehete.”
19. Lahame labi gagoha Aba vi tau meedam dam nibe im ahu faidi Yesus bake neha, “Ai oa, Oho ozom, eho modem im Oho gagohe?” lahame meit Yesus bake vi gagu ai. Meit neo vi gagu ai. Lahada.
20. Lahahat Yesusat fa gago, “Ne, um ame dam dua belas nibe meida vàmtea gi Eba neab tau na vaksa fi lihibabu niba roti zoho ekeme ab àdamam bak.
21. Lahana gi labihasule. Em Abo Asum Ahoba Iubet Bak Niba Li Dateleheda nim Eho ba modem im meit Alat Vameadaha Im Toedahana laba im meida nehasu toehe bak. ‘Elo tame,’ lahame fet toeme vàmadi esuhu labe ame bak ab imbodelo modemam bak. Aiee! Lahana ame da Em vou foholo modemda nim am oiat am faaha bak feidam vabate. Ame da nim Alat ba gi fai bak bohu tadelo modemda am bak,” lahame ab gagoham.
22. Labi lab vazisi na àdam di labe Yesusat neo roti ve Am Ai Ala bake, “Neàte,” lahame tom gagu neàdi ame rotibu lam agube faheme Am dam bake ab lodaham. Lodam labe nehame vameada. “Roti nim Em so am tame. Uho roti nim ve àm di Eba vi ozome àdale.”
23. Labi roti lam àdume neàdi Yesusat neo anggur oo vaksa mokzoho fedehena ve Am Ai Ala bake, “Neàte,” lahame tom gagu neàdi dat meidate lu vuusu vameada. “Uho ame anggur oo vaksa nim um ahebu uddam labe ototo vaidale,” lahame gagu neàdi dam ahebu ab otot udidamam.
24. Labihadam di labe Yesusat neo vi vameada. “Iho etei uddam anggur oo vaksa nim nehi vi ozomna vaksa am tame. Amu Alat dam amudate gagu gohalemna lam fa vei seti etei nim Em vasea veàtolo modemna nim fa dam bakdate gohalemna Alat ab modi gàhàdeham bak. Dam bakda dua totbaho labe ibi iho faina meedam bak lam Alat ozahigeàmu im beodaha vaba fa vei neàdedume iba modi Am damaedume Aho iba vuusdam bak vi ozome veàtolo modem vasea am bak.
25. Lahana im imboda nidi nim iademe aime tu vi ozodale. Iho etei vahi uddam anggur oo vaksa nim Em etei nib udehe tade tame. Lahana ba diamut Em Ai Alat Eba modi Boehàdateboli dam bake abobo vuusu im vahokedam di labe ba udem bakti gagom kaio.”
26. Lahame labi vameadume neàdi vou ladeedaha bak vàmadi ame num labe futoi kota Yerusalem vou esmozi Zaitun Dee Dozeadaha Bak Buzoho laba laitelo ab ladamam.
27. Labi ladam di labe Yesusat Aba vi tau meedam dam laba ab gagoham. “Etei aibu nim damat Em simeam làhà Eho geàdam bak lam uho aahemu um ahu gelevai ubu uho amu Eba lab vi tau meedam bak lam fa seti Em vou esmozi ili tame. Meit Alat Vameadaha Im Toedahana laba im meida nehi toehe labe Eho uba labi gagoho bak. Alat amu neha: ‘Ame da domba fi ho vou aasdamda lam Eho dam bake modi damat ote tame. Labi am domba gi fi goaitoi sete tame.’ Lahame labihasu toehe bak ehemu Eho uba labi gagoho bak.
28. Lahana Em eloho bak labet Alat modi fa ahedi usai nasi Galilea bak laba le uho ba vulem bake gut vou faoda tame.”
29. Lahame labi gagoha Petrusat fa ab vi gagoham. “Vabà! Dat Boehàda oa, dam totbaho nibe im ahu gelevai ibi iho Oba tu vuzehi meedam bak lam fa seti Om vou esmozi ili tame. Lahana em vàmtea nim ba Om vou esmozi itam bak em ba vi ozom vabak.”
30. Lahahat Yesusat fa gago, “Lo, oho lab gagoho bak ame. Lahana im imboda nidi nim nasi aima. Om ba labiham vabak. Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi tem veibam bak làtelademeam kuk aaum bak ab behàsdemam bak,” lahame ab fet gagu esuham.
31. Lahahat Petrusat fa neo vi gago, “Dat Boehàda oa, Omti emti damat amediat otemta neàte. Em ba àvodem vabak. Lahamnàme em ahe lahasuhu di nim em ba meia neha, ‘Em Om bieho,’ lahame vageme Om mom vabak.” Lahame labi gagoha Yesus bake vi tau meedam dam totbaho labe ame im lam aihemu gi Petrusat lab gagoho bak lamti ulohona Yesus bake neo ab vi gagodaham.
32. Labi Yesus Aho neo Aba vi tau meedam dam lam vame bak ee gagom Getsemani laba ab vou laham. Laba lafusi gago, “Uho niba nusualadume faode. Em iumà iuba le Em Ai Ala bake tom gagodalo mozo.”
33. Lahame labi gagu neàdi Aho Petrusti Yakobusti Yohanesti labihasu dam làtela lamota, “Aba tau lele,” lahame gagu dam totbaho laba vou esmozi ab laham. Labi laba le lafusi modeha Yesusat Am ahu faidi feà bak fusi admahi ab meedamam.
34. Làhàmu Aho Am dam làtela niba ab gagoham. “Em ahu faidi feà bak fuho. Em gi ab elom ahulaleham tame. Um niba faode. Em ehemo iumà iuba le tom gagodalo mozo. Labi um niba esdam di a imule. Gi vou faovoi aasdale.”
35. Lahame labi gagu neàdi Ahamo iumà iuba le ogomasu bake biti Am Ai Ala bake ab tom gagodamam. “Ai Em Ai oa, na im ahebu Ohomo modem neà bak tadeho. Labihàmu Em geàdalo modem bak nim Oho fa faatoi vei setem neào?” lahame gagu ozoha vabamu fa neo gago, “Vabo. Ebe Eho ozom bak fa feidate. Gi Obo Oho ozoho baket modem neàte,” lahame ab tom gagoham.
37. Lahame labi tom gagu neàdi usai fa Aba vi tau meedam dam làtela laba fa le aaha dam gi beilame idaomna le aa. Le aame Petrus bake ukeme ab gagoham. “Simon, Em kehàm vabna gi jam vàmtea folehena um akati vou faovoi aasdam vaba idaoe?
38. Iblisit uba li, ‘Um faina modem bak modeo,’ laham bak uba li um ahu modi ozolo modem di um ahu a bedemule. Gi mahate it vou faovoi Ala bake tom gagodale. Neham bak. Im ahu it ozomta gi neà bak modelo àhàki vi ozodam bak. Lahana im ahu nibet ihimo fatahivai bedem meo bak.”
39. Lahame labi im vahokeme neàdi Yesusat Am dam làtela lam fa neo vou esmozi iumà iuba le Am Ai Ala bake Aba Aho amu tom gagoho baket neo tom gagu ab behàsdeham.
40. Labi tom gagu neàdi usai fa Aba vi tau meedam dam làtela laba fa neo le aaha dam gi neo izeo àhàki feà bak fusi lavoidume fa idaomna le aa. Làhàmu le ukeme keesi modeha dam làtela labe ladi fa im vi gagom vabi gi daleàde.
41. Làhàmu ame dam lam fa neo vou esmozi iumà iuba le Am Ai Ala bake Aba Aho amu tom gagoho baket neo tom gagu ab làteladeham. Labi tom gagodume neàdi usai fa Aba vi tau meedam dam làtela laba fa neo le aaha dam gi beilame idaomna le aa. Làhàmu ukeme ab gagoham. “Ne, um akati bedali idaom lahasuhela? Neàde! Nasi keesi usnadale. Asum Ahoba Iubet Bak Niba Li Dateleheda nim vou fohome dam faina meedam dam laba ub lomda iba ab fuseo vabaleham bak.
42. Nasi usnadume ladase. Em vou fohome meia ub lolo modemda etei iubet ab ledamam bak.”
43. Lahame Yesus gi etei vameadam lahasuhu di labe Aba vi tau meedam dam dua belas meida Yudas lam ab lefuham. Ahamo lem kai. Dam ae tot mo tot mo lahamna vuusualaha dam zi lamti labi eobu vuusualaha dam zi lamti labihasu aba tau mitaedume ab lefusi dozeadaham. Ame dam lam gi Yahudi damat ibi iho tu vuzehi meedam im vuusdam tohe dam zi labe amu vameame ahumdi oudaha labe ame dam zi lam ab le omsuham.
44. Yudas amu aho gi iumà ium ledam labe ame dam zi laba nehame fet gagu esu, “Uho aameam im Yahudi damat meia tàm di oode totti totti tomoamdem bak lam eho ame Da laba modehe bak uho aameam làhà ame Da am tame. Uho nasi ame Da lam si vuusu uho vuusualahana lamti vuusualame vausu mei ousum bak iuba vou lale,” lahame amu fet gagu ahumdi esu.
45. Labihàmu etei li dozeaha di labe Yudasat gi taho Yesus bake ub fetu duzu ab gagoham. “Ai Guru,” lahame gagu Am oode totti totti ab tomoamdeham.
46. Labi modeha Yudas bake tau lehe dam zi labe ame bak lam aahemu vi feddume Yesus ab siham.
47. Labi modeha Aba vi tau meedamda meida labe am ae goha dusuhuna vuu vihitoi Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am na meedamda lam beoha biou gi dogoi baata fatoi bake ab biteham.
48. Labi modeha Yesusat fa neo dam duada labe Aba silo lehe dam zi laba im ab vi vahokedamam. “Um Em otelo vabeddamna akati Eho amu Fihasi Ala Bake Vou Baedam Num Vàmteabu labe am ad oli aam bak tomba laba Eho Alam im vahokeme leidamehamdehena abo umti vahi meedamna akati ame di labe Em taho si otem vaba mode? Uho ozomta vedi Em dat aa li ausume mei beome im nazoh gelevai esmozi laiam dàt mode tiba uho etei aeti eobuti ab vou lehame? Lahana uho etei nib meedalo meedam im nim ahebu gi ahole meedalo modem bak. Nehaha bak. Dam ahamda Alat vameadaha im aime fa dam bake ahate vameaidaha dam zi labe iho amu Alat Vameadaha Im Toedahana laba fet toeme esuhu im lam imbodelo modem labe uho vabili etei ab meedamam bak.”
50. Lahame labi vameadume neàdi modeha Aba vi tau meedam dam lam ahebu iedi Am vou esmozi fi goaitoi ab ilime seteham.
51. Labi laha ame di lam dat bas meida labe gi sue baana gimsudamna Yesus bake tau vulada. Vuladameam damat aba neo siha gi sue laba vi sihi labe aho fi tuha ame sue lam fodzi ab so bozbuli itaham.
53. Labi Yesus sihi dam labe Am vou duzu vou ladume Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am num feàda laba ab vou laham. Ame di labe ame Yahudi damat ibi iho tu vuzehi meedam im vuusdam tohe dam zi labe iho Yesus bake uloome aim bake ozome ame num bumat laba laha tau leida.
54. Ame di labe Petrusat gi vaitesu ba aa vi duzu vulada. Labi ame num feàda labe am ad oli aam bak tomba laba vi fusi ame meo dam labe num feàda laba vou aasdam dam lamti gi aa valiheme laba vi tau nusu vuaga fi dda.
55. Ame di labe damat Ala bake lomna ve vua vahudam toheda zi laba vuusu im vameame faheme modiam dam abo Yahudit Ibi Iho Modem Im Gagu Vàmadi Esum Dam Debu labe im dam zi lam vahe vahedume Kayafasam num laba bakamta vahi vou faoda. Damat neha, “Yesus git modeho,” lahame gagu Yesus bake giomim vàlum damat li im gagom bake aihizobe Roma eeda laba ub lu, “Yesus fà beome elose,” laham bak gagolo àhàki vou faoda. Lahana ba ame im aim kai.
56. Di lam dam giida labe giomim vàlum dam duata duat. Lahana meit vàluhu bak lamti meit vàluhu bak lamti ba vàmadem vab labe gi ot odosia.
57. Gi labihasu meedameilahit dam totbaho labe lehe labe ame dam eeda labe iho avaesdam laba li duzu ab gagoham. “Iho aiha ame Da nibe nehi gagoha. ‘Ame Fihasi Ala Bake Vou Baedam Num Vàmteabu nim damat anekehàt mohona nim Aho beodume fa faamome seti usi behàsdi Aho fa dam bakda labe im anekehàt moho vab num lam Aho mo tame,’ lahame gagoho bak lam iho aiho.” Lahame labihasu giomim vàluhunàme etei lab vàlu gagoho bak lamti meit neo vi vàlu gagoidaha bak lamti ba uloho vab im vàlu vameada.
60. Gi labihadume modeha ame Tohe Dam Zi Labe Bisi Boehàdatebo labe ahu gukeme usai tomba duzu Yesus bake netàdi vi ailo ab gagoham. “Om dam nibe etei Oba vàlu vameadam im nim Om taho veibame fa gagom vaba?”
61. Lahame gagoha Yesus ba dae buhu vaba gi daleàdi vou faoda. Làhàmu ame Tohe Dam Zi Labe Bisi Boehàdatebot aho fa neo vi ailo gago, “Om, ‘Alat Gagu Fihasi Vimteme Oluhu Dat Boehàda abo ibi iho bisi tom vou baedam Ala labe Am Adàt am bak,’ laham bak lam imbodemeam làhà taho gagu vàmadi esule.”
62. Lahame labi gagoha Yesusat fa ab vi gagoham. “Lo, Alat Gagu Fihasi Vimteme Oluhu Dat Boehàda lam Em ame Da am bak. Ba diamut Em Abo Asum Ahoba Iubet Bak Niba Li Dateleheda nim uho Eba aam di Em gi feà Dateli Ala Bisi Feàda labe Am ahi totbaho laba tau nusu na ahebu vuusdam bak lamti Em asum ahoba iube fa uloti bak niba lem bak lamti labihasu uho ba aa tame.”
63. Lahame labi gagohemu ame boehàdatebo labe aho aime faki am sue ahoba dusuhuda lam gi ahamo naedat auet it vome geleme ab faheham. Faki dam eeda totbaho niba ab gagoham. “Um aim vaba? Da nim gi Ala bake feàtàhà bak. Aho vedi, ‘Amti Alati ulohote,’ lahame gagoho bak lam ihimo ab vi aiham taia? Ba akati meit neo li vàlu gagom im lam iho aie? Dat naeda labe Ahamo ab it gagu vàmadeham bak. Uho ozom, Da nim akatihà?” Lahame labi gagoha ame dam eeda totbaho labe vazisi fa ab gagoham. “Lo, ibi iho fi hasi baleàhà bak lam Da nibe vazidazehemu gi gagu otem neàdehe bak,” lahame ab gagu vàmadeham.
65. Lahame labi gagu neàdi dam eeda zi totbaho nibe Yesusam dauha laba keha beàda. Labi neo sue baa visoi Yesusat iba aam bak labna zohàme Am fakode laba baguamdi meit am aumbut Aba vi fu tozome gago. “Hohoa. ‘Om Alat vameadaha im aime fa dam bake ahate vameaidahada am tame,’ lahamda Oho ozom, Oba amat beo. Taho iba fa gagoma,” lahame meit vi fu tozome gago. Meit fu vi tozome gago. Lahada. Gi labihadume neàdi fa neo dam Yesus si vou goomda zi laba ub lu ame dam labe fa ve vou lalo modem di labe neo ab foadamam.
66. Ame di labe Petrusat gi ame num labe am ad oli aam bak tomba laba nusda. Nusdume modeha ame boehàda labe am na modem nam meida vàmtea labe Petrus bake labohotesome aaha Petrusat vuaga fi ddam bak aahemu Petrus bake aasu ozodume ab gagoham. “Om Yesus Nazaretda laba vi tau meedam dam meida om am taia?”
68. Lahame labi gagoha Petrusat tem veibadam labe ab gagoham. “Vabo. Em ame da lam em bieho. Oho etei lab gagoho im lam em ozom vabili mozo,” lahame gagu neàdi ame num feàda labe am ad oli aam bak tomba labe am doo futom obe laba ab le duzuham. [Laba le duzuha kuk ab aauham.]
69. Lahame vou faodameilahit ame nam labe neo Petrusat doo futom obe laba doudam bak aahemu dam totbaho aba netàda laba fi desi ab gagoham. “Em ozobohu bak. Ame da nim gi damat etei sihida laba vi tau meedamda meida am bak.”
70. Lahahat Petrusat neo tem ab veibadamam. “Em ame da meida modem kaio,” lahame labi tem veibadaha bak ab behàsdeham. Labi neo vou faodameilahit neo dam laba dozeadaha dam labe ab aame gagoham. “Mm, abo imbote. Om abo damat etei sihida laba vi tau meedamda meida am bak. Iho gi oho im gagom bak vi aim di om gi Galilea damat im gagom bakti uloho bak.”
71. Lahame dam labe neo ahate gagoha Petrusat, “Damat fà aise,” lahame fa neo ohu vame ab tem veibadamam. “Uho etei gagohoda lam em bieho. Eho giomim gagomeam làhà Alat fà eba beose.”
72. Lahame gi etei tem veibaha bak làteladeha kuk neo vi aaume ab behàsdeham. Labi kuk aauha Petrusat Yesusat aba amu nehame fet gagoho bak lam ab vi ozobohudeham. “Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi tem veibam bak làtelademeam kuk aaum bak ab behàsdemam bak,” lahaha bak lam fa ab vi ozobohudeham. Làhàmu am ahu faidi nom bohusu bisteat meb dae ab faaham.
1. Labi dihambe Yahudit Ibi Iho Modem Im Gagu Vàmadi Esum Dam Debu abo damat Ala bake lomna ve vua vahudam toheda zi laba vuusu im vameame faheme modiam dam ame. Labi Yahudi dam bake vuusu im vameame faheme modiam dam busaoda zi ame. Labi Musam Im Feàna zi ozobohudi fa meia vahokedam guru zi ame. Labihasu vahe vahedume im vameadume neàdi ahu vàmadi ab gagoham. “Neàdehe bak. Yesus gagome otem neàte. Imo Yesus neo Roma dàt Yudea bak vuusdam gubernurleheda laba vou le ub lu aho fà uloome aise.” Lahame labi gagu neàdi Yesusam anekehà ahim giame vou duzu vou futoi Gubernur Pilatus bake ab vou ladamam. Labi vou ladume gubernur labe am im meedam num feàda Pilatusat aidam bak laba lafusi aho avaesdam laba vou duzu neàdehezobe, “Pilatusat fà aise,” lahame im meiti im meiti Yesus bake la vàlui le vàluidume ab vameadamam. “Gubernur oa, iho aiha Yesusat neha, ‘Am abo dam bake vuusu im vahokedam boehàdatebo Am am bak,’ lahadam bak im aiho.”
2. Làhàmu Pilatusat Yesus bake ab vi ailo gagoham. “Imbo? Oho neha, ‘Em Yahudi dam debu vuusu im vahokedam boehàda am tame,’ lahame Oho labihasu gagodàmu damat Oba vàluhu bak lam imboo? Om ame da ameo?” Lahaha Yesusat fa gago, “Lo, oho etei lab gagoho bak lam imbote. Em ame Da am bak.”
3. Lahame labi gagoha ame toheda zi laba vuusu im vameame faheme modiam dam labe fa neo im mei tem vàlu beàda. Labi neo im mei tem vàlu beàda. Lahada. Gi labihadamnàme Yesus ba dae bum kai.
4. Làhàmu Pilatusat Yesus bake neo vi ailo ab gagoham. “Dam etei Oba nib la vàlui le vàluidam bak nim Om aidamna akati taho fa veibam vaba mode?”
5. Lahame labi gagoha Yesus ba neo dae bum kai. Labihàmu Pilatus ab àvodeham.
6. Ame Roma dam zoho vuusdam gubernur labe aba aho tahun ahebu modi baleàlehe bak gi nehadam bak. Yahudi dam ibi iho na àme iziam bak abo Paskah fum di Yahudi dam amu si sel oumahehe dam lam, “Dat adida isi oluela?” laham bak lam dam bake gagu aime gi damat iho ee gagohoda vàmtea lamota aho fa gagu vou futoi Yahudi dam bake olum meot.
7. Ame di labe amu sel oumahehe dam dat meida Barabas laba ehet. Ame da Barabas lam amu im nehasu meedaha dàt moz. Amti am Yahudi dam totbaho lamti iho vazisi kota Yerusalem niba li dam totbaho gagome fàsi fa Kaisarleheda labe am Roma damti, “Beose,” lahame modi dae gai duzu mei otehemu ame Roma meo dam labe si sel oumaheda meida am bak.
8. Labihàmu ame gubernur labe aba aho amu modi baleàlehe bak fa neo vou fuhemu dam duada zi labe ame num feàda labe am ad oli aam bak tomba laba vazisi neàdehezobe ab vi tauledamam. “Obo oho amu modehe baket neo modele.” Lahame labi gagoha Pilatusat vi ailo ab gagoham. “Eho etei dat adida gagu vou futoi uba oluela? Yesus abo damat neha, ‘Um Yahudi dam vuusdam boehàda am tame,’ lahamda nim eho uba isi olue?”
10. Pilatus neham bak amu gi ozobohudi labi gagu vi ailo gagoho bak. Yesus ba git modehe bak na vabak. Gi ame toheda zi laba vuusu im vameame faheme modiam dam labe iho nehi ozo, “Akati modi dam dua totbaho labe fa Yesus bake tu vuzehi Am damali meedà?” lahame ahu adat faki teidi aba ub loho bak lam am ozobohu labe ahit vi ailo ab gagoham.
11. Lahana ame toheda zi laba vuusu im vameame faheme modiam dam labe iho amu dam duada zi laba nehi fet gagu esu, “Gubernur uba neha, ‘Am dat adida gagu vou futoi iba oluela?’ lahame gagom di uho gi gubernur laba fa nehi gagole, ‘Iba Barabas gagu vou futole. Labi oho om meo dam gagome fa Yesus otele,’ lahale,” lahame tet ootedam labe ame dam duada zi labe ab uledeham.
12. “Barabas isi oluse,” lahame gagodam labe Gubernur Pilatusat neo vi ailo ab gagoham. “Eho Barabas isi olumeam làhà eho ame da Yesus damat neha, ‘Um Yahudi dam bake vuusu im vahokedam boehàda am tame,’ lahamda nim eho akati modela?”
13. Lahahat dam zi labe vi ozome dae vàmadi fa ab gagoham. “Làhà ut tetehesuhunaso laba esu paku dodume elole.”
14. Lahahat Pilatus fa neo gago, “Ne lahana eho Da nim uloodume aiha Aho faina modehe bak aihi vabna akati eho gagu ote?” Lahame labi gagoha ame dam duada zi labe Yesus gi ut tetehesuhunaso laba esu paku dolo àhàki meedàmu dae duali dae gai ab ziddamam. “Vabo. Gi om meo dam gagome ut tetehesuhunaso laba esu paku dodume elole,” lahame ab daetesu meedamam.
15. Labi Pilatusat ozoha, dam duada zi labe labihasu daetesu vàhàdehemu, “Eho ba akati modi dam laba male,” lahame vi ozodaha vabamu dam zi labe im ahu deelem bake Pilatusat am meo dam gagome Barabas sel ousuhuda laba gagu vou futoi ame dam zi laba fa ab oluham. Labi Yesus fa meo dama ub lu na sokba nasbe ahit alibulehena labe Aba foadume ab geàdamam. Labi foadume neàdi Pilatusat neo, “Yesus ut tetehesuhunaso laba esu paku dole,” lahame am meo dam lam gagu ab oluham.
16. Labi ame meo dam labe iho Yesus si gubernur labe am im meedam num feàda labe am zoho laba abo meo damat vahi esdam bak laba neo vou le duzu neàdi im meo dam totbaho ahebu gagome ledume Yesusam obe laba ab ahilesu dozeadamam.
17. Dozeadume neàdi Yesusam sue vome vihilame fa sue sona boz gihona bohu abo boehàdat ahoba dusum sue lamohoda ve Yesus bake nom dusu. Labi neo lo alibuna vabome vuihàli neàdi Yesusam ohu laba neo nom usulo vi gago, “Nim gi boehàdat am sueti am ohu laba usumnati lahamnat modem bak,” lahame tozome afoezobe ab nom usuham.
18. Labihadume neàdi ame meo dam labe iho neo ahit neà damali Yesus bake ab gagu tozoidamam. “Looo. Yahudi dam debu vuusu im vahokedam boehàda abo neàteee,” lahame meit gagu tozo. Meit gagu tozo. Labihada.
19. Labi loso visoi Yesusam ohu laba meit fu tozo. Meit fu tozo. Labihada. Labi neo keha vi dou gagu tozoida. Labi neo ahit neà damali ogomaladume, “Yesus abo feàteee,” lahame vou baedam labe tozoida.
20. Labihadume neàdi ame sue bohu lam fa vuu vihitoi sue Abada fa duadume neàdi damat Am esu paku dolo modem ut tetehesuhunaso lam visoi Aba nom vatu kota Yerusalem vou esmozi fa bàhàgo iuba Yesus ab vou ladamam.
21. Labi lab vou ladam di labe dat ee gagom Simon abo Aleksanderti Rufusti labe im ai Kireneda labe aho kota Yerusalem bàhàgo bak laba godam dàt fa kota bake ledamda ab ot tahiaham. Ot tahiame modeha Yesusat Am vanamai alihi nemahuhemu ame meo dam labe Simon bake tet gut ooteme Yesusat Aho vatu vou ladam ut tetehesuhunaso lam fa visoi Simon bake tet ab nom vatuham. Labi Simon ame utso lam vatu ab vou ladamam.
22. Labi vou ladume Golgota laba ab vou fuham. Aram dae Golgota laham di gi, “Ohu Fetahabu,” laham bak.
23. Labi Golgota laba vou fusi ame meo dam nibe anggur oo vaksa laba na amomoi àhàkebuna ee gagom mur lamti vi tau valihehena lam, “Yesusat valo àhàkem bak laba ozome lu udese,” lahame lu modeha Yesus ab moham.
24. Labi ame meo dam labe neo Yesusam sue ahoba dusuhuda lam ab vome vihilaham. Labi vihilame neàdi neo ame ut tetehesuhunaso lam visoi bake esu afoezobe Yesus tom gaesu nom esu neàdi Am anekehà meida kidadesu paku do. Labi Am anekehà meida neo kidadesu paku do. Labi Am naba bakamta modesu paku do. Labihadume neàdi vi vuu vousai bak bumata ab nom zisuham. Labi zisu teudi neàdi ame meo dam labe iho Yesusam so laba amu lab vihilaha sue lam, “Amat vaela?” lahame ibi iho fi mam baket modeme neàdi ab vadaham.
25. Damat Yesus ve ut tetehesuhunaso laba paku doho di lam gi dihambe jam sembilan doho bak.
26. Labi meit aame ozo, “Da nim ana im modehe bake damat vàlu otehela?” lahame damat ut gaheba ve meo dam gagome toeme neàdi Yesusam ohu vazidazi toma zoho laba taasu paku vi dou esu. Ame ut gaheba lam im nehasu toe. DA NIM ABO YAHUDI DAM VUUSU IM VAHOKEDAM BOEHÀDA AM TAME, lahame toeme ab taasu esuham bak.
27. Labi Yesus ve paku doho di lam ame meo damat ut tetehesuhunaso meida ahim neo visoi dam mei nazoh vietomoadume vou itam dam ahim lam vame Yesusat modehe bakti ulohona modi paku dodume neàdi Yesusam anekehà ahi totti soi totti modesuhu laba bak bumata ab nom zisitdaham. [
28. Labihadaha bak lam vi ozom di gi meit Alat Vameadaha Im Toedahana laba im meida nim abo meit Alat Gagu Fihasi Vimteme Oluhu Dat Boehàda labe Aho ba modem im nasi ozobohudi nehi fet toeme esuhu im nim ab modi imbodeham bak. “Ame da lam ozom di faina meedamda ozomomda am bak.” Lahame fet toeme vàmadi esuhu labe ame bak lam ab modi imbodeham bak.]
29. Labi Yesus taasu modesdam di labe dam duada zi labe labohotedam labe tom aame ohu bobodam labe nehi tozome gagoida. “Làhà, ‘Ame Fihasi Ala Bake Vou Baedam Num Vàmteabu lam Om feàda modem labe Ohomo beodume fa faamome seti usi làteladi fa mo tame,’ lahame gagodamda am taia? Làhà Ohomo naedat soat it vausu taho Ohomo paku laba it vi vuu veioi usemeta,” lahame tozome labohotida.
31. Labi laha ame di labe damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu laha Yesus bake feàtàom labe ihimo ot gagoi ot gagoida. “Ea, Da nim mei modi fa neàdemda ame. Akati Ahamo naedat taho it vabieme neàdem vaba mode?
32. ‘Alat Gagu Fihasi Vimteme Oluhu Dat Boehàda Am am tame,’ lahamda Ahamo nasi paku laba it vi vuu veioi usi neàdemeta. Labihamta iho aame, ‘Imboo?’ laham bak ozome tu vuzehem bak,” lahame tozome ot gagoida. Labi laha ame di labe dam mei nazoh vadam dam abo Yesusam obe laba tau paku doho dam behàsu labe vedi fa Yesus bake laha feàtàda. Labihada.
33. Gi labihadume ala tomaleha bak ahebu ala fauhaedam bak seti ab aibuleham. Labi aibulehemu vou faodameilahit ala vakidem bak fuha fa ab fauha neàdeham.
34. Labi jam tiga abo ala vakidehe di labe Yesusat bisteat Ibrani dae, “Eloi, Eloi, lama sabaktani,” lahame buteme ab geham. (Ame lab gagoho bak lam gi, “Eba vuusdam Ala oa, Om akati Em vou esmohela?” lahame gagoho imot moz.)
35. Lahame dam Yesus paku doho bak laba netàdi dozeadaha dam labet ame lab buteme gehe bak lam aihemu vedi neha, “Laha vi aima. Da lam gi dat ahamda Alat vameadaha im aime fa dam bake ahate vameaidahada Elia am ee gagoda taia?”
36. Lahame labi gagohemu meit emoeme le kohu lasobuti ulohona visoi anggur oo vaksa àhàkebuna laba nom ekeme neàdi ut aaso bohu laba taasu giame, “Yesusat fà udese,” lahame Yesusam aha laba tom fi sulo gago, “Imo vao nim lu udeme aamase. Da labe gagoho bak lam imbodi, ‘Eliat aba vi tau fa veioi vou useo?’ laham bak aasu vou faose.”
37. Labihadameilahit Yesusat neo bisteat buteme ab geham. Labi etei lab buteme geheda labe Yesus ab fi sivai eloham.
38. Labi fi sivai eloho di labe ame Fihasi Ala Bake Vou Baedam Num Vàmteabu donibu laba tetehesdam sue tamzohobuna baa lam ahamo ahoba zoho iube fàsi nom vou li busbe nom zoho iuba ab fi tatoham.
39. Labi modeha ame meo dam zi labe iba vuusdam boehàda lam abo Yesusat avaesdam totbaho laba duzuhuda labe aho Yesusat geme fi sivai eloho bak aahemu ab gagoham. “Làhà imbote. Da nim abo Alam Adàt modem bak,” lahame ab gagoham.
40. Labihadam di labe lahi dua totbaho labe vaitesu dozeadume damat Yesus paku dome meedam bak laba vou aasda. Ame lahi zi lam amu Galilea bak labe faasi Yesus bake tau godam labe na vou modetedume fa kota Yerusalem niba vou fuhu lahi zi am. Ame lahi zi lam nam meida Maria abo num debu Magdala labet lehe nam am. Labi nam meida abo Yosesti dat baseà Yakobusti im faaha oi Maria am. Labi nam meida Salome am. Labi lahi amomoi totbaho zi am. Labihasu gi vaitesu dozeadume vou aasda.
42. Damat Yesus ve ut tetehesuhunaso laba esu paku dome eloho digat lam gi Yahudi dam labe ibi iho dihasi gi azibe im digat hari Sabat fulo modemu iho na modeme ahumdem digat eloho bak. Làhàmu disi aibulelo vabalehe di labe dat Yusufti ee fatahivahada abo num debu Arimatea laba azihida labe aho Yesus koei visom bak ozome fa Pilatus bake gagu ailo ab laham. Ame da Yusuf lam ame Yahudit ibi iho modem im gagu vàmadi esum dam debu laba taumda bisi dam totbaho labe ibi iho vou baedamda meida am. Aho laha Alat Gagu Fihasi Vimteme Oluhu Dat Boehàda lam ba li dam bake vuusu im vahokedam bak lam, “Adi diat modela?” laham bak vou faodamda am. Lahamda labe iedehe vab dàt Pilatus bake le Yesus koei baumsum bake le ab tauledamam. “Im etei Yesus koei ve vou le baumsulo oba gagu ailo leho.”
44. Lahame labi gagoha Pilatusat aiha, “Yesus akati kehàm vaba elohela?” lahame ab aime àvodeham. Làhàmu, “Imboo?” laham bak vi ailo am meo dam vuusdam boehàda abo damat Yesus ve ut tetehesuhunaso laba esu paku doho bak vou aasdamda laba ab gagome leham.
45. Lehemu gagu aiha imbodehemu Yusuf bake ab gagoham. “Lo, le visoi vou le baumsum neàte.”
46. Làhàmu Yusuf le sue fabebu vabna ee gagom linen lahamda lam doit ve am dam totbaho lamti laha labe le Yesus paku doho bak laba zisi ame koeiso vi vuu vuazi vou usi aho vou lehe sue baana lam visoi Yesus koei ab giaham. Labi giame neàdi ke bumat alimda amu kebitem laba meit fet sime bumataeme esuhuna ahum laba Yesus koei lam ab vou oli esuham. Labi vou oli esu neàdi fa futoi ke baana am doo laba tusum ulohoda lam vou ogi ogialame tusu baguamdi esu neàdi ab vou esmozi ladaham.
47. Labi ame di labe Magdala labe lehe nam Mariati am ee fatahivaha nam Maria meida abo Yoses labe am oi lamti labihasu Yesus koei vou oli esu ke baana vi baguamdehe bak lam ame lahi behàsu lam gi laba tau aasda.
1. Labi hari Sabat abo Yahudi dam labe ibi iho gi azibe im digat foli dihasi dihambe aibubet hari Minggu labe Magdala labe lehe nam Maria lamti am ee fatahivaha lahi abo Yakobusam oi Maria meida lamti nam meida Salome lamti labihasu iho minyak ahana neàna doit ve ibi iho Yahudi damat modi baleàhà bak ozome Yesus koei noilo ame koei esuhu ke bumat laba ab laham.
3. Ladam di labe im ot gagoia lada. “Uho ozom, iho laba fum di amat ke baana lam ogizi osoktoi im oedà?” lahame ot gagoia lada.
4. Labi ladume lafusi tom aaha ame ke baana lam gi ogizi osoktoi modesdamna ab aaham.
5. Làhàmu ame ke bumata vi oli aaha dat bas sue sona ahoba dusumna bohu fauha meona fako iedemna dusu ahi tot laba aidamna ab aame udovai àvodeham.
6. Labi modeha ame dat bas labe lahi laba ab gagoham. “Um a iedemule. Em ozobohute. Um gi Yesus Nazaretda damat ve ut tetehesuhunaso laba esu paku dome elohoda niba nabitaom bak em ozobohu bak. Lahana ame Da nib kaio. Am eloho bak labet Alat modi fa ahedi usaho. Nasi li aama. Damat ame Da koei vou oli esuhu bak neam bak.
7. Uho aame neàdi fa futoi Petrusti Yesus bake vi tau meedam dam totbaho lamti le gagole. ‘Am eloho bak labet Alat modi fa ahedi usai Galilea bak laba nasi le dam labe ba vulem bake vou faodalo. Ame dam labe laba vule Am alihi neo aa tame. Abo Aho amu ahe diat ame dam laba fet gagu esuhu bak ab imbodelo modemam bak,’ laham im lam nasi le gagole.”
8. Lahame labi gagohemu ame lahi labe, “Akatihasu modem im labihahela?” lahame vabi gi iedi faa gukeom labe ame ke bumat labe futoi vou esmozi fa ab emoedamam. Emoedam labe le lafusi iedem lahasuhu labe iho etei aihi im lam taho dam bake fi dem kai. [
9. Labi hari Minggu dihambe labe Yesus Am eloho bak labet Alat modi fa ahedi usaha di labe Aho ahamte tàhàda Magdala labe lehe nam Maria am. Gi Am koei esuhu ke bumat labe am doo obe laba Aho Maria bake ab tàham. Ame Maria lam amu setan tujuh am ahu oedume veimadahemu Yesusat fa gagu futodume ilidaha nam am.
10. Lahaha nam labe Yesusam alihi aame neàdi fa laha labe le aaha Yesus bake tu vuzehehe dam totbaho labe Yesus eloho bake medaomna ab le aaham. Labihàmu aho le aaha bak lam ame dam laba vameadaha dam gi tozome mouda.
12. Ame digat zoho labe neo Aba tu vuzehi meedam dam meida behàsu labe iho kota Yerusalem vou esmozi bàhàgo goomna neo tàh. Lahana ame bak laba tàhà di am dauha aba amu modesuhu bak fa veimdi fa amomoi modesuhuna tàhà labe dam lam, “Yesusat mode?” laham bak vabile.
13. Lahana gi ba ozobohudi neàdi im dam totbaho bake le, “Iho Yesus neo vi aaho,” lahame vameadume modeha im dam zoho laha neo gi tozome mouda.
14. Labi ba neo Aba vi tau meedam dam sebelas labe iho na vahi àlo meedam di labe Yesusat neo lehe bak aaha vabna ab li duzuham. Labi li duzu dae meobeat im ab vahokedamam. “Um akati Eba mahate tu vuzehem vaba mode? Um akati Eho eloho bak labet Alat modi fa ahedi usai Em alihi meia fi hemu ame dam labe fa uba li vameadahana um akati ohu aotebuli gi tozome mohela?” lahame im vahokeda.
15. Labi im vahokedume neàdi im meida neo vi vameada. “Uho nasi Eho meedaha Im Neàna lam dam bakda ahebu vou vameatedale.
16. Uho le ame Im Neàna lam vou vameatedameam meit Eba tu vuzehi valo baptislemeam làhà ame da labe aba aho faina meedàmu Alat aba beom bake Eho soat vausu fa vei neàde tame. Lahana meit ame im lam aihina vedi fa Eba tu vuzehem momda lam Alat ame da labe aba aho faina meedam bak lam faatom vaba beoda tame.
17. Labi laha dam Eba tu vuzehi meedam dam lam, ‘Alat iba modi im dedamali ame bak meedà?’ laham bak lam damat fet aame ozobohudem bake im nehasu la modi le modida tame. Eho gagu im dedamali mei ahu oli veimam setan mei setan mei laba gagu futodume ilidam bak ame. Labi Alam Aha Nutabe Neàna labet modi vizi naedat it aim biem dae abo dae mei dae meime vameadam bak ame.
18. Labi ame dam totbaho labe laha iho ozba vabi vom di ba veeme elodam vabak ame. Labi laha vao obat mei elomna ehena vabi udem di ba elom vabak ame. Labi ame dam labe laha dam gaileheda laba, ‘Alat modi fa neàdese,’ lahame im anekehà odosu tom gagomeam fa neàdem bak ame. Labihasu ame baket vi meeda tame,” lahame ab it vameadaham.
19. Lahame im Boehàda Yesusat Aba vi tau meedam dam laba im labihasu it vameadume neàdi Alat Am vousai asum ahoba iuba vou tom ilu Alam ahi totbaho laba nusu Am Ai bake tau na ahebu ab vuusdamam.
20. Labi tom ilu setehemu Aba vi tau meedam dam labe ame Im Neàna lam bak iudu iuba le vou vameateda. Bak iudu iuba neo le vou vameateda. Labihada. Labihadam di labe Boehàda Yesusat ame dam laba modi teudehe labe ame im lam ab vou vameatedamam. Dam giida labe aame ozo, “Làhà ame dam labe etei iba vou li vameadaha im lam Alat gagu oluhu im ame?” lahame ozobohudem bake ame dam labe iho Im Neàna vou vameatedam di lam Alat ahit dam laba modi im dedamali na damat ihimo modem biem im feàna lamti ab la modi le modidamam.]
1. Teofi lusoa, Yesusat Aho iba bak niba meedume esuhu im lam dam dua totbaho labe ame im ahum lam sunit toedume esuhu bak.
2. Ame dam labe sunit iho toedahada lam ba im meidem kaio. Abo Yesusat ahamte faasi vou mode ladaha im lam dam na aame vou vameatedaha damat fa iba dam badate vou vamea usehe im lam iho aihi bak lamti gi uloho imot modem bak.
3. Labihadamdaleàmu eho dam iudu iuba le Yesusat ahamte meedaha im lam aiti aitida. Labi ame im toedume esuhu sunit lam laha aame ozoida. Lahadume ame im lam ahebu ehemo iademe vi ozodume ozobohudehedaleàmu, “Eho laha im ebe eho ozobohudehe bak neo toedume esum neà bak,” lahame ozome ame im bohu nim toedume oba ab lu esulo modemam bak.
4. Dam amomoit oba amu gi ahat vahokedaha bak lam, “Imbote,” lahaha bak lam eho iademe im ahebu neà vamdesu vameadam bohu toedume neàdi oba lu esulo modem bak. Neàde. Labi ame Yesus labe Aba Aho meedaha im lam gi nehi meedaha bak.
5. Herodes Yudea bak laba boehàdateli dam vuusu im vameadam di labe Zakaria laha damat Ala bake lomna ve vua vahudam toheda meida am. Ame da Zakaria lam Abiat vou faat leheda meida am. Abia laha amu damat Ala bake lomna ve vua vahudam toheda am. Labiha labe aba aho vou faat lehe dam gi ame baket meeda. Labi Zakaria am nam Elisabet aba debu zoho vou faat leheda ahamda Harun am. Harun laha amu damat Ala bake lomna ve vua vahudam toheda am.
6. Labi Zakaria am namti im meedam di Alat aaha gi im Aba Aho gagohona fi hasi vamdesu meedamda am namti am. Labi laha Alat, “Nehame meedale,” lahame gagu esuhu im lam ahebu iademe ulohodesu meedamda am namti am bak. Ba meit neha, “Im lada lam vooho,” laham bak ba gagom vabda am namti am bak.
7. Ne lahana Zakaria am nam Elisabetti gi aona behàsu aida. Labi laha Elisabet gi maina data vabna azietedam bak.
8. Labihadam di lam Abiat vou faat leheda meida Zakaria labe am dam totbahoti fa damat Ala bake lomna ve vua vahudam tohe damalelo ototo vaiam bak fuhudaleàmu Zakariat ame bak lam modelo am dam totbahoti Fihasi Ala Bake Vou Baedam Num Vàmteabu laba ab ladaham. Labi le odosi ame bak lam meedume modeha, “Amat oli na ahana neàna vuat usime vuahubulela?” laham bak modelo ame dam labe im tai ahobada vou mode usehe baket modeha Zakaria ab modeham.
10. Labihàmu Zakaria ame na vuat usime vuahubulelo ame Ala bake baedam numa ab oleham. Labi oli ame na lam usime vuahubuledam di labe dam bako laba bakamta dozeadaha dam giida zi labe laha tom gagoda.
11. Labi meedameilahit Alat Am im gagu vou usemda meida labe na ahana neàna ohusuhu bak ahi totbaho laba ab duzuham.
12. Labi laba duzu modeha Zakaria aame ab àvodeham.
13. Làhàmu Alat Am im gagu vou usemda labe Zakaria bake ab vameadaham. “Zakaria, om bisi a àvodemule. Oho tom gagoho bak lam Alat ab aiham bak. Labi laha om nam Elisabet maina aolehena Alat uba tau daboseà fa tame. Labi ame daboseà lam faasi ee talulo modemeam, ‘Yohanes,’ lahale.
14. Labi ame data lam faasi ba buduali Alat ozomta, ‘Feàda am bak,’ lahame ozoho labe om abo deeleha vàhàde tame. Labi ame data lam etei faahemu dam amomoi zi laha vi aame oba tau deeleha vàhàde tame. Ame data lam om nam nibeso laba ahamte adatelem di labe faasi Alat Am Aha Nutabe Neàna labet ame adatelehena laba modi vizi vuusdam labe gi teudi Alat Aba Aho ozohona bohu vuusu meeda tame. Labi am ba anggur loba oo vaksa dam bobim vao lamti na vaksa dam bobim vao amomoi lamti ba udem vabak.
16. Labi ame data lam ba buduali dat ahamda Israel labe aho vou faat lehe dam debu abo Yahudi dam laba aho im vou vahokedam bak labet modi ame dam dua totbaho labe fa Boehàda im tai ahobada tu vuzehi meedam Ala laba fa neo tu vuzehe tame.
17. Labi laha Alat aham di iube Am Aha Nutabe Neàna labe fa dat ahamda Alat vameadaha im aime fa dam bake ahate vameaidahada meida Elia bake modi vizi teudehe bakti ulohona Aho ame data laba fa ame baket neo modi vizi teudi nasi olulo modem bak. Labi Boehàda ba neo vuelo modem bak. Ame data budualehezobe im nehasu modem bake Alat nasi olulo modem bak. Dam amomoi bake le im vahokedam bak labet modi ame dam busao ziti ame data ziti im ahu ot fakiam bak fa vei neàdi vahelo modem bak ame. Labi laha dam Alat Aba Aho gagu esuhu im lam aime uledi vamdesu meedam vab dam laba aho modi fa damat ame im lam aime uledi vamdesu meedam dam laba fa vahi ame im lam uledi vamdesu meedam bak ame. Labi ame da lam ame baket meedàmu Boehàda ba gi ame dam zi lam vabiedume neàdehena ahum le aam bak. Ame dam zi lam gi Am lem bake faodamna le aam bak,” lahame ame im lam Alat Am im gagu vou usemda labe Zakaria bake fet ab vameadaham.
18. Labi fet vameadume modeha Zakariat fa gago, “Ne, em abo aole. Labi em nam laha aole. Lahana oho gagoho bak lam, ‘Imboo?’ laham bak em akati ozoela? Eba ame bak fet vouhole.”
19. Làhàmu ame Alat Am im gagu vou usemda labe fa gago, “Mm, em abo Gabriel am bak. Em abo Alat vameadaha im aime vou uselo Alat aidam obe laba duzu vou faodamda am bak. Labiha labe Alat eba neha, ‘Ame Im Neàna nim vameadale,’ lahame eba gagu ab oluham bak.
20. Eho oba fet vameaha im nim ba imbodelo modem bak fum diat abo imbodem bak. Ne lahana om em im nim aime vuzehem vab labe om ba im gagom vabi fa ulaihàbulem bak. Om ulaihàbuli modesdamehamdi eho oba fet vameaha im nim imbodehezobe om ba fa dae lem bak,” lahame Zakaria bake ab vameadaham.
21. Labihadam di labe dam bako dozeadaha dam zi labe, “Zakaria akati taho futom vaba ame Fihasi Ala Bake Vou Baedam Num Vàmteabu laba bisi kehàdàla?” lahame vabi vou faoda.
22. Labi vabi vou faodameilahit Zakaria ab futoham. Futoi modeha am im gagom vabili gi daleà doudam labe gi anekehàt dam bake im ab vameadamam. Labiha labe dam bakoda zi labe ozo, “Làhà ame Fihasi Ala Bake Vou Baedam Num Vàmteabu laba Alat ahit ame da laba modi edehesi na aho aamna aame dae vabalehe taia?” lahame ab ozoham.
23. Labi Zakaria gi dae vabna labihasu ame num laba ame na meedume meit ot vam bak neo fuhuzobe fa am numa ab laham.
24. Labi am numa fa le aidam di labe am nam Elisabet modeme ab zubuleham. Zubulehezobe Elisabet ahamo aba it ozoda.
25. “Em nib zubulehe bak nim Alat ab modehame? Etei nim Am eba ab aame faobekehame? Labi em mailehe bak damat eba feàtàm bak fa ab faatohame?” lahame it ozodume betea aidume ala ab auoholeham. Am zu koe lahasuhuna futoi gohatemeam damat aba feàtàm bak labna zohàme abo am zu dualehezobe ba futoi gohatelo gi betea aida.
26. Labi ala enamli esdameilahit Alat Am im gagu vou usemda Gabriel laba neo gagu Galilea bak labe aba zoho num debu meida Nazaret laba damat na vahedam nam soaona abo damat modehe vab nam laba ab oluham. Ame nam soao labe am ee gagom Maria. Labi ame nam soao lam am valo na vaheme esdamda ee gagom Yusuf. Dat ahamda Boehàda Daud labe aho vou faat lehe dam meida am.
28. Labi Gabriel labe aho nam laba nom ilu meia ahamte tahi gagom im ab gagoham. “Om abo neàte. Om abo Alat bisi deeli im neà bak modi esuhu nam om am bak. Labi Alat vou aasdam nam om am bak.”
29. Lahame labi gagoha Mariat aba, “Neàte,” lahame gagoho im lam àvodi, “Eba akati modemna labi gagohela?” lahame vabi vi ozoda.
30. Vabi vi ozodàmu ame Alat Am im gagu vou usemda labe gago, “Maria, om bisi a àvodemule. Alat bisi deelehe nam om am bak.
31. Om abo ba zubuli daboseà faa tame. Faasi ee talulo modemeam, ‘Yesus,’ lahale.
32. Am abo feàda modelo modem bak. Labi Alat Asum Ahoba Tom Novaha Bak Laba Azihida Feà Datebo labe ame Data laba gagom di, ‘Am Adat,’ lahalo modem bak. Labi ame Data labe Am tai Daud aham di iube boehàdatelehe bak lam Boehàda abo ubu uho vou baedam Alat fa neo ame Data laba modi Boehàdatelelo modem bak.
33. Labi Boehàdateboli um tai ahamda Yakub labe aba aho ba vou faat ledaha dam zi nim Aho vuusu im vahokedam bak gi labaha bohu vuusda tame. Ba setem kaio,” lahame fet ab vameadaham.
34. Lahame labi vameadume modeha Mariat fa vi ailo ab gagoham. “Ne, em dat vab nam gi soaona aidam nam oho gagoho bak akati em modi zubulela?”
35. Lahame labi gagoha ame Alat Am im gagu vou usemda nibe fa gago, “Om zubulem bak gi neham bak. Alat Am Aha Nutabe Neàna labet oba vou nom ilu tame. Labi Ala Bisi Feà Datebo labe Am teuna oba modi vizehe labe om zubulem bak. Labiham labe data oho ba faamda lam gi fai bak vabda Neàboda abo, ‘Alam Adat,’ laham bak.
36. Ne, um ame lahi meida Elisabet gi aolehena zubuli data faalo modem bak. Abo damat amu neha, ‘Mailehe,’ lahame feàtàdam nam zubuli ala enamlehe bak.
37. Na damat modem biemna Alata modem meo bak.”
38. Lahame labi vameadume neàdi Mariat fa ab gagoham. “Lo, em Alat na gagom ule nam am bak. Eba ame bak lam modem neàte,” lahame labi gagu modeha ame Alam im vou useheda labe Maria ab vou esmoham.
39. Labi Maria gi kehàm vababoà usai am nazoh dek ateme Yudea sibu num debu meida laba ab emoe laiteham.
40. Labi laisi le lafusi Zakariam num laba oli Elisabet bake si, “Neàte,” lahame im ab vameadamam.
41. Labi Elisabet Mariat, “Neàte,” lahame gagoho bak lam aime modeha Elisabet data asum ad nibeso labe ab nigoham. Labi Alat Am Aha Nutabe Neànat Elisabet bake modi vizi teudehe labe aba ab vuusdamam.
42. Labiha labe Elisabet dae duana faasi Maria bake im ab vameadamam, “Ee làhà! Alat lahi totbaho laba deeli tauhu vabna om vàmteata Alat neà bak ab modehame? Labi oho ba faam data lam Alat laha deeli im neà bak ab modelo modem ame?
43. Labi oho ahamte eba, ‘Neàte,’ lahame gagoho di labe em nibeso ad niba datat aime deeli nigoho. Labiha labe eho vi ozoha, om abo Alat iba Gagu Oluhu Dat im Boehàda ba faaseo modem namet modem labe datat em zu ad niba deeli nigoho. Lahana om labiham namet eba feà vab namelehe bak em abo àvodeha.
45. Alat Am im gagu vou usemda labe oba fet vameaha im lam oho nehame vi ozo, ‘Ame im lam imbodem bak,’ lahame labi vi ozome vuzehe labe Alat oba deeli im neà bak ab modi esuham bak,” lahame ab vameadaham.
46. Lahame labi vameadume neàdi Maria Ala bake vou baedam labe Elisabet bake nehi vameada. “Em abo ahu vàmadi Ala bake vou baedam bak.
47. Alat eba Soat Vausu Fa Vei Neàdehe bake em abo deeleho.
48. Em gi boehà vab nam Alat Am na gagom ule namet modemnàme Aho ba eba aalahigeàmoho vabak. Abo eba aame faobekehe bak. Labiha labe em abo Ala bake deelehe bak. Etei di nibe faasi dam eteida debuti dam bada debuti ahebu vazisi eba vi ozome nehame Ala bake vou baedam bak. ‘Em vàmteata Alat bisi deeli im neà bak modi esuhu nam am tame,’ lahame Ala bake vou baedam bak. Alat Na Debu Modeheda feàda eba na iho damat modem biemna eba modehe labe dam eteida debuti dam bada debuti ame dam duada zi labe labi vi ozome Ala bake vou baedam bak. Ala bisi neàbodeheda vàmtea am tame.
50. Meit Ala bake, ‘Om abo feàte,’ lahame ozodume ahu adat iedi modemda laba Alat aame faobekesi vabiedam meo bak. Aho meia aame faobekesi im neà bak meedam bak abo feàte. Amu aham di iube ame bak lam faasi vou mode usdume etei niba ab vou fuham bak.
51. Alat na feàna modehe bak lam ba vasti modesdam vabak. Abo gi ahate tombali modesdam bak. Dam zi labe ihimo iba it daetbadume, ‘Nehame modese,’ lahame vabademsu meedam bak lam Alat ahit modi fa fi goaitoho bak. Labi dam labe ibi iho ozome modelo modem bak lam ba modi fi tatom vabak.
52. Labi laha dam bisi feàda boehàda zi lam Alat modi fa bisi feà vab damale. Labi bisi feà vab dam lam Alat modi fa bisi feà damale. Labihadam bak.
53. Labi dam na vab dam labe Ala bake neha, ‘Iba taule,’ laham dam laba Alat na neàna lodam meo bak. Ne lahana dam na duada laba Alat ba taum vabak. Gi saemea fa olum bak.
54. Alat abo aham di iube im tai ahamda zi laba nehame nasi fet vameadume esu. ‘Eho Abraham labe aho ba vou faat ladam damti aame faobekem bohu vuusda tame. Abo ba setem kaio,’ lahame labi fet vameadume esuhu im lam Alat ba fa vabiem kaio. Abo gi ozobohu lahasdam labe Aho iba Abraham mekehà abo Israel labe aho vou faat lehe dam abo iho Alat na gagom ule dam zi niba Aho iba tau aame faobekem bohu ab modesdamam bak.” Lahame Mariat labihasu vou baedume ab neàdeham.
56. Labi Maria Elisabet bake tau azibe ala làteladi fa aba bake ab laham.
57. Labi Elisabet am data faam bak fuhemu am daboseà ab faaham.
58. Labi ame data faasi modeha Elisabet ab deeli vàhàdeham. Labi dam totbaho abo am num abada obe laba tau vahi esdam dam zi lamti aba mei dam zi lamti labihasu Alat Elisabet bake lab aame faobekesi im neà bak tauhu bak lam aihemu laha Elisabet bake tau ab deeli vàhàdeham.
59. Labi ame daboseà faasi vou id lame usi delapanli Yahudi dam labe ibi iho daboseà faasi modem di laso aubehà sokba ukbom baket modi ame daboseà laba am aiam ee, “Zakaria lahame taluse,” lahame meeda.
60. Lahana am oi Elisabet mali gago, “Vabo. A labi talumule. Gi Yohanes lahame talule.”
61. Lahame gagoha ame dam labe gago, “Mm, ne um amu dam ubuda ee amu labi taluhuda vabak.”
62. Làhàmu dam labe ame daboseà labe am ai bake le anekehàt im ab vameadamam. “Om daboseà iho ee akatihasu taluela?” lahame anekehàt im ab vameadaham.
63. Làhàmu Zakariat, “Aba na toemnavat vou lele,” lahame anekehàt im ab vameaham. Labi Zakariat ame na ve ab toeham. “Em daboseà nim am ee gi, ‘Yohanes,’ laham bak,” lahame ab toeham. Labi modeha dam labe ab aame àvodi meedamam.
64. Labi modehat Zakaria fa ab daeleham. Labihàmu aho fa Ala bake ab vou baedamam.
65. Labi Zakaria am obe laba tau vahi esdam dam labe aho lab baedam bak laba aime àvodi anekehàso ab gaadamam. Labi ame im lam damat gi kehàm vababoà modi vou fi det lame Yudea sibu num debu bak ahebu ab uloholeham.
66. Labi ame im aidaha dam zi labe nehame azi vi ozoda. “Ame daboseà lam Alat tau vuusdam bak. Lahana am ba buduali akatihalo modem dàt mode?” lahame dam num debu meida iube azi vi ozoda. Dam num debu meida iube azi vi ozoda. Labihada.
67. Labi Alat Am Aha Nutabe Neàna ame daboseà labe am ai Zakaria bake ab modi vizeham. Labi modi vizi teudehe labe Alat Am Adat Yesus ba faam bak Zakaria bake amu fet gagu am ozobohudehe labe im lam ab vameadamam. Aho nehame vameada.
68. “Imo Boehàda abo im Israel damat iho vou baedam Ala abo Na Debu Modeheda laba vou baedase. Neham bak. Dat ahamda Israel labe aho vou faat lehe dam nim dam mei zi iba fakem dam labe iba simtedi iba isi olum malehemu Alat etei Am na gagom di uledi meedamda meida abo Boehàda Daud labe aba aho vou faat leheda meida lam iba soat vausumda feàda iba olu im fa ab isi oluham bak.
70. Nehaha bak. ‘Alat Aho ba ame bak mode tame,’ lahame nasi fet gagu vàmadem im lam aham di iube Aho vameadaha im aime fa dam bake ahate vameaidaha dam laba Aho ahit modi ozobohudi ame im lam aime fa ahate ab vameadaham bak.
71. Ame im lam Alat aham di iube nehame fet vameadaha bak. ‘Aho dam mei zi iba ahate fakehe dam iba beolo modem bake Aho iba soat vausu tame. Labi iba adat fakehe dam labe iba fai bak modelo modem bake Aho iba soat vausu tame,’ lahame aham di iube ame dam laba fet vameadume ame dam labe fa ahate vou vameatedaha bak.
72. Alat Aho aham di iube im tai ahamda debu zi laba neha, ‘Eho um ba vou faat ladam dam ziti uba aame faobekesi im neà bak tau meedam bohu vuusda tame,’ lahame fet vameadume vàmadi esuhu bak lam Aho fa vabiem vaba abo it ozome imbodelo modemu Aho gi iba dam bada niba ab aame faobekesi meedamam bak.
73. Alat Ahamo aham di iube im tai ahobada Abraham bake nehame fet vameadume vàmadi vaitoho bak. ‘Iba ahate fakem dam mei zi iba beolo meedam bake Aho iba soat vausu fa vei neàdeda. Labi Aho iba soat vausum bak labet modi Aho iba gagohona iho meedam di im ba meia iedem vaba gi ule neàt ame bak bohu meeda. Iho ame bak lam meedam di im gi Alat Aba Aho gagoho bak laba ulohodesu ahu vàmadi abo Alat deelem bak laba ozome iademe ahu vamdesu meeda. Im gi labihadume elodume sedda tame,’ lahame Abraham bake fet vameadume vàmadi vaitoho bak.” Laham im lam Zakariat ab vameadaham.
76. Lahame labihasu vameadume neàdi Zakaria labe am daboseà buduali ba meedalo modem im lam Alat ahit Zakaria bake modi ozobohudi am daboseà laba aasu im faasi ab vameadamam. “Daboseà oa, Alat Na Debu Modeheda Bisi Feàda labe ba oba gi nehi gagom bak. ‘Em im aime fa dam bake fa ahate vameaidamda om am tame,’ lahame gagom bak. Oho im nehasu meedam labe labihalo modem bak. Alat amu nasi om olu dam bake le neha, ‘Nehame meedale,’ lahame vabiedume neàdehena ahum Boehàda ba vi vulelo modem bak.
77. Alat om olu oho gi dam bake le im nehasu vameadalo modem bak. ‘Alat Am ahu nemahuba neà labe iba bisi aame faobekesi im neà bak tau meedàmu Aho Gagu Olulo Modemda ab nom ilulo modemam bak. Abo gi dihahana ozomomna modelo modem bak. Aho gi imbo bak iba vameadam labe imti Alati vaitesu bohu vuusdam bak lam abo iho aibuna azihina ozomom bak niba Aho modi fa fauhaeda. Labi laha, “Akati modi im Alati fa vahela?” laham bake iba neo vahoke. Labihadalo ame Da iba ab nom olulo modemam bak. Labihàmu im Yahudi dam nibe iho faina meedàmu Alat iba beolo modem bak lam Aho gi vei mu fa faamome vei neàdedàmu Aho iba beom vaba soat vausu fa vei neàdedam bak ehete,’ laham bak lam im Yahudi damat biem bake oho nasi li iba modi fi gatelo modem bak.” Lahame Alat Zakaria bake ahit modi Am Aha Nutabe Neàna labe vizi neàdehe labe Zakariat im labihasu fet vameadume ab esuham.
80. Labi Zakaria am adat Yohanes nim laba vou azim zidume buduali im ab ozobohudedamam. Labi im ozobohudi bak aotba baa bohu dam vaba alim bak laba le azi faobe aho dat ahamda Israel labe aho vou faat lehe dam totbaho laba Alat vameadaha im vou vahokedam bak fuhuzobe bak lam vou esmozi lalo faoda.
1. Labi Yohanes faasi fota àdesdume Kaisar Agustus labe aho Roma dam vuusu im vahokedam lahasuhu di labe aho nehi am dam laba vameada. “Um ahebu dat mei ee toedamda iuba la. Iuba la. Lahadume ee gagodume toedale. Eho vuusdam dam ahebu delo mozo,” lahame ab vameadume oluham.
2. Ame lab vameadume oluhu im lam Siria bak laba azim dam vuusdam Gubernur Kirenius labe aho dam vuusdam di labe alimeat modehe imot modem bak.
3. Labi vameadume oluhemu Kaisarleheda labe aba aho vuusdam dam abo bak iudu iumti bak iudu iumti ahebu im ee toem bake im tai ahamdat azihi num debu bake ab ladamam.
4. Labihàmu Yusuf laha Galilea bak labe num debu Nazaret vou esmozi fa Yudea bak labe num debu Betlehem laba ab laham. Abo am tai ahamda Boehàda Daud labe am faaha num debu bak laba Yusufat ozoha, am Daud vou faat lehe mekehàda amemu Betlehem laba ab laham.
5. Aho na vahedam nam soao zubulehe nam Mariati Betlehem laba ee toedam bake ab laham.
6. Labi le azi modeha am data faam bak ab fuham.
7. Am data faam bak fuhemu daboseà datahida ab faaham. Labi faasi sue nasbe bohu giame teohet lemda im num kekehemu Maria am daboseà ousum biehemu gi fi ho na vahem beahuba laba am data ab ousuham.
8. Labiham di labe domba vou aasum dam Betlehem bàhàgo sibe baa laba domba zi aibut vou azi aasda.
9. Labihadam di labe Alat Am im gagu vou usemda meida labe damat aidam bak laba ab nom ilu duzuham. Duzuha Alat Am na fauhalemna feà labe damat aidam bak laba fauhali ogatehe labe dam fako ab iedeham. Labi dam labe ab udovai ab iedi modem faideham.
10. Labihàmu ame Alat Am im gagu vou usemda labe dam laba ab vameadamam. “Um a iedemule. Em im neàna uba vou leho. Eho vameadam im nim uho aime fa dam bake fi demeam um dam ahebu aime deeli vàhàde tame.
11. Etei di nim tai ahamda Boehàda Daud faaha num debu bak laba uba Soat Vausu Fa Vei Neàdemda etei faaho. Ame Da lam abo Alat Gagu Fihasi Vimteme Oluhu Dat Boehàda am tame. Abo uba vuusdam Boehàdatebot modem bak.
12. Um biem bake le nabime aameam sue nasbe bohu giame fi ho na vahem beahuba laba ousdam Data aameam làhà ame Data am tame. Labi eho etei uba gagoho bak nim, ‘Imboo?’ laham bak um aame ozobohude tame,” lahame ab vameadaham.
13. Labi vameadume neàdi modeha Alam im vou usi vameadam dam duada zi neo vi tau nom ilu dozeada. Dozeadume ame Data faaha bake ozome Ala bake ab vou baedamam.
14. “Imo Ala abo asum ahoba iuba azihida, ‘Abo bisi feàte,’ lahame vou baedase. Labi dam bake esuhu dam niba Aho ozome deeli fi me vaha dam lam Alati ot deeliame fa vahe vahedase. Labi laha im dam bakda nim Aho iba modi ot deeliame fa vahe vahedase.” Lahame Ala bake ab vou baedaham.
15. Vou baedume neàdi ame domba zi vou aasdam dam labe im domba ziti vou esmozi fa asum ahoba ab tom iluham. Labi modeha dam labe, “Imo Alat Am im gagu olum dam labe iba vou li vameaha im lam Betlehem bake le aamase,” lahame ot gagoiame neàdi ab usname emoeham.
16. Usname emoeme num debu Betlehem bak laba le nabime aaha ab imbodeham. Yusufti Mariati fi ho na vahem beahuba laba ousdam datati ab le aaham.
17. Aame neàdi ame dam labe fa dam duada laba ame Alat Am im gagu vou usem dam labe iba vameadaha im lam ab vou vameatedaham. Abo ame Data nim, “Ana Data modela?” laham bak vou vameateda.
18. Vou vameatedume modeha dam ame im aihida lam ab aime àvodeham.
19. Lahana Maria ame im lam ahebu im amu modemdati ba modemdati azi ahulat vi ozoda.
20. Labi ame domba zi vou aasdam dam labe aame neàdi fa ibi bake ab ladaham. Fa ladam di labe dam labe iho aihi bak lamti iho aaha bak lamti ozome Ala bake, “Am abo feàte,” lahame vou bae lada. Alam im vou usi vameadam dam labe iba vameadaha im lam imbodehemu Ala bake vou bae lada.
21. Labi ame Data faasi ba usi delapanli Yahudi dam labe ibi iho daboseà faasi modem diat laso aubehà sokba ukbom bak modem digat fuhemu ame bak modi ee, “Yesus,” ab taluham. Ame ee lam Alat Am im gagu vou usemda labe amu Maria zubulehe vab di iube taluhu ee am. Làhàmu ee, “Yesus,” lahame ab taluham.
22. Labi vou faome Yusufti Mariati fi ham bak neàdi fa vahem digat ab fuham. Labi ame digat fuhemu Alat amu dat ahamda Musa bake neha, “Yahudi dam daboseà alimeat faahada fi hasi Eba naedate lodale.” Lahame toeme esuhu im lada lamti labi, “Yahudi lahi daboseà faasi fi ham bak neàdi fa vahelo modem bake meki fi ho behàsu modeo, gi meki adatea behàsu modeo, vou le damat Ala bake lomna ve vua vahudam toheda laba lu ame da labe ve oteme Ala bake lole.” Lahame toeme esuhu im lada lamti labihasu Yusufti Mariati ame bak lam meedalo ame na behàsu lamti ame Daboseà Yesus lamti vame kota Yerusalem laba ab vou lalo meedamam. Ame Daboseà lam Alam im meedam datelem bake ozome gagu esulo ve ab vou laham.
25. Labihadam di lam dat ee, “Simeon,” lahame taluhuda kota Yerusalem laba aida. Ame da Simeon labe aho Ala bake ahu adat iedi Alat Aba Aho, “Nehame meedale,” lahame gagu esuhu im zi lam ahebu iademe vamdesu meedamda am bak. Alat Gagu Fihasi Vimteme Olulo Modem Dat Boehàda li Yahudi dam labe ibi iho faina meedam bak lam soat vausu fa vei neàdem bak lam, “Taho modese,” lahame vou faodamda am. Labi Alam Aha Nutabe Neàna labe aba modi vizi vuusu meedamda am.
26. Labihamda laba Alam Aha Nutabe Neàna labe amu nehame fet gagu esu. “Alat Gagu Fihasi Vimteme Oluhu Dat Boehàda lam om aame ba elo tame,” lahame fet gagu esuhu bak ehe bak.
27. Labihadamda laba Alam Aha Nutabe Neàna labe ahit modi Fihasi Ala Bake Vou Baedam Num Vàmteabu labe am ad oli aam bak tomba laba ab oleham. Labi oli aidameam aaha Yusufti Mariati am Data Yesus lam ba ab vou li vi oleham. Amu im tai ahamda Musat, “Nehame modele,” lahame toeme esuhu bak lam modelo ab vou oleham.
28. Labi vou oli modeha Simeon ame Data lam aame gut si sivai Ala bake ab vou baedamam.
29. “Ai Ala oa, Oho amu eba gagoho bak ab imbodeham tame. Dam bake Soat Vausu Fa Vei Neàdemda Oho bak niba oluhuda em fako nim ab aame neàdi asimdeham bak. Em Om im meedamda nim elom neàdehe bak.
31. Ame Dam Bakdate Soat Vausumda nim Oho gi Yahudi dam nimota modi olum kaio. Abo dam ahebu modi oluho.
32. Ame dam bake Soat Vausu Fa Vei Neàdemda nim abo uma usime fauhalem bakti ulohoda Am am bak. Labiha labe ame Da nibe Yahudi damat modem vab dam abo dam giida modi Obo Oho meedam bak ozobohudemda Am am bak. Labi laha ame Da im Yahudi damat faahemu dam giida zi labe fa iba abo dat ahamda Israel labe aho vou faat lehe dam nim Om dam niba, ‘Feàte,’ lahame vou baedam bak am bak.” Lahame Ala bake ab vou baedaham.
33. Labi vou baedume neàdi modeha Simeon ame Data niba labi gagohemu ame Data labe Am aiti oiti vi ozoha vabamu fa vei àvode.
34. Labi Simeonat neo Ala bake, “Ala Oho dam nim im neà bak modi esule,” lahame Ala bake tom gagoda. Tom gagodume neàdi Simeon Data nibe Am oi Maria bake neha, “Alat ahit modi dat ahamda Israel labe aho vou faat lehe dam abo Yahudi dam lam fàsi totbaho ame Data nibe Am im aim momda lam beo. Labi totbaho ame Data nibe Am im aime vuzehemda lam soat vausu. Labihasu modelo ahit gagu oluhu bak. Labi laha damat Ala biem bake, ‘Data nibe modi fi gatedase,’ lahame Alat ahit ame Data nim gagu oluhu bak. Labi ame Data nibe ame bak lam fet vouhome damat aameam dam dua totbaho labe aame ozo, ‘Ostam im,’ lahame aalahigeàmu feàtàme tozo tame.
35. Labiham labe ame Data nim damat ahu adat ozome vastem im lam Aho modi fa ahate tombalem bak. Labi ame im lam ahebu labi modem labe om ba aame ahu faidi admahem bak,” lahame Maria bake ab vameadaham.
36. Labi ame di labe Alat vameadaha im aime fa dam bake ahate vameaidaha nam ee, “Hana,” lahame taluhu nam laha ame num zoho labe lehe labe ame Data niba ab li aaham. Ame nam lam Fanuel labe am adnamat abo Asyer debu labe vou faat lehe namet modem bak. Labi aho amu dat ve vou aidume tujuh tahun foli modeha am dat eloho namet modem bak.
37. Labi am dat eloi maboeli azibehamdi abo delapan puluh empat tahun foli aolehe namet modem bak. Labi ame nam labe laha gi Fihasi Ala Bake Vou Baedam Num Vàmteabu labe am ad oli aam bak tomba laba Ala bake vou baedam di gi labaha digat ahebu dihasi modi dihasi modidahit vou disidam namet modem bak. Labi aho ame bak lam meedam di labe gi ozahit na àm bak mu Ala bake tom gagodam namet modem bak.
38. Labihadam namet ame Data aahemu nehame vameada. “Data nim faaha bak abo neàte,” lahame Ala bake vou baeda. Labi laha Yahudi damat neha, “Dam giidat iba simtedi beodam bake Alat iba Soat Vausu Fa Vei Neàdemda adi diat iba oluela?” laham bak vou faodam dam laba Hanat ame Data lam, “Akatihasu modem datat modela?” laham im lam ame dam laba vou vameateda.
39. Labi Yusufti Mariati ame Alat aham di iube Yahudi dam bake neha, “Nehame meedale,” laham im lam amu dat ahamda Musat toeme esuhu Im Feàna zi lam abo Yahudi dam labe ibi iho daboseà faam diat meedam im lam kota Yerusalem laba ab modeme neàdeham. Labi modeme neàdi ame Data lamti fa Galilea bak labe aba zoho num debu meida Nazaret laba fa ab vou laham. Abo num debu bak ibidate fa ab laham.
40. Labi fa le vou azibe ame Data buduali teudi im ab ozobohudedamam. Labi Alat Aba deeli tau vuusdam labe gi Aba im neà bak ab modi esuidamam.
41. Yahudi dam bada nibe iho im tai ahobada zi labe Im Adam Datahida Alat Oddaha Vabat Labohotehe Bake Vi Ozome Roti Fikidehe Vabna Àme Iziam di ee gagom Paskah laham di fuhudaleàmu Yusufti Mariati kota Yerusalem laba ladume ame bak lam modi fa leda. Labi ba neo ame bak fuhudaleàmu neo kota Yerusalem laba ladume ame bak lam modi fa leda. Labihada.
42. Labihadume Yesus bos di abo dua belas tahun lehe di labe Yusufti Mariati ibi iho ame na àm bak neo modelo kota Yerusalem bake ab ladaham.
43. Labi ladume ame na modeme àme izidume neàdi fa aba bake ab ledamam. Lahana Yesusat vedi gi kota Yerusalem laba aida. Yesusat gi kota Yerusalem laba aidamna Am aiti oiti vabi ab vou esmoham.
44. Vedi imti vahi ledam dam nim ame Data lamti vahi leda tiba vabi ledume le ab disiham. Labi, “Yesus akete?” lahame imti vahi ledam dam ibi mei dam ziti dam giidati dam laba gagu aiha, “Ame Daboseà nib kaio,” làhàmu nabidume modeha vi aaha aam vabamu laba izi dihasi Yesus setehe bake nabilo fa kota Yerusalem laba le nabime ab iham.
46. Labi izi dihasi neo nabime aaha Yesusat gi ame Fihasi Ala Bake Vou Baedam Num Vàmteabu labe am ad oli aam bak tomba laba Alat aham di iube Yahudi dam bake, “Nehame meedale,” laham im lam ozobohudi meia vahokem dam ziti vahi im ot vameaidamna ab aaham. Yesusat ame dam zi labe iho vameadam im aida. Labi Aho fa ame dam zi laba im amomoi neo vabi vi gagu aida. Labi ame dam zi labe fa Yesus bake im amomoi vabi vi gagu aida. Lahadamna ab aaham.
47. Labi dam totbaho labe Yesusat fa ame dam zi laba gagoho im aiha, “Aa làhà! Daboseà nim abo im ozobohu Dàt mode?” lahame ab àvodeham.
48. Labihadam di labe Yesus Am aiti oiti neo vi aame modeha laha ab àvodeham. Àvodi Am oiat Aba neha, “Dat adat oa, Om akati iho laha bake vulehe vaba modela? Em Om aiti abo Om setehe bake àvodi nabiti nabitime abo ahu faidi seteha.”
49. Lahame gagoha Yesusat fa ab gagoham. “Ne, um akati Eba nabidàla? Em abo Em Ai aabom numa aidalo ahit uba vulehe vabake. Om bak lam biehe labe Eba nabidà?”
50. Lahame labi gagoha Am oiti aiti Aho gagoho bak lam aimta ai. Lahana, “Em Ai aabom numa aidalo,” laham bak vabi vi ozoda.
51. Labi vi ozodume Yesusat Am aiti oiti fa vahi Nazaret fa ab laham. Labi fa le aidam di lam Yesusat gi Am aiti oiti gagom im aime uledi vou meeda. Labi Am oiat im amu modeheda iumti etei modeheda nimti azi ahulat vi ozoda.
52. Labi Yesus buduali neo im vi ozobohudi ozobohudidume ab dualeham. Labihadam labe Alati damti ame Da laba ab deeleham.
1. Kaisarleheda Tiberiusat Roma dam ahebu vuusu im vahokedume ala oli buzidamehamdehe di labe Alat Zakariam adat Yohanes aho bak aotba baa bohu dam vaba alim bak aidamda laba neha, “Em im vou vameatedale,” lahame ab gagu oluham. Ame di labe ee dam labe nehame faheme meeda. Pontius Pilatusat aho gubernurli Yudea bak laba azim dam lam vuusu im meeda. Labi laha Herodesat neo Galilea bak azim dam lam vuusu im meeda. Labi laha Herodes labe am dubu Filipusat neo Iturea bak laba azim dam lamti Trakonitis bak laba azim dam lamti vuusu im meeda. Labi laha Lisaniasat neo Abilene bak laba azim dam lam vuusu im meeda. Labi laha ame di labe Hanasti Kayafasti ame dam ahim labe iho fa Damat Ala Bake Lomna Ve Vua Vahudam Tohe Dam Zi Labe Bisi Boehàdateboli meeda. Dam labe labihasu meedam di labe Alat Yohanes bake ab gagu oluham.
3. Labi gagu oluhemu Yohanes labe Yahudi dam Yordan Soabo esuhu damti obe esuhu damti Alat aba vameadaha im nim ab vou vameatedamam. “Ubu uho faina meedam bak lam nasi voedume fa ahu neà bak vàmadehezobe eho um vuu valo baptisleidase. Labi dam totbaho fà vi aame ozobohudese. Uho faina meedam bak lam Alat ozahigeàmu fa faamome uba beolo meedam bak lam fa vei mu neàdem bake labihadale,” lahame Yohanesat ab vameadume fi dedamam.
4. Yohanesat aho etei ame dam vaba alim bak laba le lab vameadaha bak labet modi dat ahamda Alat vameadaha im aime fa dam bake ahate vameaidahada Yesaya labe aho aham di iube fet nehi toeme esuhu im ab imbodeham. “Dat bak aotba baa bohu dam vaba alim bak laba azi dam aba valadamda zi laba dae buduana nehi vameada. ‘Alat Gagu Fihasi Vimteme Olulo Modem Dat Boehàda lem zie laba uho nasi duzu zie fet vueme neàdehena ahum Am ba lese. Aho lem zie a kibuna vuemule. Abo vamdesuhuna bàneàna vuele.
5. Labiham labe abo bak nohina modealaha bak fa bak vaheme bàneàdem bak. Labi sibu bak lam laha fa sime bàneàdem bak. Labi zie kibo kibomda lam laha vabieme vamdesu esum bak. Labi zie zisi usiamda lam laha bàneàdem bak.
6. Labiham labe Alat dam bake soat vausu fa vei neàdem bak lam, “Akatihasu modemna modela?” laham bak lam Alat Aho modi fa ahate fi zeam bitom labe dam ahebu aame ozobohudem bak,’ lahame ame da labe labihasu vameadam bak damat aida.” Lahame amu aham di iube Yesayat labi fet toeme esuhu bak lam imbodi Yohanesat ab meedamam.
7. Yohanesat ame baket meedam di labe dam zi labe ozo, “Yohanesat iba laha vuu valo baptisleidase,” lahame Yohanes bake valada. Labi neo dihasi valada. Labihada. Labihadàmu Yohanesat aba valadaha dam laba im nehasu ab gut vameadamam. “Um gi ahobat vagedam damat moz. Uho vedi nehi git ozo, ‘Iho valo baptislemeam làhà Alat dam ba beodam diat ba imti beom vabak am tiba.’ Làhà um git ozo. Uho faina meedam bak voedume fa ahu neà bak vàmadem vabameam Alat um laha beolo modem bak.
8. Alat uba ba beom vabake uho gi nehame meedale. Ubu uho faina meedam bak lam voedaha bak lam imbodemeam làhà fa im neà bakta vàmadi meedale. Uho labi modemeam làhà damat aame ozo, ‘Aa làhà! Dam nim iho faina meedam bak lam voedume fa ahu neà bak ab vàmadehame?’ laham bak lam damat aame ozobohudem bake uho gi nasi im neà bakta meedale. Labi um ahu a nehi git tu vi ozodamule. ‘Im tai ahamda Abrahamat vou faat ledaha dam zoho im Yahudi dam am bak. Labiha labe Alat iba ba beom vabak. Im neà bak,’ laham bak lam um ahu a git tu vi ozodamule. Alat ozomta gi ame bak labet neàdem vabak. Abrahamat vou faat ledaha dam dualem vabameam làhà Alat gi ke zi nim modi fa Abraham mekehà damalem meo bak.
9. Neham bak. Alat gi dat ut siemda labe aho ut debu laba olo bà ahamaesu vou duzu neàdeheda lamti uloho bak. Labi aho ame ut oo valem bak aameam ut oo neàna valem bak aam vabda ahebu siedume fa visomoame vua sutem gikina elum bohu vuusumna laba voeda tame. Abo uho faina meedam bak fa voou ahu vei neàdi vàmadi im neàna meedam vabameam eho etei uba lab gagoho bak lamti uloholi Alat labiham bak.” Lahame Yohanesat dam aba valadaha dam laba ab gut vahokedaham.
10. Labi gut vahokedume modeha dam zi labe ab gagoham. “Làhà Alat iba labi modem bak im akatihasu modem labe Alat iba labi modem moela?”
11. Làhàmu Yohanesat fa ab gagoham. “Dat sue sona behàsda labe sue meida visoi dat sue vabda laba lu esuiale. Labi dat na eheda labe dat na vabda laba na lu àme izidale.”
12. Lahame labi vameadam di labe dam bake teo vi vaiam doi pajak atem dam zi labe neo, “Yohanesat fà im vuu valo baptisleidase,” lahame tau li dozeaha dam labe ab vi ailo gagoham. “Guru oa, ne im laha Alat iba beom bake iho akatihasu modem labe Alat iba labi modem vaba moela?”
13. Làhàmu Yohanesat fa ab gagoham. “Làhà um zie gohali vam doi meia gut gagome doi vaiam diat a fetehesu vaiamule. Gi boehàdat oba gagomda lamota vaiale.”
14. Labi meo dam totbaho labe Yohanes bake neo vi ailo ab gagoham. “Ne, im laha Alat iba beom bake iho akatihasu modem labe Alat iba beom vaba moela?” Lahahat Yohanesat fa ab gagoham. “Làhà um mei doi a tet vietomoame vou itamule. Um a, ‘Meit fà iedi am doi iba lose,’ laham bak a labi modemule. Labi meida um na modem doi vam di gi deelehat uba lohoda lamota vale,” lahame ab gagoham.
15. Labi Yohanesat ame im lam vahokedàmu ame dam zi labe Alat Gagu Fihasi Vimteme Oluhu Dat Boehàda lem bake vou faodam dam zi labe vedi Yohanes ame da am tibame ahulat vabi vi ozodume dozeadume aasu vou faoda.
16. Labi ame dam zi labe labi vabi ozodàmu Yohanesat ahamo ozobohudi ab vi gagoham. “Um eba a git ozomule. Em gi feà vab dàt modem bak. Lahana Dat ba em ohuse vi vulelo modemda lam bisi feàda am bak. Am naba dusumna lo tadehena lam ba akati eho ziamoe? Em ba labiham uloho vabak. Dam giida labe iho uba aame ozo, ‘Um faina meedam bak lam uho voedume fa ahu neà bak meedalo vàmadi fa Ala bake tu vuzehe?’ laham bak aame ozobohudem bake eho uba gi vaota baptisleidam bak. Lahana Dat ba lemda labe li uho Aba tu vuzehi meedàmu Aho Alam Aha Nutabe Neàna lamti vuati labihasu uba modi vizi teudeda tame.
17. Ame Da ba vulelo modemda labe Aho ba dam faheme afoezobe dam faina meedam dam lam vua sutem gikina elum bohu vuusumna laba voeda. Labi dam ahu vei neàdi im neà bakta meedam dam lamota fi me vada. Labiham bak modelo modemu Am gi dat gandum oo fet lamti naube amomoiti veimodam datti uloho bak. Ame Da nibe gandum fi kbodume vaheme dehaleheda laba na nekehàsonabut dalu tom voou oo goaitoi nutabet fetti naubeti veimome fa nuta ateme vou le am na gihoemda vahedam num laba vahedalo modem bak. Lahana fet lamti naube totbaho lamti Naedat fa feàktoi vou le vua vahudalo modem bak,” lahame Yohanesat ab vameadaham.
18. Etei lab vameadam im lamti im amomoi zi lamti Yohanesat dam zi laba vou vahoketeda. Labi vou vahoketedam labe aho laha, “Alat Gagu Fihasi Vimteme Oluhu Dat Boehàdat lem bak ab fuham tame,” laham Im Neàna laha vou vameateda. Labihada.
19. Labi Yohanesat iuba le Alam Im Neàna vou vahoketedam di labe aiha Galilea dam vuusdam Boehàda Herodes Antipasat aho aba meida Filipus am nam Herodias vaha bak lamti labi aho faina meedaha im amomoi zi lamti labihasu Yohanesat ozobohudi ab gagoham. “Herodes om gi faina meedam dàt modem bak,” lahame im vahokedume modeha Herodesat neha, “Aho faina meedaha bak akati Yohanesat aba im vahokedàla?” lahame am meo dam gagome Yohanes si mei sime oumahedam num laba vou oli ousu doo ab teudeham. Labi Herodes ame bak lam modehe labe am bisi fai bak meedam bak lam duali feà bak ab fuham.
21. Amu Yohanes damat si sel ousuhu vab di iube nehame meeda. Dam aba valadam dam zi lam aho vuu valo baptisleida. Labihadam digat meida labe Yesus laha neo li valo ab baptisleham. Labi valo baptisli neàdehezobe Yesusat Am Ai Ala bake tom gagodameilahit asum ab fatahivaham.
22. Asum fatahivai bumatalehe bak labet Alam Aha Nutabe Neàna fa bume doleti ulohonali nom vou oaedume Yesus bake nom vou usi nusu vizi ab teudeham. Labihazobe Alat Aba Aho azihi bak asum ahoba iube Yesus bake ab nom gagoham. “Om Em Adat vàmtea Ebe Eho bisi deelemda Om am tame. Em abo Obo Oho meedam bak lam Em aam deeleho,” lahame ab nom gagoham .
23. Labi Yesus Alat Aba gagu oluhu im faasi meedam di abo am tiga puluh tahun foli busaoli neàdehe labe faasi ab meedamam. Dam zi labe ozomta vedi, “Yesus Yusuf am adat am tiba,” lahame ozo. Labi Yusuf Elit faa.
24. Labi Eli Matatat faa. Labi Matat Lewit faa. Labi Lewi Malkit faa. Labi Malki Yanait faa. Labi Yanai Yusufat faa.
25. Labi Yusuf Matisat faa. Labi Matisa Amosat faa. Labi Amos Nahumat faa. Labi Nahum Heslit faa. Labi Hesli Nagait faa.
26. Labi Nagai Maatat faa. Labi Maat Matisat faa. Labi Matisa Simeit faa. Labi Simei Yosekat faa. Labi Yosek Yodat faa.
27. Labi Yoda Yohananat faa. Labi Yohanan Resat faa. Labi Resa Zerubabelet faa. Labi Zerubabel Sealtielet faa. Labi Sealtiel Nerit faa.
28. Labi Neri Malkit faa. Labi Malki Adit faa. Labi Adi Kosamat faa. Labi Kosam Elmadamat faa. Labi Elmadam Eret faa.
29. Labi Er Yesuat faa. Labi Yesua Eliezeret faa. Labi Eliezer Yorimit faa. Labi Yorim Matatat faa. Labi Matat Lewit faa.
30. Labi Lewi Simeonat faa. Labi Simeon Yehudat faa. Labi Yehuda Yusufat faa. Labi Yusuf Yonamat faa. Labi Yonam Elyakimit faa.
31. Labi Elyakim Meleat faa. Labi Melea Minat faa. Labi Mina Matatat faa. Labi Matata Natanat faa. Labi Natan Daud faa.
32. Labi Daud Isait faa. Labi Isai Obedat faa. Labi Obed Boasit faa. Labi Boas Salmonat faa. Labi Salmon Nahasonat faa.
33. Labi Nahason Aminadabat faa. Labi Aminadab Adminat faa. Labi Admin Arnit faa. Labi Arni Hezronat faa. Labi Hezron Peresat faa. Labi Peres Yehudat faa.
34. Labi Yehuda Yakubat faa. Labi Yakub Isakat faa. Labi Isak Abrahamat faa. Labi Abraham Terat faa. Labi Tera Nahorat faa.
35. Labi Nahor Serugat faa. Labi Serug Rehut faa. Labi Rehu Pelegat faa. Labi Peleg Eberat faa. Labi Eber Salmonat faa.
36. Labi Salmon Kenanat faa. Labi Kenan Arpaksadat faa. Labi Arpaksad Semat faa. Labi Sem Nuhat faa. Labi Nuh Lamekat faa.
37. Labi Lamek Metusalahat faa. Labi Metusalah Henokat faa. Labi Henok Yaredat faa. Labi Yared Mahalaleelat faa. Labi Mahalaleel Kenanat faa.
38. Labi Kenan Enosat faa. Labi Enos Set faa. Labi Set Adamat faa. Labi Adam Alat ahamte modeheda am. Labihada.
1. Labi Yesus valo baptisli neàdi Alam Aha Nutabe Neàna labe Aba modi vizi teudehe labe Aho Yordan Soabo lam ab vou esmozi bak aotba baa bohu dam vaba alim bak laba ab vou laham.
2. Labi ame bak laba vou le aidam di labe Iblisit li Yesus bake modi ozolo modidume usi empat puluh ab foleham. Labihadam di labe Yesusat ahit na koena àm vaba idaia ibzidamehamdehe labe usi empat puluh foli modeha idoali ab beoham.
3. Labi idoali aidam di labe Iblisit li Yesus bake ab gagoham. “Om, ‘Alam Adat,’ lahamda Om idoalehe bake nasi ke nidi nim gagome rotibu lemeta.”
4. Lahame labi gagoha Yesusat fa gago, “Vabà! Alat Vameadaha Im Toedahana laba im meida nehasu toeme fi hasi esuhu bak. ‘Dam gi na àm bakta ahedem vabak.’ Lahame toeme esuhu labe Em moho bak.”
5. Labi im lada lam modeme neàdi Iblisit Yesus neo vou le nohu sibu feàda laba ab vou laisi duzuham. Labi vou duzu neàdi dam mei debu labe im boehàda am dam zi lamti im nazoh feà lamti labi dam mei debu labe im boehàda am dam zi lamti im nazoh feà lamti ahebu alihi fi seo fi himu modi fa setida.
6. Fiseo fi himu setidume neàdi Iblisit Yesus bake ab gagoham. “Om nasi ahit ogomasu biti ahu adat iedi eba, ‘Feàte,’ lahame vou baedale. Oho labihamta na zi feà nim ahebu eho Oba lodume Oho vame Om nazoh ziali Ohomo boehàdateli ame Oho etei aadaha dam lam vuusdam bak. Ne, ame na zi modem bak lam amu Alat eba modi vizi naedatelehe labe eho ozome fa meia modi vizi am naedatelem neà bak.”
8. Lahame labi gagoha Yesusat fa gago, “Vabà! Em ba ahit ogomasu biti oba vou baedam vabak. Nehaha bak. Alat Vameadaha Im Toedahana laba meit im nehasu toeme fi hasi esuhu bak ehe bak. ‘Um ahu a meia adat iedi vou baedamule. Gi Boehàda ubu uho vou baedam Ala lamota, “Feàte,” lahame vou baedale. Im Aho gagomda lamota uledi meedale.’ Lahame labi toeme fi hasi esuhu labe Em moho bak.”
9. Lahame labi gagu neàdi Iblisit ba neo Yesus kota Yerusalem bake vou le ame Fihasi Ala Bake Vou Baedam Num Vàmteabu labe am bisi ohut baa kila bak laba vou zisi duzu ab gagoham. “Om, ‘Alam Adat,’ lahamda Oho num ohut baa nibe so ateme feà bak niba nom ilu aamale. Alat Om gem bak malem zoaha bak.
10. Ne, Oho ba modem im nim Alat Vameadaha Im Toedahana laba meit im nehasu fet toehena taia? ‘Alat Am im gagu vou usem dam laba gagu oluhu labe im anekehàt Om si soat vausu vuusu vou usem bak. Ba kebu bake nom ilu Om naba vatfom vabak.’ Lahame toehena taia?”
12. Lahame labi gagoha Yesusat fa gago, “Vabà! Em ba Ala bake labihasu modi ozolo modem moho bak. Nehaha bak. Alat Vameadaha Im Toedahana laba meit im nehasu toeme fi hasi esuhu bak. ‘Boehàda ubu uho vou baedam Ala laba uho, “Iba taueo? Iba taum vabao?” laham bak lam a modi ozolo meedamule.’ Lahame labi toeme esuhu labe Em moho bak.”
13. Lahame labi gagu neàdi Iblisit Yesus bake modi ozolo im mei im meime meedaha Yesus ba bedem vabamu utasi Yesus vou esmozi ab laham. Iblisit aho ladam di labe nehi vi ozo lada. “Eho Yesus bake ba adi diat neo modi ozoela?” lahame vi ozo lada.
14. Labi Yesus gi amu Alat Am Aha Nutabe Neàna labe Aba modi vizi teudehe labe ame dam vaba alim bak labet fa Galilea bak laba ab laham. Labi fa le modeha Yesusat li meedaha im lam damat aime fa Galilea bak obe bak ium ahebu vou susualame ab uloholeham.
15. Labi ame di labe Yesusat Galilea bak labe aba zoho num debu meida laba le ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli ame dam laba vahokeda. Labi num debu meida laba neo le gi ame baket meeda. Labihadam di labe dam ahebu Aba ab vou baetedamam.
16. Labi Yesusat ame bak labet vou mode ledume neo Am budualehe num debu Nazaret laba fa ab leham. Labi fa li aidume hari Sabat abo Yahudi dam labe ibi iho gi azibe im digat labe neo ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba ab oleham. Aba Aho meedume baleàhà bak am. Labiha labe ame num laba ab le oleham. Labi oli Alat Vameadaha Im Toedahana lam aame gagolo modemu ame num tombu laba ab le duzuham.
17. Labi duzu neàdi ame im vameadam num vou aasdamda labe aho dat ahamda Yesaya abo Alat vameadaha im aime fa dam bake ahate vameaidahada labe aho aham di iube fet toedume esuhuna bolohona lam visoi Yesus bake ab loham. Labi lu Yesusat ve ziambitoi Aba Aho aasume gagolo modem im lam nabime aahemu ame na toehe bak lam aasu fa dam num laba nusualadaha dam laba nehame ab vameadamam.
18. “Alat Eba neha, ‘Im nehasu meedale,’ laham bak ozome Am Aha Nutabe Neànat Eba modi vizi teudehe bak. Dam na vab dam laba Eho Am Im Neàna fa ahate vou vameateda. Labi dam meida debut fa dam mei debu siàdume vou li abehamdehe dam debu laba Eho le, ‘Um fa isi olum neàdehe bak,’ laham Im Neàna lam Eho vou vameateda. Labi laha dam fako aubesuhuda debu laba, ‘Eho le um fako modi fa neàdi na aam bak,’ laham im lam eho laha vou vameateda. Labi laha meia fai bak bohu tadi meedam dam laba, ‘Eho le ame bak lam faatoi modi fa ahe neà duzum bak,’ laham im lam Eho laha vou vameateda.
19. Labi laha Eho dam bake neha, ‘ “Alat Aho dam bake soat vausu fa vei neàdeda tame,” lahame amu fet gagu esuhu im lam etei di nim ab imbodelo modemam bak,’ laham bak lam Eho laha vou vameateda. ‘Labihasu dam bake vou vameatedale,’ lahame Eba gagu oluhu bak.” Lahame Yesayat aham di iube aho fet toeme esuhuna bolohona lam Yesusat ab aame gagoidaham.
20. Labi ame na toehena lam Yesusat aame gagoidume neàdi fa giame am naedate lu dam bake im vahokelo ab nusuham. Labihadam di labe dam ame num laba nusualadaha dam labe gi Yesus bake fako zisu aasda.
21. Fako zisu aasdam labe Yesusat dam laba ab gagoham. “Dat ahamda Yesayat aho Alat Vameadaha Im Toedahana laba toehe bak meida nim Eho etei uba vameadume um dogoit aidam di nibe ame im lam ab imbodi Eho fa ab meedamam bak,” lahame ab gagoham.
22. Lahame labi gagu modeha ame dam labe ame im lam vi aime àvodi ab ozoham. “Aa làhà! Ame im lab vameahana lam abo im neàna vamdesuhunat moz,” lahame àvodi vi ozodaha vabamu dam ihimo fa neo nehame ot gagoida. “Da nim gi Yusufat faaha adat akati bisi labi gagodà?”
23. Lahame labi ot gagoidàmu ame dam labe iho ozoho bak lam Yesusat Ahamo ozobohudi fa dam laba im ab vameadamam. “Uho gi im tai ahamda labe ibi iho gagom baket ozome Eba nehame gagolo mode taia? ‘Mei fa vabieme neàdemda oa, Om Ohomo nasi fa it vabieme neàdemeta,’ lahame gagodam baket neo Eba labi gagolo mode taia? Lahana um gi nehi ailo modem dam taia? ‘Iho aiha Oho num debu Kapernaum laba na damat ihimo modem biem im feàna modehe bakvat ehete. Ame bak lam imbodemeam làhà Oho fa Obo bak Nazaret niba laha modehezobe im aase,’ lahame uho Eba vi ailo modem dam taia?”
24. Lahame labi gagu neàdi Yesusat neo vi gago, “Uho Eba labihamta labiha. Lahana Eho etei uba neo gagolo modem im imboda nidi nim laha nasi aima. Dat Alat vameadaha im aime fa dam bake ahate vameaidahada labe aho bak mei bake lam dita ame dam labe ahu adat iedi aho lab vou le vahokedaha im lam ule neàt gut ve aba vou baedam labe am im aime meedam meo bak. Lahana aho am budualehe bak laba fa le am dam laba im vahokedam di am dam labe gi ailahigeàmodam meo bak. Ba ahu adat iedi aho lab li vahokedaha im lam aime aba vou baedam vabak.
25. Uho dat ahamda Alat vameadaha im aime fa dam bake ahate vameaidahada meida Elia labe aba aho aham di iube nehi meedaha bak lam vi ozodale. Ame di lam Israel dam labe iho Alat Am dae ailahigeàmu moudahemu Alat ahit asum ulo laba modi seti ab di neà faaham. Labi di neà faasi abaa vabali bak aotbali na aladume seti dam ame bak laba azim dam lam ahebu gi idoali vàhàdeme beo. Labi ame di neà faaha di lam abo tiga tahun ala enam foli fa abaale. Lahana ame di neà faasi meedam di labe im Israel lahi maboena zi gi idoali meeda. Ne lahana Alat Elia gagome im Israel lahi maboena zi laba, ‘Taule,’ lahame gagu oluhu vabak. Alat vedi num debu Sidon labe aba zoho modesuhu num debu Sarfat laba abo Israel damat modem vab dam labe im bak laba azihi nam maboena vàmtea laba, ‘Taule,’ lahame gagu oluhu bak.
27. Labi um laha dat ahamda Alat vameadaha im aime fa dam bake ahate vameaidahada meida Elisa lam Alat aham di iube gagu olu nehi modehe bak laba laha vi ozodale. Ame di lam im Israel dam totbaho sokba faidi vàhàdem bohu vuusum dam zi Israel bak laba esdam dam ehe bak. Ne lahana Alat Elisa bake neha, ‘Oho ame dam sokba faidi vàhàdem bohu vuusdam dam lada laba le modi fa neàdi vahedale,’ lahame gagu oluhu vabak. Alat vedi Elisa bake gagu fa dat giida Siria azim dat abo sokba faidi vàhàdem bohu vuusdamda Naaman laba, ‘Le modi neàdi fa vahele,’ lahame gagu oluhu bak.” Lahame Yesusat dam laba ab vameadaham.
28. Lahame labi vameadume modeha dam ame num laba nusualadaha dam labe ame im lam aime vi ozoha, Yesusat gi Yahudi dam ahamda laba ozome vàlu ahit iba vameadàmu ab faki ziesobuleham.
29. Faki ziesobuli usnadume Yesus bake tet si odosi veioi odosi veioidume vou futoi fa num debu bak gatohoba labe vou tom vi odosi vi odosia ladume sibu gat bak laba nom voolo ab vou laiteham.
30. Vou laisi gat bak obe laba duzu modehat Yesus gi dam bà tadehe bak labe aa vou kibo kibodume Aba Aho lam bake ab lazeham.
31. Labi ba digat meida iube Yesus Galilea bak labe am zoho num debu meida Kapernaum laba ab lazeham. Labi le aidume hari Sabat abo Yahudi dam labe ibi iho gi azibe im digat meida labe Yesusat ame Yahudi damat ihimo ot vahiame im meedam num laba oli Aho dam laba Alam im ab faasi vahokedamam.
32. Labi lab vahokedam di labe damat aihat Yesusat ba ladehebeat vameadam vaba Aho gi im dedateli vahokedàmu dam labet aime ab àvodeham.
33. Labi Yesus ame num laba dam bake vahokedam lahasuhu diat dat setan oli veimahada amu ame num laba tau olehe dat labe dae meona Yesus bake gut alamdi ab gagu geham.
34. “Aa! Yesus Nazaretda oa, Om giida akati meit ihimo modem im tau meedalo modela? Oho iba li modi vàhàdeme seddalo lehe taia? Em abo Om ozobohu bak. Om abo Alat Gagu Fihasi Vimteme Oluhu Dat Boehàda bisi Neàboda Vàmtea Om am bak.”
35. Lahahat Yesusat dae meot fa ame setan laba ab gagoham. “Dae vabalele. Om taho futoi ame da nim vou esmozi itale,” lahame dae meot gagoha ame setan labe da lam belu damat nusualadaha doni laba modi biti afoezobe da lam gi ahena vou esmozi futoi ab itaham.
36. Labi modeha dam zi labe ame bak lam aahemu àvodi ab ot gagoi ot gagoidamam. “Aa làhà! Etei lab modehe bak lam im amu im lamohona aaha vab taia? Ame Da nibe Aho lab modehe bak lam gi im gàhàna modehe bak. Abo Aho im dedatelehe labe teudi ame setan zi laba, ‘Futodale,’ lahame gagom di ame setan zi lam aime uledi futodume ilidam meo bak,” lahame ab ot gagoidamam.
37. Labi kehàm vabna ame dam labe Yesusat etei modehe im lam aahemu fa Kapernaum num totobe esuhu dam laba le vou vameatedume ab uloholeham.
38. Labi Yesusat ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num labe futoi laha labe le Simonam numa ab oleham. Oli modeha Simonam boholeà so galihasi duana gaili bisdàmu dam labe Yesus bake gut gago, “Simonam boholeà so galihasi duana gaili bisdalo. Oba li aamale.”
39. Làhàmu Yesusat li nom bohusu aasume mali ooteme gago, “Om gailehe bak neàdele,” lahame mali gagoha ame gailehe bak fa ab seteham. Labi kehàm vaba fa usai duzu na ohume Yesus Am damti ab lodume àdaham.
40. Labi ala bozilelo modem di labe dam aheda labe im dam ahaladiame gailehe dam zi lam Yesus bake vou valada. Labi valadàmu Yesusat gut uladdume fa neàdeda.
41. Labi ame di labe dam setan oli veimahada zi lam Yesusat laha gagu ame setan zi lam ab gagu futodume ilidamam. Labi lab iitaom labe fa Yesus bake it bute lada. “Om abo Alam Adat am tameee. Im abo Om ozobohuteee,” lahame labi it bute ladàmu Yesusat setan zi laba mali vi gagoda. “Mm vabo. Um Em, ‘Amat modela?’ laham bak a gagomule.” Ame setan zi labe, “Am Alat Gagu Fihasi Vimteme Oluhu Dat Boehàda am tame,” laham bak ozobuhudi damat aim zohàme Yesusat mali gi gagome ab oudaham.
42. Labihadume dihambe di fi zeadam diat Yesusat num debu bak vou esmozi fa dam vaba alim bak laba ab laham. Labi le modeha dam duada zi labe ba Yesus bake vi nabidamehamdi aaha Yesus ab vi aaham. Vi aame Yesus bake tet vi mali gago, “Ai a lamule. Om gi niba azim neàte,” lahame vi mali gagoda.
43. Lahana Yesusat mu gago, “Ne lahana Alat dam bake deeli vame Am damali vuusu im vahokedam bak lam, ‘Akatihasu modemna modela?’ laham Im Neàna lam Eho num debu mei num debu mei lahadaha bak laba le vameatedume fi dedalo modem bak ehe bak. Alat amu Eba neha, ‘Labihadale,’ lahame Eba gagu oluhemu Eho ame bak lam ab meedalo modemam bak,” lahame ab gagoham.
44. Lahame labi gagu neàdi Yesusat neo Yahudi dam labe ibi iho azihi bak ahebu num debu mei num debu mei lahadaha bak laba ab ladamam. Labi ladam di labe ame Yahudi damat ihimo ot vahiame im meedam num dozeadaha bak laba olidume ame Im Neàna lam ab vou vameatedume fi dedamam.
1. Labi Yesusat ba neo digat meida iube Itea Genesaret am nohu auobe laba lazi duzu Alat Aba vameadaha im lam dam bake vahokedam di labe damat, “Ame im lam aise,” lahame Yesus bake valadam labe gi mei soat osidda.
2. Soat osiddàmu Yesusat Am duzum bak biehemu aaha ihe alimna behàsu ab aaham. Ihe dedam labe im ihe tu bohe dek kikeda.
3. Làhàmu Yesusat ihe Simonbada laba zisi ab gagoham. “Om ihe nim vihitoi vao auobe iuba vou bu duzule.” Làhàmu Simon ihe vihitoi vou bu duzu Yesusat gi ame ihe laba nusum labe dam duada nohu auobe laba dozeadaha dam laba ab vahokedaham.
4. Labi vahokedume neàdi Yesusat Simon bake gago, “Ihe laha no tombu iuba vou bu afoezobe um bohe dek nasi nom voole. Um bohe zi feà beom bak.”
5. Lahame labi gagoha Simon fa vi gago, “Ai Guru oa, im abo bohe dek nim iho usehet vou keaiaha ba bohe vam kaio. Abo aibu bohu iho vou keaiaha im vanamai vou dihaha bak. Lahana Oho gagohemu im gi ozahit modi ozolo mozo.”
6. Làhàmu ihe no tombu iuba vou bu bohe dek laba nom esu vou keaha bohe zi fai ab beoham. Labi dam labe vuu visolo voohat bohe zi fai labe dek vàuseo modemu am dam totbaho ihe dedam meida laba anekehà veguamdi gagu ihe meida vou emoeme ab lefuham. Labi lefusi dam lam fa vahi bohe dek lam visoi bohe zi lam vihilame ihe behàsu laba vahedume modeha ihe asimbuli ab tezeo vabaleham.
8. Làhàmu Simon am dam ihe abadate tau zihi damti ame bohe zi fai lam vaha bak aahemu ab aame àvodeham. Labi laha Simonam dam totbaho ihe meidate zihi dam Zebedeusam adam behàsu Yakobusti Yohanesti laha aame àvode. Simon abo ee Yesusat ba tahuda Petrus labe aho ame bak lam aame àvodehemu ahu adat iedi, “Yesus abo feàte,” lahame ozohemu Yesusam naba modesdam laba ahit ogomasu biti ab gagoham. “Boehàda oa, Om eba netàdem em ladem bak. Om itale. Em abo faina meedam dàt moz.” Labi Simonat labihasu gagohemu Yesusat fa vi gago, “Neà bak. A iedemule. Om ba bohe vam damalem bak modem vabak. Om abo etei nibe faasi Eho oba vahokedume oho fa ot vai dam nabime vame neo vahokedume ame dam labe fa Eba tu vuzehem bak modelo mozo,” lahame ab gagoham.
11. Làhàmu ame dam labe im ihe fa vou zituadume im nazoh lam ahebu laba voedume esmozi Yesusat vahokedam im ozobohudelo ab vi tau vulaham.
12. Labi ba neo digat meida iube Yesusat num debu bak meida laba aidam di labe dat sokba ahebu faidi vàhàdem bohu vuusdamda labe ame bak laba godam labe le aaha Yesusam alihi ab aaham. Aahemu ahu adat iedi, “Yesus abo feàte,” lahame ozohemu Yesusat doudam obe laba ahit ogomasu biti ab tauledamam. “Ai oa, Om eba faobekem vabao? Om uledemeam làhà em sokba faidi vàhàdem bohu vuusdam bak nimti damat eba fi hasi vaitesu esdam bak lamti Oho fa eba modi neàdem bak em ozobohu bak.”
13. Lahame labi tauledume gagohemu Yesusat gi ozahit Am anekehàt ame da niba nom ulasi gago, “Lo, Eho modi neàdem neà bak. Om sokba faidi vàhàdem bohu vuusdam bak lamti damat oba fi hasi vaitesu esdam bak lamti nasi setele,” lahame labi gagoha ame da labe am sokba faidehe bak lam fa seti ab neàdeham.
14. Labi seti neàdehemu Yesusat ame da laba ootedam labe ab gagoham. “Om sokba faidi vàhàdem bohu vuusdàmu Eho modi fa neàdehe bak lam oho a dam bake vou vameatedume fi demule. Gi damat Ala bake lomna ve vua vahudam toheda laba le gagu ame da labe om sokba faidi vàhàdem bohu vuusdam bak lam, ‘Modi fa neàdeheo?’ laham bak aho gut nabidale. Labi nabidume neàdi fa dat ahamda Musat aham di iube Israel dam bake, ‘Nehame modele,’ lahame vahokedaha bak lamti ulohona modele. Om fi ham bak neàdi fa vahem bake na fi ho oho etei si vou lalo modemna lam ame toheda laba vou le aho gut ve oteme vua vahusu om fa damti vahem bak modele. Labiham labe dam aheda aame ozo, ‘Da nim fa neàdi im fa vahem neàdehe?’ laham bak fet aame ozobohudi fa vahem bak am tame,” lahame Yesusat ab vi vameadume oluham.
15. “Meia a le gagomule,” lahana ame da labe vedi, “Ame Da Yesus lam akatihasu meedam Dàt modela?” laham im lam ab vou fi det laham. Vou fi det laha labe dam duada labe aime Yesus bake valada. Dam labe ozo, “Iho Yesusat lab vahokedam bak aise,” laham bak lamti labi dam im gailehe bak lam, “Yesusat modi fà neàdedase,” laham bak lamti labihasu ozome valada.
16. Lahana Yesusat dam duada bako vou esmozi fa dam vabake le tom gagodam meot.
17. Labi ba neo digat meida iube Yesusat num meida laba oli dam bake vahokeda. Ame di lam Farisi dam lamti labi dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti laba tau nusualada. Ame dam labe Galilea bak ahebu num debu bak meida iube le. Num debu bak meida iube le. Labihada. Labi ame dam totbaho Yudea bak ahebu num debu bak meida iube le. Num debu bak meida iube le. Labihada. Labi ame dam totbaho kota Yerusalem bak iube le. Labihadume ab tau nusualadaham. Labihadam di lam dam gaileheda modi fa neàdemna lam Alat Yesus bake modi vizi modesda.
18. Laham Dàt dam bake vahokedameilahit dam amomoi labe dat nao zoho eloi nutabedeheda lam ileba esu Yesusat avaesdam laba esum bak ozome vou leda.
19. Labi vou ledume numa olesome modeha dam bà tadi num kekesi olem biehemu fa num ohut vabna baa ahoba laba vou zisi ame numa suusuhuna baa lam feàkmome bumatali afoezobe ame dat ileba lamti loa vààsu num ohut bumat labe fa damat nusualadaha tomba laba abo Yesusat avaesdam laba nom vousdume ab nom esuham.
20. Labi nom esuha Yesusat ozo, “Ame dam labe bisi Eba tu vuzehi meedà?” laham bak aame ozobohudehemu Aho fa dat nao zoho eloi nutabedeheda niba ab gagoham. “Ba oa, om ade? Obo oho faina meedaha bak lam Eho ozahigeàmu fa vei neàdeho.”
21. Lahame labi gagoha ame Farisi damti ame guru zi lamti ame dam labe Yesusat lab gagoho bak lam aime ihimo ahulat aa nehi ozoda. “Oo, Da nim gi imti ulohona baka ana modi feà Dateli labi gagodà? ‘Obo oho faina meedàmu Alat beolo modem bak lam Eho gi vei mu fa faamome vei neàdeho,’ lahaha bak lam gi Alat Ahamo gagom bak akati Da nibe labi gagodàla? Da nim gi Ala bake feàtàdam dàt mode taia?” lahame ab ozodamam.
22. Lahame aa ozodaha bak lam Yesusat Ahamo ozobohudi dam laba ab gagoham. “Um ana modi um ahulat labi vi ozodàla?
23. Uho ozom, Eho ame nisileheda niba im gagom di im adida bisi damat aame ozobohudela? Eho nehameam, ‘Obo oho faina meedàmu Alat beolo modem bak lam Eho gi vei mu fa faamome vei neàdeho,’ lahame gagomeam damat aame ozobohudeo? Laham vabameam Eho gi neha, ‘Om nao zoho eloi nutabedehe bak lam Eho modi fa neàdeho. Nasi usai om ileba giame vuusu fa num bake lale,’ lahame gagomeam làhà damat aame ozobohudeo? Adida bisi damat aame ozobohudela?
24. Lahana Em Abo Asum Ahoba Iubet Bak Niba Li Dateleheda nim Ala naedat Eba gagu Eho fa im dedateli ot vai meit faina meedàmu Alat beolo modem bak lam Eho gi vei mu fa faamome vei neàdem meoda Em am bak. Lahana Eho labihasu meedam bak lam um biem bake Ebe Eho etei modelo modem bak nim um nasi aasu vou faomale. Labi dat nao zoho nutabedeheda nim Eho modi fa neàdi usam bak uho aameam làhà um laha neo, ‘Em meit faina meedàmu Alat beolo modem bak lam Eho gi vei mu fa faamome vei neàdem meoda Em am bak,’ laham bak etei um laha aame vi ozobohudem bak.” Lahame Yesusat labi vameadume neàdi ame dat nao zoho nutabedeheda laba ab gagoham. “Om usai om ileba visoi vuusu fa om num bake vou lale.”
25. Lahame Yesusat gi etei labi gagoha ame da labe fa neàdi damat aasdahit amti usai aho bisum ileba lam visoi giame vuusu am num bake fa ab vou laham. Am numa fa ladam di labe, “Ala abo neàte,” lahame vou bae lada.
26. Labi ame dam duada labe Yesusat etei da lam modi fa neàdehe bak laba aame àvodi anekehàso it gaadam labe Ala bake ab vou baedamam. “Aa làhà! Im amu na im feàna lamohona ba aaha vabak. Gi etei alimeat ab aaham tame,” lahame àvodi Ala bake ab vou baedaham.
27. Labi Yesusat ame bak lam modeme neàdi vou esmozi ladam di labe aaha meia gagu gi teo vi vaiam doi pajak atem dam meida Lewi labe am gi ame doi pajak vadam num buà laba aidamna Yesusat ab aaham. Labi aame gago, “Lewi oa, oho Ebe Eho vahokedam im ozobohudelo vi tau meedam datelele.”
28. Lahame labi gagoha Lewit usai aho lab meedam bak lam ahebu vou esmozi Yesus bake ab vi tau meedam dateleham.
29. Labi ba neo Lewit am na àdehena zi àlo Yesus Aba vi tau meedam dam lamti gagome am numa na àm bake ab leham. Di lam Lewi bake tau meia gi teo vi vaiam doi vadam dam totbaho zi lamti dam amomoi zi totbaho lamti labihasu ba li tau vazisi ame na àdehena zi lam ab àdamam.
30. Labi na àdam di labe Musat toedaha im ahamda vahokedam guru zi abo Farisi dam bake vi tau meedam dam lamti labi ame Farisi dam totbaho lamti iho ba li aaha ame bak lam aahemu Yesus bake vi tau meedam dam laba ab gagoham. “Um akati modi meia gagu gi teo vi vaiam doi vadam dam zi lamti damat neha, ‘Faina meedaho,’ lahame ozomsum dam lamti vazisi na àdàla?”
31. Lahame faki vi ailo gagoha Yesusat fa dam laba im totobe nidi nim nehame ab fi koadamam. “Uho ozom, dam aheda dokter abo obat vuusumdate lam meo? Vabà! Gi dam gaileheda ihimo obat vuusumdate lam bak.
32. Bak lam gi neham bak. Eho bak niba lehe bak neham bak ozome lehe vabak. Damat neha, ‘Im abo Alat gagu fi hasi esuhu im zi ahebu ulohodesu vamdesu meedam dam im am bak,’ lahame ahobat neàdem dama Eho neha, ‘Uho faina meedam bak lam nasi voedume fa ahu neà bak vàmadi meedale,’ laham bak gagolo lehe vabak. Em gi damat neha, ‘Iho faina meedam damat modem bak,’ lahame it ozome gagodam dam laba neha, ‘Uho faina meedam bak lam nasi voedume fa ahu neà bak vàmadi meedale,’ laham bak gagolo lehe bak,” lahame ab gagoham.
33. Lahame Yesusat labi gagu neàdi modeha ame dam labe Yesus bake neo ab gagoham. “Im Farisi dam nibe ibi iho vahokedam im ozobohudelo vi tau meedam damti Yohanes Mei Vuu Valo Baptisleiamda labe aba aho vahokedam im ozobohudelo vi tau meedam damti laham dam labe Ala bake tom gagodalo modemu ahit na àm mu izidam meo bak. Ne lahana Oba vi tau meedam dam akati ame baket meedam vaba vedi gi ozahigeàmu na àda. Labi anggur oo vaksa udda. Labihadàla?”
34. Lahame labi gagoha Yesusat gi damat Aba ba modem im laba ozome im totobe nidi nim nehame ab fi koadamam. “Dat soao labe nam soao valo na vahedam di labe ame da labe amti ot deeliam dam laba gagu vahi deelehat na àdam meo dam taia? Labi laha dat soao labe nam soao valo modemda ehe lahasuhu di lam am dam gi deeli na àm meo dam taia?
35. Lahana ba diamut ame nam valo modemda lam naat aa si utasi vou le setem di lam am dam totbaho labe im ahu faidi na àm mom di am taia?” lahame ab vi vameadaham.
36. Labi im lada lam vameadume neàdi Aho neo Yahudi dam labe im tai ahamda zi labe ibi iho vou vahoke usehe im lamti fa Aba Aho etei li vou vahoketedam im gàhàna nimti ulohodesu fa vahem biem bak laba vi ozome neo im totobe nidi nim ab vi fi koadamam. “Meit am sue amu soa dusumda vàusi bumatalemeam làhà ba sue soa dusumda gàhàda amu valo kikeme modi koedehe vabna am zoho fa vi vaitoi ame sue vàuhu bak laba taasu tadem vabak. Meit labi modemeam ame sue gàhàda lam gi vàhàdem bak. Labi laha sue gàhàda zoho vi vaitohona lam ba sue amudate taasu aam di am alihi ba uloho vabak.
37. Labi laha meit anggur oo gi etei unaha vaksa gàhàda fi kidi neàdehe vabda lam ba kambing fi ho sokba amu buhaleme bugeahana modi dehalehena laba fedem vabak. Meit labi modemeam ame na vaksa lam ba fi kidehe labe ame na sokba amuda lam gi modi fi fasi ame na vaksa lam gi bake veàtom bak. Labi ame na sokba lab fedehena lamti gi amait vàhàdeme setem bak.
38. Labiham bake meit ame na lam ba ozome modem vabak. Gi ame anggur oo vaksa gàhàda lam fa ame na sokba gàhàda buhaleme bugeahana modi laba fedem bak.
39. Labi im meida neha: Meit anggur loba oo vaksa amu fedeheda lam uddamehamdehe labe ba ame na vaksa gàhàda lam udem mom meot. ‘Amuda lam bisi udem neàda am bak,’ lahame meit labi gagom meot,” lahame Yesusat ame im totobe lam ab fi koadume neàdeham.
1. Labi ba hari Sabat abo Yahudi dam labe ibi iho gi azibe im digat meida labe Yesus Aba vi tau meedam damti iho bak mei bake lalo modemu gandum dee zie labe lada. Ladam di labe Yesus Aba vi tau meedam dam labe ame gandum oo amdeheda lam auet vi vuu footoi anekehà esu gigime fet veimome ab vou à ladamam.
2. Labi vou à ladam di labe Farisi dam totbaho labe ame bak lam aahemu Yesus bake ab gut gagoham. “Ne, etei nim gi hari Sabat abo im Yahudi dam labe ibi iho gi azibe im digat nim akati modi Oba vi tau meedam dam labe na oo auet vi vuu footoi vou à ledàla? Ne, im tai ahamda Musat aham di iube neha, ‘Hari Sabat fum di na a meedamule,’ lahame toeme fi hasi esuhuna akati modi Oba vi tau meedam dam labe ailahigeàmu na meedàla?”
3. Lahame labi gut vameadume modeha Yesusat fa ab gagoham. “Ne, im tai ahamda Boehàda Daud labe aho amu modehe im lam meit Alat Vameadaha Im Toedahana laba im meida nim um aame vi ozobohudehe vaba? Amu Daud aba vi tau meedam damti idoalehemu dam ahamda labe iho Teohet Mome Fa Faatoiam Num Fihamna abo Alat Israel dam bake le tau im vameaidam num laba oli Ala bake lu fi haha beahuba laba esuhu roti lam aho visoi faheme am dam bake lodume iho vahi àdaha bak lam um vi ozobohudehe vaba? Dat ahamda Musat aho aham di iube neha, ‘Ame roti lam damat Ala bake lomna ve vua vahudam toheda zi labe ihimo àm rotit modem bak. Ba dam giida tau àm fi ham roti modem bak,’ lahame gagu fi hasi esuhu roti lam ame dam giida labe àhà bak. Lahana ame dam labe iho ba, ‘Faina modeho,’ lahaha vabak.”
5. Lahame vameadume neàdi Yesusat neo ab vi gagoham. “Alat Gagu Fihasi Vimteme Oluhu Dat Boehàda Asum Ahoba Iubet Bak Niba Li Dateleheda nim Em ame Da amemu ame hari Sabat deda Em am bak. Labiham labe Ehemo neha, ‘Ame digat labe im nehasu modem neàte. Im nehasu a modemule,’ lahame ozome gagomda Em am bak,” lahame ab gagoham.
6. Labi ba hari Sabat meida labe Yesusat neo ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli dam bake vahokeda. Dam bake vahokedam di labe dat anekehà ahi totbaho nutabedeheda laha ame num laba amu vi tau oli aida.
7. Labi ame di labe Farisi damti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu laba tau nusualadaha labe Yesusat ame hari Sabat mei modi fa neàdem bak labna zohàme vou faovoi Yesus bake fakot zisda. “Yesusat ame da niba modi fa neàdem bak aahazobe fa vàluse,” lahame fakot zisda.
8. Lahana Yesusat Aho ame dam labet ibi iho ozoho bak lam ozobohunàme ozahit dat anekehà nutabedeheda laba ab gagoham. “Om usai tomba niba li duzule,” lahame labi gagoha dat nisileheda labe usai damat nusualadaha doni tomba laba le ab duzuham.
9. Labihazobe Yesusat ahit gi dam labe modem bak ozobohuna fi bovai ame lab nusualadaha dam laba ab vameadamam. “Ne, uho ozom, hari Sabat abo gi azibe im digat nim im tai ahamda Musat, ‘Akatihasu modem neàte?’ lahame gagu fi hasi esuhela? ‘Im neàna modem bak modele,’ lahaheo? ‘Im fai bak modem bak modele,’ lahaheo? Im adida Musat gagu fi hasi esuhela? Laham vaba, ‘Mei elolo modem di iho modi fa neàdem neà bak,’ lahaheo? ‘Mei otem bak modem neà bak,’ lahaheo? Im adida Musat gagu fi hasi esuhela?”
10. Lahame labi vi ailo gagoha dam ba Aba im vi gagomda kai. Làhàmu fakot ahamo vi nabidume vi ozolaha vabamu Yesusat fa dat nisileheda niba ab gagoham. “Om anekehà nasi vamdemale,” lahame gagoha da nibe am anekehà vamdeheilahit fa ab neàdeham.
11. Labi modeha Farisi dam lamti Yahudi dam ibi iho tu vuzehem im vuusum guru zi lamti Yesus bake faki neha, “Uho ozom, im Yesus bake akati modela?” lahame im aa ab odoadamam.
12. Labi ba digat meida iube Yesusat Ahamo tom gagom bak ozome bak buzoho laisi le aibut Ala bake tom gagodahit vou diha.
13. Labi dihasi dihambet Yesusat Aba Aho vahokedam im ozobohudelo vi tau meedam dam zi lam neo gagome Aba ab vi laitedaham. Labi dozeadume neàdi gagu gi dam dua belas lamota fàsi ve, “Aho gagu olu Am im vameadume esmozi laiam dam,” lahame ee ab taluham.
14. Aba Aho fi me vaha dam dua belas lam neha: Simon ee Yesusat ba taluhuda Petrus ame. Labi Simonam vahada Andreas ame. Labi Yakobus ame. Yohanes ame. Filipus ame. Bartolomeus ame.
15. Matius ame. Tomas ame. Labi Alfeus am adat Yakobus ame. Labi Simon Meohoda ame.
16. Labi Yakobus am adat Yudas ame. Labi Yudas Iskariot ba Yesus otem bake vou foholo modemda ame. Labihasu Yesusat debe fàsi vaha dam dua belas am.
17. Labi Yesusat Aho fi me vaha dam dua belas lamti ame bak buzoho labet fa buoba bake lezi odosi aaha Aba Aho vahokedam im ozobohudelo vi tau meedam dam totbaho zi ame. Labi dam dua totbaho amomoi zi ame. Labihasu li dozeadaha bak ab aaham. Ame dam dua totbaho zi lam zoho Yudea bak labe am num debu meida Yerusalem labet le. Labi dam zoho ame Yudea bak laba modealaha num debu mei num debu meime lahadaha bak labet le. Labi dam zoho fa itea feàna obe modealaha num debu Tirus lamti num debu Sidon lamti laham bak labet le. Labihasu li dozeadaha bak ab aaham.
18. Damat im nehasu ozome li dozeada. Yesusat Aho lab vahokedam bak aim bak ame. Labi im dam totbaho ahaladiame gailedaha bak lam, “Yesusat fà modi neàdese,” laham bak ame. Labihasu ozome li dozeada. Labi ame di lam dam setan oli veimahada zi lam laha tau ledahemu Yesusat ame setan laba gagu futodume ilida.
19. Labi, “Alat Yesus bake modi teudehe labe Aho fa ame dam zi lam modi fa neàdedà?” laham bak lam dam dua zoho labe neo vi aame, “Yesusam alihi vi ulase,” lahame àhàki ab meedamam.
20. Ame dam zi labe, “Yesusam alihi vi ulase,” lahame àhàki meedume modeha Yesusat ozo, “Aho vahokedam im nim dam duada zi labe fà aise,” làhàmu Aba Aho vahokedam im ozobohudelo vi tau meedam dam zi laba ahit aasu im faasi ab vahokedamam. “Um na vab dam oa, um na vab damat meedamnàme Alat uba deeli vame Am damali Aho uba ab vuusu im vahokedamam bak. Labihadamdaleàmu etei bisi deelehe bohu vuusdam dam um am bak.
21. Labi etei na vabali idoali meedam bakti ulohona Alat Aba Aho lolo modemna valo àhàki ozodam dam oa, Alat uba modi asimdi neàdeda tame. Labihadamdaleàmu etei bisi deelehe bohu vuusdam dam um am bak. Labi etei faina meedàmu it ozome ahu faidi mebe izidam dam oa, Alat ba diamut uba modi um ahu fa deeleda tame. Labihadamdaleàmu etei bisi deelehe bohu vuusdam dam um am bak.
22. Labi Em Abo Asum Ahoba Iubet Bak Niba Li Dateleheda modemu uho Eba tu vi tau meedàmu damat uba aame neha, ‘Dam mei,’ lahame uba faki feàtàdume um ee gagomti momnàme um gi ozahigeàmu keàtet lahasu meedam dam oa, uho bak niba meedaha bake gohali lodamna Alat asum ahoba iuba esu ahumdehena abo feàte. Labihadamdaleàmu etei bisi deelehe bohu vuusdam dam um am bak. Meit uba labihasu vabidamnàme um gi ozahit vei deeli etoedam labe kuguidale. Nehaha bak. Aham di iube ame dam labe im tai ahamda zi labe fa Alat vameadaha im aime fa dam bake ahate vameaidaha dam ahamda zi laba ame baket laha meedaha bak. Labihàmu ame dam labe uba etei ame baket neo meedameam làhà gi ozahit vei deeli etoedam labe kuguidale.
24. Aiee! Lahana Eho ozoha, um etei nazoh dualehe dam lam ba gi fai bak bohu tadem bak. Ame na uho amu gi ab vame asimdeham bak. Um ba diamut abo gi ahu faidi dehabalem labe gi fai bak bohu tadem bak.
25. Aiee! Um etei na aha odosdam damat mode? Làhà um ba gi diamut abo gi aha alia iddam labe gi fai bak bohu tadem bak. Aiee! Um etei ahu deeleha azim dam lam um ba diamut abo gi ahu faidi meddam labe gi fai bak bohu tadem bak.
26. Aiee! Dam dua bak labe um neà bak meeda tibame uba vou baedam labe um ba gi fai bak bohu tadem bak. Nehaha bak. Ame uba etei vou baedam dam labe im tai ahobada zi labe aham di iube laha meit neha, ‘Alat vameadaha im aime fa dam bake ahate vameaidaha dam im ame dam am tame,’ lahame vageme fa dam bake giomim vou vameatem dam ahamda laba amu laha vou baedaha bak. Um etei bada gi ame amu giomim vou vameatedam damti uloholelo modem labe ame dam totbaho labe fa uba vou baedam bak. Aiee! Um ba diamut Alat laha um beodam labe gi fai bak bohu tadem bak.” Lahame ab vahokedaham.
27. Labi im lada lam vahokedume neàdi Yesusat neo nehame Aba vi tau meedam dam dua zoho laba ab vi vahokedamam. “Um etei Em im aidam dam ade? Em im meida nim neo uba vahokedalo mozo. Uba fakemoholehe dam laba uho gi ozahigeàmu fa vei deelele. Labi laha uba adat faki ziesobulem dam laba uho gi laha ozahigeàmu fa vei neàdi ame dam laba neà bak tadi meedale.
28. Meit uba uloome neha, ‘Seee. Naat beole,’ lahame uloome gagomda laba uho gi ozahigeàmu vei neàdi fa Ala bake neha, ‘Ai oa, Oho da lam fa im neà bak modi esule,’ lahame tom gagodale. Labi laha dam uba fai bak meedam dam laba uho a fa ame baket vi modi vataumule. Gi ozahigeàmu fa vei neàdi Ala bake, ‘Ai oa, Oho da lam fa im neà bak modi esule,’ lahame tom gagodale.
29. Labi laha meit oba faki eobu visoi om udehà totbaho laba beomeam làhà oho gi teoli neo udehà totbaho ame da laba fi sule. Labi laha meit om sue sona ahoba dusuhuda tet vietomeam làhà om sue sona ada dusuhuda a malemule. Gi ozahit sue lada lam laha vihitoi vi lole.
30. Meit oba neha, ‘Na lam eba lom neào?’ lahame vi ailo gagomeam làhà ame na lam a malemule. Gi lodale. Labi om na tet si vietohoda laba a, ‘Em na fa veiale,’ laham bak lam ba a vi gagomule. Gi labihasule.
31. Uho nehi ozo, ‘Da labe eba nehi meedase,’ lahame uho labi ozomeam làhà uho ozoho bak lam ame da laba nasi meedale.”
32. “Um Eba vi tau meedam dam uho gi dam uba deelem dam lamota fa ot deeliameam làhà Alat ba uba deeli vou baedam vabak. Ne, dam faina meedam dam labe gi dam iba deelem dam lamota ot deeliam meo damat modem bak. Lahana Alat ame dam laba ba deeli vou baedam vabak. Labiham labe um laha ame baket modemeam làhà Alat laha ba uba deeli vou baedam vabak.
33. Labi um laha uho gi dam uba neà bak tadem dam lamota fa neo neà bakta ot modidameam làhà Alat ba uba deeli vou baedam vabak. Dam faina meedam dam labe ame bak lam modem meot. Ame dam labe gi dam iba neà bak tadem dam lamota fa neo neà bakta ot modidam meo damat modem bak. Lahana Alat ame dam laba ba deeli vou baedam vabak. Labiham labe um laha ame baket meedameam làhà Alat laha ba uba deeli vou baedam vabak.
34. Labi um laha uho na lodam di gi uba fa ame baleà vouhodam dam lamota na lodameam làhà Alat ba uba deeli vou baedam vabak. Dam faina meedam dam labe ame bak lam laha meedam meot. Ame dam labe na ibida lodam di vedi neha, ‘Ame da labe fa eba ame baleà vouhou fa vi vam bak ehete,’ lahame vi ozome uledi na lodam meo damat modem bak. Lahana Alat ame dam laba ba deeli vou baedam vabak. Labiham labe um laha ame baket meedameam làhà Alat laha ba uba deeli vou baedam vabak.
35. Um Eba vi tau meedam dam a labihasu meedamule. Um gi neham bakta meedale. Dam uba fakemoholehe dam laba uho gi ozahit fa vei neàdi ame dam laba deeli gi im neà bakta meedale. Labi laha meit oba nehameam, ‘Om na lam eho teohe vou lam neào?’ laham di modeo, meit oba nehameam, ‘Om na lam eho vase. Labi eho ba vamda lam fa oba baleà vouhose,’ laham di modeo, lahame labi gagomeam làhà ame na lolo modem di a nehi fet ozome lodamule. ‘Eba fa ame baleà vouhoe?’ laham bak a ozome lodamule. Gi lu olum neàte. Uho gi labihasu meedameam làhà Alat uba ame bak gohali lolo modemna lam abo feàna lolo modem bak. Labi laha Alat Bisi Feàda asum ahoba iuba azimda labe Aho uba neha, ‘Um Em data am tame,’ lahame gagom bak. Am abo im nehasu meedam Alat modem labe Aho labihalo modem bak. Meit na lom di, ‘Neàte,’ laham bak ozome fa gagom mom dam lamti dam labe bisi fai bak meedam dam lamti labihasu meedam dam laba Aho gi ozahigeàmu fa vei neàdi neà bakta meedam meo Alat modem bak. Labihàmu uho gi ulohona meedale.
36. Im Ai Alat meia aame faobekesi ozahit meedam bak lamti ulohona um laha meia aame faobekesi ozahit meedale,” lahame Yesusat ame dam laba ab vahokedaham.
37. Labi im lada lam vahokedume neàdi Yesusat im meida neo nehame vi vahokeda. “Uho meia a aame ozomsu gagodamule. Uho labiham labe Alat laha uba ba aame ozomsu gagodam vabak. Labi laha uho meia a, ‘Om gi faina meedam dàt moz. Alat fà om beom neàte,’ lahame a labihasu ozomsu gagodamule. Uho labi modem vabameam làhà Alat laha uba ba labihasu ozomsu gagodam vabak. Labi laha meit uba fai bak meedamda laba uho gi ozahigeàmu fa vei neàdedale. Uho labiham labe ubu uho faina lab meedam bak lam Alat laha ozahigeàmu fa vei neàdedam bak.
38. Uho laha meia na ilabdi lodam labe bohu vuusdale. Uho labi modemeam làhà Alat uba lolo modemna laha gi abo na ilabdi lodam labe bohu vuusdam bak. Ame na lodam di gi nehasu meedam bak. Gi mei ahoba vi vaheme bekesi totbaho goaitolo modemu auet vi neioeme neo vi vaheme zibulem bak. Nasi vi ozodale. Ubu uho meia meedam bak lam Alat gi ame baket ulohodesu fa uba meedam bak,” lahame Yesusat im lada lam neo ab vahokeham.
39. Labi im lada lam vahokedume neàdi Yesusat Aba vi tau meedam dam labe im Abada mahate ozobohudehe vaba fa Farisi dam labe ibi iho vahokedam im laba aidume tu vuzehem bak labna zohàme Yesusat neo ame dam zi laba dam fako aubesuhuna laba vàlu im totobe nidi nim nehame ab faasi vi fi koadamam. “Dam fako faida behàsu labe dat meida anekehà vuusu vou lam biem bak. Labihameam dam ahim lam gi amait bak bumat laba nom ilum bak.
40. Labi laha meit vahokedam bak aidamda labe aho ba aba vahokedam guru laba fa vafozi feà datelem vabak. Gi meit vahokedam bak aidamda labe fa aba vahokedam guru labe im ahebu vahokedam bak lam aidume vi ozome ozobohudi fa am guru lamti uloholem bak,” lahame Yesusat im lada lam ab vahokedaham.
41. Labi im lada lam vahokeme neàdi Yesusat im meida neo nehame ab vi vahokedamam. “Um vahi azim dam meida labe am fako gi ut nu keobe bitehena uho bisi aame gagodamna akati modi fako ubuda ut gahebabu bitehena it aame gagom vaba mode?
42. Fako ubuda ut gahebabu bitehena uho it aame veiom vab dam akati um vahi azim dam meida labe am fako ut nu gi keobe bitehena aame nehame gagodàla? ‘Ba oa, om fako ut nu keobe bitehe bak eho aame veiose,’ lahame akati labi gagodàla? Um abo gi ahit ahobat neàdi meedam damat modem bak. Um nasi fako ubuda lam ut gaheba bitehena it veioi voole. Uho labi modemeam làhà fako ut nu keobe meibada bitehe bak fa aasu veiom neàte,” lahame ab vahokedaham.
43. Labi im lada lam vahokedume neàdi fa, “Damat ibi iho modem bak lam, ‘Neào? Faio?’ laham bak ozobohudelo modem di gi aba aho modem bak laba iho aame ozobohudem bak,” laham bak vahokelo Yesusat im totobe meida nim neo nehame ab vi fi koadamam. “Ut neàda oo modeo, bu modeo, ba faina valem vabak. Labi laha ut faida oo modeo, bu modeo, ba neàna valem vabak.
44. Meit ame utso lam, ‘Neào? Faio?’ lahame ozom di gi ame ut labe am oo modeo, am bu modeo, laba aame am so ozobohudem bak. Neham bak. Dam gokio lo ali labe nigobuli sitom vabak. Labi laha ile lo ali labe sei voeli faitom vabak.
45. Dam ahu ahebu laha labiham bak. Mei ahu laba vahedam im zi modi fa tombalemna im aha am bak. Labiha labe da neàda am ahu gi im neà bakta vahedam labe aho im meedam di modeo, am aha labe im vameadam di modeo, gi im neà bakta meedam bak. Lahana dat bisi faina meedamda labe am ahu gi im fai bakta vahedam labe aho im meedam di modeo, am aha labe im vameadam di modeo, gi im fai bakta meedam bak,” lahame Yesusat im totobe lada lam ab fi koadaham.
46. Labi im lada lam vahokedume neàdi Yesusat ame dam zi laba im totobe meida nim neo nehame ab vi fi koadamam. “Ne, um Eho na im gagom di gi ailahigeàmodamehamdem dam akati Eba neha, ‘Ai iba vuusdam Boehàda oa,’ lahame labi gagodàla?
47. ‘Meit Ebe Eho vameadam im aime meedamehamdemda lamti akatihamdati ulohote,’ làhàla?
48. Gi neham bak. Da nibe num abada moho di abo bak simaheme neàdi bao nom zisiddume ke vame bakmat laba vou vaheteme neàdi bak bauletedume teudehedati uloho bak. Labi ba vao belu num laba zizehe di bao lam teudehe labe ba nigome agutehe vabak. Abo aho amu num moho di gi iademe moho labe labihaha bak.
49. Lahana, ‘Meit Ebe Eho vameadam im ailahigeàmomda lamti akatihamdati ulohote,’ làhàla? Gi neham bak. Da nibe num moho di gi bao zisum vabna loat giame ame num ab moham. Labi ba vao belu ame num laba zizeha num lam gi vaot beome biti agube ab vàhàdeme seteham. Dat num labi momda lamti Ebe Eho vameadam im ailahigeàmomda lamti uloho bak,” lahame Yesusat dam zi laba im labihasu ab vahokedaham.
1. Labi Yesusat Aho Am im lam ahebu ame dam zi laba vahokedume neàdi fa num debu Kapernaum laba ab laham.
2. Ame di labe Roma meo dam seratus zi meida labe im boehàda labe am na meedamda aba bisi deeleheda ame num debu Kapernaum laba gaili abo elolo vabali bisda.
3. Labi Yesusat meedaha im lam ame boehàda labe amu aime ozobohudehe labe Yesusat Kapernaum niba lehe bak aihemu aho Yahudi dam bake vuusu im vameame faheme modiam dam busaoda totbaho laba gagu Yesus bake ab oluham, “Uho Yesus bake le aile. ‘Em na meedamda nim Oho li modi fa neàdem neào?’ laham bak uho Yesus bake le gagu aile,” lahame ab gagu oluham.
4. Labi ame boehàda labe labi gagohemu aho gagu oluhu dam labe Yesus bake le ab faasi vameadamam. “Im boehàda labe am na meedamda gaili abo elolo vabali bisdalo. Oho iba tau le aame modi fa neàdem neào? Ame boehàda lam abo iba Yahudi dama deeli vuusdam meoda am bak. Am abo im Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num lam am dam gagome mome iba loho bak. Am abo neàda am tame. Labiham bake aho gagoho im lam Oho aime modem neào?” lahame ame im lam Yesus bake vameadume neàdi Yesusat uledi ame dam laba ab tau ladamam. Labi ladameam num bake fuseo vabali aaha ame boehàda labe amti ot deeliame vuusdam dam totbaho neo gagome doait ab oluham. “Uho Yesus bake doait le gagole. ‘Boehàda oa, Om bisi feàda em numa olem di em ladem bak.
7. Labi em laha Oba ahate fum ladem bake feidate. Om bisi feàda labe gi Obo Oho lab duzuhu bak labet bak bohulana gagomeam em na meedamda nim gi modi fa ab neàdemam bak.
8. Em nehi ozo. Eba vuusdam boehàda labe eba na im gagom di em aime meedam bak. Labi em laha em meo dam niba eho na im gagom di ame dam labe laha aime meedam bak. Neham bak. Ebe eho vuusdam dam niba eho da meida laba neha, “Iuba lale,” lahame gagom di ame da labe lam meo bak. Labi eho laha dat meida amomoi laba neha, “Lele,” lahame gagom di ame da labe lem meo bak. Labi em na meedam dam meida niba gago, “Na nim modele,” lahame gagom di ame da labe modem meo bak. Em fota boehàdateli labihasu meedam bak. Lahana Oho meedam bak lam bisi feàda Om am bak. Labiham labe Oho gi laba duzu, “Em da nim fa neàdele,” lahame Oho labi gagomeam làhà em da nim gailehe bak modi fa ab neàdemam bak,’ laham bak lam uho doait le Yesus bake gagole,” lahame ame dam laba labi vameadume neàdi Yesus bake doait ab oluham.
9. Labi le Yesus bake doni laba ot tahiame ame im lam vameadume modeha Yesusat ame im lam aime ab àvodeham. Àvodi Am fa vaktesi dam duada Aba vi tau godam dam laba ab gagoham. “Aa làhà! Ame da labe etei lab gagoho bak lam abo imbota imbot. Lahana Eho etei uba gagolo modem im nim laha imbo imot modem bak. Nasi aimale. Ame Romada abo Yahudi dàt modem vabda vàmtea nimota Eba bisi tuhudatebo am tame. Em Israel dam totbaho ahebu ba dat lada vàmtea labe aba aho lab bisi Eba tu vuzehehe bak lamti ulohoda Em ba aam kaio,” lahame ab gagoham.
10. Labi gagu neàdi dam doait gagome oluhu dam nibe fa im boehàda am num bake ab laham. Le ame dat gaili bisdamda nim fa neàdehe bak ab le aaham.
11. Labi Yesusat num debu Kapernaum laba azibe ba neo num debu Nain laba ab laham. Labi Aba Aho vahokedam im ozobohudelo vi tau meedam dam ziti dam amomoi zi lamti tau vulada.
12. Ladaha labe num debu Nain bàhàgo obe laba fuseo vabali aaha dam koei ileba esu vou ledam bak ab aaham. Koei labe am oi lam dat amu eloi setehena maboet moz. Lahana am adat gi vàmtea faahana neo eloi medda. Làhàmu Nain dam amomoi zi labe nam laba vi tau vule koei baumsulo vulada. Labihadamna modehe labe Yesusat ab aaham.
13. Labi Yesusat Aho ame nam labe lab meddam bak lam aahemu faobekesi ab gut gagoham. “Oi, a mebule,” lahame ab gagoham.
14. Labi gagu afoezobe Yesusat lab lehe labe koei ileba laba netàdi ulasi modeha dam ab odoham. Dam laba odosi Yesusat koei niba ab gagoham. “Baseà om fat ahedi usale.”
15. Lahame gagoha koei lam fat ahedi usai ileba nusu im ab faasi vameadaham. Labi Yesusat fa ame da labe am oi bake gago, “Om adat nasi fa om num bake vou lale,” lahame ab gagu oluham.
16. Labi modeha dam laba dozeadaha dam zi labe ab aame àvodi anekehàso ab gaadamam. Abo àvodi fa Ala bake vou baeda. “Alat vameadaha im aime fa dam bake ahate vameaidahada abo feàda etei iba ab lehame? Alat iba Am Yahudi dama taulo etei iba ab nom oluhame?” lahame Ala bake ab vou baedaham.
17. Labi ame im lam Nain bak labe ab vou fi det ladaham. Vou fi det laha labe Yudea bake azim damti Yudea totobe esuhu damti ahebu ab vou fi det lame uloholeham.
18. Labi Yohanesat aba aho vahokedam im ozobohudelo vi tau meedam dam labe laha ame Yesusat meedaha im lam ahebu aime fa Yohanes sel ousdam num laba vou le Yohanes bake ab vameadaham.
19. Labi Yohanes ame im lam aihemu ozoho vabamu aho aba vi tau meedam dam meida behàsuta gagome ab leham. Li duzu neàdi Yohanesat ame dam behàsu laba nehame vameame Yesus bake ab oluham. “Uho Yesus bake le gagu aile. ‘Dam ahamda iube neha, “Alat ba diamut Aho Gagu Fihasi Vimteme Olulo Modem Dat Boehàda olu tame,” lahame fet gagu vou vamea useheda Om ame Da ameo? Om ame Da modem vabameam làhà iho gi fa dat amomoi ba olum bake vou faodào?’ laham bak lam uho Yesus bake le gagu aile,” lahame vameadume neàdi Yesus bake ab oluham.
20. Labi ame dam behàsu labe Yesus bake le lafusi aaha Yesusat gi im nehasu meedam bak ab aaham. Dam fota gailehe dam lamti dam elolo vabalehe dam lamti Aho modi fa neàdeda. Labi dam setan oli veimahada zi lam Aho laha setan laba gagu futodume ilida. Labi fako faidi na aam biem dam lam Aho laha modi fako fa na aam neàdeda. Yesusat labihasu meedam bak lam dam behàsu labe ab le aaham. Bak lam aadahemu Yesus bake ab gagoham. “Yohanes Mei Vuu Valo Baptisleiamda labe iba neha, ‘Oba li gagu aile. “Dam ahamda iube neha, ‘Alat ba diamut Aho Gagu Fihasi Vimteme Olulo Modem Dat Boehàda ba gagu olu tame,’ lahame fet gagu vou vamea useheda Om ame Da ameo? Om ame Da modem vabameam làhà iho gi fa dat amomoi ba olum bake vou faodào?” laham bak Oba li gagu aile,’ lahame iba gagu im oluho,” lahame ame im lam Yesus bake ab vameadaham.
22. Labi vameadume neàdi Yesusat fa ame dam behàsu laba ab gagoham. “Uho etei li aaha bak nimti labi Eho vameadaha im uho aihi bak nimti labihasu fa le Yohanes bake vameadale. Eho nehasu meedam bak: Dam fako faidi na aam biem dam labe im fako fa neàdedume na aada. Labi dam nao zoho nutabedehe dam lam laha fa neàdedume usnada. Labi dam sokba faidi vàhàdem bohu vuusdam dam lam laha modi fa neàdeda. Labi dam dogoi faidi ulaihàbulehe dam laha modi fa im aim neàdeda. Labi dam elodaha dam laha modi fa ahededume usnada. Labi laha Ebe Eho meedaha Im Neàna lam Eho li vameadam bak lam dam na vab dam labe iho aida. Eho labihasu meedam im zi lam uho fa Yohanes bake vou le laha vameadale.
23. Labi uho im nidi nim neo Yohanes bake vou le vameadale. Meit nehame ozo, ‘Alat Gagu Fihasi Vimteme Oluhu Dat Boehàda lem di im nehasu meedam bak,’ lahame aba aho ozoho bak lam Eho meedam vabnàme gi ozahit Eba tu vuzehemda lam Alat gi im neà bak modi esuiamda am bak.”
24. Lahame labihasu vameadume neàdi ame dam behàsu lam fa Yohanes bake ab oluham. Labi olu neàdi Yesusat fa neo dam duada zi laba, “Yohanes ana dàt modela?” laham bak lam ab faasi vahokedamam. “Uho neha, ‘Imo le Yohanesam im aidase,’ lahame bak aotba baa bohu dam vaba alim bak laba lalo ladaha di lam um baka ana aalo ladahela? Uho gi ket et nutabet ulasi vou lai vou laidam bak aalo ladaheo? Vabà! Um ba labi ozome laha vabak. Yohanes abo meit vameadam im aim di ket et labe fi zuhusi bedem bakti uloho vabak. Am abo meit aba neha, ‘Im nehasu meedale,’ laham di am ba fa veimdem vab labe gi aba baket daetesu labaha bohu meedam dàt modem bak. Am abo teuda am bak.
25. Làhà um labiham vabameam baka ana aalo ladahela? Uho gi meit sue bisi neàna dusuhu bak aalo ladaheo? Vabà! Um ba labihaha vabak. Dam nazoh duada labe iho sue bisi neàna dusuhu dam lam ba bak aotba baa bohu dam vaba alim bak laba azim vabak. Dam lamohoda gi boehàda labe im num neàna bisi feàda lamota azim damat modem bak. Yohanes ba sue lamohoda dusu num feàda laba azim vabak.
26. Làhà labiham vabameam um baka ana aalo ladahela? Uho gi Alat vameadaha im aime fa dam bake ahate vameaidahadate aalo ladahe? Lo, imbote. Uho le aalo modemda abo ame da am bak. Lahana ame da Yohanes lam gi ame bak lamota modehe vabak. Abo ame bak labe vafozi bisi feàda am am bak.
27. Eho etei lab gagohoda lam Alat Vameadaha Im Toedahana meida nim Yohanes bake nehasu vàlu gagoho bak ehe bak. Alat Am Adat Yesus bake neha: ‘Eho Em im le vameadamda nasi dam bake olu neàdi Om ba olu tame. Damat Om ule neàt gut vam bak laba ozome ame da labe nasi le duzu zie vueme neàdehena ahum Om ba vula tame.’ Lahame dat ahamda Alat vameadaha im aime fa dam bake ahate vameaidahada Maleaki labe aho fet toeme esuhu im lam ab imbodi Yohanes ame baket ab faasi meedaham bak. Labiha labe Eho uba neha, ‘Ame da lam ame bak labe vafozi bisi feàda am tame,’ lahame uba labi gagoho bak.
28. Lo, lamota imbot. Lahana Eho etei uba neo gagolo modem im imboda nidi nim laha nasi aima. Dam ahamda iumti dam bada nimti abo dam bakda ahebu fa vazisi Alat ozodam di bisi feàda vàmtea Yohanes Mei Vuu Valo Baptisleiamda am bak. Lahana dam etei Eba tu vuzehi Alat deeli vame Am damali vuusu im vahokedam dam lam abo damat neha, ‘Feà kaio,’ lahame gagodam damat modemnàme Alat ozom di ame dam labe iho fa Yohanes vafozi feà damalem dam am bak,” lahame ab vahokedaham.
29. Lahame labihasu vahokedume modeha dam duada totbaho labe Yesusat lab vahokedaha im lam aime uledi Ala bake ab vou baetedamam. “Lo, imbote. Alat Aba Aho meedam bak ahebu gi ahole meedam Alat modem bak,” lahame Ala bake ab vou baetedaham. Ame dam labe ihimo ame bak lam modehe vabak. Dam abo meia gagu gi vi vaiam doi zoho pajak lam atem dam totbaho lam laha ame baket tau meedaha bak. Ame dam zi labe amu Yohanesat, “Nehame modele,” lahame vahokedaha im lam aime uledi Yohanesat im vuu valo baptisleidahemu Ala bake ab vou baetedaham.
30. Lahana Farisi damti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti laham dam zi labe amu Yohanesat, “Nehame meedale,” lahame vahokehe im lam ailahigeàmu moho labe ba neham bak gagom kai. “Im oho valo baptislele,” laham bak lam gagodam moho labe etei fa Yesusat vahokehe im lam, “Alat uba soat vausu tame,” lahame Yesusat lab vahokehe im lam neo laha aim mouda.
31. Labi Yesusat im meida neo ab vi vahokedamam. “Dam etei bak niba esdamda ibi iho meedam bak lam Eho, ‘Akatiham bakti ulohote,’ lahame vouhome vameadàla?
32. Làhà Eho gi neham bak vouhodase. Um dam bada nim gi data num bak tomba laba nusualadume dam busaot modem baket vouhom datati uloho bak. Ame data labe iho sikilo modem im lam fa data totbaho laba gagoha data lada labe mouda. Làhàmu ab faki tozodamam. ‘Ea. Iho neha, “Imo bo foadume umti kuguidase,” lahame gagohat um akati mohela? Labi iho neo, “Umti vahi koei esum di medaom labe nimidase,” lahame gagoha um akati mohela?’ lahame ame data labe data totbaho laba faki tozome gagoda.
33. Um dam bada gi ame data labe modem bakti uloho bak. Nehaha bak. Amu Yohanes Mei Vuu Valo Baptisleiamda labe aho lehe di lam aho gi ahit na àm mu izidam bak. Labi laha anggur oo vaksa meona lam ba uddam vabak. Labiham damat modehe labe uho aame vi ozo, ‘Ibi iho na àme im gagu igeadam bak lam iho ame da laba gagoha akati aho modem vaba ahit na àm mu izidàla?’ lahame faki vedi mu nehi vi tozoda. ‘Ea, da lam gi mei ahu oli veimam setan labe am ahu oli veimai meedam dàt modem bak,’ lahame tozoda.
34. Labi laha Em Abo Asum Ahoba Iubet Bak Niba Li Dateleheda nibe Eho ba lehe di lam Em gi na àda. Labi laha anggur oo vaksa meona udda. Labi im gagu igeadam baket meeda. Eho labihamda modehe labe uho Eba aame vi ozo, ‘Ibi iho ahit na àm mu izidam bak lam iho ame da laba gagoha akati Aho modem vaba gi deeli igeadam labe na àdàla?’ lahame faki vedi Eba nehi vi tozoda. ‘Ea, Da lam abo gi dedehe geàmu na vi àdam bohu vuusdam Dàt moz. Labi laha anggur oo vaksa meona bisi duana uddume bak vabi bobidume iziam Dàt moz. Labi Da lam abo meia gagu gi teo vi vaiam doi pajak gut gagome vaiam damti labi damat neha, “Dam faina meedam damat modem bak,” lahame feàtàdaha dam totbaho lamti vazisi ot deeliame meedam Dàt modem bak,’ lahame Eba faki mu vi tozoda. Labihàmu Eho ozoha, um dam bada gi Yohanesti Emti li meedam im im gi mohet vanamai mom damat moz.
35. Lahana Emti Yohanesti iho li Alat Aho ozobohudi meedam im lam iho fa dam bake lab vahokedaha di meit ame im lam aime vuzehi iademe ulohodesu meedameam làhà ame bak labet modi damat gi nehi ozome gagodam bak. ‘Làhà Alat Aba Aho ozobohudi meedaha bak labet modi Yohanesti Emti gagu oluhu bak lam gi ahole meedaha bak,’ lahame vi ozobohudi gagom bak am bak,” lahame Yesusat ame im lam ame dam zi laba ab vahokedaham.
36. Labi ba digat meida iube Farisi dam meida Simonat am na àm bake Yesusat ab gagu leham. Labi Yesusat Farisida labe am numa li na ab tau àdamam.
37. Labiham di labe ame num debu laba faina meedam nam laba ehet. Laham nam labe Yesusat Farisida labe am num laba li na tau àm bak ozobohu labe aho doi duana vaha minyak ahana neàna amu ke fauhana ee gagom pualam meit modeme botolilehena laba fedehena lam visoi Yesus na àm bak laba ab vou leham.
38. Labi vou li Yesusat aidam obe laba li duzu Yesus Am naba modesdam bak laba ahit ogomasu nom bohusu ab vou meddamam. Vou meddam labe nam labe am fa vaksa lam fa Yesusam naba toha laba babadume eksobuleda. Labihàmu am ohuta bohulana lam it visoi Am naba eksobu bak lam fa footoda. Labi nam nibe am ladehe labe ozo, “Em abo faina meedam namet mode? Labi Yesus abo neàda im ozobohuda ame?” laham bak ozohemu Am naba laba tomoamdi ame minyak ahana neàna lam ve ab noidamam.
39. Labi Farisida num deda labe aho nam labe modehe bak lam vi aahemu am ahulat ahamo vi ozo, “Ne, damat neha, ‘Da nim Alat vameadaha im aime fa dam bake ahate vameaidam Dàt modem bak,’ lahamda akati nam faina meedam namet Aba uladdam bak taho malem vaba vabi modela?” lahame ab vi ozoham.
40. Labi ame Farisida labe aho ozoho bak lam Yesusat gi Ahamo ozobohudi ab vi gagoham, “Simon, Em im oba vamease,” lahame gagoha Simon fa gago, “Lo, nasi vameamale.”
41. Labihàmu Yesusat Simon bake im totobe nidi nim ab faasi fi koadamam. “Dat am doi meia lu afoezobe ba ame baleà vouhoiamda meida labe dat meida doi oona perak lima ratus lo. Labi dat meidate lima puluh lo.
42. Labi faobe ame dam behàsu fa doi dedate ame baleà vouhom bie. Labihàmu doi deda labe ab gagoham. ‘Làhà fa eba ame baleà vouhom bak feidate,’ lahame ab gagu moham.” Lahame im totobe lada lam fi koadume neàdi Yesusat fa Simon bake neo ab vi ailo gagoham. “Oho ozom, dam behàsu lam dat adidat ame dat doi deda laba bisi deelehela?”
43. Lahahat Simonat fa ab vi gagoham. “Eho ozoha, dat doi duana vahada labe aba neha, ‘Feidate,’ lahame gagoho bak aihemu bisi deeleheda am bak.” Lahahat Yesusat fa vi gago, “Lo, oho vi ozome ozobohudi neàdi gagoho bak lam ahole gagoho bak.”
44. Labi Yesusat fa vaktesi nam laba avaesu gi Simon bake neo ohuset ab it vameadamam. “Nam nibe Eba etei li modehe bak Eho oba gagolo mozo. Eho om numa ahamte olehe di lam meit mei numa olem di naba kikem vao noai esum baket oho ba Eba ame baket modehe vabak. Lahana nam nimota am fa vaksat Em naba toha babame eksobueme fa am ohutat footoho bak.
45. Labi laha Eho om numa ahamte olehe di lam mei numa alimeat li olem di meia si oode tomoamdem baket oho ba Eba ame baket modehe vabak. Lahana nam nimota ba li vi olehe labe Em naba si tomo tomodam lahasuhu bak.
46. Labi oho ba Em ohu niba zaitun oo minyaklehena lam Eba noihi vabak. Lahana nam nimota abo minyak ahana neàna ve Em naba toha niba noihi bak.
47. Labihadàmu Eho oba nehi gagom bak. Am faina duana meedaha bak lam Eho ozahigeàmu fa ab vei neàdeham bak. Labiha labe aho Eba duana deelem bak. Lahana meit faina meedam bak gi koena modehena Eho ozahigeàmu fa vei neàdemeam làhà ame da labe Eba gi koena deelem bak,” lahame ab vameadaham.
48. Labi Yesusat fa neo ame nam niba ab gagoham. “Oho faina meedaha bak lam Eho fa ozahigeàmu mu fa vei neàdehe bak,” lahame ab gagoham.
49. Yesusat nam niba labi gagohemu dam Simon bake na tau àdam dam totbaho labe aime ihimo aa ab ot gagoiaham. “Da nim baka ana modelo modem Dàt labi gagoe? Meit faina meedàmu Alat beolo modem bak lam Alat Ahamo gi vei mu fa faamome vei neàdedam Alat modem labe akati da nibe, ‘Aho modeho,’ lahame faasi mode?” lahame ab ot gagoiaham.
50. Lahana Yesusat gi ailahigeàmu nam niba neo ab gagoham. “Om Eba tu vuzehe labe Alat oba beom bake Eho soat vausuhu bak. Om fa Alati vahehemu obo bake nasi lale,” lahame ab gagoham.
1. Labi ba di iube Yesusat neo Alat Boehàdateboli dam bake vuusu im vahokedam bak lam, “Akatihasu modemna modela?” laham Im Neàna lam dam num debu dua bake esuhu damti dam sii bake esuhu damti laham dam laba Yesusat ame Im Neàna lam vou le iuba vamea. Iuba vamea. Labihada. Labihadam di lam Aho Am im gagu oluiam dam dua belas lam laha vi tau goda.
2. Labi lahi totbaho zi amu setan oli veimaha bak ame. Labi so faidehe bak ame. Labihasu meedaha bak amu Yesusat modi fa neàdedaha lahi lam laha Yesus bake tau goda. Ame lahi zi lam meida Maria abo Magdala bake azim nam am. Lahana am ahu amu setan tujuh oedume veimadahemu Yesusat fa gagu futodume ilidaha nam am.
3. Labi nam meida Yohana abo Kuzam nam am. Ame Kuza lam Herodes Antipas boehàda labe am nazoh vou aasumda am. Labi nam meida Susana am. Labiham lahi lamti lahi giida totbaho ziti Yesus bake vi tau goda. Yesusat Aho Am im gagu oluiam damti iho iuba le ame Im Neàna vamea. Iuba le ame Im Neàna vamea. Lahadam di labe im na àm bakti im bakti vabalehemu ame lahi labe im doi num dedate lu na ve Yesusat Aho Am im gagu oluiam dam dua belasti àme i. Labi num iudu iuba laha le ame lahi labe im doi neo num dedate lu neo na ve àme i. Labihada.
4. Yesusat labihasu bak mei bake le Im Neàna lam vameadam di digat meida labe dam num debu bake esuhu dam zi labe Yesus bake iubet le iubet le lahadume bakamta ab li dozeadaham. Labihàmu Yesusat im totobe meida nidi nim nehame dam zi laba ab faasi fi koadamam.
5. “Dat utoho modemda nibe am na dem bak laba na oo neb ab le guladamam. Labi na dem bak laba le guladam di labe ame na oo neb totbaho gi damat lailaidam zie tomba laba ab biddaham. Labi modeha ame na oo neb totbaho damat lailaidam labe gi naot duzui duzuidume vàhàde. Labi oo neb totbaho gi bume faobuda labe visoi àme ab seteham. Lada lam labiha.
6. Labi ame na oo neb totbaho lam ke baa bak laba ab biddaham. Labi modeha ke baa bak laba biddahada lam bak vao vaksa vab labe ame na oo neb lam usihita usi. Lahana gi usilo iahamu fa ab aladaham. Lada lam labiha.
7. Labi ame na oo neb totbaho lam aliho debu bak laba ab biddaham. Labi modeha na oo neb lamti alihosoti amediat usida. Amediat usihi labe na àm vabda labe nasi kilale. Labi kilalehe labe na àmda lam gi alihosot vi giame ab aladaham. Lada lam labiha.
8. Lahana na oo neb totbaho lam fa bak neà bake bidda. Bak neà bake biddaha labe abo neàna usidume kilali abo oo duana ab vaedaham. Labi oo vaedaha di labe abo oo seratus ab vaedaham.” Lahame im totobe lada lam labihasu fi koadume neàdi Yesusat neo ab vi gagoham. “Um dogoi im aim bak ehena Eho etei lab vameadaha im lam mahate aime vi ozome ozobohudele,” lahame ab vi gagu esuham.
9. Labi Yesusat vameadume neàdi dam dua bak fa le seti Aba vi tau meedam dam dua belas nibe ihimo Yesus bake li ab gagoham. “Ame Oho totobet lab fi koadaha im lam am tombu akete?”
10. Lahame vi ailo gagoha Yesusat fa neo ab vi vameadamam. “Alat Ahamo Boehàdateboli dam bake deeli vame Am damali vuusu im vahokedam bak lam etei modi fa gàhàlehe bak lam, ‘Akatihasu modemna modela?’ lahame dam amudate vastehe im lam Em Aiat Eba neha, ‘Eho ame im lam fa uba vameadume umota ozobohudi fi gatedase,’ lahame Eba labi gagohemu Eho im dedateli etei fa uba vameadume fi desi um ab ozobohudedamam bak. Lahana Eho dam giida abo Alam damalehe vab dam laba im vameadam di lam ‘Ame dam labe Ebe Eho meedam bak lam aam bakta aa. Lahana, “Iho etei aaha im nim akati modemna modela?” laham bak lam ba vi ozome ozobohudedam vabak. Labi laha Em im aim bakta ai. Lahana, “Iho etei aihi im nim akati modemna modela?” laham bak lam ba fetehesu vi ozome ozobohudedam vabak.’ Labiham labe Eho gi ahit im totobet fi koadam bak,” lahame ab vameadaham.
11. Lahame labi vameadume neàdi Yesusat neo ab vi vameadamam, “Ame lab totobet fi koadaha im labe am tombu gi neham bak. Ame na oo neb gulahana lam Alam im am bak.
12. Labi na oo neb zie tomba biti bumet visoi àhàda lamti dam Alam im nehi aime meedam damti uloho bak. Neha: Dam nibe iho Alam im lam aimta ai. Lahana Iblis labe ozo, dam nim Alat vameadaha im aime Ala bake tu vuzehi Alat soat vausum bak labna zohàme Iblisit li im ahu ad laba modesuhu im lam ab modi seteham. Lada lam labiha.
13. Labi neo na oo neb ke baa bake biteheda lamti dam Alam im nehi aime meedam dam nimti uloho bak. Dam nibe iho Alam im lam aime gi àvodehat deeli tu vuzehe. Lahana abo mahate tu vuzehe vaba gi fota tu vuzehe. Labi iho lab aihi im lam im ahu ad laba modesu teudi omnaoli abehamdehe vab labe naat iba modi ozolo meedam di labe ame dam lam gi Ala bake fota tuhu bak labet modi gi kehàm vaba ab mu voou seteham. Lada lam labiha.
14. Labi na oo neb aliho debu bak laba biteheda lamti Alam im nehi aime meedam dam nimti uloho bak. Dam nibe iho Alam im deelehat aime ve àdesda. Lahana bak niba esdam di gi iba modi neàdemna, ‘Modem vabna ozomo?’ lahame bisi àvodi azi ozoda. Labi laha im nazoh dualelo àhàki neo azi vi ozome meeda. Labi laha ibi iho modelo àhàki ahu gukemna neo azi vi ozome meeda. Labihadam damat modem labe ibi iho amu Alam im aime vaha bak lam gi fa iho ozome meedam im lamti valiheme ab vàhàdeme seteham bak. Abo na oo neb usime bu vali amdehe vaba gi alihosot ot giaiame setem bakti uloho bak. Labiha labe Alam im lam ba ab vi ozome meedam bieham bak. Lada lam labiha.
15. Labi na oo neb bak neà bake biti usihida lamti dam Alam im nehi aime meedam damti uloho bak. Dam nibe Alam im aim di abo gi ahu teudi ule neàt abo va. Abo vaha labe iho na im meedam di gi ahate neà baket meeda. Ame Alam im lam ba mu voom vaba abo teudi tu vuzehehe bak bohu vuusdam labe abo na oo neb labe bak neà bak laba biddahada labe oo duana vaedaha bak lamti uloho bak,” lahame Yesusat Aba vi tau meedam dam laba ame im tombu lam ab vameadaham.
16. Labi ame im tombu lam vameadume neàdi Yesusat im totobe meida neo nehame faasi ab vi fi koadamam. “Meit vuagat usim di ba boloseh visoi ahoba nom suusum vabak. Labi laha damat iho im beahuba ad laba vou oli esum vabak. Gi damat oli aam neà laham bak ozome tom fi haba laba esu fauhaedam bak. Labiham labe damat ame numa olem di gi fauha neàdi modesdamna aam bak.
17. Alat Ahamo Boehàdateboli dam bakdate deeli vame Am damali vuusu im vahokedam bak lam, ‘Akatihasu modemna modela?’ laham im lam amu fi zeam bitoi tombalehe vab im lam ba gi labihasu vastem bohu modesdam vabak. Abo ame im lam ahate vameadume fi zeam bitoi tombali dam ozobohudem bak ehe bak.
18. Labiham bake Eho uba vahokedam im zi lam iademe aime ozodale. Meit ame im lam iademe aime vuzehemeam làhà Alat fa ame da laba vi tau modi aho im duana vi ozobohudedam bak. Lahana meit ame im lam iademe aime vuzehem vabameam làhà Alat Aho ame da labe koena ozobohudehena lam gi fa faatoi vei setem bak. Labiham bake Eho uba nib vahokedam im nim um dogoi balesu mahate iademe aile,” lahame Yesusat ab vameadamam.
19. Labi ame im lam vameadam di labe Yesus Am oiti Am vahadam ziti Yesus bake li netàdesome modeha dam bà tadi olem bili meeda.
20. Làhàmu dat meida labe bak lam aahemu le Yesus bake netàdi ab gagoham. “Ai oa, Om oiti Om vahadamti Oba li tàhi aalo àhàki bako iuba li dozeadume vou faodalo.”
21. Lahame gagoha Yesusat fa dam zi laba ab vi gagoham. “Ne, uho ozom, Em oiti Em vahadamti ame dam akete? Ame dam gi um neam taia? Meit Em Aiat gagoho im aime vuzehi meedam dam ahebu lam Em oi Em vahada laham dam am bak,” lahame Yesusat ab vameadaham.
22. Labi ba digat meida iube Yesusat ab gagoham. “Imo itea biou tot iuba lase,” làhàmu Aba vi tau meedam damti iho iheba ziddume ab biodamam.
23. Biodam di labe Yesusat lavoidume ab iddamam. Labi iddam di labe nutabe fai iubet li itea laba modi fi tauledume bubaholedam labe ihe laba tom foadume vao ihe laba zizi noziali tezeo vabali dam folem bak ab fuham.
24. Làhàmu Aba vi tau meedam dam labe ihe zoho laba fi ai Yesus bake ukeme ab gagoham. “Ai Guru, Om ade? Im ihe vao zizi noziali im folelo mozo.” Làhàmu Yesusat keesi usai nutabe fai lamti vao fi tauledume bubaholedamna lamti mali, “Setele,” lahame gagoha ab bagavai seteham.
25. Labi seti neàdi Yesusat Aba vi tau meedam dam laba ab gagoham. “Um Eba akati mahate tu vuzehem vaba mode?” lahame gagoha ame dam labe ame lab modehe bak lam ihimo vi ozome ahu adat iedi ab ot gagoidamam. “Aa làhà! Uho ozom, Da nim ana Dàt mode? Am gi nutabeti vao fi tauledume bubaholedamna lamti, ‘Setele,’ lahame gagom di gi uledi setem meo Dàt modem bak,” lahame ab ot gagoidaham.
26. Labi ot gagoiame neàdi neo bioda. Biodume bak ee gagom Gerasa laba fusi ab zituham.
27. Labi zitu neàdi Yesus Aho usi aaha dat setan zi duana oedume veimahada labe Yesus bake li gut tàh. Ame da lam ame num debu laba azihi dàt moz. Lahana etei gi so bozbuna num aabo bake azim vaba gi koei vahedam ke bumat zi bake azietem dàt Yesus bake li gut tàh.
28. Ame da lam amu dam ahe damat am si fa vou li bes botehà niz labe am anekehà ahim gia. Labi nao ahim gia. Labi vou azi aasdam meot. Lahamnàme ame setan zi labe veimai meolehe labe aho ame bes lam ahamo tet ukbodume dam vaba alim bake vou itaidam meot. Labihamda labe Yesus bake li gut tahi modeha Yesusat fa ame setan laba ab gagoham. “Om taho futoi da nim vou esmozi itale,” lahame mali ooteha ame da labe geàdume Yesusam naba modesdam laba ahit ogomasu ab biteham. Biti bisteat ab gagoham. “Yesus abo Ala Bisi Feàda labe Am Adat oa, meit ahamo modem im akati Oho li modi faatolo modela? Eba a modi gemule.”
30. Lahame labi gagoha Yesusat da niba neo gago, “Om ee Eba gagomale.” Lahame gagoha da nibe fa gago, “Em ee gagom Legion.” Aho ozo, setan zi duana labe am ahu oedume veimahemu ee labi taluhu bak.
31. Labi ame setan zi labe Yesus bake nehame tauleme gagoda. “Iba a bak bumat zoho novaha bak ozom vabna laba a nom olu geàdam bak tademule,” lahame labi tauleda.
32. Labi ame di labe aaha doho fi ho zi gi netà bak nom otesuhu bak laba dozeadume bakbe àda. Làhàmu ame setan zi nibe Yesus bake neo ab gagodamam. “Làhà Oho iba da nim mali gagu futodume ilidalo modem di im fa doho fi ho zi labe im ahu laba fa oedume veimadam neào?” lahame labi tauledume gagoha Yesusat uledi
33. ame setan zi laba gagu futodume ilidume ame doho fi ho labe im ahu laba ab oedume veimadaham. Labi modeha ame doho zi lam bak nom otesuhu bak labet nom itaome valo nom ilu ab tezi elodaham.
34. Labi modeha dam doho fi ho vou aasdam dam labe aaha im doho valo tezi elodaha bak aahemu iedi ab iliham. Ilime le im num debu ibidati bàhàgo bake numaedaha damti ab vou fi det ladaham.
35. Lab vou fi det ladam labe dam laba esum dam labe ame im lab modehe bak lam aalo ab valadamam. Valadam labe Yesus bake li aaha dat setan zi amu oedume veimahada lam gi Yesusam naba modesdam laba sue fa dusu im ozobohudi aidamna aahemu ab àvodi iedeham.
36. Dam na aahada nibe Yesusat ame setan zi laba gagu futodume ilidaha bak lam fa dam iube lehe dam laba vou duzu gut vameada.
37. Labi vameadume modeha Gerasa bak laba esuhu dam labe iedi modem faidehemu iho dae vazisi Yesus bake ab gagoham. “Om iba a tau azimule. Om taho fa lale.” Lahame labi ootedàmu Yesusat fa biolo iheba ab ziham.
38. Zisi fa lasome modeha amu setan zi gagu futodume ilidahada labe Yesus bake neha, “Em Oba tause.” Lahame vi tauledume modeha Yesusat mali
39. vi gago, “Obo oho azihi bak laba fa le ame dam laba Alat oba abo neàna modehe bak lam vameadale.” Lahame labi gagohemu da nibe fa num debu bake le Yesusat aba im neàna modehe bak lam ab vou vameatedaham.
40. Labi Yesus Gerasa bak vou esmozi fa Itea Galilea labe Aba Aho amu lehe tot iuba fa ab bioham. Labi fa biou zitu aaha dam zi labe Yesusat fa lem bake li dozeadume vou faodamna ab li zituham. Labi ame dam zi labe Yesus fa iba lehemu gut deeli, “Neàte,” lahame ab gagodamam.
41. Labi Aho laba li zitu modeha dat meida ee, “Yairus,” lahamda labe ab lefuham. Ame da Yairus lam Yahudi dam labe ibi iho fi hasi bakamta vahi Alat vameadaha im ahamda dogoit aidam bakti im meiti meedam num laba vou aasdamda meida am. Lahamda labe am adnamat gi vàmtea faahana abo dua belas tahun fuhuna abo duana gaili elolo vabali meeda. Labihàmu li Yesusam alihi aahemu, “Yesus abo feàte,” lahame ahu adat iedi Yesusam naba modesdam laba netàdi ogomasu ahit bake ab biteham. Ogomasu biti tauledume gago, “Om Em numa tau lele,” lahame ab gagodamam. Labi gagodàmu Yesusat ab tau ladamam. Labi ladam di labe gi dam duali bak kekesi gi mei soat osiddam labe lada.
43. Labi ladam di labe nam abo bako itaha bak bohu vuusdume dua belas tahun fuhu nam nibe abo dam amomoit aba modi fa neàdem biehe namet laha ba tau duzu vueda.
44. Laham nam labe dam duada soat vatoheme Yesusam ohus tot nibe aa vi vuli Am sue sona ahoba dusuhuda ohus tot bobusbe niba ab vi ulaham. Labi vi ulahemu am bako itaha bak bohu vuusdam bak lam fa vaitoi ab neàdeham.
45. Labi nam nibe Yesusam sue ulaha di labe Yesusat ozobohudi ab gagoham. “Eba amat ulahela?” Lahahat dam ahebu veibam tade. Làhàmu Petrusat Yesus bake ab gagoham. “Mm, Guru Om ozom vaba? Dam dua labe bak kekesi Oba ulam tadi modem bak.”
46. Lahahat Yesusat fa ab gagoham. “Mm vabà! Meit ahit Eba ulaha bak. Eho meia modi neàdemna meia modi neàdehe bak Em naeda it ozoho bak.”
47. Lahame labi gagoha nam nibe aho Yesus bake aa ulaha bak lam Yesusat Ahamo ozobohudi ahate gagohemu iedi faa ab dododamam. Am faa dododume lehe labe, “Yesus abo feàte,” lahame ahu adat iedi Yesusam naba modesdam laba ahit ogomasu ab biteham. Biti gi dam labe fà aisome ahate ab fi deham. Aho Yesus bake ulaha bak, “Ana modi ulahela?” laham bak lamti aho Yesus bake ulasi taho neàdehe bak lamti fa ahate ab vameadaham.
48. Labi vameadume neàdi Yesusat nam niba ab gagoham. “Oi oho neha, ‘Yesusat eba modi fa neàdem bak,’ laham bak oho nasi tu vuzehehe labe om fa ab neàdeham bak. Làhà om fa Alati vahehemu obo bake nasi lale,” lahame ab gagoham.
49. Labi Yesus im lada lam vameadam lahasuhu di labe ame da Yairus abo Yahudi damat ihimo fi hasi meedam num laba vou aasdamda labe am dam totbaho labe doait ab leham. Labi li Yairus bake ab gagoham. “Om adnamat eloho. Ba Guru bake a gagu vou lemule. Gi feidate.”
50. Lahana Yesusat ame lab gagoho bak lam aime fa Yairus bake ab gagoham. “A àvodi vi ozodamule. Om gi ahu teudi Eba tu vuzehi faode. Om adnamat fa neàdem bak.”
51. Lahame labi gagu neàdi ozahit fa vahi ab laham. Labi le Yairus am numa fusi Yesus dam bisi dua bak numa vi tau olem bak mali gi Petrusti Yohanesti Yakobusti labi ame adnamat labe am aiti oiti labihasu ihimo ab oedaham.
52. Labi num zoho laba oli aaha dam laba esdam dam labe adnamat elohemu nimidam labe vou medao. Làhàmu Yesusat dam laba ab gagoham. “Bisi a medaomule. Um data nim elom kaio. Gi iddalo.”
53. Lahame labi gagoha ame dam labe im koei nim eloho bak ozobohu labe gi Yesus bake vi igeame ab tozodamam.
54. Lahana Yesus gi ozahit num zoho laba le koei niba anekehà vuu visoi gago, “Ednamat oa, usale.”
55. Lahame labi gagoha adnamat nim it oazi lahana fa leheilahit ab ahedi usai duzuham. Usai duzuhuzobe Yesusat dam laba ab gagoham. “Um adnamat niba na àmnavat lu àle.”
56. Lahame labi gagoha adnamat nibe am aiti oiti gi àvodi aasda. Lahana Yesusat adnamat labe am aiti oiti mali gago, “Etei modehe im nim meia a le fi demule,” lahame ab mali vi gagu esuham.
1. Labi ba neo Yesusat Aho gagu olu Am im vameadume esmozi laiam dam dua belas lam gagome fa bakamta ab vaheham. Labi vahi neàdi Aho neha, “Uho im nehasu im dedamali meedam neàte. Mei ahu oli veimam setan mei setan mei laba gagu futodume ilidam bak ame. Labi meia vizi gailemna ahaladiahana ahebu laha modi fa neàdedam bak ame. Um labihasu im dedamali meedam neàte,” lahame ame dam dua belas laba modi vizi teudedume ab modi im dedamaleham.
2. Labi im dedamali neàdi Yesusat am dam dua belas laba neha, “Nasi ladale. Labi uho bak iuba la. Bak iuba la. Lahadam diat ame dam laba, ‘Uho Alat Gagu Fihasi Vimteme Oluhu Dat Boehàda laba tu vuzehem labe Alat uba deeli vame Am damali uba vuusu im vahokedam bak laba uledi meedale,’ lahame dam bake vou vameatedume fi deda. Labi dam nisileheda modi fa neàdeda. Labihasu vou modetedale,” lahame gagu ab oudaham.
3. Ahamte gagu oudalo modem di labe Yesusat im meida nim nehame ab vi vameadamam. “Uho bak iuba la bak iuba la lahadam diat um odoamsoti um nazoh dekti um na àmnati um doiti sue sona ada dusumna gi esuhuda lamti ahebu niba vaheme esmozi gi saemea ladale.
4. Labi uho num debu mei iuba le lafusidam di labe aimeam dam labe uho vou laha im lam aime uledi num deda meida labe uba nehameam, ‘Uho num ebeda niba azim neàte,’ lahameam làhà gi num obo oho azimda lamota azile. A num iudu iuba le i. Num iudu iuba le i. Labihadamule. Gi num ubu uho azimda lamota azibe neo num debu amomoi bake neo le ame baket mode. Lahadale.
5. Laham vabameam uho num debu mei iuba le lafusidam di labe aimeam dam labe uho vou laha im lamti um soti moudume im bak malemeam làhà uho ame num debu bak lam vou esmozi lale. Vou esmozi lalo modem di labe um naba bak itabe fau foamome esmozi lale. Labi dam labe vi aame nehi ozom bak. ‘Aa làhà! Iho dam labe vou lehe im aihi vabake im bak itabe fau foamohe? Labihalahit Alat iba beoe taia?’ laham bak vi ozom bak am tame,” lahame vi vameadume ab oudaham.
6. Làhàmu ame dam dua belas labe ladume le Alat Boehàdateboli dam bake vuusu im vahokedam bak lam, “Akatihasu modemna modela?” laham Im Neàna lam num debu bak iudu iuba le vou vameateda. Num debu bak iudu iuba le vou vameateda. Lahada. Labi dam gaileheda bak iuba le modi fa neàdeda. Iuba le modi fa neàdeda. Labihada.
7. Labihadam di lam ame dam dua belas labe iho meedaha im lam meit aime fa meia vamea. Meit aime fa meia vamea. Lahadume Galilea bak vuusdam Boehàda Herodes Antipas laha ab vi aiham. Aime vabi vi ozoda. Neham labe vabi ozoda. Dam totbaho labe vedi vabili nehame vameada. “Yohanes Mei Vuu Valo Baptisleiamda labe fat ahedi mode moio?” lahame vabi vameada.
8. Labi dam totbahot laha vedi vabili nehame vameada. “Dat ahamda Alat vameadaha im aime fa dam bake ahate vameaidahada Elia labe fa nom olu ame im lam meedam moio?” lahame vabi vameada. Labi dam totbahot laha vedi vabili nehame vameada. “Gi dat ahamda Alat vameadaha im aime fa dam bake ahate vameaidahada meida eloho dàt fat ahedi lehe moio?” lahame vabi vameada. Labihadam labe Herodesat laha gi ame bak labet modi ozom vabi ab azi ozodamam.
9. Labi Herodesat vabi azi ozodaha vabamu ahamo aba ab it gagoham. “Ne, Yohanes eho amu em dam gagome bio vaitoi eloho bak. Ne lahana eho aidam im lam ana Dàt meedam imot modela? Ba Yohanesat modem vabak,” lahame ahamo aba ab it gagoham. Labihàmu, “Am abo ame Da Yesus lam Am alihi aase,” lahame àhàki ab ozome izidamam.
10. Labi Yesusat Aho gagu olu Am im vameadume esmozi laiam dam dua belas labe iho iuba le mode iuba le mode labihadume neàdi fa li bakamta vahi iho bak mei bake le meedaha im lam ahebu Yesus bake ab li vameadaham. Labi im lam vameadume neàdi Yesusat ame dam lam gagome dam duada vaitoi vou esmozi ihimo num debu Betsaida laba ab vou ladamam.
11. Labiham di labe Yesus Am dam dua belasti ladume setehe bak laba dam dua totbaho labe ozobohudi ba vi vula. Ba vulaha labe vule vi aaha Yesus Am dua belasti doni bake odosdamna ab vi fuham. Làhàmu Yesusat gut aaha dam duada zi ba vulehemu, “Neàte,” lahame ab gut gagoham. Gut gagu ozoha vabamu fa neo im vameada. “Meit am faina meedam bak lam voedume fa ahu neà bak vàmadi Ala bake tu vuzehi meedameam làhà Alat ame da laba deeli vame Am damali vuusu im vahokeda tame,” laham im lam faasi vahokeda. Labi neo dam nisileheda labe, “Iba modi neàdele,” lahame gagodam dam lam Aho modi fa neàdeda. Labihasu ab meedaham.
12. Labihadume modeha ala vakidi ab disilo modemam. Làhàmu Yesus Am dua belas labe Yesus bake li ab gagoham. “Ai oa, im bak nim dam vaba alim bak modem labe ba na àmna kaio. Laham bake Ai Oho dam duada zi niba gagome fa dam si modealaha bak iuba gagome oudume iho àmna lamti iho im bak lamti fà le nabidume laba ahala izidase.”
13. Lahame labi gagoha Yesusat fa ab gagoham. “Gi na àmna ubuda dam zi laba lodume àdameta.” Lahame labi gagoha Am dam labe fa ab vi gagoham. “Aa! Im gi rotibu auohole. Labi bohe behàsu. Lamota ehete. Dam feà nim ba akati ulohole. Gi doi bak mei bake vou le na àmna ot loiame ve fa vou li dam niba lome àm bake Oho labi ozome gagoheo?” lahame vi ailo ab gagoham.
14. Ame dam zi feà lam gi dam aabota dem di abo lima ribu fuhu bak. Lahana Yesusat fa Aba vi tau meedam dam laba ab gagoham. “Uho dam zi nim gagome lima puluh iuba nusu lima puluh iuba nusu lahadale,” lahame ab gagoham.
15. Labi gagohemu Am dam nibe le gagome dam fàsi lima puluh iuba nusu lima puluh iuba nusu. Lahadume dam ahebu ab nusualadaham.
16. Labihazobe Yesusat ame rotibu auohole lamti bohe behàsu lamti vame vuusualame neàdi ohu vousai tom avaesu Am ai aabo bake, “Neàte,” lahame tom gagu neàdi ame rotibu lamti bohe lamti visoi ab fahedaham. Fahedume fa Aba vi tau meedam dam laba lodume iho fa ot vai vame dam duada zi laba lodume uloholi ab àdaham.
17. Labi ame dam zi fai labe ame na zi lam àdume modeha dam ahebu dedehemu zoho ab vahedaham. Labi Aba vi tau meedam dam labe damat lab àme dedehemu vahehena zoho lam fa vi ateti atetidume boloseh vahedume modeha boloseh dua belas ab bektoham.
18. Labi ba digat meida iube Yesus dam duada zi vaitoi vou esmozi Aba vi tau meedam damta ihimo vazisi ab laham. Labi le Yesusat neo Ahamo fota vaitesu Am Ai Ala bake tom gagoda. Labi tom gagodume neàdi fa li Aba vi tau meedam dam laba ab gagoham. “Dam duada labe, ‘Em amat modela?’ lahame vameadaha bak uho akatihasu aihela?”
19. Lahame labi gagu aiha Aba vi tau meedam dam labe fa ab vi gagoham. “Dam duada totbaho labe vedi neha, ‘Om gi Yohanes Mei Vuu Valo Baptisleiamda labe amu elohona fat ahedi mozo,’ lahame vameada. Labi dam duada totbaho labe vedi neha, ‘Om gi aham di iube Alat vameadaha im aime fa dam bake ahate vameaidahada Elia amu ahena Alat vahada fa nom iluhe moio?’ lahame vameada. Labi dam duada totbaho labe vedi neha, ‘Om gi dat ahamda Alat vameadaha im aime fa dam bake ahate vameaidahada meida amu eloho dàt fat ahedi lehe moio?’ lahame dam zi labe Oba labihasu ozome otesi otesidam bak.”
20. Lahame labi vameadume modeha Yesusat fa neo vi ailo ab gagoham. “Ne lahana um akatiha? Um, ‘Em amat modela?’ laham bak um akatihasu ozome gagodàla.” Lahahat Petrusat fa ab vi gagoham. “Aia, Om abo Alat Gagu Fihasi Vimteme Oluhu Dat Boehàda am bak.”
21. Lahame Petrusat labi gagohemu Yesusat Aba vi tau meedam dam laba ab gagoham. “Petrusat etei lab gagu tombalehe bak lam, ‘Em abo Alat Gagu Fihasi Vimteme Oluhu Dat Boehàda am tame,’ lahaha bak lam uho meia a le fi demule,” lahame ab mali gagu esuham.
22. Labi im lada lam gagu neàdi Yesusat neo ab vi gagoham. “Em Ai Alat fet gagu esuhemu Yahudi damat ibi iho tu vuzehi meedam im vuusdam tohe dam zi labe vahi Em abo Asum Ahoba Iubet Bak Niba Li Dateleheda niba mu fa Eba fai bak bohu modi geàda tame. Labi laha meia gagu Em oteme eloi fa usi behàsdi Em eloho bak labet Alat modi fa ahedi usa tame,” lahame fet ab vameadume esuham.
23. Labi ame im lam Aba vi tau meedam dam laba vameadume neàdi aaha dam duada zi lam neo lehemu Yesusat ame dam laba im ab faasi vameadamam. “Meit Ebe Eho vahokedam im ozobohudi vi tau meedalo àhàkedameam làhà ba im aba aho it ozome modelo àhàkemda lam it ozome meedam vabak. Ame da labe aho gi neham bak. ‘Eho Yesus bake tu vuzehi im Abada meedàmu damat em si ut tetehesuhunaso lam ve lu vatu vou ladam di lam damat eba aasdamnàme eho gi ozahit vou le em paku dou elom neà bak,’ lahame Eba labihasu tu vuzehi gagu vàmademda lam aho Eba tu vuzehi vi tau meedam neà bak.
24. Neham labe labiham bak. Meit aba aho Eba lab tu vuzehehe bak lam ahate gagomeam damat am otem bak labna zohàme it vou faovoi vei iedi ahit biehenali, ‘Em Yesus bake tu vuzehi Am damalem kaio,’ lahame veibadamda lam ba Alati vahi ahe neàna bohu vuusdam vabak. Lahana meit neha, ‘Em Yesus bake tu vuzehi im Aba Aho ozohoda lamota meedam labe damat em otemeam làhà gi neà bak. Em ba àvodem vabak,’ lahame aba aho elom bak laba bisi it vou faovoi meedam vabda lam Alati vahi gi ahe neàna bohu vuusdamda am am bak.
25. Iho bak niba esdam di meit nehi ozo, ‘Em gi nazoh zi nim vadume duali neàdese,’ lahame ozodamda labe aho vedi am ahu it vou faovoi Eba tu vuzehi Alati ahili ahena aabo laba vuusdam vabameam làhà aho amu modehe zoho ium gi meedume vanamai voom bak.
26. Labi meit etei nibe neha, ‘Em abo Yesus bake tu vuzehi Aho vahokedaha im aime meedamda modem kaio,’ lahame ladi vei iedi Eba momeam làhà ba diamut Em Abo Asum Ahoba Iubet Bak Niba Li Dateleheda nibe Em Aiat Am na fauha meona fako iedemna ogatei modealaha bak lam fa Eba modi vizi feà Dateli Aho Am im gagu vou usem dam zi lamti ba neo amediat bak niba nom ilu meedam di lam Em laha ame da laba neha, ‘Om Eba tu vuzehi Em damalehe vabda am tame,’ lahame mu voo tame.
27. Lo, lamota imbot. Lahana Eho etei uba neo gagolo modem im imboda nidi nim laha nasi aima. Um dam etei nib dozeadaha dam totbahota taho elom vaba ahe lahasdamna uho ba Alat Boehàdateboli dam bake vuusu im vahokedalo li duzum bak um dam zohota ame bak aa tame,” lahame ab vahokedaham.
28. Labi Yesusat Aho ame im lam dam bake vahokedume neàdi usi delapan folehena ozohomu dihasi Aho tom gagodam bak ozome Aba vi tau meedam dam Petrusti Yohanesti Yakobusti labihasu gi dam lada làtela lamota gagome sibu bake ab vou laiteham.
29. Labi vou laisi le Yesusat ab tom gagodamam. Tom gagodam di labe Am dauhati Am sueti alihi veimdi ab fauha meoleham. Abo asum boz velem bakti ulohona Am sue laba ab modesuham.
30. Labi modeha Alat vameadaha im aime fa dam bake ahate vameaidaha dam behàsu aham di iube eloi seddaha dam Musati Eliati Alat Am na fauha meona fako iedemna ogatedamna im so laba modesu iho lehe bak aaha vabna nom ilu Yesus Am obe laba vi tau duzu im vameadamna ab aaham. “Yesus Am ba kota Yerusalem laba le elo tame,” lahame Alat amu vameame esuhu im ab imbodelo modem amemu im lam ab vameadamam.
32. Labihadam di lam Petrus am dam meida behàsuti idao. Labi idaome fa keesi aaha Yesus labe Am dauha laba Alat Am na fauha meona fako iedemna modesu ogatedam bak lamti ame dam behàsu labe Yesusam obe laba tau doudam bak lamti ab aaham.
33. Labi aadameilahit ame dam behàsu lam Yesus vou esmozi lalo modemu Petrusat Yesus bake ab gagoham. “Ai Guru oa, iho etei niba li odosi umti vahehe bak abo neàte. Imo teohet mom num làtela mose. Meida Oba mo. Meida Musa bake mo. Meida Elia bake mo. Labihadase,” lahame gi ahulat ozom im ostame ab vi gagoham.
34. Lahame Petrusat gi etei labi vameadam lahasuhu di labe ulo fauha meona nom ilu dam lam ab baguamdi seteham. Labi baguamdi fi oli setehemu dam ab iedeham.
35. Labi modeha Alat Am dae ulo labe futoi gago, “Da nim Em Adat Eho amu fi hasi gagu oluhuda Am am tame. Uho Aho vameadam im mahate aime meedale,” lahame ulo labe ame dae lam ab gagoham.
36. Labi gagu neàdi ame dam làtela labe neo vi aaha uloti dam behàsu lamti seti gi Yesusat Ahamo duzuhu bak ab aaham. Lahana ame dam làtela labe iho etei aaha bak lam iho Yesus bake vi tau meedam lahasuhu di labe ame im lam ba meia gagom kai. Gi dam ihimo aame vaste.
37. Labi izi dihasi dihambe Yesus Aba vi tau meedam dam làtela lamti vahi sibu labe fa ab lezeham. Lezi aaha dam duada zi labe doait li odosdam bak ab aaham.
38. Labi dat vàmtea labe Yesus bake bisteat gut gago, “Guru oa, em daboseà nim Oho li aame modi fa neàdele. Em gi data vàmtea faaha dàt moz.
39. Lahana em data nim mei ahu oli veimam setan labe aba li si modi aheleidume dam aim biem dae geme vou esmozi laida. Labi laha aba modi tufa tufame kehanabu vaoda. Lahana ame setan lam em data nim gi odohalehebeat isi esmozi lalo modem labe gi beome nisili vou esmozi laida.
40. Labi modidàmu eho Oba vi tau meedam dam totbaho niba tauledume gago, ‘Uho ame setan laba gagu futoi itale,’ lahame gagoha dam labe modesome modeha modem bi moho,” lahame Yesus bake ab gut vameadaham.
41. Gut vameadume modeha Yesusat fa ame lab odosdam dam zi laba ab gagoham. “Em abo uba tau azibehamdehena um eteida nim akati Eba mahate tu vuzehem vaba modela? Akati Alat Aba Aho ozoho baket uho modehe vaba akati bisi odohabuli git meedam bak bohu vuusdàla? Eho uba vuusdam di adi bake fusi um mu voe? Uho Eba tu vuzehem bak Eho ba gi labihasu vou faodà?” lahame gagu neàdi fa ame da niba ab gagoham. “Om daboseà nasi ve vou lele.”
42. Lahame labi gagohemu da nibe le ame daboseà ve vou ledameam ame setan labe daboseà lam belu bake biti modi tufa tufada. Lahana Yesusat ame setan laba, “Futoi daboseà nim vou esmozi itale,” lahame mali gagoha ame setan labe futoi daboseà lam vou esmozi ab itaham. Labi modeha daboseà lam fa ab neàdeham. Labi fa neàdi am ai bake ab loham.
43. Labi modeha dam duada zi lab dozeadume aasdamna modehe labe Alat im feàna modehe bak lam ab aame àvodeham. Labi dam duada zi labe Yesusat etei lab meedaha im lamti amu meedahada iumti ahebu labihasu àvodi meedam di labe Aho fa Aba vi tau meedam dam bake aa ab vameadamam.
44. “Eho etei uba gagolo modem im nidi nim um mahate dogoi balesu aile. Em Abo Asum Ahoba Iubet Bak Niba Li Dateleheda nim meit Em vou fohome meia ub lu ote tame.”
45. Lahame labi vameadume modeha Aba vi tau meedam dam nibe ozo, “Yesusat akati modemna gagohela?” laham bak ozom bi vi ozoda. Lab ozom biehe bak lam Alat ahit vaste. Labiha labe dam labe Yesus bake, “Akatihasu modemna gagohela?” laham bak fa vi gagu aim iedi moh.
46. Labi ba digat meida iube Yesus Aba vi tau meedam dam labe ihimo otesi otesida. “Uho ozom, ba diamut im dua belas nim Yesusat da adidate gagu modi ee feàda talu Aba tau dam vuusu im vahokedàla?” lahame ab otesi otesidamam.
47. Lahana dam labe im ahulat ozodam bak lam Yesusat Ahamo ozobohudi data koena laba gagome li Aho Am anekehàt vuu Aba Aho balesdam tot niba ab vou li duzuham.
48. Labi vou li duzu neàdi ame dam laba ab faasi vameadamam. “Uho meidavat nehi ozo, ‘Em bisi feàda modem kaio,’ lahame ozome fa meit aba im gagomda laba uledi meedameam làhà ame da lam bisi feàda am bak. Labiham labe meit Eba tu vuzehi meedàmu fa damat neha, ‘Feà vab dàt moz,’ lahame gagomda lam abo data koena nimti ulohoda lam meit ame da lam ule neàt gut vamda lam Alat ozom di ame da lam gi Eba laha ahu ule neàt ab vaham bak. Labi Eba ahu ule neàt vamda lam gi Emota ule neàt vaha vabak. Abo Eba Gagu Oluhuda lam abo Em Ai bake laha ahu ule neàt vaha bak,” lahame Yesusat ab vameadaham.
49. Lahame labi vameadume modeha Yohanesat Yesus bake ab vi gagoham. “Ai oa, iho amu iuba le aaha da meida labe Om ee gagodume mei ahu oli veimaha setan laba gagu futoi itaha bak im aaho. Lahana ame da lam imti vahi Oba vi tau meedam vab dàt labi modehemu iho malesome modeha vaba moho.”
50. Lahame gagoha Yesusat fa gago, “Mm, vabà! Meit labihameam uho a malemule. Meit imti ot odosiam vabda lam iba taumda am bak,” lahame ab gagoham.
51. Labi Yesus Alat vuu vousai asum ahoba iuba tom ilum digat fuseo vabalehemu kota Yerusalem lalo ahu ab vàmadi vitasuham.
52. Labi lalo modem di labe Yesusat dam totbaho gagome nasi olu. “Bak iuba le na teohe labe àme imna modeme vahele,” lahame gagu nasi ab oluham. Labi dam labe le Samaria dam num debu laba fusi ame na modesome modeha Samaria dam Yesus lem bak male. Yesus Yahudi dàt modem labe kota Yerusalem laba lalo ahu vitasuhu labe Samaria dam bak ibida Yesusat lem bak male.
54. Labihàmu dam lam Yesus bake fa li Samaria dam labe ibi bak malehe im lam ab vameadaham. Vameadume modeha Aba vi tau meedam dam meida behàsu Yakobusti Yohanesti meoli Yesus bake ab gagoham. “Dat Boehàda oa, Om iho neham neào? Iho asum ahoba iuba ootedume vua modi nom ilu dam lam beom neào?”
55. Lahame gagoha Yesusat fa vaktesi dam behàsu niba mali gago, “A labihamule,” lahame mali ab gagoham.
56. Labi gagu neàdi Yesus Aba vi tau meedam damti fa vahi dam num debu meidate ab laham.
57. Yesus Aba vi tau meedam damti kota Yerusalem bake ladam digat meida labe ladameam dat vàmtea doni labe Aba tàhi ab gagoham. “Em, ‘Oho adi bake lào? Adi bake lào?’ laham di vi tau godalo mozo.”
58. Lahahat Yesusat ozo, “Da lam imboo?” laham bak ailo fa ab vi gagoham. “Nohubake azim vemta ibi iho im bak ehete. Labi bume laha ibi iho im ila ehete. Lahana Em Abo Asum Ahoba Iubet Bak Niba Li Dateleheda nim bitesu im bak kaio,” lahame ab gagoham.
59. Labi dat meida labe Aba neo gut tàhi ab gagoham. “Om Eba vi tau godamda modele,” lahame gagoha da labet fa Yesus bake vi gago, “Ai oa, faode. Em nasi em bake fa le em ai faina eloi baumsuhuzobe Oba ba vi tau meedase.”
60. Lahahat Yesusat fa ab gagoham. “Vabo. Lada gi labihasu feidate. Dam Eba tu vuzehi meedaha vab damat abo Alati vaitesuhu damat fà baumsuse. Oho gi, ‘Em abo Alat Gagu Fihasi Vimteme Oluhu Dat Boehàda niba damat tu vuzehem labe Alat ame dam laba deeli vame Am damali vuusu im vahokedam bak am tame,’ laham im lam bak mei bak iumti bak mei bak iumti le vou vameatedume fi dedale,” lahame ab gagoham.
61. Labi neo ladameam dat amomoi labe Yesus bake neo tàhi ab gut gagoham. “Ai oa, em Oba tau Obo Oho vahokedam im ozobohudelo meedam datelelo mozo. Lahana em ebe mei dam bake nasi le, ‘Em Yesus bake tau lalo mozo,’ laham bak lam le gagu neàdi Oba ba taulo modem bak.”
62. Lahame labi gagoha Yesusat fa da laba ab vi gagoham. “Meit Ebe Eho vameadam im laba tu vuzehehena vedi fa aba aho vou esmoho dam nazohti it ozodameam làhà ba Alat dam bake deeli vame Am damali vuusu im vahokedam bak lam, ‘Akatihasu modemna modela?’ laham Im Neàna lam ba bak mei bak iumti bak mei bak iumti le vou vameatedume fi dedam di ba uloho vabak,” lahame ab gagoham.
1. Labi Yesus labe Aho ba neo Aba vi tau meedam dam dua totbaho voou gi dam tujuh puluh lamota gagome ab li dozeadaham. Labi dozeadume neàdi Aho ba vulalo modem bak ahebu ozome ame dam tujuh puluh lam faheme dam meida behàsu gagu num debu meida iuba nasi olu. Labi neo dam meida behàsu gagu neo num debu meida iuba neo olu. Labihada.
2. Labi ame dam lam lalo modem di labe Aho im nehasu ab vi vameadamam. “Gandum dua bak amdi bozileho. Lahana ame gandum nim modeme vahedam dam koete. Labihàmu uho Utoho deda laba abo Em Ai Ala bake nasi nehi tom gagodale, ‘Ai oa, Oho fa dam na modeme vahem dam totbaho laha gagodume Om utoho laba oudume Om gandum fi kbodume vahedase. Abo dam Oba tuhuda amomoi laha gagome fa dam Oba tuhu vab dam labe iho bak amomoi azihi bak iuba gagu oluidume Om Adat meedaha Im Neàna lam vou vameatedume uloholele,’ lahame mahate dihasi tom gagoda. Labi neo dihasi tom gagoda. Labihadale.
3. Um nasi lam neàde. Lahana uho mahate ozodale. Eho etei uba gagu olulo modem di nim um gi domba adatea nembedati ulohona fa dam abo serigala meo feà bakti ulohona laba olulo modem bak.
4. Uho lalo modem di um doi dek lamti na dek lamti um sepatu naba dusumna meida behàsu lamti labihasu niba vou esmozi lale. Labi uho Em im vou lam dam labe doni bak laba labe dam alihi aameam làhà ame bak laba bisi a labe duzu im vameadume kehàmule. Gi taho Em im vou vameatedale.
5. Labi uho damat esuhu bak fusi dam num bake olelo modem di labe im nehasu num deda laba gagodale. ‘Neàte. Im Boehàda Alat Ahamo uba neà bak modi esuse,’ lahame gagu olele.
6. Labi gagu aameam ame num deda labe neha, ‘Lo, neàte,’ lahame ame lab gagoho bak lam uledi gagomeam làhà ame lab gagoho bak lam imbodi Alat ame dam laba gi neà bak modi esuiam bak. Lahana labiham vabameam ame num deda labe im num mali ame lab gagoho bak lam momeam làhà Alat ame dam laba neà bak modi esuiam vabak. Gi fa oba na gagohodate modi esum bak.
7. Labi laha meit uba nehameam, ‘Num ebeda nim uho azim neàte,’ lahame labi gagomda lamota laba azibe neàdi fa neo num debu amomoi neo la. Lahadale. Bisi a num iudu iuba le azibe i. Num iudu iuba le azibe i. Lahadamule. Labi laha ame num deda labe uba na àmnati vaoti lodam di ame na lam uho gi vadale. Meit mei na meedamda laba ame na modem bak gohali na lodam neà bak. Ame na uba lodamna lam uho le meedam im labet gohali lomna am bak.
8. Labihahemu uho num debu bak iuba le lafusi ame num debu laba azim dam labe uba nehameam, ‘Lo, ibi bak niba uho azim neàte,’ lahame uledi gagomeam làhà ame dam labe na iho àmna uba lodam di um ame na vam di a odohalehebeat vamule. Gi labihasu ule neàt vame àdale.
9. Labi laha ame num debu laba esuhu dam gailemeam làhà uho ame dam laba modi fa neàdedale. Labi laha uho ame dam laba le nehame vameadume fi dedale. ‘Alat Aba Aho Gagu Fihasi Vimteme Oluhu Dat Boehàda lam etei bak niba lehemu Aho dam bake deeli vame Am damali Ahamo Boehàdateli dam bake vuusu im vahokedam bak lam etei ab faasi gàhàli meedamam bak. Uho nasi ame Da laba tu vuzehi Alam damalele,’ lahame vameadume fi dedale. Ame num debu laba vahi azim dam labe uba uledemeam làhà labihasu uho ame num debu laba meedale.
10. Laham vabameam uho num debu bak iuba le lafusi aimeam ame num debu laba azim dam labe uba nehameam, ‘Bak ibida nim uho azim maleho,’ lahame labi mali uho vou laha im lamti aim moudume im bak malemeam làhà uho ame num debu lam vou esmozi lale. Vou esmozi lalo modem di labe ame num debu labe am bak tomba laba dam ahebu aam neà bak laba le ame dam laba nehame fet vouhodume gagodale. ‘Làhà um labi modehemu um bak itabe fau nim im naba zitbotoho bak nim iho abobo foamodaha bak. Uho nehame vi aame ozom bake labihaha bak. “Ee làhà! Iho dam labe ibi iho vahokedaha im lam iho ailahigeàmohemu, ‘Alat iba fà beose,’ laham bake im bak itabe fau foamohe?” lahame ozobohudem bake iho ahit um bak itabe fau foamodaha bak,’ lahame gagole. Labi laha uho ame dam laba neo nehame it vameame esmole. ‘Lahana uho im lada lamota a vi ozodamule. Im nidi nim laha vi ozobohudele. Alat Aba Aho Gagu Fihasi Vimteme Oluhu Dat Boehàda lam etei bak niba lehemu Aho dam bake deeli vame Am damali Ahamo Boehàdateboli dam bake vuusu im vahokedam bak lam etei ab faasi gàhàli meedamam bak,’ laham im lam uho laha ame num debu bak lam vou esmozi lalo modem di labe ame dam laba labihasu it vameadume esmozi lale.
12. Im Ebeda nim uho laha mahate vi aimale. Alat ba diamut Aho Dam Bake Uloodume Vi Aime Ozobohudi Neàdi Fime Fahedam Digat fum di lam ubu uho vou lehe im lamti umti ule neàt vaha vab dam lam beodam di abo duana beoda tame. Lahana dam ahamda num debu Sodom laba azihi dam lada labe bisi faina meedaha bakta imbot. Lahana eho etei uba gagu olu ubu uho lab vou le meedaha bak lam aaha vab labe Alat ba beom di mahate duana beodam kaio. Gi fota beodalo modem bak,” lahame ab vameadaham.
13. Labi im lada lam vameadume modeha Yesusat Am im moho dam debu laba Alat ba fai bak tadem bak laba vi ozome ahu faidi neo vi vameada. “Aiee! Num debu Korazim lamti num debu Betsaida lamti laham bak behàsu laba esuhu Yahudi dam oa, Alat uba ba diamut beodam bake nasi fet àvodi it ozodale. Nehaha bak. Eho etei ubu uho azihi num debu behàsu laba laha di lam na damat ihimo modem biem im feàna meedaha di lam uho aahanàme vedi Eba tuhu vaba aalahigeàmu mouda. Lahana uho nasi Em ehe vab di iube abo Yahudi damat modem vab dam Tirus num debu lamti num debu Sidon lamti azihi dam labe iho aham di iube nehi meedaha im laba vi ozodale. Ame dam debu behàsu labe iho bisi faina meedàmu Alat gi amu aham di iube dam laba faki beodume ab vàhàdeme seddaham bak. Lahana Eho etei uba lab le meedaha im feàna lam fa ame dam ahamda debu behàsu laba amu le meedameam làhà ame dam labe gi amu di iube Eba tu vuzehi iho faina meedam bak lam voedume fa ahu neà bak vàmadi meedam bak. Labi neo ame bak lam dam giida labe fet aame ozo, ‘Làhà dam lam ibi iho faina meedam bak lam voedume fa ahu neà bak vàmadi meedà?’ laham bak aame ozobohudem bake ame dam labe laha gi amu di iube sue taubuna dusu. Fa ohu fau visoi im ohu laba nom gulada. Labihadam labe Alat ba beoho vaba gi labihasu vekem bak.
14. Lahana um num debu Korazim laba esuhu dam lamti num debu Betsaida laba esuhu dam lamti ubu uho faina meedam bak lam fa voou ahu vei neàdehe vab labe Alat ba diamut Dam Bake Uloodume Aime Ozobohudi Neàdi Fime Fahedam Digat fum di labe uba beodam di bisi geàdam dam um am bak. Lahana num debu Tirus laba esuhu dam lamti num debu Sidon laba esuhu dam lamti ba Alat beodam di ame dam lam mahate geàdam vaba gi fota geàdam bak. Neham labe labihadam bak. Eho na damat ihimo modem biem im feàna lam dam labe aaha vab labe gi fota beodam bak.
15. Aiee! Um num debu Kapernaum azihi dam oa, uho vedi nehi vi ozodam damat modem bak. ‘Yesus bak ibida niba li na damat ihimo modem biem im feàna duana meedaha labe im abo bisi feàda im am bak. Damat iba aame im ee vousai vou baedam bak,’ lahame vi ozodam damat modem bak. Lahana um git ozoho bak. Ba labiham vabak. Eho amu bak ubuda laba le ame im feàna duana lab meedaha bak lam uho aahana ba Eba tu vuzehe vaba aalahigeàmu moudahemu ba diamut Alat um gi koei it oazehena le esdam bak laba vou nom ilu beodume sedda tame,” lahame Yesusat ab vameadaham.
16. Labi ame im lam vi vameadume neàdi Aba vi tau meedam dam laba neo vi vameada, “Meit uho vou le vameadam im lam aime uledi meedamda lam Alat ozom di ame da lam gi Ebe Eho vameadam im lamti aime uledi meedam bak. Laham vaba meit uho vou le vameadam im lam aime uledi meedaha vaba momda lam Alat ozom di ame da lam gi Emti Ebe Eho vameadam im lamti aime uledi meedam vaba moudam bak. Labi ame da labe Emti Ebe Eho vameadam im lamti aime uledi meedaha vaba momda lam Alat ozom di ame da lam gi Eba gagu bak niba oluhuda abo Em Ai Ala labe Aho vameadam im lamti laha aime meedam vaba momda am bak,” lahame vi vameadume neàdi ame dam tujuh puluh lam ab oudaham.
17. Labi ame dam tujuh puluh lam faheme Yesusat Aho vameadume oluhu im lam bak mei bake le meedume neàdi Yesus bake fa deelehat ab fet lei fet leidamam. Labi fet lei fet leidume Yesus bake lefusi àvodehat vameada. “Boehàda oa, Oho iba vameadume oluhu im lam iho le meedaha bak. Labi ame di labe iho laha gi Om ee gagodume mei ahu oli veimaha setan lam, ‘Taho futoi itale,’ lahame gagodam di ame setan labe aime udovai futodume ilidam meo bak.”
18. Lahame labi gagoha Yesusat fa ab vi gagoham. “Lo, uho ame setan zi laba gagu futodume ilidaha di labe Em ahulat ahamo vi ozoha, ame setan zi labe im boehàda Iblis lam aho asum ahoba iube bake bitehe bak Eho aaho. Gi asum boz velem bakti ulohona taho bitehena Em aaha bak.
19. Uho ame lab meedaha bak lam Eho naedat uba modi vizi teudehe labe uho ame bak lam ab meedaham bak. Labi laha uho ba ozbaso modeo, ut sokba bake azim moliba modeo, uho vabi naot duzum di ba uba veem vabak. Labi ame bak lam Eho uba modi vizi teudehe labe ba Iblisit aho, ‘Um bedese,’ lahame umti ot odosiam bohu modesdam lahasuhu bak lam um teudehe labe ba bedem vabak. Uho teudi Iblis fa bedem bak. Labiham bake ame na ahebu uba vabidam di gi nembena tadem bak.
20. Ne lahana um bisi ame setan labe uho lab gagodam bak laba aime udovai futodume ilidam bak laba bisi a deelemule. Uho gi nehame deelele. Ala bake tu vuzehe labe amedamali fa Alat Am bak neàna asum ahoba iuba tau azim bak laba vi ozodume deelele,” lahame ab vameadaham.
21. Labi Yesusat ame dam tujuh puluh laba im lab vameadaha di labe Alam Aha Nutabe Neànat Yesus bake modi vizi teudehe labe Yesusat ab deeli vàhàdeham. Deeli vàhàdi meedam di labe Aho Am Ai Ala bake ab tom vou baedamam. “Ai oa, Om abo neàte. Asum ahoba iumti fa bak nimti Om na debu modi vuusuhuda Boehàda Om am tame. Nehaha bak. Obo Oho dam bakdate deeli vame fa Om damali vuusu im vahokedam bak lam damat neha, ‘Im bisi sekolah vahokedam bak bohu vuusdam labe bisi ozobohu dam im am bak,’ lahame ihimo ozome it daetbadam dam laba Oho ahit modi vasteho. Lahana ame bak lam Oho fa dam sekolah vahokehe vaba im biehebu dam abo bisi feà vab dam laba Oho ahit ame dam laba modi im ozobohudi fi gatei meedam bak. Ai oa, Oho lab meedaha bak lam Oho amu fet ozo, ‘Eho labi modelo àhàkehe bak,’ lahame labi fet ozoho labe Obo Oho modelo modemna lam Oho ab modi imbodeham bak. Labiha labe Eho, ‘Om abo neàte,’ lahame vou baedaho,” lahame ab tom vou baedaham.
22. Yesusat Aho labihasu Ala bake tom vou baedume neàdi fa ame dam giida zi laba neo vi vameada. “Em Ai aabot Aho modem im lam ahebu Aho Eba neha, ‘Oho fa im dedateli meedale,’ lahame Eba modi vizehe labe Eho fa im dedateli ab vuusdamam bak. Labiha labe Alam Adat nim, ‘Amat modela?’ laham bak lam dam giida ahebu biem bak. Gi Aiat Ahamo bisi ozobohudehe bak. Labi laha ame Adat labe am Ai lam, ‘Amat modela?’ laham bak lam dam giida ahebu biem bak. Gi Am Adat labe Ahamo bisi ozobohudehe bak. Labi laha ame Adat labe Aho fi me ve Am Aiat modem im modi fi gatehe dam lamota Am Ai laha ozobohu bak,” lahame ame dam zi laba ab vameadaham.
23. Labi ame dam duada zi laba im lam vameadume neàdi Yesusat fa neo Aba vi tau meedam dam lamota avaesu aa vameada. “Eho meedam im nim um abo ahate aadahemu umota gi deelehe bohu vuusdam damat modem bak.
24. Lahana im imbona nidi nim nasi ozomale. Eho bak niba li im meedaha vab diat dam ahamda Alat vameadaha im aime fa dam bake ahate vameaidaha dam zi lamti boehàda ahamda zi lamti labihasu ubu uho etei um fakot aadam bak nim ame dam zi labe iho aalo àhàki vou faodaha vabamu gi aham di iube elodume seddaha bak. Labi ubu uho etei dogoit aidam im nim ame dam zi labe laha ailo àhàki vou faodaha vabamu gi aham di iube elodume seddaha bak. Ame dam labe lab vou faodaha di lam Alat ame im lam taho modi fi gatehe vab labe gi aham di iube elodume seddaha bak,” lahame Yesusat ab vameadaham.
25. Labi digat meida iube dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru meida labe aho ozo, “Yesus bake modi ozose,” lahame aho ozobohuna ahit vabilehenali fi bovai Yesus bake vi ailo ab gagoham. “Guru oa, eho ana im meedam labet Alat eba modi Amti vahi gi ahe neàna bohu vuusdàla?”
26. Lahahat Yesusat fa gago, “Alat aham di iube Yahudi dam bake, ‘Nehame meedale. Nehame a meedamule,’ laham Im Feàna zi lam im tai ahamda Musat akatihasu toedume fi hasi esuhela? Labi ame toedume fi hasi esuhu im zi lam oho aam di om akatihasu ozohela?”
27. Lahame labi gagoha ame da labe fa ab vi gagoham. “Dat ahamda Musat aho nehi toedume fi hasi esuhu bak ‘Im dam ahebu meit am ahu vàmadi Ala bake deeli gi labaha bohu vuusda. Labi meit laha gi ame baket mode. Labihadale.’ Labi im meida neha, ‘Uho meit aba it deeli vou faovoi vabiedam bak lamti ulohona vi ozome fa meia laha deeli vou faovoi vabiedale.’ Lahame toedume fi hasi esuhu bak.”
28. Lahame labi gagohemu Yesusat fa neo ab gagoham. “Lo, oho lab gagoho bak lam imbo bak. Oho ame baket modele. Oho ame baket modemeam làhà om ba gi Alati vahi ahe neàna bohu vuusdam bak.”
29. Ne lahana ame da lam gi dam abada lamota deelem bak laba vi ozome aho vedi Yesusat aba taumda am tibame ahit biehenali fa Yesus bake neo gago, “Ne, dam amomoi eho deelemda ana dama eho vi ozome deelela?”
30. Lahame labi gagohemu Yesusat, “Meit ana dama deelela?” laham bak ame da laba vahokelo im totobe nidi nim nehame ab faasi fi koadamam. “Yahudit modemda meida nibe kota Yerusalem labe Yeriko bake lazeda. Lazedameam dam aa li ausume laiam dam labe zila audume da niba ahile dou ab nohisi beoham. Ototo beluidume biti afoezobe am nazoh vi gelevai italo aahat dat gi tohasidamna it aame esmozi ab itaham.
31. Labiham di labe damat Ala bake lomna ve vua vahudam toheda abo Yahudit modemda meida labe ba ame da labe lehe zie labe ba neo gi ostame vuledam dàt bak bohulat vi aaha dat gi laba bisda. Làhàmu gi aalahigeàmu fa zie biou zie totbaho iubet ab labohoti laham.
32. Labi ba neo Fihasi Ala Bake Vou Baedam Num Vàmteabu laba vou aasumda labe Yahudi da abo Lewit vou faat leheda meida labe laha neo gi ostame vuledam dàt li netàdi aaha dàt bisdam bak aahemu gi labe aalahigeàmu fa zie biou zie totbaho iubet labohoti aba aho lalo ladam bak laba ab laham.
33. Labi ba neo Samaria bak azimda Yahudi damti ot fakiamda meida labe bak mei bake lalo ladam dàt neo ledameam aaha dàt bisdam bak aahemu ab aame faobekeham.
34. Faobekesi am anggur oo vaksa falailemna lam visoi damat beome foozehe bak laba veosi kikeda. Labi neo na ut oo nubehelemna nutabena lam neo visoi veosi noida. Labihada. Labihadume neàdi sue zohot ab giaham. Giame neàdi afoezobe si visoi vou le am keledai aho nusu vou godamna fi ho laba ousu ab vou laham. Vou laha labe le teohet tau im num laba oli ousu neo vabieda.
35. Labi izi dihasi am doi oona perak behàsu vatoi da num dedate lu gago, ‘Da nim oho vou azi iademe vabiedale. Em da nim oba ousu esmom bake em doi etei oba lohona nim oho na vame lome àme folemeam làhà doi oboda laha tau na vam neàte. Labi em bak iuba le azibe fa lehezobe doi oho esuhuda lam eho fa ame baleà vouho tame.’ ”
36. Lahame Yesusat ame im totobe lada lam fi koadume neàdi ame dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru niba fa vi ailo ab gagoham. “Naat aa li ausume beome biti vou esmohoda lam oho ozom, Eho etei lab vouhome vameadaha dam làtela lam dat adidat am datelehela?”
37. Lahame labi gagoha ame da labe fa ab vi gagoham. “Dat na aame faobekesi ve vabieheda lam am dateleheda am taia?” Lahahat Yesusat fa ab vi gagoham. “Lo, imbot. Làhà oho nasi fa le dat meia faobekesi vabieheda lamti uloholi ame baket meedale,” lahame Yesusat ab vi gagu oluham.
38. Labi Yesus Aba vi tau meedam damti, “Iho kota Yerusalem lase,” lahame ladume num debu amomoi bake lafu. Laba le lafuha laba azim nam Martat abo num deda labe aho Yesus bake ab gut gagoham. “Em num niba oho im neàte,” lahame ab gut gagoham.
39. Martam vahada ee gagom Maria am. Yesusat ame lahi behàsu labe im num laba oli aidam di labe Maria gi Yesusam obe netàdi nusu Aho vahokedam im dogoit vi aida.
40. Lahana Marta gi Yesusti vahi àmna ohudalo modem namet abo na iudu ium mode. Na iudu ium mode. Labihadam namet moz. Labihadam namet Yesus bake li gago, “Boehàda oa, em na ehemo meedam vanamam bak akati em vahada Oho gagome eba tau na meedam vaba mode? Oho gagome eba tau na meedale.”
41. Lahame gagoha Boehàda Yesusat fa Marta bake ab gagoham. “Marta om ade? Om abo na duana meedam bakta vi ozodam namet moz.
42. Oho labi ozome meedam bak lam feidate. Lahana im bisi imboda neam bak. Mariata abo neà bak ozome meedam bak. Aho ozome meedam bak lam ba meit gagome faatom vabak,” lahame ab gagoham.
1. Labi ba digat meida iube Yesusat bak mei bake neo le Ala bake tom gagoda. Tom gagodume neàdi modeha Aba vi tau meedam dam meida labe Yesus bake ab li gagoham. “Dat Boehàda oa, iho tom gagom di, ‘Akatihasu tom gagoela?’ laham bak lam Oho iba vahokedale. Amu Yohanesat aba vi tau meedam dam laba tom gagom di, ‘Akatihasu tom gagoela?’ laham bak Yohanesat vahokehemu Oho laha iba vahokedale,” lahame ab gagoham.
2. Lahame labi gagohemu Yesusat fa gago, “Làhà uho Ala bake tom gagodalo modem di gi nehi tom gagodale. ‘Ai oa, Im dam bakda ahebu ee Oboda vousai, “Om abo feàte,” lahame tom vou baedase. Om fa Boehàdateboli iba dam bakdate deeli vame fa Om damali Oho Iba vuusu im vahokedam bak lam nasi faasi meedale.
3. Labi im idoalem bake àmna iba dihasi lu àme neàde. Labi neo dihasi vi lu àme neàde. Labihadale.
4. Labi meit iba fai bak meedam bak lam iho gi ozahigeàmu fa vei neàdedam bak lamti ulohona Oho laha iba iho faina meedam bak lam gi ozahigeàmu fa vei neàdedale. Labi naat iba, “Iho fai bak modem uledeo?” laham bak im ahu modi ozolo vabidam di iho bedi uledem vabak laba Oho modi esule.’ Uho tom gagom di labihasu tom gagodale,” lahame Yesusat ab vahokeham.
5. Labi im lada lam vahokedume neàdi Yesusat neo Aba vi tau meedam dam laba im totobe nidi nim neo nehame vi fi koada. “Uho meidavat usi neisoali oho omti vou alemda labe am num laba le nehi gagomeam, ‘Ba oa, em dat meida nim bak mei bake lalo modem dàt idoalehena etei em numa li fuho. Lahana em na àmna foli oba na gagu valo leho,’ lahameam omti vou alemda labe oba neha, ‘Eba a vabimule. Em num doo baguamdi teudi em datati vahi beilame idaom bak. Em usai oba na lom bieho,’ lahame oba fa labi gagom meo? Vabà! Omti vou alemda labe ba oba labi gagom vabak.
8. Eho ozoha, omti vou alemda labe aho uledi usai na ve oba lom bak lam gi neham bak. Ba gi vou alehe bak labet uledi usai oba na ve lom vabak. Damat aba, ‘Na faobu dàt moz,’ lahame aba feàtàme aho lademna zohàme aho uledi usai obo oho gagohona ahebu ve lodam bak.
9. Labihàmu Em oba gi nehi gagolo modem bak. Meit Ala bake neha, ‘Im na nim vabalehe bak Oho iba na lodam neào?’ lahame Ala bake keàtet tom gagoidamda lam ame na vamda am bak. Labihàmu uho ozome valo modemna lam ehelemeam làhà, ‘Eba vàle,’ lahame Ala bake mahate tom gagoidale. Labiham labe ame na lam Alat uba lodam bak. Labi laha uho na meida, ‘Akatihasu modi vàla?’ laham bak Ala bake keàtet tom gagoidamda lam Alat ame da laba modi ame na vamda am bak. Labihàmu na meida, ‘Akatihasu modi vàla?’ laham bak lam uho Ala bake mahate tom gagoidale. Labiham labe ame na lam Aho uba modi uho ame na vam bak. Labi laha meit Ala bake neha, ‘Em na nim modem bak ozome Oba ailo leho. Om eba taum neào?’ lahame bisi tom gagoidamda lam Alat uledi taumda am bak. Labihàmu uho meit neha, ‘Em na nim modem bak ozome Oba ailo leho. Om eba taum neào?’ laham bak lam laha Ala bake mahate tom gagoidale. Labiham labe Alat uledi fa uba taum bak.
11. Um adam eheda um adat uba li nehame gagomeam, ‘Aia, eba bohe vàle,’ lahame gagomeam uho fa ostam mum ve lom meo? Vabà! Um ba labiham vabak. Gi ame bohe lam ve lom bak.
12. Laham vaba uba li nehame gagomeam, ‘Aia, eba oo vàle,’ lahame gagomeam uho fa ut sokba bake azim moliba lam ve lom meo? Vabà! Um ba labiham vabak. Gi ame oo lam ve lom bak.
13. Um bisi fai bak meedamnàme na neàna vame um data bake lodam bak lam uhumo ozobohudi meedam meo damat modem bak. Im labihadam damat modem labe im Ai asum ahoba iuba azimda abo bisi neàboda labe iho meit Aba nehi gagomeam, ‘Ai oa, Om eba ame na lam lom neào?’ lahame gagu aimeam Ai labe uledi na neàna ame da laba lodam bak. Abo meit Aba nehi gagomeam, ‘Ai Ala oa, Om Aha Nutabe Neàna eba modi vizi teudele,’ lahame gagom di Ai labe Am Aha Nutabe Neàna lam ame da laba modi vizi teudem meo bak,” lahame ab vahokedaham.
14. Labi ba di iube mei ahu oli veimai dae vabalem setan labe dat niba oli veimahemu Yesusat gagu futolo ooteda. Labi ootedume modeha ame setan labe futoi da nim vou esmozi ab itaham. Futoi itame modeha da nibe fa dae ab faaham. Dae faasi im vameadume modeha dam duada zi labe vi aame ab àvodeham.
15. Lahana dam na aahada totbaho labe vedi nehi gagoda. “Yesus gi mei ahu oli veimam setan zi labe im boehàda Beelzebul labe fa Aba modi vizi teudehe labe Aho mei ahu oli veimaha setan mei setan mei laba gagu futodume ilidam bak,” lahame ihimo ab ot gagoidamam.
16. Lab ot gagoidam labe vedi Yesus bake modi ozolo neha, “Imo Da laba, ‘ “Om Alat Gagu Fihasi Vimteme Oluhu Dat Boehàda ameo?” laham bak lam im biem bake na damat ihimo modem biem im feàna Oho nasi fet vouhodamale. Labi im aame ozobohudese,’ laham bak gagu aise,” lahame ihimo ab ot gagoidamam.
17. Lahana ame dam labe im ahu ad labe ozodam bak lam Yesus Ahamo ozobohudi dam laba im ab faasi vahokedamam. “Eho etei uba vouhome vameadalo modem im nidi nim uho nasi aime neàdi ubu uho etei lab gagoho bak lam, ‘Imbo? Imbo vabao?’ laham bak nasi it ozodale. Bak amomoi vuusdam boehàda am damti ihimo fàsi ot beluidameam làhà ame dam lam gi ahebu foli seddam bak. Labi bak amomoi vuusdam boehàda am damti neo labihameam làhà gi ab vàhàdeme setemam bak. Labi laha dat am lahi datati ihimo ot fakiame ot beluidameam làhà ame dam gi vabali setem bak.
18. Labihàmu uho Eba neha, ‘Beelzebulat Eba modi vizi Eho mei ahu oli veimaha setan mei setan mei laba gagu futodume ilidala,’ lahame Eba labi vàlu gagohemu Eho uba gi fa nehi gagom bak. Um git gagoho bak. Ame setan zi laba vuusdam boehàda Beelzebul labe aho Eba tau aba aho vuusdam setan zi lam gagu futodume ilidameam làhà gi Beelzebul fa am damti ot beluiame foli seddamna ozomom bak. Labihameam ame debu lam ba akati teudi duzue? Gi vàhàdeme seddamna ozomom bak.
19. Labihàmu uho etei Eba lab gagoho bak lam, ‘Mei ahu oli veimaha setan mei setan mei zi lam Eho gagu futodume ilidam di Beelzebulat Eba tau modi ilidala,’ lahame uho Eba labihasu vàlu gagom labe um gi uba it vàlu gagodam damat modem bak. Neham bak. Um Farisi dam totbaho laha mei ahu oli veimaha setan gagu futodume ilidam meo damat modem bak. Làhà uho Eba neha, ‘Beelzebulat Eba tau meedaha,’ lahame Eba vàlu gagomeam làhà um gi um Farisi dam zohoti vàlu gagoda taia? Labihàmu um dam zoho labe fa uba faki nehi gagom bak. ‘Uho Yesus bake git vàluho. Beelzebul iba tau setan gagu futodume ilidam vabna akati uho neha, “Beelzebul Yesus bake tau ame setan gagu futodume ilidala,” lahame labi gagodàla,’ lahame um Farisi dam zoho labe fa uba labi vàlu gagom bak.
20. Lahana Beelzebul ba Emti ahili meedam vabak. Gi Alat Am feà bak labet Eba modi vizi teudi Eho ame setan gagu futodume ilidam bak. Ne, um gi neham bak ozome tu vuzehem vaba? Em abo Alat Aho Gagu Fihasi Vimteme Oluhu Dat Boehàda Em am bak. Alat Eba gagu nom oluhemu Alat Ahamo Boehàdateboli dam bake deeli vame Am damali vuusu im vahokedam bak lam ab faasi meedamam bak. Laham bak um ozom vaba?
21. Uho Eba gi ostame vàluho. Mei ahu oli veimaha setan Eho gagu futodume ilidam meo bak lam Eho uba vouhodase. Neha: Dat teuda nibe am soa maehe nazoh vou faovoi num doo ozoho laba nazoh meona vuusualame duzu ausdameam làhà ba meit am numa oli am nazoh vam vabak. Am nazoh gi ahe lahasum bak.
22. Lahana dat bisi feàda labe fa da lada laba li nohisi beome aho vuusdam nazoh meona veimome afoezobe am nazoh gelevai voutame dam bake faheme ab lodamam bak,” lahame im totobe lada lam ab fi koadaham.
23. Labi im totobe lada lam fi koadume neàdi Yesusat neo vi gago, “Meit Eba taum vabda lam Eba fakemda am bak. Labi laha Eho dam bake vahokedam labet modi meit Eba tu vuzehem bak lam meit Eba ame bak lam vi tau meedam vabda lam gi Ebe Eho lab meedam bak lam modi vàhàdeme dam fi goaitoi seddamda am bak,” lahame Yesusat ab vameadaham.
24. Labi im lada lam vameadume neàdi Yesus im nehasu vi vameada, “Mei ahu oli veimaha setan labe futoi ame da lam vou esmozi itadam labe le meia oli odom bak ozome bak aotba baa bohu dam vaba alim bak le nabiteda. Labi nabitedume modeha meia oli odom bak aam biehemu ahamo aba it gago, ‘Làhà em gi ebe eho amu odoho bak laba fa li ame da labe am ahu laba olelo modem bak,’ lahame fa ab leham.
25. Fa li ame da laba aaha am ahu ba Alam Aha Nutabe Neàna labet modi veimam vaba abo gi num naube feaktoi nazoh fa aba bake iademe vahehe labe boz neàdi gi num alim modesdam bakti ulohona ab li aaham.
26. Làhàmu fa neo le mei ahu oli veimam setan tujuh amomoi abo am fai bak vafozi bisi faida gagome fa vazisi vou ledume aba aho amu oli odoho bak laba ab vi oedume veimadaham. Labiha labe ame setan tujuh amomoi ame da labe am ahu laba ba vi oedaha labe aba amu fota neà bak vei seti fa abo bisi fai bak ab fuham,” lahame ab vahokedaham.
27. Labi Yesusat ame im lada lam vahokedam di labe ame dam duada zi dozeadaha bak labe nam vàmtea labe ame im lam aihi labe àvodeha Yesus bake ab buteham. “Om faasi doa oluhu oi lam Alat bisi im neà bak modi esuhu namet modem bakeee.”
28. Lahame buteme modeha Yesusat fa gago, “Lo, lamota am tame. Lahana meit Em Ai Alat gagoho im lam aime uledi meedamda lam Alat bisi im neà bak modi esuiam da am bak,” lahame ab gagoham.
29. Lahame labi gagodam di labe dam amomoi zi labe neo ledume fa dam amu dozeadaha dam zi lamti fa vahi dozeada. Labihadam di labe Yesusat ame dam zi fai laba neo ab vameadamam. “Um etei dam bada nim gi bisi faina meedam bak tadem damat modem bak. Um gi labihadam damat modem labe uho vedi Eba neha, ‘ “Om Alat Gagu Fihasi Vimteme Oluhu Dat Boehàda ameo?” laham bak lam im biem bake na damat ihimo modem biem im feàna Oho nasi fet modehemu im aame ozobohudese,’ lahame gagodam damat modem bak. Lahana Em ba uledi ame bak lam uba etei di nibe fet modem moho bak. Ba nehi fet vouhodam bakti gagom kaio. Aham di iube Alat na damat ihimo modem biem im feàna abo Yunus bake modehe im lamti ulohona modemna uho ba aa tame.
30. Aham di iube Alat vameadaha im aime fa dam bake ahate vameaidahada Yunus lam Alat ahit modi bohe feàda labet Yunus visoi tolazehe di lam am eloho vaba fa ahedi kota Niniwe laba le Alat aba gagoho im lam fa dam bake vou vameatedaha bak labet modi ame Niniwe dam labe ozo, ‘Imbote. Ame da Yunus lam abo Alat gagu iba oluhuda am bak,’ laham bak ab ozobohudeham bak. Bak lamti ulohona Em Asum Ahoba Iubet Bak Niba Li Dateleheda nibe Eho modehemu um etei dam bada nibe laha aame, ‘Imbote. Alat Gagu Fihasi Vimteme Oluhu Dat Boehàda Em am tame,’ lahame ba ozobohude tame.
31. Aham di iube Yunus Yahudi da labe aho Niniwe dam giida laba le Alat aba vameadaha im nehasu vou vameateda. ‘Alat uba beolo modem bake uho faina meedam bak lam nasi voedume fa ahu neà bak vàmadi meedale,’ lahame labi vou vameatedume fi dedaha di labe ame dam labe ame im lam aime uledi ame bak lam ab meedaham bak. Nehaha bak. Yunus aho amu vou vameatedaha bak lam feàta feàt. Lahana Yunus aho amu lab vou vameatedaha bak lamti labi im Eho etei vou li vou vameatedahada nimti ozom di bisi vafozi feàda im Ebeda nim am bak. Labihàmu Alat ba diamut damat iho bak niba meedaha im ahebu Aho Dam Bake Uloodume Vi Aime Ozobohudi Neàdi Fime Fahedam Digat fum di ame Niniwe dam ahamda amu elodaha dam labe iho fa ahedi usnadume Alat avaesdam laba le duzu uba dam badate vàlu nehi vameadam bak. ‘Um abo git modeho. Yunus iba li Alat aba vameadaha im aho vou vameatedaha di lam im gi kehàm vaba iho faina meedam bak lam voedume fa ahu neà bak vàmadi Ala bake tu vuzehedaha bak. Lahana um dam bada akati Yunus vafozi bisi feàda abo Alam Adat Yesusat uba li vou vameatedahana akati um aime tu vuzehem vaba mohela?’ lahame uba ba diamut labi vàlu vameada tame. Labi laha aham di iube Syeba bak laba azihi dam vuusdam boehà nam giida abo Yahudi modem vab nam labe aho ozo, ‘Yahudi dam vuusdam Boehàdatebo Salomo lam am abo bisi im ahebu ozobohudi meedam dàt modem bak. Salomot vameadam im aise,’ lahame aba aho azihi bak vou esmozi abo bak bohulana Salomot azihi bake ab laham. Labi doni bake vou id ladume Salomot azihi num feàda laba le lafusi Salomom im ab aidaham bak. Nehaha bak. Salomo bisi im ozobohudem bakta im ozobohudeheda am. Lahana etei nim bisi Salomo vafozeheda Em am bak. Labihàmu Alat ba diamut damat iho bak niba meedaha im ahebu Aho Dam Bake Uloodume Vi Aime Ozobohudi Neàdi Fime Fahedam Digat fum di ame Syeba bak laba azihi dam bake vuusdam boehà nam amu eloho nam labe fat ahedi usai Alat avaesdam laba le duzu uba dam badate vàlu nehi vameadam bak. ‘Um abo git modeho. Eho abo Boehàda Salomo bake le aho vameadaha im lam aihi bak. Lahana Salomo vafozi bisi feàda Yesusat uba li Am im vou vahoketedaha di lam akati um aime tu vuzehem vaba modela?’ lahame uba labi vàlu vameada tame,” lahame Yesusat ab vameadaham.
33. Labi Yesusat im lada lam labihasu vameadume neàdi Aho neo dam duada zi laba im meida nidi nim ab faasi vi vahokedamam. “Meit vuagat usime fauhalem di labe ba tuoho bake esum vabak. Labi laha ba boloseh visoi ahoba nom suusum vabak. Gi damat oli aam neà laham bak ozome tom fi haba laba esu fauhaedam bak. Labiham labe damat ame numa olem di gi fauha neàdi modesdamna aam bak.
34. Um fako lam vuagat fauhati uloho labe uho na alihi aadamna am bak. Labiham labe neham bak. Fako ubuda neàdemeam abo Ebe Eho vahokedam im aime vuzehi ahu vàmadi meedameam làhà, ‘Imbo bak neame?’ laham bak uho ozobohudi meedam bak am bak. Lahana meit am fako faidemeam abo Eho vahokedam im aime vuzehi meedam vaba momeam làhà ba, ‘Imbo bak neame?’ laham bak vi ozome ozobohudi fi gatem vabak. Gi vabili im ozom bak bili modesdam bak.
35. Labiham bake um iademe meedale. Neham bak. Uho vedi nehi ozo, ‘Im fauha neàdi im imbo bak vuzehi meedam damat modem bak,’ lahame uho lab ozome meedam bak lam gi im giomimna meedam bak. Labiham bake um vabiemna zohàme mahate vou faovoedale.
36. Labi laha uho meit, ‘Ala akatihasu meedam Alat modela?’ laham im imbona lam uho ba koena mom vaba abo um ahu vàmadi ozobohudelo àhàkemeam làhà Alat ame bak lam uba modi fi zeam bitom bak. Abo vuagat usime iademe esu fauhalem bakti uloholi na ahebu ahate aadam bak,” lahame ab vahokedaham.
37. Labi Yesusat ame im lam vahokedume neàdi modeha Farisida meida nibe Yesus bake gago, “Omti emti vahi na àdase,” lahame labi gagohemu Yesusat uledi ame da labe am numa le oli vahi na ab tau àdamam.
38. Labi na àdam di labe ame Farisida labe aaha im Yahudi damat ibi iho fi hasi modem baket modehe vaba abo anekehà valo ekeme itatame neàdi na àdam baket Yesusat modehe vabamu ab aame àvodeham.
39. Labi ame da labe aame àvodi modeha Yesusat ame da laba fa ab vameadamam. “Um Farisi dam labe um ahu ad laba vou faovoi meedam vaba vedi gi ahoba totta vou faovoi meeda. Abo um ahu meia ozom vaba gi, ‘Nazoh dualese,’ lahame meia mali soat ziemausi vadam damat modem bak. Uho vedi neha, ‘Alat iba deelese,’ lahame um anekehà valo ekeme itatame neàdi na àdam bak lam gi mokzohti fi lihibati kikem di am ad totbaho gihobu lahasuhu bak lam kikehe vaba vedi gi toha totta kikem bakti uloholehe damat modem bak.
40. Um labiham damat modehe labe um gi ahusobu damat modem bak. Ne, um ozom vaba? Alat Na Debu Modeheda labe Aho im dam bake gi ahoba totta modi vou faovoi meedam vabak. Abo im ahu ad lamti modi vou faovoi meedam Alat modem bak.
41. Labiham bake uho neha, ‘Alat iba aame deelese,’ laham bak laba ozome dam ahamda labe ibi iho fi hasi vou mode usehe im lam uho bisi tau meedam bak lam nasi voou gi um ahu ad lam vabieme neàdem bak ozome fa na vab dam laba faobekesi um nazoh vame fa dam iuba lo. Iuba lo. Lahadale. Uho labi modemeam làhà um ahoba tot lamti um ahu ad lamti fa vahi gi ab boz neàdemam bak,” lahame ab vahokeham.
42. Lahame labi vahokeme neàdi Yesusat neo im nehasu ab vi vahokedamam. “Aiee! Um Farisi dam um ba vàhàdem bak vabili meedalo. Uho vedi Ala bake vou baedam di Musat lab gagoho bak lamti ulohona meedam damat modem labe um utoho laba usihina keobe lam ahebu vame vou li debe vàmtea utasi Ala bake esu. Labi sembilan totbaho lam uho naedamat va. Labi neo ame na totbaho lam neo debe vàmtea utasi Ala bake neo esu. Labi sembilan totbaho lam uho naedamat va. Um gi im lada lamota meedam damat modem bak. Abo na et nakbe ahana neàna vizemna modeo, labi nae modeo, labi na mei na meime ahanalemna totbaho modeo, labihasu debe ulohodesu fahedam damat modem bak. Lahana dat ahamda Musat aho toedume fi hasi esuhu Im Feàna zi labe im tombuda nim uho mu voedam damat modem bak. Abo dam bake iademe ahu vamdesu meedam bak ame. Labi Ala bake deeli meedam bak ame. Labihasu uho meedam vab damat modem bak. Uho im keobe lab meedaha bak lam meedamta neàt. Lahana ba gagoho zoho nimti vahi meedam bak lam bisi neà bak am tame.
43. Aiee! Um Farisi dam um ba vàhàdem bak vabili meedalo. Uho vedi im Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di vedi dam feàda ihimo nusum bak laba deeli nusualadam bak ame. Labi neo dam duana zi dokbuedam bak laba le damat fà, ‘Neàte,’ lahame uba gut gagom bake deeli meedam bak ame. Um gi labihasu meedam damat modem bak.
44. Aiee! Um Farisi dam um ba vàhàdem bak vabili meedalo. Um abo koei ilehà tatbuli, ‘Koei eheo?’ laham bak ozom biem bakti uloho bak. Ame bak ad ium dam faati meia modi vizi faidi vàhàdemna na meiti na meiti ehe bak vabi gohatemeam faidi vàhàdem meot. Ame bak lam gi neham bak. Um ahit neà damalehe labet modi dam amomoit fa im ubuda tum neà tiba tu vuzeheha fa ubu uho ad ium faidehe bak vabili ab vizemam bak. Um gi labihasu meedam damat modem bak.”
45. Lahame labi vameadume modeha ame dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru meida labe Yesus bake ab vi gagoham. “Guru oa, Oho lab vameaha im lam Farisi damat fà aisome vameaha vabak. Gi imti feàtàhà bak.”
46. Lahame labi gagoha Yesusat fa vi gago, “Lo, um dat ahamda Musat toedume fi hasi esuhu Im Feàna zi lam uho ozobohudi fa dam bake vahokedam di um ba vàhàdem bak vabili meedam gurut modem bak. Um abo meia na asimbuna ahumdem damti uloho bak. Ame bak lam neham bak. Um gi ame dat ahamda Musat toedume fi hasi esuhu Im Feàna zi lam meia ootedam di im ubu uho ozohodati tau vahi duali ootedaha labe mei mu odohalemnàme uho gi tet vi ootedume uledem damat modem bak. Lahana um akati ame im lam uho meia ootedam di akati um laha tau modem vaba modela?
47. Aiee! Um guru zi um ba vàhàdem bak vabili meedalo. Uho vedi nehi ozo, ‘Imo dam ahamda Alat vameadaha im aime fa dam bake ahate vameaidaha dam aham di iube meit oddume elodaha dam zi laba vi ozome faobekese,’ lahame im koei baumahe bak laba ilehà moadume gàhàdi aam neàdedam damat modem bak. Lahana um ozom vaba? Um tai ahobada labe ame dam lam oddaha bak. Lahana Alat lab oudaha dam labe ibi iho lab li vameadume vou esmoho im lam uho laha aidam moudaha damat vedi ahi vageme ahobat neàdi ame dam lam baumahe bak laba vi vabiedume gàhàdem meo damat modem bak. Labiha labet uho neha, ‘Neàte. Ahole oddaha bak,’ lahame uho gi daeta vi tau oddaha dam um am bak.
49. Uho labihasu meedàmu Alat Bisi Im Ozobohudatebo labe Aho aham di iube amu gi fet ozobohudi neàdehe labe nehame fet gagu esuhu bak. ‘Eho vameadaha im aime fa dam bake ahate vameaidaha dam lamti Eho gagu olu Em im vameadume esmozi laiam damti labihasu Eho um Yahudi dam bake neo vi ouda tame. Labi ame dam labe le meedameam dam iho vou le vameadaha im lam aim mom dam labe faki ame dam zoho gi odda. Labi dam zoho gi fai baket vabidume voeda. Labihada tame.’
50. Labihàmu um tai ahobada zi labe aham di iube Alat lab oudaha dam vou ote ledume vasea veàmodaha bak lam fa Alat uba dam badate vàlu nehi gago tame. ‘Ame dam vou ote ledume vasea veàmodaha bake gohali Eho gi um dam bada niba beome vasea gohalem bak,’ lahame Alat fet labihasu gagu esuhu bak. Nehaha bak. Abo Alat na ahebu ahamte modehe di iube um tai ahobada zi labe iho dat ahamda Habel amu nasi alimeat oteheda am bak. Labi uho neo gi vou ote ledume Zakaria ba ab oteham bak. Ame da Zakaria lam uho Fihasi Ala Bake Vou Baedam Num Vàmteabu labe am ad oli aam bak tomba laba abo ame num lamti labi na Ala bake lomna nom vaheme vua vahudamnabu lamti laha donibu laba otehe bak. Labihàmu ame lab vou ote ledaha bak laba Alat vi ozome um dam badate fa vàlu neha, ‘Ame dam vou ote ledume vasea veàmodaha bake gohali modeme neàdemna um am tame,’ lahame uba labi fet ab gagu esuham bak.
52. Aiee! Um dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi um ba vàhàdem bak vabili meedalo. Um gi meit lam di zie aum bakti ulohona meedam damat modem bak. Ame bak lam neham bak. Meit neha, ‘Em akatiham labe Alam damali Aho eba vuusu im vahokedà?’ laham bak lam um guru ozobohuna vedi fa meit, ‘Ame bak lam modese,’ lahame modelo àhàkemda lam fa vausu meedam labe ame da labe fa ame bak lam modem biehe bak. Uho neham labe labihaha bak. Ebe eho lab vahokedam im gàhàna lam uho vuzehi Alam damali Aho uba vuusu im vahokedam mom damat modem labe uho vedi ubu uho ahulat vi ozodam im zi lam fa Musam im laba vi tau vahokedam labe ame da labe ame bak lam modem biehe bak. Labiha labe um ba vàhàdem bak vabili meedam damat modem bak,” lahame Yesusat ame Farisi dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti laham dam laba vàlu im ab vahokedaham.
53. Labi vahokedume neàdi Yesusat ame Farisida labe am num labe futoi esmozi le aidam di labe ame Farisi dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti laham dam labe Yesus bake ahit meoli vabilo ab la gagoi le gagoidamam. Yesusat meia git vahokem bak labna zohàme vàlulo Yesus bake dihasi vi ooteme ailo vameada. Dihasi vi ooteme ailo vameada. Lahadam bak ab faasi meedamam.
1. Labi ame di labe dam zi fai Yesusat doudam bak laba valadume vahi bakamta dozeadume modeha gi dam bà tadi mei soat osidda. Labihadam di labe Yesusat amu nasi Aba Aho vahokedam im ozobohudelo vi tau meedam dam zi laba ab faasi vahokedamam. “Um iademe vou faovoehebeat meedale. Uba Farisi dam labe iho faina meedam bak uba ahit neà damali vageme uho vedi vabi dam lam imbona mode tiba uba vizemo. Labiham bake um iademe modele.
2. Damat ozo, ‘Iho modehe bak nim damat aaha vabak,’ lahame iho aa modi vastehe im lam ahebu Alat ba diamut ahate modi fi zeam bitoi dam ahebu ba aame ozobohudem bak.
3. Neham bak. Damat aibut aa fi olehe bake le aa vameaha im lam, ‘Ba meit aim vabak,’ lahame ozoho im lam ba diamut modi ala faasi fauhaedam di labe damat aime ozobohudem bak. Labi laha damat num ad oula tuoho bake le meia im adnahet aa vasti vameaha im lam, ‘Ba meit aim vabak,’ lahame ozoho im lam ba diamut modi ahate tombalem labe dam ahebu aime ozobohudem bak,” lahame ab vahokedaham.
4. Labi im lada lam vahokedume neàdi Yesusat neo im meida vi vahokeda. “Emti vou alehe dam oa, Eho etei uba vamealo modem im nim laha mahate iademe aile. Uho dam bakda uba gi soabota oteme voom dam laba a àvodi vi ozome iedemule. Dam lam um otem di um so lam gi lab eloi vooho tadem bak. Ba neo um eloi it oazehena lam vi vabidam vabak. Labiham bake ame dam laba uho a àvodi iedemule.
5. Fa gi nehale. Uho gi Ala Na Debu Modeheda laba, ‘Feàte,’ lahame ahu adat iedi ozodale. Neham bak. Um dam bakda Ala naedat modehe labe um oteme elomta elo. Lahana uho lab eloi it oazehena lam Aho ba vi ve fa vua eludamna sutem gikina bohu laba voom bak ehete. Labiham bake ubu uho bisi àvodi vi ozome ahu adat iedelo modemeam làhà Na Debu Modehe Ala laba iedele.
6. Neham bak. Damat gena bume keobena nu vabna vam di, ‘Feà kaio,’ lahame doi oona tembagat modehena lam vam mom meote. Lahana ame bume keobena lam Alat faobekesi vou aasdam labe ba vàmtea vabiem vabak. Ahebu vi ozobohu tadehe bak.
7. Lahana gi ame bume lamota vou aasdam vabak. Alat laha uba vou aasdam labe ba um meida buà vabiem vabak. Abo um ahebu vi ozobohu tadehe bak. Abo um ohuta tau keobebe lam Alat laha amu gi debe uloholi ozobohudi esuhu labe Alat um ba vàmtea vabiem vabak. Labiham bake Alat ame gena bume keobe zi laba deeli vou aasdameam làhà im dam bakda laha tau vou aasdam bak. Lahana bisi aho deeli vou faovoemda im dam am bak. Labiha labe ame dam bakda amomoi labe uba otelo modem bak modeo, uba faina modelo modem bak modeo, uho a bisi vi ozodume iedemule,” lahame ab vahokedaham.
8. Lahame labi vahokedume neàdi Yesusat neo im meida nehame vi vahokeda. “Um Em im nim mahate aimale. Meit ladi iedehe vabna dam duada labe iho avaesdam laba le ahate duzu nehasu gagomeam, ‘Em Yesus bake tu vuzehi vi tau meedamda em meida am bak,’ lahame ahate labi gagomeam làhà Em Abo Asum Ahoba Iubet Bak Niba Li Dateleheda nibe Eho laha ba Alat Am im gagu vou usem dam zi labe avaesdam laba le duzu nehame gagom bak, ‘Da nim Eba tu vuzehi vi tau meedamda meida am am bak,’ lahame ba diamut ahate labi gagoda tame.
9. Lahana meit ladi vei iedi dam duada labe iho avaesdam laba le duzu ahate nehameam, ‘Em ba Yesus bake tu vuzehi Aba vi tau meedamda modem kaio,’ lahame vei iedi Eba momeam làhà Eho ba Alat Am im gagu vou usem dam zi labe iho avaesdam laba le duzu laha nehasu gagom bak, ‘Da lam Eba tu vuzehi vi tau meedamda modem kaio. Em bieho,’ lahame ba diamut ahate labi gagoda tame.
10. Labi Dat Asum Ahoba Iubet Bak Niba Li Dateleheda nim meit Em mu feàtàme ba ozobohudi fa Ala bake ahatet tom gagomeam làhà Alat gi ame da laba ozahigeàmu fa vei neàdem meo bak. Lahana Alam Aha Nutabe Neàna Labe Eba lab tau modi vizi teudi Eho setan gagu futodume ilidam bak laba meit neha, ‘Iblisit Eba tauha,’ lahame vàlu gagoho bak lam git gagom bak am bak. Ame da labe gi Alam Aha Nutabe Neàna laba feàtàhà bak. Meit Alam Aha Nutabe Neàna laba feàtàmeam làhà ba Alat ozahigeàmu mu fa vei neàdem vabak.
11. Ba diamut uho Eba tu vuzehi vi tau meedam damat modemu uba fakemoholehe dam labe um si fa Yahudi dam labe ihimo fi hasi meedam num laba vou le ame Yahudi im ozobohudatebo zi labe uba uloodam di modeo, pemerintah eeda zi labe iho avaesdam laba vou le uba uloodam di modeo, lahadam di labe uho ame dam laba fa veibadam bak lam, ‘Iho im akatihasu vi gagoela?’ laham bak lam um ahu a bisi nasi fet vi ozodamule.
12. Ame di lam ba uhumo gagodam vabak. Gi Em Ai labe Am Aha Nutabe Neàna Labe fa um ahu ad laba vahokedam bak labet modi vizehe labe uho ot vai gagodam bak,” lahame ab vahokedaham.
13. Labi Yesus im lada lam vahokedume neàdi modeha dam zi labe dat meida labe Yesus bake ab vi gagoham. “Guru oa, Oho em dubu bake gagome aiat misiali vou esmoho nazoh gagome fàsi eba lole.”
14. Lahame gagoha Yesusat fa gago, “Uhumo modem im akati Em giida taue? Amat Eba neha, ‘Oho dam behàsu nibe modem im ozome ozobohudi gagu fi baele,’ lahaela? Lahame Eba ba labi gagomda vabak.”
15. Lahame gagu neàdi Yesusat dam laba dozeadaha dam zi laba neo vi vameada. “Uho etei bak niba esdam di um soa maehe nazoh duana vadume vahedam bak labet modi um ba ahe neàdedam vabak. Labiham bake um ahu mahate iademe it ozodume vou faovoele. A bisi, ‘Nazoh dualese,’ lahame meia mali soat ziemausi vadamule.”
16. Lahame labi vameadume neàdi Yesusat ame dam duada zi laba neo im totobe nidi nim nehame ab vi fi koadamam. “Da na duada nibe am utoho abo na duana debe soale.
17. Na duana debe soalehe labe am it ozo, ‘Na vahem num kekehe bak em na modeme ake vahela?’
18. Lahame it ozodume ozobohudi fa aba it gago, ‘Làhà em gi nehi modese. Em na vahem num zi faamome fa num buduana zi moadase. Labi em na àmna ziti na àm vabda ziti ame num laba vahedase.
19. Labi vahedume neàdi em fa eba nehi it gagom bak, “Em abo na neàna ala oli buzidamehamdi folemna modeme num tamehodi vahedaho. Em ba na modem bak ozom vabak. Em gi ame na ahum lamota azi àda. Udda. Lahadume izidalo modem bak. Labi na eho deelemna ozome meedalo modem bak,” ’ lahame aba ab it gagoham.
20. Labi it gagodume modeha Alat Am dae gagu neisoat ab vàuham. ‘Om disi elom bak vabi meedamda ahusobu dàt moz. Labi om elom di om na zi oho om soa it ozome vahehena lam oho naedat ba vame vou lam vabak. Om na zi fai oho voedume vou esmohona lam meit gelevai setem bak,’ lahame Alat ame da laba ab gagoham,” lahame Yesusat ahit im totobe lada lam ab fi koadaham.
21. Labi fi koadume neàdi Yesusat neo vi gago, “Meit neha, ‘Em akati modi em nazoh dualela?’ lahame ahamo am ahulat labi it ozodume am soa maehe nazoh vahedume zi dualem bakta ozodume meeda. Lahana im Alat, ‘Nehame meedale,’ lahame gagomda lam aho ba ozodume meedam vabak. Ame da labe aho gi da amu gagohoda lamti uloho bak. Alat laha ame da laba, ‘Ahusobu dàt moz,’ lahame gagom bak,” lahame Yesusat ab vameadaham.
22. Labi ame im lam dam duada zi laba vameadume neàdi Yesusat Aba Aho vahokedam im ozobohudelo vi tau meedam dam laba neo nehame vi vahokeda. “Eho amu neha, ‘Meit am nazoh duana vadume vahedaha bak labet modi am ahe neàna tadem vabak,’ lahame gagohemu uho etei bak niba esdam di uba modi ahe neàdemna, ‘Modem vabna ozomo?’ lahame a bisi vi ozodamule. ‘Im na àmna vabalemeam làhà im ba akati modi ahedi na im meedàla? Im labihameam eloe taia?’ laham bak modeo, labi, ‘Im so bozbulehe bak nim im akati modi sueli dusuela?’ laham bak modeo, um bisi a labi vi ozodamule.
23. Neham bak. Im ahedi na im meedam bak lamti na àm bak lamti na behàsu lam vi ozom di bisi tombuda im ahedi na im meedam bak am bak. Labi laha im so lamti sueti na behàsu lam vi ozom di bisi tombuda im so am bak.
24. Uho bumet meedam bak laba vi ozodale. Bume ba na debe soali modeme àm vab bumet modem bak. Labi laha ba na modeme vahem num mome iho àmna laba vahedam vabak. Lahana Ala naedat Aho gi ozahit ame bume keobena laba vou faovoi dihasi na lu esu. Dihasi na lu esu. Labihadam bak. Labihàmu uho ozom, damti ame bume lamti na behàsu lam vi ozom di bisi tombuda akete? Gi im dam am bak. Labiham bake Ala naedat Aho laha dam bake vou faovoi aasdam bak.
25. Uho ozom, um elom vaba ahe lahasu bohu vuusdam bak laba uho bisi lab it vou faovoi ozodam bak labet modi um elom vaba fa vi ahedidume bohu vuusdam meo? Vabà! Ba gi koena vi tau bohulalem vabak.
26. Uho koena vi tau bohulalem bak modem biem labe um a bisi nehame vabi vi ozodamule. ‘Im dihasi ana à?’ Labi, ‘Im so bozbulehe bak akati modi sueli dusuela?’ laham bak lam bisi a labi vi ozodamule.
27. Uho ut ava aam neàna ahamo usim di meedam bak laba vi ozodale. Ame ut ava lam damat dehe vabna gi ahamo usihinat modem bak. Labi laha ame ut ava labe ba anekehàli elu faitoi fi name beateli gimsum vabak. Lahana ame ut ava damat aam di abo aam neàna modem bak. Labihamta labiha. Lahana ahamda Boehàdatebo Salomo labe aba aho vuusualaha nazoh feà lamota zi feàt. Lahana aba aho dusuhu sue neàda lamti ame ut ava lamti na behàsu lam vi ozodam di bisi aam neàda ut ava am bak.
28. Ame ut ava lam gi usdalo iahamu aladume seti fa damat vamateme fa vua vahudam bak lam Alat ozobohunàme gi ozahit aasu vabiedam labe damat aam neà bak modi esuidam bak. Alat labihasu modehelahit uho ozom, um so bozbulehe bak lam laha modi fa fi olem vaba? Vabà! Abo modem bak. Neham bak. Ame ut ava lam Alat modi aam neàdehe bak lamti um so bozbulehe bak lam Alat modi fa fi oli neàdem bak lamti na behàsu lam vi ozodam di uho ozom, bisi tombuda akete? Im dam am bak. Lahana um akati Eba mahate tu vuzehem vaba vedi gi im iudu ium ozo. Im iudu ium ozo. Lahadume vi ozodam bohu meedàla?
29. Neham bak. Ala bake tu vuzehe vab dam debu mei debu mei laham dam labe, ‘Im etei ana à? Vao ake le ude?’ lahame àvodi vi ozodam bak abo feàte. Lahana ame dam labe ibi iho àvodi vi ozodam bak lam uho a vi tau meedamule. Dam bakda na àm vaba valo àhàki idoali elom bak lam im Ai Ala Na Debu Modeheda lam ozobohu bak. Am ba biem vabak. Labiham bake uho a nehame àvodi vi ozodamule. ‘Im na àm bake im akati mode? Im vao udem bake im akati mode?’ laham bak bisi a àvodi vi ozodamule.
31. Uho fa gi nehasu meedale. Alat Boehàdateboli uba deeli vame Am damali vuusu im vahokedam bak laba nasi ahu vitasu vàmadele. Uho ame bak laba nasi ahu vitasu vàmadi meedameam làhà Alat uho amu lab àvodi vi ozodamna lam ahebu uba ba vi loda tame,” lahame ab vahokedaham.
32. Lahame labi vahokedume neàdi Yesusat neo nehame vi vahokeda. “Um Ai Alat neha, ‘Aho ba diamut uba deeli vame Am damali asum ahoba iuba Aba vi tau vahi boehà damali dam bake vuusu im vahokedase,’ lahame àhàkedam bak. Labiham bake um Eba vi tau meedam dam debu koe damat modemnàme bisi a àvodi nehi vi ozodamule. ‘Im dihasi ana à? Im so bozbulehe bak akati modi sueli dusuela?’ laham bak bisi a labi àvodi vi ozodamule. Gi Ala bake mahate tu vuzehele.
33. Meit aho soa maehe nazoh vahedaha bak laba am ahu laba it ozodam meo bak. Labiham bake gi im nehasu meedamta bisi neà bak am bak. Um soa maehe nazoh fa meia doit ot loiame neàdi fa ame doi vame fa dam na vab dama iuba lo. Iuba lo. Labihadam bak meedale. Uho labi modem labe Alat asum ahoba iuba uba vahedam nazoh vadumna neàna laba soa maehe nazoh vaddume vahedam bak. Ame nazoh lam ubu uho bak niba vaheheda lamti uloho vabak. Nazoh asum ahobada lam ba vàhàdeme setem vabak. Mei na aa vamda ba iuba le na lam aa vame voutame seti koedem vabak. Labi ba naat aum vabak. Abo gi neàna modesdam bak,” lahame ab vahokedaham.
35. Lahame labi vahokedume neàdi Yesusat neo, “Am fa lem bake ahumdi neàdi vou faodale,” laham bak vahokelo im totobe nidi nim faasi ab fi koadamam. “Uho gi mei na meedam dam nibe iho nehasu meedam bakti ulohona laha meedale. Mei na meedam dam labe iba na gagu meedamda labe aho dat amomoi nam vam bake vazisi na àm bake tau àdalo modem bake am na meedam dam laba gagu esmozi ab laham. Labi gagu esmohemu ame na meedam dam labe omozit amu gi modi ahumdi sue dusu minyak vua fauhali gi labihasu modesu dat naeda fa lem bake vou faoda. Dat naeda ba fa li gagohemu num doo taho fi stom bake ame dam labe gi labihasu ahumdi vou faodam bak.
37. Labi dat naeda aibut leo? Usi neisoat leo? Labi li aameam am na meedam dam amu gi modi ahumdi neàdi aba vou faodam bak lam li aameam ab deelemam bak. Lahana gi im lada lamota modem vaba fa im nidi nim laha modem bak. Am na meedam dam labe vou faodamna li aahemu aho ame dam laba abo im neà bak modi esuiam bak. Dat naeda labe ahamo ame dam laba nehame gagom bak. ‘Um betea nusu faode. Eho na ohume fa uba lu àm bak,’ lahame deeli aho am dam laba labi gagu meedam bak.
39. Em im totobe nidi nim uho laha aime vi ozome ozobohudele. Neha: Dat num deda labe am num laba meit am na aa li vam bak ozobohudemeam làhà ba ame aibu lam ba bisu im vabak. Abo vou faovoi aasdam labe ba meit am numa oli am nazoh aa li vam vabak.
40. Labihàmu um laha gi ame baket meedale. Em Abo Asum Ahoba Iubet Bak Niba Li Dateleheda nibe Eho ba lem digat um vabilem bake um gi vou faovoi ahumdi ibzidale.”
41. Lahame labi gagu modeha Petrusat Yesus bake vi ailo ab gagoham. “Boehàda oa, Oho etei lab totobet fi koadaha im lam iho Oba vi tau meedam dam nimota im vahokelo totobet fi koadào? Gi im ahebu im vahokelo totobet fi koadào?”
42. Lahame labi gagoha Yesusat ozo, “Dam Aba tu vuzehi im Abada meedam lahasuhuna ahum Aho gi li aase,” laham bak vahokelo im totobe nidi nim fa ab faasi fi koadamam. “Mei na meedamda nibe aho aba na gagu meedamda labe na gagom di aho gi ule neàt meedam tadem dàt moz. Aba na gagome meedam di ba gi modem vaba abo iademe ozobohu aabodi meedam bak. Labihadam dàt modem labe aba na gagu meedamda labe aho bak mei bake lalo meedàmu aho ame da laba fa neo ab gagoham. ‘Em na meedam dam totbaho zi nim oho fa ot vai vou aasdume na meedam bake ohomo vi ozobohudi vameadale. Labi ame dam labe na àdalo modem di oho na àmna faheme dihasi iuba loda. Dihasi iuba loda. Lahadale,’ lahame am na meedamda ahida laba ab gagu esmozi ab laham.
43. Labi le azibe fa li aaha aho am na meedamda ahida laba, ‘Nehame modele,’ lahame amu fet gagu esuhuna lam aho uledi meedamna li aahemu aho deeli am na meedamda laba gi im neà bak meedam tadem bak.
44. Lahana ba gi im lamota meedam vabak. Ame na gagu meedamda labe am na meedamda laba neha, ‘Em soa maehe nazoh ziti doi ziti oho fa ot vai iademe vou aasdale,’ lahame ab gagomam bak.
45. Lahana ame mei na meedamda labe ahida modehe vaba soida modemeam làhà aba na gagu meedamda labe le setem di am ahulat gi nehi it ozo taia? ‘Aa! Ne, eba na gagu meedamda lam taho fa lem vaba? Akati kehàdà?’ lahame alamdi vedi aho vuusu na meedam damti na meedam lahiti ame dam laba faki beodume geàda. Labi ozom vabamu fa gi na duana àda. Anggur vaksa vao meona lam uddume bak vabili ohu bobida. Labihada.
46. Labihadam di labe ame ot vai meedamda labe vedi aba na gagu meedamda lam ba fa lem digat labe am jamti vabili esdameam làhà aho ozom vab digat labe dat naeda fa li ame da labe aho lab meedam bak lam aameam fa nehi gagom bak. ‘Om gi dat mei,’ lahame gagu feàna beome mu fa bàhàgo iuba abo Alat gagohona tu vuzehi meedam vab dam labe ibi iho esdam bak laba voom bak.
47. Neham bak. Meia na gagu meedamda labe am na meedamda laba neha, ‘Oho na nim modele,’ lahame gagohona ame na meedamda labe ahamte gagoho dita aime ozobohude. Lahana ailahigeàmu ame na modi ahumdi neàdi vou faodam vabak. Labi modemeam làhà dat naeda fa li ame da lam abo duana foadam bak.
48. Lahana dat naedat am na meedamda laba, ‘Nehame modele,’ laham bak gagom vabameam ame na meedamda labe, ‘Ana modemna gagohela?’ laham bak biehe labe ba ahamo git modemeam dat naeda faki foadamta foada. Lahana mahate foadam vabak. Gi fota foadam bak,” lahame gagu neàdi Yesusat neo ab vi gagoham. “Labiham bake Alat meia neha, ‘Oho gi na nidi nimota meedale,’ lahame amu gagu esuhuna Aho ba vi ailo gagu modem di ame da laba gi koena gagu esuhu labe gi koena vi gagu vi aim bak. Lahana Alat meia neha, ‘Oho na nidi nim meeda. Na nidi nim laha meeda. Lahadale,’ lahame amu gagu esuhuna ba Aho ame da laba vi ailo gagu modem di ame da laba bisi duana gagu esuhu labe abo duana vi gagu vi aidam bak,” lahame ab vahokedaham.
49. Lahame labi vahokedume neàdi Yesusat neo im amomoi neo vi vameada. “Dam bakda nibe faina meedàmu Alat dam bake modi geàdalo modemu Alat ahit Em gagu dam bake ab nom oluham bak. Alat Aho ame bak lam modelo modem bak akati taho modem vaba?
50. Lahana Em nasi geàdamehamdem bakti nehi Alat Aba Aho modelo modem bak lam taho modem vabamu vou faodam bak. Lahana Em geàdam bak lam akati taho modi fi gatem vaba mode? Em bak lam bisi vi ozodam bohu meedam bak.
51. Uho nehame ozohe? ‘Em bak niba lehemu dam mei debuti dam mei debuti fa ab vahe vahedam ame?’ lahame uho labihasu ozohe? Làhà um git ozoho bak. Ba labiham vabak. Eho bak niba lehemu dam totbaho labe Eba tu vuzehem mouda. Labi dam totbaho labe Eba tu vuzehem bak ulededa. Labihadume fahedaha labe dam mei debuti dam mei debuti fa ot faki ot fakiame ab ot belui ot beluidamam bak.
52. Etei di nibe faasi num vàmtea laba azihi dam auoholehena lam ihimo faheme totbaho Eba tu vuzehe. Dam totbaho Eba tu vuzehem mouda. Lahada tame. Dam Eba tu vuzehe dam làtela labe fa Eba tu vuzehe vab dam behàsu laba faki ot odosia. Laham vaba dam Eba tu vuzehe dam behàsu labe fa Eba tu vuzehe vab dam làtela laba faki ot odosia. Labihada tame.
53. Abo faheme ame ai labe fa am adatti ot fakiame ot odosia. Labi ame oi labe fa am adnamati ot fakiame ot odosia. Labi ame taai labe fa am taiti ot fakiame ot odosia. Etei di nibe faasi labihadamna bohu tade tame,” lahame ab vahokedaham.
54. Lahame ame im lam Aba vi tau meedam dam laba vahokedume neàdi Yesusat fa neo dam duada zi laba im meida neo ab vi vahokedamam. “Uho ulo giho asum ala bozilem zoho laba aameam nehi aame gagom meo dam taia? ‘Asum di ilehe bak. Etei abaalem bak,’ lahame aame gagomeam gi ame baket modem bak.
55. Labi laha uho aameam nutabe fa ba tot iube lem bak aam di uho neha, ‘Im etei di neà faasi galiha tame,’ lahame labi aame gagom di gi ame baket modem bak.
56. Um gi asumti bakti modem bakta fet aame ozobohudi gagodam damat modem bak. Ne, um im labihamna meedam damat akati Eho etei li vahokedam im nimti labi Eho im feàna meedam bak lamti uho fet aadamna akati nehame vi ozodam vaba mode? ‘Elàhà! Alat iba vuusu im Am damali iba vahokedam bak ab faasi meedam ame?’ laham bak lam akati um ozobohudem vaba vabili ahusobuli modela?”
57. Lahame labi vahokedume neàdi Yesusat neo ab vi vahokedamam. “Em Ai Alat neha, ‘Im vamdesu meedam bak neam tame,’ lahaha bak lam akati uhumo vi ozome ozobohudi neàdi Ebe Eho vahokedam im laba tu vuzehi Alati vahem vaba modela? Etei di nim ame bak lam meedam neàdi am bak.
58. Uho taho ame bak lam meedam vabameam Alat um beom bak. Abo Eho etei vouholo modem im nimti uloho bak. Umti vahi azim dat meida labe fa oba faki neha, ‘Om eba git modehemu em om si meia uloome vi aime neàdi gagu modidam dat boehàda labe aho meia uloome vi aim num laba vou lalo modem bak,’ lahame oba vàlu gagomeam làhà oho gi ozahigeàmu etei vou ladam di labe gi zie doni laba taho fa nasi im ot vameaidume fa neàdele. Oho labiham vabameam oba faki vàlu gagomda labe om vou kea lame dat boehàda laba ub lom bak. Labi ame boehàda labet fa neo am meo dam gagome om neo si mei si ousu teudi simtedem num abo sel laba voom bak.
59. Labiham bake om nasi aima. Om sel laba voomeam làhà ba taho futom vabak. Abo ousdamehamdi boehàdat aba aho gagu esuhu doi oho gohali lodume uloholehezobe ba futom bak. Labiham bake gi zie doni laba nasi ot vameaidume neàdele. Lam bisi fa ot vahiam bak am bak,” lahame ab vahokedaham.
1. Yesusat dam duada zi laba labihasu vahokedam di labe dam amomoi zi labe Aba li lefusi Gubernur Pilatus labe amu Galilea dam oddaha im lam nehasu Yesus bake vameada. Amu Galilea dam totbaho labe iho faina meedàmu ibi iho Ala bake lodamna lam ame Fihasi Ala Bake Vou Baedam Num Vàmteabu labe am ad oli aam bak tomba laba ame na fi ho vou ledume ame na lam oddume vahedam di labe Pilatus labe am meo dam gagome ame dam lam ab oddaham. Lahaha im lam Yesus bake li vameada.
2. Vameadume modeha Yesusat dam laba fa ab gagoham. “Uho nehi ozohe? Ame Galilea dam lab oddaha dam lamti Galilea dam dua totbaho oddaha vab dam lamti ozom di lab oddaha dam lam bisi faina modehe bake oddahe? Uho labi vi ozodà?
3. Vabà! Uho git ozo. Uho ozoho bak labe imbodi oddaha vabak. Uho faina meedam bak lam voedume fa ahu neà bak vàmadi meedam vabameam um laha elom bak.
4. Neham bak laha ozomale. Um kota Yerusalem labe am bàhàgo Siloam bak num naoha bohuna labe aguti nom ilu dam adbada delapan belas beome eloho bak lam um akati vi ozoe? Uho nehi vi ozohe? Ame num aguti beoho dam delapan belas lamti labi kota Yerusalem laba azihi dam dua totbaho beoho vab dam lamti ozom di lab elodaha dam lam bisi faina modehe bake beodume elodahe? Uho labi vi ozodà?
5. Vabà! Lada lam uho laha git ozo. Uho ozoho bak labe imbodi beoho vabak. Uho faina meedam bak lam voedume fa ahu neà bak vàmadi meedam vabameam um laha elom bak,” lahame ab vameadaham.
6. Labi vameadume neàdi, “Damat faina meedam bak lam voedume fa ahu neà bak vàmadi meedam vabameam Alat vou faom vabamu beom bak,” laham im vahokelo Yesusat neo im totobe amomoi vi ozome dam duada laba neo ab fi koadamam. “Da nibe am utoho laba ut oo àmda so douda. Labi, ‘Am ut oo valehe?’ laham bak le aaha oo valem kai.
7. Labihàmu da nibe am na vabieme vahemda laba ab gagoham. ‘Ut oo àmda so lam eho le aame leidaha vabamu ala oli buzidamehamdehena akati taho ooalem bi mode? Taho ome bitele. Bak neà bak akati ut nibe veimai mode?’
8. Lahame labi gagohemu am na vabieme vahemda nibe fa gago, ‘Aia, faode. Im ut nasi a omule. Gi labihasu ala totbaho laha faobe ozomase. Eho na debu obe niba vou sie làbome bak valiheme afoezobe fa oube vame fa vahem bak.
9. Labi modi ba neo aameam oo valemeam làhà, “Neàte,” laham bak. Lahana oo valem vabameam làhà eba nehi gagole. “Ome bitele,” lahame eba labi gagomeam làhà eho le ome bitem bak,’ ” lahame Yesusat im totobe lada lam ab fi koadaham.
10. Labi ba hari Sabat meida labe Yesusat ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli dam bake ab vahokedamam.
11. Labi vahokedam di labe aaha nam setan modi nisilehe nam ame num laba tau ame lab vahokedam im aidamna aa. Ame nam labe am toha abo ozuhuna vamdem bi meedamehamdi abo tahun delapan belas folehe namet moz.
12. Labiham nam lam Yesusat aahemu gagome li Aho avaesdam laba duzu neàdi ab gagoham. “Om ade? Om nisilehe bak Eho oba modi om fa ab neàdeham bak.”
13. Lahame Yesusat labi gagu neàdi Am anekehàt nam laba ulasi nam lam am toha fa ab vamdeham. Am toha vamdehemu Ala bake ab vou baedamam.
14. Vou baedume modeha ame num deda labe Yesusat hari Sabat mei fa neàdehemu faki ame num laba nusualadaha dam laba ab gagoham. “Digat enam lam ahebu na modem neàte. Digat lamota niba li mei fa neàdedam neàte. Lahana hari Sabat abo gi azibe im digat fum di niba li a meia modi fa neàdedamule,” lahame ab vameadaham.
15. Labi vameadume modeha Yesusat fa gago, “Um abo gi ahobat neàdi vagem damat moz. Ne, ame hari Sabat lam um lembu sapiti ulohona fi ho modeo, keledai fi ho modeo, valo àhàkem di uho naedamat lo vuhatomome vou olame le vao udeme fa vou li lo vààsu esum meo dam taia?
16. Labihàmu Yahudi nam nim Iblisit veimai faidi modesdume delapan belas tahunlehemu ame hari Sabat nibe am nisilehe bak nim Eho modi fa Iblisit fa am mu isi esmozi itaha bak lam ahole modehe bak,” lahame ab gagoham.
17. Labi Yesusat labi gagohemu dam Aba tauhu vab dam lam ahebu gi ladi daleàdi nom bohusu. Lahana dam duada totbaho labe Aho lab feà bak meedaha bak ahebu aame deeli ab vou baedamam.
18. Labi ame dam duada totbaho labe Yesus bake vou baedume modeha Aho fa neo dam laba im meida totobet nehame vi vahokeda. “Alat Eba gagu vimteme Eho Boehàdateboli dam bake deeli vame Em damali vuusu im vahokedam bak lam meit Eba tu vuzehi Em damali vi taui vi tauidume dualem bak lam, ‘Akatihasu modem labe dam dualedàla?’ laham bak lam damat ozobohudem bake Eho neo, ‘Akatiham bakti ulohote?’ lahame ana im vàlu uba totobet vi fi koadàla? Làhà Eho im nidi nim vouhodase.
19. Dat nibe aho ut oo keobena rica oo vàmtea buà lam vou le am utoho laba dedesu esu. Labi usime loubedi kilali utsoti uloholi bume faobuda zi labe ut aaso laba li nusualadam bak lamti uloho bak.”
20. Lahame labi gagu neàdi Yesusat neo ab vi gagoham. “Meit Alat aba vuusu im vahokedam bak laba uledi meedamda laba meit vi aame fa vizedume dualedam bak lam Eho neo, ‘Akatiham bakti ulohote?’ lahame ana im neo vàlu uba totobet vi fi koadàla?
21. Làhà Eho im nidi nim neo vouhodase. Neha: Nam nibe na ti fauti ulohona tepung ve afoezobe neo na ulasi fi kidemna keobena ragi lam laha laba vi tau esu valihedume seti vou faodameilahit deilemahi fi kidem bak lamti uloho bak. Dam Alat fa vahi vuusu im vahokedam dam amu debu koe bak lam fa dualem bak lamti ame na fi kidemna labe na ti fauti ulohoda laba modi vizi deilemahi fi kidi feà bak fum bak lamti uloho bak,” lahame ab vahokedaham.
22. Labi im lada lam vahokedume neàdi Yesusat kota Yerusalem bake lalo ahu vàmadi ab vitasuham. Labi Aho kota Yerusalem bake lalo ladam di labe gi nehada. Num debu duada laba labe vahokedume labohoti neo la. Labi neo ladume num debu koeda laba neo labe vahokedume labohoti neo la. Gi labiha lada.
23. Labi lab mode ladam digat meida labe dat meida labe Yesus bake vi ailo ab gagoham. “Dat boehàda oa, dam Alat soat vausu beom malemda duao? Koeo? Akatihasuhela?” Lahame labi gagu modeha Yesusat fa dam duada zi laba ab vi vameadamam. “Ba dam dua kaio. Alati vahi azilo lam zie lam gi doo kekehenati ulohona modem bak.
24. Labihàmu ame doo kekehena laba olem bake uho gi etei nibe kekehena geàmu tet olelo meedale. A vanamamule. Neham bak. Dam duada totbaho labe vedi nehame ozoda. ‘Imo zie nidi nim le aamase,’ lahame nabidamnàme ba vi aam vabili meedam bak.
25. Neham bak. Ala dat num deda lamti uloho bak. Dat num deda labe usai ame doo lam baguamdemeam làhà ba meit olem biem bak. Labi modemeam um bako tot laba dozeadaha dam labe nehame tauledam bak. ‘Ai, doo fi stole. Im vi tau oedase.’ Lahame labi tauledameam làhà ame num deda labe fa nehame uba gagom bak. ‘Em um bieho. Um ana damat modela?’
26. Lahame labi gagomeam uho fa neo nehame vi gagom bak, ‘Vabà! Aia, im amu di iube omti vahi na àdam bak. Labi laha amu di iube oho bak ibida labe im num debu meida laba li Alat Na Debu Modeheda labe Am im iba vahokeda. Labi num debu meida laba neo vahokeda. Labihadam bak lam om vi ozodam vabao?’
27. Lahana uho labi gagomeam ame num deda labe fa neo uba nehame gagom bak. ‘Vabà! Em um bieho. Um ana damat modela? Um bisi fai bak meedam dam em vou esmozi ilile,’ lahame uba labi gagu um ilidam bak.
28. Labi uho lab iitaom labe gi bak bohulana fa it aameam neham bak it aada tame. Alat Ahamo Boehàdateboli Am damalehe dam laba vuusu im vahokedam bak gàhà bak laba damat na feàna àlo meedam bak ame. Labi Yahudi damat modem vab dam abo dam giida zi labe ala zizem tot iube le. Ala bozilem tot iube le. Ba totbaho totti totti iube le. Labihadume fa Yahudi dam labe im tai ahamda Abrahamti am adat Isakti am mekehà Yakubti labi dam ahamda Alat vameadaha im aime fa dam bake ahate vameaidaha dam zi lamti laham dam zi lam Alat modi fa vazisi vuusu im vahokedam bak laba vahi gi deelehat esdam bak ame. Labihasu uho it aada tame. Lahana ame dam lamti umti Alat fa vazisi vuusu im vahokedam vabak lam uho aame ahu faidi ahula it fu foelamdidume kikezi geàdam labe meb dae feàna faasi buteo tame.
30. Alat ba diamut Aho Eba modi Eho Boehàdateboli dam bake vuusu im vahokedam di neham bak ehete. Damat etei bak niba esdam di vedi nehi ozoda. ‘Da lada lam ee feà vabda ame?’ lahame feàtàdam dam lam ba feà damali fa ee vousai nasi duzum dam am bak. Lahana damat neha, ‘Da lada lam ee feàda ame?’ lahame vou baedam dam lam ba feà damalem vaba gi ee vou usi ba duzum dam am bak,” lahame Yesusat labi ab vahokedaham.
31. Labi Yesusat ame im lam vahokedam di labe Farisi dam totbaho labe li Yesus bake ab gagoham. “Om bak ibi bak nim feidasi Obo Oho lalo modem bak laba taho lale. Galileada boehàda labe Herodes Antipasat am dam gagome Om otelo mozo.”
32. Lahame labi gagu fi desi modeha Yesusat fa gago, “Mm, uho dat bisi meohoda Herodes laba Em im nim fa vou le gagole. ‘Em etei digat nim mei ahu oli veimaha setan Eho fa gagu futodume ilidam bak lamti mei so faidehe bak Eho modi fa neàdedam bak lamti labihasu meedahit vou dihalo modem bak. Labi laha dihasi ame baket neo meedahit vou dihalo modem bak. Em gi im Ebe Eho vou modetem bak meedume Alat Aba Aho ozoho digat lam vou fusi novalo modem bak,’ laham bak lam uho le gagole.”
33. Lahame labi gagu neàdi Yesusat neo ame Farisi dam laba neo vi vameada. “Ne, Alat vameadaha im aime fa dam bake ahate vameaidaha dam damat oddam di ba bak mei bake bisi duana oddume voedam vabak. Abo kota Yerusalem laba bisi duana oddume voedam bak am bak. Labiha labe dam Em otelo modem di Em kota Yerusalem fuhu vab di bak mei bake otem vabak. Abo kota Yerusalem fum di lam damat Em otem di am bak. Labiham bake Em abo etei digat nimti digat ba dihamda lamti ba dihamda meida iumti labihasu ahebu gi Ebe Eho vou modetem bak lamota vou mode ladume kota Yerusalem laba vou fuseo modem bak. Em ba im meit gagomda ba aim vabak.”
34. Lahame labi vi vahokedume neàdi Yesusat neo kota Yerusalem laba vahi azim Yahudi dam ibi iho aham di iube meedaha im lam vi ozome ahu faidi gi bak kiat ab vameadamam. “Aiee! Im kota Yerusalem laba azim dam Eho uba faobekesi meedalo. Dam ahamda Alat vameadaha im aime fa dam bake ahate vameaidaha dam zi lam um tai ahobada labe odda. Labi neo Aho gagu olu Am im vameadume esmozi laiam dam uba neo oudume modeha uho neo ame dam lam laha gi ket beodume oddume eloda. Um gi labihadam dam debut modem bak. Um Yahudi dam labihadàmu Alat uba ba beom bake Eho kuk ameaso labe am adambe meia vou faovoi am busehà labe delai dae kokoadam labe fa baguamdi vamatem bakti ulohona modi Eho uba soat vaususome iuba le modem leidaha um gi Eba mohet vanamai moho bak.
35. Iumeee! Um Em moholahit um kota Yerusalem iumti ame uho Fihasi Em Ai Ala Bake Vou Baedam Num Vàmteabu lamti labihasu Alat vou esmozi ab alimdeham bak. Em uho ba aam vaba vausi modesdamehamdi ba diamut uho Em alihi aahazobe fa um ahu uledi nehasu Eba gut gago, ‘Alat Aho Gagu Olu Ot Vai Im Dedateli iba etei ledamda nim abo feàteee!’ lahame uho ule neàt Eba gut valo modem di lam uho Em alihi ba aam di am tame,” lahame Yesusat fet ab vameadume esuham.
1. Labi ba hari Sabat meida labe Farisi da elaidamda labe Yesus bake, “Lele,” làhàmu Yesusat uledi ame da labe am num bake ab laham. Le na tau àdam di labe Farisi dam abo Yahudi dam labe ibi iho fi hasi esuhu im aame ozobohudedam dam totbaho labe iho, “Yesusat git modehe bak aame vàluse,” lahame vou aasda.
2. Labihadam di labe dat so ahebu fi kideheda Yesusat avaesdam bak laba li douda.
3. Labihàmu Yesusat ahit ozobohuna fi bovai Farisi damti ame dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti ame dam laba ab gagoham. “Im tai ahamda Musat aho toedume fi hasi esuhu im lam akatihasu toedume esuhela? Ame hari Sabat abo gi azibe im digat nim iho meia modi fa neàdedam fi hào? Fiham vabao? ‘Akatihale?’ lahame toedume esuhela?”
4. Lahame labi gagoha ame dam labe gi ahu adat ot odosiame gi ladi daleàde. Làhàmu Yesusat gi ozahit Am anekehàt ame da nim vi vuu vou li Aba netàdi duzu aho modi fa neàdeheilahit am so fi kidehe bak ab vihitoham. Labi neàdehemu Yesusat ame da lam fa gagome am num bake ab oluham.
5. Labi ame da lam gagu olu neàdi Aho ame dam eeda zi laba neo vi vameada. “Ne, um ame hari Sabat modemnàme nehi modem meo dam taia? Um data modeo, um lembu sapiti ulohona fi ho modeo, damat ahit sime bumatalehe vao laba subtem di uho naedamat abo gi àvodeha vi si fa vousai esum meo dam taia?”
6. Yesusat etei labi gagoha ame dam lam fa vi ozome gagom bili gi daleàde.
7. Ame num deda labe am na àm bake aho gagohoda lamota ahebu ledume ab nusualadaham. Labi Yesusat Aho gut aaha dam etei lab gagome li nusualadaha dam labe iho dam feàda ihimo nusualadam bak laba fi me veimai nusualadam bak ab aaham. Labi ame bak lam aahemu ame dam laba im totobe nidi nim ab vi fi koadamam.
8. Aho neha, “Dam lahi valo modemu na zi àdalo modem diat meit uba nehameam, ‘Em numa li em na zi tau àdale,’ lahame uba labi gagu li ame da na zi deda labe am numa olem di labe a dam feàda ihimo nusualadamna laba a nusualadamule. Dat feàda umti vafozeheda aho amu gagu esuhuda labe abo ba li nusum bak labna zohàme uho laba a li nusumule.
9. Uho meit labi modemeam làhà ame na zi deda labe oho git nusuhu bak aame oho nusuhu bak laba li oba nehi gagom bak. ‘Ba oa, oho fa iuba le nusule. Dat feàda niba nusum bak.’ Lahame oba labi li gagomeam om gi ladi usai fa dat feà vab dat nusumna laba nusum bak.
10. Labiham bake um gi nehale. Meit uba nehameam, ‘Em numa li em na zi tau àdale,’ lahame uba labi gagu li ame da na zi deda labe am numa olelo modem di labe uho gi feà vab dam labe iho nusumna laba nusualadale. Uho meit labi modemeam làhà ame na zi deda labe oho nusuhu bak laba li oba nehame gagom bak. ‘Ba oa, oho fa dat feàda nusumna iuba le nusule,’ lahame oba labi gagomeam làhà omti vahi na tau àdam dam ahebu labe ame bak lam vi aame oba, ‘Feàte,’ lahame vou baedam bak,” lahame Yesusat im totobe lada lam ab fi koadume neàdeham.
11. Lahame labi vameadume neàdi Yesusat neo ame im labe am tombu ab vi vameadamam. “Ame bak lam gi neham bak. Meit neha, ‘Em abo bisi feàda am tame,’ lahame it daetbadume am ee vousai gagomda laba Alat modi fa ee vou usi feà vab datelemda am bak. Lahana meit neha, ‘Em feà vabda am bak,’ lahame it ozome am ahu nemahuba neàt ee vousam vabda lam Alat ame da laba modi fa ee vousai feà datelemda am bak.”
12. Lahame tombat labi vi vameadume neàdi afoezobe Yesusat dat Aba, “Na tau àdale,” lahame gagohoda laba neo vi vahokeda. “Oho om na zi àdalo modem di labe ala tomali modeo, disi modeo, a om vahi ot vou aliam dam lam modeo, obo mei dam zi modeo, om obe laba tau vahi esdam dam nazoh duada modeo, labihasu dam neàda zi lamota a gagodume ledume om na zi lam tau àdamule. Oho labi modemeam làhà ame dam au eheda neàda zi labe fa neo ba oba gagu na zi ibida lam oho tau àdam bak. Labi modemeam na oho amu modeheda lamti fa ame baleà ab vouhoham bak.
13. Labiham bak lam a modemule. Oho gi nehame modele. Oho om na zi àdalo modem di labe dam na vab dam lamti dam nisilehedati dam nao zoho eloi nutabedehedati dam fako aubesuhudati labihasu dam faida zi na modeme àm biemda zi laba gagodume ledume om na zi lam tau àdale.
14. Oho labi modemeam làhà Alat oba deeli im neà bak modi esu tame. Ame dam nisda zi lam fa oba neo gagu na zi ibida àdam biem bak. Fa oba ame baleà vouhom biem bak. Lahana ba diamut dam Alat Aba Aho gagoho im vuzehi vamdesu meedam dam amu elodahada zi lam Alat ame dam laba modi fa ahededam di iube Aho fa oba ame baleà vouhom di am bak,” lahame ab vahokedaham.
15. Labi Yesusat Aho ame na zi deda laba im lam vahokedume modeha dat ame na zi tau àdamda meida labe Yesusat lab vahokehe im lam aihemu Yesus bake ab gagoham. “Ba diamut Alat Gagu Fihasi Vimteme Oluhu Dat Boehàda labe Aho faasi dam bake vuusu im vahokedam di labe Am na zi lam, ‘Um Eba fa tau vahi àdam neàte,’ lahame Aho fi hasi esuhu dam lam bisi vi modi asimdem dam am tame.”
16. Lahame labi gagoha Yesusat im totobe amomoi vi ozome fa ab fi koadamam. “Da nibe am na zi ba àdalo modemu dam iudu ium, ‘Lele,’ dam iudu ium, ‘Lele,’ lahame dam zi laba ab gagu esuham.
17. Labi gagu esu vou faodameilahit na àdam bak ab vou fuham. Na àdam bak fusi ame na àdalo modem di labe am na meedamda niba ab gagu oluham. ‘Oho le dam eho amu fet gagu esuhu dam laba le gagole. “Im na àdeho. Nasi lele,” ’ lahame ab gagu oluham.
18. Labi dam duada laba le gagoha dam ahebu gi im amomoi la vàlui le vàluidume mouda. Amu le labe gagohoda labe neha, ‘Em bak ebe amu doi loho bake le aam bakti nehi mozo. Labiham bake eho om na zi le tau àhà vabake eba a fakemule. Em feidam neàte. Laham bak oho na zi dedate fa le labi gagole,’ lahame ab gagu moham.
19. Labi ba neo le gagohoda meida labe neha, ‘Em sapi fi ho sepuluh etei doit vahana, “Neàna vaheo?” laham bak le aalo mozo. Labiham bake eho om na zi le tau àhà vabake eba a fakemule. Em feidam neàte. Laham bak oho na zi dedate fa le labi gagole,’ lahame ab gagu moham.
20. Labi ba neo le gagohoda meida labe neha, ‘Em nam etei na vaheme vahadaleàmu oba vule na tau àm bieho. Laham bak oho na zi dedate fa le labi gagole,’ lahame ab gagu moham.
21. Dam num iudu iuba le gago. Dam num iudu iuba le gago. Lahadume modeha gi ahebu im amomoi la vàlui le vàluidume ab moudaham. Labihàmu ame na meedamda labe fa li ame dam labe la vàlui le vàluidume moudaha im lam da naedate ab vameadaham. Labi vameadume modeha dat naeda labe ab fakeham. Faki am na meedamda niba neo ab gagu oluham. ‘Taho le dam num debu zie tomba esuhudati zie aaso laba esuhudati ame dam laba le dam na vab dam lamti dam nisilehe dam lamti dam fako faidehe dam lamti dam nao zoho eloi nutabedehe dam lamti dam lada lamota labihasu gagome vou lele,’ lahame gagu oluhemu am na meedamda labe le gagu atetedume fa ab vou ledaham.
22. Fa vou ledume da naedate gago, ‘Ai, oho eba lab gagu oluhu bak lam eho le ame dam zi lam atetedume fa vou ledume neàdeho. Lahana om na zi vahehe bak nim dam koedi oloze lahasuho.’
23. Lahame labi gagu modeha dat naeda labe fa am na meedamda niba neo gago, ‘Làhà oho fa zie soaboti num debu bàhàgo bake modealaha zie koedati le dam alihi aameam làhà ame dam lam gi tet ootedume taho vou ledale. Em na nib modeme vahehena zi nim abo dam duali bak guguai àdalo mozo.
24. Neham bak. Dam eho amu em na àlo gagoha moho dam lam ba em na zi nim vi tau àm vabak. Abo gi ba koena lu zagum vabak,’ lahame gagu ab oluham,” lahame Yesusat gi Aho ba Boehàdateboli na feàna àlo modem di Yahudi dam Aho amu gagoha moho dam dua bak lam ba na tau àm vabak laba ozome im totobe lam ab fi koadaham.
25. Yesusat ame lab ladam digat meida labe dam duada zi Aba vi tau vulada. Vuladume modeha Aho fa it vaktesi Aba vuedam dam laba im ab vahokedamam.
26. “Meit nehame meedamda labe Ebe Eho vahokedam im ozobohudelo vi tau meedam biem bak. Ame da labe Eba bisi deelehe vaba vedi am ai lamti am oi lamti am nam lamti am data zi lamti aba meidam zi lamti abo amti labihasu bisi deeli meedameam làhà ba Ebe Eho vahokedam im ozobohudelo vi tau meedam biem bak.
27. Labi laha meit neha, ‘Eho Yesus bake tu vuzehi im Abada meedàmu damat em si ut tetehesuhunaso lam ve vatu vou ladam di lam damat eba aasdamnàme gi ozahit vou le em paku dou elom neàte,’ lahame Eba labihasu tu vuzehi gagu vàmadem vaba vedi iedi momda abo uloho vab labe Eho ame da laba, ‘Eba tu vuzehi vi tau meedamda am am bak,’ lahame Eho ba labi gagom biem bak.”
28. Lahame labi vahokedume neàdi Yesusat neo, “Meit Eba tu vuzehi vi tau meedalo modemeam làhà amu nasi ozo, ‘Eho modem uloho?’ lahame mahate ozodume neàdi ba Eba tu vuzehele,” laham bak vahokelo dat num kilana molo modemdati boehàda bohudelo modemdati lahamda behàsu laba vàlu im totobe nidi nim neo ab vi fi koadamam. “Uho im nehasu meedam dam taia? Uho meit nehame ozo, ‘Em meit aa li modem im azi nom aasdam neà bak ozome num kilana molo mozo,’ lahame ozome num molo modem di labe abo doi modeo, num mom ut modeo, abo nasi debe uloholi neàdi ba num mom dam taia? Laham vabameam ame doi modeo, ame num mom ut modeo, debe uloholem vabameam làhà ame num lam ba faasi mom vab dam taia?
29. Ame num mom doi amu nasi debe uloholehe vabna vedi faasi mome aameam doi koedi num lam neàdehe vabna gi aauleme voomeam làhà damat neha, ‘Elo! Om doi debe uloholi neàdehezobe num bao zisim vabna ana modi num labi aauleme voe?’ lahame labi gagom bak labna zohàme ame da labe amu nasi ozodume neàdi ba num faasi mom bak. Um laha Eba tu vuzehi meedalo modemeam làhà amu nasi ahumtedi neàdi Eba tu vuzehele.
31. Labi meida neham bak. Boehàda labe ibi modi baleàhà bak gi nehame modem dam taia? Dam mei debu koedati dam mei debu duadati ot belui ot beluidalo modem di labe dam mei debu koeda labe im boehàda labe nasi nehame ozo, ‘Dam mei debu iba beolo modemda zi lam im meo dam dua puluh ribu ehete. Lahana dam meo dam ibida gi sepuluh ribu ehena fa ame dam laba iho ot beluiao? Gi labihasu feidam neào?’ lahame labi nasi ozome neàdi ot beluiam bak lam ba faasi meedam dam taia?
32. Labi ame boehàda labe ozo, ‘Im dam koedi ot beluiam bieho,’ lahame ozobohudi neàdi am dam totbaho laba nasi neha, ‘Uho doait iuba le dam laba gagole. “Imo gi vasea gohali na ot loidume fa neàdese,” lahame doait gut vameadale,’ lahame ame dam iba fakemda duada labe ledam bak laba doait olu gagom dam taia? Ame boehàda lam dam mei debuti ot belui ot beluidalo modem di labe amu nasi ozome neàdi ba ame bak lam faasi meedam dam taia?”
33. Lahame im totobe lada lam fi koadume neàdi tombu neo ab vi vahokedamam. Neha: “Uho meit Ebe Eho vahokedam im ozobohudelo vi tau meedalo modemda lam laha gi ame baket meedale. Abo aba aho vuusu meedam im ahebu bisi it ozodam lahasumda lam ba Ebe Eho vahokedam im ozobohudelo vi tau meedam biem bak,” lahame Yesusat ab vahokeham.
34. Labi im lada lam vahokedume neàdi Yesusat im meida nidi nim neo nehame vi vahokeda. “Garam abo na àmna nu laba voou vizehe labe ame na nu lam àm di abo àm neàt. Labiha labe garam lam abo neàt. Lahana ame garam labe ahamo na nua vizemna lam fa vei seti faidemeam làhà ame na fauha keobe lam ba akati modi garamli na nu laba vizemnalela? Labiham biem bak.
35. Ame na abo gi faidi voom bak. Ba meit ame na vi visoi na debu bake na usim neà bake ozome ame bak laba vahem vabak. Abo gi voom bak. Um etei Eho nib vahokedaha im nim ahebu um aimeam làhà um ame im lam mahate vi ozodume vi ozobohudi fi gatele,” lahame Yesusat ame im lam ab vahokedaham.
1. Labi Yesusat dam bake vahokedam di labe ame meia gagu gi teo vi vaiam doi pajak gut gagome vaiam dam zi lamti dam faina meedam dam totbaho zi lamti ame dam labe Yesusat Aba Aho vahokedam im ailo Aba valada.
2. Labi valadume modeha Farisi damti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu aaha ame dam labe Yesus bake valadam bak ab aaham. Aahemu ab voe voedamam. “Da lam abo dam faina meedam dama deeli tau na àm meo Dàt moz,” lahame labi voe voeda.
3. Labihàmu Yesusat Aho ozo, “Na setehena iho fa vi aame vahana lam bisi deelemda am bak,” lahame im totobe nidi nim ab vi fi koadamam.
4. “Uho meit domba seratus ehena meida vàmtea ahamo utasi bak vabili le setemeam làhà uho ozom, dat naeda akati mode? Gi neha taia? Domba sembilan puluh sembilan zi totbaho lam iademe sibe baa alim bak laba oumahedume neàdi vou esmozi fa seteheda lam vi nabida taia?
5. Labi nabidamehamdi ame domba vi aahazobe deelehat vi si bio nom gutaasu fa vou li fa am sibe baa laba fa ousu esmozi fa numa li am vahi ot vou aliam dam lamti am obe laba tau vahi esdam lamti labihasu nehi li vameadam bak. ‘Imo vahi eho domba seteheda fa vi aame deelehe im vameadase,’ lahame deeli dam vahi im vameadam meo bak.
7. Labi Alati Aba asum ahoba iuba tau azim damti laha neham bak. Dat faina meedamda vàmtea nibe aho faina meedam bak lam voedume fa ahu neà bak vàmadi meedàmu Alati Aba tau azim damti ame da laba laha deeli ihimo im ot vameaidam meo bak. Lahana dam duada nibe neha, ‘Im gi Alat Aba Aho gagoho im vuzehi vamdesu meedam dam im am bak. Ba akati iho faina meedam bak lam voedume fa ahu neà bak vàmadi meedà?’ lahame ahobat neàdehe dam laba Alati Aba tau azim damti ame dam laba bisi deeli ihimo im ot vameaidam vabak,” lahame ab vameadaham.
8. Im lada lam vameadume neàdi Yesusat im totobe meida nim neo faasi ab vi fi koadamam. “Nam nibe doi oona perak sepuluh esuhuna meida setemeam làhà am akati modela? Aho gi umaso usime num ad bak ium ahebu nabiti nabitime modeha vabamu fa naube vààteme vi oskeame nabidamehamdi ame doi fa vi aam meo bak.
9. Vi aahemu ve am vahi ot vou aliam dam lamti am obe laba tau vahi esdam lamti labihasu nehi li vameadam bak. ‘Imo eho doi seteheda vi aame deelehe im vameadase,’ lahame ame im lam deelehat vameadam bak.
10. Labi Alati Aba tau azim damti laha neham bak. Dat faina modemda vàmtea labe aho faina meedam bak lam voedume fa ahu neà bak vàmadi meedàmu Alati Aba vi tau azim damti ame da laba laha deeli ihimo im ot vameaidam meo bak,” lahame ab vameadaham.
11. Labi im lada lam vameadume neàdi Yesusat neo im totobe meida nim faasi ab vi fi koadamam. “Da nibe am adam behàsu. Datahidati domuàdati.
12. Labi domuàdata am ai bake le gago, ‘Aia, na misia eba lomda di nibe fet lole,’ lahame labi gagohemu am aiat am nazoh faheme totbaho domuàdate fet loda. Labi datahida vahada gi laba vahe.
13. Labi dat domuàda na abada lam vadume fa meia lodume fa doi vada. Labi doi vadume iddume am doi vame bak mei bake ab vou laham. Labi bak mei bake vou le aho am doi lam ostame git meedume vàhàdeme foli sete. Seti gi sota ab duzuham.
14. Labihadume modeha ame bak lam gi di neà faasi bohulali dam gi idoali fole. Labihàmu domuàda laha na àhàki beo.
15. Làhàmu ame bak labe num meida iuba le num dedate gago, ‘Em om na modem neào?’ lahame gagoha num deda labe neha, ‘Lo, em doho na vahem bak oho modem neàte,’ lahame ab gagoham. Làhàmu domuàda nibe doho na vahem bak ab meedamam. Labi meedameam ahadou beoho labe doho vahehena sokba vi tau àm bak ab ozoham.
16. Lahadamnàme dam amomoi aba ba na lu àm kai.
17. Labi daleà azi ozodume ozobohudi fa aba it ge, ‘Aiee! Em aiam na meedam dam lamota na àmna totbaho laba vahehena em akati idoali ohabali elolo mode?
18. Làhà em ai bake fa le nehi gagom bak. “Ai oa, em abo oba Alati faina modeho.
19. Labiham labe em ladeho. Om ba eba a om adat lahamule. Om eba gi fa om na meedamda fa modele,” ’ lahame ab it geham.
20. Labi it geme ozoha vabamu am usai am aiam num bake fa ab laham. Labi laha labe le numa fusesome modeha am aiat gi bak bohulat gut aame aam faimu faobekesi emoehe labe le si dogoiba vuusu ab vou meddamam.
21. Labi domuàda am ai bake ab gagoham. ‘Aia, em abo oba Alati faina modeho. Labiham labe em ladeho. Om ba eba a, “Om adat,” lahamule.’
22. Lahame labi gagoha am aiat ozahigeàmu am na meedam dam niba gago, ‘Uho le sue sona bohu dusumda bisi boz neàda lam taho visoi vou li em adat niba gutaasule. Labi em anekehàso esum cincin lam laha visoi vou li am anekehàso dusule. Labi em naba dusumna sepatu laha visoi vou li am naba dusule.
23. Labi sapi adat teiemo amu na vaheme nehuleheda lam laha ve vou li otele.
24. Em adat amu eloi setehena ozohomu fa alihi aahadaleàmu im vahi sapiti na amomoiti giame àdume deelehat kuguidalo modem bake,’ lahame am na meedam dam niba ab gagu oluham. Labi le ame na vame fa vou li ame baket ab modeham. Labi dam nim ab deelehat kuguidalo meedamam.
25. Labi deelehat kuguidam di labe datahida utoho bak laba na meeda. Na meedam dàt lehe labe num zoho obe fusesome aiha dam kuguidam dae aida.
26. Labihàmu dat datahida labe im na meedamda meida laba anekehà vegu vegume li gago, ‘Dam baka ana modehe bake ozome kuguidàla?’
27. Labi na meedamda labe fa gago, ‘Obo meida ahena fa lehe bake om aiat sapi adat teiemo amu na vaheme nehuleheda otehe bak.’
28. Labihàmu datahidat faki numa olem bak ab moham. Olem mohemu am aiat futoi ab gagoham. ‘Olem neàte,’ lahame gagodume modeha
29. datahida fa meoli gago, ‘Aia, em abo oho na im gagom di ba ailahigeàmom vabak. Em abo uledi ala oli buzidamehamdehe bak. Lahana om amu eba gi om kambing adat teiemo meida taho oteme lu em damti kuiguidam vaba?
30. Lahana om adat meida lam amu oba na misia fet vame vou le lahi fi lohoda laba modeme vàhàdeme teoli seti fa lehena om sapi adat teiemo amu na vaheme nehuleheda oteme lohona taia?’
31. Lahame gagoha am aiat fa gago, ‘Adat om abo ebe vou azihida am bak. Ne, na nim ahebu om na tadehena tai.
32. Lahana obo meida bak mei bake le eloi setehena ozohomu fa alihi aaha bake iho deelehat kuguidam neà bak,’ lahame ab gagoham.” Lahame im lam Yesusat ame dam zi laba ab vameadaham.
1. Labi im lada lam vameadume neàdi Yesusat neo Aba Aho vahokedam im ozobohudelo vi tau meedam dam laba im totobe meida nim neo nehame ab vi fi koadamam. “Dat na duada labe am toheda laba gagu am nazoh zi vou aasda. Labi vou aasdume modeha dam amomoi zi labe ame da laba vàlulo aa li nazoh dedate gago, ‘Om toheda om nazoh vou aasdamda lam git meedam labe om nazoh dua bak lam gi vàhàdeme seti koedeho,’ lahame ame da laba vàlulo nazoh dedate aa li ab vameadaham.
2. Lahame labi vameadume modeha ame nazoh deda labe am toheda laba gagome li duzu vameada. ‘Dam zi labe eba li vameadaha im lam imboo? Làhà, “Nazoh akatihasuhela?” laham bak toedume esum buku laba obo oho ame nazoh modehe bak lam oho fa toedume neàdi eba ba vou lele. Oho em nazoh zi vou aasdam bak eho fa ab faatolo meedamam bak.’
3. Lahame labi gagu modeha am toheda labe nehame ab it ozodamam. ‘Aa làhà! Ne, em akati mode? Ebe eho mei nazoh zi vou aasdam bak dat naeda labe aho ab faatolo modem ame? Ne, em akati mode. Neà bak akete? Ne, em beeda bak sim biemda. Em meia na taulem lademda. Ne, em akati mode?
4. Làhà em gi nehalo. Damat eba ba diamut uledi deelem bake em gi ame dam laba neà bak amu nasi fet ozome dam laba modem labe emti ot deeliam damalelo modem bak. Labi ba diamut dat nazoh deda labe ebe eho am nazoh zi vou aasdam bak faatom diat em gi amu modi ahumdi neàdehena modehe labe gi emti ot deeliam dam laba lam di dam labe eba deeli fa taum bak,’ lahame it ozome ab neàdeham.
5. Lahame labi it ozome neàdi amu ame nazoh dedate vahana fa ame baleà vouhom vaba modesdam lahasuhu dam laba, ‘Fa amti ot deeliase,’ lahame ozome ame dam lam gagome fet li nehame modeme fa laida. Ahamte gagome li duzuhuda laba ahit ozobohuna vi ailo ab gagoham. ‘Oho dat nazoh dedate ame baleà vouhom vabat teoli esdam bak akatihasuhela?’
6. Lahame labi vi gagu aiha ame da labe fa gago, ‘Em abo zaitun oo vaobe nubehelemna delapan ratus liter lam eho vaha bake na lom kaio. Gi teoli esdalo,’ lahame labi gagu modeha ame toheda labe fa gago, ‘Làhà oho amu neha, “Ame baleà vouhoda tame,” lahame amu toeme esuhu sunit oboda nim oho naedat nasi ve nusu faatoi voou fa ahit, “Empat ratus liter vaha,” lahame fa toeme gàhàdele. Labi empat ratus liter totbaho lam gi labihasu teo lele,’ lahame ab gagoham.
7. Labi gagu neàdi da lada lam fa la. Labi ba neo dat meida neo gagome li duzu ahit ozobohuna neo vi ailo ab gagoham. ‘Oho dat nazoh dedate ame baleà vouhom vabat teo li esdam bak akatihasuhela?’ lahame labi vi gagu aiha ame da meida labe fa gago, ‘Em gandum oo keobe kaobu zi seribu lam eho vaha bake na lom kaio. Gi teoli esdalo,’ lahame labi gagu modeha ame toheda labe fa gago, ‘Làhà oho amu neha, “Ame baleà vouhoda tame,” lahame amu toeme esuhu sunit oboda nim oho naedat nasi ve nusu faatoi voou fa ahit, “Kaobu totbaho delapan ratus vaha,” lahame fa toeme gàhàdele. Labi kaobu totbaho dua ratus lam gi labihasu teo lele,’ lahame gagu neàdi neo ame naedate fa ame baleà vouhom vaba modesdam lahasuhu dam totbaho laba gi ame baket labihasu neo meeda. Amu duana loho bak lam fa gagome koededa. Ame dam zi labe ba diamut aba uledi deelem bake aho ame dam zi laba gi ame neà bak modehe bak lam nasi fet ozome meeda.
8. Labi ame nazoh dedat am toheda labe lab meedaha bak lam aime ozobohudi ab it ozoham. ‘Em toheda nim gi em nazoh fetehesu totbaho meia aa lu vasti modidam dàt moz. Lahadamnàme aho im ba modemda amu nasi fet ozobohudi nasi modi esuhu bak lam abo neà bak,’ lahame dat naeda labe am toheda laba ab vou baedaham,” lahame Yesusat ame im totobe lada lam fi koadume ab neàdeham. Labi im totobe lada lam fi koadume neàdi Yesusat neo vi vahokeda. “Dam Ala bake tu vuzehi meedaha vab dam bakda nibe ibi iho ba na ot modiam neà bak laba amu nasi fet vi ozome meedume esum meo damat moz. Lahana Ala bake tu vuzehi meedam dam nibe ibi iho ba asum ahoba iuba neà bak tadem bake mahate amu nasi fet ozobohudi meedume esum vab damat moz.
9. Labiham bake uho nehame meedale. Um ba diamut eloi um nazoh zi lam bak niba voedume vou esmoho di labe Alat asum ahoba laba nehame uba gago, ‘Um Em bak neà bak niba li abehamde tame,’ lahame uba labi gut gagom bake um bak niba vahedam nazoh zi lam nasi fa doit ot loidume fa ame doi lam vame fa dam na vabda zi laba iuba lo. Iuba lo. Lahadale.
10. Meit meia neha, ‘Oho im nidi nimota vuusu meedale,’ lahame ame da laba tu gagu esu aameam ame da labe ame na iademe vuusu meedam bak aaha labe fa neo, ‘Im meida vuusu meedale,’ lahame ame da laba na duana ahumdi vi gagodume esum neà bak. Lahana meit meia neha, ‘Oho na nidi nimota vuusu meedale,’ lahame ame da laba tu gagu esu aameam ame da labe ame im meedam vabameam làhà ba ame da laba neo, ‘Im meida nim laha vuusu meedale,’ lahame ame da laba na duana ba ahumdi vi gagodume esum vabak.
11. Labiham bake bak dam labe ibi iho bak niba meedume vahedaha nazoh modeo, doi modeo, meit uba neha, ‘Uho im nidi nimota vuusu meedale,’ lahame uba gagohona uho iademe vuusu meedam vabameam làhà Alat Aba Aho azihi bak neà bak iuba vahedaha nazoh aabo lam uba ba gagu uho vuusu meedam vab taia?
12. Labi laha uho bak niba esdam di Alat uba neha, ‘Uho im nidi nimota vuusu meedale,’ lahame uba tu gagu esu vou aasdam nazoh nim uho iademe vuusu vou aasdam vabameam làhà ba diamut asum ahoba iuba uba vahedaha nazoh aabo lam, ‘Uba vahedaha nazoh am tame. Nasi vale,’ laham bak lam Alat ba uba labi gagu lodam vab taia?
13. Labi im meida neham bak. Dat vàmtea labe meia na gagu meedamda behàsdemeam làhà ba na im ozome meedam vabiem bak. Neham bak. Meia na gagu meedamda behàsdemeam làhà dat meida laba faki ziesobuli aho gagoho bak lam gi tozome mu fa dat meida laba deeli aho gagoho im lamota aime uledi meedam bak. Labi laha um ahu Ala bake tu vuzehi vàmadi meedameam làhà ba ahu behàsdi fa nazoh zi lamti vahi tu vi ozodam biem bak. Labi laha um ahu bisi nazoh zi laba tu àvodi meedameam làhà ba ahu behàsdi fa Alati vahi tu vi ozodam biem bak,” lahame ab vahokedaham.
14. Lahame labi vahokedume modeha Farisi dam totbaho labe bisi doi tu deelehe labe Yesusat Aba Aho vahokedam im ozobohudelo vi tau meedam dam laba lab vahokedaha im lam aidam di labe fa omto kibou Yesus bake ab tozodamam.
15. Labi lab tozodam di labe Yesusat fa ame Farisi dam laba im ab vahokedamam. “Uho vedi neha, ‘Damat iba fà aame deelese,’ lahame ahobat neà damali meedam damat modem bak. Lahana um ahu ad labe meedam bak lam Alata ozobohu bak. Uho neham bak ozom vaba? Iho bakda nibe ozo, ‘Na lada lam bisi feàda ame?’ lahame ozome deelemna lam Alat ozom di, ‘Ame na lam feà vabak,’ lahame faki gi aame ozahigeàmom bak,” lahame Farisi dam laba ame im lam ab vi vahokeham.
16. Labi ame im lam vahokedume neàdi Yesusat neo ame Farisi dam laba im meida neo nehame vi vahokeda. “Alat aham di iube iba Yahudi dam bake, ‘Nehame meedale,’ laham im lam dat ahamda Musat toedume fi hasi esuhu Im Feàna zi lamti dam ahamda Alat vameadaha im aime fa dam bake ahate vameaidaha dam labe iho dam bake, ‘Alat uba nehaho,’ lahame toedume esuhu im lamti labihasu ame im lam im Yahudi dam amudati im dam badati ahebu aime vuzehi vou mode ledume fa etei Yohanes Mei Vuu Valo Baptisleiamda labe aba aho faasi vou vameatedaha bak laba vou fusi ab meedam lahasuham bak. Labi etei di nibe, ‘Alat Ahamo Boehàdateboli dam bake deeli vame Am damali vuusu im vahokedam bak lam, “Akatihasu modemna modela?” ’ laham im gàhàna lam Yohanesat aba aho nasi faasi vameadume fi dedaha bak laba Eho neo etei vi tau vameadam bak labet modi damat Ala bake neha, ‘Iba laha modi Om damali Oho iba vuusu im vahokedale,’ lahame deelehat modelo àhàki vi taui vi tauidume ab dualedamam bak.
17. Lahana neham bak. Asum ahoba iuba modealahana zi lamti bak niba modealahana zi nimti ehe lahasuhu di nim Alat Vameadaha Im Toedahana zi lam abo ame na toehena keobe beà vàmtea ba setem vabak. Gi labaha bohu modesdam bak.”
18. Lahame labi vahokedume neàdi Yesusat neo vi vameada. “Meit am nam aho neàt vahana fa mu voou fa nam amomoi vameam làhà ame da lam faina modeho. Labi dàt lab mu vooho nam lam meit fa vameam làhà ame da lam laha faina modeho,” lahame ab vahokedaham.
19. Labi ame im lam vahokedume neàdi Yesusat im totobe meida nim neo nehame ab vi fi koadamam. “Dam behàsu. Dat meida abo na duada modem labe aho sue dusum di gi sue beeda ada dusu afoezobe sue teuda neo ahoba vi dusu. Labiham dàt moz. Labi ame da lam laha gi na neàna àme dedehe bohu vuusum dàt moz.
20. Labi dat meida na vabda Lazarus gi so bak ahebu but fi kebe galihasi bisdam dàt moz. Ame da lam dam ahe damat vou li dat na duada am num bako natàh doo futom obe laba ousu bisda.
21. Bisdume ozoha, da na duada labe àme voedaha àhàzo nami àme dedem bak ab ozodamam. Am gi idoalem bakta modem kai. Vemet ledume am but bak demum bak lamti vanamai meeda.
22. Labihadume modeha dat na vabda Lazarus nim ab eloham. Elohemu Alat Am im gagu vou usem dam labe usi am ve Yahudi tai ahamda Abraham aham di iube elohoda labe am ousdam ba tot laba vou le ab vi ousuham. Labi dat na duada laha ba eloi bake ab baumsuham.
23. Labi ame dat na duada labe gi koei it oazehena le esdam bak laba le idiamdi geidam labe fako vousai tom aaha Abraham gi bak bohulana tom aa. Labi Abraham ba tot laba vi aaha Lazarusam alihi laha ab aaham.
24. Labihàmu da na duada labe bisteat ab buteham. ‘Ai Abraham oa, om eba aame àvodi faobekele. Em vuat beome idiamdi ge. Idiamdi ge. Labiham bake eba Lazarus gagome olu vao anekehàsoat ulasi em bio kealehe bak iso niba li ulasi fa nutabedele.’
25. Lahame gagoha Abrahamat fa ab gagoham. ‘Adat, om ahe di iube modem bak it ozome fa ozobohudele. Om gi abo neà bak tadehe dàt moz. Lahana Lazarus nim na aho modem gi fai bak tadehe dàt moz. Labihàmu am etei nim gi fa neà bak tadehe bak. Labi om gi fa idiamdi gem bak tadehe bak.
26. Labi laha im ame bak nim Alat ahit itmat feàna doni modehe labe im uba lalo modemeam uba laba lam biem bak. Labi laha um iba lelo modemeam iba niba laha lem biem bak.’
27. Lahame vameame modeha dat na duada labe neo gagoda. ‘Ai, làhà oho Lazarus gagome fa em aiam num bake olule. Em vahadam auohole laba ehete. Em vahadam auohole lam ba idiamdi gem bak niba neo vulem bak labna zohàme oho Lazarus gagome olu le fi dele.’
29. Lahahat Abrahamat fa ab gagoham. ‘Vabà! Um vahadam lam dat ahamda Musat toedume fi hasi esuhu Im Feàna zi lamti labi dam ahamda Alat vameadaha im aime fa dam bake ahate vameaidaha dam totbaho labe iho toedume esuhu im lamti laba aime ozobohudemna laba ehete. Um vahadam ame im laba aime vuzehi meedam neàte.’
30. Lahame labi gagoha dat na duada labe fa gago, ‘Em vahadam gi ame lab toedume esuhu im lam aim mom meote. Lahana abo meit eloi fat ahedi usaha dàt fa ahate le gagom labe em vahadam labe aime ibi iho faina meedam bak lam voedume fa ahu neà bak vàmadi meedam labe ba niba vulem vabak am tame.’
31. Lahahat Abrahamat fa ab gagoham. ‘Amu um vahadam labe ame dat ahamda Musat toedume fi hasi esuhu Im Feàna zi lamti dam ahamda Alat vameadaha im aime fa dam bake ahate vameaidaha dam totbaho labe iho toedume esuhu im lamti amu aihi vabak. Ba làhàme meit eloi fat ahedi usaha dàt fa ahate le vameadameam ba ame dam labe laha vuzehem vabak,’ lahame ab gagoham,” lahame Yesusat im totobe lada lam ab fi koadume neàdeham.
1. Labi Yesusat im totobe lada lam fi koadume neàdi fa Aba Aho vahokedam im ozobohudelo vi tau meedam dam zi laba neo im amomoi neo vi vahokeda. “Aiee! Bak niba azim dam Alat abo duana beoda tame. Neham bak. Bak adba niba esdam di naat li, ‘Meit faina modem neào?’ lahame modi ozolo modem di meia modi fa faina meedam bak ehete. Ame na meedam bak lam ba setem vabak. Lahana meit nehi ozo, ‘Eho da lada laba le modi, “Yesus fà mu voose,” ’ lahame modi ozolo modem di aho le modi da labe Em mu voomeam làhà da lada lam Alat bisi duana beomda am bak.
2. Gi neham vaba? Meit Eba tu vuzehi meedamda nim abo damat neha, ‘Gi data koena nimti ulohoda feà vab dàt moz,’ lahame ozomda lam meit am vou fohome faina modi ubahi ubahidume Em mu voohemu ame mei vou fohohoda lam ba diamut Alat bisi feàna beomda am bak. Dat labihalo modemda lam gi nasi nehasu meedam vaba? Dam gagome am si ke feàda bumatna visoi am bio laba lo vààsu asimbuli itea feàna tombu iuba vou le nobu feà bak iuba nasi nom voou tezi eloi setem vaba? Lam bisi neà bak am.
3. Labiham bake um iademe it vou faovoi meedale. Uho meia ootedam labe ame da labe fa faina modem bak labna zohàme iademe it vou faovoi meedale. Uho meidavat oba faina modemeam làhà oho fa ame da laba im vahokedale. Labi im vahokedume neàdi ame da lam fa aho faina meedam bak lam voedume fa ahu neà bak vàmadi meedameam làhà oho ame da labe oba faina modehe bak lam oho gi laha ozahigeàmu fa vei neàdele.
4. Labi ame digat vàmtea labe ame da labe neo oba faina vi modi fa aho faina meedam bak lam voedume fa ahu neà bak vàmadi oba li nehame gagomeam, ‘Eho oba faina modehe bak lam oho gi ozahigeàmu fa vei neàdele,’ lahame oba laba li vi gagomeam làhà oho ame da labe oba faina modehe bak lam gi fa neo vi ozahigeàmu fa vei neàdele. Ame digat vàmtea labe ame da labe gi ame baket labihasu meedume modehe bak tujuhlemeam làhà oho laha gi ozahigeàmu vei neàdehe bak laha tujuhlele.”
5. Lahame labi vahokedume neàdi Yesusat Aho gagu olu Am im vameadume esmozi laiam dam labe ihimo Yesus bake ab vi gagoham. “Boehàda oa, im Oba mahate tu vuzehem vabamu Oho iba modi teudi im Oba mahate tu vuzehese.”
6. Lahame labi gagoha Yesusat fa dam laba ab vi gagoham. “Uho meit Eba tu vuzehehe bak abo gi ut ahakebu oo keobeti uloholi gi koena tu vuzehemta làhà uho gi ut kia laba, ‘Ohomo it valoi fa itea tom laba zisule,’ lahame gagomeam làhà ame ut kilabo lam im obo oho gagoda laba vuzehi modem bak,” lahame ab vameadaham.
7. Labi im lada lam vameadume neàdi Yesusat im totobe amomoi neo vi fi koada. “Eho uho modem bak vi ozome gi vouholo modem bak. Uho nehame modem dam taia? Uho um meida labe am na meedamda laba neha, ‘Em utoho na dem bake vabiedale,’ lahame gagu olum bak modeo, ‘Em domba vou aasdale,’ lahame gagu olum bak modeo, ame na lam le modeme fa lem di labe dat naeda labe am na meedamda laba nehame gut baedam vab taia? ‘Làhà om nasi li nusu na oboda nasi àdale. Labi na ebe eho àmda ba àlo mozo.’
8. Laham bak gut baedam vaba gi nehame mode taia? Ame na meedamda labe ame na le modeme fa lem di labe dat naeda labe aho am na meedamda laba gi nehame gut gagom bak. ‘Valo ehume sue neàna dusu em na ohume eba lu àdale. Labi eho nasi àdume neàdi na obo oho àmda ba àdale,’ lahame labi gago taia?
9. Ame bak lam uho ozom di um akati ozoe? Ame na meedamda labe gi dat naeda labe aba aho gagohoda lamota meedaha labe uho ozom, dat naeda labe fa am na meedamda laba vou baedào? Vabà! Labiham vabak. Dat naeda labe am na meedamdate amu gagu modehe labe vou baedam moho bak.
10. Labi um laha Alat uba, ‘Nehame meedale,’ lahame uba gagu uho ame bak lamota vuzehi meedume neàdemeam làhà uho gi nehame vi ozome gagodale. ‘Im gi Alat na teo gagu meedume baleàhà labe iho gi Aho lab gagoho bak lamota meedam bak. Akati Aho ba iba vou baedà?’ lahame vi ozodume gagodale,” lahame Yesusat ab vameadaham.
11. Labi Yesusat kota Yerusalem laba ladam digat meida labe Galilea bakti Samaria bakti laha zie doni bak laba lada.
12. Ladameam num debu bak meida laba lafuseo vabali modeha dam sokba faidi vàhàdem bohu vuusdam dam sepuluh Yesus bake ab gut tàham. Tàhi vaitesu duzu Yesus bake bisteat ab buteham.
13. “Yesus Dat Boehàda oa, iba aame faobekele.”
14. Lahame gagoha Yesusat ame dam sepuluh lam ab aaham. Aame gago, “Uho damat Ala bake lomna ve vua vahudam toheda zi laba le, ‘Um sokba faidi vàhàdehe bak lam fa neàdi vahem neào?’ laham bak le aimale,” lahame labi gagoha ame dam labe uledi ab ladamam. Iumà iuba le modeha im sokba faidi vàhàdehe bak lam modi fa ab neàdedaham.
15. Labi dat meida labe am sokba faidehe bak laba it nabime aaha fa neàdehemu fa Yesus bake ab emoeham. Fa emoedam di labe nehame bisteat vou bae leda. “Ala abo feàte. Ala abo feàte,” lahame Ala bake bisteat vou bae ledume Yesus bake ab lefuham.
16. Fusi am ozo, “Yesus abo feàte,” laham bak ozome ahu adat iedi Yesusam naba modesdam laba ahit ogomasu biti nom bohusu gago, “Om abo neàte. Om abo neàte,” lahame Yesus bake vou baeda. Dat Yesus bake fa leheda Samaria dàt moz.
17. Gi Samariada vàmtea nibe ahamo fa lehemu Yesusat Ahamo it vameada. “Dam sepuluh ahebu modi fa neàdedaha taia? Ne, dam sembilan totbaho dua bak akati fa Eba lehe vaba modela?
18. Dat vàmtea nim Yahudi dàt modem vabda abo dat giida nibe aho Ala bake, ‘Om abo feàte,’ lahame vou baedalo fa ab leham bak. Lahana Yahudi dam sembilan dua bak lam akati fa lem vaba seti modela?” lahame labi it vameadume neàdi Yesusat fa neo da niba ab gagoham. “Om Ebe Eho vameadam im aime tu vuzehe labe om faidehe bak fa ab neàdeham bak. Om nasi fa usai lale,” lahame ab gagu oluham.
20. Labi Yesusat lab vou mode ladam digat meida labe Farisi dam totbaho labe Yesus bake vabi vi ailo ab gagoham. “Alat im dam bakda modi Am damali vuusu im vahokedam di ba adi diat ahate imbodi meedàla?” Lahame labi gagu modeha Yesusat fa ame dam laba ab vi gagoham. “Vab. Um git ozoha. Alat dam bakda modi Am damali vuusu im vahokedam bak lam faaseo meedam di meit fakot fet aam vabna gi mei ahu ad labe ahamo meedam bak. Labiha labe ba meit neha, ‘Neam tame! Ame Da Boehàda neab li meedamam tame! Iuam tame! Ame Da Boehàda iuba ab li meedamam tame!’ lahame ba gagom vabak.”
22. Lahame Yesusat ame Farisi dam laba labi vameadume neàdi fa neo Aba Aho vahokedam im ozobohudelo vi tau meedam dam laba neo ab vi vahokedamam. “Em Abo Asum Ahoba Iubet Bak Niba Li Dateleheda nibe Eho ba fa lelo modem di labe um dam bakda nibe nasi nehame aalo àhàkem bak. ‘Ame Asum Ahoba Iubet Bak Niba Li Dateleheda labe Aho iba vuusu im vahokedam bak taho fum vabao?’ laham bak um nasi aalo àhàki meedam bak. Lahamnàme ame bak lam ahate fi zeam bitom vab labe um ba aam vabak.
23. Labiham bake meit uba nehameam, ‘Iuam tame! Iuba ab le meedamam tame. Neam tame! Niba ab li meedamam tame,’ lahame labi uba gagomeam a àvodi iuba emoeme le aa. Fa iuba emoeme le aa. A labihadume fet uledi emoetedamule.
24. Neham bak. Em Abo Asum Ahoba Iubet Bak Niba Li Dateleheda nibe Eho ba fa lem di gi neham bak. Asum boz vekesi fauhali asum ahebu veibai seti dam ahebu aam bakti ulohona modem labe dam ihimo ahebu aadam tadem bak. Ba akati meit li gagom im uho aie?
25. Eho ba fa lemta abo fa lem bak. Lahana dam eteida nibe Eba nasi modi Em geàdam bakti nehi modem bak. Labi laha, ‘Em Alam adat modem kaio,’ lahame damat Eba feàtàme moudam bakti nehi modem bak.
26. Em Abo Asum Ahoba Iubet Bak Niba Li Dateleheda nibe Eho ba fa bak niba lelo modem di damat gi dam aham di iube Nuh amti vahi azihi dam labe iho ahumdehe vaba vabi gi esdaha bak lamti ulohona meedahit Em lem bak.
27. Nehaha bak. Aham di iube Nuhti vahi esdam dam labe damat gi ibi iho ozom bak lamota la modi le modidam bak. Na àda. Vao udda. Dam lahi vada. Lahi dama loda. Gi labihasu bohu modesdume Nuh am namti am adam lahiti ihe feàda numalehenabu laba ziddaha di laba ab vou fuham. Labi Nuh am namti am adam lahiti iheba ziddume modeha vao zisi bak ahebu fi oli dam ihe laba tau ziddaha vab dam lam ahebu ab belu elodume seddaham bak.
28. Labi laha aham di iube Lot amti vahi num debu Sodom bak laba azihi dam labe iho gi ibi iho ozom bak lamota la modi le modidam bak. Na àda. Vao udda. Na doit vada. Nazoh ot loida. Na debe ut sieda. Num moada.
29. Gi labihasu bohu modesdume Lot am namti am adnamat ahimti iho num debu Sodom bak vou esmozi itame modeha Alat asum labe vua feàna modi nom ilu ame Sodom dam ilihi vab dam ahebu im numti data nazohti ahebu ab belu elodume seddaham bak.
30. Em Abo Asum Ahoba Iubet Bak Niba Li Dateleheda nibe Eho fa lelo modem di lam damat gi dam aham di iube Lot amti vahi azihi dam labe iho ahumdehe vaba vabi gi esdaha bak lamti ulohona meedahit Em le tame.
31. Ame Eho ba fa lem digat labe ubu uho num ohut vabna baa ahoba laba zisi esdam dam lam a fa um numa oli na koena it ve voutamule. Gi ahebu vou esmozi iitaole. Labi laha meit utoho bake na meedamda labe fa a num bake lamule.
32. Uho Lot am nam labe modehe bak vi ozodale. Aham di iube Alat Lot vazisi azihi dam laba vuat beolo modem di labe Lot am namti im num vou esmozi itadam di labe Lot am nam labe am nazoh voedume vou esmoho bake it aaha labe Alat belu am fa ab garam kebuli duzuham bak. Labiham bake ame digat lam a um nazoh visom bake a ozome lamule.
33. Meit neha, ‘Em gi em nazohti labihasu ahena aidalo modem bak,’ lahame aba aho elom bak laba bisi it vou faovoi ozodamda lam ba Alati vahi ahe neàna bohu vuusdam vabak. Laham vaba meit bisi it vou faovoi elom bake vei iedem vaba ahatet neha, ‘Eho Yesus bake tu vuzehi Aba vi tau meedamda em am bak,’ lahame gagu afoezobe damat am otemeam làhà ame da lam ba Alati vahi gi ahe neàna bohu vuusdamda am bak.
34. Labi ame Eho ba fa lem di labe gi ame aibu labe lemeam làhà dam behàsu bakamta bisu iddamna gi meidata vuu visoi meida gi laba voou veke.
35. Labi laha lahi behàsu ti feàdam di lam meidata vuu visoi meida gi laba voou veke. Gi labihada tame. [
36. Labi laha utoho bake le na meedam dam behàsu lam meidata vuu visoi meida gi laba voou veke. Gi labihada tame.”]
37. Lahame labi vameadume modeha Aba vi tau meedam dam labe fa ab vi gagoham. “Aa làhà! Dat Boehàda oa, Om im lam adi bake modem im vameadàla?” Lahame labi gagoha Yesusat im totobe nidi nim fa ab vi gagoham. “Na koei àm bume zi oaedam bak laba damat aam di nehame ozo, ‘Bume zi oaedam adba laba na koei ehe bak,’ lahame labi aame ozobohudem bak. Labi laha Em fa bak niba lem di Em ba aa lem vabak. Em fa lem di gi dam ahebu ozobohudem bak,” lahame ab vameadaham.
1. Labi im lada lam vameadume neàdi Yesusat neo ozo, “Aba Aho vahokedam im ozobohudelo vi tau meedam dam labe Ala bake dihasi tom gago. Dihasi tom gago. Lahadam bak lam a vanamai momule. Gi labihasu vou meedamehamdi Am ba fa li aase,” lahame labi ozome Aba vi tau meedam dam niba im totobe neo ab fi koadamam.
2. “Num debu meida laba meia uloome vi aime neàdi gagu modiamda laba azi. Ame da labe aho Ala bake, ‘Abo feàte,’ lahame ahu adat iedi gagoho vabda am. Labi laha meit modem im aame faobekem vaba gi aalahigeàmomda am. Labiham dàt moz.
3. Labi nam maboena ame num debu laba laha vahi azi. Laham nam labe ame meia uloome aime neàdi gagomda laba le gago, ‘Eba fakemda laba oho eba tau im neà bak vameame vamdesu esule,’ lahame dihasi le gago. Dihasi le gago. Labihada.
4. Labihadam di labe ame da labe mu ailahigeàmu izidaha vabamu ahamo aba ab it ozoham. ‘Em abo Ala bake, “Am abo feàte,” lahame ahu adat iedi gagom vabda ame? Labi laha em meit modem im ba aame faobekem vaba gi aalahigeàmomda ame?
5. Em labihadamnàme ame maboe nibe bisi eba dihasi li gagu fa laidam labe em vanamai feà bak fum bak labna zohàme eho aba fakemda laba le fa im neà bak vameame vamdesu esulo modem bak ab uledeham bak,’ lahame labi ab it ozoham.”
6. Lahame Yesusat im totobe lada lam ab fi koadume neàdeham. Labi fi koadume neàdi Aho neo vi vameada. “Ame meia git uloome vi aime neàdi gagu modidamda labe aho etei odohalehebeat modehe im lam mahate vi ozome ozobohudele.
7. Neham bak. Ame da labe ame nam maboe labe bisi dihasi li gagu fa laidam nam maboe laba tauhu labe uho ozom, Alat Aba Aho fi me vaha dam labe Aba bisi digad di tom gagoda. Fa usehe di tom gagoda. Labihadam dam laba uho ozom, Alat ba taum vaba moe? Vabà! Tau im neà bak modi vamdesu esuiam bak. Dam Ala bake, ‘Iba taule,’ lahame labi tom gagodam di lam Alat mu dam bake, ‘Laha faode,’ lahame gagom vab taia? Am gi kehàm vaba taho aime tau im neà bak modi vamdesu esuiam bak. Labiham bakta labiha. Lahana Em Abo Asum Ahoba Iubet Bak Niba Li Dateleheda nibe Eho ba diamut bak niba fa lem di damat Eba tu vuzehi tom gagodam lahasuhuna Eho fa li aae?” lahame ab vahokedume esuham.
9. Labi im lada lam vahokedume neàdi Yesusat neo aaha dam giida labe ihimo it daetbadume neha, “Im abo neàte. Iho Alat Aba Aho gagoho im lam vuzehi vamdesu meedam dam im am bak,” lahame labi it daetbadume fa meia feàtàdam dam zi lam aahemu ame dam laba im totobe nidi nim ab fi koadamam.
10. Aho neha, “Dam behàsuva ame Fihasi Ala Bake Vou Baedam Num Vàmteabu labe am ad oli aam bak tomba laba tom gagom bak ozome ab tom laham. Dat meida Farisi dàt moz. Labi dat meida meia gagu gi teo vi vaiam doi pajak atem dàt moz. Labiham dam behàsu ab tom laham.
11. Labi ame num laba tom le Farisida nibe gi laba duzu ahamo aba it daetbadam labe Ala bake tom gagoda. ‘Ala oa, emti dam amomoi totbahoti uloho kaio. Dam totbaho labe iho mei na vam di ahi vageme na meida neo vi tau vaiam bak ame. Labi meia bisi fai bak meedam bak ahebu ame. Labi mei lahi dat ehena aa meedam bak ame. Labihasu meedam dam lamti emti uloho kaio. Labi dat meia gagu gi teo vi vaiam doi pajak atemda nimti ba emti uloho kaio. Labiham bake Om abo neàte.
12. Em hari Minggu nusu vou id ladume em ahit na àm bak mu na àhà vabna usi behàsdi fa Minggu nusuidam meo bak. Ebe eho modi baleàhà bak am bak. Labi em laha na eho le modeme vou liamna lam ahebu faheme vahedume na zi vahehe bak sepululehezobe meida zi visoi Oba lolo vou li niba esuiam meo bak. Em abo bisi neàda em am bak,’ lahame ab tom gagodaham.
13. Lahana dat meia gagu gi teo vi vaiam doi pajak atemda labe gi bak vaitesu douda. Lahana am ladehe labet asum ahoba iuba ba tom aame Ala bake tom gagodam vabak. Gi ladi douda. Ahu faidi foelamdi tom gago, ‘Ai oa, em abo faina modemda em am tame. Om eba nom aame faobekesi im neà bak tau meedale,’ lahame ab tom gagoham.”
14. Lahame Yesusat ame im totobe lada lam fi koadume neàdi ame dam laba ab vi gagoham. “Em abo imbo bak uba vameadalo modem bak. Nasi aima. Dat bada nimota am faina meedaha bak lam Alat ozahigeàmu fa gagu faatoi neàdi Alat Am damali fa num bake lahada am bak. Lahana dat amuda lam Alat gagu faatoi neàdi vaha vaba fa num bake laha bak. Labihaha bak. Eho gi neham bak ozome uba labi gagoho bak. Meit neha, ‘Em abo bisi feàda am tame,’ lahame it daetbadume am ee vousai gagomda laba Alat modi fa ee vou usi feà vab datelemda am bak. Lahana meit neha, ‘Em feà vabda am bak,’ lahame it ozome am ahu nemahuba neàt ee vousam vabda lam Alat ame da laba modi fa ee vousai feà datelemda am bak,” lahame ab vahokedaham.
15. Ame di labe dam totbaho labe ozo, “Yesusat fà im data bozna niba Am anekehà odosu neha, ‘Ai oa, Oho data niba neà bak modi esule,’ ” lahame tom gagom bake ozome im data tatvamda zi lam Yesus bake ab vou ledamam. Vou ledume modeha Aba vi tau meedam dam labe iho ame bak lam aahemu ab gut mali meedamam. “Um data Yesus bake a vou li vabidamule.”
16. Lahame labi gut mali gagoha Yesusat ozahigeàmu ame data vou ledam dam zi laba neha, “Lele,” lahame gagu neàdi Aba vi tau meedam dam laba fa neo im ab vahokedamam. “Ame data lam Eba vou ledam neà bak. Uho a mali gagomule. Neham bak. Damat ibi iho vou mode ledume baleàhà bak lam fa veimdi fa data koena zi nibe ibi iho lab vou mode ledume baleàhà bak lam abo daleà azi meit iba vahokedam im aidam bak lamti ulohona meedam dam lam Alat deeli vame Am damali vuusu im vahokedam dam am bak.
17. Imbote. Labi Eho etei uba neo gagolo modem im imboda nidi nim laha nasi aima. Meit ibi iho vou mode ledume baleàhà bak lam fa veimdi fa data koena zi nibe ibi iho lab vou mode ledume baleàhà bak lam abo daleà azi meit iba vahokedam im aime meedam bak lamti ulohona meedam vabameam làhà ba Alat ame dam laba modi Am damali Aho vuusu im vahokedume neà bak modi esuiam biem bak,” lahame ab vahokedaham.
18. Labi vahokedume neàdi modeha ame dam zi labe Yahudi elaidamda meida labe Yesus bake netàdi vi ailo ab gagoham. “Guru bisi neàda oa, eho ana im meedam labet Alat eba modi Amti vahi gi ahe neàna bohu vuusdàla?”
19. Lahame labi vi ailo gagoha Yesusat fa ab vi gagoham. “Om akati eba, ‘Bisi neàda oa,’ lahame labi Eba gagoela? Dam bak niba esuhu dam ahebu bisi neàda kaio. Gi Ala vàmteata bisi neàda am tame.
20. Alat dam bake neha, ‘Nehame meedale. Nehame meedale,’ laham im dat ahamda Musat toedume fi hasi iba esuhu Im Feàna zi lam om ozobohuna taia? Ame im neha taia? ‘Nam dat eheda modeo, dat nam eheda modeo, a modemule. Labi mei a otemule. Labi mei na a aa vamule. Labi na aaha vabda labe, “Eho nehi aaho,” lahame a ostame giomim vàlu gagomule. Labi um ai bake modeo, um oi bake modeo, ahu adat iedi uba gagoho im laba vuzehi meedale.’ Labihasu toedume fi hasi esuhu im lam om ozobohuna taia?”
21. Lahame labi gagoha da nibe fa gago, “Em gi amu bos diat ame im lam faasi vou meedume etei busaolehe bak.”
22. Lahame labi gagoha Yesusat ame da labe lab gagoho im aime fa gago, “Lo. Lahana om im meida vàmtea vekehe bak. Om soa maehe nazoh zi lam ahebu gelevai doit ot loidume neàdi ame doi lam vadume fa faheme dam na vab dama iuba lo. Iuba lo. Lahadale. Oho labi modemeam làhà Alat Aba Aho azihi bak laba oba vahehe nazoh aabo ehete. Labihàmu oho ame doi lam dam na vab dama lodume neàdi fa li Eba tu tau godale.”
23. Lahame ame da labe Yesusat lab gagoho im lam aiha am soa maehe nazoh zi abo feà dàt modemu ahu faidi gi daleàde.
24. Làhàmu Yesusat gi ame da laba aasdam labe fa laba dozeadaha dam zi laba ab gagoham. “Dam nazoh duada labe iho it ozo, ‘Iho Yesusam im aime vuzehi fa Alam damali Aho iba vuusu im vahokedase,’ lahame it ozodamnàme im nazohti nehi ame bak lam uledi meedam biem meo bak.
25. Neham bakti uloho taia? Im unta fi hobu labe aho sue tademna mo labe am bumat kekehena laba ba dalu lafutom biem bak. Labi dat na duada labe aho nehi ozo, ‘Alat laha eba modi Am Dateli eba Vuusu Im Vahokedase,’ lahame gagu meedam bak lam laha modem biem bak. Lahana ba gagohoda lam bisi modem biemda am bak.”
26. Lahame labi gagu modeha ame dam labe Yesusat lab gagoho im lam aime Yesus bake ab vi gagoham. “Aa làhà! Dam na duada labihalahit im dam totbaho ahebu Alat ba iba soat vausu im vei neàdi Amti vahi ahe neàna bohu vuusdam biehe taia!”
27. Lahame labi gagoha Yesusat fa ab gagoham. “Faode. Ame bak lam damat ihimo it modem biem bak. Lahana Ala bisi feàda abo na ahebu modem meo Ala labe ame bak lam modem meo bak.”
28. Lahame labi gagoha Petrusat fa ab vi gagoham. “Imota nehaha bak. Iho Oba vi tau meedam damalelo modemu nazoh ibida ahebu amu gi voedume vausi fa Oba tau vou godam bak.”
29. Lahame labi gagoha Yesusat fa ab vi gagoham. “Lo, oho lab gagoho bak lam imbota imbot. Lahana Eho etei uba neo gagolo modem im imboda nidi nim laha nasi aima. Uho meit neha, ‘Alat dam bake deeli vame Am damali vuusu im vahokedam bak lam eho tau vou vameatedalo mozo,’ laham bak ozome uledi modelo modemu fa am num nazohti modeo, am lahiti am datati modeo, am aiti oiti modeo, am dubu am vahadamti modeo, am nàti modeo, labihasu voedume esmomeam làhà ame da labe aho ahe lahasuhu di nibe Alat fa ame da laba gi ame baleà vouhou na lodam di abo fetehesu duana vi loda tame. Labi laha ba diamut ame da lam gi elomnàme Alat modi fa Amti vahi gi ahe neàna bohu vuusda tame,” lahame Yesusat ab vahokedaham.
31. Lahame labi vahokedume neàdi afoezobe Yesusat Aho gagu olu Am im vameadume esmozi laiam dam dua belas lam vou li vaitesu duzu im nehasu ab vameadamam. “Um nasi iademe aimale. Im etei vahi kota Yerusalem laba zoolelo mozo. Labi laba lafusi dam ahamda Alat vameadaha im aime fa dam bake ahate vameaidaha dam labe iho amu nasi fet toedume esuhu im lam abo damat Eba Asum Ahoba Iubet Bak Niba Li Dateleheda niba ba modem im nim ahebu ab modi imbodelo modemam bak.
32. Damat Em si Yahudi damat modem vab dam abo Ala bake tu vuzehem vab dam laba neo ub lu ame dam labe Eba tozoda. Labi Eba feàtàom labe keha Em soa beàda. Labi Eba na sokba nasbe ahit alibulehena labe foadume geàdume Em ab otemam bak. Labi Em eloi usi behàsdi Em eloho bak labet Alat modi fa ahedi usa tame. Labihalo modem bak.”
34. Lahame labi gagu modeha Aba vi tau meedam dam dua belas labe Yesusat lab gagoho im lam aiha, “Akati modem im labi gagohela?” lahame im ahulat ihimo vi ozome modeha ozobohudem vabili gi labihasu esu. Ame Yesusat lab gagoho im lam, “Akatihasu modemna modela?” laham bak lam ame di labe ahate fi zeam bitoho vab labe dam lam ba fi gatehe vabak.
35. Labi Yesus Aba vi tau meedam damti kota Yerusalem lalo ladam lahasuhu di labe num debu Yeriko laba fuseo vabali modeha dat fako faida na aam biemda labe zie obe laba aida. Ame da lam gi meia na vi taulelo aida.
36. Labihamda labe dam duada zi lebohotedam bak dae aidàmu ab gut gagodamam. “Bak nim amat ana im meedàla?”
37. Lahame ostame gut gagodume modeha dam nasi dozeadaha dam labe gago, “Ne, Yesus Nazaretda gi ab lebohoti Yeriko bake lalo modemam bak.”
38. Làhàmu dat fako aubesuhuna nibe ab buteham. “Yesus abo Dat Ahamda Boehàda Daud Vou Faat Lehe Mekehàda oa, Om eba aame faobekesi im neà bak tau meedaleee. Alat Gagu Fihasi Vimteme Oluhu Dat Boehàda, ‘Om am tame,’ laham bak em ozobohuteee.”
39. Lahame buddume modeha ame dam nasi dozeadaha dam labe fa gago, “Mm, a gagomule,” lahame mali modeha ame da nibe ailahigeàmu fa bisteat neo vi budda. “Dat Ahamda Boehàda Daud Vou Faat Lehe Mekehàda oa, Om eba aame faobekesi im neà bak tau meedaleee.”
40. Lahame bisteat vi buddameilahit Yesus gi laba ab duzuham. Duzu gago, “Le gagome vou lele,” lahame gagohemu dam ahe damat le ve ab vou leham. Vou li modeha Yesusat ame da laba ab gut gagoham.
41. “Eho oba akati modemna oho Eba buddàla?” Lahame gagoha ame da labe fa Yesus bake ab vi gagoham. “Kaio. Ai oa, em gi fako na aam biehemu àvodi na aalo àhàki Oba vi buddalo.”
42. Làhàmu Yesusat fa ab vi gagoham. “Lo, oho nehame ozoho labe, ‘Yesusat eba modi fa neàdem bak,’ laham bak lam oho nasi tu vuzehehe labe om fako faidehe bak lam Eho modi fa na aam ab neàdeham bak.”
43. Lahame Yesusat gi etei labi gagoha ame da labe am fako fa na aam bak ab neàdeham. Labihàmu ame da labe fa zie doni laba Yesus bake gut vi tau ab vi vuladamam. Vuladam labe, “Ala abo feàte,” lahame vou bae lada. Labi dam duada labe da nim fa neàdehe bak lam aahemu laha vi tau Ala bake ab vou baedaham.
1. Labi vou bae ladume modeha Yesusat ame num debu Yeriko laba lafusi labohotelo meeda. Labiham di lam Yeriko laba Zakeus laha laba ehet. Meia gagu gi teo vi vaiam doi pajak gut gagome vam dam labe im boehàda meida Zakeus am. Am abo na duada am.
3. Zakeus am Yesusat ledam bak aihemu am abo Yesus bake aalo àhàke. Lahana dam duada labe Yesus bake valadam labe dam duali Yesus aam biehemu Yesusat lam bak laba ahamo nasi vazidazi emoeme le uto zisi ausi gut aasda. Am gi buuna buà modehe labe labihaha bak.
5. Labi aasdameam Yesusat lehe labe Zakeus aidam adba laba li duzu tom aaha Zakeus ut aasoa aidam bak aame tom gago, “Zakeus om taho usele. Em etei nim om numa izi neo lam bak modelo modem bak.”
6. Lahame labi gagoha Zakeus gi àvodehat usi deelehat Yesusti ahili am numa ab laham.
7. Labi am numa le vou olesome modeha dam duada labe num zoho obe laba dozeadaha dam labe Zakeus labe aho Yesus am numa vou olelo modem bak aahemu ab tozoham. “Ea, ne Yesus gi dat faina modemda laba ana modi deeli vou izeo mode?” lahame ab tozome gagoham.
8. Lahana Zakeus aho gagom im gi dam labe fà aisome Yesus bake ab gagoham. “Dat Boehàda oa, em etei nim em nazoh duana ahebu faheme totbaho dam na vab dam laba lodam bak. Labi eho mei doi ahi vageme vaiamdaleàmu na ebe eho esuhuda totbaho lam laha faheme dam laba fa duana lodam bak. Eho amu meia vageme doi vaha di gi koena vaha bake etei abo fa duana lodam bak.”
9. Lahame labi gagoha Yesusat neha, “Oho etei lab gagoho bak lam Em ab aime ozobohudeham bak. Om lahi datati ubu uho faina meedàmu Alat uba beolo modem bake om abo om tai Abraham labe aba aho amu Ala bake lab tu vuzehehe bak lamti ulohona oho laha modehemu etei nim Alat ozahigeàmu fa uba soat vausu ab vei neàdeham bak.
10. Em Abo Asum Ahoba Iubet Bak Niba Li Dateleheda bak niba lehe bak nim gi damat faina meedàmu Alat beolo modesdam dam lam abo Zakeusti ulohoda lam Eho nabime soat vausu fa vei neàdedalo lehe bak. Abo dat domba vou aasdamda labe am domba zie fàusi git ub oedahemu fa vi nabime vame fa iademe oumahedam datti uloholelo Em bak niba lehe bak,” lahame ab vameadaham.
11. Labi Aho lab vameadaha im lam dam zi labe ame im lam aidam lahasuhu di labe vedi nehi ozo, “Yesusat Am kota Yerusalem ab fuseo vabaleham bak. Aho kota Yerusalem laba le lafusi im Israel dam vahi vuusu im vahokedam bak abobo modem bak etei ab faasi meedalo modemam bak,” lahame labi ahu ab git ozoham. Làhàmu Yesusat, “Aho Boehàdateboli dam bake vuusu im vahokedam bak fum kaio,” lahame vameame tombalelo ame dam laba im totobe nidi nim neo nehame ab faasi vi fi koadamam.
12. “Dat elaidamda meida nibe aho ozo, ‘ “Em boehàdateli neàdi eho fa em dam vuusu im vahokedase,” lahame fa boehàdatebo laba le fa gagu boehàdateli neàdi em fa li em dam vahi vuusu im vahokedalo modem bak,’ lahame ozome neàdi bak bohula bak laba lalo ab usaham.
13. Usai lalo modem di labe am na meedam dam sepuluh gagome li dozeadume neàdi doi oona emas lam abo nazoh feàna vamna sepuluh lam faheme am dam laba vàmtea lodume uloholi it vameada. ‘Em doi uba gi koena lohona nim uho vame vou le fa na vame ot loidam bohu vuusdume fa doi dualehena em fa li aase,’ lahame labi gagu neàdi usai bak bohula bak laba ab laham.
14. Labi ladam di labe ame da labe aho vuusulo modem dam zi aba vi feàtàdume fa dam totbaho fàsi dam laba nehame gagu ab vi oluham. ‘Uho boehàdatebo laba le gagole. “Im da labe boehàdateli iba vuusum bak im moho,” lahale,’ lahame labi gagu ab oluham. Làhàmu dam ba vulahada labe labi le boehàdatebo laba gagoha
15. boehàdatebo gi ailahigeàmu ame da laba ab modi boehàdateleham. Boehàdateli fa am bake ab oluham. Labi boehàdateli fa am bake ledume am numa ab lefuham. Am numa lefusi aho amu am doi lodaha dam abo am na meedam dam sepuluh laba, ‘Am doi dualeheo?’ laham bak aalo ame dam laba, ‘Lele,’
16. lahame gagu modeha ame da ahamte li duzuhuda labe li duzuhemu dat naeda labe ab ailo gagoham. ‘Eho oba loho doi lam akatihahela?’ Lahame labi gagu vi aaha ame na meedamda labe neha, ‘Ai, doi oona emas vàmtea oho eba lohoda lam eho modi fa duali ab sepuluhleham tame.’
17. Lahame labi gagoha dat naeda labe fa gago, ‘Lo, làhà oho modehe bak abo neàte. Om abo na meedamda bisi neàda am bak. Eho oba doi koena lohona oho abo iademe vou aasdume fa dualehemu eho fa oba modi boehàdateli oho num debu sepuluh labe im dam zi lam vuusu im vahokedam bak ab modelo modemam bak,’ lahame ab gagoham. Lada labiha.
18. Labi na meedam dam meida labe ba neo li duzuhemu dat naeda labe ab ailo gagoham. ‘Eho oba loho doi lam akatihahela?’ lahame labi gagoha dat ba leheda nibe gago, ‘Ai, doi oona emas vàmtea oho eba lohoda lam eho modi fa duali ab auoholeham tame.’
19. Lahame labi gagoha dat naeda labe fa gago, ‘Lo, làhà oho modehe bak abo neàte. Labiham bake eho oba modi boehàdateli oho num debu auoholehena labe im dam zi lam vuusu im vahokedam bak ab modelo modemam bak,’ lahame ab gagoham. Lada labiha.
20. Labi na meedamda meida labe ba neo li duzuhemu dat naeda labe neo ab ailo gagoham. ‘Eho oba loho doi lam akatihahela?’ lahame labi gagoha dat ba neo leheda nibe gago, ‘Ai, oho eba doi oona emas vàmtea lohona neam bak. Om abo dae teuna meedam dàt iba vuusu meeda. Om bisi meit debe soalehena gi ahum gagome vada. Meit ahamo meedume vanamai nuhatehena oho vedi gi ahum vada. Om labiham dàt modehe labe oho eba loho doi oona emas vàmtea lam eho meedume ame emas lam dualehe vaba setemeam làhà oho eba li faki beom bak labna zohàme em fa oba vei iedi meedam labe eho doi lam gi oho loho di labe ve sue zohot giame gi esdam bohu meedume fa om ab leham bak.’
22. Lahahat dat naeda labe ame lab gagoho bak lam aime faki ab gagoham. ‘Làhà, om em na meedamda abo bisi fai bak modem dàt modem bak. Oho lab gagoho bak lam eho ab aiham bak. Labihàmu eho gi ame bak labet fa zuhou na asimbuna feà oba ab modelo modemam bak. Oho neha, “Em abo dae teuna meedam dàt uba vuusu meedala. Em bisi meit debe soalehena gi ahum gagome vadala. Meit ahamo meedume vanamai nuhatehena eho vedi gi ahum vadala,” lahame om labi ozobohudi gagomda labe akati eho oba loho doi lam oho neo ve damat mei emas modi duaedam num laba vou oli esu eho fa lehezobe ame emas fa dualehena oho eba gut lom vaba modela?’
24. Lahame labi gagu neàdi dat naeda labe dam aba obe laba netàdi dozeadaha dam laba gago, ‘Da nibe vuusuhu doi oona emas vàmtea lam si vietoi fa em na meedamda meida labe aho em doi modi sepuluhleheda laba taho fa lole.’
25. Lahame labi gagoha ame dam labe àvodi gago, ‘Aa! Ai om akati labi gagodà? Ame da lam oho amu doi sepuluh lohona ba akati doi nidi nim neo vi loe?’
26. Lahame labi gagoha dat naeda labe fa gago, ‘Neha taia? Eho meia neha, “Em na nimota oho vou aasdale,” lahame gagu ame da labe iademe vuusu vou aasdameam làhà eho ame da laba neo neha, “Em na nidi nim oho laha vou aasdale,” lahame gagu ame na vi tau duali feà bak fusi vuusu vou aasdam bak. Laham vabameam eho meia neha, “Em na nimota oho vou aasdale,” lahame gagu ame da labe iademe vuusu vou aasdam vabameam làhà eho naedat ame da laba gagu meedam im lam gi fa faatoi vei setem bak.
27. Labihàmu uho nasi le dam amu neha, “Im da labe boehàdateli iba vuusum bak im moho,” lahame eba faki labi gagoho dam laba le gagome eba fa vou ledale. Labi eba vou li vou dozeadume em aasdahit ame dam lam oddume voedale,’ lahame ab gagoham.” Lahame Yesusat im totobe lada lam ab fi koadaham.
28. Labi im lada lam fi koadume neàdi Yesus Aba vi tau meedam damti vahi kota Yerusalem ab tom lalo ladamam. Tom ladam di labe Yesus nasi lada.
29. Labi ladume Zaitun Dee Dozeadaha Bak Buzoho bak laba tom ladume bak labe modesuhu num debu behàsu Betfageti Betaniati lahaha doni laba fuseo vabalehe di labe Aba vi tau meedam dam meida behàsu nasi gagu olulo meeda.
30. Gagu olulo modem di labe Aho nehi vi vameada. “Um ahim nim num debu iba netàdeheda laba lefusi aameam keledai fi ho adat gàhàda lo vààsdam bak aa tame. Ame keledai lam amu damat nusu gohatehe vaba alimda modem bak. Keledai lam lo vuhatoi vuusu vou lele.
31. Lo vuhatolo modem di meit uba nehi gagomeam, ‘Im keledai uho ana modelo lo vuhatolo modela?’ labihameam làhà uho fa nehi gagole. ‘Boehàda Aba Aho ozoho baket modelo modemu vou lalo mozo,’ lahame uho da laba labi gagole,” lahame ab vameadume oluham.
32. Labi le aahat Yesusat lab gagu oluhu bak lam ab imbodeham. Ame keledai fi ho adat gàhàda num zohobe laba lo vààsdam bak ab aaham.
33. Labi le lo vuhatosome modeha keledai dedam labe gago, “Aa! Im keledai uho ana modelo lo vuhatolo modela?”
34. Lahame labi gagoha dam behàsu nibe fa ab gagoham. “Mm vabà! Boehàda Aba Aho ozoho baket modelo modemu vou lalo mozo,” lahame ab gagoham.
35. Labi gagu neàdi lo vuhatoi loa vuusu fa Yesus bake vou li ibi iho sue sona ahoba dusuhuda vihilame ame keledai adat gàhàda labe am toha laba ab nom gutaudaham. Labi gutaudume neàdi Yesusam naba tom odosi zisi nusu ab ladamam.
36. Labi zisi nusu zie ladam di lam dam dua totbaho labe im sue sona ahoba dusuhuda lam laha vihilame ame keledai Yesus vou lam zie laba vou olualada.
37. Labiha ladume Yesusat Zaitun Dee Dozeadaha Bak Buzoho laba zizi kota Yerusalem lazesome modeha Aba Aho vahokedam im ozobohudelo vi tau meedam dam zi labe Yesusat na damat ihimo modem biem im feàna Aho amu meedaha im vi ozome deelehat ab faasi Ala bake bisteat ab vou baedamam.
38. Nehame vou baeda. “Alat Aho Gagu Olu Ot Vai Im Dedateli iba etei lehe Dat Boehàda nim abo feàteee! Ala asum ahoba iumti im bak niba esdam damti fà modi vahe vahedase. Labihalo modemu imo Ala bake vou baedase.” Lahame meit buteme vou bae lada. Meit buteme vou bae lada. Labihada.
39. Labi vou bae ladume modeha Farisi dam totbaho lab vi tau dozeadaha dam labe Yesus bake gago, “Guru Oba vi tau meedam dam zi nibe Oba vou baedam bak Oho gagu fa malele.”
40. Lahame labi gagoha Yesusat fa gago, “Labiham vabiem bak. Ne, dam nim gagu dae vabameam làhà ke nibe fa ahali Ala bake vou baedam bak. Labiham bake etei di nibe vou baedam bak ba vabalem vabak,” lahame ab gagoham.
41. Labi neo ladume Zaitun Dee Dozeadaha Bak Buzoho bak labe nom ladume kota Yerusalem fuseo vabali nom aaha dam num nom aadàmu Yesusat meb dae ab faaham.
42. Ame dam lam dam amomoit faki beolo modemu Yesusat vi ozome faobekesi Ahamo im mebet ab vameadamam. “Um kota Yerusalem dam akati etei nibe ahu vàmadi fa vahem bak vabili mode? Ame bak lam um etei ozobohudemeam làhà um ba gi neà bak tadem bak. Lahana um ba lahame ame bak lam ba ozom vabak. Ab vaitoham tame.
43. Um ba diamut dam uba fakehe damat li ahiledou vabousu beom bak. Um ba meida futoi itam vabak.
44. Gi um data nazohti ahebu beome setem bak. Labi um num zi lam laha ahebu faatoi setem bak. Alat uba faobekesi vuusulo oluhuda um ailahigeàmohemu labiham bak,” lahame mebet ab vameadaham.
45. Labi im lam vameadume neàdi Yesusat neo le kota Yerusalem laba lafusi Fihasi Ala Bake Vou Baedam Num Vàmteabu labe am ad oli aam bak tomba laba le duzu aaha damat Ala bake vou baedalo na Ala bake lomna ot loidam bak aahemu meoli dam na ot loidam dam zi lamti na vadam dam lamti meoleme ootedume ab futodamam.
46. Aho meoli gago, “Um ozom vaba? Meit Alat Vameadaha Im Toedahana laba im meida nehi toehe bak. ‘Alat neha, “Em num nim gi Eba tom gagodam numat modem bak.” ’ Lahame toehena um akati aalahigeàmu meit na aa ve voutame fi olehe bak ozome vou oli vasti esdam bakti ulohona modi Em num feàda niba oli im mei faasi meedàla?” lahame faki meoli meedam labe dam soa odosi veimome dam ab ilidamam.
47. Labi Yesusat kota Yerusalem laba aidam di lam gi Fihasi Ala Bake Vou Baedam Num Vàmteabu labe am ad oli aam bak tomba laba le dam bake vahokeda. Labi dihasi neo gi ame baket meeda. Labihadam di labe Yahudi damat ibi iho tu vuzehi meedam im vuusdam tohe dam zi labet vedi vahi Yesus otesome meedaha dam duada zi labe bisi Yesusat lab vahokedam im tu leidàmu otem vabi gi vabeddam bak meeda.
1. Labi ba neo digat meida iube Yesusat ame Fihasi Ala Bake Vou Baedam Num Vàmteabu labe am ad oli aam bak tomba laba neo le ame bak laba dozeadaha dam zi laba vahokeda. Labi laha, “Alat Dam Bake vuusu im vahokedam bak lam, ‘Akatihasu modemna modela?’ ” laham Im Neàna lam ame dam zi laba laha vameadume fi deda. Labihadam di labe ame Yahudi damat ibi iho tu vuzehi meedam im vuusdam tohe dam zi laha vahi tau dozeadaha dam labe Yesus bake li netàdi vabi vi ailo ab gagoham.
2. “Ne, Oba amat modi vizi teudi im feàna lam Oho duzu meedàla? Oho nib li meedam im nim Oba amat gagu im dedateli Oho vuusu meedàla?”
3. Lahame labi gagu modeha Yesusat fa gago, “Im ubuda faode. Ebe Eho etei uba vi ailo gagomda nim uba nasi vi gagu aise.
4. Ne, Yohanes Mei Vuu Valo Baptisleiamda labe aba aho amu mei vuu valo baptisleiam bak lam amat Yohanes bake gagu aho ame bak lam meedahela? Alat aba gagu aho ame bak lam meedaheo? Laham vabameam damat aba gagu aho ame bak lam meedaheo? Akatihahela? Uho ame bak lam Eba fa gagomta uho etei Eba lab gagu vi ailo modem bak lam Eho fa uba vi gago tame.”
5. Lahame labi gagu vou faoha ame Yahudi ee dam zi labe gi ihimo ot gagoida. “Uho ozom, iho akatihasu fa Yesus bake gagoe? Iho nehameam, ‘Alat Yohanes gagu olu meedaha bak,’ lahame labi gagomeam làhà Yesusat fa iba nehame vàlu gagom bak. ‘Ne, um lahana akati Yohanes am im aime tu vuzehem vaba moudume mohela?’ lahame iba labi fa gagom bak.
6. Lahana iho nehame gagomeam, ‘Damat gagu oluha,’ lahameam làhà dam etei iba tau dozeadaha dam totbaho zi nibe fa iba faki ke visomoame iba beodume elodà moio? Neham bak. Dam etei iba tau dozeadaha dam totbaho zi nim, ‘Yohanes ba damat gagu olu meedaha vabak. Am gi Alat vameadaha im aime fa dam bake ahate vameaidahada meida am am bak,’ lahame labi ozodam labe iho fa im mei gagomeam làhà dam iba faki beom bak.”
7. Lahame ame dam busaoda zi labe ihimo vou faovoi iedi fa vei biehenali Yesus bake fa ab gagoham. “Yohanes aho amu lab meedaha bak lam, ‘Amat gagu olu meedàla?’ laham bak lam im bieho.”
8. Lahahat Yesusat fa dam laba ab gagoham. “Lo, làhà Eho li meedam im zi nim, ‘Amat Eba gagu olu Eho im dedateli meedàla?’ laham bak lam Em laha ba uba gagom vabak,” lahame ab vasteham.
9. Lahame labi gagu neàdi Yesusat lab dozeadaha dam zi laba im totobe nidi nim neo nehame ab faasi fi koadamam. “Dat utoho deda nibe am tat vueheba laba am na meedam dam gagome anggur neb zi deddume neàdi esu. Labi bak mei bake le azibehamdi fa lelo modemu dam na debe soali modeme vahem dam zoho laba gago, ‘Uho em anggur dee nim teohet vou aasdume amdehezobe modeme vahedam di zoho uho va. Zoho eba naedate vahedume esu. Labihadale,’ lahame it gagu esmozi bak bohu bake ab laham.
10. Labi le aidamehamdi ozoha, am anggur oo vaedume amdem bak fuhemu fa am na meedamda meida laba gagu ab oluham. ‘Em anggur dee teohet vou aasdam dam labe iho ot loiame vaha doi ebe eho vam zoho eba esuhuda lam le vame fa vou lele,’ lahame gagu ab oluham. Labi le gagoha ame anggur dee teohet vou aasdam dam labe ame da lam lehemu gut si foadume saemea fa ab oluham.
11. Labi anggur deda labe gut aaha dat gi saemea fa lehemu am na meedamda meida laba neo gagu fa ab oluham. Labi olu lafusi modeha ame anggur dee teohet vou aasdam dam labe neo gi gut foadume game ladi fa saemea ab oluham.
12. Labihàmu ame anggur deda labe neo gut aaha neo dat gi saemea fa lehemu dat meida laba neo gagu oluhu bak ab làteladeham. Labi olu fusi modehat ame dam labe neo ame da nim gut beome nisili visoi anggur dee natàh zidazi ab vooham.
13. Labihàmu ame anggur deda labe vi ozo, ‘Ne, em akati mode? Làhà gi em adat vàmtea ebe eho deeleheda nim gagu oluse. Eho labihameam dam labe fa em adat bake vei ladi ahu adat iedi fa eba doi lu olum zoaha bak,’ lahame vi ozome neàdi am adat ab gagu oluham.
14. Olu ladume lafuseo vabalehe di labe ame anggur dee teohet vou aasdam dam labe gi bak bohulana gut aaha anggur deda labe am adat ledam bak aahemu neha, ‘Da nim ba am aiam na misia vamda am taia? Imo da nim oteme afoezobe anggur dee nim fa im na misialese,’ lahame im aa ab odoadaham.
15. Labi im aa odoadume neàdi ame da fuhuzobe neo gut si vou kea lame anggur dee natàh ke labe vou futoi bako iuba ab oteme vooham.” Lahame Yesus ame im totobe lam fi koadume neàdi neo ame Yahudi dam busaoda zi laba vi ailo ab gagoham. “Uho ozom, ame anggur deda labe fa li am anggur dee teohet vou aasdam dam laba li akati modela?
16. Gi neha taia? Dat naeda fa li ame anggur dee teohet vou aasdam dam laba oddam bak. Labi oddume am anggur dee lam fa dam amomoi gagome fa vou aasdam bak,” lahame im totobe lada lam fi koadume neàdi modeha lab dozeadaha dam zi labe Yesusat lab gagoho bak lam aime ozo, “Alat iba Yahudi dama labihalo modemna ozomo?” lahame tombu ozobohudi fa Yesus bake ab gagoham. “Vabà! A labihamule.”
17. Lahame labi gagohemu Yesusat ame dam totbaho labe Aba moho bake vi ozome Aba vi gagoho dam laba vi aasu gago, “Imbo bak. Eho etei uba lab gagoho bak lam abo imbote. Lahana meit Alat Vameadaha Im Toedahana laba im meida nehi toehena nim um aame vi ozobohudehe vaba? ‘Dam num moadam dam labe, “Faite,” lahame mu vooho ke lam fa feà Dateli bisi num mome teudem ke am bak.’ Lahame toeme esuhu im lam uho ozom, akatiham bake labi gagohela? Ame im lam gi neham bak.
18. Ame ke lam Alat Gagu Fihasi Vimteme Oluhu Dat Boehàda Em am bak. Meit Ebe Eho vahokedam im tu vuzehi meedam vabda lam gi da nibe ke bake gitadi vàhàdemdati uloho bak. Laham vaba ame ke labe ame da laba fi tmai bake deebosi setemdati uloho bak,” lahame Yesusat ab vameaham.
19. Labi dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti damat Ala bake lomna ve vua vahudam toheda zi laba vuusu im vameame faheme modiam dam lamti ame dam labe ozo, “Oo, Yesusat etei lab vameadaha im lam gi iba vàlu vameada taia? Aho li vahokedaha im lam iho aim mu vooho bak laba ozome ame anggur dee teohet vou aasdam dam laba gi vàlu im totobet fi koada taia?” laham bak ozobohudehe labe abo Yesus silo àhàki nabidaha dam duada totbaho labe Yesus bake tuhuda feà labe iedi sim bili gi vabedda.
20. Labi iho Yesus sim biehemu fa ba sim neàdi vou fuhuzobe, “Sise,” lahame gi vou faoda. Vou faodam labe ozo, “Yesus git gagohozobe si fa gubernur iba vuusdamdate vou le ub lu aho im dedateli fà uloose,” lahame fa dam amomoi bake ab gagoham. “Uho ahit Yesus bake le neà damali vahi keobaedale,” lahame gagu Yesus bake ab oluham.
21. Labi Yesus bake le dam duada zi totbaho labe vou faodahit ahit fi bovai im ab vameadamam. “Guru oa, Oho lab meedam bak lam im ahebu ozobohu bak. Om abo im vameadam di im vamdesu vameadam bak. Labi im vahokem di laha im vamdesu vahokedam bak. Labi Alat ozo, ‘Dam bakda nehasu meedase,’ lahame Aba Aho ozoho im lam Oho dam bake im vahokedam di Om laha gi im vamdesu imbona vahokedam bak. Om ba neham bak modem vabak. ‘Da lam ee feàda Eba im gagohe? Làhà aime tuse.’ Laham vab di, ‘Da lam ee vabda Eba im gagohe? Làhà Em aime tum bak mose,’ lahame ba dam fahem vabak. Om gi ozahit vahi vahokedam bak.
22. Om labiham dàt modemu iho nehi Oba gagu vi ailo modem bak. Im Yahudi dam ihimo dat ahamda Musat toedume fi hasi esuhu Im Feàna zi lam iho tu vuzehi meedam labe Oho ozom, pemerintah iba vuusu meedam bak gohali lodam doi pajak lam iho fa Kaisarleheda laba lodam neào? Ame Im Feàna zi labet iba maleheo? Akatihàla?”
23. Lahame labi gagoha Yesusat dam labe Aba keobaedam bak Ahamo ozobohudi ab gagoham.
24. “Uho ame pajak abo gi vi tau lodam doi oona perakat modehena lam Eba fi male.” Làhàmu ame dam labe le ame doi oona visoi fa vou li Yesus bake ab loham. Labi Aho ve vousai dam bake fi si vimtedam labe ab vi gagoham. “Ame doi nim amam dauha ame doi laba modesuhela? Labi amam ee toehela?”
25. Lahahat dam labe neha, “Dam ahebu vuusdam Kaisarleheda labe am dauhati am eeti modesuhu bak.” Lahame labi gagoha Yesusat fa neo vi gago, “Lo. Làhà uho dam ahebu vuusdam Kaisarleheda laba na abada lam fa naedate loda. Labi uho laha Alat Aba Aho gagohoda lam laha meeda. Labihadale.”
26. Lahame labi gagohemu dam Yesus bake keobaedam dam labe, “Dam duada zi labe Yesusat git gagom bak fà aise,” lahame ame im lam gagoha Yesusat git gagom vabamu àvodi ab daleàdeham.
27. Labi ame digat zoho labe Saduki dam labe laha neo Yesus bake gagu vi ailo ab li dozeadaham. Ame Saduki dam labe iho ozome tuhu im gi neha, “Mei elom di ba fat ahedi usam kaio,” lahame tu ozodam dam am bak. Laham dam labe Yesus bake li vi ailo ab gagoham.
28. “Guru oa, dat ahamda Musat aho toedume fi hasi iba esuhu Im Feàna zi lam im meida nehi toeme fi hasi esuhu bak. ‘Meit am itbaho fatoho vaba elomeam làhà fa ame nam maboe lam am dam zohot fa ve data faasi, “Ame koei labe am data am tame,” laham bak ozome debu bohulalelo ame maboe lam koei labe am vahadat modeo, am dubut modeo, fa vale,’ lahame Musat aham di iube labi toeme fi hasi iba esuhu bak.
29. Ne lahana iho etei vouholo modem im nim Oho nasi aimale. Amu di iube ame dam abo tujuh ehet. Datahida ame. Labi donida auoholehena ame. Labi domuàda ame. Labihasu ame dam tujuh labe dat datahida nam ab vaham. Labi ve modeha ame nam lam data faaha vabna dat ab eloham.
30. Labi ame maboe lam ame koei laba vi tusuhu dàt neo fa ab vaham. Labi ve modeha ame maboe lam data faaha vabna dat neo ab eloham. Labi ame maboe lam dat doni dàt neo fa ab vaham. Labi ve modeha ame maboe lam data faaha vabna dat neo ab eloham. Gi labihasu vou mode ledume dat domuàdate ab vou fuham. Labi vou fusi modeha gi neo ame baket modi ame maboe lam data faaha vabna dat neo ab eloham. Labiha ladume ame dam tujuh lam ahebu ab foli seteham.
32. Labi ame maboe lam ba neo ab vi eloham.”
33. Lahame ame Saduki dam labe iho ame im lam vouhome neàdi, “Im elom di ba fat ahedi usào?” laham bak lam tozolo Yesus bake neo vi ailo ab gagoham. “Làhà Oho lab gagoho bak lam, ‘Mei elom di fat ahedi usam bak,’ lahame Oho lab tu ozome gagoho im lam imbodemeam làhà ba diamut dam ahebu elodaha dam fat ahededume usnadam di lam ame dam tujuh labe ototo vaidume ba vi eloho nam lam Oho ozom, amam namet mode?”
34. Lahahat Yesusat fa ab gagoham. “Vabà! Um git ozo. Dam bakda ahebu bak niba azim di lahi vada. Labi lahit ihimo dat aho vamda gagu vada. Lahadam bak.
35. Lahana ba diamut Alat ozo, ‘Da lada lam am eloho bak labet Eho modi fa ahedi usam neàte,’ lahame Aho labi ozoho dam modeo, lahi modeo, lada zi lamota modi fat ahededume usnadume Alat azihi bak neà bak laba azim di ba meit neha, ‘Em nam valo mozo.’ Labi meit neha, ‘Em dat valo mozo,’ laham bak lam ba labi gagom vabak.
36. Labi laha ame bak laba azim di fa Alat Am im gagu vou usem dam lamti uloholehe labe ba neo elodam vabak. Labi laha Alat ame dam elodahada zi laba Aho modi fat ahededume usnadaha labe ab modi Am damalemam bak.
37. Uho vedi neha, ‘Dam elodaha dam labe im elodaha bak labe ba fat ahededume usnadam vabak,’ lahame git ozodam damat modem bak. Eho ozoha, uho Musat aham di iube toedume esuhu im lam vi aame ozodam vab damat modem bak. Aham di iube ut aabadehena buà lam vuat eludam bak Musat vi aadàmu aasuhat vua elum bak lam taho faali setem vabamu Musat le netàdi ab aasdamam. Labi aasdume modeha Alat am dae vua labe futoi Musa bake nehame vameadaha bak. ‘Em abo Abrahamti Isakti Yakubti labihasu Eho vuusuhu labe ame dam labe Eba vi ozome vou baedam Ala Em am bak.’ Lahame vameadahana toeme esuhu im lam uho mahate vi ozodam vab damat modem bak. Alat aham di iube lab gagoho bak lam ame dam làtela lam gi elodahanàme fat ahedi Aba vou baedam lahasuhu bak lam Aho vameadaha bak.
38. Labiham labe Eho vi ozom dam elodahada zi labe ba Ala bake vou baedam vab taia? Gi dam ahe damat ihimo Ala bake vou baeda taia? Alat ozomta ame dam elodahada zi lam gi ahe lahasuhu damat modem bak,” lahame Yesusat ab vameadaham.
39. Lahame labi vameadume modeha ame dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru totbaho labe iho Yesusat ame Saduki dam bake lab vameadaha im lam aime, “Ahole vahokeha,” lahame ozome Yesus bake gago, “Oho ame lab vameadaha im lam abo imbona vameadaho,” lahame ab gagoham.
40. Labi gagu modeha ame dam labe ladi ba Yesus bake fa li im vi aim bak ab moham.
41. Labi Yesusat neo ame dam zi laba neo vi vameada. “Damat akati modi ame Alat Gagu Fihasi Vimteme Oluhu Dat Boehàda laba im nehasu gagodàla? ‘Am abo boehàda Israel dam bake vuusdam dat ahamda amu gi eloi seteheda abo Daud labe am mekehàdat modem bak,’ lahame labi gagodàla?
42. Nehaha bak. Boehàda Daud aham di iube aho Ala Bake Vou Baedam Labe Ladeem Im Toedahana laba im meida nehi toehena ehe bak. ‘Na Debu Modehe Ala labe Aho fa eba vuusdam Boehàda laba gago, “Om Em ahi totbaho niba nusu Eba tau im dedateli dam vuusu im vahokedase. Labi Eho dam Oba fakemoholehe dam zi lam Eho ahit modi bedi fà Oba iedi uledi im Oboda fà aime meedase.” ’ Lahame Daud aham di iube labi toeme esuhu bak.
44. Daud ahamo Alat Ba Gagu Fihasi Vimteme Olulo Modemda Boehàda laba neha, ‘Eba vuusdam Boehàda,’ lahame labi gagodàmu ba akati meit Alat Gagu Fihasi Vimteme Oluhu Dat Boehàda laba neha, ‘Boehàda Daum mekehàda modem bak,’ lahame labi gagodàla? Labihameam làhà Alat Gagu Fihasi Vimteme Oluhu Dat Boehàda lam fa Boehàda Daud vafozi bisi feà Dateleheda Am taia?” lahame ab gagoham.
45. Lahame labi gagoha ame dam duada zi labe Yesusat lab vahokehe im aidam di labe Yesusat fa Aba vi tau meedam dam zi laba neo im vahokeda.
46. “Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru labe ibi iho meedam bak uba fa vizemo. Labiham bake um abo iademe it vou faovoi meedale. Ame guru zi labe ibi iho meedam bak gi nehadam bak. ‘Dam totbaho iba fà gut baedase,’ laham bak ozome sue sona ahoba dusumda bohuna duadume damat im vameadam bak tomba laba le it aai it aaidam labe deeli goom bak ame. Labi iho neo dam duana zi dokbuedam bak laba le damat fà, ‘Neàte,’ lahame iba gut gagom bake deeli meedam bak ame. Labi neo im Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di vedi dam feàda ihimo nusum bak laba deeli nusualadam meo bak ame. Labi laha na zi vaheme àlo modem di vedi dam feàda ihimo nusu na àm bak laba bisi netàdi vi tau nusu na àdam meo bak ame.
47. Labi laha maboe zi laba ahit neha, ‘Im om vou aasdalo mozo,’ laham dam labet vedi ahi vageme netàdi maboe nazoh fetehesu vi vadume dualem bak ame. Labi laha Ala bake tom gagodam di iho lab faina modehe bak lam vedi ahit vasti ihimo neà damali gi Ala bake la gagoi le gagoidam labe bohulaledam bak ame. Labihasu meedam damat modem labe Alat ba diamut ame dam laba, ‘Fà duana modi geàdase,’ lahame na asimbuna feà meeda tame,” lahame ab vahokedaham.
1. Labi Yesusat ame im lada lam vahokedume neàdi Aho Fihasi Ala Bake Vou Baedam Num Vàmteabu labe am ad oli aam bak tomba abo damat Ala bake lodamna vahedamnabu modesuhu bak laba netàdi nusu aidam di labe gut aaha dam na duada labe doi ibida Ala bake lolo modem doi vou li duadam bak laba vi aasda.
2. Labi neo gut aaha na vab maboe labe neo li aba aho Ala bake lolo modemna abo doi oona koena behàsu tembagat modehena ab vou li tau dusuham. Ame doi lam ozom di na vam biemna ozomomnat modem bak.
3. Yesusat ame bak lam aahemu Aba vi tau meedam dam laba ab vameadamam. “Eho etei uba gagolo modem im imboda nidi nim nasi aima. Na vab maboe labe aba aho etei Ala bake loho doi lamti dam duada labe ibi iho Ala bake lodaha doi lamti labihasu ozom di bisi na duana Ala bake lohona ozomomda gi maboe abada am bak. Neham bak.
4. Ame nazoh dua dam labe vedi doi dua totbaho iho naedamat vada. Labi gi totbaho Ala bake loda. Lahadam bak. Lahana nam maboena lam labiham kai. Ame maboe lam am na vab nam modemnàme abada gi ahebu loho bak. Aba aho modi ahedelo modem bak gi ab lu seteham bak,” lahame Yesusat ab vameadaham.
5. Labi ame di labe Yesus bake vi tau meedam dam labe ame Fihasi Ala Bake Vou Baedam Num Vàmteabu laba tom nabidume Yesus bake ab gagoham. “Guru oa, ame Num Vàmteabu nim Om aadào? Abo ke neànat modehe numat moz. Ame Num Vàmteabu niba damat Ala bake vahedaha nazoh nim abo na neàna taumahe làbohonat moz. Abo neàte,” lahame labi vou baedume modeha Yesusat fa ab vi gagoham.
6. “Uho etei lab aadamna lam bisi labaha bohu modesdam vabak. Ame ke mei ahoba vou vahe zihina zi lam ba fa faamome gi alimdi seddam bak,” lahame ab gagoham.
7. Lahame labi gagoha ame dam labe Yesus bake neo vi gago, “Guru oa, Oho etei lab vi ozome gagoho im lam adi diat modemna gagohela? Labi ame bak lam modelo modem diat amu ana nasi iba fet vouhoho bak iho aame ozo, ‘Ame bak lam ab modelo modem ame?’ lahame iho ana aame ozobohudela?”
8. Lahame labi gagoha Yesusat fa ab gagoham. “Iho bak niba esu meedam im zi ahebu ba novai vaitolo modem digat fuseo modem di lam amu im nehamda nasi meeda tame. Amu dam duada totbaho labe uba nasi li neha, ‘Em abo Alat Gagu Fihasi Vimteme Oluhu Dat Boehàda am tame.’ Labi, ‘Etei di nim Alat abo Boehàdateboli Aho dam bake deeli vame vuusu im vahokedalo modem di ab vou fuham tame,’ lahame uba li ahit vageme keobaedam bak ehete. Lahana ame dam labe uba li keobaedam im lam a aime tu vuzehemule.
9. Labi laha ame ba novai vaitolo modem digat fuseo modem di lam damat uba nasi li neha, ‘Dam bak kia bak ium ot fakiame ot belui ot beluidalo.’ Labi, ‘Dam bak ium dae gai feà zidam labe nohisi mei nazoh beluidalo.’ Labihasu meit uba nasi li vameadam bak ehete. Lahana uho im labihasuhuna aim di um ahu a bisi iedi vi ozodamule. Ame ba novai vaitom digat lam di labe taho fum vabak.”
10. Lahame labi vameadume afoezobe Yesusat neo vi susume vameada. “Ame ba novai vaitolo modem digat fuseo modem di labe im nehasu laha meeda tame. Dam debu fa vàmadiaha bak lamti dam debu fa vàmadiaha bak lamti ot fakiame ot belui ot beluidam bak ame. Labi bak amomoi vuusdam boehàda am damti bak amomoi vuusdam boehàda am damti labihasu ot fakiame ot belui ot beluidam bak ame.
11. Labi bak iuba modeo, bak iuba modeo, balim feàna nigome dam beodume foedam bak ame. Labi bak iuba modeo, bak iuba modeo, di neà faasi bak aotbali na debe soali àm vabili idoali ibzidume dam elodam bak ame. Labi bak iuba modeo, bak iuba modeo, gailem bak vou vizealamna modi ket vua dou fi hiludam bakti ulohona vou vizialadam bak ame. Labi laha asum laba damat fet aame iedemna im amu aam vabna feà damat aadam bak ame. Labihasu ahamte faasi meedam im zi am bak.
12. Ame im zi lam ahebu meedalo modem di labe uho Eba tu vuzehi vi tau meedam damat modemu uba nehada tame. Yahudi dam labe ibi iho tu vuzehi meedam bak gagu faheme modiam dam labe fa uba faki vabidume fai baket meedam bak ame. Labi laha uba fakemoholehe dam labe um siàdume fa uhumo fi hasi bakamta vahi Alat vameadaha im ahamda dogoit aidam bakti im meiti meedam num laba vou le ame num vuusdam dam labe uba uloodume ame im aihizobe dam amomoi gagu um si mei ousu teudem num laba um oumahedam bak ame. Labi laha uho Eba tu vuzehi vi tau meedam damat modemu uba fakemoholehe dam labe ozo, ‘Im boehàda zi labe laha dam nim uloodume vi aime beodase,’ laham bak laba ozome um siàdume bak ahaladiame vuusuidam boehàdatebo zi lamti dam eeda zi lamti laham dam laba vou le duzu uba uloodume aidam bak ame.
13. Lahana ame bak lam meedam di a iedemule. Neham bak. Damat uba lab meedam bak labet modi Ebe Eho meedam im lam uho fi desi tombalem di am bak. Uho modi tombalehe labe fa ame Roma boehàda zi lamti Yahudi damat modem vab dam totbaho lamti iho fa aime ozobohudem bak am bak.
14. Ame dam labe uba tet uloodalo modem di labe uho dam laba fa veibadam bak lam, ‘Iho im akatihasu fa vi gagoela?’ laham bak a bisi àvodi vi ozodamule. Gi ahu keahumtedesu vou faodale.
15. Damat uba uloodam di labe uho fa gagom dae lam Ehemo uba modi ozobohudi fi gatehe labe uho ame bak lam gagodam bak. Uho lab gagodam dae lam uba fakemoholehe dam labe ba uba ot vai dae meoli vi daetesu gagom vabak.
16. Labi laha ame di labe uho Eba tu vuzehi vi tau meedam damat modemu dam duadat uba faki im nehasu meeda tame. Um aiti oiti modeo, ubu meidam modeo, um ame dam modeo, um ot vou aliam dam modeo, laham dam Eba tu vuzehi meedaha vab dam labe laha um fa vou fohome meia gagu si ame eeda zi laba vou ladume ub loda tame. Labi um dam totbaho lam ame eeda zi labe im meo dam laba gagu um odda tame.
18. Lahana um eloi it oazehena lam ba Alati vaitesum vaba gi Amti vahi ahe neàna bohu vuusdam bak.
19. Ame na uba lab vabidamna zi lam uba modi bedi Eba tu vuzehem bak voomna zohàme abo mahate keàtedi Eba tu vuzehi meedale. Uho labi meedameam làhà um abo gi Alati vahi ahe neàna bohu vuusda tame,” lahame Yesusat ab vameadaham.
20. Lahame labi vameadume neàdi Yesusat neo vi susume vameada. “Um nasi aimale. Dam ahamda Alat vameadaha im aime fa dam bake ahate vameaidaha dam labe aham di iube neha, ‘Kota Yerusalem laba vahi azim dam labe iho faina meedàmu Alat faki ame dam lam beoda tame,’ lahame amu nasi fet toeme esuhu bak lam abo modi imbodem di fuhuzobe abo neham bak. Yahudi dam bake fakem dam labe im meo damat kota Yerusalem dam labe im numti ahiledou vabousuhu bak lam uho aa tame. Uho aameam làhà nehame vi ozoda tame. ‘Kota Yerusalem dam lam im num lamti ahebu beodume foli seddam bak ab fuhame?’ laham bak um ab ozobohudemam bak. Labiham bake um Yudea bak laba azim dam labe uho laba a esdamule. Um foli seddam bak labna zohàme ahedem bak laba ozome gi taho sibu bak laba iitaole. Labi ame Yudea bak labe aba zoho kota Yerusalem laba vahi azim dam labe laha num debu ibida vou esmozi iitaole. Labi laha kota Yerusalem bàhàgo bak laba na meedam dam labe a, ‘Imo fa li ahedese,’ laham bak lam a ozome fa lemule. Gi bak iuba iitaole.
23. Ame di labe Yahudi dam labe iho faina meedàmu Alat faki ame Yahudi damat azihi bak lam ahebu gi fai bak tadehemu beodam bak lam akati modelo. Aiee! Lahana lahi zubuleheda zi lamti data tatvamda do àm lahasuhuda eheda zi lamti iitaom vanamam bak akati modelo. Làhà gi emoem vabilemnàme taho ozahit betea iitaole.
24. Ame Yahudi dam bake fakemoholehe dam labe lab meedam di labe Yahudi dam totbaho gi ae tot mo tot mo lahamna labe oddume voeda. Labi dam totbaho gi tet siàdume fa bak mei bake vou ladume sedda. Labihada tame. Labi ame lab meedam di labe dam debu mei vàmadi vàmadiaha bak abo Ala biem dam labe iho Yahudi dam labe ibi iho azihi kota Yerusalem laba veimai naedamali fa Yahudi dam laba vou vabeotedamehamdi fai baket vou meedume Alat amu neha, ‘Vaitom di am tame,’ lahame fet gagu esuhu bak fum di labe ab vaitomam tame,” lahame Yesusat fet ab vameadume esuham.
25. Labi Yesusat neo susume vi vameada. “Labihadam di labe neo nehadam bak aada tame. Asum ahoba iuba tom aam di ala digaddati ala usehedati falo ziti asum bak ium ahebu damat amu fet aame ozobohudemna ba modesu tame. Labi laha nehada tame. Damat bak iuba aimeam itea feàna labe am dae feàna muudam bak aida. Labi laha ame itea labe vao bahot fi tauledam labe foadam bak laha aida. Labihada. Labihadam labe dam bake azim dam ahebu ahu gukedume faa dododume, ‘Im akati modela?’ lahame vabi vi ozoda tame.
26. Ala digaddati ala usehedati falo ziti asum bak ium ahebu ibi amu neàt modesuhu bak lam fa vei seti ihevoulai ihevoulaidam bak lam damat fet aadume vi ozo, ‘Im bak niba baka ana im modelo labihahela?’ lahame ahu faidi feà bak fuhu labe im ozom bakti bili ahu faidi setehe labe ahu nasi fet boloda tame.
27. Labi ame di labe damat tom aam di Em Abo Asum Ahoba Iubet Bak Niba Li Dateleheda Em Aiat Am na fauha meona fako iedemna ogatei modealaha bak lam fa Eba modi vizi feà Dateli uloti nom vousdam bak lam damat aada tame.
28. Eho etei lab vameadaha im zi lam faasi modelo meedam di lam dam bake esuhu dam nibe bisi fai bak tadi vabidam bak lam Alat ab vausdalo modemam tame. Labiham bake um a bisi ladi ohu nom bohusdamule. Um fa ohu vousai ahulat deeli vou faodale,” lahame Yesusat fet ab vameadaham.
29. Labi Yesusat neo susume nehame vi fi koada. “Uho ut araso lamti ut oo valemda so amomoi lamti ut labe modem bak laba vi ozodale.
30. Ame ut labe bak ibi bak niba et nakbedem bak damat aadam di nehi ozom bak. ‘Ab di neà faalo modem ame?’ laham bak iho aame ozobohudem bak am.
31. Labi laha Eho etei lab fet vameadaha im zi lam modesum bak uho aameam làhà uho nehi ozom bak am bak. ‘Alat Eba modi Boehàdateboli Eho fa li Am damalehe dam zi lam vazisi vuusu im vahokedam bak lam ab fuseo vabalehame?’ laham bak uho vi ozobohudem bak am bak.
32. Nasi aima. Eho etei uba gagolo modem im imboda nidi nim mahate tu vi ozodam bohu meedale. Eho etei lab vameadaha im zi lam ahebu meedume neàdehe vabna um eteida nim ahe lahasuhuna ame im zi lam imbodehe bak aadume neàdi ba eloda tame.
33. Asumti asum ahoba iuba modealahana zi lamti labi bak nimti bak niba modealahana zi nimti labihasu ahebu ba beodume foedume sedda tame. Lahana Ebe Eho vameadam im zi lam ahebu ba setem vabak. Gi labaha bohu vuusdume imbodedam imot modem bak,” lahame Yesusat fet ab vameadaham.
34. Lahame labi vahokedume neàdi Yesusat neo im meida vi vahokeda. “Eho ba fa lem diat gi neham bak. Damat felik vààsu dohot vabi duzu sim bakti ulohona modehe labe dam bakda ahebu gi vabiem di labe Em taho fa lem bak. Labiham bake um iademe it vou faovoi ozodale. A bisi dihasi vao meona uddume bak bi bobidam labe ostame la gagoi le gagoidume ahusobuli igeao. Labi dihasi neo ame baket neo vi meeda. Uho etei bak niba esdam di uba modi neàdemna, ‘Modem vabna ozomo?’ lahame a bisi dihasi vi ozo. Labi dihasi neo vi ozo. A bisi labihadamule. Uho labihasu ahu fi goaitoi meedam di labe Em ba taho lem bake uho vabilemna zohàme Eho uba neha, ‘Iademe mahate it vou faovoi ozodale,’ lahame gagodam bak.
36. Labi it vou faovoi ozodam labe mahate Ala bake tom gagodale. Neham bak. Ubu uho amu neà bak esdam bak lam fa veimdi vàhàdeme meedam di labe um ahu iedehe vaba gi ahe neàt lahasu vou meedume vaitom bake mahate tom gagodale. Labi laha Em Abo Asum Ahoba Iubet Bak Niba Li Dateleheda nim Em ba Boehàdateboli fa li dam vuusu im vahokedalo modem diat Eho uba gagu aidalo modem di labe uho gi ladem vaba teut Eba li duzum bake laha mahate tom gagodale,” lahame ab vahokedaham.
37. Labi Yesusat kota Yerusalem laba le aidam di lam Am gi nehada. Amu digad di lam ame Fihasi Ala Bake Vou Baedam Num Vàmteabu labe am ad oli aam bak tomba laba le dam bake vahokeda. Labi disidam di labe fa Zaitun Dee Dozeadaha Bak Buzoho laba laisi izi fa lezida. Labihada.
38. Labihadam di labe dam totbaho dua bak di fi zeadam diat Yesusat im vahokem bak vi ailo ame Num laba valada. Labi dihasi dihambe neo ame im lam vi ailo neo ame Num laba valada. Labihada.
1. Labihadam di labe Yahudi dam bada nibe im tai ahobada zi labe Im Adam Datahida Alat Oddaha Vabat Labohotehe Bake Vi Ozome Roti Fikidehe Vabna Àme Iziam di ee gagom Paskah lam neo fa ab vou fuseo vabaleham.
2. Labi fuseo modem di labe damat Ala bake lomna ve vua vahudam toheda zi laba vuusu im vameame faheme modiam dam lamti Musat toedaha Im Feàna lam ozobohudi fa meia vahokedam guru zi lamti laham dam labe vahi, “Im Yesus akati modi otela?” lahame dam dua totbahot aam zohàme iedi gi aa odoada.
3. Labihadam di lam Yudas abo am ee meida Iskariot lahamda lam abo Yesusat Aho Am im gagu oluiam dam dua belas labe dat meida lam Iblisit am ahu laba ab veimaham.
4. Lahamda labe am ahu Iblisit veimaha labe aho ame toheda zi laba vuusu im vameame faheme modiam dam lamti Fihasi Ala Bake Vou Baedam Num Vàmteabu laba vou aasdam damti laham dam laba le, “Aho akatihasu modi Yesus vou fohome ame dam laba ub loela?” laham bake aa ab le odoadaham.
5. Labi aa le odoadahemu ame dam labe Yudasat Yesus vou fohom bake deeli doi lolo ab gagu esuham.
6. Làhàmu Yudasat uledi ahu ab vàmadeham. Labi ahu vàmadi ahit neà dateli le, “Yesus adi diat vou fohome dam bake ub loela?” lahame gi vou faoda. Yesusat Ahamo fi ozem bak aahazobe vou fohome ame dam duada laba ub lom bak ozome vou faoda.
7. Labiham di labe vou faodameilahit Yahudi dam vahi ame Roti Fikidehe Vabna Àme Iziam di ab vou fuham. Labi ame di lam izidume modeha damat ame Paskah vi ozome àlo modem domba otem digat ab vou fuham.
8. Labihàmu Yesusat Petrusti Yohanesti ab gagu oluham. “Um nasi le ibi iho Paskah àmna lam le modeme vaheme esule.”
9. Lahame gagoha dam labe fa gago, “Ne, iho ake le modeme vaheme ahumdi esuela?”
10. Lahahat Yesusat fa ab vi gagoham. “Uho kota Yerusalem laba lefusi duzu aameam dat vao noai vou lemda omti ot gausiamda labe lam bak laba uho am ohuse vi duzu vulale. Uho laba vi duzu vulame aameam num da labe aho olemda laba um laba vi olele.
11. Labi vi oli num deda laba nehi gagole. ‘Im gurut oba neha, “Aho amu oba Paskah fum diat Am damti vahi na àdam bak gagu esuhu bak akete?” lahaho.’
12. Uho labi gagomeam làhà dat num deda labe um vou le am num zuhuba baa duana lam gi vabieme neàdi esdamna le aam bak. Uho gi ame tom fi hababu laba ibi iho ame bak vi ozome vahi àmna lam laba modeme vahedale,” lahame ab gagu oluham.
13. Làhàmu ame dam behàsu labe kota Yerusalem laba le aaha Yesusat lab gagoho bak lam abo imbona le aa. Làhàmu ame Paskah vi ozome àdamna lam modeme vahedume ahumdi ab esuham.
14. Labi ame na lam àm bak fuhemu Yesusat Aho gagu olu Am im vameadume esmozi laiam dam dua belas lamti vahi na modeme vahehe bak laba ab laham. Labi le vahi ame na lam ab faasi àdamam.
15. Labi na àlo modem di labe Yesusat Aba vi tau meedam dam laba vameada. “Em geàdam bakti lahadaleàmu ibi iho Paskah vi ozome àmna etei nib àlo modemda nimota uba tau àdalo àhàkeha. Labi Em ba geàda tame.
16. Labi em etei na nib tau àhà tadi ba diamut Alat Eba modi Boehàdateboli Am damalehe dam zi laba abobo vuusu im vahokedam di labe ba àm bakti gagom kaio. Di lam Alat dam bake abobo soat vausu fa vei neàdem di am tame,” lahame ab vameadaham.
17. Labi vameadume neàdi Yesusat neo anggur oo vaksa mokzoho fedehena ve Am Ai Ala bake, “Neàte,” lahame tom gagu neàdi dat meidate lu vuusu vameada. “Uho ame anggur oo vaksa nim um ahebu uddam labe ototo vaidale,” lahame gagu neàdi dam ahebu ab otot udidamam.
18. Labihadam di labe Yesusat neo vi vameada. “Iho etei vahi uddam anggur oo vaksa nim Em etei nib udehe tade tame. Lahana ba diamut Alat Eba modi Boehàdateboli dam bake abobo vuusu im vahokedam di labe ba udem bakti gagom kaio.”
19. Labi gagu neàdi Yesusat neo roti ve Am Ai Ala bake, “Neàte,” lahame tom gagu neàdi ame rotibu lam agube faheme Am dam bake ab lodaham. Lodam labe vameada. “Roti nim Em so am tame. Em so nim Eho ahit uledi damat oteme um gohalemna am tame. Uho roti nim àm di Eba vi ozome àdale,” lahame agube ab àdaham.
20. Labi ame anggur vaksa lam ude. Labi roti lam à. Labihadume neàdi Yesusat anggur vaksa mokzoho fedehena meida neo ve Ala bake, “Neàte,” lahame tom gagu neàdi dam bake lu uddam di labe vameada. “Iho etei uddam anggur oo vaksa nim nehi vi ozomna vaksa am tame. Amu Alat dam amudate gagu gohalemna lam fa vei seti etei nim Em vasea veàtolo modemna nim um gohalemna Alat ab modi gàhàdeham bak. Laham bake vi ozomna vaksa am tame.
21. Lahana dat Em vou foholo modemda etei Eba niba na tau àdam bak.
22. Lahana gi labihasule. Em Abo Asum Ahoba Iubet Bak Niba Li Dateleheda nim Alat amu Eba neha, ‘Elo tame,’ lahame gagu oluhu labe ame bak ab modelo modemam bak. Aiee! Lahana ame da Em vou foholo modem bak feidam vabate. Ame da nim Alat ba gi fai bak bohu tadelo modemda am bak.”
23. Lahame labi gagoha Aba vi tau meedam dam nibe aime ihimo aa ab ot gagoiadamam. “Uho ozom, Yesusat etei lab gagoho bak lam amat modelo modem im ozome gagohela?” lahame ab ot gagoiaham.
24. Labi ot gagoiame neàdi ame dam labe ihimo fa neo im amomoi faasi daet beàdam labe nehame otesi otesida. “Im meidavat amat bisi feà dateli damat iba vou baedàla?” lahame otesi otesida.
25. Lahame ame dam labe labi otesi otesidàmu Yesusat Aba vi tau meedam dam laba im ab vahokedamam. “Um ozobohuna taia? Yahudi damat modem vab dam labe vedi, ‘Im abo feàte,’ lahame iho vuusdam dam laba tet ootedam labe im vahokedam di gi dae meobeat vahokedam meo bak. Labi im ee dam labe iho vuusdam dam laba teubeat vuusdam labe iho neha, ‘Im meia faobekesi vausu vou aasdam dam im am bak,’ lahame it daetbadam meo damat modem bak.
26. Lahana um ba a labihadamule. Uho meidavat ee feàda taluhuda gi nehame it ozome meedale. ‘Em bisi feà dàt modem vabak,’ laham bak lam uho labi it ozodume fa feà vab damalele. Labi laha uho meidavat boehàdateli meia im vahokedamda gi nehame it ozome meedale. ‘Em gi na meedam dateli meit na abada gagom di eho fa modese,’ laham bak lam uho labi it ozodume fa na meedam damalele.
27. Neham bak vi ozodale. Uho ozom, dam nehame meedam dam dat adida, ‘Bisi feàda am tame,’ lahame ozoela? Dam nusu meit lohona ahum ve àmda lam bisi feàda modemda ameo? Laham vabameam dam na lodamda lam bisi feàda modemda ameo? Um dam adida, ‘Bisi feàda am tame,’ lahame labi vi ozoela? Uho bak damat ozomta, ‘Dam nusu meit lohona ahum ve àmda lam bisi feàda am bak,’ lahame labi ozom dam taia? Lahana Em ba labiham vabak. Em umti vahi godam di gi nehame meedam bak. Em gi meia na lodam damat meedam bakti ulohona meedam bak,” lahame ab gagoham.
28. Labi gagu neàdi Yesusat im meida neo vi vameada. “Meit Eba fai bak meedaha di lam uho gi Eba amu tu vuzehehe bak lahasu bohu vuusdam bak. Uho Em mu vooho vabak.
29. Uho labihasu meedaha bake gohali Eho uba nehame meedalo mozo. Ba diamut Em Aiat Eba modi Boehàdateboli Am damalehe dam zi laba vuusu im vahokedam di labe umti Emti vahi nusu na àdalo modem bak ame. Labi um laha boehà damali fa boehàdat ahamo nusu meia im vahokedalo nusumna feàda dua belas amomoi laba nusualadume dat ahamda Israel labe aho vou faat lehe dam debu dua belas laba faheme ahala vuusuiame im vahokedam bak ame. Labihasu modelo modem bake Eho uba modi um naedamalelo modem bak. Abo Em Ai Aba Aho amu Eba nehame fet gagu esu, ‘Oho ba diamut dam vuusu im vahokedale,’ lahame amu Eba labi fet gagu oluhu labe Eho fa naedateli fa neo uba ahit modi um naedamalelo modem bak,” lahame Yesusat fet vameadume ab esuham.
31. Lahame labi fet vameadume esu neàdi Yesusat Petrus bake gago, “Simon oa, Eho etei oba vameadalo modem im nim mahate aile. Iblisit um ahu ozolo Ala bake le, ‘Dam labe im ahu eho modi ozom neào?’ lahame gagu aiha Alat uledehe bak.
32. Lahana om Eba tu vuzehehe bak voou setem bak labna zohàme Eho Em Ai bake neha, ‘Petrus Eba tu vuzehehe bak lam a voou seti abehamdemule,’ lahame Em Ai bake tom gagoho bak. Labi om Eba tu vuzehehe bak voou seti ba fa vi ozome fa vei neàdi teudi fa Eba tu vuzehem di labe om dam totbaho niba laha, ‘Um mahate teudi Eba tu vuzehele,’ lahame labi vahokedale.”
33. Lahame labi gagoha Petrusat fa gago, “Vabà! Dat Boehàda oa, em ba Oba tuhu bak voou setem vabak. Meit Om si fa meit faina modehemu si ousu simtedem num laba ousumeam làhà em tau si ousum neà bak. Labi meit Om otemeam làhà em laha tau otem neà bak.”
34. Lahahat Yesusat fa ab gagoham. “Vabà! Petrus om ba labiham vabak. Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi tem veibam bak làtelademeam kuk ab aaumam tame,” lahame ab fet gagu esuham.
35. Lahame labi gagu neàdi Yesusat dam laba neo vi ailo gago, “Eho amu uba neha, ‘Em Im Neàna nim meia vou vameatedale,’ lahame uba amu gagu oluhu di lam, ‘Um doi dekti um na àmna dekti um sepatu meidati uho a vou lamule,’ lahame Eho amu uba lab mali gagu oluhu bak laba uho vi ozodale. Uho bak iuba le meedaha di lam nazoh vabna vou meedume izidào? Na àme im vabna vou meedume izidào?” Lahame dam laba labi vi ailo gagu modeha ame dam labe fa gago, “Vab. Im di lam na vabalehe vabak. Abo na ehe bak.”
36. Lahame labi gagu modeha Aho ame dam laba neo vi gago, “Lo, di lamota neà bak. Lahana damat etei di nibe faasi Eba vi ozodam bak fa veimdi Eba vabidaha labe damat laha ame baket neo uba vabidam bak. Nehaha bak. Alat Gagu Fihasi Vimteme Oluhu Dat Boehàda nibe Eho meedam im lam dat ahamda Yesaya labe aho nasi ozobohudi Alat aba vameadaha im nehi fet toeme esuhu bak. ‘Ame Da lam ozom di faina meedamda meida ozomomda Am am bak.’ Lahame Alat Vameadaha Im Toedahana laba labihasu fet toeme vàmadi esuhu labe etei nibe ame bak ab imbodelo modemam bak. Damat Eba modelo modem im nim Yesayat lab fet toeme esuhu im lam abo modem bak. Ba modehe vaba mom vabak. Labiham bake um doi dek modeo, um na àmna dek modeo, uho lam bak laba vou gohatedale. Labi um ae tot mo tot mo lahamna vabda abo ame ae valo modem doi laha vabalemeam làhà sue sona ahoba dusumda ubuda meia lu doit ve fa ame ae lam vadale,” lahame ahit Am dam laba damat ba fai baket vou vabidume im ahu bedem bak labna zohàme ahit nazoh laba gi vàlu gagoho bak.
38. Lahame labi gagu modeha Aba vi tau meedam dam labe vedi Yesusat iba gi ahu teudem bake gagoho bak lam vabili vedi abo ae laba gagoho tiba ab vi gagoham. “Boehàda oa, ne ame ae behàsu neam taia?” Lahame labi gagohemu Yesusat ozo, “Dam labe git ozoho bak,” làhàmu ab vi gagoham. “Neàde. Ba a gagom. Gi labihasule,” lahame ab gagoham.
39. Labi gagu neàdi fa futoi kota Yerusalem vou esmozi neo Zaitun Dee Dozeadaha Bak Buzoho laba Aba Aho le izi fa leiam bake neo tom la. Aba vi tau meedam dam laha tau vula.
40. Labi le Yesusat Aba Aho amu odosidam bake fusi dam niba ab gagoham. “Iblisit uba li, ‘Um faina modem bak modeo,’ laham bak um ahu ozolo modem di, ‘Um ahu a bedemule,’ laham bak mahate Ala bake tom gagodale.”
41. Lahame gagu neàdi Yesusat dam lam vou esmozi Ahamo iumà iuba le abo ke dom di ket le biti novam iuba vaitesu ogomasu ab tom gagodamam.
42. “Ai oa, em geàdalo modem bak nim Oho fa faatoi vei setem neào?” lahame gagu ozoha vabamu fa neo gago, “Vabo. Ebe Eho ozom bak fa feidate. Gi Obo Oho ozoho baket modem neàte,” lahame ab tom gagoham. [
43. Labi tom gagodume modeha Alat Am im gagu vou usemda asum ahoba iube usi Yesus Am obe laba duzu Yesus bake vabededume modi teudeda.
44. Labi modeha Am ahu faidi feà bak fusi admahi setehe labe neo bisteat ab tom gagodamam. Labi tom gagodume modeha ab nuhateham. Labi nuhateme vao fefeaha labe gi vasea babam bakti ulohona bake babada.]
45. Labi tom gagodume neàdi usai Aba vi tau meedam dam laba fa li aaha dam ahu faidi feà bak fuhu labe gi idao.
46. Làhàmu Yesusat ukeme neha, “Um baka ana idaoela? Taho usnadale. Iblisit uba li, ‘Um faina modem bak modeo,’ laham bak um ahu modi ozolo modem di um ahu a bedemule. Abo mahate it vou faovoi Ala bake tom gagodale.”
47. Lahame Yesusat gi etei vameadam lahasuhu di labe Aba vi tau meedam dam dua belas meida Yudas lam aho dam zi vihitoi Yesus bake ab le omsuham. Labi Yudasat im Yahudi damat meia tàm di oode totti totti tomoamdem bak lam aho Yesus bake modi, “Am abo neàte,” laham bak ozome gagolo netàdi modeha Yesusat Ahamo ozobohudi ab gut gagoham. “Ne, Em Abo Asum Ahoba Iubet Bak Niba Li Dateleheda modem bak. Lahana Yudas oho akati ahit neà dateli Eba, ‘Neàte,’ lahame Em oode tomoamdehezobe dam duada zi labe vi aame ozobohudi, ‘Fà Em sise,’ lahame meedà?”
49. Lahame labi gagoha Aba vi tau meedam dam labe aaha ame dam duada labe Yesus silo modemu gago, “Dat boehàda oa, im dam lam ae tot mo tot mo lahamna nibe beom neào?”
50. Lahame labi gagohoilahit Aba vi tau meedamda meida nibe am ae goha dusuhuna vuu vihitoi Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am na meedamda meida lam beoha biou gi dogoi baa ahi totbahoda lam aet fu fatoi bake ab biteham.
51. Labihàmu Yesusat fa ab gagoham. “Aa! Ab neàdeham tame.” Lahame vi gagu mali Yesusat fa da labe am dogoi debu laba ulasi fa ab dogoileham.
52. Labi Yesusat neo dam Aba silo lehe dam zi laba abo damat Ala bake lomna ve vua vahudam toheda zi laba vuusu im vameame faheme modiam dam lamti Fihasi Ala Bake Vou Baedam Num Vàmteabu vou faovoi aasdam dam zi lamti Yahudi dam bake vuusu im vameame faheme modiam dam busaoda zi lamti labihasu ame dam zi laba im ab vahokedamam. “Um Em otelo vabeddamna akati Eho amu Fihasi Ala Bake Vou Baedam Num Vàmteabu labe am ad oli aam bak tomba laba le Eho Alam im vahokeme leidamehamdehena abo umti vahi meedamna akati ame di labe Em taho si otem vaba mode? Uho ozomta vedi Em dat aa li ausume mei beome im nazoh gelevai esmozi laiam dàt mode tiba uho etei aeti eobuti ab vou lehame? Lahana etei di nim meit Em sim bak nim Alat amu fet gagoho labe uho Em ab silo modemam bak. Labi ame di nim laha aibu bak vuusdamda Iblisit aho gagohona uba modi um uledehe di am bak,” lahame ab gagoham.
54. Labi gagu neàdi ame dam labe Yesus ab siham. Labi ame dam labe Yesus si vou duzu vou ladume Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am num feàda laba ab vou laham. Vou duzu vou ladam di labe Petrusat gi vaitesu ba aa vi duzu vulada.
55. Vuladume ame num feàda labe am ad oli aam bak tomba laba vi fusi aaha dam amu nasi Yesus vou laha dam labe ame num bak tomba laba bakamta nusualadume vuaga fi dda. Labihàmu am ba vule vi tau nusu.
56. Labi na modem nam soao nibe vua faut aaha Petrusat nusuhu bak aahemu li netàdi Petrus bake aasu ozodume ab gagoham. “Da nim ame Da laba vi tau meedamda am taia?”
57. Lahame gagoha Petrus fa vei iedi vasti veiba, “Vabo. Da lam em bielo.”
58. Labi gagu koena vou faodameilahit meit neo am alihi aame gago, “Om abo damat etei sihida laba vi tau meedamda meida am taia?” Lahame gagoha Petrus neha, “Vabo. Em ame da meida modem kaio.”
59. Labi gagu vou faodameilahit meit neo ozobohudi neàdi gago, “Mm, abo imbote. Da nim abo damat etei sihida laba vi tau meedamda meida am bak. Iho gi aho im gagom bak vi aim di am gi Galilea damat im gagom bakti uloho bak.”
60. Lahame labi gagoha am neo veiba, “Vabo. Oho etei gagoho bak lam em ozom bieho. Om abo gi ostam im gagoho,” lahame labi gagoha kuk ab aauham.
61. Labi Yesusat vaktesi Petrus bake abo bisteat ab aasuham. Aasuhemu Petrusat Yesusat aba amu fet gagoho bak lam ab vi ozobohudeham. “Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi tem veibam bak làtelademeam kuk ab aaumam tame,” lahame Yesusat aba amu fet gagoho bak lam ab vi ozobohudeham.
62. Làhàmu dam dua bak vou esmozi futoi iumà iuba le ahu faidi nom bohusu bisteat meb dae ab faaham.
63. Labi Yesus bake vou aasdam dam labe Yesus bake foadam labe ab tozodamam.
64. Labi tozodam di labe dam labe sue baa visoi Yesusat iba aam bak labna zohàme Am fako laba ab baguamdeham. Baguamdi neàdi meit fu tozome gago, “Hohoa. ‘Om Alat vameadaha im aime fa dam bake ahate vameaidahada am tame,’ lahamda Oho ozom, Oba amat beo. Taho iba fa gagole,” lahame meit vi fu tozome gago. Meit fu vi tozome gago. Lahada.
65. Labi ame dam labe laha Yesus bake ab vi feàtàomam.
66. Labi lab modehe bak lam usehet modeme ab vou dihaham. Labi dihasi Yahudit Ibi Iho Modem Im Gagu Vàmadi Esum Dam Debu lam abo damat Ala bake lomna ve vua vahudam toheda zi laba vuusu im vameame faheme modiam dam ame. Labi Musam Im Feàna zi ozobohudi fa meia vahokedam guru zi ame. Labihasu vahe vahedume im vameadam bak tomba laba ab nusualadaham. Labi nusualadume neàdi Yesus si vou dozom dam labe neo Yesus vuusu vou ubahi ame dam eeda labe avaelaha tomba laba ab vou duzuham.
67. Labi vou duzu neàdi ame dam zi labe Yesus bake gago, “Om, ‘Alat Gagu Fihasi Vimteme Oluhu Dat Boehàda am tame,’ laham bak lam imbodemeam làhà taho gagu vàmadi esule.” Lahame labi gagoha Yesusat fa gago, “Eho ame bak uba gagomeam um gi ailahigeàmom bak. Um ame bak lam ba vuzehem vabak.
68. Labi Eho fa uba gagu vi ailo modemeam um ba làhàme Eba im vi gagom vabak.
69. Lahana Em gi fa im nidi nim nehi gagolo. Ba diamut Em Abo Asum Ahoba Iubet Bak Niba Li Dateleheda nim uho Eba aam di Em gi feà Dateli Ala Bisi Feàda labe Am ahi totbaho laba tau nusu na ahebu vuusdam bak lam uho ba aa tame.”
70. Lahame labi gagoha ame dam labe fa vi ailo gago, “Làhà Om abo Alam Adat mode?” Lahame labi gagoha Yesusat fa gago, “Lo. Uho gagoho bak lam imbo bak. Em ame Da am bak.”
71. Lahame labi gagoha ame dam labe ihimo fa ab ot gagoidamam. “Um aim vaba? Da nim gi Ala bake feàtàhà bak. Aho vedi, ‘Amti Alati ulohote,’ lahame gagoho bak lam uhumo ab vi aiham taia? Ba akati meit neo li vàlu gagom im lam iho aie? Dat naeda labe Ahamo ab it gagu vàmadeham bak,” lahame ab ot gagoiaham.
1. Labi ot gagoiame neàdi ame Yahudit Ibi Iho Modem Im Gagu Vàmadi Esum Dam Debu lam usnadume Yesus vou duzu Gubernur Pilatus bake ab vou laham.
2. Labi Pilatus bake vou le vou dozom labe iho Yesus bake vàluhu im fa Pilatus bake vameada. “Iho Da nibe Aho vahokedam im aiha abo im Yahudi dam niba Aho git vahokedam bak. Aho vedi neha, ‘Meit teo vi vaiam doi pajak lam Kaisarleheda laba a lodamule,’ lahame iba Yahudi dama gagome lom malemda am tame. Am laha neha, ‘Em abo Alat Gagu Fihasi Vimteme Oluhu Dat Boehàda am bak,’ lahame vameadamda am tame. Lahame git vahokedam bak iho aihi bak,” lahame Yesus bake vàluhu im lam Pilatus bake ab vameadaham.
3. Labi vameadume modeha Pilatus labe fa Yesus bake vi ailo gago, “Imbo? Oho neha, ‘Em Yahudi dam debu vuusu im vahokedam boehàda am tame,’ lahame Oho labihasu gagodàmu damat Oba vàluhu bak lam imboo? Om ame da ameo?” Lahame labi gagoha Yesusat fa vi gago, “Lo, oho etei lab gagoho bak lam imbote. Em ame Da am bak.”
4. Yesusat labi gagohemu Pilatus fa ame damat Ala bake lomna ve vua vahudam toheda zi laba vuusu im vameame faheme modiam dam lamti dam duada totbaho zi lamti laham dam laba gago, “Eho Da nim uloome aiha, ‘Iba pemerintah bake git modehe bak vàmtea ehete,’ laham bak lam aihi vab labe ba eho gagu otem bieho.”
5. Lahame labi gagoha ame dam zi labe vahi meoli Yesus beolo àhàki bobodam labe neha. “Vabo. Imbona biehena. Ame Da nim Aho Yudea bak ahebu azihi dam laba Aba Aho lab vahokedam bak labet modi dam dua bak fa ahu ulededume dae gai ab dualeham bak. Abo Aho Galilea bak labe faasi vou vahoke ledume etei kota Yerusalem niba ab vou fuham bak,” lahame daetesu ab bobodamam.
6. Lahame labi daetesu bobodàmu Pilatus ame lab gagoho bak lam mu dam zi laba gago, “Da nim Galilea da modeo?” lahame gagoha dam zi labe gago, “Lo, Galilea dàt modem bak.”
7. Làhàmu Pilatusat ozo, “Yesus abo Galilea bak azim dam labe im Boehàda Herodes Antipas labe aho vuusu im vahokemda meida am bak,” laham bak lam Pilatus ab aime ozobohudeham. Labi ozobohudehe labe Pilatus dam zi niba ab gagoham. “Uho Yesus vuusu Boehàda Herodes bake vou lale,” lahame ab gagu oluham. Ame di lam Herodes laha kota Yerusalem niba teohet li aidamna modehe labe Herodes bake ab vou laham.
8. Labi vou le Yesusat amu meedaha im Herodes aihi labe aalo àhàki vou faodamna modehe labe Yesusam alihi etei gut aahemu ab deeleham. “Na damat ihimo modem biem im feàna meida Yesusat modem bak aho aase,” laham bak gi amu di iube aalo àhàki vou faoda.
9. Laham Dat ab vou fuhamemu Herodesat Yesus bake im mei im meime gut uloodaha Yesus ba dae bum kai.
10. Labi ame toheda zi laba vuusu im vameame faheme modiam dam lamti ame Im Feàna zi lam ozobohudi fa meia vahokedam guru zi lamti laham dam laba dozeadaha dam labe laha Yesus bake vàlu vei meoli feà bak fusi ab meedamam.
11. Labi Herodes am meo damti neo Yesus bake tozome feàtàida. Tozome feàtàidam labe Herodes am dam gagome boehàdat dusum sue sona bohu bisi feàda visoi Yesus Am soa gutaasu vi tozo, “Looo. Dam bake vuusu im vahokedam boehàda abo neàteee,” lahame vi tozome feàtàidume neàdi fa Pilatus bake ab oluham.
12. Labi ame digat lam Herodesti Pilatusti amu ot fakiam dam fa ab vaheham.
13. Labi Yesus fa Pilatus bake vou le Pilatus ame toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi lamti dam duada totbaho lamti laham dam zi lam gagome li bakamta ab dozeadaham.
14. Dozeadume neàdi Pilatusat ab gagoham. “Uho neha, ‘Da nim Aho Yahudi dam niba git vahokedam bak,’ lahame si eba vou leheda nim ame uho lab vàluhu bak lam eho um vou faodahit uloodume aiha ba labiham Dàt modem kaio.
15. Labi Herodesat laha neo uloome aiha, ‘Ba labiham dàt modem kaio,’ lahame fa eba oluhu bak. Ne, Da nim im modehena vabda ba akati eho gagome ote?
16. Làhàmu eho gi nehalo. Eho em dam gagome gi na sokba nasbe ahit alibulehena labe beome im vahokeme afoezobe fa isi olulo mozo,” lahame ab gagoham. [
17. Ame Roma dam zoho vuusdam gubernur labe aba aho tahun ahebu modi baleàlehe bak gi nehadam bak. Yahudi dam ibi iho na àme iziam bak abo Paskah fum di meit faina modehemu si ousu simtedem num laba oumahehe Yahudi dam meidavat isi olum meot. Ame gubernur aba aho modem bak am. Labiham labe Pilatus ame bak lam neo modelo Yesus isi olum bak ab gagoham.]
18. Ame di labe amu sel oumahehe dam dat meida Barabas laba ehet. Ame da Barabas lam aba aho amu im nehasu meedaha dàt moz. Amti am Yahudi dam totbaho lamti iho vazisi kota Yerusalem niba li dam totbaho gagome fàsi fa Kaisarleheda labe am Roma damti, “Beose,” lahame modi dae gai duzu mei otehemu ame Roma meo dam labe si sel oumaheda meida am bak. Labihàmu ame gubernur labe aba aho amu modi baleàlehe bak fa neo vou fuhemu dam duada zi labe ame num feàda labe am ad oli aam bak tomba laba vazisi neàdehezobe ab vi tauledamam. “Obo oho amu modehe baket neo modele.” Lahame labi gagoha Pilatusat fa vi ailo ab gagoham. “Em etei dat adida gagu vou futoi uba oluela? Barabas modeo? Yesus modeo? Dat adida eho gagu vou futoi uba oluela? Uho ame da gagole.” Lahahat ame dam zi labe neha, “Vabo. Yesus gi otele. Iba fa Barabas isi olule,” lahame ab gagodamam.
20. Ame dam zi labe, “Yesus fa otele,” lahame gagoha Pilatusat Yesus isi olulo àhàkehemu dam dua bak laba neo vatoheda. “Uho Da niba vàluhu bak lam imbo kaio.”
21. Lahame vatohedume modeha dam duada zi labe vedi fa daet meoleteme gago, “Yesus taho ut tetehesuhunaso laba esu paku dodume elole,” lahame ab meoledume gagoidamam.
22. Labi modeha Pilatusat neo gago, “Aa! Ne, akati labi mode? Da nim Am git modehe bak akete? Eho uloodume aiha Da nim faina modehe bak aihi vabna akati gagu ote? Eho gi, ‘Im vahokeme neàdese,’ laham bak ozome em meo dam gagome na sokba nasbe ahit alibulehena labe foadume geàdume neàdi isi olulo modem bak.”
23. Lahame labi gagoha ame dam duada zi labe Yesus gi ut tetehesuhunaso laba esu paku dolo àhàki meedàmu dae duali dae gai ab ziddamam. “Vabo. Gi om meo dam gagome ut tetehesuhunaso laba esu paku dodume elole,” lahame daetesu bobome ibi baket ab vaham.
24. Labi Pilatusat ozoha, dam duada zi labe daetesu dae gai ziddàmu fa dam lada labet ibi iho modelo àhàkehe baket ab modeham.
25. Damat neha, “Iba isi olule,” lahame gagohoda Barabas lam abo Roma pemerintah bake odosi mei otehemu sel ousuhuda lam ab isi oluham. Labi ame Yahudi dam duada zi labe ibi iho gagoho baket modelo Pilatusat Yesus am meo dam laba ub lu ame meo dam labe Yesus bake tet ooteme Am esu dolo modem ut tetehesuhunaso lam gagu Ahamo naedat vatu ab vou kea ladamam.
26. Labi ame meo dam labe Yesus lab vou ladam di labe dat ee gagom Simon abo Kireneda labe aho kota Yerusalem bàhàgo bak laba godam dàt fa kota bake ledamda ab ot tàhiaham. Ot tàhiame modeha Yesusat Am vanamai alihi nemahuhemu ame meo dam labe Simon bake gut ooteme Yesusat Aho vatu vou ladam ut tetehesuhunaso lam fa visoi fa Simon bake tet ab nom vatuham. Labi Simon ame utso lam vatu Yesusam ohuse vi duzu ab vou ladamam.
27. Labi vou ladam di labe dam duada zi totbaho laba vi dozeadume vulada. Labi laha laba vi tau laom lahi zi labe meb daeti mebe gagoidam labe vulada. Labihada.
28. Labihadume modeha Yesusat fa it vaktesi lahi zi laba ab it vameadamam. “Aiee! Um kota Yerusalem niba azim dam ba diamut dam amomoi labe uba beoda tame. Labi ame lab meedam di labe damat uba aame nehi gagoda tame. ‘Lahi maili zubulem vabiem lahi modeo, adam nibeso data faaha vaba soaoda modeo, data do fi suhu vab lahi modeo, laham lahi labe bisi deeli asimdem lahi am bak. Lahana lahi databeda zi im ahu faidi dehabalem lahi am bak,’ lahame gagoda tame. Labiham bake um kota Yerusalem laba vahi azim lahi zi Eba bisi a vou medaomule. Uho gi feidasi ame umti um datati ba meit uba modi fai bak tadem bake vi ozome medaole.
30. Uho gi neham bak ozodale. Ut duzuhuna nim damat ome dehalehe vabna vuat usimeam làhà uho ozom, ut amu ome dehaleheda akatihà. Gi neham bak. Abo vuat vizi eludume faalem bak. Ame bak lam gi neham bak. Damat Eba Da neàda niba nehi fai baket modehelahit uho ozom, um kota Yerusalem dam faina meedam dam laba ba diamut akatihà? Ba diamut fai bak feàna tadeda tame. Labiham bake ame di labe ame dam labet nehi gagodam bak. ‘Im ahe di nibe nasi fet modi elodase. Iba bak buzoho modeo, bitaha sibu feàda modeo, taho ilihi feàna gutidume nom ilu nasi im beodume baguamdedume seddase,’ lahame labi gagodam bak,” lahame Yesusat ab it vaktesi vameadaham.
32. Labi Yesus vou ladam di lam bisi faina meedam dam behàsu laha meo damat Yesusti amediat otelo vou duzu vou lada.
33. Labi vou ladume damat neha, “Ohu Fetahabu,” lahame taluhu bak laba vou fusi odosi ame meo damat Yesusam sue ahoba dusuhuda lam ab vome vihilaham. Labi vihilame neàdi ame ut tetehesuhunaso lam visoi bake esu afoezobe Yesus tom gaesu nom esu neàdi Am anekehà meida kidadesu paku do. Labi Am anekehà meida neo kidadesu paku do. Labi Am naba bakamta modesu paku do. Labihadume neàdi vi vuu vousai bak bumata ab nom zisuham. Labi zisu teudi neàdi ut tetehesuhunaso meida ahim neo visoi dam faina meedam dam ahim lam vame Yesusat modehe bakti ulohona modi paku dodume neàdi Yesusam anekehà ahi totti soi totti modesuhu obe laba bak bumata ab nom zisitdaham. [
34. Labihadume neàdi Yesusat Ala bake ab tom gagoham. “Ai oa, dam nim Em otelo meedam bak nim abo vabili Em otelo meedalo. Làhàmu Oho gi ozahigeàmu fa vei neàdele,” lahame ab tom gagoham.] Labi ame meo dam labe iho Yesusam so laba amu lab vihilaha sue lam, “Amat vaela?” lahame ibi iho fi mam baket modeme neàdi ab vadaham.
35. Labi damat Yesus bake paku lab dodam di labe dam duada zi totbaho gi obe laba dozeadume aasda. Lahana Yahudi dam bake vuusu im vameame faheme modiam dam busaoda zi labe vedi Yesus bake tozome feàtàida. “Ea, Da nim mei modi fa neàdemda ame? Akati Ahamo naedat taho it vabieme neàdem vaba mode? Da nim, ‘Am abo Alat Gagu Fihasi Vimteme Oluhu Dat Boehàda abo Alat fi me vahada am tame,’ lahamda nasi fa Ahamo usi neàdemeta,” lahame ab gagu feàtàidamam.
36. Labi ame meo dam labe laha anggur oo vaksa na meiti valiheme àhàkebulehena ve vou le Yesus bake tom fi si tom tozoda. “ ‘Om Yahudi dam vuusdam boehàda am tame,’ lahamda Ohomo usi neàdemeta,” lahame ab tozodaham.
38. Neham bak aahemu tozoda. Meit aame ozo, “Da nim ana im modehe bake damat vàlu otehela?” lahame damat ut gaheba ve nehi toeme Yesusam ohu vazidazi toma zoho laba taasu paku vi dou esuhu bak ehet. DA NIM ABO YAHUDI DAM VUUSU IM VAHOKEDAM BOEHÀDA AM TAME, lahame toeme ab taasu esuham bak. Labiha labe damat Yesus bake aame ab tozodamam.
39. Labi faina meedam dam behàsu laba vi tau taasdamda meida labe Yesus bake tozome gago, “Om, ‘Alat Gagu Fihasi Vimteme Oluhu Dat Boehàda am tame,’ laham bak imbomeam làhà Omti imti modi fa veimome neàdemeta. Labi im usdase.”
40. Lahame labi tozome gagoha dat meida labe mali gago, “Aa! Om akati Ala bake, ‘Am abo feàte,’ lahame ahu adat iedi gagom vaba vedi labi gagodà? Im ahim nim Amti vahi damat neha, ‘Fà beose,’ lahame gagu otelo modem bak om ozom vaba?
41. Im ahim nimota faina modehe labe damat gagu ab otelo meedamam bak. Lahana Da nidi nim faina modehe vabda damat gagu otelo modem bak om ozom vaba?”
42. Lahame dat meida laba im vi vahokeme neàdi fa neo Yesus bake ab gagoham. “Yesus oa, Oho eba aame faobekele. Oho ba Boehàdateboli dam bake vuusu im vahokedam bak fum di Om em a fa vabiemule. Oho eba it ozome neà bak modi esule.”
43. Lahame gagoha Yesusat fa gago, “Eho etei oba gagolo modem im nim nasi aime vuzehele. Etei Emti omti Firdaus abo bak neà bak laba fa vei ahilem bak,” lahame ab gagoham.
44. Gi labihadume ala tomaleha bak ahebu ala fauhaedam bak fa vei seti ab aibuleham. Ame lab aibulehe di labe Fihasi Ala Bake Vou Baedam Num Vàmteabu labe am donibu laba tetehesdam sue tamzohobuna baa lam laha ab fatahivaham. Labi aibulehemu vou faodameilahit ala vakidem bak fuha fa ab fauha neàdeham.
46. Labi fauha neàdi modeha Yesusat bisteat buteme ab geham. “Ai oa, Em eloi it oazehena nim Oho vale,” lahame bisteat geha Am ohem bak ab seteham. Labi ab fi sivai eloham.
47. Labi modeha ame meo dam zi labe iba vuusdamda boehàda lam abo Yesusat avaesdam totbaho laba duzuhuda labe aho Yesusat geme fi sivai eloho bak aahemu Ala bake ab vou baedamam. “Làhà imbote. Da nim git modehe vab dàt modem bak,” lahame Ala bake ab vou baedaham.
48. Labi dam dua zoho zi labe damat etei lab meedam bak lam aalo vahi bakamta dozeadaha dam labe ame bak lam aadahemu ahu faidi ahula it foidam labe foelamdidume fa im num bake ab ladaham.
49. Labi dam Yesus bake deeli vuusum dam zi lamti amu Galilea bak labe faasi Yesus bake tau godam labe na vou modetedume fa kota Yerusalem niba vou fuhu lahi zi lamti labihasu damat lab meedam bak laba vaitesu dozeadume ab aasdamam.
50. Labi ame di lam dat Yusufti ee fatahivahada labe Yesus koei visom bak ozome fa Pilatus bake gagu ailo ab laham. Ame da Yusuf lam aho Yahudi dam azihi bak labe abo Yudea bak labe am num debu meida Arimatea laba azihida am. Am abo neàda Alat Aba Aho gagoho im lam vuzehi vamdesu meedamda am. Am abo Alat Gagu Fihasi Vimteme Oluhu Dat Boehàda lam ba li dam bake vuusu im vahokedam bak lam, “Adi diat modela?” laham bak vou faodamda am. Labi ame da lam abo Yahudit Ibi Iho Modem Im Gagu Vàmadi Esum Dam Debu laba taumda meida am. Lahana ame Yahudi busaoda zi labe vazisi neha, “Yesus otem neàte,” lahame gagu otehe di lam daeta tauhu vabda vàmtea am.
52. Lahamda labe Yesus koei vam bak ozome Pilatus bake ab le gagoham. Le gagu aime Pilatus ab uledeham.
53. Làhàmu Yusuf sue fabebu vabna nasbelehena ee gagom linen ve am dam totbaho lamti fa lehe labe li Yesus paku doho bak laba zisi ame koeiso vi vuu vuazi vou usi aho vou lehe sue baana lam visoi Yesus koei ab giaham. Labi giame neàdi ke bumat alimda amu kebitem laba meit fet sime bumataeme esuhuna ahum laba Yesus koei lam ab vou oli esuham. Labi vou oli esu neàdi fa futoi ke baana am doo laba tusum ulohoda lam vou ogi ogialame tusu baguamdi esu neàdi ab vou esmozi ladaham.
54. Yusufat Yesus koei vou le esulo modem di labe amu Galilea labe Yesus bake tau lehe lahi labe iho vule vaitesu duzu vi aasda. Aasdam labe koei esum ke bumat aa. Labi Yusufat, “Koei akatihasu esuhela?” laham bak lam neo vi aa. Labihada. Ame koei esuhu di gi hari Jumat dimatali ala bozilehe di labe esu baguamde. Ame digat lam Yahudi dam labe ibi iho gi azibe im digat hari Sabat na modem vab digat zoho fuseo modemu dam na meedume ab vahedamam.
56. Labihàmu ame lahi lam ame bak lam aame neàdi fa im num bake ab leham. Fa li Yesus koeiso noilo ozohemu koei esum di noimna ahana neàna behàsu modeme ab vaheham. Labi vaheme neàdi vou izi dihasi hari Sabat modemu gi vaheme esu. Amu di iube Alat dat ahamda Musa bake neha, “Gi azibe im digat na a meedamule,” lahame gagu fi hasi esuhu labe ame bak lam voom mohemu gi vaheme ab esuham.
1. Labi usi behàsdi dihambe aibubet hari Minggu labe ame lahi koei noimna ahana neàna iho modeme vahehena ahum behàsu visoi Yesus koei esuhu ke bumat laba ab vou laham.
2. Vou le aaha ke baana baguamdehena lam aba amu modesuhu bak fa ogizi osoktoi modesda.
3. Làhàmu vi oli nabime aaha im Boehàda Yesus koei ba aam kai.
4. Labihàmu, “Koei akati modi setehela?” lahame dozeadume vi ozotedameam aaha Alat Am im gagu vou usem dam behàsu sue fako iedemna modesu ogatedam labe lahit dozeadaha obe laba duzuhuna ame lahi labe ab aaham.
5. Labi aame modeha lahi labe udovai iedi ogomaladume bake ab biddaham. Biddahemu ame dam behàsu labe ab gagoham. “Um mei ahedehena akati vabili koei bake nabitaoela?
6. Am nib kaio. Am eloho bak labet fa ahedi usaha bak. Amu umti Galilea bak laba tau godam di labe vameaha im laba uho vi ozodale. Nehi vameadahana taia?
7. ‘Asum Ahoba Iubet Bak Niba Li Dateleheda nim meit vou fohome dam faina meedam dam laba ub lu ve ut tetehesuhunaso laba esu paku dome eloi usi behàsdi eloho bak labet fa ahedi usa tame,’ lahame uba amu vameadahana taia?”
8. Lahame ab vameadaham. Labi etei lab usi vameadaha im lam ame lahi labe vi aime modeha Yesusat iba amu vameadaha bak lam fa ab it ozobohudeham.
9. Labi it ozobohudi futoi fa im num bake fa ab leham. Fa li Yesusat Aho Am im gagu oluiam dam sebelas lamti dam Yesus bake vi tau meedam dam amomoi zi lamti laham dam laba iho fakot aaha bak lamti iho aihi im lamti dam laba ab li vameadaham.
10. Ame im lam li vameadaha lahi neha: nam meida kota Magdala labe lehe Maria am. Labi nam meida Yohana am. Labi nam meida Yakobus faaha oi Maria am. Labi iba tau gohatem lahi totbaho am. Laham lahi labe dam laba ame im lam ab li vameadaham.
11. Labi im lam li vameadume neàdi modeha damat ozo, “Lahi lam ostam im vou leha,” lahame gi tozome moh.
12. Lahana Petrusat ozahit koei esuhu ke bumat aalo ab usai emoeham. Emoehe labe le ke bumat ozoho laba nom bohusu ub aasuha koei aam kai. Gi damat amu koeiso laba giame esuhu sue nasbe bohuta laba bisdamna ab aaham. Làhàmu fa ledam labe ozo, “Akati modehe im labihahela?” lahame vi ozo leda.
13. Labi ame digat labe Yesus bake vi tau meedam dam meida behàsu labe num debu Emaus laba lada. Kota Yerusalem labe Emaus bake lam di mahate kila vabak. Laham bak laba ab ladamam. Labi ladam di labe damat Yesus bake meedaha im lam ahebu vou vamea lada.
15. Labi vou vamea ladaha vabamu fa neo ot gagoi ot gagoia lada. Ot gagoi ot gagoia ladam di labe Yesusat ba nem futoi tau lada.
16. Lahana ame dam behàsu lam Da lam gi alihita aa. Lahana, “Yesusat modeo?” laham bak mahate ozom kai. Gi vabi vou vamea lada.
17. Labi Yesusat dam niba gago, “Um baka ana im ot gagoi ot gagoia ladàla?” Lahame vi gagoha dam behàsu nibe Yesus eloho bake vi ozome ahu faidi nom bohusu ab duzuham.
18. Duzuhu di labe dat meida Kleopasat ame Da laba ab gagoham. “Ne, Om damat kota Yerusalem laba etei meedaha im dam kota Yerusalem teohet li azibe laiam dam totbaho ahebu ozobohudehena Om vàmtea akati vabi modela?”
19. Lahame labi gagoha Yesusat fa gago, “Kota Yerusalem laba baka ana im meedaha bake labi gagoela?” Lahame labi gagoha da nibe fa gago, “Mm. Damat Yesus Nazaretdate meedaha im gagom bak. Da lam abo Alat vameadaha im aime fa dam bake ahate vameaidahada feàda am bak. Labi Alati dam duada zi lamti ame Da laba vi ozom di Am abo na damat ihimo modem biem im feàna modem meoda Am am bak. Labi Aho im vameadam di damat aime modem tademda am bak. Lahana damat Ala bake lomna ve vua vahudam toheda zi laba vuusu im vameame faheme modiam dam lamti Yahudi busaoda im ozobohuda zi lamti laham dam zi labe neha, ‘Yesus fà belu elose,’ lahame na asimbuna feà modelo Pilatus bake ub lu Pilatusat am meo dam laba gagu Yesus ut tetehesuhunaso laba esu paku dome ab eloham bak.
21. Ne, iho vedi dam mei debut im Yahudi dam siàdume vou esdam bak isi olumda Alat iba ahit oluhuda Am am tiba modeha ame dam labe ab oteham bak. Etei ame im lam modeme usi ab ahileham bak. Labi im lada lamota modehe vabak.
22. Imti vahi gohatehe lahi totbaho labe dihambe koei esuhu ke bumat laba le aaha koei aam kai. Làhàmu fa iba li vameada. ‘ “Yesus eloho bak labet Alat modi fa ahedi usaha,” laham im lam Alat Am im gagu vou usem dam behàsu labe usi duzu vameadamna im aaho,’ lahame labi vameadaha im lam im abo àvodehe bak.
24. Labihàmu im dam totbahot neo usai koei esuhu ke bumat laba emoeme le aaha lahit iba vameaha bak lam imbo laham bak ab aaham. Lahana ba Yesus koei aaha vabak,” lahame ame im lam ame Da laba ab vameadaham.
25. Labi vameadume neàdi modeha Yesusat dam behàsu niba gago, “Um akati ahusobuli mode? Um akati dam ahamda Alat vameadaha im aime fa dam bake ahate vameaidaha damat fet toedume esuhu im lam akati um ahu taho vi ozome ozobohudi vuzehem vaba mode?
26. Alat amu ozome esuhemu ame Alat Gagu Fihasi Vimteme Oluhu Dat Boehàda labe Aho amu nasi geàdume ba elom bak. Labi elohozobe ba neo Am eloho bak labet Alat modi fa ahedi usai asum ahoba iuba tom iluhuzobe Alat Aba, ‘Feàte,’ lahame vou baedam bak,” lahame ab gagoham.
27. Labi gagu neàdi dam ahamda zi labe iho Yesusat ba meedam im lam amu nasi fet ozobohudi Alat Vameadaha Im Toedahana laba toedume esuhu im zi lam ahebu ame dam behàsu biem bake Yesusat ab vou vahoke ladamam. Amu dat ahamda Musat toedume fi hasi esuhu Im Feàna zi lam nasi faasi vou vahoke ledume fa neo dam ahamda Alat vameadaha im aime fa dam bake ahate vameaidaha dam totbaho labe ibi iho toedume esuhu im lam faasi vou vahoke lada.
28. Labi vou vahoke ladume num debu Emaus laba fuseo modem di labe Yesusat Ahamo utasi Aba bake lasome modeha dam behàsu labe ame Da lam Ahamo lam bake mali gago, “Disilo mozo. Om iba tau li izi dihasi lam neàte.” Labihàmu Yesusat ab vi tau vulaham.
30. Labi Yesusat tau vule na àdam di labe Yesusat roti ve Ala bake tom gago, “Oho na nim modehe bak abo neàte,” lahame tom gagu neàdi agube dam behàsu laba ab lodaham.
31. Labi lu modeha dam labe Yesus vabi modem bak lam fa ab ozobohudeham. Labi ozobohudi modeha Yesus gi neàt na lodam dàt gi ab alimdi seteham.
32. Labihahemu ame dam behàsu àvodi ab ot gagoidamam. “Alat Vameadaha Im Toedahana lam iho biem bake Aho iba zie doni iuba vou vahoke ledam di lam im ahu gelevai tu vou ozo leda taia?” lahame ab ot gagoidaham.
33. Labi ot gagoiame neàdi usai kota Yerusalem fa ab leham. Fa li aaha Yesusat Aho gagu olu Am im vameadume esmozi laiam dam sebelas lamti Aba Aho vahokedam im ozobohudelo vi tau meedam dam totbaho lamti laba vahi esdam bak ab aaham.
34. Labihàmu ame dam duada nibe gut gago, “Imbote. Boehàda eloho bak labet fa ahedi usaha bak. Am alihi Simonat aaho.”
35. Lahame gut gagu neàdi dam behàsu labe iho Emaus lalo modehe di labe modehe im lamti labi Yesus vabi modemu Yesusat roti agube lodaha di labe fa ozobohudehe bak lamti dam duada niba ab vameadaham.
36. Labi ame im lam vameadameilahit Yesusat neo lehe bak aaha vabna Aho damat im vameadam bak laba ab li duzuham. Labi duzu gago, “Neàte. Um a iedemule. Um ahu teudi vou faodale.”
37. Lahame labi gagoha ame dam duada labe aaha na it oazehenat li duzuhuna zohàme udovai ab iedeham.
38. Iedi modemu Yesusat ab gagoham. “Um akati ozom vaba iedi modela? Um akati Em ahedehe bak ozom vaba vabi, ‘Em Amat mode?’ lahame bisi vi ozodàla?
39. Em anekehàti nabati uho nasi aadamale. Eho mozo. Na it oazehenat modemeam làhà ba faati nuti ehelem vabak. Lahana Em abo faati nuti ehe bak. Em faati nuti, ‘Eheo?’ laham bak uho voatateme ozomale.”
40. Labi gagu neàdi Yesusat Aho gagoho bak lam dam nibe, “Aho vageha,” lahamna zohàme dam bake Am anekehàti Am nabati paku doho bak lam dam bake ab fi ham.
41. Labi dam labe gi lab aaha bak laba ab deeli vàhàdeham. Lahana, “Ame Da nim Yesusat modeo,” laham bak mahate ozoho vab labe vabi vi ozodam lahasu. Labihàmu Yesusat dam niba fa ab gagoham. “Um niba na àmnavat eheo?”
42. Labihàmu dam nibe bohe dehame esuhuna visoi Yesus bake ab loham.
43. Labi Yesusat bohe lam ve, “Damat fà aase,” lahame tomba laba duzu ab àham.
44. Labi àme neàdi ame dam laba im neo ab vi vameadamam. “Eho amu uba tau godam lahasuhu di labe uba nehi vameadume esuhuna taia? ‘Eho vou mode ladam im lam ahebu ba modi imbodem tadeda tame. Abo dat ahamda Musat toehe im modeo, dam ahamda Alat vameadaha im aime fa dam bake ahate vameaidaha damat toehe im modeo, dam ahamda Ala bake vou baedam ladeem dae toehe im modeo, labihasu ame dam labe iho amu nasi fet toedume esuhu im lam ahebu modi imbodem tadeda tame,’ lahame Eho amu uba vameadume esuhu bak lam um fa vabili mode?” lahame ab vameadaham.
45. Labi vameadume neàdi Alat Vameadaha Im Toedahana lam, “Akatihasu modemna modela?” laham bak lam Am damat biem bake, “Fà ozobohudese,” lahame Yesusat ame dam labe im ahu laba ab modi fi gateham.
46. Labi dam ahu modi fi gatehezobe Aho neo vi vameada. “Ebe Eho meedaha im lam dam ahamda labe iho amu Alat Vameadaha Im Toedahana laba nehi fet toeme esuhu bak. ‘Alat Gagu Fihasi Vimteme Oluhu Dat Boehàda lam damat oteme usi behàsdi Am eloho bak labet Alat modi fa ahedi usa tame.
47. Labi fa ahedi usai neàdi Aho Am dam bake neha, “Modem neàte,” lahame Aho gagu im dedamalehe dam labe fa ot vai dam bake nehi vameada, “Uho faina meedam bak lam voedume fa ahu neà bak vàmadi meedameam làhà Alat laha uho lab faina meedàmu Aho uba beolo modem bak lam Aho gi vei mu fa faamome vei neàdedam bak,” lahame vou vameatedume bak ahebu uloholeda tame. Abo kota Yerusalem nibe faasi dam debu fa vàmadehe bak iuba le vou vameateda. Dam debu fa vàmadehe bak iuba le vou vameateda. Abo labihadume bak ahebu uloholeda tame,’ lahame fet toeme esuhu bak.
48. Labihàmu Eho eloi fat ahedi usaha bak lam uho aame ozobohudehe labe uho na aaha dam nibe fa dam amomoi bake le ame im lam ahebu fa vou vameatedam bak.
49. Lahana um a nasi lamule. Em Aiat amu neha, ‘Am Aha Nutabe Neàna uba lo tame,’ lahame fet gagu esuhuna lam Eho uba nom olu tame. Laham bake um gi kota Yerusalem niba vou faodale. Niba vou faodume Alat asum ahoba iube ame na uba nom olu modi teudi neàdehezobe ba lale,” lahame ab vameadaham.
50. Labi vameadume neàdi Yesus ba neo Aba vi tau meedam dam nim vame kota Yerusalem vou esmozi laha labe num debu Betania labe am bàhàgo bak obe laba vou le dam niba im it vameadume esmolo vaktesi Am anekehà behàsu vousai vamdesu Ala bake ab tom gagodamam. “Ai oa, Oho dam niba im neà bak modi esuiale,” lahame labi tom gagodameilahit Yesusat Am dam vou esmozi Alat Am vousai Aho azihi bak asum ahoba iuba ab tom iluham.
52. Labi dam nibe ahu adat iedi, “Yesus abo feàte,” lahame vou baedam labe deeleha vàhàdi fa kota Yerusalem niba ab ledaham.
53. Labi fa ledume gi ame Fihasi Ala Bake Vou Baedam Num Vàmteabu labe am ad oli aam bak tomba laba Ala bake vou baeda. Abo gi dihasi vou baeda. Dihasi vou baeda. Labihada. Àhàm.
1. Bak nim na ahebu meedaha vab diat dat ee, “Alat Vameadaha Im,” lahamda Yesus lam ehe bak. Labi ame di labe, “Alat Vameadaha Im,” lahamda lam Alati ahili modesda. Labi, “Alat Vameadaha Im,” lahamda lam gi Ala am bak.
2. Abo aham di iube ame Da lam gi Alati ahili esdam bak.
3. Asum ahoba modealahana zi lamti labi bak adba niba modealahana zi nimti ahebu meedaha di lam Alat ame Da lamti ahili meedaha bak. Ba na vàmtea buà nim ame Da vab diat modeheda vabak.
4. Im dam bakda ahedem bake debu ame Da am. Labi im aibu bake aidam dam nim iba modi Fauhaedamda ame Da am.
5. Labi iba modi Fauhaedamda labe Aho dam aibu bak laba aidamna ozomom dam laba fi ddam labe modi fa fauhaedam bohu modesdam bak. Ba ame aibu bak lam bisi feà labe ame fi ddam bak lam ba mali sutem vabak. Gi bohu modesdam bak.
6. Neha taia? Dat, “Yohanes,” lahamda laba, “Nehame modele,” lahame Alat ab gagu oluham.
7. Ame Fauhaedamda lam damat biem bake, “Dam ahebu Yohanesat li vameadam im lam fà aime ame Fauhaedamdate tu vuzehese,” lahame ab gagu oluham bak.
8. Ame da Yohanes lam ba ame Fauhaedamda modem vabak. Gi ame Fauhaedamda labet Aho meedaha im lam, “Yohanesat fa im dedateli vou vameatedale,” lahame Alat gagu oluhuda am am bak.
9. Ame Da Fauhaedamda bisi imboda vàmtea labe, “ ‘Ala akatihasu meedam Alat modela?’ laham im imbona lam dam bakda ahebu fà ozobohudi fi gatedase,” lahame Aho dam bakdate ab li tàham.
10. Alat ame Da modi Amti ahili asum ahoba modealahana zi lamti bak niba modealahana zi nimti alimeat modehenàme Aho dat aliholi bak niba li modeha dam bak damat, “Am amat modela?” laham bak damat ba vi ozobohudem bie.
11. Abo gi Am Yahudi damat esdam bake li modeha Am damat Am mu vooho bak.
12. Lahana meit Aba uledi tu vuzehi meedam dam lamota Aho naedat gagu ame dam laba modi fat ab Alam damalemam bak.
13. Etei lab vameadaha im lam Alam damalehe bak lam ba ibi iho bak damat nam ve ozo, “Data faase,” lahame im nam modeme data faam bake gagoho vabak. Gi Alat Ahamo ozome ame dam laba meedume Am damalehe bak.
14. Ame Da, “Alat Vameadaha Im,” lahamda lam fa dat aliholi iba dam bakdate tau vazisi aidaha bak. Abo Am Ai Alat Aho modehe Adat vàmtea lam oluhu labe imota Am feà bak aaha bak. Abo Aho iba ozahit deeli im neà bak meedam bak lam iho laha aaha bak. Labi, “Ala akatihasu meedam Alat modela?” laham im imbona ahebu lam im biem bake iba modi fi gateheda Am am bak. Ba im meida vastehe vabak.
15. Ame Da lam damat biem bake Yohanes Mei Vuu Valo Baptisleiamda laba Alat modi ozobohudehe labe aho dam bake vameadaha bak. Aho dam bake vameadam di gi dae buduana nehi vameada. “Eho amu uba neha, ‘Dat em ohuse ba vulemda lam amu di ium gi Alati ahili aida. Em baat. Labihàmu emti ame Da lamti ozom di bisi feàda Am am bak,’ lahame eho uba lab vameadahada lam, ‘Alat Vameadaha Im,’ lahamda Am am bak.”
16. Aho bisi iba ozahit deeli im neà bak meedam labe neà bak duana iba neo vi modidam bak.
17. Nehaha bak. Alat aham di iube im Israel dam bake neha, “Nehame modem neàte. A nehame meedamule,” lahame gagu fi hasi esuhu Im Feàna zi lam gi Musa bake gagu aho fa vou vamea usdume iba vou fuhu im am bak. Lahana, “Ala akatihasu meedam Alat modela?” laham im imbona lamti Aho iba ozahit deeli im neà bak meedam bak lamti labihasu Yesus abo Alat Gagu Fihasi Vimteme Oluhu Dat Boehàda labe iba modi fi gatehe im am bak.
18. Alam alihi ba meit aaha vabak. Gi Aho modehe Adat vàmteata abo Aba ahida Aho bisi deeleheda labe Ahamo, “Am Ai Ala akatihasu meedam Alat modela?” laham bak im biem bake iba modi im fi gateheda Am am bak.
19. “Alat Gagu Fihasi Vimteme Oluhu Dat Boehàda lam amat mode?” laham bak lam Yohanes Mei Vuu Valo Baptisleiamda labe aho ozobohudi vameadaha bak gi neha: Yohanesat bak aotba baa bohu dam vaba alim bak laba dam bake im vahokedume dam vuu valo baptisleidam digat meida labe kota Yerusalem laba azihi Yahudi dam busaoda labe iho damat Ala bake lomna ve vua vahudam toheda zi totbaho lamti ame dam laba vi tau meedam dam abo Lewi dam totbaho lamti labihasu gagome Yohanes bake ab oluham. “Om ana dàt mode?” laham bak vi ailo ame dam laba gagu ab oluham.
20. Labi ame dam labe Yohanes bake lafusi neha, “Alat Gagu Fihasi Vimteme Oluhu Dat Boehàda lam om ame Da modeo,” laham bak vi ailo gagoho di lam aho ba vastehe vaba abo ahate fa im nehasu vameadaha bak. “Alat Gagu Fihasi Vimteme Oluhu Dat Boehàda lam em ame Da modem kaio,” lahame ahate fa gagoho bak.
21. Lahame labi gagoha ame dam labe neo vi ailo gago, “Làhà om ame Da modem vabameam làhà om ana dàt mode? Làhà om gi Alat Vameadaha Im Aime Fa Dam Bake Ahate Vameaidahada abo Alat aham di iube ahena asum ahoba vou tom iluhuda Eliat fa bak niba nom ilu mode moio?” Lahahat Yohanesat fa gago, “Vabà! Em ba ame da Eliat modem vabak.” Lahahat ame dam labe neo vi ailo gago, “Làhà om gi dat Alat vameadaha im aime fa dam bake ahate vameaidahada meida abo Alat neha, ‘Ba olu tame,’ lahame fet gagu esuhu Dàt mode moio?” Lahahat Yohanesat fa gago, “Vabà! Em ame Da modem kaio.”
22. Gi labihadume ot gagoi ot gagoidaha vabamu ame dam etei leheda zi labe fa ab gagoham. “Làhà im bie. Om ana dàt mode? Oho iba fa gagom im ohomo ozome im imbo bak lam iba taho gagu iho ame im aime neàdi fa dam iba gagu oluhu dam laba fa le vameadase.”
23. Lahame labi gagohemu Yohanesat gi dat ahamda Alat vameadaha im aime fa dam bake ahate vameaidahada Yesaya labe aho fet toeme esuhu im vi ozome fa ame dam laba ab gagoham. “Uho nasi Yesayat fet toeme esuhu im nim ozomale. ‘Dat bak aotba baa bohu dam vaba alim bak laba azi dam aba valadamda zi laba dae buduana nehi vameada. “Alat Gagu Fihasi Vimteme Olulo Modem Dat Boehàda lem zie laba uho nasi duzu zie fet vueme neàdehena ahum Am ba lese.” ’ Lahame Yesayat lab fet toeme esuhu im lam imbodi eho ame da nibe ab meedamam bak.”
24. Lahame labi vameadume modeha Farisi dam labe ibi iho gagu Yohanes bake oudaha dam totbaho labe neo Yohanes bake vi ailo ab gagoham. “Oho amu neha, ‘Om ba Alat Gagu Fihasi Vimteme Oluhu Dat Boehàda modem kaio.’ Labi neo, ‘Eliat modem kaio.’ Labi neo, ‘Alat Vameadaha Im Aime Fa Dam Bake Ahate Vameaidahada Alat ba Olulo Modemda modem kaio,’ lahadam dàt ba oba amat gagu om im dedateli im Yahudi dam oho vuu valo baptisleidàla?”
26. Lahahat Yohanesat fa gago, “Dam giida labe iho meia aame ozo, ‘Da lam am ahu faina meedam bak lam aho voedume fa ahu neà bak meedalo vàmadi fa Ala bake tu vuzehe?’ laham bak aame ozobohudem bake eho dam bake gi vaota baptisleidam bak. Lahana em ohuse ba vi vulelo modemda lam gi etei uba tau vahi esdamda ame Da ehe bak um biem bak. Ame Da feàda labe Am naba dusumna lo tadehena lam eho feà vab dàt lo ziamom di em ba uloho vabak,” lahame ab gagoham.
28. Etei lab vameadaha im lam gi Yordan Soabo ala zizem totbaho Betania abo Yohanes Mei Vuu Valo Baptisleiamda labe aho dam vuu valo baptisleidam bak laba meedaha imot modem bak.
29. Labihadume izi dihasi Yohanesat gut aaha Yesus aba ledam bak alimeat ab gut aame dam duada zi laba ab gagoham. “Iumeee! Uho nasi aamale. Alat modi ahumdi esuhu Domba Adatea iubet ab ledamam tame. Abo iho dam bakda ahebu iho faina meedàmu Alat iba beolo modem bak lam, ‘Fà faamome vei neàdedase,’ laham bak vi ozome ba ot vai eloi iba soat vausu fa vei neàdedalo modemda etei iubet ab ledamam tame.
30. Eho amu uba neha, ‘Amu di ium Dat em ohuse ba vulemda nimti Alati ahili aida. Em baat. Labihàmu emti ame Da lamti ozom di bisi feàda Am am bak,’ lahame eho amu uba lab vameadaha Da lam iubet ab ledamam tame.
31. Israel dam Soat Vausu Fa Vei Neàdemda lam, ‘Yesus ame Da modeo,’ laham bak lam ememe laha amu di iube ame bak lam biem bak. Lahana eho niba lehe bak debu gi nehaha bak. Alat Israel dam soat vausu fa vei neàdedam bak laba vi ozome Aho Gagu Fihasi Vimteme Olulo Modemda Boehàda lam Israel damat biem bake, ‘Eho ame dam laba modi fi gatedase,’ lahame eho ahit li dam bake vuu valo baptisleidam bak,” lahame aho dam bake labihasu ab vameadaham.
32. Labi vameadume neàdi Yohanesat neo aho aaha im neo nehi vi vameada. “Israel dam Soat Vausu Fa Vei Neàdemda lam, ‘Yesus ame Da modeo,’ laham bak lam eho amu di ium bie. Lahana Alat amu eba neha, ‘Damat iho faina meedaha bak voou fa vei neàdedaha dam lam oho vuu valo baptisleidale. Labi oho ame bak lam vuusu meedam labe aameam Em Aha Nutabe Neàna labe fa bume doleti ulohonali nom oaedume Dat meida laba nom vou usi vizi abehamdemeam làhà ame Da am tame. Ame Da labe Aho ba damat Aba tu vuzehi meedam dam lam Em Aha Nutabe Neàna lam Aho ame dam laba modi vizi teudedamda Am am bak,’ lahame eba labi gagohemu eho ame bak lam ab aaham. Eho Yesus vuu valo baptislehe di labe tom aaha asum ahoba iube Alam Aha Nutabe Neàna labe fa bume doleti ulohonali nom vou oaedume Yesus bake nom vou usi vizi teudi abehamdehe bak lam em alimeat ab aame ozoham bak. ‘Aa làhà! Israel dam Soat Vausu Fa Vei Neàdemda ame?’ laham bak em ab aame ozobohudeham bak.
34. Làhàmu eho aame ozobohudehe im lam dam bake gi nehi vameadam bak. ‘Ame Da Yesus lam Alam Adat am bak,’ lahame ozobohudi gagodam bak,” lahame Yohanesat ab vameadaham.
35. Labihadume izi dihasi Yohanesat neo aba aho meia vuu valo baptisleidam bak laba esda. Aba Aho vahokedam im ozobohudelo vi tau meedam dam behàsu laha ame bak laba tau aida.
36. Labi aidume modeha Yesus lebohotelo modemu Yohanesat ab gagoham. “Um nasi aama. Alat modi ahumdi esuhu Domba Adatea iube iba ab lebohotelo modemam tame.”
37. Lahaha bak lam ame da Yohanes bake vi tau meedam dam behàsu labe aime fa Yesus bake vule ab tau ladamam.
38. Labi modeha Yesusat fa it vaktesi aaha ame dam behàsu Aba vuedàmu vi ailo ab gagoham. “Um Eba ana vi vuedà?” Lahahat ame dam behàsu labe fa gago, “Ai Rabi oa, Oho aidam bak akete?” (Ibrani dae Rabi gagom di gi, “Guru,” lahame gagom bak.)
39. Lahahat Yesusat fa gago, “Uhumo Eba vuli aameam Ebe Eho aidam bak um ab aamam bak.” Làhàmu Yesus bake vuli Aho aidam bak aame neàdi modeha dimatali jam empat fuhemu gi ame digat zoho lam Yesus bake tau aidume vou disi aibule.
40. Ame da Yohanes bake vi tau meedam dam behàsu labe iho fa Yesus bake vi tau meedaha debu gi neha: Yohanes Mei Vuu Valo Baptisleiamda labe aho amu Yesusat modelo modem im lam fet vameadamna im ahim nibe aime Yesus bake ab vi tau meedamam bak. Im ahim Aba vi tau meedamda meida ee gagom Andreas laham bak. Im ahim nibe iho Yesus bake vi tau meedam di labe Andreasta kehàm vaba am dubu Simon Petrus bake fa le ab nabidamam. Le nabidume aame neàdi ab gagoham. “Simon oa, Mesias abo iho amu di iube vou faodamda imota ame Da tàho. Eba nasi tau le aale.” (Ibrani dae, “Mesias,” laham di gi Yunani dae, “Kristus,” laham bak. Abo, “Alat Gagu Fihasi Vimteme Oluhu Dat Boehàda,” laham bak.)
42. Lahame labi gagu neàdi Andreasat Simon neo ve Yesus bake ab vou laham. “Simon ana dàt mode?” laham bak Yesus bake gagu ozobohudelo ahit Yesus bake ab vou laham. Vou le lafusi modeha Yesusat Simon bake gut aasumtedi ab gagoham. “Om Yonam adat ee gagom Simon laham bak. Lahana etei di nibe faasi om ee meida, ‘Kefas,’ lahame ee gàhàda neo vi talulo modem bak,” lahame Yesusat ab gagoham. (Etei ee, “Kefas,” lahame taluhu bak lam fa Yunani dae gagom di gi, “Petrus,” laham bak.)
43. Labi izi dihasi Yesusat Aho ozo, “Em Galilea bak laba lase,” lahame fet vi ozome esuhemu ladam labe Filipus bake tàhi gago, “Om Ebe Eho vahokedam im ozobohudelo vi tau meedam datelele,” lahame labi gagohemu ame baket ab modeham.
44. Ame da Filipus lam gi Andreasti Petrusti ibi iho azihi bak num debu Betsaida laba vahi azihi dàt moz.
45. Laham dàt aho fa neo amti vou alemda ee gagom Natanael lahamdate tàhi im vameadalo ab laham. Le tàhi ab gagoham. “Alat Gagu Fihasi Vimteme Oluhu Dat Boehàda lam imota aaho. Abo dat ahamda Musat aho dam bake gagu fi hasi esuhu Im Feàna Toedahana zi lamti labi dam aham di iube Alat vameadaha im aime fa dam bake ahate vameaidaha dam labe ibi iho fet toedume esuhu im lamti nehasu toe, ‘Alat Gagu Fihasi Vimteme Olulo Modem Dat Boehàda olu tame,’ lahame amu fet gagoho Da lam imota aaho. Ame Da lam Am ee, ‘Yesus,’ lahamda num debu Nazaret laba vou budualehe dàt moz. Abo Yusufam adat moz.”
46. Lahame labi gagu modeha Natanael gi tozome fa vi ailo gago, “Nazaret! Elaidam vab baket modem bak. Ba bak labet im feàna meedamda lehe bakvat im aihe?” Lahahat Filipus fa ab gagoham. “Lahamnàme gi ozahit ohomo eba tau vule aamale,” lahame gagohemu aho usai Filipus bake ab tau vulaham.
47. Vuladam labe lafusi Yesusat Aho gut aaha Natanael Aba ledam bak aahemu, “Natanael akatihasu meedam dàt modela?” laham bak vi ozome ab gut vameadamam. “Etei ledamda nim ba meia vagem vab dàt modem bak. Labihàmu am abo Yahudi dàt am tai ahobada Israel labe vou faat leheda meida abo Israel da aabo am bak.”
48. Lahaha bak lam Natanael aho aime vi ailo ab gagoham. “Ne, Om adi bake em aame ozobohudi labi gagodà?” Lahahat Yesusat fa gago, “Natanael oa, Filipus amu oba le gagoho vab di iube om ut araso adba nutabe bak laba nusdam bak lam Em ozobohudehe bak.”
49. Lahahat Natanael àvodi ab gagoham. “Làhà, Ai Guru oa, Om abo Alam Adat am tame. Abo im Israel dam vuusu im vahokedam Boehàda iho vou faodamda Om am bak.”
50. Lahame labi gagoha Yesusat fa gago, “Oo làhà! Om gi Eho om ut araso adba nutabe bak laba nusdam bak lam Ehemo ozobohudi oba gagoho bak om aihi labe oho Eba tu vuzehi labi gagoho taia? Lahana om ba aam di im bisi feàda abo oho etei aaha im nidi nim vafozi bisi feàda om ba aa tame.
51. Lo, lamota imbot. Lahana Eho etei uba neo gagolo modem im imboda nim laha aimale. Ame im feàna lam uho ba aamna gi neha: ‘Em abo Alat Gagu Fihasi Vimteme Oluhu Dat Boehàda am tame,’ laham bak um biem bake um ba asum ahoba iube fatahivai bumatalehena ozomomna labet Alat Am im gagu vou usem dam labe Eba abo Asum Ahoba Iubet Bak Niba Li Dateleheda niba nom ilu fat tom iluiam bak uho aa tame,” lahame Yesusat labi fet ab gagu esuham.
1. Labi usi behàsdi Galilea bak zoho labe am num debu Kana laba azim dat labe nam valo modemu dam na giaha bak ehet. Làhàmu Yesusam oi laba tau vula.
2. Labi Yesusti Aba Aho vahokedam im ozobohudelo vi tau meedam damti iba gagohemu im laha laba tau ab vulaham.
3. Labi na gihi lam àdume modeha dam zi labe iho uddam anggur oo vaksa ab foleham. Làhàmu Yesusam oi labe Aba li gago, “Dam nim im anggur oo vaksa folehe bak.”
4. Lahahat Yesusat fa gago, “Oi, om akati Eba li ame im lam labi gagodà? ‘Em amat modela?’ laham bak tombalem bak lam Alat Aho ozoho di fuhu vabak.”
5. Lahame Am oi bake labi gagohemu Am oiat Yesus Aho uledi modem bak ozobohudi fa na modem dam laba ab gagoham. “Em adat labe Aho uba gagu modiamna lam gi aime meedale.”
6. Di lam im netà obe laba vao fedemna ket modehena alimnabu enam ehete. Ame nabu lam Yahudi damat ibi iho fi ham bake kikem vao nom noadam nabu am. Ame nabu vàmtea lam vao laba fedem di abo vao seratus liter fedem bak ozomomna am bak.
7. Làhàmu Yesusat dam na modem dam laba ab gagoham. “Ame vao foli alimdehe nabu zi laba vao feddale.” Làhàmu vao feddume ab bekeddaham.
8. Bekeddahemu Yesusat neo ab gagoham. “Um nasi vao fedeme bekeddahanabu laba vao koena nom noai fa im duzu vameame dam faheme na lodamda laba vou lale.” Làhàmu ame baket ab modeham.
9. Ame vao koena fa ame da laba vou li ab loham. Lu ame da labe gut ve ab udeham. Ame vao lam Yesusat modi anggur oo vaksalehe vaot moz. Lahana ame im duzu vameame dam faheme na lodamda labe aho damat uddam anggur oo vaksa gi amu folehe bak am ozobohudi, “Anggur oo vaksa nidi nim ana bake vahela?” laham bak bie. Lahana na modem dam labe iho vao noai aba vou lehe dam lamota ozobohut. Lahana im biemda labe aho dat etei nam valo modemda laba deeli vou baedalo aa gagome ab leham.
10. Li duzu neàdi ab gagoham. “Eho etei uddam vao nim udeme ozoha, anggur oo vaksa ba udeheda nim bisi neàda am tame. Ibi iho modi baleàhà bak lam amu anggur oo vaksa bisi neàda amu nasi dam bake lodume uddam bak. Labi uddume ohu bobidume bak vabi meedam di gi anggur oo vaksa mahate udem neà vabda ba lodume uddume novam bak. Lahana oho etei labihaha vabak. Oho vedi udem neàda ahit mali esu faobe ba lodam bak. Abo neàte,” lahame ab vameadaham.
11. Etei na damat ihimo modem biem im feàna damat fet aame ozobohudemna lam Yesusat etei alimeat ab modeham. Abo Galilea bak zoho labe num debu Kana laba alimeat ab modeham. Aho labi modehe labe, “Am feà bak,” ab modi tombaleham. Labi tombalehemu Aba vi tau meedam dam labe iho neha, “Yesus abo Alam Adat am tame,” lahame ibi iho tu vuzehehe bak lam ab vi teudedamam.
12. Labi ame im lada lam modeme neàdi Yesusti Am oiti Am vahada ziti labi Aba vi tau meedam dam lamti iho vazisi ame bak lam vou esmozi num debu Kapernaum laba ab lazeham. Laba lazi teohe azi izida.
13. Yahudi dam bada nibe iho im tai ahobada zi labe Im Adam Datahida Alat Oddaha Vabat Labohotehe Bake Vi Ozome Roti Fikidehe Vabna Àme Iziam di ee gagom Paskah vou fuseo vabalehe di labe Yesus Aba Aho vahokedam im ozobohudelo vi tau meedam damti vahi kota Yerusalem laba id ladume ab zooleham.
14. Labi kota Yerusalem laba zooli fusi ame Fihasi Ala Bake Vou Baedam Num Vàmteabu laba ab laham. Labi ame Num Vàmteabu labe am ad oli aam bak tomba laba le duzu aaha damat Ala bake vou baedalo na Ala bake lomna abo sapiti dombati bume doleti labihasu ot loidam bak ab aaham. Labi doi meit iube vou leheda abo na vam biem doi vame fa ame Num Vàmteabu laba na ba vam neà doi lam ot loiam dam iho doi vahedam beahuba nusdam bak laha aa.
15. Ame bak lam aahemu faki, “Meia beodamna modese,” lahame ihi sokba bobaehenati ulohona zi ateme dombuli neàdi ame dam zi lam beodume ame Num Vàmteabu labe am ad oli aam bak tomba lam dam ab futodume seddamam. Abo domba zi lamti sapi zi lamti laha meoli iteda. Labi ame doi ot loiadam dam labe im doi laha feàkmome voeda. Labi im doi vahedam beahuba zi lam laha vuu vaktemoda. Gi labihada.
16. Labi bume dole meia ot loiam dam laba Aho neha, “Um na zi nim nasi vou futodume bàhàgo iuba lale. Um akati Em Aiam Num niba na zi nim ot loidàla? Taho ilile.”
17. Lahame Yesusat gi etei labi gagoha Aba vi tau meedam dam labe iho ab vi ozoham. “Meit Alat Vameadaha Im Toedahana laba im nidi nim Yesusat modi ab imbodeham bak,” lahame ab vi ozoham. Ame toehe im neha: “Boehàda oa, Eho Om num bisi vou faovoemda modemu Em ahu galihasi seteho.” Lahame toehe bak lam ab vi ozoham.
18. Labi modeha Yahudi dam vuusdam busaoda zi labe iho Yesus etei lab meedaha bak lam aahemu beàdalo ab gagoham. “Baka Oba amat modi im dedateli im lam meedàla? Alat Oba gagu im dedateli Oho ame im lam meedameam làhà Oho laha na damat ihimo modem biem im feàna iba modi iho fet aame, ‘Imbote,’ laham bak ozobohudemna nasi modele.”
19. Lahahat Yesusat fa gago, “Làhà ame Fihasi Ala Bake Vou Baedam Num Vàmteabu nim uho fa faamome seddamale. Labihazobe Eho gi usi behàsdi fa momet neàdem bak.”
20. Lahahat ame Yahudi dam labe alamdi fa ab gagoham. “Aa! Fihasi Ala Bake Vou Baedam Num Vàmteabu nim abo empat puluh enam tahun moho bak. Ba akati Oho usi behàsdi mome neàde?”
21. Lahana ame Yahudi dam vuusdam busaoda zi labe iho Yesusat lab gagoho bak lam vabile. Yesusat etei ame Fihasi Ala Bake Vou Baedam Num Vàmteabu laba im lam gagoho di lam Am gi vàlu gagoho bak. Gi Am so laba modem im fi bovai gagoho bak.
22. Ba di iube Am eloho bak labe fat ahedi usam bak imbodehezobe Aba Aho vahokedam im ozobohudelo vi tau meedam dam labe Yesusat etei lab gagoho bak lam ba it ozome ozobohudehe bak ehe bak. It ozobohudehemu Alat Vameadaha Im Toedahana zi lamti labi Yesusat ahe di labe Aho lab fet vameadaha im lamti ahebu labihasu vazisi damat ba ozobohudi tu vuzehe bak ehe bak.
23. Dam etei kota Yerusalem laba ame Paskah vi ozome àme iziam di lam Yesus laha tau meeda. Ame bak lam tau meedam di labe Yesusat na damat ihimo modem biem im feàna damat fet aame àvodemna lam duana meeda. Ame lab meedam bak lam dam dua bak aahemu Aba fota tu vuzeheda.
24. Lahana Yesus ba dam laba tum vabak. Dam bakda labe im ahu ad laba modem bak lam ahebu ozobohu labe ba dam laba tuhu vabak.
25. Am ba dat meida nibe fa dat meida, “Neào? Faio?” laham bak ba vi gagu aim vabak. Dam bakda labe im ahu ahebu Am ozobohu labe labihaha bak.
1. Labi aibu meida labe dat ee gagom Nikodemus lahamda labe Yesus bake li tàh. Ame da Nikodemus lam Yahudit Ibi Iho Modem Im Gagu Vàmadi Esum Dam Debu labe ahala vou baeaiam im vuusualam debu Farisi laba tau meedamda meida am. Lahamda labe Yesus bake aibut tàhi ab gagoham. “Ai Guru oa, im dam totbahota Alat Oba neha, ‘Dam bake le im nehasu vahokedale,’ lahame gagu oluhu bak lam imota ozobohu bak. Ba na damat ihimo modem biem im feàna damat fet aame ozobohudemna lam Oho etei lab meedahana lam ba Alat Ahamo Oba modi vizi teudehe vab alia meedam vabak.”
3. Lahahat Yesusat fa gago, “Nasi aime ozomale. Meit am fa faasi veimdi gàhàdem vabameam ba Alam damali Aho vuusu im vahokedam vabiem bak.”
4. Lahahat Nikodemus fa gago, “Ne lahana meit am busaoli setehena akati ba fa faaela? Ba am oiam nibeso laba oli am fa faam neà? Ba modem biem bak.”
5. Lahahat Yesusat fa neo gago, “Lo, lamota imbot. Lahana Eho etei oba gagolo modem im imboda nidi nim laha aima. Meit neha, ‘Em Alam damalese,’ lahamda lam ba vao labet faasi gàhàdem vabak. Labi laha Alam Aha Nutabe Neàna labe ame da laba modi am ahu ad laba vizi teudem vabak. Labihameam làhà ba Alam damali Aho vuusu im vahokedam vabiem bak.
6. Neham bak. Dam bakda im lahiti data faam di gi ekda faadam bak. Lahana im modi fa veimdi gàhàli Alati vou alem bak lam gi Alam Aha Nutabe Neàna labet iba modi vizehe labe labihadam bak.
7. Labihàmu Eho etei lab gagoho bak lam, ‘Meit am fa faasi gàhàdese,’ lahaha bak lam a àvodemule.
8. Neham bak. Nutabe lam gi iuba foada. Iuba foada. Lahana ame nutabe, ‘Adi baket ledà? Adi bake lada?’ laham bak lam im biem bak. Im gi na nigo nigodamna foadam bakta dogoit aida. Labi laha Alam Aha Nutabe Neàna labet meia modi vizi fa veimdi gàhàlem bak lam im laha aame ozobohudem biem bak. Lahana modi fa veimdi gàhàlemda labe aba aho meedam bak lam iho aame ozobohudem bak am.”
9. Lahame labi gagoha Nikodemusat fa Yesus bake ab vi ailo gagoham. “Alam Aha Nutabe Neàna labe Aba Aho meia modi vizi fa veimdi gàhàlem bak lam akatihasu modemna modela?”
10. Lahahat Yesusat fa neo gago, “Oo, Alat Vameadaha Im Toedahana lam oho ozobohudi Israel dam vuusu im vahokedamda meida om am taia? Ba akati Eho lab gagoho im lam om ozom bi mode?
11. Làhà Eho etei oba gagolo modem im imboda nidi nim nasi iademe aima. Ibi iho ozobohudehena lam iho uba Yahudi eeda busaodate ahate gagomda am. Labi laha iho fakot aahada lam iho uba ahate vameadamda am. Lahana um akati ibi iho vameadaha bak lam uho fa vuzehem vaba modela?
12. Ne, Eho etei, ‘Ala akatihasu meedam Alat modela?’ laham bak lam uba vahokedaha di lam gi bak niba meedaha im vouhoha um ba Eba tu vuzehehe vabak. Eho ba neo ame bak lam uba vahokelo meedam di Eho asum ahoba iuba meedam im vouhomeam uho ba akati Eba tu vuzehe?
13. Ba bak niba esdamda meida vàmtea buàva nibet fa asum ahoba iuba laisi, ‘Imvat eheo?’ laham bak aame fa im dedateli lezemda vabak. Lahana asum ahoba iuba, ‘Imvat eheo?’ laham bak Emota ozobohu bak. Em abo Asum Ahoba Iubet Bak Niba Li Dateleheda modemu Em gi aham di iube asum ahoba iuba aidume fa ame im lam uba vameadalo Eho bak niba lehe bak.
14. Aham di iube im Yahudi dam tai ahobada zi labe iho bak aotba baa bohu dam vaba alim bak laba vabi godam di lam Musat vameadaha im moho dam lam ozbat veedaha bak. Làhàmu Alat Musa bake neha, ‘Tembaga ve vabiedume ozbasoti ulohona modi fa ut aaso bohulana laba modesu vousale. Labi ozbat veedaha dam labe fa ame ozba itti ulohona laba tom aameam Eho modi fa neàde tame,’ làhàmu Musat ame baket ab modeham. Im lada lam amu mode. Labi ba neo Em abo Asum Ahoba Iubet Bak Niba Li Dateleheda nim laha damat abo ut tetehesuhunaso laba esu vousalo modem bak.
15. Labiham labe meit Eba tu vuzehi meedameam làhà ame da laba modi Alati vahi gi ahe neàna bohu vuusdam bak,” lahame Yesusat ab vameadume esuham.
16. Nasi ozomale. Alat dam bakda ahebu bisi deelehemu Aho dam bakda iho faina meedam bak laba gohali fa ot vai eloi vasea veàtom bak vi ozohemu gi Aho modehe Adat vàmtea lam bak niba ab oluham bak. Labiham labe Aho Oluhu Adat lam meit Aba neha, “Am abo Alat Gagu Fihasi Vimteme Oluhu Dat Boehàda am tame,” laham bak laba tu vuzehi meedamda lam ba Alat vaitesu voom vaba abo Amti vahi gi ahe neàna bohu vuusdam bak.
17. Nehaha bak. Alat amu Am Adat bak niba oluhu di lam dam bakdate neha, “Uho faina meedam damat modem labe fà beose,” lahame na asimbuna feà modelo gagu oluhu vabak. Gi dam bakda labe iho faina meedàmu Aho beom bak lam Am Adat fa iba soat vausu fa vei neàdem bak laba ozome gagu oluhu bak.
18. Meit Alam Adat laba tu vuzehemda laba Alat ba, “Oho faina meedam dàt modem labe fà beose,” lahame na asimbuna feà modelo ba gagom vabak. Lahana meit Aba tu vuzehem vabda laba Aho gi amu di iube, “Beo tame,” lahame na asimbuna feà modelo Alat fet gagu esuhu bak lam lahasdam bak. Abo ame da labe Alat modehe Adat vàmtea laba tu vuzehem mom labe labihaha bak.
19. Alat dam bakda, “Beose,” lahame na asimbuna feà modelo gagu esuhu bak lam gi neham labe labihadam bak. Alam Adat abo Fauhaedamda labet bak niba ab leham bak. Lahana dam bakda labe iho faina meedam labe ame Fauhaedamda laba faki gi aibu bak laba deeli esdam bohu meedam damat modem bak. Labiha labe Alat, “Beose,” lahame ab gagu esuham bak.
20. Neham bak. Dam faina meedam dam ba fauha bak laba deelem vabak. Gi faki mom bak. Ibi iho lab faina meedam bak lam fi dem bak labna zohàme ba ame fauha bak laba le netàdem vabak. Gi mom bak.
21. Lahana meit im imbona lam tu vuzehi vamdesu meedamda lam ame fauha bak laba lam meot. Abo, “Ibi iho lab im vamdesu meedam bak lam gi Alat Aho iba vuusdam labe iho ame baket meedam damat modem bak,” laham bak tombalelo ahit ame fauha bak laba lam bak.
22. Labi ba digat meida iube Yesus Aba vi tau meedam damti vahi kota Yerusalem vou esmozi Yudea bak obe laba le dam etei Aba tu vuzehi meedam dam lam Aho gagu valo baptisleida.
23. Labi ame di labe Yohanes Mei Vuu Valo Baptisleiamda lam damat si sel ousuhu vab di iube aho laha Ainon sii abo num debu Salim netàdehe bak laba abo vao dua bak ehe bak laba dam vuu valo baptisleida. Damat, “Valo baptislese,” lahame dihasi valada. Dihasi valada. Labihadaha labe labihada.
25. Labi digat meida labe Yohanes aba aho vahokedam im ozobohudelo vi tau meedam dam labe iho fa im Yahudi da meidati daet otesi otesida. “Im Yahudi dam vaot itatame neàdemna neàda akete? Yohanesat im dedateli modemda nibao? Yesusat im dedateli modemda labao?” laham bak lam ozom bi daet otesi otesida.
26. Làhàmu Yohanesam dam labe aba li ab gagoham. “Ai Guru oa, digat amuda iube imti omti Yordan Soabo dumam totbaho laba vahi esdam di oho iba neha, ‘Iumeee, iba soat vausu fa vei neàdedalo modemda iubet ab ledamam tame,’ lahame vimteme iba ahate vameahada lam om vi ozodam lahasuheo? Ame Da lam laha bak iuba le dam vuu valo ab baptisleidamam bak. Om ozom vaba? Dam dua bak Oba lem vaba fa Ame Da laba dihasi valada. Dihasi valada. Labihadam bak.”
27. Lahahat Yohanesat fa gago, “Neà bak. Im dam bakda ahebu ibi iho na meedam bak lam gi Alat gagu esuhu labe ame baket ahaladiame meedam bak.
28. Eho amu uba neha, ‘Em ba Alat Gagu Fihasi Vimteme Oluhu Dat Boehàda modem vabak. Alat gi eba neha, “Em nasi le zie vueme ame Da ba vuese,” lahame gagu oluhuda em am bak,’ laham bak lam eho amu gagohona um aime ozobohudehena taia?
29. Eho dat nam valo modem bak vouhodase. Ame nam soao lam gi aba valo modemda labe aho aidam bak laba lam bak tade. Labi ame nam valo modemda labe amti vou alemda labe gi am obe duzu, ‘Aba im gagom bak eheo?’ lahame vou faoda. Vou faodam labe ame nam valo modemda labe am namti im ot vameaidam bak aidàmu am ahu abo deele. Eho etei vouhodam nam valo modemda lam gi Yesus am bak. Labi Amti vou alemda em am bak. Labi eho aiha dam bisi dua bak aba dihasi valada. Dihasi valada. Laham bak lam eho etei aihemu em ba fakem vaba abo gi deeli vàhàdehe bak.
30. Neham bak. ‘Ame Da labe Am feà bak lam vi taui vi tauidume budualedase. Labi em fa feà vab dateli vousdase,’ laham bak lam Alat modelo àhàkem bak am bak.
31. Uho neham bak ozomale. Asum ahoba iube fa bak niba leheda lamti dam bakdati ozom di bisi feàda asum ahoba iubet leheda Am am. Bak niba esdamda ahebu gi dam bakda labe ibi iho modi baleàhà bak vouhodam damat modem bak. Abo im vameadam di gi bak niba modehe im vameadam bak. Lahana asum ahoba iubet leheda im bakda vafozi bisi feàda Am am bak.
32. Ame Da labe Aho dam bake im vameadam di Aho gi Alat Aba modi fi gatei Aho aaha im lamti Aho aihi im lamti lamota dam bake ahate vameadam bak. Lahana ba dam Aba Aho vameahana tu vuzeheda vabak.
33. Lahana meit Aba Aho vameadam im lam tu vuzehemeam làhà ame da lam laha im nidi nim laha neo vi tau ozobohudi gagodam bak. ‘Alat vameadaha im lam laha imbo im vameadam bak,’ lahame neo vi tau ozobohudi gagodam bak.
34. Neham labe labihaha bak. Ame Da lam gi Alat neha, ‘Im Ebeda dam bake vameadase,’ lahame gagu oluhuda Am am bak. Alat Am Aha Nutabe Neàna labe ame Da laba modi vizehe di gi na im ahebu modi vizehe bak. Ba koena modi vizehe vabak. Labiha labe Aho gi Alat gagoho im lamota vameadam bak.
35. Im Ai Alat Am Adate deelehe labe na ahebu Aba gagu im dedatelehe bak.
36. Labi meit Alam Adat laba uledi tu vuzehemeam làhà Alat ame da laba modi Amti vahi gi ahe neàna bohu vuusdam bak. Lahana meit Am Adat laba uledi tu vuzehem vabameam ba Alati vahi ahe neàna bohu vuusdam vabak. Gi ame da laba Alat fakem bohu vuusdam bak. Ba vaitom kaio,” lahame Yohanesat ab vameadaham.
1. Ame di lam Farisi damat aiha dam dua bak, “Iba meit vuu valo baptislese,” lahame Yesus bake dihasi valada. Dihasi neo valada. Lahada. Labihadume Yesus bake tu vuzehi meit vuu valo baptisli neàdi ame dam Yesus bake vi tau meedam dam totbaho laba vi taui vi tauidume duaeda. Abo Yohanes Mei Vuu Valo Baptisleiamda labe aba aho vuu valo baptisli fa aba vi tau meedam dam lam fa vafozi Yesusbada duaeda. Laham bak lam meit li gagoho bak ame Farisi damat ab aiham. (
2. Lahana Boehàda Yesus mei vuu valo baptislem vab dàt modem bak. Gi Aba vi tau meedam dam labe ihimo mei vuu valo baptisleidam bak.)
3. Lahana ba digat meida iube meit neo Yesus bake le ab gagu fi deham. “Damat Oba vi tau meedam damalehemu meit im vuu valo baptislehe dam duale. Labi Yohanes abada fa koede. Lahaha bak lam meit gagohona Farisi damat aiho,” lahame meit Aba li gagu fi dehena Yesusat aime ozobohudi Aba vi tau meedam dam lamti iho Yudea bak vou esmozi fa Galilea bak laba ab ladamam.
4. Yudea bak vou esmozi ladam di labe Samaria bak labet ab ladamam. Di lam Yahudi damti Samaria damti ba ot vahiame meedam vab damat modem bak. Lahana Yesus ozahit, “Taho lase,” lahame iho Aba vi tau meedam dam nimti vahi gi zie buuda Samaria bak labet ab ladamam.
5. Labi ame Samaria bak labet ladume ala tomali abo jam dua belas fuseo vabaehe diat num debu Sikar labe am bàhàgo laba ab lafuham. Ame Sikar lam gi dat ahamda Yakub labe aho aham di iube am adat Yusuf bake loho bak zoho laba netàdi modesuhu num debut moz. Labi laha ame num debu bak labe am bàhàgo laba Yakubat aham di iube sihi vao nobu laha ehet. Labi Yesus ladaha vanamahemu ame vao nobu obe laba ab le nusuham. Labi ame di labe Aba vi tau meedam dam nibe iho na àm bak ozome na àmna doit valo Sikar laba ab ladaham. Labi omozit Yesus lab aidam di labe Samariada lahi vao noalo ab leham. Li modeha Yesusat ab gut gagoham. “Oi, oho Eba vao noai lom vabao?”
9. Lahahat nam labe ozo, “Ne, Yahudi dam ba im Samaria dam labe vao udemna zoho ibida ba vao udem vabak. Mom bak,” lahame àvodi fa ab gagoham. “O Dat busao, Om Yahudi dam modemna akati eba Samariada lahi niba vao tauledàla?”
10. Lahahat Yesusat fa gago, “Ne, Alat oba lolo modemna lam om ozobohude. Labi Eho etei oba vao tauleheda nim, ‘Em amat modela?’ laham bak lam om laha neo vi ozobohude. Labihameam oho Eba neo vao tauledàmu Eho uledi oba ahedem vao lu udem bak.”
11. Lahahat ame nam labe fa gago, “Dat busao, ne Om vao noamna vabna vao nobu feà adba iuba modesdamna akati noaela? Oho ahedem vao lam adi bake vàla?
12. Làhà im tai ahobada Yakub labe iba modi vou esmoho vao misia nim fai? Labi Om bisi feàda ame? Ne, ame vao nim Yakub am naeda laha tau vao noai udehe bak. Labi am adamti aba aho ba vou faat lehe mekehà dam zi lamti labi na fi ho zi lamti labihasu uddaha vao nim fai? Labi Obo Oho lolo modemda lam fa bisi neà? Lahame ozome labi gagohe?”
13. Lahahat Yesusat neo fa vi vameada, “Meit vao nidi nim udemeam ame da lam fa neo vao àhàkedam bak.
14. Lahana meit vao Eho lolo modemda nim udemeam ame da labe ba valo àhàkedam vabak. Neham labe labihaha bak. Vao Eho lolo modemda nim meit udemeam làhà aho udehe bak labet modi am ahu ad laba vao aanati ulohona labaha bohu futodam bakti ulohona modi am gi ahe neàna bohu vuusdam bak.”
15. Lahahat nam labe vabi abo gi vao abo gagoho tiba fa neo ab gagoham. “Dat busao, làhà Oho eba ame vao lam lu udele. Labiham labe em ba valo àhàkem vab labe em ba niba li vao noaiam vabak am tame.”
16. Lahahat Yesusat fa neo gago, “Làhà, om nasi fa le om dat gagome fa niba vou lele.”
17. Lahahat nam labe fa gago, “Mm, em dat vabak.” Lahame labi gagohemu Yesusat fa ab gagoham. “Lo, oho etei, ‘Em dat kaio,’ lahaha bak lam imbo taia? Lahana oho amu dat vaha bak auoholehe bak. Labi oho etei bako vou godam dat lam oho iademe vaha vab namet modem bak.”
19. Lahame labi gagoha nam nibe vatohedam labe fa neo ab gagoham. “Làhà Dat busao, em etei ab ozoham bak. Om Alat Am im fi desi fa meia ahate vameaidaha dàt mode moio?
20. Làhà Oho ozom, meit Ala bake, ‘Am abo feàte,’ lahame ahu adat iedi vou baedam di adi bake vou baedam labe neàde? Ne, im Samaria dam nibe gi sibu nidi niba Ala bake vou baedam bak. Abo im tai ahobada zi labe ibi iho aham di iube iho Ala bake vou baedam di gi sibu nidi nimota laisi ame baket meedam bak. Lahana um Yahudi damat neha, ‘Im Samaria dam git meedala. Gi Fihasi Ala Bake Vou Baedam Num Vàmteabu kota Yerusalem laba duzuhuna lamota Ala bake vou baedam bak am tame,’ lahame labi gagodam bak. Làhàmu Oho ozom, um Yahudi damat imbodeheo? Iho Samaria damat ibi iho meedam bak labet imbodeheo? Adida imbodehela?”
21. Lahame labi gagohemu Yesusat neo ab vi vameadamam. “Oi, Eho etei oba gagolo modem im nidi nim mahate aime tu vuzehele. Faobe ba damat im Ai Ala bake vou baedalo modem di ba gi sibu niba modeo, gi kota Yerusalem laba modeo, ba gi bak lamota vou baedam vabak.
22. Um Samaria dam labe uho Ala bake vou baedam di, ‘Akatihasu meedam Alat modela?’ laham bak lam um mahate ozobohudi neàdem vab damat Ala bake vou baedam bak. Lahana im Yahudi dam nibe iho Ala bake vou baedam di im abo ozobohu aabodi Ala bake vou baedam bak. Neham labe labihaha bak. Im Boehàda Alat amu di iube neha, ‘Aho ba dam soat vausu fa vei neàdedam bak lam Aho fa dam bake modi fi zeam bitom di Aho gi Yahudi dam labet modi ame bak lam fi zeam bito tame,’ lahame iba fet gagu esuhu bak.
23. Neham bak. Ala Am alihi im gi fota aam vabnat modem bak. Labihàmu iho dam bakda Aba vou baedam di gi im ahu ad nibet vi ozome vou baedam bak. Lahana gi modem vaba abo imbolabe ahu adat vi ozome ahu vàmadi Aba vou baedam bak. Damat ba im Ai Ala bake abo imbona vou baedalo modem di gi labiham bak ba mode tame. Gi im ahu ad nibet vi ozome abo imbolabe ahu vàmadi im Ai Ala bake vou baedam bak. Ai Ala labe gi, ‘Dam gi labihasu meedam damta Aba vou baedase,’ lahame ozome àhàki vou faodam bak. Lahana ame bak lam gi etei di nibet ab faasi meedamam bak.”
25. Lahame labi vameadume modeha nam labe fa neo gago, “Em nehi ozo. Alat Aho Gagu Olulo Modemda Boehàda ba iba le tame. Labi Aho lehezobe iho ba meedam biem im lam ahebu Aho ba iba gagu im ozobohudi fi gate tame.” (Ibrani dae, “Mesias,” laham di modeo, Yunani dae, “Kristus,” laham di modeo, gi, “Alat Gagu Fihasi Vimteme Oluhu Dat Boehàda,” lahame gagom bak am.)
26. Lahame labi gagoha Yesus labe fa ab gagoham. “Ne, Em ame Da am bak. Em ame Da etei im oba ab vameadamam bak.”
27. Lahame gi etei lab vameadam lahasuhu di labe iho Yesus bake vi tau meedam dam nibe iho num debu iuba le fa li aaha Yesus lahi bake im vameadam bak aame ab àvodeham. “Guruleheda ba lahi bake im ot vameaidam vabak. Fiham bak,” lahame ozome ab àvodeham. Lahana ba ame nam laba, “Om ana lehela?” lahame ba labi vi ailo gagom bak modem kai. Labi laha Yesus bake, “Guru, um ana im vameadàla?” laham bak lam laha ba vi ailo gagom iedi gi vei daleàde.
28. Labi ame nam labe am vao noamna lam gi laba vou esmozi ame num debu bake esdam dam laba fa ab emoeham. Labi le dam bake ab vameadamam.
29. “Etei niba li eba im vameadamda eho bàhàgo laba vou esmohoda lam um nasi eba tau fa le aamale. Da lam im ebe eho amu modeheda ahebu Ahamo ozobohudi eba gut vameadaha bak. Uho ozom, Da lam Alat amu Gagu Fihasi Vimeteme Iba Olulo Modem Boehàda iho vou faodamda ameo? Imo taho fa le aase,” lahame labi gagohemu dam lam ahebu num debu labe usname fa Yesus bake ab ladamam.
31. Labihadam di omozit iho Yesus bake vi tau meedam dam nibe Aba nehi gagoda. “Ai Guru oa, Om idoalehe bak na nasi li àle.”
32. Lahame labi gagoha Yesusat fa vi gago, “Em na àmna ehe bak um biem bak.”
33. Lahahat Am dam labe ihimo fa ab ot vameaidamam. “Uho ozom, Da nim amat na vou li lu àhela?”
34. Lahahat Yesusat Aho etei, “Na àmna ehe bak,” lahame lab gagoho bak lam fa neo vi vameada. “Eho na àme modi neàdemna ehe bak. Eba Gagu Oluhuda lam abo Em Ai Ala labe Aba Aho ozome Eba gagoho im lam ahebu meedume neàdem bak lam bisi Eba modi neàdemna am bak.
35. Nasi ozomale. Uho gi nehasu ozome gagodam damat mode taia? ‘Na debe uloholi neàdi ala ahiali ame na ba modeme vahedam bak,’ lahame labi gagodume baleàhà damat mode taia? Lahana Eho uba gi im nehasu gagom bak. ‘Um na utoho zi laba aale. Na ambedi neàdeho. Modeme vahedam bak ab vou fuham bak. Abo Samaria dam labe meit iba li vameadam labe aime Eba tu vuzehem bake ahumdi vou faodam bak ehe bak,’ lahame uba labi gagom bak.
36. Neham bak. Dam amuda iube bak vabieme neàdi na oo gulaha dam lam amu gi meedume neàdehe bak. Lahana dam ba etei nibe na modeme vahedam dam lam ibi iho na meedam bak gohali vamna lam etei ab vadamam tame. Labiham labe dat amu bak vabieme neàdi na oo gulahada lamti labi dat na ba modeme vahedamda lamti gi ame na ab modeme vahehamemu fa vahi deelem bak. Ame dam labe ibi iho modeme vahedamna lam gi dam Eba tu vuzehi im Ebeda meedamda zi am bak. ‘Ame dam laba im vameadume modi fa Eba tu vuzehi fa Alati vahi gi ahe neàna bohu vuusdase,’ laham bak laba ozome modeme vahedam bak.
37. Labihàmu damat gagodume baleàhà im nim imbote. Neha: ‘Dat meida na de. Labi ame na ambedehezobe dat meida fa modeme vaheda. Labihadam bak,’ lahame labi gagodume baleàhà im lam imbote.
38. Neham bak. Ba utoho Ebeda lam uho dehe vabna Eho ozahit uba neha, ‘Laba le na modeme vahedale,’ lahame Eho uba gagu oudaha bak. Ame utoho lam Alat dam amomoi gagu oudaha dam labe iho tat vueme na debe vanamahana uho gi mei na ahum fa modeme vahedaha bak,” lahame Yesusat im labihasu ab vameadume esuham.
39. Ame Samariada lahi labe neha, “Da lam im ebe eho amu modeheda ahebu Ahamo ozobohudi eba gut vameadaha bak,” lahame aho aime àvodi fa dam bake ahate vameaha labe ame Samaria dam lam num debu Sikar laba esuhu dam dua totbaho labe neha, “Ame Da Yesus lam Alat Gagu Fihasi Vimteme Oluhu Dat Boehàda Am am bak,” lahame ab tu vuzeheham.
40. Labi ame Samaria dam labe Yesus bake le tàhi im vameadaha di labe Yesus bake deeli nehi gagoda. “Om nasi a lamule. Iba tau iddume lale,” lahame labi gagodàmu Yesus uledi ame dam labe im num debu bak laba le tau aidume usi ab behàsdeham.
41. Ame dam laba Yesusat Ahamo Am im vahokedume usi behàsdi modeha dam dua bak neo vi tauidume Yesus bake ab tu vuzehedamam.
42. Labi tu vuzehedam labe fa ahamte Yesus bake tàhi im vameadaha nam laba nehame ab vameadamam. “Iho etei Yesus bake lab tu vuzehehe bak lam oho aame iba li vameadaha bak lamota ozome tuhu vabak. Im gi ihimo Yesus bake le tàhi im Abada aidume ab tu vuzeheham bak. Abo imbote. Ame Da Yesus lam abo dam bakda ahebu Soat Vausu Fa Vei Neàdemda Am am bak,” laham im lam ab vameadaham.
43. Labi Yesus Aba vi tau meedam dam lamti iho num debu Sikar lam vou esmozi ibi iho Galilea bak laba lam bak ozome neo ab ladamam.
44. Di amuda iube Yesusat Ahamo nehi ahate gagoho bak ehet. Aho neha, “Dat Alat vameadaha im aime fa dam bake ahate vameaidahada labe aho bak mei bake lam dita ame dam labe ahu adat iedi aho lab vou le vahokedaha im lam ule neàt gut ve aba vou baedam labe am im aime meedam meo bak. Lahana aho am budualehe bak laba fa le am dam laba im vahokedam di am dam labe gi ailahigeàmodam meo bak. Ba ahu adat iedi aho lab li vahokedaha im lam aime aba vou baedam vabak,” lahame ahate gagoho bak ehet.
45. Lahana Galilea bak zoho laba lafusi modeha ame Galilea bak laba azihi dam totbaho labe gi Aba deelehat gut vada. Ame dam labe amu Yahudi damat kota Yerusalem laba vahe vaheme ame na àme iziam bak abo Paskah lam laba tau vahi meedam di lam Yesusat na damat ihimo modem biem im feàna zi meedaha bak fako ibidat aadahemu labihada.
46. Labi neo Galilea bak laba ladam labe ame bak labe am num debu meida Kana laba fa ab laham. Abo Aho amu laba le vao aabo modi fa anggur oo vaksalehe bak laba fa ab laham. Ame di labe Roma Boehàda meida labe am na vi tau meedamda meida labe am adat fa ibi iho azim num debu Kapernaum laba gaili bisda.
47. Làhàmu aho aiha Yesusat Yudea bak labet fa Galilea bak niba lehe bak aihemu Kana laba le Yesus bake tàhi ab tauledamam. “Em adat Kapernaum laba gaili bisdamda elolo vabaleha. Oho eba nasi tau le modi fa neàdem neào?”
48. Lahame labi taulehemu Yesusat ab gagoham. “Na damat ihimo modem biem im feàna damat amu aaha vabna fet aame àvodemna Eho modem bak lam um dam bakda labe aam vabameam um ba, ‘Em abo Alat Gagu Fihasi Vimteme Oluhu Dat Boehàda am tame,’ laham bak ba Eba tu vuzehem vabak.”
49. Lahame labi gagoha ame eeda labe fa gago, “Dat busao, bisi a kehàmule. Em adat elolo vabaleho. Fa taho lase.”
50. Lahahat Yesusat fa gago, “Om nasi om num bake lale. Om adat gi fa neàdehena fa le aa tame.” Labi ame eeda labe Yesusat etei lab gagoho bak laba aime tu fa am num bake Kapernaum laba ab ladamam.
51. Labi ladume izi dihasi neo ladameam aaha am na modem dam doait ledam bak ab tàham. Tàhi gago, “Aia, om adat gailehe bak fa aodeha.”
52. Lahaha bak aihemu gago, “Ne ana jam fat aodehela?” Lahahat ame dam labe fa gago, “Màt jam satu am so galihaha bak fa neàdi setehena ozomoho bak.”
53. Lahaha bak lam aihemu ame eeda labe it ozo. “Oo làhà! Jam lam gi Yesusat eba neha, ‘Om adat fat ahede tame,’ lahame gagoho jam ame?” lahame it ozobohudi aho am dam laba fi desi aho am damti neha, “Ame Da Yesus lam Alat Gagu Fihasi Vimteme Oluhu Dat Boehàda am tame,” lahame Yesus bake ab tu vuzeheham.
54. Yesusat ahamte Yudea bak labet fa Galilea bak niba li na damat ihimo modem biem im feàna damat fet aame ozobohudemna ahamte modeheda lamti etei modehedati vahi gagom di ab behàsdeham bak.
1. Labi ba di meida iube Yahudi dam neo vahe vaheme na àme iziam di neo meida meedàmu Yesusat, “Vi tause,” lahame kota Yerusalem fa neo ab laham.
2. Ame kota Yerusalem bàhàgo obe ke vou vahe zime vabousuhu bak labe am doo meida ad laba, “Domba Ot Loiam Bak Laba Netàdi Modesuhu Doo,” laham doo labe am obe damat sihi vao nobu ehet. Ame vao nobu ee Aram dae gagom di, “Betesda,” laham bak. Labi ame vao nobu labe am valau obe laba vabousuhu ohut baana zisuhuna abo natàh vabna damat nutabe bake nusum bak auohole laba ehet.
3. Ame bak laba dam fako faida na aam biemda ziti nao zoho nutabedeheda zi lamti nisileheda totbaho ziti labihasu ame bak laba beiladam meot. [Neham bak. Ame vao nobu laba Alat Am im gagu vou usemda labe nom ilu ame vao laba modi bobodam meot. Labi ame vao gi etei faasi bobodam di labe dat nisileheda nasi fusi ehumda lam am faidehe bak modi fa neàdemda am. Labihàmu vao bobodam bak aalo ame dam nisileheda zi laba beilame vou faoda.]
5. Ame di lam dat nisili abo tiga puluh delapan tahun fuhuda ame bak laba ehet.
6. Lahamda labe bisdam bak Yesusat aame ozo, “Da nim am nisilehe bak abo tahun duana gailehe?” laham bak Ahamo ozobohudehemu ab gagoham. “Om fa neàdem bak uledem vabao?”
7. Lahahat dat nisileheda labe fa gago, “Lo, Dat busao, em ule bak. Lahana ame vao modi bobodam di lam dam aheda em visoi nom voomda vabak. Labiham labe ehemo etei usai lasome modiameam kehàm vaba meit vao bobodam bak laba nasi ehu fa neàdedume em vooidam bak tadehe bak.”
8. Lahahat Yesusat ame da laba ab gagoham. “Làhà, usai duzu oho ousu imna lam ve bolome fa om num bake lale.”
9. Lahame gi etei labi gagohoilahit ame da lam fa ab neàdeham. Làhàmu usai aho ousu imna lam ve bolome fa ab ladamam. Yesusat ame da laba modi fa neàdehe di lam gi hari Sabat abo Yahudi dam labe ibi iho gi azibe im digat modi fa neàdehe bak.
10. Labi dat etei Yesusat modi fa neàdeheda labe aho ousu imna lam ve vou ladam bak lam Yahudi dam busaoda im vameadam dam labe iho ame da labe aho meedam bak lam vi aame ame da laba im ab vahokedamam. “Etei hari Sabat abo gi azibe im digat modemu akati oho ousu imna lam ve vou ladàla? Dat ahamda Musat aho neha, ‘Hari Sabat na a meedamule,’ lahame toeme fi hasi esuhu labe im Yahudi damat na modem fi ham digat om akati git meedà?”
11. Lahahat ame da labe fa gago, “Vabà! Dat eba modi fa neàdeheda labe Aho neha, ‘Oho ousu imna lam ve bolome vou lale,’ lahame gagohemu eho gi ame baket modehe bak.”
12. Lahahat ame dam labe fa neo gago, “Ne, amat oba neha, ‘Oho ousu imna lam ve vou lale,’ lahame labi oba gagohela?”
13. Lahame labi gagoha ame da labe aba modi neàdeheda lam, “Amat modela?” laham bak am fa vei vabile. Yesus ba laba doudam vaba gi im vameadam labe dam duada zi laba valiheme setehe labe am gi ab vei vabileham.
14. Labihadume kehàm vaba Yesusat ame da laba ba neo ame Fihasi Ala Bake Vou Baedam Num Vàmteabu labe am ad oli aam bak tomba laba ab vi tàham. Vi tàhemu gago, “Nasi aima. Om fa neàdehena, faina meedam bak bohu vuusdam bak nasi vaitole. Oba neo im mei im meime feà bak fumo. Amu gi koena modehe bak fa dualemo.”
15. Lahaha bak lam ameda nibe, “Eba modi fa neàdeheda Yesus ame?” laham bak di labe ozobohudi fa ame Yahudi dam busaoda zi laba fa le ab fi deham. “Eba modi fa neàdeheda Yesus am tame,” lahame ab le fi deham.
16. Ame bak lam le fi dehemu Yahudi dam busaoda im vameadam dam labe iho ozoha, Yesusat gi ame hari Sabat meia modi fa neàdehemu Yesus bake feàtàdume vabidam bak bohu ab faaham.
17. Lahana ame dam labe Aba Aho meedam bak biehemu tombalelo Yesusat ame dam laba im ab vameadamam. “Ne, Em Ai Alat gi amu di iube faasi digat ahebu dam bakdate faobekesi ozahit dam bake im neà bak meedume etei vou fuhu bak. Ba digat meida labe gi azibe im vabak. Ba akati Eho laha modem vaba moela? Em gi Em Aiat modehe baket vi vouhodam bak.”
18. Lahame Yesus Aho etei labi gagoho bak labet modi ame Yahudi dam busaoda zi labe, “Imo Yesus otese,” lahame faki feà bak fusi neo im aa ab vi odoadamam. Gi labihadam bohu ab faasi meedamam. Ame dam labe neha, “Gi im hari Sabat na modem fi ham digat labe Yesusat mei modi fa neàdehe bak. Labi Aho laha Ala bake, ‘Am Ai,’ lahame lab gagoho bak labet modi Am fa Alati uloholehe bak,” lahame ame Yahudi dam busaoda zi labe Yesus bake ab fakeham.
19. Làhàmu Yesusat fa ame Yahudi dam busaoda zi laba ab gagoham. “Ebe Eho etei uba gagolo modem im imboda nidi nim um nasi iademe aima. Em Alam Adat modem labe Em ba Ebe Eho ozoho baket meedam vabak. Gi Em Ai Alat Aba Aho ozoho bak laba aame ozobohudi vi meedam bak. Am Adat na meedam bak lam gi Am Aiat na meedam bakti ulohona meedam bak.
20. Neham labe labihadam bak. Em Aiat Eba deeli meedam bak. Labi Aba Aho ozome meedam im ahebu lam Aho Eba modi fi gatehe bak. Labihàmu digat meida ium ame da nisileheda lam Eho modi fa neàdehe bak. Lahana Em Aiat Eba ba neo modi Eho ba modem im lada lam vafozi gi feàna modem bak. Labiham labe um ba àvodem bak.
21. Neham bak. Em Aiat mei eloho bak labet modi fa ahedem bak lamti ulohona Eho Am Adat modem labet Eho laha Ebe Eho ozome deelemda laba Eho laha modi fa ahe neàna bohu vuusdam meo bak.
22. Labi laha dam bakdat ibi iho na im meedam bak lam Em Aiat Aho ba uloome vi aime ozobohudi neàdi neha, ‘Da lada lam im vamdesu meedam vabda am. Beose. Da nidi nim im vamdesu meedamda am. Neà bak fà modese,’ lahame ba vi ozome ozobohudi neàdi gagodam vabak. Ame bak lam Aho gi Eba Am Adat niba fa gagu Eho fa ot vai im dedateli Eho ame baket meedam bak.
23. Em Aiat neham bak ozome Eba labihaha bak. Damat Eba ahu adat iedi vou baedam bak lamti ulohona fa Em Adat bake, ‘Ame baket modese,’ lahame labihaha bak. Meit Am Adate ahu adat iedi vou baedam vabameam làhà ba Am Ai Aba Gagu Oluhudate laha ahu adat iedi vou baedam vabak.
24. Im lada lam imbomu im imboda nidi nim laha nasi iademe aima. Meit Eho vameadaha im zi lam tu vuzehi meeda. Labi fa neo Eba gagu oluhuda Em Ai Ala bake laha tu vuzehe. Labihameam làhà Alat ba ame da laba, ‘Om faina meedam bake beose,’ lahame ba na asimbuna feà modelo gagom vaba gi modi fa Alati vahi gi ahe neàna bohu vuusdam bak. Alati vaitesum bohu modem zie lam vou esmozi fa Alati vahi gi ahe neàna bohu vuusdam zie laba lam bak.
25. Labi im nidi nim laha iademe aima. Dam Alati ot vaitesuhu dam lam ba Alam Adat nibe abo Ebe Eho vameadam im aidam bak ehete. Lahana ame di ab vou fuham bak. Labihàmu Ebe Eho lab vameadam im lam meit tu vuzehi meedaha dam lamota Alat modi Amti vahi gi ahe neàna bohu vuusda tame. Em ame Da ab li dam bake vuusu im vahokedam amemu labihaha bak.
26. Neham labe labihaha bak. Meia modi ahe neàna bohu vuusdam Alat modem labe Aho laha gi amu di iube Emti ahili asum ahoba vahi esdam di labe Aho Eba Am Adat niba vizi Eho fa im dedateli meia modi fa ahe neàna bohu vuusdam Dàt modem bak.
27. Labi Em Abo Asum Ahoba Iubet Bak Niba Li Dateleheda modem labe Em Ai Alat Eba Am Adat niba laha neo modi Eho fa ot vai im dedateli dam bakda ibi iho na im meedam bak laba Eho uloome vi aime ozobohudi neàdi gagodam bak.
28. Eho etei lab gagoho bak lam bisi a àvodemule. Neham bak. Dam elodahada zi labe ba diamut fa Eho, ‘Lele,’ lahame butem dae lam aime fa im baumahe bak labet usnadam digat ba fu tame. Dam ahe diat im neà bakta meedaha dam lam usnadume fa Alati vahi gi ahe neàna bohu vuusda tame. Lahana dam ahe diat faina meedaha dam lam usnadume Eho neha, ‘Beodume Alati vaitesuse,’ lahame na asimbuna feà modelo gagoda tame.
30. Lahana ame bak lam meedam di ba gi Ebe Eho ozoho baket meedam vabak. Eho meia uloome vi aime ozobohudi neàdi, ‘Beoeo? Beom vabao?’ lahame gagodam bak lam Eho gi Em Ai Alat Aba Aho gagoho bak lam aime neàdi ame baket meedam bak. Labiha labe Eho meia lab uloome vi aime neàdi gagom bak lam ahebu gi ahole vamdesu gagodam bak tadehe bak. Neham labe labihaha bak. Em ba, ‘Ebe Eho ozoho baket meedume Aho fà deelese,’ lahame ba meedam vabak. Em gi Eba gagu oluhuda Em Aiat Aba Aho, ‘Nehame modese,’ lahame ozoho baket meedume, ‘Aho fà deelese,’ lahame meedam bak. Labihaha bak,” lahame Yesusat ame Yahudi dam busaoda zi laba ab vameadaham.
31. Yesusat ame Yahudi dam busaoda zi laba neo nehame vi vameada. “ ‘Alat Gagu Fihasi Vimteme Oluhu Dat Boehàda Em ame Da am tame,’ lahaha bak lam gi Ehemo naedat gagomeam dam amomoi aame ozobohudi tau gagomda vabalemeam làhà Eho lab gagoho bak lam, ‘Imbo gagoheo? Giomim gagoheo?’ laham bak lam um ba tu vuzehem biem bak.
32. Lahana Eba tau gagomda ehe bak. Em Ai Ala labe Aho Eba tau gagom bak lam ba giomim gagom vabak. Abo imbo bak gagodam bak. Tu vuzehem neà bak.
33. Labi um laha Yohanes Mei Vuu Valo Baptisleiamda laba, ‘Om ame Da modeo?’ laham bak vi ailo dam amomoi aba olu gagu aiha aho neha, ‘Em ame Da modem kaio,’ lahame veibame Eba laha ahate tau gagoho bak. Aho lab gagoho bak lam imbote. Ba giomim veibam kaio.
34. Lahana Yohanesat lab gagoho bak lam, ‘Em ame Da modem kaio,’ lahaha bak lam am gi bak dàt Eba tau labi gagoho bak. Em ba ame bak laba tum vabak. Em gi uho Yohanesat lab gagoho bak lam fa vabilemna zohàme Eho gi ahit, ‘Uho Yohanesat lab gagoho bak lam aime fa Eba tu vuzehi Alat uba beom vaba soat vausu fa vei neàdedase,’ lahame Eho ahit uba vi vameadam bak.
35. Ame da Yohanes aho lab Eba tau gagoho bak lam gi vuagat fauhaedam bakti ulohona fauhaedam labe uba laha modi fauhaedam bak. Labi Yohanesat lab vameadaha im lam um gi ule neàt deeli dogoit aidam bak. Lahana uho lab ule neàt dogoit aidam bak lam ba bohu vuusdam vabak. Gi kehàm vaba fa setem bak.
36. Lahana Eho ozoha, meit neha, ‘Alat Gagu Fihasi Vimteme Oluhu Dat Boehàda Em ame Da am tame,’ lahame Eba tau ahate gagom bak lam Yohanesbada vafozi bisi feàda ehete. Neham bak. Em Aiat neha, ‘Im nidi nim nehasu modele. Im nidi nim nehasu modele. Labihadume neàdi folele,’ lahame Eba gagoho im zi lam ahebu Ebe Eho etei ozome meedam im am bak. Abo Ebe Eho vahokedam im modeo, na damat ihimo modem biem im feàna Eho meedam bak modeo, lahamna zi lam meit aame ozo, ‘Imbot. Em Aiat Eba gagu Eho bak niba lehe bak,’ laham bak ozobohudi tau gagodam bak.
37. Gi im lada lamota Eba tau gagodam vabak. Em Aiat abo Eba gagu bak niba oluhuda Ahamo laha tau, ‘Em ame Da am tame,’ lahame Eba tau gagodam bak. Lahana um ba Am dae koena aim bak vab. Ba Am alihi aam bak laha vab.
38. Labi laha Aho gagu uba oluhuda nim uho im Ebeda tu vuzehem vab labe ba im Abada laha um ahu tu vuzehem vaba mu voedaha bak.
39. Uho vedi neha, ‘Alat Vameadaha Im Toedahana zi lam iho ulohodesu meedameam làhà iba modi fa Alati vahi gi ahe neàna bohu vuusdam bak,’ lahame dihasi ame im laba aame ozoda. Dihasi ame im laba neo aame ozoda. Gi labihadam bohu vuusdam damat modem bak. Lahana um ozom vaba? Alat Gagu Fihasi Vimteme Oluhu Dat Boehàda lam, ‘Em ame Da am tame,’ lahame fet vameame esuhu bak ehe bak.
40. Lahamnàme um ba, ‘Im Alati vahi gi ahe neàna bohu vuusdase,’ laham bake ba Eba tu vuzehem moudam damat modem bak.
41. Lahana Eho etei uba im lab vahokedaha bak lam um a git ozodamule. Em ba, ‘Dam bak damat Eba ahu adat iedi, “Em abo feàte,” lahame vou baedase,’ laham bak ozome ba uba im vahokedam vabak.
42. Lahana uho um ahulat meedam bak lam Em ozobohu bak. Um ba Ala bake ahulat deelem vab damat modem bak.
43. Eho bak niba lehe diat Em Aiat Eba gagu oluhu di labe Aho Eba modi Am im ot vai im dedatelehemu lehe bak. Lahana um ba Eba gut deeli vaha vabak. Lahana meit ahamo ozome ostame li vameadam di uho gi gut aime deeli vuzehem meo damat modem bak.
44. Um gi, ‘Dam totbaho labe fà iba, “Im abo feàte,” lahame iba deeli vou baedase,’ lahame ot modidam damat modem bak. Lahana uho ba Ala bisi imboda vàmtea labe, ‘Aho fà iba vou baedase,’ lahame ba Aho uba deelemna lam uho ba meedam vab damat modem bak. Um labihadam damat modem labe ba akati uho Eba tu vuzehi meedà?”
45. “Uho Eba lab moho bak lam uho ozom, Eho ba diamut Em Aiat avaesdam laba duzu uba vàlu gagoe? Vabà! Eho ba uba vàlu gagom vabak. Uba vàlu gagomda Musa am bak. Uho vedi nehame tu vi ozodam damat modem bak. Dat ahamda Musat toedume fi hasi esuhu Im Feàna zi lam uho vuzehi ulohodesu meedam labe Alat uba soat vausu fa vei neàdedam bak am tiba. Lahana ba labiham vabak.
46. Lahana ame da Musat gi aham di iube Ebe Eho ba modem im fet toeme esuhu bak. Labihàmu uho Musa bake imbona tu vuzehi meedam labe uho akati Eba laha tu vuzehem vaba mode?
47. Lahana uho Musat toedume fi hasi esuhu Im Feàna zi lam uho abobo tu vuzehi meedam vab labe ba akati Eho vou li vameadam im nim uho tu vuzehi meedà?” lahame Yesusat ab vi vameadaham.
1. Labi ba Yesus Aba vi tau meedam damti iho kota Yerusalem vou esmozi fa Galilea bak laba li digat meida labe iheba ziddume Itea Galilea dumam tot iuba ab bioham. Ame itea lam ee behàsute. Ee meida Tiberias am.
2. Di lam dam dua bak Aba vi tau goda. Yesusat dam gaileheda zi modi fa neàdedaha bak abo na damat ihimo modem biem im feàna damat fet aame ozobohudemna zi Aho amu meedaha bak aahemu vi tau goda.
3. Labihadume modeha Yesus Aba vi tau meedam dam lamti iho bak otesuhu bak labet fa tom ladume ab zizi nusualadaham.
4. Ame di lam Yahudi dam labet ibi iho modi baleàhà bak na àme iziam bak abo Paskah lam neo fuseo vabaehe di am.
5. Labi nusualadume neàdi Yesusat lab aidam labet nom aaha dam dua bak zi fai, “Aba netàdese,” lahame tom ledam bak ab nom aaham. Làhàmu Filipus bake gago, “Dam zi fai nim iho ake le roti doit vame lodume àdàla?”
6. Lahame Yesusat etei lab gagoho bak lam Aho ba modelo modem im Ahamo naedat ozobohuna ahit biehenali Filipusam ahu modi ozolo ahit fi bovai ab gagoham.
7. Lahahat Filipusat fa ab vi gagoham. “Aa! Dam zi feà nimohona iho na ake vame lu àdàla? Dam bisi feà labe ba meit na modeme ala delapan foli vam doi lamohoda vou le na àmna vameam ba uloholem vabak. Iho na àmna le ve fa dam bake vou li gi koena zagum bak laba ozome lodume uloholesome meedameam dam bisi feà labe na koedi dam zoho fotem bak.”
8. Lahame labi gagoha Aba vi tau meedamda meida abo Simon Petrusam dubu Andreas labe aho neo vi gago, “Guru oa, daboseà nib doudamda nim am rotibu gi auoholehenati bohe behàsu buàti ehete. Lahana oho akatiham bake ozome labi gagohela? Dam duana na nim àm koena ba akati modi faheme lodume uloholela?”
10. Lahahat Yesusat fa gago, “Uho dam gagome sibe baa niba nusualadale.” Làhàmu gagu ab nusualadamam. Ame bak lam sibe baa duamu laba gagu ab nusualadaham. Ame dam zi lam dam aabota dem di abo lima ribu fuhu bak.
11. Labi nusualadume neàdi Yesusat ame rotibu auohole lam ve Ala bake, “Neàte,” lahame tom gagu neàdi ame rotibu auohole lam fahedume fa Aba vi tau meedam dam laba lodume iho fa ot vai vame dam duada zi laba ab lodaham. Labi neo bohe lam gi ame baket meeda. Abo dam labe àme dedem bake uloholi ab lodaham. Labihadume dam lam ame na lam àdume modeha dedebuli na àmna zoho gi vaheme esu.
12. Làhàmu Yesusat Aba vi tau meedam dam laba ab gagoham. “Uho nasi na damat àme dedehemu esuhuna zoho lam ahebu vamatele. Na meida vàmtea a voomule.”
13. Làhàmu rotibu auohole modi dualehena lam damat àme neàdi vahehena zoho lam vi ateti atetidume boloseh vahedume modeha boloseh dua belas ab bektoham.
14. Na damat ihimo modem biem im feàna damat fet aame ozobohudemna Yesusat etei lab modehena lam damat vi aahemu im nehasu ab faasi vameadamam. “Làhà, Ame Da Yesus nim abo Alat Vameadaha Im Aime Fa Dam Bake Ahate Vameaidahada abo Alat amu neha, ‘Aho bak niba olu tame,’ lahame fet gagu esuhuda lam iho vou faodam Dat am taia?” lahame ab faasi vameadamam.
15. Làhàmu damat neha, “Imo Yesus tet si modi iba vuusdam boehàdatelese,” lahame fet ozome esuhu bak lam Yesus ahamo nasi ozobohudi ozo, “Em Aiat Aba Aho ozome esuhu bak fuhu vabak,” laham bak ozobohudi bak lam vou esmozi Ahamo fa neo ab tom ladamam.
16. Labi disi aibulehemu Yesusat Aba vi tau meedam dam labe ihimo ab lazeham.
17. Labi lazi iheba ziddume itea tot iuba num debu Kapernaum laba aibut ab biodamam. Aibulehenàme Yesus ba iba tau biodam kai.
18. Labi biodume itea tombu fusi modeha nutabe fai iubet li vao baho foadam labe im ihe ab oke okedamam.
19. Gi oke okedamna geàmu vou vaelame enam kilometer lamoho ozomomna fusi it aaha Yesusat gi vao tom ahoba laba duzui duzuidume iba ledam bak ab aaham. Lahamnàme, “Yesusat mode?” laham bak im ozobohu vab labe ab iedi modem faideham.
20. Làhàmu Yesusat vi vuli netàdi ab gagoham. “A iedemule. Eho ledalo.”
21. Lahaha bak aihemu iho gi deelehat gut gagu Yesusat fa ab ziham. Labi zihat gi kehàm vabna ibi iho ladam auobe ab zituham.
22. Labi izi dihasi Yesus Aho ahamte li meedaha tot iuba vou esmoho dam labe Yesus setehe bake nabida. “Uho ozom, Yesus ake lahela? Ne, im ba bak niba ihe behàsu aaha vabak. Gi ihe vàmteana Aba vi tau meedam dam labe ihimo ziddume ab bioham bak,” lahame ot vameaida.
23. Labi vameadameam aaha num debu Tiberias laba azihi dam ihe ibida ziddume li zituadaha bak ab aaham. Abo màt im Boehàda Yesus Aho rotibu ve Ala bake vou baedume modi dualehe roti àdaha bak netàdi zituadaha bak ab aaham.
24. Labi zituadume nabidume aaha Yesus Aba vi tau meedam damti im alihi aam vabamu fa im iheba ziddume Kapernaum dumam tot iuba Yesus bake vi nabidalo ab biodaham.
25. Labi biodume dumam tot iuba ab zituadaham. Zitu nabidume Yesus bake ab tàham. Tàhi gago, “Ai Guru oa, Om adi diat niba fuhela? Akati modi biohela?”
26. Lahana Yesusat fa gago, “Lo, uho lab gagoho bak lam Em aiha. Lahana Eho etei uba gagolo modem im imboda nidi nim laha nasi iademe aima. Ubu uho ozome Eba nabidam bak lam Em ozobohu bak. Na damat ihimo modem biem im feàna lam abo damat fet aame ozobohudemna Eho lab meedahana labe am im tombu um ozobohudi Eba nabidam vab damat modem bak. Um gi ame roti lam àdume dedehe labet, ‘Fà neo àse,’ lahame Eba vi nabidam damat mode taia?
27. Na iho àlo àhàki dihasi meeda. Dihasi meeda. Laham im lam bisi a tombuli meedamule. Lada lam gi kehàm vaba koeili sete. Labi gi àme foli sete. Labihadamna bohu meedam bak. Fa gi nehale. ‘Im akatihasu meedam labe iho Alati vahi ahe neàna bohu vuusdàla?’ laham bake gi na àmna koeilem gikina abo uho tu vuzehem bak laba modi teudemna laba vi ozome keàtedi ame im lam dihasi mode. Dihasi mode. Labihadale. Ame bak uba modelo modemda lam gi Asum Ahoba Iubet Bak Niba Li Dateleheda nibe Eho uba ame bak lam modem bak. ‘Ame baket modele,’ lahame Em Ai Alat Eba deeli gagohemu Eho ot vai im dedateli ab meedamam bak.”
28. Lahame labi gagohemu ame dam zi labe fa vi ailo ab gagoham. “Iho ana im meedam labet Alat fa Aba Aho ozoho bak ulohodesu meedàla?”
29. Lahahat Yesusat fa gago, “ ‘Im nehasu meedale,’ lahame Alat uba gagohona gi neham bak. Alat Aba Aho Gagu Fihasi Vimteme Uba Oluhu Dat Boehàda Em ame Da niba uho tu vuzehele.”
30. Lahahat ame dam labe neo vi gago, “Làhà, Oho na damat ihimo modem biem im feàna abo damat fet aame ozobohudemna modem labe iho aame ozo, ‘Imbote. Alat Gagu Fihasi Vimteme Oluhu Dat Boehàda Om am bak,’ lahame iho aame Oba tu vuzehem bak. Làhà Oho ame im feàna adida modi iho aaela?
31. Ne, im tai ahobada zi labe iho aham di iube bak aotba baa bohu dam vaba alim bak Alat ahit zie vou kibo kibodam di labe na àmna ee gagom manna lahamna vou à ladaha bak. Ame im lam meit Alat Vameadaha Im Toedahana laba nehame toehe bak ehe bak. ‘Asum ahoba iube bak niba goagoadamna lam Musat dam laba lu àdaha bak.’ Lahame toehe im ehe bak. Làhà Oho laha ame da Musati ulohona laha modeme iho aame ozobohudi Oba tuse.”
32. Lahahat Yesusat fa gago, “Lahana bisi imbo bak gi nehaha bak. Ame na um tai ahobada zi labe iho àhana lam ba Musat lodaha vabak. Gi Em Ai Alat ame dam laba lodaha bak. Labi etei nim neo Em Aiat roti abo imbona asum ahoba iube bak niba oluhuna uba lolo modem bak ab faasi meedamam bak.
33. Ame roti imbona lam abo Alat uba lolo modemna lam gi neha: Gi Dat asum ahoba iube fa bak niba li dam bakdate modi fa ahe neàna bohu vuusdamda Am am bak.”
34. Lahahat ame dam zi labe fa neo gago, “Làhà! Dat Busao, Oho etei di nibe faasi ame roti lam iba dihasi lo dihasi lo labihadale.”
35. Lahahat Yesusat neo ab vi gagoham. “Na Àmna Meia Modi Alati Vahi Gi Ahe Neàna Bohu Vuusdam Roti lam Em ame Da am bak. Meit Eba tu vuzehemeam làhà ba idoali valo àhàkedam vabak. Eho ame da laba modi asimdi bohu vuusdam bak.
36. Lahana Eho amu uba gagoho bak lam abo uho Eho meedaha im feàna lamti Emti aadahanàme, ‘Alat Gagu Fihasi Vimteme Oluhu Dat Boehàda Em am tame,’ laham bak Eba ba tu vuzehem vabak lam uho meedam lahasuhu damat modem bak.
37. Em Aiat neha, ‘Dam nim Om dam am tame,’ lahame fet gagu esuhu dam lam Eba ba tu vuzehi im Ebeda meeda tame. Labi Eba ba tu vuzehem dam lam ba meida vàmtea Em mu voom vabak. Abo vam bak.
38. Neham labe labihaha bak. Em asum ahoba iube bak niba lehe bak nim Em ba Ebe Eho ozoho baket modelo lehe vabak. Gi Eba gagu oluhuda Em Aiat Aba Aho ozoho baket meedalo lehe bak.
39. Eba gagu oluhuda Em Aiat Aba Aho ozoho bak gi neham bak. ‘Damat Eba ozom di, “Em abo Alam Adat am tame,” lahame ozobohudi Eba tu vuzehem dam laba Eho modi fa Em Aiti vahi gi ahe neàna bohu vuusdam bak ame. Labi Aiat neha, “Dam nim Om dam am tame,” lahame fet gagu esuhu dam lam Eho meida vàmtea voom vaba gi ahe neàt vuusu vou aasdam bak ame. Gi labihasu vou aasdume Dam Bake Uloodume Vi Aime Ozobohudi Neàdi Fime Fahedam Digat vou fusi ame dam lam elodahanàme Eho modi fat ahedi usnadam bak ame. Labihadase,’ laham bak lam Em Aiat Aba Aho ozoho bak am bak.”
41. Lahame labihasu vameadume modeha ame Yahudi dam fa Yesus bake ab voe voedamam. Yesusat amu neha, “Ame roti asum ahoba iube fa bak niba oluhuna lam Em ame Da am tame,” lahame lab gagoho bak lam aihemu faki fa Yesus bake ab voe voedamam.
42. Voe voedam labe ot vameaida. “Aa! Da nim gi Yusufam adat Yesusat mode taia? Ne, Am oiti Am aiti im ozobohu bak. Baka akati Aho neha, ‘Em asum ahoba iube fa bak niba lehe bak,’ lahame labi gagodàla?”
43. Lahahat Yesusat fa ab gagoham. “Uho lab faki Eba voe voedam labe ot vameaidam bak lam nasi vaitole.
44. Meit Eba tu vuzehelo modemeam làhà ahamo ozome Eba tu vuzehem vabak. Amu Eba gagu oluhuda Em Aiat nasi meit Eba tu vuzehem bak lam ame da laba modi vizem labe ba Eba tu vuzehem bak. Labihamda lam Eho ba diamut Dam Bake Uloodume Aime Ozobohudi Neàdi Fime Fahedam Digat fum di lam am eloho bak labe Eho modi fat ahedi usa tame.
45. Dam ahamda Alat vameadaha im aime fa dam bake ahate vameaidaha dam labe damat Eba ba tu vuzehem bak laba ozome ibi iho aham di iube nehi fet toehena nidi nim ehe bak. ‘Alat fa dam ahebu im vahokeda tame.’ Alat Vameadaha Im Toedahana labihameam làhà Em Ai Alat Aho vahokedam dam lam im Abada aime ozobohudi tu vuzehi meedameam làhà Eba laha tu vuzehi im Ebeda meedam bak.
46. Lahana Eho etei lab gagoho bak lam uho a nehi git ozodamule. ‘Meit Em Aiam alihi aaho,’ laham bak a ozomule. Ba meit Am alihi aahada vabak. Gi Aba Aho gagu oluhuda Emota Am alihi aame ozobohudehe bak.
47. Im lada lam imbomu im imboda nidi nim laha nasi iademe aima. Meit Eba tu vuzehemda lam Alati vahi gi ahe neàna bohu vuusdamda am bak.
48. Em abo Roti Meia Modi Alati Vahi Gi Ahe Neàna Bohu Vuusdam Roti Em am bak.
49. Um nasi ozomale. Aham di iube um tai ahobada zi labe iho bak aotba baa bohu dam vaba alim bak laba Alat ahit zie vou kibo kibodam di labe iho vou à laha manna zi lam ba iba modi Alati vahi ahe neàna bohu vuusdaha vabak. Ame na àdamnàme gi bak laba elodume seddaha bak.
50. Lahana asum ahoba iube bak niba nom oluhu roti nim abo Em nib doudamda nim ba labiham vabak. Meit ame roti nim àmeam làhà gi Alati vahi ahe neàna bohu vuusdam bak.
51. Imbote. Asum ahoba iube bak niba nom oluhu roti abo meia modi Alati vahi gi ahe neàna bohu vuusdam roti lam Em am bak. Meit ame roti nim àmeam làhà Alati vahi gi ahe neàna bohu vuusdam bak. Ame roti lam gi Em nu am. Dam bakda ahebu iho Alati vahi gi ahe neàna bohu vuusdam bake Eho ahit Em nu nim uledi dam bakdate lolo modem bak.”
52. Yesusat etei lab gagoho bak lam gi amti vou alem bake vi ozome am nu niba gi it vàlu gagoho im laba Yahudi damat vabi otesidam labe gago, “Oo, da lam akati Am nu iba lu iho àela? Ba labiham biem bak.”
53. Làhàmu Yesusat ozo, “Damat Eba tu vuzehi ibi iho faina meedaha bak lam Aho ba Am vasea veàtoi fa faamom bak uledese,” lahame neo im nehasu vi vameada. “Eho etei uba gagolo modem im imboda nidi nim iademe aime ozomale. Asum Ahoba Iubet Bak Niba Li Dateleheda nibe Em so ad nu nim meit àm vaba mu meeda. Labi Em vasea nim laha udem vaba mu meeda. Labihameam làhà ame da lam ba Alati vahi ahe neàna bohu vuusdam vabak. Gi vaitesu meedam dàt modem bak.
54. Lahana Em abo Alat Gagu Fihasi Vimteme Oluhu Dat Boehàda modem labe meit Em so ad nu nim à. Labi Em vasea nim laha ude. Labihasu meedameam làhà ame da lam Alati vahi gi ahe neàna bohu vuusdam bak. Labi Dam Bake Uloodume Aime Ozobohudi Neàdi Fime Fahedam Digat lam vou fusi Eho fa li ame dam lam elodahanàme Eho modi fat ahedi usnada tame.
55. Neham bak. Em so ad nu nim àmna imbona am. Labi Em vasea nim udemna imbona am. Labihaha bak.
56. Meit Em so ad nu nim à. Labi Em vasea laha ude. Labihasu meedameam làhà ame da lamti Emti ot vou aliame ahu vàmadi meedam bak.
57. Im bakda ahebu ahe di godam bak lam Em Aiat debu modehe bak. Em Aiat labiham Alat modem labe Aho neo Eba gagu Eho bak niba li Dateli ahe di godam bak. Labiha labe meit Em so ad nu nim àmeam làhà Eho ame da laba modi Alati vahi gi ahe neàna bohu vuusdam bak.
58. Eho amu uba lab gagoho bak lam neo vi gagolo. Roti asum ahoba iube bak niba nom oluhu roti lam Em am bak. Lahana im tai ahobada zi labe iho àhà manna lamti uloho vabak. Ame dam labe iho ame manna àdamnàme gi elodume seddaha damat modem bak. Lahana meit Eho etei lab gagoho roti lam àmeam gi Alati vahi ahe neàna bohu vuusdam bak.”
59. Lahame lab vameadaha im bohu lam Yesusat Aho num debu Kapernaum laba abo Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli ab vahokedaham.
60. Yesusat im labihasu vameadume modeha Aba Aho vahokedam im ozobohudelo vi tau meedam dam dua totbaho labe iho aime ozome voe voedam labe ot gago ot gagoida. “Aa! Ame Da labe etei iba nib vahokedaha im nim iho vi ozom biem im iba vahokedaha bak. Ba amat uledi vuzehi meedà?”
61. Lahana ame dam labe Aho lab gagoho bak laba faki voe voedaha bak lam Yesusat Ahamo ozobohudi ame dam laba ab gagoham. “Eho lab vahokedaha im vàmtea buà lam uho aime faki Em vou esmolo modeo?
62. Làhà Eho Asum Ahoba Iubet Bak Niba Li Dateleheda fa Ebe amu azihi bake ba tom ilum bak uho aameam um di lam akatihà? Làhà uho di lam bisi faki feà bak fum di ame?
63. Alam Aha Nutabe Neàna labe Aho meia modi vizi Alati vahi fa ahe neàna bohu vuusdamda Am am bak. Dam bakda iho keàtedi meedam im lam ba na vamna vabak. Ebe Eho uba vameadaha im lam gi Alam Aha Nutabe Neàna labe Aho Eba modi vizi teudehe labe Eho uba vameadaha im lam fa uba modi Alati vahi gi ahe neàna bohu vuusdam imot modem bak.
64. Laham imot modemnàme um dam totbaho labe Eba tu vuzehem mom lahasuhu dam ehe bak.” (Yesusat etei lab gagoho bak lam gi neham bak nasi fet ozobohudehe labe labi gagoho bak. Dam adida Aba tu vuzehem moe? Labi dat adida Am vou fohome meia ub lu ote? Laham bak lam gi amu di iube dam bake ahamte lab faasi vahokedam di iube nasi fet ozobohudehe bak.)
65. Lahame labi gagu neàdi Yesusat neo vi gago, “ ‘Ana modi dam Eba tu vuzehem mohela?’ laham bak lam Eho amu uba gagohona fa neo vi gagolo. Meit Eba tu vuzehelo modemeam làhà ba ame da lam Alat neha, ‘Modem neàte,’ lahame nasi ame da laba modi teudehe vaba alia modem vabak.”
66. Lahame Yesusat ame bak lam etei lab gagoho di labe faasi Aba Aho vahokedam im ozobohudelo vi tau meedam dam dua totbaho labe fa Yesus mu vou esmozi fa ibi amu modem bake fa meeda.
67. Làhàmu Yesusat Aba bisi vi tau meedam dam dua belas laba ab gagoham. “Um akatihà? Um laha Em mu vou esmozi lào?”
68. Lahahat Simon Petrusat fa gago, “Ai Boehàda oa, iho fa Om mu vou esmozi im ama bake là? ‘Meia modi Alati vahi fa ahe neàna vuusdam bak lam akatihasu modemna modela?’ laham im lam bisi ozobohudi meia fi gatemda Om vàmtea am bak.
69. Om abo Alat Ahamo gagu fi hasi asum ahoba iube bak niba nom oluhu Dat bisi Neàboda Vàmtea Om am bak. Laham bak lam im ozobohudi tu vuzehi ab neàbodedaham bak.”
70. Lahahat Yesusat fa gago, “Em um fi me vaha di dam dua belas vaha taia? Lahana um meidavat setan zi vuusdam boehàda Iblis labe aho veimai fa im abada modelo modem bak,” lahame ab vi gagoham.
71. (Etei Yesusat lab vàlu gagoho bak lam gi Simon Iskariotam adat Yudas labe aho ba modem im nasi fet ozobohudi vàlu vameadaha bak. Ame da Yudas gi dua belas meida modemnàme ba Yesus vou fohome meia ub lu otelo modemda am bak.)
1. Labi ba di meida iube Yesus Aba vi tau meedam dam lamti gi Galilea bak laba esdam di labe Aho gi num debu meida iuba le vahokeda. Num debu meida iuba le vahokeda. Gi labihada. Ba Yudea bak laba ahit lam mom dàt moz. Yudea bak laba azim Yahudi busaoda, “Am otese,” lahame aa odoadam labe laba lam mu meeda.
2. Ame di labe Yahudi damat na àme iziam bak meida fuseo vabalehe bak. Neha: Aham di iube Yahudi damat im tai ahobada bak aotba baa bohu dam vaba alim bak laba abo Alat ahit vou kibo kibodam zie laba ladam di labe iho teohet mome vou idetehe num moadume vou idetedam bak. Labi dam badat ame bak laba vi ozome vouhodalo ut et num moadume iddam meot. Ame bak lam fa neo vi ozome na àme iziam di fuhemu damat Yudea bak labe am num debu meida Yerusalem laba vahe vaheda. Labihadam di labe Yesusam vahadam zi labe Aba im vahokeda. “Om akati fa gi Galilea niba bisi aidàla? Fa Yudea bak laba le na damat ihimo modem biem im feàna modem labe dam Obo Oho vahokedam im ozobohudelo vi tau meedam dam labe fà aase.
4. Oho gi Galilea niba aa aidameam ba ee Oboda akati damat aime vou baedà? Om ba elaidam datelem vabak. ‘Na damat ihimo modem biem im feàna lam Oho modem meote,’ laham bak lam imbodemeam làhà bak iuba le mode. Bak iuba le mode. Gi labihadume bak ahebu esdam damat fà aadase.”
5. Lahame Yesusam vahadam zi labe laha Aba tu vuzehem moudam labe Yesus bake tozome im ab vahokedamam.
6. Lahahat Yesusat fa gago, “ ‘Em amat modela?’ lahame modi fi gatem di fum kaio. Umota kota Yerusalem laba etei lào? Ba di iube lào? Gi ostame lam neà bak.
7. Ba dam uba fakemda na vabak. Lahana Eho dam bakda abo Alat modem im biem dam laba, ‘Um faina meedam damat modem bak,’ lahame ahate vameadam bak laba damat Eho lab gagoho im aime Eba faki meedam damat modem bak.
8. Ame Na Àme Izidam bak kota Yerusalem laba uhumo lale. ‘Em amat modela?’ lahame modi fi gatem bak lam fuhu vab di Em ba taum kaio.”
9. Lahame gagu neàdi Am tauhu vaba gi Galilea laba aida.
10. Labi Am vahadam zi labe ame Na Àme Iziam bak laba le setehezobe Yesus laha ba neo ame bak laba aa vi vula. Labi aa vi vule damat Aba aame ozobohudem bak labna zohàme gi aa goda.
11. Labi ame Na Àme Iziam bak laba Yahudi dam busaoda eeda zi laba laha ehet. Yesus lem bak labna zohàme nabidam labe dam bake vou gagoteda, “Um ame Da Yesus alihi aaheo?” lahame iuba le gago. Iuba le gago. Labihada.
12. Ame Na Àme Iziam bak laba godam dam zi labe, “Yesus ana dàt modela?” lahame voe voedam labe ot gagoi ot gagoida. Dam totbaho labe neha, “Da lam abo gi im neà bakta meedam Dàt modem bak,” lahame gagoda. Lahana dam totbaho labe vedi nehi gago, “Vab. Da lam gi meia ahi vagem Dàt modem bak,” lahame tozome gagoda. Labihada.
13. Lahana dam totbaho labe Yahudi dam busaoda eeda zi labe iba fakemna zohàme iedi ibi iho ozoho bak lam ba ahatet vameadam kai.
14. Labi ame Na Àme Iziam di folelo vabalehe digat meida labe Yesusat ame Fihasi Ala Bake Vou Baedam Num Vàmteabu labe am ad oli aam bak tomba laba le dam bake ahate le duzu im ab faasi vahokedamam.
15. Aho etei li lab vahokedam im lam ame Yahudi dam zi labe aime àvodi ab ot gagoi ot gagoidamam. “Aa làhà! Uho ozom, ame Da nibe Aho Alat Vameadaha Im Toedahana lam akati modi Aho bisi ozobohudi vahoketedàla? Im Yahudi dam sekolah ibida tau vahokehe vab Dàt im lam akati ozobohudi vahoketedàla?” lahame ab ot vameaidamam.
16. Lahame lab vameadaha bak lam Yesusat fa vi aime ame dam laba ab gagoham. “Eho etei lab vahokedaha im lam ba Ebe Eho ozoho baket uba vahokedam vabak. Gi Eba gagu oluhu Ala labe Aba Aho ozoho baket uba vahokedam bak.
17. Meit neha, ‘Em gi Alat Aba Aho ozoho baket meedase,’ lahame ozome gagomda lam fa gi neham bak vi tau ozobohudem bak am bak. ‘Eho lab vahokedaha im lam, “Adi baket lehela?” “Em gi ee Ebeda vousase,” lahame vahokedào? “Gi Alat Aba Aho ozoho baket Eho vahokedào?” ’ Laham bak vi tau ozobohudem bak am bak.
18. Neham bak. Meit ahamo im dedateli gi im abadata vou li vameadamna lam, ‘Gi ee abada vousai damat aba vou baedase,’ lahame meedam dàt modem bak. Lahana meit neha, ‘Eba gagu oluhuda labe ee Abada vousai vou baedase,’ lahame im Aba Aho meedamda lam gi im vamdesu meedam bak. Ba meia vagemda modem vabak. Abo im imbona meedam dàt modem bak.
19. Ne, Alat Israel dam bake neha, ‘Nehame modem neàte. Im lada lam a modemule,’ lahame gagu fi hasi esuhu Im Feàna zi lam Musat ot vai um tai ahobada zi laba vameame neàdi fa um tai ahobada zi labe neo ot vai fa neo uba vou vamea usehena taia? Lahana um meida vàmtea buà ba ame Im Feàna zi lam ulohodesu meedamda vabak. Uho ulohodesu meedameam làhà um ba Em otelo aa odoadam vabak.”
20. Lahahat ame dam duada labet neha, “Ba Oba amat otelo meedà? Gi mei ahu oli veimam setan om ahu veimai om gi ahusobuli meedamna taia?”
21. Lahahat Yesusat fa gago, “Im Yahudi damat na modem vaba gi azibe im digat hari Sabat labe Eho meia modi fa neàdehemu um aame Eba fakehe dam taia?
22. Lahana um laha hari Sabat na meedam dam taia? Amu aham di iube Musat uba neha, ‘Um daboseà faam di usi tujuh foli neàdehezobe am laso aubehà sokba ukbole,’ lahame uba vou gago usehe im lam uho vi tau meedam labe uho um daboseà faasi usi tujuh folehemu gi hari Sabat modemnàme um gi ozahit ame digat labe um daboseà laso aubehà sokba ukbom meo dam taia? (Lahana eho ozoha, ame laso aubehà sokba ukbom bak lam bisi Musat ahamo vou gago usehe vabak. Gi tai ahobada iube faasi nasi vou gago usehe bak.)
23. Làhà uho dat ahamda Musat aho toedume fi hasi esuhu Im Feàna zi lam voom vaba abo ulohodesu meedalo um gi data laso aubehà sokba hari Sabat ukbom damat ba akati modi gi ame hari Sabat Eho dat so ahebu nisileheda laba modi fa neàdem bak lam uho Eba aame fakehela?
24. Uho Eho meedam im laba gi fakot aame vi ozome ozobohudi neàdi gagodam bak lam nasi voole. Eho lab meedam bak laba uho aame vi ozome ozobohudi neàdi gagolo modem di gi Em Ai Alat Aba Aho neha, ‘Bak lam neà bak ame? Fai bak ame?’ lahame Ahamo ozoho bak laba vi ozome gagomta neàte. Uho labihameam làhà, ‘Em abo Alat Gagu Fihasi Vimteme Oluhu Dat Boehàda am tame,’ laham bak um ozobohudi ahole vamdesu gagodam bak am bak,” lahame Yesusat ab vameadaham.
25. Dam kota Yerusalem laba azihi dam totbaho labe iho Yesusat etei lab vameadaha im lam aiha ozom vabili ab ot gagoi ot gagoidamam. “Ne, ame Da nim im Yahudi busaoda labe iho nabime otelo modemda am taia?
26. Lahana akati iho aaha ame Da labe iedem vaba ahate dam bake vahokedà? Dam busaoda ba Aba mali gagom bak vaba? Làhà, ‘Am abo Alat Gagu Fihasi Vimteme Olulo Modem Dat Boehàda am tame,’ laham bak lam dam busaoda labe fa etei ozobohudi neàdehe labe ba mali gagom bak mohe?
27. Lahana Da lam akati, ‘Alat Gagu Fihasi Vimteme Olulo Modem Dat Boehàda Am am tame,’ lahadà? Ame Da nim, ‘Adi baket lehela?’ laham bak lam im ozobohu bak. Am gi Nazaret labe lehe bak. Lahana Alat aham di iube neha, ‘Eho Gagu Fihasi Vimteme Olulo Modem Dat Boehàda uba olu tame,’ lahame fet gagu esuhuda lam ba lem di, ‘Adi baket lehela?’ laham bak lam ba dam bakda meida vàmtea ba ozobohudem vabak,” lahame ot gagoida.
28. Lahaha bak lam Yesusat aihemu Aho gi ame Fihasi Ala Bake Vou Baedam Num Vàmteabu labe am ad oli aam bak tomba laba vahokedam lahasuhu di labe dae buduana ab gagoham. “Imboo? ‘Em amat mode?’ laham bak lamti labi, ‘Em adi baket lehela?’ laham bak lamti um abo ozobohu aabodeheo? Em bak niba lehe bak nim Ebe Eho ozoho bak labet lehe vabak. Gi Eba gagu oluhu Ala labe Aba Aho ozoho bak labet modi Em bak niba lehe bak. Eba gagu oluhuda lam bisi imboda Am am bak. Gi Aba tu vuzehem neàda uho ozobohudehe vaba moho bak.
29. Lahana Emota Am ozobohu aabodehe bak. Eba gagu oluhu Ala Am am bak. Labi Aho Em gagu oluhu vab di iube Em gi amu Amti vahi aidam bak. Labihaha bak.”
30. Lahame Yesusat lab gagoho bak lam dam totbaho labe aime faki, “Imo Yesus sise,” lahame meeda. Lahana Yesus sim bak Alat fet ozome esuhu digat fuhu vab labe ame dam labe meida vàmtea ba Yesus bake netàdi alihi ulam kai.
31. Dam totbaho labe Aba silo àhàki modemnàme dam totbaho labe fa Aba tu vuzehi nehi ot gagoi ot gagoida. “Ame Da Yesus lam Alat Gagu Fihasi Vimteme Oluhu Dat Boehàda iho vou faodam Dat am taia? ‘Alat Gagu Fihasi Vimteme Oluhu Dat Boehàda labe Aho ba na damat ihimo modem biem im feàna damat fet aame ozobohudemna nehasu meeda tame,’ lahame fet gagu esuhuna lam ahebu Ame Da nibe ab li meedam am taia? Ba damvat im nimohona vafozi feàda meedamna im ba aahada vabak,” lahame tu vuzehi ab gagodamam.
32. Lahame lab ot gagoiaha bak lam Farisi dam totbaho labe aihemu faki fa damat Ala bake lomna ve vua vahudam toheda zi laba vuusu im vameame faheme modiam dam lamti fa vahi fa ame Num Vàmteabu laba vou aasdam dam totbaho laba ab le gagoham. “Uho Yesus le sile,” lahame ab gagu oluham.
33. Labi ame di labe Yesusat dam bake gi im nehasu vameada. “Em umti niba aidam bak ba bohu kaio. Gi kehàm vaba Eba gagu oluhuda laba Eho fa la tame.
34. Labi di lam uho fa Eba vi nabidameam um ba Em alihi vi aam vabak. Labi laha Ebe Eho le azilo modem bak laba um laha tau vulam biem bak.”
35. Lahahat ame Yahudi dam busaoda eeda zi labe ozom vabili ab ot gagoi ot gagoidamam. “Aa! Ame Da nim Aho adi bake le iho nabidume im Am alihi vi aam biela? Làhà Aho gi im Yahudi dam totbaho fa Yunani bak laba fi goaitoi esuhu dam laba le dam lamti fa Yunani damti vahokelo gagoho labe im ba vulam biem bake gagoheo?
36. Aho neha, ‘Uho fa Eba vi nabidameam um ba Em alihi vi aam vabak,’ lahaha bak lamti labi Aho neha, ‘Ebe Eho le azilo modem bak lam um laha tau vulam biem bak,’ lahaha bak lamti, ‘Akati modemna modela?’ lahame labi gagohela,” lahame ab ot gagoidamam.
37. Labihadume ame Na Àme Iziam di labe ba novalo modem digat abo bisi feàda labe Yesusat ame Fihasi Ala Bake Vou Baedam Num Vàmteabu labe am ad oli aam bak tomba laba neo le duzu dae buduana ab faasi vameadamam. “Meit valo àhàkemeam làhà Eba li udele. Meit Eba tu vuzehemeam làhà gi meit Alat Vameadaha Im Toedahana laba nehasu toehe bakti ulohona mode tame. ‘Ame da labe aho udehe bak labet modi am ahu ad laba meia modi fa ahe neàna bohu vuusdam vao fa vao aanati ulohona labaha bohu futodume tàda tame,’ lahame toehe bak ehete,” lahame Yesusat ab vameaham.
39. (Yesusat etei meia modi fa ahe neàna bohu vuusdam vao laba vàlu gagoho bak lam gi meit Aba tu vuzehemda laba Alam Aha Nutabe Neàna Aho ilabdi ame da laba ba modi vizi teudem bak laba ozome vameadam bak. Lahana Yesusat fa Am Ai bake fa le ee Abada Alat vousai Aba modi feà datelehe vab labe Aho Alam Aha Nutabe Neàna lam it olu dam bake nom ilu vizedaha vabak.)
40. Labi Yesusat etei lab gagoho bak lam dam dua totbaho labe aihemu fa ab ot gagoi ot gagoidamam. “Oo, ame Da nim gi Musat aham di iube neha, ‘Ba diamut Alat Vameadaha Im Aime Fa Dam Bake Ahate Vameaidahada emti ulohoda olu tame,’ lahame fet vameame esuhu Dat am taia?” lahame ot gagoida.
41. Labi dam dua totbaho labe nehame gagoda. “Ne, ame Da nim gi Alat Gagu Fihasi Vimteme Oluhu Dat Boehàda iho vou faodamda am taia?” lahame ot gagoida. Lahana dam dua totbaho labe vedi Yesus Galilea laba faaha tibame nehi git gagoda. “Vabà! Ame Da ba akati labihà? Alat Gagu Fihasi Vimteme Olulo Modem Dat Boehàda lam Galilea labe ba le? Ba labiham vabak.
42. Ne, meit Alat Vameadaha Im Toedahana laba im nehasu fet toeme esuhuna taia? ‘Alat Gagu Fihasi Vimteme Olulo Modem Dat Boehàda lam gi im tai ahobada Boehàda Daud vou faat lehe mekehàda modem bak. Abo Daud aham di iube faaha kota Betlehem laba vi faa tame,’ lahame toehe bak. Labiha labe ba akati labihà? Ame Da nim iho vou faodam Dàt modem vabak,” lahame ot gagoida.
43. Labihadam labe, “Yesus ana dàt modela?” lahame damat ab faheme la ozoi le ozoidamam.
44. Labi ame di lam Aba silo àhàki meedam dam bak laba ehet. Lahana ame dam labe meida vàmtea ba Yesus bake netàdi alihi ulam kai.
45. Amu Farisi dam lamti labi damat Ala bake lomna ve vua vahudam toheda zi laba vuusu im vameame faheme modiam dam lamti vazisi fa ame Fihasi Ala Bake Vou Baedam Num Vàmteabu laba vou aasdam dam laba neha, “Yesus le sile,” lahame gagu olu ame dam labe le vabeddaha Yesus sim vabili saemea fa ab leham. Labi fa li modeha ame dam eeda zi totbaho labe ab gut meoleham. “Um akati Da lam si fa niba vou lehe vaba modela?”
46. Lahahat ame Num Vàmteabu laba vou aasdam dam labe fa gago, “Ne, im Da labet Aho etei vou li vameadam im lam im amu aihi vabak. Abo im dedat ozobohudi vameadam imot modem bak.”
47. Lahahat ame Farisi dam labe tozome gago, “Ea, um laha fa Da labe lab vagehe bak laba tau vuzehe dam ame?
48. Ne, uho ozom, im Farisi dam modeo, dam eeda zi totbaho modeo, im meida vàmtea Da laba tu vuzehehe datva ehe? Vabà! Im labihadamda vabak. Akati uho labi modelo mode?
49. Gi dam ee vabda zi nim abo dat ahamda Musat aho aham di iube toedume fi hasi esuhu Im Feàna zi lam biem damat ihimo Ame Da laba tu vuzehe bak. Dam lam gi Alat aham di iube, ‘Beome vàhàdese,’ lahame amu gi uloome esuhu dam am bak.”
50. Lahame labi gagu modeha Farisida meida abo amu Yesus bake le tàhi im vameadamda Nikodemus labe neo am Farisi dam totbaho laba ab gagoham.
51. “Um nasi ozomale. Dat ahamda Musat aho toedume fi hasi esuhu Im Feàna zi lam abo ihimo Yahudi damat tuhu im lam gi neha taia? Amu nasi, ‘Da lam git modehe bak akete?’ lahame uloodume, ‘Ame da labe aho veibadào? Veibadam vabao?’ laham bak aime neàdi ba, ‘Beose,’ lahame na asimbuna feà gagu beom bak. Ba aihi vabna ostame na asimbuna feà gagu beom vabiem bak.”
52. Lahame labi gagoha ame ee dam totbaho labe faki fa Nikodemus bake gago, “Oo làhà! Om laha Galilea labet lehe? Om nasi Alat Vameadaha Im Toedahana zi laba mahate nabidume aale. Ba nehi toehe bak vabak. ‘Alat vameadaha im aime fa dam bake ahate vameaidamda lam ba Galilea bak labe Israel bake olu tame,’ lahame fet toeme esuhu im ba na vabak.” [
53. Lahame vameadume neàdi dam lam fi goaitoi im num bake ahala ab laiame seteham.]
1. Labihàmu Yesus fa Zaitun Dee Dozeadaha Bak Buzoho laba ab laiteham.
2. Labi izi dihasi dihambe Yesus ame Fihasi Ala Bake Vou Baedam Num Vàmteabu labe am ad oli aam bak tomba laba neo fa ab laham. Labi laba lafusi modeha dam dua bak Aba valadàmu Aho im vahokelo ab nusu faasi vahokedamam.
3. Labi vahokedume modeha dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti Farisi dam totbaho lamti laham dam lam vazisi iho nam dat ehena fa dat amomoi aa modehe bak aahemu si vou li netàdi ub odosi damat avaesdam tomba laba ab vou duzuham.
4. Ame dam labe ozo, “Dat ahamda Musat aho toedume fi hasi esuhu Im Feàna zi lam, ‘Yesusat fa ame baket meedào? Meedam vabao?’ laham bak aihizobe fa Yesus bake vàluse,” lahame ame nam lam ahit ab vou li vou duzuham. Vou duzu neàdi Yesus bake ab gagoham. “Guru oa, nam nim dat ehena fa dat amomoi aa vaha bake iho si vou leho. Iho ozoha, Musat aho aham di iube toedume fi hasi esuhu Im Feàna zi lam im nehasu toehe bak ehete. ‘Nam dat ehena fa dat amomoi ve modemeam làhà ket beodume elole,’ lahame toeme esuhu bak ehe bak. Lahana Oho ozom, akatihàla? Gi ame bak lam modeo? Feidào?” Lahahat Yesusat dae buhu vaba gi fota nusu am anekehàsoat bak laba ab toedamam.
7. Labi ame dam labe gi Yesus bake vi ooteom labe neo ab vi gagoham. “Oho ozom, akatiha?” lahame meit vi gago. Meit vi gago. Lahada. Labihadàmu Yesusat fa usai duzu ab gagoham. “Làhà um etei faina modehe vabda ehelemeam làhà ame da labe nasi ke visoi nam laba beole,” lahame gagu neàdi fa neo fota nusu anekehàsoat bak laba neo nom toeda.
9. Làhàmu ame Yahudi dam busaoda eeda zi labe Yesusat etei lab gagoho bak lam aihemu dam aoleheda nasi ladi aa ahala laida. Labi neo dam gàhàda laha ladi aa ahala laida. Labihadume ame dam lam ahebu le seddume gi Yesusti dam dua bak labe iho avaesdam tombu laba duzuhu nam lamti ihimo veke.
10. Làhàmu fa usai duzu nam laba ab gagoham. “Dam oba, ‘Beose,’ lahame na asimbuna feà oba modelo gagoho dam zi lam ake ladahela? Oba vàlumda niba vekesi doudam vabao?”
11. Lahahat nam labe fa gago, “Dat Busao, ba na kaio.” Lahahat Yesusat fa gago, “Làhà Em laha obo oho modehe im laba ozome, ‘Beose,’ lahame na asimbuna feà oba modelo gagom bak kaio. Nasi lale. Obo oho faina meedam bak lam ba a vi meedamule,” lahame im vi vahokeme ab oluham.]
12. Labi Yesusat neo im nehasu ame Yahudi dam dua bak laba vi vahokeda. “Dam bakda ahebu im ahu ad laba modi Fauhaedamda Em am bak. Meit Eba tu vuzehi im Ebeda meedameam làhà ba aibu bak laba gohatem vabak. Gi Eho modi fauhaedam bak labet modi ame da labe fa Alati vahi gi ahe neàna bohu vuusdam bak.”
13. Lahaha bak lam ame Farisi damat aime mu otesidam labe ab gagoham. “Om git gagoda. Oho etei, ‘Dam bakda ahebu im ahu ad laba modi Fauhaedamda Em am bak,’ lahame lab gagoho bak lam gi Obo Ohomo ozoho im gagodam labe im ba vuzehem biem bak. Ame bak lam Oba vi tau gagomda akete?”
14. Lahahat Yesusat fa gago, “Vabà! Eho etei lab gagoho bak lam dam amomoit laha vi tau gagom vabameam làhà Eho lab gagoho bak lam ba giomimot modem vabak. Abo imbo bak. Neham labe labihaha bak. ‘Em adi baket lehela?’ laham bak lamti labi, ‘Em ake fa làla?’ laham bak lamti Ehemo naedat ozobohudi gagoho bak. Lahana um biem bak.
15. Ebe Eho meedam im lam uho ozome ozobohudi neàdi gagodam bak lam um gi uho bak damat ubu uho ozoho baket ozomsu gagodam bak. Lahana Ehemo ba meia ozome ozobohudi neàdi gagom di ba umti uloholi meia ozomsu gagodam vabak.
16. Lahana Eho meia ozome ozobohudi neàdi gagomeam làhà Ebe Eho ozome ozobohudi neàdi gagodam bak lam gi ahole imbona vamdesu gagodam bak. Neham labe labihadam bak. Ehemo meia ozome ozobohudi neàdi gagodam vabak. Em gagu oluhuda Em Aiti ahili ame baket meedam bak.
17. Lahana Eho gi im lamota ozome uba gagodam vabak. Ubu uho dat ahamda Musat aho toedume fi hasi esuhu Im Feàna zi laba tu meedam im lam im nehasu toehe bak ehe taia? Neha: ‘Meit veibam di na aahada behàsu lam ehe labe ame da laba tau ulohodesu gagomeam làhà ame da labe aho lab gagoho bak lam imbo bak. Meit aba aho gagoho bak laba tu vuzehem neàte,’ lahame toehe bak ehe taia?
18. Làhà Eba vi tau gagomda laha behàsu bak. Ehemo naedat it ozome gagomda ame. Labi Eba gagu oluhuda Em Ai labe vi tau gagomda ame. Em Em Aiti ahili uloholi gagodam labe uho tu vuzehem neà bak.”
19. Lahahat ame Farisi dam labe Yesus bake neo vi ailo gago, “Oho etei lab gagoho bak lam Om Ai akete?” Lahahat Yesusat fa gago, “ ‘Em ana dàt modela?’ laham bak lamti labi Em Ai, ‘Amat modela?’ laham bak lamti um biem bak. Uho, ‘Em ana dàt modela?’ laham bak lam um ozobohudemeam làhà um Em Ai, ‘Amat mode?’ laham bak lamti laha vi ozobohudem bak.”
20. Lahame Yesusat etei lab vameadaha im lam aho gi ame Fihasi Ala Bake Vou Baedam Num Vàmteabu labe am ad oli aam bak tomba laba abo Ala bake lodam doi vahedamnabu zi modealadaha bak laba netàdi vahokedam diat vameadaha imot modem bak. Lahana damat Yesus sim bak lam Alat fet ozome esuhu digat fuhu vab labe ba dam meida vàmtea Yesus bake netàdi sim kai.
21. Yesusat neo ame Yahudi dam busaoda eeda zi laba neo vi vameada. “Kehàm vaba Em fa le sete tame. Em le setehemu uho gi neo, ‘Alat Gagu Fihasi Vimteme Oluhu Dat Boehàda lam akete?’ lahame uho gi dat amomoi bake nabidam lahasumeam ba ame da vi aaha vab labe uho faina meedam bak lam Alat fa ozahigeàmu fa vei neàdem vaba um elodume Ebe Eho le azilo modem bak laba um tau vulam biem bak.”
22. Lahame labi gagu modeha ame Yahudi dam busaoda eeda zi labe Yesusat lab gagoho bak laba tozolo ihimo aa ot gagoi ot gagoida. “Oo, Da lam etei neha, ‘Ebe Eho le azilo modem bak laba um tau vulam biem bak,’ lahame lab gagoho im uho ozom, akatihasu ozome labi gagohela? Làhà Ahamo Aba it otem labe Aho elom di gi ààmo ziet lalo modem labe iho ame bak laba ba vulam biem bake gagohe?”
23. Lahana Yesusat gi ozahigeàmu neo vi vameada. “Um gi bak damat modem bak. Labiha labe uho na im ozom di gi bak damat ibi iho modi baleàhà bak ozodam damat modem bak. Lahana Em asum ahoba iubet lehe bak. Labiha labe Ebe Eho ozoho bak amomoi bak. Lahana uho ozom, Em umti uloholi bak dàt mode tiba. Lahana ba labihaha vabak.
24. Labiha labe Eho amu uba gagoho bak am bak. Um gi faina meedam bak Alat fa ozahigeàmu fa vei neàdem vabna um eloda tame. Eho neha, ‘Em ame Da am tame,’ lahame lab gagoho bak lam uho tu vuzehem vabameam imbote. Um gi uho bak niba faina meedam bak lam Alat fa ozahigeàmu fa vei neàdem vabna um eloda tame.”
25. Lahame Aho neo labi gagu modeha ame Yahudi busaoda eeda zi labe Yesus bake fa vi ailo ab gagoham. “Làhà Om abo amat modela?” Lahahat Yesusat fa gago, “Baka akati Eho fa uba neo vi vameà? Ebe Eho amu uba lab gagodam bak lam lahasuhu bak. Em ame Da am bak. Ba Ebe Eho gagodam bak ba veimdem vabak.
26. Eho uba neha, ‘Um faina modeho,’ lahame uba ozome vàlu vi gagodam bak feà bak ehe bak. Lahana ba Ehemo gagodam vabak. Eba gagu oluhuda lam Am abo imbona meedamda modem labe Eho gi Aba Aho Eba gagohona lam Eho aihina lam fa dam bakda ahebu vameadam bak.”
27. Yesusat etei lab vameadaha im lam gi Am Ai Alat meedaha im ozome vameadaha bak. Lahana damat ba ozobohudem vabile.
28. Ozobohudem biehemu Yesusat neo ab vi gagoham. “Etei nim, ‘Em ana Dàt modela?’ laham bak lam um bie. Lahana ba Asum Ahoba Iubet Bak Niba Li Dateleheda nim damat Em ve vousai tom modesum di lam, ‘Em ame Da am tame,’ laham bak Eho amu uba gagohona lam, ‘Imbote,’ laham bak lam um ba ozobohude tame. Labi laha ame di lam, ‘Eho na im meedam di Ebe Eho ozoho baket meedam vabak. Gi Em Aiat Aba Aho Eba vahokehe baket fa dam bake vameadam bak,’ laham bak lam um laha ba neo vi ozobohude tame.
29. Labi Eba Gagu Oluhuda lam gi Emti bakamta aidam tadem bak. Am ba Em vou esmozi Ehemo aidam vabak. Eho gi Aho deelem bak laba ozome meedam tadehemu labihaha bak.”
30. Lahame Yesusat lab vameadam di lam dam zoho dua bak aidume fa Yesus bake, “Am abo Alat Gagu Fihasi Vimteme Oluhu Dat Boehàda am tame,” lahame ab tu vuzeheham.
31. Labihadume neo Yesusat fa Yahudi dam Aba tu vuzehehe dam laba nehi vameada. “Ebe Eho uba lab vahokedaha im lam uho tu vuzehi meedam bohu vuusdameam làhà imbot. Um abo Ebe Eho vahokedam im ozobohudelo bisi vi tau meedam dam um am bak.
32. Labiham labe, ‘Ala akatihasu meedam Alat mode?’ laham im imbona lam Eho uba vameadume um ozobohudehe bak labet modi na im uba neha, ‘Nehasu modele. Nehasu modele,’ lahame ootedam im lam uba vabidam bak lam fa ab modi setemam bak.”
33. Lahahat ame Yahudi dam busaoda eeda zi labe faki fa gago, “Oo làhà! Om git gagoho taia? Na im iba ootedume modi asimbulem im vabna baka akati Oho neha, ‘Na im iba ootedume vabidam bak lam modi fa sete tame,’ lahame iba labi gagohela? Ne, im Abrahamat vou faat lehe mekehà dam im am bak. Labiham labe meit iba ootedume modi asimbulemna vabak.”
34. Lahahat Yesusat fa gago, “Lo, Abrahamat vou faat lehe mekehà dam um am bak. Im lada lam imbomu im imboda nidi nim laha nasi iademe aima. Meit faina meedam bak bohu vuusdam labe ame bak lam ame da laba vizehe labe ba modi veiom biem bak. Gi labaha bohu modesdam bak. Abo mei na teo meedamda labe aba im gagu ootedamda labe am na teo meedam bak lamti ulohote.
35. Ame mei na teo meedamda lam aba im gagu ootedamda labe am damali labaha bohu vuusdam vabak. Gi teohe am damali meedam bak. Lahana, ‘Adat,’ lahamda lam am amedamali labaha bohu vuusdamda am bak.
36. Labihàmu Em Alam Adat modem labe faina meedamna lam uba veimai uho voom vabilehe bak lam Eho modi setemeam làhà abobo seti um Alam damali gi labaha bohu vuusdam bak.
37. Um Abrahamat vou faat lehe mekehà dam Em ozobohu bak. Lahamnàme Abrahamat Ala bake tu vuzehehe bak lamti uloho vabna Eho vahokedam im lam um ahu ad labe tu vuzehi meedam vab labe uho Eba otelo àhàki vabeddam damat modem bak.
38. Em Aiti ahili azihi di labe Aho Eba modi Em ozobohudi fi gatehe im lam Eho fa uba vameadam im am bak. Lahana um gi um aiat uba vahokehe im lamota meedam damat modem bak.”
39. Lahahat ame Yahudi dam busaoda eeda zi labe fa ab vi gagoham. “Ne lahana im tai ahobada Abraham labe aho iba vahokedahana lam iho aime meedamna am bak.” Lahahat Yesus fa gago, “Vabà! Um, ‘Abrahamat vou faat lehe mekehà dam im am bak,’ lahaha bak lam imbodemeam làhà um gi Abrahamat aba aho im vamdesu meedam bak lamti ulohona vi meedam lahasdam bak.
40. Lahana uho ba labihaha vabak. Em gi Em Aiat Aho Eba im imbona gagohona lam Eho ot vai uba vahokeha uho vedi Em otelo vabeddam damat modem bak. Lahana Abrahamat Em Aiam im imbona meit vameahana aihi di ba moho vabak. Abo tu vuzehi meedaha bak.
41. Lo, Eho ahole gagoho bak. Um gi um ai aabo aho meedaha bak labet vi meedam damat modem bak.” Lahahat ame dam labe fa neha, “Im gi Abrahamam nam labe vou faat lehe bak. Ba meit vou faat lehe vabak. Im Ai aabo gi vàmtea Ala am bak.”
42. Lahahat Yesusat fa gago, “Um Ai aabot Alat modemeam làhà um gi Eba deelem bak. Nehaha bak. Alat Eba gagu oluhu labe Em niba lehe bak. Em ba Ehemo ozome niba lehe vabak. Gi Alat Ahamo ozome Eba gagu oluhu bak.
43. Eho lab vahokedaha im lam uho aimta ai. Lahana uho modehe vaba moudaha labe im Ebeda, ‘Akati modemna modela?’ laham bak lam um aime ozobohudem bi meedam bak.
44. Um gi um ai Iblis labe am damali aba aho ozoho bak laba modelo àhàki meedam damat meedam bak. Iblis lam gi Alat ahamte alimeat bakti na ahebu modi esuhu di labe faasi dam bakdate modi faidehe labe elodam bak lam modi vizeheda Iblis am bak. Labi laha aba aho meedam bak lam ba im imbo bak vab labe ba im imbona vameadam vabak. Gi vagedam tadem dàt modem bak. Labi aho meia im giomim vagedam bak lam ba it àvodem vab dàt modem bak. Aba aho amu di iube faasi modi baleàhà bak am bak. Labi laha damat im abada vuzehi meedameam làhà gi im aiti uloholi neo meia vagedam damat modem bak.
45. Labihàmu Eho im imbona uba vameadam di lam um am damat modem labe gi aba aho modeme baleàhà baket vi vouhodam labe Emti Ebe Eho vameadam imti uho tu vuzehem mu meedam damat modem bak.
46. Um meida vàmtea labe ba Eba neha, ‘Eho faina modehe bak neam tame,’ laham bak vimteme vàlu gagom bak vab taia? Làhà Eho im imbona uba vameadam labe akati modi uho Emti Ebe Eho vameadam imti tu vuzehem vaba modela?
47. Meit Alam damaleheda lam im Abada deelehat aime tu vuzehi meedam meot. Lahana um Alam damalehe vab labe um ba im Ebeda aim moho bak.”
48. Lahame labi vameadaha ame Yahudi dam busaoda labe Yesus bake feàtàlo ab gagoham. “Ibi iho amu ozoho bak lam gi ahole ozoho bak. Om gi Samariada git modem dàt modem bak. Mei ahu oli veimam setan Oba veimai vuusdam dàt modem bak.”
49. Lahahat Yesusat fa neo gago, “Vabà! Mei ahu oli veimam setan ba Eba veimai vuusdam vabak. Em gi Em Ai Ala bake ahu adat iedi vou baedam bak. Lahana um ba Eba ahu adat iedi vou baedam vabak. Uho vedi Eba feàtàdam bak.
50. ‘Damat Eba vou baedase,’ lahame Em ba labihasu ozome na im meedam vabak. Lahana Em Aiat ahamo, ‘Damat Em Adat labe Am ee vousai, “Feàte,” lahame ahu adat iedi vou baedase,’ lahame Aba Aho ozome meedam bak lamti gagom kaio. Labi, ‘Eho im ahole meedào? Ahole meedam vabao?’ lahame vi ozome ozobohudi neàdi gagomda Am am bak.
51. Im lada lam imbomu im imboda nidi nim laha nasi iademe aima. Meit Ebe Eho vameadam im lam aime tu vuzehi meedameam làhà ame da lam Alati gi ahe neàna bohu vuusda tame.”
52. Lahame labi gagoha ame Yahudi dam busaoda labe fa ab gagoham. “Ea, iho amu gagoho bak ab imbodeham bak. Mei ahu oli veimam setan Oba veimai vuusdam labe Om ahusobuli vameadam bak. Ne, Abraham gi amu di iube eloho bak. Labi Alat vameadaha im aime fa dam bake ahate vameaidaha dam totbaho lamti laha gi amu di iube elodaha bak. Lahana akati Oho neha, ‘Meit Ebe Eho vameadaha im nim aime tu vuzehi meedameam làhà ame da lam ba elom vaba gi ahe neàna bohu vuusda tame,’ lahame Oho labi gagohela?
53. Làhà im tai ahobada Abraham lam gi amu di iube eloi seteheda lam feà vab dàt mode? Labi Alat vameadaha im aime fa dam bake ahate vameaidaha dam totbaho lam gi amu di iube elodume seddaha dam lamti laha feà vab damat mode? Labi Om bisi feàda ame? Oho ozom, Om ana dàt modela?”
54. Lahahat Yesusat fa gago, “Uho vedi Eho gi ee Ebeda vou daetbada tiba. Lahana Em ba labihadam vabak. Ebe Eho etei lab gagoho bak lam uba vouhodase. Neha: Ee Ebeda Ehemo vousai it daetbadameam làhà gi teo modeme vanamai voom bak. Labihàmu Em ba labiham vabak. Em gi Em Ai uho neha, ‘Im ahu adat iedi vou baedam Ala am bak,’ laham Ala labet Em ee vousai, ‘Em abo feàte,’ lahame Eba vou baedam bak.
55. Lahana Em Ai um biem bak. Lahamnàme Emota ozobohu bak. Lahana Eho nehameam, ‘Em Ala biem bak,’ lahame labi gagomeam làhà Em gi ubu uho neha, ‘Im Ala ozobohu bak,’ lahame lab vagehe bak lamti ulohona gagodam bak. Lahana Em abo Ala ozobohudi im Abada aime vuzehi meedam bak.
56. ‘Eho bak niba lem digat aa tame,’ lahaha bak lam um tai ahobada Abrahamat amu di iube nasi tu ozome esuhu bak lam am gi deelehat vou faodam bak. Labi vou faodume modeha Eho ba lehe bak nim aho ab aame deeli vàhàdeham bak.”
57. Lahame labi gagu modeha ame Yahudi dam busaoda labe Yesus bake neo tozodam labe ab gagodamam. “Oo làhà! Om lima puluh tahun fuhu vab Dàt ba akati Om Abrahamam alihi aahela? Hohoa. Om gi giomim vameadam dàt moz.”
58. Lahahat Yesusat gago, “Imbote. Eho lab gagoho bak lam ba giomim gagom kaio. Lahana Eho etei uba gagolo modem im imboda nidi nim laha iademe ozomale. Abraham faaha vab di Em ehe bak.”
59. Lahahat Aho, “Am gi Alati ulohote,” lahame Aho etei lab gagoho bak lam ame Yahudi dam busaoda eeda zi labe faki feà bak fusi, “Yesus otese,” lahame ke visomoame, “Beose,” lahame viisiha Yesus gi ab itame seteham. Abo gi dam so neumat labe vatoheme ame Fihasi Ala Bake Vou Baedam Num Vàmteabu labe am ad oli aam bak tomba lam vou esmozi ab itame seteham.
1. Labi ba digat meida labe Yesus Aba vi tau meedam damti iho godam labe dat na aam biemda ab aaham. Gi am oiat faaha di labet fako na aam biemna faaha dat ab aaham.
2. Lahamda aahemu Aba vi tau meedam dam labe ab gagoham. “Ai Guru oa, dat etei faaha di labet fako na am biemda lam akati modi labihahela? Aho faina modem bak labet labihahe? Gi am aiti oiti faina modem bak labet labihahe? Akatihahela?”
3. Lahahat Yesusat fa gago, “Vabà! Ba ame da nibe faina modehe labe labihaha vabak. Labi laha am aiti oiti laha faina modehe labe labihaha vabak. Ala bisi im feàna meedam Alat modem labe Aho ame da niba modi fa neàdem bak lam, ‘Damat fà aame ozobohudese,’ lahame ame baket modehe bak.
4. Um nasi ozomale. Aibu bak ab fuseo vabaleham bak. Aibu bak fumeam ba iho na meedam biem bak. Labihàmu di fauha neà lahasdam di nim Eba gagu oluhu Ala labe Aho Eba gagoho im lam iho meedam neà di am bak.
5. Em bak niba ehe lahasuhu di dam bakda labe im ahu ad laba modi Fauhaedamda Em am bak.”
6. Lahame labi gagu neàdi Yesusat Am keha bak laba ab nom doham. Labi vi uhulame bak vaobedi neàdi Am anekehàt visoi dat na aam biemda labe am fakode laba ab noiham.
7. Noime gago, “Om nasi le Vao Nobu Siloam laba le dauha kikele.” (“Siloam,” lahaha bak lam Ibrani dae ozom di gi, “Gagu olum bak,” laham bak.) Lahame labi gagohemu dam aheda labe ame da lam ve Vao Nobu Siloam laba vou le naedat am dauha it kikeme modeha ab neàdeham. Gi na aam bak neàdi am num bake fa ab laham.
8. Labi modeha am num obe esuhu dam lamti labi am ozobohu dam totbaho lamti dam labihasu amu ame da labe aho nusu iba na tauledam bak ozobohu dam labe iho gut aaha àvodi ot gagoida. “Uho ozom, da lam ana dàt mode? Ne, da lam gi fako na aam bili niba nusu iba na tauledamda am taia?”
9. Lahahat dam totbaho labe vedi neha, “Vabo, ame da labe modem kaio. Gi am alihiti ulohonali modem bak.” Lahahat ame da labe ahamo vi aime fa ab gagoham. “Lo, em ame da am bak.”
10. Lahahat dam labe fa neha, “Làhà om fako akati modi fa neàdehela?”
11. Lahahat ame da labe fa neha, “Dat ee gagom Yesus lahamda labe Aho bak vaobena modi Am anekehàt visoi em fakode niba noime gago, ‘Om nasi le Vao Nobu Siloam laba le dauha kikele,’ lahame eba labi gagohemu eho ame bak laba le dauha kikeme modeha em fako na aam bak ab neàdeham bak.”
12. Lahahat ame dam labe fa neha, “Oba modi fa neàdeheda akete?” Lahahat ame da labe fa neha, “Em bie. Le seteho.”
13. Yesusat Am kehati bakti valiheme bak vaobena visoi dat fako na aam biemda labe am fakode laba noime modi fa neàdehe bak lam gi hari Sabat modehemu ame dam labe dat fako faidehena fa na aam neàdeheda ve Farisi dam bake ab vou laham.
15. Vou le modeha ame Farisi dam labe iho neo vi ailo ame da laba ab gut vameadamam. “Om fako faidehe bak akati modi om etei fa na aam neàdehela?” Lahame labi gut gagoha ame da labe fa gago, “Ame Da labe bak vaobena modi Am anekehàt visoi em fakode niba noihemu eho em dauha le valo kikeme modeha em etei fa na aam bak ab neàdeham bak.”
16. Lahame etei labi gagoha ame Farisi dam totbaho labe aime ab gagoham. “Ame Da Yesus lam ba Alat gagu oluhu vab Dàt modem bak. Im Yahudi damat hari Sabat na modem fi ham digat lam Aho ozahigeàmu fa na meedam bak.” Lahana ame Farisi dam totbaho labe vedi neha, “Mm, ne da nim faina modemeam làhà na damat ihimo modem biem im feàna damat fet aame ozobohudemna nim ba amat Aba vizi Aho teudi im lamohoda meedàla?” lahame labi gagoha ame Farisi dam labe ihimo ab otesi otesidamam.
17. Labi ihimo otesi otesidaha vabamu fa neo ame dat fako faidehena fa na aam neàdeheda laba neo ab gagoham. “Ne, om akatiha? Fako faidehena fa na aam neàdeheda om am taia? Om ame Da laba gagom im ehe?” Lahahat ame da labe fa gago, “Eho ozoha, Am abo Alat vameadaha im aime fa dam bake ahate vameaidahada Am am bak.”
18. Lahame labi gagu modeha ame Yahudi dam busaoda eeda zi labe ihimo ot gagoida. “Iho ozoha, ame da lam amu fako na aam bili meedam bak lam meit aba modi fa neàdehe bak lam gi giomim. Gi am oiat fako aam neàna faaha bak lahasdam bak,” lahame labi ozohemu da labe aho vameadaha im laba ba tuhu vabak. Làhàmu dam gagome ame dat fako faidehena modi fa neàdeheda labe am aiti oiti, “Ve vou lele,” lahame ab gagu oluham.
19. Le ve fa vou li ab gut gagoham. “Ne, da nim uho neha, ‘Uho etei faaha di labe fako na aam biemna faaho,’ lahamda nim um adat mode? Làhà akati modi etei fa na aam neàdehela?”
20. Lahahat am aiti oiti fa gago, “Lo, im adat am bak. Labi laha iho am faaha di gi fako na aam biemna faaha bak.
21. Lahana, ‘Am akati etei fa na aam neàde? Amat fa aba modi neàde?’ laham bak lam im bie. Uho gi da laba gagu aima. Da lam gi busaolehena ahamo fa uba gagometa.”
22. Ame da lam am namti nehame iedi labi gagoho bak. Amu ame Yahudi dam busaoda eeda zi labe im nehasu gagu vàmadi esuhu bak ehet. “Meit neha, ‘Ame Da Yesus lam Alat Gagu Fihasi Vimteme Oluhu Dat Boehàda am tame,’ lahame labi gagomeam làhà ame da lam ba im Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba ba tau vahem vabak,” lahame gagu vàmadi esuhu labe ame etei iba gut uloodam dam laba ab gagoham. “Da lam gi busaolehena ahamo fa uba gagometa,” lahame lab gagoho im lam ab gagoham.
24. Lahame labi gagu neàdi ame Yahudi dam busaoda zi labe fa dat fako faidehena modi fa neàdeheda laba neo gagome lehe bak ab behàsdeham. Li duzu neàdi ab gut gagoham. “Alat oba nom aasdalo. Oho nasi ohu vame, ‘Yesus akatihasu meedam dàt modela?’ laham bak imbo bak gagole. Iho ozoha, ame Da Yesus lam gi faina meedam dàt modem bak.”
25. Lahahat ame da labe fa gago, “Ne, ame Da labe, ‘Debu faina modem Dàt modeo, faina modem vab Dàt modeo,’ laham bak lam em biem bak. Em gi im nimota ozobohu bak. Em amu fako na aam biemna ame Da labet fa eba modi em etei fa na aam neàdehe bak.”
26. Lahahat ame dam labe fa neo gago, “Ame Da labe oba ana mode? Oba akati modi om fa na aam neàdehela?”
27. Lahahat ame da labe fa gago, “Ne, eho amu uba gagohona taia? Um aim vaba? Um ana modi fa bak lam neo bisi vi ailo gagodàla? Làhà uho laha ame Da labe Aba Aho vahokedam im ozobohudelo vi tau meedam damalelo mode?”
28. Lahahat ame dam labe dae meot feàtàme vameada. “Vabo. Im ame Da laba vi tau meedam damat modem vabak. Ame Da laba bisi vi tau meedamda om am bak. Im gi im tai ahamda Musa bake vi tau im abada meedam damat modem bak.
29. Alat aham di iube im abada Musa bake tàhi vameame fi gatei aho fa ot vai im dedateli iba fa vou vamea usehe bak lam im ozobohu bak. Lahana Ame Da Yesus nim, ‘Amat Aba modi im dedateli lehela?’ laham bak lam im biem bak.”
30. Lahahat ame da labe fa ame dam busaoda laba im vahokeda. “Ne, ame Da Yesus labe Aho em fako faidehena Aho modi fa neàdehenàme akati modi uho neha, ‘Amat Aba modi im dedateli lehela,’ lahame labi gagodàla? Aiee! Em uho etei lab gagodam bak lam em aiha àvodeha.
31. Bak nim im ahebu ozobohuna taia? Dam faina meedam dam labe iho Ala bake, ‘Iba taule,’ lahame gagom di Ala ba ame dam laba taum vabak. Gi dam Aba deeli vou baedam dam abo Aba Aho ozoho baket uledi meedam dam lamota ibi iho gagom im aime taum meo bak. Bak lam im ahebu ozobohuna taia?
32. Labi laha dat etei faaha di labe fako na aam biemda modi fa neàdehe bak lam im amu aaha vabak. Abo Alat ahamte alimeat na ahebu meedaha di labe faasi etei vou fuhu di nim im ame bak lam aaha vabak. Gi etei alimeat ab aaham bak.
33. Ame Da Yesus lam Alat gagu im dedatelem vabameam ba im feàna nimohona ba modem vabak.”
34. Lahahat ame dam labe fa gago, “Vabo. Om oiat om faaha di labe faasi om gi faina meedume etei vou fuhu bak. Baka akati modi oho iba im vahokedà?” lahame ame da laba dae meona bebet fa im num mali ab gagu futoi itaham.
35. Labi ba neo Yesusat aiha Farisi dam labe dat fako faidehena Aho modi fa neàdeheda lam im Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num lam mali bebet futoi itaha bak aihemu le nabidume ab vi aaham. Vi aahemu gago, “Dat Asum Ahoba Iubet Bak Niba Li Dateleheda abo Alat Gagu Fihasi Vimteme Oluhu Dat Boehàda laba om tu vuzehi meedào?”
36. Lahahat ame da labe fa gago, “Dat Busao, ame Da lam akete? Oho etei eba fa gagole. Labi em ame Da laba eho tu vuzehese.”
37. Lahahat Yesusat fa gago, “Ne, Em ame Da oho ab aaham bak. Oba etei im ab vameadamam bak.”
38. Lahahat ame da labe fa gago, “Ai Boehàda, em etei Oba ab tu vuzeheham bak,” lahame ahit ogomasu biti ab vou baedamam.
39. Labi Yesusat neo vi vameada, “Eho bak niba lehe bake gi neham bak ozome lehe bak. Dam bakda labe iho na im meedaha bak laba ozome Eho dam totbaho laba, ‘Git modeho,’ labi dam totbaho laba, ‘Im vamdesu meedaho,’ laham bak laba ozome ozobohudi neàdi gagodalo bak niba lehe bak. Em gi damat neha, ‘Im fako na aam bieho,’ laham dam lam Eho modi fa na aam neàdeda. Labi laha damat neha, ‘Fako ibida na aam neà bak,’ lahame ahobat gagodam dam laba Eho modi fako ibida fa na aam bieda. Eho gi labihasu modelo bak niba lehe bak.”
40. Yesusat etei lab gagoho bak lam Farisi dam laba tau doudam dam totbaho labe ame bak aihemu fa Yesus bake ab gagoham. “Làhà, im laha fako na aam biem dam im ame?”
41. Lahahat Yesusat fa gago, “Uho neha, ‘Bisi im vamdesu meedam bak akete?’ laham bak um biem bak lam imbodemeam làhà ba Alat uba neha, ‘Um git modeho,’ lahame ba vàlu gagom vabak. Lahana uho etei neha, ‘Fako ibida neàte,’ lahamnàme Fauhaedamda imboda nim uho moudaha bak. Labiha labe Alat ubu uho faina meedam bak lam ba ozahigeàmu um fa vei neàdedam vabak,” lahame ab gagu esuham.
1. Yesusat neo susume vi vameada. “Eho etei neha, ‘Alat ubu uho faina meedam bak lam Aho ozahigeàmu fa vei neàdedam vabak,’ lahame Eho lab gagoho bak lam abo imbote. Labi Eho etei neo uba vouhome vameadalo modem im imboda nidi nim laha iademe aima. Dat domba ut tàme ousdam bak laba olem di doo labet iademe olem vaba fa bàhàgo tot iube zidazi olemda lam mei na aa vamda am bak. Mei na tet si vietoi voutamda am bak.
2. Lahana doo labet iademe olemda lam am domba vou aasdamda naeda am am bak.
3. Labi ame domba ut tàme ousdam bak laba ame doo laba vou aasdamda labe gut aameam domba deda lehemu doo fi stoi olem bak. Labi domba deda labe oli am domba zi ee gagodam labe domba labe im aiam dae aime ledahemu am aiat ab vou futodamam bak.
4. Labi vou futodume neàdi domba deda nasi duzu ladam labe domba zi labe im aiam dae aime ozobohu labe am ohuse ba vi dozeadume vuladam bak.
5. Ba dat giida labe am ohuse vi dozeadume vuladam biem bak. Dat giida iba vou aasdam vab dàt modemu iba butemeam ba ame domba zi labe ame da labe am dae aim vabak. Gi ilime seddam bak. Ame da labe am dae im aime ozobohudehe vab labe gi ilime seddam bak,” lahame Yesusat ab vameaham.
6. Yesusat gi, “Amti fa meia vagedam dam lamti uloho kaio,” laham bak vahokelo Aho ahi gi domba ut tàme ousdam bak laba vàlu im totobe labihasu fi koadume modeha ame Farisi dam labe, “Akatihasu modemna gagoela?” laham bak lam ba vi ozome ozobohudehe vabak.
7. Làhàmu Yesusat fa neo vi vameada. “Eho amu dombat aime modem bak vameadaha bak lam imbota imbot. Lahana Eho etei uba gagolo modem im imboda nidi nim laha nasi aima. Ame domba ut tàme ousdam bak laba modesuhu Doo abo dombat oli futoiam Doo lam Em am bak. Abo olem bak gagu oluiamda naeda Em am bak.
8. Meit ame domba ut tàme ousdam bak laba modesuhu doo labet iademe olem bakti ulohona Eba tu vuzehi meedamda lam Alat soat vausu fa vei neàdemda am tame. Labi ame dombadeda labe am domba ame ut tàhà laba vou oli fa vou futoi sibe baa vou le sibe àdam bakti ulohona Eho ame dam laba vou aasdume modi fa ahe neàna bohu vuusda tame. Em lehe vab diat nasi lehe dam giida zi labe vedi neha, ‘Alat iba gagu uba oluha,’ lahame vagedume, ‘Meit aba aho Eba tu vuzehe bak lam fa vabalese,’ lahame meedaha dam ehe bak. Abo mei na aa vadam dam lamti mei nazoh tet si vietoi voutam dam lamti ulohona meedaha damat modem bak. Lahana domba Ebeda ame dam labe iho vameadaha dae lam ba aihi vabak.
10. Ame da mei na aa vamda labe ame domba ut tàme ousdam bak laba lem di gi neham bak ozome lehe bak. Gi mei domba aa ve voutame oteme àme setelo lehe bak. Lahana Ebe Eho lehe bak nim ba labihaha vabak. Em gi domba Ebeda fa Emti vahi gi ahe neàna bohu vuusdam bake abo ba na iho ozome vamna vabake ozome lehe bak.
11. Em abo Domba Vou Aasdamda Neàda Em am bak. Vem nohuda li, ‘Domba beose,’ laham di Em domba ahedem bake Ehemo uledi soat vausu ot vai elom neà bak.
12. Mei domba teohet vou aasdam bake doi vamda lam bisi domba iademe vou aasdam vabak. Neham labe labihaha bak. Domba lam am dombat modem vabak. Mei domba aho gi vou aasda. Labihàmu ame da labe aho aameam nohubake azihi vem meona ame domba beolo modemu aho gi iedi domba vou esmozi itam bak. Labi ame domba zi lam ame vem meona labe nohisi domba meida veeme àme domba totbaho ab fi goaitoi ilime seddamam bak.
13. Ame da lam gi aho doi vam bak laba deeli vou aasda. Ba domba laba faobekem vabak. Labihàmu ame vem meona lem di am ba domba faobekem vaba gi aalahigeàmu iedi itame setem dàt modem bak.
14. Lahana Em ba labiham vabak. Em abo Domba Vou Aasdamda Neàda Em am bak. Em Aiti ot ozobohudiaha bak lamti ulohona Emti domba Ebedati laha ot ozobohudiaha bak. Labi laha domba Ebeda ahedem bake Ehemo uledi soat vausu ot vai elom bak.
16. Em domba ut tàhà niba ba vi tau oumahedalo modemna zi amomoi ehete. Lada lam Eho laha le ateme fa vou li ut tàhà niba vahi oumaheda tame. Ame domba lam laha dae Ebeda aime ozobohudi fa amuda zi nimti vahi gi Ehemo zi vàmadi vou aasdalo modem bak.
17. Em ba fat ahedi usam bak laba ozome domba Ebeda ahedem bake Ehemo uledi soat vausu ot vai elom bak. Eho ahit lab uledi ot vai elolo modem bak lam Em Aiat Eba deelem bak.
18. Em Ehemo it ozome neàdi uledi gagom vabameam làhà ba meit Eba otem vabak. Gi Ehemo naedat it ozome uledi neàdi im dedateli gagom labe meit Em otem bak. Em Aiat Eba gagoho labe Eho im dedateli Ehemo uledi ot vai elom neàte. Labi laha im dedateli fat ahedi usam neàte. Labihadam bak.”
19. Lahame Yesusat lab vameadaha im bohu lam ame Yahudi damat aiha vabamu ihimo otesi otesidam labe ab fahedamam.
20. Dam dua totbaho labe nehame gagoda. “Mei ahu oli veimam setan lam ame Da labe Am ahu laba veimai ahusobuli ostam im debu vabna vameadam Dàt mode taia? Baka akati iho ame Da labe Am im iho neo vi aie?” lahame gagu mouda.
21. Lahana dam totbaho labe nehame gagoda. “Ame Da labe etei vameadume iho aihi im nim mei ahu oli veimam setan veimaha labe labihasu im vameadam biem bak. Ba akati setan oli veimahada labe dat fako na aam biemda modi fa neàdela? Labiham biem bak,” lahame ab gagodamam.
22. Labi ba digat meida labe neo Yahudi dam labe ibi iho ozome na àme iziam bak meida ab vou fuham. Ame na àme iziam di lam gi ame Fihasi Ala Bake Vou Baedam Num Vàmteabu Lam amu di iube meit modi vàhàdehemu Yahudi dam amuda labe iho ame num fa itatame gàhàdehe bak laba vi ozome na àme iziam di modem bak neo ab fuham. Labihàmu Yahudi dam bada labe kota Yerusalem laba na àme iziam bak lam neo ab meedamam. Di lam di nutabedehe di am.
23. Ame na àme iziam di labe am digat meida labe Yesusat ame Num Vàmteabu labe am bak tomba labe am baa tot Salomonam Num Tom Fihaba Alim Baa laba goda.
24. Laba godume modeha Yahudi damat Am alihi aahemu fa Aba netàdi dozeadume vi ailo ab gagodamam. “ ‘Om ana dàt modela?’ laham bak lam akati iba taho ahate gagom vaba im vabili ahu vi ozodam bohu meedàla? ‘Om Alat Gagu Fihasi Vimteme Oluhu Dat Boehàda ameo?’ laham bak imbomeam làhà taho ahate iba gagole.”
25. Lahahat Yesusat fa gago, “Ne, Eho amu uba gagohona um Em im tu vuzehem moudam damat mode taia? Lahana um ozom vaba? Em Aiat Eba gagu Eho fa im dedateli ame na damat ihimo modem biem im feàna zi nim Eho lab meedaha bak labet uba modi, ‘Em ana Dàt modela?’ laham bak ozobohudi fi gatemna am bak.
26. Lahana ame bak aahanàme um ba domba zi Ebeda modem vab labe uho ba neha, ‘Em abo Alat Gagu Fihasi Vimteme Oluhu Dat Boehàda Em am bak,’ lahame ba Eba tu vuzehem vabak.
27. Domba Ebeda dae Ebeda aim di ozobohu labe aime uledi ledam bak. Labi laha, ‘Domba adida Ebeda mode?’ laham bak lam Em naeda ozobohu bak. Labiham labe domba Ebeda Eho vameadam im aime vuzehi meedam bak.
28. Labi domba Ebeda Eho modi Em Aiti vahi gi ahe neàna bohu vuusdam bak. Labiha labe ba Alati vaitesu geàdam bohu vuusdam vabak. Ba domba Ebeda meit Em anekehà niba si vietom vabak.
29. Na ahebu vafozi bisi feàda Em Ai am bak. Labi laha domba Eba lohoda Am am bak. Ba domba Ebeda meit Em Aiam anekehà laba si vietom vabak.
30. Emti Em Aiti ozom di im gi vàmtea bak.”
31. Lahame Yesusat etei lab gagoho bak lam ame Yahudi dam labe aime faki neo, “Yesus otese,” lahame ke visomoame, “Beose,” lahame viisiha Yesusat neo vi gagoda, “Ne, Eho dam bake tau meedam im neàna lam Em Aiat Eba neha, ‘Meedale,’ lahame gagu Em im dedateli Eho na damat ihimo modem biem im feàna meedaha im zi lam um aahana taia? Eho lab meedaha im zi lam adida Eho modehe labe um faki Em otelo modela?”
33. Lahahat ame Yahudi dam labe fa gago, “Oho lab neà bak meedamna zi lam iho aame faki ke visomoame Om otelo modem vabak. Iho Om otelo modem bak gi neha: Om gi bakda labe vedi neha, ‘Emti Em Aiti ozom di im gi vàmtea bak,’ lahame gagoho bak lam Oho gi Ala bake feàtàhà bak. Om gi bakda akati, ‘Om Ala am tame,’ lahame gagodàla? Im Oho lab gagoho bak laba faki ke visomoame Om otelo modem bak.”
34. Lahahat Yesusat fa gago, “Alat Vameadaha Im Toedahana zi lam abo ubu uho vuusdam Alam im lam um laba aame vi ozodam vaba? Aham di iube Israel dam vuusdam dam ahamda busaoda zi lam abo Alat Am im gagu oluhu dam zi lam Aho im nehasu dam laba gagohona meit nehame toehe bak ehena taia? ‘Alat neha, “Um abo meit vuusualame vou baedam ala zi um am bak,” ’ laham im uho ab vuusdamam taia?
35. Alat Vameadaha Im Toedahana lam ba fa faamome veimdi fa im meidem biem bak lam im ahebu ozobohu bak. Gi labaha bohu vuusdamnat modem bak. ‘Um abo meit vuusualame vou baedam ala zi um am bak,’ lahame lab toehe bak lam imbodemeam làhà uho ozom, Em akatiha? ‘Em Alat mode,’ laham bak lam Em gagom biehe? Vabà! Gagom neà bak. Aiat neha, ‘Em Adat,’ lahame gagu fi hasi bak niba gagu oluhuda Em ame Da am bak. Labiha labe Eho amu neha, ‘Em Alam Adat am bak,’ lahame gagoho di lam akati modi uho vedi neha, ‘Eho Ala bake feàtàho,’ lahame vàlu gagohela?
37. Eho etei vameaha bak lam fa uba vouhodase. Neha: Eho Em Aiat meedam im lam Eho vi meedam vabameam làhà Eba a tu vuzehemule.
38. Lahana Eho ame im lam meedameam làhà gi Ebe Eho lab meedam bak labet uho aadaha labe, ‘Em Alam Adat am tame,’ lahame Eba tu vuzehele. Ebe Eho lab vameadaha im labet uho Eba tu vuzehem momeam làhà gi Ebe Eho lab meedam bak lam aame ozo, ‘Alat Eba gagu oluhu labe Eho ame baket meedaho,’ laham bak laba tu vuzehele. Uho labi modem labe Em Em Aiti ot vou ali ot vou aliame ahu vàmadi ulohodesu meedam bak lam um ab ozobohu aabodemam bak.”
39. Yesusat etei lab gagoho bak lam ame Yahudi damat aihemu neo faki, “Sise,” lahame vabeddume modeha Yesus neo itame sete. Ba sim vabak.
40. Labi itaha labe le Yordan Soabo dumam tot iuba fa ab bioham. Abo Yohanes Mei Vuu Valo Baptisleiamda labe aho amu dam valo baptisleidaha bak laba fa ab bioham. Biou laba teohe azi.
41. Laba le azi modeha dam dua bak Aba dihasi valada. Dihasi valada. Lahada. Damat nehi ot gagoidam labe valada. “Yohanes Mei Vuu Valo Baptisleiamda labe ba na damat ihimo modem biem im feàna damat fet aame ozobohudemna modehe vabak. Lahana Ame Da Yesus, ‘Akatihasu meedam dàt modela?’ laham im lam Yohanesat vameame esuhuna lam ahebu gi imbodem tadehe bak,” lahame ot gagoidam labe valada.
42. Labihadume modeha ame bak laba dam dua zoho labe, “Yesusat ame Alat Gagu Fihasi Vimteme Oluhu Dat Boehàda am tame,” lahame ab tu vuzehedaham.
1. Ame di lam dat ee gagom Lazarus lahamda labe aho num debu Betania laba gaili bisda. Labi am nà behàsu Martati Mariati laha ame bak laba vahi azi. Ame nam Maria lam ba im Boehàda Yesusam naba minyak ahana neàna noime afoezobe am ohuta bohu labe vi footolo modem nam am. Laham nam labe am dubu Martati im vahada Lazarus gaili bisdàmu vou aasda.
3. Làhàmu am nà behàsu labe iho da meida laba gagu Yesus bake ab oluham. “Ai Boehàda oa, Omti vou alemda Oho deelemda gaili bisdalo. Lele,” lahame ab gagu oluham.
4. Lahaha im lam Yesusat aihemu gago, “Lazarus lab gaili bisdam bak lam gi labihasu fà bisdase. Ba elom kaio. Am gaili bisdam bak lam Alat nehame ozome gaili bisdam bak. Alat Aho Lazarus bake ba modem im ehe labe ame bak labet modi Amti Em Am Adatti, ‘ “Bisi feàte,” laham bak lam damat fà ozobohudese,’ lahame ahit labihaha bak.”
5. Yesusat aho Martati Mariati Lazarusti deeli meedamnàme vedi, “Lazarus gaili bisdalo,” laham bak aihina taho laha vaba vedi Aba Aho azihi bak laba neo usi behàsde.
7. Labi usi behàsdi neàdehezobe Aho iba Aba vi tau meedam dam niba ab gagoham. “Imo Yudea bake laba fa lase.”
8. Lahame labi gagoha iho fa gago, “Ai Guru oa, Om ozom vaba? Om etei laba laha di ame Yahudi damat gi ke visomoame Om otelo modem bake akati kehàm vaba fa laba lalo modela?”
9. Lahahat Yesusat fa gago, “Digat vàmtea labe fauhaedam di dua belas jam ehete. Di lam ala fauhaedam labe damat godameam ba naba gitadi bitem vabak.
10. Lahana damat aibut godameam naba gitadi bitem di am. Fauhaedam bak vab labe labihaha bak.”
11. Lahame labi gagu neàdi neo vi gago, “Imti vou alemda Lazarus bitesu iddalo. Imo le Eho ukese.”
12. Lahahat Aba vi tau meedam dam nibe iho fa vi gago, “Ai Boehàda oa, am iddameam làhà gi fa neàdelo iddam bak. Gi labihasule.”
13. (Yesusat etei lab gagoho bak lam gi Lazarus eloho bak gagolo Aho ahit im totobet gagoho bak. Lahana Aba vi tau meedam dam labe vedi abo iddam bak gagoho tibame vabili labi vi gagoho bak.)
14. Ame dam labe vabilehemu Yesusat fa ahate ab gagoham. “Lazarus eloho.
15. Lahana Eho ame da laba ba modem im ehe labe uba modi uho Eba vi tu vuzehi dualem bake am elolo vabalehe di lam ame bak laba Em tau modehe vab labe Em gi deelehe bak. Neàde. Imo nasi Lazarus eloho bak laba ladase.”
16. Lahahat Tomas damat neha, “Tasbana,” lahame ee meida taluhuda labe aho fa im amti vahi Yesus bake vi tau meedam dam totbaho niba ab gagoham. “Lo, im Da laba tau vuladume le Amti vahi elodam neàte,” lahame gagu neàdi dam vahi Yudea bake ab laham.
17. Ame Betania gi kota Yerusalem laba netàdehe num debut moz. Gi kilometer làtela lamo. Kia vabak. Labihadam di lam Yahudi dam kota Yerusalem laba azihi dam dua totbaho labe li Martati Mariati im vahada Lazarus elohemu im ahu faidehe bak vabededa. Labihadume modeha Yesus Aba vi tau meedam damti lehe labe li num debu Betania netàdehe bak niba ab fuham. Fusi aiha, Lazarus gi digat meida iube eloi ke bumata esu abo usi ahialehena li ai.
20. Labi Yesus ledam bak lam Martat aihemu, “Yesus bake tàse,” lahame doait ab laham. Lahana Maria gi ahu faidi numa aida.
21. Labi Marta doait le tàhi ab gut gagoham. “Ai Boehàda oa, Om màt di iube iba taho lemta im vahada ba elom kaio. Oho modi fa neàdem bak lam em ozobohu bak. Oho etei nim Ala bake neha, ‘Eba na nim veiale. Eba na nim veiale,’ lahame gagomeam làhà Oho lab gagohona lam Alat ahebu aime uledi modem tadem bak.”
23. Lahahat Yesusat fa gago, “Um vahada fat ahedi usa tame.”
24. Lahahat Martat fa gago, “Lo, em ozobohu bak. Etei bak niba vou mode ladume ba Dam Bake Uloodume Vi Aime Ozobohudi Neàdi Fime Fahedam Digat labe dam ahebu elodaha bak labet Alat modi fa ahededume usnadam di lam em vahadati laha am eloho bak labet ba Alat modi fa ahedi usam bak lam em ozobohu bak.”
25. Lahahat Yesusat neo vi gago, “Dam Elodahada Lam Fa Modi Ahededume Usnadamda Em am bak. Meit Eba tu vuzehemeam làhà gi elohonàme Eho modi fa usai Alati vahi gi ahe neàna bohu vuusdam bak. Ba neo vi elodam vabak. Gi ahe neàna labaha bohu vuusdam bak. Marta, Eho etei lab gagoho bak lam om tu vuzeheo?”
27. Lahahat Martat fa gago, “Lo. Ai Boehàda, Oho lab gagoho bak lam em tu vuzeheho. Labi laha Alat aham di iube neha, ‘Eho Gagu Fihasi Vimteme Olulo Modem Dat Boehàda bak niba olu tame,’ lahame fet gagu vàmadi esuhuda Om ame Da am bak. Labi Om laha abo Alam Adat am bak.”
28. Lahame Marta labi gagu neàdi fa num bake le Maria bake aa gagu dam dua bak vaitesu vou li gago, “Im Guru bàhàgo bak laba doudalo. Oba, ‘Lele,’ lahaho.”
29. Lahame labi gagu modeha Mariat aihemu gi àvodehat usai Yesus bake ab laham.
30. Di lam Yesus gi num debu Betania bàhàgo bak laba abo Marta Aba doait tàhà bak laba vou faodam lahasu. Ba num debu bake fum kai.
31. Labihadam di labe Yahudi damat neha, “Maria bake vabededase,” lahame am num laba teohe li esdam dam labe vi aaha Mariat àvodehat usai num labe futoi ladam bak aahemu ab ozoham. “Am vahada koei ke bumata esuhu bak laba le mezeo mode taia?” lahame gagu usnadume ab vuladamam.
32. Labi Maria le Yesusat odosdam bak laba lafusi Yesus aahemu ahit Yesusat avaesdam laba ogomasu biti ab gagoham. “Ai Boehàda oa, Om màt di iube iba taho lemta im vahada Oho modi fa neàdem bak. Ba elom kaio,” lahame ab vameadaham.
33. Labi Mariat lab mebe vameadam bak lamti labi Yahudi dam aba tau vuladaha dam labe medaom bak lamti Yesusat aahemu ahu faidi feà bak fusi, “Dam nim akati modi, ‘Dam elohoda ba fat ahedi usam kaio,’ lahame tum vaba modela?” lahame vi ozodaha vabamu ab gagoham.
34. “Koei esuhu ke bumat akete?” Lahahat dam labe fa neha, “Ai, nasi iba tau le aale.”
35. Làhàmu ladam labe Yesus fa vi tau fa vaksa vevea lada.
36. Labi modeha ame Yahudi damat vi aame ab gagoham. “Nasi aama. Am abo Lazarus bake deelehe bak ba koena modem kaio.”
37. Lahana dam totbaho labe vedi neha, “Dat fako na aam biemda modi fa neàdehena ba akati koei nim amu gailehe di taho modi fa neàdehe vaba modela?” lahame ab gagoham.
38. Labi Yesus neo gi ahu faidi feà bak fuhuna ozahit ladume ame ke bumat laba lafu. Ame ke bumat lam damat koei esu neàdi am ahazo ke baana ve tusu baguamdi modesda.
39. Làhàmu Yesusat ab gagoham. “Ke bumat labe am ahazo baana osoktole.” Lahahat koei labe am nà Martat mali gago, “Ai Boehàda oa, Om ozom vaba? Im vahada koei amu gi esuhuna usi ahialehena koei ahana fem bak. A osoktomule.”
40. Lahahat Yesusat fa gago, “Eho amu oba gagohona taia? Meit Eba tu vuzehemeam làhà Eho ame da laba modi ozobohudi, ‘Ala abo feàte,’ laham bak fi gate tame.”
41. Lahame labi gagoha damat ame bak lam aihemu ame ke ahazo baana lam ab osoktoham. Labi osoktoi neàdi Yesusat Am ohu vousai asum ahoba iuba tom aasdume gago, “Ai oa, Eho Oba lab gagoho im lam Oho aihi bak lam abo neàte.
42. Eho Oba im gagom di Om gi aim tadem bak lam Em ozobohu bak. Lahana dam niba Eba tau dozeadaha dam zi nim, ‘Fà aime ozo, “Eba gagu oluhuda Om am tame,” laham bak ozobohudese,’ lahame Eho ahit labi ahate gagodam bak.”
43. Lahame labi tom gagu neàdi Yesusat dae buduana ab buteham. “Lazarus nasi futoi lele.”
44. Lahahat koei lam damat amu am anekehà ahimti am nao ahimti sue nasbe gia. Labi sue baana am dauha neo suusu baguamde. Lahadume amu lab giaha bak lahasuhuna fa usai futoi ab li duzuham. Làhàmu Yesusat ab gagoham. “Uho Lazarus fà lam neà bak ozome um nasi Lazarusam so laba giaha sue lam ahebu ziamome voedale.” Làhàmu ame baket ab modeham.
45. Labihadam labe Yahudi dam Maria bake li vabededam dam labe aaha Yesusat lab modehe bak aahemu dam dua bak totbaho labe Yesus bake ab tu vuzeheham.
46. Lahana ame Yahudi dam totbaho labe vedi Farisi dam bake le, “Yesus nehaho,” lahame ab fi deham.
47. Làhàmu ame Farisi dam labe ame bak lam aihemu fa Yahudi dam labe ibi iho Ala bake lomna ve vua vahudam toheda zi laba vuusu im vameame faheme modiam dam lamti vahi ozo, “Imo fa Yahudit Ibi Iho Modem Im Gagu Vàmadi Esum Dam Debu laba gagu fa vahe vahedume ame im lam vameadase,” lahame Yahudi dam eeda zi labe bakamta nusualadume meia uloome aime vameadam dam debu laba ab laham. Le lafusi vameada. “Ame Da lam na damat ihimo modem biem im feàna damat fet aame ozobohudemna zi duana meedam bak lam akati iho ame Da laba gagu malem vaba modela?
48. Iho gi labihasu aalahigeàmu nehasu modesdameam dam ahebu Aba aame ozo, ‘Ame Da lam Alat Gagu Fihasi Vimteme Oluhu Dat Boehàda am tame,’ lahame tu vuzehi meedam bak. Labihameam dam mei debu iba vuusdam boehàdatebo labe ozo, ‘Làhà, dam lam ibi iho vuusu meedam bak mu fa Da lada laba tu vuzehemo,’ lahame ozomsu im meo dam fa iba olu ame Fihasi Ala Bake Vou Baedam Num Vàmteabu ibi iho vuusdamna lamti im damti ame meo dam labet beodume vàhàdedume sedda moio?”
49. Lahame labi vameadam labe im dat meida abo Damat Ala Bake Lomna Ve Vua Vahudam Tohe Dam Zi Labe Bisi Boehàdatebo abo tahun etei gàhàda nibe damat gagu fa boehàdateboleheda Kayafas labe aho ab gagoham. “Um ahusobu damat mode? Uho lab gagoho bak lam um it ozodam vaba?
50. Im Yahudi dam ahebu bisi ahe neàdem bak gi neha taia? Im dam dua bak beoho vaba gi dat vàmtea ot vai eloi setem bak lam bisi neà bak lam um ozodam vaba?”
51. Kayafas lab gagoho bak lam ahamo ozobohudi gagoho vabak. Aho lab gagoho im lam ba ab imbodeham bak. Ame da labe ame tahun labe Damat Ala Bake Lomna Ve Vua Vahudam Tohe Dam Zi Labe Bisi Boehàdatebolehemu Alat ahit ame da labe am ahu laba, “Yahudi dam ahebu soat vausu fa vei neàdem bake Yesus ot vai elo tame,” laham im lam vizi ozobohudi aho vabi fet gagu esuhu bak.
52. Gi Yahudi dam lamota soat vausu fa vei neàdem bak lamota ozome gagoho vabak. Yahudi damat modem vab dam abo bak iuba azihi dam ahebu soat vausu fa vei neàdem bakti labihasu ozome gagoho bak. “Abo dam mei debuti dam mei debuti bak iuba fi goaitoho dam abo Aba tu vuzehemda ahebu Alat vamateme am dam debu vàmadese,” lahame labihalo modem bak.
53. Labihàmu ame digat labe faasi Yahudi dam busaoda eeda zi labe, “Yesus si otese,” lahame im aa odoadume ahu ab vàmadeham.
54. Làhàmu Yesusat Aba Aho meedam im lam damat Aba aam vabake Aho ahit Yahudi damat esuhu bak ahebu ahate gohatem bak ab mu vaitoham. Labi vaitoi kota Yerusalem vou esmozi bak aotba baa bohu dam vaba alim bak netàdehe num debu Efraim laba ab laham. Abo Aba vi tau meedam damti vahi laba ab le tau esdamam.
55. Ame di labe Yahudi dam labet ibi iho modi baleàhà bak abo na àme iziam bak abo Paskah neo ab vou fuseo vabaleham. Ame digat fuseo vabalehemu kota Yerusalem netàdehe num debu mei num debu meime azihi dam labe iho faidehe bak fa neàdelo ibi iho amu nasi valo it kikeme itatam bake kota Yerusalem laba valada. Ame na àme iziam bak abo Paskah lam vahi àm bake ozome valada.
56. Labi ame dam etei kota Yerusalem laba vahe vahedam dam labe, “Yesus akete?” lahame nabiha vabamo. Iho ame Fihasi Ala Bake Vou Baedam Num Vàmteabu labe am ad oli aam bak tomba laba dozeadaha di labe nehi ot gagoida. “Um akatihasu ozohela? Iho vahi na àme iziam bak nim Am ba lem vabao?” lahame ot gagoida.
57. Ame damat Ala bake lomna ve vua vahudam toheda zi laba vuusu im vameame faheme modiam dam lamti Farisi dam lamti amu dam bake nehi fet gagu esu. “Meit Yesusam alihi aameam làhà iba li gagole. Iho Da lam taho sim bak am tame,” lahame fet gagu esuhu bak ehet.
1. Labi ame na àme iziam bak abo Paskah lam vou fuhu vabna gi ba usi enamlem bak ehe lahasuhuna Yesusat nasi fa Betania laba la. Abo Lazarus am eloho bak labet Aho amu modi fa ahedi usahada labe aho azihi bak laba ab laham.
2. Labi le lafusi ame Betania esuhu dam labe Yesus ibi bake fa lehemu deeli na àmna ab modeme vahedamam. Martat na ohuda. Labi Lazarus fa Yesusti dam bak iube lehe damti vahi na àda.
3. Labi na àdam di labe Mariat aho narwastu omnao aaboda labe modehe minyak abo doi duana vahana ahana neàna vou li Yesusam naba laba veosi afoezobe am ohuta bohu labe fa footoda. Labi modeha ame minyak ahana labe feà bak fusi num lam ahana ab feedamam.
4. Labi modeha Aba vi tau meedamda meida Yudas Iskariot abo Yesus ba vou fohome dam bake ub lolo modemda labe ame bak aame faki ab gagoham.
5. “Oo, akati modi doi feàna vaha minyak ahana neàna lam gi vàhàdedàla? Gi fa meia ot loiame doi feàna abo dat vàmtea na meedume tahun vàmtea foli gohali vam doiti ulohona ve fa faheme dam na vab dam laba lodam vaba modela?”
6. (Lahana ame da Yudasat lab gagoho bak lam ba dam na vabdate faobekesi doi lolo gagoho vabak. Am gi mei nazoh aa vam dàt moz. Im Yesus bake vi tau meedam dam nibe iho na im meedam doi vuusdamda am. Labi ame da Yudas gi im doi na aho ozomna aa vame setemda modem bak.)
7. Lahame Yudas labi gagohemu Yesusat fa ab vi gagoham. “Gi labihasule. Maria bake a vabimule. Eho ozoha, Em ba elom diat koei noimna noime afoezobe ke bumata vou oli esum bakti uloho bak laba ozome Em naba niba ahit nasi fet veosi ahumdi esulo modem bak.
8. Um dam na vab dam gi labaha bohu tau esdam labe vi taui vi tauidam labe esdam bohu meedam bak ehe bak. Lahana Em etei nim ba uba tau azim bohu meedam vab Dàt modem bak. Mariat ahole modehe bak,” lahame ab gagoham.
9. Labihadam di labe Yahudi damat aiha, “Yesus Betania laba le aidalo,” lahaha bak aihemu, “Yesus aase,” lahame dam feàda zi labe Betania laba ab valadamam. Gi Yesusta aam bakta ozome valadam vabak. Lazarus am eloho bak labet Yesusat amu modi fa ahedi usahada lamti aalo ab valadamam.
10. Làhàmu ame damat Ala bake lomna ve vua vahudam toheda zi laba vuusu im vameame faheme modiam dam labe iho dam dua bak Lazarus bake valadam bak aahemu faki, “Lazarus laha otese,” lahame ab ozome esuham.
11. Neham labe labihaha bak. Yahudi dam dua totbaho labe Lazarus eloho bak labet Yesusat modi fa ahedi usaha bak aame ozobohudi fa ame toheda zi labe im boehàda zi laba tum mu vou esmozi fa Yesus bake tu vuzehi meedàmu, “Lazarus laha otese,” lahame ozome esuhu bak.
12. Labi izi dihasi dam dua bak amu ame na àme iziam bak abo Paskah lam tau àlo nasi kota Yerusalem niba vahi esdam dam labe aiha Yesus lelo meedam bak aihemu bom alahaso ab le fi kbodaham. Fikbodume neàdi, “Yesus abo feàte,” laham bak ozome vou baedalo kota vou esmozi bàhàgo obe iuba Yesus bake doait tàlo ab laham. Ladam labe ame bom alahaso lam vuusualame vou eeadam labe meit neha, “Hosana! Ala abo feàteee!” Lahame vou bae lada. Labi meit neha: “Dat abo Alat Aho Gagu Olu Ot Vai Im Dedateli iba etei ledamda nim abo feàteee!” Lahame vou bae lada. Labi meit neha: “Iba Israel dam vuusu im vahokedalo modem Boehàda abo feàteee!” Lahame neo gagu vou bae lada. Lahada.
14. Amu iub ledam di iube Yesus gi mei keledai fi ho adat gàhàda ve zisi nusu leda. Ame Yesusat etei lab meedam im lam Alat Vameadaha Im Toedahana laba meit fet toeme esuhu im nidi nim ab modi imbodeham.
15. “Dam num debu Sion laba azihi dam oa, nasi aamale! Uba vuusdam Boehàda labe etei uba ab ledamam tame. Lahana a iedemule. Gi umti vahem bak laba ozome deeli daleà ladehebeat keledai fi ho adat gàhàda laba nusu ledalo.” Lahame fet gagu esuhu bak lam ab modi imbodi meedamam.
16. Ame etei lab meedaha im lam Aba vi tau meedam dam nibe amu lab fet toeme esuhu im lam modi imbodehe bak lam vabile. Lahana ba Yesus damat oteme Am eloho bak labet Alat modi fa ahedi usai fa Am Ai bake asum ahoba iuba tom ilu Alat Am ee vousai feà Dateli neàdehezobe ba ab vi ozobohudeham. “Oo làhà! Alat Vameadaha Im Toedahana lam gi damat ba Yesus bake meedalo modem im ab modi imbodehame?” laham bak ba vi ozome ozobohudehe bak.
17. Dam dua bak etei Yesus bake doait tàlo modem bak lam debu gi nehaha bak. Lazarus eloi ke bumata esuhu di lam Yesusat buteme fa ahedi futoho bak lam Yahudi damat aame ozobohudehe labe fa iho aaha bak lam meia le fi de. Meia le fi de. Labihadam labe kota Yerusalem esdam dam dua bak na damat ihimo modem biem im feàna damat fet aame ozobohudemna modeheda Yesus ame Da amemu Aba doait tàlo ab ladaham bak.
19. Labihadume modeha Farisi dam labe dam etei Yesus bake buteme vou bae ladam bak lam aahemu ihimo ab ot gagoidamam. “Aiee! ‘Im dam Yesus bake tum bak malese,’ lahame modeha im gi nembedi ab mohameo? Um nasi ozodale. Bak niba esdam dam ahebu Aba tulo lab valadamam tame,” lahame àvodi ab ot gagoidamam.
20. Ame na àme iziam bak abo Paskah lam meedam di Yahudi dam dua bak labe neha, “Ala abo feàte,” lahame ahu adat iedi Ala bake vou baedalo modemu kota Yerusalem laba laha bak. Labi ame di labe Yunani dam totbaho laha tau laba laha bak.
21. Ame Yunani dam labe iho Yesus bake vi tau meedamda meida Filipus abo Galilea bak labe am num debu Betsaida labe leheda laba le ab gagoham. “Dat busao oa, im abo Yesus bake tàhi im vamealo àhàkeho.”
22. Lahame labi gagohemu Filipus neo Andreas bake le ame Yunani dam labe iho etei gagoho im lam fa vou le gago. Labi gagu neàdi ame dam ahim lam fa neo Yesus bake le ab gagoham. “Yunani dam Oba aalo nabidalo.”
23. Lahame labi gagoha Yesusat ame dam laba im ab faasi vameadamam. “Em kehàm vaba elo tame. Lahana Em Abo Asum Ahoba Iubet Bak Niba Li Dateleheda modem labe Em eloho bak labet Alat modi fa ahedi usai Em Ai bake asum ahoba iuba tom iluhemu Em feà datelehe bak lam Alat fa dam bakda modi ozobohudi fi gatelo modem bak ab vou fuham bak.
24. Im lada lam imbomu im imboda nidi nim laha nasi iademe aima. Ebe Eho ahe neàt aidam di gi gandum oo buàti uloho bak. Neha: Gandum oo buà bake dezi fa bak baulem vabameam gi aba esdam bak lahasuhu bak. Ba loube futoi oo valem vabak. Lahana bake dezi fa bak baulemta laha usime oo duana vaedam bak. Labi laha Eho elom vabameam làhà uba soat vausu um fa vei neàdemna ba na vabak.
25. Meit neha, ‘Em bak niba gi nehasu ahena bohu aidalo modem bak,’ lahame labihasu it ozome deeli meedamda lam ba diamut ahe neàna bohu vuusdam vabak. Gi lab eloho tadi setem bak. Lahana bak niba esdam di meit neha, ‘Em Yesus bake tu vuzehi im Abada meedam labe meit em otem neà bak,’ lahame labihasu ozodamda lam Alati vahi gi ahe neàna bohu vuusdamda am bak.
26. Meit neha, ‘Em abo Yesus bake tu vuzehi Aba vi tau meedam dateli im Abada modelo mozo,’ lahamda lam Eba nasi tu vuzehi im Ebe Eho gagomna lam meedale. Labiham labe Ebe Eho le azim bak laba ame da lamti ahili le azim bak. Labi im Ebeda meedamda lam laha Em Aiat am ee vousai vou baedam bak.
27. Lahana Em etei vi ozodaha vanamai Em ahu faidi admahi seteho. Em Ai bake akatihasu gagoela? ‘Eba ba modi geàdalo modemna lam fa faatoi vei setem neào?’ lahame gagoe? Vab. Em labiham bie. Ame bak lam gi Ebe Eho bak niba lehe bak am bak.” Lahame Aho labihasu gagu ozoha vabamu fa ab gagoham.
28. “Làhà Eho gi Ai bake nehalo. ‘Ai oa, Oho bisi feà bak lam damat biem bake Oho dam bake modi ozobohudi fi gatele.’ ” Lahame gi etei labi gagoha asum ahoba iube Alat Am im Yesus bake ab vameadaham. “Obo Oho bak niba na im meedam bak labet modi damat, ‘Em abo feàte,’ laham bak ab modi ozobohudi ab fi gateham bak. Labi laha Eho ba modem im modem labet modi dam bake neo ame baket modi ozobohudi fi gate tame,” lahame ab nom vameadaham.
29. Labi ame asum ahoba iube lab nom vameadaha im lam dam duada zi labe aime vedi neha, “Asumat giliha.” Lahana dam totbaho labe vedi neha, “Alat Am im gagu vou usemda labe Yesus bake im vameadàla?” lahame meit ibi iho ozoho bak gago. Meit ibi iho ozoho bak gago. Lahada.
30. Labi modeha Yesusat fa ame dam laba ab gagoham. “Uho etei lab aihi im lam bisi Eba ozome, ‘Em aise,’ lahame vameadaha vabak. Gi, ‘Alat Gagu Fihasi Vimteme Oluhu Dat Boehàda Em ame Da am tame,’ laham bak um ozobohudem bake ahit uba nom vameadaha bak.
31. Etei di nim Alat dam bakda labe ibi iho bak niba meedaha im, ‘Git modeheo? Neà bak modeheo?’ laham bak ozome ozobohudi neàdi gagolo modem di ab vou fuham bak. Labi laha dam bakda vuusdam boehàda Iblis lam gagu itame setem di ab vou fuham bak.
32. Lahana damat Eba modi bak nibet vousai tom modesu neàdehezobe Eho modi zie tombali dam debu ahebu Eba valadume tu vuzehi meeda tame,” lahame Yesusat ab vameadaham.
33. (Yesusat etei lab gagoho bak lam, “Damat Eba modi bak nibet vousai tom modesu neàdehezobe,” lahame lab gagoho bak lam Am gi, “Damat Am akatihasu otela?” laham bak laba ozome im totobet fi koadaha bak.)
34. Yesusat etei lab gagoho bak lam ame dam duada zi labe vi aime fa ab gagoham. “Oho etei lab vameadaha bak lam im ozom vabileho. Alat Vameadaha Im Toedahana zi lam meit aame iba gagodam di iho gi neham bak dogoit aidam bak. ‘Alat Gagu Fihasi Vimteme Olulo Modem Dat Boehàda lam gi labaha ahe neà bohu vuusdam Dàt modem bak,’ lahame labi vameadamna akati Oho neha, ‘Ame Asum Ahoba Iubet Bak Niba Li Dateleheda lam damat modi bak nibet vousai tom modesu elo tame,’ lahame labi gagodàla? Làhà im git ozohe? Iho vou faodamda Om ame Da modem vaba? Làhà Oho nasi Oho lab gagoho bak lam, ‘Asum Ahoba Iubet Bak Niba Li Dateleheda elo tame,’ lahaha bak lam, ‘Ame Da lam ana dàt mode?’ laham bak lam im biem bake Oho iba modi ozobohudi tombalele.”
35. Lahahat Yesusat gi Aba Aho ba meedalo modem im vi ozome im totobe nidi nim fa ab fi koadamam. “Uba Fauhaedamda nibe umti vahi niba esdam bak gi kehàm vaba setem bak. Labihàmu uba modi aibulem bak labna zohàme fauhaedam lahasuhu di nibe fauhaedam bak laba ladale. Meit aibu bake ladameam, ‘Am adi bake ladà?’ laham bak lam ba ozobohudem vabak.
36. Labihàmu uba modi Fauhaedamda nim umti vahi esdam lahasuhu di nibe nasi Aba tu vuzehele. Labiham labe Am itbaho fatoi Am damali Am im imbona lam fa ot vai meeda tame.” Lahame labihasu vameadume neàdi Yesusat ame dam lam vou esmozi gi ab itame seteham. Ba dam bake ahate gohatem vabak.
37. Yesusat aho na damat ihimo modem biem im feàna damat fet aame ozobohudemna zi duana lam Yahudi damat aasdahit meedahanàme ame dam lam ba Aba tu vuzehem vaba gi mu bohu vuusdam bak lahasda.
38. Ame dam labe iho lab mu bohu vuusdam bak lam gi dat ahamda Alat vameadaha im aime fa dam bake ahate vameaidahada Yesaya aho aham di iube nehame fet toeme esuhu im lam ab modi imbodeham. “Boehàda Ala oa, iho vou vameatedaha im lam iho ozoha, dam aime tu vuzeheheda mahate dua vabna ozomom bak. Om feà bak lam Oho dam bake modi ozobohudi fi gatehenàme iho vou li vameadaha im lam tu vuzehem mom bak lahasuho.” Lahame Yesayat lab fet toeme esuhu im lam ab modi imbodeham.
39. Ame Yahudi damat Yesus bake tu vuzehem vaba moudahemu fa ba ab tum bieham bak. Abo Yesayat aham di iube Alat gagoho im meida aho nehasu fet toeme esuhu bakti ulohote.
40. “Boehàda Alat nehaho. ‘Eho dam labe na aam bak labna zohàme Eho ahit modi ame dam labe na aam bileho. Labi dam labe im ahulat vi ozome ozobohudem bak labna zohàme Eho ahit modi im ahu tamzohobuleho. Labiham labe ame dam labe ba ibi iho faina meedam bak lam voedume seti fa vei neàdedam vab labe Eho ba ame dam laba soat vausu fa vei neàdedam kaio.’ ” Lahame Yesayat aham di iube labihasu fet toeme esuhu labe ame Yahudi damat fa Yesus bake ba tu vuzehem biehe bak am bak.
41. Ame da Yesaya lam Alat ahit modi Aho Gagu Fihasi Vimteme Olulo Modemda Boehàda labe ba feà Dateli meedam im lam nasi ozobohudi gi aham di iube ame im lam nasi fet toeme esuhu bak.
42. Ame Yahudi dam dua bak Yesus bake tu vuzehem vabnàme ame Yahudi dam busaoda eeda zi totbahota Aba tu vuzeheda ehe bak. Lahana ame dam labe ibi iho Yesus bake tu vuzehe bak lam Farisi dam labe aime ibi iho fi hasi bakamta vahi Alat vameadaha im ahamda dogoit aidam bakti im meiti meedam num lam mali gagu itam bak labna zohàme gi aa tu vuzehi meeda.
43. Neham labe labihaha bak. Ame dam labe iho aa tu vuzehi meedam di Alat iba deeli vou baedam bak ba ozome meedam vaba vedi, “Gi bak damat fà iba vou baedase,” lahame ibi iho Yesus bake lab tu vuzehe bak lam imbo vabna gi meeda.
44. Labi Yesus dam bake dae buduana ab buteme im ab vameadamam. “Meit Eba tu vuzehemeam làhà ba gi Emota tu vuzehem vabak. Abo Eba Gagu Oluhuda lamti tu vuzehem bak.
45. Labi laha ame da labe aho Eba fakot aam di gi Eba Gagu Oluhuda laba aadamna ààmom dàt modem bak.
46. Eho bak niba lehe bak nim gi dam bakda aibu bak laba azim dam laba, ‘Fà modi fauhaedase,’ laham bak ozome lehe bak. Meit Eba tu vuzehemda lam aibu bak laba azim lahasum vabake Eho ahit labihaha bak.
47. Meit Eho vameadam im aime tu vuzehi meedam vaba gi aalahigeàmomda laba Eho, ‘Beose,’ lahame ba na asimbuna feà aba modelo gagodam vabak. Neham bak. Eho dam bakda laba, ‘Beose,’ lahame na asimbuna feà dam laba modelo gagom bak laba ozome bak niba lehe vabak. Eho gi dam bakda ibi iho faina meedàmu Alat beom bak fa faamome soat vausu fa vei neàdedam bak laba ozome bak niba lehe bak.
48. Lahana damat Eho vameadaha im lam Emti mu aalahigeàmom dam lam ba beom bak ehe bak. Abo Alat ba diamut Dam Bake Uloodume Vi Aime Ozobohudi Neàdi Fime Fahedam Digat fum di beom di am bak. Ame dam labe Eho vameadaha im laba tu vuzehem vaba moudahemu Alat gi ame bak labet dam laba vàlu, ‘Beole,’ lahame vi ozome ozobohudi neàdi gagoda tame.
49. Neham labe labihaha bak. Eho bak niba li meedam di nim ba Ebe Eho ozoho bak labet ozome Ehemo im dedateli dam bake im vameadam vabak. Gi Eba gagu oluhuda Em Aiat Aho neha, ‘Dam bake im nehasu vameadale,’ lahame gagohemu Eho gi Aba Aho gagohoda lamota dam bake li vameadam bak.
50. Labi Em Aiat Eba neha, ‘Im nehasu dam bake vameadale,’ lahame Eba gagodaha im lam meit tu vuzehem labe Aho modi fa Amti vahi gi ahe neàna bohu vuusdam im am bak. Laham bak lam Em ozobohu bak. Labihàmu Eho dam bake im vameadam di Eho gi iademe Em Aiat amu Eba fet gagu esuhu im ahum lamota dam bake vameadam bak,” lahame Yesusat ab vameadaham.
1. Yahudi dam labet ibi iho modi baleàhà bak lam abo na àme iziam bak abo Paskah lam novalo modem di labe digat bisi tombuda dihasi àm bak ab fuseo meedamam. Labi ame aibu labe Yesusat Am bak nim vou esmozi fa Am Ai bake lam bak fuhu bak lam Am naedata ozobohu bak. Aho bak niba li tau aidam di Aba vi tau meedam dam ahebu Aho gi amu di iube faasi deelehe bohu vuusdam bak. Aho gi labihasu vou mode ledume Am bak nim fa vou esmom bak ab vou fuhamdaleàmu, “Aba Aho Am damalehe dam laba bisi lab deelehe bohu vuusdam bak lam Am dam labe fà ozobohudese,” lahame Aho ab vouhodalo modemam.
2. Aho Aba vi tau meedam dam dua belasti iho ame Paskah vi ozome àmna tombuda àlo modemu vahe vahedam di labe Iblisit gi amu di iube Simon Iskariotam adat Yudas bake am ahu laba neha, “Oho Yesus vou fohome meia ub lu otele,” lahame gagu esuhu bak.
3. Lahamnàme Yesusat Am Aiat Aba na im ahebu lu Aba modi im dedateli vuusu meedam bak lam Am naedata ozobohu bak. Labi Am Aiat Aba gagu asum ahoba iube bak niba oluhu bak lamti labi Am Ai bake fa lam bakti Am laha ozobohu bak.
4. Làhàmu, “Aba Aho Am damalehe dam laba bisi lab deelehe bohu vuusdam bak lam ame dam labe fà ozobohudese,” lahame Aho na àdam bak labe usai Am sue ahobada vihitoi esu afoezobe handuk visoi Am kemohode laba gimsu neàdi vao fedehena visoi fi lihiba laba veàtoi fa Aba vi tau meedam dam labe im naba laba vaot ab faasi kikedume afoezobe Aba it gimsuhu handuk labe eksobu bak ab footoidamam. Aho nehasu meeda.
6. Dat meida am naba kikeme neàdi fa handuk vi footoi esu. Dat meida am naba kikeme neàdi fa handuk vi footoi esu. Lahadume Simon Petrus bake vou fusi am naba kikesome modeha Petrusat ozo, “Em feà vab dàt akati Yesusat em naba kikelo mode?” lahame ozohemu Yesus bake ab gut gagoham. “Ai Boehàda oa, em naba Oho kikelo mode?”
7. Lahahat Yesusat fa gago, “Eho etei nib meedam bak nim om biem bak. Lahana faobe om ba ozobohude tame.”
8. Lahahat Petrusat fa ab gagoham. “Vabà! Om ba em naba a kikemule.” Lahahat Yesusat fa gago, “Eho oba vaot kikem vabameam Emti omti ahu vàmadi vou alem vabak.”
9. Lahame labi gagoha Simon Petrusat fa gago, “Labihameam làhà gi em nabata a kikemule. Em anekehàti em ohuti ahebu laha kikedale.”
10. Lahahat Yesusat ozo, “Am dam amu faina meedaha bak lam Eho modi fa faamome vei neàdedahamnàme fa neo ba faina vi modi vi modidàmu Eho neo vi faamome vei neàdedam bak laba ozome Eho gi nabata vaot kikedume vouhodase,” lahame ozome fa Petrus bake ab gagoham. “Meit gi etei sabunat ehume neàdeheda lam ba so gihobulem vabak. Ab boz neàdeham bak. Gi naba vekeheda lamota kikedam bak. Um dam totbaho ahebu Eho kikeme boz neàdehe bak. Lahana gi dat vàmtea vooho bak,” lahame ab gagoham.
11. Yesusat etei lab gagoho bak lam Aho gi Am vou fohome dam bake ub lu otelo modemda lam Am gi amu di iube fet ozobohudehe labe Aho neha, “Um dam totbaho ahebu Eho kikeme boz neàdehena gi dat vàmtea vooho bak,” lahame labi gagoho bak.
12. Labi Aho Aba vi tau meedam dam labe im naba vou kike ladume neàdi fa usai sue ahobada amu vihitohoda lam fa ab dusuham. Dusu neàdi Aba Aho na àdam bak laba fa ab le nusuham. Labi nusu gago, “Eho etei lab meedaha bak lam uho vi ozo, ‘Akatihasu modelo labihahela?’ laham bak lam um ozobohudeheo?
13. Neham bak. Uho Eba im gagom di, ‘Guru oa, Ai Boehàda oa,’ lahadam bak lam gi ahole gagodam bak. Em ame Da am bak.
14. Uba vuusdam boehàdati uba vahokedam guruti Em ame Da modehemu Eho ahit mei na teo meedamdati ulohonali um naba kikedaha bak. Labihàmu uho gi ame baket meedale. Um naba ot kikei ot kikeidale.
15. Eho etei uba lab meedaha bak lam, ‘Uho laha ame baket meedale,’ lahame uba ab vouhodaham bak.
16. Eho vouhohemu uho gi ame baket vi meedale. Labi laha Eho etei uba gagolo modem im imboda nidi nim laha nasi iademe aima. Mei na meedamda labe aho ba aba im gagu modiamda laba ba vafozi feà datelem vabak. Labi laha im ahum ve fa meia vameadamda lam ba im deda laba vafozi feà datelem vabak.
17. Eho etei uba lab vahokedaha bak lam um aime ozobohudehe labe uho vi meedameam làhà Alat fa uba im neà bak modi esuiam bak.
18. Eho amu neha, ‘Gi dat vàmtea vooho bak,’ lahame lab gagoho bak lam um ahebu vi ozome gagoho vabak. ‘Uho Eba tu vuzehi vi tau meedam damalele,’ lahame um fi me vaha di lam, ‘Um akatihasu meedam damat modela?’ laham bak lam Em gi amu nasi fet ozobohudehena um fi me vaha bak. Ebe Eho ba modem im lam meit Alat Vameadaha Im Toedahana laba nehasu toehena, ‘Imbodese,’ lahame Eho ahit um labihasu fi me vaha bak. Ame im neha: ‘Meit ahobat neàdi Eba tau roti àdamda lam Eba fa fakemoholemda am bak.’ Laham im lam imbodelo Eho ahit um fi me vaha bak.
19. Eho etei lab gagoho bak lam ame im meedaha vab di nibe uba nasi fet vameadam bak. Ame im lam ba modi imbodehezobe uho it ozo, ‘Em ame Da ame?’ laham bak laba tu vuzehem bake Eho ahit uba nasi fet vameadam bak.
20. Eho etei lab gagoho bak lam imbote. Em ame Da am bak. Lahana Eho etei uba gagolo modem im imboda nidi nim laha nasi iademe aimale. Ebe Eho im Ebeda gagu oluhuda lam meit ule neàt gut vameam làhà gi Eba laha ahu ule neàt ab vaham bak. Labi Eba ahu ule neàt vamda lam gi Emota ule neàt vaha vabak. Abo Eba Gagu Oluhuda lam abo Em Ai bake laha ahu ule neàt vaha bak,”
21. Lahame labi vameadume neàdi Yesusat ahu faidi feà bak fusi vi ozodaha vabamu ahate ab vi gagoham. “Im imboda nidi nim nasi iademe aima. Uho meidavat Em vou fohome meia ub lu ote tame.”
22. Yesusat etei lab gagoho bak lam Aba vi tau meedam dam labe iho aime àvodi, “Amat modem im gagohela,” lahame ihimo fako meot ot aai ot aaida.
23. Di lam Eho Yohanesat Aba vi tau meedamda meida abo Yesusat deeleheda nibe Am obe laba vi tau aida.
24. Làhàmu Simon Petrus labe eba neha, “ ‘Amat modela?’ laham bak lam oho Guru bake gagu aile,” lahame gi fakot im vameada.
25. Làhàmu eho Yesusam so laba nem ulasi netàdi aa gago, “Ai Boehàda, amat modela?”
26. Lahahat Yesusat fa eba neha, “Eho etei roti na vaksa niba nom ekeme lu àlo modemda nim ame da am tame,” lahame gagu roti aguti ame na vaksa laba nom ekeme afoezobe fa Simon Iskariotam adat Yudas bake ab loham.
27. Lu modeha Iblisit Yudasam ahu laba ab oli veimadamam. Labi modeha Yesusat Yudas bake ab gagoham. “Oho lab ozome modelo modem im taho modele.”
28. Lahame Aba Aho lab gagoho bak lam iho Aba tau na àdam dam totbaho nibe, “Yesus akatihasu ozome Yudas bake labi gagohela?” laham bak vabili vi ozoda.
29. Im doi Yudasat vuusdam dàt modem labe dam totbaho labe vedi nehi ozo, “Làhà im Paskah labe na àm tombuda àm bake na le doit vam bak gagodà tiba. Laham vabameam ame doi vou le na vame fa dam na vab dam laba lodalo gagodà tiba,” lahame vabili vi ozoda.
30. Labi Yudasat ame roti ve àme neàdi modeha ab futoi laham. Gi aibut ab futoi laham.
31. Labi Yudas futoi le seti neàdi Yesusat Am ba eloho bak labet Alat modi fa ahedi usahazobe Aba neo modi tom vousai fa feà datelelo modem bak laba ozome Aba vi tau meedam dam niba im neo vi susulo vameada. “Etei nibe Em Abo Asum Ahoba Iubet Bak Niba Li Dateleheda nim damat Eba, ‘Em abo feàte,’ lahame vou baedam bak lam Alat modi ab faaseo meedamam bak. Labi laha Eba modelo modem im nibet modi damat Em Ai Ala bake laha neo, ‘Am abo feàte,’ lahame vou baedam bak laha ab faaseo meedamam bak.
32. Labi Eho vou mode lehe im nibet modi damat Em Ai bake, ‘Am abo feàte,’ lahame vou baedameam làhà Em Aiat Eba Am Adate etei modelo modem im labet neo modi damat neha, ‘Em abo feàte,’ lahame Eba fa neo vou baeda tame. Ame bak lam ba kehàlo modem vabak. Abo taho modelo modem bak.
33. Em damalehe dam oa, Em umti vahi esdam bak nim ba bohulalem kaio. Em gi ab setelo modemam bak. Labi uho gi fa Eba vi nabidam bak. Lahana Eho amu Yahudi dam busaoda eeda zi laba neha, ‘Ebe Eho le azilo modem bak laba um tau vulam biem bak,’ lahame lab gagoho bak lam Eho neo gi ame baket uba neo vi gagu esulo modem bak. Um laha etei Eba tau vulam vabiem bak.
34. Labihàmu Eho im gàhàda, ‘Nehame modele,’ lahame uba ab vameame esulo modemam bak. Neha: Uhumo nasi meia ot deeli ot deelidale. Abo Ebe Eho uba deelehe bak lamti ulohona uho neo uhumo ot deeli ot deelidale.
35. Uhumo ot deeli ot deeliame meedameam làhà dam bakda ahebu aame ozo, ‘Dam lam abo Yesus bake bisi vi tau meedam dam ame?’ laham bak aame ozobohudem bak am tame,” lahame Yesusat ab vameadaham.
36. Ame di labe Yesusat neha, “Em umti vahi esdam bak nim ba bohulalem kaio. Em gi ab setelo modemam bak,” lahame lab gagoho bak lam Simon Petrusat aiha vabamu fa ab vi gagoham. “Ai Boehàda oa, Om ake lalo mode?” Lahahat Yesusat fa gago, “Ebe Eho etei lalo modem bak nim om Eba etei vi tau vulam vabiem bak. Lahana ba diamut Eba vi vulem bakti gagom kaio.”
37. Lahame labi gagoha Petrusat neo ab vi gagoham. “Ai Boehàda oa, akati modi eho etei nim Oba vi tau vulam biehela? Em Oba tu vuzehi vi tau meedàmu damat em otem ule bak.”
38. Lahahat Yesusat fa neo gago, “Oo làhà! Om Eba tu vuzehi vi tau meedàmu damat om otem om ule? Om abo imbona gagohe? Eho ozoha, ame bak lam om ozome neàdem kaio. Om ba labiham vabak. Nasi aima. Em abo imbo bak oba gagolo mozo. Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi veibam bak làtelademeam kuk ab aaumam tame,” lahame ab fet gagu esuham.
1. Labi Yesus neo Aba vi tau meedam dam laba neo nehame vi vameada. “Um bisi a ahu faidi vi ozodamule. Uho Ala bake tu vuzehem labe laha Eba laha tu vuzehele.
2. Em Aiam num lam abo damat azim nuzuba duate. Em etei Em Aiam num laba nasi le nuzuba ubu uho ba azilo modemda lam Eho le modeme ahumdi vahedalo mozo. Ame bak lam imbodem vabameam Em ba uba ame bak lam gagom vabak. Abo imbodelo modem labe uba vameadam bak.
3. Labi Eho laba le uho azilo modem bak lam Eho modeme ahumdi neàdi Em fa li um ateme fa vou le laba oumahedalo modem bak. Em umti vahi azim bake labihalo modem bak.
4. Ebe Eho azilo modem bak lamti labi, ‘Akatihasu modem labet laba là?’ laham bak lamti um ozobohu bak.”
5. Lahame labi gagoha Tomasat fa ab vi gagoham. “Ai Boehàda oa, Oho etei lalo modem bak lam im biem bak. Oho lalo modem bak lam, ‘Akatihasu làla?’ laham bak lam im ba akati ozobohude?”
6. Lahahat Yesusat fa gago, “Iho bakdati Alati ahu vàmadi vou alem bak lam, ‘Akatihasu modem labe ame baket mode?’ laham bak lam meia modi ozobohudi fi gatemda Em ame Da am bak. Labi, ‘Ala akatihasu meedam Alat modela?’ laham im imbona lam im dedateli meia modi ozobohudi fi gatemda Em laha ame Da am bak. Labi meia modi Alati vahi gi ahe neàna bohu vuusdamda Em laha ame Da am bak. Meit Em Ai Alati vahi ahu vàmadi vou alem bak lam gi Eba tu vuzehem labe labiham bak. Ba meit Eba tu vuzehem vaba alia modem vabak.
7. Um Em ozobohu aabodemeam làhà um laha Em Ai Ala laha ozobohu aabodem bak. Lahana Eho ozoha, um Em alihi aahemu etei aibu nibe faasi Eba modelo modem im meedam labe um Em Ai Alam alihi aame ozobohudehena ozomom bak.”
8. Lahahat Filipusat vabili neo vi gago, “Ai Boehàda oa, Om Ai, ‘Neam tame,’ laham bak lam iba gagu im aame ahu asimdi neàdese.”
9. Lahahat Yesusat fa gago, “Filipus, Eho umti vahi vou godamehamdehena, ‘Em ana dàt mode?’ laham bak lam om akati Em vabiem lahasu mode? Meit Em alihi aadameam làhà gi Em Ai Alati aadahana ozomom bak. Labiha labe ba akati oho neha, ‘Im Om Ai alihi aase,’ lahame labi gagohela?
10. Em Em Aiti ot vou ali ot vou aliame ahu vàmadi meedam bak nim om tu vuzehehe vaba? Ebe Eho uba vameadam im nim ba Ehemo ozome im dedateli uba vameadam vabak. Gi Em Aiat Eba gagu Eho im dedateli fa uba vameadam bak. Labi laha Eho na damat ihimo modem biem im feàna zi lam meedam bak lam ba Ehemo im dedateli meedam vabak. Gi Em Aiat Eba vou ali ahu vàmadi meedam labe Aho eba modi vizehemu Eho ot vai im Abada ulohodesu meedam bak.
11. Eho neha, ‘Em Em Aiti ot vou ali ot vou aliame ahu vàmadi meedam bak,’ lahame Ebe Eho lab gagoho bak lam uho tu vuzehele. Laham vabameam Ebe Eho lab vameadaha im labet uho Eba tu vuzehem momeam làhà gi na damat ihimo modem biem im feàna Eho lab meedaha bak lam uho aadaha labe ozo, ‘Alat Eba gagu oluhu labe Eho ame baket meedà?’ laham bak laba tu vuzehele.
12. Eho etei lab gagoho bak lam imbote. Gi ame bak lam aadam labe Eba tu vuzehele. Labi im imboda nidi nim laha iademe aima. Meit Eba tu vuzehemeam làhà ame da labe aho gi Ebe Eho lab meedam bak lamti ulohona ab meedamam tame. Lahana gi im lamota meedam vabak. Eho Em Ai bake fa le Aiam Aha Nutabe Neàna ame da laba it olu vizi teudelo modemu ame da labe gi Ebe Eho meedaha bak lam vafozi aba aho meedam bak lam fa fetehesu im feàna vi meeda tame.
13. Labi uho Eba na im uho ozohona gagom di uho Eba tu vuzehi vou ali ahu vàmadi meedàmu Eho ame bak mode tame. ‘Em Ai abo feàte,’ laham bak lam damat biem bake modi fa tombali damat ozobohudem bake Eho Am Adat nibet labihada tame.
14. Abo uho Eba na im uho ozohona ahebu gagom di uho Eba tu vuzehi vou ali ahu vàmadi meedàmu Eho ame bak mode tame,” lahame ab vameadaham.
15. Labi im lada lam vameadume neàdi Yesusat Aba vi tau meedam dam laba neo nehame vi vameada. “Meit Eba deeli meedameam làhà ame da labe gi Ebe Eho aba neha, ‘Im nehasu meedale,’ lahame Eho gagu esuhu im zi ahebu lam ame da labe laha meedam tadem bak.
16. Labiham labe Eho Em Ai bake gagu Aho fa Eba ot vai Uba Taumda amomoi abo uba tau abehamdemda uba nom olu tame.
17. Eho etei neha, ‘Uba Taumda ehete,’ lahame gagoho bak lam gi Alam Aha Nutabe Neànat uba tau abehamdem bak uba gagoho bak. Ame Da lam, ‘Ala akatihasu meedam Alat modela?’ laham im imbona lam meia modi ozobohudi fi gatemda Am am bak. Damat Eba tu vuzehehe vab dam labe ba Uba Taumda laba deeli tu vuzehem vabiem bak. Neham labe labihaha bak. Ame dam labe, ‘Ame Da lam akatihasu meedam Dàt modela?’ laham bak lam vi ozome ozobohudehe vab labe ba Aba deeli tu vuzehem vabiem bak. Lahana ame Da labe Aho uba vou ali ahu vàmadi meedam labe umota Am ozobohu bak. Labi laha Aho ba uba modi um ahu ad laba vizi gi labaha bohu vou modesdalo modem bak. Ba um vou esmom vabak.
18. Em ba um dumdamali vou esmolo modem vabak. Em fa neo uba lem bak.
19. Kehàm vaba dam bakda Eba tu vuzehem vab dam labe Em alihi ba aam kaio. Lahana umota Em alihi ba vi aam bak. Labi Em eloho bak labet Alat modi fa ahedi usahemu um laha gi ba ame baket ulohona neo meedam bak.
20. Uho Em alihi vi aame novalo modem digat labe uho im nehasu ozobohudi fi gatem digat am bak. Eho Em Ai bake vou ali ahu vàmadi meedam bak ame. Labi uho Emti ot vou ali ot vou aliame ahu vàmadi meedam bak ame. Lahame uho labihasu um ba fi gatei ozobohude tame.
21. Ebe Eho, ‘Im nehasu meedale,’ lahame gagu esuhu im zi lam meit aime ule neàt vuzehi meedam dam lam Eba deelem dam am bak. Labi Eba deelem dam lam Em Em Aiti fa neo ame dam laba deelem bak. Labi, ‘Em ana Dàt modela?’ laham bak lam Eho ame dam lam laha modi ozobohudi dam lam fi gate tame.”
22. Lahame labi gagoha Yudasam ee fatahivahada Yudas meida labe aho Yesus bake neo ab vi ailo gagoham. “Ai Boehàda oa, ‘Om Alat Gagu Fihasi Vimteme Oluhu Dat Boehàda Om am tame,’ laham bak lam Om akatihasu dam bakda totbaho bake modi ozobohudi fi gatelo modem vaba gi imota modi ozobohudi fi gatelo mode?”
23. Lahame labi gagoha Yesusat fa gago, “Meit Eba deeli meedameam làhà ame da labe ba Ebe Eho vahokedam im lam voom vaba abo aime tu vuzehi meedam bak. Labihadam dam lam Em Aiat deelem dam am bak. Dam labihasu meedam dam lam Em Em Aiti fa ame dam laba vahi vou ali ahu vàmadi abehamde tame.
24. Meit Eba deeli meedam vabameam làhà ame da labe ba Ebe Eho vahokedam im lam ba tu vuzehi meedam vabak. Gi voedam bak tadem bak. Uho mahate vi ozodale. Eho uba vahokedam im nim ba gi Ehemo ozome uba vahokedam imot modem vabak. Abo gi Em Aiat Eba gagu oluhuda labe Aho Am im Eba gagu Eho ot vai uba fa vahokedam bak.
25. Eho etei uba lab vameadaha im zi lam Em uba tau azihi lahasuhu di nibe Eho ahit uba vameadam bak.
26. Lahana ba Em Aiat Eba ot vai Uba Taumda abo Am Aha Nutabe Neàna lam uba olu tame. Uba Taumda labe lehezobe Ebe Eho amu uba lab vameadaha im lam ahebu Aho fa uba modi uho fa vi ozobohudeda tame. Labi laha, ‘Ala akatihasu meedam Alat modela?’ laham im imbona lam Eho uba lab vahokedahana uho ozobohudem biem zoho ahebu lam Aho uba laha vahokeda tame.
27. Em etei bak nim vou esmolo modemu Em Em Ai Alati vahem bak laba ozome, ‘Uba modi uho laha ame baket modese,’ lahame Eho it vameame esmolo modem bak. Lahana Ebe Eho uba modi uho Alati vahem bak lam ba dam bakda ibi iho ahobat neàdi teohe ot deeliame ot vahiam bakti uloho kaio. Ebe Eho meedamda lam ba setem vabna abo gi labaha ot deeliame ot vahiam bohu vuusdam bak. Labiham bake um bisi ahu vi ozom bohu a meedamule. Um bisi a ahu faidi vi ozodamule. Labi laha um ahu a na iedemoholi meedamule.
28. Eho neha, ‘Eho um vou esmozi Em Ai bake le fa neo uba le tame,’ lahame Eho amu vameadaha bak lam um aihina taia? Eho etei uba neha, ‘Em Ai bake fa la tame,’ lahame lab gagoho bak lam uho Eba deelemta um ba Eho lab gagoho bak lam uho aime um ahu ba faidem vabak. Um gi deelem bak. Neham labe labiham bak. Em Ai labe Am feà bak lam Em vafozi Am bisi feà labe Eho Aba fa lehezobe Aho Eba neo modi Em ee vousai fa feà Dateli meedam labe fa neo uba laha neà bak vi meedam labe um deelem bak am bak.
29. Eho etei lab vameadaha im lam ba imbodehezobe, ‘Uho Eba tu vuzehi meedam bak lam vi dualese,’ laham bak ozome ame bak lam modehe vab di nibe uba ahit nasi fet vameadam bak.
30. Eho etei umti vahi im vameadam bak nim ba labaha bohu vameadalo modem vabak. Gi etei vi vameadume novalo modem bak. Dam bakda Ala bake fakemoholehe dam vuusdam boehàda abo Iblis lam Eba lefulo modemna ozomomna modemu uba ab vameadume novalo modemam bak. Lahana ame da Iblis lam ba im dedateli, ‘Im abada meedale,’ lahame Eba im gagom bak ba na vabak.
31. Lahana, ‘Eho Em Ai bake deelem bak lam dam bakda ahebu ozobohudese,’ laham bak laba ozome Eho ahit Em Aiat Eba, ‘Im nehasu meedale,’ lahame gagu esuhu im lam ahebu ulohodesu meedam bak. Neàde. Nasi usnadale. Imo nasi ladase,” lahame Yesusat Aba vi tau meedam dam laba gagu neàdi ab usnadume ladamam.
1. Labi Yesus Aba vi tau meedam dam lamti iho vahi ladam labe Aho neo Aba vi tau meedam dam laba im nehasu vou vamea lada. “Em abo Anggur Labe Am So Aaboso Bisi Imboda Em am bak. Labi ame Lobaso lam aasu vabiedamda Em Ai am bak.
2. Labi Aho aameam Eho aasoalehe mekehà aaso lam oo vàlum vabda aameam gi fi kbodume voedam bak. Lahana mekehà aaso oo niz eheda lam Em Aiat ozo, ‘Ame aaso nim oo niz neo vi dualedase,’ lahame ozodam labe fai bak vi veimodam bak.
3. Umota fai bak veimodume neàbodedaha bak. Eho uba lab vameadaha im lam uho tu vuzehehe labe labihaha bak.
4. Uho Emti vahi vou ali ahu vàmadi bohu meedale. Labi Eho laha umti vahi fa vou ali ahu vàmadi bohu meedase. Neham bak. Ame aaso lam ame lobaso laba agmousuhu bak labe agutemeam làhà ba ame lobaso vaksa lam vule ooaelem vabilem bak. Gi ame lobaso lam agmousuhu bak labe agutem vaba zisdam bak lahasdameam làhà am vaksa vule oo niziledam bak. Um laha Emti vahi vou ali ahu vàmadi bohu meedam vabameam làhà ba oo vaedam vabak. Gi Emti vahi vou ali ahu vàmadi bohu meedam labe oo vaedam bak.
5. Ame Anggur So Aaboso Em am bak. Labi Em mekehà aaso lam um am bak. Meit Emti vahi ot vou ali ot vou aliame ahu vàmadi bohu meedameam làhà ame bak labet modi ame da labe oo duana vaedam bak am tame. Uho gi Emti vahi vou ali ahu vàmadehe bohu meedam labe labiham bak. Lahana Eho uba taum bak lam uho Emti vaitesumeam làhà um ba na im modem bak vabak.
6. Meit Emti vahi vou ali ahu vàmadehe bohu meedam vabameam làhà ame da lam gi mekehà aaso oo valem vabamu ame lobaso deda labe Aho fi kbodume vou futoi voedume vaheme dehali dam na meedam dam labe fa visomoame vua laba voedume vahudamda lamti uloho bak.
7. Uho Emti vou ali ahu vàmadi bohu vuusu meeda. Labi Ebe Eho vahokedam im lam uho laha aime neo tu vuzehi meedam bohu vuusu meeda. Uho labihasu meedameam làhà na im uho ozohona ahebu Em Ai bake gagodale. Labi Aho ame na uba lodam bak.
8. Uho oo duana vaedam labe Em Ai labe Am feà bak lam modi tombali damat ozobohudi Am ee vousai vou baedam bak am bak. Labi laha uho lab meedam bak labet modi damat aame ozo, ‘Um abo imbona Eba tu vuzehi vi tau meedam dam um am bak,’ laham bak lam ab modi ozobohudemam bak.
9. Em Aiat Eba deeli meedam bakti ulohona Eho uba laha deeli meedam bak. Eho uba deeli meedam bak lam um fa vabiemna zohàme uho Emti vahi vou ali ahu vàmadi meedume abehamdi bohu vuusdale.
10. Em Aiat neha, ‘Im nehasu meedale,’ lahame gagu esuhu im zi lam Eho aime tu vuzehi meedam labe Aho Eba deeli meedam bak lam Em ba biem vaba abo ozobohudem bohu meedam bak. Uho gi ame bak lamti ulohona im nehasu meedale. Ebe Eho uba, ‘Im nehasu meedale,’ lahame gagu esuhu im zi lam uho aime tu vuzehi meedameam làhà Eho uba deeli meedam bak lam um ba biem vaba gi abo ozobohudem bohu meedam bak.
11. Ebe Eho Em Aiat gagoho bak lam meedam labe Em deelehe bak. Labi, ‘Uho laha Ebe Eho gagoho bak laba tu vuzehi meedam labe um laha deelese,’ lahame Eho amu vameadaha im zi lam vi ozome uba vameadam bak. Imbote. Uho abo deelem aabo deelem bake Eho ame im zi uba vameadaha bak.
12. Eho uba, ‘Im nidi nim modele,’ lahame gagu esulo modem im gi neha: Ebe Eho uba deeli meedam bak lamti ulohona uho laha ame baket meia ot deeli ot deelidale.
13. Meit amti vahi vou alemda lam meit neha, ‘Otese,’ lahame gagom di, ‘Fà eba beose,’ lahame ahamo uledi ot vai elomda lam bisi meia deelem bak modi tombalemda am bak.
14. Ebe Eho uba, ‘Im nehasu meedale,’ lahame gagu esuhu im zi lam uho aime tu vuzehi meedameam làhà Eho abo umti vahi vou ali ahu vàmadem dam um am bak.
15. Eho etei uba lab gagoho bak lam um aihe? Em ba uba neha, ‘Em na teo meedam dam,’ lahame ba neo uba vi gagodam vabak. Lab gagoho bak lam seti Em gi uba, ‘Em umti vahi vou ali ahu vàmadem dam,’ lahadam bak. Neham labe labihaha bak. Meit aba im gagu modiam boehàda labe ahamo am ahulat ozome ba meedalo modem im lam am na teo meedamda lam gi biem bak. Lahana umota ba mei na teo meedam dam lamti uloho vabak. Em Aiat Eba gagohona ahebu Eho uba ahate fi desi vameadam labe um ozobohu bak. Labiham labe Em gi uba, ‘Emti vahi vou alem dam,’ lahadam bak.
16. Ba uho amu nasi Eba neha, ‘Im Omti vahi vou alese,’ lahame ozome um Em damalehe vabak. Gi Eho amu nasi, ‘Um Emti vahi vou alese,’ lahame um vame Emti vou alehe bak. Uho Eba tu vuzehi meedàmu Eho um oudume, ‘Im Ebeda vou vameatedam labe modi oo vaedam bak lamti ulohona ame dam labe fa neo Eba tu vuzehi bohu vuusdase,’ lahame Eho um oudaha bak. Uho labihamta uho ozome modelo modem im lam abo im mei im meime ahebu Em Ai bake gagom di Em Aiat ame bak lam uledi modem bak. Uho Eba tu vuzehi vou ali ahu vàmadi meedàmu Em Aiat ame bak mode tame.
17. Ebe Eho uba, ‘Im nidi nim modele,’ lahame gagu esulo modem im lam neo uba vi gagolo. Meia mahate ot deeli ot deeliame meedale,” lahame ab gagu esuham.
18. Im lada lam vameadume neàdi Yesusat im nidi nim neo susulo vameada. “Dam bakda Eba tu vuzehe vab dam labe uba faki moudameam làhà a àvodemule. Gi im nidi nim vi ozome ozobohudele. Ame dam labe ibi iho lab meia faki moudam bak lam amu nasi Eba modehe bak. Uba gi ba faki moudam bak.
19. Eho etei uba lab gagoho bak lam uba nehi vouhodase. Dam bakda totbaho labe Eba tu vuzehe vab dam lamti uho vahi vou ali ahu vàmadi meedamta ame dam labe gi uba deelem bak. Uho amedamalehe labe labiham bak. Lahana ba labiham vabak. Eho dam bakda lam ahit fàsi totbaho voou umota fi hasi vame Em damalehe bak. Labiha labe ame dam labe uba faki mom tadehe bak.
20. Eho amu uba vahokedaha im nidi nim vi ozome ozobohudele. ‘Mei na meedamda labe aho ba aba im gagu modiamda laba ba vafozi feà datelem vabak,’ lahaha bak lam vi ozome ozobohudele. Em abo uba im gagu meedamda ààmomda Em am bak. Labi um Em im meedam dam um am bak. Labihàmu uho a nehi ozomule. ‘Dam gi Emota fai bak duana vabidume umota vekehe tiba,’ laham bak lam a ozomule. Neham bak laha ozodale. Ebe Eho vahokedaha im laba tu vuzehi meedam dam ehelemeam làhà im ubu uho ba vahokedamda lam damat laha neo tu vuzehi meedam dam ehe bak. Lahana damat Eba vabidam labe Eho geàdameam làhà damat uba laha neo gi ame baket vabidume geàda tame.
21. Eba Gagu Oluhuda lam ame dam labe biehe labe uho Eba tu vuzehi vou ali ahu vàmadi meedàmu ame dam labe uba labihadam bak.
22. Dam bakda totbaho labe Eba tu vuzehe vab dam laba Eho amu li Em Aiam im vameadam vabaemta làhà damat ibi iho faina meedaha bak lam Eho ba neha, ‘Uho Em Ai bake faina modeho,’ lahame ba vàlu gagom vabiem bak. Lahana Eho li vameame damat aime vàhàdehemu ame dam labe ibi iho faina meedaha bak lam ame dam lam ba, ‘Iho vabili meedaho,’ lahame ba veibame gagom biem bak.
23. Meit Eba faki momeam làhà ame da labe laha Em Ai bake faki moho bak.
24. Ame dam dua bak aasdahit na damat ihimo modem biem im feàna lam dam amomoi amu modehe vab labe Ehemo alimeat modehe bak lam damat ab aadume vàhàdeham bak. Eho ame bak lam modem vabaemta làhà Eho ba ame dam laba, ‘Uho faina modeho,’ lahame ba vàlu gagom vabiem bak. Lahana na damat modem biem im feàna lam Ebe Eho meedaha im zi lam damat etei nim aahanàme vedi Em Em Aiti im ahime faki moho bak.
25. Lahana gi labihasum neàte. Ba àvodem imot modem vabak. Alat Vameadaha Im Toedahana zi lam abo ame dam labe ibi iho tuhu Alam im lam dam labe ibi iho lab faki moho bak lamti ulohona fet nehi toeme esuhu im ehe bak. ‘Ame dam labe Eba fakehe bak lam gi im debu vabnàme Eba ozahit faki moho bak.’ Lahame ame fet toeme esuhu im lam imbodelo modemu damat labihaha bak. Labihàmu ame dam labe ibi iho faki moho bak lam ba àvodem imot modem vabak.
26. Uba Taumda Em Aiat lolo modemda lam abo Eho asum ahoba iuba le it olulo modemda abo Em Ai labet li dam bake neha, ‘Ala akatihasu meedam Alat modela?’ laham im imbona meia modi ozobohudi fi gatemda lam abo Alam Aha Nutabe Neàna labe Aho lehezobe, ‘Em akatihasu meedam Dàt modela?’ laham bak lam Aho dam bake ahate vameadume dam ozobohudem bak meeda tame.
27. Lahana Ebe Eho meedam im lam ame Da labe Ahamo dam bake ahate vameadam vabak. Um laha ba labihada tame. Eho alimeat faasi vou meedume etei vou fuhu bak nim ahebu uho ab aadam tadeham bak. Labiham labe um laha, ‘Em akatihasu meedam Dàt modela?’ laham bak lam uho dam bake laha ahate vou vameateda tame.”
1. “Ebe Eho uba neha, ‘Dam bak damat uba faki mo tame,’ lahame Eho etei nib vameadam im zi nim imbodehe vab di nibe uba ahit nasi fet vameadam bak. Ba imbodi damat uba vabidam bak laba um àvodi ubu uho Eba lab tu vuzehehe bak lam voom bak labna zohàme vou faovoi uba etei vameadam bak.
2. Neham bak ehete. Ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num lam naedamat uba mali ootedume um usname ili tame. Gi im lada lamota uba meedam vabak. Damat uba li oddam bak lam laha ba faa tame. Uba otelo modem dam labe vedi neha, ‘Alat iba gagoho imot modem bak,’ lahame ozodam labe uba li oddam bak.
3. Ame dam labe Em Em Aiti vahi vou ali ahu vàmadehe vab labe uba labihada tame.
4. Labi Yesusat neo vi susulo vameada. “Ebe Eho etei uba nib vameadam im nim uho ahamte alimeat faasi Eba vi tau meedaha di lam ame im uba vameadaha vabak. Labi laha um Emti vahi godam lahasuhemu ame im nim uba nasi vameadaha vabak.
5. Lahana Em etei nim um vou esmozi Eba gagu oluhuda Em Ai bake fa lalo modem bak. Lahana akati um meida vàmteavat Eba neha, ‘Ne, Om ake lalo modela?’ lahame Eba vi gagu aim vaba mode? Em ahu faidi ozodala. Um ame bak lam vi aime ozobohudelo àhàkemda vaba?
6. Uho vedi gi Eho lab lalo gagoho bak laba vi ozome bisi ahu faidi daleàdi meeda.
7. Lahana im imboda nidi nim laha iademe vi aimale. Em gi uho ba neàdem bake vi ozome lalo meedam bak. Eho lam vaba gi uba niba tau aidam lahasumeam làhà Uba Taumda bak niba uba ba lem vabak. Lahana Em lam labe ame Da lam Eho fa uba it olum bak.
8. Uba Taumda lehezobe Aho dam bakdate Eba tu vuzehe vab dam labe im ahu laba im nehasu ahate modi tombali it ozobohudi fi gate tame. ‘Iho faina meedam dam im ame?’ Labi, ‘Ibi iho imbo tiba ozome im vamdesu meedam bak lamti labi Alat Aba Aho ozoho bak lamti uloho kaio. Bisi im vamdesu meedam bak neam tame,’ lahame it ozobohudem bak ame. Labi laha, ‘Ibi iho faina meedam bak lam Alat ba gi aalahigeàmom vaba abo, “Beose,” lahame na asimbuna feà iba modem bak,’ lahame it ozobohudem bak ame. Labihasu ahate modi tombali it ozobohude tame.
9. Uba Taumda lehezobe Aho dam bakda Eba tu vuzehi meedaha vab dam labe, ‘Iho faina meedam dam im ame?’ lahame im ahu laba modi naedamat it ozobohudi fi gate tame.
10. Labi Eho fa Em Ai bake le seti um ba Em alihi aaha vab labet Aho fa Eba ot vai dam bakdate modi vizi, ‘Ibi iho imbo tiba ozome im vamdesu meedam bak lamti Alat ozoho bak lamti uloho kaio. Bisi im vamdesu meedam bak neame?’ lahame modi ahate tombali naedamat it ozobohude tame.
11. Labi laha dam bakda labe Eba tu vuzehe vab dam laba vuusdam boehàda Iblis lam Alat gi amu di iube, ‘Beose,’ lahame fet gagu vàmadi ahumdi esuhu bak. Labiham labe Uba Taumda lehezobe Aho dam Iblisit meedaha bak vi tau meedam dam laba Aho modi vizi, ‘Alat iba laha, “Beose,” lahame na asimbuna feà iba mode tame,’ lahame modi ahate tombali naedamat it ozobohude tame. Uba Taumda labe Aho im labihasu meeda tame.
12. Em etei nim im uba vameadalo modem im abo duate. Lahana Eho ozoha, uho vi aime ozobohudem vabna zohàme etei nim ame im uba vameadam vabili mozo.
13. Lahana Uba Taumda abo, ‘Ala akatihasu meedam Alat modela?’ laham im imbona meia modi ozobohudemda Aho lehezobe ba Aba Ahamo ozoho im laba vi ozome uba vameadam vabak. Gi Ebe Eho vameadahana aime ot vai gi im lamota uba vameadam bak. Labiha labe, ‘Em akatihasu meedam Dàt modela?’ laham im imbona ahebu lam Aho uba modi um ozobohudi fi gateda tame. Labi ba diamut modem im lam laha uba nasi fet vameadume um ozobohude tame.
14. Na im ahebu Em Aiat vuusdamna lam Em laha tau vuusda. Ame bak lam Em ozobohudehemu Eho uba gi nehi vameada. Eho, ‘Uba fi desi im vameadase,’ laham im lam Alam Aha Nutabe Neàna lam abo Uba Taumda labe Aho gi Ebe Eho vameadahana ahum ve uba fa vameadume um ozobohudeda. Labihadam labe Aho modi damat ozobohudi ee Ebeda vousai, ‘Em abo feàda am bak,’ lahame vou baeda tame,” lahame Yesusat ab vameadaham.
16. Labi Yesusat neo susulo vi vameada. “Em kehàm vaba le seti um Em alihi ba vi aam vabak. Lahana neo kehàm vaba uho fa neo Em alihi aa tame.”
17. Lahahat Aba vi tau meedam dam totbaho labe ihimo ot gagoida. “Uho ozom, Yesusat etei neha, ‘Em kehàm vaba le seti um Em alihi ba vi aam vabak. Lahana neo kehàm vaba uho fa neo Em alihi aa tame,’ lahame lab gagoho bak lam akati modelo modem im iba labi gagohela? Labi laha Aho neha, ‘Em Ai bake fa lalo mozo,’ lahame lab gagoho bak lam akati modelo modem im iba labi gagohela?”
18. Lahame labi ot gagoi ot gagoidam labe meit neha, “Etei Yesusat neha, ‘Kehàm vabna,’ lahame lab gagoho bak lam uho ozom, akatihasu modem bake gagohela? Im ozom biem im gagoho taia?” lahame meit gago. Meit gago. Lahada.
19. Labihadume modeha Yesusat Ahamo ozo, “Dam lam Eho gagoho im vabili Eba vi ailo àhàki ot gagoida taia?” lahame Ahamo ozobohudi ame dam laba ab gagoham. “Eho amu neha, ‘Em kehàm vaba le seti um Em alihi ba vi aam vabak. Lahana neo kehàm vaba uho fa neo Em alihi aa tame,’ lahame Eho lab gagoho bak lam um vi ozom vabili ot gagoidà?
20. Làhà im lada lam imbomu im imboda nidi nim laha nasi iademe aima. Damat Em oteme elohozobe umota ahu faidi nimidam labe meb daeti im vameada tame. Lahana dam bakda totbaho Eba tu vuzehe vab dam labe gi deeli vi tozodam labe etoeda tame. Um ahu faidi medaomta medao. Lahana Em alihi fa vi aahazobe um ahu fa neàdi deeli vàhàdem bak.
21. Ubu uho ba deeli vàhàdem bak gi neham bakti uloho bak. Lahi data faam bak fuhemu vàzbudam labe kikezi geàda. Lahana ame data lam faasi neàdi ozo, ‘Em data nim faasi bak niba ab azihame?’ lahame ozohemu aba amu kikezi geàdam bak lam ba it ozom vaba gi ab deelehe vàhàdeham bak.
22. Um laha labihalo modem bak. Etei di nimota um ahu faidi vi ozoda. Lahana Em eloho bak labet Alat modi fa ahedi usai neàdehezobe Eho uba vi aa tame. Labi uho ba Em alihi vi aameam um ahu fa neàdi gi deelehe bohu vuusdam bak. Ba meit ubu uho lab deelehe bak lam modi vàhàdeme setem vabak.
23. Em eloho bak labet Alat modi fa ahedi usai tom ilu neàdehe di labe uho ba Eba neha, ‘Im nidi nim akatiha? Im iudu ium akatiha?’ lahame ba Eba vi ailo gagodam vabak. Uba Taumda li ot vai vameadam labe ba Eba vi ailo gagodam vabak. Im lada lam imbomu im imboda nidi nim laha nasi iademe aima. Uho Em Ai bake na im uho ozohona ahebu gagom di uho Eba tu vuzehi vou ali ahu vàmadi meedàmu Aho ame bak uba mode tame.
24. Amu di iube uho ahamte Eba vi tau meedaha di iube faasi vou mode ledume etei vou fuhu di nim uho Eba lab tu vuzehi vou ali ahu vàmadi meedam labet Em Ai bake gagoho bak ba na vabak. Lahana nasi etei di nibe faasi Ai bake gagodale. Labihamta uho ame na modem bak lam uho ab vamam bak. Uho deelehe vàhàdem bake labihadale,” lahame Yesusat ab vameadaham.
25. Yesusat neo vi susulo vameada. “Eho etei uba lab vameadaha im lam gi im totobet fi koadamna damat taho ozobohudem biemna uba vameadaha bak. Lahana gi koena faobe Em Aiam im uba ba vameadam di gi im totobet fi koadam vaba gi tomba neàt ahatet uba vameada tame.
26. Ame di lam na im uho ozohona lam ahebu uho Eba tu vuzehi vou ali ahu vàmadi meedam labet um gi Em Ai bake gagodam tade tame. Uho neha, ‘Em abo Alat Gagu Fihasi Vimteme Oluhu Dat Boehàda am tame,’ lahame Eba deeli tu vuzehi gagodam labe Em Aiat Ahamo fa uba deeli meedam bak. Labiha labe na im uho ozohona lam ba Eho uba tau Ai bake gagodam vabak. Uhumo Ai bake lafusi vàmadi gagodahana ozomom bak.
28. Em Ai labet bak niba lehe bak. Labi etei nim Em neo bak nim vou esmozi fa Em Ai bake lalo modem bak.”
29. Lahame labi gagoha Aba vi tau meedam dam labe im Abada mahate ozobohudehe vabna gi ostame fa ab vi gagoham. “Ai oa, Oho etei lab gagoho bak lam im totobet fi koadaha vaba gi ahate tomba neàt vameadam labe im gi ab aime ozobohudedamam tame.
30. Iho Oba vi ailo gagolo modem im ehe di lam Oba gagoho vabna Ohomo nasi ozobohudi fa iba gagodàmu iho ozoha, na im Obo Oho iba vameadamna ahebu Om gi im dedateli vameadamda Om am bak. Damat Oba vi ailo gagom im gi feidam neàte. Om labihadam Dàt modemu iho gi neha, ‘Om abo Ala labet niba lehe Dàt moz,’ lahame tu vuzehi gagodam bak.”
31. Lahahat Yesusat fa gago, “Oo làhà! Um gi etei Eba ab tu vuzehi aabodehame?
32. Lahana im imboda nidi nim nasi aima. Kehàm vaba um gi Em vou esmozi fi goaitoi fa um num bake ahala ilime sedda tame. Ame bak lam gi ab vou fuham bak. Lahana Eho ozohat Em ba àvodem vabak. Abo Ehemo vàmtea tousdam vabak. Em Ai etei Emti nib bak.
33. Eho etei uba lab vameadaha im zi lam ahebu uho Emti vahi vou ali ahu vàmadi meedam labet modi um ahu ba fi goaitoho vaba vabademsu modesdam bake Eho ahit labihasu vameadam bak. Uho fa dam bakda totbaho labe Ala bake fakemoholehe damti vazisi bak niba esdam lahasuhu di nim naat uba vabidume uho geàdam bak ehete. Lahana dam bakda labe Ala bake fakemoholehe dam laba Eho vafozi meodeho. Labihàmu naat uba vabidume geàdam di um ahu a faidemule. Gi ahu teudi keàtedele,” lahame Yesusat ab vameadaham.
1. Labi im zi lam Yesusat Aba vi tau meedam dam laba vameadume neàdi Ahamo vaitesu ohu vousai asum ahoba iuba tom aasu Am Ai Ala bake ab tom gagodamam. “Ai oa, Em geàdume elom di ab vou fuham tame. Em Om Adat nim bisi feà bak lam damat biem bake Oho nasi modi ee Ebeda vousai damat fà ozobohudedase. Labi Eho ba modelo modem bak labet modi Eho fa neo Om bisi feà bak lam damat biem bake Eho ee Oboda vousai damat fà neo ozobohudedase.
2. Eho gi neham bak ozome Oba labi gagoho bak. Oho neha, ‘Dam nim vou aasdale,’ lahame Oho Eba lu esuhu dam zi lamota, ‘Eho modi dam lam fa Im ahimti vahi ahe neàna bohu vuusdase,’ laham bak laba ozome Obo Oho dam bakda ahebu vuusdam bak lam Oho Eba gagu Eho fa ot vai im dedateli bakda ahebu Eho vuusdam bak.
3. Ai oa, Om bisi Ala imboda vàmtea Om am bak. Dam bakda labe iho ame bak laba tu vuzehi Omti vou ali ahu vàmadem bak ame. Labi laha neo Eba ozodam di neha, ‘Em abo Oho Gagu Fihasi Vimteme Oluhu Dat Boehàda Em am bak,’ lahame tu vuzehi Emti laha vahi vou ali ahu vàmadem bak ame. Labihasu meedameam làhà ame dam lamti Im ahimti vahi gi ahe neàna bohu vuusdam bak am bak.
4. Oho Eba neha, ‘Nehasu meedale,’ lahame gagu oluhu im lam ahebu Eho bak niba li ab meedume neàdeham bak. Eho labiha labe Om feà bak lam damat biem bake Eho ab modi fi zeam bitoham bak.
5. Labihàmu Eho Oba neha, ‘Aia, Oho amu bak nimti asum iumti abo na ahebu meedaha vab di iube Emti Omti vahi bisi feà damali modesdam bak lam Oho nasi etei fa neo ame baket modi Em fa Oba le Omti ahili feà damali modesdase,’ lahame Eho Oba labi tom gagodam bak.”
6. “Ai oa, Eba tauhu dam nim abo Oho neha, ‘Dam bakda zoho nim Oho vou aasdale,’ lahame fi hasi Eba lu esuhu dam nim Eho, ‘Om akatihasu meedam Alat modela?’ laham bak lam dam nim biem bake Eho vahokedume damat ozobohudi fi gatehe bak. Gi Om damat modem bak. Lahana Oho Eba lu Eho im Oboda vahokedume dam lam ame im lam aime uledi tu vuzehi meedaha bak.
7. Labi etei nim Ebe Eho vuusu meedam im ahebu lam ba Ehemo meedam vabak. Gi Oho Eba modi vizehe labe Eho ame baket meedam bak. Laham bak lam dam nim etei ozobohu bak.
8. Abo Obo Oho Eba gagoho im zi lam Eho dam niba vameadume dam nim aime ozobohudedume ab fi gatedaham bak. Labihàmu Oho Eba gagu oluhu bak lamti labi Eho Oba labet bak niba lehe bak lamti dam nim ab ozobohu aabodeham bak.
9. Ai oa, Eba tauhu dam nim, ‘Oho laha taule,’ laham bak laba ozome Eho Oba tom gagodam bak. Eho etei di nibe bak niba esdam dam ahebu, ‘Oho laha taule,’ lahame ozome Oba tom gagodam vabak. Neham labe Eho Oba tom gagodam bak. Eho gi Oho neha, ‘Dam nim Oho vou aasdale,’ lahame Oho Eba lu esuhu dam lamota ozome Oba tom gagodam bak. Gi Om damat modem labe Eho Oba labi tom gagodam bak.
10. Eho modi Em damali vuusdam dam nim Oho laha Om damali Oho vuusda. Labi Oho modi Om damali vuusdam dam lam fa neo Eho Em damali Eho neo vuusda. Labi ee Ebeda vousai feà datelem bak lam dam giida biem bake Eba tauhu dam nibe Ebe Eho vahokedam im aime tu vuzehi ot vai meedam labet modi dam giida aame ozobohudedume ab fi gatedamam bak.
11. Ai oa, Em kehàm vaba Oba ab lelo modemam tame. Em bisi bak niba azibehamdem vabak. Lahana Eba vi tau meedam dam nim gi bak niba esdam lahasdam bak. Labihàmu Ai Bisi Neàbodeheda Vàmtea oa, Omti Emti vahi ot vou aliame vàmadi meedam bak lamti ulohona neo Eba vi tau meedam dam nibe ihimo neo im ahu ot vou ali ot vou aliame ahu vàmadi meedam bake Oho gi ame dam niba im nehasu meedale. ‘Om akatihasu meedam Alat modela?’ laham bak lam Oho amu Eba modi fi gatehena lam Eho neo dam Eba vi tau meedam dam niba modi neo vahokeme fi gatei neàdehe bak. Labihàmu Eho le setem di dam labe ibi iho tu vuzehe bak lam fa setemna zohàme Oho Em dam niba modi gi ame baket keàtedi bohu vuusu meedam bak lam nasi modi esule.
12. Eho etei Eba tauhu dam nim bak niba tau aidam lahasdam di nibe, ‘Om akatihasu meedam Alat modela?’ laham bak lam Oho amu Eba modi fi gatehena Eho neo dam Eba vi tau meedam dam niba modi neo vahokeme fi gatehemu dam labe iho tu vuzehe bak lam Eho Em dam niba vou aasdam labet modi gi labaha keàtedi bohu vuusu meedaha bak. Eho ame baket meedam labe Em dam nim ba meida vàmteavat Eba vaitesu vooho vabak. Lahana gi Oho neha, ‘Vua elum sutem gikina laba voou beodase,’ lahame gagu ahumdi esuhudati gagom kaio. Ame da labe aho ba modem bak lam meit Alat Vameadaha Im Toedahana laba fet toeme esuhu im lam, ‘Imbodese,’ lahame da lada lamota vooho bak.
13. Ai oa, Em etei Oba ab lelo modemam bak. Lahana Eho amu Eba vi tau meedam dam niba vameadaha im zi lamti im bada zi nimti ame dam nibe, ‘Nehasu meedase,’ laham bak ozome Eho ahit Em dam nimti vahi bak niba ehe lahasuhu di nibe nehame vameadam bak. ‘Obo Oho gagoho bak lam Eho meedam labe Em ahu it ozome deeli vàhàdem bak lamti ulohona Eba vi tau meedam dam nibe laha Ebe Eho gagoho bak laba tu vuzehi meedam labe Ebe Eho deeli vàhàdem bak lamti ulohona neo ame baket modese,’ lahame Eho ahit ame im zi lam vameadam bak.
14. Ai oa, Obo Oho Eba vameadaha im zi lam Eho dam niba vameadume dam nim aime uledi vuzehi meedàmu dam bakda Eba tu vuzehe vab dam labe Em dam niba fakemoholi moho bak. Neham labe labihaha bak. Ebe Eho ame dam bakda lamti vahi vou ali ahu vàmadehe vabak lamti uloholi Eba tauhu dam nim bak niba azim di ba ame dam lamti laha vahi vou ali ahu vàmadehe vabak. Labihahemu dam bakda labe Em dam niba fakemoholi moho bak.
15. Eho etei Oba lab tom gagodam bak lam, ‘Eba tauhu dam nim Oho modi bak nim vou esmozi Oba tom vousai laitese,’ lahame ozome tom gagodam vabak. Gi, ‘Iblisit bisi meoda vàmtea labe aho Em dam niba li beodam bake Oho vatohedase,’ lahame Eho gi vou faovoi Oba labi tom gagodam bak.
16. Eho dam bakda Eba tu vuzehe vab dam lamti vahi vou ali ahu vàmadi meedam vabak lamti ulohona Eba tauhu dam nibe laha ba ame dam bakda lamti vahi vou ali ahu vàmadi meedam vabak.
17. Ai oa, ‘Om akatihasu meedam Alat modela?’ laham im Oboda lam Eho dam bakdate modi fi gatehe im zi lam gi imbo im am bak. Labiham labe im imbona Oboda lam Eho lab vameadaha bak labet Oho modi Em dam niba, ‘Fà im Oboda meedase,’ lahame gagu fi hasi esule.
18. Oho Eba gagu Eho bak niba li im Oboda meedaha bakti ulohona Eho neo Em dam niba gi ame baket neo vi meedam bak. ‘Im Oboda vi meedale,’ lahame Eho dam nim gagome fa dam bakda totbaho laba ab olulo meedamam bak.
19. Ai oa, ‘Eba tauhu dam nibe ihimo im Obodata fi hasi abobo labaha bohu meedase,’ laham bak laba ozome Ehemo naedat ahit, ‘Im Obodata meedase,’ lahame nasi gagu fi hasi esuhu bak.”
20. “Ai oa, Em gi Eba vi tau meedam dam nimota ozome Oba tom gagodam vabak. Gi ame dam nibe ba neo fa bak mei bak iuba le im Ebeda le vou vameatedume dam labe neo aidume fa Eba tu vuzehelo modem dam zi lamti ozome Oba fet nasi tom gagodam bak.
21. ‘Emti Omti ot vou aliame ahu vàmadi meedam bakti ulohona Oho modi fa dam labe ihimo fa ot vou aliame ahu vàmadi meedase,’ laham bak laba ozome Oba labi tom gagodam bak. Labi Oho Eba bak niba gagu oluhu bak lam dam bakda totbaho labe biem bake Oho dam lam, ‘Fà modi tu vuzehese,’ laham bak laba ozome Eho Oba neha, ‘Eba ba tu vuzehelo modem dam laba Oho modi fa Im ahim niba vou ali ahu vàmadi meedase,’ lahame Eho Oba labi tom gagodam bak.
22. Oho amu Eba modi vizi teudehe labe Obo Oho gagoho im lam Eho meedaha bak. Ame bak lamti ulohona Eho neo ame dam laba, ‘Im Obodati im Ebedati neo meedase,’ lahame Eho dam laba ab modi vizi teudeham bak. Eho gi neham bak ozome labi meedaha bak. ‘Emti Omti ot vou aliame ahu vàmadi meedam bakti ulohona Oho fa neo modi dam labe ihimo fa ot vou aliame ahu vàmadi meedase,’ lahame ozoho labe labihaha bak.
23. Eho gi neham bak ozome Oba labi tom gagodam bak. Eho ame dam laba vou ali ahu vàmadi meeda. Labi neo Oho fa Eba laha vou ali ahu vàmadi meeda. Labihadam bak. Labihadam labe ame dam lam ihimo ot vou aliame ahu vàmadi vi meedam bohu vuusdam bak am. Labi Oho Eba gagu bak niba oluhu bak ame. Labi Oho Eba deeli meedam bakti ulohona fa ame dam laba neo ulohona deeli meedam bak ame. Labihasu dam bakda totbaho labe biem bake modi fa ozobohudem bak am tame.
24. Ai oa, Oho amu Eba neha, ‘Dam nim Oho vou aasdale,’ lahame Eba gagu lu esuhu dam lam Eho vi ozome im nehasu Oba tom gagodam bak. ‘Ebe Eho ba le azim bak lam dam nim ame bak laba le vi tau azise. Labi Em feà bak aabo lam ame dam labe iho vi aame ozobohu aabodem bak am tame. Amu bak nimti ahebu meedaha vab di iube abo Emti Omti ahili esdam di iube Oho di labe faasi Eba deeli vou meedume etei vou fuhemu Oho Eba modi vizi feà datelehena am bak. Ame bak lam ame dam labe iho vi aame ozobohu aabodese,’ lahame Oba tom gagodam bak.
25. Ai Bisi Im Ahole Vamdesu Meedamda oa, dam bakda Eba tu vuzehe vab dam labe, ‘Om amat mode?’ laham bak lam biem bake. Lahana Emota Om ozobohudi Omti vahi vou ali ahu vàmadi meedam bak. Labi laha Oho Eba gagu bak niba oluhu bak lam Eba tauhu dam nim ame bak lam ozobohu bak.
26. Obo Oho Eba deelehe bak lamti ulohona Oho fa neo Eba tauhu dam niba deelem bak ame. Labi Eho dam nimti vou ali ahu vàmadi meedam bak ame. ‘Labihasu meedase,’ lahame Eho, ‘Om amat mode?’ laham bak lam dam nim biem bake Eho ame dam niba modi ozobohudedume fi gatedaha bak. Amu mode. Labi neo ame bak labe neo vi meedam bohu meeda tame.” Lahame Yesusat ab tom gagodume neàdeham.
1. Labi Yesusat im labihasu tom gagodume neàdi iho Aba vi tau meedam dam nimti vahi kota Yerusalem vou esmozi ladume vao koena, “Kidron,” laham vao bisuhu ohu labe ladume vao biou fa tot iuba zaitun dee dozeaha bak laba lafusi laba ab esdamam.
2. Esdam di labe Yudas abo Yesus etei vou fohome meia ub lolo modemda labe aho Yesus Aba vi tau meedam damti ibi iho etei laba li esdam bak lam am ozobohut. Amu di iube am laha Yesusti im Aba vi tau meedam dam totbahoti vahi laba tàhi odosdam meo bak.
3. Labiha labe Yudasat ozobohudi dam neham dam vihitoi ab vou ladamam. Amu damat Ala bake lomna ve vua vahudam toheda zi laba vuusu im vameame faheme modiam dam lamti Farisi dam lamti labihasu vazisi fa Yudas bake neha, “Yudas, oho Roma meo dam zi lamti labi ame Fihasi Ala Bake Vou Baedam Num Vàmteabu laba vou aasdam dam totbaho lamti labihasu oho dam nim vihitoi vou le dam nibe fà Yesus sise.” Làhàmu Yudasat mod vihitoi ab vou ladamam. Nazoh meona zi vuusualadume afoezobe aibut ladam labe dam totbaho uma usime vuusualada. Labi dam totbaho minyak usime vuusualada. Labihadume ab vou ladamam.
4. Na im ahebu etei Aba modelo modem im zi lam Yesusat Am naedata ozobohu bak. Labiha labe aaha ame dam zi lam iba lefuhemu Yesusat nasi ub fetu duzu ame dam lab ledamda zi laba ab gut gagoham, “Um baka ama bake nabidàla?”
5. Lahahat ame dam labe fa gago, “Im gi Yesus Nazaretda alihi aalo vi nabidalo.” Lahame gagohat Yesusat fa gago, “Ne, Em ame Da neam tai.” Yesus etei ahate gagoho bak lam Yudas Am vou fohome ub lolo modemda lam gi laba tau doudahit gagoho bak.
6. Labi Yesusat gi etei, “Em ame Da gi neam tai,” lahame gagohoilahit dam zi lam bolat tom gaesu ab biddaham.
7. Labi biddume fa usnadume modeha Yesusat neo vi gago, “Um baka ama bake nabidàla?” Lahahat ame dam zi labe fa neo ab vi gagoham. “Im gi Yesus Nazaretda alihi aalo vi nabidam bak.”
8. Lahahat Yesusat fa neo gago, “Um aim vaba? Eho amu uba ab gut gagoham taia? Em ame Da gi neam tai. Làhà um Eba vi nabidàmu Eba vi tau meedam dam nim a vi tau simule. Gi olule.”
9. (Yesusat etei lab gagoho bak lam Eho Yohanesat ozoha, gi Aba Aho amu fet neha, “Aia Oho Eba neha, ‘Dam bakda nim Oho vou aasdale,’ lahame fi hasi Eba lu esuhu dam nim Eho ba meida vàmtea setem vaba gi ahe neàt vuusu vou aasdam bak,” lahame amu fet lab gagu esuhu bak lam, “Fà modi imbodese,” lahame labi gagoho bak)
10. Labi Yesusat neha, “Gi olule,” lahame gagoha Simon Petrusat udovai am ae goha dusuhuna vuu vihitoi Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am na teo modemda lam beoha biou gi dogoi baa ahi totbahoda lam aet fu fatoi bake ab biteham. Ame na modemda am ee gagom Malkus laham bak.
11. Labi modeha Yesusat fa Petrus bake vi mali ab gagoham. “Om ae lam taho am goha fa dusule. Oho ozom, Em Aiat neha, ‘Em geàdase,’ lahame amu gagu ahumdi esuhu bak nim ba modem vaba gi moe? Ba labiham vabak. Abo imbodem bak,” lahame Yesusat fa Petrus bake im ab vahokeham.
12. Labi ame Roma meo dam zi ame. Labi iba im gagu modiamda boehàda ame. Labi ame Fihasi Ala Bake Vou Baedam Num Vàmteabu laba vou aasdam Yahudi dam totbaho ame. Labihasu Yesus si anekehà giame ab vou ladamam.
13. “Yesusat git modehe bak taho aime neàdi beose,” laham bak laba ozome amu nasi Hanas bake ab vou laham. Ame da Hanas lam amu Damat Ala Bake Lomna Ve Vua Vahudam Tohe Dam Zi Labe Im Bisi Boehàdatebo am. Lahana etei faasi meedam tahun nim am doli Kayafas fa boehàdatebo gàhàli meeda. Lahamda labe am bagaea Hanas bake Yesus nasi vou laha bak.
14. Ame da Kayafas lam im nehasu ame Yahudit Ibi Iho Modem Im Gagu Vàmadi Esum Dam Debu laba fet vameame esuhuda am. “Im Yahudi dam bisi ahe neàdem bake im dam dua bak beoho vaba gi dat vàmtea ot vai eloi setem neàte,” lahame fet gagu esuhuda am.
15. Yesus si vou laom di labe Simon Petrusti labi em Yesus bake vi tau meedamda meida vàmtea nimti im ahim vaitesu aa vi duzu vulada. Labi Tohe Dam Zi Labe Bisi Boehàdatebo labe am num feàda labe am ad oli aam bak tomba laba vi fusi modeha bak tomba laba modesuhu doo baabu laba vou aasdamda labe gut aaha Kayafas amu em ozobohu labe, “Olem neàte,” lahame em ab lebohoteham.
16. Lahana dam lam Petrus biem labe aba gut malehemu Petrus gi doo bako tot laba duzu vou faoda. Labihàmu Kayafas lam emota ozobohu labe eho le aime neàdi fa li nam etei ame bak tomba modesuhu doo laba vou aasdam nam laba gago, “Petrus olem neàte. Boehàdatebo gagoha,” lahame gagu neàdi eho futoi Petrus ve fa ab vou oleham.
17. Labi vou oli modeha ame doo vou aasdam nam labe Petrus bake gut aame ab gagoham. “Om laha damat etei sihida labe Aba vi tau meedamda meida om am taia?” Lahahat Petrus fa ab gagoham. “Vabà! Em ame da modem vabak.”
18. Lahame ab tem veibaham. Labi ame di lam di nutabedehemu boehàdatebo labe am na meedam dam totbaho lamti labi ame Fihasi Ala Bake Vou Baedam Num Vàmteabu laba vou aasdam dam lamti im nutahali vua gazihi modesuhu bak laba le dozeadume vuaga fi dda. Petrus laha vi tau duzu vuaga fi dda.
19. Labihadam di labe damat Yesus ame boehàdatebo amuda laba ibi iho im meedam num feàda laba vou oli ame boehàdatebo lamti ot avaesuiame duzu modeha Hanas labe Yesus bake ab gut gagoham. “Oba vi tau meedam dam labe im ee taho gagodamale. Labi Om dam laba baka Oho ana im vahokedàla?”
20. Lahahat Yesusat fa gago, “Ne, Eho vahokedam im ahate vahokedam labe dam ahebu ozobohu bak. Abo Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num zi ahebu lam modeo, ame Fihasi Ala Bake Vou Baedam Num Vàmteabu labe am ad oli aam bak tomba laba modeo, gi Yahudi damat ihimo vazisi im vameadume baleàhà bak lam ahebu Eho vi tau im Ebeda ahate vahokedam bak. Ba dam totbaho bake vasti vameadaha vabak.
21. Oho akati bisi Eba vi ailo ootedà? Lahana uho gi dam iuba le aidam vaba? Dam lam Eho vameadaha im lam aidaha labe ozobohu bak.”
22. Yesusat gi etei labi gagoha ame Num Vàmtea laba vou aasdamda meida labe ame im lam aihi bake faki Yesusam oode laba ab vi fu gagoham. “Baka Oho ozom, Tohe Dam Zi Labe Bisi Boehàdatebo laba Oho im labihasu fa gagom neào? Om ahu adat iedem vaba?”
23. Lahahat Yesusat fa gago, “Eho etei lab gagoho bak lam im giomimna oba gagom tàhàm. ‘Em etei giomim oba gagoho,’ lahamna oho etei ame bak lam taho eba gagoma. Lahana Eho etei gi im imbona vameadamna oho akati ozome Eba fohela?”
24. Lahame gagu neàdi Hanas labe damat Yesus si vou aasdamda zi laba ab gagoham. “Um nasi Yesus neo si vou duzu em doli Kayafas bake num oulabu zoho iuba neo vou lale.” Làhàmu Yesus Am anekehà giaha bak lahasu neo si vou duzu Kayafas abo Tohe Dam Zi Labe Bisi Boehàdatebo laba ab vou ladamam.
25. Labi Simon Petrus gi duzu vuaga fi ddam lahasuhu di labe dam zohot li neha, “Om laha ame Da laba vi tau meedamda meida om am taia?” Lahahat Petrusat tem veibame gago, “Vabà! Em ame da modem kaio.”
26. Lahame gagu kehàm vaba ame Tohe Dam Zi Labe Bisi Boehàdatebo labe am na teo meedamda meida lam abo Petrusat aet am dogoi fu fatohoda labe aba meida labe Petrus bake ab vi gagoham. “Ne, om gi etei iho zaitun dee dozeadaha laba Yesusti vahi esdam bak Em aaha bak.”
27. Lahame vi gagoha Petrusat neo tem ab vi veibadamam. “Vabo. Em ame da modem kaio,” lahame gi etei tem veibaha bak làteladeha kuk ab aauham.
28. Labi Kayafasat neo uloome aime neàdi, “Iho gubernur bake akatihasu gagom labe aho aime fa Yesus bake neo ulooela?” laham bak lam ozome ozobohudi neàdi neo dihambe aibubet ame Yahudi dam busaoda eeda zi lamti ame Roma meo dam zi lamti vazisi Yesus neo vou duzu Kayafas vou esmozi fa Roma dàt gubernurleheda Pilatus bake ab vou laham. Ame di lam Gubernur Pilatus lam aho gi am im meedam num feàda laba teohe aida. Lahamda laba ab vou laham. Vou le ame meo dam zi labe iho Yesus ab vou oleham. Lahana ame Yahudi eeda zi labe ba ame num laba olem kai. Gi bàhàgo laba dozeada. Ibi iho vuusu meedume fi hasi baleàhà bak ehe labe ba Yahudi damat modem vab dam labe im numa ba olem biehe bak. Iho Yahudi damat ame num laba olemeam làhà im gi ab vàhàdi faidemam bak. Labi vàhàdi faidemeam làhà im ba ame na àme iziam bak abo Paskah lam im ba vahi àm biem bak laba ozome num laba olem bak mu gi bàhàgo niba odoho bak.
29. Labihàmu Pilatus fa futoi dam bàhàgo dozeadaha dam niba im ab gut vameadamam. “Um da nim, ‘Aho git modeho,’ lahame vàlu gagodam bak akete? Uho eba nasi gagomale. Em aise.”
30. Lahahat ame Yahudi eeda zi labe fa tombu gagoho vaba gi obet ab gagoham. “Da labe bisi faina git modehe vabna iho akati oba vou le ub loe? Bisi faina modehe bak ehe labe iho ab vou leham bak.”
31. Lahahat Pilatus fa gago, “Da nim uho fa vale. Uho neha, ‘Aho git modeho,’ lahame vàlu gagoho bak laba ozome uho fa ve vou le ubu uho dat ahamda Musat toedume fi hasi esuhu Im Feàna zi lam meedume baleàhà bak labet modi uloome vi aime ozobohudi neàdi modele. Uho gagoho bak lam ba iba pemerintah bake git meedaha vabda Eho gagu beom bieho.” Lahana ame Yahudi dam bake im vameame faheme modiam dam eeda zi labe Yesus otelo àhàki Pilatusat etei lab gagoho bak lam mu fa ab vi gagoham. “Dam ibida aham di iube gagu vou mode usehe im ahum lam Da nibe zidazehemu fa otem neà bak. Lahana um Roma pemerintah labe iba Yahudi dam bake neha, ‘Mei git modehemu uho fa vatau otem neàte,’ lahame gagu vàmadem dae iba gagoho vabak. Labihàmu ame Da lam iho fa ve vou le otem biem bak.”
32. (Etei lab gagoho bak labet modi Yesus amu neha, “Damat Am nehasu oteme Am elo tame,” lahame fet gagu esuhu im lam fa ab imbodelo modemam.)
33. Labi ame Yahudi ee dam labe etei lab gagoho bak lam Pilatusat vi aime neàdi fa ame num laba oli am meo dam gagome Yesus neo vuusu aho avaesdam laba ab vou duzuham. Vou duzu neàdi ab gut gagoham. “Yahudi dam debu vuusu im vahokedam Boehàda Om ameo?”
34. Lahahat Yesusat fa ab vi gagoham. “Oho etei lab gagoho bak lam oho im nehasu vi ailo Eba labi gagohe? ‘Em bakda Boehàdateboli fa dam bakda vuusu im vahokedamda am tame,’ laham bak lam, ‘Ehemo naedat gagoheo?’ laham bak oho vi ailo mode? Laham vaba meit neha, ‘Yesusat amu nehi gagoho. “Iba Yahudi dam vuusu im vahokedam Boehàda Am am tame,” lahame gagoho bak iho aiho,’ laham bak meit gagohona oho aime fa Eba vi ailo mode?”
35. Lahahat Pilatus fa gago, “Ne, Oho ozom, em Yahudi dàt mode? Labi uho Yahudi damat modem im ehemo ozobohudi Oba gagodà? Ne, gi Om dam zohoti um Yahudi dam labe uho Ala bake lomna ve vua vahudam toheda zi laba vuusu im vameame faheme modiam dam lamti laham dam labe om si eho avaesdam niba vou lehe taia? Ne, Oho ana im modehe bake faidi dam lam Om si eba vou lehela?”
36. Lahahat Yesusat fa neo ab vi gagoham. “Eho Boehàdateboli dam vuusu im vahokedam bak lam ba bak damat Eba gagu meedam vabak. Ebe Eho Boehàdatebolehe bak amomoite. Em bak dàt boehàdateboleheda modemeam làhà damat Em sihi di lam dam Eba vi tau meedam dam labe fa Eba tau, ‘Yesus a Yahudi dam bake ub lomule,’ lahame ame Em sihi dam lamti ot belui ot beluiam bak. Lahana Ebe Eho Boehàdatebolehe bak lam ba bak dàt modem bakti uloho vabak. Ebe bak amomoite.”
37. Lahahat Pilatus neo vi gago, “Làhà Om abo Boehàdatebot modemna ozomo?” Lahahat Yesusat fa ab gagoham. “Lo, oho ozobohudi ab gagoham bak. Em Boehàdatebot modem bak. Eho, ‘Ala akatihasu meedam Alat modela?’ laham im imbona lam Eho dam bakdate ahate vameadume fi gatelo Eho ahit asum ahoba iube bak niba li Dateli faaha bak. Meit Ebe Eho lab vameadam im imbona laba tu vuzehi meedam dam lam laha nehame meedam bak. ‘Em abo Alat Gagu Fihasi Vimteme Oluhu Dat Boehàda am tame,’ lahame Eba tu vuzehi Em damali im Ebeda aime meedam bak.”
38. Lahahat Pilatus fa neo vi gago, “Oho etei lab gagoho bak lam, ‘Im imbona,’ lahaha bak lam ana im imbona gagodàla? Baka im ekda nim im imbona ozobohudemna iho meia vahokedà?”Lahame ot gagoidume neàdi Pilatus fa neo futoi Yahudi dam busaoda eeda zi bàhàgo laba odosdam dam laba ab gagoham. “Eho Da nim uloodume aiha, ‘Iba pemerintah bake git modehe bak vàmtea ehete,’ laham bak lam aihi vab labe ba eho gagu otem bieho.
39. Lahana um Yahudi dam labe ubu uho na àme iziam bak abo Paskah lam fum di um Yahudi dam amu si sel oumahehe dam meida vàmteata, ‘Vou futole,’ lahame ame da ee gagohozobe eho gagu vou futoidume baleàhà bak ehe bak. Labihàmu eho etei dat adida gagu vou futoi uba oluela? Gi damat neha, ‘Um Yahudi dam vuusdamda boehàda am tame,’ lahamda nim eho gagu uba isi olueo?”
40. Lahahat ame dam labe gi dae meot fa ab gagodamam. “Vabo. Im Da lada lam moho. Gi Barabas iba isi olule,” lahame ab gagodamam. (Ame da Barabas lam aba aho amu im nehasu meedaha dàt moz. Amti am Yahudi dam totbaho lamti iho vazisi kota Yerusalem niba li dam totbaho gagome fàsi fa Kaisarleheda labe am Roma damti, “Beose,” lahame modi dae gai duzuhemu Roma meo dam labe si sel oumaheda meida am bak.)
1. Làhàmu Pilatusat ozo, “Ame Yahudi dam busaoda eeda zi labe Yesus modi itaholehe bak fà vi aame im ahu neàdem bake eho em meo dam gagome Yesus ve na sokba nasbe ahit alibulehena labe Aba foadume geàdume afoezobe isi oluse,” laham bak ozome am meo dam gagome Yesus bake ame bak lam ab modeham.
2. Labi foadume neàdi loba ali vabome vuihàli neàdi Yesusam ohu laba neo nom usulo ab vi gago, “Nim gi boehàdat am ohu nom usumnat modem bak,” lahame gagu ab nom usuham. Labi neo sue sona boz gihona bohu abo boehàdat ahoba dusum sue lamohoda ve Yesus bake nom dusu.
3. Labihadume neàdi ame meo dam labe iho neo ahit neà damali Yesus bake ab gagu tozoidamam. “Looo. Yahudi dam debu vuusu im vahokedam boehàda abo neàteee,” lahame vi tozome gagoda. Labi neo Am oode dogoi debu bak laba meit au baat vi fu tozo. Meit au baat vi fu tozo. Labihada.
4. Gi etei labihadam di labe Pilatus neo futoi ame Yahudi eeda zi bàhàgo laba odosdam dam laba neo ab gagoham. “Um aimale. Eho da nim uloome aiha, ‘Aho git modeho,’ laham bak eba gagu em aihi vabamu eho ba gagu otem vabili fa vou futoi isi olulo mozo.”
5. Lahame gagu modeha Yesus bake loba ali vabome vuihàlehena lam Am ohula nom usuhuna lamti labi Aba tozome Am soa dusuhu sue bohu lamti labihasu dusuhu bak lahasuhuna neo meo damat vou futoi modeha Pilatus ab gagoham. “Nasi aama. Ame Da neam.”
6. Labi Yesus vou futoho bak lam ame toheda zi laba vuusu im vameame faheme modiam dam lamti ame Fihasi Ala Bake Vou Baedam Num Vàmteabu laba vou aasdam dam lamti iho Yesusam alihi aadàmu dae meonat ab buteomam. “Neàdehooo. Ba a isi olumuleee. Gi oteleee. Om meo dam gagu taho ut tetehesuhunaso laba esu paku dodume eloleee. Gi taho modeleee.” Lahahat Pilatus mu fa gago, “Uhumo ve ut tetehesuhunaso laba esu paku dodume elole. Eho Da nim uloome aiha Aho faina modehe bak aihi vabna akati eho gagu ote?”
7. Lahahat ame Yahudi eeda zi labe teudi fa ab gagoham. “Vabà! Ba a labi gagomule. Da lam amu neha, ‘Am Alam Adat am tame,’ lahaha bak lam ibi iho fi ham bak Ahamo gagu vàhàdehe labe gi ab gagu otelo modemam bak. Meit neha, ‘Em Alam Adat am tame,’ lahame labi gagomeam làhà gi gagu otem bak. Ba akati gi moe?”
8. “Yesus lam abo Alam Adat am tame,” lahaha bak lam Pilatus aihemu, “Am ba akati damat tu vuusdam Ala labe Aho faahana Yesus lam Aho gagu ote?” lahame iedi feà bak ab fuham.
9. Làhàmu Pilatus neo ame meo dam gagome Yesus fa ame im meedam num feàda laba fa ab vou oleham. Labi aho neo vi tau oli Yesus bake neo vi ailo ab gagoham. “Om adi baket lehe dàt mode?” Lahame labi vi ailo gagoha Yesus ba dae bum kai.
10. Làhàmu Pilatus fa neo gago, “Om akati eba im gagom vaba gi daleàdi mode? Om ozom vaba? Em feàda im deda modem labe em meo dam laba gagu Om isi olueo? Laham vabameam gi em meo dam laba gagu Om paku dome eloeo. Lahamda em am bak.”
11. Lahahat Yesusat fa gago, “Ne, Em Ai Alat oba modi feà datelem vabameam om ba dam bake neha, ‘Em oteo? Isi olueo?’ laham bak lam ba im dedateli gagom vabak. Labiha labe neham bak. Dat dam bake gagu Em si oba vou li ub lohoda labe aba aho faina modem bak bisi duada am bak. Obo oho modeheda gi koete.”
12. Lahame gagoho bak lam Pilatus aihemu aho amu fota mohobeat mali meedam bak lam fa olulo àhàki ab vi uledeham. “Em Yesus bake akatihasu gagu olue?” lahame di labe ab faasi vi la ozoi le ozoidamam. “Yesus gi gagu oluse,” lahame ozodamda labe neo futoi, “Yahudi dam labe fa aba tause,” lahame neo vi vameadaha ame Yahudi eeda zi labe mu vedi Pilatus bake vi buteom labe tozome vameada. “Ea, om Da nim isi olumeam làhà om ba dam ahebu vuusdam Kaisarleheda lamti vahi ahu vàmadi vou alem vab dàt modem bak. Gi fa oba ozom di, ‘Om gi aba fakemoholehe datelehe bak,’ lahame ozom bak. Ne, ame Da nim, ‘Aho boehàdateboleho,’ lahame gagoho bak ehe bak. Labiham labe ame Da lam gi Kaisarleheda veiolo odosdam bak. Ne, oho ozom, ame Da niba taum neà?”
13. Lahame gagoho bak lam Pilatus aihemu iedi aho neo am meo dam gagome Yesus fa vou futoi vou duzu neàdi Pilatus fa Tomba Vaheme Bàneàdehe Ke Baa laba le, “Iho Yesus bake akatihasu modela?” laham bak gagu vàmadelo modem di nusumnabu laba ab nusuham. (Ame Tomba Vaheme Bàneàdehe Ke Baa lam Aram dae gagom di, “Gabata,” lahame gagom bak.)
14. Etei nib meedam im nim gi ame na àme iziam bak abo Paskah labe am digat meida abo hari Jumat Yahudi damat ibi iho gi azibe im digat hari Sabat fulo vabaehe digat labe ala tomali jam dua belas fuseo vabalehe di labe meedaha imot modem bak. Di labe Pilatusat neo odohalehebeat ame Yahudi eeda zi laba tozolo ab gagoham. “Uba vuusdam boehàda gi ame Da neam tame.”
15. Lahahat ame dam labe gi dae buduana buteom labe gagoda, “Vabooo. Vou laleee. Vou le ut tetehesuhunaso laba esu paku dodume eloleee.” Lahame buteme vameadume modeha Pilatus fa gago, “Oo làhà! Um boehàda nim eho gagu damat ve fa ut tetehesuhunaso laba esu paku dodume elom neào?” Lahahat ame toheda zi laba vuusu im vameame faheme modiam dam labe fa gago, “Vabo. Baka im dam amomoi boehàdatebolehedavat ehe? Im boehàdatebo gi oba vuusdamda Kaisarleheda am bak. Im Da lam boehàdateboli iho vuusdam moho.”
16. Lahame labi gagohemu Pilatus aho vameadaha vanamahemu am gi mohet uledi, “Yahudi eeda zi labe ibi iho gagoho baket modi damat fà Yesus ve ut tetehesuhunaso laba esu paku dodume elose,” lahame am meo dam lam gagu ab oluham. Pilatus labi gagohemu am meo dam, “Ame baket meedase,” lahame Yesus bake tet ooteme am esu dolo modem ut tetehesuhunaso lam gagu Ahamo naedat vatu ab vou kea ladamam.
17. Labi lab vatu vou kea ladam di labe kota Yerusalem vou esmozi bàhàgo laba vou ladume Ohu Fetahabu laham bak laba ab vou fuham. Ame bak lam Aram dae gagom di, “Golgota,” lahame gagom bak.
18. Ame bak laba vou fusi ame meo dam labe neo Yesusam sue ahoba dusuhuda lam ab vome vihilaham. Labi vihilame neàdi neo ame ut tetehesuhunaso lam visoi bake esu afoezobe Yesus tom gaesu nom esu neàdi Am anekehà meida kidadesu paku do. Labi Am anekehà meida neo kidadesu paku do. Labi Am naba bakamta modesu paku do. Labihadume neàdi vi vuu vousai bak bumata ab nom zisuham. Labi zisu teudi neàdi ut tetehesuhunaso meida ahim neo visoi dam faina meedam dam ahim lam vame Yesusat modehe bakti ulohona modi paku dodume neàdi Yesusam anekehà ahi totti soi totti modesuhu laba bak bumata ab nom zisitdaham.
19. Labi meit aame ozo, “Da nim ana im modehe bake damat vàlu otehela?” lahame toehe ut gaheba lam Pilatusat am meo dam gagome toeme neàdi Yesusam ohu vazidazi toma zoho laba taasu paku vi dou esu. Ame ut gaheba laba im nehasu toe. “DA NIM YESUS NAZARETDA ABO YAHUDI DAM VUUSU IM VAHOKEDAM BOEHÀDA AM TAME,” lahame Aram daeti Latin daeti Yunani daeti laham dae làtela labihasu toehe ut gaheba am. Labihàmu damat Yesus ut tetehesuhunaso laba paku dome zisuhu bak lam gi kota Yerusalem laba netàdi zisuhu labe Yahudi dam dua bak lebe aasu gagodume labohoti laida.
21. Labi Yahudi damat Ala bake lomna ve vua vahudam toheda zi laba vuusu im vameame faheme modiam dam labe laha ame ut gaheba laba toehe bak aahemu faki dam gagome Pilatus bake ab oluham. “Uho Pilatus bake le gagole. ‘A, “Da nim abo Yahudi dam vuusu im vahokedam Boehàda am tame,” lahaha bak lam a toemule. Iho ozoha, gi giomimot modem bak. Gi neha, “Ame Da labe Ahamo ozo, ‘Em abo Yahudi dam vuusu im vahokedam Boehàda am tame,’ ” laham bak laba ozome toele,’ laham im lam uho Pilatus bake le gagole,” lahame ab gagu oluham.
22. Labi gagu olu dam labe le gagoha Pilatus mu gago, “Vabo. Toeme vàhàdehe bak. Ba faatoi veimdem bieho. Eho lab gagu toehe bak lam ba veimdem vabak,” lahame ab gagoham.
23. Labi ame meo dam labe Yesus paku dodume vousai zisu neàdi, “Am sue amu vihilame vahehena lam faheme vadase,” lahame vameadume neàdi ame sue lam faheme ame dam ahia labe ab vadaham. Lahana Am sue sona bohu ada dusumda lam ba damat faheme vaha vabak. Ame sue lam susume tadehe bak aam vabna gi ahoba zoho labe faasi nom vou ihezidazi ihezidazidume vàmadehe sue modemu nehi ab ot gagoidamam. “Imo sue nim nasi a fatemule. Gi ibi iho fi mam baket fi mame aame neàdi ame da labe ahamo vale.” Làhàmu ame baket modi afoezobe dat vàmtea labe ame sue lam ab vaham. Meit Alat Vameadaha Im Toedahana laba nehi toehe bak nim, “Fà modi imbodese,” lahame labihaha bak. “Em sue lam damat faheme vadaho. Labi Em sue vàmtea damat fi mame meit vaho.” Lahame fet toeme esuhu im lam ame meo dam labe vabili modeha ame bak lam ab modi imbodeham.
25. Labi Yesus ut tetehesuhunaso laba paku doho bak laba netàdi dozeadaha lahi neha: Am oi ame. Labi Am oi meida ame. Labi Klopasam nam Maria ame. Labi num debu Magdala labe lehe Maria ame. Labihasu ame lahi lam laba netàdi dozeadume aasda.
26. Laba dozeadume aasdam di labe Yesusat nom aaha Am oiti Aba vi tau meedamda meida Aba Aho deeleheda emti Aba netàdi dozeadaha bak aahemu am oi bake ab gagoham. “Oi, oho da niba ozom di gi om adat modemna ozomole.”
27. Labi gagu neàdi Aba vi tau meedamda meida niba eba neo ab gagoham. “Nasi aamale. Em oi nim oho ozom di, ‘Om oiat mode,’ laham bak laba ozome vou aasdale.” Labi gagohemu Aba vi tau meedamda nidi nibe Yesusat etei lab gagoho bak lam ba ame bak modehe bak ehet. Eho ba Yesusam oi em numa vou le em oiali ab vou aziham.
28. Labi vou faodume Yesusat ozoha, “Em Aiat Aba Aho fet ozome esuhu im lam ahebu Eho meedume ab neàdehame?” labihaha bak lam ab vi ozome ozobohudeham. Ozobohudehe labe meit Alat Vameadaha Im Toedahana laba nehi toehe bak nim, “Fà modi imbodese,” lahame Yesusat ab gagoham. “Em valo àhàkeho,” lahame labi gagoha ame fet toeme esuhu im lam ab modi imbodeham.
29. Labi anggur oo vaksa àhàkebuna damat ohanut modehe mokzoho fedehena amu damat im ba valo àhàkem bak laba ozome vou lehena ehet. Làhàmu meit ut avagat vao vizemna lam visoi ame anggur oo vaksa laba nom ekeme vizi neàdi hisop alahaso visoi zisu, “Yesusat fà udese,” lahame Yesusam aha laba ab tom fi sdamam.
30. Labihàmu Aho gi ahat ahamo udeme neàdi ab gagoham. “Ebe Eho meedam im foli ab vaitoham tame. Om Em nasi vam neàte,” lahame gagoha Am ohu nom vekoamdi ab fi sivai eloham.
31. Yesus damat ut tetehesuhunaso laba paku doho digat lam gi hari Jumat modehe bak. Hari Sabat abo Yahudi damat ibi iho gi azibe im digat fulo vabaehe digat paku doho bak. Ame hari Sabat lam Yahudi damat ibi iho na àme iziam bak abo Paskah laba modesuhemu ame hari Sabat lada lam abo feà digat moz. Labihàmu ame hari Sabat fuseo modem di Yahudi dam labe ibi iho amu modi fi hasi baleàlehe bak ehe bak. Ame bak lam neham bak: “Hari Sabat fuseo modem di koeiso ba bako laba taasu vou diham vabak. ” Lahame labihasu fi hahemu Pilatus bake ab le gagoham. “Dam làtela etei paku dodume taumahehe dam lam oho om meo dam gagome le ame dam lam im fodeha faa lam beome agube taho elodale. Labi iho koeiso taho vame fa baumahedume hari Sabat ba fuse.”
32. Lahame labi gagohemu Pilatus uledi am meo dam gagome ab oluham. Labi ame meo dam labe le Yesus bake tau ut tetehesuhunaso laba paku doho dam behàsu labe im fodeha faa lam dat meida belu fa aguti esu. Labi neo dat meida belu fa aguti esu.
33. Labihadume Yesus bake neo beolo tom aaha Yesus gi elohona aahemu am fodeha faa ba fu agutem vabak.
34. Gi ame meo dam meida labe Yesus, “Eloho bak imboo?” laham bak aalo am fosot Yesusam eabe tom geiha vaseati vaksati fusuamdi ab nom iluham.
35. Ame im nim vameadamda gi eho Yohanesat vou duzu aasuhet meedaha labe ozobohudi ahate vameadam bak. Em ba giomim vameadam vaba gi im imbona vameadam bak. Uho Yesus bake tu vuzehem bake eho na aaha dàt Yesusat meedam im uba ahate ab vameadamam bak.
36. Labi etei Yesus am faa fu agutehe vabak lam meit Alat Vameadaha Im Toedahana laba nehi toehe bak nim, “Fà modi imbodese,” lahame labihaha bak. “Am faa meida vàmtea buà ba meit fu agutem vabak,”
37. Labi ame im meida neha: “Fosot tom geihida laba dam na modehe dam labe ohu vousai tom aada tame.” Lahame fet toeme esuhu im behàsu lam ab modi imbodeham.
38. Labi Yesus eloi neàdi dat Yusufti ee fatahivahada labe aho Pilatus bake ab laham. Ame da lam num debu Arimatea laba azihida am. Ame da labe laha Yesus bake vi tau meedamda meida am. Lahana Yahudi dam busaoda eeda zi labe aba fakemna zohàme gi Yesus bake aa vi tau meeda. Lahamda labe aho Yesus koei visom bak ozome fa Pilatus bake gagu ailo ab laham. Laha labe le Pilatus bake ab gagoham. “Im etei Yesus koei ve vou le baumsulo oba gagu ailo leho.” Lahame gagoha Pilatus uledi fa ab vi gagoham. “Lo, oho le visoi vou le baumsum neàte,” lahame uledi gagohemu Yusufat Yesus koei visolo ab laham.
39. Yusuf ahamo lam kai. Nikodemus amu di iube Yesus bake aibut tàhi im vameadahada lamti ahili Yesus koei visolo ab laham. Nikodemusta aho na ahana neàna mur lamti labi na meida gaharu lamti labihasu keobededume valihemna asimbu bak abo tiga puluh kilo ozomomna vuusu ab vou laham.
40. Labi Yesus koeiso modesdam bak laba lafusi zisi Yesus koeiso lam vi vuu vuazi veioi vou usi iho vou lehe sue nasbe neàna bohu lam Yesus koeiso laba ab giadamam. Labi lab giadam di labe ame na ahana neàna keobena lam visoi vi goagoame sue zoho vi gia. Labi neo ame na keobe lam vi goagoame neo sue zoho vi gia. Labihadume ab giadaham. Yahudi dam labe ibi iho koei baumsum diat modi baleàhà bak labe ab modeham.
41. Damat Yesus ut tetehesuhunaso laba paku doho bak lam gi mei utoho bake netàdi modehe bak. Labi ame utoho obe lam laha ke bumat alimda amu feme bumatali ahumdi esuhuna ehet.
42. Labihàmu ame ke bumat lada lam netàda amemu ame Yahudi damat ibi iho gi azibe im digat hari Sabat fuseo vabalehemu Yesus koeiso àvodehat visoi vou laha labe ame ke bumat laba vou oli esu fa futoi ke baana am doo laba tusum ulohoda lam vou ogi ogialame tusu baguamdi ab vou esmozi ladaham.
1. Labi usi behàsdi hari Minggu dihambe aibubet Magdala labe lehe nam Maria labe aho damat Yesus koei vou oli esuhu ke bumat laba ab laham. Le aaha ke baana koei esuhu bake vi baguamdehena lam ogizi osoktoi modesdam bak ab aaham.
2. Laham bak lam aahemu fa Simon Petrusti labi Yesus bake vi tau meedamda meida Aho deeleheda nimti iho esdam bak laba ab emoeham. Emoeme lefusi iba ab gagoham. “Im Boehàda Yesus koeiso lam ke bumat vou oli esuhu bak lam damat aa li ve voutame seteho. ‘Ake vou le esuhela?’ laham bak em ba ozom kaio?”
3. Lahame labi gagohemu im behàsu nim usai koei esuhu bak aalo ab emoedamam. Emoedam labe Yesus bake vi tau meedamda meida nibe eho fa Petrus vafozi nasi duzu koei esuhu bake ab vou fuham.
5. Eho nasi lafuhuda nibe doo ozoh labe duzu nom bohusu ke bumat laba vi nabime aaha gi sue nasbe bohu koeisoa giahana lamota beilaha bak ab aaham. Lahana olem kai. Gi ub aame douda.
6. Labi Simon Petrusat ba duzuhuda labe aho neo vi fusi gi àvodehat ke bumata ab oleham. Labi oli neo vi nabiha ba koeiso aam kai. Gi sue nasbe bohu koeisoa giahana laba beilaha bak aa. Labi Yesusam dauha giaha sue zohobà footoi bolome ahamo vaitesu esuhuna lam laha aa. Gi labihasu laba beilahana lamota ab aaham.
8. Labi eho amu nasi lafuhuda nibe neo fa ab vi oleham. Vi oli aame vi ozo, “Imbot. Làhà Yesus Am eloho bak nibet fa ahedi ab usaham bak,” lahame vi ozome ab tu vuzeheham.
9. (Meit Alat Vameadaha Im Toedahana laba nehi fet toeme esuhuna nim, “Alat Gagu Olum Boehàda labe Am eloho bak labet fa ahedi usa tame,” lahame fet toeme esuhu im lam ame dam labe iho amu vi ozome ozobohudehe vab labe vou meedume etei ab vou fuham. Gi ibi iho etei aaha bak labet vi ozome ozobohudi tuhu bak.)
10. Labi ame bak lam aame neàdi im Yesus bake vi tau meedam dam ahim nim iho fa num bake ab laham.
11. Labiha di labe Mariat fa neo koei esuhu bak laba fa le doo obe laba duzu ab meddamam. Labi duzu meddam labe nom bohusu ke bumat laba nabidameam vi aaha
12. Alat Am im gagu vou usem dam behàsu labe iho sue sona fauha bohu dusuhuna nom ilu ame bak laba nusdam dam ahim ab aaham. Yesus koei amu esuhu diat ohu modesdam zoho laba dat meida alihi laba aa. Labi naoha zoho modesdam zoho laba dat meida alihi laba aa. Lahada.
13. Labi vi aame modeha ame Alam im vou usem dam labe Maria bake ab gagoham. “Oi, om baka ana modi meddàla?” Lahahat Mariat fa gago, “Em Boehàda koei damat aa li ve voutame seteho. ‘Ake vou le esuhela?’ laham bak em ba ozom kaio.”
14. Mariat gi etei labihasu gagu vaktesi it aaha naat aba netàdi doudam bak ab aaham. Lahana, “Yesusat mode?” laham bak lam ba ozom kai.
15. Labi modeha Yesusat Maria bake ab gagoham. “Oi, om baka ana meddà? Om baka ama bake vi nabidà?” Lahahat Mariat vedi da nim gi utoho bak niba li na meedalo modem dàt mode tibame vi ozome fa ostame ab vi gagoham. “Dat Busao oa, im koeiso seti mozo. Oho ve vou lameam làhà oho vou le esuhu bak eba gagole. Eho le visoi fa vou le iademe baumsuse.”
16. Lahahat Yesusat fa neo ab vi gagoham. “Maria.” Lahame gi etei gagoha Mariat àvodi it vaktesi Aram daet, “Ai guru,” lahalo ab gagoham. “Rabuni,” lahame gagu Yesus bake le ab si vuusdamam.
17. Labi modeha Yesusat mali ab gagoham. “Eba a bisi vuusdamule. Em Ai bake tom ilulo modem bak fum kaio. Fota faobe tom ilulo mozo. Labiham bake oho gi fa le Eba tu vuzehi meedam dam zi laba im nehasu gagole. ‘Umti Emti iho neha, “Ai,” lahamda laba abo iho vou baedam Ala laba Em tom ilulo mozo,’ lahale.”
18. Lahame labi gagohemu Mariat aho Yesus bake vuusdam bak lam isi fa Yesus bake vi tau meedam dam totbahot esdam bak laba ab laham. Le lafusi ab gagoham. “Im Boehàda Yesus Am alihi eho aaho,” lahame Yesusat Aba tàhi vameadaha im lam dam bake ab fi desi vameadaham.
19. Ame hari Minggu aibu labe iho Yesus bake tu vuzehi meedam dam totbaho nibe num vàmtea laba oedume num doo ahebu it teudedume esda. Yahudi dam busaoda eeda zi labe iba neo sim bake iedi esda. Labi esdam di labe Yesusat olehe bak ozoho vab Dàt iho esdam num bumat tomba niba gi li duzuhuna ab aaham. Li duzu ab gagoham. “Neàte. Um a iedemule. Um ahu teudi vou faodale.”
20. Lahame gagu neàdi Am anekehà damat paku doho bakti Am eabe fosot geihi bak lamti iba ab fi si vimtedamam. Labi iba fi si vimtedàmu iho ozo, “Làhà im Boehàda Yesus ame?” lahame vi ozome ozobohudi ab deeli vàhàdeham.
21. Labi Yesusat neo vi gago, “Neàte. Um a iedemule. Um ahu teudi vou faodale. Em Aiat amu Eba neha, ‘Oho dam bakdate im Ebeda vou le vameatedale,’ lahame Eba gagu oluhu bakti ulohona Eho neo uba gagu, ‘Uho im Ebeda nim vou le vameatedale,’ lahame uba ab gagu oudalo modemam bak.”
22. Labi gagu neàdi Yesusat dam zi laba Am aha nutabe feume vi gago, “Alam Aha Nutabe Neàna labe uba modi vizese.
23. Labiham labe dam amomoit ibi iho faina meedam bak lam voedume fa ahu neà bak vàmademeam làhà uho fa Eba ot vai im dedamali ame dam laba nehi gagomta neàte. ‘Uho faina meedàmu Alat uba beolo modem bak lam Aho gi vei mu fa faamome vei neàdedaho,’ lahame gagom di imbot. Alat ame baket ab modeham bak. Lahana dam amomoit ibi iho faina meedam bak lam fa voedume fa ahu neà bak vàmadem vabameam uho fa Eba ot vai im dedamali ame dam laba nehi gagomta neàte. ‘Uho lab faina meedàmu Alat uba beolo modem bak lam Aho ba gi vei mu fa faamome vei neàdedam kaio,’ lahame labi gagom di imbot. Alat ba ame dam labe ibi iho faina meedaha bak lam Aho ba gi vei mu fa faamome vei neàdedam kaio,” lahame Yesusat ab vi vameadaham.
24. Yesusat etei Aba vi tau meedam dam totbaho laba tàhi am alihi fi si im vameadaha di lam Tomas abo Yesus bake vi tau meedam dam dua belas meida lam abo damat neha, “Tasbana,” lahame taluhuda lam ame di lam lab taum kai.
25. Labihàmu Yesus bake vi tau meedam dam totbaho labe iho Tomas bake neha, “Im Boehàda Yesusam alihi vi aaho.” Lahame gagoho di lam Tomasat gi tozome gago, “Uho lab gagoho bak lam, ‘Im Boehàda Yesusam alihi vi aaho,’ lahaha bak lam em ba vuzehem kaio. Em abo damat Am anekehà paku doho bak laba eho aame afoezobe em anekehàso ame bumat laba dalu. Labi Am eabe fosot geihi bak lam laha anekehà ebedat ula. Labihamta uho lab gagoho bak lam eho tu tame,” lahame ab gagu tozome esuham.
26. Labi vou faobe hari Minggu bada labe Aba vi tau meedam dam labe neo ame num vàmtea laba neo oedume num doo ahebu it teudedume vazisi esda. Ame di lam Tomas fa neo laba vi tau vahi esda. Labi modeha doo teudehena Yesusat olehe bak ozoho vab Dàt gi damat esdam num bumat tomba laba neo li duzuhuna ab aaham. Li duzu gago, “Neàte. Um a iedemule. Um ahu teudi vou faodale.”
27. Lahame labi gagu neàdi Aho neo Tomas bake ab gagoham. “Tomas om nasi Eba netàdi Em anekehà damat paku dome bumatalehe bak nim om anekehàso nasi dalu aamale. Labi Em eabe damat fosot geihi bak nim laha om anekehà baat Em so niba nasi ulasi ozo, ‘Eho mode?’ laham bak nasi vi ozobohudi tu vuzehele. Bisi a nehi vi ozodamule. ‘Em eloi setehe? Em fat ahedi usaha vabao?’ lahame ozodam bak lam gi nasi voou setele.”
28. Lahame labi gagohemu Tomasat ame baket ab modeham. Labi Tomasat àvodi ab gagoham. “Làhà imbot. Om abo em Boehàda ame. Om abo eho vou baedam Ala Om ame.”
29. Lahahat Yesusat fa gago, “Om gi etei Em alihi aaha labe om Eba ab tu vuzehehame? Lahana om Ebe Eho etei gagolo modem im nim vi aime ozomale. Dam Eba aaha vabnàme Eba tu vuzehem dam lam Alat deeli dam laba im neà bak modi esuiam dam am bak,” lahame ab gagu esuham.
30. Na damat ihimo modem biem im feàna damat fet aame ozobohudemna Yesusat meedahana lam abo Aba vi tau meedam dam labe aasuhet meedahana lam zi dua totbaho lam buku niba eho Yohanesat toedaha vabda ehete.
31. Lahana ebe eho nib toedaha zoho nim gi uho neha, “Ame Da Yesus lam abo Alam Adat Aho Gagu Fihasi Vimteme Bak Niba Nom Oluhu Dat Boehàda am tame,” laham bak lam, “Uho tu vuzehese,” laham bak laba ozome eho sunit niba ab toedaham bak. Labi uho Aba tu vuzehe bak labet modi uho Alati vahi gi ahe neàna bohu vuusdam bak am tame.
1. Labi usi vou id lame digat meida iube Yesusat Itea Tiberias auobe laba le Aba vi tau meedam dam laba neo Am alihi ab fi ham. Aho Am alihi fi si meedaha bak lam gi nehaha bak.
2. Itea Tiberias auobe laba Aba vi tau meedam dam tujuh neham dam laba esda. Simon Petrus ame. Labi Tomas damat neha, “Tasbana,” lahamda ame. Labi Natanael Galilea bak labe am num debu Kana labe leheda ame. Labi Zebedeusam adam behàsu ame. Labi Yesus bake vi tau meedam dam meida behàsu ame. Labihasu ame itea auobe laba esda.
3. Labi esdameilahit Simon Petrus labe dam totbaho bake ab gagoham. “Em bohe lalo mozo.” Lahame gagohemu dam neha, “Làhà im tause,” lahame gagu vahi disi aibubet ihe vihitoi ziddume ab vou buadaham. Labi vou bu neàdi bohe dek nom voou vou keadahit ab vou dihaham. Lahana ba bohe vam kai.
4. Labi dihambe di fi zeam bitodam di labe Yesusat Am alihi damat aam neà bak laba ozome itea auobe laba ab le duzuham. Lahana ame Da lam, “Yesusat mode?” laham bak lam dam vabile.
5. Làhàmu Yesusat dam laba ab buteham. “Ba oa, um bohe vadào?” Lahahat dam labe fa gago, “Vabo. Bohe vam kaio. Im gi bohet vanamai dihaho.”
6. Lahahat Yesusat fa neo vi gago, “Làhà, uho um bohe dek lam fa visoi um ihe ahi totbaho laba neo nom voou vou keadale. Bohe vam bak am tame.” Làhàmu dam labe Yesusat gagoho bak labet bohe dek ahi totbaho laba nom voou vou keadume modeha bohe feà bak fusi asimbuli vi vuu vousai iheba esum vanamai meeda.
7. Vanamai meedam di labe Yesus bake vi tau meedamda meida Aba Aho deeleheda nibe eho ozo, “Ame Da lam gi Yesusat modemna ozomo?” lahame ozobohudi fa Petrus bake ab gagoham. “Itea obe iuba doudamda lam im Boehàdat modem bak.” Lahame gagoho bak lam Petrusat gi etei aiha am sue koena bo dusudàmu am sue sona bohu ahobada amu na modem bak ozome vihitoi esuhuna lam àvodehat visoi fa ab dusuham. Dusu neàdi, “Yesus bake tàse,” lahame valo nom ilu nasi vouda.
8. Labi ihe lam dam totbahot ba bohe dekti vou keadam labe vou zituada. Bohe dek laba bohe vàlume asimbuli betea vou keada. Dam labe iho bohe buhu bak lam mahate bohulana buhu vabak. Gi auobe netàdi seratus meter lamoho ozome buhu bak.
9. Labi vou zitu neàdi iho aaha vua gazihi laba bohe osba vaheme esdam bak lamti rotiti ab aaham.
10. Labi modeha Yesusat ame dam laba ab gut gagoham. “Um bohe etei vahana lam zoho vou lele.”
11. Lahame labi gagohemu Simon Petrusat ihe laba fa zisi bohe dek lam vuu fi bovai nohula ab vou zituham. Vou zitu fi zeam bitoi fi goaitoi debe aaha ame bohe lam abo seratus lima puluh tiga ehet. Labi ame bohe lam laha abo buduana feàt modem bak. Lahana bohe dek lam ba bohet belu vàuhu vabak.
12. Labi aame neàdehezobe Yesusat ab gagoham. “Um nasi ledale. Im na koena nim vahi àdase.” Lahame gagoho di lam iho Aba vi tau meedam dam meida vàmtea ba nehame vi gagu aihi vabak, “Imbo? Om Yesusat mode?” laham bak ba vi aim iedi gi daleàde. Lahana, “Im Boehàdat modem bak,” laham bak lam ozobohuta ozobohut. Lahana ba vi gagu aim gi vei lade.
13. Lahamnàme iho ozahit li bakamta vahi neàdehezobe Yesusat amu nasi le roti visoi fa vou li faheme dam bake loda. Labi neo bohe visomoame dam bake neo loda. Lahadume ab àdaham.
14. Yesus am eloho bak labet Alat modi fa ahedi usai Aba vi tau meedam dam laba le tàhi am alihi fi hi bak lam eteida nim gagom labe ab làteladeham.
15. Labi na àme neàdi Yesusat vi ailo Simon Petrus bake ab gagoham. “Simon, Yonam adat oa, Eba vi tau meedam dam totbaho nibe Eba deelehe bak nim oho fa vafozi om Eba bisi duana vou ali ahu vàmadi deeleheo?” Lahahat Petrusat fa gago, “Lo, Ai Boehàda oa, eho Oba deelehe bak lam Om ozobohuna taia?” Lahahat Yesusat fa neo vi gago, “Làhà, oho Em domba adambe ozomomna oho vou aasdume na àmna lodale.”
16. Lahame labi gagu neàdi Yesusat vedi fa neo ozoha vabamu Petrus bake ab vi gagoham. “Simon, Yonam adat oa, om Eba bisi duana vou ali ahu vàmadi deeleheo?” lahame gagoho bak ab behàsdeham. Lahahat Petrusat neo fa gago, “Lo, Ai Boehàda oa, eho Oba deelehe bak lam Om ozobohuna taia?” Lahahat Yesusat fa neo vi gago, “Làhà, Em domba ozomomna oho vou aasdale.”
17. Lahame gagu neàdi Yesusat vedi neo Petrus bake vi gagu làteladelo neo ab gagoham. “Simon, Yonam adat oa, om abo Eba deelehe bohu meedào?” Lahame gagoho bak làteladi modeha Petrusat ahu faidi vi ozo, “Yesus akati modelo eba ame baket gagoho bak làteladehela?” lahame vi ozome fa neo gago, “Lo, Ai Boehàda oa, Om abo na im ahebu ozobohuda Om am bak. Eho Oba deelehe bak lam om ozobohu bak.” Lahahat Yesusat neo vi gago, “Làhà, Em domba ozomomna oho vou aasdume na àmna lodale.
18. Labi im Eho etei oba gagolo modem imboda nidi nim oho laha iademe vi aime ozomale. Om amu bas diat gi obo ohomo ozoho baket na meedalo sue dusu afoezobe om soa gimsuidamna gimsu neàdi obo oho lalo ozoho bak laba laidam bak. Obo oho modi baleàhà bak am bak. Lahana ba diamut om aolem di iube dam amomoit om so laba sue nom dusuida tame. Labi laha damat om anekehà ahim visoi ut tetehesuhunaso laba gutaasu giadume obo oho lam mom bak laba vou la tame.”
19. (Yesusat etei lab gagoho im lam gi Petrus am ba damat ve ut tetehesuhunaso laba esu paku dome elom bak lam, “Petrusat fà ozobohudese,” lahame labi gagoho bak. Abo, “Petrus akatihasu modi elom labet modi damat Alam ee vousai Aba vou baedàla?” lahame tombalelo ahit labi gagoho bak.) Labi Yesus im lada lam vameame neàdi Aho neo Petrus bake ab vi gagoham. “Om gi Eba laha vi tau meedam bohu meedale.”
20. Lahame gagu neàdi ladam labe Petrusat fa it vaktesi aaha Yesus bake vi tau meedamda meida abo Yesusat deeleheda eho Yohanesat ba vi vuedam bak ab it aaham. Abo na àme iziam bak abo Paskah lam àm digat tombuda vahi na àdam di labe eho Yesusam so laba nem ulasi netàdi aa gago, “Ai Boehàda, amat Om vou fohome meia ub lu otela?” lahame amu gagohoda labe eho vi vuedam bak ab it aaham.
21. Eba it aahemu Petrusat Yesus bake vi ailo ab gagoham. “Ai Boehàda oa, dat ba im ohuse vi vuedamda nim ba akatihà?”
22. Lahahat Yesusat fa gago, “Meit ahamo modem im akati oho vi ailo modela? Eho nehi ozo, ‘Da nim gi ahe lahasuhuna Eho ba fa li aase,’ lahame Eho labi ozome ahumdi esumeam làhà gi Ebe Eho ozoho baket modemna oho akati bisi vi ailo mode? Oho gi Eba laha tu vuzehi meedam bohu meedale.”
23. Gi Yesusat etei lab gagoho bak lam vedi Aba vi tau meedam dam labe iho aihi bak lam fa vou gago ladume modeha dam Yesus bake tu vuzehi meedam dam totbaho labe aime git ab ozoham. “Làhà, Yesus bake vi tau meedamda lada lam ba elom kaio,” lahame git ab ozoham. Lahana Yesusat ba labiham bak ozome gagoho vabak. Aho gi neha, “ ‘Da nim gi ahe lahasuhuna Eho ba fa li aase,’ lahame Eho labi ozome ahumdi esumeam làhà gi Ebe Eho ozoho baket modemna oho akati bisi vi ailo mode?” lahame Yesusat gi labi gagoho bak.
24. Etei Yesusti Petrusti ba vulamda lam gi Eho Yohanesat modem bak. Etei nib vameadaha im zi nim eho Yohanes Yesus bake vi tau meedamda meida modem labe na im zi nim ahebu aadume toedahada em ame da am bak. Labi eho toedaha im zi nim, “Imbote,” lahame imota ab ozobohudeham bak.
25. Yesusat Aho meedaha im zi totbaho lam eho toedaha vabda abo duate. Em gi zohota toedaho. Eho ozoha, Yesusat Aho lab meedaha im ahebu lam meit ahebu toedume uloholemeam làhà ba bak niba ame buku zi vahedam di im dua labe bak nim kekesi ba vahem biem bak. Àhàm.
1. Teofi lus oa, Om abo neàte. Yesus Aho vou meedaha im zi lamti Aho vou vahokedaha im zi lamti labihasu eho Lukasat amu toedume neàdi oba esuhu bak. Abo Yesus Aho ahamte im faasi vou meedume
2. fa Am Alat asum ahoba iuba tom vousaha bak lam ahebu eho toedume neàdi oba esuhu bak. Amu Am tom vousaha vab di labe damat Am otehemu Alat modi fa ahedi usaha bak lam Yesusat gagu olu Am im vameadume esmozi laiam dam labe fà aame, “Abo imbote,” lahame ozobohudem bake ahit dihasi li Am alihi fi . Labi dihasi neo li Am alihi fi . Abo usi empat puluh labihadaha bak. Labihadam di labe damat Am alihi aadaho. Labi Am eloho vab di iube Aho Am dam bake neha, “Alat Ahamo Boehàdateboli dam bake deeli vame Am damali Aho vuusu im vahokedam bak lam, ‘Akatihasu modemna modela?’ ” laham bak lam neo vi vahokedaha bak. Labi Alat Am asum ahoba iuba tom vousalo modem di labe Yesus Aho amu gagu vame Am im gagu oluiam dam labe, “Iho ba akatihasu meedàla?” laham bak lam biem bake Alam Aha Nutabe Neàna labe Aho Yesus bake modi vizi teudehe labe ame im lam Am dam laba vahokedume neàdi vou esmozi asum ahoba iuba ab tom vousaham bak.
4. Lahana tom vousaha vab di iube Am damti vazisi meedam digat meida labe Aho nehi it vameadume esmo. “Um kota Yerusalem niba a vou esmomule. Niba vou faodale. Em Aiat neha, ‘Am Aha Nutabe Neàna uba lu modi teudemna loda tame,’ lahame Aho gagu esuhuna lam abo Eho amu uba vameahana lam uba modi vizi teudi neàdehezobe ba ladale.
5. Neham bak. Yohanes gi vaota mei vuu baptisleidaha bak. Lahana etei faobe Alam Aha Nutabe Neànat uba modi vizi teudeda tame,” lahame ab it vameadaham bak.
6. Labi neo Yesus Am damti neo vazisi meedam digat meida labe ame dam labe Yesus bake vi ailo ab gagoham. “Dat Boehàda oa, im tai ahamda Israel labe aho vou faat lehe dam lam Boehàda Daud aham di iube aho vuusu im vahokedam bak lam Oho vi ozome etei Om fa Boehàda gàhà Dateli iba ab vuusulo modem ameo? ”
7. Lahame labi vabi vi ailo gagoha Yesusat fa gago, “Vabà! Em Aiat Aho Eba modi Boehàdateboli dam bake vuusu im vahokedam bak lam gi Ahamo naedat ozobohudi ba imbode tame. Ame digat lam Ahamo ozobohudehena dam giida ba ozobohudem vabak. Gi labihasule!
8. Lahana fa im nidi nim vi ozodale. Alam Aha Nutabe Neànat uba nom ilu modi vizi teudedume neàdehezobe Eho amu meedaha im uho aahana lam kota Yerusalem nibe faasi ahate vou vameatedume fa neo Yudea bak ahebu lamti Samaria bak ahebu lamti vou vameatedume bak ahebu uloholeda tame,” lahame ab it vameadaham bak.
9. Labi Yesus ame im lam it vameadume neàdi Am im gagu oluiam damat aasdahit Alat Yesus vousai asum ahoba iuba ab tom iludamam. Labi Yesus tom iludam bak lam damat ohu gaesu vi aasdume modeha Yesus ulo labe ab baguamdi seteham. Labi asum iuba tom vi aasdam lahasuhu di labe dam sue fauha meona dusuhuna behàsu labe dam obe laba ab li duzuham.
11. Duzu gago, “Aa! Galilea dam um baka ana asum ahoba iuba aasdàla? Ame Yesus uho etei vi aasuhet Alat vousai asum ahoba iuba tom iluhuda lam ba lem di gi ame baket fa neo nom ilum bak,” lahame gagu esmozi fa ab tom iluham bak. Laham im lam ahebu eho Lukasat amu toedume neàdi Teofi lus oba esuhu im am bak. Labihàmu eho neo ame Yesus tom vousai setehemu fa ame im labe am zoho lam eho fa ab susulo modemam bak.
12. Labi Yesus Aho am im vameadume esmozi laiam dam labe iho Zaitun Dee Dozeadaha Bak Buzoho vou esmozi kota Yerusalem laba fa ab laham. Zaitun Dee Dozeadaha Bak Buzoho labe fa kota Yerusalem lam bak bisi kila kaio. Mahate kilometer vàmtea fuhu vabak. Gi netàt.
13. Labi ame dam labe im num kota Yerusalem laba fa li nuzuba adbada voou ibi iho azihi zuhuba ab ziddaham. Ame dam neha: Petrus ame. Yohanes ame. Yakobus ame. Andreas ame. Filipus ame. Tomas ame. Bartolomeus ame. Matius ame. Alfeusam adat Yakobus ame. Simon Meohoda abo, “Roma dam iba Yahudi dam vuusdam bak fa modi itese,” lahame dae gai duzuhuda ame. Yakobusam adat Yudas ame.
14. Labihasu vazisi numa oedume afoezobe ahu vàmadi Ala bake tom gagoda. Ame di lam ihimo oedume tom gagodam kai. Abo Maria Yesus faaha oi lamti labi lahi totbahoti Yesus Am amedamti labihasu laha vazisi meedam bak. Ame dam labe iho Ala bake tom gagodam di abo dihasi vazisi Ala bake tom gagoda. Labi neo dihasi vazisi Ala bake tom gagoda. Labihada.
15. Labihadam digat meida labe dam Yesus bake tu vuzehi meedam dam abo seratus dua puluh lam ame bak laba vazisi meeda. Labi vazisi meedam di labe
16. Petrusat usai duzu im ab vameadamam. “Ba oa, im ebeda nasi aimale. Yesus silo mod vihitohoda Yudas labe aho ba meedalo modem im lam aham di iube Alam Aha Nutabe Neànat Boehàda Daud bake modi vizi aho ozobohudi fi gatei fet toedume esuhu Alam im lam ba vooho vabak. Abo imbodehe bak.
17. Ame da Yudas amu di iube Yesusat imti vahi gagome vahada am bak. Abo ibi meida na vahi meedamda am bak. Lahamnàme ab faideham bak,” lahame ab vameadaham.
18. (Ame da Yudas aho mod vihitoho bake abo faina modehe bake vaha doi lam aho ve bak ab vaham. Laham dàt aho vaha bak laba nom oudasu bake biti gau fi fasi asum ahebu bake goaitoi ab eloham.
19. Labi kota Yerusalem laba esuhu dam ahebu ame bak lam aime ozobohudi, “Vasea Bak,” lahame ozome, “Akeldama,” lahame dae ibidat ee ab taluham.)
20. Labi Petrus neo vi vameada. “Boehàda Daud aham di iube aho Ala Bake Vou Baedam Ladeem Im Toedahana laba im meida nehi toehena ehe bak. ‘Ame da labe aho azihi bak lam gi alimdese. Ba meit a azimule.’ Labi Daud aho toeme esuhu im meida neha: ‘Ame da labe aho amu modem bak lam fa dat meida fa ot vase.’ Lahame Daud aham di iube labi fet toedume esuhu bak.
21. Alam Dae labihahemu Yesusat Aho gagu olu Am im vameadume esmozi laiam dam nibe im dam meida setehemu fa dat amomoi utasi ve fa dua belaslese. Ame da valo modem di dat amomoi ostame vam vabak. Abo imti vahi im Boehàda Yesus bake tau bak ahebu gohateheda vam bak. Abo Yohanes mei vuu valo baptisleidaha bak labe faasi vou meedume fa Yesus Alat asum ahoba iuba tom vousaha bak lam ahebu im vahi aahada vam bak. Labiham labe ame da labe iba tau, ‘Yesus Am eloho bak labet fa ahedi usaha bak,’ laham bak iba tau ahate vameadam bak,” lahame Petrusat ab vameadaham.
23. Labi vameadume neàdi ame dam labe dam behàsu ab gagoham. Dat meida Yusuf Barsabas abo ee meida Yustus lahamda am. Labi dat meida Matias am.
24. Ame dam behàsu lam gagome neàdi ame dam zi labe vahi Ala bake ab tom gagodamam. “Ai Boehàda oa, dam ahu ahebu Om ozobohu bak. Yesusat Aho gagu oluiam im lam Yudasat mu vooho labe Alat aba gagu oluhu bak laba ab laham bak. Labihàmu dam behàsu nim dat adidat fa Yudas aho modi vooho im lam, ‘Amat fa vàla?’ laham bak lam Oho iba tau modi ozobohudele,” lahame ab tom gagodaham.
26. Labi tom gagodume neàdi ame dam labe fi mam bakti ulohona ibida lam ab modeham. Modeha Matias bake ab aaham. Labihàmu Matias ve Yesusat gagu olu Am im vameadume esmozi laiam dam sebelas laba fa vi tau ab dua belasleham.
1. Labi Yahudi dam labe ibi iho na duana àdam digat meida, “Pentakosta,” lahame taluhu digat vou fuhemu dam Yesus bake tu vuzehi meedam dam ahebu ihimo vazisi num vàmtea laba bakamta vahi esda.
2. Vahi esdume modeha na dahobuna nutabe faiti ulohona asum iuba ab tom aidamam. Labi aidameilahit nom ilu ame damat esdam num laba ab li veimadamam.
3. Labi ame na dahobu fai lam aidàmu vi aaha na vua iso baati ulohona ozomomna nom ilu fi goaitoi ame dam zi laba ab modealadaham.
4. Labi modealadume modeha Alam Aha Nutabe Neàna labe dam zi laba ab modi vizi teudedamam. Labi vizi teudedam labe dam labe dae ibida fa vei seti dae amomoi naedat it aim biem dae ab faasi vameadamam. Ame dae faasi vameadam di lam gi Alam Aha Nutabe Neàna labe Aho iba gagohoda lamota vameada.
5. Amu di labe Yahudi dam totbaho zi labe bak iube le bak iube le lahadume kota Yerusalem niba li esda. Ame Yahudi dam zi lam abo Alat gagoho im lam ule neàt aime meedam damat moz.
6. Labihadam damat aidaha na dahobuna faiva aidàmu dam zi labe valadume ame na dae aidam num laba ab le dozeadaham. Labi le dozeadume modeha ame dam Yesus bake tu vuzehi meedam dam labe ibi iho vameadaha im lam aidaha vabamu ozo, “Dam lam dae ibida seti fa dae meibada vameadam damat moz. Lahana ame dam lam dae ibida vabilemna akati modi dam labet vameadam im iho vi aidà?” lahame ab àvodi im anekehàso ab gaadamam.
7. Àvodi meedam labe ab ot gagoi ot gagoidamam. “Aa! Ame etei im lab vameadam dam lam gi Galilea damat mode taia?
8. Ne lahana ame dam lam dae ibida ozobohu vabna akati modi iho aidam di dae ibida vameadamna iho aidàla?
9. Im bak vàmtea labe lehe vabak. Abo bak tamehona lehe bak. Im zoho Partia labe le. Labi zoho Media labe le. Labi zoho Elam labe le. Labi zoho Mesopotamia labe le. Labi zoho Yudea labe ,250,500,750,
1000. km Roma ARAB Kirene ELAM MEDIA MESOPOTAMIA Yerusalem YUDEA MESIR KRETA KAPADOKIA PONTUS PAMFILIA FRIGIA ASIA LAUT TENGAH LIBIA SIPRUS PARTIA U le. Labi zoho Kapadokia labe le. Labi zoho Pontus labe le. Labi zoho Asia labe le.
10. Labi zoho Frigia labe le. Labi zoho Pamfi lia labe le. Labi zoho Mesir labe le. Labi zoho Libia bak laba azihi dam lahana num debu Kirene laba netàdi azim dam Libia labe le. Labi zoho num debu Roma labe le.
11. Roma labe leheda zoho Yahudi damat moz. Labi zoho gi Yahudi damat modem vab dam lahana Yahudi dam labe ibi iho dat ahamda Musat vou vahoke usehe Im feàna lam vuusu meedam bak lam vi tau meedam meo damat moz. Laham dam labe num debu Roma labe le. Labi im zoho Kreta touha labe le. Labi zoho Arab bak labe le. Im bak tamehona labe lehena dae uloho vabna akati modi dam labet Alat meedaha im feàna lam ahebu vi ozome Ala bake vou baedam dae lam iho vi aidàla?”
12. Lahame àvodi vi ailo ab ot gagoi ot gagoidamam. “Ame etei meedam im nim akati modemna modela?” lahame vabi ab ot gagoidaham.
13. Lahana etei li dozeaha dam totbaho labe vedi tozome ab gagodamam. “Mm vabà! Dam lam gi vao meona uddume bak bi bobime meedam damat modem bak,” lahame ab tozoham.
14. Labihàmu Petrusti Yesusat Aho gagu olu Am im vameadume esmozi laiam dam sebelas totbaho lamti usname dozeadume neàdi Petrusat ahamo dam zi laba dae buduana ab vameadamam. “Um em Yahudi dam totbahoti dam kota Yerusalem niba azim damti um ahebu eho etei vameadalo modem im nim mahate iademe aimale. Uho etei li vou faodam dae dahobuedamna nim, ‘Akati modemna modela?’ laham bak lam eho etei uba vahokedalo mozo. Làhàmu um ahebu mahate aimale!
15. Uho etei vedi im dam nim vao meona uddume bak vabi bobidam bak. Lahana ba labiham kaio. Etei gi jam sembilan dihambe fuhu bak. Ba di nimodam di vao meona uddam vabak.
16. Im gi nehadam bak. Uho etei aadamna nim gi aham di iube Alat vameadaha im aime fa dam bake ahate vameaidahada Yoel labe aho Alat Am Israel dam bake fet nehame vameahana aho toedume esuhu imot modem bak.
17. ‘Alat neha, “Ba diamut digat folelo modem di labe Em Aha Nutabe Neàna lam dam ahebu nom oudume modi vizi teudeda tame. Labiha labe um adam zi lamti um adnamat zi lamti im Ebe Eho gagohoda lam dam bake vou vameateda tame. Labi laha um dam gàhàda zi labe ba azi aasdahit Eho ame dam laba modi edehesi fako bakamta aasdume Eho ba ozome meedam im lam nasi aame ozobohudeda tame. Labi laha um dam busaoda zi labe ba bisu iddameilahit Eho ame dam laba modi uleme Eho ba ozome modemna lam ame dam labe nasi fet aasdume ozobohudeda tame.
18. Labi ame di labe dam im Ebeda uledi meedam damat modeo, lahit modeo, laham dam laba Eho Em Aha Nutabe Neàna lam laha ame dam laba nom oudume modi vizi teudehe labe ame dam labe im Ebe Eho gagohoda lam dam bake vou vameateda tame.
19. Labi ame di labe, ‘Em abo feàte,’ laham bak lam damat aame ozobohudem bake Eho laha asum ahoba iuba uho amu aaha vabna fet aame àvodemna modi uho aame àvode tame. Ame fet aame àvodemna neha: Ala digadda ba modi fa aibulem bak ame. Labi ala useheda vaseati ulohonali bozili modesdam bak ame. Labihasu im lada lam meeda. Labi ame di labe neo Eho bak adba niba uho damat fet aame ozobohudemna modi uho aame ozobohude tame. Ame damat fet aame ozobohudemna neha: Vasea ame. Labi vua ame. Labi vuahu fai vousadam bak ame. Labihasu uho bak adba niba aada tame. Ame na zi uho aame neàdi Eho Boehàdateboli dam bakda labe iho meedaha im lam Ehemo vi ozodume uloodume neàdi gagom digat feàda lam ab fumam tame.
21. Labi ame digat fuseo vabalem di labe meit Boehàda Ala bake neha, ‘Eho faina meedàmu Oho eba beolo meedam bak lam fa mu soat vausu fa vei neàdele,’ lahame geme gagomda laba Aho soat vausu fa vei neàdemda am bak.” ’ Laham im lam Yoel aham di iube toedume esuhu im lam etei imbodi ab faasi meedamam bak.”
22. Lahame Petrus im lada lam vameadume neàdi neo vi vameada. “Dam ebeda abo im tai ahamda Israel labe aho vou faat lehe dam totbaho oa, im eho etei gagolo modem im nim um laha aimale. Uho Yesus Nazaretda labe Aho ahe diat meedaha im lam vi ozodale. ‘Alat gagu uba oluhu Dat vàmtea lam Yesus ame Da am tame,’ laham bak um biem bake Alat Aho um aasdahit Yesus bake modi Aho na damat ihimo modem biem im feàna abo damat amu aaha vabna fet aame àvodemna lam meeda. Labi fet aame ozobohudemna lam meeda. Yesusat labihasu meedamna lam um amu ab aame ozobohudeham bak.
23. Ame Da Yesus lam Yudasat uba ub lohat uho fa neo dam Alat gagu fi hasi esuhu im zi lam meedaha vab dam laba fa neo ub lu dam labe Yesus ve ut tetehesuhunaso laba esu dou otehe bak. Lahana uho meedaha bak lam gi aham di iube, ‘Uho ba nehada tame,’ laham bak lam Alat Aho amu nasi fet ozobohudehe bak. Labiha labe Aho amu fet gagu esuhu baket imbodi uho ab meedaham bak.
24. Ame Da Yesus uho otehe bak. Lahana Am eloho bak labet Alat modi fa ahedi usaha bak. Am abo eloi labaha bohu modesdam biehemu Alat ame koei it oazi le setehena lam modi fa ab it oluham bak.
25. Alat ame Da Yesus eloi labaha bohu modesdam bak malem bak lam im Boehàda Daud aham di iube nasi fet ozobohudi fa aba gi vàlu nehame toeme esuhu bak. ‘Eho godam bak it ozom di gi Em Boehàdati bakamta godam bak ozodam tadeho. Aho Eba aasu vou godàmu Em ba iedem kaio. Am Eba taum bak.
26. Labiham labe Em ahu abo deelehat Aba vou baedam bak. Em elom di ame koei it oazi le esdam bak laba Aho aalahigeàmu laba voom vabak. Labi laha im Aba Aho Gagohona Fihasi Vamdesu Meedamda nibe Em koeiso nim koeili setem bak Am ba uledem vabak. Am abo malem bak. Laham bak lam Em ozobohudehe bak. Labihàmu Em gi ozahit Aho Eba ba modem bake vou faodalo.
28. Em fa ahedem bak lam Aho Eba ab gagu Em ab ozobohudeham bak. Labi laha Om ba Em voom vabak. Omti Emti ahilem labe Em ab deeli vàhàdeham bak.’ Lahame Daud Yesus eloi labaha bohu modesdam bak Alat malem bak lam nasi fet ozobohudi toeme esuhu im am bak,” lahame Petrusat ab vameadaham.
29. Labi Petrusat neo vi susulo vameada. “Um ahebu nasi aimale. Im tai ahamda Boehàda Daud aho toeme esuhu im lam am koeiso it ozome ame im toeme esuhu vabak. Daud amu gi aham di iube eloi baumsuhu bak lam im ozobohu bak. Am koei baumsuhu bak lam im aadam lahasuhu bak.
30. Lahana Daud abo Alat vameadaha im aime fa dam bake ahate vameaidahada meida modehe labe Alat amu aba nehame fet nasi gagu esuhu bak. ‘Oho ba diamut vou faat ladam mekehàda meida labe om aham boehàdatelehe bak lamti ulohona Eho fa neo ame da laba modi boehàdatelelo modem bak tame,’ lahame fet nasi gagu vàmadi esuhu bak lam Daud ozobohudehe bak.
31. Alat ba modem im aho fet nasi ozobohudehe labe aho gi Alat Gagu Fihasi Vimteme Oluhu Dat Boehàda lam ba eloi Am eloho bak labet Alat modi fa ahedi usam bak vi ozome nehame toeme esuhu bak. ‘Am elom di ame koei it oazi le esdam bak laba Alat aalahigeàmu laba vooho vabak. Labi Am koeiso lam laha ba koeilehe vabak,’ lahame fet toeme esuhu bak.”
32. “Ame Da Yesus lam Am eloho bak labet Alat modi fa ahedi usaha bak lam im na aahada am bak. Labiha labe Boehàda Daud gi aba it vàlu ame Da Yesusat ba modem im lam nasi fet ozobohudi toeme esuhu bak.
33. Labi ame Da Yesus Alat tom vousai Amti vei ahili dam vuusdam bak ozome Am ahi totbaho laba ab vou nusuham bak. Labiha labe Alat Aho amu neha, ‘Am Aha Nutabe Neàna Yesus bake modi vize tame,’ lahame gagu esuhu bak lam imbodi Aba vizi ab teudeham bak. Labihàmu uho etei aadamna nimti aidamna nimti gi Alat amu Am Aha Nutabe Neàna Yesus bake modi vizi teudehe bak lam Yesusat fa neo etei iba modi fa vizi teudedam bak nim um ab aaha aiha lahadamam bak.
34. Eho gi neham bak ozome uba labi gagoho bak. Ba Daud Alat modi fat ahedi asum ahoba iuba vousaha vabak. Labihàmu iho ozom, Daud aham di iube aho nasi fet toeme esuhu im lam ba am koeiso laba it ozome toeme esuhu vabak. Lahamnàme Daud nehi gagoho bak. ‘Na Debu Modehe Ala labe Aho fa eba vuusdam Boehàda laba gago, “Om Em ahi totbaho niba nusu Eba tau im dedateli dam vuusu im vahokedase.
35. Labi Eho dam Oba fakemoholehe dam zi lam Eho ahit modi bedi Oba iedi uledi im Oboda fà aime meedase,” lahame gagoho bak.’ Lahame Daud Alat Aho ba Yesus bake modem im lam nasi fet ozobohudi toeme esuhu bak am.
36. Labihàmu im tai ahamda Israel labe aho vou faat lehe dam ahebu iho neham bak nasi ozobohudedase. Ame Da Yesus uho gagome ut tetehesuhunaso laba paku dome oteheda lam gi Alat Gagu Fihasi Vimteme Oluhu Dat Boehàda abo uba vuusdam Boehàdateboleheda Am am bak.” Lahame Petrusat ab vameadaham.
37. Labi ame lab dozeadaha dam zi labe iho Petrusat lab vameadaha im lam aidume modeha ab it ozoham. “Imbote,” lahame ahu gelevai fa Petrusti Yesus Aho gagu olu Am im vameadume esmozi laiam dam totbaho lamti dam laba ab gagoham. “Làhà. Im akati modi fa neàdela?”
38. Lahame gagoha Petrusat fa vi gago, “Um ahebu faina meedam bak lam nasi voedume fa ahu neà bak vàmadi meedale. Labi uho, ‘Ame Da Yesus lam Alat Gagu Fihasi Vimteme Oluhu Dat Boehàda am tame,’ lahame tu vuzehe bak lam damat aame ozobohudem bake nasi meit um vuu valo baptisleidale. Uho labi meedam labe uho faina meedàmu Alat uba beolo meedam bak lam Aho fa vei mu gi ozahigeàmu fa vei neàdedume Am Aha Nutabe Neàna uba modi vizeda tame.
39. ‘Am Aha Nutabe Neàna uba nom oudume modi vizi teudeda tame,’ lahame amu fet gagu vàmadi esuhu im lam abo imti im data iho ba vou faat ladam damti iba fet gagu vàmadi esuhu imot modem bak. Gi imota gagu esum kaio. Abo dam im biem bake esuhuda iumti ahebu laha fet gagu esuhu imot modem bak. Abo im Boehàda Alat Aho ozome meia ba modi Aba tu vuzehehe dam ahebu laha modi vizem bake fet gagu vàmadi esuhu imot modem bak,” lahame Petrusat ab vameadaham.
40. Petrus gi im lada lamota vameadaha vabak. Abo im duana vi ooteme vameada. Labi, “Dam bada etei faina meedam bak lam uho vi tau meedam bak nasi vaitole. Labiham labe Alat umti beodam vabak modi esum bak,” lahame Petrusat dam bake ab vameadaham.
41. Labi vameadume neàdi dam totbaho Petrusat lab vameadaha im aime ab uledeham. Labi uledi Yesus bake tu vuzehi valo ab baptisleham. Labihadam digat labe dam bada tiga ribu lam fa dam amu Yesus bake tu vuzehi meedam dam laba vi tau vuzehi debu ab dualeham.
42. Labi ame Yesus bake tu vuzehi meedam dam gàhàda zi labe iho vahi gi im nehasu tombuli meeda. Yesusat Aho gagu olu Am im vameadume esmozi laiam dam labe iho vahokedaha im laba tu vuzehi meedam bak ame. Labi fa vahi im ot vameaidam bak ame. Labi Yesus amu eloho bake vi ozome àm roti lam dam vahi agube àdam bak ame. Labi vahi Ala bake tom gagodam bak ame. Labihasu dihasi mode dihasi mode lahada. Gi labihadam bak bohu ab faasi meedamam.
43. Ame di lam Yesusat Aho gagu olu Am im vameadume esmozi laiam dam labe iho damat fet aame àvodi ozobohudemna abo na damat ihimo modem biem im feàna lam meedàmu dam duada giida zi labe fet aame àvodi ahu adat iedi, “Ala abo feàte,” lahame ab faasi vou baedamam.
44. Labihadam di lam ame Yesus bake tu vuzehi meedam dam zi labe ahebu im ahu vàmadi vabademsu meedam bak. Labi ame dam labe im nazoh ahebu gi toma vaheme na meedam nazohale.
45. Labi ame dam totbaho labe im nazoh fa doi vame fa na gagoho dam laba faheme lodam meot. Dihasi mode. Dihasi mode. Labihada.
46. Labi ame dam labe laha Fihasi Ala Bake Vou Baedam Num Vàmteabu labe am ad oli aam bak tomba laba bakamta vahi im ot vameaida. Labi ame di labe laha Yesus eloho bake vi ozome àm roti lam im num laba vahi agube àda. Labi neo na abo gi àmna laha bakamta vahi àda. Dihasi mode. Dihasi mode. Labihada. Labihadam di labe im ahu vàmadi deelehat bakamta vahi meedam damat moz.
47. Labi laha ame dam labe iho Ala bake vou baedam di abo dihasi vahi Ala bake vou baeda. Labi neo dihasi vahi Ala bake vou baeda. Gi labihamna bohu modesda. Labihadam labe dam giida zi labe iba deeli vou baeda. Labi ame dam giida zi labe iho faina meedàmu Boehàdat iba beodalo meedam bak lam Aho fa mu soat vausu fa vei neàdedaha dam lam Aho vame fa dam Yesus bake tu vuzeheda amuda zi totbaho laba Aho modi ab vi taui vi tauidume ab zi dualedamam.
1. Labi ame digat meida iube Yahudi dam labe ibi iho Ala bake tom gagodam jam abo jam tiga fusi ala vakidehemu Petrusti Yohanesti Fihasi Ala Bake Vou Baedam Num Vàmteabu laba ab ladamam.
2. Ame di labe dat amu am oiat faaha di iube nao zoho nutabedeheda labe aho ame Fihasi Ala Bake Vou Baedam Num Vàmteabu labe am bàhàgo totobe modesdam doo meida ee gagom Aam Neàna laham doo futom tot laba aida. Dam Ala bake vou baedalo li olelo modem dam zi laba na gut tauledam bak ozome dam ahe dàt fa dat nao zoho nutabedeheda lam dihasi vou li ousda. Dihasi vou li ousda. Labihada.
3. Labi ame da labe Petrusti Yohanesti li olelo modem bak gut aahemu doi ab gut tauledamam.
4. Labihàmu Petrusti Yohanesti ame dat nao zoho nutabedeheda laba aasu Petrusat ab gagoham. “Om nasi iba aamale.”
5. Lahame labi gagoha ame da labe vedi ame dam behàsu labe aba na lolo mode tiba ab aasuham.
6. Labi Petrusat neo vi gago, “Im doi vabak. Lahana iho ozoho im nim oba modelo mozo. Yesus Nazaretda abo Alat Gagu Fihasi Vimteme Oluhu Dat Boehàda labe Aho eba gagu eho im dedatelehemu eho oba nehaho. Om nasi usai lale.”
7. Lahame labi gagu neàdi Petrusat aho dat nao zoho nutabedeheda labe am anekehà ahi totbaho laba vuu vousai vou duzu modeha ame da labe am naba ekembu ab teudeham.
8. Teudehe labe ab usai ziagahu duzu ab lailaidamam. Lailaidume neàdi Petrusti Yohanesti tau vahi Fihasi Ala Bake Vou Baedam Num Vàmteabu labe am ad oli aam bak tomba laba ab tau vou oleham. Tau vou oli godam di labe ame da labe gi nimidaho. Ziagahui ziagahudaho. Ala bake vou baedaho. Labihada.
9. Labi dam zi totbaho labe ame da labe lab nimidume ziagahu ziagahudume Ala bake vou baedam bak aame ozo, “Aa! Da lam gi dat nao zoho nutabedeheda amu damat Fihasi Ala Bake Vou Baedam Num Vàmteabu labe am bàhàgo totobe modesdam doo Aam Neàna futom laba azi dam bake na gut taulemda am taia? Fa ab modi neàdehame?” lahame ozobohudi aha teksi ab àvodi vi ozodamam.
11. Labi ame dat nao zoho nutabedeheda fa neàdeheda labe Petrusti Yohanesti akili iuba le vi tau douda. Iuba le vi tau douda. Labihada. Labihadume modehat Salomonat amu moho num baeba misia zoho laba neo moho num tom fi haba alim baa ee gagom Salomonam Num Tom Fihaba Alim Baa laham zoho laba fusi duzuha dam zi labe àvodi iba fi di ab valadamam.
12. Làhàmu Petrusat gut aame ame dam zi laba im ab faasi vameadamam. “Em dam abo im tai ahamda Israel labe aho vou faat lehe dam totbaho oa, um etei aaha bak nim um akati modi bisi àvodi iba aasdàla? Uho ozom, ihimo meia vizi fa neàdemna ehe labe iho da nim ulasi am fa neàdehe? Laham vabameam Alat Aho deelemna iho bisi meedam labe iho fa da nim ulasi fa neàdehe? Vabà! Labiham vabak.
13. Alat Ahamo modehe bak. Iho im tai ahamda zi Abrahamti Isakti Yakubti labi tai giida totbaho zi lamti labihasu iho vou baedam Alat Aho Am Na Meedamda Yesus modi feà datelehe bak. Lahana ame Da Yesus uho vedi neha, ‘Otese,’ lahame iba Yahudi dam vuusdam boehàda zi laba dam giidate uho ub loho bak. Labi ub lohat ame Boehàda Pilatusat neha, ‘Yesus gi isi oluse,’ lahame ahu vàmadi gagu neàdi dogoit vou faodameilahit uho vedi, ‘Yesus mu voose,’ lahame gagoho bak lam Pilatusat ab aiham bak.
14. Alat neha, ‘Im nehasu meedale,’ lahame Aho Gagu Fihasi Esuhu Yesus lam abo Iademe Ahu Vamdesu Meedamda lam uho mu vooho bak. Lahana uho vedi Pilatus bake gagu da mei otemda labe ame mei si ousu teudem num laba ousdamda Barabas lam, ‘Fa isi iba olule,’ lahame ootedamehamdi Pilatus uledi ab isi oluham bak.
15. Lahana meia modi Alati vahi gi ahe neàna bohu vuusdamda lam uho gagu ab oteham bak. Lahana ame Da eloho bak labet Alat modi fa ahedi ab usaham bak. Ame Da Yesus fat ahedi godamna aame fi dehe dam im am bak.
16. Ame dat nao zoho nutabedeheda um amu aame ozobohudeheda nim am etei modi fa neàdehe bak gi nehaha bak. Yesus am meia modi vizi teudemna lam ame da nibe aho tu vuzehe labe Yesusat am nao ekembu fa ab modi teudi duzuham bak. Iho ame da nimti Yesus bake tu vuzehe labe Yesusat da nim modi fa neàdehe bak um ab aaham bak.”
17. Lahame vameadume neàdi Petrusat fa neo susulo vi vameada. “Em dam ahebu neo vi aimale. Uho, ‘Yesus Alat Gagu Fihasi Vimteme Oluhu Dat Boehàda ame?’ laham bak vabili uho gagu otehe bak.
18. Lahamnàme gi labihasule. Nehaha bak. Aham di iube Alat vameadaha im aime fa dam bake ahate vameaidaha dam zi laba Aho neha, ‘Eho Gagu Fihasi Vimteme Olulo Modem Dat Boehàda lam damat modi geàda tame,’ lahame fet gagu esu neàdehe labe ame im lam damat aham di iube ab vou vameatedaham bak. Labi uho etei Yesus gagu otehe labe amu aham di iube fet gagu esuhu baket Alat ab modi imbodeham bak.
19. Labihàmu uho faina meedam bak lam nasi voedume fa ahu neà bak vàmadi Ala bake tu vuzehi im Abadata meedale. Uho labi modemeam làhà Alat uho faina meedam bak lam gi ozahigeàmu fa faamome uba beolo meedam bak lam fa vei mu neàdedam bak.
20. Labi modem labe Boehàda Alat uba modi um ahu asimdidam bak. Labi laha Aho Gagu Fihasi Vimteme Oluhu Dat Boehàda lam abo Yesus lam Aho fa neo gagu nom olu tame.
21. Etei ame Da Yesus asum ahoba iuba vou faodam lahasuhu bak. Abo Alat Aho na alimeat modehena ahebu modi fa gàhàli neàdehezobe Am ba lem bak. ‘Ame bak lam mode tame,’ lahame Alat aham di iube fet gagu vàmadi esuhu im lam dam ahamda abo Alat Aho vameadaha im aime fa dam bake ahate vameaidaha dam zi labe iho dam bake vameadaha bak.
22. Nehaha bak. Yesus ba Alat vameadaha im aime fa dam bake ahate vameaidam datelem bak lam dat ahamda Musa labe aho nasi ozobohudi am Israel dam bake im vameadaha di labe aho nehame fet vameadume esuhu bak. ‘Im Boehàda Alat ba diamut uho vou faat ladam dam meida laba Alat fa gagome emti ulohoda Aho vameadaha im aime fa dam bake ahate vameaidam Dateli uba olu tame. Abo Alat amu em modi oluhu bakti ulohona ba neo mode tame. Labi ame da labe uba vahokedam im lam uho mahate aime vuzehi meedam tadele.
23. Meit aime vuzehem vabameam làhà ame da laba Alat neha, “Em damat modem kaio,” lahame ab momam tame.’ Lahame Musat aham di iube fet nasi ozobohudi vameadume esuhu im lam imbodi Yesusat ab meedaham bak.”
24. “Ame im lam gi Musat ahamo ozobohudi fet toedume esuhu vabak. Abo Alat vameadaha im aime fa dam bake ahate vameaidaha dam ahamda totbaho ahebu laha toedume esuhu bak. Abo etei vou mode ladam im nim ame dam labe amu gi nasi fet ozobohudi toedume esuhu imot modem bak. Abo Samuelti aba vi tusuhu dam totbahoti ahebu ame im fet vou vamea usehe bak.
25. Alat aham di iube ahu vàmadi im tai ahamda Abraham bake im nehasu fet gagu vàmadi esuhu bak. ‘Oho ba vou faat ladam dam meida laba Eho modi fa dam bake esuhuda debu ahebu neà bak modi esuida tame.’ Lahame labi fet gagu vàmadi esuhu im lam gi Alat vameadaha im aime fa dam bake ahate vameaidaha dam labe iho im tai ahamda zi laba vou vamea usdaha im am bak. Ame bak lam, ‘Alat ba nehada tame,’ lahame fet vameadume vàmadi esuhu im lam imbodi Alat Gagu Fihasi Vimteme Oluhu Dat Boehàda iba Yahudi dama ab oluham bak.
26. Alat iba Yahudi dam bake im neàna meedalo modemu Am na meedamda Yesus iba Yahudi dam bake nasi ab oluham bak. Ame Da Yesus labe Aho iba vi tau modi iho faina meedam bak lam voedume fa ahu neà bak vàmadem labe Aho iba neàna meedam bak am bak,” lahame Petrusat ab vameadaham.
1. Labi Petrusti Yohanesti ame dam iba valadamda zi laba im vameadam lahasuhu di labe damat Ala bake lomna ve vua vahudam toheda zi lamti labi Fihasi Ala Bake Vou Baedam Num Vàmteabu laba vou aasdam polisi zi laba vuusu im vameame faheme modiam boehàda lamti labi Saduki dam totbaho lamti labihasu vahi ame im lam aidume modeha faki Petrusti Yohanesti lab doudam bak laba ab le omsuham.
2. Neham bake faki le omsu. Ame Yesusat Aho gagu olu Am im vameadume esmozi laiam dam behàsu labe Yesusat meedaha im vahokeda. Labi laha, “Yesus Am eloho bak labet Alat modi fa ahedi usalahit im dam ahebu elodam di laha ba diamut fat ahededume usnadam bak ehe bak,” lahame dam bake vameadume fi deda. Labihadàmu ame dam labe neha, “Ba labiham biem bak,” lahame faki ab le omsuham.
3. Labi le omsume Petrusti Yohanesti ab siham. Si modeha disilo modemu vi ozo, “Ibi iho meia uloome aim bak vafozehe?” Làhàmu meit faina modehezobe si ousu teudem num laba teohet ousu ab vou izi dihaham.
4. Labihadamnàme dam totbaho labe iho Petrusti Yohanesti ame Fihasi Ala Bake Vou Baedam Num Vàmteabu labe am bak tomba laba lab vameadaha im lam aihemu Yesus bake ab tu vuzehedaham. Etei lab tu vuzehe dam lam dam amu tu vuzeheda laba vi tau duali dam aabota dem di abo lima ribu fuhuna ozomoho bak.
5. Labi dam ahim lam sel laba ousu izi dihasi Yahudi damat ibi iho tu vuzehi meedam im vuusdam tohe dam zi ame. Labi Yahudi dam bake vuusu im vameame faheme modiam dam busaoda zi ame. Labi dat ahamda Musat toedume fi hasi esuhu Im Feàna zi ozobohudi fa dam bake vahokedam guru zi ame. Labihasu kota Yerusalem laba im vameadalo bakamta ab vahe vahedaham.
6. Bakamta vahe vahedam di lam dam nehamda laba vi tau meeda. Damat Ala Bake Lomna Ve Vua Vahudam Tohe Dam Zi Labe Im Bisi Boehàdatebo Hanas ame. Labi Kayafas ame. Labi dat amomoi Yohanesam eeti fatahivahada ame. Labi Aleksander ame. Labi ame boehàdatebo labe am amedam totbaho ame. Labihasu laba vi tau ab vahe vahedaham.
7. Labi ame Yahudi dam busaoda zi labe ibi iho im vameadam num bak tomba laba bakamta vahe vaheme neàdehezobe, “Petrusti Yohanesti uloome aise,” lahame dam gagome ame dam behàsu lam sel labe vou futoi fa vou li ame dam zi labe ibi iho avaelaha tot laba ab vou duzuham. Vou duzu neàdehezobe ab gut uloodamam. “Uho dat nao zoho nutabedeheda fa neàdehe bak lam uho anat modi neàdehela? Amat meia modi vizi teudemna uba vizi uho da laba modi fa neàdehela?”
8. Lahame labi gut uloome aiha Alam Aha Nutabe Neàna labe Petrus bake modi vizi teudehe labe aho ame Yahudi dam bake vuusu im vameame faheme modiam dam busaoda zi laba im ab faasi vameadamam. “Dam busao oa, um im ebeda nasi aimale.
9. Im behàsu nibe dat nao zoho nutabedeheda laba taulo modemu neà bak modehe bak lam, ‘Da nim akati modi fa neàdehela?’ lahame uho etei iba uloome vi ailo meeda taia!
10. Làhà, umti em Yahudi dam debu abo Israel labe aho vou faat lehe dam totbaho ahebu lamti uho ame bak biem bake eho etei uba vamealo modem im nim nasi aime ozobohudele. Yesus Nazaretda abo Alat Gagu Fihasi Vimteme Oluhu Dat Boehàda lam Aho meia modi vizi teudemna lam ame da niba Aho modi vizi teudi ab neàdi uho avaesdam niba ab duzuham bak. Ame Da Yesus uho vedi, ‘Mu voose,’ làhàmu dam amomoit ve ut tetehesuhunaso laba esu paku dou ab eloham bak. Lahana Alat Am eloho bak labet modi fa ahedi usaha bak.
11. Uho Yesus mu vooho bak lam dat ahamda labe Alat Vameadaha Im Toedahana laba im nehi fet toeme esuhu bak. ‘Dam num moadam dam labe iho, “Faite,” lahame mu vooho ke lam fa feà Keeli bisi num mome teudem ke am bak.’ Lahame labi vàlu fet toeme esuhu ke lam Yesus am bak.
12. Labiha labe iho faina meedàmu Alat iba beodalo meedam bak lam fa mu iba soat vausu fa vei neàdelo modemda lam im bakda ahebu ba Da lamohoda kaio. Gi Alat iba bakdate gagu oluhuda vàmtea lam Yesus ame Da am tame,” lahame Petrusat dam laba ab vameadaham.
13. Lahame labi vameadume modeha ame Yahudi dam boehàda zi labe ozo, “Aa làhà! Petrusti Yohanesti ba iedi vameadam vabak. Gi im neàna vameadam dam behàsut moz. Lahana Alat Vameadaha Im Toedahana abo Ibrani daet toedahana vahokedam sekolah modehe vab dam giida behàsut moz,” lahame labi ozome ab àvodeham. Labi àvodi modeha vabamu ozo, “Petrusti Yohanesti amu Yesus ahe di iube tau gohatehe dam behàsu am taia?” laham bak ab vi ozobohudeham.
14. Labi ame Yahudi boehàda zi labe Petrusti Yohanesti feàtàsome modeha dat nao zoho nutabedeheda fa neàdeheda lam laba vi tau doudam labe feàtàm bi gi daleàdi im gagom vabili gi moh.
15. Labihàmu ame Yahudit Ibi Iho Modem Im Gagu Vàmadi Esum Dam Debu labe ibi iho im vameadam tom fi haba lam ame dam behàsu lam gagu mali ab vou futoham. Labi Yahudi boehàda zi labe ihimo im aa ab ot vameaidamam.
16. “Uho ozom, im dam behàsu niba akati modela? Iho beome itaholem biem bak. Kota Yerusalem niba esuhu dam ahebu ame dam behàsu nibe iho dat nao zoho nutabedeheda fa neàdehe bak lam abo damat ihimo modem biem im feàna modehe bak lam ab aame ozobohudeham bak. Labi im laha ame da lam fa neàdehe bak ba daetesum biem bak. Ab aame vàhàdeham bak. Lahana uho ozom, im akati modela?
17. Làhà, imo dam behàsu laba neha, ‘Um ba Yesus Aho amu meedume vou esmoho im lam ba a vou vameatedamule,’ lahame gagu dam labe fà iedi mose. Dam dua bak niba ba vou susdume uloholi ame dam labe fa ame Da Yesus bake tu vuzehemna zohàme imo dam behàsu nim ame im lam vou vameatem bak gi gagu malese,” lahame ame im lam aa vameadume ab esuham.
18. Labi aa vameadume neàdi ame dam behàsu lam gagu damat fa ab vou oleham. Vou oli duzu neàdi ab gut vameadamam. “Uho Yesus Aho amu meedume vou esmoho im lam uho a dam bake vameadume vi vahoketedamule,” lahame ab gagu maleham.
19. Lahame gagu modeha Petrusti Yohanesti fa ab vi gagoham. “Vabà! Ba iho labi modem biem bak. Uho ozom, iho akatihasu meedam labe Alat iba aame ozo, ‘Im vamdesu meedam bak neame?’ lahame aame deeli iba gagodà? Im ubuda iho aime vuzehi meedam labe Alat iba aame bisi deeli gagoeo? Laham vaba im Abada iho aime vuzehi meedam labe Aho iba aame bisi deeli gagoeo? Uhumo vi ozome ozobohudi neàdi gagomale.
20. Uho etei lab gagoho bak lam im ba labiham biem bak. Im iho aaha bak lamti im iho aihi bak lamti vou vameatedam bak voom biem bak,” lahame ab gagoham.
21. Lahame labi gagoha Yahudi dam boehàda zi labe dam behàsu laba neo faki, “Dam labe fà iedi neo mose,” lahame im meida neo vi vameada. Im meida neo vi vameada. Labihada. Labihadume modeha dam behàsu nibe faina modehe bak aihi vab labe beom vabili ab isi oluham. Neham labe beom vabili isi oluhu bak. Ame da nao faideheda lam etei bak nibe modehe vabna abo amu gi modi empat puluh tahun fuhuda modi fa neàdehe bak lam ame dam duada totbaho labe im amu aaha vabna im feàna modehe bak laba aame àvodi Ala bake vou baeda. Labiham labe ame Yahudi busaoda zi labe ame dam behàsu beomeam ame dam duada zi labe fa iba fakem bak labna zohàme iedi ame dam behàsu lam beom vabili ab isi oluham.
23. Labi Petrusti Yohanesti isi olu neàdi fa le Yesus bake tu vuzehi meedam dam im dam totbaho laba abo ibi iho azihi bak laba fa ab laham. Labi fa le damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi lamti ame dam labe iba etei malehe im lam ab le vameadaham.
24. Labi ame dam labe Petrusti Yohanesti lab vameadaha im lam aime neàdi ame dam labe iho vahi ahu vàmadi Ala bake nehame ab tom gagodamam. “Ala na ahebu vuusdam Boehàdatebo oa, Om abo na ahebu asum ahoba iuba modealahana lamti labi bak niba modealahana nimti labi itea ad laba modealahana lamti labihasu ahebu modehe Ala Om am tame.
25. Labi im tai ahamda debu vou faat leheda meida abo Om na meedamda Boehàda Daud bake Oho Om Aha Nutabe Neànat modi vizi teudehe labe dam debu meiti dam debu meiti ahebu etei Yesus bake mu voolo meedam bak lam aho nasi fet ozobohudi nehame toedume esuhu bak. ‘Dam giida abo Yahudi damat modem vab dam labe akati modelo Boehàda Ala bake bisi faki ahu zoho belu seti tozohelo? Labi Yahudi dam akati modelo im Boehàda Alat avaesdam laba im aa odoadume gi modeme vooidà?
26. Im bakda boehàdatebo iumti iumti ahebu fa Boehàdatebo Alati ot beluiam bak ozome ab ahumdi neàdeham bak. Labi dam mei debu dam mei debu lahadume vuusu im vahokedam boehàda zi labe laha iho fa Boehàda Alati Aho Gagu Fihasi Vimteme Olulo Modem Dat Boehàda lamti mu voolo ab vahe vahedume neàdeham bak.’
27. Lahame Boehàda Daud aham di iube ame dam debu meiti dam debu meiti ahebu ba Yesus mu voolo meedam bak lam aho nasi fet ozobohudi toedume esuhu im lam ab imbodeham bak. Nehaha labe im ozobohudehe bak. Yahudi damat modem vab dam ahim Boehàda Herodesti Gubernur Pontius Pilatusti labi im Yahudi dam abo tai ahamda Israel labe aho vou faat lehe dam duada totbaho zi lamti labi Yahudi damat modem vab dam totbaho zi lamti labihasu ahebu kota Yerusalem niba amu vazisi Oho Gagu Fihasi Vimteme Oluhu Dat Boehàda Yesus lam abo Oho Gagu Na Meedamda abo bisi neàboda vàmtea lam mu voolo vahe vahedume ab neàdeham bak.
28. Ame dam duada zi labe iho vahi neha, ‘Imo Yesus otese,’ lahame im aa odoadaha bak lam Om ba vabiem vaba abo ozobohuna odoadaha bak. Ame dam labe iho meedaha bak lam gi Oho aham di iube neha, ‘Ba nehada tame,’ lahame nasi fet gagu esuhu bak lam fa imbodehe imot modem bak. Labiham labe Om feà labe Om ahulat ozomna modelo àhàkehe labe ame baket ab meedaham bak.
29. Ai Boehàda oa, ame dam zi labe, ‘Iho Om im meedam dam nibe fà iedese,’ lahame lab vameadaha im lam Oho nasi ozobohudi iho im Oboda ba vou vameatedam bak nim iho vedi vei iedi mom bak labna zohàme Oho malele. Labi Oho iba Om na meedam dam niba im ahu modi fa teudi esule.
30. Ai oa, ‘Om bisi feàda am tame,’ laham bak lam dam bakda nibe biem bake Oho nasi fet meedume ame bak lam damat aame ozobohudedase. Obo Oho Gagu Na Meedamda bisi neàboda vàmtea Yesus labe Aho meia modi vizi teudemna lam Oho fa iba modi vizi teudehe labe iho dam faideheda modi fa neàdedase. Labi laha, ‘Om abo feàte,’ laham bak damat biem bake Oho iba modi iho damat fet aame àvodi ozobohudemna abo na damat ihimo modem biem im feàna lam iho meedase.” Lahame dam labe labihasu ab tom gagodaham.
31. Labi ame dam labe labihasu tom gagodume neàdi modeha iho bakamta vahi tom gagodam bak nim Alat modi ab nigo nigodamam. Labi nigo nigodume neàdi modeha Alam Aha Nutabe Neàna labe Aho dam laba ab modi vizi teudedaham. Labi modehe labe ame dam labe iho ba dam bake Yesus Aho amu meedume vou esmoho im abo Alat vameadaha im lam vou vameatedam di ba dam iudu iuba iedehebeat vameadam vaba abo gi keàtet bohu vou vameatedam bak ab modeham.
32. Labi ame di labe dam Yesus bake tu vuzehi meedam dam ahebu gi ahu vàmadi bakamta vazisi meedam damat modem bak. Labi ba meit meida vàmtea nehame gagom vabak. “Na lam em nazohot modem bak,” laham bak ba gagom vaba gi toma vaheme meedam nazohaehe bak.
33. Labi Yesusat Aho gagu olu Am im vameadume esmozi laiam dam laba Alat modi vizi teudehe labe iho, “Im Boehàda Yesus Am eloho bak labet Alat modi fa ahedi usaho,” laham im lam dam bake ahate vou vameatedam di ba bedem vabna abo teudi vou vameatedam bak. Labi laha Alat ame Yesus bake tu vuzehi meedam dam ahebu laba ozahit deeli im neà bak meedam bak.
34. Labi ame lab vou modetedam di lam ame dam labe ba na vabalemda vabak. Ahebu na ehena tadehe bak. Dam na vab di gi nehadam bak. Im da meida labe am num meida modeo, am bak zoho modeo, meia lu fa doi va. Labi ame doi ve fa Yesusat Aho gagu olu Am im vameadume esmozi laiam dam laba fa vou le lodume ame dam labe ihimo fa faheme dat na gagohodate iuba lo. Iuba lo. Lahadam meot. Dihasi mode. Dihasi mode. Labihada. Labihadam labe ba na vabalem vabak.
36. Labi ame di lam Yahudit modemda Lewit aho vou faat leheda meida labe, “Yusuf,” lahamda abo Siprus touha labe leheda labe am bak zoho meia lu doi ahebu ve fa Yesusat Aho gagu olu Am im vameadume esmozi laiam dam dua belas laba vou le ab lu esuham. Ame dam dua belas labe iho fa ame da Yusuf ee amomoi, “Barnabas,” lahame taluhuda am. “Mei ahu bedem bak labna zohàme vabedemda am,” lahamda labe am bak gohali vaha doi ahebu lam vou le Petrus giidate ab lu esuham. Ame dam labe ve fa na vabdate lom bak ozome ab lu esuham.
1. Barnabasta labiha. Lahana dat ee gagom Ananias labe am nam Safi rati im bak zoho laha meia lu doi ab vaham.
2. Lahana Ananias am namti aa ot gagoiame neàdi ame doi lam totbaho fàsi aa vasti gi zohota vou le Yesusat Aho gagu olu Am im vameadume esmozi laiam dam laba lu ab vi gagoham. “Im bak gohali vaha doi ahebu neam tame,” lahame ab le gagoham.
3. Làhàmu Petrusat Ananias bake ab gut gagoham, “Ananias om akati Iblisim im vuzehi uledi meedalo. Om abo Alam Aha Nutabe Neàna laba vageho. Oho vedi neha, ‘Em bak gohalehe doi ahebu vou leha,’ lahame oho etei lab gagoho bak lam gi giomimot modem bak. Doi zoho oho vasti vaho.
4. Om bak lam meia loho vab di om bak deda am taia? Labi ame bak lam meia lu ame doi vame neàdehe labe om fa neo doi dedatelehe labe obo oho ozoho bake modem neàna taia? Lahana om akati modi ame bak lam mahate ozom vabna git modehela? Om gi iba dam bakdate vagehe vabak. Om abo Ala bake vagehe bak.”
5. Lahame labi gagu modeha Ananias Petrusat lab gagoho bak aime modeha gi ab ub biti eloham. Làhàmu bas damat li Yahudi dam labe ibi iho koei baumsum di sue nasbe bohu giam baket giame vou futoi ab le baumsuham. Labi Ananias eloho bak lam dam ahebu aime modeha ab iedi modem faideham.
7. Labi faobe ame digat labe aba zoho labe tiga jam foli am nam Safi ra am dat eloho bak vabi neo ame Petrusat azihi num laba ab li oleham.
8. Labihàmu Petrusat neo ame doi lam ve vuusu ab gut gagoham. “Uho modehe bak eba nasi vameadale. Doi nim om dat Ananiasti um bak gohalehe doi ahebu ameo?” Lahahat nam labe fa gago, “Lo, ame doi ahebu am bak.”
9. Lahame labi gagoha Petrusat fa ab gagoham. “Om akati om datti ahu uloholi um amait neha, ‘Iho vastehe im lam, “Ala Boehàda labe Am Aha Nutabe Neànat Ahamo ozobohudi iba beoeo?” laham bak imo modi ozose,’ lahahela? Oba nasi aima. Dam om dat ve baumsuhuda gigi ledam dae num doo obe niba ab vou fuseo vabaleham bak. Om neo visoi vou le baumsulo modem bak.”
10. Lahame Petrusat gi etei labi gagohoilahit Safi ra laha ab ub biti eloham. Labi amu Ananias koei vou le baumsuhu bas dam labe fa li aaha am nam laha elo. Làhàmu nam koei neo visoi vou futoi vou le am dat koei baumsuhu obe laba neo ab vi baumsuham.
11. Labi Yesus bake tu vuzehi vahi meedam damti labi dam giida dua totbahoti ab aime iedi modem faideham.
12. Ame di lam, “Ala abo feàte,” laham bak damat biem bake Yesusat Aho gagu olu Am im vameadume esmozi laiam dam labe iho dam giida labe aasdam tomba laba damat fet aame àvodi ozobohudemna abo na damat ihimo modem biem im feàna lam iho dam bake ahate duana meeda. Labi ame na meedam di labe Yesus bake tu vuzehi vahi meedam dam totbaho labe iho dihasi Fihasi Ala Bake Vou Baedam Num Vàmteabu labe bàhàgo natàh bak tomba laba oli, “Salomonam Num Misia Tom Fihaba Alim Baa,” lahame taluhu zoho laba le Ala bake, “Am abo feàte,” lahame ahu adat iedi Ala bake vou baedalo modem bak ozome bakamta vahe vahedume ame im meeda. Labi neo dihasi laba le neo bakamta vahe vahedume ame im meeda. Labihada.
13. Ame lab meedam bak lam dam kota Yerusalem laba azim dam abo Yesus bake tu vuzehe vab dam labe dam Yesus bake tu vuzehehe dam laba, “Abo feàte,” lahame ahu adat iedi vou baedam meot. Labiham labe ame dam labe lab vahe vahedume meedam bak lam iedi ba ame dam laba vi tau vahe vahedam kai.
14. Labihadamnàme dam amu Yesus bake tu vuzehi meedam dam laba damat modeo, lahit modeo, meit vi tau meit vi tau labihadam labe ame dam im Boehàda Yesus bake tu vuzehi meedam dam debu lam ab dualedamam.
15. Na damat ihimo modem biem im feàna lam Yesusat Aho gagu olu Am im vameadume esmozi laiam dam labe iho meedàmu dam aheda fa dam faideheda zi ileba oumahedume meit abada viso. Meit abada viso. Labihadume vou le zie obe laba vaheda. Damat ozo, “Petrusat nibet lebohotemeam làhà am ala it iba lebe zidazi im fa neàdem bak,” lahame labi ozome zie obe laba ab vahedaham.
16. Labi laha dam kota Yerusalem labe totobeti totobeti esuhu dam labe im dam faideheda ziti im dam setan oli veimahada ziti iubet vou le iubet vou le lahadume kota Yerusalem niba ab vahedaham. Labi ame dam lam ahebu im faidehe bak lam modi fa neàdeda. Labi dam setan oli veimahada zi lam laha ame setan zi laba gagu futodume ilida. Labihada.
17. Labihadume modeha Damat Ala Bake Lomna Ve Vua Vahudam Tohe Dam Zi Labe Im Bisi Boehàdatebo lamti am dam totbaho abo Saduki damat vahokem im vuzehi meedam dam totbaho lamti laham Yahudi busaoda zi labe fa Yesusat Aho gagu olu Am im vameadume esmozi laiam dam laba ahu adat faki teidi ab vabidalo modemam. “Dam giida totbaho lam akati modi ibi iho vahokehe im lam mu fa Yesusat Aho gagu olu Am im vameadume esmozi laiam dam labe ibi iho vahokehe im lam fa aime vuzehi dualelo meedàla?” lahame faki ab faasi vabidalo modemam.
18. Labiha labe ame Yahudi busaoda zi labe am dam amomoi gagome Yesusat Aho gagu olu Am im vameadume esmozi laiam dam lam siàdume meit faina modehezobe si ousu teudem num abo ame num debu bak laba modesuhuda laba ab oumahedaham.
19. Labi disi aibuli modeha Boehàda Alat Am im gagu vou usemda meida labe usi duzu ame num doo bedi fi stoi ame dam lam ab vou futodaham.
20. Vou futodume neàdi gago, “Um nasi Fihasi Ala Bake Vou Baedam Num Vàmteabu labe am ad oli aam bak tomba laba le duzu, ‘Meit akatihasu modem labe Alati vahi ahe neàna bohu vuusdàla?’ laham im lam ahebu dam bake vahokedale,” lahame it gagu vou esmozi fa ab tom ilu seteham.
21. Labihàmu dihambet Fihasi Ala Bake Vou Baedam Num Vàmteabu labe am ad oli aam bak tomba laba oedume le dozeadume ame im lam dam bake ab vahokedamam. Ame Alam im vou useheda labe gagoho baket ab meedamam. Labihadam di labe Damat Ala Bake Lomna Ve Vua Vahudam Tohe Dam Zi Labe Im Bisi Boehàdatebo lamti am dam totbaho lamti iho neo Fihasi Ala Bake Vou Baedam Num Vàmteabu laba abo ibi iho im vameadam tom fi haba laba le vahi nusualada. Labi nusualadume neàdi ame Yahudit Ibi Iho Modem Im Gagu Vàmadi Esum Dam Debu lam abo tai ahamda Israel labe aho vou faat lehe dam debu vuusu im vameame faheme modiam dam busaoda zi ahebu laba ab gagoham. “Vazisi im vameadalo modem bake nasi ledale,” lahame labi gagu oluhemu ame dam totbaho labe neo ledume ab vahe vahedamam. Labi nusualadume neàdi neo dam labe ibi iho gagoho im aime ot vai meedam dam toheda totbaho laba ab gagoham. “Yesusat Aho gagu olu Am im vameadume esmozi laiam dam ame sel oumahehe dam laba le gagome vou futoi vou ledume iho avaelaha tot niba vou dozeadale,” lahame ab gagu oluham.
22. Labi ame dam toheda totbaho labe le ame dam si oumahedam num laba lafusi aaha dam alimdi sedda. Làhàmu fa ab li gagoham.
23. “Iho ame numa le aaha num doo gi teudi modesdamna aaho. Labi laha ame num doo vou aasdamda zi gi doo zi laba vou dozeadume aasdam lahasuhuna le aaho. Lahana iho doo bedi fi stoi aaha dam aam kaio. Gi num alim le aaho.”
24. Lahame labi gagu modeha ame Fihasi Ala Bake Vou Baedam Num Vàmteabu laba vou aasdam polisi zi laba vuusu im vameame faheme modiam boehàda ame. Labi damat Ala bake lomna ve vua vahudam toheda zi laba vuusu im vameame faheme modiam dam ame. Laham dam labe vabi vi ozoda, “Soo! Labihalahit ba neo akati mode?” lahame vabi vi ozoda.
25. Lahame labi vabi vi ozodaha vabamu modeha meit vi oli gago, “Iumeee! Ame dam uho ame sel laba si oumahehe dam lam futodume ilihi dam gi fa Fihasi Ala Bake Vou Baedam Num Vàmteabu labe am ad oli aam bak tomba laba oedume le dozeadume dam bake vahokedamna em aaho.”
26. Lahame labi gagoha ame Num Vàmteabu laba vou aasdam boehàda lamti ibi iho gagoho im aime ot vai meedam dam toheda totbaho lamti fa vahi le ame Yesusat Aho gagu olu Am im vameadume esmozi laiam dam lam iademe betea si fa vou leda. Dam duada zi labe iba kebut beodume oddam bake iedi betea si fa vou leda.
27. Labi fa vou ledume Im Gagu Vàmadi Esum Dam Debu labe iho avaelaha tot laba ab vou dozeadaham. Labi vou dozeadume neàdi Damat Ala Bake Lomna Ve Vua Vahudam Tohe Dam Zi Labe Iba Vuusdam Boehàdatebo labe aho fa dam laba uloome ailo ab gut vameadamam.
28. “Im amu uba mali nehi gago, ‘Uho Yesus Aho amu meedume vou esmoho im lam uho a dam bake vou vahoketedamule,’ lahame uba mali gagoho bak. Lahana uho vedi geàmu kota Yerusalem niba azihi dam ahebu vou vahoketedume uloholehe bak. Uho labi meedam labe, ‘Yesus gagu oteheda im ame dam am tame,’ lahame iba vàlulo modem damat modem bak.”
29. Lahame labi gut gagoha ame Yesusat Aho gagu olu Am im vameadume esmozi laiam dam labe meida Petrus labe fa ab gagoham. “Alat iba, ‘Nehame meedale,’ laham im nim Alat iba gagu esu vàhàdehe bak. Im ba voom biem bak. Im ba im dam ahat gagomda aime modem vabak.
30. Uho gagu damat Yesus ut tetehesuhunaso laba esu paku dou otehe bak. Lahana im tai ahamda ziti ibi iho vou baedam Ala labe Aho ame Da Yesus Am eloho bak labet modi fa ahedi usaha bak.
31. Lahana Alat ahit, ‘Am Adat fa Boehàdateli Amti ahili dam bake vuusdase.’ Labi, ‘Dam Bake Soat Vausu Fa Vei Neàdem Datelese,’ laham bak ozome Aho Yesus fa vuu asum ahoba iuba tom vousai Am ahi totbaho laba ab vou nusuham bak. Aho gi neham bak ozome labihaha bak. ‘Im tai ahamda Israel labe aho vou faat lehe dam nibe iho faina meedam bak lam Alat gi ozahigeàmu fa faamome iba beolo meedam bak lam fa vei mu neàdem bake imo nasi iho faina meedam bak lam voedume fa ahu neà bak vàmadi meedase,’ laham bake ahit labihaha bak.
32. Uho Yesus bake meedaha im lamti Am eloho bak labet Alat modi fa ahedi usaha bak lamti ahebu aame ahate vou vameatedam dam im am bak. Lahana ame im lam ihimo vameadam kaio. Abo Alam Aha Nutabe Neàna labe laha iba vi tau vameadam bak. Meit Alat gagoho im aime uledi meedàmu Alat Am Aha Nutabe Neàna labe ame da laba modi vizi teudedam bak,” lahame Petrusat ab vameadaham.
33. Labi Petrusat lab vameadaha im lam ame Yahudi busaoda bisi feàda zi labe iho aime modeha, “Akati modi ibi iho gagoho im geàmu ame im vou vahoketedàla?” lahame ozome im ahu zoho ab beoham. Labi ahu zoho beoho labe ame im vameadume esmozi laiam dam laba otem bak ab ozoham.
34. Lahana Farisi da meida abo ame Yahudit Ibi Iho Modem Im Gagu Vàmadi Esum Dam Debu laba vahi meedamda meida Gamaliel lam laha laba vi tau nusda. Ame da Gamaliel lam dat ahamda Musat toedume fi hasi esuhu Im Feàna zi ozobohudi fa dam bake vahokedam guru meida am. Labi laha Yahudi dam dua bak Gamaliel bake, “Feàte,” lahame ahu adat iedi vou baedamda meida am. Labihamda labe usai duzu am dam totbaho laba ab gagoham. “Dam lam uho teohe vou futoi faode,” lahame gagu neàdi Yesus Aho Am im vameadume esmozi laiam dam lam ab vou futoham.
35. Labi ame dam lam vou futoi neàdi Gamaliel ame Yahudit Ibi Iho Modem Im Gagu Vàmadi Esum Dam Debu labe im ahu zoho beoho bak ozobohudi dam laba ab vameadamam. “Israel labe aho vou faat lehe dam em dam totbaho oa, uho neha, ‘Imo dam lam beose,’ lahame gagoho bak lam iademe ozome gagu aime modese. Gi ostame àvodehat a beomule.
36. Nehaha bak. Imo amu di iube Teudasat modehe im laba vi ozodase. Ame da labe ahamo ozo, ‘Am abo boehàda feàda am tame. Roma dam bak ibida vou esmozi taho ilise,’ lahame it vou baedam labe dam duana abo empat ratus gagome vamatehe bak. Labihadamnàme meit ab oteham. Labiha labe ame dam labe ibi iho ozome meedam bak lam ba modem kai. Gi neisoat vaitoi am dam aba vuusdam dam lamti gi fi goaitoi setehe bak.
37. Labi ba neo Galileada Yudasat neo lahaho. Amu di iube bak ahebu vuusdamda Kaisarleheda labe, ‘Aho vuusu im vahokedam dam amamohela?’ lahame dam ee toedam di labe di lam Yudas ehet. Yudas di lam ahamo ozo, ‘Am abo feàte,’ lahame iba vuusumdate faki mu fa am dam totbaho vabi esdam bak laba le im aa odoadume neàdi fa vahe vahedume Yahudi damat modem vab dam lam beom bak laba ozome mod ab usnadaham. Labihadamnàme Yudas laha damat ab oteham bak. Labiha labe aho vuusdam dam lam laha fi goaitoi ab seteham.
38. Labihàmu eho etei uba gagolo modem im nim uho aime ozomale. Ame Yesusat Aho gagu olu Am im vameadume esmozi laiam dam lam iho gi labihasuse. Iho gi aalahigeàmole. Neham bak. Ame dam labe ibi iho ozome meedam bak lam gi dam labe ihimo ozome meedameam làhà gi Teudasti Yudasti meedam bakti ulohona meedam bak. Labiha labe dam labe ibi iho ozome meedam bak lam gi neisoat vaitoi dam nim gi fi goaitoi setem bak. Labihàmu ame dam labe ibi iho Yesusat meedaha im vou vahoketedaha bak lam ba iho akati gagu male? Ame dam labe ihimo faidehe bak.
39. Lahana Alat gagu olumeam làhà im ba dam labe iho meedam bak lam iho ba faatom vabiem bak. Gi labihasdam bohu modesdam bak. Iho dam nim vabidameam làhà im gi Alat gagoho im lam mu voolo modem bak. Im ba feà damalem vabak,” lahame Gamaliel labihasu ab vameadaham.
40. Labi Gamaliel lab vabededume vameadaha im lam ame Yahudi dam busaoda im ozobohuda zi labe ame im lam aidume vuzehi uledi ab vei neàdeham. Lahana vei neàdehenàme vedi Yesusat Aho gagu olu Am im vameadume esmozi laiam dam lam fa gagome vou olehezobe dam amomoi gagome ab fi deamahedamam. Labi fi deamahedume neàdi, “Uho Yesus Aho amu meedume vou esmoho im lam a dam bake vou vahoketedamule,” lahame mali gagu neàdi fa ab iddume oudaham.
41. Labi Yesusat Aho gagu olu Am im vameadume esmozi laiam dam labe iho ame Im Gagu Vàmadi Esum Dam Debu labe iho im vameadam tom fi haba lam vou esmozi ladam di labe gi ozahit im nehasu ot gagoidume deelehat lada. “Iho Yesus bake tu vuzehi im Abada meedàmu damat iba lab beome geàdam bak lam Alat ee ibida vousalo ahit uledehe bak,” lahame ot gagoidume deelehat ab ladamam.
42. Labi ame dam labe lab mali gagoho bak lam geàmu dihasi fa ame Fihasi Ala Bake Vou Baedam Num Vàmteabu labe am ad oli aam bak tomba laba modeo, dam labe num ibidate modeo, oli, “Yesus abo Alat Gagu Fihasi Vimteme Oluhu Dat Boehàda am tame,” laham Im Neàna lam dihasi vameadume vahokeda. Labi dihasi neo vameadume vahokeda. Labihada.
1. Labihasu vou vahokedamehamdehe labe dam Yesus bake tu vuzehi meedam dam lam meit dihasi vi tau. Meit dihasi vi tau. Lahadume ab dualedaham. Ame Yesus bake lab tu vuzehe dam lam gi Yahudi dam totbahot moz. Lahana ame Yahudi dam zoho gi Yunani daet vameadam damat moz. Labi dam zoho fa ame Yahudi dam labe im Ibrani dae vameadam damat moz. Labihada. Labi ame di labe dam Yesus bake tu vuzeheda Yunani dae vameadam dam labe fa Ibrani dae vameadam dam laba voe voedam labe Yesusat Aho gagu olu Am im vameadume esmozi laiam dam dua belas laba le faki nehame beàda. “Dam na faheme na vabdate lodam di akati modi maboe ibida na lodam vaba fotidàla? Uho fa gagole,” lahame le faki ab beàdamam.
2. Labi faki beàdàmu ame dam dua belas labe fa dam Yesus bake tu vuzehi meedam dam totbaho ahebu lam gagome ledume bakamta vahi dozeadume neàdi im ab vameadamam. “Ba oa, uho akati iba li vabidàla? Iho Yesus Aho amu meedume vou esmoho im abo Alat vameadaha im lam vahokedam bak fa voou fa na àmna faheme dam na vabdate lodam faite.
3. Labihàmu imo gi nehadase. Im dam totbaho fàsi im neà bakta meedam dam ozome dam tujuh amomoi fi me vase. Ame dam fi me vam di iho gi dam Alam Aha Nutabe Neànat modi vizi teudehedati im ozobohudati lada lamota fi me vase. Labi iho na faheme na vabdate lodam bak vou aasdam bak lam fa ame dam tujuh labe fa ot vai meedase.
4. Labi im Yesus Aho amu Am im iba gagu esmozi laiam dam nibe ihimo gi fa Ala bake tom gagodam bak ame. Labi Alam Dae vou vahoketedam bak ame. Im gi labihasu meedam tadese,” lahame ab vameadaham.
5. Lahame gagohemu etei lab vameadaha im lam dam totbaho ahebu ab aime uledeham. Labi uledehemu dam neham dam ab fi me vadamam. Stefanus ame. Ame da Stefanus abo Yesus bake tu vuzehi Alam Aha Nutabe Neànat aba modi vizi teudeheda damat ab fi me vaham. Labi neo dam nehamda ab vaham. Filipus ame. Labi Prokorus ame. Labi Nikanor ame. Labi Timon ame. Labi Parmenas ame. Labi Nikolaus abo num debu Antiokia labe leheda ame. Ame da Nikolaus lam Yahudi dàt modem vabda am. Lahana Yahudi damat meedam im feàna lam vi tau meedamda moz. Laham dam tujuh lam ab fi me vaham.
6. Labi fi me vame neàdi ame dam tujuh lam Yesusat Aho gagu olu Am im vameadume esmozi laiam dam dua belas laba vou le ame dam labe im anekehà fa ame dam tujuh labe im ohula odotlame Ala bake ab tom gagoham. “Ala oa, Oho dam nim modi dam na vabdate na faheme lodam bak modi vizele,” lahame ab tom gagu vaham.
7. Labi ame na faheme lodam vekehe bak lam dam tujuh labe fa ab meedamam. Labiha labe Yesusat Aho gagu olu Am im vameadume esmozi laiam dam dua belas labe ibi iho Yesus Aho amu meedume vou esmoho im abo Alat vameadaha im lam vou vahoketedam bak lam fa dualehe labe dam aihi vabda zoho ahebu ab aime uloholedamam. Labi laha kota Yerusalem esuhu dam zoho lam laha aime Yesus bake vi tu vuzehe labe ame lab esuhu dam lam Yesus bake tu vuzehe dam debu ab dualeham. Gi dam lada lamota Yesus bake tu vuzehehe vabak. Damat Ala bake lomna ve vua vahudam toheda zi totbaho laha Yesus bake tu vuzehi meedam dam ehet. Labihada.
8. Ame dam tujuh vahana meida Stefanus lam Alat bisi ozahit deeli im neà bak meedamda am bak. Labi laha Stefanus aho na im meedam di gi Alat aba modi vizi teudehe labe aho im dedateli ame im lam meedam bak. Labiha labe, “Ala abo feàte,” lahame damat ozobohudem bake aho damat fet aame àvodi ozobohudemna abo na damat ihimo modem biem im feàna lam damat aasdahit duana meedamda am bak. Labiha labe Yahudi dam dua zoho Stefanusat lab vahoketedam im lam aime Yesus bake tu vuzehi meeda.
9. Lahana Yahudi dam labe Stefanus bake fakemoholi vi beàdam dam totbaho ehet. Ame dam labe amu meit na tet ootedume meedaha vabamu fa ahit iddume oudaha damat moz. Ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num lam tau vuusdam damat moz. Ame Yahudi dam lam abo num debu Kirene iube le. Labi num debu Aleksandria iube le. Labihada. Labi laha Yahudi dam zoho Kilikia bak iube le. Labi Asia bak iube le. Labihadam damat vazisi Stefanus bake faki daet ab beàdamam.
10. Labi modeha Alam Aha Nutabe Neànat Stefanus bake modi vizi im ozobohudi fi gatehemu ame dam labe daetesu keàtedem vabi gi daleàdi vi ozoda.
11. Labi vi ozodaha vabamu dam amomoi bake le neha, “Uho faobe damat vahe vaheme esdam bak laba le nehame ahi vagele. ‘Iho aiha Stefanusat im tai ahamda Musat aho toedume fi hasi esuhu Im Feàna lam feàtàdam bak im aiho. Labi laha Ala bake tom feàtàdam bak im aiho.’ Uho damat esdam bak laba le labihasu vameadale. Labi iho uba doi lose,” lahame le im aa ab odoadaham.
12. Labi le odoadaha labe ame im dedam labe fa Yahudi dam totbaho abo im vabi esdam dam zi laba modi ahu uledi ab usnadaham. Neham dam debu usnada. Yahudi dam bake vuusu im vameame faheme modiam dam busaoda zi ame. Labi dat ahamda Musat toedume fi hasi esuhu Im Feàna zi ozobohudi fa dam bake vahokedam guru zi ame. Labi Yahudi dam totbaho ame. Labihasu ahebu aime uledi usnadume le Stefanus ab siham. Si vou le ame Yahudit Ibi Iho Modem Im Gagu Vàmadi Esum Dam Debu labe iho avaelaha tot laba ab vou le vou duzuham. Labi vou duzu neàdi ame im dedam labe amu dam amomoi laba im aa odoadume neàdi meia im giomimna vamealo modem dam lam neo gagome vi oli ab dozeadaham. Vi oli dozeadume neàdi amu vameaha bak labe vi ozome Stefanus am fako nu laba aasu dam boehàda zi laba ahi vagehe im nim ab faasi vameadamam. “Ame da nibe Fihasi Ala Bake Vou Baedam Num Vàmteabu laba feàtàdaho. Labi dat ahamda Musat aho toedume fi hasi esuhu Im Feàna laba laha feàtàdaho. Dihasi meeda. Dihasi meeda. Labihadam dàt modem bak.
14. Labi im laha ame da nibe nehame vameadam bak im aidaho. Aho nehame vameada. ‘Ame Da Yesus Nazaretda labe ame Num Feàna nim Aho ba beome faato tame. Labi laha ame Da Yesus labe fa dat ahamda Musat vou vahoke usdume iba vou fuhu Im Feàna lam Aho fa veimdeda tame,’ lahame vameadam bak im aidaho,” lahame giomim Stefanus bake vàlu fa dam boehàda zi laba ab vameadamam.
15. Lahame ame giomim lam vameadam bak aidam labe ame Im Gagu Vàmadi Esum Dam Debu labe Stefanus am dauhade laba fako zisu ab aasdamam. Aasdume ozo, “Dat dauha lam gi Alat Am im gagu vou usemda dauha ogatedam bakti ulohona aada,” lahame ab ozoham.
1. Labi ozoha vabamu Damat Ala Bake Lomna Ve Vua Vahudam Tohe Dam Zi Labe Im Bisi Boehàdatebo labe Stefanus bake vi ailo ab gagoham. “Damat etei oba vàlu vameadam im lam imbona vameadào?”
2. Lahame gagoha Stefanusat aho veibadalo im ab faasi vameadamam. “Faod. Dam ebeda oa, ai giidati dubu giidati eho vameadalo modem im nim uho nasi aimale. Nehaha bak. Aham di iube im Yahudi dam vou faat lehe tai Abraham labe aho Mesopotamia bak laba azim lahasuhu di labe abo Haran bake laha vab di labe Ala bisi feàda labe aba tahi im nehi vameadaha bak. ‘Om nasi bak obo oho li azibehamdehe bak lamti om damti labihasu vou esmozi Eho oba gagolo modem bak laba lale,’ lahame aba labi vameadaha bak.
4. Laha bak aho aihemu bak abadate Kasdim lam vou esmozi fa, “Haran,” lahame taluhu bak laba ab laham. Labi Haran laba le azibe Abraham labe am ai Tera ab eloham. Labi am ai eloi seti ba Alat am neo gagome iho etei azihi bak dam amuda gagom Kanaan bak laham bak niba ab oluham.
5. Labi niba li azihi di lam Alat ba aba bak koena lu bak dedatelehe vabak. Gi mei bake li azi. Di lam Abraham data faaha vabna li azi. Labihadamnàme Alat ozahit Abraham bake gi nehi fet nasi vameadume esuhu bak. ‘Kanaan bak nim ahebu oho ba vou faat ladam dam lamti um bak dedamalem bake Eho uba ba loda tame. Lahana nasi lom kaio. Amu oho ba vou faat ladam dam lam ba mei bak Mesir bak laba le abo azibehamdem bak. Azibehamdem di labe ame bak dedam abo Mesir dam labe om dam simtedi na tet ootedume meedam damali om dam vabidume empat ratus tahun fole tame.
7. Lahana um simtedi uba na tet ootedume meedam dam lam Eho ba, “Beose,” lahame na asimbuna feà ame dam laba mode tame. Labi beodume neàdi om dam fa isi oudume bak lada lam vou esmozi fa Kanaan bak niba fa li Eba vou baedam bak,’ lahame Alat Abraham bake nasi fet vameadume esuhu bak.
8. Labi, ‘Abrahamat Aba vi ozome vàmadi tu vuzeheo?’ laham bak Alat ahit modi ozolo Aho Abraham bake neha, ‘Lahana om laso aubehà sokba ukbomta Eho ozo, “Om abo imboo?” laham bak Eho ozo tame,’ lahame Abraham bake gagohemu Abrahamat uledi ame Alat nasi fet aame ozobohudemna lam am laso aubehà sokba ab ukboham. Labi Abraham ba am adat Isak faasi usi delapanlehemu Isak am laso aubehà sokba laha ab ukboham. Labi ba neo Isak am adat Yakub faasi am laso aubehà sokba laha ukbo. Labi ba neo Yakub am adam duabelas faadam di labe laha im laso aubehà sokba laha ukboda. Labihadume Alat gagoho baket ab vou mode ledaham. Ame Yakub labe am adam duabelas lam im tai ahamda elaidamda zi labe im Yahudi dam bada nim vou faat ledume im omtobeda am bak.
9. Labi im tai ahamda elaidamda zi totbaho labe im ai Yakub am adat meida Yusuf bake bisi deeli sue neàna lohemu Yusufam dubu giida labe aba faki teidi im vahada Yusuf si dam amomoi bake lu doi ab vaham. Labi dam Yusuf vaha dam labe neo Yusuf si ve Mesir bake vou le Mesirda ee eheda laba neo lu doi ab vaham. Labi ame Yusuf doit vahada labe Yusuf bake am na ootedume ab teo meedamam. Labihamnàme Alat Yusuf bake fako zisu vou goda.
10. Vou godam labe ame damat Yusuf vabidume alihi nemahusi meedam bak lam ahebu Alat modi fa ahagoa foou neàdeda. Labi Alat laha Yusuf modi im ozobohudi fi gateda. Labiha labe Yusuf labe aho Firaun abo Mesir boehàdatebo labe aba aho avaesdam tot laba li duzu im vameadam di lam Alat ahit modi Firaun labe Yusuf alihi gut aam di gi deelehat im vameadam bak. ‘Bisi im ozobohudi meedam tademda ame?’ lahame gut aame deelehat im vameadam bak. Labihàmu ame Firaun labe aho fa Yusuf gagome Mesir bak azihi dam ahebu vuusu im vahokedam gubernur ab modeham. Labi aho laha am num feàda lamti am na utoho zi lamti ahebu fa Yusuf bake lu aho fa am nali dam bake gagome meeda. Labihada.
11. Labihadume modeha ba di labe Mesir bak ahebu lamti Kanaan bak lamti ahebu di neà faasi na ab aladamam. Labi dam ahebu gi ideia ibzidam bak bohu ab vuusdamam. Na vabali idoali feà bak fusi dam ab geàdam bohu meedamam. Labi im tai ahamda laha na foli na le vam bak vabak.
12. Lahana im tai ahamda Yakub aho aiha na gihoemda gandum ahum Mesir bak laba na duana vahehena aihemu Yakub labe am adam im tai ahamda totbaho gagome Mesir bake ahamte ab oluham. Gandum vam bake ozome am adam laba doi lu ab oluham. Labi laba le gandum ve fa ab vou leham.
13. Labi gandum lada lam folehemu Yakub neo am adam gagome fa neo Mesir bake oluhu bak ab behàsdeham. Neo le gandum vadam di labe Yusuf amu, ‘Am Yusuf am tame,’ laham bak vasteheda labe am dubu etei neo lehemu am dubu bake, ‘Em um vahada Yusuf am tame,’ lahame ahate ab fi deham. Fidesi ahate gagohemu meit aime fa ame Firaun laba le ab gagoham. ‘Yusuf labe am dam totbaho leho,’ lahame le labi gagohemu ame Firaun labe ab ozobohudeham.
14. Labi Yusuf ba neo am ai Yakub bake im neo ab oluham. ‘Om data lahi nazohti ahebu osi fa Mesir bak niba vou li esule,’ lahame am ai bake ab oluham. Labihàmu Yakub am adam lahi nazohti bak ibida vou esmozi Mesir bake li ab aziham. Dam ahebu Mesir bake le esuhu dam fa vahi gagom di tujuh puluh lima ehete. Laham dam labe li esdamehamdi Yakub lamti am adam zi abo im tai ahamda totbaho lamti ahebu ab elodume seddaham.
16. Lahana ame koeiso modeo, faa zi lam modeo, Mesir bak laba voedume vou esmoho vabak. Fa Sikem bake vou le Abrahamat amu di iube Hemor vou faat lehe dam bake doi perak taluhu doi lu aho vaha ke bumat laba fa vou le vahehe bak.
17. Labi Alat amu Abraham bake nehame nasi fet gago, ‘Oho ba vou faat ladam dam lam Eho vi vame Mesir bak vou esmozi fa Kanaan bak vou ladume fa um bakele tame,’ lahame amu fet gagu esuhu im lam Aho modi imbodelo modem bak fuseo vabalehe di labe im Yahudi dam ahamda Mesir bak laba azihi dam fa debu ab dualedaham.
18. Labi dat ba diamut boehàdateboleheda lam aho Yusufat amu Mesir dam bake tau vuusu meedam bak lam bieheda labe fa boehàdateboli Mesir bak vuusda.
19. Ame Mesir boehàdatebo bada labe im tai ahamda vabidume fai bak tadeheda am bak. Aho ozom, im tai ahamda labe ba debu dualem bak labna zohàme im data etei faahada, ‘Elom neàte. Bako iuba voedale,’ lahame im tai ahamda laba tet ootedahada am bak.
20. Ame di labe Musa ab faaham. Ame data lam abo bu neàna faaha daboseàt moz. Labi faasi am aiti am oiti Mesir boehàdatebo labe gagoho baket modehe vaba num bumat laba aa vasti do fi sdume ala làteladi modeha data meb dae meit aim zohàme am oiat ve bako vou futoi ab esuham.
21. Bako laba vou esdam di labe Firaun labe am adnamat li aaha data aahemu ab vaham. Ve togoili ab vou budualedaham.
22. Labi oi Musa ve voaha nam labe fa dam amomoi bake gago, ‘Uho Musa bake na iho Mesir dam labe iho meedam bak lamti im dae vameadam bak lamti vahokedume Musat fà ame baket meedase,’ lahame ab gagu meedaham. Labi meedaha labe Musat feà dateli im gagom di dam ulededa. Labi Musat na meedam di gi ulohodesu meeda. Gi labihada.
23. Labi ba di iube Musat ozo, ‘Em gi Israel labe vou faat lehe dam debut mode?’ laham bak ozobohudi am tahun empat puluh foli Israel labe aho vou faat lehe dam abo am dam totbaho lam aalo àhàkehemu ahu vàmadi gagu ab laham.
24. Labi le aaha Mesir dam meida labe fa Israel dam meida beome geàdam bak ab aaham. Laha bak aahemu Musat vedi am faaha dam debu ame Israel da laba fa tau Mesir da ab oteme vasteham.
25. Musat ozo, ‘Am Israel dam debu lam Mesir damat simtedi vabidam bake Alat fa iddume oudam bake am ab oluham bak,’ laham bak Israel damat biem bake fa aba aame ozo, ‘ “Im iddume oudamda ab lehame?” laham bak gut aame ozobohudem bak,’ lahame ozoho labe Musat ame Mesir da lam ab oteham. Labihasu ozohonàme damat, ‘Ame da am tame,’ laham bak ba vuzehem kai. Gi fa moh.
26. Labi ba neo izi dihasi Israel dam behàsu ihimo ot beluiam bak Musat neo ab aaham. Laha bak aahemu aho fi baelo gago, ‘Ba oa, um amedam debu akati ot beluidàla?’
27. Lahame fi baedume modeha meia fohoda labe fa Musa bake odosi veioi gago, ‘Aa! Meit ihimo ot beluidalo modem bake oba amat gagu feà dateli meia vuusu im vahokedà? Oba amat gagu oho fa uloome vi aime neàdi gagu modidam dateli iba uloome modidà?
28. Làhà, oho màt Mesirda otehe bak fa neo em otelo modeo?’
29. Lahame labi gagoho bak aihemu aho amu vastehe im fi dehemu Mesir vou esmozi mei bake Midian laba itame ab le tau aziham. Laba le tau azibe Midian lahi ve data behàsu ab faaham.
30. Labi Midian laba le azibehamdi tahun empat puluh ab foleham. Ame di labe Musat gi bak aotba baa bohu dam vaba alim bak, ‘Sinai,’ lahame taluhu sibu adba laba aidam di labe Alat Am im gagu vou usemda labe aba tàh. Aba tàhà di nehada. Musat aho aidam bak labet tom aaha ut aabadehena buà vuat eludam bohu modesdamna sutem gikina aadàmu àvodi ozo,
31. ‘Em amu aam vabna le aase,’ lahame le netàdesome modeha Boehàda labe Am dae gi vua labe aba im nehi vameadamna ab aiham.
32. ‘Em om tai ahamda zi labe iho vou baedam Ala Em am tame. Abo Abrahamti Isakti Yakubti labihasu vou baedam Ala Em am tame,’ lahame Aho aba labi gagoho bak aihemu iedi faa gukedume aam ladi nom bohusu gi dogoit ahamo aida.
33. Labi modeha Boehàda Alat aba neo nehi vi vameada. ‘Oho li duzuhu bak niba Eho li modesdam labe fi ham bak tame. Om naba dusumna vihitole!
34. Em Israel dam debu lam Mesir dam labe faina modi vabidume geàdam bak lam Em ab aame neàdeham bak. Ame Mesir dam labe Israel dam debu laba na tet ootedume gagu teo meedam labe geàdam bak lam Em aime faobekesi ab nom iluham bak. Eho Mesir dam beome afoezobe Israel dam debu fa vietoi fa iddume oudam bak ab ozome ahu vàmadeham bak. Labihàmu Eho om nasi Mesir bak laba fa olulo modem bak,’ lahame Alat Am im Musa bake ab vameadaham.
35. Ame da Musa lam Israel damat amu neha, ‘Ihimo meedamna oba amat gagu feà dateli iba vuusu im vahokedà? Oba amat gagu oho fa uloome vi aime neàdi gagu modidam dateli iba uloome modidà?’ lahame amu feàtàme mohoda am. Labihamnàme Alat ozahigeàmu Am im gagu vou usemda labe am dae ut aabadehena buà vuat eludam bak labe neha, ‘Om bak nim vou esmozi Mesir damat om Israel dam simtedi meedam bak laba le Mesir dam ootedume Israel dam fa isi oudume fa oho vuusdale,’ lahame vameadume oluhuda Musa am.
36. Ame da Musa lam Mesir dam labe, ‘Ala abo feàte,’ lahame damat aame ozobohudem bake aho damat amu aam vabna alimeat fet aame iedi àvodi ozobohudemna abo na damat ihimo modem biem im feàna lam meedamda am am bak. Labi ame da laha Israel dam fa vietmome vuusu Mesir bak lam fa vou esmozi vou ladamda am am bak. Labi ame da Musa laha Ket Usimoho Itea Feàna lamti bak aotba baa bohu dam vaba alim bak lamti laham bak laba im feàna lam meedamda am am bak. Labi ame da Musa laha ame Israel dam vuusu bak aotba baa bohu dam vaba alim bak vou godume tahun empat puluh folehe im meedamda am am bak.
37. Labi ame da Musa lam laha im Israel dam ahamda zi laba neha, ‘Ba diamut uho vou faat ladam dam meida laba Alat fa gagome emti ulohoda Aho vameadaha im aime fa dam bake ahate vameaidam Dateli uba olu tame,’ lahame aham di iube nasi fet vameadume esuhu dat am am bak.
38. Labi im tai ahamda abo Israel dam labe iho ame bak aotba baa bohu dam vaba alim bak bakamta vazisi godam di labe ame dam zi laba vuusu vabiedamda Musa am bak. Ame di labe laha ame da Musat Sinai Sibu laba laisi Alat Am im gagu vou usemda labe aba im vameadume afoezobe aho ame im lam ve fa vou lezi im tai ahamda zi laba tohe duzu vameadamda am bak. Labi Alat iba aasdàmu, ‘Iho akatihasu im neà baket meedàla?’ laham im lam Sinai Sibu laba laisi aime fa lezi im tai ahamda zi laba vameadume neàdi fa iba dam badate vou vamea usdaha im debu modeheda Musa am. Labihasu ahebu modemda Musa am bak.
39. Labihadamnàme Musat im tai ahamda zi lam vihitoi Mesir bak lam vou esmozi fa Kanaan bak vou lalo modem di labe im tai ahamda zi labe vedi Musat vameadaha im lam ab moham. Ba Musat gagoho im lam vuzehi meedaha vabak. Vedi neha, ‘Musa boehàdateli iba vuusu meedam bak im fa moho,’ lahame gagu afoezobe, ‘Fa im Mesir bake lase,’ lahame im ahu vàmadi vi ozoda.
40. Labi Musat Sinai Sibu laba laisi meedam di labe im tai ahamda zi labe vedi Musam dubu Harun bake ab vameadaham. ‘Iba ostam alalehena iho vou baedamna iba vuusu fa Mesir bake vou lam ala amomoi modele. Ame da Musa im Mesir bak vou esmozi vietoi vou leheda maem sibu iuba le setehe bake iba vuusum ostam alalehena modele. Da lam akati le abehamdi setehela?’ lahame Harun bake ab vameadaham.
41. Làhàmu Harun uledi ame di labe ame dam vazisi sapi adat gàhàda emasat it modeme ab alaleham. Ostam ala modi na fi ho oddume vua vahudam labe ostam ala laba lodume vou baeda. Labi ame dam labe neha, ‘Ostam ala iho anekehàt modehena abo neàna modeho,’ lahame deeli it daetbadam labe kuguida. Labihada.
42. Labihàmu Alat ame dam lam mu afoezobe ibi iho ala digadda lamti ala useheda lamti falo zi lamti abo asum ahoba iuba modealahana labihasu ahebu, ‘Fà alali vou baedase,’ lahame gi ozahigeàmu ab mu vooham. Alat ame dam laba lab mu vooho bak lam gi dam ahamda Alat vameadaha im aime fa dam bake ahate vameaidaha dam labe ibi iho nehi toedaha im ulohoda ehe bak. ‘Um Israel labe aho vou faat lehe dam oa, uho bak aotba baa bohu dam vaba alim bak vazisi tahun empat puluh godam di labe uho Eba vou baedalo um na fi ho oddume vua vahudaha vaba gi na ostamna zi laba vou baedalo na fi ho oddume vua vahudaha bak.
43. Eba vou baedalo ame na fi ho oddume vua vahudaha vaba gi nehi meedam damat modem bak. Uho bak aotba baa bohu dam vaba alim bak ibe laidam di labe uho vedi na fi ho sokbat tàhà num koena buà auet it modi alalehena, “Molok azihi num am tame,” lahame vou baedaha bak ame. Labi laha uho vedi, “Falo Refanbada am tame,” lahame modi alalehena laba vou baedam bak ame. Uho Eba vou baedaha vaba vedi na ostamna it auet modehena laba, “Ala am tame,” lahame ahu adat iedi ogomaladume vou baedalo ame na behàsu it auet modehe bak. Labiha labe damat um si Babel bak foti bak bohu bak iuba mudoli vaitom bak Em ahit uledehe bak.’ Lahame ame da Amos labe Alat aba vameahana aime toeme esuhu im lam ab imbodeham bak. Alat im Israel dam debu abo im tai ahamda zi lam ozahit labihasu ab mu vooham bak.
44. Im tai ahamda zi labe bak aotba baa bohu dam vaba alim bak laba ibe laidam di labe Alat Musa bake neha, ‘Teohet mome fa faatoiam num abo na fi ho sokba tàm num mome Eba vou baedale! Labi Em Israel dam bake tau azim Ala, “Em am tame,” laham bak Israel damat biem bake fet aame fà ozobohudem bake ame num lam oho mole,’ lahame aba gagu ame num ab moham. Ame num moho di lam Musat gi Alat aba neha, ‘Nehasu modele,’ lahame aba vouhome oluhu bak lamti ulohona moho bak. Laham num lam im tai ahamda zi labe bak aotba baa bohu dam vaba alim bak ibe faelo modem di labe ame num lam fa vi faamome vou fali fa neo mome Ala bake vou baeda. Labihadam numat moz.
45. Labihadameham di labe im tai ahamda totbaho ame bak alim bak laba eloda. Labiha labe ame Ala bake vou baedam num misia lam im tai ahamda zi labe iho vou faat lehe dam labe neo fa vi ve Musam im ot vai meedamda Yosuat iba neo vuusu ame bak vou modetedume fa Kanaan bak niba ab vou leham. Labi Yosuat im Israel dam lam Kanaan bak niba vou li veimai esulo modem di lam Alat iba tau bak dedama nohisi ilime im Israel damat fa esu. Labi neo num debu meida laba neo laha ame baket neo mode. Labihadume im fa bak dedamali ab esuham bak. Abo im Yahudi ba dam etei azihi bak nim im tai ahamda fa im bak dedamali ab esuham bak. Labiha labe ame num lam taho vooho vabak. Gi labahana bohu vuusdam numat modem bak. Ame num lam damat vou modetedume fa im tai ahamda Daud boehàdateli Israel dam vuusu im vahokedamzobe ame num lam ab vooham bak.
46. Labi ame Boehàda Daud labe aho dam vuusdam di lam Alat aame ozoha, da lam dam bake abo neàna vuusdàmu ab aame deeleham. Làhàmu Daud Ala bake neha, ‘Im tai ahamda Yakub labe aho aham di iube vou baedam Ala oa, Oho eba gagu Oba vou baedam num aabo eho mom neào?’
47. Lahame labi gagomnàme Alat Daud ame num aabo mom bak male. Lahana vedi Daum adat Salomo ame Ala bake vou baedam num aabo lam fa ab moham.
48. Lahana eho etei gagolo modem im nim uho mahate ozodale. Ala Bisi Feàda lam im damat anekehàt moho num azim biem bak. Eho gi neham bak ozome uba labi gagoho bak. Dam ahamda Alat vameadaha im aime fa dam bake ahate vameaidahada meida Yesayat aham di iube nehame toeme esuhu bak.
49. ‘Ala Boehàdat neha, “Asum ahoba ium Eho azi dam bakda ahebu vuusdam bak am tame. Labi bak adba nim Em naba odosdam bak am tame. Labiha labe ba Eho ake li azimna oho Eba num moe? Ba Eho ake li teohet betea aidà? Bak nimti ahebu Eho modehena tadehe labe labiham biem bak.” ’ Lahame Yesayat labi toeme esuhu bak.”
51. Lahame Stefanus labi vameadume neàdi vaitolo neo ab vi vameadamam. “Uho neha, ‘Alat Musa bake vameame aho aime fa im tai ahamda zi laba vou vamea usehe im feàna lam Eho feàtàho. Labi Fihasi Ala Bake Vou Baedam Num Vàmteabu laba Eho feàtàho,’ lahame eba giomim vàlumnàme em labihaha vabak. Bisi git modeheda um Yahudi busaoda zi am bak. Um bisi odohabu damat modem bak. Abo gi Yahudi damat modem vab damti uloholi Alat iba gagoho im aihina moudume odohabuli meedam damat modem bak. Um abo um tai ahamda zi labe iho modehe bakti uloho bak. Alam Aha Nutabe Neànat uba neha, ‘Nehame meedale,’ lahame um tai ahamda zi laba vameadaha, ame dam labe moudaha bak. Labi um etei bada nibe gi ame baket neo meedam bak.
52. Labi Alat vameadaha im aime fa dam bake ahate vameaidaha dam ahamda zi lam Aho im tai ahamdate oudaha di lam ame dam labe ba meida vuzehi im abada aihi vabak. Gi Musa giidati ahebu mu vabidume moudaha bak. Labi laha ame Alat vameadaha im aime fa dam bake ahate vameaidaha dam ahamda labe neha, ‘Alat Aho Gagu Iademe Im Vamdesu Meedamda Aho ba olu tame,’ laham im fet gagu esuhu dam lam im tai ahamda labe laha vou ote lehe bak. Labi etei nim uho ame Iademe Ahu Vamdesu Meedamda Yesus lam uho vou fohome dam bake ub lu gagu oteheda um am bak.
53. Labi ame, ‘Nehame meedale. Nehame a modemule,’ lahame Alat vameadume fi hasi esuhu im zi lam Aho Am im gagu vou usem dam zi labe fa Musa bake vou usi vameadume aho fa neo im tai ahamda laba vameada. Labi im tai ahamda labe neo vamea vou usehena uho laha aihinàme vedi ailahigeàmu moudaha bak,” lahame Stefanusat ab vameadaham.
54. Labi vameadume modeha ame Yahudit Ibi Iho Modem Im Gagu Vàmadi Esum Dam Debu zi labe Stefanusat lab vameadaha bak aime faki feà bak fusi im ahu zoho ab beoham.
55. Lahana ame da Stefanus Alam Aha Nutabe Neànat aba modi vizi teudehe labe am gi asum ahoba laba tom aasda. Tom aasdume modeha Ala feàda labe Aho aidam laba vua bisi fako iedemna fau doho bak lam ab aaham. Labi Alam ahi totbaho laba aaha Yesus Ala bake tau na ahebu vuusdam bak ab vi aaham.
56. Aame gago, “Iumeee! Asum fatahivaha bak em aaho. Labi Asum Ahoba Iubet Bak Niba Li Dateleheda labe Aho fa Alam ahi totbaho laba duzu na ahebu tau vuusdam bak em aadalo,” lahame ab aame gagoham.
57. Lahana ame Yahudi busaoda bisi feàda zi labe Stefanusat lab vameadaha bak aim mohemu vedi dogoi anekehàt baguamdi ostam daebu faasi tozoda. Labi ab usnadume Stefanus otelo ab fi di siham.
58. Si vou keadume num debu bak vou esmozi bàhàgo vou fusi ame dam Stefanus bake giomim vàlu meedam dam labe ke voom biem bake im sue ahobada vihilame dat ee gagom Saulus lahamda gi doudamda laba im sue vaheme neàdi ke visomoame Stefanus bake ab beodamam.
59. Ame dam labe Stefanus ket beodam lahasuhu di labe Stefanus Ala bake ab tom gagoham. “Yesus eba vuusum Boehàda oa, em it oazehena Oho vale.”
60. Lahame tom gagu neàdi Ala bake vou baedalo ahit ogomasu biti fa neo bisteat tom gagoda. “Boehàda oa, dam nibe eba beodam bak faina modehe bak nim Oho a fa vi belu vataumule. Gi ozahigeàmu fa vei neàdedale,” lahame tom gagu neàdi ab eloham.
1. Labi Saulusat laha neha, “Ahole oteho,” lahame ab deeleham. Labi Stefanusam koei lam dam Ala bake tu vuzehi am dae aime keàtedi meedam dam totbaho labe ve ab baumsuham. Labi koei baumusuhu dam labe im ahu faidi feà bak fusi ab vou meb azidamam.
2. Labi Stefanus otehe digat labe faasi dam Yesus bake tu vuzehe vab dam labe fa dam Yesus bake tu vuzehi vahi meedam dam kota Yerusalem laba esuhu dam laba vabidam bohu ab faasi meedamam. Labiha labe Yesus bake tu vuzehe dam totbaho fi goaitoi ilime Yudea bak lamti Samaria bak lamti ahebu iuba la. Iuba la. Lahadume ab lailaiame seddaham. Lahana Yesusat Aho gagu olu Am im vameadume esmozi laiam dam ba fi goaitom kai. Gi kota Yerusalem laba esda.
3. Labi ame da Saulusat aho ozo, “Ame Yesus bake tu vuzehi vahi meedam dam laba eho vabidume dam lam fa Yesus bake tu vuzehem bak fa mu voose,” lahame ozoho labe dihasi vabida. Dihasi vabida. Gi labihasu meona bohu vuusda. Ba vaitom vaba aho gi nehada. Ame Saulus labe aho mei numa oli Yesus bake tu vuzehi meedam dam lahi modeo, dam modeo, tet si vou kea lame vou futo. Labi neo num meida iuba neo oli mei neo tet si vou kea lame vou futo. Labihadume am dam fa gagome ame dam zi lam vou le meit faina modehezobe si oumahedume teudem num laba oumaheda. Labihadamda am.
4. Labi ame Yesus bake tu vuzehi meedam dam fi goaitoi seddaha dam labe ibi iho ilime esdam bak laba azim dam labe im nehame vameada. “Ame Alat Gagu Fihasi Vimteme Oluhu Dat Boehàda lam Yesus ame Da am tame,” laham Im Neàna lam iuba le vameadume fi deda. Labi ame dam totbaho labe laha ibi iho ilime esdam dam laba ame Im Neàna lam neo vameadume fi deda. Gi labihada.
5. Labihadam di Filipus laha Samaria bak labe am num debu meida laba le, “Ame Alat Gagu Fihasi Vimteme Oluhu Dat Boehàda lam Yesus ame Da am tame,” laham Im Neàna lam laha laba le vameadume fi deda.
6. Labi ame dam duada labe Filipusat lab vou li vou vameatedaha im lam damat aida. Labi aho dam giida labe, “Ala abo feàte,” laham bak damat biem bake aho damat fet aame àvodi ozobohudemna abo na damat ihimo modem biem im feàna lam aho meedam bak lam damat aada. Labihadàmu ame dam dua totbaho labe Filipusat aho vou li vameadaha im lam aime uledi ab vuzeheham.
7. Labi laha ame da Filipusat mei ahu oli veimaha setan laba, “Om taho futoi da nim vou esmozi itale,” lahame ootedam di ame setan lam aime geme futodume itaidam meot. Labi aho laha dam nao zoho nutabedeheda zi lamti dam ouha faideheda zi lamti aho modi fa neàdedam meot. Labiha labe dam dua totbaho labe vahi Filipusat lab vou vameatedaha im lam ab aime tu vuzeheham.
8. Labihadam labe ame num debu laba azim dam ahebu ab deeli esdamam.
9. Ame num debu laba dat ee gagom Simon lahamda lam laha laba azi. Ame da Simon lam abo bisi aha daebu feàna meedamda am. Gi amu di iube faasi koba feà vou mode ledume Samaria dam ahebu aame àvodi meeda. Am laha dam bake neha, “Em bisi feàda am bak,” lahame it daetbadam labe dam bake vameada.
10. Labihasu meedam labe dam ahebu ee ehe damti ee vab damti labihasu Simon im vameadam di uledi abo iademe aidam meot. Labi laha damat vedi nehame gagodam meot. “Alat ame da Simon laba modi vizi abo teudehe labe ame im feàna lam meedam bak. Am Abo Im Modem Feàda am bak,” lahame git ozome Simon bake vou baedam meot.
11. Ame da Simon aho aha dae mome dam fa neàdeda. Labi neo mome dam modi eloda. Gi labahana bohu vuusdam labe dam ahebu gi dihasi aame àvode. Dihasi aame àvode. Labihada. Labihadàmu ame dam labe aba tu vuzehi aho gagom im ule neàt aidume meedam bak.
12. Lahana Filipusat ame dam laba neha, “Alat Gagu Fihasi Vimteme Oluhu Dat Boehàda lam Yesus ame Da am tame. Uho Aba tu vuzehemeam làhà Alat uba deeli vame Am damali Aho vuusu im vahokeda tame,” laham Im Neàna lam dam bake ba vameadume fi dedume modeha dam ziti lahi ziti iho amu Simon bake tu vuzehe bak lam fa mu voou fa Filipusat etei lab vameadaha im lam aime uledi Yesus bake ab tu vuzehedaham. Labi ame dam labe iho Yesus bake tu vuzehe bak lam dam giida labe biem bake Filipusat vuu valo ab baptisleidamam.
13. Labi ame da Simon laha vi tau Yesus bake tu vuzehi valo ab baptisleham. Labi valo baptisli neàdi gi Filipus bake akili tau goda. Filipusat aho dam giida labe, “Ala abo feàte,” laham bak damat biem bake aho damat fet aame àvodi ozobohudemna abo na damat ihimo modem biem im feàna lam Filipusat ame im modem meo dàt modemu aho àvodi da laba akili bak iuba lào? Bak iuba lào? Gi laba ab vi tau vou godamam.
14. Labi Yesusat Aho gagu olu Am im vameadume esmozi laiam dam totbaho kota Yerusalem laba esdam labe iho aiha Samaria bak laba azim dam dua totbaho Yesus Aho amu meedume vou esmoho im abo Alat vameadaha im lam ule neàt aime tu vuzehe bak aihemu Petrusti Yohanesti utasi laba ab oluham. Dam etei tu vuzeheda im vule vi vahokeme esulo ame dam behàsu lam ab oluham.
15. Amu oluhu vab di iube ame Samaria bak laba azim dam abo Yesus bake tu vuzehe dam lam Alam Aha Nutabe Neànat modi vizi teudehe vabak. Gi, “Iho Boehàda Yesus bake tu vuzehi Am damalehe dam ame?” laham bak dam giida labe ozobohudem bake valo baptisledaha bak lamota mode. Làhàmu Petrusti Yohanesti ame dam behàsu labe Samaria dam niba li im anekehà fa dam nibe im ohu laba odotlame ab tom gagodamam. “Ai Ala oa, Oho Om Aha Nutabe Neàna dam niba modi nom ilu vizi teudedale,” lahame tom gagodume modeha Alam Aha Nutabe Neàna labe nom ilu dam laba ab modi vizi teudedaham.
18. Labi Simonat vi aaha, “Yesusat Aho gagu olu Am im vameadume esmozi laiam dam labe im anekehà meia odosu tom gagu Alam Aha Nutabe Neàna nom ilu meia vizi teudem meote,” lahaha bak vi aahemu ame im feàna doit valo Petrusti Yohanesti dam ahim laba ab gagoham.
19. “Uho meia ulasi vizi teudemna lam eba modi vizi fa anekehà ebedat neo meia laha odosu tom gagodam di Alam Aha Nutabe Neàna labe ame da laba nom ilu modi vizi teudese.”
20. Lahame gagoha Petrusat fa gago, “Seee. Alat om doiti ve vua elum sutem gikina bohu laba nom voole! Om abo git ozoho. Alat Ahamo ozome Am Aha Nutabe Neàna lam meia modi vizi teudemna lam gi teo modemna oho vedi doit valo gagoho bak lam om git ozoho bak.
21. Alat ozoha, om ahu iademe vamdesu meedaha vab dàt modem labe ibi iho meedam bak lam ba oho vi taum meedam biem bak.
22. Iho ozoha, iho meedam im lam oho abo ahu adat teidi duana faki meedam bak. Labi laha na im fai bak lam oho vedi ahu vàmadi vi ozodam bohu meedam bak. Labihàmu oho faina lab meedaha bak lam nasi voou fa ahu neà bak vàmadi Boehàda bake tom gagodale. Labi om ahu git ozoho bak lam Alat gi ozahigeàmu fa faatoi oba beolo modem bak lam fa vei mu neàdem bak Aho uledeo? Uledem vabao? Laham bak em vabileho. Gi ozahit tom gagodale.”
24. Lahame labi gagoha Simon fa gago, “Làhà. Uho etei lab gagoho bak lam eho git modehemu Alat eba beom bak labna zohàme uho fa Boehàda bake tom gagodale,” lahame ab gagoham.
25. Labi Petrusti Yohanesti iho amu Yesus bake tu vuzehe bak lam ame num debu laba azihi dam laba ahate vameada. Labi neo im Boehàda Yesus Aho amu meedume vou esmoho Im Neàna lam vi vameadume fi deda. Labihasu meedume neàdi num debu lada lam vou esmozi fa kota Yerusalem laba ab ladamam. Labi fa ladam di labe ame Samaria bak laba modealadaha sii laba ame Im Neàna lam neo vou vameatedume fi deda. Labiha ladume kota Yerusalem laba ab lafuham.
26. Boehàda Alat Am im gagu vou usemda meida labe Filipus bake nom ilu gago, “Om nasi ba totbaho laba lale. Labi kota Yerusalem labe labohoti fa num debu Gaza laba lam zie labe lale,” lahame vi vameadume ab oluham. Ame zie lam gi bak aotba baa bohu dam vaba alim bak modesum ziet moz. Labiha labe dam mahate gohatem vab ziet moz.
27. Làhàmu Filipus aba gagoho baket ab modeham. Samaria bak labe usai fa kota Yerusalem labe labohoti Gaza laba lam zie labe ab ladamam. Ame di labe Etiopia bake azimda laha ame zie labe am bake fa lada. Ame da lam abo ee ehe dàt modem bak. Labi laha Etiopia dam vuusu im vahokedam boehà nam, “Kandake,” laham nam labe bak gohali lom doi ahebu ame da laba gagu ot vai vou aasdamda am bak. Lahamda labe kota Yerusalem laba le Fihasi Ala Bake Vou Baedam Num Vàmteabu laba oli dam laba tau, “Ala Om abo feàte,” lahame ahu adat iedi Ala bake vou baedume neàdi am kuda vààsu vi vulam kereta laba zisi nusu am bake fa lada. Labi aho ladam di labe nusu Alat vameadaha im aime fa dam bake ahate vameaidahada Yesaya labe aho aham di iube toedume esuhu im lam aho aame gago lada.
29. Labihadam di labe Alam Aha Nutabe Neànat Filipus bake neha, “Om taho kudat vààsu vou lamna kereta laba nusu ladam da laba taho vule vi fusi netàdele.”
30. Làhàmu Filipusat vi emoeme ame kereta laba zisi ladamda laba ab vi fuham. Labi vi fusi aiha ame da labe gi dat ahamda Yesayat toedume esuhu im lam aame gagodam bak ab vi aiham. Vi aihemu gago, “Oho lab aame gagodam im lam om it ozobohudi fi gateheo?”
31. Lahame labi gagoha ame Etiopia azimda labe fa gago. “Vabà! Meit eba vahokeme fi gatehe vabna eho ba akati modi ozobohudela? Em biem bak,” lahame labi gagu neàdi fa Filipus bake ab gagoham. “Làhà om eba nasi zile,” lahame gagohemu Filipusat zisi ab vi tau nusu ladamam.
32. Ame da labe aho Alat Vameadaha Im Toedahana abo dat ahamda Yesayat toedume esuhu im nehamda aame gagoda. “Ame da lam damat otelo modemu si vou ladam bak lamti domba meit otelo si vou ladam bak lamti ulohote. Labi domba gàhàda meit am tau aum di gem vabna gi ilabdehena tau aum bak lamti ame da lam otem bakti ulohote. Ame da lam otelo modem di gi dae vabnabu otem bak.
33. Labi ame Da lam damat feàtàme keha dou gagoidam di labe, ‘Aho modeho,’ laham bak damat uloome aime neàdi gagoho bak aim vabna gi ostame vàlu feàtàda. Labi ame Da lam laha duzubehamdehe vaba gi gàhàna otehe labe Aho vou faat ladam dam debe gagom bie.” Lahame Yesayat aham di iube toedume esuhu im lam aho aame gago lada.
34. Labi ame im lam ame Etiopia bak laba azihida labe ozom biehemu Filipus bake ab vi ailo gagoham. “Oho ozom, Yesayat lab toedume esuhu im lam, ‘Ame Da lam dombati ulohote,’ lahame toehe bak lam aba aho modem im it vameadaheo? Fa dat amomoit modem im vameadaheo? Oho ozome ozobohudi eba gagomale.”
35. Lahame labi gagohemu Filipusat ame da laba ab faasi vameadamam. “Ame Yesayat lab toedume esuhu im lam aho gi Yesusat ba meedam im fet nasi ozobohudi toedume esuhu bak,” lahame Yesus Aho amu meedume vou esmoho Im Neàna lam ahebu aho gi ame da Yesayat toedume esuhu im labe faasi Alat Vameadaha Im Toedahana im mei im meime ab vameadume fi dedaham.
36. Labi ame Etiopia bak laba azimda labe aho vi aaha zie obe vao ab aaham. Vao aahemu Filipus bake ab gagoham. “Iumeee! Vao ium tame. Oho ozom, oho em vuu valo baptislem neào?” [
37. Lahame labi gagoha Filipusat fa gago, “Om Yesus bake tu vuzehehe bak imbodemeam làhà om eho valo baptislem neà bak.” Lahame labi gagoha ame da labe fa gago, “Lo, em tu vuzeheho. Ame Da Yesus lam Alat Gagu Fihasi Vimteme Oluhu Dat Boehàda abo Alam Adat am tame.”] lahame ab gagoham.
38. Làhàmu ame da labe am nusu vou ladamna lam duzu ame dam behàsu lam bake usi ame vao laba lazi bu duzu Filipusat ame da lam vuu valo ab baptisleham.
39. Labi da lam deeli zitu modeha Boehàda Ala labe Am Aha Nutabe Neànat Filipus visoi ab alimdi seteham. Labi ame Etiopia azimda labe ba Filipusam alihi ba aam kai. Aho laha bak gi vabile. Labihamnàme am gi ozahit deelehat fa na laba zisi fa aba aho lam bake neo ab laham.
40. Labi Filipus aba zoho labe am lehe bak ozoho vabna gi num debu Asdod laba duzuhuna ahamo ab aaham. Labihahemu Filipus fa neo Asdod vou esmozi Yesus Aho amu meedume vou esmoho Im Neàna lam num debu doni bak laba labe dam bake vameadume fi desi neo la. Labi num debu doni meida laba labe dam bake neo ame Im Neàna lam vameadume fi desi neo la. Labihadume num debu Kaisarea laba ab fuham.
1. Lahana ame di labe Saulus aho gi kota Yerusalem laba azimda labe vedi nehi ozo, “Dat Boehàda Yesus bake tu vuzehi meedam dam labe aba fà iedese,” lahame, “Dam nim aho akatihasu modi oddàla?” lahame dihasi odoada. Dihasi odoada. Gi labihadamna bohu vuusda. Labihadam dàt aho Yahudi Damat Ala Bake Lomna Ve Vua Vahudam Tohe Dam Zi Labe Im Bisi Boehàdatebo laba le ab gagoham.
2. “Um eba sunitva modi veiale. Eho Yahudi dam num debu Damsik laba azihi dam labe damat ihimo fi hasi bakamta vahi Alat vameadaha im ahamda dogoit aidam bakti im meiti meedam num zi laba vuusu im gagu faheme modiam dam laba le lodume ame dam labe gut ve aame ozobohudi uledelo modem sunit eba lodale. Labi eho Damsik laba le nabidume aameam dam Yesus Aho amu vahokedume vou esmoho im laba tu vuzehi meedam dam modeo, lahi modeo, aameam làhà eho si fa kota Yerusalem niba fa vou li uho gut uloome aime neàdi beose. Laham sunitva toeme eba lodale,” lahame gagu sunit lam ab vaham. Labi aho ve dam aba tau lamda lamti vazisi Damsik zie laba ab ladamam.
3. Labi ladam labe Damsik laba fuseo vabali modeha na fako iedemna fauha Alat azihi asum labe Saulusat ladam bak laba ab nom belu fauhaleham.
4. Labi belu fauhali Saulus edehesi bake ab biteham. Bake biti bak laba bisu aiha meit aba gagodam dae aida. “Saulus oa, om akati Eba vabidàla?”
5. Lahame labi gagoha Saulusat vabi vi ailo ab gagoham. “Boehàda, oho amat mode?” Lahahat ame lab gagodamda labe fa gago, “Em abo Yesus oho vabidamda am tame. Oho dam Eba tu vuzeheda vabidameam làhà oho gi Eba vabidam bak.
6. Lahana ba a vabidamule. Om gi Damsik laba nasi ladume lafule. Labi, ‘Om ba ana im meedàla?’ laham im lam damat oba gut vameadam bak ehete,” lahame gagu ab seteham.
7. Ame Saulus bake lab tau ladam dam labe aiha ame daeta ai. Lahana ame da so aam kai. Labiha labe iedi meedàmu im gagom vabi gi bak laba daleà dozeadume vou faoda.
8. Labi Saulusat fa usai fako keesi modeha ame na fako iedemna labe aba beoho bake am fako na aam ab bieham. Labihàmu aba tau ladam dam labe fa am anekehà vuusu vou ladume num debu Damsik laba ab fuham.
9. Labi ame lab modehe bak labet fako na aam bili vou aidume usi ab làteladeham. Labi laha ahit na àm moh. Vao udem moh. Gi labihasu meedume usi ab làteladeham.
10. Labi ame di lam num debu Damsik laba dat amu Yesus bake tu vuzehi meedamda Ananias labe num meida laba aida. Ame di lam aho edehesi fako bakamta aasdume ahamo aamna aada. Aho aaha Boehàda Yesus labe aba li duzu im nehame vameada. “Ananias oa.” Lahame gagoha Ananias fa gago, “Oa. Boehàda, Om eba anate?”
11. Labi Boehàdat aba neha, “Om nasi le num debu Tarsus labe leheda Saulusat aho zie ee gagom Vamdesu lahame taluhu zie obe laba modesuhu num abo Yudasam num laba azi Eba tom gagodalo.
12. Ame da labe ahamo edehesi fako bakamta aasdume aho aamna aadalo. Oho aba li om anekehàt am fakode laba ulasi fa neàdelo meedam bak fet aadalo. Làhàmu oho, ‘Saulus labao?’ laham bak oho laba le gagu aile.” Damsik Yerusalem GAH U LAUT TENGAH
13. Lahame labi gagoha Ananias fa gago, “Ne lahana Boehàda oa, Om ozom vaba? Da lam aho meedam bak damat vameadamna eho aihi bak. Oba tu vuzehi meedam dam kota Yerusalem laba azim dam laba aho duana vabidume fai bak tadedam bak lam em abo aihi bak.
14. Labi laha damat Ala bake lomna ve vua vahudam toheda zi laba vuusu im vameame faheme modiam dam labe neha, ‘Saulusat dam Yesus bake tu vuzehe dam ahebu sim neàte,’ lahame toehe sunit lam aho etei ve Damsik niba vou lehe bak. Laham bake em da laba lam moho bak.”
15. Lahame labi gagoha Boehàdat fa neo Ananias bake neha, “Vabo. Gi ozahit Saulus bake lale. Ame da lam Eho gi ozahit Em im gagu modiamda modelo modem bak. Aho im Eho meedahada lam fa Yahudi damat modem vab dam labe im boehàda zi lamti om Israel dam debuti labihasu dam duada laba vou vameatedalo modem bak.
16. Labi oho ame da laba le im vameadume neàdi Eho fa neo, ‘Ame da labe na Eho gagohoda aho modem datelehe labe meit aba fai bak vabimna abo duate,’ laham bak Eho fet vi vameadalo mozo,” lahame Boehàdat aba li im vameadamna Ananias aho ab aame seteham.
17. Làhàmu Boehàdat etei lab gagoho baket Ananias fa uledi ame baket ab modeham. Ame num laba le oli Saulusam fakode laba anekehà ulasi gago, “Saulus, om etei emti Yesus bake tu vuzeheda oa, Boehàda Yesus oho amu zie niba ledam di oba tàhàda labe eba neha, ‘Oba lele,’ lahame eba gagome em ab leham bak. Aho eba neha, ‘Eho oba li ulasi fako fa na aam neàdele. Labi Alam Aha Nutabe Neànat oba modi vizi teudese,’ lahame eba gagome em ab leham bak.”
18. Lahame labi ulasi gagoha na bohe feeti ulohona Saulusam fako labe vuazi bake biteha fako fa na aam ab neàdeham. Labi usai Ananiasat am ve vou le valo ab baptisleham.
19. Labi valo baptisli neàdi na àme alihi fa ab teudeham. Labi afoezobe Saulus gi Yesus bake tu vuzehi meedam dam Damsik laba azihi dam laba teohe tau aida.
20. Damsik laba teohe aidam di labe aho gi dihasi Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num meida laba oli, “Yesus abo Alam Adat am tame,” lahame Yesus Aho amu meedume vou esmoho im lam dam laba vameadume fi deda. Labi neo dihasi ame num meida neo oli ame im lam dam laba neo vameadume fi deda. Gi labihasu ab faasi meedamam.
21. Labihasu faasi meedam di labe dam ahebu Saulusat lab vameadaha im aime àvodi ab ototo gagoidamam. “Aa! Ame da lam amu Yesus bake tu vuzehe dam kota Yerusalem laba azihi dam vabidume oddamda am taia? Labi laha Yesus bake tu vuzehe dam abo Damsik niba azihi dam neo si fa damat Ala bake lomna ve vua vahudam toheda zi laba vuusu im vameame faheme modiam dam kota Yerusalem laba fa vou lalo Damsik niba leheda am taia? Lahana akati labi meedà?” lahame ab àvodi ototo gagoidamam.
22. Labihamnàme ame da Saulus aho Yesus Aho amu meedume vou esmoho Im Neàna lam dam bake vou vameatedam di lam am gi vi modi teude lada. Labi laha aho ame Damsik azihi Yahudi dam laba neha, “Ame Alat Gagu Fihasi Vimteme Oluhu Dat Boehàda lam Yesus ame Da am tame,” lahame aho im meida vouhome vameada. Labi neo im meida vouhome vameada. Labihada. Labihadam labe ame dam labe Saulusat lab vameadaha bak lam ba ot vai vi gagu daetesum ab bieham.
23. Labi ba di iube Damsik laba azihi Yahudi busaoda boehàda zi labe vahi, “Saulus otese,” lahame im aa odoadume ahu ab vàmadeham.
24. Labihàmu dam amomoi gagome ame num debu natàh bàhàgoda vabousu ot odosiahana labe am futom doo ahebu laba olu Saulus aahazobe si otem bak ozome aa vou aasda. Abo digad diat vou aasda. Labi aibu diat vou aasdume vou diha. Labihada. Lahana ame dam labe iho im aa lab odoadaha bak lam meit aime vi ozobohudi fa Saulus bake le ab fi deham.
25. Fidesi neàdi aibu meida labe Saulus bake deelehe dam totbaho labe Saulus ve natàh bàhàgoda laba vou le vou zisi ame natàh bumat labe vou ub dalu vou futoi Saulus gagome lodebu buduana laba aa nom ousu fa loa vuusu vousdume bake ab nom esuham. Labihazobe Saulus lodebu labe futoi ab itaham.
26. Labi Saulus itame fa kota Yerusalem bake ab lafuham. Fa lafusi, “Yesus bake tu vuzehi meedam dam laba im fa ot deeliame tau vahese,” lahame le vameaha dam totbaho lam iedi ab moham. Vedi nehame ozoda, “Ame da lam aho Yesus bake tu vuzehi Aho gagoho im uledi meedaho,” lahaha bak lam, “Imbo kaio,” lahame git ozoho labe iedi tau vahem moh.
27. Lahana dat meida Barnabas lam ba labiham kai. Aho gi neha, “Saulus gi imbo im vameadam bak,” lahame ozome Saulus bake gut tau vou ali ab godamam. Labi Barnabas fa Saulus ve ahili Yesusat Aho gagu olu Am im vameadume esmozi laiam dam laba ab vou laham. Labi vou le Barnabas labe aho Saulusat amu Damsik laba le meedaha im ahum lam dam laba ab faasi vameadamam. Abo Saulusat aho amu Damsik laba ladam di labe zie doni laba Boehàda Yesusat aba vameadaha bak aho aihi bak lamti labi aho aaha bak lamti Barnabasat fa dam laba vameada. Labi laha ame Damsik laba azihi Yahudi dam labe Saulus bake mohonàme aho gi ozahigeàmu iedehe vab dàt Yesusat Aba Aho amu meedume vou esmoho im lam Saulus bake modi vizi aho im dedateli dam bake dihasi vameadume fi deda. Labi dihasi gi neo ame baket meeda. Lahadam im lam abo Saulusat amu meedaha bak lam ahebu Barnabasat ame dam laba ab vameadaham.
28. Labihàmu ame dam labe fa uledehemu, “Saulus fa imti vahem neàte,” lahame labi gagohemu Saulus fa dam laba tau vahi kota Yerusalem num laba godume uloholeda. Labihadam di labe aho gi Boehàda Yesus Aho amu meedume vou esmoho Im Neàna lam aho im dedateli ba meia iedehebeat vameadam vaba abo gi keàtet vou vameateda.
29. Labi laha Saulusat aho ame Yahudi busao dam totbaho labe fa Yunani dae vameadam dam laba Yesus Aho amu meedume vou esmoho im lam vameadam labe daet otesi otesida. Lahana ame dam labe vedi, “Saulus abo otese,” lahame meeda.
30. Labihàmu Yesus bake tu vuzehi meedam dam totbaho labe ame Yahudi dam busao dam totbaho labe Saulus otelo meedam bak aihemu vou faovoi Saulus ve itea feàna obe modesuhu num debu Kaisarea laba ab vou laham. Laba vou le lafusi fa neo Saulus bake im vi vameadume fa bak aba bake Tarsus laba ab oluham.
31. Labihadam di labe dam Yesus bake tu vuzehi vahi meedam dam labe abo Yudea bak laba azihi dam lamti Galilea bak laba azihi dam lamti Samaria bak laba azihi dam lamti labihasu ahebu gi ame Yahudi dam busao dam labe iba vabidam vaba gi neàna esda. Labi laha, “Ame dam labe iho Yesus Aho gagoho im aime modem mom vaba abo ule neàt meedase,” lahame Alam Aha Nutabe Neàna labe fa ame dam laba tau vabededam labe modi vizi teudeda. Labi ame dam labe laha, “Boehàda Ala abo feàte,” lahame ahu adat iedi vou baedamna bohu vou meeda. Labihasu meedam di labe dam amomoi ame dam laba vi taui vi tauidume Yesus bake tu vuzehi meedam dam debu ab dualedamam.
32. Ame di labe Yesusat Aho gagu olu Am im vameadume esmozi laiam dam meida Petrusat aho gi dam Yesus bake tu vuzehi meedam damat esuhu bak iuba le im Yesus Aho amu meedume vou esmoho im ahum lam vameada. Labi bak meida iuba le ame im lam neo vameada. Labihada. Labihadam digat meida labe ame dam labe iho esuhu num debu meida Lida laba neo ab laham.
33. Ame num debu Lida laba azihi dat ee gagom Eneas lahamda laba aida. Ame da lam abo nao zoho nutabedehe dàt moz. Am abo usam bi gi bisdume tahun delapan folehe dàt moz. Petrusat ame da lam Lida laba tàh.
34. Tàhi gago, “Eneas oa, Yesus abo Alat Gagu Fihasi Vimteme Oluhu Dat Boehàda labe Aho oba modi om fa ab neàdeham bak. Om nasi usai oho ousu bisumna lam iademe vabieme esule,” lahame labi gagoha ame di labe da lam fa neàdi ab usaham.
35. Labi modeha ame num debu Lida laba azim dam lamti num debu Saron laba azim dam lamti aaha ame da labe fa neàdehe bak lam aahemu damat Boehàda Yesus bake tu vuzehi meedam bak lam ab uledi vi tau meedamam. ,20,
40. km Gaza LAUT TENGAH Asdod Yerusalem Lida Samaria Kaisarea Yope U
36. Labihadam di labe Lida obe modesuhu num debu Yope laba nam Yesus bake tu vuzehi meedam nam ee gagom Tabita laham nam laha laba azi. Tabita fa Yunani dae gagom di, “Dorkas,” laham bak. Na fi ho ibida rusa laham bak ozome, “Dorkas,” lahame taluhu bak. Ame nam lam abo gi meia im neàna meedam namet moz. Abo na vab dam laba tau na lodam meo namet moz.
37. Laham nam labe ame di labe gaili bisdume ab eloham. Labi elohemu am koei damat vao vohume neàdi am koei visoi num zuhuba laba vou zisi ab esuham.
38. Labi ame Yesus bake tu vuzehi meedam dam Yope laba azim dam labe aiha Petrusat iba netàdi gi Lida laba aidam bak aihemu dam behàsu utasi olu, “Petrus taho Yope lele,” lahame ab gagu oluham.
39. Làhàmu le gagu Petrusat uledi dam behàsu laba tau Yope niba ab leham. Tau li lefusi damat am gagu vou zisi koei esdam zuhuba laba ab vou ziham. Labi vou zisi duzu modeha maboe zi labe aho duzuhu bak laba li vabousu vou medao. Vou medaom labe lahi sue sona ahoba dumna bohu ziti soa dusumda buuda ziti vuusualame vou medaom labe gagoda. “Sue zi nim etei koei nibe ahe diat tadehe sue am tame,” lahame gagu vou medao.
40. Lahana Petrusat lahi maboe zi lam gagome fa futodume aho Ala bake tom gagolo modemu ogomasu biti ab tom gagodamam. Tom gagodume neàdi koei laba avaesu gago, “Tabita oa, fa usale,” lahame gagoha Tabita am fako fa ab keeham. Keesi Petrus bake aaha fa ab usai nusuham.
41. Labi Petrusat Tabitam anekehà vuu vousai vou duzu neàdi fa dam Yesus bake tu vuzehi meedam dam totbaho lamti aho amu gagu futodaha lahi maboe zi lamti labihasu, “Tabita elohona fat ahedi usai duzuho,” lahame dam bake gagu fa ab oedaham. Labi modeha dam ab aame àvodeham.
42. Labi ame im lam dam Yope azim dam lam ahebu vou fi desi uloholi modeha dam dua totbaho labe Boehàda Yesus bake ab tu vuzehi meedamam.
43. Labi ame da Petrusat gi Yope laba dat ee gagom Simon lahamda abo na fi ho sokba modeme dehali nazoh meedamda labe am num laba ab tau aziham.
1. Ame di labe dat abo Yahudi dàt modem vabda Kornelius lam num debu Kaisarea laba ehet. Amu bak ahebu vuusdam boehàdatebo Kaisarleheda labe fa aba gagome Roma meo dam seratus vuusu im vameadume modiam dàt moz. Ame da Kornelius labe aho vuusdam meo dam seratus lam damat neha, “Italia bak labe lehe meo dam debu seratus meida am,” lahame gagodam bak.
2. Ame da Kornelius labe Alat gagoho im lam uledi modem tadehe dàt moz. Labi laha am lahi databeti im Yahudi dam modem vabnàme ozahit, “Ala abo feàte,” lahame ahu adat iedi Ala bake vou baedam meot. Labi am laha Yahudi dam na vabdate na ilabdi lodam meot. Labi am laha gi dihasi Ala bake tom gagoda. Dihasi neo Ala bake tom gagoda. Lahadam meot. Labihasu bohu vuusu meedam dat am lahi databeti am.
3. Labihadam dàt modem labe digat meida labe ala vakidi jam tiga fusi modeha Kornelius ahamo edehesi fako bakamta aasdume aho aamna nehi ab aadamam. Alat Am im gagu vou usemda meida labe aba nom ilu gago, “Kornelius oa,” lahame aba li gagoho bak ab aiham.
4. Lahame labi gagoha Kornelius gi fako bueme iedi aasu gago, “Boehàda, anate?” Lahahat ame Alat Am im gagu vou usemda labe fa gago, “Oho Ala bake dihasi tom gagoda dihasi tom gagoda lahadam bak lamti labi oho dam na vab dam laba ilabdi na lodam bak lamti ahebu eho vi ozoha, Alat aadaho. Ba biem kaio. Abo deeleho.
5. Oho nasi dam gagome Yope iuba olu nabime dat ee gagom Simon abo damat ba ee gagom Petrus lahamda lam aahazobe gagome ve fa num debu Kaisarea niba vou lele.
6. Ame da Petrus lam aho am ee fatahivahada Simon abo na fi ho sokba modeme dehali nazoh meedamda labe am num itea feàna obe mohona laba tau aidalo. Le gagome fa oba vou lele,” lahame ame Alat Am im gagu vou usemda labe aba im labihasu vameadamna ab aaham.
7. Labi aame neàdi Alat Aho Am im gagu vou usemda labe le setehezobe Kornelius aho am na gagu meedam dam meida behàsu lamti labi aba aho vuusdam meo dam meida aba bisi ahida lamti gagome ab li dozeadaham. Ame meo da ahida lam laha Yahudi dàt modem vab dàt ozahit, “Ala abo feàte,” lahame ahu adat iedi Ala bake vou baedam meo dàt moz. Lahamda lamti gagome ab li dozeadaham.
8. Li dozeadume neàdi aho ahamo amu aihi im lam dam làtela laba vameadume neàdi gagome fa num debu Yope iuba ab oluham.
9. Labi izi dihasi dihambe ame dam làtela lam Yope ladam labe zie zoho ladam lahasu. Labi ladume fuseo vabali ala tomalehe di labe Petrus aba zoho labe Yope laba, “Ala bake tom gagodase,” lahame aho azim num ohut vabna baa ahoba totbaho laba ab ziham.
10. Zisi tom gagodume modeha idoali na àm bak ab ozoham. Làhàmu gagome na ohume modeme vahedam di labe ahamo aamna edehesi ab aadamam.
11. Aho aahana neha. Asum fatahivai bumat labe sue baati ulohona feàda oula empat laba lo vààlume loat bohulali bake nom vou usdume bake esuhu bak ab aaham.
12. Labi aho sue baa laba vi aaha na àm fi hamda zi abo na mei na meime fi ddamna ab aaham. Abo na nekehàbu empat eheda zi lamti na sobosobomna zi lamti bume faobuda zi lamti labihasu ab aaham.
13. Labi aho na zi lam aasdam di labe aho aiha meit aba nehame gagoho dae ab aiham. “Petrus oa, oho nasi usai oddume àdale.”
14. Lahame labi gagoha Petrusat fa ab vi gagoham. “Vabà! Boehàda oa, im Yahudi dam na lam àm fi ham labe àm alim lahasuhu bak. ”
15. Lahahat aba im vameadamda labe fa neo gago, “Na Ala naedat fi ham bak gagom vabna oho a fi hamna lahamule. Oddume àdam neàte,” lahame vameaha bak ab behàsdeham.
16. Labi fa neo aba im vameadamda labe fa neo ame baket gagu làteladeha ame sue baa lamti laba vahehena zi lamti fa asum ahoba tom vousai ab seteham. [Petrusat Yahudi dàt modem labe fa Yahudi damat modem vab damti vahem bak momna zohàme Alat ozahit ame bak lam ab modeham.]
17. Labi Petrusat aho edehesi aahana lam, “Alat aba ana im gagolo na nim modehela?” lahame vabi vi ozoda. Vi ozodam di labe Kornelius oluhu dam làtela lam Yahudi damat modem vab dam labe Yope niba ab fuham. Fusi bak dedate gago, “Simonam num akete?” lahame gagu aime ozobohudi Simonam num laba le natàh bakoda doo laba ab le dozeadaham.
18. Dozeadume bute, “Simon Petrus nibao?” lahame ab buteham.
19. Labihadam di lam Petrus aho amu edehesi aahana lam vi ozodam lahasuhu di labe Alam Aha Nutabe Neànat aba neha, “Simon Yahudi damat modem vab dam làtela oba li nabidalo.
20. Om nasi fa bake usele. Ame dam om li ve vou lalo modem di om a, ‘Lào? Lam vabao?’ laham bak a ahu behàsdi vi ozodamule. Eho ahit gagome dam nim oba oluhu bak. A momule,” lahame Petrus bake ab gagoham.
21. Làhàmu Petrusat uledi num ahoba totbaho labe usi dam laba ab gagoham. “Uho li nabidamda Petrus em ame da am bak. Um eba ana nabidàla?”
22. Lahahat dam làtela labe fa gago, “Ame meo dam seratus laba im vameame faheme modiamda Kornelius labe im oba oluhu bak. Ame da Kornelius lam abo iademe ahu vamdesu meedam dàt moz. Labi, ‘Ala abo feàte,’ lahame ahu adat iedi Ala bake vou baedume Aho gagoho im modem tadem dàt moz. Labi Yahudi dam totbaho labe ahebu iho ozo, ‘Am abo neàte,’ lahame ahu adat iedi aba vou baedam meo dàt moz. Lahamda laba Alat Am im gagu vou usemda meida labe aba nehaho. ‘Am dam gagome oba olu li gagome fa am num bake vou le oho aba gagom im aho aise,’ lahame gagu olu im oba ab leham bak,” lahame Petrus bake ab vameadaham.
23. Labi vameadume neàdi Petrusat ame dam laba ab gagoham. “Làhà imo disihina niba izi dihambe lase,” lahame gagome am numa vou oli ab vou iham. Labi izi dihasi dihambe Petrusat ame Yahudi damat modem vab dam làtela laba tau Kaisarea laba ab laham. Labi dam Yesus bake tu vuzehi meedam dam Yope laba azim dam totbaho laha aba vi tau lada.
24. Labi ladume doni usi vàmadi Kaisarea laba ab fuham. Dam lam fuhu vab di labe Kornelius gi amu am amedamti am vou alem damti gagome am num laba vahi Petrus bake vou faoda.
25. Labi Petrus li lefusi numa li olesome modeha Kornelius num labe usi doait le Petrusam naba modesuhu laba ab ogomasu biteham. “Am abo feàte,” lahame ahu adat iedi vou baedalo ab ogomasu biteham.
26. Lahana Petrusat mali fa am anekehà vuu vousai alamdi ab gagoham. “A labihamule. Om usai duzule. Em gi omti uloho dàt modem bak. Em feà vabak.” Làhàmu Kornelius fa usai ab duzuham.
27. Labi Petrus fa Kornelius bake gi im vou vamea oedume aaha Yahudi damat modem vab dam duada zi amu gi nusualadume faodamna ahum ab aaham.
28. Labi Petrusat dam laba im ab vameadamam. “Im Yahudi dam nibe ibi iho Ala bake tu vuzehi meedam bak nibe im fa Yahudi damat modem vab dam umti ulohodate tau vahem fi ham bak. Labi laha Yahudi damat modem vab dam umti ulohoda labe um num laba iho laha olem fi ham bak. Laham bak lam um ozobohuna taia? Lahana Alat eba neha, ‘Na àmna ahebu àm neàte,’ lahame Alat eba labi gagoho labe eho ba Yahudi damat modem vab dam laba fi ham vabiem bak. ‘Fa vahem neàte,’ laham bak Alat eba modi fi gatehe labe em ozobohudehe bak.
29. Labihàmu oho eba, ‘Lele,’ lahame dam nim eba olu gagoho di labe em ba odohali nehaha vabak. ‘Dam etei leheda nim Yahudi damat modem vab damat modem bak. Em tau vahi gohatem biem bak,’ lahame odohali moho vabak. Em abo uledi lehe bak. Lahana oho eba ana, ‘Lele,’ lahame gagohela?”
30. Lahame gagoha Korneliusat fa ab gagoham. “Eho di nimodam di ala vakidi jam tiga dimataedamzobe eho em num niba tom gagodam di labe ehemo aahana ulem bakti ulohona eho aame usi ab làteladeham bak. Eho aahana neha. Dat sue meit aam di abo fako iedemna dusuhuna eba lehe bak aaha vabna li duzuhuna em aaho.
31. Li duzu eba gago, ‘Kornelius oa, oho Ala bake dihasi tom gagoda. Dihasi tom gagoda. Lahadam bak lamti labi oho dam na vab dam laba ilabdi na lodam bak lamti ahebu eho vi ozoha, Alat ba biem vaba abo aame ozobohudi deeleho.
32. Oho nasi dam gagome num debu Yope iuba olu nabime Simon abo damat ba ee gagom Petrus lahamda lam aahazobe gagome ve fa Kaisarea niba vou lele. Ame da Petrus lam aho am ee fatahivahada Simon abo na fi ho sokba modeme dehali nazoh meedamda labe am num itea feàna obe mohona laba tau aidalo. Lahamda laba om dam gagome olu le gagome fa vou lele.’
33. Lahame eba labi gagohemu eho gi dam lam àvodehat gagome, ‘Om ve vou lele,’ lahame oba gagu oluhu bak. Labi oho im Yahudi damat modem vab dam vahem bak mu odohalehe vabat uledi lehe bak nim abo neàte. Boehàda Alat oba neha, ‘Iba li nehame vameadale,’ lahaha im lam ahebu im ahebu ailo im etei num niba bakamta ab vaheham bak. Labi Alat iba laha tau aasdam bak,” lahame Korneliusat Petrus bake ab vameadaham.
34. Lahame labi gagohemu Petrusat im faasi ab vameadamam. “Em etei ozobohudi ab fi gateham bak. Abo imbo bak. Alat ba dam faheme gi dam debu vàmtea Yahudi dam lamota deeli vadam vabak. Abo gi Yahudi damat modem vab damti labihasu ahebu vahi deeli vadam bak.
35. Abo meit, ‘Ala Om abo feàte,’ lahame ahu adat iedi vou baedume fa iademe ahu vamdesu meedamda lam ahebu Alat vadam bak. Ba, ‘Ana dam debut modela?’ laham bak ba vi ozome fi me vadam vabak. Gi ostame Aho gagoho im aime meedam dam ahebu vadam bak.
36. Alat amu neha, ‘Eho Gagu Fihasi Vimteme Oluhu Dat Boehàda Yesus lam damat oteme am vasea veàtoho labe dam bakda fa Emti fa vahem neàte,’ lahame gagoho Im Neàna lam Alat Aho amu iba Israel labe aho vou faat lehe dam im Yahudi dam niba amu gi vameadume ahumdehe labe im Yahudi dam bada ahebu ozobohuna taia? Ba ame Da Yesus gi Yahudi damta vuusu im vahokedam Boehàdat modem vabak. Abo dam ahebu vuusu im vahokedam Boehàdat modem bak.
37. Labi Yudea bak ahebu laba meedaha im lam um ozobohuna taia? Neha. Amu Yohanes Mei Vuu Valo Baptisleidamda labe aho dam bake neha, ‘Uho faina meedam bak lam nasi voedume fa ahu neà bak vàmadi neàdehezobe eho um vuu valo baptisleiase,’ lahame dam bake vou vameatedume fi dedaha bak. Labi ba neo Yesusat Galilea bak labe faasi vou modetedaha bak.
38. Ame Da Yesus num debu Nazaret labe leheda lam Alat Aho modi Am im gagu modiam datele. Labi laha Alat Am Aha Nutabe Neànat Yesus bake modi vizi teudehe labe Aho na damat ihimo modem biem im feàna lam meeda. Labi Aho damat esuhu num debu iuba le im neàna meeda. Labi dam Iblisit veimai vuusdam dam zi laha Aho modi fa neàdeda. Labi fa neo damat esuhu num debu meida iuba le neo ame baket meeda. Labihadam labe damat ozo, ‘Ame Da Yesus lam Alat vuusu vou godamda ame?’ lahame ozobohudehe bak.
39. Um ahebu nasi aimale. Eho etei lab vameadaha bak lam abo imbote. Ame Da Yesus Aho Yahudi dam azim bak ahebu laba le im neàna lam faasi meedume fa kota Yerusalem laba le meedaha im lamti labihasu ahebu ihimo Yesus Aho amu Am im iba gagu esmozi laiam dam nibe ihimo aame neàdi etei uba ahate ab vameadamam bak. Ame Da Yesus lam kota Yerusalem laba le ame dam labe fa ve ut tetehesuhunaso laba esu paku dou ab oteham bak.
40. Labi eloi usi behàsdehenàme Am eloho bak labet Alat modi fa ahedi ab usaham bak. Labi, ‘Yesus fat ahedi usaho,’ laham bak damat aame, ‘Imbote,’ lahame damat ozobohudem bake Alat ahit modi Yesus Am alihi damat dihasi aa dihasi aa labihadaha bak.
41. Labihadaha bak lam Yahudi dam totbaho ahebu ba Am alihi aaha vabak. Lam Alat ahit male. Gi Yesusat Aho gagu olu Am im vameadume esmozi laiam dam labe ihimo Yesusam alihi aadaha bak. Alat amu neha, ‘Dam nim fa dam bake le, “Yesus Am eloho bak labe fat ahedehe bak imbote,” lahame le ahate vou vameatedam neàte,’ lahame Alat amu fet gagu esuhu damta ihimo Yesusam alihi aadaha bak. Ba dam giida Am alihi aaha vabak. Ame Da Yesus Am eloho bak labet Alat modi fa ahedi usahazobe Amti fa vahi vou ali godam dam im am bak. Im na vahi àda. Labi im vahi im vameada. Labihadaha bak.
42. Labi ame Da Yesus Aho amu iba nehame gagu esuhu bak. ‘Iho Am Im Neàna lam Yahudi dam bake vou vameatedume fi dedale.’ Labi laha, ‘Iho ame Yahudi dam bake neha, “Ba diamut dam amu gi elohoda modeo, dam ahe lahasuhuda modeo, ame dam labe iho faina modeheo? neàna modeheo? laham bak lam uloome vi aime neàdi fa gagu modidamda lam Yesus ame Da am tame,” laham im lam iho ame Yahudi dam bake ahate vou vameatedume fi dedale.’ Lahame Yesusat iba gagu esuhu bak.
43. Ame Da Yesusat ba meedaha im lam dam ahamda Alat vameadaha im aime fa dam bake ahate vameaidaha dam zi labe iho amu laha nehame vi tau vameadume esuhu bak. ‘Dam bakda fa Alati vahem biem bake Alat Gagu Fihasi Vimteme Oluhu Dat Boehàda labe Aba Aho ba meedaha bak labet modi meit Aba tu vuzehemeam làhà ame da labe aho faina meedàmu Alat Aho beolo meedam bak lam Alat gi vei mu fa faamome vei neàdem bak.’ Laham im lam amu vi tau vameadume esuhu bak ehe bak,” lahame Petrusat ab vameadaham.
44. Labi Petrusat etei lab vameadaha im lam vameadam lahasuhu di labe aaha Alam Aha Nutabe Neàna labe ab nom ilu dam etei lab vameadam im aidam dam abo Yahudi damat modem vab dam laba ab modi vizi teudedamam.
45. Alam Aha Nutabe Neànat modi vizi teudedaha labe ame Yahudi damat modem vab dam labe im dae ab amomoidedaham. Dae abada vameadam vaba vedi dae amu vaha vabna abo naedat it aime ozom biem dae ab faasi vameadamam. Labi laha ame dam labe Ala bake, “Am abo feàte,” lahame vou baeda. Lahadam bak lam ame Yahudi dam Yesus bake tu vuzehe dam Yope labe Petrus bake tau lehe dam labe ame bak lam aaha ab àvodeham. “Aa làhà! Alat iba Yahudi dam modehe bakti ulohona fa neo Yahudi damat modem vab dam laba Am Aha Nutabe Neànat nom ilu ame dam laba ab modi vizi teudedam ame?” lahame ab aame àvodeham. Labihàmu Petrusat aho ame Yahudi dam aba vi tau lehe dam laba ab gagoham.
47. “Alat iba Yahudi dam modehe bakti ulohona fa neo etei Yahudi damat modem vab dam niba Am Aha Nutabe Neànat nom ilu modi vizi teudedume neàdehe bake dam nim vuu valo baptisleidam neàdehe bak. Ba meit malem biem bak.”
48. Làhàmu ame Yahudi damat modem vab dam labe etei Yesus abo Alat Gagu Fihasi Vimteme Oluhu Dat Boehàda bake tu vuzehi neàdehemu dam giida aame ozobohudem bake Petrusat dam amomoi gagome ame dam lam vuu valo ab baptisleidaham. Labi valo baptisleidume neàdi Kornelius am dam totbaho lamti Petrus bake gago, “Iba tau azibe lale,” lahame ab gagoham. Làhàmu Petrusat ame baket ab modeham.
1. Yesusat Aho gagu olu Am im vameadume esmozi laiam dam totbaho lamti labi Yahudi dam Yesus bake tu vuzehi meedam dam totbaho abo Yudea bak laba azim dam duada totbaho lamti meit li vameahana ab aiham. “Yesus Aho amu meedume vou esmoho im abo Alat vameadaha im lam Yahudi damat modem vab dam labe iho aime vuzehi meedaho,” laham bak lam ab aiham.
2. Labihàmu Kornelius Yahudi dàt modem vabda labe am num laba Petrusat laba tau azibe Kaisarea lam vou esmozi fa kota Yerusalem niba li lefuha Yahudi dam Yesus bake tu vuzehe dam totbaho labe aba ab gut bebe im vahokedamam. Ame Yahudi dam labe vedi nehi ozome meeda. “Laso aubehà sokba vaitom vab dam laba im Yahudi dam vahem fi ham bak,” lahame ozoho labe Petrus bake gut bebe im ab vahokedamam.
3. “Om Yahudi dàt modemna akati im tai ahamda Musat iba vou gago usehe Im Feàna lam oho ozome Yahudi damat modem vab dam labe im laso aubehà sokba vaitoho vab dam labe im num laba oli na tau àm bak mom vaba mode?” lahame ab gut bebe im ab vahokedamam.
4. Lahame labi gagoha Petrusat fa aho iuba le modehe bak labe debu faasi iademe ab vameadamam.
5. “Eba nasi a gut bemule. Eho modehe im fa uba vameadase. Neha. Em Yope laba tom gagodam di labe eho edehesi fako bakamta aasdume modeha na sue baati ulohona feàda oula empat laba lo vààlume loat bohulali asum labe vou usdume eho aidam bak laba nom esuhuna aaha bak.
6. Labi eho neo aaha na nekehàbu empat eheda zi lamti na sobosobomna zi lamti bume faobuda zi lamti labihasu sue baa laba vahehe bak ab aaham bak.
7. Gi etei aame aasdameam aiha meit eba nehame gagoho bak ab aiham. ‘Petrus oa, ame na zi nim oho nasi usai oddume àdale.’
8. Lahame eba labi gagohemu eho fa gago, ‘Vabà! Boehàda oa, im Yahudi dam na lam àm fi ham labe àm alim lahasuhu bak. Im tai ahamda Musat iba vou gago usehe Im Feàna lam, “Na lam àm fi ham bak,” lahame gagu esu vàmadehemu em ba àm vabak.’
9. Lahame eho labi gagoha ame na dae asum labe fa eba neo vi gago, ‘Na Ala naedat fi ham bak gagom vabna oho a fi hamna lahamule. Oddume àdam neàte,’ lahame eba ab gagoham.
10. Labi ame na lam fa vousai vou usi Alat im vameadume fa neo vousa. Gi labihaha bak làteladeha ame sue baa lamti ame na zi lamti fa asum ahoba iuba ab vousai seteham bak.
11. Gi etei asum ahoba vousai seti em fako fa dam alihi aam neàdi modeha dam Yahudi damat modem vab dam làtela Kaisarea labe fa Yope niba eba olu li nabidume eho aidam num niba ab fuham.
12. Ame di labe eho vi ozoda, ‘Alat eba ana im gagolo sue baa niba na zi lam vaheme fi ddahela?’ lahame vabili vi ozodam lahasuhu di labe Alam Aha Nutabe Neàna labe eba neha, ‘Petrus oa, dam etei oba lehe dam làtela laba oho tau lam bak, “Lào? Lam vabao?” laham bak a ahu behàsdi vi ozodamule. Gi ule neàt vi tau vulale.’ Làhàmu em uledi ab vi tau vulaham bak. Labi laha Yope dam abo Yahudi dam Yesus bake tu vuzehe dam emti vahi esdam dam enam eba tau Kaisarea laba ab laham. Labi laba lafusi Kornelius abo Yahudi damat modem vab dam labe am num laba iho ozahit ab oleham.
13. Oli modeha Korneliusat iba im nehasu gut vameada. ‘Alat Am im gagu vou usemda labe em numa lehe bak eho aaha vabna eba li duzu im vameadamna eho aaho. Aho eba neha, “Dam gagome Yope laba olu Simon abo damat ba ee gagom Petrus lahamda le nabime aahazobe ve Kaisarea niba fa vou lele!
14. Ame da labe iba li im vameadume neàdi eho em lahi databeti iho aho vou li vameadaha im lam iho tu vuzehemeam làhà iho faina meedàmu Alat iba beodalo meedam bak lam Aho fa mu iba soat vausu fa vei neàdeda tame,” ’ lahame ame Alat Am im gagu vou usemda labe aba labi gagohemu Kornelius aho ame baket modehe bak lam fa iba gut vameadaha bak.
15. Làhàmu iba labi gut vameadàmu eho Alam Im Neàna lam ab faasi vameadamam. Vameadameam aaha Alam Aha Nutabe Neànat amu ahamte iba Yahudi dam bake nom ilu modi vizi teudedam bak lamti ulohona neo nom ilu ame dam laba modi vizi teudedam bak lam em ab aaham.
16. Gi etei modehena lam eho aame vi ozoha, Yesus im Boehàda amu iba fet it vameadume vou esmoho im lam eho ab vi ozobohudeham bak. Aho amu iba neha, ‘Yohanes gi mei vuu vaota baptisleidaha bak. Lahana ba Alam Aha Nutabe Neànat nom ilu uba modi vizi teudeda tame,’ lahame Yesusat fet it vameadume vou esmoho bak lam em ab vi ozobohudeham bak.
17. Labihàmu eho nehi ozo. Iho Yahudi dam nibe im Boehàda Yesus abo Alat Gagu Fihasi Vimteme Oluhu Dat Boehàda bake iho tu vuzehi meedàmu Alat Am Aha Nutabe Neàna iba nom oudume vizi vuusdam bakti ulohona fa Yahudi damat modem vab dam laba laha tau modi vizi vuusdam bak lam em ab aaham bak. Labiha labe eho ba akati modi malela? Ala naeda labe Ahamo modehena ba eho akati modi otesiame malela? Labiham biem bak,” lahame Petrusat aho meedaha im bohu lam ame dam zi laba ab vameadaham.
18. Labi vameadume modeha ame Yahudi dam Yesus bake tu vuzehe dam totbaho labe iho Petrusat lab vameadaha im lam aime fa vei neàdi ba aba neo gut bebe im vahokem vabi fa Ala bake vahi ab vou baedamam. Vou baedam labe nehame gagoda. “Làhà. Im git ozohe? Yahudi damat modem vab dam lam Alat laha vam meo? Abo neàte. Yahudi damat modem vab dam labe iho faina meedam bak lam voedume fa ahu neà bak vàmadi meedaha labe ba elom di Alat modi fa Amti vahi gi ahe neàna bohu vuusdam bak lam Alat ab uledeham bak,” lahame ab vameadaham.
19. Amu damat Stefanus otehe di labe dam Yesus bake tu vuzehe vab damat fa Yesus bake tu vuzehe dam laba fai bak bohuta dihasi vabida. Labi neo dihasi vabida. Gi labihadam bohu meeda. Labihadàmu ame dam labe ab faheme bak bohulana laba fi goaitoi ladume ab seddaham. Dam totbaho labe Fenisia bak laba ilime esu. Labi dam totbaho labe itea feàna labe am touha meida Siprus laba ilime esu. Labi laha dam totbaho num debu Antiokia laba ilime esu. Labihada. Labihadam di labe damat ibi iho ilime esuidaha bak laba Yesus Aho amu meedume vou esmoho Im Neàna lam vou vameateida. Lahana labihadam di labe vedi ame im lam dam giidate abo Yahudi damat modem vab dam laba vou vameatedaha vaba vedi gi Yahudi dam lamota vou vameateda.
20. Lahana ame lab ilime fi goaitoho dam totbaho abo Siprus touha laba faaha damti num debu Kirene laba faaha damti laham Yahudi dam labe iho ilime esuhu bak laba ame Im Neàna lab vou vameatedam di gi Yahudi damta vou vameatedam vabak. Ame dam labe fa Antiokia laba lafusi, “Ame Da Yesus lam abo dam ahebu vuusdam Boehàda am tame,” laham Im Neàna lam gi ostame Yahudi damat modem vab dam laba laha ab faasi vou vameatedamam.
21. Boehàdat meia modi vizi teudehena lam ame dam laba tau modi vizi teudehe labe ame im lam vameadam di labe Yahudi damat modem vab dam Antiokia laba azihi dam dua totbaho labe ame im lam aime ab vuzeheham. Vuzehe labe iho faina meedam bak voedume fa ahu neà bak vàmadi “Boehàda Yesusat fà iba vuusu im vahokedase,” lahame Yesus bake ab tu vuzeheham.
22. Laham bak lam meit kota Yerusalem laba le dam Yesus bake amu tu vuzehi vahi meedam dam laba ab vameadaham. “Ame Yahudi damat modem vab dam Antiokia laba azihi dam labe, ‘Yesus iba vuusu im vahokedale,’ lahame uledi gi eteit Yesus bake tu vuzeheho,” laham bak lam ab le vameadaham. Làhàmu ame num debu Antiokia laba meedaha im lam aihemu ame dam nibe iho Barnabas utasi, “Antiokia laba le, ‘Dam lam akatihàla?’ laham bake le aale,” lahame Barnabas Antiokia laba ab oluham.
23. Ame da Barnabas gi im neà bakta meedam dàt moz. Alam Aha Nutabe Neànat aba modi vizi teudi meedam dàt moz. Labi aho Yesus bake tu vuzehe bak lam abo ba beena tuhu vaba abo gi teudi tu vuzehi meedam bak. Lahamda labe Antiokia laba fusi aaha ame Yahudi damat modem vab dam dua totbaho labe Yesus bake tu vuzehi meedam bak ab aaham. Aame ozo, “Alat abo Yahudi damat modem vab dam nim moho vaba gi ozahit deeli im neà bak meedam Alat mode?” lahame àvodi bisi duana ab deeleham. Deeli ame dam laba vabededam labe im nehasu vameada. “Uho Boehàda Yesus bake tu vuzehi meedam bak lam mahate abo iademe ahu vàmadi meedale,” lahame ab vi vameadaham. Labihadam di labe Antiokia azim dam dua totbaho labe laha ba neo Yesus im Boehàda laba ab vi tau tu vuzehedaham.
25. Labihaha bak lam Barnabasat aame neàdi fa Antiokia lam vou esmozi Saulus bake nabidalo num debu Tarsus laba ab laham.
26. Le nabime aaha Saulus vi aahemu fa vi ve Antiokia ab vou leham. Fa vou li ame dam behàsu labe Antiokia laba azibe tahun ab vàmadeham. Laba azim di gi nehada. Ame dam Yesus bake tu vuzehi vahi meedam dam abo ame bak laba azim dam laba gagome bakamta vahi esdam labe iho dam duana zi laba Yesusat amu, “Nehame meedale,” lahame iba it vameadume vou esmoho im lam dihasi vahokeda. Dihasi vahokeda. Gi labihadume tahun ab vàmadeham. Ame di lam dam Yesus bake tu vuzehi meedam dam laba dam giida labe aame nehada, “Dam Yesus bake tu vuzehi meedam dam lam Kristen dam am tame,” lahame ame dam laba alimeat taluhu bak lam di labe Antiokia laba ab aiham.
27. Labi ame di labe dam Yesus bake tu vuzehi meedam dam abo Alat vameadaha im aime fa dam bake ahate vameaidaha dam totbaho lam kota Yerusalem labe Antiokia niba ab leham.
28. Ame dam labe dat meida Agabus lamti am dam totbaho lamti Antiokia niba ab lefuham. Alam Aha Nutabe Neàna labe Agabus bake modi vizi teudehe labe damat ba modem im aho nasi ozobohudehe labe dam labe ibi iho im vameadam tomba laba duzu im fet nehame ab vameadamam. “Ba Kaisarleheda labe aho vuusdam dam debu ahebu gi ideia ibzida tame,” lahame nasi ozobohudi dam bake fet vameadume ab esuham. (Ame bak lam ba Klaudius fa Kaisar gàhà dateli dam vuusu im vahokedam lahasuhu di labe ame fet vameadaha im lam ab imbodeham.)
29. Làhàmu lab fet vameadaha bak lam aihemu ame Yesus bake tu vuzehi meedam dam Antiokia laba azim dam labe im fa vahi Yesus bake tu vuzehe dam totbaho Yudea bak laba azim dam labe, “Ba ideia ibzida tame,” laham bak aihemu faobekesi, “Doi nasi fet vi oluse,” lahame ab ozoham. Labihàmu ame dam labe ihimo ozodaha labe doi meit ahamo ozome vi lo. Meit ahamo ozome vi lo. Labihada.
30. Labihadàmu ame dam labe im doi vaheme neàdi Barnabasti Saulusti dam behàsu laba lu neha, “Yesus bake tu vuzehi meedam dam kota Yerusalem laba azim dam laba vuusu im vameame faheme modiam dam busaoda zi laba vou lale,” lahame gagu ab oluham.
1. Labihadam di labe Boehàda Herodes Agripa labe aho ozo, “Imo Yesus bake tu vuzehi vahi meedam dam nim neo fai bak vi vabidase,” lahame ozoho labe am meo dam gagome olu Yesus bake tu vuzehi meedam dam zoho gi siàdume meit git modehezobe si oumahedam num laba oumahedume teudeda. Labi ame dam zoho gi odda. Labihada.
2. Labi Yohanesam dubu Yakobus lam Boehàda Herodes am meo dam gagome ae bohu tot mo tot mo lahamna labe ab belu oteme eloham.
3. Labi Herodes aho lab modehe bak lam Yahudi damat aaha, “Herodes abo neàte. Afoe oteha,” lahame aba deelehe bak aihemu ozo, “Dam lam eba neo fà deelese,” lahame aho neo dam gagome Petrus laha ab siham. Yahudi damat roti fi kidehe vabna àme izidam di labe si.
4. Labi si afoezobe Herodes am meo dam gagome Petrus vou le mei si oumahedume doo teudem num laba vou le sel meida laba ab ousu teudeham. Teudi neàdi aho am meo dam enam belas lamota fàsi gagome dam empat nasi Petrus bake le vou aasdume tiga jam foli fa la. Labi neo dam meida empat fa neo li Petrus bake vou aasdume tiga jam neo foli fa neo la. Gi labihadam bohu meeda. Herodes nehame ozo, “Etei em nasi mei uloome aime neàdi beom biem bak. Yahudi dam ahamda labe Im Adam Datahida Alat Oddaha Vabat Labohotehe Bak Laba Vi Ozome Àme Iziam bak abo Paskah lam Yahudi dam bada nibe àme neàdehe vab di nibe eho em meo dam gagu Petrus vihitom vabile. Labihàmu ame bak lam modeme neàdi em meo dam gagome Petrus vou futoi Yahudi damat aasdahit eho uloome aise,” lahame ozoho labe am dam gagome Petrus gi si ousu vou aasda.
5. Lahana damat Petrus si ame num laba ousu ame meo dam vou aasdam di labe dam Yesus bake tu vuzehi vahi meedam dam totbaho labe im ahu vàmadi ibi iho azim num laba, “Petrus damat a beomule. Fa isi olule,” lahame gi Ala bake tom gagodam bak bohu meeda.
6. Labi ba di iube Herodes labe Petrus vou futoi damat aasdahit aho uloome aime neàdi beolo modem digat fuseo modem aibu labe Petrus gi bes botehà niz bohu am anekehà tot vààsu tot vààsuiamna dam meo da ahim labe donibu ousu vou bisu idda. Labi dam meo da totbaho gi ame num doo bako tot laba laha vou aasda.
7. Labihadume modeha Boehàda Alat Am im gagu vou usemda meida labe ame da Petrus ousdam sel laba nom ilu duzu ab fauhaleham. Labi ame da labe Petrus bake li fu gago, “Petrus taho keesi usale,” lahame fu gagohemu Petrus udovai keesi usai modeha ame bes botehà niz teuna lam ahamo ab vuhatomoham.
8. Labi ame Alat Am im gagu vou usemda labe Petrus bake neo gago, “Om sue dusu bohe sokba neo visoi fegeamdi naba dusumna neo visoi dusu loat tadele.” Làhàmu Petrusat ame baket ab modeham. Labi neo gago, “Om sue sona ahoba dusumda laha dusu eba nasi vi duzu vulele.”
9. Làhàmu Petrusat neo ame baket modeme neàdi ame Alat Am im gagu vou usemda labe am ohuse vi duzu sel labe ab futodamam. Lahana Petrus vedi am imbona meedam vaba tiba. Am gi edehesi fako bakamta aasdamna aada tiba vabi ozoda.
10. Labi vou futodam di labe doo ahamte futomda lam vou aasdam meo dam lam Alat ahit modi fako veimdehe labe gi labohote. Labi doo meida lam vou aasdam meo dam lam neo vou labohoti futo. Labi vou futoi vou laha labe natàh bakoda doo besit modeheda lam abo num debu bak aam neà doo laba ab vou fuham. Gi etei fusi duzu modeha natàh bakoda doo lam ahamo ab fi stoham. Fistohemu ab vou futoham. Vou futoi ame dam behàsu labe neo num debu bak lam zie meida neo lada. Gi etei ame zie laba ladameam aaha ame Alat Am im gagu vou usemda labe Petrus vou esmozi ab alimdi seteham.
11. Labi modeha Petrusat aho etei meedaha im lam ab ozobohudeham. Ozobohudi ahamo aba ab it vameadamam. “Aa làhà! Imbote. Em ulem bakti ulohona aasdam vaba abo gi imbo im meedam bak. Herodes feàda am meo dam laba gagome em si ousuhu bak lam Boehàdat em isi olum bake ozome Aho Am im gagu vou usemda meida eba nom ilu em ab ve vou futoham bak. Labi laha Yahudi dam labe ihimo, ‘Em beose,’ lahame ozome gagoho bak lam em fa ab neàdeham bak.” Lahame Petrusat ozobohudi ahamo ab it vameadaham.
12. Labi Petrusat, “Am ab futoi neàdeham bak,” laham bak ozobohudi neàdehe labe aho Yohanes abo Markus labe am oi Mariam num laba ab ladamam. Amu di iube dam dua bak ame num laba oli bakamta vahi Ala bake tom gagoda.
13. Laham num laba le lafusi natàh bakoda doo laba ab le foadamam. Foadume modeha na meedam nam ee gagom Rode laham nam labe, “Amat foadàla?” lahame ab li gagu aiham.
14. Labi Rodet gagu aiha Petrusam dae aihemu deelehat doo fi stoho vabat fa emoeme numa oli dam bake le gago. “Ame da Petrus doo bàhàgoda niba li doudalo.”
15. Lahahat ame dam labe fa gago, “Eehe. Abo? Om gi ostam im vameadam namet modem bak,” lahame gagoha nam nibe gi fa otesiame gago, “Imbo bak. Petrusat niba li doudalo. Am dae em abo aihi bak,” lahame otesiame modeha damat fa neo gago. “Vabà! Petrusat modem kaio. Gi Alat Am im gagu vou usemda Petrus bake olu vou aasumda mode moio?”
16. Ame bak lam otesidam di labe Petrusat gi bako laba doo foadam lahasu. Labi otesidaha vabamu li doo fi stoi aaha Petrusam dauha aahemu ab àvodeham.
17. Àvodi meedam di labe Petrusat, “Dae vabalele,” lahame anekehàt ab fi bo fi bodamam. Labi Boehàdat Am im gagu vou usemda labe aba li ame mei si ousu teudem num labe am vou futoho im ab faasi vameadaham. Vameadume neàdi gago, “Uho laha ame im lam Yakobus meida lamti iba tau Yesus bake tu vuzehi meedam dam totbaho lamti ame dam laba le laha vameadale,” lahame vi vameadume neàdi Petrusat dam lam vou esmozi bak mei bake ab laham.
18. Labi izi dihambe ame mei si oumahedume teudem num labe sel meida laba Petrus vou aasdam meo dam labe aaha Petrus setehe bak aahemu, “Petrus akati modi futoi setehela?” lahame àvodi iedi ab fi didamam.
19. Làhàmu Herodes am meo dam amomoi gagome nabidume modeha dat ba vi aam biehe bak ab li gagoham. Li gagohemu Herodesat fa amu Petrus vou aasdam meo dam gagome li aho avaesdam laba ab dozeadaham. Dozeadume neàdi Herodesat uloodume vi aim biehemu faki fa am meo dam amomoi ab gagoham. “Dam nim si oddale,” lahame gagu ame meo dam lam ab oddaham. Labi Boehàda Herodes labe Yudea bak lam vou esmozi fa num debu Kaisarea laba teohe le ab aziham.
20. Labi Boehàda Herodes Kaisarea laba le azihi di labe dam num debu Tirus laba azihi dam lamti dam num debu Sidon laba azihi dam lamti laham dam laba Herodesat aho abo duana faki meeda. Ame dam labe bak ibida na vabali fa Herodes aho vuusdam dam laba le mei gandum na ahum le ve vou li àme izidam damat moz. Lahana Herodesat ame dam laba fakehe labe aho vuusdam dam labe im gandum fa ame dam laba lom bak aho fa male. Labi malehe labe, “Ame da Herodes iba fakehe bak fa vameadume neàdese,” lahame Tirus dam lamti Sidon dam lamti ame dam labe ibi iho im vameadam meo dam faheme fa vahi Herodes bake ab oluham. Labi laba lafusi Herodes labe am nazoh ahebu ot vai vuusu fa dam bake gagu modiamda ahida Blastus laba nasi le ab gagoham. “Oho Herodes bake le gagole. ‘Herodes iba fakehe bak lam imo fa vahi im vameadume fa vahe vahedume neàdedase,’ lahame oho Herodes bake le gagole,” lahame Blastus bake ootedume tet keobaedume ab uledeham. Labi Blastus uledi Herodes bake le gagu modeha Herodes fa uledi neha, “Lo, im vahi im vameadam neàte,” lahame Blastus fa gagome olu ame dam laba fa li ame vahi im vameadam digat ab fet gagu esuham.
21. Labi dam na im modehena, “Aho aim neàte,” lahame fet gagu esuhu digat fuhemu Herodes am boehàdat na duanat vaha sue sona ahoba dumna dume neàdi dam Boehàda ihimo nusu, “Akatihasu modela?” laham bak ozome gagu vàmadelo modem di nusumna feàda laba aho nusu dam zi laba im ab vameadamam.
22. Labi im vameadam di labe dam duada zi labe Herodes bake deeli ab vou buddamam. “Dat iba im vameadamda nim dàt modem kaiooo. Abo alalehenat mozooo,” lahame ab vou buddamam.
23. Deeli vou buddume modeha Herodes aba it mali fa ahu adat iedi Ala bake, “Om abo feàte,” lahame vou baedaha vaba aho vedi uledi am vi tau aba it baedume modeha Boehàda Alat Am im gagu vou usemda labe fa Herodes bake nom ilu da lam gi ab belu gaileham. Labi gaili ohisobuli bisdume ab eloham.
24. Labihadam di labe Yesus bake tu vuzehi meedam dam labe iho Yesus Aho amu meedume vou esmoho im abo Alat vameadaha im lam dam iudu iumti dam iudu iumti vou vameatedaha labe dam amomoi vi taui vi tauidume Yesus bake tu vuzehi meedam dam debu ab dualedamam.
25. Labi Antiokia laba azim dam labe fa Yudea bak laba azim dam lam ideia ibzidam bake na vam doi Barnabasti Saulusti dam behàsu laba lu oluhu doi lam ame dam behàsu labe vou li fa Yesus bake tu vuzehi meedam dam kota Yerusalem laba azim dam labe iba vuusdam dam busaoda boehàda zi laba lodume ab vou esmoham. Labi Barnabasti Saulusti ame doi lam lodume vou esmozi lalo modem di labe Yohanes ee meida, “Markus,” lahamda lam vi ve tau num debu Antiokia laba vahi ab ladaham. Labi ladume Antiokia laba ab lafuham.
1. Ame dam Yesus bake tu vuzehi vahi meedam dam Antiokia laba azim dam labe dam totbaho Alat vameadaha im vahokem damali meeda. Labi dam totbaho Alat vameadaha im aime fa dam bake ahate vameaidam damali meeda. Labihada. Ame dam neha. Barnabas ame. Labi Simeon damat, “Da Gihobu,” lahame taluhuda ame. Labi Lukius Kirene bak labe leheda ame. Labi Menahem abo Boehàda Herodes Antipas lamti ahili bakamta budualeheda ame. Labi Saulus ame. Labihasu.
2. Labi ba di iube Yesus bake tu vuzehi vahi meedam dam abo Antiokia laba azim dam labe bakamta vahi Boehàda Ala bake, “Am abo feàte,” lahame ahu adat iedi vou baeda. Labi laha Ala bake tom gagolo modemu ahit na àm mu tom gagoda. Labihada. Labihadam di labe Alam Aha Nutabe Neàna labe ame dam laba ab gagoham. “Uho Barnabasti Saulusti ame dam behàsu lam utasi Ebe Eho gagu olu Em im modiamdamalem bak meedale.”
3. Labihàmu fa neo Ala bake tom gagodume izidalo modemu ahit na àm mu tom gagodume izidume neàdi ame dam totbaho labe im anekehà Barnabasti Saulusti im so laba odotladume tom gagodume neàdi Alam Aha Nutabe Neànat gagoho bak laba vi ozome ame dam lam ab oluham. “Yesus Aho amu meedume vou esmoho Im Neàna lam dam bake vou vameatedale,” lahame ab gagu oluham.
4. Labi Alam Aha Nutabe Neànat gagu oluhu labe Barnabasti Saulusti dam behàsu labe ladume itea feàna valau obe laba modesuhu num debu Seleukia laba ab lazeham. Labi Yohanes damat ee meida, “Markus,” lahame taluhuda lam laha ame dam behàsu laba tau meedalo ab vi tau lazeham. Labi Seleukia laba lazi sue baa vààsu nutabet vou lam ihe buduada laba zisi Seleukia vou esmozi fa itea feàna modesuhu touha Siprus laba ab bioham. Biou num debu Salamis laba ab zituham. Zitu Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num meida laba oli Yesus Aho amu meedume vou esmoho im abo Alat vameadaha im lam dam laba ab faasi vameadume fi dedamam. Labi ame num meida laba neo oli ame baket neo meeda. Gi labihada.
6. Labi Salamis laba Alat vameadaha im lam faasi vou vameatedume Siprus touha laba modealaha num debu lam ahebu uloholedume ame touha labe am bobusbe modesuhu num debu Pafos laba ab fuham. Labi ame Siprus touha laba esuhu dam ahebu vuusdamda boehàda gubernur Sergius Paulus labe aho num debu Pafos laba azi. Ame da lam bisi im ozobohuda am. Lahamda labe amti ot deeliame vou aliamda ee gagom Baryesus am. Ame da Baryesus Yahudi dàt moz. Lahana koba deda aha daebu dàt moz. Labi ame da labe am ee Yunani dae gagom di, “Elimas,” lahadam bak. Ame da labe vedi nehada, “Am abo Alat vameadaha im aime fa dam bake ahate vameaidahada meida am am bak,” lahana giomim fa it daetbada. Labihada. Labi gubernur Sergius Paulus labe aho ozo, “Yesus Aho amu meedume vou esmoho im abo Alat vameadaha im lam aho aise,” làhàmu aho Barnabasti Saulusti am bake lefuhemu ame dam behàsu laba neha, “Aba lele,” lahame gagohemu Barnabasti Saulusti ab leham. Labi li vameadasome modeha Elimas aha daebuda labe ame dam ahim laba odosi male. Ame gubernur labe Yesus bake tu vuzehem bak labna zohàme aho gi nehada, “Boehàda oa, dam etei vou lehe im lam gi giomimot modem bak. Ba a aimule,” lahame odosi mali meeda.
9. Labihadamnàme Saulus damat ee meida, “Paulus,” lahame ba taluhuda labe Alam Aha Nutabe Neàna labe aba modi vizi teudehe labe aho ame koba deda Elimas bake bisteat aasu ab gagoham.
10. “Elimas oa, om abo meia vagemohoda Pafos Antiokia Seleukia Tarsus Derbe Ikonium Antiokia Perga Salamis Listra Atalia PISIDIA LIKIA SIPRUS SIRIA PAMPILIA LAUT TENGAH FRIGIA KILIKIA ,
100. Kilometer U LIKAONIA Iblisti ulohona modem dàt moz. Om laha abo meit iademe ahu vamdesu meedalo modemda oho vedi fa daetesu ootedam meo dàt moz. Labi Boehàda Alat Aho ozo, ‘Im iademe vamdesu meedase,’ lahamna oho vedi nehada, ‘Imbo kaio,’ lahame dihasi giomim gagoda. Dihasi giomim gagoda. Lahadam dàt moz. Om labiham bak taho setem vaba?
11. Oho labihadàmu Boehàdat etei oba faki beolo modem bak. Aho oba modi fako na aam ab bielo modemam bak. Om ba taho fa na aam neàdem vaba gi labihasu modesdam bak. Om gi na aam ab bieham bak.” Lahame labi gagoha Elimasam fako na aam bak ab aibuli na aam bak ab bieham. Na aam biehemu, “Meit am anekehà taho vuusu vou lale,” lahame ab àvodi vou vabodamam.
12. Labi ame gubernur labe ame bak lam aahemu ozo, “Aa làhà! Ame dam labe etei vou li vahokehe im lam abo Boehàda Yesus Aho amu meedume vou esmoho im lam abo feàte,” lahame àvodi Yesus bake ab tu vuzeheham.
13. Labi Paulus aba tau gohatem damti sue baa vààsu nutabet vou lam ihe buduada meidate neo ziddume num debu Pafos lam vou esmozi fa itea feàna labe dumam totbaho iuba biou Pamfi lia bak labe am num debu Perga laba ab zituham. Labi zitu modeha dam behàsu laba vou esmozi Yohanes Markus ahamo kota Yerusalem laba fa ab itaham.
14. Labi Paulusti Barnabasti dam behàsu labe ihimo Perga neo vou esmozi neo ladume Pisidia bak labe am num debu meida Antiokia laba le ab lafuham. Labi laba fusi iddume hari Sabat abo Yahudi dam labe ibi iho gi azibe im digat fuhemu ame Antiokia laba azim Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oedàmu Paulusti Barnabasti dam ahim lam laha ab tau vi oli nusuham.
15. Labi oli nusu vou faodam di labe meit usai Yahudi dam labe im im fi hamdati im neàdati laham Im Feàna dat ahamda Musat toedume fi hasi vàmadi esuhu im bolome esuhuna lam ve aame dam bake gagoda. Labi neo dam ahamda Alat vameadaha im aime fa dam bake ahate vameaidaha dam zi labe iho toedume esuhu im bolome esuhuna lam laha neo ve aame dam bake gagoda. Labi aame gagodume neàdi ame num laba oli meedam di labe meia im gagu faheme modiam dam labe meia ab gagoham. “Oho im Yahudi dam meida behàsu Barnabasti Paulusti laham dam laba gagu aile. ‘Uho iba vabedelo gagu iho aim imvat eheo? Ehelemeam làhà uho nasi niba li duzu im vameadam neàte,’ ” lahame ab gagoham.
16. Làhàmu Paulusat usai duzu, “Dam dae vabalele,” lahame anekehà baeme neàdi im faasi ab vameadamam. “Em dam abo Israel labe aho vou faat lehe dam debuti labi Yahudi damat modem vab dam lahana Ala bake, ‘Am abo feàte,’ lahame ahu adat iedi Ala bake vou baedam dam debuti laham dam oa, im ebeda nasi aimale. Em etei im Yahudi dam im tai ahamda ziat meedaha im faasi vameadalo mozo.
17. Im dam Israel aho vou faat lehe dam abo im Yahudi dam ahebu iho vou baedam Alat Aho ozodume im tai ahamda zi lam amu gi vaha bak. Aho vaha labe im tai ahamda zi Mesir bak mei bake le esdam di labe Aho ahit modi im dam debu duali feà bak fuhu bak. Labi Mesir bak dedam labe im tai ahamda simtedi vabidam di labe Alat na damat ihimo modem biem im feàna zi meedaha labet modi Mesir dam labe fa im tai ahamda ab iddume oudaham bak.
18. Labi Mesir bak vou esmozi Musat im Yahudi dam tai ahamda zi lam bak aotba baa bohu dam vaba alim bak vou ladam di labe Aba mu vou beà ladam bak lam Alat gi ozahigeàmu vou vi aasu ladume tahun empat puluh folehe bak.
19. Labi tahun empat puluh foli Alat neo ame Israel aho vou faat lehe dam labe im tai ahamda labe iho Kanaan bak valo modem di Alat im tai ahamda laba tau Kanaan bak deda dam debu tujuh lam beome ilime mei bak Alat fa faheme im tai ahamda zi laba lodume fa ab im bakeleham bak.
20. Labihadume meedaha im lam ahebu empat ratus lima puluh tahun folehe imot modem bak. Labihadume neàdehezobe Alat dam amomoi fa gagome im Israel dam bake vi tau fa iba fakemoholehe dam laba beome veimodume ihimo duzum bak ab meedamam. Da meida laba gagu ame baket meedume elo. Labi neo da meida laba gagu ame baket neo meedume elo. Labihadume ame dam labe im tai ahamda vuusualadume vou mode ladume fa Samuel laba ab vou fuham. Ame da Samuel laha Alat vameadaha im aime fa dam bake ahate vameaidahada meida am. Lahamda laba lafusi ab novaham. Ba dat amomoi gagu im vuusu meedamda vabak.
21. Lahana ame da Samuel aho lab meedam di labe ame Israel dam labe Samuel bake ab li tauledamam. ‘Iba abo dat boehàdatebo taho modi iba fa vuusu im vahokedale,’ lahame Samuel bake tauledume modeha Alat ab gagoham. ‘Làhà, Benyamin vou faat leheda meida Kis labe am adat Saul modi boehàdatebolese,’ lahame Alat gagohemu Samuelat fa Saul bake modi ab boehàdateboleham. Labi Saul Boehàdateboli Israel dam vuusu im vahokedam di lam empat puluh tahun ab foleham bak.
22. Labi empat puluh tahun foli modeha Alat Saul mu fa Daud gagu ab boehàdateboleham. Alat Saul bake lab mu fa Daud vaha bak Aho amu nehi gago, ‘Ame Isaim adat Daud lam Eho im gagom di uledi meedam tadem dàt moz. Aho meedam bak lam Em abo deeleho,’ laham bak ahate gagu fa Daud ab modi boehàdateboleham.
23. Mahate aimale. Im Israel dam debu nibe iho faina meedàmu Alat iba beodalo meedam bak lam Aho fa mu soat vausu fa vei neàdelo modemu Aho ame Boehàda Daud vou faat leheda meida Yesus lam ab modi iba Israel dam bake ab oluham bak. Aho amu Daud bake fet gagu esuhu im lam ab imbodeham bak.
24. Ame Da Yesus lam Alat Aba gagoho im faasi meedaha vab di labe Yohanes Mei Vuu Valo Baptisleiamda labe amu nasi Israel dam bake nehame vou vameatedume fi deda. ‘Uho faina meedam bak lam nasi voedume fa ahu neà bak vàmadi neàdehezobe eho um vuu valo baptisleidase,’ lahame nasi Israel dam bake ab vou vameatedume fi dedaham bak.
25. Ame da Yohanes labe Alat aba gagoho im lam meedume neàdelo modem di labe Yohanesat ame dam zi laba nehame vameadaha bak. ‘Uho ozom, em Alat Gagu Fihasi Vimteme Oluhu Dat Boehàda em ame Da am tiba. Lahana um git ozo. Em ba ame Da modem kaio. Neham bak. Im Alat eba gagohoda modeme neàdi ame Da lam ba lem bak. Ame Da feàda labe Am naba dusumna lo tadehena lam eho feà vab dàt lo ziamom di em ba uloho vabak,’ lahame ame Israel dam laba ab vameadaham bak.
26. Lahana um ahebu abo tai ahamda Abrahamat umti emti vou faat lehe dam totbahoti labi um Yahudi damat modem vab dam lahana ahu adat iedi Ala bake vou baedam dam totbahoti um ahebu nasi aimale. ‘Iho faina meedàmu Alat iba beodalo meedam bak lam Aho fa mu soat vausu fa vei neàdedalo mozo,’ lahaha im lam Alat modi iba ab vou fusi im ab aiham bak.
27. Ame Yahudi dam kota Yerusalem laba azim dam labe iba vuusu im vahokedam boehàda zi lamti laham dam labe ba, ‘Alat Gagu Fihasi Vimteme Oluhu Dat Boehàda lam Yesus ame Da am tame,’ laham bak lam vabile. Labi hari Sabat ame dam labe ibi iho gi azibe im digat meida fuhuzobe Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num zi laba oedume Alat vameadaha im aime fa dam bake ahate vameaidaha dam ahamda zi labe iho fet toedume bolome esuhu im lam meit visoi aame gagu damat dogoit vou faoda. Labi ame digat neo fuhuzobe gi ame baket neo meeda. Labihadamnàme dam lam ame im labe am tombu lam ba ozobohudi fi gatem vabak. Labihadàmu ame Yahudi dam labe, ‘Yesus otem neàte,’ lahame ab gagoham bak. Labihadamnàme, ‘Yesus otem neàte,’ laham bak gagoho labe ame dam labe vabi ame dam ahamda Alat vameadaha im aime fa dam bake ahate vameaidaha dam labe iho amu fet toedume esuhu im lam, ‘Dam bada Alat Gagu Fihasi Vimteme Oluhu Dat Boehàda laba ba nehada tame,’ lahame fet toedume esuhu im lam ab modi imbodeham bak.
28. Ame Yahudi dam bada totbaho nibe Yesus bake uloodume aiha fai bak aihi vabna otem biehenàme fa Boehàda Pilatus bake neo vou le ootedume uledi am meo dam gagome Yesus ab oteham bak.
29. Labi dam ahamda Alat vameadaha im aime fa dam bake ahate vameaidaha dam labe iho amu neha, ‘Dam bada labe iho Alat Gagu Fihasi Vimteme Oluhu Dat Boehàda laba nehada tame,’ lahame iho fet toedume esuhu im lam ahebu Yahudi dam bada totbaho nibe ihimo ba vabi meedume imbodi neàdehe labe damat Yesusam koeiso ut tetehesuhuna laba paku dohona lam fa vou usi ke bumata vou le vou oli ab esuham bak.
30. Lahana Am eloho bak labet Alat modi fa ahedi ab usaham bak.
31. Labi fa ahedi usai neàdi Yesus Aba tu vou gohatem dam Aba tau Galilea bak labe fa kota Yerusalem laba lehe dam laba, ‘Am fa ahedi usaho,’ lahame Am so dihasi fi dda. Dihasi fi dda. Labihada. Labihahemu ame dam lam aame ozobohudehe labe etei Yesus Aho amu meedaha im lam fa im Yahudi dam bake ahate ab vou vameatedamam bak.”
32. Lahame labihasu vameadume neàdi ame Yahudi dam laba nusualadaha dam laba Paulusat neo vi vameada. “Emti Barnabasti im ahim nibe fa etei uba ame Im Neàna lam ab vameadume fi dedalo modemam bak. Alat amu im tai ahamda zi laba neha, ‘Im Yahudi dam iho faina meedàmu Aho iba beodalo meedam bak lam fa mu iba soat vausu fa vei neàdemda iba olu tame,’ lahame fet gagu esuhu bak lam etei fa iba dam badate ab modi imbodeham bak. Ame Da Yesus Am eloho bak labet Alat modi fa ahedi ab usaham bak. Ame lab ahedi usahada laba vàlu gagom im lam Ala Bake Vou Baedam Ladeem Im Toedahana abo Mazmur pasal dua laba nehame fet toeme esuhu im ehete. ‘Om abo Em Adat modem bak. Labi etei nibe damat biem bake Em Om Aiat modem bak ab modi tombaleham bak.’ Lahame Daud amu di iube fet toeme esuhu labe ab imbodeham bak.
34. Labi, ‘Ame Da Yesus eloho bak labet Alat Aho modi fa ahedi usai neàdi ba neo eloi koeilem gikina bohu vuusda tame,’ lahame dam ahamda labe iho fet vameadume esuhu im lam laha ehete. Alat Am Adat Yesus bake gagoho im lam dat ahamda Alat vameadaha im aime fa dam bake ahate vameaidahada meida Yesayat nehame fet toedume esuhu bak. ‘Alat Aho Daud bake neha, “Oho ba vou faat ladam dam meida Bisi Neàboda lam Am eloho bak labe Eho modi fat ahedi usa tame,” lahame Eho Daud bake fet gagu esuhu bak lam Eho ba voom vabak. Eho modi imbode tame.’ Lahame Yesayat fet toeme esuhu im lam ab imbodeham bak.
35. Labi laha Boehàda Daud aham di iube aho Ala bake tom gagodam di labe aho aba gi vàlu nehada. ‘Ala oa, Obo Oho gagohoda abo Fihasi Vamdesu Meedamda nibe Em koeiso nim koeili setem bak Om uledem vaba malem bak.’ Lahame Ala bake tom gagoho bak lam Daud aham di iube fet toedume esuhu bak.
36. Lahana um em Yahudi dam totbaho oa, um nasi ozodale. Daud ame bak lam tom gagoho di lam am ba eloi am koei laba it ozome tom gagoho vabak. Neham labe ame bak lam im ozobohudi gagodam bak. Daud aham di iube ahe diat Alat aba gagoho im ahebu uledi meedume neàdi ab eloham bak. Labi am koei lam damat ve fa am tai ahamda vou faat leheda baumahe bak laba neo vou le vi baumsu abo koeilehe bak. Labiha labe im ahebu ozobohu bak. Daud aba gi it vàlu gagoho bak.
37. Lahana ame Da Yesus ba labihaha vabak. Damat Am koeiso lam vou le ke bumata vou oli esuhu bak laba ba koeilehe vabak. Alat modi fa ahedi usaha bak.
38. Labihadam labe em Yahudi dam totbaho oa, ‘Yesus Am eloho bak labet Alat modi fa ahedi usaha labe uho faina meedam bak lam Alat gi ozahigeàmu fa faamome uba beolo meedam bak lam fa vei mu neàdedam bak,’ laham bak lam um biem bake iho etei uba ab vameadume fi dedamam bak.
39. Labi laha um biem bake im nidi nim laha nasi aimale. Iho meit gi dat ahamda Musat aho toedume fi hasi esuhu Im Feàna zi lam damat vou vamea usehe im lamota uledi ulohodesu meedameam làhà ame da labe aho faina meedàmu Alat beolo meedam bak lam Aho ba ozahigeàmu fa vei neàdem vabak. Ba ame da laba, ‘Im vamdesu meedam dàt modem bak,’ lahame deeli gagu vam vabak. Lahana etei Yesus Am eloho bak labet Alat modi fa ahedi usaha labe meit Aba tu vuzehemeam làhà faina meedam bak lam Alat gi ozahigeàmu fa beom bak mu fa vei neàdi ame da laba neha, ‘Im vamdesu meedam dàt modem bak,’ lahame deeli gagu vam bak. Laham bak lam um laha biem bake im etei uba ab vameadamam bak.
40. Labiha labe iho etei uba lab vameadaha im lam a mu voomule. Mahate Yesus bake tu vuzehele. Uho mu voomeam làhà dam ahamda Alat vameadaha im aime fa dam bake ahate vameaidaha dam labe iho fet toedume esuhu im lam uba imbodemo. Ame dat ahamda meida Habakuk labe aho Alat gagohona nehi fet toeme esuhu bak.
41. ‘ “Eho ba nehada tame,” lahame fet nasi gagu esuhu im lam uho tozome mom dam oa, um nasi Eho meedalo modem im nim nasi ozodale. Um ahe lahasuhu di labe Eho ba im feàna modem di um aame àvodemta aame àvode. Lahana ame bak lam uho ba tu vuzehem vabak. Ba meit Eho ba meedam bak uba iademe vahokedameam làhà um ba tu vuzehem vabak. Gi tozome mom bak. Labiha labe Em uba beoda tame.’ Lahame ame dat ahamda Alat aba gagu aho fet toedume esuhu im lam uba neo imbodi Alat uba beomna zohàme iho uba etei vameadaha im lam a mu voomule.” Lahame Paulusat ame Yahudi dam labe ibi iho bakamta vahi meit Alat vameadaha im ahamda vahokedam diat dogoit aidam num laba nusualadaha dam zi laba ab vameadaham.
42. Labi ame im vameadume neàdi Paulusti Barnabasti ame num labe futolo modem di labe ame dam zi labe ab vi gagodaham. “Um le ba hari Sabat meida fa neo iba li ame im lam laha vi vameadale,” lahame ab vi gagodaham.
43. Labi vi gagodume neàdi ame num laba im gagu faheme meedam dam labe ame num laba nusualadaha dam zi laba, “Neàdeho. Nasi futodale,” lahame dam bake gagodume futodume fi goaitoi ahala ab ladaham. Labi Yahudi dam totbahoti labi Yahudi damat modem vab dam lahana Yahudi damat Ala bake tu vuzehem bakti ulohona tau meedam meo dam lamti ame dam zi labe vahi Paulusti Barnabasti dam ahim laba vi tau lalo meeda. Labihàmu ame dam behàsu labe fa dam zi duada laba neha, “Alat abo iba ozahit deeli im neà bak meedam bak. Uho ame bak lam mahate tu vuzehi bohu vuusdale. A mu voomule,” lahame ab vameadaham.
44. Labi ba hari Sabat meida labe Antiokia laba azihi dam duada zi totbaho abo Yahudi damat modem vab dam labe laha ame Yahudi dam labe ibi iho bakamta vahi meit Alat vameadaha im ahamda vahokedam diat dogoit aidam num laba vi tau valadume ab vahe vahedaham. “Imo Boehàda Yesus Aho amu meedume vou esmoho im lam Paulusti Barnabasti vameadam bak laba vule vi tau oli aidase,” lahame ab valadume vahe vahedamam.
45. Labihadume modeha Yahudi dam labe aaha dam Yahudi damat modem vab dam duada zi labe tau oli nusualadaha bak aahemu ozo, “Dam duada zi nim ibi iho vahokehe im aim vabna akati modi Paulusat lab vahokedaha im laba bisi ailo modela?” lahame ame bak aahemu ahu adat faki ab teideham. Labi faki teidehe labe Paulusat lab vahokedaha im lam tozome ab moham. “Da lam baka ana modeo, gi im giomimna vameadàla?” lahame ab vi feàtàidamam.
46. Labihadamnàme Paulusti Barnabasti meia iedem vab damat gi ozahit neo duzu fa keàtet vi vameada. “Uho labihameam làhà im fa um vou esmozi fa Yahudi damat modem vab dam bake fa ab lalo modemam bak. Alat amu iba neha, ‘Em Adat Yesus Aho amu meedume vou esmoho im abo Eho vameadaha im lam nasi Yahudi dam bake vou vameatedale,’ lahame iba gagu oluhu labe iho ame baket ab meedamam. Lahana iho Alat gagu oluhu im uba vameadaha uho vedi uledi vaha vaba moudaha bak. Labiha labe uhumo naedamat it vàhàdehe labe Alat ba uba, ‘Amti vahi ahe neàna bohu vuusdam neà bak,’ laham bak ba ab gagom bieham bak. Laham bak lam im ab ozobohudeham bak. Labihàmu im um vou esmozi fa Yahudi damat modem vab dam laba Alat vameadaha im vou vameatedalo modem bak.
47. Boehàda Alat amu iba nehame gagu oluhu labe iho gi ame baket ab meedalo modemam tame. ‘Dam debu mei vàmadiaha bak ahebu Ala biem lahasuhu dam laba Eho modi fi gatelo om ab gagu vaham bak. Abo uma usime fauhali na aam bakti ulohona oho dam laba modi fi gatem bak. Damat faina meedàmu Eho beodalo meedam bak lam Eho fa mu soat vausu fa vei neàdedam bak lam oho dam bakda ahebu le vameadam bake Eho om ab fi me vaham bak.’ Lahame Alat amu fet gagu esuhu labe im ame baket ab meedalo modemam tame,” lahame ab vameadume esuham.
48. Labi ame Yahudi damat modem vab dam labe ame dam ahim labe lab gagoho bak aihemu deeli Ala bake ab vou baedamam. “Boehàda oa, Oho vameadume oluhu im nim dam behàsu nibe etei iba vameadahana iho aiha abo bisi neàte. Làhàmu iho etei, ‘Om abo feàte,’ lahame Oba vou baedam bak,” lahame Ala bake ab vou baedamam. Labi Alat amu neha, “Dam nimota Emti vahi ahe neàna bohu vuusdam neàte,” lahame Aho amu nasi fet gagu esuhu dam lamota Yesus bake ab tu vuzeheham.
49. Labiha labe ame Yahudi damat modem vab dam lam etei Yesus bake tu vuzehe dam labe ibi iho azihi bak laba ahebu godam di im Boehàda Yesus labe Aho amu meedume vou esmoho im lam ame bak laba dam iudu iuba vameada. Dam iudu iuba vameada. Labihadume ame bak laba ab uloholedaham.
50. Lahana ame Yahudi dam Antiokia laba azim dam labe fa iba im vameame faheme modiam dam busaoda im ozobohudam zi lamti labi Yahudi lahit modem vab lahi lahana Yahudi damat, “Ala abo feàte,” lahame ahu adat iedi Ala bake vou baedam bakti ulohona tau meedam lahi zi abo ee ehe lahi zi lamti laham dam laba le vameadume ootedume, “Dam labe iba fà tause,” lahame meolehe labe ame dam lam fa vahi Paulusti Barnabasti faki vabidume im bak mali fa ootedume ab olulo meedamam.
51. Labihàmu Paulusti Barnabasti Antiokia vou esmozi lalo modem di labe ame Yahudi damat vou aasdahit im naba bak itabe fau foamodume esmozi ab laham. Ame damat ihimo vi aame ozo, “Iho ame dam labe vou lehe im lam moho bake Alat iba ba beom bak ihimo naedamat ab vàhàdehame?” laham bak lam ame dam labe vi aame ozobohudem bake itabe fau foamodume esmozi ab laham. Labi Antiokia vou esmozi num debu meida Ikonium laba ab laham.
52. Lahana dam Yesus bake tu vuzehi meedam dam Antiokia laba vou esmoho dam labe abo bisi duana deeli meeda. Labi Alam Aha Nutabe Neànat ame dam laba laha modi vizi teudeda. Labi dihasi neo meeda. Gi labihadam bohu ab meedamam.
1. Labi Paulusti Barnabasti ladume Ikonium laba ab lafuham. Laba lafusi ame dam ahim labe ibi iho bak mei bake le modem baket ab modeham. Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli Yesus Aho amu meedume vou esmoho Im Neàna lam ab faasi vahokedaham. Ame dam behàsu labe im vameadam di damat aime uledem dam behàsu modehe labe Yahudi dam duada totbaho lamti labi Yahudi damat modem vab dam duada totbaho lamti labihasu dam duada zi labe ame im lam aime uledi Yesus bake ab tu vuzeheham.
2. Lahana Yahudi dam totbaho labe vedi Yesus bake tu vuzehem mouda. Laham dam labe vedi Paulusti Barnabasti feàtàdam labe fa Yahudi damat modem vab dam laba le ooteda. “Ame dam behàsu lam giomim vameadalo. A aimule,” lahame ootedam labe ame dam labe fa Yesus bake tu vuzehi meedam dam lamti Paulusti Barnabasti laham dam laba faki ahu zoho ab beoham.
3. Labihàmu Paulusti Barnabasti ame dam behàsu labe dam iba fakehenàme geàmu gi Ikonium laba ozahit vi azimzida. Labi ozahit laba azimzidam di labe Boehàda Yesus Aho amu meedume vou esmoho im lam meia iedehebeat vameadam vaba abo gi keàtet ame dam laba ahate vameada. Dihasi mode. Dihasi mode. Labihada. Labi laha Alat Am meia vizi teudemna lam ame dam behàsu laba modi vizi teudehe labe iho damat fet aame àvodi ozobohudemna abo na damat ihimo modem biem im feàna lam ab meedaham. Labihadaha bak lam ame Ikonium laba azim dam labe aahemu fa Paulusti Barnabasti ame dam ahim labe iho neha, “Alat abo dam ahebu ozahit deeli im neà bak meedam Ala Am am bak,” lahame lab vahokehe im lam, “Imbote,” lahame ab tu vuzeheham.
4. Labihadamnàme ame Ikonium laba azihi dam lam bisi ahebu Yesus Aho amu meedume vou esmoho im lam tu vuzehem kai. Vedi otesiame ab faheham. Ame dam totbaho labe vedi Yahudi dam Yesus bake tu vuzehem mom dam laba tau. Labi dam totbaho labe vedi fa Yesusat Aho gagu olu Am im vameadume esmozi laiam dam behàsu laba tau. Labihada.
5. Labihadume modeha ame Yahudi damat modem vab dam totbaho lamti labi Yahudi dam labe iba im vameame faheme modiam dam busaoda im ozobohuda zi lamti vazisi gago, “Imo dam behàsu nim vabidume ket beodume elose,” lahame aa im ab odoadamam.
6. Lahana dam labe aa lab odoadam im lam Paulusti Barnabasti meit gagohona aime ozobohudehe labe bak lam neo vou esmozi fa Likaonia bak laba ab itaham. Likaonia bak laba itaha di ame bak laba modealaha num debu totbaho lamti labi num debu behàsu Listrati Derbeti laba ab lafusidaham.
7. Laba lafusidam di Yesus Aho amu meedume vou esmoho Im Neàna lam neo ame dam laba ab vou vameatedume fi dedaham.
8. Labi num debu Listra laba lafusi Paulus aho im vahokedam digat meida labe aaha dat nao ahim eloi nutabedehena ba gohatem biemna am oiat faaha di iube modehe bak lahasuhuda labe Paulusat vameadalo modem im ailo li nusuhu bak Paulusat ab aaham.
9. Ame da labe Paulusat lab vameadam im lam dogoit aida. Labiha labe Paulusat ame da laba aasdamehamdi modeha Paulusat ahamo nasi fet ozo, “Ame da nim, ‘Alat am fa neàdem bak,’ lahame am ahu vàmadehe bak,” lahame Paulusat ahamo nasi fet ozobohudi ame da laba dae buduana ab gagoham. “Nasi usai duzule,” lahame labi gagoha ame da labe fa neàdi àvodehat usai duzu ab godamam.
11. Labi ame dam duada zi labe Paulusat ame da lam fa neàdehe bak aahemu àvodi im Likaonia dae Paulusat aim biem dae lam ostam im ab faasi bisteat ab vameadamam. “Aa làhà! Ibi iho vou baedam alalehena zi lam fa dam ahim nim aliholi nom usi duzuhu alalehena behàsu am taia?” lahame dae ibida ab faasi bisteat ab vameadaham. Ame Likaonia bak laba azim dam labe Yahudi dam labe ibi iho vou baedam Ala imboda modehe vaba gi ostam ala Hermesti Zeusti vou baedam damat modem bak.
12. Lahaha dam labe vedi nehi git ozo. Barnabas Zeus am tiba. Labi Paulus bisi Hermesti im vameadam meo bakti ulohoda modemu Paulus Hermes am tiba. Labihada.
13. Labi ame Likaonia bak laba azim dam labe iho ostam ala Zeus bake vou baedam num lam gi num debu Listra labe am bàhàgo obe laba douda. Làhàmu ame num laba damat Zeus bake lomna ve vua vahudam toheda labe aho lembu abo sapiti ulohona fi ho lamti ut ava etehàso neme omahemna lamti bàhàgo natàh doo laba ab vou ledaham. Ame Zeusam toheda lamti Listra dam dua totbaho lamti iho ozo, “Iho vahi dam ahim nim vou baedalo modem bak,” lahame ame na fi ho zi lam vou ledume oddalo ab meedamam.
14. Labi modeha Paulusti Barnabasti dam duada zi labe ibi iho meedalo modem bak aime ozobohudehemu, “Dam lam git meedalo. Akati iba alalehela?” lahame faki ibi iho damat fet aame ozobohudemna lam dam im sue ab it vome faheham. Damat aame ozo, “Dam ahim nibe iba faki im sue it vome fahehe?” laham bak damat fet aame ozobohudem baket ab modeham. Labi ame dam ahim labe iho damat im meedam laba emoeme dam soat ogiame ab oli duzuham.
15. Duzu gago, “Aa! Um akati git iba vou baedà? A labi modemule. Im bakda umti uloho bak. Im ba meit vou baedam alat modem vabak. Im gi Yesus Aho amu meedume vou esmoho Im Neàna nehamna uba vou vameatedalo lehe bak. Uho neha, ‘Iba vuusuhu ala am tame,’ lahame dam itti ulohona modi alali ostame vou baedam ala zi lam uho nasi voole. Labi fa Ala imboda ahena elom gikida laba abo asum ahoba iumti bak adba nimti vaoti labi ame bak laba modealahana zi lamti labihasu ahebu modehe Ala laba fa tu vuzehi, ‘Am abo feàte,’ lahame ahu adat iedi Ala lada laba vou baedale.
16. Aham di iube um Yahudi damat modem vab dam abo debu mei lahadaha dam labe uho ozo, ‘Iba vuusdam ala am tame,’ lahame ostam alalehena ahaladiame vabi vou baedam bak lam Ala imboda labe uba faki beoho vaba gi ozahigeàmu labihasu esuhu bak.
17. Lahana uho Ala imboda vabi ostam alalehena laba vou baedam bak lam Aho uba bisi vooho vabak. Abo, ‘Am amat mode?’ laham bak lam Am ba uba vastehe vabak. Dam bakda niba Aho iba gi neà bak nehamda fet vouhoda. Iho na deddaha bak laba Aho asum labet modi abaeda. Labi abaedam labe fa neo na iho deddahana lam Aho modi duana usdume soaedam labe iho àda. Labihasu meedam labe im abo deeli, ‘Am Ala am tame,’ laham bak lam im ab ozobohudeham bak.”
18. Lahame Paulusti Barnabasti dam ahim labe dam duada laba, “A labihamule,” lahame labi mali feà bak fusi vameadamnàme ame dam zi labe ozahigeàmu ame lembu oddume dam behàsu laba vou baedalo àhàki meeda. Labihàmu ame dam ahim labe neo mali daetesu meedàmu dam duada zi labe ozodaha vabamu ab moham.
19. Labi ba di iube Antiokia laba azim Yahudi dam totbaho lamti labi Ikonium laba azim Yahudi dam totbaho lamti vazisi Listra niba ab leham. Labi li Listra azim dam Yahudi damat modem vab dam laba vameadume vi ootedume uledi dam labe leheda zi laba fa ab gut tauham. Labi fa gut vazisi Paulus bake le ket beodume, “Paulus eloho,” lahame vabili si vou kea lame num debu bak vou esmozi bàhàgo obe laba ab vou esmoham.
20. Lahana dam Yesus bake tu vuzehi meedam dam labe vule Paulusat bisdam bak laba li vabousu dozeadume modeha Paulusat fa ab usaham. Usai fa bàhàgo vou esmozi ozahit fa num debu Listra laba fa ab laham. Labi izi dihasi Paulusti Barnabasti Listra vou esmozi fa num debu Derbe laba ab laham.
21. Labi ame dam ahim labe Derbe laba le Yesus Aho amu meedume vou esmoho Im Neàna lam ame dam laba vou vameatedume fi desi modeha Derbe dam dua totbaho labe Yesus bake tu vuzehi ab Am im meedam damaleham. Labi Derbe laba vou vahoketedume neàdi laba novai ame dam behàsu labe iho amu lehe baket fa ab ladamam. Amu nasi Listra laba fa le izi labohote. Labi neo Ikonium laba fa le izi labohote. Labi neo Pisidia bak labe aba num debu meida Antiokia laba neo le izi labohote. Labihada.
22. Labihadam di labe Paulusti Barnabasti dam Yesus bake tu vuzehi meedam dam labe im ahu bedi Yesus bake tu vuzehem bak voom bak labna zohàme im nehasu vi vahoketedume vabededa. “Im Yesus bake tu vuzehi meedam dam iho bak niba azim di damat iba abo duana vabidam bak. Labiha labe nasi ahu a bedi behàsdi Yesus bake tu vuzehem bak a voomule. Mahate tu vuzehem bohu meedale. Neham bak. Im Alam damaleheda im am bak. Im gi labihasu damat iba vabidam bohu meedume ba Alat Aho azihi bak neà bak laba le Aho iba vuusu im vahokeda tame,” lahame Paulusti Barnabasti ame im lam iho lehe bak labe fa faasi vou vahoke lada.
23. Labi ame dam behàsu labe ibi iho lehe bak labe faasi vou vahoke ladam di labe gi nehame meeda. Num debu meida iuba le Yesus bake tu vuzehi vahi meedam dam meida fi me ve gago, “Oho dam Yesus bake tu vuzehi vahi meedam dam niba oho fa vuusu im vameame faheme modiam datelele,” lahame gagu afoezobe ahit na àm mu Ala bake tom gagodam labe nehada, “Ai Boehàda oa, dam nim Om Adat Yesus bake ab tu vuzeheham tame. Im le seti omozit Om Adat Yesus abo ame dam nibe iho tu vuzehe Boehàda labe fa ame dam niba iademe vou aasdale,” lahame Ala bake tom gagodume neàdi vou esmo. Labi num debu meida iuba le gi ame baket mode. Labihada. Ame dam ahim labe ibi iho lehe bak labet labihasu ahebu ab vou mode ladaham.
24. Labihasu ahebu vou mode ladume neàdi Likaonia bak vou esmozi neo Pisidia bak ahebu gi ame baket neo meeda. Labi Pisidia bak ahebu ame baket meedume uloholi neo Pamfi lia bak laba neo laha gi ame baket meeda.
25. Pamfi lia bak laba modesuhu num debu meida Perga laba esuhu dam lam aho Yesus Aho amu meedume vou esmoho Im Neàna lam neo vameadume fi desi neàdi fa neo itea feàna obe modesuhu num debu Atalia laba ab lazeham.
26. Labi Atalia laba lazi Siria bak laba modesuhu num debu meida Antiokia bak laba lalo modemu fa sue baa vààsu nutabet vou lam ihe buduada laba ab ziddaham. Iba amu alimeat faasi vameadume oluhu bak Antiokia laba fa ab ladaham. Amu di iube Yesus bake tu vuzehi vahi meedam dam Antiokia laba azim dam labe iho Ala bake tom gago, “Dam behàsu nibe Oho gagohona iuba le mode iuba le mode lahadam di Oho vou aasu ozahit deeli im neà bak meedale,” lahame labi gagu oluhu labe Paulusti Barnabasti ame dam behàsu labe iho ame baket meedume neàdi iba amu tom gagu oluhu bak laba fa ab lafuham.
27. Labi Antiokia laba fa lafusi Yesus bake tu vuzehi vahi meedam dam ahebu gagome bakamta vahe vahedume neàdi Alat iba modi teudehe labe ibi iho iuba le lab meedaha im lam ahebu ame dam laba vameada. Labi neo Yahudi damat modem vab dam labe amu Yesus bake tu vuzehem biem bake Alat iba modi vizi teudehe labe iho ame dam laba Alam im vou vameatedume modeha ame dam labe Yesus bake tu vuzehe bak lam iho neo dam laba vameada. Labihasu ame im zi lam dam laba ab vameadaham.
28. Labi vameadume neàdi Paulusti Barnabasti ame dam behàsu labe gi Antiokia laba Yesus bake tu vuzehi meedam dam laba tau azimzida.
1. Labi ame di labe Yahudi dam Yesus bake tu vuzehi meedam dam totbaho abo Yudea bak labe fa Siria bak nibe am num debu Antiokia niba li iho vou lehe im lam fa Yahudi damat modem vab dam abo Yesus bake tu vuzehi meedam dam niba nehi ab faasi vahokedamam. “Uho dat ahamda Musat toedume fi hasi esuhu im abo dam badate vou vahoke usehe Im Feàna lam, ‘Laso aubehà sokba ukbole,’ laham bak lam uho uledi meedam vabameam làhà uho faina meedàmu Alat uba beodalo meedam bak lam Aho fa mu uba soat vausu fa vei neàdedam vabak,” lahame ab li vahokedaham.
2. Labi vahokedume modeha Paulusti Barnabasti ame Yahudi dam labe etei vou li vahokehe im lam gut aime modeha mu vedi otesi otesidam labe ab dahobuleham. Labihàmu dam ahim nibe ab gagoham. “Vabo. Ba labiham vabak. Meit am faina meedàmu Alat aba beolo meedam bak lam gi ame da labe am laso aubehà sokba ehena Alat ozahigeàmu mu vei neàdi aba soat vausum bak. Gi labihasule. A ukbomule,” lahame otesi otesida. Labihàmu ame Yesus bake tu vuzehi vahi meedam dam Antiokia laba azim dam labe ozodaha vabamu fa Paulusti Barnabasti labi Yesus bake tu vuzehi vahi meedam dam Antiokia esum dam totbaho lamti labihasu fàsi fa kota Yerusalem laba ab oluham. “Uho le Yesusat Aho gagu olu Am im vameadume esmozi laiam dam lamti kota Yerusalem laba azim Yahudi dam bake vuusu im vameame faheme modiam dam busaoda zi lamti laham dam laba le ame im modehe debu lam iademe aile.”
3. Lahame ame dam lam vule vi odosi im vameadume neàdi kota Yerusalem laba ab oluham. Labi Antiokia labe ladam labe Fenisia bak labe am num debu meida izi labohote. Labi neo num debu meida izi labohote. Labi neo ladameam Samaria bak labe am num debu meida izi labohote. Labi neo num debu meida izi labohote. Labiha lada. Labe izi labohotidam di labe nehi gagu labohotida. “Um aihe? Yahudi damat modem vab dam laha Yesus bake tu vuzehi meedam bak,” lahame labe gagu laida. Labihàmu ame lab gagoho bak lam ame doni esuhu dam Yesus bake tu vuzehi vahi meedam dam lam ahebu aiha ab aime àvodi deeli meedaham.
4. Labihadume kota Yerusalem laba ab lafuham. Lafusi modeha Yesus bake tu vuzehi vahi meedam dam ame kota Yerusalem laba azim dam lamti Yesusat Aho gagu olu Am im vameadume esmozi laiam dam lamti ame Yahudi dam bake vuusu im vameame faheme modiam dam busaoda zi lamti labihasu ahebu Antiokia iube lehe dam laba ab gut deeli, “Neàte,” lahame im ab gut vameadamam. Labi neo Paulusti Barnabasti Alat iba modi vizi vuusu teudehe labe iho Yahudi damat modem vab dam laba Yesus Aho amu meedume vou esmoho Im Neàna lam dam laba vahokedaha di dam lam gi uledi Yesus bake tu vuzehedaha bak lam kota Yerusalem dam zi laba ab vameadaham.
5. Labi vameadume modeha ame Yahudi dam Yesus bake tu vuzehi meedam dam zi labe im dam totbaho Farisi dam laba tau na ibi iho ozomdata meedam dam totbaho labe usai duzu im ab vameadamam. “Yahudi damat modem vab dam Yesus bake tu vuzehi meedam dam labe im Yahudi dam nibe ibi iho modem baket im laso aubehà sokba ukbom bak lam laha tau modem bak. Gi labihasu laso aubehà sokba ukbom vabna modem biem bak. Labi laha im tai ahamda Musat toedume fi hasi esuhu im fi hamda ziti im fi ham vabda ziti laham Im Feàna lam ahebu laha aime uledi meedam labe neàdem bak,” lahame ab vameadaham.
6. Labi Yesusat Aho gagu olu Am im vameadume esmozi laiam dam lamti labi ame Yahudi dam bake vuusu im vameame faheme modiam dam busaoda zi lamti labihasu lab vameadaha im aihemu dam ihimo ame im lam ot vameaidalo bakamta ab nusualadaham.
7. Labi bakamta nusualadume neàdi meit aho ozoho bak vameada. Meit aho ozoho bak vameada. Gi labihadam bohu modesu otesi otesida. Labi otesi otesidaha vabamu Petrusat usai duzu im ab vameadamam. “Um emti Yesus bake tu vuzehi meedam dam totbaho oa, um ozobohuna taia? Amu di iube Alat um mu em vàmtea utasi gago, ‘Yesus Aho amu meedume vou esmoho Im Neàna lam eho Yahudi damat modem vab dam laba le vou vameatedale,’ lahame eba gagu eho le vou vameatedam di labe ame dam labe aime uledi Yesus bake ab tu vuzeheham bak.
8. Labi eho laba le vou vameatedaha di lam Yahudi damat modem vab dam lam Yesus bake ab tu vuzeheham bak. Uho eho Kornelius Yahudi dàt modem vabda labe am num laba le im vameadaha ame da labe am dam totbaho lamti Yesus bake tu vuzehedaha bak laba uho vi ozodale. Alat Am Aha Nutabe Neàna lam amu iba Yahudi dam bake modi vizi vuusu teudehe Aha Nutabe Neàna lam fa neo ame Yahudi damat modem vab dam laba laha neo ab modi vizi vuusu teudeham bak. Labiha labe iho nehi ozo, ‘Ahu meibada ozobohu Ala labe Aho laha Yahudi damat modem vab dam vam meote,’ laham bak lam im ahebu ab ozobohudeham bak.
9. Alat ba nehi vi ozome gagodaha vabak. ‘Im Yahudi dam. Dam lam Yahudi damat modem vab dam,’ lahame Alat ba ahulat vi ozome faheme gagodaha vabak. Neha labe im labi ozobohudehe bak. Iho amu Yesus bake tu vuzehedaha labe iho faina meedàmu Alat iba beolo modem bak lam Aho ozahigeàmu mu fa vei neàdedaha bak. Labi laha ame Yahudi damat modem vab dam labe iho laha gi Yesus bake tu vuzehedaha labe ame dam labe ibi iho faina meedàmu Alat iba beolo modem bak lam Aho laha ozahigeàmu mu fa vei neàdedaha bak.
10. Am labiham Alat modem labe um akati imti vahi Yesus bake tu vuzehi meedam dam totbaho laba im tai ahamda Musat toedume fi hasi esuhu im fi hamda ziti im fi ham vabda ziti laham Im Feàna lam uho vedi, ‘Meedale,’ lahame vi ootedàla? Im tai ahamda Yahudi dam zi lamti labi im dam bada zi nimti ame Im Feàna zi lam modem biem damat modem labe uho akati etei Yahudi damat modem vab dam Yesus bake tu vuzehehe dam laba bisi ame im lam vi ootedume alihi nemahuseo modela? Alat gi modi neàdehena uho akati im lada zi lam neo vi tauidume vàhàdelo modela? Làhà, um gi, ‘Alat ba iba fakeo?’ laham bak ozahit modi ozolo meedam dam taia?
11. Vabo. Ba a labi modemule. Eho nehi ozoho labe labi gagoho bak. Im Yahudi dam dat ahamda Musat toedume vou usehe Im Feàna zi lam iho ulohodesu meedam labe Alat iba soat vausu fa vei neàdedaha vabak. Gi nehaha bak. Im Boehàda Yesus labe Aho iba ozahit deeli im neà bak modi esuiam Dàt modem labe Aho iba soat vausu fa vei neàdedam bak. Labi ame Yahudi damat modem vab dam laba laha ame baket modehe bak. Labiha labe uho neha, ‘Iho Im Feàna zi lam ame Yahudi damat modem vab dam laba vi tauidameam làhà Alat iba fakeo?’ laham bak ozahit modi ozolo modem bak lam a modemule. Gi labihasu voole,” lahame Petrusat ab vameadaham.
12. Labi Petrusat lab vameadaha im lam dam laba vahi im vameadam dam zi totbaho labe aime vi ozodam labe dae vabali ab daleàdeham. Labi daleàdi vou faodam labe Paulusti Barnabasti dam ahim labe iho im nehasu faasi vameada. Dam giida labe, “Ala abo feàte,” laham bak biem bake Alat amu iba modi teudehe labe iho damat fet aame àvodi ozobohudemna abo na damat ihimo modem biem im feàna lam iho Yahudi damat modem vab dam labe im bak iuba le meeda. Bak iuba le meeda. Laham im lam ab faasi vameadamam.
13. Labi Paulusti Barnabasti im ibida vameadume ab neàdeham. Labi im vameadume neàdi modeha Yakobus im abada neo faasi ab vameadamam. “Um emti Yesus bake tu vuzehi meedam dam totbaho oa, im ebeda nasi aimale.
14. Alat Aho amu nehi fet ozo, ‘Yahudi damat modem vab dam nim Eho modi ame dam labe fà Eba tu vuzehi Em damali im Ebeda meedase,’ lahame Aho ozoho dam totbaho alimeat fàsi faobekesi fa Am damalehe bak. Laham bak lam Simon Petrusat iba vameadume neàdehe labe im ab ozobohudeham bak.
15. Alat Aho Yahudi damat modem vab dam totbaho fàsi, ‘Aba tu vuzehi Am damali fa im Abada meedase,’ lahame alimeat fàsi Am damalehe bak lam gi Alat vameadaha im aime fa dam bake ahate vameaidaha dam ahamda zi labe ibi iho nehi fet toedume esuhu im lamti ulohote.
16. ‘Boehàda Daud aham di iube aho vuusu im vahokedaha Israel dam lam iba fakemoholehe damat beome elodume foli seddaha bak. Lahana ame dam labe ibi iho ba vou faat ladam mekehà zoho laba Eho ba diamut li Daud amu modehe bakti ulohona modi ame dam laba vuusu im vahokedume fa gàhàdi teudeda tame.
17. Nehame modem bake Eho ahit labihada tame. Dam bakda debu vekeheda totbaho lamti labi Yahudi damat modem vab dam abo Eho neha, “Eba laha tu vuzehi Em damali im Ebeda meedale,” lahame Eho vame Em damalelo modem dam lamti labihasu ahebu Ebe Eho ba meedam bak laba aame ozo, “Iba laha vuusdase,” lahame ahu adat iedi Eba labi gagoda tame. Ame im lam Eho Boehàda Alat oba gagu esuhu bak. Ame im lam Eho gi aham di iube Em damalehe dam laba vou vamea usdume fa dam badate vou fusi fi gatehe imot modem bak.’ Laham im lam Amosat aho fet toedume ab esuham bak. Labihàmu Petrusat etei iba li neha, ‘Alat Yahudi dam laba alimeat faobekesi dam lam ab modi Am damaleham bak,’ lahaha bak lam eho ozom, Amosat aham di iube lab fet toedume esuhu im lam ab modi imbodeham bak.
19. Labihahemu eho nehi vi ozome ozobohudi neàdi gagodam bak. Imo Yahudi damat modem vab dam etei Ala bake tu vuzehi meedam dam lam im feàna zi lam a vi ootedume im alihi nemahudamule!
20. Imo fa gi sunit nehame toedume oluse. Dat ahamda Musat aho toedume fi hasi esuhu Im Feàna zi lam fàsi dua bak voou im nidi nimota sunit toedume oluse. Damat, ‘Ala am tame,’ lahame ostamna it modi vou baedamna laba vou baedalo na fi ho otemna zoho lam a àmule. Labi laha na vasea a udemule. Labi meit na otem di na vasea ad laba bekehedabu lam a àmule. Labi laha ostame fi loholi ot vai ot vaidam bak ahebu a meedamule.
21. Im Yahudi dam fa ame Yahudi damat modem vab dam laba fakem vabake imo gi im fi hamda lamota sunit toedume oluse. Ame Yahudi damat modem vab dam labe ame bak lam ozobohu bak. Ba biem vabak. Neham bak. Hari Sabat abo Yahudi dam labe ibi iho gi azibe im digat fum di labe ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli ame Musat aho toedume fi hasi esuhu Im Feàna zi lam sunit bolohona laba toehena meit visoi aame gagodam labe damat gi dogoit aida. Labi neo hari Sabat neo fum di labe gi ame baket neo meeda. Gi amu di iube faasi meedume etei vou fusi ab lahasdamam bak. Abo Yahudi dam labe im num debu bak iumti num debu bak iumti ahebu labihadaha bak. Labiha labe Yahudi damat modem vab dam labe ame bak lam ozobohudem bak. Labihàmu im fi hamda lada lamota sunit toedume Yahudi damat modem vab dam laba oluse,” lahame Yakobusat im labihasu ab vameadaham.
22. Labi Yakobusat aho lab vameadaha bak lam ame dam Yesus bake tu vuzehi vahe vahedaha dam zi lam abo Yesusat Aho gagu olu Am im vameadume esmozi laiam dam lamti labi Yahudi dam Yesus bake tu vuzehi meedam dam kota Yerusalem esuhu dam lamti ame Yahudi dam bake vuusu im vameame faheme modiam dam busaoda zi lamti labihasu vahi ab aime uledeham. Labi uledehemu im dam totbaho fàsi Paulusti Barnabasti ame dam ahim laba vi tau fa Antiokia laba olum bak ab ozoham. Labi ozohemu ame Yesus bake tu vuzehi vahi meedam dam lam iba im vameame faheme modiam dam behàsu ab fi me vaham. Yudas ee meida taluhuda Barsabasti labi Silasti laham dam behàsu lam fi me utasi Paulusti Barnabasti tau Antiokia laba ab oluham.
23. Ame dam vahe vahehe dam zi labe dam behàsu laba lu Yesus bake tu vuzehi vahi meedam dam abo Yahudi damat modem vab dam labe Antiokia laba azim dam lamti Siria bak ahebu azim dam lamti Kilikia bak ahebu azim dam lamti laham dam laba oluhu sunit lam neha: “Imti vahi Yesus bake tu vuzehi meedam dam oa, sunit nim iho Yesusat Aho gagu olu Am im vameadume esmozi laiam dam nimti Yahudi dam bake vuusu im vameame faheme modiam dam busaoda zi nimti iho uba sunit nim oluho. Neàte.
24. Iho aiha im Yahudi dam totbaho iho gagu oluhu vabda uba amu li im iho gagu oluhu vab im uba vahokedam labe uba vabidume um ozom biehe bak im aiho.
25. Labihàmu im ahebu vahi im vameadume neàdi ahu vàmadi dam ibida fàsi fa Paulusti Barnabasti im bisi vou alem dam behàsu laba tau uba olum bak ab ozoham.
26. Ame Barnabasti Paulusti dam behàsu nim im Boehàda Yesus abo Alat Gagu Fihasi Vimteme Oluhu Dat Boehàda labe Aho meedume vou esmoho im lam amu dam bake vou vameatedàmu damat iba otelo meedam di labe, ‘Im fà otem neàte,’ lahame ozahigeàmu vou meedam dam behàsu am bak.
27. Labiha labe iho im vameadume neàdi Yudasti Silasti uba ab oluham bak. Ame dam behàsu lam iho uba toeme oluhu im lam gi ahumna uba ahat vameada tame. Ba im meit modem vabak. Labi uho, ‘Imbote,’ laham bake iho ahit uba dam behàsu lam ab oluham bak.
28. Alam Aha Nutabe Neàna labe iba neha, ‘Gi Im Feàna fi hamda nimota dam laba gagu ozobohudele,’ lahame iba modi fi gatehe labe im aime uledi fa neo uba gagolo sunit nim ab oluham bak. Uba im fi hamda ziti im fi ham vabda ziti laham Im Feàna lam ahebu vazisi duali uba gagu vabidume alihi nemahum bake moho. Labihàmu gi im nidi nimota, ‘Malele,’ lahame uba gagolo modem bak.
29. Damat, ‘Ala am tame,’ lahame ostamna it modi vou baedamna laba vou baedalo na fi ho otemna zoho lam a ve àmule. Labi laha na vasea a udemule. Labi meit na otem di na vasea ad laba bekehedabu lam a àmule. Labi laha ostame fi loholi ot vai ot vaidam bak ahebu a meedamule. Uho lada lamota fi hasi meedameam làhà Yahudi dam ba uba fakem vabak. Uho gi iademe vamdesuhuna meedam bak. Im ibida ab foleham. Neàde.”
30. Laham im lam sunit laba toedume neàdi ame kota Yerusalem laba vahe vaheme im vameadam dam zi labe ame dam behàsu laba vi vameadume neàdi sunit vi lu Paulusti Barnabasti ame dam behàsu laba vi tau ab oluham. Labi ame dam labe num debu Antiokia laba ab laham. Le lafusi Yesus bake tu vuzehi vahi meedam dam Antiokia dam ahebu gagome bakamta vazisi neàdi iho vou laha sunit lam ame dam laba ab loham.
31. Labi ame dam labe ame sunit ve aaha, “Im fi hamna dua bak voou gi im nidi nimota fi hale,” lahame iba vabededam im iho ve aahemu im ahu amu faidehe bak lam fa ab neàdi deeleham.
32. Labi Yudasti Silasti taho fa lam kai. Ame dam behàsu labe Alat vameadaha im aime fa dam bake ahate vameaidaha dam behàsu modemu gi Antiokia laba imti vahi Yesus bake tu vuzehi meedam dam totbaho laba dihasi im vahokeda. Dihasi im vahokeda. Gi labihadam bohu meeda. Labihadam labe ame dam lam amu fota bee bak lam fa etei lab vahokedam bak lam aihemu iho Yesus bake tu vuzehi meedam bak fa keàtedi meeda. Labihada.
33. Labihadume Yudasti Silasti Antiokia laba azibehamdi fa ibi bake lalo meedàmu ame Yesus bake tu vuzehi vahi meedam dam Antiokia dam labe nehame vi vameada. “Neàte. Uho lab ladam di iademe ladale,” lahame vi vameadume neàdi ame dam behàsu iba gagu oluhu dam zi laba kota Yerusalem laba fa ab oluham. [
34. Lahana Silas vedi fa lam mu gi Antiokia laba aida.]
35. Labi Paulusti Barnabasti laha gi Antiokia laba aida. Taho fa laha vabak. Ame dam behàsu lamti dam amomoi totbaho lamti im Boehàda Yesus labe Aho amu meedume vou esmoho Im Neàna lam Antiokia esdam dam laba vahokedume fi desi neo vi vameada. Abo dihasi mode. Dihasi mode. Labihada.
36. Labi ba neo di iube Paulusat Barnabas bake gago, “Imo im Boehàda Yesus labe Aho amu meedume vou esmoho Im Neàna lam amu vou le vameame fi dehe num debu bak iudu iumti iudu iumti ahebu laba le, ‘Ame Yesus bake tu vuzehi meedam dam labe iho meedam lahasuheo?’ laham bak imo fa le aase.”
37. Lahame labi gagoha Barnabas uledi vedi Yohanes ee meida, “Markus,” lahame taluhuda lam, “Iba tau vou lase.”
38. Lahame labi gagoha Paulus ame da lam vou lam mu gago, “Eho ozom, da lam vou lam faite. Iho amu Yesus im Boehàda labe Aho amu meedume vou esmoho Im Neàna vou vahoketehe di lam da lam vou laha iho meedam bak taum mu iba Pamfi lia bak laba vou esmozi fa itahada akati neo tau lalo modela? Feidate.”
39. Lahame labi gagoha Paulusti Barnabasti Yohanes vou lam bake otesi otesidaha vabamu Barnabas aho geàmu Markus ve ahili sue baa vààsu nutabet vou lam ihe buduada Siprus bake lam ihe laba ab zisi Siprus bake ab bioham.
40. Labi Paulus ozoha vabamu amti ahilemda vabalehemu aba tau lalo modemda Silas ab gagome vaham. Labi ame Yesus bake tu vuzehi meedam dam Antiokia laba azim dam labe Paulusti Silasti olulo modem di labe Ala bake tom gago, “Ai Boehàda oa, dam behàsu nibe Oho gagohona iuba le mode iuba le mode lahadam di lam Oho vou aasu ozahit deeli im neà bak modi esuidale,” lahame tom gagu vi vameadume neàdi ame dam behàsu lam ab oluham.
41. Labi Paulusti Silasti ladam di labe abo Siria bak lamti Kilikia bak lamti laham bak laba ahebu lada. Yesus bake tu vuzehi vahi meedam dam laba le im vou vahoketedume dam labe im ahu modi fa teudeda. Labiha lada.
1. Paulusti Silasti neo ladume num debu Derbe laba le izi labohoti fa neo num debu Listra laba fa neo ab laham. Listra laba le neo Yesus bake tu vuzehi meedamda ee gagom Timotius lahamda ame bak laba azimda ab aaham. Ame da Timotius labe am oi Yahudi namet Yesus bake tu vuzehi meedam namet moz. Lahana am ai Yahudi dàt modem vabda Yunanit modem dàt moz. Lahamda labe am adat ab aaham.
2. Dam Yesus bake tu vuzehi meedam dam abo Listra laba azim dam lamti Ikonium laba azim dam lamti laham dam labe, “Timotius abo neà bak tadedam dàt moz,” lahame ahu adat iedi vou baedamda am.
3. Laham bak aihemu Paulus aho Timotius ve aba tau Yesus im Boehàda labe Aho amu meedume vou esmoho im vou vahoketedalo modem bak ab ozoham. Labi lalo meedàmu Paulusat Timotius ve dat ahamda Musat vou vamea usehe im lam ozome Timotiusam laso aubehà sokba ab U Antiokia Ikonium Antiokia Neapolis Derbe Listra Troas Filipi Korintus MISIA GALATIA MAKEDONIA ASIA SIRIA LAUT TENGAH FRIGIA Kilometer
300. SAMOTRAKE BITINIA ukboham. Paulusat nehi ozo, “Timotius am ai gi Yunani dàt moz. Laham bak lam Yahudi dam bak laba azim dam ahebu ozobohute. Labihàmu iho num debu bak iudu iumti iudu iumti laham bak laba ladam di Yahudi dam iba faki iho vou lehe im aim mom zohàme ozahit am laso aubehà sokba vaitom neà bak,” lahame ozoho labe ame baket ab modeham.
4. Labi modeme neàdi Paulusti Silasti Timotiusti labihasu vahi num debu bak iudu iuba le dam Yesus bake tu vuzehi vahi meedam dam Yahudi damat modem vab dam laba im vahokeda. Labi neo num debu bak iudu iuba neo le im vahokeda. Labihada. Labihadam di labe Yesusat Aho gagu olu Am im vameadume esmozi laiam dam lamti Yahudi dam bake vuusu im vameame faheme modiam dam busaoda zi lamti laham dam amu kota Yerusalem laba bakamta vahe vahedume im vameadume neàdi vàmadehe im lam ame Yahudi damat modem vab dam Yesus bake tu vuzehi vahi meedam dam laba vou vahoketeda. “Gi im fi hamda lamota uho laha fi hale,” lahame vou vahoketeda.
5. Labihasu meedam labe ame Yesus bake tu vuzehi vahi meedam dam labe ibi iho Yesus bake tu vuzehi meedam bak keàtedi ab meedamam. Labi laha lab vahokedam di labe dam amu Yesus bake tu vuzehe vabda neo vi tau Yesus bake tu vuzehe. Labi laha meida neo vi tau Yesus bake tu vuzehe. Labihadam labe ame Yesus bake tu vuzehi vahi meedam dam debu ab dualedamam.
6. Alam Aha Nutabe Neàna labe amu Paulusti Silasti dam behàsu laba neha, “A nasi etei Asia bak ahebu azim dam laba le Yesus Aho amu meedume vou esmoho im lam a vou vameatedume fi dedamule,” lahame mali gagohemu Paulusti Silasti Timotiusti ame dam làtela labe ame di lam Asia bak laba laha vabak. Fa Frigia bak ahebu lamti Galatia bak ahebu lamti laham bak laba fa ladam labe ame im lam vou vameateda.
7. Labi vou vameate ladam labe Misia bak lamti Bitinia bak lamti laha donibu gutehe bak laba fusi Bitinia bak neo lasome modeha Yesus labe Aho oluhu Alam Aha Nutabe Neàna labe, “Laba a lamule,” lahame iba gagu malehemu ba Bitinia bak laba laha vabak.
8. Gi gutehe bak laba novai fa Misia bak labe ladume fa num debu Troas laba itea feàna obe laba ab lazeham.
9. Labi lazi disiha Paulusat bisdameam edehesi fako bakamta aasdume aaha Makedonia bak laba azimda labe am bak laba duzu im nehame vameadume tauledam bak ab aaham. “Uho iba Makedonia dam niba biou iba li vahokedale,” lahame tauledamna ab aame seteham.
10. Labi Paulusat lab edehesi aaha im lam aame neàdi aho lab aahana lam fa eba Lukasti aba vahi tau vou vameatedam dam totbaho lamti labihasu vameadume neàdi iho Makedonia bak laba lalo nazoh ab ateme vahedaham. Iho nehi ozo, “Paulusat aho lab edehesi aahana lam gi modem kaio. Abo Alat, ‘Im Makedonia bak laba le ame dam laba Yesus Aho amu meedume vou esmoho Im Neàna lam vou vameatedale,’ lahame gagu oluhunat modem bak,” lahame ozobohudehe labe im nazoh ateme ab ahumdi esuham.
11. Labi iho Troas labet ihe sue baa vààsu nutabet vou lam ihe buduada laba ziddume neàdi Troas vou esmozi ladume Samotrake touha laba le neo izi dihasi fa neo ladume num debu Neapolis laba lafusi ihe tu im ab usdaham.
12. Labi im Neapolis laba usdume neo baket ladume num debu Filipi laba ab le lafuham. Ame Filipi lam Makedonia bak labe aba zoho ahamte lafum num debu bak am. Labi ame num debu Filipi lam Kaisarleheda labe aho vuusdam dam duada zi azim bak meida am. Laham bak laba iho li laba tau idda.
13. Labi tau iddam labe hari Sabat abo Yahudi dam labe ibi iho gi azibe im digat fuhemu iho vahi num debu bak vou esmozi lazi vao vabak laba le odo. Yahudi dam labe ibi iho Ala bake tom gagom bak labna zohàme tau modelo vao vabake ab lazi odoham. Labi le aaha lahi zi amu gi li bakamta nusualadaha bak aahemu ab le tau nusu im ab vameadamam.
14. Nam meida labe num debu Tiatira labe fa Filipi niba li tau azim nam ee gagom Lidia laham nam labe laha tau laba nusda. Ame nam Lidia labe am sue baana alihi boz gihona abo na duana vam sue lam dam bake doit ot loiam namet moz. Labi Yahudi namet modem vab namet moz. Labi laha Ala bake, “Abo feàte,” lahame ahu adat iedi Ala bake vou baedam namet moz. Laham nam labe am ahu laba Boehàda Alat modi fi gatehe labe Paulusat aho lab vahokedaha im lam uledi Yesus bake ab tu vuzeheham.
15. Labihàmu Lidia am num laba tau vahi azim damti ahebu iho Yesus bake tu vuzehi meedàmu vahi valo ab baptisledaham. Labi valo baptisledume neàdi Lidiat Paulus giidate nehame ab gagoham. “ ‘Em Boehàda Yesus bake tu vuzehe nam am bak,’ laham bak lam uho vi ozome ozobohudi neàdi gagu em valo baptislehena uho Filipi bak niba Alam im abo Yesus Aho amu meedume vou esmoho Im Neàna lam vou vameatedam di nim làhà em numa tau oli im neàte,” lahame iba labi vi gagodume modeha im uledi Lidiam num laba tau vule ab aziham.
16. Labi ba digat meida iube ame Yahudi dam labe ibi iho Ala bake tom gagodam bak laba iho Paulus am dam totbahoti tau ladam digat meida labe Yahudi damat modem vab dam labe im na teo meedam nam soao iho ab tàham. Ame nam soao lam mei ahu oli veimam setan labe veimai modesdam labe meit ba modem im lam ahamo nasi fet ozobohudi ahate vameadam nam soaonat moz. Lahadam nam labe damat deeli lodam doi duana lam aba na gagome meedam dam labet vada.
17. Laham nam soao labe iba Paulus giidate vi tau vuledam labe dam bake bisteat fi desi vameada. “Dam nim Ala Bisi Feàda labe Aho gagom im meedam damat mozooo. Uho faina meedàmu Alat uba beodalo meedam bak lam Aho fa mu uba soat vausu fa vei neàdedam bak lam um biem bake ame dam labe uba vameadume fi desi ozobohudem bake ozome uba lehooo,” lahame bisteat vi tau vamea lada.
18. Ame nam soao labe ame bak lam gi dihasi mode. Dihasi mode. Lahadam namet meedam labe Paulus ab vanamaham. Vanamai feà bak fuhemu it vaktesi ame nam soao laba oli veimaha setan laba ab ootedamam. “Yesus abo Alat Gagu Fihasi Vimteme Oluhu Dat Boehàda labe Am meia vizi teudemna lam eba modi vizi eho im dedatelehe labe eho oba neha, ‘Nasi futoi itale,’ ” lahame labi gagoha ame setan labe futoi nam soao lam vou esmozi ab itaham. Labiha labe ame nam labe aho mei im fet ozobohudi gagoidam bak lam ab seteham.
19. Labi modeha nam soao labe aba im gagu meedam dam labe lab modehe bak aahemu ozo, “Im doi vam bak vàhàdeme setehe moio?” lahame ozobohudi faki Paulusti Silasti ame dam ahim lam tet si vou kea lame ame num debu bak laba azim dam labe ibi iho im vameadam bak tomba laba vou le meia uloome im aime gagomda busaoda zi labe ibi iho avaesdam laba vou duzulo ab si vou ladamam.
20. Labi si vou ladume ame Kaisarleheda labe am im ot vai gagom dam busaoda zi labe ibi iho avaesdam laba vou duzu giomim vàlu gagoda. “Dam ahim nim Yahudi damat modem bak. Ame dam nibe, ‘Ibi iho na meedam bak vuzehi meedale,’ lahame iba li vahokedaha im lam ibi iho modi baleàhà bakti uloho kaio. Gi iba fa im meidi vameadam bak. Abo Kaisarleheda labe aho vuusdam dam ahebu iho ame dam nibe lab vahokedaha im lam tau modem biem labe ba aime vuzehi meedam vabiem bak. Ame dam nibe labihasu meedaha labe im num debu bak gi neàt esdamna dam ahim nibe fa iba vabidume dae gai ab dualeham bak.”
22. Lahame labi gagoha dam duada zi totbaho labe laha vi tau gago, “Dam im fi hamna vameadam dam ahole siho,” lahame vi tau Paulusti Silasti vàlu vameada. Labihadàmu ame meia uloome im aime neàdi gagomda busaoda zi labe am meo dam gagome Paulusti Silasti iho dusuhu sue lam tet si vihitoi esu afoezobe Paulusti Silasti damat vuusu losot ab beodamam.
23. Abo duana beodume neàdi ame meo dam labe neo si fa mei si ousu teudem num sel laba ab ub vooham. Labi ousdalo modem di labe mei si oumahedume teudem num laba oumaheheda zi vou aasdamda laba gago, “Oho mahate vou aasdale.”
24. Lahame labi gagohemu ame sel vou aasdamda labe Paulusti Silasti ve sel bumat tamehoda vou oli fa sel donibuda meida abo mei itam vabiemda laba ub voou ame dam ahim labe im naba ut gaheba bumatalehena laba duadume ab teudedaham.
25. Labi aibuli usi neisoat Paulusti Silasti gi Ala bake tom gagoda. Labi Ala bake baedam labe ladeeda. Labihada. Labihadam labe dam totbaho laba amu oumaheda zi labe ame dam behàsu labe ladeedam bak vi aida.
26. Lab ladeedam dae vi aidume modeha balim feàdat sel zi duana teuna feà lam ahebu ab modi nigo nigodamam. Nigo nigodume modeha sel doo ahebu ahamo bedi ab fi skeamodume modealadaham. Labi dam laba oumaheda zi labe im naba sim bes botehà niz lam laha ahamo ab bedi fi skeamodume modealadaham.
27. Labi modeha ame sel vou aasdam dam labe im boehàda labe fa keesi aaha sel doo ahebu bedi fi skeamodume modealaha bak ab aaham. Lahaha bak aahemu dam oumaheda zi ahebu futodume ilime seddamna zohàme am ae tot mo tot mo lahamna valoi aba it beolo meeda. Aho nehi ozo, “Dam lam futodume ilime seddameam làhà dat boehàda eba im gagu meedamda labe eba ba otem bak,” laham bak ozome, “Ahamo naedat nasi it belu elose,” lahame am ae tot mo tot mo lahamna valoi fa aba it beolo meeda.
28. Lahaha bak lam Paulusat vi aame gi sel doo abada labe vi gago, “Aa! Faode. Om ohomo a it otemule. Im ahebu anime. Im ilime seddam kaio,” lahame Paulusat bisteat ab vi vameadamam.
29. Lahame gagoha ame sel oumahedam dam laba vou aasdam dam labe im boehàda labe aba it beom bak fa vei mu dam gagome uma usime emoehe labe Paulus ousdam sel bumat laba oli Paulusti Silasti ame dam behàsu labe iho avaesdam laba le faa gukedamda labe, “Dam lam abo feàte,” lahame ahu adat iedi ogomasu ab biteham.
30. Labi fa usai Paulusti Silasti ve sel bumat donibuda labe vou futoi vou esmozi fa sel num tom fi haba laba futoi gago, “Eho faina meedàmu Alat eba beolo meedam bak lam eho akati modem labe Alat ozahigeàmu eba soat vausu fa vei neàdela?”
31. Lahame labi gagoha Paulusti Silasti ame dam behàsu labe fa gago, “Oho modeo, om nam databeti ahebu modeo, uho Yesus im Boehàda laba tu vuzehemeam làhà uho faina meedàmu Alat uba beodalo meedam bak lam Aho fa mu soat vausu fa vei neàdeda tame.”
32. Labi Paulusti Silasti neo im Boehàda Yesus labe Aho amu meedume vou esmoho im lam ame da lamti am num laba tau vahi azim dam lamti ahebu vahokedume modeha ame dam labe ab tu vuzehedaham.
33. Labi aibu lahasuhu di labe ame dam vou aasdamda labe ame dam behàsu lam ve vou futoi vao ehe bak laba vou le im damat foho vasea lam vaot kikeda. Labi kikedume neàdi ame da lamti am lahi databeti abo am num laba tau vahi azim dam ahebu, “Iho Yesus bake tu vuzehi im Abada meedam damalelo mozo,” lahame Paulusti Silasti ame dam lam vame valo ab baptisledaham.
34. Labi valo baptisledume neàdi ame da labe fa Paulusti Silasti am num bake vou ziddume na àmna ve ab lu àham. Ame da lamti am nam databeti ahebu iho etei Ala bake tu vuzehe bake ab deeli meedamam.
35. Labi na àme neàdi ame sel vou aasdamda labe neo Paulusti Silasti ve im sel fa ousu doo teude. Labi izi dihambe ame meia uloome im aime neàdi gagodam dam busaoda zi labe fa im polisi laba ab gagoham. “Uho fa dam oumahedam sel laba le ame sel vou aasdam dam labe im boehàda laba le gagole. ‘Màt si ousuhu dam behàsu Paulusti Silasti fa isi olum neàte,’ lahale,” lahame gagu ab oluham.
36. Labi ame dam labe le gagohemu ame sel vou aasdam dam labe im boehàda labe Paulusti Silasti dam behàsu laba ab le gagoham. “Ame dam busaoda zi labe polisi eba olu gagoho. ‘Um isi olum neàte,’ lahame gagohemu um nasi futoi lam neàdeho. Iademe ladale,” lahame ab gagoham.
37. Labi gagoha Paulusat mu polisit na gagu modiam dam laba gago, “Vab. Im ostame futom moho bak. Im abo bak ahebu vuusdam Kaisarleheda labe aho vuusdam dam totbaho im am bak. Lahana màt ame meia uloome aime neàdi gagodam dam busaoda zi labe im ibi iho meedahana amu nasi iademe uloome aime neàdehe vabna damat aasdahit im meo dam gagome iba beodaha bak. Labi neo im sel niba ub vooho bak. Im Kaisarleheda labe aho vuusdam damat modem labe damat iba amu nasi iademe uloome aime neàdehe vabak lam git modehe bak am tame. Lahana akati im fa a isi olulo mode? Im moho. Uho fa le ame dam busaoda zi labe iba git modehe dam laba le gagole. ‘Uhumo iba li im gagu olule. Giida iba a gagu olumule,’ laham im lam le gagole,” lahame Paulusat ame polisi laba ab gagu oluham.
38. Làhàmu ame polisit na gagu modiam dam lam fa ab laham. Fa le Paulus iba gagu oluhu im lam ame dam busaoda zi laba ab vameaham. Labi ame dam busaoda zi labe lab vameadaha bak lam aiha Paulusti Silasti gi Kaisarleheda labe aho vuusdam dam meida behàsu amemu ab àvodi iedeham. “Elàhà! Iho git modehe? Dam behàsu nim iho amu nasi iademe uloome aime neàdehe vabna fome sel laba ub voohe?” laham bak ozoho labe ab iedeham.
39. Làhàmu ame dam labe ihimo le Paulusti Silasti gagome futoi vabededam labe gagoda, “Iho uba git modeho. Iba a fakemule. Gi ozahigeàmu fa vei neàdele,” lahame gagu neàdi ame dam behàsu lam ve vuusu sel tom fi haba labe ab vou futoham. Vou futoi neàdi gago, “Num debu ibida Filipi nim vou esmozi bak mei bake lale,” lahame amu vameada. Labi neo vi vameada. Labihadume ab oluham.
40. Làhàmu Paulusti Silasti sel vou esmozi futoi Lidiam numa fa ab laham. Lidiam num laba le Yesus bake tu vuzehi vahi meedam dam lam num laba bakamta vahehe dam labe im ahu bedi Yesus bake tuhu bak voom bak labna zohàme neo im vi vabededume im ahu teudeda. Labihadume neàdi Paulus giidati vazisi Filipi vou esmozi neo ab ladamam.
1. Labi Paulusti Silasti iba vi tau gohatem dam totbahoti num debu Filipi laba vou esmozi neo ladam labe num debu Amfi polis lamti num debu Apoloni lamti laham bak behàsu laba vou vameatedume neàdi labohoti num debu Tesalonika laba ab lafuham. Tesalonika laba Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num lam laba ehet.
2. Labihàmu Paulusat aba aho mei bake laidam di ame num laba oli Alat Vameadaha Im Toedahana ve vahokedam meo dàt modemu hari Sabat abo Yahudi dam labe ibi iho gi azibe im digat fuhemu ame num laba oli Alat Vameadaha Im Toedahana aba aho ozohoda lam visoi fa dam bake vahokeda. Labi ame dam labe aime fa ot vai vi gagu vi aida. Labi aho neo aame gagodume afoezobe damat im tombu biem bake aho modi fi gateda. Labihada.
3. Aho nehame vameada. “Dam ahamda labe iho neha, ‘Alat Gagu Fihasi Vimteme Oluhu Dat Boehàda lam amu nasi geàdume ba elo tame. Labi Am eloho bak labet Alat modi fa ahedi usa tame,’ lahame dam ahamda fet toedume esuhu Alam im lam ba voom vabiem bak. Abo modi imbodem bak. Eho etei uba vameadume fi dehe Yesus lam abo dam ahamda labe neha, ‘Alat ba uba olu tame,’ lahame fet toedume esuhu Boehàda lam ame Da am bak,” laham im lam Paulusat amu hari Sabat meida labet vameadume damat aime fa ot vai vi gagu vi aida. Labi neo hari Sabat meida labe ame baket meeda. Gi labihadume hari Sabat ab làteladeham.
4. Lahame labi vameadàmu Yahudi dam totbaho labe Paulusat lab vameadaha im lam aime, “Imbote,” lahame uledi vuzehi fa Paulusti Silasti dam behàsu laba tau vahi goda. Labi laha Yahudi damat modem vab dam abo Yunani dam labe laha, “Ala abo feàte,” lahame ahu adat iedi vou baedam dam labe laha tau vahi goda. Labi laha Yahudi lahit modem vab lahi giida totbaho ee ehe lahi labe laha Paulusat lab vameadaha im lam laha vuzehi ame dam behàsu laba tau vahi goda. Labihada.
5. Labihadam di Yahudi dam totbaho labe Paulusat lab vameadaha im lam mom dam labe aaha dam dua totbaho labe Paulusti Silasti laba tau vahi im vameadam bak aahemu teidi ab fakeham. Labi teidi faki vedi Tesalonika laba azim dam labe ibi iho na ot loiam bak tomba laba le dam gi aidam dam abo na modem odohabu dam laba ab le gagoham. “Paulusti Silasti ame dam behàsu labe vou lehe im lam gi giomimot modem bak,” lahame ostam im vàlu ame dam laba vameame fa tau vahe vaheme duali meoli ahu gukeme dae gai duali dam num iudu iuba le daet ot bei ot beida. Labi neo num iudu iuba le daet ot bei ot beida. Labihada. Labihadume meedaha Yasonam num laba Paulusti Silasti vahi tau azihi num laba ab vou fuham. Ame dam labe nehi ozo. “Ame num laba tet oli Paulusti Silasti si vou futoi vou kea lame dam meoli li dozeadaha dam duate lose,” laham bak ozome num laba tet ab oleham.
6. Teet oli aaha ame dam behàsu lam aam kai. Aam biehemu vedi num deda Yasonti dam Yesus bake tu vuzehi meedam dam totbahoti siàdume vou futodume vou kea lame ame num debu bak laba azim dam labe iba uloome im aime neàdi gagomda dam busaoda zi laba ab vou ladaham. Labi ame dam busaoda zi labe iho avaesdam laba vou le dozeadume neàdi dam Yason giidati siàdume vou lehe dam labe ozo, “Paulusti Silasti dam behàsu lam git meeda,” laham bak ozome fa dam behàsu laba vàlu dam busaoda zi laba bisteat ab vameadaham. “Eea, Paulus aba tau gohatem dam lamti mei bake lam di dam vabidume bohudem bak modi ulediam damat modem bak. Labi laha neo ibi bak abo Tesalonika niba li ame baket neo meedalo mozo.
7. Labi ame da Yason nim vedi am num malem vaba ame Paulus giidati vahi esuhu dam am bak. Labi ame dam Yesus bake tu vuzehi vahi meedam dam labe laha vedi Kaisarleheda labe aho gagu fi hasi esuhu im zi lam ailahigeàmu fa, ‘Dat ee gagom Yesus lahamda lam bisi boehàda am tame,’ lahame gagodam damat modem bak,” lahame ab vameadaham.
8. Lahame labi vameadàmu ame dam duada zi lamti ame dam busaoda zi lamti laham dam labe ame lab gagoho bak aihemu àvodi dae gai ab dualeham.
9. Labihàmu ame dam busaoda zi labe fa Yason giidate gago, “Um Paulusti Silasti git modem bake uho fa vou aasdam bak, ‘Imbote,’ lahameam làhà uho iba doi nasi lole. Labi im nasi fet ozobohudi ahumdi vou faodase. Paulusti Silasti ba git modemeam, ‘Debu uho modeho,’ lahame iho labi gagom bak,” lahame labi gagohemu Yasonti dam Yesus bake tu vuzehi meedam dam totbaho lamti etei lab gagoho bak lam aihemu im doi lam lodume neàdi im fa isi ab oluham.
10. Labi disi aibulehe di labe ame num debu Tesalonika laba azim dam Yesus bake tu vuzehi vahi meedam dam labe Paulusti Silasti dam behàsu laba gago, “Niba a aidamule. Uba damat beomo. Taho itale,” lahame gagu neàdi num debu Berea laba ab oluham. Labi Berea laba lafusi Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli Yesus Aho amu meedume vou esmoho Im Neàna lam ab vahokedamam.
11. Berea laba azim Yahudi dam lamti labi Tesalonika laba azim Yahudi dam lamti bisi mei im aim uleda Berea laba azim Yahudi dam am. Labihàmu Paulusti Silasti ame dam behàsu labe Yesus Aho amu meedume vou esmoho Im Neàna lam lab vahokedaha bake ailo àhàki meeda. Labi laha ame dam behàsu labe iho ahat lab vahokedaha im lam dam labe, “Imbo?” laham bak ozobohudelo modemu Alat Vameadaha Im Toedahana lam dihasi nabime vi aame ozoda. Dihasi nabime vi aame ozoda. Labihada.
12. Labihadam labe Yahudi dam dua totbaho labe Yesus bake ab tu vuzehedaham. Labi laha Yahudi vab lahi Yunani lahi ee ehe lahi dua totbaho lamti labi Yunani dam dua totbaho lamti laha Yesus bake ab tu vuzehedaham.
13. Labihadam di labe ame Tesalonika laba azim Yahudi dam labe abo meia vabime meolem dam labe aiha Paulusat Berea laba le Yesus Aho amu meedume vou esmoho im abo Alat vameadaha im lam ame dam laba neo vameadume fi dedam bak aihemu neo Berea laba vule ame dam laba le ootedume vameada. “Paulusti Silasti ame dam behàsu labe ibi iho vahokedaha im lam a aimule. Gi giomimot modem bak,” lahame le ootedàmu Berea dam zi labe vi ozodaha, “Ada imbona ozomo?” lahame vuzehi im ahu meoli neo fa Paulus giidate ab fakeham.
14. Labihàmu Yesus bake tu vuzehi vahi meedam dam totbaho Berea laba azim dam labe Paulus damat otem bak labna zohàme iedi Paulusta bak amomoi olulo gagu itea feàna obe laba ab vou laham. Lahana Silasti Timotiusti gi Berea laba aida.
15. Labi Paulusti dam am vou ladam dam Apolonia Atena Filipi Tesalonika Berea Korintus U Amfipolis totbahoti iho kapal zisi ladume num debu Atena laba ab vou fuham. Laba vou fusi Paulus am vou laha dam laba neha, “Uho fa Berea laba le Silasti Timotiusti dam behàsu laba gagole. ‘A kehàmule. Taho eba Atena niba vi vuli fusi im vahi neo lase,’ ” lahame gagu fa ab oluham. Labi fa Berea laba le Paulusat iba gagu oluhu im lam fa Silasti Timotiusti dam ahim laba ab le vameadaham.
16. Labi Paulus Atena laba Silasti Timotiusti aba vulem bake vou faodam di labe aaha dam Atena laba esdam Yahudi damat modem vab dam labe ibi iho, “Ala am tame,” lahame ostamna it anekehàt modi vou baedamna zi aahemu ahu ab faideham.
17. Labihàmu Paulusat neham bak ab faasi meedamam. Aho ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli fa Yahudi dam lamti labi Yunani dam labe Ala bake, “Feàte,” lahame ahu adat iedi vou baedam dam lamti fa vazisi Alam im abo Yesus Aho amu meedume vou esmoho Im Neàna lam vahokeda. Labi ame dam labe fa ot vai vi gagu vi ai. Labihada. Labi laha damat na ot loidam bak tomba laba le dam laba goom dam zi laba aho ame im vahokeda. Labi ame dam labe fa ot vai vi gagu vi ai. Labihada. Ame bak lam dihasi mode. Dihasi mode. Labihada.
18. Labihadam di labe Epikurosti Stoati laham dam amuda behàsu labe ibi iho ozoho baket vou vamea usehe im lam vuzehi meedam guru zi laha Atena laba ehet. Ame im vi ozome vi vameadam dam labe laha Paulusti vazisi im otesiame ot vameaidam meot. Ame dam totbaho labe Paulus bake nehi feàtàdam labe gago, “Da nim gi im biehebuda akati aha baabuli mode? Da nim im biehebulehe labe bisi im duana vameadam bak.” Labi ame dam totbaho labe laha nehi vameada, “Da nim gi bak iuba azim dam labe ibi iho vou baedam ostam ala abo im biem ala zi lam fa iba vameada taia?” lahame gagoda. Paulusat Yesus Aho meedaha im lamti labi Yesus Am eloho bak labet Alat modi fa ahedi usaha bak lamti laham im lam vameadume fi dedàmu ame dam labe vedi git ozome feàtàda.
19. Labihadam di labe ame Yunani dam labe ibi iho bisi im vi ozome vi vameadam dam boehàda debu labe Paulus gagome ibi iho vahe vaheme neàdi im ot vameaidam bak tomba ee gagom Areopagus Bak Buzoho lahame taluhu bak laba vou laisi odosi vi ailo ab gagoham. “Oho etei lab vou li vahokedam im gàhàda lam akatihasu meedam imot modela?
20. Ame im lam im amu aihi vabna im alimda lam oho iademe tombu iba vameadale. Labi im aise,” lahame Paulus bake ab gagoham.
21. Ame Atena laba azim dam bak deda lamti bahagikida iube fa niba li mei bake tau azihi dam lamti laham dam labe iho im gàhàda alimda aidam di gi ame im gàhàna lam vi aidume ot vameaidahit vou disim meo damat moz. Ame dam labe ibi iho modi baleàhà bak am. Gi labihadam damat modehe labe Paulus bake, “Ame im tombu iba vameadale,” lahame ab gagodamam.
22. Labihàmu Paulusat uledi ame dam labe ibi iho vahe vahedume neàdi im ot vameaidam bak tomba Areopagus Bak Buzoho laba bakamta nusualadaha dam labe iho avaelaha laba duzu im ab faasi vameadamam. “Um Atena niba esuhu dam oa, num debu bak ubuda niba eho ahamte li gohatehe di lam eho aaha uho neha, ‘Ala am tame,’ lahame ostamna it auet modi vou baedamna zi lam em aaha bak. Labiha labe eho nehi ozo, ‘Uho auet modi alalehena zi lam vou baedam meo damat modem bak,’ laham bak lam em aame ozobohudehe bak. Labi eho neo aaha ubu uho vou baedam ala meida laba vou baedalo modemu na lodamna zi vou li esum ke vaheme beahubaehena vua vahudamna meida lam eho laha aaha bak. Ame ke vaheme beahubaehena laba im nehame toehena eho laha aaha bak. ALA LABE AM EE DAM BIEM ALA LABA VOU BAEDAM BEAHUBA, lahame toehena eho aaha bak. Labiha labe ame Ala lam um biemdaleàmu eho etei uba li vameadume fi dedalo modem bak.
24. Ame Ala nim bakti na ahebu modehe Ala am bak. Ame Ala lam asumti bakti damti vuusum Boehàda am bak. Labi damat auet modi ostam alalehena laba vou baedam num buà laba azim vaba Alat modem bak.
25. Labi ame Ala nim laha dam ahedi ohedam bak lamti labi dam iho ozome vamna lamti ahebu meedam Alat modem bak. Labiha labe iho ba akati ozome Ala bake na loe? Ame Ala lam Ahamo na im meedam di ba damat vi tau meedam biem Alat modem bak. Labihaha bak.
26. Labi ame Ala Aho laha aham di iube alimeat modehe dat labe faasi vou mode ledume im bakda debu mei debu mei lahadume fi goaitoi bak iuba le esu bak iuba le esu labihadume bak ahebu uloholedume bak nim dam bà tadehe Alat modem bak. Labi laha, ‘Dam mei debu niba guti esuiam neàte?’ laham bak lamti labi, ‘Dam mei debu adi diat faadume vou faodume elodume seddàla?’ laham bak lamti gi aham di iube na modehe vab di iube fet vi ozome esuhu Alat modem bak.
27. Damat Aba vi ozome tu vuzehem bak laba ozome Alat ahit bak nim dam bà tadehe bak. Damat neha, ‘Eho Ala bake tu vuzehese,’ lahame Aba vi ozodume nabidam bak labna zohàme ahit labihaha bak. Labi meit Aba nabidameam làhà Aba tàhi fi gatem zoaha bak. Lahamnàme Ala ba bohu vabak. Gi taho vi aame ozome ozobohudem bak.
28. Eho gi neham bak ozome uba labi gagoho bak. Dam amuda ubuda labe iho gagoho im gi neham bak. ‘Ame da labe Am feà bak labet iba modi im ahededam bak. Im nigodam bak. Im bake niba aidam bak,’ lahame gagoho bak. Labi laha um tai ahamda meida bisi ladeedamda lam nehame amu gi toeme esuhu bak. ‘Ala im Ai am bak. Labi im ahebu Alam data am bak,’ lahame toeme esuhu bak. Labiha labe eho nehi ozo. Ame Ala nim bisi bohu vaba gi taho vi aame ozome ozobohudem bak.
29. Labihàmu im Ala imboda labe Am dam modem labe ba akati emas modeo, perak modeo, ke modeo, dam anekehà neàda labe aho ame na ve na it modeme alalehena laba ahe vabna laba iho neha, ‘Ala am tame,’ lahame vou baedàla? Labiham bak lam git ozome meedam bak am bak.
30. Amu di iube im tai ahamda labe Alat, ‘Nehame modele,’ lahaha bak lam vabili ostamna ve it modeme alalehena imbo vabna laba, ‘Ala am tame,’ lahame ahusobuli baedam di lam iho faina meedaha bak lam ba Alat iba faki beoho vabak. Iho ostam im meedam bak lam Alat gi aalahigeàmu labihasu esu. Lahana etei nim Alat ba labiham vabak. ‘Dam bakda ahebu ibi iho faina meedam bak nasi voedume fa ahu neà bak vàmadi fa Aba tu vuzehi Aba neha, “Om abo feàte,” lahame ahu adat iedi Aba vou baedale,’ lahame Alat etei iba ootedam bak.
31. Alat nehame fet ozome gagu esuhu labe labi ootedam bak. Im dam bakda ahebu iho meedaha im lam ba uloome aime neàdi gagu vàmadelo modem digat lam Alat amu fet ozome gagu esuhu bak. Ame iademe ahu vamdesu meedam bak lam, ‘Amat ba meedàla?’ lahame modemda lam Alat amu gi fi me gagu esuhu bak. Yesus ame Da am bak. Aho fi me gagu esuhu Da lam, ‘Amat modela?’ laham bak lam damat biem bake ame Da lam Am eloho bak labet Alat modi fa ahedi usaha labe damat ozobohudehe bak,” lahame Paulusat ab vameadaham.
32. Labi ame dam labe Paulusat lab vameadaha im lam aiha meit eloho bak labet fa ahedi usahana aihemu Paulus bake tozome ab moham. “Dam elohona fa ahedi usam biem bak,” lahame Paulus bake ab tozoham. Lahana dam totbaho labe vedi uledi gago, “Oho etei lab vameadaha im lam ba neo li digat meida labe iba laha neo vameadale. Im laha aise,” lahame uledi ab gagoham.
33. Labi gagu neàdi Paulusat ame dam vahe vaheme im vameadam bak tomba lam vou esmozi ab laham.
34. Ame di lam dam totbaho Paulusat lab vameadaha im lam ba moho vabak. Uledi Yesus bake ab tu vuzeheham. Labi Paulus bake vi tau goda. Ame dam neha. Dat meida ee gagom Dionisius am. Ame Areopagus Bak Buzoho laba vahe vaheme im vameadam dam laba im vameame faheme modiamda meida am. Labi laha nam meida ee gagom Damaris am. Labi dam giida totbaho ame. Labihasu Yesus bake tu vuzehi Paulus bake ab vi tau godamam.
1. Labi Paulusat Atena laba azibe vou esmozi fa num debu Korintus laba ab laham.
2. Paulusat Korintus laba Yahudi dat meida Akwila bake ab tàham. Akwila faaha bak ee gagom Pontus. Labi Akwila am nam Priskilati gi etei Italia bak laba vou esmozi fa Korintus niba li tau azihida am namti am. Abo bak ahebu vuusdam Kaisarleheda Klaudius labe aho amu neha, “Yahudi dam ba num debu Roma niba a vahi esumule,” lahame mali Yahudi dam ahebu ootedume oudahemu Akwila am nam Priskilati fa Korintus niba li azihina ab tàham. Labihàmu Paulusat ame da labe am namti im vameadalo iho azihi num laba ab laham.
3. Laba teohe le im vameadume modeha ame da labe am namti ibi iho doi vam bak gi na fi ho sokba dehalehena tademe baa duali afoezobe teohet mome fa faatoiam numa suusumna meedam bak aahemu aho ozoha, aba aho amu meedume doi vamnati ulohona meedam bak aahemu laba tau vahi azi amena baa ab meedamam.
4. Labi hari Sabat abo Yahudi dam labe ibi iho gi azibe im digat fuhuzobe Paulusat le ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli dam laba vahe vahedaha dam zi abo Yahudi dam modeo, Yunani dam labe fa Ala bake, “Am abo feàte,” lahame ahu adat iedi Ala bake vou baedam dam modeo, laham dam laba im vameadume damat aime fa ot vai vi gagu vi aida. Labi ba neo ame hari Sabat meida neo fuhuzobe neo ame baket mode. Labihada. Paulusat aho nehi ozoho labe labihada. “Ame dam labe eho vahokedam bak labet modi ozobohudi fi gatei fa Yesus bake tu vuzehese,” lahame labi ozoho labe ame hari Sabat ahebu labihasu meeda.
5. Labi ba Silasti Timotiusti Berea laba vou esmoho dam behàsu labe Makedonia bak labe lebohoti fa Korintus niba ab vi fuham. Làhàmu Paulusat aho ozo, “Emti vou alem dam behàsu Makedonia bak labet eba niba ab vi fuhame? Làhà em na modem bak fa ame dam laba ahumdese,” lahame aho doi nabimna abo numa suusumna baa meedam bak lam fa voou gi, “Alat Gagu Fihasi Vimteme Oluhu Dat Boehàda lam Yesus ame Da am tame,” laham Alam im lam Yahudi dam bake ahate vou vameatedume fi dedam bak bohu lamota ab meedamam.
6. Labihadume modeha ame Korintus laba azim Yahudi dam labe Paulusat lab vou vahoketehe im lam, “Gi giomimot modem bak,” lahame mu tozome Paulus bake feàtàda. Labihàmu Paulusat am sue aho naedat it vuusu bak fau footolo ab feifeiham. Labi ab gagodamam. “Uho faina meedam bak lam Alat uba soat vausu fa vei neàdem bak mu beomeam làhà debu uhumo modeho. ‘Eho modeho,’ laham bak lam vàlu ba eba a gagomule! Em etei nibe faasi Yahudi damat modem vab dam bake le Yesus Aho amu meedume vou esmoho Im Neàna lam vou vahoketedalo mozo. Ba uba Yahudi dama vahokedam kaio,” lahame gagodam labe am sue it vuusu damat aasdahit bak fau feifeime neàdi ab laham. Damat fet aame ozo, “Paulusat aho iba lab vahokedaha im lam iho mohemu iba ame bak lam ab modehame?” laham bak ozobohudem bake ab modeham.
7. Labi Paulusat ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num labe futoi fa ame num labe aba obe duzuhu num abo Titius Yustus labe am num laba ab oleham. Ame Titius Yustus Yahudi dàt modem vabda lahana Ala bake, “Am abo feàte,” lahame ahu adat iedi Ala bake vou baedam dàt moz. Lahada labe am num laba oli Yesus Aho amu meedume vou esmoho im lam ab vahokedamam.
8. Labi laba oli vahokedume modeha ame num laba oedam dam zi lam vuusu im vameame faheme modiamda Krispus labe am nam databeti abo am num laba tau vahi azim dam ahebu im Boehàda Yesus bake ab tu vuzeheham. Labi laha Yahudi damat modem vab dam Korintus laba azihi dam dua totbaho laha Paulusat lab vou vahoketehe im lam aime uledi Yesus bake laha tu vuzehi meedàmu valo ab baptisledaham.
9. Labi ba aibu meida labe Paulusat edehesi fako bakamta aasdameam aaha Boehàda Yesus am obe duzu im nehame vameadamna ab aaham. “Paulus oa, om Em im Korintus niba esuhu dam laba vou vameatedam di dam oba beolo modemeam làhà a iedi dae vabali Em im vou vahoketem bak lam a momule. Gi ozahigeàmu meedale.
10. Em fa oba taum bak. Korintus niba azim dam alimda oho vahokem im lam ba aime uledi Eba tu vuzehi Em damalelo meedam dam dua totbaho ehete. Ba meit oba nasi vabidume beom vabak,” lahame vameadamna ulem bakti ulohonali ab aaham.
11. Lahame labihasu vameadam bak aahemu Paulusat gi Korintus laba azihi dam laba Yesus Aho amu meedume vou esmoho im abo Alat vameadaha im lam vahokedam bak bohu meedume tahun vàmtea foli ala enam vi tau ab foleham.
12. Labi Paulusat aho Korintus laba azi meedam di labe dam ahebu vuusdam Kaisarleheda labe aho gi amu Galio bake gagu fa Akaya bak laba esuhu dam lam ahebu vuusdalo gubernurli meeda. Labi Galio gubernurli meedam di labe Yahudi dam Korintus laba esuhu dam labe vazisi ahu vàmadi im aa odoadume Paulus ab siham. Labi si meia uloome im vi aime neàdi gagom bak laba ozome Galio bake vou le aba aho avaesdam laba ab vou duzuham.
13. Labi vou le vou duzu neàdi ame Yahudi dam zi labe Paulus bake giomim vàlu dat boehàda laba vameada. “Dat ahamda Musat aho amu im Yahudi dam labe im tai ahamda laba neha, ‘Ahu adat iedi Ala bake, “Am abo feàte,” lahame Ala bake vou baedam di nehadale,’ lahame toedume iba dam badate vou vamea usehe Im Feàna lam da nibe vedi voou fa aba aho modemda laba, ‘Ahu adat iedi Ala bake, “Am abo feàte,” lahame vou baedam di nehadale,’ lahame im abada tombuli dam modi ulededume Ala bake vou baedam bak. Lahana aba aho vahokem bak lamti dat ahamda Musat vahokedam bak lamti uloho kaio. Paulusbada uho neha, ‘Modem neàte,’ laham bak gagoho vaba aho gi bak meide,” lahame Paulus bake vàlu Gubernur Galio bake ab vameadaham.
14. Labihasu vàlu vameadume neàdi Paulusat fa gagosome modeha Gubernur Galio meoli fa Yahudi dam laba ab gagoham. “Aa! Um Yahudi dam ozom vaba? Kaisarleheda labe aho iba gagu fi hasi esuhu im feàna lam da nibe aho zidazeheo? Bisi fai bak meedào? Labihamta uho ame da nim si eba vou li uho lab vàlu vameadaha im lam eho fa aime neàdi gagom neà bak. Lahana ame im feàna lam ame da labe zidazehe vabak. Labi bisi fai bak meedaha vabak. Labihameam em uho lab vàlu vameadaha im lam em ba uloome aim moho bak.
15. Lahana debu modehe vabna gi uho dat ahamda Musat toedume fi hasi esuhu Im Feàna zi laba uho Yahudi damat vuusu otesi otesidume meedàmu ubu uho ozoho baket meedale. Eho giidat akati meia uloome vi aime neàdi gagu modidàla? Uhumo ozome modele. Em moho.”
16. Lahame gagu neàdi ame Yahudi dam lam Galio aba aho meia uloome vi aime neàdi gagom num tombabu lam mali am meo dam gagome ame dam lam tet ooteme ab oudaham.
17. Labi oudume neàdi modeha ame meia uloome im vi aime neàdi gagom bak laba dozeadaha dam zi totbaho labe duzu faobe Yahudi damat ihimo vazisi Alam im meedam num laba vuusu im vameame faheme modiamda meida Sostenesam alihi aahemu gut si ab beome vooham. Lahana Galio gi aalahigeàmo. “Yahudi dam lam ihimo meedam im em akati taue?” lahame gi ab aame aalahigeàmoham.
18. Ame da Paulus aho gi Korintus laba azi vahokedam bohu meedume neàdi amti Yesus bake tu vuzehi meedam dam totbaho laba, “Neàte. Em lalo mozo,” lahame im it vameadume neàdi vou esmozi amti Akwila labe am nam Priskila lamti iho ihe sue baa vààsu nutabet vou lam ihe buduada laba ziddume Siria bake lalo modemu itea feàna obe laba modesuhu num debu Kengkrea laba ab lazeham. Paulus amu Ala bake neha, “Eho Oba amu gagohona eho mode tame,” lahame aho Ala bake fet gagu vàmadi esuhu im aho ba modeme neàdehemu Kengkrea laba am ohuta bohu aume am ohu ab veibozieham. Labi ohuta aume neàdi ame ihe buduada laba ziddume vihitoi Siria bake ab ladamam.
19. Labi ladume biou num debu Efesus laba ab lafuham. Labi laba lafusi Paulusat Akwila am nam Priskilati esmozi ahamo Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli Yahudi dam laba Alam im abo Yesus Aho amu meedume vou esmoho Im Neàna lam dam bake vahokedam di labe damat aime fa ot vai vi gagu vi aida. Labihadume modeha ame dam labe gago, “Om etei lehena nasi a lamule. Efesus niba tau azibe lam neàte,” lahame gagoha Paulus ab moham. Lahana Paulusat lalo modem di labe im nehi it vameada, “Alat eba gagomeam làhà em ba fa niba le tame,” lahame it vameadume neàdi Akwila am nam Priskilati Efesus laba vou esmozi Paulusat ahamo neo ame nutabet vou lam ihe buduada laba zisi Siria bak laba lam bak ozome ab ladamam. Antiokia Korintus Efesus GALATIA KILIKIA AKAYA ASIA LAUT TENGAH SIRIA FRIGIA U
22. Labi itea laba vou id ladume itea obe modesuhu num debu meida Kaisarea laba ab lafuham. Labi lafusi zitu usi Kaisarea labe labohoti Yesus bake tu vuzehi vahi meedam dam kota Yerusalem laba azim dam laba ab zooleham. Labi zooli lafusi, “Neàte,” lahame im ot vameaidume neàdi laba tau izi dihasi neo Siria bak labe am num debu meida Antiokia laba ab laham.
23. Antiokia laba le lafusi Yesus bake tu vuzehi vahi meedam dam laba tau azibe fa neo vou esmozi Galatia bak labe am num debu totbaho laba le dam Yesus bake tu vuzehi meedam dam labe bedem bak labna zohàme le im vi vahoketedume teudeda. Labi neo Frigia bak labe am num debu totbaho laba le dam Yesus bake tu vuzehi meedam dam labe bedem bak labna zohàme le neo im vi vahoketedume teudeda. Labihada.
24. Labihadam di labe num debu Aleksandria laba faahada abo Yahudi dat ee gagom Apolos lahamda labe aho Efesus niba ab leham. Ame da lam im vameadam di gi bibana aim neàna vameadam dàt moz. Amu sekolah modemehamdehe labe im ozobohuna vameadam dàt moz. Labi laha Alat Vameadaha Im Toedahana lam am tombu ahebu ozobohudi neàbodehe labe vameadam dàt moz.
25. Labi laha Boehàda Yesusat amu meedaha im totbaho lam meit aba vahokehe labe ozobohu dàt moz. Lahamda labe Efesus niba li azim di labe aho Yesus meedaha im totbaho lamota dam bake vahokedam di gi ahulat vi ozome ozobohudi dae ule neàt deelehat vahokeda. Lahana Yesusat meedaha im totbaho vabilem lahasu. Am gi Yohanes Mei Vuu Valo Baptislemda labe aho amu dam bake neha, “Uho faina meedam bak lam nasi voedume fa ahu neà bak vàmadi neàdehezobe eho um vuu valo baptisleidase,” lahame dam bake vou vameatedaha im lamota ozobohudi dam bake vahokeda.
26. Labiham dàt Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba alimeat oli aho im ozobohudi meia iedehebeat vameadam vaba abo gi keàtet dam laba ab faasi vameadamam. Labi modeha Akwila am nam Priskilati ame num laba tau olehe labe Apolosat lab vahokedaha im lam aime ozo, “Apolos gi im zoho vekehe dàt moz,” làhàmu dat am namti Apolos gagome am num bake ab vou laham. Labi Alat meia soat vausu fa vei neàdem bak, “Akatihasu modemna modela?” laham bak lamti Yesusat meedaha im totbaho lamti Apolos biem zoho lam dat am namti iademe vahokedume Apolos ab ozobohudedaham.
27. Labi ba neo Apolos fa Akaya bak laba lalo ab ozoham. Labihàmu amti Yesus bake tu vuzehi vahi meedam dam Efesus laba azim dam totbaho labe Apolos Akaya lam bake deeli vi tau vameada. Labi dam Yesus bake tu vuzehi vahi meedam dam Akaya bak laba azim dam totbaho labe aho lem bak gut malem bak labna zohàme ame Efesus dam labe neha, “Da nim uho uledi gut vale. A bak malemule,” lahame sunit toeme Apolos bake lu ab oluham. Labi Apolos laha labe le Akaya bak laba ab lafuham. Alat meia ozahit deeli soat vausu fa vei neàdedam bak lam ame Akaya dam lam biem bake Alat amu di iube ame dam laba modi ozobohudi fi gatehe labe Yesus bake tu vuzehe dam ehet. Laham dam laba Apolos laba ab lafuham. Lafusi aho faasi im vou vahoketedam di labe ame dam labe iho Yesus bake lab tu vuzehi im Abada meedam bak lam bedem bak labna zohàme ame dam labe im ahu Apolosat ab modi teudedamam.
28. Apolos aho nehadam labe dam labe im ahu modi teudeda. Dam giida labe aasdahit Apolosti Yahudi damti Alat vameadaha im otesi otesidam di Apolos dae abada bisi teudi daetesu meeda. Labi laha ame Yahudi dam labe biem bake Apolos Alat Vameadaha Im Toedahana lam aame ozobohudehe labe gi im lada lam faasi, “Ame Da Yesus lam abo Alat Gagu Fihasi Vimteme Oluhu Dat Boehàda am tame,” laham bak lam dam laba iademe vahokedam labe damat aime ozobohudeda. Labihadàmu ame Yahudi dam labe gi dae vabali ab moudaham. Labihadam labe Apolos Akaya dam Yesus bake tu vuzehi meedam dam labe im ahu ab modi teudedaham.
1. Apolos Korintus laba azim di labe Paulusat gi Galatia bak lamti labi Frigia bak lamti laham bak behàsu labe am num debu meida laba le dam Yesus bake tu vuzehi meedam dam labe im ahu bedem bak labna zohàme le im vi vahoketedume teudeda. Labi neo num debu meida laba le gi ame baket meeda. Labihadume neàdi sibu zie labe ladume le Asia bak labe am num debu meida Efesus laba fa ab lafuham. Le lafusi Paulusat aho ozo, “Dam nim Yesus bake tu vuzehi meedamna ozomo?” laham dam Efesus laba ab tàham.
2. Tàhi vi ailo gago, “Uho amu Yesus bake tu vuzehe di lam Alam Aha Nutabe Neànat uba modi vizi um teudeheo?” Lahame labi gagoha ame dam labe fa gago, “Vabà! Im, ‘Alam Aha Nutabe Neàna eheo?’ laham bak im biem bak.”
3. Làhàmu Paulusat fa neo vi ailo gago, “Làhà, meit um vuu valo baptislehe di lam um amam im aime vuzehi baptisledàla?” Lahahat dam labe fa gago, “Im gi Yohanes Mei Vuu Valo Baptislemda labe aho amu mei vuu valo baptisleidaha di labe meia vahokehe im ahum lam iho vi aime ame baket meedam bak.”
4. Lahame labi gagoha Paulusat fa ab vi vameadamam. “Ne lahana Yohanes mei vuu valo baptisleiam di aho gi dam nehamdàta vuu valo baptisleidaha bak. Damat neha, ‘Iho faina meedam bak lam voedume fa ahu neà bak meedalo vàmadeho,’ laham dam lamota aho vuu valo baptisleidaha bak. Ame bak lam damat fet aame ozobohudem bake aho meia vuu valo baptisleidaha bak. Lahana aho amu ame bak lam meedam di labe Yahudi dam bake nehame vameada. ‘Eba vi tusu ba lemda laba uho tu vuzehele,’ lahame Yahudi dam laba Yohanesat amu vahokehe bak. Ame Da aba vi tusu lemda lam gi Yesus am bak. Uho ame Da laba tu vuzehele.”
5. Lahame ame dam labe Paulusat lab vameadaha bak lam aime vuzehi ozo, “Iho etei Boehàda Yesus bake tu vuzehi Am damalehe dam im ame?” laham bak dam giida labe biem bake, “Fà ozobohudese,” lahame gagome meit im vuu valo ab baptisledaham.
6. Labi Paulusat am anekehà ahim lam ame dam labe im ohu laba odotlame tom gagodume modeha Alam Aha Nutabe Neànat nom ilu ame dam laba ab modi vizi teudedaham. Labi modeha im dae fa vei seti fa dae naedat it aime ozobohudem biem dae faasi Ala bake ab vou baedamam. Labi laha Alat iba modi ozobohudi fi gatehena abo Alat gagu oluhu im lam laha dam bake ahate faasi vameada. Labihada.
7. Ame lab meedaha dam lam dem di abo dua belas ehena ozomom bak.
8. Labi Paulusat Efesus laba azim di aho gi nehada. Yahudi dam labe ibi iho gi azibe im digat hari Sabat fuhuzobe Paulusat aho ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli aho meia iedehebeat vameadam vaba abo gi keàtet dam laba nehame ab vameadamam. “Alat Gagu Fihasi Vimteme Olulo Modem Dat Boehàda abo damat vou faodamda lam Yesus am tame. Uho meit Aba tu vuzehi im Abada meedamta Alat uledi ame da laba modi Am damali vuusu im vahokeda tame,” lahame dam bake vahokedume modi vuzeheda. Aho lab meedam bak lam ame hari Sabat fum di gi labihada. Gi labihadume modeha ala ab làteladeham.
9. Labi modeha dam totbaho gi odohabuli Paulusat lab vameadaha im lam aim moho labe Yesus bake tu vuzehem moh. Vedi dam totbaho aasdahit nehi tozoda. “Paulusat neha, ‘Im Soat Vausu Fa Vei Neàdemda lam Yesus ame Da am tame,’ lahame lab vahokehe im lam gi giomimot modem bak,” lahame tozome mouda. Labihadume modeha ala làteladi Paulusat aho lab vameadaha bak lam dam tozome moudàmu am gi ab vei moham. Labihàmu aho ame dam lam gi vou esmozi ab laham. Labi dam Yesus bake tu vuzehi meedam dam lam aho vamateme dat ee gagom Tiranus lahamda labe am num feàda laba ab vou laham. Ame da Tiranus labe am num feàda lam dam labe ibi iho meia im vahokedam di ot gagu vi ai. Ot gagu vi ai. Laham num laba vou le oedume, “Alat meia modi Am damali Aho vuusu im vahokedam bak lam, ‘Akatihasu modemna modela?’ ” laham im lam Paulusat laha ame dam laba vameadume damat ot gagu vi ai. Ot gagu vi ai. Lahada. Gi digat ahebu labihadam tade.
10. Paulusat Efesus laba azi ame im lam vou vameatedume tahun behàsu ab foleham. Aho lab meedamehamdehe bak labet modi dam Asia bak laba azim dam dua totbaho ahebu abo Yahudi dam modeo, Yahudi damat modem vab dam modeo, ame Alat vameadaha im abo Boehàda Yesus labe Aho amu meedume vou esmoho im lam ab aime uloholedaham.
11. Paulusat Efesus laba aidam di labe na damat ihimo modem biem im feàna lam damat amu aaha vabna Alat Paulus bake modi vizi teudi aho ame na meeda.
12. Labiha labe dam ahe dam labe im sue ahugia footomna modeo, sue baana kemohode gimsum sue modeo, Paulus bake vou le lu aho gut ve vuu neàdehezobe dam naedamat fa ve im dam faideheda modeo, setan oli veimahada modeo, dam laba vou ladume dam im so laba uladdam di dam faideheda lam Alat modi fa neàdeda. Labi setan oli veimahada lam laha futodume ilida. Labihada.
13. Labihadam di labe Yahudi dam totbaho labe mei ahu oli veimam setan fa koba ibidat gagu futodume ilidam meo dam labe bak iuba le mode. Bak iuba le mode. Lahada. Ame lab meedam dam lam gi Skewa labe am adam tujuh totbaho am. Ame da Skewa lam Yahudi damat Ala bake lomna ve vua vahudam toheda zi laba vuusu im vameame faheme modiam dat meida am. Laham adam tujuh labe vedi nehi ozo, “ ‘Imo fa Boehàda Yesusam ee gagom di setan futodume ilidam meo,’ laham bak imo modi aase.” Làhàmu ame dam labe iho digat meida labe le dat mei ahu oli veimam setan laba neha, “Setan oa, Paulusat lab vameadam Yesus labe oba neha, ‘Om taho futoi da nim vou esmozi itale,’ lahaha bak.”
15. Lahame gagoha ame setan labe fa aho veimahada labe am ahat Skewam adam laba ab gagoham. “Alat Aho Yesus bake modeo, Paulus bake modeo, ame dam ahim laba modi vizi im setan niba gagu futodume ilidam bak lam em ozobohu bak. Lahana um ana damat mode? Alat uba gagu vizi teudi, ‘Im setan niba gagu futodume ilidale,’ lahaha vabak. Em ba futoi itam moho bak.”
16. Lahame labi gagoha ame setan oli veimahada labe ziagahu ame Skewam adam tujuh lam siàdume ab beodaham. Beodume vasealedume ame dam labe im sue ahebu gelevai so bozbu tadi futodume im num bake ab ilime seddaham.
17. Labi modeha Efesus laba esuhu dam ahebu abo Yahudi damti Yahudi damat modem vab damti lab meedaha bak lam aime àvodi ab iedeham. “Paulusat aho setan gagu futodume ilidam bak Yesusam ee gagom di setan aime uledi futodume ilidam meote. Lahana giomim modehe dàt gagom di ba aime uledi ilidam vabak,” laham bak ozome, “Im Boehàda Yesus abo feàte,” lahame ahu adat iedi Yesus bake ab vou baedamam.
18. Labi laha dam gi etei Yesus bake tu vuzehi meedam dam totbaho labe fa damat vou faodahit ibi iho faina meedam bak lam voedume ahate fi desi vameada.
19. Labi dam koba deda labe laha iho Yesus bake tu vuzehi meedàmu im koba modem bak ozobohudem bake toehena bolohona lam vou ledume damat aasdahit vua vahuda. Ame toehena bolohona lam amu doit vaha bak lam vi ozome dem di abo doi oona perak lima puluh ribu ehe bak. Lahana vua vahuda.
20. Labihasu meedam labe, “Ala abo feàte,” laham bak lam ab modi tombaleham. Labiha labe im Boehàda Yesus labe Aho amu meedume vou esmoho im lam dam Yesus bake tu vuzehi meedam dam labe meit ve iuba vou le vameada. Meit ve iuba vou le vameada. Labihada. Labihadam labe ame bak laba meit vi tau Yesus bake tu vuzeheda. Meit vi tau Yesus bake tu vuzeheda. Labihadume ab tauidume dualeham.
21. Labihadume neàdi Paulusat aho ozo, “Em Efesus vou esmozi fa Makedonia bak labe am num debu ahebu lamti labi Akaya bak labe am num debu ahebu lamti im vou vahoketedume neàdi fa neo kota Yerusalem laba lase,” lahame ozome ahu ab vàmadeham. Labi aho neo vi ozo, “Em kota Yerusalem laba le azibe fa neo num debu buduada Roma laba ba lam bak,” lahame ozome ahu vàmadi ab gagu esuham.
22. Labi gagu esu neàdi aba vi tau im vou vameatedam dam behàsu Timotiusti Erastusti ame dam behàsu lam gagu Makedonia laba nasi ab oluham. Labi Paulusat ahamo Asia bak laba koena laha azi vou faodalo modemu nasi tau lam kai.
23. Ame di lam Paulusat lab vou li vahokehe im lam, “Dam bake Soat Vausu Fa Vei Neàdemda lam Yesus ame Da am tame,” lahame lab vou li vahokehe im lam Efesus dam dua totbaho Yahudi damat modem vab dam labe mu dae duali im nehasu otesi otesida.
24. Dat ee gagom Demetrius lahamda labe aho nazoh modem perak lam ve modeme nazoh meedamda am. Lahamda labe aho perak ve Efesus laba azim dam labe ibi iho vou baedamna ostam alalehe nam ee gagom, “Artemis,” laham alalehena laba vou baedam num itti ulohona buà modi dam bake lodume doi vada. Ame Demetrius am dam totbaho labe aba tau perak ve ame num itti ulohona buà meedam bak lam dam labe ibi iho doi dualem bak am.
25. Labihamda labe am dam totbahoti fa dam amomoi perak ve nazoh mei meedam dam totbahoti labihasu gagome bakamta ab vaheham. Vaheme neàdi Demetriusat neha, “Ba oa, im ebeda nim nasi aimale. Na iho modeheda nim dam bake lodam labe im doi dualedam bak am bak. Laham bak lam um ozobohuna taia?
26. Lahana ame da Paulusat meedam bak lam um aada. Labi um dogoit aida. Lahana taia? Um ba biem vabak. Ame da Paulusat aho vedi nehi vahokeda. ‘Damat auet modi alalehena lam Ala imboda modem kaio. Gi ostam alalehenat modem bak,’ lahame vahokehe labe dam Efesus niba esuhu dam dua totbaho nimti abo Asia bak ahebu azim dam dua totbaho lamti labihasu am im vuzehi meedam bak.
27. Labiha labe im nazoh nim damat ba akati modi doit và? Dam gi, ‘Gi giomimot modem bak,’ lahame tozome moudam labe ba doit vam vabak. Labi im doi vam bak fa ab vabalemam bak. Lahana gi lada lamota faidehe vabak. Fa neo damat nam alalehena Artemis laba vou baedam num laba, ‘Num lam feà kaio,’ lahame feàtàme ba le oli Artemis bake vou baedam vabak. Gi ame numti ame nam alalehena Artemisti mu feàtàdam bak. Asia bak ahebu azim dam dua totbaho lamti labi dam bak iuba esuhu dam totbaho ahebu lamti labihasu ibi iho amu, ‘Artemis abo feàte,’ lahame ahu adat iedi vou baedam bak lam ba sete tame. Eho gi ibi iho doi vadam bak lamti labihame setemna zohàme vou faovoi nasi fet vameadam bak,” lahame ab vameadaham.
28. Lahame Demetriusat lab vameadaha im lam ame dam dua totbaho labe bakamta vahehe dam labe aime ozoha, “Abo imbona ozomo?” lahame Paulus am dam totbahoti faki feà bak fusi dae duali ab buddamam. “Im Efesus dam nibe ibi iho vou baedam nam alalehena Artemis lam abo feàteee,” lahame ame na aaha vabna gi ostame bisteat buteme vou baeda. Labi neo bisteat neo buteme vou baeda. Gi labihadam bohu ab meedamam.
29. Labihadume modeha Efesus laba azim dam dua totbahoti ame dam labe meit vi tau faki budda. Meit vi tau faki budda. Lahadume dae gai ab dualeham. Labiha labe ame dam zi labe vedi Gaiusti Aristarkusti Makedonia laba amu azim dam behàsu fa Efesus niba li Paulus bake vi tau gohatem dam behàsu lam ab siham. Labi ame dam zi fai labe ame dam behàsu si vou kea lame ame Efesus dam labe ibi iho bakamta vahi im vameadam bak tomba laba vou emoeme natàh doo labohoti ab vou oleham.
30. Laham bak lam Paulusat vi aahemu vedi am dam behàsu sihi bake, “Aho tau oli dam bake im vameadase,” lahame modeha dam Yesus bake tu vuzehi meedam dam totbaho labe, “Paulus om laba a tau olemule. Oba damat beoma,” lahame Paulus tau olem bak ab maleham
31. Labi laha Paulus bake vou alem dam abo Asia bak laba azim dam laba im vameame faheme modiam dam abo dam ee eheda totbaho labe laha Paulus bake, “Damat im vameadam bak tomba laba a tau olemule,” lahame meia gagu oluhemu Paulusat vedi olem bak ab moham.
32. Ame di lam dam ahebu ame im vameadam numbu laba oli dozeadaha dam labe ozo, “Ne, im ana im vameadalo num niba olehela?” lahame ostame vi tau olehe labe vabi vi ozoda. Labiha labe dam totbaho gi ostam imbu dae duana faasi vameada. Labi dam dua totbaho laha ostam imbu amomoi neo faasi vameada. Labihadaha labe dahobueda.
33. Labihadume modeha Yahudi dam labe im da meida Aleksander bake neha, “Dam nibe dahobulehe bak nim, ‘Debu iho modem kaio,’ lahame oho le Yahudi damat modem vab dam duada zi laba veibadale,” lahame odosi im vameadam bak tomba laba ab oluham. Làhàmu aho le duzu im vameasome modeha Yahudi dam dua totbaho labe Aleksander bake, “Nehame gagole,” lahame neo vi buteme vameada. Làhàmu Aleksander, “Am Yahudi dam totbahoti etei dahobu bak nim im Yahudi damat iho debu modem kaio,” lahame ozome dam dua bak laba veibalo am anekehà vousai, “A dahobuedamule,” lahame baedume modeha
34. Yahudi damat modem vab dam dua totbaho labe ozo, “Da lam Yahudi dàt modem bak. Artemis alalehena ibida vou baedam vab dàt modem bak,” lahame ailahigeàmu vedi nehame buddam labe neo dahobueda. “Oooa! Im Efesus niba azihi dam nibe ibi iho vou baedam nam alalehena Artemis lam abo feàteee. Im ba im ubuda aim vabooo,” lahame bisteat vameadam bohu modesdume jam behàsu ab foleham.
35. Labihadume modeha ame Efesus num debu laba azim dam labe tohe duzu im vameame faheme modiamda labe aho li neo dam duada laba fi baedume dam dae ab vabaleham. Dae vabalehemu im abada ab faasi vameadamam. “Um Efesus niba azim dam oa, im ebeda nim nasi aimale. Im Efesus niba esuhu dam nibe nam alalehena Artemis bake vou baedam num vou faovoi aasdam dam im am bak. Labi laha ke asum ahoba labe fa bak niba biti abo nam alalehena Artemis labe am alihiti uloho ke damat vou baedam ke lam vou faovoi aasdam dam im am bak. Dam ahebu ame bak lam ozobohu bak.
36. Ame bak lam ba meit iba nehame gagodam vabak. ‘Gi giomimot modem bak. Um ame na lam vou aasdam vab damat modem bak,’ laham bak lam ba meit iba labi gagom biem bak. Lahana um akati bisi àvodi buddàla? Gi nasi dae vabali faode. Uho amu enohit dam behàsu nim git sihi bak. Labihaha bake uho etei neo bisi àvodehat neo modi faidemo!
37. Um etei dam behàsu nim àvodeha si vou kea lame ibi iho bakamta vahi im vameadam bak tomba niba vou leheda behàsu nim im Efesus niba azim dam labe im nam alalehena vou baedam num laba vahehe nazoh aa le oli vaha vabna Artemis feàtàhà vabna uho akati git ostame sihela? Um git modeho.
38. Ame da Demetriusti labi perak ve nazoh meedam dam totbaho lamti ame dam labe meia im vàlum bak ehelemeam làhà niba a modemule. Gi uho vàlu meedamda lam uho ve fa meia uloome aime neàdi gagu vàmadem dam labe iho im vameadam num laba vou le ame dam busaoda labe fà da laba uloome aime neàdi meedale. Meia uloome aime neàdi meedam dam labe ibi iho meedam bak am. Ame num laba vou le uho meia vàlum im lam boehàda laba vameadume aho uloome aime neàdi fa uba gagom bak aile. Niba a modemule.
39. Lahana um etei im meida vameadam bak ehelemeam làhà ba etei vameadam kaio. Faobe dam busaoda boehàda fet gagu esuhu digat fuhuzobe dam vazisihizobe dam labe iho avaelaha laba le duzu vameadam neàte. Labi dam busaoda labe uba gagom bak fa vi aile.
40. Etei uho git modehe bak em abo iedeho. Um ozom vaba? Iho meit vi taui meit vi tauidume dae duali feà bak fuhu bak lam Kaisarleheda labe aho gagu ot vai meedam dam labe iba fa vàlu ozomsum bak. Labi im fa akati gagoe? Im etei vahe vaheme dae dualehe bak nim debu vabna vahe vahehe bak,” lahame ab vameadume neàdeham.
41. Labi vameadume neàdi ame num debu Efesus laba im vameame faheme modiamda labe aho ame dam duada zi laba gagome ame im vameadam bak tomba natàh doo labe futodume fi goaitoi dam im num bake fa ahala ab lailaidaham.
1. Labi ame num debu Efesus laba azim dam labe ibi iho modi dahobulehe bak lam fa dae vabali fi goaitoi fa im num bake fa ahala lailaidume neàdehezobe Paulus amti vou alem dam Yesus bake tu vuzehi vahi meedam dam lam aho gagome bakamta ab vaheham. Bakamta vazisi neàdi ame dam labe iho Yesus bake tu vuzehehe bak fa bedem bak labna zohàme Paulusat aho im vi vahokedume vabededa. Labi im vi vahokedume neàdi lalo ab gagoham. “Um gi iademe esdale,” lahame it vameadume neàdi Efesus lam vou esmozi Makedonia bak laba lalo ahu vàmadi ab laham.
2. Aho Makedonia bak laba ladam labe num debu meida laba le Yesus bake tu vuzehi vahi meedam dam labe ibi iho Yesus bake tu vuzehi meedam bak lam ahu bedi voom bak labna zohàme im vi vahokedume vabededa. Labi neo ladume num debu meidate fusi ame baket neo meeda. Labihada. Aho lab vi vahokedam Patara Miletus Efesus RODOS Atena Asos Metilene Korintus Troas Filipi Tesalonika Berea KIOS KOS SAMOS ,
300. Kilometer U bak lam ba koena vahokem vaba abo duana vi vahokedam bak. Labihadam labe dam labe im ahu modi teudeda. Labihadume neàdi Paulusat Makedonia bak lam vou esmozi fa neo Akaya bak laba Yunani dam labe ibi iho azim bak laba neo ab laham.
3. Laba le neo ame baket ab meedamam. Labi meedam labe ala ab làteladeham. Ala làteladi neàdi Paulusat ozo, “Em sue baa vààsu nutabet vou lam ihe buduada laba zisi fa Siria bak labe labohoti fa kota Yerusalem laba fa lase,” lahame gi etei vi ozoha, Akaya laba azim Yahudi dam labe am otelo aa odoadam bak aihemu gi mu fa, “Aba aho lehe baket Makedonia bak laba fa naot lase. Labi bak labe fa kota Yerusalem lafuse,” lahame ozohemu ame baket ab modeham.
4. Paulusat aba aho lehe baket fa lalo modem di labe am vou alem dam neham damat aba vi tau lada. Pirusam adat Sopater abo num debu Berea labe leheda ame. Labi Aristarkusti Sekundusti dam behàsu num debu Tesalonika labe leheda behàsu ame. Labi Gaius num debu Derbe labe leheda ame. Labi Timotiusti Tikikusti Trofi musti dam làtela Asia bak labe leheda làtela ame.
5. Labihasu dam tujuh lam Paulusat aba aho lehe zie labe fa ladume num debu Troas laba nasi fusi eho Lukasti Paulusti im behàsu nibe ba vulem bake it vou faoda.
6. Labi Yahudi dam labe ibi iho im feàna vi ozome roti fi kidehe vabna àdume iziam digat fum di modem im meedume neàdi im ahim neo sue baa vààsu nutabet vou lam ihe buduada laba zisi num debu Filipi labe fa Troas laba ab biodamam. Biodam di lam abo doni bake vou id ladume usi ahim labe ahim labe ladume Troas laba ab fuham. Labi fusi dam amu nasi oluhuda laba ab vi tàham. Labi tàhi im Troas laba esdume usi ab tujuhleham.
7. Labi iho Troas laba azim di labe hari Minggu aibu labe im Paulusti iba tau Yesus bake tu vuzehi vahi meedam dam lamti iho vazisi num kilada zuhuba làteladeheda laba ziddume im bakda faina meedam bake Yesus damat oteme vasea veàtoi iho fa Ala bake gohalehe bak laba vi ozome àmna lam vahi na àda. Labi Paulusat aho ozo, “Am dihasi lam bake nasi dam bake im vameadume vabededase,” lahame ozoho labe ame lab nusualadaha dam laba im vameadume usi ab neisoaleham.
8. Labi Paulusat iba im vameadam zuhuba lam aibulehemu fauhalem bake damat vuagat abo duana fauhaedaha bak.
9. Ame di lam Eutikus dat gàhàda labe ame zuhuba labe am aumat laba nusu Paulusat lab vameadam im aidameam Paulusat bisi im bohulana vameadam labe izeo àhàki lavoidume aumat laba ab iham. Labi iddume modeha ame num zuhuba ahoba laba modesuhu aumat labe oktoi bake ab nom iluham. Labi damat àvodi bake usdume si vousai aaha gi elohona aa.
10. Labihàmu Paulusat nom aaha Eutikus elohemu neo usi ame da labe am koeiso laba nom taasu si gago, “Bisi a ahu faidemule. Fa ahedeho,” lahame gagoha ame da labe eloho bak labet fa ab ahedeham.
11. Fa ahedi dam fa vahi Paulus bake vi tau ame zuhuba ahobada laba fa neo ab ziddaham. Ziddume neàdi Paulusat neo ame roti lam agube dam bake lodume dam vahi na lamti na amomoiti ab àdamam. Labi àdume neàdi Paulusat neo vi vameadume ab vou dihaham. Labi dihambe Eutikus aibut eloi fat ahedeheda lam damat ve im num bake abo deelehat ab vou laham. Labi Paulusat ame dam lam vou esmozi ab laham.
13. Labi im dam totbaho labe Paulus gi Troas laba vou esmozi ihimo nasi num debu Asos laba lalo modem bak ozome sue baa vààsu nutabet vou lam ihe buduada laba ziddume ab ladamam. Paulusat amu iba neha, “Uhumo nasi Asos laba lale. Em gi naot ba vuli Asos laba ot tahiame iheba ziseo mozo,” lahame iba labi nasi fet gagu esuhu labe iho ame baket ab modeham. Im ihe buduada ziddume num debu Asos laba ab laham.
14. Labi iho Asos laba fusi aaha Paulusat ba iba vi fuhemu iho gagome ihe buduada zisi im fa vahi ihet ab ladamam. Ihet ladume num debu Metilene laba ab fuham.
15. Fusi izi dihasi fa neo bak lada lam vou esmozi neo ladume itea feàna labe am touha meida Kios laba neo le lafu. Lafusi izi dihasi neo ihet ladume biou touha meida Samos laba neo lafu. Lafusi izi dihasi neo ihet ladume biou num debu Miletus laba ab lafuham.
16. Paulusat aho nehi ozo, “Am Asia bak laba usi tamehodem moho. Am abo taho fa kota Yerusalem laba fuseo àhàkeho. Yahudi damat im feàna vi ozome na àm digat Pentakosta fuseo modem di lam kota Yerusalem laba nasi le lafusi im lada lam modeme neàdi ba godase,” laham bak ozome ahu vàmadehemu im gi num debu Efesus labohoti fa Miletus laba ab lafuham.
17. Miletus laba lafusi Paulusat sunit toeme meia lu num debu Efesus laba azim dam labe Yesus bake tu vuzehi vahi meedam dam laba vuusu im vameame faheme modiam dam busaoda zi laba ab oluham. “Em Miletus niba fuho. Um nasi eba li eho uba im it vameadume esuse,” lahame sunit toeme Efesus laba ab oluham.
18. Làhàmu ame dam busaoda zi labe sunit ve aame uledi Miletus niba ab leham. Labi li lefusi Paulusat im ab faasi vameadamam. “Ba oa, em amu bak ubuda Asia bak niba ahamte lehe di em git modehe vabak. Abo iademe meedume etei digat nim vou fuhu bak lam um ozobohuna taia? Um ba biem vabak.
19. Labi Boehàda Alat eba gagohona lam eho uledi Asia bak niba meedaha di lam, ‘Em feàte,’ lahame eba it baedam vaba, ‘Em gi feà vab da,’ lahame it ozodam labe ame baket meedaha bak. Labi laha eho ame baket meedaha di lam em laha uba vi ozome faobekesi ahu faidi meddam meot. Em gi labihadaha bak. Ame di lam Yahudi dam Yesus bake tu vuzehe vab dam labe, ‘Em otese,’ lahame im amu odoa. Labi ba neo im odoa. Labihadam labe em abo alihi nemahusi feà bak fuhunàme em ba mu vooho vabak. Laham bak lam ahebu um ozobohuna taia?
20. Labi um damat neàdem bak vi ozome meedamna lam eho ba ahu ittu meedam vaba gi ule neàt Yesus Aho amu meedume vou esmoho Im Neàna lam uba ahate iademe vameadume fi dedam bak. Abo dam ahebu vahi im vameadam bak tomba modeo, gi num ubu uho azimda modeo, le em ba ahu ittu meedam vaba gi ule neàt uba vahokedam bak. Laham bak lam um laha ozobohuna taia?
21. Eho amu uba Yahudi dam modeo, Yahudi damat modem vab dam modeo, uba neha, ‘Uho faina meedam bak lam nasi voedume fa ahu neà bak vàmadi Ala bake tu vuzehi im Abada meedale. Labi im Boehàda Yesus bake uho laha tu vuzehedale,’ laham im lam eho dihasi vameadume fi de. Labi neo dihasi vameadume fi de. Labihadaha bak.
22. Lahana etei di nibe ab vaitoham bak. Alam Aha Nutabe Neàna labe amu eba neha, ‘Kota Yerusalem laba lale,’ lahame amu eba gagu ootedaha labe voom biehemu um vou esmozi kota Yerusalem laba ab lalo modemam bak. Em kota Yerusalem laba le lafum di dam labet eba modem im em biem bak. Lahamnàme em gi ozahit lalo modem bak.
23. Em gi neham bakta ozobohute. Eho amu num debu meida iuba le ame Im Neàna vou vameatedume fi deda. Labi num debu meida iuba le neo ame baket meeda. Labihadam bak. Labihadam di lam Alam Aha Nutabe Neàna labe eba nehame vameadume fi gateida. ‘Om kota Yerusalem laba lam di ame dam labe om si meit faina modehezobe si ousu teudem num sel laba om ousu vabidume geàdam bak ehete,’ laham bak lam eba nasi fet vameadaha labe em ozobohu bak.
24. Lahamnàme em gi ozahit kota Yerusalem laba lalo modem bak. Em ba so it vou faovoem vabak. Elom neà bak. Eho gi neham bak ozome kota Yerusalem laba lalo modem bak. Yesus im Boehàda amu eba neha, ‘ “Ala abo dam ahebu ozahit deeli soat vausu fa vei neàdedam Ala Am am bak,” laham Im Neàna lam eho dam bake ahate vou vameatedume fi dedale,’ laham bak lam eho le meedume neàdelo modem bake em ozahit kota Yerusalem laba lalo modem bak.
25. Lahana em im meida nim uho nasi aimale. Eho amu, ‘Iho akatihasu meedam labe Alat iba deeli vame Am damali vuusu im vahokedàla?’ laham bak lam um biem bake eho amu uba vou vameatedume fi dedume ab neàdeham bak. Lahana eho vi ozoha, em etei le seti um emti ba alihi ot aaiam vabak.
26. Labihàmu eho amu uba vou vameatedaha im lam um fa biemna zohàme eho etei neo uba nehalo. Um ba faina meedam bak voou ahu vei neàdi vàmadem vabameam làhà Alat uba ba ozahigeàmom vaba beomeam làhà debu eho modem kaio. Uhumo modeho.
27. Eho gi neham bak ozoho labe uba labi gagoho bak. Alat neha, ‘Eho dam bakdate im nehasu meedalo modem bak,’ laham bak Aho naedat nasi fet ozobohudi vameadume esuhu im lam ahebu eho ba ahu ittu meedaha vaba abo uledi vou vameatedume fi desi um ozobohudedaha bak. Labiha labe um ba vàhàdemeam làhà debu eho modem kaio. Uhumo modeho.
28. Uho ba git meedam bak labna zohàme um ahu naedamat mahate it vou faovoi malele. Labi laha Alam Aha Nutabe Neàna labe uba amu neha, ‘Efesus dam totbaho Yesus bake tu vuzehi vahi meedam dam labe ba git meedam bak labna zohàme uho dam busaoda labe ame dam lam iademe vuusu vou aasdale,’ lahame uba amu labi fet gagu esuhemu uho ame baket laha meedale. Abo domba zi vou aasdamda labe am domba zi laba iademe vabieme vou aasdam bakti ulohona ame dam laba vou aasdale. Ame dam lam Alat gi vam biehemu Am Adat Yesus labe Am vasea dam laba modi gohali Alat fa Aho vaha dam am bak. Labiha labe uho ame dam lam iademe vou aasdale.
29. Eho gi neham bak ozoho labe uba labi gagoho bak. Em etei le seti omozit dam faina meedam dam abo giomim vahokedam guru labe uba li uho vuusu im vameame faheme modiam dam laba aame faobekem vab dam labe vedi vabidume ibi amu vabademsuhu bak modi fa vàhàdedume sete tame. Abo na meona nohubake azihi vem labe li domba veeme elom bakti ulohona meeda tame.
30. Labi laha em le seti omozit ba um dam totbaho labe fàsi Yesus Aho amu meedume vou esmoho im imbona lam vedi veimdi fa im meidi vou vameateda tame. Ame dam labe neham bak ozome labihada tame. ‘Dam Yesus bake tu vuzehi vahi meedam dam labe iho amu Yesus bake tu vuzehi meedam bak lam fa mu voou seti fà ibi iho vahokedaha im laba tu vuzehi fa im damalese,’ laham bak laba ozome labihada tame.
31. Labihàmu uho ba git modem bak labna zohàme um ahu mahate it vou faovoi malele. Em amu uba tau azibe im vahokedaha bak lam abo tiga tahun ehete. Ame bak lam meedaha di em gi uba faobekesi mebet vahokedaha bak. Abo digad diat vahokeda. Aibu diat vahokeda. Labihadam bohu meedaha bak lam uho mahate vi ozome ahu teudi meedale. Ba a voou setemule.
32. Em etei um vou esmozi lalo modemdaleàmu im meida nim ab vameame neàdelo modemam. Alat uba iademe vou aasdam bak ame. Labi uho Yesus bake tu vuzehi meedam bak lam keàtedi meedam bak ame. Labi umti dam amomoi uba tau Yesus bake tu vuzehi meedam dam totbaho lamti Alat modi Am damalehe dam laba Aho amu neha, ‘Lo tame,’ lahame fet gagu esuhu bak lam um tau vadam bak ame. ‘Labihadase,’ lahame eho Ala bake, ‘Ala oa, dam nim eho Oba vou esmolo mozo. Oho iademe vou aasdale,’ lahame eho Ala bake gagu fi hasi ab esuham bak. ‘Alat uba ozahit deeli im neà bak modi esuiam Ala Am am bak,’ lahame eho amu uba vameadaha im lam uho tu vuzehi meedam labe Alat uba labihasu meeda tame.
33. Neham bak vi ozodale. Em amu uba tau azibe ame Im Neàna lam vou vameatedam di labe em ba uba neha, ‘Sue vàle! Doi vàle,’ lahame labi uba tauledaha vabak lam um ozobohu bak.
34. Em amu gi nehadam bak. Eho modeo, em dam eba tau im vou vameatedam dam lam modeo, iho ozome vamna ehelemeam làhà em gi anekehà ebedat modeme vadam bak. Im ba uba na tauledaha vabak.
35. Eho amu uba lab tau azibe meedaha im zi lam meedam di eho gi neham bak ozome uba fet vouhodam bak. Dam nisileheda na modem biemda laba uho tau na modeme lodam bake eho amu nasi uba fet vouhodaha bak. Uhumo um anekehà keàtedi na meedume doi vame na uhumo ozome vamna lamota vam bake eho fet ozome vouhodam kaio. Uho nasi Yesus im Boehàdat Aho amu vahokeme vou esmoho im nidi nim vi ozodale. ‘Nazoh ubuda uho meia teo lodam labe um ahu bisi deelem bak am. Na vam bak um ahu gi fota deelem bak,’ lahame Yesusat amu vahokeme vou esmoho im lam imo nasi vi ozodase,” lahame Paulusat im lam ab vameadaham.
36. Labi Paulusat im lada lam vameadume neàdi Ala bake tom gagom bak ozome Efesus labe lehe dam busaoda zi lamti im vahi ab ogomaladume ab tom gagodamam.
37. Labi tom gagodume neàdi dam ahebu usnadume Paulus im vou esmozi lalo modemu dam labe im ahu faidi meb dae ab fouham. Paulusat amu iub gagoho bak lam, “Um emti ba alihi ot aaiam vabak,” lahaha bak lam vi ozohemu ahu faidi feà bak fuhemu meit li aba si vagamsu vou medda. Meit li aba si vagamsu vou medda. Labihada. Labihadume neàdi Paulus vou vi vulazi sue baa vààsu nutabet vou lam ihe laba zihi bak vi aame olulo ab lazedaham.
1. Labi laba lazi Paulusti im aba vi tau gohatem dam totbaho nimti ame iheba ziddalo modem di labe Efesus dam busaoda zi laba, “Neàte. Iademe aidale,” lahame it vameadume neàdi dam lam vou esmozi ame ihe sue baa vààsu nutabet vou lam ihe buduada laba ziddume Miletus vou esmozi fa Kos touha laba lam bak ozome ahu vàmadi vitasu ab bioham. Labi laba biou izi dihasi neo Rodos touha labe labohoti neo ladume itea feàna labe am valau obe modesuhu num debu Patara laba ab zituham.
2. Labi Patara laba zitu aaha sue baa vààsu nutabet vou lam ihe buduada meida Fenisia bak laba lalo modem ihe aahemu iho neo ame ihe laba ab ziddaham. Labi ziddume neo ab ladamam.
3. Labi ladam labe aaha Siprus touha gi im soi tot nibe bak bohulana vi aahemu ame touha ba totbaho labe labohoti Siria bak laba lam bak ozome neo lada. Labi neo ladume biou ame itea feàna labe am valau obe modesuhu num debu Tirus laba iho ziddaha ihe laba ab tuham. Ame ihe dedam labe iho vou laha nazoh doit ot loiam bak ozome Tirus laba valame vahedalo modemu im gi laba ab usdaham.
4. Iho Tirus laba usdume dam Yesus bake tu vuzehi meedam dam, “Ana numa azihela?” laham bak aalo zooedume nabidume aaha ame dam vi aahemu iho ame dam labe im num laba vahi im vameadam labe usi tujuh ab foleham. Ame dam lam Alam Aha Nutabe Neàna labe iba amu modi vizi fi gatehe labe, “Paulus kota Yerusalem laba lameam damat aba modem im ehete,” laham bak nasi fet ozobohudi Paulus bake ahate gut gagu ab fi deham. “Om kota Yerusalem laba a lamule! Damat oba modem im ehete,” lahame Paulus bake ab gut gagu maleham.
5. Ame dam labe iba labihadamnàme iho ozo, “Im ibida vameame neàdehemu im ab lam neàdeham bak,” lahame labi ozohemu ame usi tujuh lam foli im gi ailahigeàmu ibi iho kota Yerusalem lalo modem bake ab usnadamam. Labi im usnadume lalo modem labe ame dam Yesus bake tu vuzehi meedam dam labe im lahiti im datati ahebu laha iba vi tau vule ame num debu bak vou esmozi ladume itea feàna labe am obe kebe fauha baa laba lazi im ahebu Ala bake tom gagolo modemu ogomaladume Ala bake ab tom gagodamam.
6. Labi tom gagodume neàdi im ahebu fa usnadume ab ot gagoi ot gagoidamam. Meit neha, “Neàte. Om iademe ladale,” labi meit fa neha, “Lo, neàte. Om iademe aidale,” lahame ot gagoi ot gagoidume neàdi im sue baa vààsu nutabet vou lam ihe buduada laba ab ziddaham. Labi ame dam labe im lahiti im datati fa im num bake ab ladaham.
7. Labi im ame iheba ziddume neàdi Tirus vou esmozi ibi iho kota Yerusalem lalo modem bak ozome neo ladume itea feàna obe modesuhu num debu Ptolemais doni bak laba neo ab lafuham. Laba lafusi vao auobe laba tu iho ihe labe usdume Yesus bake tu vuzehi vahi meedam dam laba tàhi, “Neàte,” lahame vahi im vameadume usi vàmade.
8. Labi izi dihasi im neo iheba ziddume Ptolemais vou esmozi neo ladume itea feàna obe modesuhu num debu meida Kaisarea laba neo le lafusi laba ab tuham. Labi iho usdume Yesus Aho amu meedume vou esmoho Im Neàna lam dam bake vou vameatedamda Filipus labe am num laba ab ladaham. Ame Yesusat Aho gagu olu Am im vameadume esmozi laiam dam labe iho amu kota Yerusalem laba na faheme na vabdate lodam bak ozome fi me vadaha dam tujuh lam meida Filipus am.
9. Labi ame da Filipus labe am adnamat soaona abo empat ehet. Ame lahi soao empat lam aa modem vab lahi soao am. Labi Alat modi vizi fi gatehe labe Am im dam bake ahatet fi desi vou vameatedam meo lahi am. Laham lahi labe im aiam num laba iho Paulus giidati ab le tau aziham.
10. Labi iho Filipusam num niba li tau azi usi tamehodehe vabna aaha dat ee gagom Agabus lahamda labe Yudea bak labe fa ibi iho etei li tau esdam num debu Kaisarea niba iba lezi ab fuham. Ame da Agabus lam Alat vameadaha im aime fa dam bake ahate vameaidahada meida am. Lahamda labe Yudea bak labe Kaisarea niba ab lezeham.
11. Ame da Agabus iho azihi num Filipusam num niba oli Paulus bake li gagome am kemohode fegeamdem sue lam footoi Agabus bake lo. Labi aho ve damat aasdahit aho am naba ahimti am anekehà ahimti ahamo naedat it giame neàdi iba gago, “Alam Aha Nutabe Neàna labe eba nehaho. ‘Ame kemohode fegeamdem sue deda nim kota Yerusalem laba le ame num debu laba azim Yahudi damat am si nehasu giame fa Yahudi damat modem vab dam laba ub lo tame,’ lahame Alam Aha Nutabe Neàna labe eba modi vizi fi gatehe labe em nasi fet ozobohudi uba li ab vameadaham bak,” lahame ab vameadaham.
12. Ame da Agabusat aho lab gagu fi dehe im lam im aihemu im Yesus bake tu vuzehi vahi meedam dam Kaisarea laba azim dam totbaho lamti im ahebu Paulus vou faovoi ab vameadamam. “Paulus, om kota Yerusalem laba a lamule,” lahame mali ab vi vameadamam.
13. Lahame mali vi vameadàmu Paulusat fa vi gago, “Vabà! Um akati bisi eba vou faovoi meddàla? Em ba uho lab mali meddamnàme em kota Yerusalem laba lam mom vabak. Gi ozahit lam neà bak. Damat em si sel laba ousu teudemeam làhà em ba iedem vabak. Modem neà bak. Em abo Yesus im Boehàda labe Aho gagoho im aime meedamda modemu kota Yerusalem laba azim damat em otemeam làhà em ba iedem vabak. Modem neà bak. Um akati bisi iedi vou faovoi meddàla?”
14. Lahame iho gagu malehe bak Paulusat ailahigeàmu kota Yerusalem laba lalo àhàki meedàmu im ba vi tau mali gagom bak ab moham. Mu gago, “Làhà im Boehàda Alat Aba Aho ozoho baket fà meedase,” lahame gagu ab moham.
15. Labihazobe iho Kaisarea laba neo fota azibehamdi kota Yerusalem laba lam bak ozome im nazoh ateme neàdi ab laham.
16. Labi dam Yesus bake tu vuzehi meedam dam Kaisarea laba azim dam totbaho labe iba vi tau kota Yerusalem laba ab laham. Labi laba lafusi iba vi tau lehe dam labe im vou le dat ee gagom Manason lahamda labe am num laba im vou le oumaheme ab esuham. Ame da Manason nibe aho Siprus touha labe fa kota Yerusalem niba li azihi dàt moz. Labi laha ame da labe amu Yesus bake tu vuzehi meedam dàt moz. Lahamda labe am num laba vou le oumaheme ab esuham.
17. Iho kota Yerusalem laba lafuhu di lam imti vahi Yesus bake tu vuzehi meedam dam totbaho laba esuhuda labe iba ab gut deeli meedamam.
18. Labi izi dihasi im fa vahi Paulus bake vi tau Yakobusam num laba ab laham. Yesus bake tu vuzehi vahi kota Yerusalem laba meedam dam laba vuusu im vameame faheme modiam dam busaoda meida Yakobus am. Ame da lamti labi dam im vameame faheme modiam dam busaoda totbaho lamti laham dam labe iba faodamna im ab lafuham.
19. Labi lafusi iho, “Neàte,” lahame ot vameaidume neàdi Paulusat Alat amu aba modi vizi teudehe labe aho Yahudi damat modem vab dam labe im num debu meida iuba le Alat Aho gagoho im meeda. Labi num debu meida iuba le neo ame baket meeda. Lahaha im lam ba im meida vekehe vaba ahebu dam laba ab vameadaham.
20. Paulusat lab vameadaha im lam ame dam zi labe aime deeli Ala bake, “Om abo feàte,” lahame Ala bake ab vou baedamam. Labi Ala bake vou baedaha vabamu ame dam busaoda meida labe fa Paulus bake ab vameadamam. “Paulus oa, oho iuba le godaha di labe damat omozit kota Yerusalem niba meedaha bak om biem bake eho etei oba nehi vamealo modem im nim om aile. Im kota Yerusalem niba esuhu Yahudi dam totbaho labe iho Yesus bake tu vuzehi meedam dam abo feàte. Lahana ame dam labe dat ahamda Musat aho toedume fi hasi esuhu Im Feàna zi lam mu voedam kaio. Abo lab vi aihi bak labet vou mode ledam lahasuho.
21. Lahaha dam niba oho amu iuba la. Iuba la. Lahadume le meedaha im lam meit li git vameadahana ahum lam ame Yahudi dam nibet nehi aiho. Yahudi dam fa Yahudi damat modem vab dam laba tau vahi azim Yahudi dam laba oho amu laha di lam oho nehame vameadamna ame dam nibe aihi bak. ‘Ibi iho Yahudi damat im fi hamda ziti im fi ham vabda ziti Alat aham di iube im tai Musa bake gagu aho toedume fi hasi esuhu Im Feàna lam im Yahudi dam fa mu voom neàte. Labi ibi iho Yahudi damat im daboseà faam di im laso aubehà sokba ukbodam bak lam feidam neàte. Labi ibi iho Yahudi damat modem bak ahebu voedase,’ labihasu ahebu oho Yahudi dam laba vahokedam bak lam Yahudi dam nibet aiho.
22. Oho amu labihasu vahokehe bake dam Yesus bake tu vuzehi meedam dam kota Yerusalem niba azim Yahudi dam nibe om etei niba lehe bak vi aimeam oba ab fakemam bak. Labiha labe oho ozom, im akati mode? Làhà, imo gi nehase. Damat oba git vàlum bak laba ozome ohomo naedat, ‘Imbo kaio,’ lahame damat aame ozobohudemna oho nasi modele. Labi damat fà aame ozobohudese. Iho etei oba gagolo modem im nim oho aime modele. A voomule. Neha. Etei dam empat nibe amu Ala bake neha, ‘Iho nehame mode tame,’ lahame amu Ala bake nasi fet gagu esuhu dam empat iba tau azihida ehete.
24. Ame dam empat nibe ibi iho Yahudi damat meit faidem diat meedam baket abo vaot itatame neàdem baket modelo modem bak lam uho vahi Fihasi Ala Bake Vou Baedam Num Vàmteabu laba le ame im lam meedale. Labi ame dam empat nibe iho amu Ala bake fet gagu esuhu baket, ‘Iho modeme neàdeho,’ laham bak lam dam giida labe aame ozobohudem baket laha meedale. Abo ame dam lam im ohuta audam bake Paulus oho doi oboda ve damat Ala bake lomna ve vua vahudam toheda laba lu aho ve meia na fi ho vame oddume vahudase. Labi ohuta ba audase. Labi dam giida labe aame ozobohudem bak am tame. Oho labihasu meedameam làhà Yahudi dam kota Yerusalem niba azihi dam nibe fa ame bak lam aam labe fa nehi ozobohudem bak. ‘Làhà, Paulusat aho amu iuba la. Iuba la. Lahadam di labe meedaha im lam meit iba li git vameadahe? Aho ibi iho Yahudi damat modem bak lahasuhu dàt mode? Im tai ahamda Musat toedume fi hasi esuhu im fi hamda ziti im fi ham vabda ziti laham Im Feàna lam voou veimdehe vaba abo meedam lahasuhe?’ laham bak lam Yahudi damat fa aame ozobohudem bak am tame. Dam Yesus bake tu vuzehi meedam dam kota Yerusalem niba azim Yahudi damat oba fakem bak labna zohàme iho oba labi gagoho bak.
25. Lahana Yahudi damat modem vab dam Yesus bake tu vuzehi meedam dam abo bak iuba esu. Bak iuba esu. Laham dam laba iho Yahudi dam busaoda kota Yerusalem niba esuhu dam nibe iho amu kota Yerusalem laba bakamta vahe vahedume im vameadume neàdi vàmadehe im lam iho amu sunit gi nehame toeme olu neàdehe bak. ‘Im tai ahamda Musat toedume fi hasi esuhu im fi hamda ziti im fi ham vabda ziti laham Im Feàna lam ahebu bisi a meedamule. Gi im nidi nimota fi hasi meedale. Damat, “Ala am tame,” lahame ostamna it modi vou baedamna laba vou baedalo na fi ho otemna zoho lam a ve àmule. Labi laha na vasea a udemule. Labi meit na otem di na vasea ad laba bekehedabu lam a àmule. Vasea veàtoi folemda lam àm neàte. Labi laha ostame fi loholi ot vai ot vaidam bak ahebu a meedamule.’ Iho gi Im Feàna lada lamota Yahudi damat modem vab dam laba, ‘Fihasi meedale,’ lahame amu gi sunit toeme oudume neàdehe bak. Dam lada labe ibi iho modem bak am. Lahana iho amu oba gagoho bak lamota oho meedale,” lahame ab vameadaham.
26. Lahame ame dam busaoda meida labe Paulus bake im labihasu vameadahemu Paulusat aime ab uledeham. Uledi izi dihasi Paulus ame dam empat lam tau vahi Fihasi Ala Bake Vou Baedam Num Vàmteabu laba vou le aho faidehe bak amu nasi vaot itatame neàdem bak ozome le ahamte faam bak nasi ab modeham. Labi Paulusat neo ame damat Ala bake lomna ve vua vahudam toheda laba le gago. “Em amu Yahudi damat modem vab dam laba tau vahi azihi labe faidehemu oba li gagu esmozi fa fi hasi le aidume usi tujuh folehezobe fa fi ham bak neàdehezobe le tame. Labi dam empat nibe iho amu Ala bake fet gagu esuhu im lam laha amediat modeme neàdehezobe vahi oba fa le tame. Labi oba fa li eba vaot itatame neàdi em fa neàdem bak lamti labi dam empat nibe iho amu Ala bake fet gagu esuhu im lam modeme neàdem bak lamti laham bak laba ozome fa oba neo doi vou li lu oho na fi ho auohole meia vame neàdi Ala bake lolo oddume vua vahudam bak meedam bak. Eho labiham bak ozome oba nasi fet vameame esulo mozo,” lahame Paulusat ame damat Ala bake lomna ve vua vahudam toheda laba fet ab vameadume esmozi fa ab laham.
27. Labi le azibe fi ham bak seti ame usi tujuh folehe di labe Paulusti ame dam empat lamti vahi Fihasi Ala Bake Vou Baedam Num Vàmteabu laba ab laham. Laba le Paulusat aho faidehe bak vaot itatame neàdem bak lamti labi ame dam empat labe iho amu Ala bake fet gagu esuhu bak lam iho modeme neàdi im ohuta audam bak lamti laham bak laba ozome damat Ala bake lomna ve vua vahudam toheda laba Paulusat doi lu ame da labe ve meia na fi ho vame neàdi oddume ab neàdedalo meedamam. Labihadam di labe Asia bak labe amu kota Yerusalem niba lehe Yahudi dam labe ame num zohobe niba li odosdamna modehe labet vi aaha Paulusat Fihasi Ala Bake Vou Baedam Num Vàmteabu labe Yahudi dam labe dam aabot ihimo olem bak tomba zoho laba duzuhuna ab vi aaham. Vi aahemu faki fa dam duada zi totbaho laba gago, “Imo da nim beose,” lahame ootedume dam meoli Paulus ab siham.
28. Si vuusu dae meot vameada. “Neàdeho. Im Yahudi dam totbaho oa, um nasi li iba tau imo da nim beose. Ame da nim aho amu iuba la. Iuba la. Lahadam di labe nehame meedaha bak. Iba Yahudi dama feàtàda. Labi ibi iho Yahudi damat im fi hamda ziti im fi ham vabda ziti Alat aham di iube im tai Musa bake gagu aho toedume fi hasi esuhu Im Feàna laba tozome nehada. ‘A fi hamule,’ lahame tozome feàtàda. Labi Fihasi Ala Bake Vou Baedam Num Vàmteabu nim, ‘Feà kaio,’ lahame feàtàda. Labi ame da nim laha Yahudi damat modem vab dam aho vame fa ame Num Vàmteabu niba im Yahudi dam labe dam aabot ihimo olem bak tomba zoho laba vou oli vàhàdeda. Labihasu meedam dàt modem bak. Si beom neà bak,” lahame Paulus bake vàlu dae meot ab vameadamam.
29. Ame Asia bak labe amu kota Yerusalem niba lehe Yahudi dam labe neham bak aaha labe Paulus bake fake. Amu num debu Efesus labe leheda Trofi mus abo Yahudi dàt modem vabda lam Paulusti vahi kota Yerusalem laba tau gohatem bak aaha labe vedi vabi Paulusat laha neo ame da lam etei ve ame Fihasi Ala Bake Vou Baedam Num Vàmteabu labe am maem zoho laba neo vou oli modehe tiba vi ozome faki giomim vàlu ab gagoham. “Ame num bak tomba zoho vàhàdeho,” lahame ab gagodamam.
30. Labi dam kota Yerusalem laba azim dam duada zi totbaho abo Asia dam labe damat etei Paulus bake lab vàlu vameadaha im lam aime ozobohudi ab dahobuli guhugadamam. Làhàmu Fihasi Ala Bake Vou Baedam Num Vàmteabu laba iube le. Iube le. Lahadume valadume ame num maem zoho laba ab le omsuham. Le omsume Paulus tet si vou keadam di labe damat meit fo meit fo lahadume ame num maem zoho vou esmozi ab vou futoham. Labi vou futoi neàdehezobe ame Fihasi Ala Bake Vou Baedam Num Vàmteabu lam vou aasdam dam labe ame num doo maemda lam ahebu ab it baguamdedaham.
31. Labi ame dam labe Paulus bake beodam lahasuhu di labe meit emoeme meo dam labe iho esum num netàda laba le lafusi meo dam seribu zi duada laba vuusu im vameame modiamda boehàda Klaudius Lisias laba ab le gagoham. “Kota Yerusalem laba azihi dam ahebu meoli dahobuli meedam labe uho dae lam ab aidamam tame,” lahame ab le gagoham. Ame da Lisias lam Kaisarleheda labe aba amu gagu ame meo dam kota Yerusalem laba azim meo dam seribu zi duada lam vuusu im vameame faheme modiam boehàda am.
32. Lahamda laba le gagu modeha ame boehàda aabo labe àvodeha fa am im aime ot vai meedam dam donida totbaho lamti am meo dam zoho lamti gagome vihitoi vazisi vou emoedume damat dahobuedam bak abo ame Fihasi Ala Bake Vou Baedam Num Vàmteabu labe am bak tomba gutehe zoho laba ab le omsuham. Le omsuhu di labe dam Paulus beodam dam labe ohu vousai aaha dat boehàda aabo labe am meo dam ziti le omsuhemu Paulus bake beodam bak ab moham.
33. Labi ame boehàda aabo labe li Paulus si am meo dam gagome bes botehà niz bohu ame dam labe iho vou lehena behàsu labe Paulus anekehà tot laba vààsu. Labi meida anekehà tot laba vààsu. Labi zoho lam meo dam labe im anekehà laba vààuda. Labihadume neàdi Paulus donibu laba ab vou duzuham. Labi vou doudam di labe ame boehàda aabo labe fa dam duada zi laba ame im modehe debu vi ailo ab vameadamam. “Da nim ana dàt modela? Labi aho ana im modi faidehe bake uho beodàla?”
34. Lahame labi gagoha ame dam duada zi labe vedi iademe dat vàmtea vi gagom vaba vedi meit im abada bisteat vi gago. Meit im abada bisteat vi gago. Labihadume ab dahobuleham. Labihàmu ame boehàda labe dam dahobuli damat debu modehe bak aim biehemu am meo dam laba ab gagoham. “Imo da nim ibi iho azihi num laba vou le iademe uloome ame im debu aise,” lahame labi gagohemu ame meo dam labe ibi iho esum num laba Paulus ab vou ladamam.
35. Labi vou ladume ame Fihasi Ala Bake Vou Baedam Num Vàmteabu lamti ame meo dam labe im num lamti ot odosuiahana vou duzu duzuiame zisiamna adba laba fusi ziddasome modeha dam duada zi labe Paulus bake faki feà bak fuhemu neo vi folo àhàki mei soa odosi veimodam bak tadehemu dam duada zi labe Paulus neo vi fomeam elom bake mali ame meo dam behàsu labe Paulus visoi im giaha ot odosiame Paulus nom ousu im num bake ab vou ladamam.
36. Labi ame dam duada zi labe vuedam lahasuhu labe dae duali vi oote leda. “Da lam nasi oteleee. Taho oteleee,” lahame vi oote leda.
37. Labi ame meo dam labe Paulus im numa vou fusi ame vou duzu duzuiame zisiamna labe vou ziddume ab vou zizeham. Labi ahoba laba vou zisi neàdi ame meo dam labe im num vou olelo vabalehe di labe Paulusat ame meo dam laba im vameame modiamda boehàda aabo laba ab gagoham. “Em im koena oba gagose.” Lahame labi gagoha ame boehàda labe àvodi gago, “Aa làhà! Om Yunani dae em dae ozobohuo? Eho vedi om em dae vabiem dàt mode tiba.
38. Làhà, om labihalahit Mesir da amu gi im nehasu meedamda om ame da ame moio? Amu Kaisarleheda labe ame da laba im gagom di am gi ailahigeàmu tozoidam bak. Labi tozoidam labe aho fa dam empat ribu abo, ‘Meit fà iedese,’ lahame gagoiam dam debu zi laba gagome meoledume iho im nazoh meona ahebu visomoame aho vihitoadume bak aotba baa bohu dam vaba alim bak vou lahada om ame da mode moio? Om ame da modem vabameam làhà eba taho gagole.”
39. Lahame labi ostame àvodi gagoha Paulusat fa vi gago, “Vabà! Em ame da modem kaio. Ame da lam em vabiem bak. Em gi abo Yahudi dàt modem bak. Em Kilikia bak labe am num debu meida Tarsus tombuda laba faahada em am bak. Lahana dam eba fakemda zi nibe eho im it gagu veibadam neào?”
40. Lahame labi gagohemu ame boehàda labe uledi gago, “Lo, nasi vameamale.” Làhàmu Paulusat ame vou duzu duzuiame zisiamna ahoba laba duzu, “Fa dam duada zi laba am im nom gagose,” lahame anekehà ab baedamam. Baedam labe gago, “Um dae vabalele. Em im vameadase,” lahame gagoha dam zi labe dae ab vabaleham. Dae vabali neàdehezobe Paulusat ame Yahudi dam zi laba am Aram dae ozobohu dàt modehe labe im ab faasi vameadamam.
1. “Im Yahudi dam busaoda im ozobohu dam zi lamti labi Yahudi dam giida totbaho zi lamti laham dam oa, eho uba veibadalo modem im nim um ahebu nasi aidale.”
2. Lahame gagoha ame Yahudi dam zi labe Paulusat gi im Aram daet faasi vameadaha bak aihemu àvodi dae vabali seti ab vi aidamam. Lahaha bak lam Paulusat aahemu neo nehame susume vi vameada.
3. “Em abo Yahudi dàt modem bak. Em abo Kilikia bak labe am num debu meida Tarsus laba em oiat em laba faaha bak. Labi em kota Yerusalem niba oiat gi koena vou li budualehe bak. Labihaha bak. Labi im tai ahamda Musat aho im Yahudi damat im fi hamda ziti im fi ham vabda ziti laham Im Feàna lam aho toedume fi hasi esuhu im lam abo im tai ahamda vou vahoke usehe im lam ame guru feàda Gamaliel labe aho eba dihasi vahokeda. Dihasi vahokeda. Labihadam labe ame Im Feàna lam em ba meida biem vaba abo ahebu ozobohu bak. Ame Im Feàna lam ahebu eho aime vuzehi iademe meedam bak. Labi Alat uba gagohona uho aime vuzehi keàtedi iademe meedam bak lam em laha ame baket meedam bak. Ba uhumo meedam vabak.
4. Em labihamda modem labe amu di iube dam Yesus bake tu vuzehi meedam dam lam eho vabidume fai bak tadedaha bak. Labi ame dam totbaho lam eho gagome oddaha bak. Labi ame dam totbaho lahi modeo, dam abo modeo, laham dam lam eho siàdume bes botehà niz visoi dam lam im anekehà laba vààumahedume meit faina modehemu si oumahedam num sel laba vou ladume oumahedaha bak. Em amu gi labihadam dàt modem bak.
5. Em etei lab gagoho bak lam em ba giomim gagom vabak. Abo imbo gagoho bak. Damat Ala Bake Lomna Ve Vua Vahudam Tohe Dam Zi Labe Im Bisi Boehàdatebo lamti labi im Yahudit Ibi Iho Modem Im Gagu Vàmadi Esum Dam Debu lamti laham dam eeda zi labe eho amu meedaha im lam ozobohudi neàdi tau gagodam bak. Nehaha bak. Ame dam labe amu eba neha, ‘ “Oho num debu Damsik laba le dam Yesus bake tu vuzehi meedam dam lam im alihi aameam làhà oho siàdume fa kota Yerusalem niba vou ledume iho uloodume aime neàdi modi itaholi ozobohudedase,” laham bak lam oho modem neàte,’ lahame toeme oluhu sunit lam lu oluhuda em ame da am bak. Labi ame sunit lam eba lu eho fa ve Damsik laba vou le Yahudi busaoda totbaho laba lolo ab vou ladamam. Ame Damsik Yahudi dam busaoda zi labe eho le meedam bak lam malem bak labna zohàme sunit fi si aame ozobohudelo ab vou ladamam.
6. Labi eho vou ladume ala tomaleha Damsik laba fuseo vabalehe di labe na fako iedemna fauha meo Alat azihi asum ahoba iube nom ilu eho ladam bak laba ab fauhaleham.
7. Labi fauhali modeha em bake ab subteham. Labi bak laba biti bisdameam aiha ame na so aaha vabna labe eba nehame gagodam bak ab aidamam. ‘Saulus, om akati Eba vabidàla?’
8. Lahame eba labi gagohemu eho vabi vi ailo fa gago, ‘Boehàda, Oho amat mode?’ Lahahat ame na dae labe fa eba neha, ‘Em Boehàda Yesus amu Nazaret laba azihida oho vabidamda Em am bak,’ lahame gagohona eho ab vi aiham.
9. Labi eba tau ladam dam lam ame na fauhalehe bakta aa. Lahana ame na eba im vameadamna dae lam, ‘Ana daet modela?’ lahame ba vi aime ozobohudehe vabak.
10. Labi eho neo vabi vi ailo ab gagoham. ‘Boehàda, làhà em akati mode?’ Lahahat Boehàda labe eba neha, ‘Nasi usai oho lam bake num debu Damsik laba ladume lafule. Labi lafusi, “Om ba ana modela?” laham bak om biem bake Alat amu oba modelo ozome ahumtedehena lam damat ba oba gut vameadam bak ehete,’ laham im lam eba gagu modeha ame eba im vameadamna lam gi ab seteham.
11. Labihàmu eho na fauha laba aasdaha baket fako aibuli usai modeha em fako na aam ab bieham. Labihàmu eba tau ladam dam labe em anekehà vuusu num debu Damsik laba vou ladume ab lafuham.
12. Ame num debu Damsik laba dat Yesus bake tu vuzehi meedamda meida ee gagom Ananias lahamda num meida laba aida. Ame da Ananias labe ibi iho Yahudi damat im fi hamda ziti im fi ham vabda ziti Alat aham di iube im tai Musa bake gagu aho toedume fi hasi esuhu Im Feàna lam bisi aime vuzehi iademe meedamda am. Labi laha Yahudi dam Damsik laba azihi dam ahebu ame da laba, ‘Am abo feàte,’ lahame ahu adat iedi vou baedamda am.
13. Lahamda labe eba li em obe laba duzu eba ab gagoham. ‘Saulus oa, om fako fa na aam neàdele,’ lahame gagoha em fako na aam bak fa vei neàdi ohu vousai aaha ame da Ananias lam am alihi ab aaham.
14. Labi ameda Ananias labe eba nehame vameada. ‘ “Oho nehasu meedase,” lahame im Yahudi dam tai ahamda zi labe ibi iho vou baedam Ala labe Aho ahit oba ab modi itaholi om ab fi me vaham bak. “Ala labe Aho ozome ahumdehena lam oba modi ozobohudi fi gatedam bak ame. Labi laha Yesus abo Iademe Ahu Vamdesu Meedamda lam oho aam bak ame. Labi Aho oba ba vameadam im oho aim bak ame. Labihasu meedase,” lahame Alat ahit om ab fi me vaham bak.
15. Labiha labe oho etei Yesus aaha bak lamti Aho oba vameadaha im oho aihi bak lamti ba oho iuba la. Iuba la. Lahadume damat esuhu bak ahebu oho vou vameatedume fi detedalo modem bak.
16. Ame im ab vameame neàdeham bak. Om ana vou faoda? Nasi usale. Eho om vuu valo baptislese. Labi oho faina meedam bak lam Alat oba ba beom vaba mu voolo modem bake oho nasi Yesus bake geme tom gagodale,’ lahame Ananias eba labi gagohemu eho ame baket ab modeham bak.
17. Labi ame bak lam modeme neàdi eho kota Yerusalem niba fa ab leham. Labi li aidam di labe eho digat meida labe Fihasi Ala Bake Vou Baedam Num Vàmteabu niba oli tom gagoda. Labi tom gagodam di labe Alam Aha Nutabe Neàna labe eba modi vizi eho edehesi fako bakamta aasda.
18. Aasdameam aaha im Boehàda Yesusat Aho em obe li duzu eba im nehasu vameadamna eho ab aaham. ‘Paulus oa, om kota Yerusalem taho vou esmozi itale. Dam niba azim Yahudi dam nibe ba Eho meedume vou esmoho im oho vou vameatedam di dam ba aim vabak. Gi mu tozome mom bak.’
19. Lahahat eho vi ozo, ‘Dam nim akati modi eho vameadam im aim moe?’ lahame vi ozoho vabamu mu fa ab vi gagoham. ‘Boehàda oa, lahana eho amu meedaha im lam dam nim ozobohuna taia? Dam nibe modem bakti eho modem bakti gi ulohona meedam bak. Ba eho im amomoi meedam vabak. Eho amu Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num zi laba oedume eho dam Yesus bake tu vuzehi meedam dam alihi aadam di eho fa siàdume meit faina modehemu si oumahedam num laba oumahedam bak lamti eho ame dam lam beodam bak lamti dam nim ozobohuna taia?
20. Labi laha Stefanus im Oho meedahada ahate vou vameatedamda lam damat amu si kebut beome otehe di lam em laba tau doudahit dam labe im sue soa dumda vihilame eho doudam bak laba voedume beiladam di eho gi sue lam vou aasdaha bak. Labi em ba dae buhu vabak. Em gi neha, “Ahole oteho,” lahame ozoho bak. Laham bak lam ahebu dam nim laha ozobohuna taia? Labihalahit dam nim eho etei meedam bak fa veimdi gàhàlehe bak damat aime àvodi em im aime uledem bak. Ba akati im ebeda mu tozoe?’
21. Lahame eho lam bak mu labi gagoha Yesus im Boehàda labe neo eba nehame vameada. ‘Vabà! Gi ozahit taho lale. Em abo om bak bohulana laba Yahudi damat modem vab damat azim num debu laba olulo modem bak,’ lahame Yesusat eba labi gagohona eho ab aiham. Eho labihasu aime modeha ame na ab seteham,” lahame Paulusat ab vameadaham.
22. Lahame Paulusat lab vameadam im bohu lam ame Yahudi dam zi labe gi ule neàt vi aidume modeha Paulusat ba, “Alat am Yahudi damat modem vab dam laba oluhu bak,” lahame gagohemu dam lam fa ab fakeham. Faki dae duana bisteat ab buddamam. “Um da lam beom vabda akati mali mode? Taho belu seti bak alim tadese.”
23. Lahame buddume faki meedam labe neo im sue sona ahoba dusuhuda vihilame fa tom voeda. Labi ke taho visom vabilehemu gi bak itabe fau meit visoi Paulus bake dou fi goaito. Meit visoi dou fi goaito. Labihada.
24. Lahadam bak lam ame meo dam zi labe im boehàda aabo labe vi aisome modeha dam lam gii mei dae Ibrani dae vameadam labe boehàda labe aim biehemu am meo dam gagome Paulus neo vuusu Paulus bake uloome ailo im num laba ab vou olelo modemam. “Paulus im akatihasu modehe bake Yahudi dam labe bisi aba faki beolo àhàki buddàla? Ame im taho gagu ame dam labe aime ozobohudese,” lahame na fi ho sokba faheme nasbedi na eimeona laba vàluhuna labe fu vi ootedume gagoidalo modem bak ozome am meo dam gagome Paulus ab vou oleham.
25. Labi vou oli Paulusam anekehà ahim si tom vamdesu utso laba taasu giame am so kidadesu neàdi fom bak fusi modeha ame meo dam seratus vuusu im vameadam dat boehàda donida Paulus am obe duzuhuda laba Paulusat ab gagoham. “Em laha Kaisarleheda labe aho vuusdam dam meida em am bak. Em umti uloho bak. Lahana eho faidehe bak uho eba uloome aime neàdehe vabna akati nasi eba fi deam bak ozome mode? Uho ozom, Kaisarleheda labe aho vuusdam dam laba uho labihasu modem neào?”
26. Lahame Paulusat lab gagoho bak lam, “Am laha Kaisarleheda labe aho vuusdam dam meida am am bak,” lahame gagoho bak lam ame boehàda donida labe aihemu àvodi aba im vameadam boehàda aabo laba Lisias bake le ab gagoham. “Im git meedam damat modem bak. Da lam laha Kaisarleheda labe aho vuusdam dat meida imti uloho bak. Lahana oho akati iba, ‘Foadam neàte,’ lahame iba gagohela?”
27. Lahame labi gagoha Lisias ame boehàda aabo labe àvodi Paulus bake li gago, “Imbo? Om laha Kaisarleheda labe aho vuusdam dat meida mode? Làhà, eba taho gagoma. Em aise.” Lahahat Paulusat fa neha, “Lo, imbote. Em ame da meida am bak.”
28. Lahahat ame meo dam boehàda aabo labe aho neo vi gago, “Lahana em abo Kaisarleheda labe aho vuusdam datelehe bak lam am im ot vai meedam dam laba, ‘Eba uledi vase,’ lahame em doi feàna dam laba lu em ba vi tau aho vuusdam datelehe bak.” Lahame labi gagoha Paulusat fa gago, “Lahana em ba labiham dàt modem vabak. Em oiat em faaha di labe faasi Kaisarleheda labe aho eba vuusdam bak.”
29. Lahame Paulusat lab gagoho bak lam ame meo dam zi labe aihemu udovai iho da lam foadalo ozoho bak lam fa mu vi vihitoi dozeadume ozoda. Labi laha ame meo dam boehàda aabo labe Lisias laha àvodi iedi meeda. “Iho Kaisarleheda labe aho vuusdam dat meida iho iademe uloome aime neàdehe vabna anekehà giaha bak lam im git modeho,” lahame iedi duzu vi ozoda.
30. Labi ame boehàda aabo labe, “Ame Yahudi dam labe akati modi Paulus bake bisi faki vàlu meedàla?” laham bak aime ozobohudelo àhàkehemu izi dihasi dihambe am meo dam gagome Paulus bake vààudaha bes botehà niz lam ab fi skeamoham. Labi fi skeamome neàdi ame boehàda aabo labe aho neo damat Ala bake lomna ve vua vahudam toheda zi laba vuusu im vameame faheme modiam dam lamti abo ame Yahudit Ibi Iho Modem Im Gagu Vàmadi Esum Dam Debu totbaho lamti ahebu ab gagoham. “Ubu uho im vameadam num tom fi haba laba vahe vahedale. Paulusat modehe im debu uloome ailo mozo,” lahame labi gagohemu ame baket ab modeham. Ame Yahudi dam eeda zi labe ibi iho im vameadam num tom fi haba laba vahe vaheme neàdi ame meo dam boehàda aabo labe am meo dam gagome Paulus neo vuusu vou futoi vou laha labe ame Yahudi dam zi labe iho avaelaha laba ab vou le duzuham.
1. Labi Paulus vou duzu neàdi ame Yahudi dam eeda zi labe im dauha laba Paulusat fako ladehe vaba gi dam laba fako zisu im ab vameadamam. “Em Yahudi dam totbaho oa, em amu di iube git modehe vaba gi iademe vou mode ledume etei ab vou fuham bak. Alat ba em vabiem vabak. Ozobohu bak.”
2. Lahame labi gagoha Damat Ala Bake Lomna Ve Vua Vahudam Tohe Dam Zi Labe Im Bisi Boehàdatebo Ananias labe Paulusat lab gagoho bak lam aihemu faki ozo, “Paulus akati amota bisi, ‘Neà dàt moz,’ lahame it daetbadà?” laham bak ozome am dam totbaho Paulusam obe laba dozeaha dam laba vi gago, “Da lam am aha laba taho fole.”
3. Làhàmu damat foha Paulusat meoli Ananias bake ab gagoham. “Oho etei eba foholahit Alat oba laha fom bak. Oho neha, ‘Imo dat ahamda Musat aho toedume fi hasi esuhu Im Feàna zi laba ulohodesu iademe vi ozome Paulus bake uloome vi aime ozobohudi neàdi im vahokedume modi itaholedase,’ lahame modelo modem dàt ame Im Feàna lam, ‘Meia fu im vahokedale,’ lahame gagoho vabna akati oho meia gagu em fohela? Om gi ahi ahobat neàdi meedam dàt moz. Ame Im Feàna lam om iademe vuusu meedam vab dàt vedi meia gagu em foho bak.”
4. Lahame Paulusat labi gagu im vahokeha dam aba netàdi dozeadaha dam labe alamdi fa Paulus bake im vahokelo ab gagoham. “Aa! Om akati Damat Ala Bake Lomna Ve Vua Vahudam Tohe Dam Zi Labe Im Bisi Boehàdatebo laba labi gagu feàtàhela? Ba a labi gagomule.”
5. Lahame aba labi mali im vahokehemu Paulusat fa gago, “Um em dam totbaho oa, ‘Etei amat akatihasu modem dàt gagoho imot modela?’ laham bak em mahate vi ozome neàdehe vab dàt nasi git vi gagoho bak. ‘Damat Ala Bake Lomna Ve Vua Vahudam Tohe Dam Zi Labe Bisi Boehàdatebo mode,’ laham bak eho ozoho vab dàt git vi gagoho. Dat ahamda Musat aham di iube nehame toeme esuhu im ehete. ‘Dam uba vuusu im vahokedamda boehà dam laba a meoli feàtàmule. Gi vahi iademe meedale.’ Lahame labi toeme esuhu labe eho ozom, eho git vi gagoho.”
6. Lahame Paulusat labi gagu neàdi aho fakot ahamo vi nabiteme aaha ame Yahudi eeda etei vahe vahedaha dam zi lam dam totbaho Saduki dam debut moz. Labi dam totbaho Farisi dam debut moz. Labihadaha bak ab vi aaham. Ame Saduki dam nehame ozom dam debut moz. Dam elodam di ba fa ahededume usnadam vabak. Labi Alat Am im vou usem dam laha vabak. Labi dam elom di ba it oazi lam vabak. Lahame ozom dam am. Lahana Farisi dam labi ozom kai. Gi ame na lam ahebu ehe bak. Lahame ozodam dam am. Labiham dam laba Paulusat vi aahemu bisteat dae teuna ame Yahudi dam eeda zi laba ab vameadamam. “Um em dam totbaho oa, um em Farisi dam debu modem bak. Labi laha em vou faat lehe bak gi Farisi dam debut modem bak. Labiha labe dam elodam di Alat modi fa ahededume usnadam bak lam, ‘Imbote,’ lahame eho vi ozome tu vuzehe bak lam uho eba uloome vi ailo em si niba ab vou leham bak.” Lahame Paulusat lab gagoho bak lam gi koena gagoha ame Yahudi dam zi labe aime ab otesi otesidamam. Imo Farisi dam ihimo fàsi bakamta dozeada. Labi Saduki dam laha ihimo fàsi bakamta dozeada. Labihadase. Lahame amu valiheme meedam bak lam dam otesi otesidam labe ab fahedaham.
9. Labi fahedume otesi otesidam labe dae teuna beàdam labe dat ahamda Musat toedume fi hasi esuhu Im Feàna zi ozobohudi fa dam bake vahokedam guru abo ame Farisi dam labe im dam totbaho labe meit usai duzu Saduki dam laba beàda. Labi meit usai duzu Saduki dam laba beàda. “Uho gagoho bak lam imbo kaio,” lahame beàdam labe vedi fa Paulus bake tauhu labe ab gagoham. “Iho ozoha, da nim ba fai bak kaio. Neà dàt moz. Alat Am im gagu vou usemda modeo, dam elohona it oazehena modeo, aba li vameaha zoaha. Im mahate ozom kaio. Làhà lahame neà bak. Ba fai vabak,” lahame ab gagoham.
10. Lahame labi gagoha dam lam ba neàdem vab. Gi otesi otesidam labe dae feà bak fusi beàda. Labi modeha ame meo dam boehàda aabo labe ame duzu duzuiame zisiamna ahoba laba duzu nom vi aasu vou faodamda labe ozo, “Dam labihadahit Paulus gi faati fegube beolo meedamna ozomo?” lahame ozoho labe am meo dam gagome usdume nom emoeme vule Paulus neo tet si vietoi vuusu fa amu lehe bake ame meo dam labe im numa fa ab vou le ousu ab disiham.
11. Labi ame aibu labe Yesus im Boehàda labe Paulus sel laba aidam obe laba lehe bak ozoho vabna ab li duzuham. Labi Yesus labe Paulus bake vabededam labe im nehame ab vameadamam. “Om a bedemule. Mahate ahu teudele. Om etei kota Yerusalem niba Eho amu meedume vou esmoho im lam oho dam bake ahate vou vameatedaha bak lam om laha num debu Roma laba azim dam laba ba neo gi ame baket meedam bak ehete. Dam nasi om oteme elom vabak. Mahate ahu teudi bohu vuusdale,” lahame Yesus aba duzu vabededam labe im vameadume neàdi fa ab seteham.
12. Labi izi dihasi dihambe ame Yahudi dam labe im ahu gukeme vàhàdehemu ihimo vahi neha, “Imo Paulus oteme vasea veàtoi neàdi ba na àda. Labi vao udda. Labihadase,” lahame im aa odoadume ahu vàmadi neàdi ab esuham.
13. Ame lab aa odoadaha bak lam Yahudi dam lam abo empat puluh ehet. Laham damat im aa odoadume ab esuham.
14. Ame im aa odoadaha dam zi labe fa damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi lamti laham dam laba le gago, “Im Paulus oteme vasea veàtoi neàdi ba na àda. Vao udda. Laham bak lam im aa odoadume neàdeho. Im ahu gukeme vàhàdehe labe ame da Paulus lam ab beolo modemam tame. Oteme neàdi ba na àdam bak.
15. Labihàmu uho abo im Yahudit Ibi Iho Modem Im Gagu Vàmadi Esum Dam Debu labet modem bak lam fa ot vai im dedamali fa ame meo dam labe im boehàda aabo laba le gagole. ‘Im Paulus debu modehe bak mahate iademe aime neàdem kaio. Neo uloome vi aim bake Paulus iba laha neo vi olule,’ lahame ahi neà damali ame boehàda aabo laba le gagu aho aime neàdi Paulus fà iba oluse. Labi iho doni bak laba audume vou faobe Paulus ledamzobe otese. Labi ba niba fum vabak am tame. Gi laba oteme setese,” lahame ame Yahudi dam busaoda zi totbaho laba im aa ab odoadume esuham.
16. Labi ame lab aa odoadaha im lam Paulusam gaeda labe ahamo gi lab godam labe dogoit ahamo ab vi aiham. Aihemu ame meo dam labe iho azim num debu laba le gago, “Em abi Paulus bake tàlo mozo,” lahame gagu aime neàdi am abi bake le gago, “ Abia, Yahudi dam om otelo aa odoadam bak eho aa vi aiho,” lahame Paulus sel laba aidahit ab le fi deham.
17. Labihàmu Paulusat am gaeda labe aba li im fi dehemu Paulusat ame meo dam seratus laba vuusu im vameadamda boehàda donida laba, “Lele,” lahame vi buteme anekehà veguamdi ab leham. Li duzu neàdehezobe Paulusat ab gut gagoham. “Em gaeda nim oho ve boehàda aabo laba vou lale. Am im vameamna ehete.”
18. Làhàmu ame boehàda donida labe Paulusam gaeda ve ame meo dam labe im boehàda aabo laba ab vou laham. Vou le lafusi gago, “Iho si sel niba ousuhuda Paulus labe eba buteme, ‘Eho li dabosi nim ve oba vou lale,’ lahame eba gagohemu eho ve oba ab vou leham tame. Im oba vameamna ehete.”
19. Lahame labi gagohemu ame meo dam labe im boehàda aabo labe ame dabosi lam am anekehà vuu vihitoi vou le vaitesu ihimo ahim duzu vastehebeat ab gagoham. “Oho eba gagolo modem im akete? Nasi gagole.”
20. Lahame labi gagohemu Paulusam gaeda nibe fa gago, “Yahudi dam totbaho labe neha, ‘Imo ahi neà damali ame meo dam labe im boehàda aabo laba le nehi gagose. “Paulusat debu modehe bak lam im mahate iademe aime neàdem kaio. Neo Yahudit Ibi Iho Modem Im Gagu Vàmadi Esum Dam Debu labe iho avaelaha laba vou duzu uloome aim bake Paulus iba dihasi laha neo olule,” ’ lahame ahi neà damali oba le gagom bak ozome ahu vàmadehe bak em aiho.
21. Labihàmu ame Yahudi dam labe oba li gagomeam om a uledi em abi Paulus olumule. Dam lam gi oba ahi neà damali li vage tame. Dam lam gi doni bak laba audume vou faobe abi ledamzobe otelo oba ahi vagedam bak tame. Abo dam empat puluh zi lamti dam amomoi zi lamti laha dam labe nehi gagoda, ‘Im Paulus oteme vasea veàtoi neàdi ba na àda. Vao udda. Im ahu gukeme vàhàdehe labe ame da Paulus nasi oteme neàdi na àdalo mozo,’ lahame ahu vàmadi im aa odoadume vameadamna eho aiho. Ame dam labe gi oho gagom bak ailo vou faodam bak. Laham bak lam oho a nasi uledi olumule,” lahame Paulusam gaedat ame meo dam labe im boehàda aabo laba ab fet vameadume fi deham.
22. Labi vameadume neàdi ame boehàda aabo labe fa ame dabosi lam olulo modem di labe nehi vi gagoda. “Om etei eba li lab vameadaha bak lam ba meia a vameadamule. Em ab aime neàdeham bak. Ame bak lam ba modem kaio,” lahame vi vameame neàdi ame dabosi lam fa ab oluham.
23. Labi ame dabosi lam fa olu neàdi ame meo dam labe im boehàda aabo labe am im ot vai meedam dam boehàda donida behàsu laba gagome li duzu neàdi ab gagoham. “Uho nasi meo dam ee vabda dua ratus zi lamti labi meo dam tujuh puluh kuda toha nusu lalo modem dam zi lamti labi dam dua ratus foso vuusu vou lalo modem dam lamti labihasu gagome vahe vahedume neàdehezobe eho um num debu Kaisarea laba aibu nibe jam sembilan olulo modem bak.
24. Labi Paulus ahe neà vou le Gubernur Feliks bake vou fum bak laba ozome aho nusu vou lam kuda totbaho lamti laha vame ahumdele,” lahame ab vameadume olulo meedamam.
25. Olulo modem di labe ame Gubernur Feliks, “Damat ana modi Paulus aba vou lehela?” lahame ozom biem bake ame meo dam labe im boehàda aabo labe sunit nehame toeda.
26. “Gubernur Feliks oa, om abo feàte. Sunit nim eho Klaudius Lisias toeme oba oluho. Oho ve aale!
27. Labi laha sunit nimti ame da Paulus nimti oba oluhu bak. Ame da Paulus nim Yahudi damat si otelo modemu eho em meo dam gagome im vahi le vi si vietoho. Da nim laha Kaisarleheda labe aho vuusdam dat meida imti ulohoda modemu iho vi si vietoho.
28. Da nim, ‘Ana modehe bake Yahudi dam labe aba bisi faki vàlu meedàla?’ laham bak em biehemu eho em meo dam gagome neo si fa ame Yahudit Ibi Iho Modem Im Gagu Vàmadi Esum Dam Debu labe iho avaelaha tot laba vou le duzu uloome ailo vameadaha
29. da nim aho git modehe vab labe ba sel ousum bak gagom vabile. Labi, ‘Beome elose,’ laham bak laha gagom vabile. Labihaha bak. Damat vedi neha, ‘Dat nim dat ahamda Musat aho toedume fi hasi esuhu Im Feàna zi lam abo ame Yahudi dam labe ibi iho vuusu meedam im lam da nibe mu vooha,’ lahame vàluhu labe beolo meedam bak.
30. Labi ba ame Yahudi dam labe, ‘Iho Paulus otese,’ lahame im aa odoadaha bak meit fi dehena eho aihi bak. Lahana ame im lam eho ailahigeàmu vou faodameam da nim damat beomna zohàme eho em meo dam gagome da nim ve oba nasi ab oluham tame. Labi Yahudi damat aba vàlu meedam dam nim eho ba neo gagome vi olulo modem bak. Labi dam lam oba lafusi dam labe im im lam dam ihimo oba gagolo modem bak. Oho aile. Sunit nim eho Klaudius Lisias oba oluho. Neàde.” Lahame ame meo dam labe im boehàda aabo labe sunit labihasu toeme ame meo dam seratus vuusu im vameadamda behàsu laba vi lu gago, “Sunit nim Gubernur Feliks bake vou le lole,” lahame gagome ab vi loham. Roma meo dam kuda toha nusu lam dam (Meedaha Im 23:23)
31. Labi vi lu ame meo dam labe im boehàda aabot iba gagoho baket ab modeham. Dam vahe vahedume afoezobe Paulus gagome sel labe vou futoi kuda toha laba zisi nusu neàdi aibut kota Yerusalem vou esmozi ab vou ladamam. Gi aibut vou ladume num debu Antipatris laba ab vou fuham.
32. Labi laba fusi izi dihasi dam kuda ziddaha meo dam labe Paulus vou Kaisarea laba ab ladaham. Labi ladume seddahazobe meo dam naot lahada zi labe fa im num kota Yerusalem niba fa ab ledaham.
33. Labi kuda ziddaha dam labe Paulus vou ladume Kaisarea laba ab vou fuham. Labi iho vou lehe sunit lam visoi Gubernur Feliks bake ab loham. Labi sunit lam lu neàdi, “Ame da Paulus neam tame,” lahame ab vi gagoham.
34. Labi Gubernur Feliks labe ame sunit ve aame adnahet gagome neàdi Paulus bake ab gagoham. “Om adi bake faaha dàt modela?” Lahahat Paulusat fa gago, “Em Kilikia bak laba faaha dàt modem bak.”
35. Lahame labi gagohemu Gubernur Feliks ozobohudi Paulus bake neo vi gago, “Oho modehe im debu eho nasi oba uloome aim kaio. Faobe dam, ‘Oho git modeho,’ lahame oba vàlu meedam dam labe vuli neàdi eho ba iademe uloome aime neàdi gago tame.” Lahame gagu neàdi neo am meo dam laba ab gagoham. “Paulus neo si eho azim num feàda nim abo Boehàda Herodes amu moho num misiana eho etei azihi num niba ousu doo teudi vou aasdale,” lahame am meo dam gagome ame baket ab modeham. Paulus ve ab ousuham.
1. Labi Gubernur Feliks labe am meo dam gagome Paulus ve am num feàda zoho laba ousu faobe vou aasdume usi auoholehezobe dam Paulus bake vàlu meedam dam kota Yerusalem laba azim dam labe ba Kaisarea niba ab vulezeham. Dam nehamda debu vuleze. Damat Ala Bake Lomna Ve Vua Vahudam Tohe Dam Zi Labe Im Bisi Boehàdatebo Ananias ame. Labi Yahudi dam bake vuusu im vameame faheme modiam dam busaoda totbaho ame. Labi ame Yahudi dam labe ibi iho im aime vameadam neàda toheda Tertulus ame. Labihasu vahi ba Kaisarea niba ab vulezeham. Labi vulezi neàdehezobe Gubernur Feliks am meo dam gagome Paulus sel labe ab vou futoham. Labi vou futoi Gubernur Feliks lamti dam etei kota Yerusalem labe lehe dam zi lamti laham dam labe iho avaelaha laba ab vou duzuham. Vou duzu neàdi ame Yahudi dam zi labe Gubernur Feliks aho avaesdam laba dozeadume, “Paulus git modeho,” lahame vàlu gubernur bake im faasi ab vameadamam.
2. Amu Gubernur Feliks labe Tertulus vi gagome netàdi duzu afoezobe, “Ame im debu akete?” lahame gagohemu Tertulus ame Yahudi dam labe ibi iho Paulus bake vàlu modem im lam ab faasi vameadamam. Keobaedam labe nehada. “Gubernur Feliks oa, om abo feàte. Oho iba vuusdam bak abo neàna bohu vuusdam bak. Dam ba ot faki ot fakiame fahem vabak. Abo gi ahebu ot deeli ot deeliame vahi meedam bak. Labi laha im Yahudi dam ahebu oho vuusdam labe iho ba bak faina azim bak labna zohàme oho nasi fet ozobohudi iba faobekesi vabiedam labe iho azihi num debu ahebu gi im gàhà bak tadehe bak.
3. Oho meedaha im zi lam im ahebu ozobohu bak. ‘Na nim oho modeme vahedaha bak,’ lahame iho labi gagodam bak. Ba biem vabak. ‘Om abo neàte,’ lahame im labihasu ozodam bak. Etei ozo. Ba ozo. Gi labihadam bohu gagodam bak.
4. Lahana om na meedam bakti lahaha bake om vanamam zohàme em bisi im bohulana vamealo modem kaio. Im da nibe aho modehe im koena nim oba taho gagu oho vi aime voose.
5. Ame da nim aho meedaha im neha. Aho gi meia modi meoliam dàt moz. Aho im Yahudi dam labe ibi iho esuhu num debu meida laba le im vameadume modemeam dam labe faki meoli dahobueda. Labi neo num debu meida iuba le ame baket neo meeda. Am gi labihadam dàt moz. Ame da nim laha Dat num debu Nazaret labe leheda Yesus labe Aho amu vahokeme vou esmoho im lam vuzehi meedam dam laba im vameame faheme modiamda am bak.
6. Labi ame da nim laha Fihasi Ala Bake Vou Baedam Num Vàmteabu labe Yahudi dam abo dam aabot ihimo olem zoho laba aho Yahudi dàt modem vabda lam ame num zoho laba vou oli ame num vàhàdelo modemu iho aame si veioho. [Iho si, ‘Ibi iho Yahudi damat im fi hamda ziti im fi ham vabda ziti Alat aham di iube im tai Musa bake gagu aho toedume fi hasi esuhu Im Feàna lam aho ailahigeàmu vooheo?’ laham bak uloome aime neàdi modesome modeha vedi ame meo dam seribu vuusdume im vameadamda boehàda aabo Lisias labe am meo dam zi totbaho lamti vahi li Paulus si ab vietoi ab vou laham bak.
8. Si vietoi vou lahemu ibi iho modelo modem bak modem bili Lisias aho iba neha, ‘Paulus bake vàlu meedam dam oba lale,’ lahame iba labi gagu im oba ab leham bak.] Labiha labe iho etei oba, ‘Paulus git modeho,’ lahame ame da niba lab vàlu vameadaha im nim, ‘Imbo?’ laham bak ohomo da niba uloome vi aile.”
9. Lahame Tertulus im lam Gubernur Feliks laba vameadume modeha ame Yahudi dam aba tau lezehe dam zi labe laha vi tau, “Imbote,” lahame Paulus bake neo vàlu Gubernur Feliks bake vameada. Meit Paulus bake vàlu im vameada. Meit Paulus bake vàlu im vameada. Labihada.
10. Labihadume modeha ame da Tertulus labe aho lab vàlu vameadaha im lam Gubernur Feliks labe aho aime neàdehemu aho neo Paulus bake, “Im Paulusbada aho aise,” lahame aubehà vimteme ao ab vi loham. Làhàmu Paulusat im abada ab faasi vameadamam. “Gubernur Feliks oa, oho im Yahudi dam vuusu im vahokedaha bak tahun abo dualehe bak. Im Yahudi dam iho na im meedam di oho bisi uloome vi aime neàdi gagu modidamda om am bak. Labihàmu dam nibe eba vàluhu bake em ba oba veibam iedem vabak. Eho veibalo modem im nim oho vi aime neàdi gagom bake em abo deeleho.
11. Eho amu nehaha bak. Em Fihasi Ala Bake Vou Baedam Num Vàmteabu laba le Ala bake, ‘Am abo feàte,’ lahame ahu adat iedi Ala bake vou baedalo modemu eho kota Yerusalem laba le eho vou mode leme niba fuhu usi dua belas ehete. Eho etei lab gagoho bak, ‘Imbo?’ laham bak oho Tertulus modeo, dam amomoi bake modeo, laham dam laba gagu aimeam, ‘Imbote,’ laham bak aim bak.
12. Eba vàlu vameadam Yahudi dam nibe amu eho Fihasi Ala Bake Vou Baedam Num Vàmteabu laba olehe di lam ame dam labe vi tau oli aaha ba em dam bake beàdamna aaha vabak. Labi eho Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num modeo, kota Yerusalem labe num meida modeo, num meida modeo, lahaha bak laba eho le dam bake im vou vameatedume dam lam meoli dahobuedam bak ame dam labe laha ba aaha vabak.
13. Ame Yahudi dam nibe etei eba vàluhu bak lam giomim vàlu vameadam bak. Ame na aame ozobohudemna vabak. Ame na aam vabna ba akati, ‘Imbote,’ lahame eho oba gagoe?
14. Lahana im imbona eho modeheda gi nehaha bak. Im Boehàda Yesus Aho amu vahokedaha im lam ame Yahudi dam nibe neha, ‘Giomim vahokedalo,’ lahame mu tozome moho Im Neàna lam eho aime vuzehi meedam im am bak. Lahamnàme im Yahudi dam nibe im tai ahamda vou baedam Ala bisi feàda lam eho laha, ‘Am abo feàte,’ lahame ahu adat iedi vou baedam bak. Labi em laha Musat lab toedume fi hasi vàmadi esuhu Im Feàna zi lamti dam ahamda Alat vameadaha im aime fa dam bake ahate vameaidaha dam zi lamti iho toedume esuhu Alam im lam lamti laham Alam im lam eho vooho vabak. Abo vuzehi ozome meedam lahasuhu bak.
15. Labi dam ahe diat iademe ahu vamdesu meedam dam lamti ahu kibuli fai bak meedam dam lamti laham dam ahebu ba elodume seddaha dam lam Alat ba uloodume aime neàdi gagolo modem bake Aho ame dam zi ahebu ba fa ahededume usnadam bak lam ame Yahudi dam nibe vi ozome ozobohudi esdam bak lam em laha vi ozome ozobohudi esdam bak.
16. Alat ba labihalo modemu eho gi nehadam bak. Alat Am ahu deelem bak laba ozome em gi Aba Aho ozoho im lamota meedam bohu meeda. Labi laha damat eba, ‘Em git modeho,’ lahame ba vàlu gagom vabake eho gi iademe meeda. Em gi labihadam bak.
17. Nasi aima. ‘Eho kota Yerusalem niba ana modelo lehela?’ laham bak eho etei oba vameadalo modem bak. Em tahun amu zoho ium ame Im Neàna lam num debu bak ahebu vou vameatedume uloholedaha bak. Labi kota Yerusalem niba ba lehe bak. Eho em Yahudi dam totbaho Yesus bake tu vuzehi vahi meedam dam na vab dam niba eho amu iuba le ame im lam vou modetedaha di vadaha doi lam vou li lolo ozome kota Yerusalem niba ab leham bak. Labi laha em Yahudi dàt fa Yahudi damat modem vab damat azihi bak laba tau vahehe labe faidehemu eho doi vou le damat Ala bake lomna ve vua vahudam toheda laba lu aho ve fa dam bake na fi ho ve oteme vua vahusu fa neàdelo modem bak modelo eho kota Yerusalem niba ab leham bak.
18. Labi eho ame doi lam kota Yerusalem niba vou li Fihasi Ala Bake Vou Baedam Num Vàmteabu labe am ad oli aam bak tomba laba vou oli ame na meedameam ame Yahudi dam labe em alihi aaha di em gi ame bak lam meedamna aaha bak. Di lam im Yahudi dam nibe ibi iho faidehemu fa vaot itatame neàdem bak lam eho modeme neàdehena damat em alihi aaha bak. Labi laha di lam dam duada eba tau ame bak modehe vabak. Gi ehemo modehe bak. Labi eho ame di lam laha dam duali im vameadume meoledume dahobuedaha vabak.
19. Ame dam zi labe meoledume dahobuedam bak lam debu eho modem kaio. Yahudi dam Asia bak labe lehe dam zi labe ihimo meedume dahobuedaha bak. Lahana dam lam akati taho lem vaba mode? ‘Eho git modeho,’ laham bak ame im, ‘Imboo?’ laham bak akati dam lam taho li oho avaesdam niba dozeadume eba vàluhuna taho li ahate oba vameadam vaba mode? Akati seti mode?
20. Ame Asia labe lehe Yahudi dam Kaisarea niba lehe vaba setehedaleàmu oho fa Yahudi dam nidi nim etei vulehe dam niba oho nasi gagu aimale. ‘Paulusat amu kota Yerusalem laba Yahudit Ibi Iho Modem Im Gagu Vàmadi Esum Dam Debu labe iho avaelaha laba duzu ame dam labe aba uloodaha di lam, “Am faideho,” lahaha bak lam uho aihi bakvat eheo?’ lahame oho gagu aimeam ba làhàme aim vabak.
21. Eho gi nehame bisteat gagodamna lamota damat aihida am bak. Eho amu neha, ‘Dam elodaha bak labe Alat modi fa ahededume usnadaha bak lam eho vi ozo, “Imbote,” lahame eho tu vuzehe bak lam uho eba uloome vi ailo meo damat em si uho avaelaha niba ab vou li uloodamam bak,’ lahame eho bisteat labi gagodamna lamota damat aihi labe fa oba gagom im vàmtea am bak. Ba im amomoi damat eba vàluhuna oba gagom bak vabak,” lahame Paulusat Gubernur Feliks bake ab vameadaham.
22. Labi ame da Feliks labe aho dam Yesus bake tu vuzehi meedam dam labe, “Iho ana im tu vuzehi meedàla?” laham bak lamota ozobohut. Làhàmu Paulusat lab vameadaha im lam aime neàdi aho dam laba ab gagoham. “Em ozobohuna ahum Paulusat aho ab vameadume neàdeham tame. Neàde. Yahudi dam im ibida imbodeheo? Im Paulusbada imbodeheo? Laham bak lam eho nasi ozome gagom vabak. Em ozom biehedaleàmu gi teohe novai esulo mozo. Faobe ame meo dam labe im boehàda aabo Lisias kota Yerusalem labe fa Kaisarea niba lehezobe ba uloome vi aime ozobohudi neàdi gago tame.” Lahame vameadume neàdi dam zi lam gagome ab futodaham.
23. Labi Feliks aho ame meo dam labe iba vuusdam boehàda donida laba gago, “Om meo dam gagome Paulus neo vou aasdale. Lahana a bisi mali vou aasdamule. Gi fota aasdale. Paulusti vou alem dam labe aba aho ozome vamna li lodam neàte,” lahame gagome ame baket ab meedamam.
24. Labi fota izi vou faozidameam Gubernur Feliks iuba lahada am nam Drusila lamti fa Kaisarea niba neo ab leham. Ame nam lam Yahudi namet moz. Laham nam lamti fa ab leham. Fa li Feliks ame da Paulus vou aasdam dam laba gagome Paulus vou futoi, “Am namti iho avaelaha laba vou duzule,” lahame gagohemu ame dam labe Paulus vou futoi vou lehe labe Feliks am namti iho avaelaha laba ab vou duzuham. Duzuhuzobe, “Dam akatiham bake Alat Gagu Fihasi Vimteme Oluhu Dat Boehàda abo Yesus bake tu vuzehi meedàla?” laham bak ailo Paulus bake gagu Paulusat fa ab vameadamam. Labi Feliks gi dogoit aida.
25. Labi Paulus ame im lam vameadume neàdi im nehamda neo vi vameada. “Im dam bakda iho akatihasu iademe ahu vamdesu meedàla?” laham bak lam vameada. Labi neo, “Im git meedam bak iho akatihasu im ahu fa it vou faovoi mali meedàla?” laham bak lam laha vameada. Labi neo, “Ba diamut Dam Bake Uloodume Aime Ozobohudi Neàdi Fime Fahedam Digat fum di akatihasu meedàla?” laham im lam vameada. Labihasu ahebu Paulusat vameadume modeha Feliks aime udovai iedi gago, “Lo, neàde. Nasi lam neàde. Om ba neo li eba im vameadam neà laham bak lam ehemo ba ozome oba gago tame,” lahame gagu neàdi am meo dam neo gagome Paulus fa sel laba ab vou le ousuham.
26. Ame di lam Feliks nehi vi ozoda. “Eho Paulus gagu isi olumeam làhà Paulus am doi eba lom bak,” lahame vi ozodam labe aho am meo dam ahit gagome Paulus sel labe vou futoi aba netàdi im ot vameaida. Labi neo dihasi ame baket neo mode. Gi labihada. Lahana ame Feliks labe aho ozodam bak lam ba modehe vabak.
27. Gi labiham im lamota meedume dua tahun ab foleham. Labi dua tahun foli modeha dam ahebu vuusdam boehàdatebo Kaisarleheda labe aho Feliks gubernurli meedaha bak lam faatoi fa Perkius Festus bake gagu gubernur gàhàda ab modeham. Lahana Feliks faatoi fa dat gàhàda ot vai modelo modem di lam Feliks ba Paulus isi oluhu vaba Yahudi damat aba fakem vaba fa aba deelem bak ozome Paulus gi sel laba ousdam lahasuhuna esmo.
1. Labi Gubernur Festus Yudea bak laba gubernur gàhà dateli neàdi num debu Kaisarea niba usi làteladi fa kota Yerusalem laba ab zooleham.
2. Labi kota Yerusalem laba fusi aidam di labe damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi lamti laham dam zi labe Gubernur Festus bake li aho avaesdam laba dozeadume, “Paulus git modeho,” lahame vàluhu im lam neo Festus bake vameada.
3. Labi neo Festus bake keobaedam labe nehame vameada. “Om iba deelemeam làhà oho taho Kaisarea laba fa le Paulus laba ousdam bak lam fa feidasi om meo dam gagome vihitoi kota Yerusalem niba fa it olu fa sel nidi niba ousdase. Labi iho neo uloome aidume neàdi vaitose,” lahame ahi vageme ab gagoham. Ame Yahudi dam labe iho ozo, “Ame da Paulus Kaisarea labe fa kota Yerusalem niba meo dam labe vou ledahit zie doni laba gut audume faobe otese,” lahame aa odoadume esdam im lam ehena ahi vasti Festus bake ab vameadaham.
4. Lahame Festus bake labi gagoha Festus fa gago, “Vabà! Paulus gi Kaisarea sel laba ousdam bak lahasdamna em laba lam bak etei ab ozoham bak.
5. Labihàmu uho ozom, ‘Ame da lam git modeho,’ laham bak ehelemeam làhà um Yahudi dam bake vuusu im vameame faheme modiam dam busaoda totbaho fàsi eba vi tau olu im vahi lazese. Labi laba lazi uho vàluhu im lam ame da labe am dauha aasu uho eba vameadume eho fa ame da laba uloome, ‘Imbo?’ laham bak aime ozobohudese. Em ba niba modem kaio.”
6. Lahame labi gagu neàdi Festus ame Yahudi dam kota Yerusalem laba tau azibe digat aho fa lamda lam fuhemu fa Kaisarea laba ab lazeham. Fa lazi izi dihasi Festus ame Yahudi dam bake vuusu im vameame faheme modiam dam busaoda eeda zi lam gagome aba aho meia uloome vi aime neàdi gagodam num tom fi haba laba vahe vahedume afoezobe fa neo am meo dam gagome Paulus sel labe vou futoi aho avaesdam laba ab vou li duzuham.
7. Labi ame meo dam labe Paulus vou li vou duzu modeha ame Yahudi eeda zi kota Yerusalem labe fa Kaisarea niba lezehe dam zi labe Paulusam obe laba vabousu dozeadume Paulus bake giomim vàluhu im zi lam meit neha, “Aho faidehe bak meida neam tame,” lahame vàlu vameada. Labi neo meit neha, “Aho faidehe bak meida neam tame,” lahame vàlu vameada. Labihada. Ame dam zi labe iho vàluhu im lam aame ozobohudemna gagoho vabna gi ostame ab meedamam.
8. Labihadume modeha Paulusat fa veibalo Festus bake ab gagoham. “Gubernur oa, dam eba etei vàlu vameadam im lam gi giomimot modem bak. Ba imbo bak kaio. Ibi iho Yahudi damat im fi hamda ziti im fi ham vabda ziti Alat aham di iube im tai Musa bake gagu aho toedume fi hasi esuhu Im Feàna lam em ba im vàmtea mu voou vàhàdehe vabak. Labi laha ame Fihasi Ala Bake Vou Baedam Num Vàmteabu labe am zoho Yahudi dam ihimo oliam zoho laba eho dam giida vou oli vàhàdehe vabak. Labi laha Kaisarleheda labe aho gagoho im fi hamda ziti im fi ham vabda ziti labihasu gagoho im lam eho mu voou vàhàdehe vabak. Ame bak lahasuhu bak. Em im labihasu ahebu meedam labe faidehe vabak. Dam nim gi ostame giomim eba vàluho.”
9. Lahame Paulusat veibadume modeha Festus aho ozo, “Eho neham labe Yahudi damat eba fa deelem bak,” lahame fet ozoho labe Paulus bake vi ailo gago, “Làhà. Damat oba vàlu meedam im lam eho Kaisarea niba oba uloome vi aime ozobohudi neàdi gagom bak feidasi fa kota Yerusalem laba le ebe eho avaesdam laba oho li duzu ame bak lam modem neào? Uledemeam làhà taho eba gagole.”
10. Lahame labi gagoha Paulusat fa gago, “Vabo. Ne, em gi Kaisarleheda labe am im ot vai meedamda nibe oho avaesdam niba abo obo oho uloome vi aime neàdi gagodam bak niba ab duzu meedam am taia? Bak nim gi ame bak am bak. Ba akati fa kota Yerusalem laba le meedà? Gi ame im vàmtea niba ab meedamam bak. Em Yahudi dam bake git modehe vabak om ozobohuna taia? Akati vabilehenali eba bisi vi ootedàla?
11. Eho Kaisarleheda labe aba aho gagu fi hasi esuhu im lam meida vazidazi git modehemu fa vi vataum bak ehelemeam làhà oho om meo dam gagome em otem neà bak. Em ba malem vabak. Lahana ame Yahudi dam nibe etei eba vàlu vameadam im lam imbo kaio. Gi giomimot modem bak. Labiha labe em ba meit ame Yahudi dam niba ub lom vabak. Em meit bisi im ostamnabe vàlu meedam bak nim gi labihasu vou esmozi fa dam ahebu vuusdam boehàdatebo Kaisarleheda labe aho azi im meedam num debu Roma laba le ahamo eba uloome, ‘Ame im aieo?’ laham bak modelo oba ab gagoham bak.”
12. Lahame Paulusat aba labi gagohemu Festus aba im vameame modem dam zi laba im ot vameaidume neàdi Paulus bake ab gagoham. “Làhà. Ohomo om ahat ab gagoham bak. Oho eba neha, ‘Kaisarleheda labe aho oba uloome, “Ame im aieo?” laham bak aise,’ lahame eba gagohemu eho om num debu Roma laba abo Kaisarleheda laba ab olulo modemam bak,” lahame Festusat ab gagu esuham.
13. Labi fota azi vou faodameam ba aaha dat boehàda bak mei bak iuba vuusdam Boehàda Agripa labe am nà Bernike lamti Kaisarea niba ab leham. Festus gi etei gubernur gàhà datelehe bak lam ozome, “Neàte,” laham bak gagolo Kaisarea niba ab leham.
14. Labi ame boehàda labe am nàti Festus bake li tau azim zidam di labe Festus ame Boehàda Agripa laba Paulusat meedaha im biem bake nehame vameada. “Amu Feliks gubernurli meedaha di labe meit faina modehemu si oumahedam num sel niba ousu vou esmohoda Paulus niba ehete. Feliks ame da isi oluhu vaba niba ousdam lahasuho.
15. Eho amu kota Yerusalem laba le aidam di labe damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi lamti laham dam labe, ‘Ame da Paulus git modeho,’ lahame vàlu eba vameada. Labi neo eba neha, ‘Ame da lam eho na asimbuna feà aba modem bak gagohozobe dam labe iho fà beose,’ lahame eba neo labi vameadaha bak.
16. Lahana ame Yahudi dam labe eba labi gagohemu eho dam laba neha, ‘Kaisarleheda labe aho vuusdam dam ahebu labiham biem bak. Meia nasi iademe uloome aime neàdehe vabna meit meia ub lom vabiem bak. Amu dam na im vàluhuda zi lam gagome vahe vaheme neàdi afoezobe ba ame damat vàluhuda lam neo gagome vou duzu afoezobe ot aasuiame vameadam labe aho veibadào? Veibadam vabao? Laham bak aame ozobohudem labe làhà gagomta neàte,’ lahame eho ame Yahudi dam laba vameadaha bak.
17. Làhàmu ame Yahudi dam labe ozoha vabamu fa eba tau Kaisarea niba ab vuleham. Labi vuli izi dihasi eho kehàm vaba dam gagome ebe eho meia uloome im vi aime neàdi gagodam num tom fi haba niba ab vahe vahedaham. Labi neo em meo dam gagome Paulus sel labe vou futoi li eho avaesdam niba ab vou duzuham.
18. Labi ame Yahudi dam eeda zi labe eho avaesdam niba li dozeadume Paulus bake aasu vàlu vameadam di labe eho ozo, ‘Ame im fai bak ehena gagu afoezobe eho em dam gagu beolo mode tiba,’ lahame vou faoha ebe eho ozomda lam ba gagoho vabak. Ame dam lam aba vàlu vameadam di fai bak vameadaha vabak.
19. Gi dam labe ibi iho Ala bake vou baedam bak, ‘Akatihasu Ala bake vou baedàla?’ laham im lam ame da lamti otesi otesida. Labi, ‘Dat ee gagom Yesus lahamda eloho bak labet Alat modi fa ahedi usaho,’ lahame ame da Paulusat lab vameadaha im lam, ‘Imbo kaio,’ lahame otesi otesida. Dam gi labihasu otesidamna eho aihi bak. Lahana ame da lam, ‘Fai bak ehete,’ laham bak em ba aihi vabak.
20. Labiha labe eho ozo, ‘Im labi modehena eho ba akati uloome vi aie?’ lahame ozom vabili eho ame da laba neha, ‘Làhà. Damat oba vàlu meedam im lam, “Imbo?” laham bak eho oba uloome vi aime ozobohudi neàdi gagom bake fa kota Yerusalem laba le modem neào? Uledemeam làhà taho eba gagole.’
21. Lahame eho ame da laba labi gagoha Paulusat vedi fa kota Yerusalem laba le uloolo modem bak mu gago, ‘Vabo. Oho om meo dam gagome em gi niba vou aasdume faobe fa Kaisarleheda labe aho azi im meedam num debu Roma laba olu ahamo eba uloome, “Ame im aieo,” laham bak vi aime ozobohudi neàdi gagom bak modelo mozo,’ lahame Paulusat eba labi gagohemu eho ame baket ab meedalo modemam. Lahana eho teohe em meo dam gagome ame da lam gi Kaisarea sel niba vou aasda. Kaisarleheda labe aho num debu Roma laba ame da nim uloome aim bake ba olum bak ozome ousu vou faodalo ab ousdamam bak.”
22. Lahame Festus labi vameadaha Agripa labe neha, “Em ame da labe veibaha bak abo ehemo ailo àhàkeho.” Lahahat Festus fa gago, “Lo, neàte. Izi dihasi eho gagome vou futoi iho avaelaha niba vou duzuhuzobe aho vameadamzobe oho aim bak.”
23. Lahame labi gagu izi dihasi Agripa labe am nà Bernike lamti ahili dam ee eheda labe dum sue abo doi duana vaha sue lam dume li Gubernur Festus aho im vameadam num tom fi haba laba oli modeha damat gut vou baedume kuguidamna ab vou oleham. Labi laha meo dam zi labe im boehàda dam aabo zi lamti labi ame Kaisarea laba esum dam ee eheda totbaho zi lamti laha vi tau oedume nusualada. Labi oedume nusualadume neàdi Festus labe neo am meo dam gagome Paulus sel labe vou futoi dam zi labe iho avaelaha laba ab vou li duzuham.
24. Vou duzu neàdi Festusat Paulusam dauha laba aasu fa Agripati dam totbaho lamti laham dam laba ab vameadamam. “Boehàda Agripati um dam ee eheda totbaho ahebu lamti laham dam oa, ame da nim Yahudi dam ahebu abo kota Yerusalem laba azim dam zi lamti labi Kaisarea niba azim dam zi nimti laham Yahudi dam ahebu eba li neha, ‘Eho em meo dam gagome ame da nim taho oteme neàdese,’ lahame bisi eba li dae duana vi ootedam bak.
25. Lahana eho uloome aiha fai bak modehe vabna eho gagu otem biehe bak. Labihadamnàme ame da nibe aho eba neha, ‘Em fa Kaisarleheda labe aho azi im meedam num debu Roma laba le ahamo eba uloome, “Ame im aieo,” laham bak modelo mozo,’ lahame eba labi gagu vàhàdehemu eho uledi ame baket ab modelo modemam bak. Eho ame da nim Roma laba abo Kaisarleheda laba olum bak ab ozoham bak.
26. Lahana eho ame da nim fa Kaisarleheda laba olulo modem di toem sunit, ‘Ame da nim aho ana modi faidehena aba oluhela?’ lahame toem sunit eho akatihasu ozome toela? Em ame im ozome toem biehe bak. Eho ozom, da nim ame im debu modi faidehe bak sunit ahate toeme olum vabna Kaisarleheda laba olum biem bak. Labihàmu iho vahi ame da niba neo uloome iademe vi aime neàdi, ‘Am modi faidehe bak neame?’ laham bak ozobohudi sunit laba toeme Kaisarleheda laba olum bak ozome eho ahit em meo dam gagome ame da nim neo sel labe vou futoi li uho avaelaha niba ab vou duzuham bak. Labi Boehàda Agripa om laha feà labe eho ahit em meo dam gagome ame da nim neo sel labe vou futoi li obo oho avaesdam niba laha ab vou duzuham bak.”
1. Lahame Festus labi gagohemu Agripa labe Paulus bake neha, “Lo, neàdeho. Ame Yahudi dam labe oba vàluhu bak lam imboo? Imbo vabalemeam làhà nasi veibale. Im aidase.” Lahame gagoha Paulusat am im veibalo modemu, “Dam nasi dae vabalele,” lahame dam bake am anekehà ab fi bovaham. Fibovai neàdi im nehame ab veibadamam. Paulusat aho ozo, “Agripa aba taum bak am tiba,” lahame labi ozome im ab faasi veibadamam.
2. “Agripa bisi Boehàda feàda oa, em etei oho avaesdam niba li duzu veibalo modem bake em abo deeleho. Neham bak. Ibi iho Yahudi damat im fi hamda ziti im fi ham vabda ziti Alat aham di iube im tai Musa bake gagu aho toedume fi hasi esuhu Im Feàna lam iho uledi meedam bak lam bisi ozobohuda om am bak. Labi ame Im Feàna lam im Yahudi dam nibe ihimo otesi otesidam bak lam laha bisi ozobohuda om am bak. Labiha labe Yahudi dam labe eba neha, ‘Eho git modehe bak meida neam bak.’ Labi meit neha, ‘Eho git modehe bak meida neam bak,’ lahame eba vàluhu im ahebu lam eho etei oho avaesdam niba li duzu veibalo modem bake em abo deeleho. Labiha labe oho eho veibadam im nim betea aidam labe vou faodale.
4. Eho amu koe diat bak ebeda laba azihi di gi em Yahudi damti vahi azihi bak. Labi ba neo vou mode ledume fa kota Yerusalem niba ba li em Yahudi dama neo tau vahi azihi bak. Labihaha labe eho iademe meedam im ahebu lam Yahudi dam ahebu amu gi ozobohudehe bak. Ba biem vabak.
5. Labi laha em amu gi Farisi dàt modem bak. Abo ibi iho Yahudi damat im fi hamda ziti im fi ham vabda ziti Alat aham di iube im tai Musa bake gagu aho toedume fi hasi esuhu Im Feàna lam eho bisi vuzehi iademe meedamda em am bak. Lahana eho amu lab meedaha bak lam Yahudi damat ozobohunàme akati uledi eba tau gagom vaba mode? Ana modi gi vei vabilehe damali vou mode ledume di nimohohela?
6. Labi etei damat em si uho avaelaha niba vou li duzuhu bak debu gi neha. Alat aham di iube im Yahudi dam nibe im tai ahamda zi laba nehame fet vameadume esuhu bak. ‘Dam elodahada ahebu Aho ba diamut modi fa ahededume usnada tame,’ lahame aham di iube fet vameadume esuhu im lam eho laha vi ozome ozobohudi vou faodamnàme uho vedi em si uho avaelaha niba ab vou duzu uloodamam bak.
7. Lahana Boehàda Agripa oa, im Yahudi dam debu ahebu iho Ala bake, ‘Am abo feàte,’ lahame ahu adat iedi vou baedam bohu meedam labe Aho amu neha, “Im Yahudi dam amu elodahada ahebu ba diamut Eho modi fa ahededume usnada tame,” lahame fet vameadume esuhu im lam iho laha ozobohudi esdam bak. Labihadamna eho laha ame fet gagu esuhu im lam vi ozome ozobohudi esuhemu akati em vàmtea Yahudi damat eba vàlu neha, ‘Em git modeho,’ lahame em si uho avaelaha niba duzu, ‘Uho eba uloome aise,’ lahame meedàla?
8. Lahana um Yahudi dam totbaho ahebu oa, uho neha, ‘Dam elodahada ahebu Alat ba diamut modi fat ahededume usnada tame,’ laham dam labe akati Alat etei Yesus eloho bak labet modi fa ahedi usaha bak lam um akati vuzehi meedam vaba mu voohela? Labihalahit um im amuda lam laha mu vooho damat modem bak.
9. Em laha amu di iube nehame ozodam dàt modem bak. ‘Dam ame Da Yesus num debu Nazaret labe leheda laba tu vuzehi meedam dam laba eho fai bak bohu vabidase,’ lahame labi ozodam dàt modem bak.
10. Lahame labi ozodam dàt modem labe eho ame baket kota Yerusalem niba ab faasi meedamam. Eho amu gi nehada. Damat Ala bake lomna ve vua vahudam toheda zi laba vuusu im vameame faheme modiam dam laba eho le gagu aiha, ‘Lo, neàte.’ Làhàmu dam Yesus bake tu vuzehi meedam dam lam eho le si meit faina modehemu si oumahedam num sel laba oumaheda. Labi Kaisarleheda labe am im ot vai gagom dam labe am meo dam gagome ame dam lam oddalo modem di em laha, ‘Otem neàte,’ lahame tau gagome oddam bak. Ba malem vabak.
11. Labi laha Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num meida oli dam Yesus bake tu vuzehi meedam dam lam im alihi aahazobe eho si vou kea lame futodume beoda. Labi neo ame num meida laba laha neo ame baket neo meeda. Dihasi mode. Dihasi mode. Em gi labihadam dàt modem bak. Labi ame bak lam meedaha di lam eho gi neham bak ozome meedaha bak. ‘Dam labe ibi iho amu Yesus bake tu vuzehehe bak lam mu, “Yesus imbo kaio,” lahame Yesus bake feàtàme mu voose,’ lahame eho labi ozome ahit beodaha bak. Eho dam laba aam di gi ahebu ahu fakehena tadi meedaha bak. Em ahu bisi gukeme feà bak fuhu labe em gi kota Yerusalem nimota vabidaha vabak. Abo bak iudu iumti iudu iumti im Yahudi damat azihi vabak iuba le dam Yesus bake tu vuzehi meedam dam aam di laha vabidam bak tadedaha bak. ” lahame Paulusat ab vameadaham.
12. Labi Paulusat labihasu vameadume neo susulo vameadam labe nehame veibada. “Eho ame mei bake ladam di num debu Damsik laba lada. Amu damat Ala bake lomna ve vua vahudam toheda zi laba vuusu im vameame faheme modiam dam labe eba neha, ‘Iuba le dam nabidameam dam Yesus bake tu vuzehi meedam dam alihi aameam làhà si fa kota Yerusalem niba vou li fa sel oumahedam neàte,’ lahame toeme olum sunit lam eba lu eho ve eba tau gohatem damti iho Damsik laba ab vou ladamam.
13. Iho Damsik laba lam zie labe ladume lafuseo vabalehe di labe ala tomali aaha Alat azihi bak labe dam fako iedemna fauha meona nom ilu em em damti ladam bak laba ab fauhaleham. Ame na fauha meo lam ala fauha meoti uloho vabak. Abo bisi ogatedam labe fako iedemna lam feàna nom ilu fauhali emti vahi ladam damti im fako ab iedeham.
14. Labi im ab biddaham. Labi iho lab biti bisdam labe eho aiha naat eba im Yahudi dam labe ibi iho vameadam Aram daet vameadamna em ab aiham. Labi eho gi dogoit vou faodam labe nehame gagoho bak ab aiham. ‘Saulus oa, om akati Eba vabidàla? Eba vabidam bak taho vaitole. Oho ame bak lam meedam labe ohomo naedat fa it vàhàdedam bak.’
15. Lahame eba labi gagohemu eho fa neha, ‘Boehàda, Oho amat mode?’ Lahame labi gagoha Boehàda labe fa eba neha, ‘Eho Yesusat modem bak. Oho vabidamda Em am bak. Eba tu vuzehi meedam dam laba oho vabidameam làhà om gi Eba laha vabidam bak. Nasi usai duzule. Eho oba, “Nehame meedale,” lahame om gagu valo modem bak lam om biem bake Eho etei ahit oba tahi im vameadam bak. Oho fa im Ebeda tau meedam datelelo modem bak. Labi laha Eho etei oba tahi im vameadamna oho aaha bak lamti labi ba neo diamut Eho neo oba tahi im vameadamna oho ba aame ozobohudem bak lamti labihasu om ozobohudi bak iuba la. Bak iuba la. Lahadume ame im lam ahate vou vameatedam datelelo modem bak. Oho ba labihadam datelelo modem labe Eho ahit etei oba tahi im ab vameadamam bak.
17. Oho labihadam bak meedam di labe om Yahudi dam totbahot modeo, dam giida Yahudi damat modem vab damat modeo, oba fai bak modelo aa odoadam di Eho oba soat vausu ame bak lam ba modem vabak. Gi fa vei neàdedam bak. Ame dam labe iho faina meedam bak lam Alat gi ozahigeàmu fa faamome dam laba beolo meedam bak lam fa vei mu neàdedam bak lamti ame dam labe Eba tu vuzehi meedàmu Alat Aho vame fi hasi Am damaedam bak lamti, “Labihasu meedase,” laham bak ozome oho im nehasu meedam bake Eho om gagome ame dam zi laba ab olulo modemam bak. Oho le im nehasu meedam bak: Ame dam labe, “Iho faina meedà?” laham bak biem labe abo gi usi aibuna aidamna ozomom bak lam oho fa ame dam laba modi ozobohudi fi gatei iho faina meedam bak voou fa ahu vàmadi vei neàdedume abo dihahana ozomolo modem bak ame. Labi ame dam laba Iblisit veimai vuusdam bak lam oho modi veimodume fa Alat vuusu im vahokedam bak ame. Labihasu oho ba meedalo modem bake Eho om gagome ame dam zi laba ab olulo modemam bak,’ lahame Yesusat eba labihasu vameadume ab seteham,” lahame Paulusat ab vameadaham.
19. Labi Paulusat labihasu vameadume neo susulo nehame vi vameada, “Boehàda Agripa feàda oa, ame Da Yesus Aho asum ahoba iube eba nom ilu vameadahana eho edehesi fako bakamta aasdume aahana lam eho ba vooho vabak. Abo aime uledi meedam lahasuhu bak.
20. Eho uledi meedam labe eho gi im nehasu vameadaha bak. ‘Dam ahebu iho faina meedam bak lam nasi voedume fa ahu neà bak vàmadi meedale. Labi fa Ala bake tu vuzehi im Abada meedale,’ laham im ame. Labi, ‘ “Ame dam labe iho faina meedam bak voedume fa ahu neà bak vàmadeho,” laham bak, “Imbo?” laham bak lam damat modeo, Alat modeo, biem bake fa aame ozobohudem bake im neà bakta meedale,’ laham im ame. Labihasu eho bak mei bak iuba la. Bak mei bak iuba la. Lahadume ame im lam vou vameatedume fi dedaha bak. Ame im lam eho amu nasi Damsik laba azim Yahudi dam bake le vameada. Labi ba neo eho Yahudi dam kota Yerusalem laba azim dam labe faasi vou mode ledume Yudea bak ahebu azim Yahudi dam laba vameadume uloholeda. Labi ame im lam eho neo Yahudi damat modem vab dam laha neo vameadume uloholeda. Labihadaha bak.
21. Em labihadaha bake Yahudi damat eba faki, ‘Otese,’ lahame eho amu ame Fihasi Ala Bake Vou Baedam Num Vàmteabu am ad oli aam bak tomba gutehe zoho laba olehe di lam damat vi oli em si, ‘Otese,’ lahame ab meedaham bak.
22. Lahana Alat eba vuusu vou aasdam labe damat taho otem bili etei ab vou fuham bak. Labiha labe em abo um ee ehe dam zi nimti dam ee vab dam zi nimti uho avaelaha niba duzu Yesus Aho amu meedume vou esmoho im lam eho uba ahate ab vameadamam bak. Eho uba ahate vameadaha im lam ba im meit modem vabak. Abo tai ahamda ibida Musati labi dam Alat vameadaha im aime fa dam bake ahate vameaidaha dam zi lamti laham dam labe iho amu aham di iube, ‘Alat Gagu Fihasi Vimteme Oluhu Dat Boehàda labe nehada tame,’ lahame nasi fet toedume esuhu im lam eho uba ahate vameadam im am bak. Ba im meit modem vabak.
23. Ame im lam nehaha bak. ‘Alat Gagu Fihasi Vimteme Oluhu Dat Boehàda lam amu nasi damat modi geàdume ote tame. Labi ba Am eloho bak labet Alat alimeat modi fa ahedi usa tame. Labiha labe, “Dam bakda ahebu abo Yahudi dam lamti Yahudi damat modem vab dam lamti laham dam niba Alat Aho soat vausu fa vei neàdeda tame,” laham Im Neàna lam Aho im dam bakda ahebu vou vameatedume fi desi dam ahebu ozobohudeda tame.’ Lahame ame dam ahamda labe fet toedume esuhu im lam eho laha uba ab vameadamam bak.”
24. Lahame Paulusat lab veibadam lahasdam di labe Festus vedi im abada ausi tozolo dae buduana ab vameadamam. “Elo! Paulus om abo ahusobuli meedam dàt mode? Om bisi dihasi sunit bolohona it aame ozoda. Labi neo dihasi neo it aame ozoda. Labihadam labe im vabili ahusobulehe tai?”
25. Lahahat Paulusat fa gago, “Vabà! Gubernur Festus oa, em ba ahusobulehe vabak. Eho etei oba lab vameadaha im lam ahebu imbo bak. Em ba ahusobulehena damat ba ozom biemna oba vameadaha vabak. Abo ozobohu aabodi neàdi vameadam bak.
26. Eho lab vameadaha im lam abo ame Da Yesusat Aho meedaha im lamti damat Aba meedaha im lamti ahebu meedaha di lam aa vasti meedaha vabak. Abo ahatet dam ahebu ozobohuna meedaha bak. Labiha labe eho etei oba lab vameadaha im lam ahebu Boehàda Agripata am ozobohu bak. Labiha labe eho lab vameadaha im lam gàhàna modem vab labe eho iedehe vaba Boehàda Agripa aho avaesdam niba duzu ahate vameadam bak.” Lahame labi vameadume neàdi Paulusat vaktesi fa Boehàda Agripa bake ab gagoham.
27. “Boehàda Agripa oa, Alat vameadaha im aime fa dam bake ahate vameaidaha dam ahamda zi labe iho fet toedume esuhu im lam, ‘Alat Gagu Fihasi Vimteme Oluhu Dat Boehàda labe Aho ba nehada tame,’ laham im lam oho tu vuzehi meedamda om am taia? Oho tu vuzehi meedam bak lam eho ozom, imbo bak.”
28. Lahame labi gagohemu Agripa fa Paulus bake tozome gago, “Oo làhà! Oho ozom, im gi etei ot aaiame im ot vameaidaha bak nibet modi eho Kristus bake tu vuzehe? Ame im vameadamehamdehe vabna eho akati ba tue?”
29. Lahahat Paulusat fa ab vi gagoham. “Etei modeo, ba vou faobe modeo, omti dam etei em im vou faodam dam zi nimti um ahebu eho Kristus bake tu vuzehi meedam bakti ulohona uho neo modem bake eho ozahit, ‘Dam nim Oho modi Kristus bake tu vuzehi meedale,’ lahame eho Ala bake tom gagodam bak. Bisi damat em si bes botehà niz eba vààudaha bakti ulohona gagom kaio,” lahame Paulusat ab gagoham.
30. Labi Paulusat etei lab vameadaha im lam aime modeha ame Boehàda Agripa lamti am nà Bernike lamti labi Gubernur Festus lamti labi dam totbaho zi lamti labihasu ahebu ab usnadamam.
31. Usnadume im vameadam num tom fi haba lam vou esmozi futodam labe im ot vameaida. “Ame da lam faina modehe bak vabna ba akati iho meo dam gagome meit faina modehezobe si oumahedam num laba am ousulo vameada. Otelo vameada. Lahadàla?” lahame futodam labe im ot vameaida.
32. Labihadume modeha Agripa labe fa Festus bake ab gagoham. “Ame da nim aho amu neha, ‘Kaisarleheda laba le aho aba uloome aise,’ lahame gagoho bak lam modem vabameam làhà oho ame da nim gi isi olum neàdehe bak. Lahana ame da nibe amu, ‘Kaisarleheda laba lase,’ lahame gagu vàhàdehe labe ba isi olum biehe bak. Abo olum bak,” lahame Boehàda Agripa labe fa Festus bake ab gagu esuham.
1. Labihadume gubernur labe am im ot vai meedam boehà dam labe ozo, “Iho Paulus ve sue baa vààsu nutabet vou lam ihe buduada laba ousu afoezobe Italia bak labe Kaisarleheda labe aho azi meedam num debu Roma laba vou lam bak ab vou fuhame?” lahame ahu vàmadi Festus am meo dam laba gagome Paulusti ame sel laba bakamta oumahedam dam totbaho zi lamti im sel labe vou futodume fa ame meo dam seratus vuusuhu im vameadamda boehàda donida meida Yulius laba ab ub lodaham. Yulius aba aho vuusdam meo dam seratus lam damat neha, “Kaisar Agustus labe im abada meedam meo dam debu totbaho am,” lahame gagodam bak.
2. Labi Paulusti ame sel laba bakamta oumahe dam totbaho zi lamti Yulius bake ub lodahemu aho am meo dam zi neo gagome im vou ladume ame nutabet vou lam ihe feàda niba ab vou ziddaham. Ame ihe nim num debu Adramitium laba azihi dam labe im ihe Kaisarea niba vou lehena fa Asia bak labe valau modealadaha num debu laba vou lalo modem ihe niba Paulusti dam totbaho lamti ab vou ziddaham. Dat ee gagom Aristarkus lahamda Makedonia bak labe am num debu meida Tesalonika laba azimda nimti em Lukasti fa Paulus bake gi vi tau ame ihe niba ab ziddaham. Ame ihe niba ziddaha dam ahebu gagom di abo dua ratus tujuh puluh enam ehete. Laham dam zi nim iho ame ihe niba ziddume vihitoi Kaisarea nim vou esmozi ab ladamam.
3. Labi ladume izi dihasi itea feàna am valau obe modesum num debu Sidon laba im ab lafuham. Labi Sidon laba lafusi vao obe laba tu modeha Yuliusat Paulus bake im neà bak ab gagoham. “Om vou alem dam Sidon niba azihi dam laba le na oho valo ozohoda lam le vam neàte,” lahame gagu neàdi ame baket ab modeham.
4. Labi modeme neàdi ame ihe neo ziddume itea tombu aamte biolo meeda. Lahana ladam di labe nutabe fai iba feifeidam labe ihe oke okeda. Làhàmu Siprus touha labe tohesu gi itea valau obet lada.
5. Labi ladume vou fi ozi itea tombu labe neo Kilikia bak lamti labi Pamfi lia bak lamti ot netàdiaha bak laba ab ladamam. Neo ladume Likia bak labe am num debu meida valau obe laba modesuhuda laba ab lafuham.
6. Laba lafusi modeha im vou lehe ihe nim fa bak mei bake lalo modem ihe modemu ame meo dam seratus vuusuhu im vameadamda boehàda donida Yulius labe mu fa ihe meidate abo Mesir bak labe am num debu meida Aleksandria labe fa Mira niba lehena fa Italia bak laba lalo modem ihe laba am Kirene Sidon Salmone Lasea Regium Sirakusa Putioli Roma Kaisarea Mira Feniks KAUDA MALTA AKAYA LAUT TENGAH YUDEA SIPRUS KRETA ASIA KILIKIA ITALIA MAKEDONIA ,
300. Kilometer LIBIA U PAMFILIA Forum Apius Aleksandria SISILIA LAUT ADREA LIKIA KNIDUS Ihe Tum Neàda meo dam gagome im fa ab vou ziddaham. Labi vou ziddume neàdi im Mira ab vou esmoham.
7. Labi Mira vou esmozi neo ladam di labe nutabet im ihe osi fa vou leda. Labi fa vou lada. Lahadam labe taho lam bili usi totbaho lam gi vao tom laba labiha lada. Taho fi tu lam kai. Gi labihasu ladam labe Asia bak labe am zoho itea auobe modesuhu num debu Knidus laba tet ab lafuham. Labi laba lafusi neàdi Knidus neo labohoti ibi iho lam bak ozome lasome modeha nutabe fai bisi im ihe niba felidam labe im lam bi ihe gi doudàmu gi mu fa bak mei bake lam bak ab ozoham. Làhàmu neo ladam labe Kreta touha labe am busbe zoho labe fi bovai nutabe felidam vabak laba ozome Salmonebus labe tuou gi vao auobet lada.
8. Labi Kreta labe am vao auobe labe ladam di gi betea tet ladume vao auobe damat ihe tu doit ot loiam nazoh valadam num debu ee gagom Ihe Tum Neàda lahame taluhu bak laba ab lafuham. Ame Ihe Tum Neàda lam fa num debu Lasea laba ot netàdiaha baket moz. Laham bak laba ab lafuham.
9. Iho ahamte lehe zoho ium betea lehe labe usi tamehodi kehàdam labe itea fa nutabe duali vao fi tauledume bubaholem di fuhemu ihet lam biem bak ab ozoham. Ozahit nutabet vou lam ihet ladameam mei beom bak labna zohàme lam biem bak ab ozoham. Làhàmu Paulusat dam vou faovoi ame nutabet vou lam ihe buduada nim vou ladam bak ozobohu dam ihe dedam niba ab gagoham.
10. “Ba oa, nutabe felidam di iho ozahit ladameam làhà iba nutabe fai labet belu umti uho bak iuba le ot loidalo modem nazoh zi feà nimti um ihe nimti im dam ahebu nimti vaot belu seddamo? Imo gi feidase.”
11. Lahame vou faovoi mali ame ihe vou ladam dam laba gagu modeha ame meo dam labe im boehàda Yulius labe vedi Paulusat lab gagoho bak lam ailahigeàmu vedi fa ame ihe deda lamti ame ihe laba dam bake im vameame faheme modiamda kapten lamti laham dam behàsu labe ibi iho ozoho bak laba vuzehi ab modelo meedamam.
12. Labi im dam dua totbaho labe laha nehi ozo, “Nutabe fai duali vao fi tauledume bubaholem di fuhemu im ihe iho etei lefuhu Ihe Tum Neàda niba doudam faite. Niba doudameam im beom bak. Nasi ame ihe nim lam bak mali valo nom voou aulemna asimbuna bes vi vààsuhunabu amu valo nom voohona lam fa vi vihitoi iheba esu neo ladume fa Kreta labe am valau obe modesuhu num debu Feniks labe am tuoho bak abo neà bak laba le doudam neàte. Laba le doudume nutabeti vao bubaholem bak lamti fa seddume bagavai neàdehezobe neo ladase,” lahame ozoho labe ame baket ab modelo meedamam.
13. Labi ame di labe nutabe fa ba totbaho abo selatan labe koena foodam labe ame ihe nim vou lam bak ozobohu dam labe ozo, “Ibi iho amu ozome esuhu bak lam Feniks laba lam bak etei lam neàdehe taia?” lahame ab ozoham. Làhàmu ame ihe labe nom voou aulemna asimbuna bes vi vààsuhunabu amu valo nom voohona lam fa vi vihitoi iheba esu Ihe Tum Neàda nim vou esmozi gi ame Kreta touha valau obet vou lada.
14. Gi etei vou ladume modeha kehàm vaba nutabe fai ala zizem labe lehedati Kreta touha ba tot labe lehedati fa vazisi im ihe niba gut beodam labe ihe ab oke okedamam. Ame nutabe fai lam damat neha, “Ala Zizem Bak Labe Lehe Nutabe Fai,” lahame taluhu nutabe labe iba ab beodamam.
15. Ame ihe vou ladam dam labe im ihe nutabet ledam bak laba vamdesu lasome modeha vanamai nutabe fai lamti aba fai lamti im ihe laba belu odosi veiodam labe fa bak mei bake ab vou ladamam. Ame dam labe iho vamdedaha modem biehemu gi nutabet lab vou ladam bak laba im gi vou faoda.
16. Labi nutabe fai labe im ihe vou ladam labe touha koena Kauda laba nutabe lem koena tuom bak laba ab vou ladamam. Vou ladam di labe ame ihe vou ladam dam labe iho ozo, “Nutabe lem koena tuoho bak niba imo im ihe koeda ihe duada tahabu vààsuhuna visoi iheba niba esuse,” lahame ihe lam si vousasome modeha vanamai meeda.
17. Lahana ozahit ame ihe koeda lam tet siàdume vousai ihe duada niba ab esuham. Labi esu neàdi lo visoi ihe duada gau ad laba vou dalu futoi vou dalu futoiame ab giaham. Im ihe ke gatbu vao ad laba modesuhuna laba beome ihe gau fegube vàhàdem bak labna zohàme mali ihe gau teudelo loat ab giadaham. Im ihe gi nibe vaot vou ladameam git le Libia bak ot netàdiaha touha ee gagom Sirtis labe am valau obe mahate vao tamzoho vab labe vao ad iube modesuhu itaeba tousuhuna laba tu teudem bak labna zohàme mali neo nutabet felidam di vou ladam sue baa lam fa vi ziamoi bolome iheba ab esuham. Labi sue vabalehe labe ihe lam gi nutabet ahamo vou lada. Labi im gi vou faoda. Labihada.
18. Labi nutabe fai lamti vao bubaholem bak lamti iba bisteat beodam labe im ihe gi oke okedam bak lahasuhu labe izi dihasi ame ihe vou ladam dam labe iho ozo, “Iba nehadume ihe asimbuli valo temna ozomo?” lahame ozoho labe im nazoh bak iuba le ot loidalo modem nazoh zi totbaho lam vame valo voeda. Labi ozoha, asimbu lahasuhemu neo visomoame valo voeda.
19. Gi labihadume neo izi dihasi nutabe fai lamti aba fai lamti vaitoi setem vabamu vi ozoha, asimbu lahasuhemu ame ihe lam vabiem nazoh totbaho fàsi neo vame valo ab voedamam.
20. Ame nutabe fai lam taho vaitoho vaba bohu vuusdam labe usi ab dualeham. Labihasu meedam di labe asum ulot baguamdi ala fauhalem bak lamti falo zi fauhaedam bak lamti ba aam kai. Gi vabi sete. Labi iho lam bak lamti, “Im akatihasu bake doudàla?” laham bak lamti im ab vabileham. Gi itea tombu bak laba nutabe fai lamti vao bubaholem bak lamti im ihe nim beodume oke okeda. Labihadume modeha iho ozo, “Im beodume elodam bak ab fuhamna ozomo? Ba meit iba vi nabime aame vi atem vabna ozomo?” lahame im ahu ab faidedaham.
21. Labi ame ihe laba ziddaha dam labe im beom bak iedi na àhà vaba usi dualehe labe Paulusat usai dam tombu laba duzu im ab vameadamam. “Ba oa, eho amu iho num debu Lasea labe am valau obe laba doudam lahasuhu di uba nehi ab gagoham bak. ‘Im ihe Kreta touha laba a vou esmozi neo ladamule,’ lahame mali gagoho bak am bak. Um eho amu lab gagoho bak lam vuzehemeam làhà ba nehi modemom vabak. Nutabe fai lamti vao bubaholem bak lamti labihasu im iheti nazohti etei nib beodàmom vabak.
22. Lahana li vàhàdehena gi labihasule. Imti umti ba beom kaio. Ahedem bak. Gi iheta beo tame. Labihàmu bisi ahu a faidemule. Um ahu nasi vei neàdi teudedale. Nehaha labe em ozobohudehe bak.
23. Màt aibu labe eba vuusdam Ala abo eho vou baedam Boehàda Ala labe Am im gagu vou usemda meida utasi eba olu em obe niba duzu im vameadamna eho aaho.
24. Ame da labe eba nehame vameada. ‘Paulus oa, om a iedi ahu faidi vi ozodamule. Gi teudi vou faodale. Om ba vaot beom vabak. Om ba Kaisarleheda labe aho avaesdam laba le duzu ot avaesuiame aho oba uloome ailo modem bak. Om nasi modi elom vabak. Labi Alat oba aame faobekem labe omti ihet ladam dam totbaho lamti ahebu laha ba elodume seddam vabak. Gi ahe lahasdam bak,’ lahame em obe niba li duzu im labihasu vameame neàdi setehena eho aaha bak.
25. Labihàmu um bisi a ahu faidedamule. Gi ahu teudedume vou faodale. Ala labe Am im gagu vou usemda labe eba vameaha im lam, ‘Alat ba imbode tame,’ lahame em vuzehehe bak. Làhàmu um ahu teudedume vou faodale.
26. Lahana im ihe touha mei bake vou le vao ad iuba modesuhu itaeba tousuhuna laba tu teudi ihe beom bak ehete,” lahame Paulusat ab vameadume esuham.
27. Labi ame nutabe fai labe im ihe neo vou ladume usi empat belas fusi aibu labe gi Adria itea laba vou lada. Labi vou ladam labe ame aibu neiso labe ame ihe vou ladam dam labe iho ozo, “Tum bak fuseo vabaehena ozomo?” lahame ab vi ozoham.
28. Làhàmu ame dam labe ibi iho vao nom ulohomna abo loso laba na asimbuna vààsuhuna visoi valo nom voou ulohoha abo empat puluh meter lo laba toehe bak vao laba novaha bak ab aaham. Labi koena neo laha faobe neo valo nom voou ulohoha abo tiga puluh meter lo laba toehe bak vao laba novaha bak neo ab aaham.
29. Labihadume modeha ozo, “Soo! Iba nutabet nehadume ke gatbu vao ad laba modesuhuna laba im ihe belu fegube imti beomna ozomo?” lahame iedi ame ihe vou ladam dam labe ihe ladam bak mali na asimbuna niz ihe laba vààsuhuna empat lam fa visomoame ihe tahabu labe valo nom voedume auleda. Labi ame ihe git ohulaesum bak fa vamdem vaeme lam loat giame esu. Labihadume neàdi auledume ab doudamam. Labihàmu damat, “Nohu taho aase. Dihasi fauha neàdele,” lahame gagodam labe ooteda.
30. Labihadam labe ame ihe vou ladam dam labe ihimo vi ozo, “Imo dam vou esmozi ihe koeda visoi aa vou itase. Labi dam nim fà ihimo vaot beose,” lahame labi vi ozome ahi neà damali, “Im laha na asimbuna ihe ohu zoho niba esuhuna visoi valo nom voolo mozo,” lahame iba ahi vageme ihe koeda lam aa visoi valo ab nom esulo meedamam.
31. Lahana ame lab meedam bak lam Paulusat vi aame fa meo dam labe im boehàda Yulius lamti am meo dam lamti laham dam laba ab gagu fi deham. “Dam lam ihe buduada nim vou esmozi ilimeam làhà im dam ahebu foli seddam bak. Taho, ‘Feidate,’ lahame gagole.”
32. Lahame labi gagoha dam lam gi etei ihe koeda nom voou vousdàmu ame boehàda nibe am meo dam gagome vi fi ai ame ihe koeda laba vààudaha lo lam fi kbodume ihe lam valo ab subti vaot ab vou le seteham.
33. Labi aibu bak lam dihaseo modem labe Paulusat neo dam laba vi vabededam labe vameada. “Um nasi na àdale. Um abo iedi vou faodam labe ahit na àhà vaba gi ihi usi abo empat belas ehe labe alihi ab nemahuham bak.
34. Um idoalem bake na nasi àdale. Um ba bedalem vaba ahedem bake na di nibe àdale. Neham bak. Um ba meidavat valo tezi elodam vabak. Um so lam ba ulasi totbedem vabak. Abo dam ahebu zituadume ahedem bak.”
35. Lahame Paulusat labi gagu neàdi damat aasdahit aho roti ve Ala bake, “Oho na nim modehe bak abo neàte,” lahame tom gagu neàdi roti lam aguti ab àdamam.
36. Labi modeha dam totbaho ahebu Paulusat lab meedaha bak lam vi aahemu im ahu fa vei neàdi ame na lam dam vahi ab àdamam.
37. Im dam ahebu ame ihe labe ladam dam zi lam gagom di abo dua ratus tujuh puluh enam ehete. Lahana na vahi ab àdamam.
38. Na àdume dedebuli neàdi ame gandum ahum iho modeme àdamna lam ihe laba vahehena zi lam ame ihe vou ladam dam labe ozo, “Ihe bisi asimbute. Fà dehabalese,” lahame neo vame valo ab nom voedamam.
39. Labi dihasi ala faasi neàdi dam ame ihe vou ladam dam labe dum vi aaha nohu ab vi aaham. Lahana, “Ana touhat modela?” laham bak vabiem lahasuhuna vi aa. Labi vi aasdam labe aaha itea oula kebe fauhana baa bak ab vi aadamam. Làhàmu ozo, “Im ihe itea oula laba olem bake imo ihe taho vamdedume vou fi tu vao auobe itaba fauha aadam bak laba tu teudese.”
40. Lahame ozome ame ihe vou ladam dam labe ihimo faheme dam totbaho labe ame ihe aulemna zi lam fi kbodume gi itea laba voedume ab vou esmoham. Labi ihe oula laba vou olelo modemu dam totbaho labe neo ame ihe git ohulaesum bak fa vamdem vaeme ihe tahabu laba amu loat giahana lam fa ab vi ziamoham. Labi neo ame dam totbaho fàsi ame ihe omtobe laba nutabe felime ihe vou lam sue fa ab vousaham. Nutabet foodam labe im ihe oula vabak laba vou lam bak ozome ame sue baa lam ab vousaham. Labi vousai neàdi ame dam labe im ihe lam ab vamdedamam.
41. Labihasu meedume modeha vao nobu vabak laba git le vao ad iuba modesuhu itaeba tousuhuna laba gitadi ab tu teudeham. Labi teudi lam bi meedam labe vao fi tauledume bubaholedam labe im ihe tahabu vaot ab beodume fegudamam.
42. Fegudam di labe ame meo dam labe ozo, “Dam iho amu sel laba oumahedaha dam zi nibe valo goaitoi valo vouome vabake zituadume ilidam bak labna zohàme nasi di nibe oddase,” lahame ab ozoham.
43. Lahana ame meo dam labe im boehàda Yulius labe Paulus gi ahena vou lalo modemu am meo dam laba ab gagu maleham. “Uho etei ozoho bak lam a meedamule,” lahame ab gagu maleham. Labi mali aho neo dam bake nehada. “Dam valo voum meo dam nasi valo nom goaitoi vouome zituadale.
44. Labi dam vao voum gikida ihe gaheba fahehena niba taualame vi vouome zituadale,” lahame gagu im ame baket meedume im dam ahebu ab zituadaham. Ba meida valo tehe vaba im ahe neà ab zituadaham.
1. Labi im ahebu ahe neà zituadume neàdi iho dam bak dedam laba gagu aiha dam labe, “Im bak ee gagom Malta lahame taluhu touhat moz,” laham bak iho ab aiham.
2. Labi dam bak dedam labe iba gut aame neà baket meeda. Im abaa fait beodam labe im nutahalehemu ame bak dedam labe vuali vua vahume eludamzobe iba, “Lele,” lahame gagohemu im ladume vuaga ab fi ddamam.
3. Labi Paulusat neo vua vahum bak ozome ozbaso ehe ia zi vabi vààteme visoi vou li vua laba ab vahudamam. Labi modeha ame ozbaso labet vua gait aba ulahemu futoi Paulusam anekehà laba ab zagusuham. Lahana Paulus ame mum lam ba fi di vaitom vabak. Gi aba zagusdam bak lahasu modesda.
4. Labi modeha ame bak dedam labe ame lab modehe bak vi aame dam ihimo ab ot gagoi ot gagoidamam. “Soo! Ame da nim mei oddam dàt mode moio? Amu itea vao bubaholem bak iuba beoho vab labe ibi iho vou baedam nam alalehena ee gagom Uloodume Aime Neàdi Gagom Nam laham alalehena nibe ab beodamam taia? Ame da nim elom bak malehe vaba ab beodamam taia?” lahame ab ot gagoi ot gagoidamam.
5. Lahana Paulusat aho am anekehà fi deamdeha mum lam vaitoi vua laba ab biteham. Labi Paulus gi na modehe vab dàt doudamna ààmu gi gem vabna ab doudamam.
6. Làhàmu bak dedam labe neo ozo, “Ame da nim gi kehàm vaba dedai feà bak fusi biti elom bak,” lahame ozodume vou faodaha ba ame baket modem kai. Ba ibi iho ozoho bak modehe vaba gi fa vei neàde. Fa vei neàdehemu ibi iho amu ozoho bak lam fa veimdi ab gagoham. “Vabà! Da nim gi ibi iho vou baedam alalehena meida modem bak,” lahame meit gago. Meit gago. Lahada.
7. Ame bak lam meedam di im gi dat ee gagom Publius lahamda labe am utoho zi bak laba netàdi meeda. Ame touha laba azim dam labe im boehàda aabo labe am im ot vai meedam dam labe meida bisi feàda Publius am. Lahamda labe iba faobekesi neha, “Am num laba lele,” lahame iba labi gagohemu im uledi am num laba ab vou ladaham. Vou ladume Publius iba na lodume àda. Labi am num laba im gagome idda. Labihadume usi ab làteladeham.
8. Ame bak lam meedam di labe Publius labe am ai so gaili asum kikezi haeholi vaseati viedamna bisda. Ame bak lam gi dihasi mode dihasi mode. Labihadamna bisda. Làhàmu Paulusat ame da labe bisdam num laba oli Ala bake tom gagodume neàdi am anekehà da labe am so laba ulasi modeha fa ab neàdeham.
9. Lahaha bak lam ame Malta touha laba azim dam bak dedam labe aime ozobohudi dam faidi nisileheda ahebu Paulus bake ab valadamam. “Im laha Paulusat uladdume fa neàdedase,” lahame ozome Paulus bake ab valadamam. Valadàmu Paulusat uladdume fa ab neàdedaham.
10. Labi iho Malta touha laba neo vi esdume ala làteladi neo lalo modemu sue baa vààsu nutabet vou lam ihe buduada amomoi ab ziddalo modemam. Ame ihe lam amu num debu Aleksandria labe fa Malta niba lehe ihet moz. Ame ihe dedam labe ibi iho vou baedam alalehena tasbana behàsu Kastor lamti Poluks lamti im itolehena behàsu ame ihe omtobe zoha laba modesuhunat moz. Nutabe fai lamti vao bubaholem bak lamti meedam lahasuhemu faobe vabalehezobe neo lalo modem bak ozome vou faodam ihe am. Laham ihe laba im ab ziddalo modemam. Labi ziddalo modem di labe ame bak dedam labe iba deeli, “Abo neàte,” lahame ahu adat iedi iba vou baedalo meedam labe iba na duana ab vi lodamam. Labi im nutabet vou lam ihe buduada ziddume neo ladam bak fuhemu ame bak dedam labe im na àmda zi iba vi lodume iho iuba ladam di labe doni bake vou à ladamna zi lam vou ledume iho etei ziddalo modem ihe niba vahedume ab modi ahumdi neàdi esuham.
12. Labi iho ziddume Malta touha vou esmozi neo ladume Sisilia touha labe am valau obe laba modesuhu num debu meida Sirakusa laba lafusi douda.
13. Labi doudume usi làteladi neo lada. Ladam labe gi Sisilia touha labet am valau obe labe lada. Labi ladam labe Italia bak labe am valau obe modesuhu num debu meida Regium laba ab lafuham. Laba lafusi izi dihasi modeha nutabet iho lam bak niba ab vi foodamam. Làhàmu nutabet lab vi foodaha labe im gi kehàm vabna iho lalo modem bak laba fi tudume dihasi Italia bak labe am valau obe modesuhu num debu Putioli laba ab lafuham.
14. Putioli laba lafusi zituadume aaha imti Yesus bake tu vuzehi meedam damti uloho dam laba ab tàham. Labi ame dam labe im totbaho niba nehame gago, “Um Putioli niba abo num ibida niba tau azibe usi tujuhli neo ubu uho lam bake ba lale.” Làhàmu em Lukasti Aristarkusti Paulusti iho ame baket ab modeham. Labi usi tujuhli neàdi im ba iho lehe ihe laba fa zim kai. Im num debu Roma laba lalo modemu meo damat im gi naot ab vou ladamam.
15. Ame di lam imti vahi Yesus bake tu vuzehi meedam damti ulohoda Roma laba azim dam labe meit gagohona aiha iho Roma laba ladam bak ab aiham. Aihemu dam zoho doait li num debu meida ee gagom Doni Labe Im Num Làtela lahame taluhu bak laba esu iba gut vou faoda. Labi dam totbaho doait li num debu meida ee gagom Na Ot Loiam Bak Tomba Apius lahame taluhu bak laba odosi iba gut vou faoda. Labihadume gut vou faodameam aaha im vou ledume ab vou fuham. Labi Paulusat ame dam lam aahemu deeli Ala bake, “Oho em vuusu dam niba vou fuhu bake Om abo neàte,” lahame Ala bake ab vou baedaham.
16. Labi iba doait lehe dam lamti im Paulusti vahi meo damat im Roma laba vou ladume im ab vou lafusi neàdeham. Labi im Paulusti Roma laba lafusi modeha ame meo dam labe im boehàda donida labe Paulus bake fa zisu vou ladamda Yulius labe Paulus damat amu sel ousuhu di labe modehe bak lam ba sel ousuhu vabak. “Gi ahamo ozome azim neàte,” lahame gagohemu Paulus num aho azimda laba le ab aziham. Labi meo dam meida utasi, “Paulus bake vule vi tau azi vou aasdale,” lahame ame meo dam labe im boehàda labe labi gagohemu ame meo da labe ame baket ab le meedamam. Ame bak lam meedam di ba digat meida vooho vabak. Gi digat ahebu meedam tade.
17. Labi iho Roma niba lefusi azibe usi làteladi modeha Paulusat ame bak laba azim Yahudi dam busaoda im ozobohuda zi laba gago, “Um num ebeda niba ledume imo vahi im vameadase,” lahame ab gagome vahe vahedamam. Labi vahe vahedume neàdi Paulusat im ab faasi vameadamam. “Ba oa, em Yahudi dam totbaho oa, eho Roma niba lehe bak uba vameadase. Nehaha bak. Im tai ahamda Israel labe aho vou faat lehe dam em Yahudi dam totbaho laba eho git modehe bak kaio. Labi laha ibi iho Yahudi damat im fi hamda ziti im fi ham vabda ziti Alat aham di iube im tai Musa bake gagu aho toedume fi hasi esuhu Im Feàna lam abo damat vou vamea usehe im lam eho mu voou setehe vabak. Eho ba vàhàdeme setehe vaba meedam lahasuhu bak. Lahana kota Yerusalem laba azim Yahudi dam busaoda zi labe em si fa meo dam labe im boehàda aabo laba ub lu ame boehàda labe am meo dam gagome em neo si meit faina modehemu si oumahedam num kota Yerusalem laba em ab ousuham. Ousu modeha vabamu neo vou le Kaisarleheda labe am im ot vai meedam dam Kaisarea laba azim dam laba em neo lu sel lada laba neo ab ousuham.
18. Labi ame sel lada laba ousdam di labe ame Yahudi dam busaoda zi labe amu eba neha, ‘Em git modeho,’ lahame vàluhu im lam, ‘Imbo?’ laham bak ame Kaisarleheda labe am im ot vai meedam dam labe eba iademe uloome vi aiha em im fai bak modehe vabna ba em otem biehemu ame dam feàda labe em isi olum bak ab ozoham.
19. Lahana ame Yahudi dam busaoda zi labe ame dam feàda labe gagoho bak lam ailahigeàmu mali eba neo vi vàlu vameadam labe odosda. Làhàmu ame dam labe eba uloodam bak neàdi vaitom vabamu eho, ‘Num debu Roma niba li Kaisarleheda labe aho eba fà uloodume aime neàdese,’ laham bak ozome Gubernur Festus bake gagu vàhàdehemu em ab vou leham bak. Lahana em ba em Yahudi dam totbaho Yudea bak laba azim dam laba im vàlu vameadamna kaio. Em gi, ‘Eho ame im modem kaio,’ lahame veibalo Kaisarleheda niba ab leham bak.
20. Ame im lam modehemu eho uba aasu im vameadalo modem bake ozome um gagome ab vahe vahedaham bak. Damat em sihi bak nehame ozome sihi bak. ‘Alat Aho Gagu Fihasi Vimteme Olulo modem Boehàda ba le tame,’ laham im lam Yahudi dam ahebu tu vuzehi vou faodamda lam eho neha, ‘Yesus ame Da am tame,’ lahame eho tu vuzehe labe damat em si ousu ab vou aasdamam bak.”
21. Lahame Paulusat labi vameadahemu ame dam labe vahi fa gago, “Oho etei lab vameadaha bak lam im biem bak. Yudea bak laba azim Yahudi dam labe, ‘Oho faina modeho,’ laham bak lam sunit toeme iba oluhu vabak. Labi imti Yesus bake tu vuzehi meedam dam totbaho abo Yudea bak labet lehe dam labe iba niba li neha, ‘Om faina modeho,’ lahame oba feàtàdam bak lam im laha aihi vabak. Labiha labe im vabili modem bak. Gi oho etei lab vameadaha bak lam im etei alimeat ab aidamam bak.
22. Lahana obo oho vuzehi meedam im lam, ‘Akatihasu modem imot modela?’ laham bak im biem bake oba ailo. Iho neham bak ozoho labe oba ailo modem bak. Dam amomoi bak iumti dam amomoi bak iumti laham dam labe oho amu lab vou vameatedaha im lam aime tu vuzehi meedam dam laba faki feàtàdamna iho aihi bak. Labiha labe obo oho vuzehi meedam im lam, ‘Akatihasu modem imot modela?’ laham bak im biem bake oba ailo modem bak.”
23. Làhàmu ame Yahudi dam busaoda zi labe, “Im ana digat fa Paulusti vahe vahedume im lam aie?” laham bak ozome ame digat lam ab gagu esuham. Labi faobe ame gagu esuhu digat fuhemu ame Yahudi dam feàda zi Paulusat aho azim num laba ab valadamam. Dam amu vazisihi di dam koet. Lahana dam etei Paulusam num laba vazisihida abo feà bak fu. Ame dam zi laba Paulusat dihambet im ab faasi vameadamam. “Alat Ahamo Boehàdateboli dam bake deeli vame Am damali vuusu Im Vahokedam bak lam, ‘Akatihasu modemna modela?’ ” laham im lam ame dam zi labe im biem bake ahate vameadume fi gatedume ab vou disiham. Gi im lada lamota vameadaha vabak. Aho neo ibi iho Yahudi damat im fi hamda ziti im fi ham vabda ziti Alat aham di iube im tai Musa bake gagu aho toedume fi hasi esuhu Im Feàna lamti dam ahamda Alat vameadaha im aime fa dam bake ahate vameaidaha dam zi labe iho toedume esuhu im lamti labihasu toeme bolome esuhu Alam im lam aame dam bake vameada. “ ‘Alat Gagu Fihasi Vimteme Oluhu Dat Boehàda ba olu tame,’ lahame fet vameadaha im lam imbodi Yesus ame Da am bak. Aho ab li meedaham bak. Labihàmu um mahate ame Da Yesus laba tu vuzehi meedale,” lahame ame dam zi lam aasdahit ab ootedume vameadaham.
24. Labi vameadume modeha ame Yahudi dam totbaho labe Paulusat lab vameadaha im lam, “Imbote,” lahame ab vuzeheham. Lahana ame Yahudi dam totbaho labe ba vuzehem kai. Vedi gi tozome mouda.
25. Làhàmu Paulusat aho ame dam nibe Alat gagoho im lam aim mu odohali meedaha bak lam ozome ame dam zi labe etei lalo modem di labe im meida nehame ab vi vameadume novalo modemam. “Am bak. Alam Aha Nutabe Neàna labe amu dat ahamda Alat vameadaha im aime fa dam bake ahate vameaidahada Yesaya laba modi vizi teudehe labe im Yahudi dam bada nibe im tai ahamda laba vameadaha bak lam um etei ame bak lam laha ab meedamam bak.
26. Alat aham di iube Yesaya bake neha: ‘Oho om Israel dam totbaho laba le nehame vameadale. “Uho Em im uho aim bakta ai. Lahana, ‘Uho etei aihi im nim akati modemna modela?’ laham bak lam ba fetehesu vi ozome ozobohudedam vabak. Labi laha uho Ebe Eho meedam bak lam aam bakta aa. Lahana, ‘Uho etei aaha im nim akati modemna modela?’ laham bak lam ba vi ozome ozobohudedam vabak,” laham im lam oho om Israel dam totbaho laba vameadale.
27. Ame dam labe amu nehaha labe oho ame im lam ame dam laba vameadale. Ame dam labe ihimo ahu tamzohobuli im Ebeda ba ozobohudem biem damat modem bak. Labi laha ame dam labe im dogoi faidi ba im Ebeda aim biem bak. Labi laha ame dam labe im fako faidi ba Ebe Eho meedam bak lam ba aam biem bak. Labihadam labe ahusobulehe damat modem bak. Lahana dam lam ame bak lam modem vabameam dam lam im fakot gi fa Ebe Eho meedam bak vi aada. Labi dam lam im dogoi ulaihàbulehe vaba gi im Ebeda vi aida. Labi dam lam im ahu im Ebeda vi ozobohudeda. Labiham labe ame dam labe iho faina meedam bak lam voedume fa ahu neà bak vàmadi Eba tu vuzehedàmu Eho beolo meedam bak lam fa mu soat vausu fa vei neàdedam bak.’ Lahame Alat amu Yesaya bake vameame ab esuham bak.
28. Lahana Alat im tai ahamda laba, ‘Nehame meedale,’ lahame gagoho bak lam damat odohali aim mu meedam bak lam um Yahudi dam badat laha gi ame baket neo laha meedam damat modem bak. Labihàmu uho Alat ba modem bak lam um biem bake eho uba ab gagolo modemam bak. ‘Alat meia soat vausu fa vei neàdem bak akatihasu modem labe neàdela?’ laham im lam meit ba uba Yahudi dam bake vou vameatedam vabak. Fa dam Yahudi damat modem vab dam debu iudu iumti iudu iumti laham dam laba vou vameatedam bak. Dam lam ba mom vaba abo uledi meedam dam am bak.” [
29. Ame Yahudi dam zi labe Paulusat gi etei lab vameadaha im lam aime modeha ab otesi otesidamam. Meit neha, “Imbo bak.” Lahahat meit neha, “Giomim,” labihasu daet otesi otesidam labe fa faheme Paulus vou esmozi fa im num bake ab ladaham.]
30. Labi Paulusat Roma laba azim di aho gi damat iddam di doi lodam num meida laba azibehamdi dua tahun ab foleham. Labi aho ame num laba azim di damat aba li im vameadam di gi uledi, “Lem neàte,” lahame gagoda.
31. Labi laha im Boehàda Yesus abo Alat Gagu Fihasi Vimteme Oluhu Dat Boehàda labe Aho amu meedume vou esmoho im lam am num laba dam bake vameadume fi deda. “Uho Yesus bake tu vuzehi im Abada aime meedameam làhà Alat uba deeli vame Am damali Aho uba vuusu im vahokedam bak,” lahame gi meia iedehebeat vameadam vaba abo gi keàtet dam bake im lam gi dihasi vameada. Dihasi vameada. Labihada. Ba meit aba vabim bak vab labe im lam ab meedamam. Eho Lukasat toedaha im àhàm.
1. Um Kristus bake tu vuzehi vahi meedam dam abo num debu Roma laba azihi dam oa, eho Paulusat sunit nim toedume uba oluho. Em abo Kristus Yesus labe Aba Aho gagoho im uledi meedamda meida em am bak. Labi laha Alat eba neha, “Yesus labe Aba Aho meedaha Im Neàna lam eho fa vou vameatedale,” lahame eba gagu fi hasi esuhemu eho fa Kristusat Aho gagu olu Am im vameadume esmozi laiam dateli ab meedamam bak.
2. Yesus bak niba lehe vab di iube Aba Aho ba meedalo modem Im Neàna lam Alat aham di iube gi Aho vameadaha im aime fa dam bake ahate vameaidaha dam laba modi ozobohudi iho Alat Vameadaha Im Toedahana Aabo laba fet toeme vàmadi esuhu imot moz.
3. Abo Alam Adat im Boehàda Yesus Kristus labe Aba Aho meedaha Im Neànat modem bak. Ame Da labe im bakda aliholi faaha bak ozom di Am abo gi dat ahamdat Boehàda Daud vou faat leheda meida am. Lahana Aba Aho Alati vahi esdam ahoba iube fa bak niba lehe bak ozom di Am abo Alam Adat modem bak. Labi laha Alat Am feà bak lam fa Yesus Am eloho bak labet modi fa ahedi usahemu iho ozo, “Da lam abo Alam Adàt modem bak,” laham bak modi tombali im ab ozobohudeham bak.
5. Yesus Aba Aho eba lab modi fi zeam bitoho bak labet Alat ozahit eba deeli im neà bak ab modi esuham bak. Aho eba neha, “Im Abada vou vameatedale,” lahame eba gagu fi hasi eho ame im ab vou vameatedamam bak. “ ‘Ame Yahudi damat modem vab dam iho Boehàda Yesus bake tu vuzehi im Aho gagohoda lam uledi meedam labe Yesusam ee vousai vou baedase,’ lahame eho ame Im Neàna lam fa Yahudi damat modem vab dam abo bak iudu iumti iudu iumti ahebu vou vameatedale,” lahame eba fi hasi gagu oluhu bak.
6. Gi dam lamota, “Fà Em Adat Yesus Kristusti vou ali meedam labe Am damali Aho ame dam laba vuusu meedase,” lahame Alat amu fet ozome esuhu vabak. Abo um Kristus bake tu vuzehehe dam dua bak num debu Roma laba azihi dam lam um laha, “Ame baket meedase,” lahame Alat amu fet ozome esuhemu uho ame baket modehe bak.
7. “Eho uba im Abada vou vameatedase,” lahame eba gagu fi hasi esuhemu eho ame baket meedam dàt uba num debu Roma laba azihi dam ahebu abo Alat amu neha, “Am damalese,” lahame deeli fet ozome esuhu dam laba sunit nim toedume uba oluhu bak. Eho gi uba ozome neha, “Im Ai Alati im Boehàda Kristus Yesusti ahili uba ozahit deeli im neà bak modi esuidase. Labi uba modi um ahu faheme fi goaitom vaba gi vabademsuse,” lahame eho ozodume Ala bake labihasu tom gagodam bak.
8. Eho ahamte uba im nehasu gagolo. Uho amu im Boehàda Yesus bake lab tu vuzehi meedam bak lam eho num debu iudu iube gagodam bak ai. Num debu iudu iube gagodam bak ai. Abo Kaisarleheda labe aba aho vuusdam dam ahebu ai. Lahadam bak labet eho uba vi ozodam di eho gi Ala bake, “Am abo neàte,” lahame deeli tom vou baedam bak. Abo Yesus Kristus labe Aho iba lab meedaha bak laba vi ozome Ala bake deeli tom vou baedam bak.
9. Alat neha, “Em Adat labe Aba Aho meedaha Im Neàna lam oho dam bake vou vameatedale,” lahame eba labihasu fi hasi gagoho im lamota em gi ahu vàmadi vou vameatedam bak. Labi eho uba vi ozodam bohu meedam labe abo gi aibu diat modeo, digad diat modeo, um ee gagodume Ala bake tom gagodam bak. Eho uba ba giomim vameadam vaba abo gi im imbona uba vameadam bak lam Alata ozobohu bak. Labi eho Ala bake bisi tom gagodamda meida neha, “Eho uba ilahu le aam bake Alat uledemta Aho taho etei nibe modi em uba oluse,” lahame tom gagodam bak.
11. Em abo uba ilahu modem bak. “Alam Aha Nutabe Neàna labe Aho uba modi vizemna fà vizi teudese,” lahame eho uba tàhi taulo àhàki meedam bak.
12. Abo uho Yesus bake lab tu vuzehi meedam bak labet eba modi vabededume em ahu vi modi teudeda. Labi eho Yesus bake lab tu vuzehi meedam bak labet uba laha modi vabededume um ahu vi modi teudeda. “Gi labihasu ot vabdi ot vabdidase,” lahame em uba tàhi alihi aalo àhàki meedam bak.
13. Emti vahi Kristus bake tu vuzehi meedam dam oa, um biem bake um ahebu nasi ozomale. Em abo uba lesome modidaha naat ausidam labe uba lem bi modidalo. Lahana etei nim uba lem bak fota neàdehe labe fa uba lem bak ab vi ozodamam bak. Nehaha bak. Eho amu Yahudi damat modem vab dam labe ibi iho esuhu bak mei bak meime lahadume ame dam labe iho amu Kristus bake tu vuzehi meedam bak lam eho modi ame dam labe fa keàtedi meedam bak. Eho labihasu meedam bak lamti ulohona, “Eho etei fa uba le ame baket neo meedase,” lahame uba lelo àhàki meedam bak.
14. Em uba lelo ozodam bak ba mom vabak. Abo Alat eba gagu vàmadi esuhu bak. Abo Yunani dae vameadam dam labe ibi iho modi baleàhà im lamti ozobohu dam modeo, Yunani dae vameadam dam labe ibi iho modi baleàhà im lamti biem dam modeo, labi laha sekolah modeme ozobohudehe dam lam modeo, sekolah modehe vab dam lam modeo, labihasu Yahudi damat modem vab dam ahebu eho ame Im Neàna lam vou vameatedalo modem dam am bak.
15. Labihàmu eho gi amu di iube nehi ozo, “Eho ame Im Neàna lam uba num debu Roma laba azihi dam laba laha le vameadase,” lahame modelo àhàki ozome esuhu bak.
16. Kristus labe Aba Aho lab meedaha Im Neàna lam eho vou vameatedam di em ba ladehebeat vameadam vabak. Ame im lam feà imot modemu eho ozobohudi keàtet vou vameatedam bak. Neham labe labihaha bak. Meit ame Im Neàna lam aime fa Kristus bake tu vuzehi meedam labe Alat ame bak labet modi ame da labe aho faina meedàmu Alat Aho beolo ozoho bak lam fa mu soat vausu fa vei neàdedam im am bak. Abo amu nasi ame Im Neàna lam Yahudi dam bake vou vameatedaha di labe ame dam labe iho Kristus bake tu vuzehi meedàmu Alat soat vausu fa vei neàdeda. Labi ba neo Yahudi damat modem vab dam laba neo ame baket meeda. Labihadam imot modemu eho keàtet vou vameatedam bak.
17. Meit ame Im Neàna lam iba vameadam bak labet modi iho im nehasu ab ozobohudeham bak. “Iho akatihasu meedam labe Alat iba neha, ‘Im im vamdesu meedam damat modem bak,’ lahame ozahit deeli gagu vàla?” laham bak im biem bake iba modi im ab ozobohudeham bak. Iho gi Kristus bake tu vuzehi meedam bak labet modi Alat iba deeli vam bak am bak. Ba im amomoi modi Alat iba deeli vam bak na vabak. Eho gi Alat vameadaha im aime fa dam bake ahate vameaidahada labe aho Alam im ot vai nehi toehe bak laba ozome uba labi gagoho bak. “Alat neha, ‘ “Im vamdesu meedam damat modem bak,” lahame Ebe Eho ozahit deeli gagu vadam dam lam Eba tu vuzehi meedàmu Eho ame dam laba modi Emti vahi gi ahe neàna bohu vuusdam bak.’ ” Lahame labihasu toehena lamti uloho bak laba vi ozome uba gagodam bak.
18. Alat Aba Aho gagoho im lam dam bakda ahebu iho uledi meedaha vaba mu gi fai bak meedam bak ame. Labi neà bak vamdesu meedaha vaba faina meedam bak ame. Labihasu meedam dam lam Alat neha, “Beodase,” lahame faki gagu esuhu bak lam damat biem bake Aho gi asum ahoba iube dam bake modi ozobohudi ab fi gatedamam bak. Ame dam labe iho neà bak vamdesu meedaha vab labet modi, “Ala akatihasu meedam Alat modela?” laham im imbona lam im ozobohuna fa baguamdehe labe dam amomoit fa im imbo bak modelo ozodam bak lam fa ab ozome modem bieham bak.
19. “Ala akatihasu meedam Alat modela?” laham bak lam Alat gi amu dam bakdate modi ozobohudi fi gatehe labe etei dam ahebu ab ozobohu neàdeham bak.
20. Neham bak. “Ala akatihasu meedam Alat modela?” laham bak lam im biemnàme bak nimti na ahebuti alimeat modi debulehe di labet faasi bak niba modealahana zi nimti asum ahoba iuba modealahana zi lamti labihasu Alat modehena zi lam iho bak damat aham di iube faasi vou aa ledam bak. Labiha labe, “Aba Aho im feà bak meedam bak lam gi labaha bohu meedam Alat modem bak,” laham bak lamti, “Am akatihasu meedam Alat modela?” laham bak lamti im ab ozobohudeham bak. Labihàmu ba meit neha, “Em Ala biem dàt modem bak,” lahame ba labi gagom biem bak. Ab ozobohudi vàhàdeham bak.
21. “Ala akatihasu meedam Alat modela?” laham bak lam dam bakda ahebu ozobohunàme ba, “Imbote. Om abo Ala bisi feàda am tame,” lahame ba ahu adat iedi vou baedam kaio. Ba, “Oho iba neà bak modehe bak abo neàte,” lahame ba vou baedam kaio. Vedi ibi iho ozom bak lam ostame faasi Ala bake vàlu la gagoi le gagoidume vanamai mu voom im meeda. Labi im ahu aibuna ozohomu ba ame im imbona lam ozobohudem bi ab vabileham bak.
22. Vedi, “Im bisi im ozobohu dam im am bak,” lahamnàme ame dam lam gi ahusobuli meedam damat modem bak.
23. Vedi nehame meedam damat moz. Ba, “Ala abo feàte. Am Abo elom giki labe gi labaha bohu vuusdam Alat modem bak,” lahame vou baedaha vaba vedi gi na ostamna ve modi dam ekda aliholi, “Ala am tame,” lahame vou baeda. Abo bume modeo, nohubake azimna modeo, na sobosobomna modeo, labihasu ame na lam aliholi, “Ala am tame,” lahame ab vou baedaham bak.
24. Labihàmu dam bakda labe iho Ala imboda laba vou baedam mohemu ame dam labe ibi iho im ahu adat faina modelo àhàki ozodamna labet iba ootedume fi loholi ahate modem bak ba ladem vaba aam ahasbeam im ahebu meedam bak lam Alat gi, “Fà meedase,” lahame uledi ab aalahigeàmoham bak. Labiham labe ame dam labe bisi im imbo bak modehe vaba vedi ihimo fa ot modi ot modidume ab vàhàdedamam bak.
25. Neham labe labihaha bak. Ame dam labe vedi neha, “Ala nehasu meedam Alat modem bak,” laham im imbona lam ahit mu voou fa im giomimna laba fa vuzehi meeda. Vedi Na Debu Modeheda bisi feàda laba ahu adat iedi vou baedaha vaba vedi gi Alat Aho modehena zi laba fa feà damali ahu adat iedi ab vou baedamam bak. Bisi neà bak gi neham vaba? Na Debu Modeheda abo Ala bake vou baedam bohu meedam bak lam bisi neà bak am bak. Imbote!
26. Labihàmu bak damat Ala imboda laba vou baedam mohemu Alat faki damat ibi iho bak niba ahate modem bak ba ladem vaba aam ahasbeam im modelo àhàki meedam bak lam Alat gi, “Fà dam ibi baket meedase,” lahame mu ab ozahigeàmoham bak. Labiha labe bakda lahit ibi iho dat bake vi tauleme modeme baleàhà bak lam fa voou vedi lahit ihimo fa ahu gukeme ot modida.
27. Labi dam aabot laha ame baket neo meeda. Ibi iho lahi bake vi tauleme modeme baleàhà bak lam vedi fa voou damat ihimo modelo àhàki meedam bak labet fa ahu gukeme ot modida. Labihàmu damat ihimo fàsi ostame fi loholi ladem im ot modi ot modidàmu Alat faki ame dam labe iho faina meedam bak laba ozome Aho gi ulohona im so laba fa beodam bak.
28. Labi laha ame dam labe vedi neha, “Iho Ala bake vi ozodameam làhà im gi vanamai voomnat modem bak,” lahame im ahulat ba Ala bake vi ozodam vabak. Labihàmu ame dam labe ibi iho ostame ozome meedam bak bohu laba Alat faki, “Fà vàhàdedase,” lahame ab uledeham bak. Labi modehemu ame dam labe Alat malehe im nehasu ab faasi meedamam bak.
29. Im vamdesu modehe vaba vedi im fai bak mei fai bak meime meedam bak ame. Labi, “Nazoh dualese,” lahame meia mali soat ziemausi vadam bak ame. Labi laha, “Mei beose,” lahame ahu gukeme fai bak la modi le modidam bak ame. Labi laha na im meedam di gi ahu adat faki teidemoholi meedam bak ame. Labi laha ame dam labe im ahu gukeme mei otelo àhàki meedam bak ame. Labi laha, “Mei fà meolese,” lahame modi bohudidam bak ame. Labi laha meia vagemoholi meedam bak ame. Labi laha meia faki bisi fai bak la modi le modidam bak ame. Labi laha meit modehe im fa aime meia vameadam bak bohu ame.
30. Labi laha meia feàtàdam bak bohu ame. Labi laha Ala bake fakemoholi meedam bak bohu ame. Labi laha meia tozodam im meedam bak bohu ame. Labi laha, “Mei fa ahu faidi ladese,” lahame meia faki gagodam bak bohu ame. Labi laha aba it daetbadam bak bohu ame. Labi laha, “Fai bak amu modehe vaba alimna nim neo modi aase,” lahame la ozoi le ozoidam bak bohu ame. Labi laha im aiti oiti gagom im voedam bak bohu ame.
31. Labi laha ahusobuli faina ostame meedam bak bohu ame. Labi laha ame dam labe iho meia gagu vàmadi esuhu im fa faamodam bak bohu ame. Labi laha meia ahu deelem vabak bohu ame. Labi laha meia faobekesi taum mom bak bohu ame. Ame im zi lam labihasu meedam bohu meedam damat modem bak.
32. Ame dam labe Alat amu neha, “Im labihasu meedameam làhà Eho ame dam laba beodume eloda tame,” lahame gagu vàmadi esuhu im lam ame dam zi labe ozobohunàme vedi ozahigeàmu meedam bohu meedam bak. Gi fai bak lada lamota meedam vabak. Dam amomoit ame im zi lam meedam di lam vedi ame dam laba neha, “Ahole meedalo,” lahame vi tau uledi gagodam bohu meedam damat modem bak.
1. Ame fai bak meedam dam zi lam Alat Ahamo ozome vàlu gagome beodam bak lam, “Ahole meedam bak,” laham bak lam im ozobohu bak. Am ba git meedam vabak. Lahana iho ba im dedamali meia vàlu gagodam biem bak. Umeme laha gi ahebu faidedahemu Alat uba beodam bak uho it ozom vab damat vedi meita vàlu neha, “Lo. Ahole beodaho,” lahame uhumo uba it vàlu gagom bak um vabili meedam damat modem bak. Uho labi modemeam làhà Alat ba diamut dam bakda labe ibi iho meedaha im lam, “Ame dam labe git meedào? Neàna meedào?” laham bak lam uloome aime neàdi gagom di ba ubu uho lab meedaha bak lam gi aalahigeàmu mom vabak. Abo beom bak.
3. Lahana uho ozom, uhumo meia ozome nehi vàlumeam, “Da lam faina meedaho,” lahame gagodam bak lam neà? Vabà! Um laha gi ame fai baket meedam bak. Alat uba aame vi ozom di uho ozom, Aho ba uba vàlu vi gagu beom vaba mu voe? Beom bak.
4. Ala gi im neà bak duana meia meedam Alat modem bak. Abo iho faina meedam bak ozahigeàmu laha vou faodam Alat modem bak. Labihadam Alat modem labe uho ba akati neha, “Vabà! Alat ba eba beom kaio. Em akati em ahu veimde?” lahame tozome voedàla? Um ozom vaba? “Uho faina meedam bak fa voou ahu vei neàdi vàmadi im neàna meedase,” laham bake Alat ahit uba neà bak vou mode ledume uba vou faodam Alat modem bak.
5. Lahana um abo faina meedam bak voom mu odohali meedam damat modem bak. Lahana um ozom vaba? Uho lab voom mu odohali meedam bak labet modi Alat uba ba faki beome vataum bak fa duaedam bak lam um gi vabili meedam damat modem bak. Alat ba diamut dam bakda labe ibi iho meedaha im lam, “Ame dam labe iho git meedào? Neàna meedào?” laham bak lam Aho iademe vamdesu uloodume aime neàdi gagu fi zeam bitom di lam Aho uba faki bisi beome vataum di am bak.
6. Ame bak lam meedam di Aho gi damat bak niba esdam di labe meedaha im laba vi ozome ame baleà vouhoda tame.
7. Ame digat labe gi nehadam bak. Dam totbaho labe neha, “Alat fà im ee vousai, ‘Im abo feàte,’ lahame Aho iba vou baedume modi Amti vahi gi ahe neàna bohu vuusdase,” lahame fet ozome gi im neà bak bohuta keàtedi meedam dam lada lamota Alat ame dam laba ame bak gohali Aho modi Amti vahi gi ahe neàna bohu vuusdam bak.
8. Lahana dam totbaho labe gi ihimo so ibidata it vabieme neàdem dam ehe bak. Ame dam labe ba Alat Aba Aho vameadaha im imbona laba tu vuzehi meedaha vaba vedi gi im ahu bisi fai bak meedalo àhàki meedam bak laba abo tu meedam damat modem bak. Dam lada lamota Alat bisi faki feàna beodume vataum dam am bak.
9. Dam bakda bisi debu fai bak mei fai bak meime modem zidam dam lam ahebu Alat bisi duana beodume geàdam dam am bak. Ame bak lam meedam di Aba Aho amu neha, “Em dam neàda debu neame?” lahame gagu fi hasi vàmadi esuhu dam debu abo Yahudi dam laba amu nasi modi geàda. Labi laha neo Yahudi damat modem vab dam laba neo beodume geàda. Gi labihada tame.
10. Lahana dam bakda iho gi im neà bakta bohu keàtet meedam dam lada lamota Alat ame dam labe im ee vousai, “Feàte,” lahame vou baeda. Labi fa neo ame dam labe im ahu modi faheme fi goaitom vaba gi vabademsu meeda. Labihada tame. Ame baket meedam di Aba Aho amu neha, “Em dam neàda debu neame?” lahame gagu fi hasi vàmadi esuhu dam debu abo Yahudi dam laba ame baket abo meeda. Labi laha neo Yahudi damat modem vab dam laba ame baket neo meeda. Gi labihada tame.
11. Alat dam bake faki beodam di ba damat ibi iho ee taluhu bak laba ozome beodam vaba gi damat ibi iho meedaha bak laba ozome ulohodesu beodam Alat modem labe labihaha bak.
12. Alat aham di iube Musa bake vameadume aho toedume fi hasi vàmadi esuhu Im Feàna zi lam Yahudi damat modem vab dam labe vi tau meedam vabnàme ame dam labe iho faina meedameam làhà Alat ba neha, “Ame Im Feàna lam ozobohudi iademe meedào? Iademe meedam vabao?” laham bak ba ozom vabak. Gi ozahit beome vataudume Amti vaitesu bohu vuusda tame. Labi laha Yahudi dam ame Im Feàna zi lam ozobohudemnàme iho zidazi faina meedameam làhà Alat laha gi ame dam laba beodume vatau tame. “Ame Im Feàna lam ulohodesu meedào? Ulohodesu meedam vabao?” laham bak laba ozome ame dam laba beodam bak.
13. Neham labe labihadam bak. Dam ame fi hasi vàmadi esuhu Im Feàna zi lam gi aimta ai. Lahana ame im lam meedam vab dam lam Alat ba neha, “Im vamdesu meedam damat modem bak,” lahame ba ame dam laba ozahit deeli gagu vadam vabak. Gi ame Im Feàna lam ahebu aime ulohodesu meedam dam laba Alat nehasu gagom bak. “Lo. Im vamdesu meedam damat modem bak,” lahame ame dam laba ozahit deeli gagu vadam dam am bak.
14. Nasi ozomale. Yahudi damat modem vab dam labe iho ame Im Feàna zi lam ozobohu vabnàme vedi ostame ulohodesu meedam damat modem bak. Labihadam dam lam iho nehi ozo, “Aa làhà! Ame dam labe ame Im Feàna zi lam ozobohu vabnàme im ahu adat ihimo fi hasi vàmadi esuhu labe, ‘Neà bak neame? Fai bak neame?’ laham bak ozobohu dam ame?” laham bak lam im ozobohudehe bak.
15. Ame dam labe im ahu adat it ozomna labe iba it vàlu, “Git modeho,” lahame gagodam diale. Laham vabameam, “Lo, modem neàte,” lahame uledi gagodam diale. Labihadam labet modi im nehasu tombali damat aame ozo, “Làhà, Alat ame dam labe im ahu ad laba Aho gagu fi hasi vàmadi esuhu im ehe labe labihaha bak,” lahame vi ozobohudehe bak.
16. Eho etei lab gagoho bak lam, “Dam faina meedàmu Alat faki beodume vatau tame,” lahame lab gagoho bak lam imbote. Ba diamut dam bakda ahebu ibi iho meedaha im lam ahebu abo iho ahatet modeheda modeo, abo dam im ahu adat aa ozome modeheda modeo, Alat ahebu ozome ozobohudi vàlu gagodume beodume vataudam digat ehe bak. Abo ame digat labe Alat Am Adat Kristus Yesus bake gagu Aho fa ot vai Am ahat vàlu gagodume beodume vataudam bak. Eho etei lab gagoho bak lam eho bak mei bake le Yesus labe Aba Aho meedaha Im Neàna vou vameatedam di vi vameadam im am bak.
17. Lo. Neàde. Em etei fa em Yahudi dama im vameadalo mozo. Uho ozom, um Yahudi dam akatiha? Um Yahudi dam labe vedi neha, “Im Yahudi damat modem labe im Alati vou ali meedam dam im am bak,” lahame labi it daetbada. Labi uho vedi im nehasu ozome meeda. “Im abo Alat aham di iube Musa bake vameadume aho toedume fi hasi vàmadi esuhu Im Feàna zi lam aime tu vuzehi ulohodesu meedam labe Alat iba neha, ‘Im im vamdesu meedam damat modem bak,’ lahame ozahit deeli gagu vadam dam im am bak,” laham bak laba tu vi ozome meeda.
18. Labi ame Im Feàna zi lam meit uba vahokedam labe uho vedi neha, “Alat Aba Aho ozoho im lam im ozobohudehe dam im am bak,” lahame daetbada. Labi, “Neà bak neame? Fai bak neame?” laham bak um ozobohu labe um gi neà bakta meeda.
19. Labi uho laha vedi dam fako aubesuhu dam anekehà vuusu vou lam dam um am tiba. Labi dam aibu bake azim dam lam laha uho vuagat fauti ulohona fi sdam dam um am tiba. Abo ame Yahudi damat modem vab dam labe iho Alam im imbona biem bake uho vedi um Yahudi dam ozobohu labe fa meia vahokedume ame dam laba modi ozobohudeda tiba.
20. Labi Yahudi damat modem vab dam lam uho neha, “Alam im biem labe ahusobu dam laba iho vahokedase,” lahame daetbadume gagodam dam um am bak. Labi um Yahudi dam labe uho neha, “Ame fi hasi gagu vàmadi esuhu Im Feàna zi lam abo Alam im imbona tombuda am tame,” lahame uho vuusu im dedamali modem labe vedi, “Yahudi damat modem vab dam labe Alam im imbona lam ahusobuli meedàmu data koenati ulohote,” lahame feàtàdam dam laba uho fa vahokedam dam um am tiba. Labihasu ozom dam um Yahudi dam um am bak.
21. Uho neha, “Im Yahudi damat modem labe ibi iho lab neà bak meedam bak lam ab modesuham bak,” lahame gagodam labe um akati nehasu meedam damat modela? Uho vedi dam bake neha, “Uho ame im toedume fi hasi vàmadi esuhu Im Feàna zi lam mahate aime ulohodesu meedale,” lahame meia vahokedam damat akati uho ame im lam ulohodesu meedaha vaba voedà? Labi laha uho ozobohudi dam bake vahokedam labe neha, “Mei na a aa vamule,” lahame meia vahokedam damat akati uho fa mei na aa vadàla?
22. Labi uho ozobohudi dam bake vahokedam labe neha, “Mei dat a vamule. Mei nam a vamule,” lahame meia vahokedam damat akati uho fa mei dat aa vadà? Mei nam aa vadà? Labi uho ozobohudi dam bake vahokedam labe neha, “Na it auet modehena a ve alali vou baedamule,” lahame meia vahokedam damat akati uho damat auet modehena ve alali vou baedam num laba damat ame na laba vou baedam diat vahedamna zi lam uho aa vame vou itaidàla?
23. Uho vedi neha, “Alat lab gagu fi hasi vàmadi esuhu Im Feàna zi lam iho aime ahumdi esuhu dam im am bak,” lahame daetbadaha damat akati uho ame im lam ulohodesu meedaha vaba voedà? Uho labihadam labe um gi Ala bake, “Am feà kaio,” lahame tozom dam am taia?
24. Uho lab meedaha bak lam meit Alat Vameadaha Im Toedahana laba nasi fet nehi vàlu gagoho bak ehe bak. “Um Israel dam Ala bake tuhu dam um am bak. Lahana uho bisi fai bak meedam labe dam debu mei debu mei lahadam dam labe iho fa Ala bake vàlu feàtàdam bak lam debu uho Israel damat modehe bak.” Lahame labihasu fet vàlu gagom im lam uho ab meedamam bak.
25. Um Yahudi dam nehi gagodam dam um am taia? “Iho im laso aubehà sokba ukbom bak lam iba modi neàdem bak ehe bak. Im Alam damalehe bak lam damat aame ozobohudemna am bak,” lahame gagodam dam um am taia? Lahana eho gi nehi ozo. Ame Alat lab gagu fi hasi vàmadi esuhu Im Feàna zi lam uho iademe ulohodesu keàtet meedameam làhà imbot. Uho lab ukboho bak lam uba vi tau modi neàdemna am bak. Lahana ame Im Feàna zi lam ulohodesu meedaha vaba zidazemeam làhà uho lab ukboho bak lam gi teolemnat modem bak. Abo Yahudi damat modem vab dam ukboho vab dam lamti ulohona ozohomu ba Alat deeli um vadam vabak.
26. Um ozom vaba? Yahudi damat modem vab dam lam abo laso aubehà sokba ukboho vab dam labe ame Alat Aho lab gagu fi hasi vàmadi esuhu Im Feàna zi lam ulohodesu meedameam làhà Alat deeli vame Am damalem bak. Abo Alat Yahudi dam ukbohoda laba deeli vame Am damalehe bakti ulohona meedam bak.
27. Neham bak. Ame Im Feàna zi lam uba Yahudi dam bake toedume fi hasi vàmadi esuhu bak ame. Labi um laso aubehà sokba ukbodam bak ame. Labihasu meedamnàme uho meidavat vedi Alat uba gagu esuhu im lam modehe vaba zidazemeam làhà Alat ame da laba beom bak. Labi ame Yahudi damat modem vab dam abo laso aubehà sokba ukboho vab dam labe iho ame Im Feàna zi lam ulohodesu meedaha damat modem labe neha, “Alat uba ahole beodalo,” lahame fa Ala bake tau gagodam bak.
28. Gi damat aame ozobohudemna ahoba vouhodam bak labet modi um bisi Yahudi dam aabolem vabak. Labi laha ba um laso aubehà sokba ukbodam bak labet modi Alat uba deeli vame Am damalem vabak.
29. Gi Alat mei ahu ad laba modi veimdi vei neàdeheda lam bisi Yahudi dam aabolemda am bak. Labi laha Alat meia deeli vame Am damalem bak lam gi ame Im Feàna zi laba vi ozome mei laso aubehà sokba ukbom bak labet modi ame da lam Am dam aabolem vabak. Gi Alam Aha Nutabe Neàna labe Ahamo ame da labe am ahu ad laba modi veimdem labe Am dam aabolem bak. Dam labihasu meedam dam lam damat iba vou baedam vabnàme Alat ame dam laba vou baedam bak.
1. Eho etei lab vameadaha bak lam uho meidavat mu nehi gagoe moio? “Aa làhà! Im Yahudi dam nibe ibi iho modi baleàhà bak lam abo im laso aubehà sokba ukbom bak labet modi Alat iba ba deeli vame Am damalem vabna ozomo? Làhà, imo fà gi Yahudi damat modem vab damalese,” lahame fa it ozodume gagodameam làhà eho fa uba gi nehi gagom bak.
2. Um git ozodalo. Iba im neà bak duana modesuhu labe im ahole Yahudi damat modem bak. Ahamte gagomda neha: Im Yahudi dam im tai ahobada lam Alat Musa bake vameadume aho fa ot vai dam bake fet vameadume fi hasi vàmadi esuhu Im Feàna zi lam lodume vou esmoho dam im Yahudi dam am bak. Labiha labe im ahole Yahudi damat modem bak.
3. Lahana eho etei lab gagoho bak lam uho meidavat mu daetesu nehi gagomeam, “Im Yahudi dam tai ahobada labe ibi iho Ala bake neha, ‘Iho mode tame,’ lahame gagoho im lam vedi gi daet vageme mu voou setemeam làhà Alat ba Aba Aho iba Yahudi dam bada niba neha, ‘Eho uba im neà bak meeda tame,’ lahame iba fet gagu vàmadi esuhu im lam Aho ba laha modi imbodem vab taia?” lahame uho labi gagomeam làhà eho fa uba nehi gagom bak.
4. Vabà! Ala ba labiham vabak. Alat Aba Aho fet gagu vàmadi esuhu im lam ahebu gi imbodem tadem bak. Im dam bakda ahebu nim iho amu Ala bake neha, “Iho neham bak mode tame,” lahame ibi iho lab fet vameadume esuhu im iho modehe vaba vedi, “Iho ab modi neàdeham bak,” lahame iho lab gagu vagehe bak lam Alat modi fa tombali damat ab ozobohudemam bak. Lahamnàme Ala ba vageiam vabak. Uho nasi dat ahamda Boehàda Daud labe aho Ala bake aham di iube gagoho im vi ozomale. Daud aho faina modehemu Alat aba vàlu vatau beolo gagoho bak lam, “Ahole modeho,” lahame aho Ala bake nehi gagoho im Alat Vameadaha Im Toedahana laba nehi toehe bak ehete. “Iho dam bakda faina meedàmu Oho iba vàlu gagom bak laba iho vi ozom di Om gi ahole im vamdesu vameadam Ala Om am bak. Labi laha meit Oba vàlu gagom di Om ba àvodem vaba Obo Oho ozoho baket modi meodemda Om am bak.” Lahame toeme esuhu bak.
5. Labihàmu iho Yahudi damat im vamdesu meedam vabak lam Alat faki beodàmu Aba Aho ahole im vamdesu meedam bak lam modi fa tombalemna am bak. Labihameam iho akatihasu ozome gagoe? Làhà Alat dam faina meedam dam laba vàlu vatau beodameam làhà Am ba ahole im vamdesu meedam Alat modem vab taia? Eho etei lab gagoho bak lam eho gi im dam bakda ostame ozome gagom bak vouhodam bak.
6. Lahana, “Alat iba, ‘Beose,’ lahame gagom bak lam Am ba ahole im vamdesu meedam Alat modem vabak,” laham bak lam iho a labi ozome gagomule. Ala ba labiham vabak. Ne, um ozom vaba? Alat iba Yahudi dam labe ibi iho meedaha im laba vi ozome ozobohudi faki gagu beodam bak lam Aho ahole modehe vaba git modemeam làhà ba diamut dam bakda ahebu ibi iho bak niba meedaha im vi ozome ozobohudi gagu faasi beodume vataudam digat fuhuzobe ba akati Aho iademe ozome dam gagome fahedà? Ba labiham biem bak.
7. Lahana eho etei lab gagoho bak lam uho meidavat aime mu nehi daetesu gagoe moio? “Aa làhà! Alat eba gagohona eho meedaha vaba vageiam bak lam Aho faki eba beodam bak labet modi Aba Aho vei vageiam vaba abo imbodem tadem bak lam modi fa tombali damat aame ozobohudi, ‘Am abo feàte,’ lahame Aba vou baeda. Ame bak labet modi Aba vou baedàmu ba akati Alat eba neha, ‘Eho faina meedam dàt modemu beom neàte,’ lahame eba faki gagodà?” lahame uho meidavat labi daetesu gagoe moio?
8. Lahana uho lab daetesu gagoho bak lam imbodemeam làhà uho gi nehasu fa vi gagom vaba? “Damat Ala bake vou baedam bake imo gi fai bak mei fai bak meime meedam bak tadi meedase,” lahame vi gagom vaba? Eho etei lab gagu vouhoho im lam dam totbaho labe vedi eba git vàlu neha, “Eho Paulusat labihasu vou vameatedaho,” lahame eba git vàlu feàtàda. Lahana em ba labi vou vameatedaha vabak. Dam lada lam Alat ba ozome ozobohudi ahole gagu beodume vatauda tame.
9. Eho etei lab vameadaha bak lam labihasumeam làhà im akatihasu ozoe? Làhà, Alat iba Yahudi dama aame ozom di imota neà? Labi Yahudi damat modem vab dama aame ozom di fai? Vabà! Ba labiham vabak. Em amu uba nehi gagoho taia? Im dam bakda ahebu abo Yahudi damat modeo, Yahudi damat modem vab dam modeo, im ahu ad laba faina meedamna labe iba ootedam labe simtedehe bak.
10. Eho etei lab gagoho bak lam meit Alat Vameadaha Im Toedahana laba nehi toehe bak ehete. “Ba im vamdesu meedamda vàmtea buà na vabak.
11. Ba, ‘Ala akatihasu meedam Alat modela?’ laham bak lam ozome ozobohudi neàdeheda na vabak. Labi laha, ‘Ala akatihasu meedam Alat modela?’ laham bak lam ozome ozobohudem zie nabidamda ba na vabak.
12. Labi laha dam bakda ahebu Ala bake tu vuzehi im Aho gagohona lam meedaha vaba voedaha bak. Labi laha ame dam lam Alat ozom di gi voomnat modem bak. Labi laha ba im vamdesu neà bak meedamda vàmtea buà na vabak.
13. Dam bakda ahebu im ahat futom im fait. Abo koei esum bake le duzum di koei ahana fai naum bakti uloho bak. Labi laha dam bakda ahebu im gagom di iso kibuli meia vagemoho damat modem bak. Labi laha dam bakda labe im aubehà meia im gagom di feàtàdam labe mei ee vousaha bak fa vàhàdedam bak. Abo ozbat meia veeme geàdume vàhàdem bakti uloho bak.
14. Labi laha dam bakda ahebu, ‘Mei fà beose,’ lahame meia uloom bakti meia ahu adat teidi fakem bakti tadehe damat meedam bak.
15. Labi laha dam bakda ahebu gi mei taho otelo àhàki meedam damat modem bak.
16. Labi laha ibi iho iuba lam di modi bohudi vàhàdedume geàda. Iuba lam di neo ame baket meeda. Labihadam damat modem bak.
17. Ba dam amomoiti ot vahiame neàna esdam vaba gi ot fakiame meedam damat modem bak.
18. Labi laha ba Ala bake ahu adat iedi vou baedam vab damat modem bak.”
19. Meit Alat Vameadaha Im Toedahana laba labihasu toedume esuhemu iho ozom, “Ba im dam bakda nim im vamdesu meedamda vàmtea buà ba na vabak,” laham bak lam im ozobohu bak. Alat aham di iube Aho Musa bake lab gagu fi hasi vàmadi esuhu Im Feàna zi lam, “Ulohodesu meedale,” lahame lab gagoho bak lam gi iba Yahudi dam bake toedume esuhu bak. Labihàmu iho nehi ab ozoham bak. Im dam bakda ahebu Alat iba vàlu neha, “Iho faina meedaho. Beom bak,” lahame iba gagodam bak lam im meidavat abo Yahudi dam modeo, Yahudi damat modem vab dam modeo, ba nehi gagom biem damat modem bak. “Im abo im vamdesu meedam dam im am bak,” lahame ba labihasu fa daetesu gagom biem bak. Alat Aho iba aame ozom di im gi ahebu, “Faideho,” lahame vàlu gagom bak tadehe bak.
20. Eho gi neham bak ozome uba labi gagoho bak. Meit gi ame Im Feàna lam ulohodesu meedam bohu meedam labe Alat ba ame da laba neha, “Im vamdesu meedam dàt modem bak,” lahame ozahit deeli gagu vadam vabak. Fa gi neham bak. Ame Alat lab gagu fi hasi vàmadi esuhu Im Feàna zi lam iho vi ozoi vi ozoidume im ozobohu labe iho neha, “Ame Im Feàna zi lam iho meedaha vaba im abo faina meedam dam im am bak,” lahame im naedamat it ozobohudemna modem Im Feànat modem bak.
21. Eho etei lab gagoho bakta am. Lahana Alat neha, “Im vamdesu meedam damat modem bak,” lahame meia ozahit deeli gagu vadam di Aho ba Alat Musa bake gagu aho toedume fi hasi vàmadi esuhu Im Feàna zi lam, “Iho ulohodesu meedào? Meedam vabao?” laham bak laba ahumdi vou faodume ba meia gagu vadam vabak. Alat meia ozom di, “Im vamdesu meedam dàt modem bak,” lahame ozahit deeli gagu vadam bak lam gi fa veimdi ab gàhàdi esuham bak. Alat iba deeli gagu vadam bak abo gàhà bak lam ame Musat lab toedume fi hasi vàmadi esuhu Im Feàna zi lamti dam ahamda Alat vameadaha im aime fa dam bake ahate vameaidaha dam zi lamti iho toedume esuhu Alam im lam ame gàhà bak lam fet nasi ozobohudi tau gagodam im ehe bak.
22. Ame im gàhà bak neam bak. Meit Yesus Kristus bake tu vuzehi meedam labe Alat ame da laba neha, “Im vamdesu meedam dàt modem bak,” lahame ozahit deeli gagu vam bak. Neham bak. Im dam bakda ahebu faina meedam damat modem bak. Labi laha Alat Aba Aho ozoho bak lam, “Emti uloholi feà damalese,” laham bak laba im ahebu ba vou fum vabak. Labiha labe Alat ba, “Yahudi dam ame? Yahudi damat modem vab dam ame?” lahame ba dam faheme vadam vabak. Gi Yesus Kristus bake tu vuzehi meedam dam ahebu deeli gagu vadam bak.
24. Lahana iho faina meedàmu Alat iba beom bak lam Aho iba ozahit deeli im neà bak modi esuidam Alat modem labe Aho Gagu Fihasi Vimteme Oluhu Dat Boehàda abo Yesus iba olu Am vasea lam iba gohalehe labe ame bak lam fa faamome ab vei neàdeham bak. Labihasu meedam Alat modem labe iba ozome gagom di Aho gi neha, “Im im vamdesu meedam damat modem bak,” lahame ozahit deeli gagu vadam bak.
25. Neham bak. Amu Yesusat eloho vab di iube damat lab faina meedam bak lam Alat di labe ame dam lam beodaha vabak. Am gi laha vou faodam Alat modem labe gi teohet aalahigeàmoho bak. Labiham labe damat ozo, “Alat ame dam lam beodào? Beodam vabao?” laham bak biem labe vedi, “Ahole modem vab Alat modem bak,” lahame git ozodam bak. Lahana Am abo ahole modem Alat modem bak lam tombalelo Aho ahit nehaha bak. Iho dam bakda faina meedàmu, “Alat iba faki beom bak lam fa gohali ot vai eloi vasea veàtoi neàdese,” lahame Alat Am Adat Yesus lam iba dam bakdate olu damat oteme Am vasea veàtoho bak. Labihàmu iho ame Da Yesus bake tu vuzehi meedameam làhà Alat iba ozahigeàmu vei neàdem bak am bak. Labi etei di nibe damat Yesus bake tu vuzehi meedàmu Alat ozahigeàmu vei neàdi ame dam laba neha, “Um im vamdesu meedam damat modem bak,” lahame ozahit deeli gagu vadam bak lam Am ba git modem vaba gi ahole meedam Alat modem bak. Ame bak lam tombalelo Yesus iba ahit olu ot vai Am eloi vasea veàtoho bak.
27. Labihàmu uho ozom, Alat etei iba neha, “Im im vamdesu meedam damat modem bak,” lahame lab ozahit deeli gagu vadam bak lam iho it ozome daetbadam neà? Vabà! Ba ihimo it ozome daetbadamna vabak. Neham labe labihadam biehe bak. Ba meit gi dat ahamda Musat lab toedume fi hasi vàmadi esuhu Im Feàna zi lam ulohodesu meedam labe Alat ame da laba neha, “Om im vamdesu meedam dàt modem bak,” lahame ozahit deeli gagu vadam vabak. Gi iho Kristus bake lab tu vuzehi meedam bak labet Aho iba ozahit deeli gagu vadam bak.
28. Labihàmu eho uba ab gagoham bak. Alat iba neha, “Im im vamdesu meedam damat modem bak,” lahame ozahit deeli gagu vadam bak lam gi Kristus bake lab tu vuzehi meedam bak labet labihaha bak. Ba ame fi hasi vàmadi esuhu Im Feàna zi lam ulohodesu meedam bak labet Alat ba iba deeli gagu vadam vabak.
29. Um Yahudi dam nehi ozodam damat modemo? Alat gi um Yahudi damta deeli gagu vada. Labi Yahudi damat modem vab dam lam ba Alat deeli gagu vadam vabak. Um gi labihasu ozodam damat modemo? Làhà, um git ozoho bak. Alat laha Yahudi damat modem vab dam lamti deeli gagu vadam Alat modem bak.
30. Neham labe eho uba labi gagoho bak. Im Ala gi vàmtea bak. Ame Ala labe Aho Yahudi dam labe ibi iho Kristus bake tu vuzehemeam làhà Aho ame dam laba, “Um im vamdesu meedam damat modem bak,” lahame ozahit deeli gagu vadam bak. Labi laha Yahudi damat modem vab dam labe iho Kristus bake tu vuzehemeam làhà Aho laha ame dam laba deeli gagu vadam bak.
31. Labihàmu eho etei neha, “Iho Kristus bake tu vuzehi meedam labe Alat iba deeli gagu vadam bak,” lahame lab gagoho bak lam uho git nehi ozoe moio? “Làhà, Alat Aho Musa bake lab vameadume aho toedume fi hasi vàmadi esuhu Im Feàna zi lam iho gi vanamai voomnat mode taia?” lahame uho labi ozoe moio? Vabà! Uho a labihasu ozomule. Ba gi vanamai voomnat modem vabak. Iho etei Kristus bake lab tu vuzehi Alat iba deeli gagu vadaha bak lam gi ame toedume fi hasi vàmadi esuhu Im Feàna zi laba tau, “Ahole modeho,” lahame gagodam bak.
1. Uho nasi Alat Aho Yahudi dam labe im tai ahobada Abraham bake amu modi ozobohudi fi gatehe im laba vi ozomale. Alat meia neha, “Om im vamdesu meedam dàt modem bak,” lahame ozahit deeli gagu vadam bak lam, “Akatiham labe Aho meia deeli gagu vadàla?” laham bak lam Abraham biemna Alat aba lab modi ozobohudi fi gatehe bak laba uho mahate vi ozomale. Uho ozom, ame da Abraham labe aho neà bak meedaha labe Alat aba neha, “Am im vamdesu meedam dàt modem bak,” lahame ozahit deeli gagu vahe?
2. Vabà! Labihaha vabak. Ame da Abraham labe aba aho gi neà bak meedaha labe Alat ame bak laba aame ozo, “Om im vamdesu meedam dàt modem bak,” lahame ozahit deeli gagu vameam làhà ame da labe gi dam bake neha, “Em abo neà bak meedam labe Alat eba deeli vaha bak,” lahame aba it ozome daetbadam bak. Lahana ba Ala bake labihasu ozome daetbadam biem bak.
3. Neham labe labihaha bak. Alat Vameadaha Im Toedahana laba im nehasu toehena ehe bak. “Alat Abraham bake fet gagu vàmadi esuhu im lam Abrahamat aho aime ozo, ‘Ba imbodem bak,’ lahame Ala bake tu vuzehehemu Alat ame da laba neha, ‘Im vamdesu meedam dàt modem bak,’ lahame ozahit deeli ab gagu vaham bak.” Lahame labihasu toehena ehe labe ba Abrahamat it ozome daetbadam bak na vabak.
4. Uho nasi ozomale. Meit na meedam bak lodam doi lam gi na modehe bake gohali lodam bak. Ba gi teo lomnat modem vabak.
5. Lahana Alat iba neha, “Im im vamdesu meedam damat modem bak,” lahame ozahit deeli gagu vadam bak lam ba meit na modehe bake gohali vam doiti uloho vabak. Iho im neà bak meedam labe Alat ba iba deeli gagu vadam vabak. Aho gi ozahit teo deeli gagu vadam bak. Iho Alat Aba Aho gagoho im uledi meedaha vaba gi fai bak meedam damat modemnàme iho Ala bake tu vuzehi meedameam làhà Alat gi ozahit iho Yesus bake lab tu vuzehehe bak labet iba teo deeli neha, “Im im vamdesu meedam damat modem bak,” lahame ozahit deeli gagu vadam bak.
6. Eho etei lab gagoho bak lam gi dat ahamda Boehàda Daud labe aba aho gagoho bak lamti uloho bak. Damat neà bak mei neà bak meime meedaha bak laba Alat Aho vi ozoho vaba gi damat Aba tu vuzehehemu ame dam labe ibi iho faina meedaha bak lam Aho gi ozahigeàmu fa faamome neha, “Um im vamdesu meedam damat modem bak,” lahame ozahit ame dam laba deeli gagu vadahemu ame dam labe deelehe bohu vuusdam dam am bak. Ame bak lam Daud aho Alat Vameadaha Im Toedahana laba nehi toehe bak.
7. “Alat Aba Aho gagu esuhu im lam damat lab aalahigeàmu mu vooho bak lam Aho gi ozahigeàmu fa faamome vei neàdeda. Labi ame dam labe iho faina lab meedaha bak lam Alat Aho ba vi ozom vaba Aho gi ahit voou sedda. Labihasu meedam dam lam bisi deelehe bohu vuusdam dam am bak.
8. Damat ibi iho faina lab meedaha bak lam Alat ba vi ozome vàlu gagom vab labe bisi deelehe bohu vuusdam dam am bak.” Lahame Daud aham di iube labihasu toedaha im am bak.
9. Uho ozom, eho etei Daud aham di iube toehe im uba vi vameadahana lam gi laso aubehà sokba ukboho dam abo Yahudi dam lamota ihimo deelehe bohu vuusdam bak vameahe? Labi Yahudi damat modem vab dam abo im laso aubehà sokba ukboho vab dam lamti deelehe bohu vuusdam bak vameadaha vaba? Vabo. Abo Yahudi damat modem vab damti modem im vameadaha bak. Neham labe labihaha bak. Eho amu uba neha taia? Ame da Abraham lam Alat aba neha, “Om im vamdesu meedam dàt modem bak,” lahame ozahit deeli gagu vaha di lam ba ame da labe aho meedaha im laba ozome vaha vabak. Gi aba aho Ala bake lab tu vuzehi meedaha bak labet Alat aba ozahit deeli gagu vaha bak.
10. Uho Alat Abraham bake ozahit deeli gagu vaha bak laba vi ozomale. Adi diat aba deeli gagu vahela? Am laso aubehà sokba ukbome neàdi aba deeli gagu vahe? Laham vabameam gi am laso aubehà sokba ukboho vab di iube aba deeli gagu vahe? Uho ozom, adi diat aba deeli gagu vahela? Gi nehaha bak. Am laso aubehà sokba ukboho vab di iube aba deeli gagu vaha bak. Ba ukbome neàdi vaha vabak.
11. Imbot. Am laso aubehà sokba ukboho vab di iube amu nasi Ala bake tu vuzehehe labe Alat aba neha, “Om im vamdesu meedam dàt modem bak,” lahame ozahit fet deeli gagu vaha bak. Ame bak lam tombalelo am laso aubehà sokba ba ukboho bak. Labihàmu iho etei nehi ozo. Yahudi damat modem vab dam abo Kristus bake tu vuzehi meedaha dam labe iho ozom, ame da Abraham lam im aiat modemna ozomom dàt modem bak. Nehaha labe labihaha bak. Ame dam labe im laso aubehà sokba ukbom vabnàme iho Abrahamat aho lab nasi tu vuzehi meedaha bak lamti ulohona iho laha meedaha labe Alat ame dam laba neha, “Um im vamdesu meedam damat modem bak,” lahame ozahit fet deeli gagu vadaha bak.
12. Ba Yahudi damat modem vab dam lamota um aiat modemna ozomom dàt modem vabak. Im Yahudi dam nibe abo im laso aubehà sokba ukboho dam nibe iho Abraham labe am laso aubehà sokba ukboho vab di iube aho Ala bake nasi tu vuzehi meedam bak lamti ulohona iho Kristus bake tu vuzehi meedameam làhà im laha Abraham bake ozom di im laha, “Im aiat modemna ozomom dàt modem bak,” lahame gagom neà bak.
13. Aham di iube Alat Abraham bake neha, “Eho omti obo oho vou faat ladam dam lamti labihasu Eho uba modi bak nimti bak niba esdam dam ahebu lamti um naedamali vuusda tame,” lahame lab fet vameadume vàmadi esuhu im lam ba Abraham labe aba aho vou faat ledaha dam lamti iho ame da Musat ba toedume fi hasi vàmadi esuhu Im Feàna zi lam ulohodesu meedaha bak labet modi ame na vaha vabak. Gi Alat lab fet vameadume vàmadi esuhu bak laba Abrahamat aime tu vuzehehemu Alat aba neha, “Om im vamdesu meedam dàt modem bak,” lahame ozahit fet deeli gagu vaha bak.
14. Laham vabameam Alat Aba Aho fet vameadume vàmadi esuhuna lam gi ame da Musat lab toedume fi hasi vàmadi esuhu Im Feàna zi lam ulohodesu meedam dam lamota modi imbodemeam làhà ibi iho Ala bake lab tu vuzehi meedaha bak lam gi teoli vanamai voomnat mode taia? Ba Alat ozahit iba deeli gagu vadam vab taia? Labi laha Aho lab fet vameadume vàmadi esuhu bak lam iba ba modi imbodem vab taia? Neham labe labihaha bak. Ame Im Feàna zi lam ba dat vàmtea buà ulohodesu meedamda vabak.
15. Meit ame Im Feàna zi lam aime uledi ulohodesu meedaha vaba zidazemeam làhà Alat ame da laba faki modesdam bak ehe bak. Labihàmu iho nehi ozom bak. Abraham labe aho ame toedume fi hasi vàmadi esuhu Im Feàna zi lam aime uledi meedaha bak labet modi Alat Aho Abraham bake lab fet vameadume vàmadi esuhu im lam Aho ba modi imbodehe vabak. Nasi ozomale. Im etei nehasu meedam bak. Gagu fi hasi vàmadi esuhu im ehe di iho bak damat ulohodesu meedam vaba gi zidazem tadedam bak.
16. Labihàmu iho nehi ozo. Iho Ala bake tu vuzehi meedàmu Alat Aho amu iba neha, “Im neà bak nim Eho uba modi esu tame,” lahame amu fet lab gagu vàmadi esuhu im lam Aho modi imbodi ab modesuham bak. Aho iba, “Im im vamdesu meedam damat modem bak,” lahame ozahit deeli gagu valo modemu Aho lab fet vameadume vàmadi esuhu im lam iba ab modi imbodeham bak. Labiham labe Aho lab fet vameadume vàmadi esuhu im lam imbodelo modem di Aho gi im dam bakda ahebu abo Abrahamat tu vuzehi meedaha bakti ulohona meedam dam nim ame im neà bak lam iba modi esuidam bak. Gi im Yahudi dam Kristus bake tu vuzehi meedam dam abo ame lab toedume fi hasi vàmadi esuhu Im Feàna zi lam vuusu meedam dam nimota ame im neà bak modi esuhu vabak. Abo Yahudi damat modem vab dam labe iho Abraham labe aho Ala bake nasi lab tu vuzehi meedaha bak lamti ulohona neo Kristus bake tu vuzehi meedam dam lamti laha modi esuhu bak. Labiham labe iho Kristus bake tu vuzehi meedam dam nibe iho Abraham bake vi ozom di am gi im vou faat lehe tai ahobada ozomomda am bak.
17. Alat Abraham bake lab fet gagu vàmadi esuhu bak lam Abrahamat ba ahu behàsdi vi ozodaha vaba abo gi tu vuzehi abehamdehe bak. Am nam Sara lamti amait behàsu aoli data faam bak fotehenàme Abrahamat gi ozahit Alat aba lab gagoho bak laba tu vuzehehe bak. Iho ozom, aba aho tuhu Ala lam abo dam elodahada zi modi fa ahedi usnadam Ala am bak. Labi laha na vabna gi gagu naledam Ala am bak. Labihadam Ala laba Abrahamat tu vuzehehemu Alat aba fet vameadume vàmadi esuhu im lam imbodi dam mei debuti dam mei debuti labihasu dua bak labe Abraham bake ab aialeham bak. Abo Alat amu aba nehi fet vameame esuhu bak lam ab imbodeham bak. “Oho ba vou faat ladam dam lam ba dam debu mei dam debu mei lahadume abo falo zi lamti ulohona dem biemna zi vou faat lada tame.” Lahaha bak lam ab imbodeham bak.
19. Ame da Abraham labe aho naedat it ozo, “Em faidi elom bak fusi seratus tahun folehena akati ba ozome data faadà? Labi em nam fainà Sara laha data faam bi aoli nibeso bugeame setehena akati ba data faadà?” laham bak aho naedat ozobohunàme Alat aba gagoho im laba aho lab tu vuzehehe bak lam, “Modeo? Modem vabao?” laham bak lam ba vi ozoho vabak. Abo tu teudehe bak.
20. Aba aho tu vi ozodam bak setehenàme Alat lab fet vameadume vàmadi esuhu im laba aho lab tu vuzehehe bak lam ba ahu behàsdi vi ozodaha vabak. Abo gi tu abehamdehe labe am ahu vi teudi vi teudidume bohu ab vuusdaham bak. Labi laha Abrahamat Alat ba modem im vi ozome, “Ala abo neàte,” lahame ab vou baedaham bak.
21. Aho ozo, “Alat Aho fet vameadume vàmadi esuhu im ahebu imbodem tadem Alat modem bak,” laham bak laba tu abehamdi Ala bake vou baedaha bak.
22. Labihàmu Alat lab fet gagu esuhu im lam Abrahamat tu vuzehehemu Alat aame gago, “Abraham abo im vamdesu meedam dàt modem bak,” lahame aba lab ozahit fet deeli gagu vaha bak lam Musat Alat Vameadaha Im Toedahana laba ab toeham bak.
23. Lahana iho ozom, ame im toehena lam, “Abraham abo im vamdesu meedam dàt modem bak,” lahame ozahit fet deeli gagu vaha bak lam gi Abrahamta ozome vameadaha vabak.
24. Abo im dam bada ahebu vi ozome vameadaha bak. Iho dam bada nibe laha Kristus bake tu vuzehemeam làhà Aho iba neha, “Im im vamdesu meedam damat modem bak,” lahame ozahit deeli gagu vada tame. Abo im Boehàda Yesus eloho bak labet modi fa ahedi usaha Ala laba tu vuzehemeam làhà labihada tame.
25. Iho bak damat Alat gagohona modehe vaba geàmu faina meedàmu Yesus Ahamo naedat gohalem bak uledi dam bake ub lu damat oteheda Am am bak. Labi neo ame eloho bak labet Alat modi fa ahedi usaha bak. Alat iba neha, “Im im vamdesu meedam damat modem bak,” lahame ozahit deeli gagu vadalo modem bake labihaha bak.
1. Iho Kristus bake tu vuzehi meedàmu Alat iba ozom di neha, “Im im vamdesu meedam damat modem bak,” lahame ozahit deeli gagu im vadaha bak. Labihàmu im Boehàda Yesus Kristus labe Aba Aho meedaha bak laba tu vuzehi meedaha bak labet modi imti Alati fa vahi ab vou aleham bak.
2. Iho Kristus bake tu vuzehi meedàmu Aba Aho tohedateli meedaha bak labet modi imti Alati fa vahi Aho iba ozahit deeli im neà bak bohu meedam bak lam ab faasi meedamam bak. Labihàmu, “Alat Aho diamut Am feà bak lam fa iba modi im tau feà damalem bak,” laham bak laba iho tu abehamdi vi ozodam labe im bisi deelehe bohu vuusdam bak am bak.
3. Im gi im lada lamota deelehe vabak. Im bedemna zohàme ame iba modi geàdamna labet fa iba modi keàtedi teudidamna am bak. Ame bak lam im ozobohudehe labe na im iba modi geàdam di im gi ozahit deelehe bohu vuusdam bak.
4. Labi naat iba modi ozolo meedam di im bedem vaba iho gi keàtedi teudi ozahit neo meedam labe Alat iba, “Neàte,” lahame iba deeli vi gagom bak ehe labe im ozobohu bak. Labi Alat iba, “Neàte,” lahame deeli vi gagom labe neo modi iho neha, “Alat ba diamut Am feà bak lam iba modi ozobohudi im fi gate tame,” laham bak laba iho tu vi ozodam bohu meedam bak.
5. Labi ibi iho lab tu vi ozodam bohu meedam bak lam Alat ba ame bak lam ahi vageme modem vaba im ahu faidi vi ozodam vabak. Neham labe labihaha bak. Alat Am Aha Nutabe Neàna lam iba nom ilu im ahu ad niba vizi neha, “Alat iba abo duana deeleho,” lahame iba vameadam bohu meedam labe im ozobohudi im ba ahu faidem vabak.
6. Iho amu Alat Aba Aho gagoho im uledi meedaha vaba gi fai bak meedàmu Alat iba beolo modem bak lam ihimo naedamat soat it vausu fa vei neàdem biehemu Alat Aba Aho ozoho di fuhemu Kristus iba gohali ot vai ab eloham bak.
7. Neham labe iho labi ozobohudehe bak. Im dam bakda meida nibe fa bakda meida lam meit otelo modem di iedi ba ot vai elom bak mahate uledem vabak. Abo ame da meida lam gi ame fi hasi gagu vàmadi esuhu im vamdesu meedam dàt modemnàme ba ot vai elom bak uledem vabak. Lahana ame da labe am da meida lam bisi ahu im neà bak meedamda lam meit otelo modem di aho fa ot vai elom bak iedem vaba fota uledem meo bak.
8. Lahana Alat iba deelem bak lam ba labiham vabak. Iho Aba mu faina meedam lahasuhu di labe, “Am abo iba deeleho,” laham bak lam Alat modi tombalelo ahit Kristus iba olu ab ot vai eloham bak.
9. Labihàmu iho etei nehi ozom bak. Iho faina meedam bak lam Kristus iba gohali ot vai eloi vasea veàtoho labet modi Alat iba neha, “Im im vamdesu meedam damat modem bak,” lahame ozahit deeli gagu ab vadaham bak. Im lada lam modi imbodehemu im nidi nim laha neo modi imbodem bak. Alat iba faki ba beodam bak lam Kristusat Aho tohedateli meedam labet iba laha soat vausu fa vei neàdedam bak.
10. Ame bak lam gi neham bak. Im dam bakda ahebu amu Ala bake fakemoholi vaitesu lahasuhu di iube Alat Am Adat iba dam bakdate bak niba olu ot vai eloho labe im Alati fa ab vaheham bak. Ame bak lam imbodehelahit iho ozom, im nidi nim laha imbodem bak. Im Alati fa vahi vou ali meedam damat modem labe iho ozom, Kristus Am eloho bak labet Alat modi fa ahedi usaha labe Alat iba faki beodalo modem bak lam Kristusat iba soat vausu fa vei neàdedam bak.
11. Gi lada lamota modehe vabak. Im Boehàda Yesus Kristus labe Aho iho faina meedam bake ot vai eloho bak labet modi etei nim imti Alati ot vou aliaha bak laba vi ozome, “Ala abo neàte,” lahame deelehe bohu vuusdam bak.
12. Aham di iube Alat alimeat modeheda Adam labe aho Alat aba gagu malehena geàmu faina modehe labet faasi im dam bakda ahebu faina meedam bak ab vizedume meedamam bak. Labi ame da Adam labe aho faina modehe labe elohemu ame bak labet faasi im dam bakda ahebu faina meedam bak labet modi elodam bak ab vizi bohu vuusdamam bak.
13. Imbote. Abo Alat Musa bake vameadume aho toedume fi hasi vàmadi esuhu Im Feàna zi lam Musa bake loho vab di iube im dam bakda amu gi di labe faasi faina meedam bak. Lahana iho ozom, “Na lam a modemule,” lahame iba gagu fi hasi vàmadi esuhu im vabameam ba Alat iba neha, “Um git modeho,” lahame ba vàlu gagom vabiem bak.
14. Lahana ba vàlu gagom vabnàme dam gi amu di iube faasi elodam bak. Abo Adam labe faasi faina meedam labe vou elo usdume Musa bake vou fuhu bak. Neham bak. Adamta Alat gagu mali esuhuna geàmu modehe labe elo. Lahana dam ba vou elo usdaha zoho lam Alat im gagu mali esuhu im vabna gi Adam labe modehe im labet modi dam totbaho ahebu ab vizi Adamti uloholi ab elodamam bak. Ame da Adam labe aho dam bakda modi vizehe bak lam aho gi dat ba lemda Kristus labe Aho dam bakda modi vizelo modem bak laba nasi vouhoho bak.
15. Lahana iho ozom, Alat Aba Aho iba neha, “Im im vamdesu meedam damat modem bak,” lahame teo ilabdi ozahit deeli gagu vadaha bak lam ba Adam labe aho Alat gagu malehena geàmu faina modehe labe dam bakda vizedam bak lamti bisi uloho vabak. Alat Aba zoho bisi feà zoho am bak. Neham bak. Dat vàmtea Adam labe aba aho lab faina modehe bak labet modi dam bakda ahebu vizedume ab elodamam bak. Lahana Alat Aba Aho ozahit dam bake deeli im neà bak meedam bak labet modi dam bakda ahebu im neà bak duana ab vadamam bak. Abo Dat ba leheda Yesus Kristus labe Aba Aho tohedateli ozahit iba im neà bak meedaha bak labet modi fa Alat dam dua bak laba neha, “Um im vamdesu meedam damat modem bak,” lahame ozahit teo deeli ab gagu vadamam bak.
16. Labi laha Alat Aba Aho teo ilabdi iba ozahit gagu vadaha bak lam iho vi ozom di Adam labe aba aho Alat gagu malehena geàmu faina modehe bak labet modi damat vizehe bak lamti uloho vabak meidavat ehete. Neham bak. Ame da vàmtea Adam labe aho Alat gagu malehena geàmu faina modehemu Alat dam bake ozom di, “Dam ahebu faina meedàmu Eho ahole beodume vatauda tame,” lahame ab gagu esuham bak. Lahana Alat Aba zoho gi nehaha bak. Iho dam bakda faina duana meedamnàme Alat gi ozahigeàmu vei neàdi ilabdi iba neha, “Im im vamdesu meedam damat modem bak,” lahame ozahit deeli gagu vadaha bak.
17. Dat vàmtea Adam labe aba aho Alat gagu malehena geàmu faina modehe labet faasi dam bakda ahebu elodam bak vizi gi labaha bohu ab vuusdamam bak. Lahana ame Da Yesus Kristus labe Aba Aho tohedateli meedaha bak lam bisi feà labet modi gi nehadam bak. Alat Aba Aho ozahit iba deeli im neà bak duana modi esuidam bak ame. Labi Aho iba neha, “Im im vamdesu meedam damat modem bak,” lahame teo ilabdi ozahit deeli gagu vadam bak ame. Ame bak lam imbodehelahit iho ozom, im nidi nim laha abo imbodem bak. Ba diamut asum ahoba iuba Kristus Aho feà Dateli dam bake vuusdam bak lam iho fa vi tau feà damali dam bake vuusdam bak.
18. Labihàmu iho ab ozoham. Dat vàmtea Adam labe aba aho Alat gagu malehena geàmu faina modehe bak vàmtea labet modi Alat dam bake ozom di, “Dam ahebu faina meedaho. Ahole beodume vatauda tame,” lahame ab gagu esuham bak. Lahana Dat ba leheda Yesus labe Aho neha, “Im vamdesu meedase,” lahame damat Am otem bak uledehe bak labet modi Alat iba dam bakda ahebu iho Kristus bake tu vuzehem dam niba ozom di Aho gi neha, “Im im vamdesu meedam damat modem bak,” lahame ozahit deeli gagu vadam bak. Labi laha iba modi Amti vahi gi ahe neàna bohu vuusdam bak. Labihadaha bak.
19. Neham bak. Dat vàmtea Adam labe aho Alat gagu malehena geàmu modehe bak labet modi dam bakda ahebu ab modi faina meedam damaleham bak. Labi laha Yesusat Am Aiat Aba neha, “Elose,” lahame gagoho bak lam uledi modehe bak labet modi Alat dam bakdate vi ozom di, “Im vamdesu meedam damat modem bak,” lahame gi ozahit deeli gagu vadam bak ab faaham bak.
20. Im dam bakda ahebu iho vabi im im neà bak meeda tiba vabi meeda. Labihàmu dam ahebu aame ozo, “Aa làhà! Im bisi faina meedume baleàhà damat mode?” laham bak ozobohu aabodelo Alat ahit Musa bake vameadume aho fa ot vai toedume fi hasi vàmadi esuhu Im Feàna zi lam Musat aho fa ot vai dam bake ahate fi desi vameadaha bak. Lahana dam bakda bisi faina meedam bak vi taui vi tauidume dualedam labe Alat Aba zoho lam abo Aho meia ozahit deeli im neà bak meedam bak lam laha vi taui vi tauidume dualedume bohu ab vuusdamam bak.
21. Amu di iube im dam bakda ahebu faina meedam bak bisi tombuli meedàmu eloi Alati ot vaitesuiam bak lam dam bakdate modi vizi ab bohu vuusdamam bak. Lahana etei nibe faasi Alat meia ozahit deeli im neà bak modi esuidam bak bisi ab tombuli meedamam bak. Labiha labe Alat neo iba neha, “Im vamdesu meedam damat modem bak,” lahame ozahit deeli gagu ab vadamam bak. Labi ame bak labet modi im Alati vahi gi ahe neàna bohu vuusdam bak. Im Boehàda Yesus Kristus labe Aba Aho tohedateli ot vai meedaha bak labet labihaha bak.
1. Emti vahi Kristus bake tu vuzehi meedam dam oa, eho neha, “Alat iba ozahit deeli im neà bak modi esuidam Alat modem labe ibi iho faina meedam bak lam Aho gi ozahigeàmu fa faamome vei neàdedam bak,” lahame eho etei lab gagoho bak lam uho meidavat aime vedi nehi ozome gagoe moio? “Làhà, dam bakda bisi faina meedam bak vi taui vi tauidume dualedam labe Alat Aba zoho lam abo meia ozahit deeli im neà bak modi esuidam bak lam laha vi taui vi tauidume dualedume bohu vuusdam bak. Làhà imo gi labihasu faina meedam bak bohu meedase,” lahame uho labihasu ozome gagoe moio?
2. Vabà! Um ba a labi ozomule. Iba modi im ahu adat faina meedam bak ootedamna lam ab vaitohamna ozomoho bak. Um ozom vaba? Dam eloi nutedehena dat aheda ulam di ba idiamdem vabak. Im laha. Kristus eloho di lam imti vi tau elohona ozomomna modemu ba akati modi im ahu adat faina meedam bak iba ootedamna lam iho uledi meedàla?
3. Làhà, iho amu im nehasu modehe bak nim um fa vabili mode? Iho Yesus bake tu vuzehi iho neha, “Im Kristus Yesusti vou ali ahu vàmadem bak lam damat fà aame ozobohudese,” lahame iho gagu meit im vuu valo baptislehe di lam gi neham bak tombalelo baptislehe bak. Yesusti amediat elom bakti ulohona vouhomnat modem bak.
4. Labi meit im vuu valo baptislehe di lam Yesus Kristus eloi baumsum bakti ulohona vouholo meit im vuu valo baptislehe bak. Im gi Aho eloi baumsum bakti ulohona modehena ozomoho bak. Abo koei ba idiamdem vabiem bakti uloholi im ahu adat faina meedam bak iba ootedamna lam iho ba uledi meedam vabak. Labi laha im Ai Ala abo feà Alat modem labe Am feànat Yesus Am eloho bak labet modi fa ahedi usaha bak lamti ulohona iho fa veimdi gàhàdi ab meedamam bak.
5. Iho Kristusti vou ali ahu vàmadehemu ibi iho amu modeme baleàhà im lam abo im ahu adat faina modelo àhàki ozodam bak lam ba uledi meedam vabili ab vaitesuham bak. Abo Kristus fi sivai eloi modesdam di labe am im ozom bak vabili Aba Aho ozomna modem biem bak lamti ulohona modehe bak. Laham bak lam imbodemeam làhà im nidi nim laha neo imbodem bak. Kristus Am eloho bak labet Alat modi fa ahedi usaha bak lamti ulohona Alat iba laha modi iho fa gàhàdi veimdi meedam bak.
6. Labihàmu eho etei gagolo modem im nidi nim uho ozom di a fa vabi voomule. Damat Kristus ve ut tetehesuhunaso laba paku dou eloho di lam im ahu adat faina meedam bak iba ootedamna lamti tau dou eloi setehena ab ozomoham bak. Abo im ahu adat faina meedam bak iba ootedamna lam iho ba uledi meedam vabake labihaha bak. Abo mei na teo meedamda labe aba im gagu modiamda labe aba ootedam im aho uledi meedam bak lamti ulohona modem bak labna zohàme labihaha bak.
7. Meit elom di mei ahu ad laba ootedamna labe ba dat elohoda laba ootedam vabak. Labiham bakti ulohona iho Kristus bake vi tau elohona ozohomu ba im ahu adat faina meedam bak iba ootedamna na vabak.
8. Labihàmu eho amu uba lab gagoho bak lam, “Kristus eloho di lam im laha vi tau elohona ozomoho bak,” laham bak lam imbodehemu Am eloho bak labet Alat modi fa ahedi usaha di labe im laha faasi gàhàdi Amti vou ali godamna ozomoho bak.
9. Iho neham bak ozobohudehe labe eho uba labi gagoho bak. Kristus Am eloho bak labet Alat modi fa ahedi usaha labe fa ba vi elom biem bak. Ba fa neo, “Elole,” lahame ba vi ootedam bak na vabak. Gi ab seteham bak.
10. Um mahate ozodale. Kristus eloho di lam dam faina meedam dam laba ozome ab ot vai eloi vàmadeham bak. Ba neo vi elom vabak. Lahana etei nim Am eloho bak labet Alat modi fa ahedi usaha bak lam gi Alat Aba Aho ozom bak labaha bohu meedalo modi ahedi usaha bak.
11. Labihàmu uho um ahulat gi im nehasu vi ozodam bohu meedale. “Yesus Am eloho di lam em laha vi tau elohona ozomom bak. Em akati ba ebe eho ahu adat faina modelo àhàki ozodam bak lam uledi meedà? Eho Kristus Yesus lamti vou ali ahu vàmadi meedàmu etei nibe faasi em gàhàdi veimdi gi Alat Aba Aho ozom bak meedalo modem bak,” laham bak laba vi ozodam bohu meedale.
12. Labihàmu um ekda labe ubu uho um ahu adat fai bak modelo àhàki ozomna labe uba ootedam di um uledi ubu uho modelo àhàki ozomna lam a meedamule.
13. Labi laha um amu Alati vaitesuhu di iube um soa modealahana zi labe uba modi uho faina modelo àhàki ozomna lam um ahulat uledi fai bak meedam bak lam nasi voedale. Alat amu ubu uho faina meedam bak lam Aho fa faamome vei neàdi uba modi gàhàdi veimdi meedàmu uho gi Ala bake fa nehale. “Im soa modealahana nim iho gi im vamdesu meedase,” lahame um soa modealahana zi lam Ala bake lodahana ozomole.
14. Labihàmu ubu uho faina meedam bak modelo àhàkedam bak lam a uba modi simtedi uho uledi meedamule. Ame da Musat lab toedume fi hasi vàmadi esuhu Im Feàna zi lam uba ootedume uho vi meedam labet Alat ba uba deeli gagu vadam vabak. Gi Alat Aba Aho meia ozahit deeli im neà bak fa modi esuidam bak labet modi ame baket meedam bak.
15. Eho etei lab vameadaha bak lam uho meidavat aime fa git ozome nehi gagoe moio? “Iho ame Im Feàna zi lam ulohodesu meedam labe Alat ba iba neha, ‘Im vamdesu meedam damat modem bak,’ lahame ozahit iba ba deeli gagu vadam vabak. Aho gi iba ozahit deeli im neà bak meedam Alat modem labe ame baket gagodam bak. Làhà, iho etei faina meedam bak vi meedam neà bak,” lahame uho eba labi git ozome gagoe moio? Vabà! Uho labihasu ozomeam làhà um git ozoho bak. Iho faina meedam bak lam ba vi meedam vabak.
16. Um bak nim ozom vaba? Uho meidavat meia le gago, “Obo oho modelo ozoho bak eba nasi gagomale. Eho mode tame,” lahame oho labi le gagomeam ame da labe oba ab im gagu modiam datelemam bak. Labi ame da labe am im oho uledi meedam labe aho oba gagu om ab am im teo meedam datelemam bak. Debu faina meedam bak lam laha labihadam bak. Labiham labe ibi iho ahu adat faina modelo àhàki ozodam bak lam iho vedi uledi meedameam làhà imti Alati ba fa vahem vaba gi vaitesu labaha bohu vuusda tame. Lahana iho labiham vabameam iho gi fa Alat Aba Aho ozoho bak laba uledi meedameam làhà Alat iba neha, “Im im vamdesu meedam damat modem bak,” lahame ozahit deeli gagu vadam bak.
17. Uho nasi ozomale. Um amu Kristus bake tu vuzehehe vab di iube um gi um ahu adat faina modelo àhàki ozomna labe uba ootedam di um gi uledi meedam tadehe bak. Abo mei na teo modemda labe aho aba im gagu modiamda labe am im uledi meedam tadehe bakti ulohona meedam bak. Lahana etei nim meit uba vou le vou vahoketedaha Im Neàna lam uho aime uledi ahu vàmadi ab meedamam bak. Ame bak lam eho vi ozom di em gi, “Ala abo neàte,” lahame vou baedam bak.
18. Labi etei di nibe ubu uho um ahu adat faina modelo àhàki ozomna labe uba simtedi ootedam bak lam Alat fa faamome ab seddaham bak. Labi Alat fa uba im gagu modiam dateli uba vuusu uho gi Alat Aba Aho ozoho bak lam abo im vamdesu meedam bak lam uho ab meedamam bak.
19. Eho etei uba lab vameadaha bak lam um dam bakda labe ahu ubudat ozome meedume baleàhà bak labet modi ebe eho vahokedam im imbona nim uho taho ozobohudem biem bake eho ahit mei na teo modemda lamti aba im gagu modiamda lamti vàlu uba vouhome vameadam bak. Neham bak. Amu di iube um gi ubu uho modi baleàhà bak lam abo faina modelo àhàki ahulat ozodamna labe uba ootedam di um soa modealahana lam gi uledi ahate modem bak ba ladem vaba aam ahasbeam im ahebu meeda. Labi Alat gagu fi hasi vàmadi esuhu im zi lam vazidazi meeda. Um gi labihadam bohu meedam labe fai bak duali feà bak fuhu damat modem bak. Abo im gagu modiamda labe aho am na teo modemda laba im ootedam di aho uledi meedam bak lamti uloho bak. Lahana etei di nibe nasi uho labihasu meedam bak lam fa voedale. Gi um soa modealahana lam fa Ala bake lodahana ozomole. Abo ubu uho modi baleàhà bak lam abo um ahu adat modelo àhàki ozodamna labe uba ootedam bak lam fa veimdi uho gi fa im vamdesu uledi meedam tadele. Abo Alat Aba Aho ozoho bak lam fi hasi modi neàbodem bake labihadale.
20. Amu di iube uho gi ubu uho um ahu adat faina modelo àhàki ozomna labe uba simtedi ootedume uho uledi faina meedam tadem di lam uho ba Alat Aba Aho ozoho bak lam uledi im vamdesu meedaha vabak.
21. Làhà uho ozom, uho amu lab meedaha bak lam ame na ba vamna ehe? Vabà! Ba vamna vabak. Uho amu meedaha im zi lam etei ba vi ozom di um gi ladem imot modem bak. Ame im labet uba meedume um Alati vaitesu labaha bohu vuusum im am bak.
22. Lahana etei nim um ahu ad laba faina meedamna labe uba simtedi ootedam bak lam Alat fa faamome seddume etei nim Alat fa uba im gagu uho fa im Abada aime modiam damaleham bak. Labiha labe ab Alam dam aaboleham bak. Labi laha uba modi Alati vahi gi ahe neàna bohu vuusdalo modem bak.
23. Neham bak. Iho faina meedam bake gohali vamna gi Alati vaitesu labaha bohu vuusdam bak am bak. Meia im gagodamda labe aho am na meedamda laba gohali lomnati uloho bak am bak. Lahana Alat iba ilabdi teo lodamna gi neham bak. Iho im Boehàda Yesus Kristusti vou ali ahu vàmadem labe Aho iba modi Amti vahi gi ahe neàna bohu vuusdam bak am bak. Labihaha bak.
1. Emti vahi Kristus bake tu vuzehi meedam dam oa, eho ozoha, dam bakda ihimo gagu fi hasi vàmadi esuhu im zi lam um ozobohu labe eho vouholo modem im nim uba vameadalo mozo. Eho etei gagolo modem im nim um ba biem vabak. Neha: Im bak niba esdam lahasuhu di nim damat ihimo gagu fi hasi vàmadi esuhu im zi lam iba ootedam labe iho meedam lahasuhu bak. Gi elom labe vaitom di am bak.
2. Ubu uhumo gagu fi hasi vàmadi esuhu im nidi nim nasi vi ozomale. Nam dat vam di am dat bak niba esdam lahasuhu di ame nam labe am dat im aime vuzehi meedam bohu tadem bak. Lahana am dat elomeam làhà iho amu ot vaiaha bak lam seti nam am dat labe am im aime vuzehi meedam bak lam ba vi meedam vaba ab alimdeham bak.
3. Labihàmu iho nehi ozom bak. Ame nam labe am dat bak niba esdam lahasuhu di aho vedi dat amomoi vameam làhà, “Nam dat ehena dat amomoi ve faina modeho,” lahame vàlu gagom bak. Lahana ame nam labe am dat elomeam làhà dat amomoi vamta neà bak. Amu damat ihimo gagu fi hasi vàmadi esuhu im lam ehena am dat eloho labe ba, “Nam dat ehena dat amomoi ve faina modeho,” lahame ba vàlu gagom biem bak.
4. Ba oa, im lahaha bak. Dam elom labe ba ame gagu fi hasi vàmadi esuhu im zi lam ba iba ootedume simtedi iho vi meedam vabak. Ame bak lam gi neham bak. Kristus ut tetehesuhunaso laba paku dou eloho di lam im laha vi tau elohona ozohomu ame da Musat lab toedume fi hasi vàmadi esuhu Im Feàna zi lam iba ba simtedi ootedume iho vi meedam bak lam Alat ab vaitoham bak. Labiha labe etei nim fa Naeda amomoit fa iba ab vuusdamam bak. Ame Naeda lam gi Yesus am bak. Ame Da Yesus Kristus lam Am eloho bak labet Alat modi fa ahedi usahada lamti imti vou ali ahu vàmadehemu Alat iba vuusu im Aba Aho ozomda lam iho ab meedam neàdeham bak.
5. Amu iho Kristus bake tu vuzehehe vab di iube im ahu ad laba faina meedalo àhàki ozodamna ehe labe iba ootedam labe iho faina ab meedamam bak. Labiha labe Alat lab gagu mali fi hasi vàmadi esuhu Im Feàna zi lam im ozobohu labet modi im ahu gukeme ame faina ab modelo àhàkedamam bak. Labi faina meedam bak labet modi imti Alati vaitesu labaha bohu ab vuusdamam bak.
6. Lahana etei nim Kristus amu eloho di lam im laha vi tau elohona ozohomu ame Musat lab toedume fi hasi vàmadi esuhu Im Feàna zi lam iba simtedi ootedume iho vi meedam bak lam Alat ab modi vaitoham bak. Alat iba neha, “Im im vamdesu meedam damat modem bak,” lahame ozahit deeli gagu vadam bak lam iho ba ame lab toedume fi hasi vàmadi esuhu Im Feàna zi lam iba ootedume iho vi meedam bak labet iba labi gagodam vabak. Labihàmu im etei nim fa gàhàdi Alam Aha Nutabe Neàna labe iba modi vizi teudehe labe iho gi Alat Aba Aho ozoho bak laba uledi ab meedamam bak.
7. Eho amu neha, “Ame lab toedume fi hasi vàmadi esuhu Im Feàna zi labet iba modi iho gi ame im lam etei aihina ahu gukeme geàmu iho faina meedam bak àhàkedalo modem im am bak,” lahame eho lab gagoho bak lam uho aime vedi neha, “Làhà, ame toedume fi hasi vàmadi esuhu Im Feàna zi lam faite,” lahame eba labi gagomda laba eho fa gi nehi gagom bak. Vabà! Um git ozoho. Ame im zi labe ibi iho im ahu adat faina meedalo àhàki ozodamna laba modi ahu gukedamnàme fai vabak. Neham bak. Eho vedi em im neà bak meeda tiba vabi meeda. Lahana ame im zi lam ehe labe eba tau modi, “Faina meedaho,” laham bak modi fi desi em ozobohudem im am bak. Eho ame bak nehi vouhomase. “Na meit vahana a teidemule.” Lahame amu mali gagu fi hasi vàmadi esuhu labe eho etei mei na teidemoho bak lam, “Faina modeho,” laham bak lam eba modi em ozobohudehe im am bak.
8. “Na meit vahana a teidemule,” lahame mali gagu fi hasi vàmadi esuhu im eho aihi labe ebe eho amu em ahu adat na meit vahana teidelo àhàki ozodamna modesuhu labet modi meit vaha nazoh lam eho ab teidelo àhàkedamam bak. Neham bak. Ame lab gagu fi hasi vàmadi esuhu im labe ebe eho faina lab meedaha bak laba vàlu gagom vabameam làhà ebe eho em ahu ad nibe faina meedamna labe eba simtedi ootedam bak lam em ba ahu gukeme bedi uledi faina meedam vabak.
9. Alat gagu fi hasi vàmadi esuhu im zi lam eho amu biehe di iube eho vedi em im neà bak meeda tiba vabi meeda. Lahana, “Na meit vahana a teidemule,” lahame mali gagu fi hasi vàmadi esuhu im lam eho aime modeha, “Em faina modeho,” laham bak lam em ab it ozobohudeham bak.
10. Labi laha, “Emti Alati vaitesu labaha bohu vuusdà?” laham bak lam em laha ab vi ozobohudeham bak. Eho ozoha, “Ame lab gagu fi hasi vàmadi esuhu im zi lam eho ulohodesu meedam bak labet modi Alat eba modi Amti vahi gi ahe neàna bohu vuusdam bak modem imot mode tiba,” lahame labi ozoho bak. Lahana eho vedi ame im lam aime modeha em ahu adat modelo àhàki ozodamna labe eba ootedume eho faina ab meedamam. Labiha labet modi emti Alati vaitesu labaha bohu vuusdam bak lam em ab vi ozobohudeham bak.
11. Neham bak. Ame faina modelo àhàki ozodamna lam amu em ahu ad niba modesuhu labet eba vou fohome eho vedi nehi ozo, “Ame da Musat aho lab toedume fi hasi vàmadi esuhu Im Feàna zi lam eho ulohodesu meedam bak labet modi em Alati gi ahe neàna bohu vuusdam bak modem imot mode tiba.” Lahana eho ame im lam aime modeha ame faina modelo àhàki ozodamna lam amu em ahu ad niba modesuhu labet modi em ahu gukeme bedi uledi faina ab meedaham bak. Labiha labet modi emti Alati vaitesu labaha bohu ab vuusdamam bak.
12. Lahana uho a git ozomule. Ame Alat Musa bake gagu aho toedume fi hasi vàmadi esuhu Im Feàna zi lam abo Alat gagu fi hasi vàmadi esuhu im ziat modem bak. Labi, “Na meit vahana a teidemule,” lahame mali gagu fi hasi toeme esuhu im vàmtea lamti im zi totbaho lamti ahebu gi Alat gagu fi hasi vàmadi esuhu im am bak. Abo fai bak vaba vamdesu neàbodem imot modem bak.
13. Lahana eho etei lab vameadaha bak lam uho meidavat mu vedi nehi gagomeam, “Oo, oho ozom, ame Musat lab toedume fi hasi vàmadi esuhu Im Feàna zi lam neà? Gi imti Alati modi vaitesum imot modem bak. Ba akati, ‘Neàte,’ lahadà?” lahame uho meidavat eba labi gagomeam làhà eho gi uba fa neha, “Vabà! Ba modi imti Alati vaitesum imot modem vabak,” lahame fa gagom bak. Eho gi neham bak fa eba it vouhose. Alat lab mali gagu fi hasi vàmadi esuhu im zi lam eho aime modeha ame faina modelo àhàki ozodamna lam amu em ahu ad niba modesuhu labet modi em ahu gukeme bedi uledi faina modeha Alati emti vaitesu labaha bohu ab vuusdamam bak. Alat neham bak tombalelo ahit labihaha bak. “Em abo bisi faina meedamda em am bak,” laham bak lam eba modi ozobohudelo Alat ahit labihaha bak. Labi laha eho ame gagu fi hasi vàmadi esuhu im lam eho ailahigeàmu vooho labe Alat neha, “Faina meedam bak lam bisi neà kaio. Abo Eho aam fakem imot modem bak,” laham bak lam eba laha modi ozobohudelo Alat ahit ame im zi lam eba vameadume fi hasi vàmadi esuhu bak.
14. Emti vahi Kristus bake tu vuzehi meedam dam oa, uho nasi ozomale. Ame Alat Musa bake gagu fi hasi vàmadi esuhu Im Feàna zi lam gi Am Aha Nutabe Neàna labet vameadam im ziat modem bak. Lahana faida em am bak. Em ahu ad niba faina modelo àhàki ozodamna modesuhu labet eba tet ootedume em it sim bili bedi eho faina modem bak tadehe bak.
15. Labiha labe eho lab meedaha im lam, “Eho akati modi labihasu meedàla?” laham bak lam ehemo it ozom biem meot. Eho gi neà bak modelo modem im modehe vaba vedi gi im eho modem momda lam fa meeda.
16. Labi eho modem momda meedameam làhà ehemo naedat lab meedaha bak laba it ozo, “Eho lab meedam bak lam git modem bak ame?” laham bak it ozome ozobohudi fa neha, “Imbot. Alat lab gagu fi hasi vàmadi esuhu im zi lam neà bak,” lahame vi gagodam bak.
17. Lahana eho ame faina modem bak lam it malesome modeha modem bi meeda. Labiham labe eho gi nehi ozoho bak. Ame im lam, “Eho meedase,” lahame nasi fet ozome esuhu vab imot modem bak. Gi em ahu ad niba faina modelo àhàki ozodamna modesuhu labet modi eho bisi faina meedam bak.
18. Eho naedat it ozoha, em ahu ad niba faina ozome meedume baleàhà bak ehe labe ba neà bak vabak. Eho gi neham bak ozome uba labi gagoho bak. Eho gi neà bak modelo ozome modem dàt modeha gi fa modem bi fai bak meedam tade. Labihaha bak.
19. Neham bak. Ebe eho gi neà bak ozome modelo meedamna meedasome modeha modem bi meeda. Labi laha eho fai bak modem mom dàt it malesome modeha vedi gi fa ame fai bak meeda.
20. Lahana eho ozoha, faina eho modem momda eho meedameam làhà ame eho lab meedaha bak lam debu, “Eho meedase,” lahame nasi fet ozome esuhu vab imot modem bak. Gi em ahu ad niba faina meedalo àhàki ozodamna modesuhu labet modi eho momda fa meedam bak.
21. Eho ozoha, eho bak niba aidam di modi baleàhà bak gi neham bak. Eho gi neà bak ozome modelo meedamna meedasome modeha em ahu adat fai bak modelo àhàki ozodamna ehe labe modem bi fa faina modem bak fa meeda.
22. Ebe eho modi baleàhà bak lam fa veimdi gàhàdehe labe, “Em abo Alat gagu fi hasi vàmadi esuhu im zi lam meedase,” lahame modelo àhàki deeli ozodam bak.
23. Lahamnàme ba ame lab gagu fi hasi vàmadi esuhu im zi lam meedam vabak. Em ahu ad niba ootedamna ehe labet modi eho amu veimdi gàhàlehe bak lam modesome modeha ame na labe eba ausi ot odosiame meedam labe ba ebe eho gi neà bak modelo ozodam im lam ab meedam bieham bak. Labihaha labe ame mei ahu ootedamna labe em ahu ad niba simtedi meedam labe ebe eho faina modelo àhàki ozodam im lam fa meeda.
24. Aiee! Em gi fai bak ab modehameo? Em ahu adat faina modelo àhàki ozodamna modesuhu labe em soa modealahana niba ootedume eho faina meedam tadedàmu emti Alati vaitesu labaha bohu vuusdam bak lam amat eba fa tohe duzu ame bak lam modi fa seti vei neàdela?
25. Faode! Ala ehe bak! “Neàteee,” lahame eho Ala bake vou baedam bak. Aho Am Adat im Boehàda Yesus Kristus modi tohe duzu meedam labe ibi iho im ahu adat faina meedalo àhàki ozodamna labe iba ootedume iho fa faina meedam tadem bak lam modi fa vei seti neàdedamda ehe bak. Labihàmu eho ozoha, ibi iho im ahulat ozome modelo àhàkem bak lam fa veimdi gàhàdehe bak labet modi iho gi ame Alat gagu fi hasi vàmadi esuhu im zi lam modelo àhàki ozodam bak. Lahamnàme ibi iho modi baleàhà bak lam modelo ozodamna labe fa im neà bak ozomna laba ot odosiame iba simtedi ootedam labet modi iho fa uledi faina ab meedam tadeham bak.
1. Yesusat Aho lab tohedateli iba meedaha bak laba iho tu vuzehi meedàmu Alat iba neha, “Im im vamdesu meedam damat modem bak,” lahame ozahit ab deeli gagu vadaham bak. Labihaha labe iho Kristus Yesusti vou ali ahu vàmadi meedam dam nim Alat iba ba gagu beodume vataudam vabak.
2. Eho etei lab gagoho bak lam imbote. Neham bak. Ame faina meedalo àhàki ozodamna labe iba simtedi vi ootedamna lam abo ibi iho modi baleàhà bak labet modi iho faina meedam bak tadehe bak. Labihadam labe Alati imti vaitesu labaha bohu vuusdam bak. Labihàmu Kristus Yesus labe Aba Aho lab tohedateli meedaha bak labet modi Alam Aha Nutabe Neàna abo iba modi gàhàdi iho im vamdesu meedam Da labe Aho mali isi neàdem bak ab faasi meedamam bak.
3. Neham bak. Iho im ahu adat faina meedalo àhàki ozodamna lam ehe labe im bedi ame Musat lab toedume fi hasi vàmadi esuhu Im Feàna zi lam iho keàtet ulohodesu meedam vabilehe bak labet modi iba ba neàdem biehe bak. Lahamnàme Alat fa Aba Aho ozoho bak gàhàna lam fa iba ab tauham bak. Abo Am Adat Yesus bak niba nom olu fa ab im dam bakda faina meedamda aliholeham bak. Abo im dam bakda ahebu iho faina meedam bake gohali ot vai elolo labihaha bak. Aho labiha labe Alat, “Iho faina meedaho. Beome vatause,” lahame Aho iho faina meedam dam niba gagu beodaha vaba vedi fa Am Adat Yesus bake gagu ot vai modi ab eloham bak.
4. Neham bak modelo ahit labihaha bak. Ame Musat lab toedume fi hasi vàmadi esuhu Im Feàna zi lam ahebu iho ulohodesu vamdesu meedume neàbodem bake labihaha bak. Iho ame bak lam meedam di ba ibi iho im ahu adat faina meedalo àhàki ozodam bak laba uledi meedam bak labet ame bak lam meedam vabak. Gi Alam Aha Nutabe Neàna labe Aba Aho ozoho bak lam iba modi vizi iho meedam labe iho Alat Aho gagu fi hasi vàmadi esuhu im zi lam ahebu iho neàbodi bohu vuusdam bak am bak.
5. Iho bak damat Alam Aha Nutabe Neàna labe Aba Aho ozome meedalo àhàkedam bak laba vi uledi tau meedam dam lam im ahu vàmadi gi ame bak vi ozodam bohu meedam damat modem bak. Labiha labe im ahu ba faheme nigom vaba gi vabademsu Alati ahu vàmadi ahe neàna bohu vuusdam bak. Lahana bak damat ibi iho modi baleàhà bak lam ahulat faina modelo àhàki ozodamna labet iba vi ootedam labe iho vi uledi meedameam làhà im gi ahu vàmadi ame bak laba vi ozodam bohu meedam damat modem bak. Labiha labe im ba Alati vahi ahe neàna bohu vuusdam vaba gi Alati vaitesu labaha bohu vuusdam bak.
7. Neham labe labihadam bak. Dam totbaho labe ibi iho modi baleàhà bak lam modelo ozodamna laba uledi meedam dam lam gi Ala bake faki mu vooho damat modem bak. Labi ame dam labe ba Alat Aba Aho gagu fi hasi vàmadi esuhu im zi ba uledi meedaha vabak. Amu gi mu voou baleàhà labe ba uledi meedam biehe bak.
8. Labi laha ame dam labe ibi iho faina meedume baleàhà bak lam modelo ozodamna labe iba ootedam di iho vedi uledi vi meedam dam labe ba Alat Aba Aho deelemna lam ba modem biem damat modem bak.
9. Lahana ubu uho faina meedume baleàhà bak lam modelo ozodamna labe uba vi ootedameam làhà uho ba vi uledi meedam vabak. Alam Aha Nutabe Neàna labe fa uba vizi vuusdam labe uho gi Aba Aho ozoho bak laba uledi meedam bak. Uho laha ozomale. Kristus labe Aho oluhu Aha Nutabe Neàna lam meia vizi vuusdam vabameam ame da lam ba Kristusam damali Amti vou ali ahu vàmadi meedam vab damat modem bak.
10. Lahana umti Kristusti vou ali ahu vàmademeam làhà ozom bak behàsu nim uho ozomale. Uho faina meedàmu um elodam bak lam amu gi vizi baleàhà labe ba malem biemna gi labaha elodam bohu modesdam bak. Lahamnàme Alat uba neha, “Um im vamdesu meedam damat modem bak,” lahame ozahit deeli gagu vadàmu um it lam modi fa Alati vahi gi ahe neàna bohu vuusdam bak.
11. Yesus eloho bak labet modi fa ahedi usaha Ala labe Am Aha Nutabe Neàna lam iba modi vizi vuusdam labe im ekda elodamohonàme Aho gi ame iba vizi vuusdam Da abo Am Aha Nutabe Neàna labe iba laha modi im fa ahededam bak.
12. Emti vahi Kristus bake tu vuzehi meedam dam oa, Alam Aha Nutabe Neàna labe labihadàmu im gi Aba Aho iba mali vi ootedam bak lam iho fa ot vai meedamna am bak. Ba im dam bakda nibe ibi iho meedume baleàhà bak lam modelo ozodamna labe iba ootedam di iho ba ot vai ame faina meedam bak lam vuusdam vabak.
13. Eho gi neham bak ozome uba labi gagodam bak. Uho gi im bak damat ibi iho faina meedume baleàhà bak lam modelo àhàki ozodamna labe uba vi ootedam di uho vi uledi meedameam làhà ba uba modi Alati vahi ahe neàna bohu vuusdam vaba gi Alati vaitesu labaha bohu vuusdam bak. Lahana Alam Aha Nutabe Neàna labe uba vizi vuusu vamdedam labe um fa keàtedi um soa modealahana labe faina modelo àhàkemna lam uho gi labihasu mu voedam bohu meedameam làhà Alat uba modi Amti vahi gi ahe neàna bohu ab vuusdamam bak.
14. Alam Aha Nutabe Neàna labe Aba Aho meia vizi vuusu vamdedam di lam vi uledi meedam dam lam Alam damalem dam am bak.
15. Ame bak lam imbote. Alat Am Aha Nutabe Neàna labe uba vizi vuusdam labe imbodehe bak. Lahana Aho uba vuusdam labe Alat uba beom bak lam uho ba Ala bake vei iedem vabak. Ba mei na teo meedamda labe aba im gagu modiamda laba iedem bakti uloho vabak. Gi fa neham bak. Alat Am Aha Nutabe Neàna labe uba vizi vuusdam labe mei data ve voam bakti ulohona modi im ab Alam damaleham bak. Labi laha im ahu ad niba modi vizi teudehe labe iho meidavat fa Ala bake gagom di, “Om em Ai am tame,” lahame gagodam bak.
16. Ame Alam Aha Nutabe Neàna labe Aba Aho im ahu ad niba lab vizi meedam bak labet modi, “Alam damalehe dam im am bak,” laham bak lam im ab ozobohudeham bak.
17. Kristus labe amu bak niba aidam di gi im neàna meedam Dàt modemnàme na im Aba modemna modi geàda. Labi im Alam damalehemu ame bak lamti ulohona laha iba neo modi vabidume geàdam bak. Alat Am feà bak lam fa Kristus bake modi feà Datelehe bak lam ba diamut iho laha tau modi feà damalem bake labiham bak. Abo im Alam damalehe labe Am Adat Kristus bake neà bak vizi meedamna lam im laha ba tau vizi meedam bak lam im ab ozobohudeham bak.
18. Eho ozoha, Alat Am feà bak lam ba diamut iba fi zeam bitoi im tau feà damalem bak lam bisi feà labe na im etei iba vabidume geàdamna nim im ba ozome àvodemnat modem vabak. Na lam gi vo gatbeti ulohona modem bak.
19. Etei nim Alat asum ahoba iuba modealahana zi iumti bak niba alimeat modealahana zi nimti im ahebu, “Alam damaleheda imboda akete?” laham bak lam Alat Aho ba modi fi zeam bitom bake im ahebu ilahu vou faodam bak.
20. Nehaha bak. Alat alimeat bak nimti na ahebu meedaha di iube gi fi hasi neà bak modi esuhu bak. Lahana Adam labe aho faina modehe labe Alat bak niba ahit vi ulooho labe vàhàdeme ab bohulaleham bak. Labiha labe Alat Aba Aho fet ozome esuhu bak lam ame na zi labe ab modem bieham bak. Lahana iho lab modem biehe bak lam debu ame na zi labe ibi iho ozoho bak labet modehe vabak. Gi Alat Ahamo, “Nehi modese,” lahame gagu vàmadehe labe labihaha bak. Alat gi, “Na zi lam fa neham bak tu vi ozodase,” lahame ahit labihaha bak.
21. “ ‘Ame na alimeat meedahana zi lam Aho fa ba diamut modi koeilem gikinali fa Am damalehe dam labe iho feà damalehe bak laba vi tau modi feà damalem bak ehe bak,’ laham bak laba ilahu vou faodase,” lahame Alat ahit vi ulooho bak.
22. Im neham bak ozobohu bak. Bak niba na alimeat meedahana zi lam ahebu fai bak modi esuhu labe, “Fà modi feà damali neàbodedase,” lahame geàda. Amu gi faasi meedume etei ab vou fuham bak. Abo nam data faaseo modem di labe kikezi geàdam bohu meedume data faam bakti ulohona meedam bak.
23. Ba na zi lamota geàdam vabak. Im Kristus bake tu vuzehehe dam abo Alam Aha Nutabe Neàna labe iba vizi vuusdam dam nibe im laha im ahu ad niba laha modi geàdam bak. Ame Alam Aha Nutabe Neàna labe im ahu ad niba lab vizi vuusdam bak lam Alat nasi fet modemna am. Ba diamut Alat Am feà bak lam iba fi zeam bitoi im tau feà damalem bak ehe bak. Labihàmu iho adnahet geàdam labe nehasu vou faoda. Alat ba diamut iba modi im Am dam aaboli neàdi iba fi hasi vizi meedamna laba ozome ilahu vou faoda. Abo im so niba modealahana zi nibe modi vanamamna fa vaitoi fa so gàhàli neàbodem bake laha vou faoda. Labihasu vou faodam di nibe gi geàdam bak.
24. Alat neha, “Aho ba Am feà bak lam iba modi fi zeam bitoi im tau feà damale tame,” laham bak lam iho lab nasi tu vou faodam bak lam iho amu gi Alat Aho im faina meedam bak lam Aho fa faamome iba soat vausu fa vei neàdehe di labe faasi etei tu vou faodam lahasuhu bak. Ame na iho tu vou faodamna lam iho amu gi vameam làhà im ba tu vou faodam vab taia? Ame na iho vame neàdehena akati ba tu vou faoela?
25. Lahana ba labiham vabak. Etei laha tu vou faodam lahasuhu bak. Iho meit nehi gagomeam, “Ame na lam iho ba vam bak,” lahame iho labi tu vou faodameam làhà ame na iho tu vou faodamna lam iho amu vaha vabak. Ame na iho vaha vaba tu vou faodam lahasumeam làhà im ba vou faome mu voom vabak. Abo ilahu modem faidehenàme gi labaha bohu vou faodam bak.
26. “Alat Aho ba Am feà bak lam iba modi fi zeam bitoi im laha vi tau feà damale tame,” laham bak laba iho tu vou faodam bak labet modi na im iba modi geàdam labe im ahu nemahubalem di lam Alam Aha Nutabe Neàna labe iba tau meedam labe im gi keàtedi meedam bak. Iho Ala bake tom gagodam di, “Im akatihasu tom gagoela?” laham bak lam im biem meot. Lahana Alam Aha Nutabe Neàna labe Aho iba tau ot vai im aim biem dae geme fa Ala bake tom gagodam meo bak.
27. Labi mei ahu ad laba nabime ozobohudem Ala labe Am Aha Nutabe Neàna labe fa Aba im gagom di, “Akatiham bak ozome Eba labi tom gagodàla?” laham bak lam Ala Am ozobohudem bak tadehe bak. Nehaha labe labiham bak. Iho ba modem im Alat amu nasi fet ozome esuhu bak ehe bak. Labiha labe Alat Am Aha Nutabe Neàna labe im Alam damalehe dam niba iba ozome Ala bake tom gagodam di gi Alat amu fet ozome esuhu bak lamti uloholi ot vai Ala bake tom gagodam bak.
28. Iho Ala bake deeli meedam dam nim abo Alat neha, “Iho nehasu meedase,” lahame Aho fet ozome esuhu dam nibe iho bak niba esdam di na im zi iho meedamna ahebu Aho fa meedume ba neàbodedam bak. Ame bak lam im ozobohudehe bak.
29. “Dam adida Am Adat Kristus bake tu vuzehi meedàla?” laham bak lam Alat amu di iube gi fet ozobohudi esuhu bak. Labi ame dam lam, “Fa Am Adat Yesus labe Aba Aho meedume baleàhà im lamti ulohona fà meedume Am itbaho fatose,” laham bak lam Alat laha amu di iube gi fet ozobohudi esuhu bak. Labiha labe iho ozom, Yesus abo datahida ozomomda Am am bak. Labi im Alam damalehe dam nim Am vahadam zi ozomom dam im am bak.
30. Labi Alat Aho neha, “Am Adat Yesus labe Aba Aho meedume baleàhà im lamti ulohona fà meedume Am itbaho fatose,” lahame Aho fet ozome esuhu dam lam Aho laha gi ame dam laba, “Aba tu vuzehedase,” lahame ozome vameadaha bak. Labi Aho neha, “Aba tu vuzehese,” lahame ozome vameadaha dam laba Aho laha neha, “Um im vamdesu meedam damat modem bak,” lahame ozahit deeli gagu vadaha dam am bak. Labi Aho lab ozahit deeli gagu vadaha dam lam Aho neo neha, “Ba diamut Am feà bak lam ame dam laba modi Aba tau feà damalese,” lahame fet gagu vàmadi esuhu dam am bak. Labihadaha bak.
31. Alat iba faobekesi bohu vuusu meedaha bak lam eho etei uba lab vameadaha im zi lam iho vi ozom di im ahu ab teudi deelehe bohu vuusdamam bak. Alat iba taum labe amat ba iba mali odoe? Ba iba mali odomda vabak.
32. Eho gi neham bak ozome uba labi gagoho bak. Am Adat lam Alat Aho naedat ba malehe vaba fa gi nehaha bak. Im dam ahebu nibe iho faina meedam bake gohali ot vai elom bake uledi ahit bak niba olu dam bake ub lu otehe bak. Labihàmu Alat Am Adat iba malehe vaba fa iba oluhu labe im akati ozoe? Gi neham bak. Am laha, “Iho Aba Aho ozoho bak laba uledi meedase,” laham bak modelo na im vekeheda totbaho ahebu aho laha iba ilabdi neo vi modi vizeda tame.
33. Alat iba tauhu labe Aho iba neha, “Am damalehe dam im am tame,” lahame amu gi ozahit deeli gagu vadaha dam niba ba amat iba neha, “Iho faina meedaho,” lahame vàlu gagoe? Alat iba vàlu gagoe? Vabà! Ba vàlu gagomda vabak. Alat Ahamo amu neha, “Im im vamdesu meedam damat modem bak,” lahame ozahit deeli gagu esuhemu labihaha bak.
34. Ba amat iba neha, “Dam lam faina meedaho. Beome vataum neàte,” lahame labi vàlu gagoe? Kristus Yesus iba labi vàlu gagoe? Vabà! Ba labi vàlu gagomda vabak. Nehaha bak. Iho faina meedam bak lam Kristus gi amu iba gohali ot vai eloi vasea veàtoi eloho bak. Lahana gi im lada lamota modehe vabak. Am eloho bak labet Alat modi fa ahedi usai fa neo tom ilu Alat Am ahi totbaho laba nusu tau feà Dateli na ahebu vuusdam bak. Labi ame Da Kristus Yesus lam Alat avaesdam laba tohe duzu dam Aba tuhuda labe im im ot vai vameadam bak. Labiham labe ba iba neha, “Faite. Beom neàte,” lahame vàlu gagomda vabak.
35. Um im nidi nim laha nasi aimale. Kristus iba deeli meedam bak lam ba amat modi sete? Na im modem biemna labet ame bak lam modi sete? Na im iba modi gemna zi labet ame bak lam modi sete? Meit iba vabi beodam bak labet modi sete? Iho idoalem bak labet modi sete? Iho na vabalem bak labet modi sete? Iho bak fai bak ahebu azi meedam bak labet modi sete? Damat iba oddam bak labet modi sete? Ba ame im zi labe iba modi Kristus iba deeli meedam bak lam vàhàdeme setem bak na vabak.
36. Eho etei lab debe vameadaha im zi lam gi dat ahamda Daud labe aho Ala bake vameadaha im abo Alat Vameadaha Im Toedahana laba nehi toehe bakti ulohote. “Boehàda oa, im Om damalehemu dam giida zi totbaho labe iba otelo àhàki modem zidalo. Ame dam labe iba ozom di vedi im gi na vahedume nehuli otem dombati ulohona ozomom damat modem bak.” Lahame labihasu toehe im lamti uloho bak.
37. Lahana ame im zi ahebu iba meedamnàme ibi zohot gi ab teudi vàmadi duzu meedamam bak. Kristus iba deelem bohu meedamda labe Aho iba tauidam labe labihaha bak.
38. Eho etei gagolo modem im nim em abo ozobohudi neàbodehe bak. Alat iba deelem bohu meedam bak lam ba modi setem bak na vabak. Damat iba oddam bak modeo, iho gi elodam bak modeo, iho bak fai bak niba esdam lahasuhu di modi geàdam im zi modeo, Alat gagu Am im vou usem dam modeo, mei ahu oli veimam setan zi modeo, etei meedam im modeo, ba diamut meedam im modeo, na meona abo bak niba veimai boehà damalehena lamti labi asum beaba iuba veimai boehà damalehena lamti labihasu iho aam biemna zi ahebu modeo, abo Alat na alimeat meedahana zi totbaho ahebu modeo, ame na zi labe Alat iba deelem bohu meedam bak lam ba modi setem vabak. Abo im Boehàda Yesus Kristus labe Aba Aho tohedateli iba lab meedaha bak labet modi Alat iba deelem bohu meedam bak lam iho ab ozobohudeham bak.
1. Emti vahi Kristus bake tu vuzehi meedam dam oa, emti Kristusti vou ali ahu vàmadehemu eho etei uba vameadalo modem im nim ba giomimot modem vabak. Abo imbote. Abo Alam Aha Nutabe Neàna labe em ahu ad niba vizi vuusdam labe em ahu adat it ozomna nibe eba vi tau uledi vameadam bak.
2. Neha: Em Israel dam dua totbaho labe Yesus bake tu vuzehem bak mu bohu vuusdàmu em ahu faidi feà bak fusi bohu vuusu meedalo. Em ba giomim gagom kaio. Em Israel dam totbaho labe fa Kristus bake tu vuzehi Alat ame dam laba soat vausu fa vei neàdemta Alat fa eba nasi neha, “Seee. Kristusti emti vaitesu labaha bohu vuusdase,” lahame eba labihasu uloom di em uledem bak.
4. Em Israel dam lam aham di iube Alat neà bak abo duana nehi iba modi esuidaha bak. Israel labe aho vou faat ledaha dam lam Alat gi amu di iube fi hasi gagu Am damalehe dam zi am bak. Labi laha Alat neha, “Am data aabolehena ozomom damat modem bak,” lahame ozahit deeli gagu vadam dam zi am bak. Labi laha ame dam labe iho aham di iube ame bak aotba baa bohu dam vaba alim bak laba Am feà bak lam aadume tombalehe dam zi am bak. Labi laha ame dam zi lam Alati im fet ot vameadume vàmadi esuidam dam zi am bak. Labi laha ame dam lam Alat aham di iube Sinai Sibu laba Aho gagu fi hasi vàmadi esuhu Im Feàna zi lam Musa bake vameadume aho fa ot vai fa vameadam dam zi am bak. Labi laha meit am ahu adat iedi Ala bake vou baedam di, “Akatihasu iademe vou baedàla?” laham bak lam Alat modi ozobohudi fi gatedaha dam zi am bak. Labi laha Alat fet vameadume vàmadi esuhu bak lam ba fa modi imbodi meedam dam zi am bak.
5. Labi laha ame dam labe im tai ahobada lam abo Abrahamti Isakti Yakubti labihasu Alat gagu fi hasi im Israel dam debu dualehe dam làtela am bak. Labi ame dam debu labe vou faat ledume Alat Gagu Fihasi Vimteme Oluhu Dat Boehàda lam gi im Israel dam aliholi faaha bak. Labihadaha bak. Lahana akati modi em Israel dam dua zoho labe fa Kristus mu Aba tu vuzehehe vaba mode? Am abo Ala am bak. Na ahebu vuusdamda bisi feàda lam iho gi Aba labaha bohu vou baedam bak lam gi ahole meedam bak. Imbote.
6. Eho amu neha, “Em Israel dam dua zoho labe iho Kristus mu vooho bak,” lahame eho lab gagoho bak lam uho mu nehi gagoe moio? “Làhà, Alat amu im Yahudi dam labe im tai ahobada lam abo Abrahamti Isakti Yakubti labihasu ame dam laba neha, ‘Ubu uho vou faat ladam dam laba Eho neà bak modi esuida tame,’ lahame im Yahudi dam ahamda laba amu fet vameadume esuhu im lam Aho gi vagehe taia?” lahame uho eba labi gagomeam làhà eho uba gi nehi fa gagom bak. Um git ozoho. Alaba zoho ba vagem vabak. Neham bak. Ame da Israel labe aho vou faat ledaha dam ahebu iho nehi gagodam bak. “Im abo Israel dam am,” lahame daetbadam dam lam Alat ozom di bisi ahebu Am dam aabolehena ozomoho vabak.
7. Labi laha Abrahamat aho lab vou faat ledaha bak labet modi ame dam zi ahebu Alat ozom di, “Abrahamam mekehà zoho aabolehena ahebu am bak,” lahame ba labi ozome gagodam vabak. Abrahamam adam totbaho labe iho lab vou faat ladaha dam lam, “Abrahamam mekehà zoho aabolehena am bak,” lahame ba labi ozome gagodam vabak. Neham labe labihaha bak. Alat amu Abraham bake fet vameadume vàmadi esuhu di lam gi Abraham bake nehi vameadume esuhu bak. “Gi om adat Isakat aba aho vou faat ladam dam lamota om mekehà zi aabolehena am bak.” Lahame labihasu fet vameadume esuhu labe eho uba labi gagoho bak.
8. Labihàmu iho nehi ab ozoham bak. Aham di iube Alat Abraham bake fet vameadume vàmadi esuhu bak laba Abrahamat tu vuzehehe bak labet modi Isak ab faaham bak. Ame bak lamti ulohona iho Alat fet vameadume vàmadi esuhu im zi laba tu vuzehemeam làhà im Alam dam aabolem dam im am bak. Ba Abrahamat aho lab vou faat ledaha bak labet Alat ozome im Am dam aabolem vabak. Iho gi Alat iba lab fet gagu vàmadi esuhu bak laba tu vuzehemeam làhà im bisi Abrahamat aho vou faat ledaha dam aabolemna ozomom dam im am bak.
9. Alat Abraham bake nehi fet gagu vàmadi esuhu im ehe labe labihaha bak. “Em abo tahun nidi nim foli neàdi di nimodam di fa neo oba le tame. Labi di labe om nam Sara daboseà faam di am tame.” Lahame labihasu fet vameadume vàmadi esuhu bak. Labiham labe Abrahamat nehi ab ozoham. Ba am data amu faahada Ismael labet modi aho vou faat ladam dam aabolehena debu dualem bak laba vameadaha vabak.
10. Ame bak lam ozom di gi ba im lada lamota vi ozodam vabak. Im meida nidi nim laha ehe bak. Alat Aho ba neo Ribka bake fet vameadume vàmadi esuhu im lam ozom di gi nehaha bak. Abrahamat Isak faasi buduali Ribka ab vaham. Labi am nam Ribka zubuli data tasbana faaseo modem di labe Alat nehi fet vameame vàmadi esuhu im ehe bak. Ame im lam ehe labe eho amu uba lab gagoho bak lam, “Ba Abrahamat aho lab vou faat ledaha bak labet Alat ozome im ba Am dam aabolem vabak,” lahaha bak lam ahole gagoho bak. Neha: Ame data tasbana lam am ai gi vàmtea bak. Im tai ahobada Isak am bak.
11. Lahana Ribka ame data tasbana Yakubti Esauti faaseo modem di labe abo ame data ahim labe iho fai bak meedào? Neà bak meedào? Labihasu meedaha vab di labe, “Ame data tasbana lam ba ibi iho Israel damat meedume baleàhà im modem vaba gi im mei meeda tame,” laham im lam Alat Ribka bake nehi fet vameadume vàmadi esuhu bak. “Oho etei faaseo modem data tasbana lam amu nasi duzu faahada labe aho vou faat ladam dam lam gi data tasbana ba vi faahada labe aho vou faat ladam dam labe im na teo meedam damalem bak meeda tame.” Lahame labihasu fet vameadume vàmadi esuhu bak. Alat labi fet vameadume vàmadi esuhu bak labe iho nehi ozo, “Alat, ‘Dam adida Aho neà bak mode,’ laham bak ozome dam fi hasi vam di ba, ‘Ame dam ibi iho neà bak meedào? Fai bak meedào?’ laham bak laba nasi vi ozome ba dam fi hasi vadam vabak. Aho gi Aba Aho ozoho baket modi fi hasi vadam bak.” Laham bak lam tombalelo aho ahit Ribka bake labi fet vameadume vàmadi esuhu bak.
13. Eho etei lab gagoho bak lam meit Alat Vameadaha Im Toedahana laba nehi toehe bakti ulohote. “Alat neha, ‘Yakub lam Ebe Eho bisi deeleheda am bak. Lahana am dubu Esau lam Eho bisi deelem kaio.’ ” Lahame labihasu toehe im lam ehe labe eho uba labi gagoho bak.
14. Eho etei lab vameadaha bak lam uho meit aime mu nehi gagomeam, “Oo làhà! Alat gi Aba Aho ozoho bak labet modi dat meida voo. Dat meida va. Labihameam làhà ba neà bak modem vaba git modehe taia?” lahame uho meit labi gagomeam làhà eho gi fa uba nehi gagom bak. Vabà! Um git ozoho. Alat ba git modehe vabak. Ahole modehe bak.
15. Alat aham di iube Musa bake nehi gagoho im nasi vi ozomale. “Eho ozo, ‘Eho da lada laba aam faimu faobekesi im neà bak tau meedase,’ lahame Ehemo labi ozomeam làhà Eho ame da laba labihasu modem bak.”
16. Lahame Alat Musa bake labihasu gagohemu iho nehi ab ozoham bak. Alat gi Ahamo ozoho bak labet modi dam bake fi me vadam bak. Ba meit neha, “Em vale,” lahame labi gagomeam ba vam vabak. Labi laha meit neha, “Eho gi im nehasu meedam labe Alat eba deeli vam bak,” lahame ame da labe aho lab gagu meedam bak labet modi Alat ba dat lada lam laha vam vabak. Gi Alat Ahamo Aba Aho ozoho bak labet modi dam bake aam faimu faobekesi im neà bak tau meedam labet modi dam vadam bak.
17. Gi im lada lamota vi ozodam vabak. Im nidi nim laha vi ozomale. Alat aham di iube Firaun abo Mesir boehàdatebo bake nehi vameadaha im Musat toehena ehete. “Om ee vousai boehàdatebolehe bak lam gi modehe vabak. Eho ahit oho Em dam lab isi oudaha vaba odohali moidàmu Eho na feàna oudaha bak labet modi, ‘Em feà bak nim modi tombalese. Labi tombali dam ahebu vou susu ladume Em ee vou fi det ladume ozobohudi fi gatedase,’ laham bak ozome oba modi om ee vousai boehàdatebolehe bak.”
18. Lahame Alat Firaun bake labihasu gagohemu iho nehi ab ozoham bak. Alat Aba Aho ozoho dam laba fi hasi neha, “Eho ame dam niba aam faimu faobekesi im neà bak tau meedase,” lahame ozom di ame baket meeda. Labi laha neo Aba Aho ozoho dam laba fi hasi neha, “Ame dam labe im ahu laba Eho modi odohalese,” lahame ozom di laha ame baket meeda. Alat gi Ahamo Aba Aho ozoho bak labet labihadam bak.
19. Eho etei lab vameadaha im lam uho meit aime mu nehi gagomeam, “Oo làhà! Alat labihasu meedam Alat mode? Làhà, iho faina meedam bake akati modi Aho iba faki beom bak gagodàla? Im gi Aba Aho amu di iube fet ozome esuhu baket meedaha taia? Akati ba iba fake?” lahame uho meit labi gagomeam làhà eho fa gi uba nehi gagom bak. Vabà! Labihameam um git ozome gagodam bak. Um ba a labi ozome gagodamule. Im gi ekda akati ba Ala bake im vahokedà? Ba labiham biem bak. Um ozom vaba? Ba ohanubu labe ba ahali aba modi nazohaedamda laba neha, “Om ana modi eba nazoh giida meedà?” lahame ba labi gagom vabak.
21. Gi nehamta ahole modem bak am. Ame ohanubu modeme nazohaedamda labe ahamo naedat ozome ame ohanubu vàmtea ve guti behàsdi meida na vaheme fi hasi esumda mode. Labi meida gi dihasi na vahe. Dihasi na vahe. Lahamda mode. Gi labihadam bak. Ahamo aba aho ozoho baket meedam bak lam ahole modem bak am. Alat laha Aba Aho ozoho bak lam ahole Ahamo meedam bak.
22. Labihadam labe iho nehi ozo. Alat neha, “Damat im nehasu meedase. Damat im nehasu meedase,” lahame Aba Aho ozoho bak labet modi Ahamo naedat faheme ahala modi ahala modidam bak lam ahole meedam bak. Ba git meedam vabak. Alat im nehasu modi tombalelo àhàki meedam bak. Damat ibi iho faina meedam bak lam, “Am abo faki ahu nemahuho,” laham bak lamti labi, “Am feà labe ame dam laba vatau beom meo bak,” laham bak lamti, “Labihasu damat fà ozobohudese,” lahame Alat modi tombalelo àhàki meedam bak. Lahadamnàme dam Aba fakem dam lam Alat Ahamo ozo, “Aho beodume foli seddase,” lahame amu lab fet gagu esuhu dam lam Ahamo ozahigeàmu gi laha vou faodam bak.
23. “Am abo gi im neà bak duana meedam Alat modem bak,” laham bak lam, “Dam nehamda fà ozobohudese,” lahame ame dam laba ozahigeàmu vou faodam bak. Aho aam faimu faobekesi im neà bak tau modelo modem dam lam, abo Aho amu di iube neha, “Dam nim Emti feà damali asum ahoba iuba vahi azise,” lahame Aho lab modi neàdi ahumdi esuhu dam lam,
24. abo Aba Aho deeli fi hasi vaha dam abo im Yahudi dam modeo, Yahudi damat modem vab dam modeo, “Laham dam fà ozobohudese,” lahame ahit ozahigeàmu vou faodam bak.
25. Alat dam bake fi me valo modem di gi Yahudi dam modeo, Yahudi damat modem vab dam modeo, ahebu Ahamo naedat Aba Aho ozoho bak labet modi Am damali vadam bak lam gi Alat Ahole meedam bak. Nehaha bak. Dat ahamda Alat gagoho im aime fa dam bake vameaidahada Hosea labe aho Alat aba fet vameadume esuhu im nehi toehe bak ehe labe eho uba labi gagoho bak. “Dam amu Em damalehe vab dam lam Eho ba etei neha, ‘Em dam,’ lahame gagu esu tame. Labi Eho meia deeli meedam bak lam Eho modi ozobohudi fi gatehe vab labe biem lahasuhu dam debu lam Eho ba ame dam debu laba modi ozobohudi fi gate tame.”
26. Labi Alat fet vameadume esuhu im Hoseat neo toeheda meida laha neha: “Aham di iube bak mei bak mei lahadume azihi dam laba Alat neha, ‘Um Em dam modem vabo,’ lahame vou gagotedam bak lam ba diamut dam amomoi laba le nehi gago tame. ‘Um abo Ala elom gikina ahe neàna bohu vuusdam Ala labe Am dam um am bak,’ lahame ba gagu esu tame.” Lahame Hoseat labihasu toeme esuhu bak. Ame im lam gi Yahudi damat modem vab dam bake ozome fet toeme esuhu Alam im am bak.
27. Lahana dat ahamda Alat vameadaha im aime fa dam bake ahate vameaidahada Yesaya labe aho laha Israel labe aho vou faat ledaha dam nim abo im Yahudi dam bake ozome nehi fet toeme esuhu bak. “Ame da Israel aho vou faat ladam dam debu dua labe abo itea auobe kebe fau ziti uloholi dem biemna modemnàme Alat gi ame dam koe zohota soat vausu fa vei neàdeda tame.
28. Neham labe labiham bak. Alat dam bakda ahebu ibi iho meedaha im vi ozome fahedam digat ba fuhuzobe faheda tame. Am ba, ‘Laha vou faodase,’ lahame gagom vabak. Abo gi taho modeme vaitom bak.” Lahame labihasu fet toeme esuhu bak.
29. Labi Yesayat fet toeme esuhu im meida neha: “Iho vou faat ladam bak lahasdam bak lam Boehàda Bisi Feà Datebo Ala labe Aho uledem vaba abo im zoho vekem vabameam làhà im gi ahebu beodume foli seddam bak. Abo Aho amu Sodom damti Gomora damti beodume foli seddaha bakti uloholem bak.” Lahame Yesayat aham di iube labihasu fet toeme esuhemu iho nehi vi ozom bak. Alat dam bake fi me valo modem di gi Yahudi dam modeo, Yahudi damat modem vab dam modeo, ahebu Ahamo naedat Aba Aho ozoho bak labet modi Am damali vadam bak lam gi ahole meedam bak.
30. Làhà, iho labihasu vameadam labe im ba akatihasu ozoe? Gi nehi ozom bak. Yahudi damat modem vab dam, “Alat iba deeli vam bak im akatihasu meedam labe Aho iba deeli vàla?” laham bak lam ba ozodaha vabnàme Alat ozahit ame dam laba neha, “Dam lam im vamdesu meedam damat modem bak,” lahame ozahit deeli gagu vadam bak. Kristus labe Aho iba lab tohedateli meedaha bak laba tu vuzehi meedàmu labihaha bak.
31. Lahana ame da Israel labe aho vou faat ledaha dam abo im Yahudi dam nimota iho nehi ozo, “Ame da Musat lab toedume fi hasi vàmadi esuhu Im Feàna zi lam iho meedam labe Alat iba neha, ‘Im im vamdesu meedam damat modem bak,’ lahame ozahit deeli gagu vada tiba.” Lahana iho ame Im Feàna zi lam la modi le modidaha ba ulohodesum bi ibi iho ozoho bak lam abo Alat iba ozahit deeli vadam bak lam ba modem vabak.
32. Neham labe labihaha bak. Vedi ibi iho ozome neà bak meedam bak lam abo ame da Musat toedume fi hasi vàmadi esuhu Im Feàna zi lam la modi le modidaha modem bak labet modi Alat iba deeli va tiba. Ba Alat Aba Aho meia soat vausu gàhàlem bak laba tu vuzehem vabak. “Alat Gagu Fihasi Vimteme Oluhu Dat Boehàda ba elom kaio,” lahame tu vuzehehe damat modem labe Yesus elohemu ame Yahudi damat vedi ab ahu faidi teidi ozodamam. Ame bak lam gi kebu guezi bitem bakti ulohona modehe bak.
33. Ame Yahudi dam labe ibi iho guezi bitehe bak lam gi dat ahamda Yesayat aho nasi fet toeme esuhu im am bak. Yesayat aho aham di iube Alat Aho ba Gagu Fihasi Vimteme Olulo Modem Dat Boehàda laba ozome gagoho im lam Alat Vameadaha Im Toedahana laba nasi nehi fet toeme esuhu bak. “Alat neha, ‘Nasi aimale. Ame Israel damat azihi bak Sion laba Eho damat guezi bitem kebuti ulohona ozomomda ab modesuham bak. Abo ame Da labe Aho ba meedam im lam damat ibi iho ozoho bak modehe vabamu damat ahu faidi teidem bak. Lahamnàme ame Da laba tu vuzehem dam lam ba ahu faidi teidem vabak.’ ” Lahame Yesayat labihasu toeme esuhu bak.
1. Emti vahi Kristus bake tu vuzehi meedam dam oa, “Alat em Israel dam lam Aho soat vausu ibi iho faina meedam bak fa faamome vei neàdedase,” lahame ilahu vi ozoda. Labi eho Ala bake tom gagodam di em gi ame bak lam vi ozome keàtet tom gagodam bak.
2. Em dam laba abo imbona vi ozome nehi vameadalo modem bak. Dam labe ozo, “Alat fà iba deelese,” lahame ahu adat iedi dihasi Ala bake vou baedam imta modida. Lahana ame dam labe, “Ba iho ana meedam labe Alat iba deelela?” laham im imbo bak lam vabili meedam damat modem bak.
3. Alat meia neha, “Im vamdesu meedam dàt modem bak,” lahame ozahit deeli gagu vadam bak lam Aba Aho ozoho bak lam damat iademe meedam bak ehelahit ame Israel dam labe vedi fako aubesuhuna ozohomu meeda. Ame dam labe iho Kristus bake tu vuzehem mu vedi fa gi zie fàusi ibi iho modelo àhàkemda fa meeda. Vedi gi ame Im Feàna zi lam meedam labe, “Alat iba neha, ‘Im im vamdesu meedam damat modem bak,’ lahame ozahit deeli gagu vadase,” lahame vedi git la modi le modidam damat modem bak.
4. Lahana ame bak labet modi Alat iba ozahit deeli gagu vadam bak na vabak. Kristus iba ba oluhemu dam amu ame Im Feàna zi lam la modi le modidam labe Alat iba ozahit deeli gagu vadam bak lam fa ab vaitoi seteham bak. Labihàmu meit Kristus bake tu vuzehemeam làhà Alat ozomta, “Ame da lam im vamdesu meedam dàt modem bak,” lahame ozahit deeli gagu vadamda am bak.
5. Eho amu neha, “Damat ozoha, Musat lab toedume fi hasi vàmadi esuhu Im Feàna zi lam iho ulohodesu meedam labet modi Alat iba neha, ‘Im im vamdesu meedam damat modem bak,’ lahame ozahit deeli gagu vadam bak,” laham bak lam Musat aham di iube im nehi fet toeme esuhu bak ehe bak. “Alat vameadume fi hasi vàmadi esuhu Im Feàna zi lam meit ame im vàmtea voom vaba abo ahebu ulohodesu meedam bak labet modi ame da lam ahedemda am bak.” Lahame Musat labihasu ab toeme esuham.
6. Lahana meit Kristus bake tu vuzehehemu Alat aba neha, “Im vamdesu meedam dàt modem bak,” lahame ozahit deeli gagu vamda lam fa meia gagom di gi dat ahamda Musat aba aho gagoho bakti ulohona nehi gagodam bak. “Um ba a nehi tozome gagodamule. ‘Alat iba soat vausu fa vei neàdem im lam im aise,’ lahame, ‘Amat asum ahoba iuba tom ilu ame Da ve fa neo vou nom ilu Aho iba ame im lam vameadà?’ laham bak lam a gagomule.” Ame bak lam gi neham bak. “Ba amat asum ahoba iuba tom ilu Kristus ve fa neo vou nom ilu Aho iba ame im lam vameadà?”
7. “Laham vaba um ba a nehi tozome gagodamule. ‘Amat koei it oazi esdam bak laba nom ilu ame Da ve fa neo tom ilu Aho iba ame im lam vameadà?’ laham bak lam a gagomule.” Ame bak lam gi neham bak. “Ba amat koei it oazi esdam bak laba nom ilu Kristus ve fa neo vou tom ilu Aho iba ame im lam vameadà?” Nehaha bak. Kristus amu gi bak niba nom ilu dam bake soat vausu fa vei neàdi Am eloho bak labet Alat modi fa ahedi usaha bak. Labiha labe ba akati meit labi gagoe?
8. Iho Kristus bake tu vuzehi meedam dam nibe iho gi fa Musat aham di iube aho nehi gagoho bakti ulohona gagodam neà bak. “Alat Aho vameadaha im lam gi netà niba aim neà imot modem bak. Abo iho ame im lam ve im ahat vameadam neàt. Labi laha ame im lam ihimo ozome im ahu ad niba vi ozodam neàt. Labihasu meedam imot modem bak.” Lahame labihasu gagodam bak. Ame im lam, “Meit Kristus bake tu vuzehi meedam labe Alat soat vausu fa vei neàdemda am bak,” laham im lam ibi iho dam bake vou vameatedume fi dehe im am bak.
9. Ame im lam gi im nehasu vameadam imot modem bak. Yesus Am eloho bak labet Alat modi fa ahedi usaha bak laba uho meit am ahulat tu vuzehi nehi gagomeam, “Ame Da Yesus lam im Boehàda am bak,” lahame am ahat ahate gagomda lam Alat soat vausu fa vei neàdemda am bak.
10. Eho gi neham bak ozome uba labi gagoho bak. Kristus Am eloho bak labet Alat modi fa ahedi usaha bak lam im ahulat vi ozome tu vuzehem labe Alat iba neha, “Im im vamdesu meedam damat modem bak,” lahame ozahit deeli gagu vadam bak am bak. Labi iho neha, “Ame Da Yesus lam im Boehàda am bak,” lahame im ahat ahate dam bake labi gagom labe Alat iba soat vausu fa vei neàdem bak am bak.
11. Damat ba Kristus bake tu vuzehi meedam bak lam Yesayat aham di iube Alat Vameadaha Im Toedahana laba nehi nasi fet toehe bak. “Meit Aba tu vuzehemda lam ba ahu faidi teidem vabak.”
12. Lahame labihasu toeme esuhu im lam iho vi ozom di gi dam ahebu vi ozome gagom daet modem bak. Yahudi dam modeo, Yahudi damat modem vab dam modeo, Alat vi ozome meedam di ba dam faheme modidam vabak. Gi ulohodesu meedam bak. Neham bak. Im Aba tu vuzehehe dam ahebu im Boehàda gi vàmtea bak. Labiham labe meit Aba neha, “Eba faobekesi taule,” lahame gagomda lam Aho gi ilabdi deeli neà bak duana meedam bak.
13. Eho etei lab gagoho bak lam dat ahamda Alat vameadaha im aime fa dam bake ahate vameaidahada Yoel labe aho aham di iube nehi toeme esuhu imti uloho bak. “Meit Boehàda Ala bake neha, ‘Eho faina meedàmu Oho eba beolo meedam bak lam fa mu soat vausu fa vei neàdele,’ lahame geme gagomda laba Aho soat vausu fa vei neàdemda am bak.” Lahame labihasu toeme esuhu bak.
14. Eho etei lab gagoho bak lam, “Meit Boehàda Ala bake neha, ‘Eba faobekesi taule,’ lahame gagomda lam Aho soat vausu fa vei neàdemda am bak,” lahame gagodam bak lam uho meidavat aime vedi mu eba nehi gagoe moio? “Ne, Yahudi dam lam ame Im Neàna lam ba aihi vabak. Neham labe labihaha bak. Alat meia neha, ‘Em Im Neàna nim Yahudi dam bake vou vameatedume fi dedale,’ lahame meia gagu oluhu vabna ba akati le ame Im Neàna lam vou vameatedume fi dedà? Meit Alat Vameadaha Im Toedahana laba nehi toeme esuhu bak. ‘Damat bak mei bake lafusi Alam Im Neàna vou vameatedume fi dedam bak lam bisi neà bak am bak.’ Lahame labihasu toeme esuhu im lam ba modi imbodem vaba? Ne, meit le Yesus labe Aba Aho meedaha Im Neàna lam vou vamatedume fi dedam vabameam akati damat ba aie? Labi damat aihi vabna ba akati damat Aba tu vuzehe? Labi Aba tu vuzehem vabameam ba akati damat àvodi Ala bake geme neha, ‘Iba faobekesi taule,’ lahame gagu ge?”
16. Lahame uho meit eba labi gagomeam làhà eho gi fa uba nehi gagom bak. Amu ame Im Neàna lam vou vameatedaha dam ehe bak. Labiha labe ame Im Neàna lam Israel dam ahebu aimta ai. Lahana ame dam ahebu tu vuzehehe vaba gi dam zohota tu vuzehi meedaha bak. Ame bak lam Alat vameadaha im aime fa dam bake ahate vameaidahada Yesaya labe aho ahu faidi Ala bake aham di iube nehi gagoho im toehe bak ehe bak. “Boehàda Ala oa, iho vou vameatedaha im lam iho ozoha, dam aime tu vuzeheheda mahate dua vabna ozomom bak.” Lahame labihasu fet toeme esuhu bak ehe labe eho uba labi gagoho bak.
17. Labihàmu eho nehi uba ab gagoham bak. Meit ame Da Kristus labe Aho meedaha Im Neàna lam vou vameatedume fi dedam labe damat ame im lam aidam bak am bak. Labi dam ame Im Neàna lam aidam labe Kristus bake tu vuzehi meedam bak am bak.
18. Lahana uho meidavat eba nehi gagomeam, “Ame Da Kristus labe Aho meedaha Im Neàna lam ame Israel dam labe aidaha taia?” lahame uho labi gagomeam làhà eho gi uba fa nehi gagom bak. Lo. Imbo bak. Ame dam labe ame im lam aidaha bak. Ba biem vabak. Ame Im Neàna lam damat Israel dam ahebu vou vameatedume aime ozobohudehe bak. Ame bak lam meit Alat Vameadaha Im Toedahana laba nehi toehe bak ehe bak. “ ‘Ala akatihasu meedam Alat modela?’ laham Im Neàna lam meit vameadaha dae lam gi dam bak bohula bake vaitesu esuhu dam abo dam bakda ahebu aidume uloholehe bak.” Lahame labihasu toeme esuhu bak.
19. Labi uho meidavat neo eba nehi gagoe moio? “Damat ibi iho faina meedam bak lam Alat Aho fa faamome soat vausu fa vei neàdedam bak lam im Israel dam labe vi ozome ozobohu aabodehena taia?” lahame eba labi gagomeam làhà eho gi nehi fa uba gagom bak. Ame dam labe ame im lam aime tu vuzehem neàna gi mu vooho bak. Lahana Yahudi damat modem vab dam iho amu Ala bake ozodam vab dam labe iho ame Im Neàna lam aihi di labe aime tu vuzehehe bak. Ame bak lam Alat Aho Israel dam bake vameadaha im lam Musat amu ot vai fa nehi fet toeme esuhu im ehe labe eho uba labi gagoho bak. “Eho im neà bak fa Israel damat modem vab dam abo debu koeda amomoiti amomoiti abo damat neha, ‘Debu vab damat modem bak,’ laham dam zi laba Eho meedam bak labet modi um Israel dam labe vi aime um ahulat teidemoholedam bak. Abo dam uho ozom di, ‘Ahusobut,’ laham dam laba Eho fa im neà bak meedam labet modi um vi aime fakem bak.” Lahame Musat aham di iube labihasu toeme esuhu bak.
20. Labi Yesaya ba meia ahu iedem vabda labe aho ba laha Alat aba gagoho bak aime nehi fet toeme esuhu bak. “Dam giida Eba, ‘Em akatihasu meedam Alat mode?’ laham bak amu ozome ozodaha vab dam labe fa Eba ab ozobohudemam bak. Labi laha dam neha, ‘Iba taule,’ lahame Eba gagoho vab dam lam, ‘Em akatihasu meedam Alat mode?’ laham bak Eho modi ozobohudi fi gatehe dam am bak.” Lahame Yesayat Israel damat modem vab dam laba ozome ba fet vameadume esuhu im am bak.
21. Lahana Alat neo Israel dam laba ozome nehi gagohona Yesayat aime fet toeme esuhu bak. “Ame dam lam, ‘Eho fa deeli vadase,’ lahame Eho duzu anekehà baedam bakti ulohona bohu meedaha damat im Ebeda aime meedam vaba odohali ahu teudi moudam bohu meedam bak.” Lahame labihasu fet toeme esuhu bak.
1. Eho etei lab vameadaha im lam uho meit aime vedi nehi gagoe moio? “Làhà, Alat Aho modi Am damalehe dam lam abo ame Yahudi dam lam ahebu Aho mu vooho taia?” lahame uho meit eba labi gagomeam làhà eho fa uba gi nehi gagom bak. Vabà! Ba im Yahudi dam ahebu mu vooho vabak. Um ozom vaba? Em laha Yahudi dàt modem bak. Em tai ahobada Abraham am bak. Labi Benyamin labe vou faat ledaha dam debu meida em am bak. Labihadamnàme Alat em mu vooho vabak.
2. Imbote. Alat neha, “Am damalese,” lahame Aho amu di iube fet ozome esuhu Yahudi dam lam Aho ba mu vooho vabak. Alat vameadaha im aime fa dam bake ahate vameaidahada Elia labe aho Israel dam bake vàlu fa Ala bake nehi vameadahana Alat Vameadaha Im Toedahana laba toehe bak ehete.
3. “Eliat neha, ‘Boehàda oa, iho Oba vou baedam di na fi ho vou li oteme esu vua vahudam beahuba zi ahebu lam damat fa faamome seddaha bak. Labi laha Om im aime fa dam bake ahate vameaidaha dam dua totbaho ahebu lam damat oddume seddaha bak. Gi emota vekehenàme ame dam labe neo em otelo ozodam bak.’ ”
4. Lahame Eliat labihasu gagoha Alat fa aba nehi gagoho im um ozodào? Alat fa aba gi nehi gagoho taia? “Vabo. Dam Eba tuhuda omota vekehe vabak. Eho, ‘Em damalese,’ lahame vekesi mali esdam dam abo tujuh ribu vekeho. Ame dam lam damat anekehàt modi ostam alalehena Baal laba vou baedaha vab damat modem bak.” Lahame labihasu gagoho bak lam um ozodào?
5. Alat aham di iube Elia bake lab vameaha bak lam etei di nim laha gi ame baket neo modehe bak. Yahudi dam dua totbaho Yesus bake tu vuzehehe vabnàme etei nim dam Aba tu vuzehehe dam koe zoho ehe bak. Ala abo meia ozahit deeli im neà bak modi esuidam Alat modem labe, “Am damalese,” lahame Aho aham di iube gi fet ozome fi hasi vaha labe labihaha bak.
6. Aho ame dam laba ozahit deeli gagu vadaha dam lam ame dam labe ibi iho im neà bak meedam bak labet modi ba dam lam gagu vadaha vabak. Gi Aba Aho meia ozahit deeli im neà bak modi esuidam bak labet modi Aho ame dam lam gagu vadaha bak. Aho gi dam bakda labe ibi iho im neà bak meedam bak labet modi Aho fa ame bak baleà vouhou deeli gagu vadameam làhà ba Aba Aho meia ozahit deeli im neà bak modi esuidam bak labet modi dam lam gagu vadam vabak.
7. Labiham bake eho etei lab vameadaha bak bohu ium iho akatihasu ozoe? Gi neham bak. Ame Israel dam labet iho modelo àhàkehe bak nim, “Iho akatihasu meedam labe Alat iba neha, ‘Im im vamdesu meedam damat modem bak,’ lahame ozahit deeli gagu vadàla?” laham bak lam modelo àhàki meedume modeha ba Alat Israel dam dua zoho Am damalehe vaba gi koe zohota Am damalehe bak. Abo Alat Aba Aho aham di iube fet ozome fi hasi mali esuhu dam lamota labihaha bak. Lahana dam dua totbaho lam Alat ahit modi Aho im gagom di momoholi im aihi vab damalehe bak.
8. Eho etei lab gagoho bak lam meit Alat Vameadaha Im Toedahana laba nehi nasi fet toeme esuhu im lam laha eba tau gagoho im am bak. “Alat ame dam laba ahit modi im ahu im ozom bak ab tamzohobuleham bak.” “Abo im fako modi aubesuhu labe na aam biem bakti ulohona modi im imbona ba ozom biem bak meeda. Labi laha im dogoi modi baguamdi im aim biem bakti ulohona modi im imbona ba aim biem bak meeda. Abo amu di iube gi faasi etei vou fuhu bak.” Lahame labihasu toeme esuhu bak lam ame Israel dam dua zoho laba vàlu vameadaha bak.
9. Labi laha ame Israel dam dua zoho labe Alat iba im gagom di iho lab momoholi im aihi vab damalehe bak lam dat ahamda Boehàda Daud labe aho aham di iube Ala bake nehi vameadaha im laha ehe bak. “Boehàda oa, ame dam lam Oho modi dam labe ibi iho neà tiba vabi esdam bak lam modi felik lo vààsu naat vabi duzu sim bakti ulohona modi vou fohodume belu udovai vàhàdedale. Ame dam labe iho faina meedam bake belu fa vataule.
10. Labi ame dam labe im ahu ad labe neà bak ozomna lam Oho modi fa aibulem bakti ulohona abo ozobohu aabodem biem baket modele. Labi laha ame dam laba oho na asimbuna vohom bakti ulohona modi im toha ozuhusi agutehena bohuti ulohona ààmole.” Lahame Daud aham di iube labihasu toeme esuhu im am bak.
11. Eho etei lab vameadaha im lam uho meit aime vedi nehi gagoe moio? “Làhà, Yahudi dam labe iho Kristus bake tu vuzehem moudaha labe faina meedàmu Alati ab vaitesu labaha bohu modesda moio?” Lahame eba labi gagomeam làhà eho fa uba gi nehi gagom bak. Vabà! Ba abo vaitesu labaha bohu modesdam vabak. Um ozom vaba? Ame Yahudi dam labe iho Yesus mu vooho labet modi Alat fa Yahudi damat modem vab dam laba ab ozodamam. Aho neha, “ ‘Ame dam labe iho faina meedàmu Eho beolo modem bak lam fa mu soat vausu fa vei neàdedam bak lam meit fa ame dam laba vameadume iho Yesus bake tu vuzeheo? Vuzehem vabao?’ laham bak modi ozose,” lahame ame dam laba ab ahumdi vou faodamam. “Ame Yahudi damat ame bak laba vi aame teidi fa vi taulo àhàkedase,” lahame Alat ahit labihasu meedam bak.
12. Neham labe labihaha bak. Yahudi dam dua totbaho labe Kristus bake tu vuzehem moudume Alam damalehe vabamu Alat Aho vedi fa Yahudi damat modem vab dam lam abo bak mei bak meime ahebu esdam dam laba ilabdi im neà bak duana meedaha bak. Labihàmu iho vi ozom, Alat labihameam làhà Yahudi dam iho Kristus bake mu bohu vuusdameilahit ba abobo tu vuzehe ladam labe Alat amu Yahudi damat modem vab dam laba ilabdi meedam bak laba vafozi dam bakda ahebu im neà bak duana modi esum di am bak.
13. Emti vahi Kristus bake tu vuzehehe dam abo Yahudi damat modem vab dam oa, eho etei gagolo modem im nim gi uba vameadalo modem bak. Alat amu eba neha, “Eho fa Yahudi damat modem vab dam laba Am im vou vameatedale,” lahame eba gagu oluhemu em ame im modem datelehe bak. Ebe eho lab meedam bak lam eho ba voom biemna abo tombuli meedam imot modem bak.
14. Eho gi neham bak ozome labi meedam bak. Ebe eho meedam bak labet modi em Yahudi dam fa um Yahudi damat modem vab dam uho Yesus bake tu vuzehedam bak laba vi aame, “Iho laha ame baket meedase,” lahame ahu adat faki teidi fa vi tau lo àhàki meedàmu Alat ame dam totbaho lam soat vausu fa vei neàdedam bak laba ozome eho labi meedam bak.
15. Em Yahudi dam ba Alat fa vame Amti vahedam di lam damat deeli vàhàdem di am tame. Neham bak. Yahudi damat Ala moudàmu Alat em Yahudi dam dua bak mu vooho bak. Ame bak labet modi fa Yahudi damat modem vab dam amu Alati vaitesuhu bak lam Aho ame dam labe iho faina meedam bak lam fa faamome vei neàdi fa Amti vahedam bak ab faasi meedamam bak. Lahana eho ozom, ame Yahudi dam fa Kristus bake tu vuzehedameam làhà Alat fa deeli vi vadam labe ame dam lam abo elohona ozohomu modesdam bak lam Alat modi fa ahedem bakti ulohona modem bak.
16. Roti gaena ahubu guti ahamte vi gutehe zoho lam ohume àdi Ala bake lomeam làhà gi ame ahubu zoho ahebu Ala bake fi hasi neàbodehena ozomom bak. Ame bak lam gi neham bak. Im Yahudi dam nibe im tai ahobada zi lam Alat fi hasi vame Am damalehemu ame dam zi labe im mekehàda nim laha ba vame Am damalem bak. Uho utot modem bak laha vi ozomale. Ame ut labe am omnao neàdemeam làhà am aasoaedaha bak lam laha neà bak. Ame bak lamti ulohona modi im Yahudi dam nibe im tai ahobada bisi feàda zi lam Alat fi hasi vame Am damalehemu ame dam zi labe im mekehàda im laha ba vame Am damalem bak.
17. Em etei neo Yahudi dam abo Abraham labe am mekehàda labe modehe bakti ulohona zaitun laba vàlu uba nehi vi vameadalo mozo. Alat ame zaitun damat auet deheda labe am aaso fi kbodaha bak lamti ulohona modi im Yahudi dam dua totbaho mu vooho bak. Labi ame aaso fi kbodaha bae zi laba meit zaitun damat auet dehe vaba ahamo usihida labe am fi kbodaha aaso zi neo visomoame fa laba iademe ot taasuiame susdume usidam bak lamti ulohona modi Alat um Yahudi damat modem vab dam Aho ozahit deeli vame Am damalehe bak. Labi laha etei lab ot taasuiame susdume usidam aaso lam fa ame zaitun damat auet deheda labe am omnao vaksa fa vizi oedam labe ahedi usidam bak lamti ulohona modi Alat Aho amu im Yahudi dam labe im tai ahobada laba im neà bak meedam bak labet modi um Yahudi damat modem vab dam lam uba neo vizi um neàdedam bak.
18. Labihadamdaleàmu meit amu fi kbodaha aaso zi lamti uloho dam lam abo Alat mu vooho Yahudi dam laba um Yahudi damat modem vab damat a feàtadume neha, “Im uba ot vaha dam am bak,” lahame a labi gagu daetbadamule. Um ozom vaba? Ut am aaso labe am vaksa lam ba ame omnao laba vizi neàdem biemnat modem bak. Gi ame ut soabo omnao vaksa labe fa ame aaso susuhuda laba vizi ahedi usidam bak. Ame bak lam gi neham bak. Alat Yahudi dam laba im neà bak meedam bak labet modi vizi Yahudi damat modem vab dam lam fa vei neàdedam bak. Ba uho ame dam laba vizi meedamna na vabak.
19. Eho etei lab gagoho bak lam um Yahudi damat modem vab dam uho meit aime vedi nehi gagoe moio? “Imota bisi Alat deelehe dam im am bak. Ne, meit ahit nehalo modehe taia? Ut damat auet deheda labe am aaso fi kbodaha bak laba fa ut ahamo usihida labe am aaso vou li ame aaso fi kbodaha bae zi laba fa ot taasuiame susdume fa neàdelo mode taia? Abo Alat ahit im Yahudi damat modem vab dam deeli valo fa Yahudi dam mu vooho taia?”
20. Lahame uho meit eba labi gagomeam làhà eho fa uba nehi gagom bak. “Lo. Imbote,” lahame gagom bak. Lahadamnàme ame Yahudi dam labe iho Kristus bake tu vuzehi meedaha vabake Alat mu vooho bak. Lahana umota Kristus bake tu vuzehi meedam labe ahe neàt vekesi duzuhu bak. Labihàmu um ba a bisi it daetbadamule. Gi iademe iedehebeat vou faodale.
21. Eho gi neham bak ozome uba labi gagoho bak. Ame ut damat auet dehena labe am aaso meit ozahit fi kbodaha bak lamti ulohona modi Alat ozahit ame Yahudi dam mu vooho bak. Aho labiham labe um Yahudi damat modem vab dam Alat gagohona iho neo mu voomeam làhà uho ozom Aho um gi aalahigeàmu moe? Vabo. Ba gi aalahigeàmu mom vabak. Um laha neo fi kbodume voedam bak.
22. Labiham labe iho nehi ab ozoham bak. Alat meia deeli neà bak meedam Alat modem labe aho laha neo, “Meit fà itaholedase,” lahame meoli meeda. Labihadam Alat modem bak. Ame bak lam gi neham bak. Aba mu vooho Yahudi dam laba Aho meoli meeda. Lahana um Yahudi damat modem vab dam laba Aba Aho meia deeli im neà bak meedam bak labet modi Aho uba Yesus oluhemu uho Aba tu vi ozodam lahasdameam làhà Aho uba deeli neà bak meedam lahasdam bak. Lahana uho ame bak laba tu vuzehi lahasdam vabameam um laha fi kbodume voedam bak.
23. Labi ame Yahudi dam Alat amu mu voedaha dam labe ibi iho faina meedam bak lam mu voou fa vei neàdi fa Kristus bake tu vuzehi meedameam làhà meit ut aaso faitoi fa vi visoi zisu ahedem bakti ulohona modi Alati fa vahem bak. Uho ozom, Alat ba ame bak lam modem bie. Am abo feà labe modem meo bak.
24. Um ozomale. Eho etei lab vouhome vameadaha im lam abo zaitun damat auet dehe vaba ahamo usidahana labe am aaso fi kbodume fa auet deheda labe amu damat fi kbodaha bae laba ot taasuiame susuhu bak lam abo im dam bakda nibe ibi modi baleàhà bak vabak uba vameadam bak. Lahana Alat Ahamo modehe bak. Ame bak lam gi neham bak. Um Yahudi damat modem vab dam abo Alam damalehe vab dam amu Alati vaitesuhuna Alat Aba Aho amu Yahudi dam bake ozahit deeli im neà bak meedam bak labet modi um fa neàdedam bak. Labihadam meo Alat modemeam làhà Yahudi dam amu Am damalehe dam fa faatoho dam lam aho bisi ule neàt fa vi vam meo bak. Abo ut damat auet deheda am aaso amu fi kbodume voedahada zi lam fa vi visomoame fa aba amu fi kbodaha bae laba ot taasuiame susdume ahedem bakti ulohona modem bak.
25. Emti vahi Kristus bake tu vuzehi meedam dam oa, eho etei uba vameadalo modem im imbona nim abo Alat amu dam bake vastehena etei modi fa fi zeam bitoho im nim um ozobohudem bake eho ahit uba vameadalo modem bak. Uho daetbadume neha, “Alat dam bake vi ozodam di im Yahudi damat modem vab dam nim Aho bisi deelehe dam im am bak,” lahame bisi daetbadume gagom vabake Alat Aba Aho ozoho bak lam eho uba ahit iademe vameadalo mozo. Ame im lam gi neham bak. Yahudi dam labe iho etei odohali im aihi vab damali meedamta meeda. Lahana ame bak lam ba bisi labaha bohu vuusdam vabak. Gi labihasu vou mode ledume Yahudi damat modem vab dam abo Alat amu fet ozome esuhu dam labe iho Ala bake tu vuzehe ladume Alat Aba Aho ozome debe uloholi novam bak vou fusi neàdi vaitom di am bak.
26. Labi ame di lam ame Israel dam ahebu ibi iho faina meedàmu Alat Aho beolo meedam bak lam Aho gi vei mu fa soat vausu fa vei neàdedam di am bak. Ame bak lam dat ahamda Alat vameadaha im aime fa dam bake ahate vameaidahada Yesaya labe aho Alat Vameadaha Im Toedahana laba nehi fet toeme esuhu bak ehe bak. Alat neha, “Ba diamut Yakub labe aho vou faat ladam dam meidavat am dam totbaho labe ibi iho faina meedàmu fa Soat Vausu Fa Vei Neàdemda oluhemu Eho ame dam laba beolo meedam bak lam Eho gi fa vei mo tame. Labi Yakub vou faat ladam dam abo Israel dam labe iho Eho gagoho im modehe vaba voedume fa fai bak meedam bak lam ame Da labe Aho fa faamome sedda tame.
27. Labi ame di labe, ‘Ame dam labe ibi iho faina meedàmu Eho beolo modem bak lam Eho gi vei mu fa faamome vei neàdeda tame,’ lahame Eho ame dam laba fet vameadume vàmadi esu tame.”
28. Lahame amu di iube labihasu fet vameadume esuhuna etei imbodehe vabak. Etei Yahudi dam dua totbaho labe iho Kristus labe Aho meedaha Im Neàna lam mu vooho labe Alat ozomta ame dam lam Aba fakemoholehe dam am bak. Ame bak labet modi Alat fa uba Yahudi damat modem vab dam bake im neà bak fa meeda. Labihadamnàme Aba Aho amu ame Yahudi dam laba, “Am damalese,” lahame Aho amu lab fet ozome gagu fi hasi vàmadi esuhu bak labet modi Aho ozahit dam laba deeli meedam lahasuhu bak. Labi laha Aho amu aham di iube im Yahudi dam labe im tai ahobada zi laba abo Abrahamti Isakti Yakubti labihasu ame dam laba Aho fet vameadume vàmadi esuhu im lam vi ozodam labe labihadam bak.
29. Neham bak. Alat neha, “Eho dam nim gagu fi hasi Em damali Eho im neà bak ame dam laba meedase,” lahame amu fet ozome vàmadi esumeam làhà ba fa faatom biem Alat modem bak. Abo gagu vàhàdehemu gi ame baket modidam Alat modem bak.
30. Um nasi ozomale. Amu di iube um Yahudi damat modem vab dam lam Alat gagoho im lam uho ba uledi meedaha vaba vedi mu vooho damat modem bak. Lahana etei nim Yahudi damat Aho gagoho im mu vooho labe Alat fa um Yahudi damat modem vab dam laba aam faimu faobekesi im neà bak tau meedaha bak.
31. Labi etei nim Yahudi dam labe iho laha Alat gagoho im uledi meedaha vaba vedi mu vooho bak. Labihàmu Alat uba lab aame faobekesi im neà bak tau meedaha baket modi fa neo Am Yahudi dam laba laha ame baket meeda tame.
32. Neham bak. Alat Aba Aho gagoho im lam dam bakda ahebu uledi meedaha vaba vedi mu voohemu, “Fà beom neàte,” lahame ab gagu vàmadi esuham bak. Aho Yahudi dam modeo, Yahudi damat modem vab damat modeo, laham dam ahebu laba, “Aho aam faimu faobekesi im neà bak tau meedase,” laham bak modelo ahit labi gagu vàmadi esuhu bak.
33. Eho vi ozome àvodi im nehasu Alat bake vou baedam bak. “Alat Aba Aho iba dam bakdate im neà bak meedam bak lam ba koe vabak. Abo duana deeli meedam bak. Aba Aho labaha bohu im ozobohu aabodehe bak labet modi na im meedam bak lam abo feàte. Labi laha Aba Aho amu lab fet ozome esuhu im zi lam ba iho bak damat akati ba la gagu ai le gagu ai lahadume im ozobohude? Labi laha Aba Aho iademe ozome iba meedaha im lam ba iho akati modi la ozoi le ozoidume im ozobohude. Am feà labe iho ba modem biem bak.
34. ‘Alat Am ahulat ozom im lam ba amat la ozoi le ozoidume ozobohude? Amat Ala bake neha, “Nehame modele,” lahame Ala bake im vi vahokedà?’
35. ‘Ba amat Ala bake na lu neha, “Eba ame baleà vouhole,” lahame vi gagoe? Na modehedate ba lom biem bak.’
36. Iho etei aadamna zi nim ahebu debu Alat modehe bak. Labi laha ame asum ahoba iuba modealahana zi lamti bak niba modealahana zi nimti ahebu Alat Am feà labe Aho naedat vuusdam bak. Alat ahit ame na zi labe, ‘ “Am abo feàte,” laham bak laba ozome Aba vou baedase,’ lahame ahit modealadaha bak. Imo dam ahebu ahu adat iedi gi labaha bohu Aba vou baedase. Imbote.”
1. Emti vahi Kristus bake tu vuzehi meedam dam oa, Alat uba aame faobekesi im neà bak tau modem zidàmu eho uba, “Im nehasu abo modele,” lahame vi vahokedalo modem bak. Uhumo naedamat it uledi Ala bake neha, “Obo Oho ozoho baket iba modem neàte,” lahame Ala bake gagu esuidale. Abo dam ahamda labe ibi iho ahu adat iedi Ala bake vou baedalo modem di na fi ho so git modesuhu bak vabna fi hasi oteme Ala bake lomnati ulohona ozome meedale. Lahana um gi ahena lodamna ozomom damat modele. Abo Alat uba aame deelem bake Aba Aho ozoho bak laba uledi meedam tadele. Alat iba im neà bak duana meedàmu eho ozoha, fa ame bak laba baleà vouhom di iho im so Ala bake lab lodume esuidamna ozomom bak lam bisi iho ahole meedam bak am bak.
2. Dam bakda Alati vou ali ahu vàmadi meedam vab dam labe ibi iho modeme baleàhà im lam uho amu tau meedaha bak lam nasi voou setele. Ba a tau meedamule. Fa gi nehasu meedale. Alat fa uba modi veimdi ubu uho amu ahulat ozome meedam bak lam fa voou seti gàhàdi meedale. “Alat iba ana im gagu mode?” laham bak um ozobohudem bake labihadale. Abo, “Neà bak akete?” Abo, “Iho ana modem labe Alat iba deele?” Abo, “Iho akatihasu meedam labe bisi neàbodi meedà?” Labihasu um ozobohudem bake labihadale.
3. Alat Aba Aho eba ozahit deeli im neà bak modi esuidam bak labet modi eba gagu Am im gagu oluiam datelehe bak. Em labiham dàt modem labe eho ahit um ahebu im nehasu vameadalo modem bak. Uho Kristus bake tu vuzehi meedàmu Alat uba ahala modi vizedaha bak laba it ozome a fa neo modi ee feàda talu vousai meedamule. Gi Alat uba ahala modi vizedaha bak lamota iademe ahu nemahuba neàt it ozome modidale.
4. Im dam bakda so gi vàmtea bak. Lahana ame so laba modealahana abo zi duat. Labi laha im soa modealahana zi nim im meedam di ahala modi ahala modidam bak.
5. Ame bak lam labihahemu im Kristus bake tu vuzehi meedam dam nim laha gi ame baket meedam bak. Neha: Im dam duanàme gi debu vàmteana ozomom bak. Labi laha iho vahi Kristusti vou ali ahu vàmadi meedàmu iho ab vazisiham bak. Labihàmu uho meidavat a nehamule. “Em abo feàt. Om mahate feà vabak,” lahame a ozome it daetbadamule.
6. Fa gi neham bak vi ozodale. Alat meia modi vizem di gi Aba Aho meia ozahit deeli im neà bak modi esuidam Alat modem labe gi Aba Aho ozoho bak labet modi nehi ahala modi vizidam bak. Alat Aho meia im Abada aime fa dam bake ahate vameadam bak vizemda labe aho ame baket meedam di aho gi neha, “Im lada lam Alat eba vameadaha bak. Im lada lam Alat eba vameadaha vabak,” lahame gi aba aho aihida lamota dam bake vameadale.
7. Labi laha Alat Aho meit fa meia taum bak modi vizemda lam ame da labe gi ame baket iademe meedale. Labi laha meia guruli am im imbona meia vahokem bak modi vizemda lam ame da labe gi ame baket iademe meedale.
8. Labi meit fa meia vabedeme im vahokedam bak modi vizemda lam ame da labe gi ame baket meedale. Labi meit am nazoh faheme fa meia lodam bak modi vizemda lam ame da labe gi ame baket ilabdi meedale. Labi meit fa meia im gagu faheme modidam bak modi vizemda lam ame da labe gi ahu vàmadi ame baket keàtet meedale. Labi meit fa dam na vab dam bake aam faimu faobekesi im neà bak tau meedam bak modi vizemda lam ame da labe gi ame baket ahu ule neàt meedale. Labihadale.
9. Uho dam bake deeli meedam di gi ahu vàmadi meia deeli meedale. Labi fai bak modem bak mu voole. Alat neha, “Neà bak neam tame,” laham bak lam uho mahate labihasu meedam bohu meedalo àhàkedale.
10. Amedam debut ihimo ot deeliam bakti ulohona uho fa dam amomoi bake laha ame baket meedale. Ubu uho ahu adat iedi lab ot modidam di lam obo oho modemda nasi meia modele.
11. Alat iba gagu meedamna lam mahate keàtedi modelo àhàkedale. A odohalehebeat meedamule. Uho amu im Boehàda Kristus bake lab tu vuzehi im Abada meedam bak lam a vuat modehemu sutemule. Abo vuat gazihibuli elum bakti ulohona ahu vàmadi keàtedi bohu vuusdale.
12. Labi laha Alat Aho ba iba modem im fet ozome esuhuna lam, “Ba modem bak,” laham bak laba iho tu vou faodam bohu meedàmu ahu deelehe bohu vuusu aidale. Labi na im uba modi geàdam di um gi teudi betea laha vou faodale. Labi laha Ala bake tom gagodam bak a vaitomule. Gi labaha bohu vuusdale.
13. Labi laha Alam damalehe dam labe im na vabalem di nazoh ubuda fàsi vi tau lodale. Labi laha dam bahagikida lem di na a malemule. Na ilabdi gut loda. Labi laha num ilabdi lu i. Labihadale.
14. Labi laha dam uba vabidam dam laba a fa faki uloodamule. Gi, “Ai Ala oa, Oho ame dam laba na im neà bak modi esuidale,” lahame Ala bake tom gagodale.
15. Labi laha dam im ahu deelehe bohu meedam dam laba uho vi taui vi tauidume deelehe bohu meedale. Labi laha dam ahu faidi dehabali meddam dam laba uho laha vi taui vi tauidume ahu faidi meddale.
16. Labi laha um dam totbaho laba vazisi ot deeliame vabademsu meedale. Uho na meedam di, “Im iudu ium im ee vousamna ame?” laham bak laba a ozome it daetbadume meedamule. Fa gi neha, “Na lada lam im ee vousam vabnàme im gi ozahit modem neà bak,” laham bak laba laha ahu ule neàt meedale. Labi laha na im meedam di a, “Om im biemda. Em bisi im ozobohu aaboda em am bak,” lahame a ozome it daetbadamule.
17. Meit uba fai bak modehe dam laba a fai bak modi vi vataumule. Labi laha uho na im meedam di damat aame uba ozomsum vaba, “Abo neàte,” lahame gagom bak laba ozom im lamota meedale.
18. Uho nehi ozo, “Dam amomoiti ot fakiam vaba neàna esdam bak neame?” laham bak laba ozomeam làhà gi im lada lamota keàtet dam bake meedale.
19. Emti vahi Kristus bake tu vuzehi meedam dam abo eho deelem dam oa, meit uba fai bak modemeam làhà, “Modi fa vatau neàdese,” lahame a fai bak modi vi vataumule. Gi labihasule. Alat Ahamo Naedat fa belu vi vataum bak ehete. Eho gi neham bak ozome uba labi gagoho bak. Alat Vameadaha Im Toedahana laba Alat Aba Aho gagoho im nehi toehena ehe bak. “Meia vi vataum di Em Naeda ehe bak. Dam uba fai bak modem di Eho fa belu vi vataumda Em am bak. Eho Boehàdat gagoho.” Lahame labihasu toeme esuhu im ehe labe eho uba labi mali gagoho bak.
20. Fa gi meit Alat Vameadaha Im Toedahana laba im nehi toehena nim meedale. “Oba fakemohoda lam idoalemeam làhà oho gi ozahit navat lu àle. Abo valo àhàkem di modeo, oho gi ozahit vao noame lu udele. Oho labi modem labe da lam fa ladi oba vei deelemna zoaha.” Lahame labihasu toehe bak laba fa meedale.
21. Meit uba fai bak modem labet uba neo modi um ahu gukeme feà bak fusi uho fa fai bak modi vi vataum bak lam a modemule. Uho labi modemeam làhà ame fai bak labet fa uba modi um bedemna am tame. Fa gi nehale. Dat ame fai bak modemda laba uho gi fa deeli neà bak modi vataule. Uho labi modemeam làhà ame neà bak labet fa ame da laba modi aba aho fai bak modem bak lam fa setem bak am tame.
1. Im Kristus bake tu vuzehi vahi meedam dam ahebu iba vuusdam pemerintah labe ibi iho gagom im lam a voomule. Abo aime uledi meedam tadele. Eho gi neham bak ozome uba labi gagoho bak. Ame dam labe im ee damali dam vuusu meedam bak lam ba gi modemnat modem vabak. Abo Alat gagu ee damalehe bak. Ba meit gagu ee damali vuusu meedam bak amomoi vabak. Ame bak lam ehelemeam làhà gi Alat gagu meedam labe ame dam eeda zi labe ame baket meedam bak.
2. Labihàmu meit ame dam eeda laba mu odohali meedameam làhà ame da labe aho gi Alat Aba Aho gagu modesu esuhu bak lam laha mu odohali meedam bak. Uho labihameam dam eeda zi labe um beome vataum bak lam debu uho modehe bak. Alat gi, “Ahole beome vatauho,” lahame gagom bak.
3. Uho mahate it ozodale. Dam im neà bak meedam dam lam, “Fà iedese,” lahame Alat ba ozome ame dam laba ee taudume modesu esuhu vabak. Gi im fai bak meedam dam lam, “Fà iedese,” lahame ozome ee taudume modesu esuhu bak. Labihàmu um ba ame eeda zi laba iedem vabake im neà bak meedam tadele. Uho labi modemeam làhà ame eeda zi labe ba uba, “Fà iedese,” lahame uba vabidam vaba gi, “Um abo neàte,” lahame um ee vousai gagodam bak am bak.
4. Neham bak. Ame eeda zi labe iba tau modi im neàt esdam bak modelo gi Alat Aba Aho gagoho im uledi meedam damat modem bak. Labiha labe uho fai bak modemeam làhà um iedem bak ahole iedehe bak. Belu fa vataum bak ehe bak. Um ozom vaba? Ame dam eeda zi labe, “Iho meia beom neàte,” laham bak lam Alat iba gagu im dedamali neàdehe labe belu vataum meo bak. Neham bak. Ame dam eeda zi lam gi Alat im gagu modiam dam zi am bak. Dam fai bak meedam dam laba belu fa vataum bak lam gi Alat gagoho im ot vai meedam dam eeda ziat modem bak.
5. Labihàmu ame eeda zi labe ibi iho gagoho im lam uho mahate aime uledi meedam tadele. Neham bak. Ame im lam uho meedam vabameam uba belu fa vataum bak ame. Labi laha uho amu ahu ad labe ozo, “Bisi neà bak ame?” lahame ozobohu aabodehe bak ame. Labihàmu ame im lam mahate aime uledi meedam tadele.
6. Labi laha gi ame bak behàsu laba vi ozome pemerintah bake gi teo vi vadam doi pajak lam laha dam eeda zi laba lodale. Neham bak. Ame eeda zi labe ibi iho dam bake labaha bohu vuusu im vameame faheme modidam bak lam gi Alat Aba Aho gagoho im ot vai meedam damat meedàmu labihadale.
7. Dam eeda labe gi vi vaiam doi uba vam bake modi duzumeam làhà taho ame baket lodale. Neha: Pemerintah dam labe uba neha, “Meia gi teo vi gagome vaiam doi pajak iba lodale,” lahame gagom bak duzumeam làhà mom vaba ame doi pajak lodale. Labi laha pemerintah uba neha, “Ame na gohali lodale,” lahame gagom bak duzumeam làhà mom vaba ame na lodale. Labi laha meia ahu adat iedi gagom bak duzumeam làhà mom vaba abo ame baket meedale. Labi laha mei ee taluhuda laba, “Feàte,” lahame vou baedam bak duzumeam làhà mom vaba ame da laba am ee vousai vou baedale. Gi labihadale.
8. Meit gi vi vaiam doi uba vam bake modi duzum bak ehelemeam làhà taho ame baket lodale. Lahana uho meit gi vi vaiam doi lu fa neàdem vaba abo vi meedume bohu vuusdam bak lam gi vàmtea bak. Ame bak lam gi meia deelem bak am bak. Gi ame bak vàmtea laba meedam bohu vuusdale. Neham bak. Meit meia deelemda lam aho gi ame bak vàmtea meedam labet modi Alat gagu fi hasi vàmadi esuhu im zi ahebu gi ab imbodi ab meedamam bak.
9. Eho gi neham bak ozome uba labi gagoho bak. Alat gagu fi hasi vàmadi esuhu im abo zi duat. Ame im totbaho neha: “Nam dat eheda modeo, dat nam eheda modeo, a modemule.” Labi, “Mei a otemule.” Labi, “Mei na a aa vamule.” Labi, “Na meit vahana a teidemule.” Lahame Alat gagu fi hasi vàmadi esuhu im totbaho am bak. Lahana eho etei lab vameadume fi hasi vàmadi esuhu im lamti Alat Aho gagu fi hasi vàmadi esuhu im zi totbaho ahebu lamti labihasu meedume neàbodem bake gi gagu fi hasi vàmadi esuhu im nidi nim meedam labe ame fi hasi vàmadi esuhu im zi lam ahebu meedume ab neàbodedamam bak. “Uho meit aba it deeli vou faovoi vabiedam bak lamti ulohona vi ozome fa meia laha deeli vou faovoi vabiedale.” Lahame labihasu ba gagohoda lam uho modem labe bisi ame fi hasi vàmadi esuhu im zi lam ahebu meedume neàbodem bak am bak.
10. Neham bak. Iho meia deeli meedameam làhà iho ame da laba ba fai bak modem vabak. Labihàmu eho uba ab gagoham bak. Meit meia deeli vabiedamda lam Alat gagu fi hasi vàmadi esuhu im ahebu lam gi ame da labe aho meia lab deeli vabiedam bak labet modi ame im zi lam ahebu meedume ab neàbodedaham bak.
11. Eho etei uba, “Iademe im vamdesu meedam tadele,” lahame lab vameadaha im zi lam mahate vi ozome meedam tadele. Nehaha bak. “Etei di nimodam di nim iho im akatihasu meedam labe ahole meedamna mode?” laham bak lam um ozobohu bak. Um ba biem vabak. Etei di nim uho ihi tamzohobuli modesdam bak nasi fa keele. Iho amu Kristus bake tu vuzehehe di lam im Boehàda Yesus ba li iba abobo soat vausu fa vei neàbodedam bak lam bohu lahasuhu bak. Lahana iho ahamte lab tuhu di labe faasi vou mode ledume etei ab netàdi vou fuham bak.
12. Iho bak niba esdam di digat ab folelo modemam bak. Abo aibuli dihalo vabalehe bakti uloho bak. Abo Kristus fa lem digat ab vou netàdeham bak. Labihàmu imo faina meedam bak abo aibut meedamna ozomom bak lam ahebu nasi mu voedase. Fa gi digad diat esdamna ozomom damalese. Abo Iblisit iba modi im bedem vabak laba ozome im neà bak bohuta ozome meedase. Abo tentarat digad diat im so laba modealahana fo bogozemna lamti ulohona modealadase.
13. Imo gi digad diat esdamna ozohomu abo gi iademe neà bak bohu tadi vuusu meedase. “Kristusat fa lem bak ab vou fuham bak,” laham bak lamota esu vi ozodase. Labi laha a im nehi meedamule. Damti lahiti vazisi vao meona duana uddume bak vabili sikitaom labe fa ostame la modi le modidam bak ame. Labi laha ostame fi loholi ot vai ot vaidam bak ahebu ame. Labi laha damat gagu fi hasi esuhu bak ehelahit ahole meedam vaba vedi neha, “Iho faina meedahe?” laham bak naedat it ozom vaba ahusobuli ostame la modi le modidam bak ame. Labi laha ot fakiame daet ot beidam bak ame. Labi laha ahu adat faki teidemoholedam bak ame. Labihasu a meedamule.
14. Fa gi nehale. Uho bak niba esdam di gi im Boehàda Yesus Kristus labe Aba Aho lab meedaha bak lamti ulohona vouhome meedale. Ubu uho modi baleàhà bak lam abo faina modelo àhàki ahulat ozodamna labe uba vi ootedume uho vi uledi meedam bak lam nasi voedume seddale.
1. Imti vahi Kristus bake tu vuzehi meedam dam totbaho labe iho tu vuzehemta tu vuzehe. Lahana bee lahasuhu bak. Ame dam labe ibi iho Ala bake tum bak modi baleàhà bak lamti ubu uho ozome tu vuzehi meedam bak lamti uloho vabnàme a faki daet otesidamule. Gi ozahit fa uledi vahi meedale.
2. Neham bak. Dam Kristus bake tu vuzehi meedam dam totbaho labe vedi neha, “Iho na ahebu àm neà bak,” laham bak ozome neàdi vaitoho damat modem bak. Lahana Kristus bake tu vuzehi meedam dam totbaho labe ozo, “Alat tau uledi meedào? Uledi meedam vabao?” laham bak biem lahasuhu labe vedi nehi it ozo, “Iho na nubuda àm bak lam Alat mali gagu fi haha bak. Gi na dehenata àm neàte,” lahame ahu adat it ozodam damat modem bak.
3. Meit nehi ozo, “Na ahebu àm neàte,” lahame ozome neàdi vaitomda labe ba meit nehi ozo, “Na ahebu àm vabak. Fihasi mali esuhuna ehe bak,” lahame ahu adat it ozodam lahasuhuda laba ba aame feàtàdam vabak. Labi laha dam na nubu àm mali fi hasi vàmadi esuhu dam labe ba na ahebu àme baleàhà dam laba ba aame feàtàm vabak. Ame dam lam Alat laha vame Am damalehe bak.
4. Uho ozom, um fa Alam na modem dam laba ozomsu feàtàm neà? Vabà! “Ame da lam git modeheo? Git modem vabao?” laham bak ba iho giidat gagom vabak. Gi aba Im Gagu Modiamda labe fà aame gagom bak. Damat nubu ào? Nubu àm vabao? Laham bak lam Alat ba ozom vabna gi ozahit dam lam vadam bak. Dam lam aba tu vuzehi abehamdem bak laba ozome Alat dam lam modi teudi duzum meo bak.
5. Labi laha dam totbaho labe vedi nehi ozome gagodam damat modem bak. “Digat nidi nim fi hasi esuho. Labi digat lada lam fi ham kaio,” lahame gagodam damat modem bak. Lahana dam totbaho labe vedi nehi ozome gagoda. “Ba digat fi hahada vabak. Gi ahebu uloho bak,” lahame gagodam damat modem bak. Lahana bisi modem bak gi neham bak. Ame da labe am ahu it ozome neàdi fi haseo modemeam làhà fi hale. Labi meit am ahu fi ham molo modemeam làhà mole. Labihadale. Ahu meibada ahamo ozome neàdi modele. Ba meit a meia ootedume meedamule.
6. Neham bak. Meit digat fi hasi vàmadi esuhuda labe gi Alam ee vousai, “Feàte,” lahame vou baedalo ame digat fi hasi vàmadi esuhu bak. Labi na ahebu àme baleàhàda labe aho laha gi Alam ee vousai, “Feàte,” lahame vou baedalo ame na ahebu àdam bak. Aho Ala bake neha, “Oho na nim modehe bake abo neàte,” lahame nasi tom gagodam labe labihaha bak. Labi meit na àmna totbaho fi hasi esumda lam laha Alam ee vousai, “Feàte,” lahame Ala bake vou baedalo ame na àmna fi hasi vàmadi esuhu bak. Ame dam laha ibi iho fi ham vabda àmna totbaho lam àlo modem di Ala bake neha, “Oho na nim modehe bake abo neàte,” lahame tom gagodam bak. Labihàmu eho nehi ozo, “Fiham bak modeo. Fiham vabak modeo,” gi ahebu neà bak tade. Ba git meedam bak vabak.
7. Eho gi neham bak ozome uba labi gagoho bak. Iho bak niba esdam di ba ibi iho ozoho bak labet modi ahedi meedam vabak. Labi iho elom di laha labiham bak. Ba ibi iho ozoho bak labet modi im elodam vabak.
8. Iho Kristus bake tu vuzehi meedam dam nibe iho ahedi bak niba esdam di iho gi Alat iba deelem bak laba ozome im Aho gagohoda lamota meedam bak. Ba ibi iho it ozome deelem bak meedam vabak. Labi laha im elom di gi ame baket modem bak. Gi Alat Aba Aho ozoho baket modi elodam bak. Labiham labe im ahedi esdam bak modeo, elom bak modeo, gi Alam damalehena ozomom damat modem bak.
9. Neham labe labihaha bak. Dam ahebu abo bak niba etei esdamda zi modeo, amu elodaha dam zi modeo, labihasu ahebu Kristus labe Aho ozome, “Aho fa Boehàdateli vuusdase,” lahame ahit eloi fa ahedi usaha bak.
10. Kristus labihahemu uho ba akati umti vahi Kristus bake tu vuzehi meedamda meida laba obo oho ozome fi hasi vàmadi esuhu im lam tau fi ham vabda laba akati modi uho neha, “Faite. Beom neàte,” lahame feàtàdàla? Labi laha uho gi im ahebu meedam neà tadem dam labe uho ba akati umti vahi Kristus bake tu vuzehi meedamda meida laba abo obo oho gi im ahebu meedam neà tadem bak laba tau modehe vaba fi hamda laba akati modi uho aam bakti mu fakehela? Um ozom vaba? Ba diamut im ahebu Alat avaesdam laba dozeadume iho bak niba meedaha im, “Neào? Git modeheo?” laham bak Aho uloodume aime neàdi gagom bak ehena uho ba akati labi nasi fet meedà?
11. Yesayat aham di iube Alat Vameadaha Im Toedahana laba im meida nehi toehena ehe labe eho uba labi gagoho bak. “Eho Boehàdat neha, ‘Em amta nim. Em ba giomim gagom kaio. Dam ahebu ba Eho avaesdam niba ogomasu nom bohusu gago, “Om abo Ala imboda am bak,” lahame ahate gagoda tame.’ ”
12. Lahame labihasu toehemu iho ab ozobohudeham bak. Ba diamut iho dam bakda ahebu Alat avaesdam bak laba le dozeadume iho bak niba esdam di meedaha im lam, “Iho neà bak modeheo? Iho git modeheo?” laham bak gagu aim di Alat Ahamo ozome gagu vàmadi esum bak ehe bak.
13. Ba diamut im dam ahebu iho bak niba esdam di meedaha im lam Alat Ahamo ozome gagu vàmadi esum bak ehe labe ibi iho meia, “Faite. Beom neàte,” lahame ozomsu feàtàdam bak lam imo nasi mu voedase. Uho fa neham bak nasi it ozome vàmadi esule. Ubu uho modeme baleàhà bak lam umota modem neàt. Lahana meit ahamo fi hasi vàmadi esuhu bak ehena uho ozahit ame bak meedameam làhà uho lab meedam bak labet modi umti vahi Kristus bake tu vuzehi meedamda meida labe aho fa faina ab modemam bak. Labiham bak labna zohàme uhumo nasi it ozome vaitole.
14. Lahana em etei im Boehàda Yesusti vou ali ahu vàmadehemu emota ahu ebeda nehi it ozome ab tu vàmadeham bak. Na àmna lam ahebu àm di ba git modem bak vabak. Alat Aba Aho ozom zoho ba fi hamna vabak. Lahana meit nehi ozo, “Na lada lam eho àm fi ham bak,” lahame labi ozomda ehelemeam làhà ame da labe ame na ba àm vabak. Fihamda modem bak. Labihàmu uho ame da laba a, “Tau àm neàte,” lahame a ootedamule.
15. Meit ahamo fi hasi vàmadi esuhu bak lam uho geàmu ame na lam àmeam ame da labe aho vi aame fa am neo vi tau àhà labet modi am ahu faidi vi ozodameam làhà um ba meia deelem bak modem vabak. Labihàmu eho uba nehi ab gagoham bak. Meit ahamo fi hasi vàmadi esuhu bak ehena uho a geàmu ame na àme ame da laba modi vàhàdi faidem bak a modemule. Neham bak. Ame dam lam imti vahi Kristus bake tu vuzehi meedam dam totbaho am bak. Labi ame dam labe ibi iho faina meedam bak lam Kristusat laha gohali ot vai Am vasea veàtoho dam totbaho am bak. Labihaha bak.
16. Labihàmu gi nehale. Uho neha, “Ibi iho modeme baleàhà bak nim modem neàte,” lahame ahu adat it ozohonàme gi ozahit feidate. Neham bak. Ubu uho geàmu modemeam umti Kristus bake tu vuzehi meedamda meida laba fa vizi faina meedàmu damat uba, “Faite,” lahame vàlu gagom bak labna zohàme gi ozahit feidate.
17. Eho gi neham bak ozome uba labi gagoho bak. “Iho na lam àm neào? Àm fi hào? Iho na lam udem neào? Udem fi hào?” laham bak laba ozome Alat ba iba modi Am damali vuusu im vahokedam vabak. Gi neham labe Aho iba modi Am damali vuusu im vahokedam bak. Im vamdesu meedam bak lamti dam amomoiti ot fakiam vaba gi neàna esdam bak lamti labi Alam Aha Nutabe Neàna labe iba modi vizi teudi ahu deelehe bohu vuusu meedam bak lamti labihasu meedam labe Alat iba vuusu im vahokedam bak am bak.
18. Iho Kristus bake tu vuzehi vahi meedam dam nibe labihasu meedameam làhà Alat bisi deelem bak am bak. Labi ame lab meedam bak labet modi dam totbaho labe vi aame im ahu adat iedi neha, “Feàte,” lahame im ee vousai vou baedam bak am tame.
19. Labihàmu imti Kristus bake tu vuzehi vahi meedam dam totbahoti ot fakiam vaba gi neàna esdam bak laba vi ozome imo keàtet meedase. Labi laha iho Kristus bake lab tu vuzehi meedam bak lam vi teudelo im ahu ot vabdi ot vabdiame teudedase.
20. Alat mei ahu ad laba im meedam bak ehena uho ame da labe am ahu laba a modi vàhàdemule. Meit neha, “Em na lam àm fi ham bak,” lahame ahamo mu fi hasi vàmadi esuhuna uho meidavat vedi geàmu àm labe meit vi aame fa àhà labe am ahu ad laba Alat modehena uho modi vàhàdem bak am tame. Imo iademe vou faovoi meedase. Lahana eho ozoha, na ahebu àm neàna tadehe bak. Alat ba na àm fi hamda modi esuhu vabak. Labihadamnàme meit ahamo mu fi hasi vàmadi esuhuna lam uho meidavat vedi ame na àhà bak labet modi mei vou fohome tau àhà labe faina meedameam làhà, “Git modeho,” laham bak gi uba vàlu gagom bak.
21. Umti vahi Kristus bake tu vuzehi meedam dam totbaho labe ibi iho tu vuzehi meedam bak lam uho modi vàhàdi faina meedume ibi iho tu vuzehehe bak lam voomna zohàme uho na nubu àm bak modeo, anggur oo vaksa meia modi bobim vaoli udem bak modeo, nasi it mali vaitom neàte. Labi laha na meiti na meiti laha it mali vaitom neàte.
22. Meit ahamo fi hahana uho vedi, “Imota modem neàte,” laham bak lam uhumo ozome tu vàmademeam làhà ba a meia neha, “Om laha iho modehe baket modele,” lahame vi ootedamule. Gi umti Alati uhumo ot vameaidume ahu ubudata labihasule. Meit am ahu adat it ozomna labe neha, “Modem neàte,” lahame it ozobohudi ame bak meedam di ame da labe ba, “Em git modehe?” laham bak ba it ozom vabda lam Alat bisi deeleheda am bak.
23. Lahana meit am ahu adat it ozomna labe neha, “Alat mali fi hasi vàmadi esuhu bak,” lahame mali gagu esuhuna geàmu àmeam làhà, “Faina modeho,” lahame ahamo naedat it ozome ozobohudi gagodam bak. Labi laha Alat tau gagodam bak. Neham bak. Meit na im modelo modem di am ahu ad labe neha, “Bak nim git meedamna ozomo?” laham bak ame da labe aho it ozome ozobohudehena geàmu modemeam làhà ame da labe faina ab modeham bak.
1. Iho etei neha, “Iho fi ham vab labe Alat iba faki beom vabak,” lahame ozobohudi neàdi keàtet tuhuda totbaho im am bak. Lahana dam totbaho labe neha, “Fihao? Fiham vabao?” lahame ozome neàdehe vab dam ehe bak. Labihàmu iho ame dam laba gi labihasu vou faodale. Kehàm vabna a meia bisi neo vi ootedume meedamule. A bisi gi ubu uho deeli meedam bak laba vi ozome meedamule.
2. Fa gi nehadale. Umti vahi Kristus bake tu vuzehi meedam dam totbaho bak ubuda laba leo? Uho gi iuba le tào? Laham dam labe im ahu fakem vaba abo deelem bak laba ozome meedale. Abo ame dam labe im neàdem bak laba ozome deeli meedale. Ame dam labe ibi iho Kristus bake tu vuzehem bak bedem vaba abo keàtedi meedam bake labihadale.
3. Um nasi Kristus labe Aho modem bak ozomale. Kristus bak niba aidam di Aho gi, “Neà bak neam tame,” lahame vimteheda Am am bak. Am ba Am ahu it deelem bak laba ozome na im meedaha vabak. Damat Aba feàtàdamnàme Aho gi ozahit Am Ai Alat Aba deelem bak laba ozome keàtedi meedaha bak. Meit Alat Vameadaha Im Toedahana laba Alat Gagu Fihasi Vimteme Oluhu Dat Boehàda labe Aho Ala bake nehi fet vameadume esuhu im ehe bak. “Damat Oba feàtàdaha di lam gi Eba feàtàdamna ozomom bak.”
4. Lahame labihasu toehe bak. Alat Vameadaha Im Toedahana ahebu lam iba dam bada ahebu vahokedalo toedume esuhu bak. Ame toedaha im lam ihimo aame gagodam bak modeo, meit ame im lam iba vahokedume iho dogoit aidam bak modeo, ame bak labet modi na im iba modi geàdam di im gi ozahit keàtet meeda. Labi im ahu vabededume teudeda. Labihadam labe Alat iba fet vameadume esuhu im lam, “Ba imbodem bak,” laham bak laba iho tu vou faodam bak. Labiham bake iba toedume esuhu bak.
5. Na im iba modi geàdam di Alat iba modi teudi iho gi ozahigeàmu keàtet meeda. Labi Aho iba modi im ahu vabededume teudeda. Labihasu meedam Ala laba eho im nehasu tom gagodam bak. “Ai Ala oa, Oho dam niba tau modi im ahebu vazisi vabademsu ahu vàmadi azise. Abo dam niba modi iho Kristus Yesus labe Aba Aho ozome meedam bak lamti ulohona fà ot modidase.
6. Labi ame dam nibe gi vazisi vabademsu im ahuti im ahati vàmadem labe im Boehàda Yesus Kristus labe Am Ai Ala Oba, ‘Om abo feàte,’ lahame vou baedase,” laham bak laba ozome tom gagodam bak.
7. Eho amu lab vameadaha im zi laba vi ozome neo uba im nehasu vameadalo modem bak. Kristus labe Aba Aho iba deeli vame Amti vou alehe bakti ulohona uho dam totbaho bake ame baket meedale. Damat ubu uho meedam bak laba vi aame Ala bake vou baedam bake labihadale.
8. Uho im nidi nim laha vi ozomale. Kristus bak niba lehe bak ba gi modehe vabak. Abo im Yahudi dam bake taulo ahit lehe bak. Ala abo gagu vageiam vab Alat modem bak lam tombalelo lehe bak. Abo Alat Aho aham di iube im Yahudi dam labe im tai ahobada laba neha, “Eho Gagu Fihasi Vimteme Oluhu Dat Boehàda ba olu tame,” lahame fet vameadume vàmadi esuhu im lam, “Imbodeho,” laham bak lam tombalelo Kristus bak niba lehe bak.
9. Gi Yahudi dam lamota aame faobekesi im neà bak taulo lehe vabak. Am laha Am Ai Alat Yahudi damat modem vab dam bake aame faobekesi im neà bak tau meedàmu, “Ame Yahudi damat modem vab dam labe iho laha fa Ala bake vou baedase,” lahame ame bak laba ozome lehe bak. Alat Vameadaha Im Toedahana laba Yahudi damat modem vab dam labe fa Yahudi dam bake tau Ala bake vou baedam bak lam, “Mode tame,” lahame nehi fet nasi toedume esuhu im zi ehe labe eho uba labi gagoho bak. Dat ahamda Boehàda Daud aho Ala bake nehi vameadaha im meida neha: “Im Boehàda Ala oa, eho gi Israel labe aba aho vou faat ladaha vab dam debu meiti dam debu meiti tau vahem di Om ee vousai ladeedam labe Oba vou baedam bak.”
10. Labi meit Alat Vameadaha Im Toedahana laba laha neo neha: “Um Israel labe vou faat ladaha vab dam debu meiti dam debu meiti laham dam oa, im Israel labe vou faat ladaha dam nim abo Alat gi amu di iube fi hasi Am damalehe dam niba uho iba tau vahi deelehe bohu vuusdale.”
11. Labi ame im meida laha neo neha: “Um Israel labe vou faat ladaha vab dam debu meiti dam debu meiti laham dam labe uho im Boehàda Ala bake, ‘Am abo feàte,’ lahame vou baedale. Gi um dam bakda ahebu ame baket meedale.”
12. Labi dat ahamda Alat vameadaha im aime fa dam bake ahate vameaidahada Yesaya labe aho aham di iube Yesus ba modem im nasi fet toeme esuhu bak laha neha: “Isait vou faat ladam Dat meida labet ba diamut Israel labe aho vou faat ladam vab dam debu meiti dam debu meiti lahadam dam laba vuusu im vahokedam bak ba faasi meeda tame. Labi ame Da labe Aho fet vameadume esuhu im lam, ‘Ba imbodem bak,’ laham bak laba ame dam zi labe iho tu vou faoda tame.” Labihasu toehe im zi lam Alat Aho Yahudi damat modem vab dam bake lab ozahit deeli im neà bak meedam bak labet modi ame Alam im ahamda vou gago ledaha im zi lam ab modi imbodedaham bak.
13. Imbote! Ala labe Aba Aho fet vameadume esuhu im lam Aho iba modi iho neha, “Ba imbodem bak,” laham bak laba iho tu vou faodam bak. Labihadam Ala laba eho uba vi ozome nehasu tom gagodam bak. “Ai Ala oa, dam nibe im Boehàda Yesus bake tu vuzehem labe Oho ame dam niba modi im ahu deelehe bohu vuusdale. Labi im ahu modi faheme fi goaitom vaba gi vabademsu neà esdale. Om Aha Nutabe Neàna labe fa ame dam niba modi teudi Obo Oho amu fet vameadume esuhu im lam, ‘Ba imbodem bak,’ laham bak laba vi ozome vi teudi vi teudidume tu vou faom bohu meedam bake Oho labihadale,” lahame eho Ala bake labihasu tom gagodam bak.
14. Emti vahi Kristus bake tu vuzehi meedam dam oa, eho ozoha, uho fa dam totbaho bake na im meedam di gi uhumo im neà bakta meedam damat modem bak. Laham bak lam em ozobohudi neàdehe bak. Neham labe labihaha bak. Eho ozoha, Alam im imbona lam um ab ozobohudi neàdi meedamam bak. Labi laha uho ot vabdi ot vabdidam labe meia im vahokedam bak lam um laha ozobohu bak. Um gi meia im neà bakta labihasu meedam bak lam em ozobohudi neàdehe bak.
15. Lahadamnàme em gi ozahit uba ladehebeat vameadaha vaba gi ahu teudi uba im meiti im meiti lahadume afoezobe neo vi vahokedam bak. Um fa vabiem bak labna zohàme, “Fà ozobohudese,” lahame eho ozahit ame im zi lam uba vi vahokedam bak. Nehaha bak. Alat Aba Aho meia ozahit deeli im neà bak meedam bak labet modi eba nehi gagu oluhu bak.
16. “Em fa Kristus Yesus labe Am na modem dateli fa Yahudi damat modem vab dam laba le Am im meedale,” lahame eba gagu oluhu bak. Yahudi damat modem vab dam labe iho Kristus bake tu vuzehi meedàmu, “Alat uledi vadase,” lahame em gi damat Ala bake lomna ve vua vahudam tohedateli meedam bakti ulohona meedam labe ame Im Neàna lam ame Yahudi damat modem vab dam laba vou vameatedam bak. Alam Aha Nutabe Neàna labe Aba Aho amu neha, “Alat Aho dam nim fà vase,” lahame fet gagu fi hasi vàmadi esuhu dam lam gi dam ahamda labe iho Ala bake vou baedam di na vou li tohedate lu aho fa ve Ala bake lomna lamti uloho bak.
17. Labihàmu emti Kristus Yesusti vou ali ahu vàmadehemu em Alam na modem dateli modidaha bak lam it ozom di em gi ahulat it deelehe bak.
18. Em ahu ladehebeat vameadam vaba abo ahu teudi uba vameadam di em gi Kristus Aba Aho eba modi vizi eho meedahada lamota uba vameadam bak. Nehaha bak. Eho Yahudi damat modem vab dam laba le ame Im Neàna lam vahokedaha bak lamti eho meedaha bak lamti labihasu meedam labet modi ame dam labe etei Kristus bake tu vuzehi Alat gagoho im lam fa ab meedamam bak.
19. Lahana eho ba gi ame bak lamota meedam labet modi ame dam labe iho ame Da Kristus labe Aba Aho meedaha Im Neàna laba tu vuzehi meedam vabak. Abo Alam Aha Nutabe Neàna labe eba laha modi vizi teudi eho damat amu aaha vabna fet aame àvodi ozobohudemna lamti damat ihimo modem biem im feàna lamti eho meedam labe ame dam labe iho ame Im Neàna laba tu vuzehi meedam bak. Eho labihasu meedam labe eho gi Kristus labe Aho meedaha Im Neàna lam ahebu kota Yerusalem labe faasi vou vameatedume fi de ledume fa bak Ilirikum laba ab vou fuham bak.
20. Eho ame Im Neàna lam vou vameatedume fi dedam di ebe eho ozomda vàmtea nehamda nim modelo àhàkemda am bak. Dam amu Kristusat meedaha im aihi vaba alimda laba le ame Im Neàna lam vou vameatedume fi dedalo àhàki ozodam bak. Em ba meit amu bao zisuhu num lam eho fa neo soabo vi mom moho bak. Meit amu Alam im faasi vahokedam dam laba eho fa neo vi tau vahokedam bake em moho bak.
21. Em gi Alat Gagu Fihasi Vimteme Oluhu Dat Boehàda labe Aho ba modem im lam dat ahamda Yesayat aho Alat Vameadaha Im Toedahana laba nehi fet toeme esuhu bak nim imbodelo labihadam bak. “Dam amu neha, ‘Ame Da lam amat modela?’ laham bak modi fi gatehe vab dam lam ba diamut modi ozobohudi fi gate tame. Dam amu ame Da labe Aho meedaha im lam aihi vab dam lam ba ame im lam aime ozobohude tame.” Lahame labihasu fet vameadume esuhu im lam eho modi imbodelo em gi Kristus aihi vab dam laba abo alimda laba le ame Im Neàna lam vou vameatedalo àhàki ozodam bak.
22. Eho etei lab gagoho bak lam mei bak ium ahebu ame Im Neàna lam vou vameatedam labe amu uba num debu Roma laba lasome modeha gi modi moh. Labi ba neo lasome modeha neo gi modi moh. Labihadam labe uba taho lam bi bohulaleho.
23. Lahana etei nim dam amu Kristusat meedaha im aihi vaba alimda abo bak zoho niba azihi dam vou vameatedume uloholeho. Labihàmu em uba laha vaba tahun duali modem zidam labe em uba ilahu lalo àhàki novaho.
24. Eho etei bak Spanyol laba lalo ahu vitasu ozoda. Lahana ame bak laba lam di bak ubuda Roma labe labohotem bak. Labi ame di lam eho uba tau deelehat iddume neàdi em fa lalo modem diat uho eba tau na koena lu Spanyol bake olueo? Bak lam gi uhumo ozome modele.
25. Lahana em etei nibe nasi uba num debu Roma laba lam vabak. Neham labe labihaha bak. Kristus bake tu vuzehi vahi meedam dam abo Makedonia bak lamti Akaya bak lamti laham bak behàsu laba azihi dam ihimo ozome Alam damalehe dam abo na vab dam zoho kota Yerusalem laba azihi dam laba faobekesi ilabdi vahedume dualem doi lam eho ve fa kota Yerusalem laba nasi vou le ame dam laba lolo modem bak.
27. Ame kota Yerusalem dam bake vi ozome faobekesi vahedam doi lam Makedonia damti Akaya damti ihimo ozome im ahulat deeli ilabdi ame doi vahedam bak. Lahana ehemo ozoha, ame dam labe iho fa imti vahi Kristus bake tu vuzehi meedam dam abo kota Yerusalem laba azihi Yahudi dam laba ame baleà vouholo ahole ame doi vahedam bak. Nehaha bak. Ame Yahudi dam labe amu Yahudi damat modem vab dam ame bak behàsu azihi dam laba Kristus labe Aho meedaha Im Neàna lam ame dam laba vou le vameadume iba modi fi gatei iho Kristus bake tu vuzehi meedàmu ahole doi vahedam bak.
28. Labihàmu eho ame damat vahehe doi lam nasi kota Yerusalem laba vou le dam labe im anekehà laba lu neàdi em fa kota Yerusalem vou esmozi fa Spanyol bak laba lalo modem di labe uba num debu Roma labe tau azibe neo la tame.
29. Labi eho ozom, eho uba laba lafusi tau aidam di labe Kristus eba modi vizi teudi eho fa neo uba im neà bak duana vi modidume esu tame.
30. Emti vahi Kristus bake tu vuzehi meedam dam oa, imti im Boehàda Yesus Kristusti vou ali ahu vàmade. Labi Alam Aha Nutabe Neàna labe im ahu ad niba modi vizi teudehe labe ihimo ot deelida. Labihasu meedàmu eho uba nehasu ooteme gagolo mozo. Ebe ehemo it tom gagodam bak lam uho vi tau em ee gagu Ala bake mahate tom gagodale.
31. Im nehasu tom gagodale. Uho eho Yudea bake lam diat ame Yahudi dam lam abo Kristus labe Aho meedaha Im Neàna laba tu vuzehi meedaha vab dam labe eba beom bake, “Alat soat vatohele,” lahame Ala bake mahate tom gagodale. Labi laha eho kota Yerusalem laba lafusi ame vamatehe doi lolo modem di, “Ame Alam damalehe dam labe iho deelehat uledi gut vale,” lahame uho Ala bake mahate tom gagodale.
32. Labiham labe Alat uledemta em gi ahu deelehat uba lafum bak. Labi laha em uba lafum di uho em lehemu em ahu gut vabedeme teudeda. Labiham bake uho Ala bake mahate tom gagodale.
33. Eho uba vi ozome Ala abo mei ahu ad laba modi faheme fi goaitom vaba gi vabademsu bohu vuusdam Ala laba nehasu tom gagodam bak. “Ai Ala oa, oho Roma dam ahebu laba tau gi neà bak bohu meedale. Gi labihasu meedale,” lahame eho Ala bake tom gagodam bak.
1. Febe, “Ana namet modela?” laham bak um biem bake eho etei toedaha sunit nim uba olum labe um aame ozobohudelo modem bak. Ame nam Febe lam imti vahi Kristus bake tu vuzehi meedam nam meida am bak. Kristus bake tu vuzehi meedam dam abo num debu Kengkrea laba vahe vahedam dam laba aho tau vuusu im vameame faheme modidam nam am bak. Ame nam labe etei uba lelo modem bak.
2. Umti im Boehàda Yesusti vou ali ahu vàmadi meedam bak lam uba tau meedam namet modemu uho deelehat gut vale. Neham bak. Iho vahi Alam damalehemu ahole bisi ot deeliame meedam bak am bak. Labi Febe labe aho ozome uba gagolo modem im ehelemeam làhà uho uledi ame na lodale. Nehaha bak. Amu di iube aho dam dua bake uledi tau na lodaha bak. Labi laha eba tau na lodaha bak. Labihàmu uho ame nam laba deelehat gut vale.
3. Labi eho, “Neàte,” lahame gagoho im lam uho ve ot vai fa Priskila am dat Akwilati gagodale. Ame dat am namti Kristus Yesus labe Aho gagoho im lam eba tau meedam dat am namti am bak.
4. Amu di iube ame dat am namti eba soat vatohe bake elolo fotehe bak ehete. Labihàmu eho ame dat am namti vi ozom di eho gi, “Abo neàte,” lahame gagodam bak. Ehemo gagodam vabak. Yahudi damat modem vab dam abo Kristus bake tu vuzehi vahi meedam dam abo dam zi mei dam zi meime laham dam ahebu laha tau deeli, “Abo neàte,” lahame ame dat am namti laba gagodam bak.
5. Labi laha eho, “Neàte,” lahame gagoho im lam uho ve ot vai fa dam Kristus bake tu vuzehi vahi meedam dam totbaho abo iho ame dat am namti im num laba vahe vahehe dam laba gagole. Labi laha eho, “Neàte,” lahame gagoho im lam uho ve ot vai fa Epenetus bake abo eho deeleheda meida laba gagole. Ame da Epenetus lam Asia bake azihida ahamte Kristus bake tuhuda am bak.
6. Labi laha eho, “Neàte,” lahame gagoho im lam uho ve ot vai fa Maria bake gagole. Ame nam Maria lam gi Kristus labe Aho gagoho bak laba uledi na im feàna meedam labe uba tauhu bak.
7. Labi laha eho, “Neàte,” lahame gagoho im lam uho ve ot vai fa Andronikusti Yuniasti laham dam behàsu laba gagole. Em Yahudi dam totbaho meida behàsu am bak. Amu damat em si sel ousu esdam di labe ame dam ahim lam laha siàdume emti sel oumahehe dam ahim am bak. Labi ame dam ahim lam Kristusat Aho gagu olu Am im vameadume esmozi laiam dam abo elaidam dam ahim am bak. Labi ame dam ahim lam gi amu di iube Kristus bake tu vuzehehe bak. Em ba tuhu bak. Laham dam ahim laba, “Neàte,” lahame gagole.
8. Labi laha eho, “Neàte,” lahame gagoho im lam uho ve ot vai fa Ampliatus bake abo eho deeleheda meida laba gagole. Am laha im Boehàda Yesusti vou ali ahu vàmadi meedamda meida am bak.
9. Labi laha eho, “Neàte,” lahame gagoho im lam uho ve ot vai fa Urbanus bake abo Kristus labe Aho gagoho im iba tau meedamda laba gagole. Labi laha eho, “Neàte,” lahame gagoho im lam uho ve ot vai fa Stakis ebe eho deelemda meida laba gagole.
10. Labi laha eho, “Neàte,” lahame gagoho im lam uho ve ot vai fa Apeles bake gagole. Ame da Apeles lam abo na im feàna aba modi geàdamnàme aba aho Kristus bake tu vuzehi meedam bak lam gi ozahit keàtedi meedamda am bak. Labi laha eho, “Neàte,” lahame gagoho im lam uho ve ot vai fa Kristus bake tu vuzehi meedam dam totbaho Aristobulusam num laba vahi azihi dam laba gagole.
11. Labi laha eho, “Neàte,” lahame gagoho im lam uho ve ot vai fa em dam Yahudit modemda meida Herodion bake gagole. Labi laha eho, “Neàte,” lahame gagoho im lam uho ve ot vai fa im Boehàda Yesusti vou ali ahu vàmadi meedam dam Narkisusam num laba azihi dam laba gagole.
12. Labi laha eho, “Neàte,” lahame gagoho im lam uho ve ot vai fa nam meida Trifena labe am vahada Trifosati abo im Boehàda Yesus labe Aho gagoho im meedam meo lahi behàsu laba gagole. Labi laha eho, “Neàte,” lahame gagoho im lam uho ve ot vai fa ibi iho deelem nam meida Persis bake abo im Boehàda Yesus labe Aho gagoho im meedam meo lahi meida laba gagole.
13. Labi laha eho, “Neàte,” lahame gagoho im lam uho ve ot vai fa Rufus abo damat ozom di, “Bisi Kristus bake tu vuzehi meedamda elaidamda am tame,” lahame vou baedamda laba gagole. Labi am oi abo eho em oialehena ozomom nam laba laha gagole
14. Labi laha eho, “Neàte,” lahame gagoho im lam uho ve ot vai fa Asinkritusti Flegonti Hermesti Patrobasti Hermasti imti vahi Kristus bake tu vuzehi meedam dam totbaho labe fa ame dam laba tau vahehe dam lamti labihasu gagole.
15. Labi laha eho, “Neàte,” lahame gagoho im lam uho ve ot vai fa Filologusti Yuliati Olimpasti Nereus labe am nàti labi Alam damaleheda totbaho labe fa ame dam laba tau vahehe dam lamti labihasu gagole.
16. Labi laha uho dam vazisi Alam im vahokelo modem di uhumo nasi ahu vàmadi ot deeliame, “Neàte,” lahame ot gagoi ot gagoidale. Labi laha dam Kristus bake tu vuzehi vahi meedam dam abo dam zi mei dam zi meime laham dam labe fa uba laha, “Neàte,” lahame gagodam bak.
17. Emti vahi Kristus bake tu vuzehi meedam dam oa, dam amomoit uba li Kristus labe Aho meedaha im meit amu uba vahokehena lamti uloho vabna uba vahokedam labet modi uho fa aime fa tu vuzehi vedi um dam totbaho laba otesi otesidume dam faheda. Labi ubu uho amu Kristus bake tu vuzehehe bak lam modi fa vàhàdeda. Laham bak labna zohàme mahate it vou faovoi vi ozodam labe meedale. Ame dam labe im im a aime netàdemule. Gi mu vaitesu tozodam tadele.
18. Eho gi neham bak ozome uba labi gagoho bak. Ame dam lam ba im Boehàda Kristus labe Aba Aho ozoho baket meedam vaba gi ibi iho im ahu adat ozoho baket modelo meedam damat modem bak. Ame dam labe ibi iho meedam bak gi neha: Im vameadam di biba neàt vameada. Labi, “Meit fà aime deelese,” lahame vi keobaeda. Labihadam labet modi dam mahate im ozome ozobohudem biem dam labe vedi imbo im vameada tiba ab tu vuzehemam bak. Labihàmu eho uba neha, “Ame dam labe lab vou lehe im lam uho aim di gi mu tozodam tadele,” lahame eho uba ab gagoham bak.
19. Lahana eho ozoha, um ba labiham vabak. Uho Kristus labe Aba Aho meedaha Im Neàna lam um aime uledi meedam tadem bak lam Kristus bake tu vuzehi meedam dam ahebu ozobohudi vou gagotedam bak. Labi uho lab meedam bak lam eho laha aiha em abo deeli seteho. Lahadamnàme uho ba git meedam bak labna zohàme, “Uho gi neha, ‘Neà bak neame?’ laham bak lam um ozobohu aabodi neàdi ame bak meedale. Labi fai bak meedam bak it malele,” lahame eho labi vi malelo àhàki ozodam bak.
20. Uho ame bak lam meedameam làhà kehàm vaba abo mei ahu ad laba modi faheme fi goaitom vaba gi vabademsu bohu vuusdam Ala labe Aho uba modi teudehe labe Iblisit uba vabimna bee lam uho gi naot belu uhulame setem bak. Imbote! Eho Ala bake nehasu tom gagodam bak. “Ai Ala oa, Oho modi im Boehàda Yesus labe Aho meia ozahit deeli im neà bak meedam bak labet modi ame dam niba laha ame baket labaha bohu meedale,” lahame tom gagodam bak.
21. Eba na tau meedamda meida nibe Timotius aho laha uba, “Neàte,” lahaho. Labi laha em Yahudi dam totbaho nim abo Lukiusti Yasonti Sosipaterti labihasu uba laha, “Neàte,” lahaho.
22. Ame sunit niba toedaha im zi ahebu lam eho Paulusat Tertius bake gagu aho toedaho. Tertius laha im Boehàda Yesusti vou ali ahu vàmadi meedamda meida nibe aho laha uba, “Neàte,” lahame gagodalo.
23. Gayus nibe laha uba, “Neàte,” lahaho. Ame da Gayus labe am num lam eho Paulusat azihi num am tame. Labi dam Kristus bake tu vuzehi meedam dam totbaho nibe laha am num laba vazisi bakamta vahi Alam im aidam meote. Labi laha eho niba azihi num debu nibe pemerintah eeda zi labe gagome na mei na mei lahadume gohali vadam doi vuusdamda Erastus labe aho uba laha, “Neàte,” lahaho. Labi laha imti vahi Kristus bake tu vuzehemda meida Kwartus uba laha, “Neàte,” lahaho.
24. [Eho Ala bake nehasu tom gagodam bak. “Ai Ala oa, oho modi im Boehàda Yesus Kristus labe Aho meia ozahit deeli im neà bak meedam bak labet modi ame dam niba laha ame baket labaha bohu meedale,” lahame tom gagodam bak.]
25. Imo im Boehàda Ala bake vou baedase. Neham bak. Am feà Alat modem labe iba modi vizi ibi iho Kristus bake tu vuzehi meedam bak lam fa abehamdem meo bak. Eho ame Da Yesus Kristus labe Aba Aho meedaha Im Neàna lam eho vou vameatedume fi dedam di eho gi ame bak lamti vou vameatedam bak. Ame eho lab vou vameatedume fi dedam Im Neàna lam aham di iube Alat vasti vou mode ledume etei vou fusi ahate ab fi zeam bitoham bak.
26. Neham bak. Dam ahamda labe Alat vameadaha im aime fa dam bake ahate vameaidaha dam labe iho Kristus labe Aba Aho ba meedam im lam ame dam labe iho lab nasi fet ozobohudi toedume esuhu im zi lam iho ve dam bakda ahebu vou vameatedam labe modi damat ozobohudedam bak. Ame bak lam ihimo ozome meedaha vabak. Abo Ala elom gikida abo gi labaha bohu vuusdam Ala labe Aho iba gagu iho meedaha bak. “Yahudi damat modem vab dam abo dam debu meiti dam debu meiti im lam aime ozobohudi fa Ala bake tu vuzehi im abada uledi meedase,” lahame labihaha bak.
27. Yesus Kristus Aho lab tohedateli iba tau vuusu meedam labe im ba iho vou baedamda amomoi vabak. Imo gi Ala imboda vàmtea abo na im ahebu ozobohu aabodemda laba vou baedase. Neàte. Eho Paulusat sunit nim toedume ab neàdeham. Àhàm.
1. Um Kristus bake tu vuzehi vahi meedam dam abo num debu Korintus laba azihi dam abo Alam damalehe dam oa, eho Paulusat sunit nim toedume uba oluho. Alat amu neha, “Eho fa Kristus Yesusat Aho gagu olu Am im vameadume esmozi laiamda meidatelese,” lahame fet ozome vàmadi esuhu labe em ab ame im modem dateleham bak. Eho ame da meida nibe sunit nim toedume uba oluho. Imti vahi Kristus bake tu vuzehi meedamda meida Sostenes nibe eba tau sunit nim toedume uba oluho. Uho Kristus Yesusti vou ali ahu vàmadehemu Alat uba neha, “Gi im Abadata fà meedase,” lahame ahit gagu fi hasi esuhu dam um am bak. Labi uho Yesus Kristus bake ahu adat iedi, “Im Boehàda am tame,” lahame vou baedam bak lamti ulohona dam totbaho bak iuba esuhu dam modeo, bak iuba esuhu dam modeo, labihasu ahebu laha im Boehàda Yesus Kristus laba neha, “Ame Da Yesus Kristus lam laha Boehàda ibida modem bak. Am abo feàte,” lahame ahu adat iedi vou baedam bak. Alat amu ame dam laba neha, “Dam lam Am damat modemu gi im vamdesum bakta meedale,” lahame ame dam laba fet gagu vàmadi esuhu bak lamti ulohona neo uba laha meedaha bak. “Um laha Am damat modemu uho laha im vamdesu bakta meedale,” lahame uba laha fet gagu vàmadi esuhu dam um am bak. Laham dam laba eho Paulusat sunit nim toedume uba oluho.
3. Im ahim nibe neha, “Im Ai Alati im Boehàda Kristus Yesusti ahili uba ozahit deeli im neà bak modi esuidase. Labi uba modi um ahu faheme fi goaitom vaba gi vabademsuse,” lahame im ahim nibe uba ozodume Ala bake labihasu tom gagodam bak.
4. Emti vahi Kristus bake tu vuzehi meedam dam oa, uho Kristus Yesus bake lab tu vuzehi Amti vou ali ahu vàmadi meedàmu Alat uba ozahit deeli im neà bak mei im neà bak meime uba modi vizi meedaha bak. Lahaha bak laba eho vi ozome Ala bake, “Am abo neàte,” lahame vou baedam tadehe bak.
5. Uho Kristus bake tu vuzehi Amti vou ali meedàmu Alat uba tau im neà bakta abo feàna duana nehame meedaha bak. Aho uba modi vizi neàdedaha labe uho im Abada, “Iho meia akatihasu vameadàla?” laham bak lam uba modi um ozobohudi uhumo meia vameadam bak. Labi laha Aho uba vameadaha im imbona lam, “Akatihasu modem imot modela?” laham bak lam uba laha modi vizi um ozobohudi uho ame im lam meedam bak. Labihasu Alat uba tau im neà bakta abo feàna duana meedam bak.
6. Neham labe labihaha bak. Iho amu uba le Kristusat meedaha im lam ahebu uba ahamte le vameadaha di lam Alat iba vi tau gago, “Lo. Imbote,” lahame labi vi tau gagoho labe uba laha modi vizi uho ame im laba ab tu vuzehi bohu vuusu meedamam bak.
7. Labihàmu na uho damat modem biemna lam Alat Ahamo Am Aha Nutabe Neàna labe uba ilabdi modi vizi uhumo ab faheme ahala la modi le modidamam bak. Ba uba modi vizi teudemna amomoi vekeheda kaio. Gi ame im zi ab vizedume neàdedaham bak. Labihàmu im Boehàda Yesus Kristus lam Alat fa bak niba nom olum bak uho vou faodam di nibe uho gi ame baket ab meedamam bak.
8. Uho neham bak mahate vi ozodale. Alat Aho neha, “Eho nehame mode tame,” lahame im gagom di ba vagem vaba abo ame bak lam imbodi modem tadem Alat modem bak. Labi laha Aho amu neha, “Um Korintus dam lam fa Am Adat abo im Boehàda Yesus Kristus bake uho tu vuzehi Amti vou ali ahu vàmadese,” lahame amu fet gagu vàmadi esuhu Ala Am am bak. Labihadam Alat modem labe iho laha nehi ozobohudehe bak. Làhà Alat ba diamut uba aame neha, “Um git modeha,” lahame vàlu gagom vabake aho ahit uba modi um ahu teudi uho Kristus bake tu vuzehem bak lam gi labaha bohu vuusdume im Boehàda Yesus Kristus ba fa li aam bak.
10. Emti vahi Kristus bake tu vuzehi meedam dam oa, im Boehàda Yesus Kristus labe eba gagu em Am im dedateli uba nehame vameadalo mozo. Eho aiha uho um ahu faheme dam totbaho labe neha, “Vabo. Eeda ibida im vameadamda bisi imboda am bak.” Labi dam totbaho neha, “Vabo. Eeda ibida im vameadamda bisi imboda am bak,” lahame labi otesi otesidam bak lam em aiha em abo àvodehe bak. Labihàmu eho uba gi nehalo. Um ba a labihadamule. Uho meidavat meit im gagom di gi ahu vàmadi ame bak labe meedale. Abo Kristus meedaha im lam uho a faheme dam zoho im amomoi ozo. Labi dam zoho gi ame baket neo mode. A labihadamule. Gi ahu vàmadi im vàmadele. Labi laha uho neha, “Iho nehame modemeam Alat iba deelem bak am tame,” lahame ozome meedam bak lam gi ahu vàmadedume im vàmadele. A ahu faheme dam totbahot im amomoi ozome meeda. Labi dam totbahot laha im amomoi ozome meeda. A labihadamule.
11. Eho gi neham bak ozome uba labi gagoho bak. Dat ee, “Koloe,” lahamdate tau azihi dam totbaho labe eba li gago, “Im dam totbaho git meedalo,” lahame eba li labi vameadaha bak lam em aihi bak. Uho vedi nehame daet otesida.
12. Dam totbahot vedi neha, “Im Paulus bake tu im abada meedam bak.” Labi dam totbahot vedi neha, “Im Apolos bake tu im abada meedam bak.” Labi dam totbahot vedi neha, “Im Petrus bake tu im abada meedam bak.” Labi dam totbahot vedi neha, “Im abo Kristus bake tu im Abada meedam bak,” lahame uho labihasu gagodam damat modem bak.
13. Aiee! Uho lab otesi otesidume ahu fahedaha bak lam em abo àvodehe bak. Uho ozom, Kristus ba im faheme dam iudu iuba le neha, “Uho nehame modele.” Labi neo dam iudu iuba le fa neo im amomoi, “Uho nehame modele,” lahame labi modehe? Labi uho faina meedam bake gohali damat em ve ut tetehesuhunaso laba paku dou em elohe? Labi um meit vuu valo vou baptislehe di lam damat neha, “Om Paulusam damali im abada vuzehi meedale,” lahame gagu um valo vou baptislehe? Vabà!
14. Eho gi um dam behàsu Krispusti labi Gayusti dam ahim lamota eho vuu valo baptislehe bak. Lahana um dam dua totbaho lam eho vuu valo baptislehe vabak. Labihàmu damat ba neha, “Iho Paulus bake tu vuzehi im abada meedase,” lahame eba li gagohemu, “Eho um vuu valo vou baptisleho,” lahame ba eba labi gagom vabiem bak. Labiham labe eho gi dam koena vuu valo vou baptislehe bak laba it ozome, “Damat eba vou baedam vabake em ahole modehe,” lahame vi ozome fa Ala bake vou baedam bak.
16. Aa faod! Stefanus am num laba vahi azihi dam lamti eho laha vuu valo baptislehe bak ehe bak. Labi um dam totbaho eho vuu valo baptislehe bak lam em vabilem bak. Em mei vuu valo vou baptislem bak lam mahate vi ozodam vab dàt modem bak.
17. Em gi dam koena vuu valo baptislehe bak. Nehaha bak. Kristus eba gagu oluhu di lam Aho eba neha, “Oho dam ahebu vuu valo baptisleidale,” lahame eba labi gagu oluhu vabak. Aho gi neha, “Aho meedaha Im Neàna lam eho dam bake vou vameatedale,” lahame eba labi gagu oluhu bak. Lahana ame im lam eho vou vameatedam di lam Kristus eba malehemu eho ba bak damat ibi iho ozome keobaeme vameadam bakti ulohona ame im vou vameatedam vabak. Bisi bak damat ibi iho ozome keobaeme vameadam bakti ulohona dam bake vou vameatedam labe damat gi ame bak labet tum bak labna zohàme em gi uho faina meedam bak laba Kristusat Aho gohali damat Am ve ut tetehesuhunaso laba paku dou eloho im lamota vou vameatedam bak. Meit gi ame im lab aihi labe ame im lam feà labe uba modi vizi uho tum bak laba ozome eho gi ame im lamota dam bake vou vameatedam bak.
18. Iho bak damat faina meedam bak lam Kristusat Aho fa faamolo damat Am ve ut tetehesuhunaso laba paku dou eloho im lam iho vou vameatedam im am bak. Alat dam vua elum feàna sutem gikina laba voou vaitesu esdalo modem dam labe iho ame im lam vi aime ozodam di gi neha, “Ostam imot moz,” lahame tozome gagodam dam am bak. Lahana Alat soat vausu fa vei neàdedam dam nibe iho ame Im Neàna lam aidam di ba tozome gagodam vaba gi, “Abo bisi feà Alat modem labe ame baket meedam bak,” lahame ozome gagodam bak.
19. Eho etei lab gagoho bak lam ba ehemo ozome uba labi gagodam vabak. Dat ahamda abo Alat vameadaha im aime fa dam bake ahate vameaidahada Yesayat laha ame bak lam Alat Vameadaha Im Toedahana laba nehi toeme esuhu bak. “Dam im ozobohu dam labe vedi neha, ‘Im ibida bisi imboda am bak,’ lahame ibi ihimo ozomom im lam Eho modi fi goaitoi ame im lam gi vàhàdeme sete tame. Labi damat neha, ‘Im bisi im ozobohuda im am bak,’ lahame it daetbadam dam labe ibi iho ozobohudehe bak lam Eho laha modi gi zohali sete tame.” Lahame Yesayat labihasu toeme esuhu bak.
20. Labihàmu iho gi nehi ozodam bak. Bak damat neha, “Im bisi im ozobohuda im am bak,” lahadam damat modeo, labi damat neha, “Yahudi dam labe ibi iho vou vahoke usehe Im Feàna lam bisi ozobohuda im am bak,” lahadam damat modeo, labi damat neha, “Im vameadam bibada im am bak,” lahadam damat modeo, labihasu Alat ba, “Feàte,” lahame ozome gagodam vabak. Neham labe labihaha bak. Damat Ala bake tu vuzehem vab damat neha, “Im ahulat ozoho im nim bisi imboda am bak,” lahame ozobohudi meedam im lam Alat amu gi neha, “Um im lam ostam imot modem bak,” lahame ab ahatedi modesuham bak.
21. Eho gi neham bak ozome uba labi gagoho bak. Bak damat vedi neha, “Ibi iho ahulat ozome ozobohudi meedam im labet modi im Alati vou ali vahem bak am tame,” lahame ozodam damat modem bak. Lahana Alat bisi Ahamo im ozobohuda modem labe ba ame bak laba uledem vabak. Aho ahit mali ame dam laba modi Amti vou ali vahem bak ab modem bieham bak. Lahamnàme Alat deelehat gagu esuhu bak nim ehe bak. Alat amu neha, “Am Adat Yesusat meedaha Im Neàna lam abo bak damat vedi neha, ‘Ostam imot modem bak,’ lahame tozome moho im lam iho geàmu fa vou vameatedam di meit gi ame Im Neàna laba tu vuzehem labe Aho soat vausu fa vei neàdedam dam am bak,” lahame Alat deelehat gagu esuhu im am bak.
22. Ame Da Yesus Aho meedaha Im Neàna lam Yahudi damat vi ozodam di, “Ostam imot modem bak,” lahame tozome moudam damat modem labe vedi neha, “Làhà uho na damat ihimo modem biem im feàna modi im aame ozobohudi, ‘Imbo?’ laham bak im aame im oboda iho fa tu vuzehese,” lahame gagodam damat modem bak. Labi Yahudi damat modem vab dam laha ame im laba vi ozodam di vedi iba ame im vameadam dam laba neha, “Làhà uhumo im bak damat ozobohudi la modi le modidam bak labet iba vahokedume im ahu vi ozobohudi im ubuda fà tu vuzehese,” lahame gagodam damat modem bak.
23. Lahana imota ba labihadam vab damat modem bak. Iho gi nehadam bak. “Damat faina meedam bak lam fa faamome vei neàdedalo Alat Gagu Fihasi Vimteme Oluhu Dat Boehàda Kristus lam damat ve ut tetehesuhunaso laba ahit dou eloho bak,” laham im lam iho dam bake vou vameatedam bak. Lahana ame Im Neàna lam gi dam naba kebut ulasi biti dam beom bakti ulohona modi Yahudi damat faki ahu taihaoli mom imot modem bak. “Alat Gagu Fihasi Vimteme Oluhu Dat Boehàda ba akati eloe?” lahame tozome moudam bak. Labi Yahudi damat modem vab dam labe laha ame im laba ozom di, “Ostam imot modem bak,” lahame gagodam damat modem bak.
24. Lahana Alat amu neha, “Dam lam Eho ve Em damalese,” lahame amu lab fet ozome esuhu dam lam abo Yahudi damat modeo, Yahudi damat modem vab dam modeo, laham dam labe iho Kristus ut tetehesuhunaso laba eloho bak lam meit vameadamna aim di tu vuzehem dam ehe bak. Ame dam labe ame Da Kristus labe Aba Aho meedaha im lam vi aime ozodam di fa im meida behàsu nim laha vi tu ozodam bak. “Ala abo im feàna meedam Ala ame. Labi laha Alat Am ahulat bisi im ozobohuda modem labe ame im lam meedam Ala ame.” Labihasu ame dam labe tu vi ozobohudem im behàsu am bak.
25. Eho gi neham bak ozome uba labi gagoho bak. Alat neha, “Am Adat Yesus lam damat ve ut tetehesuhunaso laba dou elose,” lahame uledehe bak lam bak damat vedi nehi ozo, “Alat ozoho vabna gi ostam im meedam Alat modem bak,” lahame ozome gagodam bak. Lahana um nasi ozomale. Im bak damat ahulat ozome meedam bak lamti Alat Aba Aho Am ahulat ozome meedam bak lamti bisi im ozobohu feà Ala Am am bak. Labi bak damat vedi neha, “Alat Aho meedam im lam Am gi nembeda modem Alat modem bak. Ba feàna modem vab Alat modem bak,” lahame gagodamnàme bak damat ibi iho feàna meedam bak lamti Alat Aba Aho im feàna meedam bak lamti bisi im feàna meedam tademda Ala Am am bak.
26. Emti vahi Kristus bake tu vuzehi meedam dam oa, uho neham bak vi ozodale. Alat amu uba neha, “Aho um vame um Am damalese,” lahame amu uba fet gagu alimeat vaha di iube dam bakda totbahot uba ozome gagodam bak laba vi ozodale. Di lam ame dam labe uba ozodam di vedi neha, “Um dam gi koe zohota bisi im ozome ozobohudi la modi le modidam bak ame. Labi um gi koe zohota feà damali meedam bak ame. Labi um gi koe zohota ee feà dam labet faaha adamat modem bak ame.” Uba labihasu ozodam damat modem bak.
27. Lahamnàme bak damat Ala bake tu vuzehi im Abada meedaha vab dam labe vedi neha, “Dam lam bisi im ozome ozobohudi la modi le modidam dam am bak,” lahame damat lab vou baedaha dam lam, “Fà ladese,” lahame Alat ahit ame dam lam mu fa bak damat neha, “Ostam im meedam damat modem bak,” lahame ibi iho tozodam dam laba Alat ahit gagu vadaha dam am bak. Labi laha Ala bake tu vuzehi im Abada meedaha vab dam labe neo neha, “Dam lam feà damali meedam bak lam iho dam labe iho gagom im aim uledem neà bak,” lahame lab vou baedaha dam lam, “Fà ladese,” lahame Alat ahit ame dam lam mu fa bak damat neha, “Bisi feà damali meedaha vab damat modem bak. Im dam lada labe im im aim moho bak,” lahame ibi iho tozodam dam laba Alat ahit gagu vadaha dam am bak.
28. Labi laha bak damat iho vedi neha, “Dam lam bisi im feàna meedam vab damat modem bak. Gi aam ahasbeai voom damat modem bak,” lahame tozodam dam lam Alat ahit gagu vadaha dam am bak. Nehaha bak. Bak damat iho neha, “Dam lam bisi im feàna meedam dam am bak,” lahame iho lab vou baedaha dam labe iho vameadaha im modi, “Fa seddase,” lahame Alat ahit bak damat tozoho dam lam fa vadaha bak.
29. Alat lab meedaha bak lam neham bake mali labihadaha bak. Ba meit Alat avaesdam laba le duzu neha, “Bisi ozome ozobohudi la modi le modidamda em am bak. Bisi feà damali meedamda em am bak,” lahame it daetbadam bak lam Alat ahit mali fa damat tozodaha dam lam fa vadume Am damalehe bak.
30. Alat Aba Aho meedaha bak labet modi imti Kristus Yesusti vou ali ahu vàmadehe bak. Am abo im ozobohu Alat modem labe Aho amu neha, “Iba modi soat vausu fa vei neàdedase,” lahame Aho lab fet ozome esuhu bak labet modi Kristus Yesus bak niba li iho faina meedam bak lam Aho fa ot vai fai Dateli eloho bak. Labiha labe Alat Aho iba ozodam di im gi im vamdesu meedam damat modem bak. Labi laha, “Im Am damali gi im Abadata meedase,” lahame Alat iba fi hasi gagu esuhu bak. Labi laha iho faina meedam bak lam Alat ba neha, “Debu uho modehemu um beo tame,” laham bak lam Alat ba labi gagom vaba Aho amu gi fa faamome seddaha bak. Kristus lam iho faina meedam bak lam Aho fa ot vai fai Dateli eloho labe Alat gi labihadaha bak.
31. Iho neha, “Bisi feà dam im am bak,” lahame it daetbadam vaba gi im Boehàda Yesus Kristus bake vou baedam bake Alat ahit labihadaha bak. Imo gi dat ahamda Alat vameadaha im aime fa dam bake ahate vameaidahada Yeremia labe aho Alat Vameadaha Im Toedahana laba nehi toeme esuhu bak lamti ulohona meedase. “Meit na im vi ozome vou baedalo modemeam làhà gi im Boehàda Alat Aba Aho meedaha bak laba vi ozome Aba vou baedale.” Lahame Yeremiat labihasu toeme esuhu im lamti ulohona meedase.
1. Emti vahi Kristus bake tu vuzehi meedam dam oa, Alat iba modi fi zeam bitoho im lam eho uba vou le vameadaha bak laba uho vi ozodale. Nehaha bak. Ame im lam uba vou le vameadaha di lam, “Em bisi im ozobohuda modem labe damat fà im ebeda aidase,” lahame eho ba uba im keobaedume ebe eho ozome ozobohudehe bak labet uba vameadaha vabak. Labi laha bak damat neha, “Ibi iho ozome ozobohudehe bak nim bisi imbo bak ame?” lahame labi ozom bakti ulohona eho ame im lam uba vameadaha vabak.
2. Em di labe, “Gi iho faina meedam bak lam Yesus Kristus labe Aho fa ot vai ut tetehesuhunaso laba eloho im lamota uba vou le vameadase,” lahame ahu vàmadi uba vameadaha bak.
3. Eho amu uba le tau azi ame im lam vameadaha di lam, “Em abo feàte,” lahame it ozome ahumdi ame im lam meedaha vabak. Em gi feà vab labe ahit feà datelem bak mu gi fa alihi vei nemahusi faa dododam bakti ulohona vei iedi ame im lam uba vou le vameadaha bak.
4. Eho amu Alam Im Neàna lam uba vou le vameadaha di lam eho ba ebe eho ozome modidume ozobohudehe bak labet uba ame im lam vou vameatedaha vabak. Labi laha eho ba bak damat ibi iho ozome keobaedume vameadam bak lamti ulohona vameadaha labe uho ame im lam aime tu vuzehehe vabak. Gi Alat Am Aha Nutabe Neàna labe eba modi vizi teudi eho meedaha labe uho aame ozo, “Imbote. Paulusat vou lehe im lam abo Alam im vou leha,” lahame ozobohudi um ab tu vuzeheham bak.
5. Uho Kristus bake lab tu vuzehehe bak lam ba gi ebe eho dam bakda labe ibi iho ozome modidume ozobohudehe bak labet modi uho tu vuzehem vaba uho gi, “Ala bisi im feàna meedam Ala Am am bak,” lahame uho labihasu ozome tu vuzehem bake eho ahit labihadaha bak.
6. Iho gi nehadam meo bak. Dam Kristus bake abo tu vuzehi neàdi keàtedi meedam dam laba iho ame Alam im lam vou vameatedam di lam iho Ala bisi im ozobohuda labe Aba Aho meedam im lam iho ame dam laba vou vameatedam meo bak. Lahana iho lab ozome ozobohudi vou vameatedam bak lam ba bak damat ibi iho ozome ozobohudi vameadam bak lamti uloho vabak. Labi laha ba dam bakda vuusdam boehàda zi nibe ibi iho ozome ozobohudi meedam bak labet iba modi fa vizi im ahulat bisi ozobohudi ame im lam laha vameadam vabak. Neham labe labihadaha bak. Ame dam boehàda zi labe ibi iho dam vuusu im vahokedam bak lam Alat ahit modi fa ame bak lam koededume ba diamut seddalo modem bake labihadaha bak.
7. Iho lab ozobohudi ame im vou vameatedaha bak lam gi Alat Ahamo Am ahulat bisi im ozobohu feà bak labe iba modi vizi iho ozobohudi ame im lam vou vameatedam bak. Lahana Alat amu di iube bak nimti na ahebu meedaha vab di iube Aho neha, “ ‘Dam Em damalelo modem dam labe im ee vousai vou baedase,’ lahame Eho ba diamut Em damalehe dam laba Eho gi im neà bak duana meeda tame,” lahame Alat Aba Aho amu lab ozobohudi fet ozome esuiam im lam ahebu amu dam bake vastehe bak. Lahana etei nim fa iba modi im ozobohudi fi gatei fa dam bake ab vou vameatedamam bak.
8. Lahana Am abo im ozobohu Alat modem labe Aba Aho lab fet ozome esu vàmadiam im lam dam bakda vuusdam boehàda zi nibe Yesus bake tu vuzehem vab labe ame im zi lam ozobohuda vàmtea ba na vabak. Ame boehàda zi lam ahebu vabiem tadehe bak. Laham vaba ame dam labe ozobohudemeam làhà iho ba uledi im Boehàda Yesus abo Alat ee vousahada lam ve ut tetehesuhunaso laba esu paku lab dou eloho bak lam ba modem vabak.
9. Ame boehàda zi labe iho lab vabi otehe bak lam gi Yesaya dat ahamda Alat vameadaha im aime fa dam bake ahate vameaidahada labe aba aho aham di iube Alat Vameadaha Im Toedahana laba nehi toeme esuhu imti ulohona modehe bak. “Ala bake deelehe dam laba Aho, ‘Neà bak nehame mode tame,’ lahame amu fet ozome ahumdi esuiaha im lam ba damat fakot aam kai. Ba damat dogoit aim kai. Ba damat im ahulat vi ozome ozobohudem kai. Laham im ziat modem bak.” Lahame Yesayat aham di iube labihasu toeme esuhu bak.
10. Alat Vameadaha Im Toedahana labihasu toehenàme Alat Aba Aho fet ozome esuiam im zi lam Alat Am Aha Nutabe Neàna labe iba nom olu fi gatehe labe imota ozobohudehe bak. Neham bak. Na im ahebu, “Akatihasu modemna modela?” laham bak lam fota vi ozome modiam vaba abo im ahebu vi ozodume ozobohudehe Alam Aha Nutabe Neànat modem bak. Abo Alat Aba Aho fet ozome esuiam im lam abo damat ihimo ozome ozobohudem biem im lam laha Aho gi vi ozodume ozobohudi fa iba modi im ozobohudi fi gatehe bak.
11. Neham labe labihadaha bak. Dat meida ahamo am ahulat ozom im lam ba dat meida ozome ozobohudi tombali gagom vabak. Im bak dam nim ba labihamda vàmtea na vabak. Gi naedat ahamo am im ozobohudem bakta àhàm bak. Labi laha Alat Aba Aho Am ahulat ozom im lam ba im bak damat vi ozome ozobohudemda vàmtea na vabak. Gi Alam Aha Nutabe Neàna labe Ahamo ame im ozobohudem bakta àhàm bak.
12. Alat, “Aho dam bakdate tau neàdedase,” lahame Aho iba lab ilabdi vizi meedaha bak lam, “Iho fà ozobohudese,” lahame Am Aha Nutabe Neàna lam iba nom olu vizedaha labe im ab fi gateham bak. Ba bak damat ibi iho ozome ozobohudehe bak labet modi iba vizi iho ame im lam ozobohudehe vabak.
13. Labihàmu Alat iba lab modi im ozobohudi fi gatehe im imbona lam iho meia vahokedam di iho ba bak damat neha, “Bisi im ozobohu dam im am bak,” lahame ibi iho ozome meedam bak labet iba vizi iho meia vahokedam vabak. Iho ame im lam dam bake vahokedam di gi Alam Aha Nutabe Neàna labe iba vahokedume vizehe im lamota meia vahokedam bak. Labiham labe dam Alam Aha Nutabe Neàna amu modi vizehe dam labe biem bake iho vahokedam di gi Alam Aha Nutabe Neàna labe iba gagohoda lamota ame dam laba vahokedam bak.
14. Dam Alam Aha Nutabe Neàna labe vizi modesdam vab dam lam ba Alam Aha Nutabe Neàna labe Aho neha, “Alat ilabdi iba im neàna meedalo modem bak,” lahame labi vahokedaha im lam ame dam labe aim di vedi, “Ostam imot modem bak,” lahame mu voedam bak. Neham bak. Alat Aho iba ba meedalo modem im ahebu lam, “Akatihasu meedamna modela?” laham im lam meit biem bake gi Alam Aha Nutabe Neàna labe ame da laba modi vizi modesdam labe ame im ozome ozobohudi fi tatom bak. Labihàmu Alam Aha Nutabe Neàna labe ame dam laba vizedume modesdam vab labe ba ame im lam ozome ozobohudi fi tatom vabak. Gi ozom bi modesdam bak. Labihadaha bak.
15. Lahana Alam Aha Nutabe Neàna labe vizi modesdam dam lam ihimo ame Alat Aho modi fi zeam bitoho im zi lam ahebu, “Imbo? Imbo vabao?” lahame iademe ozome ozobohudi gagodam dam im am bak. Lahana Alam Aha Nutabe Neàna labe vizi modesdam vab dam lam ba ame Alam Aha Nutabe Neàna labe vizi modesdam dam laba, “Imbo? Imbo vabao?” lahame ba ozome ozobohudi fa gagom vabiem bak.
16. Dat ahamda Yesayat laha ame bak lamti ulohona Alat Vameadaha Im Toedahana laba nehi toeme esuhu bak. “Alat Am ahulat ozom im lam ba amat la ozoi le ozoidume ozobohude? Labi laha amat Ala bake neha, ‘Nehame modele,’ lahame Ala bake im vi vahokedà? Ba im labihasu modemda vàmtea na vabak.” Lahame Yesayat aham di iube labihasu toeme esuhu im am bak. Lahana Alat Vameadaha Im Toedahana labihamnàme imota Alam Aha Nutabe Neàna labe iba vizi modesdam labe iba modi fa im ahu laba fa Kristus labe Am ahulat ozom im lamti ulohona modesdam bak.
1. Imti vahi Kristus bake tu vuzehi meedam dam oa, eho amu uba le tau azi vahokedaha di labe eho nehi meedaha bak laba uho vi ozodale. Ame di labe eho ba neham bak ozome uba ame im lam vahokedaha vabak. “Alam Aha Nutabe Neàna labe uba modi vizi modesdam labe Aho uba gagodaha im lam uho abo aime vuzehi keàtedi meedam dam um am bak,” lahame eho amu di iube labi vi ozome uba vahokedaha vabak. Ame di labe um gi data etei faahanati uloholi alimeat Kristus bake tu vuzehehe labe eho gi fa neham bak ozodam labe uba vahokedam bak. “Uho gi bak damat ibi iho ahu ad laba faina meedalo àhàki ozodamna lam uba ootedam labe uho faina meedam damti ulohona meedam lahasuhu dam um am bak,” lahame eho amu di iube uba labi vi ozome uba vahokedaha bak.
2. Eho amu uba ame Im Neàna lam vahokedaha di labe uho im teuna vi ozome ozobohudi fi tatom bak lam uhumo modi ahumdi neàdehe vabak. Labihàmu eho gi lahit am data do àmda laba na teuna lu àm biem bak lamti ulohona modi gi im bee bakta abo im aime ozom biba neà bakta uba di labe vahokedaha bak. Data do àmda labe na teuna àm biehemu em laha ba uba im teuna abo ame im ahebu lam uba vahokedam bak mu gi im nemahuba neà bakta ozome fi me uba vahokedaha bak. Lahana etei nim eho vou faoha um ba modi teudi neàdem kaio. Em abo àvodeha.
3. Eho gi neham bak ozome uba labi modehe bak. Um di labe um ahu ad laba faina meedalo àhàki ozodamna labet uba ootedume uho vei uledi ame faina meedam bak lam meedam lahasuhu damat modem bak. Ba vooho vabak. Um abo gi na im meedam di ahebu ahu adat ot fakiame ot teidi ot teidiam damat modem bak. Labi laha daet ot bei ot beidam damat modem bak. Làhà eho etei lab gagoho bak lam ahole gagoho bak. Um gi damat ibi iho ahe diat ahulat ozome àhàki uledi meedam bak lam uho etei nibe meedam lahasuhu damat modem bak. Abo dam Kristus bake tu vuzehi meedaha vab dam labe ibi iho meedam bakti ulohona meedam damat modem bak.
4. Uho nehame meedam labe eho uba labi gagoho bak. Um dam totbahot otesi otesidam labe vedi neha, “Im gi Paulus aba aho vahokedaha im lamota tu vuzehi meedam bak.” Labi dam totbahot vedi neha, “Im gi Apolos aba aho vahokedaha im lamota tu vuzehi meedam bak,” labihasu meedam labe eho nehi ozo. Làhà eho etei uba lab gagoho bak lam gi ahole gagoho bak. Um gi bak damat abo Kristus bake tu vuzehi meedaha vab dam labe ibi iho meedam bakti ulohona meedam damat modem bak.
5. Aa làhà! Uho ozom, Apolos ana dàt modem labe um dam totbahot vedi im abadata tu vuzehi meedà? Labi em laha ana dàt modem labe um dam totbahot vedi im ebedata tu vuzehi meedà? Vabà! Um git ozodume meedam damat modem bak. Im ahim feà vab damat modem bak. Im gi Alat Am na meedam dam ahim nibe uba ame Im Neàna ahamte faasi vameadam labe uba modi uho Kristus bake tu vuzehehe dam ahim im am bak. Im gi Boehàda Alat iba gagu fahedume im ahala modiam damat modem bak.
6. Nehaha bak. Eho amu uba le Alat Am Im Neàna lam eho ahamte alimeat uba faasi vameadahada em am bak. Labiha labe em abo dat bak vabiedume na debe esu neàdemdati ulohona modehe bak. Labi ame da Apolos lam aho ba vuli ame im lam vi vahokedume dualeheda am am bak. Abo dat meida ba vuli ame na dehe bak laba vi vabiedamdati ulohona modehe bak. Lahana ame im lam im ahim nibe uba vahokedahana lam uba modi uho ame im lam ozodume ozobohudi fi tatom bak lam Ala na modeheda Am am bak. Abo Aho ame na dehena laba modi usidume kilali soaedam bakti ulohona modehe bak.
7. Labihàmu ame im ahamte faasi vou vameatedamda modeo, ba vuli vi vahokedume vabiedume dualeheda modeo, labihasu ame dam ahim lam ba bisi feà vab dam ahimit modem bak. Abo dat bak vabiedume na debe esu neàdemda modeo, dat meida ba vuli ame na dehe bak laba vi vabiedamda modeo, labihasu ame dam ahim lam bisi feà vabak lamti ulohona modem bak. Bisi feàda Alat Ahamo modem bak. Neham labe labihadaha bak. Im ahim nibe iho uba vahokedaha im lam Aho uba vi tau modi uho ame im lam ozodume ozobohudi fi tatom Ala Am am bak. Abo Aho ame na dehena laba modi usidume kilali soaedam bakti ulohona meedam Alat modem bak.
8. Uho mahate ozodale. Dat bak vabiedume na debe esu neàdemda lamti dat meida ba vuli ame na dehe bak laba vi vabiedamda lamti labihasu ame dam ahim labe gi na soali àdam bak laba ozome gi ame im vàmtea labe meit aba aho ozoho bak mode. Labi meit aba aho ozoho bak mode. Labihadam bak. Ba ame im vàmtea lam faheme dat meida bisi feàda mode. Labi dat meida lam feà vabda mode. Laham bak lam ba modem biem bak. Ame dam ahim lam gi ame im vàmtea laba vi ozodam labe gi uloho bak. Ulohonàme ame dam ahim labe ibi iho meedaha bak gohali vamna ba vam di gi meit aba aho modehe bak laba vi ozome uloholi vadam bak. Labi im Apolosti laha labihaha bak. Kristus Aba Aho meedaha Im Neàna laba uho tu vuzehi meedam bohu meedam bake im ahim nibe gi ame im vàmtea laba vi ozome faheme ebe eho modem bak mode. Labi Apolos aba aho modem bak mode. Labihadam bak. Ba ame im vàmtea lam faheme dat meida bisi feàda meedamda mode. Labi dat meida feà vabda meedamda mode. Laham bak lam ba modem biem bak. Im ahim nim gi ame im vàmtea laba vi ozodam labe gi uloho bak. Ulohonàme iho lab meedaha bak gohali vamna ba vam di Alat gi ebe eho modehe bak laba vi ozome uloholi ame na lodam bak. Labi Apolos laha aba aho modehe bak laba vi ozome uloholi ame na lodam bak. Gi labihadam bak.
9. Eho gi neham bak vi ozome uba labi vameadam bak. Im Alam na modem dam ahim am. Labi Alam utoho ozomom dam um am. Ame bak lam gi neham bak. Alat iba gagoho labe iho gi ahili ame Alam Im Neàna vàmtea lamota uba vou vameatedam bak. Labi Alat iba gagoho labe iho gi ahili ame Alam Im Neàna vou vameatedam bak lam gi mei num iho teohet vi tau mome neàdehena laba iho neha, “Im numat modem bak,” lahame labi gagom vaba gi, “Num deda labe am numat modem bak,” lahame gagom bakti uloho bak.
10. Labiha labe um naeda gi Ala am bak. Dat num mom bak ozobohuda labe aho nasi bao iademe vou zisit ladume teudi neàdi num soabo mohoda lamti ulohona modeheda em am bak. Alat eba ozahit deeli im neà bak modi esuidàmu eho uba le ame Im Neàna lam ahamte alimeat iademe faasi vameadamda em am bak. Labi ba neo dam amomoi uba ba li dam num soabo vousai mome neàdem dam lamti ulohona modi uba ame Im Neàna labe aba zoho neo vi susume vahokedume dualedam bak. Lahamnàme ame dam amomoit uba ba li ame Im Neàna vi vahokedume dualedam dam labe ba git vahokedam bak labna zohàme ame dam labe gi fa dam ba num soabo vousai mome neàdedam dam labe ibi iho iademe vamdesu moadam bak lamti ulohona meedale.
11. Dam num mom di bao vou zisit lahana lam gi vàmadehe bak. Im laha iho vou vameatedam im gi vàmtea bak. Ame im lam gi Yesus Kristusat meedaha im am bak.
12. Uho neham bak nim laha vi ozomale. Ame bao zisit lahana laba dam totbahot num soabo vousai molo modem di nehame modem meot. Na teuna ahamo labahana emas modeo, perak modeo, ke modeo, labihasu vame num soabo vousam meot. Labi dam totbahot gi na teu feà vabna ahamo labaha vabna abo ut modeo, ut et modeo, iloho modeo, labihasu vame num soabo vousam meot. Labihadam bak.
13. Lahana ame num soabo lam, “Na akatihasuhunat mohela?” laham bak lam ba diamut vuat usime fi hiludam di lam, “Alamom vabao? Alamoeo?” laham bak lam damat aame ozobohudem di am bak. Neham bak. Ebe eho amu Yesus Kristus Aba Aho meedaha im lam ahamte debut faaha bak labet dam amomoit ba vi susume labaha bohu vahokedam bak lam, “Git vahokedào? Iademe vahokedào?” laham bak lam Alat ba diamut Aho dam bake uloome aidume gagu fahelo modem di labe Aho fa ame dam laba nasi modi aame ozobohudi fa ahate fi zeam bitoi damat ozobohudem di am bak. Abo vuat usime fi hiludam labe ame num lam, “Na akatihasuhunat mohela?” laham bak modi tombalehe bak lamti ulohona modem di am bak.
14. Alat ame dam labe ibi iho meedaha bak lam uloome ozolo modem di lam, “Iho iademe meia modi neàdem im vahokedào? Abo meia modi vizi labaha bohu vuusdam im vahokedào?” Laham bak uloome aimeam imbodemeam làhà ame dam labe iho lab vahokedaha bak laba gohali vamna Ala bake vam bak.
15. Lahana Alat ame dam labe ibi iho meia im vahokedam bak lam, “Iho iademe meia modi neàdem im vahokedào? Abo meia modi vizi labaha bohu vuusdam im vahokedào?” Laham bak uloome aimeam imbo vabameam làhà ame dam labe ibi iho vahokedaha bak laba gohali vamna ba Ala bake vam vabak. Gi setem bak. Abo dat num momda labe aho na teu feà vabna vame num mome vuat beome fi hiluvai seti ame num laba vahehe nazoh ba vi atem biem bakti ulohona modem bak. Gi ame num labe am nazohti ihimo vuat beom bak. Lahana ame num deda lamota vekem bak. Ame bak lam gi neham bak. Dat ame Im Neàna lam aho git vahokedahemu Alat Aho ame bak gohali ame na lom malehenàme gi ame da lamota Aho soat vausu fa vei neàdehe bak lamti uloho bak.
16. Um ozom vaba? Alat uba ozom di um abo Fihasi Ala Bake Vou Baedam Num Vàmteabu ozomom dam um am bak. Eho gi neham bak ozome uba labi gagoho bak. Ame Alam Num Vàmteabu lam Ala ehe bak. Labi um ahu laba laha Alam Aha Nutabe Neàna labe uba modi vizedume modealadaha bak. Labihaha bak.
17. Um nasi ozomale. Ame Alam Num Vàmteabu laba gi Aba Aho ozohona lamota meedam bake mali fi haha numat modem bak. Labiha labe Aba Aho ozoho im lamota, “Uho Am damat meedale,” lahame uba mali fi haha bak. Labihàmu um Kristus bake tu vuzehi vahi meedam dam lam ame num ozomom dam um amemu meit uba li giomim vahokedume ubu uho vabademsu iademe meedam bak lam vàhàdemeam làhà Alat ame da laba laha modi beome vàhàdeda tame.
18. Uhumo uba it vageiam bak nasi vaitole. Neham bak. Um dam totbaho labe nehi ozo, “Dam amomoit iba ozom di im abo im ozobohudem dam im am bak,” lahame ozom dam ehelemeam làhà nasi fa dam amomoit uba ozom di gi ahusobuna modemna ozom damalele. Labiham labe Alat uba ozom di, “Um abo bisi ozobohu aabo dam am bak,” lahame uba ozom bak.
19. Eho gi neham bak ozome uba labi gagoho bak. Bak damat ihimo ozome ozobohudi daetbadam dam lam Alat neha, “Dam lam gi ahusobuda im ozobohu vab dam am bak,” lahame tozodam dam am bak. Meit Alat Vameadaha Im Toedahana laba im meida nehi toehe labe eho etei lab gagoho bak lam imbote. “Bak damat neha, ‘Im bisi im ozobohu dam im am bak,’ lahame ibi iho labi ozoho bak lam Alat modi fa vàhàdeme ibi iho ozoho bak fa vei setem bak. Abo dohot aba aho ozoho bak labet modi le na àsome modeha felikit belu ahamo fa it vàhàdeme aba aho ozoho bak fa vei setem bakti ulohote.”
20. Labi meit Alat Vameadaha Im Toedahana laba im meida laha nehi toehe bak ehete. “Bak damat neha, ‘Im bisi im ozobohu dam im am bak,’ lahame labi ozodam dam labe ibi iho ozome meedam bak lam ba imbodem vabak. Gi ostame ozome meedam imot modem bak. Laham bak lam Alata ba biem vaba abo ozobohu bak.” Lahame labihasu toehe labe eho etei lab gagoho bak lam, “Bak damat ihimo ozome ozobohudi daetbadam dam lam Alat gi tozodam damat modem bak,” laham bak lam imbote.
21. Labihàmu uba vuusu im vahokedamda labe ee abada lamota uho a bisi vousai, “Am abo feàte,” lahame a vou baedume fa neo dam totbaho labe iba vuusu im vahokedam dam labe im ee, “Mahate feà kaio,” lahame a tozome gagoidamule. Nehaha bak. Im uba vuusu im vahokedam dam nim Alat ahit um neàdedam bak laba ozome uba oudaha bak.
22. Eho modeo, Apolos modeo, Petrus modeo, Alat ahit um neàdedam bak laba ozome im uba oudaha bak. Ba gi im dam làtela nimota Alat ozome uba oudaha vabak. Abo iho bak niba azi meedam im zi modeo, im oheme ahedehe bak nim modeo, im elom bak lam modeo, etei iba meedam im nimti ba diamut meedam im lamti modeo, labihasu ame im lam ahebu Alat ahit um neàdedam bak laba ozome modeme vahedahana zi am bak. Alat labi meedahana uho akati bisi gi dat vàmtea labe am ee vousai, “Am abo feàte,” lahame vou baedàla?
23. Eho gi im lada lamota ozome uba neha, “Uba vuusu im vahokedamda labe ee abada lamota a bisi vousai, ‘Am abo feàte,’ lahame labi a vou baedamule,” lahame gagoho vabak. Em im meida nim laha nehi ozome uba labi gagoho bak. Kristus uba vuusdam labe um Am dam am bak. Labi Kristus lam Alat Aho gagu dam bake oluhuda Am am bak. Uho ame da laba vou baedam vaba?
1. Eho etei uba lab vameadaha bak laba vi ozome uba nehalo mozo. Kristus labe Aba Aho meedaha Im Neàna lam iho vou vameatedam dam niba damat iba ozodam di gi nehame ozodale. “Im abo Kristus labe Aba Aho gagoho im lamota aime meedam dam im am bak.” Labi, “Alat Aho amu dam bake vastehe im lam Aho iba modi im ozobohudi fi gatei, ‘Iho ame im lam iademe vou vameatedale,’ lahame Alat iba ahit gagu oluhu dam am bak,” lahame damat labihasu iba vi ozodale.
2. Im bak niba esdam di iho gi nehame meedam meo dam taia? Iho meia na im gagom di meit gagoho im lam ba gi aime voedam vaba abo ahebu aime ulohodesu meedamda laba im gagu esuiam bak.
3. Lahana eho ozoha, Alat eba gagoho im lam em gi keàtedi meedam bak. Em ba vanamai vooho vabak. Lahana meit eba git ozomsumnàme em ba àvodem vabak. Uho Korintus damat modeo, meia uloodume aime ozobohudi gagodam damat modeo, Alat eba gagu oluhu bak lam, “Eho iademe meedào? Eho git meedào?” laham bak lam meit uloome aime gagom bak lam em ba àvodem vabak. Labi em laha ba im ebe eho meedaha bak lam eho naedat laha ba it uloome ozobohudi gagodam vabak.
4. Neham labe eho uba labi gagoho bak. Ehemo naedat ahu ebeda it nabime ozom di em gi nehame ozome gagodam bak. “Alat eba gagu oluhu bak lam em gi iademe meedam dàt modem bak. Em ba git meedaha vab dàt modem bak,” lahame eho labi it ozome gagodam bak. Lahana gi ebe eho gagoho bak labet Alat ba eba aame deeli, “Eho oba gagu oluhu im lam om abo im ahebu vamdesu meedamda om am bak,” lahame ba eba labi deeli vi gagodam vabak. Ebe eho meedaha bak lam, “Iademe meedào? Git meedào?” lahame uloodume ozobohudi gagomda gi Boehàda Ala am bak.
5. Labihàmu uho eho meedaha im modeo, meit meedaha im modeo, iho lab meedam bak lam uho bisi aame ozomsu gagodam bak lam nasi voedale. Neham bak. Ame uloodume ozobohudi gagodam digat fuhu vabak. Gi ba im Boehàda Yesus fa li iho meedaha im ahebu uloodume ozobohudi gagodam di am bak. Labihàmu imo gi ame di lam vou fum bake vou faodase. Di labe Aho iho bak damat ibi iho faina aa modi vastehe im lamti abo gi iho faina modelo ahulat aa ozomda lamti labihasu ahebu modi fa tombalem di am bak. Labi laha ame di labe im bak damat iho neà bak meedaha im laba Alat Aho vi ozome faheme ahala vou baeida tame.
6. Imti vahi Kristus bake tu vuzehi meedam dam oa, eho etei uba lab vameadaha im lam uho neha, “Neà bak neame? Neà vabak neame?” laham bak lam um ozobohudem bake eho ahit ee ebedati ee Apolosbadati gi vàlu uba vameadaha bak. “Alat Vameadaha Im Toedahana laba a mu fa im mei meedamule,” laham bak lam, “Uho ozobohudi ame baket meedase,” lahame eho ahit labihadaha bak. Uho Alat Vameadaha Im Toedahana laba lab toehe im lam uho aame ozobohudi ulohodesu meedameam làhà uho ba dam uba vuusu im vahokedamda meida lamota ee abada vousai vou baeda. Labi dat meida labe am ee vousaha vaba mu feàtàda. Laham bak lam ba modem vabak.
7. Um dam totbaho labe vedi nehadam meote. “ ‘Iba im vahokedam guru meida lam iademe meedam dàt moz. Labi ame da meida ium git meedam dàt moz,’ lahame gurut meedaha im lam ihimo vi ozome ozobohudi aame gagom meo dam im am bak,” lahame uho labi it daetbadam damat modem bak. Uho vedi neha, “Im abo bisi feàda modem labe iho meia aame gagom neà bak,” laham bak lam uba amat gagu uho meeda? Ba ame im lam uba im gagohoda nib vabak. Lahana ame bak lam imbodemeam làhà gi Alat Ahamo uba modi vizi uho ame bak lam meedamna akati uho neha, “Im ihimo meedaho,” lahame bisi it daetbadàla? Ba im lada lamota Alat uba modi esuhu vabak. Abo uba vizi ozobohudi teudi uho meedamna lam ahebu Alat Aho uba modi vizi um ozobohudi uho meedam bak. Alat labihahana akati, “Im ihimo meedaho,” lahame uho bisi it daetbadàla?
8. Ee làhà! Alat uba modi vizi um ozobohudi teudi meedam bak lam ahebu uba ab vizi meedam ame? Abo uho na àme dedebuli neàdehe bakti ulohona modehe? Alat uba ba neo modi vizem bak amomoi vaba? Labi Alat uba neà bak ab modi duali neàdehame? Ba neo vi modem vaba? Labi laha uho vedi neha, “Kristus fa ab leham tame,” lahame Kristus Aho amu Am im vameadume esmozi laiam dam nim uho im voou umota abo fa boehà dam feà damali fa Kristus bake tau dam bake vuusu im faasi ab vahokedam ame? Im ba taum vaba? Imbodi im fa uba tau boehà dam feà damali dam bake vuusu im vahokedam vaba? Im ame bak lam laha modelo àhàkedam bak.
9. Lahamnàme eho ozom, ame bak lam fuhu vabak. Eho gi neham bak ozoho labe uba labi gagoho bak. Eho ozoha, etei nibe Kristusat Aho iba gagu olu Am im vameadume esmozi laiam dam nim Alat iba ozodam di im gi eeda feà vab damali bako voedam damat modemna ozomom damat modem bak. Abo boehà damat neha, “Beome elom neàte,” lahame damat avaelaha tomba laba voedume beodam damti uloho dam im am bak. Abo dam bakda ahebu modeo, Alat Am im gagu vou usem damat modeo, “Ahebu fà aasu igeame tozodase,” lahame Alat ahit iba labi modehena ozomoho bak.
10. Im Kristus Aho amu Am im vameadume esmozi laiam dam nim iho im Kristusbada lamota meedam labe dam giida totbaho labet vedi iba neha, “Im im biehebu damat moz,” lahame feàtàdam bak. Labi laha um Korintus dam abo Kristus bake tu vuzehi vahi meedam dam labe uho vedi neha, “Im Kristusti vou ali ahu vàmadi im Abadata meedam dam im am bak. Imota bisi im ozobohu dam im am bak. Mit ahea! Iho modem modem bak,” lahame it daetbadam damat modem bak. Làhà uho im voou umota bisi im ozobohu dam um ame. Labi um dam dua totbaho labet vedi iba neha, “Im busao vab damat meia im vahokedume meit aime vizem biem damat modem bak,” lahame iba feàtàdam bak. Lahana uho vedi uba it neha, “Im bisi busao dam meia im vameadam di meit aime uledi vizem dam im am bak,” lahame it daetbadam damat modem bak. Làhà uho im voou umota bisi busao feà dam um ame? Labi um dam dua totbaho labet vedi iba neha, “Im faite,” lahame iba tozome feàtàdam bak. Lahana uho vedi uba it neha, “Um abo feàte,” lahame, “Damat ahu adat iedi uba fà vou baedase,” lahame uho labi ozome it daetbadam damat modem bak. Làhà um gi etei Kristus bake tu vuzehi vahi meedam damat uho im voou umota bisi feà dam um ame?
11. Im imbo bak gi neham bak. Im Kristus Aho amu Am im vameadume esmozi laiam dam nim iho gi amu di iube nehasu faasi vou mode ledume etei vou fuhu damat modem bak. Im gi idoali ibzida. Labi laha valo àhàki meeda. Labi laha im sue vabali gi sue ukehenabe dume goda. Labi laha damat iba beodume tozome feàtàida. Labi laha im gi num vabna ideteda.
12. Labi laha im nazoh vabalehe bake ihimo anekehà ibida ihimo na meedume nazohaedam bak. Im gi labihadam bak. Labi damat iba, “Seee. Paulusat lab meedam bak lam fà vàhàdeme setese,” lahame iba fai bak uloodamnàme im ba ot ulooidam vabak. Im gi meia fa neà bak vi gagodam bak. Labi laha damat iba vabidam di iho gi ozahigeàmu teudi keàtedi meedam bak.
13. Labi damat iba feàtàdam di im ba ot feàtàidam vabak. Im gi fa meia fakem vab daet fa vameadam bak. Labi damat iba neha, “Gi àhàzo nami visoi voom bakti ulohona meedam damat modem bak. Gi bako voedam damat modem bak,” lahame labi tozodam bak. Damat iba lab meedam bak lam abo gi amu di iube faasi vou mode ledume etei ab vou fuham bak.
14. Eho etei uba lab vameadaha im zi lam, “Um Korintus dam fà ladese,” lahame labi ozome uba toedaha vabak. Um gi em data ebe eho deelehena ozomom damat modem labe eho gi, “Um fà neàdese,” lahame vabededalo uba labihasu toedaha bak.
15. Neham bak. Kristus bake tu vuzehi meedam bak, “Akatihasu meedamna modela?” laham im uba vahokedam guru abo tamehote. Lahana um ai gi vàmtea em am bak. Eho gi neham bak ozome uba labi gagoho bak. Eho Kristus Yesus bake tu vuzehi Amti vou ali ahu vàmadehe labe eho uba ahamte alimeat le ame Im Neàna lam vahokedume modeha uho aime Yesus Kristus bake tu vuzehi meedàmu em um aiat modemna ozomomda em am bak.
16. Labihàmu eho uba nehame gagodam bak. “Uho gi ebe eho amu bak ubuda laba le meedaha im lam ahebu vi ozome neo ame baket vi meedale,” lahame gagodam bak.
17. Eho amu uba le meedaha im lam, “Uho ame baket vi meedase,” laham bak um biem bake eho Timotius bake, “Oho dam laba le tau vi vahokedale,” lahame gagu uba olulo modem bak. Ame da Timotius lam em adat modemna ozomomda abo ebe eho deeleheda modem labe uba laba gagu olulo modem bak. Am abo im Boehàda Yesus bake tu vuzehi im Abada aime modem tademda modem bak. Ame da nibe aho uba le ebe eho Kristus Yesus bake tu vuzehi Amti vou ali ahu vàmadi im Aba Aho eba gagohoda lam eho aime iademe meedam bak lam uba vi vameadalo modem bak. Ebe eho meedaha im lam Timotiusat uba le vamealo modem im lam ba im meit modem vabak. Ame im lam gi ebe eho dam Kristus bake tu vuzehi vahi meedam dam abo dam zi mei dam zi meime laham dam ahebu vou vahoketedam im am bak.
18. Um dam totbahot vedi neha, “Ame da Paulus aho amu iba vahokedaha im lam, ‘Iho meedào? Iho meedam vabao?’ laham bak lam ahamo naedat iba li aam iedem dàt modem bak. Da lam iba ba fa lem vabak. Im gi ihimo meedam bak,” lahame uho eba tozome vou it daetbadam damat mode taia?
19. Lahana um git ozoho bak. Boehàda Alat eba neha, “Em uba laba lale,” lahame eba labi gagomta làhà em kehàm vaba uba lam bak. Labi eho uba le dam daetbadam dam lam, “Alat iba gagoho labe im dedamaleheo? Gi ahat boehà damali daetbadào?” laham bak eho uba laba le aame gagom bak.
20. Eho gi neham bak ozome uba labi gagoho bak. Alat meia vuusu im vahokedam bak lam iho gi ame da labe aba aho gi ahat ahamo ozom im lam vameadam labe iho aime ozo, “Da lam Alat vuusu im vahokedamda ame?” lahame ba aame ozome gagodam biem bak. Abo Alat am teuna feà ame da laba modi vizi teudi Alat am na im feàna meedam labe meit ame da laba aame ozo, “Da lam abo Alat vuusu im vahokedamda am bak,” lahame aame ozobohudem bak am bak.
21. Làhàmu eho uba toedume oluhu im nim uho ve aame uhumo nasi vi ozodale. Eho uba fa laba lam di eho uba akatihasu mode? Eho uba gagodaha im lam uho aame vi ozodume meedam vabak laba eho fet aimeam làhà eho gi uba em datat modemu loso vou le uba beodam bakti ulohona uba dae meona bebe im vahokedà? Laham vabameam eho uba gagodaha im lam uho aime vi ozodume meedam bak laba eho fet aimeam làhà eho gi uba em datat modemu ahulat deeli gi im iademe nemahuba neàt le uba vameadà? Eho ba uba laba le modem bak lam uhumo etei di nibe ozome ahumdi vou faodale.
1. Eho aiha um dam Kristus bake tu vuzehi vahi meedam dam labe uho meidavat fa damat ostame fi loholi ot vaidam dam ziti lahi ziti ame dam zi laba vi tau git modehe bake damat ahate vàlu vou vameateomna eho aiho. Ame da labe aba aho faina modehe bak lamti dam Ala bake tu vuzehem vab dam labe ibi iho faina meedam bak lamti bisi vafozi faina modeheda dat ba tau modeheda am bak. Eho aiha uho meidavat am aiat ba vaha nam bako vou godam bak ehemu em abo àvodehe bak.
2. Lahamnàme uho amu neha, “Im ba meit iba im vahokem vabak,” lahame labi it daetbadam damat modem labe uho vedi um neàna meedam damat mode tiba. Lahana um ame da labe lab modehe bak lam um ahu faidi ladem vaba? Um ahu faidi ladi um ba fa vahe vaheme Ala bake vou baedalo modem di labe ame da lam nasi im vahokedume mali gagu veiom vaba? Uho gi labihasu geàmu vahe vahedam bak lahasdam bak lam em abo àvodeha.
3. Em soabo uho aam vabake mode? Ne, em it uba lab bak. Làhàmu im Boehàda Yesus eba gagu em fa im dedateli em gi uba laba tau vahi duzuhunali ame dat git modeheda lam eho ab ozome mali gagu veioham bak. Labihàmu em it uba lab labe uho dam vazisi vahe vaheme neàdi Im Boehàda Yesus uba modi vizi teudi im dedamalehe labe uho ame da lam mu veioi Iblis bake ub lole. Neham bak. Im Boehàda Yesus ba fa li damat meedaha im ozobohudi fahedam di labe ame da labe am it Alat fa soat vausu fa vei neàdem bak laba ozome Iblis bake ub lole. Labi ub lom labe ame da labe am so fà vàhàdedume geàdàmu fa aba aho faina modehe bak lam fa ab voomam tame.
6. Uho vedi nehame it daetbadam damat modem bak. “Im abo Kristus bake tu vuzehi im Abada meedam dam aabo im am bak,” lahame gagodam damat modem bak. Lahana uho lab it daetbadume gagodam damat akati dat git modeheda lam uba tau vahi meedam bak lam uho malem vaba akati gi tau vahi meedam lahasdàla? Lam abo faite. Um ozom vaba? Uho roti modem bak laba vi ozodale. Roti ahubu modi deili fi kidemna ragi lam ve fa roti ahubu gàhàda laba vi tau valihem labe ame roti ahubu gàhàda lam modi deili fi kidem bak lam um ozobohuna taia? Labi um laha. Uho vahi Kristus bake tu vuzehi meedam dam labe um meida labe git modehe bak lam uho malem vaba vahi meedam labe gi um dam ahebu ame bak lam uba vizedume dualedam bak um ozodam vaba?
7. Uho gi fa nehale. Yahudi dam ahamda labe iho Paskah vi ozome na modeme àidam di labe damat ame roti ahubu modi deili fi kidemna vekehe zoho lam im numa esum mali fi hasi voedam bak laba uho vi ozodume ame dat git modeheda lam nasi mu veiole. Uho ame da lam veiom labe ame faina modehe bak lam uba vizi um faidem vabak am tame. Abo Yahudi dam ahamda labe iho ame roti ahubu modi deili fi kidemna vekehe zoho lam voedume fa roti ahubu fa gàhàdi roti deili fi kidem vabak lamti uloholi um gi neà bakta meedale. Nehaha bak. Alat gi amu di iube neha, “Um im vamdesu meedam dam um am bak,” lahame Aho fet ozome um ab vame Am damaleham bak. Lahana um akati ba fa git meedàla? Ame Paskah modeme àidam bak fum di Yahudi damat ame Mesir damat iba Yahudi dam ahamda simtedi vuusdam bak lam Alat fa vi zizi im vi vietohona ozoemom bak laba vi ozome iho domba adatea oteme àm bak laba vi ozodale. Kristus laha ame domba lamti uloholi, “Am damat otem neàte,” lahame Aho ahit uledi damat oteme vasea veàtoho labe ibi iho faina meedam bak lam Aho fa faamome Alat iba beom bak lam Aho iba soat vausuhu labe im fa neàdedam bak lam ab modi tombali esuham bak.
8. Labihàmu im Kristus bake tu vuzehehe dam nibe imo Kristusat Aho iba lab meedaha bak laba vi ozome gi labaha bohu deelehat vuusdam labe meedase. Iho ame bak lam meedam di iho meia faki, “Mei fà beose,” lahame bisi fai bak la modi le modidam bak iho ba koena a vi tau meedamule. Imo gi fa ahu vàmadi gi im neà bakta abo Yesusat Aho gagoho im imbona lamota meedase. Abo Yahudi dam ahamda labe iho ame Paskah modem diat otem domba àme neàdi Alat iba beoho vaba fa vi zizi vi vietohona ozomom bak laba vi ozome iademe roti ahubu modi deili fi kidemna vekehe zoho lam voedume fa gi roti ahubu fa gàhàdi roti deili fi kidehe vabna àidam bak lam gi labaha bohu deeleha meedam bak lamti ulohona meedase.
9. Eho amu uba nehi gagoho bak. “Damat neha, ‘Iho Kristus bake tu vuzehi vahi meedam dam im am bak,’ lahame gagodam dam labe vedi ostame fi loholi ot vaidam dam ziti lahi ziti ame dam zi laba tu meedam dam laba um a tau vahi na meedamule. Gi fi tateme ahala modiale,” lahame labi sunit toeme uba amu oluhu bak.
10. Lahana eho amu uba lab toeme oluhu im lam um git ozohomo? Di labe em ba uba nehi toeme oluhu vabak. Uho bak damat Ala bake tu vuzehem vab dam labe im nehasu meedam dam laba a tau vahi meedamule. Abo ostame fi loholi ot vaidam dam ziti lahi ziti laham dam zi lam modeo, Labi damat neha, “Na lada lam eho laha neo vi vadase,” lahame soat ziemausi vadam dam lam modeo, Labi meia vageme ahi fa na fetehesu vi vadam dam modeo, Labi na ostamna laba, “Ala am tame,” lahame vou baedam dam modeo, Labihasu meedam dam abo Ala bake tu vuzehem vab dam laba, “A tau vahi meedamule,” lahame eho labi toeme uba oluhu vabak. Eho uba labi gagomeam um ba faheme vaitesu esum biem bak. Gi elom dita um bak lam vou esmom di am bak.
11. Eho gi neham bak ozome uba amu sunit lam toeme oluhu bak. Damat neha, “Em Kristus bake tu vuzehi meedamda em am bak,” lahame gagomda labe vedi fa im nehasu meeda. Ostame fi loholi ot vaidam dam ziti lahi ziti ame. Labi damat neha, “Na lada lam eho laha neo vi vadase,” lahame soat ziemausi vadam dam ame. Labi na ostamna laba, “Ala am tame,” lahame tu vuzehi vou baedam dam ame. Labi meia feàtàdam dam ame. Labi vao meona uddume ahusobulem dam ame. Labi meia vageme ahi fa na fetehesu vi vam dam ame. Im labihasu meedam dam laba, “Um Kristus bake tu vuzehi meedam dam labe a tau vahi meedamule,” lahame eho amu labi ozome sunit lam toedume uba oluhu bak. Labi laha, “Abo gi ame dam na àdam di a vazisi àdamule,” lahame eho labi ozome sunit toedume uba oluhu bak.
12. Eho gi neham bak ozome uba labi gagoho bak. Imti vahi Kristus bake tu vuzehi im Abada meedam vab dam labe ibi iho git meedam bak lam iho Kristus bake tu vuzehi meedam dam nibe iho ame dam labe, “Git modeheo? Neà bak modeheo?” laham bak lam iho ba uloodume ozobohudi fa gagom vabiem bak. Lada lam Alat Ahamo fa ame dam laba ba modem bak. Lahana umti vahi Kristus bake tu vuzehi im Abada meedam dam totbaho labe fa git meedam di uhumo uloodume ozobohudi fa gagom neà bak. Labihàmu uho gi meit Alat Vameadaha Im Toedahana laba nehi toehe bak laba vi ozodume ulohona modele. “Umti vahi meedamda meidavat bisi fai bak meedamda lam mali gagu veiole.” Lahame labihasu toehe bak lam uho gi ame baket meedale. Ame dat faina meedamda lam uho vahi Ala bake vou baedam bak lam fa mali veioi mu voole.
1. Um Kristus bake tu vuzehi vahi meedam dam labe uhumo um ahulat ot odosiaha im ehe di um akati ladem vaba vedi bisi meia im uloome aime neàdi gagoiam debu abo Ala bake tu vuzehem vab dam iuba le, “Fa modi ame im lam neàdese,” lahame bisi le gagu modidàla? Ame dam lam Ala bake, “Am abo feàte,” lahame ahu adat iedi gagom vab dam lam uho akati bisi im ubuda le gagu aime modidàla? Um ozom vaba? Ame im lam bisi modi neàdem bak lam gi um Alam damali im vamdesu meedam damat uhumo modi neàdem dam um am taia?
2. Um ozom vaba? Im Alam damali im Abada vamdesu meedam dam nibe iho ba diamut dam bak niba esuhuda totbaho ahebu ibi iho meedaha im lam, “Ame dam labe git meedào? Neàna meedào?” laham bak lam im Alam damaleheda nibe ihimo ame dam laba ba uloodume aime neàdi gagodam bak lam um ozom vaba? Um ba diamut im feàna lam modem bake etei nim um akati um ahulat ot odosiaha im koenabe lam gi uhumo uloodume ozobohudi gagu vàmadem neàna um akati bisi iuba le meit git meedaha bak uloodume aime ozobohudi gagu vàmadem debu iuba bisi le gagoidàla?
3. Ee làhà! Um labihalahit im nidi nim laha um fa vabilehe? Iho ba diamut Alat Am im gagu vou usem dam labe ibi iho meedaha im lam im Alam damaleheda nibe iho laha uloodume aime neàdi gagu vàmadem bak lam um laha fa vabilehe? Ame im behàsu lam abo im feàna iho modemna akati uho um ahulat ot odosiaha im koenabe lam uhumo uloodume ozobohudi gagu vàmadem neàna uho akati modem vaba modela? Ame im lam gi beena ihimo modem neàna modem bak.
4. Labihàmu um akati um ahulat ot odosiaha bak ehe damat uhumo uloodume ozobohudi gagu vàmadem neàna vedi dam mei abo Kristus bake tu vuzehi meedaha vab dam laba le, “Uloodume aime neàdi gagu vàmadese,” lahame ame im lam bisi vou le vi gagoidàla? Ame dam lam ubu uho Kristus bake tu vuzehi vahi meedam bak laba vi tau meedaha vab labe ba im dedateli vameadam vabiem bak.
5. Eho gi ahit, “Um fa ozome ladi fà ozobohudese,” lahame im lam uba toedume oluhu bak. Uho um ahulat ot odosiaha im ehe di um dam meidavat abo bisi im ozobohuda labe fa tohedateli ame im lam vi uloodume aime neàdi gagu vàmademda vàmtea buà vaba?
6. Lahana uho meit vedi neha, “Umti vahi Kristus bake tu vuzehi meedamda meida labe aba amti ot odosiahada lam, ‘Da nim uloome aime neàdi modi itaholi fà neàdese,’ ” lahame meia uloome aim debu laba vou le ame dam laba ub lodam meo damat modem bak. Gi lada lamota faidehe vabak. Abo gi uhumo modeme neàdem neàna uho vedi Ala bake tu vuzehem vab dam laba neha, “Uho da nim modi itaholi fà neàdese,” lahame bisi ame dam laba vou laidam bak.
7. Ame uho lab meedam bak lam em abo aime àvodehe bak. Um dam Kristus bake tu vuzehi vahi meedam damat uhumo uho lab ot odosiadam bak lam um vi ozome ladem vaba? Eho vi ozoha, um fa vei faidi ubu uho Kristus bake tu vuzehi vahi meedam bak lam gi ab vàhàdeme seddalo modemam bak. Um gi neham vaba? Meit uba fai bak meedameam làhà uho gi aalahigeàmu fa vei neàdem vaba? Meit uba ahi vageme na ubuda teo vam di um gi ozahigeàmu fa vei neàdem vaba? Lam bisi neà bak modem bak am bak. Bisi meia uloome aime neàdi gagodam debu laba vou le, “Fà modi itaholi fako buese,” laham bak lam ba bisi neà bak modem vabak.
8. Lahana uho vedi neà bak modehe vaba fa bisi fai bak nehame meedam damat modem bak. Uho vedi umti vahi Kristus bake tu vuzehi meedam dam totbaho laba fai bak meeda. Labi laha im nazoh ahi vageme teo vada. Um gi labihasu meedam damat modem bak.
9. Um ozom vaba? Dam Alat Aba Aho ozoho bak abo im vamdesu meedam vab dam lam ba diamut Alat vuusu Am damali im vahokedam vabak. Uho vedi neha, “Dam im nehasu meedam dam lam Alat vuusu Am damali im vahokedam dam am bak.” Lahana um gi uba it vagedam bak. Dam im nehasu meedam dam lam ahebu ba Alat vuusu Am damali im vahokedam vabak. Damat modeo, lahit modeo, ostame fi loholi ot vaidam dam zi ame. Labi na ostamna laba, “Im Ala am tame,” lahame vou baedam dam ame. Labi dam im nam ehena fa nam meibada vam dam ame. Labi lahi im dat ehena fa dat meibada vam lahi ame. Labi dam aabot ihimo fi hasi ostame fi loholedume doi vadam dam ame. Labi ihimo fi hasi ot modidam dam ame. Labi mei na aa vadam dam ame. Labi damat neha, “Na lada lam eho neo vi vadase,” lahame soat ziemausi vadam dam ame. Labi vao meona uddume ahusobulem dam ame. Labi meia feàtàdam dam ame. Labi meia vageme mei na ahit fa fetehesu vi vadam dam ame. Labihasu meedam dam lam ahebu ba Alat vuusu Am damali im vahokedam vab dam am bak.
11. Eho etei lab gagodaha im zi lam um dam totbahota amu gi labihadaha bak. Lahana etei nim ubu uho faina meedam bak lam Alat fa faamome ab vei neàdedaham bak. Labi laha Alat uba modi Am damali uba neha, “Um gi im Abadata fà meedase,” lahame ahit gagu ab fi hasi esuham bak. Labi laha Aho uba ozodam di, “Um gi faina meedaha vaba gi im vamdesu meedam damat modem bak,” lahame ab ozome esuham bak. Neham labe labihadaha bak. Im Boehàda Yesus Kristus Aba Aho ahit fai Dateli ut tetehesuhunaso laba eloho bak lamti Alam Aha Nutabe Neàna labe um ahu laba modi vizi teudehe bak lamti labihasu meedam labe um fa vei neàdedaha bak.
12. Eho amu uba neha, “Ame Im Feàna lam eba ootedam bak lam vaitoi ehemo ab duzuham bak,” lahame eho amu uba lab gagoho bak lam uho aime vedi fa nehi gagoe moio? “Làhà Alat malehe vabna ahu ibida uledemeam làhà ame na modem neà bak tadehe taia?” lahame uho labi gagodameam làhà eho fa uba nehi gagom bak. Uho lab gagoho bak lam imbota imbot. Lahana Alat mali gagoho vabda totbaho ahebu lam iho vedi vi meedameam làhà ba iba modi fa neàdemna vabak. Labi laha uho lab gagoho bak lam, “Alat malehe vabna ahu ibida uledemeam làhà ame na modem neà bak tadehe taia?” lahame lab gagoho bak lam imbota imbot. Lahana ame im labe eba modi akili vàhàdemeam eho ba fa voom biemna zohàme emota ahit moho bak.
13. Labi laha um dam totbahot vedi neha, “Na àmna lam damat àme dedem bak laba ozome Alat ahit na àmna lam modi esuhu bak. Labi zu lam laha na nu vahem bak laba ozome Alat ahit im zu modi esuhu bak. Lahana ame lab modehe bak behàsu lam Alat ba diamut gi modi fa vàhàdeme setelo modemu im etei nim gi ostame na duana àdam neà. Ostam vao uddam neà. Lahadam bak.” Lahame uho lab gagoho bak lam imbota imbot. Lahana uho im nidi nim git vi tauidume dualehe damat modem bak. Uho vedi ame bak labet im dam modeo, lahi modeo, vedi neha, “Alat ahit iho ot modidam bak nim ahit dam modi esu. Labi lahi modi esu. Labiha labe iho gi ostame fi loholi ot vaidam bak ahebu meedam neà bak tadehe bak,” lahame uhumo git ozodume meedam damat modem bak. Alat ame bak lam ozome damti lahiti modi esuhu vabak. Am gi iho im Boehàda Yesus labe im Abadata iho aime tu vuzehi meedam bak lamota ahit damti lahiti modi esuhu bak. Labiha labe im so nim Aho naedat modem labe iba na gagomda Am am bak.
14. Alat gi im lada lamota modi esuhu vabak. Am laha feà labe im Boehàda Yesus Aho eloho bak labet modi fa ahedi usaha bak. Labi ba diamut Alat laha iba gi ame baket modem bak. Iba laha modi im elodaha bak labet Aho modi fa ahededume usnadam bak. Labiha labe uho lab nehame gagoho bak lam, “Im so nim ba gi vàhàdeme setemna im etei gi ostam im ahebu meedam neà bak,” lahame labi gagoho bak lam um git gagoho bak.
15. Um ozom vaba? Uho Kristus bake tu vuzehi Amti vou ali ahu ulohodesu fa ahu Abadati vàmadehemu um so lam gi Kristus labe Am soat modemna ozomomna modem bak. Im lada lam labi gagohemu uho ozom, im Kristusat naedatele dam nibe nam fi lohona laba fa taasu modem neà? Vabà! Um git ozoho bak. Im Kristus bake tu vuzehi meedam dam nim im ba labiham vabak.
16. Dat am namti ot taasuiame meedam bak lam uho meit Alat Vameadaha Im Toedahana laba nehi toehena nim vi ozodale. “Dat am namti ihimo ahim labe gi fa nubu ab vàmadeham bak.” Lahame labihasu toehemu uho meit nam fi lohona laba le ot taasuiame modemeam làhà uho gi ame nam fi lohona lamti umti nubu vàmadi ahu ab ulohodesu vàmadeham bak.
17. Lahana meit im Boehàda Yesus laba vou ali ahu vàmademeam làhà ame da lamti Yesusti gi ahu ab ulohodesu vàmadeham bak.
18. Labihàmu dam ostame fi loholi ot vai ot vaidam bak ahebu uho vi tau meedam bak labna zohàme um ahu mahate it vou faovoem bohu vuusu meedale. Eho gi neham bak ozome uba labi gagoho bak. Ibi iho faina meedam bak totbaho lam im alihi uladdume iba modi faidi vàhàdem vabda ehet. Labi im alihi uladdume iba modi faidi vàhàdemda ehet. Ibi iho faina meedam bak lam bisi im alihi uladdume iba modi faidi vàhàdemda lam gi neham bak. Damat ostame ot modidam bak ahebu laba vi tau meedam bak am bak.
19. Uho vedi neha, “Im na ahebu modem neànabu,” lahame labi gagodam dam labe um im nidi nim abo Alat Am Aha Nutabe Neàna uba olu um ahu laba vizi modesdam bak lam um fa vabilehe? Eho ozoha, um ba vabilem vaba gi ahit meedam damat modem bak. Um ozom vaba? Damat neha, “Ala bake vou baedam num laba Ala ehet,” lahame labi gagodam bakti ulohona Alat Am Aha Nutabe Neàna um so ad laba modesdam bak. Labiha labe um so lam uhumo um naedamalehe vabak. Gi Alat Ahamo Am naedatelehe bak.
20. Nehaha bak. Alat um vadume Am damalehe di lam abo na feànat vaha bak. Uho faina meedam bak lam Am Adat Yesus Kristus fa ot vai fai Dateli, “Damat Am otem neàte,” lahame ahit uledi eloho bak lam um gohali vahana am bak. Labiha labe im so nim meit ihimo ostame fi loholi ot vaidam bak lam a vi tau meedamule. Gi im Alat uba deelemda lamota iademe fi hasi meedale. Uho labi meedam labe uho, “Ala Am abo neàte,” lahame ahu adat iedi vou baedam bak am tame.
1. Em etei fa neo im uho eba amu sunit toeme oluhuda lam fa uba vameadalo mozo. Uho vabi eba nehame vi ailo gago, “Iho Kristus bake tu vuzehi im Abada meedam dam nibe iho lahi ba vam vabao? Gi nehasu esdào?” lahame vabi eba vi ailo gagoho bak lam eho ozoha, dam lahi vam vaba gi esdam neàte.
2. Lahana eho neo vi ozoha, bak ubuda lam meit ostame fi loholi ot vaidam bak ahebu ehe labe eho lab ozome gagoho bak lam em fa malehe bak. Uho labi modemeam um gi iddam vanamahemu um vou fohome faidemna am tame. Laham bak labna zohàme uho gi lahi vame ubu uho vahada lamota vi tauleda. Labi meit aba aho vahada lamota vi tauleda. Labi lahi laha gi dat vame aba aho vahada lamota vi tauleda. Labi meit aba aho vahada lamota vi tauleda. Gi labihadale.
3. Labi laha dat fa namdate ozome la modi le modidume asimdem bake iademe meedale. Labi laha namet fa dat bake ozome la modi le modidume asimdem bake iademe meedale. Gi datti namti ahu adat ot ozoiame vàmadi meedale.
4. Eho gi neham bak ozome uba labi gagoho bak. Nam lam am so lamti ahebu am dat labe am naeda laha am bak. Am nam labe ahamo naedatelehe vabak. Labi laha dat am so lamti ahebu am nam labe laha am naeda am bak. Am dat labe ahamo naedatelehe vabak.
5. Labihàmu dat am namdate vi taulelo gagom di nam a momule. Labi laha namet am date vi taulelo gagom di dat a momule. Gi ahu ulohodesu meedale. Lahana im nidi nim nehasu ozom bak ehete. Dat am namti neha, “Imo Ala bake tom gagodalo modemu teohet modem bak vaitoi fa Ala bake tom gagodume neàdi ba fa modese,” lahame im ot vameaidume ahu vàmadi esumta neàte. Lahana a bisi labihasu ibzidume usi duali feà bak a fumule. Iblisit uba li gagu modi ozolo modem di um ahu bedi fa nam amomoi modeo, fa dat amomoi modeo, fa modemna zohàme uho gi taho fa um lahiti um datti fa vahi vi taulele.
6. Im eho amu uba lab gagohoda lam, “Nam dat vale. Dat nam vale,” laham bak lam eho uba, “Ame bak lam meedale,” lahame ba labi tet ootedume uba gagodam vabak. Gi uhumo ozo, “Em gi soaona aidalo,” lahameam làhà labi modem neàte. Laham vabameam, “Em abo nam valo.” Laham vabameam, “Em abo dat valo,” lahameam làhà laha vam neàte. Gi uhumo ozome modele.
7. Lahana um eho nam valo àhàkehe vaba gi ibzidam bohu keàtedi meedam bakti uloholem vabate. Lahana eho ozoha, Alat meia vizi teudi àhàkem bak gi ahala modidaha bak. Ba vizi teudem bak uloholehe vabak. Alat dat meida laba aho nam valo àhàkem bak modi vize. Labi dat meida laba laha aho nam vam mom bak lam neo modi vize. Labi nam meida laba aho dat valo àhàkem bak modi vize. Labi nam meida laba laha aho dat vam mom bak lam neo modi vize. Gi labihadaha bak.
8. Labi em etei im meida nim fa dam soaona zi lamti maboe gàhàda ziti labihasu modem bak uba neo ahi gi gagodalo mozo. Dam soaona ziti maboe gàhàda ziti um gi labihasu eho nam vaha vaba gi aidam bakti uloholese.
9. Lahana eho lab gagoho bak lam um dam soao uhumo ozome um ahu it malesome modemeam modem bi gukeme vàhàdemeam làhà nam vam neàte. Labi maboe lam laha fa dat valo àhàkemeam làhà fa dat vam neàte. Dat nam vam bak bisi neà bak am. Labi ahu it malesome modemeam modem bi gukeme vàhàdem bak lam bisi fai bak am.
10. Labi em etei im meida nim uho Kristus bake tu vuzehi meedam damat lahi vadam bak neo vi gagolo. Nam am dat a mu vou esmozi itamule. Ame bak lam ehemo gagoho vabak. Abo im Boehàda Yesus Aho ahe di iube laha labi gagoho bak.
11. Lahana eho etei lab gagoho bak lam um lahit ailahigeàmu fa am dat mu vou esmozi itameam làhà gi fa le soaoli aidale. Lahana fa dat vam bak ozomeam làhà a fa iuba le dat amomoi vamule. Gi fa dat aba aho amu mohoda lam fa li ot vameadume vàmadi vale. Labi um dam lahi vadahada lam um laha nam ubuda a mu vou esmozi itamule.
12. Labi em etei im meida nim neo gago. Uho damat neha, “Eho vaha nam nim Kristus bake tu vuzehem kaio. Em fa mose,” lahame labi gagodam dam lam eho uba im nehasu gagolo. Ame im nim im Boehàda Yesus Aho ahe di iube gagoho vaba imot modem bak. Gi ehemo Kristus Aho amu Am im vameadume esmozi laiamda meida nibe eho uba nehi gagolo modem bak. Uho vahi Kristus bake tu vuzehi meedam dam meida labe am nam lam Kristus bake tu vuzehem vabnàme ame nam labe am dat mu itam bak gagom vabameam làhà ame da labe gi ozahit am nam laba deeli vahi esdale. Am nam laba a faki mu vou esmozi itamule.
13. Labi uho vahi Kristus bake tu vuzehi meedam lahi meida labe am dat Kristus bake tu vuzehem vabnàme ame da labe am nam mu itam bak gagom vabameam làhà ame nam labe gi ozahit am dat laba deeli vahi esdale. Am dat laba a faki mu vou esmozi itamule.
14. Eho gi neham bak ozome uba labi gagoho bak. Dat Kristus bake tu vuzehem vabda labe fa am nam Kristus bake tu vuzehehe nam lamti ot deeliame meedam labe Alat gi ame nam labe aho Kristus bake tu vuzehehe bak labet modi am dat laba, “Am damali im Abadata meedase,” lahame ab fi hasi esumam bak. Labi laha nam Kristus bake tu vuzehem vab nam labe fa am dat Kristus bake tu vuzeheheda lamti ot deeliame meedam labe Alat gi ame da labe aho Kristus bake tu vuzehehe bak labet modi am nam laba, “Am damali im Abadata meedase,” lahame ab fi hasi esumam bak. Eho etei lab gagoho bak lam giomimot modemeam làhà ibi iho faadaha data lam gi dam Ala bake tu vuzehem vab dam labe im data iho faadahanalehe bak. Lahana ba labiham vabak. Alat dat modeo, namet modeo, Kristus bake tu vuzehehe bak labet modi im data laba ozodam di gi, “Am damali fà im Abadata meedume aho fà deelese,” lahame ab gagu fi hasi esu ab meedamam bak.
15. Um ozom vaba? Eho etei uba lab gagoho bak lam, “Am dàt modeo, am namet modeo, a faki mu vou esmozi itamule,” lahame gagoho bak lam eho gi neham bak ozome uba labi gagoho bak. Uho Kristus bake tu vuzehi meedam lahi meida labe aho am date abo iademe meedam labet modi am dat labe fa Kristus bake tu vuzehi Alat am soat vausu fa vei neàdem bak lam am vabiem bak. Labi laha uho Kristus bake tu vuzehi meedam dam meida labe aho am namdate abo iademe meedam labet modi am nam labe fa Kristus bake tu vuzehi Alat am soat vausu fa vei neàdem bak lam am laha vabiem bak. Labihàmu um gi ubu uho amu lab ot vaidaha bak lahasdale. Lahana uho vaha namet modeo, dat modeo, Kristus bake tu vuzehem vabda lam fa uba tau azim momeam làhà fà lase. Uho a fa vi malemule. Uho Kristus bake tu vuzehi meedam dam modeo, lahi modeo, ubu uho vahada labe um mu vou esmozi itam bak gagomeam làhà uho amu ot vaiaha bak lam modi fa faatom neàte. Alat uba ba faki vi gagom vabak. Lahana eho ozoha, faatom bak lam ba bisi neà bak modem vabak. Bisi neà bak amu vaha bak lahasdam bak lam bisi neà bak am. Alat amu neha, “Am damalehe dam gi ahu vàmadi vabademsuse,” lahame iba labi fet gagu esuhu bak. Lahana akati dat am namti amu ot vaiaha bak lam ba fa faatoe?
17. Eho etei uba lab vameadaha im lam uho aime vi ozodam labe im meida nim laha vi ozodale. Iho bak niba esdam di dam zoho gi soaona esda. Labi dam zoho lahi ehena esda. Labi dam zoho mei na teo meedam dam meeda. Labi dam zoho bisi feà damali meeda. Labihadam bak. Alat neha, “Uho gi nehasu meedam labe esdale,” lahame iba bakdate ahala faheme modidam labe labihadam bak. Labi Alat iba neha, “Am damalese,” lahame fi hasi esuhu labe iho Kristus bake tu vuzehedaleàmu Aho amu iba ahala faheme modidaha bak lam im ba voom vabak. Gi labaha bohu modesdam bak. Eho etei lab gagoho bak lam dam Kristus bake tu vuzehi vahi meedam dam abo dam zi mei dam zi meime laham dam ahebu laba ebe eho vou vahoketedam im am bak.
18. Ame bak lam um biem bake eho nehi uba vouhodalo mozo. Uho amu Kristus bake tu vuzehem vab di iube uho neha, “Im Yahudi dam am tame,” lahame um laso aubehà sokba ukbome neàdehe dam labe etei ba Kristus bake tu vuzehi im Abada fa meedameam làhà a fa neha, “Im Yahudi damat modem vabak,” lahame a labi git vi ozome ahobat vagedamule. Gi ubu uho amu lab meedaha bak lam lahasule. Labi laha uho amu Kristus bake tu vuzehem vab di iube uho um laso aubehà sokba ukboho vab dam labe etei ba Kristus bake tu vuzehi im Abada fa meedameam làhà a fa neha, “Um laso aubehà sokba ukbodase,” lahame a labi git vi ozodamule. Gi ubu uho amu labihasuhu bak lam lahasule.
19. Eho gi neham bak vi ozome uba labi gagoho bak. “Damat im laso aubehà sokba ukbodào? Ukbom vabao?” laham bak lam Alat ba ame bak lam bisi vi ozodam vabak. Im lam bisi feà vab imot modem bak. Bisi Aba Aho ozomda gi neha, “Damat Aba Aho gagoho im aime meedào? Meedam vabao?” laham bak lam bisi Aba Aho ozom im am bak.
20. Labihàmu Alat, “Um vame Am damalese,” lahame amu um ve Am damalehedaleàmu ubu uho amu Kristus bake tu vuzehem vab di iube na meedam bak lam gi labaha bohu modesdam lahasule. Ba a voedamule.
21. Eho etei lab vameadaha im lam uba neo nehi vouhodase. Alat amu um ve Am damalehe vab di iube um dam totbaho gi dam na duadam labe im na teo meedam damali meedam bak. Lahana etei nim fa Alat um ve Am damalehemu uho vedi, “Ame mei na teo meedam bak lam fa odohali mose,” lahame labi ozodam bak lam gi ozahit keàtedi meedale. A bisi odohali vi ozodamule. Lahana ame meia na teo gagome ooteme meedam dam labe fa um ahit isi olumeam làhà ubu uho lab meedam bak lam vou esmozi lam neàte.
22. Neham bak. Mei na teo meedam damat modeo, labi mei na teo meedam vab dam labe na im ibi iho ozohona meedam damat modeo, labihasu ahebu Alat ozom di gi uloho bak. Neham labe labihaha bak. Mei na teo meedam dam laba Alat neha, “Am damalese,” lahame gagodam dam labe iho faina meedam bak lam Aho fa faamome Am damaledam meo bak. Labi laha mei na teo meedam vab dam laba Alat neha, “Am damalese,” lahame gagodam dam lam Alat modi Kristusat gagoho im meedam damalem meo bak.
23. Um ozom vaba? Alat um vadume Am damalehe di lam abo na feànat vaha bak. Uho faina meedam bak lam Am Adat Yesusat Aho fa ot vai fai dateli, “Damat Am otem neàte,” lahame ahit uledi ut tetehesuhunaso laba paku dou eloho bak lam um gohali vahana am bak. Labihàmu dam Ala bake tu vuzehi meedaha vab dam labe uba neha, “Iho fà uba deeli vuusu im vahokedase,” lahame ibi iho gagu esuhu im lam um bisi a uledi tu vuzehi meedamule. Gi Alat uba, “Fà deeli vuusu im vahokedase,” lahame im Abadata uledi tu vuzehi meedale.
24. Emti vahi Kristus bake tu vuzehi meedam dam oa, eho etei lab vameadaha im lam imbona modemu eho neo vi gagolo mozo. Uho mahate Ala bake vou ali ahu vàmadi bohu vuusdale. Labi Aho amu um ve Am damalehe di labe ubu uho amu na meedam bak lam gi labaha bohu modesdam bak lahasule. Ba a voedamule.
25. Em etei nim uho amu eba sunit toeme oluhu im meida lam neo fa uba vameadalo mozo. Lahana ame im nim im Boehàda Yesus labe Aho ahe di iube eba, “Toele,” lahame gagoho vaba imot modem bak. Gi im Boehàda Yesus labe Aho eba aame faobekesi eba tau modi vizi teudi ehemo Kristus Aho amu Am im vameadume esmozi laiamda meida nibe eho uba gagolo modem bak. Labiha labe eho etei uba gagolo modem im nim uho aime vuzehem neàte. Ba im giomimna uba gagodam vabak. Uho amu neha, “Làhà dam soaona lamti lahi soaona lamti akatihàla? Dat vam neào? Nam vam neào?” lahame vabi eba vi ailo gagoho bak lam
26. eho ozoha, uho Kristus bake tu vuzehi meedam dam num debu Korintus laba azihi dam naat uba vabidume beodam di nibe gi ubu uho amu nam vaha vaba modesdam bak modeo, nam ve modesdam bak modeo, gi labihasdale.
27. Lahana uho lahi vadaha damat ubu uho vadaha lahi lam a mu vou esmozi itamule. Gi ubu uho amu vadaha bak lahasdale. Labi um dam soaona a lahi valo nabidamule. Gi ubu uho amu nam vadaha vaba soaona esdam bak lahasdale.
28. Lahana uho dam soaoda labe vedi neha, “Em nam vase,” lahame labi ozome gagodameam làhà nam vam neàte. Lam laha fai baket modem kaio. Labi laha nam soaona damat modehe vaba alimda labe vedi neha, “Em dat vase,” lahame labi ozome gagodameam làhà dat vam neàte. Lam laha fai baket modem kaio. Lahana lahi dat vam bak modeo, dat nam vam bak modeo, uba modi vanamamna modem bake eho ozoha, dat vam vabak modeo, nam vam vabak modeo, bisi neà bak am bak. Labiham bake eho neha, “Dat a nam vamule. Nam a dat vamule,” lahaha bak lam em gi uho vanamam bake faobekesi mali im lam uba gagoho bak.
29. Emti vahi Kristus bake tu vuzehi meedam dam oa, eho neham bak vi ozome uba labi vameadam bak. Ibi iho bak niba na meedam digat ab folelo modemam bak. Labihàmu um lahi deda labe gi lahi vab dam soaona modemna ozomom damalele. Abo uho vadaha lahi labe ibi iho gagodaha im zi ahebu laba uho a bisi tu vi ozodamule.
30. Labi laha um ahu faidi dehabali meddam dam lam uba lab modi dehabali meddam im laba uho a bisi tu vi ozodamule. Labi laha um ahu asimdi deeleha meedam dam lam uba lab modi asimdi deelehe im laba uho a bisi tu vi ozodamule. Labi laha nazoh duana doit vadaha dam lam uba lab modi um nazoh dualehe bak laba uho a bisi tu vi ozodamule. Gi fa dam na vab damalele.
31. Labi laha bak damat ibi iho modehe nazoh zi lam uho vadume neàdi, “Oba modi neàdemna am tame,” lahame ahu ame nazoh laba tu meedam bak laba uho bisi deeli ahu a tu vi ozodamule. Neham bak. Uho etei bak niba aadume ahulat deeledamna zi ahebu lam gi ab seddalo modemam bak. Gi teohet meedamnat moz. Labihàmu uho etei bak niba teohet meedamna zi nim ahebu bisi fa tu a vi ozodamule. Feà vabnat modem bak.
32. Eho etei lab mali vameadaha bak lam gi dam lahi eheda lam ibi iho ozome meedam im dua bak lam, “Fà setese,” lahame uba labi vameadam bak. Dat nam vabda labe gi im Boehàda Yesus labe im Aba Aho gagoho im lamota meedam bak. “Boehàda Yesus aba fà deelese,” lahame gi im Abadata meedam bak.
33. Lahana dam lahi deda gi bak niba modealahana zi iba modi neàdemna ozodume meedam im feà laba tu vi ozodam damat modem bak. Abo, “Am namet aba fà deelese,” lahame ozom im lamota bisi deeli meedam damat modem bak. Abo gi ahu faheme sediebali fi goaitoi gi im am namdat gagohodata bisi tombuli im Alabada gi totobe voedam damat modem bak.
34. Labi lahi laha. Dat ba vam vab nam modeo, nam soaona damat modehe vaba alimda modeo, amait gi im Boehàda Yesus labe Aba Aho gagoho im lam, “Bisi im feàda am bak,” lahame tu vuzehi gi im lada lamota fi hasi meedam bak. Abo, “Im Boehàda Yesus iba fà deelese,” lahame gi im Abadata ahu vàmadi fi hasi meedam bak. Lahana lahi dat eheda labe ba labiham bili vedi gi bak niba modealahana zi abo iba modi neàdemna feà laba tu vi ozodam meo bak. Abo, “Am dat labe aba fà deelese,” lahame ozom im lamota bisi deeli meedam bak. Abo gi ahu faheme sediebali fi goaitoi gi im am dàt gagohodata bisi tombuli im Alabada gi totobe vooho bak.
35. Eho etei uba lab vameadaha bak lam, “Um num debu Korintus laba azihi dam lam na im uho ozolo modemna ahebu maemna tadese,” lahame eho uba vameadaha vabak. Eho gi uba tau fa neàdelo uba labi vameadam bak. Neham bak. Ubu uho im Boehàda Yesus Aba Aho uba gagodaha im lam uho ozolo modem bak lam ba modi fa setem vabake abo um ahu faheme sediebali fi goaitoho vaba gi ahu vàmadi iademe meedam bak ozome uba labi vameadam bak.
36. Uho meidavat nam soaona valo na vaheme neàdi esdam labe neha, “Nam soao nim eho vam bak fuhunàme em akati vou faodam labe aba vam di fotelo meedà? Taho vam vaba?” lahame ozodameam làhà gi aba aho ozoho baket modem neàte. Ame bak lam ba faina modem kaio.
37. Lahana uho meidavat ozo, “Em nam vam bak laha vou faom neàte,” lahame ahulat ozome neàde. Labi meit aba neha, “Nam taho vale,” lahame labi ootedume gagodam vab. Labi gi aba aho ozoho bak modelo modemeam làhà gi ame bak lam laha fa modem neàte. Lam laha fai bak kaio. Gi neàna modehe bak.
38. Labihàmu dat aho na vaheme esdam nam soao vahada lamti dat nam soao vaha vabda lamti amait gi neàna modehe bak. Lahana eho ozoha, um num debu Korintus laba azihi dam lam naat uba vabidume beodam di nibe dat nam soao vaha vabda lam bisi neà bak modeheda am bak.
39. Um lahit fa dat vam di gi ame dat vàmtea laba ve am soa taasu akili bobodamehamdi am dat aho vahana lam elole. Lahana am dat labe nasi eloi nam maboelemeam làhà ame nam maboe lam am fa dat valo àhàkemeam làhà dat vam neàte. Lahana aho valo modemda lam abo Boehàda Yesus bake tu vuzeheheda vale.
40. Lahana eho ozoha, ame nam maboe lam aba aho amu meedam bak lam bisi vanamaha bake gi ba fa dat vam vabake ahamo gi aidam bak lam aba ahamo naedat it deelem bak am tame. Eho etei uba lab gagoho bak lam gi ebe eho ozodaha im uba gagoho vabak. Abo Alam Aha Nutabe Neàna labe Aho eba modi vizi fi gatehe labe eho ame im uba gagoho bak.
1. Um Korintus dam neo aimale. Uho amu eba sunit toeme oluhu im meida lam eho fa uba vameadalo mozo. Uho neha, “Dam giida totbaho labe iho na ostamna it modi alali vou baedamna laba na nubu vou le lodamna lam iho Kristus bake tu vuzehi meedam dam nibe iho fa tau àm neào? Tau àm fi hào?” lahame vabi eba vi ailo gagoho bak lam eho fa uba nehi vameadalo mozo. Uho Kristus bake tu vuzehi vahi meedam dam totbaho labe vedi neha, “Damat na ostamna laba alali vou baedamna lam im ozobohu bak. Ala imbona modem kaio. Laham bak lam im abo ozobohudi neàdi meit ame na nubu laba vou le lodamna lam iho Kristus bake tu vuzehi meedam dam ahebu vi tau àm neàte,” lahame labi vi ozodume gagodam damat modem bak. Lo. Uho lab ozome gagoho bak lam imbote. Em laha labi ozodam bak. Lahana eho ozoha, uho lab ozobohudi meedam bak labet uba modi nehi it daetbadam bak. “Im abo ihimo im ozobohudi meedam dam im am bak,” lahame uba modi uho bisi it daetbadam bak lam abo faite. Gi nehame meedam bak nim bisi neà bak am bak. Uho umti vahi Kristus bake tu vuzehi meedam dam totbaho laba neha, “Dam labe iho Ala bake tu vuzehi meedam bak lam fà modi teudese,” lahame deeli vabededam bak lam bisi neà bak am bak.
2. Neham bak. Meit neha, “Eho ame bak lam ozobohu aabodehe bak,” lahame it daetbadamda lam gi giomim it daetbadam bak. Im totbaho vekehe bak ehena abo ame bisi neà bak ozobohudi meedaha vabna aho git daetbadaha bak.
3. Lahana iho meit Ala bake abobo deelemda lam Alat ame da laba ozom di gi neha, “Em damaleheda am bak,” lahame ozobohudi gagodam bak.
4. Lo. Neàde. Uho neha, “Dam giida totbaho labe iho na ostamna it modi alali vou baedamna laba na nubu vou le lodamna lam iho Kristus bake tu vuzehi meedam dam nibe iho tau àm neào? Tau àm fi hào?” lahame vabi eba vi ailo gagoho bak lam eho etei fa uba nehi vameadalo mozo. Iho Kristus bake tu vuzehi meedam dam im ahebu neham bak ozobohute. Ame dam labe iho vou baedamna zi lam ahebu Ala imboda modem kaio. Ala imboda gi vàmteate. Ame Ala bisi imboda vàmtea lam gi ibi iho vou baedam Ala am bak.
5. Dam duada totbahot vedi neha, “Bak niba modealahana zi modeo, asum ahoba iuba modealahana zi modeo, ibi iho vou baedamna lam ala ibida am tame. Labi boehàda ibida am tame,” lahame vou baedam damat modem bak.
6. Lahana iho Kristus bake tu vuzehi meedam dam nibe ba ame dam laba vi tau meedam vabak. Ibi iho vou baedamda gi im Ai Ala imboda vàmtea am bak. Labi na bak niba modealahana zi feà bak modeo, asum iuba modealahana zi feà bak modeo, ame na zi lam ahebu Na Debu Modeheda lam abo Alat Ahamo modehe bak. Aho ozo, “Iho Am damali fà Aba vou baedase,” lahame ozoho labe ahit dat mode. Nam mode. Labihadaha bak. Labi laha ibi iho vou baedam Boehàda gi vàmtea bak. Yesus Kristus ame Boehàda vàmtea am bak. Ame na Alat ahamte modehena zi lam alimeat modehe di lam Aho gi Am Adat Yesus Kristus im Boehàda laba gagu Aho ame na zi lam ahebu ahaladi ahaladiahana ab meedaham bak. Labi im dam bakda nim Aho laha iba modi ahededam bak.
7. Lahana iho Kristus bake tu vuzehi meedam dam totbaho nibe iho neha, “Damat na ostamna it modi alali vou baedam bak lam ba Ala imboda modem vabak,” lahame labihasu ozobohudi gagodam bak. Lahana im dam totbaho labe ba labi vi tau gagodam biem lahasuhu bak. Vedi damat ame na ostamna it modi alali vou baedamna lam, “Imbo? Imbo vabao?” lahame vabili ahu adat it ozodam bohu lahasuhu bak. Neham labe labihaha bak. Ame dam labe amu Kristus bake tu vuzehem vab di iube ibi iho na ostamna it modi alali vou baedam bak lam gi amu koe diat faasi vou baedume etei busaoli vou fuhu damat modem labe ibi iho modi baleàhà bak lam taho voom vabiem damat modem bak. Labiha labe ame dam labe vedi neha, “Ame na ostamna it modi alali vou baedam labe na lodamna lam iho tau àmeam làhà im gi fa ame dam laba vi tau ame ostam alalehena laba ab vou baedamam bak. Labi laha im ab vi tau modi faidi vàhàdemam bak,” lahame it ozodam damat modem bak.
8. Uho nasi ozomale. Imti Alati vahi ot vou aliam bak modeo, ot vou alia vaba vaitesum bak modeo, ba na àmna labet modi ame bak lam modem vabak. Neham bak. Na àm fi hamna lam iho àm vabak labet modi ba Alat Aho iba lab deeli imti vou alem bak lam Aho modi fa dualedam vabak. Laham vaba na àm fi hamna lam iho àhà bak labet modi ba Alat iba lab deeli imti vou alem bak lam fa koededam vabak. Am gi ozahit deeli imti vou alem bohu meedam Alat modem bak. Gi ame àmna lam, “Feà kaio,” lahame ozome gagodam Alat modem bak.
9. Lahana uho Kristus bake tu vuzehi vahi meedam dam totbaho labe amu neha, “Ame na ostamna it modi alali vou baedamna lam ba imbona modem kaio. Àm neàte. Ba fai baket modem kaio,” lahame ozome vaitoi neàdehe dam labe uho lab ozome gagoho bak lam neàta neàt. Lahana dam Kristus bake tu vuzehi vahi meedam dam totbaho labe ame na nubu lodamna lam àmeam im ahulat ozodam bohu lahasuhu labe, “Neào? Faio?” laham bak neàdem biem dam ehe bak. Ame dam labe fa ubu uho amu gi ozome vaitoi neàdehe dam labe lab àdam bak laba fa vi aame vizi fa vedi, “Na lam àm neàte,” lahame vi àmeam làhà ame dam labe ibi iho ozodam bak gi ab vàhàdeme seti ab faidemam tame. Labihàmu, “Debu uho modeho,” laham bak. Labiham vabake uho gi vou faovoi iademe meedale.
10. Eho nehi ozome uba labi gagoho bak. Uho ame bak lam vou faovoi iademe modem vabameam uho nehame git mode moio? Uho vedi fa ame na ostamna it modi alali vou baedamna laba vou baedam num zoho laba oli dam vahi ame na nubu lodamna lam àdam bak laba vi tau àmeam làhà dam neha, “Na nubu lam iho àm maem bak,” lahame ahu adat it tu ozodam bohu lahasuhu dam labe uho lab meedam bak laba vi aameam ame dam labe nehame vi ozoda taia? “Làhà ame na nubu lodamna lam im fa vi tau àm neàna ozomo?” lahame labi gagu à moio?
11. Labiha labe uho neha, “Ame na lam àm bak fai bak kaio,” lahame amu di iube gi ozobohudi vaitoi neàdehe damat fa umti vahi Kristus bake tu vuzehi meedamda meida lam abo bisi ahu adat it tu ozodam bohu lahasdamda laba modi aba it vàhàdem bak lab tame. Um ozom vaba? Kristus amu iho faina meedam bak Aho fa ot vai ut tetehesuhunaso laba paku dou eloho bak lam gi ame da lamti gohalelo ahit eloho bak. Lahana uho akati modi ame da laba modi aba it vàhàdehela?
12. Lahana um ozom vaba? Ame da labe amu neha, “Ame na lam eho vi tau modemeam làhà faina modem bak ame moio?” lahame ahu adat it tu ozodam bohu lahasdamda labe aho uho lab meedam bak lam vi aame ozahit vi modem labe faina ab modeham bak. Lahana ame da labe it vàhàdehe bak lam faina uho ab modeham bak. Uho lab faina modehe bak lam gi umti vahi Kristus bake tu vuzehi meedam da laba faina modehe vabak. Abo gi fa Kristus bake laha faina modehena ozomom bak.
13. Labihàmu eho ame na nubu lodamna lam vi tau àm labe vedi emti vahi Kristus bake tu vuzehi meedamda meida labe aho neha, “Bak lam faina modem bak ame moio?” lahame am ahu adat it tu ozodam bohu lahasdamda laba modi faina modemeam làhà em ba ame na nubu ba àm vabak. Em gi ab moham bak. Emti im vahi meedamda meida lam vàhàdem bak labna zohàme em ba àm vabak.
1. Um Korintus dam ozom vaba? Alat uledemta na im ahebu eho modem neàna tadem vaba? Im Boehàda Yesus Aho duzu eba im vameadaha bak em aaha vaba? Labi Aho eba gagohemu eho ba Am im vameadume esmozi laiamda meidatelehe vaba? Labi laha eho im Boehàda Yesus Amti vou ali im Abada meedam dàt modemu eho Am im aime im dedateli uba vameadume modeha uho Yesus bake tu vuzehi im Abada um meedam vaba?
2. Dam totbaho labe neha, “Kristusat Aho ba eba gagu olu Am im vameadume esmozi laiamda meida modem kaio,” lahame gagodam meo dam laba um akati vi tau gagodàla? Uho, “Em ame da am tame,” lahame ozome vuzehem vaba? Eho amu ame Im Neàna lam uba vameadume um ozobohudedàmu im Boehàda Yesus labe Aho uba modi um Amti vou ali meedam dam um am taia? Lahana ame bak lam uhumo it aame ozobohudi fa nehame gagom vaba? “Làhà imbot. Em ame da meida am tame,” lahame it ozobohudi fa eba labi gagodam vaba? Ame bak lam bisi vi ozome gagom neà dam gi um am taia?
3. Damat vedi neha, “Paulusat ba Kristusat Aho gagu olu Am im vameadume esmozi laiamda meida modem kaio,” lahame eba aame feàtàom dam laba eho gi nehi daetesu vameadam bak.
4. Kristusat Aho Barnabasti emti gagu olu iho Am im vameadume esmozi laiam dam totbahot modemu iho ozoha, Alat iba gagoho bak lam iho uba le meedàmu iho na àm bakti vao udem bakti gi uba bak dedate ahumdi vou faodam neà bak.
5. Labi im ahim Kristusat Aho gagu olu Am im vameadume esmozi laiam dam totbaho modemu im lahi ehedata lahi ibidati laha vou godume uba bak dedate na àm bak ahumdi vou faodam neà bak. Kristusat Aho gagu olu Am im vameadume esmozi laiam dam totbaho lamti im Boehàda Yesus labe Am vahadam zi lamti Petrusti laham dam labe iho ame Im Neàna lam bak mei bake vou vameatedam di lam im lahi Kristus bake tu vuzehehe lahi lamti vou godam damat uba bak dedate na àm bak ahumdi vou faodam neàna im ahim nibe lahaha bak.
6. Làhà uho gi iba Barnabasti im ahim nimota faki mode. Labi ihimo anekehà ibida na modeme doili na àmna vame àdam bake ahumdi voohe? Im laha na àm bak gi uba bak dedate ahumdi vou faodam neà taia?
7. Uho iho bak damat nehame meedam bak um ozom vaba? Tentara labe ibi iho tentarali meedam im lam iho meedam labe ihimo doili na vame àda. Labi sue vame duada. Labihadam vaba taia? Gi iba im gagu oluhu boehàda labe am doi laba ahumdi na vame àda. Sue vame duada. Labihadam bak tadehe taia? Labi laha na debe soalemda lam laha na debe soali ame na modeme vahedam di lam ba ame na àm vab alia vahedam vab taia? Gi ame dam ahebu iho vanamaha bak ame na zoho lam ve àm neàna taia? Labi laha na fi ho deda labe am domba dotet ufeam di ame dotet tau uddam neàna taia? Im gi labihadam meo bak. Labihadàmu iho Kristus Aho amu Am im vameadume esmozi laiam dam nibe iho im Alabada uba li meedam di labe iho na àm bak gi uba ahumdi vou faodam neà bak.
8. Eho etei lab gagoho bak lam uho ozom, eho gi im bak damat ibi iho lab ozome meedam bak lam, “Bak lam bisi neà bak am tame,” lahame vi ozodam bak lamota ozome uba labi gagohe? Vabà! Alat aham di iube Musa bake vameadume aho toedume fi hasi vàmadi esuhu Im Feàna lam gi ame bak lam laha gagohona taia?
9. Alat Vameadaha Im Toedahana laba Musat aham di iube im meida nehi toeme esuhu im ehe bak. “Damat gandum oo fet veimome nu atelo modem di sapi lo vààsu am nekehàbu labe gandum oo laba duzu duzuidume unadam labe vou làbo lebodam di labe am omto a loat giamule. Aho duzui duzuiam diat fokehe bake koena visoi àm neàte.” Lahame Musat aham di iube labihasu toeme esuhemu uho ozom, Alat gi ame sapi laba ozome faobekesi gagu Musat toehe. Vabà!
10. Aho gi iba ozome gagu Musat toeme esuhuna taia? Imbo bak. Uho neham bak vi ozomale. Na debe utoholelo modem di dat bak vabiedamda lam modeo, gandum fi kbodume vaheme dehaleheda laba na nekehàsonabut dalu tom voou oo goaitoi nutabet fetti naubeti veimome fa nuta atemda modeo, ame dam ahim labe iho ame na modeme vanamaha bak laba gohali na ba ve àm bak laba vi tu ozome ahumdehe labe gi ozahit meedam dam taia?
11. Làhàmu iho ame Da Kristus labe Aho meedaha Im Neàna lam uba vou le vameadaha bak lam iho gi dat na debe utoholelo modemdati ulohona meedahana taia? Labihàmu iho lab meedume vanamaha bak lam gohali na vame àm bake gi uba gagu ahumdi vou faodam neà bak taia? Ne, iho lab gagoho bak lam ahole gagoho bak. Uhumo na modeme fa iba lodam neà bak.
12. Ne, uba li Alam Im Neàna vahokedam dam giida totbaho labe vedi neha, “Iho vahokehe bake gohali na àm bake gi uba gagu ahumdi vou faodam neà bak,” lahame meedam damat meedàmu eba tau meedam dam lamti emti iho laha gi ame baket fa modem neà bak. Iho Kristus labe Aba Aho meedaha Im Neàna lam ahamte alimeat uba nasi faasi vou vameatedam dam im amemu ame lab meedam bak gohali na vame àm bak bisi fa uba gagu ahumdi vou faodam neàda im am bak. Lahana iho uba gagu ahumdi vou faodam neànàme iho ba uba gagu ootedume ahumdi vou faodaha vabak. Im gi idoalehenàme gi ozahit keàtedi meeda. Gi gaili meeda. Na vabali meeda. Im gi labihadamnàme im ba uba gagom vabak. Iho gi geàmu im ahu tet teudi na ihimo meedam bak. Iho gi neham bak ozome labihadaha bak. Iho na àm bak uba gagu ahumdi vou faodameam uho fa meedume vanamai fa iho Kristus labe Aba Aho meedaha Im Neàna lam vou le vameadaha im lam uho tu vuzehem mom bak labna zohàme iho ame bak lam mali ahit na àm bak uba gagu ahumdi vou faodam moho bak.
13. Uho nasi dam kota Yerusalem laba Fihasi Ala Bake Vou Baedam Num Vàmteabu laba na meedam dam modeo, damat Ala bake lomna ve vua vahudam tohe dam modeo, laham dam labe ibi iho na meedaha bak laba gohali ame meit vou lehena ve àm bak laba vi ozodale. Neham bak. Damat Ala bake vou baedalo modem di labe iho vou le lodamna lam ame tohe dam labe gut ve oteme Ala bake vou baedalo na fi ho vahudam beahuba laba zoho vua vahuda. Labi zoho tohe dam labe ihimo fa ve àdam meo bak. Ame dam labe iho meedaha bak laba gohali ame na zoho vi vame àm neàte. Ba fai vabak. Laham bak lam um ozohohunda taia?
14. Labihàmu im Boehàda Yesus Aho amu ahe di iube laha nehi gagoho bak. “Meit Ebe Eho meedaha Im Neàna lam fa dam bake vou vameatedam bak lam gi ame bak labe gohali ame dam laba vi gagu ahumdi iho fa na vam bak am tame,” lahame labi gagu esuhu bak.
15. Lahana emota nehaha bak. Eho ame Im Neàna lam uba le vahokedaha bake, “Uho ame bak gohali fa eba doi lole,” lahame uba gagu ahumdi tu vou faodam neànàme em ba uba gagu ootedume ame na vaha vabak. Eho ahit moho bak. Uho git ozom bake fa nehasu vi ozodale. Em etei uba neha, “Taho doi eba lu olule,” lahame ozome uba sunit nim toedume uba oluhu vabak. Eho doi uba vi gagom neànàme ahit moho bak. Neham bak. Eho gi doi uba gagu vam neàte. Lahana uho eba ba gagom bake em moho bak. Eho uba gagu ootedume uho fa uledi ame doi eba lu eho vameam làhà em ba nehi it ozome daetbadam vabiem bak. “Im Kristusbada vou vameatedaha bak lam eho gi uba faobekesi teo modeho,” lahame ba it ozome daetbadam vabiem bak labna zohàme em ba uba gagu ootedume doi vam moho bak. Em gi uba na tauleme vam vabnàme gi nehasu aidume elom neàte.
16. Neham bak. Kristus amu eba neha, “Oho Em Im Neàna nim dam bake vou vameatedale,” lahame eba amu gagu oluhu labe eho ame bak lam meedam di em ba ebe eho lab meedaha bak laba ba it ozome daetbadam vabiem bak. Meit eba gagohona ehemo ozome modehe vabna ba akati eho ozome it daetbada? Em labiham vabiem bak. Labi laha Aho eba gagu oluhu bak lam eho uledi modem vabameam làhà, “Aiee!” Alat eba beome itaholem bak abo feàna modem bak ehe bak.
17. Eho nehi ozo. Ame Im Neàna lam vou vameatedaha bak lam ehemo ozome uledi ame bak faasi deelehat meedameam làhà ebe eho meedaha bak gohali doi vam bak fa dam bake gagu ootedume ahumdi vou faodam neà bak. Lahana eho labihaha vabak. Ehemo ozome ame bak faasi meedaha vabak. Gi Alat eba gagu oluhu labe eho ame bak lam mu voom bi gi ame Im Neàna lam ule neàt keàtedi vou vameatedam bak.
18. Ne lahana uho ozom, Alat Aho eba gagu oluhu bak lam eho gi ozahit ule neàt keàtedi meedam bak lam ame bak gohali em ana vam bake eho ame bak lam deelehat meedàla? Neha taia? Eho Kristus labe Aho amu Am im vameadume esmozi laiamda meida modem labe ame Im Neàna lam vou vahoketedam bake gohali eho na vam bak uba gagu ahumdi vou faodam neànàme eho ahit mu ame Im Neàna lam gi uba faobekesi teo vou vahoketedam bak. Ebe eho deelehat meedamna am bak.
19. Uho ozom, em ba meit gagohe? Gi ehemo ozome duzu meedam bak. Ba ebe eho ozoho im lam ba meit gagu faatom vabak. Lahamnàme em ozahit dam ahebu taum dàt modem bak. Meit neha, “Ibi iho modi baleàhà baket modele,” lahame eba gagoidam di em gi ozahit uledi meedam tadem dàt modem bak. Abo mei na meedam da labe aba im gagomda labe am im meedam datti ulohona meedam bak. Dam dua bak labe im ahu modi bedi Kristus bake tu vuzehem bak laba ozome labihadam bak.
20. Eho ame Alam Im Neàna lam Yahudi dam bake vou vameatedam di lam eho gi ame Yahudi dam labe ibi iho ozoho bak lam vi tau ulohodesu meedam labe ame im lam vou vameatedam bak. “Ame dam lam Kristus bake tu vuzehese,” lahame labihadam bak. Labi ame Musat aho lab toedume fi hasi esuhu Im Feàna lam em fi ham vaba ehemo duzuhunàme damat ame Im Feàna lam fi ham lahasuhu dam labe ibi iho ozoho bak lam eho vi tau ulohodesu meedam labe eho ame Im Neàna lam vou vameatedam bak. “Ame Im Feàna lam fi ham lahasuhu dam labe im ahu fa veimdi ame Im Neàna lam fa uledi Kristus bake tu vuzehese,” lahame eho gi ozahit labihadam bak.
21. Labi laha eho Yahudi damat modem vab dam laba ame Alam Im Neàna lam vou vameatedam di eho gi ame dam labe ibi iho ozoho bak lam vi tau ulohodesu meedam labe ame im lam vou vameatedam bak. “Ame dam labe im ahu fa veimdi ame Im Neàna lam fa uledi Kristus bake tu vuzehese,” lahame eho gi ozahit labihadam bak. Lahana Kristus labe Aba Aho vameadume esuhu im lam eho keàtedi meedam labe em ba Alat vameadume esuhu im zi lam eho ba ohusesu voom vabak.
22. Labi laha dam Kristus bake tu vuzehemta vuzehe. Lahana im ahulat, “Ame bak lam modem neào? Faio?” lahame ozodam bohu lahasuhu labe neàdem biem dam laba eho ame Im Neàna lam vou vameatedam di eho gi ame dam labe ibi iho fi ham im lam vi tau ulohodesu meedam labe ame Im Neàna lam vou vameatedam bak. “Ame dam labe im ahu fa veimdi ame Im Neàna lam fa uledi Kristus bake tu vuzehese,” lahame eho gi ozahit labihadam bak. Eho gi dam iudu iumti iudu iumti ahebu ulohonali ame Im Neàna lam vou vameatedam bak. “Ame dam zoho labe im ahu fa veimdi ame Im Neàna lam aime fa uledi Kristus bake tu vuzehi meedàmu Aho ame dam zoho soat vausu fa vei neàdedase,” lahame eho gi ozahit lamosi lemosidam bak.
23. “Dam dua bak fa ame Im Neàna lam aime fà Kristus bake tu vuzehese,” lahame eho gi ozahigeàmu ame dam iudu iumti iudu iumti ahebu ibi iho ozoho bak laba vi tau ulohodesu meedam dateli ame Im Neàna lam vou vameatedam bak. Labihadam labe Alat amu neha, “Eho em damaleheda laba eho gi im neà bakta modidume esuida tame,” lahame amu fet ozome gagu vàmadi esuhu bak lam, “Fà imbodi Alat fa emti dam lamti iba ame baket meedase,” lahame eho labihadam bak.
24. Um Korintus dam ahebu neham bak nim ozobohu dam taia? Damat vahi emoelo modem di, “Amat nasi keàtedi emoeme lafuela?” laham bak lam aalo modem di lam dam ahebu emoemta emoe. Lahana gi dat vàmtea nasi emoeme lafumda lam na vamda am bak. Labihàmu uho laha ame da keàtedi nasi lafuhuda lamti ulohona modele. Alat uba deelem bak laba ozome Aba Aho uba gagoho im lam ahebu uho laha mahate keàtedi meedume Aho uba ame bak lam gohali lomna vam bak laba meedale.
25. Labi uho neham bak laha ozomale. Dam ame emoem bak lam modelo modem di amu nasi fet vouhodam meo bak. Abo kikemna geàmu tet meedume fa neàdem bak ozome dihasi vouhoda. Labi neo dihasi vouhoda. Gi labihadam bak. Neham bak ozome labihadam bak. Dam giidat aame ozo, “Da lam nasi lafuhuda ame?” laham bak ozobohudemna abo ohula nom usumna lam vam bake labihadam bak. Lahana ame da labe aho nasi lafuhu bak gohali vamna lam na et damat auet modi vabome vuihàlehena lam gi kehàm vabna fa nemahubalem bak. Lahana ibi iho ba vamna labiham vabak. Ba diamut iho bak niba meedamna gohali Alat iba lomna lam abo gi labahana ba faidem vabna iho ba vam bak laba ozome iho gi, “Alat iba deelese,” lahame keàtedi meedam bak.
26. Labi laha ame da labe emoem di aho ba ub oli ostame emoem vabak. Abo gi ohu tousu emoedume lafum bak. Labi laha dat aumbut meia ot foiam di aho gem vabak laba beom vabak. Abo gem bak laba ahit beom bak. Labi em laha gi ame bak laba ozome ulohonali ba ostame meedam vabak. Em gi ahu vàmadi Alat eba deelem bak laba ozome im Abada keàtedi iademe meedume novalo modem bak.
27. Eho gi neham bak ozome labihadam bak. Eho ame bak lam meedam vabameam eho dam bake ame Alam Im Neàna lam vahokedume ame dam labe fa Kristus bake tu vuzehi meedamna eho vedi fa faidi Alat ba eba neha, “Om git modeho,” lahame gagu eba ame na gohalem vabna zohàme vou faovoi eho gi Alat eba deelem bak laba ozome ahit tet mali meedume neàdedam bak. Abo dat emoemda lam git modehemu ame emoem bake meia vahokemda labe aba neha, “Om git mode. Om nasi fa futole,” lahame gagu futoi aba ame na gohalem vabak lamti uloholemna zohàme eho ahit tet mali meedume neàdedam bak.
1. Emti vahi Kristus bake tu vuzehi meedam dam oa, uho amu eba neha, “Iho Kristus bake tu vuzehi meedam dam nibe fa dam Ala bake tu vuzehem vab dam labe iho ostam alalehena laba vou baedam di na nubu lodamna lam àm di iho fa tau vahi ame na àm neào? Tau àm fi hào?” lahame uho eba gagu vi ailo modem im lam eho fa neo uba nehi vameadalo mozo. Uho im Yahudi dam nibe im tai ahobada zi labe Mesir bak vou esmozi fa dat ahamda Musa bake tau vi vuladam di labe ibi iho amu meedaha im laba uho mahate vi ozome ozobohudele. A fa vabiemule. Im tai ahobada zi labe gi nehasu meedaha bak. Ame dam lam, “Alat im vou ladà?” laham bak biem bak labna zohàme Alat ahit ulo nom olu nasi duzu dam labe ba vuladam bak. Labi ame dam zi lam Itea Feàna laba fusi Alat modi fa fatahivai tombali ame dam ahebu gi ahe neàna biodume dozeadaha bak.
2. Labi ame bak lam im dam bada nibe, “Iho Kristus bake tu vuzehi im Abada meedam dam im ame?” laham bak lam dam giidat aame ozobohudem bake meit im vuu valo baptislehe bakti ulohote. Nehaha bak. Im tai ahobada zi labe ulo labe vi vuladaha bak lamti Itea Feàna ahe neà biodume dozeadaha bak lamti labihasu meedam labe iho ozo, “Làhà dam lam ahebu Musa bake tu vuzehi im abada meedam dam ame?” lahame aame ozobohudehena am bak.
3. Labi im tai ahobada zi labe laha Alat iba asum ahoba iube fa bak niba nom goagoadamna lam vahi àda. Labi laha dam labe iho valo àhàki meedàmu Alat Musa bake gagu Horeb sibu modesuhu ke laba fu vao futoi ame dam ahebu laha vahi vao lam uddaha bak. Gi labihadam bohu meedaha bak. Iho ozom, ame Horeb sibu modesuhu ke labet modehe bak lam gi Kristusat dam laba tau godaha bak fet vouhoho bak. Nehaha bak. Ame ke labe vao futoi damat uddume ahedi godaha bak lamti ulohona Kristusat iba ba Amti vahi gi ahe neàna bohu vuusdam bak ab modeham bak.
5. Alat ame dam laba gi neà bakta meedamnàme ame dam dua zoho labe iho ba Am im aim mu voedume fa faina meedàmu Aho ame dam laba ba deelehe vaba gi fakehe bak. Eho gi neham bak ozome uba labi gagoho bak. Ame dam labe im koei gi ame bak aotba baa bohu dam vaba alim bak laba vou voe ladaha bak.
6. “Im dam badate, ‘Im nehasu a meedamule,’ lahame vahokedase,” lahame Alat ahit ame aham di iube meedaha im zi lam nasi fet vouhome esuhu bak. Im tai ahobada zi labe iho bisi fai bak modelo àhàkedam bak lam im ahu a it ozome meedamule.
7. Labi uho ame dam ahamda zoho labe im ahu adat iedi na ostam alalehena zi laba, “Im Ala zi am tame,” lahame vou baedam bakti ulohona a vi meedamule. Ame dam labe ibi iho amu meedaha im lam meit Alat Vameadaha Im Toedahana laba nehi toehena vi ozodale. “Ame Israel dam debu labe ibi iho auet modehena ostam alalehena lam vou baedalo modemu ame na labe am obe laba ab nusualadaham. Labi nusualadume na lam àda. Labi anggur oo vaksa udda. Labihadume ahu veimdi damti lahiti ostame sikidalo ab usnadaham.” Lahame labihasu toehemu uho ame bak lam a vi tau meedamule.
8. Labi im laha ame dam ahamda zoho labe iho amu di iube ostame fi loholi ot vai ot vaidam bak lam a tau meedamule. Ame dam zoho labiha labe digat vàmtea labe dam dua puluh tiga ribu fai elodaha bak. Labiha bake im a dam lamti ulohona meedamule.
9. Labi ame dam ahamda zoho labe iho neha, “Iho faina meedam bake, ‘Alat iba fakeo?’ laham bak imo neo Ala bake modi aamase,” lahame gagu ai. Labi fa neo vi gagu ai. Labihadam bak lamti ulohona im bada nim a Kristus bake labihadamule. Ame dam zoho labihadaha labe Alat ozba zi oudume dam lam veedume elodaha bak.
10. Labi laha ame dam ahamda zoho labe Alat iba na lu àdamnàme iho vedi faki voe voedam bak lamti ulohona iho a vi meedamule. Nehaha bak. Ame dam zoho labiha labe Alat Am im gagu vou usemda abo meia beome vàhàdedamda labe nom olu ame dam zoho ahebu oddume elodaha bak.
11. Alat aham di iube im tai ahobada zi labe lab vou beo ledaha bak lam gi, “Im dam ba dàt fà aidume ozobohudedase,” lahame Alat ahit fet vouhoidume esuidaha bak. Labi iho dam bada nibe digat folelo vabali ba novalo modem dam nibe iho neo git meedume, “Ame baket neo meeda moio?” lahame iho vi aidume ozobohudem bake dat ahamda Musat aho Alat Vameadaha Im Toedahana laba ab toedume esuham bak.
12. Labihàmu uho iademe meedale. Neham bak. Uho vedi neha, “Im abo Kristus bake tu vuzehi im Abadata keàtedi meedam dam im am bak. Im ba biti faina meedam vabak,” lahame bisi it daetbadam damat modemu uho ba im tai ahobada Musa bake tau vuladam dam labe iho biti faina meedam bak lamti ulohona neo meedam bak labna zohàme uho iademe it vou faovoi vi ozome meedale.
13. Eho gi neham bak ozome uba labi gagoho bak. Ahu adat faina modelo àhàkemna labe iba ootedàmu iho uledi meedam bak lam gi iba dam bakdate labaha bohu meedam im am bak. Lahana naat iba li lab modi ozolo modidam bak lam im bedem vaba vei teudedam bak ehe bak. Neham bak. Alat amu neha, “Na im ahebu uba modi ozolo modem di Eho uba taum bak,” lahame amu iba labi fet gagu esu vàmadehe bak lam Aho ba iba ozahigeàmu voom vabak. Gi labaha bohu vuusdam labe ame na iba modi ozolo modem bak lam Aho ba bisi ahebu uledi modi ozolo meedam vabak. Gi iho bedi vi uledi faina meedam vaba abo teudi duzum bak lamota Aho uledi meedam bak.
14. Ebe eho deeli vou alem dam oa, im tai ahobada zi labe im ahu adat iedi ostam alalehena laba vou baedàmu Alat faki na asimbuna modi beodaha bak. Labihàmu meit ostam alalehena vou baedam bak laba uho a vi tau vou baedamule.
15. Eho etei lab gagoho bak lam uho mahate vi ozodale. Eho ozoha, um em sunit nim ve aam dam lam ba ahusobu vabak. Um abo im ozobohu damat modem bak. Labihàmu eho uba git gagodào? Git gagom vabao? Laham bak lam uhumo vi ozodume neàdehezobe eba gagodale.
16. Neham bak. Iho Kristus bake tu vuzehi meedam dam nibe iho vahi ame Da Kristus eloho bak laba vi ozome vahi na àdam bak lam, “Akati modemna modela?” laham bak lam vi ozodale. Neham bak. Iho faina meedam bake gohali Kristus ahit uledi damat Am ve ut tetehesuhunaso laba paku dou am vasea veàtoho bak laba iho vi ozome Ala bake neha, “Ai Ala oa, oho na nim neàna modeho,” lahame labihasu tom gagodume neàdi iho ame anggur oo vaksa lam vahi uddam bak. Ame iho lab vahi uddam bak lam iho gi neham bak vi ozodume uddam bak. Dam giidat aame ozo, “Làhà dam labe iho faina meedam bake Yesusam vasea gohali modi fa neàdem dam zoho ame?” lahame aame ozobohudem bake iho vahi uddam bak. Labi laha damat Yesus Am so ut tetehesuhunaso laba esu paku doho bak laba iho vi ozome ame roti agube dam bake lodume uloholi vahi àdam di lam iho gi neham bak vi ozodume vahi àdam bak. Dam giidat aame ozo, “Làhà dam labe iho faina meedam bake Yesus damat ve Am so ut tetehesuhunaso laba esu paku dou eloi gohali modi fa neàdem dam zoho ame?” lahame aame ozobohudem bake iho vahi àdam bak.
17. Uho iho ame roti lam àdam di vi ozodale. Ame beahuba laba esum roti gi bu vàmtea ve agube keobedi dam bake lodamnat modem bak. Labihàmu iho nehi ozo, “Ame dam zi gi debu vàmtea Yesus Am dam debut moz,” lahame ozom bak. Neham labe labihaha bak. Ame rotibu lam gi Yesus Am soti ulohona ozomomnat modemu iho vahi àdam labe neha, “Im Yesus Am damalehe dam im am bak,” lahame labi gagodam bak.
18. Israel dam debu labe ibi iho meedaha bak laba uho laha vi ozodale. Ame dam lam laha labi modehe bak. Ame dam labe iho im ahu adat vei iedi Ala bake vou baedalo modem di im na fi ho vou le damat Ala bake lomna ve vua vahudam toheda labe aho ame na fi ho ve oteme vasea veàtoi neàdi zoho fa ame vua vahudam beahuba fi hamna laba vahuda. Labi zoho lam damat vahi àda. Labihadam bak. Ame lab meedam bak lam iho ozom di iho gi nehi ozom bak. “Dam lam gi tohedati vazisi Ala bake ahu adat iedi vou baedam damat mode?” lahame ozom bak.
19. Eho etei lab gagoho bak lam um a git ozodamule. Meit am ahu adat iedi ame ostam alalehena laba vou baedalo na oteme lodamna fi ho lam gi modemnat modem vabak. Abo ozom bak ehe bak. Labi laha ame na ostam alalehena lam gi modemnat modem vabak. Abo ozom bak ehe bak.
20. Eho gi neham bak ozome uba labi vameadam bak. Dam im ahu adat vei iedi Ala imboda laba vou baedam vab dam labe ibi iho auet modi ostam alalehena laba vou baedalo na fi ho oteme lodam bak lam ba Ala imboda laba na lam oteme lodume vou baedam vabak. Gi setan zi laba na oteme lodume vou baedam bak. Labiham bake ame dam labe iho ame setan zi laba vou baedalo ame na fi ho oteme zoho modi loda. Labi zoho gi dam vahi àda. Labihadam bak laba uho vi tau vahi àdam bak lam em malehe bak. Uho labi modemeam làhà um gi ame setan zi laba vou ali ahu vàmadi meedam dam zi um am bak.
21. Um akati labi git ozodàla? Uho vedi dam Yesus bake tu vuzehi vahi meedam dam laba bakamta vahi neha, “Imo Yesus eloho bak laba vi ozome anggur oo vaksa vahi udda. Roti vahi àda. Labihadase,” lahame im Boehàda Yesusti vou ali ahu vàmadi meedam diale. Labi vedi fa neo dam setan zi laba vou baedam dam laba bakamta vahi neha, “Imo setan zi laba vi ozome anggur oo vaksa vahi udda. Na fi ho ibida vahi àda. Labihadase,” lahame ame setan zi lamti vou ali ahu vàmadi meedam diale. Ba uho neham bak modem vabiem bak. Im Boehàda Yesusti vou ali ahu vàmade. Labi neo setan zi lamti neo vou ali ahu vàmade. Labiham biem bak.
22. Um ozom vaba? Uho ame setan zi laba vou baedalo modem bak labet modi Alat Am ahu adat faki teidi iba na asimbuna modi im beodam bak am taia? Uho ozom, im feà? Labi Ala beeda modemu iba ba beom vaba? Vabà! Beom bak. Labihàmu ame dam labe ibi iho ostam alalehena laba vou baedalo modemu ame na fi ho oteme lodamna zoho lam vahi àdam bak lam um a tau oli vahi àdamule. Uho gi fi hasi ahala modidale.
23. Um dam totbahot labe vedi neha, “Ame Im Feàna lam iba ootedam bak lam vaitohemu Alat malehe vabna iho Kristus bake tu vuzehem dam nibe ahu ibida uledemeam làhà ame na modem neà bak tadehe taia?” lahame uho lab gagoho bak lam imbota imbot. Lahana Alat mali gagoho vabna totbaho ahebu lam iho vedi vi meedameam ba iba modi fa neàdemna vabak. Labi laha ba damat ame im lam vuusu meedam labe ibi iho Kristus bake tu vuzehi meedam bak lam ba modi im ahu teudi meedam bohu vuusdam vabak.
24. Uho akati meit ahamo amota neàdem bak lamota ozome tombuli meedàla? A labihamule. Um gi fa neham vaba? Gi meit aba aho vou alemda labe aba aho neàdem bak tombuli taum vaba? Lam bisi neà bak am bak.
25. Uho gi nehale. Uho na nubu àlo modemu damat na fi ho oteme aume doi ot loiam bak laba lam di ubu uho neha, “Eho meit ostam alalehena laba lohona zoho lam vi tau àmeam eho git modem bak am bak,” lahame ahu adat it tu ozodam bohu lahasdameam a neha, “Na nubu nim ostam alalehena laba lodamna zohot mode moio?” laham bak a gagu vi aimule. Gi gagoho vabna doi lu ostame vame àdale.
26. Eho gi meit Alat Vameadaha Im Toedahana laba nehi toehe bak laba vi ozome uba labi gagoho bak. “Bak nimti bak niba modealahana zi nimti ahebu naeda Boehàda Ala am bak.” Lahame labihasu toehe bak ehemu uho lab àlo ozohona nubu lam Ala naeda am bak. Àm neà bak.
27. Uho im nidi nim laha vi ozomale. Meit Kristus bake tu vuzehi meedaha vabda labe ubu meida laba nehameam, “Lele. Im na nim vahi àlo mozo,” lahame uba gagu uho meit uledemeam làhà le aba aho esuhuna lam ve àle. Ame da laba a nehi vi gagu aimule. “Na nim ostam alalehena laba vou baedamna lodamna zohot mode moio?” laham bak a vi gagu aimule. Uho gagu aimeam làhà um ahu ad laba ab vizi it ozomna ab faidi vàhàdemam tame.
28. Lahana um dat meida labe neha, “Ba oa, na nubu lam ostam alalehena laba vou baedamna lodamna zohot modem bak,” lahame uba nasi ahate gagomeam làhà ba a àmule. Uho geàmu àmeam oba im gagohoda lam fa ladi vi ozodam bak tame. Ame da labe aho am ahu adat it tu ozomta fi ha. Labi uho geàmu àmeam làhà am ahu adat vi ozome vàhàdehemu ab modi lademam bak.
29. Em ba ubu uho um ahu adat it tu ozomna gagom kaio. Umota, “Fiham kaio,” lahame ozobohudi neàdehe labe um ba ladem vabak. Lahana ame da labe, “Fiham bak,” lahame am ahu adat it tu ozodam bohu lahasuhu labe ladem bak ehete. Eho labi gagomeam meit fa nehi gagoe moio? “Oo, em ahu adat nehi ozo, ‘Àm neà bak,’ lahame ozome neàdehena ba akati meit neha, ‘Fiham bak tame,’ lahame ozodamda labe ba eba gagu male?
30. Meit eba lu esuhuna lam eho àlo modem di Ala bake neha, ‘Ai Ala oa, Oho modehena nim abo neàna modeho,’ lahame eho tom gagu neàdehena ba akati meit eba feàtàme mali eba gagoe? Ba labiham biem bak,” lahame uho labi gagoe moio?
31. Labihàmu eho fa uba nehi gagom bak. Alat uba malehe vabna ahu ubuda uledemeam làhà ame na modem neà bak tademnàme um gi ozahit iademe meedale. Abo uho na àm bak modeo, anggur oo vaksa uddam bak modeo, abo na im ahebu meedam bak modeo, um gi iademe meedale. Dam totbahot uho modehe bak laba vi aame Alam ee vousai, “Am abo feàte,” lahame labi vou baedam bak fà modi bohulalese.
32. Uho nehame meedam labe ame bak lam modi imbodem bak am tame. Uho meia modi faidi vàhàdem bak labna zohàme uho gi vou faovoi iademe it ozome meedale. Abo Yahudi dam modeo, Yahudi damat modem vab damat modeo, dam Kristus bake tu vuzehi vahi meedam dam abo Alam damalehe dam modeo, labihasu vàhàdem bak labna zohàme it vou faovoi iademe it ozome meedale.
33. Ebe eho meedam bak am bak. Eho na im ahebu meedam di meia modi vàhàdem bak labna zohàme eho gi vou faovoi iademe meedam bak. Em bisi emota neàdem bake it ozome meedam vab dàt modem bak. Em gi fa dam ahebu neàdedalo ozome meedam bak. Abo damat iho faina meedam bak lam Alat fa faamome soat vausu fa vei neàdedam bak laba ozome labihadam bak.
1. Kristus ahedi bak niba godume iademe vamdesu meedaha bak lam eho vi ozobohudi vouhodàmu uho laha ame bak lamti ulohona ebe eho meedam bak nim uho laha vi ozobohudi vouhodale.
2. Lo. Neàde. Uho amu eba sunit oluhu im lam ahebu eho ab vameadume neàdeham bak. Làhàmu etei nim eho gi im ebe eho amu vahokedaha im lam uho git ozoho bake eho uba neo nehi vi vahokedume ozobohudelo mozo. Ebe eho amu uba tau azihi diat meedaha im lam uho vi ozodam bohu lahasda. Labi eho amu uba vahokedaha im lam uho voedaha vaba abo keàtedi meedam bohu vuusu meeda. Eho gi uho labihadaha bak laba vi ozome, “Um abo neàte,” lahame eho uba labi deeli vou baedam bak.
3. Lahana em im meida nim uho vahi Ala bake vou baedalo modem di, “Akatihasu meedàla?” laham bak uho vabili voomna zohàme fa uba vameadume um ozobohudelo mozo. Neha: Kristus bake im gagu modiamda Ala am bak. Labi dam bake im gagu modiamda Kristus am bak. Labi lahi bake im gagu modiamda im dam aabo am bak.
4. Labihàmu dat meida Ala bake tom gagodalo modem di modeo, labi damat vou faodahit im Alat aba modi ozobohudi fi gateheda labe aho fa ve dam bake ahate vameadam di modeo, ame di labe aho vedi am ohula suusumna suusumeam làhà ame da labe gi aba im gagu modiamda Kristus bake feàtàdam bak am tame.
5. Labi laha uho vazisi meedam di lahit Ala bake tom gagodalo modem di modeo, damat vou faodahit im Alat aba modi ozobohudi fi gatehe nam labe aho fa ve dam bake ahate vameadam di modeo, ame di labe aho vedi ohula suusumna suusum vabameam làhà am git modehe bak. Neham bak. “Aho vaha dat lam aba im gagu modiamda am tame,” laham bak modi tombalem bak laba ozome am ohula suusumna suusum bak. Ame bak lam lahit ibi iho amu modi baleàhà bak am bak. Lahana ame bak lam modehe vab labe gi aba im gagu modiamda am date modi feàtàme ladem bak am tame. Ame lahi lam am ohula suusumna suusuhu vab nam lam gi meit aa modehemu ohuta aume veiboziem nam lamti uloho namelehe bak.
6. Ibi iho modi baleàlehe bak nim lahi ibida ohuta aume buulem bak modeo, abo aume veiboziem bak modeo, lahit ladem bak am bak. Labihàmu lahi ibida ohula suusumna ve im ohula suusum vabameam làhà gi ohuta aume buulem vaba? Gi ulohona modem bak. Labihàmu a labihamule. Gi lahi Ala bake ahu adat vei iedi vou baedalo modem di, “Iba im gagu modiamda ehe bak,” laham bak modi tombalem bake suusumna ve ohula suusu vou baedale.
7. Lahana im dam aabo Ala bake vou baedalo modem di im ba labiham vabak. Im dam aabo ba im ohula suusu Ala bake vou baedam vabak. Eho gi neham bak ozome uba labi gagoho bak. Alat im dam aabo alimeat faasi modehe di gi Aba Aho na ahebu vuusu im gagu modiam bakti ulohona iba modi vizi iho na zi ab vuusdamam bak. Labi laha, “Dam aabo labe fà ee abada vousai vou baedase,” lahame ahit dam aabo modehe bak. Labiha labe im dam aabo ba im ohula suusu Ala bake vou baedam vabak. Lahana lahi ba labiham vabak. Lahi gi, “Aba im gagu modiamda am dat am bak,” lahame ame bak labe tombali am dat ee vousai vou baedalo am ohula suusu Ala bake vou baedam bak.
8. Eho gi neham bak ozome uba labi gagoho bak. Alat alimeat nasi nam mode. Labi ame nam labe dat ba mode. Labihaha vabak. Alat gi nehaha bak. Aho amu nasi dat mode. Labi ba neo ame dat labe nam neo mode. Labihaha bak.
9. Labi ame bak lam ozom di nehaha vabak. Alat nam nasi modi afoezobe, “Aba taumda akete?” lahame dat neo modi am nam laba lu esu. Labihaha vabak. Alat gi nasi dat modi afoezobe, “Aba taumda akete?” lahame nam modi ame da laba ab lu esuham bak.
10. Labihàmu lahi ihimo ozo, “Iba im gagu modiamda im dat am bak. Iho bak lam tombali im dat ee vousai vou baedam bake im lahi ohula suusumna im ohula suususe,” laham bak ozome ame suusumna ve suusum bak. Neham bak. Alat Am im gagu vou usem dam zi labe laha neha, “Ame lahi labe na suusumna suusuheo?” lahame aame deelem bake labihadale.
11. Labihadamnàme im meida nim laha ozom bak ehe bak. Iho im Boehàda Kristus bake tu vuzehi im Abada meedam dam nibe iho gi nehadam bak. Ba lahit dam bake ahumdi vou faodam vaba ihimo duzum vabak. Labi laha damat lahi bake ahumdi vou faodam vaba ihimo duzum vabak. Gi ahili ototo modidam labe neàdem bak.
12. Uho eho amu lab gagoho bak laba vi ozodale. Eho amu uba neha, “Alat amu nasi dat mode. Labi ba neo ame dat labe nam neo mode,” labihaha bak. Lahana etei namet fa data daboseà faadume damaedam bak. Lahana im nidi nim laha ozodale. Dam modeo, lahi modeo, abo bak niba modealahana lamti modeo. Ahebu Alat modehe bak.
13. Neham bak nim uhumo ozome gagomale. Um Korintus dam vahi Ala bake vou baedam di lahi ubudat modi baleàlehe bak lam abo im ohula suusumna ve suusum bak lam fa modehe vaba Ala bake tom gagodam neà?
14. Uho neham bak ozobohu dam taia? Ubu uho modi baleàlehe bak labe um dam abo ohuta ukbom vaba bohulalemeam làhà um ladem bak am taia?
15. Lahana lahi ubuda ohuta bohulalemeam làhà um gi aame neha, “Aa làhà! Neà bak bohu ame?” lahame vou baedam bak am bak. Uho gi neham bak vi ozome labi vou baedam bak. Alat ahit modehe bak. Lahi am ohu veiboziem bak mali vi ozome ahit ohuta bohu modi suusuhu bak.
16. Eho etei uba lab vameadaha bak lam uho meit daetesulo modemeam làhà um git modelo modem bak. Iho Kristus labe Aho amu im vameadume esmozi laiam dam nibe ibi iho modi baleàlehe bak am bak. Meit daetesulo modemda lam im ba uledem vabak. Gi iho Kristusam im vahokedam dam nibe ihimo ame bak lam meedume baleàlehe vabak. Abo Kristus bake tu vuzehi vahi meedam dam abo dam zi mei dam zi meime Alam damalehe dam ahebu laha meedume baleàlehe bak. Lahi Ala bake tom gagodalo modem di modeo, im Alat aba modi ozobohudi fi gateheda lam aho ve fa dam bake ahate vameadam di modeo, abo im ohula suusum tadem bak lam ibi iho meedume baleàlehe bak am bak.
17. Im lada lam neàde. Em etei nim uho Kristus bake tu vuzehi vahi meedam dam labe im Boehàda Yesus eloho bak laba vi ozome deeli vahi roti àm bakti anggur oo vaksa uddam bakti labihasu meedam di, “Neà bak akete?” laham bak uba vahokedalo mozo. Um Korintus dam labe vahi ame im lam meedam di uho fa git meedaha bak laba vi ozome eho ba uba, “Neàte,” lahame vou baedam vabiem bak. Uho ame im lam meedalo vazisidam diat ba neà bak modem bak vi ozome vahe vahedam vab damat modem bak.
18. Labihàmu eho uba nehi vameadalo modem bak nasi aimale. Eho aiha uho Ala bake vou baedalo vahe vahedam di lam um gi daet beàdume ot odosiame faheme ahala modidam damat modem bak. Dam num debu Korintus laba tau azihi damat eba li vameadàmu eho aiha, “Fota imbote,” lahame vuzehehe bak.
19. Eho ozoha, uho lab faheme ahala modidam bak lam gi ahole meedam bak. Dam adida neà bak meedam labe Alat aame deele? Labi dam adida git meedam labe Alat aame fake? Laham bak tombalelo ahit uho ahala faheme modidam bak.
20. Uho bisi lab ot odosiame faheme ahala modidam bak lam eho vi ozoha, uho amu neha, “Iho im Boehàda Yesus Aho eloho bak laba vi ozome deeli vahi roti àda. Labi anggur oo vaksa udda. Labihadase,” lahame uho lab ozome gagu vahe vahedume meedam bak lam eho vi ozom di um ba imbo bak meedam vab damat modem bak.
21. Uho akati im Boehàda Yesus eloho bak laba vi ozome deeli vahi roti lam àda. Labi anggur oo vaksa lam udda. Labihadam diat ame na gi vou li àmna lam abo damat vahi toma àdamna akati uho git meedàla? Uho vedi dam dua totbahot na zi uho vou lehena lam dam totbaho li vahe vaheme neàdehe vab di labe uhumo nasi meia mali àda. Labiha labe dam na vabda totbaho labe iho idoali na àsome modeha na vabalehemu vedi gi idoali esda. Labi dam dua totbaho labe iho anggur oo vaksa duana vou lehena vedi dam ihimo meia mali duana uddaha labe fa bobidume bak vabilem meo damat modem bak.
22. Aiee! Um akati labi git meedàla? Uho na gi àmna àm bak lamti anggur oo vaksa gi uddamna uddam bak lamti labihasu meedam di num ubuda vabali labihahe? Em abo àvodeha! Um na gi àmna lamti anggur oo vaksa gi uddamna lamti meedam di akati iho vahi im Boehàda Yesus labe Am eloho bak laba vi ozome deeli roti àdam bak lamti anggur oo vaksa uddam bak lamti labihasu meedam di labe uho akati bakamta vahi vi tau meedàla? Làhà uho gi iho Kristus bake tu vuzehi vahi meedam dam abo Alam damalehe dam niba uho gi iba feàtàlo labihahe? Labi uho gi dam na vabda lam na àmna vou lem biemda zi lam, “Fa ladese,” lahame labihahe? Eho ba uba akatihasu gagoe? Eho uba, “Neàte,” lahame uba vou baedà? Vabà! Em labiham vabiem bak.
23. Eho gi neham bak ozome uba labi vameadam bak. Iho im Boehàda Yesus labe Am eloho bak laba vi ozome deeli vahi ame roti lam àda. Labi anggur oo vaksa udda. Laham bak lam, “Akatihasu modemna modela?” lahame vou vahoke lehe im lam im Boehàda Yesus labe amu eba vahokedume em ozobohudi eho fa uba vahokedume esuhu bak. Ame vou vahoke lehe im lam neha: Yudas labe Yesus vou fohome dam faida zi laba ub lolo modem di aibu labe Yesus aba tu vou gohatem dam dua belas lam amu gagome bakamta vazisi afoezobe rotibu ve
24. Ala bake, “Neàte,” lahame tom gagu neàdi ame rotibu agube am dam bake lodume gago. “Roti nim em so it ozomomna am tame. Eho ahit uledi meit dam faida laba em ub lu oteme um gohalemna am tame. Eho etei lab tom gagu roti lam ve agube uba lodume uho vahi àdam bak lamti ulohona uho gi labaha bohu vuusu meedale. Uho ame bak lam meedam di gi ebe eho uba neà bak modehe bak laba it ozome àdale,” lahame gagu afoezobe roti ab àdaham bak.
25. Labi neo na gi àmna zi lam àme neàdi afoezobe Yesusat anggur oo vaksa fedehe mokzoh lam ve gago, “Anggur oo vaksa nim nehi vi ozomna vaksa am tame. Em Aiat amu dam bakdate neha, ‘Aho um vame Am damali im vamdesu meedam dam um am bak,’ lahame amu fet gagu vàmadi esuhu bak lam Em vasea veàtolo modemna nim fa ame bak lam modi imbodi ab tombali gàhàdeham bak. Laham bake vi ozomna vaksa am tame. Eho etei anggur oo vaksa ve uba lodume uho vahi uddam bak lamti ulohona uho gi labaha bohu vuusu meedale. Uho ame bak lam meedam di gi Ebe Eho uba neà bak modehe bak laba it ozome uddale,” lahame gagu afoezobe anggur oo vaksa lam ab uddaham bak. Laham im lam im Boehàda Yesusat amu eba vahokedaha im am bak.
26. Labihàmu uho im Boehàda Yesus labe Am eloho bak vi ozome ame bak vahi meedalo modem di gi iademe vi ozome meedale. Neham bak. Uho ame bak laba vi ozome vahi ame roti agube dam bake lodume àda. Labi anggur oo vaksa udda. Labihadam labe iho faina meedam bak lam Yesusat fa ot vai damat Am so lam ve ut tetehesuhunaso laba esu paku dou eloho bak lam uho modi tombalem im am bak. Uho gi labihasu bohu vuusu meedume im Boehàda Yesus fà lese.
27. Labihàmu meit im Boehàda Yesus eloho bak laba vi ozome ame roti àda. Labi anggur oo vaksa udda. Labihadam di iademe meedaha vaba abo git ozome ostame meedameam làhà ame da labe gi aho im Boehàda Yesus iba gohaleheda labe Am so ut tetehesuhunaso laba esu paku dou vasea veàtoi eloho bak laba git vi ozome tozodume faina modehe bak. Ba ame bak laba ozome, “Feàte,” lahame ba ahu adat vei iedi vou baedam vabak.
28. Labihàmu bisi neà bak gi neham bak. Meit im Boehàda Yesus labe Am eloho bak laba vi ozome deeli ame roti àda. Labi anggur oo vaksa udda. Labihadalo modemeam làhà ame da labe naedat ahamo nasi am ahu laba nehasu it ozodale. “Na nim gi modem vabnat mode. Abo Yesus Am so damat ve ut tetehesuhunaso laba esu paku dou eloho bakti Am vasea veàtoho bakti vi ozomna ame?” labihasu naedat am ahu nasi it ozodale. It ozodume neha, “Am abo imbona modelo modem bak,” lahame labi it ozomeam làhà ame na roti vahi àda. Labi ame anggur oo vaksa vahi udda. Labihasu meedamta neàte.
29. Eho gi neham bak ozome uba labi gagoho bak. Ame da labe aho dam totbaho laba tau im Boehàda Yesus labe Am eloho bak laba vi ozome deeli ame roti à. Labi anggur oo vaksa ude. Labihadalo modemda labe aho nasi am ahu neha, “Ame roti lam Yesusam so damat ve ame ut tetehesuhunaso laba esu dou eloho bakti ulohona ozomomna am bak. Labi ame anggur oo vaksa lam Yesusam vasea veàtoho bakti ulohona ozomomna am bak,” lahame nasi it ozome ozobohudi neàdem vabna vedi ostame meedameam làhà Alat ame da labe aho modehe bak laba ozome gago, “Om git modeho,” lahame ozobohudi gagu ame da laba na asimbuna feàna modi beo tame.
30. Uho etei labihasu meedam labe um dam dua totbaho gailedume um alihi vihiladam bak. Labi gi lamota meedaha vabak. Dam totbaho neo elodam bak.
31. Lahana uho nasi neham vaba? Ame bak lam meedalo meedam di uho naedamat um ahu nasi it ozodameam làhà ba Alat uba neha, “Uho git modeho,” lahame uba gagu na im asimbuna ba beodam vabak.
32. Lahana eho ozoha, ba bisi àvodemnat modem vabak. Neham bak. Alat etei uba neha, “Uho git modeho,” lahame gagu uba na im asimbuna beodam di lam gi Alat uba modi itaholedume neàdedam bak am tame. Bak lam ba fai kaio. Labiham labe Alat ba diamut dam Yesus bake tu vuzehem vab dam lam vua elum feàna sutem gikina laba voedam di lam ba umti voedam vabak am tame.
33. Emti vahi Kristus bake tu vuzehi meedam dam oa, eho etei lab vameadaha im lam neàdelo modemu em fa im tombuda uba neo vi gagolo. Uho im Boehàda Yesus Am eloho bak laba vi ozome deeli bakamta vazisi ame roti àm bak lamti anggur oo vaksa uddam bak lamti labihasu meedalo meedam di gi nehadale. Dam ahebu bakamta vazisi neàdi ame na gi àmna lam àm neàte. A dam ahebu bakamta vazisi neàdehe vabna uhumo dam totbahot nasi a àmule.
34. Ame di labe uho bisi idoali feà bak fum di vou faom vabiemeam làhà gi num ubuda laba nasi na àme neàdi ba lele. Neham bak. Uho gi na àmna duana laba ahu vitasumeam làhà Alat uba, “Uho git modeho,” lahame gagu uba na im asimbuna modi beo tame. Lo. Neàde. Ame im uhumo ozom biemna totbaho lam eho bak ubudate lahazobe uba neo vi vameadume fi tato tame.
1. Emti vahi Kristus bake tu vuzehi meedam dam oa, sunit uho amu eba oluhuda lam uho eba vi ailo modemda meida lam eho neo uba vi vameadalo mozo. Uho amu neha, “Alam Aha Nutabe Neàna labe meia modi vizi teudi meedam bak lam akatihasu modemna modela?” lahame vabili eba vi ailo modemu uho aime ozobohudi neàdem bake eho uba vameadalo mozo.
2. Uho amu Kristus bake tu vuzehi im Abada meedaha vab di iube uho lab meedam bak laba it ozodale. Di labe ubu uho amu modi baleàlehe bak labet modi um ahu adat vei iedi na ostamna it modi alali vou baedamna abo dae vabna ba Alat vameadaha im uba gagom biemda meida laba uho tu vuzehi vou baeda. Labi neo meida laba neo tu vuzehi vou baeda. Gi labihadam bohu vuusu meedaha damat modem bak.
3. Labihàmu uho Alam Aha Nutabe Neàna labe meia modi vizi teudem bak biem labe eho nehasu uba vameadalo mozo. Alam Aha Nutabe Neàna labe meia modi vizi vi teudeheda labe ba nehame gagom vabak. “Yesus fà beose,” lahame ba uloome gagodam vabak. Labi laha Alam Aha Nutabe Neàna labe meia modi vizi teudehe vabda labe ba nehame gagom vabak. “Ame Da Yesus im Boehàda am bak,” lahame ba gagom vabak.
4. Gi neham bak. Alam Aha Nutabe Neàna labe Aba Aho meia modi vizi teudi meedam im lam ba bisi dam ahebu im ulohona modi vizi teudi meedam vabak. Aho gi ahala modi ahala modidam bak. Labihadamnàme ame ahala modi vizi modidam bak lam gi Alam Aha Nutabe Neàna lam ame na debu modeheda vàmtea am bak.
5. Labi laha iho Kristus bake tu vuzehi meedam dam nibe, “Iho im Boehàda Yesus fà iba deelese,” lahame im Abadata meedam im lam gi im mei im meime meedamnàme ibi iho lab meedam bak lam, “Fà iba deelese,” lahame ozome gagomda lam gi vàmtea Boehàda Yesus am bak.
6. Labi laha iho dam imti vahi Kristus bake tu vuzehi meedam dam totbaho labe im neàdem bak laba ozome iho im feà bak meedam im lam gi im mei im mei lahadam bak. Lahadamnàme ame bak lam iba modi vizi teudi meedamda lam gi vàmtea Ala am bak.
7. Eho etei uba neo gagolo modem im nidi nim uho mahate aime vi ozodale. Alam Aha Nutabe Neàna labe iba modi vizi teudedam di labe gi im mei meia modi vizi teudem im feàna mei meeda. Labi neo im mei meia modi vizi teudem im feàna mei meeda. Gi labihasu ahala modidam bak. Ame lab ahala modidam bak lam gi iho Kristus bake tu vuzehi vahi meedam dam ahebu neàdedam bak laba ozome labihadaha bak.
8. Ame Alam Aha Nutabe Neàna labe ame bak lam meedam di gi nehada. Aho uba meidate modi vizi teudi bisi im ozobohudi meia vameadam bak ame. Labi ame Alam Aha Nutabe Neàna vàmtea labe Aho neo uba meidate modi vizi teudi Alam im aime fa meia vahokedume ozobohudedume fi gatedam bak ame.
9. Labi ame Alam Aha Nutabe Neàna vàmtea labe Aho neo uba meidate modi vizi teudi, “Na damat ihimo modem biem im feàna lam Alat modem meo bak,” lahame am ahu abobo tu vuzehi meedam bak ame. Labi ame Alam Aha Nutabe Neàna vàmtea labe Aho neo uba meidate modi vizi im dedateli dam gailedahada lam modi fa neàdedam bak ame.
10. Labi Aho neo uba meidate modi vizi teudi na damat ihimo modem biem im feàna meedam bak ame. Labi Aho neo uba meidate modi vizi teudi Alat aha Abadat vameadaha im lam ame da laba modi ozobohudi fi gatei aho aime fa dam bake ahate vameaidam bak ame. Labi Aho neo uba meidate modi vizi teudi ame da labe aho dat meida labe vameadaha im aim di, “Ame im vameadamda lam Alam Aha Nutabe Neàna labe ame da laba modi vizi imbona vameadào? Setan ame da laba modi vizi giomim vameadào?” laham bak lam Alam Aha Nutabe Neàna labe ame da laba modi vizi ahamo ozobohudi gagodam bak ame. Labi Aho neo uba meidate modi vizi teudi ame da labe aho naedat it aim biem dae mei dae meime vameadam bak ame. Labi Aho neo uba meidate modi vizi teudi ame da labe ahamo fa dat meida labe am naedat it aim biem dae lab vameadaha bak lam vi aime, “Ame da labe akatihasu vameadàla?” laham bak ozobohudi fi gatei fa dam bake iademe ahate vameadam bak ame.
11. Alam Aha Nutabe Neàna vàmtea labe Ahamo labihasu ame dam laba ahala modi vizi teudi modidam bak. Labi Aho ame bak lam meedam di gi Aba Aho ozoho bak labet la modi le modidam bak.
12. Iho Kristus bake tu vuzehi vahi im Abada meedam dam nibe im dam zi dua bak lamti im dam so niba modealahana zi nimti ulohote. Neham bak. Im dam so niba modealahana nim zi dualehenàme ot odosiame fa vahi ab dat sobuleham bak. Labi Kristus laha labihaha bak. Am gi Dat vàmtea. Lahana im dam Aba tu vuzehi Amti vou ali ahu vàmadehe dam nim dua labe fa vazisi debu vàmadehe bak.
13. Eho gi neham bak ozome uba labi gagoho bak. Iho Kristus bake tu vuzehi vahi meedam dam nim abo dam mei debuti dam mei debuti am bak. Im dam totbaho Yahudi damat modem bak. Labi im dam totbaho Yahudi damat modem vab damat modem bak. Labi im dam totbaho mei na teo meedam damat modem bak. Labi im dam totbaho mei na teo meedam vaba gi ihimo ozome meedam damat modem bak. Labihadaha bak. Labihadamnàme meit iba vuu valo baptisleidaha di lam Alam Aha Nutabe Neàna vàmtea labe Ahamo im ahebu modi vizedaha labe im Yesus Kristusam dam debuli ab vàmadeham bak. Abo gi Alat Aho im dam ahu ahebu laba modi vizi teudi modesdam Aha Nutabe Neàna vàmtea am bak.
14. Uho a git ozodamule. “Alam Aha Nutabe Neàna labe Aho iba modi vizi teudi meedaha di lam akati ulohona vizi meedaha vaba? Akati gi ahala vizi modidàla?” Laham bak lam a labi git vi ozodamule. Eho gi neham bak ozome uba labi gagoho bak. Im dam so nim gi na vàmtea modesuhu vabak. Abo na meiti na meiti ahebu im so niba modealadume uloholehe bak. Ame bak lam gi neham bak. Alam Aha Nutabe Neàna labe iba ahala modi vizi teudi modidaha bak lamti im so niba modealadume na zi dua bak lamti ulohote. Lahana dam totbaho vedi nehi ozoda. “Alam Aha Nutabe Neàna labe akati bisi eba feà bak modi vizehe vaba? Akati da lada lamota modi vizehela? Làhà em ba Kristusam dam meida modem vabak,” lahame ozohoda lam git ozoho. A labi ozodamule.
15. Eho gi ame bak laba vi ozome im dam so modealahana zi niba vàlu uba vouhodalo modem im nidi nim uho mahate ozodale. Im dam naba nibe ahali nehameam, “Em ame da so nim modealaha di lam em anekehàlehe vaba? Akati gi naba na feàna modem biem datelehela? Làhà em ba da so niba modealahana labe meida modem vabak. Em gi na mei,” lahame labi gagomeam làhà uho ozom, ame naba lam ba ame da so laba modealaha vaba? Vabà! Labiham biem bak. “Am feà kaio,” lahadamnàme geàmu ame da so laba modesuhu bak.
16. Labi uho ozom, im dam dogoi labe ahali nehameam, “Em ame da so nim modealaha di lam em fakolehe vaba? Akati gi dogoi na feàna modem biem datelehela? Làhà em ba da so niba modealahana lam meida modem vabak. Em gi na mei,” lahame labi gagomeam làhà uho ozom, ame dogoi lam ba ame da so laba modealaha vaba? Vabà! Labiham biem bak. “Am feà kaio,” lahadamnàme geàmu ame da so laba modesuhu bak. Ba modesuhu vaba vabalem vabak.
17. Neham labe labihaha bak. Im dam so nim gi fakobu faita modesumeam làhà ba im meit gagomda aim vabak. Labi laha im so nim gi dogoibu faita modesumeam làhà im ba na ahana ba naum biem bak. Im dam so niba modealahana meida vekemeam làhà im ba na keàtedi meedam biem bak. Ame bak lam gi neham bak. Iho Kristus bake tu vuzehi vahi meedam dam nibe ibi meida laba neha, “Da lada lam feidam neàte,” lahame ba ame da laba labi gagu utasi voom vabiem bak. Im gi dam debu vàmtea modem labe im gi ahebu vahi, “Ame bak meedase,” lahame vabademsu meedam damat modem bak.
18. Ame bak lam vabiem vabak lam gi Alat Ahamo ozobohudi ahit im so nim modehe di labe Aba Aho ozoho baket na zi keobe nim abo fakoti omtoti dogoiti labihasu ahebu modealadume ot odosiaha bak.
19. Uho ozom, im dam so niba modealahana zi lam meida utasi fa ahamo bu faita modesumeam làhà im ba soaleo? Vabà! Ba soalem vabak.
20. Labiham vabiem bak. Im so vàmtea nim gi na keobe zi modealaha bak. Ame bak lam fa neham bakti ulohote. Alam Aha Nutabe Neàna labe Aho iba ahala modi vizi teudi modidamnàme im gi ahebu vabademsu meedam bak.
21. Labihàmu dam zoho labe Alam Aha Nutabe Neàna labe iba im feàna modi vizi teudi meedam dam labe vedi nehi it daetbada. “Im abo im feàna meedam dam im am tame,” lahame labi daetbadam dam labe ba dam totbaho laba neha, “Um gi im feà vabna meedam dam um gi feidam neàte,” lahame ba labi gagom vabak. Ame bak lam gi neham bakti ulohote. Im dam fako labe ba ahali fa anekehà laba ba nehame gagom vabak. “Om nasi feidate. Ihimo mode tame,” lahame ba labi gagom vabak. Labi laha im dam ohu labe ba ahali naba zoho laba ba nehame gagom vabak. “Om nasi feidate. Ihimo mode tame,” lahame ba labi gagom vabak.
22. Fa gi neham bak. “Im dam so niba modealahana lam meida nim bisi feà kaio. Beeda am bak. Fa feidam neàte,” lahame labi ozohoda lam modi fa tombali abo ibi iho modi vekeheda modi fa vi ozome voom biemna am bak.
23. Labi laha iho nehi ozo, “Im dam so niba modealahana lam ohuta nim bisi feà kaio,” lahamda lam iho vedi neha, “Damat fà aame deelese,” lahame ahit na feàna demsoti ulohona lam visoi dusu damti lahiti ab aadamam bak. Labi laha im dam so niba modealahana lam totbaho nim damat aameam im lademda lam iho ahit na baana visoi it vastedam bak.
24. Labi im dam so niba modealahana lam im ladem vabna totbaho nim gi damat aam neàna im ba ozom vaba gi labihasu ozahit geàmodam bak. Lahana Alat im so modehe di labe iho damat ozo, “Na bisi feà vabna ziat moz,” lahame feàtàmna lam Alat ahit, “Damat fà aame vou baedase,” lahame ahit modi fa feànali zisiddaha bak.
25. Alat gi neham bak ozome labihadaha bak. Im dam so niba modealahana zi lam ahebu fa vahi vabademsu na modem di ot taui ot tauidam bak laba vi ozome labihaha bak. Fa ahala utasi modesum bak Alat mali gi bakamta modealaha bak. Ame bak lam gi neham bak. Ibi iho vahi Kristus bake tu vuzehi meedamda meida laba iho neha, “Om feà kaio. Om feidam neàte. Ihimo mode tame,” lahame labi gagu utasi voom bak labna zohàme Alat ahit mali im dam modi fa vahi vabademsu ot taui ot tauidam bake Alat ahit im dam debu vàmteadehe bak.
26. Neham bak vi ozomale. Im dam so niba modealahana keobe zi nim meida kikezi geàdameam làhà im so niba modealahana totbaho ahebu vi tau kikehena ozomomna meedam bak. Laham vabameam im dam so niba modealahana keobe zi nim meida damat aame nehame gagomeam, “Abo na neàna modesuhe?” lahame labi vou baedameam làhà so niba modealahana zi nibe ame na laba vi tau deelem bak. Ame bak lam gi neham bak. Iho vahi Kristus bake tu vuzehi meedam dam meidavat geàdameam làhà im dam totbaho ahebu tau àvodi ahu faidi ame da laba iademe vabiedam bak. Laham vabameam im meidavat meit git modem vaba abo iademe meedume damat am ee vousameam làhà iho ibi meida ee vousahemu, “Feàte,” lahame vi tau deeli vou baedam bak.
27. Eho etei lab vameadaha bak lam gi im dam so niba na keobe zi modealaha bak laba gi vàlu uba vameadaha bak. Alat ahit im dam so niba na keobena zi modealaha bak lam fa vazisi im sobulehe bak lamti ulohona modi im Kristus bake tu vuzehi meedam dam zi nim modi fa Yesus Kristusam dam debu vàmadehe bak.
28. Iho Kristus bake tu vuzehi vahi meedam dam debu gi vàmadehenàme Alat ozahit iho vahi ototo tauidam bak laba vi ozome iba nehame ahala modi vizi teudi modidam bak. Aho amu nasi im dam zoho laba modi fa Kristusat Aho gagu olu Am im vameadume esmozi laiam damali meedam bak ame. Labi im dam zoho laha neo modi fa Alat aha Abadat vameadaha im aime fa dam bake ahate vameaidam damali meedam bak ame. Labi im dam zoho laha neo modi fa Am im ve fa dam bake vahokedam guru damali meedam bak ame. Labi im dam zoho laha neo modi fa damat amu aaha vabna meedume damat aame àvodem im feàna meedam damali meedam bak ame. Labi im dam zoho laha neo modi fa mei gailedaha dam zi laba ulasi fa neàdedam damali meedam bak ame. Labi im dam zoho laha neo modi fa mei na modem biem bake vi tau meedam damali meedam bak ame. Labi im dam zoho laha neo modi fa iho Kristus bake tu vuzehi vahi meedam dam totbaho vuusu im faheme modidam damali meedam bak ame. Labi im dam zoho laha neo modi fa dae im naedamat it aim biemna vameadam damali meedam bak ame. Gi labihadaha bak.
29. Eho etei lab vou vameadaha bak lam um ozom vaba? Alat iba modi vizi teudedaha di lam im ulohona modi vizi teudi meedam vab damat modem bak. Aho gi ahala modi vizi teudi modidam bak. Aho iba dam ahebu modi vizi teudi im ahebu fa Kristusat Aho gagu olu Am im vameadume esmozi laiam damali meedam vab taia? Labi laha Aho iba dam ahebu modi vizi teudi im ahebu fa Alat aha Abadat vameadaha im aime fa dam bake ahate vameaidam damali meedaha vab taia? Labi laha Aho iba dam ahebu modi vizi teudi im ahebu fa am im ve fa dam bake vahokedam guru damali meedam vab taia? Labi laha Aho iba dam ahebu modi vizi teudi im ahebu fa damat amu aaha vabna meedume damat aame àvodem im feàna meedam damali meedam vab taia?
30. Labi laha Aho iba dam ahebu modi vizi teudi im ahebu fa mei gailedaha dam zi laba fa ulasi fa neàdedam damali meedaha vab taia? Labi laha Aho iba dam ahebu modi vizi teudi im ahebu fa dae im naedamat it aim biemna vameadam damali meedam vab taia? Labi laha Aho iba dam ahebu modi vizedume teudi im ahebu fa dam totbaho im naedamat it aim biem dae lam vi aime ozobohudi fa dam bake iademe vameadam damali meedam vab taia? Lahana Alat gi iba ahala modi vizi teudi modidam bak.
31. Labihàmu eho nehi ozo. Uho Ala bake tom gagodam di lam uho neha, “Eba nehi modi vizi teudele. Eba nehi modi vizi teudele,” labihasu modelo àhàki Ala bake tom gagodam di lam gi im bisi feàna, “Oba modi vizi teudese,” lahamda lamota Ala bake tom gagodale. Alat iba modi vizi teudi ame im lam meedam di bisi neà bak lam eho etei uba ab vameadalo modem am bak.
1. Neha: Iho dam bake deeli meedam labe bisi neà bak am bak. Uho neham bak ozomale. Alam Aha Nutabe Neàna labe iba modi vizi teudi iho dam mei dae dam mei dae ahebu biemna lam modeo, abo Alat Am im gagu vou usem dam labe im dae modeo, iba vizi iho vameadamta vameada. Lahana iho dam bake deeli meedam vabameam làhà ibi iho lab vameadam im lam ba damat aim vaba gi teo vameadam bak. Abo lonceng foho di labe dae lafutom biem bak lamti bo foho di labe dae lafutom biem bak lamti ulohote. Ame bak lam gi teole.
2. Labi laha Alat aha Abadat vameadaha im lam Alam Aha Nutabe Neàna labe iba modi ozobohudi fi gatei iho fa dam bake ahate vameaidam bak ame. Labi laha Aho iba modi vizi teudi Aho dam bake vasti damat ozobohudi fi gatei neàdehe vab im zi lam ahebu Aho iba modi iho fa ozobohudi fi gatei vameadam bak ame. Labi laha Aho iba modi vizi teudi bak damat meedam im ahebu iho ozobohudi neàdi meedam bak ame. Labi laha iho Ala bake neha, “Na damat ihimo modem biem im feàna lam Oho iba modi vizi teudele,” lahame tom gagu Aho iba modi vizi teudi iho ame bak lam meedam bak ame. Labihadam bak ahebu Alat iba modi vizi teudi iho ame bak meedamta meeda. Lahana iho dam bake deeli meedam vabameam làhà ibi iho lab meedaha im zi lam Alat ozom di im gi voomnat modem bak.
3. Labi laha iho nehameam, “Im na zi nim ahebu iho dam na vab dama vi loi vi loidalo mozo,” lahame labi gagu meeda. Labi laha neo damat iba neha, “Uho Alat vameadaha im laba, ‘Tufea,’ lahame feàtàle,” lahame iba gagomeam làhà iho ba feàtàm mu iho neha, “Im uho otem neàte. Uho im ve vua vahusum neàte,” lahame labi uledi gagoda. Labihadam bak lam iho meedamta meeda. Lahana iho im ahu dam bake deeli meedam vabameam làhà Alat ba iba neha, “Gi na im feà vabna mode?” lahame labi gagu ame na gohalemna ba iba lodam vabak.
4. Meit fa dam bake deeli meedam dam labe iho gi nehasu meedam bak. Meit iba git modemeam làhà iho gi ozahigeàmu fa vei neàdeda. Labi laha iho meia aame faobekesi iademe vabieda. Labi laha meit modehe im iho ba vi aame ahu adat faki teidem vabak. Labi laha ba im ee vousai it daetbadam vabak. Labi laha ibi iho meedaha im it ozome, “Im abo neàna modeho,” lahame ba naedamat it ozome deelem vabak.
5. Labi laha iho ba meia dae meona git gagu meia modi ladem vabak. Labi laha ba ibi iho neàdem bakta ozome na im meedam vabak. Labi laha meit im gi koena gagohona kehàm vaba gukem bak lam ba modem vabak. Labi laha meit iba fai bak meedam di iho ba vi ozodam bohu meedam vabak. Gi ozahigeàmu fa voou setem bak. Iho meia deeli meedameam làhà ba meia fai bak meedam bak laba uledi vi meedam vabak. Iho fa meia gi im neà bak meedam bak lamota vi ozome meedam bak.
6. Labi laha iho dam bake deeli meedameam làhà dat meida labe aho bisi fai bak meedam bak lam meit iba li ame im lam vameadam di im ba deelem vabak. Gi fa dam im vamdesu meedam dam laba iho deeli meedam bak.
7. Labi laha iho dam bake deeli meedameam làhà im ba meit meedam bak laba aame ozo, “Da lam git meedà?” laham bak lam ozobohunàme ba ame da lam mu voom vabak. Gi ozahigeàmu labihasu vou faodam bak. Labi laha imti vou alem dam laba, “Uho faina mode moio?” lahame ba nasi fet ozomsu esum vabak. Labi laha, “Imti vou alem dam lam gi im vamdesu bakta meeda tame,” lahame ahumdi tu vou faodam bohu meedam bak. Labi laha iho dam bake deeli meedameam làhà iho gi keàtedi meedam damat modem bak. Ba meit iba git meedào? Iba git meedam vabao? Laham bak ba ozome odohali ame da lam voom vabak.
8. Dam ihimo ot deeliame meedam bak lam ba vaitom vabak. Gi labaha bohu vuusdam bak. Eho gi neham bak ozome uba labi gagoho bak. Alam Aha Nutabe Neàna labe Aba Aho meia ahala modi vizi teudi modidam bak lam ba labaha bohu modesdam vabak. Gi fa nehadam bak. Alam Aha Nutabe Neàna labe Aba Aho meia modi vizi teudi ame da labe im Alabada aime ozobohudi fi gatei fa dam bake ahate vameaidam bak lam ba bisi gi labaha bohu meia vi vizedam vabak. Fa ba diamut modi vaitoi setem bak ehe bak. Labi laha Alam Aha Nutabe Neàna labe Aba Aho meia modi vizi teudi ame da labe aho naedat it aim biem dae fa vameadam bak lam laha bisi gi labaha bohu meia vi vizedam vabak. Fa ba diamut modi vaitoi setem bak ehe bak. Labi laha Alat amu dam bake vastehe im lam Alam Aha Nutabe Neàna labe Aho meia lab modi vizi teudi fi gatei ame da labe aho fa dam bake vameadam bak lam bisi gi labaha bohu meia vi vizedam vabak. Fa ba diamut modi vaitoi setem bak ehe bak. Ame di lam meit iba vameadam bak ba ozom vabak.
9. Neham labe labihadaha bak. Abo Alat Aho amu dam bake vasti modi fa ozobohudi fi gatehe im lam iba gi fota zohota modi im ozobohudi fi gateda. Labi laha Aho meia modi im Abada aime fa dam bake ahate vameaidaha im lam laha iba gi fota zohota aime fa dam bake vou vameatedam bak.
10. Lahana ba diamut Alat Aba Aho ozom digat fusi neàdi im Aba Aho ozom zoho ahebu Aho modi fi tatoi neàdehe labe im ab ozobohudi neàdedaham bak. Labi ame di labe Alam Aha Nutabe Neàna labe iba ahala modi vizi teudi meida vekesi modidam bak lam im ba meedam vabak. Gi modi fa setem bak.
11. Eho etei lab gagoho bak lam um biem bake eho vouhodam im nim uho nasi aime ozodale. Eho amu data koena lahasuhu di lam eho im vameadam di gi data koenat im vameadam bakti uloho bak. Labi laha data koena labe vi ozome àhàkem bakti uloho bak. Labi laha data koena mei im aime ozodam bakti uloho bak. Labihadam bak. Lahana em etei fa busaoli data koe diat meedam im lam em ba meedam vabak. Amu gi voou setehe bak. Ame bak lam gi neham bak. Ba diamut im Alat Aba Aho ozom zoho ahebu fa fi tatoi neàdem labe fa ame Alam Aha Nutabe Neàna labe meia ahala modi vizi teudi modidam bak lam gi abehamdem vabna fa setem bakti ulohote.
12. Eho etei lab gagoho bak lam eho fa neo vouhodase. “Ala akatihasu meedam Alat mode?” laham bak lam im etei bisi ozobohudi fi tatoi neàdehe vabak. Abo, “Na lam anat mode?” lahame itaamna ve aasome modeha itaamna gihobuli vi aam biem bakti ulohote. Lahana ba diamut, “Ala akatihasu meedam Alat mode?” laham bak lam ahebu fa fi tatoi neàdem di lam im ba im meida vekem vaba abo gi ame im ahebu ozobohudem bak. Abo damat im dauha ot aaiam labe bisi aame ozobohudem bakti ulohona modem bak. Neham bak. Etei nim Alat iba modi fi gatehena lam im gi fota zohota ozome ozobohudehe bak. Lahana ba diamut ame im lam ahebu modi fi tatoi im ba ozobohudem bak. Abo Alat Aho etei nibe im so nim ahebu ozobohudi neàdehe bak lamti ulohona iho fa ba neo Ala bake laha labihasu ozobohudem bak.
13. Labihàmu iho etei gi ame bak lam vou faodam di nibe gi im làtela nehamda nim bisi iho im tombuli meedam im am bak. Ala bake abo tu vuzehi meedam bak bohu modesdam bak ame. Labi laha Alat, “Aho iba ba nehame mode tame,” lahame fet gagoho im laba iho tu ahumdi vou faodam bak ame. Labi laha im dam totbaho bake deeli meedam bak ame. Labihasu iho etei nibe tombuli vuusu meedam im làtela am bak. Lahana ame im làtela labe bisi tombuleheda gi iho dam bake deeli meedam bohu modesdam bak am bak.
1. Iho dam bake deeli meedam bohu vuusdam bak lam bisi iho modi tombalehe im am bak. Labihàmu im vàmtea lam uho a voomule. Abo mahate keàtedi meedam bohu vuusdale. Lahana gi im lada lamota a modemule. Uho laha Ala bake, “Am Aha Nutabe Neàna labe iba nehi modi vizi teudi im Abada meedase. Iba nehi modi vizi teudi im Abada meedase,” laham bak laba mahate labihasu Ala bake tom gagodale. Labi uho labihasu tom gagodam di lam bisi uho Ala bake tom gagu modi vizemda gi im nidi nim am tame. “Alat aha Abadat vameadaha im lam iba modi ozobohudi fi gatei fa dam bake ahate vameaidase,” laham bak lam uho bisi Ala bake tom gagu uba vizemda neàda vàmtea am bak.
2. Eho gi neham bak ozome uba labi gagoho bak. Meit Alam Aha Nutabe Neàna labe aba modi vizi teudi aho naedat it aim biem dae vameadam di lam ba dam bake im vameadam vabak. Gi Ala bake vameadam bak. Neham bak. Meit ba ame dae lam aim di ba vi ozobohudem vabak. Alam Aha Nutabe Neàna labe ame da laba modi vizehe labe Am gi Alat Ahamo modi vastehe im am aha labe futodam bak. Labiha labe meit ame dae lam aim di ba vi ozome ozobohudem vabak.
3. Lahana meit Alam Aha Nutabe Neàna labe aba modi vizi teudi im Alat aha Abada labe gagohoda lam aho aime ozobohudi fi gatei fa dam bake ahate vameaidamda labe im aba aho gagohoda lam gi dam daeti uloho labe damat aidam bak. Labi damat ame im lam aidume vi ozoha, “Im lam fa im ahu vei neàdedume teudedamna mode? Iba vabededamna mode? Im ahu amu dehabaedam bak lam modi fa seti im ahu asimdedume neàdedamna mode?” lahame ozobohudemna am bak.
4. Meit Alam Aha Nutabe Neàna labe aba modi vizi teudi aho naedat it aim biem dae vameadam di lam gi ahamo aba it vabededume neàdem bak meeda. Lahana dat meida Alam Aha Nutabe Neàna labe aba modi vizi teudi im Alat Aba Aho gagohoda lam aho aime ozobohudi fi gatei fa dam bake ahate vameaidamda labe im aba aho gagohoda lam gi dam daeti uloho labe amti Kristus bake tu vuzehi vahi meedam dam totbaho laba vabededume modi neàdedam bak.
5. Eho ozom, Alam Aha Nutabe Neàna labe uba modi vizedume teudi uho naedat it aim biem dae vameadamta neàte. Em ba malem vabak. Lahana Alam Aha Nutabe Neàna labe uba modi vizedume meedamna bisi eho uledi ozomda gi neham bak. Alat aha Abadat vameadaha im lam Alam Aha Nutabe Neàna labe uba modi vizedume uho aime ozobohudi fi gatei fa dam bake ahate vameaidam bak lam bisi eho uledi ozomda am bak. Neham labe labihaha bak. Dat labihamda lam amti Kristus bake tu vuzehi vahi meedam dam totbaho laba bisi modi vabededume neàdedamda am bak. Dat aho naedat it aim biem dae vameadamda lam ba aba aho lab meedaha bak labet modi amti vahehe dam totbaho laba vabededume neàdedam vabak. Lahana ame da labe aho naedat it aim biem dae lab vameadam di lam Alam Aha Nutabe Neàna labe aba neo modi vizi teudi ahamo it ozobohudi fa am dam totbaho laba ahate vameadume dam lam vabededume neàdedameam làhà am fa gi dat amuda lamti uloho bak.
6. Emti vahi Kristus bake tu vuzehi meedam dam oa, uho ozom, Alam Aha Nutabe Neàna labe eba modi vizi teudi gi eho naedat it aim biem dae uba li vameadameam làhà eho uba vabededume um neàdedào? Vabà! Eho gi labihasu uba le vameadameam làhà um ba vabededume neàdedaha vabak. Eho uba li gi nehame meedamta um fa neàdedam bak. Alam Aha Nutabe Neàna labe eba modi vizi em ozobohudi fi gatei Alat dam bake vastehe im lam eba modi fi zeam bitoi eho fa uba li vameadam bak modeo, Alat aha Abadat vameadaha im lam eho aime fa uba li vameadam bak modeo, Alat eba neha, “Im nim ve dam bake vameadale,” lahame eba modi em ozobohudi fi gatei eho uba li vahokedam bak modeo, gi labihasu uba li meedamta uba vabededume um fa neàdedam bak am bak.
7. Eho etei lab gagoho im lam eho nehi vouhodase. Dae modemna ahebu abo mabso feume ladeem dae meedamna ee gagom suling lahamna modeo, labi na etehàso modealahana damat vi voiame ladeem dae meedamna ee gagom kecapi lahamna modeo, ame na lam damat git vou sikimeam làhà, “Ana ladeem dae mode?” laham bak ba vi ozom vabiem bak. Lahana gi iademe vou sikim labet damat, “Ana ladeem dae mode?” lahame aime ozobohudem bak. Bak lamti meit Alam Aha Nutabe Neàna labe aba modi vizi teudi aho naedat it aim biem dae vameadam di damat aim biem bakti ulohote.
8. Labi laha meit omaso visoi iademe omeem vabameam làhà ba dam bak iuba esuhuda ba akati aime fa vahe vaheme ozobohudi ot beluiam bak ahumdi vou faoe? Ba labiham vabiem bak.
9. Uho laha meit naedat it aim biem dae faasi vameadameam làhà ba ame dae lam amat ba vi aime ozobohude. Ba labiham biem bak. Oma dae lam gi ostame bak iuba futoi le setem bak. Gi ame im lam iademe gagom labe damat aime vi ozobohudem bak.
10. Uho neham bak vi ozodale. Im dam bak niba esuhuda debu ahebu dae tamehona ahaladi ahaladiaho. Lahana ame dae lam ba ozom biemnat modem vabak. Meit dae abada dam abadate vameadam di lam ba aim biem vabak. Abo gi ozobohudem tadem bak.
11. Labiham labe meit li eba im vameadam di eho ame im lam aisome modemeam làhà dae lam gi dam mei dae modem labe em aim vabiem bak. Ame da lamti emti gi ot bahagikiahana ozomom labe labihaha bak.
12. Um laha labihaha bak. Meit Alam Aha Nutabe Neàna labe aba modi vizi teudi aho naedat it aim biem dae uba faasi vameadameam làhà um ba laha aim vabiem bak. Labihàmu uho neha, “Alam Aha Nutabe Neàna labe iba nehi modi vizi teudi meedase,” lahame vizelo àhàkedameam làhà gi nehasu Ala bake gagoidale. “Alam Aha Nutabe Neàna labe Aho iba modi vizi teudi iho gi imti Kristus bake tu vuzehi vahi meedam dam totbaho laba modi neàdedamna lamota iba modi vizi teudedale,” lahame gagoidale.
13. Eho etei lab gagoho bak lam gi neham bak ozome uba labi gagoho bak. Meit Alam Aha Nutabe Neàna labe aba modi vizi teudi aho naedat it aim biem dae faasi vameadam di ame da labe laha Ala bake nehame tom gagodale. “Ai Ala oa, Oho laha eba modi vizi teudi eho naedat it aim biem dae lab vameadaha bak lam Oho eba neo modi vizi ame dae lam em naedat ehemo it ozobohudi fa dam bake ahate iademe dam daeti ulohona fà vameadase,” laham bak lam laha Ala bake labihasu vi ozome tom gagodale.
14. Eho gi neham bak vi ozome uba labi gagoho bak. Alam Aha Nutabe Neàna labe eba modi vizi teudi eho naedat it aim biem dae faasi Ala bake tom gagodam di lam em ahu ba vi tau ozobohudi ame im lam Ala bake vameadam vabak. Gi Alam Aha Nutabe Neàna labe Ahamo eba modi vizi teudi em ahat ahamo vameadam bak.
15. Labihameam làhà em akati mode? Làhà eho gi fa dae behàsdese! Neha: Alam Aha Nutabe Neàna labe eba modi vizi teudi eho naedat it aim biem dae ahat ahamo faasi Ala bake tom gagodam bak lam meeda. Labi laha em naedati dam totbaho lamti iho aim neà bak laba vi ozome em ahulat vi tau ozobohudem dae lam Ala bake faasi tom gagodam bak laha meeda. Labi laha Alam Aha Nutabe Neàna labe eba modi vizi teudi eho naedat it aim biem dae ahat ahamo faasi ladeedam bak meeda. Labi laha em naedati dam totbaho lamti iho aim neà bak laba vi ozome em ahulat vi tau ozobohudem dae laha faasi ladeedam bak meeda. Em gi labihadalo modem bak.
16. Eho gi neham bak ozome uba labi gagoho bak. Uho vahi Ala bake vou baedam di lam um dam meidavat Alam Aha Nutabe Neàna labe aba modi vizi teudi aho naedat it aim biem dae am ahat ahamo faasi, “Neàte,” lahame Ala bake vou baedam di lam dam laba tau nusualadaha dam lam ame im lam aime vi ozom biemda alimda lam ba ame lab vou baedam dae lam, “Lo. Imbote,” lahame vi tau vou baedam vabiem bak. Ame da labe aho lab vou baedam dae lam fa aim biem labe labihaha bak.
17. Uho meidavat Ala bake lab vou baedam bak lam neàta neàt. Lahana uho lab meedam bak lam em mali uba labi vameadaha vabak. Lahana dat gi tau nusuhuda alimda labe uho lab vameadam dae lam vi aim biehe labe ba ame lab meedam bak labet aba modi vabiedume neàdem vabak. Eho gi labiham bak vi ozome uba labi gagoho bak.
18. Eho ozoha, Alam Aha Nutabe Neàna labe meia modi vizi teudi naedat it aim biem dae faasi vameadam bak lam bisi modi ba vi vizi vi vizedamda em am bak. Labihadàmu eho gi Ala bake, “Am abo neàte,” lahame vou baedam bak. Lahana eho ozoha, um gi fota vizedume meedam bak.
19. Labihadamnàme emti Kristus bake tu vuzehi vahi meedam dam totbahoti iho fa bakamta vazisi Ala bake vou baedam di lam ebe eho bisi vi ozome uledi meedam bak gi nehadam bak. Dam gi nusualadaha dam biem bak labna zohàme eho vi vahokedam bak laba vi ozome dae gi zohobuna abo damat aim bibada vameadam bak lam bisi ebe eho uledi meedam bak am bak. Em ba ame Alam Aha Nutabe Neàna labe eba modi vizi teudi eho naedat it aim biem dae bohulana abo damat aim biem dae abo dam bake vabiedume fa neàdem biem dae lam vameadam bak lam em ba bisi uledi meedam vabak.
20. Emti vahi Kristus bake tu vuzehi meedam dam oa, data koe diat im ahulat vi ozome meedam bak lamti ulohona a vi meedamule. Uho vedi nehi ozo, “Alam Aha Nutabe Neàna labe uba modi vizi teudi uho naedat it aim biem dae faasi vameadam damat modem labe Alam im lam ahebu um ab modi ozobohudi neàdeham tame,” lahame labihasu ozome daetbadam labe um gi data koe diat im ahulat vi ozom bakti ulohona meedam bak. Um gi, “Datati ulohona meedase,” lahame àhàkemeam làhà gi data etei faahada im biehebuda abo, “Fai bak neame?” lahame vi ozom vabiemda lamti uloholi faina a meedamule. Gi fa dam busao ahulat iademe vi ozome meedam bakti ulohona meedale.
21. Aham di iube Yahudi dam labe im tai ahamda labe iho Alat gagoho im mu voedahemu Alat ame dam laba neha, “Ba diamut Eho uledi uba fakemoholehe dam labe fa uba nehi beome itaholedam bak ehete,” lahame Alat ame dam laba vou faovoem dae gagu esuhu bak ehe bak. Alat lab ozoho bak lam dat ahamda Yesayat Alat Vameadaha Im Toedahana laba nehi toedume esuhu bak. “Làhà Em gi um Israel dam bake dam bahagikida uho aim biem dae vameadam dam lamohoda, ‘Im Ebeda vou vameatedale,’ lahame bak ubuda laba oudume omsu tame. Lahamnàme um ba im Ebeda aidam moudume meeda tame.”
22. Lahame Yesayat labihasu toedume esuhemu eho nehi ozo. Alam Aha Nutabe Neàna labe meia modi vizi teudi naedat it aim biem dae faasi vameadam bak lam gi dam Kristus bake tu vuzehem vab dam laba modi iho ame bak lam aame ozo, “Oo, bak lam ana im feà meedamnat mode?” lahame labi fet aame àvodemnat modem bak. Ba dam Kristus bake tu vuzehehe dam laba modi iho fet aame àvodemnat modem vabak. Lahana Alat aha Abadat vameadaha im lam Alam Aha Nutabe Neàna labe meia modi ozobohudi fi gatei fa dam bake ahate vameaidam bak lam gi dam Kristus bake tu vuzehi vahi meedam dam labe iho aime ozo, “Làhà Alat iba aame ozahit deeli im neà bakta meedam Ala ame?” lahame labi fet aime vi ozobohudemnat modem bak. Ba dam Kristus bake tu vuzehem vab dam laba modi iho fet aame ozobohudemnat modem vabak.
23. Eho etei lab gagoho bak lam um biem bake eho fa uba nehi vouhodalo mozo. Uho Kristus bake tu vuzehi vahi meedam dam labe uho Ala bake vou baedalo modemu bakamta vazisi meedume modeha Alam Aha Nutabe Neàna labe uba modi vizedume um ahebu naedat it aim biem dae lam ab faasi vameadamam. Labi ame di lam Kristus bake tu vuzehi im Abada meedaha vab dam modeo, dam ame im lam vi ozome ozobohudem biem dam labe modeo, ame dam labe uho lab meedam bak laba vi oli aameam làhà gi àvodi neha, “Um baka ana im meedam damat mode? Um gi ahusobuli ostame meedam dam taia?” lahame uba labi gagom bak.
24. Lahana labiham vabameam uho bakamta vazisi meedume modeha Alat aha Abadat vameadaha im lam Alam Aha Nutabe Neàna labe uba modi vizedume uho aime ozobohudi fi gatei fa dam bakda daeti ulohona fa dam bake ahate faasi vameadameam làhà ame di labe dat Kristus bake tu vuzehi im Abada meedaha vabda labe modeo, dat ame im lam vi ozome ozobohudem biemda labe modeo, ame da labe vi oli uho lab vameadam dae lam vi aimeam làhà ab vi ozobohudemam bak. “Làhà em faina meedam dàt mode?” laham bak lam it ozome ab ozobohudemam bak.
25. Labi ame da labe uho lab gagodaha im zi lam aidume vi ozo, “Eho im lada lam fai bak modehe. Eho im lada lam fai bak modehe,” lahame labi vi ozodume aba aho am ahu ad iuba vastehe im lam ahebu ab modi fa tombalemam taia? Labi aho lab vastehe im lam ahebu modi tombalehemu aho fa vei ladi am ahu adat vei iedi Ala bake, “Am abo feàte,” lahame ab faasi vou baedamam bak. Vou baedam labe damat vou faodahit ame da labe ab gagodamam. “Lo. Uho lab meedam bak lam Alat uba tau vuusdam labe uho meedalo,” lahame ahate uba labi gagodam bak.
26. Emti vahi Kristus bake tu vuzehi meedam dam oa, uho bak ubuda laba bakamta vazisi Ala bake vou baedalo modem di uho gi nehame meedam dam taia? Meit Alat aba modi vizi teudi aho ladeem dae ladeelo ozoda. Labi meit Alat aba neha, “Im nim dam bake nehasu vahokedale,” lahame Alat aba modi ozobohudi aho fa dam bake vahokedalo ozoda. Labi meit Alat aba modi am ahu ad iuba modi ozobohudi fi gatem im aho fa dam bake ahate vameadalo ozoda. Labi meit Alam Aha Nutabe Neàna labe aba modi vizi teudi aho naedat it aim biem dae faasi vameadalo ozoda. Labi meit Alam Aha Nutabe Neàna labe aba modi vizi teudi dat meida labe aho naedat it aim biem dae vameadam bak lam modi ozobohudi fa dam bake vameadalo ozoda. Labihada. Labihadamta labiha. Lahana ame bak lam meedam di lam bisi vi ozome iademe meedam bak gi neham bak. Umti Kristus bake tu vuzehi vahi meedam dam ahebu modi neàdedume im ahu vei teudedam bak laba uho vi ozome ame baket ahala modidale. Bisi uhumo modi neàdi um ahu vei teudem bak lamota vi ozome ame baket a meedamule.
27. Uho gi nehale. Uho bakamta vazisi Ala bake vou baedalo modem di lam Alam Aha Nutabe Neàna labe uba modi vizi teudi uho naedat it aim biem dae faasi vameadam bak lam uba modi vizi teudemeam làhà dam behàsu modeo, dam làtela modeo, modem neàte. Labi ame bak meedam di gi nehasu meedale. Amu nasi dat vàmtea labe aba modi vizehe im lam nasi vameadume neàdi fa neo dat meida labe im aba modi vizeheda faasi vameada. Labihadale. A amediat faasi vameadume dahobuedamule. Labi laha ame lab vameadam im lam meit Alam Aha Nutabe Neàna labe aba modi vizi teudi ame naedat it aim biem dae lam modi fa ozobohudi fi gateheda labe ame im lam dam bakda daet iademe ahate dam bake fa vameadale. Ba ame im lam gi vou esum vabak.
28. Uho bakamta vazisi Ala bake vou baedalo modem di lam ame naedat it aim biem dae lam modi fa ozobohudi fi gatei fa dam bakda daet iademe ahate dam bake fa vameadamda vabalemeam làhà dam Alam Aha Nutabe Neàna labe iba modi vizi teudi iho naedat it aim biem dae lam dam bake faasi vameadalo àhàkem dam lam nasi dae vabalele. Gi dam ihimo ame dae lam im ahu ad nibe Ala bake vameadamta neàte.
29. Labi laha uho bakamta vazisi Ala bake vou baedalo modem di lam dam totbaho Alam Aha Nutabe Neàna labe iba modi vizi teudi iho abo Alat aha Abadat vameadaha im aime im ahu modi ozobohudi fi gatei fa dam bake ahate vameaidam dam lam laha labiha. Dam behàsu modeo, làtela modeo, labihasu dam bake vameadamta neàte. Labi gi nusualadaha dam labe dogoit iademe vou faodam labe, “Ame dae lam Alat dam laba modi vizi dam labe labihasu vameadào? Alat dam laba modi vizehe vabna dam labe gi giomim vameadào?” laham bak lam gi nusu vou faodamta neàte.
30. Labi vou faodameilahit Alat dat meida laba neo modi im Abada meida ame da labe am ahu ad iuba modi ozobohudi fi gatei fa ahate dam bake vameadalo modemeam làhà dat amu duzu ahate vameadamda lam nasi fa dae abada teohet vabali vou faode. Labi dat etei modi vizeheda labe im abada fà vameadase.
31. Uho labihasu iademe meedalo ozodameam làhà gi dat meida labe im abada amu nasi modeme neàdi fa neo dat meida labe im abada mode. Labi neo meit im abada mode. Gi labihadume ame dam lam ahebu uloholi neàdem bak am tame. Ame bak lam dam totbaho ahebu ibi iho meit Alam im vameadam bak lam aime im ahu teudedam bak am tame.
32. Neham bak. Dam totbaho Alam Aha Nutabe Neàna labe iba modi vizi teudi iho Alat aha Abadat vameadaha im lam aime im ahu modi ozobohudi fi gatei fa dam bake ahate vameaidam dam labe ibi iho ame im lab vameadam di lam ihimo naedamat fa teohet dae vabali fa faasi vameada. Teohet dae vabali fa faasi vameada. Gi labihadam meo damat modem bak.
33. Iho Ala bake vou baedalo oedume meedam di labe dam ahebu meit im aba aho ozohoda meeda. Meit im aba aho ozohoda meeda. Labihasu im ahala modidume dahobuedam bak lam Alat ba ozome deelem vabak. Gi iademe dat vàmtea modi vàmtea modidam bak lam Alat Aba Aho deelem bak am bak. Dam Kristus bake tu vuzehi vahi meedam dam abo Alam damali im vamdesu meedam dam num debu iudu iumti num debu iudu iumti labihasu ibi iho modi baleàlehe bak lam uho laha ame bak labet meedale.
34. Dam Ala bake vou baedalo bakamta vazisi oedume meedam di lam lahi ba dae bum kai. Gi daleà vou faodam bak. Ba meia im vameadam vabak. Gi am dat fa aba im gagom dateli ozahit uledi am im aime meedam tadem bak. Ame bak lam Yahudi dam labe ibi iho gagu fi hasi vàmadi esuhu im am bak.
35. Labi laha ame bak lam meedam di lahi labe iho aihi im zoho vabiemeam làhà fa num bake le esdam di meit ahamo am date vi gagu aiale. Dam vahi Ala bake vou baedalo modem di lahit fa gagu vi ailo modem bak lam ba neà vabak.
36. Eho etei lab vameadaha im zi lam um Korintus dam akati im lam meedam mu modela? Làhà Alam Im Neàna ahamte faasi vou vameatedaha bak lam uho ahamte alimeat faasi vou vameatedahe? Làhà Alam im neàna lam vou vameatedaha di lam gi uhumo aime novahe? Vabà! Um git ozoho.
37. Uho meit nehameam, “Alam Aha Nutabe Neàna labe eba modi vizi teudi eho Alat aha Abadat vameadaha im aime ozobohudi fi gatei fa dam bake ahate vameaidamda meida em am bak,” lahame labi gagomda modeo, labi, “Alam Aha Nutabe Neàna labe eba modi vizi teudi eho nehi meedamda meida em am bak,” lahame labi gagomda modeo, labihamda ehelemeam làhà ame da labe laha ebe eho uba lab toedaha im lam ahebu, “Imbote! Paulusat iba nib toedaha im nim gi Alat aba gagu am im dedateli toedaha imot modem bak,” lahame laha tu vuzehi gagodale.
38. Lahana ame da labe ebe eho lab toedaha im lam, “Alat eba gagu toedaha vabak,” lahame tu vuzehem momeam làhà iho nehi ozo, “Làhà Alam Aha Nutabe Neàna labe ba ame da laba modi vizi teudehe vabak,” lahame im ab ozobohudemam bak. Labihàmu ame da labe aho vameadam im lam ba a aime tu vuzehemule. Gi ailahigeàmu voole.
39. Labihàmu uho Ala bake tom gagodam di lam uho neha, “Eba nehi modi vizi teudele. Eba nehi modi vizi teudele,” labihasu modelo àhàki Ala bake tom gagodam di lam gi, “Alat aha Abadat vameadaha im lam Alam Aha Nutabe Neàna labe uba modi vizi ozobohudi fi gatei fa dam bake ahate vameaidam bak lam uba modi vizi teudele,” lahame tom gagodale. Lahana dam totbaho Alam Aha Nutabe Neàna labe modi vizi teudi ame dam labe iho naedat it aim biem dae faasi vameadam bak lam a malemule.
40. Lahana uho Ala bake vou baedalo oedam di ame lab meedam bak lam ahebu gi iademe vamdesu vou meedale.
1. Emti vahi Kristus bake tu vuzehi meedam dam oa, eho amu uba le Kristus labe Aho meedaha Im Neàna lam vou vameatedaha bak lam, “Ame im lam akati modemna modela?” laham im eho uba neo vi vameadalo mozo. Ame im lam uho amu gi tu vuzehi keàtedi meedume etei ab vou fuham bak.
2. Ame eho amu uba lab vou vameatedaha Im Neàna lam uho mu vooho vaba abo vuusu vagamsu meedam labe uho faina meedam bak lam Alat uba beom vaba Aho um soat vausu fa vei neàdedam bak am bak. Lahana uho ame im lam vuusu meedam vabameam làhà uho amu Kristus bake lab tu vuzehehe bak lam gi modi teolem bak.
3. Ame eho uba le lab vou vameatedaha im lam gi im Boehàda Yesusat eba amu vameadahana eho aime vuzehi fa uba neo vou vameatedaha bak. Ame im tombuda lam gi neham bak. Iho faina meedam bake Yesus Aho ot vai fai Dateli damat ve ut tetehesuhunaso laba paku dou eloho bak. Labi eloi damat Am koeiso ve ke bumat laba vou oli esu baguamdehe bak. Labi usi behàsdi Am eloho bak labet Alat modi fa ahedi usaha bak. Ame im lam dat ahamda Alat Vameadaha Im Toedahana laba labi nasi fet toeme esuhu im am bak.
5. Labi fat ahedi neàdi amu nasi Petrus bake le duzu Am alihi fi hi bak. Labi ba neo Aba tu vou gohatem dam totbaho lam abo dam sebelas laba le duzu am alihi fi hi bak.
6. Labi ba neo dam Aba tu vuzeheheda abo lima ratus vafozi abo dam duada zi feà totbaho laba le duzu Am alihi fi si ame dam zi feà labe aadaha bak. Ame eho etei lab gagoho dam zoho lam eloda. Labi dam zoho etei ahe lahasu. Labihaha bak.
7. Labi ba neo Yakobus bake le duzu Am alihi fi hi bak. Labi ba neo Yesusat Aho gagu olu Am im vameadume esmozi laiam dam ahebu laba le duzu Am alihi fi hi bak.
8. Labi Am alihi neo fi si ba aame novahada em am bak. Lahana em abo im Boehàda Yesusat Aho gagu olu Am im vameadume esmozi laiam datelehe bak lam em gi ame bak modem bak ozoho vabna ab modeham bak. Abo lahit zubuli data faam bak fuhu vabna auna faam bakti ulohona modehe bak.
9. Eho gi neham bak ozome uba labi gagoho bak. Eho amu dam Kristus bake tu vuzehi meedam dam abo Alam damaleheda eho vabidume dam zoho lam eho beodaha bak. Labiha labe em ba Kristusat Aho gagu olu Am im vameadume esmozi laiamda totbahoti emti uloho vabak. Em ba bisi feàda modem vabak. Damat eba neha, “Kristusat Aho gagu olu Am im vameadume esmozi laiamda meida am tame,” lahame eba labi gagomeam em gi ladem bak.
10. Lahana Alat gi eba ozahit deeli im neà bak meedàmu em ame dateli eho Am im meedam bak ab modi baleàleham bak. Labi Aho eba ozahit deeli im neà bak meedaha bak lam ba teolehe vabak. Aho gi ahamte eba lab gagoho di labe eho ame im ve faasi vou vameatedume ab bohulaleham bak. Yesus Aho Am im vameadume esmozi laiam dam totbaho mahate eho keàtedi meedam bak lamti uloho vabak. Gi fota meedaha bak. Lahana eho lab keàtedi meedaha bak lam ehemo keàtedi meedaha vabak. Alat eba ozahit deeli im neà bak meedam labet modi eho labi meedaha bak.
11. Labihàmu eho ame Im Neàna lam uba vameadam bak modeo, Yesus Aho Am im vameadume esmozi laiam dam meida labe uba ame im lam vameadam bak modeo, laham bak lam ba bisi ozom bak modem vabak. Bisi ozom bak gi neham bak. Iho gi Alam Im Neàna vàmtea lam uba vameadume uho tu vuzehehe bak lam bisi ozom bak am bak.
12. Iho Yesus Aho gagu olu Am im vameadume esmozi laiam dam nibe iho amu neha, “Kristus eloho bak labet Alat modi fa ahedi usaha bak,” lahame vou vameatedamnàme akati modi um dam zohot nehame gagodàla? “Dam elodaha bak labet ba fa ahededume usnadam vabak,” lahame labi gagodàla?
13. Um ozom vaba? Dam elodahada zi ba fat ahededume usnadam vabameam làhà Kristus Aho eloho bak labet Alat laha modi fa ahedi usam vab taia?
14. Kristus Aho eloho bak labet Alat modi fa ahedi usam vabameam làhà iho uba lab vou vameatedaha Im Neàna lam, “Gi ostam imot modem bak,” laham bak. Labi uho Kristus bake lab tu vuzehehe bak lam, “Gi ostame tu vuzeheha,” laham bak. Ne, ame im lam gi giomimnat modemeam im ba akati tu vuzehi neàdedà?
15. Dam elodahada zi ba fat ahededume usnadam vabameam làhà im amu neha, “Kristus Aho eloho bak labet Alat modi fa ahedi usaha bak,” lahame iho dam bake lab vou vameatedam im lam, “Iho gi giomim vou vameatedam bak,” laham bak. Uho nehaha labe eho labi gagoho bak. “Dam elodahada zi ba fat ahededume usnadam vabak,” lahame labi gagodameam làhà Kristus laha Am eloho bak labet Alat modi fa ahedi lab usahamom vabak.
16. Dam zohot lab gagoho bak lam eho vi ozoha, em gi ahole vi ozoho bak. Dam elodahada zi ba fat ahededume usnadam vabameam làhà Kristus Aho amu lab eloho bak labet Alat modi fa ahedi lab usahamom vabak.
17. Labi Kristus Aho amu lab ot vai eloho bak labet Alat modi fa ahedi usam vabameam làhà uho Kristus bake lab tu vuzehehe bak lam gi ostame tu vuzehi teolem bak. Labi uho faina meedam bak lam Alat modi fa faamodaha vaba um gi labaha bohu vuusdam labet modi Alat uba beom bak.
18. Labi laha dam amu Kristus bake lab tu vuzehi Amti vou ali ahu vàmadi im Abada meedume elodaha dam lam laha ba fat ahededume usnadam vabak. Abo gi iho faina meedam bak fa faamom bili gi labaha bohu vàhàdedume seddam bak.
19. Um nasi ozomale. “Iho asum ahoba iuba vamna Kristusat iba ba lo tame,” lahame tu vi ozodam labe naat iba vabidam bak lam geàmu iho gi labaha bohu Kristus bake tu vuzehi meedam bak. Lahana iho gi modeme vanamai teoli ame na vam vabameam làhà dam bak niba esuhuda iba ozom di, “Im bisi aam faobekem dam im am taia?” lahame ozom bak.
20. Lahana um dam zohot git ozodalo. Bisi imbo bak gi neham bak. Kristus Aho amu eloho bak labet Alat alimeat modi fa ahedi usahada Am am bak. Aho labiha labe iho ozoha, im nidi nim laha imbo bak. Iho Kristus bake tu vuzehi meedam dam nim im laha ba elodam di gi ame bak lamti ulohona fat ahededume usnadam bak.
21. Eho gi neham bak ozome uba labi gagoho bak. Dat ahamda vàmtea Adamat aho faina modehe labe dam bakda ahebu elodam bak ab modi vizeham bak. Labi laha Dat vàmtea Kristusat Aho lab modehe bak labet modi dam bakda ahebu elodam bak lam fa ahededume usnadam bak ab modi vizeham bak.
22. Nehaha bak. Im dam bakda nim ahamte modi debuli vou susualeheda Adam labe aho faina modehemu elom bak iba dam bak dama ab modi vizi meedamam bak. Labi laha iho Kristus bake tu vuzehi Amti vou ali ahu vàmadehemu iho ba laha elodam di im eloho bak labet Alat modi fa ahededume usnada tame.
23. Lahana Kristusti imti iho ame bak lam amediat modem kaio. Gi faheme ahala modida tame. Amu ahamte alimeat eloho bak labet Alat modi fa ahedi usahada Kristus am bak. Labihàmu ba diamut Kristus fa bak niba lem di Am damalehe dam lam ba neo elodaha bak labet Alat modi fa ahededume usnada tame.
24. Labi usnadume neàdi dam bakda vuusdam boehàdatebo zi lamti boehàda totbaho zi lamti abo dam ee vousaha dam totbaho lamti ahebu Ala bake faki moudaha dam labe iho im dedamali meia vuusu im vahokedam bak lam abo ame feà bak lam Kristus Aho fa faamome seddume neàdi iho bak damat bak niba meedam im lam ahebu Alat modi novai ab vaitomam tame. Labi neo Kristus Boehàdatebo vàmadi dam bake lab vuusu im vahokedam bak lam Aho fa Am Ai Ala bake ub gagu Aho ab ot vamam tame.
25. Lahana Am Aiat ot vaha vab di iube Kristus Aho dam bake lab vuusu im vahokedam bak lam Aho amu nasi teohet labihasu vuusdamehamdi dam Aba fakemoholi moudaha dam lam ahebu Aho beodamehamdi fa vàhàdedume neàdi vaitom di am bak.
26. Labi ame di labe Kristus Aho ba novalo modi vaitom im gi elom bak am bak. Aba tu vuzehi im Abada meedam dam lam Aho ba modi ame dam labe iho elodaha bak labet Aho modi fa ahededume usnadume neàdehezobe naat dam bake modi eloidam bak lam Aho modi fa ab vaitoi setemam bak.
27. Eho etei lab vameadaha im lam aham di iube meit Alat Vameadaha Im Toedahana laba nehi toehe im ehete. “Alat fa ame Da laba modi feà Dateli Aho na ahebu vuusdam labe fa Aba ulededa tame.” Lahame labihasu toehemu iho nehi ozobohudehe bak. Na ahebu modi fa Kristus bake ulededa tame. Lahana iho neha, “Làhà Kristus fa Ala bake laha vuusu im vahokedà?” lahame ba labi git ozom vabak. Neham labe labihaha bak. Na ahebu modi fa Kristus bake ulededume Aho fa feà Dateli vuusdam bak lam debu Alat modehe labe labihaha bak.
28. Labi Alat Am Adat Kristus laba modi Aho na ahebu vuusdume fa Aba ulededume neàdehezobe Kristus Ahamo ahit fa feà vab Dateli fa Am Ai Ala bake Aho ahit uledehemu Alat fa Aba ab vuusdamam bak. Labiha labe Alam ee vousai bisi feà datebolehe labe bak iumti bak iumti ahebu abobo ab vuusdamam bak.
29. Emti Kristus bake tu vuzehi vahi meedam dam oa, um dam zohot amu neha, “Dam elodahada zi lam ba fat ahededume usnadam vabak,” lahame uho lab gagoho bak lam imbodemeam làhà um akati modi um dam totbaho amu valo baptislehe vabna elodàmu uho vedi fa ame dam laba ot vai fa valo baptisleidàla? Dam elodahada lam ba fat ahededume usnadam vabna um akati ostame ot vai fa valo baptisleidàla? Uho labi modemeam làhà um gi teoli vanamai voe taia?
30. Labi em ba gi im lada lamota ozodam vabak. Iho Alam Im Neàna lam vou vameatedam dam nibe iho ame bak lam meedàmu dam iba fakem damat iba neha, “Fà beose,” lahame meedam dam dihasi iba tahi vabida. Labi neo dihasi iba tahi vabida. Gi amu di iube labihasu faasi vou mode ledume etei di nim ab vou fuham bak. Lahana dam elodaha dam ba modi fa ahededume usnadam vabameam làhà im gi teoli vanamai voom bak.
31. Ba oa, eho ame Im Neàna lam vou vameatedam bake dam eba fakem dam labe neha, “Em otese,” lahame labi bisi dihasi gagoda. Dihasi gagoda. Labihadam bohu meedam bak. Ba oa, em ba giomim gagom kaio. Abo imbote. Lahana eho gi ozahigeàmu keàtedi meedam bak. Labi em laha uho im Boehàda Yesus Kristus bake tu vuzehi Amti vou ali ahu vàmadi meedam bak lam em abo ozobohudi deeli fa dam totbaho bake vou daetbadam bak.
32. Labi laha num debu Efesus niba azihi dam bisi fai bak meedam dam zi nibe, “Eba beose,” lahame vazisi vabidume modeha em gi keàtedi duzuhu bak. Dam lam abo doho seagam feàdati ulohona eba aame nohisidàmu eho gi aet ot beluiame em fa ahedi duzuhu bakti ulohote. Lahana dam elodaha dam ba modi fa ahededume usnadam vabameam làhà eho lab meedaha im lam gi teoli vanamai voomnat mode taia? Làhà ame dam labe fat ahededume usnadam vabameam làhà akati modi iho gi dat ahamda Yesaya labe aho nehi toeme esuhu baket gagodam vaba? “Im dihasi elodam bake imo gi etei digat nibe nasi vazisi deeli na zi feà àda. Anggur oo vaksa zi feà udda. Labihadume vaitose. Ba eloi na àm biem bak.” Làhà imo gi etei ahedi modesdume novam bake gi labihadam vaba?
33. Lahana dam zohot neha, “Dam elodaha bak labet ba Alat modi ahededume usnadam vabak,” lahame lab vameadam dam lam uba vizem bak labna zohàme um a giomim git vi ozodamule. Dam zohot uba giomim vameadam dam labe uba vizi uho fa faina vi tau meedume vàhàdem bak labna zohàme um a netàdemule. Fa fi hasi ahala modidale.
34. Eho uba labi vameadàmu ubu uho faina meedam bak laba vi ozodume aha teksi ame bak lam nasi voedume uho amu iademe ozodam bak lam fa meedale. Neham bak. Um dam zoho labe abo Ala bake mahate ozome ozobohudem vaba abo vabili ahusobuli meedam lahasuhu damat modem bak. “Um fà ladese,” lahame eho uba ahit labi gagoho bak.
35. Eho neha, “Dam elodahada zi ba fat ahededume usnada tame,” lahame eho uba lab vameadahanàme um dam totbaho labe vedi, “Imboo?” laham bak vabi vi ozodam lahasuhu bak. Uho vedi vabi nehi vi ailo gagoda. “Dam elodahada zi lam ba akati modi fa ahedi usnadà?” Labi laha, “Ame koei lam koeili setehena anat modi fa sobuli ahededàla?” lahame vabi vi ailo vameadam damat modem bak.
36. Aiee! Uho labi gagodam labe um abo ahusobuli mode! Um ozom vaba! Uho kait oo dem di labe amu nasi dedesu bauleme ahamo bak ad iuba bedi koeilem labe loubedi futom bak.
37. Labi laha kait oo dem di modeo, na neb amomoi dem di modeo, ba ame na labe am so dem vabak. Gi am oota bake deddam bak.
38. Labi ame na neb lam deddume neàdi Alat gi Aba Aho amu fet ozome esuhu bak labet modi ame na neb dehe bak labe soaedam bak. Labi Aho modi ame na neb labe soaedam di labe gi ahala modidume soaedam bak. Kait oo nehasu modesu. Gandum oo nehasu modesu. Labihadam bak.
39. Uho laha nasi na bake azimna zi ahebu labe im so laba vi ozodale. Ame na zi lam so uloho vabak. Gi so ahala veimdi veimdidaha bak. Dam so amomoi. Labi bume so amomoi. Labi bohe so amomoi. Labi nohubake azimna zi labe im so laha veimdi veimdiame modesuidaha bak. Labihadaha bak.
40. Labi laha asum ahoba iuba modealahana zi lam laha alihi ahala veimdi veimdidaha bak. Abo ala digadda modeo, ala useheda modeo, falo zi modeo, labihasu ba na bake modealahana nimti uloho vabak. Asum laba modealahana zi laba damat aam neà bak vou baedam bakti fa bak niba modealahana zi niba aam neà bak vou baedam bakti uloho vabak. Ahala vou baeidam bak.
41. Ala digadda fauhaedam bak laba damat aame vou baedam bak amomoi. Labi laha ala useheda fauhaedam bak laba damat aame vou baedam bak amomoi. Labi falo zi labe fauhaedam bak laba damat aame vou baedam bak amomoi. Labi ame falo zi lam laha faheme fauhaedam bak laha ahala fauhaedaha bak.
42. Na ahebu labihadaha labe Alat dam elodaha dam lam ba modi fa ahededume usnadam di laha labihadam bak. Neham bak. Im etei dam elodam di koeiso bake baumsu koeilem meo bak. Lahana ba diamut Alat dam elodahada zi ba modi fa ahededume usnadam di labe Aho iba modi eloi koeilem gikina labahanaso fa modesu ahededume usnada tame.
43. Iho nehi ozo. Iho bak niba ahedi esdam di im gi alihi nemahudam meot. Fa gailemoholedam meot. Fa nu vabali na modem biem meot. Labihàmu ba eloi damat im koeiso bake baumsum di lam gi aam faobekemna baumsum bak. Gi olebana na modem biemna baumsum bak. Lahana ba diamut Alat dam elodahada zi modi fa ahededume usnadam di lam Aho iba modi im so aam neàna abo damat aame vou baedamna sobu modesu ahedi usnada tame. Aho iba modi teudi ba eloi koeilem gikina sobu modesu ahededume usnada tame.
44. Iho eloi damat im koeiso baumsum di labe gi im bak dam soali baumsum bak. Lahana ba diamut iho elodaha bak labet Alat modi fa ahededume usnadam di labe im bak dam soali modesuhu bak lam fa vei seti asum ahoba iuba azihida soali modesu usnada tame. Ba fa vazidazi modem biem bak. Eho gi neham bak vi ozome uba labi gagoho bak. Iho bak niba esdam di im gi bak dam soali esdam bak. Làhàmu iho ba diamut asum ahoba iuba le azim bake im bak damat soali modesuhu bak lam fa vei seti fa asum ahoba iuba azihida soali modesum bak.
45. Eho etei lab gagoho bak lam meit Alat Vameadaha Im Toedahana laba nehi toehena nimti ulohote. “Alat ahamte alimeat modi dateleheda Adam am. Ame da lam bak niba azim bake Alat ahit aba modi oheme im ozobohudehe bak.” Lahame labihasu toeme esuhu bak. Lahana Kristus labe Aba Aho modehe bak laba iho vi ozom di Aba Am ee gi, “Adam bada,” lahame talum neàte. Neham bak. Kristus labe Aho Am damalehe dam labe iho asum ahoba iuba azim bake im so fa ahe neàna bohu vuusdam bak modehe labe Am ee, “Adam bada,” lahame gagodam neàte.
46. Uho nasi vi ozodale. Alat amu nasi iho asum ahoba iuba le azim bake nasi asum ahoba iuba azihida soali iba modesuhu vabak. Gi iho bak niba azim bake im bak dam soali amu nasi iba modi esuhu bak. Labi ba neo diamut dam asum ahoba iuba azihida soali modi esu tame.
47. Labi uho Alat ahamte alimeat modeheda Adam lam modehe bak laba vi ozomale. Ame da lam modehe di lam Alat gi bakbu visoi modi dateli bak niba azihi bak. Lahana Kristus ee, “Adam bada,” lahame taluhuda lam gi asum ahoba iube bak niba lehe Dàt modem bak.
48. Im dam bakda debu ahebu Adamat vou faat lehe labe im so nim gi am soti ulohona modehe bak. Lahana ba gi labihasum vabak. Iho Kristus abo asum ahoba iube fa bak niba leheda laba iho tu vuzehi Amti vou alem labe im laha ba diamut so Abada asum ahoba iuba modesdam soti ulohole tame.
49. Lahana etei di nibe iho bak niba esdam lahasuhu di nim im so nim gi Adamam so modehe bakti ulohona lahasuhu bak. Labihahanàme ba diamut labiham vabak. Adamam soat modesuhu bakti uloho vabak. Fa vei seti gi Kristusam soat modesuhu bakti ulohona fa modesu tame. Asum ahoba iuba le azim bake labiham bak.
50. Emti Kristus bake tu vuzehi vahi meedam dam oa, eho etei lab vameadaha im lam uho biem bak lahasuhuna zohàme neo uba nehi vi vameadalo mozo. Alat ahit iho bak niba azim bake im so nim vaseati nuti faati modealaha bak. Lahana Alat Aba Aho dam vuusu im vahokedam bak asum ahoba iuba im ba so ibida nimti ulohona labihasu le azim biem bak. Asum ahoba ium ba eloi koeilem bak vabak. Labihàmu iho im so bak niba eloi koeilemna nimti labihasu laba lam biem bak.
51. Labihàmu um nasi aimale. Alat amu di iube dam bake vastehe im eba ba modi fi gatehena um biem bake eho etei uba ahate vameadalo mozo. Neha: Im Boehàda Yesus ba fa lem di im dam Kristus bake tu vuzehehe dam ahebu elodume setehe vabna dam dua zoho ahe lahasuhuna am ba le tame. Lahana ame di lam im dam aheda modeo, elodaha dam modeo, ame di labe Aho modi im so fa veimdedam bak ehete.
52. Im so fa veimdedam bak lam kehàm vabnat moz. Abo gi damat fako aubekesi fa neàdem bakti ulohona abo asum boz velem bakti ulohona mode tame. Labi ame di labe Alam im vou usem dam zi labe im omati ulohona trompet labe dae feàna budda tame. Labi na dae lam aidam di labe damat ozo, “Bak niba meedam im ahebu ab vaitoi seddalo modem ame?” lahame fet aime ozobohudemna am bak. Labi ame oma dae lam buddam lahasuhu di labe dam Kristus bake tu vuzehehe dam amu elodahada zi lam fat ahededume usnadume im so fa veimdedume ahena elom gikina labahana modealada. Labi im dam aheda laha ame di labe im so fa veimdedume ahena elom gikina labaha bohu modesdamna modealada. Labihada tame.
53. Eho etei lab gagoho bak lam ba modehe vaba voom vabak. Abo modem bak. Neham bak. Iho ahedi bak niba esdam di im gi ek damat modem labe im so nim eloi koeili setemna ehe labe fa veimdesu so eloi koeili setem gikina abo labahana fa modesuidam bak ehe bak.
54. Labi im ek damat modesuidam so fa veimdedume so eloi koeili setem gikina abo labahana fa modesuidume neàdehezobe meit Alat Vameadaha Im Toedahana aham di iube nehi fet toeme esuhuna lam ab imbodemam tame. “Damat elodam bak lam Alat ab modi vaitoi seteham tame. Ba elodam bak vi modem kaio.” Lahame labihasu toeme esuhu im lam ame di labe ab modi imbodemam tame.
55. Labi ame di labe meit Alat Vameadaha Im Toedahana laba laha nehi fet toeme esuhuna meida nim ab modi imbodemam tame. “Ee làhà! Elom bak oa, om akati meia modi elom bak setehelo. Ee làhà! Elom bak oa, om akati meia veeme elom bak setehelo.” Lahame labihasu toeme esuhu bak lam ab modi imbodemam tame. Ame bak lam neha: Alat Aho ahit dam bake meedume elodamna zi ahebu modi fa seddaha labe im ba elom bake iedem vabak. Ame na labe ba, “Fà modi elodase,” lahame ba iba modi im iedem vabak. Lahame labi toehe bak.
56. Dam etei elom bake iedem bak lam gi neham labe elom bake iede taia? Damat ozo, “Iho faina meedàmu ba diamut Alat iba beodam bak ehe bak,” lahame ame bak laba vi ozome elom bake iede taia? Alat Aho gagu fi hasi esuhu im feàna lam damat mu zidazehemu dam bake beodam bak ehe bak.
57. Dam lada lamota labiha. Lahana im ba labiham vabak. Im gi Ala bake vou baedam bak. Neham labe labihaha bak. Iho faina meedam bake im Boehàda Yesus Kristus fa iba ot vai eloi iho faina meedam bak lam Aho fa faamome vei neàdehe labe im ba elom bake iedem vabak.
58. Ebe eho deelem dam abo emti Kristus bake tu vuzehi vahi meedam dam oa, ba diamut im elodaha bak labet Alat modi fa ahededume usnadàmu uho im Boehàda bake tu vuzehi meedam bak lam mahate keàtedi laodoamsu im Abada lamota meedam bohu vuusdale. Labi meit uba im git vameadam bak laba uho aime tu vuzehi bitem bak labna zohàme uho mahate teudi laodoamsdale. Labi im Boehàda uba gagodaha im lam ahebu uho abo ule neàt meedam tadele. Neham bak. Uho Boehàdat uba gagohona lam ahebu meedam bak lam ba gi teoli vanamai voomnat modem vabak. Abo modi ame im lam imbodemnat modem bak
1. Lo. Neàde. Uho amu eba neha, “Iho Alam damali im vamdesu meedam dam kota Yerusalem laba azihi dam laba lolo modem doi iho akatihasu ateme vahela?” lahame toeme eba oluhu im lam eho etei fa uba nehi vameadalo mozo. Uho etei meit vi tau meit vi tau laham doi lam vaheme umti Kristus bake tu vuzehi vahi meedam dam kota Yerusalem laba azihi dam labe di neà faasi na vabali idoalehe bake lolo modem doi lam gi eho amu dam Kristus bake tu vuzehi vahi meedam dam Galatia bak laba azihi dam abo dam zi mei dam zi meime laham dam laba nehi vameadaha im lamti ulohona meedale.
2. Uho hari Minggu Ala bake vou baedam digat ahebu labe nasi meit aho doilehe bake ozome doi aho Ala bake esum zoho fi hasi ahumdi esu. Labi meit ba neo gi ame bak labe neo mode. Labihadale. Uho labihadume neàdi eho ba le aameam um amu gi modi ahumdi neàdehena em ba le aam bak. Ba em lehezobe ame im lam modem vabak am tame.
3. Labi uho doi lam vaheme ahumdi neàdi neo dam ame doi lam vou lamda lam laha nabime dam uho ahu ubuda tuhuda laba ozome fi me ve esu vou faodale. Labi eho ba lafusi neàdehezobe uho fi me vahada laba eho sunit, “Um ana im vou lehela,” laham bake fet aame ozobohudem sunit lam ame dam laba lu dam labe ame doi lamti ve, “Kota Yerusalem laba vou lale,” lahame labi gagu olu tame.
4. Labi uho laha eba nehi vi ozo, “Emti vahi ame doi lam vou lam neà bak,” lahame eba labi gagomeam làhà ame dam labe fa eba gut tau lam neàte.
5. Em amu nasi Makedonia bak laba le im vou vameatedam bak ehete. Labihàmu amu nasi laba le ame dam laba im vou vameatedume neàdi ba uba num debu Korintus laba la tame.
6. Em uba laba le tau azibehamdem bak laha ozodam bak. Lahana em ozome neàdem kaio. Em uba laba le tau azibe di nutabededam di abo itea feàna labe nutabe fait li vao fi tauledume bubaholedam di fotehezobe fa ebe eho neo ozome lam bak laba lam zoaha. Em bieha. Lahana em uba laba le tau azibe lalo modem di labe ba bak ubuda lam vou esmozi bak mei bake lalo modem di lam uho eba tau faobekesi na lu olumna ame di labe eba lu olumna zohàme uba nasi gagoho bak.
7. Em etei nibe uba laba lameam làhà gi taho labe izi usi vàmadi modeo, usi behàsdi modeo, gi taho labohoti lam bak. Labiham bake em mu em uba laba taho lam kaio. Em gi fa nehalo. Eho uba laba lam bak im Boehàda Yesus uledemeam làhà em ba uba le tau azibehamdem zoaha bak.
8. Lahana etei taho nasi lam vabak. Em gi num debu Efesus niba azibe Yahudi dam labe ibi iho na feàna àdam digat Pentakosta lam foli neàdi ba laba la tame.
9. Neham bak. Num debu Efesus niba azihi dam dua zoho ame Im Neàna lam aim vaba alim lahasuho. Lahana ame num debu niba azihi dam zoho emti ot odosiaha dam ehete. Lahamnàme eho ame im lam vahokedam bak ba modem biem vabak. Ala naedat modi tombalehe bak. Labiham labe eho vahokedume neàdi esmozi ba uba la tame.
10. Labi em im meida neo gagolo. Timotius uba lafum di uho gi ame da laba, “Neàte,” lahame ule neàt gut gagu ve vou azile. Aho uba tau azim di gi iedem vabna aidam bak am tame. Neham bak. Ame da lam gi im Boehàda Yesusat eba gagoho im lam eho meedam bakti ulohona aho laha meedamda am bak. Uho ame da lam gi deelehat gut vale.
11. Ba meit aba a aame gi ozahigeàmu mu voomule. Fa gi nehale. Ame da lam gi ahena eba fa olum bake uho abo deelehat gut ve vou aidume neàdi fa olulo modem di labe uho aba tau faobekesi lu olumna ame di labe vi lodume, “Om abo neàte,” lahame deelehat vi vameadume eba fa olule. Em gi Timotiusat fa imti vahi Kristus bake tu vuzehi meedam dam totbaho laba vi tau lem bake vou faodalo modem bak.
12. Im lada lam neàde. Em fa imti Kristus bake tu vuzehi vahi meedamda meida Apolos labe aho meedam im lam uba vamealo. Ame da laba eho amu neha, “Apolos oho imti vahi Kristus bake tu vuzehi meedam dam totbaho labe iho num debu Korintus laba lam bake oho tau vahi lale,” lahame eho amu gago. Labi ba neo vi gago. Lahamnàme am etei lam odohali moho bak. Lahana ba aho lam bak aba modi fumeam làhà ba uba lam bak ehe bak.
13. Ba oa, um fa faidemna zohàme iademe meedale. Uho Kristus bake lab tu vuzehehe bak lam abo mahate keàtedi teudi laodoamsule. Ba a na iedi ahu bedi meedamule. Abo gi ahu teudi ozodam labe meedale.
14. Labi laha na im ahebu meedam di um ahu gi dam bake deeli meedam tadele.
15. Emti Kristus bake tu vuzehi vahi meedam dam oa, um ozobohute. Eho amu bak Akaya laba le ame Im Neàna vou vameatedaha di labe Stefanus amti num vàmtea azihi dam labe ihimo nasi ahamte alimeat Yesus bake tuhu dam am bak. Labi ame dam lam gi ahu im amomoi ozom vabna gi Alam damali im vamdesu meedam dam laba tau vabiedam bak laba ahu vàmadi vabiedam bohu vuusu meedam dam am bak. Labihàmu eho uba nehi gagodam bak.
16. Dam Kristus bake tu vuzehi vahi meedam dam laba vuusu im vameame faheme modiam dam totbaho abo Stefanusam dam lamti ibi iho meedam bak lamti ulohona meedam dam lam uho ahu adat iedi dam labe iho gagom im lam ulededale. Labi laha dam giida totbaho labe ame dam laba ba tau im Boehàda Yesus labe Aho gagoho im meedam dam laba laha ahu adat iedi dam labe iho gagom im lam laha ulededale.
17. Em abo uba ilahuho. Lahana Stefanusti Fortunatusti Akaikusti eba lefuhemu em abo deeleho. Um eba niba lem biehemu ame dam làtela lam ot vai lehemu em abo deeleho.
18. Neham bak. Ame dam làtela labe amu uho um ahu bedem bak labna zohàme uba vabededume um ahu teudehe labe ame dam labe eba neo ame baket neo meedume em ahu teudedam bak. Labihàmu eho etei lab gagoho bak lam, “Uho ame dam lamti uloho dam laba ahu adat iedi, ‘Abo feàte,’ lahame vou baedale,” lahame uba ab gagoham bak.
19. Lo. Neàde. Dam Kristus bake tu vuzehi vahi meedam dam abo dam zi mei dam zi meime laham dam Asia bak niba esuhu dam nibe iho uba Korintus dam bake, “Neàte,” lahame gagodam bak. Labi laha Akwilati Priskilati labi dam Kristus bake tu vuzehi vahi meedam dam labe iho Akwilam num laba vazisi Ala bake vou baedam dam lamti iho Boehàda Yesus vou ali ahu vàmadehemu iho laha vahi uba, “Neàte,” lahame tau gagodam bak.
20. Labi laha imti Kristus bake tu vuzehi vahi meedam dam num debu Efesus niba azihi dam totbaho laha uba, “Neàte,” lahame tau gagodam bak. Labi laha uho vazisi Ala bake vou baedalo modem di lam um gi ahulat abo deeli, “Om abo neàte,” lahame ot gagoidale.
21. Sunit baa toehe zoho nim anekehà ebeda ehemo toeho. Eho Paulusat uba neha, “Neàte,” lahaho.
22. Dam im Boehàda Yesus bake deelehe vab dam laba Alat na asimbuna modi esum dam am bak. Lahana imota gi nehada, “Boehàda Yesus nasi fa lele,” lahame gagodam bak.
23. Eho gi nehame Ala bake tom gagodam bak. “Im Boehàda Yesus uba ozahit deeli im neà bak meedase,” lahame tom gagodam bak.
24. Emti umti vahi Kristus bake tu vuzehi meedam dam oa, uho vahi Kristus Yesus bake vou ali ahu vàmadehemu em abo um ahebu deeleho. Neàte. Eho Paulusat sunit nim toedume ab neàdeham. Àhàm.
1. Kristus bake tu vuzehi vahi meedam dam abo Alam damalehe dam num debu Korintus laba esdam dam oa, eho Paulusat sunit nim toedume uba oluho. Eho uba oluhu sunit nim um Alam damalehe dam ame bak Akaya laba modealadaha num debu totbaho ahebu lam laha aame gagodam neàte. Alat amu eba neha, “Kristus Yesus labe gagu Am im vameadume esmozi laiamda meidatelese,” lahame eba fet gagu vàmadi esuhu labe eho ame im modem datelehe bak. Eho ame da meida nibe sunit nim toedume uba oluho. Imti vahi Kristus bake tu vuzehi meedamda meida Timotius nibe eba tau uba laha, “Neàte,” lahame sunit nim toedume oluho.
2. Im ahim nibe neha, “Im Ai Alati im Boehàda Yesus Kristusti ahili uba ozahit deeli im neà bak modi esuidase. Labi uba modi um ahu faheme fi goaitom vaba gi vabademsuse,” lahame im ahim nibe ozodume Ala bake labihasu tom gagodam bak.
3. Imo im Boehàda Yesus Kristus labe Am Ai Alat nehi meedaha bak laba vi ozome Aba vou baedase. Iba dam bakdate aam faimu faobekesi im neà bak meedam bak ame. Labi laha iba vabededume im ahu teudedam tadem bak ame. Labihasu modem Ala laba imo vou baedase.
4. Na im ahebu iba modi geàdam di Alat gi labaha bohu iba vabededume im ahu fa vei teudedam bak. Aho gi neham bak ozome labihadam bak. “Na im im dam totbaho laba modi geàdam di Alat amu iba vabededume im ahu fa teudedaha bak labet modi iho fa neo ame dam laba gi ame baket neo meedase,” lahame ahit labihaha bak.
5. Na im amu Kristus bake modi geàdamna bohu lam iho Aba tu vuzehi meedam dam niba ame bak labet iba laha modi geàdam bohu meedam bak. Ame bak lam labihahemu iho Kristusti vou ali ahu vàmadehemu Alat laha iba duana vi vabededume im ahu vei teudedam bak.
6. Na im iba modi geàdam di gi modem imot modem vabak. Abo gi ame bak labet modi Alat fa neo uba vabededume um ahu modi teudedam bak. Labi laha Aho um ba soat vausu fa vei neàdedam bak. Gi labihadamnat modem bak. Labi laha Alat iba vabededume im ahu vei teudemeam làhà Alat fa neo uba laha vabededume um ahu fa vei teudedam bak. Labi Alat uba vabededume um ahu fa vei teudedaha labe na im iba modi geàdamna lamti ulohona fa uba neo meedam di um gi keàtedi teudi bohu vuusu meedam bak.
7. Labihàmu iho uba vi ozodam di gi neham bak labaha bohu tu vi ozodam bak. Na im uba modi geàdam di um ba bedem vaba um gi labaha keàtet bohu vuusdam bak. Neham labe labihaha bak. Na im iba modi geàdam bak lam uba laha neo ulohona modi geàdam di lam Alat iba lab vabededume im ahu modi fa vei teudedam bak lam Aho laha uba ame baket neo modi um ahu vei teudedam bak. Laham bak lam im ozobohu bak.
8. Emti vahi Kristus bake tu vuzehi meedam dam oa, iho amu Asia bak laba le esdam diat na im iba modi geàdam bak lam um biem bake eho ahit, “Um ozobohudedase,” lahame nehi uba vameadalo mozo. Iho Asia bak laba esdaha diat na im iba modi geàdam di ame im lam feànat modem labe iho ozomta, “Iho modem biemna feàt modem labe im ba ahedem vaba gi eloe moio?” lahame im ahu faidi vi ozodam bak.
9. Ame iba lab meedaha di lam iho ozomta, “Im gi elom bak ab vou fuhame?” lahame im ahu ab vi ozodamam bak. Lahana Alat neham bak ozoho labe Aho ahit iba modi iho labi ozoho bak. Ihimo fa iba it modi vei neàdem bak laba it ozome tum vaba, “Abo bisi feà Ala abo mei elohona modi fa ahedi usam Ala laba iho vi ozome tuse,” lahame Aho ahit iba modi iho geàdaha bak.
10. Neham bak. Amu di iube, “Na im iba belu fà elose,” laham im feà lam Alat fa iba modi soat vausu fa vei neàdehe labe im ba elom vabak. Labi etei nim laha na im iba modi geàdam di Aho neo iba gi ame baket neo meeda tame. Labi laha na im iba ba diamut modi geàdam di iho gi neha, “Alat iba gi labaha vatohedume fa vei neàdedam bohu modesdam Alat modem bak,” lahame iho ab tu vi ozodam bohu ab meedamam bak.
11. Naat iba beom vaba Alat iba soat vatohedume fa vei neàdedam bake uho mahate iba vi ozome tau Ala bake tom gagodale. Uho dam duada labe iba vi ozome lab tom gagodaha bak labet modi na im iba belu elom bak feà lam Alat fa iba faobekesi ozahit iba modi soat vatohedume fa vei neàdem labe dam dua totbaho labe fa Ala bake, “Am abo neàte,” lahame vou baedam bak am tame.
12. Emti vahi Kristus bake tu vuzehi meedam dam oa, iho gi uba modeo, dam bakda totbaho ahebu modeo, iho na im meedam di iho im ahu adat it ozodam di iho neha, “Im ba uba im keobe vabak. Im gi uba iademe meedam bak. Abo imbote,” lahame it ozome deeli gagodam bak. Alat deelem bak laba ozome iho na im meedam di Alat iba modi vizi teudi im gi vamdesu meedam damat modem bak. Abo gi ahu giho neàna vàmadehena meedam damat modem bak. Ame baket meedam di iho bisi meedam bak lam gi uba Korintus dam laba meedam bak am bak. Labi iho ame bak lam meedam di ba dam bak damat ibi iho na im ozome meedume baleàhà bak lamti ulohona meedam vabak. Iho gi Alat iba ozahit deeli im neà bak modi esuidam bak laba vi ozodam labe na im meedam bak.
13. Eho gi neham bak ozoho labe uba labi vameadam bak. Iho lab oudaha sunit lam ahebu uho ve aame gagodam di ba uho ozome ozobohudem biem im toedaha vaba gi, “Um ahu ozobohudi fi gatese,” laham bak laba ozome iho sunit lam toedume uba oudaha bak. Labi ebe eho tu vi ozodam bak gi neha:
14. Ibi iho lab meia vagem vaba gi imbona vameadam damat modem bak lam um dam totbaho mahate ozobohudi fi gatei neàdehe vab damat modem bak. Làhà, “ ‘Iho meia vagem vab dam gi imbona vameadam damat mode?’ laham bak lam um ahebu fà ozobohudi fi gatei ozobohu aabodese,” lahame eho uba labihasu ilahu tu vou faodam bak. Labi ibi iho lab ozome meedume baleàhà bak lam uho etei ozobohu aabodemeam làhà ba diamut im Boehàda Yesus fa lem di iho uba vi ozome deeli vou baedam bak lamti ulohona uho laha fa iba vi ozome deeli vou baedam bak am bak.
15. “Uho iba vi ozome deeli vou baeda tame,” laham bak lam eho tu vi ozodàmu eho nehi fet ozome esuhu bak. Eho Efesus vou esmozi fa bak Makedonia niba lelo modem di uba nasi lebe azibe lebohoti Makedonia niba lem bak. Labi fa neo Makedonia vou esmozi fa lam di neo uba labe azibe fa neo lam bak. Labiham labe eho uba tau azi vabiedam bak behàsdem bak am bak. Labi eho fa labe uba tau azim di uho fa neo eho Yudea lam bak ozome eba vi tau faobekesi eba nazoh beà vi lodume olum zoaha.
17. Eho lab fet ozome esuhu im lam eho ame baket meedaha vaba gi fa faatoho bak ehenàme uho vedi eba neha, “Em gi im gagom di fa faatomoho dat modem bak,” lahame eba feàtàdàla? Um ozom vaba? Em gi im bisi imbona duzum labet im eho gagohoda fa vazidazidam bak. Em ba ostame modem vabak. Uho ozom, em dam bak dàt modehemu gi ebe eho ozoho baket ozome meia im gagu, “Lo,” laham dàt fa kehàm vabna neha, “Vabà,” laham dàt mode?
18. Vabà! Em ba labiham dàt modem vabak. Alat Aba Aho gagoho bak vagem vaba abo modem tadem Alat modem labe Aho eba aam di em gi laha ame baket meedam dàt modem bak. Neham bak. Eho uba neha, “Lo, eho neha tame,” lahame uba fet ozome gagu esum di im bisi feàna duzum vabameam em ba veimdi neha, “Vab. Eho ba modem kaio,” lahame ba gagom vabak.
19. Neham bak. Iho Silasti Timotiusti iho Alam Adat Yesus Kristus labe Aba Aho meedaha Im Neàna lam uba vou vameatedume uba modi fi gatehe im lam iho gi Dat im gagoho vàmadehena fa faatom vab imot meedamda labe Am im lam uba vameadume uba modi fi gatehe bak. Ame Da Kristus ba Aba Aho gagoho im fa faatoi veimdem vab Dàt modem bak. Aho meia neha, “Lo, Eho modem bak,” lahame Aho lab gagu esuiam im lam gi ab modi imbodidamam bak.
20. Eho etei lab gagoho bak lam imbote. Neham labe labihaha bak. Kristus labe Aba Aho tohedateli meedam bak labet modi Alat Aho neha, “Lo, Eho meeda tame,” lahame iba fet gagu esum im zi ahebu modi fa imbode tame. Labi ame Da Kristus labe Aba Aho lab meedaha bak labet modi im dam ahebu iho Ala bake neha, “Imbote! Aba Aho amu di iube fet vameadume esuhu im zi lam ahebu ab imbodeham bak,” lahame Am ee vousai vou baedam bak.
21. Alat Ahamo im ahebu abo imti umti modi Am Adat Kristus bake fa vou ali ahu vàmadi teudi laodoamsum Ala Am am bak. Labi laha, “Am damali im Abada fà meedase,” lahame ahit iba fi hasi gagu esuhu bak lam gi Alat Ahamo modehe bak.
22. “Im vahi Am dam am tame,” laham bak iho it ozobohudem bake Alat ahit Am Aha Nutabe Neàna iba olu im ahu ad niba modi vizehe bak. Iho neha, “Ba Aba Aho iba modem im zoho ehete,” lahame iho nasi tu vi ozodam bake Aho nasi Am Aha Nutabe Neàna iba fet lu im ahu ad niba ab modi vizi meedamam bak.
23. Emti vahi Kristus bake tu vuzehi meedam dam oa, Ala amta nim. Em ba uba giomim gagolo modem vabak. Alat em ahu ad niba modesuhuna Amota ozobohu bak. Eho uba Korintus dam bake fa neo laha vabak lam gi nehaha bak. Eho fa uba le dae meona vameadameam uho aime ahu faidem bak labna zohàme em uba nasi fa neo laha behàsdem mu meedam bak.
24. Im bisi uba neha, “Im nehasu tu vuzehi meedase,” lahame ba uba im ooteme vahokedam bak ozodam vabak. Uho Kristus bake lab tu vuzehi meedam bak lam uho gi amu di iube faasi keàtedi ab meedamam bak. Akati iho bisi uba neo vi vahokedamehamdela? “Um Korintus dam um ahu faidehe vaba gi Yesus bake labaha bohu tu vuzehi deelehat dozeadase,” lahame iho umti vahi tau meedalo modem bak.
1. Labihàmu eho nehi ab gagu vàmadi esuham bak. Em ba uba nasi neo lam moho bak. Em uba neo nasi lameam gi em amu uba le dae meona vahokedume um ahu faidehe bak lam fa neo ame baket modemna zohàme uba nasi neo lam moho bak.
2. Eho uba le neo modi um ahu faidemeam làhà em laha ahu faideheda niba ba amat eba gut vabededume em ahu fa teudi neàde? Ame bak lam gi eho uba modi um ahu faidehe dam labe uho eba gut vabededam biem bak am taia? Labihàmu em nasi neo uba lam moho bak.
3. Labihahemu em uba nasi neo taho lam biehemu sunit amuda lam uba toedume oluhu bak. Eho gi neham bak ozome sunit lam nasi toedume uba oluhu bak. Eho ba uba le aam di um gi neàdehena ahum eho le aam labet uho em ahu modi faidem vaba gi deelehat uba fa lem bak am bak. Labi eho uba fa deelehat lemeam làhà um gi eba laha deelehat gut vam bak.
4. Nehaha bak. Eho amu uba sunit lam toedume oluhu di lam em gi ahu faidi dehabali meddam labe fa vaksati toedume uba oluhu bak. “Ba um ahu fà modi faidese,” laham bak ozome uba toedume oluhu vabak. Gi, “ ‘Em abo uba duana deeli meedamda em am bak,’ laham bak lam um ozobohudedase,” lahame eho ame sunit lam toedume uba oluhu bak.
5. Um vahi meedam dam dat meida vàmtea labe faina modeheda labe modi fa um dam totbaho labe uho ladi ahu faidehe im lam eho uba vameadalo mozo. Neha: Ame da labe aho modehe bak lam em vi aime ahu faidemta ahu faide. Lahana bisi modi ladi ahu faidemda um ahebu am bak. Dam zoho duana ladi ahu faideda. Labi dam zoho gi fota ladi ahu faideda. Labihadam bak. Labihàmu em gi uba ahit fota vi vameadam bak. Um ahebu modi ladi ahu faidehenàme uho ame da laba a bisi faki modi itaholedam bohu meedamule.
6. Eho amu uba neha, “Uho ame da laba vaitesu ubahi duzu modeme itaholedale,” lahame sunit amu toedume uba oluhemu uho ame bak lam aame ame da lam um dam dua totbahot ab modi itaholedaham bak. Neàde. Aho ame faina modehe bak lam voou ahu ab vei neàdeham bak. Ba a neo vi modi itaholedamule.
7. Uho ame da laba modi itaholedam bak lam nasi vaitole. Gi ame da laba ozahigeàmu nasi fa vei neàdedale. Labi neo vi vabededume am ahu teudedale. Ame da labe aho ozo, “Làhà dam labe eba ab faki mu voohame?” laham bak lam vi ozome ahu faidi feà bak fumna zohàme labihadale.
8. Labi laha uho labiham labe ame da labe aho nehi vi ozo, “Làhà dam nim eba abo bisi deeli meedà?” lahame aho aame ozobohudem bake uho ame da laba nasi fa deeli meedale.
9. Eho amu uba neha, “Uho ame da laba modi itaholedale,” lahame sunit amu oluhu di lam eho gi neham bak uba modi ozolo toeme oluhu bak. “Dae ebeda ahebu uho aime meedào? Gi mu voedào?” laham bak ozolo ahit sunit lam toeme uba oluhu bak.
10. Labihàmu uho ame da laba modi itaholedam bak lam nasi vaitole. Ozahigeàmu nasi fa vei neàdele. Uho ame da laba ozahigeàmu fa vei neàdemeam làhà eho gi laha labiham bak. Ame da labe eba git modem bak ehelemeam làhà em bisi ozom bak vab. Em gi ame da laba ozahigeàmu fa ab vei neàdeham bak. Eho lab modehe bak lam Kristusat ozobohu bak. Uho ame da lamti fa vazisi neàdem bake eho gi labihaha bak.
11. Im vahi ame da laba ozahigeàmu fa vei neàdem vabameam làhà Iblisit aho fa ame bak labet iba neo vi modi ozolo meedam bak. Labiham bake eho lab gagoho bak lam uho modele. Neham bak. Iblisit aho iba modi ozolo modidume baleàhà bak lam im ba biem vabak. Im abo ozobohu bak.
12. Eho amu num debu Efesus labe labohoti fa num debu Troas laba le, “Kristus labe Aho meedaha Im Neàna lam eho ame dam laba vou vameatedase,” lahame le aaha ame Troas dam lam im Boehàda Yesus labe gi amu Aho ame dam labe im ahu gi ab modi im ebe eho etei vou lalo modem im lam ule neàt ailo àhàki vou faodamna ahum eho ab le aaham.
13. Eho ahamte Troas laba lafuhu di lam eho vedi emti vahi Kristus bake tu vuzehi meedamda meida Titus bake tàhi im vameadaha tiba modeha Titus am alihi aam vabamu em ahu faidi vi ozodam lahasuhu bak. Ame da lam eho amu neha, “Oho num debu Korintus laba le dam lam, ‘Akatihasu meedàla?’ laham bak lam oho le aame neàdi fa num debu Troas laba le eba faode. Em lehezobe oho laba le aaha im lam eba gut vameadale,” lahame labi gagu oluhuda eho Troas laba le aaha ame da labe am alihi em ba aam vab. Làhàmu eho Troas laba aidaha vabamu fa ame dam laba, “Neàte,” lahame it vameadume esmozi fa bak Makedonia niba ab leham bak. “ ‘Ame da Titus bak Makedonia laba laheo?’ lahame le nabidase,” lahame Makedonia bak niba vou nabite ledume ab leham bak.
14. Im zi lam meedamnàme eho gi Ala bake neha, “Om abo neàte,” lahame ozahit tom vou baedam bak. Neham bak. Dat boehàda labe aho le zili siàdaha dam ve fa vou ledam labe aho meodehe bake eetu vuusualame damat aasdahit vou lebohotem bakti ulohona iho Kristusti vou ali ahu vàmadehemu Alat iba labaha bohu tau fa Iblis modi nembededam bak. Labiham labe iho bak iuba lào? Bak iuba lào? Laham di ame Da Kristus labe Aba Aho meedaha Im Neàna lam, “Damat fà aime ozobohudese,” lahame iho vou vameatedume damat aime uloholem bak laba ozome Alat gi im vame oudaha labe iho ame baket meedam bak. Abo ut àk ahana neàna feedam labe dam ahebu naume uloholem bakti uloho bak.
15. Alat ibi iho Kristus labe Aba Aho meedaha Im Neàna lam iho dam bake vou vameatedam bak lam Alat ozom di im gi ut àk ahana neàna feedam labe dam ahebu naume uloholem bakti uloho bak. Neham bak. Ame im lam vou vameatedam di lam damat uledi tu vuzehehe dam lam Alat soat vausu fa vei neàdedam bak. Lahana ame im lam moudaha dam lam Alat modi fa Amti gi labaha bohu vaitesulo modem bak. Labihasu meedam bak.
16. Neham bak. Dam Alati labaha bohu vaitesulo modem dam labe iho ame im lam aim di, “Im beodume Alati vaitesu abehamde tame,” laham bak aihemu, “Im lam ahana faite,” lahame naume mu voedam bak. Lahana Alat Aho soat vausu fa vei neàdedalo modem dam labe iho ame im lam aim di, “Im Alati vahi gi ahe neàna bohu vuusda tame,” laham bak aihemu, “Im lam ahana neàte,” lahame naume deeli meedam bak. Ba amat teudi Kristus labe Aba Aho meedaha Im Neàna lam vou vameatedà? Im ihimo tadem di ba ame im lam vou vameatedam biem bak.
17. Lahana im ba damat neha, “Ame Alat vameadaha im lam gi nazoh ot loiamna uloholi iho vou vameatedam di doi vamnat modem bak,” lahame ozome meedam damti uloho vabak. Gi Alat iba gagu oluhu labe iho ame Im Neàna lam vou vameatedam bak. Kristusat neha, “Ame im lam vou vameatedam neàte,” lahame vi tau gagodam labe iho im dedamali ame im lam vou vameatedam di iho gi ahu vàmadi ame baket meedam bak. Labi iho ame bak lam meedam di iho ozoha, Ala naedat vou aasdahit iho ame baket meedam bak.
1. Eho etei uba lab gagoho bak lam, “Iho Kristus labe Aba Aho meedaha Im Neàna lam vou vameatedam di im gi ahu vàmadi meedam bak,” lahame gagoho bak lam uho aim di uho amu iba lab vàlu gagoho bak lam a ba neo nehame gagomule. “Paulus am dam totbahoti gi im ee vousai it daetbadam damat modem bak,” lahame a neo iba vàlu gagomule. Im ba uba tau azi im ahaladi ahaladiame vahokedam guru lamti uloho vabak. Ame guru zi labe iho uba lafum di lam iho meedam im meit biem bake, “Damat fà aame ozobohudese,” lahame meit toehe sunit lam vou li uba lom meo bak. Labi laha ame guru labe iho um vou esmozi bak mei bake neo lalo modem di nasi ostame saemea lam vabak. Amu nasi ame sunit amomoi iho neo ve vou le dam laba fi si aame ozobohudem bak laba ozome neo uba gagu uho toehe sunit lam fa ve vou lam meo bak. Lahana iho sunit lamohoda ba meia gagome ve fa uba vou le fi m vabak. Labi laha ba uba gagu sunit amomoi neo ve bak mei bake vou le fi m vabak.
2. Iho gi nehadam bak. Iho bak mei bake lam di ame vou fi det laha sunit ozomomna gi ubu uho lab meedaha bak lam am bak. Lahana ame im lam ba sunit baa laba toehe vabak. Ubu uho lab neà bak meedaha bak lam iho gi im ahu ad niba vi ozome esu vou godam bak. Labihaha labe iho bak iuba lào? Bak iuba lào? laham di lam iho amu uba vou lehe Im Neàna uho ule neàt tu vuzehi meedaha bak lam iho ame dam laba vou fi det ladam bak. Dam amomoi debu labe uho lab neà bak meedam bak lam aihi labe fa im nehasu vi ozobohudi gagodam bak. “Imbot. Paulus am dam totbaho lamti labihasu Alat gagu oluhu dam am bak. Labi ame dam labe ibi iho vou vameatedam Im Neàna lam tum neà imot modem bak.” Labihasu vi ozobohudi gagodam bak lamti fa damat aame ozobohudem sunit lamti ulohonat modem bak.
3. Kristus Aho meedaha Im Neàna lam uho lab aime tu vuzehi meedam bak labet modi dam giidat aame fa neham bak vi aame ozobohudem sunit ozomom dam um am bak. “Paulus am dam totbaho lamti iho Korintus dam bake li ame Im Neàna lam vou vameatedume meedaha bak labet modi dam lam ibi iho amu meedaha bak lam voou fa gàhàdi im neà bak meedam damat modem bak,” lahame vi ozobohudi gagodam bak. Ame sunit lam gi Kristus Ahamo toehe sunit ozomomna modem bak. Lahana Kristusat lab toehe sunit lam Aho ba sunit baa laba na toemna vaksat toehe vabak. Labi laha aham di iube Israel damat fi hasi meedaha im lam Alat toedume Musa bake loho ke baa behàsu lamti ulohona ba laba toehe vabak. Gi um ahu ad laba toedahana ozomom bak. Abo gi labaha bohu vuusdam Ala labe Am Aha Nutabe Neàna labe Aho um ahu ad laba modi vizi fa veimdi gàhàli meedam bak lam Kristusat gi dam giida laba modi ozobohudedaha bak.
4. Eho etei lab gagoho bak lam, “Iho ame Im Neàna lam uba lab vou vameatedaha di labe uho lab aime Kristus bake tu vuzehi ab Am im meedam damaleham bak,” lahame iho uba le lab meedaha bak lam iho fa meia vameadam di im ba ladehebeat vameadam vabak. Gi abo ahu teudi ozobohu aabodi vameadam bak. Neham labe labihaha bak. Iho Ala bake abo tu vuzehi meeda. Labi laha Am Adat Kristusat iba neha, “Aba Aho meedaha Im Neàna lam iho vou vameatedase,” lahame iba gagu fi hasi esuhemu iho ame bak lam meeda. Labihàmu iho gi ahu teudi ozobohu aabodi ibi iho lab meedaha im uba vameadam bak.
5. Iho ba nehi it gagodam vabak. “Ame Da Kristus labe Aba Aho meedaha Im Neàna lam vou vameatedam bak lam ihimo it teudi ame baket meedam bak,” lahame ba labi gagodam vabak. Gi Alat Ahamo iba modi vizi iho teudi ame bak lam ozobohudi keàtedi meedam bak.
6. Alat Aba Aho Ba Fet Gagu Vàmadi Esuhu Im Gàhàda lam, “Iho dam bake vou vameatedase,” lahame Alat iba modi vizi teudehe labe iho ozobohu aabodi ame baket meedam bak. Ame Im Gàhàda lam gi neham bak. “Alam Aha Nutabe Neàna labe Aho fa dam im ahu ad laba modi veimdi gàhàdi neà bak meeda tame,” laham im lam iho dam bake vou vameatedam bak. Lahana ba ame da Musa labe aba aho aham di iube dam bake neha, “Alat uba deeli gagu vame Am damalem bake uho Aho gagu fi hasi esuhu Im Feàna lam vuzehi ulohodesu meedale,” lahame amu Fet Gagu Vàmadi Esuhu Im lamti ulohona iho ba dam bake vou vameatedam vabak. Neham bak. Meit ame Musat toedume fi hasi esuhu Im Feàna lam ulohodesu meedam vaba zidazemeam làhà Alat faki gi labaha bohu vaitesu modesdam bak. Lahana Alat Ba Fet Gagu Vàmadi Esuhu Im Gàhàda labet modi Alam Aha Nutabe Neàna labe Aho dam bake modi Alati vahi gi ahe neàna bohu vuusdam bak.
7. Aham di iube Alat gagu fi hasi esuhu Im Feàna zi lam Aho Sinai Sibu laba ke baa behàsu toedahana Musat ve fa ame Israel dam bake vameada. Ame di iube Musat dam bake neha, “Ame Im Feàna zi lam uho ulohodesu meedam vaba zidazemeam làhà Alati ot vaitesuiame labaha bohu modesda tame,” lahame vameadaha bak. “Alati ot vaitesuiame labaha bohu modesda tame,” lahame fet gagu vàmadi esuhu bak lam ehenàme ame da Musat ame ke baa laba toedaha im lam ve neàdi fa vou lezedam di labe Alat ahit Musa bake modi am dauha na fauha meona modesu ab fi t lezedamam. “Aho gagoho im vou lehe dàt modem bak,” laham bak ozome ahit labihadaha bak. Labi Alat aba gagoho im lam aho Israel dam bake vameadaha di labe Alat Musam dauha modi abo na fauha meona modesu fi ddam labe im vameada. Am dauha laba Alam na feà modesu fi ddam bak lam ame Israel dam labe iho ame bak aasdam di fako iedi gi fako laba zisu aasdamehamdem bohu modesdam biem bak. Lahana ame na modesu fi si ogatedamna lam gi ame di labe faasi fa aam tooledam bak lam damat vabi vedi fako iedi meedam bak.
8. Aham di iube Musat neha, “Meit zidazemeam beoda tame,” laham Im Feàna lam dam bake vameadaha di lam, “Alat gagoho im vou lehe dàt modem bak,” laham bak, “Damat fà ozobohudese,” lahame Alat ahit Musam dauha modi fauhali ogatedam labe dam bake vameadam bak. Labi laha, “Alam Aha Nutabe Neàna labe Aho fa dam im ahu ad laba modi veimdi gàhàdi neà bak meeda tame,” laham Im Bada Gàhàda nim iho dam bake vou vameatedam di, “Alat gagoho im vou lehe damat modem bak,” laham bak, “Damat fà ozobohudese,” lahame Am feà bak iba modi vizi iho ame im vameadam bak. Lahana ibi ba zoho nim im bisi feàda am bak.
9. Eho gi neham bak ozome uba labi gagoho bak. Aham di iube Alat gagu fi hasi esuhu Im Feàna zi lam Musat ve fa ame Israel dam bake vameadam di ame damat ulohodesu meedam vaba zidazedameam làhà Alat neha, “Beoda tame,” lahame gagom bak ehe bak. Lahana Musat ame im lam dam bake vameadam di Alat modi am dauha laba na fauha meona modesu fi si ogatedam labe damat neha, “Feàte,” lahame vou baeda. Lada lam labihahemu iho ozoha, ame Im Gàhàda nim iho dam bake vou vameatedam bak labet modi bisi dam dua bak labe neha, “Ala abo feàte,” lahame meia modi vou baedam im am bak. Neham labe labihaha bak. Iho etei dam bake lab vahokedam di labe gi nehi vameada, “Alat dam bake, ‘Um abo im vamdesu meedam damat modem bak,’ lahame ozahit deeli gagu vame Am damaleda tame,” lahame labi vou vameatedam labe ame Im Gàhàda lam bisi feàte.
10. Alat Aba Aho aham di iube Fet Gagu Vàmadi Esuhu Im lam Musat dam bake vameadaha di lam Aho Musa bake modi am dauha laba na fauha meona modesu fi si ogatedam labe ame im lam labihasu feà imoli vameadamta vameada. Lahana Alat Aba Aho Ba Fet Gagu Vàmadi Esuhu Im Gàhàda nim iho etei ve dam bake vou vameatedam labet modi Alam feà bak lam bisi etei modi tombali meedam im am bak. Labiham labe iho ozom, im ahamda feà imoli meedam bak lam fa ab seteham bak.
11. Aham di iube Alat Aba Aho Fet Gagu Vàmadi Esuhu Im lam, “Aho ba gi modi voou sete tame,” lahame Ahamo ozobohudehena vedi Musat ame im lam ahamte vameadaha di lam ahit Musa bake modi feà imoli vameada. Lada lam labihahemu Alat Aba Aho Ba Fet Gagu Vàmadi Esuhu Im Gàhàda nim gi labaha bohu modesdam imot modem labe im bada nim bisi feà imoli meedamda am bak.
12. Ame Im Baada Gàhàda nim, “Ba setem biem imot modem bak. Gi labaha bohu modesdam imot modem bak,” lahame im ahu gi ihimo labihasu tu vi ozodam labe iho ba ladehebeat ame Im Neàna lam vou vameatedam vabak. Abo gi ahu teudi ahatet vou vameatedam bak.
13. Ame Im Bada Gàhàda nim ba setem biem imot modem labe iho ba vastem vabak. Iho ame im bada gàhàda nim vou vameatedam di im ba Musat aba aho sue baa visoi am dauha suusu baguamdem bakti ulohona meedam vab damat modem bak. Aham di iube Musat gi im nehasu meedam dàt modem bak. Am dauha laba na fauha meona modesu fi si ogatedamna lam fa koedi aam tooli seddam di lam ame Israel damat aam bak labna zohàme aho ahit sue baa visoi am dauha suusu baguamdem meo dàt modem bak.
14. Ame Israel dam labe ame feà bak aadamta aada. Lahana ame da Musa labe aho lab vameadaha im lam, “Akatihasu modem Im Feànat modela?” laham bak lam ba ozobohudem kai. Ame dam labe im ahu zohobuli, “Ame Im Feàna lam modi seteho,” laham bak lam ozom vabili ab im biehebuleham. Ame bak lam ame da Israel labe aho vou faat lehe dam bada nim Yahudi dam nibe meedam lahasuhu bak. Nehaha bak. Ame Yahudi dam bada nibe ibi ihimo vazisi Alam im vameadam num laba oli Alat Aham Di Iube Fet Gagu Vàmadi Esuhu Im lam meit aame gagodam di lam ame dam labe im ahu zohobuli, “Akatihasu modem Im Feànat modela?” laham bak lam im biehebulehe labe ame Im Bada Gàhàda lam ba aime ozome ozobohudehe vabak. Abo gi im tai ahobada zi labe iho Musat am dauha sue baa visoi suusu baguamdi ame feà bak lam aam biem bakti ulohona etei dam bada nibe meedam lahasuhu bak. Im ahu zohobuli im biehebulem bak lam ba setem kaio. Gi ame dam labe iho Kristus bake tu vuzehedam labe im ahu zohobuli im biehebulem bak lam fa setem bak am bak. Setem labe nehi ab ozodamam bak. “Alat aham di iube fet gagu vàmadi esuhu im lam fa seti fa Kristus labe Aba Aho meedaha Im Neàna bada nim fa ot vai modesuhu bak,” laham bak ozobohudi gagodam bak am bak.
15. Iho ozom, etei ame Yahudi dam bada nibe ibi ihimo vazisi Alam im vameadam num laba olem di meit Alat Aba Aho aham di iube gagu fi hasi esuhu im zi lam aho Musa bake vameadume esuhu im zi lam etei meit visoi aame gagodam di lam ame Yahudi dam labe im ahu vi ozom zohobuli vedi neha, “Ame im ahamda lam feà imoli meedam lahasda tiba,” lahame git ozodam bak lahasuhu bak. Abo im ahu niba sue baa suusu baguamdem bakti ulohona modehe labe labihaha bak.
16. Lahana meit am ahu veimdi fa im Boehàda Yesus bake tu vuzehi meedameam làhà ame sue baa am ahu baguamdehe bak lam veioi fi gatem bak am bak. Abo Musat Ala bake tàhi amti im ot vameaidam di am dauha suusu baguamdehe sue baa veiom bakti uloho bak.
17. Iho etei lab vameadam Boehàda Yesus lam gi Alam Aha Nutabe Neàna am bak. Alam Aha Nutabe Neàna labe Aho im ahu ad niba vizi modesdameam làhà iho amu Musat aho lab fet toedume esuhu Im Feàna zi labe iba ootedam bak lam Aho fa faamome asimbu bak lam modi fa vei seti im ab dehabali duzuham bak.
18. Labi laha im vahi im Boehàda Yesus bake tu vuzehi meedam dam nibe im ahu ad niba ba sue baati ulohona baguamdem vabak. Abo ame da Musat aho aham di iube Ala bake tàhi im ot vameaidalo modem di am dauha sue baa suusu baguamdehena lam fa vuavai im ot vameaidam bakti uloho bak. Labiham labe im etei Boehàda Yesus labe Am feà bak lam iho fako zisu aasdam neàdehe bak. Labi aasdam labe Alat im ahu ad niba modi vizi fi gatehe labe dam giida totbaho labe iba aam di gi Yesus labe Am feà bak iba modesuhuna ozomomna aasdam bak. Labi laha, “Am itbaho fatoi Am feà bak lamti ulohona iba modi vizese,” lahame im Boehàda lam abo Alam Aha Nutabe Neàna labe Am feà bak labet modi im ahu ad laba ahit dihasi vabiedume veimdeda. Labi dihasi neo vabiedume veimdeda. Gi labihadam bohu meedam bak.
1. Ala bisi meia aam faimu faobekesi im neà bak tau meedam Alat modem labe Aho gi iba neha, “Ebe Eho etei ba gagu vàmadi esuhu im gàhàda nim uho fa dam bake vou vameatedale,” lahame iba labi gagu oudahemu iho ame baket ab meedamam bak. Labihàmu na im iba modi geàdam di iho ame bak lam ba mom vabak. Gi ozahit keàtet meedam bak.
2. Dam totbaho labe ibi iho na im meedam di ibi iho aa meedaha bak lam meit fi demeam iba modi iho ladem bak labna zohàme vedi vasti fa meia keobaedam meo damat modem bak. Lahana iho ba labihadam vabak. Iho bak lam mu gi ahatet iademe meedam damat modem bak. Labi laha iho Kristusat meedaha Im Neàna lam vou vameatedam di lam im ba meia vou fohome keobaedume ahi vagedam vabak. Labi laha iho Alat Aba Aho gagoho im lam vameadam di im ba veimdi kibuli im meidi vameadam vabak. Im gi Alam im imbona iademe ahatet vameadam bak. Iho labihasu meedam labe iho bak iuba lào? Bak iuba lào? Labihadam di lam dam ahebu iba aame vàlum vaba gi nehi ozome gagodam bak. “Oo làhà! Paulus giida gi im vamdesu meedam damat mode? Ibi iho vou le vahokedam im lam imbo imot mode?” laham bak damat ozobohudi gagodam bak. Neham labe labihadam bak. Iba im vi gagu ailo modemda Ala ehemu iho gi ame im iademe vou vameatedam bak.
3. Kristus labe Aho meedaha Im Neàna lam iho vou vameatedam di dam totbaho labe ame im ozosome modeha ozom bi ahusobulehe labe ame im lam ba tu vuzehi meedam vabak. Abo dam ahamda labe iho ba Musat am dauha sue baa suusu baguamdehe di lam Alam na feà Musam dauha laba modesu fi si ogatedam bak aam biem bakti uloho bak. Ame dam labe iho ozom bi ahusobulehe bak lam debu iho ame Im Neàna lam ahate iademe vou vameatedaha vab labe ahusobulehe vabak. Gi iho iademe vou vameatedahana ame dam labe ihimo Yesus bake tu vuzehedam moho bak lam Alat amu neha, “Dam lam emti ba vahem kaio. Gi vaitesu modesda tame,” lahame amu gi fet ozome ahumdi esuhu labe labihaha bak.
4. Neham labe labihaha bak. Abo dam Ala bake tu vuzehi meedaha vab dam laba vuusdam Boehàda Iblis labe ame dam labe iho ozodam bak lam veimai modesdam bak. Dam lam Kristus labe Aba Aho meedaha Im Neàna lam aime ozobohudem bak lam mali gi ozom bili ahusobuli meedam damat modem bak. Abo dam fako aubesuhuda labe fauha neà bak aam bili meedam bakti ulohona meedam damat modem bak. Labiha labe ame Im Neàna lam damat vou vameatedam di ba fauha neàdem vabile. Labi fauha neàdem vabilehe labe Kristus labe Am Aiti uloholi feà datelehe bak lam laha ozom bi ab ahusobuleham bak.
5. Ame dam labe iho ozom bi ahusobulehe bak lam debu iho ame Im Neàna lam ahate iademe vou vameatedaha vab labe ahusobulehe vabak. Eho etei lab gagoho bak lam imbote. Im ba neham vabak. “Ee ibida fà damat vousai vou baedase,” lahame ba dam bake vou vameatedam vabak. Iho fa gi im nehasu dam bake vou vameatedam bak. “Ame Da Yesus Kristus lam im Boehàda amemu ee Abada vousase,” lahame dam bake vou vameatedam bak. Labi laha Yesus labe Aho iba gagohemu im gi na ubuda tau modiam damalehe bak. Iho uba tau modi neàdedam bak laba ozome labihadam bak.
6. Iho Yesusat Aba Aho meedaha Im Neàna lam iho vou vameatedam bak lam gi neham bak ozome meedam bak. Aham di iube Alat bak nimti asum iumti alimeat modelo modehe di lam aho gi neha, “Aibu bak lam fa fauha neàdese,” lahame gagoha gi ame baket ab modeham bak. Labi ame Ala labe laha im dam bakda labe im ahu ad niba modi fauha neàdehe bak labet modi Am bisi feà bak lam iba modi fi gatedam Ala Am am bak. Abo aham di iube Alam na feà Musam dauha laba modesu fi ddam bak lam damat aadam labe ozo, “Ala bisi feà Ala ame?” laham bak aame ozobohudehe bak lamti uloholi im dam bada nibe im Alam Adat Yesus Kristus bake tu vuzehedameam làhà Aho iba neo modi ozobohudi Am Aiam feà bak lam im laha vi fi gatem bak.
7. Alat Am feà lam iba lab modi vizi teudi iho ame Im Neàna lam vuusu vou vameatedam bak lam gi iho nazoh soa maehena vuusdam bak lamti uloho bak. Lahana im gi ek damat abo ohanut modi asalehena agube setem bakti uloho damat modem bak. Lahana na soa maehena dume esuhu bak. “Dam giida labe fà im nehasu aame ozobohudese,” lahame Alat ahit labihaha bak. Iho ame Im Neàna lam dam bake vou vameatedam di ihimo it teudi keàtedi meedam vaba gi Alat Am feà bak labet iba modi vizi iho teudi keàtedi ame bak lam meedam bak ozobohudem bake labihaha bak.
8. Eho gi neham bak ozome uba labi gagoho bak. Iho ame Im Neàna lam vou vameatedam di labe na im iba modi geàdamna lam abo bak iubet li iba ulasi geàda. Bak iubet li iba ulasi geàda. Gi labiham zida. Lahana lam biem bakti uloholi bisi deausi meedamnàme iho ba àvodem vabak. Im lam zie ehe bak. Labi laha im ahu ozom bili modem zida. Lahana iho tu vi ozodamda ehe labe im ba ahu bisi faidem vabak. Ala iba taumda ehe bak.
9. Labi laha damat iba fakemoholi beom zidamnàme Alat ba im mu voom vabak. Labi laha damat iba na asimbunat belu bitidamehamdehenàme im ba elodam vabak.
10. Labi laha iho bak iuba lào? Bak iuba lào? Lahadam di lam iho ame Im Neàna lam vou vameatedam labe damat iba aam di otelo modem zida. Abo Yesus amu damat Am alihi aam di otelo modem bakti uloho bak. Laham bak lam im ozobohudehe labe iho gi ozahit uledi meedam bak. Yesus Aho amu eloho bak labet Alat modi fa ahedi Am feà bak lam iba modi vizi teudi meedam bak lam, “Damat fà ozobohudese,” lahame iho gi ozahit uledi meedam bak.
11. Im etei bak niba esdam di nim iho im Boehàda Yesus bake tu vuzehi im Abada vahokedàmu damat iba aam di im otelo àhàki modem zidam bak lam Alat gi neham bak modi tombalelo modemu Aho ozahit ame bak lam uledehe bak. Im Boehàda Yesus Aho amu eloho bak labet fa ahedehena feà lam Aho neo iba ekda so niba vizi teudi meedam bak lam, “Dam giida ahebu fà aame ozo, ‘Paulus am dam totbaho lamti ihimo ozome meedam kaio. Yesus labe Am feà bak lam ame dam laba vizi teudi meedam bak,’ laham bak lam ozobohudese,” laham bak lam tombalelo modemu Alat ahit damat iba aam di otelo modem zidam bak lam uledehe bak.
12. Labihàmu imota ab vi ozobohudeham bak. Iho ame Im Neàna lam vou vameatedàmu damat iba otelo modemna zohàme iho vou faovoi vi ozodam digat tadedam bak. Lahamnàme iho gi ozahit labihasu meedam neà bak. Iho Yesus labe Aho lab meedaha Im Neàna lam iho uba vou vameatedam labe uho tu vuzehi fa ba Alati vahi gi ahe neàna bohu vuusdam bake iho gi labihasu ozahit meedam bak.
13. Alat Vameadaha Im Toedahana laba meit Ala bake im nehasu gagohona toehe bak ehe bak. “Eho Oba tu vuzehehemu em ba im Oboda meia vameadam di ba iedehebeat vameadam vaba gi ahu teudi vameadam bak.” Lahame labihasu Ala bake gagodaha bak. Labiha labe iho laha Ala bake tu vuzehedahemu iho ame Im Neàna lam vou vameatedam di Alat iba tauhu labe im ba elom bak iedehe vaba gi ahu teudi dam bake ame Im Neàna lam vou vameatedam bak.
14. Iho neham bak ozobohudehe labe labihadam bak. Im Boehàda Yesus labe Am eloho bak labet Alat modi fa ahedi usahemu Aho neo ba diamut im elom di iba laha neo modi fa ahedi usnada tame. Modi usnadume neàdehezobe Alat fa imti umti ahebu fa vahi im Boehàda Yesus Aho avaesdam laba vou tom ilu le dozeada tame. Laham bak lam im ozobohudi ame Im Neàna lam iho iedehe vaba gi teudi vou vameatedam bak.
15. Na im iba modi vabidume geàdamna zi ehenàme iho gi um neàdem bak laba ozome ozahit keàtedi meedam bak. Iho gi neham bak ozome keàtedi meedam bak. “Alat dam bake ozahit deeli im neà bak modi esuidam Ala Am bak,” laham Im Neàna lam iho vou vameatedam labe dam dua bak labe meit vi aime tu vuzehe. Meit vi aime tu vuzehe. Labihasu vi taui vi tauidam labe ame dam duali Ala bake, “Am abo feàte,” lahame im ahu adat iedi Am ee vousai vou baedam bake iho gi ozahit keàtedi meedam bak.
16. Labihàmu na im iba modi vabidume geàdam di im ba iedi ahu faidi ame Im Neàna lam vou vameatedam bak mom vabak. Im so nu ad nim dihasi alihi nemahusi meeda. Labi neo dihasi alihi nemahusi meeda. Labihasu meedamnàme im ahuta Alat dihasi vi modi gàhàdi teudeda. Labi neo dihasi vi modi gàhàdi teudeda. Labihasu bohu vuusu meedam bak.
17. Neham bak. Alat ba diamut iba bisi neàbodem bak duana abo gi labahana ahoba iuba Aho azihi bak laba esu ahumdehena ehe labe na im iba etei modi vabidume geàdamna nim iho vi ozom di gi koena vo gatbeti ulohona asimbu vabna gi teohet vabidam bak. “Bisi feà kaio,” lahame vi ozodam bak.
18. Labihàmu etei iba duzuhuna zi nim abo na im iba vabidume modi geàdamna zi nim im ba ahu bisi tu vi ozodam vabak. Im gi asum ahoba iuba Alat gagohona lam abo iho etei aam vabna laba im ahu adat bisi tu vi ozodamna am bak. Neham bak. Na im iba etei modi vabidume geàdamna nim gi teohe modi fa setem bak. Lahana Alat iba ba modemna lam abo iho etei aam vabna lam abo gi labaha bohu vuusdamna am bak.
1. Im etei nim ba bak niba teohe modesu iho fakot aadamnata bisi tu vi ozodam vabak. Im abo gi iho aam vabna abo gi ahamo labaha bohu modesumna laba bisi ibi iho tu vi ozodamna am bak. Iho neham bak ozobohudehe labe labihadam bak. Im bakda ahebu ibi iho bak niba teohet mome faatoiam num iho azimna nim fa faatoi vàhàdemeam làhà im asum ahoba iuba Alat iba mome esuhu num abo dam bak dàt auet modehe vab num abo gi labaha bohu vuusdam num ehe bak. Ame im labe am tombu gi neham bak. Iho bak niba eloi sokba vou esmomeam làhà asum ahoba iuba Alat iba modi im so fa gàhàdi elom gikina bohu vuusdamna ehe bak. Laham bak lam im ozobohu bak.
2. Lahana ame bak lam modehe vab labe etei di nim im bakda iho bak niba esdam lahasuhu di nim im gi geàdam bohu meedam bak. “Alat gi ame bak lam taho etei modi seti im so fa gàhàdi abo asum ahoba iuba azim neà soti ulohona etei di nibe fa modesuse,” lahame vi ozodume geàdam bohu meedam bak.
3. Eho gi neham bak vi ozome uba labi gagoho bak. Ame so gàhàda lam iba fa modesumeam làhà im ba so bozbuna it ozomom vabak. Abo gi sue dume neàdi gi ahumdem bakti uloho bak. Ba gi it oazi so vabna azim vabiem bak.
4. Iho bak niba esdam lahasuhu di nim im so ad nim dihasi faidi gaili bisda. Labi neo dihasi faidi gaili bisda. Labihasu meedume alihi nemahusi meedam labe im geàda. “Taho eloi sokba vou esmose,” lahame geàdam meot. Lahana iho gi eloi sokba vou esmom bak laba bisi ozome geàdam vabak. Gi, “Etei nim eloho vab di bak niba modi im so gàhàdi elom gikina modesu godase,” lahame ozome geàdam bak. Labiham labe im ekda nim fa veimdi ahena neàna bohu tadi vuusdam bak am bak.
5. “Iho bak damat fà labihadase,” lahame Alat gi amu di iube iba modi ahumdi esuhu bak. Iho ba diamut im so veimdi fa gàhàdi modesum bak lam iho, “Imbote,” lahame tu vi ozodam bak lam Alat ahit Am Aha Nutabe Neàna labe iba nasi fet modi vizi iho vi ozodam bak am bak.
6. Alam Aha Nutabe Neàna labe iba vizi vuusdam labe im ahu ba bedi nigom vabak. Abo im ahu teudi, “So gàhàdi elom gikina iba modesum bak lam Alat ba mode tame,” laham bak laba tu keàtedi vi ozodam bak. Im neham bak ozobohu bak. Iho bak dàt bak niba esdam di gi ek damat esdam bak. Ek damat bak niba esdam lahasuhu di nim im ba im Boehàda Yesusti asum ahoba iuba vahi esdam bak fuhu vabak.
7. Labiham labe iho Kristus bake tu vuzehi meedam dam nibe iho bak niba esu na im meedam di iho Kristus bake aam vabnàme gi ozahit, “Ame bak lam Alat ba mode tame,” lahame Aba tu vuzehi na im meedam bak.
8. Imbote. Em gi eho amu gagoho bak lam fa neo vi gagolo mozo. Alat Aho neha, “Im so Aho modi veimdi fa gàhàda modesu tame,” lahame amu gagoho bak lam, “Imbote,” laham bak laba iho tu keàtedi vi ozodam bak. Labi im laha nehi vi ozodam meot. Iho bak niba esdam di gi ek damat esdam bak lam fa feidasi im so fa veimdi, “Fà im Boehàda Yesusti vahi asum ahoba iuba azise,” lahame ilahu, “Etei meedase,” lahame àhàki vi ozodam bak. Iho ozoha, lam bisi neà bak am bak.
9. Labihàmu iho im ahu vàmadi gi nehi ozome meedam bak. Iho bak niba ek damat esdam di nibe gi im Boehàda Yesus labe Am ahu deelem bak laba vi ozome na im iademe vamdesu meedam bak. Abo iho ba diamut im so veimdi fa im Boehàda Yesusti vahi asum ahoba iuba azim di modem bakti ulohona meedam bak.
10. Neham bak. Ba diamut im bakda ahebu iho bak niba ek damat esdam di meedaha im lam Kristus iba uloodume aim bake Aho avaesdam laba le dozeadam bak ehete. Labi ame di labe iho bak niba meedaha im laba Aho vi ozome fa ame baleà vouhodam bak ehe bak. Abo iho faina meedam bak modeo, iho im neàna meedaha bak modeo, gi ame bak laba vi ozome uloholi fa ame baleà vouhou vatauda tame.
11. Ba diamut im Boehàda Yesus Aho iba bakda ahebu uloodume aim bak ehe labe iho im ahu ad vei iedi ba im Aho deelem vabna lam meedam vabak. Labihàmu iho, “Damat fa im Boehàda Yesus bake tu vuzehedase,” lahame iho bisi keàtedi dam bake vou vameatedam bak. Iho ame Im Neàna lam dam bake vou vameatedam di ba ibi iho ozom im lam vasti uba keobaedam vabak. Gi ahate tombali vameadam bak. Iho lab meedam bak lam Ala naeda ozobohu bak. “Ame bak lam um laha vi ozome ozobohudese,” lahame iho ozome meedalo àhàki meedam bak.
12. Uho ozom, eho etei uba lab gagoho bak lam gi iba naedama it daetbadam imot mode? Vabà. Ba labiham vabak. Iho gi dam iho vou lehe im lam mu iba feàtàdam dam giida labe uba lem di uho fa ame dam laba neha, “Paulus giida ibi iho lab vou vameatedam bak lam abo neàte. Ba git modem bak na vabak,” laham bak lam um ozobohudi fa iba deelehat tau gagom bake eho ahit uba labi gagoho bak. Ame dam giida labe uba lem di gi neha, “Iho gi neà bak ahate meedase. Labi dam totbaho labet fà iba aame vou baedase,” lahame ahobat neàdi meedam damat modem bak. Lahana ame dam labe im ahu ad ium gi faina meedam bak tadehe damat modem bak.
13. Dam iba fakem dam totbaho labe vedi iba neha, “Ozbiehebu damat modem bak,” lahame iba labihasu feàtàdameam làhà gi neà bak. Iho gi Alam ee vousai, “Am abo feàte,” lahame im ahu vàmadi Alat Aba Aho gagoho bakti ulohodesu meedalo àhàki meedam bak. Labi ame dam zoho labe laha iba neha, “Im gi im ozobohudi iademe meedam damat modem bak,” lahame labi gagomeam làhà lam laha neàt. Im gi uba vi tau vabiedalo lehe bake dam labe ahole gagodam bak.
14. Kristus labe Aba Aho lab meedaha Im Neàna lam iho dam bake vou vameatedam bak lam iho voom vabi keàtet meedam bak lam debu gi neham bak. Kristus iba nehi deeli meedam labe iho gi ame bak lam meedam bak. Dam bakda ahebu ibi iho faina meedam bak lam dat vàmtea abo Kristus labe Aho fa ot vai ab eloham bak. Ame bak lam im ab ozome ozobohudi ab neàdeham bak. Ame bak lam imbodehemu im nidi nim laha imbodehe bak. Im ahebu Kristus bake vi tau elodahana ozomom bak.
15. Kristus iba bakda ahebu ot vai eloho bak lam gi neham bak ozome labihaha bak. “Iho Kristus bake tu vuzehi meedam dam imboda nibe iho ba ibi iho bak damat meedume baleàhà bak lam meedam vaba gi Kristus labe Aba Aho ozoho bak laba iho vi ozome meedase,” lahame ot vai eloho bak. Ame Da Kristus lam abo im bakda ahebu ot vai eloi Alat fa Am eloho bak labet fa ahedi usahemu iho gi neha, “Kristus iba fà deelese,” lahame iho gi Aba Aho deelehe im lamota meedam bak.
16. Kristus amu iba ot vai elohoda laba iho tu vuzehi vàmadehemu iho ba bak dam nibe ibi iho meia ozoho bak labet modi meia neha, “Om abo neàte.” Laham vab di, “Om abo faite,” lahame labi ozome gagodam vabak. Amu di iube iho Kristus bake ozoho di lam gi ibi iho bak damat ozoho baket modi Aba neha, “Dat bakda modem bak,” lahame labi ozome gagodam bak. Lahana etei nim ba labihadam vabak.
17. Iho meit Kristus bake tu vuzehi amti vou ali ahu vàmadi meedamda lam gi ab modi gàhàdeham bak. Ame da lam aba aho amu bak niba esu meedume baleàhà bak lam fa gi voou seti fa aba aho am ahulat ozom baket fa gàhàdi meedam bak.
18. Iba lab modi gàhàdi meedam bak lam bak damat ihimo modem biem bak. Gi Alat Ahamo iba bakda niba modehe bak. Kristusat iba fa ot vai eloho labe Alat Aho iba ozom di, “Aba fakemoholehe damat modem bak,” lahame ba iba labi vàlu gagodam vaba gi, “Fa Am damali Amti vahem damat modem bak,” lahame iba labi ozodume gagodam bak. Labiha labe Aho fa neo iba neha, “Iho laha dam amomoi bake le im nehasu vou vameatedale. ‘Amu Ala bake fakemoholehe dam laba Alat modi fa Am damali Amti vahem bak ehete,’ lahame dam bake le labihasu vou vameatedale,” lahame iba labi gagu esuhu bak. Aho iba labi gagu esuhemu ihimo ame baket ab meedamam bak. Iho dam bake le im nehasu vou vameatedam bak. “ ‘Kristusat dam bakdate Aho ot vai elose,’ lahame Alat ahit Am Adat bake gagu bak niba oluhu bak. ‘Dam Aba fakemoholehe dam lam fà modi Am damali Amti fa vahedase,’ lahame ahit labihaha bak. Labi iho bak damat faina meedam im zi lam Am ba Am ahu laba ateme vahedam vaba gi mu fa faamome vei neàdedaha bak,” laham Im Neàna lam ihimo dam bake vou vameatedam bak.
20. Labihàmu Kristus labe Aho iba gagu modi Am im aime im dedamali fa dam bake vou vameatedam dam im am bak. Labiha labe iho ame im lam vou vameatedam di lam Alat iba im aha niba modi vou vameatedamna ozomom bak. Labihàmu Kristus labe Aho iba modi Am im dedamali meedàmu iho dam bake gi nehi ooteme vi vameadam bak. “Ubu uho amu Ala bake fakemoholi meedume baleàhà bak lam nasi voou fa Am damali Amti vahe vahem damalele,” lahame dam bake labihasu ooteme vi vameadam bak.
21. Ame Da Kristus lam ba faina meedam vab dàt modem bak. Lahana iho bak damat ibi iho lab faina meedam im zi lam ahebu Alat fa Am adat Kristus bake modi Aho ab ot vai eloham bak. “Iho fà Kristus bake tu vuzehi amti vou ali ahu vàmadi meedam labe Alat fa iba ozom di, ‘Im gi im vamdesu meedam damat modem bak,’ lahame labi ozahit deeli gagu vame Am damalese,” lahame labihaha bak.
1. Iho gi Alat Aba Aho iba gagu oluhu bak lamota meedàmu im gi Alati vahi im meedamna ozomom damat modem bak. Labihàmu iho gi nehi uba ooteme vi vameadam bak. “Alat amu uba lab ozahit deeli im neà bak modi esuidaha bak lam uho a nehi ozodamule. ‘Feà imot modem kaio. Gi sikim imot modem bak,’ lahame a labi vi ozome meedamule. Uho labihameam um gi modeme vanamai teolemna mode moio?” lahame etei nibe iho uba labi ooteme vi vameadam bak.
2. Iho gi neham bak ozoho labe uba labi ooteme vi vameadam bak. Etei di nim Alat uba deeli im neà bak uba meedalo modem neà di am bak. Etei di nim Alat uba soat vausu fa vei neàdedalo modem neà di am bak. Laham bak lam iho gi Alat aham di iube Aho Am im aime fa dam bake ahate vou vameatedamda meida Yesaya bake nehi fet gagu esuhu bak lam vi ozome uba labi gagodam bak. “ ‘Eho oba deeli taum neàte,’ lahame Eho lab fet ozome esuhu di lam oho Eba gagohemu Eho aime oba ab deeli tauham bak. Labi obo oho faina meedam bak lam Eho oba beom bak lam fa Ehemo vei mu oba soat vausu fa vei neàdehe bak.” Lahame Alat aham di iube labihasu fet gagu esuhu bak lam uho faina meedàmu Alat uba beolo modem bak lam, “Fà soat vausu vei neàdedase,” lahame fet gagu esuhu bak lam Alat etei meedalo ahumdi vou faodam bak.
3. Ibi iho ame Im Neàna lam lab vou vameatedam bak lam meedam di iho gi nehi it ozodume meedam bak. “Iho git modem bak damat vi aame iba vàlu, ‘Im git modeho,’ lahame iba labi vàlu fa ibi iho ame Im Neàna lam vou vameatedam bak laba vi feàtàm bak labna zohàme iho gi im iademe vamdesu meedase,” lahame labi it ozodume meedam bak.
4. Labihàmu ibi iho lab meedam im lam meedam di, “Im gi Alat Aba Aho gagoho im lamota meedam tadem dam im am bak,” laham bak modi tombali damat iba iademe ozome ozobohudem bake im nehasu meedam bak ehenàme iho gi ozahit keàtedi meedam bak. Naat iba vabidume im alihi nemahusi meedam di modeo, Naat iba modi geàdam bohu meedam di modeo, Na im iho vi ozome meedamna lam meedasome modeha ame im lam meedam vabili ahu faidi vi ozodam bohu meedam di modeo,
5. Damat iba siàdume foho bak uloholedume fa sel oumahedam di modeo, Ibi iho Alam im lab vou vahokedam bak lam damat iba faki dae duali feà bak fusi meedume iba otelo vabidam bohu meedam di modeo, Iho ame im lam dam bake vou vameatedam di lam abo gi keàtedi meedume vanamai alihi nemahusi meedam di modeo, Bisu idam di na im vi ozodam labe im vabili meedam di modeo, Gi ideia ibzidume idoalem diale. Na àme im diale. Gi labihadam bohu meedam di modeo, Labihasu meedamnàme im ba mom vaba gi ozahit keàtedi labaha bohu vuusu meedam bak.
6. Iho im nehasu meedam labet modi damat ozo, “Paulus giida abo Alat Aba Aho gagoho im lamota meedam tadem dam am bak,” laham bak modi ab tombaleham bak. Im ahu ba fai bak vabna gi ahu vàmadi meeda. Labi iho Alat Aba Aho gagoho im lam vi ozome ozobohudi gi iademe meeda. Labi laha damat iba git meedam di modeo, im fai bak duzum di modeo, iho gi ozahigeàmu laha vou faoda. Labi laha iho gi ahu neàt dam amomoit iho na meedam di fa tau meeda. Labi laha Alam Aha Nutabe Neàna labe iba modi vizi teudehe labe Alat gagohona lamota iho meeda. Labi laha iho dam bake deelem di ba koena deeli meedam vaba abo ahu vàmadi duana deeli meeda.
7. Labi iho Kristusat lab meedaha Im Neàna lam abo im imbona lam vou vameatedam di lam Alat Am feà bak lam iba tau modi vizi teudehe labe iho dam bake vou vameateda. Labi iho laha Alat Aba Aho ozome iba gagoho im lam iho vamdesu meedam labe iho gi naat iba beomna zohàme vatohemna baa lamti ulohona vuusu. Labi ae tot mo tot mo lahamna lamti vuusu. Labihasu vuusualame meedam bak. Neham bak. Damat iba fakemoholehe dam labe fa ibi iho lab meedam bak laba feàtàm di modeo, iba fai bak vabidalo meedam di modeo, iho lab im vamdesu meedam bak lam ame dam labe aahemu ibi iho modelo modem bak gi fa ab setidamam bak.
8. Alat Aba Aho iba gagohona lam iho meedam di lam dam totbaho labe iba aame ahu adat iedi iba vou baedào? Laham vaba vedi fa gi iba faki beàdào? Labi laha dam totbaho labe fa ee ibida vousai gagodào? Laham vaba vedi fa gi iba feàtàdào? Labi dam totbaho labe vedi iba neha, “Im giomimna vameadam damat modem bak,” lahame iba feàtàidamnàme im gi ozahit ame im imbona lam vahokedam bak.
9. Labi laha dam dua zoho labe iba ozom di im bisi elaidamda am bak. Lahana dam zoho labe vedi iba ozom di, “Im ee aim vaba gi aidamda modem bak,” lahame iba ozahigeàmu fa mu voeda. Labi laha Kristus labe Aba Aho iba gagohona lam iho meedàmu damat iba faki, “Beodume elodase,” lahame meedamnàme im ba elodaha vabak. Gi ahe lahasuhu bak. Damat neha, “Im foho bak uloholi itaholedase,” lahame meedam di im ba elodaha vabak.
10. Naat iba vabidume im ahu faidemnàme Alat iba tauhu labe ba im ahu bisi faidem bohu meedam vaba gi deelehe neàt bohu vuusu meedam bak. Labi im gi na vab damat modem bak. Lahana iho ame Im Neàna lam uba vou vameatedam labe uho aime Kristus bake tu vuzehi meedam labe Alat fa uba neà bak duana vi meedam bak. Iho bak niba esdam di damat iba ozom di im gi na vab damat modemna ozomom bak. Lahana ba diamut Alat Aho dam bake vuusu im vahokedam di iba lolo modemna lam ahebu iba nasi fet gagu esuhu labe iho etei nasi im dedamali vi ozodam bak. Iho labihasu meedam labe, “Im gi Alat Aba Aho gagoho im lamota meedam tadem dam im am bak,” laham bak ab modi tombaleham bak.
11. Korintus dam abo emti vahi Kristus bake tu vuzehi meedam dam oa, im ahu ad nibe vi ozoha, iho uba lab vi vameadaha im ahebu lam uba ab modi ahate vameadume ab tombaleham bak. Ba iho ad niba vastem bak kaio. Labiha labe, “Im abo uba deeleho,” laham bak lam um ab ozobohudedaham bak.
12. Neham bak. Ibi iho uba deeli meedam bak lam ba vaitom vabak. Gi labaha bohu vuusdam bak. Lahana ubu uho iba deeli meedam bak lam mahate deelem vaba gi odohali meedam damat modem bak.
13. Labihàmu um gi em data modemna ààmom damat modemu eho uba gi nehi gagodam bak. “Uho iba laha ame baleà vouhou um ahulat iba odohalehebeat deelem bak lam fa voou fa ahu vei neàdi iba mahate deelele,” lahame gagodam bak.
14. Dam Kristus bake tu vuzehi meedam vab dam laba a fa vazisi vou ali ahu vàmadi vi tau meedamule. Neham bak. Kristus bake tu vuzehi im vamdesu meedam damti labi Kristus mu im fai bak meedam damti fa vazisi ahu vàmadi ba im meedam biem bak. Abo bak fauha bak lamti bak aibu bak lamti vazisi meedam biem bak. Abo dam fauha bak laba azim dam lamti fa dam aibu bak laba azim dam lamti vazisi ahu vàmadi ba im meedam biem bak.
15. Iho ozom, Kristusti Iblisti ba fa vahi ahu vàmadi im meedam vabiem bak. Labiha labe ba Kristus bake tu vuzehi meedam dam lamti Aba moho dam lamti laha ba vazisi ahu vàmadi im meedam vabiem bak.
16. Labi laha elom gikina gi labaha bohu vuusdam Ala Bake Fihasi Vou Baedam Num Vàmteabu laba ba na ostamna it modi alali vou baedamna lam vou oli esu vou baedam vabiem bak. Eho gi neham bak ozome uba labi gagoho bak. Eho num laba vàlu gagoho bak lam gi im Alam damalehe dam ahebu iho meedam bak laba ozome ame num laba vàlu uba labihasu vameadam bak. Neham bak. Ame num lam iho ozoha, gi im am bak. Labi Ala elom gikina gi labaha bohu vuusdam Ala labe aho im ahu laba vizi teudedam Ala Am am bak. Aho im ahu laba vizi teudedaha bak lam imbodehemu im ba dam na ostamna it modi alali vou baedam dam laba vi taum vabak. Eho gi meit Alat Vameadaha Im Toedahana laba nehi toeme esuhu bak laba vi ozome uba labi vameadam bak. Alat aham di iube Aho Israel dam laba ozome nehi vameadaha bak: “Eho ame dam laba tau vazisi azi tame. Ba ame dam lam Eho vou esmom vabak. Labi ame dam labe ibi iho vou baedam Ala Em am bak. Labi Ebe Eho vuusdam dam ame dam lam bak.
17. Labihàmu Eho Boehàda Alat ame dam laba ab gagoham. ‘Umti dam Eba tu vuzehehe vab dam lamti vahi meedam bak lam fa nasi fi hasi vaitesu ame dam lam vou esmozi uhumo vazisi meedale. Labi ame dam labe ibi iho bisi fai bak meedume baleàhà bak lam uho mu vaitesule. Eho malehe im lam uho uledi meedam vabameam làhà Eho um vame Em damalem bak.
18. Labi Em abo uba vuusu vabiedam labe ab um Aialeham bak. Labi laha um Em adamti Em adnamati ulohona ààmom damat modem bak,’ lahame Eho Boehàda Bisi Feà Datebo nibe uba labi fet gagu vàmadi esuhu bak.” Lahame Alat labihasu gagohemu eho uba neha, “Dam faina meedam dam laba uho a vazisi ahu vàmadi meedamule. Gi fa fi hasi vaitesu uhumo meedale,” lahame eho uba labi gagoho bak.
1. Ebe eho deeli meedam dam oa, Alat neha, “Aho ba im Aiat modemna ààmomna mode tame,” lahame iba labihasu fet gagu vàmadi esuhemu imo neham bak meedase. Faina meedam bak lam iba im ahu ad niba modi vizi im faidi vàhàdem bak lam abo damat ahate aamda lamti im ahu ad laba aa vastemda lamti labihasu ahebu imo nasi voedume fa vei neàdedase. Abo Ala bake im ahu adat iedi vou baedam labe im ahu vàmadi Aba Aho gagohoda lamota ulohodesu meedase.
2. Emti vahi Kristus bake tu vuzehi meedam dam oa, uho ozom, iho uba git modehe bakvat ehe? Labi iho uba na im modi faidi vàhàdehe bakvat ehe? Labi iho uba ahobat neàdi keobaedume nazoh ubuda iho vadaha bakvat ehe? Vabà! Im ba labihadam vabak. Labihàmu uho iba faki ot odosiaha bak lam taho fa faamome vei neàdi um ahu ad lamti fa iba deelele.
3. Eho etei uba lab gagoho bak lam, “Uho modeho,” lahame uba ba vàlu, “Um fà aime ladese,” lahame labi vi ozome uba labi vameadam vabak. Iho uba deeli meedam bohu meedam bak lam um ozobohuna taia? Im ahe lahasuhu di nibe modeo, abo iho ame Im Neàna lam uba vou vameatedàmu damat iba, “Oteme eloi fà setese,” lahame iba meedam di modeo, ba iho uba lab deeli meedam bak lam ba vaitoi setem vabak. Gi labaha bohu deeledam bak. Laham bak lam um ozobohuna taia?
4. Eho uba vi ozom di, “Um laha gi iba deeli meedam damat modem bak,” laham bak lam em ahu ozobohu aabodi bisi tu vi ozodam bak. Labi laha uho lab neà bak meedam bak lam eho ee ubuda vousai fa dam amomoi bake vameadam bak. Labi laha naat iba vabidamnàme em gi ubu uho lab neà meedam bak laba vi ozom labe em ahu ba faidem vaba gi fa teudi keàtedi meedam bak. Uho lab meedam bak lam eba vabededam bak lamti ulohona meedamna ozomom labe em ahu gi deelehat bohu vuusu meedam bak.
5. Em ahu etei fa teudi keàtedi meedam bak lam um biem bake eho uba tombalelo modem im nidi nim uho nasi aimale. Iho bak Makedonia niba ahamte lefuhu di lam naat iba vabidume toet ula toet ula lahadume im alihi nemahuda. Labi dam dua totbaho labe iho vou lehe im aim mu iba faki beàdam labe dae gai zidda. Labi im laha, “Um neào? Faio?” laham bak aihi vabna im ahu faidi iedi vi ozoda. Labihadam labe im ahu ba vabademsum vabak. Gi fi goaitoi modesda.
6. Lahana Titus amu uba le im ubuda aame fa iba Makedonia niba li vameadàmu im ahu amu fi goaitoi modesdam bak lam fa seti im ahu ab vabademsuham bak. Labihàmu iho mei ahu faidem di fa vabededume teudedam Ala labet Aho iba vabededume teudehemu iho gi Aba vou baedam bak.
7. Titus aho fa iba lehe bak lam iho aahemu im ahu fi goaitoi setehe bak lam fa ab neàdeham bak. Lahana gi aho lehe bak laba iho aame im ahu teudehe vabak. Aho laha iba li neha, “Eho ame Korintus dam bake ahamte lafuhu di lam em ahu fi goaitoho bak lam ame dam labe eba gut vabededam bak. Labi fa neo eba neha, ‘Im Paulus bake ilahuho. Am fa taho niba lele.’ Lahame eba gagoda. Labi laha ame dam labe iho Paulus bake git modi am ahu faidehemu ozo, ‘Iho git modehe?’ lahame ahu ladehe bak lam ahate eba vameada. Labi laha ame Korintus dam totbaho labe iho aaha im dam zohot amu Paulus giidate feàtàhà di lam iho vedi gi daleàdi vi aasda. Lahana iho ba vi ozome ladi, ‘Im git modehe? Im akati modi dam zoho laba im vahokehe vaba?’ lahame vei ozobohudi fa etei Paulus giidate fa vi taulo àhàki meedam bak,” laham im lam ahebu iba li vameadaha bak lam iho aime im ahu ab teudeham bak. Labihàmu im ahu ba koena deelem vaba abo bisi duana deelehe bak.
8. Sunit eho amu uba oluhu di lam uho ve aame ozo, “Im git modehe?” lahame um ahu it ozome ladi ahu ab faideham bak. Lahamnàme em ba neha, “Eho uba Korintus dam bake lab vahokedaha im lam eho git toeme oluhe?” lahame ba it ozome ahu faidehe vabak. Gi, “Ahole oluhu bak,” lahame it ozoho bak. Ame sunit lam eho uba ahamte oluhu di lam eho aiha um ladi um ahu faidehemu eho it ozo, “Oo làhà! Em akati sunit lamohoda toeme ame dam laba oluhela?” lahame it ozoho bak. Lahana etei nim eho ba labi it ozodam vabak. Uho um ahu lab faidehe bak lam gi kehàm vaba fa vei neàdehemu em laha gi kehàm vaba fa em ahu vei neàdehe bak.
9. Eho ame sunit lam, “Gi ahole toeme oluhu bak,” lahame labi ozome em ahu it deelehe bak. Uho ame sunit lam ve aaha di lam uho ladi um ahu faidehe bak laba em ba vi ozome ahu deelehe vabak. Gi um ahu faidi it ozodam labe ozobohudi uho lab faina meedam bak lam mu voedume fa ahu neà bak vàmadi meedam bak laba eho vi ozome em ahu deelehe bak am bak. Neham bak. Eho uba oluhu sunit lam uho ve aaha di lam uho ladi um ahu faidehe bakta faide. Lahana Alat ubu uho lab ahu faidehe bak laba vi modi uho lab faina meedam bak lam mu voedume fa ahu neà bak vàmadi ab meedamam bak. Ubu uho lab meedaha bak lam gi Alat Aba Aho ozoho bak am bak. Labihàmu eho uba sunit lab toeme oluhu bak lam eho ba uba git modehe vabak. Gi ahole modehe bak.
10. Neham bak. Alat Aba Aho ozoho bak laba vi ozome iho ladi ahu faidehe bak labet modi iho faina meedam bak lam mu voedume fa ahu neà bak vàmadi meedam bak am bak. Labi ame bak labet modi neo Alat iba soat vausu fa vei neàdedam bak am bak. Labihasu meedaha labe Alat iba im vahokehemu iho lab ladi im ahu faidehe bak lam im gi, “Ahole ladi ahu faidehe bak. Iho lab faina meedam bak lam mu voedume fa ahu neà bak vàmadi ab meedamam bak,” lahame it ozodume ahu vei deeli gagodam bak. Lahana dam Ala bake tu vuzehedaha vab dam labe ibi iho faina meedam bak it ozom di, “Im git modeho,” lahame ahu faidemta ahu faide. Lahana ibi iho faina meedam bak lam ba voedume fa vei neàdedam vabak. Gi Ala bake labaha bohu vaitesu modesdam bak.
11. Eho amu uba oluhu sunit lam uho ve aaha di lam ubu uho ladi ahu faidehe bak lam Alat uba vi modi uho faina meedam bak voedume fa vei neàdedàmu umota neàt. Labihàmu Alat ubu uho lab ladi um faidehe bak laba vi modi um im nehasu neàdedam bak nim mahate vi ozodamale. Um dam totbaho labe iho faina meedam di uho neha, “A meedamule,” lahame meia keàtet im vahokedam bak ame. Labi laha iho uba neha, “Dae ibida lam uho moho bak,” lahame uba lab vàlu gagoho di lam um dam totbaho labe vedi kehàm vaba fa eba neha, “Ame im lam imti modehe vabak. Gi dam totbaho labe ihimo modehe bak,” lahame fa iba labihasu veibadam labe vi vameadam bak ame. Labi faina meedam dam laba uho fa vei meoli im vahokedam bak ame. Labi dam faina meedam dam laba uho vi taumeam làhà Alat umti beodam bak labna zohàme uho àvodi vou faovoi meedam bak ame. Labi laha um gi eba ilahu, “Taho iba li iho aase,” lahame àhàki meedam bak ame. Labi laha Alat Aho ozome gagu vàmadi esuhu im lam eho uba vameadamna lam uho ulohodesulo àhàki meedam bak ame. Labi laha dam faina meedam dam laba uho neha, “Modi fà itaholedase,” lahame ahu vàmadi vi vameadam bak ame. Uho labihasu meedam labe eho vi ozoha, um dam totbaho laba vi tau faina meedam kaio. Um gi im Alat Aho gagohona lam vamdesu meedam dam um am bak.
12. Labihàmu eho amu uba toeme oluhu sunit lam um a git ozodamule. Eho ba gi im nehasuhuda nimota vi ozome uba ame sunit lam toeme oluhu vabak. “Uho dat git modeheda laba uho im vahokeme itaholedale,” laham im lam modeo, “Ame da labe aho modi da meida labe am ahu faideheda laba uho fa neo vi tau gagu fa vei neàdele,” laham im lam modeo, gi im lamohodata bisi vi ozome toeme uba oluhu vabak. Ame sunit lam eho toeme uba oluhu di lam eho gi im nehasu vi ozome uba toeme oluhu bak. Gi uho ame sunit lam ve aame vi ozom di uho vi ozo, “Làhà Paulus giida labe im dedamali iba vahokedaha im lam ahebu iho aime ahu ule neàt gut vuzehi meedam tadem dam im am bak,” lahame it ozobohudem bake eho ahit ame sunit lam toeme uba oluhu bak. Alata ozobohute. Em ba giomim gagom kaio.
13. Eho uba oluhu sunit lam uho ve aame um ozobohudi ubu uho faina meedam bak lam voedume fa vei neàdedahemu im ahu amu lab fi goaitoho bak lam fa vei seti gi ab teudi vabademsu modesdamam bak. Ba ame bak vàmtea lamota uho meedam labe im ahu teudi vabademsu modesdam vabak. Fa neham bakti ozome im ahu teudi vabademsu modesdam bak. Titus amu uba le tau azihi di lam um Korintus dam labe ubu uho lab neà bak meedam bak lam aho aahemu fa am ahu modi teudi vabademsu fa iba lehe bak iho gut aaha am gi ahu deelehe neàt fa lehemu im laha ahu ibida gut aame ab deeleham bak.
14. Eho Titus amu uba gagu oluhu vab di iube eho nasi Titus bake neha, “Ame Korintus dam lam abo im neà bak meedam damat modem bak,” lahame eho uba labi vi ozome vou baedam bak lam Titus bake fet nasi vi vameadaha bak. Labi Titus uba le aaha uho gi ame baket meeda. Làhàmu Titus fa iba li gi ame baket vameadahemu em ahu ba ladehe vabak. Titus uba le aaha um gi eho aba gagoho bak gi ulohodesu meedamna aahemu em ba ladehe vabak um ozobohuna taia? Eho amu uba tau azihi di lam em ba im giomimna uba vameadaha vabak. Gi im imbona lamota uba vameadaha bak. Labi em laha etei ubu uho neà bak meedam bak laba vi ozome uba vou baedaha bak lam eho Titus bake vameadume oluhuna lam laha giomim vameadume oluhu vabak. Gi aho uba le aaha gi imbodehena le aaha bak.
15. Labi ame da Titus aho uba ahamte lafuhu di lam uho gi um ahu adat fota iedehenàme gi ule neàt aba gut vaha bak lamti aba aho uba vameadaha im lam uho gi uledi ame baket meedaha bak lamti labihasu ahamo vi ozom di aho amu uba deeli meedaha bak lam neo vi deeli bohu vuusu meedam bak.
16. Labihàmu Alat uba neha, “Nehasu meedale,” lahame labi uba ba gagolo modem im lam, “Um ba moho vaba gi ule neàt aime vuzehi meeda tame,” laham bak lam em ab deeli nasi tu vi ozodamam bak.
1. Emti vahi Kristus bake tu vuzehi meedam dam oa, Kristus bake tu vuzehi vahi meedam dam abo dam zi mei dam zi meime bak Makedonia laba esdam dam laba Alat Aho meia im neà bak bisi duana modi esuidaha bak lam eho etei fa uba vameadalo mozo.
2. Neha: Ame Makedonia dam labe naat iba bisi vabidume alihi nemahusi geàda. Labi laha ame dam lam na vab damat modem labe na iho valo ozohona ehenàme gi ozahit, “Ame Kristus bake tu vuzehi meedam dam kota Yerusalem laba azihi dam abo na vab dam laba tau doi vi lodase,” lahame ame dam laba faobekesi duana deeli doi duana lodaha bak.
3. Em ba giomim gagom kaio. Ame Makedonia dam labe im doi ame dam na vab dam laba lodaha di lam ba doi koena lodam kaio. Dam lada laba faasi lodaha bak abo duana vi lodam labe ibi zoho fa koedehe bak. Koedehe labe na iho ozome valo modemna ehenàme gi ozahit labihasuhu bak. Labi ame bak lam meedaha di lam meit ame dam laba vi ootehe labe ba ame dam lam odohalehebeat meedaha vabak. Gi ihimo im ahulat uledi lodume vahedaha bak.
4. Nehaha bak. Bak mei bake azihi damti bak mei bake azihi damti laham dam labe iho Alam damalehe dam na vab dam abo bak Yudea laba azihi dam laba doi lodam bak lam ame Makedonia dam labe iho aahemu vedi neha, “Im laha vi tau lodase,” lahame labi tauleme gagodaha bak.
5. Ame Makedonia dam labe iba neha, “Paulus oa, uho doi ibida ve ame dam na vab dam laba le lodale,” lahame ame doi iba lodaha di lam ba ibi iho debe novalo nasi tu vi ozodaha bak laba ulohona vamateme lodaha vabak. Abo vafozi fa fetehesu vamateme lodaha bak. Ame di lam ba gi doi lamota lodaha vabak. Ame dam labe iho nasi im Boehàda Yesus bake neha, “Im oboda iho ahu vàmadi meeda tame,” lahame labi gagu vàmadi esuhu bak. Labi laha neo iba neha, “Im ubu uho iba gagohoda lam im laha uledi meeda tame,” lahame neo iba gagu vàmadi esuhu bak. Ame dam labe ibi iho lab gagu vàmadi esu meedam im lam gi Alat Aba Aho ozoho bak lam ab meedamam bak.
6. Labihàmu ame Makedonia dam labe ibi iho im neàna meedaha bak lam iho aahemu, “Iho Titus gagome fa uba Korintus dam bake neo oluse,” lahame ab fet vi ozome esuham bak. Nehaha bak. Ame da Titus labe aho amu uba le dam Kristus bake tu vuzehi meedam dam abo kota Yerusalem laba azihi dam lam na vabalehe bak lam um biehe bake aho uba le fi desi um aime deeli faobekesi doi lodam bak ahamte faahada am am bak. Labihàmu fa neo uba modi, “Gi ubu uho meia lab faasi deeli meedam bak lam abo ame doi lam neo vi atetedume neàdese,” lahame labi ozome uba neo olulo modem bak.
7. Eho ozoha, um Korintus dam labe uho Kristus bake tu vuzehi im Abada meedam labe um etei nim abo gi im neàna abo duana meedam bak. Uho gi nehada: Uho Kristus bake lab tu vuzehi meedam bak lam ba koena meedam vaba abo gi duana meedam bak ame. Labi laha Alat uba modi fi gatehe im lam uho gi ve fa dam bake iademe vamdesu vameadam bak ame. Labi laha Alat Ahamo ozobohudehe im lam fa uba neo vi modi vi modidume ozobohudi um fi gatedam bak ame. Labi laha uho neha, “Dam lam na vabake iho vi tau lodase,” lahame meedalo àhàki gi amu di iube fet ozome ahumdi esuhu labe gi ame baket meedam bak ame. Labi laha uho iba duana deeli meedam bak ame. Uho labihasu meedam damat modem labe fa im nidi nim laha vi meedume neàbodi iho vi aadase. Ame kota Yerusalem laba azihi dam na vab dam laba um doi vou atetedume neàbodi ahumdi esum bak lam mahate vi meedume iho aase.
8. Eho etei uba lab vameadaha bak lam ba, “Uho laha ame dam laba doi vi tau lodale,” lahame ba labi dae meona uba vi ootedume vameadam vabak. Eho gi neham bak ozome um ahu modi ozolo ahit labihasu vi vameadam bak. “Ame Kristus bake tu vuzehi meedam dam bak Makedonia laba azihi dam labe ibi iho meia deeli meedam bak lamti ulohona uho laha ahu vàmadi vi meedào?” laham bak modi ozolo uba labihasu vi vameadam bak.
9. Im Boehàda Yesus Kristus labe Aho iba ozahit deeli im neà bak modi esuidam bak lam um ozobohuna taia? Aho amu Am Ai Alati asum ahoba iuba azihi di lam Am ba na Aho ozome valo modemna vabak. Lahana Aho gi ozahit Am bak neà bak azihi bak lam gi fa vou esmozi fa bak niba li fa dam bakdati uloholi nazoh vab datelehe bak. Iba bakdate aame deeli faobekehe labe, “Iho fa asum ahoba iuba le abo iho ba diamut ozome valo modemna vabak laba le azise,” lahame ahit bak niba li nazoh vab datelehe bak.
10. Ebe eho nehi ozoho bak nim bisi neà bak am tame. Uho aime meedale. Uho tahun amuda bak iube neha, “Imo dam na vab dam abo bak Yudea laba azim dam laba faobekesi vi tau doi lodase,” lahame nasi alimeat fet vi ozome gagu vàmadi doi faasi atetedam dam um am bak.
11. Labihàmu um gi ahat vameadaha vaba abo uho amu ule neàt lab faasi doi atetedam bak lam gi labihasu neo vi meedume neàbodele. Uho labi modemeam làhà ubu uho amu nasi deelehat uledi ahamte faaha bakti ulohona neo vou mode ladume fi tatom labe dam giidat aame ozobohudem bak am tame. Labi uho ame bak lam meedalo modem di gi doi oboda laba vi ozome gi ulohona lodale. Um doi dualemeam làhà doi duana lodam neàte. Laham vabameam um doi koedemeam làhà gi doi koena lodam neàte. Gi labihasu meedale.
12. Neham bak. Uho meit neha, “Doi ebeda nim vi tau lodam neàte,” lahame um ahulat ule neàt labi vi ozome ahumdi esumeam làhà uho meia vi tau lodalo modem doi lam Alat ule neàt deeli vam bak gi neham bak. Doi ubu uho vuusum vabak laba Alat ba ozome vadam vabak. Gi ubu uho vuusum doi laba ozome ame doi vadam bak. Neha: Aho ba dat doi koeda laba neha, “Oho doi duana lodale,” lahame ba labi gagu ootedam vabak. Gi koena lom neà bak. Doi dualemeam làhà duana lom neà bak. Labihadam bak.
13. Eho ba neham bak vi ozome uba vameadume ootedam vabak. “Um Korintus dam fà nazoh vabalese. Labi fa ame kota Yerusalem laba azihi dam labe ihimo fà nazohaedase,” lahame vi ozome ootedam vabak. Em gi um dam debu meidati dam debu meidati ot modidam bak laba vi ozome uba nehi vameadam bak. Um Korintus dam etei di nibe nazoh dua labe uho ba ozome valo modemna vabak. Uho fa dam kota Yerusalem laba azihi dam laba vi tau lodam neàte. Labi ba diamut um Korintus dam fa na vabali ba ozome valo modemna ehelem di ame dam labet fa uba ame baleà vouhou vi tau lodam bak. Labihasu ot modidam labe gi um ahebu ba diamut ozome valo modemna vabak.
15. Eho etei uba lab gagoho bak lam gi Alat Vameadaha Im Toedahana laba nehi toeme esuhu bak lamti ulohona uba vameadam bak. “Dat ame na àmna duana ateheda labe am dam zohoti ame na àdam di ba fetehesu zoho vekehe vaba gi ahebu àme folehe bak. Labi dat ame na àmna koena ateheda lam laha am dam zohoti ame na àdam di ba koedi meida fotehe vaba gi ulohodesu àdaha bak.” Lahame aham di iube labihasu toeme esuhu bak.
16. Eho um fa vei neàdem bak laba vi ozome, “Fà vabededase,” lahame meedalo àhàki meedam bak lamti ulohona Alat fa Titus bake laha neo modi vizi aho gi neo um vei neàdem bak laba vi ozome, “Fà vabededase,” lahame modelo àhàki meedàmu em gi Ala bake, “Neàte,” lahame vou baedam bak.
17. Titus uba le faobekesi vi vabededalo modem bak lam imbo bak. Eho gi neham bak ozome uba labi gagoho bak. Iho Titus bake neha, “Oho num debu Korintus laba le, ‘Ame doi atetedam bak nehasu modele,’ laham bak lam oho le vi vameadam neào?” lahame iho Titus bake labi ailo gagoho di lam aho fa neha, “Lo, em ule bak. Uho lab gagoho bak lam em le modelo àhàkedam bak am bak. Neham bak. Ebe eho amu gi fet ozome esuhu bak lam uho ab gagoham bak,” lahame iba fa labi gagoho bak. Labiha labe eho uba labi gagoho bak.
18. Iho ba gi Titus ahamo uba olulo modem vabak. Abo imti vahi Kristus bake tu vuzehi meedamda meida nim laha vi tau olulo modem bak. Imti vahi Kristus bake tu vuzehi meedam dam abo dam zi mei dam zi mei lahadam dam nibe iho ame da nibe aho Kristusat meedaha Im Neàna lam dam bake lab vou vameatedaha bak laba ozom di iho vou baedamda am bak.
19. Eho ba im lada lamota ozome uba labi vameadam vabak. Imti vahi Kristus bake tu vuzehi meedam dam abo dam zi mei dam zi mei lahadam dam nibe ihimo ame da niba laha neha, “Aho iba ba tau ame dam Kristus bake tu vuzehi meedam dam abo kota Yerusalem laba azihi dam lam abo na vab dam laba damat vi tau ilabdi lodalo modem doi lam aho iba vi tau ame doi lam gi iademe ahe neà kota Yerusalem laba vou fule,” lahame gagu olulo modemda am bak. Iho ame doi lam ba vou ladalo modem bak lam gi, “Damat im Boehàda Yesus labe ee Abada vousai vou baedase. Labi ame kota Yerusalem laba azihi dam labe fà iba gut aame ozo, ‘Meia faobekesi ahu vàmadi vi tau meedam dam ame?’ lahame iba aame fà gagodase,” lahame labi vi ozome ame baket meedalo modem bak.
20. Titus bake vi tau olulo modemda nim fa iba ba neo vazisi kota Yerusalem laba vi tau lalo modemu dam totbaho labe ba iba nehasu vàlu gagom vabiem bak. “Ame doi lam iho git modi seteho,” lahame ba iba vàlu gagodam vabiem bak. Damat iba feàtàhà vaba gi iba ahumdi neha, “Uho ame doi lam vou lam neàte. Ba etba vàmtea buà vam vaba gi ahebu ame dam laba vou le lodam bak,” lahame damat iba ahumdi gagom bake iho gi iademe meedam bak.
21. Neham bak. Boehàda Alat iba vou aasdam bak lamti damat iba vou aasdam bak lamti labihadàmu iho git meedam bak labna zohàme iho gi iademe vamdesu meedalo àhàkedam bak.
22. Labi Titusti da meida lamti uba olulo modem di lam da meida nim laha dam behàsu laba neo vi tau olulo modemda ehete. Ame da nim imti vahi Kristus bake tu vuzeheheda meida am bak. Labi ame da nim iho, “Iba vi taum neào?” lahame modi ozolo modidam di lam gi ule neàt iba vi tau ame Im Neàna lam vou vameatedam bak lam meedalo àhàkedam dàt modemda am bak. Lahaha bak lam iho ab aaham bak. Labi laha um Korintus dam doi ubuda malem vaba abo gi meia vi tau lodalo àhàki meedam bak lam am ozobohudi uba tu vi ozodam labe etei nim Titus bake vi tau uba le ame doi lam vamatetedume ahumdi vou faodalo ame bak vi tau modem bak uledehe bak.
23. Labi ame da Titus lam gi nehadam bak. Titus emti vou ali eba tau ame Im Neàna lam vou vameatedamda meida am bak. Emti amti gi um neàdem bak laba vi ozome vahi ame im lam meedam bak. Labi ame dam iho Titus bake vi tau gagu uba olulo modemda behàsu lam ba ehemo gagu uba olulo modem vabak. Abo imti vahi Kristus bake tu vuzehi meedam dam zi mei dam zi mei lahadam dam nibe iho ame dam behàsu laba gagu Titus bake vi tau olulo meedam bak. Ame dam behàsu labe ibi iho neà bak meedam bak labet modi dam dua totbaho labe fa aame Kristus bake, “Am abo feàte,” lahame im ahu adat iedi Kristusam ee vousai vou baedam bak.
24. Labihàmu ame dam làtela nim uba lafum di lam uho gi ule neàt gut vame meia deelem bak laba vi vouhodume meedale. Uho labihadam bak labet modi imti vahi Kristus bake tu vuzehi meedam dam zi mei dam zi mei lahadam dam nibe iho fa uho meia lab deeli meedam bak lam ab aame ozobohudemam bak. Labi laha iho amu uba lab vou baetedam bak lam ame dam labe laha, “Imbote,” lahame ozobohudi gagodam bak.
1. Ame Alam damalehe dam na vab dam abo bak Yudea laba azihi dam laba uho doi ubuda, “Vi tau lodam neàte,” laham bak lam um amu gi uledi meedalo àhàki meedam bak lam em ozobohu bak. Labiha labe em ba akati sunit niba, “Mahate meedale,” lahame uba vi ootedume vi vameadam bohu meedà? Eho gi ame bak lam vi ozome fa bak Makedonia esdam dam niba um ee vousai vou baedam labe ame dam laba ahate vameadam bak. Eho gi nehi vi ozome labihadam bak. “Ame bak Akaya labe am num debu meida Korintus laba azihi dam labe iho neha, ‘Iho ame dam na vab dam laba doi ibida vi tau lodase,’ lahame uledi fet ozome ahumdi esuhu bak lam gi tahun amuda iube fet ozome esuhu labe etei vou fuhu bak,” lahame eho ame Makedonia dam niba labihasu vameadume modeha ame Makedonia dam totbaho nibe laha neo uledi ame dam na vab dam laba doi vi tau lodalo àhàki meedam bak.
3. Lahamnàme em gi ozahit Titus aba taum dam behàsu lamti nasi uba fet olulo modem bak. Neham bak. Uho ame dam na vab dam laba doi vi tau lodalo àhàki meedam bak lam uho amu gi vi ozome uledi vou faodam bak lam eho um ee vousai Makedonia dam niba fi desi vameadaha bak. Eho uba lab vou baedaha bak lam fa giomim modehe vaba abo gi imbodem bake eho ahit ame dam làtela lam uba nasi olulo modem bak. Ame dam làtela nibe uba tau modi ame doi atetedume ahumdi vou faodam dam làtela am bak. Labiham labe eho uba ba lafum di lam em gi ahumdi neàdehena le aame ve vou lam bak.
4. Neham bak. Eho ba uba vulam di Makedonia dam totbaho nibe eba vi tau vazisi vulameam ame doi lam uho ahumdi neàdehe vabna eho le aameam làhà umti emti ladem bak. Neham labe lade taia? Eho amu, “Um abo neàte,” lahame vou baedam bak lam gi ame Makedonia dam niba amu vameadume dam lam aime vàhàdehe bak. Labihaha bak.
5. Labi im ladem vabake eho ahit ame da Titus aba taum dam behàsu lamti nasi uba ahit olulo modem bak. Uho neha, “Iho doi ibida vi tau lodam neàte,” lahame uho ilabdi fet gagu esuhemu ame dam làtela labe uba vi modi ame doi lam atetedume neàdi ahumdi eba vou faodam bake eho ahit ame dam làtela lam uba nasi olulo modem bak. Labi modem labe eho li aam di gi ahumdi neàdehena le aame ve fa ame kota Yerusalem laba azihi dam laba vou lam bak. Uho labi modemeam làhà damat ba nehi vi ozome gagodam vabak. “Vabà! Ame Korintus dam labe ba ule neàt doi ilabdi vi tau lodaha vabak. Gi Paulusat ba li ootedam labe doi gi odohalehebeat lodaha bak,” lahame ba gagodam vabak.
6. Eho etei uba vameadalo modem im nidi nim mahate vi ozomale. Meit na neb dem di gi koena demeam làhà ba ame na modeme vahem di gi koena modeme vahem bak. Labi meit na neb dem di duana demeam làhà ba ame na modeme vahem di abo duana modeme vahedam bak. Ame bak lam gi neham bak. Uho ame dam laba vi tau doi lodam di gi ilabdi doi duana vi lodale. Alat fa uba neà bak ilabdi duana meedam bak am bak.
7. Uho ame doi lodalo modem di gi nehasu meedale. Uhumo naedamat nasi um ahulat iademe vi ozo, “Eho doi nehasu meia lodam neàte,” lahame labi fet ozoho bak lamti ulohona ilabdi ule neàt lodale. A meit uba vi ootedam labe odohalehebeat a lodamule. Neham bak. Meit am ahu deelehat ilabdi meia doi lodamda lam Alat Aba Aho bisi deelemda am bak.
8. Labi laha Ala feà Alat modem labe ubu uho valo ozome modemna lam aho gi vafozi ilabdi duana vi lodam Ala Am am bak. Labiha labe uho valo ozome modemna lam gi ab uloholedam tadedamam bak. Aho gi neham bak ozome uba neà bak duana fetehesu ilabdi meedam bak. Uho fa neo dam amomoi bake vi tau neà bak mode. Vi tau neà bak mode. Lahadam bak laba vi ozome Aho ahit uba labihaha bak.
9. Meit Alat Vameadaha Im Toedahana laba nehi toehe bak ehe labe eho uba labi gagoho bak. “Dam na vab dam abo aam faobekem dam laba Aho ilabdi neà bak la modi le modidam Alat modem bak. Aba Aho lab modidam bak lam ba novam vabak. Gi labaha bohu vuusu meedam bak.” Lahame labihasu toehe im ehe labe eho uba lab gagoho bak lam, “Fa dam amomoi bake tau neà bak modem neàte,” lahame gagoho bak lam imbote.
10. Iho im utoho laba demna neb lam Alat iba bakdate modi ahumdi esuhu bak. Labi iho lab na meedume vanamaha bak labet neo modi na àmna vi lodaha bak. Alat labihasu meedam Alat modem labe fa neo uba laha nehadam bak. Uho meia teo lolo modemna lam Alat uba lodume afoezobe neo modi vi dualedam bak. Labiham labe ubu uho um ahu meia faobekesi uledi na ilabdi lodam bak lam Alat modi fa dam na vab dam lam ba na vabalem vaba abo labaha bohu vadam bak.
11. Labi Alat laha uba neà bak mei neà bak meime gi labaha bohu uba vi meedam labe uho fa dam amomoi debu bake laha ahu ule neàt ilabdi deeli na vi lodam bohu meedam bak am bak. Uho labi modem labe uho ame dam na vab dam kota Yerusalem laba azihi dam laba vi tau lodaha doi lam iho ve vou le lodam di lam dam dua zoho ame bak lam aam labe fa Ala bake, “Am abo neàte,” lahame ab vou baedamam bak.
12. Ubu uho lab meia vi tau meedam bak labet modi Alam damalehe dam labe ibi iho valo ozome meedamna lam fa vam bak meeda. Lahana gi im lamota meedam vabak. Ubu uho lab meedam bak labet modi dam dua zoho fa ame bak lam vi aame neha, “Ame dam labe ibi iho meedaha bak lam abo neàte,” lahame fa Ala bake ab vou baedamam bak.
13. Neham bak. Ame dam na vab dam kota Yerusalem laba azihi dam labe iho ubu uho ame dam laba vi tau lodaha doi gut ve aam di lam Ala bake, “Am abo neàte,” lahame vou baedam bak. Neham bak ozome Ala bake vou baedam bak. Kristus labe Aba Aho meedaha Im Neàna lam uho Korintus dam labe lab tu vuzehi ahu vàmadi meedam bak lam ame kota Yerusalem laba azihi dam labe iho vi ozohat imbodehemu gi Ala bake nehasu vou baedam bak. “Ai Ala oa, ame Korintus dam labe iho Kristus bake lab tu vuzehi meedam bak lam gi ahobat neàdi meedam vabak. Abo gi ahu ad iumti neàbodi ilabdi meedam bak. Abo gi labihasu modehe labe fa neo iba neà bak vi tau meedam bak. Gi ibi iho valo ozome modemna lamota vi ozome iba vi tauhu vabak. Fa dam amomoi debuti laha vi tauhu bak,” lahame Ala bake vou baedam bak am bak.
14. Labi laha ame kota Yerusalem laba azihi dam labe iho neo uba Korintus dam laba vi ozome Ala bake tom gagodam di lam gi ahu deelehat im nehasu tom gagodam bak. “Ai Ala oa, Obo Oho meia ozahit deeli im neà bak modi esuidam bak lam oho ame Korintus dam laba gi ame baket neo abo duana modehe bak. Iho im nehasu ozoho labe Oba labi gagoho bak. Ame Korintus dam labe fa iba ule neàt ilabdi doi duana lodaha labe iho Oba labi tom gagoho bak. Labihàmu Oho ame dam laba gi labaha bohu im neà bak vi modi esuidale,” lahame ame dam labe iho gi Ala bake labihasu labaha bohu vuusu tom gagodam bak am bak.
15. Labihàmu Alat iba lohona lam abo bak damat meia vi ozome lom vabiemnat modem bak. Imo ame bak lam vi ozome Ala bake, “Am abo neàte,” lahame vou baedase. Lahana eho ozoha, ame na lam feà labe ba iho vou baedam bak lam ba neàdi vaitom vabili gi labaha bohu vou baedam imot modem bak.
1. Kristus labe Aba Aho meia im vameadam di gi dae meo vaba nemahuba neàt neà vameadam bak. Eho Paulusat gi ame bak laba vi ozodume uloholi fa nehi uba vi ooteme vameadam bak. Eho aihat um dam totbaho labe eba nehi tozodam bak em aihi bak. Uho vedi nehi ozo, “Ame da Paulus lam ba Kristusat Aho Am im vameame esmozi laiamda modem kaio,” lahame ozoho labe vedi eba nehi gagoda. “Paulusat iba num debu Korintus niba tau aidam di lam ba iba dae meona vi vameadaha vabak. Lahana fa bak bohu bak iube sunit toedume oudam di lam gi dae meona iba vi ooteme vameadam labe sunit toedume oudam bak,” lahame eba labi vàlu tozodaha bak lam em aihi bak.
2. Dam etei eba lab tozodaha dam labe im im lam uho a aime vuzehi meedamule. Uho ame dam labe im im aime vuzehi tau meedameam làhà em ba uba lafusi im vameadam di eho gi dae meona sunit laba toehena lamti ulohona fa uba im vi vahokedam bak. Labihàmu uho nasi ame dam lam mu vaitesu uhumo meedale. Eho ozoha, em ba uba lafum di lam um Korintus dam zoho labe iba neha, “Paulus giida na im meedam di gi dam bakda Kristus bake tu vuzehi meedaha vab damat ibi iho vi ozome meedume baleàhà bak lamti ulohona meedam damat modem bak. Ba Alat Aba Aho ozoho baket ba meedam vabak,” lahame iba labi tozome feàtàdaha dam lam eho ozoha, ame dae meona lam eho bisi vahokedam dam am bak.
3. Lahana em ba labihadam vabak. Eho gi bak niba esdamta esda. Lahana eho lab vameadaha im lam moudaha dam lam eho ot odosidam di lam em ba bak damat ibi iho vuusdam na meona lam vuusu ame baket meedam vabak.
4. Ba bak damat abo Kristus bake tu vuzehedaha vab dam labe ibi iho meia bohudem di meedam bak lamti ulohona eho ba vi ozome Alam im mu tozoho dam laba ot odosidam vabak. Gi Alat Am feà bak labet eba modi vizi teudedam labe ame dam labe im ebeda moudaha dam laba eho ot odosidam bak. Em gi dam meoda labe ibi iho nehasu meedam bakti uloho bak. Ame dam meoda labe fa dam totbaho iba fakemoholehe dam laba ibi iho azihi num debu abo ame damat neha, “Ba meit iba lefusi nohisi ahiledou beodam vab num debut modem bak,” lahame labi vi ozome tuhu dam laba lafusi im num debuti beodume agube seddam bak. Ame bak lam gi neham bak. Alat eba modi vizi teudehe labe meit giomim vameadam im lam eho daetesu vàmadehe labe ame im imbona laba feàtàdaha dam labe im ibida lam ba imbodehe vaba gi ab modi setidamam bak.
5. Labi damat neha, “Da iudu ium a Ala bake tu vuzehi im Abada ozobohudi meedamule. Fa im ibida tule,” lahame la ausi le ausidam bak lamti labi damat neha, “Im feàte. Ala ba feà kaio,” lahame im mei im meime daetbadam bak lamti labihasu ahebu, “Belu fi goaitoi seddase,” lahame eho daetesu vàmadi im vi vahokeidam labe modi setidam bak. Labi laha bak damat ibi iho ozodam bak ahebu lam, “Seti fa veimdi fa Kristus bake uledi im Abada fa aime meedase,” lahame eho ahit dae meobeat im vi vahokeidam labe damat fa Kristus bake tu im Abada aime uledi meedam bak.
6. Labi laha uho fa Kristus bake tu vuzehi im Abada uledi meedam bak lam tombalehemu eho aame neàdi fa uba lam di lam ame Kristus labe Aba Aho gagoho im lam mu voedaha dam lam ahebu eho vi ootedume itaholeda tame.
7. Ubu uho git modem bak gi neham bak. Uho vedi iba ozom dita im alihi aame ozobohudeda. Lahana im ahu ad ium um ozobohudehe vab damat modem bak. Uho mahate iba vi ozome im imbo bak vi ozome ozobohudi fi gatele. Neham bak. Um dam totbaho labe vedi nehi it ozo, “Imota Kristus labe Aho Am im vameame esmozi laiam dam ihimo meedam bak. Lahana Paulus giida ba labihadam vabak,” lahame labi it daetbadume fa iba feàtàdam bak lam gi im giomimot modem bak. Im laha Kristus labe Aho Am im vameame esmozi laiam dam totbaho im am bak.
8. Im Boehàda Yesus labe Aho eba lab modi vizi eho im dedateli uba vameadam bak lam eho vi ozome labaha bohu it daetbadameam làhà em ba ladem vabak. Eho gi neham bak vi ozodam labe ba ladem vabak. Um Korintus dam labe uho Kristus bake lab tu vuzehi meedam bak lam, “Eho ame bak laba vi ozome uba vi vabidume fa faamodase,” lahame im Boehàda Yesus labe eba gagoho vabak. Aho gi neha, “Eho fa uba vi vabiedume uho gi fa labaha bohu vuusu keàtedi meedase,” lahame eba labihasu gagu eho im dedateli meedàmu eho ame bak laba vi ozome it daetbadam bak lam em ba ladem vabak.
9. Eho ba, “Uho fà eba iedese,” lahame labi ozome sunit toedume uba oudaha vabak.
10. Eho gi neham bak ozome uba labi gagoda. Eho aiha um Korintus dam zoho labe eba nehi voe voedam bak nim meit aime eba vou li vi vameadahana eho aihi bak. Uho vedi neha, “Paulusat sunit toedume iba oudam di lam abo dae meona vi ootedume toedume oudam bak. Lahana ame da so niba duzum di lam ba iba dae meona vameadume vi vahokedam vaba vedi gi im ibida vuzehi meedam dàt modem bak. Ba aha teudi im vameadam biem dàt modem bak,” lahame voehe bak em aihi bak.
11. Làhà uho eba labihasu ozomsu gagodam dam lam gi labihasu fao! Em uba ba lafum di gi eho sunit laba toedaha dae meona lamti ulohona lam ame dam laba im vahokeda tame.
12. Eba fakemoho dam labe vedi neha, “Im abo neàte. Paulus ba imti uloho kaio,” lahame ibi ihimo neàdem bak laba it ozome daetbada. Lahana em ba ame dam lamti uloholi neha, “Dam lada lamti imti uloho? Uloho vabao?” laham bak lam em ba ozome gagodam vabak. Em moho bak. Ame dam labe vedi neha, “Alat Aba Aho gagoho im uledi meedam dam gi nehasu meedam damat modem bak,” lahame ibi ihimo ozome fi hasi esuhu im lam, “Ame bak lam iho ulohodesu meedào? Ulohodesu meedam vabao?” lahame ihimo ozome daetbadam bak. Lahadam dam lam eho ozoha, gi ahusobuli meedam damat modem bak.
13. Lahana em ba labiham vabak. Alat eba neha, “Oho gi bak Eho oba guti loho bak lamota oho ame Im Neàna lam vuusu dam bake vou vameatedale,” lahame eba labi gagohemu eho im dedatelemta im dedatelehe bak. Lahana bak Alat eba guti loho zoho laba ba vafozi bak mei bake meit meedamda lam eho ba vi ozome, “Feàte,” lahame it daetbadam vabak. Gi Alat eba gagu eho im dedateli meedam bak lamota eho vi ozome it daetbadam bak. Alat eba lab gagu eho im dedatelehe di lam Aho eba laha nehi gago, “Oho laha ame Im Neàna lam fa Korintus dam lamti laha vou vameatedale,” lahame eba labi laha gagohemu eho im dedateli ame Im Neàna lam uba vou vameatedam bak.
14. Um Korintus dam totbaho abo eba fakemoholehe dam labe vedi eba nehi gagoda, “Paulusat aho Korintus niba im vuusu meedam bak lam git meedalo. Alat bak nim Paulus bake lom kaio,” lahame labi gagodam dam lam git gagodam bak. Eho ba git it daetbadam vabak. Eho Kristus labe Aba Aho meedaha Im Neàna lam amu vou vameatedaha di lam uba nasi alimeat vou li fi deheda em am bak. Dam lada lam uba ba li vahokedam damat modem bak. Labiha labe ame dam labe eba lab gagoho bak lam ba debu vabak. Gi ostame gagodam bak. Lahana imota iho lab it daetbadam bak lam gi ahole meedam bak.
15. Em ba dam totbaho labe giomim it daetbadam dam lamti uloho vabak. Ame dam labe vedi meit vahokeme neàdehena laba neha, “Iho modeho,” lahame giomim it daetbadam bak. Em ba dam lada lamti uloho vabak. Ba Alat meia gagu gutehe bak laba meit meedaha im lam eho ba vi ozome it daetbadam vabak. Gi Alat eba gagu eho im dedateli meedam bak lamota eho vi ozome it daetbadam bak. Lahana ebe eho nasi tu vi ozodam bak gi neham bak. “Ubu uho Kristus bake lab tu vuzehi im Abada meedam bak lam fà gi labaha bohu vuusu dihasi vi modi keàtedi meeda. Neo dihasi vi modi keàtedi meeda. Gi labihadam bohu vuusdam bak labet modi bak ubuda laba im eho meedamna lam fà dualedase,” lahame eho nasi tu vi ozodam bak am bak.
16. “Abo bak ubuda laba im eho meedamna lam fa dualedahemu eho fa bak ubuda vafozi bak mei bake neo le ame Im Neàna lam vou vameatedam neàdehe?” lahame labi fet ozodam bak. Neham bak. Eho gi bak mei bake abo dam alimdate le ame Im Neàna lam neo vou vameatedalo àhàki vi ozodam bak. Em ba meit bak mei bake le ame Im Neàna lam vameada. Meit bak mei bake le ame Im Neàna lam neo vameada. Lahadume vou fi desi aime ozobohudehe dam laba em ba ame bak laba le ame Im Neàna lam vi vou vameatedam moho bak. Eho ame bak laba le vi vou vameatedameam làhà eho meit modehena vi ozome neha, “Eho modeho,” lahame labi it daetbadam bak labna zohàme em ba meit modeheda laba lam moho bak.
17. Imo gi meit Alat Vameadaha Im Toedahana laba nehi toehe bakti ulohona vi meedase. “Meit na im vi ozome vou baedalo modemeam làhà gi im Boehàda Alat Aba Aho meedaha bak laba vi ozome Aba fà vou daetbadase.” Lahame labihasu toehe bak lamti ulohona vi meedase.
18. Neham bak. Meit gi aba aho na im meedaha bak laba vi ozome it daetbadamda lam ba Boehàdat deeli neha, “Om neàna modeho,” lahame ba ame da laba vou baedume deeli gagodam vabak. Gi Boehàdat Ahamo neha, “Da lam im neàna meedamda am tame,” lahame Aba Aho vi ozome vou baedamda lam Aho deeli vamda am bak.
1. Eho uba neo vi gagolo modem im nim abo em gi fota ahusobuli eba it daetbadam bak nim um ba aime eba a fakemule. Uho gi ozahigeàmu dogoit vou faodam labe aidale.
2. Um dam totbaho labe ebe eho vahokedam im aime eba vi tauhu dam lam dam amomoi giomim vameadam dam labe vedi fa uba neha, “Dae ibida vi tau meedase,” lahame vi tauledume vi vietomoadam bak labna zohàme em ahu adat faki teidi vou faovoi meedam bak. Ebe eho faki teidi vou faovoi meedam bak lam gi Alat Aba Aho ozoho bak lamti ulohona vi ozome meedam bak. Nam meit modehe vaba alim nam soaoti ulohona eho ozome fa dat bas nidi niba abo Kristus bake lolo gagu vàmadi esuhuna akati fa dat amomoit um fa vi vietoi valo meedà?
3. Labihàmu eho nehi ozome iedi vou faovoi meedam bak. Amu di iube Iblisit fa mumali Hawa bake li ahi vagehe di lam aho vedi imbo tibame ame im lam modi faidehe bakti ulohona fa neo uho modem bak labna zohàme eho iedi ahit uba vou faovoi meedam bak. Eho ozoha, dam amomoit uba li neha, “Dae ibida aime vuzehem neàte,” lahame ahi vagem di lam uho vedi neà tiba vuzehi fa ubu uho amu Kristus bake lab tu vuzehi ahu vàmadi im Abada meedam bak lam fa mu voolo modem bak labna zohàme eho iedi vou faovoi meedam bak.
4. Neham labe eho uba labi vameadam bak. Meit uba le im giomimna im meiti im meiti uba vameadam di lam uho malem vaba vedi gi uledi kehàm vaba vi aime vuzehelo àhàki meedume baleàhà damat modem bak. Neham bak. Dam amomoi labe uba le neha, “Yesus bake tu vuzehi im Abada meedale,” lahame vahokedam di lam ba ibi iho vahokedam im lamti ulohona vahokedam vaba gi im amomoi faasi vahokedam di lam uho vedi uledi vi vuzehelo àhàki meeda. Labi laha ame dam labe uba le fa ibi iho vahokedaha Alam Aha Nutabe Neàna lam abo uba modi vizi teudehena lam gi mu fa ibi iho vi ozohoda lam uba vi vahokedam di lam uho laha vedi uledi vi vuzehi vizelo àhàki meeda. Labi laha ame dam labe ba ibi iho uba vi vahokedaha Im Neàna lam ba uba vi vahokedam vabak. Vedi neha, “Ubu uho faina meedam bak lam Kristus ba ot vai eloho vab labe ba Alat uba soat vausu fa vei neàdem kaio. Uba soat vausu fa vei neàdem bak amomoite,” lahame uba labi vi vahokedam di lam uho vedi imbo tiba im lada lam fa vi vuzehelo àhàki ozoda. Meit uba le im giomimna lamohoda uba vameadam di lam uho malem vaba vedi, “Neàte,” lahame gi uledi vi aime vuzehedam damat modem bak. Uho labihadam damat meedam labe làhà em fota ahusobuli it daetbadam im nim laha aimale.
5. Dam ihimo im ee it vousai neha, “Im Kristus labe Aho gagu Am im vameame esmozi laiam dam feàda im am bak,” lahame it daetbadam dam labe iho im giomimna uba vou li vameadam im lam uho vuzehedam damat modem bak. Uho ozom, em faida ba ame baket meedam vab tibame um em im aim mohe? Làhà um git ozo. Em laha ame bak meedamda meida em am bak.
6. Eho uba im vameadam di lam em aha gi alimdi alimdidam bak lam em naedata ozobohu bak. Lahana eho labiha labe uho ozom, ame im imbona lam em im biehebu dàt uba im vameadà? Vabà! Em gi im ozobohu dàt uba vameadam bak. Ame bak lam um ozobohuna taia? Iho amu uba le tau azihi di lam iho Alam im imbona lam uba vahokedaha di modeo, iho uba tau na meedaha di modeo, iho lab iademe meedaha bak lam um ba biehe vaba abo aame ozobohudehena taia?
7. Labi Alat gagu oluhuda labe Aba Aho meedaha Im Neàna lam eho amu uba le vameadaha di lam eho uba nehaheo? “Ebe eho uba ame Im Neàna lam lab vameadaha bak laba gohali uho eba doi lodale,” lahame uba labi gagohe? Vabà! Em ba uba labi gagoho vabak. Ame di lam eho gi feà vab dateli em so na vabalem bak ozome vadamna lam ehemo nabidume vadam bak. Eho gi um fa neàdi vousam bake vi ozome uba labihadam bak. Làhà eho lab modehe bak lam git modehe labe uho eba fakehe?
8. Eho amu num debu ubuda laba le uba tau azi ame Im Neàna lam vou vahokedaha di lam gi Kristus bake tu vuzehi vahi meedam dam abo dam zi mei dam zi mei lahadam dam labe eba doi lu oudume eho uba ame Im Neàna lam uba vou vahokedume um neàdedaha bak. Eho ba uba gagu doi vadaha vabak. Uho ame bak laba vi ozome eba nehi gagolo mode? “Ame da Paulus labe aba aho iba lab vahokedaha bak lam doi ibida gagu vaha vaba vedi fa dam Kristus bake tu vuzehi vahi meedam dam abo dam zi mei dam zi mei lahadam dam labe im doi vame fa iba vahokedaha bak,” lahame uho eba labi faki gagolo mode?
9. Labi eho amu uba le tau azihi di lam na eho valo ozohona vabalem di lam em ba uba gagome ame na vadaha vabak. Neham labe labihaha bak. Emti vou alem dam totbaho labe Makedonia bak labe lehe dam labe li aaha na eho valo ozohona vaha vabak aahemu fa eba vi tau doi ab lodaham bak. Di lam eho uba modi vanamam bak labna zohàme eho it vou faovoi mali ba na eho valo ozohona vabalem di lam em ba uba vi vabidume ootedam vabak. Labi laha eho etei gi labihadam bak. Labi laha ba diamut eho gi labihadalo modem bak.
10. Kristus labe Aho gi imbo bak vameadam dàt modem bak. Làhà eho ame Da lamti uloholi eho etei uba nib vameadalo modem im nim laha imbo bak. Eho ba um bak Akaya laba azihi dam abo um num debu Korintus laba azihi dam modeo, ame bak zoho labe am num debu meida azihi dam modeo, em ba ebe eho uba lab meedam bak lam, “Uho ame bak gohali eba doi lodale,” lahame eho ba uba ootedume vi tauledume doi vadaha vabak. Eho ame Im Neàna lam uba vou vameatedam di lam ba uba gagu doi vadam vaba eho gi uba teo vahokedam labe fa em so na vabalem bak ozome vadamna lam ehemo nabidume vadam bak. Laham bak lam eho vi ozome it daetbadam bak lam ba uho meit eba mali gagu vaitom vabak.
11. Eho etei lab gagoho bak lam uho ozom, em ba uba deelem vaba? Vabà! Eho uba bisi deeli meedam bak lam Alata ozobohu bak.
12. Eho ame Im Neàna lam uba vou vameatedam bak lam em ba uba neha, “Ame bak gohali eba doi lodale,” lahame ba uba labi ootedume vi vameadume doi vadaha vabak lam eho gi labaha bohu vuusu meeda tame. Eho gi, “Neham bak fà modese,” lahame labihadalo modem bak. Ame dam etei uba le neha, “Im laha Kristus labe Am im vameame esmozi laiam dam totbaho im am bak,” lahame giomim gagodam dam labe iho vedi nehi it daetbada. “Im abo Paulusat im aba aho meedam bak lamti ulohona meedam damat modem bak,” lahame it daetbadam bak lam, “Fà vabali setese,” laham bak vi ozome eho ozahit gi teo vi vahokedam bohu meedam bak. Neham bak. Ame dam labe iho im vuusu meedam di lam ba emti uloho vabak. Dam lam gi, “Doi vadase,” lahame àhàki ame im lam dam bake vou vahoketedam bak.
13. Ame dam labe labihasu meedam labe ba ibi iho amu lab gagoho bak lam, “Im abo Kristus labe Aho gagu Am im vameame esmozi laiam dam totbaho im am bak,” lahaha bak lam ba imbo imot modem vabak. Gi giomim daetbadam damat modem bak. Ame dam labe neha, “Im gi Alat Aho iba gagu oluhu im vou li meedalo meedam damat modem bak,” lahana ahi vagedam damat modem bak. Labi ame dam labe laha nehi meedam meo damat modem bak. Vedi, “Dam amomoit fà iba aame ozo, ‘Im abo Kristus labe Aho gagu Am im vameame esmozi laiam dam totbaho im am bak,’ lahame fà iba aame ozose,” lahame ahit ibi iho meedamna nimti ulohona vouhodam bak. Lahana ame dam lam ba Kristus labe Aho gagu Am im vameame esmozi laiam damat modem vabak.
14. Lahana ame dam labe lab meedam bak lam em ba àvodem vabak. Dam lam gi iba na gagome meedam Iblis labe aba aho lab meedume baleàhà bak lamti ulohona meedam damat modem bak. Labihaha bak. Iblisit laha neha, “Em abo Alat Am im gagu vou usemda modem labe Alam fauha meona vou usemda em am bak,” lahame ahit gi ahobat neàdi ame bak lam vouhoda. Labiha labe aho na gagome meedam dam labe laha gi ame baket neo vi meedam bak. Ame dam labe vedi ibi iho faina meedam bak lam vasti vedi neha, “Im abo Alat Aba Aho gagohona lam im vamdesu meedam dam im am bak,” lahame ahit gi ahobat neàdi ame bak lam vouhoda. Labiha labe ame dam labe amu neha, “Im abo Kristus labe Am im vameame esmozi laiam dam totbaho im am bak,” lahame ahit ahobat neàdi vouhodam bak lam ba akati iho aame àvode? Im ba àvodem vabak. Ame dam labe ibi iho lab meedam bak lam Alat ba diamut ame baleà vouhou faki beodam bak lam im ba àvodem vabak. Ahole beodam bak.
16. Emti vahi Kristus bake tu vuzehi meedam dam oa, eho etei uba lab gagoho bak lam neo vi gagolo mozo. Eho uba neo vi gagolo modem im nim abo em gi fota ahusobuli eba it daetbadam bak nim um ba aime eba a fakemule. Uho gi ozahigeàmu dogoit vou faodam labe aidale. Lahana um dam totbaho labe em im nim aime nehameam, “Mm! Paulusat gi ahusobu dàt im vameadam bak,” lahame eba labi ozom dam ehelemeam làhà ame dam labe gi ibi iho amu ame dam giomimda labe ahusobuli it daetbadam im lam aidume modi baleàhà damat modemnàme fa im ebeda gi ozahigeàmu vou faodam labe vi aidale.
17. Eho etei uba nib toedaha im nim abo ebe eho it ozobohu aabodi daetbadam im nim ba im Boehàda Yesus labe Aho eba gagu eho meedam vabak. Gi dam ahusobu damat meedam bakti ulohona eho vi meedam bak.
18. Neham labe labihadam bak. Um dam dua totbaho labe vedi ibi iho bak niba esdam diat meedaha im lam vi ozome daetbadam meo bak. Làhà eho gi ebe eho bak niba meedaha im lam laha vi ozome ame baket modelo. Nasi aima.
19. Um Korintus dam abo im ozobohu aabodem dam um ame? Labiham labe uho vedi dam amomoit neha, “Im abo Kristus labe Am im vameame esmozi laiam dam totbaho im am bak,” lahame giomim gagodam dam labe uba le ibi iho ahusobuli vi vahokedam di lam uho vedi mom vaba gi ame im lam aime uledi meedam damat mode?
20. Uho labihadam damat modem labe uho vedi neo dam nehasu uba le meedam dam laba neo vi uledi meedam dam um ame? Dam amomoit uba le neha, “Um gi im na tet ootedume teo meedam damalese,” lahame uba ootedume vabidam di modeo, Labi dam amomoit uba le ahi vageme keobaedume nazoh ubuda valo modem di modeo, Labi dam amomoit uba le dam labe im ee vousai fa ee ubuda fa vousem di modeo, Labi dam amomoit uba le uba feàtàdam di modeo, Labihasu uba le meedam dam lam uho mom vaba vedi gi ule neàt gut vadam damat modem bak.
21. Lahana eho etei lab gagoho bak lamti ulohona iho uba meedaha vab labe uho vedi im nembe damat mode? Lahame uho lab gagoho bak labet modi fa im lade? Làhà ame dam giomimda labe ibi iho bak niba meedaha im lam vi ozome it daetbadam im uba vameadam di ba iedem vabak lamti ulohona eho etei laha ozahit vei ahusobuli uba neo ebe eho bak niba meedaha im lam neo vi ozome ba iedem vaba it daetbadam labe uba im vameadalo modem bak. Uho nasi aimale.
22. Ame dam labe it daetbadam di uba nehi vameadà? “Iba vou faat lehe dam debu lamti dae ibida lamti labihasu vi ozodam di im abo Ibranit modem damat modem bak,” lahame uba labi daetbadà? Ne, em laha Ibrani dàt modem bak. Labi ame dam labe uba neha, “Im abo Israel labe aba aho vou faat lehe dam bisi Alat deeli vaha dam debu im am bak,” lahame uba labi daetbadà? Ne, em laha Israel labe aba aho vou faat leheda meida em am bak. Labi ame dam labe uba neha, “Im abo Abrahamat aba aho vou faat lehe dam debu im am bak,” lahame uba labi daetbadà? Ne, em laha Abrahamat aba aho vou faat leheda meida em am bak.
23. Labi ame dam labe uba neha, “Im abo Kristus labe Aba Aho im gagu meedam dam im am bak,” lahame uba labi daetbadà? Ne, em laha ame da meida em am bak. Lahana eho meedam bak lam fa ame dam labe ibi iho meedam bak vafozi duana meedamda em am bak. (Em etei eba lab it daetbadam bak lam em gi ahusobuli ostame uba im vameadamna ozomom bak.) Labi ame dam labe ibi iho na im meedam bak lam zohobuli fa ebe eho meedam bak lam fa fetehesu bohulaledam bak. Labi ame dam lam damat si fa ame mei si oumahedam num laba vou oli oumahedam bak lam gi fota meeda. Lahana eho ame Im Neàna lam vou vameatedàmu damat em si ame mei oumahedam num laba ousuiaha bak lam abo tamehodehe bak. Labi eho ame Im Neàna lam vou vameatedàmu damat em si foadaha bak lam dam lada laba foho bak lam vafozi damat eba foho bak lam ba koena foadaha vabak. Gi di iube beoda. Di iube neo vi beoda. Gi labaha bohu bisteat foadaha bak. Labi eho elolo fotehe bak lam abo gi duana meedaha bak. Lahana ame dam lam bisi labihaha vabak.
24. Labi laha Yahudi busaoda zi labe eba sihi di iube bisteat beodume fi deadaha bak tiga puluh sembilanlehe bak. Labi ba neo di iube em si bisteat beodume fi deadaha bak neo tiga puluh sembilanlehe bak. Gi labihadume ab auoholeham bak.
25. Labi laha Roma dam eeda labe eba ihim lobasot eba foadaha bak làteladehe bak. Labi laha damat, “Em otese,” lahame ke visomoame eba beodaha bak vàmadehe bak. Labi laha eho kapal laba zisi ladam di labe ame kapal vousai vousidume ke gatbu laba beodume agudume tezeo fotehe bak lam gi amu di iube mode. Ba neo di iube neo mode. Labihadume em valo tezeo fotehe bak làteladehe bak. Labi laha ba di meida iube eho kapal neo zisi vao tombu laba ladam di labe disihi di lam ame kapal neo belu agudume setehemu eho gi ut gaheba oha zoho laba zisi taasu toddume neo dihasi vou faodume dimatali damat aame visoho bak vàmadehe bak.
26. Labi laha eho bak mei bake ladam di lam naat eba beom bake eho vou faovoemnàme gi ozahit godaha bak tamehodehe bak. Neha: Vao duali biodam diat em beolo fotidam bak ame. Dam mei na valo zie laba ausi na vietomoadam dam labe ebe eho lam zie laba ausi em nazoh vietomoadalo fotidam bak ame. Labi neo em Yahudi dam zoho modeo, Yahudi damat modem vab dam labe modeo, Eba otelo fotidam bak ame. Labi laha eho ame Im Neàna lam vou vameatedam di lam eho num debu tombuda laba le meedào? Num debu tombuda labe am bàhàgo laba le meedào? Gi kapal zisi lam di meedào? Em beolo fotidam bak ame. Labi laha damat eba neha, “Im omti vahi Kristus bake tu vuzehi meedam dam totbaho im am bak,” lahame ahobat neàdi vagedam damat eba beolo fotidam bak ame.
27. Labi laha Kristus labe Aba Aho lab gagoho baket meedam di, “Eho taho meedume folese,” lahame na meedam di im vabali gi aibu di meeda. Digad di meeda. Gi labihadume vasea vabali setidam bak ame. Labi di lam laha na àm vaba idoali meeda. Vao udem vaba valo àhàki meeda. Labi ideia ibzidam diale. Labi bak nutbu bake lam di sue koedi nutahali ibzidam diale. Eho bak mei bake ladam di gi labihasu labaha bohu meedaha bak.
28. Lahana gi im lada lamota modemet em alihi nemahu vabak. Im meida nim laha ehe bak. Dam Kristus bake tu vuzehi vahi meedam dam zi mei dam zi mei lahadam dam ahebu, “Iho Kristus bake tu vuzehi keàtedi meedam lahasuheo?” laham bak lam eho vi ozom di em gi ahu faidi vi ozodume alihi nemahusi meedam bohu vuusu meedam bak meida am bak.
29. Neham bak. Eho aimeam ame dam meida labe aho Kristus bake tu vuzehehe bak lam keàtedi meedaha vaba laolaodamda lam eho vi ozom di em laha ahu faidi nehi vi ozodam bak. “Da labe aho Kristus bake tu vuzehi meedam bak lam a bedemule,” lahame eho labi vi ozome em ahu faidi modida. Labi laha eho aimeam ame dam Kristus bake tu vuzehi meedamda meida lam dam giida meida labe aba vou fohome aba modi faina modehe bak lam eho aimeam em ba ahu koena fakem vabak. Abo gi duana faki modida. Labihadam bak.
30. Ame dam giomim meedam dam labe ibi iho bak niba meedaha im lam vi ozome it daetbadam di, “Im abo teute,” lahame labi it daetbadam damat modem bak. Lahana eho ba labihasu it daetbadam vabak. Em gi, “Em teu vaba gi alihi nemahudam dàt modem bak,” lahame ahate vameadam bak.
31. Eho etei uba lab vameadaha im zi lam em ba giomim uba vameadam vabak. Abo gi imbo bak. Abo ibi iho gi labaha bohu vou baedam Ala lam abo im Boehàda Yesus labe Am Ai ozobohu bak.
32. Nehaha bak. Eho amu num debu Damsik laba azihi di lam abo boehàdatebo Aretas labe aho Damsik damti vuusu meedam di lam Aretas labe aho fa Damsik vuusdam gubernur laba neha, “Paulus si otele,” lahame labi gagohemu ame gubernur labe aho am dam meoda laba neo gagome ame num debu natàh bàhàgo iube vabousu ot odosiahana labe am futom doo laba olu, “Em futoi fà damat em sise,” lahame ahit laba le vou aasda.
33. Lahana emti vou alem dam totbaho labe ame bak lam aihemu fa eba gagu ame natàh bàhàgoda laba em vou zisi lodebu buduana laba em aa nom ousu neàdi ame natàh bàhàgoda num bumat am aumat labet loa vààsu bake vou usehemu em ahe neà ab itaham bak.
1. Eho ozoha, ebe eho etei lab it daetbadam bak lam ba eba modeo, dam amomoi modeo, ba meia modi fa neàdem biem imot modem bak. Lahana em gi ozahit nehi it daetbadalo mozo. Abo eho amu biem im lam Alat fa eba modi ozobohudi fi gatehe im lamti Alat eba modi eho edehesi fako bakamta aasdam labe aadaha im lamti labihasu eho etei vi ozome it daetbadam labe uba vi vameadalo mozo. Neha:
2. Em Kristus bake tu vuzehi meedamda nim Alat amu di iube em nom visoi fa vousai asum ahoba tom novaha bak iuba abo Aho azihi bak iuba vou tom ilu azibe fa neo vou nom ilu bak niba aidume etei vou fuhu di nim empat belas tahun lehe bak lam em ozobohudi uba vameadalo modem bak. Lahana ame im lam meedaha di lam em so lam Alat vou tom iluheo? Laham vaba gi em itot ahamo laheo? Laham bak lam em bieho. Ala Am Naedata ozobohu bak. Lahana neham bakta em ozobohu bak. Alat em nom visoi fa vousai asum ahoba iuba abo Firdaus bak neà bak laba vou tom iluhu bak lam em naedata ozobohu bak. Labi em vou tom ilu Ala bake netàdi vou duzu eho aiha iho bak damat amu aihi vab dae alimna lam abo ba dam bakda labe ve fa dam amomoi bake vi vameadume modi fi gatem malem im lam eho ab aiham bak. Labi aime fa ab vou nom iluham bak.
5. Ebe eho lab meedaha bak lam eho vi ozoha, feà imot modemu gi vou it daetbadam neà bak. Lahana eho ozahigeàmu moho bak. Eho fa gi, “Em teu vaba gi alihi nemahudam dàt modem bak,” lahame labi it ozome ahate vameadam bak.
6. Lahana ebe eho lab meedaha bak lam eho vi ozom di em it daetbadam bak modelo àhàkemeam làhà em ba ahusobuli git meedam vabak. Ame it daetbadam im lam ba giomimnat modem vaba abo imbo imot modem bak. Lahana eho gi ahit it daetbadam moho bak. Neham bak. Eho lab meedam bak lam vi ozome it daetbadameam làhà dam fa neo eba vou baedam bak labna zohàme em it daetbadam moho bak. Gi ebe eho meedam bak lam damat aam di modeo, gi ebe eho vameadaha im lam damat dogoit aim di modeo, labihamta dam labe im ahulat vi ozome eba neha, “Oo làhà! Paulus gi labiham dàt mode?” lahame labi gagomta neàte.
7. Eho amu ulem bakti ulohona edehesi fakot aame ozobohudehe im lam abo Alat eba modi fi gatehe bak lam eho bisi vi ozome it deeli vou baedam bak labna zohàme Alat ahit eba modi geàdamna ab modesuham bak. Ame bak lam gi àsà mot eba belu zisdam bakti ulohona eba modi alihi nemahusi geàdamna am bak. Abo Iblisit am im gagu oluhuda eba olu, “Fà eba modi geàdase,” lahame ozomomnat modem bak.
8. Ame na eba modi geàdamna lam eho Ala bake tom gago, “Ai Ala oa, oho eba tau eba beohona nim oho modi fa setele,” lahame gi labihasu Ala bake tom gagoho làteladehe bak.
9. Lahana Alat ba uledem vabak. Aho vedi fa nehi eba gago. “Ame na lam Eho ba modi setem moho bak. Ebe Eho oba ozahit deeli im neà bak meedam bak lam gi labaha bohu vi meedam bak ehe labe gi labihasule. Om teu vaba alihi nemahusi meedam di lam Em feàna lam oba modi vizi teudem di am bak,” lahame Alat eba labi fa gagohemu em ba ebe eho lab meedaha im lam ba vi ozome daetbadam vabak. Eho fa gi ule neàt, “Em teu vaba alihi nemahudam dàt modem bak,” lahame labi it ozome deeli ahate gagodam bak. Eho gi neham bak ozoho labe labihadam bak. Em teu vaba alihi nemahusi meedam di lam Kristus labe Am feàna lam fa eba modi vizi teudi tombalem di am bak. Labihaha bak.
10. Labihàmu em alihi nemahusi meedam di lam em ba mom vaba gi deelehe bohu vuusu meedam bak. Abo eho Kristus labe Aho vameame esuhu im lam eho meedam di lam naat eba modi em alihi nemahudam di modeo, damat eba feàtàdam di modeo, damat eba vabidume modi geàdam di modeo, eho modem vabiemna meedam di modeo, em gi labihasu ozahit labaha bohu vuusu meedam bak. Neham bak. Em teu vaba alihi nemahusi meedam di lam Kristus labe Am feàna lam fa eba modi vizi teudi tombalem di am bak.
11. Ebe eho lab meedaha im lam vi ozome daetbadaha im zi lam um Korintus dam labe uho meit vi aidam di neha, “Paulusat gi ahusobuli it daetbadam dàt modem bak,” lahame eba vi ozome gagodam bak ehe bak lam em ozobohu bak. Lahana debu uho modeho. Neham bak. Um dam totbaho labe neha, “Im abo Kristus labe Aho gagu Am im vameame esmozi laiam dam totbaho im am bak,” lahame giomim gagodam dam labe um vou faodahit eba vi ozome neha, “Paulus bisi feà vabak. Bisi feàda im am bak,” lahame eba feàtàdaha di lam uho em ee vousai vou baedaha vab labe ehemo vedi it deeli vou baedaha bak. Em feà vabak lam em naedata ozobohu bak. Lahana ame giomim meedam dam lam ba eba vafozi bisi feà damalehe vabak. Em laha Kristus labe Am im vameame esmozi laiamda meida em am bak.
12. Eho amu uba tau azihi di lam eho nehi meedaha im lam uho vi ozodale. Em abo Kristus labe Am im vameame esmozi laiamda nim Alat eba gagu oluhu bak lam, “Imbote,” laham bak lam, “Uho fà àvodi ozobohudese,” lahame Alat eba modi vizi eho fet aame ozobohudemna zi lamti damat ihimo modem biem im feàna zi lamti uho vou faodahit eho meedaha bak. Uho eba momnàme em gi ozahit keàtedi gi ame im lam vi modidam bak.
13. Làhà eho uba lab vi tau meedaha bak lam uho vi ozom di eho dam Kristus bake tu vuzehi meedam dam abo dam zi mei dam zi mei lahadam dam laba eho meedaha bak lamti eho uba meedam bak lamti uloho vaba? Dam lada lam eho bisi neà bak meedà? Labi eho uba gi fota neà bak meedà? Eho labihadà? Vabà! Gi ulohodesu meedam bak. Làhà giomim meedam dam labe iho ame Im Neàna lam uba vou vameatedaha di lam uba neha, “Ame bak gohali modi doi vadase,” lahame gagome doi vada. Lahana eho uba ame bak gohalem bake doi gagome vadaha vabake uho eba labi vi ozome gagohe? Làhà eho git modehe bake uho eba labi vi ozome, “Em fà ladese,” lahame eba labi gagodà? Lahana em ba uba vi meedume vanamadam vabak. Ba akati uho eba faki eba labi ozodà?
14. Um nasi aimale. Eho kehàm vaba uba fa neo le im vi vameadam bak làteladelo modem bak lam eho ab vi ozome ahumdi esulo modemam bak. Labi eho etei ba uba lalo modem di nim em ba uba neha, “Ebe eho ozome valo modemna lam eho vam biem bake uho eba vi tau doi lodale,” lahame ba labi uba gagodam vabak. Um doi em moho bak. Em gi, “Uho eba deeli ebe eho uba le lab vahokedaha im lam uho mahate aime tu vuzehi ahu vàmadi meedase,” lahame eho uba lalo modem bak. Neham bak. Data labe im ai modeo, im oi modeo, nazoh vabalem bak labna zohàme ba vou faovoi ozome meedam vabak. Gi im aiat modeo, im oiat modeo, im data vou faovoi ozome doi modeo, nazoh modeo, labihasu vi ozome lodam bak. Labiha labe eho um aiat modemna ozomomda modem labe ba uba gagome nazoh vadam vabak.
15. Em um aiat modemna ozomomda modemu um neàdem bake em gi ozahit doi ebeda modeo, nazoh ebeda modeo, eho meedume vanamai em vasea vabalehe bak modeo, labihasu uba vi tau meedam bak lam em ba malem vaba gi ilabdi ule neàt uba vi taui vi tauidam bak. Eho uba labihasu duana deeli meedamnàme um akati eba gi koena deeli meedàla?
16. Emti vahi Kristus bake tu vuzehi meedam dam oa, eho amu uba tau azihi di lam em ba uba modi vanamamna meedaha vabak. Lahana um dam zoho labe em ohuset eba nehi voeme vastem dam ehe bak. Ame dam zoho labe neha, “Paulusat iba li tau azihi di lam iba modi vanamamna meedaha vabak lamota imbot. Lahana aho gi ahobat neàdi ahi vageme im na aa vadaha bakvat ehe bak,” lahame eba labi voeme vastem dam ehe bak. Lahana giomimot modem bak. Em ba labiham vabak.
17. Uho ozom, eho etei uba gagome oluhu dam lam uba le ahobat neàdi uba ahi vageme um doi vame fa eba modi em neàdem bakvat ehe? Vabà! Um git ozo.
18. Labi laha eho Titus bake neha, “Oho Korintus dam bake le im vameadale,” lahame eho amu amti dat meida abo imti vahi Kristus bake tu vuzeheheda meida lamti gagu uba oluhu di lam ame da Titus lam ahobat neàdi uba ahi vageme um doi aa vadaha bakvat ehe? Vabà! Labihaha vabak. Em ahuti Titusam ahuti gi uloho labe iho na im meedam di gi ulohona meedam bak. Ame bak lam um ozobohuna taia?
19. Uho ozom, eho etei sunit nim uba lab toedume oluhu im zi nim, “Iho uba git meedam kaio. Iba a faki vàlumule,” lahame uba labi veibalo toedume uba oluhe? Vabà! Um git ozoho bak. Ibi iho uba im vi vahokedaha im ahebu lam uba vahokedam di lam im gi Kristusti vou ali ahu vàmadi meedam labe Alat iba vou aasdahit ame im lam uba vahokedam bak. Ibi iho meedam im lam ahebu gi ubu uho Kristus bake lab tu vuzehi meedam bak lam, “Uho mahate keàtedi laodoamsu meedase,” laham bak vi ozome ame im lam meedam bak.
20. Eho gi neham bak vi ozome uba labi gagoho bak. Eho uba ba le lafum di lam ebe eho ozoho bak lam uho meedam vaba fa veimdi im meidi meedam bak eho le aam bak modeo, laham vabameam ubu uho ozoho bak lam eho meedam vaba fa gi uba dae meona im vahokedam bak lam uho vi aim bak modeo, labiham bak labna zohàme em iedi vou faovoi ozodam bak. Uho neham bak meedamna zohàme em iedi vou faovoi ozodam bak. Uho daet ot modi ot modiam bak ame. Labi laha ubu uho valo modemna meit vahemu ot fakiame teidedam bak ame. Labi laha meit im duana gagoho vabna gi kehàm vaba faki feà bak fusi meedam bak ame. Labi laha meit ahamo amota neàdem bak ozome meedam bak ame. Labi laha meia ot feàtài ot feàtàidam bak ame. Labi laha meit modehe im lam aaha vabna fa meia le fi dem bak ame. Labi laha meia neha, “Mit ahea! Eho modem modem bak,” lahame it daetbadam bak ame. Labi laha ostam im ahala modidume dahobuli meedam bak ame. Labihasu uho meedam bak eho uba le aame em ahu faidem bak labna zohàme em iedi vou faovoi ozodam bak.
21. Uho labihasu im zi lam meedam lahasuhuna eho uba neo lafusi aameam ebe eho vou baedam Alat Aho eba modi fa ladem bak labna zohàme em iedi vou faovoi ozodam bak. Neham bak. Eho uba lafusi nehi aameam, “Oo làhà! Dam nibe ibi iho amu faina meedam bak lam ba voedume fa ahu neà bak vàmadi meedam vaba vedi meedam lahasuhe?” lahame le aameam em ahu ba koena faidem vaba abo gi duana faidi mem bak. Neham bak. Ubu uho amu ahate modem bak ba ladem vaba aam ahasbeam im meedam bak ame. Labi damat nam meibada vam bak modeo, namet dat meibada vam bak modeo, ostame fi loholi ot vaidam bak ahebu meedam bak ame. Labi laha damat gagu fi hasi esuhu bak ehelahit ahole meedam vaba uho vedi neha, “Iho faina meedahe?” laham bak naedat it ozom vaba ahusobuli ostame la modi le modidam bak ame. Labihasu uho voedume fa ahu vei neàdehe vaba gi amu meedam bak lahasuhuna eho le aameam làhà em ahu faidi medda tame.
1. Korintus dam oa, eho etei uba lalo modem bak nim ab làteladelo modemam bak. Labi eho uba le ubu uho lab meedam bak lam eho aame ozo, “Neào? Faio?” laham bak aame ozobohudi gagolo modem di lam em gi Alat Vameadaha Im Toedahana laba meit nehi toehe bak lamti ulohona modelo modem bak. “Meit meia vàlu neha, ‘Da nim git modeho,’ lahame meia vàlu gagomeam làhà a nasi oba ahamte vou lehe im laba aime tu vuzehemule. Abo dam behàsu modeo, dam làtela modeo, vi tau aame vameadamta aime tu vuzehem neàte.” Lahame labihasu toehemu eho gi ame baket modelo modem bak.
2. Eho amu uba laha bak behàsdehe di labe eho uba gagu vi ozobohudem im nim uba gagohona um fa vabilehe? Di lam eho uba nehaha bak. “Eho uba ba neo lafusi aameam um gi faina meedam bak lahasuhuna eho le aameam làhà eho uba gi dae meona im vi vahokedume itaholeda tame,” lahame uba labi fet vameadume esuhu bak. Lahana eho etei ba di nim gi bak bohu bak nibe gi ame im lam neo sunit toedume uba oluhu bak. Imbote. Abo dam amu faina meedam dam lamti dam etei ba neo faina meedam dam lamti eho dae meona im vi vahokedume itaholeda tame. Ba dam meida vàmtea vekehe vaba gi ahebu ame baket meeda tame.
3. Uho eba vi ozom di vedi eba nehi gagoda. “ ‘Ame da Paulus lam Kristus labe im Abada vameame esmozi laiamda meida modeo?’ laham bak lam aho vouhome iba aame ozobohudese,” lahame gagodam dam um gi fao! Um ba àvodem bak. Eho ba uba le im vahokedam di lam Kristus labe im Abada eba modi vizi im dedateli teudi meedam bak lam um ba aame àvodi nehi gagodam bak. “Oo làhà! Kristus iba im meedam di ba beena meedam vaba abo gi feàna meedam bak,” lahame vi ozome àvodi labi gagoda tame.
4. Lahana damat Am ut tetehesuhunaso laba paku dou eloho di lam damat ozom di lam, “Am gi beet,” lahame labi ozom bak lam imbot. Lahamnàme Alat Am feà bak labet Aba modi Am fa ahedi usaha bak. Im laha damat iba aam di im so gi bee damat modem bak. Lahana Alat Am feà bak labe Kristus bake modi teudehe bak lamti ulohona iba laha neo modi teudehe bak. Labiha labe iho uba le vabiedam di lam gi Alat Am feà bak labet iba modi vizi teudi iho uba vabiedam bak.
5. Uho Kristus bake lab tu vuzehi meedam bak lam, “Imbo?” laham bak lam uhumo naedamat ubu uho bak niba meedam im lam vi ozome, “Im abo tuheo? Tuhu vabao?” laham bak lam uhumo um ahu it nabidale. Kristus Yesus labe um ahu laba modi vizi teudi umti vou ali ahu vàmadi meedam bak lam um naedam biehe? Uho naedamat um ahu it nabime ozo, “Im abo tu vuzehe bak,” laham bak it ozomeam làhà imbot. Umti Kristusti vou ali ahu vàmadi meedam damat modem bak. Laham vabameam uho it nabime ozo, “Im ba Kristusti vou ali ahu vàmadehe vab damat mode?” laham bak it ozomeam làhà ubu uho lab tuhu bak lam gi giomimot modem bak.
6. Ibi iho uba lab vameadaha im zi lamti ibi iho amu uba lab meedaha im zi lamti uho vi ozome nabidam di lam uho gi neha, “Lo, imbot. Ame da Paulus giida lam Alat gagu iho Kristus labe Am im vameame esmozi laiam damalehe bak,” lahame, “Uho iba labihasu gagodase,” laham bak lam eho tu vi ozodam bak am bak.
7. Labi laha eho Ala bake nehi vi ozome tom gagodam bak. “Ai Ala oa, eho Korintus dam laba le aam di dam labe faina meedam vaba gi Obo Oho ozoho bak lam meedamna le aase,” lahame eho labihasu Ala bake tom gagodam bak. Labihadamna eho le aameam em ba uba, “Um faina meedam damat modem bak,” lahame ba uba laba le im vahokedume itaholedam vabak. Neham bak. Alat Aba Aho gagoho im imbona lam eho ba im amomoi lamti ot odosiame meedam vabiem bak. Iho gi ame im imbona lam, “Uho mahate meedale,” lahame uba vi vameadume vahokedam bak am bak. Lahana eho ozoha, eho uba le im vahokedam vabameam làhà um dam zohot neha, “Paulus giida ame Da Kristus labe Am im vameame esmozi laiam damali meedam bak lam, ‘Imbo?’ laham bak lam modi tombalehe vabak,” lahame gagodam bak. Lahana dam zohot labihasu ozohonàme em ba àvodem vabak. Uho abo Kristus bake tu vuzehedume im Abada meedam labet modi eho uba ootedume itaholedam vaba em ahu deeli asimdem bak am bak. Labiham labe eho neha, “Ai Ala oa, oho ame Korintus dam laba modi ibi iho Kristus bake lab tu vuzehi meedam bak lam gi labaha bohu keàtedi vuusu vou meedume neàbodele,” lahame Ala bake labihasu tom gagodam bak.
10. “Uho ame bak lam meedase,” lahame eho ahit uba sunit nim gi bak bohulat toedume uba fet oluhu bak. Eho uba ba lafum di im Boehàda Yesus Kristus labe Am feà bak lam iba modi vizi teudehe labe iho im dedamali uba dae meona vi vahokedam vabak laba ozome nasi sunit nim fet toedume uba oluhu bak. Nehaha bak. Im Boehàda Yesus labe Aho iba lab modi vizi teudi iho im dedamalehe bak lam ba, “Uho Kristus bake lab tu vuzehi meedam bak lam fà modi vàhàdeme setese,” lahame iba labi modehe vabak. Gi ubu uho lab tu vuzehi meedam bak lam, “Gi labaha bohu vuusu keàtedi meedase,” laham bak ozome Aho ahit iba labi modehe bak.
11. Emti vahi Kristus bake tu vuzehi meedam dam oa, neàte. Sunit nim eho ab toedume neàdeham tame. Lahana im nidi nimota fa neo uba vi vameadume neàdi vaitolo mozo. Ubu uho Kristus bake lab tu vuzehi meedam bak lam gi labaha bohu vuusu keàtedi meedume neàbodele. Labi laha eho uba toedume oluhu im zi lam ahebu mahate vi ozodume keàtedi meedale. Labi laha uho ame im lam meedam di gi ahu im ozom bak vàmadi meedale. Labi laha a ot fakiamule. Gi meia ot deeli ot deelidam labe gi fa vahe vahedale. Eho etei uba labihasu gagodaha im lam uho meedameam làhà uba modi uho ot deeli ot deelidam labe um vahe vahedam Ala labe Aho uba taum bak.
12. Uho fa ot tahi ot tahidam di modeo, vahe vahedam di modeo, uho vahi Kristus bake tu vuzehi meedam damat modemu oode ot gilivaidam labe nehi gagodale. “Om abo neàte,” lahame vi gagodale. Im Alam damalehe dam ahebu nibe uba, “Neàte,” lahaho.
13. Eho gi uba nehi vi ozome Ala bake tom gagodam bak. “Im Boehàda Yesus Kristus labe Aho uba ozahit deeli im neà bak meedase. Labi laha Alat uba deeli meedam bak lam Aho uba modi um naedamat it ozobohudedase. Labi laha Alam Aha Nutabe Neàna labe Aho uba modi vizi teudi meedam labe um ahebu ot vou ali ot vou aliame bakamta vahi esdase.” Eho labihasu uba vi ozome Ala bake tom gagodam bak. Neàte. Eho Paulusat sunit nim toedume ab neàdeham. Àhàm.
1. Dam Kristus bake tu vuzehi vahi meedam dam abo dam zi mei dam zi meime Galatia bak ahebu laba esdam dam oa, neàte! Eho Paulusat abo Yesus Kristusat gagu olu Am im vameadume esmozi laiamda meida nibe eho sunit nim toedume uba oluho. Lahana ame sunit nim ehemo toedume uba olum kaio. Emti vahi Kristus bake tu vuzehi meedam dam totbaho nibe eba tau vi vameadume, “Neàte,” lahame toedume uba oluho. Eho Kristusat Am im vameadume esmozi laiam datelehe bak lam gi nehaha bak. Ba damat eba gagu olu eho ame baket modehe vabak. Labi laha Alat meia gagu olu meit eba li gagu eho ame im ahum ve dam bake vou vameatedaha vabak. Gi Yesus Kristus lamti labi Am eloho bak labet modi fa ahedi usaha im Ai Ala lamti eba gagu eho aime ame baket meedam bak. Em labihadamda modem labe sunit nim toedume uba oluho.
3. Eho uba ozome neha, “Im Ai Alati im Boehàda Kristus Yesusti ahili uba ozahit deeli im neà bak modi esuidase. Labi uba modi um ahu faheme fi goaitom vaba gi vabademsuse,” lahame eho ozodume Ala bake labihasu tom gagodam bak.
4. Im Ai Alat aham di iube im Boehàda Yesus Kristus bake nehi fet gagu esuhu bak. “Dam bakda fai bak meedam bak lam Oho fa fai Dateli gohali elom neàte,” lahame gagu Am Aiat Aba gagoho baket Aho uledi, “Lo. Em gohali elom neàte,” lahame ab gagoham bak. Dam bakda Ala bake tu vuzehi meedaha vab dam labe ibi iho faina meedam bak lam iba neo vizi iho faina meedam bak labna zohàme, “Im a tau meedamule,” lahame iba soat vausu fa vei neàdelo labihaha bak.
5. Labihàmu imo Ala bake, “Am abo feàte,” lahame vou baedam bohu vuusdase. Labihadase.
6. Emti vahi Kristus bake tu vuzehi meedam dam oa, Kristusat uba ozahit deeli im neà bak modi esuidàmu Alat uba, “Am damalese,” lahame uba gagoho bak. Lahana uho vedi kehàm vaba ubu uho etei Ala bake tu vuzehi meedam bak lam voou fa im amomoi damat neha, “Iho etei uba vou le vameadam im neàna nim bisi imboda am bak,” lahame uba li gagomda laba fa tu vuzehelo meedam bak. Uho lab meedalo modem bak lam em it aiha àvodi fakeho. Um akati labi meedàla?
7. Lahana um nasi aimale. Ba Im Neàna amomoi vabak. Gi Im Neàna iho uba amu vou le vou vameatedaha im lam ame im vàmtea am bak. Lahana eho ozoha, dam amomoi labe uba le vedi neha, “Paulus am dam totbahoti amu Galatia dam bake le Kristusat Aba Aho meedume vou esmoho Im Neàna lab vahokehena lam imo fa dam lam ozom biem bak modi esuse,” lahame labi ozome im ibida uba vameadume modeha um ahu fa behàsdi, “Im im adida imbodehela?” lahame um ab vi ozom bieham bak.
8. Lahana eho ozoha, iho uba vou le vou vameatedaha Im Neàna lam bisi imboda am bak. Ba amomoi kaio. Labihàmu Yesusat gagu olu Am im vameadume esmozi laiam dam nibe iho modeo, Alat Am im gagu vou usemda modeo, labihasu uba le ibi iho amu uba vou le vou vameatedaha Im Neàna lam uba vahokedaha vaba vedi fa im amomoi uba git vahokedameam làhà eho gi nehadam bak. “Alat ame dam laba beome abo vaitesu voou seddase,” lahame labi gagodam bak.
9. Eho etei lab gagoho im lam iho amu uba tau azihi di gagoho bak am bak. Lahana eho ozahit neo etei gagodam bak. Iho uba vou le vou vameatedaha Im Neàna lam uho amu gi uledi vahana taia? Labihàmu damat etei uba vou le, “Im Neànat modem bak,” lahame im mei vameadaha dam lam eho neha, “Alat ame dam laba beome abo vaitesu voou seddase,” lahame labi gagodam bak.
10. Eho etei lab gagoho im lam uho akati ozoe? Uho nehi ozohe? “Damat eba fà aame deelese,” lahame fet ozome eho uba labi gagohe? Vabà! Em ba labiham vabak. Eho gi, “Alat eba fà aame deeli meedase,” lahame ozoho labe uba labi gagoho bak. Em ba, “Damat eba aame deelese,” lahame im meedam vabak. “Damat eba aame deelese,” lahame eho ahit vi ozome na im meedameam làhà em ba Kristus eba gagoho im lam ba ule neàt meedam vabiem bak. Lahana em ba labiham vabak. Em gi Kristus eba gagohona uledi meedam tademda em am bak.
11. Emti vahi Kristus bake tu vuzehi meedam dam oa, eho uba le vou vameatedaha Im Neàna lam, “Akati vou lehe imot mode?” laham bak lam um biem bake nasi aimale. Ba damat ihimo ozome vameadam imot modem vabak.
12. Nehaha bak. Ame im lam damat eba modi ozobohudi em fi gatehe vabak. Labi laha ame im lam damat eba vahokedam bohu meedume em ozobohudi uba le vou vameatedaha vabak. Gi neham bak. Eho uba lab vou le vou vameatedaha Im Neàna lam Yesus Kristus Ahamo eba modi ozobohudi fi gatei uba le vou vameatedaha bak.
13. Eho nehame meedaha bak laba vi ozome uba labi gagoho bak. Eho amu Yesus bake tu vuzehehe vab di iube em Yahudi dàt modemu eho gi Yahudi dam labe ibi iho ozome tu vuzehi meedam im feàna lam eho tau vuzehi meedam lahasuhu di labe ebe eho meedaha im lam um aime ozobohudehena taia? Em gi nehadam bak. Dam emti amedi dam labe ame Yahudi dam labe ibi iho ozome tu vuzehi meedamna lam meedamta meeda. Lahana em bisi ulohodesu keàtedi meedamda em am bak. Neham bak. Im tai ahamda zi labe ibi iho vou gago usehe im feàna lam em bisi keàtedi ulohodesu meedamda em am bak. Labi laha, “Ame im lam vi tau modese,” lahame meia ootedume gagodamda em am bak. Em labihasu ame im lam ahebu meedalo àhàkemda modemu eho vedi Kristus bake tu vuzehi vahi meedam dam lam abo Ala bake vou baedam dam laba eho ame dam zoho vabidume dam zoho oddam dàt modem bak. Eho nehi ozo. “Eho labihadam labe ame dam labe ibi iho Kristus bake tu vuzehi vahi meedam bak lam fa mu voedume dam lam ahebu modi seddase,” lahame fet ozome ahit labi keàtedi meedaha bak. Eho amu lab meedaha bak lam meit uba li vameadahana uho aime ozobohudehena taia?
15. Eho gi labihasu meedamnàme oiat em faaha vab di iube Alat ozahit nehi ozo, “Aho em ve Am damalelo modem bak,” lahame amu labi fet ozome esuhu bak. Labihàmu Alat Aba Aho fet ozome esuhu digat fuhemu Aho meia ozahit deeli im neà bak modi esuidam Alat modem labe eba neha, “Kristus labe Aho meedume vou esmoho Im Neàna lam dam Yahudi damat modem vab dam bake vou vameatedale,” lahame labihasu eba gagu em ab oluham bak. Ame di labe dam Yahudi damat modem vab dam ahebu, “Ala labe Am Adat Yesusat modem bak,” laham bak biem bake, “Eho le vou vameatedase,” lahame Alat ahit eba modi ozobohudi fi gatei, “Am Adat Yesus am tame,” laham bak lam eba modi ozobohudi ab fi gateham bak. Labi Alat eba neha, “Am Im Neàna lam Yahudi damat modem vab dam bake vou vameatedale,” lahame eba gagu oluhu di lam eho ba dam bake le im ot vameaidume neàdi laha vabak.
17. Labi ame di labe laha em ba kota Yerusalem laba le dam amu Yesusat gagu olu Am im vameadume esmozi laiam damalehe dam laba le im ot vameaidume neàdi laha vabak. Gi ehemo Kristusat eba lab gagoho di labe Arab bak laba le azi. Labi laba le azibe Arab bak lam vou esmozi fa num debu Damsik laba fa neo lehe bak.
18. Labi li azibehamdi tiga tahun foli neàdi Petrusam alihi alimeat aalo kota Yerusalem laba ba laha bak. Laba le Petrus bake tau azibe gi usi lima belas folehe bak.
19. Ame di labe eho laha Yesusat gagu olu Am im vameadume esmozi laiamda meida alimeat aahada ehete. Ame da Yakobus im Boehàda Yesus Am vahada am bak. Ame dam totbaho em ba aaha vabak. Gi ame dam behàsu lamota aaha bak.
20. Eho etei nib toehe bak nim ba giomim toedaha vaba abo imbote. Abo Alat eba aasdahit eho toedaha bak.
21. Labi eho Petrus bake le tau azibe usi lima belas foli neàdi eho ba neo Siria bak ahebu lamti labi Kilikia bak ahebu lamti neo laba le ame Im Neàna lam vou vameatedaha bak.
22. Eho lab le meedam di labe Yudea bak laba le meedaha vab labe Kristus bake tu vuzehi vahi meedam dam zi mei dam zi mei lahadam dam Yudea bak laba esdam dam labe ba em alihi aam vaba abo em biem lahasuhu bak.
23. Gi eho bak mei bak iuba le meedaha im lam meit ame dam laba le nehame vameaidam im ahum aidaha bakta ehet. Meit le neha, “Dat amu Kristus bake tu vuzehi vahi meedam dam laba le, ‘Kristus bake tu vuzehi meedam bak lam fà mu vou seddase,’ lahame vabidamda labe fa veimdi, ‘Kristus bake tu vuzehi meedale,’ lahame fa dam bake vou vameatedam bak,” lahame meit le vameaidam im ahum aidamehamdehena ehe bak.
24. Labihadam bak lam Yudea damat aidàmu Ala bake, “Am abo feàte,” lahame vou baedaha bak.
1. Labi eho amu ahamte kota Yerusalem laba le vou esmozi neo bak mei bake le ame Im Neàna vou vameatedume empat belas tahun foli neàdi emti Barnabasti kota Yerusalem laba fa neo ab zooleham. Labi ame di labe iho laha Titus ve ab vou zooleham.
2. Eho lab zoolehe bak lam meit eba, “Lele,” lahame eba gagu eho zoolehe vabak. Abo Alat eba, “Lale,” lahame labi modi ozobohudi fi gatei ehemo kota Yerusalem laba zoolehe bak. Labi zooli lafusi Kristus bake tu vuzehi vahi meedam dam laba vuusu faheme im vameadam dam busaoda zi abo damat neha, “Feàte,” lahame ahu adat iedi vou baedam dam lamota eho gagome vazisi. Labi vazisi neàdi ebe eho Yahudi damat modem vab damat esuhu bak laba le Kristusat meedume vou esmoho Im Neàna lam vou vameatedaha bak lam ame dam labe iho biem bake eho ab vameadaham. Eho gi neham bak vou faovoi ame dam eeda zi laba gagome vazisi ahate im vameadaha bak. Ame dam eeda labe eba neha, “Paulusat lab vou vameatedaha im lam ba im ibidati uloho kaio,” lahame eba labi feàtàmna zohàme eho amu ame Im Neàna lam dam bake le lab vou vameatedaha bak modeo, eho ba etei le vou vameatedam bak modeo, gi vanamai teolemna zohàme eho dam eeda laba gi ahate vameadaha bak.
3. Lahana iho lab vazisi im vameadaha di labe dam iba ot odosiaha dam ehete. Ame dam labe nehame vou vahoketedaha damat modem bak. “Dam Kristus bake tu vuzehi vahi meedam dam ahebu laha dat ahamda Musat toedume fi hasi esuhu Im Feàna zi lam laha tu vuzehi im laso aubehà sokba ukbodam labe Alat iba deeli vadam bak am tame,” lahame labi vou vahoketedaha dam ehe bak. Lahana ame dam labe neha, “Im Kristus bake tu vuzehi vahi meedam dam am bak,” lahana ahi vageme gi ahobat neàdi ibi iho vazisi im vameadam bak lam aalo iho gagoho vabna ostame vi oli tau nusu meeda. Neham bak ozolo ostame vi ole. “Iho Kristus bake tu vuzehi meedam labe ame Im Feàna lam fa faatoi abo mu vooheo? Ulohodesu meedam lahasuheo?” laham bak ozolo ostame vi olehe bak. Ame dam labe vedi neha, “Dam Kristus bake tu vuzehi meedam dam lam Alat dam laba deeli vadam bake imo dam laba modi fa ame Im Feàna lam vi tau meedume alihi nemahudase. Abo mei na teo meedamda labe aba na teo ootedume meedamda labe aho gagohona lam aime meedam bak lamti uloholese,” lahame labi vi ozome ab tau oleham bak. Labihadam damat modehe labe vi oli aaha Titus eho ve vou leheda lam abo Yahudi dàt modem vabda lam gi amu Kristus bake tu vuzehi neàdeheda lam aahemu, “Laha laso aubehà sokba ukbole,” lahame labi bisi ooteda. Lahana am gi Yahudi dàt modem vabda modemnàme ame dam eeda labe ba ame bak lam vi tau gagu modehe vabak.
5. Im ba ame dam giida ostame vi tau oleheda labe im im ba koena aime uledi Titusam laso aubehà sokba ukboho vabak. Neham bak. Kristusat meedume vou esmoho Im Neàna lam abo im imboda lam fa im giomimdati valiheme um Galatia dam ubu uho amu tu vuzehehe bak fa vàhàdem bak labna zohàme iho gi ozahit mali ailahigeàmoho bak.
6. Lahana ebe eho uba Yahudi damat modem vab damat esuhu bak laba le ame Im Neàna lam lab vou vameatedaha di lam ame dam eeda zi lam abo damat neha, “Feàte,” lahame ahu adat iedi vou baedam dam labe ba eba nehi gagoho vabak. “Oho gi im lada lamota a vou vameatedamule. Im nidi nim laha tau vou vahoketedale,” lahame ba eba vi gagu ebe eho amu vahokedaha im lam ba veimdehe vabak. Gi amu bak lahasdam bak. (Ame dam eeda lam damat vi ozo, “ ‘Feàte,’ lahame, vou baedào? Vou baedam vabao?” laham bak lam em ba àvodi vi ozodam vabak. Neham bak. Alat dam bake aam di ba dam faheme dam totbaho deele. Labi dam totbaho faki mu voo. Labiham vab Alat modem bak. Gi dam ahebu vou aasdam Alat modem bak.)
7. Ame dam eeda labe ba eba vi gagu ebe eho amu vahokedaha im lam ba veimdehe vaba vedi gi nehi vi ozobohudi ahu vàmadi vi tau gagodam bak. Alat amu Petrus bake neha, “Am Im Neàna lam Yahudi dam ahebu iudu iumti iudu iumti laham dam laba le vou vameatedale,” lahaha bak lam amu vi ozobohudi ahu vàmadi vi tau gagoho bak. Labi Alat eba neo neha, “Am Im Neàna lam Yahudi damat modem vab dam ahebu iudu iumti iudu iumti laham dam laba le vou vameatedale,” lahaha bak lam laha etei neo vi ozobohudi ahu vàmadi neo vi tau gagodaha bak.
8. Abo Alat amu Petrus bake modi vizi teudehe labe Yesusat gagu olu Am im vameadume esmozi laiam dateli ame Im Neàna lam Yahudi dam ahebu iudu iumti iudu iumti laham dam laba vou vameatedaha bak lam ame dam eeda labe amu vi ozobohudi ahu vàmadi vi tau gagoho bak lamti uloholi neo Alat eba modi vizi teudehe labe eho neo Yesusat gagu olu Am im vameadume esmozi laiam dateli Am Im Neàna lam uba Yahudi damat modem vab dam bake le vou vameatedaha bak lam laha etei neo vi ozobohudi ahu vàmadi neo vi tau gagodam bak.
9. Labi Alat eba ozahit deeli im neà bak modi esuidam labe eba neha, “Am Im Neàna lam dam bake vou vameatedale,” laham bak lam ame dam eeda labe laha vi ozobohudi ahu vàmadi, “Neàte,” lahame neo vi tau gagodaha bak. Labihàmu ame dam eeda labe abo damat, “Feàte,” lahame ahu adat iedi vou baedam dam lam abo Yakobusti Petrusti Yohanesti labihasu ahu vàmadi iba nehame tau gagoda. “Lo imbote. Im Boehàda Yesus labe Aho amu iba gagu Am im vameadume esmozi laiam damalehe bak lamti ulohona neo ame baket Paulus bake modehe bak,” lahame ahu vàmadi tau gagodume neàdi ame dam labe im anekehà voadume ab, “Neàte,” lahadaham. “Dam lam ot deeliame ahu vàmadi vou alem damat mode?” lahame damat fet aame vi ozobohudem bake im anekehà ab voadaham. Ame dam eeda làtela labe ahu vàmadi neha, “Lo. Neàte. Omti Barnabasti fa Yahudi damat modem vab dam bake ame Im Neàna lam vou vameatedam neàte. Labi iho fa Yahudi dam bake ame baket laha meedase,” lahame ahu vàmadi ab tau gagodaham bak.
10. Ame dam eeda labe gi im vàmtea nim iba nehame vi ootedam bak ehete. “Iho dam na vab dam laba tau aasu vabiedam bak lam a voomule. Abo labaha bohu vuusdale,” lahame iba vi ootehe bak vàmtea am. Ame dam na vab dam laba tau aasu vabiedam bak lam eho ozoha, ebe eho amu bisi modelo àhàkedam im am bak. Em ba voom vabak.
11. Labi ba di iube eho Barnabasti num debu Antiokia laba azihi di labe Petrus ba neo vuli azibe modeha Petrus fa git meedàmu damat aasdahit eho Petrus bake neha, “Om abo git meedaho,” lahame damat aasdahit eho im ab vahokedaham bak.
12. Ame da Petrus labe aho git nehasu meedaha bak. Aho ahamte Antiokia laba lehe di labe dam faheme Yahudi dam bake im amomoi meeda. Labi Yahudi damat modem vab dam bake im amomoi meeda. Ba aho labihadaha vabak. “Yahudi damti Yahudi damat modem vab damti fa vahem neàte,” laham bak lam Alat amu Petrus bake gagu ozobohudi fa vahi im vàmtea vabademsu meeda. Aho gi dihasi dam Kristus bake tu vuzehi vahi meedam dam abo Yahudi damat modem vab dam modeo, Yahudi dam modeo, laba tau vahi nusu na àda. Im vameada. Labi neo dihasi ame baket neo mode. Gi labihadam dàt modem bak. Lahana Yakobus abo Kristus bake tu vuzehi vahi meedam dam abo dam zi mei dam zi meime kota Yerusalem laba meedam dam laba vuusu faheme im vameadam dat busaoda labe aho vou alem dam totbaho labe fa Antiokia bake lehemu Petrus vedi aba aho amu keàtedi vabademsu meedaha bak lam fa odohali fota ab meedamam. Ba Yahudi damat modem vab damti bisi valihem vaba vedi fa koena fi haseo meeda. Ame fi ham lahasuhu dam abo etei lehe Yahudi dam labe vedi nehasu ozoda. “Yahudi damat modem vab dam labe Kristus bake tu vuzehi meedam dam lam laha im laso aubehà sokba ukbodam bak. Ukbodaha vab dam tau vahi na àm fi ham bak,” lahame gagodàmu ame Yahudi dam labe aba gagu lademna zohàme iedi Petrus ba Yahudi damat modem vab dam lamti na àm bake mu fa fi haseo ab meedamam.
13. Ame da Petrus amu gi ozobohudehe bak. Yahudi dam Kristus bake tu vuzehi meedam dam labe fa Yahudi damat modem vab dam lamti vahi na àm neàte. Ba fi ham vabak. Laham bak lam Petrus gi amu ozobohudi neàdehena vedi ame Yahudi dam totbaho lehemu fa ahit neà dateli meeda. Labi dam Kristus bake tu vuzehi vahi meedam dam abo num debu Antiokia laba azihi Yahudi dam labe ame bak lam aahemu fa vi tau vizi ahit neà damali ab vi meedamam. Gi dam lada lamota vizi meedaha vabak. Barnabas laha vedi, “Fihase,” lahame vi tau vizi fa neo ahit neà dateli ba Yahudi damat modem vab dam lamti vahi na àm bak fi haseo meeda. Labihada.
14. Labihadàmu eho aaha ame dam zi labe ba Kristusat meedume vou esmoho Im Neàna lam ba ulohodesu meedaha vaba vedi zidazi zidazidàmu imti vahi Kristus bake tu vuzehi meedam dam totbaho fa vazisi aasdahit eho Petrus bake ahate im nehasu ab vahokedamam. “Om abo Yahudi dàt modem bak. Lahana im Yahudi dam labe ibi iho ame Im Feàna laba tu vuzehi ulohodesu meedam bak lam oho amu gi mu voou setehe bak. Labi etei fa Yahudi dàt modem vab dateli fi ham vab dateli meeda. Lamota neàte. Lahana om ozom vaba? Obo oho etei lab ubahadam bak labet modi Yahudi damat modem vab dam abo Kristus bake tu vuzehi vahi meedam dam labe iho vi aame ozobohudi fa Yahudi dam labe ibi iho ame Im Feàna lam ulohodesu meedam bak lam ab vi taui vi tauidalo modemam bak. Lam abo git meedam bak am bak,” lahame eho Petrus bake im ab vahokedaham.
15. Lahame im lada lam vahokedume neàdi eho Petrus bake neo im nehasu vahokeda. “Petrus, om oiti aiti Yahudi namet om faaha bak. Labi em laha ame baket modehe bak. Labiha labe im behàsu amait Yahudi damat modem bak. Im behàsu ba Yahudi namet modem vab namet im faaha vabak. Im ba ame Im Feàna lam ba meida voom vaba abo ulohodesu meedam bak. Labiha labe Yahudi dam totbaho labe iba neha, ‘Um gi Yahudi damat modem vab damti uloholi faina meedam damat modem bak,’ lahame ba labi aame feàtàdam vabak.
16. Labihadamnàme Alat nehame gagoho im nidi nim im Yahudi dam Kristus bake tu vuzehi meedam dam nibe iho laha ozobohu bak. Alat amu neha, ‘Meit gi dat ahamda Musat toedume fi hasi esuhu Im Feàna zi lam ulohodesu meedam labe Eho ba ame da laba, “Im vamdesu meedam dàt modem bak,” lahame ozahit deeli gagu vadam vabak. Gi Em Adat Yesus Kristus bake tu vuzehem labe Eho ozahit deeli gagu vadam bak.’ Laham bak lam imbomu im behàsu Yahudi damat modemnàme iho Kristus Yesus bake tu vuzehehe bak. Neham bak. Meit gi ame Im Feàna lam ulohodesu meedam bohu meedam labe Alat ba ame da laba neha, ‘Im vamdesu meedam dàt modem bak,’ lahame ozahit deeli gagu vadam vabak. Labihàmu iho Alat iba deeli vadam bak laba ozome Kristus bake tu vuzehehe bak.
17. Petrus, im Yahudi dam nibe iho gi Kristus bake tu vuzehi ahu vàmadi vou ali meedam labe, ‘Alat iba neha, “Im im vamdesu meedam damat modem bak,” lahame iba ozahit deeli gagu vadase,’ lahame modelo àhàki ozodam damat modem bak. Iho labi meedàmu Yahudi dam totbaho labe iba feàtàdam labe nehame gagoe moio? ‘Uho labi meedam labe um gi Yahudi damat modem vab damti uloholi meedam bak. Gi ame Im Feàna lam mu zidazi faidehe bak. Uho Kristus bake tu vuzehehe bak labet modi faina meedam bak fa uba vizehe bak,’ lahame iba labi gagom zoaha bak. Lahana ba labiham vabak. Damat iba gi feàtàdam bak. Iho Kristus bake tu vuzehi ame Im Feàna ulohodesu meedam bak lam mu vooho bak lam ba Kristusat, ‘Dam nim fà faina meedase,’ lahame iba modi vizi iho faina meedam vabak.
18. Neham bak. Eho, ‘Alat eba neha, “Em im vamdesu meedam dàt modem bak,” lahame ozahit eba deeli gagu vase,’ laham bak laba ozome eho ba ame Im Feàna lam neo faasi ulohodesu meedam vabak. Eho amu gi ame Im Feàna lam mu voou seti fa Kristus bake tu vuzehehe bak. Lahana eho amu labi modehe dàt vedi fa neo, ‘Alat eba deeli vase,’ laham bak laba ozome ame Im Feàna lam fa vi tau ulohodesu meedameam làhà Alat ba eba deeli gagu vam vabak. Em gi Aho gagoho im zidazi faina meedamda em am bak.
19. Eho gi neham bak vi ozome oba labi gagoho bak. Amu di iube eho ozo, ‘Eho ame Im Feàna lam ulohodesu meedam bak labet modi Alat ba eba neha, “Em im vamdesu meedam dàt modem bak,” lahame ozahit eba deeli gagu vam vabak,’ laham bak lam em ozobohu bak. Labihàmu eho gi elom bakti ulohonali ame Im Feàna labe eba ootedume vabidam di lam eho gi ozahigeàmu vooho bak. Etei em gi fa Alam damali im Abadata vi ozome meedam bak. Eho ozoha, Kristus eloho di lam emti vi tau elohona ozomom bak. Abo ebe eho amu ame Im Feàna ulohodesu meedam bak lam gi di labe mu vooho bak.
20. Labihàmu eho Kristus bake tu vuzehi Amti vou ali meedume vi tau elohona ozohomu eho etei nehi ozo. Ba ebe eho ozomda abo, ‘Alat eba deeli vase,’ lahame ehemo naedat labi it ozome ame Im Feàna lam ulohodesu meedam vabak. Em gi Kristusat eba modi tau vuusu meedam labe eho teudi im Alabadata meedam bak. Labihàmu eho bak niba ahedi na im meedam di eho gi Alam Adat Yesus bake tu vuzehi meedam bohu vuusdam labe ahedi na im meedam bak. Alam Adat lam eba deeli eho faina meedàmu Aho fa gohali ot vai, ‘Damat fà Am otem neàte,’ lahame gagohoda Am am bak.
21. Alat iba ozahit deeli im neà bak modi esuidam Alat meedam labe Aho neha, ‘Im im vamdesu meedam damat modem bak,’ lahame ozahit iba deeli gagu vadaha bak lam dam totbaho labe, ‘Gi modehe imot modem bak,’ lahame tozome mu voedam damat modemnàme em ba labi tau gagom vabak. Eho gi neham bak ozome uba labi gagoho bak. Meit dat ahamda Musat toedume fi hasi esuhu Im Feàna zi lam ulohodesu meedamda laba Alat nehameam, ‘Lo, om im vamdesu meedamda om am bak. Eho ozahit oba deeli gagu vam bak,’ lahame labi gagomeam làhà imbot. Kristus labe Aho lab eloho bak labet ba im modemna vabak,” lahame eho Petrus bake labihasu im ab vahokedaham.
1. Galatia dam abo emti vahi Kristus bake tu vuzehi meedam dam oa, um abo ahusobuli meedam damat mode taia? Yesus Kristus damat ve ut tetehesuhunaso laba esu paku dou eloho bak lam, “Akatiham bak ozome Am otehela?” laham bak lam eho amu uba gi iademe vahokedume um ozobohudehena taia? Lahana um akati eho uba vahokedaha im imbona lam mu voou fa meit ba neha, “Dat ahamda Musat toedume fi hasi esuhu Im Feàna zi lam iho ulohodesu meedam labe Alat iba deeli vada tame,” lahame meit ba giomim vou lehe im lam uho akati vuzehi meedàla? Làhà um ahole ahusobulehe bak.
2. Eho uba gagu ailo modem im nidi nim uho fa eba vi gagoma? Uho ozom, Alat Am Aha Nutabe Neàna uba amu vizi teudehe bak lam uho neham labe labihahe? Uho dat ahamda Musat toedume fi hasi esuhu Im Feàna zi lam ulohodesu meedam labe uba ame baket vizi teudehe? Vabà! Labihaha vabak. Uho gi Alam Im Neàna lam aime Yesus bake tu vuzehi meedam labe Am Aha Nutabe Neàna labe uba modi vizi teudehe bak.
3. Um akati bisi ahusobuli mode? Um ozom vaba? Uho amu Yesus bake ahamte tu vuzehi Amti vou alehe bak lam Alat Am Aha Nutabe Neàna labe uba modi vizi teudehe labe um fa im gàhà bak faasi meedahana taia? Lahana um akati fa ba, “Alat iba deeli vadase,” laham bak ozome fa ame Im Feàna lam vi tau meedàla? Gi ubu uho amu faasi meedam bak lahasdam vaba? Làhà um ahole ahusobulehe bak.
4. Làhà uho gi nehalo mode? Uho ame Im Feàna lam vi tau modem moho labe damat uba vabidume um alihi nemahudàmu uho vedi iedi um Yesus bake tu vuzehehe bak lam fa mu voolo ozome meedà? Làhà uho labi modemeam làhà um gi vanamai teolem bak. Lahana eho ozoha um ba vanamai mu voou teolem vabak. Uho gi ozahit keàtedi meedam bohu lahasdalo modem bak.
5. Uho ozom, uho ame Im Feàna zi lam ulohodesu meedam labe Alat Am Aha Nutabe Neàna lam uba ilabdi modi vizi teudi uho na damat ihimo modem biem im feàna meedà? Vabà! Ba labiham vabak. Uho gi Alam Im Neàna lam aime Yesus bake tu vuzehi meedam labe uba modi vizi uho ame im meedam bak.
6. Emti vahi Kristus bake tu vuzehi meedam dam oa, iho etei Kristus bake tu vuzehi meedàmu Alat iba neha, “Im Am damat modem bak,” lahame iba deeli im ab vadamam bak. Ame bak lam iho im Yahudi dam labe im tai ahamda Abrahamat aho amu aham di iube meedaha im lamti uloho bak. Ame da Abrahamat aho meedaha im lam meit Alat Vameadaha Im Toedahana laba nehi toehe bak ehe bak. “Abrahamat Alat aba lab fet gagu esuhu im lam aho aime ozo, ‘Ba imbodem bak,’ lahame uledi tu vuzehehemu Alat aba neha, ‘Im vamdesu meedam dàt modem bak,’ lahame ozahit deeli gagu ab vaham bak.” Lahame labihasu toehena ehete.
7. Labihàmu ame toehena lam iho nehi ozom bak. Im dam bada nibe iho meit ame da Abrahamat modehe im lam vi ozome ulohona modi Alam Im Neàna lam aime, “Imbote,” lahame Yesus bake tu vuzehi meedam dam niba Alat ba iba laha neha, “Im Abrahamat vou faat ledaha dam ààmom dam im am bak,” lahame iba labi ozome gagodam bak.
8. Labi laha Alat aham di iube neha, “Yahudi damat modem vab dam labe ba Eba tu vuzehi meedàmu Eho ame dam laba neha, ‘Im vamdesu meedam damat modem bak,’ lahame ozahit deeli gagu vada tame,” lahame fet ozome esuhu bak. Labihàmu ame Im Neàna lam Aho Abraham bake nasi fet vameadume ozobohudi fi gatei esuhu bak ehe bak. Ame im lam Musat Alat Vameadaha Im Toedahana laba laha nehi toehe bak. “Alat Abraham bake neha, ‘Oho ba vou faat ladam dam meida laba Eho modi fa dam bake esuhuda debu ahebu neà bak modi esuida tame.’ ” Laham Im Neàna lam Alat gi Abraham bake aham di iube nasi fet gagu ozobohudi fi gatei esuhu bak.
9. Labihàmu Abrahamat Alat aba fet gagu esuhu im lam, “Ba imbodem bak,” lahame tu vuzehi meedàmu Alat Abraham bake im neà bak ab modi esuidaham bak. Labihàmu etei im dam bada neo gi labihadam bak. Ame bak labet iho Yahudi damat modeo, Yahudi damat modem vab damat modeo, iho meit Kristus bake tu vuzehi meedamda laba Alat laha iba im neà bak modi esuidam bak.
10. Aham di iube meit Alat Vameadaha Im Toedahana laba nehi toehena ehete. “Alat dat ahamda Musa bake gagu aho toedume fi hasi esuhu Im Feàna zi lam ahebu meit ulohodesu meedam bohu meedaha vaba abo im meida zidazi zidaziameam làhà ame da lam, ‘Alat ba beo tame,’ lahame amu gi fet uloome esdam bak.” Lahame labihasu toehemu uho meit nehi ozo, “Ame Im Feàna lam ahebu eho ulohodesu meedam labe Alat eba deeli vam bak,” lahame labi ozodamda lam git ozoho bak. Ba labiham vabak. Alat ame da laba gi amu fet uloome esdam bak. Neham bak. Ame im lam feà bak. Ba amat keàtedi ame Im Feàna lam meida voom vaba abo ahebu ulohodesu meedà? Ba labihasu modemda vàmtea vabak.
11. Labihàmu im nehi ozodam bak. Alat ba ame Im Feàna lam ulohodesu meedam da laba, “Im vamdesu meedam dàt modem bak. Eho ozahit oba deeli gagu vam bak,” lahame ba labi gagom vabak. Aham di iube meit Alat Vameadaha Im Toedahana laba laha nehi toehe bak ehe labe eho uba labi gagoho bak. “Alat neha, ‘ “Im vamdesu meedam damat modem bak,” lahame Ebe Eho ozahit deeli gagu vadam dam lam Eba tu vuzehi meedàmu Eho ame dam laba modi Emti vahi gi ahe neàna bohu vuusdam bak.’ ”
12. Labi laha meit Alat Vameadaha Im Toedahana laba im meida nehi toehena ehete. “Alat vameadume fi hasi vàmadi esuhu Im Feàna zi lam meit ame im vàmtea voom vaba abo ahebu ulohodesu meedam bak labet modi ame da lam ahedemda am bak.” Lahame labihasu toehemu eho nehi ozo. Meit neha, “Alat eba deeli vam bake eho ame Im Feàna lam ahebu ulohodesu meedase,” lahame labi tu vuzehi meedamda labe aho ba Kristus labe Aba Aho meedaha bak laba ba tu vuzehi meedam vabiem bak. Am gi, “Alat aba deeli vase,” lahame aba ahamo lab modem bak laba tu ahumdem bak.
13. Lahana ba ame Im Feàna lam ahebu ulohodesu meedamda vàmtea buà vabak. Labihàmu im dam ahebu ame Im Feàna lam ulohodesu meedaha vaba abo meida vazidazi vazidaziahemu Alat iba laha amu gi, “Beose,” lahame uloome esdam bak. Labihadamnàme Kristusat ahit fa fai Dateli Alat iba lab uloome esdam bak lam Aho ot vai fa ab faamodaham bak. Eho gi dat ahamda Musat Alat aba nehi gagohona aho Alat Vameadaha Im Toedahana laba im meida neo nehi toehe bak laba vi ozome uba labi gagoho bak. “ ‘Elose,’ lahame ut laba taasdamda lam Alat gi amu, ‘Labaha bohu beodase,’ lahame fet uloome esdamda am bak.” Lahame labihasu toehemu eho ame bak laba vi ozome uba neha. Kristus laha ame baket modehe bak. Iho damat faina meedam bak lam Kristus Ahamo uledi fa fai Dateli ot vai damat Am ve ut tetehesuhunaso laba esu paku dou eloi taasdàmu Alat iba amu lab uloome esdam bak lam Aho fa faatoi fa Kristus bake ab modi esuham bak.
14. Kristus Yesusat Ahamo uledi fa fai Dateli ot vai lab eloho bak lam gi modi elom kaio. “Nehadase,” lahame labi eloho bak. Alat aham di iube Abraham bake neha, “Omti oho ba vou faat ladam dam lamti eho uba gi im neà bakta modi esuida tame,” lahame fet vameadume esuhu im lam, “Yahudi damat modem vab dam laba laha ame im neà bak modi esuidase,” lahame labi ozome Yesusat Ahamo ahit uledi fa fai Dateli ot vai eloho bak. Labi laha, “Alat, ‘Aho Am Aha Nutabe Neàna iba olu tame,’ lahame amu fet gagu esuhuda lam iho Kristus bake tu vuzehi meedam labe im ahebu vizi teudedase,” lahame Kristusat labi ozome fa ahit fai Dateli ot vai eloho bak.
15. Emti vahi Kristus bake tu vuzehi meedam dam oa, Alat aham di iube Abraham bake fet vameadume vàmadi esuhu im lam, “Akati modemna modela?” laham bak lam um biem bake eho gi im dam bakda nibe ibi iho meia im fet gagu vàmadi esulo modem di ba voom vabak laba vi ozome uba vouhodalo mozo. Im gi nehadam bak. Iho ame im lam fet gagu esulo modem di damat aasdahit ohu fau visoi im so nasvai fet gagu vàmadi esuhu labe ba meit ame im lam vi gagu faatom biem bak. Abo labahasdam bak. Ibi iho meedam bak labihahemu Alat aham di iube Abraham bake lab fet vameadume vàmadi esuhu im lam laha labihaha bak. Ba faatom vabak. Abo labahasdam bak.
16. Nehaha bak. Alat aham di iube Aho Abraham bake lab fet vameadume vàmadi esuhu im lam gi Abrahamti aba aho ba diamut vou faat leheda meida lamti labihasu, “Aho neà bakta modi esuia tame,” lahame fet vameadume vàmadi esuhu bak. Ame lab vou faat ledam bak lam meit amu Alat Vameadaha Im Toedahana laba toehe di lam Alat ba Abrahamat aba aho vou faat ledaha damdua bake ozome Abraham bake labi gagoho vabak. Gi Abrahamat aba aho ba diamut vou faat leheda meida vàmtea Kristus bake ozome im lam toehe bak.
17. Labihàmu eho etei uba lab fet vouhoho bak labe am tombu uba neo nehi vameadume um ozobohudelo mozo. Alat aham di iube Abraham bake lab fet vameadume vàmadi esuhu di lam, “Aho mode tame,” lahame ohu fau visoi am so nasvam bakti ulohona modi fet gagu vàmadi esuhu labe ba naat vi faatom biem bak. Aho lab fet vameadume vàmadi esuhu bak lam gi aham di iube modehe bak. Labi ba diamut abo empat ratus tiga puluh tahun foli neàdi ba Musa bake, “Im Feàna lam Yahudi dam bake fi desi meedale,” lahame gagu Musat fa Yahudi dam bake ab vou vameatedaham bak. Labihadamnàme Alat amu Abraham bake lab fet vameadume vàmadi esuhu im lam ba faatoi voou setehe vabak. Gi aba Aho amu gagoho bak lahasu bohu meedam bak.
18. Neham bak. Alat aham di iube Abraham bake neha, “Omti oho ba vou faat ladam dam lamti eho neà bak uba modi esuida tame,” lahame lab fet vameadume vàmadi esuhu im lam uho ozom, ame dam labe iho ame Im Feàna lam ulohodesu meedam labe Alat ame dam laba ba neà bak meedahe? Vabà! Ba labihaha vabak. Lahana labihameam làhà Alat Abraham bake lab fet vameadume vàmadi esuhu im lam gi vameame voom bak. Lahana Alat ba labihaha vabak. Im Alat Abraham bake lab fet vàmadi esuhu im lam gi amu modehe bak. Lahana ame Im Feàna lam Alat gi ba Musa bake fi desi aho ba toedaha bak. Labihàmu im ba biem vabak. Alat gi Abraham bake ozahit deeli im neà bak modi esuidam Alat modem labe gi Aba Aho lab fet vameadume vàmadi esuhu bak labet ba veimdem bi ame neà bak lam Abraham bake ab meedaham bak. Im laha. Alat Aho iba, “Lo tame,” lahame fet vameadume vàmadi esuhu im lam imbodem bake ba iho ame Im Feàna ulohodesu meedam bak labet iba lodam vabak.
19. Labihahemu uho eba nehi gagoe moio? “Làhà Alat akati modi ame Im Feàna lam Musa bake ba gagu dam bake vou fi dehela?” lahame eba labi gagomeam eho fa uba nehi gagom bak. Iho bak damat Aba Aho gagoho bak meedaha vaba zidazi meedam di iho vi ozo, “Faina meedam bak ame?” lahame vi ozobohudem bake Alat ahit Musa bake ame Im Feàna lam gagodume fi desi meedam bohu vuusdam bak. Alat nehi fet ozome esu, “Dam bakda ame Im Feàna lam vuzehi meedam bohu vuusdume Abrahamat aba aho vou faat lahada bisi neàda vàmtea lam abo Eho aham di iube fet vameadume esuhuda Kristus lam faasi fi zeam bitoi neàdehezobe ame Im Feàna lam fa voou setem neàte,” lahame fet ozome esuhu bak. Ame Im Feàna lam Alat ahamte Am im gagu vou usem dam laba gagu olu Musa bake usi neo vameada. Labi Musat fa tohedateli ame Im Feàna lam fa Yahudi dam bake neo vameada. Labihadam Im Feànat modem bak.
20. Um nasi ozodale. Alat ame Im Feàna lam Yahudi dam bake fi dehe di lam Aho gi tohedate vameadume olu fi dehe bak. Lahana Alat Abraham bake lab fet vameadume vàmadi esuhu di lam ba tohedat modeo, Alam im vou usem damat modeo, ba vameadaha vabak. Gi Alat Ahamo aha Abadat ahate fet vameadume vàmadi esuhu bak.
21. Alat Abraham bake lab fet vameadume vàmadi esuhu bak lam gi aham di iube amu mode. Labi ba diamut Alat neo ame Im Feàna lam Musa bake vameadume olu Yahudi dam bake vou fi dehe bak lam ba mode. Labiham labe uho ozom, ame Im Feàna lam ba fi dehe labet modi Alat Aho amu Abraham bake lab fet vameadume vàmadi esuhu im lam Ahamo naedat it ozome fa faatoheo? Vabà! Aho naedat ame im lam ba it fa faatoi veimdehe vabak. Eho gi neham bak ozome uba labi gagoho bak. Ba ame Im Feàna lam iho ulohodesu meedam labet modi im Alati vahi gi ahe neàna bohu vuusdam vabak. Lahana ame bak lam ehelemeam làhà gi ame Im Feàna lam iho ulohodesu meedam labet modi Alat iba neha, “Im im vamdesu meedam damat modem bak,” lahame iba ozahit deeli gagu vadam bak. Lahana ba labihadam vabak.
22. Lahana meit Alat Vameadaha Im Toedahana laba nehame toehena eho vi ozome uba labi gagoho bak. “Im dam bakda ahebu ba Alat gagohona aime vuzehi meedam vaba gi faina meedam bak labet simtedi modesdam damat modem bak,” lahame labihasu toehemu iho ame Im Feàna lam ahebu ulohodesu meedaha vaba abo meida vazidazi vazidaziahemu ba Alat iba deeli vadam bak vabak. Gi iho Yesus Kristus bake tu vuzehi meedam bak labet modi Aho iba deeli vadam bak. Alat, “Aho ba iba neà bakta meeda tame,” lahame lab fet vameadume vàmadi esuhu bak lam gi dam Kristus bake tu vuzehi meedam dam lamota Aho deeli ame neà bakta meeda tame.
23. Aham di iube iho bak damat Kristus bake tu vuzehem bak lam, “Akatihasu modemna modela?” laham Im Neàna lam Alat iba Yahudi dam bake fi dehe vab di labe iho faina meedam bak labna zohàme iba teohet vou aasu vabiedam bak laba ozome Alat ahit Im Feàna lam Musa bake gagu fi desi iba vuusu vabiedam bohu vuusdam bak. Ame Im Feàna lam abo tentara mei si sel ousu vou aasdam bakti ulohona iba modi veimai modesdam bak. Gi labihasu veimai modesdume, “ ‘Kristus bake tu vuzehem bak lam akatihasu modemna modela?’ laham Im Neàna lam Alat ba iba modi ozobohudi fi gatei neàdi iho tu vuzehese,” lahame ahit labi meedaha bak.
24. Ubu uho um na gagu modemda laba gagome um data ahusobuda laba vou aasdam labe vabiedam bak laba vi ozodale. Alat laha iba ame bak lamti ulohona modehe bak. Aho ahit fet nehi ozo, “Iho bak damat git meedam bake ame Im Feàna lam modi iba teohet vuusu vabiedam bohu vuusdume, ‘Kristus bake tu vuzehem bak lam akatihasu modemna modela?’ laham im lam Aho ba iba modi im ozobohudi fi gatehezobe ame Im Feàna lam iba vuusu vabiedam bak lam fa faatoi seddase,” lahame fet ozome esuhu bak. Iho etei ba Kristus bake tu vuzehem labe Aho iba neha, “ ‘Im im vamdesu meedam damat modem bak,’ lahame ozahit deeli gagu vadase,” lahame ahit labi modehe bak.
25. Kristus bake tu vuzehem bak lam Alat iba Yahudi dam bake modi ozobohudi fi gatehe Im Neàna lam iho aime Kristus bake tu vuzehi meedàmu Alat iba ozahit deeli gagu ab vadaham bak. Labiha labe ba ame Im Feàna lam iba ootedume iho meedam vabak. Gi ab vaitoi seteham bak.
26. Emti vahi Kristus bake tu vuzehi meedam dam oa, im Yahudi dam modeo, im Yahudi damat modem vab dam modeo, iho Kristus Yesus bake tu vuzehi meedàmu Alat iba modi ab Am damaleham bak.
27. Nehaha bak. Uho amu Kristus bake tu vuzehi meedàmu uho neha, “ ‘Iho Kristus labe Aba Aho ozoho im lamota meedam damalehe bak,’ laham bak lam damat fà aame ozobohudese,” lahame meit um vuu valo baptisleidaha bak. Labihàmu Alat uba aame ozom di um fa Kristusti vahi amedamalehemu um abo Kristus Am itbaho fatoho dam um am bak.
28. Iho Kristus Yesus bake tu vuzehi vou ali ahu vàmadehemu Alat ba iba aame faheme nehame gagodam vabak. “Um Yahudi damat mode? Labi um Yahudi damat modem vab damat mode? Um gi mei na teo meedam damat mode? Labi um mei na modem vaba gi uhumo meedam damat mode? Um gi dam aabot mode? Labi um gi lahit mode?” lahame ba labihasu aame faheme gagodam vabak. Alat iba aame ozome gagom di Aho gi nehada. “Im gi Kristus Yesus bake vahi vabademsu meedam damat modem bak,” lahame gagodam bak.
29. Labi laha Abrahamat aba aho vou faat leheda meida Kristus laba iho vou ali ahu vàmadem labe Alam damalehemu Alat iba ozom di, “Im abo Abrahamat aba aho vou faat ledaha dam laba ààmom dam im am bak,” lahame ozom bak. Labiha labe Aho amu Abraham bake neha, “Eho neà bak uba mode tame,” lahame fet vameadume vàmadi esuhu bak lam Aho ba modi imbodi iba laha ame neà bak meeda tame.
1. Im abo Abrahamat aba aho vou faat ledaha dam ààmom damat modehe labe Alat amu Abraham bake neha, “Eho neà bak uba mode tame,” lahame fet vameadume vàmadi esuhu bak lam, “Ame neà bak iba meedam bak akete?” laham bak um biem bake eho ame im fet vouhome um ozobohudelo mozo. Neham bak. Uho um datat im aiam na misia vam bak laba vi ozodale. Aiat am na misia am datat ba vam bake nasi fet gagu esda. Labi ame na misia lam ame data nibe ba vame naedatelemnàme etei nim koe lahasuhu di nim ame na misia lam nasi vam vabak. Fa gi nehadam bak. Gi mei na teo meedamdati ulohonali aba vou aasdamda labe aba neha, “Nehame meedale. Nehame meedale,” lahame vou aasu gagoida.
2. Labi laha ame na misia setem bak labna zohàme, “Nasi a vamule,” lahame mali vou faovoi aasda. Labihasu meedam labe ame data labe aba aho ozoho bak lam modem vabilehe bak. Ame bak lam gi labihadume am aiat amu am data bake neha, “Om ba buduali ame digat fuhuzobe em na zi nim oba lo tame,” lahame amu fet gagu esuhu digat fuhuzobe ame lab meedam bak lam fa vaitoi ame na misia lam ab vadamam bak.
3. Ame bak lam iho Yahudi damat modem bakti uloho bak. Neham bak. Aham di iube Alat neha, “Am Adat bak niba olu tame,” lahame Aba Aho fet ozome esuhu digat fuhu vab di labe im Yahudi dam gi ame data labe ahusobuli meedam bakti ulohona meedam bak. Abo gi mei na teo meedam dam labe iba na gagome meedam dam labe im im vuzehi meedam dam lamti ulohonali meedam bak. Ame bak lam gi neham bak. Amu di iube dam bakda ihimo ibi bak niba fi hasi vuusdume baleàhà im labe iba neha, “Nehame modele. Lada lam a modemule,” lahame iba vou ootedume vabiedam im feàna lam iho vi tau vuzehi meedam bak.
4. Lahana Alat Aba Aho amu fet ozome vàmadi esuhu digat fuhemu Am Adat iba bak niba ab gagu oluham bak. Alat Am Adat alimeat oluhu di lam gi im bakda namet faaha bak. Labi faasi buduali Yahudi damat modehe labe im Yahudi dam ibi iho ame dat ahamda Musat toedume fi hasi esuhu Im Feàna zi lam laba vuzehi meedam bak laba Aho vi tau meedam meo Dàt modem bak.
5. Alat neha, “Ame Im Feàna lam iba Yahudi dam vuusu veimai vabidam bak lam fa vi faatoi fa neàdi ahagoa foose,” lahame Aho ahit Am Adat iba bak niba gagu oluhu bak. Labi laha, “Aho iba modi Am damali neàdehezobe Aho amu neha, ‘Eho neà bak uba mode tame,’ lahame fet vameadume vàmadi esuhu bak lam Aho ba modi imbodi iba ame neà bak meedase,” lahame Aho ahit Am Adat iba bak niba gagu oluhu bak.
6. Imbote. Alat iba modi ab Am damaleham bak. Bak lam im biem bake Alat Am Aha Nutabe Neàna lam abo Am Adate amu modi vizi teudehena lam, “Iba laha modi vizi teudi ame bak lam ozobohudese,” lahame ame Aha Nutabe Neàna lam iba olu im ahu adat ab vizi teudeham bak. Labiha labe im abo Am Adatti uloholi Ala bake deeli, “Ai, im Ai oa,” lahadam bak.
7. Alat Am Adatti Am Aha Nutabe Neàna lamti iba labi gagu oluhu labe, “Alat iba deeli vadase,” lahame ame Im Feàna lam iho ba vuzehi ulohodesu meedam vabak. Gi fa ab voou seteham bak. Im ba mei na teo meedam damti uloholi meedam vaba im gi fa ab Alam damaleham bak. Labi im Alam damalehe labe Aho amu neha, “Eho Em data bake neà bak mode tame,” lahame Aho labi fet vameadume vàmadi esuhu bak lam Aho ba modi imbodi iba ame neà bak meeda tame.
8. Emti vahi Kristus bake tu vuzehi meedam dam oa, um Galatia dam amu Ala biem di iube uho gi ostam alalehena zi laba vou baedam bak. Labi laha ame na labe im im ootedàmu uho gi vuzehi meedume alihi nemahudam damat modem bak. Lahana uho vou baedam alalehena zi lam Ala imboda modem kaio.
9. Lahana um etei nim fa Ala bake ozobohudi Amti vou ali meedam bak. Lahana ame bak lam bisi imbo bak gagom di gi neham bak. Alat fa um ozobohudi umti vou ali meedam bak. Labihadamnàme um akati ahusobuli meedàla? Uho nehadam labe ahusobuli meedam dam taia? Uho vedi neha, “Alat iba neha, ‘Im im vamdesu meedam damat modem bak,’ lahame iba ozahit deeli gagu vadase,” lahame gi dam bakda ihimo ibi bak niba fi hasi vuusdume baleàhà im lam ulohodesu meedam labe Alat uba deeli vada tiba. Um Yahudi damat modem vab dam labe vedi fa Yahudi damat ibi iho vuusu baleàhà im abo di meida iube fi hasi im meeda. Labi di meida iube fa fi ham bak vabali gi esda. Labi ala meida iube fi hasi im meeda. Labi ala meida iube fa fi ham bak vabali gi esda. Labi tahun meida iube fi hasi im meeda. Labi tahun meida iube fa fi ham bak vabali gi esda. Uho gi labihasu meedam damat modem bak. Uho fa lab vi meedam bak lam em abo àvodehe bak. Um ozom vaba? Ame im lam teu vabna um vabieme neàdem bak vabna abo Alat modi uba deeli vadam bak vabna akati uhumo deeli uledi meedàla? Làhà ame im lam uba fa neo veimai vuusu meedalo àhàki mode? Um amu ame im lam meedam di um vanamam vaba? Em abo àvodehe bak.
11. Uho lab meedam bak lam eho ozoha, em amu uba tau azi vahokedume vabiedume neàdehe bak lam gi vàhàdedume voou vanamai teolemna ozohomu em ahu faidi vabi vi ozodam bak.
12. Galatia dam abo emti vahi Kristus bake tu vuzehi meedam dam oa, eho uba neha, “Uho ebe eho meedam bakti uloholi meedale,” lahame uba vi ootedam bak. Eho amu uba tau azihi di lam em Yahudi damat modemnàme ame Im Feàna lam eho amu gi mu voou fa umti uloholehe bak. Lahana uho vedi fa etei neha, “Alat iba deeli vadase,” lahame ame Im Feàna lam ulohodesu vi meedam damat modem bak. Lahana uho ame lab meedam bak lam nasi mu voedale. Emti vahi Kristus bake tu vuzehi meedam dam oa, eho amu uba Galatia bak ahebu num debu mei num debu mei lahadume ame Im Neàna vou vameatedaha di labe uho eba git meedaha vaba abo iademe neàna meedaha bak.
13. Eho amu alimeat um Galatia bak ahebu godaha diat meedaha im lam um ozobohudehena taia? Eho bak mei bake lasome modeha em alihi nemahuhemu fa bak ubu bake le ame Im Neàna faasi ab vou vameatedaham bak.
14. Ame di labe em alihi nemahuna uba lahanàme uho ozo, “Ame Im Neàna vou vameatedamda Paulus akati alihi nemahusi mode?” lahame feàtàm neànàme uho ba eba faki aam ahasbeai mu vooho vabak. Abo em Alat Am im gagu vou usemdati ulohonali em vaha bak. Abo Kristus Yesusti ulohonali em vaha bak. Uho gi labihadaha bak.
15. Ame di labe eho vi ozoha, um abo eba taulo àhàki modem faidehe damat modem bak. Uho labihadam damat modem labe eho gi gagomeam um fako it valoi fa eba lu zisum meo bak. Uho neha, “Paulusat iba lehe bak Alat iba neàna modeho,” lahame deelehe bohu vuusdam bak lam em abo ozobohu bak. Lahana etei nim akati modi um ahu fa veimdi uho eba amu deeli meedam bak lam fa seti eba faki meedàla? Em abo ahu faideho.
16. Eho uba im imbona vahokedam labe uho neha, “Em uba faki meedam dàt modem bak,” lahame em mu voohe?
17. Lahana damat uba neha, “Alat iba deeli vadam bake iho ame Im Feàna lam ulohodesu meedase,” lahame ozome uba le giomim vahokedam dam lam gi ahobat neàdi uba vagedam damat modem bak. Ba ame Im Feàna lam uho ulohodesu meedam labe ba Alat uba deeli um vadam vabak. Ame dam labe ba uho neàdem bak laba ozome uba vameadam vab damat modem bak. Vedi, “Gi im ibidata vuzehi keàtedi meedase. Fa Paulusam im gi ohuset ailahigeàmu mu voose,” lahame vasti uba labi vameadam bak.
18. Eho nehi ozo. Eho uba tau li azim di modeo, um vou esmozi fa bak mei bake le azim di modeo, meit um neàdem bak laba ozome uba li neha, “Umti amti vou ali meedase,” lahame gagom bak lam ahebu gi neàna tadehe bak. Em abo ame bak lam deelem bak. Lahana meit um neàdem bak laba ozoho vabda labe uba li neha, “Omti amti vou ali meedase,” lahame gagom bak lam em ba deelem vabak.
19. Emti vahi Kristus bake tu vuzehi meedam dam oa, eho uba ozom di ebe eho faadaha damat modemna ààmodam bak. Lahana uho bisi mei im aidume meedam bak labe em ahu faidi vi ozodam bak. Em gi ahu faidi vi ozodam bohu modesdahit um Kristus am itbaho fatoi neàdem bak vou faodam bak. Labi itbaho faatoi neàdehezobe em ahu faidem bak fa vei setem bak. Ame bak lam gi lahit data faaseo meedume data faasi neàdi gem dae vabalem bakti uloho bak.
20. Uho lab meedam bak lam, “Eho akatihasu uba vi vahokedàla?” laham bak vi ozome toesome modeha em ahu zohobuli vi ozom bili moho. Labihàmu em abo uba ilahu uba li em im uba ahate vameadalo àhàki meedam bak. Eho ozom, eho uba netàdem labe, “Eho akatihasu gagoe?” laham bak ozobohudi uba gi iademe gagodam bak. Ba uba dae meona vameadam vaba zoaha.
21. Làhà. Um dam totbaho labe vedi neha, “Alat ozahit iba deeli gagu vadase,” lahame ame Im Feàna lam ulohodesu meedalo àhàkedam damat modem bak. Làhà um em im nasi aima. Musat Alat Vameadaha Im Toedahana laba im meida nehi toehena nim eho ozom, um mahate ozom vab damat modem bak. Làhàmu eho uba nehi vameadume um ozobohudese.
22. Abrahamat adam ahim fa. Meida Ismael am. Labi meida Isak am. Ismael lam Abraham labe am nam meida Sara labe am na teo meedaha nam Hagarat faaha adat ame. Labi Isak lam Abraham labe am nam aba aho vahadatebo Sara abo meit na gagu meedaha vab nam labet faaha adat ame. Labihasu faada.
23. Lahana ame mei na teo meedam nam labe aba aho faaha adat lam gi bak damat ibi iho ozoho baket abo Abrahamat ahamo modeme faaha adat modem bak. Labi nam aba aho vahadatebo Sara abo meit na gagu meedaha vab nam labe aba aho faaha adat ba labihaha vabak. Gi Alat fet gagu esuhu labe Abrahamat modeme faaha adat modem bak. Labihaha bak.
24. Eho Hagarti Sarati lahi ahim laba gi vàlu fa uba im vameadalo mozo. Neha: “Iho akatihasu meedam labe Alat iba neha, ‘Im im vamdesu meedam damat modem bak,’ lahame iba ozahit deeli gagu vadàla?” laham bak lam im behàsu ozom di gi Hagar labe aba aho modehe bak lamti labi Sara labe aba aho modehe bak lamti labihasu ozome vàlu vameadam bak. Im meida neham bak. Damat neha, “Iho dat ahamda Musat toedume fi hasi esuhu Im Feàna zi lam ulohodesu meedam labe Alat iba ozom di, ‘Im im vamdesu meedam damat modem bak,’ lahame ozahit iba deeli gagu vadam bak,” lahame ozome meedam dam lam gi Hagar bake vàlu gagodam bak. Ame dam labe iho ame Im Feàna uledi meedam labe gi mei na teo meedam dam lamti uloho bak. Labiha labe aham di iube Alat bak Arab am sibu meida Sinai laba Aho ame Im Feàna lam Musa bake vameadume aho fa ve dam bake fi desi damat aidume gago, “Lo. Iho meeda tame,” lahame labi im ot vameaidume vàmadi esuhu bak laba vi ozom di im gi Hagar bake vàlu vameaidam bak. Labi laha dam etei kota Yerusalem laba azim Yahudi dam laba ame Im Feàna labe iba ootedam labe iho meedam bak lamti fa Hagar aba aho meedaha bak lamti uloholehemu iho ame kota Yerusalem laba azim dam lam ozom di gi Hagar bake laha vàlu nehame vameadam bak. “Ame Yahudi dam kota Yerusalem laba azim dam labe im oi lam ame mei na teo meedaha nam Hagar am tame,” lahame vàlu vameadam bak. Lada lam labiha.
26. Lahana Sara ba meit na gagu meedaha vab namet modem bak. Labiha labe aham di iube Alat Abraham bake neha, “Omti obo oho ba vou faat ladam dam lamti eho uba im neà bak modi esuida tame,” lahame fet vameadàmu Abraham gi nasi tu vuzehi fa gago, “Lo. Ba imbode tame,” lahame tu vuzehi fet ot vameaidume vàmadi esuhu bak laba vi ozom di im gi Sara bake vàlu vameadam bak. Labi laha dam bada nibe iho neha, “Alat iba deeli vadase,” lahame ba ame Im Feàna lam vuzehi ulohodesu meedam vaba gi Kristus bake tu vuzehi meedam bak laba vi ozom di im gi Sara bake vàlu vameadam bak. Im laha kota Yerusalem asum ahobada iuba le azim bak vi ozom di iho gi Abrahamam nam Sara abo meit na gagu meedaha vab nam laba vàlu nehame vameadam bak. “Im oi Sara am tame,” lahame labi vameadam bak.
27. Eho gi meit Alat Vameadaha Im Toedahana laba im nehasu toehe bak laba vi ozome uba vameadam bak. “Lahi mai lahasu abo data faam vaba vàzbudume kikem bak alim lahasuhu lahi oa, om ozahit igeame etoedale. Neham bak. Om dat om voou etei mai lahasuhunàme ba diamut om data debu dualem bak. Lahi dàt bisi deeleheda labe am data debu koete. Labiham labe ozahit igeame etoedale.” Lahame Yesayat aham di iube labihasu toehe bak ehe labe eho uba labi vameadam bak. Nehaha bak. Sara laha amu gi labihaha bak. Amu maina aida. Abo data faaha vabna aoli sete. Lahana ba Alat Abraham bake fet gagu esuhu bak labet am daboseà Isak ab faaham. Labi ame daboseà lam faasi vou faat ledume im ame mekehà debu ab dualeham bak.
28. Emti vahi Kristus bake tu vuzehi meedam dam oa, Alat iba fet gagu esuhu bak lam iho neha, “Ba imbodem bak,” lahame labi tu vuzehehe labe im ab Alam damaleham bak. Abo Alat aham di iube Abraham bake neha, “Om ba data faa tame,” lahame fet gagu esuhu di lam Abrahamat neha, “Ba imbode tame,” lahame labi nasi tu vuzehehe labe Isak faaha bak lamti uloholehe bak.
29. Labi aham di iube Abrahamat am adat ahamo modeme faaha adat labe vedi fa Alat Aho fet gagu esuhu labe Am Aha Nutabe Neàna labe Sara bake vi tau modi faaha adat laba faki tozodume vabidaha bak. Ame bak lamti ulohona etei neo meedam lahasuhu bak. Damat neha, “Alat iba deeli vadase,” laham bak laba ozome ame Im Feàna lam ulohodesu meedam dam labe vedi fa, “Alat iba deeli vadase,” lahame Kristus bake tu vuzehi vahi meedam dam niba vabidam bak. “Ame Im Feàna lam iho ame dam laba modi iba fa laha tau meedase,” lahame iba vabidam bak.
30. Ame bak lam labihadamnàme, “Im akati modela?” laham bak lam im ba biem vabak. Aham di iube Musat Alat Vameadaha Im Toedahana laba Sarat Abraham bake nehame vameadam im toehe bak ehe bak. “Ame mei na teo meedam nam labe am adatti oho mali ootedume olule. Ba ame mei na teo meedam nam labe am adat lam ba meit eba na gagu meedam vab nam nibe em adat Isak bake tau ba om na misia vam vabak.”
31. Lahame labihasu toehemu eho nehi ozoho bak. Im ba mei na teo meedam nam Hagar labe am adamat modemna ozomom vabak. Im gi mei na teo meedam vab nam Sara labe am adamat modemna ozomom bak. Im ba, “Alat iba deeli vadase,” lahame ame Im Feàna lam vuzehi ulohodesu meedam vaba im gi Yesus bake tu vuzehi meedam labe Alat iba ozahit deeli gagu vadam bak.
1. Ame Im Feàna lam iho ahebu ulohodesu meedaha vaba zidazi zidaziame meedàmu Alat neha, “Beose,” lahame amu iba lab uloome esdam bak lam Kristus Aho fa ahit fai Dateli ot vai ame bak lam ab faatoham bak. Ame Im Feàna lam iba veimai vuusu ootedàmu iho uledi meedam labe, “Alat iba deeli vadase,” lahame iho ame Im Feàna laba ba tu vuzehi meedam vabake Kristusat labihaha bak. Labihàmu dam giomim vou lehe dam labe uba neha, “Alat uba deeli vadam bake um laso aubehà sokba ukbodale,” lahame uba labi ootedam im lam uho bedi vuzehi ame bak labet modi uba neo veimai vuusu ootedam bak labna zohàme a uledi meedamule. Gi teudi laodoamsdale.
2. Yesus Aho amu eba Paulus bake gagu Am im vameadume esmozi laiam dateleheda meida nibe uba vameadalo modem im nim iademe dogoi balesu aidale. Dam giomim vou lehe dam labe ibi iho vameadam im uho aime vuzehi neha, “Alat iba aam di, ‘Im im vamdesu meedam damat modem bak,’ lahame Aho iba ozahit deeli gagu vadam bake ame Im Feàna lam ulohodesu meedam labe im laso aubehà sokba ukbom bak lam vi tau meedam neàte,” laham bak laba uho uledi meedameam làhà ba Kristusat Aba Aho amu meedaha bak labet uba tau modi um neàdedam vabak. Aba zoho gi vanamai teolem bak. Ba ame bak labet modi Alat uba deeli vadam vabak.
3. Labi laha uho neha, “Iho ame Im Feàna lam ulohodesu meedam labe Alat iba deeli vadam bak am tame,” lahame labi tu vuzehi meedam dam lam eho uba nehi gagolo mozo. Uho labihameam làhà uho gi Kristus mu ot vaitesuiame ab vooham bak. Labi Alat ozahit uba deeli gagu vadam bak lam uho ab ohusesuham bak. Labihaha bak. Uho fa vabiem bak labna zohàme eho neo uba nehi gagolo. Meit am laso aubehà sokba ukbodam bak vi tau meedalo àhàkem dam lam um gi im lada lamota meedam labe ba Alat uba deeli um vadam vabak. Gi ame Im Feàna lam totbaho ahebu laha ulohodesu meedam labe Alat uba deeli vadam bak am bak. Lahana im ba ame Im Feàna lam labihasu ahebu ulohodesu meedamda vàmtea buà vabak.
5. Lahana iho Kristus bake tu vuzehi Amti vou ali meedam dam nim im labihasu meedamda ba na vabak. Alam Aha Nutabe Neàna labe iba neha, “ ‘Im im vamdesu meedam damat modem bak,’ lahame Alat iba ozahit deeli gagu vada tame,” lahame iba fet gagu vàmadi esuhemu im ozobohudi iho gi Kristus bake tu vuzehi meedam bak labet ame bak laba nasi tu vou faodam bak.
6. Iho Kristus bake tu vuzehi Amti vou ali ahu vàmadi meedam labe Alat ba iba ozom di nehasu vi ozodume gagodam vabak. “Im laso aubehà sokba ukboeo? Ukbom vabao?” Laham bak lam ba vi ozom vabak. Alat ozomta ame im lam feà vabak. Lahana im bisi feàda Aho vi ozodamda gi neham bak. “Gi iho Kristus bake tu vuzehi meedam bak labet modi iho meia deelem bak meedào? Kristus bake tu vuzehem vaba iho meia faki meedào?” Laham bak lam Aho bisi vi ozodam im am bak.
7. Amu dita uho Kristus labe Aba Aho meedume vou esmoho Im Neàna lam uho tu vuzehi keàtedi meedamna amat fa uba ba li im mei vahokedam labe um vou fohome veimdi ubu uho amu im imbona vuzehi meedam bak lam fa mu voou setehela? Em abo àvodeha!
8. Alat uba, “Am damalese,” lahame amu gi gagu esuhu bak. Labihaha labe damat etei uba li vahokedume um ahu faheme ame im laba vuzehehe bak lam debu ba Alat ame dam laba gagu uba modi um ahu fahehe vabak. Gi dam labe ihimo im imot uba modi um ahu fahehe bak.
9. Ame im mei ba li vahokedahana labet uba vizi faidemo! Um ozom vaba? Uho roti modem bak laba vi ozodale. Roti ahubu modi deili fi kidemna ragi lam ve fa roti ahubu gàhàda laba vi tau valihem labe ame roti ahubu gàhàda lam modi deili fi kidem bak lam um ozobohuna taia? Uba laha labi modemo. Ame giomim vou lehe dam lam mahate dua vab damat uba li vameadaha um dam ahebu vizi feà bak fusi faidemo!
10. Labihadamnàme emti umti im Boehàda Yesus bake tu vuzehi Amti vou ali vàmadehe labe eho amu gi nehi nasi tu vi ozodam labe em ba àvodem vabak. Damat uba neha, “Uho ame Im Feàna lam ulohodesu meedam labe Alat uba deeli vadam bak am tame,” laham im giomimna lam um ba vi tau vuzehi meedam vabak lam em ozobohu bak. Um gi im ebe eho amu uba vahokedahada lamota um vuzehi meedam lahasum bak. Labi laha dam uba li vameadume um ahu modi fahehe dam lam abo eeda modeo, ee vabda modeo, Alat fa dam laba beom bak ehemu eho amu gi nasi tu vi ozobohudehe labe em ba àvodem vabak.
11. Emti vahi Kristus bake tu vuzehi meedam dam oa, dam totbaho vedi eba nehi giomim vàlu gagodam dam ehete. Ame dam labe eba neha, “Ame da Paulus lam dam bake im vou vameatedam di gi nehada, ‘Alat meia deeli vadam bak laba ozome ame Im Feàna lam ulohodesu meedam labe um laso aubehà sokba ukbodale,’ lahame im labihasu vou vameatedam dàt modem bak,” lahame eba labi giomim vàlu gagodam bak em aihi bak. Lahana em ba labi vou vameatedam vabak. Eho ame im lam vou vameatedam lahasumeam làhà ame Yahudi dam labe ibi iho ozoho bak eho meedam labe ame dam labe ba eba vabidam lahasum vabak. Lahana em ba labi vou vameatedam vaba gi im nehasu vou vameatedam bak. “Kristus iho faina meedam bak lam Aho ot vai fai Dateli damat Am ve ut tetehesuhunaso laba esu paku dou eloho im lamota iho tu vuzehem labe Alat iba deeli vadam bak,” lahame eho gi labihasu vou vameatedam labe ame Yahudi dam labe eba faki vabidam bak.
12. Uho Kristus bake tu vuzehi meedam bak lam ame dam labe uba li, “Um laso aubehà sokba laha ukbodale,” lahame uba vameadume um ahu modi fahehe dam lam laha gi ahebu nehame vi modem vaba? Meia gagu am olohu àko laha vi vaome esum vaba?
13. Emti vahi Kristus bake tu vuzehi meedam dam oa, iho ba neha, “Alat iba deeli vadase,” lahame vedi ame Im Feàna lam vuzehi ulohodesu meedam bak labna zohàme Alat ahit neha, “Am damalese,” lahame amu gi fet gagu esuhu bak. Labihadamnàme imo nasi nehi a vi ozome meedamule. “Ame Im Feàna lam iba veimai vuusu vabidam bak lam amu gi faatoi neàdehe? Làhà imo gi im ahulat faina modelo àhàki ozomna lam fa vi meedase,” laham bak lam vi ozome meedam vaba fa gi nasi dam bake ot deeli ot deeliame fa ahu vàmadi vou ali na meedam di ototo vi tauidume meedam bohu vuusdale.
14. Eho gi neham bak vi ozome uba labi gagoho bak. Alat amu Musa bake gagu aho toedume esuhu Im Feàna lam im meida gi nehaha bak. “Uho meit aba it deeli vou faovoi vabiedam bak lamti ulohona vi ozome fa meia laha deeli vou faovoi vabiedale.” Lahame amu labi toeme esuhu bak. Labiha labe iho Alat lab gagoho im vàmtea buà lam vuzehi meedameam làhà ame Im Feàna totbaho lam ahebu gi ab vi taum neàdeham bak.
15. Lahana uho gi dihasi ot vai ot beida. Labi dihasi neo meia ot fakiame feàtàida. Labihadam bak lam nasi voole. Uho gi labihasu ot modi ot modiameam làhà ubu uho Kristus bake lab tu vuzehi vahi meedam bak lam gi uhumo naedamat it vàhàdedume fa seddam meote. Laham bak labna zohàme ubu uho lab ozome meedam bak lam nasi voou it vou faovoi ozodale.
16. Eho amu uba neha, “Iho ahulat faina modelo àhàkem im lam mali voedume seddale,” lahame lab gagoho bak lam, “Akatiham labe labi meedàla?” laham bak um biem bake eho uba vi vameadume um ozobohudelo mozo. Neha: Alam Aha Nutabe Neàna labe iba modi vizi vuusu iademe vamdedam bak lam a malemule. Gi labihasu uledem bohu meedale. Uho labi modemeam làhà im ubu uho ahulat faina modelo àhàki ozomna lam vi uledem vaba modi setem bak am bak.
17. Eho gi neham bak vi ozome uba labi gagoho bak. Im ubu uho ahulat faina modelo àhàki ozomna lamti labi Alam Aha Nutabe Neàna labe Aba Aho ozohoda lamti gi ot odosiam bak. Labiha labe iho im meida lam vuzehi meedameam làhà ba im meida meedam biem bak. Neham bak. Im ibi iho ahulat faina modelo àhàki ozomna lam vuzehi meedameam làhà ba Alam Aha Nutabe Neàna labe Aba Aho ozohoda lam ba vuzehi meedam vabiem bak. Labi laha iho Alam Aha Nutabe Neàna labe Aba Aho ozohoda lam vuzehi meedameam làhà ba im ibi iho ahulat faina modelo àhàki ozomna lam ba vuzehi modem vabiem bak. Labihasu ot odosiahemu uho neha, “Làhà em im nidi nim nehasu modese,” laham bak lam modem biem bak tadem bak.
18. Labihàmu im ubu uho ahulat faina modelo àhàki ozomna lam ba vi modem vaba fa Alam Aha Nutabe Neàna labe uba modi vizi vuusu iademe vamdedam bak lam uho uledehemu Aho fa uba vuusu iademe vamdedameam làhà ba ame Im Feàna lam uba veimai vuusu vabidam vabak.
19. Im ibi iho ahulat faina modelo àhàki ozomna lam, “Ana imot modela?” laham bak lam im ba biem vaba abo ozobohu bak. Ame im zi gi neham bak. Ostame fi loholi ot vai ot vaidam bak ahebu ame. Labi ahate modem bak ba ladem vaba aam ahasbeam im meedam bak ame. Labi laha damat gagu fi hasi esuhu bak ehelahit ahole meedam vaba meit vedi neha, “Eho faina meedahe?” laham bak naedat it ozom vaba ahusobuli ostame la modi le modidam bak ame.
20. Labi ostamna anekehàt modi alalehena laba ahu adat iedi vou baedam bak ame. Labi mei otem bak modi mei oddam bak ame. Labi, “Mei fà beose,” lahame ot fakiam bak ame. Labi daet ot beidam bak ame. Labi damat neha, “Na lam eho laha vaha vabate,” lahame vi ozome meia ahu adat faki teidem bak ame. Labi im gi koena aihina ahu gukeme gi kehàm vabna tufamoholem bak ame. Labi meit neha, “Amota ee abada vousai damat aba fà vou baedase,” lahame vi ozome meedam bak ame. Labi dam modi faheme ahu ot odosiame meedam bak ame. Labi dam aba tau gagom dam lamota deeli fa vahe vahedam bak ame.
21. Labi na meit modehe im aame ahu adat faki teidiam bak ame. Labi damti lahiti vazisi vao meona duana uddume bak vabili sikitaom labe fa ostame la modi le modidam bak ame. Labi faina meedam bak ahebu totbaho ame. Labihasu faina meedam bak ahebu eho lab vou gago ledaha nim meit dihasi mode. Meit dihasi mode. Labihadam bohu vuusdam dam lam ba Alam damali Amti vahi Aho ba Boehàdateboli dam lam vuusu im vahokedam vabak. Eho etei lab gagodaha im lam eho amu uba vameadahanàme etei ozahit neo uba vi vameadam bak.
22. Lahana Alam Aha Nutabe Neàna labe iba modi vizi teudi vuusdam bak lam iho uledem labe im ba labihadam vabak. Iho gi fa nehadam bak. Iho dam bake deeli meedam bak ame. Labi deeli vàhàdehe bohu modesdam bak ame. Labi im ahu laha faheme fi goaitom vaba gi vabademsu modesdam bak ame. Labi damat uba git meedam di modeo, im fai bak duzum di modeo, uho gi ozahigeàmu laha vou faodam bak ame. Labi dam bake im neà bak meedam bak ame. Labi dam bake neà bak ilabdi meedam bak ame. Labi im iho gagohona ahebu imbodem tadem labe meit vuzehem neà bak ame.
23. Labi meo vaba meia na im neà bakta meedam bak ame. Labi im ahu naedamat faina modem bak labna zohàme it mali vou faovoi meedam bak ame. Alam Aha Nutabe Neàna labe iba modi vizi teudi vuusdam labe iho gi labihasu meedam bak. Iho labihadam bak lam Alat ba mali vi gagu esuhu vaba gi ahebu modem neà tadehe bak.
24. Labi laha im Boehàda Kristus Yesusat Aho iba vuusu, “Am dam am tame,” lahame gagodam dam nibe ibi iho im ahulat faina modelo àhàki ozomna lam iho ba vi ozome uledi meedam vabak. Abo dat eloi seteheda labe am ahulat ahamo modelo àhàki ozomna lam ba modem biem bak lamti ulohona modem bak.
25. Alam Aha Nutabe Neàna labe iba modi vizi vuusdam labe ibi amu bak fa vei seti fa gàhàdehe bak. Làhà im gàhàdehe labe imo gi Aba Aho iba neha, “Im nidi nimota meedale. Im nidi nimota meedale,” lahame iba modi ozobohudi fi gateheda lamota meedase.
26. Imo laha gi nehadase. Im ba daet boehàdateli gago, “Im bisi feàda am bak. Dam lada lam bisi feà kaio,” lahame daet boehàdateli gagom bak lam feidase. Labi laha im ba meit neha, “Em eeda am bak. Damat eba fà vou baedase,” lahame ot modi ot modiam bak lam feidase. Labi laha meit modehe im iho aame ahu adat faki ot teidiam bak lam laha feidase. Imo gi Alam Aha Nutabe Neàna labe Aba Aho iba neha, “Im nidi nimota meedale,” lahame iba modi ozobohudi fi gateheda lamota meedase.
1. Emti vahi Kristus bake tu vuzehi meedam dam oa, em im nim laha aimale. Iho im dam meidavat fa faina meedam bak vi aameam làhà iho Alam Aha Nutabe Neàna labe iba amu vizi teudi vuusdam damat ihimo fa ame da laba le im vahokedume vabiedume fa neàdedase. Lahana ame bak lam meedam di imo gi dae nemahuba neàt vameadume fa neàdedase. A dae meona vameadume daet beàdamule. Labi ame bak lam meedam di naat neo iba laha modi ozolo neha, “Na nim modem neào?” lahame gagu iho uledi fa faina modem bak labna zohàme it vou faovoi ozodam labe meedase.
2. Labi im dam meidavat na modem vekesi meedam bak modeo, na im modem biemna duzum di modeo, labihasu meedam bak iho vi aameam làhà imo fa ot vai ot modi ot modidase. Iho labihasu meedam labe Kristus Aba Aho amu iba lab gagu esuhu im lam gi ab vi tau modi imbodi neàdeham bak.
3. Lahana meit ee vabda labe vedi neha, “Em bisi neàda am bak. Em dam totbaho lamti uloholi git meedam vab dàt modem bak,” lahame labi it daetbadamda labe vedi na meibada tau modem momda lam am gi ahobat neàdi aba gi giomim it daetbadalo meedam dàt modem bak.
4. Lahana uho a labi modemule. Gi ubu uho meedaha im lam, “Em neàna meedào? Em faina meedào?” laham bak uhumo naedamat nasi it ozodam bohu meedale. Labi it ozodume neàdi uho neà bak modehe labe uhumo naedamat it deelem neàte. Imo nasi im meit modeheda laba aame ozo, “Dat lada labe aba aho modeheda lam faina modehe? Labi ebe eho meedamda nim neàna modehe?” lahame im meibada aame feàtàme tozome mu fa im abada, “Neàte,” lahame a vi ozodume it daetbadamule. Gi im ubu uho modeheda lamota it ozome deelemta neàte.
5. Neham bak. Meit im ahamo modehena gi ahamo vuusu vou doudam bak.
6. Labi im meida neham bak. Uho Alam im aidam dam labe na neàna Alat uba modi lodamna lam fa uba Alam im vahokedamda laba faheme lodale.
7. Iademe modele. Uho vedi neha, “Eho faina modehe bak nim Alat ba eba aame fa beom vabak. Làhà eho gi neham bak bohu meedase,” lahame ozome meedamda labe aho gi aba giomim it ozome vagedam dàt modem bak. Ba Ala bake ahi vagem biem bak. Iho bak damat meedam bak ahebu Alat ba biem vaba abo ozobohu bak. Um ozom vaba? Ame na iho dehena lam ba na mei mode. Na mei mode labihasu vahedam vabak. Gi ame na vàmtea iho dehena fa modeme vahedam bak. Ame bak lam gi neham bak. Ubu uho meedam bak lam ahebu Alat vi ozobohudi fa gi ame baleà vouhodam bak.
8. Neham bak. Meit im aba aho ahulat faina modelo àhàki ozomna lam vi uledi meedam bohu vuusdam bak labet modi Alati abobo ot vaitesuiame abehamdemda am bak. Lahana meit aba vizi teudi vuusdam Alam Aha Nutabe Neàna labe Aba Aho ozohoda lam vi uledi meedam bohu vuusdamda lam ame bak labet modi Alati vahi gi ahe neàna bohu vuusdamda am bak. Labihaha bak.
9. Lahana iho meia neà bak meedam bak lam a vanamai voomule. Neham bak. Ibi iho meia neà bak meedam bak lam neàdi doni novam vaba abo labahasdam bohu vuusdameam làhà Alat fet gagu esuhu di fuhuzobe iho ame na gohali vamna vam bak.
10. Labihàmu uho neha, “Eho da lada laba nehi modem neà bak,” lahame obo oho labi aadam dam ehelem di a modehe vaba vabi momule. Gi oho ozoho di labe taho meedale. Dihasi mode. Dihasi mode. Gi labihadam bohu vuusdale. Lahana ame bak lam meedam di imti vahi Kristus bake tu vuzehi meedam dam lam ibi iho bisi neà bak meedalo ozoho dam am tame.
11. Um mahate sunit anekehà ebeda ehemo toeheda zohoda nim mahate aame ozodale. Sunit zoho ium eho gi gagu meit toehenat modem bak. Labi etei zoho nim im debu buduana toeheda nim eho toeheda am tame. Mahate aame ozodale.
12. Ame uba ba lab lehe dam labe neha, “Alat uba deeli vadam bake um laha ame Im Feàna lam laha vuzehi ulohodesu meedam labe um laso aubehà sokba ukbodale,” lahame uba vi ootedume gagodam dam labe vedi nehi ozo, “Im Yahudi dam totbaho fi ham lahasuhu dam labe iba fà aame deeli vou baedase,” lahame labi vi ozome gi ahobat neàdehe damat uba li ootedume gagodam bak. Lahana ame dam labe ihimo ame Im Feàna lam ba ahebu ulohodesu vuzehi meedam vab damat modem bak. Lahana vedi uba, “Laso aubehà sokba ukbodale,” lahame vi ootedume gagodam bak. Labihàmu eho uba neha. Ame dam labe uba vahokedam di nehameam, “Iho gi Kristus ut tetehesuhunaso laba esu paku dou eloho bak lam, ‘Imbote,’ lahame tu vuzehem labe Alat iba deeli vadam bak am tame,” lahame im lamota uba vou vameatedameam làhà Yahudi dam totbaho labe iba faki vabidam bak labna zohàme iedi uba ahit im meidi vi ootedume uba gagodam bak. Labi laha ame dam labe uba modi uho ame bak lam uledi meedume neàdehemu gi Yahudi dam totbaho laba, “Iho gagu dam aime uledi meedam dam neam tame,” lahame iba it daetbadalo uba ahit labi vi ootedume gagodam bak.
14. Lahana meit im labihasu modem im lam em ba daetbadam vabak. Ebe eho vou daetbadam bak gi neham bak. Im Boehàda Yesus Kristusat iho faina meedam bak ot vai fai Dateli damat Am ve ut tetehesuhunaso laba esu paku dou elohoda laba vou daetbadam bakta àhàm bak. Kristus Aba Aho eloi meedaha bak labet modi em ba dam Kristus bake tu vuzehi meedam vab dam labe ibi iho ozome deelemna lam em ba vi tu ozome deelem vabak. Ba ame na laba tu meedam bak labet modi Alat eba deeli vam vabak. Labi laha Kristus bake tu vuzehi meedam vab dam labe laha ba eba vi tu ozodam vabak. Gi em alihi aam bakti mom damat modem bak.
15. Neham bak. Kristusat iho faina meedam bake Aho fa ot vai fai Dateli damat Am ve ut tetehesuhunaso laba esu paku dou eloho bak laba ebe eho bisi vou daetbadam bak lam neham labe labihadam bak. “Meit am laso aubehà sokba meia gagu ukboeo? Ukbom vabao?” laham bak lam Alat ozomta amait feà vab labe Am bisi deelem vabak. Lahana Aba Aho ozome deelemna gi neham bak. Iho Kristus bake tu vuzehehe labe Am itbaho fatoi gàhàdehe bak lam Aho ozomta bisi feà bak am bak. Bisi Aba Aho ozome deelemna am bak.
16. Labihàmu eho Ala bake tom gagodam di eho gi nehada, “Ai oa, ebe eho sunit niba vahokedume vàmadi toeme esuhu im niba tu vuzehi tau meedam dam niba abo amu Israel labe aho vou faat ledaha dam lam Alam damalehe dam ziti ulohona modi Alam damaleheda imboda zi niba Oho modi im ahu faheme fi goaitom vaba gi vabademsu modesdale. Labi ame dam niba Oho aam faimu im neà bak tau meedale,” lahame eho labi tom gagodam bak.
17. Labi nasi eho uba ba novalo gagom im nim laha aimale. Eho amu Yesus labe Aba Aho meedaha Im Neàna lam vou vameatedàmu damat eba faki vabidume beodamehamdehe labe em but bae tadehe bak. Em so niba modealaha but bae nim damat fet aame ozo, “Làhà. Da nim aba im gagu modiamda Yesus ame?” lahame ahit but bae modealaha bak. Labihàmu etei di nibe faasi meit eba vabidam dam lam ba eba a vabidamule.
18. Emti vahi Kristus bake tu vuzehi meedam dam oa, eho uba ozome nehi Ala bake tom gagodam bak. “Im Boehàda Yesus Kristusat fà uba ozahit deeli im neà bak modi esuidase,” lahame eho Ala bake labihasu tom gagodam bak. Neàte. Eho Paulusat sunit nim toedume ab neàdeham. Àhàm.
1. Dam Alat Aho gagu fi hasi modi Am damaleheda num debu Efesus laba azihi dam abo Kristus Yesus bake tu vuzehi Amti vou ali ahu vàmadi gi labaha bohu meedam dam oa, neàte. Eho Paulusat sunit nim toedume uba oluho. Alat amu neha, “Paulusat fa Am Adat Kristus Yesus Aho gagu olu Am im vameadume esmozi laiamda meidatelese,” lahame Alat amu labi eba fet gagu vàmadi esuhu labe em ame im modem datelehe bak. Eho ame dat meida nibe sunit nim toedume uba oluho.
2. Eho uba ozome neha, “Im Ai Alati im Boehàda Kristus Yesusti ahili uba ozahit deeli im neà bak modi esuidase. Labi uba modi um ahu faheme fi goaitom vaba gi vabademsuse,” lahame eho ozodume Ala bake labihasu tom gagodam bak.
3. Iho Alam Adat Kristus bake tu vuzehi Amti vou ali ahu vàmadi meedam labe Aho asum ahoba iubet Am Aha Nutabe Neàna labe iba im neà bak mei im neà bak mei lahadume iba modi esuidaha bak. Labihàmu imo Ala bake abo im Boehàda Yesus Kristus labe Am Ai laba, “Am abo feàte,” lahame ahu adat iedi vou baedase.
4. Nasi ozomale. Asum ahoba iuba modealahana lamti bak niba modealahana nimti ahebu na vabna alimeat modehe vab di iube Alat ame di labe gi neham bak fet ozome esuhu bak. “Dam bakda nibe iho Am Adat Kristusti vou ali ahu vàmadehezobe im fa Am damalese,” lahame fet ozome neàdi ab ahumdi esuham bak. Iho bakda nibe ozo, “ ‘Alat fà iba aame deelese,’ lahame gi im Abadata fi hasi meedàmu ba meit iba vàlu gagom vabiem bak lam meedase,” laham bak laba ozome gi aham di iube, “Am damalese,” lahame fet ozome ahumdi esuhu bak. Labi laha ame di labe Alat nehi fet ozo, “Am Adat Yesus Kristus labe Aba Aho iba ba soat vausu fa vei neàdedam bak labet iba modi Am damalese.” Abo, “Mei data ve voadaha bakti ulohona meedase,” lahame amu gi labi fet ozome neàdi esuhu bak. Aho iba nasi fet deeli meedam labe, “Ebe Eho meedalo àhàki meedam bak meedase,” lahame labihaha bak.
6. Labihàmu iho Alat Aba Aho deeleheda Yesus laba iho vou ali ahu vàmadi meedàmu Aho ozahit iba lab bisi deeli IM neà bak ilabdi modi esuidaha bak lam damat ame bak laba vi ozome Ala bake, “Am abo feàte,” lahame vou tom baedam bak lam gi ahole tom vou baedam bak.
7. Alat ozahit iba duana deeli im neà bak modi esuidam Alat modem labe Am Adat Yesus lam iba dam badate ab oluham bak. Labi olu Aba modi ibi iho faina meedàmu Alat iba beom bake, “Aho fa ot vai faatose,” lahame, “Damat Am ut tetehesuhunaso laba esu paku dome elom neàte,” lahame ahit uledi Am vasea veàtoi ibi iho faina lab meedam bak lam Alat gi ozahigeàmu fa ab vei neàdedaham bak.
8. Alat Aba Aho iba lab ozahit deeli im neà bak modi esuidam bak lam ba koedehe vaba abo duana meedaha bak. Labi laha Aho ozome modelo modem im lam ahebu Aho iba modi iho ozobohudedume fi gatedam bak.
9. Alat amu neha, “Kristusat Aba Aho lab meedam bak labet modi Ebe Eho ozoho bak nehasu meedume neàdese,” lahame Aho labihasu fet ozome ahumdi esuhu bak lam dam amudate vastehe im lam Ahamo fa uledi iba dam badate fi zeam bitoho labe im ab ozobohudi fi gatedaham bak.
10. Aho neha, “Am Adat Kristus labe Aba Aho ba meedam bak lam modeme neàdi Aba Aho ozoho digat ba vou fuhuzobe Kristus bake modi Boehàdatebo vàmteadi na asum ahoba iuba modealahana zi lamti bak adba niba modealahana zi nimti ahebu fa vamateme Kristusam nali vàmadi vuusdase,” lahame Aba Aho amu fet ozome ahumdi esuhu bak am bak.
11. Alat Aho modelo àhàki fet ozome esuhu im lam ba setem vaba abo gi imbodi modem tadem Alat modem bak. Labihadam Alat modem labe Aho amu na ahebu alimeat modehe vab di iube neha, “Im Yahudi dam nibe iho Kristusti vou ali ahu vàmadi meedàmu im fa Am damalese,” lahame labi fet ozome esuhu labe im Yahudi dam nim Alat ab vame gagu fi hasi Am damaleham bak.
12. “Nehadase,” lahame labihaha bak. Im Yahudi dam amu neha, “Kristus labe nehada tame,” lahame nasi tu vuzehi vou faodam damat modemu dam ahebu aame ozo, “Ala abo feàte,” lahame vou baedam bake Alat ahit iba nasi deeli fi hasi vame Am damalehe bak.
13. Labi um Efesus dam abo Yahudi damat modem vab dam um laha labihaha bak. Alat uba laha modi iho Yahudi damat modehe bakti uloholi uba fi hasi vame Am damalehe bak. Uho amu Alam im imbona lam abo iho faina meedam bake Alat iba beolo modemu Kristusat fa iba soat vausu fa vei neàdehe Im Neàna lam uho aihi di labe uho Kristus bake ab tu vuzehi Amti vou ali ahu ab vàmadeham bak. Labi uho Kristusti vou ali vazisi ahu vàmadehemu Alat Aho amu neha, “Am Aha Nutabe Neàna ba uba nom olu tame,” lahame fet gagu vàmadi esuhuna lam uba nom ilu uba ab vizedaham bak. “Um Em naeda am tame,” laham bak um ozobohudelo ahit labihaha bak.
14. Uho neham bak nim nasi vi ozomale. Meit aho valo modem nazoh meit vam bak labna zohàme dat na deda laba fet nasi doi lu esum meo bak. Aho ba diamut imbodi doi dua zoho lom bak ehe labe ahit labihaha bak. Ame bak lamti Alat Am Aha Nutabe Neàna labe imti umti nasi vizedaha bak lam ulohote. Neham bak. Am Aha Nutabe Neàna labe iba nasi fet modi vizedaha labe Aho neha, “ ‘Iba Am damaleheda niba lo tame,’ lahame fet gagu esuhuna zi totbaho ahebu lam iho ba diamut vam bak,” laham bak lam im ozobohu bak am bak. Labi Alat Am Aha Nutabe Neàna labe iba Am damaleheda niba modi vizi vi vabiedume Alat Aho ozoho digat fuhuzobe iho fai bak niba azim bak nim Aho modi isi fa fi tadzi im asum ahoba iuba ab vousai neàdemam bak. Labihadam bak labet modi im ahebu fa Ala bake, “Am abo feàte,” lahame ab tom vou baedamam bak.
15. Alat uba neà bak labihadàmu eho gi Ala bake, “Neàte,” lahame tom vou baedam tadedam bak. Uho im Boehàda Yesus bake lab keàtet tu vuzehi meedam bak lamti labi Alam damaleheda totbaho ahebu laba uho laha deeli meedam bak lamti labihasu meit eba li vameadaha im ahum lam eho gi ahamte aihi di labe
16. faasi uba vi ozome gi Ala bake, “Neàte,” lahame tom vou baedam tadedam bak. Labi laha eho uba vi ozodam labe gi Ala bake im nehasu tom gagodam tadedam bak.
17. “Im Ai Ala bisi feàda abo im Boehàda Yesus Kristus vuusdamda oa, Oho Om Aha Nutabe Neàna labe dam laba modi vizi dam labe fà na im ahebu ozobohu aabodi iademe meedase. Labi laha Obo Oho modelo ozom im lam ahebu Oho dam laba laha modi fi zeam bitoi dam labet aime ozobohudi fi gatedase,” lahame eho labihasu tom gagodam tadedam bak.
18. Labi laha eho neo uba nehasu vi ozome tom gagodam bak. “Im Ai Ala oa, dam lam abo Oho neha, ‘Om damalese,’ lahame lab fi me vame Om damalehe dam laba Oho im neà bak ba modi esuiam im lam dam lam biem bake Oho dam labe im ahu ad laba modi ozobohudi fi gatei ame bak laba tu vou faodam bak modele. Labi Oho ba abobo modem zoho amu nasi fet ahumdi esuhu im neà bak lam, ‘Abo duate,’ laham bak lam dam labe im ahu ad laba fà modi ozobohudi fi gatedase.
19. Labi laha iho Kristus bake tu vuzehi meedam dam niba Ala labe Aba Aho im ahu ad niba lab vabiedam bak lam, ‘Iho damat modem biem im feàna meedam Ala Om am bak,’ laham bak lam ame dam nibe fà ozobohudedase,” lahame eho labihasu Ala bake tom gagodam bak. Alat im ahu ad niba vizi vabiedamna lam abo im feànat modem bak. Ame na labet Aho Kristus bake modi Am eloho bak labet fa ahedi usai fa neo modi tom ilu asum ahoba iuba Am Aiam ahi totbaho laba modesu Amti uloholi feà Dateli fa Alati ahili na ahebu vuusdam bak.
21. Alat Am feà bak lam Kristus bake modi vizi im dedatelehe bak lam abo feàte. Abo dam bake vuusdam boehàda eeda zi ahebu ame. Labi im dedamalehe dam zi ahebu ame. Labi asum doni beaba laba modealadaha boehàda zi ahebu ame. Labi Alat Am im gagu vou usem dam zi ame. Labihasu ahebu Yesusat foti fotidume ee vousai asum ahoba iuba tom novai modesuhu bak. Abo etei ee eheda modeo, ba diamut ee eheda modeo, gi labaha ee vousai vou baedam bohu vuusdamda Am am bak.
22. Labi laha Alat fa ame Da Kristus laba modi fa feà Dateli Aho fa na ahebu vuusdam bak labet modi ame na labe Aba fa ab ulededamam bak. Labi laha dam Kristus bake tu vuzehi vahi meedam dam labe iho teudi neàdedam bak laba ozome Alat ahit ame Da Kristus bake gagu Aho fa ame dam laba im vameadume faheme modidam Datelehe bak.
23. Im Kristus bake tu vuzehi vahi meedam dam nim im gi Kristusam soabo ozomomna im am bak. Labi aho iba lab im vameadume faheme modidam bak laba ozome im dam ahulat vi ozome meedamna ozomomna Kristus am bak. Kristusat Am abo feà labe na zi ahebu Aho vuusu la modi le modidam bak lamti uloholi iho Kristus bake tu vuzehi meedam dam nibe ibi iho ozome meedam bak ahebu gi Kristus labe Am feà bak iba modi vizehe labe iho na im meedam bak.
1. Amu uho Yesus bake tu vuzehem vab di iube uho gi Ala bake tu vuzehem vab dam labe ibi iho faina meedam bak laba vi tau meedume baleàhà damat modem bak. Uho gi Alam im aim mu gi voedam damat modem bak. Labi laha na im iudu ium modi faideda. Na im iudu ium modi faideda. Labihadam damat modem bak. Labihàmu um gi elohona ozohomu modesdam damat modem bak. Abo Ala bake vaitesu Aba Aho gagohona aime meedaha vaba gi ailahigeàmu modesdam labe fa Iblisit aba aho gagohona lam uho gi uledi meedam damat modem bak. Ame da Iblis lam abo asum doni beaba laba azim meona zi vuusdam boehàdatebo am am bak. Abo dam etei bada nibe iho na im Alat gagohona mu voedam dam laba vizi meedam boehàdatebo am bak. Labihadamda labe aba aho gagohona lam uho gi uledi meedam damat modem labe um gi elohona ozohomu modesdam damat modem bak.
3. Im ahebu amu laha vabili ame dam na im Alat gagohona mu voedam dam laba vi tau meedam damat modem labe iho vedi vabi gi im ahu nibe faina modelo àhàki meedume baleàlehe bak laba vi ozome meedam damat modem bak. “Iho gi nehasu meedase. Nehasu meedase,” lahame ozome ahu gukeme vàhàdem di fa neàdem vabili gi ame bak lam uledi meedam tadem damat modem bak. Labihàmu im gi dam bakda labe ibi iho Alat gagohona mu voedam dam totbaho lamti uloholi meedàmu Alat iba laha faki beolo modem bak lam gi ahole modelo modem bak.
4. Alat iba labihasu modelo modemnàme Aho bisi meia duana deeli aame faobekedam bak lam Aho ab modi tombaleham bak. Nehaha bak. Iho na im Alat gagohona mu voedàmu im gi Ala bake vaitesu gi elohona ozohomu modesdam damat modemnàme Alat ozahit duana deeli meedam Alat modem labe Aho Kristus eloho bak labet modi fa ahedehe di labet im laha fa ahedi gàhàdehena ozomoho bak. Mahate ozomale. Aho gi iba ozahit deeli im neà bak modi esuidam Alat modem labe iba soat vausu fa vei neàdedam bak.
6. Iho fa Kristus Yesusti vou ali ahu vàmadehemu Alat amu Kristus eloho bak labet fa ahedi tom vousai asum ahoba iuba modesuhu di labe iho gi elohona ozohomu modesdam damat modem labe Aho iba laha modi Kristusti vahi fa ahedi tom vousai asum ahoba iuba vahi modesdamna ozomom bak. Labiha labe iho Aba tau fa na ahebu nom vuusdam bak ab modeham bak.
7. Neham bak. Kristus Yesus labe Aba Aho meedaha bak labet modi Alat meia ozahit deeli faobekesi im neà bak modi esuidam bak lam, “Ba koena modem vaba abo duana meedam bak,” laham bak lam ba diamut, “Damat fà ozobohudidam bohu meedase,” lahame Alat ahit iba modi Kristusti fa vahi tom vousai asum ahoba iuba vahi modesdam labe iho Aba tau fa na ahebu ab vuusdamam bak.
8. Alat nasi meia ozahit deeli im neà bak modi esuidam Alat modem labe uho Yesus bake tu vuzehedàmu Alat uba soat vausu fa ab vei neàdedaham bak. Ame bak lam Alat Ahamo uba teo modehe bak. Ba ubu uho na im meedaha bak labet ame baket meedaha vabak.
9. Uba soat vausu fa vei neàdedaha bak lam ba ubu uho na im neà bak meedaha bak labet modi ame baket meedaha vabak. Labiha labe uho ba it ozome daetbadam vabiem bak.
10. Neham bak. Im Am damali gàhàdehe bak lam ihimo modehe vaba gi Alat Ahamo modehe bak. Amu di iube Alat nehi ozo, “Aho iba modi Am damali fa im neà bak mei im neà bak meime fà bohu vuusdase,” lahame amu fet ozome esuhu labe iho Am Adat Kristus Yesusti vou ali ahu vàmadi meedam labet modi Aho iba ab modi Am damali im ab gàhàdeham bak.
11. Um Yahudi damat modem vab dam oa, ubu uho amu lab meedaha bak laba vi ozomale. Yahudi dam modeo, Yahudi damat modem vab dam modeo, iho Kristusti vou ali vàmadehe labe Alat iba lab modi Am damali gàhàdehe bak lam gi etei ba modi im fa ab vazisiham bak. Lahana amu di iube vazisi nib modehemom vabak. Um gi Yahudi damat modem vab dam debut modem labe um amu laso aubehà sokba ukboho vabak. Labiha labe Yahudi damat uba neha, “Im laso aubehà sokba ukboho labe im Yahudi damta Alam damalehe bak. Lahana um laso aubehà sokba ukboho vab dam lam um ba Alam damalehe vab damat modem bak. Um gi dam mei laham bak,” lahame uba labi gagodam bak. Lahana ame bak lam ba im ahu ad laba modehe vaba gi damat ihimo im ai ahamda gagu baleàlehe bak labet im so laba auet modehenat modem bak.
12. Labi laha ame di lam Alat Yahudi dam bake olulo gagohoda Kristus lam um Yahudi damat modem vab dam lamti ba vou ali vahem bak vabak. Um amu di ium gi vei vabi esdam damat modem bak. Gi Alat Aho fi hasi gagu vadaha Yahudi dam debu abo Israel labe aba aho vou faat ledaha dam debu lam um tau modem vab labe gi, “Dam mei debu,” lahadam bak. Alat ba uba tau vuusu vabiedam vabak. Labi laha Alat amu Aba Aho fi hasi gagu vadaha dam lam abo Yahudi dam debu laba Aho neha, “Eho neà bak nehasu meeda tame. Neà bak nehasu meeda tame,” lahame amu fet ot vameaidume ahu vàmadi ahumdehe im lam Alat ba umti vameame ahumdehe vab labe ame neà bak lam ba uba modehe vabak. Labi laha ame di labe uho ame Yahudi dam labe ibi iho vou baedam Ala imboda lam um gi vabilehe labe ba, “Alat iba vuusdam bak,” lahame tu vi ozodam vab damat gi vabi bak niba goom bak.
13. Lahana uho amu Alat Aba Aho ozoho bak lam ozome meedam vab labe um Am damalehe vaba gi Alati ot vaitesuiame aidam bak lam fa seti etei nim uho Kristus Yesusti vou ali vàmadehe labe fa Alam damali Amti ot netàdiame ab vahedaham bak. Ba, “Dam mei,” laham vabak. Abo Kristusat Aho ahit uledi damat Am ve ut tetehesuhunaso laba esu paku dome Am vasea veàtoho bak labet labihaha bak.
14. Nehaha bak. Im Yahudi dam lamti um Yahudi damat modem vab dam lamti im amu gi ot fakiame abo natàh ausi ot vaitesuiame modesdam bak lamti ulohona modehe bak. Lahana Kristus labe Aba Aho meedaha bak labet modi ame ot fakiame ot vaitesuiame meedaha bak lam gi fa faamome ab seddaham bak. Abo im dam debu ahilehena modi fa vàmadi ab ot vazisiaham bak.
15. Nehaha bak. Dam amuda labe nehi ozo, “Iho ame fi hasi gagu vàmadi esuhu Im Feàna lam vuzehi meedam labe Alat im vame Am damalem bak am bak,” laham bak lam fa veimdi Yesusat ahit uledi damat Am ve ut tetehesuhunaso laba esu paku dome Am vasea veàtoho labe fa Alat im vam bak ab vei gàhàdeham bak. Gi Kristus labe Aba Aho meedaha im laba iho tu vuzehi im Abada meedam labe Alat im vame Am damalem bak ab modeham bak. Aho gi nehi fet ozome esuhu labe labihaha bak. “Im Yahudi dam nimti um Yahudi damat modem vab dam lamti iho Kristusti vou ali ahu vàmadehe labe im dam debu ahilehena ozomom bak lam fa faamome debu vàmadi ot deeliame vazisi gàhàdese,” laham bak fet ozome esuhu labe labihaha bak.
16. Abo Kristus damat Am ve ut tetehesuhunaso laba esu paku dome eloho labe im Yahudi dam nimti um Yahudi damat modem vab dam lamti iho amu ot fakiame ot vaitesuiaha bak lam ahebu fa ab faamome seddaham bak. Labi laha im dam debu ahili Ala bake vaitesuhuna ozomom bak lam Aho laha fa ab faatoi debu vàmadi fa Ala bake vou netàdi Amti ab vaheham bak.
17. Neham labe labihaha bak. Kristus amu ahe lahasu bak niba godam di um Yahudi damat modem vab dam abo Alati ot vaitesuiaha dam laba Aho uba li neha, “Um fa Alati vahem bak ehete,” lahame ame Im Neàna lam uba le fi desi vameadaha bak. Labi laha Aho im Yahudi dam abo amu Alati fota ot netàdiaha dam niba Aho laha iba li nehasu vameada. “Im fa Alati vahem bak ehete,” lahame ame Im Neàna lam iba laha fi desi vameadaha bak.
18. Neham bak ehe labe labihaha bak. Ame Da Kristus labe Aba Aho tohedateli meedaha bak labet im dam debu behàsudehenàme Alam Aha Nutabe Neàna Vàmtea labe iba modi vizehe labe iho etei fa vahi im Ai Alati im ot vameaidam bak lam ab tombali modesu iho ab meedamam bak.
19. Labihahemu um Yahudi damat modem vab dam laba meit uba neha, “Um Alat vuusum kaio,” lahame amu gagodaha bak lam etei fa seti uho fa iho Kristus bake tu vuzehi vahi meedam dam nimti fa vazisi ab Alam damaleham bak. Ba nehi ozome gagodam bak vabak. “Um bahagikida gi bak iubet li tau azihi damat modem bak,” laham bak lam ba gagom vabak. Gi dam totbaho labe ibi iho Alat Am damali amedamalehe bak laba um ab tau meedamam bak.
20. Iho Kristus bake tu vuzehi meedam dam nim im gi Alat num molo modem ut zi totbaho ozomomda im am bak. Neham bak. Bao zisime teudem bak lam abo dam Kristus labe Aho amu Am im vameadume esmozi laiamda zi lamti labi dam Alam Aha Nutabe Neàna labe vizi Alat gagohona ozobohudi fi gatei fa dam bake ahate vameadam dam zi lamti labihasu Alat num molo bao zisime teudedaha dam am bak. Labi ame num mom ut totbaho zi lam um ahebu laha am bak. Neham labe labihaha bak. Iho amu Kristus labe Aba Aho meedaha Im Neàna lam iho ahamte ozobohudi faasi vou vameatedam labe num ahamte aauleheda im am bak. Labi ame num mom di ohut ahamte zisu teudehe zoho laba aame fa neo num zoho lam mom di gi ame baket uloholi modem bak. Labiham bak lam num ohutso amu zisu teudeheda lam Kristus am bak. Neham bak. Iho Kristus bake tu vuzehi meedam dam ahebu iho na im meedam di gi Kristus labe Aba Aho lab meedaha bake vi ozome uloholi meedam tadem bak. Labihaha bak.
21. “Fihasi Ala bake vou baedam num mose,” lahame meit ut totbaho lam vame fa ame num ohut ahamte zisu teudeheda laba tau modealadume numalem bakti ulohona iho Kristus bake vou ali ahu vàmadi meedàmu Alat ahit Am damali modi fa debu ab vàmadedamam bak.
22. Labi um Yahudi damat modem vab dam labe uho Kristus bake vou ali ahu vàmadi meedàmu Alat laha um vame fa iho Kristus bake tu vuzehi meedam dam totbaho ahebu nimti vazisi fa ab debu vàmadedamam bak. Labihadam labe iho Kristus bake tu vuzehi fa vazisi meedam dam nim Alam Aha Nutabe Neàna labe iba vizi meedam labe Alat fa imti vou ali vàmadi meedam bak am bak.
1. Emti vahi Kristus bake tu vuzehi meedam dam oa, um biem bake nasi ozomale. Em gi Kristus Yesus labe Aba Aho gagoho im meedam dàt Aho meedaha Im Neàna lam eho uba Yahudi damat modem vab dam bake vou vameatedume, “Um neàdedase,” lahame vou vameatedam dàt modemu damat em si sel niba ousdam bak. Ame Da Kristus labe Aba Aho tohedateli meedaha bak labet um Yahudi damat modem vab damti im Yahudi dam nimti debu behàsudehenàme Alat fa vazisi vàmadehemu eho Paulusat sel niba ousdamda nibe uba vi ozome Ala bake tom gagodam bak.
2. Alat amu eba neha, “Paulus oho le, ‘Em abo meia ozahit deeli im neà bak modi esuidam Ala am tame,’ laham Im Neàna lam oho Yahudi damat modem vab dam bake vou vameatedale,” lahame eba amu fi hasi gagu oluhemu eho uba Yahudi damat modem vab dam bake ame baket modehe bak. Laham bak lam um aime ozobohuna taia? Um ba vabiem vabak.
3. Alat Aba Aho fet ozome esuhu im abo Aho amu modi fi gatehe vab im lam Aho fa eba modi ozobohudi fi gatei ame bak lam eho sunit amu zoho niba toehe bak.
4. Eho sunit amu zoho niba toehena lam uho iademe aame ozodameam làhà uho gi nehi ozome gagodam bak. “Aa làhà! Alat Aba Aho fet ozome esu vastehe im abo Kristusat Aho meedaha im lam ame da Paulusat abo ozobohudi fi gatehe dàt modem bak,” lahame um ab ozobohudemam bak.
5. Aham di iube Alat Aba Aho lab fet ozome esuhu im lam dam ahamdate vastehe bak. Lahana ba etei di nim Alam Aha Nutabe Neàna labe fa iba abo Yesusat Aho gagu olu Am im vameadume esmozi laiam dam zi nimti labi Alat vameadaha im aime fa dam bake ahate vameaidam dam zi nimti abo Alat Aba Aho fi hasi ozoho dam lamota fa ahate ozobohudi fi gatedaha bak.
6. Alat Aho lab fet ozome esuhu im lam abo etei eba lab modi ozobohudi fi gatehe im lam gi neha: Alat amu neha, “Aho Am damalehe dam laba neà bak meeda tame,” laham bak lam ba Israel labe aba aho vou faat ledaha dam abo Yahudi dam labe iho Am Adate tu vuzehi meedam dam lamota ame neà bak meedam vabak. Abo Yahudi damat modem vab dam labe iho laha Am Adat Kristus Yesus labe Aba Aho meedaha Im Neàna laba aime tu vuzehi fa Amti vou ali ahu vàmadehemu ame dam niba laha ame neà bak tau meedam bak. Labi laha Yahudi damat modem vab damti Yahudi damti ba debu behàsudehena ozomom vaba gi debu vàmteana ààmom bak. Labi laha um Yahudi damat modem vab dam labe uho Kristus bake tu vuzehi Amti vou ali ahu vàmadehemu Alat Am damalehe dam laba fet gagu esuhuna lam um fa Yahudi damti vahi ame baket tau vadam bak. Labihasu Alat aham di iube dam ahamdate vastehe Im Neàna am bak.
7. Alat amu neha, “Yahudi damti Yahudi damat modem vab damti akatihasu meedam labe debu vàmteana ààmoela?” laham Im Neàna lam eho lab vou vameatedam bak lam am debu gi nehaha bak. Ehemo ozome meedam imot meedaha vabak. Gi Alat eba ozahit deeli im neà bak modi esuidalo meedam labe eba gagu fi hasi eho ame im dedateli ame bak lam meedam bak. Alat Am feàna labet eba modi vizi eho fa ame Im Neàna lam vou vameatedam bak.
8. Uho bak nim ozomale. Alam damaleheda ahebu ozom di bisi feà vaba abo ee vousaha vabda em am bak. Lahamnàme Alat eba ozahit deeli neha, “Kristus labe Aba Aho iba im neà bak meedam bak lam abo feà labe ba dem bi moho Im Neàna lam eho fà Yahudi damat modem vab dam bake vou vameatedase,” lahame eba ozahit fi hasi gagu oluhu bak.
9. Aham di iube asum ahoba iuba modealahana zi lamti bak adba niba modealahana zi nimti labihasu ahebu alimeat modehe Ala labe Aho neham bak fet ozo, “Ame Yahudi damti Yahudi damat modem vab damti labihasu iho Kristusti vou ali ahu vàmadehedaleàmu Aho ame dam debu behàsudehena modi fa vazisi debu vàmteana ààmose,” lahame fet ozome esuhu bak lam gi aham di iube dam ahamdate vasti modesdume etei di nibe vou fusi eba ab modi fi gateham bak. “Ame im lam dam ahebu laha modi ozobohudi fi gatedase,” lahame eba gagu fi hasi oluhu labe eho ame bak lam ab meedamam bak.
10. Alat neha, “Eho gi neham bak meedase,” lahame eba gagu fi hasi oluhu bak. “ ‘Alat Aba Aho fet ozome esuhu im lam ba ahusobuli meedam vaba gi Ahamo ozobohudi la modi le modidam Alat modem bak,’ laham bak lam iho Kristus bake tu vuzehi vahi meedam dam nibe iho etei di nibe faasi meedam bak labet modi asum doni beaba bak laba azimna labe im boehàda zi lam ahebu fà modi ozobohudi fi gatedase,” lahame Alat ahit eba gagu fi hasi oluhu bak.
11. Alat Aba Aho lab fet ozome esuhu bak lam gi aham di iube na ahebu meedaha vab di iube fet ozome esuhu labe ab lahasdam bohu modesdamam bak. Im Boehàda Kristus Yesus labe Aba Aho meedaha bak labet Alat Aba Aho aham di iube fet ozome esuhu bak lam ab modi imbodeham bak.
12. Iho Kristus Yesus bake tu vuzehi Amti vou ali ahu vàmadehemu iho etei di nibe Ala bake tom gagodam di im ba iedehe vaba gi, “Im ibida Alat ba ailahigeàmom vaba abo aim bak,” lahame ozome ahu vàmadi Aba fusi tom gagodam damat modem bak.
13. Alat amu eba gagu eho im Abada meedàmu eho uba laha nehame gagolo modem bak. Eho um neàdedam bak laba ozome ame Im Neàna lam vou vameatedume modeha damat em si sel niba ousu geàdam bak nim um aidamnàme um ahu a bisi vi ozodamule. Gi neham bak ozodale. “Paulus gi modehe vabak. Im ba diamut feà damalem bak laba ozome Paulusat gi ozahit meedam bak.” Uho labihasu vi ozodam labe um ahu vei neàdi teudedam bak am bak.
14. Emti vahi Kristus bake tu vuzehi meedam dam Yahudi damat modem vab dam oa, uho Kristus bake tu vuzehi Amti vou ali ahu vàmadehemu Alat uba im neà bak duana tau meedam bak laba ozome eho im Ai Ala bake ahu adat iedi ahit ogomasu biti tom gagodam bak.
15. Im Ai Ala lam iho Kristus bake tu vuzehehe dam abo bak niba esdam lahasuhu dam debu meime labi asum ahoba iuba esuhu dam lamti labihasu ahebu iho vahi gi, “Ai,” lahadamda Am am bak.
16. “Uho Kristus bake tu vuzehi meedam labe uho gi Amti vou ali ahu vàmadi meedam bohu ba voou setem vabak meedase,” lahame eho gi im nehasu Ala bake tom gagodam bak. “Bisi feà modem Alat modem labe Am Aha Nutabe Neànat um ahu laba modi vizi gi labaha bohu teudedase. Labi laha ut labe am omnao bak adba bake nom ilu teudem bak laba ozome uho fa neo laha gi Ala Am Adat Kristus Yesusti dam totbahoti deeli meedam bohu meedase,” lahame eho labi Ala bake tom gagodam bak.
18. Kristus iba deeli meedam bak lam ba koena modem vaba abo duana deeli meedam labe ba zohobu vab imot modem bak. Abo nobu damat ehum diat ad vou usem vabak lamti uloho bak. Abo kebitem feà damat laitem diat zizem biem bak lamti uloho bak. Ame bak lam feà labe ba akati meia vahokedume ozobohude? Ba Kristus iba deeli meedam bak lam novam bak im ba ozome ozobohudem vabak. “Laham bak lam umti Alam damaleheda zi totbaho lamti Alat uba modi vizi teudi ame bak lam ozobohudi fi gatedase. Labi uho ame bak lam ozobohudi fi gatehe labe Alat Aba Aho modem bak ahebu fà uba modi vizedase,” lahame eho Ala bake labihasu tom gagodam bak.
20. Eho gi nehasu Ala bake vou baedam bak. Alat Am feà bak lam im ahu ad niba vizi vabiedamna lam abo feà labe ibi iho ozom bak modeo, ibi iho gagu vi aidam bak modeo, vafozi Ahamo fetehesuhunat modem bak.
21. Alat Aho Kristus bake modi vizi Aho meedaha im lamti labi Kristus bake tu vuzehi vahi meedam dam laba Aho modi vizi iho meedaha im lamti labihasu meedam labe Alat Am feà bak lam damat fà aame ozobohudi gi Ala bake vou baedam bohu meedase. Labihadase.
1. Im Boehàda Yesus labe Aba Aho meedaha Im Neàna lam eho dam bake vou vameatedàmu damat em si sel niba ousdamda nibe eho uba im nehasu ooteme vahokedalo modem bak. Eho amu uba lab vameadaha bak lam abo Alat uba duana deeli neà bak meedàmu, “Um Am damalese,” lahame Alat amu uba gagu fi hasi vadaha bak laba ozome gi im lamohodata nehi iademe vi ozome meedale.
2. Im ubuda daetesu meedam vaba gi feà vab damali ladehebeat im vameadam tadele. Labi meia im vameadam di gi dae nemahuba neàt vameadam bak tadele. Labi meit uba git meedam di modeo, im fai bak duzum di modeo, uho gi ozahigeàmu laha vou faodume fa ot deeliame meedale.
3. Labi laha Alam Aha Nutabe Neàna labe amu uba modi vizi um fa vahi um ahu vàmadehe bak lam ba ot fakiame fahedam vaba abo gi it vou faovoi vabademsu bohu vuusdale.
4. Eho gi neham bak vi ozome uba labi gagoho bak. Iho Kristus bake tu vuzehi vahi meedam dam nim abo im Yahudi damti um Yahudi damat modem vab damti labihasu dam debu behàsudehenàme fa vahi debu ab vàmadeham bak. Labi laha im ahebu vizi vuusdam Alam Aha Nutabe Neàna gi vàmtea bak. Labi laha Alat amu neha, “Am damalese,” lahame iba gagu fi hasi vadaha dam nibe ibi iho tu, “Ba mode tame,” lahame vi ozome vou faodamna gi vàmtea bak.
5. Labi laha iba vuusdam Boehàda iho tu vuzeheda gi vàmtea bak. Yesus Kristus lam ame Boehàda am bak. Labi laha ibi iho ozome valo baptislem bak lam gi vàmtea bak. Iho Yesusti vou ali im Abada meedalo modem bak lam damat aame ozobohudem bake fet ozome meedamna am bak.
6. Labi laha im ahebu, “Ai,” lahamda vàmtea gi Ala am bak. Abo im dedateli na ahebu vuusdamda Am am bak. Labi laha na ahebu laba modi Aba Aho ozoho bak lam meedam bak. Labi laha Am feà bak lam ame na ahebu labe im ad laba vizedume modealadaha bak.
7. Im gi amedam debu vàmteana ààmomnàme Kristus Aba Aho ozahit meia ilabdi deeli im neà bak modi esuidam Dàt modem labe Aba Aho ozoho bak labe faheme ahaladidume da iudu iuba im amomoi modi vize. Da iudu iuba im amomoi modi vize. Labihadaha bak.
8. Ame Da Kristus Aba Aho ba lab meedaha bak lam dat ahamda Daud labe Alat Vameadaha Im Toedahana laba nasi nehi fet toeme esuhu bak ehete. “Boehàda labe Aba fakeheda zi lam beodume neàdi Aho zili vadaha nazoh zi lamti ahoba iuba vou tom iluhu bak. Labi Aho zili atehe nazoh lam Am dam bake lodaha bak.” Lahame labihasu fet toeme esuhu im am bak.
9. Ame im lam, “Ba akatihasu modemna modela?” laham bak lam ozom di iho gi nehi vi ozodam bak. Daud amu neha, “Boehàda labe tom iluhu bak,” lahame fet toeme esuhu bak lam iho gi nehi vi ozo, “Làhà ame da labe amu bak adba niba nom ilu fa tom iluhu bak,” lahame labi vi ozodam bak.
10. Kristus lam ame Da am bak. Aho amu bak niba nom iluhuda fa Ahamo asum ahoba iuba tom iluhu bak. Abo na ahebu vuusdalo ahit asum ahoba tom novaha bak iuba tom iluhu bak. Labiha labe Aba Aho vuusuhu vaba voohoda vabak.
11. Labi Daud amu neha, “Aho zili atehe nazoh lam Am dam bake lodaha bak,” lahame fet toeme esuhu bak lam ozom di iho gi Kristusat Aho ba nehasu meedam im lam vi ozodam bak. Kristus bake tu vuzehi im Abada vahi meedam dam laba taum bak ozome Aho ahit dam bake modi im neà bak nehasu ahala vizedaha bak. Aba tu vuzehi vahi meedam dam totbaho laba vizi Yesusat gagu olu Am im vameadume esmozi laiam damalehe bak ame. Labi dam totbaho laba neo laha vizi Alat vameadaha im aime fa dam bake ahate vameaidam damalehe bak ame. Labi dam totbaho laba neo laha vizi Aba Aho meedaha Im Neàna lam dam iudu iumti dam iudu iumti alim lahasdam dam laba vou vameatedam damalehe bak ame. Labi dam totbaho laba neo laha vizi Aba tu vuzehi vahi meedam dam laba im vameadume faheme modiam damalehe bak ame. Labi dam totbaho laba neo laha vizi Alam im dam bake vahokedam damalehe bak ame. Labihadaha dam zi lam vizedume neàdi iba ab modeme vahedaham bak.
12. “Nehadase,” lahame Kristusat ame dam lam iba modeme vahedaha bak. Dam Kristus bake tu vuzehi Alam damaleheda zi nibe iho Alat Aba Aho ozome iba gagohona lam iho ba meida modem biem vaba abo ahebu ozobohudi meedam bak ame. Labi laha iho Kristus bake tu vuzehehe dam nim abo Kristusam soabobu ààmom dam nibe iho Amti vou ali ahu vàmadi vazisi debu vàmadi meedam bak lam fa vi teudedam bak ame. Labihasu ozome Aho ame dam lam iba modeme vahedaha bak.
13. Ame dam zi labe ibi iho meedam im lam gi labaha bohu vuusdahit, iho Kristus bake tu vuzehi meedam dam nibe neha, “Lo imbot. Ame Da Kristus lam Alam Adat am tame,” laham bak ozobohudehemu im ahebu fa vazisi Amti vou ali vàmadi neàdehe bak ame. Labi laha Kristus labe Aba Aho ozobohu aabodi busaoli meedaha bak lamti uloholi iho laha im vekehe bak vaba abo ozobohu aabodi vou teude ladume neàbodem bak laba vou fusi neàdem bak ame. Labihasu meedàmu ame dam lam vaitom di am bak.
14. Labihameam làhà im ba data koenati uloholi meit im gagom di uledemoholehe damat modem vabak. Im ba data koenati uloho vab labe meit giomim vameadam dam labe neha, “Iho meia ahi vagedase,” lahadam dam labe iba im gagom di im ba aime im iudu ium vuzehi meeda. Im iudu ium vuzehi meeda. Labihadam vabak. Labi laha im ba ihe itea tomba laba vou ladam di nutabe fai nom ilu ibi iho lalo ozoho bak iuba lam bi gi nutabe fai nom ilu vao fi tauledam labe iehelai iehelaidam bakti uloho vabak. Abo im ba ahu fi goaitoi ozom bili ibi iho modelo modem bak lam ba modem vabiem vabak. Abo ibi iho tu vuzehehe bak lam ba veimdem vaba abo gi labaha bohu tu vuzehi modesdam bak.
15. Im ba data koenati uloholem vaba iho Alam im imbona lam teuna vuusdam labe iho meia vameadam di ba meia fakehebeat vameadam vaba gi meia deelehat betea dae nemahuba neàt vameadam bak. Iho labihadam labe iho Kristus bake tu vuzehi vahi meedam dam nim abo Kristusam soabobu ààmom dam nibe iho gi labihadume bak niba im iho meedamna ahebu ab ozobohu aabodi busaoledamam bak. Abo im Boehàda Kristus labe Aba Aho ozoho bak laba vi ozome vi meedam labe Kristusti ab uloholemam bak. Iba vuusdam Boehàda Kristus amemu ibi iho na im meedam di im gi Kristusat gagohozobe ame im modidam bak.
16. Ba ihimo modem vabiem bak. Nasi ozomale. Im dam so nim alisoti aligat fauti aasoaledume lailaiaha labe im so vàmadi soahebuli teudi usai godam bak. Ame bak lamti uloholi iho Kristus bake tu vuzehi Amti vou ali ahu vàmadehe dam ahebu nim fa ot vuusuiame debu ab vàmadeham. Labi laha Kristusat iba ahala gagoiaha bak lam ihimo it ozome meit im abada meeda. Labi meit im abada meeda. Labihadam labe ibi iho Kristus bake tu vuzehi im Abada meedam bak lam gi keàtedi ab meedam bohu modesdamam bak. Labi iho ot deeli ot deeliame meedam labe ibi iho ot vahiaha bak lam ba setem vabak. Abo gi labaha vi meedam bohu modesdam bak.
17. Eho etei lab vameadaha bak lam vi ozome uba nehasu neo ootedume gagolo modem bak. Im Boehàda Yesus Kristusat eba gagu eho im dedateli uba nehi gagolo modem bak. Ala bake tu vuzehehe vab dam labe ibi iho ahu ozom bak lam gi im ostamna imbo vabna gi voom im meedam damat modem bak. Labihàmu ubu uho amu meedume baleàhà im lam abo ame dam labe ibi iho meedam bak lamti ulohona uho meedam bak lam ahebu nasi mu voedume seddale.
18. Ame dam labe ibi iho ozoho bak lam gi aibuna ozomom bak. Alam im imbona lam ba ozobohudem biehe bak. Ame dam labe ihimo ahu teudi, “Ala akatihasu modem Alat modela?” laham bak lam ba aime vi ozom mu ahusobulehe bak. Labihàmu Alat Aba Aho neà bak ozoho bak lam modi vizi ozobohudi meedam bak lam ba uledi meedam vabak. Ba Am gau ada netàdi im Abada gagu meedam vabak. Gi vaitesu godam bak.
19. Ame dam labe ibi iho faina meedam bak ba vi ozome ladem vaba vedi, “Imo fai bak nidi nim modese. Nidi nim modese,” lahame gi ibi iho ahulat aam ahasbeam im modelo àhàkedam bak lamota vi ozodume meedam bohu meedam damat modem bak. Abo ostame fi loholi ame na modehelahit faozohobusu vou vabodam damat modem bak.
20. Lahana umota labihaha vabak. Meit uba amu Kristus labe Aba Aho meedaha im lam uba vahokedume um aime tu vuzehe labe ame im lam ba uba vizi uho meedam vabak.
21. Em ozobohu bak. Kristus labe Aba Aho meedaha im lam meit uba vahokedume um aihi bak. Labi laha uho Kristus bake tu vuzehi Amti vou ali ahu vàmadehemu meit neha, “Bisi im vamdesu meedam bak neam tame,” lahame Yesusat amu vouhoho im lam meit uba vahokedahana uho aihi bak.
22. Uho amu Kristus bake tu vuzehehe vab di iube uho vedi nehi ozo, “Eho fa im nidi nim modi asimdese. Im nidi nim modi asimdese,” lahame ahu gukeme meedume modeha ba neàdem bak ozom vabna gi ahulat it vagedam bak tadi meedam bohu meedume abo fai dam aaboli vàhàdedalo modem damat modem bak. Lahana meit uba amu, “Labihadase,” lahame uba labi vahokedaha vabak. Gi nehi vahokedaha bak. “Uho amu Kristus bake tu vuzehehe vab di iube uho fai bak lab meedume baleàhà im lam ahebu nasi mu voedume seddale.
23. Labi seddume neàdi fa Ala bake nehale. ‘Eho ahulat ozome modelo àhàkem bak lam Oho modi fa veimdi gàhàledam bohu meedale,’ lahame Ala bake tom gagoidale.
24. Labi laha Alat amu neha, ‘Eho um modi Em itbaho fatoi gàhàdese,’ lahame fet ozome esuhu labe imbodi uba modi um dam ab gàhàdeham bak. Labihàmu uho im meedam di ubu uho gàhàlehe bak lamti ulohona im nehasu meedume baleàlele. Abo fai bak meedam vaba gi Alat Aba Aho gagoho im lamota fi hasi iademe vamdesu meedam tadele. Abo Alam im imbona vahokedahana lamti ulohona meedale,” lahame meit uba labihasu vahokedaha bak.
25. Meit uba neha, “Ubu uho amu meedume baleàhà bak lam mu voedume seddume fa na im meedam bak gàhàli meedume baleàse,” lahame meit uba labi vahokedàmu eho uba nehi gagolo. Uho meia ahi vagedam bak lam nasi mu voedume fa umti vahi Kristus bake tu vuzehi meedam dam totbaho laba gi iademe im vamdesu imbona vameadale. Neham bak. Im gi debu vàmteadi Kristusam soabobu laba modealahana ààmom damat modem bak. Ba akati ibi meida laba vage? Ba labiham vabak.
26. Uho na im modi fakem di a ame fakehe bak labet fa uba modi vi ozodume faina a meedamule. A fakem bohu vuusu vi ozodume a ala bozilemule. Gi taho ozahigeàmu fa vei neàdele.
27. Uho labiham vabameam ame fakehe bak labet modi Iblisit uba li um ahu ozolo modem bak ab modemam tame. Iblisit uba li labiham bak labna zohàme um ahu mahate it vou faovoi ozodale.
28. Uho meit mei na aa vadam bak lam nasi mu voedume fa gi anekehà abada keàtedi na meedume fa nali na modeme àdale. “Labi nali dam na vabdate fa lodume damat fà ame na lam àdase,” lahame labihadale.
29. Labi laha uho meia im vameadam di um aha lam im faina futom vaba gi meit am ahu fa teudem bak laba ozome gi damat aim di, “Abo ahole gagoho bak,” lahame aime vuzehem neà bak laba ozome vameadale.
30. Alam Aha Nutabe Neàna labe Am ahu faidem bake uho faina a meedamule. Gi iademe meedale. Neham bakti uloho bak. Meit am fo damat aame ozobohudem bake ahit so laba toedam bak. Alat laha labihaha bak. “Um Alam damaleheda Ala naeda am tame,” laham bak lam um ozobohudem bake Aho Am Aha Nutabe Neàna lam uba ahit lodume modi vizedaha bak. Labi Alat Am Aha Nutabe Neàna lam iba Am damaleheda niba lodume vizedam bak labet modi iho neham bak vi ozobohudemna am bak. Iho faina meedam bak lam Alat gi labaha bohu vou faamo ladume Aba Aho ba diamut modi vaitom digat fuhuzobe Aho lab vou faamo ladam bak lam fi tatahivai neàdi im asum ahoba iuba vousai ab neàdehame? Laham bak lam iho vi ozobohudem bak am bak. Labiham bake Alam Aha Nutabe Neàna labe Am ahu faidem bake faina a meedamule.
31. Labi laha faina nehasu meedam bak nim laha mu voedume seddale. Meia ahu adat teidi faki meedam bak ame. Labi im gi koena aihina ahu gukeme gi kehàm vabna tufamoholem bak ame. Labi daet beàdam labe meia gadam bohu meedam bak ame. Labi meia feàtàdam bak ame. Labi meia faki, “Mei fà beose,” lahame bisi fai bak la modi le modidam bak ame. Labihasu ahebu mu voedume seddale.
32. Fa gi nehasu meedale. Neà bak ot modida. Labi laha ot faobekesi ot faobekesidume im neà bak ototo tauidume meeda. Labi laha Kristus Aba Aho meedaha bak labet modi ubu uho lab faina meedam bak lam Alat ozahigeàmu fa vei neàdedaha bak laba ozome uloholi uho laha faina ot modidam bak lam ot ozahigeàmoiame fa vei neàdeida. Labihadale.
1. Alat bisi iba deeli meedàmu iba modi ab Am damaleham bak. Labihàmu um gi um Ai ààmomda labe Aba Aho modem bak vouhodale.
2. Uho bak niba na im meedam di gi meia deelem bak tadi na im meedale. Abo gi Kristus labe Aba Aho iba lab deeli meedaha bak laba vi ozome meedale. Neham bak. Kristus iba deeli meedàmu iho faina meedam bak lam Alat iba beolo meedàmu Aho fa ahit uledi gohali ot vai eloho bak. Aho lab meedaha bak lam Alat ab deeli uledeham bak. Abo dam ahamda labe Ala bake vou baedalo na ahana neàna vuat usime vuahubuleda. Labi na fi ho oteme vasea veàtoi vua vahuda. Labihadume Alat naume deelem bakti ulohona Kristus ab modeham bak. Uho gi Kristus lab deeli meedam bak laba ozome keàtet meia deelem bak tadele.
3. Ba oa, um ab Alam damaleham bak. Labihàmu uho meidavat faina meedam bak nehamda nim ba a meedamule. Ostame fi loholi ot vai ot vaidam bak ahebu ame. Labi ahate modem bak ba ladem vaba aam ahasbeam im meedam bak ame. Labi damat neha, “Na lada lam eho neo vi vadase,” lahame soat ziemausi vadam bak ame. Labihasu a vi tau meedamule. Alam damaleheda labe ba labihadam vabak. Dam giidat uba aame vàlu gagom vabak laba vi ozome a koena vi tau meedamule.
4. Labi laha um Alam damalehe dam ba a im nehamda vi tau meedamule. Lahit modeo, damat modeo, im so laba modealahana vi ozome ahate faina gagom bak ame. Ostam im debu vabna gagom bak ame. Labi laha gi sikim damat modem bak vameame sikim bak ame. Um Alam damalehe dam ba ame im lam vi meedam vabak. Gi um aha labe Ala bake, “Am abo neàte,” lahame vou baedam bak.
5. Eho etei gagolo modem im nim iademe mahate aime ozodale. Damat modeo, lahit modeo, ostame fi loholi ot vai ot vaidam bak ame. Labi ostame ladem im git vou modetedam bak ame. Labi damat neha, “Na lada lam eho neo vi vadase,” lahame soat ziemausi vadam bak ame. Labihasu meedam dam lam gi meit ostamna laba alali vou baedamda lamti uloholi gi ibi iho meedam bak laba deeli fa tombuli vou baedam dam am bak. Labihadam labe Kristus Yesus labe Am Ai Alati ahili ba ame dam laba vuusu im vahokedume im neà bak ba meedam vabak.
6. Labihàmu imo it vou faovoi meedase. Neham bak. Meit im debu vabna uba vou li ahit keobaedume neha, “Uho lab faina meedam bak lam modem neàte. Alat ba uba beom vabak,” lahame uba giomim vou li vameadam dam laba a aime vuzehi meedamule. Uho Alat gagohona meedaha vab labe vedi fa fai bak lam meedàmu Alat faki beoda tame.
7. Labihàmu ame dam labe lab faina meedalo àhàki meedam bak laba um a vi tau valiheme meedamule.
8. Nehaha bak. Amu di iube uho Ala bi godam di um gi ahu aibuli modesdam damat modem bak. Lahana etei nim uho im Boehàda Kristusti vou ali ahu vàmadehemu um ahu fa ab fauha neàdeham bak. Labihàmu uho gi dam ahu fauha neàdeheda labe ibi iho meedam bak laba vouhodale.
9. Neham labe eho uba labi gagoho bak. Um ahu fauha neàdem bak imbodemeam abo uho Kristus labe Aba Aho gagohona uho uledi meedam bak imbodemeam làhà um gi nehadam bak. Neà bak mei neà bak meime meedam bak ame. Im vamdesu modidam bak ame. Meia im vastehe vaba gi iademe ahate modidam bak ame. Labihasu meedam bak am tame.
10. Labi laha, “Uho akatihasu meedam labet modi Alat deelela?” laham bak laba vi ozodume modidale.
11. Dam Ala bake tu vuzehi meedaha vab dam abo aibu bak laba aidam lahasuhu dam labe ibi iho faina meedam bak laba uho a vi ozome vi tau meedamule. Ame dam labe ibi iho meedam bak lam ba neà bak modem vab tadehe damat modem bak. Lahana ame dam labe ibi iho faina meedam bak lam uho a gi aalahigeàmodamule. Fa ame fai bak lam modi fi desi neha, “Um faina meedalo,” lahame im vi vahokedale. Bisi neà bak am tame.
12. Eho gi neham bak vi ozome uba labi gagoho bak. Ame dam Ala bake tu vuzehi meedaha vab dam labe ibi iho ai bak aa meedam bak lam iho Alam damalehe dam nibe iho meia fa ahate ot vameaidam lademnat modem bak.
13. Ame aibu bak azim dam labe ibi iho fai bak meedam bak lam gi aa meeda. Lahana ame fai bak aa meedam dam labe fa ubu uho neà bak meedam bak lam aameam làhà ame dam labe ibi iho fai bak meedam bak lam fa ab tombali fi zeam bitoi ibi iho fai bak meedam bak lam fa mu voedume seddam bak am tame. Labi fa umti uloholi ahu ab vei neàdi fauha neàdemam tame. Eho etei lab gagoho bak lam imbomu damat ladeedam dae nidi nim ehe bak. “Idamda fa keeleee. Elohoda fat ahedeleee. Faina meedam bak nasi fa it ozobohudi voedume fa vei neàdaleee. Labiham labe Kristus uba modi fauhali um ozobohude tameee.” Lahame labihasu vou ladeedam dae lam ehe bake eho uba labi gagoho bak.
15. Emti vahi Kristus bake tu vuzehi vahi meedam dam oa, eho etei lab vameadaha bak laba vi ozohemu uba neo nehalo. Ubu uho vou meedume baleàhà bak lam iademe vou faovoele. Ba dam ostame ahusobuli meedam dam labe ibi iho meedam bak laba a vi tau meedamule. Gi dam im neà bak ozome meedam dam abo ozobohu aabo damat ibi iho meedam bak laba vi tau meedale.
16. Dam bakda nibe etei na im vou meedam di nibe im ahu gi fai bak ozome meedam bak tadehe bak. Labiha labe uho nehi ozom di, “Ame neà bak lam eho etei modem neà bak,” lahame ozomeam làhà ame bak lam nasi meedale. A modehe vaba vafozemule.
17. Labihàmu ubu uho meedume baleàhà bak lam a gi ostam im lada meeda. Im iudu meeda. Labihadume a meedume baleàmule. Amu nasi, “Em akati modela?” lahame Ala bake tom gagu Alat Aba Aho fet ozome esuhu bak lam ozome ozobohudi ame baket meedale.
18. A vao meona uddume ahusobuli bak bi bobidamule. Uba modi it vàhàdeme im ozome modem biemna am tame. Fa gi Alam Aha Nutabe Neàna labe Am teuna uba modi vizi teudi bohu modesdam bak laba ozome meedale.
19. Uho vazisi vahe vahedam di labe ubu uho ot modi teudi ot modi teudidam bak laba ozome Alat Vameadaha Im Toedahana laba Ala bake vou ladeem dae modesuhu zoho laba aame ot vou ladeei ot vou ladeeidale. Abo Ala bake vou baedam ladeem dae modeo, Alam Aha Nutabe Neàna labe, “Nehasu ladeedale,” lahame um ahu ad laba modi vizi fi gatem ladeem dae lam modeo, labihasu ot vou ladeei ot vou ladeeidale. Labi laha im Boehàda bake vou baedam bak laba ozome um ahu ad labe deelehat vou ladeedale.
20. Labi laha uho im Boehàda Yesus Kristus iba vuusdam labe na im iho modem biem di modeo, na im iho modem di modeo, ahebu im Ai Ala bake, “Neàte,” lahadale.
21. Ba oa, um ahebu em im aimale. Uho Kristus bake, “Am abo feàte,” lahame ahu adat iedi vou baedam labe ot odohaliam vaba fa ahu neàt ot modidale.
22. Lahi dam eheda oa, uho Kristusat uba na gagom di uho uledi meedam bak lamti ulohona um damat uba im gagom di uledi meedale.
23. Nasi ozomale. Im dam im ozome meedamna gi ahu am bak. Labiham labe eho nehi ozo. Lahi labe im damat ibi iho ozoho bak lam iba gagom di iho uledi meedam labe im ahu ozomomna im dam am bak. Ame bak lamti iho Kristus bake tu vuzehi vahi meedam dam nibe im ahu ozomomna Kristusat meedamna ozomom bak lamti uloho bak. Kristus labe Aba Aho iba gagohona iho uledi meedam labe labihaha bak. Kristusam soabobu ozomomna iho Aba tu vuzehi vahi meedam dam nim im am bak. Labi iho faina meedam bak Soat Vausu Fa Vei Neàdemda Am am bak.
24. Labihàmu iho Kristus bake tu vuzehi vahi meedam dam nibe Kristusat iba gagohona iho uledi meedam bakti ulohona lahi labe laha im damat iba gagohona ahebu uledi meedam tadele.
25. Labi dam lahi eheda oa, Kristus labe Aba Aho iba deeli meedaha bak lam ba koena deeli meedaha vaba abo duana deelehe labe iho faina meedam bak lam Aho ot vai eloi iba soat vausu fa vei neàdedaha bak. Kristus labe Aho iba lab deeli meedam bak laba ozome uho fa lahi ubuda laba laha labihasu deeli meedale.
26. “Alat iba deeli vadase,” lahame Aho ahit ot vai eloho bak. Abo damat im vuu valo baptisleidam bak ame. Labi Kristus labe Aba Aho meedaha Im Neàna lam meit iba vameadam bak ame. Labihasu meedam labe iho faina meedam bak lam Aho fa ab faamodamam bak.
27. “Nehadase,” lahame labihaha bak. Iho Kristus bake tu vuzehi vahi meedam dam niba Kristusat iba modi fa aam neà bak modesu. Labi Aho neo iba modi iho git meedam vab labe damat iba vàlum vaba gi im Abadata fi hasi ozome meeda. Aho iba labihasu meedume neàdehezobe Ahamo naedat iba gagu vadam bake labihaha bak.
28. Labihàmu Kristusat iba lab bisi deelehe bak laba ozome damat im lahi bake laha ame baket deeli meedale. Abo ibi iho naedamat iba it deelem bakti ulohona im lahi laha deeli meedale. Eho nehi ozo. Iho dat am nam bake deeli meedam bak aameam làhà iho nehi ozo, “Ame da labe aba naedat it deelem bak ehe bak,” lahame ozobohudem bak.
29. Eho gi neham bak vi ozome uba labi gagoho bak. Dat am nam bake deelem vabameam làhà ame da labe ahamo naeda aba it fakem bak ehe bak. Lahana ba meit ahamo naedat it faki beome vàhàdemda vabak. Gi ame da labe am so it vou faovoi iademe it vabiedam bak. Ame da labe aba aho meedam bak lamti ulohona Kristus labe Aba tu vuzehi vahi meedam dam niba iba laha vou faovoi iademe aasu vabiedam bak.
30. Im Am soabobu laba modealahana ààmom dam modem labe Aho labihadam bak.
31. Ame bak lam meit Alat Vameadaha Im Toedahana laba nehi toehe bak ehe bak. “Làhà etei di nim dat nam vam di am aiti am oiti vou esmozi da nim gi am nam laba akili ihimo ahili so vàmadi ab le azimam bak. Labi lab le azihi bak vi ozom di gi nubu ab vàmadeham bak.”
32. Lahame labihasu toehemu eho ozom, gi vàlu im totobet toehe bak. Lahana ame im labe am tombu lam im feànat modem bak. Kristus labe Aba tu vuzehi vahi meedam dam lamti vahi vou ali vàmadem bak laba ozome dat am nam vam bak laba gi vàlu vameadam bak.
33. Lahadamnàme uba dam bada laba laha vahokedam imot modem bak. Iho meit ibi iho naedamat iba it deelem bakti ulohona im lahi bake laha deeli meedam tadele. Labi laha lahi labe im dam bake, “Abo feàte,” lahame im ahu adat iedi vou baedam tadele.
1. Data oa, uho im Boehàda Yesus Kristusti vou ali ahu vàmadehemu um oiti aiti vameadam im lam mu ailahigeàmu voedam vaba abo aime vuzehi meedam tadele. Ame bak lam gi ahole meedam bak.
2. Alat Vameadaha Im Toedahana laba Alat Aba Aho gagu fi hasi vàmadi esuhu im sepuluh Musat toehena labe aba meida nim uho nasi ozomale. “Um ai bake modeo, um oi bake modeo, ahu adat iedi uba gagoho im laba vuzehi meedale.” Lahame labi gagu fi hasi esu afoezobe im nehasu neo vi gagu vàmadi esuhu bak.
3. “Uho um aiti oiti ahu adat iedi vou baedam labe iho gagoho im lam uho aime uledi meedameam làhà um gi bak niba aidamehamdi abo busaoli tau fauhali eloda tame.” Lahame Alat fet vi gagu vàmadi esuhu im ehedaleàmu eho etei lab gagoho bak lam mahate vuzehi meedale.
4. Um dam data eheda oa, um data, “Fà iedese,” lahame a faki dae meona im vahokedume modi data fa uba faki obo oho gagoho im modem biem bak a meedamule. Fa gi nehale. Iademe vou aasu vabiedam labe dae nemahuba neàt fa im Boehàda Yesus Aba Aho ozohona laba ozome im vahokedume vabiedale.
5. Um mei na teo meedam dam oa, Kristusat uba gagohona uho aime vuzehi meedam bak lamti ulohona fa uba bak niba na tet ooteme meedam dam labe ibi iho gagohona ahebu lam gi ozahit, “Dam lam abo feàte,” lahame ahu adat iedi vou baedam labe ahu vàmadi uledi meedam tadele.
6. Uho neha, “Iba na tet ooteme meedam dam labe iba aame deelese,” lahame naedat aasuhet meedamda lamota a meedamule. Abo naedat aam vab di laha ahebu ozahit uledi meedam tadele. Abo Kristusam na meedam dam labe ibi iho Alat Aba Aho ozohona im ahu gi deeli ule neàt meedam bakti ulohona meedale.
7. Abo odohalehebeat tet meedam vaba abo gi ahu deelehat vàmadi damat uba gagoho vabna abo gi Boehàda Yesusat uba gagohona ààmom bak ozome meedale.
8. Eho gi neham bak vi ozome uba labi gagoho bak. Iho mei na teo meedam dam modeo, mei na teo meedam vaba gi ihimo ozome meedam dam modeo, ibi iho neà bak meedaha bak ahebu im Boehàda Yesus labe ame bak gohali iba na lodam bak ehete.
9. Labi um dam meia na tet ooteme meedam dam oa, ubu uho na gagu teo meedam dam laba laha a git meedamule. Gi iademe meedale. A, “Fà iedese,” lahame dae meoli na meona vuusu im ooteme meedamule. Um ozom vaba? Ubu uho na gagu teo meedam dam lamti umti uba vuusu vou aasu uba im vi gagu aidam Boehàda gi vàmtea asum ahoba iub bak. Labi aho meia vi gagu aim di ba dam faheme ba da lada lam eeda mode? Làhàmu koena beo. Labi da lada lam ee vabda mode? Làhàmu duana beo. Labihadam vab Alat modem bak. Gi mei beodam di gi ulohona beodam Alat modem bak.
10. Emti Kristus bake tu vuzehi vahi meedam dam oa, em sunit nim toeme novalo modemu eho nehi uba gagolo. Im Boehàda Kristus labe Am teuna feà lam uba modi vizi neàdehe labe uhumo mahate teudedale.
11. Iho Iblis bake bohudelo modem diat aho iba beom bak labna zohàme im so niba modealadume ahumdem nazoh lamti mei beom bak ozome vuusualadam nazoh lamti labihasu Alat iba lolo modi ahumdi vou faodam nazoh ozomomna ehe bak. Labihàmu Iblisit neha, “Aho uba nehi modi aase,” lahame fet ozome esuhuna zi lam, “Uho bedem vaba abo adau veimodume uho lab laodoamsuhu bak fa teudedase,” lahame Alat uba lolo modi ahumdi vou faodam nazoh lam ahebu visomoame fa um so laba modealadume ahumdi vou faodale.
12. Eho gi neham bak vi ozome uba labi gagoho bak. Eho etei bohudem im uba lab vameadahana lam ba im ekdati bohudem bak ozome gagoho vab imot modem bak. Gi asum doni beaba bak laba azimna labe iba vuusdam boehàda alihi aam biemna zi mei zi meime, abo ba neà bak meedam vaba, abo fai bak ahebu vuusdam labet dam bake modi vi aibuedamna zi mei zi meime, labihasu ahebu ame na zi laba bohudem bak ozome uba labi vameadam bak.
13. Labihàmu Iblisit uba fusi bohudelo modem digat fum di uho gi teudi laodoamsu adau veimom bak ame. Labi uho ot beluiame modeha Iblista bite. Lahana um bitem vaba laodoamsu duzum lahasuhu bak ame. Labiham bake Iblis bake bohudelo modem diat Aho iba beom bak labna zohàme Alat iba lolo modi ahumdi vou faodam nazoh ozomomna lam ahebu uho visomoame fa um so laba modealadume ahumdi vou faodale.
14. Uho gi meo dam labe bohudelo modemu im bohudem nazoh ahumdi vou faodam bak lamti uloholi ubu uho Iblis bake bohudelo modemu nazoh ubuda lam laha nehasu ahumdi laodoamsu vou faodale. Amu nasi ubu uho Kristus bake lab tu vuzehi im Alat Aba Aho ozohodata meedam bak lam gi labaha bohu teudi ahu vàmadi vuusdale. Abo tentara labe bohudelo modemu am so laba modealadaha nazoh totbaho goaitom bak labna zohàme aho amu nasi bohe sokba ve am kemohode laba fegeamdi teudehezobe emoem neàdehena ozomomna am bak. Labi laha Iblisit uba modi ozolo meedume um vàhàdem bak labna zohàme uho neo gi ahu vàmadi im vamdesu meedale. Abo tentara labe bohudelo modemu meit am ahude foat dou elom bake vou faovoi bes teuna ahude laba taasu vààsu vastehena ozomomna am bak.
15. Labi laha, “Damat modi fa Alati vahem bak akete?” laham Im Neàna lam dam amomoi bake vou vameatedam bake ozome ahumtededale. Abo gi tentara labe aho bohudelo modem di, “Am ba bitem vaba abo teudi laodoamsum bak,” laham bak ozome ahumtedi vou faodam bak laba ozome sepatu adahu tot alibuna duhuna ozomomna am bak.
16. Labi laha ubu uho Kristus bake lab tu vuzehi meedam bak lam mahate teudehe bohu vuusdale. Abo gi tentara labe bohudelo modem diat meit aba beomna zohàme aho fo fu veiomna abo sapi sokba tamzohobuna baa damat ahit modi valo ekeme eksobulehena baa lam visoi vuusum labe fo fu veiomna ozomomna am bak. Ame na baa tentarat vuusdam labe damat fo omtobe vua vizehena iba dom di gi valo eksobu bak laba belu fa vua sutem bak. Ame bak lamti ulohona ubu uho Kristus bake lab tu vuzehi meedam bak teu vuusdam labe Iblisit neha, “Vàhàdeme setese,” lahame uba li modi ozolo meedam bak lam adau veimom bak am bak.
17. Labi laha, “Alat uba ab modi soat vausu fa vei neàdedaham bak,” laham bak laba uho tu vuzehi meedam labe Iblisit neha, “Vàhàdeme setese,” lahame uba li modi ozolo meedam bak adau veimomna am tame. Abo tentara labe aho bohudelo modem diat meit am ohula beom bak labna zohàme am na modem ahida labe ohula dusumna besit modehena lam visoi lu aho ve ohula dusuhuna ozomomna am bak. Labi laha uho neo Alam im lam ve vuusule. Ame Alam im lam Am Aha Nutabe Neàna labe uba loho ae tot mo tot mo lahamna am bak. Abo tentara labe aho aba fakem dam totbaho laba beom bak laba ozome am na modem ahida laba gagu am ae tot mo tot mo lahamna visoi lu aho ve mei beolo vuusu fi bodamna ozomomna am bak. Ame ae lam vuusu fi bodam bakti ulohona uho ame Alam im lam ve Iblis am dam meona zi lamti iba modi aaiam bak lam uho beodume modi fa vabali setemna am bak.
18. Iblis bake ot odosiame bohudem di uho gi Ala bake, “Iba taule,” lahame Ala bake dihasi tom gago. Dihasi tom gago. Labihadam bak tadele. Labi laha uho, “Akatihasu tom gagoela?” laham di Alam Aha Nutabe Neàna labe uba modi vizi ozobohudehe bak lam uho tom gagodale. Labi laha uho Ala bake tom gagodam di ba lavoidam vaba abo iademe fako teudi tom gagodale. Labi laha uho Alam damaleheda totbaho lam ahebu ozome tom gagodam di gi im mei im meime vi ozome Ala bake dihasi tom gago. Dihasi tom gago. Labihadam bohu vuusdale.
19. Labi laha eba vi ozome im nehasu tom gagodale. “Eho ame Im Neàna lam dam bake vameadam di damat iademe aihi vaba labohotem bak labna zohàme gi iademe damat vao ifozba aha tasi udem bakti ulohona modem bake eho vameadase. Labi laha Alat dam ahamdate vasti fa eba modi fi gatehe Im Neàna lam eho dam bake vameadam di eho gi iedehe vabna gi teu neàt vameadase,” lahame eba labihasu vi ozome Ala bake tom gagodale.
20. Nehaha bak. Alat amu di iube eba neha, “Kristus Aba Aho meedaha Im Neàna lam eho ve dam bake ahate vou vameatedale,” lahame eba amu gagu oluhu bak. Labi eho ame bak lam vou meedume modeha damat em si sel niba ab ousuham bak. Lahamnàme, “Alat amu eba gagoho bak lam eho etei iedehe vaba abo ahu meot teu neàt ame Im Neàna lam dam bake vameadase,” lahame eba laha vi ozome Ala bake tom gagodale.
21. Neàde. Uho neha, “Paulus akati modi setehela? Paulus eloheo? Fa gaili bisdào? Ana im meedàla?” laham bak um biem bake, “Uba fà modi ozobohudedase,” lahame eho imti vahi Kristus bake tu vuzehi meedamda meida abo ibi iho bisi deeleheda abo Kristusat gagohona keàtedi gi labaha bohu meedamda Tikikus bake gagu uba olulo mozo.
22. “Im akatihàla?” laham bak um ahu vabi vi ozodam bake, “Uba vabedeme fà modi um ahu neàdese,” laham bak laba ozome eho Tikikus bake gagu uba olulo modem bak.
23. Neàde. Eho gi nehasu Ala bake tom gagodam bak. “Im Ai Alati im Boehàda Yesus Kristusti oa, emti vahi Uba tu vuzehi meedam dam totbaho laba Uho modi dam labe im ahu faheme fi goaitom vaba gi vabademsule. Labi laha ame dam laba Uho modi dam totbaho ahebu ot deeli ot deelidale. Labi laha ame dam laba modi iho Kristus bake lab tu vuzehehe bak lam modi fa vi keàtedi meedam bohu vuusdale,” lahame eho Ala bake labi tom gagodam bak.
24. Labi laha, “Ai Ala oa, dam im Boehàda Yesus Kristus bake bisi deelehe bohu meedam dam lam oho gi ozahit ame dam laba deeli im neà bak modi esuidale,” lahame eho Ala bake labihasu tom gagodam bak. Neàte. Eho Paulusat sunit nim toedume ab neàdeham. Àhàm.
1. Dam Kristus Yesus bake tu vuzehi Amti vou ali ahu vàmadi im vamdesu meedam dam abo Alam damalehe dam num debu Filipi laba azim dam oa, eho Paulusti Timotiusti iho Kristus Yesus Am im aime meedam dam behàsu nibe iho sunit nim toedume uba oluho. Gi umota olum kaio. Abo Kristus bake tu vuzehi meedam dam laba vuusu im vameame faheme modiam dam busaoda zi lamti ame dam busaoda zi laba ba vi tauidamda zi lamti labihasu um ahebu laba ozome im ahim nibe sunit nim toedume oluho.
2. Im ahim nibe uba ozome neha, “Im Ai Alati im Boehàda Kristus Yesusti ahili uba ozahit deeli im neà bak modi esuidase. Labi uba modi um ahu faheme fi goaitom vaba gi vabademsuse,” lahame im ahim nibe ozodume Ala bake labihasu tom gagodam bak.
3. Um dam ahebu eho Paulusat vi ozodam di eho Ala bake, “Am abo neàte,” lahame tom vou baedam bak.
4. Labi eho uba Ala bake tom gagodam di uho im nehame meedaha bak laba eho vi ozome gi deelehat Ala bake tom gagodam bak.
5. Uho amu Kristus bake alimeat tu vuzehehe di labe faasi eba tau Alam Im Neàna lam vou vameatedume etei vou fuhu bak. Uho labihasu meedam di ba vaitom vaba gi labaha bohu modesdàmu eho gi uho lab meedaha bak laba vi ozome Ala bake, “Am abo neàte,” lahame gi deelehat tom vou baedam bak.
6. Labi laha uho amu Kristus bake tu vuzehehe di lam um ahu laba ahamte modi vizi vei neàde ladam bak lam debu Alat Ahamo modehe bak. Labihàmu Alat Ahamo ba neo gi labihasu uba modi vizi vei neàde ladume Kristus Yesus ba lem digat laba fusi um ahu ab modi vei neàdedamam bak. Labiham bak lam eho vi ozobohudi Ala bake, “Am abo neàte,” lahame gi deelehat tom vou baedam bak.
7. Eho uba bisi deeli meedam bak lam eho ozom, eho gi ahole meedam bak. Neham bak. Alat amu eba neha, “Im Ebeda oho vou vameatedale,” lahame eba gagu olu eho ame baket meeda. Labi laha uho eho meedaha baket neo ot vai tau meeda. Labihada. Labihadam di labe damat em si sel ousdam di nim modeo, eho amu gi godam labe Alam Im Neàna damat momna zohàme vi daetesu meedam di modeo, ame im lam, “Imbote,” lahame damat aame ozobohudem im meedam di modeo, labihasu meedam di labe Alat eba ozahit deeli vou aasu vabiedam bak tadehe bak lamti ulohona Aho fa neo uba laha ame baket neo meedam bak. Labiha labe eho uba bisi deeli meedam bak lam gi ahole meedam bak
8. Alata ozobohu bak. Eho etei lab vameadaha im lam ba giomim vameadam vabak. Em abo uba ilahu seteho. Abo Kristus Yesusat uba deeli meedam bakti ulohona eho uba laha deeli meedam bak.
9. Eho um ahebu vi ozome ahit gi im nehasu Ala bake tom gagodam bak. “Alat fà uba modi uho Aba deele. Labi uho dam bake deele. Lahadam bohu meedase. Labi laha, ‘Ala akatihasu meedam Alat modela?’ laham bak lam Alat uba modi vizi uho vi ozome vi ozobohudedam bak bohu meedase. Labi laha uho neha, ‘Neà bak neame? Fai bak neame?’ laham bak ozome vi ozobohudi git meedam bak modem vaba gi im neà bakta vamdesu meedam bak bohu meedase,” lahame eho labihasu Ala bake tom gagodam bak.
10. Labi laha, “Uho labihasu meedameam làhà damat uba im vameadam di uho im giomimna vuzehem vaba Alat uba modi uhumo im tombu laba ahu adat vi ozome vi ozobohudi gi im neàdata meedam bak bohu meedase. Uho gi im vamdesu bohu vou meedam labe Kristus Aho ba li dam faheme fi me vadam digat fusi Aho li aame, ‘Um git modeho,’ lahame ba vàlum vaba uho gi im vamdesu meedam lahasuhuna Aho li aase.
11. Labi laha Yesus Kristus uba vizi teudi tau vuusu meedàmu uho gi im vamdesu bohu meedam labe dam giida totbaho labe uho lab meedam bak lam vi aame ahu adat iedi Ala bake, ‘Am abo feàte,’ lahame Am ee vousai vou baedase,” lahame eho labihasu Ala bake tom gagodam bak.
12. Emti vahi Kristus bake tu vuzehi meedam dam em dam ààmom dam oa, eho vameadalo modem im meida nim um biem bake nasi aimale. Damat amu nehi ozo, “Damat em si sel niba ousuhemu damat ame Im Neàna lam aim vabiem bak ab modeham tame,” lahame ab ozoham. Lahana dam meo dam labe em si sel niba ousu modeha ame bak lam modehe vaba dam Alam Im Neàna aime tu vuzehi meedam dam ihimo gi fa ibi bak iuba modeo, fa gi num debu nidi nim modeo, labihasu damat fa neo vi tauidume ab dualedaham bak.
13. Labihasu meedaha labe boehàdatebo labe am num feàda laba na meona vuusu vou aasdam dam nimti dam giida totbaho num debu Filipi niba esdam dam nimti labihasu im nehasu vi aime ab ozobohudeham bak. “Eho Kristus bake tu vuzehi im Abada vou vameatedàmu damat em si sel niba ousuho,” laham bak lam ame dam labe vi aime ab ozobohudeham bak.
14. Labi laha damat em si sel niba ousdam di labe emti vahi Kristus bake tu vuzehi meedam dam dua totbaho nibe Alat eba fakot zisdam bak aaha labe ozo, “Alat laha iba labihamna ozomo?” lahame vi ozome ahu teudi Alam Im Neàna amu iedi gi fota vou vameatedam bak lam fa seti etei di nibe neo vou vameatedam di ba iba fakemdate iedem vaba fa ahu teudi keàtet vou vameatedam bak.
15. Dam Kristus bake tu vuzehi meedam dam totbaho labe gi neà bak laba ozome dam bake nehada. “Kristus bake tu vuzehi meedase,” lahame gi eho vou vameatedaha im lam ot vai fa dam bake vi tau vou vameatedam bak. Dam nidi nibe Kristusti emti deeli meedam damat modem labe labihadam bak. Labi laha Alat amu eba neha, “ ‘Alam Im Neàna lam giomim modem kaio. Abo imbona modem bak,’ lahame ame im debut eho ahate iademe dam niba daetesuidale,” lahame eba gagu eho meedaha bak lam dam nidi nibe laha ozobohu bak. Labihasu ozobohudi meedam damat modem labe ahu neà bak ozoho labe Kristus labe Aba Aho meedume vou esmoho Im Neàna lam vou vameatedam bak. Lahana Kristus bake tu vuzehi meedam dam totbaho labe vedi nehi vi ozoda, “Paulusam im a aimule. Aho dam duana vadaha bak. Labiham bake imo fa dam im ibida aidume iba taumda fà dualedase,” lahame vi ozome eba ahu adat faki teidehenàme ame dam labe ozahit Kristus labe Aba Aho meedume vou esmoho Im Neàna lam vou vameatedam bak.
17. Lahana dam eba faki teidehe dam iube ahu neà bak vi ozoho vaba vedi neha, “Iho fa feà damali dam fà im ibida aidume vi taui vi tauidume dualedase,” lahame ozome meeda. Labi laha vedi neo nehi ozome meeda, “Kristus labe Aba Aho meedume vou esmoho Im Neàna lam iho vou vameatedam labe dam fa dualedàmu Paulus sel laba ousdam dat ibi iho meedam bak lam fà teidese,” lahame neà bak ozoho vaba eba faki ahu git vi ozohonàme iho ozahit Kristus labe Aba Aho meedume vou esmoho Im Neàna lam vou vameatedam bak.
18. Dam gi ozahit labihasu meedam neà bak. Em ba àvodem vabak. Em gi nehi ozodam bak. Dam ahu git vi ozodam dam modeo, dam ahu neà bak vi ozodam dam modeo, labihasu amait Kristus labe Aba Aho meedume vou esmoho Im Neàna lam vou vameatedaha taia? Ba akati eho dam laba fakela? Ame dam debu behàsu ame Im Neàna lam vou vameatedam bake em abo deeleho. Labi eho deelehe bak lam gi labihasuhu bohu modesda tame. Ba setem vabak.
19. Eho gi neham bak vi ozoho labe uba labi gagoho bak. Uho eba Ala bake tom gagoda. Labi laha Yesus Kristus Aho oluhu Alam Aha Nutabe Neàna labe Aho eba tau vuusu vabieda. Labihadam labe damat etei em si sel niba ousu vabidam bak nim Alat eba soat vausu fa vei neàdem bak ehe bak. Laham bak ozobohudi gi deelem bohu modesdam bak.
20. Ebe eho ahulat vi ozome vou faovoi modelo àhàkemda uba nehi vameadalo mozo. Kristus eba gagu oluhu im lam eho iademe modem vaba git modi fa faidi ladem bak labna zohàme eho etei gi iademe im vamdesu meedam bak ozome meedalo àhàkedam bak. Labi laha eho amu bedehe vaba gi keàtedi meedaha bak lam ba damat vi aame fa Kristus bake feàtàdam vaba gi, “Am abo feàte,” lahame ahu adat iedi vou baedam bak lam, “Fa etei neo ame baket meedase,” lahame em ahulat labi vi ozome modelo àhàkedam bak. Neham bak. Damat em isi olu fa ahedi Alam Im Neàna vou vameatedam bak lam damat vi aame fa Kristus bake, “Am abo feàte,” lahame vou baedameam làhà em isi olum neàte. Laham vabameam damat em oteme eloho bak lam damat vi aame ozahit Kristus bake, “Am abo feàte,” lahame vou baedameam làhà em oteme elom neàte. Damat Kristus bake, “Am abo feàte,” lahame lab vou baedam bak lam bisi im tombu meedamda amemu ebe eho ozodam bak behàsu amait neà bak tadehe bak.
21. Eho lab gagoho bak lam nehi vi ozome uba labi gagoho bak. Em ahedem bohu modesdam bak nim gi eho ahu adat iedi, “Kristus abo feàte,” lahame Am ee vousam bak laba ozome labihaha bak. Laham vaba em elomeam làhà lam bisi neà bak am bak. Em fa Kristus bake tàhi vahi abehamdem bak lam eho it ozom di bisi neàda am bak.
22. Lahana em ozom vabili ahu behàsdehe bak. Eho adida ozome mode? Em eloi fa Kristus bake tàhi vahi azibehamdem neà? Eho gi nehasu elom vaba ahedi Kristusat meedume vou esmoho Im Neàna lam vou vameatedam bohu modesdam labe damat ame bak lam vi aame Kristus bake, “Am abo feàte,” lahame ahu adat iedi vou baedam neà? Eho adida ozome mode?
23. Em etei ahu behàsdi em im adida mode? Adida mode? Lahame vi ozodume modem vabili gi azi vi ozoda. Eho eloeo, gi ahedeo, labihasu ame im behàsu lam amait neà bak. Lahana ebe eho ozome modelo àhàkem bak gi neham bak. Gi eloi Kristus bake tàhi vahi azibehamdem bak lam ebe eho modelo àhàki bisi vi ozodamda am bak.
24. Lahana eho ozom, um neàdehe vabamu eho uba tau vi vabiedam bak ehe lahasuhu labe em nasi elom vabak lam bisi neà bak am.
25. Um neàdehe vabamu eho uba tau vi vabiedam bak ehe lahasuhu bak lam em ab ozobohudi neàdeham bak. Labiha labe eho ozom, em nasi elom vabak. Eho amu ame Im Neàna lam uba vahokedahana uho aime Kristus bake fota tu vuzehi meedam bak lam eho nasi elom vaba gi ahedi fa neo uba le modi uho Kristus Yesus bake lab tu vuzehehe bak lam fa vi teudedume um keàtededume deelehat meeda tame.
26. Labiha labe eho uba ba fa le tau azim labe um abo deelehat Kristus Yesus bake, “Am abo feàte,” lahame ahu adat iedi vou baedam bak.
27. Nasi aimale. Bisi im neà bak meedam bak gi neham bak. Uho neha, “Kristusat meedume vou esmoho Im Neàna lam iho tu vuzehi meedam dam im am bak,” lahame gagodam damat modem labe uho gi ame im lam abo iademe vi ozodam labe ulohodesu meedale. Uho labihadam labe eho im nehasu vi ozobohudem bak am tame. Eho ba uba le aaeo, laham vaba gi niba aidam labe dogoit aieo, damat uba le ame Im Neàna laba mu odosdam di uho bedi mu fi goaitoho vaba gi bakamta vabademsu laodoamsu meedam bak ame. Labi laha dam amomoit ame Im Neàna lam vou le vameadaha vaba vedi im mei fa uba vou le, “Uho fà tu vuzehese,” lahame vameadam dam laba uho vahi mali odosi teudi meedam bak ame.
28. Labi laha uba odosdam dam laba uho iedem vabak ame. Uho labihasu meedam bak lam eho vi ozobohudem bake ame Im Neàna lam iademe vi ozodam labe ulohodesu meedale. Uba odosdam dam laba uho iedem vabak lam ame dam labe aame nehi ozo, “Làhà. Im Alat beolo modem dam zi im ame?” lahame vi ozobohudem bak. Lahana umota nehi it ozo, “Alat iba labaha bohu soat vausu fa vei neàdedà?” laham bak ozobohudem bak. Ame bak lam ahebu Alat Ahamo meedam bak.
29. Alat amu nehi fet ozome esuhu bak. “Uho Kristus bake tu vuzehese,” lahame fet ozome esuhu labe ame baket ab modeham bak. Lahana, “Uho gi im lamota meedase,” lahame fet ozome esuhu vabak. “Uho laha Kristus bake tu vuzehe labe damat uba vabidume geàdase,” lahame Alat neo fet ozome esuhu bak.
30. Em amu laha labihaha bak. Eho amu um num debu Filipi laba le tau azihi di labe damat neha, “Kristus labe Aho meedume vou esmoho Im Neàna lam a vou vameatedamule,” lahame eba faki mali meedam dam laba eho odosi meedam bak lam uho aahana taia? Labi laha neo etei nibe damat eba faki si sel niba ousu geàdam bak nim eho neo odosi meedam bak lam uho neo laha aihina taia? Labiha labe Alat amu lab fet ozome gagu esuhu im lam imbodi uho lab vou vameatedam Im Neàna lam damat mu uba odosi meedàmu um laha neo geàdam bak.
1. Emti vahi Kristus bake tu vuzehi meedam dam abo em dam ààmom dam oa, uho amu Kristus bake tu vuzehi Amti vou ali vàmadehedaleàmu Kristusat uba vabededume um ahu teudedam bak ame. Labi laha Kristusat uba deeli meedam labe um ahu fa asimdedam bak ame. Labi laha Alam Aha Nutabe Neàna labe um ahu ad laba neo modi vizi vabiedam labe um ahebu fa vahe vaheme uhumo ot deeli ot deeliame vou ali meedam bak ame. Labi laha Kristusat uba aam faimu faobekesi im neà bak meedam bak ame.
2. Im labihasu uba meedàmu uho laha im nehamda meedam bak labet modi em ahu deeli asimdem bak meedale. Um ahebu ahu ulohodesu vàmadi ozodam bak ame. Abo ulohodesu ot deeli ot deelidam bak ame. Labi laha ahu fi goaitoi meit ahamo im amomoi ozome mode. Meit ahamo im amomoi ozome mode. Labihadam vaba gi ahu vàmadi vabademsu iademe ame im vàmtea lamota vahi meedam bak ame. Labi laha meit aho gagu vàmademeam làhà gi ame bak labe ahu vi tau ulededam bak ame. Uho labiham labet modi em ahu asimdedam bak am bak.
3. Labi laha uho a nehi it ozo, “Em na nim meedam labe damat fà em ee vousai vou baedase,” laham bak a it daetbadam bak ozome na meedamule. Gi fa feà vab dateli ladehebeat na meedam labe nehi it ozodale. “Em feà vab dàt modem bak. Da lada lam feàda am. Da lada labe am ee iho vousai vou baedam neàte,” laham bak it ozome na meedale.
4. Labi um laha uhumo naedamat uba it vabiedume neàdem bak laba bisi a it ozome vabiedamule. Gi meit aba aho ozome modi neàdemna laba uho laha vi taule. Im labihasu ahebu meedale. Uho im labihasu meedam labe eho ba aime deelehat vàhàdem bak am tame.
5. Uho Kristus Yesusat Aba Aho amu im ozome ladehebeat uledi meedam bak lamti ulohona uho laha vi ozome ulohona vi meedale. Aba Aho amu ozome meedaha bak nehaha bak.
6. Yesus lam Am Ai Alati ulohonàme, “Am gi labihasu Alati uloholi bohu vuusu modesdase,” laham bak lam Am ba labi ozoho vabak.
7. Vedi Ala Am Aiti uloholem bak lam Ahamo naedat ahit fa vou esmozi iba bak niba li dam aliholi gi mei na meedamdati uloholehe bak.
8. Gi dam aliholi mei na meedamdati uloholi vedi fa neo feà vab Dateli Am Ai Alat gagoho im lam neo aime vi uledi vou meedume Alat Aba Aho ozoho bak lam fusi Ahamo naedat uledi damat Am oteme ab eloham. Abo meit faina meedàmu meo damat si ut tetehesuhunaso laba esu paku dome elom di damat lebe tozome labohotiam di ladem bak ozobohuna ahit uledi damat Am oteme ab eloham bak. Abo dat faina meedamda otehemoho bak. Aba Aho amu ozome meedaha bak labihaha bak.
9. “Am labihasu oteme elom neàte,” lahame Yesusat Ahamo it uledehemu Alat Am tom vousai Am ahi totbaho laba ousu Am Aiti feàda ahimeli dam bakda ahebu ab vuusdamam bak. Labi Alat neha, “Ba Amti ulohoda feàda amomoi kaio,” lahame ee feàda ab taluham.
10. Alat neham bak vi ozome labi modehe bak. “Asum ahoba laba Alati vahi azimna ohemna zi lamti labi bake azimna ohemna zi nimti labi bak adba iuba koei it oazi le esdam bak laba esdamna ohemna zi lamti labihasu ahebu Yesusam ee aihizobe im ahu adat iedi ogomaladume Aba, ‘Feàte,’ lahame vou baedase,” lahame labihaha bak.
11. Labi laha dam ahebu, “Ame Da Yesus Kristus lam dam ahebu vuusdam Boehàdatebo feàda am bak,” lahame ahate vou vameadam bake Alat ahit Aba modi feà datelehe bak. Dam ahebu labihadam labe Am Ai Ala Am ee laha vousai, “Am abo feàte,” lahame vou baedam bak am bak.
12. Ebe eho deeli vou ali meedam dam oa, Alat gagoho im lam uho gi amu di iube faasi uledi vou meedam tadehe damat modem bak. Labihàmu uho faina meedam damat modemu Alat um beolo modem bak lam Aho gi fa vei mu soat vausu fa vei neàdehe labe um gi im lamohoda laba ahu adat iedi ule neàt mahate meedam bohu meedale. Uho lab meedam di a gi em ehe dita a meedamule. Abo em setem di gi laha ame baket meedale.
13. Eho etei lab gagoho bak lam uho ba modem biem vabak. Neham labe um modem meolehe bak. Alat ozo, “Am im uho aime vuzehi uledi meedam bohu meedase,” lahame Aho amu gi fet ozome esuhu labe Aho neo uba modi vizi teudehe labe uho ame im lam modem meolehe bak.
14. Uho na im meedam di, “Dam akati nehasu modem vaba?” lahame a teidi voe voedam labe im meedamule. Labi laha a daet ot beidamule. Gi ule neàt vahi meedale.
15. “Uho nehasu meedale,” lahame eho uba labi gagoho bak. Um etei bak niba azim di gi dam faina meedam dam abo im vamdesu meedam vaba fai bak meedam dam lamti vahi azihi damat modem bak. Labihàmu um gi Alam dam aaboli git meedam vaba im neà bakta ozome gi im vamdesu meeda. Labi laha meit uba neha, “Uho git modeho,” lahame ba uba vàlu feàtàdam vaba gi, “Um abo neàte,” lahame vou baedam bak neo meeda. Labihasu meedale. Ame dam duada zi lamti umti vahi vazisi esdam labe, “Alat meia modi Amti vahi gi ahe neàna bohu vuusdam bak,” laham Im Neàna lam uho vou vameatedume fi gatedam labe um gi aibu bak laba falo zi futodume nekehàli fauhaedam bakti ulohona meedam damat modem bak. Uho labihasu meedameam làhà Kristus ba fa bak niba lem di iho Aho avaesdam laba le duzum di em ba ladem vaba gi ahulat deelem bak. Neham labe labihaha bak. Eho amu uba tau azi keàtet vabiedamehamdehe bak lam eho gi modeme vanamai vooho vaba abo fa soalem bakti ulohona modehe labe labihaha bak.
17. Eho Kristusat meedume vou esmoho Im Neàna lam dam bake vou vameatedume damat Kristus bake tu vuzehehe bak lam damat aime faki em oteme vasea veàtom zoaha. Em bielo. Em otemeam làhà neà bak. Eho nehi ozoho bak. Uho Kristus bake tu vuzehi im Abada meedam bak lam abo dam ahamdat ahu adat iedi Ala bake vou baedalo nasi na fi ho oddume vua vahudam bak lamti ulohona meedam bak. Labi laha damat em ba vi oteme em vasea veàtom bak lam dam ahamdat anggur oo vaksa visoi ame na otehenaso laba vi veome neàdem bak lamti ulohona meedam bak. Labiha labe eho it ozom, uho amu Kristus bake tu vuzehi neàdi im Abada meedàmu damat em vi otemeam làhà neà bak. Em ba iedem vabak. Labi laha ubu uho meedaha bak laba uho it ozom, “Neà bak,” lahame it ozome deeli gagodam bak lam eho laha uba vi tau deeli gagodam bak.
18. Eho uba vi tau deeli labi gagodàmu uho laha ubu uho meedaha bak laba it ozo, “Neà bak,” lahame vi ozome deelele. Uho laha damat em oteme vasea veàtomeam làhà eho ozo, “Neà bak,” lahame gagodam bak lam uho laha eba vi tau deeli gagodale.
19. Em adam ààmom dam oa, em abo uba ilahuho. Labihàmu eho nehi fet ozome esuhu bak ehete. Eba vuusdam Boehàda Yesusat eba gagohozobe eho Timotius gagome uba olum bak lam ba kehàm vabak. Abo etei olulo ozodam bak. Aho uba num debu Filipi laba le im ebeda, “Em akatiha,” laham im lam uba vameadume uho aime deeledam bak. Labi laha aho fa eba neo li im ubuda, “Um akatiha,” laham im lam fa eba vameadume eho laha aime deeli meedam bak. Laham bak laba vi ozome eho Timotius gagome uba olulo modem bak ab fet ozome esuham bak.
20. Ame da Timotius lam nehame meedam dàt modem labe eho gagome uba ab olulo modemam bak. Ame da labe gi uba aame faobekesi na uho ozome meedamna lam ahebu vi tau meedam tadehe dàt moz. Bak niba eba tau azim dam lamohoda amomoi kaio. Gi labihamda vàmtea Timotius am bak.
21. Eho lab gagoho bak lam giomim gagom vaba abo imbote. Bak niba eba tau azim dam totbaho ahebu gi na ibi iho ozomdata meedam bak tadem damat modem bak. Ba Yesus Kristusat Aba Aho ozoho im lam tau meedam vabak. Gi ailahigeàmu na ibidata meedam bak tadehe bak.
22. Lahana uho aaha Timotius neà bak keàtedi meedam bak lam aho vouhoho labe um ba biem vaba abo aame ozobohudehe bak. Aho eba tau ahili Alam Im Neàna vou vameatedam bak lam uho aame ozobohudehe bak. Abo aiat na meedam bak am adat tau meedam bakti ulohona meedam bak.
23. Labihasu meedaha labe ame da Timotius lam eho gagome uba olulo àhàki meedam bak. Em si sel niba ousdam damat eba uloome aime gagom bak eho aime ozobohudehezobe eho kehàm vaba Timotius gagome uba olu tame.
24. Labi laha eba vuusdam Boehàda Yesusat Aho eba taum labet modi em kehàm vaba ba laha uba vule aam bak. Laham bak lam ehemo ozome fet nasi uba gagu esuhu bak.
25. Eho laha nehi fet ozome esuhu bak. Emti vahi Kristus bake tu vuzehi meedamda meida Epafroditus uho amu neha, “Eba li tau meedase,” lahame uho gagome eba oluhuda nim ame baket li modeme neàdi eho vi ozoha, bisi neà bak gi, “Fà uba oluse,” lahame fet ozome esuhu bak. Ame da lam uho gagome oluhu di lam aho eba li tau meeda. Labi laha dam iba faki, “Alam Im Neàna lam a vou vameatedamule,” lahame mali meedam dam ehenàme Epafroditus ozahit keàtedi abo dam meo dam labe iba fakem damti ot beluiam di meo damat meodem bak lamti ulohona aho eba tau ame Im Neàna lam vou vameatedam bak. Labihasu meedamda, “Fa uba oluse,” lahame ozome esuhu bak.
26. Ame da labe, “Um alihi aase,” lahame uba ilahu feà bak fuhemu eho gagome uba fa olulo modem bak. Labi laha aho aiha meit uba li gago, “ ‘Epafroditus gaili feà bak fuho,’ lahame gagoho bak uho aiha um ahu ab faideham bak,” laham bak lam aho aihemu ozo, “Am gailehe bak damat aihe? Lahana am fa neàdehe bak dam lam ozobohudehe vaba?” làhàmu Epafroditus am ahu faidi le am alihi uba fi seo lalo àhàki meedàmu eho uba fa ab olulo modemam bak.
27. Damat uba li neha, “Epafroditus abo gaileho,” lahaha bak lam gi modem kaio. Am gailehe bak abo elolo vabalehe bak lam imbo bak. Lahana Alat aba aame faobekesi modi fa neàdehe bak. Lahana eho nehi ozo. Alat Epafroditus bake aam faimu im neà bak tau meeda. Labi eba laha aam faimu im neà bak tau meeda. Neham bak. Alat Aho nehi ozo. “Epafroditus gailehe bake Em data Paulusat am ahu faide. Labihàmu Epafroditus neo elomeam làhà Paulusat laha ahu faidi feà bak ab fumam bak.” Làhàmu Alat ozahit eba aam faimu im neà bak tau meedam labe Epafroditus bake modi fa ab neàdeham bak.
28. Labihàmu uho da lam alihi fa neo gut aameam um deelem bak. Labi laha uho deelehe labe ebe eho amu nehi vi ozo. “Da nim eho taho uba olum vabameam làhà um ahu faidi vi ozodam lahasuhu bak,” lahame ebe eho vi ozodam bak lam fa vei seti em fa ahagoa foom bak tame. Im labihasu ozodàmu Epafroditus lam eho gagome uba fa olulo àhàki meedam bak.
29. Labi Epafroditus eho uba olu aho um num debu Filipi laba lehezobe umti vahi Kristus bake tu vuzehi meedamda meida fa ab lehamemu uho abo deelehat, “Neàte,” lahame gut si dogoiba vuusu vou meddale. Labi laha uho da lam, “Abo neàte,” lahame am ee vousai vou baedale. Abo Amti ulohoda im neà bak meedamda ahebu uho ame dam labe im ee vousai, “Abo neàte,” lahame vou baedale.
30. Eho uba neha, “Uho ame da laba vou baedale,” lahame lab gagoho bak lam gi ostame vou baedam vabak. Aho meedaha im ehe bak. Neham bak. Amu di iube uho bak bohu labe vaitesuhu labe eba taum biehemu uho Epafroditus eba oluhu bak. Labi Epafroditus niba li Kristus labe Aba Aho ozoho im lam meedam labe gaili feà bak fusi elolo vabalehe bak. Ame da labe gi Kristus labe Aba Aho ozoho bak laba vi ozome eba tau vi meedam di labe gaili elolo vabalehe bak laba uho vi ozome abo deelehat, “Neàte,” lahame gut si vou baedale.
1. Emti vahi Kristus bake tu vuzehi meedam dam oa, em im nidi nim uba laha vi gagolo modem bak. Uho im Boehàda Yesus bake tu vuzehi vou ali ahu vàmadi meedam bak laba vi ozome deelehat bohu vuusu meedale. Eho amu uba toedume oluhu im lam fa neo vi ozome ozahit uba gagolo mozo. Neham bak vou faovoi labihalo modem bak. “Dam im giomimna vou vameatedam damat uba vizemo,” laham bak ozome um vàhàdem vabake eho etei neo ame im lam uba ozahit toedume olum neà bak. Ba vanamamnat modem vabak.
2. Ame im neha: Damat aam ahasbeam dam abo faina meedam dam labe uba li gagome meedam im lam gi tem modemo. Mahate it vou faovoi ozodume teudedale. Ame dam labe neha, “Iho dat ahamda Musat toedume fi hasi esuhu Im Feàna zi laba vuzehi ulohodesu meedam labe im laso aubehà sokba ukbodàmu Alat iba neha, ‘Im im vamdesu meedam damat modem bak,’ lahame ozahit iba deeli gagu vadam bak,” lahame labi ozodam dam lam gi im giomimna ozodam damat modem bak. A aime tu vuzehemule.
3. Ame dam labe vedi im labet modi Alat ozahit iba deeli vada tiba. Lahana iho gi nehadam labe Alat ozahit imota deeli gagu vadume Am damalehe dam im am bak. Alam Aha Nutabe Neàna labe iba modi vizi teudehe labe iho Ala bake, “Am abo feàte,” lahame ahu adat iedi Alam ee vousai vou baedam bak ame. Labi laha iho bakda faina meedàmu Alat iba beom bak mali soat vausu fa vei neàdelo Kristus Yesus Am vasea veàtoho bak laba vi ozome, “Kristus Yesus abo feàte,” lahame Yesus bake vou baedam bak ame. Labi laha im ba iho bak damat meedam bak abo laso aubehà sokba ukboho bak laba iho ba tu vi ozodume neha, “Alat iba ozahit deeli gagu vadume Am damalehe dam im am bak,” lahame iho ba labi it ozodume daetbadam vabak ame. Im labihasu meedam damat modehe labe Alat ozomta gi imota ozahit deeli gagu vadume Am damalehe dam im am bak.
4. Iho bak damat ihimo meedamna laba vi ozo, “Iho im labihasu meedaha labet modi Alat iba ozahit deeli gagu vadume Am damalehe bak,” lahame labihasu vi ozome ba it daetbadam vabak. Labihadamnàme iho meit ame bak lam fa vi ozome it daetbadameam làhà bisi ame meedam bak vi ozome daetbadamda em am bak. Nehaha bak.
5. Em Israel labe faaha datat modem labe em faaha di gi faasi usi tujuhli neàdi damat em laso aubehà sokba ab ukboham bak. Labi laha em vou faat lehe tai ahobada Benyamin am bak. Labiha labe em vou faat lehe dam donida ba dam debu mei lahi vaha vabak. Gi Israel dam tadehe bak. Labi laha em Yahudi dàt modehe labe em gi Yahudi damat ibi iho meedam bak ahebu em ozobohu labe em gi Ibrani aabo dàt modem bak. Labi laha dat ahamda Musat toedume fi hasi esuhu Im Feàna zi lam dam ahamda vou vamea usehe im lam Farisi damat iademe ulohodesu meedam bak lam em laha amu Farisi datelehe di lam eho gi ame baket meedam bak.
6. Labi laha eho amu Kristus bake tu vuzehehe vab di labe, “Ame Im Feàna lam tombuli dam ahebu laha tet modi ulohodesu meedase,” lahame bisi im vàmtea lamota vuusu keàtedi vou vameatedàmu eho fa Kristus bake tu vuzehi vahi meedam dam laba vabidam bohu vuusu meedam bak. Labi laha, “Alat eba ozahit deeli ve Am damalese,” lahame ame Im Feàna lam em ba vàmtea vooho vab labe ba damat eba vàlu gagohoda vabak. Em gi ame Im Feàna ahebu iademe ulohodesu vamdesu meedam bak.
7. Em gi labihadam dàt modem labe eho vedi amu nehi git ozo. Eho amu Yahudi damat meedam im lam ahebu vi tau meedam labe Alat eba ozahit deeli gagu vame Am damale tiba vabi git ozoda. Lahana etei nim eho amu meedaha im lam gi, “Ba eba modi neàdem vab imot modem bak,” lahame ozome vooho bak. Eho etei gi Kristus Aba Aho meedaha im lamota tu vuzehehe labe em ba ame im lam vi ozome tum vabak.
8. Gi im lamota ozome uba vameadam vabak. Eho Boehàda Kristus Yesus bake tu vuzehi Amti vou ali ahu vàmadi meedam bak lam ebe eho bisi modelo àhàkemda am bak. Kristus Yesus labe iba neà bak meedàmu eho amu neha, “Eho nehasu meedameam Alat ozomta em im vamdesu meedam dàt modem bak,” lahame ebe eho amu vi ozodume it daetbadume meedaha im zi lam ahebu gi modeme vanamai voomna tadehe bak. Abo àhàzo nami voom bakti ulohona vooho bak. Labi eho, “Fa Kristus bake tu vuzehi Amota vuusulo
9. Amti vou ali ahu vàmadi meedase,” lahame tombulelo meedàmu ebe eho amu vi ozome tu meedaha im ahebu gi modeme vanamai voomna tadehe bak. Neham bak. Alat neha, “Em im vamdesu meedam dàt modem bak,” lahame eba ozahit deeli gagu vaha bak lam ba ebe eho ame Im Feàna lam vuusu iademe ulohodesu meedaha bak labet labihaha vabak. Gi eho Kristus bake tu vuzehehe labe Alat ame baket modehe bak. Ba im amomoi modehe labe Alat ba ozome eba labi gagoho vabak. Gi eho Kristus labe Aba Aho meedaha bak laba tu vuzehi ahu vàmadi meedam labe Alat Ahamo eba neha, “Em im vamdesu meedam dàt modem bak,” lahame ozahit deeli gagu vaha bak.
10. Ebe eho bisi ozome modelo àhàkem bak gi nehadam bak. Eho Kristus bake tu vuzehi Amti vou ali ahu vàmadi meeda. Labi laha Alat amu Kristus eloho bak labet modi fa ahedi vousai asum ahoba iuba tom ilu fa Amti ahili feà Dateli vizi teudehena lamti ulohona eba laha vizi teudeda. Labi laha Yesus amu Am Aiat Aba gagoho im lam voom vabi Aba Aho ozoho bak lam fa vei mu uledi meedaha labe damat Aba vabidume modi geàdume ba otehe bak lamti ulohona eba laha meeda. Abo Alat ame bak lam eba neo modi ebe eho ozom bak fa vei mu, “Damat eba vabidam labe modi geàdume em fà otem neàte,” lahame meeda. Eho gi im labihasu meedalo àhàki ozodam bak.
11. Gi modem vabak. Eho ba nehi modem bak ehe bake eho gi im labihasu meedalo àhàki ozodam bak bohu meedam bak. Ba diamut dam Kristus bake tu vuzehi meedaha dam amu elodahada zi lam Alat modi fa ahededume vousadam di lam emti amediat fa ahedi vousam bak laba ozome ame im labihasu meedalo àhàki ozodam bak.
12. Emti vahi Kristus bake tu vuzehi meedam dam oa, eho etei uba lab vameadaha im lam, “Em Kristusti vou ali ahu vàmadi neàbodeho,” lahame ba uba labi gagodam vabak. “Alat eba modi eho im git modehe vaba gi im vamdesu meedam tadem dateli neàbodeho,” laham bak ba uba gagodam vabak. Ebe eho bisi ozome modelo àhàkemda lam meedume neàdehe vabnàme Kristus Yesusat Aho amu ozahit nehi ab fet ozome esuham bak. “Eho Amti vou ali ahu vàmadi im vamdesu meedam tadem dateli neàbodese,” lahame amu nasi fet ozoho labe eba soat vausu fa vei neàdi eba ab vuusdamam bak. Labihadàmu eho laha, “Ame bak bohu labet keàtet meedase,” lahame etei keàtedi ab meedamam bak. Abo dam na vam bak ozome uledi keàtedi emoedume le ulasi novam bakti ulohona meedam bak.
13. Eho nehi ozo. Kristus Aba Aho amu neha, “Eho Amti vou ali ahu vàmadi meedam tadem dateli neàbodese,” lahame eba labi fet ozome esuhu bak lam eho ame bak lam meedume neàdehe vabak. Eho ame bak lam meedume neàdehe vabnàme ebe eho amu im vamdesu meedaha bak lam em ba it ozom vabak. Em gi im ebe eho ba modem zoho lamota vamdesu vou ladalo modem bak. Abo damat sikilo emoedam di meit neha, “Em adi bak fudàla?” lahame it aam vaba gi aho ozome emoedam bak lahasu emoedume lafum bakti ulohona meedalo modem bak.
14. “Eho Kristusti vou ali ahu vàmadi meedam tadem dateli neàbodese,” lahame em gi ohulaesu emoedam lahasuhu bak. Alat Aho amu fet nehi ozo, “Eba ba gagome asum ahoba iuba le eho Kristusti vou ali ahu vàmadi meedam bak gohali lomna teuna abo dam sikim di meodehemu lom bakti ulohona li vale,” lahame eba fet ozome esuhu labe eho keàtet meedam bak. Abo damat sikilo emoedam di ame da labe emoedume meodi le novam bak laba nasi lafusi ulasi neàdi na vam bak ozome abo keàtedi emoem bakti ulohona meedam bak.
15. Iho neha, “Iho amu Kristus bake tu vuzehi im ozobohuda im am bak,” lahame gagodam damat modem labe eho etei lab vameadaha bak lam imo vahi ahu vàmadi ame baket keàtet meedase. Ba a im mei im meime meedamule. Lahana uho meit eho etei lab vameadaha im lam uledi ozom vabameam abo emti ahili ame im lam uledi vitasu vi ozodam vaba vedi fa im amomoi vi ozome meedameam làhà Alat fa ame da laba ba neha, “Imbo bak neam tame,” lahame modi ozobohudi fi gatei fa vi ozodume meeda tame.
16. “Alat ba fa uba modi ozobohudi fi gate tame,” lahamnàme Alat amu uba modi ozobohudi fi gateheda lam a voou setemule. Gi labihasu bohu vuusu meedam lahasdale.
17. Emti vahi Kristus bake tu vuzehi meedam dam oa, uho neha, “Akatihasu meedam neàte?” laham bak um biem bake ebe eho ozome meedam bak lam damat aame vuzehi meedam dam laba uho laha vi aame ame dam lamti vahi ame baket vi tau meedale. Labi laha emti eba tau meedam damti iho amu uba le tau azihi di labe ibi iho im vamdesu meedam bak lam um ab aame ozobohudeham taia? Labiha labe um ba, “Im vamdesu meedam bak akete?” laham bak um ba biem vabak. Labihàmu dam ibi iho amu vouhoho bak lam vi tau meedam dam laba uho iademe vi aame ozodume ame baket vi tau meedale.
18. Eho amu uba neha, “Iho amu uba lab vahokedume vou esmoho im lam mahate tu vuzehi meedale,” lahame eho lab gagoho bak lam gi neham bak vi ozome uba labi gagoho bak. Dam dua totbaho labe vedi nehi ozo, “Yesus otehe di lam damat Yesus ve ut tetehesuhunaso laba esu paku dome eloho bak lam gi oteho. Ba vasea gohalemna modem vabak,” lahame git ozome Kristus bake mu tozome fakemoholi vaitoho bak. Ame im lam eho amu uba vameadamehamdeho. Lahana eho etei neo uba ahu faidi mebet neo vi vameadam bak.
19. Ame dam lam Alat ba diamut beodume vaitesu vua elum sutem gikina laba voou geàdam bohu vuusdalo modem bak. Im nehasu meedam labe Alat labihalo modem bak. Ame dam labe Alat im Aba Aho gagohoda modehe vaba fa gi ibi iho ozome modelo àhàkemda lamota meeda. Labi ame dam labe iho faina meedam di ba, “Iho git modeho,” lahame it ozome ladem vab damat vedi gi it daetbadam damat modem bak. Labi laha gi im ibi iho bak niba meedamda lamota tu meedam damat modem bak.
20. Dam lada lam gi ibi iho bak niba meedamda lamota tu meedam damat modem bak. Lahana im ba labiham vabak. Asum ahoba iuba Alat im ee etei toedume neàdi esuhu labe ibi iho abo azilo modem bak lam gi asum ahoba ium am bak. Labi laha, “Iba Soat Vausu Fa Vei Neàdemda labe Aho adi diat asum ahoba iube fa bak niba li im vàla?” laham bak laba iho vi ozome ahumdi neàdi vou faodam bak. Iba Soat Vausu Fa Vei Neàdemda ba dat amomoi modem kaio. Abo im Boehàda Yesus Kristus am tame.
21. Yesus Alati uloholi feà labe bak nimti asum iumti na ahebu vuusdam bak. Labihadam Dàt modem labe Aho ba diamut im bakda ekda nim abo so nemahubana abo vàhàdem meona nim Aho fa modi veimdi Am so Ahamo asum ahoba iuba modesuhuna feà lam iba fa modesuida tame.
1. Emti vahi Kristus bake tu vuzehi meedam dam oa, ebe eho deeli faobekesi ilahu seteheda um am bak. Eho uba tau azi ame Im Neàna uba vahokedaha bak lam eho gi modeme vanamai vooho vaba abo soalehe bak. Uho eho vahokedaha im lam aime vuzehi im vamdesu neà bak meedàmu em abo deeli, “Um abo neàte,” lahame uba vou baedam bak. Uho im Boehàda Yesusti vou ali ahu vàmadi meedàmu eho etei uba nib toedume oluhu im nim ahebu uho iademe ulohodesu keàtet meedale.
2. Euodiati Sintiketi oa, em um behàsu laba etei neo im nidi nim vi vameadume esulo modem bak. Uho ot odosiam bohu vuusdam bak lam nasi voou ahu vàmadi fa vahele. Um amu im Boehàda Yesusti vou ali ahu vàmadem lahi behàsu modem labe um akati labi meeda? A labihamule.
3. Labi emti vou ali ahu vàmadi eba na tau meedamda Sunsugos oa, oho eba tau ame lahi behàsu laba, “Ba ot odosiame beàdam vaba gi fa ot vahiale,” lahame vi vahokedale. Nehaha bak. Eho amu dam bake Alam Im Neàna vou vameatedaha di lam ame lahi behàsu lam eba tau keàtedi dam bake vou vameatedam bak. Ame lahi behàsu lamota eba tau ame Im Neàna lam vou vameatedaha vabak. Abo Klementi dam totbaho amomoiti lahi laba tau vahi eba vi tau ame Im Neàna lam vou vameatedaha bak. Labi eho etei lab gagoho dam ahebu im ee lam Ahe Neàna Bohu Vuusdam Dam Labe Im Ee Toedam Buku laba toedume esuhu bak. Labiha labe oho ame lahi behàsu laba im vi vahokedume vamdesule.
4. Emti vahi Kristus bake tu vuzehi meedam dam oa, uho im Boehàda Yesusti vou ali ahu vàmadi meedam damat modehe labe na im ahebu duzum di uho gi ozahit deelehe bohu vuusdale. Eho etei lab gagoho im lam eho neo uba vi gagolo. Uho mahate deeli meedam bohu vuusdale.
5. Uho umti vahi azihi dam laba na im meedam di dam ahebu aame ozobohudem bake na im meedam di gi ahu neà baket meedale. Nasi ozomale. Im Boehàda Yesus fa lem bak ab fuseo vabaleham bak.
6. Iho bakdat na im ahebu meedam di, “Im akati mode?” laham bak a vi ozodume ahu faidemule. Fa gi nehale. Uba fai bak duzum di modeo, uba neà bak duzum di modeo, ozahit fa Ala bake nehi tom gagodale. “Ai Ala oa, Oho nehasu modi neàdele,” lahame uho ozomda ahebu tom gagodale. Labi uho im labihasu tom gagodam di Ala bake laha, “Am abo neàte,” lahame fet vi tom baedale. Gi ame bak lam bohu vuusdam labe meedale.
7. Uho im labihasu tom gagodam bak lamti labi Ala bake, “Am abo neàte,” lahame laha fet vi tom baedam bak lamti im labihasu meedaha labe Alat uba nehada tame. Uho amu Kristus Yesus bake tu vuzehi Amti vou ali ahu vàmadi meedam labe Alat um ahu laba modi faheme fi goaitom vaba gi vabademsu meeda tame. Abo um naedamat, “Im akati mode?” laham bak lam ba vi ozome ahu faidem vabak. Abo dam meo dam labe iho boehà damat num feàda laba meit olem zohàme mali doo laba duzu aum bakti ulohona Alat um ahu laba modi mali ab modesdamam bak. Labi um ahu fi goaitoho vaba gi vabademsu meedam bak lam uhumo naedamat it ozo, “Làhà na im duzuhemu akati modi em ahu faidehe vaba gi neà modesdàla?” laham bak lam ba uhumo vi ozome ozobohudem biem bak.
8. Emti vahi Kristus bake tu vuzehi meedam dam oa, em sunit nim omtobe fuseo vabaleho. Làhàmu eho uba nehalo. Uho im nehasu vi ozodume meedam bohu vuusu meedale. Neha: Imbo bak meedam bak ame. Labi meit uba aame ozo, “Ahole meedam bak,” lahame ahu adat iedi vou baedam bak ame. Labi im git meedam vaba gi im vamdesu meedam bak ame. Labi im faina meedam vaba gi neàna meedam bak ame. Labi Alat ozo, “Im neà bak lame,” lahame aame deelem bak ame. Labi damat aame ozo, “Bisi neà bak ame?” lahame meit vou baedam bak ame. Abo im neà bak ahebu abo Alat neha, “Bisi neà bak lame,” lahame Alat ozome deeli vou baedamda lam labihasu ahebu vi ozodume meedam bohu meedale.
9. Gi im lada lamota vi ozodume bohu vuusu meedam bakta uba gagodam vabak. Abo eho amu uba le tau azi vahokedume uho aime tu vuzehehe im modeo, eho neo etei uba ba vi vameadaha im nim modeo, uho eba aasdahit eho neà bak vouhodaha im lam modeo, labihasu ahebu uho laha vi ozodume bohu vuusu meedam bak tadele. Uho labihasu vi ozodume bohu vuusu meedam tademeam làhà mei ahu modi faheme fi goaitom vaba gi vabademsu meedam Ala labe Aho umti vou ali ahu vàmadi meedam bak am tame.
10. Emti vahi Kristus bake tu vuzehi meedam dam oa, eho im meida neo uba vameadalo mozo. Uho amu neha, “Iho Paulus bake tause,” lahame vi ozodam bohu lahasu vuusdam damat modehenàme ame baket modesome modeha dat na vou lamda vabali modem vabilehe bak lam em abo ozobohu bak. Lahana uho amu ame bak lam modesome meedaha seti kehàdamnàme uhumo etei neo ozo, “Imo Paulus bake tause,” lahame neo gagu ame baket ab modi imbodeham bak. Laham bak laba eho vi ozome em abo duana deeli im Boehàda Yesus bake, “Neàte,” lahame tom gagodam bak.
11. Eho ba neham bak ozome uba labi gagoho vabak. “Na eho ozomna vabaleho. Eba ame na lole,” lahame ozome ba uba labi vi gagodam vabak. Neham bak. Na im ahebu eba modi duzum di em gi ahebu neà bak tadehe bak. Labiha labe em ba uba na tauledam vabak.
12. Em gi na im ahebu eho modi baleài neàdehe bak. Na vabali na valo àhàkem diale. Na duali na amomoi ba neo vi vam bak ozom vab diale. Em labihasu meedume baleài neàdehe bak. Abo na duali na duana àme dedem di modeo, na vabali idoalem di modeo, im fai bak tadem di modeo, im neà bak tadem di modeo, labi nazoh dualem di modeo, nazoh koedem di modeo, gi ahebu labihasu meedam neà tadehe labe labi modi baleàhà bak.
13. Kristusat Am teuna lam eba modi vizi teudehe labe ame im meedam bak ahebu lam eho gi meedam neà tadehe bak.
14. “Na eho ozomna vabaleho. Eba ame na lole,” lahame àvodi uba labi taulehe vabnàme na im fai bak eba duzuhuna nim uhumo ozome faobekesi eba na oluhu bak lam abo neàte.
15. Uho eba gi im lada lamota modehe vabak. Um num debu Filipi laba azim dam uho laha amu eba nehasu meedaha bak nim um ozobohuna taia? Eho amu Makedonia bak labe aba zoho num debu Filipi uho esuhu num debu laba ahamte le Alam Im Neàna uba vameadume uho aime vuzehi neàdi eho num debu ubuda vou esmozi fa Makedonia bak labe aba zoho num debu meida Tesalonika laba le ame Im Neàna vou vameatedam di lam em na vabali ozom di uho na eho ozodamda lam eba amu olu. Ba neo olu. Uho amu labihadaha bak ehe bak. Labi Makedonia bak ahebu ame Im Neàna lam vou vameatedume neàdi fa bak mei bake laha di lam umota nehi ozo, “Em Alam Im Neàna vou vameatedam bak meedam labe na vabalem bak uho tause,” lahame uhumo nasi fet ozome eba na oudam bak. Ba dam Kristus bake tu vuzehi meedam dam bak mei bake azim dam amomoi eba labihadam vabak. Gi uhumo eba tauidam bak.
17. Eho etei lab gagoho im lam, “Uho laha eba na neo olule,” laham bak ozome na vam bak àhàki uba labi gagoho vabak. Eho gi neham bak ozome uba labi vameadam bak. “Uho eba na oudàmu Alat uba laha im neà bak duana vi modi esuidase,” lahame labihasu vi ozome uba labi vameadam bak.
18. Uho etei Epafroditus bake lu eba oluhu nazoh lam eho ahebu ab vame neàdeham bak. Labiha labe eho ozom bak lam foti neo vi vahedaha bak. Uho eba oudaha nazoh lam Alat ozoha, ahole oudahanat modem labe Aho gi deelehat vahana ozomom bak. Abo dam ahamda Ala bake vou baedalo na fi ho oteme vua vahudamna faana Aho naume uledi gago, “Abo neàte,” lahame deeli gagomnati ulohona modehe bak.
19. Labi laha ebe eho ee vousai vou baedam Ala labe nazoh Abada feà labe uho Am Adat Kristus Yesusti vou ali ahu vàmadi meedam labe ubu uho ozome vame neàdemna lam ahebu uba loda tame.
20. “Dam ahebu ahu adat iedi im ai Ala bake, ‘Am abo feàte,’ lahame vou baedam bohu vuusdase. Labihasuse,” lahame eho Ala bake tom gagodam bak.
21. Dam Kristus bake tu vuzehi meedam dam laba vuusu im vameame faheme modidam dam busao oa, uho Alam damalehe dam Kristus Yesusti vou ali ahu vàmadi num debu Filipi laba vahi meedam dam totbaho laba im ebeda gagodale. “Eho Paulusat uba, ‘Neàte,’ lahame gagoho,” lahame gagodale. Labi laha imti vahi Kristus bake tu vuzehi meedam dam eba niba tau azim dam totbaho nibe laha uba, “Neàte,” lahadam bak.
22. Labi laha Alam damalehe dam abo num debu niba esuhu dam totbaho nibe ahebu laha uba, “Neàte,” lahadam bak. Gi dam lada lamota uba, “Neàte,” lahadam vabak. Bak ahebu vuusdam boehàdatebo labe am na meedam dam totbaho Kristus bake tu vuzehi meedam dam nibe laha uba, “Neàte,” lahame gagodam bak.
23. “Im Boehàda Yesus Kristus labe Aho uba ozahit deeli im neà bak modi esuidase. Labihadase,” lahame eho Ala bake tom gagodam bak. Neàte. Eho Paulusti Timotiusti im ahim nibe sunit nim toedume ab neàdeham. Àhàm.
1. Dam Alam damaleheda num debu Kolose laba esdam dam abo imti vahi Kristus bake tu vuzehi meedam dam abo Kristusti vou ali ahu vàmadi gi labaha bohu meedam dam oa, eho Paulusat sunit nim toedume uba oluho. Alat amu neha, “Aho eba modi eho Am Adat Kristus Yesus labe Am im vameadume esmozi laiamda meidatelese,” lahame Alat amu labi eba fet gagu vàmadi esuhu labe em ame im modem datelehe bak. Eho ame dat meida nibe sunit nim toedume uba oluho. Imti vahi Kristus bake tu vuzehi meedamda meida Timotius aho eba tau, “Neàte,” lahame sunit nim toedume uba oluho. Im ahim nibe uba ozome neha, “Im Ai Alat Aho uba ozahit deeli im neà bak modi esuidase. Labi uba modi um ahu faheme fi goaitom vaba gi vabademsuse,” lahame im ahim nibe ozodume Ala bake labihasu tom gagodam bak.
3. Iho uba ozome tom gagodam di labe iho gi im Boehàda Yesus Kristus labe Am Ai Ala bake, “Neàte,” lahame tom vou baedam tadem bak.
4. Meit iba li nehi vameadahana iho aihemu iho gi labihasu tom vou baedam bak. Uho Kristus Yesus bake tu vuzehi keàtedi meedam bak lamti labi uho fa dam Alam damaleheda ahebu laba deeli meedam bak lamti meit labihasu iba li vameadahana iho aihi bak.
5. Epafras uba amu le Kristus labe Aba Aho meedaha Im Neàna lam uba ahamte vameadam bak labet modi uho Kristus bake tu vuzeheheda am am bak. Abo ibi iho deeleheda am am bak. Abo imti vahi Kristus labe Aba Aho iba gagodaha im lam tau meedamda meida am am bak. Abo um Kolose dam neàdem bak ozome gi Kristusam im uledi gi labaha bohu meedam tademda am am bak. Labihadam dàt amu di iube uba le Alam im imbona abo Yesus labe Aba Aho meedaha Im Neàna lam uba alimeat vameadaha di labe, “Alat ba uba modelo modem im neàna lam Aho asum ahoba iuba mali esu vou faodamna ehete,” laham bak lam uho vi aime ozo, “Ba imbodi iba ame bak mode tame,” lahame tu vi ozodam labe uho Kristus Yesus bake ab tu vuzeheham bak. Labi dam Alam damaleheda totbaho ahebu laba uho fa ab deeli meedamam bak. Labihadam bak. Ame da labe aho Kristus labe Aho meedaha Im Neàna lam uba vou le lab vameadaha bak lamti ulohona meit ame im lam laha gi amu di iube bak iudu iumti bak iudu iumti ahebu faasi vou vameatedume vou fi dedamam bak. Labihadam baket modi ame dam labe iho faina meedam bak lam fa voedume fa neà bakta meeda. Labi laha ame im laba tu vuzehehe dam lam fa dualeda. Labihadam bak. Labi um laha ame baket etei laha labi meeda. Alat ozahit iba deeli im neà bak modi esuidam bak lam um biem bake Epafras amu uba ahamte le vameadaha bak lam uho aime ozo, “Imbote. Alat ozahit iba deeli im neà bak modi esuidam Ala am bak,” laham bak lam uho amu tu vuzehehe di labe faasi uho faina meedam bak fa voedume fa neà bakta meeda. Labi um dam totbaho labe ame im lam tu vuzehehe dam laha dualeda. Labihadume etei di nibe ab vou fuham bak.
8. Labi laha Alam Aha Nutabe Neàna labe Aho fa uba Kolose dam laba modi vizi uho fa dam Alam damaleheda totbaho ahebu laba deeli meedam bak lam Epafras iba li vameadahemu im laha ozobohudehe bak.
9. Uho Kristus bake lab tu vuzehi meedam bak lamti labi uho Alam damaleheda totbaho ahebu laba deeli meedam bak lamti labihasu Epafras labe iba li vameadahemu iho gi ahamte im ahum lam aihi di labe faasi uba vi ozome gi Ala bake im nehasu tom gagodam bak tadehe bak. “Ai Ala oa, ‘Kolose dam labe iho akatihasu meedàla?’ laham bak lam biem bake Obo Oho ozoho bak lam ahebu dam laba modi dam lam fa abobo ozobohu damali meedam bak modi esule. Labi laha ame dam labe neha, ‘Làhà. Neà bak neame? Fai bak neame?’ laham bak vabi vi ozodam bak lam Oho Om Aha Nutabe Neàna labe fa dam laba modi vizi ozobohudi fi gatei esule.
10. Labi ame dam labe amu neha, ‘Im Alam damalehe bak,’ lahame ahate gagodam damat modemu Om ahulat deelem bak laba ozome ame dam labe gi ibi iho ahate lab gagodam im lamota ozome meedale. Eho gi, ‘Ame dam labe fà nehadase,’ lahame Oba tom gagodam bak. Ame dam labe iho na im ahebu meedam di fa gi im neà bakta meedam bak ame. Labi, ‘Om akatihasu modem Alat modela?’ laham bak lam ame dam labe iho amu fota ozobohudedaha bak lam Oho modi fa duana vi taui vi tauidume duali ozobohudedam bak ame. Labihasu fà meedase.
11. Labi Om bisi feà bak lam ame dam laba modi vizi teudi naat iba vabidam di modeo, fai bak duzum di modeo, labihasu iba modi nemahudam di iho gi ozahit abo keàtedi deelehat laha vou faodam bohu meedale.
12. Labi laha Oho amu neha, ‘Ame Kolose dam labe im vamdesu meedam damalese,’ lahame Ohomo ozahit ame dam laba deeli gagu vadàmu ame dam labe fa Om damaleheda totbaho laba Oho ba im neà bak modi esuiamna lam Oho nasi modem vaba mali asum ahoba fauha neàdehe bak iuba esu vou faodamna lam ame dam labe iho ba fa ame dam totbaho lamti vahi tau valo modemu ame dam labe fà Oba, ‘Im Ai abo neàte,’ lahame tom vou baedase.” Lahame iho labihasu Ala bake tom gagodam bohu meedam bak.
13. Amu imti umti vahi Alam Adat Kristus bake tu vuzehehe vab di iube gi Iblisit iba vuusu im vahokedam labe gi aibuna esdam bak. Lahana Iblisit iba lab vuusdam bak lam im Ai Ala labe Aho mali fa im ab vi vihilaham bak. Labi im fa vi vihilame fa Am Adat vàmteana Aho deeli meedamda laba ab lu Boehàdateli Aho fa iba ab vuusumtedeham bak.
14. Abo iho faina meedaha bake gohali Am Adat Yesusat uledi, “Damat Am otem neàte,” lahame ot vai eloho labe Alat im fa vi vihilame fa Am Adate lu iba ab vuusumtedeham bak. Abo iho faina meedaha bak lam Alat gi ozahigeàmu fa ab vei neàdedaham bak.
15. Ala damat Am alihi aam vab Alat modem bak. Lahana Kristus Am Ai Alati uloho labe fa bak niba nom ilu Dateli, “Am Ai Ala akatihasu modem Alat modela?” laham bak lam dam bake modi ab ozobohudi fi gatei neàdeham bak. Na vab di Alat Aho alimeat modealahana lam ahebu ozom di bisi feàda Am Adat Kristus am bak. Labiha labe iho ozom, Alam Adat lam bisi Datahidatebo Am am bak.
16. Neham labe labihaha bak. Asum ahoba laba modealahana lamti bak niba modealahana nimti abo damat aadamda modeo, fako aam vabda abo Alat Am im gagu vou usem dam labe ee bisi vousahada modeo, ee bisi vousaha vabda modeo, abo na aam biemna zi asum doni beaba bak laba azimna labe im boehàda mei boehàda meime labihadamna lam ahebu Alat fa Kristus bake gagu Aho alimeat ab modealadaham bak. Abo imbote! Alam Adat Kristus labe Am ee vousam bake Alat ahit fa Kristus bake gagu Aho na ahebu ab modealadaham bak.
17. Labi laha na ahebu modealadaha vab di ium Yesus di lam gi labaha modesda. Labi laha na ahebu modealadume neàdi ame na zi ba fi goaitoi ahala lai ahala laiaha vaba gi aba amu modesdam bak lahasu vuusdamda Yesus ame Da am bak.
18. Labi laha iho Kristus bake tu vuzehi vahi meedam dam nim Im Yesusam sobu am. Labi Yesus im ohubu am. Abo ohubu nasi ozom labe so ba nigom bakti ulohona Yesusat Aba tu vuzehi vahi meedam dam laba im vameadume faheme modidamda Am am bak. Dam elodaha bak labet fa ahedi usaha bak lam ahamte alimeat modeheda Am amemu Aho fa Aba tu vuzehi vahi meedam dam laba modi fa im gàhà bak meedamda Am am bak. Labiha labe na ahebu vi ozom di Am fa bisi feà Dateboleheda Am am bak.
19. Alat ozo, “Em Adat fa Em itbaho vi fatomda modese,” lahame amu fet ozome esuhu labet modi imbodi Kristus fa Am Aiti uloholi bak niba nom ilu ab bakdateleham bak. Labiha labe, “Am Ai Ala akatihasu modem Alat modela?” laham bak lam Yesusat dam bake modi ozobohudi ab fi gatei neàdeham bak.
20. Asum ahoba iuba modealahana lamti bak niba modealahana nimti labihasu ahebu Alat fa Amti vazisi vahelo modemu ab ozoham. “Em Adat Kristus fa bake nom olu damat Am ve ut tetehesuhunaso laba esu paku dou elose,” lahame ozome ab nom oluham bak. Am Adat lam ame ut tetehesuhunaso laba eloi Am vasea veàtoho labet modi na ahebu amu Alati vaitesuhu bak lam fa Alati ab vahe vahedaham bak.
21. Um ahebu amu di iube gi faina ozodume meedam bak tadehe bak. Labiha labe um ahu gi fa Ala bake fakemoho damat modem labe ba Amti vazisi fa vahehe vab damat modem bak.
22. Lahadamnàme Alat ozahit etei umti fa Amti vazisi ab vaheham bak. Am Adat damat ve oteme vasea veàtoho labe labihaha bak. Am Adat Kristus ba um vou le Am Aiat avaesdam laba vou dozeadam di um ba fai bak meedam vaba gi Alat Aba Aho gagoho im lamota fi hasi meedam labe meit vàlu gagom biemna gi neàbodehena vou le vou dozeadalo modem bake labihaha bak.
23. Uho nehasu meedam bohu vuusdam bake Kristusat labihalo modem bak. Ubu uho amu Kristusat meedaha Im Neàna laba lab tu vuzehi meedaha bak lam bedem vaba abo laodoamsu teudi gi labihasu bohu vuusdam bak ame. Labi laha uho amu ame Im Neàna lam meit uba le vameadahana uho alimeat ahamte aihi di iube uho neha, “ ‘Alat ba iba neà bak mode tame,’ lahame Aba Aho lab fet gagu esuhu im lam ba imbodem bak,” lahame amu lab tu vi ozodam bak lam gi ame baket meedamna bohu meedam bak ame. Uho labihadam labe Aho ba um vou le Am Aiat avaesdam laba vou dozeadam di gi neàbodehena vou dozeadam bak am tame. Neham bak. Ame Im Neàna lam gi modem imot modem vabak. Abo iuba le vameada. Iuba le vameada. Lahadume dam dua bak labe aidam Im Neànat modem bak. Labi laha Alat Aho eba modi eho ame Im Neàna lam vou vameatedamda meidateli ame Im Neàna lam eho dam bake vou vameatedam im am bak. Labiha labe ubu uho amu ame Im Neàna lab tu vuzehi meedaha bak lam uho gi labihasu bohu vuusdale.
24. Damat em si sel niba ousu geàdam bak nim gi um Kolose dam modi neàdem bake ozome eho ozahit deelehat geàdam bak. Kristus bake tu vuzehi vahi meedam dam abo Kristusam soabobu ozomom dam laba vabiedume neàdi teudedam bak laba ozome eho gi ozahit Kristus labe Aba Aho amu geàdam bak lam fa vi vouhome susulo vou geà ladume Aba Aho ozome eba gagoho bak laba fusi neàdi vaitolo eho gi ozahit deelehat geàdam bak.
25. Alat ozo, “Im Abada gi zohali vooho vaba abo ahebu um Yahudi damat modem vab damat esuhu bak ahebu uloholedume um ozobohudedase,” laham bak ozome Aho eba gagu eho fa dam Kristus bake tu vuzehi vahi meedam dam ahebu laba vabiedume neàdedam datelehe bak.
26. Aham di iube Alat Am im dam bake fi zeam bitoho vaba vastehe labe damat biehe bak. Lahana etei nim Aba tu vuzehi Am damalehe dam laba Aho modi fa ab fi zeam bitoham bak.
27. Alat amu neha, “Aho um Yahudi damat modem vab dam laba neà bak mei neà bak meime mode tame. Abo Am Adat Kristus labe Aho uba modi Amti ozahit vou ali ahu vàmadi meeda tame. Labi ame bak labet fa uba neo modi uho nehasu tu vi ozoda, ‘Làhà. Ala bisi feàda labe fa iba bakdate laha ba diamut Am feà bak lam iba laha modi vizi im fa tau feà damali bohu vuusdà?’ lahame tu vi ozoda tame,” laham bak lam, “Im Am damalehe dam nibe iho fà ozobohudedase,” lahame Aho ame im lam etei iba ahit modi ab fi zeam bitoham bak.
28. Kristus labe Aba Aho meedaha Im Neàna lam iho dam debu iudu iumti iudu iumti vou vameatedam bak. Abo, “Uho faina meedaha bak voedume fa vei neàdi ahu vàmadele,” lahame iho im ozobohu aabodehe bak labet iademe fi desi vou vahoketedam bak. Iho ba diamut ame dam Kristusti vou ali ahu vàmadeheda zi lam fa Ala labe Aho avaesdam bak laba vou dozeadam di gi neàbodehena vou le dozeadam bak ozome labihadam bak.
29. “Ame bak lam modi neàdese,” lahame eho gi vanamamna geàmu keàtet Alat eba gagohona meedam bak. Abo Kristusat meia modi vizi teudemna feà lam Aho eba laha modi vizehe labe labihadam bak.
1. Um biem bake, “Um fà ozobohudese,” lahame vameadalo modem im nidi nim nasi aimale. Umti dam num debu Laodikia laba azihi dam lamti labi dam em biemda totbaho zi lamti labihasu ahebu um neàdem bake eho ahit keàtet meedam bak.
2. “Ame dam lamti umti uho ot deeliame vabademsu meedam labe ubu uho Ala bake lab tu vuzehi meedam bak lam fa teudi keàtedi labaha bohu vuusdase,” lahame eho ahit keàtet meedam bak. Labi laha Alat amu di iube neha, “Am Adat Kristus laba modi Aho fa um Yahudi damat modem vab damti ozahit vou ali ahu vàmadi meedase,” lahame Aba Aho amu lab fet gagu ahumdi esu vastehe im lam, “Aho fà uba modi uho ame im meida vekem vaba abo ahebu ozobohudi fi gatei neàdedase,” lahame eho labi ozome ahit keàtet meedam bak.
3. Alat amu neha, “Am Adat Kristus lamti fa um Yahudi damat modem vab damti vou ali ahu vàmadi meeda tame,” lahame Aba Aho amu fet gagu ahumdi vasti esuhu im abo modem feà imot modemna lam uba modi abobo ozobohudi fi gateheda Kristus ame Da am bak.
4. Meit uba ba li keobaedam im labet uba modi uho aime ahusobuli vuzehem bak labna zohàme eho vou faovoi uba labi vameadam bak.
5. Neham bak. Em soabota niba aidalo. Lahana em it gi uba lab bak. Em ba um vabi voom vaba gi uba vi ozodam bohu meedam bak. Uho ot deeliame vabademsu meedam bak lamti ubu uho Kristus bake lab tu vuzehi meedam bak lam uho gi keàtet meedam bohu vuusdam bak lamti lahaha bak lam em abo ozobohudi neàdehe labe em gi deelehat uba vi ozodam bak.
6. Emti vahi Kristus bake tu vuzehi meedam dam oa, uho amu neha, “Boehàda Yesus iba vuusu im Abadata meedase,” lahame Kristus Yesus bake tu vuzehi vou ali ahu vàmadi meedàmu uho gi ame im lamohodata vou meedam bohu vuusdale.
7. Labi ame bak lam meedam di ut omnao labe bak adba iuba nom ilu teudem bakti ulohona meit uba ahamte le ame im imbona vahokedahana lam mahate tu vuzehi meedam bohu vuusdale. Labi laha abo num mom di ut mei ut meime zisit làbome teudem bakti ulohona ubu uho Kristus bake lab tu vuzehi meedam bak lam gi labaha bohu vi meedume teudedale. Labi laha Epafras amu uba Alam im imbona vou le vahokedaha di lam uho aime neha, “Imbote,” lahame vuzehehe bak lam gi labaha bohu vuzehi meedam bohu vuusdale. A mu vaitomule. Labi laha Alat uba neà bak meedam bak lam laha Ala bake, “Neàte,” lahame mahate dihasi vou baeda. Labi neo dihasi vou baeda. Labihadam bohu meedale.
8. Meit uba le vou foholo bakdat ibi iho ozom im abo im modem bak vab im lam abo meia vagem im lam vahokedume uba modi um aime vuzehi meedam bak labna zohàme it vou faovoi iademe meedale. Neham bak. Ame im lam gi dam bakda labe ihimo ahulat modi vameadume baleàlehe imot modem bak. Abo dam vàhàdem bak labna zohàme dam ihimo bak niba ostam im gagu fi hasi meedam imot modem bak. Ba Kristus labe Aba Aho ozome gagoho imti ulohonat modem vabak. Labihàmu uho abo it vou faovoi iademe meedale.
9. Eho gi neham bak ozome uba labi gagoho bak. Alat Aba Aho modem bak lam ahebu fa Kristus bake modesuhu labe Alam itbaho fatoi dateleheda Am am bak.
10. Labi um lahaha bak. Uho Kristusti vou ali ahu vàmadehe labe Aba modesuhuna lam ahebu fa uba modesuhu labe Kristusam itbaho fatohoda um am bak. Ame Da Kristus lam asum doni beaba bak laba azimna labe im boehàda zi lamti bak niba boehà damalehe da zi nimti ahebu vafozi bisi feàda Kristus am bak. Ame Da labe Am itbaho fatohoda um amemu meit uba le vou foholo ame bakdat ibi iho ozom im vahokedume uba modi um aime vuzehi meedam bak labna zohàme it vou faovoi iademe meedale.
11. Uho Kristusti vou ali ahu vàmadehemu uho faina modelo àhàkedam bak lam Aho fa faamome seddaha labe um ab Alam damaleham bak. Yahudi damat neha, “Im Alam damaleheda im am bak,” lahame gagolo im laso aubehà sokba ukboho bak lam gi damat fet aame ozobohudem bake gi auet modehenat modem bak. Lahana uho faina modelo àhàkedam bak lam fa lab faamome seddaha bak lam gi Kristusat Ahamo im ahu ad laba modehenat modem bak. Ba bakdat auet veioi setem vabak.
12. Labi laha meit um vuu valo baptisleidaha di lam umti Kristusti vahi eloi baumsuhuna ozomomna modehe bak. Labi laha ame di labe damat um vuu vao labet vousaha bak lam gi Kristusti umti eloho bak labet modi fa ahedi usahana ozomomna modehe bak. Uho neha, “Ala feà labe fa Kristus bake modi Am eloho bak labet modi fa ahedi usaha bak,” lahame labihasu tu vuzehe labe labihaha bak.
13. Labi laha um Yahudi damat modem vab dam labe uho amu Kristus bake tu vuzehehe vab di ium um gi Alat Aba Aho fi hasi gagu vàmadi esuhu im zidazedam bak ame. Labi ubu uho modi baleài faina modelo àhàki ahulat ozodamna lam fa faamome seddaha vab damat modem bak ame. Labihasu meedam labe um gi Alati vaitesu godam damat modem bak. Labihadamnàme Alat ozahit Aho amu Kristus eloho bak labet modi fa ahedi usaha bakti ulohona uba modi fa vizi um fa gàhàli Alat Aba Aho ozoho im lam uho fa ab meedamam bak. Labi laha iho faina meedaha bak lam ahebu Alat gi ozahigeàmu fa faamome ab vei neàdedaham bak.
14. Ame bak lam gi neham bakti uloho bak. Alat amu dat ahamda Musa bake gagu fi hasi esuhu im zi lam iho meedaha vabat faidi zidazehe bak lam Alat ozobohudi, “Im beome fa vatause,” lahame iba vàlu toedaha sunit lam Aho naedat fa ozahigeàmu ve fa faatoho bak. Aho ba iba vàlu beom bak vaba gi ab seteham bak. Am Adat Kristus damat ve ut tetehesuhunaso laba paku dou eloho bak lam Aho ahit uledi meedaha labe labihaha bak.
15. Labi Kristus damat ve ut tetehesuhunaso laba paku dou eloho di labe Alat laha ame di labe asum doni beaba bak laba azimna labe im boehàda zi lam ahebu Aho beodume nembedi Aba ba ot odosidam vaba gi ab modem bieham. Aho gi, “ ‘Ame na zi lam feà kaio,’ laham bak lam dam bakda ahebu aame ozobohudese,” lahame Aho ahit uledi Am Adat Kristus lam damat ve ut tetehesuhunaso laba ahate paku dou eloho bak.
16. Labiha labe meit uba le nehameam, “Ibi iho tu vuzehi meedam bak nim uho vi tau nehasu meedam vabameam Alat uba beoda tame,” lahame labihasu gagomeam làhà gi ailahigeàmole. Neham bak. Na àm fi hamna modeo, udem fi hamna modeo, tahun vàmtea labe ibi ihimo vi ozome gagu fi hasi vahi deelehat Ala bake vou baedume na àdam digat zi modeo, ala gàhàda futom di meedam im modeo, gi azibe im digat hari Sabat fum di meedam im modeo, labihasu gagu fi hasi meedam im zi lam uho laha tau fi ham vabak laba damat uba aame feàtàme tozodameam làhà gi ozahigeàmole.
17. Eho gi neham bak ozome uba labi gagoho bak. Dam vàhàdem bak labna zohàme dam ihimo bak niba ostam im gagu fi hasi meedamna zi lam bisi imbona modem kaio. Gi fet vouhodamna abo ala it nasi aam bakti ulohonat modem bak. Labi ame da so ba aame ozobohudem bakti ulohona Kristus uba neà bak meedam bak lam um ab aame ozobohudi nehi vi ozome gagodamam bak. “Amu lab fet vouhodaha bak lam fa voou Kristus bisi imboda lehemu iho ab tu vuzehi meedam ame?” lahame ozobohudemna am tame.
18. Meit uba le nehameam, “Ibi iho tu vuzehi meedam bak nim uho laha vi tau ahu adat iedi vou baedam vabameam Alat uba beoda tame,” lahame labihasu gagomeam làhà gi ailahigeàmole. Neham bak. Ame dam labe Ala bake vou baedam vaba vedi Am im gagu vou usemda zi laba, “Feàte,” lahame ahu adat iedi vou baedam dam labe vedi neha, “Em im vabda modem bak,” lahame gagodam damat modem bak. Lahamnàme ame dam labe iho dae feà damat vasti vageme uba nehameam, “Ibi iho Ala bake vou baedam bak nim uho laha ame baket tau meedale,” lahame uba ootedameam làhà um ba a aimule. Labi laha ame dam labe im ibi bak lam um mohemu vedi fa uba feàtàme tozodameam làhà gi ozahigeàmole. Neham bak. Ame dam labe ibi iho edehesi fako bakamta aasdume aahana lam dam bake fi desi vameadam di neha, “Im abo im feàna aaho,” lahame iba it daetbadam labe dam bake fi desi im bohulana vameadam damat modem bak. Lahana giomimot modem bak. Ame dam labe gi ahusobuli ostame daetbadam bak. Alat Aba Aho ozoho bakti ulohona meedaha vab damat gi ibi ihimo dam bakdat ozoho baket faina meedam bak laba ozome meedam damat modem bak.
19. Im Boehàda Kristus labe vuusu im vahokedam bak lam ba vi tau meedam vab damat modem bak. Abo gi sobu damat ahu seti ba im vi ozome modem biem bakti ulohona meedam damat modem bak. Iho Kristus bake tu vuzehi vahi meedam dam nibe ibi iho lab tu vuzehi meedam bak lam iho ahu fi goaitoho vaba abo vabademsu teudedume meedam bak lam debu meedamda gi Kristus am bak. Abo Alat Aba Aho fet ozoho baket meedamda Am am bak. Abo im dam so ad niba modealadaha aligat fau lamti aliso lamti labet teudi dam so teudem bakti ulohona ab meedamam bak.
20. Kristus amu eloho di lam um Amti vou ali ahu vàmadehemu gi umti vi tau elohona ozomom bak. Ne lahana uho akati Ala bake tu vuzehem vab dam labe ibi iho bak damat ostam im fi ham bak faasi meedam bak laba um fa vi tau meedàla? Im gi elohona ozomom labe ba iho vi modem biehena ozomom bak. Labihàmu dam bakdat neha, “Lada lam a vuusumule. Fiham bak tame. Lada lam a àmule. Fiham bak tame. Lada lam alihi a ulamule. Fiham bak tame,” laham im lam uho akati fa neo vi tau fi hasi meedàla?
22. Um ozom vaba? Dam bakdat osatm im ozome fi hahana lam gi bak niba modeme setidamna akati bisi fi hasi gagoidàla? Ame fi ham im lam ba Alat gagoho vaba gi dam bakdat ihimo ahulat ozome gagu fi hasi vou vahoke usehe imot modem bak.
23. Ame ostam im lab gagu fi hasi esuhu im lam meedam dam lam dam amomoit aame ozomta ame dam lam gi im ozobohu aabo dam tiba. Neham labe labihaha bak. Ame fi ham im vuusdam di ba im amomoi vuusdam vaba gi dam ihimo fi hasi gagoho im lamota tombali vuusu meeda. Labi laha ame dam laba modi, “Im dae vab damat modem bak,” lahame gi ahobat neàdi meeda. Labi laha ihimo naedamat im so it modi geàda. Labihasu meedam imot modem bak. Laham im fi hamna labihasu damat uledi vi tau meedamnàme ba ibi iho faina modelo àhàkedam bak lam ame im fi hahana labet modi, “Im fa mose,” laham bak ba modem vabak. Gi labaha bohu vuusu faina meedam bak. Labihàmu dam vàhàdem bak labna zohàme dam ihimo bak niba ostam im gagu fi hasi meedamna zi lam um a uledi vi tau fi hasi meedamule.
1. Alat amu di iube Kristus Am eloho bak labet modi fa ahedi usaha di labe um laha gi elohona ozomom bak labet modi fa ahedi usahana ozomom bak. Ame bak lam gi neham bak. Alat uba modi fa ab im gàhàdi vou ladamam bak. Labi um fa im gàhàdi vou ladàmu uho gi Alat asum ahoba iuba Kristus bake modi Amti feà Dateli fa Am ahi totbaho laba modesu ahili na ahebu vuusdam bak iuba um ahu gi laba vitasu ozodale.
2. Dam bakda nibe ibi iho faina ozome meedam bak laba tu vi ozodam bohu vuusdam bak lam uho a vi taulo àhàki meedamule. Uho gi um ahu asum ahoba iuba vitasu ozodam bohu meedale.
3. Eho gi neham bak ozome uba labi gagoho bak. Um gi elohona ozomom labe uho amu faina meedam bak lam ba vi modem vabiem bak. Labi laha Kristus lam fa Alati vahi asum ahoba iuba ahili vàmadehemu uho Kristusti lab vou ali ahu vàmadi im fa gàhàdi meedam bak lam damat ba aam vabiem bak. Gi asum ahoba iuba vou ali ahu vàmadi meedamnat modem bak.
4. Lahana umti vou ali ahu vàmadi uba modi fa im gàhàdi meedamda Kristus lam Alat ba diamut Aba ahate modi fi zeam bitoi tombalelo modem di labe Aho Alam na feà lam Aho fa modesu fauhali feà Dateli nom ilu tame. Labi ame di labe um laha Amti vahi ame na feà lam uba modesu um feà damalelo modem bak lam ahate modem labe damat aada tame.
5. Ubu uho bak niba faina meedalo àhàki ozodume baleàhà bak lam ahebu ba a vi ozome meedamule. Nasi ahebu mu voedume seddale. Abo dat eloi seti im aho ozomna meedam biem bakti ulohona meedale. Abo im nehamna voedale. Ostame fi loholi ot vai ot vaidam bak ahebu ame. Labi ahate modem bak ba ladem vaba aam ahasbeam im ahebu meedam bak ame. Labi laha ame na modehelahit ahu gukeme neo, “Vi modese,” lahame faozohobusu vou vabodam bak ame. Labi laha uho neha, “Imo fai bak nim meedase. Imo fai bak nim meedase,” lahame um ahulat modelo àhàki meedam bak lam ahebu ame. Labi laha uho neha, “Na lada lam iho neo vi vadase,” lahame soat ziemausi vadam bak ame. Uho labihasu meedameam làhà uho fa Ala bake tum vaba gi ame nazoh laba tum bak am tame. Ame nazoh lam fa alali uho vou baedamna am tame. Labihàmu eho etei uba lab faina meedam bak vameadaha im zi lam ahebu nasi mu voedume seddale.
6. Neham bak. Eho etei lab faina meedam bak vameadaha im zi lam damat ailahigeàmu meedam labe im Alat Aba Aho ozohoda lam meedaha vabake faki beoda tame.
7. Uho amu Alat gagohona vuzehi meedaha vab di iube ubu uho faina meedume baleàhà im lam gi labaha bohu meedam damat modem bak.
8. Lahana uho im faina nehasu ozome meedam bak nim ahebu etei nasi mu voedale. Abo meia faki meedam bak ame. Labi im gi koena aihina ahu gukeme gi kehàm vabna tufamoholem bak ame. Labi meia faki, “Mei fà beose,” lahame bisi fai bak la modi le modidam bak ame. Labi meia feàtàdam bak ame. Labi meia gadam bak ame.
9. Labi ot vagei ot vageidam bak ame. Labihasu ahebu nasi mu voedale. Ubu uho amu faina meedam bak modi baleàhà bak lam gi ab mu voedaham bak. Ba akati fa vi meedalo mode?
10. Labi etei Alat fa uba modi um fa im ab gàhàdi meedamam bak. Abo im bakda modeheda Ala labe, “Am itbaho fatose,” lahame dihasi uba vabiedume gàhàleda. Labi dihasi neo uba vabiedume gàhàleda. Labihadam bak. Uba vuusdam Ala, “Akatihasu meedam Alat modela?” laham bak lam um biem bake, “Uba modi um abo ozobohu aabodedase,” lahame Alat ahit uba labihadam bak.
11. Alat iba labi vabiedume gàhàledam labe iho ba nehasu ozome gagodam vabiem bak. “Da lada lam Yahudit modemda ame. Labi da lada lam Yahudi dàt modem vabda ame. Da lada lam laso aubehà sokba ukbohoda ame. Da lada lam ukboho vabda ame. Da lada lam bahagikida dae ibida vameadam biemda alimda ame. Da lada lam ahusobuli ostame meedamda ame. Da lada lam mei na teo meedamda ame. Da lada lam mei na teo meedam vaba ahamo ozome meedamda ame?” lahame ba, “Ana damat modela?” laham bak lam ba bisi ozodume gagodam vabak. Neham labe labihaha bak. Na ahebu ozodam di bisi feàda Kristus am bak. Aho gi ozahit im ahebu vou ali ahu vàmadehe bak.
12. Alat uba abo deeli meedam labe neha, “Umota fi hasi vuusu Am damali im Abadata fà meedase,” lahame gi amu di iube fet ozome esuhu labe um ab vame Am damaleham bak. Alat uba labiha labe uho gi nehame meedale. Meia aam faimu ot faobekesiame ahu im neà bakta ot vabiei ot vabieidam bak ame. Labi laha im ubuda daetesu meedam vaba gi feà vab damali ladehebeat im vameadam tadedam bak ame. Labi laha meia na im meedam di gi ahu neà baket meedam tadem bak ame. Labi damat uba git meedam di modeo, im fai bak duzum di modeo, uho gi ozahigeàmu laha vou faodam bak ame.
13. Labi laha meit uba git modemeam uho ot vam vabna gi ozahigeàmu labaha bohu laha ot vou faoi ot vou faoidam bak ame. Labi laha im Boehàda Kristus labe Aba Aho amu uba lab ozahigeàmu fa vei neàdedaha bak lamti ulohona meit uba fakem im eheda laba uho gi ozahigeàmu fa ot vei neàdi ot vei neàdidam bak ame.
14. Labihasu ahebu ot modidale. Lahana uho ot deeli ot deeliame modidam bak lam bisi tombu labe voom maemda am bak. Uho im lada lam meedam bak labet modi um abo vabademsu neàbodem bak am tame.
15. Uho Kristus bake tu vuzehi vahi meedam dam zi mei dam zi mei lahadam dam laba Alat uba nehi ozo, “Uho bak ubuda laba im uho vi ozodume meia fakehe vaba gi ot vahi ot vahidase,” lahame Alat amu labihasu ahit fet ozome esuhu labe um vame debu ab vàmadeham bak. Labihàmu Kristusat uba modi uho ot vahi ot vahidam bak lam vàhàdem bak labna zohàme iademe vou faovoi meedale. Labi laha Alat uba neà bak meedàmu uho Aba laha, “Neàte,” lahame vou baedam tadele.
16. Labi laha, “Kristus akatiham dàt modela?” laham im meit vameadahana lam uho amu nasi faasi aidume fota ozobohudehe bak lam laha mahate neo vi aime ozodume ozobohudi neàbodedale. Abo uho amu ozobohudehe bak lam vi susume iademe ot vahokei ot vahokeidale. Labi laha meit git meedam bak labna zohàme iademe im ot vahokei ot vahokeidale. Abo damat vahi Ala bake, “Neàte,” lahame vazisi vou ladeedam dae lam modeo, labi Alam Aha Nutabe Neàna labe meia modi vizi Ala bake vou ladeedam dae lam modeo, labihasu ahebu ototo vou ladeeidam labe Ala bake, “Am abo feàte,” lahame um ahu adat iedi vàmadi vou ladeedale.
17. Labi uho amu neha, “Boehàda Yesus iba vuusu im vahokedam dam im am bak,” lahame gagodam dam labe ame im ulohodesu meedam bake im ubu uho meedamna modeo, im ubu uho gagomna modeo, labihasu ahebu gi iademe meedale. Labi uho ame bak lam meedam di um Yesusti vou ali ahu vàmadi meedàmu im Ai Ala bake, “Am abo feàte,” lahame tom vou baedam bak meedale.
18. Lahi dam eheda oa, uho neha, “Iho Boehàda Yesus Amti vou ali ahu vàmadi meedam lahit modem bak,” laham lahi labe um damat uba gagom im lam uho uledi meedam tadele.
19. Labi dam lahi eheda oa, lahi ubudate uho deeli iademe meedale. A faki dae meona beàdamule.
20. Data zi oa, uho um ai modeo, um oi modeo, uba gagohona ahebu uledi meedam tadele. Alat uba deelem bak laba ozome labihadale.
21. Um dam data eheda zi oa, uho um data bake im vahokedam di bisi, “Data fà iedese,” lahame a dae meoli feà bak fusi bebet im vahokedamule. Uho labi modemeam làhà fa uho deelem im modem bili gi ab momam bak.
22. Um mei na teo meedam dam oa, uba na ooteme meedam dam labe ibi iho gagohona ahebu gi ozahit uledi meedam tadele. Gi uba aasuhet meedam di lamota a meedamule. Abo uba aam vabnàme gi ozahit ahebu uledi meedam tadele. Labi laha ame dam labe iho uba deeli vou baedam bak lamota a vi ozome meedamule. Gi im Boehàda Yesus laba deeli vou baedam bak laba ozome, “Am abo feàte,” lahame ahu adat iedi Aba vou baedam labe fa neo uba na ooteme meedam dam labe ibi iho gagohona ahebu gi ozahit ahu vàmadi meedam tadele.
23. Labi laha uba gagohona uho meedam di a odohalehebeat meedume, “Zoho voose,” lahame a ozome meedamule. Abo gi ozahit ahu vàmadi neà bak ozome meedam bohu meedume aba gagoho bak fusi novale. Abo uba gi bak niba na ootedume meedamda labe uba gagu aim vabna abo im Boehàda Yesusat uba gagu aidamna ààmom bak.
24. Uho lab teo meedaha bake ba diamut gohali vamna lam abo Alat amu neha, “Aho lo tame,” lahame amu fet ozome esuhuna lam im Boehàda Yesusat uba lodam bak um ozobohu labe labihadale. Nasi ozomale. Bisi uba im gagu meedamda imboda Boehàda Kristus Am am bak.
25. Labi laha uho meit bisi dihasi faina meeda. Labi dihasi neo faina meeda. Bisi labihasu meedamda lam aba aho faina meedaha bak lam Alat fa ulohodesu modi vataum bak tadem bak. Dam ba fi me beodam vaba gi ostame beodume vataudam Alat modem bak.
1. Labi um meia na ootedume meedam dam oa, uba laha na ootedume gagu meedamda abo uba vi gagu aimda asum ahoba iuba ehe bak. Labihàmu ubu uho na gagu teo meedam dam laba a git meedamule. Gi iademe faobekesi vabiedam labe gagu na meedale.
2. Uho Ala bake lab tom gagodam bak lam ba mu voom vaba abo gi keàtet bohu vuusdale. Labi uho tom gagodam di labe a izeo àhàki lavoime git ozome tom gagodamule. Labi laha Aho iba neà bak meedàmu, “Am abo neàte,” lahame laha tom vou baedale.
3. Labi laha uho Ala bake tom gagodam di iba laha vi ozome tom gagodale. Abo Kristus labe Aba Aho meedaha Im Neàna lam Alat amu dam bake vastehena fa etei modi fi zeam bitoho im lam iho dam bake neo ahate vou vameatedam bak lam, “ ‘Zie akete?’ laham bak Alat iba modi tombali im ozobohudi fa dam bake neo vou vameatedam bak bohu tadese,” lahame labi tom gagodale. Neham bak. Damat em si sel niba ousdam bak nim debu eho ame im lam vou vameatedaha labe labihaha bak. Lahana gi ozahit tom gagodale.
4. Labi laha eho dam bake ame im lam ahate vameadam di, “Eho gi damat aim bibana taho aime ozobohudemna vameadase,” lahame Ala bake tom gagodale. Neham bak. Alat eba gagu vàhàdehe labe ame im lam eho ba vameadam mom biem bak.
5. Labi uho dam Kristus bake tu vuzehem vab dam lamti vahem di uho git meedameam dam tuhu vabda labe vi aame Kristus bake tu vuzehem mom bak labna zohàme iademe it vou faovoi ozodam labe meedam tadele. Vahe vahedam di labe ame im lam vameadam vaba alia a modemule. Abo vameadam tadele.
6. Labi laha Kristus bake tu vuzehem vab dam laba uho ame im lam vameadam di im fakehebeat vameadam vaba abo gi ozahit deeli im damat aim bibana taho aime iademe ozobohudem bakta vameadale. Ame bak lam abo garam voou na nu neàdem bakti ulohote. Ame im labihasu vameadam labe ba damat aime mom vaba abo ailo àhàki uledi aime vuzehem bak am tame. Uho labi modemeam làhà meit umti ot odosiam im vameadam di, “Iademe fa vameadam bak akete?” laham bak lam um ozobohudi fa vameadam bak am tame.
7. Emti vahi Kristus bake tu vuzehi meedam dam oa, ebe eho niba meedam im nim ahebu faobe Tikikus uba le vameada tame. Ame da Tikikus lam imti vahi Kristus bake tu vuzehi meedamda abo ibi iho deelemda meida am bak. Abo imti vahi im Boehàda Yesusat iba gagoho im meida vooho vaba iba tau keàtedi meedamda meida am bak.
8. Eho gi neham bak ozome ame da nim uba olulo modem bak. “Im akatihadàla?” laham bak um bili vi ozodam bak lam, “Fà aime ozobohudi um ahu modi deeli teudedase,” laham bak ozome uba olulo modem bak.
9. Amota olum kaio. Abo ibi iho deelemda Onesimus imti vahi Kristus bake tu vuzehi meedamda meida laha aba vi tau ahili olulo mozo. Ame da Onesimus lam umti vahi Kolose laba tau azimda lam laha im Boehàda Yesusat iba gagoho im lam meida vooho vaba abo ahebu ulohodesu meedamda meida am am bak. Lahamda lamti vei ahili uba olu iho niba meedam im nim ahebu uba le vameada tame.
10. Labi Aristarkus emti sel niba ousdamda meida nibe uba laha, “Neàte,” lahaho. Labi Barnabasti amedamelehada meida Markusat uba laha, “Neàte,” lahaho. Uho ame da Markus bake, “Akatihasu meedale?” laham bak lam eho amu uba vameahana um ozobohu bak. Labihàmu ame da Markus lam uba lafumeam làhà gi deelehat, “Neàte,” lahame gut gagu vale.
11. Labi dat Yesusam eeti fatahivahada am ee meida gagom Yustus lahamda nibe laha uba, “Neàte,” lahaho. Ame Yahudi dam làtela lam abo Aristarkusti Markusti Yustusti laham dam nibe iho Kristus bake tu vuzehehe labe eba tau dam bake im vahoketedume modi dam uledi, “Alat iba vuusu im vahokedam neàte,” lahame modi aime vuzehedam dam làtela am bak. Labi laha ame dam làtela nibe eba vabededume em ahu teudedam dam làtela am bak.
12. Labi laha Epafras lam abo Kristus Yesusat aba gagohona meedamda meida lam umti vahi num debu Kolose laba azihida meida nibe laha uba, “Neàte,” lahaho. Ame da Epafras lam gi keàtet uba Kolose dam laba vi ozome Ala bake dihasi tom gagoda. Dihasi tom gagoda. Labihadamda am tame. “Uho ba modem im, ‘Nehasu meedase,’ lahame Alat Aba Aho ozoho bak lam ahebu um ozobohudi neàbodi neha, ‘Lo modem neà bak,’ lahame keàtet laodoamsu meedume neàdi novase,” laham bak laba ozome keàtet dihasi tom gagoda. Labi neo dihasi tom gagoda. Gi labihadam dàt modem bak.
13. Ame da labe um neàdem bake aho faobekesi keàtedi uba vabiedam bak lam em ozobohu labe uba labi vameadam bak. Gi umota neàdem bake labihadam vabak. Abo Kristus bake tu vuzehi meedam dam num debu Laodikia laba azihi dam lamti num debu Hierapolis laba azihi dam lamti labihasu ozome laha keàtedi meedam bak lam em ozobohudi uba labi vameadam bak.
14. Labi Demasti dam vabiedamda dokter Lukasti dam behàsu nibe laha uba, “Neàte,” lahaho.
15. Labi laha imti vahi Kristus bake tu vuzehi meedam dam totbaho Laodikia laba azihi dam laba eho neha, “Neàte,” lahaha bak lam uho fa ve laha gagodale. Labi laha nam Nimfa lamti labi dam Kristus bake tu vuzehi vahi meedam dam num abada laba vahi meedam dam lamti eho neha, “Neàte,” lahaha bak lam uho laha fa ve gagodale.
16. Eho etei toedaha sunit nim eho gagu oluhuda labe aho uba vou lahazobe uho bakamta vazisi um dogoi vou faodahit aho aame vameadume neàdi uho fa neo ve fa dam Kristus bake tu vuzehi vahi meedam dam labe iho num debu Laodikia laba meedam dam laba vou le dam lam laha bakamta vazisi neàdi im dogoi vou faodahit uho laha neo aame vameadale. Labi sunit eho amu toedume Laodikia laba azihi dam laba oluhu sunit lam uho laha ve fa neo um Kolose dam bakamta vazisi neàdi um dam totbaho labe im dogoi vou faodahit ame sunit lam laha aame vameadale.
17. Labi laha dat Arkipus laba im ebeda nim uho laha vameadale. Eho neha, “Oho im Boehàda Yesusti vou ali vàmadehemu Aho oba neha, ‘Nehasu meedale,’ lahame Aho amu oba fi hasi gagoho im lam ahebu ulohodesu meedume neàdele,” lahaha im lam ame da laba vameadale.
18. “Neàte.” Eho Paulusat anekehà ebedat sunit zoho nim toeho. Uho neha, “Im nim meit toeha,” laham bak labna zohàme eho ahit uba labi vi gagoho. Em sel niba ousdam bak uho vi ozome tom gagodaha vaba a vabili voomule. Mahate tom gagodale. “Im Boehàda Yesus Kristusat Aho ozahit uba deeli im neà bak modi esuidase,” lahame eho uba vi ozome tom gagodam bak. Neàte. Eho Paulusat sunit nim toedume ab neàdeham. Àhàm.
1. Kristus bake tu vuzehi vahi meedam dam num debu Tesalonika laba azihi dam abo im Ai Alati im Boehàda Yesus Kristusti im damalehe dam oa, sunit nim iho Paulusti Silasti Timotiusti labihasu toedume uba oluho. Neàte. Im làtela nibe uba ozome neha, “Im Ai Alati im Boehàda Yesus Kristusti ahili uba ozahit deeli im neà bak modi esuidase. Labi uba modi um ahu faheme fi goaitom vaba gi vabademsuse,” lahame iho ozodume Ala bake labihasu tom gagodam bak.
2. Iho Ala bake dihasi tom gagoda. Dihasi tom gagoda. Labihadam di lam im ba um fa vabilem vabak. Iho gi ubu uho lab meedam bak laba vi ozome Ala bake, “Am abo neàte,” lahame tom vou baedam bak.
3. Labi iho im Ai Ala bake tom gagodam di labe uho neà bak nehasu meedaha bak nim iho vi ozodam bohu modesdam labe im Ai Ala bake tom vou baedam bak. Uho Kristus bake tu vuzehi meedàmu Alat Aho gagoho im lam uho meeda. Labi laha uho dam giida totbaho laba deeli meedam labe ame dam laba vi tau vabieda. Labi laha uho fet ozo, “Im Boehàda Yesus Kristus ba fa le tame,” laham bak laba uho um ahu nasi tu vou faodamdaleàmu damat uba vabidam di uho naedamat um ahu it vou faovoi ozodam labe ba vanamai mu bedi voom vaba abo gi ozahit keàtedi meedam bohu meedam bak. Uho im labihasu ahebu meedam labe iho vi ozodume Ala bake tom vou baedam bak.
4. Imti vahi Kristus bake tu vuzehi meedam dam abo Alat deeli meedam dam oa, Alat neha, “Um Am damalese,” lahame fet ozome esuhu labe uba modi um fa ab Am damaleham bak. Laham bak lam im ozobohudi fa Ala bake vou baedam bak.
5. Nehaha labe im ozobohudehe bak. Iho amu uba ahamte le im Boehàda Yesus labe Aho meedume vou esmoho Im Neàna lam uba vou vameatedaha di lam iho gi im lamota meedam labe uho aime tu vuzehi Am damalehe vabak. Abo Alam Aha Nutabe Neàna labe Aho Am feà lam iba modi vizi iho teudi ame Im Neàna lam uba vameadaha bak. Labi laha iho neha, “Im imbona modem bak,” lahame ame Im Neàna laba nasi tuhu bak lam um ozobohudehe bak. Labihasu meedaha labe uho laha tu vuzehehe bak. Iho amu uba le tau azihi di lam, “Ame im lam akatihasu meedam imot modela?” laham bak lam um biem bake iho uba tau vabiedam labe uho ab aame ozobohudeham bak.
6. Labi laha uho im nehasu meedaha labe Alat uba modi Am damalehe bak lam im ozobohudehe bak. Damat uba abo duana vabidume um alihi nemahusi geàdamnàme uho gi ozahit deelehat keàtedi meedaha bak. Abo amu damat Yesus bake vabidamnàme Aho gi ozahit deelehat keàtedi meedam bak lamti labi damat ba iba vabidamnàme iho laha gi ozahit deelehat keàtedi meedam bak lamti ulohona uho laha etei ame baket ab tau vi meedamam bak. Nehaha bak. Iho amu uba ahamte le ame Im Neàna lam uba vou vameatedaha di lam damat uba duana vabidam bak ehenàme uho gi ozahigeàmu iho vou lehe im lam aime deeli uledi tu vuzehi meedaha bak. Uho deeli uledi meedaha bak lam Alam Aha Nutabe Neàna labe uba modi vizi uho deeli uledi meedaha bak.
7. Labihàmu dam im Boehàda Yesus bake tu vuzehi meedam dam giida Makedonia bak laba azim dam lamti Akaya bak laba azim dam lamti labihasu damat uba vabidaha bak lam uho ozahigeàmu iho vou lehe Im Neàna lam uho aime uledi tu vuzehi keàtedi meedaha bak lam ame dam labe vi aame fa neo ame baket vi vouhodam labe keàtedi meedam bak.
8. Nehaha labe iho labi gagoho bak. Ame Im Neàna lam iho uba vou le vameadaha di lam uho aime uledi tu vuzehi keàtedi meedam labe uho fa neo ame Im Neàna lam vou vameateda. Labihàmu ubu uho lab meedaha bak labet modi ame im aidaha dam labe fa neo ame baket modi Makedonia bak lamti Akaya bak lamti labihasu azim dam laba le ab fi goaitoi vou mode ladume uloholedaham bak. Lahana uho Ala bake tu vuzehi lab meedam bak lam gi bak netàda lamota ame im lam aime novaha vabak. Abo dam bak bohula bake esuhu dam iudu iumti iudu iumti ahebu meit vou vameatedume uloholehe bak. Labihàmu iho ba bak iuba lào? Bak iuba lào? Lahadam di lam uho amu Ala bake tu vuzehi lab keàtedi meedaha bak lam iho bak mei bake azihi dam laba iho ba vameadam vabak.
9. Neham labe labihaha bak. Ame dam labe ihimo ozobohudi fa iba nehasu nasi gut vameadam bak. Iho amu uba ahamte le tau azihi di lam, “Im akatihasu meedam damat modela?” laham bak lam um biem bake iho uba tau vabiedam labe uho ozobohudehe bak lam ame dam labe laha ozobohudi iba gut vameadam bak. Labi laha uho amu damat na ostamna it auet modi alali vou baedamna zi laba ahu adat iedi, “Abo feàte,” lahame vou baedam bak lam fa mu voou fa Ala imboda abo elom gikina ahe neàna bohu vuusdam Ala abo Im feàna modem Ala laba fa tu vuzehi vou baedume im Aho gagohoda uho meedam bak lam laha iba gut vameadam bak.
10. Labi uho fa Alam Adat asum ahoba iube fa bak niba lem bak lam uho um ahu vitasu vou faodam bak lam laha iba gut vameadam bak. Alat Am Adat lam damat amu Am oteme eloi usi behàsdi Alat modi ahedi fa usaha bak. Ame lab eloi fat ahedeheda lam Yesus am bak. Alat ba dam Aba tu vuzehem vab dam faki beodalo modem di iho Aba tu vuzehehe dam fa soat vausu fa vei neàdedamda Am am bak. Uho ame Da labe asum ahoba iube fa bak niba lem bak lam uho um ahu vitasu vou faodam bak lamti uho lab meedaha im totbaho lamti ahebu ame dam giida ozobohudi iba im labihasu gut vameadàmu iho ba akati aha ibidat ame dam laba vameadà?
1. Imti vahi Kristus bake tu vuzehi meedam dam oa, iho amu uba teohe le tau azihi di lam iho uba le meedahana lam gi vàhàdeme seti im fa neo bak iuba laha vabak. Abo modi imbodehe bak. Lahaha bak lam um ba biem vaba abo ozobohudehe bak.
2. Iho uba lehe vab di iube amu nasi num debu Filipi laba le tau azihi di labe ame bak dedam labe iho vou lehe im lam mu iba faki feàtàdume vabidume im alihi nemahusi geàdam bak lam um ozobohudehe bak. Labi iho neo uba li modeha um Tesalonika dam totbaho labe neo iba ame baket meedam labe iba gut mali odosi meedaha bak. Iba labihadamnàme ibi iho vou baedam Ala labe Aho iba modi teudi im meia iedem vaba gi ozahit uba Alam Im Neàna lam uba vou vameatedaha bak.
3. Iho bak ubuda iuba lào? Bak mei bak iuba lào? Lahadam di lam iho ba im nehasu meedam vabak. Iho gi dam bake neha, “Yesus bake tu vuzehi meedale,” lahame dam bake vi vameadam di lam im ba im giomimna tu vuzehehena fa dam bake git vi vameadam vabak. Labi laha iho im ahu adat git vi ozodam labe ba dam bake le Alam Im Neàna lam vi vameadaha vabak. Labi laha iho dam bake ame im lam vi vameadam di lam ba meia ahi vagelo ame im lam vi vameadume afoezobe meia modi Yesus bake tu vuzehedam vabak.
4. Im gi fa nehame meedam damat modem bak. Alat ahu ibida nasi nabidume vi ozobohudi neàdi uledi iba neha, “Am Im Neàna lam iho fa dam bake vou vameatedam neàte,” lahame uledi iba ab gagu oluham bak. Labihàmu ame Im Neàna lam iho dam bake vou vameatedam di lam, “Damat iba fà deelese,” lahame iho ba keobaedume vameadam vabak. Iho dam bakda nibe im meedam di im ahu adat git ozome meedào? Neà bak ozome meedào? Laham bak modi ozolo modemda Ala Am am bak. Labihàmu im gi, “Alat fà iba deelese,” lahame ame im tombuda lam iademe vou vameatedam bak.
5. Um ozobohudehe bak. Iho ahamte uba le ame im lam vou vameatedaha di lam, “Uho iba deeli im ibida fà uledi tu vuzehese,” lahame uba ahit keobaedume vameadaha vabak. Labi laha iho neha, “Im dam iuba le vahokedume dam labe fà iba doi lodase,” lahame ahu adat aa ozome vasti ahobat neà damali uba le ame im lam vou vameatedaha vabak. Iho etei lab vameadaha bak lam, “Imbote,” laham bak lam Alata ozobohudehe bak. Im ba uba giomim vameadam vabak.
6. Labi laha iho bak ubuda laba laha di modeo, fa bak iudu iuba laha di modeo, ame im vou vameatedaha di lam, “Im feà damali uho modeo, dam iudu iube modeo, iba fà deeli vou baedase,” laham bak lam ahu adat ozome vasti ame im lam vou vameatedaha vabak.
7. Lahana iho ozoha, Kristus Aho amu iba neha, “Aho vameadume vou esmoho im lam iho vou vameatedale,” lahame iba gagu esmozi laiam dam totbaho amemu, “Uho iba, ‘Feàte,’ lahame ahu adat iedi na àmna iba lodale. Sue iba lodale,” lahame vi tauledam neànàme iho gi ozahigeàmu labihasuhu bak. Iho amu uba le tau azihi di lam ame bak lam meedaha vaba gi dae nemahuba neàna uba vameadaha bak. Abo um oi labe im data iademe vabiedam bak lamti ulohona meedaha bak.
8. Iho uba duana deelehemu iho gi ule neàt ame Alam Im Neàna lam uba vameadaha bak. Lahana im gi labiham bakta uba modehe vabak. Iho uba bisi deeli meedàmu uba ame Im Neàna lam vou vameatedam di labe gi modem vanamamnàme im gi ozahit faobekesi uba tau vabiedam bak.
9. Iho amu uba le tau azi ame Alam Im Neàna lam uba vou vameatedaha di lam ihimo keàtedi mei na meedume fa doi vadam bak lam uho ba vabilem vaba abo aame ozobohudehena taia? Iho nehi ozome meedam bak. “Iho uba Alam Im Neàna lam vameadam di labe uba na modem bake ahumdi meedameam um vanamamna ozomo?” laham bake ihimo ozome iho na àm bakti sue vam bakti labihasu ihimo ozome mei na meedume doi vadam bak. Abo digad diat meeda. Aibu diat meeda. Labihadaha bak.
10. Um laha neham bak vi aame ozobohudehena taia? Um Kristus bake tu vuzehi meedam dam lam iho amu uba le tau azihi di lam iho fai bak meedam vaba gi Alat Aba Aho gagoho im lamota fi hasi iademe vamdesu meeda. Labi laha ba meit iba neha, “Iho git modeho,” laham bak ba vàlu gagoho vabak. Labihasu meedam labe uho aame, “Imbote,” lahame laba gagodam bak lam Alat laha, “Imbote,” lahame ozobohudi uba vi tau gagodam bak.
11. Labi iho uba le tau azi vabiedaha di labe iho abo aiat am data zi laba iademe faheme vabiedam bak lamti ulohona um laha faheme meida amomoi vabieda. Meida amomoi vabieda. Labihadaha bak.
12. Labihadam di labe iho gi nehadam bak. “Alat uba modi Am damalehe labe, ‘Neà bak neame? Fai bak neame?’ laham bak lam uho vi ozodam labe ame baket iademe meedale,” lahame uba im vahokedume uba modi teudeda. Labi fa neo, “Um iademe meedale,” lahame neo vi vabededa. Labi neo, “Mahate teudi meedale,” lahame im vi vahokeda. Labihadam bak. Alat Am feà bak lam, “Um tau feà damalese,” lahame uba amu neha, “Uho fa Am damali Aho uba vuusu im vahokedase,” lahame uba vameadaha bak.
13. Iho uba ahamte le ame Alam Im Neàna lam uba vameadaha di lam uho nehame ozodume tu vuzehehe vabak. “Ame im lam iho dam bakda nibe debut faasi meedaha imot modem bak. Ada imbona ozomo?” lahame labi vi ozome tu vuzehehe vabak. Uho gi neha, “Ame im lam abo Alat debut faasi meedaha imot modem bak,” lahame labi vi ozome uledi tu vuzehehe bak. Labihàmu iho ame bak laba laha vi ozome Ala bake, “Am abo neàte,” lahame dihasi tom vou baeda. Dihasi neo tom vou baeda. Labihadam bak. Uho lab vi ozoho bak lam imbote. Ame im lam Alat debut faasi meedaha imot modem bak. Labi Alat Am im lam ve uho Kristus bake tu vuzehi meedam dam labe um ahu ad laba modi vizi vabiedam labe ubu uho amu meedaha bak lam fa voedume seddume fa vei neàdeda. Labihadam imot modem bak.
14. “Ame Alam Im Neàna lam uho tu vuzeheho,” laham bak lam iho ozom, “Imbote,” lahame vi ozobohudi gagodam bak lam uho nehame meedaha labe iho labi vi ozobohudi gagodam bak. Damat etei uba lab vabidume um alihi nemahusi geàdam bak lamti Kristus bake tu vuzehi vahi meedam dam zi mei dam zi mei lahadam dam Yudea laba esdam Yahudi dam abo Alam damali Kristus Yesusti vou ali ahu vàmadem dam zi laba vabidam bakti uloho bak. Nehaha bak. Amu di iube ame Yahudi dam Yesus bake tu vuzehi meedaha vab dam labe vedi fa im Yahudi dam totbaho labe Yesus bake tu vuzehi meedaha dam laba faki vabidaha bak. Labi ba ame Alam Im Neàna lam uho neo tu vuzehi meedàmu um vahi esum dam totbaho labe abo Yesus bake tu vuzehi meedam vab labe laha uba faki vabidam bak.
15. Ame Yahudi dam Yesus bake tu vuzehi meedaha vab dam labe meia vabidam bak lam ibi iho modi baleàlehe bak am bak. Nehaha bak. Amu di iube dam ahamda Alat vameadaha im aime fa dam bake ahate vameaidaha dam zi odda. Labi ame Yahudi dam ahamda labe faasi vou ote ledume fa etei nibe im Boehàda Yesus ba ote. Labi etei iho neo bak mei bake le Alam Im Neàna vou vameatedam di dam iba bak mali ootedume oluida. Labihasu meedam damat modem bak. Ame dam labe ibi iho meedaha bak lam Alat ba deelem vabak. Labihadam damat modehe labe gi dam ahebu fakemoholehe dam am bak.
16. Ame Yahudi dam labe laha Yahudi damat modem vab dam labe ame Alam Im Neàna aime uledi Ala bake tu vuzehi Alat fa ame dam lam soat vausu fa vei neàdedam bak labna zohàme mali, “Yahudi damat modem vab dam laba ame Alam Im Neàna lam a vou vahokedamule,” lahame iba mali odosi meedam damat modem bak. Ame Yahudi dam labe faina meedam bak bisi duana vi meedamehamdi Alat Aba Aho fet ozome esu ahumdehe bak laba fuseo meedàmu Alat ab ozoham. “Ame dam lam etei beom neàdehe bak,” lahame gagom bak ab fuseo meedamam tame.
17. Imti vahi Kristus bake tu vuzehi meedam dam oa, iho amu uba le tau azihi di lam im gi um vou esmom momna damat iba tet ooteme oluhu bak. Iho vabi im gi teohe lehe tiba modehat gi ab vausi abehamdi seteham bak. Lahana im uho vi aam vabnàme im gi uba ahulat ahamo vi ozodam lahasuhu bak. “Aa làhà! Im dam ab dumdamali vou esmohame?” lahame im gi uba ahulat ahamo vi ozodam lahasuhu bak.
18. Labihàmu iho uba abo aalo àhàki ilahu alihivei meedàmu, “Imo Tesalonika dam laba le aase,” lahame uba num debu Tesalonika laba lem bak ozome neàdi esu. Ame bak lam bisi lalo àhàki meedamda em Paulus am bak. Lahana em gi ehemo uba lesome modiameam im zie lam bak Iblisit ausi meedam labe im uba taho lam bili mozo.
19. Iho neham bak ozoho labe uba ilahu aalo àhàki meedam bak. Im Boehàda Yesus Kristus ba asum ahoba iube fa bak niba lem di iho Aho avaesdam tot laba le duzu Aho iba ozolo modem di lam iho ozom, “Uho Kristus bake tu vuzehi meedam bak lam gi keàtedi meedam bak lahasuhuna le duzum bak,” lahame iho fet ahu vitasu ozodam dam um am bak. Labi laha iho um ve Yesus bake vimtedume gago, “Iho dam niba le tau azihi di labe dam nim iho Om im vahokedaha dam abo Oba tu vuzehi meedam dam am bak,” lahame iho ba deeli daetbadume gagodam dam um am bak.
20. Iho lab gagoho bak lam ba giomim gagodam vabak. Abo etei laha iho deeli daetbadume gagodam dam um am bak.
1. Iho umti vaitesu azihi labe iho uba ilahu alihivei modem ziahat vanamahemu iho ab ozoham. “Làhà emti Silasti ihimo behàsu nim num debu Atena laba aidase.
2. Labi Timotius fa uba oluse,” lahame ab ozoham bak. Ame da Timotius lam imti vahi vou ali meedamda meida am bak. Am abo iba tau Kristusat meedume vou esmoho Im Neàna lam dam bake vou vameatedam labe Alam na meedamda meida am bak. Labiham dàt modemu damat uba vabidam bake uho neha, “Im akati modela?” laham bak vabi vi ozodam vabake Timotius uba le uho Kristus bake tu vuzehi meedam bak lam voedam vaba abo keàtedi bohu vuusdam bak lam aho uba le tau vabededume teudedalo iho ame da lam uba ab oluham bak.
3. Naat uba vabidume geàdam bak lam uho udovai ubaham vaba gi Kristus bake labaha bohu tu vuzehem bake iho Timotius gagu uba oluhu bak. Alat amu di iube fet nehi ozo, “Dam Kristus bake tu vuzehi meedam dam meit vabidam bak ba vaitom vaba gi labaha bohu modesda tame,” laham bak lam Alat amu gi fet ozobohudi esuhu bak lam im ahebu ozobohu bak.
4. Neham labe im ozobohudehe bak. Iho amu uba le tau azihi di lam iho uba gi nehame fet ozome gagodam bak. “Dam Kristus bake tu vuzehi meedam dam meit iba vabidam bak ehete,” lahame uba gagodam bak. Lahamnàme ame iho lab gagodam bak lam imbodi ame baket ab meedamam bak. Laham bak lam um ab ozobohudeham bak.
5. Labihàmu eho umti vaitesu azihi labe em uba ilahu alihivei modem ziahat vanamahemu eho Timotius uba ab oluham bak. “Iblisit uba li neha, ‘Um faina modem bak uledeo?’ laham bak modi ozolo uba vabidume um ahu bedi uho Kristus bake lab tu vuzehi meedam bak lam fa voedào? Tu vuzehi meedam lahasuheo? Labi iho amu uba le tau azi vabiedaha bak lam iho gi meedume teoleheo?” laham bak le aalo iho ame da laba gagu uba ab oluham bak.
6. Imti vahi Kristus bake tu vuzehi meedam dam oa, ame da Timotius iho amu uba olu aho uba le aame neàdi etei fa iba ab leham bak. Labi aho li meit aime deelem im nehame iba vameadaha bak. “Uho amu Kristus bake lab tu vuzehi meedam bak lam meedam lahasuho.” Labi laha, “Uhumo ot deeli ot deeliam bak lamti labi uho fa dam amomoi bake deelem bak lamti labihasu uho ab meedamam tame.” Labi laha, “Uho ahu deelehat iba vi ozodume, ‘Iho uba lele,’ lahame vi ozodume iba ilahu aalo àhàki ab meedamam tame. Abo iho uba ilahu aalo àhàkem bakti ulohona ab meedamam tame,” lahame aho im labihasu iba li vameadaha bak.
7. Labi bak niba na im fai bak duzum di modeo, damat iba duana vabidam di modeo, iho vanamai meedamnàme Timotius iba li vabededam labe neha, “Uho amu Kristus bake lab tu vuzehi meedam bak lam vooho vaba meedam bak lahasuho,” laham im lam iba li vameadàmu iho aime im ahu fa ab vei neàdeham bak.
8. Timotius iba li uho im Boehàda Yesus bake tu vuzehi keàtedi meedam bak lahasuhuna iba vameadahemu im ahu faidehe bak lam fa ahagoa foou fi gatei im ahu fa vei deeli neàdehe bak.
9. Alat uba modi uho Yesus bake tu vuzehi keàtedi meedam bak lam iho aihemu iho im Ai Ala bake tom gagodam di im abo deeli Ala bake neha, “Ai Ala oa, oho ame dam laba modi keàtedi meedaha bak lam abo neàte,” lahame labi vou baedam bak. Lahana iho ozom, im bisi deelehe bohu vuusdam damat meedàmu ba Ala bake, “Am abo neàte,” lahame vou baedam bak lam ba taho ozome novai vaitom biem bak. Iho gi labahana meedam bohu meedam bak.
10. Iho uba vi ozodume Ala bake tom gagodam di im gi nehada. “Iho uba neo le tau azi um biem bake im vekeheda lam uba neo vi vahokedume vabiedume uho Yesus bake tu vuzehi meedam bak lam neo vi keàtedi meedase,” lahame abo digat ahebu keàtedi tom gagodahit vou disiam damat modem bak.
11. Iho uba vi ozodam di im gi nehasu im Ai Alati im Boehàda Yesusti tom gagodam bak. “Iho uba fa neo lam bak lam naat ame zie lam auhu bake im Boehàdat fà modi faatoi tombalese.
12. Labi iho uba faobekesi deeli vabiedam bak lamti ulohona Boehàdat fa uba vi modi uhumo neo vi ot deeli ot deelidume meedase. Labi laha neo dam amomoi bake neo vi deeli meedase.
13. Labi Boehàdat laha um ahu modi teudi uho Aba lab tu vuzehehe bak lam keàtedi meedase. Labiham labe ba im Boehàda Yesusti labi Aba Aho gagoho im aime neà bakta meedam dam zi ahebu lamti labihasu asum ahoba iube fa bak niba ledam di lam uho im Ai Alat Aho avaesdam laba le duzum di Aho ba uba, ‘Uho git modeho,’ lahame ba vàlu gagoho vaba gi deeli neha, ‘Ebe Eho gagoho im lamota vuzehi ahu vàmadi meedam bohu meedam damat modem bak,’ lahame uba vou baedase,” lahame iho gi labihasu ozome Ala bake tom gagodam bak.
1. Imti vahi Kristus bake tu vuzehi meedam dam oa, em im zi meida nim uba neo nehi vi vameadume neàdelo mozo. Amu di iube Im Boehàda Yesus labe Aho iba modi vizi teudi iho uba Tesalonika laba ahamte lehe di lam iho uba neha, “Dam Kristus bake tu vuzehi vahi meedam dam labe iho akatihasu meedam labe Alat iba aam deelela?” laham im lam um biem bake iho uba vahokedaha bak. Labi uho ame bak lam uledi vuzehi meedam lahasu etei nibe neo ab vou fuham bak. Abo neàte. Lahana im Boehàda Yesus lamti imti vou ali ahu vàmadi meedàmu Aho iba gagoho labe iho uba neo ozahit vi vameadalo mozo. “Ame bak lam uho laha abo mahate keàtet vi meedam bohu modesdale,” lahame uba ozahit vi vameadalo modem bak.
3. Alat ozo, “Uho Am damalehemu fai bak meedam vaba gi Aba Aho gagohoda lamota vuzehi ahu vàmadi meedam bohu meedase,” lahame Alat fet ozome esuhu bak. Ame bak lam gi neham bak. Uho ba ostame fi loholi la modi le modidam vabak.
4. Um dam ahebu uho git ozome ahu gukeme meia vi tauleme modem bak labna zohàme uho gi ubu uho amu neha, “Im Alam damalehe bak,” laham bak laba ozome it vou faovoi fai bak meedam vaba gi Alat gagohoda lamota vuzehi ahu vàmadi meedam bak. Labiham labe Alati damti uba aame, “Abo neàte,” lahame uba vou baedam bak.
5. Fa dam Ala bake tu vuzehi meedam vab dam abo dam giida labe ibi iho ahu gukeme fai bak modelo àhàki it malem vab dam labe ahu ibidat ihimo vi ozome meedam baket uho ba vi tau meedam vabak. Um gi nam ubu vahada lamota meedam bak.
6. Iho neham bak ozome uba labi gagoho bak. Naedat ahamo am ahu it ozome malem vaba amti vou alemda labe am nam laba gi ahulat vi ozom bak modeo, abo modem bak modeo, labihasu meedameam làhà ame da labe git modi ame dam behàsu lam ot vou aliame neà bak meedam bak lam gi fa vei vàhàdeme setem bak. Dam labihasu meedam dam lam ba diamut Alat beoda tame. Ame lab gagoho bak lam um ba biem vabak. Ame im lam iho amu uba li tau azihi di labe uba fi desi amu vahoke. Ba neo vi vahoke. Lahadamna taia?
7. Alat Aho amu iba neha, “Am damalese,” lahame gagu vadaha di labe Aho nehame ozome im gagu vadume Am damalehe vabak. “Iho gi ostame fi loholi la modi le modidam baket meedase,” lahame gagu vadume Am damalehe vabak. “Iho gi Alat Aba Aho gagohoda lamota vuzehi ahu vàmadi meedam bohu meedase,” lahame Alat iba gagu fi hasi vadume Am damalehe bak.
8. Iho uba lab vameadaha im lam gi im ibida uba vameadaha vabak. Abo Alat iba gagodaha im fa uba vameadam bak. Labihadàmu meit ame im lam ailahigeàmu mu voedameam làhà ame da labe gi Ala labe Aho gagodaha im lamti Alati ailahigeàmu mu voedam bak. Abo Am Aha Nutabe Neàna iba modi vizi teudem Ala lam mu vooho bak.
9. Imti vahi Kristus bake tu vuzehi meedam dam oa, Alat amu uba neha, “Um dam ahebu fa ot deeli ot deelidale,” lahame uba amu vahokedume uho ame bak lam ab meedam am taia? Umti vahi Kristus bake tu vuzehi meedam dam abo Makedonia bak labe am num debu mei num debu meime ahebu uho ame dam laba deeli meedam dam taia? Ba akati iho uba neo, “Um dam ahebu fa ot deeli ot deelidale,” lahame bisi vi gagu toeidàla? Iho ame im lam labihasu bisi vi gagu toeidam vabnàme iho ozahit uba neha, “Uho meia deelem bak lam laha mahate vi meedume bohulalele,” lahame vi vameadam bak.
11. Uho dam ubudati dam amomoida iumti ahebu ot fakiam vaba gi dae vabna esdale. Labi laha im meit ihimo fi hasi meedam im lam meit a vi tau meedamule. Labi laha uhumo modi valo àhàkemna lam uhumo anekehà ubudat uhumo meedale. Meia a ahumdi meedamule. “Im labihasu meedale,” lahame iho lab vi vameadaha im lam gi etei uba alimeat vameadam imot modem vaba abo amu gi labaha vameadam imot modem bak.
12. Uho im labihasu meedameam làhà uhumo modi valo àhàkemna lam ba meia ahumdi meedam vabak. Labi laha dam Kristus bake tu vuzehi meedam vab dam giida labe uho lab meedam bak lam aame ozo, “Um abo neàte,” lahame ahu adat iedi deeli uba vou baedam bak am tame.
13. Imti vahi Kristus bake tu vuzehi meedam dam oa, dam Kristus bake tu vuzehi meedam vab dam labe dam ibida elom di, “Ba fa ahedi usnadume iho vi aa tame,” lahame fet vi ozome esuhu vab labe ahu faidi meb azidume meedam damat modem bak. Uho ame dam lamti uloholemna zohàme iho ahit, “Dam Kristus bake tu vuzehi meedam dam abo dam ubuda amu elodahada zi lam ba akatihasu meedàla?” lahame uho vabi vi ozodam bak laba iho vi ozome im imbona nim uba vameadume um ozobohudelo modem bak.
14. Iho im nehasu tu vi ozodam damat modem bak. Yesus amu Am eloho bak labet Alat modi fa ahedi usaha bak. Lahame tu vi ozodam damat modem labe iho laha nehasu tu vi ozodam bak. Yesus fa lem di dam Kristus bake tu vuzehi meedam dam amu elodaha dam lam Alat laha modi fa ahededume usnadam labe fa Yesusti vahe vaheda tame.
15. Im Boehàda Yesus labe Aho ba fa li dam vamateme vahe vahedalo modem bak lam amu iba nehasu fet vameadume esuhu bak. Aho ba lem di im dam ahe lahasuhuda zi nibe fa dam Kristus bake tu vuzehi meedam dam amu elodaha dam zi lam vazidazi nasi Yesus bake le tàm vabak. Dam Kristus bake tu vuzehi meedam dam amu elodaha dam zi labe nasi ledume tàm bak. Im aheda ba le tàm bak.
16. Im Boehàda Yesus labe Aho ba asum ahoba iube nom ilum di gi nehame meeda tame. Aho amu nasi Aba tuhuda niba neha, “Neàdeho. Nasi ledale,” lahame nom butem dae bohu vàmade tame. Labi neo Alat Am im gagu vou usem dam zi labe meida bisi ee vousahada labe aho neo vi budda tame. Labi neo Alam oma fi stehena bumatti ulohona ee gagom trompet labe neo buddam dae aida tame. Labihadam di labe im Boehàda Yesus labe Ahamo asum ahoba iube nom usdume ulo asum ahoba iuba tom voou doni tomba laba li ab duzumam bak. Labi dam Kristus bake tu vuzehi meedam dam amu elodaha dam zi labe nasi fat ahededume ab usnadamam tame.
17. Labi dam lada labe amu nasi ahededume usnadume neàdi ame di labe Alat im dam ahe lahasuhuda zi abo Kristus bake tu vuzehi meedam dam zi nim Yesus bake asum ahoba iuba tom vousai tàlo modemu im ahebu amediat gelevai fa dam amuda lamti ulo zi laba vahe vaheda tame. Labiham labe im Boehàda Yesusti bakamta vahi abehamde tame.
18. Labi iho etei lab vameadaha im lam uho Kristus bake tu vuzehi meedam dam labe uhumo ame im lam vi ozome, “Im dam elodaha dam lam ba ahededume usnada tame. Bisi a ahu faidemule,” lahame ot vabedei ot vabedeidale.
1. Imti vahi Kristus bake tu vuzehi meedam dam oa, iho etei lab vameadaha im lam, “Ame Yesus ba lem digat labe ba labihada tame,” lahame vameadaha im lam, “Ba adi diat modela?” laham bak lam iho ba uba toeme olum vabak. Gi labihasule.
2. Neham bak. Im Boehàda Yesus labe fa lem digat lam damat im ahu nasi ahumdi neàdi vou faodam vabna gi àvodehat aa le tame. Abo naat mei na aibut aa li vam bakti ulohote. Laham bak lam um ozobohudehe labe ba akati ame digat lam iho toeme uba oluela?
3. Neham bak. Ba diamut damat vedi nehi it ozome gagodam bak ehete. “Im ahu faheme fi goaitom vaba gi neà vabademsu esdam bak,” lahame labi ozodamnàme Alat Aho ame dam laba na im feàna modi olu beom bak vabili meedam damat modem bak. Abo lahi zubuda am data faalo meedam diat, “Kikezi àvodehat vàzbudam bak fuhe?” laham bak vabi meedam bakti ulohote. Ame lab àvodehat vàzbudam bak lam ba vabalem vabak lamti uloholi dam labe ilim bili meedahit beodam bak.
4. Lahana imti vahi Kristus bake tu vuzehi meedam dam oa, umota neà bak. Um dam aibu bak laba azim dam lamti uloho vabak. Labiha labe ame Yesus ba lem digat lam fum di um ba dat iddahit meit am na aa li vahemu udovai àvodemda lamti uloholem vabak.
5. Im aibu bake aidam vab damat modem labe ba im fai bak meedam vabak. Abo damat usehe diat na aam biem diat aa meedam bakti ulohona meedam vab damat modem bak. Im gi nehame meedam damat modem bak. Alat iba modi Am damalehe labe im gi abo fauha neà bake aidam damat modem labe im vamdesu meedam bak. Abo damat digad diat na aame iademe meedam bakti ulohona meedam damat modem bak.
6. Labihadàmu imo nehadase. Imo nasi dam giida ihi tamzohobulem dam labe ahusobuli im vabi git meedam tadem bak lamti ulohona ba a meedamule. Im aibu bak laba aidam vab damat modem bak. Labiha labe imo nasi dam ihi bibali keesi aasdamda labe meedam tadem bakti ulohona meedam labe na im ahebu meedam di ihimo naedamat im ahu it vou faovoi iademe meedam tadese.
7. Neham bak. Damat neha, “Im bitesu izi setelo mozo,” lahame meedam dam lam gi aibut meedam damat modem bak. Labi laha, “Imo vao meona uddume bak vabi bobidase,” lahame meedam dam lam laha gi aibut meedam damat modem bak.
8. Lahana im ba aibu bake azim vaba gi fauha neà bake azi im vamdesu meedam damat modem bak. Labiha labe iho na im ahebu meedam di ihimo naedamat im ahu it vou faovoi iademe meedase. Imo tentara labe bohudelo modemu meit am ahude foat dou elom bake vou faovoi bes teuna ahude laba taasu vààsu vastehena dusum bakti ulohona iba vatohemna modesuse. Neha: Iho Kristus bake tu vuzehi keàtedi meeda. Labi laha dam totbaho bake deeli meeda. Imo labihadase. Labi laha tentara labe aho bohudelo modem diat meit am ohula beom bak labna zohàme ohula dusumna besit modehenati ulohonabu dusum bakti ulohona laha meedase. Neha: “Ba diamut Alat iba soat vausu fa vei neàdeda tame,” laham bak lam imo im ahu fet vi ozodume tu esu vou faodase.
9. Iho neham bak ozoho labe uba labi gagoho bak. Alat amu iba gagu Am damalehe di Aho ba neha, “Eho dam bakda lam beodume fà vàhàdedase,” lahame labi ozome iba gagu Am damalehe vabak. Aho ozome esuhu bak gi nehaha bak. Im Boehàda Yesus Kristus abo Am Adat labe Am vasea veàtoi neàdehemu dam bakda labe iho faina meedàmu Aho beom bak lam, “Yesusat fa soat vausu fà vei neàdedase,” lahame labi ozome esuhu bak.
10. Neham bak ozome labihaha bak. Im Boehàda Yesus ba fa bak niba lem di labe im gi elodume seddào? Im ahe lahasdào? Laham di labe Aho li im vamateme vou le Amti vahi azibehamdi bohu vuusdam bak laba ozome iho dam bakda faina meedam bak lam gohalelo Aho naedat ahit vasea Abada, “Veàtose,” lahame uledi damat Am oteme vasea ab veàtoham bak.
11. Labihadàmu uho amu meia ot vabedeidume teudedam bak lam laha mahate vi meedale.
12. Imti vahi Kristus bake tu vuzehi meedam dam oa, uho neham bak mahate meedale. Kristus bake tu vuzehi meedam dam laba vuusu im vameame faheme modidam dam busao damali uba vuusu im vahokedume meedam dam laba uho abo ahu adat iedi deeli, “Um abo imbo meedam damat modem bak,” lahame labi vou baedale. Ame dam labe gi modem kaio. Abo Alat dam laba gagu dam labe keàtedi uba vuusu im vahokedam bak.
13. Labi ame im lam keàtedi meedume vanamai meedàmu uho ame dam laba deeli meedam labe ozo, “Dam lam iba vuusdam dam ee ehe dam ame?” lahame mahate ahu adat iedi deeli vou baedale. Labi laha uho um dam totbaho laba a ot fakiame beàdamule. Gi iademe betea bakamta vahi vabademsu esdale.
14. Labi laha im meida nim iho uba neo vi ootedam bak. Dam na modem odohabu dam laba neha, “Um bisi meia a ahumdi meedamule. Uhumo na meedume doi vame ubu uho valo modemna doit lu vale,” lahame amu gagoda. Ba neo vi gagoda. Lahadale. Labi laha dam na iedemoho dam laba uho vabededume modi ahu teudedale. Labi laha dam totbaho labe ibi iho Kristus bake tu vuzehi meedam bak lam fota bedi meedam dam laba uho im vi vahokedume teudedale. Uho labihadam di labe bisi a vi ootedamule. Gi betea laha vou faodale.
15. Labi laha meit uba fai bak modemeam làhà bisi fai bak a ot modi ot modidume fa vi vatauiamule. Ame bak lam mahate it vou faovoi mali meedale. Fa gi neham bak bisi neà bak am. Uho Kristus bake tu vuzehi vahi meedam dam uhumo ot deeliame neà bak ot modidale. Labi laha dam giida totbaho laba laha deeli neà bakta meedale.
16. Labi laha gi deelehe bohu tadi vuusdale.
17. Labi laha Ala bake tom gagodam bohu tadi vuusdale.
18. Labi laha na im ahebu uba duzum di gi Ala bake, “Am abo neàte,” lahame dihasi tom vou baeda. Dihasi neo tom vou baeda. Labihadam bohu meedale. Nehaha bak. Alat amu di iube neha, “Iho vahi Kristus Yesusti vou ali ahu vàmadi meedam dam nibe na im iba duzum di gi ozahit Aba vou baedase,” lahame fet ozome esuhu bak. Labiha labe uho gi ozahit Ala bake, “Am abo neàte,” lahame vou baedam tadele.
19. Alam Aha Nutabe Neàna labe Aho uba laba modi vizi vuusu im ahu ad laba vabiedam bak lam meit a vi mali vua elum modi sutem bakti ulohona a modemule.
20. Labi laha Alam Aha Nutabe Neàna labe Am Im meia modi vizi ame da labe fa aho aihi im ahum meia ahate vameadam di meit a àvodehat mu tozomule.
21. Fa gi nehadale. Amu nasi ame im lam aime vi ozo, “Im lam Alat da laba gagu eba oluhe? Alat gagu oluhu vaba?” lahame mahate vi ozo, “Alam Im imbonati ulohona mode. Làhà imbo bak,” lahame labi ozobohudi neàdi ame im lam tu vuzehi meedale. A gi ostame àvodehat lab aihi im laba tu vuzehi meedamule.
22. Laham vabameam oho gi nehi vi ozo, “Ame Im lam Alat da laba gagu eba oluhu vabak. Fai imot modem bak,” lahame labi vi ozomeam làhà nasi a tu vuzehi meedamule. Abo im fai bak meedam bak lamti ahebu ailahigeàmu voedale.
23. Meia modi am ahu faheme fi goaitom vaba gi vabademsu bohu meedam Ala laba iho nehame tom gagodam bak. “Im Boehàda Ala oa, Ohomo Tesalonika dam laba modi fa fi hasi gi im neà bakta ahu vàmadi bohu vuusdam damalele. Labi laha Oho ame dam laba vou aasu vabiedume dam labe im ahu vàmadi im vamdesu meedam labe im Boehàda Yesus Kristus ba li neha, ‘Dam lam git modeho,’ lahame vàlu gagom vabak laba Oho laha modi esule,” lahame iho im labihasu ozodume Ala bake tom gagodam bak.
24. Uba modi fi hasi, “Am damalese,” lahame uba amu labi fet gagodam Ala labe im Aba Aho gagohoda ahebu ba meida vàmtea vagem vaba abo imbodem tadem bak. Labiham Alat modehe labe iho etei lab tom gagoho im lam laha Aho modi imbodem bak.
25. Imti vahi Kristus bake tu vuzehi meedam dam oa, uho laha iba Ala bake tom gagodale.
26. Labi iho uba, “Neàte,” lahame gagodam bak lam uho fa ve imti vahi Kristus bake tu vuzehi meedam dam totbaho laba gagodale.
27. Labi laha im Boehàda Yesusat amu eba neha, “Im nehasu toedale,” lahame eba gagu eho toedaha labe uho sunit nim ve aame gagodam di labe Kristus bake tu vuzehi vahi meedam dam totbaho labe iho dogoit aidahit uho sunit nim aame vameadale.
28. Eho gi neha, “Im Boehàda Yesus Kristus labe Aho uba ozahit deeli im neà bak modi esuidase,” lahame labi ozodume Ala bake tom gagodam bak. Neàte. Iho Paulusti Silasti Timotiusti im làtela nibe sunit nim toedume ab neàdeham. Àhàm.
1. Kristus bake tu vuzehi vahi meedam dam num debu Tesalonika laba azihi dam abo im Ai Alati Im Boehàda Yesus Kristusti im damalehe dam oa, sunit nim iho Paulusti Silasti Timotiusti labihasu toedume uba oluho. Neàte.
2. Im làtela nibe uba ozome neha, “Im Ai Alati im Boehàda Yesus Kristusti ahili uba ozahit deeli im neà bak modi esuidase. Labi uba modi um ahu faheme fi goaitom vaba gi vabademsuse,” lahame iho ozodume Ala bake labihasu tom gagodam bak.
3. Imti vahi Kristus bake tu vuzehi meedam dam oa, im làtela nibe Ala bake tom gagodam di uba vi ozome Ala bake, “Neàte,” lahame vou baedam bak lam iho voou setem vaba abo gi labaha bohu vuusdalo meedam bak. Neham labe ame bak lam gi ahole meedam bak. Uho im Boehàda Yesus bake amu fota tu vuzehehe bak lam etei ba fa vi tu vuzehehe bak bohulali meedam bohu vuusda. Labi uho meia ot deeli ot deeliam bak lam laha fa vi dualeda. Labiham labe iho ozoha, “Iho lab vou baedam bak lam gi ahole meedam bak,” lahame ozoho bak.
4. Uho labihasu meedàmu iho bak mei bake le Kristus bake tu vuzehi vahi meedam dam abo Ala bake vou baedam dam zi mei dam zi mei lahadam dam laba im vou vameatedam di im gi uba vi ozodume deeli vou baedam labe im nehasu dam laba vou vameatedam bak. “Ame Tesalonika laba azim dam lam naat iba vabidume alihi nemahusi geàdam di modeo, na im iba modi duzum di modeo, gi ozahit ibi iho Boehàda Yesus bake lab tu vuzehi meedam bak lam ba voom vaba abo keàtedi bohu vuusu meedam damat modem bak,” lahame labi vou vameatedam bak.
5. Naat uba vabidume um alihi nemahusi geàdamnàme um gi ozahit im Boehàda Yesus bake tu vuzehi keàtedi im Abada meedàmu iho nehi ab ozoham bak. Dam bakda ahebu ibi iho meedaha im lam Alat uloodume aime neàdi gagodam di Aho gi iademe ahole imbona gagodam Alat modem bak. Alat ba diamut abobo Boehàdateboli dam bake vuusu im vahokedalo modem bak laba Aho uba neha, “Um em dam am tame. Eho um vuusu im vahokedam neàte,” lahame uba ahate gagoda tame. Uho Ala bake tu vuzehi im Abada meedàmu damat uba vabidam bak lam uho ozahit keàtedi meedam labe Aho labihada tame.
6. Mahate ozodale. Alat dam bakda ahebu ibi iho meedaha im uloodume aime neàdi gagodam di Am ba git modem vaba gi iademe vamdesu meedam Alat modem labe Aho gi ahole fi me vaida. Labi ahole fi me ve ahala beoida. Labihadam Alat modem bak. Labihadam Alat modem labe dam uba vabidamda lam Aho fa vatau na asimbuna dam laba ahole modi vanamai meeda tame.
7. Labi damat uba vabidam bak lam Alat modi fa seti Aho uba fa neà bak modi ahagoa foo tame. Ame bak lam gi umota modi neàdem kaio. Abo gi imti laha modi neàde tame. Ame bak lam abo Alat modi im Boehàda Yesus iba bak niba nom ilu fi zeam bitom di am bak. Ame di lam Yesus asum ahoba iube na vua bozti ulohona Am so laba modesu nom ilu tame. Labi Alat Am im gagu vou usem dam feàna zi laha vi tau nom ilu tame.
8. Labi li dam Ala bake, “Am abo feàte,” lahame ahu adat iedi Aba tu vuzehi Amti vou alehe vab dam lamti labi dam im Boehàda Yesus labe Aho meedaha Im Neàna laba tu vuzehi meedaha vab dam lamti labihasu beodume geàda tame.
9. Ame dam Ala bake tu vuzehem vab dam laba beodume geàdam bak lam abo ba vaitoi setem vaba gi labaha geàdam bohu vuusda tame. Labi laha im Boehàda Yesusat ame dam lam Amti vahi azim vaba gi abo vaitesu bohulalem bak. Labiha labe Alat Aba modi Am feà datelehe bak lam ame dam lam ba aame neha, “Am abo feàte,” lahame ba gagom vabak.
10. Iho etei lab vameadaha im lam ahebu Alat Aho fet ozome esuhu digat fuhuzobe im Boehàda Yesus asum ahoba iube fa nom ilum diat meedam imot modem bak. Neham bak ozome labi meeda tame. “Im Boehàda Yesus bake tu vuzehi meedam dam lam abo Alat neha, ‘Am dam,’ laham dam labe Yesus Aho iba neà bak meedaha bak laba vi ozome iho Am alihi aame im ahu adat deeli, ‘Am abo feàte,’ lahame Aba vou baedase,” laham bak ozome labi meeda tame. Labi ame di lam gi dam lamota ihimo ame bak lam meedam vabak. Abo uho Tesalonika dam Yesus labe Aho meedaha Im Neàna lam iho amu uba vou li vameadume esuhu im lam uho aime tu vuzehi meedàmu um laha ame baket meeda tame.
11. “Uho Yesus bake ahu adat iedi labihasu im Boehàda bake vou baedase,” lahame iho uba vi ozodume Ala bake nehasu tom gagodam bak tadehe bak. “Im Ai Ala oa, Oho amu neha, ‘Ame Tesalonika dam lam Eho vame Em damalese,’ lahame Obo Oho amu lab fet ozome ahumdi esuhu bak lam Oho dam laba modi imbodele. Labi laha ame dam labe neha, ‘Iho neà bak nim modese,’ lahame ihimo modelo àhàki fet ozome esulo meedam di modeo, labi iho Yesus Kristus bake tu vuzehi meedàmu, ‘Iho nehasuse,’ lahame modelo àhàki meedam di modeo, Oho dam laba tau modi teudi ame baket meedale,” lahame tom gagodam bak tadehe bak.
12. “Im nehasu meedase,” lahame iho labihasu tom gagodam bak tadehe bak. “Uho im Boehàda Yesus labe Aba Aho iba neà bak meedaha bak laba vi ozome Am ee vousai, ‘Am abo feàte,’ lahame vou baedase. Labi laha uho lab vou baedam bak lamti ulohona Aho fa neo um ee laha vousai neo vou baedase,” laham bak laba ozodume tom gagodam bak. Iho etei lab ozodam bak lam neham labe ame bak lam modi fa imbodem bak. Ibi iho vou baedam Alati im Boehàda Yesus Kristusti uba amu ozahit deeli im neà bak modi esuidaha bak labet modi ame lab ot vou baeidam bak lam fa imbodem bak.
1. Imti vahi Kristus bake tu vuzehi meedam dam oa, im Boehàda Yesus Kristus ba fa lem di Alat im fa vamateme modi im Yesusti vahi azim bak lam uba vameadalo mozo.
2. Dam giida zoho vedi neha, “Im Boehàda Yesus fa lem digat ab vou fuham tame,” laham im lam uho aimeam bisi a àvodehat aime udovai ahu faheme ozom bili vi ozodamule. Ame im lam giomimot modem bak. Ame dam labe neha, “Alam Aha Nutabe Neàna labe iba modi vizi ame im lam ozobohudi fa uba vameadam bak,” lahamda modeo, labi meit uba neha, “Ame im lam iho gi Paulus giidate aime neàdi im ozobohudi fa uba vameadam bak,” lahamda modeo, labi meit uba neha, “Ame im lam Paulus giidat sunit toeme iba oluhu labe im ozobohudi uba vameadam bak,” lahamda modeo, labihasu vameadam im ahum ahebu aim di a àvodehat aime udovai ahu faheme im ozom bi vi ozodamule. Gi giomimot modem bak.
3. Abo meit vou lehe im iudu ium modeo, im iudu ium modeo, labihasu ahebu aime imbo tiba laham bak a vuzehemule. Ame digat fuhu vabak. Im Boehàda Yesus fa lem digat fuseo modem di amu im nidi behàsu nim nasi modeme neàdi Aho ba lem bak. Dam duada zoho fa Alat gagoho im aim mu fa im ibi iho ozomda lamota faasi meeda. Labi laha Dat Alat Gagu Fihasi Vàmadi Esuhu Im Mu Zidazi Fa Ala Bake Ot Odosiahada labe li duzuhuna damat aada tame. Labihadume neàdi im Boehàda Yesus ba fa lem di am bak. Ame Ala Bake Ot Odosiahada labe am ba gi vua elum sutem gikina bohu laba nom ilu vàhàdelo modemda am bak.
4. Ame Ala Bake Ot Odosiahada labe aho ba Alat gagoho im vàmtea ba aim vaba bisi faki Ala bake ot odosidam bak. Labi laha ame da labe ahamo am ee vousai it daetbadam bohu meedamda am bak. Abo dam bakda ibi iho ozome ahu adat iedi vou baedamna modeo, ostamna laba, “Ala ibida am tame,” lahame vou baedam bak laba modeo, labihasu ahebu aho ba vi tau ozome vou baedam vab dàt vedi gi, “Damat fà aba vou baedase,” lahame it ozome daetbadam bohu meedam dàt modem bak. Ame da labe gi im lada lamota meedam vaba vedi neo Fihasi Ala bake Vou Baedam Num Vàmteabu kota Yerusalem laba modesdamda laba oli tombu nusu dam vou faodahit, “Am Ala am tame,” lahame dam bake vameadam dàt modem bak.
5. Laham bak lam eho amu uba Tesalonika laba tau azihi lahasuhu di labe uba vahokedahana um fa vabili mode? Làhà uho meit neha, “Yesus leho,” lahame im meit li uba vameahana aihi labe um ahu sediebalehe?
6. Ame Ala Bake Ot Odosiahada lam lem bak mali naat vatohedam lahasuhu labe ame da labe li duzuhuna damat etei aadam vabak. Bak lam um laha ozobohuna taia? Ba Alat Aba Aho amu fet ozome esuhu digat fuhuzobe, “Ame da lam li duzuhuna damat fà aadase,” lahame naat vatohedam lahasuhu bak.
7. Labihadamnàme ame da labe aba aho dam bakda laba aa vizehe labe iho Alat gagu fi hasi vàmadi esuhu im zi lam fa moudume zidazedam bak ehete. Labiham bak ehenàme naat ame da lam lem bak mali vi vatohedam bak ehe labe ahamo nasi li ahate duzuhu vabak. Labihàmu naat gi labihasu vi vatohedam bohu modesdume ba Alat Aba Aho amu fet ozome esuhu digat fuhuzobe ame naat lab vi vatohedam bak lam ab veiomam bak.
8. Labi di lam ame Ala Bake Ot Odosiahada labe aho ahate li duzuhuna damat ab aamam bak. Lahana im Boehàda Yesus asum ahoba iube na fako iedemna feà Am so laba modesu vou nom ilu duzuha ame da lam aba aho amu feà bak lam gi ab setemam bak. Labi im Boehàda Yesus Aho gi Am Aha Nutabe Neànat feuha da lam gi belu ab elomam bak.
9. Lamota am. Lahana ame Ala Bake Ot Odosiahada labe aho ahamte duzum di meedam im uba vamealo mozo. Ame da labe am gi Iblisit aba modi teudi duzu im mei feàti im mei feàti nehasu meedam bak. Abo, “Alat am oluho,” lahame damat fet aame àvodi ozobohudemna im meiti im meiti meeda. Labi na damat ihimo modem biem im feàna abo im meiti im meiti laha meeda. Am gi, “Abo Alat aba vizi meedalo,” lahame vageme im lam meeda tame.
10. Labi laha ame da labe ba im vamdesu meedam vaba gi, “Meit fà am im aime aba àvodehat tuse,” lahame gi giomim la gagoi le gagoidam bak. Ame bak labet modi Alat amu, “Vàhàdedase,” lahame fet ozome esuhu dam labe iho aime udovai vabi imbo tibame tu vuzehelo meedam tadem bak. Ame dam labe iho im imbona lam deeli tu vuzehem mu vedi fa im giomimna laba tu vuzehi meedam labet modi vàhàdelo modem bak. Ba Alat ame dam laba soat vausu fa vei neàdedam vabak.
11. Ame dam labe im imbona laba deeli tu vuzehem mu voohemu Alat ahit dam laba modi meit im vameadam di ame dam labe iho àvodehat aime tu vuzehemoholem bak lam modi vize tame. Labiham labe damat ame Ala Bake Ot Odosiahada labe am im giomimna lam aim di kehàm vaba ab tu vuzehedamam bak.
12. Labihadam labe ame dam im imbona tu vuzehem vaba vedi, “Fai bak nidi nim modese. Fai bak nidi nim modese,” lahame deeli meedam dam lam Alat ba uloodume aime neàdi ahole beoda tame.
13. Imti vahi Kristus bake tu vuzehi meedam dam abo im Boehàda Yesus Kristus labe Aba Aho deeli meedam dam oa, iho ozom, ibi iho uba lab vi ozome Ala bake, “Neàte,” lahame vou baedam tadem bak lam gi ahole meedam bak. Neham labe labihaha bak. Alat aham di iube na ahebu modehe vab di iube Aho gi nehi fet ozome esuhu bak. “Um Tesalonika dam uho ame im imbona lam tu vuzehi ulohodesu meeda. Labi Am Aha Nutabe Neàna labe Am feà labet uba modi fi hasi gi Aba Aho gagohona meeda. Uho labihasu meedàmu Aho uba beom bak fa vei mu uba soat vausu fa vei neàdedume um Am damalese,” lahame fet ozome ahumdi neàdi gagu esuhu bak.
14. Alat neha, “Aho um soat vausu fa vei neàdedume um Am damalese,” lahame labi ozome um gagodume vadaha bak lam gi iho uba Tesalonika laba le ame Im Neàna lam uba vou vameatedume uho aime tu vuzehedaha bak labet modi Alat lab fet ozome esuhu bak lam modi imbodehe di am bak. Di lam um ab Am damaleham bak. Im Boehàda Yesus Kristus Am feà bak lam, “Uba laha modi feà damalese,” lahame Alat ahit um soat vausu fa vei neàdedume um vame am damalehe bak. Iho labihasu ozodume Ala bake, “Neàte,” lahame vou baedam tadem bak.
15. Alat uba labihadàmu iho uba vahokedaha im imbona ahebu lam abo iho ahat vameadahada modeo, iho toedume oluhuda modeo, labihasu ahebu uho amu tu vuzehi meedaha bak lam laha mahate vi tu teudi laodoamsu bohu vuusu meedale.
16. Alat iba ozahit deeli im neà bak modi esuiam labe Aho iba vabededume im ahu modi teudedam bohu vuusda. Labi laha Aho amu neha, “Na labaha bohu vuusdamna lam Eho loda tame,” lahame iba fet gagu esuhuna lam iba modi, “Iho ba vam bak,” lahame iba modi iho ahu vàmadi tu vi ozoda. Labihadàmu iho uba nehi vi ozodume tom gagodam bak. “Im Boehàda Yesus Kristusti im Ai Alati uba Tesalonika dam laba vabededume um ahu modi teudeda. Labi laha uba modi ubu uho na im meedam di modeo, im vameadam di modeo, gi neà bakta vi ozome meedam tadeda. Labihadase,” lahame iho labihasu Ala bake tom gagodam bak.
1. Emti vahi Kristus bake tu vuzehi meedam dam oa, em sunit nim novalo modemu im nim uba gagolo mozo. Uho iba vi ozome nehasu Ala bake tom gagodale. “Iho lab vou vameatedaha Im Neàna lam damat etei kehàm vaba taho aime uledi ket vuat usime fi hiludamose. Abo la vizi le vizidume dam duana ahebu ame im lam aime tu vuzehi meedase. Abo uho amu alimeat aime tu vuzehi keàtedi meedam bak lamti ulohona meedase.
2. Labi laha damat im neà bak meedam vaba abo bisi fai bak meedam dam labe iba vabidam bak lam Alat fa soat vatoheme im fa neàdese,” lahame uho iba labihasu vi tom gagodale. Im Boehàda Yesus labe Am Im Neàna lam dam tu vuzehem vab dam dua daleàmu uho iba tom gagodale.
3. Lahana iho ozom, bisi àvodemnat modem kaio. Im Boehàda Yesus lam Aba Aho fet gagoho im lam ahebu Aho modi imbodem tademda Am am bak. Labihamda modemu iho gi nehi tu ozodam bak. Aho uba modi teudi gi labaha bohu laodoamsum bak. Labi laha Iblisit uba, “Um fai bak meedam bak uledeo?” laham bak modi ozolo meedam di im Boehàda Yesus labe uba modi um fa soat vatoheme fa vei neàdedam bak. Iho gi labihasu tu vi ozodam bak.
4. Uho im Boehàda Yesus bake tu vuzehi Amti vou ali meedàmu iho amu uba vahokedume esuhu im lam modeo, etei neo uba vameadaha im nim modeo, uho labihasu ba voom vaba abo aime vuzehi meedam bak lam im ahu amu gi ahumdi ab tu neàdeham bak.
5. Iho uba vi ozome nehasu tom gagodam bak. “Ai Ala oa, Oho Tesalonika dam bake deelem bak lam dam lam fa vabiem bak labna zohàme im Boehàda Yesusat dam laba tau modi it ozodam bohu vuusdase. Labi laha naat dam laba vabidam di lam amu Kristus bake naat vabidam di Aho gi geàmu keàtedi teudi meedam bak lamti ulohona Oho laha dam lam modi gi ame baket laha meedase,” lahame iho uba vi ozome Ala bake labi tom gagodam bak.
6. Imti vahi Kristus bake tu vuzehi meedam dam oa, im Boehàda Yesus Kristus iba gagu iho im dedamali uba nehame ootedume vameadalo mozo. Imti vahi Kristus bake tu vuzehi meedam dam na modem momohoda abo ostame azi auahadamda abo iho amu uba vahokedume uho aime vuzehi meedam bak laba vi tau meedam mom dam lam uba vizemo. Gi ahala fi tateme modiale.
7. Iho neham bak ozome uba labi gagoho bak. Iho amu uba le tau azihi di labe, “Im akatihasu meedam damat modela?” laham bak lam um ozobohu bak. Um ba biem vabak. Iho amu uba le tau azihi di lam im ba na modem mom vabak. Ba gi ostame azi auahadam vabak. Iho lab meedam bak lam uho laha gi ame baket meedam vaba?
8. Im ba mei na ve àm di ba teo ve àm vabak. Abo doi lu ve àm tadehe bak. Iho uba ahumdi meedameam uho vanamai meedamna zohàme ahit im anekehàt na modeme doiledam bak. Abo digad di modeo, aibu di modeo, ahebu na meedam labe doili na vame àdam bak. Labi laha sue modeo, gi nazoh amomoi modeo, gi ihimo vadam bak.
9. Iho bahagikidat uba li Alam Im Neàna vahokedam damat modemu gi uba ahumdi modem neà bak. Lahana im labiham mu ihimo na meedume doi vadam bak. Ahit nehalo labihaha bak. “Ibi iho meedaha bak lam uho laha vi aame ame baket meedase,” lahame ahit labi vouhodam bak.
10. Uho laha neham bak vi ozodale. Iho amu uba vi tau azihi di lam nehame gagodamehamdi esuhu bak taia? “Uho meidavat anekehà ehena na modem mohoda lam ba na àmna a lu àmule,” lahame labi uba vahokedamehamdi esuhuna taia?
11. Iho neham bak ozome uba labi gagoho bak. Iho im ahum aiha um dam totbaho na modem momda bak ubuda laba ehete. Labi ame dam lam na ibida modem bak ehena vedi fa meia li vi vabidume vàhàde. Labi neo fa meia li vi vabidume vàhàde. Gi labihadam dam ehe labe iho uba ozahit neo, “Dam lamohoda ahala fi tateme modidale,” lahame uba neo gagodam bak.
12. Umti vahi Kristus bake tu vuzehi meedam dam totbaho labe labihadàmu im Boehàda Yesus Kristus iba gagu iho im dedamat modemu iho ame na modem moho dam laba nehame tet ooteme vameadam bak. “Gi neà esdam labe im so neàdem bak laba ozome na meedume uho valo modemna vale,” lahame iho dam laba tet ooteme vameadam bak.
13. Lahana umota imti vahi Kristus bake tu vuzehi meedam dam laba iho uba neha, “Ubu uho lab im vamdesu meedam bak lam a vanamai mu voomule. Gi labaha bohu vuusdale,” lahame iho uba vi vabededam bak.
14. Iho etei sunit nib toedume oluhu im nim meit na modem momohoda labe ame im lam aim mu voomda aameam làhà, “Ame da labe udovai fà ladese,” lahame damat vou faodahit ahatet ame da labe am fako nua aasu gagu esu. Labi neo laha ame da lam fi tateme esu ahala modida. Labihadale.
15. Lahana ame bak lam meedam di obo oho fakemda laba im gagu im vahokem baket a modemule. Gi iademe om vahada bake im gagu fa neàdem bak labet ame da laba iademe beteat gagu vabededale. Lam bisi neà bak am tame.
16. Im Boehàda Yesus lam meia modi am ahu faheme fi goaitom vaba gi vabademsu bohu meedamda Am am bak. Labihàmu eho Ala bake neha, “Ai Ala oa, Oho Tesalonika dam laba modi im ahu faheme fi goaitom vaba gi vabademsu bohu meeda. Labi dam laba Oho laha vuusu vou aasdam bohu meeda. Labihadase,” lahame eho labi tom gagodam bak.
17. Eho Paulusat sunit nim toedume novalo modemu uba, “Neàte,” lahaho. Sunit omtobe nim eho Paulusat ehemo em anekehàt toedam bak. Eho nehasu toedam bak lam um amu sunit eho amu uba oluhuda laba em anekehàt toedaha bak lam um aame ozobohudehena taia? Uho ba aame ozo, “Aa làhà! Paulusat sunit nim neo toedume iba oluhe?” laham bak ozobohudem bake ehemo ahit em anekehàt zoho nim toedaha bak.
18. “Im Boehàda Yesus Kristus Aho uba Tesalonika dam laba ozahit deeli im neà bak modi esuidase,” lahame labi ozodume Ala bake tom gagodam bak. Neàte. Eho Paulusat sunit nim toedume ab neàdeham. Àhàm.
1. Timotius oa, om Kristus bake abo tu vuzehe labe om em adat ààmomda oa, sunit nim eho Paulusat toedume oba oluho. Neàte. Iba Soat Vausu Fa Vei Neàdedam Ala ame. Labi Kristus Yesus Aho fa lem bake iho nasi tu ahu vitasu vou faodamda ame. Labihasu vahi amu eba gagu esuhu labe em Kristus Yesus labe Am im vameadume esmozi laiam dam meidat ba ab modeham bak. Em labihamda meida nibe sunit nim toedume oba oluho. Eho oba ozome neha, “Im Ai Alati labi im Boehàda Kristus Yesusti labihasu vahi oba aam faimu ozahit deeli faobekesi im neà bak oba tau modi esuidase. Labi oba modi om ahu faheme fi goaitom vaba gi vabademsuse,” lahame eho ozodume Ala bake labihasu tom gagodam bak.
3. Timotius oa, Eho amu Makedonia bak laba lalo modem di labe oba neha, “Oho num debu Efesus laba aidale,” lahame oba it gagu vou esmoho bak labet oho gi neo ame baket meedale. Neham bak. Ame Efesus laba azim dam totbaho labe gi im giomimna vahokedàmu oho ame dam laba mali, “Ba a labihamule,” lahadale.
4. Labi ame dam lam laha im tai ahamda zi labe ihimo imohimti labi im faadaha debu vahokedam di ba taho novam bak ozom vabna lamti labihasu faasi vou vamea usehe im laba iho tu vi ozodume meedam bak lam oho dam laba mali, “Ba a labihadamule,” lahadale. Eho gi neham bak ozome oba labi gagoho bak. Im lamohoda gi dam otesidam bak modi fa duzum imot modem bak. Labi laha iho Kristus bake tu vuzehi meedàmu Alat Aba Aho ozoho bak lam iho ozobohudehena lam ba ame dam labe vi tau meedam vabak. Labiham bake oho gi Efesus laba azi, “Ame dam labe ba a labihamule,” lahame vahokedale.
5. Eho gi neham bak vi ozome oba labi gagoho bak. Alat ozoha, iho im Abada meia vahokedam di, “Dam otesidam bak modi fa duzule,” lahame ba ozodam vabak. Gi ame im vahokedam labet modi, “Dam fà ot deelidase,” lahame ozodam bak. Iho meia fa ot deelidam bak gi im nehasu meedam labe labihadam bak. Iho ba fai bak im ahu adat modesum vaba gi ahu bisi neàna modesum bak ozome meeda. Labi iho ahu adat it ozomna labe nehi ozo, “Im lada lamota Alat ozom di bisi im vamdesu modemda ame?” lahame it ozome meeda. Labi laha Kristus bake tu vuzehi ahu vàmadi meeda. Labihasu meedam labe fa im dam totbaho laba ot deeliame meedam bak am bak.
6. Dam totbaho labe vedi ame im imbona vahokedahana lam mu vedi fa zie fàusi ub oli bak vabi godam bakti ulohonali ostam im debu vabna laba deeli otesi otesida.
7. Labi ame dam labe vedi nehi ozo, “Im guruledume dat ahamda Musat toedume fi hasi esuhu Im Feàna lam meia vahokedase,” lahame modelo àhàkemnàme gi ame im bili ahusobuli meedam bak. Labi laha ame dam labe neha, “Im im nim ozobohudeha,” lahame it daetbadume ahit dam fà aisome bak tomba laba vameadamnàme ame im labe am tombu im ahu mahate ozobohudem vabna gi ostame daetbadume vi vahokedam bak. Dam lam gi labihadam damat modem bak.
8. Iho nehi ozo. Dat ahamda Musat toedume esuhu Im Feàna lam, “Akatihasu meedamnat modela?” laham bak lam damat iademe ozodume vahokedameam làhà ame Im Feàna lam gi neà bak.
9. Ame Im Feàna lam iademe ozodam bak gi neham bak. Alat dam im vamdesu meedam dam laba ozome ame Im Feàna lam Musa bake gagu toedume esuhu vabak. Gi fai bak nehasu meedam dam laba ozome toedume esuhu bak. Ame lab gagu vàmadi fi hasi esuhu im lam zidazi meedam dam ame. Labi dam boehà dam labe ibi iho gagu vàmadi fi hasi esuhu im zi mu fa ibi iho ozoho bak modelo àhàki odosi meedam dam ame. Labi laha Ala bake, “Am abo feàte,” lahame ahu adat iedi vou baedaha vaba gi ozahigeàmu fa im mei labaha bohu meedam dam ame. Labi laha faina labaha bohu meedam dam ame. Labi laha ba Ala bake tu vuzehi Aba Aho deelem im meedam vab dam ame. Labi damat neha, “Giomim modem Alat modem bak,” lahame tozome moudume im ibi iho bak damat ozomdata meedam dam ame. Labi dam im oi modeo, im ai modeo, gi dam amomoi modeo, oddam dam ame.
10. Labi nam meibada dat ehena aa le modem dam ame. Labi dat meibada nam ehena aa le modem lahi ame. Labi damat ihimo nam vam bak mu fa dat meidate modelo àhàkem dam ame. Labi lahit ihimo dat vam bak mu fa nam meidate modelo àhàkem lahi ame. Labi laha dam mei gi godam dam siàdume vou le meia lodume fa doi vadam dam ame. Labi dam meia ahi daet vagem dam ame. Labi dam meia ahit giomim vàlum dam ame. Labi Alam im imbona vahokedahana lam ulohodesu modehe vaba fa ot odosiame im meidehe dam totbaho ahebu ame. Labihasu meedam dam laba Alat ba beodam bak ozome aham di iube ame Im Feàna lam Musa bake ahit gagu toedume esuhu bak.
11. Ame im imbona vahokedahana lam im amomoit modem vaba gi Kristus Yesus labe Aba Aho meedaha Im Neàna lam am bak. Ame Im Neàna lam nehame modem imot modem bak. Ibi iho, “Feàte,” lahame ahu adat iedi vou baedam Ala labe Aho modi fi zeam bitoi fi gatehe Im Neàna am bak. Labi Aho eba neha, “Ame Im Neàna lam eho ve dam bake vou vameatedale,” lahame Alat eba labi gagu oluhu imot modem bak.
12. Im Boehàda Kristus Yesusat eba nehi ozo, “Paulus abo meit gagoho im ahebu aime uledi modem tademda am am bak,” lahame Aho eba nasi fet labi ozoho labe em ve eba ab gagoham. “Eho meedaha Im Neàna nim oho fa ve dam bake vou vameatedale,” lahame eba ab gagu Am im modem dateleham bak. Labi eho Am im aime dam bake vou vameatedam bake Aho eba laha modi teudehemu eho fa Aba, “Neàte,” lahadam bak.
13. Eho amu di iube gi nehadam bak. Kristus bake feàtàda. Labi laha Kristus bake tu vuzehehe dam laba eho laha vabidume fai bak bohu tadeda. Labi laha eho ame dam laba faki fu tozome dam labe fa geàda. Eho amu di iube gi labihasu meedam dàt modem bak. Lahana eho di labe Kristus Yesus bake tu vuzehem vab labe eho amu lab faina meedaha bak lam eho vedi em im neàna meeda tiba vabi meedam bak. Em labihadamnàme Kristus Yesus gi eba aam faimu im neà bak tau meedam labe eba modi fa ab Am im modem dateleham bak.
14. Labi laha im Boehàda Yesus labe Aho gi eba ozahit deeli im neà bak duana ilabdi modi esuidaha bak. Labiha labe eho etei fa Kristus Yesus bake deeli ab tu vuzeheham bak. Labi laha Kristus Aho dam bake deeli meedam bak lamti ulohona eho laha dam bake ab deeli meedamam bak.
15. Eho etei oba gagolo modem im nim im imbonat modem bak. “Kristus Yesusat bak niba lehe bak nim gi dam faina meedam dama soat vausu fa vei neàdedalo bak niba lehe bak.” Laham im imbona lam dam ahebu mahate aime vuzehem neàte. Ame dam faina meedam dam labe meida bisi faina meedamda em ame da am bak.
16. Em labihadamnàme Kristus Yesusat gi eba aam faimu im neà bak tau meedaha bak. Aho neham bak ozome labi modehe bak. Am abo meit Aba tu vuzehem bak labna zohàme ozahit laha vou faodam bohu meedamda Am am bak. Laham bak lam Aho fet vouholo eho bisi faina meedamda nim Aho eba amu nasi aam faimu im neà bak tau meedaha bak. Labiha labe ame bak lam dam badat vi aame ozobohudi fa Kristus bake tu vuzehi fa Alati vahi gi ahe neàna bohu vuusdam bak neo vi modem bak am bak.
17. Ala ibida nehame meedam Alat modem bak. Am abo dam vuusdam bohu lahasdume fa dam badate vou fum Boehàdatebot modem bak. Labi Am laha eloi koeilem gikina ahena bohu vuusdam Alat modem bak. Labi Am laha im aam biem Alat modem bak. Labi Am laha Ala bisi imboda vàmtea Am am bak. Labihamda laba imo dam ahebu nasi, “Feàte,” lahame Aba vou baedam bohu modesdase. Labihadase.
18. Timotius em adat ààmomda oa, eho etei oba lab toedume oluhu im lam oho mahate aime uledi im dedateli dam im giomimna vahokedam dam laba ot odosiale. Ame im lam ba im meit modem vabak. Abo amu di iube Alam Aha Nutabe Neàna labe dam busao dam laba modi vizi teudehe labe oho ba modem im nim ame dam labe amu nasi fet ozobohudi fa oba fet gagu esuhu im am bak. Labiham bake oho gi ame im lam uledi vi ozodume meedam labe mahate teudi vuusu meedale. Abo tentara labe iba otelo lem mod laba, “Beose,” lahame keàtedi meedam bak lamti uloholi oho dam giomim vameadam dam laba fa odosi veimodale.
19. Labi oho teudi vuusu meedam di labe gi nehame vuusum bohu meedale. Alam im imbona vahokedahana obo oho lab tu vuzehi bohu meedam bak ame. Labi laha om ahu adat it ozomna labe ozo, “Im nidi nim bisi vamdesu modemda ame?” lahame ozodam labe meedam bak ame. Oho gi labihasu teudi vuusum bohu meedale. Lahana dam labihasu meedaha vabamu ame im imbona vahokedahana lam fa etei mu voohoda ehete. Vedi gi im giomimna laba fa tu vuzeheho.
20. Ame dam lam meida Himeneus am. Labi meida Aleksander am. Laham dam ahim lam gi amu im neàna modehe bak fa vàhàdeme setehe dam am bak. Ame dam ahim labe iho giomim vahokedam labe vedi Ala bake feàtàdam bak lam, “Fà vaitoi voose,” laham bak ozome eho dam ahim lam Iblis bake teohet lu esuhu bak.
1. Timotius oa, eho etei oba toedume oluhu im nim oho aame fa Kristus bake tu vuzehi vahi meedam dam abo oho vuusdam dam laba nasi vameadale. Um ahebu Ala bake tom gagodalo modem di ubu uho valo ozomna lam tom gagodam bak ame. Labi gi tom gagodam bak ame. Labi dam amomoi labe ibi iho modelo ozomna laba tom gagodam bak ame. Labi laha Ala bake, “Am abo feàte,” lahame vou baedam bak ame. Labi dam debu meiti dam debu meiti ahebu vi ozome tom gagodam bak ame.
2. Labi dat boehàdatebo iudu iumti iudu iumti ame. Labi dam vuusu im vahokedam boehà dam zi totbaho lamti ahebu ame. Labihasu uho laha vi ozome Ala bake tom gagodale. “Neham bak meedase,” lahame eho oba labi gagoho bak. “Alat Aba Aho ozoho im lam meedase,” lahame im ahu vàmadi abobo meedam bak ame. Labi laha Alat modeo, damat modeo, fa iba aame ozo, “Ahole meedam damat modem bak,” lahame ahu adat iedi vou baedam bak ame. Labihasu meedam di lam naat iba vabidam vaba iho gi neà esdume ame im lam meedam bake uho dam eeda ahebu vi ozome Ala bake tom gagodale.
3. Ame bak lam bisi neàna modem bak am bak. Labi iho ame bak lam meedam labet modi iba Soat Vausu Fa Vei Neàdem Ala labe Am ahu deelem bak am bak.
4. Neham labe Am ahu deelem bak. Am im imbona laba ozobohudi fi gatei tu vuzehehe dam ahebu soat vausu fa vei neàdedalo àhàkedam labe labihaha bak.
5. Oho neham bak nim mahate ozodale. Dam bake vuusum Ala gi vàmtea bak. Ba amomoi kaio. Labi laha im dam bak niba esuhu damti Alati toheda gi vàmtea bak. Im toheda vàmtea lam gi Kristus Yesus am bak.
6. Ame Kristus lam neham Dàt modem bak. Dam faina meedam bak lam fa faamome vei neàdem bak ozome Aho naedat ahit uledi, “Am elom neàte,” lahame Ahamo gagoho labe Alat amu fet gagu esuhu digat fusi ab eloham bak. Labi ame digat fusi Am elohemu Alat Aba Aho dam ahebu soat vausu fa vei neàdedalo àhàkedam bak lam Aho ab modi fi gatei ab tombaleham bak.
7. Labihàmu Alat ame bak lam meedalo àhàkem labe Aho eba gagu, “Am im vameadume esmozi laiam dateli ame im lam vou vameatedale,” lahame eba labi gagu oluhu bak. Ame bak lam eho giomim gagom vaba abo imbona gagodam bak. Alat eba neha, “Yahudi damat modem vab dam ahebu laba le Am im imbona lam vahokedume dam lam fa ame im laba tu vuzehi meedase,” lahame eba labi gagu oluhu bak.
8. Timotius oa, eho neha, “Dam bak iuba esuhu dam lam ahebu nehame meedase,” laham bak oba vameadalo mozo. Dam Kristus bake tu vuzehi meedam dam bak ahaladiame esuhu dam ahebu ubu uho esuidaha bak laba vazisi Ala bake tom gagolo modem di dam aabot damat avaelaha bak laba duzu tom gagodam di ba faina meedam vaba gi im neà bakta ahu vàmadi meedam dam abo meia daet bem bakti meia fakem bakti amu nasi mu voou ahu vàmadehe dam lamota ihimo im anekehà ahim vousai Ala bake tom gagodale.
9. Labi laha lahit ihimo im nehasu meedale. Damat aame ozo, “Sue ahole duhe?” laham bak ozome sue iademe dume nazoh naele. Gi iademe im ladem vabak laba ozome ozobohudi sue dume nazoh naele. A, “Damat fà aame im vase,” lahame doi duana vaha sue modeo, emasat modeme naehena modeo, mutiarat modeme naehena modeo, a naedamule. Gi feà vab namelele. Labi laha lahi ahulat ozo, “Meit iba fà aame vase,” laham bak a ozome im ohuta sisit gome bobaeme naemule. Gi ozom vabna gome vabiemta neàte. Ame lahi labe iho git modemna zohàme it vou faovoi ozodam labe iademe meedam bohu meedale.
10. Gi nehasu meedamta neàte. Lahit neha, “Im abo Ala bake, ‘Am abo feàte,’ lahame ahu adat iedi Ala bake vou baedam lahit moz,” laham lahi labe gi meia im neà bak meedam bakta tadele. Ame bak lam bisi neà bak am bak.
11. Labi im meida neham bak. Meit Alam im vahokedam di lahit a ot vai fa ot gagoiamule. Gi daleàdi azi ame im lam aime vi ozodume uledi meedale.
12. Labi em laha abo dam Kristus bake tu vuzehi meedam dam labe iho Ala bake vou baedam num laba bakamta vahi Ala bake vou baedam di ba lahit boehà nameli dam vuusu fa dam bake vahokedam vabak. Eho malem bak. Labi em laha lahit feà nameli fa dam bake im ootedam bak lam em laha malem bak. Gi ame lahi labe nehame modemta neàte. Ame im lam gi daleàdi azi vou faodume dogoit aidam labe vi ozodale. Labi modemta neàte.
13. Eho gi neham bak ozome labi mali gagoho bak. Alat ahamte bak visoi Adam modi ab dateleham bak. Labi ba neo nam Hawa mode. Labihaha bak.
14. Labi laha Iblisit ahi vagem im lam amu dat Adam bake gagu Adamat ame im lam aime, “Imbote,” lahame vuzehi modehe vabak. Gi am nam Hawa bake ahamte gagu namet vedi imbo tiba vuzehi modehe bak. Labiha labe Alat gagu esuhu im lam nam Hawat aho ame im lam voou fa ab fai nameleham bak. Labiha bake lahit feà nameli dam bake im vahokedam bake eho mali gagoho bak.
15. Labi fai namelehemu Alat ab gagu uloome esuham. “Seee. Ba lahi data faam di gi kikezi geàdamna faadale,” lahame ab uloome esuham. Lahana Alat labi uloohonàme lahit im nehasu meedameam làhà ame lahi labe ibi iho faina meedam bak lam Alat ozahit soat vausu fa vei neàdedam bak. Lahit Kristus bake tu vuzehem bak voom vaba abo keàtedi bohu vuusu meeda. Labi laha meia fakem vaba gi meia deelem bohu meeda. Labi laha gi im Alat gagohoda lamota vuzehi ahu vàmadi meedam bohu meeda. Labi laha iho na im ahebu meedam di ihimo nasi vi ozodume ozobohudi neàdi ame im iademe meeda. Labihasu meedam labe Alat lahi laba soat vausu fa vei neàdedam bak am bak.
1. Timotius oa, eho etei oba gagolo modem im nim im imbonat modem bak. Oho aimale. Meit ozo, “Kristus bake tu vuzehi meedam dam laba eho vuusu im vameame faheme modiam busao datelelo modem bak,” lahame ozomda labe aho gi im neàna modem bakta modelo àhàkedam bak.
2. Dam Kristus bake tu vuzehi meedam dam laba meit vuusu im vameame faheme modiam bak lam im feàna modem bak am bak. Labiha labe gi im nehasu meedam damta ihimo ame dam laba vuusu im vahokedam busao damalem neà bak. Da lam, “Am git modeho,” lahame meit aba ba vàlu gagom vabak. Labi laha ame da lam gi lahi vàmtea vam bak. Labi laha ame da labe na im ahebu meedam di ahamo naedat am ahu it vou faovoi iademe meedam bak. Labi laha ame da labe aho na im ahebu meedam di ahamo nasi vi ozodume ozobohudi neàdi ba iademe meedam bak. Labi laha damat ahu adat iedi aba vou baedam baket meedam bak. Labi ame da labe laha bahagikida lem di labe am num malem vaba abo uledi na àmna lodume am num laba vou im bak. Labi laha ame da lam meia vahokedam bak lam am ozobohudi gi iademe vahokedam bak.
3. Labi laha ame da labe aho ba vao meona duana uddume bak vabi bobidam vabak. Labi laha meit gi im koena gagomna lam aho ba am ahu gukeme meoli feà bak fum vaba gi ame im lam ailahigeàmu fa ahu nemahuba neàt meedam bak. Labi laha ba beilo àhàki daet ot vai beàdam vabak. Labi laha ame da labe aho bisi doi dualelo deeli meedam vabak.
4. Labi laha ame da labe am namti am datati labihasu aho iademe vuusu im vahokedam bak. Labi iademe vuusu im vahokedam labe am data labe ibi iho im aiam im laba aime uledi vuzehi fa im ai bake, “Ai ahole meedam bak,” lahame ahu adat iedi vou baedam baket meedam bak.
5. (Eho gi neham bak ozome oba labi gagoho bak. Meit am namti am datati iademe vuusu im vahokem vabna ba akati Kristus bake tu vuzehi vahi meedam dam laba iademe vuusu im vahokedàla? Labiham biem bak.)
6. Labi laha meit gi etei faina meedam bak voou fa ahu vàmadi Kristus bake tu vuzehi meedamda lam eho ame da lam fa ame dam laba vuusu im vahokedam busao datelem malem bak. Ame da labe gi etei ahu vàmadi fa ame dam laba vuusum busao datelemeam làhà am gi aba it daetbadam bak. Dat labihamda lam Alat gagu gi fai bak tadem bak. Amu Iblis aba it daetbadam labe Alat gagu gi fai bak tadem bak lamti ulohona neo ame da laba modi neo fai bak tadem bak. Labiham bake meit gi etei ahu vàmadi fa ame dam vuusum busao datelem bak lam eho malem bak.
7. Labi laha ame dam vuusu im vameame faheme modiam busao datelelo modemda labe gi neà bakta meedam labe dam Kristus bake tu vuzehem vab dam abo dam giida labe ame da labe lab meedam bak lam aame ozo, “Da lam abo neà bakta meedamda ame?” lahame labi gagohoda lam vame fa dam laba vuusum neàte. Lahana ame da labe labi modem vabameam git meedameam làhà damat lab meedam bak lam aame tozome im vahokemeam làhà ame da lam ab lademam bak. Labi laha ame da lam fa Iblis am im gagu oluiam datelem bak. Abo dohot vabi ledahit felik loat si abehamdem bakti ulohona modi Iblisit ab vamam bak. Labihasu ame da labe eho etei, “Im nehasu meedale,” lahame oba lab vameadaha im lam ahebu neàna meedamta ame da labe aho fa Kristus bake tu vuzehi meedam dam laba vuusu im vameame faheme modiam busao datelem neà bak.
8. Timotius oa, meit ame Kristus bake tu vuzehi meedam dam laba vuusdam busao dam laba vi taui vi tauidume vuusu im vahokedalo meedameam làhà gi eho amu oba gagohoda lamti ulohona fi me valo modem di gi im nehasu meedam damta fi me vale. Ame dam lam meit aame ozo, “Ahole meedam bak,” lahame ahu adat iedi vou baedam baket meeda. Labi laha ame dam labe ba meia vagedam vaba gi imbodem tadem bak meeda. Labi laha ba ame vao meona duana uddume bak vabi bobidam vabak meeda. Labi laha ba meia vageme, “Am doi dualese,” lahame àhàki git meedam vabak meeda.
9. Labi ame dam lam laha ame Alat amu iba vasti modi fa ba ahate fi zeam bitoho im imbona lam ba, “Imbo?” laham bak ba it ozodam vaba abo tu vuzehi ahu vàmadi meeda. Labihasu meedam damta fi me vale.
10. Lahana ame Kristus bake tu vuzehi meedam dam laba vuusdam busao dam laba vi tau meedam datelelo àhàki modem di labe ba meit ahamo ostame ozome modem vabak. Ame da lam fi me valo modem di am ahu nasi ozo, “Meit im vàlu gagom bak na vabak,” lahame ozome ozobohudemeam làhà oho ame da laba neha, “Oho vi tau vuusu meedam neàte,” lahame gagom neà bak.
11. Labi ame dam vi tau vuusu meedam damalelo modem dam labe im lahi laha gi am dàt meedam bak labe laha ame baket meedale. Ame dam labe im lahi im nehasu meedam bak. Ame lahi lam meit aame ozo, “Ahole meedam bak,” lahame ahu adat iedi vou baedam baket meedale. Labi ame lahi lam laha, “Mei fà beose,” lahame ba meia aa vou voe voetedam bak vabak. Labi ame lahi labe iho na im ahebu meedam di ihimo naedamat im ahu it vou faovoi iademe meedam bak. Labi ame lahi lam laha iho im meedam di ba vastem vaba abo ahate meedam labe damat aam di tum neà bak ozome im meedam bak. Labihasu meedam lahi labe im damat fa ame busao dam laba vi tau vuusu meedam neà bak.
12. Labi ame dam vuusdam busao dam laba vi tau vuusulo meedam dam labe laha gi nam vàmtea vam bak. Lahi ba behàsdem vabak. Labi laha ame dam labe im lahiti im datati labihasu iademe vuusu im vahokedam bak.
13. Ame dam laba iademe vi tau vuusu meedameam làhà meit ame bak laba aame ozo, “Dam lam abo feàte,” lahame ahu adat vei iedi vou baedam bak. Labi laha ame dam labe, “Iho Kristus bake tu vuzeheho,” laham im lam dam bake vameadam di ba ladehebeat vameadam vaba abo teudi ozobohudi vameadam bak. Labihadam bak.
14. Timotius oa, em abo oba ilahu taho lelo àhàkedaho. Lahana em oba taho lem vabameam làhà Alam damalehe dam labe iho ba, “Akatihasu meedam neàte,” laham bak biem bak lam om ozobohudi fa ame dam laba vahokedam bake eho oba im nim ahebu nasi fet toedume oba oluho. Im abo Ala imboda elom gikida labe Am damalehe dam im am bak. Labi Alat Am im imbona lam Am damalehe dam nibe iho vuusdume meia vou vameatedam bak. Ame bak labet modi Alat Aba Aho modelo ozoho bak lam ab modi imbodedamam bak. Abo num baoso tom odosu num teudehe bak lamti ulohona meedam bak.
16. Yesus Kristus labe Aba Aho meedaha im lam Alat amu vasti fa etei ba ahate fi zeam bitoho im lam abo feàte. Labiha labe iho nehasu vou ladeedam bak. Ame Da labe Aho bak niba ahamte lehe di fa Dateli damat Am alihi aadaho. Labi, “Am abo im vamdesu meedamda am tame,” lahame Aho gagoho bak lam Alam Aha Nutabe Neàna labe laha vi tau ot vai gagoho. Labi Am alihi lam Alat Am im gagu vou usem damat laha aadaho. Labi Aba Aho meedaha im lam Aba tu vuzehi meedam dam labe fa dam Alat meedam bak ozobohudehe vab dam debu iudu iumti iudu iumti ahebu vou vameatedaho. Labi ame Da lam dam bakda dua labe Aba tu vuzehi meedaho. Labi ame Da lam Alat Aho azim bak asum ahoba iuba Aho vousaha di lam Alat Am im gagu vou usem dam labe gi, “Am abo feàte,” lahame Aba gut vou baedamna tom iluho. Kristus Aba Aho labihasu meedaha im ahebu lam ame im imbona am bak.
1. Timotius oa, Alam Aha Nutabe Neàna labe Aho amu iba nehame iademe fet gagu esuhu bak. “Ba diamut ibi iho tu vuzehi meedaha im imbona lam dam totbaho labe fa mu voou seti vedi fa meia ahi vagedam setan zi labe iho vuusdam dam labe ibi iho im giomim vahokedaha im laba fa aime tu vuzehi meeda tame,” lahame labi fet gagu esuhu bak.
2. Ame lab vahokedam im giomimna lam gi dam ahobat neàdi vagem dam labe ibi iho vahokedaha imot modem bak. Labi laha ame dam labe ibi iho faina meedam bak lam abo gi dihasi meeda. Dihasi neo meeda. Labihadam labe ba im ahulat, “Iho faina meedaho,” laham bak lam vi ozodam vabili gi as vua vahume umahubuli tamzohobuli vua vahum di vua bogozi as dom biem bak lamti uloholehe damat modem bak.
3. Ame giomim vameadam dam labe vedi nehame vahokeda. “Nam dat a vamule. Dat nam a vamule. Im na lada lam àm fi ham dam tame. A àmule. Lahame Alat malehe bak,” lahame labihasu vahokeda. Lahana ame im lam giomim vahokedaho. Neham bak. Dam Kristus bake tu vuzehi meedam dam abo ame im imbona vahokedahana lam ahebu tu vuzehi meedaha dam labe iho ame na àmna lam ve àlo modem di Ala naedate gago, “Oho na nim modehe bak abo neàte,” lahame labi tom gagodaha labe ve àm neà bak. Iho ve àm bake na àmna ahebu Alat ahit modi ab esuham bak.
4. Na ahebu Alat modehena lam abo neàna tadehe bak. Labiha labe iho ba neha, “Na nim fi hamda am tame. Im ba àm vabak,” laham bak lam ba labi gagom biem bak. Gi neham bak. Iho Ala naedate gago, “Oho na nim modehe bak abo neàte,” lahame labi tom gagu neàdi afoezobe ame na àmna lam visoi àm neà bak.
5. Alat amu neha, “Na àmna ahebu àm neàte,” lahame labi gagoho bak lamti iho Ala naedate gago, “Oho na nim modehe bak abo neàte,” lahame labi tom gagoho bak lamti labihasu meedam labe iho na àmna ahebu gi ve àm neàna tadem bak.
6. Timotius oa, eho etei oba lab toedume oluhu im zi lam oho ve fa omti vahi dam Kristus bake tu vuzehi meedam dam totbaho laba vahokedale. Oho labi meedameam làhà neham bak nim ab imbodemam bak. Damat ame bak lam aame ozo, “Om abo Kristus Yesus labe Am im aime fa dam bake iademe modidamda neàda om am bak,” lahame oba labi gagodam bak. Labi laha Alat lab vameadaha im imbona lam abo ibi iho amu tu vuzehehe im ame. Labi ba oba neo lab vahokedaha im neàna oho amu faasi tu vuzehi vou mode ledume etei vou fuhu im ame. Labihasu oho vuzehi vi ozodume meedam labet modi om ab ozomam bak. “Làhà ebe eho tu vuzehehe bak lam vi teudedà?” lahame ozome ozobohudem bak am tame.
7. Tai ahamda labe ibi iho fi hasi vou mode lehe im ahum modeo, imohim modeo, a vi tu ozodamule. Im lada lam Alat gagu esuhu vab imot modem bak. Labihàmu oho gi ailahigeàmu fa Alat Aba Aho ozome oba gagoho im lamota vouhodam labe meedale. A vanamai voomule.
8. Meit gagohona eho etei oba gagolo modem im nim im imbonat modem bak. Meit am so bedem bak labna zohàme am so teudelo dihasi na meeda. Dihasi neo na meeda. Labihadam labe iho bak niba esdam di iba koena vi tau meedam labe im so neàdem bak am bak. Lahana meit Alat Aba Aho ozome gagoho im lamota ahu vàmadi dihasi modi dihasi modidam labe bisi iba vi tau im ahu teudedam bak am bak. Neham labe bisi iba vi tau im ahu teudedam bak. Iho bak niba azim di ame im lam meedam labe Alat iba gi neà bak tadeda. Labi laha ba diamut iba modi im Alati vahi Aba Aho azim bak abo neà bak laba azim bak. Labihadam imot modem bak.
9. Laham im imbona lam dam ahebu aime vuzehem neàte.
10. Ala abo elom gikida abo gi labaha modesuhu Ala Am am bak. Labi laha Am abo dam bake Soat Vausu Fa Vei Neàdem Ala vàmtea Am am bak. Meit Aba tu vuzehehe dam lam bisi Aho soat vausu fa vei neàdem dam am bak. Ala labihasu meedam Alat modemu iho nehi fet ozo, “Iho gi im Abadata meedameam làhà Aho iba im neà bak duana modi esuidam bak,” laham bak laba iho nasi tu vi ozodàmu dam totbaho labe Ala bake tu vuzehem bak laba ozome iho abo keàtedi ame Im Neàna lam dam bake vou vameatedam bak.
11. Eho etei oba lab toedume oluhu im lam ahebu oho ve fa dam bake vahokedume afoezobe, “Uho mahate aime vuzehi meedale,” lahame mahate vi ootedale.
12. Timotius oa, om abo dat gàhàda modem labe oba damat aame feàtàmo. Oho gi, “Damat fà aame ahu adat iedi oba vou baedase,” laham im lamota ozodume meedale. Dam Kristus bake tu vuzehi meedam dam labe, “Iho akatihasu meedam labe neàdela?” laham bak lam ohomo naedat amu nasi it vouhodale. Vouhodam labe gi iademe im nehasu meedale. Oho meia git gagodam vaba gi im neàna vameada. Labi laha git meedam vaba gi iademe meeda. Labi laha dam amomoi bak ium ahebu oho laha deeli meeda. Labi laha oho Kristus bake tu vuzehi meedam bak lam voom vaba gi keàtedi meedam bohu vuusda. Labi laha oho om ahu faina meedam vaba gi neà bak bohuta meeda. Oho labihasu vouhodam labe ame dam labe vi aame ozobohudi ame baket tau meedam bak am bak.
13. Om eho oba lem bake vou faodam di labe oho gi nehame meedale. Damat dogoit vou faodahit Alat Vameadaha Im Toedahana lam meit aame gagoda. Labi ame dam labe, “Im akatihasu meedam labe neàdela?” laham bak lam oho laha dam bake vahokeda. Labi vahokedume afoezobe neo vi ozodume, “Im imbona vahokedahana nim uho mahate aime vuzehi meedale,” lahame vi vahokeda. Oho gi labihadamna eho ba li aase.
14. Alat ozahit oba amu neha, “Im Ebeda nim meedale,” lahame oba amu fet gagu esu oba vizi teudehe bak lam oho mahate vi ozome meedale. A voou setemule. Alat oba lab modi vizi teudehe bak lam gi nehaha bak. Amu di iube Kristus bake tu vuzehi vahi meedam dam laba vuusu im vameame faheme modiam dam busaoda laba Alam Aha Nutabe Neàna labe ame dam laba modi vizi teudehe labe, “Om ba nehame mode tame,” lahame Alat fet gagu esuhu im lam ame dam labe ozobohudi fa neo im anekehà om ohu laba odotladam labe oba ahate ab gagu esuham bak. Labihàmu ame bak lam a voomule.
15. Eho etei oba, “Nehame meedale,” lahaha im lam oho mahate ahu vàmadi keàtedi meedale. Oho labi meedam labe dam ahebu aame ozo, “Da lam abo im Alabada fa meedam meolehe?” lahame aame ozobohudi gagom bak am bak. Labiham bake oho mahate ahu vàmadi keàtedi meedale.
16. Obo oho meedam im lam om ahu adat it vou faovoi iademe meedale. Oho labi meedam labe Alat oba soat vausu fa vei neàdem bak am bak. Labi laha oho Alam Im Neàna vahokedahana lam dam bake vahokedam bak lam om ahu adat it vou faovoi iademe meedale. Oho labi meedameam làhà oho lab vahokedaha im laba aidume vuzehedam dam lam laha Alat soat vausu fa vei neàdedam bak am bak. Labiham bake oho mahate keàtedi iademe meedale.
1. Timotius oa, dam Kristus bake tu vuzehi meedam dam labe git meedam di oho fa im vahokedam di gi iademe nehame meedale. Om dat gàhàda labe dam busaoda laba bisi dae meona a gagu im vahokedamule. Oho gi om ai laba iademe im vameadume fa neàdem bakti uloho bak laba ozome fa dam busaoda laba laha ame bak labet neo meedale. Om aiat modemna ozomom bak. Labi omti ulohoda dam gàhàda laba im vahokedam di oho gi om vahada modeo, om dubu modeo, laham dam laba iademe im vameadume fa neàdem bakti uloho bak laba ozome fa ame dam gàhàda laba ame bak labe neo meedale. Om vahadat modemna ozomom bak.
2. Labi lahi busaoda laba oho im vahokedam di gi om oiat modemna ozohomu iademe im vameadume fa neàdem bak laba ozome fa ame lahi busaoda laba im vahokedale. Labi lahi gàhàda laba im vahokedam di gi om nàt modemna ozohomu iademe vameadume fa neàdem bak laba ozome fa ame lahi gàhàda laba im vahokedale. Oho ame bak lam meedam di om ahu git ozodume faina meedam vaba gi neà bakta ozodume meedale.
3. Labi laha lahi maboena ihimo todamsuomna zi lam Timotius oho om damti mahate aame faobekesi vabiedale. Lada lamota ubu uho aame faobekesi vabiedam maboe zi am bak.
4. Lahana lahi maboena labe am datat modeo, am mekehàdat modeo, ehelemeam làhà ame dam labe neha, “Iho Kristus bake tu vuzehi Aba Aho ozome gagoho im lam meedam dam im am bak,” laham bak lam ahu vàmadi vouholo modem bake ame dam labe im oi modeo, im tai modeo, nasi aame faobekesi vabiedale. Ame bak lam ba dam giida labe aame faobekesi vabiedam vabak. Am datat modeo, am mekehàdat modeo, ihimo aame faobekesi vabiedam labe ame data labe im aiti im oiti im taiti labihasu amu iba koe diat vabiedaha bak lam im fa neo ame baket ame baleà ab vouhoham bak. Neham bak. Ame dam labe labi meedameam làhà Alat nehi ozo, “Ame lab modehe bak lam abo neàte,” lahame labi deeli gagodam bak.
5. Lahana lahi ahamo tousdam maboe labe dam aba vabiemda vabalehe labe fa am ahulat nehi ozo, “Alat eba taum bak,” lahame Ala bake nasi tu vi ozodam labe neha, “Ala oa, Oho eba taule,” lahame digad diat tom gagoda. Usehe di laha tom gagoda. Labihadam bohu meedam maboe zi lam Kristus bake tu vuzehi meedam dam labe iho aame faobekesi vabiedam maboe am bak.
6. Lahana lahi maboe totbaho labe na ibi iho deelemna laba deeli àhàki meedam lahi maboe laba uho aam dita ahet. Lahana Alat aamta gi Amti vaitesuhu labe elohona ozomom bak.
7. Meit uba neha, “Um git modeho,” laham bak vàlu gagom bak labna zohàme eho etei oba lab vameadume oluhu im lam oho ve fa dam Kristus bake tu vuzehi vahi meedam dam laba mahate vahokedale.
8. Meit neha, “Em Kristus bake tu vuzehi meedamda meida em am bak,” lahame gagomda labe am namti am datati aba aho bisi faobekesi vabiedamda am bak. Lahana ame da labe am dam debu labe aba ahumdehe maboe modeo, am namti am datati modeo, ame dam laba aame faobekesi vabiedam vabameam làhà ame da labe aho ibi iho tu vuzehehe im imbona lam gi abo ab mu vooham bak. Labi laha ame da labe labi modemeam làhà dam Kristus bake tu vuzehem vab dam labe ibi iho faina meedam bak lam vafozi bisi feàna modeheda am am bak. Labiham bake eho etei oba lab toedume oluhu im lam oho ve fa om dam laba mahate vahokedale.
9. Labi laha dam Kristus bake tu vuzehi vahi meedam dam labe iho, “Akatiham maboe labe im ee toedume iho vuusu vabiedam neàte,” laham bake toedam sunit laba gi lahi ihimo todamsuom maboe nehame meedam lahi lamota im ee sunit laba toedale. Ame maboe lam abo doudamehamdi faidi enam puluh tahun fuhu bak ame. Labi laha am dat ahamte lab vaha vàmadehe bak ame.
10. Labi laha damat aaha ame maboe labe meia im neà bak vuusu meedam maboet modem bak aahemu vou vameatedam bak ame. Ame neà bak lam neham bak. Ame maboe lam abo mei datati abo iademe vou aasdume budualeda. Labi laha dam bahagikida lem di laha na ve lu àidam bak meeda. Labi laha dam Kristus bake abobo tu vuzehi meedam dam labe im na aho fa ot vai meeda. Labi laha meit na im duzum di aho aame faobekesi tau vabiedume asimdedam bak meeda. Labi laha meia neà bak meedaha bak totbaho ahebu laha meeda. Labihasu meedaha maboe lam im ee laba toedale.
11. Lahana lahi maboe gàhàda zi lam im ee a ame sunit laba tau toedamule. Uho labi modemeam làhà ame lahi maboe gàhàda labe im ahu dat vam bak it malesome modeha modem bili fa dat vam bak ozodume feà bak fusi fa ab tombalemam bak. Labiham labe iho amu Kristus bake gagu vàmadehe bak lam gi fa totobedi vàhàdeme setem labe fai bak ab modemam bak. Labiha labe maboe labe ihimo faina modehe bak.
13. Labi laha ame maboe gàhàda labe im ee toedameam làhà na modem odohali vedi fa num iudu iuba le im vameada. Num iudu iuba le im vameada. Labi àdesda. Lahadam bak. Ba fai bak lada lamota meedam vabak. Abo meit modehe im dam iudu iuba le vameadam labe it feàtàda. Labi laha na abada modem vabna vedi meia na ootemoholi meeda. Labihasu meedam labe im dedat gagoho vab im lam vedi aho giida labe fa vameadam bak meeda. Ba labiham bake lahi maboe gàhàda labe im ee a ame sunit laba toedamule.
14. Eho gi labihadam lahi maboe gàhàda laba, “Nehame meedale,” laham bak fa vameadalo mozo. Gi dat amomoi fa ve fa data faasi am datati am datti iademe neà bak ozome meedam neàte. Labiham labe Kristus bake tu vuzehehe vab dam abo iba fakem dam giida labe ba iba aame vàlu feàtàdam biem bak.
15. Eho gi neham bak ozome oba labi gagoho bak. Lahi maboe gàhàda totbaho labe meit im ee toedume modeha im Kristusbada vuzehi meedam bak lam mu voou seti fa im Iblisbada vuzehi meedalo ahu ab vàmademam bak. Labiham bake eho oba, “Labihasu faheme meedale,” lahame vameadam bak.
16. Meit Kristus bake tu vuzehi meedam nam meida labe am oi maboelehena modeo, am nam dubuda maboelehena modeo, am tai maboelehena modeo, am nade maboelehena modeo, am hagalea maboelehena modeo, ehelemeam làhà ame nam labe ahamo aame faobekesi vabiedale. Ba ame nam labe amti vahi Kristus bake tu vuzehi meedam dam totbaho laba a ahumdi meedamule. Amti vahi Kristus tu vuzehi meedam dam labe fa maboe ihimo todamsuomna laba aame faobekesi vabiedam bake eho oba labi toedume oluhu bak.
17. Em im meida nim neo oba gagolo. Oho Alat Vameadaha Im Toedahana laba meit nehame toehena laba vi ozodale. “Damat gandum oo fet veimome nu atelo modem di sapi lo vààsu am nekehàbu labe gandum oo laba duzu duzuidume unadam labe vou làbo lebodam di labe am omto a loat giamule. Aho duzui duzuiam diat fokehe bake koena visoi àm neàte.” Lahame labihasu toehe Alam im lada lam vi ozodale. Labi Alam im meida nim laha vi ozodale. “Meit mei na meedamda laba ame na modem bak gohali na lodam neà bak.” Lahame labihasu toehe Alam im lada lam laha vi ozodale. Alam im labihasu toehemu ame Kristus bake tu vuzehi vahi meedam dam laba ahala vuusuiam busao dam labe ibi iho vuusualaha dam laba vuusdam di gi iademe neà vuusu meedàmu am dam labe ame lab meedam bak laba ozome gohali na lodam di gi, “Abo neàte,” lahame ahu adat iedi fetehesu vi lodale. Ame bak lam meedam di bisi ozomda neha: Busao dam labe Alam im vou vameateda. Labi Alam im neo vou vahoketeda. Labihasu keàtet meedam busao dam lam ame bak laba ozome gohali na lodam di bisi ozome fetehesu vi lodam dam am bak.
19. Labi Timotius oa, meit oba ahamte li nehameam, “Kristus bake tu vuzehi vahi meedam dam laba vuusu im vameame faheme modiam dam busaoda labe aho faina modeho,” lahame li vàlu gagomeam làhà a nasi ame da vàmtea labe aho gagoho im lam àvodehat aime uledemule. Lahana ba neo meit vuli vi gago, meit vuli vi gago, labihamta aim neàte.
20. Lahana ame dam laba vuusum busaoda labe aho faina modehe bak imbodemeam làhà oho ame da lamti ame Kristus bake tu vuzehi vahi meedam dam lamti vazisi dam aasdahit im vahokedale. Labi modem labe busao dam totbahot fa aame udovai fai bak modem mom bak am tame.
21. Eho etei oba, “Labihasu meedale,” lahame oba lab gagu oluhu im lam ehemo gagom kaio. Abo Alati Kristus Yesusti labi Alat Am im gagu vou usem dam abo Aho fi me vadaha ahi damti labihasu ba oba vi gagu aim bak ehe labe eho oba gagu oluhu imot modem bak. Eho etei oba lab toedume oluhu im lam oho mahate aime vuzehi meedale. Labi ame bak lam meedalo meedam di labe, “Imbo?” laham bak ozom vabameam làhà meia a vàlu im vahokedamule. Amu nasi aime, “Imbote,” laham bak aime neàdi vàlu im vahokedamta neàte. Labi laha ame dam laba vuusum busao dam labe iho faina meedàmu a bisi dam totbahota fàsi obo oho deelem dam lamota im betea vahokeheda. Labi dam totbahota fàsi obo oho deelehe vabda lam vedi bisi dae meona fa vahokeda. A labihadamule. Gi ulohodesu meida im vahokeda meida im vahokeda lahadale.
22. Labi Timotius oa, oho dam Kristus bake tu vuzehi vahi meedam dam meida fi me utasi ve ame dam laba fa vuusum busao datelelo gagom di om a àvodehat om anekehà ahim vousai meia nom odosu gagu vadamule. Gi iademe ozodume afoezobe gagu vadale. Ame da labe aho faina meedam bak lam om vabili àvodehat gagu vameam làhà, “Om laha fai bak modeho,” laham bak. Labiham bake oho faina modem bak labna zohàme ohomo ozome om ahu mahate it mali fa iademe neà bak ozome meedale.
23. Labi im ebe meidateà nim oba gagu voolo. Om bisi gaili gailiam bak lam gi vaota a udidamule. Anggur oo vaksa koena laha udeme àdesdume vi udidale. Oho labihadam labe om asum faididam bak koena neàdem bak am tame. Ame im koena lam ab gagu neàdeham.
24. Eho amu uba neha, “Dam Kristus bake tu vuzehi vahi meedam dam meida fi me utasi ve ame dam laba fa vuusum busao datelelo gagom di om a àvodehat om anekehà ahim vousai meia nom odosu gagu vamule,” lahame lab gagoho bak lam eho gi neham bak ozoho labe labi gagoho bak. Dam totbaho labe iho faina meedam di ahate meedam labe dam giidat ba ame dam labe im ahu ozolo uloodume aim vabak. Amu gi ozobohudi neàdehe bak. Lahana dam totbaho labe iho faina meedam bak lam ihimo aa meedam labe dam giida biem labe ame dam labe im ahu ozolo uloodume aime neàdi ba ozobohudem bak.
25. Labi laha dam totbaho labe neà bak meedam di gi ahate meedam labe dam giida aame ozobohudem bak. Lahana dam totbaho labe neà bak modem bak, “Eheo?” laham bak ahate modem vab labe damat biem bak. Lahamnàme ba ahate tombali dam giida aame ozobohudem bak. Labiham bak ehemu oho a àvodehat ohula odosu tom gagodamule.
1. Timotius oa, dam Kristus bake tu vuzehi meedam dam totbaho abo mei na teo meedam dam labe, “Iho akatihasu meedam labe neàdela?” laham bak lam om biem bake eho etei sunit nim toedume oba oluho. Labihàmu mei na teo meedam dam laba oho nehame vahokedale. “Uba na gagu meedam dam labe iho gagohona lam um abo ahu adat iedi ozahit uledi aime meedale,” laham bak lam oho ame dam laba labihasu vahokedale. Ame mei na teo meedam dam labe iho labi meedam labe dam giida totbaho labe ame bak lam aame ba Ala bake feàtàdam vabak. Labi laha iho im imbona vahokedahana lam laha ame dam labe ba aame feàtàdam vabak. Labiham bake oho ame dam laba labihasu vahokedale.
2. Labi im meida laha neham bak. Dat Kristus bake tu vuzehi meedamda labe am na teo meedam dam laba oho laha fa nehame vahokedale. “Uba na gagu meedam dam laba uho a nehi ozome meedamule. ‘Iba na gagu meedam dam lamti imti vahi Kristus bake tu vuzehi meedam dam taia? Labihàmu im ba akati ahu adat iedi im abada aime meedà? Im moh,’ lahame tozom bak lam uho ozom vaba gi nehame ozodale. ‘Iho lab na meedam bak laba vi aame deelem dam lam abo imti vahi Kristus bake tu vuzehehe damat modem bak. Labi laha ibi iho deelehe dam am bak,’ lahame labi ozodam labe na iho gagohona lam uho bisi aime uledi iademe keàtedi meedamda am bak.” Labihasu oho ame mei na teo meedam dam laba vahokedale. Eho etei oba lab toedume oluhu im lamti ahebu Kristus bake tu vuzehi vahi meedam dam laba abo oho vuusdam dam laba mahate vahokedam labe im vi vahokedale.
3. Timotius oa, ame im giomimna vahokedam dam labe ba ibi iho vahokedam bakti uloho vabak. Ame dam labe ba im Boehàda Yesus Kristus labe Aba Aho Alam im imbona vahokedahana lam tu vuzehem moho damat modem bak. Labi laha, “Alat Aba Aho ozome gagodaha im lam im ahu vàmadi abobo meedase,” lahame vahokedaha im lam laha ba tu vuzehi meedam vabak.
4. Ame dam lam ba im iademe ozom bili im biehebuli meedam damat modem bak. Gi, “Im abo feàte,” lahame fa iba it daetbadam damat modem bak. Iho im meibada veioi im ibida fa bisi tom aaboli otesi otesidalo àhàkedam damat modem bak. Labihàmu ame dam labe ibi iho lab vahokedam im laba dogoit aidam dam labe vedi im nehasu ab faasi meedamam. Meit modehena iho gi ahu adat faki teidemoholedam bak ame. Labi meia daet beidam bak ame. Labi meia feàtàidam bak ame. Labi meia im fai bak vabna ostame vàlum bak ame.
5. Labi laha gi daet ot odosiame beidam bak meedam bak ame. Ame dam labe iho im ahu neà bak meedam bak lam fa vei seti ahusobuli meeda. Labi laha iho amu im imbona tu vuzehi meedam bak lam fa voou seti ba vi ozome vuzehi meedam vabile. Labi ame dam labe vedi nehi ozo, “Iho Alat Aba Aho ozome gagodaha im lam im ahu vàmadi abobo meedam labe damat iba doi lodam bak am tame,” lahame labi git ozoda. Labiha labe ot odosiame beidam bak. Labihasu meedam damat modem bak.
6. Timotius oa, imbote! Ibi iho tu vuzehi meedam bak lam iba modi ibi iho gi vi tau vam zoho dua bak ehete. Neham labe labiham bak. Alat Aba Aho ozome gagodaha im lam iho ahu vàmadi abobo meeda. Labi laha ibi iho lab vadamna lam vadume asimdeda. Labihadam labe labihaha bak.
7. Eho gi neham bak ozome oba labi gagoho bak. Im oiat amu im ahamte faaha di gi nazoh vabna so buàta faaha bak. Labi laha im ba elom di im nazoh vou lam vaba gi niba vou esmom bak.
8. Labihàmu im nehi ozo, “Im na àmna lamti sueti labihasu ehe labe im ahu gi ab neàdeham bak,” lahame ozom bak.
9. Lahana dam totbaho ba labihadam vabak. Dam lam abo na dualelo àhàki meedam damat moz. Labiha labe ame dam labe gi im ahu beena tadehe labe gi kehàm vaba faina meedam bak tadi meeda. Labihasu meedam labe abo dohot na àlo àhàki lem zie laba damat tet zisime esuhu bak dohot vabi li nom ilumeam tetat beom bakti ulohona modem damat modem bak. Im ba vàhàdem bak vabi gi ahusobuli na mei na meime modelo àhàkem damat meedam labe na iho modem neà bak tade. Labiha labe bisi fai bak fusi aba amu neà bak fa vàhàdeme seti ab faideham bak.
10. Nehaha bak. Bisi doi valo deeli meedam bak labet modi ame dam labe ibi iho fai bak mei fai bak meime bohu vuusu meedam bak am bak. Labiham labe ame dam labe ihimo nehi meedam labe it faidehe bak. Dam totbaho labe vedi iho bisi doi duana valo deeli meedam bak labet modi ibi iho amu Kristus bake tu vuzehi meedam im imbona lam fa mu vooho labe im ahu it beome ab vàhàdedaham bak.
11. Timotius oa, dam totbaho labihadume faidedamnàme om ba labiham vabak. Om abo Alam damali im Abada meedam bak. Làhàmu oho ame dam labe neo oba vizi om faidem bak labna zohàme om ahu mahate it vou faovoi ozodam labe nehame meedale. Om ahu vàmadi iademe im vamdesu ozodume meedam bak ame. Labi laha gi im Alat Aba Aho ozome gagohoda lamota ahu vàmadi abobo meedam bak ame. Labi laha Kristus bake abo mahate tu vuzehi meedam bak ame. Labi laha dam iudu iumti iudu iumti labihasu ahebu deelem bak ame. Labi laha na im oba modi duzum di om ahu bedem vaba gi ozahit ahu teudi keàtedi meedam bohu vuusu meedam bak ame. Labi laha na im ahebu meedam di gi ahu neà baket meedam bak ame. Labihasu ahu vàmadi meedale.
12. Om Kristus bake tu vuzeheheda modem labe Alat oba gagoho im lam meedam di abo mahate iademe keàtedi meedale. Oho labi meedam labe ba diamut Alati vahi gi ahe neàna bohu vuusdam bak oho ab vamam bak. Oho ba lab vam bak lam Alat amu oba, “Am damalese,” lahame oba amu ozome fi me vaha di labe fet gagu esuhu di am bak. Labi laha oho amu damat vou faodahit oho neha, “Em abo Kristus bake tu vuzehi im Abada meedamda em am bak,” lahame ahate labi gagoho bak lam dam duadat aidaha bak. Labihàmu oho mahate keàtedi meedume ame ba lab meedam bak lam vale.
13. Na ahebu modi ohedam Ala lamti labi amu Pontius Pilatus bake im imbona iademe veibahada Kristus Yesus lamti labihasu ba oba vi gagu aim bak ehe labe eho nehame oba nehi gagolo modem bak.
14. Alat oba, “Im nehasu meedale,” lahame oba vameadahana zi lam ahebu mahate uledi ulohodesu meedam bohu vuusdale. Meit oba neha, “Om im meida vooho,” lahame ba vàlu gagom vabak laba ozome meedale. Oho gi labihadume im Boehàda Yesus Kristus ba fa li aameam oho ame bak lam meedam lahasdam bak li aase.
15. Kristus ba fa lem di modem bak gi neham bak. Amu Alat fet gagu esuhu digat fuhuzobe Yesus Kristus Ala naedat fa bak niba nom olum bak. Ame Ala lam bisi vousai neà bak bohu modesdam Ala am bak. Damti na ziti ahebu vuusu vabiedamda ame Ala vàmtea am bak. Ala Am bisi Boehàdatebo vàmtea modem labe Aho fa dam bakda boehàda zi lam ahebu vuusu im vahokedam Ala am bak.
16. Am abo eloi koeilem gikina ahena bohu modesdamda vàmtea am bak. Labi Am laha abo bak fauha neà feà bak dam fako iedem bake azim Alat modem labe meit netàdem biem bak. Labi meit Am alihi amu aaha vabak. Labi laha etei meit ba Am alihi aam vabak. Imo dam ahebu ame Ala laba nehadase. “Am abo feàte. Dam iudu iumti iudu iumti labihasu ahebu Aho vuusu im vahokedam bohu vuusu meedase. Labihadase.”
17. Timotius oa, oho dam Kristus bake tu vuzehi meedam dam nazoh dua dam laba nehame mahate vahokedale. “Um meia a nehame tozome it daetbadamule. ‘Imota abo nazoh feàda im am bak,’ lahame a labihasu meia tozome ihimo it daetbadamule. Labi laha um nazoh dualehe bak laba a bisi nasi tu vi ozodamule. Na lam gi teohe modemnat modem bak. Um fa gi Ala bake tu vuzehi meedale. Ibi iho deeli azim bak niba Alat ozome ilabdi na ahebu modi iba esuhemu uho gi Ala bake tu vuzehi meedale.
18. Labi laha um doi dua bak laba ozome gi neà bak bohuta meia faobekesi tau meedale. Abo meia na lom bak faobuli meedam vaba gi ilabdi na lodale. Labihasu meedale,” lahame ame dam nazoh dua dam laba mahate vahokedale.
19. Ame dam nazoh dua dam labe labihasu ilabdi meedam bak lam iho ozom di ame dam labe Alat nazoh soa maehena aaboda asum ahoba laba vahehena ba diamut vam bak laba ozome tu ahumdehe labe labihadam bak. Labi laha abo ba Alati vahi gi ahe neàna bohu vuusdam bak am bak.
20. Timotius oa, Alat amu oba neha, “Am im imbona lam oho dam bake vou vahoketedale,” lahame oba gagu esuhu bak. Labihàmu obo oho amu aihi bak lamti ulohona iademe dam bake vou vahoketedam bohu meedale. Dam totbaho labe im debu vabna abo Ala bake vou baedam vab im abo Alat vameadaha im imbonati uloho vab im lam ot vameaidam di a aime vuzehi vi ozodamule. Om gi fi tateme im ahala modidale. Ame dam labe vedi im debu vabna laba neha, “Ame im nim meia modi Ala bake ozobohudi fi gatedam im vàmtea am bak,” lahame labi git ozodam damat modem bak. Labiham bake a aimule.
21. Mahate ozodale. Dam totbaho labe vedi ibi iho lab ozobohudehe bak laba tu vuzehi meedaha labe ibi iho amu Kristus bake tu vuzehi im imbo bak meedam bak lam voou fa zie fàusi ub oli bak vabiem bakti ulohona ab modeham bak. Neàde. Eho nehi ozo, “Alat omti vahi Kristus bake tu vuzehi meedam dam totbaho lamti uba ozahit deeli im neà bak modi esuidase,” lahame labi ozodume Ala bake tom gagodam bak. Neàte. Eho Paulusat sunit nim toedume ab neàdeham. Àhàm.
1. Timotius abo eho amu oba vameadaha im lam oho aime Kristus bake tu vuzehi meedàmu em adat modemna ozomomda abo ebe eho deeleheda oa, eho Paulusat Kristus Yesus labe Am im vameadume esmozi laiam dam meida nibe eho sunit nim neo toedume oba oluho. Neàte. Eho oba ozome neha, “Im Ai Alati labi im Boehàda Kristus Yesusti labihasu vahi oba aam faimu ozahit deeli faobekesi im neà bak fà oba tau modi esuidase. Labi oba modi om ahu faheme fi goaitom vaba gi vabademsuse,” lahame eho ozodume Ala bake labihasu tom gagodam bak. Alat amu di iube neha, “Eho modi Paulusat fa Kristus Aho amu Am im vameadume esmozi laiam dam laba vi tau meedam datelese,” lahame labi fet ozome esuhu labe eho ame im modem datelehe bak. Alat amu di iube neha, “Meit Kristus Yesus bake tu vuzehi Amti vou ali ahu vàmademeam làhà Eho ame dam laba modi Emti vahi gi ahe neàna bohu vuusda tame,” lahame Alat amu fet vameadume esuhu im lam, “Eho ba dam bake le vou vameatedase,” lahame Alat eba labi gagu eho ame im modem datelehe bak.
3. Timotius oa, Alat eba aam di em ba git meedam vabda modem labe eho Ala bake abo digad diat modeo, usehe diat modeo, tom gagodam di om ba fa vabiem vabak. Eho gi neha, “Ai oa, Oho Timotius bake neà baket meedale,” lahame tom gagodam bohu meedam bak. Ame Ala lam em vou faat lehe tai ahobada zi labe ibi iho ahu adat iedi Ala bake vou baedaha bak lam em laha ame baket ahu vàmadi meedam bak.
4. Eho oba vi ozome Ala bake vou baedam di eho gi amu iho im ahimeat fi tatahivaha di labe oho vi mehe bak lam vi ozome ilahu, “Em ahu fà modi deeli asimdese,” lahame oba aalo àhàki meedam bak.
5. Obo oho Kristus Yesus bake abobo tu vuzehi ahu vàmadi meedam bak lam eho vi ozoha, neàmu eho gi, “Neàte,” lahame Ala bake vou baedam bak. Labi obo oho etei meedam bak lam om tai namahada Loisti om faaha oi Euniketi amu laha labihaha bak. Labi oho etei neo ame baket meedam bak lam em laha ozobohudehe bak.
6. Labihàmu eho etei neo oba nehame vi vameadalo modem bak. Eho amu di iube em anekehà ahim vousai oba nom odosu tom gagu Alat oba modi vizi teudi oho keàtedi Alat oba gagu Am im meedam bak lam fa setem bak labna zohàme ohomo naedat om ahu abo it vabiedume teudi fa neo ame baket keàtedi meedale. Abo vua sutelo modemu fa vi feume elum bakti ulohona fa meedale.
7. Eho gi neham bak ozome oba labi gagoho bak. Alat Am Aha Nutabe Neàna labe iba modi vizi teudehe bak. Iba ba na iedemnat im ahu ad niba modi vizi teudehe vabak. Gi Alat Aba Aho gagodaha im lam, “Iho modidase,” lahame iba labihasu vizi teudehe bak. Labi laha iba modi meia deeli meeda. Labi laha iho na im ahebu meedam di ihimo nasi vi ozodume ozobohudi neàdi ame im ba meeda. “Gi labihadase,” lahame iba labi modi vizi teudehe bak.
8. Alam Aha Nutabe Neànat iba modi vizi iho labi meedàmu im Boehàda Yesus labe Aba Aho amu meedume esuhu Im Neàna lam dam bake a ladi odohalehebeat vou vameatedamule. Labi laha eho ame Im Neàna lam vou vameatedàmu damat em si sel niba ousdam bak nim om a vi ozome em eeti utausu gagom bak a ladi vi ozodamule. Gi eho ame Im Neàna vou vameatedàmu damat eba vabidam bakti ulohona neo oba vabidam di om a ladi momule. Alat oba modi vizi teudedam labe obo oho keàtedi ame Im Neàna lam vou vameatedam bak lam damat oba vabidume om alihi nemahusi geàdamnàme oho gi ozahit meedam labe bohu vuusdale.
9. Alat iba nehasu meedam Alat modem labe Aho ame bak lam meedam meo bak. Alat amu iba soat vausu fa vei neàdedaha bak. Labi laha, “Iho Am damali gi Aba Aho gagohoda lamota vuzehi ahu vàmadi meedam bohu meedase,” lahame Aho amu iba gagu fi hasi vadume Am damalehe bak. Labihadaha bak. Ba ihimo nasi ozome im neà bak meedaha labe Aho iba gagu Am damalehe vabak. Alat Ahamo nasi fet ozo, “Ehemo dam bake ozahit deeli im neà bak modi esuidase,” lahame Ahamo nasi fet ozome esuhu labe iba gagu Am damalehe bak. Alat Aho lab fet ozome esuhu bak lam Aho gi aham di iube bak nimti na ahebu lamti meedume esuhu vab di iube Aho fet ozome esuhu di am bak. Labihàmu Aho Kristus Yesus iba ba olulo modem labe Aba Aho amu fet ozome esuhu bak lam ab modi imbodeham bak.
10. Labi etei nim Kristus Yesus abo iba Soat Vausu Fa Vei Neàdemda bak niba lehemu Alat Aba Aho amu lab fet ozome esuhu bak lam, “Aho iba ba ozahit deeli im neà bak modi esuidase,” lahame lab fet ozome esuhu bak lam etei ab fi zeam bitoi imbodi im ab ozobohudeham bak. Abo iho faina meedam bak lam Kristus Yesus Aho ot vai eloho di lam Aho ba eloi labahasdam vabak. Fat ahedi usaha bak. Labihàmu meit elom di lab eloho bak tadi setem vaba fa ahedi usam bak. Labi laha meit Yesusat meedume esuhu Im Neàna lam iba li vameadume iba modi fi gatei iho tu vuzehi meedam labe Alat iba modi im so gàhàna fa modesum labe ba koeilem vaba abo Amti vahi gi ahe neàna bohu vuusdam bak.
11. Ame Im Neàna lam Alat amu fet nehi ozo, “Paulusat ame Im Neàna lam ve fa dam bake ahate vou vameateda. Labi neo vi vou vahoketeda. Labihadase,” lahame Alat fet gagu esuhu labe eho Kristus labe Am im vameadume esmozi laiam datelehe bak.
12. Eho ame Im Neàna lam vou vameatedàmu damat em si sel ousu vabidam labe em alihi nemahudam bak. Abo dam git modeheda laba vabidam bakti ulohona meedamnàme em ba ladi vi ozodam vabak. Neham bak. Ebe eho tu vuzeheheda lam, “Amat mode?” laham bak em ba biem vaba abo ozobohu bak. Labi laha Kristusat amu eba neha, “Oho vou vameatedale,” lahaha Im Neàna lam ba setem bak labna zohàme Aho abo gi labaha bohu vou aasdume Dam Bake Uloodume Vi Aime Ozobohudi Neàdi Fime Fahedam Digat fusi meedam di labe ame bak lam vaitom bak lam em laha ozobohu labe em ba ladem vabak.
13. Timotius oa, oho dam bake vahokedam di eho amu oba Alam im imbona vahokedam bak laba vi ozome ame baket ulohodesu dam bake vahokedale. Oho ame baket meedam di gi nehadale. Oho Kristus Yesusti vou ali meedàmu obo oho Yesus bake lab tu vuzehi meedam bak lamti labi meia lab deeli meedam bak lamti gi labihasu labaha bohu meedam labe ame Alam im imbona lam dam bake vahokedale.
14. Alat amu oba neha, “Em Im Neàna lam oho dam bake vou vameatedale,” lahaha bak. Labihàmu Alam Aha Nutabe Neàna labe iba modi vizi teudi iba vi tau vuusdam labe Alat amu oba lab gagoho bak lam fa vàusi setemna zohàme oho iademe it vou faovoi ozodam labe vou vameatedale. Ame im lam meit li modi veimdi setemna zohàme oho iademe it vou faovoi ozodam labe vou vameatedale.
15. Timotius oa, om ozobohuna taia? Dam Asia bak niba azihida amu eba vi tau meedam dam totbaho ahebu em damat sihemu ladi em mu vou esmozi ab iliham bak. Ame dam meida Figelus am. Labi meida Hermogenes am. Labi dam totbaho laha am. Labihaha bak.
16. Lahana Onesiforus ba labihaha vabak. Damat em si sel ousuhunàme am gi geàmu ba ladem vaba eba li vabedeidam bak. Ame da labe damat em si ousdam num debu Roma laba ahamte lefuhu di eba vi nabitedume em fa vi aaha bak. Labi laha eho amu Efesus laba le tau azihi di labe Onesiforus eba vi tau dam bake vabiedamehamdehe bak lam om ba biem vaba ozobohuna taia? Labihàmu eho, “Alat Onesiforus labe am num laba tau azihi damti labihasu ozahit aam faimu im neà bak tau meedase.” Labi laha, “Kristus ba fa li dam fahem di Alat Onesiforus bake aam faimu ozahit beom vaba gi im neà bak tau meedase,” lahame eho Ala bake labi tom gagodam bak.
1. Timotius em adat ààmomda oa, dam lada lam labihahemu om ba a labi modemule. Oho gi Alat fa oba modi om ahu teudi meedam bak laba uledele. Alat ozahit meia deeli im neà bak modi esuidam Alat modem labe oho Kristus Yesus bake tu vuzehi Amti vou ali ahu vàmadi meedam labe om ahu teudi meedam bak am bak.
2. Labi laha dam giida totbaho labe dogoit vou faodam labe eho amu ame Alam im imbona oba vahokedam di lam oho laha ame im lam meia vahokedam di gi im oboda gagom di aime uledi meedam dam laba abo ame im lam fa ot vai meia vahokem bak ozobohu dam laba ozome fa vahokedale. Labi ame dam labe laha fa neo ame im imbona lam fa dam amomoi bake neo vahokedale. Gi labihadale.
3. Timotius oa, Kristus Yesus labe Aba Aho meedaha Im Neàna lam iho dam bake vou vahoketedam di damat iba vabidam bak lam iho ozahigeàmu tet keàtedi meedam bak laba oho vi ozome gi neo ame baket ulohona meedale. Ba a odohalehebeat a meedamule. Abo tentarat iho meedume alihi nemahusi meedam bak lam ozahigeàmu mu fa vei teudem bak laba vi ozome ahu vàmadi Kristus Yesus Am im meedam datelele.
4. Oho gi tentara labe ibi iho meedam bak laba vi ozodale. Ame tentara labe, “Aba im gagu modiamda boehàda labe aba fà deelese,” lahame ba im meiti im meiti ame da boehàda labe im abadati valiheme meedam vabak. Gi aba vuusum boehàda labe aba gagoho im lamota uledi meedam bak. Oho gi ame bak laba vi ozome ahu vàmadi Kristus Yesus Am im meedam datelele.
5. Labi om laha dam bola sikidamda labe aba aho nehi meedam bak laba laha vi ozodale. Ame da labe nasi keàtedi meodehe bake gohali vam nazoh valo àhàki meedàmu aho gi ame bola sikim di iademe sikim bak vahokem im lam iademe ulohodesu vou sikidam bak. Oho laha ame da labe lab meedaha bak lamti ulohona vi ozome Kristus Yesusat oba lab vameadaha im lam iademe ulohodesu meedale. Alat oba deeli ame na gohali lomna vam bak am tame.
6. Labi om laha na debe ut siedamda labe aba aho meedam bak laba laha vi ozodale. Neham bak. Na nasi soaleheda lam modeme vahem di lam na debe ut sieme vanamaha dàt nasi le modeme vaheme àmda am bak. Labi oho laha gi ame bak laba vi ozome Kristus Yesusat oba gagoho im lam uledi keàtedi meedale. Oho labi keàtedi meedam labe Alat ame bak gohali oba lomna oho vam bak am bak.
7. Eho etei lab vameadaha im lam oho mahate vi ozodale. Oho labi meedameam làhà im Boehàda Yesusat oba modi fi gatei ame im lam ahebu modi tombuli om ozobohudem bak am bak.
8. Naat oba vabidume om alihi nemahudam bak lam gi ozahigeàmu keàtedi gi Yesus Kristus bake vi ozodume ame bak lam fa setele. Ame Da Yesus lam dat ahamda Boehàda Daud labe vou faat leheda meida Am am bak. Labi Am laha damat gi vou vabidam bohu meedume oteme eloi fa ahedi usahada Am am bak. Ame da labe Aho meedume esuhu Im Neàna lam eho dam bake vou vameatedam im am bak.
9. Labi ame Im Neàna lam eho dam bake vou vameatedàmu damat eba gut odosi mali, “Em veiose,” lahame modi em alihi nemahudam bak. Abo ba koena meedam vabak. Damat neha, “Em fai bak meedam dàt moz,” lahame bes botehà niz labet em anekehà niba ab vààudaham bak. Damat eba labihadamnàme ba Alam Im Neàna lam vaitoi setem vabiemnat modem bak. Gi labaha vou mode ladam bohu meedam imot modem bak.
10. Labihàmu em alihi nemahudamnàme eho geàmu keàtedi meedam lahasuhu bak lam gi neham bak vi ozome labihadam bak. Alat amu nehi fet ozo, “Dam lam Am damalelo mozo,” lahame Aho fi me vadaha dam laba eho vi ozome faobekesi ba Yesusat eba gagoho bak lam em ba ohusesum vabak. Ame dam labe iho ba Kristus Yesus bake tu vuzehi Amti vou ali vahi meedam labe Alat ame dam laba laha soat vausu fa vei neàdeda. Labi laha ame dam lam neo fa vame Aba Aho azim asum ahoba iuba abo bisi neà bak iuba ba vou le abehamdi labaha bohu modesdam bake em gi ozahit alihi nemahudamnàme gi geàmu keàtedi meedam lahasuhu bak.
11. Om laha alihi nemahudamnàme ozahigeàmu keàtedi meedam lahasule. Neham bak. Eho etei oba gagodalo modem im nim abo imbona gagodalo modem bak. Oho aime uledi vuzehem neàte. Iho faina meedam bak voou setemeam làhà Alat ozomta Yesus eloho di labe gi imti amediat elohona ozomom bak. Ame faina meedam bak lam ba vi ozodam vabak. Labihameam làhà ame Da Yesus lam Am eloho bak labet Alat modi fa ahedi abo fa ab usahamemu im laha fa neo ame baket modem bak. Im fa gàhàli ame Da lamti ba vahi abobo ab abehamdemam bak.
12. Labi laha naat iba vabidume im alihi nemahudam bak lam ozahigeàmu ibi iho keàtedehe bak lahasdameam làhà ba diamut Yesus labe Aho damti na meiti ahebu vuusu im vahokedam di lam iho ba Aba vi tau neo vuusu im vahokedam bak. Lahana iho nehame gagomeam, “Yesus Boehàdateboli iba vuusum vab dàt modem bak. Am im biem bak,” lahame labi gagomeam làhà ba diamut Yesus Aho iba laha nehi gagom bak, “Lo. Làhà um eho vuusum vab damat modem bak. Um em biem damat modem bak,” lahame neo ot vi gagoiam bak.
13. Labi laha Aho iba gagohona lam iho neha, “Ame bak lam iho mode tame,” lahana im ba ame bak lam meedam vabnàme Aba Aho iba neha, “Eho mode tame,” lahame Aba Aho fet gagu esuhu zoho lam ba vabili setem vabak. Abo im Aho gagohona lam ahebu ozahit imbodem tadem bak. Neham labe labihaha bak. Kristus ba im gagu veimdi vazidazem vab dàt modem labe labihaha bak.
14. Timotius oa, eho etei oba lab vameadaha im lam ahebu obo oho vuusum guru zi lam fa vabiemna zohàme oho ame dam laba mahate vi vameadale. Labi laha ame dam labe git modem bak labna zohàme oho dam laba, “Ostam im bisi a otesi otesidamule,” lahame mahate vi vameadume esuidale. Alat iba ba vi gagu aim bak ehete. Eho gi neham bak ozome oba labi gagoho bak. Meit ostam im gagohona laba gurut ihimo otesi otesidam labe dam giida labe ba aime it vabieme neàdem vabak. Gi ame bak labet modi ame dam giida labe ibi iho amu tu vuzehehe bak lam fa vàhàdeme setem meote. Labihadam imot modem bak.
15. Labi laha Alat oba aame deelem bake Timotius oho gi im neà bakta ozome meedale. Oho dam bake Alam im imbona vahokedam di gi iademe vi ozome ulohodesu vahokedale. Oho labi meedam labe om ba obo oho meedaha bak laba it ozome ladem vabak am bak. Labi laha Alat oba aame deelem bak am bak.
16. Timotius oa, im debu vabna vameadam dam labe iho ba Ala bake, “Am abo feàte,” lahame ahu adat iedi vou baedaha vaba gi ozahigeàmu fa im mei meedume Ala bake vaitesu ubahi ubahidume bak bohulali vaitolo modem dam am bak. Labihàmu ame dam labe iho im ot vameaidam di om ba a aime vuzehi vi ozodamule. Om gi fi tateme im ahala modidale.
17. Labi laha ame dam labe ibi iho Alat gagu esuhu vab im lab vahokedam bak lam fa im dam totbaho laba vizedume uloholi ibi iho amu tu vuzehehe bak lam gi fa vàhàdeme seddam bak lab tame. Abo damat keàhà but meia modi vizem bak lamti uloho bak. Ahamte dita gi but vàmtea duzu. Lahana kehàm vaba la vizi le vizidume uloholi ab dualemam bak. Dam behàsu im labihasu lab meedam bak lam ehete. Meida Himeneus. Labi meida Filetus. Laham dam ahim am.
18. Ame dam behàsu lam ba Alam im imbona lam ba vahokedam vabak. Gi zie ub fàusi ub oli ladam labe dam dua totbaho gi ame bak labe ab vi meedamam bak. Vedi nehi git vahokeda. “Iho Kristus bake tu vuzehi meedam dam nim im elohona ozomom bak lam Alat iba ab modi gàhàli ahedeham bak. Im elom di ba akati modi fat ahededume usnadà?” lahame labi giomim vahokedam labe vedi dam amu Yesus bake tu vuzehi vahi meedam dam totbaho labe ibi iho amu tu vuzehehe bak lam ab vàhàdedume seddaham bak.
19. Lahamnàme ba àvodemnat modem vabak. Alam damalehe dam labe gi bao vou zisit làbome zisu num teudem ke lamti ulohona modem bak. Gi labaha bohu tu vuzehi meedam bak. Ame bao lam Alat im nehasu toehe bak ehe bak. “Eba abobo tu vuzehi Em damalehe dam lam Em Boehàda nibe ba vabiem vaba Em naedata ozobohu bak.” Labi laha im meida neha, “Meit neha, ‘Ame Da Yesus lam eba vuusum Boehàda am bak,’ lahame gagodamda lam ba faina meedam bak bohu meedam vaba gi abo vaitoi setem bak,” lahame Alat labihasu toeme esuhu bak.
20. Timotius oa, em im meida nim oho laha aimale. Dat na duada labe am num lam na modeme vahem nazoh bisi na modeme vahem vabda fi hamda abo iademe modeme fa esumda abo bisi neàda emasat modehedati perakat modehedati laham nazoh ehete. Labi laha fi ham vabda abo utot modehedati bak ohanut modehedati abo gi dihasi na modeme esu. Labi dihasi na modeme esu. Labihadamda laha ehete. Amuda lam gi im feàna meedam di lamota visomoame na modeme fa esuiam bak. Labi bada lam gi dihasi na modiam bake ozome meedam nazohot modem bak. Labihadam bak. Dam Kristus bake tu vuzehi vahi meedam damat dam totbaho labe ozo, “Iho fi hasi im Alabada feàda lam modem bak ahumdi vou faodam bak,” lahame gagodamda ehe bak. Labi dam totbaho im giomimna vameadam guruti uloholehe labe ba, “Iho fi hasi im Alabada feàda lam modem bak ahumdi vou faodam bak,” lahame labihasu gagodam vabda ehe bak.
21. Labihàmu meit aba aho faina meedam bak lam nasi voedameam làhà Alat fa aba gagu fi hasi im Abada modem bak ahumdem neàte. Abo na modeme vahem nazoh bisi na modeme vahem fi hamda lamti uloho bak. Abo gi amu di iube modi ahumdi neàdi Boehàdat aba neha, “Im neàda nidi nim modele. Im neàda nidi nim modele,” lahame aba gagom bake ab ahumdi vou faodamam bak.
22. Timotius oa, eho etei oba lab gagoho bak lam iademe aime meedale. Bas dam totbahot ibi iho ahulat fai bak modelo àhàkemna zi lam oba fa neo vizi oho neo meedam bak labna zohàme ahu oboda it mali vou faovoele. Oho gi fa iademe im vamdesu ozodume meeda. Labi laha Alam im imbona vahokedahana laba oho lab tu vuzehi meedam bak lam mahate meedam bohu modesda. Labi laha Ala bake deeli meeda. Labi laha dam bake deeli meeda. Labi laha dam Ala bake tu vuzehi ahu vàmadi gi im Abada meedam dam laba ot fakiaha vaba gi vabademsu deeli meeda. Labihasu meedale.
23. Labi dam im debu vabna ostam im laba otesi otesidam bak lam om a aime vuzehi tau vahi meedamule. Ame dam lam im vahokedume neàdi ozobohudehe vab damat modem bak. Eho gi neham bak ozome oba labi gagoho bak. Ame im debu vabna ostam im faasi ot vameai ot vameaidam di lam daet beilo modem bak ab faamam tame.
24. Lahana Alat Aba Aho gagohona meedamda lam ba daet ot beiam vabak. Gi dam bake aame faobekesi neà bak meedam bak. Labi laha ame da lam meia vahokedam bak lam am ozobohudi gi iademe vahokedam bak. Labi laha meit aba git meedameam làhà ba fa ot vai ot gagoiam vaba gi ozahigeàmu fa vei neàdedam bak.
25. Labi damat aba faki, “Am git vahokedalo,” lahame odosi meedameam làhà aho ba ame dam laba dae meona vi vahokedam vaba gi dae nemahuba neàt vi vahokedume vou faodam bak. Neham bak. Alat ame dam laba ba modi iho faina meedam bak lam fa mu voou ame im imbona laba fa vi ozome ahu nemahubali ba tu vuzehem bak laba ozome aho gi labihadam bak.
26. Ame im Alabada meedamda labe aho labihadam bak labet modi amu Iblisit modi si vuusdam dam labe ihimo it ozo, “Aa làhà! Iblisit iba veimai im abada meedà?” laham bak lam it ozobohudi fa isi neàdem bak am bak.
1. Timotius oa, eho etei oba gagolo modem im nim mahate vi ozodale. Bak damat ibi iho na meedume novai folelo meedam di labe bak niba damat fai bak tadi meedam labe dam Kristus bake tu vuzehi meedam dam laba vabidamna abo duana meeda tame.
2. Bak damat nehadam labe labiham bak. Ba dam meidate deeli vabiedam vaba gi dam labe ihimo iba it ozome deeli vabiedam bak tade. Labi laha dam gi im doi dualem bak laba deeli vi ozome tu meedam bak tade. Labi dam labe, “Im abo feàte,” lahame ee ibida ihimo vousai it daetbadam bak tade. Labi dam labe laha meia feàtàdam bak tade. Labi laha data labe im ai modeo, oi modeo, ba im im lam aim vaba gi ozahigeàmu voedam bak tade. Labi laha dam labe na vam di modeo, meit iba vi taum di modeo, ba, “Neàte,” lahame vi gagodam vabak tade. Labi laha dam labe ba Ala bake tu vuzehi Alat Aho deelem im meedam vabak tade.
3. Labi laha ame dam labe ba dam debu meida iuba modeo, gi am dam totbaho modeo, ba deeli faobekem vabak tade. Labi laha meit iba git meedam di ba ozahigeàmu fa vei neàdedam vaba vedi fa ot fakiame meedam bohu tade. Labi laha meia feàtàdam bak tade. Labi laha iho faina meedam bak labna zohàme ba im ahu it vou faovoi it malem vaba gi ibi iho taho ozome modelo modemda lam ahebu modem bak tade. Labi laha im ahu it malem bi ahu gukeme mei beom bak tade. Labi laha dam labe im neàna modemna ahebu ba deelem vaba vedi gi mu tozome voom bak tade.
4. Labi laha meit aba aho vou ali meedamda lam gi ahobat neàdi vou fohome fa fai bak meedam bak tade. Labi laha ba it vou faovoi meedam vaba vedi ahu gukeme àvodehat meedam bak tade. Labi laha ame dam labe neha, “Im bisi feà dam am bak,” lahame it daetbadam bak tade. Labi laha ame dam labe ba Alat Aba Aho ozomda lam ba vi ozome meedam vaba gi bak damat ibi iho modelo àhàki meedamda lamota ozome vou meedam bak tade.
5. Labi laha ame di lam dam labe neha, “Im Alam damalehe dam modem labe imo Alat Aba Aho ozome gagodaha im lam ahu vàmadi abobo meedase,” lahame ame bak meedam di gi ahobat meedam labe ba Alat Am feà bak lam im ahu ad laba modi vizi veimdem neàna ba modem vabak tade. Dam labihasu meedam dam labe oba vizemo. Om gi fi tateme ahala modidale.
6. Eho gi neham bak vi ozome oba labi vameadam bak. Ame eho etei lab vameadaha dam totbaho labe nehame meedam meot. Ame dam labe mei numa olelo modem di lam dat num deda laba ahit keobaedume olem meot. Labi olehezobe ame num laba azim lahi abo meit gagom im aime ozom vabna àvodehat uledem lahit modem labe ame dam labe ame lahi laba ahi vagedam bak labet modi ame dam labe im im ame lahi labet vuzehem meot. Ame lahi lam im imbona lam gi amu mu voou setehe labe gi faina meedam bohu vuusdam lahit modem bak. Labi ame lahi lam im ahu gi, “Fai bak nim modese. Fai bak nim laha modese,” lahame modelo àhàkehe labe gi bedi ame baket meedam tadem lahit modem bak.
7. Ame lahi lam gi dihasi neha, “Lada lam laha iba vahokedale. Iudu ium laha iba vahokedale,” lahadam lahit modemnàme ba im imboda lam tu vuzehi ozobohudem vab lahit modem bak. Ame lahi lam im ahu fi goaitoho labe labihadam bak.
8. Eho etei lab vameadaha dam labe iho gi dam ahamda Yanesti Yambresti dam ahim labe iho Musat vameadaha im lam mu odosi meedaha bak lamti ulohona meedam labe Alam im imbona mu odosi meedam bak. Abo im ahu gi faina meedam bakta ozodam damat modem bak. Labi im imbona tu vuzehi meedam vab labe Alat ame dam lam ab mu voedamam bak.
9. Labi laha ame dam labe iho ame im imbona mu voedume fa im giomimna dam bake vahokedamnàme dam lam gi vanamai mu voom bak. Ba modi fi tatom vabak. Neham labe labihaha bak. Dam giida labe ihimo it ozo, “Oo! Dam lam gi ahusobuli ostam im vahokedam damat mode taia?” lahame ihimo labi it ozobohudehe labe ba ame im giomimna laba tu vuzehem vabak. Aham di iube Yanesti Yambresti labihaha bak. Ame dam ahim labe koba ibida vuusdam labe Musa bake odosi modeha Alam feà Musa bake vizi modesdam labe ba imbodehe vabak. Dam giida labe neha, “Oo! Dam ahim lam ahusobu damat mode taia?” lahame ihimo labi it ozobohudehe labe ba ame dam ahim labe im im aime vuzehehe vaba gi ailahigeàmoho bak.
10. Lahana Timotius oa, em ba dam im giomimna vahokedam dam lamti uloho vabak. Eho amu im nehasu meedaha bak lam om ozobohuna taia? Ebe eho dam bake vahokedaha im ame. Labi ebe eho iademe meedam bak ame. Labi eho neha, “Eho Kristus bake tu vuzehi im Abada meedase,” lahame ahu vàmadi meedume ba elolo modem bak ame. Labi ebe eho Kristus bake tu vuzehi im Abada meedam bak ame. Labi damat eba git meedam di modeo, im fai bak duzu meedam di modeo, eho gi ozahigeàmu laha vou faodam bak ame. Labi eho dam bake deeli meedam bak ame. Labi na im eba modi duzum di em ahu bedem vaba gi ozahit ahu teudi keàtedi meedam bohu vuusu meedam bak ame. Labihasu ebe eho meedaha im lam ahebu ba biem vaba om abo ozobohu bak.
11. Eho amu num debu Antiokia lamti num debu Ikonium lamti num debu Listra lamti labihasu eho le tau azietedaha di labe ame dam labe eba vabidume em alihi taihaoli nemahubali geàdam bak lam om gi amu labaha ozobohudehena taia? Lahana ame dam labe eba labi vabidamnàme em ba bedem vabak. Em gi geàmu labaha laodoamsu teudehe bak. Boehàdat eba gi soat vausu fa vei neàdehe labe labihadaha bak.
12. Labi eho etei gagolo modem im nim eho ozoha, abo imbote. Meit Kristus Yesus bake tu vuzehi Amti vou alemda labe neha, “Eho Alat Aba Aho ozome gagodaha im lam ahu vàmadi abobo meedase,” lahame labihalo àhàki meedamda lam damat ba vabidam bak ehete. Ba lab vabidam bak vabalem vabak.
13. Lahana dam fai bak meedam dam lamti meia ahi vagedam dam lamti ibi iho faina lab meedam bak lam ahamte dita gi koena meedume ba fa feà bak fum bak. Labi laha ame dam labe meia vagedam bak meedam labet modi meit fa neo iba vagedam bak meeda.
14. Lahamnàme Timotius omota gi iho damat amu oba vahokedaha im lam oho amu neha, “Im lam abo imbote,” lahame oho amu tu vuzehi meedaha im lam labihasu gi labaha laodoamsu teudi bohu vuusdale. Eho gi neham bak ozoho labe oba labi gagodam bak. Oba vahokedam dam lam abo im iademe meedam dam lam om ozobohu labe gi laodoamsu teudi bohu vuusdale.
15. Oho it ozodale. Alat Vameadaha Im Toedahana lam om gi koe di labe faasi ozobohudedume etei ab vou fuham bak. Labi oho ame Toedahana lam aasume ozoidam labe oba modi vizi fi gatehe labe neham bak nim om ab ozobohudeham bak. “Meit Kristus Yesus bake tu vuzehi meedamda lam Alat beom bak fa mu soat vausu fa vei neàdemda am bak,” laham bak lam om ab ozobohudi neàdeham bak.
16. Ame Alat Vameadaha Im Toedahana lam ahebu damat gi ostam im ahulat ozome toedume esuhu vabak. Abo Alam Aha Nutabe Neàna labet ame dam laba modi vizi ozobohudi fi gatehe labe toedume esuhu imot modem bak. Ame Alat Vameadaha Im Toedahana lam nehame meedam imot modem bak. Iba modi ozobohudi iho fa im imbona fi gatem bak ame. Labi iho faina meedam di iba im vahokedam bak labet modi iba vamdedam bak ame. Labi laha, “Iho akatihasu meedam labe iho im vamdesu meedàla?” laham bak lam im biem bake vahokedam labe iba modi ozobohudi fi gatedam bak ame. Labihasu meedam Alam imot modem bak.
17. Labihàmu ame Alat Vameadaha Im Toedahana laba iho aasume vi ozoidam labe iho Alat gagoho im ahebu meedalo modem bak lam im ab ahumdi vou faodamam bak. Abo neà bak iudu iumti neà bak iudu iumti labihasu ahebu meedam bake Alat iba ab modi ahumdeham bak.
1. Timotius oa, Kristus Yesus ba Boehàdateboli dam bake vuusu im vahokedalo bak niba fa li dam bakda abo elodahada ziti ahe lahasuhuda ziti laham dam labe ibi iho meedaha im lam uloodume aime neàdi dam fahelo modem bak. Labihasu meedalo modemu Alati Kristus Yesusti ba iba vi gagu aim bak ehe labe eho oba nehi gagolo mozo.
2. “Oho Alam im imbona lam dam bake mahate vou vahokeidale,” lahame eho oba labihasu vi vameadam bak. Lahana oho ame im imbona lam vahokedalo modem di lam dam lam aim uledeo? Aim moheo? Laham bak lam gi geàmu dam laba vahokelo modem bak ozome ahumdesu esu afoezobe vahokeidale. Oho ame im imbona lam vahokedalo modem di gi nehadale. Dam git vahokedam dam lam oho fa odosi gagu vamdedale. Labi laha dam lam faina meedam di oho laha im vi vahokedume dam lam fa aidume ame faina meedam bak lam fa voedume fa neà bak vamdesu meedale. Labi laha dam bake vi vabededume ame dam labe im ahu fa teudedale. Oho bak lam meedam di a dae meona vi ooteme vahokedamule. Gi iademe betea dae nemahuba neàna im vi vahokedume afoezobe gi laha vou faodale.
3. Eho gi neham bak vi ozome oba labihasu vameadaha bak. Ba diamut meit Alam im imbona vahokedahana lam damat fa aim mom meo bak ehete. Ame di lam ame dam labe vedi neha, “Ibi iho ozoho baket fa meedase,” lahame dam labe ibi iho valo ozoho guru zi lam vam di gi dam labe ahu ibi iho ozoho bak fa gagom guru zi lam vadalo modem bak. Ame dam labe faina modelo àhàkehe labe gi labihadalo modem bak.
4. Ba ame im imbona lam aime tu vuzehi meedam vaba vedi fa gi meit imohim ostame faasi vou vameatedam im lam aime, “Imbote,” lahame tu vuzehi meedam bohu vuusdam bak.
5. Lahana Timotius, oho na im ahebu meedam di ohomo naedat om ahu it vou faovoi iademe meedale. Labi na im oba modi geàdamna duzum di om bisi vi ozodume vanamai voom vaba gi ozahit keàtedi meedale. Labi laha ame Alam im Neàna lam dam alimda iuba laha vou vameatedam bohu vuusdale. Labi om Alam na gagu meedam dàt modemu ame im Alat oba gagohona lam ahebu gi ame im lamota keàtedi meedume folele.
6. Eho gi neham bak vi ozome oba labi gagoho bak. Em elom bak ab fuham daleàmu oho mahate ot vai meedume bohulalele. Dam ahamda labe im ahu adat iedi Ala bake vou baedam bak laba ozome na fi ho oteme afoezobe anggur oo vaksa ve fa ame na fi ho vua vahusulo modemna laba vi veàtoi neàdem bak lamti ulohona eho Alat gagohona vou mode ledume neàdi em elom bak.
7. Ame Im Neàna lam eho keàtedi dam bake vou vameatedaha bak. Labihàmu eho ozoha, ebe eho lab vou mode ledaha bak lam bisi vou mode ledaha bak neà bak am. Labi laha Alat eba gagohona lam ahebu eho ba meida vekehe vaba gi ahebu vou mode ledume neàdehe bak. Ebe eho lab meedume neàdehe bak lamti ulohona gi damat neha, “Amat nasi emoeme le lafuela?” laham bak lam aalo modem di nasi fi tu emoeme novaha bak laba lafuhuda lamti uloho bak. Labi em ba ibi iho tu vuzehe im imbona lam eho ba vanamai vooho vaba gi iademe ulohodesu vamdesu meedume vaitoho bak.
8. Em im vamdesu meedam dàt modemu meia iademe vamdesu uloodume aime neàdi gagodamda lam abo im Boehàda Kristus labe Aho eho lab meedaha bak gohali lomna Aho Dam Bake Uloodume Vi Aime Ozobohudi Neàdi Fime Fahedam di eba lolo vi ozome ahumdi esuhuna ehete. Lahana ame na gohali lomna ahumdi esuhuna lam gi emota ozome ahumdi esuhu vabak. Abo dam Aho fa lem bak deeli tu vou faodam dam lamti lomna ahumdi esdam bak.
9. Timotius oa, oho eba taho lem bak lam mahate modi ozoidale.
10. Eho gi neham bak ozome oba labi gagoho bak. Demasat vedi, “Dam bakdat ibi iho meedam bak laba deeli am nazoh dualese,” lahame em vou esmozi fa num debu Tesalonika laba itaha bak. Labi Kreskes eho ahit gagu Galatia bak laba oluhu bak. Labi Titus laha eho ahit gagu Dalmatia bak laba oluhu bak.
11. Labiha labe dam amu eba vou aasu vabiedam dam ahebu em vou esmozi ladume seddahana Lukasat ahamo vàmtea laha vaba eba tau aidam bak. Eba tau na meedamda Tikikus lam eho gagu num debu Efesus laba oluhemu om ba lem di fa Markus lebe ve omti ahili eba lele. Ame da Markus lam eba tau na meedam bak ozobohuda vàmtea am bak.
13. Labi laha em nutahalem bake ahoba dusum sue sona eho amu Karpus labe am num debu Troas laba vou esmohona lam laha lebe ve vou lele. Labi laha em buku zi laha ve vou lele. Labi laha em na toehena bolohona baa lam laha ve vou lele. Na ebe lada lam bisi voom maemda am tame.
14. Timotius oa, oho iademe modele. Dat Aleksander labe bak sime vamna abo tembaga vame meedume aliholi fa nazohaedamda labe eba abo fai bak duana meedaha bak. Labihàmu Boehàda labe ame bak laba vi ozome ame da laba ba modi itaholem bak duana vatauda tame.
15. Iho neha, “Ibi iho im imbona vahokedase,” lahame meedaha di labe ame da lam gi di labet usai tetehesu gut odosi gagodamda am bak. Iba labihadam dàt oba neo fai baket meedam bak labna zohàme oho iademe aasu faode.
16. Labi im meida neo oba gagolo. Meit git modehemu uloodume aidam num tom fi haba laba eho ahamte le duzu damat eba uloodaha di lam eba tau veibamda ba na vabak. Dam ahebu gi em vou esmozi ilidume seddaha bak. Lahana eho gi Ala bake nehadam bak. “Dam lam a beomule. Oho gi ozahigeàmu fa vei neàdele,” lahame labi gagodam bak.
17. Lahana damat em vou esmohonàme Alat ba em vou esmoho vabak. Aho gi amu di iube eba vou aasu vabiedume modi em teudi meedaha bak neo di labe eba vi modi em neo teudi duzuhu bak. Aho labihahemu Yahudi damat modem vab dam labe tau dozeadaha diat eho iademe lab veibadaha Im Neàna ahebu lam ame damat vi aidaha bak. Labi laha ame di labe dam faina meedam dam labe neha, “Imo Paulus oteme voou setese,” lahame labi gagohonàme Alat eba soat vausu em fa vei neàdehe bak.
18. Labihàmu eho ozoha, naat eba fai bak modi vàhàdelo modemna ahebu lam Alat gi eba soat vatohem bohu vou meedume neàdidume em asum ahoba iuba abo Aho azi dam bake vuusu im vahokedam bak iuba vou le abehamdem bak. Labihàmu imo Ala bake, “Feàte,” lahame Aba vou baedam bohu modesdase. Labihadase.
19. Timotius oa, eho, “Neàte,” lahaha bak lam oho ve fa Priskilati Akwilati Onesiforus labe am amedamti laham dam laba gagole.
20. Dat Erastus labe gi num debu Korintus laba le aidam lahasuhu bak. Labi dat Trofi mus lam gailehemu eho gi num debu Miletus laba vou esmoho bak.
21. Oho eba niba lem bak a kehàmule. Di nutabe fai itea feàna laba nom ilu modi bubaholem di fuseo vabaleho. Nasi di nibe taho lele. Ebulusti Pudesti Linusti Klaudiati labi imti vahi Kristus bake tu vuzehi meedam dam totbaho nimti eba tau oba, “Neàte,” lahadam bak.
22. Eho nehi ozo, “Alat oba vou aasu tau vabiedase. Labi omti vahi Kristus bake tu vuzehi vahi meedam dam totbaho lamti labihasu Alat uba laha ozahit deeli im neà bak modi esuidase,” lahame labihasu ozodume Ala bake tom gagodam bak. Neàte. Eho Paulusat sunit nim toedume ab neàdeham. Àhàm.
1. Titus, abo oho amu Kristus bake tu vuzehi Am im uledi vi meedam labe emti uloholi meedàmu em adat modemna ozomomda oa, eho Paulusat sunit nim toedume oba oluho. Alat amu eba nehi fet ozome esuhu bak. “Eho Am im aime uledi meedam datelese.” Labi laha, “Eho Yesus Kristus labe Am im vameadume esmozi laiam dateli Am im vou vameatedase.” Labihasu Alat fet ozome esuhu labe eho ame baket ab meedamam bak. Alat neha, “Am dam,” lahame Aho lab nasi fet ozome fi me vadaha dam laba, “Eho le ame dam labe ibi iho Aba lab tu vuzehehe bak lam, ‘Iademe tu vuzehi meedale,’ lahale,” laham bak ame. Labi, “Alam im vahokedahana abo imbona lam eho ame dam laba le vahokedume fà modi ozobohudi meedase,” laham bak ame. “Im labihasu meedase,” lahame Alat eba labi fet ozome esuhu labe eho ame baket ab meedamam bak. Ame im imbona lam iho ozobohudemeam làhà Alat Aba Aho ozome gagodaha im lam im ahu vàmadi abobo meedam bak lam laha vi tau ozobohudi meedam bak am bak.
2. Eho im labihasu meedam labe ame dam labe etei fa nehasu ozo, “Iho ba Alati vahi gi ahe neàna bohu vuusda tame,” lahame ozobohudi nasi tu vi ozodam bak. “Iho ba Alati vahi gi ahe neàna bohu vuusda tame,” laham bak lam Alat amu asum iumti bak nimti modehe vab di iube abo ba meia vagem vaba Ala labe Aho fet gagu esuhu im am bak.
3. Alat amu di iube Aho Am ahulat Ahamo ozo, “ ‘Meit akati modi Amti vahi gi ahe neàna bohu vuusdàla?’ laham bak lam damat biem bake Aho ba ahate modi fi zeam bitoi damat fà ozobohudese,” lahame Aho amu fet ozome esuhu bak lam fa gagom neà di fuhemu Am na meedam dam bake gagu ame Im Neàna lam ab vou vameatedamam bak. Labi iba Soat Vausu Fa Vei Neàdem Ala labe Ahamo eba neha, “Oho Em Im Neàna lam ve dam bake vou vameatedale,” lahame eba labi gagohemu eho ame baket ab meedamam bak.
4. Titus oa, eho oba ozome neha, “Im Ai Alati labi Kristus Yesus abo iba Soat Vausu Fa Vei Neàdemda lamti labihasu oba ozahit deeli im neà bak modi esuidase. Labi oba modi om ahu faheme fi goaitom vaba gi vabademsuse,” lahame eho ozodume Ala bake labihasu tom gagodam bak.
5. Titus oa, eho neha, “Oho im nehasu meedase,” lahame ozome om Kreta touha laba vou esmozi em fa bak mei bake laha bak. Kreta dam labe git meedam bake eho vabiedume modeha vabamu vekehe zoho oho laha ame baket vi meedume neàdem bak ame. Labi laha Kristus bake tu vuzehi vahi meedam dam Kreta laba abo num debu mei num debu mei laham dam laba le, “Ame dam laba amat vuusu im vameame faheme modiam datelela?” laham bak ozome ahala fi me vaiame dam vuusum bak modidam bak ame. Laham im behàsu lam eho vi ozome om Kreta touha laba vou esmozi em laha bak. Oho ame dam iuba le ame dam busaoda fi me valo modem di eho amu oba neha, “Im nehasu meedam dam lamota vadale,” lahame oba vameaha baket ulohona meedale.
6. Dam im nehasu meedam dam lamota oho gagu fa Kristus bake tu vuzehi meedam dam laba vuusu im vameame faheme modiam dam busao damalem neàte. Da lam, “Am git modeho,” lahame ba meit aba ba vàlu gagom im vabak ame. Labi laha ame da lam gi lahi vàmtea vam bak ame. Labi laha ame da labe am datat Kristus bake tu vuzehi meeda. Labi am data laba ba meit aame aba neha, “Om data abo ahusobuli gi ostame git meedam datat moz. Labi oho gagoho im laha mu fa ibi iho ozoho bak modelo àhàki odosi meedam datat moz,” lahame ba damat vàlu feàtàdam vabak ame.
7. Labi laha Kristus bake tu vuzehi meedam dam laba meit vuusu im vameame faheme modiam datelem bak lam ba ahamo ozome meedam vaba gi Alat ame da laba gagu meedamnat modemu ba damat neha, “Da lam git modeho,” lahame vàlu gagom vabak ame. Labi laha ba, “Em abo feàte,” lahame daetbadam labe dam bake, “Uho nehasu meedale. Uho nehasu meedale,” lahame vameadam labe fa neo tet vi ootedam vabak ame. Labi laha ba meit gi im koena gagomna kehàm vaba ahu gukeme meoli feà bak fum vabak ame. Labi laha ba vao meona duana uddume bak vabi bobidam vabak ame. Labi laha meit gi im koena gagomna lam aho ba am ahu gukeme meoli feà bak fum vabak ame. Labi laha ba meia vageme, “Am doi dualese,” lahame àhàki git meedam vabak ame.
8. Im labihasu meedam vaba fa gi im nehasu meedam bak meeda. Bahagikida aba lem di am num malem vaba abo uledi na àmna lodume am numa vou im bak ame. Labi laha gi im neà bakta deeli iademe meedam bak ame. Labi laha aho na im meedam di ahamo nasi vi ozodume ozobohudi neàdi ame im ba meedam bak ame. Labi laha gi iademe im vamdesu ozodume meedam bak ame. Labi laha ba im fai bak meedam vaba gi Alat Aba Aho gagoho im lamota fi hasi meedam bak ame. Labi laha am ahu fai bak modelo àhàkemna lam ba meedam vaba abo it mali vou faovoi iademe meedam bak ame.
9. Labi laha ame da labe aho Yesus Kristusat meedume vou esmoho im imbona lam iho amu vahokedahana lam aho laha gi amu tu vuzehi neàdi keàtedi ulohodesu meedam bohu tadedam bak ame. Eho gi neham bak ozome oba labi gagoho bak. Ame da labe aho ame lab vahokedahana vuusdam labe ba neo dam Kristus bake tu vuzehi meedam dam totbaho laba neha, “Im nehasu meedam labe im vamdesu meedam bak am tame,” lahame ame im lam vi vahokedam labe ame dam labe ame im lam neo vi aime vuzehi teudi meedam bak am tame. Labi laha dam totbaho labe neha, “Ame Alam im lab vahokedahana lam imbona modem kaio,” lahame ot odosiaha dam laba fa neha, “Vabo. Alam im vahokedahana nim im imbonat modem bak,” lahame labihasu fa vi vahokedume fa ame dam laba vamdedam bak am tame. Im labihasu meedam dam lamota oho gagu ve fa dam Kristus bake tu vuzehi meedam dam laba vuusu im vameame faheme modiam dam busao damalem neàte.
10. Titus oa, eho etei oba lab vameadaha im lam gi vameadaha vabak. Eho gi neham bak ozome oba labi vameadam bak. Ibi iho im imbona vahokedahana lam dam duada labe mu ot odosiame vedi ibi iho ozoho bak modelo àhàki odosi meedam dam ehete. Ame bak lam bisi meedam dam Yahudi dam Kristus bake tu vuzehi meedam dam am bak. Ame dam labe vedi nehada. “Dat ahamda Musat toedume esuhu im feàna lam vuzehi ulohodesu meedale,” lahame vahokedam damat modem bak. Gi ostam im debu vabna vahokedam labe dam totbahot vedi dam lam im imbona vahokeda tibame git zie ub fàum bakti ulohona modi ame im laba tu ostam im meedam bak.
11. Titus, omti oho gagu valo modem dam zi lamti uho ame dam laba, “A labihasu im vahokedamule,” lahame mahate mali im vahokedale. Neham bak. Ame dam labe vedi nehi git ozoda. “Iho im ibida vahokedameam làhà damat iba doi lodume im doi dualem bak am tame,” lahame labi git ozoho labe ame im lam vahokedam bak. Ame dam labe ibi iho vahokedam im lam meia vahokem bak gi feidam vabna dat am nam datati dat am nam datati labihasu vedi ame im lam imbo tibame fa im imbona amu tu vuzehehe bak lam fa voou fa ame giomim laba tu vuzehi meedam bak. Labihàmu uho ame dam laba, “A labihasu meedamule,” lahame mahate mali im vahokedale.
12. Ame im lam ehemo ame dam laba gagodam kaio. Kreta ahamda meida abo Kreta damat neha, “Alam im aime dam bake ahate vou vameadamda meida am tame,” lahame tu vuzeheda labe nehi gagoho bak ehete. “Kreta laba azim dam gi nehame meedam damat modem bak. Im vameadam di gi ot vagei ot vageidam damat modem bak. Labi ame dam lam abo seagam feàdat meoli dam beodam bakti uloholi meo feà damat modem bak. Ba im meit gagomda aime ilabdem vab damat modem bak. Labi ame dam lam laha na modem odohabu damat modem bak. Labi ame dam lam laha na àme dedehe geàmu neo vi àme dedebuli feà bak fum damat modem bak.” Lahame gagoho bak.
13. Ame da labe aho lab gagoho bak lam abo imbo bak. Làhàmu Kristus bake tu vuzehi vahi meedam dam Kreta laba azim dam labe iho fa ame im imbona vahokedaha vaba vedi git dehozi im giomimna vameadam dam labe im im lam vi aime tu vuzehem dam laba, “Um git meedalo,” lahame oho mahate keàtet im vahokedale. Oho mahate keàtet im vahokedume vamdedameam làhà ame dam lam im imbona laba tu vuzehehe bak lam git dehozehe vaba gi fa teudi meedam bohu lahasu vuusdam bak am tame.
14. Labi laha ame Yahudi dam labe im dam ahamda labe vou vamea usehe imohim ostamna vi vahokedahana lam ame dam labe amu tu vuzehi meedam bak lam laha fa voou mu setem bak am tame. Labi laha dam im imbona tu vuzehem vaba git dehozi vooho dam labe gi dam bak damat ibi ihimo, “Nehame meedale. Nehame meedale,” lahame ootedam im lam ba aime vuzehi meedam vabak am tame. Titus oa, “Dam Kristus bake tu vuzehi meedam dam labe im labihasu meedase,” lahame oho ame dam laba mahate mali im vahokedam bohu modesdume vamdedale.
15. Eho gi neham bak ozome oba labi gagoho bak. Damat faina meedam vaba gi neà bakta meedam bohu meedam dam labe ba, “Im lada lam em fi ham bak,” lahame gagom bak lam ba gagodam vabak. Gi na im ahebu neàna tadehe bak. Lahana Alat modi vei neàdehe vaba abo ahu fai bak modesdam lahasuhu dam abo Kristus bake tu vuzehi meedam vab dam ba labiham vabak. Gi na im ahebu fi ham bak tadehe labe ba aba modi neàbodi Alat vam bak na vabak. Ame dam labe im ahu gi fai bak modesdam labe gi faina bohu ozodume meedam bak. Labiha labe ba, “Iho faina meedaho,” laham bak lam ba it ozodam vab labe gi vei vabi meedam damat modem bak.
16. Ame dam labe vedi neha, “Im Alati vou ali ahu vàmadi meedam dam im am bak,” lahame gagodamnàme Alat Aba Aho ozoho bak laba vi meedam vab labe gi giomim gagodam damat modem bak. Ba im Alat Aho gagohoda lam aim vaba gi ozahigeàmu voedam bak. Labi dam lam ba im neà bak meedam biem damat modem bak. Ame dam lam iho faina meedam bak feà bak fuhu labe Alat aam di gi ahasbeai moudaha bak.
1. Titus oa, ame dam labe im imbona tu vuzehem vaba git dehozi mu vooho dam labe ibi iho meedam bak lam om a vi tau meedamule. Oho gi fa dam Kristus bake tu vuzehi vahi meedam dam laba im vahokedalo modem di gi neha, “Uho Alam im imbona vahokedahana laba vi ozodume ulohodesu meedale,” lahame dam bake vahokedale.
2. Labi laha oho dam busaoda laba im vahokelo modem di im nehasu vahokedale. Uho na im ahebu meedam di uhumo naedamat um ahu it vou faovoi iademe meedam bak ame. Labi laha um na im ahebu meedam di gi damat uba vàlu feàtàm vaba gi ahu adat iedi uba vou baedam baket meedam bak ame. Labi laha na im ahebu meedam di uhumo nasi vi ozodume ozobohudi neàdi ame im ba meedam bak ame. Labi laha ubu uho ame Alam im imbona vahokedahana lab tu vuzehi meedam bak lam mahate meedam bohu modesdam bak ame. Labi laha meia deeli meedam bak lam ba gi ahobat deelem vaba abo imbodi deelehe bohu vuusu meedam bak ame. Labi laha ame im imbona lam tu vuzehi meedam labe na im iba modi duzum di im ahu bedem vaba gi ozahit ahu teudi keàtedi meedam bohu vuusu meedam bak ame. Titus oho ame dam busaoda laba, “Im labihasu meedale,” lahame vahokedale.
3. Titus oa, oho neo lahi busaoda im vahokelo modem di gi amu dam busaoda laba vahokedaha baket neo ozome lahi busaoda zi laba laha im nehasu neo vi vahokedale. Ame lahi labe amu neha, “Iho Ala bake tu vuzehi im Abada meedam lahi im am bak,” lahame labi gagodam baket ahu vàmadi meedam labe, “Alat iba fà vou baedase,” lahame meedam bak ame. Labi laha meia feàtàdam vabak ame. Labi laha vao meona lam ba duana uddume fa vao meona udemoho nameledam vabak ame. Labi laha fa meia, “Na im neà bak nim meedale,” lahame meia vahokedam bak ame. Titus, oho ame lahi busaoda laba, “Im labihasu meedale,” lahame vahokedale.
4. Ame lahi busaoda zi labe oho lab vahokedaha bak lam uledi meedameam làhà iho fa lahi gàhàda laba fa vahokedam bak labet modi ame lahi gàhàda labe fa im nehasu meedam bak am tame. Im datti im datati deeli iademe meedam bak ame.
5. Labi laha iho na im ahebu meedam di ihimo nasi vi ozodume ozobohudi neàdi ame im ba meedam bak ame. Labi laha faina meedam vaba gi neà bakta meedam bohu meedam bak ame. Labi laha im datti im datati labihasu iademe vabiedam bak ame. Labi laha iho meia aame faobekesi neà bak meedam bak ame. Labi laha im dat iba gagoho im lam aime vuzehi uledi meedam bak ame. Lahi busaoda fa lahi gàhàda laba iademe vahokedam labe im labihasu meedam bak am tame. Eho etei oba lab vameadaha im lam ame lahi gàhàda labe meedameam làhà dam giida labe ame bak laba vi aame iho Alam im vahokedahana laba ba feàtàm vaba fa, “Ame lab vahokedam im lam abo imbote,” lahame vou baedam bak.
6. Titus oa, oho neo dam gàhàda im vahokedalo modem di gi eho amu lab gagodaha bak labet neo ozome dam gàhàda laba vi vahokedale. “Ame dam gàhàda labe laha iho na im ahebu meedam di ihimo nasi vi ozodume ozobohudi neàdi ame im ba meedale,” lahale. Im labihasu oho dam gàhàda laba vahokedale.
7. Labi Titus, oho na im ahebu meedam di gi neà bakta vouhodam labe meedam bohu meedale. Labi damat obo ohomo nasi vouhodam bak fà vi aame ame baket vi tau meedase. Labi oho Alam im lam dam bake vahokedam di lam damat oba aame ozo, “Ahole meedam bak,” lahame im ahu adat iedi vou baedam bak laba ozome om ahu abo vamdesuhuna imbo bakta modesu dam bake vahokedale.
8. Labi laha ibi iho vou vameatedaha Alam im imbona lam abo meit neha, “Im meit modem bak,” lahame ozome feàtàm biemda laba vi ozome ulohodesu dam bake vahokedale. Oho labi modem labe ba iba faki ot odosiaha dam labe iba ba neha, “Im git vahokedalo,” lahame ba feàtàm bi gi ladem bak am tame.
9. Titus oa, oho dam mei na teo meedam dam laba im vahokedam di gi im nehasu vahokedale. “Uba na gagu meedam dam labe im na uba gagom di gi ozahit na ahebu uledi meedam tadele. Ame bak lam meedam di, ‘Iba na gagu meedam dam nibe fà deelese,’ lahame it ozodam labe ame na ahebu uledi meedume neàdedale. Ba a ot vai vi gagu odohali momule.
10. Labi ame na gagu meedam dam labe na ibida meedam di uho ame dam labe im nazoh a aa vamule. Labi laha uho gi im iademe vamdesu meedale. Ame bak labet modi ame na gagu meedam dam labe iho uho lab meedaha bak laba aame um ahu ozobohudi ba, ‘Um git modem damat moz,’ laham bak vi ozome gagom vabak.” Im labihasu ahebu ame dam mei na teo meedam dam laba oho vahokedale. Neham bak. Ame dam mei na teo meedam dam labe im labihasu meedameam làhà dam giida labe ame dam labe ibi iho im iademe vamdesu meedam bak laba vi aame ozo, “Aa làhà! Dam laba Soat Vausu Fa Vei Neàdedam Ala labe Aba Aho meedaha im lam abo Paulus giida labe iba vahokedaha im lam abo imbote,” lahame vi ozome vou baedam bak am tame. Eho ame bak laba vi ozome neha, “Im labihasu ahebu ame dam mei na teo meedam dam laba vahokedale,” lahame oba vi vameadam bak.
11. Titus oa, eho etei oba lab vameadaha im lam, “Dam Kristus bake tu vuzehi meedam dam labe ame im imbona laba tu vuzehi im neà bak vamdesu meedale,” lahame oba lab vameadaha bak lam eho gi neham bak ozome oba labi vameadaha bak. Alat dam bakdate ozahit deeli im neà bak modi esuidam Alat modem bak. Laham bak lam im dam bakda ahebu amu biem bake etei Alat Aho iba soat vausu fa vei neàdedalo modem bak lam fi zeam bitolo Am Adat Yesus Kristus iba ab oluham bak.
12. Labi Alat iba ozahit deeli im neà bak modi esuidam Alat modem bak lam iho ozobohudehe labe iho neo neham bak nim laha vi ozobohudi meedam bak. Iho amu Ala bake, “Am abo feàte,” lahame ahu adat iedi vou baedaha vaba gi ozahigeàmu fa im mei meedam bak lam iho etei fa voedume fa sedda. Labi laha dam Kristus bake tu vuzehi meedaha vab dam labe ibi iho bak niba fai bak mei fai bak meime modelo àhàki meedam im lam iba vizi iho amu vi tau meedam bak lam iho laha etei fa voedume fa sedda. Labihasu seddaha labe iho bak niba azim di iho gi fa im nehasu meedam bak. Iho na im ahebu meedam di ihimo nasi vi ozodume ozobohudi neàdi ame im ba meeda. Labi laha gi iademe im vamdesu ozodume meeda. Labi laha iho Alat Aba Aho ozome gagodaha im lam im ahu vàmadi labaha bohu meeda. Aho iba fi zeam bitoho bak lam iho vi ozobohudehe labe im labihasu ahebu vi ozobohudi ab meedamam bak.
13. Mahate it ozodale. Im etei Yesus Kristus fa lem bak labet iba modi deelemna lam iho nasi tu vi ozodume vou faodam bak. Ala bisi Feàda abo iba Soat Vausu Fa Vei Neàdemda Yesus Kristus lam ibi iho vou faodamda Am am bak. Labi Yesus Kristus ba bak niba nom ilum di Aho gi damat Aba, “Am abo feàte,” lahame ahu adat iedi vou baedam daeti nom ilu tame.
14. Ame Da Kristus labe Aho fet nehi ozo, “Iho dam bakdat faina meedam bak bohu meedam vaba abobo vaitom baket meedase,” lahame fet ozome iho faina meedaha bake gohali, “Am elom neàte,” lahame Aho naedat ahit uledi iba ot vai ab eloham bak. Labi laha, “Iho fai bak meedam bak lam Aho iba vabiedume neàdi fa Am dam tadi iho im neà bakta meedam bak fà àhàki meedase,” lahame ame baket modehe bak.
15. Titus, eho oba gagu oho im dedateli eho etei oba lab toedaha im ahebu lam oho Kreta touha azim dam laba mahate keàtedi vahokedale. Labi laha dam momna zohàme mahate ame im lam vi vahokedume dam bake vabededume im ahu teudedale. Labi laha ame im lam damat uledi meedaha vaba git meedameam làhà oho ame im lam ozahit vi vameadume fa vamdedale. Labi damat oba, “Om ee vab dàt moz,” lahame vàlu feàtàme oho lab vahokedam im lam mu tozomeam làhà ame dam laba mahate vi vahokedume modi dam labe fa oba uledele.
1. Titus oa, dam Kristus bake tu vuzehi meedam dam labe neham bak fa vabiemna zohàme oho dihasi vameada, dihasi vameada, labihadam bohu meedale. “Uba vuusu im vahokedam dam busaoda zi lamti labi dam pemerintah modi ee vousaha boehà dam zi totbaho lamti ame dam labe ibi iho gagoho im lam uho ba mu voom vaba gi ame im lam ahebu aime vuzehi uledi meedam bak bohu tadele. Labi laha uho neha, ‘Neà bak lame,’ laham bak laba vi ozome, ‘Iho uledi meedase,’ lahame ahumdi esule.
2. Labi laha meia a feàtàdamule. Labi laha a beilo àhàki daet ot vai beàdamule. Gi fa ahu nemahuba neàt meedale. Labi laha na im ahebu meedam di gi, ‘Da lam feàda am. Em gi feà vab dàt modem bak,’ lahame ahu nemahuba neàt meedale.” Titus, oho im labihasu ahebu dam Kristus bake tu vuzehi meedam dam laba, “Mahate meedale,” lahame vi vahokedume meedam bohu meedale.
3. Eho gi neham bak ozome oba labi gagoho bak. Iho amu Kristus bake tu vuzehi meedaha vab di lam im laha im nehasu meedam damat modem bak. Ahusobuli git meedam bak ame. Labi laha im Ala labe Aba Aho gagoho im lamti labi im dam ee vousahada labe ibi iho gagoho im lamti labihasu ahebu iho aim vaba gi ailahigeàmu voedam bak ame. Labi laha meit giomim gagoho im laba imbo tibame iho vabi vi tu vuzehi meedam bak ame. Labi laha iho amu im ahu nibe fai bak mei fai bak meime modelo àhàkedam labe ame bak lam meedam di voom vabi gi labaha faina modelo àhàkem bohu meedam bak ame. Labi laha meia faki, “Mei fà beose,” lahame bisi fai bak la modi le modidam bak ame. Labi laha na meit modehena iho gi ahu adat faki teidemoholedam bak ame. Labi laha ibi iho meedaha bak laba damat iba faki meedam labe gi ot fakiame meedam bak ame. Im labihasu meedam tadem damat modem bak.
4. Im amu labihasu meedam damat modemnàme iba Soat Vausu Fa Vei Neàdedam Ala labe, “Aho meia ozahit deeli im neà bak modi esuidam Alat modem bak,” laham bak im biem bake aho iba modi ame baket ab fi zeam bitoham.
5. Iho im vamdesu meedam labet Alat ba iba soat vausu fa vei neàdedaha vabak. Gi Alat Ahamo iba aam faimu ozahit im neà bak tau meedalo labihaha bak. Aho iba soat vausu fa vei neàdehe bak lam fa damat ahugiabu bake valo kikeme boz neàdem bakti uloho bak. Neham bak. Iho faina meedaha bak lam Alat fa faamome seddaha labe iba soat vausu fa vei neàdehe bak am bak. Labi Aho fa faamome seddàmu Alam Aha Nutabe Neàna labe fa iba vi modi im fa Alam damali gàhàli iho ab faasi meedamam bak.
6. Alat Am Aha Nutabe Neàna iba nom oluhu di lam Aho gi nehaha bak. Amu Yesus Kristus bak niba olu dam bake soat vausu fa vei neàdedume fa tom vousai ba neo Am Aha Nutabe Neàna iba ba it oudaha bak. Im dam ahebu duana vizedume keàtedi vuusdam bak laba ozome Alat abo Am Aha Nutabe Neàna lam iba it oudaha bak.
7. Alat neham bak ozome labihaha bak. Aho iba modi Am damalehe labe iho ba Amti vahi gi ahe neàna bohu vuusdam bak laba, “Iho nasi tu vi ozodam bohu vou faodase,” lahame labihaha bak. Neham labe ame bak lam meedam bak. Aho iba ozahit deeli im neà bak modi esuidam Alat modem labe Aho iba neha, “Im vamdesu meedam damat modem bak,” lahame ozahit deeli gagu vadaha bak. Alat ahit, “Labihadase,” laham bak ozome Am Aha Nutabe Neàna nom oudume iba vizedume keàtedi iba vuusdam bak.
8. Titus oa, eho etei oba lab vameadaha im lam abo imbote. Omti dam ahebu aime vuzehem neàte. Labihàmu dam Ala bake tu vuzehi meedam dam labe ame im lam tu vuzehi meia gi im neà bakta vamdesu ahu vàmadi meedam bake eho etei oba lab vameadaha im lam ahebu oho dam bake, “Ame im lam mahate tu vuzehi ulohodesu meedale,” lahame mahate dam bake vahokedale. Eho etei oba lab vameadaha im lam im bisi neàda am bak. Abo damat aime it vabiedume neàdi vamdesum im am bak.
9. Lahana damat im debu vabna ostam im laba otesi otesidam bak lam om a aime tu vuzehi uledi tau meedamule. Labi laha damat neha, “Imo dam ahamda debu im vou faat ledaha im vameadase,” lahame vameadam di vedi fa ostame otesi otesidameam làhà om ba a vi tau gagodamule. Labi laha dam vahi dat ahamda Musat lab toedume esuhu Im Feàna lam vameadam di vedi dam zohot neha, “Ba labiham vabak.” Lahahat dam zohot fa gago, “Imbo bak,” lahame neo ostame otesi otesidameam làhà om ba a vi tau gagodamule. Ame lab otesi otesidam labe ba ame im lam meit aim di meia tau vabiedume vamdesum vabiem imot modem bak. Gi voom imot modem bak. Labihàmu ba a vi tau gagodamule. Gi ailahigeàmole.
10. Meit uba li iho Kristus bake tu vuzehi meedam dam labe ibi iho vuzehi meedam im imbona lam vahokehe vaba vedi zie fàum bakti ulohona modi uba fa ostam im lam vahokedume um faheme dam totbaho vedi ame ostam im lam imbo tibame tu vuzehi meedameam làhà ame da laba, “Om akati im imbona vahokehe vaba vedi zie fàusi im ostamna vahokedàla? A labi modemule,” lahame ame da laba im labihasu vahokedale. Labi im vahokedume vi aameam ame da lam ame bak lam meedam lahasumeam làhà neo im vi vahokedume behàsdele. Labi im vi vahokedume behàsdi vi aameam ame da lam ame bak lam meedam lahasumeam làhà gi neha, “Ea, om labiham dàt mode! Om ba dam bake vahokedam vabak. Malem bak,” lahame da laba gagu mu vaitesule.
11. Dat labihamda lam am naedat ozobohudi ahit im imbona mu vooho bak. Ame da labe, “Aho faina meedam dàt mode?” laham bak lam am naedata ozobohuna gi geàmu meedam bak. Ame bak labet modi ahamo ab it vàhàdeham bak.
12. Titus oa, im im vahi meedamda meida Artemas eho oba olueo? Fa Tikikus oba olueo? Laham bak em ozome neàdem kaio. Lahana eho ame da ba oba olu laba lafuhuzobe om gi kehàm vaba taho fa eba num debu Nikopolis niba li eba tàle. Neham bak. Etei di nim nutabe faiti aba faiti bohu vuusdam di nim eho Nikopolis laba le azi faobe fa di neà faam di labe fa bak mei bake lalo modem bak. Labihàmu om eba ame bak laba li tàle.
13. Labi im meida neha: Dat Zenas abo meit meedaha im aime vameadam toheda lamti Apolos lamti ame dam behàsu labe neha, “Im lalo mozo,” lahame gagu Kreta lam vou esmozi lalo modem di labe oho dam labe iho nazoh vabalem bake oho mahate ozome na doni bake vou mode lamna meida vekem vaba na ahebu vi lodume oudale.
14. Titus oa, eho etei gagolo modem im nim omota gagolo modem kaio. Abo imti vahi Kristus bake tu vuzehi meedam dam totbaho laba laha gagolo modem bak. Oho ame im nim dam laba vahokedale. “Uho aameam meit na vabali na valo ozomda lam aameam làhà uho nehi it ozodale. ‘Imo ame da laba tau vabiedase,’ lahame it ozodume ahu vàmadi ame neà bak lam meedale.” Laham im lam oho im dam laba laha vahokedale. Neham bak. Im dam fa au vabali anekehà gaemata ozoesum bak labna zohàme oho ame dam laba ame im lam mahate vahokedale. Dam labe iho bak niba azim di gi voom damat modemna zohàme oho ame im lam mahate vahokedale.
15. Lo. Eho Paulusat sunit nim ab toedume neàdeham. Dam emti vahi azim dam nim iho oba, “Neàte,” lahadalo. Labi oho laha imti vahi Kristus bake tu vuzehi meedam dam abo iba deelehe dam oba tau azim dam laba iho neha, “Neàte,” lahame gagoho im lam oho ve fa dam laba gagodale. Eho gi neha, “Im Boehàda Yesus Kristus labe Aho um ahebu ozahit deeli im neà bak modi esuidase,” lahame labi ozodume Ala bake tom gagodam bak. Neàte. Eho Paulusat sunit nim toedume ab neàdeham. Àhàm.
1. Filemon oa, sunit nim eho Paulusat oba oluho. Eho amu Kristus Yesus labe Aba Aho meedume esmoho Im Neàna vou vameatedàmu damat em si sel ousdam dàt sunit nim toedume oba oluho. Lahana ehemo toem kaio. Imti vahi Yesus bake tu vuzehi meedamda meida Timotius laha eba tau gagu eho sunit nim toedume oba oluho. Im ahim nibe iho deeli vou ali meedamda meida om am bak. Abo imti vahi Kristus labe Am im tau meedamda meida om am bak. Om labihamda modemu iho sunit nim oluho.
2. Gi omota toedume olum kaio. Abo imti vahi Kristus bake tu vuzehi meedam nam meida Apfi a lamti labi dat meida Arkipus abo ame Im Neàna vou vameatedàmu damat vabidamnàme geàmu keàtedi meedamda meida abo imti ulohoda lamti laha iho vi ozome sunit nim oluho. Labi laha dam Kristus bake tu vuzehi vahi meedam dam labe num oboda laba vahi Ala bake vou baedam dam laba laha sunit nim iho toedume oluho. Iho uba, “Neàte,” lahaho.
3. Im ahim nibe uba ozome neha, “Im Ai Alati im Boehàda Kristus Yesusti ahili uba ozahit deeli im neà bak modi esuidase. Labi uba modi um ahu faheme fi goaitom vaba gi vabademsuse,” lahame ozome Ala bake labihasu tom gagodam bak.
4. Filemon oa, om abo im Boehàda Yesus bake tu vuzehi keàtedi meedam bak lam labaha bohu lahasdam bak lamti labi dam Kristus bake tu vuzehi meedam dam abo Alam damaleheda ahebu oho deeli meedam bak lamti labihasu meedaha bak lam eho aiha em abo aime deelehe bak. Làhàmu ebe eho vou baedam Ala bake tom gagodam di eho gi oba vi ozome neha, “Ai oa, Oho Filemon bake meedaha bak lam abo neàte,” lahame Ala bake vou baedam bak tadehe bak.
6. Labi laha eho oba neo vi ozome Ala bake tom gagodam di eho nehi vi ozome tom gagodam bak. “Ai Ala oa, Oho iba im neà bak lab modi esuidam bak lam Filemon biem bake Oho modi fa am ozobohudi fi gatedale. Labi ame baket meedam labe Oho neo vi modi Filemonat fa amti vahi Kristus bake tu vuzehi meedam dam totbaho laba amu vou ali ahu vàmadi meedam bak lam fa duali keàtedi modesdale. Labiham labe Om damaleheda totbaho ahebu, ‘Kristus abo feàte,’ lahame ahu adat iedi Am ee vousai vou baedam bak am tame,” lahame eho labihasu tom gagodam bak.
7. Emti vahi Kristus bake tu vuzehi meedamda Filemon oa, oho Alam damaleheda ahebu deeli vabededàmu ame dam labe im ahu fa vei teudi deelehat meedam bak. Oho gi labihadam bak eho aihemu em ahu laha abo fa vei teudi deelehat meedam bak.
8. Filemon oa, em im nim oho ba modem im nasi gagu esulo mozo. Lahana eho ozom, em abo Kristus Am im gagu esmozi laiamda meida busaoda amemu eho gi oba, “Nehame modele,” lahame oba ooteme gagomeam làhà em ba iedem vabna oba gagu oho ame im lam aime uledi modidam neà bak. Lahadamnàme oho Alam damaleheda ahebu deeli meedam bak lam em ozobohudehemu em ba oba labi tet vameadam bak mu oba gi iademe nasi, “Om uledeo,” laham bak gagu ailo modem bak. Em gi aoli tau fauhalehena amu di iube Kristus Yesus labe Aba Aho meedaha Im Neàna lam vi tau vou vahoketedàmu damat em si sel niba ousdam dàt ame im nim oba gi iademe nasi gagu ailo modem bak.
10. Ame im nim eho modem im oba ailo modem kaio. Em gi meit modem im oba gagu ailo mozo. Damat Onesimus lahamda nim damat em sel niba ousdam di eho fa Kristus Yesus labe Aba Aho meedaha Im Neàna lam aba vahokedume modeha am aime uledi tu vuzehi meedam bak. Abo em adat modemna ozomomda modem labe eho am im oba nasi gagu ailo mozo.
11. Ame da Onesimus amu na oboda modehe bak odohali mu itahemu oho neha, “Im modem biemda ahole itaha,” lahame ozohoda lam etei fa vei neàdi eba tau na ebeda keàtedi meedam bak. Labi eho ozoha, eho fa oba olumeam làhà fa vei neàdi na oboda laha keàtedi meeda tame.
12. Ame da lam abo ebe eho bisi deelemda em ahu tu aidamda modemnàme ozahit oba fa ab olulo modemam bak.
13. Eho Yesusat meedaha Im Neàna lam vou vameatedàmu damat em si sel niba ousdam di labe oho eba taum biem bake eho ame da nim fa ot vahemu, “Eho mali vou aidase,” lahame ozodaha vabamoha.
14. Lahana eho labihasu ozodamnàme eho oba nasi gagu aimeam oho fa eba neha, “Eho ve vou aidam neàte,” laham bak lam eho oba aihi vabna eho ame bak lam modem vabilehemu oba fa ab olulo modemam bak. Eho amu nehi vi ozo. Eho oba bisi tet vi ootedume om ahu bedi, “Eho ve vou aidam neàte,” lahame tet vi gagodameam làhà oho gi eho oba ootedaha bak labet modi om uledi modemna zohàme eho ahit ohomo ozome eba faobekesi, “Eho vou aidam neàte,” lahame nasi eba gagom bake vou faodam bak. Lahamnàme ame da nim eho oba fa ab olulo modemam bak.
15. Nehahana zoaha. Alat ahit oba modi teohet seti fa eba li Alam im aime fa Kristus bake tu vuzehi fa ba oba abo li oho fa ve na iademe meedume abehamdelo modem bake Alat ahit labi modehe zoaha.
16. Lahana oho fa vam di gi om na teo tet meedam bak lamota abo obo oho amu meedam bak lahasuhuna lamota fa vam vabak. Abo fa vei neàdehena fa vam bak. Abo obo oho meedam bak lamti uloholi Kristus bake tu vuzehi meedamda abo omti vou alemda fa vam bak. Ame da nim ebe eho deeli vou alemda am bak. Lahana eho ozoha, etei nim gi om na teo tet meedamda lamota lahasuhuna vaha vaba abo im Boehàda Yesus bake tu vuzehi im Abada meedamda omti vou alemda fa vahemu om bisi ame da laba deeli meedam bak.
17. Labihàmu, “Om emti Yesus bake tu vuzehi im Abada meedam dam ahim am tame,” laham bak imbodemeam làhà eho Onesimus oba fa olum di oho gi eho oba lem di gut aame deeli vam bakti ulohona fa Onesimus bake laha gut aame deelele.
18. Labi ame da labe oba amu git modehe bak eheo, na oboda amu ve fa ame baleà vouhom vabak modeo, labihasu modehe bak ehelemeam làhà a bisi faki vi ozodamule. Ehemo ame bak ahebu fa ame baleà vouhoda tame.
19. Sunit nim eho Paulusat em anekehàt toedaha bak. Em ba vagem vabak. Oba ame bak ahebu ame baleà vouhoda tame. Lahana bak nim a fa vabili voomule. Eho amu ame Im Neàna lam oba vameadume oho aime Kristus bake tu vuzehi Alat oba soat vausu fa vei neàdehe bak laba ozome gohali oho eba im meedaha bak baleàhà vaba teolehe bak lam a vabili voomule. Eho ozoha, obo zoho lam eba bisi ame baleà vouhom zoho am bak. Labihàmu eho Onesimus oba fa olum di oho gi eho oba lem di gut aame deeli vam bakti ulohona fa Onesimus bake laha gut aame deelele.
20. Emti vou alemda Filemon oa, im ahim abo im Boehàda Kristus Yesus bake tu vuzehi im Abada vahi meedàmu Onesimus oba lafum di gi ahu deelehat gut aame deeli vale. Oho labi modemeam làhà om eba taumda am tame. Labi laha oho em ahu modi asimdi deelem bak am tame.
21. Ebe eho nasi, “Om uledeo,” lahame gagu ailo modem im nim oba olu oho aameam oho mom vaba abo uledem bak lam eho fet ozodam labe sunit nim oba toedume oluhu bak. Lahana eho ozom, om gi ebe eho nasi gagu ailo modem im lamota uledi meedam vabak. Abo gi na eho oba gagoho vabda iumti ahebu oho fetehesu duana meedam bak lam em ozodam bak.
22. Labi laha num oboda oula meida lam vabieme ahumdi esu vou faodale. Neham bak. Uho eba vi ozome neha, “Paulus fa isi olule,” lahame Ala bake tom gagodàmu Alat aime uledi em isi uba olum zoaha bak. Laham bak lam em ahu nasi tu ozodam bak.
23. Emti vou alemda meida Epafras aho Kristus Yesusat meedaha Im Neàna lam vou vameatedàmu damat am si sel niba emti ousdamda nibe laha oba, “Neàte,” lahaho.
24. Labi laha Markusti Aristarkusti Demasti Lukasti labihasu eba tau na meedam dam nibe oba laha, “Neàte,” lahaho.
25. Eho uba vi ozome neha, “Im Boehàda Yesus Kristusat oba ozahit deeli im neà bak modi esuidase,” lahame eho Ala bake labihasu tom gagodam bak. Neàte. Eho Paulusat sunit nim toedume ab neàdeham. Àhàm.
1. Alat aham di iube im dam bada nibe im vou faat lehe tai ahobada zi laba im vameadaha di lam Aho gi nehasu meedaha bak. Dam ahamda Alat vameadaha im aime fa dam bake ahate vameaidaha dam zi labe Alam im lam aime fa im tai ahobada zi laba vou vamea ledamehamdehe bak. Labi laha ame im lam Aho im tai ahobada zi laba lab modi ozobohudi fi gatehe bak lam gi tamehona zi meedaha bak. Abo im meida mode. Im meida mode. Labihadaha bak.
2. Lahana etei nim digat folelo modem di nibe Alat Am im lam gi Am Adat Am aha labet iba dam badate vou fusi vameadaha bak. Alam Adat lam nehasu meedaha Dàt modem bak. Asum ahoba iuba modealahana zi lamti bak adba niba modealahana zi nimti ahebu Am Adat labe ot vai modi debulehe bak. Labi laha Aho Am Adat laba neha, “Ame na zi lam Eho fa Oba lu Oho naedateli gi labaha bohu vuusdale,” lahame fet ozome gagu esuhuda Am am bak.
3. Labi laha Ala Am bisi feà bak lam iba modi ozobohudi fi gateheda Yesus am bak. Labi laha iho Am Adat aaha labe im gi Ala ab aaham bak. Ba git aaha vabak. Yesus Am feà bak lamti Alat Am feà bak lamti gi uloho bak. Labi laha Am feà bak labet modi Aho im gagodam labe na ahebu gi aba amu modealadaha bak lahasdam bak. Labi laha iho faina meedam bak lam Aho ot vai eloho labet modi fa faamome vei neàdedume asum ahoba iuba tom ilu Am Ai Bisi Feàda labe Am ahi totbaho laba le nusu tau feà Dateli na ahebu ab vuusdamam bak.
4. Labihàmu Alat Am Adat ee taluhu di lam bisi Alat Am im gagu vou usem dam zi lamti ee ulohona ozome taluhu vabak. Gi damat bisi ahu adat iedi vou baedamda eeti ulohona Am Adat laba ab taluham bak. Labiha labe Am Adat laba modi feà datelehe di lam bisi Am im gagu vou usem dam zi lamti ba uloholehe vabak. Am Adat bisi feà Datebo am bak.
5. Eho Etei lab gagoho bak lam, “Am Adat bisi feà Datebo am bak,” laham bak lam gi nehaha labe labi gagodaha bak. Ba Alat Am im gagu vou usemda meida laba ba nehame gagoho vabak. “Om abo Em Adat modem bak. Labi etei nibe damat biem bake Em Om Aiat modem bak Eho ab modi tombaleham bak.” Lahame ba labihasu gagoho vabak. Labi laha Alat ba Am im gagu vou usemda meida laba ba neo nehame gagoho vabak. “Ame Da labe Eba, ‘Am Ai aabot modem bak,’ lahame gagoda. Labi Eho ame Da laba, ‘Em Adat modem bak,’ lahame gagoda.” Lahame ba labihasu gagoho vabak. Ame im lam gi Am Adat vàmtea laba gagoho bak.
6. Labi laha Am Adat Ahidatebo bak niba gagu olulo modem di lam Aho gi ahate nehi gagoho bak. “Em im gagu vou usem dam zi ahebu labe im ahu adat iedi ame Da laba vou baedase.” Lahame labihasu gagoho bak.
7. Lahana Alat Am im gagu vou usem dam zi lam Aho gi nehi gagodam bak. “Em im gagu vou usem dam zi lam ba Eho modi Em im aime modiam damalem bak. Abo nutabe foodume setidam bak lamti vua elum boz labe eludume setidam bak lamti ulohonali meedam bak.” Lahame labihasu gagodam bak.
8. Lahana Alat Am Adat laba ozom di Aba nehi gagodam bak. “Om abo Alat modem labe Obo Oho dam vuusu im vahokedam bak lam ba vàusi setem vaba gi labaha bohu vuusdam bak. Labi laha Oho dam vuusu im vahokedam di lam Om gi im vamdesu meedam Alat modem bak.
9. Om abo damat ibi iho im vamdesu meedam bak laba uledi deelem bak. Labi damat ibi iho im kibuna meedam bak laba Om abo faki mom bak. Labihàmu Em Oho vou baedam Ala Boehàda nibe Om dam totbaho voou gi Om vàmteata utasi ee Oboda bisi vousai, ‘Om abo feàte,’ lahame Eho Oba vou baedam bak. Oho naedat ahulat it deelem bake, ‘Om abo ee feàda ame?’ lahame damat fet aame ozobohudem bake Eho ahit Oba minyak veoho bak.” Lahame labihasu gagodam bak.
10. Labi meit Am Adat bake laha nehi gagodam bak meit nehi toehena ehete. “Boehàda oa, aham di ium abo na debu modehe vab di ium alimeat bake modealahana zi nim Oho modi na debulehe bak. Labi asum ahoba iuba modealahana zi lam laha anekehà Obodat modehe bak.
11. Lahana ame na zi lam ahebu gi ba diamut modi vabali seddamnàme Omota ba labiham vabak. Om ba setem vaba gi labaha bohu modesdam bak. Ame na zi lam abo sue faidi ukbiteme dusum biem bakti ulohona modi vou setem bak. Lahana Omota ba labiham vabak. Om ba setem vaba gi labaha bohu modesdam bak.
12. Oho gi ame na zi lam damat sue sona ahoba dumna amuda faidehemu bolome esu fa gàhàda ve dusum bakti ulohona modem bak. Lahana Om ba labiham vabak. Om gi Obo amu modesuhu bak lahasum bak. Om ba aoli faidi setem vabak.”
13. Labi laha Alat Aho Am Adat bake nehi gagoho im nimohoda ba Am im gagu vou usemda meida laba nehi gagoho vabak. “Om Em ahi totbaho niba nusu Eba tau feà Dateli na ahebu vuusdase. Labi Eho dam Oba fakemoholehe dam zi lam Eho ahit modi bedi fà Oba iedi uledi im Oboda fà aime meedase.” Lahame ba labihasu gagoho vabak. Gi Am Adat lamota labi gagoho bak. Labiha labe iho nehi ozoho bak. Bisi feà Datebo gi Am Adat am bak.
14. Lahana Alat Am im gagu vou usem dam zi lam gi Alat Aba Aho gagoho im meedam damat modem bak. Abo Alat Aho ba soat vausu fa vei neàbodedalo modem dam laba vi tau meedam bak laba ozome oudam bak.
1. Ebe eho deelehe dam oa, Alat Aho iba aame faobekesi iba soat vausu fa vei neàdem bak feà labe iho ame im imbona lam ailahigeàmu voomeam làhà Alat iba beom bak. Labihàmu Alam Adat bisi feà Datebo modemu imo im iho etei aihina nim, “Iho Yesus bake tu vuzehi meedam labe Alat Aho iba soat vausu fa vei neàdedam bak,” laham im imbona lam iho koena vooi vooidume bohulalem bak labna zohàme imo ame im lam abo iademe vi ozodam labe bohu vuusdase. Abo ihe vaot vou lam vaba abo iademe vààsum bakti ulohona meedase. Nehaha bak. Alat aham di iube Israel dam bake neha, “Nehame meedale. Nehame meedale,” laham Im Feàna lam Aho amu nasi Am im gagu vou usem dam laba vameadume ame dam labe fa ot vai neo Musa bake fi desi vameada. Labi aho fa neo ot vai im Israel dam tai ahobada zi totbaho laba neo fi desi vameada. Labihadaha Im Feàna lam abo gagu vàmadi vaitoho imot modem bak. Ba modehe vaba mu voom biem imot modem bak. Labihahemu im tai ahobada totbaho labe ulohodesu modehe vaba zidazi ailahigeàmu vooiam di Alat abo faki beom tadehe bak.
3. Laham bak lam im ozobohu bak. Labihàmu Alat amu im tai ahobada zi laba labihahemu uho ozom, etei nim iho neo Alat Aho iba soat vausu fa vei neàdem im gàhàda lam iho neo ailahigeàmu voomeam làhà Alat ba iba beom vaba moe? Vabà! Abo beom bak. Neham bak. Ame Alat Am im gagu vou usem dam labe iho fa ot vai vameadaha im lamti etei Alat ba Am Adat Yesus olu Aho vameadaha im lamti ozom di bisi feàda im bada am bak. Neham labe labihaha bak. Alat Aho dam bake soat vausu fa vei neàdem im lam im Boehàda Yesus labe Ahamo ame im lam ahamte alimeat faasi vou vameatedaha bak. Labi ba neo ame im aihi dam labe, “Imbote,” lahame fa ot vai fa iba ba neo fi desi vou vameatedaha bak.
4. Iba ame im fi dehe dam zi lam ba ihimo meedam vabak. Iho ame im laba, “Imbote,” lahame vi ozodam bake Alat Aho ame dam laba vi tau meedam labe im nehasu vizi meedaha bak. Iho, “ ‘Imbote,’ lahame fet aame ozobohudese,” lahame iho amu aaha vabna fet aame àvodemna meida mode. Meida mode. Labihada. Labi laha na damat ihimo modem biem im feàna meida mode. Meida mode. Labihada. Labihasu ahebu ame dam laba vizi meedam tadehe bak. Labi laha Alat Am Aha Nutabe Neàna labe ame dam laba fi me Aba Aho ozoho dam lamota laba vi tau nehasu vizi teudeda. Im mei meia modi vizi teudem im feàna meia meeda. Labi neo im mei meia modi vizi teudem im feàna meia meeda. Gi labihasu ahala modidaha bak. Labihàmu iho etei aihi im imbona lam abo iademe vi ozodam labe bohu vuusdase.
5. Iho etei vameadalo modem im nim, “Bak fa gàhàde tame,” laham im lam Alat ba Am im gagu vou usem dam zi laba gagu vizi teudi fa ot vai bak gàhàda vuusdume im vahokedalo modem vabak. Gi dam bakda niba gagu vizi teudi fa ot vai bak gàhàdati damti ahebu vuusdume im vahokedalo modem bak.
6. Lahaha bak lam meit Ala bake vameadaha im lam meit fa Alat Vameadaha Im Toedahana laba nehi toehe bak. “Boehàda Ala oa, im dam bakda nim feà vaba gi voomna Oho ana modehe bake iba bisi deeli vi ozodàla? Oho ana modehe bake bisi iba faobekesi vi vabiedume neàdedàla? Om gi im feidam vaba?
7. Oho dam alimeat modehe di lam bisi Om im gagu vou usem dam labe ibi feà bak lamti ulohona modi esuhu vaba gi fa teohet fota vou usi adbalehe bak. Vou useheta vou use. Lahana fa neo modi feà damali boehàdati uloholi dam totbaho labe im ahu adat iedi fa ame dam laba vou baedam bak ab modi vizeham bak. Labi modi im dam bakda nibe fa boehà damali na ahebu imna debuli vuusdam bak.” Lahame labihasu toehe bak. Labi iho etei lab aame gagoho bak lam gi neham bak vi ozomna mode taia? “Na ahebu um na debu dedateli uho vuusdale,” lahame Alat Aho uledi gagu ot vaha di lam ba na meida vàmtea vekeheda vabak. Abo gi ahebu gagu esuhu bak. Labihamta labiha. Lahana etei di nim na ahebu iba uledem bak im ba aadam vabak.
9. Lahana ame lab fet gagu esuhu im zoho lam imbodi Yesus fa Dateli bak niba ab li tau azi meedaham bak. Ame di labe Alat Am im gagu vou usem dam zi labe ibi feà bak lamti ulohona modi esuhu vaba gi fota vou usi adbalehe bak lam iho ab aame ozobohudeham bak. Alat neha, “Aho dam bake ozahit deeli im neà bak modi esuidase,” lahame ozohemu dam ahebu faina meedam bak lam gohali, “Am Adat Yesus Ahamo naedat ahit uledi ot vai elose,” lahame ozome esu vàmadehemu Yesus damat beodume geàdamehamdi ab eloham bak. Labihàmu etei di nibe Alat fa Am Adat Yesus modi feà Dateli tom vousai damat aba, “Feàte,” lahame ahu adat iedi vou baedam bak ab modeham bak.
10. Na ahebu modi debuleheda Ala am bak. Labi ame na zi ahebu lam gi Aba Aho ozoho bak labet la modi le modidam bak. Labihadaha Alat Aho neham bak ab ozome esuham bak. “Em feà bak nim Em damaleheda dua zoho lam Eho modi fa Eba tau feà damalese,” lahame labi fet ozome esuhu labe Aho Am Adat Yesus modi damat beodume geàdamehamdi ab eloham bak. Im dam bakda nibe iho Yesus bake tu vuzehi meedam labe Alat iba soat vausu fa vei neàdem bak lam Yesusat geàdamehamdi eloho labe ame bak lam ab faaham bak. Alat lab ozome modi esuhu bak lam neham labe ahole modehe bak. Yesus damat lab beodume geàdamehamdehe bak labet modi Alat fa Yesus bake modi ab neàbodehe dateleham bak.
11. Ame Da labe iba neha, “Im Alabadata meedase,” lahame iba gagu fi hasi esuhuda Yesus am bak. Amti iba gagu fi hasi esuhu dam nimti im Ai vàmtea gi Ala am bak. Labihàmu Yesus ba iba ozome gagom di, “Im Am dam am tame,” lahame gagodam bak. Ame bak gagodam di ba ladehebeat gagodam vaba gi deelehat gagodam bak.
12. Neham labe labihaha bak. Yesusat Ala bake vameadaha im lam meit Alat Vameadaha Im Toedahana laba nehi fet toehe labe labihaha bak. “Em damat Om biem bake, ‘Fà Om ozobohudese,’ lahame Eho Om ee vousai, ‘Om abo feàte,’ lahame vou baedam bak. Abo damat vahi Oba vou baedam bak laba ame dam labe im dogoit vou faodahit Eho vou ladeedam labe Oba vou baedam bak.”
13. Labi Yesusat Ala bake vameadaha im meida neha: “Ebe Eho tuhudatebo Boehàda Ala Am am bak.” Labi Yesusat Ala bake vameadaha im meida neha: “Ai Ala oa, Em nib bak. Labi Oho Eba loho dam laha nib bak.” Lahame Yesus labihasu gagoho labe ba, “Im Am dam am tame,” lahame gagom di ba ladehebeat gagodam vabak.
14. Yesus etei lab gagoho bak lam, “Am dam,” lahaha bak lam gi bak damat modem bak. Abo faati nuti vaseati ehe labe elomna modem bak. Labiham labe Aho ahit Am damalehe dam lamti uloholi bak datelehe bak. “Meia modi elom bak vizemda Iblis fà beome nemahubali modesdase.” Labi, “Iho bak damat amu bisi elom bake iedemoholi vi ozodam bohu meedam bak lam fà faatoi setese,” lahame Yesusat ahit Dateli eloho bak.
16. Yesusat lab meedaha bak laba iho nehi ozo. Alat Am im gagu vou usem dam laba taulo Yesusat datelehe vabak. Gi imota abo Abrahamat aba aho Ala bake tu vuzehehe bakti ulohona meedaha dam abo Abrahamat vou faat lehe dam modemna ozomom dam zi niba taulo Yesusat ab dateleham bak.
17. Yesusat gi dam bakdate taulo lehemu Aho im dam bakda aliholehe bak. Abo Aho iba neha, “Am vahadam zi. Am nà dam zi,” lahame gagodam dam nibe ibi iho modem bakti ahebu uloholehe bak. Neham bak ozome labihaha bak. Yesusat Aho gi Alat Aba Aho ozoho im lam abo labaha bohu meedam bak laba ozome dam bake aame faobekesi im neà bak tau meedam Tohedatebolehe bak. Labi laha, “Damat faina meedàmu Alat faki beom bak lam Aho ozahigeàmu fa faamome vei neàdedase,” laham bake gohali Aho ahit uledi ot vai eloho bak. Yesusat labihasu modelo modemu Aho ahit Am vahadam ziti uloholi Dateli fa iho bak damat meedaha im ahebu Aho fa ot vai ab vouhodaham bak.
18. Iblisit amu Yesus bake modi ozolo meedaha di lam Yesusat geàdaha bak. Labihàmu etei nim Iblisit neo iba modi ozolo meedam di Yesusat Tohedatebolehe labe iba fa taum meo bak.
1. Emti vahi Kristus bake tu vuzehi meedam dam abo Alam dam asum ahoba iuba lalo Alat gagu fi hasi Aho vadaha dam oa, iho etei lab vameadam Yesus lam uho mahate vi ozodam bohu modesdale. Abo iho neha, “Alat Aho gagu olu Am im vameadume esmozi laiamda Am am tame. Abo iba ozome Ala bake tau meedam Tohedatebo Am am tame,” lahame iho tu vuzeheda laba uho mahate vi ozodam bohu modesdale.
2. Ame Da Yesus gi Musat aba aho meedaha bakti ulohona meedaha bak. Neha: Aham di iube Alat Musa bake gago, “Israel labe aho vou faat ledaha dam nim abo Em dam zi nim ahebu oho iademe vuusu aasdale,” lahame labi gagoidàmu Musat gi ame baket bohu vuusu vou meedaha bak . Labi Yesus laha gi ame baket vou meedaha bak. Alat Aba gagoho im lam, “Oho meedale,” lahame gagu oluhu labe Aho gi ame baket labaha bohu vou meedaha bak.
3. Num ahebu gi damat moadam labe numaedam bak. Lahana Yesus gi Alat modem labe na zi ahebu modi debuleheda Am am bak. Labihàmu Alat Musati Yesusti ame dam behàsu laba vi ozome vou baedalo modem di bisi Aho Am ahu adat, “Feàte,” lahame vou baedam neàda Yesus am bak. Ame bak lamti gi neham bakti uloho bak. Num neàna mohona lamti ame num mohoda lamti iho vi ozome vou baedalo modem di iho vou baedam neàda gi ame num mohoda am bak.
5. Mei na modemda labe aho aba im gagu modiamda labe aho gagoho im lam gi ame da labe am num laba na meedam bak. Musat gi ame bak lamti ulohona vou meedaha bak. Alat Musa bake neha, “Em dam zi nim ahebu oho iademe vuusu vou aasu vabiedale,” lahame labi gagohemu Musat gi ame baket labaha bohu vuusu vou meedaha bak. Ame da Musat aho lab meedaha bak lam gi Dat ba lemda labe Aba Aho vameadam im nasi fet vouhodaha bak.
6. Lahana ame Da Kristus lam gi mei na modemda Musati uloho vabak. Am abo Alam Adat am bak. Alat Aba gagohemu Am abo Alam damalehe dam laba im gagu faheme vou meedume bohulalem Datebo Am am bak. Iho Kristus bake keàtet tu vuzehi im Abada bohu meeda. Labi Alat iba fet gagu vàmadi esuhu im lam, “Imbodi meeda tame,” lahame iho keàtet teudi tu vi ozodam bohu meeda. Labihasu meedameam làhà im ame Alam damalehe dam im am bak.
7. Eho etei lab vameadaha bak lam, “Yesusti Musati vi ozodam di Yesus bisi feà Datebo am tame,” lahame lab gagoho bak lam imbote. Làhàmu uho Alam Aha Nutabe Neàna labe Aho dat ahamda Ala bake vou baedam ladeem dae toeheda laba vizi aho fa ame Israel dam ahamda laba im vahokedaha im nim uho aimale. “Alat neha, ‘Um etei nibe Eho uba vameadam im nim uho aimeam làhà um ahu a odohali mu meedamule.
8. Um tai ahobada Israel dam zi lam Musat Mesir bak labe vi vihitoi fa bak aotba baa bohu dam vaba alim bak laba vou ladam di labe ame dam labe neha, “Iho Ala bake modi ozolo modidam di amamoli Alat iba faki feà bak fusi iba beoe?” lahame meedaha labe vedi Alat gagoho im ahu odohali mu voedaha bak. Labihàmu uho ame dam labe ibi iho meedaha bak lamti ulohona a meedamule.
9. Eho damat ihimo modem biem im feàna lam Eho vou meedume empat puluh tahun vou fuhuna um tai ahobada zi labe iho aahanàme gi geàmu vedi Eba neha, “Iho git meedameam Alat im voeo? Voom vabao? Imo neo modi ozomase,” lahame vi modi ozoidaha bak.
10. Labihàmu Eho aam vanamai ame dam laba faki mu ab tozoham bak. “Ame dam labe bisi Ebe Eho vahokedaha bak mu fa ibi iho ozoho bak labet bisi daetesu meedam bohu meedam damat modem bak,” lahame ab tozoham bak.
11. Labihàmu Eho ame dam laba faki meedàmu ab gagu vàmadi vaitoi esuham bak. “Ebe Eho amu ame dam laba lolo gagu vàmadehe bak Kanaan lam ba lafusi Emti ame dam lamti vahi neà odosi esdam kaio,” lahame Eho ab gagu vàmadi vaitoi esuham bak.’ ” Lahame Alam Aha Nutabe Neàna labe labihasu gagoidam im lam uho iademe aime tu vi ozodale.
12. Emti vahi Kristus bake tu vuzehi meedam dam oa, uba neo ame baket mode moio? Uho meidavat fa neo ame baket modi uho Kristusat uba gagoidam im lam uho tu vuzehedam vaba vedi, “Fai bak nidi nim modese. Fai bak nidi nim modese,” laham bak ozodam ahu modesu uho fa Elom Giki Ala bake ohusesu vou esmozi ubahi ubahidume bak bohulale moio?
13. Lahana eho nehi ozoho bak. Alam Aha Nutabe Neàna labe lab gagoho bak lam, “Um etei nibe Ebe Eho uba vameadam im uho aimeam làhà um ahu a odohali mu meedamule,” lahame lab gagoho bak lam ba gagom vaba setem bak ehete. Labihàmu uho etei ba modem digat zoho nim ahebu fa gi meia im ot vahokei ot vahokeidume vabededale. Uba vagedamna labet modi uho faina meedam labe Ala bake odohali mom bak lam ba it ozobohudem bake labihadale.
14. Neham labe eho uba labi gagoho bak. Iho ahamte alimeat Kristus bake tuhu di lam iho abo keàtet teudi tu vuzehi meedam bak lam labihasu bohu vou meedume elomeam làhà iho Kristusti lab vou ali ahu vàmadi meedam bak lam ba setem vabak am tame.
15. Lahana eho amu Alam Aha Nutabe Neàna labe Aba Aho dam ahamda donida laba im vahokedaha im abo Alat Vameadaha Im Toedahana laba lab toedaha im nidi nim a fa vabili voomule. “Um etei nibe Alat Aho uba vameadam im uho aimeam làhà um ahu a odohali mu meedamule. A um tai ahobada zi labe ibi iho Alat gagoho im ahu odohali mu voedume fa ibi iho ozoho bak labet bisi daetesu meedaha bakti ulohona a vi meedamule.” Lahame labihasu toedaha im lam uho a vabili voomule.
16. Uho ozom, dam adida bisi Alat gagoho im lam aime modehe vaba voedume fa im ibi iho ozoho bak labet bisi daetesu meedahela? Ne, ame Israel dam zi lam ahebu Musat Mesir bak laba vi vihitoi fa vou laha dam am taia?
17. Labi uho ozom, Alat dam adidate bisi fakemoholi empat puluh tahun vou fuhela? Ne, gi ame dam zi labe iho faina meedam labe bak aotba baa bohu dam vaba alim bak laba vou elo ladaha dam am taia?
18. Labi uho ozom, Alat dam adidate neha, “Ebe Eho amu ame dam laba lolo gagu vàmadehe bak Kanaan lam ba lafusi Emti ame dam lamti vahi neà odosi esdam kaio,” lahame gagu vàmadi vaitoi esuhu im lam dam adidate labi gagohela? Ne, gi ame dam zi labe im Abada aime modehe vaba mu voedaha dam am taia?
19. Labiha labe iho neham bak ozobohudehe bak. Ame dam zi labe iho Alat gagoho im zi lam tu vuzehedaha vab labe ba ame bak laba vou fusi odosdam vaba abo Alati fa vahi im ahu ad nibe vabademsu modesdaha vabak.
1. Emti vahi Kristus bake tu vuzehi meedam dam oa, ame Alat lab fet gagu vàmadi esuhu im lam, “Amti vahi neà odosi esda tame,” lahame labi fet gagu vàmadi esuhu im lam etei setem kaio. Etei nim ame bak lam ehe lahasuhu bak. Labiha labe etei nim im dam meidavat Yesus bake tu vuzehem vab labe ame bak lam modehe vaba faidi voom bak labna zohàme imo it vou faovoi vi ozodume iademe meedase.
2. Eho gi neham bak ozome uba labi gagoho bak. Alat neha, “Amti vahi neà odosi esdam bak ehete,” laham Im Neàna lam Alat aham di iube ame Israel dam bake fet vameadume esuhu bak lam ame dam labe aihi bak. Labi im dam bada nibe laha Kristusat meedaha Im Neàna lam aihi bak. Lahana ame dam ahamda zi labe iho ame im lam aihinàme dam dua bak tu vuzehedaha vab labe ame im lam modi imbodem kaio. Labihahemu imo it vou faovoi vi ozodume iademe meedase.
3. Gi iho Kristus bake tu vuzehi meedam dam bada nibe ihimo Alati fa vahi neà odosi esdam bak ab modeham bak. Lahana Alat aham di iube ame Im Neàna lam ahamte alimeat fi desi vameadahanàme ame Israel dam dua totbaho labe iho Ala bake tu vuzehedaha vaba vedi Aba Aho gagoho im lam mu voedaha labe ba Alati fa vahi neà odosi esdaha vabak. Alat aham di iube nehame gagoho labe labihaha bak. “Eho ame dam laba faki meedàmu ab gagu vàmadi vaitoi esuham bak. ‘Ebe Eho amu ame dam laba lolo gagu vàmadehe bak Kanaan lam ba lafusi Emti ame dam lamti vahi neà odosi esdam kaio.’ ” Lahame labihasu gagu vàmadi vaitoi esuhu labe ame dam ahamda labe iho ba ame bak modehe vabak. Labihàmu ame dam ahamda labe iho ame bak lam modehe vab labe iho nehi ozo. Ame fet gagu vàmadi esuhu im lam ba faatoi setem kaio. Etei nim ame bak lam im dam bada nibe fa vi ozome meedam neà lahasuhu bak. Aham di iube Alat na alimeat modi na debulehe di iube ame Amti vahi neà odosi esdam bak lam gi amu labaha ahumdi modesuhuna modem bak. Labihamnàme ame dam ahamda lam ba ame Alati fa vahi neà odosi esdam bak lam ba modem vabak. Eho gi neham bak ozome uba labi gagoho bak. Alat Vameadaha Im Toedahana laba Musat ame digat tujuhleheda lam im nehi toehe bak ehete. “Digat tujuhleheda lam fuhemu Alat Ahamo it ozo, ‘Em na ahebu meedume foli na ba modemda vabalehemu gi odosdase,’ lahame it ozohemu ab mu vaitoham bak.” Lahame labihasu toehena ehete. Neham bak. Alat ahamte alimeat modi na debulehe di Aho bakti na bake vi modeme vahehena zi lamti asumti na asum ahoba iuba vi modeme vahehena zi lamti labihasu ahebu vou meedume debuledume modeha digat tujuhleheda fuhemu fa vaitoi neàdi betea odosdam bak ab modeham bak.
7. Nehaha bak. Aham di iube Yosuat ame Israel dam ahamda zi lam Kanaan bak laba vou ladume vou fusi odosdaha bak. Lahana iho ozom, Alat ba ame lab odosdaha bak laba ozome gagoho vabak. Gi lada lamota ozome gagomeam làhà ba diamut Alat, “Ame bak lam ba di amomoi modem bak ehete,” lahame ba labi gagom bak vabak. Lahana ba labiham vabak. Aho gi neham bak ozome gagoho bak. “Dam Amti vahi neà odosi esdase,” laham bak lam neo di amomoi ab modi esuham bak. Ame di amomoi lam gi etei nibe Aho gagoho im iho aidam digat ahebu am bak. Eho gi neham bak ozome uba labi gagoho bak. Ame dam ahamda zi lam abo Musati Yosuati labihasu ahebu vou fole usdume ba Alat Boehàda Daud bake neo gi ame bak lam neo gagoho bak. Labi Daud aime Alat Vameadaha Im Toedahana zoho laba nehi ab toeham bak. “Alat neha, ‘Um etei nibe Ebe Eho uba vameadam im uho aimeam làhà um ahu a odohali mu meedamule.’ ” Lahame labihasu toeme esuhunàme Daud am ehe lahasuhu di lam am dam labe ame lab fet gagu esuhu bak lam Alati vahi neà odosi esdam bak lam ame dam labe ba modehe vabak.
9. Ame di labe imbodehe vab labe iho neo nehi ab vi ozoham bak. Làhà Daud neha, “Etei nibe,” lahame lab gagoho bak lam laha iba dam badate ab vou fuham bak. Im Alam damalehe dam nim im ba ame Alati vahi neà odosi esdam di feàna meida etei vou faobe modem bak ehe bak.
10. Neham bak. Alati vahi neà odosi esdam bak lam meia modi imbodemeam làhà ame da labe amu neha, “Eho ame Musat toedume esuhu Im Feàna zi laba ulohodesu meedam labe Alat eba ozom di, ‘Em im vamdesu meedam dàt modem bak,’ lahame ozahit deeli gagu vadam bak,” laham bak lam fa voou seti vaitoho labe Alati vahi neà odosi esdam di ab vou fusi meedamam bak. Abo Alat aham di iube alimeat na debuledume vaitoi betea odosdaha bak lamti uloho bak.
11. Labihàmu iho Alati vahi neà odosi esdam bak laba ozome imo etei keàtet vou meedume fa imbodese. Ame Israel dam ahamda zi labe ibi iho Alat gagoho im aime tu vuzehi meedaha vaba voedahemu Alat faki beome vàhàdedaha dam lamti uloholem bak labna zohàme imo it vou faovoehebeat meedase.
12. Eho gi neham bak vi ozome uba labi gagoho bak. Alat Aba Aho iba vameadam im lam abo ahedem im feànat modem bak. Iho dihasi aida. Labi neo dihasi aida. Labihadam imot modem labe im so ad iuba dusu ahulat vi ozom bak laba vi fum imot modem bak. Abo ae tot mo tot mo laham ae bohu lamti Alam im lamti labihasu ozom di bisi feàda Alam im am bak. Ame ae bohu lam meia faitom di gi faa zisiddaha bak lamti veiso lamti labihasu vou fusi uladdaha bak tadem bak. Lahana Alam im bisi feà labe abo mei ahu ad ozom bak laba vou fusi uladdam bak. Abo im ahu ad nibe ozom bak niba nabime im damat iho modelo ozomna lam gi modi fa tombalem imot modem bak.
13. Damti bak niba modealahana zi totbaho lamti ahebu iho meedam im ahebu ba Ala bake modi vastem biem bak. Abo gi damat so bozbuli tombali modesdam bak lamti uloho bak. Iho bak niba meedam im ahebu Alata ozobohuna tadehe bak. Labihàmu ibi iho meedaha im lam iho fa ahate fi desi gagomda Ala am bak.
14. Emti vahi Kristus bake tu vuzehi meedam dam oa, iba ozome Ala bake meedam Tohedatebo bisi feàda ehe bak. Ame Da lam gi Alam Adat Yesus am bak. Am abo Alat vousai asum ahoba iuba tom ilu Am Aiat avaesdam laba duzu vatohedam bak. Labihàmu iho amu neha, “Ame da labe Aba Aho gagoiam im lam imbote,” lahame iho tu vuzehedaha bak lam imo gi labihasu bohulali keàtet vuusdase.
15. Eho gi neham bak vi ozome uba labi gagoho bak. Iba ozome Ala bake tau meedam Tohedatebo lam iho dam bakda nibe na im meedam diat bedi meedam bak lam Am ba biem Dàt modem vabak. Am abo ahebu ozobohudi fa iba tau vabededam meo Dat am bak. Neham bak. Yesus ahe di bak niba godam di Iblisit iba modi aam bakti ulohona Aba modi aaidaha bak duana meedaha bak. Labihàmu Aho fa iba tau vabededam meo bak. Lahana Iblisit Aba modi aaidaha bak duana meedahanàme Am ba faidehe vabak.
16. Iba vuusdam Tohedatebo Yesusat modehemu imo gi nehadase. Iho Ala bake im vameadalo modem di imo ahu adat iedehe vaba gi keàtedi meia ozahit deeli im neà bak meedam Ala labe Aho nusu dam bake vuusdam bak abo Aho avaesdam laba lafusi netàdese. Iho na im modem biem di Aho iba ozahit deeli faobekesi im neà bak tau meedam bak ozome imo gi labihasu meedase.
1. Ame Israel dam labe ibi iho Alam im meedam di Alat ozo, “Amat Emti dam lamti tohedateboli duzuela?” lahame fi me valo modehe di lam gi Israel dam totbaho laba nabime aame neàdi vaha bak. Ame tohedatebo aba aho meedam im neha: Damat faina meedam bake gohali ot vai otemna fi ho vou lemna zi lam ame da tohedatebo labe aho vame fa Ala bake lu vou baedalo oddume vua vahudam bak ame. Labi neo ame dam labe iho, “Neàte,” lahame Ala bake vou baedalo vou lemna totbaho amomoi laha ame da tohedatebo labe aho ot vai fa Ala bake lu vou baedalo meedam bak ame. Labihasu ame tohedatebo labe aba aho meedam bak am.
2. Ame tohedatebo lam laha gi bak dàt modem labe am ahu bedi fa faina meedam meot. Labiha labe dam mahate neàdehe vab dam lam abo, “Neà bak neam tame,” laham bak biem labe fa faina meedam dam laba aho vuusdam di lam aho gi ahu nemahuba neàt dam laba iademe im vahokedume vabiedam meo tadehe bak.
3. Labihàmu ame tohedatebo labe am ahu laha bedi fa faina meedam meoda modem labe am gi ame Israel dam totbaho labe ibi iho faina meedàmu fa faamome vei neàdedalo na fi ho lada lamota aho ot vai Ala bake lolo oddaha vabak. Abo aba aho laha Ala bake git modi faina meedàmu fa faatoi neàdelo modemna fi ho lamti oteme Ala bake lu vahuidaha bak.
4. Labi laha meit ahamo naedat am ee vousai, “Tohedatebo em am tame,” lahame ba ee it talu gagom vabak. Bak lam gi Alat Ahamo ame da laba modi ee vousai, “Tohedatebolese,” lahame ee talum bak. Abo aham di iube Alat Harun bake modi tohedatebolehe bak lamti ulohona modem bak.
5. Labi laha Kristus ba Ahamo feà Dateli Am ee vousai, “Tohedatebo Em am tame,” lahame ba Ahamo ee it talu gagoho vabak. Abo gi Alat gagu Am ee vousai taluhu bak. Alat Aba neha, “Om abo Em Adat modem bak. Labi etei nibe damat biem bake Em Om Aiat modem bak ab modi tombaleham bak.” Lahame labihasu gagoho bak.
6. Labi Alat Kristus bake ozome gagoho im meida meit Alat Vameadaha Im Toedahana laba nehi toehe bak. “Alat neha, ‘Om abo dat ahamda Melkisedek labe aba aho tohedateli meedaha bakti ulohona gi labaha bohu vuusu meedamda Om am bak.’ ” Lahame Alat labihasu ozome Yesus bake gagoho bak.
7. Yesus Aho amu ahedi bak niba godaha di labe Aho Am Ai bake abo mei elolo modem bak soat vatohem Ala laba dae buduana mebet tom tauleme vameada. “Ai oa, Em gem bak nim Oho fa veiom neào?” lahame bisteat Ala bake tom tauleme vameadaha vabamu fa Aba Aho ozoho bak fa gi mu voou fa Am Ai bake, “Feàte,” lahame ahu adat iedi vou baedam labe fa Am Ai labe Aba Aho ozoho bak labe fa ab uledi ab gagoham bak. Labiha labe Yesus Aho Am Ai bake lab vameadaha im lam Am Ai Alat ab aime uledeham bak.
8. Yesus abo Alam Adat modemnàme Am Aiat Aba gagoho im Aho aime uledi meedam bak lam gi damat Aba modi geàdaha bak labet modi Aho ozo, “Làhà, Em Aiat gagoho im aime uledi meedam bak ame,” lahame ab it ozobohudeham bak.
9. Am Aiat Aba gagoho im ahebu lam Yesus Aho lab uledi meedam tadehe bak labet Alat Aba modi ba vekehe vaba abo bisi neàbodehe Datelehe bak. Neàbodehe labe meia soat vausu fa vei neàdem bak lam Aho im dedateli dam Aba uledeheda ahebu Aho gi labaha bohu ab soat vausu fa vei neàdedamam bak.
10. Labi Alat laha Aba fa, “Tohedatebolese,” lahame Yesus Am ee vousai ee ab taluham bak. Abo aham di iube Alat Melkisedek bake modehe bakti ulohona ab modeham bak.
11. Emti vahi Kristus bake tu vuzehi meedam dam oa, eho etei lab gagoho bak lam, “Alat Melkisedek bake modehe bakti ulohona fa Yesus ab modeham bak,” lahame lab gagoho bak lam uba neo vi vameadam bak ehe bak. Lahana uho ailo àhàkem vab labe abo ozbiehebulem damat modem labe eho fa neo vi vameadume um ozobohudelo modemnàme um ozobohudem biehe bak.
12. Um amu gi Yesus bake tu vuzehi bohu vuusu meedam damat akati etei nim uho Alam im lam fa ot vai fa meia vahokedam vaba mode? Lahana eho ozom, Alam im abo ahamte faasi vahokem debu zoho lam um biem lahasuhu labe meit uba fa neo vi vahokedam bak ehe lahasuhu bak. Uho amu meit uba ame im beeda vahokehe bak lam uho aime ozobohudehe vab labe ba akati meit im teuna feà uba vahokeme um ozobohude? Um gi data etei faahadati uloholi am oiam do àdam lahasuhu bak. Na teuda àm biem lahasuhu bak.
13. Meit ame data etei faahadati uloholi am oiam do àdam lahasuhuda lam ba neham vabak. “Neà bak neame? Fai bak neame?” laham bak lam ba ozobohudi im vamdesu meedam vabak.
14. Lahana na teuda lam dam busaoda àmda am bak. Ame bak lam tombu gagom di gi neham bak. Ame dam lam im imbona lam aime tu vuzehi vi ozoi vi ozoidume vouhodam labe fauha neàdedume bohu vuusdam dam am bak. Ame dam lam neham bak ozobohudem bak. “Neà bak neame? Fai bak neame?” laham bak lam ozobohudi meedam dam am bak.
1. Imo nasi Kristusat meedaha im lam meit iba ahamte faasi vahokehe im debu zoho lam abo im ozom beeda lam imo teohet vaitoi esu faodase. Imo gi fa im bisi teuda ad iuba modesuhuda vi tau ozodume ozobohudedase. Imo nasi im ahamte nehi vahokedam im nim vausi vou esuse. Uho faina meedam bak vi meedume fa Alati vaitesu labaha bohu vuusdam bak lam meit uba neha, “Ame faina meedam bak lam voedume fa ahu neà bak vàmadi fa Ala bake tu vuzehedale,” lahame meia ahamte vahokedam im ame.
2. Labi laha, “Boz neàdese,” lahame meia vuu valo baptislem bak modeo, Yahudi damat ibi iho vaot itatam bak modeo, meia ahamte vahokedam im ame. Labi laha eeda labe, “Alam Aha Nutabe Neàna meia vizi im nidi nim modese,” lahame gagu fi hasi esulo modem di labe am anekehà amait mei ohu laba odosu gagu meedam bak ahamte gagu vahokedam im ame. Labi laha Alat ba diamut dam elodahada zi fat ahededume usnadam bak meia ahamte vahokedam im ame. Labi laha Alat Aho dam faina meedam dam laba gi labaha beodam bohu meedam bak meia ahamte vahokedam im ame. Labihasu meia ahamte vahokedam im ahebu neàta neàt. Lahana akati fa ame vahokehe im debu zoho lam amu vahoke. Labi ba neo vi vahoke. Imo im lada lam nasi vausi vou esu fa im bisi teuda ad iuba modesuhuda fa faasi vi tau ozodume ozobohudedase.
3. Alat iba uledi gagomeam làhà iho ame im bisi ad iuba modesuhuda lam dam bake vahokeda tame.
4. Eho gi neham bak ozome uba labi gagoho bak. Iho meit amu Kristus bake tu vuzehi meedamda meida nibe vedi ahit mu voomeam làhà ba meit fa ame da laba vi vahokedume modi ame da lam aho faina meedam bak lam fa voou fa vei neàdi vàmadem vabiem bak. Neham labe labihaha bak. Ame dam lam amu fako aibu bak lam Alat modi fa fako fi gatei fauha neàdi ame im imbona ozobohudehe bak ame. Labi laha Alat Aho ame dam laba ozahit faobekesi im neà bak tau meedaha bak ame. Labi laha Alam Aha Nutabe Neàna labe ame dam laba modi vizi teudi meedam bak ame.
5. Labi laha ame dam labe neha, “Alat vameadaha im abo neàte,” lahame ozobohudi vou baedaha bak ame. Labi laha Alat ba diamut bak fa gàhàdi Aho dam ahebu vuusu im vahokedam bak imbodem di lam Aho bak niba nasi ame im feàna fet vouhodam bak lam ame dam labe laha tau aadume ozobohudehe bak ame.
6. Labihasu ame im zi ahebu damat ozobohunàme vedi iho amu Kristus bake tu vuzehedaha bak lam mu voedameam làhà ba meit fa ame dam laba vi vahokedume modi ame dam labe iho faina meedam bak lam fa voedume fa ahu neà bak vàmadem vabilehe bak. Neham labe labiham vabilehe bak. Ame dam labe iho Kristus ahit mu voedaha labe dam ihimo iba it vàhàdem bak vabili meedam bak. Ame dam labe iho vedi gi dam amuda labe iho Alam Adat Yesus mu voou damat ve ut tetehesuhunaso laba esu paku dou eloho bak lam gi fa neo gagu paku dou fa vousai dam dua bak labe fa aasdume feàtàdahit modi fa ladem bak behàsdemna ozomom bak.
7. Eho etei lab vameadaha dam lam eho gi fa iho bak niba modem bake vàlu uba nehi vouhodalo mozo. Dat naedat am na utoho soali àm bak laba abaa biteme auvamoholi bak bedi modi na soaedam bak lam iho ozoha, Alat ame bak laba neha, “Bak laba na neàna usidale,” lahame gagu ulooho labe ame bak lam na neàna usidam bak.
8. Lahana ame bak laba sibeti alihoso fainabuti usidameam làhà iho ozom, ame bak lam gi voou tatbulemna modem bak. Bak lada lam Alat gi, “Seee. Bak lam na àmda a usidamule,” lahame gagu ulooho bak. Abo gi ba vuat usime falavai setem baket modem bak. Ame dam Kristus bake ahit mu vooho dam lam bak eho ba gagohoda lamti ulohote.
9. Ebe eho deelehe dam oa, eho etei uba lab vameadaha im lam labihasu gagohonàme ba uba vi ozome vàlu vameadam imot modem vabak. Um eho bak ba gagohoda lamti uloho vabak. Ubu uho meedam bak lam iho ozom, um gi im neàna meedam damat modem bak. Iho gi nehi tu vi ozodam bak. “Alat uba soat vausu fa vei neàdedahemu uho gi ame bak labe neà bak vi vouhodam bak,” lahame im ahulat tu vi ozodam bak am bak.
10. Neham labe im ahulat labihasu vi ozodam bak. Ibi iho vou baedam Ala lam ba im kibuna meedam vaba gi im vamdesu meedam Alat meedam bak. Gi labihasu meedam Alat modem labe im Abada uho meedam bak lam Am ba fa vabilem vabak. Labi laha uho neha, “Iho Ala bake deelem bak lam Am biem bake im ibi iho meedam bak nim Alat fà aame ozobohudese,” lahame uho Alam damalehe dam laba abo umti vahi Kristus bake tu vuzehi meedam dam totbaho laba uho tau vabiedam bak lam abo amu mode. Labi ba neo vi modida. Uho labihasu lab meedam bak bohu lam Am laha ba fa vabilem vaba abo ozobohudi bohulali vi ozodam bak.
11. Labihamta labiha. Lahana bisi ibi iho uba fet gagu esuhu im gi neham bak. Ubu uho umti vahi Kristus bake tu vuzehi meedam dam totbaho laba uho lab deeli tau vabiedam bak lam uho a voomule. Uho gi labaha bohu keàtet vuusu vou meedume eloi novale. Uho lab meedam bak lam gi labihasu labaha bohu vuusu meedume eloi novameam làhà uho amu neha, “Alat iba ba nehada tame,” lahame ubu uho ahulat nasi lab tu vi ozodam bak lam modi fa imbodem bak am tame.
12. Uho ba Alam im aim di ba a ulaihàbuli odohalehebeat meedamule. Gi dam Ala bake tu vuzehi meedam dam labe iho neha, “ ‘Alat iba im nehasu meeda tame,’ lahame Alat fet vameadume esuhu im lam imbode tame,” lahame ibi iho ahulat nasi lab tu vuzehi laha vi vou faodam bak bohu vuusu meedam damti ulohona meedale.
13. Uho nasi aham di iube Alat Abraham bake nehi fet gagu vàmadi esuhu im lam vi ozodamale. Alat neha, “Em amta nim. Em abo oba im neà bakta vou meedume bohulale tame. Obo oho ba vou faat ladam dam debu lam Eho modi duale tame,” lahame labihasu fet gagu vàmadi esuhu di labe, “Am abo imbote,” lahame vi gagu faa fegube vàmadi esuhu bak. Aho, “Abrahamat fa Aba Aho gagoho im laba tu vuzehese,” lahame labihaha bak. Aho vi gagu faa fegube vàmadi esuhu di lam, “Amat Aba bisi vafozi vousahela?” lahame vi ozosome modeha ame da amomoi vi ozome gagom biehemu Aho gi Aba naedate it gagu faa fegube vàmadi esuhu bak.
15. Labi fet gagu vàmadi esu neàdehezobe Abraham gi ame bak lam, “Alat fa modi imbode tame,” lahame tu laha vou faodume modeha ame bak lam ab imbodeham bak.
16. Uho iho bak damat meedam bak nim laha vi ozomale. Im bak dam nim iho meit fet gagu vàmadi esum im meia gagom di abo neo vi gagu faa fegube vàmadi esum meo damat modem bak. Ame da labe aho vi gagu faa fegube vàmadi esum di ee abada gagom vaba gi dam ee feàda vi gagu vàmadi esum bak. “Aho giomim gagoha,” lahame damat ba daetesum vabak laba ozome dam ee feàda vi gagu faa fegube vàmadi esum bak.
17. Alat laha labihaha bak. Alat Aho aham di iube Abraham ame. Labi im dam bada nibe iho Abrahamat amu Ala bake tu vuzehi meedaha bak lamti uloholi iho Kristus bake tu vuzehi meedam dam ame. Labihasu Alat Aho iba fet ozome vàmadi esuhu im gagoho di lam iho im ahu nehasu ozo, “Alat ba Aba Aho fet ozome vàmadi gagu esuhu im lam Aho ba faatoi veimdem vabak,” laham bak laba iho tu betea vou faodam bake Aho ahit ee Abada vi gagu faa fegube vàmadi esuhu bak.
18. Labiha labe iho ozom, Alat Aba Aho fet gagu vàmadi esuhu im lam Am ba vagedam Alat modem vabak. Labi laha Aho neo ee Abada neo vi gagu faa fegube vàmadi esuhu bak lam Am ba laha vagem vab Alat modem bak. Aho vagem vab Alat modem labe iho ozom, ame im behàsu lam ba faatoi veimdem biem imot modem bak. Abo gi labaha bohu modesuhuna modem bak. Labihàmu Alat Aba Aho modehe bak behàsu labet modi iho Aba Aho amu fet gagu vàmadi esuhu bak lam, “Aho iba soat vausu fa vei neàdeda tame,” laham bak lam iho tu vi ozodam dam nibe im ahu ab modi vabededume teudeham bak.
19. “Iho Yesus bake tu vuzehi meedam labe Alat iba soat vausu fa vei neàdeda tame,” lahame ibi iho lab tu vi ozodam bak lam gi ihe feàna kapal duzulo modem di labe visoi nom voou asimbuli duzumna jangkarti uloho bak. Ame bak lam gi neha: “ ‘Alat iba ame neà bak meeda tame,’ lahame Aho fet vameadume esuhu bak lam ba imbodem bak,” lahame im ahu ad nibe teudi ba nigom vaba gi labaha bohu tu vi ozodam bohu meedam bak am bak. Neham labe labihaha bak. Ibi iho tu vuzeheda Yesus labe Aho iba tohe duzulo nasi asum ahoba iuba Am Ai Ala bake laha bak. Abo Israel dam vuusdam tohedatebo labe aho aham di iube Ala Bake Vou Baedam Bake Teohet Mome Fa Faatoiam Num labe Bisi Fiham Zoho laba olelo modem di sue tamzohobuna doni tetehesu sue lam ogizi olem bakti ulohona modehe bak. Neham bak. Yesus nasi le duzuhu labe im ba Ala bake le lafum di ba na aumna vabak. Am abo iba ozome Ala bake tau meedam Tohedateboli gi labaha bohu modesuhuda modem bak. Abo gi dat ahamda Melkisedek modem bakti ulohona modehe bak.
1. Eho etei lab gagohoda Melkisedek lam, “Akatihasu modem dàt modela?” laham bak uba vameadalo mozo. Neha: Ame da Melkisedek lam aham di iube num debu Salem laba azi dam vuusdam boehàda am. Labi laha ame dam labe ibi iho Ala Bisi Feà Datebo bake vou baedam di labe meedam im lam faheme modiam tohedatelehe dàt moz. Ame da labe am ee, “Melkisedek,” lahame taluhu bak lam gi neham bak ozome talu. Ame dam laba vuusu im vahokedam di am abo Im Vamdesu Meedam Boehàdatebot moz. Ame da labe aho vuusdam dam labe im num debu Salem lam gi, “Ot fakiam vaba gi neà esdam bak,” laham bak laba ozome taluhu num debut modem bak. Labihàmu iho ozom, ame da Melkisedek ame dam vuusu im vahokedam di Ot Fakiam Vaba Gi Neà Esdam Boehàdatebot modem bak. Laham bak behàsu laba ozome ee, “Melkisedek,” lahame taluhu bak. Labi ame da labe aba aho meedaha im meit toehena nabime aameam ba am faaha ai modeo, am faaha oi modeo, am vou faat lehe tai ahobada modeo, “Amat modela?” lahame toem bak ba aam vabak. Am faaha bakti am eloho bakti ba toehe bak im aaha vabak. Labiha labe iho ozom, “Ame da Melkisedek gi Alam Adatti uloholi gi labaha tohedateli bohu vuusdam dàt modemna ozomom bak.” Aham di iube Abraham am damti vazisi le bohudi ot beluiame aho meoli ame boehàda zi labe im damti ahebu beodume vou esmozi fa ledam di labe Melkisedek doait li Abraham bake tàhi Ala bake tom gago, “Oho da niba neà bak tadi bohu vuusu meedale,” lahame deeli ab gut tom gagodamam. Labi gagu neàdi modeha Abrahamat aho zili vietomoaha nazoh zi lam ahebu fahedume na zi sepuluhli neàdehezobe meida zi vàmtea lam utasi Melkisedek bake ab lodaham bak.
4. Uho im nim nehasu vi ozomale. Ame da Melkisedek lam feà datebo mode taia? Nehaha bak. Israel labe aho vou faat ledaha dam labe im tai ahobada feàda Abrahamat modemnàme aho zili vietomoaha nazoh zi lam ahebu fahedume na zi sepuluhli neàdehezobe meida zi vàmtea lam utasi Melkisedek bake ab lodaham bak. Aho ozo, “Melkisedek bisi feàda modem bak,” lahame ozobohudi ahu adat iedi ame nazoh zi lodaha bak.
5. Uho im nidi nim laha nasi vi ozomale. Ame Israel damat vuusdam Im Feàna lam im meida nehasu toeme fi hasi esuhuna ehe bak. “Abrahamam mekehàda Lewi labe aho vou faat ladam dam laba modi Ala bake lomna ve vua vahudam tohe damalehe dam labe iho fa im dam totbaho laba gagome im nazoh lam ahala faheidume sepuluhli sembilan vekesidume vàmtea utasi vaida. Lahadume dam ahebu uloholele. Ba dam giidate a gagu vaidamule,” lahame labihasu toehe im ehe bak. Ame dam lam ahebu Abrahamat vou faat lehe dam abo gi im dam debut modemnàme ozahit gagome ame nazoh vaidaha bak.
6. Lahana ame da Melkisedek lam ba Abrahamam mekehàda Lewit vou faat leheda meida modem vabnàme aho gi ozahit Abrahamat aho vàmtea utasi esuhuda lam aho ab vaham bak. Labi laha Alat Aba Aho aham di iube fet vameadume vàmadi esuhu im lam, “Obo oho ba vou faat ladam dam debu duale tame,” lahame fet vameadume vàmadi esuhu im lam gi Abraham bake gagohonàme iho dat feàda ozomomda Abraham labe ba Melkisedek bake ozome nehasu Ala bake tom gagoho vabak. “Ala oa, Oho Melkisedek bake im neà bak modi esule,” lahame ba labihasu tom gagoho vabak. Vedi gi ame da Melkisedek labe fa Abraham bake ozome tom gagohoda am am bak.
7. Iho nehasu ozobohudehe bak. Meit meia neha, “Alat oba im neà bak modi esule,” lahame Ala bake tom gagu esuhuda lamti labi neà bak modi esum bak gagohemu deelehedati labihasu ozom di bisi feàda Ala bake im gagu esuhuda lam am bak. Labiha labe Abrahamat aho na zi vàmtea utasi Melkisedek bake loho labe iho ame dam behàsu lam vi ozodam di bisi feàda Melkisedek am bak.
8. Iho labi gagomeam làhà iho neo im nehasu vi ozodam bak. Làhà Melkisedek lamti Lewit vou faat ledaha dam laba modi tohe damalehe dam lamti ozom di laha bisi feàda Melkisedek am bak. Neham labe labihaha bak. Etei nim ame tohe dam zi lam am dam giida totbaho laba gagu doi zi vàmtea utasi esuhuda lam etei vadamta vada. Lahana ame dam lam gi ek damat modem bak. Abo elom meote. Lahana Abrahamat na zi vàmtea utasi esuhuna vahada lam Melkisedek lam ba labiham vabak. Alat Vameadaha Im Toedahana laba am elom bak vi tau toehe vab labe iho ozom, ame da Melkisedek lam gi labaha ahena bohu vuusdam dàt modem bak. Ba elom vab dàt modem bak.
9. Labi ame im lam vi ozom bak meida ehe bak. Neha: Etei nim ame da Lewit vou faat ledaha dam laba modi tohe damalehe dam zi lam am dam debu totbaho laba gagu doi zi vàmtea utasi esuhuna lam vadamta vada. Lahana im gi nehi laha vi ozom bak. Abrahamat na zi vàmtea utasi esuhuna lam aho Melkisedek bake loho di lam Lewit vou faat ledaha dam laba modi tohe damalehe dam labe laha tau lodahana ozomom bak.
10. Neham labe labi gagoho bak. Ame da Lewi lam abo Abrahamam mekehàdat modem bak. Labihàmu Melkisedek Abraham bake tahi im vameadaha di labe ame di lam Lewi faaha vabak. Lahana iho ozom, Abrahamam iba zohot ba Lewi ba faam bak ehe bak. Gi Abrahamam ibat goudahana ozomom bak. Labihaha bak. Iho laha nehi vi ozo. Ame da Abrahamat na zi vàmtea utasi esuhuna lam ve fa Melkisedek bake loho di lam Lewit vou faat ledaha dam laba modi tohe damalehe dam labe iho vi tau lohona ozohomu iho ozom, ame tohe dam lamti bisi feà damat modem kaio. Bisi feàda Melkisedek am bak.
11. Emti vahi Kristus bake tu vuzehi meedam dam oa, aham di iube Alat Aho neha, “Nehame modem di Em fi ham bak. Nehame modem di Em neà bak,” lahame ame Im Feàna lam Musa bake gagu aho fa ot vai fa ame Israel dam ahamda laba vameadaha bak. Labi Musat aho ame Im Feàna lam vameadaha di lam Alat neo gi Lewit aho vou faat ledaha dam laba gagu fa tohe damali, “Ame Im Feàna lam Israel damat ulohodesu iademe meedào?” laham bak laba ame dam labe vou faovoi meeda. Lahana ame tohe dam labe iho lab vahokedaha Im Feàna lam ame Israel dam ulohodesu vou mode ledasome modeha modem vabili vou mode ledume iba dam badate vou fuhu bak. Labihàmu ba ame tohe dam amuda labe iba modi neàbodem biehemu Alat fa ozo, “Toheda amomoi modi fa oluse,” lahame labi ozohemu Aho ba Lewit vou faat leheda Harunti ulohona ba modi tohedatelehe vabak. Gi Melkisedekti ulohona ozome tohedateli oluhu bak.
12. Labihàmu Alat Lewit vou faat ledaha dam laba modi tohe damalehe dam lam mu fa veimdi dam mei debu laba ozome fa toheda amomoi modi ab ot vaham bak. Làhàmu iho ozom, Alat aham di iube Musa bake gagoho Im Feàna lam abo fa veimdem bak. Eho gi neham bak ozome uba labi gagoho bak. Alat amu neha, “Israel dam debu amomoi bake a gagu tohe damali a meedamule. Gi Lewit vou faat ledam dam lamota gagu tohe damali meedale,” lahame gagu vàmadi esuhu bak. Labihàmu iho ozom, damat ame bak lam ulohodesu modehe vaba voohemu Alat Aho naedat ame Im Feàna lam modi fa veimdi fa im amomoi fa toeme fi hasi vàmadi esuhu bak.
13. Neham labe iho labi ozome uba gagoho bak. Iho etei lab gagoho toheda amomoi lam gi im Boehàda Yesus am bak. Yesus ba Lewit vou faat leheda modem vabak. Am abo Yehudat vou faat leheda meida Am am bak. Lahana ame Yehudat vou faat ledaha dam labe ba meida utasi gagu tohedateli meedahada vàmtea vabak. Lahaha bak lam im laha ozobohu bak. Labi laha Musat ame Yehudat vou faat ledaha dam meida utasi tohedateli meedaha bak toehe bak vabak. Labihàmu iho ozom, ame Im Feàna lam modi fa veimdi fa im amomoi fa toem bak ehe bak.
15. Iho etei lab gagoho bak lam, “Ame Im Feàna lam modi fa veimdi fa im amomoi fa toem bak ehete,” lahame gagoho bak lam ahole gagoho bak. Nehaha labe labihaha bak. Tohedatebo ibida etei leheda nim gi Melkisedek tohedatelehe bakti ulohona modehe bak. Ba Lewit vou faat ledaha dam laba modi tohe damalehe bak lamti ulohona modehe vabak. Labiha labe iho ozom, ame Musat gagodume vahedaha Im Feàna zi lamti labi Lewit vou faat ledam dam lamota ihimo fa tohe damalehe bak lamti labihasu ahebu fa voedume veimdi fa ot vaha bak lam im ab ozobohudeham bak.
16. Alat Yesus bake gagu modi tohedatelehe di lam Aho ba ame Israel dam labe ibi iho fi hasi vàmadi esuhu im zi laba ozome modehe vabak. Ame Israel dam ahamda labe meia gagu tohedatelem di iho gi nehadam bak. Ame dam labe iho ozo, “Ame da nim Lewit vou faat leheda mode?” lahame nasi ozobohudi ame da lam fi me vame gagu tohedatelem bak. Lahana Yesus gagu tohedatelehe di lam ba labiham vabak. Gi Am bisi feà labe Am elom gikina ahena bohu modesdam bak laba ozome Aba gagu tohedatelehe bak.
17. Meit Alat Vameadaha Im Toedahana laba nehi toehe labe eho gi ame bak laba vi ozome uba labi gagoho bak. “Alat neha, ‘Om abo dat ahamda Melkisedek labe aba aho tohedateli meedaha bakti ulohona gi labaha bohu vuusu meedamda Om am bak.’ ” Lahame labihasu toehena lam gi Alat Aho ba Am Adat Yesus bake gagu tohedatelem bak fet nasi ozome toeme esuhunat modem bak.
18. Iho ozom, Alat amu Musa bake vameadume Musat fa ot vai toedume esuhu Im Feàna zi amuda lam gi voomnat modem bak. Neham labe labi gagoho bak. Etei nim iho ame Im Feàna zi laba tu ulohodesu meedameam làhà ba Alat iba neha, “Im im vamdesu meedam damat modem bak,” lahame Alat iba ba ozahit fet deeli gagu vadam vabak. Im lada lam bee labe ba iba modi Ala bake lafum imot modem vabak. Labihàmu ame Musat lab toedume fi hasi esuhu Im Feàna zi lam modi seti fa amomoi bisi neàda fa ab ot vai ab modesuham bak. Ame bisi neà bak lam gi neham bak. Ame aham di iube lab meedaha bak lam Alat fa veimdi Yesusat fa ot vai Tohedatebolehe bak. Labi Tohedateboli damat faina meedam bake gohali Aho fa ot vai elohemu im Ala bake lafum bak ab modi esuham bak.
20. Yesus iba lab ot vai tohedateli duzu vameadam bak lam vi ozodam di fa im nehasu laha vi ozodam bak ehe bak. Aham di iube ame Israel dam iho dam gagu tohe damali meedam di lam ba iho amu im gagu fa neo vi gagu faa fegube vàmadi esuhu vabak. Gi amu lab gagoho vàmadehe tadehe bak. Lahana ame Toheda bada nim Alat gagu tohedatelehe di lam gi gagoho vàmadi tohedatelehe vabak. Amu gagohona ba neo, “Em amta nim,” lahame vi gagu faa fegube vàmadi esuhu bak.
21. Nehaha bak. Alat Yesus bake gagu tohedatelehe di lam Aho amu gagohona ba neo vi gagu faa fegube vàmadi esuhu bak lam meit Alat Vameadaha Im Toedahana laba nehi toehe bak ehete. “Em Boehàda Ala amta nim. Dae Ebeda ba veimdem vaba abo imbodem bak. Eho Oba modi tohedateli Om gi labaha bohu vuusdam bak.” Lahame Yesus bake labihasu vi gagu faa fegube vàmadi esuhu im am bak.
22. Alat amu Yesus bake gagu afoezobe ba neo vi gagu faa fegube vàmadi esuhemu iho neo nehi vi ozome ab ozobohudeham bak. Làhà, Alat Aho ba im amomoi modi fa gàhàdi vameadume vàmadi esuhu im lam ba vagem vaba abo imbodem bak. Labiha labe Alat aham di iube Israel dam bake fet gagu vàmadi esuhu im lamti labi Aho iba dam badate fet gagu vàmadi esuhu im gàhàna nimti labihasu ozom di bisi neàda im bada nim am bak. Yesus tohedateli duzuhemu labihaha bak.
23. Yesus iba lab ot vai tohedateli duzu vameadam bak lam vi ozodam di fa im nidi nim laha vi ozodam bak ehe bak. Lewit vou faat ledam dam laba modi tohe damalehe dam lam abo zi duate. Ame dam ek damat modehe labe labihaha bak. Ba ame dam zi lam meida vàmtea utasi ame tohedateli meedam bak lam gi labaha bohu vuusu meedamda vàmtea vabak. Gi teohet modi eloi seti fa meit ot vaidam bak.
24. Lahana Yesus Aba Aho tohedateli meedam bak nim ba labiham vabak. Ba veimdi meit fa ot vai meedam vabak. Am elom gikida modehe labe Aba Aho tohedateli meedam bak nim gi labaha bohu vuusu meedam bak.
25. Labihàmu Yesus Am elom gikida gi labaha ahena bohu vuusu fa tohedateli duzu iba tau fa Ala bake fi baedam bohu meedam dàt modem labe Aho iba lab meedaha bak laba iho tu vuzehi fa Ala bake neha, “Iba tau le,” lahame gagodam dam nim ahebu Aho iba soat vausu fa vei neàbodedam meo bak.
26. Yesusat im labihasu meedamda lam bisi iba taum Tohedatebo ulohoda am bak. Ame Da Yesus lam Alat Aba gagu fi hasi, “Im Abada lamota meedale,” lahame labi gagu fi hasi esuhuda Am am bak. Labi laha ba faina meedam vabak. Labi laha ba meit Aba neha, “Am git modeho,” lahame vàlu gagom vabak. Labi laha Am bak dàt modemnàme ba bak dam totbahot faina meedam bak laba vi tau meedam vabak. Labi Am etei gi Am Aiat Am vousai tom ilu asum ahoba ium abo bisi tom novaha bak iuba olu aidam bak. Labihàmu iho ozom, ame da Yesus lam bisi iba tau Tohedatebolem neàda ulohoda Am am bak.
27. Tohedatebo ibida labe Aho faina meedaha vab labe ba Israel dam tohedatebolehe dam labe ibi iho faina meedam bak lam fa faamome vei neàdedalo Ala bake vou baedalo na fi ho vou li oteme vua vahudam bak lam dihasi mode. Dihasi mode. Labihadam bak lamti ulohona ba Aho vi modehe vabak. Ame Israel dam tohedatebolehe dam labe nehadam meot. Amu ame tohedatebolehe dam labe ibi iho faina meedàmu fa faamome vei neàdedalo Ala bake vou baedalo na fi ho ibida vou li oteme vua vahuda. Labi ba neo dam giida totbaho labe ibi iho faina modehemu fa faamome vei neàdedalo Ala bake vou baedalo na fi ho ibida neo vou li oteme ame tohe dam labe fa neo vame vua vahuda. Gi dihasi mode. Dihasi mode. Labihadam damat modem bak. Lahana iba taum Tohedatebo Yesus lam ba labiham vabak. Gi Am naedat, “Damat fa Am ve ut tetehesuhunaso laba esu paku dou oteme vasea veàtoi fa dama gohalem neàte,” lahame uledi lab modehe bak lam gi modehe vàmadehe bak. Ba tamehodehe vabak.
28. Labihàmu iho ozom, im labihasu meedamda lam bisi iba tau Tohedatebolem neàda ulohoda Am am bak. Neham labe labihaha bak. Dat ahamdat Musa labe aho ame Israel dam laba fi me gagu tohedatebolelo modem di lam aho gi ame Alat Aho fet vameadume vàmadi esuhu im amuda laba aame gi ame toehe bak laba ozome ulohodesu meeda. Labi modem labe gi bak damat abo bee damat faina meedam meo dam fi me vame fa gagu tohedateboli modidam bak. Lahana Alat ame fet vameadume vàmadi esuhu im amuda lam Musa bake vameadume vàmadi esuhunàme fa ba veimdi Aba Aho fet vameadume vàmadi esuhu im gàhàda fa faasi modelo modemu Am Adat Yesus bake abo gi labaha bohu neàbodeheda laba gagu faa fegube vàmadi esu Tohedatebolehe bak.
1. Emti vahi Kristus bake tu vuzehi meedam dam oa, eho etei lab vameadaha im lam bisi tombu bak uba ab vameadalo modemam tame. Neha: Eho etei lab vameadaha im lam ba iba vuusu abehamdi meedam Tohedatebo vabalem vabak. Abo ehe bak! Tohedatebo ibida asum ahoba iuba tom ilu Ala Bisi Feàda labe Am ahi totbaho laba nusu tau feà Dateli na ahebu ab vuusdamam bak.
2. Labi laba le Aba Aho Tohedateboli meedam im lam Aho ame Teohet Mome Fa Faatoiam Num abo Ala bake vou baedam num imboda asum ahoba iuba modesuhuda laba le ame im lam meeda. Ame num lada lam im Boehàda Alat mohoda am bak. Ba Ala Bake Vou Baedam Num bak damat im anekehàt mohoda nimti uloho vabak. Ba Musat Israel dam ahamda laba gagome Teohet Mome Fa Faatoiam Num lamti uloho vabak.
3. Dam bakda tohedatebolem di meit gagu im nehasu meedam bak. Damat Ala bake vou baedalo modemu vou lemna lam ame tohedatebo labe vame Ala bake loda. Labi damat faina meedàmu fa faamome vei neàdedalo ibi iho vou lemna fi ho oteme vasea veàtoi ame tohedatebo laba lu aho ve vua vahuda. Gi labihasu bohu meedam tohedatebot modem bak. Tohedatebo lada labe labihasu meedàmu iba vuusdam Tohedatebo Yesus ba gi labihasu Ala bake vou baedalo na loho vaba voom biem bak. Am laha Tohedatebot modem labe Am abo laha ame bak modehe bak. Aho naedat ahit uledi Ala bake neha, “Em abo dam bake gohali ot vai elom neàte,” lahame Ala bake ahit uledi gagoho bak.
4. Uho im nehasu laha vi ozomale. Alat aham di iube Musa bake vameadume vàmadi esuhu Im Feàna lam abo Ame Israel dam labe im tohe dam labe meit Ala bake vou baedalo vou lemna lam vame meedam bak lam, “Akatihasu modemna modela?” laham bak lam meit Alat Vameadaha Im Toedahana laba toehe bak ehete. Labihàmu etei Ala bake im vameadam tohe dam bada nibe gi ame toedahana laba aame ozobohudi gi ame baket vou mode ledume etei vou fusi bak niba ame baket meedam bak. Damat Ala bake vou baedalo vou lemna zi lam vame fa Ala bake lodam dam tohe dam zi ehe bak. Labihàmu Yesus bak niba aidam lahasumeam làhà Am ba tohedatelem vabak.
5. Neham bak. Ame tohe dam nidi nim gi Teohet Mome Fa Faatoiam Num bake modesuhuda laba ame im lam meedam bak. Lahana ame bak lam gi Yesus Aba Aho Ala bake vou baedam num asum ahobada imboda iuba meedam bak laba nasi fet ozome ulohona vouhodaha imot modem bak. Eho gi neham bak vi ozome uba labi gagoho bak. Aham di iube Musat Ala Bake Vou Baedalo Ame Teohet Mome Fa Faatoiam Num ahamte alimeat molo modehe di lam Alat aba im nehasu vi vameada. “Musa oho ame num molo modem di gi Eho oba Sinai Sibu niba vameadume vouhodalo modem bak nimti ulohona vi ozome ame mome faatoiam num mole.” Lahame Alat Musa bake labihasu fet vameadume esuhu bak.
6. Lahana iho ozom, Alat etei Yesus bake gagu Tohedateboli asum ahoba iuba meedam bak lamti labi Israel damat tohe damali ame Teohet Mome Fa Faatoiam Num laba meedam bak lamti labihasu vi ozom di bisi im feàna meedamda Yesus Abada am bak. Labi laha Alat amu Israel dam bake fet vameadume vàmadi esuhu im lamti labi etei Yesus Aba Aho tohedateli fa im dam badati Alati lahaha doni duzu fet vameadume vàmadi esuhu im gàhàda nimti labihasu vi ozom di bisi feàda im bada am bak. Neham labe labihaha bak. Alat Aho etei ba lab fet vameadume vàmadi esuhu im gàhàda faaseo modi duzuhu bak nim ba im amuda lamti uloho vabak. Eteida nim abo im neàna damat bisi ule neàt vamna fet vameadume vàmadi esuhu bak.
7. Im nidi nim laha vi ozomale. Alat aham di iube Musa bake fet vameadume vàmadi esuhu im lam vekehe bak ehe bak. Ame im amuda lam vekehe vaba abo iba modi neàbodemeam làhà Alat ba fet vameadume vàmadi esuhu im gàhàna amomoi ba nabime fa ot vai gagu esum vabak. Gi amu neàdehe bak.
8. Lahana ba labiham vabak. Alat Aho ozoha, Aho aham di iube Israel dam lamti Amti lab fet ot vameadume vàmadi esuhu im lam ame Israel dam labe ailahigeàmu fa fai bak meedàmu Alat Ahamo im Aho amu gagohoda lam fa mu ame dam laba im gàhàda fa nehi fet vameadume esulo ab gagoham bak. “Boehàda Alat neha, ‘Uho im nim vi aimale. Eho ba diamut Israel labe aho vou faat ladam dam debu lamti labi Yehudat aba aho vou faat ladam dam debu lamti labihasu Eho im amomoi gàhàda fa neo fet vameadume vàmadi esu tame.
9. Eho etei fet vameadume vàmadi esulo modem im nim ba Eho amu ame dam bada nibe im tai ahobada lam Eho aham di iube Mesir bak labe vi vihitoi vou laha di labe lab fet vameadume vàmadi esuhu im lamti ulohona ba modem vabak. Amuda Eho fa voou veimde tame. Nehaha labe labihalo modem bak. Im tai ahobada labe Eho ahamte lab fet vameadume vàmadi esuhu im lam ba gi labaha bohu aime ame im lam uledi meedaha vab labe Eho ame dam laba vuusu vabiedam bak lam Eho fa mu ab vooham bak.
10. Labihàmu Ebe Eho amu aham di iube ame Israel dam bake fet vameadume vàmadi esuhu im lam Eho ba vi ozom vaba vaitom di fuhuzobe Eho ame dam laba ba neo fet vameadume vàmadi esuhu im gàhàna nidi nim gagu vàmadi esu tame. Ebe Eho gagu fi hasi vàmadi esuhu im zi lam Eho ame dam labe im ahu laba modi fa ozobohudi fi gatei gi labaha bohu vi ozodam bak ame. Labi laha ame dam labe im biem vaba abo aime uledi vi meedam bake im ahu ad laba Eho modi ozobohudi abehamdedam bak ame. Labi Eho fa ame dam laba vuusdam Alalem bak ame. Labi ame dam lam fa Em damalem bak ame.
11. Labiham labe ba di iube meit am amedam modeo, dam mei debu amti fa vahehe dam totbaho modeo, ame dam labe, “Boehàda amat mode?” laham bak biem bak lam ba meia vahokem bak lam ba ozom vabak. Ame di labe Em damalehe dam abo dam eeda modeo, ee vabda modeo, dam ahebu lam gi Em ozobohudi ab neàbodedaham bak.
12. Labi laha ame dam labe ibi iho faina meedam bak lam abo Ebe Eho gagu esuhu im aalahigeàmu zidazi git meedaha bak lam Eho ozahigeàmu fa vei neàdi vaito tame. Eho ba ame dam labe ibi iho lab faina meedam bak lam Eho ba neo vi ozome dam bake gagodam vabak. Eho ahit voou sete tame.’ ” Lahame Alat aham di iube ame dam laba labihasu fet vameadume vàmadi esuhu im lam Yeremiat Alat Vameadaha Im Toedahana laba labihasu toedume esuhu bak.
13. Emti vahi Kristus bake tu vuzehi meedam dam oa, Alam im labihasu toehemu iho ozom, Alat im amomoi fa ab modi gàhàdi vameadume vàmadi esuham bak. Labi Aho lab gàhàdi vameadume vàmadi esuhemu iho ozom, Aba Aho amu ahamte vameadume vàmadi esuhu im lam ba vi modem bili fa voou setelo modemu fa etei Aba Aho ba vameadume vàmadi esuhu im gàhàda nim Yesusat fa ot vai Tohedateboli ab meedamam bak.
1. Alat aham di iube Aba Aho ahamte lab fet vameadume vàmadi esuhu im lam Musa bake vameadume aho fa ot vai ame Israel dam ahamda laba vameadaha di lam, “Ame dam labe im akatihasu Ala bake vou baedàla?” laham bak lam biem bake aho gi, “Im nehasu modele. Im nehasu modele,” lahame iademe vahokedam labe ame dam labe ulohodesu meedam bak ehete. Labi laha ame im lam meedam di gi Ala bake vou baedalo ame Teohet Mome Fa Faatoiam Num abo damat bak niba moho num laba meedaha imot modem bak.
2. Etei lab gagoho num lam gi teohet mome fa faatoiam num abo kemah modem bakti ulohona modem bak. Labi ame num lam doni gutehe bak laha ehe bak. Labi ahamte olem zoho abo Fota Fiham Zoho laba olem bake tetehesum sue lam ogizi oli aam di vuagat usime fauhalem bake na modi soali naoli aasoaedahana lamti labi Ala bake lolo gagu fi hasi esum rotibu vahem beahuba lamti labihasu laba esuhu bak.
3. Labi doni labe gutehe bak laba sue tamzohobuna laba tetehesu modesu Bisi Fiham Zoho laba baguamdi modesda.
4. Labi ame Bisi Fiham Zoho laba na nehamda vahehe bak. Vuat usime vuahubuli ahana neàna feemna esum beahuba abo emasat modehena ame. Labi na esu baguamdehena gahebabu abo Alat Aba Aho dam bake fet vameadume vàmadi esuhu im vi ozomna esuhunabu ame. Labihasu zoho laba vahehe bak. Ame na vaheme esuhunabu lam damat emas modeme gahebali fa ame na vaheme esuhunabu labe am ad iumti ahobati gi emasat modi vabousu ba ut gaheba alihi aam vabna modi esuhu bak. Labi ame na vaheme esuhunabu lam nazoh nehamda laba nom vahehe bak. Dam ahamda Alat bak aotba baa bohu dam vaba alim bak laba vou idetedam di labe na àmna asum ahoba iube bake goagoadamna abo roti bibanati ulohona manna nom vahehena emasat modehena ame. Labi neo Harunam odoamso loube futodamna ame. Labi neo ke baa behàsu Alat Am Israel dam laba, “Im nehasu meedale. Im nehasu meedale,” lahame fet vameadume vàmadi esuhu im tombuda sepuluh toehe ke baa behàsu ame. Labihasu ame na vaheme esumnabu laba vahehe bak.
5. Labi ame na vaheme esumnabu labe am ahazo lam abo Alat neha, “Meit faina meedam bak lam Eho ame da laba faobekesi beom bak mu fa ozahigeàmu vei neàdem bak,” laham bak vi ozomna ahazo lam ame na vaheme esumnabu laba nom esu baguamdehe bak. Labi ame na ahazo laba damat emas vabiedume fa Alat Am im gagu vou usem dam Kerub itti ulohona behàsu modi neàdi ame na ahazo ahoba laba zoho modi zisu teude. Labi zoho modi zisu teude. Lahahana behàsu labe oto avaesuiame am busehà ahim delai ame ahazo baa donibu laba nom aasum neà laham bak laba ozome nom avaesu modesu esuhuna modehe bak. Abo Ala Am feàna fauhaedam labe ogatedamna li ame na ahazo baa laba duzum bake labihaha bak. Ame im lam em gi lamota gagu ab novai esuham. Ame im lam ahebu bohula labe ba sunit niba toem biehe bak.
6. Eho etei lab vameadaha num labe am nazoh modealadaha bak lam gi ame Israel dam ahamda labe ibi iho Ala bake vou baedalo modem bake labihasu modealadaha bak. Labi ame nazoh lam modealadume neàdi ame Israel dam vuusdam tohe dam labe ame Teohet Mome Fa Faatoiam Num labe am Fota Fiham Zoho laba oli ibi iho dihasi na mode. Dihasi na mode. Lahadam bak lam ab faasi meedamam bak.
7. Lahana ame num labe am Bisi Fiham Zoho laba olemda gi tohedatebo ahamo olem bak. Lahana bisi digat ahebu olem vabak. Gi tahun vàmtea labe olehe vàmade. Labi ba neo tahun meida iube olehe vàmade. Gi labihadam bohu meedaha bak. Labi laha ame num labe am Bisi Fiham Zoho laba olem di ba na fi ho vasea vaba alia olem vabak. Abo na vaseati vou olem bak. Ame na fi ho vasea lam abo tohedatebo labe aba aho faina meedam bak lam fa faatoi vei neàdem bake Ala bake lolo modemna vaseat modem bak. Labi laha dam giidat vabili git faina meedam bak lam laha fa faamome vei neàdedam bake Ala bake lolo modemna vaseat modem bak.
8. Eho etei lab vameadaha im lam Alam Aha Nutabe Neàna labe Aho iba gi im nehasu modi fi gatelo labihasu fet vouhodaha bak. Ame Teohet Mome Fa Faatoiam Num duzuhu lahasdam di lam ame tohedatebo labe ahamo ame Bisi Fiham Zoho laba oli Musat ot vai aba gagoho im lam ulohodesu meeda. Ame di lam dam ee vab dam labe ba tau olehe vabak. Ame lab meedam di lam abo Israel damat ibi iho na fi ho oteme Ala bake vou baedam lahasuhu di lam ba dam ee vab dam labe ozo, “Imti fa Alati fa vahedam bak akete?” laham bak lam ba ame di labe modi fi zeam bitoho vabak.
9. Ame Israel tohe dam labe ibi iho Ala bake vou baedalo ame Teohet Mome Fa Faatoiam Num laba oli meedaha im lam gi Alat iba dam badate nasi fet vouhodaha imot modem bak. Gi, “Iho dam bada nibe fà aime fa im tombu nehamda ozobohudese,” lahame meedam imot modem bak. Alat aham di iube Aba Aho fet vameadume vàmadi esuhu im lam ame Israel damat meedam di lam dam tohe dam labe meit vou li otemna fi ho modeo, Ala bake, “Neàte,” lahame vou lemna amomoi modeo, labihasu ame toheda labe ve fa Ala bake lodume fa ame dam labe iho faina meedam bak lam fa faamome vei neàdedamta vei neàdeda. Lahana ame na vou leheda labe aho ozo, “Eho faina modehe?” lahame ahu ad iube it ozodam bak lamti ba faatoi neàbodem biemnat modem bak.
10. Neham labe labihaha bak. Ame dam labe ibi iho meedaha im zi lam gi bak niba meedume baleàlehena nehamda meedamnat modem bak. Na àm fi ham bak ame. Labi na udem fi ham bak ame. Labi fi hasi valo ehume itatam bak meiti itatam bak meiti ame. Labihasu meedam im lam gi Ala bake vou baedalo modem di bak niba meedam imot modem bak. Abo bak niba aidam diat im so neàdelo meedume baleàlehe im meedamnat modem bak. Lahana ame im lam Alat neha, “Ba abo labaha bohu vuusu meedalo modem vabak. Gi teohet vou meedume Ebe Eho ba diamut fet vameadume vàmadi esuhu im gàhàda gagu esuhuzobe ame im zi amuda lam gi fa voolo modem bak,” lahame gagu esuhu bak. Gi fai imot modemu fa ba im bisi neàda modelo im amuda lam voolo modem bak.
11. Labihamta labiha. Lahana iho ozom, etei nim Kristus Aho Tohedateboli iba soat vausu fa vei neàdem bak lam abo neà bak lam ahebu Aho ab faasi meedamam bak. Lahana Aba Aho lab meedam im lam ba Musat Ala bake vou baedam num abo ame Teohet Mome Fa Faatoiam Num ahamda mohoda lamti ulohona oli meedam vabak. Gi asum ahoba laba abo Alat azihi bak laba le ame im lam meedam bak. Abo num feàda bisi neàbodeheda ozomom num laba oli meedam bak. Ba dam anekehàt moho num laba ba olehe vabak. Ame num lam ba bak niba modealahana zi nibe na meida visoi modehe vabak.
12. Labi Aho lab meedaha bak lam ba dam ahamda tohedatebo labe ibi iho meedam bakti ulohona meedaha vabak. Am ba ame dam ahamda labe ibi iho faina meedam bak lam fa faamome vei neàdedalo ame tohedatebo labe tahun vàmtea labe aba aho kambing vasea modeo, sapi dobeda vasea modeo, ame na fi ho labe am vasea ve ame Teohet Mome Fa Faatoiam Num labe am Bisi Fiham Zoho laba vou oli ame na labe ot vai modehe bak vàmadiam bak lamti ulohona modehe vabak. Am gi vasea Abada Ahamo ame bisi neàbodehe bak asum ahoba iuba olehe vàmadi iba soat vausu fa vei neàbodi labaha bohu ab vuusdamam bak.
13. Nehaha bak. Alat aham di iube Musa bake gagu aho fa ot vai gagu vàmadi esuhu im zi labe im meida nehasu gagu esuhu bak ehe bak. Dam faina meedam bak fa faamome vei neàdedam digat fum di ame tohedatebo labe kambing dooda modeo, sapi dooda modeo, ame na oteme am vasea vou oli meedam labe ame dam labe ibi iho faina meedam bak lam fa faamome ab vei neàdedamam bak. Labi im meida laha nehaha bak. Meit ame im lam ulohodesu modehe vaba vedi git modi zidazi it faidemeam làhà fa damti neo vahem bake im nehasu meedam bak ehe bak. Sapi namda dobeda oteme buahebu vua vahusu faali seddume neàdi am ohu fau lam dat aheda labe visoi vao laba veosi valiheme ame vao fau lam fa ve ame da labe am so laba ub faaledam labe am git modi faidehe bak lam fa ab faatoi vei neàbodemam bak. Gi labihasu meedam labe ame dam labe amu lab fi hasi dam totbahoti fa vahi Ala bake vou baedam biem bake fa im so modi boz neàdi fa vahem neàdem bak am bak.
14. Gi ame na vasea lamti labi ame na fi ho buahebu vahusuhuna labe am ohu fau vaoti valihehena lamti labihasu ame da labe aho git modi faidehe bak lam modi fa boz neàdi fa vahem neàdemeam làhà Kristusam vasea bisi feà labe dam Alati vaitesu labaha bohu vuusdam dam labe ibi iho faina meedam bak lam ahebu im ahulat it ozodam bak lamti fa faamome vei neàbodedam bak ab faaham bak. Labiha labe iho fa Ala abo elom giki labe ahe neàna bohu vuusdam Ala laba fa vou baedam neàdehe bak. Nehaha bak. Iho bak damat faina meedam bake Alam Aha Nutabe Neàna labe abo elom giki labe ahe neàna bohu vuusdamda labe Aho Kristus bake abo fai bak vabda laba modi Kristus Aho naedat neha, “Am fa ot vai fai Dateli eloi fa dam bake gohalem neàte,” lahame ozome uledi eloi vasea veàtoho bak. Abo Israel dam ahamda labe ibi iho faina meedam bak lam fa faatoi vei neàdelo na fi ho labe am so ba git modesuhu bak vabda lam vou li oteme tohedate lu modidam bakti uloholi Am abo gi neàbodeheda damat otehe bak.
15. Alat aham di iube Aba Aho ahamte lab fet vameadume vàmadi esuhu im amuda lam damat ulohodesu meedaha vaba git modi zidazi faina meedam meot. Labihàmu Yesusat ahit uledi Am vasea veàtoi eloho labe Alat ame dam laba beolo modem bak lam Aho fa faamome ab vei neàdedamam bak. Labiha labe damti Alati fa ot vahiam bake Alat Aba Aho ba neo iba fet vameadume vàmadi esuhu im gàhàda lam Yesus tohe duzu ab meedamam bak. “Am damalese,” lahame Aba Aho gagu fi hasi valo modem dam labe iho fa Aba Aho neha, “Eho neà bak nim uba modese. Neà bak nim uba modese,” lahame fet vameadume vàmadi esumna lam abo gi labaha bohu vuusumna lam iho vam bake Kristus tohe duzu im gàhàda ab meedamam bak.
16. Alat Aba Aho nasi fet vameadume vàmadi esuhu im lamti labi bak damat ibi iho ahe diat, “Im elohozobe im na misia nim amat vàla?” laham bak vi ozome iho nasi fet toeme esuhu im lamti uloho bak. Neham bak. Meit am nazoh misia am data bake ba lom bak ozomeam làhà aho amu nasi am eloho vab di iube, “Amat vàla?” lahame fet toeme esum bak. Lahana ame fet toeme esuhuda labe am eloho vab di labe ame im lam nasi faasi meedam vabak. Gi am eloho bak lam damat ozobohudi neàdi ba ame im lam faasi meedam bak.
18. Labi laha Alat aham di iube Aho fet vameadume vàmadi esuhu im lam Musat ot vai fa dam bake ahate vameadaha im lam laha gi ame baket modehe bak. Ame im lam faasi meedam bake amu na fi ho oteme vasea veàtoi neàdi ame im lam ba faasi meedam bak. Ame na vasea vabalemeam làhà ba faasi meedam vabak. Ame dam ahamda labe im nehasu meedaha bak.
19. Alat Musa bake neha, “Oho om Israel dam laba, ‘Im nehasu meedale. Im nehasu meedale,’ lahame vameadale,” lahame Alat lab fet vameadume fi hasi vàmadi esuhu im zi lam Musa bake vameadume neàdi Musat fa ot vai ame im ahebu fa ame Israel dam bake ab vameadaham. Labi vameadàmu damat ab uledi, “Neàte. Iho mode tame,” lahame ab gagu vàmadi esuham. Labi gagu vàmadi neàdi Musat amu dam bake gagu sapi dooda dobeda zi oddahana labe am vasea zoho lam vame fa vaoti ab valiheham. Labi valiheme neàdi aho neo domba tau damat modi alihi veimdi bozileheda lamti fa utolehena ee gagom hisop lahamda lamti labihasu vame bugeame dombuli neàdi ame na valihehena laba nom ekeme fa vousai fa Alat Aba Aho fet vameadume vàmadi esuhu Im Feàna toeme bolome esuhuna laba ub faaleda. Labi neo ame Israel dam labe im so laba ub faaleda. Labihada.
20. Aho ame na valihehena ub faaledam di labe aho nehasu gagoda. “Alat uba neha, ‘Aba Aho uba fet vameadume vàmadi esuhu im lam mahate uledi ulohodesu meedale,’ lahame gagoho im lam uho neha, ‘Neàte,’ lahame ozobohudi gagu faasi meedamna ame na vasea neam bak,” lahame dam bake vameadaha bak.
21. Musat gi lada lamota ame na vaseat ub faaledaha vabak. Am laha ame Teohet Mome Fa Faatoiam Num lamti labi ame num laba modealadaha nazoh lam abo Alam im fi hasi modelo modem di labe ame tohe dam labe ibi iho modidam nazoh lamti ahebu labihasu laha ame na vasea labe ub faaledaha bak.
22. Iho gi nehi ozom bak. Musat lab toedume fi hasi vàmadi esuhu Im Feàna lam modi esuhu labe nazoh dua bak Ala bake gagu fi hasi esulo modem di ame na vasea ub faaledume neàbodem labe Alat uledi vam bak am bak. Labihahemu iho nehi ab ozobohudi gagoham. Na Ala bake lolo modemna oteme vasea veàtom vabameam làhà ba Alat ame da labe aho faina meedam bak lam ba ozahigeàmu fa vei neàdedam vabak. Lahame ab gagodamam bak.
23. Eho etei lab vameadaha nazoh lam abo ame Teohet Mome Fa Faatoiam Num bak niba modi duzuhuda modeo, ame num laba modealadaha nazoh lam modeo, labihasu ahebu gi asum ahoba iuba abo imboda modem bake gi vi vouhomnat modem bak. Labihahemu Ala bake gagu fi hasi esulo modem di Alat uledi vam bake ame na fi ho Ala bake lolo modemna labe am vasea ame nazoh laba amu nasi ub faaledume neàbodedam bak. Lahana iho ozom, asum ahoba iuba modealadaha nazoh ium bisi feà labe ame nazoh lam fa gagu fi hasi neàbodelo modem di ba ame na vasea amu gagohoda lamti ulohona modem vabak. Abo bisi neàboda ozome Am vasea veàtom labe ame nazoh gagu fi hasi neàbodem bak am bak.
24. Neham labe labihaha bak. Damat Ala bake vou baedalo ame Teohet Mome Fa Faatoiam Num mohoda laba Kristusat ba le olehe vabak. Num iho bak niba moadahada nim gi asum ahoba iuba mohoda bisi imboda laba vi ozome vi vouhodam bak. Kristus abo gi asum ahoba iuba Alat azihi bak laba le olehe bak. Abo Alat Aba Aho avaesdam laba le dam bakda niba vi ozome tohe duzu fi baedam bak.
25. Labi Kristus laha gi Am Ai Ala bake neha, “Damat faina meedam bake gohali Eho fa ot vai elom neàte,” lahame uledi gagu eloho bak gi vàmadehe bak. Ba eloho bak tamehodehe vabak. Ba ame Israel dama vuusdam tohedatebo labe aba aho faina meedam bak lamti labi dam giida labe ibi iho faina meedam bak lamti labihasu fa faamome vei neàdedam bak laba ozome vasea abada modehe vaba gi na fi ho vasea lam ve ame Teohet Mome Fa Faatoiam Num labe am Bisi Fiham Zoho laba tahun vàmtea labe am digat vàmtea labe vou olehe vàmade. Labi ba neo gi ame baket mode. Labihadaha bak lamti ulohona Kristusat ba vi modehe vabak.
26. Lahana Aho Ala bake lab uledi gagoho bak lam tamehodemeam làhà Am gi Alat ahamte alimeat na debu modehe di iube faasi gi geàdume elo. Labi fa neo vi geàdume elo. Gi labihadam bohu meedam Dàt modem bak. Lahana Aho ba labihadaha vabak. Etei digat folelo modem di nibe bak damat ibi iho faina meedam bak lam ahebu fa faamome vei neàdedalo modem bake Kristus bak niba ab leham bak. Am Ai Ala bake neha, “Damat faina meedam bake gohali Eho fa ot vai elom neàte,” lahame uledi gagu eloho bak ab vàmadeham bak.
27. Alat Aba Aho ozome vàmadi esuhu bak meida gi neham bak. Dam ahebu eloho vàmadidume afoezobe Alat, “Aho ame da lam ba vào? Vam vabao?” laham bak gi di labe vi ozome neàdi gagu fahedam bak.
28. Kristus laha gi eloho vàmadehe bak. Aho gi, “Damat faina meedam bake gohali Aho fa ot vai elom neàte,” lahame uledi gagu eloho vàmadehe bak. Labi Am laha ba bak niba fa lem bak ehete. Lahana ame di lam damat faina meedam bak fa faamome vei neàdedalo li eloho bak neo behàsdem vabak. Aho gi dam Aba tu vou faodam bohu meedam dam lam Aho amu faasi soat vausu fa vei neàdedam dam lam fa abobo meedume neàbodedalo modem bake fa lelo modem bak.
1. Yesusat ba iba modi im neà bak modi esuiam bak lam ehe labe aham di iube ame da Musat Alat aba vameadume fi hasi vàmadi esuhu Im Feàna gi it vevedamnati uloho labe ba modem bak laba gi nasi fet vouhodaha bak. Bisi imbo zoho modehe vabak. Neham labe labihaha bak. Dam ahamda labe ozo, “Alat fa iba ozahit deeli gagu vadase,” lahame ibi iho Ala bake vou baedalo vou lemna lam tahun ahebu vou leidam bak. Abo Musat aba aho gagu ulohodesu bak laba vi ozome gi ulohona vou leidam bak. Gi labihadam bohu meedamnàme ba Alat neha, “Dam lam im vamdesu meedam damat modem bak,” lahame ba ame dam laba ozahit deeli gagu vadamnat modem vabak.
2. Eho gi neham bak vi ozome uba labi gagoho bak. Ame na vou lehe dam lam ibi iho Ala bake etei lab vou li lohoda lam gi ame lab loho vàmadehe labe bisi faatoi abobo vei neàbodemeam làhà ba neo vi vou li lodume modidam vabak. Ame dam labe gi nehi ozo. “Lo. Iho lab loho vàmadehe bak labet modi ibi iho faina meedam bak lam gi fa ab faamome vei neàbodedaham bak,” laham bak lam ozobohudi ba neo, “Im faina meedam damat mode?” laham bak lam ba ahulat it vi ozodam vabak.
3. Lahana ba labihaha vabak. Abo gi labaha bohu vi ozodam damat modem bak. Ame dam labe ibi iho Ala bake vou baedalo vou lemna lam tahun meida labe vou le mode. Labi neo tahun meida labe vou le mode. Gi labihadam bohu meedaha labe ame dam labe ozo, “Im faina meedam damat mode?” lahame im ahulat vi ozodam bak lam ba vaitom biehe bak. Gi labaha bohu vi ozodam damat modem bak.
4. Nehaha labe labihaha bak. Ame sapi dooda modeo, kambing modeo, im vasea lam ame dam labe ibi iho faina meedam bak lam ba fa faamome vei neàdedam biemnat modem bak.
5. Labihàmu Kristus Aho ahamte alimeat bak niba lelo modehe di labe Aho Am Ai Ala bake gagoho im meit Alat Vameadaha Im Toedahana laba nehi toehe bak ehete. “Oho ba dam bake neham kaio. ‘Uho faina meedam bake gohali na fi ho vou li oteme Eba lole. Na amomoi vou li Eba lole,’ lahame ba labi gagoho vabak. Om laha ba dam bake neham kaio. ‘Na fi ho buahebu vua vahudale. Dam faina meedaha bake fa faamome vei neàdedam bake na fi ho vou li oddume Eba lodale,’ lahame Oho ba labi gagoho vabak. Ame na zi lam Om ba deeli uledem vaba Om gi nehi modehe bak. Damat faina meedam bake gohali Eho ot vai elom bak laba ozome Oho ahit modi dam alihiti ulohona Eba modi ahumdi esuhu bak. Ame bak lam Oho deeli uledemna am bak.
7. Labihàmu Eho fa neo Oba nehi vi gago, ‘Ai Ala oa, lo. Làhà neàte. Obo Oho ozoho baket modem neàte. Obo Oho ozoho baket modelo modemu Em fa ame bak laba lam neàte. Abo Eho ba modem im Oho Vameadaha Im Toedahana laba fet toehena lam Eho imbodelo modemu Em fa ame bak laba lam neàte.’ ” Lahame Kristus Aho ahamte alimeat bak niba lelo modem di labe Aho Am Ai bake labihasu gagodaha bak.
8. Kristus lab gagoho im lam eho etei lab vameadaha bak lam uho nasi vi ozomale. Kristus labe Aho neha, “Ai oa, Oho ba dam bake neham kaio. ‘Uho faina meedam bake gohali na fi ho vou li oteme Eba lole. Na amomoi vou li Eba lole,’ lahame Oho ba labi gagodaha vabak. Ame na zi lam Om ba deeli uledem vabak,” lahame Kristus labi gagohonàme dam ahamda labe ba git meedaha vabak. Ame dam labe gi Musat Alat aba vameadume fi hasi vàmadi esuhu im fa ot vai vameadam Im Feàna lam ulohodesu meedam labe labihaha bak.
9. Labi Kristus Aho ba lab gagoho im lam, “Ai Ala oa, lo. Làhà neàte. Obo Oho ozoho baket modem neàte. Obo Oho ozoho baket modelo modemu Em fa bak laba lam neàte,” lahame gagoho bak lam iho gi nehi vi ozom bak. Làhà Kristus gi Alat aham di iube neha, “Uho faina meedam bak lam fa faamome vei neàdedam bake na fi ho vou li oddume Eba lodale,” lahame Alat Aba Aho aham di iube fet vameadume vàmadi esuhu im lam fa faatoi fa Yesus Aba Aho lab eloho vàmadehe bak labet iho damat faina meedam bak lam fa faamome vei neàbodedam bak gàhà bak lam fa ab modi esuham bak.
10. Labihàmu Yesus Kristus Aho Alat Aba Aho ozoho baket uledi meedaha labe abo Aho naedat neha, “Dam faina meedam bake gohali Eho fa ot vai elom neàte,” lahame Aho lab uledi eloho vàmadehe bak labet modi, “Iho faina meedam bak lam fa faamome vei neàdedume Alam damali gi im Abadata meedam bak bohu meedase,” lahame iba gagu fi hasi ab esuham bak.
11. Ame Israel dam vuusdam tohe dam labe iho Alat aham di iube fet vameadume vàmadi esuhu im ulohodesu meedam di gi ame na vua vahudamnabu gaheba bumatalehenabu laba duzu dam giidat vou li otehena fi ho lam gut ve Ala bake loda. Abo gi dihasi mode. Dihasi mode. Abo gi Musat aba aho gagu ulohodesu bak laba vi ozome gi ulohona gut ve Ala bake lodam bohu meedam bak. Lahana ame na Ala bake lodamna zi lam ba damat faina meedam bak lam fa faamome vei neàbodedam biemnat modem bak.
12. Lahana Kristus Aba Aho meedaha bak lam Aho naedat neha, “Dam faina meedam bake gohali Eho fa ot vai elom neàte,” lahame uledi eloho vàmadehe labe ba neo vi modem bak na vabak. Aba Aho lab eloho vàmadehe bak labet neàdi neà bak bohu ab modesuham bak. Labi Aho lab modehe bak lam modeme neàdi asum ahoba iuba Alat azihi bak laba tom ilu fa Am Aiam ahi totbaho laba nusu tau feà Dateli na ahebu ab vuusdamam bak.
13. Kristus etei gi Aho lab tom ilu ame bak faasi meedam di labe dam Aba fakemoho dam laba Alat fa modi Aba fa uledem bak laba vou faoda.
14. Alat neha, “Am damali fà im Abada meedase,” lahame amu nasi fi hasi fet gagu esuiam dam lam Kristus Aho lab eloho vàmadehe bak labet modi ame dam labe ibi iho faina meedam bak lam ahebu fa faamome vei neàbodi vàmadi ab vaitoham bak. Labi laha ame bak labet modi Alat iba ozom di, “Im im vamdesu meedam damat modem bak,” lahame iba gi ozahit labaha bohu ab gagodamam bak.
15. Labihàmu iho nehi ozo. Alat ba fet vameadume vàmadi esuhu im gàhàna lam abo ame bak lam faasi vou mode ledam im lam Yesus lab eloho vàmadehe bak am bak. Labiha labe bak damat ibi iho faina meedam bake gohali ot vai oteme Ala bake lomna ba modem bak ozom bak vabak. Gi Kristusat Aho lab ot vai eloho vàmadehe bak lam gi ab neàdeham bak. Eho etei lab gagoho bak lam ehemo ozome uba gagoho vabak. Ame bak lam Alam Aha Nutabe Neàna labe Aho laha iba tau gagodam bak. Aho gagoho im lam Alat Vameadaha Im Toedahana laba nehi toehe bak ehe bak.
16. “Boehàda Alat neha, ‘Ebe Eho amu aham di iube ame Israel dam bake fet vameadume vàmadi esuhu im lam Eho ba vi ozom vaba vaitom di fuhuzobe Eho fa ba neo ame dam laba fet vameadume vàmadi esuhu im gàhàna nidi nim fa neo gagu vàmadi esu tame. Ebe Eho gagu fi hasi vàmadi esuhu im zi lam Eho ame dam labe im ahu laba modi fa ozobohudi fi gatei gi labaha bohu vi ozodam bak ame. Labi laha ame dam labe im biem vaba abo aime uledi vi meedam bake im ahu ad laba Eho modi ozobohudi abehamdedam bak ame.’ Lahame labihasu gagu neàdi Aho neo vi vameada. ‘Labi laha ame dam labe ibi iho faina meedam bak lam abo Ebe Eho gagu esuhu im aalahigeàmu zidazi git meedaha bak lam Eho fa ozahigeàmu fa vei neàdi vaito tame. Eho ba ame dam labe ibi iho lab faina meedam bak lam Eho ba neo vi ozome dam bake gagom vabak. Eho ahit voou sete tame,’ lahame labi gagoho bak.”
18. Alam Aha Nutabe Neàna labe labihasu gagohemu iho nehi ozom bak. Iho bak damat faina meedam bak lam Alat ozahigeàmu fa faamome vei neàdedameam làhà ame bak laba gohali ot vai otemna Ala bake lomna ba modem bak ozom bak vabak. Kristus Aba Aho lab ot vai eloho vàmadehe bak lam gi ab neàdeham bak.
19. Emti vahi Kristus bake tu vuzehi meedam dam oa, im nidi nim laha vi ozomale. Aham di iube ame tohedatebo labe aho ame Teohet Mome Fa Faatoiam Num labe am zohoti zohoti lahaha doni laba tetehesuhu sue lam ogizi Bisi Fiham Zoho laba olem di abo na fi ho vasea vuusu vou olem labe ba iedem vaba olidam bak. Lahana etei nim Yesus Aho lab eloi Am vasea veàtoho labe Aho Tohedateboli Alat avaesdam laba tohe duzu im vameadam labe im laha ba Ala bake im vameadam bak ba iedem vabak. Abo gi ahu keàtedi ahate Ala bake netàdi im vameadam bak.
20. Iho Ala bake netàdi im vameadam bak lam gi zie gàhàda labe le im vameadam bak. Ame zie lam Kristus Aho etei ab vieme gàhàdi ab neàdeham bak. Abo Ala bake netàdi lafusi im vameadam zie bisi feàda am bak. Ba neham bakti uloho vabak. Ame Israel dam labe ibi iho Ala bake vou baedalo ame Teohet Mome Fa Faatoiam Num labe am Fota Fiham Zoho lamti Bisi Fiham Zoho lamti lahaha doni laba sue tamzohobuna tetehesuhemu dam giida ba laba olem biem bakti ulohona modehe vabak. Labi laha iho Ala bake netàdi lafusi im vameadam zie lam ba na aumna vabak. Neham labe labihaha bak. Yesus Aho naedat neha, “Dam faina meedam bake gohali Eho fa ot vai damat Em otem neàte,” lahame uledi eloho labe iho Ala bake netàdi lafusi im vameadam zie gàhàda aho ab faasi meedamam bak.
21. Labi ame Da Yesus lam laha im Alam damalehe dam niba iba vuusdam labe fa gagomda Tohedatebo Am am bak.
22. Labihahemu imo nasi Ala bake netàdi lafusi im vameadase. Abo gi ahu vàmadi labaha bohu tu vitasu vuzehi keàtedi meedam labe Ala bake netàdi lafusi im vameadase. Abo Yesusam vasea iba modi fa neàbodi im ahulat neha, “Iho faina modehe?” lahame im ahulat it vi ozodam vabna modesuse. Labi laha iho faina meedam bak lam Alam Aha Nutabe Neàna labe Aho fa faamome abo iho im soa vao alim it kikeme boz neàdem bakti ulohona im ahu ad nibe modi fa vei neàbodedam bohu modesuse. Imo ahu gi labihasu modesdam bohu modem ahulat Ala bake ahate netàdi lafusi im vameadase.
23. Iho amu ozo, “Alat iba nehada tame,” lahame iho lab nasi tu vi ozodam bak lam gi labaha bohu teudi vuusdase. A gi tulo tuhumu fa voo. Labi neo tulo tuhumu fa voo. A labihadamule. Neham bak. Alat Aba Aho fet vameadume vàmadi esuhu im lam Aho ba vagem vabak. Abo modi imbodem tadedam Alat modem bak. Labihàmu imo Aba mahate tu meedase.
24. Labi laha, “Im akatihasu meedam labe iho fa meia modi fà udovai fa ot vou aasu vabiei ot vou aasu vabieidàla? Im akatihasu meedam labe iho meia modi fà udovai fa ot deeliame meia neà bak ot modidàla?” laham bak lam imo fa ahu teudi ot vabedeidase.
25. Labi dam totbaho labe ibi iho amu bakamta vahi Ala bake vou baedam bak mu vooho bak lamti ulohona iho a vi tau meedamule. Imo gi ibi iho amu lab vahi Ala bake vou baedam bak lam gi labaha bohu vuusdase. Imo gi damat ahu bedi mom bak laba vi ozome ot vai fa vabedeidase. Ame bak lam iho modehe vaba a voomule. Neham bak. Im Boehàda Yesus Aho fa lem di ab vou netàdi fuseo modemam bak. Laham bak lam im ozobohu bak. Labihàmu ame bak lam iho a voomule.
26. Uho Kristus bake tu vuzehedaha bak lam a mu voedamule. Neham bak. Kristus labe Aho meedaha Im Neàna imbona lam meit iba vahokeme iho aime ozobohudi fi gatehena vedi ahit mu fa faina meedam bak vi meedume bohulalemeam làhà ame da labe aho faina meedam bak laba gohali ot vai eloi fa faamome vei neàdemna ba amomoi vabak.
27. Iho labihameam làhà iho ba akatiham bak modelo vou faodà? Gi neham bak vou faoda taia? Im gi Alat iba fa vàlu gago, “Um debu git modeho,” lahame iba faki feà bak fusi gagu beom bak laba vou faoda taia? Abo iho Aba fakemoholi meedam dam niba abo vua elum dae feà aidam vua labe na ahebu beome seddam bakti ulohona iba beodam bak laba vou faoda taia?
28. Uho ame Israel dam ahamda labe ibi iho meedaha bak laba vi ozomale. Nehaha bak. Musat Alat aba vameadume aho fa ot vai ame dam laba vameadume fi hasi vàmadi esuhu Im Feàna lam meit aime ulohodesu modehe vaba vedi ailahigeàmu voomeam làhà abo ame bak lam na aahada labe dam behàsu modeo, làtela modeo, fa nehi ahate gagu fi demeam, “Lo. Imbote. Ame da labe aho modeho,” lahame labi gagu fi demeam làhà ame da laba ba aame faobekesi ozahigeàmu tau meedam vaba abo otem bak.
29. Labihalahit uho ozom, meit Alam Adat laba naot vi beome uhulame seti mu tozomda lam akatiha? Labi laha, “Im Alam damali im Abadata fi hasi meedase,” lahame iba gagu fi hasi esuhu vasea lam meit neha, “Vasea lam ba feànat modem kaio,” lahame mu tozomda lam uho ozom, akatiha? Labi laha dam bake ozahit deeli im neà bak modi esuidam Alam Aha Nutabe Neàna lam meit neha, “Feà kaio,” lahame feàtàmda lam uho ozom, akatiha? Im labihasu meedamda lam uho ozom, Alat ba beom vaba ozahigeàmu gi moe? Vabà! Bisi feàna beomda am bak.
30. Eho etei lab gagoho bak lam abo imbote. Iho neham bak ozobohudi labi gagoho bak. Alat Vameadaha Im Toedahana laba Alat im nehasu gagoho bak toehena ehe bak. “Meia vi vataum di Em Naeda ehe bak. Dam uba fai bak modem di Eho fa belu vi vataumda Em am bak.” Labi laha im meida neo nehaha bak. “Boehàda Alat Aho Am damalehe dam labe iho meedaha im Aho vi ozome ozobohudi neàdi gagom bak.” Lahame labihasu toehe im ehe labe iho nehi ozom bak. Meit labihasu mu tozomda lam bisi feàna beomda am bak.
31. Iho meit labihasu mu tozodàmu Ala abo elom gikida ahena bohu vuusdamda laba im ub lomeam làhà meia modi iedi modem faidi meedam bak ehe bak.
32. Emti vahi Kristus bake tu vuzehi meedam dam oa, meit amu neha, “Iho Kristus bake tu vuzehedam labe Alat iba soat vausu fa vei neàdeda tame,” laham Im Neàna lam meit uba vahokeme uho ahamte alimeat aime ozobohudi fi gatei tu vuzehi meedam bak laba vi ozomale. Uho nehada. Uho Kristus bake tu vuzehi meedàmu ame di labe faasi na im uba modi gemna bohu tadi meedamnàme um ba ubu uho Kristus bake lab tu vuzehi meedam bak lam ba mu vooho vabak. Abo gi keàtet bohu vuusu meedam bak.
33. Labi uho laha ame di labe um dam totbaho labe aasdahit meit uba feàtàme tozoidume uba modi ladem bak meeda. Laham vaba um dam totbaho labe aasdahit meit uba vabidume fa beodume esuidume um ladem bak meeda. Laham vaba uho umti amediat modi geàdam dam totbaho laba uho laha aame faobekesi vi tau vabededa.
34. Labi laha ame di labe um dam totbaho labe iho Kristus bake tu vuzehi meedàmu damat im si fa mei oumahedam sel zi laba oumahedam dam laba uho laha faobekesi vabededam bak meeda. Labihadam bak. Lahana um ba gi im lada lamota meedaha vabak. Uho nehi ozo, “Iho ba diamut vam nazoh abo asum ahoba iuba vahehena abo ba faidem gikina abo gi neàna labaha modesuhuna lam iho ba vam bak,” laham bak um ozobohu labe etei meit um nazoh ahebu tet si vietoi gelevaha di lam uho ba ahu vi meolehe vaba gi labihasu aalahigeàmu gi deelehat meedam damat modem bak.
35. Labihàmu damat uba vabidume uba modi gem di um ahu a bedi faidemule. Uho Kristus bake lab tu vuzehedume keàtedi meedam bak lam voom vaba abo labaha bohu keàtet meedale. Uho labihameam làhà uho lab meedaha bak lam Alat uba ame bak gohali ba vamna abo feàte.
36. Uho Kristus bake lab tu vuzehi meedam bak lam gi ozahit labaha bohu keàtet teudi vuusu vou faodale. Uho labihasu Alat uba gagohona ahebu uledi betea vou meedam bohu meedam labe Alat uba gagu vàmadi esumna lam abo ahe neàna bohu vuusdam bak lam uho ba vam bak am tame.
37. Eho gi Kristus Aho ba modem im lam meit Alat Vameadaha Im Toedahana laba nehi nasi fet toehe im ehe labe uba labi gagoho bak. “Alat neha, ‘Dat lelo modemda kehàm vaba lem bak. Aho lem bak lam ba gagu faatoi neo vou faome lem vabak. Abo gi taho lem bak.
38. Labi Eho neha, “Im vamdesu meedam damat modem bak,” lahame Ebe Eho ozahit deeli gagu vadam dam lam Eba tu vuzehi meedàmu Eho ame dam laba modi Emti vahi gi ahe neàna bohu vuusdam bak. Lahana ame dam labe vedi fa Eba tu vuzehedam bak fa moudume ubahi bak bohulalemeam làhà Em ba deelem vabak.’ ” Lahame labihasu toehe im ehe bak.
39. Lahana eho etei lab gagoho dam lamti iho ba ulohona meedam vab damat modem bak. Iho Kristus bake tu vuzehi meedam bak lam fa mu ubahi bak bohulalehemu ba beome vàhàdem vaba gi Kristus bake tu vuzehi meedàmu Alat iba soat vausu fa vei neàdi Amti vahi gi ahe neàna bohu vuusdam damat modem bak.
1. Tu vuzehem bak lam, “Akatihasu meedamnat modela?” laham bak lam eho uba vameadalo mozo. Neham bak. Iho neha, “Ame bak lam Alat mode tame,” lahame lab tu vi ozodam bak lam, “Ba imbodem bak,” lahame labihasu nasi fet gagom bak lam tu vuzehem bak am bak. Abo ame na aaha vabnàme ahulat ahamo neha, “Ba imbodem bak,” lahame nasi fet vi ozodam bak lam tu vuzehem bak am bak.
2. Im tai ahamda zi labe Alat iba gagohona lam iho aaha vabnàme vedi nasi lab tu vuzehi meedaha bak laba Alat aame ozo, “Dam lam abo neàte,” lahame labi deeli ab gagoham bak.
3. Labi laha ibi iho Ala bake nasi tu vuzehedaha bak labet modi iho neham bak ozobohudi gagodam bak. Alat gi Aho ahat gagoho labe bak niba modealahana zi nimti asum ahoba iuba modealahana zi lamti labihasu ahebu modi na debulehe bak. Labiha labe ame iho aadamna zi nim ahebu Alat ba auet modi naleheda na vabak. Gi Am ahat gagoho bak labet modi ahamo naledume modealadaha bak.
4. Eho dam ahamda labe ibi iho Ala bake nasi tu vuzehi meedaha bak lam faasi uba vameadalo mozo. Aham di iube Adamam adam ahim Habelti Kainti iho Ala bake vou baedalo modemu ame dam behàsu labe iho Ala bake na loda. Lahana Habel labe aba aho lab oteme Ala bake lu vahusuhuda lamti labi am dubu Kain labe aba aho Ala bake lab lohona lamti labihasu vi ozom di bisi ahole modeheda Habelat lohoda am bak. Habel aho Ala bake nasi tu vuzehi meedàmu labihaha bak. Habel labe aba aho Ala bake lohoda lam Alat uledi vaha di lam Alat gi neha, “Abo neàte,” lahame gagu vaha bak. Labi aba aho lab nasi tu vuzehehe bak labet modi Alat neha, “Om im vamdesu meedam dàt modem bak,” lahame ab gagoham bak. Lahana ame da Habel gi aham di iube eloi setehenàme aba aho lab nasi tu vuzehi meedaha bak lam iba dam badate vouhodam bak lam lahasdam bak.
5. Labi laha Henok Ala bake nasi tu vuzehi meedaha labe am ba fi sivai eloho vaba gi Alat ahena tom vousai vaha bak. Labiha labe damat am alihi aasome nabidaha am alihi aam bili gi moho bak. Ame bak lama Alat Vameadaha Im Toedahana laba im nehi toehe bak ehe bak. Ame da Henok ahe di Alat tom vousai vaha vab di iube Alat fet nasi ozo, “Da lam bisi neà bak meedamda am bak,” lahame Alat deelehe bak.
6. Bak lam labiha labe iho nehi vi ozom bak. Henok abo Ala bake nasi tu vuzehehe labe iho ozom, meit Ala bake nasi tu vuzehem vabameam làhà Alat ba ame da laba deelem vabak. Meit fa Ala bake netàdi fa Amti vahelo àhàkemeam làhà ame da labe nasi neham bak meedale. Amu nasi neha, “Imbot. Ala na debu modeheda etei nim ehe bak. Labi ame Ala lam meit Aba ozobohudelo àhàkemeam làhà Aho fa ame da laba neà bak vi modi ame baleà vouhom bak,” lahame nasi tu vuzehi meedale.
7. Labi laha Nuh Ala bake nasi tu vuzehi meedam labe Alat aba gagoho im aho uledi ab modeham bak. Alat Nuh bake neha, “Damti bake azimna zi ahebu lamti Eho vao feàna olu ab beodume foli seddalo modemam tame,” lahame labi gagu modeha Nuh labe ozo, “Ala abo feàte,” lahame ahu adat iedi uledi ihe feàna ab modeham. Alat Nuh bake lab gagoho vao feàna lam amu ba bak niba labihasu modesuhu vabnàme Nuh gi ozahit uledi ihe feàna modehe bak. Am namti am adam labe im lahiti valo tezi elom vaba abo ahedem bak laba ozome ame ihe feàna ab modeham bak. Aba aho lab nasi tu vuzehi ame ihe feàna lam modehe bak labet modi iho nehi ozo, “Ame dam dua bak lam iho Ala bake nasi tu vuzehedaha vab labe ahole beodaha bak,” lahame ozobohudehe bak. Lahana ame da Nuh lam Alat vi ozodam di gi nehada. “Ame da Nuh lam abo im vamdesu meedam dàt modem bak,” lahame ozahit deeli gagu vaha bak.
8. Labi laha ame da Abraham labe aho Ala bake nasi nehi tu vuzehehe bak. Alat aham di iube Abraham bake lab tahi fet vameadaha di labe neha, “Om nasi om dam debuti om faaha bak lamti labihasu vou esmozi Eho oba gagolo modem bak iuba lale. Labi laba le ame bak lam Eho modi omti obo oho ba vou faat ladam dam debu lamti eho uba modi um bak dedamale tame,” lahame lab fet vameadaha im lam aho nasi Ala bake tu vuzehi meedaha labe Abrahamat uledi ab faleham bak. “Ame bak akete?” laham bak lam biehenàme ozahit fali Alat aba gagoho bak laba ladaha bak.
9. Alat aba neha, “Eho oba neha, ‘Laba lale,’ lahame gagoho bak lam ba um bak dedamale tame,” lahame fet vameadume esuhu bak laba Abrahamat nasi tu vuzehi vàmadehe bak. Ame bak lam gi, “Abrahamat ahamo am bak dedatele tame,” lahame fet vameadume esuhu vabak. Abo am adat Isakti am mekehàda Yakubti ame dam behàsu laba laha ame bak lam fet vameadume esuhu bak. Lahana Alat lab gagoho bak lam, “Um bak dedamale tame,” lahame lab fet vameadume esuhu bak laba Abrahamat nasi tu vuzehehenàme Abrahamat aho ame bak laba le lafuhu di labe ame di labe am bakelehe vabak. Ame da Abraham lamti am adat Isak lamti am mekehàda Yakub lamti labihasu gi bahagiki damali mei bake le tau azim dam lamti uloholi ba num aabo azihi vabak. Gi mome faatoiam num ee gagom kemah laba idetedam bak.
10. Neham bak ozome labihadaha bak. Abrahamat gi labaha bohu duzum num abo asum ahoba iuba moho num abo Alat am ahulat nasi vi ozome moho num laba azilo keàtet tu vi ozodam labe amu gi teohet kemah laba vou idetedaha bak.
11. Labi laha ame da Abraham labe am nam Sarati data faam bake vou faodaha vabamu aoli vou setehenàme Abrahamat aba aho Ala bake nasi tu vuzehehe bak labet modi Alat aba modi fa teudi am nam Sara modeme zubuli data ab faaham bak. Abrahamat gi Alat aba gagoho bak lam, “Om nam Sara labe ba daboseà faa tame,” lahame nasi fet gagu esuhu bak laba, “Alat ba imbode tame,” lahame nasi tu vuzehehe labe labihaha bak.
12. Abraham lam gi aoli seti ba am nam modem biem dàt modehenàme aho Ala bake nasi tu vuzehehe labe Alat aba modi teudi am nam modeme zubuli daboseà faasi aba aho ba vou faat ledam dam debu ab dualeham bak. Abo falo zi lamti itea feàna valau obe modesuhu kebe zi lamti uloholi feà bak fusi ba dem bak modesome modeha dem bili moho bak.
13. Eho etei lab gagoho dam lam iho gi Ala bake labaha bohu nasi tu vuzehi meedume ba elodaha bak. Alat iba ba modelo fet gagu esuhu im lam iba modehe vabna nasi elodaha bak. Lahana ame dam labe nehi ozo, “Alat iba lab fet gagu esuhu im lam ba imbode tame,” laham bak laba nasi tu vuzehedaha labe gi deelehat keàtet tu vou faodaha bak. Ame dam labe nasi fet ozome nehi gagodaha bak. “Iho bak niba esdam di im gi bahagiki damat mei bake teohe azihina ozomom damat modem bak,” lahame fet ozome gagodaha bak.
14. Eho nehi ozo. Dam labihasu gagodam dam lam ba bak niba deelem vabak. Abo, “Im bak aabo,” lahame vi ozome gagom bak lam gi abo bak ibida ba diamut le abobo azim bak laba ilahu labihasu gagodam labe vou faodam bak.
15. Ame dam labe iho lab gagoho bak lam, “Im gi bahagiki damat mei bake teohe tau azim damat modem bak,” lahaha bak lam ba bak iho amu vou esmoho bak lam ilahu, “Fa lase,” lahame gagodaha vabak. Gi ibi iho amu vou esmoho bake fa laba lalo àhàki ilahu meedameam làhà amu gi fa laha bak. Amu di iube fa lem neà di ehe bak dua labe amu gi fa laha bak. Lahamnàme ame dam lam ba labihaha vabak.
16. Lahana ame dam labe ibi iho lalo àhàki ilahu gagodam bak lam gi bak bisi neà bak abo bak asum ahoba iuba modesuhu bak laba le azim bake vi ozome ilahu gagodaha bak. Labiha labe ame dam labe iho Ala bake neha, “Iba vuusdam Boehàda Ala am bak,” lahame Aba gagom bak lam Am ba ladem vabak. Am abo gi deelehe bak. Labi ame dam labe ame bak ba ozobohudem bake Alat ame dam lam fa Aba tau azim bak laba ozome Aho num debu asum ahoba iuba moadaha bak.
17. Labi laha Alat ozo, “Abrahamat ba Am im aime modem uledeo? Moeo?” laham bak Abraham bake modi ozolo modehe di labe Abrahamat Ala bake nasi tu vuzehehe labe aho Ala bake vou baedalo am adat Isak Ala bake lolo modemna oteme vua vahudam bak uledi ahumdi esuhu bak. Amu di iube Alat Abraham bake nehi gago, “Om adat Isak lam bisi obo oho ba vou faat ladam dam debu vou mode lamda am am bak,” lahame fet vameadume esuhunàme am adat Isak Ala bake lolo modemna oteme vua vahudam bak uledi ahumdi esuhu bak.
19. Abraham gi nehi vi ozo, “Alat nasi fet vameadume esuhu im lam ba gi voom biem bak. Em adat elomeam ba ame im lam akati ba imbode? Eho ozom, em adat otemeam làhà Ala feà labe fa ame daboseà am eloho bak labet modi fa ahedem bak,” lahame nasi ozome esuhu labe am adat otem bak uledi ahumdi esuhu bak. Labihàmu iho nehi ozo. Alat amu di iube lab gagoho bak lam, “Om adat a otemule,” lahame gagu mali am adat fa vi vaha bak lam gi eloi fat ahedem bakti ulohona ozomomnat modehe bak.
20. Labi laha Isak labe aho Ala bake nasi tu vuzehehe labe am adam ahim Yakubti Esauti ozome Ala bake nehi tom gagoho bak. “Ala oa, Oho ame data ahim niba im neà bak modi esuidale,” lahame tom gagoho bak. Labi laha ame dam ahim labe ibi iho ba modem im nasi vi ozome fet vameadume vou esmoho bak. Lahana ame bak modehe di labe ame im lam aaha vabna gi Ala bake nasi tu vuzehehe labe labi fet vameadume vou esmoho bak.
21. Labi laha Yakub labe aho Ala bake nasi tu vuzehehe labe im nehasu modehe bak. Am elolo vabalehe di labe am tai ahim lam abo am adat Yusuf labe am adam ahim laba anekehà odosu Ala bake neha, “Ala oa, Oho em tai ahim niba im neà bak modi esuidale,” lahame fet vameadume vou esmoho bak. Lahana ame bak modehe di labe ame im lam aaha vabna gi Ala bake nasi tu vuzehehe labe labi fet vameadume vou esmoho bak. Labi am aolehemu am ohu nom bohusu am odoamso laba odosu Ala bake vou baedaha bak.
22. Labi laha Yusuf aho Ala bake tu vuzehehe labe am elolo modem di labe am dubu giidate gagodume vou dozeadume neàdi nasi fet vameada. “Alat um Israel dam Mesir bak vou esmozi fa Kanaan bak laba um vou la tame. Labihàmu uho em eloi neàdi Mesir niba esumzidamehamdi im dam fa Mesir bak mu vou esmozi Alat im dam zoho fa Kanaan bak laba ba diamut vou lalo modem di labe em faa ateme vou lale,” lahame nasi ozome it vameadume vou esmoho bak. Ame bak aaha vabna aho Ala bake nasi tu vuzehehe labe nasi fet vameadume vou esmoho bak.
23. Labi laha Musa labe am aiti am oiti laha Ala bake nasi tu vuzehehe labe im nehasu modehe bak. Musa alimeat faaha di labe am aiti am oiti aaha im daboseà zimboz neàna faahemu deeli damat aame otem bak labna zohàme ahit aa vasti num bumata ousdume ala làtela folehe bak. Ba Mesir boehàdatebo labe aba aho gagu vàmadi esuhu im lam, “Daboseà etei faahada ahebu Nil Soabo laba voedume fà elodase,” lahame labi fet gagu vàmadi esuhu im lam ailahigeàmu ba iedem vaba gi ve ahit aa vasti num bumata ousdume ala làtela folehe bak. Musam ai lamti am oi lamti iho Ala bake nasi tu vuzehehe labe labihaha bak.
24. Labi Musat laha Alat aba gagohona lam aho nasi tu vuzehehe labe aho im nehasu modehe bak. Mesir boehàdatebo am adnamat labe ame da Musa ve voame vou buduali busaoli neàdi Musat neha, “Em ba Mesir boehàdatebo labe am num feàna laba nazoh feà bak laba deelehe neàt tau azim moho bak.
25. Em gi fa em dam totbaho abo Israel dam abo Alat vuusdam dam laba eho taum labe dam giida totbaho labe fà eba fai baket modi em tau geàdase. Eho ozoha, eho labi modem vabameam làhà eho num feàna neà bak azim bak lam em gi faina meedamna ozomom bak. Bak lam gi teohet deeli meedume setemnat modem bak,” lahame Musat ab vi ozome ame baket ab modeham.
26. Labi laha Musat nehi ozo, “Alat ba diamut ibi iho Aba tu vuzehi meedaha bake gohali lomna asum ahoba laba eho va tame. Labihàmu gi Mesir niba aidume damat eba ee feàda talu em soa maehe nazoh dualem bak lam em moho bak. Lada lam Alat ozoha, bisi feà kai. Bisi feà bak gi neham bak. Eho Alat Gagu Fihasi Vimteme Olulo Modem Dat Boehàda ba lemda laba eho nasi tu vuzehi meedàmu damat eba tozome feàtàdume em fa lademnàme em gi ozahit im lada lam modelo. Lam bisi neà bak am bak,” lahame labi ozome ame baket ab modeham.
27. Labi laha Musat aho Ala bake nasi tu vuzehi meedam labe Mesir boehàdatebo labe aba fakem bake ba iedehe vabna ozahit Mesir bake vou esmozi gi bak aotba baa bohu dam vaba alim bak laba ab laham bak. Am gi iho damat aam biem Ala laba aho fako zisu vou aasdam bak ozomom dàt gi am ahulat lab ozoho bak laba vi ozome vàmadi ozahit keàtet laha dàt modem bak.
28. Labi laha Musat Alat aba gagoho im nasi tu vuzehehe labe aho neha, “Alat Am im gagu vou usemda meoda dam beodume folemda labe ba am Israel dam lam ba beom vabak,” lahame Ala bake nasi tu vuzehehe labe aho Israel dam labe Im Adam Datahida Alat Oddaha Vabat Labohotehe Bake Vi Ozome Roti Fikidehe Vabna Àme Iziam bak abo Paskah lam ab faaham bak. Aham di iube Musat aho ame Israel dam bake im nehasu vameadaha bak. “Uho domba fi ho oddume neàdi am vasea totbahota ve iho vahi ame na fi ho àdam num labe am doo bako tot labe am ahoba utso tetehesuhuda lamti labi am obe tom zisuhuda behàsu lamti na fi ho labe am vasea foodale,” lahame gagohemu ame dam labe ame baket meedaha bak. Alat Am im gagu vou usemda meoda dam beodume folemda Mesir bak laba nom olu ladaha di labe Mesir damat faadaha adam datahida fi me oddalo modem di labe aho aameam ame Israel dam labe iho im num doo laba na fi ho vaseat fooho bak lam aameam ame da meoda labe ba im num doo laba oli iho faadaha adam datahida ba oddam vaba gi aalahigeàmu labohotedam bake labihaha bak.
29. Labi laha im tai ahamda zi labe iho Alat iba vameadaha im laba tu vuzehedam labe im nehasu modehe bak. Musat aham di iube aho Israel dam vou ladume Ket Usimoho Itea Feàna laba fusi biom biehemu aho neha, “Alat um ahebu soat vausu fa vei neàdedam bak lam um aada tame,” lahame labi gagu ame Israel dam labe ibi iho Ala bake nasi tu vuzehehe labe ame Ket Usimoho Itea Feàna bioho di lam ame vao gi fatahivai vao vima zoho vousai zitousu modesu. Labi vao zuma zoho vousai zitousu modesu. Labihazobe donibu vao vabali setehezobe ame Israel dam gi donibu vao vabak labe ab biodaham bak. Abo gi bakti ulohona ozomomnat biodume fa zituadaha bak. Lahana ame Mesir meo dam labe neo vi biodasome modeha Alat mali ame Mesir dam lam vao labe fa baguamdi dam ab teddume elodume seddaham.
30. Lada lam labiha. Labi gii mei lahi Rahab labe aho Alat aba gagohona lam aho laha tu vuzehehe bak. Aham di iube Israel meo dam vuusdam boehàda Yosua labe aho am meo dam behàsu utasi gago, “Um behàsu nim nasi Yeriko laba le vime aameam dam lam duao? Koeo? Iho beom neào? Laham bak aame neàdi fa eba li gagole,” lahame ame Yeriko bak laba oluhu di lam ame Yeriko laba tau azihi nam fi lohona Rahab labe aho gi ozahit ame dam giida behàsu lam ule neàt gut ve am num laba ousu vastehe bak. Ame nam Rahab labe aho Ala bake nasi tu vuzehehe labe Yeriko bàhàgo tot iuba vou vahe ziddume vousai vabousuhu ke zi feàna lam fegube goaitoi nom ilu ame Israel dam labe fa ame Yeriko laba azim dam abo Ala bake uledi tu vuzehi meedaha vab dam laba beodume folehe di lam ame nam Rahab lamti tau otehe vabak. Labi laha aham di iube Alat fa Israel dam bake neha, “Eho num debu Yeriko uba lo tame,” lahame labi gagu ame Israel dam labe iho Ala bake nasi ab tu vuzehedaham bak. Labi tu vuzehi meedam labe ame num debu labe am bàhàgo tot iuba ke vou vahe ziddume vousai vabousuhuna feàna laba ame Israel damat iademe vamdesu nao ulohodesu vou nimia ladume vou fi bodaha bak vàmadi esu. Labi neo digat meida labe ame baket mode. Labihadume digat tujuh lehemu ame digat tujuhleheda labe neo vou nimia ladume vou fi bodaha bak fa tujuhli modeha ame ke vou vahehena zi feàna lam ab fegube goaitoi nom iluham bak.
32. Eho etei lab gagodaha dam lam abo Ala bake nasi tu vuzehedaha dam lam abo duate. Lahana ame im lam eho bisi vi vameadameam ame im bohu lam bohula labe di folem bak. Labihàmu em gi niba novalo modem bak. Abo Gideonti Barakti Simsonti Yeftati Daudti Samuelti labi dam ahamda Alat vameadaha im aime fa dam bake ahate vameaidaha dam zi totbaho lamti labihasu ibi iho Ala bake nasi tu vuzehi meedaha im lam laha bohula labe ba uba vameadam biem bak.
33. Labi ame dam ahamda labe iho Ala bake nasi tu vuzehi meedaha labe im nehasu laha meedaha bak. Dam debu mei dam debu mei lahame vuusdam boehàda zi labe im meo damti laham dam laba beodume fa im bakeli veimada. Labi laha ame dam totbaho labe im dam vuusdam di gi iademe im vamdesu meeda. Labi laha ame dam totbaho labe Alat iba lolo fet gagu esuhuna lam fa vada. Labi laha ame dam totbaho labe nohubake azimna meona ee gagom singa lam iba veehe vaba iho fa teo beoda.
34. Labi ame dam totbaho labe iho Ala bake nasi tu vuzehi meedam labe ba vua meona laba elodaha vabak. Labi laha dam amomoi labe, “Iba fa ae tot mo tot mo lahamnat fi kebe otese,” lahame meedaha bak lam ba beoho vaba itame fa ahededa. Labi ame dam totbaho lam gi bee damat modemnàme Alat modi fa teudeda. Labi ame dam totbaho labe dam debu meidati ot belui ot beluidalo modem di iedem vaba gi fa meolida. Labi dam bahagikida iba fakem dam abo bak iube leheda dam labe iba beodasome modeha bak dedam labe fa vei meoli feà bak fuhemu fa vei iedi ililo meeda. Gi labihasu meeda.
35. Labi lahi totbaho labe iho Ala bake nasi tu vuzehi meedam labe ibi mei dam elodahada lam Alat modi fa ahededume fa vame asimdida. Labihada. Lahana dam totbaho labe iho Ala bake nasi tu vuzehedahemu dam amomoit iba sihida labe fa iba beodume im fa elodam bak fa ulededa. Ame dam iba sihida labe iba neha, “Uho Ala bake tu vuzehedaha bak lam fa voedale. Uho voedameam làhà iho ba uba beom vaba gi fa um isi ouda tame,” lahaha bak lam mu fa elom bak fa ulededa. Ame dam labe iho nehi ozo, “Im elomeam Alat iba modi fa ahededume usnadume im gi Amti vahi gi ahe neàna bohu vuusdam bak,” laham bak modelo àhàki gi ozahit ame dam labe iba beodume elodam bak fa ulededa. Ame dam iba fa isi olumeam im fa Alati vahem vaba gi bak niba azim di gi fai bak tadem bak moho labe labihadam bak.
36. Labi dam totbaho labe iho Ala bake nasi tu vuzehedahemu dam amomoit fa iba tozome igeaom bak meeda. Labi laha damat im ve fa iba na sokba nasbe ahit alibulehena labe iba beodume foozedume vaseaeda. Labi laha meit im si fa bes botehà niz labe im anekehàti naoti giame fa sel oumaheda.
37. Labi laha damat iba kebut beodume im dam totbaho eloda. Labi laha damat im ve fa gergaji visoi im so doni bak laba ukbodume voeda. Labi laha damat ae tot mo tot mo lahamna labe iba beodume im eloda. Labi ame dam totbaho labe im doi vabali sue vam bi gi domba modeo, kambing modeo, ame na fi ho labe am sokba vuavai àga bake esume fa dehali sueli duada. Labi laha num vabali gi bak iuba goda bak iuba goda labihada. Labi laha damat iba fa vabidume beodume modi geàda.
38. Ame dam labe gi num debu bak vou esmozi fa bàhàgo iuba itame gi bak aotba baa bohu dam vaba alim bak laba ideteda. Fa sibu bake ideteda. Fa gi ke bumat modeo, bak bumat olozeheda modeo, laba azieteda. Labihasu meedam bak. Eho ozoha, ame dam bakda nibe fa ame dam laba beodaha dam lam bisi fai labe fa dam Ala bake tu vuzehedaha dam lamti fa bak niba fa vahem bak gi feidam vaba? Aiee! Dam lada lam gi voom vaba? Akati dam bisi faidati fa dam neàdati fa valiheme vahi esuhela?
39. Eho etei lab gagodaha dam lam ahebu iho Ala bake nasi tu vuzehedaha bak. Labiha labe Alat ame dam laba deeli, “Um ahebu abo im neàna modehe bak,” lahame deeli labi vou baedaha bak. Lahadamnàme Alat dam laba lolo fet gagu esuhuna lam ahebu ame dam labe ame na vadaha vabak.
40. Alat Aho ozahit lolo modemna ame dam laba gagu esuhuna lam nasi ame dam laba lom mali vou faodam bak. Neham labe labihaha bak. Alat Aho ame dam ahamda lamti fa im ba Yesus bake tu vuzehedaha dam nimti ba diamut bisi neàna lom bak lam abo Yesus Aba Aho tohe duzu meedam bak labet modi im fa Ala bake ot netàdiam bak lam Aho fet ozome esuhu labe ame dam ahamda labe ame na nasi vadaha vabak. Alat ahit imti fa ame dam lamti ba diamut vahehezobe ame di lam Aho im ahebu modi neàbodem bake nasi ame dam laba Aho lolo gagohona ahebu nasi lodaha vabak.
1. Emti vahi Kristus bake tu vuzehi meedam dam oa, eho ozoha, Ala bake nasi tu vuzehedaha dam ahamda zi lam Alat iho aame ozobohudem bake ab vimteham bak. Ame dam zi lam gi dam nehi modem damti uloho bak. Damat sikim di, “Amat nasi meoli lafuela?” laham bak meedam di dam gi vi dozeadume aasdam labe vi vabededam dam lamti uloholi iba vi vabededamna ozomom dam am bak. Ame bak lam im ozobohudehemu imo nasi ahu fi goaitoi faina meedam bak lam nasi fa voedume seti fa ahu vàmadi keàtedi gi Alat Aba Aho iba neha, “Im nehasu meedale. Im nehasu meedale,” laham bak laba abo Aba Aho ozoho bak laba vi ozome mahate meedume folese. Abo damat sikim di, “Amat nasi emoeme novaha bak laba lafuela?” laham bak modelo modem di dat am sue ahobada bisi asimbuda fa vihilame afoezobe dehabali emoeme meodem bak lamti ulohona modese.
2. Abo ame emoemda labe aho novam bak laba am ahulat vitasu emoedam bak lamti ulohona modi iho im ahulat gi Yesus bake vitasu meedase. Iho tu vuzehi vou mode ladume iba modi neàbodemda Yesus am bak. Ame Da labe Aho nasi Am Ai Ala bake lab tu vuzehi vou meedume bisi neàbodehe labe, “Iho laha ame baket meedase,” lahame Aho ab vouhodaham bak. Ame Da Yesus labe Am eloi ba neàdehezobe ahagoa foou neàdi deelem bak laba fet ozoho labe damat Am ve ame ut tetehesuhunaso laba nom esu paku dou eloho di labe Aho feàna geàdam bak lam Aho gi ozahit keàtet geàdam bohu meedume eloho bak. Am ut tetehesuhunaso laba nom esu paku dou vousaha di lam damat tom aame tozom labe ame Da lam gi ladem dàt moz. Lahana Yesus gi ozahit keàtet geàdam bak bohu meedume eloho bak. Labi etei nim ame Da Yesus fa ahedi usai Am Ai Alat azihi bak laba tom ilu Am ahi totbaho laba tau nusu feà Dateli na ahebu ab vuusdamam bak.
3. Dam faina meedam dam labe iho Yesus mu fa Aba meoli bisi fai bak vou meedume geàdahanàme Yesus gi ozahit keàtet betea vou meedume eloho bak. Uho ozom, um labihahe? Vabà! Uho faina meedam bak lam keàtet it mali meedam di lam damat uba vabidume uho Yesus Am vasea veàtoho bak lamti ulohona modi um otehe? Vabà! Labihàmu um ahu nemahusi fa ubu uho Yesus bake lab tu vuzehedaha bak laba fa mu voedamna zohàme gi Yesus labe Aba Aho meedam bak laba vi ozome keàtet meedale.
5. Labi laha meit Alat Vameadaha Im Toedahana laba nehi toehe bak lam a vabi voomule. Abo im bakda nibe im aiat am data laba vausu im vahokedam bakti ulohona Alat uba laha im vahokedam im laba vi ozodale. “Em data oa, Boehàda Ala oba im vahokeme um ozobohudelo modem di a gi ailahigeàmu voomule. Labi oba beome itaholedam di a bisi ahu faidi nemahusi odohalehebeat modemule.
6. Neham bak. Alat Aho iba faobekesi deelem bak lam im ozobohudem bake Aho iba ahit im vahokedume itaholi vamdedam meot. Labi laha Aho neha, ‘Em damat modem bak,’ lahame uledi vam dam, ‘Im ame dam am tame,’ laham bak im ozobohudem bake Aho ahit iba beome itaholedam meot.”
7. Alat uba labi im vahokeme um ozobohudelo modemu Aba Aho uba modi geàdam di uho gi geàdamnàme keàtet meedale. Neham bak. Aho uba lab im vahokedume um ozobohudelo modem bak lam Aho gi im bak damat iho data ibida iho vausu im vahokedume ozobohudem bakti ulohona meedam bak. Iho ozom, im bakda ahebu im data vausu im vahokedume ozobohudem baket meedam damat modem bak.
8. Alat neha, “Am damat modem bak,” laham dam laba im vahokeme ozobohudedam tadem bak. Labihàmu Alat uba modi um ozobohudelo modem vabameam làhà um gi meit aa modeme faaha data abo im vahokem vab labe ba Alam dam imboda modem vabak.
9. Uho im nidi nim laha ozomale. Im bak dam nibe im aiat iba koe diat vausu im vahokedume im ozobohudelo modem di iho ahu adat iedi deelehat vou baedam bak. Iho labi modemeam làhà im Ai Feàda labe abo im ahu vou faovoi vou aasdamda labe Aba Aho iba im vahokedume im ozobohudelo meedam bak lam iho gi deelehat uledi meedam bak lam bisi meedam tademda am bak. Abo ba diamut Alati vahi gi ahe neàna bohu vuusdam bake labihaha bak.
10. Im bak dam nibe im aiti oiti iba vausu im vahokedume im ozobohudelo meedam di bisi bohu vausdam vabak. Gi ibi iho ozoho bak fum di labe vausum bak vaitom di am bak. Lahana Alat iba im vahokedam di gi im neàdem bak laba ozome meedam bak. Aba Aho iba tau modi Amti uloholi bisi neàbodem bak laba ozome iba im vahokedam bak lahasdam bak.
11. Alat iba im vahokelo beome itaholedam di lam im ba deelem vaba gi ahu faidi geàdume molo vi ozodam meot. Lahana ame lab beome itaholedam bak lam iho gi ozahit deeli uledi meedume ozobohudemeam làhà im gi im vamdesu meedam damalem bak. Labi laha iba modi im ahu faheme nigom vaba gi vabademsu modesdam bak.
12. Um anekehà nemahusi bedi nom oloalaha bak lam nasi vousale. Labi um nao nemahusi duzum biehe bak lam nasi fa duzum bak teudele. Ame bak lam eho gi neham bak ozome uba gagoho bak. Ubu uho Yesus bake lab tu vuzehi meedam bak lam a bedi mu voomule. Fa gi keàtet teudi labaha bohu vuusu meedale.
13. Ubu uho im Boehàda bake lab tu vuzehi meedam bak lam gi iademe vamdesu meedale. Uho labiham labe dam Kristus bake tu vuzehi meedam dam totbaho fa molo modem dam labe uho lab vamdesu meedam bak laba fa vi aame ibi iho bitem bakti ulohona modehe vaba fa vi teudeda. Abo dam nao nisili gohatem bili meedam dam lam modi fa neàdi teudi fa gohatem bakti ulohona meedale.
14. Emti vahi Kristus bake tu vuzehi meedam dam oa, uho fa dam ahebu vazisi ot fakiam vaba neà esdale. Labi um Alam damalehemu Alat Aba Aho gagoho im lam fi hasi mahate vamdesu meedale. Dam im fi hasi vamdesu meedaha vab dam lam ba diamut im Boehàda alihi aam vabak.
15. Alat uba ozahit deeli im neà bak meedam bak lam uho meit fa mu voedam bak labna zohàme um ahebu mahate ot vou faovoiame modidale. Labi laha um meidavat fa am dam totbaho laba fakemoholi meedam bak labna zohàme iademe ot vou faovoiame modidale. Uho vou faovoem vabameam kehàm vaba ame da labe uho lab vabademsu meedam bak lam modi fa vàhàdi fa aho meia fakemoholehe bak lam fa um dam totbaho laba fa neo vizi faidedam bak. Abo na omnao ahakebuna labe kehàm vaba am so laba vizi ahakebulem bakti ulohona modem bak.
16. Labi laha uho meidavat fa ostame fi loholedam bak modemna zohàme mahate ot vou faovoiame modidale. Labi laha uho meidavat fa Ala bake vi ozom vaba vedi ubu uho ozoho baket meedam bak labna zohàme mahate ot vou faovoiame modidale. Uho fa dat ahamda Esaut meedaha bak lamti ulohona meedam bak labna zohàme mahate ot vou faovoiame modidale. Esau aho ahamte datahili ee feàna taluhu bak lam abo Alat modehena lam aho vedi neha, “Feà kaio,” lahame am aiat ba misialemna lam aho ba vamna vedi gi fa am vahada bake na àmna fi lihiba vàmtea ot loiaha bak.
17. Bak lam um ozobohuna taia? Am vahada bake ame na lam vame neàdi ba diamut am ai elolo modem di labe am ai bake neha, “Eba laha im neà bak it vameadume vàmadi esule,” lahame tauleha ba am aiat aba im neà bak it vameadam vabili moho bak. Aho amu datahilehe bak labe na misia valo gagoho bak lam fa am vahada bake gi amu gagu esu setehemu ba aho mebet vi tauledamnàme ba aba im neà bak it vameadaha vabak. Aho amu git modi vàhàdehe labe ba modi fa neàdem biehe bak. Uho ame da labe aba aho meedaha bakti ulohona modem bak labna zohàme mahate ot vou faovoiame modidale.
18. Uho neha, “Imti Alati fa vahese,” lahame Ala bake netàdelo meedam di um ba dam ahamda Israel dam labe ibi iho meedaha bakti ulohona meedam vabak. Dam ahamda labe vedi nehi meeda. Aham di iube Alat Israel dam bake ame Im Feàna fet vameadume vàmadi esuhu di lam aho gi Sinai Sibu labet faasi vameadaha bak. Ame Sinai Sibu lam gi damat aadamnat modem bak. Labi ame Israel dam ahamda labe iho Musat fa ot vai iba vameadam bak lam ailo ame sibu netàdi ohuba bak laba duzu tom aaha di lam ame sibu ahoba laba vua feànat eludam bak tom aada. Labi laha ame bak laba ulo gihoti vuahubuti aada. Labi ame bak laba laha nutabe feà foadam bak aada.
19. Labihasu aadam di labe neo domba dooda moso ohula tom futohona labe omati ulohona trompet labe am dae vàmtea bohu buddamna dogoit aida. Labi neo Alat Am dae feàna neo aida. Labi aidume modeha dam na aihi dam labe iedi modem faidi, “Iba a vameadamule,” lahame iedi budda.
20. Neham labe mali buddam bak. Alat amu neha, “Sibu adba bak nim Eho guti vaha bak niba uho a zidazi ba koena alihi ulamule. Abo damat modeo, na fi holehena zi ahebu modeo, ame sibu adba bak nim ulameam ab elomam tame. Uho meit niba zidazi duzum bak modeo, gi koena ulam bak modeo, labihasu modemeam làhà ame da lam ab elomam tame. Eho gagu damat fa ke zi visomoame ame da lam modeo, ame na fi ho modeo, beodume elo tame.” Labihasu vameadume fi hasi esuhu lam ame dam labe vedi, “Iba a vameadamule,” lahame iedi buddaha bak.
21. Ame Israel dam ahamda labe iho Sinai Sibu laba lab meedaha bak aaha bak lam abo meia modi ahu gelevai iedi feà bak fumna meedaha bak. Gi dam lamota iedehe vabak. Abo ame dam vuusu vou lahada Musa lam laha tau iedi gago, “Em abo iedi modem faidi fa gukedalo,” lahame gagoho bak.
22. Ame Israel dam ahamda labe amu gi labihaha bak. Lahana uho etei dam bada nibe neha, “Yesus abo Alat Aba Aho fet vameadume vàmadi esuhu im gàhàda tohe duzu meedamda lamti imti fa vahedase,” lahame Ala bake netàdelo meedam di nim um ba ame Israel dam ahamda labe ibi iho ame Sinai Sibu laba netàdi lab meedaha bak lamti ulohona meedam vabak. Um gi Sion Sibu lamti kota Yerusalem asum ahobada ium abo Ala elom gikida ahena bohu vuusdam Ala labe Aho azihi num debu asum ahoba iuba le lafusi avaesu ab dozeadahana ozomoham bak. Labi laha Alat Am im gagu vou usem dam zi feà labe deelehat bakamta vahehena zi lam abo dem biemna zi feà laba um laha ab le lafusi avaesu ab dozeadahana ozomoham bak.
23. Labi laha Yesus bake tu vuzehi meedaha dam abo Alam damalehe dam zi abo adam datahiledaha dam modem labe im aiat iba neà bak it vameadam dam modemna ozomom dam zi labe im ee Alat amu asum ahoba iuba fet toedume vàmadi esuhu dam zi laba uho laha ab le vi tau vahedaham bak. Labi laha uho Ala bake abo im bak dam ahebu iho meedaha im ozobohunàme gi gagodume aidume neàdi fa gagu fahedamda laba uho laha ab le lafusi avaesu ab dozeadamna ozomoham bak. Labi laha uho Alam damalehe dam amu bak niba esdam di gi im vamdesu meedam dam labe elodume it oazehena labe asum ahoba iuba le Alat modi fa neàbodedume esdahana zi laba uho ab le lafusi avaesu ab dozeadamna ozomoham bak.
24. Labi laha Alat neha, “Bak damat iho Yesus bake tu vuzehedaha labe Eho uba vi ozom di um gi, ‘Im vamdesu meedam damat modem bak,’ lahame Eho ame dam laba ozahit deeli gagu vadam bak,” lahame Aho lab fet vameadume vàmadi esuhu im gàhàna lam doni tohe duzu im vameadamda Yesus bake uho ab le lafusi avaesu dozeadamna ozomoham bak. Ame Da Yesus labe Aho ut tetehesuhunaso laba Am vasea veàtoi eloho bak lam meit Aba tu vuzehemda labe aho faina meedam bak lam Alat fa faamome vei neàdedam vasea am bak. Yesus Am vasea lab veàtoho bak lamti labi dat ahamda Habel labe am na fi ho oteme ame na vasea lab veàtoho bak lamti labihasu vi ozodam di bisi feàda Yesusam vasea am bak. Neham labe labihaha bak. Habel labe aho Alat aba gagohona tu vuzehi meedàmu na fi ho oteme vasea veàtoho di labe Alat aba vi ozome ab gagoham. “Om abo im vamdesu meedam dàt modem bak,” lahame ozahit deeli gagu vaha bak. Lahana Yesus am vasea lam abo Alat Aba Aho ba fet vameadume vàmadi esuhu im gàhàda lam abo Aho iba neha, “Im im vamdesu meedam damat modem bak,” lahame iba ozahit deeli gagu vadam bak lam faasi meedam vasea am bak. Labihaha bak.
25. Labihàmu uba etei im vameadam Ala labe Am im uho a ailahigeàmu mu voomule. Abo mahate iademe aime meedale. Nehaha bak. Ame Israel dam ahamda labe iho Musat aho Alat vameadaha im aime fa ot vai vameadaha Im Feàna lam ame dam labe iho ailahigeàmu vooho di labe Alat ame dam laba gi aalahigeàmu mu vooho vabak. Abo beodaha bak. Uho ozom, im etei asum ahoba iuba azihida labe iba vameadam im lam iho ailahigeàmu fa mu voomeam làhà im ba beoho vaba gi labihasue? Vabà! Abo iba laha beom bak. Im amuda lam gi bak damat vameadaha bak. Lahana etei nim ba iba vameadamda nim abo asum ahoba iubet iba vameadam bak.
26. Alat amu Sinai Sibu labe ame Israel dam ahamda laba im vameadaha di lam am dae feà labe modi bak ititidaha di gi bakta modi ititidaha bak. Lahana Aho ba etei im nehasu neo gagu esuhu bak. “Ba diamut Eho fa neo modi bak ititidaha vàmadi bak vàhàdeme sete tame. Lahana ame di lam gi bakta modem vabak. Abo asumti modi ititidume afoezobe vaitom bak,” lahame Aho labihasu fet gagu esuhu im ehete.
27. Aho lab fet gagu esuhu im lam, “Ba fa neo modehe bak vàmadi vaito tame,” lahaha bak lam eho fa uba nehi iademe vameadume um ozobohudelo mozo. Alat Aba Aho meedume vahedaha na zi lam ahebu Aho modi fa ititidume vàhàdedume sedda tame. Ame na zi lam abo gi labaha bohu vuusdamnat modem vabak. Lahana na abo gi labaha bohu vuusdamna abo ititidume vàhàdem biemna zi lamota vekem bake Aho labihada tame.
28. Labihàmu imo Alat Aba Aho dam bake vuusu im vahokedam bak laba iho vi taui vi tauidume vahi Aho fa iba vuusdam bak laba abo ititidam vaba gi labaha bohu vuusdam bak laba vi ozome Ala bake, “Neàte,” lahame vou baedase. Labi imo laha gi im ahu adat iedi im Aba Aho ozohoda lamota ule neàt meedam labe Aba vou baedase.
29. Neham bak. Ibi iho vou baedam Ala lam abo vua feàna na ahebu beodume foli setem vuati ulohona modem Alat modem bak.
1. Emti vahi Kristus bake tu vuzehi meedam dam oa, uho gi im nehasu meedam bohu meedale. Uho im Boehàda Yesus bake tu vuzehedahemu um gi ab amedamali ot deeli ot deelidume ab meedamam bak. Labihàmu uho lab ot deeli ot deelidume meedam bak lam gi mahate labaha bohu vuusu meedale.
2. Labi laha dam bahagikida lem di uho um num a malemule. Abo gi deelehat gut ve vou ile. Neham bak. Etei leheda lam om biem dat mei abo Alat Am im gagu vou usemda modeo, abo damat modeo, laham bak lam om biem bak. Aham di iube damat laha vabi dam amomoi lehe tibame ve vou iha gi Alat Am im gagu vou usem dam vabi vou ihi bak.
3. Labi laha umti vahi Kristus bake tu vuzehedaha dam totbaho labe ibi iho tu vuzehedaha bak lam damat faki siàdume dam sime oumahedam sel zi laba oumahedaha dam laba uho a aame faobekem vaba gi aalahigeàmomule. Gi um dam laba vi tau geàdamna ozomom bak vi tau meedale. Labi laha dam totbaho labe ibi iho Kristus bake tu vuzehedaha bak lam damat iba vabidume fai bak meedume geàdam dam lam gi um dam laba vi tau vabidume geàdamna ozomom bak laba vi ozome tau vabededale.
4. Labi laha im ahebu iho bak damat nam vam bak lam, “Abo im feàna modemnat modem bak,” laham bak laba vi ozome iademe fi hasi meedale. Gi obo oho vahada lamota iademe vi ozodam labe meedale. Neham bak. Dat nam ehena vedi nam meibada va. Nam dat ehena vedi dat meibada va. Dat soaona git meeda. Lahi soaona git meeda. Labihasu meedam dam lamti ostame fi loholedam bak meedam dam ahebu lamti labihasu meedam dam labe ibi iho meedaha im lam Alat Aho vi ozome ozobohudi neàdi gi nehi gagom bak. “Um faina meedam damat modemu Eho uba uloome beoda tame,” lahame gagu vàmadi esuhu bak.
5. Labi laha uho bak niba esdam di a bisi doi dualelo àhàki deeli meedamule. Gi obo oho vaha zoho lamota ve asimdi neàdele. Alat amu gagoho im nehasu gagohoda ehe labe labihadale. “Em ba om bako vou esmom vabak. Em abo oba vou aasdam labe vi vabiedam bak.”
6. Alat amu labi gagohemu im gi Ala bake vou baedam im toeheda meida labe aba aho aham di iube toehe im nim, “Imbote,” lahame iho ozobohudi vi tau gagodam bak. “Boehàda eba taumda am bak. Em ba na eho iedemna vabak. Ek damat eba ana im modem bake eho iede?” Laham im lam iho ozobohudi vi tau gagodam im am bak.
7. Emti vahi Kristus bake tu vuzehi meedam dam oa, dam amu uba vuusu alimeat Alam im vahokedaha dam lam a fa vabili voomule. Gi ame dam labe iho eloho vab di iube abo gi iademe vou meedaha bak laba uho vi ozodume ame dam labe ibi iho Kristus bake lab tu vuzehi meedaha bak lam vi vouhodale.
8. Ame dam lam gi Yesus Kristus bake tu vuzehi meedaha bak. Ame Da Yesus Kristus lam ba veimdi amomoidem vabak. Aba Aho amu lab modesuhu bak lam gi lahasda. Labi etei nim gi amu bak lahasda. Labi laha ba neo diamut gi ame baket lahasda. Gi labihasu bohu vuusdam Dàt modem bak.
9. Labihàmu dam amomoi uba li im amomoi abo Alam im imbona lamti uloho vabna abo bak damat ihimo ozome fi ham im lamohoda uba vahokedam di a aime tu vuzehi meedume zie fàusi bak vabiem bakti ulohona a meedamule. Ame Israel dam ahamda labe iho ame Im Feàna vuusu ulohodesu meedam di lam iho àmna fi hasi meedamna abo duate. Lahana iho ozom, ame dam labe ibi iho lab àm fi haha bak lam iademe fi hasi meedam bak labet modi ba dam bake soat vausu fa vei neàdemnat modem vabak. Labihàmu iho ame lab iademe fi hasi meedam bak laba vi taum labet ba iba modi im ahu teudem vabak. Gi Alat Aho iba ozahit deeli im neà bak meedam bak labet modi im ahu teudem bak am bak. Lam bisi neà bak am.
10. Labi ibi iho etei vuusdamna lamti labi Israel dam labe ibi iho modi baleài vuusdamna lamti ozom di ibi iho vuusdamna lam bisi neàda am bak. Im gi Yesus bake vuusdam bak. Neham labe labihaha bak. Israel damat faina meedam bak fa faamome vei neàdedalo modemu vou li Ala bake vou baedalo otehena fi ho lam ame Israel dam bake vuusdam tohedatebo labe aho ve damat esuhu bak labe labohoti abo bàhàgo bak iuba vou le vua vahudume faali seddaha bak. Alat mali fi hasi esuhu labe ba ame na vahudamna zoho lam ame tohe dam abo ame Teohet Mome Fa Faatoiam Num laba meedam dam labe ba àhà vabak. Lahana Yesus etei am vasea veàtoho labe Alat iba faobekesi ozahit iba deeli im neà bak meedam labe faasi gàhàdehe bak lam iho Kristus bake tu vuzehi meedam dam nim im ahebu vi tau ame neà bak ab vadamam bak.
11. Nehaha bak. Aham di iube damat faina meedam bak fa faamome vei neàdedalo modemu vou li oddaha na fi ho labe im vaseata ame Israel dam bake vuusdam tohedatebo labe aho ve ame Teohet Mome Fa Faatoiam Num labe am Bisi Fiham Zoho laba vou oli aba aho modem bak modeme neàdi aho fa futoi neo ame na fi ho labe im odot nu ahebu lam ateme fa ame bak tomba labe vou futoi damat esuhu bak labe labohoti abo bàhàgo bak iuba vou le ia vame vua vahudume vahusu faali seddaha bak.
12. Ame Da Yesus labe laha ame bak lam nehi vouhoho bak. Am damalehe dam nibe iho faina meedam bak lam Aho fa faamome iba modi neàbodedam bake Aho neha, “Aho ot vai Am vasea veàtoi elose,” lahame vi ozome damat Am ve kota Yerusalem labe bak obe laba ke vou vahe làbome vou zizehena labe am doo vou futoi bàhàgo bak iuba otehe bak. Abo ame na fi ho labe am odot nu lam gi bàhàgo bak iuba le vahudaha bak lamti ulohona modehe bak.
13. Labihàmu iho etei neha, “Iho ame Israel damat ibi iho modi baleàhà im feàna lam iho vi tau meedam labe Alat iba soat vausu fa vei neàdem bak am tame,” lahaha bak lam imo nasi voose. Imo gi Yesusta tu vuzehi Aho fà iba soat vausu fa vei neàdedase. Labi iho labi modehemu damat iba tozome feàtàme im fa lademnàme imo gi ozahit meedase. Abo damat amu Yesus bàhàgo bak iuba vou le damat Aba tozome feàtàhà bakti ulohona vi meedase.
14. Neham bak. Bak nim iho Kristus bake tu vuzehedaha damat abobo azim baket modem vabak. Im gi bak asum ahoba iuba abo gi labaha bohu vuusdam bak laba ba diamut azim bake vou faodam bak.
15. Labihàmu Yesus iba tohe duzu tau meedàmu imo gi labaha bohu Ala bake vou baedase. Dam ahamda labe ibi iho amu na fi ho oteme Ala bake lodam bak lam gi modi vaitoi vaitoidam bak lamti ulohona im ba a labihasu meedamule. Imo gi, “Am abo feàte,” lahame ahate Am ee vousai labaha bohu vou baedase. Ame bak lam ibi iho Aba teo lohona ozomom bak am tame.
16. Labi laha iho dam totbaho bake neà bak bohu meedase. Labi laha nazoh ibida meia malem vaba gi deelehat uledi loidam bohu meedase. Ame bak behàsu lam laha ibi iho Ala bake vou baedalo modemu Aba lu Aho deelemna ozomom bak am tame.
17. Labi im nidi nim uho laha modele. Uba vuusdam dam lam uho bak niba esdam di uba vou aasu vabiedam dam am bak. Labi laha ame dam labe iho bak niba meedaha im fa gagu aimda Ala Am am bak. Labihàmu ame dam labe uba gagom im ahebu lam uho mahate aime uledi tu vuzehi iademe meedale. Ame dam labe ibi iho deelehat meedam bake labihadale. Uho mahate aime uledi tu vuzehi iademe meedam vabameam làhà ame dam lam ibi iho meedam bak lam gi ahu faidi gi fa odohalehebeat meedam bak lab tame. Uho labi modemeam làhà ba ame bak labet uba modi neàdemnat modem vabak.
18. Uho iba ozome Ala bake labaha bohu tom gagodale. Im gi ihimo naedamat ahulat it ozo, “Meit iba vàlu neha, ‘Um git modeho. Alat ba uba deelem vabak,’ ” lahame ba iba labi vàlu gagoho im vabak. Iho uba na im meedam di im gi, “Im vamdesu meedam tadese,” lahame ozodam damat im meedam bak.
19. Labi laha eho uba taho fa lem bake uho etei mahate iba vi ozome Ala bake tom gagodale. Ame bak lam eho gi uba tauledume gagodam bak.
20. Iba modi im ahu faheme nigom vaba vabademsu modesdam Ala Am am bak. Labihasu meedam Alat modem labe Aho neha, “ ‘Iho Kristus bake tu vuzehedàmu im gi im vamdesu meedam damat modem bak,’ lahame gi labaha iba ozahit deeli gagu vadam bohu meedam bak,” lahame fet vameadume vàmadi esuhu im gàhàda lam fa faasi vou mode ladam bak lam gi Yesus Am vasea veàtoho bak am bak. Alat neha, “Am Adat labe Am vasea ame bak lam faam neàte,” laham bak lam tombalelo im Boehàda Yesus abo domba na fi ho vou aasdamdati uloholi iba vou aasu vabiedamda lam Am eloho bak labet Alat modi fa ab ahedeham bak.
21. Labihasu meedam Ala laba eho nehasu tom gagodam bak. “Ai Ala oa, Obo Oho ozoho bak lam dam nibe iho modem biem bak lam, ‘Fà ozobohudi meedase,’ lahame Oho dam niba ahala modi vizedume ame baket meedale. Labi laha Yesus Kristus Aho tohe duzu meedaha bak lam Oho dam laba modi ozobohudi fà Oho iba deelemna lamota meedase,” lahame eho Ala bake labihasu tom gagodam bak. Imo gi Yesus Kristus Am ee vousai, “Am abo feàte,” lahame gi labaha bohu Aba vou baedase. Neàde.
22. Emti vahi Kristus bake tu vuzehi meedam dam oa, eho etei uba Ibranit modem dam laba eho toedaha sunit nim bisi im feàna uba vameadume bohulana toedaha vabak. Gi buuna toedaha bak. Uho eho lab vahokedam im zi lam abo sunit niba toedaha im zi lam a aim vanamamule. Gi betea azi vi ozodale.
23. Um im nidi nim biem bake nasi aimale. Imti vahi Kristus bake tu vuzehi meedamda meida Timotius lam damat amu si sel ousuhu bak lam fa isi oluho. Labihàmu ame da lam fa eba taho niba lefumeam làhà emti amti fa vei ahili uba le tame.
24. Eho, “Neàte,” lahame gagodam im nim uho fa dam neham dam laba ot vai vameadale. Uba vuusu Alam im vahokedam dam lam ame. Labi imti vahi Kristus bake tu vuzehi meedam dam totbaho num debu ubuda laba tau azim dam ahebu ame. Labihasu iho uba, “Neàte,” lahame labi gagodam bak lam uho ame dam zi laba ot vai vameadale. Labi laha imti vahi Kristus bake tu vuzehi meedam dam totbaho Italia bak labe niba lehe dam nibe laha uba vi ozome ilahu, “Neàte,” lahame vi tau gagoho.
25. Eho Ala bake nehasu tom gagoda. “Ai Ala oa, Oho dam niba ozahit deeli im neà bak dam niba modi esuidale,” lahame eho labihasu tom gagodam bak. Àhàm.
1. Yahudi dam Kristus bake tu vuzehi meedam dam abo Alam damaleheda zi labe faheme ahala fi goaitoi le esdam dam oa, neàte. Eho Yakobusat sunit nim toeme uba oluho. Alati im Boehàda Yesus Kristusti labihasu im na eba gagu eho meedamda am bak. Em labihamda modem labe eho sunit nim toeme uba oluho.
2. Emti vahi Kristus bake tu vuzehi meedam dam oa, naat uba, “Fai bak nim modem neào?” lahame uba modi ozolo modem im ahebu modeo, fai bak mei fai bak meime duzum di modeo, labihasu uho gi ozahit deelehe bohu vuusdale.
3. Im nidi nim um ozobohuna taia? Alat ozo, “ ‘Uho gi ozahit Aba labaha tu vuzehi meedào?’ laham bak lam modi aase,” lahame ozohemu ame fai bak mei fai bak meime uba duzum bak lam Aho ahit uledehe bak. Neham labe labi ahit uledehe bak. Naat uba, “Fai bak nim modem neào?” lahame uba modi ozolo modem di uho gi Ala bake ozahit labaha bohu tu vuzehi meedameam làhà ba neo ame na uba vabidam di lam um ba bedem vaba gi Aba ozahit labaha tu vuzehi meedam bak am bak. Laham bak lam um ozobohuna taia?
4. Uho lab keàtedi labaha bohu meedam bak lam ba a bedi fa odohali momule. Gi keàtedi ame bak bohu meedale. Uho labi modem labe um gi labahana bohu vuusdam damat modem bak. Ba Alat uba, “Im zoho vekeho,” lahame ba uba gagom vabak. Gi ab neàdeham bak.
5. Na im uba duzum di lam uho meit neha, “Ahu adat iademe ozome meedam bak akete?” lahame vi ozom vabiemeam làhà gi Ala bake nehasu tom gagodale. “Ai Ala oa, em akati modela?” lahame tom gagodam di labe Alat ba uba neham vabak. “Aa! Om akati modem bi mode?” lahame ba meoli im vahokedam vabak. Alat abo na ilabdi kehàm vaba meedam Alat modem labe gi taho ame da laba, “Nehame modele,” lahame modi ozobohudi fi gate tame.
6. Lahana ame da labe aho Ala bake lab tom gagodam di labe abo mahate Ala bake tu vuzehi ahu vàmadi neàdi Ala bake tom gagodale. Ba, “Eho etei tom gagoho im lam Alat aime modeo? Aime modem vabao?” lahame ba a ahu behàsdi Ala bake tom gagodamule. Eho gi neham bak ozome uba labi gagodam bak. Ame da labe ahu behàsdeheda labe am gi nutabet vao foadam labe niba li fi tauleda. Fa iuba le fi tauleda. Lahame modem vao bahoti ulohote.
7. Ame da lam gi taho ozome ahu vàmadem vaba gi ahu behàsdi vi ozodam bohuta meedam dàt modem bak. Ame da labe na meedam di lam mahate fi tatom vaba gi zohali esuiam dàt modem bak. Labihàmu ame da labe aho ba a nehi it ozodamule. “Eho Ala bake tom gagodameam làhà Alat gi ilabdi eba modi em ozobohudi fi gatem bak,” laham bak lam ba a it ozodamule. Alat ba ame da laba labi modem vabak. Labiham bak uho Ala bake tom gagodam di gi ahu vàmadi tom gagodale.
9. Emti vahi Kristus bake tu vuzehi meedam dam oa, uho meit nazoh vabda abo damat neha, “Feà vabda,” lahame feàtàhàda ehelemeam làhà ame da lam nasi a ladi aidamule. Gi ozahigeàmu fa deeli vou faodale. Neham bak. Alat ame da laba neha, “Om Eho deelemda am bak,” lahame ame da labe am ee vousaha bak laba vi ozome deelele.
10. Lahana na duada lam ba diamut Alat Dam Bake Uloodume Aime Ozobohudi Neàdi Fime Fahedam Digat fuhuzobe Aho ahit ame da laba modi fa na vabali am ee vousem bak lam ame da labe nasi ahu it daetbadam neà? Vabà! Ba labiham vabak. Neham bak. Ame na duada lam gi ut avat alai setem bakti ulohote.
11. Ala faasi tomali galihasi modeha ame ut ava boz lam kehàm vaba ala gait belu nemahubali alai goaitoi bake bitem bak. Labi aba amu aam neà bak lam laha setem bak. Ame da na duada lam modem bakti ulohote. Neha. Ame da labe neha, “Am na neo vi tau dualese,” lahame bak niba na im meedam di labe aho vedi am elom vab tiba ozome modeha ab eloham bak. Labi aho vahehe nazoh lam gi vou esmom bak. Labiham bak.
12. Alat amu nehi fet gagu vàmadi esu, “Meit Eba deeli meedamda laba Emti vahi gi ahe neàna bohu vuusda tame,” lahame amu di iube fet ozome gagu esu vàmadehe bak. Labihàmu fai bak mei fai bak meime uba duzum di uho bedem vaba gi ozahigeàmu Alat Aba Aho gagohona lam uledi bisi keàtedehe bohu vuusu meedamda lam Alat ame da laba gi neà bak modi esuida tame. Aho ame bak lam gohali ame da laba ba modi Amti vahi gi ahe neàna bohu vuusdam bak.
13. Naat uba li neha, “Fai bak nim modem neào?” lahame uba modi ozolo meedam di lam ba a nehi ozo, “Alat gagu oluho,” laham bak lam a ozome Ala bake vàlu gagomule. Neham bak. Ala ba fai bak modelo àhàkemna vab labe ba naat Aba li neha, “Fai bak nim modem neà?” lahame li Aba modi ozolo modemna na vabak. Labi laha Aho meia, “Fai bak nim modem neào?” lahame ba meia modi ozolo modem vabak.
14. Gi neham bak. Naat iba li, “Fai bak nim modem neào?” lahame iba modi ozolo gagom di iho meit vedi uledi faina modemeam làhà gi nehame modem labe faina modehe bak. Am ahu faina modelo àhàkemna ehe labe vou fohodume ame fai bak ab modeham bak.
15. Labi ame na labe vou fohodam labe ame bak lam ab uledi modeham bak. Labi ame da labe gi labihasu faina meedam bohu vuusu meedameam làhà Alat ba ame da laba modi vaitesu vua elum sutem gikina bohu laba voou geàdam bak bohuta meeda tame.
16. Emti vahi Kristus bake tu vuzehi meedam dam abo ebe eho deelehe dam oa, uho git ozohomo? Uho neha, “Iho faina meedam bak lam Alat iba gagu meedaho,” lahame a giomim it ozome vuzehi meedamule. Alat ba meia neha, “Im fai bak nim modem neào?” lahame ba meia modi ozolo gagu faina modem vabak.
17. Eho gi neham bak ozome uba labi gagoho bak. Na Alat iba meedume esuhuna lam ahebu ba fai bak vaba gi neà bak tade. Ba zohalehe vaba gi ahebu modi neàbodedaha bak. Ame na ahebu alimeat meedume esuhu Ala am bak. Abo ala digaddati ala usehedati labi falo zi nimti abo na fauhaedamda ahebu modehe labe iba na neàna modi esuhu Ala am bak. Lahana ame na fauhaedamna zi lam ogatem bak veimdi veimdiam bak lam Ala Na Debu Modeheda lamti ba uloho vabak. Ala ba veimdi veimdiam vabak. Gi Aba aham modesuhu bak lam lahasuhu bak.
18. Alat amu neha, “Ebe Eho alimeat modehena zi ahebu lam fi hasi gi dam aabota Em damali im Ebedata fà meedase,” lahame fet ozome esuhu labe Aho iba vameadaha im imbona lam iho tu vuzehehe labe Alat iba ab modi am damaleham bak.
19. Emti vahi Kristus bake tu vuzehi meedam dam abo ebe eho deelehe dam oa, eho etei uba gagolo modem im nim uho iademe dogoit aidale. Meit vameadam im aidam di, “Aise,” lahame mahate dogoi balesu iademe aidale. Labi laha im gagolo modem di àvodehat im faasi vameadam vaba gi amu nasi iademe ozome neàdi ba im faasi vameadale. Labi laha gi etei aihina a nasi àvodehat fakemule.
20. Nehaha bak. Alat amu nehi fet ozome esuhu bak. “Eho dam bake deelem bake damat gi im vamdesu labaha bohu meedase,” lahame amu fet ozome esuhu bak. Lahana iho meia fakemoholem bak bohu vuusdameam làhà ba Alat aame iba deelemna lam im ba modem biem bak.
21. Labiham bake ubu uho faina meedamehamdem bak lam abo fai bak mei fai bak meime baleàhà bak lam ahebu nasi mu voou seddale. Labi neo damat amu uba vahokedaha Alam im lam uho amu aime um ahu ad labe vuzehi meedam bak lam voom vaba gi daleà azi vi ozodume ule neàt labaha bohu vuusu meedale. Uho labi meedam labe Alat uba soat vausu fa vei neàdem bak am tame.
22. Uho Alam im aim di abo iademe aime uledi ame baket meedale. A gi aimta aime mu voomule. Uho Alam im aimta ai. Lahana ba uledi modem vabameam làhà uho amu lab ozoho bak lam, “Alat iba soat vausu fa vei neàdem bak am tame,” lahame labihasu ozoho bak lam gi giomim it vou daetbadam bak.
23. Meit Alam dae aimta ai. Lahana uledi ame bak modem vabda lamti fa dat nehame modemdati uloho bak. Da nibe am dauha, “Boz neào?” laham bak lam itaamna aasdam bakti ulohote.
24. Ame da labe itaamna iademe nabidume, “Em dauha labihasuhe?” lahame aame esu iuba lam di, “Am dauha akatihasuhela?” laham bak lam fa vabiem bak. Dam Alam im aimta ai. Lahana uledi ame bak modem vabda labe fa ame da lamti ulohote.
25. Ala labe Aba Aho vameadume vàmadi esuhu im lam ba zohali esuhu vabak. Abo gi ahebu ab vameadume vàmadi esuham bak. Labi laha ame im lam feà labe iho faina modem bake soat vausu fa vei neàdemna am bak. Labiham labe meit itaamna, “Am dauha akatihasuhela?” lahame it aame ozodam bak lamti uloholi ame Alam im lam aime ozodume ba fa vabiem vaba abo ulohodesu meedam bohu vuusdamda lam Alat modi aho na meedam di gi neà bak modi esuida tame.
26. Uho meit nehame it ozome daetbadameam, “ ‘Alat eba fà aame deelese,’ lahame Alat Aba Aho gagoho im meedamda em am bak,” lahame daetbadamna am dae ahat faina gagom bak lam it vou faovoi malem vabalemeam làhà ame da labe aba aho lab it daetbadam bak lam aho gi aba giomim it vou daetbadam bak. Labi laha aba aho lab meedam bak lam gi ostame meedam dàt modem bak. Ba imbo vabak.
27. Dam Ala bake ahu adat iedi vou baedume Aba Aho gagoho im aime uledi meedam dam lam Alat Aho vi ozo, “Dam lam ba git modem vaba abo im vamdesu meedam damat modem bak,” lahame Aba Aho vi ozome deelem dam lam dam gi nehame meedam damat modem bak. Data dumdamda vou aasdume vabieda. Labi laha lahi maboe zi abo naat vabidam di vou aasdume vabieda. Labi laha dam Ala bake tu vuzehehe vab dam zi labe ibi iho faina meedam bak iba vizi iho fa faina meedam bak labna zohàme im ahu it vou faovoi mali meeda. Labihasu meedam dam lam Alat Aba Aho bisi deelehe dam am bak.
1. Emti vahi Kristus bake tu vuzehi meedam dam oa, uho im Boehàda Yesus Kristus abo iho, “Feàte,” lahame vou baedamda laba uho amu gi tu vuzehi im Abada meedam damat modem bak. Labihàmu um ba a dam faheme, “Dam nim neàte. Dam iudu ium faite,” lahame a labi gagome faheme meida debuta ahu adat iedi vou baedamule.
2. Eho etei vouholo modem bak nim uho nasi aimale. Uho Alam im ailo vazisilo modem di labe aameam dam behàsu dat na duadati dat na vabdati li oedam bak ab aaham. Ame dam ahim lam dat na vabda labe sue faina ukehena ohabe dusu li ole. Labi dat meida na dua labe am anekehàso emas dusu. Labi sue neàna duada. Labiham dam behàsu li oedaha bak aahemu dat na duada laba aame, “Feàte,” lahame ahu adat iedi gago, “Ba oa, oho nusumna neàna niba nusule,” lahame uledi ab gagoham. Lahana vedi dat na vabda sue ukehena ohabe dusuhuda laba faki ab gagoham. “Oho fa iuba le duzule.” Laham vabameam, “Oho gi adba bolo gaheba laba nusule,” lahame ab gagoham. Labihada.
4. Uho labi modem labe uho gi dam ubu uho Kristus bake tu vuzehi vahi meedam dam ab faheham taia? “Im dam nidi nim neàt,” lahame deeli ee vousada. Labi, “Im dam iudu ium fait,” lahame feàtàda. Lahadume um dam gi ab faheham taia? Um ahu gi fai bak modesdam labe um dam laba aame labi faheme gagodam damat mode taia?
5. Emti vahi Kristus bake tu vuzehi meedam dam abo ebe eho deelehe dam oa, eho uba etei gagolo modem im nim mahate iademe aime vi ozodale. Ala bake tu vuzehem vab dam labe neha, “Dam na vabda,” lahame feàtàdam dam lam bisi Alat Aho deeli, “Nehadase,” lahame ahit fi me vadaha dam am bak. “Dam lada lam Em Adat Yesus Kristus bake tu vuzehi meedàmu Eho neà bak duana nehi modi esuidase,” lahame ahit deeli fi me vadaha bak. Labi laha Alat amu di iube neha, “Eho gi dam Eba deelehe dam lamota Eho Boehàdat vuusu im vahokedase,” lahame labi fet ozome esuhu bak lam, “Fà modi imbodese,” lahame fet vi ozome ahit ame dam lam deeli fi me vadaha bak.
6. Iho amu ame dam na vab dam bake, “Fa iuba le duzule,” lahame lab gagodam bak laba it ozom di im gi ame dam laba, “Faite,” lahame feàtàdam dam taia? Lahana um ozom vaba? Ba ame na vab dam labe uba vabidam vabak. Gi ame dam na dua dam labe uba vabidume um alihi nemahudam dam am taia? Labi laha ame dam labe uba vàlulo um tet si meia uloodume aime neàdi gagu beodam dam laba vou ladam dam am taia?
7. Labi laha uba vuusdam Boehàda Yesus Kristus labe Am ee neàda laba tozome feàtàdam dam am taia?
8. Musat aham di iube Alat Vameadaha Im Toedahana laba im nehasu toehena ehete. “Uho meit aba it deeli vou faovoi vabiedam bak lamti ulohona vi ozome fa meia laha deeli vou faovoi vabiedale.” Lahame labihasu toehe im lam Boehàda Yesusat laha uba lab vameadume vàmadi esuhu im lam uho uledi meedameam làhà um ba git meedam vabak. Abo gi im vamdesu meedam bak.
9. Lahana uho dam faheme meida debuta vuusdameam làhà uho gi faina meedam bak am bak. Labi laha uho Alat lab vameadume vàmadi esuhu im zi lam ulohodesu meedaha vab labe Alat uba neha, “Im Eho gagu esuhuda lam uho ab zidazi vooham bak,” lahame gagu esum bak.
10. Eho gi neham bak ozome uba labi gagoho bak. Meit vedi nehi ozo, “Alat gagu vàmadi esuhu Im Feàna zi lam ahebu eho aime uledi ulohodesu meedamda em am bak.” Lahana ame da labe vedi gi meida vàmtea uledi modehe vaba zidazi voomeam làhà Alat ba ame da laba ozome gagom di gi neham bak. “Aa! Oho im Ebeda ahebu zidazi voedaha bak,” lahame labi gagom bak.
11. Nehaha bak. Amu di iube Alat nehi gagu vàmadi esuhu bak. “Nam dat eheda modeo, dat nam eheda modeo, a modemule,” lahaha bak. Labi laha Aho gagu vàmadi esuhu im meida neha: “Mei a otemule,” lahaha bak. Ame im lam ahebu Alat Aho amu mali gagohona iho meit mei nam modeo, mei dat modeo, modem vabnàme vedi mei otemeam làhà Alat gagu vàmadi esuhu Im Feàna zi lam iho zidazi faidehe bak. Labiha labe Alat Aba Aho gagu vàmadi esuhu Im Feànà zi lam iho gi vàmtea vooho labe im gi ahebu faidehe bak.
12. Ame Alat lab gagu vàmadi esuhu im zi lam iho aime vuzehi meedam labe iba modi soat vausu fa vei neàdem im ziat modem bak. Ba diamut iho bak damat Alat avaesdam laba le duzu Aho uloodume aime neàdi gagu beodam di labe Aho gi Aba Aho lab gagu vàmadi esuhu im zi lam vi ozome, “Iho ame im lam uledi vuzehi meedào? Meedam vabao?” laham bak ozome dam fahedam bak ehete. Labihàmu Alat ba neha, “Am im lam iho mu voedaho,” laham bak lam iba gagu vàlum vabak laba ozome iho im faina gagom bak lamti iho meia git modem bak lamti labihasu meedam bak labna zohàme im ahu iademe it vou faovoi mali meedam bohu vuusdase.
13. Eho gi neham bak vi ozome uba labi gagoho bak. Ba diamut Alat dam bake uloodume aime neàdi gagu beodam di labe Aho aameam meit meia aam faimu im neà bak tau meedam vabda laba aameam làhà Aho gi ame baket fa ame da laba modi vi vatau tame. Lahana meia aam faimu im neà bak tau meedamda labe ba Alat avaesdam laba le duzum di Alat aba deeli beom vabak laba ozome ba iedehena le duzum vabak.
14. Emti vahi Kristus bake tu vuzehi meedam dam oa, uho meit neha, “Eho Boehàda Yesus Kristus bake tu vuzeheho,” lahadamnàme damat aame ozobohudemna vi meedam vab labe ba, “Neà bak ake?” laham bak ozom vaba ame da labe gi ostame meedam bak. Aho lab gagoho bak lam gi ahobat neàdi meedam dàt modem bak. Aba aho faina meedàmu Alat beolo modem bak lam Alat ba fa vei mu aba soat vausu fa vei neàdem bak modem vabak.
15. Eho nehame vouhodam bak nim uho nasi aimale. Uho meit umti vahi Kristus bake tu vuzehi meedam nam modeo, dat modeo, aameam sue koedem bak modeo, na àmna koedem bak modeo, labihasu aa.
16. Aame nehasu gagomeam, “Neàte. Iademe ladale. Ohomo om nutahalem bake sue nabime ve dusule. Om idoalem bake ohomo na nabime ve àle,” lahame gagomda vedi na ubuda vi lodam vabameam làhà ubu uho lab gagoho bak lam gi ostam imbu gagodam bak. Gi laba gagom bak labet ba neàdem vabak.
17. Eho etei lab vouhoho bak lam meit Kristus bake tu vuzehem bakti ulohote. Meit neha, “Eho Kristus bake tu vuzeheho,” lahamda labe aho vedi damat aame ozobohudemna vi meedam vabameam làhà aho lab gagoho bak lam gi koeisoti uloholi ba ozome modem bak vab labe gi voomnat modem bak.
18. Lahana meit nehi gagoe moio? “Alat meia soat vausu fa vei neàdedam di gi ame da labe Aba tu vuzehe bak labet modi ame da laba soat vausu fa vei neàdedam bak. Labi laha dat meida labe gi aba aho meia neà bak lab meedam bak labet modi Alat ame da laba soat vausu fa vei neàdem bak,” lahame labi gagoe moio? Uho meit labi gagomda lam eho gi fa nehi daetesu gagodam bak. Ba labiham vabak. Oho vedi neha, “Eho Kristus bake tu vuzeheho,” lahana damat aame ozobohudemna vi meedam vab labe em ba akati aame ozo, “Imbote,” lahame ozobohudi gagoe? Lahana damat aame ozobohudem im neàna lam eho vi meedam bak lam damat vi aameam làhà eho amu neha, “Eho Kristus bake tu vuzeheho,” lahame lab gagoho bak lam damat laha aame ozo, “Imbote,” lahame labi gagodam bak.
19. Uho neha, “Ibi iho vou baedam Ala lam bisi imboda gi vàmtea bak. Ba Ala amomoi kaio,” lahame gagu tu vuzehehe bak lam abo imbote. Lahana gi labihasu gagoho bak labet neàdem vabak. Uho gi labihasu gagodam labe ame damat aame ozobohudem im neàna lam vi meedaha vab labe uho amu lab gagoho bak lam meit neha, “Imbote,” lahame ba labi gagom vabiem bak. Neham bak. Mei ahu oli veimam setan zi labe laha ame bak lam gagodam meo bak. “Ala gi vàmteate. Ba amomoi kaio,” lahame gagodam meo bak. Lahadamnàme Alat ba iba beom bak lam ozobohudi iedi dododam bak.
20. Nasi aimale! Eho amu uba neha, “Meit neha, ‘Eho Kristus bake tu vuzeheho,’ lahana damat aame ozobohudem im neàna lam vi meedaha vab dam labe ibi iho lab gagoho bak lam gi giomim gagu abo ozome modem vaba gi voomnat modem bak,” lahame eho lab gagoho im lam uho aim momda lam um gi ahusobu damat modem bak. Meit Kristus bake tu vuzehehena vedi damat aame ozobohudem im neàna lam vi meedam vabak lam ba ame bak labet aba modi im neà bak modi esuiam vabak.
21. Ame bak lam um biem bake im tai ahobada im vou faat leheda Abrahamat modehe bak lam nasi vi ozodale. Aham di iube Alat Abraham bake neha, “Oho Eba neha, ‘Em abo feàte,’ lahame Eba vou baedalo modem bak laba ozome om adat Isak Eba lolo modemda vou le ke mei ahoba vou vahe ziddume om adat laba esu oteme vua vahusule,” lahame gagoha Abrahamat uledi ame baket ab modelo modemam. Labi ame bak lam modesome modeha Alat aame Abraham bake ab ozoham. “Im vamdesu meedam dàt modem bak,” lahame ozahit deeli gagu ab vaham bak. Làhà uho ozom, Abrahamat akatihasu meedam labe Alat aame labi gagohela? Neha taia? Abraham gi am ahat, “Eho Ala bake tu vuzeheho,” lahame gagom vaba vedi damat aame ozobohudem im neàna lam vi meedam labe Alat aame deeli labi gagoho bak.
22. Labihàmu um ba biem vabak. Ame da Abrahamat Ala bake amu imbona tu vuzehehe labe Alat aba ba gagodaha im ahebu lam gi vi uledi ulohodesu meedaha bak. Labi Abrahamat lab uledi vi meedaha bak labet modi, “Aho Ala bake tu vuzeheho,” lahame amu lab gagoho bak lam ab modi tombali imbodeham bak.
23. Eho etei lab gagoho bak lam meit Alat Vameadaha Im Toedahana laba nehi toehe bak nimti uloholehe bak. “Alat Abraham bake fet gagu vàmadi esuhu im lam Abrahamat aho aime ozo, ‘Ba imbodem bak,’ lahame Ala bake tu vuzehehemu Alat ame da laba neha, ‘Im vamdesu meedam dàt modem bak,’ lahame ozahit deeli ab gagu vaham bak.” Lahame labihasu toehe im lamti eho lab gagoho bak lamti uloholehe bak. Labi laha damat nehi gagodam bak ehete. “Ame da Abraham lam Alat deeli Amti vou alemda am bak,” lahame gagodam bak.
24. Labihàmu im ba biem vabak. Alat neha, “ ‘Ame da lam im vamdesu meedam dàt modem bak,’ lahame Ebe Eho ozahit deeli vamda am tame,” lahame aame ozome gagom bak lam ba dat gi ahat, “Eho Ala bake tu vuzeheho,” lahame gi ahobat neàdi meedamda laba ba gagodam vabak. Gi damat aame ozobohudem im neàna lam vi meedam labe Alat aame deeli gagodam bak.
25. Labi aham di iube fi loho nam Rahab labe aba aho meedaha im laba uho laha vi ozodale. Filoho namta fi loho namet moz. Lahana Alat ozomta, “Im vamdesu meedam namet modem bak,” lahame ozahit deeli gagu vaha namet modem bak. Neham labe labihaha bak. Aham di iube Israel labe aho vou faat ledaha dam labe iho Alat iba lolo fet gagu esuhu bak lam fa naedamalelo modem di labe im faheme modiamda Yosua labe am dam meida behàsu laba gago, “Uho Yeriko bak laba le, ‘Dam akatihasu esuhela?’ laham bak vime aasume fa lele,” lahame labi gagu oluhu dam behàsu labe num debu Yeriko laba fusi modeha Rahab ame dam behàsu ve ab vasteham. Yeriko meo damat beom zohàme ve ab vasteham. Labi faobe ame dam meo damat vi vaitem vab zie laba fa ab gagu oluham bak. Rahab labiha labe Alat ozahit deeli gagu vaha namet modem bak.
26. Nasi ozodale. Damat im so it oazemeam làhà elom bak. Ba im ozome modem vaba gi voomnat modem bak. Labi laha meit neha, “Eho Yesus bake tu vuzeheho,” lahana damat aame ozobohudem im abo dam bake im neà bak vi meedam vabameam làhà aba aho lab gagoho bak lam gi ostam im gagodam dàt modem bak.
1. Emti vahi Kristus bake tu vuzehi meedam dam oa, uho meit neha, “Em fa guruli dam bake Alam im imbona lam vahokedase,” lahame ozodam bak lam um a bisi dam tamehona ame bak lam meedalo àhàki meedamule. Neham bak. Dam Alam im imbona vahokedam guruleheda zi lam ba diamut Alat dam bake uloodume aime neàdi gagu beodam di bisi vi uloodume beodamehamdemda im guru zi am bak. Ba dam giidate mahate vi uloodamehamdem vabak.
2. Eho gi neham bak ozome uba labi gagoho bak. Im dam bakda ahebu im fai bak mei fai bak meime git meedam meo damat modem bak. Lahana iho meit im gagom aha nim git gagom vaba gi iademe vameadameam làhà ame da lam ba fai bak modem vaba abo im vamdesu meedamda am bak. Aba aho modelo àhàki ahulat ozomna lam ahebu ahamo naedat it mali vou faovoi modidam bak.
3. Ame bak lam eho vouhose. Neham bak. Iho damat kuda toha laba zisi nusu ladam di lam ibi iho ladam bak lam kuda laha vi ozome tau vou ladam bak laba ozome iho vuusu vamdedamna buà am aha laba modesu gimsum bak. Ame vuusu vamdedamna lam gi koena modem bak. Lahana iho damat vuusdam labe ame kudabu vamdedam bak.
4. Labi im meida nim laha nehi vi ozodale. Iho im faina gagodam bak labna zohàme im dam aha it vou faovoi mali meedam bak lamti kapal vuusdamda labe aba aho ame ihe vuu vamdedamna vuusu meedam bak lamti laha ulohote. Ame kapal lam abo budua bak. Labi laha ame kapal vou ladam nutabe lam abo feàna fai modem bak. Lahana dat ame kapal vuusdamda labe aba aho vuu vamdedamna lam gi koete. Lahana ame na koena buà vuusu meedam labe ame kapal deda labe aba aho ozome lam bak laba ame kapal lamti ab ladamam bak.
5. Kuda aha laba modesu vuusu vamdedamna lamti kapal lam vuu vamdedamna lamti amait behàsu koete. Labi laha im dam aha laha koete. Lahana im vameadam di vedi, “Mit ahea! Eho modem modem bak,” lahame it daetbadam bak budualedam meo bak. Um neham bak nim laha vi ozom vaba? Iho ut sieme ut oloha dehana vuat usime eludume falavai setehe bak lam gi vua koena usihinat ahamo buduali eludume ame oloha dehana lam ahebu falavai setemna modem bak.
6. Im dam aha lam it vou faovoi malem vabak lam abo vua koena usihinat eludume falavai setem bakti uloho labe iho gi fai bak vameadam labet modi dam vàhàdedam bak. Neham bak. Im aha nibe im vameadam di labe gi fai bak mei fai bak meime duana im ahu ad niba modesdahana lam fa ab modi tombali duzumam bak. Labiha labe im aha labet modi im so niba modealahana nibe fa fai bak mei fai bak meime labaha bohu ab meedamam bak. Abo amu faaha di iubet ame fai bak faasi vou mode ladume elom labe vaitom di am bak. Im dam aha modi vuati uloholi fai bak meedam bak lam debu Iblisit modehe bak.
7. Eho gi neham bak ozome uba labi gagoho bak. Bak niba modealahana ahebu abo nohubake azimda modeo, asum ahoba iuba boiatem bume modeo, na sobosobomna modeo, valo azimda modeo, ame na ahebu lam damat si fi holi ousdam meot. Fa am aialem bak ozome ilabdehe bak. Amu mode. Lahana etei meedam lahasuhu bak.
8. Lahana damat im aha lam ba ihimo modi ilabdem biemna vàmtea am bak. Neham labe labiham bak. Im aha gi faina modem bak. Im ahu it vou faovoi malesome modeha ahat vedi ahamo veimai im meidi meedam labe ab ilabdem biem bohu meedamam. Abo ozba soat mei veem di am aha vao meona labe ahula azi elom bak lamti uloholi im dam aha it vou faovoi malem vab labe gi meia beome vàhàdedam meo bak.
9. Emti vahi Kristus bake tu vuzehi meedam dam oa, uho neham bak nim laha vi ozomale. Im dam aha gi vàmtea. Lahana im ahu behàsdi dae faheme keobedi im Ai Boehàda, “Am abo feàte,” lahame vou baedam meot. Lahana vedi dam abo Alat ahamte alimeat modehe di Am itbaho fatohona meedaha dam laba, “Fà beose,” lahame uloodam meot. Labihadume vameadam ahat modem bak. Ne lahana um aha gi vàmteana akati modi Ala bake vou baeda. Fa meia ulooda. Labihadàla? Abo maem im iho meedam bak.
11. Uho ozom, vao boz neàda iho udemna lamti vao kebeam bozda iho udem vabda lamti gi bak bumat vàmtea labe futodào? Vabà! Ba labiham vabak. Gi vao kebeam bozda amomoi futoda. Labi vao boz neàda lam ibi iho udemda lam amomoi futoda. Labihadam bak.
12. Labi uho ozom, sei aaso laba kohubuli vààsum meo? Vabà! Labiham biem bak. Labi nigo bohuda loso laba iloi oo vààsum meo? Vabà! Labiham biem bak. Labi laha vao boz neàda lam noai udelo modem di lam ba vao kebeam bozda laba le noam vabak. Labihàmu iho im faina git gagom vaba fa gi im neàna gagodam bak laba ozome im aha mahate it vou faovoi malele.
13. Uho meit neha, “Alat eba modi vizi em bisi im ozobohuda am bak,” lahame gagomda ehelemeam làhà ame da labe damat fet aame, “Imbote,” lahame vi ozobohudem bake im vamdesu meedale. Labi ame da labe aho ame im lam iademe vamdesu meedam di ba, “Em abo bisi im vamdesu meedamda em am bak,” lahame ba aba it daetbadam vaba gi ahu nemahuba neàt daleà meedam bak. Lam bisi imbo bak am bak. Labihadamda lam bisi imboda im ozobohuda am bak.
14. Lahana uho meit am ahu ad labe meia faki teidi neha, “Em fa feà dateli dam ee ebeda vousai fà eba vou baedase,” lahame meedamda labe, “Alat eba modi vizi em im bisi ozobohuda am tame,” laham bak lam ba aba a it daetbadume gagodamule. Lam gi giomim daetbadalo. Uho labihadameam làhà um Alam im imbona ba modem vaba gi zidazi voedam bak.
15. Uho meit neha, “Em bisi im ozobohuda em am bak,” lahame lab it daetbadaha bak lam debu Alat gagu meedaha vabak. Gi dam bakda nibe abo dam Ala bake tu vuzehehe vab dam labe abo mei ahu oli veimam setan zi labe ibi ihimo ozome meedam bakti uloholi meedam damat modem bak.
16. Eho gi neham bak vi ozome uba labi gagoho bak. Uho meit am ahu ad labe faki teidi neha, “Em fa feà dateli dam ee ebeda vousai fà eba vou baedase,” lahame meedameam làhà ba dam vabademsum vaba gi dae gai duzu dahobuedam labe fai bak mei fai bak meime bohu vuusu meedam bak am bak. Labiham daleàmu eho uba ab gagoham bak. Ame da labe lab it daetbadaha bak lam Alat ba gagu meedaha vabak. Gi ahamo meedam bak.
17. Lahana Alat meia modi vizi im ozobohu dam abo imbo dam labe gi nehadam bak bohu meedam bak. Amu ahamte nasi modemda gi ibi iho ozohoda lam ba meedam vaba fa Alat Aba Aho gagoho im lamota ulohodesu vamdesu meeda. Labihazobe ame dam labe laha meia ot vei neàdedume vabademsu meeda. Labi laha meia im vameadam di gi im nemahuba neàt dam aim neà bak laba ozome iademe vameada. Labi laha meit im gagom di ba odohali mom vabak. Gi uledi meedam bak tade. Labi laha meia aam faimu im neà bak tau meeda. Labi laha dam bake im neà bakta meeda. Labi laha ba dam faheme dam totbaho lamota deeli vuusu meedam vabak. Gi dam ahebu uloholi iademe meeda. Labi laha ba ahobat neàdi meedam vaba abo gi neà bakta ahu vàmadi meeda. Labihasu Alat ame im ozobohu dam laba modi gi labihadam bohu meedam damat modem bak.
18. Meit fa meia ot fakiam vaba ot deeliame meedamda lam aba aho lab meedaha bak labet modi dam totbaho gi ame baket neo vi meedam bak. Labiham labe dam ahebu gi vahi ot fakiam vaba neà esdam labe gi im vamdesu meedam bak.
1. Uho ozom, uho ot fakiame beàdam bak lamti labi ot bohudidam bak lamti ahebu debu akatiham labe labihadàla? Neha taia? Um ahu ad iube fai bak modem bak it malesome modeha voom vabili vedi fa modelo àhàki ahu ad iuba ot odosiame meedam labe ot fakiame beàdam bak debu am taia?
2. Neham bak. Uho amu nasi um ahu ad iube na lam valo àhàki vasome modeha ame na lam vam bie. Labiha labe mei otem bak ab ozodamam bak. Labi laha mei na oho laha, “Vase,” lahame valo àhàki modemna lam vam vabilehemu vedi fa faki daet beàdume ab ot beidamam bak. Uho ozom, uho ame na valo àhàkemna lam akati modi bisi vam biehemoholi modela? Uho neham vab labe mode taia? “Ala oa, eho vam bi modemna lam eba lole,” lahame tom gagom vab labe ame na lam vam vabili modem bak.
3. Lahana uho Ala bake neha, “Oho eba na nim lole,” lahame tom gagodamnàme Alat ame na uba lom vaba momoholehe bak lam uho ozom, debu akati modi labihadàla? Neha taia? Ubu uho um ahulat ozoho bak lam git ozoho labe labihaha bak. Uho vedi ame na uho valo àhàkemna lam gi vame fa uhumo neàdem bak laba nasi fet ozome neàdi tom gagodam labe faidehe bak.
4. Um abo mei dat vam lahiti ulohote. Uho amu neha, “Im Alabadata iho meeda tame,” lahame gagu vàmadi esuhunàme vedi gi ahu behàsdi dam Kristus bake tu vuzehi meedaha vab dam labe ibi iho faina meedam bak lam uho laha vi tau deeli meedam bak. Um ozom vaba? Dam Kristus bake tu vuzehi meedaha vab dam labe ibi iho faina meedam bak lam iho fa vi tau meedameam làhà im ba Ala bake deelem vaba gi Ala bake fakemoholehe dam im am bak.
5. Uho ozom, meit Alat Vameadaha Im Toedahana laba im nehasu toehena nim gi toeme voomnat mode? Ame im neha: “Alat alimeat dat modehe di labe amu bakbu visoi ahuleme vabieme dat aliholi esu neàdi ba neo Am Aha Nutabe feume mei ahu modi im ozobohudemna lam ab modi vizeham bak. Ame na im ahu modi im ozobohudemna lam Alat Aho vi ozo, ‘Aba Aho ozoho bak lamota iho deeli meedase. Im meibada a modemule,’ lahame bisteat mali vi ozodam bak.”
6. Lahamnàme Alat Aba Aho iba ozahit deeli im neà bak modi esuiam bak abo duana meedam bak. Meit Alat Vameadaha Im Toedahana laba im lamohoda toehe bak ehete. “Dam im ahu it daetbadam dam lam Alat faki mu odosdam dam am bak. Lahana dam im ahu adat ladehebeat meedam dam laba Alat aame ozahit deeli im neà bak modi esuiam dam am bak.” Lahame toeme esuhu bak.
7. Labihàmu Alat uba gagohona lam uho uledi meedale. Labi Iblisit uba neha, “Nehame modele. Nehame modele,” lahame aba aho gagohoda lam uba vabidam di gi odosi meedam labe veimodale. Uho labi modemeam làhà Iblisit um vou esmozi ita tame.
8. Labi uho amu Alati fi tadzehe bak lam fa ahu vàmadi Alati vahi vou alele. Uho labi modemeam làhà Alat fa uba deeli umti vazisi vou alem bak. Ame bak lam gi neham bak. Uho faina meedam dam labe nasi ubu uho faina meedam bak lam nasi mu voole. Labi laha uho neha, “Iho gi im Alat gagohoda lamota uledi meedam damat modem bak,” laham damat vedi Kristus bake tu vuzehi meedaha vab dam labe ibi iho meedam bak vi tau deeli meedam labe ahu behàsdi meedam bak lam nasi voou fa im Alat gagohoda vàmtea laba ahu vàmadi meedale.
9. Labi laha uho faina meedam bak lam it ozome deeli igeadam vaba gi it ozome ahu faidi vi ozodume meddale.
10. Labi laha uho Ala bake neha, “Ai oa, em faina meedamda em am tame. Lahana Oho ozahit aame faobekesi eba fa vabiedale,” lahame ladehebeat labihasu tom gagodale. Uho labihadam labe Alat uba deeli um Am damali ee vousam bak am tame.
11. Emti vahi Kristus bake tu vuzehi meedam dam oa, ubu uho, “Om faite,” lahame ot feàtàidam bak lam nasi mu voou seddale. Meit amti vahi Kristus bake tu vuzehi meedamda meida laba aame ozo, “Om faite,” lahame feàtàdào? “Oho git modeho,” lahame vàlu gagodào? Lahame gagom di gi Alat gagu vàmadi esuhu im lam vuzehehe vaba gi mu voohoda am bak. Alat neha, “Oba it deelem bakti ulohona fa meia deelele,” lahame toehe Im Feàna lam aime vuzehehe vaba vedi neha, “Alam im lam gi gagoho. Em ba vuzehi meedam vabak,” lahame tozome mu voohoda am bak. Labi ame Alat gagu vàmadi esuhu im lam ame da labe tozome mu voou zidazemeam làhà ame Im Feàna lam aho ba vuzehi meedam vaba vedi, “Am fa feà dateli meia uloodume aime neàdi fa gagu beodamda am am bak,” lahame daetbadam dàt modem bak.
12. Uho akati neham bak vi ozodam vaba modela? Ame Im Feàna Gagu Vàmadi Esuhuda lam gi Alat Ahamo vàmtea am bak. Ba dam amomoi vabak. Labi laha Meit Meedaha Im Lam Uloodume Aime Neàdi Fa Gagu Beodamda lam gi Ala Ahamo vàmtea am bak. Ba dam amomoi vabak. Labi ame Ala lam meia soat vausu fa vei neàdem bak modeo, vua elum sutem gikina geàdam bak bohu laba voom bak modeo, ame bak lam meedamda lam Ala Ahamo vàmtea meedam bak. Ba dam amomoi vabak. Labihadam Alat modem bak. Meit meedaha im lam Alat Ahamo vi ozome neàdi gagomda modemu uho giida akati modi umti vahi Kristus bake tu vuzehi meedamda meida laba ozome, “Om faite,” lahame feàtàdàla? Labihadam bak lam git modeho.
13. Um dam totbahot vedi neha, “ ‘Imo abo doi dualese,’ lahame etei modeo, dihasi modeo, kota iudu iuba le nazoh ot loi ot loidume tahun vàmadi fa niba lese,” lahame uhumo nasi fet ozodume daetbadume gagu esuiam dam oa, im ebeda nim nasi aimale.
14. Um akati bisi ubu uho ba modem im uhumo nasi fet ozobohudi daetbadume gagu esuidàla? Um ozom vaba? Uba ba dihasi modem im modeo, ba diamut modem im modeo, um biem bak. Im dam bak niba esdam di gi as ahagoa gaiti uloho bak. Ame na lam gi aame kehàm vabna fa sete. Labi iho bak niba esuhu dam nim laha kehàm vabna eloi setem meo bak. Labiham bak.
15. Labihàmu ubu uhumo nasi fet ozobohudi daetbadume gagu esuidam bak lam nasi mu voou seddale. Fa ba gi nehame nasi fet ozome gagodale. “Alat uledemta em ahedi ame na nim modeo, ame na lam modeo, laham bak,” lahame nasi fet ozome labi gagodale.
16. Lahana uho labiham kaio. Uho vedi neha, “Mit ahea! Eho modem modem bak,” lahame it daetbadam labe, “Iho nehame mode tame. Iho fa nehi mode tame,” lahame fet gagu esuiam damat modem bak. Uho labihasu it daetbadam bak lam ahebu faite.
17. “Akatihasu meedam labe im vamdesu meedàla?” lahaha im lam eho uba vi vahokedume um ozobohudehe bak. Labihàmu uho meit, “Im neà bak neame?” laham bak ozobohudemnàme gi geàmu meedameam làhà ame da lam gi faina meedam dàt modem bak.
1. Um na dua dam abo Kristus bake tu vuzehehe vab dam oa, eho etei uba gagolo modem im nim uho nasi aimale. Naat uba vabidume um alihi nemahudume feà bak fusi geàdam bak ab fuseo vabaleham bak. Labihàmu um etei vei iedi meb daeti mebe gagoiam neà di neam tame.
2. Eho gi neham bak ozome uba labi gagoho bak. Um soa maehe na mei na meime vahehena lam ab faidi seddaham bak. Labi laha um sue neàna feà lam laha gi boet audume ab faidi voedaham bak.
3. Labi laha etei digat folelo meedam di nibe um na dua dam labe vedi na ubuda feà lam na vabdate lodam faobuli gi vaheme esdam labe um soa maehena lam abo uho lab vahedaha emas modeo, perak modeo, amu alihi aam neà bak lam fa seddume fa alihi aam àboziedume ab vàhàdedamam bak. Labihadàmu ba diamut Alat dam bake uloodume aime neàdi dam fahedam digat fuhemu ame soa maehena labe ahali uba neha, “Dam na vabdate taho lodam vabate,” lahame uba vàlu gagoda tame. Labi laha vuat nazoh belu falavai seddam bakti ulohona Alat fa uba duana beodam labe um geàda tame.
4. Um na dua dam labe um na feàna lam gi meia lodam faobuli fa um num laba mali vahedam dam taia? Lahana um laha aimale. Amu di iube na ubuda soalehe di iube uho dam bake neha, “Na modeme vahedale,” lahame labi gagu meedume neàdi ame na meedaha bake gohali ba doi lodam vabak. Labihàmu ame dam na ubuda meedaha dam labe im ahu faidi ab geàdamam bak. “Akati modi iba doi taho loho vaba modela? Akati iba faobekesi taum vaba modela?” lahame ahu faidi uba ab buddamam bak. Ame dam labe lab geàdam bak lam um dogoit aidam vabao? Lahana im Boehàda Bisi Feà Datebo labe Aho aidam bak. Labi Am ba ailahigeàmom vabak. Abo aime fa vabiedume neàde tame. Lahana um dam na dua dam, “Aiee!” um ba akati modela?
5. Um gi na fi ho naedat na aume nehuli ba oteme àm bakti ulohote. Ame na fi ho lam naedat ba am otem bak lam vabili gi ame na feà lam deeli àida. Labi um laha. Um na dua dam labe uho bak niba ahe diat azim di lam na dua labe gi neàna azihi bak. Labi laha uhumo it neàdem bak laba ozome neha, “Em fa na lam ve neàdese. Em laha na iudu ium laha ve neàdese,” lahame deeli bohu vuusdam damat modem bak. Uho it deeli meedam labe vedi Alat dam bake uloodume aime neàdi fa faheme dam zoho beom bak lam um vabili meedam damat modem bak.
6. Labi laha um na dua dam labe uho vedi dam git meedaha vaba abo im vamdesu meedam dam lam tet si vou kea ladume meia uloodume aime neàdi gagu beodam boehà dam laba vou le ub lodam meo damat modem bak. Lahana ame uho si vou kea ladam dam lam ba daetesu vou geà ladam vaba gi daleà vuladamnàme uho vedi neha, “Ame boehàda labe aho ame da nim gagu otese,” lahame modem meo damat modem bak. Um gi labihadam damat modem labe, “Aiee! Ba akati modela?”
7. Emti vahi Kristus bake tu vuzehi meedam dam oa, na dua dam labe uba vabidam bak lam gi ozahigeàmu meedam bohu vuusdume vou faodume im Boehàda Yesus iba bak niba fa lese. Ubu uho lab ozahit vou faodam bak lamti na debe soali àm da labe aba aho meedam bak lamti ulohote. Neham bak. Ame da labe am na soali àm neà bak lam vou faodam meot. Aho gi nehadam bak. Amu nasi na debe afoezobe abaabu ahamte lemda laba vou faoda. Labi neo am na soalelo vabalem di lem abaabu laba neo laha vou faodume soali neàdehezobe ab meedume vahedamam bak.
8. Labihàmu im Boehàda Yesus fa bak niba lem bak netàdelo vabalehemu uho laha ubu uho Kristus bake lab tu vuzehi meedam bak lam mu bedi setem vaba gi ozahit labaha bohu vuusdume vou faodume im Boehàda Yesus fa lese.
9. Labi laha uho a teidi ot vàlui ot vàluidume gagodamule. Eho gi neham bak ozome uba labi mali gagodam bak. Alat ba diamut uba neha, “Uho lab meedam bak lam faite,” lahame Aho ba uba vàlu gagu beodam vabak laba ozome eho uba mali gagodam bak. Labi laha im Boehàda Yesus labe Aho dam bake uloodume aime neàdi gagu beodam bak ab fuseo vabaleham bak.
10. Emti vahi Kristus bake tu vuzehi meedam dam oa, eho etei uba lab gagoho bak lam, “Naat uba vabidume geàdam di gi ozahit laha vou faodale,” lahame uba lab gagoho bak lam uba fet vouhome esuhu bak lam ba vabalem vabak. Ehe bak. Uho dam ahamda Alat vameadaha im aime fa dam bake ahate vameaidaha dam zi labe ibi iho aham di iube meedaha bak lam vi ozodale. Aham di iube na im ame dam laba vabidume geàdamnàme dam labe gi ozahigeàmu Alat iba gagu oluhu im lam vou vameatedam bohu vuusdume neàdehe bak. Labihàmu uho laha ame baket meedale.
11. Ame dam ahamda labe naat iba vabidume geàdamnàme iho gi ozahigeàmu lab keàtet labaha bohu meedaha bak lam iho ba Kristus bake tu vuzehi vahi meedam dam nibe ame dam laba vi ozodam di iho gi nehame vi ozome gagodam dam taia? “Dam lam labihahemu Alat dam laba neà bak mei neà bak meime labihasu modi esuidahana taia?” lahame ozome labi gagodam bak. Dat ahamda Ayub labe aba aho aham di iube meedaha im lam um aime ozobohudehena taia? Ayubat nehi meedaha bak. Na ahebu aba vabidume geàdamnàme aho gi ozahigeàmu aba aho Ala bake tu vuzehi meedaha bak lam mu vooho vaba gi meedam bohu vuusdume ame na vabidam bak lam setehezobe keàtedi meedam lahasuhu dàt modem bak. Labi ame na vabidam bak lam setehezobe Alat fa ame da laba neà bak bisi feàna modi esuidaha bak. Ame bak lam modehe labe iho dam bada nibe neham bak laha ozoda. “Im Boehàda Ala abo bisi dam bake aam faimu faobekesi im neà bak tau meedam Ala am bak,” lahame vi ozodam damat modem bak.
12. Emti vahi Kristus bake tu vuzehi meedam dam oa, eho etei nib gagolo modem im nidi nim uho mahate iademe aime ozodale. Uho meia neha, “Eho ame na mode tame,” lahame fet gagu esum di uho ba giomim gagomna zohàme uho dam bake a faa vi fegumule. Abo asum ahoba iuba esumna modeo, bak niba esumna modeo, bak ium ahebu esumna modeo, lahamna labe im ee a gagu faa vi fegumule. Uho im fet gagu esulo modem di lam gi imbona gagodam tadele. Neham bak. Uho nehalo modemeam, “Lo. Imbo bak,” lahame gagolo modemeam làhà gi, “Lo,” lahale. Laham vabameam uho nehalo modemeam, “Vab. Imbo kaio,” lahame gagolo modemeam làhà gi, “Vab,” lahale. A faa vi fegumule. Gi Alat uba vàlu gagu beodam vabak laba ozome labihadale.
13. Na im uba dat meidate duzu vabidameam làhà Ala bake tom gagodale. Labi laha uho meidavat deelemeam làhà Ala bake, “Am abo feàte,” lahame vou baedam labe ladeedale.
14. Labi laha uho meidavat gailemeam làhà fa dam Kristus bake tu vuzehi vahi meedam dam laba vuusu im vameame faheme modidam dam busaoda zi laba gagome li Alam im dedamali ame gaileheda labe am obe laba duzu neàdi minyak visoi am so laba noidam labe Ala bake tom gagodale. “Boehàda oa, Oho ame da niba tau modi fa neàdele,” lahame Ala bake tom gagodale.
15. Labi uho lab tom gagodam di labe nehi fet ozo, “Alat da nim modi fa neàdem bak,” lahame nasi ozome tu ahu vàmademeam làhà Boehàda Alat ame da laba modi fat aodem bak. Labi laha ame da labe faina meedaha bak ehelemeam làhà Alat Aho beolo modem bak lam Aho gi vei mu fa faamome vei neàdedam bak.
16. Labihàmu uho faina meedaha bak ehelemeam làhà a ot vastiamule. Gi ahate ot fi desiame neàdi fa Ala bake ot tom gagoidale. Um dam totbaho gailehe bak lam Alat modi fa aodem bake uho ame baket meedale. Neham bak. Dam im vamdesu meedam dam labe Ala bake tom gagodam di lam Alat abo aime uledi Am feà bak labet modi gi ame baket fa meedam bak.
17. Uho dat ahamda Alam im aime fa ahate vou vameateheda Elia labe aba aho meedaha bak lam vi ozodale. Ame da lam gi imti uloho bak. Lahana amu di iube aho nehasu Ala bake keàtedi tom gagoda. “Ai Ala oa, bak niba a abaedamule. Gi di neà faasi bohu vuusdale,” lahame tom gagodume modeha Alat aime uledi ame baket ab modeham bak. Alat abaedam bak modi vaitoi modesdahit tiga tahun fole. Labi ba neo ala enam neo vi fole. Labihadaha bak.
18. Labihadume neàdi Elia ba neo tom gago. “Ai Ala oa, Oho iba bak niba modi fa abaedale,” lahame labi tom gagoha Alat neo uledi abaedam bak fa ab modeham bak. Labiha labe bak aotbalehe bak lam modi fa bedi na ab usdume soali ab àidaham bak. Labiha labe eho uba amu lab gagoho bak lam, “Dam im vamdesu meedam dam labe Ala bake tom gagodam di lam Alat abo aime uledi gi ame baket meedam tadem bak,” lahame eho lab gagoho bak lam abo imbo bak.
19. Emti vahi Kristus bake tu vuzehi meedam dam oa, im dam meidavat faina modemeam abo ibi iho amu Alam im imbona tu vuzehehe bak lam fa mu voou fa zie meit lameam làhà iho meit ame da laba fa tau vabededume modi aho fa am im imbona amu tuhuna lam fa vi meedameam làhà ame da meia tau vabedeme neàdeheda lam abo neàna modehe bak.
20. Ame meia vi tau vabededamda lam nehame vi ozodale. “Aa làhà! Ame da lam Alat vua elum sutem gikina geàdam bohu laba voou vaitesulo vabalehena eho vabiedume Alat fa vei neàdehe? Labi ame da labe aho faina meedam bak lam eho tau modehe labe Alat modi fa faamome vei neàdehe?” laham bak lam vi ozodale. Neàte. Eho Yakobusat sunit nim toedume ab neàdeham. Àhàm.
1. Um Alat amu fi me vame Am damalehe dam oa, eho Petrusat abo Yesus Kristus Aho amu im vameame esmozi laiamda meida nibe eho sunit nim toedume uba oluho. Abo uho gi fa dam Pontus bakti Galatia bakti Kapadokia bakti Asia bakti Bitinia bakti labihasu ahala esui ahala esuiaha dam laba lailaiame tau esdam dam abo bak niba abobo esdam vaba gi bahagiki damali teohet azihi labe fa asum ahoba iuba ba abobo esulo modemna ozomom dam oa, eho Petrusat sunit nim toedume uba oluho.
2. Im Ai Ala labe Aho um fi me vame Am damalehe bak lam gi Aho aham di iube Aba Aho fet ozome esuhu bak am bak. Labi etei imbodi um ab fi me vame Am damaleham bak. Neham labe labihaha bak. Alat Am Aha Nutabe Neàna labe Aho neha, “Um Alam damali neà bakta bohu meedase,” lahame amu gi gagu fi hasi esuhu labe um Ai Alat labihaha bak. Aho labihahemu uho Yesus Kristus labe Aba Aho gagoho im uledi ab meedamam bak. Labi laha uho neha, “Alat gagoho im lam iho bohu vuusu meeda tame. Ba voom kaio,” lahame um ahu vàmadi gagu fi hasi esuhu bak lam Yesus labe Am vasea veàtoho labe ame baket ab meedume neàdeham bak. Neàte. Eho uba ozome neha, “Im Ai Alati im Yesus Kristusti ahili uba ozahit duana deeli im neà bak modi esuidase. Labi uba modi um ahu faheme fi goaitom vaba gi vabademsu bohu vuusdase,” lahame eho ozodume Ala bake labihasu tom gagodam bak.
3. Imo im nehasu ozome im Boehàda Yesus Kristus labe Am Ai Ala bake vou baedase. Aho iba beom vaba ozahit bisi im neà bak duana tau modi esuidam Ala Am am bak. Labihadam Alat Aho Am Adat Yesus Kristus eloho bak labet modi fa ahedehe bak labet Aho iba neo modi fa faasi ab gàhàdeham bak. Labi laha im etei gi Alat Aba Aho iba ba modem zoho laba iho tu vi ozodam bohu laodoamsu vuusu vou faodam bak.
4. Iho gi Alat iba Am damalehe dam niba neà bak modemna fet ozome asum ahoba laba vahehena lam iho tu vou faodam bak. Ame na ba faidem vabak. Labi ba koeilem vabak. Labi ba veimdi setem vabak. Labihadamna laba iho tu vou faodam bohu meedam bak.
5. Eho etei lab gagodaha im lam gi uba modem im gagodam bak. Alat amu neha, “Aho ba uba soat vausu fa vei neàbodeda tame,” lahame Aho amu labi fet ozome esuhu bak. Ame bak lam ba imbodi um ozobohudi fi gatem bake Aho ahit Am feà labe etei uba vou aasu soat vatohedam labe vabiedume neàdi afoezobe dam ahebu uloome aime neàdi fa gagom digat abo ba novai vaitom digat fuhuzobe Aho amu fet ozome esuhu bak lam ab modi imbodemam tame. Uho Kristus bake tu vuzehi meedàmu Alat uba labihalo modem bak.
6. Alat uba labihadalo modemu um etei gi ame bak laba it ozodume abo deelehe bohu vuusdam damat modem bak. Lahana etei di nimodam di naat uba, “Um ahu bedeo?” laham bak la modi le modidam di lam um ahu faidehenàme abobo modem vabna gi etei nibe teohet vabidam labe um gi ozahit it ozodume deelehe bohu vuusdam damat modem bak.
7. Iho Aba tu vuzehi meedam bak lam, “Imbodi teudi tu meedào? Bedi mu voou im meideo?” laham bak ozolo naat iba lab vabidam bak lam Alat ahit uledehe bak. Neham bak. Damat, “Ke nim emas ehe bak imboo?” laham bak aalo vua ohume aam meot. Lahana ame emas lam ba labaha bohu vuusdam vaba gi vàhàdeme setem meot. Labiha labe iho ozom, emas vam doi koet. Labi iho Kristus bake tu vuzehem bak lam abo emas vam doi vafozi bisi feàda am bak. Labihàmu damat, “Ke emas eheo?” laham bak aalo vua ohume aam bak lamti iho Kristus bake tu vuzehi meedam bak lam, “Imbodi teudi tu meedào?” laham bak ozolo naat iba lab vabidam bak lam Alat ahit uledehe bak lamti ulohote. Labihàmu ame lab la modi le modidam bak lam modi aameam uho Kristus bake tu vuzehi meedam bak lam imbodi teudi tu vuzehi meedam bohu vuusdam bak aameam làhà ba diamut Yesus Kristus fa lem di uba, “Um abo feàte,” lahame ahu adat iedi um ee vousai vou baedam bak am tame.
8. Ame Da Yesus Kristus lam uho am alihi amu aaha vabnàme um abo Aba deelehe bak. Labi laha uho etei Am alihi fota aam vabna bohu vuusdamnàme uho gi ozahit Aba tu vuzehehe bak. Labihadàmu um ahu gi deelehe bohu vuusdam bak. Lahana uho lab deelehe bohu vuusdam bak lam feà labe ba vi ozome vou ded lam biem bak.
9. Neham bak ehe labe uho deelehe bohu vuusdam bak. Uho Yesus Kristus bake lab tu vuzehi meedam bak lam gi modeme voomnat modem vaba ba vam zoho ehe bak. Aho uba soat vausu fa vei neàbodedam bak am bak. Lahana Alat ame bak lam uba etei ab faasi meedamam bak.
10. Eho etei neha, “Alat uba soat vausu fa vei neàbodedam bak,” lahame lab gagoho bak lam dam ahamda Alat vameadaha im aime fa dam bake ahate vameaidaha dam labe iho im ahum nehasu aham di iube fet vameadume esuhu bak. Alat etei uba ozahit deeli im neà bak modi lab esuidam bak lam, “Ba meeda tame,” laham bak lam ame dam ahamda labe nasi fet ozobohudi vameadume esuhu bak. Lahana Alat uba soat vausu fa vei neàbodedalo modem bak lam, “Akatihasu ba modemna modela?” laham bak lam ame dam labe biehe labe, “Iho fa ozobohudese,” lahame iho im iudu gagu vi ai. Im iudu gagu vi ai. Labi neo vi ozodume iademe vi gagu ai lahadam bak.
11. Abo Kristusam Aha Nutabe Neàna labe fa ame dam ahamda labe im ahu ad laba modi vuusdam labe neha, “Damat ba Alat Gagu Fihasi Vimteme Oluhu Dat Boehàda Kristus laba nasi vabidume geàdume elo tame. Labi ame bak lam foli neàdi Alat neo ame Da Kristus labe Am ee vousai, ‘Am abo feàte,’ lahame ahu adat iedi Aba vou baeda tame,” labihasu ame dam ahamda laba modi nasi fet ozobohudi fi gatehe bak. Ame im lam ozobohudi fi gatemta fi gate. Lahana, “Adi diat modem imot modela?” Labi, “Ama bake modem imot modela?” laham bak lam bili, “Ame fet vameadume esuhu im lam ba akatihasu meedam labe ame im lam im ozobohudi tombale?” lahame vabi la ozoi le ozoidam bak.
12. Lahana Alat fa ame dam ahamda labe iho Am im aime fa dam bake ahate vameaidam dam laba Aho neha, “Ba uhumo umota neàdem bak laba ozome Eho uba modi fi gatem vabak. Gi dam badate neàdem bak laba ozome uba modi fi gatem bak,” lahame labi gagoho labe ame dam laba modi fi gatehe bak. Labi etei nim ame lab fet vameadume esuhu im lam imbodi Kristus asum ahoba iube bak niba nom oluhu Alam Aha Nutabe Neàna labe um dam bada totbaho laba modi vizi teudi ame Im Neàna lam fa uba vou vameatedam labe uba fi desi um ozobohudehe bak. Labi laha Alat uba soat vausu fa vei neàbodedam bak lam Aho Am im gagu vou usemda zi labe laha ozobohudi fi gatelo àhàki la ozoi le ozoidume vou faodam bak.
13. Emti vahi Kristus bake tu vuzehi meedam dam oa, Alat Aba Aho uba ba modem zoho laba uho bisi lab tu vi ozodume vou faodam bohu vuusdàmu eho uba nehaho. Uho gi um ahu im vamdesu vi ozodam labe so ateme faode. Daleàdi ahusobuli vabi esdam vaba gi uhumo nasi vi ozodume ozobohudi neàdi ame im ba modidale. Abo Yesus Kristus fa lem di Alat uba ozahit deeli neà bak duana modi esuidam bake uho mahate tu vi ozodume vou faodam bohu vuusdale.
14. Um amu Kristus vabili aibuna esdamna ozomom damat modem labe uho um ahulat fai bak modelo àhàkem bak laba vi ozome meedume baleàhà damat modem bak. Lahana etei nim um Alam damali im Abadata meedam damat modem labe ba akati labihà? Lada lam gi nasi voou setele.
15. Fa im nidi nim nasi faasi meedale. Alat uba, “Am damalele,” lahame uba lab gagu vadahada lam Am abo fai bak vab labe um gagu vadaha bak. Labihàmu um na im ahebu meedam di uho im fai bak meedam vab labe gi Aba Aho ozome gagodaha im lamota fa meedale.
16. Alat Vameadaha Im Toedahana laba Alat Musa bake nehasu gagoho im toehe bak ehe labe eho uba labi gagoho bak. “Em abo fai bak vabda gi im neà bak bohu meedam Alat modem labe um laha gi ame baket meedale.” Lahame labihasu gagohemu eho uba labi gagoho bak.
17. Um Ala bake tom gagodam di uho gi, “Im Ai Ala,” lahame gagodam meo damat modem bak. Lahana um laha im nidi nim laha ozomale. “Um Ai Ala,” lahamda labe Aho meia uloome aime neàdi, “Modi itaholedase,” lahame meedam di ba fetehesu meida faobekesi koena meedume itaholeda. Labi meida faobekehe vaba duana meedume itaholeda. Labihadam vaba Aho gi iademe dat meida aba aho git modehe bakti ulohona modi itaholeda. Labi dat meida labe aba aho modehe bakti ulohona neo modi itaholeda. Labihasu iademe meedam Alat modem bak. Labihàmu uho gi bak niba teohe azim lahasuhu labe bahagikina ozomom damat modem labe uho asum ahoba iuba le Alati vahi azim digat fuhu vab di nibe uho gi Ala bake, “Am abo feàte,” lahame ahu adat iedi vou baedam labe im Abada uledi meedale.
18. Eho gi neham bak ozome uba labi gagoho bak. Ubu uho vou faat lehe dam labe ibi iho vou mode ledume baleàlehe im lam uba neo vou fusi uho neo vi meedume baleàlehe bak lam ba ame na gohali vamna vab labe gi modeme vanamai mom imot modem bak. Lahana dam ahamda labe uba lab vou mode ledume baleàlehe im lam uho lab vi meedam bak lam,, “Alat uba anat modi fa faamome um Am damalela?” laham bak lam um mahate vi ozodale. Aho ba na gi modi setemnat abo perak modeo, emas modeo, na lamohonat um gohali vaha vabak.
19. Abo na feànat um gohali vaha bak. Abo Am Adat Kristus damat oteme Am vasea labe um gohali vahana am bak. Damat Kristus otehe di lam gi Dat neàda labe fa iho damat faina meedam bak lam Aho fa ot vai eloho bak. “Alat iba fà ozahigeàmu vei neàdese,” lahame ot vai eloho bak. Abo ame Israel dam ahamda labe ibi iho faina meedam bak Alat laha, “Fà iba ozahigeàmu vei neàdese,” lahame iho domba so git modesuhu bak vabda abo so neàda oteme vasea veàtom bakti ulohona otehe bak.
20. Ame Da Kristus Alat uledi damat oteme Am vaseat um gohali vam bak lam gi aham di iube Alat bakti na ahebuti meedaha vab di iube Aho nasi fet ozome esuhu im am bak. Lahana etei ba di zoho nim abo Alat dam bake uloome aime neàdi fahedam digat fuseo meedam di nibe Alat um vam bak ozome Aho Kristus uba ab modi gohali fi zeam bitoham bak.
21. Labihàmu uho Kristusat lab meedaha bak lam um ozobohudehe labe um Ala bake ab tu vuzehedamam bak. Alat ame Da Kristus lam Am eloho bak labet modi fa ahede. Labihazobe Aho neo Am Adat ee vousai, “Am abo feàte,” lahame vou baeda. Labihadàmu uho ozobohudi Ala bake ab tu vuzeheham bak. Labi, “Ala Aba zoho ba vagem kaio. Aba Aho lab fet gagu esuhu im zi lam abo, ‘Aho iba soat vausu fa vei neàbodeda tame,’ lahame amu lab fet gagu esuhu bak lamti ahebu mode tame,” lahame uho tu vi ozodume ab vou faodamam bak.
22. Labi etei nim uho Yesus Kristus labe Aba Aho meedaha im Neàna lam aime tu vuzehi meedam labe uho neha,, “Imti vahi Kristus bake tu vuzehi meedam dam totbaho laba iho abo imbona ot deeliame meedase,” lahame uhumo um ahu naedamat it ozodume im fai bak modem bak mu voou vei neàdi neà bakta ozome ab meedamam bak. Uho labihadàmu eho uba nehi ozahit neo vi gagodam bak. Mahate ahu it ozodume vàmadi meia ahobat neàdem vaba abo ahu ad iumti imbona modi ot deelidale.
23. Eho gi neham bak ozome uba labi gagoho bak. Alat uba modi fa faasi gàhàdi uho ab meedamam bak. Lahana ame lab modi fa faasi gàhàdi meedam bak lam ba om oiti om aiti om faaha bak labet modehe vabak. Lada lam gi eloi setem meot. Lahana uba etei lab modi faasi gàhàdi meedam bak lam gi labaha bohu vuusu meedam imot modem bak. Debu gi Alam im abo labaha bohu vuusdamna laba uho tu vuzehehe labe uba ab modi fa faasi gàhàdi uho ab meedamam bak.
24. Dat ahamda Yesayat aho Alat Vameadaha Im Toedahana laba im meida nehi toehe bak ehe labe eho ozome uba labi gagoho bak. “Damat modem bakti sibet modem bakti ulohote. Sibe gi ahamo modesdume kehàm vaba alai setem meot. Labi dam laha gi aidume kehàm vaba eloi setem meot. Labihadam bak. Labi meit meia aame vou baedam bak lam kehàm vaba mu voou setem bakti baket ahamo usihina labe am avagat etei aam neàna kehàm vaba bake biti koeili setem bakti uloho bak. Sibe kehàm vaba alai sete. Labi ahamo baket usihina am avagat kehàm vaba bake biti koeili sete.
25. Lahana Boehàda Ala labe Am im ba labiham vabak. Gi labaha bohu vuusdam bak.” Lahame eho Yesayat labihasu toedume esuhu im laba vi ozome uba fa nehi gagom bak. Boehàda Ala labe Am im lam im mei modem kaio. Abo gi damat etei Yesus Kristus labe Aba Aho meedume vou esmoho Im Neàna lam uba fi desi vou vameatedam im am bak.
1. Labihàmu Alat uba lab modi gàhàdi faasi meedàmu uho dam bake faina nehasu meedam bak ahaladi ahaladiaha bak lam ahebu nasi voedume vaitole. Meia faki, “Mei fà beose,” lahame bisi fai bak la modi le modidam bak ame. Labi laha meia ahit daet vageidam bak ahebu ame. Labi laha meia ahobat neàdeidam bak ame. Labi laha meit modehe im aame ahu adat faki teidemoholedam bak ame. Labi laha meia feàtàdam bak ame. Labihasu ahebu nasi voedume seddume vaitole.
2. Fa gi nehasu meedale. Data etei faahada labe am oiam do àlo àhàki meddam bakti ulohona meedale. Abo uho mahate um ahu vi ozodam labe um neàdemna lam abo Alam im lamota uho mahate aime tu vuzehi meedalo àhàkedale. Abo ame Alam im lam uho dihasi aame vi ozoda. Dihasi aame vi ozoda. Gi labihadume Aho uba soat vausu fa vei neàdedume ba abobo neàbodem bake labihadale.
3. Um alimda modem vab labe uho im Boehàda labe Aba Aho meia faobekesi neà bak meedam bak lam amu ozobohuna taia? Labihàmu uho Alam im aime tu vuzehi meedalo àhàkedam bak lam mahate keàte bohu vuusu meedale.
4. Uho im Boehàda Yesus Kristus bake ab tu vuzehi meedamam bak. Abo meia modi vizi ahedem bak vuusdamda laba uho ab tu vuzehi meedamam bak. Im Boehàda Yesus lam damat num zoho mom di it aame zisuiam kebu ozomomda Am am bak. Ame ke lam damat amu neha, “Faite,” lahame mu vooho ke lam Alat ozoha, ame ke lam bisi neàda amemu Aho naedat fa ve ab it aame zisuiam keleham bak.
5. Labi uho ame Da laba tu vuzehi meedam labe Alat Am Aha Nutabe Neàna labe uba modi vizi teudehe dam debulehe bak. Abo Alat um laha ve modi num mom ke totbaho ahena ozomom dam ziali fa Ala bake vou baedam num ab moadamam bak. “Nehadase,” lahame labihadam bak. “Aho neo uba modi fi hasi Aba im vameadam tohe dam bisi neàbodem damali num Abada laba im Abadata meedase,” lahame labihadam bak. Labi uho Yesus Kristusti vou ali ahu vàmadehe bak labet modi ubu uho fi hasi meedam bak lam Alat deelem bak am bak.
6. Eho etei lab vameadaha im lam Alat Vameadaha Im Toedahana laba Yesayat toedaha im nim ehe bak. “Alat neha. ‘Nasi aimale. Eho num mom kebu bisi neàda eho ab fi me vaham bak. Ame Israel damat azihi bak Sion laba Eho ame num mom kebuti ulohona ozomomda laba ab modesuham bak. Labi meit ame Da laba tu vuzehemda lam ba ahu faidi teidem vabak.’ ” Lahame Yesayat aham di iube labihasu fet toedume esuhu bak.
7. Ame im lam imbote. Kristus lam it aame zisuiam kebu ozomomda Am am bak. Labi dam ame Da Kristus bake tu vuzehem dam labe nehi ozo. “Ame num it aame zisuiam kebu lam bisi feàda am tame,” lahame labi ozodam damat modem bak. Lahana dam Aba tu vuzehi meedam vab dam labe ozom di ba labihasu ozodam vabak. Ame dam lam Alat ba beodam dam am bak. Alat Vameadaha Im Toedahana laba im behàsu nim toehe labe labihaha bak. “Dam num moadam dam labe, ‘Faite,’ lahame mu vooho ke lam fa feà Dateli bisi num mome teudem ke am bak.”
8. Labi laha, “Ame it aame zisuiam kebu lam dam bake modi guezi bitelo àhàki modi bitem kebu am.” Labihasu gagu toedume esuhu im behàsu lam am tombu gi neham bak. Ame dam labe iho lab guezi bitelo àhàki modi bitem bak lam debu iho Yesus Kristus labe Aba Aho meedaha Im Neàna lam abo Alam im lam aime tu vuzehi meedam mom bake labihaha bak. Labiha labe ame dam lam Alat amu neha, “Gi vàhàdedase,” lahame fet ozome esuhu labe labihaha bak.
9. Lahana um etei ba labihadam vabak. Umota, “Am damalese,” lahame Alat fi me vaha dam um am bak. Labi um laha im Boehàda Ala labe Am tohe damali gi im Abadata meedam dam um am bak. Labi laha Alat um vame Am damali, “Gi im Aba Aho gagohodata fi hasi bohu vuusdase,” lahame umota Aho gagu fi hasi vadaha dam debu um am bak. Nehaha bak. Im aibu bake aidàmu Alat iba gagu iho fa Am soa modesuhuna fako iedemna fauha meo bak laba ab le duzuham bak. Labihàmu, “Uho gi Aba Aho feà bak meedam bak lam fa dam amomoi bake vou vameatedase,” lahame labihasu uba meedam bak.
10. Um amu di ium Alam damalehe vabak. Lahana etei nim Aho um vaha labe uba modi um ab Am damaleham bak. Labi laha um amu di ium Alat uba faobekesi ozahit im neà bak modi esuidaha vabak. Lahana etei nim Alat faobekesi ozahit uba im neà bak ab modi esuidamam bak.
11. Um emti vahi Kristus bake tu vuzehi meedam dam eho deelem dam oa, uho bak niba teohe vahi esdam di eho nehi ozodam bak. Um gi bahagiki damali bak niba teohe vahi esdamna abo mei bake teohe li fa bak obodate lam damat modemna ozomom bak. Labihàmu uho bak niba teohe esdam di um ahulat faina meedalo àhàkem bak lam mahate it mali meedale. Faina meedam bak lam uba modi vàhàdi ba neàbodem biemna am tame.
12. Uho dam Kristus bake tu vuzehem vabda totbaho lamti vahi esdam di, “Uho gi im neà bakta meedase,” lahame ahulat it vou faovoi meedale. Neham bak. Ame dam labe uba vàlu neha, “Um git modeho,” lahame im giomim gagodam meot. Labihadamnàme ubu uho im neà bak meedam bak lam ame dam labe etei vi aame mu vooho im lam ba diamut Alat dam bake uloome aime neàdi fahedam digat fuhuzobe ame dam labe ab gagodamam bak. “Aa làhà! Alat dam lam vuusuhu labe neà bak meedalo modem bak im vabilehe,” lahame ba ozobohudi àvodi Ala bake vou baedam bak tame.
13. Bakdat uba vuusu im vahokedam dam eeda ahebu im gagom di um ahebu iademe aime uledi meedale. Neham bak. Ame im lam im Boehàda Yesus labe Aba Aho ozoho bak am tame. Labihàmu ame dam eeda labe iho vameadam im iho iademe aime uledi meedam di abo dam bakdate vuusdam boehàdatebo bisi feà dateboli novahada lam modeo,
14. labi aba aho gagu ee damalehe dam zi totbaho lam abo gubernur zi lam modeo, labihasu ahebu im iademe aime uledi meedam tadele. Ame gubernur zi laba boehàdatebo labe iba neha, “Dam im fai bak modeheda beodume itaholedase. Labi dam im fai bak modehe vabda abo im vamdesu meedamda laba aame vou baedase,” lahame aho gagu ee damalehe dam zi totbaho lam abo gubernur zi lamti labihasu ahebu im im iademe aime uledi meedale.
15. Neham bak. Alat nehi ozo, “Uho lab neà bak meedam bak lam dam Ala bake tu vuzehem vab dam labe fa vi aahemu ame dam labe fa ibi iho ahusobuli uba giomim vàlu gagom bak lam fa daleàdi setem bak am tame,” lahame Alat Aba Aho amu fet ozome esuhu bak am bak.
16. Uho Kristus bake tu vuzehi meedam dam umota Iblisit amu simtedi uba modi faina meedume baleàlehe bak lam Alat Aho modi fa faamome vei neàdedaha labe uhumo duzu na ubu uho ozomda ab la modi le modidamam bak. Bak lam neàte. Lahana ozomale. Um fa Alam im meedam damali gi ame baket meedam bohu vuusu meedale. Ba a nehi ozo, “Ne, Iblisit amu em simtedehe bak lam Alat fa faatoi em isi ab neàdeham bak. Eho fai bak nim vi modem neà bak,” laham bak lam uho a it ozome meedamule.
17. Eho bak laba ozome uba nehi gagolo modem bak. Meit gagohoda lam ahu adat iedi ozahit dogoit aidale. Labi imti vahi Kristus bake tu vuzehi meedam dam totbaho laba deeli meedale. Labi laha Ala bake, “Am abo feàte,” lahame ahu adat iedi vou baedale. Labi laha im dam bakdate teohe vuusuhu boehàdatebo bisi feà dateboli novahada laba neo ame baket ahu adat iedi im aba aho gagohoda lam ozahit aime meedale. Labihasu meedale.
18. Mei na teo meedam dam oa, uba na teo gagu ooteme meedam dam labe iho uba im gagom di um gi ozahit ahu adat iedi ibi iho gagohoda lam uledi meedam tadele. Abo ame dam labe iho uba na teo gagome meedam di abo faobekesi uba dae nemahubat uba vameame meedamda modeo, abo uba dae meot ooteme vameame meedamda modeo, labihasu ahebu uho gi ozahit uledi meedam tadele. Um abo Ala bake ahu adat iedi vou baedam damat modem labe labihadale.
19. Eho gi neham bak ozome uba labi gagoho bak. Uho mei na teo meedam dam labe meit nehi vi ozo, “Em git modehe vabda nim eba na teo gagu ooteme meedamda nibe eba git vabidume geàdà? Làhà, Ala ehe bak. Eho gi ozahit uledi keàtedi labaha bohu meedase,” labihasu ozome meedamda lam Alat bisi deelemda am bak.
20. Uho ozom, uho debu git modehe labe ame dam labe uba beome, “Itaholedase,” lahame uba modi geàdam di uho fa ozahit ame dam labe im im uledi laha keàtedi labaha bohu meedam labe Alat ba uba vou baedà? Vabà! Alat ba uba vou baedam vabak. Lahana uho debu git modehe vab labe ame dam labe fa uba beome modi geàdam di uho fa ozahit ame dam labe im im uledi laha keàtedi labaha bohu meedam labe Alat uba deelem bak am bak.
21. “Uho gi ame baket meedale,” lahame Alat amu di iube uba labi fet ozome fi hasi esuhu bak meida am bak. Uho ame bak lam meedam di gi Kristusat Aba Aho meedam bakti ulohona vi ozome meedale. Uho faina meedam bak lam Kristus fa ot vai geàdume eloho bak laba vi ozome meedale. Aba Aho modehe bak lam uba nasi vouhohona am bak. Labihàmu lada laba vi ozome meedale.
22. Nehaha bak. “Ame Da Kristus lam ba faina meedaha vabak. Ba meia ahi vagedaha vabak.”
23. Labi laha damat Aba feàtàdaha di lam Am ba ot feàtàiaha vabak. Gi teo feàtàdaha bak. Labi laha damat Aba modi geàdaha di lam Am ba fa ot vai meia vi uloodaha vabak. Am gi Am Ai Ala bake abo meia uloome aime neàdi fa gagom di gi iademe ulohodesu modemda laba ahumdi, “Labihasule,” lahame Ala bake ahumdehe bak.
24. Iho faina meedàmu Alat fa iba beomna zohàme Kristusat fa ot vai ahit fai Dateli ut tetehesuhunaso laba eloho bak. Iho ba faina meedam vaba gi neà bakta im vamdesu meedam bohu vuusdam bake ozome ahit uledi ot vai eloho bak. Labi am beodaha but zi lam uba modi fa ab vei neàdedaham bak.
25. Um amu di ium domba fi ho bak vabi seti godamdati uloholi Kristus bili faina meedam bak. Lahana etei nim uba faobekesi vou aasdume fa vabiemda Kristus lam uho fa Aba tu vuzehi im Abada ab meedamam bak. Abo domba bak vabi seti godamda lam fa vou lehemu naedat fa vou aasdume vabiedam bakti ulohona ab meedamam bak.
1. Lahi dat eheda oa, uho eho etei lab gagoho bak lam ame baket laha meedale. Uho um dat labe vameadam im lam laha iademe aime uledi meedam tadele. Lahana Yesus Kristus labe Aba Aho meedaha Im Neàna lam abo iho vou lehe Alam im lam um vadaha dam totbaho ame im laba tu vuzehem momda ehelemeam làhà, gi ozahit ame baket meedale. Neham bak. Uho um dam laba lab iademe aime uledi meedam bak ame. Labi uho lab neàbodi meedam bak ame. Labihasu meedam bak lam um damat vi aadam labe ozo, “Im lahi ba git modem vaba?” lahame vi ozodam labe, “Alam im imbote,” lahame Yesus Kristus bake tu vuzehem bak am tame. Ba uho um dat im vahokedam labe Kristus bake tu vuzehem vabak. Gi dam ihimo uho lab meedam bak laba vi aame ozobohudi tu vuzehem bak.
3. Labi uho laha neha, “Damat iba fà aame deelese,” lahame um ahulat it ozome sis visoi ohuta gome naem bak ame. Labi um soa naem bak ame. Labi doi duana vaha sue dum bak ame. Labihasu ahebu a it ozome ahumdi ahobata neàdemule.
4. Abo um ahu ad iumti neàdem bak laba it ozome meedam labe damat fà aame deelese. Abo lahi dae vabda ahu nemahubada modem bakti ulohona meedale. Um soa naehena lam veimdi setem meote. Lahana aam neà bak bada nim ba setem gikina gi labahanat modem bak. Im bada nim Alat aam di bisi feàda am bak.
5. Lahi ahamda Ala bake tu vuzehi im Abadata meedam lahi abo git modehe vab lahi labe laha ibi iho modi damat iba aame deelehe bak am. Lahi lada lam im damat vameadam im iademe aime uledi meedam tadehe bak labet modi damat iba aame deelehe bak.
6. Abo Abrahamam nam Sarat labihaha bak. Sarat am dat Abrahamat aba im gagom di gi aime uledi meedam tadem namet modem bak. Labi laha Sarat am dat bake ozom di aho gi nehada. “Eba im gagu modiamda am bak,” lahame labi ozome gagoda. Labi uho etei Sarat lab neà bak meedaha bak lamti ulohona ozome meit uba fai bak vabidameam uho iedem vabna gi ozahit im vamdesu meedameam làhà, um Saram adnamat ozomom lahi um am bak.
7. Dam lahi eheda oa, um laha um ahu adat iedi lahi bake deeli iademe vabiedam labe vou aidale. Neham bak. Lahi bee bak. Labi im dam teu bak. Labi laha Alat ozahit aame faobekesi neà bak meedam di gi um damta meedam vabak. Alat uba lab modi Amti vahi gi ahe neàna bohu vuusdam bak lam um lahiti vahi ame baket modehe bak. Labihàmu um ahu adat iedi um lahi bake deeli iademe vabiedale. Uho labiham vabameam làhà, uho Ala bake tom gagodam di Alat ba aim vabak.
8. Eho uba neo nehi vi vameadase. Um ahebu ahu vàmadi vabademsu meedale. Labi laha ubu uho ozoho bak gi labihasu esu fa im meibada nasi ozome meedale. Labi laha uho dae vab damalele. Labi laha ahu nemahubat dam giida totbaho bake aame faobekesi amedamalem bak ozomom baket ot deeliame meedale.
9. Alat ahamte uba neha, “Am damalese,” lahame gagu fi hasi vaha di labe, “Uho gi im nehasu meedase,” lahame Aho labihaha bak. Meit uba fai bak modemda laba a modi fa vi vatau neàdemule. Labi laha meit uba feàtàdam di a modi fa ot feàtàiamule. Fa gi nehale. Dam uba fai bak meedaha dam laba uho gi fa Ala bake im nehasu tom gagodale. “Ai Ala oa, Oho fa ame dam laba gi im neà bakta meedale,” lahame tom gagodale. “Labihasuse,” lahame Alat labi ozome uba gagu fi hasi vaha bak. Uho ame baket meedam labe Alat uba aame faobekesi uba neà bak meedam bak am tame.
10. Meit Alat Vameadaha Im Toedahana laba im meida nehasu toehena ehemu eho uba labi gagoho bak. “Uho meit neha, ‘Em abo digat ahebu ahu faidem vaba gi neà bak tadese,’ laham bak it ozome meedamda lam fa gi im nehasu meedale. Am aha it vou faovoi ba fai bak a gagomule. Ba meia laha a ahi vagedamule.
11. Ba meia laha fai bak a modemule. Fa gi neà bakta ozome meedale. Labi ame da labe laha dam totbahoti fa vahem bak laba ozome mahate keàtedi meedume fa vahi neàdi bohu vuusdale.
12. Neham bak. Dam im vamdesu meedam dam lam Boehàda Alat vou aasdume vabiedam dam am bak. Labi laha ame dam labe iho tom gagodam di Aho laha dogoi balesu vou faodam dam am bak. Lahana dam faina meedam dam lam Aho odosi mom dam am bak.” Lahame labihasu toehemu eho amu uba neha, “Alat Aba Aho ozoho bak laba vi ozome meedale,” lahame labi gagoho bak.
13. Uho neà bak bohu keàtedi meedameam làhà, ba uba amat fai bak mode? Uba fai bak modemda vabak.
14. Lahamnàme uho im vamdesu meedam labe meit uba modi geàdameam làhà gi, “Neà bak,” lahame deelehe bohu vuusdam damalele. Labi meit, “Um fà iedese,” lahame meedam di a bisi vi ozodume iedemule.
15. Fa gi nehale. Fa Kristus bake, “Am abo feàte,” lahame ahu adat iedi Aba vou baedam labe nehale. “Ebe eho ozom bak fa vei seti Obo Oho ozom bak fa meedase. Oho Boehàdatebo labe fa eba im gagu modiam datelese,” lahame gagu fi hasi vàmadi esule. Labi laha uho Yesus Kristus bake tu vuzehi meedam bak lam meit uba neha, “Uho ana modi bisi Yesus Kristus bake tu vuzehi ahumdi vou faodàla?” laham bak uba vi ailo gagom di, “Uho im akatihasu fa iademe gagoe?” laham bak biem bake nasi uhumo fet ozome ozobohudi ahumdi vou faodale.
16. Lahana uho fa gagom di a dae meona gagodamule. Uho gi Alat Aba Aho ozoho bak lamota meedam labe uho gi damat aime deelem bak ozome ba ahu gelevam vaba gi ahu adat iedi dae nemahuba neàt vameadale. Eho gi neham bak ozome uba labi gagoho bak. Uho Kristus bake tu vuzehi Amti vou ali ahu vàmadi gi im neà bakta meedàmu damat uba feàtàdam dam labe iho vi aam di uho lab neà bak meedam bak lam vi aame fa ladem bak am tame.
17. Mahate ozodale. Alat neha, “Uho im nehasu meedale,” lahame Aba Aho ozoho bak lam Aho meia modi fa vuusu ame im neà bak meedam labe meit fa ame da laba modi geàdameam làhà bak lam bisi neà bak am bak. Lahana iho faina meedam labe meit iba modi geàdam bak lam bisi fai bak am bak.
18. Eho gi neham bak ozome uba labi gagoho bak. Kristus laha faina meedaha vabda damat modi geàdaha bak. Aho gi iho faina meedam bak fa faamome vei neàdedam bak laba vi ozome gi ot vai eloho vàmadehe bak. Abo ame Da lam faina meedaha vabda abo gi im vamdesu meedamda fa iba dam faina meedam dam abo im vamdesu meedaha vab dam niba ot vai eloho bak. Umti fa Alati vahem bak laba ozome labihaha bak. Am soabota damat oteme eloho bak. Lahana Alat Am Aha Nutabe Neàna labe Am eloho bak labet modi fa ahedi usaha bak.
19. Labi usai godume amu aham di iube Nuh am namti im adam làtela lamti am taai làtela lamti labihasu dam delapan lam ihe feàna laba ziddume vao deili vousaha di labe dam dua bak ahebu vaot beodume elodume it oazi le simtedi lam bi esdam bak laba le, “Am feà dateleho,” laham im vou vameatedaha bak. Ame dam it oazi le simtedi esdamda zi lam amu Nuhat ihe feàna moadam di labe Alat, “Aba tueo?” laham bak laha vou faodaha Aba tum vabamu moho dam it oazi le simtedi esdam dam zi feà am bak. Ame vao deili vousaha di lam dam dua bak ahebu vaot beodaha bak. Gi ame ihe feàna laba ziddaha dam delapan lamota ame vao labe vousai modesdume ame ihe vou ladume fa ab ahedeham bak.
21. Ame da Nuh am damti aham di iube ziddaha ihe feàna lam vousai modesdume vou ladume fa dam ahedehe vao lam etei nim dam Kristus bake tu vuzehi meedam dam meit uba vuu valo vou baptisleidam bak nasi fet vouhohona am bak. Ame lab baptisleidaha bak lam ba dam labe im so gihobulehe bak lam modi fa boz neàdem bake it ozome baptisleidaha vabak. Gi neham bak. Meit um vuu valo baptisleidam di uho gi Ala bake neha, “Iho faina meedam bak lam fa voou gi Yesus labe Aba Aho ozoho bak bohu meedalo mozo,” lahame um ahu im meidem vaba gi ahu vàmadi Ala bake fet gagu esum bak am bak. Ame bak labet Alat etei uba soat vausu fa vei neàdedam bak am bak. Alat Am Adat Yesus Kristus eloho bak labet modi fa ahedehe labe labihaha bak.
22. Alat neha, “Em Adatti ahili feà datelese,” lahame Yesus Kristus lam Alat modi fa ahedi fa asum ahoba iuba vousai tom ilu Am ahi totbaho laba ab vou nusuham bak. Labi vou nusu fa Aba modi Boehàdateboli Alat Am im gagu vou usem dam zi lamti labi eeda totbaho zi lamti labi asum doni beaba laba modealadaha boehàda zi lamti labihasu modi uledi Am Adat labe ab Am im aime modiam damaleham bak.
1. Labihàmu Kristus Am soabota damat modi geàdume oteme elohemu um laha, “Ame baket im laha modi geàdam neàte,” lahame uho it ozome ahu vamateme ahumdi meedale. Eho gi neham bak ozome uba labi gagoho bak. Iho meit neha, “Ame baket em laha modi geàdam neàte,” lahame it ozome am ahu vamateme labi gagu fa imbodemeam làhà ame da labe aba aho amu lab faina meedam bak lam gi ab mu vaitomam bak.
2. Labiha labe ame da labe aho bak niba aidam lahasdam di zoho nibe aba aho amu bakdat faina meedume baleàlehe bak lam, “Fa vi meedase,” lahame modelo àhàkedam vaba gi Alat Aba Aho ozoho im lamota fi hasi meedam bak.
3. Eho gi neham bak ozome uba labi gagoho bak. Uho amu di iube dam Ala bake tu vuzehem vab dam labe ibi iho faina meedalo àhàki meedam im lam uho ab tau meedamehamdeham bak. Neàde! Ba a vi tau meedamule. Di labe uho gi im nehasu meedam damat modem bak. Damat gagu fi hasi esuhu bak ehelahit ahole meedam vaba uho vedi neha, “Iho faina meedahe?” laham bak naedat it ozom vaba ahusobuli ostame la modi le modidam bak ame. Labi faina meedalo àhàki ahu gukeme im mei im meime ozome meedam bak ame. Labi damti lahiti vazisi vao meona duana uddume bak vabili sikitaom labe fa fi loholi la modi le modidam bak ame. Labi laha ostamna imbo vabna Alat ahasbeamna laba alali vou baedam bak ame. Labihasu uho gi amu di iube ab meedume etei ab vaitoham bak.
4. Uho ame na zi lam vaitohemu dam Ala bake tu vuzehem vab dam labe iho fa ubu uho amu ame dam laba tau gi ostame vahi faina la modi le modidam bak lam uho fa vi meedaha vabak laba vi aame ozo, “Akati iba tau modehe vaba um fa mu voohela?” lahame àvodi uba fa feàtàdam bohu meedam bak.
5. Lahana ame dam etei uba feàtàdam dam lam ozom vaba? Ba diamut Alat avaesdam laba le duzu Alat Aho ame dam labe iho faina meedam bak gagu vi aim bak ehe bak. Abo iho etei dam aheda ziat modeo, amu elodahada ziat modeo, abo dam ahebu Aho vi uloome aime neàdi fa gagom bake Alat etei ozobohudi ahumdi neàdi vou faodam bak.
6. Ame bak lam ehedaleàmu Kristus bake tu vuzehi meedam dam etei elodahada zi lam iho amu ahe lahasdam di lam damat ame Im Neàna lam ame dam laba vou vameatedaha bak. Neham bak ozome labihaha bak. Iho bak damat bak niba aidam di elodam bak meedamta meeda. Lahana Alat Aho ozoho bak labet modi, “Fa Amti vahi ahe neàna bohu vuusdase,” lahame ame Im Neàna lam ame dam laba vou vameatedaha bak.
7. Bak nimti na ahebuti ab meedume novai vaitolo modemam bak. Labihàmu etei nim um mahate it ozodume vou faovoi na im ahebu meedam di uhumo nasi ahulat vi ozodume ozobohudi neàdi ame im ba meedale. Uho labihadam labe iademe Ala bake tom gagom bak am tame.
8. Labi laha im nidi nim bisi tombuda amemu a voomule. Abo um ahu ad iumti neàbodi ot deeli ot deelidale. Iho labihameam làhà im dam totbaho labe iba git duana meedam bak lam im ba ozom vaba gi ozahigeàmodam bak.
9. Labi laha bahagikida lem di om numti na àmnati a malemule. Abo ahu odohalehe vabna gi ahu deelehat ilabdi vou ile.
10. Alat Aba Aho meia ozahit deeli im neà bak modi esuidam bak lam abo ilabdi meedam Alat modem labe Aho dam bake, “Nehasu meedale. Nehasu meedale,” laham im lam Aho iba ahala vizi teude. Ahala vizi teude. Labihadaha bak. Lahana ba meit ahamo aba it daetbadam bak ozome labi modehe vabak. Iho gi Aho iba lab vizi teudehe bak laba vi ozome gi iademe meedam labe fa dam totbaho laba tau vabiedume teudi neàdedaha bak laba ozome iba labi modi vizi teudehe bak.
11. Abo Alat Aho uba dat meidate neha, “Dam bake duzu im vameadam datelele,” lahame meia labi modi vizi teudi meedamda labe aho gi Alam ahat Am im vameadam bakti ulohona ozome duzu vameadale. Labi laha Alat Aho uba meidate neha, “Meia aame faobekesi tau vabiedume neàdedam datelele,” lahame meia labi modi vizi teudi meedamda labe aho gi Alat aba lab modi teudehe bak labet meia tau vabiedume teudi neàdeidale. Abo Yesus Kristus ame dam laba tau teudedam labe ame baket meedale. Alam ee vousai, “Am abo feàte,” lahame ahu adat iedi aba vou baedam bake labihadale. Am bisi feà labe dam bake vuusu im vahokedam bohu meedam bak lam damat ahu adat iedi Am ee vousai, “Am abo feàte,” lahame vou baedam bohu meedam bak lam ahole meedam bak. Labihadase.
12. Emti vahi Kristus bake tu vuzehi meedam dam abo eho deelem dam oa, naat ubu uho Kristus bake tu vuzehi meedam bak lam, “Um teuo? Bedi mu voeo?” laham bak modi ozolo uba lab vabidume modi geàdam bohu meedam bak lam uho a àvodemule. Neham bak. Uba etei lab modi vabidume geàdam bak lam ba alimnat modem vabak. Gi ibi amu bak niba vabidume geàdume baleàlehe bak am bak.
13. Fa gi nehale. Damat amu Kristus bake vabidume geàdaha bak lamti ulohona fa etei uba neo ab vabidume geàdamam bak. Labihàmu uho gi ozahit deelehe bohu vuusu meedale. Uho labi modem labe ba diamut Alat Am adat Kristus, “Am abo feàte,” laham bak lam dam bakdate fi zeam bitom di lam um laha aame deeleha vàhàdem di am tame.
14. Uho Kristus bake tu vuzehi im Abada meedàmu damat uba feàtàdameam làhà um gi deelehe bohu vàhàdi vuusdam damat modem bak. Neham labe labihaha bak. Uho nehi ozo, “Làhà. Iba modi Ala Am feà bak lam im ozobohudedam Alam Aha Nutabe Neàna labe iba modi vizi teudehe labe damat iba labi feàtàdàla?” laham bak lam um ozobohudem bak am tame.
15. Lahana damat uba modi vabidume geàdam di uho a nehasu meedam labe ame dam labe uba vàlu fai bak modi vabidume geàdamule. Uho mei na aa vam bak modeo, uho mei otem bak modeo, uho im fai bak meida meedam bak modeo, meit ihimo modem im uho giida vedi vi taum bak modeo, labihasu uho a meedume ame dam labe uba fa vàlu fai bak modi vabidume geàdamule. Uho labi modemeam làhà ame dam labe uba lab vabidume geàdam bak lam gi ahole modi geàdume ladehe bak.
16. Lahana uho Kristus bake tu vuzehi im Abada meedàmu damat uba fai bak modi vabidume geàdameam làhà a ladi ahu faidemule. Uba lab modi vabidume geàdaha bak lam ahole modi geàdaha vabak. Fa gi nehale. “Ai oa, em Kristusti vou ali ahu vàmadeho. Om abo neàte,” lahame Ala bake vou baedale.
17. Eho gi neham bak ozome uba labi gagoho bak. Etei nim dam bakdat ibi iho meedaha im lam Alat uloome vi aime fa gagu fahem digat ab vou fuseo meedamam bak. Labi Aho nasi gagu uloome aime neàdi fa gagodam dam lam im Am damalehe dam am bak. Lahana Aho lab uloome aime neàdi fa gagodam bak lam iba Am damalehe dam niba iba etei nasi faasi meedameam làhà uho ozom, dam Am Im Neàna aime fa mu voohoda laba Aho ba gi labihasu aalahigeàmu beoho vaba voeo? Vabà! Ba labiham vabak. Ame dam laba laha uloome aime neàdi fa gagom di abo feàna beodume geàdam bak.
18. Eho etei lab gagoho bak lam gi meit Alat Vameadaha Im Toedahana laba im meida nehi toehe bak ehe labe uba labi gagoho bak. “Im vamdesu meedam dam lam damat modi vabidume geàdam bohu nasi meedume ba Alat soat vausu fa vei neàbodedam bak. Aho labihameam làhà, damat Aba Aho gagoho im uledi meedaha vaba faina meedam dam lam uho ozom, akati mode? Dam lada lam bisi duana beodume geàdam bohu meedam vaba?”
19. Lahame labihasu toehemu eho uba nehi gagolo. Uho Alat Aba Aho ozoho bak abo naat uba vabidume geàdam bak lam meedàmu uho gi Ala bake abo Na Debu Modeheda laba abo im fet gagu esum di ba vagem vab Ala laba ahumdi tule. Uho Ala bake ahumdi tum labe uho lab neà bak meedam bak lam ba voom vaba gi labaha bohu vuusu meedam bak am bak.
1. Kristus bake tu vuzehi meedam dam laba vuusu im vameame faheme modiam dam busao dam oa, eho etei uba gagolo modem im nim uho aimale. Em laha Kristus bake tu vuzehi meedam dam laba vuusu im vameame faheme modiamda meida em am bak. Labi laha damat amu Kristus bake vabidume geàdaha di lam tau duzu aasuhet meedahada em am bak. Labi ba diamut Kristus labe Am feà bak lam Alat dam bake modi fi zeam bitom di abo um ee vousam di lam em laha vi tau ee vousamda meida em am bak. Eho labihamda nibe uba im nehasu gagolo mozo.
2. Dam Kristus bake tu vuzehi meedam dam lam abo ubu uho vuusu im vameame faheme modiam dam lam uho busao damat iademe vou aasu vabiedale. Abo domba fi ho vou aasu vabiedamda labe aba aho am domba fi ho iademe vou aasu vabiedam bak lamti ulohona meedale. Uho lab vou aasu vabiedam bak lam a odohalehebeat tet meedamule. Abo Alat uba gagoho imot modemu uho gi ule neàt keàtedi meedale. Labi laha ame bak lam meedam di, “Ubu uho lab meedam bak lam gohali doi duana vam bak ehete,” lahame a vi ozome meedamule. Gi ubu uho amu lab ule neàt meedam bak lahasu meedale.
3. Labi Alat uba gagu uho vuusum dam lam a bakda boehàdat meia tet ootedam bakti ulohona a meedamule. Gi iademe im neà bakta meedume damat fà vi aame ame baket vouhodase.
4. Uho labi modemeam làhà uba Vou Aasu Vabiedamda Bisi Feàda Yesus abo Alat ba modi fi zeam bitomda lam lem di ame Da labe Aho uho lab meedam bak gohali Am feà bak lam fa uba modi vizi um ee laha vousam bak. Um ee lab vousai ahu adat iedi vou baedam bak lam ba setem vaba gi labaha bohu vuusda tame.
5. Um dam gàhà lahasuhu dam oa, um laha uba vuusu im vameame faheme modiam dam labe im im lam aime uledi meedale. Labi laha um ahu a bisi it daetbadume ubu uho ozome meedam im laba ozome meedamule. Gi um dam totbaho labe ibi iho ozome meedam im laba ahu ladehebeat tau meedale. Alat Vameadaha Im Toedahana laba meit nehi toehena ehe labe eho uba labi gagoho bak. “Dam im ahu it daetbadam dam lam Alat faki mu odosdam dam am bak. Lahana dam im ahu ladehebeat meedam dam laba Alat aame ozahit deeli im neà bak modi esuiam dam am bak.”
6. Labihàmu Ala abo im feàna meedam Alat modem labe Aba Aho gagoho im laba uho ahu ladehebeat uledi meedale. Uho labiham labe Alat Aba Aho fet ozoho digat feàda fuhuzobe um ee vousai fa feà damalem bak am bak.
7. Uba faobekesi vou aasu vabiedam Alat modem labe uba modi ahu faidi vi ozomna ahebu vou le Ala bake ahate tom gagodume esule.
8. Uba faki mu odosdamda Iblis labe aho gi singa fai labe aautedam labe godume na veeme àme setem bakti ulohona aho uba dalu um ve ubu uho amu Kristus bake tu vuzehi meedaha bak lam, “Fà vàhàdedase,” lahame uba modi am damalelo vou faodam bak ehe bak. Labihàmu uho um ahu it vou faovoi so ateme vou faodale. A gi daleàdi ahusobuli esdamule.
9. Iblisit uba lem bak uho gi ubu uho Kristus bake lab tu vuzehi meedam bak labet keàtet ahate Iblis bake gut odosi meedale. Neham bak. Naat uba etei lab vabidume geàdam bak lam gi umota meedam vabak. Abo umti vahi Kristus bake tu vuzehi meedam dam totbaho abo bak iumti bak iumti ahebu laha ame baket meedam bak. Bak lam um ba biem vaba abo ozobohu bak.
10. Ala abo dam ahebu ozahit deeli im neà bak modi esuidam Ala Am am bak. Labi laha Aho uba gagu fi hasi Am damalelo modemu Aho neha, “Uho Am adat Kristusti vou ali ahu vàmadem labe Aho uba modi Am feà bak abo setem biemna gi labaha bohu vuusdamna lam fa uba modi vizi, ‘Um abo feàte,’ lahame fa uba vou baedase,” lahame labi fet ozome esuhu Ala Am am bak. Labihasu meedam Alat modem labe uho bak niba esdam di naat uba teohet lab vabidume geàdamna lam nasi vaitoi neàdi afoezobe Aho ba um bitelo modem bak lam kehàm vaba um fa si vabededume vou duzu teudi laodoamsu ab modi neàbodelo modemam bak.
11. Imo Dat bisi feàda Ahamo labaha feà bak bohu vuusdamda abo ba setem gikida laba vou baedase. Labihadase.
12. Eho etei nib toedume oluhu sunit buuna nim ehemo toem kaio. Emti vahi im Boehàda Kristus bake tu vuzehi meedamda meida Silas labe aho eba tau toedume uba oluhu bak. Ame da Silas lam emti vou ali ahu ulohodesuhuda am bak. Em abo gi uba vabededume um ahu teudem bak ozome eho sunit nim toedume uba oluhu bak. Labi laha Alat iba ozahit deeli im neà bak modi esuidam bak lam, “Imbote,” laham bak lam um fota biem bake, “Fa vi ozobohudi fi gatedase,” laham bak laba ozome eho sunit nim toedume uba oluhu bak. Ame bak lam uho mahate tu vuzehi keàtedi meedale.
13. Umti vahi Kristus bake tu vuzehi meedam dam abo Alat uba gagu fi hasi vadaha bakti ulohona meedaha dam num debu Babilon niba esdam dam nibe uba, “Neàte,” lahaho. Labi Markus abo emti bisi vou aleheda modemu em adat modemna ozomomda nibe laha uba, “Neàte,” lahaho.
14. Labi um sunit nim ve aame neàdehezobe nasi um Kristus bake tu vuzehi meedam damat ubu uho ot aaiam di ot siame deelem bak laba ozome ame baket modele. Uho Kristus bake vou ali ahu vàmadehemu eho gi, “Alat Aho uba modi um ahu faheme fi goaitom vaba gi vabademsuse,” lahame eho Ala bake tom gagodam bak. Neàte. Sunit nim iho Silasti toedume ab neàdeham. Àhàm.
1. Iho Yesus Kristus bake tu vuzehi meedam bakti ulohona meedam dam oa, eho Simon Petrusat sunit nim toedume uba oluho. Yesus Kristus labe Am im gagu modidamda meida em am bak. Labi laha Yesusat Aho gagu olu Am im vameadume esmozi laiam dam meida em am bak. Em gi labihasu meedamda nibe eho sunit nim toedume uba oluho. Alat uba modi uho Kristus bake ab tu vuzehi meedamam bak. Ame bak lam umti imti gi uloho bak. Ame Da Yesus Kristus lam abo ibi iho vou baedam Ala am bak. Labi laha iho faina meedam bak lam Alat iba beom bake Aho fa Ot Vai Iba Soat Vausu Fa Vei Neàdemda Am am bak. Am abo im vamdesu meedam Dàt modem labe Alat modi fa umti imti fa Aba tu vuzehi meedam bak ulohona ab modeham bak. Kristusat uba labihasu meedam dam laba eho sunit nim toedume oluho.
2. Eho uba vi ozome neha, “Uho im Ai Ala lamti im Boehàda Yesusti, ‘Akatihasu meedamna ahimit modela?’ laham bak ozobohudehe labe Alat uba ozahit duana deeli im neà bak modi esuidase. Labi uba modi um ahu faheme fi goaitom vaba gi vabademsu bohu vuusdase,” lahame eho ozodume Ala bake labihasu tom gagodam bak.
3. Iho Alati vahi gi ahe neàna bohu vuusdam bak lamti labi Aba Aho ozome gagodaha im lam im ahu vàmadi abobo meedam bak lamti iho labihasu meedam neàna tadem bake Alat Aho gi amu iba modi ahumdi neàdi esuhu bak. Neham labe labihaha bak. Am abo na ahebu alimeat modehe Alat modem labe bisi feà labe Aho iba labihasu meedaha bak. Labi laha, “Ala akatihasu modem Alat modela?” laham bak lam im ozobohudehe labe Aho iba labihaha bak. Ame Ala lam Am bisi feà bak meedam bak lamti labi Am bisi neàbodehe bak lamti laham Ala labe iba neha, “Am damalese,” lahame iba gagu fi hasi vame Am damalehe bak.
4. “Bak damat iho Kristus bake tu vuzehi meedam vab dam labe ibi iho ahu adat fai bak modelo àhàki ozodamna labe iba it vizi vàhàdedam bak lam fa iba neo vizi vàhàdem vaba fa vaitoho labe iho Alam itbaho fatoi im vamdesu meedase,” lahame Alat Aba Aho lab feà modesuhu bak lamti neàbodehe bak lamti labihasu modem Alat modem bak. Labihadam Alat modem labe iba neha, “Eho uba im bisi neà bak duana nehasu modi esuida tame,” lahame fet gagu vàmadi ab esuham bak.
5. Alat uba labihasu vi tauhu labe ubu uho Kristus bake lab tu vuzehi meedam bak labet modi im nidi nimti im nidi nimti mahate keàtet neo vi taui vi tauidale. Uho Kristus bake lab tu vuzehi meedam bak labet modi um laha fa im neà bak fa neo vi meedam bak ame. Labi ubu uho im neà bak lab meedam bak labet modi um neo, “Im bisi neà bak neame?” laham bak laba vi ozobohu aabodi vi meedam bak ame.
6. Labi ubu uho lab vi ozobohu aabodi meedam bak labet modi neo uho git meedam bak labna zohàme ahu it vou faovoi vi meedam bak ame. Labi ubu uho ahu lab it vou faovoi meedam bak labet modi um neo na im uba vabidam di uho ozahit keàtedi meedam bak bohu vi meedam bak ame. Labi ubu uho lab ozahit keàtedi meedam bohu meedam bak labet modi uho neo Alat Aba Aho uba gagu esuhu bak lamota fi hasi uledi vi meedam bak ame.
7. Labi ubu uho lab fi hasi uledi meedam bak labet modi uho neo umti vahi Kristus bake tu vuzehi meedam dam totbaho laba laha aame faobekesi im neà bak vi meedam bak ame. Labi ubu uho dam totbaho laba lab aame faobekesi im neà bak vi meedam bak labet modi uho neo Alat iba deeli meedam bak lamti uloholi dam totbaho ahebu laha deeli vi meedam bak ame.
8. Uho ame im zi labihasu it baleà vouhou vi modidume bohulali meedameam làhà uho im Boehàda Yesus Kristus lam, “Akatihasu meedam Dàt modela?” laham bak ozobohudehe bak lam ba gi meedume vanamai voomnat modem vabak. “Abo imbodi keàtedi meedà?” laham bak damat aame ozobohudem bak am bak.
9. Lahana eho etei lab gagoho im zi lam uho meit it baleà vouhou vi modidume bohulalem vabameam làhà ame da lam gi fako aubesu na aam biem dàt modeo, na aam nasai tooledam dàt modeo, dam labiham damti uloholi meedam dàt modem bak. “Ame im zi lam imbo kaio,” lahame ozodam dàt modem bak. Ame da labe aba aho faina meedam bak lam Alat amu ozahigeàmu fa vei neàdehe bak lam gi fa vei vabilehe datelehe labe labihaha bak.
10. Emti vahi Kristus bake tu vuzehi meedam dam oa, eho etei lab gagoho bak lam a meedamule. Fa gi im nehasu meedale. Alat uba neha, “Am damalese,” lahame uba gagu fi hasi vadaha bak lam, “Imbo? Em Alam damalehe?” lahame um naedamat it ozobohudem bake Aho uba gagoho im ahebu lam uho mahate keàtet vouhodale. Neham bak. Eho etei uba neha, “Ubu uho Kristus bake lab tu vuzehi meedam bak labet modi im nidi nimti im nidi nimti mahate keàtet neo vi taui vi tauidale,” lahame lab vameadaha im zi lam uho meedameam làhà um ba biti Ala mu voou bisi faina meedam vabak.
11. Labi laha uho ame im zi lam meedameam làhà ba diamut Alati Am damti vahi azim bak neà bak laba abo im Boehàda Yesus Kristus iba Soat Vausu Fa Vei Neàdemda labe Aba Aho Am damalehe dam laba labaha bohu vuusu im vahokedam bak labe am doo fi stoi dam vou olem di Alat abo duana deeli ule neàt uba gagu vou oedam bak.
12. Emti vahi Kristus bake tu vuzehi meedam dam oa, eho etei lab vameadaha im zi lam um amu gi ozobohudi neàdehe bak. Labi laha ame Da Kristus labe Aba Aho meedaha im imbona abo meit uba vahokedaha im lam uho amu gi tu vuzehi ab teudi laodoamsdamam bak. Uho labihadamnàme em gi ozahit ame im zi lam uba vi vameaidalo modem bak.
13. Em etei bak niba teohe ehe lahasuhu di nibe ame im zi lam uho mahate vi ozoi vi ozoidume bohu vuusdam bake eho uba lab vi vameai vi vameaidam bak lam gi ahole meedam bak.
14. Eho gi neham bak ozome uba labi gagoho bak. Em gi abo azim vaba valo bum bak ab vou fuham bak. Ame bak lam im Boehàda Yesus Kristus labe Aho eba amu modi ozobohudi fi gatehe bak.
15. Labihàmu em eloi setehezobe uho ame im lam ba fa vabilem vaba abo gi vi ozobohudi labaha bohu vuusu meedam bake eho ahit etei em ahedi nibe uba keàtet vi vameadam bak.
16. Iho amu uba gi nehi vahokehena taia? “Im Boehàda Yesus Kristus labe Aho ba fa bak niba lem di Am feà bak lam im aada tame.” Lahame iho lab vahokehe im lam ba dam bakdat ihimo vi ozoidume ostame faasi debulehe imot modem vabak. Abo im Boehàda Yesus Kristus labe Am ee bisi vousai Boehàdatebolehe bak lam abo fako ibidat aasuhet meedaha imot modem bak.
17. Iho amu nehaha bak. Yesus amu ahedi labe iho Aba tau Ala bake tom gagom bak laba ozome sibu laba laitehe di labe im Ai Alat ulo fauha meo ad labe Am Adat Yesus labe Am ee vousai, “Am abo feàte,” lahame vou baedalo nehasu gagoho bak im aihi bak. “Da nim Em Adat vàmtea Ebe Eho bisi deelemda Am am tame. Em abo Aba Aho meedam bak lam Em aam deeleho,” lahame lab gagoho bak lam imti Yesusti amu ame fi ham sibu laba vou laitehe di labe asum ahoba iube bak niba nom gagoho im lam im vou faodahit gagoho labe im aime ozobohudi, “Imbote,” lahame vi gagodam bak.
19. Labihàmu ame im lam iho aihi labe dam ahamda Alat vameadaha im aime fa dam bake ahate vameaidaha dam zi labe iho aham di iube Yesusat ba meedam im nasi fet ozobohudi toedume esuhu im zi lam iho amu fota tuhu bak lam fa etei nim abo tu vi dualehe bak. Um laha gi ame dam ahamda labe iho toedume esuhu im zi laba mahate aime tu vuzehi meedale. Neham bak. Ame dam ahamda labe ibi iho toedume esuhu im lamti labi aibu bak laba lam biem bak fa uma usime fauhali lam bakti ulohona modi ame dam ahamda labe iho toedume esuhu im lam uho tu vuzehi meedam labet uba modi uho damat ba uba li vahokem im lam, “Imbo? Giomim modeo?” laham bak um ozobohudemna am bak. Ame dam ahamda labe iho toedume esuhu im zi lam uho gi labaha bohu tu vuzehi meedume im Boehàda Yesus Kristus labe Aho ba fa li, “Am akatihasu meedam Dàt modela?” laham bak lam um ozobohu aabodese. Yesus fa lem bak lam abo gi diham bak fum di aam falo labe fauhaedam bakti uloho bak.
20. Bisi uho vi ozome ozobohudem im nim a fa vabili setemule. Dam ahamda Alat vameadaha im aime fa dam bake ahate vameaidaha dam zi labe iho toedaha im zi lam im dam bada nibe meit ahamo aame ozo, “Akatihasu modem imot modela?” lahame vi ozoi vi ozoidume ozobohudi fi gatei neàdi ba aba aho ozoho bak labet modi meia ahate vameadaha vabak.
21. Eho gi neham bak ozome uba labi gagoho bak. Ame dam ahamda zi lam abo Alat fi hasi vadaha dam labe iho ba dam bakdat iba neha, “Toedale,” lahame ibi iho im ahulat ozomna labet modi im ozobohudi ame im lam toedaha vabak. Ba ame bak labet modi im ozobohudi ame im lam iho dam bake ahate vameadaha vabak. Abo gi Alam Aha Nutabe Neàna labe ame dam laba modi vizi ozobohudehe labe Alat iba gagoho im lam iho dam bake ahate vou vameatedaha bak.
1. Aham di iube Alat vameadaha im aime fa dam bake ahate vameaidaha dam totbaho labe iho vou vameatedamta vou vameateda. Lahana ame di labe, “Iho Alam im nehasu aiho,” lahame dam bake ahi vagedume im giomimna vou vameatedam dam totbaho ame Israel dam laba tau vahi azihi dam ehe bak. Labi laha etei ba di nibe im giomimna vahokedam guru zi labe uba laha vi tau azi tame. Ame guru zi labe iho ame im vahokedam di gi ahobat neàdi ahit Alam imti ulohona imbo vab im lam vahokedam labe damat vabi imbotibame tu vuzehi meedàmu Alat ba beodume vàhàdeda tame. Labi laha iho bak damat faina meedàmu Alat iba beom bake Aho gagu oluhuda Yesus Kristus labe Aho ahit uledi iba ot vai eloi fa faamome vei neàdemnàme ame guru zi labe vedi neha, “Im Boehàda modem kaio,” lahame ba mu tozo tame. Ame guru lam labihadam bak meedàmu ihimo it faidi vàhàdehe labe Alat ba faki beom di gi koena beom vaba abo duana taho beoda tame.
2. Lahamnàme um dam dua zoho totbaho labe vedi im giomim vahokedam guru labe iho ostame fi loholi la modi le modidam bak laba vi tau meeda tame. Labi meedam labe dam giida labe uho lab meedam bak laba vi aame fa Kristusat vahokedume vou esmoho im imbona abo uho ahamte lab tu vuzehi meedam im zi lam vedi fa feàtàda tame.
3. Ame guru zi labe iho bisi doi dualem bake àhàki meedam damat modemu ahit, “Um ahusobute,” lahame nazoh ubuda iho vam bake ahit im giomimna abo ihimo ostame faasi debulehe im uba vameada tame. Lahana eho ozoha, ame guru lam faina meedàmu, “Ba beoda tame,” laham bak lam Alat gi amu di iube fet ozome ahumdi esuhu bak. Labiha labe Alat ame dam lam, “Beodume vàhàde tame,” lahame ozobohudi gagu beom bak lam ba laha vou faom vabak. Abo gi taho beodume vàhàdem bak.
4. Ame im giomimna vahokedam guru zi lam, “Alat ba diamut ame dam laba na feànat beoda tame,” laham bak lam im ozobohu bak. Neham labe im ozobohudehe bak. Alat Am im gagu vou usemda zi totbaho labe iho aham di iube faina meedàmu ame dam zi lam Alat gi labihasu aalahigeàmoho vabak. Abo asum ahoba iuba Alat Aba Aho azim bak mali fa beodume bak adba bak bumat aibu feà bak ahamo labaha modesuhuna laba abo Yunani dae, “Tartarus,” lahame taluhu bak laba nom voedume simtedi vuusdam bak. Abo Alat ba diamut Dam Bake Uloodume Vi Aime Ozobohudi Neàdi Fime Fahedam Digat feàda fum bak vou faodam bak.
5. Labi laha dam ahamda labe iho Alat gagohona fi hasi meedaha vaba vedi gi ibi iho ozoho baket la modi le modidam dam lam Alat laha gi labihasu aalahigeàmoho vabak. Abo beodaha bak. Nehaha bak. Aham di iube ame dam labe iho bisi faina meedàmu Alat faki vao duana feà olu dam ahebu ab baguamdi fi oli seddaham bak. Gi dam delapan abo Nuhti aba vi tauhu dam tujuh lamti labihasu Alat soat vausuhu labe vaot beodaha vaba ahedehe bak. Ame da Nuh lam Alat ozom di neha, “Im vamdesu meedamna ozomom dàt modem bak,” lahamda am. Ame di lam aho dam bake neha, “Alat Aba Aho gagohona lamota bisi im vamdesu meedam bak am tame,” lahame dam bake vou vameatedamda am am bak. Lahamda lamti ame dam tujuh lamti labihasu Alat soat vausuhu labe vaot beoho vabak.
6. Labi laha num debu Sodomti Gomorati laba azim dam zi labe ibi iho aham di iube meedaha im laba uho laha vi ozodamale. Nehaha bak. Ame dam zi labe Alat gagohona fi hasi meedaha vaba vedi gi ibi iho ozoho baket la modi le modidàmu Alat faki neha, “Beoda tame,” lahame ame num debu bak laba esuhu dam zi ahebu im num ziti vua feà nom ilu beodume falavai ab seddaham bak. Alat ame Sodom damti labi Gomora damti beodaha bak lam, “Gi iho dam bada nibe a vi tau meedamule,” lahame iho vi ozome ozobohudi iedem bake Alat ahit nasi fet vouhoho bak.
7. Lahana Alat num debu Sodom dam lam beodalo modehe di lam ame da Lot lam beoho vaba amu nasi vou le fi ozi neàdi dam dua zoho ba beodaha bak. Neham labe labihaha bak. Alat Lot bake ozom di, “Am gi im vamdesu meedam dàt modem bak,” labiha labe deeli gagu vou fi ozehe bak. Ame da Lot lam ame num debu bak behàsu laba azihi di gi dam labe meedam bak aam di am abo ahu faidi feà bak fusi meeda. Neham labe labihaha bak. Ame dam labe iho Alat gagu fi hasi esuhu im lam meedaha vaba vedi gi ailahigeàmu im ahu adat modelo àhàki ozomna lam uledi abo fi loholi ostame modem neà bak tadi la modi le modidaha bak.
8. Ame dam labe ibi iho kibu bak meedam bak lam Lot abo dihasi aa. Dihasi aa. Gi labihadam bohu meedam bak aadam tadehemu Lot gi im vamdesu meedamda modem labe am ahu bisi faidi feà bak fusi vi ozodaha bak.
9. Alat aham di iube meedaha im lam eho etei lab vouhome vameadaha im zi lam iho vi ozodam di iho gi neham bak ab vi ozobohudeham bak. “Dam Alat gagoho im fi hasi meedam dam lam na im iba vabidamna beodume geàdam di feà Alat modem labe Aho fa soat vausu fa vei neàdedam meote,” laham bak lam im vi ozobohudehe bak. Labi laha, “Dam Ala bake ozome im vamdesu meedaha vaba vedi gi ibi iho ozoho baket meedam dam lam Alat Aho etei simtedi fota beodam bak lam gi labihasu vou meedume ba diamut Dam Bake Uloodume Vi Aime Ozobohudi Neàdi Fime Fahedam Digat feàda fusi abobo beodume vaitom bak vou faodam meo Alat modem bak,” laham bak lam im laha vi ozobohudehe bak.
10. Eho etei ba lab gagoho bak lam bisi Alat faki beodam dam lam gi im nehasu meedam damat modem bak. Ame dam bakda zoho labe iho gi im ahu adat modelo àhàki ozomna lam uledi abo fi loholi ostame modem neà bak tadi la modi le modidam bak ame. Labi laha iba vuusdam Boehàdatebo labe Am im mu tozodam bak ame. Labihasu meedam dam lam Alat bisi beodam dam am bak Ame im giomimna vahokedam guru zi lam abo ahu ladehebeat im vameadam vaba vedi gi nehada. “Mit ahea! Eho modem modem bak,” lahame bisi ahate it daetbadam damat modem bak. Labi laha ame guru labe ba iho aam biemna asum doni beaba azimna feà zi laba feàtàdam di ba iedem vabak.
11. Lahana ame guru zi labe neham bak vi ozom vaba? Alat Am im gagu vou usemda zi lamti labi ame guru zi lamti iho vi ozom di bisi feàda Alat Am im gagu vou usemda zi am bak. Lahamnàme ame Alat Am im gagu vou usemda zi labe iho ba Boehàda Alat avaesdam laba le duzum di iho ame na asum doni beaba azimna feà zi laba neha, “Dam lam git modeho,” lahame ba le duzu vàlu feàtàdam vabak.
12. Lahana ame im giomimna vahokedam guru zi labe ba iademe ozome ozobohudi im meedam vab damat modem bak. Vedi ihimo ozome ozobohudem biemna zi lam abo asum doni beaba azimna zi laba ostame tozome feàtàda. Neham labe labihadam bak. Ame guru lam gi na bake esumna zi labe ibi iho iademe ozome ozobohudi im meedam vaba vedi ihimo ibi iho modi baleàhà baket meedam bak lamti ulohona meedam damat modem bak. Ame na bake esumna zi lam gi damat le oteme vou li àidam bake Alat ahit modi esuidam bak. Ame na zi lam damat oddam bakti ulohona ame guru labe iho faina meedàmu Alat iba beodume vàhàdedam bak lamti uloho bak.
13. Ame guru zi labe amu im dam totbaho laba faina duana meedàmu Alat ba diamut ame baleà vouhou ahole duana beodume geàda tame. Ame im giomimna vahokedam guru zi labe ibi iho meedume baleàhà im lam ba iba it ozome ladem bak ozom vab damat modem bak. Ame guru labe im ahulat bisi it deeli modi asimdemna gi neham bak. Abo gi digad di im ahu adat faina modelo àhàki ozomna lam meedume ozomeam ilabdem bilehemu neo vi modidahit vou disim damat modem bak. Labi laha, “Im vazisi na àdalo mozo,” lahame vahe vahedam di labe ame guru zi labe uba tau vahi na àdam di labe ahit neà damali iademe meedam vab dam labe vedi gi im ahu adat modelo àhàki ozomna lam modi fa asimdemna lam meedam damat modem bak. Labihadam labe uba modi uho vi aame fa um ladem bak meeda. Labi laha dam giidat ame bak laba aame uba neha, “Um gi guru zi lamti ulohote,” lahame fa vàlu feàtàda. Labihada.
14. Labi laha ame guru zi labe mei lahi gi etei fakot aahana abo ahu gukeme modelo àhàki meedam tadem damat modem bak. Ame guru labe ibi iho faina meedam bak lam ilabdem bilehemu neo vi modidahit gi labaha bohu vuusdam damat modem bak. Labi ame guru zi labe laha dam gi etei Kristus bake tu vuzehi teudi neàbodehe vabda laba ahit modi keobaedume modi vàhàdedam meo bak. Labi laha, “Na lada lam iho laha neo vi vadase,” lahame àhàki soat ziemausi meedume baleàhà damat modem bak. Aiee! Ame guru lam Alat neha, “Seee. Dam labihasu meedam dam lam Eho ba diamut duana beodume geàda tame,” lahame ab vi uloome esuham bak.
15. Ame guru labe labihasu meedam labe zie vamdesuhuda laba laha vaba vedi zie kibuda ub oli bak vabi godam damti uloho bak. Abo Alat gagohona meedaha vaba vedi git meeda. Abo dat ahamda Alat vameadaha im aime fa dam bake ahate vameaidahada lam abo Beoram adat Bileam labe aho aham di iube git modehe bak lamti ulohona meedam damat modem bak. Ame da Bileam labe aho neha, “Israel dam fà beose. Labi em fa doi vase,” lahame uloolo meedàmu Alat malehe bak lam am ozobohuna ozahit, “Doi vase,” lahame faina modehe bak.
16. Lahana ame da Bileam labe, “Aho doi vase,” lahame git ozodàmu Alat mali im vahokelo modemu fa Bileam labe aho nusu vou ladam keledai laba ahit modi vizi am aha labe dam daeli Bileam bake neha, “A modemule,” lahame gut mali odosi im vahokedàmu Bileam aba aho ahusobuli meedalo modem bak lam ba modehe vabak.
17. Ame im giomimna vahokedam guru zi lam, “Iho nehame mode tame,” laham im lam gi ahit neà damali keobaedume modi vageme seddam im vameadam damat modem bak. Abo vao aana udesome le aaha auvai setem bakti ulohona meedam damat modem bak. Labi abo di neà faasi bak aotbali modesum di ulo labe abaalem vaba vageme nutabet vou le setem ulo lamti ulohona meedam damat modem bak. Labihasu meedam damat modem labe Alat faki ame dam lam aibu feà bak laba voom bak lam amu gi ozome esu ahumdehe bak.
18. Labi laha ame guru zi labe ahit neà damali keobaedam labe neha, “Mit ahea! Iho modem modem bak,” lahame daetbadamnàme ame ibi iho lab gagodam im lam ba imbodem vaba gi modeme vanamai voom imot modem bak. Labi laha dam bisi faina meedam dam totbaho labe gi etei utasi fa im vamdesu modelo modem dam laba ame guru zi labe fa vi valo meeda. Ame iho valo modem dam labe im ahu adat gukeme faina modelo àhàki ozomna lam ehe lahasuhu labe ame guru zi labe iho ahit neha, “Uho modem neàte. Uho modeme neàdemnàme geàmu mahate vi modi vi modidale,” lahame gagu modi vou fohodume fa ame dam labe faasi ab vi meedamam bak.
19. Labi ame guru zi labe fa dam gi etei utasi ibi iho faina meedam bak voolo meedam dam laba im vameadam di gi neha, “Uho im ibida tu vuzehi meedameam làhà uhumo duzu ubu uho ozoho bak meedam bak am tame,” lahame labihasu fet gagu vàmadi esuhunàme ame guru labe ba ihimo duzum vabak. Neham bak. Ame guru labe im ahu adat faina modelo àhàki ozomna labe iba it ootedam bak labet modi iho ame baket meedam bak. Ibi iho im ahu adat faina modelo àhàki ozodamna labe iba veimai ootedam labe iho vedi fa uledi meedameam làhà gi ame bak labe faasi ab bohu vuusu meedamam bak. Labihadam labe ba ihimo duzum vabak.
20. Ame guru zi labe amu im Boehàda Yesus Kristus abo iba Soat Vausu Fa Vei Neàdemda lam, “Akatihasu meedam Dàt modela?” laham bak lam meit iba vameadahana iho aime tu vuzehehe labe fa dam bak dam labe ibi iho faina meedam bak lam ba meedam vaba fa mu voou seddameam làhà ba vàhàdeme faidem vabak am bak. Lahana ame guru zi labe labihadamnàme vedi ba fa ame faina meedam bak lam fa vi meedàmu fa voom bili gi ab faasi bohu vuusu meedamam bak. Labiham labe iho ozo, “Ame guru labe ibi iho amu Yesus Kristus bake tu vuzehi meedaha vab di lam fota neàt. Beomta beo. Lahana etei nim bisi faina meedam bak bohu vuusu meedàmu abo bisi feàna beoda tame,” laham bak.
21. Iho Yesusat Aho amu Am im vameadume esmozi laiam dam nibe iho ame guru zi laba neha, “Im nehasu meedam labe vamdesu meedam bak am bak,” lahame iho vahokedam labe ame guru labe fa tu vuzehi meeda. Lahana ame guru labe vedi fa etei mu vooho bak lam gi taho iho amu lab vahokehe di labe mu feidam vaba? Lam bisi neà bak am. Iho Alat Aho gagu fi hasi esuhu im zi lam iho ame guru zi laba amu vahokedume ame dam labe tu vuzehi meedahana vedi ba fa mu vooho bak lam bisi fai bak am.
22. Ame im giomimna vahokedam guru zi labe amu ibi iho bisi faina meedam bak lam voohona vedi fa etei ba neo vi gàhàdi meedàmu gi bak damat ibi iho nehi gagu baleàhà im nimti uloho bak. “Vemet aho na faina àme it voohona fa le vi visoi àho. Doho fi ho iho valo kikeme boz neàdehena fa fua noa bisu gigime itabebuleho,” lahame gagom bakti ulohona meedam damat modem bak.
1. Eho deeli meedam dam oa, sunit nim eho etei ba toeheda nim vi toedume uba oluhu bak ab behàsdeham bak. Sunit amu toeheda lamti etei ba toeheda nimti gi im uho amu ozobohudehena um fa vabilemna zohàme ozahit uba modi udovai, “Gi im neà bakta ahu vàmadi vi ozome meedase,” lahame uba toedume oluhu bak.
2. Abo Alat neha, “Am im aime fa dam bake ahate vou vameatedase,” lahame Aho gagu fi hasi vadaha dam ahamda labe im im ame. Labi im Boehàda Yesus Kristus abo iba Soat Vausu Fa Vei Neàdemda labe Aho vameadume fi hasi esuhu im zi lam abo Aho amu Am im vameadume esmozi laiam dam nibe iho uba vameaha im ame. Labihasu uho fa vabilemna zohàme eho ozahit uba modi udovai uho fa ahu vàmadi vi ozodam bake sunit behàsu nim uba toedume oluhu bak.
3. Im eho etei gagolo modemda nim tombuda meida modemu uho mahate iademe aimale. Digat folelo modem di abo Kristusat Aho ba fa lem bak fuseo meedam di nim dam bakda nibe im ahu adat faina meedalo àhàki ozomna labet iba it ootedam bak labet modi iho ame baket bohu vuusu meedam dam labe uba tau valiheda tame. Uho neha, “Yesusat fa bak niba lem bak,” lahame uho labihasu tu gagodam im laba ame dam totbaho labe vedi im ubuda fa tozome nehasu gagoda tame. “Ne, dam duada totbaho labe neha, ‘Kristus ba fa le tame,’ lahame fet gagu vàmadi esuhuna ame da alihi akete? Am fa lelo modem bake iho fet aame ozobohudemna akete? Im ba uho tu gagom im lam tum moho bak. Im tai ahobada zi labe gi aham di iube elodume seddaha bak. Lahana bak nim ahebu ba veimdem kaio. Gi Alat ahamte alimeat modi esuhu bak lahasuhu bak. Ba uho tu gagom im lam akati im tue?” lahame ubu uho tu gagom im laba labihasu tozome gagoda tame.
5. Im labihasu tozome gagodam dam lam gi Alat amu alimeat meedaha im lam ozobohuna ahit fa biehenali gagodam damat modem bak. Nehaha bak. Alat aham di iube asumti asum laba modealahana zi lamti alimeat meedaha di lam Aho gi Am ahat neha, “Nalele,” lahame gagoha gi ab modealadaham bak. Laham bak lam ahit biehenali tozome gagodam damat modem bak. Labi ame di lam gi iteata modesdam labe Alat modi fa bak alihi aalo vao fatahivai bak alihi ab modesuidaham bak. Labi ame vao labe fa ab itealeham. Labihadaha bak lam ahit biehenali gagodam damat modem bak.
6. Labi Alat Aho ba neo aaha, bak dam ahebu git meedàmu faki Am gi Am ahat gagoha vao feà labe modi fa neo bak ahebu fi oli baguamdi damti bake esumna zi lamti ahebu ab beodume foli seddaham bak. Labihadaha bak lam ahebu ozobohuna ahit biehenali uba tozome gagodam bak.
7. Labi laha iho etei aadamna zi abo asum laba modealahana zi lamti bak niba modealahana zi nimti labihasu ahebu Ala naedat Am ahat gagu mali ot vaitesuiame betea modesdam bak. Aho ba diamut, “Bak damat iho Aho gagohona meedào? Meedam vaba voedào?” lahame Dam Bake Uloodume Vi Aime Ozobohudi Neàdi Fime Fahedam Digat fuhuzobe vuat beodume falavai seddam bak laba vou faodam labe Aho etei ahit gi labihasu ame na zi lam vou aasdam bak. Labi laha ame digat fuhuzobe dam Alat gagohona uledi fi hasi meedaha vab dam lam aho laha beodume geàdam bohu meeda tame.
8. Eho deeli meedam dam oa, eho etei lab gagoho bak lam labihadalo modemta labiha. Lahana im eho etei gagolo modemda nim a fa vabili voomule. Dam totbaho labe iho vedi neha, “Im usi dualehe bak nim im Boehàda Yesus akati taho lem vaba mode?” lahame ozodam damat modem bak. Lahana im Boehàda Alat Ahamo ozomta ba kehàm vabak. Eho gi neham bak ozome uba labi gagoho bak. Im Boehàda Alat Aho digat dem bak amomoi bak. Labi im bakda digat dem bak laha amomoi bak. Im Boehàda Alat Aba Aho ozome digat vou ded lam di digat vàmtea azibe im bak modeo, gi vou ded lame seribu tahun vou fum bak modeo, gi uloho bak. Ba veimdem vabak.
9. Labihàmu um a git ozodamule. Um dam totbaho labe vedi nehasu ozo, “Im Boehàda Yesus Kristus ba fa li iba dam badate, ‘Git meedào? Git meedam vabao?’ laham bak ozome ozobohudi neàdi gagu fahedam kaio. Aba Aho amu lab fet gagu vàmadi esuhu bak lam ba modem kaio,” lahame labi ozome gagom dam lam um git ozoho bak. Im Boehàda Yesusat Aba Aho amu lab fet gagu esuhu bak lam ba fa lem mu odohali kehàdam vabak. Aho taho fa li iba gagu fahedam vabak lam gi neham bak ozome labihaha bak. Alat ba dam meida vàmtea buà beodume geàdam bak uledem vabak. Am abo gi, “Dam ahebu iho faina meedam bak lam fa voedume fa ahu neà bak vàmadi vei neàdedase,” laham bak laba ozome ozahit laha vou faodam bak.
10. Alat labihasu ozahit laha vou faodamta vou faoda. Lahana im Boehàda Yesus labe Aho fa lem digat lam abo Alat amu fet ozome esu vàmadehe digat lam fuhuzobe Yesus bak niba fa ab lemam bak. Aho fa lem bak gi neham bak. Damat vabi esdahit mei nazoh aa valo modemda labe aho aa li modeha damat udovam bakti ulohona modelo modem bak. Yesus laha damat vabi esdahit li damat udovai àvodelo modem bak. Ame di labe na dae feàna modi dam dogoi fi ateme geàda tame. Labi laha ame di labe Alat laha asumti asum ahoba laba modealahana zi lamti vuat beodume vàhàdeme sedda tame. Labi laha bak nimti bak niba modealahana zi lamti abo Alat alimeat ahamte modehena zi lam modeo, abo damat ihimo auet modeme nazohaedamna zi lam modeo, ahebu gi vuat beodume vàhàdeme sedda tame.
11. Ne, Alat na ahebu labihasu vuat beodume vàhàdeme seddalo modemu uho ozom, iho Kristus bake tu vuzehi meedam dam nibe iho akatihasu meedàla? Làhà imo gi Alat Aba Aho gagoho im zi lamota uledi fi hasi meedase.
12. Im Boehàda Yesus fa lem digat abo Alat amu fet gagu vàmadi esuhu digat lam, “Taho vou fuse,” lahame ahumdi vou faodam di nibe gi ame im lamota meedase. Ame digat taho vou fum bak am tame. Ame digat lam fum di asumti asum ahoba laba modealahana zi lamti Alat modi vuat beodume vàhàdeme sedda tame. Labi laha Alat bak niba na ahebu ahamte modi debulehe diat ame na Aho ve modi naledahana lamti ahebu ame vua gai labe modi na ahebu vaobedi falavai sedda tame.
13. Alat ba labihadamnàme iho Kristus bake tu vuzehi meedam dam nim im ba àvodem vabak. Alat amu neha, “Eho modi fa asumti bakti gàhàde tame,” lahame amu fet gagu vàmadi esuhemu iho gi ame bak laba tu vi ozodume vou faodam bak. Ame bak gàhà bak laba gi dam im vamdesu meedam dam lamota ihimo vahi azim bak ozome modi esulo modem bak.
14. Eho deeli meedam dam oa, im Boehàda Yesus fa lem digat uho neha, “Taho vou fuse,” lahame ahumdi vou faodam di nibe gi Alat Aba Aho gagohona lamota fi hasi meedale. Abo uho Kristusat avaesdam laba le duzum di Aho uba neha, “Um git modehe bak vabak. Uba vàlu gagom bak vabak,” lahame uba gagu modi ladem vaba gi neàna le duzum bak laba vi ozome meedale. Abo umti Alati vou ali vabademsum bak lam setem vaba meedam lahasuhuna le duzum bak laba vi ozome mahate keàtet Alat Aba Aho gagohona fi hasi meedale.
15. Labi eho etei uba lab gagoho bak lam, “Im Boehàda Ala labe Aho bakda ahebu ibi iho faina meedàmu beodam bak lam, ‘Aho soat vausu fa vei neàdedase,’ laham bak laba ozome, ‘Damat ibi iho faina meedam bak lam fa voedume fa vei neàdedào? Gi labihasu Aho fa beodào?’ laham bak laba ozome ozahit laha vou faodam lahasuhu Alat modem bak,” laham bak lam um mahate vi ozodale. Eho etei lab gagoho bak lamti labi imti vahi Kristus bake tu vuzehi meedamda meida abo iho deeli meedamda Paulus lam aba aho amu Yesus fa lem bak toedaha im lamti uloho bak. Paulusat aba aho toedaha im lam gi Alat aba modi ozobohudi fi gatei toedaha bak. Ba ahamo toedaha vabak.
16. Aba aho toedume oudaha sunit zi lam ahebu gi Alat aba modi ozobohudi fi gatehe labe eho etei lab vameadaha im lamti ulohona aho toedume oudaha bak. Labi ame da Paulusat aba aho toedume oudaha sunit totbaho lam damat dogoit aim di modeo, fakot aam di modeo, “Paulusat akatihasu modem im toehela?” lahame damat ozome ozobohudem biemda ehete. Labihàmu dam ahusobuda lam abo dam Kristus bake tu vuzehi meedam dam labe ibi iho tu vuzehi meedam im lam mahate vi ozome ozobohudehe vab dam lam abo dam Kristus bake gi etei tu vuzehehena mahate teudehe vab dam labe iho vedi ame im lam ve fa meia vameadam di vedi Paulusat ozome toehe bakti ulohona vameadaha vaba vedi veimdi fa im kibuna vameada. Gi Paulusat toedaha im lamota labihaha vabak. Abo gi Alat Vameadaha Im Toedahana totbaho lam laha gi ame baket meedam bak. Labihasu meedam labe dam ihimo it vàhàdeme Alat iba beom bak ab modi ahumdi esuham bak.
17. Eho deeli meedam dam oa, eho etei lab vameadaha bak lam um ba biem vaba abo ozobohu bak. Labihàmu uho iademe it vou faovoi meedale. Neham bak. Ame im giomimna vahokedam guru zi labe ibi iho faina meedam bak lam uba fa neo vizemo. Ame guru zi labe ba dam eeda ziti Alati labihasu iho gagu fi hasi esuhu im lam ba meedaha vaba gi voedaha bak. Uba neo vou fohome modi vàhàdeme faidi ubu uho amu lab tu vuzehi teu aabodehe bak lam modi fa bedem bak labna zohàme mahate keàtet it vou faovoi meedale.
18. Ubu uho amu lab tu vuzehi teu aabodehe bak lam modi fa bedem vabak laba fa gi nehadale. Uho Yesus bake tu vuzehi im Abada vi modi vi modidam bakta meedale. Uho lab meedam bak labet modi im Boehàda Yesus Kristus lam abo iba Soat Vausu Fa Vei Neàdemda labe Aba Aho iba ozahit faobekesi im neà bak modi esuida tame. Labi laha im Boehàda Yesus Kristus lam, “Akatihasu meedam dàt modela?” laham bak lam uho mahate vi ozoi vi ozoidume ozobohu aabodele. Imo etei nibe faasi Yesus Kristus bake mahate Am ee vousai, “Am abo feàte,” lahame gi labaha bohu vou baedase. Labihadase. Neàte. Sunit nim eho Petrusat toedume ab neàdeham. Àhàm.
1. Yesus bake tu vuzehi meedam dam oa, sunit nim eho Yohanesat uba ozome toedaho. Iho Yesus Aho amu Am im iba gagu esmozi laiam dam nibe iho Dat ee, “Alat Vameadaha Im,” lahamda abo meia modi ahe neàna bohu vizemda labe Am im uba nehi vamealo mozo. Aham di iube Alat bakti na ahebu modehe vab di iube ame Da lam gi labaha modesdam bak. Labi ame Da labe ba bak niba li Dateli godam di labe Aho vameadaha im lam im na vi aidaha dam im am bak. Labi Am so fakot vi aadaha dam im am bak. Labi Aho meedaha bak lam vi aasuhet meedaha dam im am bak. Labi Am so lam anekehàt voatame alihi uladdaha dam im am bak. Im labihaha dam nibe im Abada lam iho toedume uba ab oluham tame.
2. Yesus Kristus labe meia modi ahe neàna vizemda lam amu na vab di iube im Ai Alati Ame Da lamti asum ahoba iuba gi labaha azihi Dàt moz. Lahana Alat ame Da lam bak niba olu fi zeam bitoho di lam gi bak niba li abo datelehe bak. Labiha labe ame Da so iho aadaha bak. Labiha labe iho na aadaha damat aame vàhàdi voom vabi uba vameadam bak. Meia modi ahe neàna vizemda labe Aho meedaha im lam iho aame uba ahate vameadam bak.
3. Imota im Ai Alati labi Am Adat Yesus Kristus lamti iho vou ali ahu vàmadi meedam bak. Labiha labe, “Uho iba tau vazisi ame baket laha meedase,” laham bak lam iho uba gagolo modemu Ame Da labe Aho meedaha bak lam iho aaha bak lamti labi Aho iba vameadaha im lam iho aihi bak lamti labihasu iho uba laha ahate vameadam bak.
4. Labi laha iho toedaha sunit nim uho ve aadameam, “Imbo?” laham bak vuzehi meedam labe ahu ubudati ibidati ot vahiame deeli meedam bak laba ozome iho sunit nim toedume uba oluhu bak.
5. Alam Adat Yesus Kristus labe Aho ahe diat iba vameadaha im lam iho aidume ozobohudi fa uba ab vameadalo modemam bak. Neham bak. “Ala ba aibu bak vaba gi fauha neàdehe Alat modem bak,” lahaha im lam iho aime uba ahate ab vameadamam tame.
6. Labiha labe iho meit nehame gagodameam, “Em Ala bake vou ali ahu vàmadi meedam bak,” lahamda labe vedi aibu lahasuhuna godameam làhà ame da labe aho amu lab gagoho bak lam gi giomim gagoho labe vagedam bak. Alat Aba Aho vameadaha im imbona lam aho aidahana vedi ame baket meedam vaba gi voedam bak tadem dàt modem bak.
7. Lahana iho aibu bake godam vabameam abo fa Alati vahi fauha bak laba aidameam làhà iho imti Yesus bake tu vuzehi meedam dam totbaho laba iho vazisi ot vou aliame ahu vàmadi meedam bak. Labi laha Alam Adat Yesus labe iho faina meedam bake Aho ot vai eloho labe iho neo faina meedam di Aho Am vasea labet iba modi iho lab faina meedam bak ahebu fa faamome ab modi vei neàdedamam bak.
8. Im bakda ahebu gi faina meedam damat modem bak. Labiham labe iho meit it daetbadume neha, “Em faina meedam vaba gi neà bak meedam dàt modem bak,” lahame labi it gagodameam làhà iho gi ihimo ahusobuli giomim gagodam bak. Labi laha Alat Aba Aho vameadaha im imbona lam iho vuzehi meedam vaba gi mu voedam damat modem bak.
9. Lahana Ala Aho gi im nehame meedam Alat modem bak. Aho neha, “Eho nehame meeda tame,” lahame gagom di Am abo im Aho gagodahana lam ahebu Aho naedat voom vaba ahebu imbodi ulohodesu meedam Alat modem bak. Labi laha im git meedam vaba gi iademe vamdesu meedam Alat modem bak. Labihasu meedam Alat modem labe iho Aba neha, “Eho faina modeho,” lahame ahate tom gagodameam làhà Aho iba beolo ozoho bak lam gi vei mu iho lab faina meedam bak Aho fa faamome vei neàdedam bak. Labi Am Adat labe Am vasea veàtoho labe im ahu vabiedume neàdedam bak. Labihadam bak.
10. Alat amu neha, “Dam ahebu faina meedam bak ehete,” lahame gagoho bak. Labihaha labe iho meit it nehame gagodameam, “Eho ba faina meedaha vabak,” lahame it gagodamda labe aho Ala bake ahit tozome nehame gagoho bak. “Ala gi im giomimna vameadam bak,” lahame Alat Aba Aho amu gagoho bak fa vazidazi vameadam bak. Labi laha Alat Aho iba gagodaha im lam ame da labe aim mu gi bogozi ahula esum vaba ame im meedam vaba gi voedam bak.
1. Em data ààmom dam oa, “Uho a faina meedamule,” laham bak ozome sunit nim eho toedume uba oluhu bak. Lahamnàme iho meit ahu bedi faina modemeam làhà Alat iba beom vabake gi neham bak. Iba tau im Ai Ala bake fa vameadamda toheda ehete. Ame toheda lam Yesus Kristus am bak. Ame Da Yesus lam bisi im vamdesu meedamda modem labe Aho tohedateli iba tau im Ai Ala bake nehame gagoda, “Ai Ala oa, ame da nibe aho faina meedam bake oho ozahigeàmu fa vei neàdele,” lahame iba tau im Ai Ala bake vameadam labe Alat ame bak lam aime uledi iba fa vei neàdedam bak.
2. Iho faina meedam bak lam Alat Aho ozahigeàmu iba beom bak mu fa faamome vei neàdi fa Amti vahem bake ot vai oteheda Yesus am bak. Gi ibi iho faina meedam bak lamota fa faamome vei neàdem bak ozome ot vai otehe vabak. Abo dam debu meiti dam debu meiti ahebu faina meedam bak fa faamome vei neàdedam bake ozome ot vai oteheda Am am bak.
3. Im Alat Aho iba gagu fi hasi esuhu im lam iho aime vuzehi meedameam làhà iho nehi it ozo, “Làhà imbot! Im Alati ab vou ali ahu vàmadi meedamam bak,” laham bak im ab it ozobohudi neàdemam bak.
4. Lahana iho meit nehameam, “Em Alati vou ali ahu vàmadi meedam bak,” lahana Alat Aho gagodaha im lam ame da labe aime vuzehi meedam vabameam làhà ame da labe aba aho amu lab gagoho bak lam gi giomim vameadam dàt modem bak. Labi laha Alat Aba Aho vameadaha im imbona lam ame da labe ba vuzehi am ahula esuhu vaba gi aime voedam dàt modem bak.
5. Lahana Alat Aho iba gagodaha im lam iho meit aime vuzehi meedamda lam bisi Ala bake deelem aabo deelemda am bak. Iho meit neha, “Emti Alati vou ali ahu vàmadi meedam bak,” lahamda labe gi im nehasu meedam bak. Abo Yesus amu ahe diat neà bak iademe vamdesu meedam bak lamti ulohona vi ozome ame baket meedam bak. Iho meit labihasu vi meedameam làhà gi nehi it ozom bak. “Làhà imbot. Em Alati vou ali ahu vàmadi meedamda em am bak,” laham bak lam iho ab it ozobohudi neàdemam bak.
7. Ebe eho deeli vou alem dam oa, eho nehi uba gagolo mozo. “Uho dam ahebu ot deeli ot deelidale,” lahame eho etei uba lab gagoho im lam ba im gàhàna amomoit modem vabak. Ame im lam uho amu Yesus bake ahamte alimeat tu vuzehe di lam meit uba vahokehena uho amu aime etei vou fuhu imot modem bak. Em gi im amuna uba vi gagu ozobohudelo toedam bak.
8. “Uho dam ahebu ot deeli ot deelidale,” lahame eho uba gagoho im nim gi im amu aihinat modem bak. Lahamnàme im nim fa etei gàhàli vameadam lahasuhu bak. Eho gi neham bak ozome uba labi gagoho bak. Yesus Aho bisi dam ahebu deeli faobekehe labe Aho neha, “Damat fà Am ot vai otem neàte,” lahame labi gagu damat Am ot vai otehe labe eho ozom, Yesus ame im amuna lam Aho modi fa gàhàdehe bak. Labi uho laha ubu uho amu faina meedam bak lam fa voedume fa im neà bakta meedam labe eho ozom, ame im lam uho laha fa etei modi gàhàdehe bak. Yesus Aho bisi dam ahebu deeli faobekehe bak lamti ulohona uba modi vizi uho fa neo ame baket meedam labe um aibu bak lam etei fa vou sete ladam labe fa fauha neàdedam bak.
9. Iho meit nehameam, “Em fauha neà bake aidam dàt moz,” lahame gagodam da labe vedi fa amti vahi Yesus Kristus bake tu vuzehi meedamda meida laba ahu adat faki meedameam làhà ame da labe aho amu lab gagoho bak lam gi giomim gagoho bak. Ame da lam gi aibu bak aidam lahasuhu dàt modem bak.
10. Lahana iho meit imti vahi Yesus Kristus bake tu vuzehi meedamda meida laba deeli meedameam làhà ame da labe gi fauha neà bake aidam bak. Labi fauha neàdehena modesdam labe ba git le guezi bitem vabak.
11. Lahana iho meit imti vahi Yesus Kristus bake tu vuzehi meedamda meida laba ahu adat faki meedameam làhà ame da labe aho gi aibu bake azi ladam lahasuhu bak. Aibu bake azi ladam labe am fako na aam aibulehe labe, “Am ake ladà?” laham bak aho git le vàhàdem bak vabili it ozom vab labe gi ostame ladam bak.
12. Um Yesus Kristus bake tu vuzehi meedam dam em data ààmom dam oa, Yesus Kristus labe Am vasea veàtoho labe uho faina meedàmu Alat uba beolo modem bak lam Aho gi vei mu fa faamome ab vei neàdedaham bak. Alat uba labihahemu eho sunit nim toedume uba oluhu bak.
13. Uho Yesus Kristus bake amu tu vuzehi meedam labe abo busaolehena ààmom dam oa, eho neham bak ozobohudi sunit nim toedume uba oluhu bak. Bakti na ahebu lamti Alat modehe vab di ium ame Da Yesus Kristus lam Am Ai Alati asum ahoba iuba gi labaha modesdamda laba uho vou ali ahu vàmadi meedam bak. Labi um ba etei Yesus Kristus bake vi tu vuzehi keàtedi meedam dam abo bas damat modemna ààmom dam oa, eho neham bak ozobohudi sunit nim toedume uba oluhu bak. Uho keàtet meedume Iblis modi bedehe bak. Um Yesus Kristus bake tu vuzehi meedam dam em data ahebu ààmom dam oa, eho neham bak ozobohudi eho sunit nim toedume uba oluhu bak. Um ahebu im Ai Alati vou ali ahu vàmadi meedam bak.
14. Uho Yesus Kristus bake amu tu vuzehi meedam labe abo dam busao ààmom dam oa, uho nehame meedam damat modem bak em ozobohudi uba neo vi vameadam bak. Bakti na ahebuti Alat modehe vab di ium ame Da Yesus Kristus lam Am Ai Alati asum ahoba iuba gi labaha modesdamda laba uho vou ali ahu vàmadi meedam bak. Labi um ba etei Yesus Kristus bake vi tu vuzehi keàtedi meedam dam abo bas damat modemna ààmom dam oa, uho nehame meedam damat modem bak em ozobohudi uba neo vi vameadam bak. Uho Kristus bake lab tu vuzehi meedam bak lam abo keàtedi meedam bak ame. Labi Alat Aho uba gagoho im imbona lam uho laha voedam vaba iademe vuzehi meedam lahasuhu bak ame. Labi laha uho keàtedi meodi Iblis modi bedehe bak ame. Labihasu meedam bak em ozobohudi sunit nim uba toedume oluhu bak. Uho labihadaha bak lam ahebu em ozobohudi neàdehenàme eho sunit nim gi ozahit toedume uba oluhu bak.
15. Dam bakda abo Ala bake ozom vaba gi ibi iho modi baleài faina modelo àhàki ozodam dam labe ibi iho deeli meedam bak gi nehadam bak. Ibi iho modi baleàhà bak lam modelo ozodam labe, “Fà meedase,” lahame meedam bak ame. Labi fako aame vàhàdehena voom vabilehemu valo àhàki ozodam bak ame. Labi ihimo ahu asimdehe bake daetbadam bak ame. Labihasu meedam bak lam ahebu debu im Ai Alat gagoho vaba imot modem bak. Gi dam Ala bake ozom vaba gi ibi iho modi baleài faina modelo àhàki ozodam dam labe ihimo bak niba faasi meedam imot modem bak. Labihàmu ame dam labe ibi iho bak niba bisi deeli duzu meedam bak laba uho a bisi deeli vi taulo àhàki meedamule. Labi ame dam labe neha, “Na nim neàte,” lahame ibi iho bak niba deelemna lam a vi tau deelemule. Meit labihasu vi aame taulo àhàki meedameam làhà ame da labe aho ba im Ai Ala bake deelem vabak.
17. Ame dam Ala bake ozom vaba gi ibi iho modem bak modi baleàhà dam labe ibi iho aame ahu gukeme vàhàdi neàdemna lamti ba gi labihasuhuna bohu meedam vabak. Ame na zi lamti damti vabaedume seddam bak lam etei faasi abo ab seddamam bak. Lahana im Alat Aba Aho amu fet ozome esuhu im lam meit aime vuzehi ame bak lam meedamda lam ba setem vaba gi labaha ahe neàna bohu vuusdam bak.
18. Em data ààmom dam oa, Yesus fa lem bak fudàmu im bakda ahebu ibi iho bak niba ozome meedamna lamti bak nimti ahebu novai ab vaitoi seddalo meedamam bak. Iho amu neha, “Ame di labe Kristus Bake Vi Taum Mu Fakemoholi Vaitohoda Labe bak niba le tame,” lahame gagoho bak lam iho Yesusat Aho gagu olu Am im vameadume esmozi laiam dam nibe amu uba vahokedam labe um aime ozobohudehe bak. Ame bak ab fuham bak. Eho gi neham bak ozome uba labi gagoho bak. Etei di nim dam Kristus bake vi taum mu fakemoholi vaitoho dam zi bak niba etei fi ddamna iho ab aadamam bak. Labihàmu iho nehi ab ozoham. “Làhà imbote! Im bakda ahebu ibi iho bak niba ozome meedamna lamti bak nimti ahebu novai ab vaitoi seddalo meedamam bak,” laham bak lam iho ab ozobohudeham bak.
19. Ame dam Kristus bake vi taum mu fakemoholi vaitoho dam zi lam amu gi iba vi tau vahi meedam dam lam vedi iho vahi meedam bak fa mu voou im vou esmozi fa ab im meideham bak. Lahana iho nehi ozo. Dam labe amu iba vi tau meedam di ba imbona vi tau meedaha vabak. Gi ahit ahobat neàdi vi tauhu damat moz. Ame dam lam amu iba vi tau meedaha di lam imbodi vi tau meedameam làhà imti vahi uloholi meedam bak lahasu meedam damalem bak. Lahana im mu ab vou esmoham bak. Labiha labe iho ozo, “Dam lam imti uloholi meedam vab damat modem bak. Ba im damat modem vabak,” lahaha bak lam im ab ozobohudeham bak.
20. Dam lada lam labi modi ita. Lahana umota neà bak. Kristus abo fai bak modem vabda labe Aho Alam Aha Nutabe Neàna lam uba modi vizi um ab teudeham bak. Labiha labe umota Alat Aba Aho modi fi zeam bitoho im imbona lam uho aime ozobohudi fi gatei ab neàdeham bak.
21. “Um Alat Aba Aho modi fi zeam bitoho im imbona lam biem damat modem bak,” lahame eho labi ozome toedume uba oluhu vabak. Um gi amu ozobohudi fi gatei neàdehe labe eho sunit nim ozahit vi toedume uba oluhu bak. Labi laha, “Ame Alam im imbona meit vahokemna lam ba im giomimda laba vi tau vameadam vabak,” laham bak lam um laha ozobohudi neàdehe labe eho gi ame bak lam ozobohuna gi ozahit sunit nim vi toedume uba oluhu bak.
22. Lahana uho ozom, bisi giomim gagodamda amat mode? Nehamda am taia? Meit neha, “Yesus lam Alat Gagu Fihasi Vimteme Oluhu Dat Boehàda modem kaio,” lahame ozome gagodamda lam bisi giomim gagodamda am bak. Ame da labihasu gagodamda lam gi eho amu uba nehame gagohoda am bak. Dam Kristus bake vi taum mu fakemoholi vaitoho dam zi bak niba meedam dam zi iho aadamda zi am bak. Ame dam labe laha nehame gagodam bak. “Ala ba Yesusam Aiat modem vabak. Labi Yesus Kristus lam ba Alam Adat modem vabak,” lahame gagodam dam zi am bak.
23. Meit nehameam, “Yesus lam Alam Adat modem kaio,” lahame gagodamda labe ba im Ai Alati vou ali ahu vàmadi meedamda modem vabak. Lahana meit nehameam, “Yesus lam Alam Adat am tame,” lahame gagodamda labe gi Yesusti vou ali ahu vàmadi meedam bak lamota meedam vabak. Abo Am Ai Alati laha vou ali ahu vàmadi meedam bak.
24. Labihadàmu uho amu alimeat Yesus Kristus bake tu vuzehi meedaha di labe meit uba Alam im imbona vahokedaha im lam uho aihina lam a voomule. Gi labihasu ahu ozodamna bohu vuusu meedale. Uho labihadameam làhà uho Alam Adat Yesusti labi Am Ai lamti uho vou ali ahu vàmadi meedam bohu meedam bak am tame.
25. Iho labiham labe Yesusat Aho amu iba fet gagu esuhu im lam, “Aho ba iba modi Alati vahi gi ahe neàna bohu vuusda tame,” lahame iba labi fet gagu esuhu bak lam Aho ba iba ame baket mode tame.
26. Ame giomim gagodam dam zi labe uba neha, “Iho vahokehe im nim uho vuzehi meedale,” lahadam damat uba giomim vameadume uho vuzehem bak labna zohàme eho sunit nim toedume uba oluhu bak. Uho im meibada vi vulameam zie fàusi ub olem bakti ulohona modemo. Uho iademe it vou faovoi ozodale.
27. Lahana eho ozom, umota neà bak. Amu Yesus Kristus labe Aho Alam Aha Nutabe Neàna uba modi vizi teudi neàdehena lam ehe lahasuhu labe uba ba akati meit vahokem im aie? Alam Aha Nutabe Neàna labe uba modi vizi um vuusdam labe Aho uba im ahebu ab vahokedamam bak. Ame Alam Aha Nutabe Neàna labe uba vahokedam im lam ba im giomimna vahokedam vaba abo im imbona iademe vahokedaha imot modem bak. Labihàmu Ame Alam Aha Nutabe Neànat uba neha, “Uho Yesus Kristus bake vou ali ahu vàmadi meedale,” lahame uba vahokehe im lam a voomule. Gi labihasuhuna bohu meedale.
28. Em data ààmom dam oa, eho etei uba neha, “Uho Yesus Kristusti vou ali ahu vàmadi meedale,” lahaha im lam uho mahate ame im meedume bohulaledale. Labiham labe Yesus Kristus ba fa lem di um gi amu vou ali ahu vàmadi meedamna ahum modehe labe ba Aho avaesdam laba le iedi ladem vabna teudi dozeadam bak am tame.
29. Kristus gi im vamdesu meedam Dàt modem bak. Laham bak lam im ozobohu bak. Labiham labe iho laha nehi ozo, “Meit im vamdesu bohu meedamda lam Alat modi Am datalehe bak,” laham bak lam im laha ozobohu bak. Im Ai Alat meedam bakti ulohodesu meedam labe labihaha bak.
1. Ai Alat Aho iba bisi deeli meedam bak lam uho mahate ozodale. Aho iba lab deeli meedam bak labet neha, “Im Am data am bak,” lahame iba labi gagodam bak. Alat iba labi gagodàmu iho nehi ozo, “Làhà imbot,” laham bak. Lahana Ala bake ozom vab dam labe iho vedi neha, “Ala lam amat mode?” lahame ba ozome ozobohudem vabak. Labiha labe ame dam labe iba ozodam di laha, “Im Alam datat modem bak,” lahame ba ozome gagodam vabak. Vedi gi iba tozodume moudaha bak.
2. Lahana ebe eho deeli vou alem dam oa, im etei Alam datalehe bakta Alam datalehe bak. Lahana, “Ba diamut im akatihasu modem damat modela?” laham bak lam Alat iba modi fi gatehe vab labe im vabile. Iho gi neham bakta ozobohudehe bak. Yesus Kristus bak niba fa lem di Aba Aho abobo modesuhu bak lam iho ba aame neàdem labe im laha fa veimdi vei neàdi Amti uloholem bak. Laham bakta im ozobohudehe bak.
3. Ame Da Yesus Kristus lam faina meedaha vaba bisi neà bak tadi meedamda Am am bak. Labiham labe iho meit nehi ozo, “Ame Da Yesus Kristus labe Aho ba bak niba fa lem di Aba Aho abobo modesuhu bak lam iho ba aa tame,” lahame nasi tu vou faodamda labe aho faina modem bak labna zohàme it vou faovoi gi iademe neà bakta meedam bak. Aho Yesusti uloholem bak laba ozome labihadam bak.
4. Uho ozom, faina meedam bak debu akete? Neha taia? Alat Aba Aho gagu fi hasi esuhu im lam meit mu voedam bak lam faina meedam bak am bak. Labiha labe meit faina meedam bak bohu tademda lam Alat Aba Aho gagu fi hasi esuhuna zi lam zidazedamda am bak.
5. Im bakda ahebu faina meedàmu Yesus Kristusat Aho fa faamome vei neàdelo modem bake bak niba li datelehe bak. Lahana ame Da lamota ba fai bak vaba gi neà bak bohu meedamda am bak. Laham bak lam um laha ozobohu bak.
6. Yesus Kristus fai bak meedam vaba gi neà bak bohu meedam dàt modem labe meit Aba vou ali ahu vàmadi meedamda lam ba fai bak dihasi mode. Dihasi mode. Labihadam vabak. Gi neà bak bohuta meedam bak. Lahana meit faina meedam bak bohu tadi meedamda labe aho ba nehame ahulat ozom vabak. “Yesus Kristus bisi imboda am bak,” lahame ba ahulat ozome Yesus Kristus bake tu vuzehi Amti vou ali ahu vàmadi meedam vaba gi mu voom bak tadehe bak.
7. Em data ààmom dam oa, meit uba giomim vameadume um vou fohodume uho vabi ahusobuli uledi tau meedam bak lab tame. Labiham bake uho gi ailahigeàmu it vou faovoi iademe im vamdesu meedale. Neham bak. Yesus Kristus bisi im vamdesuhu bakta tadi meedamda am bak. Labiham labe meit gi im vamdesu meedameam làhà ame dam lam gi Yesus Kristusat modem bakti uloholi bisi im vamdesuhu bakta tadi meedam dam am bak.
8. Lahana meit bisi faina meedam bak tadi meedamda lam gi Ibilisit vuusu aba aho gagoho baket meedamda am bak. Iblisit am data ààmom bak. Eho gi neham bak ozome uba labi gagoho bak. Iblisit gi aham di iube na ahebu Alat modehe vab di iube faasi faina meedam bak tadi vou mode ledume etei ab vou fuham bak. Labiha labe meit Iblisit modem bak vi tau uloholi bisi faina meedam bak tadi meedam dam lam gi Iblisim datat modem bak. Iblisit amu aho faina meedam bak lam gi labaha modesdam dàt modemu Alat ozo, “Iblisit aho ozome meedam bak lam eho beome fa faamome seddase,” làhàmu Alat Am Adat Yesus bak niba olu ab dateleham bak.
9. Meit Alam dataleheda laba Am Ai Ala labe Aba Aho modem bakti ulohona aba modesuhu labe aho ba faina meedam bak bohu meedam vabak. Fa Ala bake am Aialehe labe ba faina meedam bak bohu meedam vabak.
10. Iho meit, “Amat Alam datalehela?” Labi, “Amat Ibilisim datalehela?” laham bak lam im biem bake iho gi neham bak nim aadam labe im ozobohudem bak am bak. Meit iademe im vamdesu meedamda laba iho aame ozo, “Da lam Alam datat modem bak.” Laham vabameam meit iademe im vamdesu meedam vaba faina meedamda laba iho aame ozo, “Da lam gi Iblisim datat modem bak,” lahame aame ozobohudi gagodam bak. Labi laha meit amti Yesus Kristus bake tu vuzehi meedam dam totbaho laba ot deeliam vabda lam ba Alam datat modem vabak. Gi Iblisim datat modem bak. Labiham bak lam iho aame ozobohudem bak am bak.
11. Emti Yesus Kristus bake tu vuzehi meedam dam oa, iho amu Yesus Kristus ahamte alimeat tu vuzehi meedam di labe meit iba neha, “Iho imti Yesus Kristus bake tu vuzehi meedam dam totbaho laba iho ot deeli ot deelidale,” lahame meit iba vahokedume iho aihi bak lahasdume etei vou fuhu im am bak. Labiham labe imo dam ahebu ot deeli ot deelidase.
12. Im ba dat ahamda Kain labe aho modehe bak lam a vi vouhodamule. Ame da Kain lam Iblisit amu vuusu am im meedaha labe am vahada Habel beoho baket uloholi oteme vooho bak. Lahana uho ozom, ame da Kain labe am vahada Habel ana modehe bake otehela? Neha taia? Kain im aba aho meedamda gi im fai bak meedam bak tade. Lahana am vahada Habel labe im aba aho meedamda gi im vamdesu meedam bak tade. Labiha labe Kainat Habel bake ahu adat faki ab oteham bak. Labihahemu iho Kainat modehe bak a vi vouhodamule. Imo dam ahebu gi ozahit ot deeli ot deelidamna bohu modesuse.
13. Kain am vahada Habel bake labihahemu dam Ala bake ozom vaba gi ibi iho modem bak modi baleàhà dam abo bak niba esdam dam nibe uba ahu adat faki meedameam làhà ba a àvodemule. Habel bake modehe di lahaho.
14. Lahana imota ba labiham vabak. Iho imti vahi Yesus bake tu vuzehi meedam dam totbaho ahebu laba iho deeli meedam bak. Labihadam labe iho nehi ozo, “Iho amu faina meedam damat modem labe Alat iba vaitesu vooho bak. Lahana iho etei fa veimdehe labe Alati imti fa vahehe bak. Vahehe labe gi Amti vahi ahe neàna bohu vuusdam bak,” lahame iho lab veimdehe bak lam im ozobohu bak. Lahana iho meit imti Yesus bake tu vuzehi meedam dam totbaho laba iho deeli meedam vabameam làhà ame da lam ba Alati vahem vaba vaitesu voom bak bohu lahasuhuna vuusdam dàt modem bak.
15. Uho im nehi ozobohudem damat mode taia? Mei otemda ba Alati vahi ahe neàna bohu vuusdam vabak. Alat ame da lam gi vaitesu voom bak. Labiha labe meit amti Yesus Kristus bake tu vuzehi meedamda meida laba am ahu adat faki meedameam làhà ame da lam gi mei otemda lamti uloholi ba Alati vahi ahe neàna bohu vuusdam vabak.
16. Em data ààmom dam oa, iho dam bakda faina meedam labe Alati imti vahi neàdem biehe bake Yesus Kristus Ahamo naedat neha, “Am fa ot vai otem neàte,” lahame uledi gagoho labe damat Am oteme Am vasea lam iho faina meedam bake ab gohaleham bak. Yesus Kristusat labiha labe iho nehi ozo, “Aho meia aame faobekesi deelem bak ame?” laham bak lam iho vi ozobohudehe bak. Labiha labe imo ame baket neo meedase. Ibi meida neàdem bak laba ozome faobekesi deeli meedam di meit iba otelo gagomeam làhà imo gi ozahit, “Ot vai otem neàte,” lahame gagodase.
17. Uho neham bak ozodale. Iho imti Kristus bake tu vuzehi meedamda meida labe am nazoh uloholi neàde. Lahamda labe aho aaha amti Kristus bake tu vuzehi meedamda meida am nazoh uloholi neàdem vabda laba aamta aa. Lahana faobekesi na abada lom vaba vedi ozahigeàmu male. Labihadamda labe uho ozom, Alat amu iba faobekesi deelehe bak lam Aho vouhodà? Vabà! Ba labihaha vabak. Alat amu iba faobekesi deeli meedàmu Am Adat Yesus ot vai otehe bak lamti ulohona ame da labe ba dat aba meidate faobekesi deelehe vabak.
18. Em data ààmom dam oa, im a meia gi ahat ahobat neàdi deeli vameadamule. Abo meia neà bak meedam labe fa meia deeledale. Labiham labe iho meia deelehe bak lam, “Imbote,” laham bak am tame.
19. Eho vou alem dam oa, iho imti vahi Kristus bake tu vuzehi meedam dam totbaho laba iho deeli meedameam làhà, “Alam damali im Abada meedam dam im am bak,” laham bak lam im ozobohu bak. Labiham labe iho Ala bake tom gagodam di im ba ladi daleàdem vabak.
20. Neham bak. Iho faina meedàmu fa Ala bake tom gagom di iho vedi ladi odohali ozo, “Em ba akati Ala bake tom gagoela?” lahame ladi daleàdemnàme iho gi ozahit ahu meoli Ala bake tom gagodam neà bak. Neham labe labihaha bak. Ala bisi feà labe ibi iho modem bak ahebu ozobohu Alat modem labe Am ba iba mom vaba gi ozahit iba deeli im neà bak tau meedam bak.
21. Labihàmu ebe eho deeli vou alem dam oa, im ahu ad nibe iba neha, “Um faina modeho,” lahame iba it vàlu gagu im ladi daleàdem vabameam làhà iho Ala bake tom gagodam di iho gi ahu meoli tom gagodam bak.
22. Labiham labe Alat Aho iba gagu fi hasi esuhu im lam iho aime uledi meeda. Labi laha iho na meedam di gi Alam ahu deelemna lamota meeda. Iho labihadam labe iho tom gagodam di labe ibi iho ozome valo modemna lam Alat uledi iba lodam bak.
23. Alat Aho iba gagu fi hasi esuhu im ahim neham bak. “Uho Em Adat Yesus Kristus bake tu vuzehi vou ali vàmadi meedale.” Labi laha, “Umti vahi Em Adat Yesus bake tu vuzehi meedam dam totbaho ahebu laba uho laha ot deeli ot deelidale,” lahame iba gagodaha im ahim am bak. Ame lab gagoho bak lam, “Umti vahi meedam dam totbaho ahebu laba uho ot deeli ot deelidale,” lahaha bak lam Am Adat Yesus Kristus laha amu bak niba godaha di lam laha tau gagodaha im am bak.
24. Alat Aho iba gagu fi hasi esuhu im lam iho meit aime vuzehi meedamda lam abo Alati vou ali ahu vàmadi meedamda am bak. Labi laha ame da laba deeli amti vou ali ahu vàmadi meedam Ala Am am bak. Alat Aho Am Aha Nutabe Neàna lam iba modi vizi teudehe labe iho nehi ozo, “Làhà imbot! Alat iba deeli imti vou ali ahu vàmadi meedam bak,” laham bak lam im ab ozobohudeham bak.
1. Ebe eho deeli vou alem dam oa, Alam im aihi vaba vedi gi ostamna vou le meia neha, “Im nim Alam imot modem bak,” lahame dam bake le vou vameatedam dam etei bak niba vou fi ddamda zi duate. Làhàmu meit uba li nehame gagodameam, “Alam Aha Nutabe Neàna labe eba vameadaha im eho aime fa uba ab li vameadalo modemam tame,” lahame uba li gagodamda lam bisi a ahusobuli àvodehat ame im laba aime vuzehemule. Amu nasi, “Alam Aha Nutabe Neànat ame da laba modi vizi uba li vameadào? Iblis labe am aha nutabe faina labe ame da laba vizi uba li vameadào?” laham bak mahate modi ozoidume neàdi ba vuzehele.
2. Meit uba li im vameadam di, “Alat Am Aha Nutabe Neàna labe ame da laba modi vizi uba li vameadào?” laham bak um biem bake uho modi ozome neàdelo modem di uho neham bak aim labe um ozobohudem bak am tame. Ame da labe uba li nehame ahate gagodameam, “Ame Da Yesus lam abo Alat Gagu Fihasi Vimteme Iba Oluhu Dat Boehàda am tame. Bak niba li abo datelehe bak,” lahame uba li labi ahate gagodameam làhà ame da lam Alat Am Aha Nutabe Neàna labe aba modi vizi uba li im lam vameadam bak. Labiham labe ame da labe am im uho aime vuzehem neà bak.
3. Lahana meit ame bak lam ahate gagom vaba vedi fa nehi ahate gagodameam, “Ame Da Yesus lam amu asum ahoba iube fa bak niba li abo Datelehe vabak,” lahame giomim ahate gagodamda lam ba Alam Aha Nutabe Neàna labe aba modi vizi uba li im vameadam vabak. Gi Kristus Bake Vi Taum Mu Fakemoholi Vaitohoda labe aba modi vizi uba li im lam vameadam bak. Uho amu nehi fet aihina taia? “Ame da Kristus Bake Vi Taum Mu Fakemoholi Vaitohoda labe ba bak niba le tame,” laham bak lam um amu fet aihina taia? Lahana etei di nim ame da Kristus Bake Vi Taum Mu Fakemoholi Vaitohoda labe aho modi vizi bak niba vou fi ddamda zi etei li ab fi ddamam bak. Labiham bake ame dam giomim vameadam dam labe uba li modi vizemo. Nasi iademe ozoidume neàdi ba ame im vuzehele.
4. Lahana em data ààmom dam oa, umota neà bak. Alat um vuusu ab Am dataleham bak. Uba vizi teudehe Alam Aha Nutabe Neàna lamti labi dam Ala bake ozom vaba gi ibi iho modem bak modi baleàhà dam laba vizi teudehe Iblisim aha nutabe faina lamti ozom di bisi feàda uba vizi teudehe Alam Aha Nutabe Neàna am bak. Labiha labe ame giomim vou vameatedam dam labe im im lam uho amu vuzehem vaba gi mu aime voedume neàdehe bak.
5. Ame giomim vou vameatedam dam lam abo Ala bake ozom vaba gi ibi iho modem bak modi baleàhà dam labe im data ààmom dam am bak. Labiha labe ame dam labe im vameadam di gi ame dam Ala bake ozom vab dam labe ibi iho ozoho bak lamti ulohona modesu dam bake im vameadam bak. Labiham labe dam Ala bake ozom vab dam lam ame giomim vameadam dam labe im im aime vuzehi meedam meote.
6. Lahana imota ba dam Ala bake ozom vab dam labe im data ààmom damat modem vabak. Im abo Alam datat modem bak. Labiha labe iho dam bake im vameadam di iho gi Alat Aba Aho ozoho bak lamti ulohona dam bake im vameadam bak. Labiham labe dam Ala bake vou ali ahu vàmadi meedam dam labe im ibida aime vuzehem meote. Lahana Alat vuusu Am datalehe vab dam abo Amti vou ali ahu vàmadi meedam vab dam labe ba im ibida aime vuzehem vaba gi mu voedam bak. Labihadam labe, “Ame im vameadam dam lam Alam Aha Nutabe Neànat vizi im imbona vameadào? Iblisit modi vizi im giomimna vameadào? Amat vizi ame dam im vameadàla?” laham bak lam iho gi dam meit vameadaha im laba aime vuzehedam bak laba aame ozobohudem bak am bak.
7. Ebe eho deeli vou alem dam oa, imo nasi ot deeli ot deelidase. Eho gi neham bak ozome uba labi gagoho bak. Iho meia deeli meedam bak lam debu Alat iba modi vizi iho meia deeli meedam bak am bak. Meit amti vahi Kristus bake tu vuzehi meedam dam totbaho laba deeli meedamda lam Alam data am bak. Labi Ala bake deeli vou ali ahu vàmadi meedamda am bak.
8. Alat Aba aho meedam bak lam gi iba bakdate deeli meedam bak am bak. Labiha labe meit ame bak lam vouhome amti vahi Kristus bake tu vuzehi meedam dam totbaho laba abo aba meida laba deelem vabda lam ba Ala bake deeli vou ali ahu vàmadi meedam vabda am bak.
9. Alat Aho iba deeli faobekesi meedam bak lam im biem bake Aho nehame iba vouhoho labe im ozobohudehe bak. Iho faina meedàmu Alat Aho iba beolo meedam bak lam gi fa ozahigeàmu vei neàdi fa Amti vahi ahe neàna bohu tadem bak modelo Am Adat vàmtea Yesus iba bakdate olu ab ot vai eloham bak. Labiha labe iho nehi ozo, “Alat Aho iba deeli faobekesi meedam bak ame?” laham bak lam im ab ozobohudeham bak.
10. Meia deelem bak akatihasu meedamna modela? Ba neham vab taia? “Iho nasi Ala bake tu deelem bak,” labiham vabak. Gi Alat iba nasi deeli meedaha bak. Iho faina meedàmu Alat Am ahu neàdem bak ozome iba beom vaba gi ozahigeàmu fa vei neàdelo Am Adat Yesus bak niba olu fa ot vai eloho labe iho faina meedam bak lam fa ab faamome vei neàdeham bak. Alat Aho iba bakdate labi meedaha labe iho nehi ozo, “Meia deeli meedam bak ame?” laham bak lam im ab ozobohudeham bak.
11. Ebe eho deeli vou alem dam oa, Alat iba bisi labi deelehe labe imo laha ot deeli ot deelidase.
12. Im ba Alam alihi koena aaha vabak. Im ahebu vabilem bak. Labihadamnàme iho ot deeli ot deelidameam làhà Alat Aba Aho meedam bak lamti ulohona iho ab vi meedamam bak. Labi laha Aba Aho ozome meia deeli meedam bak lamti ulohona iba modi vizi iho fa meia ab deeli meedamam bak.
13. Alat Am Aha Nutabe Neàna labe iba modi vizi teudi vuusdàmu iho nehi ozom bak, “Imti Alati ot vou aliame ahu vàmadi ab meedamam bak.” Laham bak lam im ozobohudi gagodam bak.
14. Iho bakda nibe faina meedàmu im Ai Alat iba beolo modem bak lam Aho gi vei mu iba soat vausu fa vei neàdelo modemu Am Adat vàmtea Yesus iba bak niba oluhu bak. Ame Da Yesus labe Aho amu iba Am im vameadume esmozi laiam dam nibe ihimo Yesus bake aame neha, “Imbote. Iba Soat Vausu Fa Vei Neàdemda bak niba leho,” lahame dam bake ahate vameadam bak.
15. Meit nehame ahate gagodameam, “Ame Da Yesus lam Alam Adat Aho iba bak niba olu dateleheda am bak,” lahame ame bak lam vuzehi ahate gagodameam làhà Alati ame da lamti ot vou aliame ahu vàmadi ab meedamam bak.
16. Imti Alati ot deeliame vou ali ahu vàmadi meedam labe iho nehi ozo, “Làhà imbot! Alat iba bisi deeli meedam bak lam Aho ba vaitoi setem vaba gi labahana bohu modesdam bak,” laham bak lam im ab ozobohudi tu vuzehi meedamam bak. Alat Aba Aho meedam bak lam gi iba bakdate deeli meedam bak. Labiham Alat modem labe iho meit Ala labe Aba Aho meia bisi deeli meedam bak laba ozome iho ame baket vi tau meedam bohu meedameam làhà imti Alati ot vou aliame ahu vàmadi ab meedamam bak.
17. Labiham labe Alat Aba Aho meia deeli meedam bak lamti ulohona iho meia deeli meedameam làhà ba neham bak. Ba diamut Alat Iba Uloodume Vi Aime Ozobohudi Neàdi Fime Fahedam Digat lam fuhuzobe Yesus Aho dam gagome Aba Aho avaesdam laba le dozeadam di iho ba iedi ladehebeat Aba Aho avaesdam laba le dozeadam vabak. Abo gi ahu teudi le dozeadam bak. Neham labe labihaha bak. Yesusat Aba Aho amu bak niba godume meedam bak lamti ulohona iho meedam labe labihaha bak.
18. Iho Ala bake abobo deeli meedameam làhà ba akati iho Ala bake iedemna modela? Ba Ala bake iedem biem bak. Iho meit iedemeam làhà gi neham bak ozome iede taia? Ame da labe Ala bake abobo deeli meedaha vab labe, “Alat eba beom bak,” lahame ozome iedem bak.
19. Iho Alati dam totbahoti deeli meedam bak lam nehaha labe deeli meedam bak. Alat amu nasi iba deeli meedaha labe iho fa Alati dam totbahoti labihasu deeli meedam bak.
20. Iho meit nehameam, “Em Ala bake deeli meedamda am bak,” lahamda labe vedi amti vahi Kristus bake tu vuzehi meedam dam totbaho laba deeli meedam vaba gi ahu adat faki meedamda lam aho amu lab gagoho bak lam gi giomim vagedam dàt modem bak. Eho gi neham bak ozome uba labi gagoho bak. Im ba Alam alihi koena aaha vabak. Labiham labe iho meit imti Kristus bake tu vuzehi meedam dam totbaho labe im alihi dihasi aa dihasi aa lahadamda labe aho vedi dam lada lam deeli meedam vab labe ba akati Ala Aho aam biemda laba aho deeli meedà? Labiham biem bak.
21. Labihàmu Yesus Kristusat Aho amu iba im nehasu gagu fi hasi vou esmoho bak. Aho neha, “Meit nehame gagodameam, ‘Em Ala bake deeli meedamda am bak,’ lahame gagodamda labe am laha amti vahi Eba tu vuzehi meedam dam totbaho laba laha abo deeli meedale,” lahame Yesusat iba labi gagohemu iho imti vahi Yesus bake tu vuzehi meedam dam totbaho laba deeli meedam bak lam ba voom vabiem bak. Abo modem bak.
1. Meit nehame ahate gagodameam, “Ame Da Yesus lam Alat Gagu Fihasi Vimteme Oluhu Dat Boehàda am bak,” lahame vuzehi labi ahate gagodam dam lam Alam data am bak. Laham dam labe laha im Ai Ala bake deeli meedam bak. Iho meit im Ai Ala bake deeli meedameam làhà Am data totbaho laba iho laha deeli meedam bak.
2. Iho meit Ala bake deeli meeda. Labi Aho iba gagodaha im lam iho laha aime vuzehi meeda. Iho labihasu meedameam làhà iho nehi ozo, “Làhà imbot! Imti vahi Kristus bake tu vuzehi meedam dam abo Alam data totbaho laba iho laha deeli meedam bak.” Laham bak lam im ozobohudehe bak.
3. Iho Ala bake deeli meedam bak lam it ozome ozobohudem bak akete? Gi neha taia? Alat Aho iba vameadume fi hasi esuhu im lam iho aime vuzehi meedameam làhà imbot. Iho Ala bake deeli meedam bak am bak. Alat Aho iba vameadume fi hasi esuhu im lam iho ba modem biemnat modem vabak. Gi ahebu meedam neàna tadehe bak.
4. Eho gi neham bak ozome uba labi gagoho bak. Iho ahamte alimeat nehi gagoho labe, “Ame Da Yesus lam Alam Adat am bak,” lahame tu vuzehi labi gagoho labe im ab Alam dataleham bak. Labi im Alam datalehe labe Alat iba modi vizi teudehe labe ba ame dam Ala bake ozom vaba gi ibi iho modem bak modi baleàhà dam labe iba li neha, “Nehame meedale,” lahame iba li vabidam di lam im ahu ba bedi tau meedam vabak. Gi im ahu it mali teudi meedam labe ame dam labe im im lam gi ailahigeàmu voedam bak.
5. Labiha labe uho ozom, dat akatihasu meedamda labe ame dam Ala bake ozom vaba iba li vabidam dam labe im im voedam dàt modela? Nehame gagodam dat am taia? “Ame Da Yesus lam Alam Adat am bak,” lahame vuzehi gagodamda lam ame da am bak.
6. Yesus Kristus lam abo Alam Adat Aho gagu olu bak niba li dateleheda am bak. Neham bak meedaha di, “Ame bak lam imbote,” lahame Alat modi tombalehe di am bak. Alam Adat amu bak niba li datelehezobe Yohanes mei vuu valo baptislemda labe Am vuu valo baptislehe di ame. Labi laha neo Yesus eloi Am vasea veàtoho di ame. “Yesus abo Alam Adat am tame,” laham bak lam Alat iba modi ozobohudi fi gatehe di am bak. Gi valo baptislehe di lamota Alat modi tombalehe vabak. Abo Yesus eloi vasea veàtoho di lam laha iba neo modi tombalehe bak. Ba im behàsu lada lamota vi ozodam vabak. Alam Aha Nutabe Neàna labe laha, “Yesus abo Alam Adat am tame,” lahame tau iba vi gagodam bak. Iho ozom, Alam Aha Nutabe Neàna lam gi im imbona vameadam bak. Labiha labe iho ozobohudi nehame uba gagodam bak. “Imbote! Yesus Kristus lam abo Alam Adat Aho gagu olu bak niba li dateleheda am bak,” lahame gagodam bak.
7. Laham bak lam im biem bake Alat ahit im làtela nim modehe labe im ozobohudehe bak. Alam Aha Nutabe Neàna labe iba gagodam bak ame. Labi Yesus valo baptislehe di Alat nom gagoho bak lam ame. Labi Yesus eloi vasea veàtoho di damat aame gagoho bak ame. Laham im làtela lam gi ame baket uloholi gagodaha bak.
9. Ubu uho bakda nehame meedam bak nim nasi it ozodale. Uho meia uloolo modem di lam dam na aahada labe li gagodam labe uho ame im ahum lam aime àvodehat vuzehi vi uledem meo damat modem bak. Lahana ame im lam gi bak damat vameadamna ahum uho àvodehat vi vuzehedam bak. Lahana Alat iba lab ahate gagodam bak lam bisi feàda am bak. Aba Aho lab gagodam bak lam gi nehadam bak. “Yesus lam Am Adat am tame,” lahame gagodam bak. Labihàmu Aba Aho ahate lab gagoho bak lam abo bisi vuzehem neàda am bak.
10. Iho meit neha, “Ame Da Yesus lam Alam Adat am bak,” lahame vuzehi ahate gagodamda lam am ahu ad labe laha nehi ozo, “Alat Aba Aho Yesus bake ozome lab ahate gagoho bak lam abo imbote,” lahame ozobohudehe bak. Lahana iho meit Alat Aba Aho lab ahate gagoho bak lam vuzehem vabameam làhà iho ozom, ame da labe gi nehi meedam bak. Alat amu neha, “Ame Da Yesus lam Em Adat am tame,” lahame lab ahate gagoho bak lam ame da labe ba vuzehem vaba vedi neha, “Ala lam ba im imbo bak vameadam vaba gi giomim vameadam Alat modem bak,” lahame gagodam bak.
11. Alat Aba Aho ahate gagom bak gi neham bak. “Iho Am Adat Yesus bake tu vuzehi vou ali ahu vàmadi meedam labe Aho iba ab modi Amti vahi gi ahe neàna bohu ab vuusdamam bak,” lahame Aho iba labi ahate gagodam bak.
12. Meit Alam Adat Yesus bake tu vuzehi vou ali ahu vàmadi meedamda lam Alat ame da lamti vahi gi ahe neàna bohu vuusdamda am bak. Lahana meit Alam Adat Yesus bake tu vuzehi vou ali ahu vàmadi meedam vabda lam ba Alati vahi ahe neàna bohu vuusdam vabak.
13. Uho amu neha, “Ame Da Yesus lam Alam Adat am bak,” lahame amu tu vuzehi meedam dam oa, uho sunit nim ve aame ozo, “Alat iba ab modi Amti vahi gi ahe neàna bohu ab vuusdam ame?” laham bak lam uho it ozobohudem bake eho sunit nim toedume uba oluho.
14. Iho Alam Adatti vou ali ahu vàmadi meedam dam nibe iho ozom, iho Ala bake tom gagodam di ibi iho ozome tom gagodam bak lam Alat ozoha, Aba Aho ozom bak lamti uloholemeam làhà Alat ai tame. Labiham labe iho ba ladehebeat tom gagodam vaba gi keàtedi tom gagodam bak.
15. Labi iho lab tauleme tom gagodam bak lam, “Aho ai tame,” laham bak im ozobohudemeam làhà iho vi ozo, “Na iho gagohoda lam Aho iba lodam bak,” lahame iho laha nasi tu ozobohudem bak.
16. Umti Kristus bake tu vuzehi meedamda meida lam uho aameam faina meedamta meeda. Lahana ame faina lab meedam bak labet aba modi Alati vaitesum bohu modem vabameam làhà uho gi ozahit neha, “Ai Ala oa, oho da nim ozahigeàmu fa vei neàdedale,” lahame Ala bake tom gagodale. Uho labi modemeam làhà Alat ame da lam beolo modem bak lam gi vei mu soat vausu fa vei neàdedume fa Amti vahi gi ahe neàna bohu vuusdam bak. Lahana meit faina meedam bak labet aba modi Alati vaitesum bohu modemda ehete. Dam labihasu meedam damti, “Tom gagodale,” lahame eho uba gagoho vabak.
17. Im vamdesu meedam vabak ahebu lam gi faina meedam bak am bak. Lahana faina meedam bak totbaho meit aho meedamta meeda. Lahana Alati vaitesum bohu meedam vabda ehete. Lada lam uho tom gagodam labe Alat ame da laba modi fa Amti vahi gi ahe neàna bohu vuusdam bak.
18. Iho nehi ozo, “Alat meia modi Am damalehe dam ahebu lam ba faina vi modidam vabak,” laham bak lam im ozobohudehe bak. Neham labe vi meedam biehe bak. Ame dam labe Iblisit iba vabidume faina meedam bak labna zohàme Alam Adat Yesus labe Aho ame dam laba vou faovoi soat vausu vou aasdam labe vi meedam biehe bak.
19. Dam Ala bake ozom vaba gi ibi iho modem bak modi baleàhà dam lam Iblisit vuusu meedam labe Ibilisim im meedam lahasuhu bak. Lahana im Alam dataleheda nibe Alat iba vuusu im Abada iho meedam bak. Laham bak lam im laha ozobohudehe bak.
20. Labi laha Alam Adat Yesus lam bak niba lehemu, “Imbo Ala lam akatihasu meedam Alat modela?” laham bak lam iba ab modi im ozobohudeham bak. Labihàmu iho Am Adat Yesus Kristus bake vou ali ahu vàmadi meedàmu iho laha Ala Imboda laba ab vou ali ahu vàmadi meedamam bak. Ame Da Yesus Kristus lam Ala Imboda vàmtea am bak. Labi laha meia modi Amti vahi gi ahe neàna bohu vuusdamda am bak.
21. Eho deeli vuusdam dam em data ààmom dam oa, damat neha, “Iba vuusu faobekesi vabiedam ala am tame,” lahame na ostamna it auet modi alali vou baedamna laba uho a vuusu vou baedamule. Gi ozahigeàmu voole. Neàte. Eho Yohanesat sunit nim toedume ab neàdeham. Àhàm.
1. Alat neha, “Am damalese,” lahame amu deeli fi me vaha oi labe am datatieho abobo deelem dam oa, Kristus bake tu vuzehi vahi meedam dam laba vuusu im vameame faheme modiamda busaoda nibe eho sunit nim toedume uba oluho. Ba ehemo vàmtea uba abobo deeli meedam vabak. Ame Alat Aba Aho vameadume modi fi gatehe im imbona lam aime vuzehi meedam dam totbaho nibe laha uba deeli meedam bak.
2. Ame Alam im imbona lam iho amu aime vuzehi meedam labe im ahula esu meedam lahasuhu labe ba setem vabak. Labiha labe iho uba deeli meedam bak.
3. Eho ozome neha, “Iho ame Alat Aba Aho vameadume modi fi gatehe im imbona lam iho tu vuzehi meeda. Labi iho dam bake ot deeli ot deelidume meeda. Iho labihasu meedam labe im Ai Alati Am Adat Yesus Kristusti labihasu vahi iba aam faimu ozahit deeli faobekesi im neà bak modi esuidase. Labi iba modi im ahu faheme fi goaitom vaba gi vabademsuse,” lahame eho Ala bake labihasu tom gagodam bak.
4. Eho deelem oi oa, meit eba li neha, “Im Ai Alat Aba Aho amu iba neha, ‘Nehame meedale. Nehame meedale,’ laham im imbona lam om data totbaho labe ame im lam aime vuzehi ulohodesu iademe meedam bak,” lahame eba li gagohona eho aiha em abo ahulat deelehe bak.
5. Labihàmu oi oa, em im nidi nim omti vahehe dam lam om data ààmom dam lamti uho aimale. Eho uba neha, “Im ahebu ot deeli ot deelidume im neà bakta bohu ot modidase,” lahame eho uba gagodam bak. Ame im lam iho amu Yesus Kristus bake ahamte alimeat tu vuzehe di labe Alat iba gagohona lam iho amu aime modesdam labe etei vou fuhu imot modem bak. Labiham labe ame im nim gi gàhànat modem kaio. Em gi im amuna uba vi gagu ozobohudelo toedam bak.
6. Iho lab aihi bak lam, “Iho ot deeli ot deelidale,” laham bak lam gi neham bak. Im Alat Aho gagodaha im ahebu iho aime vuzehi ulohodesu iademe meedam bak bohu vuusdam labe iho meia ot deeli ot deelidume im neà bakta ot modidam bak am bak. Neham bak. “Im ahebu ot deeli ot deelidume im neà bakta bohu ot modidase,” lahaha im lam uho amu Yesus Kristus bake ahamte alimeat tu vuzehe di labe Alat uba gagohona uho amu aime modesdam labe etei vou fuhu imot modem bak. Labiha labe imo nasi ame baket bohu meedase.
7. Meia vagedam dam zi duada labe etei di nibe bak niba fi goaitoi im giomimna vou vameatedalo modem bak. Ame dam im giomimna vou vameatedam dam labe neha, “Ame Da Yesus Kristus lam amu bak niba li abo datelehe bak,” lahame gagodam mom damat modem bak. Labihasu meedam dam lam gi im giomimna vameadam labe meia ahi vagedam damat modem bak. Abo Kristus bake vi taum mu fakemoholi vaitoho damat modem bak.
8. Dam im giomimna vameadam dam labe ibi iho vameadam im uho aime vizemo. Iademe it vou faovoi meedale. Iho uba le tau vabiedume um neàdelo vabalehena uhumo fa vàhàdeme seddam bak labna zohàme mahate it vou faovoi meedale. Labi laha uho Alam im imbona lam vuzehi meedam bak lamti labi uho dam bake ot deelidume im neà bakta ot modidam bak lamti uho labihasu bohu vuusu meedam bake Alat Aho ozome uba ba diamut lolo modemna abo Aho asum ahoba iuba vahehena lam uho vaha vaba voom bak labna zohàme uho iademe it vou faovoi meedale.
9. Kristus Aho amu vahokedume vou esmoho im imbona lam meit mu fa veimdi im amomoi giomimna meedameam làhà ame da labe ba Ala bake vou ali ahu vàmadi meedam vabak. Gi vaitesu voom bak. Lahana meit Kristus Aho amu vahokedume vou esmoho im imbona lam aime vuzehi ame im bohu vuusu meedameam làhà ame da labe abo im Ai Ala labe Am Adatti vou ali ahu vàmadi meedam bak.
10. Ame dam giomim vameadam dam labe uba lem di uho malem vaba gut ve nehameam, “Neàte,” lahame ve um numa vou oli ousu iddam labe na lodameam làhà um gi dam laba vi tau dam bake vagedam labe gi faina bohu tadem damat modem bak. Labiham bake meit uba li Kristus Aho amu vahokedume vou esmoho im abo im imbona lam uba vahokedam vaba vedi fa im amomoi giomimna uba vou li vahokedameam làhà uho a gut ve, “Neàte,” lahame num ubuda laba vou oli iddamule. Gi num ubuda nasi malele.
12. Em abo im dua labe uba vameadume neàdem kaio. Lahana eho ba sunit niba toedam moho. Eho nehi fet ozoho labe uba labi gagoho bak. Em faobet uba laba le umti ot avaesuiame ame im vameada tame. Iho labi modemeam làhà im ahu abobo ab ot deeliame vàmadi meedamam bak.
13. Neàdeho. Obo meida abo Alat neha, “Am damalese,” lahame amu deeli fi me vaha nam nibe am datat oba, “Neàte,” lahame gagoho. Àhàm.
1. Ebe eho abobo deeli vou ali meedamda Gayus oa, Kristus bake tu vuzehi vahi meedam dam laba vuusu im vameame faheme modiamda busaoda nibe eho sunit nim toedume oba oluhu bak.
2. Ba oa, om ahulat neà bak ozome meedam bak lam em ozobohu bak. Labiha labe om so laha ba gailem vabake abo gi ahe neàdem bake eho Ala bake tom gagodam bak. Labi laha Alat oba gi neà bak bohu modi esuidam bak lam eho laha Ala bake tom gagodam bak.
3. Omti Kristus bake tu vuzehi meedam dam totbaho lamti eho vuusu im vahokedam dam abo em data ààmom dam labe uho ame Alat Aba Aho vameadaha im imbona lam uho voom vaba abo tu vuzehi ame im lam ulohodesu meedam tadem lahasuhu bak lam meit eba li vameadamna eho aidam di em abo ahulat deeli meedam bak. Em im mei aidam di mahate deelem vaba gi im lada lamota eho aim di deeli meedamda am bak. Labihàmu dam imti vahi Kristus bake tu vuzehi meedam dam totbaho labe bak oboda labe eba leidume obo oho meedam bak lam eba nehame vameaida, “Ame da Gayus labe aho ame Alat Aba Aho vameadaha im imbona lam aho voom vaba abo tu vuzehi ahu vàmadi dihasi vi modidam bak,” lahame ame im lam eba li vameadamna eho aiha em abo ahulat deeleho.
5. Ebe eho bisi deelemda Gayus oa, dam imti vahi Yesus bake tu vuzehi meedam dam totbaho labe oba lem di oho amu aaha vabna bahagikida alihi aam di om aalahigeàmom vaba oho abo ozahit faobekesi vabiedam bak. Dihasi mode. Dihasi mode. Oho gi labihadam bohu meedam bak lam eho aihi bak.
6. Ame dam labe amu oba le iba fa lehe di lam Kristus bake tu vuzehi vahi meedam dam niba li nehame vameadaha bak. “Gayus abo uba deeli vuusdam bak,” lahame niba li vameadam bak lam im aihi bak. Labihàmu ame dam labe ibi iho lalo ozoho bake neo lalo modem di ibi iho ladam dia doni bake vou mode lamna lam oho lodume oudam neàte. Abo Alam im vou vameatedam dam ààmom damat modemu Alat oba deelem bake labihadale.
7. Eho gi neham bak ozome oba labi gagoho bak. Ame dam labe bak ibida vou esmozi iho Kristusat Aho meedume vou esmoho Im Neàna lam fa bak mei bake le vou vameatedaha di lam ba dam Kristus bake tu vuzehi meedam vab dam labe iba ba na koenavat doni bake vou mode lamna tau lodaha vabak.
8. Labihàmu ame dam labe ibi iho Alam im imbona lam dam bake vou vameatedam bak lam iho Yesus bake tu vuzehi meedam dam labe fa na àmna modeo, doi modeo, ame dam laba tau lodam bak lam gi ahole meedamnat modem bak.
9. Labi eho im meida nim neo vameadalo modem bak oho laha aimale. Eho amu dam omti vahi Yesus bake tu vuzehi meedam dam laba eho sunit nim nehame toedume oluhu bak. “Ame Alam im vou vameatedam dam labe iho doni bake vou mode lamna uho tau lodale,” lahame eho amu sunit toedume uba oluha Diotrefes labe aho vedi im eho gagohoda lam aho gi ailahigeàmu vooho bak. Aba aho modem bak am. Eho modeo, ee dam totbaho modeo, iho im gagom di ame da labe gi mu voedam dàt modem bak. Ame da labe vedi nehi ozo, “Am fa feà dateli dam lam aho vuusu im vahokedam labe dam labe fà aba vou baedase,” lahame meedam dàt modem bak.
10. Labihàmu eho ba uba lem di ame da Diotrefes aho faina meedaha im ahebu um biem bake eho uba ahate vou le fi deda tame. Ame da labe aho faina meedam di gi nehame meedam bak. Aho dam amomoi bake le, “Im fà vàhàdese,” lahame fa iba it feàtàdam labe giomim vameadam bak. Gi lada lamota aho faidehe vabak. Abo imti Kristus bake tu vuzehi meedam dam totbaho labe abo Alam Im Neàna vou vameatedam dam labe num debu ibidate lefum di aho ba gut ve num abadate ousu vou im vabak. Ba na ohume lodam vabak. Labi laha um dam totbaho labe ame dam lam iba lehemu im numa ve vou izesome modeha ame da Diotrefes labe vedi neha. “Ame dam lam a ve um numa vou oli imule,” lahame gagu mali meeda. Labi laha um dam totbaho labe im num ame dam laba malehe vaba gagome vou ihi bake faki meedam labe Diotrefesat vedi neha, “Iho vazisi Ala bake vou baedam num niba uho a vi tau vazisi oli Ala bake vou baedamule,” lahame maliam dàt modem bak. Aho labihasu meedaha bak lam faobe eho uba lem di ahatet vameada tame.
11. Ebe eho vou ali meedamda Gayus oa, ame da Diotrefes labe aba aho faina meedam bakti ulohona meedam dam totbaho ahebu oho a ozome ame bak laba vi tau meedamule. Gi dam im neà bakta meedam dam laba vi tau meedale. Meit neà bakta meedamda lam Alam datali Alati vou ali ahu vàmadi meedamda am bak. Lahana meit gi fai bakta meedamda lam ba Alam datali Alati vou ali ahu vàmadi meedam vabak.
12. Imti vahi Yesus bake tu vuzehi meedam dam totbaho ahebu nehi ozo, “Demetrius lam abo neàte,” lahame ame da laba labihasu vou baedamda am bak. Labi laha ame da Demetrius labe ame Alat Aba Aho vameadaha im imbona lam aho tu vuzehi ulohodesu dihasi modidam dàt modem bak. Labihadam dàt modehe labe iho ozom di, “Imbote. Ame da lam gi im neà bakta meedamda am bak,” lahame ozobohudi ihimo laha vi tau gagodam bak. Ibi iho lab gagodam im lam ba giomim gagodam vaba gi imbona gagodam bak. Labiham labe Demetriusat uba lefum di uho gi nehale, “Lem neàte,” lahame gagu gut vale.
13. Em abo im dua labe oba vameadume neàdem kaio. Lahana eho ba sunit niba toedam moho.
14. Eho nehi fet ozoho labe oba labi gagoho bak. Em faobet oba laba le omti ot avaesuiame ame im vameada tame.
15. Gayus oa, “Alat oba modi om ahu faheme fi goaitom vaba gi vabademsuse,” lahame eho Ala bake labihasu tom gagodam bak. Omti vou ali meedam dam totbaho eba niba tau azihi dam nibe oba neha, “Neàte,” lahame gagodam bak. Labi imti vou ali meedam dam oba laba tau azihi dam laba oho laha ibi iho, “Neàte,” lahadam bak lam oho laha dam laba vameadale. Neàte. Sunit nim eho Yohanesat toedume ab neàdeham. Àhàm.
1. Im Ai Ala Aho deeli, “Am damalese,” lahame gagu fihasi esuhu dam abo Alat labaha bohu vuusu vabiedahit Yesus Kristus ba lehezobe Aba gut lolo modem dam oa, eho Yudasat sunit nim toedume uba oluho. Yesus Kristus labe Aho im gagu modiamda meida nibe abo eho Yakobus ba meida nibe sunit nim toedume uba oluho.
2. Eho uba ozome neha, “Im Ai Alat Aho uba aam faimu ozahit deeli faobekesi im neà bak uba modi esuidase. Labi uba modi um ahu faheme figoaitom vaba gi vabademsuse,” lahame eho Ala bake labihasu tom gagodam bak.
3. Eho deeli meedam dam oa, “Umti imti Alat iba vazisi soat vausu fa vei neàdedaha bak lam gi ulohona modeho,” lahambak lam, “Eho uba sunit toedume oluse,” lahame eho modelo àhàkedam bak lam modesome modeha modem bi fa im amomoi uba fa toedume oluho. “Yesusat Aba Aho meedaha Im Neàna abo imbona lam iho tu vuzehehe bak lam fa meit odosi veioi veimdem vabake uho mahate keàtet odosi meedale,” laham bak uba vi ootedalo ozome sunit nim toedume oluhu bak. Ame im imbona lam amu Yesusti labi Aho Am im gagu esmozi laiam dam lamti iba Alam damalehe dam niba modi ozobohudi fi gatehe bak. Labihàmu ame im imbona lam, “Meit ba a veimdi setemule,” lahame eho uba im labihasu vameadalo sunit nim toedume oluhu bak.
4. Eho etei uba neha, “Mahate keàtet odosi meedale,” lahame lab gagoho bak lam gi neham bak ozome uba labi gagoho bak. Dam giida labe ahobat neàdi uba le tau azi im git vahokedam dam ehe bak. Ame dam labe Ala bake ozom vaba vedi uba im nehasu vahokeda. “Alat iba ozahit deeli im neà bak modi esuidam Alat modem labe Aho iba soat vausu fa vei neàdehemu ibi iho im ahu adat bisi faina modelo àhàki ozomna lam abo fi loholi ostame la modi le modidam bak lam fa meedam neàte. Alat ba iba fakem kaio,” lahame labihasu git vahokedam dam uba laba ehe bak. Labi laha im Boehàda Yesus Kristus lam abo ibi iho neha, “Iba vuusu im vahokedam neàte,” lahame ee vousahada vàmtea lam ame dam labe iho ba tu vuzehem vaba gi mu tozome moho damat modem bak. Ame dam lam Alat amu neha, “Beom neà bak,” lahame amu fet gagu esuhu bak lam meit Alat Vameadaha Im Toedahana laba toehe bak ehe bak.
5. Eho etei uba vameadalo modem im nim um ba biem vabak. Um amu gi ahebu ozobohudehe bak. Lahana eho ozahit, “Bisi faina meedam dam lam Alat beoda tame,” laham bak lam um fa vabiemna zohàme eho ozahit uba neo modi vi ozobohudelo ame im nim uba vameadalo mozo. Nehaha bak. Aham di iube Mesir damat fa Yahudi dam simtedi geàdàmu im Boehàda Ala labe nom aaha faobekesi Aho Musa bake gagu olu ame Yahudi dam zi ahebu fa soat vausu ab vi vihitoham bak. Lahana amu soat vausu vi vihitoi vou ladahana vedi dam zoho labe ba ibi iho amu Ala bake tu vuzehehe bak lam fa mu voedàmu Alat fa vi beodume gi bak aotba baa bohu dam vaba alim bak laba vou voe ladaha bak.
6. Im lada lam labiha. Labi uho im nidi nim laha vi ozomale. Aham di iube asum ahoba iuba Alat Am im gagu vou usemda zi laba, “Im dedamali im nehasu meedale,” lahame ahala faheme lu vuusiada. Lahana ame dam zi labe Alat iba ahamte gagu fi hasi esuhu im lamota meedaha vaba vazidazi fa mu im amomoi vi meedàmu ibi iho azi na im meedam bak lam mu fa ab vou esmoham. Labi ame di labe im Boehàda Alat ame dam zi laba modi nom ilu aibu bak feà laba voou bes botehà niz labe giame gi labaha simtedi bohu vuusdam bak. Abo gi labaha bohu vuusdahit ba diamut damat amu meedaha im Alat vi ozome ozobohudi fahedam digat feàda fusi Aho dam lam gagu beodam bake vou faodam bak.
7. Im lada lam labiha. Labi uho im nidi nim laha vi ozomale. Num debu Sodomti Gomorati labi num debu netàda totbaho lamti labihasu azim dam zi labe ibi iho amu meedaha im laba uho laha vi ozomale. Nehaha bak. Ame dam zi labe gi eho etei lab vameadaha Alam im gagu vou usemda zi lamti uloholi faina meedaha bak. Ame dam zi labe iho Alat uledehe bak meedaha vaba vedi ihimo gi ostame fi loholi ot vai ot vaidam bak ahebu la modi le modida. Labihàmu Alat faki ame num debu laba esuhu dam zi ahebu im num zi lamti vuat beodume ab seddaham bak. Alat ame Sodom dam lamti Gomora dam lamti beodaha bak lam gi Aho ba diamut dam faina meedaha dam ahebu laba vua gi labaha elum sutem gikina bohu labe ba beodam bake ahit amu nasi iba dam badate fet vouhoho bak.
8. Uho ozom, gi amu di lamota damat ame faina lamohona meedà? Vabà! Etei ba di nim ame im giomimna vahokedam guru lam etei uba li tau azihi dam labe laha gi ame baket meedam bak. Ame dam labe iho ulehe im laba neha, “Imbote,” lahame tu meedam labe gi im nehasu meeda. Filoholi ostame la modi le modidam bak labet modi im it vàhàdeme faididam bak ame. Labi laha Alat neha, “Aba Aho ozoho im lamota meedale,” laham im lam gi mu tozodam bak ame. Labi iho aam biemna asum ahoba iuba azimna feà zi laba feàtàdam bak ame. Labihasu meedam damat modem bak.
9. Dam lada lam labihadamnàme ba Alat Am im gagu vou usemda zi labe im boehàda bisi feàda Mikael labe aho ba Iblis bake vàlu feàtàdaha vabak. Nehaha bak. Aham di iube dat ahamda Alat vameadaha im aime fa dam bake ahate vameaidahada Musa lam am eloho di labe am koeiso lam Mikaelti Iblisti, “Amat vàla?” lahame ototo vuusuiaha di lam Mikael ba ahamo ozome keàtedi Iblis bake vàlu feàtàdaha vabak. Aho gi neha, “Boehàda Alat ahamo fà oba faki beose,” lahame labi gagoho bak.
10. Lahana ame im giomimna vahokedam guru labe iho vedi iho aam biemna asum ahoba iuba azimna feà zi laba abo im ozome ozobohudem biemna feàna zi laba vedi feàtàda. Abo gi na bake esumna zi labe ibi iho iademe ozome ozobohudi im meedam vaba vedi ihimo ibi iho modi baleàhà baket meedam bak lamti ulohona meedam damat modem bak. Ame guru labe vedi ihimo it ozom vabna modelo àhàki meedam labe ihimo it vàhàdem bak vabili gi ostame meeda.
11. Aiee! Gi modeme vàhàdeme setem dam lam akati modela? Abo aham di iube Kain labe faina modelo am ahu gukeme modehe bak lamti ulohona meedam damat modem bak. Abo dat ahamda Alat vameadaha im aime fa dam bake ahate vameaidahada Bileam labe aho git modelo modem bak lam ozobohuna ahit, “Doi dualese,” lahame faina meedaha bakti uloholi ame guru zi labe iho ba it ozom vaba ahu bedi, “Im doi dualese,” lahame im vàmtea laba tombuli vahokedam damat modem bak. Labi laha aham di iube Alat gagu vahada Musa lam Korahat neha, “Ame da lam ba iba Israel dam a vuusdamule,” lahame mu dam zoho bake odoadume dae dou vahehe bak lamti uloholi ame guru zi labe iho Alat gagu fi hasi esuhu im mu voedam damat modem bak. Labihasu meedam damat modem labe Alat laha ba beodume sedda tame.
12. Labi laha ubu uho im Boehàda Yesus iba deelehat meedaha bake vi ozome vazisi na àlo modem di ame im giomimna vahokedam guru labe iho ahobat neàdi umti deelehat vazisi na àdam meo bak. Labi na àlo modem di lam dam labe uba modi fa vàhàdem bak um vabili uho vahi meedam bak. Abo ke gat vao ad iuba boaedam bak lam kapal labe vabili belu vàhàdem bakti ulohona uho vabili meedam bak. Labi ame guru labe ibi iho lab neàdem bakta ozome àhàlahit geàmu neo vi àdume meedam bak lam ba it ladi iedem vabak. Ba ibi iho vuusdam dam laba ba iademe vou aasu vabiedam vab damat modem bak. Abo di neà faasi bak aotbali modesum di ulo labe abaalem vaba vageme nutabet vou le setem ulo lamti ulohona meedam gurut modem labe uba neha, “Uba im imbona vahokeda tame,” lahame vameadam damat ame bak meedaha vaba gi voedume seddam damat modem bak. Abo na amdi àdam bak fusi ame di labe le aaha ame ut ooalem vabak lamti uloholi ame guru zi labe ibi iho guruledaha bak lam gi ahobat neàdi guruledume ba ame baket meedaha vab damat modem bak. Abo ame ut labe am omnaoti valoi ala faam bake ahoba laba voou aotbali alai setem bakti uloholi meedam damat modem bak. Ame guru zi labe iho amu Ala bake tu vuzehi meedam bak lam vedi fa mu Alati vaitesuhu labe ba ibi iho amu guruledaha bak lam fa meedam vabili vooho damat modem bak.
13. Ame dam labe laha gi im ahu ad labe faina meedalo àhàki ozodamna lam fa gi labaha ahate tombali bohu vuusdam labe ba it malem vab damat modem bak. Abo itea feàna vao foadam labe naubeti kehanabuati vou futodume auobe laba modealadume modesdam labe àbozna aadam bak lamti ulohona meedam damat modem bak. Abo gi falo aba amu modesu doudam bak laba modesuhu vabna fa veimdi bak mei bake le modesdam labe meit vabili git ladam bakti ulohona meedam damat modem bak. Ame guru labe vedi im fauha neà bak meeda tiba vabili meedam labe ibi iho vahokedam dam laba modi zie fàusi ub olem bak meedam damat modem bak. Ame guru lam Alat mu aibu feà bak laba voou seti gi labaha bohu vuusdam bak laba amu gi modi ahumdi esuhu bak.
14. Ame im giomimna vahokedam guru lam etei uba tau vahi azihi dam lam Alat ba diamut beodam bak lam dat ahamda Henok labe amu aham di iube nasi fet ozobohudi vameadume esuhu im ehe bak. Ame da Henok lam ozom di gi nehaha bak. Adamat aba aho vou faat ledam debu gagu vàmteade. Labi neo vou ded ladume Henok aba aho vou faat ledam debu fusi gagu tujuhle. Labihaha bak. Ame da Henok labe aham di iube im nehasu fet vameadume esuhu bak. “Uba aimale. Eho fet aaha im neha. Im Boehàda labe Am im gagu vou usem dam zi abo dem biemna zi abo bisi neàbodeheda vou lelo modem bak eho fet aaha bak.
15. Im dam bakda ahebu iho bak niba ahedi meedaha im lam, ‘Iho git meedào? Git meedam vabao?’ laham bak ozome ozobohudi dam vamda vada. Labi beodamda beoda. Abo Ala bake ozom vaba vedi gi ibi iho ozoho baket meedam dam laba abo ahu odohabuli meedam dam laba vàlu neha, ‘Um abo faina meedaho,’ lahame vàlu gagodume beodalo modem bak. Abo Am im aime uledem mu im Boehàda bake odosi neha, ‘Tufea. Giomim modem Boehàdat modem bak,’ lahame labi feàtàdam bake beodalo modem bak.” Laham im lam Henok aham di iube labi fet vameadume esuhu bak.
16. Labi ame giomimna vahokedam guru lam laha gi meia ostame faki voe voedam bak tadem damat modem bak. Labi meia la feàtài le feàtàida. Abo im ahu adat modelo àhàki ozomna lam, “Iho gi nehi faina meedase. Iho gi nehi faina meedase,” lahame ozom di gi ame baket la modi le modida. Labi laha ibi iho meedaha im it ozome daetbada. Labi laha ame dam labe, “Dam amomoi fà iba na lodase,” lahame ahit keobaeda. Labihasu meedam damat modem bak.
17. Um eho deeli meedam dam oa, ame guru labe labihasu meedamta meeda. Lahana um a labihamule. Uho gi im Boehàda Yesus Kristus labe Am im gagu esmozi laiam dam labe iho amu nasi ozobohudi uba fet vameadume esuhu im laba uho mahate vi ozodale.
18. Ame dam labe amu uba neha, “Ba diamut digat folelo modem di labe dam Ala bake uledem vaba gi ibi iho ozoho bak abo im ahu adat faina modelo àhàki ozodam im lam bisi uledi meedam labe fa Yesus bake tu vuzehi meedam dam niba iba tozoda tame,” lahame amu labihasu fet vameadume esuhu im lam ab imbodi damat ab meedamam bak.
19. Ame im giomimna vou li vahokedam guru zi labe ibi iho meedaha im gi nehame meedam bak. Uba modi um ahu fahedume daet ot beidume fa faheme fàsi meeda. Labi ame dam labe laha Alam Aha Nutabe Neàna labe iba vizi vuusdam vab labe gi ibi iho amu meedume baleàhà im lam abo im ahu adat modelo àhàki ozomna labet modi uledi meedam tadi meeda. Labihasu meedam damat modem bak.
20. Eho deeli meedam dam oa, ame im giomimna vou li vahokedam guru zi labe ibi iho meedam bak laba uho ba a vi tau meedamule. Um gi fa im nehasu meedale. Alat amu uba modi um ozobohudi fi gatehe im imbona lam uho amu keàtet tu vuzehi meedam labe gi labaha bohu vuusu im meida aime vi mode. Im meida aime neo vi mode. Gi labihadume bohu vuusdume teudi neàbodedale. Abo damat num molo modem di amu nasi bao zisime neàde. Labi neo vagimso vaheme teude. Gi labihadume neàbodi teudem bakti ulohona meedale. Labi Alam Aha Nutabe Neàna labe uba vizi vuusdam labet modi uho Ala bake mahate tom gagodale.
21. Labi Alat uba gi labaha deeli bohu vuusdam bak laba vi ozome gi Aba Aho ozome deelem im lamota uho meedale. Labi laha im Boehàda Yesus Kristus labe Aho meia faobekesi im neà bak meedam Dàt modem labe Aho ba li iba modi gi Amti vahi ahe neàna bohu vuusdam bak laba tu vou faodale.
22. Uho laha im nehasu meedale. Dam Kristus bake tu vuzehemta vuzehe. Lahana fa bedi fa moeo, lahame ozodam dam laba uho ozahit im neà bak iademe vi vahokedale.
23. Labi dam totbaho amu Kristus bake tu vuzehehena vedi fa vaktesi git ladam dam lam uho fa vi vuu vou li neàdele. Abo vua laba bitelo modemna ozomom bakti ulohona modi vi si vi vihitoi vei neàdele. Labi dam totbaho labe bisi im ahu adat modelo àhàki ozomna uledi meedam labe bisi faina meedam dam lam uho laha ame dam laba ozahit deeli im neà bak tau meedale. Lahana ame dam labe ibi iho faina meedam bak uba fa vizemna zohàme gi iademe meedale. Abo ame dam labe ibi iho faina meedaha bak labet modi im sueti vàhàdeme aotbali dum mom bak lamti ulohona uho ame dam labe ibi iho faina meedam bak laba faki moudale.
24. Ala abo feàte. Imo Aba vou baedase. Am abo iho git ladam di iba vou aasu vabiedume fa neàdedamda Am am bak. Aho im vou le Aho avaesdam feà bak laba duzum di lam Aho iba vàlu gagom biemna abo gi neàbodi ahumdehena im ahu deelehat vou le duzum bak. Am gi iba labaha bohu vou aasu vabiedume neàbodi vou duzum meo Alat modem bak.
25. Ibi iho vou baedam Ala gi vàmtea bak. Labi im Boehàda Yesus Kristus labe Aho iho faina meedam bake gohali ot vai eloho labe Alat iba soat vausu fa vei neàdehe bak. Labi Am laha abo bisi feà labe iba modi iho ozome àvodi, “Am abo feàte,” lahame meedam Ala Am am bak. Labi Am laha na ahebu im Aho modem meo bak tadi meedam Alat modem bak. Labi na im iho bak niba meedamna ahebu im deda Ala naeda Am am bak. Labihasu meedam bak lam gi amu aham di iube na modehe vab di iube faasi meedam labe etei nim meedam lahasu vou meedume ba neo diamut gi ame baket meedam Alat modem bak. Im labihasu meedam Ala laba imo Am ee vousai, “Am abo feàte,” lahame im ahu adat iedi vou baedase. Labihadase. Àhàm
1. Im zi nim Alat Yesus Kristus bake modi ozobohudi fi gatehe imot modem bak. Yesusat Aho gagoho im uledi meedam dam nibe iho, “Ame fi gatehe im nim kehàm vaba abo taho modelo modem imot modem bak,” laham bak im ozobohudem bake Alat ahit Am Adat bake modi ozobohudi fi gatehe bak. Labi Am Adat Yesus labe Aho ot vai fa Am im gagu vou usemda meida laba neo gagu olu eba Yohanes abo Yesusat gagoho im aime uledi meedam dat meida niba tahi ame im lam vameadume eba modi fi gatehe bak.
2. Alat Aho eba modi fi gatei eho aadaha im ahebu lam eho iademe buku niba toedaha bak. Ba ame im meida vàmtea buà vekehe vabak. Abo Alat vameadume oluhu im lamti Yesus Kristusat Aho ahate vameadaha im lam eba modi eho ozobohudi fi gatehe im lamti ahebu toedaha bak.
3. Yesusat eba modi fi gatei eho fet toedume esuhu im zi nim meit damat vazisihi bak laba ahate tomba duzu aame gagodamda modeo, gi dogoit vi aime vuzehi meedamda modeo, ame dam lam deelehe bohu vuusdam dam am bak. Neham labe labihaha bak. Yesus Kristus eba nib modi fi gatelo modem im nim kehàm vaba imbode tame. Labihàmu ame im nim mahate aime tu vuzehi meedale.
4. Yesus Kristus bake tu vuzehi vahi meedam dam abo dam zi mei dam zi mei lahadam dam Asia bake modesuhu num debu tujuh ehena laba azihi dam oa, Neàte. Eho Yohanesat im nim toeme uba oluho. Eho Ala bake neha, “Im Ai Alati Am Aha Nutabe Neàna lamti Am Adat Yesus Kristus lamti labihasu uba ozahit deeli im neà bak modi esuidale. Labi laha uba modi um ahu faheme fi goaitom vaba gi vabademsule,” lahame labihasu tom gagodam bak. Im Ai Ala aham di iube gi labaha modesdume etei vou fusi neo vou mode ladume bohu vuusdam Alat modem bak. Labi Alam Aha Nutabe Neàna labe Aho feà bak mei feà bak mei tujuhlehena vuusdam labe feà Dateboli Aho boehàdat zisi nusumnabu Alabada avaesdam bak laba modesdam bak. Labi ame Da Yesus Kristus labe Aho Am Ai Alat, “Akatihasu meedam Alat modela?” laham bak amu dam bakdate vameadaha di gi imbo bak vameadam bohu meedamda Am am bak. Labi Am laha abo Eloho Bak Labet Ahamte Fa Ahedi Usahada Am am bak. Labi Ahamo vàmtea Boehàdateboli dam bakda vuusdam boehàda zi ahebu fa vuusdamda Am am bak. Iho faina meedàmu Alat iba beom bake Yesusat fa iba deeli ahit uledi ot vai eloi Am vasea veàtoi iba soat vausu fa vei neàdeheda Am am bak.
6. Labi laha, “Iho Am Ai Alat Aho gagohona iho uledi meedase,” lahame Aho iba modi Am damalehe bak. Labi neo iba modi Am Ai Alam tohe damali im Abada meedam bak. Labihàmu imo gi Yesus Kristus bake, “Am abo feàte,” lahame gi labaha bohu vuusu vou baedase. Labi laha Aho fà Boehàdateboli gi labaha bohu dam bake vuusu im vahokedase. Labihadase.
7. Abo imbote! Yesusat asum ahoba iubet ab nom ilulo modemam bak. Am gi uloti nom iludamna dam ahebu aada tame. Abo damat amu fosot Aba tom geihi dam labe laha aada tame. Labiham labe dam bakda debu mei debu meime ahebu, “Alat iba beom bak ab fuhame?” laham bak ozobohudi medda tame. Lo, imbote. Labihadase.
8. Im Boehàda Ala labe Aho nehi gagodam bak. “Em abo na ahebu ahamte faasi vou mode ledume ba novam zoho vou fusi vaitomda Em am bak. Em aham di iube gi labaha modesdume etei vou fusi neo vou mode ladume bohu vuusdamda Em am bak. Labi laha Bisi Feà Datebo vàmtea Em ame Da am bak,” lahame labihasu gagodam bak.
9. Eho Yohanesat modem bak. Em umti vahi Yesus bake tu vuzehi meedamda meida em am bak. Em umti vahi Yesus bake vou ali ahu vàmadi meedam di lam damat iba vabidume geàdamnàme iho gi ozahit keàtedi im Boehàda Yesus iba vuusdamda labe Aho gagoho im lam iho gi labaha bohu vuusu meedam bak. Lahana Alat vameadume oluhu im lamti Yesus Kristusat Aho ahate vameadaha im lam eba modi eho ozobohudi fi gatehe im lamti eho neo dam bake ahate vou vameatedàmu damat eba faki em si vou le Patmos touha niba vooho bak. Labihamda nibe eho sunit nim toedume uba oluho.
10. Iho im Boehàda bake vou baedam digat hari Minggu meida labe Alam Aha Nutabe Neàna labe Aho eba modi veimai vuusdam labe eho edehesi fako bakamta aasdume aadam di labe eho em ohuset it aiha na daevat abo aim tomba neàna trompet dae abo oma buddam daeti ulohona eho ab aiham.
11. Ame na dae labe nehame vameada. “Oho etei aadalo modem im nim oho sunit baa bolohona laba toedume neàdi ame sunit lam damat esuhu num debu abo tujuhlehena lam abo Eba tu vuzehi vahi meedam dam laba olu ame num debu laba esuhu dam labet fà aadase. Ame num debu lam neha: Efesus ame, Smirna ame, Pergamus ame, Tiatira ame, Sardis ame, Filadelfi a ame, Laodikia ame, labihasu fà aadase,” lahame eba vameadahana eho ab aiham.
12. Eba im labihasu vameadàmu eho, “Aase,” lahame it vaktesi aaha gi vuagat zi abo tujuhlehena emasat modehena abo ogatedamna aam neàna abo nao bohuledume dozeahana zi eho ab it vaktesi aaham.
13. Labi ame vuagat modealaha doni laba eho neo vi aaha datva abo Asum Ahoba Iubet Bak Niba Li Dateleheda Alihoehena laba douda. Ame Da lam abo sue sona ahoba dusumda bohu dusu abo nao busbe iuba novai modesda. Labi Am ahude laba vastesuhuna modesdamna lam abo emasat modehena abo ogatedamna aam neàna am ahude laba vatasda.
14. Labi Am ohuta abo fauhana domba tau fauti kapas fauhati ulohona modesu ogatedamna vi aa. Labi Am fako laha abo meit aibu bake olem di uma usime fauhalem vuati uloholi im so ad nimti ahebu aadam Dàt doudam bak laha vi aa.
15. Labi laha Am naba ahim lam gi ke ee gagom perunggu damat vame vua vahusu bozili ogatedam bakti uloholi modesda. Labi ame Da labe am dae aim di dae buduana meedam labe gi vao gum feàna daeti ulohona aidamna ozomom bak.
16. Labi Am au ahi tot lam falo abo tujuhlehena vuusualadaha bak ehet. Labi laha Am Bisi Feà Datebo vàmtea im vameadam Dàt modemu Am aha labe ae tot mo tot mo lahamna futoi modesda. Labi laha Am dauha labe abo ala digadda labe tomali fauhaedam bakti ulohona modesu ogatedam labe fako iedemna feà laha aada.
17. Labi eho ame feà bak lam aame modeha ame Da labe aho avaesdam laba em gi bolou damat elom bakti ulohona Am naba modesdam bak laba ab biteham. Labi modeha ame Da labe Am anekehà ahi tot labe eba nom odosu ab gagoham. “Om a iedemule! Eho mozo. Em abo Em Ai Alat amu na ahebu meedaha vab di iube Amti ahili na ahamte alimeat faasi meedahada Em am bak. Labi laha ame na zi lam vuusdume novai vaitolo modemda Em am bak.
18. Ebe Eho meedam bak nasi ozomale. Em gi ahena bohu vuusdamda Em am bak. Em amu eloho bak. Lahana Eho eloho bak labet Alat modi fa ahedi usai ahe neàna bohu ab vuusdamam bak. Ba neo vi elom vabak. Gi labaha bohu ab modesdamam bak. Labiham labe iho dam bak damat elodam di koei it oazehena le esdam bak Hades laba, ‘Labaha esdào? Eloho bak labet fa ahedi usnadào?’ laham bak vuusdamda im deda Em am bak.
19. Yohanes oa, oho etei nib edehesi fako bakamta aasdume fet aadaha im nimti abo etei meedam im nimti labi ba meedalo modem im lamti labihasu ahebu oho sunit baa bolohona laba nasi toedale.
20. Oho etei nib aadahana lam abo falo tujuhlehena lamti labi vuagat naoledahana tujuhlehena lamti lahamna labe am tombu om biem bake nasi aimale. Falo tujuhlehena lam gi Alat vameadaha im aime vou le vameatedam dam tujuh am. Labi ame dam labe fa dam Eba tu vuzehi vahi meedam dam Asia bak labe am num debu tujuh laba esdam dam laba vuusu aasdam dam am bak. Labi vuagat naoledahana tujuhlehena emasat modehena lam gi ame dam Eba tu vuzehi vahi meedam dam labe esdam num debu tujuh laba esdam dam am bak,” lahame eba ab vameadaham.
1. Yesusat eba neo nehi vi vameada, “Oho dat Alam im aime fa meia vou le vameadamda lam abo dam Eba tu vuzehi vahi meedam dam num debu Efesus laba esuhu dam lam vuusu vou aasdamda laba oho im nehasu sunit toedume olule. ‘Eba tu vuzehi vahi meedam dam num debu Efesus laba esuhu dam oa, Eho falo tujuhlehena au ahi tot labe vuusda. Labi ame vuagat naoledahana tujuh emasat modehena dozeadaha bak laba Eho lailaida. Eho labihamda nibe uba im nehasu ab vameadamam bak.
2. Em uho meedam im Em ozobohu bak. Uho Eho gagoho im meedam di gi keàtedi meedam bak. Labi uho Eba tu vuzehi meedàmu dam uba fakem dam labe uba vabidume geàdam di um ba ahu bedem vaba gi ozahit keàtedi bohu meedam bak. Labi dam bisi fai bak meedam dam lam uho ba uledi gi aalahigeàmom vaba fa gi odosi im vahokedam bak. Labi dam totbaho labe uba neha, “Im Kristus labe Aho gagu olu Am im vameadume esmozi laiam dam im am bak,” lahame gagodam dam lam uho ostame vuzehem vaba amu nasi ame dam labe im ahu uho modi aame ozo, “Dam lam gi vagedam damat mode?” laham bak aame ozobohudi mu voedam meot.
3. Labi uho Eba tu vuzehi meedàmu damat uba fai bak vabidume geàdamnàme um gi ozahit keàtedi bohu vuusu meedam labe uho Eba lab tu vuzehi meedam bak lam um ba vanamai voom vab damat modem bak. Uho labihasu meedam bak lam Em ozobohu bak.
4. Lahamnàme Eho uba ozom di im meida uho meedamna Eho aam deelem vabda neham bak. Uho amu Eba ahamte tu vuzehe di lam Eba deelehe bak lam uho vedi fa voou setehe bak.
5. Labihàmu Eho uba im nehi vahokedalo mozo. Um mahate it ozodale. Uho amu Eba deeli meedam bak lam fa vei koededa. Labihàmu uho lab faina meedam bak lam voedume fa vei neàdi uho amu Eba deeli meedam bak lam fa faasi meedale. Uho ame bak lam meedam vabameam làhà Eho li um vuagat naolehena lam aba modesdam bak nibet fa vi ve alimdi seti fa aibulem bakti uloholehe labe ba imbo im lam meia vou fi desi vou vameatedam vabak.
6. Lahana Eho neo uba vi ozom di im meida Eho aam deelemda nehamda ehe bak. Nikolaus aba aho vahokedahana tu vuzehi meedam dam labe ibi iho im git meedam bake Eho faki moho bak lam uho laha vi tau faki moho bak lam Em aame deelehe bak.
7. Nasi aimale. Uho meidavat naat uba vabidume geàdamnàme geàmu uho Eba lab tu vuzehi meedaha bak lam mu voom vaba gi keàtet meedam bohu vuusu meedume meodemeam làhà Alat azihi bak bisi neà bak laba doudam ut labe am oo abo àm labe fa elom gikina ahe neàna bohu vuusdam bak vizedam ut oo lam Eho gagu uho gi sitoi àdam bohu meedam bak. Labihàmu um dogoi im aim bak ehena Alam Aha Nutabe Neàna labe Eba modi vizi Eho ot vai fa neo uba abo Eba tu vuzehi vahi meedam dam abo dam zi mei dam zi meime ahebu vameadaha im nim iademe aime ozodam labe meedale.’ Laham im lam Yohanes oho nasi toedume Eba tu vuzehi vahi meedam dam num debu Efesus laba esuhu dam lam vuusu vou aasdamda laba olule,” lahame ab vameadaham.
8. Labi im lada lam vameadume neàdi Yesusat eba neo vi vameada, “Oho dat Alam im aime fa meia vou le vameadamda lam abo dam Eba tu vuzehi vahi meedam dam num debu Smirna laba esuhu dam lam vuusu vou aasdamda laba oho im nehasu sunit toedume olule. ‘Eba tu vuzehi vahi meedam dam num debu Smirna laba esuhu dam oa, Em abo Em Ai Alat amu na ahebu meedaha vab di iube Amti ahili na ahamte alimeat faasi meedahada Em am Bak. Labi laha ame na zi lam vuusdume novai vaitolo modemda Em am bak. Labi Em amu damat oteme elohona fa ame eloho bak labet Alat modi fa ahedi usahada Em am bak. Em labihamda labe Eho etei im nidi nim uba vameadalo modemu mahate aimale.
9. Uho Eba tu vuzehi meedàmu damat uba vabidume geàdam bak lam Em ozobohu bak. Labi um nazoh vabali meedam bak lam Em laha ozobohu bak. Lahana uho nazoh vabali meedam bak lam Eho ozoha, ubu uho ba asum ahoba niba li gohali vamna dua labe umota nazoh dua damat modem bak. Labi damat neha, “Im Yahudi dam nim Alat iba deeli im vadaha dam im am bak. Um mu voedaha bak,” lahame ahobat neàdi gagom dam labe uba feàtàdam bak lam Em laha ozobohu bak. Lahana ame dam labe labi gagodamnàme gi Ibilisit aho vuusu im abada meedam dam laba tau vazisi meedam damat modem bak.
10. Ba naat uba neo vabidume geàdamna ab vou fuseo modemam bak. Lahana ame im lam uba meedam di um a iedemule. Gi ubu zohot mahate keàtedi bohu vuusu meedale. Nasi ozomale. Iblisit neha, “Uho Eba lab tu vuzehi meedam bak lam fa voose,” lahame am dam laba modi fa um dam totbaho lam si sel oumahedume uba fai bak vabidamehamde tame. Lahana uho ame bak lam a iedemule. “Gi damat fà iba otese,” lahamnàme ozahit tet teudi, “Iho Yesus bake tu vuzeheho,” lahame Eba tu vuzehi meedam bohu meedume elole. Uho labihamta Eho uba ame bak gohali uba modi uho elom gikina ahe neàna bohu vuusda tame. Abo damat sikime meodehedate gohalemna ohula gimsumna teilehà ulou bobaehena lamti ulohona uba lo tame.
11. Abo ubu zohot meodi labihasu meedameam làhà um ba ame geàdamna bohu laba voedume Alati vaitesu abehamdemna ba modem vabak. Labihàmu um dogoi im aim bak ehena Alam Aha Nutabe Neàna labe Eba modi vizi Eho ot vai fa neo uba abo Eba tu vuzehi vahi meedam dam abo dam zi mei dam zi meime ahebu vameadaha im nim iademe aime ozodam labe meedale.’ Laham im lam Yohanes oho nasi toedume Eba tu vuzehi vahi meedam dam num debu Smirna laba esuhu dam lam vuusu vou aasdamda laba olule,” lahame ab vameadaham.
12. Labi im lada lam vameadume neàdi Yesusat eba neo vi vameada, “Oho dat Alam im aime fa meia vou le vameadamda lam abo dam Eba tu vuzehi vahi meedam dam num debu Pergamus laba esuhu dam lam vuusu vou aasdamda laba oho im nehasu sunit toedume olule. ‘Eba tu vuzehi vahi meedam dam num debu Pergamus laba esuhu dam oa, Eho Yesus Kristus im dedateli dam bakdate uloome aime neàdi beomda modem labe abo ae tot mo tot mo lahamna vuusdamna ozomomda feà Datebo nibe Eho uba nehi vameadalo mozo.
13. Ubu uho esdam bak lam Em ozobohu bak. Uho esdam bak lam gi boehàda Iblis labe aho vuusdam dam laba uho tau vazisi esdam bak am bak. Ame dam labe iho Iblisim im vuzehi meedam labe fa uba vabidam di uho ba, “Im Yesus bake tu vuzehi meedam damat modem kaio,” laham bak gagoho vaba gi Eba labaha bohu keàtedi tu vuzehi meedam bak. Abo amu Antipas labe aho Ebe Eho meedaha Im Neàna lam aho ahate dam bake labaha bohu vou vameatemda lam uho aasdahit damat bak ubu bak laba abo Iblisit aba aho vuusdam dam uba tau azihi bak laba otehe di lam um ba iedi, “Im Yesus bieho,” lahame ba veibame gagodaha vabak. Uho gi Eba labaha bohu tu vuzehi meedaha bak.
14. Lahamnàme Eho uba ozom di im meida uho meedamna Eho aam deelem vabda nehamda ehe bak. Um dam totbaho labe vedi Israel damat fa dat ahamda koba deda Bileam labe aho vahokedaha im laba vuzehi meedam dam lamti ulohona meedam damat modem bak. Ame da Bileam labe aho aham di iube Moab dam labe im Boehàda Balak bake neha, “Iho akatihasu vou fohom labet modi Israel dam labe iho faina meedume vàhàdedàla?” laham im lam vameadume modeha Balak uledi lahi ibida fi lohoda lam fa Israel dam bake oudume ostame fi loholi la modi le modida. Labi neo ame lahi labe ame Israel dam laba keobaedume fa iho ostame vou baedam alalehena laba tau vou baedume ame alalehena laba vahedahana lam tau vame àda. Labihadume modeha Israel dam lam fai bak tadi ab meedamam. Um Pergamus dam totbaho labe vedi Bileam aba aho aham di iube lab vahokedaha im lamti ulohona vuzehi meedam dam laba um akati ame dam laba, “A vuzehemule,” lahame mali gagoho vaba vedi uba fa tau vazisi meedam lahasuhela?
15. Labi laha um dam Eba tu vuzehi meedam dam totbaho labe neo vedi Nikolausat aho dam abada neo gi ostam alalehena laba gagu vou baeda. Labi neo lahi fi lohona laba meeda. Labihasu vahokedaha im vuusu meedam dam ehe bak. Lahana um akati ame dam laba, “A vuzehemule,” lahame mali gagoho vaba vedi uba fa tau vazisi meedam lahasuhela?
16. Ubu uho lab faina meedam bak lam taho voedume fa ahu neà bak vàmadi meedale. Uho labiham vabameam Em gi kehàm vaba uba li ame giomim vahokedam dam laba Em aha nibe futoi modesdam ae tot mo tot mo lahamna nibe abo Eho vameadam im nibe ame dam laba gagu beoda tame.
17. Nasi aimale. Uho meidavat naat uba vabidume geàdamnàme geàmu uho Eba lab tu vuzehi meedaha bak lam mu voom vaba gi keàtet meedam bohu vuusu meedameam làhà meit vastehe manna lam Eho neo asum ahoba niba esdamna ba uba loda tame. Labi Eho laha ke fauhana uba laha ahala loida tame. Um ee Eho vousai vou baedalo modemu ame ke zi lam um ee gàhàna Eho laba ahala toeida tame. Labi Eho toehena labe, “Akatihasu ozome taluhela?” laham im tombu lam meit aame ozobohudehe vabna abo gi dat na vaha dàt ahamo aame ozobohudemna lam Eho laha uba loda tame. Labihàmu um dogoi im aim bak ehena Alam Aha Nutabe Neàna labe Eba modi vizi Eho ot vai fa neo uba abo Eba tu vuzehi vahi meedam dam abo dam zi mei dam zi meime ahebu vameadaha im nim iademe aime ozodam labe meedale.’ Laham im lam Yohanes oho nasi toedume Eba tu vuzehi vahi meedam dam num debu Pergamus laba esuhu dam lam vuusu vou aasdamda laba olule,” lahame ab vameadaham.
18. Labi im lada lam vameadume neàdi Yesusat eba neo vi vameada, “Oho dat Alam im aime fa meia vou le vameadamda lam abo dam Eba tu vuzehi vahi meedam dam num debu Tiatira laba esuhu dam lam vuusu vou aasdamda laba oho im nehasu sunit toedume olule. ‘Eba tu vuzehi vahi meedam dam num debu Tiatira laba esuhu dam oa, Eho Alam Adat fako abo meit aibu bake olem di usime fauhalem vuati uloholi mei so ad iumti ahebu aadam Dàt modem bak. Labi laha Em naba ahim nim gi ke ee gagom perunggu damat vame vua vahusu bozili ogatedam bakti uloholi modesda. Lahamda Feà Datebo nibe Eho uba nehi vameadalo mozo.
19. Uho meedam im zi nim Em ozobohu bak. Uho Eba deeli meeda. Labi um dam totbaho bake ot deeliame meeda. Labi uho Eba tu vuzehi im Ebeda meeda. Labi Eho vameadaha im uho ulohodesu meeda. Labi uho laha naat uba vabidume geàdam di uho gi ahu teudi ozahit keàtedi meeda. Labi laha uho etei na im meedam di uho amu meedam bakti uloho vaba etei duana vi meeda. Uho labihasu meedam bak lam ahebu Em ozobohu bak.
20. Lahamnàme Eho uba ozom di im meida uho meedamna Eho aam deelem vabda nehamda ehe bak. Uho vedi nam Izebel labe neha, “Aba Alat gagu oluha,” lahame vagehe nam labe aba aho meia vahokedam bak lam um malem vaba vedi uledehe labe um dam totbaho labe ame im laba tu vuzehi meedam bak. Ame nam labe aho vahokedam im labet modi Em damalehe dam labe Eho gagodaha im aime uledi meedam dam lam vou fohome fa ostame fi loholi ot vai ot vaidam bak ahebu lam la modi le modida. Labi laha damat ostame vou baedam alalehena zi laba tau vou baedume ame alalehena laba vahehena lam tau vame àda. Labihada.
21. Labihàmu Eho ame nam labe aho meia modi fi loholedam bak lamti ostam alalehena laba vou baedam bak lamti labihasu meedaha bak lam, “Voedume fa ahu neà bak vàmadi meedase,” laham bak gagu vou faoiaha ame nam lam ba ame faina meedam bak lam taho voedume fa vei neàdem mu meedam namet modem bak.
22. Labihàmu um mahate ozomale. Eho faobe ame nam laba modi gailemna feàna vizi bisdume geàdam bakti ulohona belu geàdam bohu vuusda tame. Labi laha ame nam labe aba aho fi loholi meedam bak laba tauhu dam lam faobe Eho modi geàdam bak bohu meeda tame. Lahana ame nam labe aba aho fi loholi meedam bak laba tauhu dam lam iho ame faina meedam bak voedume fa ahu neà bak vàmadi meedamta làhà Eho modelo gagoho bak lam fa vei setem bak.
23. Ame nam labe aho vahokedaha im tu vuzehi meedam dam abo am data ààmom dam lam Eho oddume fole tame. Labiham labe dam Eba tu vuzehi vahi meedam dam abo dam zi mei dam zi meime ahebu ozo, “Làhà Em abo damat modem ahu ozobohuda Em ame? Labi dam bakda labe iho ahaladiame meedam bak lam Eho ba aalahigeàmom vaba eho dam lam beodam di gi ulohodesu ahala beluidume vi vataumda Em ame?” laham bak fa ozobohudem bak am bak.
24. Lahana um dam num debu Tiatira laba esuhu dam dua totbaho lam ame nam labe aho lab vahokedam im giomimna lam ba vi tau meedam vabak. Ame im giomimna vuzehem dam labe vedi neha, “Ibi iho vuzehi meedume baleàhà im lam bisi feàda am bak,” lahana gi Iblisit modi vizehe imot modem bak. Lahana um dam dua totbaho labe laha ame im lam, “Im laha tau vi ozobohudi fi gatedase,” lahame ba vi tau meedam vabak. Labihasu meedam vab dam laba Eho uba im nehasu gagolo mozo. Em ba im uba gagu uho meedume vanamamna uba vi modi asimbuli meedam vabak.
25. Gi ubu uho amu Eba tu vuzehi im Ebe Eho gagohona duana vi keàtedi bohu meedam bakta uba gagodam bak. Im lada lam uho labihasu meedam lahasuhuna Eho fa li aase.
26. Nasi aimale. Uho meidavat Iblis modi bedi fa meode. Labi Eba lab tu vuzehi meedaha bak lam mu voom vaba gi Ebe Eho ozoho bak vou mode ladume elom bak fusi nova. Lahamda laba Eho Em Aiat Aho amu Am feà bak Eba modi vizi Eho im dedateli meedahana lamti ulohona Eho fa neo ame da laba modi vizi im dedateli dam bakda debu mei debu mei laham dam laba vuusu im vahokeda tame.
27. Ame da labe ame bak lam meedam di abo bak dàt boehàdateli meia odosu im vahokemnaso besit modehena lam vuusu meobeat meedam labe abo ohanut modi na vahem nalehena zi beome fegum bakti ulohona aba fakemoholehe dam lam beodume vàhàde tame.
28. Labi laha Eho neo um meodehe bak laba vi ozome uba modi diham bak fum di aam falo labe am feà bak lamti ulohona modi feà damalem bak.
29. Labihàmu um dogoi im aim bak ehena Alam Aha Nutabe Neàna labe Eba modi vizi Eho ot vai fa neo uba abo Eba tu vuzehi vahi meedam dam abo dam zi mei dam zi meime ahebu vameadaha im lam iademe aime ozodam labe meedale.’ Laham im lam Yohanes oho nasi toedume Eba tu vuzehi vahi meedam dam num debu Tiatira laba esuhu dam lam vuusu vou aasdamda laba olule,” lahame ab vameadaham.
1. Labi im lada lam vameadume neàdi Yesusat eba neo nehame vi vameada, “Oho dat Alam im aime fa meia vou le vameadamda lam abo dam Eba tu vuzehi vahi meedam dam num debu Sardis laba esuhu dam lam vuusu vou aasdamda laba oho im nehasu sunit toedume olule. ‘Eba tu vuzehi vahi meedam dam num debu Sardis laba esuhu dam oa, Alam Aha Nutabe Neàna labe Aho feà bak mei feà bak mei tujuhlehena vuusdam labe feà Dateboleheda labe Aho Eba modi vizi Eho vuusda. Labi laha ame falo tujuh lam Eho vuusualada. Lahadamda nibe Eho uba nehi vameadalo modem im nim aimale. Em uho meedam bak lam Em ozobohu bak. Dam giida labe uba aam di um gi ahobat neàdi Eba tu vuzehi meedam labe um gi ahe damat modemna ààmom bak. Lahana Eho ozohat um gi ahobat neàdi meedam bak. Uho Em im mu voolo vabalehe damat modemu um ad lam gi elodalo vabalehena ozomom damat modem bak.
2. Labihàmu um nasi aimale. Um ad elodaha bak lam nasi fa usnadale. Ubu uho amu neà bak meedaha bak lam fa nemahusi vei setelo vabalehe bak lam taho fa modi teudele. Neham bak. Eho ozoha, Em Ai Alat uba aasdam di ba dat vàmtea buà labe na im aho modeheda modeme fi tatoi neàbodehe vab labe Em Aiat aame deelem vabak. Gi modeme zohali voomna tade.
3. Labihàmu uho faina meedam bak lam taho voedume fa ahu neà bak vàmadi meedale. Labi meit uba Alam im amu vahokedume uho aime ozobohudehena lam um fa vabilehe bake um taho fa it ozome vi ozobohudi meedale. Lahana uho neha, “Im mahate iademe Yesus bake tu vuzehi meedam vab damat mode?” laham bak lam taho fa it vi ozome ozobohudi fa vei teudi ame bak meedam vabameam làhà Eho meia uloome fahedam digat fum di uba le beoda tame. Ame bak lam meedam di Eho gi dat mei na aa valo lemdati uloholi lem labet Eho lem digat lam um biem bak.
4. Lahana Eho ozoha, um vahi Eba tu vuzehi meedam dam num debu Sardis laba esuhu dam totbaho labe um sue vàhàdeme gihobulehe vaba abo meit uba vizi faina vi meedaha vabda koe zoho ehete. Eho ozoha, uho fai bak vabna abo neàbodehena modem labe Eho Boehàdateboli dam vuusu im vahokedam di labe uho fa sue bisi fauha neàna ogatedamna Ebedati ulohona duadume fa Emti vahi goda tame. Uho Emti vahi godam bak lam gi ahole meedam bak.
5. Nasi aimale. Uho meidavat naat uba vabidume geàdamnàme geàmu uho Eba lab tu vuzehi meedaha bak lam mu voom vaba gi keàtet meedam bohu vuusu meedam dam lam Eho laha ame sue fauha neàna ogatedamna lam ame dam laba lodume duada tame. Labi laha Dam Ba Elom Gikina Ahe Neàna Bohu Vuusdam Dam Labe Im Ee Toedaha Buku laba ame dam labe im ee toedume esuhu bak lam Eho ba faatoiam vabak. Labi laha ame dam labe iho Em Ai labe Am im gagu vou usem dam lamti iho avaelaha niba li dozeadam di Eho neha, “Em damat modem bak,” lahame labi gagoda tame.
6. Labihàmu um dogoi im aim bak ehena Alam Aha Nutabe Neàna labe Eba modi vizi Eho ot vai fa neo uba abo Eba tu vuzehi vahi meedam dam abo dam zi mei dam zi meime ahebu vameadaha im lam iademe aime ozodam labe meedale.’ Laham im lam Yohanes oho nasi toedume Eba tu vuzehi vahi meedam dam num debu Sardis laba esuhu dam lam vuusu vou aasdamda laba olule,” lahame ab vameadaham.
7. Labi im lada lam vameadume neàdi Yesusat eba neo vi vameada, “Oho dat Alam im aime fa meia vou le vameadamda lam abo dam Eba tu vuzehi vahi meedam dam num debu Filadelfi a laba esuhu dam lam vuusu vou aasdamda laba oho im nehasu sunit toedume olule. ‘Eba tu vuzehi vahi meedam dam num debu Filadelfi a laba esuhu dam oa, Uba etei im vameadamda nim abo Alat neha, “Im Abada meedase,” lahame gagu fi hasi esu Am im meedamda abo bisi im vamdesu meedamda nibe Eho Yesus Kristusat uba nehi vameadalo mozo. Aham di iube damat kota Yerusalem laba lem uledem bak modeo, lem maem bak modeo, dat ahamda Boehàda Daud labe ahamo naeda gagodam bak. Ame bak lamti ulohona Ebe Eho Boehàdateboli vuusu im vahokedam bak ahoba niba, “Amat tau azim neàdehela?” laham bak lam Ehemo naedat gagodam bak. Eho naeda doo aumeam meit ba osoktom vabak. Labi Eho naeda doo oskimeam meit ba aum vabak. Eho im dedat gagom di ba meit otesiam vabak. Eho labihamda modem labe Ebe Eho etei vameadalo modem im nim aimale.
8. Uho Filadelfi a laba meedam bak lam Em ozobohu bak. Nasi ozomale. Uho Eba tu vuzehi meedam bak lam gi fota keàtedi meedamnàme damat uba vabidume um alihi nemahunàme Eho uba lab vameadam im lam uho moho vaba vuzehi keàtet meedam bak. Labi laha uho Eba lab tu vuzehi meedam bak lam ba vasti veibam vab damat modem bak. Labihàmu Em Aiat dam bake vuusu im vahokedam bak laba um li tau meedam bake Eho naeda doo fi stom bakti ulohona ab modi tombalemam bak. Ba meit uba zie ausi malem biem bak.
9. Lahana im nidi nim mahate ozomale. Um dam totbaho Iblisim damalehe dam labe meia vageme neha, “Im Yahudi dam nim Alat iba deeli im vadaha dam im am bak. Um mu voedaha bak,” lahame labi gagodam dam lam ba Yahudi damat modem vaba gi ahobat neàdi gagodam damat modem bak. Laham dam lam Eho modi im ahu ad laba fa iedi uba li ahit um naba modesdam bak laba biti ogomaladume nehi uledi uba gagodam bak. “Aa làhà! Yesusat laha uba deeli meedam dam um ame?” lahame ozobohudi gagoda tame.
10. Eho amu uba vameadaha im lam, “Naat uba vabidam di gi ozahit keàtedi bohu meedale,” lahaha bak lam uho teudi ule neàt ulohodesu meedaha bak. Labiha labe Alat ba dam bakda ahebu modi geàdam im feàna ba vou fum di lam Eho uba soat vou vatohedume meedam labe umti beoho vaba um ahededa tame. Abo dam bakda Ala bake fakemoholehe dam laba, “Iho faina meedam bak mu voedume fa vei neàdeo? Neàdem vabao?” laham bak Alat modi ozolo meedam di ame baket mode tame.
11. Em gi kehàm vaba lem bake uho Eba lab tu vuzehi im Ebeda meedam bak lam mahate vou faovoi meedale. Em Aiat uho meodehe bake gohali lolo modemna lam meit uba modi vàhàdehemu oho ame na vam vaba voom bake mahate vou faovoele.
12. Nasi aimale. Uho meidavat naat uba vabidume geàdamnàme geàmu uho Eba lab tu vuzehi meedaha bak lam mu voom vaba gi keàtet meedam bohu vuusu meedam dam lam Eho ame dam lam modi Em Ai Ala Bake Fihasi Vou Baedam Num Asum Ahobada niba duzuhu num nibe am tom odosu teudemnaso lamti ulohole tame. Abo gi ame bak laba modesu abehamdi Alam damali labaha bohu modesda tame. Ba ame bak lam vou esmom kaio. Labi laha ame dam labe Eba tu vuzehi Em Ai Alati im damalehemu im vazisi ame bak laba azim bake Eho Em ee gàhàda lamti labi Em Ai Ala labe Am ee lamti labi Aho azihi num debu ee lamti labihasu ame da labe am so laba nohaedume esu tame. Alat Aho azihi num debu lam gi kota Yerusalem gàhàda abo Alat asum ahoba iube fa bak adba niba nom olulo modem kota am bak.
13. Labihàmu um dogoi im aim bak ehena Alam Aha Nutabe Neàna labe Eba modi vizi Eho ot vai fa neo uba abo Eba tu vuzehi vahi meedam dam abo dam zi mei dam zi meime ahebu vameadaha im lam iademe aime ozodam labe meedale.’ Laham im lam Yohanes oho nasi toedume Eba tu vuzehi vahi meedam dam num debu Filadelfi a laba esuhu dam lam vuusu vou aasdamda laba olule,” lahame ab vameadaham.
14. Labi im lada lam vameadume neàdi Yesusat eba neo vi vameada, “Oho dat Alam im aime fa meia vou le vameadamda lam abo dam Eba tu vuzehi vahi meedam dam num debu Laodikia laba esuhu dam lam vuusu vou aasdamda laba oho im nehasu sunit toedume olule. ‘Eba tu vuzehi vahi meedam dam num debu Laodikia laba esuhu dam oa, Alat Im Gagom Di Modi Imbodem Tademda nibe Eho uba etei im vameadam bak. “Ala akatihasu meedam Alat mode?” laham im imbona lam Eho dam bake labaha bohu modi fi gatedam labe meit vuzehem neàda Em am bak. Labi laha Alat na ahamte alimeat gagu meedaha di lam gi Eba modi na ahebu alimeat meedahada Em am bak. Labihasu meedamda nibe Eho uba nehi vameadalo modem im nim nasi aimale.
15. Uho meedam im lam Em ozobohu bak. Uho lab meedam bak lam gi vao fota nutabedehedati ulohote. Um mahate galiham kai. Labi laha mahate nutabedem kai. Lahana um gi fa taho Em mu voom vaba? Laham vabameam um gi fa taho keàtedi Eba vuusum bohu meedam vaba?
16. Labihàmu ubu zoho etei teudehe vaba gi fota nemahubali odohalehebeat Eba tu vuzehi meedàmu eho um ab mu voolo meedamam bak.
17. Uho vedi neha, “Im abo nazoh duali ab uloholeham bak. Im ba na meida vekeheda vab damat modem bak,” lahame gagodam damat modem bak. Lahamnàme uhumo naedamat it ozom vaba? Aiee! Um ba ahu faidi, “Im git modehe?” laham bak ba it ozodam vab damat modem bak. Labi uho meedam bak lam Em gi aam faobekemnat modem bak. Um gi na vabali so bozbuli meedamna ozomom damat modem bak. Labi laha um gi na aam vabili fako aubesuhuna ozomom damat modem bak.
18. Uho labi meedàmu Eho uba im nehasu vameadalo modem bak. Ba gi labihasu meedam bohu a meedamule. Fa gi nehale. Alat uba ozom dita, “Um nazoh dua dam ame?” laham bake uho gi doi Eba lu Eho uba emas vuat vabieme giho neàdeheda fa uba lodase. Labi um etei so bozbuli ladem bake uho Eba doi lu Eho fa uba sue fauha neàna uba lodume uho fa duadam bakti ulohona uho eba gagu Eho fa um ahu ad laba modi vizi im vamdesu meedam damalese. Labi laha um fako faidi na aam biehe bake doi lu obat ve it veosi fa na aam neàdem bakti ulohona uho Eba gagu Eho fa um ahu ad laba modi Em Aiat vameadaha im lam uho ozobohudem biem im lam eho modi fa ozobohudi fi gatedase.
19. Eho faobekesi deeli meedam dam lam Eho im vahokedume itaholi vamdedam dam am bak. Labihàmu uho faina meedam bak lam voedume fa ahu deeleha ule neàt neà bak vàmadi meedale.
20. Nasi aimale. Um Emti amu vou ali ahu vàmadi meedam bak lam uho fa vei mu vou ubahaha bake, “Fa vei netàdese,” laham bak ozome Em um num doo ozoho duzu num doo foadamna ozomom bak. Eho neha, “Em olese,” laham im lam meit aime uledi num doo fi stomeam làhà Eho oli ame da lamti Emti ahili nusu na àm bakti uloholi ame da labe Emti ot vou aliame ahu vàmadi meeda tame.
21. Nasi aimale. Amu na im bisi fai bak Eba vabidàmu Eho bedem vaba fa meodehemu Em Aiat Eba uledi Nusumnabu Abada laba tau nusu na ahebu vuusu im vahokedam bak ab modeham bak. Labi laha meit neo na im bisi fai bak iba vabidàmu iho bedem vaba fa meodemeam làhà Eho ame dam laba uledi neha, “Um laha Nusumnabu Ebeda niba tau nusu Emti vahi na ahebu vuusu im vahokedam neàte,” lahame gagoda tame.
22. Labihàmu um dogoi im aim bak ehena Alam Aha Nutabe Neàna labe Eba modi vizi Eho ot vai fa neo uba abo Eba tu vuzehi vahi meedam dam abo dam zi mei dam zi meime ahebu vameadaha im lam iademe aime ozodam labe meedale.’ Laham im lam Yohanes oho nasi toedume Eba tu vuzehi vahi meedam dam num debu Laodikia laba esuhu dam lam vuusu vou aasdamda laba olule,” lahame ab vameadaham.
1. Labi im lada lam aadume neàdi eho neo asum ahoba iuba vi aaha gi tombali ahatedi modesdam bak ab aaham. Labi eho aiha ame Da labe dae abo aim tomba neàna oma buddam dae eho amu aihi trompet dae lamti ulohona asum ahoba iubet eba neo im nom vameadam bak ab aiham. Ame na dae labet nehame vameada. “Om nasi eba niba tom ilule. Ba abobo modem im Eho oba nasi fet vameadase,” lahame ame na dae labe eba ab gagoham.
2. Labi modeha Alam Aha Nutabe Neàna labe Eba ab veimai vuusdamam. Làhàmu eho asum ahoba iuba tom vi aaha boehàdat zisi nusumnabu laba Dat Feà Datebo vàmtea laba zisi nusdam bak eho ab aaham.
3. Ame Da labe Am alihi lam aam di gi fako iedemna ogatedam labe omoke omokedamna eho ab vi aaham. Abo ke alihi gàhàna ee gagom yaspis lamti labi ke alihi bozina ee gagom sardis lamti laham ke labe ogatedam labe omoke omokedam bak lamti ulohona meedamna eho ab vi aadamam. Labi bimboz vàmtea labe am alihi ke zamrudti ulohona gàhà meo ame Boehàdat zisi Nusumnabu laba vabousu modesda.
4. Labi ame bimboz labe lab vabousdam obe laba laha boehàdat zisi nusumna totbaho dua puluh empat laha laba vabousdam bak neo vi aa. Ame na laba modealahana lam dam meia im gagu modiam dam laha dua puluh empat ehe dam zi labe sue fauhana duada. Labi laha damat meodehedate gohalemna ohula nom usumna emasat modehena laha im ohula nom omaheda. Labihadahana ame Dat Feà Datebo labe Am obe vou làboho dam zi eho laha vi aa.
5. Labi ame Boehàdat zisi Nusumnabu labe asum boz veleidam bak eho neo vi aa. Labi asum gilidume lautoidam bak eho neo vi ai. Labihada. Labi ame Nusumnabu modesuhu tomba laba laha soe vuati ulohona abo tujuh ehena laba modealadume fauhaeda. Ame na lab fauhaedamna tujuh lam gi Alam Aha Nutabe Neàna labe Aho feà bak mei feà bak mei tujuhlehena vuusdam labe feà Datebolehe bak vouhohona am bak.
6. Ame Boehàdat zisi Nusumnabu labe avaesdam laba na baana abo itaamna alihoehena abo itea asum vao baati ulohona laha laba modesda. Abo ke aam lafutom ke kristalti ulohona laba modesda. Labi ame Nusumnabu vabousdam obe laba na ohemna zi ahia laha laba dozeada. Neha: Ame na ohemna zi lam am so bak ahebu gi fako laba zisitda. Labi ame na ohemna ahia labe im busehà ahaladiame zisitdahana abo enam zisitda. Labi ame busehà enamleidahana lam am toha totti ad totti gi fako laba zisitda. Labi ame na ohemna meida ahamteda lam am ohu aam di gi singa ohubu ààmom bak. Labi na ohemna meida labe am ohu aam di gi sapi dooda ohubu ààmom bak. Labi na ohemna meida labe am dauha aam di gi dam bakda dauha ààmom bak. Labi na ohemna meida labe am ohu aam di gi tuha asum ahoba iuba oaedam tuha ohubu ààmom bak. Labi ame na ohemna ahia labe iho Ala bake vi ozome vou baedam labe ab vou ladeedamam. Ame bak lam vou fudam di labe abo digad diat modeo, usehe diat modeo, vi modida. Ba di meida modehe vaba vafozem vabak. Gi labaha bohu meedam bak. Ame na zi labe vou baedam labe im nehi vou ladeeda. “Im Boehàda Ala Bisi Feà Datebo oa, Om abo neàte. Om ba fai bak kaio. Om abo gi neàbodeheda vàmtea Om am bak. Aham di iube Oho gi labaha modesdume etei vou fusi neo vou mode ladume bohu vuusdam Ala Om am bak.” Lahame vou baedam bak eho ab vi aiham.
9. Ame na ohemna ahia labe iho Dat ahe neàna bohu vuusdamda Boehàdat zisi Nusumnabu laba nusdam bak laba vi ozome im ahu adat iedi, “Neàte. Am abo feàte,” lahame Am ee vousai vou baeda. Labihadam di labe ame dam meia im gagu modiam dam zi abo dua puluh empat ehe dam labe iho ame lab vou baedam dae laba vi aime neo ame di labe ame Nusumnabu labe avaesdam tomba laba ahit biti ogomaladume neo vi tau ame Da laba ab vou baedamam. Vou baedume afoezobe iho meodehe bake iba gohalehena ohula nom omahehena lam vihiladume Aho avaesdam laba ub vahedume nehame ab vou baedamam.
11. “Im Boehàda iho vou baedam Ala oa, Na Debu Modeheda Om am bak. Oho amu neha, ‘Na nim modi fa esuidase,’ laham bak Oho nasi fet ozome esuhu labe ame na zi lam ahebu Oho alimeat modeme vaheme afoezobe ab vou azi aasdamam bak. Labihàmu, imbote! Im ahu adat iedi Oba, ‘Om abo feàte,’ lahame Om ee vousai vou baedam bak lam gi ahole meedam bak.” Lahame ab vou baedamam.
1. Labi im zi lada lam aadume neàdi eho Yohanesat neo vi aaha ame Boehàdat zisi Nusumnabu laba zisi aidamda labe Aho sunit baa bolohona laba toedahana Am au ahi tot laba vuusu aidamna eho ab aaham. Ame sunit baa laba toedaha bak lam abo duate. Ba im meida vekehe vaba ame im ahebu modi neàdehena tot laba toe. Labi vaktesi tot laba neo toe. Labihadahanat moz. Labi ame sunit baa bolohona lam dam giidat ziamom bak Alat mali gi Aba Aho ozohoda vàmtea labe ahamo ziamom neà bake ozome ahit na àk ame sunit aha obe laba nom odosu zitbotoidume tujuhledaha bak eho ab aaham.
2. Eho labihasu aadam di labe aiha Alat Am im gagu vou usemda feàda vàmtea labe dae feàna ab butedamam. “Ba amat bisi neàbodeheda labe sunit baa bolohona nibe am àk teudehena tujuhlehena lam vi vuavaidume ziambitoela?”
3. Lahame labi buteha ba Alat modeheda ahebu abo dam asum ahoba iuba esdamda modeo, dam bak niba esdamda modeo, bak adba iuba esdamda modeo, laham dam ahebu ba dat vàmtea buàvat neàbodeheda ame sunit baa bolohona labe am àk teudehena lam vuavai ziambitoi ame im ad laba toedahana aame gagodamda vabak.
4. Labihàmu ba dat vàmtea buàvat neàbodeheda ame sunit baa bolohona labe am àk teudehena lam vuavai ziambitoi ame im ad laba toedahana aame gagodamda vabalehemu em gi ahu faidi vi ozome ab mebzidamam.
5. Em ahu faidi mebzidàmu ame dam meia im gagu modiam dam dua puluh empat meida labe eba neha, “Om a memule! Nasi aama! Dat Feà Datebo abo singati uloho Dàt lab doudamda laba aale. Ame Da lam abo Yehuda dam debu Boehàda Daud labe vou faat leheda labe Aho Aba fakemoholehe dam lamti ot beluiame meodehemu ame sunit baa bolohona labe am àk teudehena tujuh lam Aho vuavaidume ziambitom neàda Am am bak,” lahame eba labihasu vameadamna eho ab aiham.
6. Labi vameadume neàdi eho neo vi aaha ame Boehàdat zisi Nusumnabu labe modesu avaesdam laba Domba Adat laba doudam bak eho ab aaham. Abo ame na ohemna ahia lamti labi meia im gagu modiam dam dua puluh empat zi lamti Am obe laba vabousda. Ame Domba Adat lam damat gi amu oteme Ala bake lohona but baeba ehena ààmomna fa ahedehenat moz. Labi Am dogoi labe futoho mobu abo tujuh ehet. Labi fako laha tujuh ehet. Ame na fako tujuh lam gi Alam Aha Nutabe Neàna labe Aho feà bak mei feà bak mei tujuhlehena vuusdam labe feà Datebolehe bake vouhohona am bak.
7. Labi ame Domba Adat labe nem duzu ame sunit baa bolohona Boehàdat zisi Nusumnabu laba aidamda labe Aho Am anekehà ahi tot labe vuusdamna ab visoham.
8. Labi Domba Adat labe gi etei visoi modeheilahit dam meia im gagu modiam dam dua puluh empat lamti labi na ohemna ahia lamti Aho avaesdam bak laba ahit biti, “Am abo feàte,” lahame ogomaladume faasi vou baedam bak lam eho ab aaham. Ame dam dua puluh empat labe iho Ala bake vou baedamna gitarti ulohona etehà valuhuna ee gagom kecapi vuusualada. Labi fi hiba na ahana neàna vuat usime vuahubulemna ee gagom kemenyan nom goaitoi vuat usime vuahubuledam fi hiba emasat modehena lamti laha vuusualada. Ame vuahubulemna lam gi dam bakda Alam damalehe dam labe ibi iho Ala bake tom gagodam im ozomomna am bak.
9. Labi ame dam dua puluh empat labe neo im kecapi vuusualadume ladeedam dae gàhàna vàmtea nehame ab faasi Domba Adat laba ab vou ladeedamam. “Om abo feàte. Dam bakda faina meedahemu Alat beom bake Oho fa ot vai damat Om oteme eloi Om vasea veàtoho bak labet modi dam bakda ahebu abo bak feàna meidati bak feàna meidati ahaladiame esuiaha dam zi ame. Labi dam debu mei debu meime dae ahaladiaha dam zi ame. Labihasu dam iudu iubet va. Dam iudu iubet va. Lahadume fa vazisi Alam dam debuleheda Om am bak. Labiha labe ame sunit baa bolohona lam Oho visoi ame na labe am àk teudehena tujuh lam vuavaidume ziambitom neàda Om am tame.
10. Labi laha Oho ame dam zi laba modi Alat Aho gagohona lam, ‘Fà uledi meedase,’ lahame ibi iho vou baedam Ala labe Am damali Aho ab vuusu im vahokedamam bak. Labi laha Oho ame dam laba modi Alam tohe damali im Abada ab meedamam bak. Labi laha Alam damalehe dam zi lam Oho fa neo vi modi boehà damali fa dam bakda faheme vuusu im vahokeda tame.” Lahame vou ladeedam bak eho ab vi aiham.
11. Labi eho neo vi aaha Alat Am im gagu vou usem dam abo dem vabiemna zi fai labe im dae fai ab faasi butedamam. Ame dam zi fai labe li ame Nusumnabu lamti dam meia im gagu modiam dam dua puluh empat lamti na ohemna ahia lamti labihasu modealadaha bak ohus tot labe ab li vabousuham.
12. Labi ame dam zi fai labe im nehame ame Domba Adat laba ab faasi vou ladeeme vou baedamam. “Alat fa dam bake beom bake Domba Adat fa ot vai oteme gohaleheda lam imo ame Da laba nasi nehasu ozome ahu adat iedi, ‘Am abo feàte,’ lahame Am ee vousai vou baedase. Aho Boehàdateboli dam ahebu vuusdam bak ame. Labi am bisi feàda na im ahebu im dedateli meedam bak ame. Labi na ahebu Am naedat modem bak ame. Labi na im ahebu ozobohu aabodi la modi le modidaha bak ame. Am labihasu meedam Dàt modemu iho gi ahole Aba vou baedam bak.” Lahame vou baedamam bak eho ab vi aiham.
13. Labi eho neo vi aiha asum ahoba iuba azihina zi lamti bak niba esuhuna zi lamti bak nu adba esuhuna zi lamti valo azihina zi lamti labihasu gi na ahebu zi labe ab faasi vou ladeeme vou baedamam. “Imo Domba Adat labe Aho Dat ame Nusumnabu laba aidamda laba vi tau boehà damali dam ahebu vuusdam bak laba ozome ahu adat iedi, ‘Abo feàte,’ lahame ame Dam ahim labe im ee gi labaha vou baedam bohu meedase.”
14. Lahame vou baedume modeha ame na ohemna ahia labe fa ab gagoham. “Lo. Imbote. Alati labi ame Domba Adat lamti gi ahole vou baedam bak.” Lahame fa gagu modeha ame dam meia im gagu modiam dam dua puluh empat labe laha neo ahu adat iedi ahit biti ogomaladume, “Alati ame Domba Adat lamti abo feàte,” lahame Im ee vousai vi tau vou baedam bak eho ab aaham.
1. Labi eho im lada lam aadume neàdi eho neo vi aaha Domba Adat labe ame na àk teudedahana tujuh lam ahamteda ab vuavaham. Labi vuavai aiha na ohemna ahia laba dozeahana meida vàmtea labe aho neha, “Lele,” lahame butehena abo budua labe gi asumat gilihina aimomna butehe bak.
2. Labi buteheilahit na em vi aam iedemna kuda fauhana am toha laba dat zisi nusu digehi vuusdamda eho avaesdam laba lehe bak ozoho vabna li nem fi ozi duzuhuna eho ab aaham. Labihaha di labe Alat aba neha, “Om im dedateli oba fakemoholehe dam lamti ot beluiame fa meodese,” laham bak ozome ohula nom usumna lam lu am ohula ab nom usuham. Usu neàdi ozo, “Am abo meodem dàt modem bak,” lahame it daetbadam dàt, “Fa aba fakemoholehe dam lamti ot beluiame fa aho meodem datelese,” laham bak ozome ab laham.
3. Labi eho neo vi aaha Domba Adat labe ba neo ame na àk teudedahana meida lam neo ab vuavai behàsdeham. Labi lada lam vuavai eho neo vi aiha na ohemna behàsdeheda labe aho neha, “Lele,” lahame butehe bak ab vi aiham.
4. Labi eho aime neo vi aaha na em vi aam iedemna kuda buheda eho avaesdam laba lehe bak ozoho vabna ab li nem fi ozi duzuhuna eho ab aaham. Dat ame kuda labe am toha laba zisi nusdamda lam ae abo tot mo tot mo lahana fai lu vuusdamna neo vi aa. “Oho dam bakdate modi ibi iho amu ot deeliame vazisihi bak fa vei seti fa ot otiam bak fa meedase,” lahame gagu im dedateli ame ae fai lu vuusdamna eho ab aaham.
5. Labi eho neo vi aaha Domba Adat labe neo ame na àk teudedahana meida lam neo ab vuavai làteladeham. Labi lada lam vuavai eho neo vi aiha na ohemna làteladeheda labe aho neha, “Lele,” lahame butehe bak ab aiham. Labi eho aime neo vi aaha na em vi aam iedemna kuda gihobuda eho avaesdam laba lehe bak ozoho vabna ab li neo nem fi ozi duzuhuna eho ab aaham. Dat ame kuda labe am toha laba zisi nusdamda lam na àmna vaheme ulohome aaiam kilo lu vuusdamna eho ab aaham.
6. Labi ame da laba gagu olu aho dam bakda labe iho gandum dehe bak laba modi alai ab vàhàdeham. Labi vàhàdehemu damat modeme vahedam di gi koena modeme vaheda. Labihada. Labihadume modeha eho neo vi aiha na daevat gi na ohemna ahia labe dozeaha doni labet nehame vameada. “Di neà faasi bak aotbali na debe soali àm vabili idoali ibzidam di na àmna ot loiam di gandum bisi neàda am liter vàmtea lam gohalelo doi valo modem di gi harga vousai digat vàmtea labe na meedaha bake gohali vam doi lamti ulohona vaiale. Labi gandum bisi neà vabda labe am liter làtela lam gohali doi valo modem di laha harga ozahit vousai digat vàmtea labe na meedaha bake gohali vam doi lamti ulohona laha vaiale. Lahana zaitun oo minyaklehena lam modeo, labi anggur oo vaksa lam modeo, lada lam gohali doi valo modem di harga a vousamule. Im zi lada lam beodume vàhàdehe vabna gi amu vam bakti uloholele,” lahame vameahana eho ab aiham.
7. Labi neo Domba Adat labe neo ame na àk teudedahana meida lam neo ab vuavai ahialeham. Labi lada lam vuavai eho neo vi aiha na ohemna ahialeheda labe aho neha, “Lele,” lahame butehe bak neo ab aiham.
8. Labi eho aime neo vi aaha na em vi aam iedemna meida kuda alihi nahagateleheda eho avaesdam laba lehe bak ozoho vabna ab li nem fi ozi duzuhuna eho ab aaham. Dat ame kuda labe am toha laba zisi nusdamda labe am ee gagom Mei Modi Elomda lahamda am. Lahamda labe am ohus laba dat ee gagom Koei It Oazehena Le Esdam Bak abo Hades lahamda lam vi tau netàdi duzu vuedam bak eho neo ab aaham. Ame dam ahim laba Alat modi im dedamali dam bakda zoho, “Beodase,” lahame ab gagu oluham. Abo dam oddam di dam zoho làtela vekesi zoho meida beoda. Lahadume dam ahebu ab uloholedaham. Labi ame dam laba oddam di im nehamna meedume otidam bak eho vi aaha bak. Dam zoho ot beluidam labe eloda. Labi dam zoho di neà faasi idoali na àm bili ibzidume eloda. Labi dam zoho na meia modi gailemna ahana vizi modi feàna gailedume eloda. Labi dam zoho na meonabu abo mei nu àmna olu beodume ukebe sedda. Labihasu dam zoho beome foledam bak eho ab aaham.
9. Lada lam aadume neàdi Domba Adat labe ame na àk teudedahana meida lam neo ab vuavai auoholeham. Labi lada lam vuavai eho neo aaha abo Fihasi Ala Bake Vou Baedam Num Vàmteabu Alat azihi bak laba modesdam beahuba labe am adba laba vi aaha dam meida zi labe iho im nehasu meedàmu damat faki oddaha dam labe im it oazehena lam eho ab aaham. Ame dam labe iho amu Alat vameadume oluhu im lam iho vou vameateda. Labi laha, “Ibi iho tu vuzeheda Yesus lam im Boehàda am tame,” lahame ahate gagoda. Labihasu labaha bohu dam bake ahate vou vameatedàmu damat faki oddaha dam labe im it oazehena lam eho ab vi aaham.
10. Labi vi aame modeha ame it oazehena zi labe gi dae feàna faasi nehame buteda. “Dam bakda ahebu vuusdam Boehàda abo Bisi Feà Datebo vàmtea abo im imbona meedam Ala oa, Oho adi diat dam bakda labe iba faki oddaha dam lam Oho uloome aime neàdi beodume fa vasea ibida gohali vi vatauela?” lahame buteomna eho ab vi aiham.
11. Labi eho neo vi aaha Alat ame dam labe iho iademe meedume meodehe bak laba ozome sue sona bohu ahoba dusumna fauha meona ahala lu duadume im nehasu vi vameadam bak ab vi aiham. “Um laha koena faode. Dam umti vahi Em Adat gagoho im vuzehi tau meedam dam lam damat amu uba faki oddaha bakti uloholi ame dam lam neo oddume Ebe Eho ozoho bak fusi uloholehezobe ba um vasea gohali Eho vi vatau tame,” lahame labi vi vameadam bak eho ab vi aiham.
12. Labi im lada lam aadume neàdi Domba Adat labe neo ame na àk teudedahana meida lam neo ab vuavai enamleham. Labi lada lam vuavai modeha balim feàna belu bak ab nigo nigodamam. Labi modeha ala digadda ab aibuli sue taubuna gihodati ab uloholeham. Labi laha ala useheda laha ab buheli dam vasea bozti uloholi modesdamam.
13. Labi laha falo zi asum ahoba iube bak adba niba ab nom goaitodamam. Abo ut ara labe am oo ba amdeheda nutabe fai foodam di belu goaitodam bakti uloholi nom goaitodam bak eho ab vi aaham.
14. Labi eho neo vi aaha asum giho ium gi sunit baa bolohona amu fi zeam bitohoda fa ahamo bolome setem bakti ulohona bolome sete. Labi sibu modealadaha bak lamti vao laba dozeaha touha lamti ibi amu modesdam bak lam fa vei seti fa ubahi modealada. Labihasu meedàmu Alati Domba Adat lamti im alihi ahate ab modesdamam.
15. Labi modeha dam Yesus bake tu vuzehem mom dam lam abo dam bakda vuusdam boehàda zi modeo, dam eeda zi modeo, dam meoda vuusdam boehàda zi modeo, dam nazoh duada zi modeo, na im mei im meime im dedamalehe dam modeo, labi dam totbaho ee vabda mei na teo meedam dam modeo, gi azietemda zi modeo, labihasu, “Im so vastese,” lahame ilime ke bumat bak modeo, sibu bak ke itmat modeo, laba ab le oedamam.
16. Ame dam labe iho ozo, “Dat ame Boehàdat zisi Nusumnabu laba nusdamda lamti Domba Adat lamti ibi iho dam bake faki feà bak fusi ahu zoho beoho labe dam beome vàhàdedam digat fuho,” lahame ilime le oedume iho oedaha ke lamti ame sibu bak lamti laba gagu ab buteomam. “Iho omsuhu bak nim taho iba nom goaitoi baguamdele. Labiham labe Dat ame Nusumnabu laba nusdamda labe Aho iba fakot meot aasdam bak lamti Domba Adat labe iba faki ahu zoho beoho bak lamti iba aame beom vabak am tame,” lahame buteomna eho ab vi aiham.
1. Labi eho im lada lam aadume neàdi neo vi aaha Alat Am im gagu vou usem dam ahia bak adba nibe aba novaha zoho oula ahia ahobà alim bak laba iuba le duzu. Iuba le duzu. Lahahana eho ab aaham. Ame Alam im vou usem dam lam meida bak ala zizem nanovaha ahobà iuba le douda. Labi meida ala le nom fi olem nanovaha ahobà iuba le douda. Labi meida fa ba totbaho nanovaha ahobà iuba le douda. Labi meida fa ba totbaho nanovaha ahobà iuba le douda. Labihadam dam ahia lam Alat amu neha, “Bak modeo, itea modeo, laba esdam dam laba uho meia modi vàhàdemna fa laba oudam neàte,” lahame Alat ahit gagu oluhu dam ahia labe ibi iho im dedamali vou aasdam zoho laba im nohubak modeo, im itea bak modeo, itea obe bak modeo, laham bak lam beolo ahala duzuiame vou faoda. Im faina vou lam nutabe labe nasi foodameam bak ahebu beom bak labna zohàme teohet mali vou duzu vastesdamna eho ab aaham. Labi eho neo vi aaha Alat Am im gagu vou usemda meida neo ala zizem labe li duzuhu bak ab aaham. Ame da labe Alat abo Elom Gikina Ahe Neàna Bohu Vuusdam Ala labe mei so nohaemna aba lohona vuusu li duzuhuna eho ab vi aaham. Ame da labe aho duzu neàdi ame Alat Am im gagu vou usemda ahia totbaho laba dae buduana nehame ab butedamam.
3. “Ibi iho vou baedam Ala labe Aho modi Am damali im Aho gagohona aime uledi meedam dam lamti beodamna zohàme uho bakti utti iteati labihasu a nasi modeme vàhàdedume seddamule. Iho ame dam lamota fi hasi im dauha laba nohaeme neàdehe vabna nasi dam a beodamule,” lahame buteme neàdi ame baket ab modeham.
4. Etei im vameadamda labe am dam totbaho lamti iho Alat gagu fi hasi esuhu dam lamota ab nohaedume esuidaham. Labi eho neo vi aiha ame dam lab nohaedaha dam zi, “Amamohela?” laham bak lam naat eba nehi ab gagoham. Ame dam labe im dauha laba nohaedaha dam gi Israel dam debut modem bak. Abo seratus empat puluh empat ribu ehe dam zi laba nohaedume esuidaha bak.
5. Labi ame dam zi fai lam vi fahedume debu vàmtea vaiahana gi dua belas ribu ehe damta vame nohaedume esuidaha bak. Ame dam debu vaiahana neha: Yehudat vou faat lehe dam debu ame. Labi Rubenat vou faat lehe dam debu ame. Labi Gadat vou faat lehe dam debu ame.
6. Labi Asyerat vou faat lehe dam debu ame. Labi Naftalit vou faat lehe dam debu ame. Labi Manasyet vou faat lehe dam debu ame.
7. Labi Simeonat vou faat lehe dam debu ame. Labi Lewit vou faat lehe dam debu ame. Labi Isakarat vou faat lehe dam debu ame.
8. Labi Zebulonat vou faat lehe dam debu ame. Labi Yusufat vou faat lehe dam debu ame. Labi neo Benyaminat vou faat lehe dam debu ame. Labihasu vame nohaedume esuidaha bak eho ab aaham.
9. Labi eho im lada lam aadume neàdi eho neo vi aaha eho avaesdam laba dam zi feà ba meit dem di dem biemna feà li dozeadaha bak eho ab aaham. Ame dam lam gi dam bakda ahebu abo bak feàna meidati bak feàna meidati ahaladiame esuiaha dam zi ame. Labi dam debu mei debu meime dae ahaladiaha dam zi ame. Labihasu dam iudu iubet le. Iudu iubet le. Lahadaha dam zi feà labe sue sona ahoba dusumda fauha meona bohu abo fako aam iedemna dume bom et fi kbodume vou li ame Nusumnabu lamti Domba Adat labe aidam bak lamti lahaha labe avaesdaha bak laba li, “Feàte,” lahame vou baedalo dozeadam labe bom et vuusualame vou neineidamna eho ab aaham.
10. Bom et vuusualame vou neineidam labe dae buduana nehame ab buteomam. “Ame Nusumnabu laba aidamda abo iba vuusdam Ala oa, iho faina meedam bake Oho iba beom bak lam Omti Domba Adat lamti Um ahimit iba soat vausu fa vei neàdedàmu iho Uba vou baedam bak.”
11. Lahame labi vou baedume modeha ame Alat Am im gagu vou usem dam zi feà lamti meia im gagu modiam dam dua puluh empat lamti na ohemna ahia lamti labihasu vazisi ame Nusumnabu modesuhu bak laba vabousu afoezobe ame Nusumnabu Alabada avaesdam laba ahit neo biti ogomaladume ahu adat iedi Ala bake nehi ab vou baedamam.
12. “Imbote! Boehàdat iba vuusdam Ala abo bisi feàda laba imo nasi ahu adat iedi, ‘Neàte. Am abo feàte,’ lahame Am ee vousai vou baedase. Abo na im ahebu Am ozobohu aabodi la modi le modidam bak ame. Labi Aho Boehàdateboli na ahebu vuusdam bak ame. Labi Am bisi feàda na im ahebu im dedateli meedam bak ame. Labihasu meedam Ala laba imo gi labaha bohu vou baedase. Labihadase.” Lahame vou baedamam bak eho ab vi aiham.
13. Labi im lada lam eho aime neàdi modeha ame meia im gagu modiam dam meida vàmtea labe eba vi ailo ab gagoham. “Oho ozom, dam sue sona ahoba dusumda bohu fauha meona abo fako aam iedemna duhu dam nim ana damat modela? Labi laha ame dam lam adi bake lehela?”
14. Lahame eba labi gagohemu eho gi fa nehi gago, “Meia im gagu modiamda oa, oho eba gagoho dam lam em bieho. Gi oho ozobohudehe dam taia? Oho fa eba gagole.” Lahame eho ame da laba labihasu vi gagoha aho fa eba neha, “Nasi aimale. Dam zi fai nim amu damat fai bak duana vabidume vanamai geàdamnàme ozahit keàtedi ahe neàt dozeadaha dam am bak. Laham dam nibe im sue sona ahoba duhuna nim neham labe fauha neàdehe bak. Iho Yesus bake tu vuzehi im Abada meedàmu Domba Adat nibe Am vasea laba kikeme boz neàdehena ààmom bak. Abo ame dam nibe iho faina meedahemu Alat beom bake Yesusat fa ot vai damat Am oteme eloi Am vasea veàtoho labet modi ame bak lam fa faamome setehe labe ab vei neàdeham bak.
15. Labihahemu neham bak. Ame dam nibe etei Fihasi Ala bake Vou Baedam Num Asum Ahobada niba oedume ame Nusumnabu Alabada labe avaesdam laba ab li dozeadaham bak. Labi dozeadume im ahu adat iedi, ‘Am abo feàte,’ lahame Am ee vousai ab vou baedamam bak. Abo digad diat vou baeda. Usehe diat vou baeda. Gi labihadam bohu ab meedamam bak. Labi ame Nusumnabu laba aidamda labe Aho ame dam lam soat vausu vou aasdam bak.
16. Labi ame dam lam ba idoalem vabak. Labi laha ba valo àhàki bio kealedam vabak. Labi laha ala gai feàna modi dam lam ba galihasi meedam vabak.
17. Neham labe labihadam bak. Ame Nusumnabu laba aidamda labe Am obe doudam Domba Adat labe etei domba fi ho vou aasdamda lamti uloholi fa ame dam laba vou aasdam labe labihaha bak. Aho ame dam lam vou duzu le vao naa zoho laba abo elom gikina ahe neàna bohu vuusdam vao laba vou le vimteme gago, ‘Udele,’ lahame gagodam bak. Labi laha Alat na im ame dam laba modi ahu faidemna zi lam aho modi fa seddam labe dam labe iho mehe fa vaksa uhulam bakti ulohona modelo modem bak.” Lahame meia im gagu modiam dam meida labe eba labihasu vameadahana eho ab vi aiham.
1. Labi neo Domba Adat labe neo ame na àk teudedahana meida lam neo ab vuavai tujuhleham. Labi lada lam vuavai eho aiha asum ahoba ium na daeti ab vabaedume seddaham. Labi na dae vabali koena àdesuha fa ab na daeleham.
2. Labihadam di labe eho neo vi aaha Alat Am im gagu vou usem dam tujuh amomoi zi lam abo Alat avaesdam laba labaha dozeadahana tujuh lam oma daeti ulohona meedamna trompet laha tujuhlehena meit lodume ahala vuusuiaha bak eho ab aaham.
3. Labi modeha Alam im gagu vou usemda amomoi vàmtea labe aho vuat usime vuahubuledamna sehena buà emasat modehena lam vuusu vou li Nusumnabu Alabada avaesdam bak laba modesdam beahuba abo vuat usime vuahubuli ahana neàna feemna esum beahuba emasat modehena laba ab vou li vou duzuham. Labi vou duzu modeha meit na ahana neàna vuat usime vuahubulemna ee gagom kemenyan lam duana ame da laba ab lodaham. “Ame kemenyan lam vua laba nom goaitoi vuahubuli ame vuahu lamti Alam damalehe dam labe iho tom gagodaha im lamti valiheme Ala bake fà vou laitedase,” lahame ame na lam ab lodaham. Labi ame da labe ame na lam vame ame beahuba laba modesdam vua gazihi laba nom goaitoi ab vuahubuledamam.
4. Labi vuahubuledam di labe ame Alam damalehe dam labe iho tom gagodam im lamti ame vuahubu lamti Ala bake ab vou laiteham. Labi vou laisi modeha Alat ab aiham.
5. Labihasu meedume neàdi ame Alat Am im gagu vou usemda labe aho vuusdamna vua gazihi esumna sehena buà lam ame beahuba vahehe vua gazihi lam fa visomoame aho vuusdamna laba vaheme bektoi vou fi bovai bak adba niba bisteat ab nom beoham. Labi modeha asum boz ab veleidamam. Veleidam labe asum gilidume lautoida. Labi balim feàna bak nigo nigoda. Labihadamna eho ab aadaham.
6. Labi im lada lam aadume neàdi eho neo vi aaha Alat Am im gagu vou usem dam tujuh zi labe trompet oma daeti ulohona feume dae modelo ab vuusualame ahumtedi duzu vou faodamam.
7. Labi Alat Am im gagu vou usemda ahamteda labe trompet abada dae ab feuham. Feume modeha abaa fai abo ke keobeti ulohona ame. Labi vua boz ame. Labi vasea boz ame. Labihasu valihehena bak adba niba bisteat ab nom biddaham. Labi biddume modeha bak nu behàsu vekesi meida vuat beo. Lahadume ab uloholeham. Abo utti sibe gàhà bakti labihasu gi ame baket meedume ab uloholeham. Lada labihada.
8. Labi neo Alat Am im gagu vou usemda behàsdeheda labe trompet abada dae neo ab feuham. Feume modeha naavat gi sibu vuat eludamna feà lamti ulohona labe itea asum laba bisteat nom vooha itea labe am zoho meida behàsu vekesi zoho meida vaseale. Lahadume itea ahebu ab uloholeham.
9. Labihadume modeha na ohemna ame itea esumna zoho amu modehemu zoho behàsu vekesi zoho meida beo. Lahadume na ohemna ahebu ab uloholeham. Labi laha kapal mei kapal meime lahamna zi neo zoho behàsu vekesi zoho meida beodume agube sedda. Lahadume itea ahebu godam kapal ahebu ab beodume foedaham. Lada labihada.
10. Labi neo Alat Am im gagu vou usemda làteladeheda labe neo trompet abada dae ab feuham. Feume modeha falo buduada vàmteabu ee gagom Àhàkebuna laham falo abo uma vua eludamna feà lamti ulohona asum labe bisteat nom iluha fi goaitoi bak adba zoho niba modealaha vao aana zi lamti vao soabo zi lamti bisteat ab nom biddaham. Abo vao meida behàsu vekesi meida àhàkebuleda. Lahadume vao ahebu ab uloholeham. Labi ame vao àhàkebuna lam damat vedi udem neà tibame uddume modeha dam dua zoho ab elodaham. Lada labihada.
12. Labi neo Alat Am im gagu vou usemda ahialeheda labe neo trompet abada dae ab feuham. Feume modeha ala digadda lamti ala useheda lamti falo zi lamti labihasu ibi iho bak niba nom fauhaedam bak ab vàhàdeham. Neha: Ala digadda aba zoho behàsu vekesi zoho meida aibule. Labi laha ala useheda neo gi ame baket meeda. Labi laha falo zi meida behàsu vekesi zi meida aibueda. Lahadume falo ahebu ab uloholedaham. Labihadume modeha ame na zi labe ibi iho fauhaedam bak lam amu neà bak fa vei seti fa gi nehada. Digad diat fauhaedam zoho fa aibule. Labi laha usehe diat fauhaedam àga fau zoho lam fa aibule. Labihada.
13. Labi eho neo vi aaha bume tuha baabu labe mahate asum gae toolehe vaba gi donibu laba boiadam bak eho ab aaham. Labi ame tuha baabu labe oaedam labe nehame dae bisteat budda. “Aiee! Dam bakda Yesus bake fakemoholi mu vooho dam ab beodalo modemam tame. Aiee! Alam im usem dam vekeheda làtela nim trompet ibida feume butem bak vou fusi feume butemeam làhà dam bakdate fai bak feà ab vou fumam tame. Aiee!” lahame labihasu buddamna eho ab aiham. Lada labihada.
1. Labi neo Alat Am im gagu vou usemda auoholeheda labe neo trompet abada dae neo ab feuham. Labi feume modeha eho neo vi aaha falo gi amu asum ahoba iuba fa bak niba biti modesdamna eho ab aaham. Ame falo lam dat ààmomna laba abo koei it oazehena le esdam bak abo bak itmat zoho novaha bak ozom vabna labe am de naolehe zoho modesuhu doo labe am kunci lu vuusdam bak eho ab aaham.
2. Labi eho neo vi aaha ame da labe aho bak itmat zoho novaha bak ozom vabna labe am de naolehe zoho modesuhu doo fi stoi modeha vuahu fai abo oloha vuahuti ulohona ab tom futoham. Labi modeha ala digadda lam ab aibuleham. Labi asum tom fi haba doni alim baa neà bak nim laha vuahubut belu ab aibuleham.
3. Labi modeha sàgàhà mei zi feà ame vuahu labe silidam labe futodume dam bakdate ab beodamam. Amu ame sàgàhà zi lam Alat ahit modi moliba ut sokba bake azim moliba labe iho meia veem bak lamti ulohona modi vizi im dedamali dam bake veeme kealem sàgàhàt moz.
4. Lahana ame sàgàhà lam, “Ba sibe modeo, ut et modeo, na deddahana labe am et modeo, labihasu a modi vàhàdedamule. Gi dam meit im dauha laba meia nohaeme itoeme esuhuna Alabada lam im dauha laba nohaeme itoehe vabda laba beome geàdale,” lahame gagu oudaha bak.
5. Ame sàgàhà zi lam laha, “Abo dam bake beodume elodale,” lahame ba gagu oudaha vabak. “Gi dam bake veedume damat vanamai alihi nemahusi geàdam bohu meedume ala auoholele,” lahame gagu oudaha bak. Ame lab veedume galihasi geàdamna lam abo molibat dam bake veem di kealedam bak lamti ulohona dam bake veedume kealedam bak.
6. Labihadam di labe damat modem vanamahemu, “Ihimo ahit it oteme elodase,” lahame vi ozodamnàme ame elomna debu lam dam bake vou netàdehe vab labe ba dam labe ihimo ahit it oteme elodam vabilehe bak.
7. Labi ame sàgàhà labe am alihi aam di gi dam debu meit fa dam debu mei bake ot beluidalo modem di iho ziddaha kuda im so damat beom bak labna zohàme na teuna vastesumna modealadam bakti ulohona ame sàgàhà so laba modealadaha bak. Labi ame sàgàhà labe im dauha aam di gi dam bakda dauhalehe bak. Labi im ohu laba nom omahehena lam abo emasat modehena omahehena ààmom bak.
8. Labi im ohuta lam laha lahi ohuta bohetlehe bak ààmom bak. Labi im mo lam gi mei vàhàdedam singa mole.
9. Labi laha im ahude vastesdamna aam di gi besit modehena ààmomna tetehesdam bak. Labi im busehà dae lam gi kuda damat kereta laba vààsu ziddume dozealaha kereta labe dam bake ot beluidalo fi tudam labe nom gigidam daeti uloholi silidam bak.
10. Labi ame sàgàhà labe abo moliba dogosoali meia belu kealemna ehe bak. “Dam bakdate veeme modi kealedume ala auoholele,” lahame gagu vizi dam bake modi geàdamna lam gi im dogoso laba modesda.
11. Labi ame sàgàhà zi labe im boehàda iba gagu na meedamda ehe bak. Ame boehàda iba na gagu modiamda lam abo Alat Am im gagu vou usemda abo na ahebu modi fa vàhàdedamda abo koei it oazehena esdam bak abo bak zoho novaha bak ozom vabna labe im dedateleheda am bak. Laham dat labe am ee lam Ibrani dae gagom di, “Abadon,” laham bak. Lahana Yunani dae gagom di, “Apolion,” laham bak. Ame ee behàsu laba ozom di gi, “Meia modi vàhàdeme seddamda,” lahame gagom bak. Laham im lam eho ab vi aadaham.
12. Im lada lam aadume neàdi meit eba neha, “Beodume geàdam bak ahamteda lam oba ab modi fet aaham bak. Lahana faod! Ba neo beodume geàdam bak modelo modemda behàsu ehe lahasuhu bak,” lahame eba ab gagoham.
13. Labi eho neo duzu vou faoha Alat Am im gagu vou usemda enamleheda labe neo trompet abada dae ab feuham. Labi feuhu di labe eho vi aiha na butem daevat Alat avaesdam laba modesuhuna abo vuat usime vuahubuli ahana neàna feemna esum beahuba emasat modehena labe am oula ozoho fetehesu tom tousdamna sapi dooda mo ohula modesuhuna moti ulohona modesuhu bak ahia labet futoho daevat ab vi aiham.
14. Ame dae lam gi Alat Am im gagu vou usemda etei trompet dae feuhudate nehame buteda. “Alat Am im gagu vou usem dam Efrat Soabo am naa zoho laba Alat amu simtedi modesdam dam ahia lam taho isi olule,” lahame ab buteham.
15. Làhàmu ame dam lam ab isi oudaham. Ame Alat Am im gagu vou usem dam ahia lam amu di iube Alat ame dam laba neha, “Dam bakda zoho beodume foedale,” lahame fet gagu esuhu alati digatti jamti fuhu labe ab isi oudaham. Labi isi oudume dam bakda zoho behàsu vekesi zoho meida beodume eloda. Lahadume damat esuhu bak ahebu ab uloholedaham.
16. Labi ame Alat Am im gagu vou usem dam ahia labe iho dam bakda zoho lab faasi beodalo modem di labe im meo dam zi kuda laba zisi nusualadaha dam lam dehe di abo dua ratus juta zi fai ehe bak. Meit ame debe novaha bak lam eba fi desi gagohona eho vi aime ozobohudi niba toehe bak.
17. Labi eho edehesi fako bakamta aasdume aaha di lam kuda zi fai labe im toha nusualadaha dam zi fai lamti gi nehasuhuna aadaha bak. Ame kuda laba zisi nusualadaha dam totbaho labe im ahude vastesdamna lam abo besit modehena lam totbaho alihi bozina abo vua eludam bakti ulohona modealada. Labi ame dam totbaho zi laba vi aaha ame na ahude vastesdamna lam abo alihi gihona modealada. Labi ame na totbaho lam abo alihi haualihoena meona abo na keobe ee gagom belerang lahamna labe am alihiti ulohona modealada. Labihada. Labi ame kuda zi labe im ohu laba vi aaha gi na meona singa ohubu ààmom bak. Labi im aha labet na nehamda làtela futoda. Vua elum boz ame. Labi vuahubu ame. Labi fahet fi fasi bubuadam bakti ulohona futodamna ahagoa gai ame.
18. Lahamna làtela lam kuda zi labe im aha labe futodume modeha dam zoho behàsu vekesi zoho meida vabidume beoda. Lahadume bakda ahebu ab uloholedaham.
19. Ame kuda zi labe iho meia vabidume beomna zoho gi im aha labe futodamna làtela am. Labi laha neo im dogoso fa mum ohubuli meia belu geàdamna am. Labihasu meedahana labe dam bake beodahana eho ab aaham.
20. Lahana eho aaha di lam dam Yesus bake fakemoholi mu vooho dam zoho ame na labet tau beodume elodaha vab dam zoho labe ame bak lam aahanàme ba ibi iho faina meedam bak lam voedume fa ahu neà bak vàmadi meedam kai. Abo ibi iho setan zi laba ahu adat iedi vou baedam bak ame. Labi ostam alalehena abo emasat modehena lamti perakat modehena lamti perunggut modehena lamti ket modehena lamti utot modehena lamti labihasu ve auet modi alalehena zi lam abo na aam biemna zi abo mei dae aim biemna zi abo nao gohatem biemna zi lahamna laba im ahu adat iedi vou baedam bak ame.
21. Labi laha ame dam labe iho meoli meia oddam bak ame. Labi iho aha dae feàna vuusu meedam bak ame. Labi iho ostame fi loholi la modi le modidam bak ame. Labi iho na meina aa vadam bak ame. Labihasu ba voedume fa ahu neà bak vàmadi meedaha vabak lam eho ab vi aadaham.
1. Labi im lada lam aadume neàdi eho neo vi aaha Alat Am im gagu vou usemda aba modi teudehena feàna modesuhuna asum ahoba iube nom iluhu bak eho ab aaham. Ame da labe am so budua feà labe gi uloti valiheme nom ilu duzuhuna eho ab aaham. Ame da labe am ohu laba bimboz laba vabousda. Labi am dauha lam abo ala digadda fau labe ogatedam bakti uloholi fako iedemna ogateda. Labi am nao zoho lam gi baobu feàna vuat usime eludam bakti uloholi modesda.
2. Labi, “Dam ahebu fà am im aise,” lahame am nao ahi tot itea laba kidadesu duzu. Labi neo am nao soi tot laha bak nua kidadesu duzu. Labi am anekehà lam sunit baa bolohona koena buà lam ziambitohona laha vuusu douda. Labihasu modesdamna eho ab aaham.
3. Labi aadume vi aiha ame Alat Am im gagu vou usemda labe labihasu doudam labe dae feàna abo na meona singat aaudam bakti uloholi butedam bak eho ab aiham. Labi ame da labe aho gi etei buteme modeha asum dae feàna fa dam daelehena eho aim neàna gilidume tujuhli ab lautoidamam.
4. Labi ame lab gilime vameadam im lam eho aime toedasome modeha asum ahoba iube lehe dae meidavat eba mali gagoho bak eho ab aiham. “Oho etei asum dae feàna fa dam daelehena gilidume tujuhlehena oho aihi im lam ba meia a vameadamule. Ba a toemule. Gi ohomo aime vasti faode,” lahame eba labi gagu malehemu ame im lam eho ba toem kai.
5. Labi ame Alat Am im gagu vou usemda labe am nao ahi tot itea laba kidadesu duzu. Labi neo am nao soi tot laha bak nua kidadesu duzu. Labihasu doudamna eho amu aahada labe aho im gagu vàmadi esulo modem bak ozome am anekehà ahi tot asum ahoba iuba tom vousai modesdam bak eho neo ab vi aaham.
6. Labi aho am anekehà tom vousai Alam ee gagodam labe im nehasu vameadume vàmadi ab esuham. “Eho etei dam bake gagolo modem im nim Ala bisi feàda abo gi ahena labaha bohu vuusdamda lam abo na ahebu asum ahoba iuba modealahana lamti labi bak niba modealahana nimti labi itea ad laba modealahana lamti labihasu modeheda labe Aho eba aasdahit eho etei nib vameadam im nim ba laha vou faodam vabak. Abo modem bak tame. Neham bak. Damat ba aimeam Alat Am im gagu vou usemda tujuhleheda labe trompet abada dae feume butem di fumeam làhà Alat aham di iube neha, ‘Eho im nehasu mode tame,’ lahame Ahamo fet ozome esuhu im lam abo Aho amu dam bake modi mahate ozobohudi fi gatehe vab im lam Aho ab modi imbodelo modemam tame. Dam Aho gagoho im aime uledi meedam dam abo Aho vameadaha im aime fa dam bake ahate vameaidaha dam zi laba Aho fet vameadume esuhu im lam Aho ab modi imbodelo modemam tame,” lahame eba vameadamna eho ab aiham.
8. Labi ame na dae asum ahoba iube eba amu nom vameadam dae labet eba im meida neo nehame vameada. “Oho nasi le Alat Am im gagu vou usemda labe am nao ahi tot itea laba kidadesu duzu. Labi neo am nao soi tot laha bak nua kidadesu duzu. Labihasu doudamda labe aho lab vuusdam sunit baa bolohona koena buà etei lab fi zeam bitoi modesdamna lam oho nasi le vale,” lahame eba ab gagoham.
9. Làhàmu eba labi gagohemu eho ame Alat Am im gagu vou usemda laba le gago, “Eba ame sunit baa bolohona koena lam lole,” lahame le duzu gagoha aho eba nehame gut vameada. “Ame sunit baa bolohona nim oho ve àle. Oho ve àmeam làhà oho ahamte zagu aha esu ozom di gi bonahi vaksa àmehàkem bakti uloho bak. Lahana oho àme zulu bisu neàdi vi ozolameam asum ooname galihasi vou zizi ab avamam bak.”
10. Làhàmu eho ame sunit baa bolohona lam aho eba fi suhemu eho ve ab àham. Eho ve àme modeha abo imbot? Ahamte àhà di lam aha esu vi ozoha, gi bonahi vaksa àmehàkem bakti ulohona àhà bak. Lahana àme tolazi em zulu esu vi ozolaha asum ooname galihasi vou zizi ab avaham.
11. Labi modeha ame asum ahoba iube lehe dae labe neo eba nehame vameada. “Dam bakda ahebu abo bak feàna meidati bak feàna meidati ahaladiaha bak labe im boehàda ziti ame. Labi dam debu mei debu meime dae ahaladiaha bak ame. Labihasu Ala bake fakemoholehe dam ahebu lam Alat ame dam laba ba modem im lam oho amu ahatet lab fet vameadaha bak lam a voomule. Obo oho dam bake ahatet lab fi desi fet vou vameatedam bak lam gi labaha bohu meedale,” laham im lam asum ahoba iubet eba labihasu vameadamna eho ab vi aiham.
1. Labi im lada lam aadume neàdi naat utso zoho buà abo na modem di ulohomna lam eba ab loham. Lu neàdi Alat eba vi gago, “Oho nasi ame Fihasi Eba Vou Baedam Num Vàmteabu lamti labi ame num laba modesdam Ala bake lomna fi hasi vaheidam beahuba lamti le ulohole. Labi oho laha dam ame num laba oli dozeadume ahu adat iedi Eba vou baedam dam lam, ‘Amamohela?’ laham bak laha debe esule.
2. Lahana oho ame num laba le ulohodam di ame num labe am natàh bakoda bak tomba a tau ulohomule. Ame bak tomba lam dam giida abo Eba fakemoholehe dam labe Em im aim mom dam abo Yahudit modem vab dam laba lolo modem bak am tame. Labi ame dam giida labe ihimo feà damali kota Yerusalem abo bisi Eba vou baedam kota laba veimai vabidume ala empat puluh dua abo digat seribu dua ratus enam puluhle tame.
3. Labi ame dam bake vabidume geàdam di labe Eho im Ebeda aime fa dam bake ahate vameaidaha dam ahim modi duzu im vameada tame. Ame im lam vameadam di lam ame dam ahim labe iho meit ahu faidem diat dusum sue abo taubuna alihi veemna ahit dusu ame im lam vameada tame,” lahame eba labihasu vameadahana eho ab vi aiham.
4. Eho ozoha, na ahia Boehàda abo bak ahebu vuusdam Ala labe Aho avaesdam bak laba dozeadaha dam ahim lam gi neham dam ahimit modem bak. Amu dat ahamda Alat vameadaha im aime fa dam bake ahate vameaidahada Zakaria labe aho amu fet vameame esuhu ut zaitun labe am so ahim lam gi ame Alat vameadaha im aime fa dam bake ahate vameaidaha dam ahim laba vouhohonat modem bak. Labi laha ame vuagat naoledahana ahim lam laha gi ame dam ahim laba vouhohonat modem bak.
5. Laham dam ahim labe ba meedam im eho nehasu ab fet aadaham. Alat Am feà bak ame dam ahim laba modi vizehe labe iho duzu dam bakdate im vameadam di labe meit iba faki, “Eho fai bak nim dam laba belu aase,” lahame modi ozolo modemeam làhà im aha labe vua elum feà futodume ame iba fakemoholehe dam laba belu elodam bak. Dam iba fakemoholehe dam labe iba modi vabidam di Alat modi fa ame dam laba belu vataumna am bak. Ba fa belu elodam vaba alia gi mu labihasum vabak.
6. Laham dam ahim labe Alat iba modi vizi im dedamali meedàmu iho laha nehi gagomeam, “Asum aule,” lahame mali gagomeam làhà ame dam ahim labe Alat iba gagu oluhu im lam iho dam bake ahate vameadam di ba abaedam vabak. Iho asum ahoba iuba ausi abaedam vaba modesdume ame im vameadume neàdehezobe fa ba abaedam bak. Labi laha ame dam labe iho vao soabo modeo, vao aana modeo, gi vao bak iumti ahebu im dedamalehe labe fa ame vao zi modi na vaseali modesdam meot. Labi laha ame dam ahim labe iho dam bak niba esdam dam ahebu im feàna modi vabidume geàdamna meiti im feàna modi vabidume geàdamna meiti lahamna ahebu dam bakda ahebu modi vabidume geàdam meot. Abo im feàna meia modi gaili elomna meiti im feàna meia modi gaili elomna meiti vizi modi elodam modeo, bak uloome aotbali na dem bi idoali elodam bak modeo, labihasu meedam meot. Abo ame dam ahim labe iho neha, “Imo ame bak nim modi aase,” lahame gagom di ame digat labet mode. Labi izi dihasi neo, “Imo ame bak nim modi aase,” lahame gagom di ame digat labet mode. Gi labihadam bak tade.
7. Labi ame dam ahim labe iho Alat iba gagu oluhu im lam dam bakdate ahatet vameadume foli eho neo vi aaha damat fakot aam iedemna meo feà utmeoso lahamna labe abo dam it oazehena le esdam bak itmat feàna labe am novaha bak ozom vabna bumat labe tom futoho labe le ame dam ahim laba modi geàdume alihi nemahusi bedehemu oteme meodehe bak eho ab aaham.
8. Lahana eho neo vi aaha ame na koei ahim lam taho baumsum kai. Gi elaidam kota Yerusalem labe abo ame dam ahim labe iba im gagu modidam Boehàda Yesus damat ut tetehesuhunaso laba esu paku dou eloho kota labe am zie tomba laba voou bisda. Abo dam fai bak meedam damat azim num debu modemu gi, “Sodom,” modeo, “Mesir,” modeo, lahame vàlu gagom kota labe am zie laba voou bisda.
9. Voou bisdam labe gi dam bakda ahebu abo bak feàna meidati bak feàna meidati ahaladiame esuiaha bak labe lehe dam zi ame. Labi dam debu mei debu meime dae ahaladiaha dam zi ame. Lahadaha dam zi feà labe iho gi aame labohoti lebohotidam labe usi làtela foli digat zohoda lamti ab fuham. Ba gagu baumsum bak modem vaba gi mu ozahigeàmoda.
10. Labi eho neo vi aaha dam bakda Ala bake fakemoholehe dam labe ame Alat vameadaha im aime fa dam bake ahate vameaidaha dam ahim eloho bak aahemu deeli igeaom labe nehi tozome gagoda. “Dam ahim labe iba vabidume geàdam bake ahole beoha. Imo vazisi na àdase,” lahame vazisi na àda. Labi, “Na ot loidase,” lahame na ot loida. Labihadam bak lam eho ab aaham.
11. Labi ame koei lam bisdume usi làteladi digat zohoda laba vou fusi modeha Alat Am aha nutabet dam ahim laba nom feume fa ab ahedi ohedamam. Fa ahedi duzuha dam ame bak aahada ahebu ab aame àvodi iedi modem faideham.
12. Labi modeha na daevat asum ahoba iubet dam ahim laba im nehame bisteat ab nom gagoham. “Um nasi Eba tom ilule.” Lahame labi gagohemu dam ahim laba fakemoholehe dam zi labe aasdahit ame dam ahim lam ulot valihedume vousai asum ahoba iuba ab tom iluham.
13. Labi modeha ame di labe balim feàna ame kota laba belu bak nigo nigodume num sembilan vekesi num vàmtea beoda. Lahadume kota bak laba modealaha num ahebu ab uloholeham. Labi laha dam tujuh ribu feà laha belu foli ab seddaham. Labi dam totbaho beodaha vab zoho labe ozoha, labihahemu fa iedi feà bak fuhemu, “Asum ahoba iuba azim Ala abo feàte,” lahame tom vou baedam bak eho ab vi aiham.
14. Im lada lam aadume neàdi modeha tuhat amu vameaha im ab vi ozoham. “Beodume geàdam bak ahamteda behàsu lam eba modi eho fet ab aadam ame? Labi ba beodume geàdalo modemda vàmtea eho neo aam bak ehe?” lahame eho ab vi ozoham.
15. Im lada lam labihadume neàdi eho neo duzu vou faoha Alat Am im gagu vou usemda tujuhleheda labe neo trompet abada dae feuhu bak eho ab vi aaham. Labi feume modeha asum ahoba iuba na dae zi feà bisteat nehame buddamna eho ab aiham. “Dam debu iudu iube im boehàda iumti dam debu iudu iube im boehàda iumti labihasu meedam bak lam ahebu im Boehàda Alat Aho fa faamome Am Adat Aho Gagu Fihasi Vimteme Oluhu Dat Boehàda laba modi fa im deda Boehàdateboli Aba tau dam bakda ahebu vuusu im vahokedam bak ab modeham bak. Labiha labe Aba Aho tau Boehàdateboli meedam bak lam gi labaha bohu ab vuusdamam tame. Ba vaitoi setem kaio.” Lahame labi buddamna eho ab vi aiham.
16. Lahame labi buddume modeha ame dam meia im gagu modiam dam dua puluh empat labe boehàdat zisi nusumna ibida labe usnadume fa ame Nusumnabu Alabada avaesdam bak laba ahit biti ogomaladume ahu adat iedi, “Ala abo feàte,” lahame Am ee vousai Ala bake ab vou baedamam. “Im Boehàda na ahebu vuusdam Ala Bisi Feà Datebo abo aham di iube ehe lahasu vou mode ledume etei vou fuhu Ala oa, Om feà bak lam Oho modi Oba fakemoholehe dam laba beodume meodi feà Dateli dam bakda totbaho ahebu vuusu im vahokedalo modem bak ab faaham bak. Labihàmu iho Oba, ‘Neàte,’ lahame gagodam bak.
18. Dam mei debuti dam mei debuti Oba tu vuzehi meedaha vab dam labe Oba faki beàdàmu Oho ab aame faki feà bak fusi beodam bak ab vou fuham bak. Labi laha dam amu elodahada zi lam Oho uloome aime neàdi fahedam di ab vou fuham bak. Labi laha im Obo Oho gagohona aime uledi meedam dam lam abo Oho vameadaha im aime fa dam bake ahate vameaidaha dam modeo, Om damalehe dam ahebu abo im ahu adat iedi Om ee vousai vou baedam dam abo eeda modeo, ee vabda modeo, laham dam ahebu labe iho bak niba meedaha bake gohali na lodam di ab vou fuham bak. Labi laha dam bakda totbaho labe fa dam totbaho laba fai bak vabidume vàhàdedaha dam laba Oho fa ame dam laba beodume vàhàdem bak ab vou fuham bak.” Lahame labi vou baeda.
19. Lahame labi vou baedume modeha ame Fihasi Ala bake Vou Baedam Num Asum Ahobada laba vastesu modesdamna baa veioi ahate modesdam bak eho ab vi aaham. Labi eho neo vi aaha Alat Aho Israel dam bake fet vameadume vàmadi esuhu im ke baa toedahana nom esu baguamdemnabu ame num ad laba esdamna eho ab aaham. Labi eho vi aame modeha asum boz mei bobusbe vi veleidam labe asum gilidume lautoidume abaa abo feàna ke keobeti ulohona nom bidda. Labi ame di labe laha balim feàna neo belu bak nigo nigoda. Lahadam bak eho ab aadaham.
1. Labi im lada lam aadume neàdi eho neo tom aaha damat fet aame àvodi ozobohudem im feàna lam asum ahoba laba eho ab aaham. Namvat ala useheda laba doudamna ààmomna abo sue fauha meona fako iedemna ala digaddati ulohona dusu afoezobe falo dua belaslehena labet modehena ààmomna am ohula nom usu ogateda.
2. Labi ame nam labe gi zubulehena data faam bak fuhu labe kikezi vàzbudam labe geàdamna eho ab vi aaham.
3. Labi eho neo vi aaha damat fet aame àvodi ozobohudem im feàna meida amomoi asum ahoba laba eho neo ab aaham. Eli feàdati ulohona feà am alihi bozinabu lehe bak aaha vabna li duzu. Ame mokbu labe am ohubu tujuh zisitda. Labi ame na ohubu tujuh laba boehàdat ohula nom usumna laha ame na ohubu zi laba ahala usui ahala usuida. Labi ame na ohubu tujuh zisitdaha labe mobu sepuluh labe tom futodume modealada.
4. Labi ame mokbu labe am vahaso labe it fi bovai modeha asum ahoba iuba modealaha falo zi lam behàsu vekesi meida beo. Lahadume bisteat bak niba ab nom goaitodaham. Labi ame mokbu labe ozo, “Ame nam data faahazobe vietoi àme tolazese,” lahame ame nam labe avaesdam laba duzu vou faoda.
5. Labi vou faodameilahit Daboseà ab faaham. Ame Daboseà lam Boehàdateboli boehàdat meia odosu im vahokemnaso besit modehena lam aho vuusdam labet modi dam bakda ahebu abo dam debu mei debu mei laham dam laba vuusu im vahokedalo modem di ba bedem vaba abo keàtedi vuusu vahokedam Datat moz. Laham Data lam faasi ame mokbu labe àsome modeha Alam im gagu vou usemda labe nom visoi ab vou tom iluham. Vou tom ilu, “Ala bake tau dam bakdate vuusdase,” lahame ame Nusumnabu Alabada labe Am obe laba ab vou le ousuham.
6. Labi modeha ame nam labe ozo, “Ame mokbu labe eba beoma,” lahamna zohàme Alat Aho amu di iube modi ahumdehe bak abo bak aotba baa bohu dam vaba alim bak italo ozome esu. “Alam im gagu vou usem dam labe ame nam laba vou aasdume ala empat puluh dua abo digat seribu dua ratus enam puluh folese,” lahame ame nam labe ahit ame bak laba itam bak ozome Alat gi amu di iube ahumdi ab esuham bak.
7. Laham bak lam eho aadume neàdi modeha dam asum ahoba laba ot beluidam bak eho neo ab vi aadaham. Neha: Alat Am im gagu vou usemda meida Aba ahida vàmtea Mikael lamti labi Am im gagu vou usem dam totbaho Mikael bake taumda zi lamti vazisi fa mokbu labe Alat Am im gagu vou usemda totbaho fa mokbu laba tauhuda zi lamti ot beluidam bak eho ab aaham.
8. Labi ot beluiame modeha ame mokbu labe aba taumda zi bedi ba ot vam vabilehemu Alat ame mokbu labe aba taumda zi labe iho amu asum ahoba neàt azihi bak fa mali bak niba bisteat ab nom voedaham. Ame mokbu lam amu mumali Hawa bake ahi vagehe mokbu am bak. Abo am ee gagom Iblis laham bak. Meia modi veimam setan zi labe im boehàda am bak. Abo im dam bakda ahebu modi vagedamda am bak. Lahamda lamti aba taum dam zi lamti bak niba bisteat ab nom voedaham bak.
10. Labi im lada lam aadume neàdi eho neo vi aiha asum ahoba iube dae buduana buddam bak eho neo ab vi aiham. Ame dae labe nehame buteme vameada. “Etei ibi iho vou baedam Ala abo feà Alat modem labe Aho Gagu Fihasi Vimteme Oluhu Dat Boehàda bake modi fa Aho ot vai im dedatelem bak ab vou fuham tame. Labi im dedateli meedam labe Am Ai Alat neha, ‘Em damaleheda zi lam fà soat vausu fa vei neàbodedase,’ lahame fet ozome esuhu bak lam Aho modi neàbodedam bak ab vou fuham tame. Labiha labe Yesusat Boehàdateboli dam bakda ahebu vuusu im vahokedam bak ab vou fuham tame. Nehaha labe ame bak vou fuhu bak. Imti vahi Yesus bake tu vuzehi meedam dam nim iba vàlu gagodamda lam abo setan zi labe im boehàda labe aho ibi iho vou baedam Ala labe aho avaesdam laba le neha, ‘Dam lam faina meedam dam beodam neàte,’ lahame iba ozomsu Ala bake ootedam bak lam abo digad diat modeo, usehe diat modeo, gi labaha bohu ootedamda lam Alat ame da lam bak niba bisteat ab nom vooham bak.
11. Imti vahi Yesus bake tu vuzehi meedam dam laba Iblisit neha, ‘Yesus bake tu vuzehi meedam bak lam voole,’ lahame ame dam laba ootedume modeha iho fa ab meodeham bak. Nehadam labe labihaha bak. Ame dam labe ibi iho faina meedam bak lam Domba Adat labe Aho ot vai eloi Am vasea labet modi fa faamome seddaha bak laba tu vuzehe bak ame. Labi iho neha, “Ibi iho tu vuzeheda Yesus lam im Boehàda am tame,” lahame ahate gagodam bak ame. Labi iho lab ahate gagodam bak lam ba vooho vaba damat iba faki, ‘Otese,’ laham di im ba iedem vaba gi ozahit teudi labaha bohu vou vameatedam bak ame. Labihasu meedam labe ame dam labe iho Iblis modi bedi iho fa meodehe bak.
12. Labihàmu imo im asum ahoba niba azihi dam ahebu ame dam labe iho meodehe bak laba ozome nasi deelese. Aiee! Lahana um dam bakda abo nohula esuhuda modeo, itea valau obe esuhu dam modeo, Iblis uba ab nom iluham bak. Aho ozo, ‘Dam bakda eho vabidume meedam bak lam gi labaha bohu meedam vaba gi modem ab zohobulelo modem ame?’ laham bak ozobohudehemu faki uba vabidam bak feà bak ab fuham tame.” Lahame buteme vameadaha im lam eho ab vi aiham.
13. Labi eho amu nam daboseà faasi italo modehe di lam eho vi aaha di neha: “Ame mokbu labe nam laba beom bak labna zohàme Alat amu modi ahumdehe bak abo bak aotba baa bohu dam vaba alim bak laba ame nam labe itame Alam im gagu vou usem dam labe aba vou aasdume digat seribu dua ratus enam puluh folese,” lahame, “Ame nam labe fà boiateme ahe neàt fi ozem bak laba odose,” lahame naat busehà ahim abo tuha feàda labe am busehà lamti ulohona ame nam laba lu ab modesuham. Labi ame mokbu labe aho ozoha, am bak niba bisteat nom voohemu, “Fa etei daboseà faaha nam laba nabidase,” lahame ab le nabidamam.
15. Labi nabidume ozoha vabamu ozo, “Làhà eho nam lam vao olu vao bahot tom belu vou feàzi setese,” lahame vao soaboti ulohona feà lam aho modi am aha labe futoi ame nam labe aho ladam bak laba ab vi oluham.
16. Labi olu modeha bak nu nibe ozo, “Vao labe nam lam beomna ozomo?” Làhàmu bak nibe am aha utasi modesu vou faodameilahit mokbu labe am aha labet oluhu vao lam gi aho ab gut ve tolazi seteham.
17. Labi modeha ame mokbu labe ame nam laba faki feà bak ab fuham. Faki ame nam lam vou esmozi ame nam labe aho vou faat ledahana ozomom dam lam abo Alat gagoho im aime uledi meeda. Labi, “Ibi iho tu vuzeheda Yesus lam im Boehàda am tame,” lahame labaha bohu dam bake ahate gagoda. Laham dam laba, “Ot beluidase,” lahame ab laham.
18. Labi eho neo vi aaha ame mokbu labe lab laha labe itea auobe laba le ab duzuham.
1. Labi ame mokbu itea auobe laba le duzuhu bak aame neàdi eho neo vi aaha na ohemna meona em vi aam iedemna meida itea labe sikisi nohula zitu neo le duzuhu bak eho ab aaham. Am ohubu tujuh zisitda. Labi ame na ohubu tujuh laba Ala bake feàtàm bak ozome im dauha laba ee ahaladiame toeida. Labi ame na ohubu tujuh zisitdaha bak labe am mobu sepuluh labet tom futoda. Labi boehàdat ohula nom usumna laha ame na mobu laba nom ahala usui ahala usuida.
2. Ame na eho aahana labe am so gi na meona macan tutul soti ulohona ozomomnat modem bak. Labi am naba gi beruang naba ààmom labe odot eimeo feàna modesu. Labi am omto zoho gi singa omtole. Lahamnabu laba ame mokbu labe am bisi feà bak im dedateli dam vuusu im vahokedam bak lam ame na itea labe lehena laba fa ab modi vizeham.
3. Ame na itea labe lehena labe am ohubu meida aam di abo meit aet belu fat aodehe but baeba feàna laba modesdam bak eho aaha bak. Ame but baeba lam amu gàhà di, “Abo eloe?” lahame ozomomna fa neàdehe but baebat modem labe dam bakda ahebu aahemu àvodi ame da laba valadume aho gagoho im laba tu vuzehi meeda.
4. Labi ame dam labe ozoha, mokbu labe am feà bak im dedateli dam vuusu im vahokedam bak lam fa ame na itea labe lehena laba vizehemu iho neo ahu adat iedi, “Feàte,” lahame ame mokbu labe am ee vousai vou baeda. Abo gi ame itea labe lehena laba laha ahu adat iedi, “Am abo feàte,” lahame am ee vousai vou baeda. Vou baedam labe nehi ot gagoida, “Uho ozom, itea nibe lehena nimti ulohoda ehe? Ba amati ame da nimti ot beluia? Ba na amomoi nimohoda vabak,” lahame ab vou baedamam.
5. Labi modeha ame na itea labe lehena laba Alat modi fa dam daeli, “Am abo Ala am tame,” lahame it daetbadam labe vedi fa Ala bake feàtàda. Labi laha aba modi aho im dedateli dam bake vuusu im vahokedume ala empat puluh dualem bak ab modi esuham.
6. Labihadam dàt modem labe aho neha, “Em bisi feà dateli Alati uloho bak,” lahame daetbadume Ala Am eeti labi Alat Aba Aho asum ahoba iuba azihi bak lamti labi ame bak laba tau esuhu dam lamti labihasu ab feàtàdamam.
7. Labi laha Alat ahit uledi ame nabu laba modi vizi im dedateli fa Alam damalehe dam laba bohudi aho fa meodem bak ab modi esuham. Labi Alat laha ahit uledi ame nabu laba modi im dedateli dam bakda ahebu abo bak feàna meidati bak feàna meidati ahaladiame esuiaha dam zi ame. Labi dam debu mei debu meime dae ahaladiaha dam ame. Lahadaha dam zi feà laba vuusu im vahokedam bak ab modi esuham.
8. Labi modeha dam bakda ahebu ame nabu laba ahu adat iedi, “Feàte,” lahame am ee vousai vou baedam bak lam eho ab aaham. Lahana Alat aham di iube bak nim modehe vab di iube Damat Elom Gikina Ahe Neàna Bohu Vuusdam Dam Labe Im Ee Toedaha Buku laba ee toedaha dam labe ba ame nabu laba vou baedaha vabak. Abo Domba Adat damat oteme vasea veàtohoda laba tu vuzehi meedam dam abo ahe neàna bohu vuusdam dam labe im ee ame buku laba toedahemu iho ba ame nabu laba vi tau vou baedaha vabak. Gi ee toedaha vab dam labe iho ame baket meedaha bak. Labihadam bak lam eho ab aadaham.
9. Labihàmu eho Yohanesat uba im nehasu sunit niba gagolo. Um dogoi im aim bak ehena um nasi eho etei gagolo modem im nidi nim iademe aime ozodam labe meedale.
10. Meit uba fakemoholehe dam labe fa zili um siàdume vou lalo modemeam làhà a bohudemule. Fà vou lase. Alat ahit gagu uledi modeho. Labi laha damat uba li ae tot mo tot mo lahamna labe beolo modemeam làhà a iedi itamule. Fà beome elodase. Alat ahit gagu uledi modeho. Labihàmu um Alam damalehe dam naat uba vabidam di ubu uho Yesus bake lab tu vuzehi meedam bak lam voom vaba gi ozahit keàtedi bohu meedam bake eho ahit uba labi gagu ootedam bak. Uba ba modi geàdam im ehe labe eho uba labi gagoho bak.
11. Labi im lada lam aadume neàdi eho neo vi aaha na ohemna meona meida feà labe bak ad iube tom futoi duzuhuna eho ab aaham. Ame na labe am dogoide labe futoho mo abo domba moti ulohona behàsu tom futoi modesda. Lahana ame na labe aho im vameadam bak eho aiha abo mokbu labe am daeti uloholi meedam labe damat am dae aim di mom vaba abo tu vuzehem bake dae feàna vameadam bak eho dogoit vi aida.
12. Ahamte itea labe lehena meonabu labe aho im dedatelehe bak lam fa na ba bak ad iube tom futohoda laba modi fa ub vizehe labe aho fa neo dam bakda ahebu ootedume meedam labet modi damat fa na itea labe lehena laba abo am ohubu meida butolehena fa vei neàdehe but baeba modesdamda laba im ahu adat iedi, “Feàte,” lahame am ee vousai ab vou baedamam.
13. Na bak ad iube tom futohoda nibe aho damat fet aame àvodi ozobohudemna abo na damat ihimo modem biem im feàna zi nehamna meeda. Damat aasdahit aho modi vua asum ahoba iubet fa bak niba nom iluda. Labi im feàna amomoi laha neo meeda. Gi labihada.
14. Alat ahit uledi, “Na meona amuda labe fa bada laba modi im dedateli ame damat ihimo modem biem im feàna fà la modi le modidase,” lahame gagu esuhu labet modi bak ad iube tom futohoda nibe dam Yesus bake tu vuzehi meedam vabdate neha, “Itea labe amu lehenabu lam abo Ala am tame,” lahame ab vageham bak. Labi ame na meona bada nibe aho vagehe dam laba dam bakda ahebu neha, “Na meona amuda lam abo meit aet belu fat ahedeheda laba um ahu adat iedi, ‘Feàte,’ lahame am alihiti ulohona auet modi itoli duzu am ee vousai vou baedamna modele,” lahame labi ootedume damat ame na itolehena ab modeme duzuham.
15. Labi modi duzu neàdi na ohemna bada nibe fa na amuda labe am itolehena laba ohem bak ab modi vizeham. Ame bak lam Alat ahit na ohemna bada laba modi vizehe labe labihaha bak. Ame na itolehena labe aho im vameadam bak ame. Labi dam ahu adat iedi aba vou baedam mom dam laba, “Beodume oddase,” lahame aho ootedam bak ame. “Labihadase,” lahame ahit modi ohem bak ab modeham.
16. Labi ame bak labe futohoda nibe aho dam bakda ahebu tet ootedume im dauha modeo, im anekehà ahi tot modeo, “Nohaeme itoedase,” lahame ootedam labet modeme itoeda. Abo dam ee eheda modeo, ee vabda modeo, nazoh feàda modeo, nazoh vabda modeo, mei na teo meedamda modeo, gi azietemda modeo, labihasu ahebu ootedume modeme itoeda.
17. Neham bak ozome labihaha bak. Damat na vadam bak modeo, na ot loidam bak modeo, ame na nohaeme itoehena aam vab di ba na ot loidam vabak. Ba na vadam vabak. Labihadam bak laba ozome nohaeme itoedaha bak. Ame nohaeme itoedaha bak lam gi ame ahamte itea labe lehena meonabu labe am ee modeo, am ee laba taluhu nomor modeo, lahamna nohaeme itoedaha bak.
18. Labihadaha bak eho Yohanesat aahemu uba nehalo. Ame nohaeme itoedaha bak lam, “Akati modemna modela?” laham bak lam um ozobohudem bake uho Ala bake neha, “Iba modi ozobohudi fi gatele,” lahame mahate tom gagodale. Meit im vi ozome ozobohudemeam làhà ame itea labe lehena meonabu labe am nomor ozobohudem bak am tame. Neham labe labihaha bak. Ame nomor lam gi im dam bakda laba taluhu nomor am bak. Abo enam ratus enam puluh enam laham bak.
1. Labi im lada lam aadume neàdi eho neo vi aaha Domba Adat labe Aho vuusdam dam abo seratus empat puluh empat ribu ehe dam zi feà Sion Sibu laba Aho vou dozeadam bak eho ab aaham. Ame dam zi fai lam Yesus bake tu vuzehi im Abada meedam dam ame. Labi Alam damali Aho naedat vou aasdam bak ame. Labihasu, “Dam giidat fà ozobohudese,” lahame im dauha laba Domba Adat Yesus ozomomna labe Am ee lamti labi Am Ai Ala labe Am ee lamti laba itoedaha bak lam eho ab vi aaham.
2. Labi ame bak lam aadam di labe eho neo vi aiha na daevat asum ahoba iuba ab aidamam. Ame na dae lam budua labe gi vao gum feàna dae lamti labi asum gilidume lautoidam dae lamti ulohona aida. Labi laha abo dogoit aim neà labe gi dam duana gitarti ulohona kecapi vuusualadume foadam labe muudam daeti ulohona aida.
3. Ame na dae lam eho vi aidam di labe ame seratus empat puluh empat ribu ehe dam labe iho ame Nusumnabu Alabada modesdam bak lamti na ohemna ahia lamti dam meia im gagu modiam dam dua puluh empat ehe dam lamti labihasu iho avaesdam laba dozeadume ladeedam dae gàhàda faasi vou ladeedam bak eho neo ab vi aidamam. Lahana ame ladeedam dae gàhàda lam ba meia vouhome meit ozobohudem biem ladeedam daet modem bak. Gi ame seratus empat puluh empat ribu ehe dam labe abo Domba Adat aho dam bakda ahebu totbahota fàsi ibi iho faina meedam bak laba ozome gohali eloi am vasea veàtoho labe aho ot vai fa Ala bake loho dam lamota ihimo vouhodume ozobohudi ladeedam daet modem bak.
4. Ame dam zi fai lam faina meedam bak voou fa tomba neàt meedam damat modem bak. Gi lahi dat amu modehe vab nam alimna modeo, dat lahi amu modehe vabda alimna modeo, lahadam bak lamti uloholi abo tomba neàt meedam labe ba na amomoi alalehena giomimna laba ahu adat iedi, “Feàte,” lahame vou baedume vàhàdedam vaba gi Domba Adat laba ahu adat iedi, “Feàte,” lahame vou baedam damat modem bak. Labi Domba Adat labe Aho gagoho bak lamota vuzehi uledi Aba vi duzu vi vuladam dam am bak. Ame dam lam ibi iho faina meedam bak laba ozome gohali Domba Adat labe am eloi am vasea veàtoho labe aho dam bakda ahebu totbahota fàsi Domba Adat labe Am Ai Alati iho vadaha dam am bak. Abo Israel dam aham di iube iho na dehena ahamte soaleheda fi hasi Ala bake lodam bak lamti ulohona meedaha bak.
5. Labi ame dam lam laha im vameadam di ba vagedam vabak. Labi laha meit ame dam laba, “Uho git modeho,” lahame ba vàlu gagodam bak na vabak. Labihadaha dam zi eho ab vi aadaham.
6. Labi im lada lam aadume neàdi eho neo vi aaha Alat Am im gagu vou usemda meida labe mahate asum gae toolehe vaba gi donibu laba boiadam bak eho ab aaham. Aho Alam Im Neàna abo veimdem bi ba setem biem Im lam dam bakda ahebu abo bak feàna meidati bak feàna meidati ahaladiame esuiaha dam zi ame. Labi dam debu mei debu meime dae ahaladiaha dam zi ame. Lahadaha dam zi feà laba ahate vou vameatedam bak ozome vou nom boiadam bak eho ab aaham.
7. Ame Alat Am im gagu vou usemda labe gi dae buduana nehame vou buteme vameadam labe boia lada. “Alat Aho dam bake uloome aime neàdi fahedam di ab vou fuseo vabaleham tame. Labihàmu asum ahoba iuba modealahana lamti labi bak niba modealahana nimti labi itea ad laba modealahana lamti vao aana laba modealahana lamti labihasu na zi lam modi esuhu Ala laba um ahu adat iedi, ‘Am abo feàte,’ lahame Am ee vousai vou baedale,” lahame buteme gagodam bak lam eho ab vi aiham.
8. Labi im lada lam aame aidume neàdi modeha Alat Am im gagu vou usemda meida labe neo ahamteda laba vi tusu boiadam labe im nehame vameadamna eho neo ab vi aiham. “Vàhàdeho. Vàhàdeho. Kota Babelti ulohona modesdam kota zi laba esdam dam lam modi vàhàdeho. Nam fi lohona labe, ‘Meit fà aba modese,’ laham bak laba ozome dam bake vou fohom anggur oo vaksa lam abo vao meona meia lu uddume bak vabilehezobe ostame fi loholehe bak lamti ulohona ame Babel dam labe iho dam bakda ahebu abo dam debu mei debu mei laham dam laba vou fohome ba Ala bake tu vuzehem vaba gi mu fa gi ibi iho bak niba modelo àhàkedam bak lamota meedàmu ab vàhàdeham tame,” lahame buteme gagodam bak lam eho neo ab vi aiham.
9. Labi im lada lam aadume modeha Alat Am im gagu vou usemda làteladeheda labe dae buduana nehi bisteat vameadamna eho neo ab vi aiham. “Meit ame itea labe lehena meonabu lamti damat am it auet modehena lamti labihasu ahu adat iedi, ‘Am abo feàte,’ lahame am ee vousai vou baeda. Labi ame nabu labe am toheda zi laba uledi neha, ‘Iba laha am ee nohaeme itoedume esuse,’ lahame gagu im anekehà modeo, im dauha modeo, laba nohaeme itoeda. Labihasu meedam dam lam Alat gi meit meia tet ootedume tamao tet vao tauhu vabda udeme beom bakti ulohona Aho ame dam laba bisi faki feà bak fusi ba koena beodam kaio. Abo Alat Aho gagu am im vou usem dam zi lamti labi Domba Adat lamti iho nom aasdahit Alat ame dam lam vua gazihi feàna laba voedume galihasi geàda tame.
11. Labi ame dam laba vabidume modi geàdam vua labe am vuahubu lam gi labaha bohu modesu bukeda tame. Ame dam labe iho ame itea labe lehena meonabu lamti labi damat am it auet modehena lamti labihasu iho im ahu adat iedi, ‘Abo feàte,’ lahame im ee vousai vou baeda. Labi ame nabu labe am toheda zi laba uledi neha, ‘Iba laha nohaeme itoedume esuse,’ lahame gagu nohaeme itoeda. Labihasu meedam dam lam iba lab modi vabidume geàdam bak lam ba vaitom kai. Abo digad diat modeo, usehe diat modeo, gi labaha bohu modi geàdamna tade tame,” lahame buteme gagodam bak lam eho ab vi aiham.
12. Labihàmu eho Yohanesat ozoha, Alam damalehe dam nim abo Alat gagohona uledi meedam dam nim abo Yesus bake gi labaha bohu tu vuzehi meedam dam nim naat iba vabidam di gi ozahit keàtedi ibi iho meedam bak lam gi neo vi meedam bohu meedam bak.
13. Labi im lada lam aadume neàdi eho neo aiha asum ahoba iubet na daevat nehame gagodam bak ab aiham. “Eho etei gagolo modem im nim oho laha toele. ‘Etei di nibe faasi im Boehàda Yesus bake tu vuzehi Amti vou ali ahu vàmadi bisi keàtedi lahasdume elodam dam lam deelehe bohu vuusdam dam am bak,’ laham bak lam oho laha toele.” Lahame eba labi gagoha Alam Aha Nutabe Neàna labe eba ab vi tau gagoham. “Imbo bak! Ame dam labe iho bak niba gi keàtet meedahemu ame bak lam Alat ba fa biem vabak. Abo ozobohudi gohali vamna lam ame dam laba asum ahoba iuba lolo modemu ame dam labe iho ba na meedume vanamadam vaba gi esdam bak,” lahame gagohona eho ab vi aiham.
14. Labi im lada lam aadume neàdi eho neo vi aaha ulo fauhana eho aasdam laba ab li modesuham. Labi ame ulo laba nusdam datva ehet. Am alihi gi Asum Ahoba Iubet Bak Niba Li Dateleheda Alihoehena ààmomna eho ab aaham. Labi Am ohu laba dusuhuna lam abo emasat modehena Am ohu laba nom usu. Labi Am anekehà labe vuusdamna na modeme vahem ae kidesuhuna eimeona vuusda.
15. Labi eho im lada lam aame modeha Alat Am im gagu vou usemda meida ame Fihasi Ala bake Vou Baedam Num Asum Ahobada iube futoi dae buduana ame da etei ulo laba nusdamda laba nehame ab vameadamam. “Dam bakda ibi iho bak niba meedaha im, ‘Neàna modeheo? Faina modeheo?’ laham bak uloome aime neàdi fahedam digat vou fuhemu om ae kidesuhuna lam ve om anekehàt ahamo bohulali nasi dam bakda ahebu vamateme ame baket nasi meedale. Abo bak adba niba dehe gandum amdi modeme vahedam bak vou fuhemu damat ae kidesuhuna ibida ve fi kbodume vahem bakti ulohona nasi modeme vahedale. Na ahebu amdehe di ab vou fuham bak,” lahame naat etei ulo fauhana laba nusdamda laba ab vameadamam.
16. Lahame labi gagohoilahit ame ulo fauhana laba nusdamda labe aho am ae kidesuhuna labet bak adba niba anekehàt ahamo bohulali nom fi bovaha, bak niba dehena lam ahebu amdehemu ab modeme vahedaham.
17. Labi im lada lam aame modeha Alat Am im gagu vou usemda meida labe neo ame Fihasi Ala bake Vou Baedam Num Asum Ahobada iube neo laha ae kidesuhuna eimeona neo vuusu vou futoi li duzuhuna eho ab vi aaham.
18. Labi eho neo vi aaha Alat Am im gagu vou usemda meida abo ame Num Vàmteabu asum ahobada iuba modesdamna abo vuat usime vuahubuli ahana neàna feemna esum beahuba laba im dedateli vuusdamda labe ame bak labet li duzuhuna eho ab aaham. Aho li Alam im vou usi im vameadamda ame ae kidesuhuna eimeona vuusdamda laba dae buduana neo nehame buteme ab vameadamam. “Dam bakdate uloome aime neàdi fahedam digat vou fuhemu om ae kidesuhuna eimeona lam ve om anekehàt ahamo bohulali nasi dam bakda Ala bake fakemoholehe dam laba oho nasi beodale. Abo bak niba dehe anggur dee ahebu amdi modeme vahedam bak vou fuhemu damat ae kidesuhuna labe ame anggur labe am oo noha niz lamti fi kbodume vahedam bakti ulohona nasi modeme vahedale.”
19. Lahame labi gagohoilahit Alat Am im gagu vou usemda labe am ae kidesuhuna labet bak adba niba anekehàt ahamo bohulali nom fi bovaha bak niba dehena anggur labe am oo noha niz lam ahebu amdehemu ab itezeadaham. Labi itezeadume neàdi vamateme na anggur oo vaheme damat nao nom gigime unamna feànabu laba ab vahedaham. Ame anggur oo vaheme damat nao nom gigime unamna feànabu lam gi Alat dam bakda faina meedam dam laba bisi faki feà bak fusi beodamna ozomomna am bak.
20. Alam na im meedam dam toheda labe iho ame anggur oo zi lam ame nabu laba vahedam di gi kota bàhàgo bak laba modesuhuda laba vaheme nom gigime uname modeha am vaksa feà bak ab fuham. Abo ame dam laba beodume vasea feà bak fusi vao soaboti uloholi tà ladam labe ladume abo tiga ratus kilometer lamoho vou fuhu bak. Labi ame na vasea labe am nobu bak nom ulohom di abo dua meter lamoho nobu li modesdam bak.
1. Labi im lada lam aadume neàdi eho neo tom aaha damat fet aame àvodi ozobohudem im feàna meida asum ahoba iuba ab aaham. Alat Am im gagu vou usem dam tujuh lehe dam labe iho im dedamali dam bakda Ala bake fakemoholehe dam laba vabime vàhàdedume tujuh lehe im abo ba meedume novalo modem im vuusu li dozeadume ahumdehena eho ab aaham. Dam bakda vabime vàhàdedam im tujuh nidi nim meedume neàdemeam làhà Alat dam bakda Aba fakemoholehe dam laba Aho bisi faki feà bak fusi beodume vataum bak lam ab vaitolo meedamam.
2. Labi eho neo vi aaha naavat abo itea vao asum fau baa abo itaamnalehena vua laba eludamna eho ab aaham. Labi eho neo vi aaha dam zi feà labe iho ame na itea labe tom futohoda meonabu lamti labi am alihi damat auet modi itolehena lamti lahamna laba iho ahu adat iedi, “Am abo feàte,” lahame vou baedaha vabak ame. Labi ame nabu labe am ee laba taluhu nomor lam iho im anekehà modeo, im dauha modeo, laham bak lam laha tau vi nohaedaha vabak ame. Labihasu iho vi tau meedaha vaba meodehe dam laba Alat neha, “Aba fà vou baedase,” lahame Aho ame dam laba gitarti ulohona kecapi lahamna lodume vuusualadume neàdi ame itea obe laba dozeadaha bak eho ab vi aaham.
3. Labi ame na kecapi vuusualadume vou ladeedam labe gi dat ahamda Musa Alat gagoho im uledi meedamda labe aba aho Ala bake vou ladeedam daeti ulohona vou ladeeda. Abo Domba Adat labe Aba Aho dam bakdate soat vausu fa vei neàdedam bak lamti labihasu ozome nehame Ala bake vou ladeeda. “Im Boehàda Ala bisi feàda oa, Obo Oho la modi le modidaha bak lam gi Obo Oho bisi feà bak labet damat ihimo modem biem im feàna Oho meedam bak. Om abo Boehàdatebot dam ahebu vuusdam Ala Om am bak. Obo Oho meedam im lam gi ahole im vamdesu imbo bak meedam bak.
4. Im Boehàda oa, Om bisi neàbodeheda vàmtea Om am bak. Labi modehe labe ba amat Oba am ahu adat iedi, ‘Feàte,’ lahame Om ee vousai vou baedam vabamu voe? Ba labihamda na vabak. Obo oho meia im uloome aime ozome ozobohudi gagodam di lam ba biou giomim gagodam vaba abo gi ahole im vamdesu imbo bakta la gagu le gagoidam bak lam gi amu di iube fi zeam bitoho labe dam ahebu ozobohudehe bak. Labihàmu dam bakda ahebu abo dam debu mei debu mei laham dam labe iho Oho avaesdam laba le ahu adat iedi, ‘Om abo feàte,’ lahame Om ee vousai vou baedam bak.” Lahame labihasu Ala bake vou ladeeme vameadamna eho ab aiham.
5. Ame im lada lam aime neàdi eho neo asum ahoba iuba tom aaha ame Fihasi Ala bake Vou Baedam Num Asum Ahobada lam abo damat neha, “Teohet Mome Fa Faatoiam Num abo Alat Ahamo azim numat modem bak,” laham num lam gi ahate modesdam bak eho ab aaham.
6. Labi eho ame Num laba tom aame modeha Alat Am im gagu vou usem dam tujuh ehe dam labe iho im dedamali dam bakda Ala bake fakemoholehe dam laba vabime vàhàdedume tujuh lehe im meedalo ahumtedehena ame Num labe futodamna eho ab vi aaham. Ame Alat Am im gagu vou usem dam labe sue fauha meona fako aam iedemna abo, “Sue etehàsoat modehe?” laham bak ozomom vab sue duada. Labi im ahude vastemna lam sue abo emasat modehena etehàso tadehena ozomomna ahude laba ahaladiame gimsuida. Labihadahana eho ab vi aaham.
7. Labihadam dam tujuh labe li dozeadume neàdi ame na ohemna ahia labe meida vàmtea labe ozo, “Ala elom gikina labaha bohu modesdam Ala labe Aho damat Aba fakemoholehe dam laba faki feà bak fuhemu ame dam laba vabidume vàhàdedase,” lahame ozome esumna zi fi hiba laba vahehena lam ame dam tujuh laba lodume ahala vuusualada.
8. Labi modeha Ala bisi feà Alat modem bak lamti labi Am fauha meo feà ogatedam bak lamti labihasu meedam labe ame Fihasi Ala bake Vou Baedam Num Asum Ahobada laba ab vuahubuli veimai seteham. Labihahemu ba dat vàmtea buà ame Num laba olem biehe bak. Gi Alat Am im gagu vou usem dam tujuh labe iho im dedamali dam bakda Ala bake fakemoholehe dam laba vabime vàhàdedume tujuh lehe im lam modeme neàdemta olem neà bak.
1. Labihadam bak lam eho aasdam labe vi aiha ame Fihasi Ala bake Vou Baedam Num Asum Ahobada iube dae buduana ame Alat Am im gagu vou usem dam tujuh ehe dam laba nehame buddam bak eho ab vi aiham. “Uho nasi nibet le bak adba iuba, ‘Damat Ala bake fakemoholehe dam laba Alat bisi faki feà bak fusi dam bake vabidume vàhàdem bak ehete,’ lahame ozomna zi fi hiba laba vahehena lam nasi vou le bak adba iuba nom veomodale,” lahame butehena eho ab vi aiham.
2. Labihasu buteme modeha Alat Am im gagu vou usemda ahamteda labe le ame na vahehe fi hiba abada lam bak nu adba niba ab nom veàtoham. Labi veàtoi modeha damat ame itea labe lehena meonabu labe aba aho meia nohaeme itoem bake uledi im anekehà modeo, dauha modeo, labihasu nohaedume itoedume esuhu dam lam abo am alihi damat auet modi itolehena laba ahu adat iedi, “Am abo Feàte,” lahame am ee vousai vou baedam dam lam ab modi keàhàli feà bak fusi ab geàdamam. Lada lam labiha.
3. Labi neo Alat Am im gagu vou usemda behàsdeheda labe neo le ame na vahehe fi hiba abada lam itea feàna tombu niba ab nom veàtoham. Labi veàtoi modeha vao lam abo koei vasea giho bozili keàtedi na ohemna ame itea laba esuhuna ahebu ab elodaham. Lada lam labiha.
4. Labi neo Alat Am im gagu vou usemda làteladeheda labe neo le ame na vahehe fi hiba abada lam vao aanati vao soaboti lahaha bak laba abo bak damat ibi iho vao le noadaha bak laba le ab nom veàtoham. Labi veàtoi modeha ame vao lam ab dam vasea bozileham.
5. Labi modeha Alat Am im gagu vou usemda abo im dedateli vao vuusdamda labe nehame Ala bake gagoda. “Om Bisi Neàbodeheda Vàmtea abo aham di iube ehe lahasu vou mode ledume etei vou fuhu Ala oa, damat Oba fakemoholehe dam laba Oho lab uloome aime neàdi gagu beodaha bak lam gi ahole im vamdesu meedaha bak.
6. Neham labe labihaha bak. Damat Oba fakemoholehe dam labe iho amu Om damalehe dam lamti Obo Oho vameadaha im aime fa dam bake ahate vameaidaha dam lamti labihasu oddume im vasea veàtohemu Oho ame bak laba vi vatauhu labe Oho ahit modi vao nim dam vasea bozili damat ab uddamam bak. Oho ahole neàna modeho.”
7. Lahame labi gagoha ame Fihasi Ala Bake Vou Baedam Num Vàmteabu asum ahobada laba modesdam beahuba abo vuat usime vuahubuli ahana neàna feemna esum beahuba laba netàdi doudamda labe aho Ala bake nehi fa vi tau gagoho bak eho ab vi aiham. “Im Boehàda Ala Bisi Feà Datebo oa, Om im vou usemda labe etei gagoho im lam abo imbote. Obo Oho meia im uloome aime ozome ozobohudi gagodam di ba biou giomim gagodam vaba abo gi ahole im vamdesu imbo bakta gagu beodam bak.” Lahame fa gagoho bak eho ab aiham. Lada lam labiha.
8. Labi neo Alat Am im gagu vou usemda ahialeheda labe neo le ame na vahehe fi hiba abada lam ala digadda laba ab veàtoham. Labi modeha im Boehàda Ala labe Aho ala digadda laba ahit modi im dedateli dam bake modi vuat ab aladamam.
9. Ame ala gai meo lam dam bake ab ulasi teehuvaidamam. Lab modi teehuvaidamnàme ba ame dam labe ibi iho lab faina meedam bak lam voedume fa ahu neà bak vàmadi ahu adat iedi Ala bake, “Am abo feàte,” lahame Am ee vousai vou baedam bak mu vedi fa im dedateli dam bake vabidume vàhàdedam Ala laba vei faki feàtàda. Lada lam labiha.
10. Labi neo Alat Am im gagu vou usemda auoholeheda labe neo le ame na vahehe fi hiba abada lam ame na itea labe lehena meonabu labe aba aho zisi nusu dam abada im vahokeidamnabu laba ab nom veàtoham. Labi veàtoi modeha aba aho vuusdam dam labe ibi iho esdam bak lam ab aibuleham. Labi aibuli modeha ibi amu modi keàhàlehe bak labet galihasi feà bak fusi geàdam labe fa im iso ab it gaadamam.
11. Labi it gaadam labe asum ahoba azim Boehàdatebo Ala bake faki ab feàtàdamam. Lahana ba ibi iho amu faina meedam bak lam voedume fa ahu neà bak vàmadi meedam vaba vedi gi abo mu meeda. Lada lam labiha.
12. Labi neo Alat Am im gagu vou usemda enamleheda labe neo le ame na vahehe fi hiba abada lam vao feàda abo Efrat Soabo laba ab nom veàtoham. Labi modeha ame vao lam auvai seti gi kebe fauhata ab modesuham. “Boehàda zi labe im meo dam ahaladiahana zi lamti ala zizem zoho labet usnadume li bohudem zie neàna ahumdi modesuse,” lahame ahit labihaha bak.
13. Labi Efrat Soabo auvai seti modeha eho neo vi aaha setan bisi faida ikelehena meida mokbu am ahat futo. Labi meida itea labe lehena meonabu labe am ahat futo. Labi meida dat neha, “Em Alat vameadaha im aime fa dam bake ahate vameaidalo mozo,” lahame vagemohoda labe am ahat futo. Lahadahana làtela lam eho ab aadaham. Ame na setan ikelehena làtela lam im dedamali damat fet aame àvodi ozobohudemna abo na damat ihimo modem biem im feàna lam meedam meot. Lahamna làtela labe ozo, “Ala Bisi Feà Datebo labe Aho dam Aba fakemoholehe dam laba beodam digat fuseo vabaleho. Imo Ala bake bohudem bake nasi vahe vahedume ahumdi vou faodase,” laham bak iho bakda ahebu vuusuiaha boehàda zi laba le la gagoi le gagoidume vamatedalo modemna làtela am.
15. Laham setan làtela labe ame boehàda zi lam vamateme neàdi bak Ibrani dae gagom Harmagedon laham bak laba vahe vahedaha bak eho neo ab vi aaham. Labihadam bak eho vi aadume modeha Yesusat eba im nehasu fet ab vameame esuham. “Eho etei gagolo modem im nim iademe aimale. Eho ba lem digat lam gi mei na aa vamda labe damat vabi esdahit lem bakti ulohona Eho lem bak. Labihàmu Eho lem di damat im so bozbuna ahate le goom bak lam dam giidat vi aame im ladeem bak labna zohàme im sue vihilam vaba gi sue dume le goom bakti uloholi gi im vamdesu meedume ahumdi neàdi vou faodamna Eho li aam dam lam deelehe bohu vuusdam dam am bak,” lahame Yesusat eba labi vameadahana eho ab vi aiham.
17. Labi neo Alam im gagu vou usemda tujuhleheda abo ba vi novahada labe neo le ame na vahehe fi hiba abada lam asum tom fi haba laba ab nom veàtoham. Labi nom veàtoha ame Fihasi Ala bake Vou Baedam Num Asum Ahobada laba modesuhu Nusumnabu Alabada labet dae buduana nehame butehena eho ab vi aiham. “Alat Aba fakemoholehe dam laba Aho lab faki feà bak fusi la belui le beluidam bak lam ab vaitoi neàdelo modemam tame,” lahame butehena eho ab vi aiham.
18. Labi buteme modeha asum boz mei bobusbe vi veleidam labe asum gilidume lautoidume balim feàna modi bak ab nigo nigodamam. Amu Alat alimeat damti bakti modi esuhu di labe faasi vou mode ledume etei vou fuhu di nim ba balim lamohoda modehe vabak. Eho etei aahada nim abo bisi feàda eho ab vi aaham.
19. Labi ame balim lab nigo nigodam labet modi dam duana esdam kota Babel lahame ozom kota lam beodume bak agauhu bak ab làteladeham. Labi modeha bak ahebu modealadaha num debu zi totbaho lam laha ab beodume vàhàdeme seddaham. Labi ame Babel laba azihi dam labe ibi iho amu bisi faina duana meedaha im lam Alat vi ozome ab vi vatauham. Meit meia tet modi anggur oo vaksa bisi meona duana udem bakti ulohona Alat Aba Aho faki feà bak fusi meedam dam laba Aho bisteat ab beodaham.
20. Labi ame balim lab nigo nigodam di labe eho neo vi aaha itea feàna laba modealadaha touha zi ahebu ab seddaham. Labi nohu aabo modealadaha sibu bak ahebu laha ab bagavai seddaham.
21. Labi eho neo vi aaha abaaso abo feàna kebuti ulohona asimbuna lima puluh kilo ozomomna bisteat dam bake ab nom biddamam. Etei abaaso ke feànati ulohona dam bake vabidume vàhàdehena nim bisi feà labe damat Ala bake ab faki feà bak fusi feàtàdamam. Alat Am im gagu vou usem dam tujuh labe labihasu meedahana eho ab vi aadaham.
1. Labi im lada lam aadume neàdi ame na fi hiba tujuh veomodaha dam Alat Am im gagu vou usem dam tujuh meida vàmtea labe eba li neha, “Om nasi eba tau lele. Vao zi modealadaha bak laba modesuhu kota Babel laba esdam dam labe iho bisi faina meedàmu Alat ame dam laba faki beodalo modem bak laba ozome eho nam bisi fi lohona feà laba vàlu, ‘Akatihasu beodàla?’ laham bak lam oba vameadase.
2. Neham bak. Eho ozoha, dam bakda vuusdam boehàda zi ahebu ostame fi loholi ame kota laba azihi dam laba oali vou modetedam labe fa faina im mei im meime ostam alalehena zi laba neo vou baedamna ozomomna meeda. Labi laha dam bakda ee vabda ahebu vou fohome modi damat uledi ame baket vi tau meedamna ozomomna meeda. Abo nam fi lohona labe aho neha, ‘Damat fà aba modese,’ lahame ahit anggur oo vaksa meona lam dam bake lodume uddume bak vabi bobidume aba modem bak lamti ulohona ame dam labe ab meedamam bak.”
3. Lahame eba labi vameadume neàdi Alam Aha Nutabe Neàna labe eba modi veimai vuusdam labe ame Alat Am im gagu vou usemda labe em ve bak aotba baa bohu dam vaba alim bak laba ab vou laham. Labi em ve vou le usi aaha nam na ohemna meona alihi bozina laba nusumna eho ab aaham. Labi ame na feà labe am ohubu tujuh zisitda. Labi ame na ohubu zi laba am mobu sepuluh ehena tom futome modealada. Labi ame na labe am so laba Ala bake vàlu feàtàdam ee laba toeida.
4. Labi eho etei aaha nam labe aho dusuhu sue lam am alihi aam neàna abo boz gihonati boz buhedati labihasu dusuhuna eho ab aaham. Labi emas keobeti labi damat doi duana vaha mutiara ke lamti ke vabiehena totbaho lamti labihasu naedaha labe am fau vekesi vekesidamna eho ab aaham. Labi ame nam labe aho mokzohbu emasat modehena abo ogatedamna vuusda. Ame mokzohbu lam gi aho fi loho bak labet modi ahasbeam im meedam bak lamti fai bak modem bak lamti git modem bak lamti aho àhàkemna lamti labihasu vouhomna laba fedeme bektoi modesdam mokzohbu vuusda.
5. Labi am dauha laba aba aho meedam bak ozome im nehasu totobet fi koame toehena eho ab aaham. NAM NIM BABEL BISI FAI BAK MEEDAM KOTAT MOZ. FILOHO LAHI ZI LAMTI FILOHO DAM ZI LAMTI LABI BAK ADBA NIBA IM MEI IM MEIME FILOHOLI MEEDAM IM TOTBAHO ABO DAMAT AAM AHASBEAM IM MEEDAM DAM LAMTI LABIHASU MODI FAAHA OIAT MOZ.
6. Labihasu toedaha bak eho ab aaham. Labi lada lam aame neàdi eho neo vi aaha ame nam lam Alam damalehe dam iho amu neha, “Ibi iho tu vuzeheda Yesus lam im Boehàda am tame,” lahame amu ahate fi desi vou vameatedahemu damat oteme veàtoho vasea lam aho uddume bak vabi bobidamna ozomomna eho ab aaham. “Dam lam ahole eloho,” lahame deeli vàhàdehe bak lam eho ab aaham. Eho ame bak lam aame modeha àvodi ozo, “Akatihasu modemna modela?” lahame ab vabi vi ozodamam.
7. Vabi vi ozodume modeha ame Alat Am im gagu vou usemda labe eba nehi neo ab vi gagoham. “Om akatihasu àvodi vabi vi ozodàla? Làhà ame nam lamti aho nusu vou ladamna ohemnabu abo am ohubu tujuh zisitda. Labi ame na ohubu zi laba am mobu sepuluh ehena tom futome modealada. Lahamna lamti, ‘Akatihasu modemna modela?’ laham bak labe am tombu om biem bake eho oba vameadase. Neha taia?
8. Obo oho etei aaha na ohemnabu lam amu dita ahedi goda. Labi ba neo etei fa sete. Lahana faobe am alihi ba neo vi aam di gi ame dam it oazehena le esdam bak itmat feàna labe am novaha bak ozom vabna bumat labet tom futoi duzum bak. Labi aho li duzum di dam bakda abo Alat aham di iube bak nim modehe vab di iube Domba Adat labe aho Dam Ba Elom Gikina Ahe Neàna Bohu Vuusdam Dam Labe Im Ee Toedaha Buku laba vi tau toedaha vab dam labe iho ame nabu lam ba aame àvode tame. Ame nabu amu dita ahedi godume fa setehena fa neo duzuhemu ame dam labe iho aame àvode tame. Lahana ame nabu labe ba Alat aba beodume gi labaha bohu geàdam bak laba la tame.
9. Eho etei ame im labe am tombu oba vouhodume vameadalo modem im nim meit iademe vi ozome ozobohudemeam làhà ame im labe am tombu ab vi ozobohudemam bak. Neham bak. Ame na ohemnabu labe am ohubu tujuh zisitdaha bak lam ozom di gi nam labe aho nusdam sibu tujuh am. Abo ame kota Babel bisi num debu feàda elaidamda laba modealaha sibu zi am bak.
10. Labi ozom bak meida gi neham bak. Ame bak niba dat meida boehàdateboli vuusdume elohozobe fa neo amomoi boehàdatebole. Labi neo da lada lam elohozobe fa neo amomoi boehàdatebole. Labihadume vou mode ladume auoholi elodume ab seddaham bak. Labi etei nim meida dam bake vuusu im vahokedam lahasuhu bak. Labi meida boehàdateboli dam vuusu im vahokedam bak lam etei fuhu vabak. Lahana ame da lam ba boehàdateboli dam bake vuusu im vahokedam bak lam mahate bohulalem kaio. Gi zohale tame.
11. Labi ame na ohemnabu labe am sobu lam amu dita ahedi godume fa etei setehena labe aho fa ame etei gagoho boehàda tujuh laba laha vi tau vazisi boehàdateli ame boehàda zi lam ab delapanlelo modemam bak. Am gi ame boehàda tujuhlehena zi lamti uloholi bisi fai bak meedam labe Alat beodume gi labaha bohu geàdam bak laba ba la tame.
12. Labi oho etei aaha ohemnabu labe am mobu sepuluh lam gi neham bak. Ba dam sepuluh amomoi fa boehà damali dam debu sepuluh laba vuusu im vahokedalo modem mobu sepuluh am bak. Ame dam sepuluh lam boehà damali dam bake vuusulo ahamte faam di Alat gi ame dam laba modi im dedamali fa ame na ohemnabu lamti vazisi dam bake vuusu im vahokedam bak. Lahana ibi iho lab vuusu meedam di mahate bohula kaio. Gi jam vàmtea folehena ozomom bak.
13. Ame boehà dam sepuluh lam gi ame na ohemnabu laba vi taum bak ozome ahu vàmadi esda. Labihadam damat modem labe ibi iho boehàli im dedamali dam bake vuusu im vahokedam bak lam fa ame na ohemnabu laba ab ub lu vizeham.
14. Labi ub lu vizi meedam labe iho fa vazisi Domba Adatti ot beluida tame. Lahana Domba Adat labe aho neha, ‘Um Em damalele,’ lahame Aho fi me vadaha dam labe Aba tu vuzehi im Abada labaha bohu meedam dam lamti vazisi meedam labe Aho ame boehàda sepuluh lamti ame na ohemnabu lamti laham dam lam fa vazidazi meode tame. Neham labe labihaha bak. Am abo bak niba boehàdateleheda totbaho ahebu modi vousidume Ahamo fa vousai Bisi Boehàdateboli ame boehàda zi totbaho laba fa vuusdam labe labihaha bak.”
15. Labihasu vameadume neàdi ame Alat Am im gagu vou usemda labe aho neo eba nehame vi vameada. “Ame fi loho nam labe aho nusdam vao zi lam oho aahana lam gi neham bak vouhomna modem bak. Dam bakda ahebu abo bak feàna meidati bak feàna meidati ahaladiame esuiaha dam zi ame. Labi dam debu mei debu meime dae ahaladiaha dam ame. Lahadaha dam zi fai am bak.
16. Labi laha oho etei aaha mobu sepuluh lam abo eho oba neha, ‘Boehàda sepuluh am tame,’ lahame gagoho dam sepuluh lamti ame na ohemnabu lamti labihasu vazisi iho ame fi loho nam laba faki mu meedamna ozomomna modem bak. Abo ame kota laba azihi dam labe iho vuusuhu nazoh ahebu iho gelevai vou ilime dam lam gi so bozbuli nazoh vabali modi vàhàdi vou esmo tame. Abo im nu totbaho ukebe àhana ozohomu vàhàdedume sedda. Labi im nu totbahota gi vuat neo vi beodahana ozohomu vàhàdedume sedda. Labihasu meedume ame dam laba ab vàhàdeme seddalo modemam bak.
17. Ame lab meedam bak lam Alat amu di iube neha, ‘Im Ebe Eho ozohona fà meedase,’ lahame ahit fet gagu esuhu labe labihaha bak. Labiha labe ame boehàda sepuluh labe ibi iho teudi im dedamali dam bake vuusu im vou vahoketedam bak lam fa ame na ohemnabu faida laba ub lu vizi aho fa dam bake vuusu im vou vahoketedam bak. Ame ohemnabu labe gi labihasu vou modetedume Alat Aba Aho fet ozome esuhu im lam ahebu imbodedahazobe vaitolo modem bak.
18. Labi oho aaha fi loho nam lam ozom di gi bisi fai bak meedam kota ozomomna modem bak. Labi ame kota laba vuusu im meedam boehàda zi labe iho bak ahebu ahala vuusuiaha boehàda zi laba vuusdam dam am bak,” lahame eba vameadahana eho ab vi aiham.
1. Labi im lada lam aidume neàdi eho neo vi aaha Alat Am im gagu vou usemda meida neo asum ahoba iube nom iludam bak ab aaham. Ame da labe aho bisi feàda im dedateli nom iludam labe am so labe ogatedam labet modi bak adba niba ahebu ab modi fauhaedamam.
2. Labi nom ilu dae buduana nehame ab buddamam. “Vàhàdeho! Vàhàdeho! Kota Babel laba esdam dam labe neha, ‘Im abo feàte,’ lahame it daetbadam dam lamti ulohona modesdam kota zi laba esdam dam lam ahebu ab modi vàhàdeham tame. Labiha labe ame num debu bae lam setan mei setan meime modeo, labi ahasbeam dut mei dut meime modeo, na ohemnabu Ala bake lom fi hamna ahasbeamna ahebu modeo, labihasu laba li vatasuidalo. Labi bume Ala bake lom fi hamna ahasbeam bume ahebu fa laba li ila moadalo. Labihasu modem num debu baet modem bak.
3. Kota Babel vàhàdehe bak neham labe labihaha bak. Ame kota Babel ot vai gagodam nam fi lohona labe, ‘Meit fà aba modese,’ laham bak laba ozome dam bake vou fohom anggur oo vaksa meona lam meia lu uddume bak vabilehezobe aba modem bak lamti ulohona ame Babel dam labe iho dam bakda ahebu abo dam debu mei debu mei laham dam laba vou fohome ibi iho fi loholi la modi le modidam bak lamti ibi iho ostam alalehena vou baedam bak lamti labihasu modi baleàhà bak lam fa ame dam laba modi vizi ab meedaham bak. Labi dam bakda vuusdam boehàda zi ahebu iho gi ame dam labe ibi iho lab faina meedam bak lam tau vi meedalo. Labi ame Babel dam labe nazoh doi duanat vamna lam aam di, ‘Laha vame im nazoh dualese,’ lahame ozome àhàki vi vadam labet modi fa dam bakda iubet lehe dam labe im nazoh fa doit ot loidam dam labe im doi dualehe bak.” Lahame vameadamna eho ab vi aiham.
4. Labi eho neo vi aiha dae meidavat asum ahoba iubet nehame Alam damalehe dam niba vameadamna eho neo ab vi aiham. “Alat uba nehaho. ‘Em damalehe dam oa, um taho ledale. Uho ame num debu laba a tau esdamule. Dam labet faina meedam bak uba vizi uho vi tau meedameam Eho dam laba vabime vàhàdemna lam uba vi tau beomo.
5. Neham bak. Ame dam labe ibi iho faina meedam bak lam feà bak fusi abo gi mei ahoba vi modidume asum ahoba iuba vou fuhuna ozomom bak. Ame fai bak la modi le modidaha bak lam Eho vi ozome beom bak ahumtedi ab vi vataulo modemam bak,’ lahame Alat uba labihasu gagodam bak.” Lahame vameadamna eho ab vi aiham.
6. Labi Alat Aho Am im vou usem dam laba amu neha, “Uho Babel dam laba le beodale,” lahame gagoho dam laba ame na dae labe fa neo ame dam laba nehame vi vameadamna eho ab vi aiham. “Uho ame Babel dam labe ibi iho meia vabidume modi vàhàdedam bak laba ozome gi ame baket neo fa vataule. Lahana fa vataum di gi ame dam labe ibi iho amu modehe bak laba ozome fetehesu duana vi belu vataule. Abo uho ame dam laba vi vataulo modem di gi ame dam labe ibi iho amu mei elom obat vi tau valiheme fedehena meia lu udelo ahumtedehe vao meona labe am meo bak ibida lam vafozi fetehesu bisi meona fa vi tau valiheme lu udem bakti ulohona beodale.
7. Ame Babel dam labe ame nam lamti uloholi gi nehi meeda. Ame nam labe aho am so bisi it vabieme neàdeda. Labi laha gi aba ahamo ozome neàdemna lamota vame meeda. Labihadam nam lamti uloholi ame Babel dam labe it daetbadume ilabdem vabili neo vi modidam damat modemu uho ame dam laba vi vataulo meedam di gi ame bak labet fetehesu duana vabidume geàdale. Neham bak. Ame dam labe gi nam nibe am ahu ad labe nehame it daetbadam bakti ulohote. ‘Em abo boehà namet modem bak. Em ba maboet modem vabak. Ba eba modi ahu faidem im na vabak.’
8. Lahame modem nam lamti uloho dam labe iho labihasu daetbadam damat modem labe gi digat vàmteat na im feàna nehamna ame dam laba modi vabidume geàda tame. Meia modi gailedam im ame. Labi meia modi ahu faidem im ame. Labi idoalem im ame. Labi im num debu vuat beodume aladam bak ame. Labihasu ame dam laba ozome neàdi beodamda lam im Boehàda Ala Bisi Feà Datebo modem labe labihadam bak.” Labihasu meit ame Alat Am im gagu vou usem dam laba vameadahana eho ab vi aiham.
9. Labi im lada lam aime neàdi eho neo im nehamda neo vi aada. Ame kota Babel laba azihi dam vuat beodam di lam dam bakda vuusdam boehàda zi ahebu abo amu ame dam laba vi tau fi loholi la modi le modidam labe ilabdem vabili vi modidam dam labe gi bak bohulana duzu ame dam lam beodam labe vuahu bukedamna aadam labe ahu faidi meb daeti dozomna eho ab vi aaham.
10. “Iba laha ame baket modi im geàda moio?” lahame gi bak bohulana vaitesu duzu aadam labe ahu foelamdidam labe nehi gagoda. “Aiee! Um num debu bisi feàda Babel laba azim dam oa, um kota elaidamda akati labihahelo? Aiee! Um gi jam vàmtea ozomomna kehàm vaba Alat taho uba beodume um ab foedahame?” Lahame udovai geomna eho ab vi aiham.
11. Labi eho neo vi aaha dam bakda bak amomoi iubet li nazoh fa doit ot loidam dam labe laha ame kota Babel laba azim dam lam beodam bak vi aame laha ahu faidi meb daeti dozo. Ibi iho vou lehe nazoh dam na vamda vabalehemu ahu faidi medao.
12. Ame iho vou lehe nazoh neha: Soa naemna emasat modehena zi ame. Soa naemna perakat modehena zi ame. Ke ogatedamna doi feàna vamna zi ame. Mutiara vabiehe ke zi ame. Labi sue baana abo etehàsoat modehe vabna ozomom sue neàna ame. Labi doi feàna vam sue baana neha: alihi boz gihonati boz buhedati nemahuba neàdati labihasu ame. Labi neo ut mei ut meime ahana neàna abo doi duana vam ut ame. Labi fi ho dogoide tom futohona mobu mei mobu meime lahamnat modi nazohaedamna ame. Labi ut doi duana vam ut mei ut meime lahamnat modi nazohaedamna ame. Labi perunggut modehena modeo, besit modehena modeo, pualam keti ulohona modehena modeo, labihasu modi nazohaedamna ame.
13. Labi na keobe ahana neàna àmdati labi usime vuahubulemdati labihasu ame. Labi ut àk ahana neàna ame. Labi anggur oo vaksa meiti oo vaksa meiti lahamna ame. Labi mur ahana neàna fa na mei valiheme fa soa noimna ame. Labi zaitun oo vaksa minyaklehena ame. Labi gandum oo fi name ohu fauli tepunglehena ame. Labi na oo keobe àmna totbaho ame. Labi na fi ho sapi modeo, domba modeo, kuda modeo, labihasu ame. Labi na nusu gohatemna ee gagom kereta ame. Labi iho dam num debu bake le meia doit ve fa meia na teo tau modem damalehe dam zi ame. Labihasu iho vou li ame Babel dam laba lu ot loidume doi vamna zi am. Lahana ame dam laba esuhu bak lam ahebu foedahemu dam ba na vamda ab vabalehamemu im ahu faidi ab medaomam.
14. Labihahemu ame dam im nazoh fa doit ot loidam dam labe im ahu faidi meb daeti dozom labe nehame ame Babel laba azim dam laba vi ozome gagu mezidam bak lam eho neo ab vi aiham. “Ubu uho ilahu valo àhàkedamna na neàna ahebu vabaleho. Abo doi duana vamna lamti labi um so, ‘Aam neàdese,’ lahame soa naemna lamti ahebu seteho. Ame na zi lam uho ba vi aam vabo. Um elodume setehe labe labihaha bak.”
15. Amu di iube ame nazoh fa doit ot loidam dam labe ame nazoh zi lam Babel dam bake ot loidume im doi dualedam bak am bak. Lahana, “Iba laha ame baket modi im geàda moio?” lahame gi bak bohulana vaitesu duzu aadam labe ahu faidi meb daeti dozom labe ame Babel laba azim dam laba neo vi ozome ahu foelamdidam labe nehi gagoda. “Aiee! Um num debu bisi feàda Babel laba azim dam oa, um kota elaidamda akati labihahelo? Aiee! Um amu gi sue baana etehàsoat modehe vabna ozomom sue neàna abo boz gihonati boz buhedati duadaha bak. Labi um soa it naemna abo emasat modeheda modeo, ke ogatedamna doi feàna vamna modeo, mutiara vabiehe ket modeo, labihasu um soa it naedaha bak.
17. Labi eho neo vi aaha ame kota Babel laba azihi dam vuat beodam di lam dam kapal ut gaheba modeheda vuusualame itea vou goom dam lamti labi ame kapal laba ziddume tau laom dam lamti labi kapal ad laba na meedam dam lamti labi dam doi lem bak itea bake nabitaom dam lamti labihasu ahebu gi bak bohulana duzu ame dam lam beodam labe vuahu bukedamna aadam labe nehi gagodam bak eho neo ab vi aaham. “Ame kota Babel lahamda lamti num debu amomoiti ba ulohoda vabak. Ahamo elaidam kota bisi feà datebo am bak.”
19. Lahame gagoho bak eho vi aime neàdi eho neo vi aaha ame dam labe im ahu faidehemu ohu fau ateme im ohula it beome goaitoidam bak eho ab aaham. Labi im ohula it beome goaitoidam labe mebe ahu foelamdidam labe nehame neo vi gagodamna eho ab vi aiham. “Aiee! Um num debu bisi feàda Babel laba azim dam oa, um kota elaidamda akati labihahelo? Ubu uho doi duana vuusdam bak labet modi fa im kapal vuusdam dam nibe iho doi duana vam nazoh uba vou le ot loidam labet iba neo modi doi dualedam bak debu um am bak. Lahana akati fai bak labihasu modehelo? Aiee! Um gi jam vàmtea ozomomna kehàm vaba Alat um dam taho modi vàhàdeme ab foedahame?” Lahame àvodi geomna eho ab vi aiham.
20. Lahame àvodi geàdam di labe eho neo vi aiha dae meidavat asum ahoba iubet nehame vameadamna eho ab vi aiham. “Um Alam damalehe dam asum ahoba laba azim dam lamti labi um Kristus labe Aho gagu olu Am im vameadume esmozi laiam dam lamti um Alat vameadaha im aime fa dam bake ahate vameaidaha dam lamti labihasu um ahebu Alat ame kota Babel laba azihi dam laba beodaha bak laba vi ozome mahate deelele. Neham bak. Ame Babel laba azihi dam labe iho uba fai bak meedàmu Alat ahole ame dam laba vi vatau beodalo modem bak.” Lahame vameadahana eho ab vi aiham.
21. Labi im lada lam aime modeha Alat Am im gagu vou usemda feàda labe ke feàna abo ke bumatna gandum oo vaheme gilimna feàdati ulohona visoi itea laba bisteat ab nom vooham. Labi nom voou gago, “Eho etei ke feàna nim itea laba nom voou setehe bakti ulohona Alat Aho im gagu modiam dam laba gagu ame bisi elaidam kota Babel laba azihi dam lam bisteat vàhàdeme seddàmu ba im alihi vi aam vaba gi ke labe tezi setehe bak lamti ulohona modem bak.
22. Abo ame kota labe im doi dua labe aam neà bak lam ahebu gi ab modi seteham bak. Ame nazoh neha: Gitar daeti ulohona kecapi modeo, seruling modeo, trompetmodeo, labihasu damat vou sikimna dae lam ba ame kota laba ame na dae ba aim vaba abo sete. Labi dam nazoh meedam dam im mei im meime meedam bak lam ba vi aam vaba laha sete. Labi ke bumatna gandum oo vaheme gilidam debu laba ba gilidam dae aim vaba sete. Labi iho àmna roti ohudam bak laha sete.
23. Labi ibi iho vuagat fauhaedam bak ba modem vaba laha sete. Labi dat lahi vam di damat deelehat na vahi àdam labe deeli sikitaom bak ba aim vaba laha sete. Ame kota Babel laba azihi dam labe iho nehame meedaha labe Alat ame dam laba labihasu beodaha bak. Dam ame kota laba nazoh ot loiam dam labe ibi iho feà damalehe bak lam ba Ala bake vou baedam vaba vedi neha, ‘Ibi iho iuba le na ot loia. Iuba le na ot loia. Lahadam bak lam bisi feàna meedam labe ee ibida bisi aidamda ame?’ lahame daetbada. Labi laha ame kota laba esuhu dam labe vedi neha, ‘Ibi iho esdam bak nim neà esdam bak am tame. Ala mu voom neàte,’ lahame dam bakda ahebu abo dam debu mei debu mei laham dam laba vou fohome vagedam labe modi vàhàdeda.
24. Labi dam bakda Alat vameadaha im aime fa dam bake ahate vameaidaha dam lamti labi Alam damalehe dam totbaho lamti labihasu ahebu damat iba faki oddume im vasea veàtoho bak lam debu ame kota Babel laba azihi dam am bak. Abo gi bak niba oddume elodaha dam ahebu lam damat iba faki oddume im vasea veàtoho bak lam debu ame kota Babel laba azihi dam am bak.” Lahame vameadamna eho ab vi aiham.
1. Labi im lada lam aidume neàdi eho neo vi aiha asum ahoba iube dam zi feà vazisi dahobuedam labe nehi buteom dae eho ab vi aidamam. “Boehàda iba vuusdam Ala oa, haleluya! Ibi iho vou baedam Ala Om abo feàte! Om damalehe dam laba Oho soat vausu ab vei neàdeham tame. Labi laha Ohomo Boehàdateboli bisi im feàna meedam Ala Om am tame.
2. Neham bak. Obo Oho meia im uloome aime ozome ozobohudi gagodam di ba biou giomim gagodam vaba abo gi ahole im vamdesu imbo bakta gagu beodam bak. Labi ame nam fi lohona labe aho meia vou fohome fi loholi ostam alalehena laba vou baedam bak lamti ulohona ame kota Babel laba azihi dam labe iho neo dam bakda totbaho ahebu laba gi ame baket neo meedàmu Oho ame dam laba ab beodaham bak. Labi laha Obo Oho gagoho im aime uledi meedam dam lam ame dam labe iho oddume im vasea veàtoho bake Oho fa ot vai vatau dam lam ab beodaham bak. Labihàmu iho Oba, ‘Om abo feàte. Ahole modeho,’ lahame Oba vou baedam bak.”
3. Lahame labihasu vou baedume ozoha vabamu im neo nehasu buteme vameadamna eho ab vi aiham. “Haleluya! Ibi iho vou baedam Ala Om abo feàte. Etei ame dam debu lab beodume alamodam labe vuahu feàna lab bukedam bak lam ba vaitom gikina gi ab labaha bohu modesdamam bak.”
4. Lahame labihasu vou baedume modeha dam meia im gagu modiam dam dua puluh empat lamti na ohemna ahia lamti labihasu iho ame Nusumnabu laba nusdamda Ala labe Aho avaesdam bak laba ahit biti ogomaladume im ahu adat iedi, “Am abo feàte,” lahame neo faasi im nehasu ab vou baedamam. “Imbote. Haleluya! Ibi iho vou baedam Ala Om abo feàte!”
5. Lahame gi etei labi vou baedume modeha eho neo vi aiha ame Nusumnabu Alabada labe na daevat nehame gagodam bak eho neo ab vi aiham. “Alam damali ahu adat iedi im Aba Aho gagohona aime uledi meedam dam abo eeda modeo, ee vabda modeo, labihasu im ahebu iba vuusdam Ala laba, ‘Am abo feàte,’ lahame vou baedase.”
6. Lahame labi vou baedume modeha eho neo vi aiha asum ahoba iube dam zi feà vazisi dahobuedamna abo vao gum feàna dae modeo, asum gilidume lautoidam dae modeo, lahamna dae lamti ulohona labe nehame bisteat gagodam bak eho neo ab vi aiham. “Haleluya! Ibi iho vou baedam Ala Am abo feàte! Im Boehàda Ala Bisi Feàda Boehàdatebo modem labe dam vuusu im ab vahokedamam bak.
7. Imo Ahamo Boehàdateboli bisi im feàna nehasu meedam bak laba vi ozome Am ee vousai, ‘Am abo feàte,’ lahame ahu deeli Aba vou baedase. Domba Adat labe Am nam vam bak ab vou fuham bak. Abo Kristus Am damalehe dam lamti deelehat vazisi meedam bak ab vou fuham bak. Aho valo modem nam labe am Dat aba ab valo modem amemu am Dat aame deelemna lam am so laba omahedume ahumtedi ab vou faodamam bak,” lahame gagodam bak eho ab vi aiham.
8. Labi eho neo vi aaha meit sue nemahuba neàna abo fauha meona ogatedamna, “Dusule,” lahame Aho valo modem nam laba gagohemu aho dusuhu bak lam eho ab aaham. (Ame Domba Adat valo modem nam laba sue nemahuba neàna loho bak lam am tombu gi Alam damalehe dam labe ibi iho im vamdesu meedaha bak am bak.)
9. Lahame ame bak lam eho aadume modeha ame Alat Am im gagu vou usemda labe aho eba neo im nehasu gagoho bak eho ab vi aiham. “Oho im nehasu toedale. ‘Domba Adat labe Am nam valo modemu Alat neha, “Nasi ledale. Imo ame bak laba vi ozome deeli vahi na àdase,” laham bak le gagoho dam lam deelehe bohu vuusdam dam am bak,’ laham bak lam oho toele,” lahame labi gagu neàdi modeha vedi im nehasu eba neo vi gago, “Eho etei lab gagoho im lam gi Alat Ahamo gagoho im oba gagoho bak. Ba giomim kaio,” lahame eba ab vi gagoham.
10. Aho eba labi gagohemu eho ahu adat iedi, “Am abo feàte,” lahame vou baedalo am naba modesdam laba eho ahit biti ab ogomasuham. Labi eho aba vou baedasome modeha ame Alat Am im gagu vou usemda labe eba mali ab gagoham. “Om eba a vou baedamule. Neha: Om ame. Labi omti vahi Yesus bake tu vuzehi meedam dam totbaho labe iho neha, ‘Ibi iho tu vuzeheda Yesus lam im Boehàda am tame,’ lahame labaha bohu dam bake ahate gagodam dam ame. Laham dam labe Alat gagoho im meedam bak lamti ulohona em laha Alat gagoho im meedam dàt modem bak. Labihahemu om gi Alata ahu adat iedi vou baedale. Neham bak. Yesusat ame im imbona lam Aho lab vameadaha bak labet modi meit ame Alat vameadume oluhu im lam aime fa dam bake ahate vameaidam bak am bak,” lahame vameadahana eho ab aiham.
11. Labi im lada lam aidume neàdi eho neo asum ahoba iuba tom aaha asum ahoba gi fi zeam bitoi tombali modesdamna eho ab aaham. Labi eho neo vi aaha kuda fauhada labe Dat laba zisi aidamda lam abo Am ee, “Alat Gagoho Im Bisi Keàtet Meedamda,” lahame taluhu bak lamti labi, “Im Aho Gagohona Lam Imbo Labe Meit Vuzehem Neàda,” lahame taluhu bak lamti ee labihasu talu aidamna eho ab aaham. Aho meia im uloome aime ozome ozobohudi gagodam di ba biou giomim gagodam vaba abo gi ahole im vamdesu imbo bakta gagu beodam bak. Labi laha Aba fakemoholehe dam laba Aho ot beluiam di gi Alat Aba Aho gagoho bak labet ulohodesu ahole ot beluidam bak. Laham bak laba ozome taluhu Dat eho ab vi aaham.
12. Lahamda labe Am fako laha abo meit aibu bake olem di usime fauhalem vuati uloholi abo fauha meona modesuhu labe im so ad nimti ahebu ozobohudi aadam Dàt modem bak. Labi Am ohu laba boehàda usumna tamehona omaheda. Labi Am so laba Am ee toehena ba meit ame ee labe am im tombu ozobohudem biem ee abo Ahamo naedata ozobohudehena Am so laba toehe bak.
13. Labi Am sue sona ahoba dusumda bohu lam gi vasea boz tàdamna dusda. Labi ame Da labe am ee meida neha, “Alat Vameadaha Im,” lahamda am.
14. Labi dam asum ahoba azihi dam meoda zi labe, “Iho kuda fauhada labe Dat laba zisi aidamda laba tau dam Ala bake fakemoho dam laba bohudese,” lahame ibi iho ahoba dusuhu sue bohu lam gi nemahubana fauha neàna dusu kuda fauhada laba nusualadume Am ohuse vi dozeadume mitaeda.
15. Labi laha dam bakda ahebu Aba fakemoholehe dam lam abo dam debu mei debu mei laham dam laba beodume meodem bak ozome Am aha labe ae tot mo tot mo lahamna futoi modesda. Labi Aho ame dam lam vuusu im vahokedam di labe gi boehàdat meia odosu im vahokemnaso besit modehena labet dam bake odosu meobeat im vahokedalo modem bak. Labi laha Aba fakemoholehe dam laba Aho beodume vàhàdeme setem bak. Abo damat anggur oo vaheme unamna laba anggur oo vaheme naot nom gigime unadam bakti ulohona modem bak. Ala Bisi Feà Datebo labe Aho dam bakda faina meedam dam laba bisi faki feà bak fusi meedàmu etei lab meedamda labe Aho ot vai im dedateli ame bak lam meeda tame.
16. Labi Aho dusdam sue bohu labe am bamaha zoho laba ee nehasu toe: AM ABO BAK NIBA BOEHÀDATEBOLEHEDA TOTBAHO MODI VOUSI VOUSIDUME AHAMO FA VOUSAI BISI BOEHÀDATEBOLI FA BAKDA BOEHÀDA ZI TOTBAHO LABA VUUSDAMDA AM AM BAK. Lahame talu toehe bak eho ab aaham.
17. Labi eho neo vi aaha Alat Am im gagu vou usemda meida vàmtea labe aho ala digadda labet fauha meo ogatedam bak laba doudamna eho ab aaham. Ame da labe aho gi dae buduana abo bume mahate asum gae toolehe vaba gi donibu laba boiatem bume zi ahebu abo na koei nu àm bume ahebu im nehasu buddam bak eho ab vi aiham. “Nasi ledale! Alat uba na àmna zi feà modeme vahedume ahumtedeho. Nasi li àdale.
18. Abo bak niba boehàdateleheda koei nu zi modeo, labi dam meoda labe iho ot beluiam di im gagu modiamda boehàda koei nu zi modeo, labi meo dam debu mei debu meime lahadaha dam labe im koei nu zi modeo, labi kuda nusualadam dam labe im kuda lamti im koei nu zi modeo, abo ee ehedati ee vabda lamti laham koei nu zi modeo, mei na teo meedamda lamti gi azietemda lamti laham koei nu zi modeo, laham dam zi ahebu im koei nu zi nim ahebu nasi li àdale.” Lahame amu nasi fet vameadahana eho ab aiham.
19. Labi im lam aime neàdi aahailahit itea labe lehena meonabu lamti labi dam bakda vuusdam boehàda zi lamti labi iho vuusdam meo dam zi lamti labihasu vahe vaheme neàdi fa ame kuda fauhada laba nusdamda lamti labi ba aba tau ohuse vi dozeadume vuledam dam zi lamti ot beluidalo zoho li odo. Zoho li odo. Labihadamna eho ab aaham.
20. Lahana eho neo vi aaha Dat kuda fauhada nasi nusu duzuhuda feàda labe Aho ame itea labe lehena meonabu lamti labi dat neha, “Em Alat vameadaha im aime fa dam bake ahate vameaidalo mozo,” lahame vagemohoda lamti amait ab siham. Ame da meia vagemohoda lam ame itea labe lehena meonabu labe aba modi vizi im dedateli damat fet aame àvodi ozobohudemna abo na damat ihimo modem biem im feàna meedamda am. Ame bak labet modi damat ame itea labe lehena meonabu labe aba aho meia nohaeme itoem bake uledehe dam lam abo am alihi damat auet modi itolehena laba ahu adat iedi, “Am abo Feàte,” lahame am ee vousai vou baedam dam lam ame da labe modi vageda. Labihasu meedam dam ahim lam Dat Feàda labe gi ahena siàdume vua elum feàna itea bakti ulohona abo vua gazihi feàna eludam bak laba ab vooham.
21. Labi ame dam behàsu lam voou neàdi im dam meoda zi totbaho lamti im boehàda zi lamti ame dat kuda fauhada nasi nusu duzuhuda feàda labe Aho neo Am aha labe futoho ae tot mo tot mo lahamna labet ab oddume voedaham. Labi voedahazobe amu di iube, “Nasi ledale,” lahame butehe bume zi labet ab li ame koei zi labe im nu àom labe gi dedehe geàmu àdam bak eho ab vi aaham.
1. Labi im lada lam aadume neàdi eho neo vi aaha Alat Am im gagu vou usemda meida neo asum ahoba iube nom iludamna eho ab aaham. Ame Alat Am im gagu vou usemda labe aho mei si giam lo feàna abo besit ahamo ot voi ot voiahana lamti bak itmat zoho novaha bak ozom vabna labe am de naolehena zoho modesum doo kunci lamti vuusda.
2. Ame na behàsu vuusualadume li ame mokbu lam abo amu mumali Hawa bake ahi vagehe mum lam abo meia modi veimam setan zi labe im boehàda lam abo am ee gagom Iblis lahamda lam Alat Am im gagu vou usemda labe aho ame lo labe si giadume ame bak zoho novaha bak ozom vabna laba voou afoezobe ame de naolehena zoho modesum doo lam ab modesu kuncileham. Labi, “Damat osoktomeam elo tame,” lahame malem bak ozobohudemna ab nom odosu sobaeli itoeme esuham. Ame mokbu labe dam bakda ahebu neo vi vagedume vou fohom bak labna zohàme teohet mali simtedi vou faodume seribu tahun folehezobe teohet fa neo isi olulo labihaha bak. Labihadahana eho ab aadaham.
4. Labi im lada lam eho aadume neàdi eho neo vi aaha boehàda zisi nusumna zi totbaho laba dam eeda zi laba nusualadaha bak ab aaham. Ame dam lam Alat amu gagu im dedamali dam bakdate uloome aime fahedalo modem dam am bak. Labi eho neo vi aaha dam amu elodahada zi labe fat ahededume fa Kristus bake tau boehà damali dam vuusu im vahokedume seribu tahunlehena eho ab aaham. Ame dam lam amu ame itea labe lehena meonabu lamti labi am it damat auet modi itolehena lamti labihasu ahu adat iedi, “Am abo feàte,” lahame am ee vousai vou baedaha vab damat modem bak. Labi laha ba ame nabu labe am toheda laba uledi neha, “Iba laha am ee nohaeme itoedume esuse,” lahame gagu im anekehà modeo, im dauha modeo, laba nohaeme itoedaha vab damat modem bak. Ame dam lam amu di iube neha, “Ibi iho tu vuzeheda Yesus lam im Boehàda am tame,” lahame labaha bohu dam bake ahate gagoda. Labi Alat Aho vameadume oluhu im lam iho laha dam bakdate ahate vou vameateda. Labihadam damat modemu dam bak damat faki ohu fi kbodume elodaha dam am. Lahana ame dam labe im fat ahededume fa Kristus bake tau boehà damali dam vuusu im vahokedume seribu tahunlehena eho neo ab vi aaham.
5. Ame dam zi lam Alat ahamte modi fat ahededume usnadaha dam zi am bak. Alat ame dam laba ozom di Am damali im Abada fi hasi meedam dam am bak. Labihasu meedam dam lam deelehe bohu vuusdam dam am bak. Neham labe labihaha bak. Ame dam laba Alat ba, “Eloho bak behàsdese,” lahame gagodam vabak. Abo ba Alati vaitesu neo vua eludam bohu laba voou geàdam bohu meedam vabak. Ame dam lam gi Kristus labe Am Ai Alati im tohe damali im ibida gi labaha bohu vuusu meeda tame. Labi laha fa Kristus bake tau boehà damali dam vuusu im vahokedume seribu tahun fole tame. Dam lada lam labiha. Lahana dam totbaho elodahada zi lam di lam fat ahededume usnadam vabak. Ame seribu tahun foli ba fat ahededume usnadam bak. Labihadaha bak eho ab vi aaham.
7. Labi im lada lam aadume neàdi eho neo vi aaha ame seribu tahun foli neàdi Iblis amu lab giame simtedehe bak labet fa isi oluhuna eho ab aaham.
8. Labi eho neo vi aaha Iblis isi olu neàdi dam debu meiti debu meiti abo dam bakda ahebu Ala bake fakemoholehe dam abo bak iumti bak iumti ahebu abo ot vai gagodam ee, “Gog,” laham dam debu lamti labi ot vai gagodam ee, “Magog,” laham dam debu lamti laba le, “Imo vahe vahedume neàdi fa Ala bake ot beluiase,” lahame ame dam laba le vageme vou fohome le gagu vahe vahedahana eho ab vi aaham. Ame dam Iblisit le vahe vahedalo modem dam lam abo debe novaha bak ozom vabna zi feà abo itea valau obe modesuhu kebe dem biem bakti ulohona feà modem bak.
9. Ame dam meoda zi fai zoho ala zizem zoho iubet leda. Labi dam zoho Ala le nom fi olem zoho iubet leda. Labi dam zoho ba totbaho iubet leda. Labi neo ba totbaho meida iubet leda. Labihasu bak ahebu iubet nao meot mitaedume li Alat Aho deelehe num debu laba abo Am damalehe dam labe ibi iho esdam bak laba fusi, “Oddase,” lahame ahiledou odosda. Labihadume modeha Alat ahit vua feàna bisteat Aho azihi bak asum ahoba iubet modi nom ilu ame dam zi fai ab beodume vàhàdedume seddaham. Ba vàmtea buà vekem vaba abo ahebu beodume seddaha bak.
10. Labihazobe eho neo vi aaha ame dam laba vagedume vou fohodam Iblis lam Alat Am im vou usem dam laba gagu Iblis si ve fa ame vua eludam feàna itea nobu bakti ulohona abo vua gazihi feàna eludam bak laba ab nom vooham. Abo amu itea labe lehena meonabu lamti dat neha, “Em Alat vameadaha im aime fa dam bake ahate vameaidalo mozo,” lahame vagemohoda lamti amu vooho bak laba neo Iblis ab vi vooham. Ame dam làtela laba voedaha bak lam gi labaha bohu feàna geàda tame. Ba vaitom kaio.
11. Labi im lada lam eho aadume neàdi eho neo vi aaha Boehàdat zisi Nusumnabu fauhana feàdabu abo meia uloome aime neàdi fahedam di nusumnabu lamti labi ame Nusumnabu laba zisi nusdamda lamti eho ab aaham. Ame na behàsu eho aasdume modeha Dat ame Nusumnabu laba zisi nusdamda labe Am bisi feàda modem labet modi bakti asumti gi ab modi alimdi seteham. Ba aam kai.
12. Labi eho neo vi aaha dam amu Yesus bake tu vuzehi im Abada meedaha vab dam labe amu elodaha bak labet fat ahededume usnadaha dam zi abo ee ehedati ee vabdati ame Nusumnabu laba aidamda labe Aho avaesdam laba fet li duzu fet li duzuida. Abo dam eloi koei it oazehena le esdam bak Hades laba esdam dam ahebu abo dam itea laba tezi elodaha dam modeo, dam gi elodaha dam totbaho ahebu modeo, labihasu fat ahededume usnadume ame Nusumnabu avaesdam laba fet lei fet leida. Fet li duzuidume modeha dam bakda nibe ibi iho bak niba meedaha im ahebu Alat aame toedaha buku zi lam fi zeam bitoi ab nabidamam. Labi nabidume abo ibi iho meedaha bak buku laba toedaha bak aame neàdi ulohodesu ahala gagoidume ab fahedamam. Labi ame di labe neo buku amomoi laha fi zeam bitoi nabidaha bak. Abo Dam Ba Elom Gikina Ahe Neàna Bohu Vuusdam Dam Labe Im Ee Toedaha Buku laha neo ab fi zeam bitoham.
14. Labi ame Buku laba nabidume aameam meit am ee laba tau toedaha vab dam lam Alat gagu ame dam lam vua elum feàna itea nobu bakti ulohona abo vua gazihi feàna eludam bak laba ab voedamam. Labihadume neàdi dam eloi koei it oazehena le esdam bak lam laha neo ve ame vua feàna laba ab voou seddaham. Labiha labe dam ba elodam bak ab vabaleham. Ame, “Ba eloho bak behàsdem bak,” laham bak lam gi ame vua elum feàna itea nobu bakti ulohona abo vua gazihi feàna eludam bak laba voom bake gagoho bak. Labihadaha im eho ab aadaham.
1. Labi im lada lam aadume neàdi eho neo vi aaha asum amudati bak amudati ahebu ab seddume fa neo asum gàhàdati bak gàhàdati modesuhu bak eho ab aaham.
2. Labi ame di labe Alat azihi kota abo kota Yerusalem gàhàda Alat asum ahoba iubet nom vousdamna eho ab aaham. Ame kota lam Alat abo gi nam dat valo modem nam labe am soa it naedume aho valo modem dat laba ahumtedi vou faodam bakti ulohona ame kota laba modi neàdehena ahum abo alihi aam neàna fauha neàna ogatedamna nom vousdam bak eho ab vi aaham.
3. Eho ame bak laba aasdume modeha na daevat ame Nusumnabu labet bisteat dae buduana nehame buddamna eho laha vi aida. “Nasi aimale. Alat fa bak niba nom ilu dam bakdati fa vahi azilo modem bak ab vou fuham bak. Aho dam bakdati vahi azi fa ame dam laba modi Am damalelo modem bak. Labi Aho fa dam bakdati vou ali ahu vàmadi meeda tame. Labi dam bakda fa Ala bake ahu adat iedi, ‘Om abo feàte. Oho iba vuusdam neàte,’ lahame Am ee vousai vou baeda tame.
4. Labi bak damat iho medaom fa vaksa lam Aho fa uhulamome sedda tame. Labi dam bakda iho amu bak niba esdam di kikezi gailedam bak modeo, elodam bak modeo, na im iba modi ahu faidi mem bak modeo, labihasu Alat modi fa sedda tame. Ba im amu bak niba meedaha im neo vi meedam vabak.”
5. Lahame labi vameadume neàdi ame Nusumnabu laba nusdamda labe Aho eba im nehasu neo ab vi gagoham. “Nasi aamale. Na ahebu Eho fa ab modi gàhàdelo modemam bak.” Lahame gagu neàdi Aho neo eba nehi vi gago, “Oho nasi om sunit baa laba Eho lab vameadam im nim ahebu toedume esule. Im Eho nib gagodamna nim ahebu abo imbo imot modem labe ba modehe vaba alia voom vabak. Abo imbodem tadem bak.”
6. Lahame labi gagu neàdi Aho nehi eba neo vi gago, “Neàdeho! Ebe Eho fet ozome esuhu im ahebu ab meedume neàdi vaitoham tame. Eho damat bak niba meedaha im ahebu Eho ahamte faasi meedume ba novam zoho vou fusi vaitomda Em am bak. Em abo Ahamteda Em am bak. Labi laha Ba Vi Novamda Em am bak. Labihaha bak. Labiham labe meit valo àhàkemda laba Eho vao aana abo meia modi elom gikina ahe neàna bohu vuusdam vao lam eho ame da laba ilabdi lu ude tame.
7. Labi laha uho meidavat naat uba vabidume geàdamnàme geàmu uho Eba lab tu vuzehi meedaha bak lam mu voom vaba gi keàtet meedam bohu vuusu meedam dam laba Eho etei neà bak lab vou gago ladaha bak lam ahebu ame dam laba meeda tame. Labi ame dam lam Eho fa Em adamale. Labi ame dam labe fa Eba neha, ‘Im Boehàda am tame,’ lahame Eba vou baeda tame.
8. Lahana dam im nehasu meedam dam ame vua elum feàna itea nobu bakti ulohona abo vua gazihi feàna eludam bak laba voedaha dam am tame. Damat neha, ‘Em Yesus bake tu vuzehemeam làhà damat eba faki modi geàda tame,’ laham bak labna zohàme iedi ba Eba tu vuzehi im Ebeda meedaha vab dam ame. Labi dam eba tu vuzehem mom dam ame. Labi Eho aam ahasbeam dam ame. Labi dam fi loholi la modi le modidam dam ame. Labi mei oddam dam ame. Labi mei ahugia vaitom dam ame. Labi ostam alalehena laba vou baedam dam ame. Labi meia vagemoholehe dam ahebu ame. Labihasu ahebu gi ame vua elum feàna itea nobu bakti ulohona abo vua gazihi feàna eludam bak laba voedam dam am bak. Ame dam lam gi eloho bak behàsdem dam am bak,” lahame eba vameadahana eho ab aiham.
9. Labi im lada lam eho aidume modeha ame Alat Am im gagu vou usem dam tujuh ehe dam labe iho fi hiba abo, “Alat Aba fakemoholehe dam laba Aho faki feà bak fuhemu vabime vàhàdem bak ehete,” lahame ozom fi hiba zi ahala vuusualame dam bake fai bake vabidume novaha dam tujuh eho amu edehesi aadaha dam lam meida vàmtea labe eba nom ilu ab gagoham. “Nasi eba tau lele. Domba Adat labe Aho valo modem nam eho oba fi se.”
10. Lahame labi gagoha Alam Aha Nutabe Neàna labe Aho eba modi vizi veimai vuusdam labe ame Alat Am im gagu vou usemda labe em visoi vousai sibu feàda laba ab vou laiteham. Laba vou laisi aho eba neha, “Nasi aama,” lahame eba labi gagohemu eho neo vi tom aaha Alat azihi kota abo kota Yerusalem gàhàda Alat asum ahoba iubet nom vousdamna eho ab aaham.
11. Ame kota lam Alat Am feà bak modesu fako aam iedemna ogateda. Labi ame kota labe am ogatedam bak lam gi dam anekehàso modesumna laba taasumna doi feàna vam ke keobe ogatedam bak lamti ulohona meeda. Abo ke yaspis laham ke damat vabieme alihoehena ààmomna ogateda. Abo itaamna alihoehena aam lafutom bak modesda.
12. Labi ame kota bàhàgo obe laba tàme vabousdamna kilana fai modesda. Labi ame vabousdamna labe am olem doo baabu dua belas ehena Alat Am im gagu vou usem dam laha dua belas ehe dam labe ame doo baabu laba ahala duzuiame vou aasda. Laham doo baabu zi labe am aha obe bako tot ahoba tetehesuhu bak laba Israel aho faaha adam dua belas labe iho vou faat ledaha dam debu dua belas labe im ee doo laba ahala toeidahana eho ab vi aaham.
13. Ame doo baabu dua belas ehena labe ahala faheiame làteladi nehi modealada. Meida làtela ala zizem zoho iuba modesu. Labi meida làtela ala nom fi olem zoho iuba modesu. Labi meida làtela ba totbaho iuba modesu. Labi meida làtela ba totbaho meida iuba modesu. Labihada.
14. Labi ame bàhàgo obe laba tàme vabousdamna labe am tom odotlahada gi ke alihi mei alihi meime vou fi bovai odosu. Labi neo ke alihi mei alihi meime vou fi bovai odosu. Labihadume tom vou vahe laidume ab dua belasleham. Labi ame lab tom vou vahe laidahana lam Domba Adat Aho gagu olu Am im vameadume esmozi laiam dam dua belas labe im ee ahala laba toeida. Lahadaha bak eho ab aadamam.
15. Labi Alat Am im gagu vou usemda em vou le im vameadamda labe aho na ulohomnaso emasat modehena vuusu ame kota lamti fa neo am bàhàgo tàme vabousuhunabu labe im olem doo baabu zi lamti uloholo vuusdam bak ehet.
16. Ame kota labe am modesuhu bak labe am oula ahia ehete. Labi am bohula bakti baabu bakti gi ulohote. Labi ame Alat Am im gagu vou usemda labe aho ame kota labe am bohula bak lam ulohoha abo dua ribu empat ratus kilometer ehete. Labi neo am baabu bak lamti am vousaha bak lamti gi ulohot. Dua ribu empat ratus kilometer ehete.
17. Labi aho neo bàhàgo tàme vabousuhunabu lam neo am tamzohobu bak ulohoha enam puluh meter vou fuhuna ozomom bak. Ame Alat Am im gagu vou usemda labe gi dam bakda labe ibi iho na ulohom bakti ulohona ulohoho bak.
18. Labi ame bàhàgo tàme vabousuhunabu lam gi doi feàna vam ke ee gagom yaspis laham ke labe mei ahoba vou vahe ziddume modehe labe ogatedamnat moz. Labi ame num debu bak ahebu gi emas abo vabieme giho neàdehena modehenat moz. Abo fakot aam di gi itaamna alihoehena alihi voena aadam bak.
19. Labi ame bàhàgo obe laba tàme vabousdamna labe am tom odot vou vahe laidahana dua belaslehena lam doi feàna vam ke aam neàna labet modeme ahaladiame tom vou vahe laidaha bak. Ame ke neha: Ahamte vaheme fi bovai odosuhuda lam gi ke yaspis laham ke abo ut et gàhà lamti ulohona aam lafutom neà kebu vaheme fi bovai odosu. Labi meida gi ke nilam laham ke giholehena toi tauti ulohona koena aam lafutom kebu vaheme fi bovai odosu. Labi meida gi ke mirah laham ke alihi boz fauhalehena bimehe tauti ulohona koena aam lafutom kebu vaheme fi bovai odosu. Labi meida ke zamrud laham ke sibe gàhà alihoehena koena aam lafutom kebu vaheme fi bovai odosu.
20. Labi meida ke unam laham ke alihi bozina fauhat tohesuidaha kebu vaheme fi bovai odosu. Labi meida ke sardis laham ke alihi bozina eluao busehà tau alihoehe kebu vaheme fi bovai odosu. Labi meida ke ratna cempaka laham ke haualihoehena abo geme tuhu tauti ulohona aam lafutom biem kebu vaheme fi bovai odosu. Labi meida ke beril laham ke gàhà fauhat uladdahana fatbati ulohona aam lafutom kebu vaheme fi bovai odosu. Labi meida ke krisolit laham ke haualihoehena ahaga am ahude tauti ulohona aam lafutom kebu vaheme fi bovai odosu. Labi meida ke krisopras laham ke gàhàna bihi ooti ulohona koena aam lafutom kebu vaheme fi bovai odosu. Labi meida ke lazuardi laham ke alihi giholehena fehole ohu tauti ulohona kebu vaheme fi bovai odosu. Labi meida ke kecubung laham ke alihi giholehena biobolo busehà tauti ulohona aam lafutom kebu vaheme fi bovai odosu. Labihasuhuna tom odot vou vahe laidahana dua belas eho ab vi aaham.
21. Labi am doo baabu dua belas modealahana lam doo baabu meida gi mutiara ke buduana vàmtea amu vabiedume aliholi ààmomna ogatedam labe ahamo doo baabuli modesu. Labi meida gi neo ame baket mode. Labihasu ahaladiame modealadume dua belaslehena eho ab vi aaham. Labi ame kota labe am zie tomba feàna lam abo damat gohatemna lam gi emas abo vabieme giho neàdehena alihi itaamna alihoehena aam lafutomna neàna modesda.
22. Lahana eho ame kota laba aaha di lam ba ame Fihasi Ala Bake Vou Baedam Num Vàmteabu ame kota laba vi tau modesuhu bak aaha vabak. Neham labe labihaha bak. Ame Num Vàmteabu lam gi im Boehàda Ala abo Bisi Feà Datebo lamti Domba Adat lamti ihimo fa ot vai ab modesdamam bak. Gi ame kota labe am zoho iuba modeo, am zoho iuba modeo, lahadam bak ahebu Alati ame Domba Adat lamti gi ostame lab vou baedam bak tadehe bak.
23. Labi ala digaddati ala usehedati ame kota laba modesu fauhaedam kai. Neham labe labihaha bak. Alat Am ogatedamna feà lam fi ddam labet modi ame kota laba modesu fauhaeda. Labi Domba Adat labe ame kota labe am vuagatso ààmomna am bak. Labihasu modesu fauhaedam labe labihaha bak.
24. Labi ame kota lab fauhaedam bak labet modi dam debu meiti debu meiti abo dam bakda ahebu gi ame fauhaedam bak fi ddamna lam esu goom bak. Labi ame dam labe ibi iho vuusdam soa maehena zi lam ame kota laba vou oedume ahu adat iedi Alati ame Domba Adatti, “Feàte,” lahame vou baeda tame. Labi laha dam bakda vuusdam boehàda zi labe neo ihimo gi ame baket meeda tame. Labi laha ame kota labe am bàhàgo laba vabousu tàhànabu im doo baabu dua belaslehena labe lab modealahana lam gi digat bohu oskihi bak lahasdam labe ba baguamdem vabak. Ame bak lam ba aibu bak vab labe gi labihaha bak.
27. Lahana ba Alat ozo, “Faite,” lahame ozome gagu fi hasi esuhu dam nazohti modeo, Alat aam di ahasbeam im meedam dam modeo, meia vagedam dam modeo, labihasu ba ame kota laba vi tau oedam vabak. Gi Domba Adat labe aho vuusdam buku abo Dam Ba Elom Gikina Ahe Neàna Bohu Vuusdam Dam Labe Im Ee Toedaha Buku laba ee toedaha damta ihimo oedam bak. Laham im lada lam labihasu eho ab vi aadaham.
1. Labi im lada lam aadume neàdi ame Alat Am im gagu vou usemda lam abo ame kota laba ulohohoda labe neo vao soabo meia modi ahe neàna bohu vuusdam vao lam eba vimtedam labe eba neha, “Nasi aama,” lahame labi gagohemu eho ab vi aaham. Ame vao lam itaamna alihoehena gi aam lafutom ke kristalti uloholi ogatedam labe modesda. Ame vao naa zoho lam gi ame Nusumnabu lam abo Alati ame Domba Adat lamti iho nusdam bak labet ame vao kota modesuhu zie feàda labe am tombu laba ab tàdamam. Labi ame vao labe am aha obe totti totti ut am oo àm di abo elom gikina ahe neàna bohu vuusdam ut laba dozeada. Labi ame ut lam tahun vàmtea oo vaedam di gi ame tahun labe am ala dua belas lam ahebu oo vaedam bohu tadedam bak. Labi ame ut zi labe am et lam laha dam bakda ahebu aodam labe ibi iho amu bak niba esdam di gailehe bak ba fa vizi gailem vaba gi ahe neà bohu vuusdam bak laba ozome modem ut et am.
3. Labi laha ame kota laba dam modeo, na modeo, Alat fi hasi neha, “Am kota laba ba a tau esumule,” lahame mali gagomna ahebu ba ame kota laba modesdam vabak. Gi Alati ame Domba Adat lamti Ibi Iho Nusumnabu lam ame kota laba modesu iho dam bakdate vuusu im vahokedam bak. Labi dam im Alat Aho gagohona aime uledi meedam dam labe iho Alam dauha alihi aame im ahu adat iedi, “Am abo feàte,” lahame Am ee vousai vou baedam bak. Labi ame dam labe im dauha laba Alat Am ee ahaladiame toedaha bak.
5. Lahana ame dam labe ba, “Iba fauhaedam vuagat akete? Ala digadda akete?” laham bak ba ozome gagodam vabak. Im Boehàda Ala labe Ahamo Am feà bak labet modi fauhaedam labe ba aibulem bak vab labe labihaha bak. Labi laha ame dam labe fa Alat Aba Aho dam bake vuusu im vahokedam bak lamti ulohona iho labaha bohu vuusu meedam bak. Im lada labihasu ab vi aadaham.
6. Labi im lada lam aadume neàdi ame Alat Am im gagu vou usemda labe neo eba ab gagoham. “Im Alat oba modi ozobohudi fi gatehe im lam ahebu abo imbo imot modem labe ba modehe vaba alia voom vabak. Abo imbodem tadem bak. Im Boehàda Alat Aho dam bakdate modi im Abada aime fa dam bake ahate vameaidam dam laba Aho Am Aha Nutabe Neàna lam ame dam laba vizi teudedam Ala labe Aho neo eba abo Am im vou usemda niba gagu fa oba olu, ‘Aba Aho vameadaha im lam kehàm vaba abo taho mode tame,’ laham bak lam, ‘Im Aba Aho gagohona aime uledi meedam dam totbaho labe fà aime ozobohudese,’ lahame oho gut aime fa toedam bake labihasu vameadaha bak,” lahame eba vameadahana eho ab aiham.
7. Im lada lam eho aime neàdi modeha Yesusat neo Aba tu vuzehi meedaha dam laba nehi vameadahana eho ab vi aiham. “Um nasi aimale. Em fa lem bak ab vou fuseo vabaleham bak,” lahame gagoho bak eho ab aiham. Labihàmu etei eba fet modi ozobohudi fi gatei fa buku niba toedaha im zi nim meit uledi vuzehi meedamda lam deelehe bohu vuusdam dam am bak.
8. Etei nib fakot aaha im nimti dogoit aihi im nimti labihasu ahebu eho Yohanesat aadaha aidaha lahaha bak. Labi eho ame im lam aadaha aidaha lahadume neàdehezobe ame Alat Am im gagu vou usemda lam abo em vou le na im vimteme vameadamda labe am naba avaesdam laba eho ahu adat iedi, “Am abo feàte,” lahame vou baedalo eho ahit biti ab ogomasuham.
9. Labi eho vou baedasome modeha aho eba mali neha, “Om a eba vou baedamule. Neha: Om ame. Labi omti vahi Yesus bake tu vuzehi meedam dam totbaho labe iho Alat vameadaha im aime fa dam bake ahate vameaidaha dam ame. Labi oho buku niba toedaha im ahebu aime tu vuzehi meedam dam ame. Laham dam labe Alat gagoho im meedam bak lamti ulohona em laha Alat gagoho im meedam dàt modem bak. Labihahemu om gi Alata ahu adat iedi vou baedale.”
10. Labi im lada lam vameadume neàdi aho neo nehi vi gagoda, “Alat etei oba modi ozobohudi fi gatei oho aame fet toedaha im nim a meia vameaha vaba vastemule. Mahate vou fi dedale. Neham bak. Ame im nim kehàm vaba abo modi imbodem bak.
11. Labihàmu dam bisi faina meedam dam lam ibi iho lab faina la modi le modidam bak modelo àhàkemeam làhà gi labihasule. Ba vataum bak ehete. Labi laha Alat aam di ahasbeam im meedam dam lam ibi iho la modi le modidam bak modelo àhàkemeam làhà gi labihasule. Ba vataum bak ehete. Lahana dam im vamdesu meedam dam lam gi labihasu bohu vuusdale. Labi laha dam Alat gagohona lamota fi hasi meedam dam lam laha gi labihasu bohu vuusdale.”
12. Lahame vameadume neàdi modeha Yesusat neo iba dam bakda ahebu nehi vi vameadam bak eho ab vi aiham. “Nasi aimale. Kehàm vaba Em lem bak. Labi Eho li dam bakda labe iho ahaladiame meedaha bak lam Eho neà bak meedam dam laba gi ame baket baleà vouhom bak. Labi dam faina meedam dam lam eho laha neo gi ame baket baleà vouhou beom bak. Abo gi ulohodesu ahala modiam bak.
13. Eho damat bak niba meedaha im ahebu Eho ahamte faasi meedume ba novam zoho vou fusi vaitomda Em am bak. Aham di iube Em abo Em Ai Alat amu na ahebu meedaha vab di iube Amti ahili Na Ahamte Alimeat Faasi Meedahada Em am Bak. Labi laha ame na zi lam Vuusdume Novai Vaitolo Modemda Em am bak. Em abo Ahamteda Em am bak. Labi laha Ba Vi Novamda Em am bak.
14. Dam im sue sona ahobada bohu dusuhuna lam kikeme fauha neàdem bak lamti uloholi iho faina meedam bak Alat faamodam dam lam bisi deelehe bohu vuusdam dam am bak. Neham labe labihaha bak. Dam lam ame kota labe am doo baabu labet oedume ut am oo àm di abo elom gikina ahe neàna bohu vuusdam ut lam Eho naedamalehemu ame ut oo lam gagu sitoi àm neà labe labihaha bak.
15. Lahana dam bisi fai bak nehi meedam dam nim ba ame kota laba oedam malem bak. Gi bako tot laba voom bak. Ame dam neha: Koba vuusu meedam dam modeo, Ostame fi loholi la modi le modidam dam modeo, Mei oddam dam modeo, Ostam alalehena vou baedam dam modeo, Meia vagem dam modeo, Meia vagemda laba deelem dam modeo, Labihasu meedam dam lam ame kota laba oedam malem bak.
16. Eba tu vuzehi vahi meedam dam abo dam zi mei dam zi meime ahebu mahate aimale. Eho modi fi gatehe im nim, ‘Yohanesat fa uba vameadume um ozobohudedase,’ laham bak ozome Eho Em im gagu vou usemda lam Yohanes bake ab gagu oluham bak. Neham bak. Em abo Israel dam vuusdam Boehàda Daud labe aho vou faat leheda tombuda vàmtea Em am bak. Labi Em abo Diham Bak Fum Di Ogatedam Falo Em am bak,” lahame ab vameadaham.
17. Labi Alam Aha Nutabe Neàna lamti labi dam Kristus bake tu vuzehi meedam dam abo Domba Adat labe Aho valo modem nam ozomom damti vazisi Kristus bake tu vuzehelo àhàkem dam laba neha, “Nasi tu vuzehele,” lahame gagoda. Labi ame lab gagodam bak laba aim dam labe fa im dam totbaho laba laha, “Nasi tu vuzehese,” laham bak vou gagotedale. Uho meidavat valo àhàkedameam làhà Yesus bake lale. Uho Aba li gagomeam làhà meia modi elom gikina ahe neàna bohu vuusdam vao lam Aho ame da laba ilabdi teo lu udem bak.
18. Etei eba fet modi ozobohudi fi gatei eho fa buku niba toedaha im zi nim dogoit aidam dam ahebu oa, um nasi aimale. Eho neo uba gagu ozobohudi ahumdi esulo modem im neo vameadalo mozo. Eba fet modi ozobohudi fi gatei eho buku niba toedaha im zi nim meit neha, “Alat eba modi ulem bakti ulohona edehesi eho vi aadaha im neam tame. Nasi Yohanesbada niba vi tause,” lahame aba ahamo gi uleme aamda amomoi buku niba vi tauidume meedameam làhà Alat ame da laba beodam di gi buku niba toedaha im meia modi vabime geàdamna lamti ulohona ame da laba vi tau beoda tame.
19. Labi laha eba fet modi eho ozobohudi fi gatei buku niba toedaha im zi nim meit meida fi me neha, “Im nim Alat ba modi Yohanesat aam kaio. Ame im nim voose,” lahame ame im meida lam voedameam làhà Alat ba ame da laba gagu Alam damaleheda labe ibi iho fi hasi azim kota nibe am doo baabu laba olem bak male. Labi neo ame ut am oo àm di abo elom gikina ahe neàna bohu vuusdam ut labe am oo àm bak laha taum male. Gi labihadume bàhàgo laba voom bak. Abo amu buku niba, “Modem neàte,” laham bak lam gi ab malemam bak.
20. Buku niba vameadaha im ahebu, “Imbote,” lahame vi tau gagodamda Yesusat laha nehi gagodam bak. “Imbote. Em lem bak ab vou fuseo vabaleham bak.” Lahame Aho labi gagohemu eho Yohanesat fa neha, “Lo labihadase. Im Boehàda Yesus oa, om nasi lele,” lahame eho labi gagoho bak.
21. Neàdeho. Eho Yohanesat im Boehàda Yesus bake neha, “Oho Alam damalehe dam laba Obo Oho meia ozahit deeli im neà bak modi esuiam bak lam ame dam laba modi esuidale. Labihasule.”